نتذكر مواقفه الج حماج وتكفل دراستج ربع دينار
ماصرفنه هو يصرف عليج وجاب فلوسه وتعب
گلبه وسلمه بيدج وهذا دليل ع حبه حقيقي
مونزوه وتروح الرجال مايضحي بس لليحبهه ...

هسه تظلين يمه بالغرفه تعزلين فراشج ماتخلي
يتقربلج تظلين ع موقفج بس مااتركين الغرفه
مومن الاصول ولاعلمونه اهلنه المره تتنازل ع زوجهه
باول ليله واول موقف

احنه النسوان علينه التضحيه وعلينه اللوم
والله يختبرنه وان شاء الله تكونين كد الاختبار

جراح اني احجي وياه واني ابين موقفج
بس العليج هسه ماتحاجي ماتنطي مجال
بس مااتركين الغرفه واجبج تأدي ع اتم وجه
ملابسه واكله صيري سباعيه بنتي..

راح ننطي فرصه اذا تعالج وتحسن خير ع خير
ماتحسن يا بنتي كل واحد بطريق ضحي بسنه
من عمرج ولاتضحين عمر كامل...

لبابه.. ماما لتحجين لعمه زينب ورانيا اني كتلهه
لدكولين مالهه ذنب كون محد يدري
ساهره.. امج سترج وامانج ومااقبل واحد يدري
حته اذا لاسامح الله ماتوفقتوا يبقه سر وممنوع
تحجين ..

لبابه.. كمت من يم ماما هم وانزاح ع الاقل عرفت
شلون اتصرف وراح اتبع كلام ماما بالتفصيل..

مارجع جراح وماادري وين يبات وثاني يوم
خابرته عمه كالهه ابغداد عرفت راح للطبيب
اخلص شغلي الفوك وانزل جوه احاول اهدي
نفسي واكول كلشي ينحل وهذا اختبار من
رب العالمين..

ثاني يوم العصر اجه دخل بس السلام عليكم
وراح للحمام سبح وطلع يصلي كعد ويه عمه
زينب يسولف يمكن عمه حاسه علينه...

جنت بالمطبخ سويت ماعون فواكه لابرار
واجت وراي سألتني جراح شبي شو موطبيعي
ومافرحان بنتي بعدهه سبعتكم ماطلعت شبيكم؟

جاوبتهه بابتسامه لاعمه ماكو شي بس هو مشغول
وضايج ع دوامه لان شغلته طولت

زينب.. لبابه اكيد مااشوف فرحه عرس بعيونكم
لبابه.. اني هم ضايجه علموده صار سنه ومعاملته
مااجت وكل مايراجع يشمروا ع غير دائره

زينب... الله يسهل علي ويسعدكم ديربالج علي
يابنتي ترى وليدي متعوب من صغره حجت هيج
وطلعت اخذت الماعون وطلعت شفته واكف
يم المغسله معناتهه سمعنه ...

رحت يم ابرار سولفنه شويه وتحجيلي
ع الدوام وجايبتلي معطرات جسم وغسولات
كالت لان عروس هسه ادللج ...

عمه كالت نتعشه ابيتنه ماننزل هي سوت عشه
واني ساعدتهه بشي بسيط ناكل ع ميز بالمطبخ
اجه كعد بصفي صرت اراقب حركاته وكانو عندي
دراسه علي واريد اطلع بنتيجه...

ايده اللازم بيهه الخاشوكه بيهه رجفه قليله
شفته حولهه بالثانيه يله سيطر اكل شي قليل وكام
وامه عينهه علي وتجر حسرات..

كال راح اطلع يم اواب جاي تحتاجون شي
هزيتله راسي لاا ماردت تشك بشي عمه
وهي مريضه وخاف زله اللسان وتحجي كدام
اخوهه ويشمتون بي..

اكعد اتابع تلفزيون ويه عمه وابرار تقره تريد تقدم
دراسه وطبعا جراح الداعم الاكبر الهه والمشكله
عمه ماتقبل لان دراستهه بالخارج وهو يكلهه
مالج علاقه ...

ب10 ونص اجه خله علاكه حلويات ع الطبله
واسمع صوت الدوش شكد يسبح وكانو يريد
يخلص نفسه من التوتر ...

كمت دخلت للغرفه طلع يفرك بشعره كعد ع حافه الجربايه
واني من جهه الثانيه صار كل واحد منطي ظهرهه لثاني
بصوت مكسور كال حجيتي كلشي لامج؟

لبابه.. اااي ماعندي احد اخذ نصيحه منه بس ماما
سكت ماجاوبني كام فرش فراشه ومدد وصاح
طفي الضوه ...

طفيت الضوه ونزلت اركض ع ماما اريد اعرف شكالتله
دخلت للغرفه لكيتهه تريد تنام شافتني كامت للمطبخ
سالتهه ماما شحجيتي وياه؟؟

ساهره.. عكس الكلام الحجيته الج ماقبلت اي مبرر
اله وحسسته بغلطه ماكتله لانطيك فرصه ولا ذره
تبرير وتعاركت بعصبيه وهو ساكت بس كال حقج
بأي كلام دكولي

اتبعي كلامي ماما روحي لغرفتج نامي بغير مكان
بس خلي عينج اتراقبه جاي يتعالج ولازم توكفين
وياه اذا تعالج واكو تحسن تسامحي وحدج واذا بقه
ع الحاله هذيج الساعخ اني ادخل...

لبابه.. بوست ماما الله يخليهه الي بدونهه اضيع
شكد حاولت اتكتم ع الموضوع وماكدرت احتاجهه
بكل وقت..

صعدت فوك كالت عمه زينب باجر يجن نسوان القصر
يباركن والعصر يجي ابو نوال كلت انطيج علم
كتلهه هله بيهم ودخلت للغرفه ...

مددت بفراشي ظليت اقره ايات وغفيت فزيت
ع صوت جراح وهو يصيح لااا لاا بس موبصوت عالي
كمت فتحت الضوه اهز بي جراح اكعد جاي تحلم..

فز ع حيله لازمني من زندي ويتلفت انتبه ع نفسه
هو بالبيت كال استغفر الله وفرك وجهه ورگبته
لبابه.. اجيبلك مي؟
جراح.. لا رجعي نامي راح انزل جوه

لبابه.. ليش تنزل ؟
جراح.. اشتم هوه مختنك كومي نامي
لبابه.. اخذت علاجك
جراح.. لاتخافين مااسويلج شي ماخذ علاج
من اتركه ترجع عليه الحاله ..

لبابه.. شكالك الطبيب؟
جراح.. يحجي وهو مدنك غيرته رحت لغير واحد
لبابه انه المهدئات دمرتني وعلاج تعب اعصابي

لبابه.. يعني كالك اكو تحسن؟
جراح.. لاماكو بديت من الصفر
لبابه.. التزم بالعلاج ماكوشي صعب بس انت متهاون
جراح.. الله كريم

لبابه.. نزل جوه واني رجعت نمت ثاني يوم هو طالع
واجن نسوان القصر باركن وراحن والعصر اجت ام نوال
ورجلهه سلمت وصعدت ...

اليوم موعد النتائج اعصابي متوتره خايفه حيل
ماعدنه انترنيت ولازم انروح للمدرسه جنت جوه
يم البنات وفجر جابت تليفوني كالت جراح يتصل

فتحت خط كال دزيلي رقمج الامتحاني
بسرعه صعدت كتبته ودزيته ياربي ع الاقل
فرحني بالنتيجه فرحه تعوض الكسره مال زواجي...

للمغرب يله اجه شفته صعد ركضت صعدت من الدرج
الجوه بس فتح الباب تلگيته هابشر شطلعت
ابتسم ابتسامه تعب وكال مبروك ناجحه معدلج
78 ...

حضنت عمه واكمز وابرار نزلت قبلي تبشرهم
بدون خصوصي وبنص اوضاع زفت الله وفقني
قابله وقانعه المهم كليه زينه قبل ب2009 القبولات
زينه لان معدلات ماكو...

زينب.. موالمفروض من الفرحه تحضنين جراح
شو بس انه حضنتيني؟
جراح.. احضنهه بالغرفه اله كدامج

زينب.. كلبي لاعب منكم خلوني احجي ولاتزعلون وخاصه
لبابه لاتزعلين تعرفيني شكد احبج واريد راحتج
لبابه.. لاعمه ماازعل

زينب.. كل عروس عدهه بياض وانه امه ليش ماجبتي
بياضج سألتج كلتي غسلته امج ماوصتج لازم تحتفضين
بي وتشوفي ع الاقل لامه

جراح.. شنو هالحجي يمه الناس وين وصلت وبعدين
انتي مومن هذا النوع منيلج هالحجي اسأليني انه
اجاوبج

زينب.. لايمه موقصدي بس اشوف علاقتكم بارده
وماجنكم عرسان وانشغل بالي اعذريني بنيتي

جراح.. ماتعودتي ع حالتي ترى موجراح القديم
تقبلي الجديد ماكو شي بيناتنه مولازم نتغزل كدامكم
حته نبين متزوجين..

زينب.. الله يسعدكم اعذروني وكامت وهو كام
للغرفه اااوف يالبابه لازم ماتكمل فرحتج
نزلت لماما وباركولي بس ضجت من كلام عمه
معناتهه مراقبتنه...

هاي الليله بيهه معنى جانت الساعه ب1
كل واحد مدد بمكانه وصافن يفكر
هو يفكر شلون يتعالج واني افكر شلون اساعده
جنت مغمضه عيني وفتحت ع صوته وهو يكول
كاعده لونايمه؟ جاوبته كاعده؟

جراح.. بعده عندج الم؟
... لا زينه
... اريد احجي وياج تسمعيني؟
... ااي اسمعك
جراح... تتوقعين اتعالج؟
لبابه.. اذا التزمت ليش لعد؟

جراح.. وتسامحيني؟
لبابه.. من ترجع جراح القديم
جراح.. ادري بگلبج شنو والدليل بعدج يمي لو وحده
غيرج عافتني بلحظتهه لبابه اذا بقائج يمي مجرد
عطف مااريده

لبابه.. ع شنو اعطف؟ اني ادري بيك مريض بس ماادري
راح تعاملني بهالوحشيه ومارفلك جفن ولاانتبهت ع نفسك
فوك الساعه واني اتوسلك

جراح.. كام فتح الضوه وراح للكنتور طلع
علاليك صغار مال ادويه انصدمت من شفتهم
بقايا العلاجات واغلفه فارغه وابر ع مدار سنه
كامله هو يتعالج

شوفي هذني كلهن ماخذهن من اخذهن اصير زين
ومن اتركهن ترجع حالتي قبل لانتزوج رحت للطبيب
وكال جسمك بحاله ادمان ع المهدئات وراح نتبع
طريقه التجويع وصرت اعاني حته مااخذ مهدء

قبل الزواج ب5 ايام اني مااخذت واصبر بروحي
مااعرف عواقبهه هيج انه مااذيج بقصد تعرفيني
مااحب اذي احد موعاد انتي؟

لبابه.. ليش مااخذت مهدء بالعرس حته ماتنفعل
وتوصل لهيج مرحله
جراح.. مااكدر اتقربلج من اخذ مهدء مااكدر اسوي
اصير عاجز وهاي موحلوه بحقي اكعد اشرحهه الج
باول يوم..

