❤️♨️♨️

... البارت الستون


‏بعد شتفيد الندامه
‏وبعد شيفيد الأسف
‏مادرينه الريح عالي لمن أهتز السعف
‏صدفه أجينه وصدفه رحنه
‏والعمر كلّه صدف
‏گطرة گطرة ومادرينه ينشف الماي ونشف .
.....

ام جراح.. هنا يمه ارتاح بالاستقبال حته اليجي
نكله ماله خلك عاد تخلص من هوسه الخطار
السبع.. وين عقيق؟؟ بيهه شي؟؟

ام جراح.. دكعد يايمه ارتاح وهسه نسولف مابيهه شي
السبع.. وينهه ام جراح صح ماعندي نظر بس گلبي
يبصر قبل عقلي..

ياسين.. يااخوي البت شويه تعارضت من سمعت
بيك واحسن الهه من البيت دخلناهه مستشفى
حته تظل كدام الطبيب

السبع.. شبي گلبهه؟؟ ووين هسه ؟؟ ماتدري انه
زين وطلعت؟
ياسين.. شويه كلبهه تعبان كال اثر صدمه
هسه بس تدري بيك طلعت ادكوم على حيلهه
بس انت انتبه على صحتك

السبع.. وينك ضرغام ؟؟
ضرغام.. يمك
السبع.. اخذني الهه بيا مستشفى
ضرغام.. تحجي صدك شوف هستوك طلعت وهاي الناس
مگلوبه فوك راسنه البنيه مابيهه شي موكل مره تتخربط

السبع.. ضرغام تاخذني لو اشوف واحد غيرك
ضرغام.. يابه كوم بس خل اجيب السياره بعيده

لبابه.. انشوفه طلع ويه ضرغام مرات الانسان يفقد نعمه
بس الله مايتركه يتخبط صح نظره انعدم بس دائما يكول
الله وهبني بصيره القلب بعد ماذهبت بصيرة العقل
يعني طريقه المشي مالته وكانما حافظ الطريق ...

خاله ام رانيا سولفت النه دكول جنت كاعده اباب الانعاش وانتبهت دخل الطبيب وطلع كال تعالي شوفيهه هاي البنيهمامبين عليهه عمرهه 21 صايره جنهه حمصايه حته مامبينه بالفراش من كدما ضعفت بهاي الفتره..

كعدت يمهه بستهه من خدهه الحمدلله على سلامتج
بنيتي جاوبتني وهي كوه تفتح عينهه خاله جمره
وين ؟؟ ماعرفت شگلهه ادري بي طلع بس ماكدرت
اكلهه ترى مايشوفج بعد كتلهه زين وطلع للبيت

تعبانه حيل ماتكدر تحجي الحرف الواحد يتعبهه
الطبيب كال بقت هي واصرارهه وقوتهه واهم شي
حالتهه النفسيه اقل حزن راح تفقدوهه لان العلاجات
الماخذتهه مدمرتهه حته مناعتهه قليله ..

ظليت احلفلهه والله السبع طلع وهواي ناس يمهم
بس من كدما تعبانه كلساع وغفت وهذا صدرهه
يصعد وينزل حيل تنفسهه موطبيعي مثل الواحد
المختنك ...

بجنطتي قران صغير طلعته وكمت اقره يم راسهه
هاي يتيمه ومالهه احد ومن كدما تحب رجلهه
حته مااتحملت توكف على رجليهه ...

انفتح الباب واشوف ضرغام ومخليه ايده على
كتف السبع ويكله فوت هنا امشي ماكو شي
كدامك

لا ارادي بجيت ياربي هذا السبع الهيبه والله
اكول لرانيا من يمشي يهز الكاع من صلابته هيج
ركيك ويمشي يتلمس خاف ينصدم

كعد على الكرسي يمهه سلمت علي رد عليه
واشرلي ضرغام براسه نطلع وعفتهم وحدهم
بس اني مره غريبه بس كلبي نار واشتعل ولو بيدي
وعندي سلطه احرگ جبار ومايشفه كلبي...

عقيق.. ماجنت احس بشي بهذيج الفتره النمت
بيهه بالمستشفى مجرد نفس يصعد وينزل الاوقات
الي افتح عيني بيهه وانتبه اتذكر السبع ماادري
عاش لومات بس ابجي اتخربط ويجون يضربوني ابر

احس كلبي مثل المكينه البدت تشحط بنفسهه
وكلساع توكف ويشحنوهه ادري بنفسي مريضه
وهالمره مومثل قبل بس لا اكدر اتحرك ولا اكدر حته احجي

من كالت خاله ام رانيا السبع طلع مافرحت معناتهه
بي شي ابد ماراودني احساس الفرح بالعكس اجتني
نغزه قويه خلتني على اثرهه استسلم للنوم بس حته
اهدء...

بين النايمه وبين الغافيه اسمع صوته بالاول عبالي
حلم لان طول مااني نايمه بالمستشفى اسمع صوته
بأذاني وهو يكول مااعوفج صيري قويه..

اسمعه بوضوح تام وكأنو بس اني وياه بهذا الكون
صوته نسمه دافيه يدحرج على كل خلايا عقليه
ونزول لگلبي وتستقر ..

ماالتقت عيونه بس التقت قلوبنه قبل كلشي
صوته مااسمعه بأذاني جنت اسمعه من بين
طيات گلبي...

السبع.. عقيقي اشتاگيتلج حيل اشتاگيتلج
اريد اشوفج اريد عيونج الحلوه لاتنامين هاي النومه
احنه موگلنه انتي قويه احنه مو اخذنه وعد اثنينه
مانفترگ

ادري تسمعيني لان اني مثلج جنت اسمع كلشي
بس مااكدر احجي لان تعبان وهسه انتي تسمعيني
گلبج حاسه بيه عقيق لاتزعليني منج هاي الدنيا
كلهه ماترد عليه ساعه وحشه من دونج

عقيق... فتحت عيني واشوفه كدامي مرات شعور الفرح
هم يمرض شهگت بصوت عالي وصحت جمررره
انت عايش وكمت اخذ النفس بصعوبه ...

مااريد اتخربط مااريد يضربوني ابر اريد اشبع شوف
منك جمره كلهم لايضربوني ابره خليني الزمك جمره
انت زين كلبك مايوجعك وراسك زين؟؟

السبع.. على كيفج اهدي هاي اني يمج زين مابيه شي
واجيتج برجليه بس ماكالولي غير هسه
ليش هيج يابويه موكايلج باليوم الماتلگين اريدج
قويه بعدني مامتت وهيج وكعتي هالوكعه

عقيق.. كالو ميت وعماتك يلطمن ليل نهار
جمره كلبي يوجعني هسه بس فرحانه لان
شفتك الله عليك كول للطبيب يطلعني اني اصير
زينه بس اظل يمك

السبع.. اشششششش على كيفج هسه احجي ويه
الطبيب وتصيرين زينه واخذج بحضني

عقيق.. انتبهت علي لابس نظاره سوده معتمه
من هوستي مامنتبهه لزمت ايده كتله ليش لابس
نظاره شبيهه عيونك وشلون تشوفني من هاي؟؟

السبع.. مابيهن شي يوجعني اشوفج موهاي جنج
ورد بس ذبلانه شو شوفيني اسنونج وااضحكي
وخلي عيونج تختفي..

عقيق.. ابتسمت حيل عيوني صغار
من اضحك يروحن لزمت ايده اريد اكعد ماخلاني
كال احجي ويه طبيبج يله تكومين صاح ضرغام
ماكو صوت

تصرفاته غريبه ماكام ظل يهدي بيه ويطمني علي
بس ماباسني من راسي مثل كل مره وحركه راسه
مثل الواحد مايندل وجاي يركز على مصدر الصوت

شويه واجه ضرغام شفته شلون كومه ويكله
ديربالك الباب كدامك صحت جمره شبيهن
عيونك؟؟؟

التفت عليه وكال مابيهن شي من شافنج
صحن هسه اجيج احاجي الطبيب واجي...

من طلع ظليت صافنه علي خاله ام رانيا واكفه
كتلهه شبي جمره هو ابد مايلبس نظارات
وليش سود وشو ضرغام لازمه خاف عيونه بيهن شي؟؟

ام رانيا.. الطبيب كايله لازم تلبس حته ماتفقد نظرك
لان الضربه قويه وهن هذني حيل سود يخلن الواحد
مايشوف كلشي مابي طلع منهه سلامات

عقيق.. ظلت عيني على الباب اجت الممرضه قاست
النبض كالت تحسين نفسج متخربطه هزيتلهه راسي
اااي كلبي يوجعني والنفس ماجاي يكمل عندي
كالت اشوف الطبيب واجي...

جنت متأمله اطلع وياه بس من رجعوا كال تصيرين زينه يله اطلعين اتحملي هاليومين لخاطري
اني اتحمل بس حالته ابد ماعجبتني ضرغام يدلي
بالطريق ومن راد يطلع راد يلزم ايدي مااندلهه لزم رجلي...

جنت اقتنع بأي كلام ينكال الي
وصدكت كلام ام رانيا
وماادري سبعي فقد نظره بالكامل ...

رانيا.. هوسه متنه من التعب الخطار خلاني مانندل
دربنه وجبه تروح ووجبه تجي السبع اخذوا لعقيق
ورجعوا ابيته وياسين مايخلي واحد يشوفه اله
المقربين حيل...

غسلنه مواعين الغده واجت وجبه زلم كلهه لابسه
عگل صاحوا جايات جايات لبابه لازمه الطباخ
واني على النسوان هلكد عدهم كرايب كل سياره تجي
تنزل منهه زلم ونسوان ويحجن بالمقتل قال وقيل...

اخذت صينيه الجاي قدمتهه نسوان مااعرفهن
بس عمة السبع ام جاسم دكلهن هاي مرت ضرغام
وتبدي الاسئله ...

رجعت للمطبخ لكيت ضرغام يشرب مي
كال امشي وياي عفت البيدي وطلعت من الممر
وره البيت وطبيت لبيتنه لگيته كاعد بالصاله وماد رجليه
على الطبله..

كعدت بصفه وكتله تعبان
ضرغام.. حيل رجليه مااحس بيهن وجتفي احسه مخلوع
رانيا.. ليش شبي؟
ضرغام.. جراح الاثول من طلعنه من المستشفى ضربني
بالباب مايدري وهسه يسعر بگلبي

رانيا.. كوم افركه الك ومدد شويه واسبح ترتاح
ضرغام.. انتي تشوفين هيج
رانيا.. تعبت شوف وجهك شلون صاير واللحيه عاليه
ضرغام.. موهين الصار

رانيا.. كوم ضرغام خلي افركه الك حته ترتاح
ضرغام.. يله كومي جهالج وين؟
رانيا.. يم فجر كتلهه عينج عليهم

نام على الجربايه وجبت دهن وكمت افرك بجتفه
ونسولف على الصار كال طالبيني بالدوام ولازم
اروح وبالي كله هنا

رانيا.. جراح بمكانك
ضرغام.. جراح دوام من باجر يبدي هو ضابط الاحوال
الجنسيه وشغله ينراد التزام
رانيا.. ارتاحيت تحسه صار زين
ضرغام.. عاشت ايدج خلي اكوم اسبح واطلع

رانيا.. حضرتله الملابس ورحت للبيت الجبير ظلينه
يومين واكفين على رجلينه ولان سالفه قتل والعم
كتل ابن اخو صارت سالفه بحلوك الناس

الصبح راحت ام جراح وضرغام جابوا عقيق
طلعوهه من المستشفى جان يمنه خطار
زلم والسبع يمهم ذبوهه براسي كالو انتي احجيلهه
اخذتهه ورحت لبيتهه...

