#خبايا_الاقدار
❤️♨️♨️

... البارت الرابع والاربعون
......

چَـا و گلبي ؟
چَـا وكسـري ؟
چَـا عفـت كلشي وبَعتني ؟
چَـا شگلك فرگاك هَيـّن ؟
شنسى يا لچمه واعذرك ؟
چَـا والعيون البچتلك ؟
والدرابين الخذت صوتي ومشتلك ؟
چَـا والعـزاز العفتها ؟
والبچي ؟ ودگـات گلبك ؟
ورجفتك وخوفك ؟
ذَني شنهي ؟
.....

رانيا.. مرات الانسان يكون عاجز او تمر مرحله بحياته مايحس بطعم الايام الي يعيشهه يتمنى لو يفارق الدنيا ويغمض عينه ويرتاح بعيدا عن كلشي مايفكر لا بالولد ولا بالزوج لان وصل الى طريق نهايته انغلقت وبعد ماكو طريق للعوده..

صرت بين نارين وكل نار لهيبهه اكبر ومميز عن الثانيه
مهما حاولت ومهما استخدمت عقلي واكول تهون
بس محد تكدر تتجاوز مشاعر الامومه وادير ظهرهه
وتختار طريق الزواج الا ماندر..

حجيت كلامي دفعه وحده واني واكفه كدامه بدموع
تجري اتمنى لو هسه طير واروح لجهالي وكلشي مااريد
اتحمل الذل وحقاره حسام بس احميهم..

ضرغام.. ع كيفج اهدي فهميني شصاير؟
رانيا.. سامحني الله عليك والله مااريد اجرحك بس
انت تعرف الطفل شكد غالي ضرغام اولادي
متعذبين واني تعبت مستحيل اكمل حياتي بعيد عنهم

ضرغام.. كتلج اهدي .. اني وياج بأي قرار تتخذي
بس خليني افتهم شبيهم ولاتبجين فدوه

سحبني من ايدي وطبينه جوه كعدت ع فراشه ضامه
وجهي باديه وابجي وهو واكف فوك راسي
صاح بيه كاافي رانياااا فهميني شكو ؟؟

كمت احجيله كلشي خلصت طاقتي مااتحمل بعد
اريد اولادي اني غلطت من الاساس المفروض مااتزوج
اخذوهم مني وياريت كد المسوؤليه عايفين
مرت عمهم تضربهم ومسويه بيهم رعب

ضرغام.. كعد كدامي ولزم وجهي ويمسح دموعي
باصبعه الجبير كال كااافي اسكتي اني ووياج موضدج
واذا هيج السالفه اني اتركج لاتهتمين كلشي مقسوم
ومكتوب علينه..

بس شويه اهدي وخليني افتهم منج وبلكي نلكه
طريقه حل يله حبيبتي اخذي نفس وع كيفج
منا لباجر الصبح اذا ماكو حل بيدي اوديج
الهم واختاريهم بس انطينه صبر ...

رانيا.. الشهكه لازمتني ابتعد كعد بصفي
واني امسح بدموعي الماترضه توكف
لزم ايدي وهو مرجع راسه ع حافه الشباك

ضرغام.. راح اخابر المحامي وانشوف نكدر نرفع
دعوه تعنيف وهم موكد المسوؤليه ونرجع ناخذهم
واذا مارهمت الله ومحمد وعلي وياج مابيدي شي
ولا احب اكون طرف بخسارتج وحزنج

رانيا.. باوعتله غمض عينه بيأس ورجع باوعلي
ابتسم بوجهي ابتسامه محمله هموم وخلف
هاي الابتسامه جرح ووجع وخوف من الفقدان

ماكدرت اكون طبيعيه احبه حيل تعلقت بي بشكل
موطبيعي مستعده اشيل عمري وانطي اله بس
حته يكون سعيد وكعت دمعه من عيني واني اباوعله

تنهد وكال ليش تبجين دموعج غاليه عليه
اذا الله ماقاسمنه لبعض موبكيفج ولابكيفي
خلي املج بالله جبير انتي صرتي بين امرين
واحد اصعب من الثاني بس اختاري اولادج حته
بالمستقبل مايكولون تخلت عنه وتزوجت

لاتخافين عليه اني رجال اعيش ايامي حتلو سوده
عشت الاصعب لاتحملين نفسج الذنب مالمفروض
اعلقج بيه ولا اساسا اخليج براسي جان ماوصل
حالج لهنا..

كومي ارجعي وارتاحي خابريهم طمنيهم والي اكدر
علي اسوي وحتلو افترگنه اني وياج ومااعوفج
لاتفكرين بالسند بس صيري سباعيه..

رانيا.. سحبت ايدي من ايده وطلعت بدون ماالتفت
مااريد اشوف احد صعدت للسطح عيني ع السما
وابجي ياربي ساعدني كلبي جاي يحترگ مثل
الورقه وخاف تاكلهه النار ويبقه بس رمادهه...

البيت خيم علي الحزن حته محد تعشه ماما وفجر يبجن وياي وعمه ساهره لازمه السبحه وتسبح تنحل ع خير
كلهم متأذين ع ضرغام وكل العنده نصيحه يكول لاتعوفي
بس موبيدي اني ام وياريت اطفالي بسعاده..

بليل دك تليفوني ضرغام جاوبته كال اطلعي للحديقه
اريد احجي وياج سديته منه وطلعت جان كاعد ع الدرجات
ويدخن خليت ايدي ع كتفه وكعدت بصفه ..

ضرغام.. شلون صرتي؟
رانيا.. الحمدلله جرحك شلونه؟
ضرغام.. اخذ نفس عالي وكال زين

رانيا.. ضرغام اني احبك مااريد اخسرك بس خلي
نفسك بمكاني تكدر تشوف قطعه منك تتعذب
وانت نايم براحه؟

ضرغام.. اني ماجاي الومج انتي حره باختيارج
وسبق وكتلج كلشي مسجل ومقسوم اكو حل
واحد تريدين تسمعي بكيفج

رانيا.. شنوو؟
ضرغام.. المحامي كال نكدر نرفع دعوه تعنيف ويعيد
الحكم من جديد بس خاف يسوولهم لعبه لو يحلفون
ع القران جذب لو يجيبون اخوج شاهد وهو من كاعه عار

رانيا... بس اني هسه مااكدر اظل عود تنرفع الدعوه
وهم يبجون وبعد شي ثاني احتمال تتازم الشغله
وتصير عناد والجهال الضحيه...

ضرغام.. كام وكف وكال روحي باجر اكعدي
بالشقه بين ماتصير صوره حل وخلي يجيبهم
يمج

رانيا.. ماعرفت شحجي شفته شلون حالته
ومنا صوت ابني يرن باذاني عافني ومشه
اباوع ع طوله لحدما وصل للباب وشغل سيارته
وطلع بدون مايلتفت...

جان قراري نهائي مااباوعت وراي ولا سمعت صوت
احد لا گلبي ولاعقلي بس صوت رضاوي وسيوفي
براسي وهم يستنجدون بيه..

كعدت الصبح صافنه ع الجنط المحضرتهه ماما
صافنه عليه ودكلي راح ادمرين نفسج مااريد
اسمع احد حته ضرغام ماسلمت علي ماعندي
عين تباوعله ولاهو اجه...

اجه السبع كال يله عندي شغل صعدنه اني وماما
ويه كل دقيقه ينتزع كلبي شنو ذنبه ضرغام
دخلت بحياته وطلعت بجرح معقوله راح نفترق
وبعد محد اله علاقه بالثاني؟؟

عندي امل جدا ضعيف تنحل وارجعله
فززني صوت السبع وهو يحجي ويه ماما ووجه كلامه
الي شنو رأيج ام سيف؟

رانيا.. شنوو
السبع.. انتي هسه اخذي الجهال وكولي اتنازل عن زواجي
بس لتذكرين بان انتي بعدج ع ذمة ضرغام بين
ما نرفع دعوه ونرتب وضعنه يعني انطي الامان

رانيا.. هزيت راسي وسكتت الطريق طويل بس اريد
اوصل السبع خابر وسام كاله احنه جايين الكم
كاله هله بيكم موجود بالبيت ..

عيني ع تليفوني بلكي يتصل ضرغام ماكو اي اتصال
منه ولارساله ولا اكدر ادزله رساله لان بيا وجه
اني استعجلت بموضوع الزواج..

وصلنه للبيت اهل وسام فتحلنه الباب اخو الصغير
دخلنه بالاستقبال واجت امه وابو وهو سلموا
وكعدوا عيني ع الباب وينهم كتلهم وين الاولاد؟؟

ام وسام.. نايمين هسه راح اكعدهم راحت كعدتهم
وشويه واجو يفركون بعيونهم اباوع لسيوفي لازم ايد
رضاوي بس شافوني اجو يركضون بحضني

ابوس بيهم واشمهم اوف ياريحتكم عساني
بالموت اذا عفتكم بعد كعدت رضاوي بحضني
ومثل الطفل ابو سنه ضام راسه جوه حجابي

السبع.. ابو سيف احنه حلينهه وامهم اتخذت قرار
بس هسه رجعت بقرارهه وتريد اولادهه لان هي ام
والظاهر انتو هم موگد المسوؤليه

ابو وسام.. ليش ابني مامقبول منك هالحجي احنه اهلهم
اشفت علينه وموكد المسوؤليه؟؟

رانيا.. من رخصتك السبع اني راح احجيلكم ليش موكد
المسوؤليه انطيتكم ورود مفتحه ماسألتوا حالكم شبيهم
هيج تغيروا؟ طبعا ماتدرون الاب مايدري طشت رشت
وانتو اخابر الحجيه اكلهه مرت عمهم تكتلهم دكلي ابنج وكح

تقبلهه ياوسام انت من اخذتهم شكتلي موكتلي بامان
ولاتخافين عليهم هيج تاليتهه ابني يخابرني وهو طفل
حته مايجمع الكلام يبجي من مرت عمه

خلي تجي تكعد كدامي ودكلي ماتخاف الله اطفال مالهم ذنب
تمد ايدهه عليهم منافسيهه بشي حاقده عليهم
حرامات بيوم جنت منكم لان اثبتوا عديمين مسوؤليه والدليل
حته ماتدرون بعذابهم..

التفت وسام ع امه كالهه صدك هالحجي ؟
جاوبته والله مره وحده صارت كدامي وماقبلت وتعاركت
وياهه ماادري بعد

سكت وسام بس هز راسه بعصبيه وباوع لامه
كال وهسه المطلوب مني شنو ؟ تريدون اطعنون بالدعوه
روحوا سووهه تعم لنفسهه اذا جانت تشوفهم كل جمعه
تحلم تشوفهم اله يصيرون عرسان..

رانيا.. ماردت اجادله اعرفه فول بالعناد كتله مااطعن
بشي اريدهم يمي راح اكعد ابغداد وتنطيهم الي انت موكلت
هيج ؟؟

وسام...كتلج بحاله وحده انطيج اذا ماتزوجتي؟!!!
رانيا.. مااتزوج اذا تنازلت بيهم الي مااتزوج اهم شي
اولادي

وسام.. وين تكعدين ؟
رانيا.. حاليا اكعد بشقه مال السبع بين ماانشوف حل
وسام.. راح اخابر اخوج يجي حته يصير الحجي
كدامه مالي خلك يوميه تجيني براي جديد

رانيا.. كتلك ماعندي اخ هذا غريب من الشارع ماعندي
اخ والله العظيم اروح اشتكي عليكم كلكم بتهمه
تهديد كاافي بس اني اطلگت وردت اتزوج متفق ويه
اخوي ضدي

وسام.. ماعندي كلام ثاني مع احترامي للسبع
رجال غريب عنج من اريد اعاتب احد اعاتب اخوج
يجي اخوج وخالج ويتكفل يوفرلج سكن يله انطيج
الاولاد مااكدر اخلي اولادي يوميه بمكان..

السبع.. حجي انتو ماعدكم شيخ يجي نتفاهم وياه
ترى مانشتغل عدكم مره لاحول ولاقوه منين ماتجيكم
اطلعولهه بسالفه شتردون منهه

وسام.. كلامي مابي غلط هي راح تنفصل من خطيبهه
معناتهه ماراح تربطهه بيكم علاقه بعد والمسوؤل عنهه
اخوهه وخالهه

رانيا.. اني مسوؤله عن نفسي من اجيت خطبتني
ماعندي اخ هذا طلع جديد ومااعتبره اخويه
وسام اكسر الشر وانطيني اولادي

وسام.. ماانطيهم اذا مايجي اخوج كدام الكل يوفرلج
سكن ويتعهد بحمايتهم قابل اعوفهم يم نسوان اثنين
بدون رجال ماكو هيج حجي..

رانيا... اعصابي تلفت السبع كوه مصبر ع نفسه
وساكت ووسام يحجي باريحيه وعينه بعيني
مانزلهه ابد ...

اريد اخذهم وماقبل ورضاوي يبجي لاتعوفيني
كلبي يتفطر مثل كاع يابسه

كتله خابره يله خلي يجي كام خابره وكال شويه
ويجي السبع طلع خابر ومتاكده خابر ضرغام
والله اعلم بحالته شنوو..

شويه واندك الباب اجه هو وخالي دخل سلم وكعد وانفتح
الموضوع كال اني اكعدهه ابيتي !! واذا ماتقبل خلي
تنطيني فلوسهه هي وامهه وانطيهم لمقاول يبني الهم
ع كد فلوسهم..

رانيا... ماعدنه فلوس انت مو ع اساس اخ يله وسام
يزامط بيك ويكول يوفرلج سكن يله واجبك هذا

حسام.. اوفرلج الج انتي اختي امج مالي علاقه
بيهه عدهه اخ تروح تكعد يمه

رانيا.. نار وشبت بيه اباوع لامي مدنگه راسهه
وخالي ساكت بالجذب ماسكته وماكال اختي ع راسي
ياربي انهانينه بنص الغرب ويم طليقي..

السبع.. انت مقتنع بكلامك تريد تالي وكت تعزلهه عن امهه
زين ميخالف انت ماعندك اصول خالك شبي ماعنده
مخافه الله ويفرق الام ع بتهه مع الاسف صار الحجي
ويه امثالك

حسام.. لاتتجاوز والا....
السبع.. والا شنووو احترام للبيت الكاعدين بي ماراح
اعلمك الزلم شنو والتفت ع وسام كاله انهي هاي المهزله
صار ساعتين تمسلت بدون معنى لان نسوان ماعدهن احد
لو وراهن سند محد بيكم يفك حلكه ...