لبابه.. مااعرف شحجي ظليت ساكته وهو كاعد بالكاع
ومرتجي ع الجربايه واني كاعده بصفه اريد اكله
اني وياك ماراح اعوفك حتلو اذيتني بس لازم اساندك
وارجع الكلام مااريد ابين شعوري...

جراح.. صدكي مااذيج ولا اتقصد انزل دمعتج
وروح ابوي ماعندي بالدنيا غيرج انتي وامي واختي
ولو اطلبين روحي انطيهه الج ولا اكون سبب حزنج

لبابه.. لاتحجي هيج عمرك طويل انت استمر ع العلاج
والباقي ع الله لاتشغل بالك محد يدري ولاراح
احجي ...

لزمته الكحه وطلع يكح بره واسمعه فتح الباب نزل
واني رجعت لميت علاجه ومددت ودعيت الله
يقوي ويشافي ويرجع مثل قبل وينطيني القوه
واتحمله...

السبع... شجاي اتسوين؟
عقيق.. منتظرتك بالبيت وين وصلت؟
السبع.. هاي يمكم بس راح اجيب عشه وياي
عقيق.. يله بسرعه مشتاقتلك
السبع.. اصبري عليه بويه بنص ترى انه الشارع ...

عقيق.. اذن الاذان صليت واني انتظره
كلساع اروح اباوع من المطبخ ماكو سمعت صوت
سيارته كلبي فز كدامي صار شهر كامل ماشايفته...

بس فتح باب المطبخ خلا الاكل ع الميز
وركضت شمرت نفسي بحضنه شالني ليفوك
ويشم بركبتي بنفس طويل ويبوس بيه
هواي ويصيح ميت عليج...

سد باب المطبخ برجله وطبينه للصاله نزلني
ع القنفه وباسني من راسي وكال شلونج
ينسمتي ؟

عقيق.. هسه صرت زينه جنت ميته ع شوفتك
السبع.. اسم الله عليج من الموت يابعد اهلي
شلون صايره الخدود متفحه ؟؟!!

عقيق.. انت ضعفان وصاير بعد اسمر
السبع.. حرگتني الشمس النهار كله تلفح بينه
عقيق.. كوم اسبح ملابسك بالحمام واني راح
احضر العشه

السبع.. ووره العشه شنو؟
عقيق.. انروح لخاله ساهره
السبع.. شسوي بساهره اكلهه كلبي طاك عليج دكلي ساهره
عقيق.. مو تسأل عليك وتدري تجي اليوم
السبع.. دكومي اخذي العلاكه الجبيره بيهه عشه الهم
وديهه وبصفهه علاكه سوده انطيهه لفجر..

عقيق.. راح للحمام واني اخذت الاكل وعلاگه فجر ورحت
وديتهن فجر صايره دب صغير لقبهه بالبيت كلهه تصيحلهه
البط تمشي تگلب بنفسهه وخدودهه منفوخه ...

رجعت لگيته يصلي خليت الاكل ع الميز
واجه تعشينه ويسولفلي عن الشغل وشكد تعب هاي المره
كملنه رتبت المطبخ ورحت وراه للغرفه جان مدد ومخليه
اديه جوه راسه..

خلاني بحضنه ومد ايده بصفه طلع علبه صغيره
فتحهه مداليه صغيره ذهب حجر العقيق
وشكلهه دعبله دائريه لبسنياهه وباسني من كتفي..
فرحت بيهه حيل كلساع اركض للمرايه
اباوعلهه لونهه ماروني وبيهه لمعه..

نص الليل غافيه وبين الحلم وبين الحقيقه
هذا عطر السبع وهاي لمساته اريد افتح عيني
عبالك مبنجه ولاول مره ابادله بكامل جوارحي
واحاسيسي ....

جنت اريده ونسيت او تناسيت حالتي المرضيه
اندماجي وياه خلاه وكأنو يفقد اخر ذره
صبر عنده ...

فتحت عيوني الغرفه ظلمه وبس بوساته
وصوت تناغمنه الروحي همس يم اذني
اهدي ولاتخافين ...

هذا الشعور هواي عليه كمت اخذ النفس
بصعوبه ماكدرت اكمل حجيت واني
بعدني بعالمه جمره كلبي يوجعني اختنكت..

ابتعد عني بسرعه وسحب الغطه غطاني وكام فتح
الضوه ظل كاعد يم راسي جابلي علاجي
بس عرگانه وعبالك حاله اغماء عندي...

ارتبك من شافني رغم متخربطه بس مااريد
اصحه من شعوري كال اخذج للمستشفى
هزيت راسي لاا هسه اصير زينه..

السبع.. كومي خليني اغسلج اطرافج
جسمج حار
عقيق.. لازمه الغطه ولبسني البدي
وكلما اصابيعه تلامس بشرتي تنتفض
خلايا جسمي...

غسلت وهو وساندني ورجعت مددت شويه
بديت اتحسن اخذني بحضنه حسيته
ضاج لو حاس بالذنب وبعدهه نمت لان
علاجي منوم...

رانيا.. ضرغام مانزل صار اسبوعين
بس مخلصيهه اتصال ومرات شبكه ماكو يمه
واظل يوم كامل قلقه علي...

بيوم منهن اجه الشيخ ياسين كال خابرني
اخوج وجايين بالطريق كلبي لعب شعنده
شمضيع يمنه ؟

للظهر اجو ماطبيت ولاماما طبت مانسمع
صوتهم بس اجت فجر كالت الشيخ يريدج
انتي وخاله...

لبست وطبيت هالمره كاعد باريحيه ويشمر
بحجيه جان يكول اخر كلام عندي اما اسويهه
وياكم كعده عشاير وتعرفون الاصول ماكو داعي
نشرحلكم

اختي تجي تكعد يمي منا لمن يتزوجهه
تحل موضوع جهالهه وتحضر المحكمه لان وسام
عرف بيهه انخطبت وهالمره قراره نهائي الرجال
مايريد مشاكل ودزنه انجيب ولده وتحلهه المحاكم

رانيا.. وانت بأي حق كاعد تحجي ومتفق ويه وسام
اعرف خالي واحد مادي وانت اتعس منه شكد
انطاكم وسام حته تجون تحجون نيابه عنه

حسام.. صوتج مااسمعه ولدج يرجعون لابوهم
وروحي تزوجي كدامج اسبوع لوتزوجين وتخسرين
اولادج لو تجين تكعدين يمنه ببغداد واولادج عندج
وتنسين سالفه العرس..

ياسين.. مع الاسف ع الزلم وضبة الشوارب چااا
من طلعتلك شوارب ماعلمك خالك الحرمه تبقه
حرمه انجانهه اخت لو زوجه ..

تعلي صوتك عليهه وتفرض وتحطهه كدام
امرين لو جهالهه لورجلهه ماكو زلم عدكم
تجي نتفاهم وياهه چاا نبقه يوميه زايرنه
انت وخالك ونفس الحجي..

خال رانيا.. شيخ الحجي موبس الكم بتنه واختنه
عدكم وطليقهه يريد اولاده خلي تنطيهم لابوهم
وتزوج

الشيخ.. وشبيهم ولدهه موهاي عايشين بنعيم وبعدين
الرجال والزلمه السبع مايعوف ابنه لويوم واحد موعافهم
5 سنوات وهسه حده مابده جاي يطالب بيهم

حسام.. احنه اجينه وطريقنه طويل خبرناكم
القرار يطلع خلال اسبوع وتحضر محكمه موعبالهه
وسام ساكت ع زواجهه والقرار الباقي يمهه
لو اولادهه لو رجلهه ...

رانيا.. ماتحملت اسمع بعد نفس الموقف من اخذوهم
انعاد عليه بجيت لطمت ماكو فايده وهالمره
ماكو غير المحكمه تحلهه وصارت بيهه اطراف اكثر..

لليل اجه ضرغام مايدري بس شافني هز راسه
شكو شبي وجهج منو مضوجج؟؟

بجيت وبديت احجيله كلام اخوي وحجي وسام
متاكده وهذا الخايفه منه يجي يوم
وانحط بين حياتي وبين اولادي..

فتحلي ايده وحضني وايده بشعري كال
لاتبجين اني وياج مااعوفج خليني ارتاح
وانشوف حل جان بعده بالزي مالته

راح للبيت مالته واني كعدت صافنه ع زماني
وين يوديني وليش كل فرحه ماتم لشوكت
الفرح عدنه ناقص والحزن دومه تام...

دك تليفوني فتحته رساله طويله. من وسام
مكتوب رانيا تعذريني اعرف تعلقج بالاطفال
وادري مالج ذنب بس مااكدر اولادي يتربون
عند غريب وبغير محافظه بعد باجر تجين لبغداد
ضروري تلتقين ويه المحاميه احسن ماتصير الجلسه
مفاجئه عليج..

موكلمات قريتهن عبالك يكول بعد يومين وراح
تموتين ركضت حافيه للضرغام دكيت الباب حيل
فتحه ابجي واشوفه الرساله ايدي ترجف..

سحبني من ايدي وكعدني ع كرسي وكال اهدي
ع كيفج جاوبته بشهكه شهدأ ضرغام اولادي
لوانت؟ راح اخسرهم وهم بمكان واني بمكان

ضرغام.. بغض النظر عن كلشي وعن سلبياته
بس اي رجال يتصرف نفس التصرف ماينطي
ولد اثنين لغريب وبغير محافظه لذلك لازم
نحلهه بالتفاهم ..

من سمعت كلامه حسيت بشعور موحلو مدري
لان قلقه حسيته هو هم مايريد يبقون
يريدهم يرجعون لابوهم...

اريد اسكت عيوني مااكدر ابجي واشهك ونفسي
ينكطع مايكمل دموعي من غزارتهن تنزل بسابق
حسيت نفسي ضايعه واني ابجي بين اديه..

ضرغام.. فدوه اروحلج لاتبجين رانيااا لاتخليني
اتهور واستعجل بالتصرف
رانيا.. لاتاخذوهم مني والله اموت
ضرغام.. اششششش بس اهدي ويمسح بدموعي
وهن مستمرات يمطرن ع خدي..

رانيا.. لاتعوفوني وحدي لادكولون الحق وياه
ضرغام.. انعل صفحه وسام هاي دموعج كون
تغسلني هيج تبجين وتريدن اتخله عنج..

رانيا.. راسي ع صدره ويحاول يهدي بيه
بس كل كلمات المواساه ماجابت نتيجه
رجعت لماما وكامت تبجي وياي اثنينه صابنه
العجز واخاف من قرار المحكمه...

اجه الموعد وروحي مسلوبه اخذت اولادي
ورحت برجلي السبع ويانه وضرغام بس السبع
كال لضرغام لاتنزل اني اتكفل بكلشي حته
لاتصادم ويه وسام

اباوع عليهم خاف اليوم ياخذوكم مني
وخاف مااشوفكم كل لحظه وكل ساعه
تصير شوفتكم حسره عليه

كلساع تجي عيني ع ضرغام بالمرايه
يسوق بس باله مويمنه صافن وكلساع يفرك
وجهه ويسوق سريع وينتبه ويقلل..