اول شي ساعدتهه دخلت للحمام سبحت وطلعت
وهي تسولفلي عن السبع ودكلي اني اريد اصير
زينه حته اساعده لان شفته ضايج مو مثل قبل..

كعدت ضفرت شعرهه سويتلهه هنديه ولزمت ايدهه
وكعدت كدامهه كتلهه عقيق انتي مؤمنه بالله
والله يحبج هواي وشفتي شلون رزقج السبع
ودراستج يعني الدليل الله يحبج

عقيق ادري بيج مريضه وكلبج موالقديم
بس انتي لازم تتحملين وتصيرين بعد اقوى
السبع داير مدايره وحوش ولازم توكفين وياه
مابيدج شي بس راحته يمج يبتعد عن الناس كلهه ويجيج

عقيق.. بلعت ريگي بقلق السبع بي شي؟؟
رانيا.. الضربه قويه حيل واحمدي الله طلع منهه
ويمشي على طوله بس فقد بصره وصار كفيف

عقيق.. شنوووو السبع بعد مايشوف
يعني من اجاني للمستشفى هومايشوف
لعد شلون كال شفت ضحكتج وعيونج راحت

رانيا.. شافج بگلبه تدرين بي شكد يحبج
اذا شافج متأثره ومريضه وكلبج يوجعج هسه
يتخربط الطبيب كال حته دماغه متضرر وموزين علي

عقيق.. اريد اسكت عيوني مااكدر دموعي
نار وتلهب بخدي السبع مايشوف الله عليج
رانيا لادكولين هيج السبع مايشوف شلون يشتغل
شلون هيج يصير ضرير

رانيا..انفعلت حيل اريد اهديهه مااكدر كامت تعيط بصوت عالي وتبجي خرب حظي لاتتخربط بيدي
كوه سكتتهه واكلهه بس يشوفج هسه يتخربط

عقيق القوه ياخذهه منج ولج هسه تروحين تحضني
ولاتحسسي انتي ماراح تعوفي وتظلين ساندته
ترى موهينه علي هاي الحاله

عقيق..تعبت حيل الهي تعبت كلما افرح اسبوع
نحزن شهر كلشي ولا السبع روحي تفرفح
اذا صابه مكروه شلون راح يظل يمارس حياته
طبيعيه وهو ابد مايشوف...

اجت عيني على القران على الميز كمت توضيت
وكمت اقره كل كلمه اكولهه اشهك احس
كاعده كدام ربي واطلب منه هو يسمعني
وادعي يرجع السبع مثل قبل...

وكعت دمعتي واني امسحهه بحجابي دنگت
واشوف دمعتي واكعه على الورقه وعلى كلمه
الله شهگت شهكه جبيره الهي انت السند..

عافتني رانيا وطلعت واني كلساع اروح اباوع من الشباك
وارجع شوكت يجي للبيت يمهم خطار هواي
كلبي ماجاي يساعدني بس اضغط على نفسي
مستعده انطي عمري وسعادتي بس اشوفه مرتاح

فوك الساعه تقريبا واني وحدي سمعت الباب انفتح
وصوت ضرغام وياه وهو يكله من احتاجك اصيحك
عقيق هنا خلي اشوفهه...

وكفت اباب الغرفه وهو بالمطبخ طلع ضرغام واشوفه شلون يتلمس الحايط يمشي وماد ايده خاف ينصدم
بشي ركضت من الغرفه للمطبخ وهو يمشي حضنته حيل

اديه حاوطت ظهره واني اريد اضمه بنص كلبي
حضني اكثر ورفعني اكثر وهو يتنفس
وكأنو يشم بورد وعاجبه عطرهه...

ابتعدت عنه وخليت اديه على خدي جمره
حبيبي الحمدلله على سلامتك
السبع.. الله يسلمج شلونه كلبج يگلبي؟؟

عقيق.. من شافك صار زين تعال وياي خليني
احضنك حيل لزمت ايده ومشينه للغرفه
كعد على الجربايه وسحب ايدي كعدني على رجله

السبع.. ليش تبجين؟
عقيق.. مامصدكه رجعتلي
السبع.. تدرين بيه مااشوف بس جاي اشوفج بكلبي
عقيق.. ازمه وتعدي اهم شي رجعتلي سالم
انطيك عيوني اثنينهن

السبع.. تعالي خلي امدد تعبان من الكعده والهوسه
عقيق.. مددنه على الجربايه عندي الم كلساع ينغزني
كلبي بس هيج حالتي مخبوصه واريد بكل الطريق
اشيل الهم عنه

السبع.. شو خليني احس بگليبج شلونه وخله ايده
على كلبي وفركه بحركه دائريه مثل كل مره
وباسني من فكي

عقيق.. التفتت علي صرت بوجهه واتلمس لحيته
كتله اني زينه توعدني هسه ماتضوج وماتنقهر
عيونك ترجع وتاخذ حقك بس هسه توعدني
ابد ماتضوج انت مودكول مااريد اذيج واذا شفتك
ضايج كلبي يكوم يوجعني

السبع.. ماضايج كل شي يجي من رب العالمين
وراه خير صح يصيبنه اليأس بالبدايه وصح نحزن
بس اكو خير وراه الله مايأذي عبده صدكي ياعقيق
ماضايج لان كل واحد بينه بهاي الدنيا محمل ذنوب
والله من يصيب العبد بالمرض وبالبلاء وبالدين
هذا تكفير عن ذنوبه

انه مؤمن بكلشي يجي من الله خير صح راح اواجه صعوبه حته اكدر اتكييف ويه الوضع وشغلي
وانه حامل مسوؤليه يتامى بس لازم من ياخذ شي
ينطي اضعافه خير

الي اريده منج انتي تصيرين قويه مااريد اقل
موقف توكعين وبالانعاش احنه شتفقنه
مولازم تكملين دراسه وتصيرين مدرسه
اذا ظليتي بهالضعف ماتكملين

عقيق.. لااا اوعدك اصير قويه وسباعيه
انت السبع واني سباعيه

السبع.. فدوه لهالحلك شويه خلي اصير زين
ويهدء الوضع واخذج للطبيب
عقيق.. جمره احبك حيل
السبع.. موبگدي ياعقيق صرتي بين عيوني
من وكعت

عقيق.. جمره احبك
السبع.. احبج حيل
عقيق.. تنام بحضني شويه
السبع.. عندي صداع قوي
عقيق.. نام واني افركلك راسك واغفه شويه

نزعته النظاره وبسته من عيونه وكمت افرك
بگصته واقره ايات على راسه هدء
نفسه وغفه ماكمت من يمه ابد ظليت كاعده
يم راسه واني مامصدكه اشوفه كدامي..

لبابه.. جراح اكعد صار المغرب
جراح.. عوفيني نايم تعبان
لبابه.. خالك هنا دكول عمه خلي ينزل
جراح.. شوكت اجه
لبابه.. صارلهم ساعه ومبينين يباتون هنا

جراح.. شكد شايف ناس بلا كرامه بس مثل نوال
وامهه ماكو موطردتهن ذاك اليوم شعدهن جايات

لبابه.. هي الصوج مو بيهه بابوهه اليوميه
جايبهه مايكول رجال اتزوج شكو بنتي مكابلته
جراح.. حضريلي ملابسي راح اسبح وانزل

لبابه.. جراح ديربالك تحاجيهه
جراح.. امشي حضريلي الملابس صايره تخوفين
لبابه.. لا بس اتخبل منهه هي وامهه

ابتسم وراح للحمام بدل واني واكفه يمه
كمل ونزلنه سوه صارت كدامنه نوال
بس كال السلام عليكم وطلع هم جانت اكو نسوان
غريبه كاعده...

رحت اسوي عشه طبت ابرار جايه من الدوام
ابرار بعدلهه اسبوع وتسافر دائما تجي
تعبانه تصعد تنام يمكن حته اذا سافرت مانحس
بفرق لان دومهه ماموجوده...

السبع وعقيق مااجو احنه اخذنالهم عشه
حته من يجي خطار مايدزون علي يكولون
خلو يرتاح مدام عقيق يمه هو. زين...

خلص اليوم بوسط تعب لبست تراك خفيف
ومددت اجه جراح مدد بصفي عينه
بالسگف التفتت علي كتله بيك شي؟؟

جراح.. بعد ورانه مشوار طويل وصعب
جبار بالسجن واليوم ابو علاء دز خبر كال الاسبوع
الجاي يكعدون كل الشيوخ ويمكن راح ينطون الشيخه
للسبع والسبع كال مااريدهه اعتقد راح تصير لياسين

لبابه.. واخبار القصر؟
جراح.. عاصم اجه اليوم وبس شاف السبع بجه
وحضنه بس هذا بيهم شريف والبقيه ماشفناهم
عباس طلع كلشي مابي تصوب برجله وزين

مالهم عين ابد لايكعدون بمضيف ولا يكدرون
يحجون بعد جبار انفعل من سمع بالفلوس والشيخه
وخسر الاول والتالي كلهه صارت ضده
وحته اذا طلع من دولتنه الفاشله هم بعد ماله عين
القصر يصير گبر عليهم

لبابه.. اخذت نفس وكتله جراح هاي الدزتلك رساله
هم حاجتك بعد
جراح.. اااي
لبابه.. شنووو وفوكاهه دكول اي؟؟

جراح.. چاات اجذب عليج
لبابه.. شوكت حاجتك
جراح.. وره ماتعاركنه اجت على المعامله وكتلهه منين اخذتي رقمي دكول كرايبي شرطي يمك وماخذته
وظلت ادز رسائل ورزلتهه وبعد مادزت

لبابه.. وهي شنو ماعدهه رجال
جراح.. رجلهه بالسجن وهي تسرح وتمرح
لبابه.. ادنيت علي ضمني بحضنه وباسني
وظلينه انسولف شويه وغفينه من التعب...

فجر.. رحت لدورات التقويه مال الرياضيات انطانه
الاوراق جنت راسبه ماخذه 34 من نطلع من المدرس
نفوت من يم عياده الاطباء يوميه افوت من يم عياده
اواب

جنت حيل مقهوره كارهه السادس بشكل موطبيعي
من وره الرياضيات صدفه جان واكف بباب العماره
يحجي ويه واحد من شافني ظلت عينه عليه لحدماابتعدت...

رجعت تعبانه حيل بسرعه بدلت ونمت بالحلم
شفت نفسي واكفه على تل عالي والناس واكفه
جواي من بين هاي الناس شفت جبار شكله يخوف
ومن يمد ايده مثل اليشمر عليه نار. ..

فزيت مرعوبه واني استغفر بسرعه كمت دفعت
صدقه عن الحلم لان تفسيره موزين

لبابه.. ثاني يوم اجو كرايبهم من الكوت نسوان وزلم
والتهيت بالخطار مدري شلون اجت عيني
على النسوان افتقدت نوال ماموجوده دورتهه بالغرف الجوه مالكيتهه

سمعت صوت سيوفي وهو يكول اجه عمو جراح
من زمان ذبيت البيدي وصعدت اركض كلبي يدك
سريع والافكار تراكمت براسي شوكت اجه؟ وليش ماشفته ونوال هسه هنا جانت وين راحت صعدت
والكه باب الصاله مقفول ومااكدر افوت لغرفتي...


يتبع.....