وسام... حسام وابو بهاء ام سيف قررت تترك سالفه الزواج
وتجي تكعد ببغداد واطفالي يمهه بس واجبكم تتكفلون
بسكن وحمايتهم

حسام.. ابو سيف كتلك اختي ع راسي بس امهه تعذرني
اني موكفيل العائله هسه اخذ اختي واكعدهه ابيتي
تريد تكعد هي وامهه خلي تشوفلهه بيت واني احميهم

السبع.. كام وكف كال راح اخليهم هاليومين يمي
شوفلكم صوره حل ورجعولنه الجواب

رانيا.. وسام ماقبل اخذهم اله ياخذ كلمه من حسام
وهذا النذل مصر ع ماما مو ويانه اريد اهد علي بنصهم
واكله بسنوني ومايشفه كلبي

صارت هوسه الجهال اخذوهم مني يبجون جوه
واني ابجي وماما عينهه تتنقل بيني لبين اخوهه للسبع
كلهم اجتمعوا ع اذيتنه...

من طلعنه بعدني بباب الاستقبال ومدنكه ابجي فات وسام من يمي السبع وامي واكفين مسافه يحجون ويه خالي
جنت مدنگه امسح بدموعي وكف بصفي

وكال لاتبجين لمصلحتج الى متى تظلين بدون سكن
خلي يتكفل موبس بالاسم اخوج
رانيا.. انت جاي ادمرني حرام عليك انت الاذيتني
وبعدك مستمر

وسام.. لاتبجين رانيا عليمن تشهكين هسه احاسبهم
شلون مأذيهم اطمئني عليهم
رانيا.. حسبي الله ونعم الوكيل بيكم

عفته وطلعت للسياره اجه السبع حته سد الباب حيل
كال شلون ناس لاذمه ولاضمير دك وصلنه للشقه
وكال عندي شغل وراح..

فتحت الباب ودخلنه واتفاجىء بضرغام كاعد بالصاله
كام سلم ع ماما وراحت للغرفه جنت حيل محتاجته
بسرعه حضنته وكمت ابجي ..

ضرغام.. كااافي انعل ابهاتهم شمسويه بروحج
رانيا.. جاي اموت ضرغام لو شايفهم شكد بجوا واسمع
صوتهم وماعندي قوه واخذهم

ضرغام.. هاهي رانيا حطي جهالج واكعدي اني اطلع
من حياتج عليمن هالهوسه اني مااقبلهه احد يتأذى بسببي
حته اولادج جاي يتأذون من وراي لومااني بحياتج
ماصار الصار...

رانيا.. وافارگك
ضرغام.. عندج حل؟
رانيا.. لااا
ضرغام .. خلص ارجعي لحياتج السابقه وعيشي
لاولادج

رانيا.. بسرعه غيرت الموضوع لان شفت عيونه حمر
كتله شلون اجيت ورانه؟
ضرغام.. اجيت بسياره

رانيا.. لاصدك
ضرغام.. ماكدرت اظل وانتي وحدج وبالطريق خابرني
السبع ع اخوح السكط اني اعلمه ع هاي الدكه بس
خلي تنحل والله كريم..

يله ارتاحي اني راح اروح يم صديقي معزوم
منا لباجر شيصير جديد انطيني خبر
دنك ع ركبتي باسني من رگبتي وطلع...

صفنت ع حالي هم تنحل مااصدك هم ارجع
اضحك بدون هم حزن؟! هم اصبح وامسي
واطفالي يمي؟!

لليل السبع بالصاله واحنه بالغرفه دك التليفون
انسمعه يحجي بصوت عالي ويه ابو وسام
ويكله وشنو اليضمن انت ماشفته شلون يتهدد عليهه

ظلوا يحجون وسده صاح ام سيف طلعنه اني وماما
كال هذا حسام كايلهم يجن يكعدن ابيتي ومعتذر منهم
صاير عصبي والبيت قريب ع اهل وسام

رانيا.. اني ماارتاح لحسام خاف يأذينه
السبع.. والله يا ام سيف حگج بس ماكو حل حته من احجي
يكلولي غريب ومخابرين ع الشيخ ياسين وماعندي حق
احجي يتسمى اخوج ...

احنه وياج وبظهرج اقل زله منه انه اجي ادوس ع راسه
واخذج للبصره وابن امه اليحجي والله لو ما الاولاد بالنص
جان عرفت شغلي وياهم

وثقي بالله ضرغام لاول مره اشوفه ساكت عن مشكله
ومالگالهه حل دومه يطلعهه من عيونهم بالضرب والمحاكم
بس ع كولته اولادج ضحيه وخاف يستغلون نقطه ضدج
وتنحرمين منهم نهائيآ...

للصبح كاعده اتنقل بين السجاده للفراش اختنك وارجع
اصلي اخر شي صليت صلاة الاستخاره ونمت هو راح
يدليني بالطريق الصح...

كعدت الصبح حجيت ويه ماما بعد نقاش طويل
اتخذنه قرار نتحمل علمود الجهال منا لمن يكبرون
كامت ماما خابرت ع السبع فهمته كالهه براحتهه..

مخلين جنطنه وكاعدين اندك باب الشقه فتحته ضرغام
اجت عينه ع الجنط ماحجه شي ماما راحت للغرفه
وهو عينه مركزه ع الجنط رفع راسه عليه وكال
هاهي خلاص؟؟؟؟

هزيت راسي ودنكت وعيوني غوشت من الدمع
كال الله يسعدج ويحفظج صيري سباعيه واهتمي
بنفسج لاتتعاملين ويه الناس ع نيتج والمقابل
يحسبهه غير شي شوكت ماتحتاجيني تلگيني موجود

رانيا.. مزنة مطر وصابت عيوني ابجي بدون انقطاع
اريد اخذ نفس مااكدر ولاهو كدر يحجي دار وجهه
وكال لاتبجين كايلج دموعج تغسلني

اهتمي بنفسج زين وخليج نبهه دائما اي شي يصير
تلگيني موجود حاليا لاتفكرين بيه فكري باطفالج
واذا الله قاسمنه لبعض نصير موبكيف واحد..

حجه هيج وطلع صحت وراه ضرغاااام بس ردت
احضنه اخر شي بس ردت اباوع بعيونه واكله
احبك واذا ماانجمعنه راح تظل باعماق گلبي..

ماانطاني مجال بسرعه سد الباب ركضت فتحت البرده
اباوعله وايدي ع الجامه الوحله مع السلامه وياريته
شافني شغل السياره وراح ..

شمرت نفسي بحضن ماما وهي تهدي بيه
ضاعت الكلمات وماكو شي يواسي الگلبه محروك
محد يحس بنار الفراگ ونار الحب..

للعصر اجه السبع واخذنه لبيت حسام جان واكف بالباب
هو وخالي ووسام والاطفال اخذت اولادي وطبيت
للبيت هو بيت بناء قديم بس زين دخلت وحدي
وعفت ماما ويه السبع...

وره شويه صفينه وحدنه كلهه راحت وطب حسام
كال اني غرفتي هاي ومالي علاقه بيكم باوعتله بحقد
اكره هذا الشخص مااتقبل بيوم يكون فعلا اخ ويعتمد علي...

لهنا خلصت الحكايه بعدني ع ذمة ضرغام بس محد
يدري عبالهم هاهي انفصلنه اي اتصال من ضرغام ماكو
بس عمه ساهره تخابرنه يوميه بس ماتذكره ابد ...

كمت انام ع صورته واكعد وهو كدام عيني
اتخيله بكل مكان كمت مااكل احس الطعم مر
مرات اضغط ع نفسي واكول لاتهلك صحتي علمود اطفالي
ع الاقل بس اخلي الاكل بحلگي تخنكني العبره واتذكره..

اتسائل شلون وضعه؟ شلون عايش وحده ؟
كال من يومي وحيد وانتي اجيتي نورتي حياتي
هسه رجع لوحدته راد يعالج جرحه وياي بس
اني شسويتله ضفتله فوك الجرح جرحين مايشفن...

عقيق... السبع حيل متأثر بسالفه ضرغام حته مايجي
بليل يظل يمه لحد 12 يله يرجع ومرات يروحله يلكا
قافل الباب مايفتحه ...

كلنه انشوفه شكد متأذي هو مبين علي كتوم بس معزول
عن الكل صار يروح للدوام ايام طويله وماينزل واذا ينزل
مايجي للبيت يكول السبع يروح للقصر رجع ع حياته
السابقه...

بيومهه اجه السبع كال باجر انروح للبغداد كتله
جراح هم يروح لان لبابه كالت انروح وياكم
كال لا مايروح يكول يشتغل بمعامله ابرار...

رحنه لبغداد ظلينه اسبوع كامل راجعت الطبيب
حالتي متحسنه بس بعد اكثر انطاني علاج
اخذني لابو التغذيه هم زينه وكال بعد لتاخذين علاج
هرمونات النمو مالتج استقر...

بداخلي انقهر لان هواي يخسر السبع فلوس عليه
العلاج غالي والتحاليل والفحوصات حيل غاليه
اكول شنو ذنبه اتزوجله وحده مريضه ومامحصل
منهه شي..

نطلع يوميه بليل نفتر شويه ونرجع بليل انام بحضنه
رجعنه مثل قبل مايتعمق ابد اساسا هو باله وفكره
كله يم ضرغام وجراح يكول هذوله اخوتي افديهم
بعمري ولا اشوف بيهم شي...

لبابه...شويه شويه اتقرب لجراح مرات يريد هو يبادر
ومايكدر يخاف من نفسه خاف بعده مايسيطر ع وضعه
هاي الايام يطلع الصبح يجي العصر يسوي
باجراءات السفر مال ابرار...

بيومهه اجه الظهر جنت نايمه حسيت ع حركه
بوجهي فتحت عيني واشوفه كاعد يم راسي ويلعب
بشعري ويحرك اصبعه ع تقاسيم وجهي..

ابتسمت كتله الله يساعدك رد عليه ويساعدج
وين امي؟؟
لبابه.. راحت للقصر هيام مسويه عمليه
جراح.. ابرار وين؟
لبابه.. عفتهه كالت راح انام انت كملت الاجراءات
جراح.. بعد بس باجر..

لبابه.. اكوم اصبلك غده؟
جراح.. لاتغديت راح اصلي وانام
لبابه.. كام سبح وصله كعدت ع حيلي اباوعله وضعه ماعجبني
من يركع اباوعله رجليه زرك من يكوم يوكف اديه ترعش

كمل صلاة وكاعد ع السجاده كمت يمه
خليت ايدي ع كتفه كتله شبيك جراح كال مابيه شي
تعبان شويه

لبابه.. كوم نام ارتاح
جراح.. اطلعي من الغرفه روحي يم ابرار
لبابه.. عرفته موتمام عفته وطلعت حجيت ويه نفسي
ليش طلعت ليش مااروح احضنه وبلكي يهدء

رجعت طبيت للغرفه لكيته مدد تقربت علي اريد احضنه
جان يدفعني حيل انضربت بتاج الجربايه صحت اااخ

جراح.. صاح بصوت عالي موكتلج اطلعي كومي
اطلعي بسرعه
لبابه.. بجيت بسرعه احس نفسي تفشلت
كمت طلعت واني الوم بنفسي مااعرف شسوي وشلون
اتصرف وياه...

ظليت بالصاله لحد المغرب اجت عمه وكمت اسوي عشه
جنت دايره وجهي اسوي زلاطه وحسيت ع اديه حضنت
خصري وباسني من كتفي من وره وكال اعتذر

لبابه.. بيني وبين نفسي احجي لبابه قوي حالج
اتحملي هو مريض درت علي مبتسمه كتله لاتعتذر
شلون صرت؟

جراح.. لاتضغطين ع نفسج بسبيل ارتاح ترى تهلكين
نفسج قبل اوانه بس اذا شفتيني موتمام عوفيني
وباسني من راسي..

لبابه.. هسه عوفك من الموضوع كلي شسويلك
عشه انت متاكل كبه
جراح.. لاتسوين بس جاي لان مااشتهي
لبابه.. رفعت رجليه بسته من خده كرصني بشقه وراح
يصلي...

كملنه عشه جان يدك تليفون عمه اني كاعده بصفه
ومخلي ايده وره ظهري شافت الرقم جان دكول هاي
ام نوال فتحت خط حجت وياهه من سدته جان دكول
باجر يجون يمنه خالك رايح للنجف ويجيبهم يمنه

جراح.. هاااااا
ابرار.. انت تدري نوال فسخت خطبتهه وصارت مشكله
ويه اهل الولد لان دكله مااريدك
جراح.. ماتعذرتي منهم يايمه مالي خلك مشاكل
زينب..شكول والله استحي

لبابه.. كلبي دب الخوف بي باجر اشوف نوال ووضع جراح
مايسمح لازم ابذل كل جهدي هاي الايام حته يكون طبيعي
وماتأثر بي..

شويه وكام طلع يم جماعته واسمع صوت ماما تصيح
ع فجر نزلت يمهم واشوفهه لازمه فجر وعقيق
وترزل بيهن سألتهه ماما شكو؟؟

ساهره.. راح يموتني هذني ولج شوفي وشالت صينيه
ممسوحه مسح بقايا تمر وراشي ماكلاتهه كلهه
وفوكاهه عقيق متخربطه

هاي فجيران انهرشت عليه شوفي صايره جنهه دبة غاز
وانوب توكل بالبنيه ورفعت سكرهه خلي اشوفج
توصلين يم الدبس والراشي وشوفي شسوي بيج

فجر.. ماكو بعد دبس خلص
ساهره.. راح تخبليني كومي من كدامي
وخابري السبع يجي لمرته لاتموت علينه
فجر.. ماتموت هو تمغ وغاشي قابل تيزاب

لبابه.. اضحك عليهن وماما من كل عقلهه معصبه
اجه السبع اخذ عقيق وحجه عليهه شلون تاكلين هلكد
موزين ع سكرج واحنه انريد سكرج طبيعي

عقيق.. فجر قشمرتني
السبع.. بويه فجر شعليهه كولي انه مشتهيه حلا
عقيق.. شسوي بالحلا انت حلو

جنه هستوني طابين بيتنه بعدنه بالمطبخ من حجيت
هيج كال شو عيدي صايره خوش تحجين

عقيق.. هو انت مثل التمر وراشي من تجي يمي
اتخربط
السبع.. خوش غزل وشالني كعدني ع الكاونتر
وكال هسه انتي ماكله صينيه تمر وراشي واجي ابوسج
خاف تذوبين واكعد المج

عقيق.. لا بوسني واطيب
السبع.. منين ابوسج
عقيق.. رفعت راسي عندي شامه بركبتي كتله منا
السبع.. الصبر ياربي الصبر...