لازم اتخذ قرار نهائي راح يكعدون هسه
وراح يخيروني بين اولادي وبين ضرغام
شختار؟ ثمره عمري وتعب السنين والتحملت
اشكال علمودهم؟؟ لو حبي واماني وكمت احس
عندي سند وافكر بحياتي ودلالي وياه؟!

.
يتبع....

#خبايا_الاقدار
❤️♨️

... البارت الثاني والاربعون

...

ماشايل عتاب بكلبي شايل ظيم
ومن هجرك حبيبي بيه الف غصه.
.تدري شكد جروح بفركتك شديت
ولسه جروحي تنزف ولكل جرح قصه
.. يابسمار نابت فوك جرح الروح
ياجتال كاعد ينتظر فرصه
..ياساكن منامي وصحوتي ودنياي
ياماخذ كليبي وكاعد بنصه.
.هاك الروح اخذهه وهاك عمري الراح
وبعمري الجاي صدك هم الك حصه....
.....

رانيا... وصلنه لبغداد الساعه ب1 اخذنه مباشرة للشقه
الطريق كله ماحجه ولا اني حجيت جان لابس نظارات
حته مااشوف عيونه شلونهن وشبيهن حجي..

نزلنه بباب العماره رجلينه مكسره السبع اخذ السياره
وكال هسه اجي عندي شغله واحنه صعدنه من وكفنه
يفتح بالباب تذكرت من جابني يم عقيق من سويت
معامله النقل وهنا شلون حجه وع كولته ساقط
من الشوارع..

فتح الباب ودخلنه الشقه بيهه تراب كال راح انزل
اجيب اكل اقفلي الباب وراي قفلته ولزمت الشقه
نظفتهه هي مرتبه بس تراب لان متروكه..

كملت وسبحت وكعدنه بالصاله ماما صافنه بوجهي
واولادي يلعبون بالغرفه هزت راسهه ودنگت وكالت
فكرتي يارانيا اذا انخليتي باختيار لو اولادي لو زوجج؟؟

رانيا.. انتي شدكولين يا امي لو بمكاني شتختارين؟
ام رانيا... محد تكدر تستغني عن اولادهه حتلو يم ابوهم
ضنه والضنه غالي وهو تركهن وانتي صرتي الهم ام واب
ورفضتي الزواج هاي السنين علمودهم

وهسه حبيتي ضرغام وانتي ماعندج سند ماعندج عمام
ولاعندج خوال بيهم حظ واحد والله مطيح حظه كسر
اخته تريدي يرحمج؟؟

لوعندج اخ اجه من تالي وكت وشلون جيه اجه يهدد
ويتوعد تتوقعين هذا يعتمد علي؟ هذا يسندج بيوم
وهو مصفك ومطبل ع خراب حياتج..

رانيا.. ياامي اثنينهم عسلهم حنظل اذا اختاريت
اطفالي راح يتحكم بيه حسام وراح اظل بدون ظهر
وهسه تشوفين وتذكرين كلامي حته بالبيت طمعان

واذا اختاريت ضرغام اطفالي يمه تذكرين شلون
تعذبت ليالي ع رضاوي وهو مريض واني وحدي
بالجذب الف دينار مادز الهم شلون اسلمهم اله اعرف
هو يدللهم ويحبهم بس وين يكعدون يم نسوان عمامهم
لو يتزوج ويجيبلهم مرت اب...

ام رانيا.. والحل سولفيلي ولج رانيا البكدج بعدهن ماتزوجن
عايشات بدلال اهلهن وانتي شايله هموم بكد الجبال
وين حظج ياامي من هسه شفتي السعاده مالحكتي
تفرحين غير ايام معدوده...

رانيا.. رجعت راسي ع حافه القنفه ونزلت دمعه حاره
كوت خدي .. دمعه حائره عليمن تبجي ع اولادي
وروحي لو ع ضرغام العشت الحب وياه ومستقبلي
وحلمت احلام ورديه وياا؟؟

انفتح الباب كمت وكفت مسحت دمعتي بسرعه وركضت للغرفه
اخذ النفس بجزع حته الحياة صارت مره واذا عشت يوم
حلو وراهه شهر مر ...

طلعت الجهال من الغرفه يلعبون بالصاله حته يجي يرتاح
مايتقيد ماما بالصاله ماقبلت تدخل الغرفه كالت خليهه اله
فشله الرجال تعبان..

طلعت من الغرفه جان واكف يغسل ويفرك بشعره وكفت
بصفه كتله تعال ارتاح بالغرفه ماما تريد تظل بالصاله
سحب الخاولي يجفف شعره وكال الاكل بالمطبخ
خاف الجهال جاعو...

هزيتله راسي وهو راح للغرفه واني رتبت الاكل
رحت صحته جان يخابر بواحد ع الدوام اشرلي
مااريد ماردت اضغط علي عفته براحته..

كملنه غده وجمعت السفره وغسلت مواعين
ورحت يم ماما كالت روحي يمه احجي وياه
الجهال راح انيمهم تعبانين وهسه سألته كال
بليل انروحلهم لان وسام يجي المغرب من الجيش...

من ينذكر اسمه ينقبض گلبي وارجع استغفر
واكول ان مع العسر يسرا ورب العالمين
ماراح يخليني حايره...

دكيت باب الغرفه ودخلت وكفت صافنه علي
مدد ومخلي ايده ع وجهه حجه وهو ع وضعه
كال ليش واكفه فوتي..

كعدت ع حافه الجربايه عدل كعدته وكال
ليش وجهج شاحب وعبالك غرگانه السفن
كولي يالله..

رانيا.. تعرفني من ناحيه اطفالي ضعيفه حته تفكير
مااعرف افكر جنت قبل وحدي وماعندي شي اخسره
واتخبل من التفكير وهسه انت بالاختيار ومااكدر اخسركم
اثنينكم...

ضرغام.. انتي تثقين بيه؟
رانيا.. طبعا اثق بيك بس انت ماتعرف وسام
عنده الرشوه والفلوس لاشيء اني عشت وياه واعرفه
حته جان يوكع بشغله بسرعه يدفع فلوس ويخلص روحه
يعني اذا اخذهم مني شسوي شلون اعيش بدونهم؟؟

نهيت كلامي وهو صافن بوجهي هدوء مسيطر
علينه عين بعين اني وياه... ألسنه اخرست وصار
الحجي بالعيون نحجي الماكدرنه نبوحه ..

عيني تحاجي ودكله اذا اختاريت اولادي لاتزعل
سامحني لان صرت بين نارين!!
ترد عليه عينه وكأنو دكلي مابيه حمل فراگ
واني مجروح من يومي لاتزوديهه عليه..

من شدة التركيز بعينه المارمشت ابد طفرت دمعه
من عيوني وفتحت وراهه الباب لدموعي البقيه
وصارن وحده تتسابق منو الاسرع ومنو نارهه اقوى...

قرب نفسه ولزمني من ركبتي باثنين اديه بخفه
اصابيعه تتحرك وره اذاني وهو يكول ليش تبجين
ليش هلكد حزينه اني وياج مااعوفج..

كمت احجي وابجي ضرغام لاتعوفني اني ماعندي
احد يساعدني بس انت وامي ضعيفه حال مااكدر
افارك اطفالي يوم واحد الله عليك ساعدني ...

ضرغام.. تعاي تعاي وحضني حيل يشمني من ركبتي
بقوه ويتنهد وانفاسه حاره مثل نار گلبه ..

رجع نفسه ليوره وارتجه ع التاج مال الجربايه
واني صرت بين اديه نفس وضعيته مد ايده ع شعري
سحب القراصه فتحه شعري طويل نزل ع اكتافي
وسحب راسي خلاه ع صدره ...

اصابيعه تلامس فروة شعري بهدوء وكال شوفي
رانيا ماكو خساره بدون مقابل تخسرين شي بس
تربحين شي ثاني الله من يحرم العبد من الشي الرايده
لازم هو كاتبله ومعوضه بغيره..

اني مااكلج فضليني ع اطفالج لاابد اني هم اب وهم
عشت الفراگ سنين ويه كل نفس وجرة جكاره اتذكرهم
موهسه انتي يائسه بس غيرج مر بايام من شدة مرارتهه
من اتذكرهه ارجع طفل وفاقد لعبته

فقدت عائلتي كلهه بليل يمهم سهران ويلعبون ع صدري
ومرتي بحضني والصبح الكاهم محترگين ابني الصغير
بدون ملامح گلبي الدلاني بي وميزته..

حب حياتي الوحيد ماتتوقعين شتعبت عليهه وشلون
اخذتهه غصب عنهم مشاكل وتهديد يوكفولي بالطريق
اهلهه يهددون وماتبت واخذتهه لوهي لو مااريد..

وينهه هسه؟؟ وين اطفالي ؟؟ صفيت وحيد لا ام ولا اب
ولا عائله انام واصحه ومنظرهم كدامي طلعت حامل
يعني ابني الثالث مات وهو مااشتم الهوه بس دخان
النار...

لاتتوقعين التمرين بي انتي اصعب لا غيرج مر باتعس
وظل موكل امره لرب العالمين احنه عباد الله بوقت الحزن
نجزع بسرعه بس المفروض عدنه امل لان عدنه رب رحيم..

مااكدر اتخلى عنج ولااكدر اذيج واحرمج من اطفالج
حبيتج بعد مافكرت ليالي طويله وشفت نفسي احبج من
صدك لومجرد نزوه بس يوم عن يوم اتعلق بيج وكمت
افكر بحياة جديده وكمت ارسم احلام وتصير عندي
عائله وافرح بيهه..

مااكدر اخسرج ولااكدر اشوفج متعذبه ع اطفالج
الي اريده منج شي واحد اريدج تثقين بيه اتحملي
بعدهم بس مرجعهم الج ...

حته اذا هسه اخذهم لاتضعفين كل مشكله الهه حل
ويجوز يبتعدون عنج سنه ويرجعون اني مااكلج فضليني
عليهم بس مااريدج تتخذين قرار عاطفي فكري بعقل
ودرسي الامور بكل ايجابياته وسلبياته ..

رانيا.. رفعت راسي اباوعله كتله اني احبك مااكدر
اتركك اريد حل اثنينكم اريدكم
ضرغام.. حاليا ماكو اثنينه لان الوضع مشحون مستحيل
يشيلهم وينطيهم الج ..

رانيا.. ظليت اباوعله وكلبي ينبض سريع
حرك اصبعه ع طرف شفتي اصبعه يروح ويجي
سره خدر خفيف غمضت عيوني سحب ايده من جوه
راسي وخلاني ع المخده..

تناغمت ارواحنه وامتزجت دقات قلوبنه
وهو يبوسني باتقان وكل هدوء عكس طبيعته
السابقه ايده ماطلعهه من شعرهه دائما اكله انت خبره
بحيث يداعب شعري ويبوس بشفايفي بنفس اللحظه ..

رفع راسه وخله راسه ع راسي وصرنه ناخذ نفس
واحد مد ايده رفع شعري من الجانب وباسني
من رگبتي ورجع نام ع ظهره وسحبني لحضنه..