#خبايا_الاقدار
❤️♨️♨️

... البارت الواحد والستون


تالي ما تالي شلگيته
سالفه بحلگ الشماته
ثاري مو بس أني حبني
وثاري هم غيري بحياته
وثاري كل ساعه حبيب
وماخذ الناس بحلاته.
.....

لبابه.. فتحت الباب مقفول اباوع من الدرج ليجوه
ماكو احد بس عماتي وامهه كاعده احنه مشتملنه
من نصعد اكو درجات صغار كدام الباب واي واحد
بينه يجي ينزع حذائه بره ويفوت للصاله اباوع هذا
حذاء جراح موجود وشحاطة نوال يعني هو جوه؟!!

دكيت الباب حيل ماكو رد واكيد ماراح يردون
شسوي ياربي افتر داير مداير الباب اعيط واجمع
الناس لو شنو اسوي التفتت شفت فجر كاعده على الدرج
نزلت اركض عليهه

لبابه.. فجر باب المشتمل مقفول يمكن نوال وجراح
جوه
فجر.. شيسوون
لبابه.. كومي ساعديني اريد افتح الباب ادك ومايفتحوا
وماعندي قفل جوه واخاف اكول لعمتي واتفشل كدام
الناس رجلهه يخونهه

فجر.. ياستاغ شبسع سويتي خاين وخغي من يمي
لبابه.. دفعتني وراحت للغرفه لبست عبايه عمتي
وطلعت من بره اكو زلم بالطرمه صعدت الدرج
الخارجي ولافه نفسهه زين مطلعه بس عينهه

انتبهت عليه رانيا كالت اوكفي لاتسوين هوسه
اذا مافتحوا الباب نصيح ضرغام راسي احسه راح
يوكع كدامي متاكده نوال فوك شفت حذاء جراح
وشحاطتهه...

اسمع صوت فجر وهي تصيح لبابه تعالي بسرعه
ركضت على الدرج لگيتهه فاتحه الباب
ولازمه الماسحه بيدهه ونوال محصوره بالزاويه

ادور على جراح وينه صحت بصوت وينه؟
فجر.. ماكو سدي الباب وساعديني خليني. افتغسهه
هالمشعوله هاي

لبابه.. قفلنه الباب مال المشتمل ونوال تغلط وتصيح
عوفني حقيرات كاعده ابيت عمتي ماكاعده ابيت
ابوجن

دفعتني فجر وضربتهه بالماسحه كامت تصيح
صوتهه اعتقدت يوصل ليجوه بس هوسه
ومحد يسمع وفجر ايد بيهه الماسحه وايد بيهه
سجينه مال لحم دكلهه اليوم اذبحج انتي ماتعرفيني

كامت تضرب بيهه وهاي تصيح اخر شي ذبت الماسحه
ونامت فوكاهه ادنگ عليهه اتعضهه وهاي كالبه الدنيا بالصياح
مايهونلي ابعد فجر انگلبت عليهه وحش مرعدتهه تمرعد

اسمع الباب يندك صوت عمتي وامهه يصيحن افتحن الباب
وفجر كاعده على رجليهه وتأشرلهه بالسيجنه تكلهه
يله عيطي حته اكطعج وصل وصل واشمرج للجلاب...

جريت فجر كومتهه واني مااعرف عليمن كتلتهه وجراح
وينه نوال تبجي وكامت فتحت الباب وذبت نفسهه على
امهه ودكلهه هذني ضربني لان نمت هنا جنت نعسانه

عمتي عبالهه اني هزت راسهه بعدم رضا لان حال نوال
فدمره الشعر منفوش ولازمه اماكن العض مال فجر
مسويتلهه اقراص بكل جسمهه حته بوجهه وغير ضربات الماسحه على رجليهه..

امهه كامت تحجي وعمتي نزلتهه ودكلهه احسبيهه عليه
ومبين ضاجت مني سديت الباب وراهه كتلهه
وين جراح؟؟

فجر.. والله خبصتيني بجغاح ماعندج ثقه بي شكو
عايشه وياه تضحكين على نفسج اجيتي وجهج اصفر
ترجفين

لبابه.. اني شفت حذائه بالباب وهو جاي وماادري
وقافلين المشتمل
فجر.. انجبي لبابه صح اكبغ مني بس عقلج تنكه
ماتفكغين بس تتبكبكين...

جغاح ماموجود ولگيتهه وحدهه تفتغ بغغفتكم وفاتحه
كنتوغكم غوحي شوفي ملابسكم حته ملابسج الداخليه
مطلعتهه ولگيت بيدهه تشيغت جغاح

لبابه.. ياحقيره صدك متستحي قفلت الباب وظلت
بكيفهه تعزل
فجر.. غميتهه امداج امداج هذا الي الله كدرج علي
بس حقيره ولج اكلتهه وماشفه كلبي

لبابه.. ولي فجر خلي ننزل شفتي عمه زعلت
فجر.. واذا زعلت خلي تلزم بنت اخوهه العايقه
تركض وره رجال متزوج دخل تحجي امهه حته اطلعهن
جلاليق

لبابه.. نزلنه جوه استلمني عماتي يرزلن بينه شلون
هيج مسويات بالبنيه وماتستحن ماعدجن حيه
حضوري

فجر.. لاعدنه عگاغب ( عقارب) تاغسات البيت
ام جاسم.. من كون خفه هالحلك

فجر.. انتي مغه جبيغه عيب هالحجي محد كالهه
تطاول على غرف غيرهه متستحي ناشره ملابس
اختي الداخليه ياغريب كون اديب بس منين يجيهه
الادب انطردت شكم مره وماتابت

ام جاسم.. خلي يجي جريح يشوف حجيج هالكبرج
والسانج بطول النعال
فجر.. والله اليدك الباب يلگه جواب واي واحد يتجاوز
علينه ويطاول ويخرب حياتنه العب بي لعب شدكولن
كولن عفت الاخلاق لبنات الشيوخ

نوفه.. لا اكومن اضربج على حلكج توليتنه بالحجي
نكلج عيب من المره واذا نامت بغرفه ابرار شنهي انتي
مالج رداد

فجر.. لا والله مالي رداد عايفه الرداد الكم من اجيتن
لسه صارلجن اسبوع تلطمن فوك راسنه وتحرضن بفلان
وعلان عبالجن ماسمعتجن وانت دكولن لعمتي ليش جراح
ماياخذ هاي الفقمه نوال

وهسه كمت تحجن بالعيب وروح بابا الغالي التطاول
على اختي تحسب الله ماخلقهه العبيهه لعب اطلعهه
سحل من هالبيت

وخلي اكلجن ياعماتي البيت بيتنه نطرد اليعجبنه
ونخلي اليعجبنه اي وحده مثل نوال وامثال هذيج
بنت الشيخ ايناس اسحلهه سحل والماعاجبهه كلامي
ذاك السبع وروحن كلله

ام جاسم.. من جنه نكول ادكين ادروب محد يصدك
والله على هالسانج اتجيبلنه مصيبه صلفه توكفين بنصنه
وتهدين ماتستحين واذا كلنه خلي يتزوجهه الزلمه اله الحگ
يتزوج 4 وخلي يكول ومن باجر نخطبله هسه هي عاد
اختج شلونهه حته خلفه ماخلفت

فجر.. هذاك ابنكم وخلي يسويهه احنه مانقبل القسمه
على اثنين وبعدين انتن شحامي حمامجن عبالجن
مامراقبتجن من اجيتن لسه تنگن براس عمتي ورحتن
خابرتنهه تجي وهااا انتي سمعتج دكليلهه مالج دخل نخلصهه الجن ونخلي يتزوجهه

نوفه.. سكتن عنهه هاي يرادلهه نعال على حلكهه
خلي يجي ياسين مو مسوؤل عنهه وانشوف شنهي
من تربيه

فجر.. اني تربيه ساهره الماطخت راس للمشمور بالسجن
واذكرجن شلون جنتن تخافن تحجن كدامهه بحرف
وهذا تهجمي مو لله لوماسمعتجن تتفقن واريد اشوف
وين توصلن

لزمتني ام اواب من اكتافي. واخذتني للغرفه
اني ماحجيت بكيفي صار اسبوع اسمعهن يخابرنهه
ويحجن على لبابه ومتحلفه بيهن مايستحن كل وحده
بعدهه شبر عن الگبر ويخبثن

ام اواب.. فجر بنتي ادري بيج عصبيه وماتحبين الغلط
بس موهيج هذني يظلن يحجن عليج وين مايكعدن

فجر.. خاله اختي فقيره وعينك عينك يدافعن عن وحده
تركض وره رجلهه وكلساع وكالن ماتخلف شبيهه
ماتخلف موصار عدهه اسقاط وهذيج نويله قافله الباب
والله اعلم شتسوي كون تشوفين الغرفه شمسويه
بيهه مطشره ملابس لبابه كلهه وادوس عليهن بالكاع

ام اواب.. تعاي يمي بالمطبخ واسكتي عنهن هسه
تولي لاهلهه مدام انكتلت
فجر..طلعت للمطبخ رانيا تسوي عشه لان اكو زلم
جايين خطار واسمع صوت عماتي يحجن عليه
كلساع اريد اهد عليهن وتلزمني رانيا..

التهيت اشتغل ويه رانيا ولبابه واشوف ام جاسم
ونوفه المنتوفه هذا لقبهه جنت دائما اكوله وماما تحجي
عليه دكول مره جبيره

طلعت بره وتشكي لشيخ ياسين واواب واكف
فشلني الله يفشلهن هسه يكولون هاي جلبه
مسعوره يوميه هاده على وحده رجعن طبن
وانهزت كرامتهن مسويات اقامه...

لبابه.. طلعت رقم جراح ودكيت علي مااتحمل
بعد لازم افتهم وين جان فجر دكول موبالبيت
لعد حذائه شيسوي بالباب وشمعنه ويه نوال؟؟

جاوبني كال هنا بالمضيف كتله تعال فوك اريدك
صعدت لغرفتي ماشلت اي شي عفتهه على هوستهه
ملابسي كلهه مطشره وتشيرته على الجربايه ملابسي
الداخليه وملابس النوم واصلات يم الباب كلت اله
يشوف بعينه اريد يشوفلي حل..

