‏⁧ #الحوت ⁩ هو الصديق اللي رغم انه متضايق منك مستحيل يخليك في وقت حاجتك له ..

#خبايا_الاقدار
🍁🍁

... البارت السادس والستون


وين افضفضهة
حسرتي ابيا مسامع ..؟
خاف افزن والگة جرحي
معلگ بروس الشوارع ..
....

عقيق...صافنه عليهه شتحجي واجت فجر يمنه وهاي ضحى تحجي بعصبيه ودمعه بعينهه لزمتني فجر وخرتني وراهه وكالتلهه احجي محد اكو بالصف
شنو مشكلتج ووين تعرفين السبع؟؟

ضحى.. روحي سألي ب2005 شسوه هم ينام وضميره
مرتاح عساهه تطلع ببنته ومرته

فجر.. شوفي انتي ماتعرفيني بس عندي نظره وحده
بالمقابل وجاي اشوفج انتي تتبلين علي احتمال تشابه
او سوء فهم بس متاكده مثل ماجاي اشوفج اشوف اكو كذب بالموضوع

ضحى.. كعدت بالرحله ولزمت راسهه وكالت مااجذب
هو دمرني ودمر عائلتي ابوي مات بسببه وامي مريضه
والناس تترحم علينه

فجر..تعالي نستأذن من المدرسه عدنه فنيه ونكعد
انسولف واذا ماتحجين اروح للمديره واكلهه هجمت علينه
وهددتنه خلينه نفتهم...

عقيق.. امشي وره فجر راحت للمدرسه كالتلهه ضحى متخربطه وانريد نكعد وياهه ماكالت شي اصلا كالت
الدرس شاغر الكم اخذناهه ورحنه بالساحه اكو درجات صبه كعدنه عليهه وبدت تحجي

ضحى.. بسنه 2005 جان عمري بحدود 13 سنه بيتنه عبر الشط والمدرسه بالصوب الثاني ومن نجي للمدرس نعبر بالبلم ونمر ببستان الشيخ جريان واولاده هاي من جنه بالابتدائيه وكبرنه واحنه هيج...

كل مره نعبر انه وبنات من غير صوب ونفوت ببستانكم
واحنه كلهه تعرفه الوادم يسمو المهجور وابوي يحجيلنه
عنه ويوصينه من نطب بي يكول هذا للسبع ابن فاضل المات...

حافظه الطريق واني مغمضه وجان دوامنه ظهري
والبنات الوياي اكبر مني وطالعات الدرس الاخير
واجيت امشي وحدي وانه متعلمه امشي وحدي
ابوي يكول السبع خوش رجال ...

وشته جان والغروب يصير من وكت ومااحس غير واحد
يلزمني ويسد حلكي ويشحط بيه بالبستان وخلاني لحدماصار الغروب وهو حابسني بغرفه طين خرابه

دنكت راسهه وكامت تبجي انفعلت حيل كامت ادك على صدرهه وتصيح اعتده عليه اغتصبني واجه واحد وياه
مو وحده وكمت اصيح واكلهم هسه يجي السبع
وواحد يضحك ويكول هو السبع دزنه احنه ازلام السبع...

وظليت لثاني يوم وتكشف الجو مالكيت احد ورجعت
لابوي ابجي واحجيله واكله السبع سوه هيج هم ازلامه
كالو احنه زلم السبع وكال كل التمر بالبستان مال ابوي
حلالكم

ابوي رجال جبير راح للسبع وذاك مدري شكايلهه
وابوي رد متخربط وبيومهه شلنه من بيتنه
لغير مكان وابوي مايرضه يحجي اتمرض هواي
وكام ماياكل وعفنه حلالنه وماعدنه وابوي ماطول حط
راسه ومات وظلينه انه وامي واخواتي ماعدنه اخو

انه صارت بيه حاله نفسيه كلماينذكر اسمهم انهار
وماعدنه افلوس اتعالج وبيوم منهن اجت بنت الشيخ
جبار الجبيره اسمهه وسن وجابتلنه فلوس وهدوم
واكل وكالت هو السبع مفشلنه والشيخ جبار هو عرف بسالفه السبع وجاي السبع مهدد ابوي حته يشيل
من قريتنه

كله من ورا مات ابوي من الفگر والقهر وانه يصيحولي
الخبله لان دز زلمه شكو بنيه صغيره ياخذوهه
واحنه صار اسنين بكفاله الشيخ جبار يدزنه فلوس
وادعي يوميه على السبع الله ياخذ حيفي منه

فجر.. هسه احنه سمعناج دورنه نفتهم الصدك والجذب
لان السبع عنده عداوه ويه جبار اول سؤال الج
مواجيتي بوفاه ماما شو ماحجيتي انتي اجيتي
لبيت السبع وماتعرفينه شمعنه هسه من شفتي تذكرتي؟؟؟

ضحى.. اخذت العنوان من المديره وانطيته لابو الخط مالتنه وهو وصلني شمدريني بيته وانه حته ماشفته
موسألتج عقيق وكلتي بالمستشفى وانه السبع شايفته
من جنت صغيره ومن شلنه ماشفته بعد وانه ماسألت عقيق شسمه رجلهه...

فجر.. شوفي ياضحى التجربه الماره بيهه حيل مأساويه
والله يساعدج بس اخذيهه مني السبع اسم على مسمى هاي مرته وعلى ذمته سنين ومادنت نفسه عليهه
تريدي على طفله بذاك الوكت

وسن المشعوله ماتت وطلعت خيستهه وراهه
والسبع عنده عداوه ويه جبار وتلكي هو وره السالفه
وذبهه براس السيع وحته لاتحجون كام وتكفلكم
حته يغطي سالفته

والسبع ماعنده ازلام هو وحده بس ويه ولد عمه
انتي متوهمه ومدام انفتح الموضوع راح نجي لامج
ونفتهم اكثر والفلوس. والاكل التاكلو كله مال حرام
وايد جبار الحوتكم متروسه دم ابرياء ...

ضحى.. لاادفعن عنه اكلهه ابستانه وازلامه هم حته
سمعتهم يكله السبع كال عوفوهه للصبح وسمعت
طلقات ضربهن وكالو هاي اشاره من السبع عود
اخذنه الي انريده ونعوفهه

فجر..كومي عقيق وانتي ضحى انصحج تحتفظين بالكلام
بداخلج وهذا الموضوع راح ينفتح كدام زلم وعوداحجي
وعرفت حالتكم تعبانه وداخله اهليه يعني بفلوس جبار
وبالمناسبه جبار يصير عمي

عقيق..سحبتني من ايدي حيل ورحنه للصف وضحى
مادخلت للدروس مخابرين امهه جايه ماخذتهه
يكولون متخربطه

اني اعرف السبع شنو ولو اشوفه بعيني مااصدك
يجوز جبار كاد هيج مكيده بس انقهرت عليهه
اني تعرضت للحادثه وشلون اثرت على نفسيتي
ولوما السبع وكف بجانبي واحتواني جان حالتي مثلهه
واكثر ...

خلص الدوام ورجعنه طبيت للبيت ذبيت جنطتي بالغرفه والسبع يصلي بالهول بدلت ورحت غسلت واجيت لگيته
كاعد يسبح هاي التسبيحه مالته حافظتهه بعز المي وقهري ولو مشاكل الدنيا على راسي بس اكولهه يتغير الحال ( كهيعص حم عسق) هاي جان يرددهه على اصابيعه ميه مره وره كل صلاة...

كعد يسبح واني اردد وياه بكلبي من كمل كتله يتقبل
الله ارتجى ليوره وكال منا ومنكم حبيبتي
عقيق.. راح اجيب الغده من عمتي واجي
السبع.. جابته خلته بالطباخ

عقيق..كمت للمطبخ صبيته وجبت الصينيه كتله
يله ناكل
السبع.. ليش مو بالمطبخ
عقيق.. لا على كعدتك مرتاح كعدة الكاع حلوه

اكلنه وشلت الصينيه غسلت المواعين ورحت كعدت
بصفه جان كاعد بالكاع والسجاده مصفطه بصفه
والتلفزيون مفتوح نمت بالكاع وخليت راسي على رجله

السبع.. شبيهه عقيقي اليوم صوتهه ماسمعته
عقيق.. احجيلك وتوعدني ماتضوج
السبع... احجي
عقيق.. كمت اسولفله بالتفصيل وهو ساكت لحدما
كملت واحجيله شكالتلهه فجر..

السبع.. لا اله الا الله امنت بالله عمر الظلم مايدوم
وعمر الحقيقه ماتظل مدفونه لازم يجي يوم وتنكشف
بس اله حكمه بيهه بموتت اهلي اتذكرتهه هاي البنيه
بس مااعرف اسمهه ولا شايفهه

جنت بالشغل ومن طلعت لكيت رجال جبير واكفلي
بالباب بس طلعت لزمني من قميصي كدام العمال
ويغلط ويصيح وايده ترجف اخذته على جهه وهو يصيح
على اساس ازلامي معتدين على بنته

كتله حجي انه ماعندي ازلام انه رجال وحدي لا ابو ولا اخو وعمري ماعينت زلمه وراي وتأمرت على واحد صح
البستان مالتي بس هاي شوفه عينك انه بالشغل صار اسبوع جان شغلي يم جامعه البصره تبليط شارع

كعدت افهم واتعذر وهو يرجف كتله عوفهه وراي
انه اعرفه منو واجيبه جوه رجلك ظليت هواي ادور
ومنو دخل البستان وعرفته جواد الخطفج هذا ايد جبار
اليمين ورباه جبار ومن اروح طلع يجي ويفتر بالقصر

جنهم شايفين الرجال من طالع من يمي مدري لان كمت ادور عليهم والظاهر مهددين الرجال ومن رحتله اريد
اكله عرفت السوه هيج كالو شال ودورت علي ماادري وين كعد وهو اصله فلاح يكعد يم الوادم التحتاج فلاليح
يعني يفتر وره لگمه الاكل بالحلال

وهاي سنين انه مااعرف شي عن الرجال لااعرف بنته
شسمهه ولااعرف مصيره سبحان الله الدنيا صغيره
وشما ادور دائره الظلم لازم توكف وتنكشف وصارن هواي
على جبار ...