باسني من ركبتي حيل ورجع باسني من شفايفي
ودك تليفونه عاصم جاوبه كاله اني بالباب تعال
عندي شغله وياك سده وجرني من خشمي كال
الله يحبني ودزلي عاصم لان بعد مااكدر اجاهد...

فجر... ماما سني يوجعني
ساهره.. من الحلويات
فجر.. صاغ يومين مماكله
ساهره.. هسه اخابر ام اواب تحجزلنه واخذج يشلعه ونخلص

فجر.. بدلنه العصر واخذنه جراح وصلني السره
دخلنه اني وماما جان مدنك يكتب بس شافنه
انصدم يباوع عليه ومصدوم من شكلي شافني جنت
طبيعيه هسه سمنانه عشر كيلوات..

ماما شرحتله الوضع وكلساع وكالتله تاكل حلا هواي
اشرلي اصعد نمت ع السديه وماما كاعده بعيده..
بيني وبين نفسي اجاني شعور غريب وبنفس
الوقت دكات كلبي زادت..

كعد يم راسي وكال افتحي حلكج فتحت حلكي صغير
كال بعد كتله هو هذا حده ابتسم ودخل مال الفحص
يفحصه كال هاي رحاتج الاخيره تعبانه هسه نشلعهه

خفت كتله غير مره كال لا تظل تصل عليج جاب ابره
بنج وماما دكله اي اشلعهه خلصنه منهه حته ماتاكل
حلويات بعد...

ضربني ابره البنج وكال دقايق ونبدي بين ماسولف ويه
ماما وحضر الادوات خدرت كام يشتغل بيهه ويسولف
ويه ماما تأذيت شويه وبعدهه صار الالم اقوى لزمت
ايده بحركه لا اراديه لا اكدر اصيح شاك حلكي

بصوت ناصي كال اثبتي خلصت مغمضه عيوني
بس الم قوي شلعهه وشمرهه كال هذا الالم للبصفهه هم
ملتهبه اذا مااعتنت بيهه هم يجيهه السره وتنشلع

نزلت حلكي مورم كتب وصفه وراحت ماما تجيبهه
وعافتني يمه رجع نفسه ع الكرسي وكال منيلج
هاي الخدود ماشاء الله

فجر.. اريد اكله كل اعوذ برب الفلق بس مااكدر
احجي عينه مركزه عليه كلما ارفع راسي يباوعلي
ويه رفعه راسي ركزت علي ملامحه عاديه مواسمر حنطاوي
عيونه صغار خشمه رفيع جسمه معتدل رشيق..

فززني صوته وهو يكول وين وصلتي بسرعه
درت وجهي اجت ماما وعلمنه ع العلاج وطلعنه
خليت ايدي ع كلبي شنو سبب هالاحساس الغريب
من اشوفه...

لبابه.. كعدت الصبح جراح راح للمعامله واني وعمه
نشتغل ام نوال بس تقلد ماردنه تلگه زله
صارت ب11 دك تليفون عمه كالهه اخوهه احنه وصلنه..

اباوعلهم من فوك يسحلن بالجنط هي وامهه
والظاهر ناويت اقاومه وفسخت الخطبه وتعالي
يالبابه اتحملي ...

صعدن سلمت عليهن ورحت للمطبخ ابونوال راح
وكال عندي شغل بالنجف وعمه كلبهه طيب ويبقه
اخوهه رحبنه بيهن ويسولفن سوالف عاديه بس
نوال نفس حركاتهه وماتباوع بوجهي ابد ..

صارت الصلاة راحت عمه تصلي واني بالمطبخ
شفت نوال وحدهه بالصاله وبيدهه تليفونهه
رحت لغرفتي خاف متصل جراح وماسامعه التليفون

من وصلت للباب اسمعهه تخابر وتهمس بالتليفون
حته لاواحد يسمعهه دكله وين صرت اجينه من 11
منتظرتك مراح اتغده اله تجي مشتاقتلك ياجرح گلبي..


يتبع....

#خبايا_الاقدار
❤️♨️♨️

... البارت الخامس والاربعون

وين افضفضهة
حسرتي ابيا مسامع ..؟
خاف افزن والگة جرحي
معلگ بروس الشوارع ..
....

لبابه.. وكفت بمكاني مصدومه بكلامهه لاول مره
اتنصت ع بشر لزكت اذني بالحايط واسمعهه مستمره
بالمكالمه بحيث تسكت وهو يحجي وترد علي دكله
دتعال موگلبي طاك عليك

نوال.. لك جراحي صار شكد ماشايفتك ميته
ع شوفتك وهاي مرتك عبالك تراقبني انت انتبه
من عدهه لاتشوفنه بين مايطلع جوازي..

لبابه.. البوخه تصعد لراسي احس انفاسي تلهب
شنو جواز شنو تحجي وياه بكلام اني ماحاجيته
وهو يستمعلهه وتضحك يريد يسافر ويستغلني
لو شنو ؟؟

ماكدرت اوكف كعدت بالكاع ومصدومه مابجيت
ولا طلعت هديت عليهه كل الصار اعصابي
تشنجت وداخلي يغلي ومااريد افقد السيطره
من العصبيه..

اخذت نفس عالي وظليت افتر بالغرفه ياربي
شسوي ساعدني اطلع اواجهه لو اخابر جراح
اتعارك وياه لو اكول لعمه لو اهد ع امهه واكلهه بنتج
جايه بنص بيتي وتتغزل برجلي مااعرف مااعرف شسوي..

لازمه تليفوني لكيت نفسي اتصل بفجر صح اصغر
مني بس دائما ارتاح بنصيحتهه ودائما تجي مضبوطه
خابرت ع ماما جاوبتني امي عبالهه بيه شي كتلهه
لا اريد فجر اسالهه ع الحلاوه شلون تسويهه..

اخذت التليفون من ماما وكالت الو كتلهه روحي
من يم ماما لا تسمعج
فجر.. شكووو؟؟
لبابه.. لتحجين لاحد بس ساعديني شسوي
فجر.. احجي شكوو؟

لبابه... اجت نوال وامهه وسمعتهه تخابر بجراح
دكله ياجرح كلبي وراح انتظرك ع الغده ودكله ديربالك
لالبابه تحس بين مايطلع الحواز

فجر.. اياااا حشغره( حشره) شعدهه جايه
لبابه.. كليلي شسوي اطلع اتعارك وياهه لو اكول لعمه
فجر.. هوب هوب لاهيج ولاهيج

سوي نفسج عاديه ومن يجي جغاح هم سوي نفسج
طبيعيه وخلي عينج عليهم اثنينهم غاقبيهم (راقبيهم)
صيغي شديده انتباه والزميهم بالجغم ( الجرم) المشهود
هاي اذا ماطلعت كذابه ...

لبابه.. ماشي خلي اطلع وقت غده وخلي تليفون ماما
يمج من احتاجج اخابرج
فجر.. دزيلي ماعون حلاوه
لبابه.. ولي راح تنفجرين من الاكل هسه اكول لماما
فجر.. مااغيد عندي حبشكلات بالكنتوغ

لبابه.. سديته من فجر ورحت للمرايه صافنه ع نفسي
كلت خلي ابدل بدلت ملابسي لبست تراك جديد من ملابس النيشان وخليت حمره خفيفه وشعري فتحه ذيل حصان
وطلعت..

لكيت عمه وامهه كاعدات وهي رجل ع رجل باوعتلي
صفح ودارت وجهه عبرتهه رحت للمطبخ جذب اذا اكول
اسوي نفسي مامهتمه بس جاي احاول اضبط نفسي...

كملت الشغل وحدي بس بدون واهس كلامهه يرن بأذاني
سمعت الاذان يأذن توضيت ورحت للغرفه كملت صلاة
دك تليفوني جراح بس شفت اسمه بلحظه ردت افتح
خط واصيح واتعارك بس تعوذت من الشيطان

جراح.. هالبابه احجي ليش ساكته الووو
لبابه.. هاجراح اسمعك
جراح.. بيج شي؟
لبابه.. لامابيه شي جنت اصلي
جراح... محتاجين شي اجيب وياي

لبابه.. لااا .. ترجع موكلت اتأخر
جراح.. كملت المعامله وبعد تجي الموافقه من بغداد
ويدزون علينه راح امر ع ابرار اجيبهه واجي
لبابه.. ماشي راح ننتظرك ع الغده

كوه اطلع الحجايه يعني صدك جانت تحجي وياه
هو كال اني العصر اجي اتاخر وهسه وره مكالمتهه
كال راح اجي لا ياربي اذا بهذيج المره اتحملت وصبرت
بحجة حالته النفسيه هسه اتخبل اذا خاني وبعده يحبهه..

طلعت كعدت يمهن كالت عمه صبي غده يمه كتلهه جراح
جاي بالطريق هو وابرار ننتظرهم من حجيت هيج نوال
ابتسمت وباوعت بطرف عينهه وكانو دكول شفتي رجع
علمودي..

جانن يحجن بمواضيع عامه واني ساكته ماشاركت
صارت ب1 انفتح الباب دخلت ابرار وجراح وراهه
سلمت عليهن وهو كال السلام عليكم بدون حته مايلتفت
ودخل للغرفه ..

اشرتلي براسهه عمه معناتهه كومي وراه كمت للغرفه
جان كاعد ع الجربايه ينزع بجواريبه وكفت يمه
كتله تسبح جاوبني ااي اسبح واصلي يله اتغده

لبابه.. خلي احضرلك الحمام
جراح .. مايحتاج بس انطيني تراك وروحي صبي غده
لبابه... هزيت راسي وطلعت مااكدر امثل اني طبيعيه
اصلا حته مبين ع وجهي شلون مگلوب اشما احاول
ابتسم تطلع الخزره لا ارادي..

ابرار بدلت واجت يمي ساعدتني انتبهت عليه كالت
شبيج ضايجه كتلهه مابيه شي
ابرار.. موهذا وجهج معبس خاف مقهوره من نوال ترى
معروفه عديمه كرامه لو انه بمكانهه لو اموت لو اعرف ابات
بالشارع ماادخل بيت مامرحب بيه ..

لبابه.. شسويلهه فشله من عمه
ابرار.. ماما تحب اخوهه شيسوي بيهه وتحبه لان ماعدهه بس هالاخ ومتمسكه بي ماتريد تخسره ندري بيج بتنه واخلاقج
عاليه وتتجاوزيهه ترى تتعمد تغثج اتجنبيهه ..

انتي تعرفين حاله اخوي ماتسمح حته للمشاكل انه اعرف
كلشي عن جراح وادري بيج جاي تسندي وتوكفين وياه
حته يطلع من حالته النفسيه وهذا قبل ماانشكرج احنه
الج اجر عن الله ..

لبابه.. واجبي هذا لاتحجين هيج كدامه تحسسي جاي
اعطف علي اني اريده يتشافه باقرب وقت بس موبيدي
اتحمل نوال

ابرار.. انه عشت وياهم وشفت العجب منهه هي وامهه
عدهن قابليه جذب موطبيعيه يجذبن ويصدكن نفسهن
واليحطنه براسهن يخربن ومايفكرن بكلشي بس المهم
يحصلن الي يريدنه لذلك انتبهي واتنجبيهه ..

لبابه.. حجيت بگلبي خاف عوزني قهر واجتني هاي
وفوكاهه بحيره اكو صوت بداخلي يكول لاتصدكيهه
جراح بوضع مايتقبل اي شي وبعدين منو جابره يعوفهه
ويتزوجني..

كملت صب وخليته ع الميز ورحت كتلهن تفضلن وصحت جراح اجه كعد بصفي وهي صارت كدامه عين بعين فد صلفه
مادكول مرته كاعده وامه عيب ابد ماتنزل عينهه ابد

اكل جراح قليل وياكل ع كيفه عيني تتنقل بينهه وبينه
هو مارفع راسه ولا حجه حته امهه سألته عن دوامه بس
جاوبهه راح ارجع وسكت كمل اكله...

جان غدانه سمك شوي وتمن احمر وعمه كالت سوي دجاج
خاف ماياكلن ماحاسه بطعم الاكل بس تقرب عليه وكال
اكلي بطلي صفنات وشال سمك وخلاهه كدامي يفلس ويخلي
ع التمن ...

تعمدت اباوعلهه شلون اغتاضت حته ماكملت اكلهه
كالت شبعت وكامت شعور خفيف انتابني كملت اكلي وكمت سويت جاي وهو راح للغرفه..

ابد ماكعد يمهن وابد مادار حديث بيناتهم شي غريب
لعد شنو هاي المكالمه وشتقصد بيهه وهي دكله جرح
كلبي معقوله متعمده؟؟ ظليت ع وضعي واريد نهايتهه شنو؟؟

كملت غسل مواعين اني وابرار ورحت للغرفه لگيته
مدد ويگلب بتليفونه اخذت ملابس ورحت للحمام
سبحت بدون ماابلل شعري واجيت مددت بصفه
جنت تعبانه وظهري يوجعني .

جراح.. التفت عليه وخله ايده جوه راسه وكال
هم تعرفين اخبار رانيا؟
لبابه.. موهوايه اخابرهه بس ماما يوميه تخابرهه
دكول زينه ليش تسأل؟

جراح.. اليوم الصبح من طلعت لكيت السبع بالباب
يخابر بضرغام ويتعارك وياه وكاله اذا رحت ازعل
عليك ولادكول عندي اخوان بعد ومن سده كتله
شبي ضرغام؟؟

كال مكان خطر ورايحله وشغله تحقيق ويه ارهابين
درجه اولى وحته جاي تجي جماعات تهدده مثل سالفته
الاولى بس مامهتم يكله خلي يهددوني ماعندي شي اخسره!!