فتح الباب واني افتر بالغرفه وكف بالباب متفاجئ
يباوع للكاع ويباوعلي هز راسه شنو هاي لبابه
شصاير؟؟

لبابه.. وين جنت؟
جراح.. بالمضيف اكو ضباط جايين على ضرغام
لبابه.. وشوكت رجعت شو ماادري
جراح.. قبل ساعه تقريبا طبيت منا سألت امي عليج
كالت بغرفه امهه بدلت ونزلت للخطار ليش شصاير؟؟

لبابه.. جراح كول الحقيقه
جراح.. شبيج اكعد احلفلج كليلي هاي شنو الغرفه
من يمته انتي هيج تصرفين؟؟
لبابه.. مواني هاي بنت خالك الشريفه نوال

جراح.. ضيق عينه نوال شنووو؟؟ شصعدهه للغرفه
لبابه.. ماادري جنت جوه ومن شفتهه ماكو صعدت
ولكيت الباب مقفول وفجر صعدت من بره ولكتهه
هيج مسويه بالغرفه

جراح.. وانتي ليش ماقافله الغرفه
لبابه.. جاي تحاسبني ماتروح تحاسبهه شلون تدخل
غرفتي وهيج تسوي بملابسي
جراح.. انه اعلمهه هاي تمادت هواي هي وامهه

لبابه.. دنگت الم بالملابس دنگ لزمني وكال هلكد
عندج ملابس ومايوم لبستيلي واحد الله عليج
لبابه اني مااستاهل؟؟

لبابه.. موهيج بس اذا البس مصيري شنو وراهه
شتفقنه جراح مو شويه شويه ونتحسن
جراح.. لبابه انه مقدر وضعج بس انتي راجعي نفسج
يعني اذا لبستي وحده من هاي الملابس شراح يصير
ترى موكل حياتنه نوم نوم

لبابه.. سكتت ماكدرت احجي فعلا مالابسه من زواجي لهذا اليوم انام بصفه بالتراك لو دشداشه قصيره
بس سيت نوم واغراءات مااسويهه فعلا مقصره بهذا الشي

لميت الملابس وهو كعد على الجربايه شفته يهز برجله مثل السابق ضاج حيل كملت وخليت ايدي على ظهره
كتله جراح لاتضوج مني بس انت شفت المصايب وحده وره وحده

جراح.. عليمن اضوج لان ماتلبسين؟؟ انتي حره
مااجبرج بس من طبيعتي هيج مومعناتهه انه عديم
احساس ولا الي مشاعري الي احتاجهه ملاحظه علاقتنه
شنو حب دفين لا انتي تعبرين ولا انه

وادري بيج عبالج انه ويه نوال ويجوز سويتيني نايم
وياهه موجديده عليج تحكمين عليه من اول موقف
واكعدي ويه نفسج وشوفي شكم مره بمره حكمتي
عليه وطلع غلط

لبابه... انت خليتني هيج
جراح.. صح انه خليتج موخنتج مويوميه تلگيني
يم وحده ترى طكت روحي منج المقدمته شنو
هاهي من متحمله خبالي اني وياج هسه اخوه
لااكثر

خليني احجي وهذيج الساعه تعاي عاتبيني
اكو يوم اجيت من الدوام ولگيتج حالج حال النسوان
مكياج ولبس ؟؟ لا منيلج خلصتي عمرج مدثره
ولو انه احضنج بالليل لو ماتبادرين ابد

ابتليت تخبلت باول ليله بشر موصاحي مريض
ودريتي بيه عليمن متمسكه بيه عوفيني
مااستاهل عيشتنه شنو تمثيل هاحبيبي هاحبيبتي
شنو العلاقه البيناتنه

لبابه.. لاتصيح صوتك لحد يسمعه يعني شسوي
البسلك هيج حته تنغري وتأذيني والله حيرتني
وفوكاهه سويت نفسك انت المسكين

جراح.. انعل حظج لبابه كرهتيني بهاي السالفه
واتفلي بنص وجهي اذا طلبت منج بيوم
خليهه ابالج انه موحيوان مونومه وياج كشره
يوميه معيرتني بيهه...

لبابه.. فتح الباب ونزل كعدت على الجربايه
اني فاشله موبيدي لا اعرف افكر ولا اتصرف
قفلت الغرفه ونزلت بعدني على الدرج واسمع صياحه
بالغرفه

امه تسكت بيه دكله عيب وهو يكلهه اخوج ومرته
وبنته مااريدهم ويوجه كلامه لنوال اذا شفتج فوك
وعلي اردج لابوج

مللتيني مايوم اجيتي اذا ماسويتلج طلابه وراج
انتي امهه شتردن مني مسويات حزب انتن وعماتي
ماتستحن هسه من اطردجن موطلعني مااستحي
ومااعرف الاصول ...

لبابه.. هن سكتن وعمتي طلعته ودكله عيب من عماتك
جان عصبي حيل حته صيح على امه وهي تسكت بي
عصبيته موبس عليهن اني الشعلتهه مشكلته الاساسيه
وياي....

كعدت بالمطبخ وراسي مصدع اني ليش هيج
ضعيفه ودائما ماامشي بعقلي امشي بنصيحه
غيري زين باجر كبرت وصارت عندي بنات مولازم انصحهن لو اظل اسمع من غيري

رانيا.. شبيهه الحلوه
لبابه.. مابيه شي راسي يوجعني
رانيا..لاتنقهرين خلي تولي هاي من غيرتهه
لبابه.. خلي تولي لويستحن مااكلن الرزاله وبعدهن

رانيا.. عقيق ماكو وحته السبع ماطلع من بيته
لبابه.. خابرتهه فجر دكلهه نايمين خليهم احسن
من هوسه الخطار
رانيا.. اهم شي بخير شنريد منهم

عقيق..سبعي اكعد صار المغرب
السبع.. كاعد مانايم بس مغمض
عقيق.. شلون صار راسك
السبع.. عندي صداع عقيق تضارب عندي الاحداث قبل
شويه ردت اكعدج نسيت اسمج

عقيق.. شنووو شحدك تنساني اموتك والله
السبع.. موبيدي عقلي احسه متحرك موبمكانه
كلساع انسه شي وبصعوبه اتذكر

عقيق.. يله ميخالف من تنسه صيحلي هييي وليج
السبع.. بضحكه شلونه كلبج؟
عقيق.. زين مدام انت زين
السبع.. خلي اكوم اطلع اكيد اكو خطار

عقيق.. لا متطلع اوامري دكول متطلع خلي يولون الخطار شمستفادين منهم وانت تعبان تظل يمي
السبع.. تملين
عقيق.. نتراهن

السبع.. لا مانتراهن
عقيق.. لعد انت تمل
السبع.. بويه ماتسكتين واني مريض حته حيل ماعندي
عقيق.. جمره منطلع خلينه وحدنه واني اسوي عشه وانت تكعد يمي حباب كول ااي

السبع... فشله ياسين وحده شيكول ماصدك شافهه
عقيق.. خابره وكله تعبان
السبع.. بويه عيب لازم اطلع اسلم عليهم
عقيق.. يله اطلع بس تسلم وترجع نتعشه
هنا واني اسوي عشه

السبع.. شو تعاي ابوسج وينج
عقيق.. هياتني يمك وبسته من خده
السبع.. افييييش هم هياتني وهم بوسه من اروح
فدوه لهالحلك

عقيق.. كلت هياتني وعمتك دكول لاتتعقيلين علينه
كولي هنا فشلتني
السبع.. عقيق مشتاگ اشوفج شلون اصبر عمري
كله ومااشوفج تكبرين كدامي

عقيق.. انت مودكول الله يحبج والله مايرد دعوتي
واني راح اظل ادعي هواي يرجع نظرك بس انت
كول يالله ولاتضعف

السبع.. خلي اروح اغسل وابدل واطلع
وشويه واجي ظلي هنا لااطلعين ولاتسوين اكل
دسم مااكدر اكل

عقيق.. يمشي وحده بس اني بصفه كلبي يتكطع
من الداخل بس اكابر واسوي نفسي ممهتمه
بس اني جاي اموت الف موته

فتحتله المغسله غسل واني اساعده راح للغرفه
طلعتله دشداشه نزع التشيرت جنت اخجل اباوعله
هسه مايشوفني مااتحملت بسرعه حضنته
ضحك وكال ها ولج ملعونه صارت بكيفج اشبعي
شوف ومااشوف خدودج الحمر

عقيق.. اخجل مااباوع
السبع.. تقنعيني مابلحقتي عيونج هسه
عقيق.. بلحقت
السبع... هههههه شو وينج وخري راسج ترى مااشوف
لاتستحين

عقيق.. تعال اكعد اني البسك
السبع.. لا انه البس بس انطيني راسهه
وجيبيلي الفرجه امشط
عقيق.. لبس وكمل ومشط شعره من يريد يبوسني
يتلمس وجهي من يوصل اصبعه لحلگي كال اي هنااا
الراحه...

دكيتله على ضرغام حاجاه واجه اخذه واني
ظليت اسوي عشه سويت حلاوه شعريه اله
وطلعت تكه شويتهه بين مايجي كملت كلشي ورحت
صليت سمعت الباب انفتح وهو يصيح عقيق ..

كملت وكمت لگيته واكف بالمطبخ مايندل يمشي
ركضت علي لزمته من ايده كتله تاخرت يمهم
السبع.. تنهد وكال يسولفون وماكدرت اكوم
امشي وياي دايخ لاتعوفين ايدي

عقيق.. مشيته مامتوازنه كوه وصلته للتخم
كتله بيك شي؟؟
السبع.. اااي هسه من جنت يمهم يسولفون وفجأه
ضرب راسي كمت كلشي مااعرف وعبالك ابن اليوم

عقيق.. ميخالف جمره هذا تعب هسه من ترتاح
يروح وحتلو تفقد وترجع شنو يعني المهم تعرفني
السبع.. دخل اصلي وبعدين نحجي

عقيق.. توضه. وكام يصلي واني حضرت العشه جنت
شايله هم شلون ياكل ام جراح كالت هذني اليومين
مااكل بس يشرب سوائل لان ينحرج كدامهم

اجه كعد على الميز كتله احزر شمسويه عشه
السبع.. بخشمج هذا ترى صح مااشوف بس خشمي صاحي ويشتم موهاي ريحه التكه طاشه

عقيق.. جمره باوع هذا الماعون كدامك وهاي الخبزه
تاكلهن كلهن واذا مااكلت اعاقبك
السبع.. عقيق ادري تحاولين ماتحسسيني بس تعاملي وياي طبيعي شويه شويه اتعود

عقيق.. واني شمسويه هم طبيعي اني من اتمرض مو تعتني بيه وهسه واجبي اعتني بيك يله جمره تاكله
كله
السبع.. خاف تعاقبيني
عقيق.. اي اذا مااكلت اعاقبك
السبع.. نوعهه شنو؟؟
عقيق.. عود افكر

السبع.. شنو انه رأيج اعاقبج على اللسانج هذا
عقيق.. ميخالف قابله بس اكل يله برد
السبع.. اتفقنه خلي اكمل وانشوف عقوبه منو اضبط

عقيق.. كام ياكل اني مخليه كلشي كدامه ياكل
على كيفه من يريد مي اخلي الكلاص بيده من يدنه
عنه الماعون لوتخلص الخبزه بدون مايحس ابدلهه

لحدماكملنه سويتله جاي وغسلت مواعين وهو يمي
ظلينه انسولف هواي عن الصار والفتره الغاب
بيهه صوت بره خطار بس ماطلع شيخ ياسين
كالهم ماله خلك

رحنه لغرفتنه نومني بحضنه وكال هسه منو يبدي
اول واحد؟؟ ضحكت كتله اني استسلم جنت
اتشاقه وياك يله تصافينه

السبع.. لا بويه انه زلمه عند كلمتي وبدت جوله
رومانسيه ذبت بيهه مثل قطعه جليد
اثنينه موبس طرف واحد عشنه احساس عالي
رغم جروحنه ومرضنه بس گلوبنه متعانقه بقوه
ومانكدر نفصلهه

لبابه.. وره العشه راحت نوال وامهه وعماتي
كلهن اني صعدت لغرفتي مددت بفراشي اجه
هو اخذ ملابس وراح سبح واجه نام بسرعه
طفه الضوه ردت احجي بس كتله جراح
سكتني كال تعبان عوفيني

ظليت الليل كله كاعده صدك اني ليش
هيج حارمته حته من اللبسه ليش ماالبس
واتمكيج هو يشوف اشكال كدامه اذا تزوج
اظل الوم بروحي..

قررت من باجر ابدي صفحه جديده
بس كون ماتصير مشاكل واكدر
اكملهه على خير...