عقيق.. اني اعرفك شنو بس هي حالتهه تقهر وتدعي
عليك واني اتخبل من تدعي عليك
السبع.. الدعاء على الحق قابل كل اليدعي يستجاب
اذا انه غلطان حيل بيه استاهل بس والله عانيت
ماعانيت ويه جبار واكدر من يومهه اكتله بس مخافه
الله واكفه بعيني..

كمت من رجله ولزمت وجهه باديه جمره انت الله يحبك
ويكشفلك الامور رغم تروح سنين والاهم من هذا الله
حاميك من شرهم ..

السبع.. خليني اخابر ياسين ونروح لاهل البنيه نفتهم
هيج نذاله وشيطان ماشايف يعني دمرهه وهسه
كافلهه الله يستر صار الظلم منتشر علني

عقيق.. شفته ضاج خليت اصابيعي بشعره وكتله
اني نعسانه دكوم انام شويه
السبع.. كومي يله ماعندج امتحان
عقيق.. لا ماعندي بس تحضير العصر اقره

كمنه للغرفه حضنته وهو يلعب بشعري حسيت بدكات كلبه سريعه شلت راسي شفته صافن بالفراغ وهو منا
مايشوف رفعت نفسي ليفوك وسحبت راسه وخليته
على صدري وحضنته

اخذ نفس عالي قشعر جلدي وظليت اقره ايات
بكلبي وانفخ على راسه من يضوج ذاكرته تتخربط
ظليت على وضعي لحدماغفيت ..

فزيت على صوت الاذان التفتت اشوفه كاعد بالكاع ومدنك راسه ولازمه باثنين اديه كمت بسرعه كعدت كدامه واصيح جمره شبيك دار وجهه عني وكال منو انتي؟؟؟

عرفته صابه فقدان جزئي مااعرف شسوي سحب ايده من عندي ورجع لزم راسه واني كمت افتر بالغرفه
اقره ايات وركضت لزمت السبحه وكمت اسبح بتسبيحه
المعتاد ..

ظليت كاعده بالهول فوك النص ساعه صاح عقيق
كمت اركض كاعد كتله هاحبيبي شتحس؟؟
السبع.. ماادري عقلي مخربط وراسي يوجعني كومي
صيحي جراح ياخذني للمستشفى احس شي يمشي
براسي ..

طلعت اركض واني البس بحجابي فتحت الباب عمه
تسوي عشه احجي والهث كتلهه وين جراح السبع متخربط صعدت فوك صاحته نزل يركض

اخذه للمستشفى واني بالي يمه يمكن ضغطه
مرتفع لحد وره العشه يله رجعوا طالع ضغطه
مرتفع ومنطي علاج انقهر من وره جبار ...

عمه ام جراح سوت شوربه واكل خفيف وكعدنه
اني وياه ناكل كلساع اسأله شلون صرت ويكول
لاتخافين زين ارتفع ضغطي وهسه زين...

هاي الليله خلصت بس ماغمضت عيني اراقب بي
خاف يفز لو يتخربط كمت صليت ركعتين
وادعي الله يحفظه الي...

لبابه.. هاي الايام احس بخنگه موطبيعيه صايره احب
اكعد بره بالهول ابد مااحب الغرفه رغم علاقتنه اني
وجراح زينه بس مامرتاحه ودائما ضايجه..

بده الدوام وكمت اداوم اطلع الصبح ويه جراح
يوصلني والظهر مرات هو يجيني ومرات يدزلي
السايق ماشايفه شي منه متفاهمين بس اني
صايره نحسه وعصبيه على اقل شي...

جراح سولفلي على سالفه ضحى وراحوا لياسين
ومناك راح هو وياسين على اهل البنيه يكول كعدنه
وكمنه وامهه تبجي وهي تبجي حالفيلهم بالقران
السبع موهيج وهذا العمل من جبار الخدعهم

يكول امهه جانت تبجي دكله بس ابجي على الاكل
الي اكلنا من عنده احنه ناكل حرام وماندري
كاعدين بغرفه بالتجاوز وحالتهم تعبانه حيل
وفلوس الاهليه جبار يدفعهه حته لاتنكشف اللاعيبه

يمكن محد يدري بس هو وجواد ووسن مااعرف
شلون راح يلاكون رب العالمين بياوجه وبياعمل
شيطان وهم دمروا عوائل والدليل موتت وسن شلون
موته وهي بالتواليت...

اليوم كلهه راحت حته السبع يكعدون بمضيف واحد من الشيوخ يصير بغير قريه وراح يتواجهون السبع وجبار
ويقررون مصير الشيخه..

ظلينه قلقين على نار كاعدين خاف جبار هم يغدر
بيهم لليل يله اجو ضرغام راح لبيته والسبع لبيته
واحنه استلمنه جبار يريد يشرب مي وعمتي
دكله بعدين اشرب سولفنه شصار

جراح.. يمه انطيني مجال شصار يعني كعدوا بنفس
الحجي وتعال يالسبع اتنازل عن الدعوه لان جبار طالع
بكفاله وضرغام حركهه ومشتكي على القاضي
واحتمال ينسجن من جديد

واخر شي السبع كال اتنازل بشرط ينطينه حصصنه
بالكامل من الكاع وحته من القصر وبعد الحجي والهوسه
راح نطلع مساح ونسوي قسام شرعي وراح ناخذ حصصنه

الشيخه انطوهه للسبع لان هي اله وماقبل كال مااريدهه
واتنازل بيهه لياسين وضرغام كال لازم ينسجن جبار
لان الدعوه مشت ومن ناخذ حق الكاع عود يتنازل عنه
السبع...

وهاي خلصت الشيخ هسه ياسين وجبار راح يروح
يسلم نفسه بحجه بالغلط ضربه ومن ناخذ الكاع السبع
يتنازل وهاهي خلصت يله عوفني عدجن شي...

لبابه... الحمدلله انحلت خلصنه بس بعديش
السبع خسر نظره
جراح... خلي تترتب الامور ويراجع بلكي ترهمله
عمليه واندز التقارير لابرار تشوفهن وان شاء الله
خير...

لبابه.. صعدنه للغرفه طلعت ملابسه مال الدوام
اكوي بيهه كملت وعلكتهن وتليفوني يدك
رحت شفته خاله ام رانيا فتحت خط اجاني صوتهه
تصيح لبابه رانيا راح تموت ولج ماترضه تسوي
عمليه وضرغام ماسأل عليهه ...

ظلت تحجي وتبجي طلع جراح واني احجي وياهه
واكلهه هسه اخلي جراح يروحله. من سديته
كتله كال مايروح ضرغام راس يابس ورانيا نفسه
هو طلك اقبال دخلت باسبوع بحياتهم خربتهه وطلعت
ليش ماصبرت رانيا..

لبابه...هو ضرغام مامبرر الهه ومن جابهه لهنا زاد
الامور تعقيد يعني يدري بيهه عصبيه ومقهوره
كالتله طلكني يروح يطلكهه

جراح.. والله ماادري اصلا مايريد واحد يحجي بالموضوع ياسين يكول طلكهه واخذهه لعمامهه وثاني يوم مخابرته
دكله حابسيني ويكتلون بيه وهو من نسوان اثنين صفه ولا وحده

وهسه من رجعنه حجه وياه السبع بس ماقبل يحجي
كال موتريد تطلك وتعتبرني خاين لان ماحجيتلهه
ماتقبلت تصبر خليهه براحتهه ...

لبابه.. روح جراح كله رانيا مريضه وحدهن ببغداد
خاف تحتاج عمليه شي خوما خاله تركض بيهه
راح جراح يكله واني خابرت خاله ردت احجي وياهه
كالت نايمه...

رانيا.. جنت بالدوام ورجعت واشوف الكنتور مالته فارغ
من طبيت ماما جانت تصلي معناتهه جاي وماخذ
ملابسه هاهي ياضرغام انقطع اخر خيط بيناتنه...

سمعت مطلكهه وصح اني طلبت الطلاك بس النار البكلبي
ماتسولف وحتلو استفزيته جان يكدر يروح يطلك
وبعدين يقرر هو شسوه طلكنه بنفس اليوم ...

خابرني وسام يسأل عن الجهال كتله انت شمدريك
اني مريضه تنهد وكال شفتج مرتين تمشين بالشارع
ومره منهن اتبعتج وشفتجن رحتي للمجمع مال الاطباء

رانيا.. تراقبني ؟؟
وسام.. لااا بس صدفه شفتج ومبينه تعبانه
تبقين عزيزه عليه وام اولادي
رانيا... تسلم

سديته منه واني مااحس بطعم الحياه لاهو الي اجه
وتمم الطلاك ولاهو الواجهني وذاك يوم وهذا يوم
ماشفته بعد

الطبيبه كتبتلي ورقه عمليه على احسابي فورا
النزف موتني كالت افتح بطنج واشوف لو من الرحم لو
اشيل المبايض استسلمت للامر ووقعت على العمليه..

بيومهه بس اني وماما عيني على الدرب ياريت
اشوفه قبل لا افوت احتمال اموت بالعمليه
على الاقل اكحل عيني بشوفته

سمعت ماما من تحجي ويه لبابه وطلبت منهه يجي
وللاسف مالبه طلبنه وهيج گلب قاسي ماشفت
ابد ماهزه حنين وابد مااجه ودخلت للصاله العمليات
واني اتلفت وين وعودك وين كلامك ياضرغام

تاكدت هو ماحبني حبه البكلبه بس لمرته المرحومه
واني جنت عابر بحياته دللني لان اني دللته
جنت انطي كلشي ومتهمه بي وهو يقدملي جزاء لعطائي...

لحدما خلولي البنج واني افكر بي اذا متت مبري
الف ذمه واذا عشت عندي عتاب وياك
على ايام الجفاء على الاقل لخاطر يوم عشناه حلو...

فتحت عيني واني اون من الالم جنت اصيح باسماء
جهالي من بديت انتبه شفت لبابه وماما وام جراح
جايبهن جراح بس كالن شلونج بجيت..

ردت اسمع الكلمه من عنده هو مومن غيره
هزيت راسي بالم ومااعرف قلعوا الرحم لو شنو
سألت ماما كالت اكو كتله جبيره شالوهه مسببتلج
نزف وشالو واحد من المبايض غمضت عيني بقله
حيلي شبعد يارانيا شنو الماشفتي !!!

جنت بمستشفى اهلي وماما تعبانه حيل والجهال
جايبتهم وياهه كتلهه روحي وام جراح تظل يمي
حته لبابه ماخليتهه كلهم راحوا وظلت بس زينب
وياي ...