لبابه.. خطيه اثنينهم رانيا تحب ضرغام وانجبرت تعوفه
هي عدهه اولادهه بالدرجة الاولى وهم بعدهم صغار
بس ضرغام مايستاهل

جراح.. من جنه صغار انه اصغرهم بس اتذكر مواقف قويه
ضرغام الوحيد عنده طاقة تحمل من جان جبار يكتلنه السبع يغلط وعصبي ويقاوم بس ضرغام جان يستفز جبار يخلي يتخبل..

جنه وره الكتله نظل نتألم الحزام طابع ع ظهرنه بس هو
بنفس اللحظه يكوم ويطلع وعادي يلعب لو يفتر بالبستان
بدون مايكول اخ ومتأذي..

لبابه.. مبين هو حته عصبيته تختلف عنكم
جراح.. حته من ماتت مرته واولاده تشوفي حزين مثل هسه
بس ابد ماشارك احد بحزنه نكعد ونسولف وياه بس
مايحجي وهسه نفس الشي من نذكر اسم رانيا بسرعه
يعوفنه ويگوم

لبابه.. الله يباوع لحالهم اثنينهم خطيه كل واحد بيهم
محتاج الثاني واثنينهم مجروحين
جراح.. ونعم بالله
لبابه.. اتذكرت شي اريد اسألك

جراح.. كولي
لبابه .. من اجينه للقصر جنت اشوف السبع مرات
تتضارب انت وياه لحدماتعبون

جراح.. ضحك هذا من يعصب لو انه لوضرغام يفرغ
عصبيته بينه اقل حجايه مايتحملهه جان موضوع
اهله حيل مأثر بي بس من اجت عقيق السبع تغير
تغير جذري ..

لبابه.. هويحبهه حيل
جراح.. اي يحبهه والدليل مايتمنى تنكشف الحقيقه
حته لاياخذ بثار ابو وتظل وحيده وراه كل همه
هسه عقيق..

لبابه.. هو يحجي واني اباوعله رموشه طوال وعيونه سود
خشمه رفيع وجهه بالطول لحيته محدده خفيفه مقدمه
شعره مرفوعه من حالهه...

ابتسم بوجهي ومد اصبعه ع وجهي يحرك بي
ع ملامحي بده من حواجبي لخدودي ع اطراف
شفتي غمضت عيوني وبلعت ريگي
كام يحجي واني مغمضه واصبعه الجبير يتحرك
بخفه ع شفايفي ..

جراح.. خاف دكولين يبالغ بالحجي بس صاير حته
مااحب اطلع من البيت لان ارتاح من اشوفج
اول ماافتح عيني الصبح اظل هواي اباوعلج ويوم عن
يوم احبج اكثر ..

من اول يوم اجيتي بي للقصر عجبني لون شعرج
جنتي صغيره وبدون حجاب وره اسبوع شفتج
اطلعين بحجاب سألت امي كالت جبار شاد وياهن
هن وامهن..

بمرور الايام شفتج اطلعين من الفجر للشغل
ومن حاجيت جبار كام يصيح ويغلط تركته
وكمت ادز واحد من الزلم ابمكانج اكلهم خلوهه تكعد وانتو
كملوا الشغل ..

لبابه.. فتحت عيني كتله صدك جان يجي واحد يكلي
عمي اكعدي لا تحوشين تين اني اشتغل بمكانج
يعني انت جنت مراقبني

جراح.. لا مومراقبه بس ماادري ليش مهتم بيج
وبيوم الي انهزمنه للبستان جان جبار يريد يزوجج لابن عباس وخير امج لو تزوجه لو تنطي بتهه وامج اختارت تنطيج
لابن عباس وماادري شلون لكيت نفسي اصيح ومنفعل
ودفعت جبار واخذتج بيومهه عرفت انتي براسي

لبابه.. ونوال؟
جراح.. ماتصدكين ادري بيج بس وروح ابوي قبل لاتجون للقصر ب6 اشهر انه ونوال واحد مايعرف الثاني
قررت ابدي حياة بعيد عنهه واحب واتزوج وطلعتهه من عقلي

مرات الانسان يخلصله علاقه مده سنه اوسنتين وعباله
يحب بس هو مجرد تعويد اليحب مايكدر يترك ومن تركت
نوال عرفت نفسي مااحب صح انعجبت بيهه وتوددت الهه
بس ماحبيتهه مثلج

لبابه.. هم حاجتك هسه؟
جراح.. لا ماشوفين ماطلعت ادري بيج تتحسنين منهه
لبابه..شكد راح يبقون؟
جراح.. ماادري خالي لاگي شغل بالنجف ورايح ماادري
شكد عوفج منهه لاتخليهه ابالج

لبابه.. سكتت وقابلته بابتسامه مد ايده جوه راسي
وسحبني بتردد علي يخاف يحضني وارفضه
ضميت راسي بحضنه وهو يلعب بشعري ..

فززنه صوت التليفون عاصم يتصل فتح خط جاوبه
كاله معزومين كلكم ع الغده باجر الشيخ جبار مسوي
ثواب ع روح عامر ووسن ظل يتعذر جراح مايريد يروح
بس جبار اخذ التليفون واسمع صوته عالي ويكله ازعل
عليكم اريد ارضي السبع ..

سده منه وهو صافن كال منه من الشيطان
جبار وراه بلاوي مايسكت لازم يخطط لشي
ماشايف هيج بشر يكره ابن اخو جبار يكره
السبع ويتمنى موتت السبع اليوم قبل باجر..

لبابه.. اسم الله بجبار ولا بالسبع لان احسن منه
يكرهه خلي يولي
جراح.. خلي انام شويه معزوم ع عشه عود كعديني
لاتخليني نايم

لبابه.. ظليت بحضنه لحدماغفه جاي اشوفه يتحسن
اكثر بس بقت مكالمه نوال شاغله بالي ماكو شي مبين
ع جراح نهائي بس شتقصد معقوله تكذب؟؟

من غفه سحبت نفسي من حضنه ونزلت اخذت تليفونه وركضت للحمام مامخلي رمز عبالي بي رمز جنت خايفه
خاف يشوفني..

شفت الرسائل كلهه ماكوشي رحت للمكالمات وبنفس وقت الي خابرت بي نوال هم ماكو شي اصلا محد متصل بي بس اني
اخذتني الحيره هيج انسانه تخوف ومبينه نيتهه سيئه...

كعدت جراح المغرب بدل وراح للعشه واني استأذنت من عمه
ونزلت يم ماما اريد اخلص من نوال وشوفتهه
وصوتهن هي وامهه هارجات البيت هرج..

طبيت للغرفه جانت فجر مطلعه ملابسهه تعزل بيهم
كعدت اسولفلهه ع نوال وهي ترتيب بملابسهه
اجت عيني قمصله نيلي مبينه رجاليه سحبتهه بسرعه
وكتلهه منيلج هاي؟؟

فجر... من اواب
لبابه.. عزه بعينج وفوكاهه دكولهه بسرعه شجاب
اواب عليج؟

فجر.. من غحت لشيخ ياسين مطغت الدنيا وانطاني
لبابه.. وماما تدري
فجر.. لاا
لبابه.. وشكو محتفظه بيهه
فجر.. غاليه وحلوه ليش اذبهه تفيد بالمطغ

لبابه.. لج فجر خاف معجبه بي
فجر.. حتلو انعجب بي مو وقتهه اكمل دغاسه وعود
انعجب
لبابه.. موهي بكيفج شوكت ماتريدين
فجر.. الحب موجود في كل زمان وكل مكان

لبابه.. معناتهه تفكرين بي اني حاسه
فجر.. عادي صح مرات يجي ابالي بس مو حب
لبابه.. ماانطت مجال بسرعه لمت الملابس وكامت
والله يافجر اذا صدك الله يساعد الدكتور عليج
احنه اهلج وماافتهمناج عاد هو شلون؟؟

عقيق.. تليفون السبع ماسكت ابد كلساع واحد يتصل
اخر شي خابره واحد شيخ يكله ابو علاء وظل كومه يسولف وياه حته يحضر عزيمه جبار لان السبع زعلان وجبار مسوي عشه حته يكسر الشر..

اخر شي استحه منه وكال مااكدر ارد ابو علاء وكال كومي حضري نفسج وانه اروح اشوف ام شهد متحضره
كمت للكنتور طعلت تنوره عدله وقميص شيفون
احلى من الفستان طويل عليه ويشحط وراي..

كملت كلشي واجه هو بدل تاكدت من الغاز مسدود
من طلع من الغرفه ابتسمت لابس دشداشه نيلي
ولاف شماغ ع راسه وواكف بباب الغرفه يلبس
بساعته .

طالع حلو ظلت عيوني مركزه علي وين مايتحرك
هو مامنتبه لان جان يخابر من سده باوعلي عينه
صعدت ونزلت ع طولي شال تليفونه والسويج
خلاهم بجيبه وتقرب عليه..

جانت دكمه القميص من فوك مفتوحه مامتتبهه عليهه
سدهه بايد وحده والثانيه حاضنه خصري جنت
لابسه حجابي رفعه من الجهه البيهه شامه وباسني
منهه..

السبع.. يله امشي خلي انروح بس ماتعوفين ام شهد
ابد ترى اشكال راح تلگين التحجي لاترديهه
دزيهه عليه حته اشعل ابوهه

عقيق.. محد يحجي وخاله ساهره متخلي احد يحجي
عليه هي ادافعلي
السبع.. خاف وحده تذكر سالفه الحمل كولي السبع
مأجله علمود السنه عندي مدرسه

عقيق.. يعني اجذب
السبع.. جذبه بيضه وبعدين موصدك اني مأجله ترى
اذا اريد محد يمنعني بس خوفي ع صحتج اهم من كلشي صيري زينه واترسي البيت جهال

عقيق.. مويكولن السبع جبير وبعد مايخلف
السبع.. لابويه اخلف لوعمري 90 امشي كدامي
لااغير رأي ومانروح

عقيق.. راحت ويانه خاله وفجر قبل مانوصل القصر
بعدنه بالشارع وصوت طلقات ورمي هواي
السبع خفف السرعه ومستغرب من الصوت ليش
ويه جيتنه..

قريب مانوصل للقصر واشوف زلم اجت تركض
من البستان ومدري منو يرمي بسرعه السبع
فتح الجكمجه وطلع مسدسه واني لازمه بيده
اتوسله لاينزل ..
.
يتبع........

#خبايا_الاقدار
❤️♨️♨️

... البارت السادس والاربعون


أثاريني " بواچي" شما حضيت بخد
وأثاريني حچي ،ب گلب الرساله،
الـ ما قراها أحد
شثگل حزنه ؟؟
اليطشر واهسه أعله البوب ؟
ويرد تاكل بگلبه حچاية الـ محد...
...

عقيق.. لزمت السبع من ايده ماخليته ينزل صوت رمي صار قوي سحب ايده مني حيل وكال لاتخافن بس اشوف شكو
بس اني بسرعه بجيت واتوسل بي ...

التفت عليه وهو واكف بره مسدسه بيده ويباوع جهه القصر
خليت اديه ع وجهي وكمت ابجي بصوت مااريده يموت
وخاله ساهره تتوسل اصعد خلي نرجع ..

رجع صعد وكال كافي عقيق عليمن هالبجي ورجع السياره
ليورا بسرعه يرجع بك للراس الشارع وشال تليفونه
خابر ع جراح مايرد دك ع ضرغام

يحجي وياه وماادري شيگله بس كاله انت متاكد
هذا الرمي ع شنو ماخافو واحد يموت؟؟ ظل يحجي
ويه ضرغام وسده..

ساهره... شكو السبع شنو هالرمي عليمن؟
السبع.. يكول ضرغام ع اساس مسوين عراضه لان جبار
حال مشكله بس هم ماتدخل بعقلي اخذي حذر ام شهد
وعينج ع البنات ..

ساهره.. خلي نرجع
السبع.. ماترهم انطيتهم كلمه نجي وجراح وصل كدامنه
ع كد الغده ونرجع مانتاخر
عقيق.. اني مااروح
السبع.. ماكوشي لاتخافين تكعدين يم ام شهد هي ساعه
ونرجع

عقيق.. رجع حرك السياره ونزل بشارع القصر
اكو زلم هواي وسيارات دك هورن ابتعدوا وافتر من جهه البستان ع الباب الخلفي ..

نزلنه وكال روحن منا وانه راح اروح للمضيف
امشي وره خاله تلگتنه الجهال شكثرهه اموت من هوستهم
لان اشكال عجيبه غريبه وكرايبهم هواي ولازم اسمع حجايه

دخلنه ع الصاله من الممر مادخلنه من المطبخ خاله وين
ماتسلم اسلم وياهه اعرف عمات السبع نوفه وام جاسم
كعدنه يمهن ولگينه لبابه وام جراح ونوال وامهه هم جايات..

عيني ادور ع الكل الي تباوعلي مبتسمه والي تباوع بحقد
وحده منهن ايناس كلساع تخزرني واني ادنك شراح يخلصه
الغده حته نفسي انسدت ..

ام جاسم.. شعلومج يمرت السبع؟
عقيق.. الحمدلله بخير
ام جاسم.. چااا صارلج شكد من عرستي ماحبلتي
شنهي هاي بنياتنه يشيلن من اول ليله

عقيق ... باوعت لخاله ساهره اريدهه ترد بمكاني بوسط
هاي النسوان وكلهه تباوع وتسمع الحديث ردت عليهه ام
جراح بهدوء..