رانيا... ضرغام شوكت نرجع
ضرغام.. باجر التحق ومن اجي نرجع
رانيا.. اروح وياك
ضرغام.. لااا موخفر وين اخليج

رانيا.. شلون صار جتفك
ضرغام.. زين ايدج طيبته
رانيا.. شوف الجوه عيونك اسود ماشابع نوم
ضرغام.. تعبان رانيا العبيلي بشعري خلي اغفه
وعليج الله لاتحوصين توتريني

رانيا.. ضحكت وخله راسه بحضني ظليت
العب بشعره وافرك براسه لحدما غفه
تليفونه يدك مال رسائل بس ماكمت ولاشفته
هم جنت تعبانه ونمت...

ثاني يوم التحق كال يومين واجي
واني التهيت بالهوسه بس يخابرنه
يطمن علينه ويكول عندي شغل مثل كل مره

يومين واجه اخذت ملابسه غسلتهه
تليفونه على الميز وهو بالحمام يدك هواي
رحت شفته بي رمز بس على الشاشه مكتوب
ام فضل صحت ضرغام منو ام فضل
ماجاوبني والدكه خلصت

من طلع كتله منو هاي سكت شفته يگلب
بتليفونه وكال موظفه وياي وبدل وطلع
حته ماانطاني مجال اسأل ورغم هذا ماظلت ابالي
لان اعرف اكو وياه عناصر نسويه مااهتميت

بليل جنت كاعده كدام الميز امشط وحضني من وره
وباسني من وره اذني وكال راح اروح عندي شغل
طارىء هسه خابروني

التفتت علي مستغربه انت اليوم اجيت وشنو الشغل
بليل والطريق يخوف
ضرغام.. هنا بالبصره بالمركز ماكو شي لاتخافين
باجر ارجع

رانيا.. ضرغام شكووو
ضرغام.. ماكوشي
رانيا.. ديربالك على نفسك لاتسوي شي فكر
بينه عوف المجرمين

دنگ عليه باسني وحضني حيل واخذ مسدسه
وتليفونه وراح ماانكر خفت بس عبالي
تهديد وشي يخص شغله ثاني يوم
رجع بوجهه نام وعبالك الليل كله سهران نايم على
وجهه ومايدري حته بالهوسه

تليفونه جان مغلق عبالي طافي شحن
اخذته خليته على الشحن وفتحته ورحت
اشتغل سمعته يدك نفسهه ام فضل فتحت
خط اجاني صوت بنيه حيل ناعم ومبينه صغيره

كتلهه تفضلي كالت ضرغام وين؟؟ انصدمت
ضرغام وبدون ابو ليث كتلهه منو انتي؟؟
جاوبتني كوليله زوجتك ام فضل

رانيا.. ثقل ووكع على راسي واحد سحبني من اطراف
اصابيعي وشمرني من جسر عالي
حجر صلد ووكف ابلعومي مااكدر ابلع ريگي

عدت عليهه العفو شتحجين اني زوجته
منو حضرتج خاف متوهمه؟؟
... لاعيوني شنو متوهمه انتي رانيا واني هم زوجته
وقبلج متزوجني ليش مكايلج؟؟
كليله خلي يخابرني ضروري وعود بعدين تحاسبو


يتبع............

#خبايا_الاقدار
❤️♨️♨️

... البارت الثاني والستون




شفت من العمر عثرات
سموم وغيض والحسره
وحزن يعكوب والجمره
كلهن اهــــون اشويــه
بس كلبي خلص عمره
چنــــه امرايه متكسره
.....

رانيا.. منو انتي حته تحجين وياي بهالطريقه وشنو
زوجته ؟؟
ام فضل... عيوني اني ماجاي اتعارك وياج كتلج كعدي
ضروري شلون اظل اناقش بيج روحي سألي وهو يجاوبج
يله من رخصت عود خلي يخابرني

رانيا.. جنت واكفه يم الشاحنه بس سدته افترت بيه
الكاع ردت اوكع اني بحلم لو هاي حقيقه عندي صدمه
من كلمه خيانه من اي رجال يضحك ويستغل مرته
لزمت القنفه وكعدت لازمه راسي

بديت استرجع ذاكرتي معقوله من يروح للخفاره يروح
يمهه ؟؟ يعني اني نايمه. ورجليه بالشمس وضرغام
عنده وحده ثانيه؟؟ منين هاي من بغداد لوهنا بالبصره
والبارحه وين جان؟؟

اريد اسند نفسي واكوم اكعده حته يحجي مااكدر
المكان يفتر بيه كمت استغفر بكلبي واكول لا هاي
تريد تخرب وساعه اكول هو حته مايقبل بالغلط شلون
يطلع كل هذا تمثيل؟؟

لزمت الحايط وامشي ومخليه ايدي على راسي
كلبي مصدوم اكثر من عقلي مااعرف شحجي
اخاف حته اواجهه ويطلع صدك وهذيج الساعه
موبس اعوفه ماادري شسوي ..

فتحت باب الغرفه شفته كاعد وسيوفي يمه يلعب
وهو بيده اوراق يكتب بيهه اخذتني رجليه
بقلة حيله ووكفت فوك راسه وصحت سيوفي اطلع
بره العب ...

جان مندمج ويه الاوراق من طلع سيوفي حجيت
بنبره مكسوره ماانكر شلون جانت العبره خانگتني
واريد اسد اذاني مااسمع جوابه خاف يصدمني
حاولت اكون هادئه

رانيا.. ضرغام منو ام فضل
ضرغام.. رفع راسه والانزعاج بين على عيونه من
حركه حاجبه وكال شنو مناسبه السؤال

رانيا.. ضرغاااام منو ام فضل انت متزوج عليه
ضرغام.. ساد الصمت وهو يباوع بوجهي عاف الاوراق بصفه وكال كتلج شنو مناسبه السؤال

رانيا.. مناسبته زوجتك دكت تريدك ضروري
واني بحكم زوجتك الاولى او الثانيه ماادري
لازم استفسر

ضرغام.. كام وكف وضم شفايفه ورجع صك على اسنانه
وكال شكالتلج؟؟
رانيا.. مومهم شكالت المهم توضحلي منو هاي غايتهه
شنو لو غايتك شنو اني اسمعك احجيلي

ضرغام.. ماعنده جواب ظل ساكت
رانيا.. انت متزوجهه؟؟
ضرغام.. اااي ...

رانيا.. بيه صرخه تفزز النايم بگبره
وبيه حسره ودمعه مكبوته تبجي عدوي
والادهى من هذا شعور الذل الحسيت بي

يمكن مرات يگلولي تبالغين من موضوع الخيانه بس مستعده اتحمل مصائب الدنيا ولا اعيش يوم واحد ويه رجال خاين واستغفلني واني اقدم اهتمام وهو يم غيري يحجي نفس الكلام اليگوله..

جهالي يلعبون بالهول وامي يم فجر ماردت الجهال يشهدون على اليصير وباجر عگبه يتذكرون عفته بدون مااحجي طلعتهم ودزيتهم لفجر ورجعت بين كل خطوه اخطيهه اريد اوكع على وجهي..

قفلت الابواب ووكفت كدامه جان بالهول وكتله من شوكت؟؟
ضرغام.. رانيااا اهدي وتعالي افهمج لاتتخربطين صار وجهج اصفر بس اهدي ومد ايده يريد يلزمني

رانيا.. ابتعدت حيل بنفور وصحت احجي ضرغام
من يمته وليش استغفلتني؟؟
ضرغام.. قبل 5 سنين قبل لا اتعرف عليج

رانيا.. لو بلحظتهه ضاربيني طلقه ولا اسمع كلامه
شكد حاولت اكون هادئه وافتهم وابرر بداخلي مثل
ماجنت ابرر لوسام بس من كال قبل 5 سنين بركان وانفجر

كمت اعيط بصوت عالي 5 سنين ولك 5 اسنين ياظالم
ياماعندك مخافه الله ولك ماكلت هاي الانسانه مكسوره
وملجوم گلبهه من الخيانه تجي تكمل عليه انت

ضرغام.. رانياا اهدي خلي افهمج بس اهدي على كيفج
رانيا.. منين مايريد يلزمني ادفعه حيل عيوني
تتسابق قبل الحروف ماتطلع من اللساني

شتفهمني شتريد دكول بغض النظر عن اي سبب تبقه
خيانه تبقه استغلال حرام عليك والله حرام اني مظلومه
وانت اجيت كملتهه عليه شنو سويته الك منو دز عليك
اتبيع حب براسي

انت ماحبيتني جذب انت شفتني صعبه عليك
وراهنت نفسك تاخذني انت اخذتني لان اشبه
مرتك ونفس اسمهه جذاب انت الله يلعنك

ضرغام... كااافي كتلج افتهمي وبعدين مسلتي
اي متزوج وقبل 5 اسنين وعلى ذمتي بس عقد
شيخ وماكو داعي احجيلج لان اساسا الموضوع مومهم
ومن اتزوجتج ناوي انهيي بس الظروف حكمت

رانيا.. مسحت دموعي ياظروف حكمت ليش ماكتلي
بلحظتهه شنو خايف لو زياده الخير خيرين اسبوع
يم رانيا الغبيه واسبوع يم هاي وعندك ولد منهه بعد
وانت تجذب ودكول موظفه وياي

ضرغام.. انجبي عاد ولد شنو اكعدي خلي افهمج
مامسوي جريمه وسواء دريتي هسه او بعدين
ماراح تغيرين شي وحتلو مسولفلج بلحظتهه
هم ماراح تجبريني على اي شي ...

رانيا..مااريد اسمع منك لأي سبب كان مااتقبلك
مااقبل برجال ماعنده ذرة احترام لمشاعر مرته التشاركه
حياته وعادي عنده يتزوج ويطلك وهي مغفله
انت كلت عليه ثوله وصدك ثوله اني لان تعرفت على واحد مثلك ماتبت وماصارتلي عبره قبلك وسام شنو السواه هم نفس سوايتك

ضرغام.. لاتظلين تلغين افتهمي واحجي صح ماحجيتلج
لان موشي مومهم وكتلج ناوي انهي هاي السالفه
لو عندي زوجه وطفل مااتزوجتج واني مومن هذا النوع
تدرين بيه

رانيا.. لا والله مادريت يانوع شوكلي عذرك شنو
ضرغام.. مااحجي اذا ماتهدئين وتكعدين
رانيا.. غمضت عيوني واخذت نفس دموعي تجري
بس لازم افتهم السالفه كعدت كتله احجي

ضرغام.. اول شي ماعندي طفل ولاهي عدهه طفل
وهذا اسم فضل هي يصيحولهه هيج ماادري لقب
وصح اني متزوجهه وعلى ذمتي هي ومن اهل البصره
وهنا ساكنه بالمركز

اتزوجتهه قبل 5 سنوات هي صديقه المرحومه ام ليث
وصديقتهه المقربه تذكرين حاجيلج عن تعارفنه شلون
صار بوقتهه هي هاي جابت ام ليث واجت طلبت مني
المساعده علمود الصور مالتهه وظلن اثنينهن اعرفهن
حبيت واتزوجت وهي صديقه رانيا وتحبهه حيل

وره وفاه عائلتي تقريبا ب3 سنوات خابرتني تطلب
المساعده بس هي وابوهه وعدهه اخ صغير عايشين
سوه ابوهه رجال جبير ومشلول واخوهه هم مريض
عدهم وراثه بمرض الصرع وشويه عقله موتمام حته عنده تلكأ بالكلام وبوقتهه خابرتني كالت
ساعدني لان عمامهه رادو يودون ابوهه لدار العجزه
واخوهه يودو لمستشفى الامراض العقليه وهي يتزوجهه
ابن عمهه متزوج وعنده حته جناين

اني مابيدي شي ساعدتهه بشغله وحده كتلهه تعالي
اشتكي عليهم واني اخلي واحد من الضباط يساعدوج
لان هي وابوهه كاعدين ابيت جدهم بيت ورثه
وعمامهه باعوا لبيت ومحد قبل يكعدهم يمه واعتمدوا على حل يزوجوهه وابوهه رجال جبير يوميه يموت موته..