جنت نايمه بس ماغافيه من الالم اغفه وافز
ومااكدر اتحرك تجي الممرضه تنطني مسكن شويه
ويروح حسيت اديه تخلت على كصتي فتحت عيوني
بسرعه واشوفه كدامي

شهكت وبجيت وصحت ضرغااااااام ؟!!!
خله راسه على كصتي وكال الحمدلله على سلامتج
رانيا.. العبره خانكتني كتله الله يسلمك باسني
من كصتي ووكف يفرك بوجهه ومتوتر وعصبي...

رجع حضني من اكتافي واني نايمه وكام يبوس
بكل وجهي مااعرف شصار بيه ابجي من الالم
لومن شوفته لو من كلبي المارحم بيه ...

مسح دموعي بايده وثنه رجليه بالكاع
وكال شكد شايفه حقيرات بس مثلج ماشفت
شسويتي بيه لا اكدر اعوفج ولااكدر اتقربلج

رانيا.. انت فدواحد انت شسويت بيه ماصدكت
اطلكني اجتك عدله لو رحت تجيبهه كدامي
اشهر واني مريضه كلفت روحك تسال

ضرغام.. مو وقته الحجي صيري زين والله
كريم هسه عندج الم
رانيا.. اااي ضرغام بعد مااخلف
ضرغام.. هستوج طلعتي من الموت وتفكرين
ب***** خفي علينه

رانيا.. السانك لاتفشر ميته عليك اني
ضرغام.. لايابه اني الميت والله وروح ابوي ميت
وسحب ايدي وباسهه وكال عبالي بيه حظ
واتحمل افراك بس طلعت جذب بجذب

رانيا.. هستوك اجيت وين جنت عبالي ماتجي
ضرغام.. جنت بالبصره محد كالي اليوم عمليتج
احسابي ويه جراح لمن طلعتي من العمليات
يله كال..

رانيا... حجبت عليك
ضرغام.. احجي هو انتي السانج ينكدرله بس
بحاله وحده وهم فلت عن السيطره

رانيا.. راح تروح
ضرغام... اي الصبح اجيج بس تشوفج الطبيبه
ونطلع
رانيا.؟ باسني وراح هاج عليه الالم انطوني ابره
واني اصرخ مدري كلبي اليوجعني الالم بكل مكان

ثاني يوم اجه الصبح هو دافع التكلفه مال العمليه
وطلعنه للبيت جراح وامه ولبابه رجعوا وهو ظل يمنه
للعصر وراح للدوام ماحجينه شي لان اني متاذيه..

عقيق... اليوم الشيخ ياسين مسوي غده بمناسبه الشيخه
وكلنه رحنه صادفت جمعه كومه ناس يمهم وام اواب
انطتنه غرفتهه بس اجن اخوات ام اواب 8 وترسن البيت

كمنه انساعد بيهه بلي نكدر عليه واشوف فجر
واكفه وتغسل بالمواعين وماخلت شغله ماخلصتهه
وكفت بصفهه كتلهه اليوم نادره

فجر..حته تخطبني امه
عقيق.. ولج لاتسمعج
فجر.. امشي لاتلهيني خليني اغسل حته السيراميك
راح انظفه

عقيق.. وهناك نتوسل بيج على كلاص مي
فجر.. قابل انتو بيت اواب هو وينه ماشفته
صار ابن الشيخ مايتحاجه بسلا يهدوله مره بهاي
المناسبه

عقيق.. لج شفتي بنات خالاته شكثرهن
فجر.. ولي من يمي جنج بومه تخربطين عليه
التكتيك سحلتي السبع من ياختي ولاحكتني توسوسين
جنج شيطان...

عقيق.. والله بنت خالته هذيج حلون وتدرس هندسه
فجر.. واني يدرسني رياضيات شكد فشله
عقيق.. هذاك اجه اجه..

فجر.. وينه ولج وخري من يمي
ياحقيره ياعقيق اوكفيلي خلي اوصل للبيت واني اعلمج
تضحكين عليه تروحين فدوه لاذاناته

عقيق.. اتشاقيت وياهه وطردتني من المطبخ
وام اواب طايره بيهه لان تشتغل ونادره وهي
بالبيت ام جراح تصيحلهه الفاهيه

صار وقت الغده واكو مواعين حلاوه وفواكه
بالمطبخ وطب هو يريد يشيلهن خالاته واكفات
سلم عليهن وباسنه واباوع لفجر رافعه الردان
وتحك بالسنك وهو يلمع وهي تغسل

فجر.. ماادري بروحي شسوي كلبي جنه
ماطور كلهه ملتهيه وهو يشيل الصينيه وينطيهه
للبره من كملوا هوسه وكالو راح انصب للنسوان

اجه مد اديه بالسنك يغسل وكال على كيفك
ياحلو اليوم شاد الهمه عمي والله نادر وامي
فرحانه بيج خوش چنه

فجر.. فشلني بس بلعتهه سويت روحي مااسمع
كتله شنو تريد جاي؟؟

اواب.. لا اريد اكلج غير شي تعاي تقربي اشاورج
فجر.. ابتعدت بسرعه ورحت وره عقيق
كاعده يم لبابه كتلهه عقيق اواب يريد يشاورني

عقيق.. ديربالج ولج جذاب السبع من يكول اشاورج
يبوسني
فجر.. حرامات اسمج هالكبره

عقيق... امشي ولي عبالي غير شي
فجر.. تخربين كلشي من اكلج امداج امداج ومايفوخ
كلبي.. عقيق خلي اعضج حته يبرد كلبي

عقيق.. والله اكول للسبع عليج عوفيني مجلوبه
مشبعتني عض
فجر.. من اشوف اواب انگلب شبيج بس عضه وحده

عقيق.. ادنيت عنهه ادري بيهه تعضني تسويهه
كلما تشوف اواب حتلو بالشارع تجي تجرني من
اذاناتي وتعضني هاي تعبيرهه عن الحب...

فجر.. كلساع يجي ابالي جان لابس دشداشه نيلي
ولاف الغتره على راسه واني كلساع ابتسم
وام جراح دكلي شبيج يمه عليمن فرحانه...

بنت خالته المهندسه بعمره تقريبا حبابه كعدت وسولفت
ويانه جان دكول فجر تعالي ادرسج رياضيات
لان حجينه على الرياضيات استغربت بس كلت
اكوم واشوف...

صعدنه فوك اندل غرفه اواب من كعدنه يمهم طبينه بيهه
نفسهه اشمشم جني بزونه كالت هسه اجي
ونزلت تضحك يمكن لاول مره اصير غبيه وماالكفهه
او اساسا من اوصل يم اواب عقلي ينشال ويتخله
ابمكانه حجاره...

كمت افتر بغرفته فتحت المجرات كلهه
الكنتور مقفول حته دوشك الجربايه شلته
كعدت على الجربايه من الجهتين اكو زوايه بين
الكنتور والحايط مديت راسي بيهه ماخليت شي
مااستكشفته..

رجعت كعدت بمكاني ومااحس غير الباب ينفتح
كمزت وهو تفاجىء وكال فجر والتفت وراه شكو ليش
صحتيني ؟؟ عقجت حاجبي اني صحتك بنت خالتك
كالت اقريج رياضيات ومدري وين راحت

اواب.. انه اعلمهه ضحكت عليه وتقرب وهو يكول
بلكي اتركين لمساتج علويه فجر بالغرفه صار قريب
عليه حيل اني كصيره وسمينه وهو طويل ورشيق
شتان مابين الاثنين

يباوعلي واني اريد الم الابتسامه مااكدر
دنكت وكتله خلي اروح بعده هستوه يريد يحجي
ونسمع صوت الشيخ ياسين يصيح بويه اواب وينك
وصوته قريب على الباب...!!!

.
يتبع............

#خبايا_الاقدار

❤️♨️🍁💚

.. البارت السابع والستون

ولا چنهن
كواغد بيهن وجوه
صورهم
ياخذني لذيچ الايام...
.....

فجر... صوت الشيخ ياسين قريب على الباب وهو
يصيح بويه اواب وينك بسرعه اوب ركض قفل الباب
ماكدر يقفله بالمفتاح حته لايطلع صوت اكو مسمار
بالخشب ومعوج مثل الرزه سد الباب بي...

كام يدك بالباب ياسين وناويهه اليوم وهو مجلب بويه
اواب وينك افتح الباب واواب مااعرف شكم مره هو
يفر راسه على الغرفه يريد مكان يطلعني ماكو

شباكهه على الخارج ولابيهه منفذ بعد لزمني من ايدي
حيل وكال تعالي هنا فوتي واشرلي على المكان
البين الكنتور والحايط هذا رجلي ماتفوت بيه

اواب.. انعل حظج فجر اذا شافنه ابوي شنو موقفي
كدامه وكدام السبع
فجر.. لاتكوم تسوي نفسك العبد المطيع من صدك
هو انت متفق ويه بنت خالتك

اواب.. دفوتي فوتي ويدفع بيه ماافوت تكربست
وابوه كسر الباب جاوبه اااي بويه اوكف جاي ابدل
اخر شي فتح الكنتور الوسط بي ملابس معلكه الكنتور
بابين وشمرني بي بدون ماياخذ رأي وركض فتح الباب

ياسين.. صدك جذب بويه چاا تبدل تسد الباب هيج
اواب.. هواي نسوان هنا شمدريني خاف وحده تصعد
زحمه
ياسين.. چااا شو مامبدل موهاي دشداشتك نفسهه

اواب.. هو انت انطيتني مجال ترى هستوني قفلت الباب
وجنت ادور على ملابسي امي مدري وين مخليتهن

ياسين.. دكعد يابويه اكعد خلينه اسولف وياك
اواب.. كعدت خير حجي صاعدلي ليفوك وعايف
خطارك
ياسين..بويه ابن خال امك هنا مزهر وعنده بنيه
يكولون فلگه گمر ومخلصه تاريخ شدكولن يابويه
مدام هنا اطلبهه الك وهو عنده بس هاي الوحيده

اواب.. لابويه شاكيلك على عرس
ياسين.. انت بعمر جراح موهذاك جراح تزوج وانت
مالك حجه بعد شمنتظر
اواب..الله عليك يابه عايف خطارك وجاي تناقشني
بهيج موضوع من اريد اتزوج انه اجي واكلك
اخطبلي

ياسين..چنهه هالمره اكو من ماخذه بالك يوليدي
اشوفنك انفزعت وكمت ماتعرف اداري ملامحك
اواب..حته اذا اكو ابالي ماراح اعارضك وراح اجيبهه
من مستوانه

ياسين .. بكيفك وليدي انه كلت اشوفنك
ومالكيتك جوه واجيتك اخذ راحتك ولاتتاخر
فشله من الوادم ...