ام جراح.. ام جاسم بعدهه صغيره وتدرس لاحگه
ع هوسة الجهال
ام جاسم.. شلاحگه يخايبه البكد السبع جهالهم بطولهم
زلم عرسان وهذا لسه حاطله فرخه ماتخلف
شنهي يظل يتصرف من راسه

ساهره..داده قابل صغير هو اختارهه وهو ساكت عنهه
واني كل مره اسأله يكول اريدهه تكمل سادس
يله نخلف حته ماتنشغل بالدراسه بعد

نوفه.. هي البت مگطوعه من شجره لا ام ولا ابو
وهو مدري منين لفاهه والله اعلم الجان مالكاهه بالشارع
وجابهه بنص الگصر

ساهره.. شنو هالحجي مردود عليج حجيه الحجي هذا
مينكال لمرت السبع لو سمع كلامج توقعي يسكت
لو لازم كل لمه ومناسبه تتخشن الخواطر

نوفه.. ماحجينه غير الصگد چاا هي وين اهلهه
ازلامنه كالو لگاهه بالشارع وجابهه وهسه صارت
مرته وهي دخيله واخذت خيرة زلمنه

عقيق.. كلبي يفور شتحجي هاي ولااكدر اجاوبهه
حته مااكدر اباوع بوجه الكاعدات لان صار التبسبس
بفلس واسمع طراطيش حجي ياصدك ماعدهه اهل؟
ياا صدك لكاهه بالشارع؟ واكثر كلمه غثتني هي مبينه
مريضه من اجت وتعالجت...

ابلع بالغصه وساكته وخاله وام جراح الوحيدات
يدافعن عني كلساع فجر تريد تحجي وتگرصهه
خاله تسكتهه صاحت خديجه مرت جبار كالت شلجن
بهالسالفه احنه مسوين غده نرضي لو نتعارك لايسمع
وتصير هوسه

سكتن كلهن بس عيونهن عليه اني ماعندي اذيه
ع احد ليش هيج يذمن وليش يكرهني يعني
واذا يتيمه واذا لكاني بالشارع مو انسانه مالي حق
اعيش حياة كريمه ؟؟ لو مدام ابن شيوخ لازم ياخذ
شيخه يله يسكتن ؟؟

خلصت مني اندارت ع لبابه كالت ومرت جريح
ماحبلت ؟؟ ردت عليهه ام جراح وهي تمسح ع كتف
لبابه وكالت بعدهه هستوهم صارلهم 40 يوم خليهم
متونسين بعدهم عرسان

ام جاسم.. كل وحده ادافع لحبيبتهه وهن بيهن عيبه
نسوان اخر وكت يبطن اشهر وهن مايحبلن
حوبت بنياتنه عبنهم اختاروا وعافوا بنات الگصر شحلاتهن...

ذاك ضرغام خطبله وحده تتموع كدامه سحلته سحل
وتالي دارت ظهرهه وعافته چااا شتدري من تموعت
كدام الزلمه وهسه جهالي وجهالي..

ساهره.. البنيه غايبه لاتجيبين اسمهه محد يخلص من
الغيبه قسمه ونصيب وماتمت شنو اول وحده اخر وحده
عفيه اذا دازين علينه حته تسمعونه كلام يغث احنه نترخص
البينه مكفينه...

عقيق.. كلهه سكتت وام جاسم طكت الجكاره ولمت النسوان
داير مدايرهه ويحجن فلان هيج وفلان هيج لحدما اجت
خديجه كالت راح نمد السماط اجه الغده..

فرشوا السفره وكاموا يوزعون الاكل اباوعله صواني صغار
ومتروسه لحم بس نفسي مسدوده من كلشي واساسا
مااكل اللحم ظليت اكل بس تمن ...

كملنه الغده ورجعنه لمكانه محد راح كلهن كاعدات
يمكن ساعه احنه ع كعدتنه منتظرين السبع يصيحنه
حته انروح لبابه بصفي ونوال كدامهه اكو صفه مشتركه
بهاي النسوان الي بالقصر كلهه عديمه كرامه

نسمع صوت هوسه بالمطبخ بالاول ماميزت بس
كلهه انتبهت ع صوت عاصم وهو يصيح ابوي وين
يريد يوصل شنهي هالسوالف عمي مايكدر بدون هجمان
بيوت..

يسكتن بي ومرته دكله صوتك لحد. يسمعك وطلعنه بره
شويه وطبت هيام تضحك كعدت بنص النسوان وتخرخش
بالسوارات مالاتهه سألتهه ام جاسم شبي عصيم؟؟

هيام... هههه مابي شي الشيخ عنده حكمه بكلشي
وهسه شيوخ الناصريه موجوده وهو كال اخوجن
اريد اكسر حاجز الشر بيني وبين اخوي وسوه هالعزومه
وهسه بالديوان منطي بنيت عمه ايناس مره للسبع ؟؟

عقيق.. افر براسي اريد اركز بكلامهه شنو مره للسبع
شنو ايناس خاله ساهره قربت نفسهه عليه وعين النسوان
عليه وايناس واكفه بباب المطبخ مبتسمه ..

ساهره.. شتحجين ام عباس شنو ايناس للسبع
السبع عنده مره شنو هالحجي؟؟
هيام.. واذا عنده مره كسر لشوكه الشر والعداوه انطا
بنيتنه الوحيده هديه وكدام شيوخ بعد

ام جراح.. والله ونسيتي الاصول انتي والشيخ بنت الشيخ
ماتنطي هديه مااستحه من حط من قدر شيختنه
ابآ عن جد تنحلف بروسنه تالي يجي جبار وينزل اسمهم

ام جاسم.. صگد حجي زينب شنهي هديه ولج هيام يمصكوعه
بنت الشيخ ماتنطي هديه كولي السبع رادهه مو الشيخ
انطاهه كدام الديوان..

نور...لا ابوي كال الشيخ كال للسبع انطيك بنتي حته
تتصافه النفوس والسبع كايله عندي مره وبنت عمي
ع راسي وبناتنه غاليات مايتوزعن بديوان

واحد من شيوخ الناصريه صديق الشيخ وكايل
للسبع مايصير ترفض بنت عمك بوسط الزلم
وتكوم تحب راس عمك وتكله مشكور ع العطيه

والسبع كايله انه ماادنك راسي وكلت عندي مره
وبنت عمي مااقبل ينحجي بيهه كدام كوم زلم
بس الصوج بابوهه النسه عاداتنه وتقاليدنه ..

ام جاسم.. كامت وكفت وكالت خلنه نطلع انشوف
هسه السبع يثور ع جبار امشي ولج ايناس شاگه
حلكج كيفتي اجاج السبع حاضر محضر..

عقيق.. صوت نفسي عالي خاله تهدي بيه ودكول
جذابات حتلو كالن هيج السبع مايسويهه
باوعتلهه وعيني مغرغره دموع خاله لايتزوج عليه!!

ساهره... اسكتي امي معروفه غايه هالنذل كون سم
بكلبه بجاه النبي وال بيته ينتقم منك ياجبار على
شلعان الگلب هذا وهجمان البيوت..

عقيق.. خاله كومي وياي نطلع اندور السبع والله اموت
اذا اتزوج خلي يتزوج بس موايناس خاله الله عليج
كومي كلبي كام يوجعني مااريد اتخربط يمهن..

بعدني اتوسل بخاله وهن مشمتات بيه وكلهه مأيده
الصار واليقهر يباركن لايناس اجت نور كالت السبع يكول
يله طلعت قبل الكل اركض للطرمه شافني كال ع كيفج
وين ام شهد ؟؟

وراي خاله كالتله هاالسبع خلينه انروح هز راسه وكال
يله مشه كدامنه للسياره ضرغام واكف بره وكف حجه
وياه واحنه صعدنه ولبابه وجراح طلعوا لسيارتهم..

بس صعد السبع كتله افتح الجامه فتحهه ويلفح
بيه الهوه روحي تريد تطلع جان يسوق بهدوء
حجت خاله ساهره كالتله صدك هالحجي مال جبار؟؟

السبع.. هذا الواحد من الله يريد يمذره يخلي
بي ومايصغر كدام الناس لو يستحي ماحجه هيج
وهي بنت شيخ بس يدري بروحه موشيخ بي حظ

ساهره.. شوف عقيق لاتتخربط ترى حته يباركن لايناس
السبع.. باوع عليه وكال ماكو هيج حجي وسكت

عقيق... زادت حالتي لان مابرر ولاحجه اكتفه بكلمتين
افرك بگلبي واكول لاتتخربطين كدامه اتحملي عقيق
اتحملي..

وصلنه للبيت خاله صاحتني اجي يمهه كالهه شويه
واجيبهه يمكم فتح باب المطبخ وطبيت ليجوه وهو يقفل بالباب كعدت ع الجربايه واستسلمت كمت ابجي بصوت

اجه يمي كعد بالكاع واني ع الجربايه كرفص كدامي
ولزم اديه وكال ليش هالبجي تتوقعين ابدلج بيوم؟
والله لو يهدولي بنات شيوخ الجنوب كلهه ماابدل اظفر
من عقيق..

عقيق.. ايناس فرحانه وتباوعلي وتضحك ويباركلهه
اني مااريد ضره وتقسم ايامك علينه احجي وابجي

السبع... لا مااقسمهن يومين الج ويوم الهه ميخالف
لازم اصير رجال حقاني الله مايرضه

عقيق.. يعني راح تزوجهه جريت اديه من عنده
رجعني لاهلي وديني لعمتي اني عرفتك تزوج وين
اكو واحد يتحمل وحده مريضه مثلي

بس ليش اخذتني للغده ليش خليتهم يكولون عليه
لكاهه بالشارع وبنت الشيخ مناسبه اله
كلهن يكولن حته خلفه ماتخلف وماعدهه لا ام ولا ابو

كام كعد بصفي وسحب راسي بحضنه
دفعته حيل كتله مااريدك وخر عني انت تقشمر بيه
دكلي مااتزوج عليج واتحمل واصبر وتالي ينطوك بنت عمك
هديه

السبع.. كافي كافي وروح ابوي اتشاقه وياج يابه
كل ايامي الج عدل ميت الج كافي عقيق لاتشهكين
لا ايناس ولا عشره مثلهه اقبل بيهن ..

بويه بنيتي الربيتهه بيدي شلون افرط بيهه ولج لو انطيج
عمري هم اظل مقصر انه احبج حب حقيقي محد يكدر
يبعدني عنج اتخله عن كلشي ولا اسمع هاي الشهكه

عقيق.. انت كلت تزوجهه؟
السبع.. مااتزوجهه بس اهدي انه كدامج شوكه نابته
ببلعوم جبار مايكدر يمشي سوالفه عليه هو هان نفسه
بهاي عملته ...

عقيق.. خاله دكول مايصير يرفضهه
السبع.. لعيونج كلشي يصير صح مايصير تنرفض كدام
الديوان وظليت ساكت لان العيبه عليه بس انه اعرف
شلون ارفض وماينجاب اسمي بالشين

تعاي تعاي وسحب راسي ع صدره ومد ايده
ع عيوني يمسح بايده وباسني من راسي
وخله ايده ع كلبي وكال اهدي محد يجبرني
ع اذيتج ابد..

عقيق.. رفعت راسي وعدلت كعدتي وكتله ليش
سكتت ماحجيت كدام خاله وكلت ارفضهه
شوسكتت؟؟

السبع.. والله عقيق انه رجال جبت عمري حاضن سلاحي
استحي من مواضيع النسوان ماكدرت احجي واهدي بيج
واسكت كدامهه واكلج حبيبتي وعقيقتي هاي وصلنه
للبيت وشتردين احجي..

عقيق.. ماتزوج عليه؟
السبع.. شتزوج هو انه متمم زواجي الاول حته اتزوج
الثاني گبل اتذكر ابوي جان من يكعد يكول لو يخيروني
امك بچفه والدنيا وملك من چفه ثانيه اختار امك

وهسه انه اكلج لو يخيروني بكنوز الدنيا كلهه ماابدل
شعره منج انتي تمشين ويه دمي ربيتج ع ايدي طفله
صغيره وكبرت كدامي شويه شويه شلون ابدلج وانتي
عوض الهي عن تعبي وصبري...

عقيق.. ممم كلبي بعده يوجعني
السبع.. يابويه كوه تريدين تفتحين باب الجهاد
والله بعد ماعندي صبر جنت گبل اصبر هسه الحيل
وياج راح

عقيق.. ميلت راسي ع كتفه حاوطني باديه ومددني
ع الجربايه مدد بصفي وايده جوه راسه خله ايده
ع كلبي من جوه القميص وكام يحرك بصوره دائريه مثل
كل مره ...

بديت اهدء واني مغمضه عيوني دك تليفونه بوسط
هدوئنه جان ضرغام يتصل وكاله انتظرك ع الشارع
سده منه وظل يلعب بشعري كال نامي انه اجيب عشه
وياي من اجي ...

غفيت ع لمساته وغطيت بنوم رغم جنت بوضع صعب
بس بسرعه تبدد الشعور عندي وتحول الى شعور حلو
ومريح واطئنيت اكثر...

لبابه.. من رجعنه للبيت جراح سبح وطلع راحن ويانه نوال
وامهه ورجعن ويانه بس اي حديث بينهه وبين جراح ماكو
لاحظته ابد ماباوعلهه ولا حته لفظ اسمهه..

عندي الم بظهري قوي مددت شويه دك تليفوني نور
استغربت شعدهه متصله فتحت خط حجتهن دفعه وحده
نور.. لبابه ماعندي رصيد بس ديربالج من هاي نويله
الحيه سمعتهه هي وايناس يتفقن يروحن لام عواد الكشافه
بذاك الصوب كلي لعمه زينب حته تراقبهه..

خلص رصيدهه وهي بعدهه تحجي بعد عوزني بس
السحر هو جراح وضعه موتمام وانوب سحر حته
يكوم يربطني خاف الليله الاولى عدت..

طلعت صحت عمه حجيتلهه كالت لاتخافين عيني عليهن
حته مااخليهن يطبخن ويتقربن للاكل شفت ابرار كالت القبولات
طالعه خابري جراح يجيب قبولج

ركضت للغرفه دكيت علي كال هسه اروح اشوفهن
ماطلعت من الغرفه ظليت مدده واتابع تلفزيون
صار قريب المغرب طلعت للمطبخ اني وابرار نسوي عشه

نوال وامهه بغرفه خاله وماالهن علاقه بينه بس
اني اخاف من الهدوء احسهن مثل جبار يكيدن
مكيده من يهدأن ...