المهم هذا مو موضوعنه ساعدتهه بلي اكدر علي وموبس هي اساعدهه تدرين بيه هواي ساعدت الله منعم عليه
بخير وكله بثواب عائلتي اخذتلهه شهر وخابرتني
تبجي كالت مافادت الشكوه بيهم اني حبسوني
وابوي اخذوا مني واخوهه هي مربيته عمره 10 سنوات
مودي للمستشفى مال الامراض النفسيه

كتلهه اني راح اروح والتقي بابوج واخلي هو يشتكي
حتلو انشوف محامي زين بحكم وضع ابوج والتقيت بابوهه شوفي رانيا صح اني يتيم بس ابوهه بمنظر
العدو ماتتمنى رجال جبير لحيته بيضه وفارشيله
بالكاع وشته بارده ومشلول عود يحنون علي ويجون
يگوموا اذا احتاج شي

اول ماكعدت يمه رفض يشتكي كال يأذون بنتي
لان عدهم عداوه سابقه من جان بحيله وماادري
رايدين بنته ومامنطيهه ظاله الگلوب محمله حقد
ماجان اكو حل وطبعا هذا الطلب من ابوهه كال
بس اخطبهه حته نكول هو وفرلنه مكان واني اخلي
بنتي تشتغل يعني لا حمايه ولاشي ناس ماعدهم مكان يكعدون بي ...

طبعا بوقتهه رفضت لان وضعي مايسمح واجيت
وحجيت للسبع كال مابيهه شي سويهه لله وفرلهم سكن واني اساعدك حته بالسكن لان السبع يبني بيوت للناس الماعدهم صدقه بثواب ابو وكال اني ابنيلهم

جنت فارغ ماعندي شي سويت عمل انساني
مواكثر رحت اني والسبع وهذا المصخم جراح
واكو ضباط وياي وخطبناهه من عمهه وماقبل
وكتله ابوهه انطاهه وبحجي ومنا ومنا ووصلت نشتكي
علي وبالاخير وافق...

اجرت بيت وكعدوا ووراهه السبع اشترالهم ارض زراعيه
وبناهه الهم مشتمل صغير وظل بس المصرف عليه
حاولت تشتغل هي بس مالگت وظلت هي وابوهه
واخوهه واني جنت امر عليهم بالاسبوع مره حته لايشكون عمامهه بس على ورق...

وره سنه مات اخوهه الصغير وظلت هي وابوهه
زاد الطين بله كلما اريد اخطي خطوه واطلگ ماترهم
لان هي اعتكفت عن الزواج وتعتبر مرتي اكو واحد
يروح يدورلهه رجل ...

ومن اتعرفت عليج مات ابوهه وظلت وحدهه
اذا اطلكهه ترجع لابن عمهه واني احجي الصراحه
ماتهمني ردت اطلكهه بس حارت شسوت حته انتحرت
شربت سم يوميه سالفه جديده تصيح اظل بالبيت
ولا اطلكني حته لايتزوجني ابن عمي...

ومن اتزوجنه اني وياج رحت وحاجيتهه وجنت مصمم
بقراري وخابرتني جارتهه اسبوع بالمستشفى منتحره
وذمتهه برگبتك وهسه هاي كدامج اطلكهه
ابقيهه ماخاينج اني ..

رانيا.. ليش ماحجيتلي
ضرغام.. كتلج مومهم وبالمناسبه السبع وجراح
عبالهم مطلك لان بوقتهه رحت واتفقت على الطلاك
ومن انتحرت رجعت وهم مايدرون

رانيا.. لان تدري نفسك على غلط
ضرغام.. اي على غلط واساسا المفروض مااسوي
عمل انساني زين لاتسوي شر مايجيك

رانيا.. اسألك سؤال واحد وجاوبني علي
متمم زواجك بيهه؟؟ متقربلهه؟؟
ضرغام.. ااااي

رانيا.. سجينه ونبتت بگلبي وواحد يحركهه
بهدوء!!! ظليت فاتحه عيني مصدومه
مثل اخرس ووكع على جرحه ملح ...

ضرغام.. لاتنصدمين كل هذا قبلج مالج حق تحاسبيني
علي تممت زواجي وتقربتلهه حته قبل لا اتعرف عليج

رانيا.. ماكدرت احجي بس كتله ليش ؟؟
ضرغام.. ماادري بيوم منهن جنت محتاج مره
بحياتي ورحت اشوفهم والصار الصار بس مره
وحده

رانيا.. كمت من يمه وطبيت للغرفه يصيح وراي
رانيا بس ماالتفتت سديت الباب وكعدت ارتجيت على الحايط اطلقت العنان لدموعي احس عيوني
تريد توكع من محاجرهه

مو جرح واحد جرح وسام انعاد من جديد
اتذكرت ذاك الموقف من شفت الخيانه على فراشي
ومن حاجيته نفس التبريرات وهسه عادهه الجنت
اكول علي سند

بغض النظر عن كلشي حتلو موبقصد وحتلو مايحبهه
وحتلو مساعده انسانيه بس مجرد ما اتذكر اكو وحده
على ذمته غيري ومتقربلهه وفوكاهه بعدهه بنيه
وصغيره روحي تطلع...

بجيت هواي ملخت نفسي مثل الوكعله بحفره
ويريد بصيص ضوه مستحيل اتقبل هذا الموضوع
حيل يأثر بيه حتلو كدامي لوحاجيلي ميخالف بس ليش
استغفلني ليش مايحجيلي والبارحه جان يمهه

فتحت الباب ورحت اركض لگيته كاعد يدخن
وكفت كدامه وصحت بصوت عالي البارحه جنت
يمهه مو؟؟ احجي ضرغام جنت يمهه؟؟

ضرغام.. لاااا البارحه والله يم ضابط عدنه شغل
ومارايحلهه صار هواي وحته اذا اروح ساعه وارجع
على كد شمحتاجه

رانيا..وشعدهه ادك عليك ودكلي بصلافه اني زوجته
وقبلج وعود بعدين حاسبي يعني لهدرجه مترهيه
زين ماتخاف منك انت مامحذرهه تكشف العلاقه
لو متگدرلهه وبعدين سالفه فضل تقنعني ماكو طفل

ضرغام.. كتلج ماكو شبيه خبل اخلف بالسر
رانيا كتلج هذا قبلج جاي تحاسبيني هسه
ماكو حل اكعدي واسكتي

رانيا.. يعني ماعندك حل مو؟؟ ماناوي اطلكهه
ضرغام.. لاناوي اجيبهه تتعرفين عليهه
تمشين من وجهي لا اكوم ابتلي بيج صار ساعه
شلغي اكلج اريد انهي كلشي بس لازم بهدوء
ماراح يسالون عمامهه شنو سبب طلاكهه لو اكلهم
جنت على ورق

رانيا.. اسمع ضرغام خاف شفت وجهي الحنون
الانثر البريئه بعدك ماشفت شي وحق الله وروح
بابا اخليك بالاحلام ماتشوفني اذا مانهيت هاي المهزله
راح اسكت وراح انطيك العذر لان صاير قبلي هالشي
وبحجه الانسانيه الله يسلمك بس عدكم الانسانيه مشتغله انتو الضباط كل التطلب منكم مساعده
تزوجوهه

اليوم ثلاثاء حدي للجمعه اما اني او هي
تريد تساعدهه طلگني وخلي ابالك خاف انت عنيد
وراسك يابس ودكول مااطلكج اني اعند منك خليني
معلگه بس تحلم تشوفني وبنفسي اطب للقاضي
واطلب الطلاگ انهي هاي السالفه قبل ماافقد عقلي

ضرغام..تهدديني للللججججج كتلج ناوي من زمان
بطلي هالحجي هذا
رانيا.. خلي انشوف اني موزعطوطه كدامك وعقلي
براسي واعرف اتصرف الك منا للجمعه طلگتهه خير
على خير ماطلگتهه ارجع لحياتك السابقه واياك
تلفظ اسمي حته بحلمك

رحت للغرفه اصبر بحالي وانطي الاعذار بداخلي
وره ساعه اجه دك الباب صاح افتحي اريد اولي
للدوام بدل وطلع حته بدون سلام فوكاهه هو ابو الراهي
خلي انتظر هاي اليومين واشول وين توصل
ووراهه اتخذ قرار ...

عقيق...السبع نايم جانت الساعه ب4 العصر
وقته كله نوم رغم الخطار كومه بس يكول
مااكدر اكعد يمهم تعبان والشيخ ياسين مكفي
وموفي هو يتلگه الخطار...

رحت سبحت وبدلت لبست دشداشه مخصره
جديده جابتهه رانيا الي حيل حلوه ورحت فتحت
الضوه وكعدت يم راسه دنگت بسته من خده
تحرك وابتسم بسته من خده الثاني فتح عيونه
وكال اريد اشوفج!!!

عقيق.. شوفني هنااا ودنگت بسته من گلبه
السبع.. ااااااوف يابويه وحضني حيل بحيث
ادينه تشابكت واحنه وجه بوجه اتمعن بكل تفاصيله
بس هو مايشوفني

حواجبه والطبره الحلوه بشرته السمره من الشمس
بس صافيه خشمه رفيع ورموشه كبار ولحيته
محدده وترتيب شعره حلو..

حجيت بهدوء جمره احبك
السبع.. واني هم احبج بيش الساعه
عقيق.. ب4
السبع.. هم اكو خطار
عقيق.. شفت زلم طلعوا
السبع.. حضريلي الحمام اريد اسبح

عقيق.. يله كوم اني محضرتلك كلشي
السبع.. كومي انطيني ايدج لسه ماحفظت المكان
عقيق..انطيته ايدي وكام راح للحمام واني كلما يفوت
للحمام اظل واكفه بالباب لحدمايطلع

طلع يفرك بشعره صاح عقيق كتله هياتني
يمك مد ايده يريد يلزمني تقربت علي
حضني من خصري وباسني من كتفي ورحنه كعدنه

السبع.. عقيق من الاسبوع الجاي سجلي بدورات التقويه واريد وعد تفرحيني وتنحجين هاي السنه
عقيق.. شلوت اقدم وانت تظل وحدك على الاقل صير زين يله عود لاحگه على المدرسه

السبع.. لاااا شعندي اخلصهه نوم بس انتي ارجعي
لدراستج لاتناقشين
عقيق.. جمره وسالفه جبار شلون؟
السبع.. شبي ماراح اتنازل عنه شيحكمه القانون خلي
يحكمه ومدام جبار بالسجن احسبي القصر خامد

عقيق... خطيه عاصم يوميه يجي
السبع.. عاصم بكدي ربينه سوه جان يجي يكعد ويانه
وضرغام يطرده يكول ابن جبار يطلع على ابو بس من كبرنه سوه عرفناه عكس ابو حيل وفقير

عقيق... خوماضايج
السبع.. الحمدلله مابيدي شي اغيره
بس متعلم يوميه اقره قران وهسه اريد اقره
عقيق.. افتحلك التلفزيون واسمعه بهدوء
السبع.. يله وعوفيني لاتصير شيطان

عقيق.. كمت فتحته وكتله راح اروح يم فجر شويه
واجي حته يظل بهدوء وحده ويردد الايات
ويه القارىء..