فجر.. حابسه نفسي راح انفجر واسمع حديثهم طلع
الشيخ ياسين واسمع قفل الباب ولا اكدر امد راسي
خاف بعده وهدوء وصوت اواب ماكو بسلا قفله عليه
جنت غركانه بوسط ملابسه وحرت اشتم هذا القميص
لو هذا التشيرت بزونه وخلوهه بكوم لحم...

اواب.. حلتلج الكعده اطلعي ام المصايب
فجر..وخرت الملابس وطلعت اخذ هوه واصيح والله
عيب عود ابن شيخ ماتلوكلك هاي التصرفات

اواب..والله صدك عيب انضحك عليه وتخليت بهيج
موقف كدام ابوي وجذبت من وراج
فجر..تقنعني انت ماتدري؟؟

اواب. والله ماادري صاحتني كالت تعال يريدوك بغرفتك
كالت امهه شمدريني انتي؟؟
فجر.. وهي ليش. تسوي هيج شو ماسوت ويه عقيق
شمعنى اني ؟؟

اواب.. هي تعرف
فجر.. بشنو؟؟
اواب.. تعرف اني اريدج
فجر.. شنوووووووو؟؟؟

اياماتستحي وواكف كدامي وتحجي نزلني اروح
للسبع وعود كول كدامه اريدهه بله موعيب
هسه مدحتك وكلت صدك تربيه شيخ وتحجي هيج؟؟

اواب.. اكليني حاصل فاصل لاتستغبين تعرفين
كلش زين وقبل لاتعرفين انه اعرف بيج وادري
بيج نفس المشاعر سوالف الثگل عوفيهن على صفحه
لان انتي من الاساس وزنج ماقاصر وثگيله

فجر.. والله هاي ضامتهه اريد اشوف شلون
تبرر للسبع وهاي بنت خالتك هسه اعرف شلون
احاجيهه ووخر عني يله وافتح الباب وحته رياضيات بعد لادرسني ...

اواب.. صار تأمرين امر بس انجحي دور
اول حته اخطبج خومانظل هيج
فجر.. عفته بسرعه وركضت للباب مرجع المسمار
من فوك ما اوصله التفتت علي كتله افتحه

اجه وكف بصفي ماد ايده يفتح ويكلي
لاتعبريهه وقاحه انه مومن هذا النوع
بس حجيت الصراحه

فجر..مدنگه واحجي افتحلي الباب فتح الباب
ونزلت اركض بعدين عرفت بنت خالته تدري
وهو حاجيلهه وسوت هاي السالفه عود زينه
حرامات مالحگت عليهه دكت الدكه وراحت

كعدت بصف عقيق كالت وين جنتي؟؟
فجر.. يم اواب
عقيق.. عزززه ولج شتسوين ؟؟

فجر..هاي بنت خالته البعيره صعدتني ومااحسه غير
فوك راسي وانوب اجه الشيخ ياسين وضمني
بالكنتور واني مثل جيس تمن كلهه مواقف زفت

عقيق.. شبيج ترجفين
فجر.. خلي يولي ابو اذانات يكلي انتي ثگيله
يقصد سمينه
عقيق.. مامجذب الرجال صدك سمينه

فجر..انجبي عقيق والله من باجر اسوي
رجيم لا استغفر الله من الاسبوع الجاي
لان الاحد اكو عزيمه بالمدرسه

عقيق.. والله مااشوفج تلتزمين كومي نغسل
مواعين ويه ام اواب فشله
فجر.. مااغسل شكو بعد شافني حكيت السنك
وفشلني هاهي الحقوق انضمنت

عقيق.. لعد خلي نرجع عدنه امتحان خلي نقره
خابرت على جراح كال اطلعن يله سلمنه
عليهم ورجعنه السبع مارجع كال اظل يم ياسين
وجراح رجع ويانه...

من وصلنه للباب انشوف سياره واكفه بالبيت الكدامنه
متروسه غراض وابو نوال موجود نزل جراح يسلم علي
وهنا جانت صدمه من كال اشترينه البيت الكدامكم
لان من اروح للشغل مااقلق على المره ...

لبابه.. سمعتن معناتهه اصبح وامسي بوجهه
خاف عوزني قهر
ام جراح.. ماننطيهه وجه عدهن بيت ويكعدن
لبابه.. تقنعيني عمه ماتجي انطردت شكم مره
هي وامهه وبعدهن نفس الشي والله الظاهر
جايتني ايام مشحونه بسببهه

عفتهن وصعدت حيل ضجت اتوتر منهه
والمشكله شكد يخطبوهه وترفض ومتأمله بي
مدري شنو غايتهه مع العلم اشوف جراح موباله
بس اخاف منهه عدهه سوالف مكسره والكرامه
عدهه معدومه...

طبيت للغرفتي كمت ابدل جنت لابسه بنطرون
وقميص طويل نزعت القميص اريد ابدل
وانفتح الباب بسرعه سحبته خليته على جسمي
وصحت جراح خلي ابدل...

سد الباب وهو يشمر الستره على الجربايه
ولزمني من اكتافي باسني من عظمه ركبتي
ميلت راسي ليوره حضني من خصري
وكال ضاجت حبيبتي؟؟

لبابه... شلون مااضوج تدري بيهه شنو من بشر
جراح..ادري ومتقصدين اجو هنا ابوهه مشترك
وياهه بس ماكو داعي نعيد نفس الحجي
واكلج شنو هي

لبابه.. لزم ايدي اللازمه القميص واخذه مني
شمره وظل يبوس برگبتي على كيف لحدما
اخذني للجربايه حضنته حيل وكتله جراح
حبيبي بعدني عندي الم من هذيج المره خلي
اصير زينه...

جراح.. مااريد شي بس اريد انام ظلي يمي
منا لمن انام
لبابه.. خلي البس الله عليك
جراح.. تعالي بدون حجي وفتح اللحاف الجو بارد
نمت بحضنه وهو يلعب بشعري لحدماغفه يله كمت..

بدلت ونزلت جوه عقيق وفجر يقرن وعمه تكنس
بالحديقه بيهه ورق مال شجر وين اروح رحت
كعدت يمهن كتلهن سولفن وياي

فجر.. الله جابج هاي عقيق جابرتني اقره
عقيق..عدنه امتحان واني اذا رسبت السبع
يزعل عليه
فجر.. بخت!!!

لبابه.. عوفن الكتاب واسمعني صار مده احلم
احلام موحلوه لو واحد يركض وراي لو ابو بريص
لو كلب بالحلم ومرات يتخيلي واحد بالغرفه
ولجن يمكن اتخبلت..

فجر..هوب هوب وحده وحده هم عندج وشه
وصفير بالاذن؟؟
لبابه.. اي مرات اطن اذاني فجاه
فجر..لاكون دائما مو هيج
لبابه.. اي حته عيوني بيهن غواش

فجر.. يجوز نويله مسويتلكم شي لو بيج تابعه
هاي بابا مره حجه عليهه تذكرين من كال
يسموهه ام الصبيان تصيب الجهال ومن تكبر تكبر
ويانه

لبابه.. وشنسوي اني مرات تجيني خنكه ومالي
خلك كلشي حته جراح مرات ماله خلك..
فجر.. كومن جيبلي دولكتين مي
لبابه.. شتسوين؟
فجر.. سحر...

كومي انسوي شي يطرد الطاقه السلبيه
عقيق.. انتي شمعرفج جنج عجوز
فجر.. مالجن دخل كومن قبل لا يخرب واهسي
لبابه.. مي وشنو؟؟
فجر..فد 5 شعرات من راس عقيق
لبابه.. طاحظج انتي باليه عقيق بلوه شوساكتتلهه
عقيق.. احبهه ماكدرلهه...

لبابه.. كمت جبت مي وطلعنه بره اخذنه ورق سدر
( نبگ) عدد 7 وحبه سوده هم 7 وحرمل هم 7
خليناهن بالمي وفجر فتحت القران وتعرف الايات
قرت عليهن وكمنه رشينه البيت كله

جنه فارشين فراش بس خلينا بمضخه مي وحته
الملابس رشيناهه وعتبة الباب انرش ونقره ايه
الكرسي وفتحنه بخور وسوره البقره لحد الاذان

من هذا اليوم استمرينه 7 ايام مااعرف شنو اكول
بس راحه نفسيه فضيعه ماكو صياح ماكو عصبيه
حته جراح يكول من افوت للغرفه ريحتهه طيبه
شمخليتلهه...

اهل نوال بعدهم ماانتقلوا بس يجيبون غراضهم
شويه شويه وحته عمتي ماراحت ولاشافتهم
واني ملتهيه بالدوام...

عقيق.. اليوم احد رحنه للدوام فجر لبست تنوره
وقميص هو ممنوع لازم نلبس فوك ستره بس
هي مالبست ...ضحى مداومه بس معزوله ومتحجي ويانه الي ادري بي السبع يدفعلهه صح ماحجه
بس سمعت من ام جراح...

احنه كاعدين اول رحله طبت ام الاسلاميه كالت لفجر
روحي للاداره جيبي الجدول فجر مخالفه ماتكدر
تروح ام الاسلاميه حبابه كالتلهه اخذي جاكيت زميلتج
اكو بنيه مشتريه جاكيت جديد انطته لفجر...

شو فجر راحت واجت بدون جاكيت والبنيه عيونهه
صارن بگصتهه ماكدرت تحجي لحدماكملنه الدرس
وطلعت المدرسه اجتهه كالتلهه وين جاكيتي

فجر.. اسفه اني اشتريلج غيره المعاونه كالت حلو
جاكيتج واني كتلهه عمي جابه من الخارج
وكتلهه ست بالعرضه كالت انطينيا وانطيج
فلوسه مايمنه هيج وبعد مااكدر الم الجذبه

عقيق.. البنيه تخبلت كامت تكمز وتعيط اريد جاكيتي
وفجر تسكت بيهه ودكلهه اشتريلج غيره بس لا اطلعيني
جذابه كدام المديره اخر شي تعاركن البنيه شيلي الكتاب واضربي فجر بي وهاي جري حجاب البنيه وصارت
هوسه..