همس يم اذني احبج حيل مااريد اخسرج مااكدر
اعيش جرح جديد واني اعالج بالقديم
انتي الشي الوحيد الحلو حاليا بحياتي اذا رحتي
شنو طعمهه حياتي بعد خساره ثانيه؟!!

رانيا.. اني هم احبك حيل ومااكدر اعوفك ولا افكر
بيوم اتخلى عنك ماتتوقع احساس الفرح العشته
وياك بهاي الايام وگانو شرنقه جديده بعدهه بطور
التكوين...

ضرغام... منيلج هالسوالف ادري مدرسة حاسوب لو سيبوبه
شلون تشبيه شرنقه
رانيا... هههههه اخذني الواهس

ضرغام.. ممممم شعرج حلو لاتگصي
رانيا.. بالعرس اگصه
ضرغام.. اكلهه حلو لاتگصي دكلي بالعرس
رانيا.. عاجبني اغير
رانيا.. بس انتي هيج تعجبيني

رانيا.. نوعك المفضل مو؟؟ تذكر من كتلي هيج
ضرغام.. مامجذب صدك نوعي المفضل احب المتمرده
رانيا.. زوحتك جانت مطيعه
ضرغام.. ااي جنت اكلهه مرات تمردي مااحب كله طاعه

رانيا..يعني اتمرد عليك هسه؟
صرغام.. يله بس اريد التمرد الحقيقي ع اصوله
رانيا.. شتقصد؟
ضرغام.. انتي تعرفين شوكت مطلوب التمرد لو عبالج
اطب واطلع تتعاركين؟؟

رانيا.. بسته من ركبته كتله افكارك منحرفه
ضرغام.. هاي افكاري بعدج ماشايفه تطبيقهن
رانيا.. احبك
ضرغام.. كومي يم امج لا نخلف قبل الاوان

رانيا... ضحكت وكمت من حضنه بعد مابسته من خده
وطلعت كلساع يتبدد عندي شعور الفرح من اتذكر اطفالي...

بليل اجه السبع اخذنه وضرغام نام السبع ماقبل
يجي كاله حته ماتكبر السالفه رحنه لبيت عيالي
فتح الباب حماي دخلنه بالاستقبال موجود عمي
ابو وسام واجت امه سلمت واخذوا الجهال يبوسوهم
وهم لازگين بحضني..

شويه واندك الباب واتفاجىء بحسام وخالو يعني
ناويهه ع شر ياوسام لو شنو الفلم اكره وجود حسام
وعبالك عنده عداوه وياي...

سولف سوالف عاديه بين مايجي وسام خابروا كالهم
راح اوصل مرات اصفن ويه نفسي اكول عجيب بيوم الانسان
تتحول كل مشاعر الموده بداخله الى كره وتصير اقل
من العاديه

ماتتحرك مشاعري ذره اتجاه وسام ع الرغم شكله حلو
وشخصيته حيل حلوه مابي قصور بس اكو ناس تعبر
الخيانه واني شكد حاولت اعبرهه وافكر ابيتي بس
جنت انهار وكمت اكره وجوده...

دك هورن كام اخو فتحه واجه دخل سلم لابس زيه العسكري
بوس الجهال وسلم ع السبع وكعد شال كلاص المي شرب
وعينه عليه بسرعه درت وجهي...

السبع.. تعرفون سبب جيتنه ومن البصره اجينه
وعندي اشغال بس ماانريد مشاكل وياريت تنحل بالود
كل واحد عنده حگ وكل واحد لازم يراعي مشاعر الثاني..

ابو وسام.. والله ياابني مبين عليك من شفتك بهذيج المره
تربات شيوخ وتعرف توازن كلامك وهالشي خلانه مطمئنين
ع اولادنه بامان وهسه الحجي النه اريد وسام وام سيف يسكتون خلونه نتنافش...

اني من الاساس ضد وسام وام سيف بنيتي وتعرفني شكد
اعزهه وماقبلت ع طلاقهم وحاولت وياهه وماقبلت
ردتهه بكل الطرق تبقه لخاطر الاطفال مولخاطر احد..

السبع.. حجي الله بالخير عليك عوفنه من هذا رجال وهاي
مره ..خلينه نحجي بالمشاعر الله شنطه للرجال گلب واحساس هم انطه للمره گلب ومشاعر وهم بعد اكثر ..

نبينا محمد عليهه افضل الصلاة والسلام وصانه بيهن
وصانه بالاخت والام والزوجه مو نجي ندوس عليهن
بحجه اني رجال يعني من يجي يخونهه وكدام عينهه
ليش اطلبون منهه تتحمل هي المره صخره لو هم بشر..

ابو وسام..بس هو وعدهه وكالهه غلطه وصارت جان
تحملت وماهجمت بيتهه واني كتلهه اتعدلهه بي..

السبع.. بالله عليك حجي لو عندك ابنيه وماعندك ولد
واجتك هاي البنيه وكالتك بويه رجلي خاني وبفراشي
وضربني وكالي تتحملين اني يوميه ويه وحده ويوميه
تلگا بموقف شكل شنو نصيحتك الهه ؟؟

ابو وسام.. اذا هي رايده الطلاق اوكف وياهه
السبع..چااا ليش ع بنات الناس حرام حقوقهن وع بناتنه نحلل
اليعجبنه مايصير ياعمي كلشي ينغفر اله الخيانه

الرجال اذا لگه مرته تخونه يطلگهه ومرات يغسلون عارهن
بس من يخون هو مرجله هاي تسمه؟؟ بعيد عن المجتمع
والعادات نحجي من الجانب الانساني ومن جانب كل
انسان بداخله مشاعر من تنجرح ماتصلح بعد..

انه هاي كدامكم مودفاع عنهم اثنينهم ولابصف واحد
بس لازم واحد يقدر مشاعر المقابل واجب ابوسيف
يقدر كونها ام وتعبت وربت وحدهه وهي تقدر بان هو
اب ومرجعهم اله...

وسام.. اني ماعندي اي اعتراض يبقون يمهه اني كدامهه
اكلهه تريد تجي واخليلهه بيت ويظلون عدهه مثل قبل
تريد تزوج لاوالله تعذرني اطفالي يردون الي ..

رانيا.. اني مااكدر اعوفهم انت تدري ربيتهم وحدي
حته ماسألت عليهم خلوني احجي رضاوي من صغره
تمرض وجنت اخابر وسام ماعندي فلوس اعالجه راتبي
مايكفي بس اطباء وبابا ماعنده راتب جان تطلعلي مرته
مرتين تسد التليفون بوجهي ومايرجع يخابر

لو وره شهر اتطلت جاوبني يكلي مسافر اني وهو فعلا
مسافر بس لو عنده ذرة محنه عليهم جان شال تليفون
ع ابو وكاله روح لابني مريض ..

لاتكعدون تحجون بالمعروف وبالدين كل انسانيه
ماعدكم تريدون تاخذوهم مني لان ردت اتزوج وكلش
زين تدرون ماعندي احد اذا صار شي ع ماما اظل
ملطشه بالادين..

حسام.. اذا هيج الحجي بطلي تقنعر ورجعي لوسام
موبس انتي خانج رجلج تقبلي واسكتي
هو رجال مابي عيب

رانيا.. انت اخر واحد تحجي اساسا انت غريب شكعدك
بنصنه ومنو كالكم ادزون علي انت العيب بيك عقلك
المملي حقد وجاي تشوفني مراجلك وعود شوفوني
اني اخوهه

من حجيت هيج كام يصيح ويدك ع الطبله واكسر
راسج واحرمج من الدوام التفت عليه السبع هز راسه
ماقابل ع كلامي ..

السبع.. شنو تكسر راسهه تايهتلك مرت اخوي هاي روح
ابوي لسه ماشفت شي لحدالان نعاملك باصولنه
كل ماتجي تهدد وتغلط شنهي ماعندك حيه محد معلمك
تحترم المره لو انت رجال ولازم اطبقهن براسهه..

ابو وسام.. تهدو بالخير ياجماعه ابني حسام موهيج الحجي
اني لو عندي سلطه على ابني والله العظيم مااخذهم منهه
ابني كله قصور وجاي بعد 5 سنين يطالب بيهم بس
بهذا العمر صار الجبير محد يحترمه والابن ينفذ البراسه...

السبع.. هسه الحل شنو ؟
وسام.. الحل واحد تريد تزوج تعوفهم ماتريد تعوفهم اني
اتكفل بعيشتهم واخليلهه بيت قريب ع اهلي تريد احنه
والمحاكم..

رانيا..حجي حجي هوسه هذا يكول هيج وهذا هيج
وعيني ادور من وجه لوجه ماما وام وسام ماحجن
لان ماكو شي ينحجي وصلنه لطريق مسدود
وكمنه انريد نطلع وكتلهم يومين واردلكم القرار...

بعدنه واكفين جان يصيح حسام حته بيت ابوي عرضته
للبيع اخذ حصتي جان موجه كلامه للسبع
من كدما شايله بكلبي علي كتله صدك ماتستحي وتربات
خالك ياناقص ياماعندك كل اصول ..

مااحسه غير يكمز من وره خالي وبنص بيت الناس
ورفع ايده عليه يريد يضربني بس وسام صار كدامي ولزم
ايده بنتر ودفعه ...

طلعت دمعتي ع خدي والسبع يرزل بي وابو وسام
يعتذر صعدنه بالسياره واحس بغداد صارت صندوق
وانغلق عليه ..

بعدني ع ذمة رجال وهيج يتجرأ ويمد ايده عليه
كدام الناس اذا صفيت وحدي وبدون سند شيسوي
بيه اتخذت قرار بلحظات بعده السبع بالطرمه
فتحت الباب ونزلت كتلهم احنه والمحاكم اذا حكم القاضي
الجهال لوسام هاهي ياخذوهم حياتي مااخربهه ...

رجعت طول الطريق حسبي تاخذني وحسبه تردني
السبع نزلنه وراح كال ابات يم صديقي فتحنه الشقه
ضرغام ماموجود بدلت وونيمت الجهال بالصاله
وفرشنه اني وماما..

شويه واجه ضرغام رحت وراه كال طلعت اشتري جكاير
بشري شصار كعدت احجيله بالتفاصيل وهو يدخن
من كملت كال هاهي خوش قرار حسام مايعوفج
اذا بقيتي وحيده مايرحمج راح اشوفلج محامي
وبلكي الحضانه الج...

بهاي الليله مانمت ولاهو نام كلما اباوع للضوه مفتوح
من الفجر طلع بعد ماباسني كال عندي دوام بس عرفته
يتهرب صار ضغط علي ...

عقيق...ليش مابايت بالشقه وين هسه ؟
السبع.. يم مرتي الثانيه انه بكل محافظه عندي وحده
عقيق.. لاتشاقه هيج كلبي يكوم يوجعني
السبع.. كلشي ولاگلبج .. بايت يم صديقي
هم مقاول فشله من ام رانيا هي شقه

عقيق.. شوكت تاخذني لبغداد
السبع.. العصر رحت لطبيبج ابو التغذيه حجزتلج موعد
بعد اسبوع ورحت لمركز القلب هم حته نجيك من جديد
يعني اسبوع ونجي

عقيق.. زين نبقه شكم يوم واطلعني بليل
السبع.. نبقه شعدنه .. وين انتي هسه؟
عقيق.. نايمه بفراشي فجر تشوف مسلسل
بالصاله
السبع.. اخذتي دواج؟

عقيق... ااي اخذته اليوم اجت يمنه ام اواب
باتت هي والحجيه وباجر يروحن
السبع.. عوفيني من ام اواب مشتاگلج!!