لليل اجه جراح كال متعشي عفت العشه وركضت
للغرفه كتله شطلع قبولي جان واكف يفتح بقميصه
كال تربيه مبروك وابتسم

اني راضيه بقبولي الحمدلله كلشي يجي من الله
يفرحني نزع قميصه وشمره ع الجربايه وظل بالفانيله
الداخليه دار ظهره للكنتور يطلع ملابسه

عيني ع اكتافه شلون مشخطه اخذ تراك وكال راح اسبح
بس اريد تكويلي القميص الرصاصي باجر عندي مقابله
ويه الآمر هزيتله راسي وهو راح للحمام واني كويته
وعلگته

من طلع فاجأني وهو يفرش بالكاع كتله ليش ماتنام
ع الجربايه؟؟ حاجاني بتعب
جراح.. تعبان حيل ومااكدر اخذ العلاج خاف مااسيطر
ع حالي خليني انام هنا اليوم

لبابه.. شبيك اليوم مو ع بعضك صاير شي؟
جراح.. لا ماصاير شي بس العلاج تعبني جذب اي تحسن
ماكو اخذ العلاج زين اتركه اتخبل تعبت يالبابه
ومنظر هذيج الجثث والبنات العاريه وهي تطلب الرحمه
كدامي ..

لبابه.. جراح قبل شكم يوم قريت بالتلفزيون يكول الشي
الي يأذيك وتخاف منه احجي اكثر من مره حته تخلص
منه اذا تظل كاتمه بداخلك تتعب

جراح... شحجيلج؟
لبابه.. المريت بي كله الشي اليسيطر عليك احجي
جراح.. تعالي افركيلي راسي خليني اغفه واقفلي الباب
لحد يجي ويشوفنه بهيج وضع

لبابه.. تقربت يم راسه خليته ع رجلي كمت افرك بكصته
والعب بشعره شويه وهو مغمض شويه وحسيته غفه ظليت
اباوعله احبك رغم اذيتك ...

رجعت لفراشي مددت جانت الساعه هستوهه ب8 مومال نوم
بس هو نام تعبان تابعت مسلسل لحدما نعست
طفيت التلفزبون ونمت ...

ساهره... ولاصدريه تصير عليج من العام وحته هاي
الجديده طالعه بيهه جنج كونيه تمن

فجر.. ماما لاتقلدين عليه شوفي خصغي الجميل
ساهره.. وينه خصرج ولج يمعزايه محد ياخذج راح
تصيرين مثل ليالي جيرانه ببغداد شوفي عقيق شحلاتهه
ولج رايحه حاصره روحج بهالصدريه اليوم المديره اطيح حظج

فجر.. اشتغيلي وحده اكسين
ساهره.. البسي صايه فوكاهه
فجر.. ماما شدعوه هي مدغسه بنات ماشايفين وحده
دبه حميسه

ساهره... معترفه بروحج تعاي يمه عقيق خلي يجي الخط
اكعدي انتظري بين ماتكمل علف هاي العجله
فجر.. اكو لقب ظل يعتب عليج؟

وانتي عقيق منيلج هاي الصدغيه ؟ موكلتي مااشتغيت؟
عقيق.. البارحه السبع جابهه
فجر.. اني ماعندي السبع منو يجيبلي .. يله كومي شبعت
واجه الخط

عقيق... طلعنه اني وياهه هي بصف خامس واني بصف سادس
مدرستنه اهليه فتحوا اعدادي وخلانه السبع اثنينه فتحت جنطتي اريد اتاكد من كتبي شفت فلوس بجيب الجنطه
ابتسمت عرفته هو مخليلي مصروفي لان مرات انسه..

وصلنه للمدرسه اهليه نموذجيه نفسهه القديمه مالتي بس موسعيهه هي راحت لصفهه واني رحت للسادس العلمي
بصفي بنيه اسمهه ضحى مااعرف شلون اوصفهه كشكل
عاديه حالهه حال اي بنيه بس ممعتنيه بنفسهه

اكو بنات يعرفنهه جايات نقل من نفس مدرستهه كلهه
تتجنبهه وهي موطبيعيه اذا فتحن المروحه تكوم تسدهه
اذا المدرسه كومتهه تحضير تسوي نفسهه يغمى عليهه..
لو اذا حاسبتهه مدرسه تطلع من الصف وتروح تشتكي بالاداره وغير تطلب رقم الحارس وتخابر ع اهلهه دكلهم المدرسات
كتلوني يعني ارتكابيه..

اني مالي علاقه بيهه دخلت ام الفيزياء انطت تحضير وشرحت
وكالت اذا عدكم درس اقروا اني فتحت الادب اقره صاحت ام الفيزياء انتي البصف ضحى شسمج؟؟

كمت وكفت كتلهه عقيق
... عاشت الاسامي انتي متزوجه؟
.. اي ست
.. وشلون تكدرين ادرسين ليش تزوجتي وانتي صغيره؟
... اني عمري 21 وادرس خارجي

... استريحي ماما سباعيه اقري زين حته تنجحين
عقيق.. كعدت جان دكلي ضحى رجلج حلو؟ باوعتلهه
وسكتت شحاجيهه هاي كلت بكلبي اذا عالت بيه
اجيب فجر واجي...

خلص الدوام وطلعنه اندور ع الخط وكفت سياره كدامنه
نزل الجامه لابس نظاره كال اصعدن الخط مايجي عاطله
السياره اباوع لفجر هذا الملامحه باهته ومثل الماعاجبه الوضع

فتحنه الباب وصعدنه مدري شجاب اواب علينه بس احتمال
السبع مخابره وصلنه للبيت من نزلنه شفته باوع لفجر
ومصدوم بشكلهه حيل سمنانه كل اليشوفهه يتفاجىء

ضرغام... احس نفسي ضايع ورجعت لنقطه الصفر من طفولتي واني اصارع وحدي ياما جرعت مر بحياتي بس هذه الكاس ماينجرع بديتهه من وفاة ابوي وتيمت وربيت ع ايد جلاد لو امي الجنت اشوفهه خدامه لهيام ومااكدر احجي لو عائلتي واطفالي الراحوا بسببي ...

شكد احاول اضاهر بلقوه بس داخلي هش محطم
رانيا جانت الامل الوحيد اليخليني اتحمل
واتعده المريت بي ... جنت اكول مااحب بعد ولا حته
ارتبط. بس من شفتهه صارت دومهه متربعه براسي
وماردت اخسرهه بأي شكل من الاشكال..

شكد الانسان يحلم بس مرات
ماريد اغمض عيوني حتى لا احلم واشوفهه!!
حتى لاطيف رانيا يمر كدامي!!
حته لا اكعد مسلوب القوه واتمنى لو اشوفهه لحظه..

ثنينه مرينه بضروف صعبه ونفس الضروف الجمعتنه فركتنه شكد احاول اشغل بالي وتفكيري واشتغل اضعاف شغلي حتى اصدقائي الوياي ملو مني شكد حجو يمعود ماتريد روحك وين ماكو خطر وذاب نفسك هاي الروح امانه ولازم تحافظ عليهه

بس محد يحس،بلنار الشابه بين ضلوعي
في سبيل انسه بس بدون شعور الكه نفسي سارح بيها وصورتها كدام عيني مستحيل اكدر اعيش طبيعي بعد الصار ورانيا ماكو بحياتي، بعد مالونت ايامي ببتسامتها

اشتاگ لثولهه وفطاريتهه اول ماشفتهه اخذت نظره موحلوه
عليهه اكول خفيفه وتنطي مجال بس بمرور الوقت عرفتهه
فطيره وماتعرف تصرف وضعيفه حال..

جنت ماانام اذا مامرتي كدامي واعيد ذكرياتي وياهه
بس من حبيت رانيا رحت لقبرهه وكعدت اطلب منهه
السماح ماوفيت بوعدي الهه..

هذا الشهر الثالث يارانيااا اي خبر واي تفصيله ماكو
عنج اقاوم واقاوم حته لا اروح اسأل ساهره عنهه
حته لااسمع خبر منهه واضعف اكثر لا نسيت ولاتناسيت
اثنينهن مادبرتهن...

بعدهه ع ذمتي بس شيفيد ع لحظه يدك تليفوني
تطلب الطلاگ اذا عرفوا بيهه جمعتنه مستحيله
مدام اكو طرف ثالث بالموضوع كل الامال تصير
سراب..

اندل بيت اخوهه مرات اراقب من بعيد ماتطلع ابد
لاهي ولاامهه مرات اشوف اولادهه يرحون للمحل
ويرجعون يركضون ومبين الخوف عليهم..

حاسبلهه بدت المدارس والي ادري بي اخوهه سوالهه
نقل هواي اشياء مستغربهه شلون عايشه؟ ومعامله
اخوهه شلونهه؟ يتخيلي يضربهه واكوم افور ..

رانيا... كاعده بلغرفه والحزن مخيم على كل عضو بيه
بس من اشوف جهال كدام عيني اكول الحمد الله
بس ضرغام زدت عذابه عذاب ياريت ماشايفته
بحياتي ولامتقربه منه ...

جاي احتاج وجوده وياي احتاج احضنه
احتاج يطمني بكلامه ويكلي اني وياج لاتشيلين هم الله لايشوف نارك الفراك لعبده نار تحرك بيه وتلتهم اعضائي..

افتر بلبيت وحدي الجهال يلعبون احس البيت يخنك
اشتاقيت لعمه و البنات اشتاقيت للبصره
بكبرها لان هواها هوه احباب كلبي...

طلعت الرسائل اخر رساله من ضرغام اقره بيها واركز بكل حرف بيها نزلن دموعي على شاشه الموبايل واحس كلبي راح يطلع من بين اضلوعي مشتاقتله ليش اني من دون هاااي الناس فرحتي ناقصه؟؟

شنو ذنبي تزوجت رجال خاين ليش يحاربون حبنه شنو الجرم السويناه حتى نعيش بعاد والفراك هد حيلنه بذني الاشهر المرن تأكدت موتي ارحم ولا بعدي عنه ماكدر،

ماكدر ابعد تفكيري عنه ليل الله اليمر على ناس وتنامه اني اكضي اتكلب بفراشي ودموعي تحفر خدي كل مااذكر اخر
مره حجه وياي بيها لو من دار ضهره الي وطلع احس الموت اهون عليه نحطيت بين خيارين كلش صعب اختار ضرغام على حساب اطفالي ماكدر اعيش مرتاحه واطفالي بعيدين عني...

ماتحمل يخابروني يبجون ومحتاجين وماسويلهم شي،
ومن جهه ثانيه ضرغام اووف يضرغام الضاهر مكتوبلنه نعيش بنار الفراك ومقسوملنه نعيش ابعاد عن بعض...

بسبب مجتمع وناس ماترحم احس روحي
فاقده كلشي حلو بالدنيا عشت يمه ايام بعمري
ماراح انساها بأي وقت احتاجه هوه موجود
شيسوي هسه هم يفكر بيه ؟

سمعت من لبابه من يوم الرجعت لجهالي
وهوه منازل ومكانه خطر والسبع دايخ بي وخايف عليه بس هوه معاند اعرف بي مايتحمل يبقه بمكان يذكره بايامنه

افترگنه بدون وداع صورته ماتروح من عيني
استفزازه وعصبيته.. اشتاقيت لكلشي حته لرزالته
وهو يكول الثول كاتلج

سرح بالي للبعيد واحس داخلي بحالة فوضى
من يبوسني من وره اذاني يكزبر جلدي واصير
مسلوبه الاراده واكله ليش تبوسني منا كلما يشوفني
اله هذا المكان ..
يضحك ويكول احبه واذا حبيت شي الزك بي..

واكف بطوله كدام المرايه وجنت كاعده ع الكرسي وراه
بيومهه انريد نجي لبغداد من جابني اتفق ويه وسام
على اطفالي اتذكر هذاك الطول الحلو

لابس كله اسود وعدل شعره بااثنين اديه
ويدنن باغنيه قديمه بنفس اللحن وصوته عذب
كلماتهه براسي اكوم اكعد اغني بيهه

هواه الغرب بروحي اخذهه وسافر بليله
تظل جم دوب ياروحي صبرهه العين تربيله
يگلبي بخير ادعيله
سلام احباب وديله
اندى يريعان العمر ماضوه بسنين الگمر
شلي بليالي بلا كمر.. شلي بليالي بلاكمر..

مندمجه ويه صوته ويه حركاته شلون شال العطر
ورش ت معصم اديه اثنينهم بمكان الوريد ورش
بركبته قريب ع المكان الخلفي للاذن والاخيره يم عكس
ايده ...

ضحكت بوقتهه وكتله هاي ليش هيج تخلي العطر
التفت عليه وكال هو يتخلى العطر بمكان النبض
متشوفيني احب ابوسج منا ورفع حجابي وباسني
من نفس المكان..

فززتني من صفنتي دمعتي الحاره شلون انسابت
ع خدي وهي محمله شوگ وحنين مااتحمل
بديت اتعب واصبر بروحي لخاطر اطفالي...

وضعي ويه حسام عادي يتأمر وعليه انفذ
نطبخ ونخلي كدامه ياخذن من عدنه مصرف من راتبي
طلبت ارجع لدوامي بيومهه راد يضربني وماما منعته...

اجه وسام ع الاطفال اخذهم وبالطريق سيف حاجي
لابو ومن رجع حاجه حسام وماادري شنو سبب هالقبول
من حسام والطاعه اتجاه وسام ...

راح سوه نقلي وهو ساكت وبنفس الشهر الي انقلت
بي حسام انقبل بالجيش عرفته وسام دبرهه اله
وخلاه بمكان قريب علينه بدائره حكوميه ...

بديت اداوم بمدرسه قريبه اطفالي يم امي
اروح مشي وارجع مشي صار اسبوعين اداوم
تهيئلي مدري لمحت سيارة ضرغام وتعوذت من الشيطان
كلت هواي نفس سيارته..

امشي بالفرع واستغفر بكلبي بس اريد اهدء
كلبي مثل النار فجاه دكات كلبي زادت وشعوري
تخربط اتلفت يمنه يسرى مثل مايدليني كلبي ويكلي
هنا ضرغام..

اشوف سيارته دخلت الفرع واني وكفت بمكاني
اريد اشمه اريد احضنه اريد ابجي بين اديه
بلكي دموعي تبرد كلبه ..

طبگت السياره بصفي ونزل الجامه كال اصعدي
بسرعه فتحت الباب وصعدت مانحجي يمكن
هي دقايق بس حسيت كلبي راح يوكف ابتعدنه عن المنطقه
ودخلنه بمنطقه زراعيه وكف السياره واندار عليه..