اخذوهن للاداره اثنينهن ومايعرفن شيحجن دكلهه
المديره عليمن تعاركتن البنيه استحت دكول
لان اخذتوا جاكيتي وفجر بالعتهه وساكته
اخر شي كالو راح نتصل على اولياء اموركم خابروا على ابو البنيه يجي واحنه دكوا على السبع مارد
كالتلهه انطونه غير رقم

عقيق.. انطيتي يارقم
فجر.. رقم جراح
عقيق.. شلون تسوين هيج
فجر... غير هي كلمه التنكال هي متستحي
عقيق.. هسه السبع يطيح حظنه
فجر.. حضري اذاناتج سويلهن احماء

عقيق.. شعليه اني مارحت وياج
فجر.. وتريدين انكتل وحدي والله تنكتلين وياي
الصديق وقت الضيق
عقيق.. ولي فجر والله ازاعلج اذا ذبيتيهه براسي
فجر.. هسه يجي جراح اهون من ضرغام جان
سحلني همزين ببغداد

عقيق.. جان الدرس الاخير شويه وصاحو البنيه
اجه ابوهه وطلعت واحنه صاحونه كالو تعالوا
اني ممسويه شي بس اخذوني وياهه طبينه
للاداره وانشوف ضرغام يفر بالسويج وخزر فجر

المديره.. هاي كدامك مشلعه شعر البنيه وانريد
نعرف عليمن مايحجن هذيج ابوهه كتب تعهد
وهاي بتكم مشكلجيه قبل مده دافعه وحده بالحانوت
واصبعهه مكسور

ضرغام.. عليمن تعاركتي؟؟
فجر.. هي غلطت عليه وضربتني بالكتاب
ضرغام.. وعقيق وياج؟؟
عقيق.. لا والله مالي علاقه ست اني شعليه

المديره.. عقيق دره مؤدبه وحبابه وشاطره
وفجر هم مؤدبه بس وكيحه حيل تمشي
جنهه عصابجيه يوميه شكوه عليهه

ضرغام.. ان شاء الله ماتنعاد واحسبيهه علينه
والمره الثانيه اذا عادتهه النه حساب وياهه
زين مستواهن العلمي شلونه

المديره..عقيق درجاتهه زينه وحته المدرسات
يمدحن بيهه وفجر مهمله بعدنه ماكملنه شهريات
انكمل واندز درجاتهن وقعوا عليهن

عقيق.. كام ضرغام واعتذر من الاداره واخذلنه
اجازه طلعنه صعدنه بالسياره غسل فجر
برزاله غسل ولبس وهي ساكته وصلته للبيت
ام جراح مسويه سمج على الحطب وجراح
موجود والسبع رحت بدلت واجتمعنه على سفره
وحده...

جراح.. شرادوا المدرسه ماكدرت اجي دزيت ضرغام
السبع.. ليش خابروكم
جراح.. اي خابروني كالو اكو مشكله ويه البنات
ولازم تحضرون داكين عليك مامجاوب

عقيق.. كاعده بصف السبع بسرعه التفت عليه
وكال شمسويات؟؟
عقيق.. والله مواني ماسويت شي

ضرغام.. موعقيق هاي ام السان المكروض
كاتله بنيه ودكول المديره ادور مشاكل عصابجيه
مثل عمهه جبار

فجر.. خلي احجيلكم السالفه حجيتهه وسكتت
غمتني ام جراح وضربتني على راسي
ولج صغيرونه كريمه بخير غيرج شلون اتجذبين
لو هنا ساهره جان طيحت حظج

ضرغام.. منو عمج الجابلج من الخارج بسلا
جبار هسه دجذبي جذبه بيهه خير عمه
العماج

السبع..موعيب فجر من يمته متعلمه هيج
جان حجيتي الحقيقه وكتيلهه ست مال صديقتي
هاي المره صارت المره الثانيه ازعل عليج

جراح.. وهسه هي معاونه وبمدرسه اهليه ماتستحي
تطلب هيج قبل بزمن الحصار يطلبون المعلمين
بيض ودجاج لان راتب المعلم قليل وحصار هسه
شبيهن ؟؟

عقيق... بسرعه ضحك السبع وجراح وراه
طكهه ضحكه وام جراح كالت عدهه رس ( وراثه)
بالرشوه بخير غيرهه وضرغام مغلس

جراح.. لاتزعلين فجر ضرغام الرزلج مسويهه
قبلج جنه بالابتدائيه وضرغام يوميه يجيب
ديج للمعلم والمعلم من المدينه ياخذه ويركض
وانه اخاف احجي لان يربطني للنخله لحدما انكشف
شكو ديج عند جبار ضرغام بايگه لحدما ظلن بس
الدجاجات وبيض ماكو ..

عقيق.. كلنه ضحكنه وضرغام مبتسم كال انت ارعن
ورحت حجيت والله هو جبار شمدري يجي يلكاهن
ناقصات عباله ماكلهن الواوي ( الثعلب)

جراح.. انه جنت مستر على جريمتك وبدرس
الفنيه يطلبون صابون ومكناسه انه اخذت
صابونه وهو جاب حذاء جبار مشتري جديد
وانطاه للمعلم ويكل للمعلم شكد تلبس استاذ...

عقيق.. من وفاه خاله لحد هذا اليوم ماضاحكين
هيج ضحك والمصيبه طلعوا خياسات ضرغام
كلهن حته السبع فرحانه لان شفته يضحك وام
جراح مغطيه وجهه وتهتز اكتافهه والسمجه
باقيه بس العظام...

ضرغام.. سد حلكك ولك هسه تزوعهن كلهن غير
جنت جاهل وبعدين المعلم يستاهل احسن
من جبار

السبع.. جنت اكبرهم بالمتوسطه بالدوام الثاني
يوم منهن اجيت عندي اضافي لكيت موكفين جراح وضرغام على تك رجل وكاتليهم بالعوده وطبعا
جراح بريء بس الفاينه من ضرغام

واكو معلم حضري من بغداد يداوم يمنه ولابس
حذاء مال اهل قبل وجديد وحلو واحنه عرب
وبالضيم جاي ضرغام كايل للمدرس استاذ حذائك حلو...

المعلم كايله بالعرضه طبعا احنه ماسامعين هاي
الكلمه ابد ضرغام صاير نجر وكايل للمعلم الله
يعرض وجهك ...

عقيق.. جنت اضحك واكول ضحكه خير لان تلاثتهم
اتذكروا ايام قبل وشعدهم بطولات والقائد ضرغام
مامخلي سالفه مامسويهه وجراح ينكتل وياه ...

لمينه السفره ولبابه كالت روحي لبيتكم واني
اغسل مواعين رحنه اني والسبع بس طبيت
حضنته مشتاقتلك حبيبي من الصبح ماحاضنتك

السبع.. يابنيتي السباعيه كالي ضرغام درجاتج
زينه مااريد تخيبين املي
عقيق.. لا مااخيب املك هسه تشوف شلون ارفع
راسك ..

السبع.. تعاي انام شويه كلبج شلونه
عقيق.. ضحكت من يسالني على كلبي اكو شي
السبع.. لوتيه تعرفين كل دماراتي وصايره
وكحه ولاجنهه البزونه المغمضه..

عقيق..منو البزونه اني ورفعت رجليه بسته
من رگبته صاح عقييييييق لاتلعبين على اعصابي
عقيق.. جمره اني احبك
السبع.. لاتتمردين عليه ومد ايده نزع حجابي

واني كمت افتح بدكم قميصه لزم ايدي
وكال كلبج شلونه؟؟ حضنته حيل وايده على
راسه كتله زين مدامه يمك زين..

مشينه للغرفه لزمني من فكي برقه وبده
يبوس بيه بكل شغف وهو يحجي باذاني
باعذب الكلمات ويرجع يحضني حيل
وكل يوم وكل تقارب اعيشه بشعور احلى...

رانيا.. ضرغام احلف طلگتهه
ضرغام.. والله طلكتهه
رانيا.. واذا ضميت عليه
ضرغام.. اخاف منج مااضم

رانيا.. كلش ترجف
ضرغام.. اني مامتمسك بيهه حته مااطلكهه
بس اسلوبي جاف ماعرفت اهديج وانتي
جنج ثور وهاج

رانيا.. لاتغلط تريدني اسكتلك وهي ادوس
ابطني وماتسكتهه
ضرغام.. هسه عوفينه راحت ومشت
احجيلنه بالمفيد اخذج للطبيه شوكت تفتح خياطات

رانيا.. باجر تفتحهن بس لسه مااكدر اتحرك
ضرغام.. بس تشيلهن تصيرين زينه اجددلج
الاجازه مالتج باجر
رانيا.. ضرغام ضام عليه شي

ضرغام.. عاد مره ولزگت كتلج طلگتهه ماتصدكين
اسألي ياسين
رانيا.. اذا ضميت عليه بعد اسوي ازيد وبعدين
احنه مواطلگنه شو كاعد كدامي

ضرغام.. طلاكنه باطل لاشهود لا بوعي
جنت عصبي رحت سألت كالو باطل
رانيا.. هااا وتريد ترجع بدون مشيه
ضرغام.. اجيبلج مشيه لوانتي اتجيبيلي لان
اني رجال واتهمتيني زور وتذكرين رجولتي على السانج

رانيا.. يعني وكفت عندك هاي الكلمه جنت عصبيه
وبعدين ليش تاخذهه بغير شي هي الرجوله
بس بهاي ؟؟ بالافعال والاقوال

ضرغام.. واني ماعندي لا افعال ولا اقوال والله
يارانيااا يرادلج ضب براغي فالتات من جديد
بس هسه مااكدر استخدم الاسبانه براغيج ملتهبات...

رانيا.. شلون السان صدك لوكالو ضابط
ضرغام.. يعني شتتوقعين من واحد يحقق ويه
مجرمين السانه يتلو القران واكبر باذانهم...

رانيا.. تعال كومني اريد افتر شويه اجه كومني
تمشيت شويه اني وياه مد وجزر متحمله علي
وهو متحلف بيه مرات يتشاقه ومرات يعصب
من صدك ...

اخذني للطبيبه فتحت الخياطات كمت اكدر اتمشه بالبيت
جددلي الاجازه سيوفي امي تاخذه للمدرسه وترجعه
انخاف علي الوضع يخوف...