عقيق.. اني هم ومااعرف انام لان انت ماكو
السبع.. انه هم اتگلب اريد شعرج وحضنج
عقيق.. عيب جمره صاير متستحي
السبع.. هاي عليمن ولج؟ لاتحجين كدام احد وتالي
انمسح بالكاع

عقيق.. جمره اليوم هيام خابرت خاله ساهره وخاله
صارت عصبيه بالتليفون دكلهه ليش عقيق ماصارت
حامل وخاله رزلتهه

السبع.. هاي موهيام هذا جبار من يضيمه الضيم
يركض وراي وبيش يلزمني غير بعقيق
اسمعي واسكتي هذوله يرادلهم هجه زينه من زمان
مامتخبل عليهم...

عقيق.. فجر دكلي خاف يتزوج عليج لان ماتصيرين
حامل وعضيتهه كامت تبجي
السبع.. ضحك بصوت عالي هسه عليمن اضحك ع عضتج
لو ع كلام فجر طيح الله حظهه عود جنت ناوي اجيبهه
لبغداد بطلت

عقيق.. صدك تريد تزوج عليه؟
السبع.. ليش اتزوج عليج؟
عقيق.. لان تريد طفل واني مااكدر شفت شلون تخربطت
ذاك اليوم..

عقيق.. كليبي عقيق عوفج من هاي الافكار الترفع
الضغط وتحزنج يازواج هذا عمري 36 سنه يله
حبيتج تريدين هسه اتزوج واني اخاف عليج من نفسي
واجاهد جهاد بس الله يدري بي حته لا اتقربلج واذيج
وتاثر ع صحتج وتريدين اجي اكون سبب كسرتج...

عقيق.. انت هواي صابر عليه وخاله دكول الرجال
يبيع امه وابو ع حقه
السبع.. ماعندي احد ابيعه .. والله جاي اكلج اجاهد
مرات اضعف حيل وانسه مرضج واريدج واتعوذ
من الشيطان اكعد نص الليل اصلي حته انسه

احبج موبيدي مااشوفج مجرد رغبه اشوفج ويه
دمي تمشين واليصيبج يصيبني ومااسامح نفسي
لوتوكع دمعه منج بسببي ..

عقيق.. احبك جمرررره..
السبع... جر نفس عالي وكال افيييييش
ياروح جمره ولللج احب گلبج هذا واحب سوالفج
احسهه عسل وتحلي ايامي..

عقيق.. ظل يتغزل بيه واني مبتسمه وكلساع
اكله احبك وهو يكول ترى هسه ارجع بنص الليل
ع كيفج وياي ترى هذا تعذيب ع البطيء

بعدني احجي انفتح الباب فجر بيدهه صينيه
خلتهه بالكاع وكالت ماتاكلين من سمع صوتهه
كال يله راح انام وسده...

اباوع لصينيه بيهه ماعون جبير صحن مال عزايم
وبي محروك اصبعه كعدت اكل وياهه هيج مايعه
ومستويه حيل وبيهه حموضه بحيث مسحنه الصحن
كله ...

ارتجت فجر ليوره وكالت الحمدلله اللهم اشبع كل
جوعان واكسي كل عريان..

جاوبتهه امين جان دكول تدرين شكم كغصه خبز سويت
كتلهه شكد جان دكول 4 يعني اني وياج هسه ماكلين
4 كغص خبز الساعه ب1 ونص بليل

عقيق.. شهكت عزززه فجر هسه نصير دببه
فجر.. اني صايره مثل واحد مكغصه ( مكرصه)
الزنابيغ ( الزنابير) من اغيد اغسل وجهي بايد وحده
توكف بخد واحد ماتكفي..

عقيق.. هسه تصيرين مثل هيام مرت جبار
فجر.. باجغ مااكل مااتعشه لا من عكب باجغ
لان ماما تسوي دولمه كالت ...

عقيق.. وكل اسبوع فجر توزن تلكه نفسهه صاعده كيلوين
وخاله ترزل بيهه حته ملابس ماتصير عليهه وتشتري
جديد..

لبابه... اني وجراح نفس وضعنه ماكو بيناتنه كلام
داخل الغرفه بس كدام عمه سؤال وجواب ع حاله
عدد مرات اليدخل يسبح كامت تزود صاير يدخن موبانصاف
حسيته للاسوء مو للاحسن..

نزلت لماما حجيتلهه كالت تقربي اله وشوفي
احتوي وحسسي بحنانج اذا شفتي استجاب معناتهه
علاجه انتي واذا رفض ابتعدي..

ماكدرت اسوي هيج كلما اكول اتقربله اتذكر هذيج
الليله اخر شي تعبت من التفكير كمت فرشت سجادتي
وصليت ودعيت وكتله ياربي بروح شهد البريئه هي
طفله وعدهه حوبه يمك دليني ع الطريق الصحيح..

ارتاحت نفسيتي وراهه ظلينه يومين ع نفس الحال
ابرار قدمتلي كالت صديقتي شاطره بالقبولات
وهي سوتلي الاستماره ...

عقيق كالتلي راح انروح لبغداد بعد اسبوع فكرت
لو نروح وياهم هم يغير جو وهم يصير تقارب جنت
كله مجرد افكار من توصل للتطبيق ابطل جاي اضغط
ع نفسي ومتناسيه سعادتي بس اريد اساعده...

جنت كاعده بالغرفه الساعه ب11 ودخل هو بين
يوم ويوم يجيبلي علاكه لوحلويات لونساتل
يخليهن ع الميز يجيب الي ولابرار..

دخل سبح ورجع مدد بفراشه احجي ويه نفسي
كومي صيري قويه ساعدي يالبابه اتذكري زيناته
هو يحبج بس مريض انسي هاي الليله ابدي من جديد

شويه قويت حالي وكمت كعدت يم راسه فز
كال بيج شي؟؟؟ كتله لا مابيه شي بس اريد
احجي وياك جاوبني كولي ..

كعدت بصفه كتله خلي انروح لبغداد
جراح.. قصدج اروح للطبيب؟؟
لبابه.. لا مولطبيب بس انروح نتونس كلشي ماشفنه
بعرسنه والسبع وعقيق راح يرحون خلي انروح

جراح.. ميخالف اخابر السبع ونحدد يوم
لبابه... ظليت ساكته مااعرف شحجي ولاهو يفتح
موضوع
جراح.. مرتاحه؟؟
لبابه.. الحمدلله ..

مد ايده ع شعري رفع خصله خلاهه وره اذاني
وتفاحه ادم عنده تتحرك من كدما يبلع بريگه
ايده قطعه ثلج ماادري ليش هيج اطرافه بارده...

دكات كلبي قويه بس مهديه حالي كون مااضعف
وكون مااتذكر الصار اريد اكون وسط لاهيج ولاهيج

ماادري شلون طلع الكلام من حلكي وكتله
تعال نام ع الجربايه كال لا احسن الج مااكدر
خليني هيج مرات مااسيطر ع وضعي واخاف عليج

لبابه.. سكتت وكمت كتله تصبح ع خير
ومددت بكلبي كلت شويه شويه موكله دفعه وحده
بلكي واحد يتجاوب ويه الثاني..

رانيا...يجي السبع يبات يمنه بليل بالصاله وضرغام
اني وياه ع التليفون اجراءات المحكمه مستمره
التقيت مرتين بالمحاميه وتخابرني اول باول كل الفلوس
تكفلهه ضرغام..

قبل موعد المحكمه بيومين اجه ضرغام ماما طلعت للصاله
ماقبل هو بس ماما اصرت كالتله ارتاح سبح وكال راح انام
لاتكعديني كملت كل شغلي لحد ب11 بليل
فتحت باب الغرفه بارده ثلج وظلمه وهو ع نومته..

فتحت الضوه وكعدت يم راسه كعدته بس لمست
لحيته كعد سحبني من خصري ونومني بصفه
اكله اكعد اتعشه يصيح مااريد خليني اكوم فشله
من ماما كال بس خليني اغفه هنا ويأشر ع صدري..

ظليت العب بشعره ولاكانما ذاك ضرغام البارد المستفز
احسه طفل وفاقد حنان وجاي يحاول يلملم
نفسه من جديد...

غفه بحضني بسته من راسه وكمت طفيت الضوه
وطلعت اباوع بين جهالي وبين ضرغام ياربي لاتحرمني
منهم اثنينهم مااكدر ع فراكهم..

اليوم موعد المحكمه كعدت من الصبح دماغي احسه
يريد يوكع بين اديه من شدة القلق والتفكير اجه السبع من
الصبح ويحجي ويه ماما وضرغام بين مابدلت وطلعتلهم

جان يكول حسام رافع دعوه ع البيت يريد حصته
ومدعي انتم حارمي من حقه يعني حصركم بالزاويه
حته الحق يصير ويه وسام...

ضرغام.. اوكف اوكف هو مو ع اساس المرحوم ابو رانبا
مايدري عنده ولد وحسام مسجلي بأسم خاله يعني
بأي حق يشتكي؟؟

السبع.. انه هم كلت هيج هسه انروح انشوف الفلم
السالفه ماطابه بعقلي وراهم لعبه ومحتمين بوسام
بحجه نرجعلك ام سيف غايتهم شي ثاني..

رانيا.. طلعنه للمحكمه وضرغام جان كلش عصبي حته
صاح عليه البسي عبايه ماجادلته لبست وحته بدون
نقاش باي موضوع لان مادري شبي..

وصلنه للمحكمه وهناك وسام اردد بداخلي ايات ويارب
مايرحون مني معقوله اليوم اخر يوم وياي ومااشوفهم
يوميه ؟؟ معقوله اني فضلت حياتي عليهم وهذوله يتربون
بأدين النسوان الغرب؟؟

ضرغام لكه ضابط وظل يسولف وياه بس عينه عليه
خاف يشوف وسام كدامي صاحوا باسمنه ودخلت
رجل تخط ليكدام ورجل ليوره...

هاي اللحظه اصعب مامريت بي بحياتي حسيت
نفسي مااستحق اكون ام من اباوع لضحكه سيوفي
شلون امكم فضلت سعادتهه عليكم وانتم راح تصبحون
وتمسون بدوني ...

اخذني فكري للبعيد واني اتخيل من يكبرون يعاتبوني
شلون هانو عليه وتخليت عنهم لو تجي افكار براسي
يبجون ومحد يبوسهم ويسكتهم...

لحظات جدا صعبه الله لايخلي احد يشوفهه دائما
الاطفال ضحيه ولازم طرف خسران وطرف يطلع
يمشي بزوده...

جان صوت القاضي ع شكل ذبذبات صوتيه من كدما
ترفض اذاني تسمع الحكم قرر الاطفال عند وسام لعدة اسباب
ماعندي سكن !! زوجي غريب من غير محافظه!! والاهم
من هذا عايشه بوسط قريه عشائريه بيهه قتل وثارات...