حضني حيييل ياخذ نفس طويل ويرجع
يتمم واني ابجي بحضنه ابتعد شويه واني
اكله مشتاقتلك والله مشتاقتلك...
مااحس غير راشدي انطبع ع خدي بس موذيج
القوه وسحبني من زندي ورجع حضني

بجيت بين اديه لحدما عيوني كالت كافي
لحدما كلبي كال ارحميني مااتحمل لحظات
اللقاء واني ادري وراي فراك حته عقلي شارك
گلبي بشعوره وكانو يكله افرح انت متعوب...

باسني من خدي وكال ليش هيج عيونج ذابله
وخدودج الحلوه رايحه ماحجيت بس اباوعله اريد
اشبع منه شوف رفع ايدي باسهه ..

بهالاثناء دك تليفوني حسام رجفت ايدي اشرلي
جاوبي فتحت خط كلت الو اجاني صوته بالغلط والفشار
وهو يكلي وينج اليوم اذبحج واكفلج باب المدرسه
الدوام خلص وانتي دايحه ؟؟!!!

.
يتبع...

#خبايا_الاقدار
❤️♨️♨️

... البارت السابع والاربعون


‏والك ردناك بس النه
شكثر جينه وترجعنه
شكثر دگينه بالبيبان
لسه ولون بيبانك ب اصابعنه...
....

رانيا.. ضرغام انت روح لايشوفك وتصير مصيبه
اني ادور حجه اكله عدنه اجتماع اي شي
ضرغام.. عليمن اروح بايگ ترى انتي مرتي اذا اطبله
ادوس ع راسه

رانيا.. الله عليك ضرغام رجعني قريب ع المدرسه واني
اطلع واكله عدنه اجتماع لو اضافي ويه الدوام الثاني
فدوه لخاطري

ضرغام.. راح اوصلج بس مااروح من شارعكم اذا
ماتخابريني ودكليلي ماسوالج شي
رانيا.. متوتره حيل هاي الاشهر بس الخوف مسيطر عليه
حرك السياره ورجعني للمدرسه ماحجه شي
بس كال انتظرج تخابريني ..

نزلت اركض من الفرع وطبيت من الباب الثاني الدوام
الثاني متوسطه اعرف مدرسه وياي حايره شريد اكلهه
وشحجي قريت الفاتحه لام البنين وتليفوني تكسر
من اتصالات حسام..

الله نقذني المدرسه كالت راح اطلع عبالهه عندي درس
اضافي لزگت بيهه وطلعت وياهه عبرت الشارع شفته واكف
من بعيد من شاف مدرسه وياي مشه كدامي

هي صعدت سياره واني دخلت للفرع سحبني من ايدي
ويشحط بيه بالفرع الرايح والراد يباوعلي وهو يكلي
شعندج بالمدرسه عندج مدرس وظاله تنتظرين..

ابو المحل طلع يباوع اليغسل بسيارته صافن علينه
تبهذلت بنص الشارع لحدماوصلت للبيت فتح الباب وشمرني
بالطرمه الكاشي مالتهه قديم تزلغت اديه..

كمت اعيط ماما الحكيلي وهو يضرب بيه دفرات
يمي طابوگه شمرتهه علي وركضت للغرفه قفلت الباب
اسمع صريخ جهالي وصوته وهو يغلط ع ماما ويكلهه
بنتج كح... اليوم اربيهه بعد شكم يوم نلكاهه نايمه
ويه مدرس..

ام رانيا.. الله يبهذلك ولك هاي عرضك اختك هيج
تحجي عليهه يامتستحي شفتهه بعينك لو اخوي
ماعرف يربيك..

صوت ماما وهي تدعي علي وصوت رضاوي يصيح
لاتضرب بيبي دفع ماما حيل ووكعهه بالكاع ويكلهه
اذا ماسديتي حلگج اكطعج بالصونده..

رجع يضرب بالباب ويصيح اوكفيلي راح اكسر الباب
واليوم اخلي دمج بطولج جنطتي ظلت بره اتمنيت
تليفوني عندي هسه اخابر ضرغام وشيصير خلي يصير..

لاول مره انضرب وانهان بهاي الصوره وكدام اولادي
جبت عمري عزيزه بزود بابا حته وسام ماضربني ابد
مره وحده غلط عليه ودفعني وطلع خاين وفضلت اموت
وماارجعله...

اندفع الباب حيل وطب عليه مثل الوحش صونده
مال مي صغيره يابسه كام يضرب بيه بوحشيه
وعبالك عدوته وجاي ينتقم منهه اتلوى جوه اديه
وماما تسحب بي ويدفعهه لو يرفع الصونده عليهه..

من حلاة روحي ومن كدما شاغت من الالم ركضت
من الغرفه للصاله اريد منفذ اطلع منه عيني اجت ع سيوفي
بالزاويه يبجي ويهز براسه ويضرب برجليه بالكاع

حسام ماعافني منين مااكمز. يركض وراي وين
ماتجي الضربه ع ايدي ع رجلي ع صدري
ومحد ينقذني منه ماما وكعت بالغرفه ومالهه صوت..

واني تحت ادين هالنذل اندفع الباب حيل وصاح
بصوت عالي ولك حسام شيل ايدك لا اكسرهه
الك وحط ايده بصدره ودفعه حيل رجعه ليوره
اخر واحد اتمنيته ينقذني..

حسام.. عوفني ابو سيف اربيهه هاي محد مربيهه الصلفه
وسام.. اطلع بره قبل ماابتلي بيك ولزمه من ياخته
خنكه وذاك السان دلاله يلعلع تالي ضربه بوكس ع خشمه
يله طلع بره..

حالتي حاله شعري منفوش ومشلع ودكم قميصي
مكطعه اشهك من الالم واصيح امي كعد كدامي سحب
القميص منا ومنا وسترني وكام وكف اخذ سيوفي
شاله هو ورضاوي..

دخل للغرفه اسمع يصيح خاله ويكل لسيوفي اركض
جيب مي .. بيه مابيه الالم موتني احس رطوبه نزلت
ع رجليه بس روحي تفرفح ع ماما شبيهه..

طبيت للغرفه واكعه ومغمي عليهه اضرب بخدهه وابجي
نكعتهه بالمي يله فتحت عينهه انتبهت شويه وهي تبجي
وتشكي لوسام دكله ضربهه اذاهه لان تاخرت بالدوام..

كمت وكفت الغرفه تفتر بيه اريد اوكع اريد اوصل لغرفه ماما
ابدل يمكن صار عندي نزف لان ضربني دفرات ع بطني
واني كوه معتنيه بنفسي حته ثگل مااشيل..

شفت وسام يباوعلي انتبه كام من يم ماما واجه عليه
كال جاي تنزفين رانيا خلي اخذج للمستشفى
باوعتله ودموعي تجري كتله حسبي الله ونعم الوكيل بيكم
انت دمرتني كتلك ماعندي اخ وانت اصريت ارجع يمه

وسام.. مو وقته هالحجي امشي بدلي خلي اخذج للمستشفى
وحسام اني اعلمه
رانيا.. مشكور علم روحك بالاول كل الصار بيه بسببك
هم الك عين تحجي لا اريد مساعدتك ولا اريد اي شي
منك عوفني بحالي شنو التريده هالذله التحملتهه علمود
الاولاد وبعدك مستمر

راد يحجي مالي خلك روحي عفته ورحت لغرفه ماما اطلع
ملابس وابجي بس اني هيج صار وياي اذا اطلگت جريمه
صارت عايفينه يسرح بطوله وهو خاين واني متحمله القهر
والضيم...

بدلت واني منين ماارفع ايدي واحرك رجليه ابجي
الله لايوفقك ياحسام طلعت واني اضغط ع نفسي
وسام كاعد يم ماما ويمهه الجهال لبست حجابي
وكعدت ..

وسام.. ليش ضربج؟
رانيا.. تاخرت بالمدرسه وجابني سحل بالشارع
والناس تتفرج عليه
وسام.. ليش هيج وياج هو مو اخوج اني اعرف علاقته
بسهاد قويه ليش انتي حاقد عليج

رانيا.. روح اسأله ليش تسألني كتلك الف مره ماعندي
اخ هيج واحد حرام يتسمى سند وانت خوش خليته
يتجربع عليه لان واكف وياه..

وسام.. بشنو واكف وياه ؟؟ علمودج ماردتج تظلين يوميه
بمكان لاتقبلين اخليلج بيت ولاتقبلين تكعدين ويه اخوج
شتردين بعد؟؟

رانيا.. مااريد اشوفك اطلع من حياتي السنين العشتهه وانت
ماموجود بالنعيم من اجيت خربطت كلشي والله العظيم
وروح ابوي ياوسام اذا ظليتوا هيج تأذون بيه احرك روحي
وعود انت افرح اخذ الجهال ربيهم ..

ظل ساكت شويه وكام ماما طلعت وراه ورجعت تطمن عليه
ماردت اخوفهه خطيه مريضه اخذت جهالي بحضني
سألت ماما وسام شجابه؟؟

رفع راسه رضاوي وكال اني خابرت بابا كتله حسام
يضرب ماما وهو اجه بسرعه حجيت بكلبي طفل واخذه
الخوف ومالكه احد غير ابو يخابره..

حسام طلع مارجع مددت يم ماما كتبت رساله لضرغام
ماكو شي صيح شويه وسكت لايظل بالك
بسرعه رد عليه متاكده ماكوشي ؟؟

جاوبته ماكو شي لايظل بالك اي شي يصير
اخابرك ديربالك ع نفسك
ضرغام.. انتي هم ديربالج ع نفسج

رانيا..لليل رجع حسام ماحجه ويانه ولا احنه ثاني يوم
ماداومت جسمي مكسر خابرت المديره اخذت اجازه 3 ايام
الم قوي بكل جسمي منا لمن تحسنت ..

رجعت وره ال3 ايام داومت ايامي باهته حته طعم مابيهه
ماتوقعت بيوم ادور بيه الدنيا هيج واظل اعاني
حته من اطلگت موهيج حالتي كلت مايستاهل وصبرت روحي
بس هسه شصبر وضرغام بين عيوني..

مانتواصل بالتليفون ابد مره وحده دك وانطيته رفض
لان حسام موجود وبعد ابد مااتصل ولا اني اتصلت كلت
ازود ناره ونتعلق اكثر خلينه هيج ...

لبابه.. جنه كاعدين ع الغده نفسي لعبت حيل بسرعه كمت
للحمام تقيئت هواي واني حته ريوك ممتريگه
اجت وراي ابرار كتلهه مدري شبيه طلعت وهي لازمتني دايخه

جراح ماموجود عمه زينب اجت تركض عليه
كالت خاف مستبرده الجو برد وانتو فاتحين
التبريد كتلهه يمكن لان هسه بردانه..

اخذتني ابرار لغرفتي مددت رفعت رجليه ع مخده
بلكي يستقر ضغطي باب غرفتي مفتوح طبت نوال وامهه
بحجه يشوفني بس عيني ع نوال شلون تباوع ع الغرفه

ام نوال.. خاف حامل
لبابه.. كلمتهه صبت ع اذاني بسرعه اتذكرت صدك الشهريه
فاتت هواي بس مامنتبهه من كدما فكري مشغول بجراح
وشلون اراقب نوال واخلص منهه..

زينب.. الله يسمع منج خيه يوم المنى
ام نوال.. شبيهه مستعجله بعدهه صغيره متوازيه
زينب.. جراح وحيد واني وحيده ورزق الله شوكت مايجي
هله بي

لبابه.. ولا ركزت بحديثهن ياربي اذا حامل شلون
بيه هو وضع جراح وين يتحمل وحده تدلل علي
وحامل وهو روحه مايتحملهه؟؟

عمه طلعت وابرار شويه وراحت سحبت تليفوني
خابرت ع جراح انطاني مشغول معناتهه جاي صدك
شويه ودخل شافني مدده ويمكن عمه كايلتله اجه يم راسي
كال سلامتج شبيج ؟؟

لبابه.. يمكن هبوط شو تخربطت!!
جراح.. حرك ايده ع شعري وكال تروحين للطبيب
لبابه.. ااي العصر اخذني اريد احلل
جراح.. يعني كلام امي صحيح؟؟

لبابه.. مواكيد ولو مو وقته
جراح.. لادكولين هيج اذا الله قاسمه كولي الحمدلله
لبابه.. اكيد الحمدلله بس الحامل تصير ماتنحمل وانت
منا وضعك

جراح.. شبي وضعي اطمئني ماراح يتحسن اله بمعجزه
لاتفكرين بيه لاتخافين مني ماتوصل بيه اذي حته ابني

لبابه.. لا لا مااقصد هيج لاتاخذهه بغير شي بس
اني اريد نكون قريبين اكثر نطلع نمشي واني عندي
دوام اول سنه يعني مامستعده

جراح.. كام وكف كال راح اسبح واتغده واخذج
نامي شويه
لبابه.. كمزت من مكاني بسرعه مااريد انام ويبقه
وحده يم نوال كمت صبيتله غده وكعدت يمه
بين ماكمل وراح للغرفه وهي كاعده تشوف تلفزيون

خابرت ماما تروح وياي بدلت ونزلنه عمه زينب ماحجتلهن
كالت اله نتاكد اخذنه لطبيبه نسائيه حللت شويه وماما
جابت النتيجه حامل...

اتذكر هذا اليوم وحته الشعور موذيج الفرحه الي تتمنى
كل بنيه ماادري ليش مامرتاحه خايفه مااكدر احتوي
جراح وخاف تأثر ع دراستي وخاف الطفل ينظلم؟!!!

ماادري شبيه كتبتلي الطبيبه وصفه وطلعنه صعدت
بالسياره وماما كالت لجراح مبروك ابني باوعلي بفرحه
وكال الله يبارك بيج وصلنه للبيت بوجهي للغرفه كتله انت
كول لعمه زينب..

دخلت للغرفه بدلت ومددت انفتح الباب عمه زينب ركضت
عليه حضنتني هي وابرار تتنقل من عندي لجراح فرحتهه
ماتنوصف وتوصي بيه ماتنزلين كلساع لامج الدرج موزين
وماتشتغلين انه اشتغل انه وابرار ..

ضحك جراح كالهه ع كيفج يمه باسته من خده ودموعهه
تجري حجت بغصه لسه ايام فراكك ادك بكلبي اظل طول عمري
احمد واشكر ربي ع رجعتك وقرت عيني بشوفتك ..