سنه 2010/10/31 هذا اليوم عصيب على المسيح
الموجودين بالعراق وهم اخوانه لان الياكل نفس الزاد
وبنفس الماعون موشرط اخ بالام والاب او الدين
جانن كومه مدرسات ويانه مسيحيات وعلاقتي
حلوه بيهن مثل مانكول ينطن اللگمه من حلكهن..

جنت انظف بالطباخ والتلفزيون مفتوخ وضرغام بالدوام
صادف العصر واسمع خبر عاجل هجوم ارهابي
على كنيسه سيدة النجاة بالكراده والي تعتبر
موطن موطن لتوافد العديد من المسيح واثناء مراسم
القداس داخلين انتحاريين ومفجرين نفسهم بوسطهم
واكو رئاهن محجوزه ...

تركت البيدي وامي علت التلفزيون ضجه جبيره
صارت بهذا البلد ماحابروا السني ولا الشيعي مااكتفوا
بدمهم وصلتوا بيهم لغير اديان ولاكثر مسالمين
هم المسيح صار القنوات تنقل اخبار كذا بلد يستنكر
وكذا رئيس يتسنكر اتذكر الموقف بجيت وياهم
من طلعوا المسيح بالدول الاوربيه يبجون ويطالبون
من السلطه العراقيه يحررون الرئاهن...

يمكن نص ساعه واجه ضرغام على سرعته
اخذ ملابسه وهويته وطلع كال انذار
علمود الكنيسه لتحرير الرئاهن ركضت وراه
حضنته من ظهره وكتله ديربالك على نفسك
دار وجهه عليه باسني من خدودي وراح...

بس طلع بجيت ماادري على الحادثه يعز علينه
انشوف دم ناسنه هيج مدري قلقت علي
كمت ادعيله وادعي يحفظ الجميع يومين ضرغام
مابين ومن اتصل ماجاوب غير مره وحده
كال مااكدر لان استخبارات وخاف اجهزتهم مراقبه
حته طلعه ماطلعنه ودزلنه بعد حارس بالباب...

قلقت حيل فاتحه التلفزيون واسمع كلساع
خبر اندك الباب حيل كلبي لزمني ماما طلعت
صاحت منو اسمع صوت جراح وهو يكلهه
ضرغام اتصوب بتحرير الكنيسه وحالته
موتمام...

.
يتبع.......

#خبايا_الاقدار
❤️❤️♨️

... البارت الثامن والستون

رانيا.. ركضت ليبره حافيه امي لزمتني
وصاحت مابي شي مابي شي بس اني سمعت جراح كال وضعه موتمام وهاي ثاني اصابه حجيت بتوسل الله عليك جراح بي شي ؟؟

جراح.. والله مسويله عمليه مطلعين الطلقه بس مامنتبه
بعده وخابرونه وهاي اجيت السبع وياسين يمه
بالمستشفى واني اجيت اشوفكم

ام رانيا.. فوت يمه فوت اشربلك كلاص مي وانتي
بنتي تعالي موزين على عمليتج البرد
رانيا.. مسحت دموعي ياربي بيه ولابي بعدني
ماكمت على حيلي يوكع هو شنو من مصايب على راسنه

دخل جراح شرب مي وشويه وطلع وكال اجيكم
بليل وبس ينتبه اخابركم توسلتله اروح ماقبل كال
هواي ضباط يمه الي عرفناه محررين الرهائن وصاير
هجوم ومواجهه ومتصوب ...

ظليت لليل واني الوب خابرني جراح كال منتبه
وزين بس اله اشوف بعيني ماقبلوا اجي وشددو علينه
حته الحارس بس يسمع الباب ينفتح يصيح لااطلعون..

ثاني يوم مااتحملت شيصير خلي يصير اخذت امي
ورحت للمستشفى سيوفي بالمدرسه وبس رضاوي ويانه
طبيت اركض سألت عن غرفته واسمه دلتنه الممرضه
وصلت للممر شفت ياسين واكو اثنين ضباط بالباب
وجندي اخاف اتقرب انتظرتهم يرحون يله رحت

سلمت على ياسين كال يمه الآمر مالته خلي يطلع
وفوتي انتظرت بره وعيني على الباب طلع رجال جبير
هذا الآمر. مالته واني بسرعه ركضت لگيته لازم المغذي
ويريد يوخره ..

صحت ضرغام حبيبي رفع راسه عليه بسرعه
ركضت حضنته صاح اااخ اااخ مااندل اصابته كل
كتفه وصدره مضمد ابتعد عنه واني امسح بدموعي
شنو يوجعك؟؟

ضرغام.. كلبي يوجعني ولج رانياااا ماينكدرلج
شلون تجين وهاي المستشفى كلهه زلم
رانيا.. اسكت يازلم من البارحه لسه حته مي ماشاربه
تريد تموتني يوميه مصيبه

ضرغام.. موتريدين تطلگين
رانيا.. وانت صدكت موتدري بيه مخبله
ضرغام.. اااااخ يابويه خفت اموت وبالي يمج وماشايفج
رانيا.. اسم الله عليك يومي قبلك

ضرغام.. منو جابج؟
رانيا.. ماما بره هي ورضاوي
ضرغام... الحارس لوتكسي!؟
رانيا.. الحارس وصلني خطيه ماقبل بس كتله اروح
لشارع وماقبل

ضرغام.. رجعي للبيت باجر اطلع ماكو شي
رانيا.. وين اصابتك ؟
ضرغام.. بصدري قريب ايدي ماكو شي يله حبيبتي
رجعي للبيت وسدي الباب ولااطلعون ابد...

رانيا.. بسته من خده سحبني من راسي باسني
وطلعت اخذت امي ورجعنه للبيت حضرتله الغرفه
دك تليفوني لبابه تسأل عنه طمنتهه والتهيت بالبيت
ثاني يوم طلع ياسين والسبع رجعوا للبصره وجراح
ظل يمنه علمود الخطار...

اول مادخل كال اريد اغسل صعدت وياه للغرفه نزعته
قميصه وعلى كيفي غسلتله كتفه ولبس قميص وكعد
على الجربايه ايده مخليهه بحامل كال خوماعندج الم

رانيا.. لا مابيه شي اني علر كيفي اتحرك
ضرغام.. خلي انزل جوه يم جراح يظل وحده
رانيا..اطلعلك جربايه ماما نام عليهه وهي تنام يمي
ضرغام... يله بليل يجون جماعتي من هسه دزي على كهوه بيد الحارس..

رانيا..نزلت شلت الجربايه اني وجراح خليناهه بالصاله
ونزل نام عليهه ظل يمه جراح ماكدرت افوتله بس بوقت
مايصيحني حته جراح ياخذ راحته...

ام جراح.. منووو بالباب؟؟
اواب.. انه اواب خاله
ام جراح.. هله بيك يمه همزين اجيت وحدنه بس نسوان
ماتدري شلونه ابو ليث؟
اواب.. زين باجر يجي السبع وابوي واليوم انه ابات
يمكم

ام جراح... هله بيك وليدي فوت للاستقبال
عقيق..ماندري اواب اجه ولاندري ام جراح مدخلته
جانت بره وفاتحتله الباب واني وفجر وحده تركض وره
الثانيه نلعب تشد عيوني واظل ادور عليهه ولبابه تصيح صرعتن راسنه شوكت يجي السبع ونخلص.

عقيق..فجر والله كلبي انكطع انتي تزاغلين وبعدين
احنه كلنه اليفوز مرتين يعتبر فايز
فجر.. يله اخغ مغه شدي عيوني واذا لگيتج اطيح
حظج تغسلين هدومي مال المدغسه وتحليلي واجب
بيتيي وتسويلي كاستغ

عقيق..ماتلگيتي يله نبدي سديت عيونهه بالشال
وهي لابسه تراك وتفتر وراي تريد تلزمني باب
الاستقبال الي على الصاله مفتوح ماتندل فاتت بي
واني ماادري اواب هنا كلت افترلهه من الباب الثاني
والزمهه من وره...

فجر..اطلعي حمصايه وينج عقيق عبالج تفوزين عليه
مو اليوم اسحلج سحل السبع وماكو تغسلين هدومي
واعوفج وتحليلي واجب بيتي يله ولج بزونه

ماكو صوت ولج عقيق صخمايه انضربت بحاجز كونكريتي رجعت ليوره وهذا الحاجز بشري بس
العطر لفحني عرفت اني وكعت بالمصيده

رفعت الحجاب عن عيني وياريتني فايته بالكاع
شكلي يخزي يخزي تمشيط ماامشط شعري سبرنگات
بس ينشف يعكش تراكي شعرضه وماخذه راحتي
البجامه شكل والبدي شكل واواب مكتف اديه
وصافن عليه..

اواب.. جاي تصدميني يوم عن يوم اشك بأنوثتج
فجر..منين طبيت وخليت الشال على غاسي واضم
بشعغي المهوس
اواب.. طبيت من شيب الخلفوج

فجر..ماادغي انت هنا وجنت العب ويه عقيق
اواب..تلعبين؟؟ ليش شكبرج انتي البكدج مو مرحله اولى مدري ثانيه وعرسن
فجر.. وانت شبيك العب بغجليه لاعبه بغجليك

اواب.. لايابه شعلينه هو منو يكدر للسانج وبعدين
شكالج الطبيب مولازم تخففين من وزنج انتي
بزياده موبنقصان

فجر.. لاتدخل بوزني اكل واشغب بكيفي شو كلما
تشوفني تصيح سمينه سمينه عود شنو معناتهه
اواب.. معناتهه انتي سمينه والحساسات عندج مشيوله
وياريت تعتبرين كلامي تنمر حته تلتزمين برجيم
وتضعفين

فجر..راح اعتبغ نفسي ماسمعت الكلام تنمغ على غوحك
وهذا الاسبوع صعدت كيلوين وانصحك ماتنصدم
كل اسبوع تلكاني زايده 2

اواب.. وصحتك موكالج عندج دهون على الكبد
فجر احجي جديات
فجر... لا بيبيات ...