رحت للبيت الجبير ماكو خطار رايحين والشيخ ياسين
رايح عنده كعده وبس احنه ظلينه دورت على فجر
ماكو سألت لبابه كالت تلگيهه يم الدجاج طلعت لگيتهه
هي وجهال رانيا

فجر عدهه جهه كامله من الحديقه متروسه دجاج
وبط وبش حته حمام مال زينه كل الانواع عدهه
ومعتنيه بيهم طيور الحب قفص متروس بي فوك 50
بلبل كل وقتهه يمهن..

كعدت يمهه تحجيلي عن السادس والبطه تلعب
بحضنهه انفتح الباب اواب وجراح دخلوا
اجت عينهم علينه شفتهه انخبصت وشمرت البطه
وراهه...

وجرتني كومي كومي خلي انفوت جوه عرفتهه لان
شافت اواب يمكن فجر كبرت وصارت تستحي
جانوا واكفين بباب المطبخ يحجون ويه ام جراح
وهي الارتباك مبين عليهه ركضت للغرفه

شويه ورجعت للبيت صوت القران عالي باوعتله
بعده كاعد ويسمع ظليت كاعده بالمطبح شكو
شغله خلصتهه لحدما خلص القران ودخلت...

السبع.. اجيتي
عقيق.. اااي تتمشه شويه
السبع.. ااي شويه نطلع بالحديقه جراح هنا
عقيق .. اي هو واواب
السبع.. كومي وياي اروح يمهم شويه

عقيق.. ساعدته وصلته الهم وهم خلو كراسي
بالحديقه ويسولفون لحدمااذن المغرب كمت مانتعشه
هناك احسه ينحرج نتعشه ابيتنه حته ياخذ راحته

وره العشه لو نسولف وتخلص السوالف لو فاتح التلفزيون
يسمع بس صوت لو اخبار لو قران ماعنده
شي يسوي بس علاجه بي منوم وينام هواي

جان مخلي راسه على رجلي واني العب بشعره
وهو يسمع اخبار والشي الي اشوفه اكله بالحدث
انتبهت علي غافي احس بجرحه واحس بگلبه
المحمل هموم ومابيدي غير الدعاء...

لبابه... جراح زعلان مايحجي وياي بس اليوم من ذاتي
بدلت ولبست من ملابس النوم مال العرس واذا
تقرب اتحمل النتيجه لبست الروب وظليت بفراشي

هو من يصعد بوجهه للحمام سبح واجه
واكف يم المرايه ويحاجيني على ملابسه
مال الدوام كتله مكملتهن دار وجهه عليه
اني متغطيه كلشي ماطالع مني بس الظاهر حس

جراح.. تعالي نكعد بالصاله ابرار تنام جوه
لبابه.. كمت بخجل لاول مره هيج والضوه مفتوح
واللبس مدري شلونه مشيت واني مدنگه ماحرجني
كعدنه على التخم وفتح التلفزيون جان فلم اجنبي
على mpc2 مد ايده على كتفي ميل راسي على صدره

غمضت عيوني واني اخذ نفس واشم عطره دكات
كلبي تضاربت لزمت ايده شدد حضنته اكثر
وباسني من شعري دقايق والصمت سيد الموقف

جراح.. لبابه احجي البداخلج عبري حتلو سلبي
ليش هيج تضمين بداخلج
لبابه.. ماعندي شي بداخلي بس اكوشغلات احتاج
بيهه ماما لان متعلمه تنصحني

جراح.. احنه موسوه ليش هيج كل واحد عايش
ثقله لوحده
لبابه.. انت متحجيلي
جراح.. والله يالبابه خاف تعيريني خطره انتي
بس تتعاركين يكوم السانج يهلهل

لبابه.. والله نتيجه الضغط وبعدين تدري اني اغار
وخاصه من نوال اتخبل منهه جراح مااريد اشوفهه
لو تلاحظ اغلب مشاكلنه بسببهه كل ماتجي نتعارك

جراح.. وشسويلهه شكم مره حجيت وطردت
مافاد مااعرف وين تريد توصل
لبابه.. احجيلي الحقيقه هم تراسلك
جراح.. قبل شهر دكت عليه وماجاوبت ورجعت دكت
عليه من تليفون خالي ومن جاوبت جانت تسأل شلونكم

لبابه.. رزلهه كللهه لاتخابرين بعد
جراح.. والله يالبابه مايفيد مرات الانسان يغلط
بسبب طيش مشاعر وهاي اكبر غلطه ارتكبتهه
لو مشاعري حقيقه ماكرهتهه هيج حيل مشمئز منهه
ومن تصرفاتهه

لبابه.. ضميت راسي اكثر بحضنه ايده على كتفي
يحرك بالروب وطلع زندي ودنك باسني
رفعت راسي بسته من رگبته ميل راسه ليوره
وضغط على زندي بقوه...

ادعي بگلبي كون ماتهيج عنده الحاله ظل مرجع راسه
شويه وعبالك يحاول يهدء مااحس غير يلزمني
من زندي وينومني على القنفه وكام يبوس بيه
بطريقه اشبه بالعنيفه مادفعته لان بس ارفضه يتخبل

حاولت اكون وياه بس بالي مشتت لان اخاف
يأذيني خاف يسويلي شي فجأه ابتعد
وادنه عني وهو يفرك برگبته ايده جمر
بسرعه كام للمغسله ودنگ راسه جوه المي

تقربت علي صاح لاتجين ظليت واكفه بمكاني
واني اباوعله ياربي الى متى لا اني اتحمل ولاهو
جاي يتحسن وتاكدت هذا طبع عنده مايكدر يتجاوزه
واني ماجاي اتقبل طبعه ...

نشف شعره واجاني حاوطني بديه ورحنه للغرفه
اتخذ وسيله هاي صارت عاده يوميه يحرك اصابيعه
على كل جسمي وخاصه رگبتي وزندي مثل من انريد
انوم طفل لحدماااغفه صرت احب هاي الحركه منه
ومرات نتبادل البوسات بس ابد ماتقربلي ...

شويه تحسنه صار حته بليل حده للسبع ويجي
البس وارتب يوميه ماكو تقارب جسد بس
جاي نحس بگلوب بعض ومثل مانكول مخلصيهه
مقبلات...

فجر.. اريد اروح للدرس واواب هنا كال السبع
روحي وياه يوصلج لان السايق تاخر وراح تروح
عليه المحاضره ركضت للمرايه عدلت حجابي ورشيت عطر وطلعت صعدت وره وهو يسولف ويه السبع

اجه صعد وحرك السياره التفت عليه وكال شلونج
ست فجر؟؟
فجر.. زينه
اواب.. شلونه الرياضيات وياج
فجر.. موزين كله عشغينات

اواب.. ليش هيج دماغج ثگيل
فجر.. لا يستلم بس هنا مااحبه
اواب.. چااا عليمن اتروحين مدرس
فجر.. احسن من ماكو
اواب.. سجلي عندي تقويه

فجر.. وانت وين تفهم مو غسبت من دغستي
اواب.. شسويلج اذا كعدتي تحفظين بوجهي

فجر.. سكتت باوعلي بالمرايه بنظره حلوه
وصلني ومن نزلت كال كليلي اني ادرسج
لا تستحين وجهي يفتح دماغج

نزلت واني ملصومه شبيه وين الساني
شو اكلني واخذني حاصل فاصل واني ساكته
امداج عقيق كالت تحبين وكلما اشوفه اتذكر حجايتهه...

رانيا... اليوم جمعه وينزل ضرغام كلما يتصل بهاليومين
مااجاوبه كلبي نار ماحجيت لامي بس اريد اشوف
الحل الاخير حته اكل مااشتهي الليل كله ابجي
مااتوقع اكدر اتحمل اذا ماطلگهه ...

جنت اشتغل واسمع التليفون يدك رحت جاوبته
سألنه شلونكم كلامي ثگيل وياه كال ماانزل اليوم
عدنه شغل ماكتله ليش بس كتله طلگت لوبعدك

رد عليه لاتحجين بهذا الموضوع البنيه ماعدهه
احد اذا اطلگهه تدمر حياتهه انطيني مجال
احلهه بصوره احسن..

بسرعه سديته بوجهه شتوقع منك انت مونسخه وسام
وهسه جاي اترجى منك خير رحت لامي حجيتلهه
صافنه بوجهي ماعدهه جواب غير هم تطلگين وترجعين
لحسام وضيمه..

رحت دكيت الباب على السبع طلعتلي عقيق
طبيت كعدت بالصاله وصاحته كمت احجي
وابجي واكله تقبلهه وهو ساكت متفاجىء شلون
كل هاي السنين وضام عنهم ضرغام...

كال اهدي وان شاء الله تنحل طلعت من يمهم
واني بس الله يعلم بحالتي شنو وشلون
احساس بشع عندي ثاني يوم اجت عقيق كالت
السبع خابره وتعارك وياه حته غلط علي وضرغام
كاله راح اطلگهه اني بالطريق رايح لعمامهه وانهي
هاي السالفه ...

مااكول ارتاحيت بس القلق ماخذ عقلي للعصر
اجه سيوفي يركض كال عمو ضرغام اجه
طلعت اريد اتلكا وياريتني ماطلعت بنيه حلوه
حيل وهو بملابسه العسكريه وهي بصفه واكفه
عين بعين اني وياه وروحي تشب وتنطفي تقربت
بخطوات ثقيله لزمت زنده واحتمت وراه .....

.
يتبع....

#خبايا_الاقدار
❤️♨️♨️

... البارت الثالث والستون


اعتذرلي ؟ وبعد شيفيد اعتذارك
ينقبل ما ينقبل
بالسمه الغربان باعتنه وشرتنه
وقسمتنه نصير جم وجبة اكل
.....