ردت احجي وماسمحلي قرار نهائي طلب من عدنه نطلع ليبره
هايمه ع وجهي مثل التايه بصحراء مستعده ابوس ادين
ورجلين وسام بس لاياخذهم..

طلعت ابجي وسحبني ضرغام من ايدي للسياره
لان صوتي بده يعله الناس تباوعلي ونظرات الشفقه
بعيونهم اريد اصرخ بعلو صوتي واكول اني ام وحرموني منهم

ربيتهم ليالي ظلمه وطويله ويه كل نفس يصعد منهم
احمد الله واشكره من يتمرض واحد بيهم للصبح اظل ابجي
اكول اخذ من عمري وانطيهم..

باجر يكبرون ويعوضوني التعب وباجر اشوفهم
عرسان ويكعدون يتذكرون تضحيتي الهم وشلون ربيتهم
وفنيت عمري الهم ..

بس بعد هسه ماراح يفتخرون بيه راح يكولون عافتنه
وربانه ابونه لومرت ابونه اصير غريبه عليهم واشوفهم
بالصدفه منو ينام يوميه بحضني رضاوي مايغفه اذا
مايلعب بشعري ويبوسني يكلي ماما لاتبجين من اكبر
اوديج للحج...

باجر من يكبرون ويريدون نصيحه امهم وين اني عنهم
من يريدون يتزوجون منو يروح يخطبلهم منو يهلهل
بعرسهم ويكولون هاي ام العريس...

مستحيل اكدر افاركهم لو اعرف انذل وانكتل واتعذب
وماافاركهم لحظه ارضى بكلشي واظل اتعذب وحدي
بس ضحكتهم كافيه ...

اسمع وسام يكل للسبع حضروهم العصر امر عليهم
لان باجر التحق واني حاضنتهم مثل الحمامه
تخاف من صيادهه...

ضرغام ابد ماانطخ بوسام حته بعيد واكف بس
حسبه تاخذه وحسبه ترجعه وهادىء حيل كشكل خارجي
بس اعرفه عصبي من عيونه...

رجعت مكسوره خاطر ضرغام مارجع عنده
شغل رجعنه ويه السبع وصافنه بزماني مستحيل
يرجعهم الي وسام مايتنازل عنهم من ذاته هاهي خسرتهم
لو اروح واكله اطلگ من ضرغام ورجعهم الي؟؟؟

دخلت الغرفه جان تشيرت ضرغام الاسود ع الجربايه
شلته شميته حيل ردت اداوي جرحك وردت احقق
احلامي وياك بس !!! كلشي ناقص خسرت اولادي
حطيت تشيرته ع وجهي وكعدت بالكاع وكمت ابجي...

احبه حيل روحي متعلقه بي مااكدر اتخله عنه راح اعيش
بحزن طول عمري وبنفس الوقت اولادي راحوا من ايدي
شهكت شهكه حسيت نياط گلبي تگطعت وشعوري
مثل واحد لزمو من اصابيعه وشمروا من مرتفع...

.
يتبع....

#خبايا_الاقدار
❤️♨️♨️

... البارت الثالث والاربعون


تدري بيه بروحتك ماراح اعيش..!!
اشلون گلبك طاوعك خليتني..!!
موش عميه الوادم تشوف الدموع..!!
وانت هيج بلا ذنب بجيتني..!!
لو صدگ مكسور گلبك مامشيت..!!
بسكته لو بهداي جا حاجيتني..!!
وگتلي رايح لايظل بالك وراي..!!
حتى اعرفك من صدگ مليتني..!!
ليش خليت الدمع فايض عليك..!!
ردتك تشوفه شعجب نسيتني..!! 
.....

رانيا.. اجمع بملابسهم وابجي هاهي بعد مااشوفهم
يلعبون يمي ومايدرون امهم تخلت عنهم اسمع
سيوفي يكول لرضاوي يمته نرجع يم فجر خاف
دجاجاتي ماتن وذاك يگله لا فجر كالت اني انطيهن اكل..

روحي تتكطع عليهم اختاريت خطأ شلون ضحيت
بيهم ومن جهه اخاف اتعذب وحسام يستقوي
عليه اجت ماما يمي كل قطعه ملابس اشيلهه اشمهه
اميز ريحه رضاوي وهذا سيوفي ..

ام رانيا.. ياامي كافي راح تموتين شوفي حالتج شلونهه
خلي ياخذهم شكم يوم وبلكي مايتحمل ويرجعهم من
كيفه ترى هو عناد بيج مو همه الجهال بس شلون راح
تزوجين ..

رانيا.. واني شلون افاركهم هاي الايام واذا مارجعولي
شسوي يمه اظل اشوفهم بالاسبوع يوم انتي تدرين
بيه مااتحمل ..

ام رانيا.. لعد عوفي ضرغام ورجعي لوسام وخلي حسام
يستقوي عليج يابنتي اني موام بس تصرفج صحيح
صدكي يرجعون تدرين بيه ربيتهم وياج وكلبي مفرفح
عليهم بس يابنتي ماعندج ظهر يحميج ولج بنص الناس
ويرفع ايده عليج هذا تترجين منه خير..

رانيا... ضرغام مااجه صارت الساعه ب6 اجه السبع
كال ابوهم جوه لو ذابين عليه نار ولا عشت هذيج الساعه
يباوعولي شلون ابجي وحاضنتهم وسيوفي يكلي ماما
خابري عمو ضرغام يجي يسكتج ليش تبجين...

سحبتهم ماما مني وانطتهم للسبع اركض وراهم وسدت
الباب وكعدت كدامه الطم ع وجهي واشلع بشعري وهي
تنوح وياي ..

افترت بيه الدنيا وكمت مااشوف احس بلي اسوي
بس مااكدر افتح عيني ماما تضرب ع خدي
وتجر بيه للقنفه تغسل وجهي وتصيح راح تموتين
ماعليهم شي يم ابوهم...

تعبت واحس دموعي صارت من تنزل تجرح خدي
گلبي يوجعني حيل والدوخه لازمتني بديت اتخربط
حجيت بالم ماما متخربطه كلبي حيل يوجعني اذاني
توش وماجاي افتح عيوني..

اسمعهه تخابر بضرغام ودكله الحكلي بنتي راح
تموت ع حالي ماكمت جسد بدون روح ماعندي
امل يرجعون هالمره بالقانون اخذهم وبعد ماعندي
اي حجه..

شويه وانفتح الباب بس وضعي للاسوء ضربني
ع خدي خفيف ويحاجي بماما حجيه لبسيهه
خلي اخذهه للمستشفى ...

راسي بحضن ماما بالسياره واون مثل الطير
المذبوح خاف اموت ومااودعهم حته ماوصيتهم
خلصتهه بس بجي وراحوا مفزوعين ..

اليوم بحضن منو ينامون يوميه اذا ماانام بنصهم
مايغفون ومرات اله ع رجلي اخلي واحد منا واحد
منا والعب بشعرهم واقرالهم قصص يله يغفون...

مدللتهم حيل ابخل ع نفسي بالمصرف ومااشتري
بس حته اوفرلهم اي شي يريدو مايوم طلبوا مني
وكتلهم ماعندي راتبي اجيبه احير ششتري بس
كون اشوفهم فرحانين

طببوني للمستشفى ضغطي هابط حيل واصل 4
تحجي الدكتوره وياي بس روحي مو يمهم
كلساع اريد اكلهم بطلت راح اختارهم ...

ساعتين ضبط وطلعنه العجيب بضرغام حته ماحجه
وياي حته ماكعد يم راسي حاله حال الغريب
بس اشوفه عصبي حيل ومتوتر..

رجعنه للبيت طببتني ماما للغرفه ونزعت العبايه
والشال وظلت يمي شويه وكامت كالت راح اروح
بالصاله وخلي ضرغام يجي يطمنج شويه ...

طلعت ماما دخل هو اباوع ع حركاته طلع المسدس خلاه
ع الميز وغلق تليفونه جان لابس تشيرت اسود مال طلعه
نزعه ولبس فانيله رياضيه سوده ربع ردن...

افتر من الجهه الثانيه وهو ساكت بس عيني
تفتر وراه مدد بصفي وسحبني علي حضني
حيييييل من قوتهه حسيت اضلاعي تشابكت

اخذ نفس وهو يشمني من ركبتي وباسني
من راسي وكال مااعرف شلون اقلل من حزنج
لذلك تشوفيني ساكت من اصير عصبي
يضيع الحجي عندي...

رانيا.. شهكت وكتله اريدهم
ضرغام.. خليج قويه واتحملي والله يرجعون مايتحمل
تربيتهم وهو دوام وهم متعلقين بيج هسه يمل ويرجعهم
بس خليج قويه لاتخلي يلزم نقطة ضعف عليج

رانيا... اني ليش هيج ماعندي حظ
ضرغام.. لادكولين هيج اكو اتعس منج انتي تعرفين
من زمان اذا تزوجين ياخذهم بعد لاتلومين نفسج
لاتقبلين بانصاف الحلول اما اكون اولا اكون..

تعبتي اليوم نامي ارتاحي واني من تغفين اروح
بالصاله وخلي تجي امج يمج اني ماانام اظل
سهران خطيه نايمه بره..

رانيا.. جنت بحاجه حضنه ظل يلعب بشعري
ويطبع بوسات ع كصتي غمضت عيوني بتعب
صورهم كدام عيني وماادري نهايتهه شنو...

غفيت شويه وفزيت ع صوت ماما تصلي
وضرغام ماكو باوعت للساعه نايمه نص ساعه
موهواي ظليت بفراشي اتگلب مااخذت عيني
نوم ابد..

الصبح كعدنه نتريك بس اني وماما ضرغام طالع
كالت ب11 نرجع ضرغام يظل عنده دوام ونرجع
ويه السبع انقبض كلبي كتلهه يعني اعوفهم خلاص
وارجع بدونهم؟

ام رانيا.. لعد شكو بعد عيب من السبع عنده شغل وعايف
مرته وحاير بينه وضرغام دوام عنده وحتلو ظلينه هنا
شنو اليتغير ترى الج حق كل جمعه تشوفيهم يعني
بهذا الاسبوع اكعدي واسكتي..

رانيا.. انسدت الابواب بوجهي جنت اصبر بحالي
واكول اتحملي بلكي وسام يمل ويرجعهم بس
كل انسان اله طاقه ومحد يكدر يتحمل فوك
طاقته..

ب11 اجه السبع طلعنه للبصره بالطريق خابرني
ضرغام كال مالحكت عليكم الآمر خابرني وطلعت
ووصاني اهتمي بنفسج وصيري سباعيه..

بالطريق ماما سألت السبع ع سالفه البيت وحسام
يريد حصته جاوبهه حجيه بنت الجبيره هي العارضه
البيت للبيع بصفتهه بنته محد يحاجيهه تريد حصتهه
وهو يمشي بالاجراءات وتنطي نصهه لان هو ماله ورث
مامسجل باسم المرحوم..

ام رانيا.. شلون تسوي سهاد هيج لا مستحيل لج
رانيا خابريهه خاف متدري بسوالف حسام
رانيا.. لا ماما احنه الفقره وهي الحيه كله شغلهه هذا
وهي تحرض بي وتدري بحسام قبل وفاة بابا
وهن الفطيرات كلشي ماندري ..