اواب.. امشي من وجهي
فجر..درت وجهي وطلعت لكيت عقيق كاعده اول ماشلتهه مت شعرهه ولج انعاله ادكيهه بيه وطببيني
للاستقبال

عقيق.. عوفي شعري شمدريني اواب هنا وبعدين
هو انتي تكيفين لو مامكيفه ماتاخرتي جوه
فجر.. والله لومااخاف من السبع جان عرفت شسوي
بيج امشي مزاعلتج دائما تعوفيني وادكيهه بيه

عقيق.. والله ملابسه حجاب وام جراح بره ماكالت
الصوج بيهه اني شعلينه يله لاتزعلين احل الواجب
بيتي مالتج ..

فجر..امشي ولي
عقيق.. عافتني وكامت زعلانه شويه ورحت وراهه لكيتهه
مطلعه علاكه الحبشكلات مالتهه وتاكل نستله ومبرطمه

فجر.. اواب يكلي انتي سمينه
عقيق.. انتي ليش ماتضعفين ولج شوفي كرشج
فجر.. والاكل شلون مااكدغ احبه مااكدغ افاغكه

عقيق.. خلي هو يحاجي الطبيب يسويلج نظام
والتزمي بي والعبي رياضه ولج حته اذا عرستي بدله
ماكو عليج شوفي هسه اني السبع يشيلني

فجر.. السبع يشيلج؟!!!! اعوذ بالله امشي مااتخيل
السبع يسوي مكسغات
عقيق..عابتلج غير اني مرته يعني اذا تزوجتي رجلج
مايشيلج

فجر... وتغيدين اضعف واصير مثلج
عقيق.. طبعا لازم تضعفين شوفي جسم لبابه
يخبل وبعدين ام جراح كالت اكو عرس راح يصير
يم شيخ ياسين وخوما كلهه تصيحلج السمينه

فجر.. كومي شجعيني
عقيق.. شلون اشجعج كومي فجر روحي لاواب
كليله يشوفلج طبييه تغديه مواني راجعت جنت قزمه ولج تدرين جنت استحي اطلع تذكرين من اجيتكم

فجر.. اي جنج ذبانه
عقيق.. طاحظج غير جنت مريضه واخذني للطبيب
وانطاني نظام وعلاج وتحسنت الله عليج شوفي
جسمي مثل قبل لومتحسن

فجر.. موتزوجتي شوفي لبابه شلون كبغانه
انتن من تزوجن تثيغن كباغ
عقيق..لعد من تزوجين شتصيرين بعد
فجر.. اسكتي كافي غاح اغوح اكله يله تعالي
ناكل هاي العلاگه وداعيه بعد ماكو حبشكول

فجر.. كملت اكل واتخذت قرار اكيد لان هو اتنمر
عليه وصدك كلام عقيق يخبل جسمهه شتلبس
يلوكلهه خوب لبابه خصرهه مايزود سانتم من كدما
محافظه على نفسهه بس اني مومثلهن

دكيت الباب ودخلت جان كاعد ولازم تليفونه
وكفت قريب علي كتله شوفلي نظام غذائي
اواب..تضحكين عليه شكم نظام جبتلج ووينه
ضاع خبره؟!

فجر.. لا التزم بس موقاسي
اواب.. ترى مو اقلد عليج بس والله مومناسب لعمرج
ولا لصحتج حته الصدريه تصيح ارحميني

فجر.. هسه تشوفلي نظام لو ابطل
اواب.. شو محملتني منيه تبطلين على روحج حته اسنانج
تشلعت الليل والنهار تلفين
فجر.. ماكله من خيغ ابوك شعليك بيه

اواب.. والله ولاترهملج جاره
فجر.. عفته وطلعت اخذت الليل كله افكر التزم لولا
وكلما اكول التزم اركض للثلاجه اكل شكو بيهه وعبالك
اريد اخزن لايام الجفاف...

عقيق.. ثاني يوم رحنه للدوام وفجر انطاهه نظام من دكتوره
يعرفهه اول يوم تتريك بيض سلگ وحده طول الطريق
تصيح هو بيض شكو اكلت بس وحده فد 4 خمسه واصبر بيهه
ماخلص الدرس الاول بالشافعات

يمكن هذا اليوم جان اصعب يوم الهه تاخذني للحانوت
دكله بس نتمشه من يمه ونشتم الريحه حته وجهه
صار اصفر من تشوف وحده بيدهه لفه دكول هنيالهه
هني ومري ...

رجعنه من الدوام جان السبع راجع طبيت للبيت
صحت جمره ماكو صوت بدلت وصليت وطلعت
جان بالاستقبال مال البيت الجبير ويمه ياسين
تغدينه وظليت انتظره شوكت يطلع ايست منهم
عفته ورحت للبيت نمت وكعدت وهو ماكو ...

طلعت اركض حته بدون مااغسل عبالي بي شي
طلع يمهم خطار علمود ضرغام جايين يسألون
علي وظالين يدكون سوالف ...

لحدالمغرب يله شفته صاح عقيق جنت بالمطبخ
يم فجر عفتهه وطلعت لزمت ايده ورحنه للبيت
بس طبينه حضنته الحمدلله على سلامتك حبيبي
السبع.. الله يسلمج حبيبتي خطار ماشفتج تغديتي ؟؟
عقيق.. ااي الحمدلله وانت خوماجوعان ادري بيك تتقيد
بالاكل وياهم

السبع.. اي والله ماكدرت اكل بس الماعون الكدامي مااندل
الاكل كل يوم انتي تخلين كدامي مدللتني
عقيق.. عمه ام جراح مسويه دجاج شوي وطماطه شوي
راح ادزلنه روح صلي بين مايكمل العشه..

السبع.. اريد اسبح عقيق راسي موتمام كلساع تضارب
عندي الاحداث من التعب
عقيق.. تعال راح احضرلك الحمام واني انتظرك بالباب
رحت للغرفه طلعت ملابسه وفتحت المي دافي
لان الجو بدايه 11 بي بروده

دخل سبح واني كاعده على الدرج كمل وطلع صله
اني رحت للبيت الجبير جبت العشه واجيت
كعدنه ناكل مبين ماشبعان بالغده عفت اكلي وكمت
اخلي كدامه حته اسويله لفات ابد مايتقيد يمي حته
مرات من يجي خطار وره الغده يكلي جوعان واسويله شي بسيط واله اكعد يمه ...

كملنه عشه مدد بالهول واني جبت كتبي كعدت يمه
وكمت اقره وهو يسمع اخبار اجه ابالي العرس اليم بيت
ياسين سديت الكتاب وكتله جمره المن العرس اليم الشيخ
ياسين؟؟

السبع... ابن اخو طه
عقيق.. هو طه وين ؟
السبع.. ماسامعه فلان يجلي وطه طرده من القريه كلهه
وراح بغير مكان كعد هو ومرته الرجال الي يستر على مرته
وهي على غلط ماينشد بي ظهر

عقيق.. زين هو علي ابنهه صغيرون بالابتدائيه شنو قابل
يزوجوه بهالعمر وليش مو يم ابو؟؟
السبع.. لا طه متزوج بنت عمه اول وحده وميته بالولاده
ومخلفه توم ولد وبنيه البنيه 6 اشهر وميته والولد ظل
جان عايش ويه ابو ومن كام يكبر عاش يم ياسين وخلاه
يدرس وتخرج ماشايفته انتي لان كل وقته بالمدينه قليل
وحته هسه هم راح يتزوج بالمدينه..

عقيق.. وشوكت العرس؟
السبع.. ماادري بس اله يتحسن ضرغام
عقيق.. وجبار وين هسه؟؟
السبع.. بالسجن والكاع بيد جراح خلي تكمل واتنازل عنه
ويطلع ...

عقيق..ظلينه انسولف لحدما صارت ب12 كملت دراسه
وحضرت ملابسي ورحنه للفراش احاول اخفف عنه
ومايضوج بس من يتعب حيل يستحسف روحه وشلون
هيج مايشوف..

لبابه.. طلعت من الكليه جراح واكفلي صعدت يمه
بس تحركت السياره الموطه صارت بين عيوني
كتله جراح مشتهيه موطه التفت عليه وكال كولي غيرهه
حامل مو؟؟

لبابه.. لا ليش حامل مايصير اشتهي موطه
جراح.. بحملج الاول هم اشتهيتي موطه وجنه بعيدين
وانتي كاعده واطلعين صوت ردت اطبك السياره بالطريق

لبابه... ضحكت وكمت اتوسل جراح اشتريلي موطه
لان جان الجو بارد ومايقبل يكول بلاعيمج تلتهب
وكف على جهه ونزل جابلي موطه بحيث احسهه
صبت على گلبي من البروده مستمتعه بيهه بشكل ...

وهو يباوعلي مبتسم وكال شغلتج موخاليه خلي انشوف
مختبر مدامنه طالعين
لبابه.. لاجراح موحامل ماعندي اعراض بس ابتليت
اشتهيت موطه
جراح... وانتي شمعرفج بالاعراض
لبابه.. اخذني لمختبر قريب نزل وياي جنت اتأفاف
اصلا اضحك علي بس هو جان حاس طلع تحليلي
وجابه يضحك كومي خلي اشتريلج بعد موطه ابتسمت بوجهه
حامل ؟؟؟

جراح.. اي حبيبتي مبروك النه امشي للبيت
لبابه.. بالاول صفنت بوجهه وبعدين ضحكت لازمه
ايده وفرحانه حيل جنت خايفه ام جراح دكول
الي يصير عدهه اسقاط باول بطن تتاخر يله تحبل...

بس دخلنه للبيت صاح يمه اجت تركض وهي دكله
مبينه من فرحتك لبابه حامل عكس المره الاولى
ماجان هيج فرحان وراحت خابرت ابرار وهي تصلي
على النبي..

منا وبدت معاناتي ويه الحمل هرموناتي زفت
اقل شي نتعارك هو متحملني وصلت بي مرات
ينام بالهول من كدما انفعل اذا دك تليفونه اصرخ. وهو
يكول ميخالف عاذرج...

مااغار ولابيه شي بس احس نفسي مختنكه اريد املخ
نفسي وشعري ومايبرد كلبي حيل متوتره حته بدوامي
نص المحاضره واستأذن اطلع احس القاعه تخنكني
لو شي يصعد على كلبي...

اهل نوال استقروا يمنه بس مايجونه ولاعمتي
تروح مرات اباوع من فوك من يطلع جراح تطلع
بالباب بس مايحجي وياهه ...