طلعت هي وابرار واني كعدتي سد الباب وراهن وقفل الباب
اجه بصفي مدد خله ايده جوه راسي وباسني من خدي
ومن راسي وكال ليش مافرحانه؟؟

لبابه.. شلون مافرحانه الحمدلله بس قلقه
جراح.. من شنو؟
لبابه.. خاف يأثر الحمل ع نفسيتي ونتعارك اني وياك
جراح.. هههه كولي يالله بعدنه باولهه

جان وياي ضابط كلما يصير نزول ماينزل يستلم بمكانه
هو من النجف ومن ينزل يظل ببغداد يم جماعتنه يكول
مرتي حامل واذا طبيت للبيت تدخل مستشفى تكره عطره
وماتريده حته ينام يمهه وخلص 5 اشهر الحمل هو لوينزل يومين ويجي شارد..

لبابه.. ضحكت وكتله لا كلشي ولاهاي السالفه اذا كرهت
عطرك وانت منا عصبي حته نوال تشمت بينه

جراح.. دگج ومدگوگج نوال شكو مخليتهه ابالج اساسا
مااشوفهه كدامي ابد
لبابه.. اكلك شي بس بدون عصبيه!!!

جراح.. كولي
لبابه.. اول يوم اجت بي سمعتهه تخابر ودكول انتظرك ع الغده
ياجرح كلبي ودكلك مرتك تفتر وراي تراقبنه خلتني اشك بيك
بس من شفتك مامهتم ودورت تليفونك وراقبتهه عرفتهه
جذابه..

جراح.. تحجين صدك؟وليش سكتي غير تحجيلي حته
اواجهه واوكفهه عند حدهه هيج قابليه عدهه وتجذب

لبابه.. عوفك منهه لاتحاجيهه هي تريد تفتح موضوع وياك
ويجوز تحلف ماحاجيه هيج وحده جذابه تألف وتتهم
خلي تولي..

جراح... يلعب بشعري ويحجي واني اباوعله مد اصابيعه
بكذلتي رفعهه وباسني من كصتي رفع فكي باصبعه
ويحرك الجبير ع بشرتي عيوني ذبلت واني اتمعن بي..

دنگ راسه واخذ شفايفي ببوسه عميقه اكثر
مااكول عليهه هادئه رومانسيه ممليه احساس
ومشاعر ..

رفع راسه وباسني بوسات متفرقه من شفايفي
ومن رگبتي وضمني بحضنه حيل مرتاحه ومطمئنه
حيل لان هادىء حته تجاوبت وياه وهو ضامني
لصدره ويهمس يم اذني احبج حيل..

لعلهه بوادر خير ولعل هالطفل هو بوابه خير ع جراح
ويحسن من نفسيته شفته شلون فرحان
والشي الحلو ماطلعت ولاشفت ردة فعل نوال

وبليل يمكن ماتحملت جاي ابوهه ماخذهن اول ماجاي
من الشغل خلصت منهن ورجعت طبيعيه جراح رجع يداوم
مكانه حلو ضابط بدائره الجوازات مرات يكول من اعصب
افرغ عصبيتي بالشغل لان هوسه ..

عقيق.. دوامي كله صباحي يكعدني السبع الصبح
ابدل واتريك واروح لفجر يجينه الخط يصعدنه هو
وينطينه مصروفنه اثنينه ..

مااضغط ع نفسي اقره بس مو هالكه حالي مسيطره
ويه المدرسات احضر يوم بيومه المدرسه حلو حيل
والصفوف بيهه اعداد متجاوز 25 طالبه وصفوف كبار
مومثل الحكومي دكول فجر ننجعص كل 3 برحله..

البصفي ضحى غريبه الاطوار بس متجنبتهه بيوم منهن
عدنه درس شاغر طلعنه بالساحه كعدنه ع درجات اني كاعده
وحدي اكل بلفتي اجت كعدت بصفي وصافنه ليكدام

كالت اني ماعندي حظ بكلشي ومهمومه محد يحبني
وكلهه تشرد مني
عقيق.. ليش ؟؟
ضحى.. يكولون عليه مخبله والتفتت عليه وكالت شدكولين
مخبله؟؟

عقيق.. جانت لابسه شال من طوله يسحل وراهه يمكن
مخيطه شالين وتباوعلي بنظرات مدري شلونهه
كتلهه لاحشاج وكمت من يمهه كتلهه اريد اراجع من رخصتج

رجعت للصف مدنگه اطلع كتابي مااحسهه غير فوك
راسي فزيت بسرعه من تمشي عبالك نمله محد يحس بيهه
جان دكول اريد اسولف وياج ارتاحيتلج

عقيق.. اريد اراجع ماقاريه القصيده
ضحى.. شويه اسمعيني لوانتي مثلهن ماتحبيني
عقيق.. لا شعندي وياج بس خاف تجي ام العربي وتكومني
ضحى.. چاا نسولف باجر احجيلج قصتي

عقيق.. هزيت راسي وطلعت خفت منهه اتمشه واراجع بس
كلساع يتخيلي بصفي البنات كلهه مهزومه منهه ومره يكولن
بيهه جني وام الارشاد دكول حته عائلتهه هيج نفس التصرفات

مرات اشوفهه عاديه بس تجيهه حالات بنص الدرس
وتضحك ومره منهن كومتهه ام الكيمياء كالتلهه ماكاتبه
الاسئله وحاسبتهه كالتلهه باجر تجين كاتبتهن

هن 30 سؤال ثاني يوم من كامت تفتش لكتهه كاتبه تعريف
واحد وعايدته ب5 اوراق متروسات كتابه وكلهن نفس التعريف
خلت ام الكيمياء بيومهه تخبلت علينه ..

اتذكر مواقفهه زين خلتهه ام الكيمياء واكفه طبت المديره
تفتش جان فجأه ودكوم تبجي وتعيط وتصيح ام الكيمياء
ضربتني ع ظهري واحنه كلنه صافنين عليهه وتصيح
اااخ ظهري يوجعني...

دك الجرس بوقتهه وركضت ع فجر حجيتلهه كالت هاي
المدرسات يحجن عليهه هاي نص سويج ..

عقيق.. اخاف منهه؟؟
فجر.. شتخافين خلي تندك بيج وشوفي شسوي بيهه
عقيق.. خاف ماالحك اجيج
فجر.. اذا ضغبتج اضغبيهه بالكتاب وتعالي اغكضي
حته املخهه تملخ شالهه بي دشداشتين اليه..

عقيق.. جنت مخليه فجر للاوقات الصعبه حته من نشتري من
الحانوت ازدحام هي تدفعهن وتشتريلي ودكلي اكلي اعلفي
وهي بكل فرصه شايله لفه وقوطيه ببسي وكيكه

من رجعت حجيت للسبع عليهه وكال اتجنبيهه
واذا لزم الامر كومي من يمهه كعدي بغير رحله
بس مدري شبيه خايفه منهه لان كاعده بصفي والمدرسات
حته لرحلتنه مايوصلن ...

بعد كلام جمره هدئت ونسحب الخوف البداخلي غفيت بين احضانه وايده تتجول بشعري فتحت عيني بتعب ماعرف شكد نمت جمره طالع ماموجود بقيت امدده بفراشي شويه واسمع الباب نفتح عرفته هوه اجه نفتح باب الغرفه وطب

السبع... عقيقي لسه نايمه
عقيق... عدلت كعدتي وخليت المخده وره ضهري تقرب مني باسني بخدودي كل واحد بوستين واني مبتسمه ابتعد عني واني نفس ابتسامتي ..

السبع.. شبيها بنيتي ليش مبتسمه ؟؟
عقيق.... رفعت ايدي واشترتله على الشامه البركبتي
السبع.... اووويلي شلون فاتتني وتقرب طبع بوسه دافيه رقيقه محمله بلحب.والطمأنينه رفعت ايدي حضنته وخليت راسي على صدره

عقيق... اعترف صايره جريئه وياه ومااخجل منه
السبع..اوووف ولج گربج تيار كهربائي ماسيطر،على ذبذباته اترجف كلبي وتنفض كل احاسيسي يمج
عقيق...جمره تحبني ؟؟

السبع....ابد لاتسالين هيج سوال
عقيق...ليش؟
السبع...انه اكلج ليش هيج سوال ينسال للانسان المامتأكد من حبه بس انه ياعقيقي كلي ملكج كلبي وروحي وكلشي بيه كولي شكد تحبني وانه مستعد اشرحلج لصبح شكد احبج

عقيق...واني احبك
بوجوده احس بروحي مالكه الدنيا بوجوده اصير مثل الفراشه واطير بين الازهار جمره اماني وملااذي الوحيد الاحتمي بي
من ناس ماتت الرحمه بداخلها بنظرهم اني ما اصلح اكون زوجه للسبع ...

ينظرولي بنظره ماحبها شنو ذنبي نولدت مريضه شنو ذنبي يتيمه وماعندي اليسندي ويسال عني رب العالمين خله السبع بطريقي لان نوايانه بيضه ثنينه وثنينه بينه نقص واحد يكمل الثاني..

دائما اكعد بنص اليل واناجي رب العالمين الجمعني، بي وخلاني بضرف لايمكن يخطر على بال اجيت ويه
بابا بمكان ماعرف شخص بي ونكسرت بشوفة
بابا مرمي بشارع واني مريضه ضعيفه لا حول ولاقوه

رب العالمين جاب جمره وخلاه كدامي الهي انته اعرف بضعفي، وقلت حيلتي الهي لاتكسر كلبي بلسبع بس هذه طلبي منك وابعد عني كل انسان حاقد ويحاول يدخل. بيناتنه يوميه قبل لا انام اطلب هذه الطلب من رب العالمين ومن افز بليل الساني يلهج بهذا الذكر،

اخاف.واكثر مخاوفي افقد السبع مستحيل اكدر اعيش بدونه لو يمر يوم وما اسمع صوته جمره امي وابوي وكل دنياتي مجرد اتخيل افقد السبع لو صدك جبار يضغط عليه ويتزوج ايناس كدامي اكعد ابجي ماتحمل الهي كل اختباراتك اتحملها بس لاتختبر صبري بلسبع صافنه ومجرد تفكير فكرت نزلن دموعي بدون ماحس..

عقيق....كمت من فراشي وهوه راح فرش السجاده يصلي غسلت وجهي على مغسله وحضرت الاكل وكعدت انتضظره بين مكمل شكل الاكل يشهي،فجر وينه عن الاكل جابه من المطعم دكول بس الريحه تسطرني

كمل صلاه واجه كتله جمره دزيت عشا لفجر وخاله ساهره
السبع...دزيتلهم اتعشي بين ما اخابر ضرغام واجيج

عقيق...ما اكلت بقيت منتظرته يكمل مكالمته يخابر واسمع صوته يحجي بالالغاز بس عرفت الموضوع يخص جبار شويه وصار صوته عالي ماعرف شكاله ضرغام وهيج صار عصبي

نهه المكالمه واجه كعد كبالي على ميز بس مبين عليه ضايج واكو حسبه اباله اعرفه من نزره عينه فتح علاكه الصمون طلع صمونه وخلاها كدامي خفت اساله واني بطبيعتي مااسأل وادقق وياه رفع عينه باوعلي مركزه وياه ..

السبع...ليش متاكلين يابويه شو تعشي وعلاجج موتنسيه احتمال اطلع بشغله عندي اذا تأخرت روحي يم ام شهد

عقيق،...بعده يحجي دك تليفونه بسرعه جاوب
السبع..هااا. يعني هيج صارت يدلل ولا يهمك اني احلها

عقيق...فصل الخط وكال راح يجون ازلام يمي المضيف مرتب . كتله اي نضيف بس خل ارشله معطر كمت من يمه وهوه صافن بلفراغ ماعرف بشنو يفكر ومنو راح يجي بهيج وقت ؟؟

شويه وندك الباب فتحه ضرغام وجراح
وكفوو بلطرمه يحجون ماعرف عليمن بس اسم
جبار كل شويه ويذكروه ماكو اقل النص ساعه
فات ضرغام للمطبخ كال سوي جاي هواي زلم عدنه
وام شهد راح تجي يمج...

فعلا اسمع صوتهم وسلامهم واحد يسلم على ثاني
قوري جبير ماعندي حرت بيمن اسوي بعدني ادور بلكاونتر فاتت خاله ساهره وفجر لافت نفسهن بلعبي..

متت ضحك على شكل فجر مدبدبه وخدودها حمر، ومطلعه بس عين وحده ودردم لان ضرغام خابصهن من جايات وملبسها عبيه عن لا واحد يشوفهن لان هواي زلم بالحديقه وياسين واواب هم اجو وضاجت شلون ضرغام عايط بيها وكايللها لفي روحج زين كدام اواب ومفشلها...

طلعت خاله جايبه وياها قوري جبير واستكيان تدري ماعندي عدد جبير وكفت هيه تسوي جاي واني بقيت اضحك على فجر وشكلها يموت ضحك ادور،شافت الاكل على ميز نزعي العبايه و
فجر... ولج عقيق اني جوعانه ماتعشيت هذه خبصني وماكملت عشاي

ساهره...ولج ام نص السان منو اكل الكباب وصمونتين هااا
فجر....اي بس بعدني جوعانه تعاي تعقيق وياي واذا ماتغدين بعد احسن ..

عقيق... يلا نتعشه سوه اني وياج اني هم ما اكلت
ساهره.. اكلي يمه اكلي هري ومري وسم بكلب جبار

عقيق.. بعدهه تحجي دخلت عمه زينب نزعت عباتهه وكالت
هذا صدك يحجي يامايستحي ياناقص غيره وناموس
ساهره.. شكو فهميني اجاني ضرغام ماخلانه انشوف دربنه..

هسه جراح سولفلي يكول ضرغام مخابر السبع كايله
شيوخ جاين عليك عدهم سالفه وياك عرفته من جبار
دفعهم حتى يحط السبع تحت الامر الواقع

والسبع متخبل يكلهم يحلم اذا ما اندمه على هاي عملته فلا اتسمه السبع ولامن ظهر ابوي رجال مستقر تريد تهجم بيته
من نكون انهجم راسك ومالكولك اثر...