رانيا... عينه بعيني وهي لازمته من زنده محتميه بي
مع العلم مابدر مني اي تصرف حته تخاف جانت الصدمه
اقوى من انطق احرف بس عيوني مفتوحه وصافنه علي
وكلبي رافض يصدك

هو لزم ايدهه ووخرهه واجه عليه قبل لايوصل اني بسرعه ركضت للبيتنه عفت كلشي مااريد اواجه مااريد احجي احس روحي بمتاهه اريد اصرخ واريد اضرب بس ماجاي يطلع بيدي

اجه وراي اني هادئه او اتصنع الهدوء من اثر الصدمه
سحبتني ايده وحضني بسرعه دفعته حيل بكل قوتي
ارتد ليوره وصحت وخر عني

ضرغام... لاتحسبيهه بغير شي خليني افهمج
رانيا.. مااريد افتهم اي عذر واي سبب مااريد ضرغام
ودينه باجر لبغداد وطلكني

ضرغام.. انجبي وسدي حلكج لوينزل امر سماوي بطلاگج
مااطلك خليني افهمج وعود اذا مااقتنعتي نحجي

رانيا.. انت منو؟؟ حته تأمرني وتمشيني على مرامك
كتلك اني مااقبل القسمه على اثنين اطلكني وانت الممنون مدام جبتهه كدامي لوتصير موضرغام مااتقبلك بعد

ضرغام.. ماجبتهه حته اذيج ولا اخليج كدام الامر الواقع
بس كتلج مامحسبلهه هيج حساب وتورطت رانيااااا
اسمعيني واحكمي والله ماناوي اذيج ولا استغفلج

رانيا.. كتلك مااسمع اي عذر اطلكهه تخليهه مايهمني
الرجال الي يدوس على مرته وهي صاينته ومقدمتله
كل متطلباته مايستاهل تفني عمرهه وياه راح دكلي اتحملي لا مامجبوره اتحمل انت انسان واني انسانه انت عندك مشاعر واني مشاعري تفوق احاسيسك من تقبل اني ادك هيج دكه ومااحجيلك عن علاقتي السابقه هذيج الساعه نتعادل اما هسه اني مااقبلهه على نفسي اعيش ويه واحد مثلك

مثل عليه. دور الحزين والوفي لمرته وبالتالي شطلع
متزوج صديقتهه قبل 5 اسنين بغض النظر عن كلشي
وعن اسباب الزواج شلون دنت نفسك على صديقه مرتك
المقربه

ضرغام.. شنو دنت نفسي احد كالج من ماتت مرتي مات الاحساس عندي احبهه وحزين عليهه بس مايمنع اني رجال وبحاجه المره وبعدين هسه انتي كاتلج ليش تقربتلهه ترى هي مره وحده وبعد ماوصلتلهه وصار نتيجه تفريغ لا اكثر

رانيا.. وتريدني اصدكك هسه من دكوا مره وحده؟
وليش اصدكك موانت نفسك السألتك كتلك شلون اتحملت بدون مره كتلي الحزن مامخليني اشوف بس خلاك تشوفهه واتمم زواجك بيهه

ضرغام.. اسمعيني رانيا زواجي اتممه بيهه سواء اليوم او بالماضي مال اطلكهه وترجع بنيه مستحيل لان راح تبقه
عيبهه عليه موعليهه لاتناقشيني بهذا الموضوع وعسما نايم وياهه الف مره هم مالج حق لان هذا الشي قبلج وانتي موبحياتي اشتم گفه ايدي راح ارتبط بيج

حاسبيني ليش ماكتلج وضميت عنج اي حقج بس ماردت
اجرحج ولاردت اضوجج عبالي اكدر اطلكهه شمدريني
لزگت بركبتي وقسما بالله وروح اولادي كل شهر اني
محاول اطلگ وماتصير ماسامعه واحد تورط تورطت اني

رانيا.. المهم مالي علاقه انت شايف وجهي اللطيف والحنين الرومانسي ماشايف الجانب الثاني اذا انجرحت شلون اكره وتدري كلش زين ليش اطلكت وتحملت الكتل والضيم علمود ماارجع موبس علمود حبك لا علمود اني انسانه ومااقبل كان من يكول يهيني ولو بكلمه

جبتهه وتحتمي بيك وتلزمك من زندك مااعرف شكول
بس الله يسامحك الله اعدل العادلين لا ادعي عليك
ولا احقد هسه العليك اطلكني عيشه وياك مااعيش
واذا تجبرني اعيش وياك تحلم تشوف رانيا القديمه
انت بمكان واني بمكان

ضرغام.. ماتريدين تسمعين مني
رانيا... لا مااسمع اي كلمه مااسمع منك وياريت
حته وجهك مااشوفه ..
ضرغام.. راح اعوفج على راحتج بين مااطلك وعود نحجي
رانيا.. شتحجي انصحك بقيهه لان انت بحاجه المره
لان رانيا ماراح تكون الك زوجه

ضرغام.. لحدالان بالي طويل وياج وعاذرج بس اذا ظليتي تلغين هاي اللغوه اطيح حظج
رانيا.. انت فالح بس بالتهديد كدرتك على رانيا
ضرغام.. لللللللج راح اكوملج

رانيا.. موزين عليك انت رجال متزوج اثنين ويطلب
من عندك طاقه لاتصير عصبي وتتمرض وزوجتك
الاولى بعدهه صغيره وانت ماتتحمل لازم تادي الواجب

ضرغام...لا اله الا الله راح اتحملج واريد اشوف السانج
هذا لشوكت يظل يلغي كتلج ماعندي شب وياهه كفرت
زنيت والله شنو نمت وياهه قبلي يامره مااعرفج جنت
فارغ رجال ماعنده مره بيوم احتاجيت وين اولي اشوفلي كح.... وعندي وحده على ذمتي

رانيا..مااحاسبك على القبلي اصلا اني جنت متوقعه انت واحد ابو نسوان ومستحيل صابر كل هاي السنين لاعبالك عود هاي اللهفه مالتك بيوم عرسنه تثبت انت ماجان عندك شي اصلا مااستغرب اذا ماهاي اللهفه نفسهه وياهه

بسرعه لزمني من فكي وصاك على اسنانه اذا مااسكتي
اشگ حلكج انتي شي ثاني وتقربي الهه احتياج لا اكثر
لاتقارنين نفسج بيهه يحجي وايده رخت بطرف اصبعه
يحرك على مكان لزمته وكال انتي رانيااا الحب بعد تعب
وسنين حرمان لاتقارنين نفسج بأي وحده ماابدلج وماافضل وحده عليج ومسح باصبعه على شفتي ووخر ايده..

رانيا.. لاتلزمني ضرغام شوفني واكفه بطولي واحجي وعبالك هادئه لااا النار البكلبي مااكدر اطلعهه واعبر عنهه اذا تعزني وخر عني ولاتشوفني وجهك واذا شفت هاي الجايبهه اشحطهه شحط روح يمهه لاتنتحر

عفته ورحت للغرفه اسمعه يصيح خبله سخيفه خلي اخلص من هاي البلوه وشوفي شسوي بيج رانياااااااااا
صوته رج البيت وهو يغلط ويفشر جان الفشار كله على عمامهه اسمعه يصيح اخوات الكح..... ابتليت سويت زين...

رانيا.. ماطلعت من الغرفه لان هو جوه من سمعت باب المطبخ انفتح يله طلعت ملابسه نازعهن وشامرهن على التخم وماخذ التشيرت من الحبل وطالع كلبي نار غسلت
وطلعت اريد اشوف زوجته مثل مادكول

طبيت للهول مال البيت الجبير والكاعه كاعده ويمهه ام جراح وامي بالغرفه وفجر وعقيق كاعدات كدامهه
وهي بس شافتني عبالك وحش كدامهه ادنت ليوره وعود تحتمي بام جراح

فجر.. شبيج فزيتي هاي غانيااا مغت صغغام
رانيا.. عقيق تعالي وياي اخذت عقيق ودخلت للغرفه
كتلهه فهميني موكلتي راح يطلك موهذا جابهه

عقيق.. رانيا حبيبتي هدي حالج هسه اروح احجي للسبع ونفتهم اني مارتاحيتلهه من سألتهه عمه ام جراح شلون اتزوجج ماكالت حمايه وماعندي احد دكلهه هو رادني

رانيا.. ويجوز صدك صدكي بيهه ولاتصدگين بضرغام
عقيق.. اذا يريدهه محد جابره يتزوج عليهه وضامهه
عن الناس هو مايجذب وحته السبع كال صدك ساعدهه
هسه اروح افتهم منه واجي...

عقيق.. طلعت من يمهه وهي ظلت يم امهه اني عندي نظره وحده بالمقابل اذا نارتاحيتله وهاي ابد مابلعتهه
احسهه تمثل والهه غايه ابالهه اني هم عقد عليه السبع
حمايه وجان اي واحد يسالني اكله لان ماعندي اهل
ولحد هسه مااكول حبني اكول ماعندي احد وساعدني

رحت لبيتنه جان باب المطبخ مامسدود فتحته واسمع
صوت ضرغام والسبع وجراح يسولفون ظليت بالمطبخ
وهاي اول مره اتسمع على احد بس استحيت ادخل ليجوه

جراح.. وهسه شراح تسوي
ضرغام.. خلي يهدء الوضع واروح لشيخهم احجيله
شنو ابتليت خطبت منهم فوك ماساعدتهه
جراح.. انت ماساعدتهه الي يساعد مايتقرب انت
متمم زواجك يعني موصاحب فضل عليهه

ضرغام... هم انته انوب شلزگتوا بسالفه متقربلهه
منو بيكم مامحتاج مره بحياته لاتصيرون براسي
يوسف كفرت خوما كفرت مره عندي وبالحلال
وشمدريني راح اتعرف على رانيا جنت رافض ارتباط
حقيقي وعائله

جراح..ليش ماكتلهه لو محاجيهه قبل زواجكم مااتخذت
هيج موقف وانت تدري بيهه مجروحه من هالموضوع
ضرغام.. والله مامتوقع توصل هيج كلت اطلكهه مثل
مادخلنه بالمعروف نطلع بالمعروف

السبع.. ضرغام حلهه البنيه هم خطيه تنكسر بس لازم
تحلهه مدام رانيا رافضه تتقبل الموضوع لازم تشوفلك
حل اخذ ياسين وروح لشيخهم فهمه الوضع

جراح.. وهسه انت تقنعني خفت من عمامهه شعجب
ماطلعت اسلاحك بوجهم ضرغام احجي الحقيقه
البنيه هم عاجبتك وتريدهن اثنينهن

ضرغام.. من اكلك انت زمال وارعن وكلب ابن كلب
الخله النجمه على جتفك كوم جراح من وجهي
تبقه طول عمرك مصخم

جراح.. دروح ماعجبك الحجي لان حقيقه احجي
الصدك محد اكو نسمعك هاي انه كدامك قبل هم حبيت بنت خالي وعرفت لبابه مستحيل بيوم اتقبل ارتبط بنوال حتلو مجرد مساعده ولا حته افكر اساعدهه بس انت عاجبك الدور تعيش حجي متولي

ضرغام.. انت براسك نعال اكلك يكتلوهه بيت عمه
يكلي عاجبتك
جراح.. ليش يكتلوهه اول وحده اخر وحده تطلك
هذيج محكمه وروح انت بمعرفتك قدم شكوه واخذ
ضمان الهه
ضرغام.. راح اكوم ** سكت جراح

السبع.. انت ليش عصبي جراح كلامه منطقي وواقعي
بس انه اعرف هواي ناس هيج عدهم البنيه التطلك عار
احنه ماانريد انأذيهه صار 5 سنين انته حاميهه مو بالاخير نرجعهه لنقطه الصفر بس لازم تلكه حل واله رانيا تعوفك من حجت وياي مبينه مايهزهه حبك كدام موضوع زواجك

ضرغام.. اني متفق وياهه من زمان اطلك وكلما افتح الموضوع مدري شسوي بروحهه واخاف ابتلي بيهه
اليوم وروح ليث بيدي اخذتهه لعمامهه رغم رفضهه
بس ماتوقعت حته اسلاح رفعوا بوجهي شنو اطلكهه
طلعت حجتي مايصير عدنه طفل 4 عمام عدهه جنهم
جلاب مرعدوني

السبع.. والله اليجي من ايده عسا الله يزيده انت لو مامتمم زواجك جان حجينه وكلنه حمايه وهاي بتكم
ردت الكم صاغ سليم وروحوا تاكدو موهسه انت ماخذهه
لو تحلف ببير زمزم محد يصدكك مره وحده

جراح.. ولا انه اصدك ضرغام ابو نفس مره وحده
شنو فرق المره الوحده عن المره الثانيه

ضرغام.. انت ظل مسلت وراح اكوم ابتلي بيك
وروح اولادي مره ومافكرت وراهه ابد ولاعدتهه
اني اسكت رانيا يطلع جراح يفك بحلكه غسل لهالحلك
مشهودلك اتجيب حطب وتعلگهه