سولفت لماما كلشي ماما من النوع الهادىء ظلت بس
تبجي وماتكدر تدعي لان بتهه بس كلساع وكالت
الله ياخذ حقنه مانريد بني ادم...

وصلنه للبصره ورحت هم بحضني ورجعت ايد
ليوره وايد ليكدام تلكتنه عمه ساهره حضنتهه
وبجيت عيني افترت ع دجاجات سيوفي يوميه
يكمزون يمهم واله ينامن يله يعوفوهن...

عقيق... انقهرت ع رانيا حيل من اجو السبع راح
للبيت واني ظليت يمهم كمنه نبجي وياهه وفجر
نصبتهه مناحه صديقهه سيوفي ..

حاجتني خاله كالت كومي وره السبع واني
ادزلكم عشه خلي يرتاح ابيته بوست رانيا
ورحت للبيت هدوء ماله صوت فتحت الغرفه
جان نايم عفته لان تعبان وظليت وحدي افتر بالحديقه
عندي زراعات وورود حلوه اتلهه بيهم..

قريب مايأذن الاذان غسلت وطبيت فتحت الضوه وكعدت بصفه نايم ع الجهه اليمنه بس خليت ايدي ع كتفه كال
لاتتحرشين تحوصين يم راسي..

عقيق.. كوم اكعد ماشفتك وراح يأذن الاذان
التفت عليه فتحلي ايده حضنته وباسني من خدي
وكال ماشاء الله هاي الخدود شنفخهه؟!

ضحكت وكتله من الاكل كعد ع حيله وطك رگبته
وكالي سويلنه عشه انتي مانروح يمهم
عقيق.. خاله كالت اني ادزلكم
السبع.. شلونهه ام سيف
عقيق.. خطيه بس تبجي وفجر هم تبجي

السبع.. الله يساعدهه اكلج لبابه شلونهه؟
عقيق.. زينه ماتنزل هوايه دكول عمه زينب تظل وحدهه
تضوج
السبع.. ماتحجيلج عن جراح؟
عقيق.. لا شبي؟؟
السبع.. مابي شي بس عبالي تسولفلج علاقتهم

عقيق..لامتحجي اكلك جمره هاي السنه تقدملي
سادس خارجي
السبع.. شلون جمره بحلكج تخليني اصير
جمره بويه خفي علينه

عقيق.. ابتسمت وكتله احب اسمك الحقيقي
السبع.. انه هم احبج
عقيق.. ليش سموك جمره؟
السبع.. ماادري ابوي مسميني
عقيق .. وليش سموك السبع؟
السبع.. غير انه سبع من مات ابوي جنت اطالب هواي
واسوي مشاكل ويه ولد جبار ومشه عليه السبع..

عقيق.. تدري اني شنو لقبي من جنت صغيره؟
السبع.. شنووو؟
عقيق.. كلهم يصيحولي الصفره الصفيره
السبع... ضحك بصوت عالي عمت عينهم هاي لان
بيضه چنج جماره ..

عقيق.. هسه ماكتلي تقدملي سادس
السبع.. اي اقدملج بس لازم هاي السنه ماتمتحنين
السنه الجايه بس انتي داومي حته ادرسين وتنجحين
من اول سنه
عقيق.. هم اهليه؟
السبع.. اذا فتحوا اعداديه بنفس مدرستج اخليج
بس اذا ماكو لازم تردين ويه فجر حكوميه..

عقيق.. بس تخليني مو تغير رأيك؟
السبع... يايوم مغير رأي عليج كومي خليني اصلي
انت من تجين يمي شيطان تربع براسي

عقيق.. ضحكت وابتعدت عن حضنه كام يصلي واني
رحت جبت العشه من خاله تعشينه وغسلت مواعين
ورجعت كعدت بصفه هو يشوف تلفزيون

السبع.. اطلب منج طلب وماترديني
عقيق..شنو
السبع.. شفت شي عجبني واشتريته الج اريدج
تلبسي ماشايفج بهيج ملابس
عقيق.. وينه ؟

السبع.. بالكنتور علاكه جيبيهه
عقيق.. كمت جبتهه فتحتهه اني ابد مالابسه كدامه دلع
ولايوم مطلعه زنود اوقصير لبسي عادي تراك ربع ردن
وبالعرس بدلتي ارادن جانت..

جايبلي فستان قصير لركبه كصه عدله وبس اسقيات ولونه
سماگي اباوعله ومصدومه هذا وين يفوت بيه وشلون
هيج البس استحي ..

السبع.. لاتصعبيهه يله البسي
عقيق.. جمره استحي هذا فضيحه
السبع.. منين تستحين مني صدك شو بعد مااخليلج دهن
شنو رأيج نبدي العلاج من جديد وغمزلي

عقيق.. ركضت للغرفه مستحيه متردده البسه لولا
قررت البسه ع الاقل افرحه بشي قليل اتذكرت الحجي
علينه ويكولون ماتخلف وخطيه عمره جبيره وماعنده
ولد يشيل اسمه وهو من حقه بس مراعي حالتي..

قفلت الباب وبدلت القماش ينطي باللبس جسمي موذاك
القديم الي اول مااجيت يكولون جاهله جنت فوك نعومتي
مابيه لحمه استمراري ع العلاج غيرني هواي

حته طولت ع ابر الهرمونات بس بقت المفاتن الانثويه
مو مثل عمري دائما جان يكولون جسمج رشيق
بس من اقارن وحده بعمري الكه نفسي مسح كلشي ماكو..

فتحت شعري ومشطته ناعم نزل ع اكتافي شعري بي
لون حمار والفستان لونه حلو اني انعجبت بنفسي
وحسيت مسويه انجاز جبير ..

ترددت اطلع احس جسمي صار نار بس كلبي هادىء
بس من يوصل يم السبع يفشلني واتخربط
واخربهه علي..

احجي ويه نفسي وافتر بالغرفه ضغطت حيل
ع روحي واكول لاتخجلين صارلكم هواي سوه
وتعودتي علي وجمره من النوع المتفهم فتحت الباب
وطلعت امشي مدنگه مااكدر ارفع راسي خدودي
احسهن اشتعلن نار...

طفه التلفزيون واباوع لرجليه كام وكف وهن يتقربن عليه
بيناتنه اشبار قليله ايده انمدت ع خصري برقه وهو يبعد
شعري من اكتافي ويرفع راسي واني انزل بي..

طويل حيل اني اوصل لصدره رفعني من خصري
اكثر اديه ع صدره وكلساع يشدد قبضته ويرفعني
لحدماوصلت بمستواه ورجليه انرفعت عن الكاع
ولزمت برگبته..

غمر راسه برگبتي قشعر جسمي من حركته وهو
يمشي للغرفه ويطبع بوساته ع طول رگبتي
وكتفي .. نزلني ع الجربايه وعينه مايعرف وين
يخليهه وشنو يسوي وشيحجي؟

لزم ايدي وباسهه وكال حيل حلوه طالعه عقيق
كلج احبج منين ابدي اوصف واتغزل بيج
من اصغر تفصيله بيج اعشگج ...

عقيق.. اديه برگبته وكتله اني هم احبك حيل
السبع.. گلبج زين ؟ تحسين بشي؟
عقيق.. اي زين هادىء
السبع.. مستعده لولا؟
عقيق.. خاف اتخربط؟

السبع.. اذا حسيتي بالم لو شويه كلبج تخربط
كليلي ع كيفي وياج
عقيق.. هزيت راسي بقبول اني الموضوع موترني
مافكرت بصحتي بس المهم محد يحجي علينه..

مد ايده طفه الضوه وفتح تيبلام صارت الغرفه هادئه
حيل اخذني بين اديه بحنيه عاملني معامله طفله
رقيقه يخاف عليهه لا تتأذه..

يطبع بوساته بحنيه اني اتقزز من مكان الحرك
وهو مستمر ببوساته ويهمس يم اذني
بكلام غزل خلاني مستسلمه بالكامل...

احس بده كلبي يصير جهد علي اقاوم واعيش
الشعور بارادتي مااريده يبتعد حتلو يأذيني
كلبي اريده كمت مااتحمل صارت نبضاتي
قويه حيل وراسي افتر عرفت نفسي راح اتخربط..

قطعه جليد وذابت بشمس تموز
هيج حالتي واكثر واني بين ادين رجال
غامرني بحنانه وبلمساته التوصل لاعماق گلبي..

اريد احجي اريد اكله ابتعد كانو انضربت ابره
بنج كمت مااكدر اتحرك بس معركه بداخلي
وكلشي بيه يبادله وحاضنه بقوه ضغطت ع كتفه
باصابيعي بسرعه انتبه .

خله ايده ع كصتي وكال بيج شي؟
هزيت راسي ااي مااكدر احجي بسرعه ابتعد
وسحب الغطه وكام جابلي علاجي فتح الضوه
انطاني الحبايه الحراره تطلع من اذاني واني
اول مره اشوفه بدون تشيرت كدامي..

كام وكف سحب التشيرت لبسه ورجع كعد يم راسي
يمسح ع شعري ويحجي عقيق بيج شي حاجيني
لاتسكتين..

عقيق.. حجيت بتعب لاتخاف هسه اصير زينه بس
اذاني توش
السبع.. خاف هبط ضغطج مثل هذيج المره
عقيق.. جاب مخده ورفع رجليه لازمه الغطه من فوك
اريد البس شلون استحي اباوع بوجهه..

اصلا شعور موحلو صار اني فاشله هاي ثاني مره
ومااخلي واتخربط وتخرب علي وهو متحمل وساكت
بس الى متى اكو اصغر مني واتزوجن وخلفن
واني بعده بالبدايه واتخربط..

كام فتح الكنتور طلع دشداشه قصيره كال شو
البسي حته تكومين تغسلين خلاهه براسي
لبستهه وكمت ساندني غسلت بالمي البارد
ومسح رگبتي ورفع شعري واخذني للصاله خلاني
بحضنه وهو يهدي بيه..

بده مفعول العلاج بديت ارتاح وجسمي صار خفيف
نعست واحنه ساكتين ردت اعتذر منه بس كتله
جمره اني اسفه خله ايده سد حلكي وحرك اصبعه
ع شفايفي وباسني من كتفي ...

ظل يلعب بشعري بعدهه غفيت ماادري بروحي
فزيت نص الليل نايمه ع الجربايه وهو غافي
ظليت اباوعله شكد صبرت وشكد راح تصبر ؟؟
بس مااكول غير الله يكتبلك بكل لحظه خير وسعاده..

لبابه.. دخلت للغرفه لكيت جراح يخابر ومبتسم
خليت الملابس بالكنتور واسمعه يحجي ويه واحد
ويكله الحمدلله جنت خايف يطلعون حجه ويكولون
غير مؤهل..

سده واني اباوعله رفع راسه بابتسامه كال راح
ارجع للدوام وهنا بالبصره بسبب الاسر
لبابه.. تحركت من مكاني وصلت يمه رفعت رجليه
وبسته من خده كتله الحمدلله ماضيع تعبك..