صادفت جمعه وكالو كلنه نروح لضرغام انشوفه
تحضرنه وطلعنه من الصبح الطريق متعب وجراح
كلساع يوكف السياره اتقيء منا طريق وحمل
خليته يصيح التوبه اذا طلعتج بعد

رانيا.. شبيك واكف على راسي وترتني
ضرغام.. العفو ست رانيا هاي كعدت
رانيا.. ضرغام اعصابي تلفانه تخيل هذا الاسبوع
تجي سهاد الباعتنه برخص راح تجي ولاكانما شي
صاير وتشوف امي وتسلم علينه وهاي اذا ماكعدت يمنه

ضرغام.. ناخذلج اجازه ونروح للبصره وهي خلي
تكعد يم حسام حامي العرض
رانيا.. اني كلت لماما مااريد اشوفهه اخذ الجهال ونروح
بس شفت ماما گلب والده دكلي اخيتج هاي

ضرغام.. تعالي خلي اسولف وياج
رانيا.. اكو شي؟؟
ضرغام.. ماتسولفين لامج
رانيا.. شكو احجي صاير شي؟
ضرغام.. اختج مطلگه قبل سنه خالعه زوجهه
وشامرته وره ظهرهه واخوج حسام هو المحرض

رانيا... لطمت على صدري شنووو؟؟ عزه العزاهه
رجلهه حباب وشلون عايشه وحدهه
ضرغام.. رجلهه مايدري بيهع ماخذه ورث منكم
ومايدري حسام منطي الشقه مالته طول هاي السنين
رجلهه يدفع ايجار كل شهر وهي تاخذهن عود يحولهن
لحسام وسالفه الورث هم مايدري ماخذه حصتهه

بحيث رجلهه يشتغل الليل والنهار حته يسد مصروفهم
وسكنهم واختج مدري وين تودي الفلوس ومن دره بيهه متعارك وهي طاردته من الشقه وهو راجع للعراق قبل
سنه رجع لاهله وهي عاشت هناك هي وبناتهه ورافعه
دعوه علي ومطلكهه وهذا الحجي يدري بي خالج
بس امج ماتدري وهم الواكفين وياهه وشنو المصلحه هم
ماادري

رانيا.. منو كالك
ضرغام.. شعليج بابا شغلي استخبارات بروحي
مااثق ماردت اكلج بوقتهه لان جنتي هايجه
على سالفه متزوج قبلج وانوب اكلج على اختج اطلعيني
من ال*****

رانيا.. صدمتني اذا عرفت ماما شلون؟ احس
مقبلين على مصيبه
ضرغام.. مااعتقد حسام يلفيهه وراح تجي يمج
لان مرت حسام علاقتهه موشي وياهه
رانيا.. وانت شمدريك؟؟

ضرغام.. اذا تظلين تسألين شمدريك مااسولف بعد
اكو قانون بشغلنه من يسألنه الآمر شلون وليش
احسبي الضابط بعد مادبر شغله وانتي اذا ظليتي
هيج مااحجيلج

رانيا.. كلبي اوجعني شكول عليهه ياربي شنو
من بشر حرامات ذاك التعب بيهه هسه راح يجون
من البصره ويلكون وجهي هيج مگلوب على هالخبر

ضرغام.. هسه اعدل مزاجج
رانيا..هو انت تكدر تحرك ايدك
ضرغام.. شعليج بيدي ****
رانيا.. السانك السانك بلكي تحجي كدام الجهال
هيج

ضرغام.. لا شنو السالفه بس كدامج فالت
اني ثگيل
رانيا.. لاتخليني احجي خليني ساكته
ضرغام.. شو تعالي فد تصبيره على ايام القحط
سنين يوسف سويتيهه عليه

رانيا... بعدني ماثاقه من اثق عود تدلل
ضرغام.. تحجين صدك وعلي اكوم *
البنيه راحت ومشت وانتي لزگتي

رانيا... شسوي موبكيفي اليضم مره يضم عشره
درت وجهي ورحت للكنتور اريد اطلع ملابس
مااحس غير شعري ينجر من وراه وراسه ينسحب
علي احس ركبتي راح تنخلع

باسني من بلعومي كزبر جلدي بس مااكدر اتحرك
صحت ااخ شعري ضرغام ايده اليمنه مرفوعه بحامل
وباليسره ساحبني باسني من وره اذني وحجه بيهن
احبج حيل اتنازل عن كلشي ومااعوفج

رانيا.. ابتسمت واني مغمضه عيوني
ضرغام عوف شعري دتأذيني
ضرغام... فد جرعه على الماشي
رانيا.. والجرعه تسحب شعري عوفه لاتقسي ترى اذكرك
بعمايلك السوده خليني ساكته

ترك شعري بدفعه وكال غضب الله عليج
لزگتي باليوم تذكريهه عشر مرات
رانيا.. حضنته من ركبته وبسته وكتله ماتضم عليه بعد?
ضرغام.. مااوعدج!!

رانيا.. تحجي صدك ؟
ضرغام.. امور دنيا كل التريد مساعده برسم الخدمه
رانيا.. جرب وشوف شسوي بيك
ضرغام.. شتسوين؟؟ وجرني من خصري

رانيا.. جرب واكلك؟؟
ضرغام.. هيج تسوين وصار يعزف على كل
خليه احساس بداخلي رغم ماهو تك ايد بس
متقن عمله على اتم وجه ومافززنه غير صوت ماما
تصيح اجه خطاركم...

ابتعد وهو يعدل بشعره نزل واني لبست طويل وحجاب
ونزلت وراه بوست البنات وسلمت على الكل والتهينه
بالهوسه فجر ضعفانه فرق حيل وكلساع اطلع الورقه
مال النظام ودكول بس اليوم ونشخط هاليوم..

حيل تونسنه باتوا يمنه كلهم البنات يمي
وسهرنه على السوالف وهم جوه يلعبون طاولي
السبع مايلعب انقهرت علي حيل احسه هو وعقيق
مثل الروح الوحده بس يسمع صوتهه يرفع راسه

اخذت ماما والجهال يمي وفرغتلهم الغرفه كتلهم
نامو بيهه حته ياخذ راحته وبس جراح وضرغام
ظلوا بالاستقبال...

عقيق..دخلت للغرفه فرشنه بالكاع مايندل واخاف
يضرب الحايط لازمه ايده وطبينه قفلت الباب
وكتله وحدنه هسه يله حبيبي بدل ارتاح

السبع.. لشوكت هيج ضجت من وضعي
عقيق.. ها جمره تذكر شكد عانيت اني يله صرت
زينه موانت دائما دكلي اصبري حته تضوكين
حلاوه صبرج

السبع.. الحمدلله تعاي دليني وين الفراش
عقيق.. هياتك واكف علي تعال حبيبي خلي
اسولفلك سالفه
السبع.. احنه مو بالبصره سوالفج مال البزونه
الفتحت موهسه

عقيق.. موسالفه كامله هيج نص سالوفه
السبع.. زين خلي اسولفلج السالفه العندي
وابدي منا وخله اصبعه وهو يتلمس شفتي نبدي
منا وننتهي هنا ...

عقيق... ضحكت بصوت صاح ولج عقيق
مو ابيتنه احنه دنگ باسني من شفايفي
واني بادلته بكامل احساسي ابتعد وهو يحضني
حيل ويكول كلشي بيج حلو وعذب وكل يوم
احس عبالك اليوم ضايكهن...

رانيا.. كعدت الصبح سويت ريوك صادف سبت كالو
انروح ضرغام ماقبل يكول لجراح اذا طلعت الباب
تعرف شسوي وجراح يضحك يكله كريم وبالكرم
معروف ...

ماخليناهم يرحون وكنالهم بس اليوم ظلوا السبع
كال نظل العصر اريد اروح للطبيب بلكي ترهم جاره لعيوني العصر حجزوا وحته ضرغام طلع وياهم
كعدنه نسوي كيك ومهوسين ودك تليفون ماما اسمعهه
تصيح يايمه سهاد اجيتي ؟!!

عفت البيدي ورحت وكفت يمهه تحجي ودموعهه تنزل
ودكلهه لا خوماتظلين بالشارع صح رانيا. زعلانه
عليج بس كلبهه حنين وهذيج دكلهه اريد اعتذر الهه
سدته منهه وماما تباوعلي بتوسل لاتخلين اختج
بالشارع ماردت اكسر بخاطرهه كتلهه يمنه خطار
وين اخليهه؟؟

ام رانيا.. بس هي وبناتهه بغرفتج لخاطري يمه
هي شكم يوم وراجعه
رانيا.. عمري ماكسرت بخاطر ماما بست راسهه
وكتلهه لاتبجين كلشي ولادموعج..

نص ساعه موهواي واندك الباب اختي الصار اسنين
ماشايفتهه متغيره جذريا لبس اخر موديل مطلعه شويه
من الشعر البنات وحده محجبه ووحده شعرهه لخصرهه
حيل حلوات وانيقات...

حضنتني وتبجي وتعتذر ولحظه شيطان ولج
انتي اختي الصغيره بس مدري شجاني
وكالعاده ذبت الصوج براس رجلهه وعبالهه اني
مااعرف سوايتهه..

كعدت بغرفه ماما هي وبناتهه والبنات وياي سوينه
عشه واجو من الطبيب كايلهم حاليا ماترهمله عمليه
بعد وقت اكثر يله انجازف صحت ضرغام على جهه
كتله على سهاد ماحجه كال لخاطر امج اسكتي ...

تعشينه وفجر وعقيق غسلن مواعين من كملنه
كعدنه بغرفه ماما انسولف بناتهه عينهن بالتليفون
وهي تسولف عن الغربه صار وقت النوم كمت فرشت
للكل وهن كتلهن تعالن فوك الي بالصاله الفوك والي بالغرفه لان استحي حيل من السبع وماانريد انحرجه

سهاد.. خلينه انسلم على زوجج
رانيا.. تعالي بالاستقبال طلعت هي وبناتهه وطبن
للاستقبال سلمن على ضرغام واجت ام جراح وامي
والبنات صارت كلهه الكعده بالنص ساعه يمهم وبعدين
كل واحد راح لمكانه...

من صعدنه ليفوك لبابه كالت بس اخذ ملابس لجراح
اخذتهن ونزلت واني رحت اغسل بالحمام الفوك واسمع
بنت اختي الجبيرهه اسمهه مروه تحاجي اختهه
دكلهه هذا الرشيق الي اسمه جراح حطيت علي علامه
ومن اليوم تنطلق مروه لهذا االاسمر الحلو....


يتبع......