اباوعله مصدوم عينه عليه ومصدوم بتصرفي
دنگت وكتله اريد جراح القديم ظل ساكت اشوف
ايده يحركهه يريد يحضني ويبطل...

كعد الجربايه وكال لبابه نطلع نتعشه بره ؟؟
رغم الالم البگلبي واتذكر الصار بس اصبر روحي
واكول بمرور الوقت انسه ومن يصير زين اعاتبه..

كتله اااي ياريت ضايجه كام وكف كال بدلي يله
بين ما اسبح راح للحمام واني بدلت ع السريع
لبست بنطرون وقميص طويل وتحضرت وكعدت..

طلع من الحمام عفته يبدل ورحت كلت لعمه
فرحت لان شافتنه سوه ادري بيهه حاسه
بس ماتكدر تحجي طلع مبدل لابس زيتوني
لونه المفضل..

صعدت بالسياره وطلعنه بالاول ساكتين بعدين
مد ايده فتح المسجل اغنيه هيثم يوسف
بس انت وحدك ليه تغمرني بالحنيه...

اباوعله فرحه بداخله ع المبادره مالتي ماسويت
شي مجرد بسته من خده وابتسمت بوجهه خلته
طاير ومايعرف شلون يعبر عن فرحته حته نفسيته
تغيرت ونبره كلامه تغيرت جان بنتر هسه بهدوء
نفس قبل...

نزلنه بالمطعم تعشينه ونحجي عن الدوام وبلكي
يطلع قبولي زين ونحجي عن ابرار بعدهه مصره
تطلع للخارج تدرس لان من الاوائل واجتهه بعثه
ع حساب الدوله...

كملنه وكال خلي نفتر شويه مد ايده خليت
ايدي بايده ونتمشه دخلنه لمحلات اشتريت شغلات
بسيطه جان الجو نهايه السابع وكفنه يم المرطبات اشترالي
موطه وكال بالسياره اكليهه..

رجعنه اكلت الموطه بالسياره استطعمت بيهه حيل
طيبه جان يكول صوتج لاهيج تاكلين
سديت حلكي خجلت منه ..

دب الهدوء بيناتنه قريب مانوصل كال لبابه
بعدج متأذيه مني ؟؟ رديت علي لاتحجي هسه
من ترجع جراح القديم اعاتبك خلينه بالحالي هسه

جراح.. تعرفيني شكد احبج كلشي صار موبارادتي
لبابه... لاتحجي عوف الموضوع خلينه نبدي من جديد
بس توعدني تلتزم بعلاجك وبراحتك النفسيه وماتنقهر..

رفع ايدي جنت مخليتهه بحضني اخذهه باسهه
وكال اسف ع كلشي ابتسمت بوجهه وحسسته
اني مازعلانه واصلا نسيت بس كذب من اتذكرهه
يصيبني شعور موحلو...

وصلنه للبيت جبنه حلويات ويانه لابرار هو دخل يسبح واني
بدلت قررت مااخلي ينام بالكاع واليوم انجرب ينام يمي
خلي نحسب نفسنه مخطوبين ..

طلع يجفف بشعره راح للكنتور يريد يطلع فراشه
كتله لاتنام بالكاع خلي انام سوه التفت عليه جاوبني
لا احسن الج هزيتله راسي برفض لااا بس اليوم انام
سوه..

رحت يمه سديت باب الكنتور وكفت كدامه وارتجيت
ع الباب رافعه راسي علي وهو يباوعلي بتمعن
دنك راسه اكثر وباسني من رگبتي بهدوء ..

رغم هادىء حيل بس بلحظه ردت انفر منه وادفعه
مدري شلون سيطرت ع وضعي ومابين عليه
اخذني من ايدي مددنه ع الجربايه كتله خلي اطفي الضوه
واقفل الباب...

كمت قفلت الباب وطفيت الضوه ونمت بحضنه
راسي ع صدره واسمع دكات كلبه سريعه خليت ايدي
ع صدره شويه شويه اثنينه هدئنه وواحد حضن
الثاني ونمنه براحه...

رانيا... اسبوع صار لا ليلي ليل ولا نهاري اله معنى
عيني ع التليفون شوكت يخابروني مااريد اخابر
وسام ضرغام مايقبل بس ماكو حل كمت لماما
كتلهه خابري دكت علي من تليفونهه جاوبهه..

سألته ع الاطفال كالهه زينين اني عندي انذار وبعد 3 ايام
وانزل واجيبهم الكم يظلون يمكم يومين وارجعهم
ماما فاتحه سماعه واسمعه يكلهه شلونهه رانيا خومامتخربطه؟؟

ام رانيا.. تعرفهه ماكوداعي تسأل عنهه صار اسبوع
هي ع فد بجيه اذيتهه يا ابني لزمتهه من ايدهه
التوجعهه

وسام.. اعذريني خاله والله مااريدلهه الاذيه بس مااتقبل
موضوع زواجهه ويتبرون يم الغريب قنعيهه خلي ترجعلي
والله كل طلباتهه انفذهن حته اذا ماتريدني ميخالف بس
ع الورق المهم اطفالنه مايشتتون

ام رانيا.. سالفه الرجعه انساهه وهي موصغيره واقنعهه
صارلهه اسبوع كلبهه مفرفح عليهم ابيش طالبيهه
تحرموهه من ضناهه..

وسام.. راح ادزلج رقم امي وخابريهه تحاجيهم اني من
انزل اشتريلهم تليفون يخابروهه خلي تهتم بصحتهه

رانيا.. سدته ماما ورجعت دكيت ع امه جاوبتني
كتلهه شلونج خاله اني رانيا
ام وسام.. هله بنتي وعليكم السلام شلونج صحتج شلونهه
رانيا.. شلونهه صحتي خاله ع الله اولادي شلونهم
ام وسام .. الحمدلله والله عيني عليهم مااعوفهم ابد
انام يمهم بغرفة ابوهم ومن يجي هو يمهم

رانيا.. خاله منو عايش وياكم ونسوان عمامهم شلونهن
ام وسام.. اثنين جناين وزينات وعدهن جهال بكدهم يلعبون
وياهم وجدهم يوميه يطلعهم العصر بس رضاوي
بليل يبجي كوه انومه ...

رانيا.. بجيت بسرعه كتلهه اريدهم خلي احاجيهم
اسمعه تصيحهم هاي امكم خابرت عليكم اجو يركضون
يتعاركون ع التليفون سيوفي حاجاني ماما شلونج
شوكت تجين؟؟

كمت ابجي واحجي حبيب امك شلونك انت
سيوفي.. زين ماما بيبي زينه وجدوا يوميه يطلعنه
للسوك واشترالي بايسكل وبابا يخابرنه يوميه بس احنه
انريدج ماما ..

رانيا.. ماما مريضه اني اصير زينه واجيكم صيروا حبابين
لاتكتل اخوك وناموا يم بيبي وبليل كعدوهه وروحوا لتواليت
موتسوهه ع نفسكم ترى مااشتريلكم بلي..

سيوفي.. ماما رضاوي زعلان مايريدج
رانيا.. دموعي تنزل كتله ليش؟؟
يسحل بي سيوفي وكوه حاجاني بس كتله وليدي كام
يبجي ويشهك ويكلي مااريد بابا اريدج تجين

رانيا.. ادك ع صدري بقبضة ايدي اريد اتجرع
الالم وهو يشهك بصوته الطفولي يكول محد
يقرالي قصه ومحد ينومني بحضنه ..

ظليت احجي وياه واهدي بي وكتله مريضه اسوي
عمليه واجيكم يله سكت وكتله من يجي ابوك
كله يجيبلك كتاكيت العب وياهم ...

سديته منهم لو جبل ووكع ع ظهري بجيت
بجي احس دموع بعد ماعندي بس اشهك
واني اسمع صوتهم جهال مقنعيهم بالالعاب
بس بداخلهم محتاجين امهم...
كمت يوميه اخابرهم يحاجوني زينين انوب
تزود حالتي من اسمع صوتهم

بهاي الايام سهاد ماادري شنو من بنيه وشنو
السويناه الهه اني وامي صممت اله ينباع البيت
ورجلهه مخابر شيخنه وخابر ع الشيخ ياسين
واتفقوا ينباع...

حسام ماشفت خلقته بعد انباع البيت واخذت حصتهه
وبالجذب ما شالت تليفون وطيبت خاطرنه بكلمه
اخذنه حصه اني وماما ماتجيب قطعه ارض بغداد
صفينه لاحول ولاقوه...

اليوم نزل ضرغام بس سلم وراح للبيت
شويه ودك تليفوني رساله كاتب تعبان
تعالي يمي..

استأذنت من ماما ورحت يمه فتحت الباب وطبيت
لكيته كاعد بالكاع ومرجع راسه ع الحايط بس شافني
فتحلي اديه اثنينهن شمرت نفسي بحضنه

ظلينه هواي واحد حاضن الثاني ضرغام موطبيعي
وكاتم بداخله ومايحجي ولا اني اعرف اسولف
من كدما نفسيتي تعبانه..

كعدت كدامه لازمه ايده شبيك حبيبي ليش
تعبان؟؟ جاوبني ماادري احس طاقتي خلصت
اريد يوم ارتاح بي ماكو ..

رانيا..كول يالله اخذ اجازه ارتاح الدوام تعبك
ضرغام.. هو بس الدوام بس انتي بس ذكرياتي
منين اتلكاهه يارانيااا.

هسه كليلي الجهال شلونهم خوماتخابرين هذا العار
هزيتله راسي لااا اخابر ع امه واحاجيهم زينين
ع اساس يجيبهم يمي يومين يظلون..

ضرغام.. الله كريم تنحل ماتظل هيج
اريد اسبح واطلع اريد كلاص جاي من ايدج
رانيا.. ادلل كام وكف نزع التشيرت عطت بصوت
عالي شنو هاي ضرغام؟؟

صدره لحد ظهره كله ملفوف بشاش من جهه گلبه
لزمني من خدي كال عركه بهجوم وطلع شايله سجينه
وضربني زينه صارلهه اسبوع هسه اطيب

رانيا.. عفيه ضرغام ماعندي غيرك والله اهتم بنفسك
ترى اموت اذا صار بيك شي
ضرغام.. اسم الله عليج ودنك باسني من وره اذاني
ميلت راسي بدلع

جان يكول ماتجين تسبحيني مجروح
ضحكت كتله بطل انحراف خليني اسويلك جاي
كرصني من خدي وراح للحمام...

سبح وطلع صبيتله الجاي وكعدنه شويه انسولف
وكال هاي الايام اثث البيت لان جنت مافارغ
بس ماادري ليش مامرتاحه...

مثل ماوعدني وسام وره 3 ايام جابهم وخابر السبع
تلكا بالعشار اخذهم بيومهه اشمهم وابوسهم
وهم يبوسون بيه يكلولي ماما وجهج صاير صغير..

اخذتهم للغرفه ابوس واحضن بيهم كعدتهم بحضني
كتلهم سولفولي شلون عايشين شفتهم واحد يباوع
بوجه الثاني رضاوي يباوع لسيوفي بخوف ويدنك..

سيوفي.. ماما رضاوي بليل يسويهه ع نفسه ومرت باقر
تصيح علي وجرته من اذانه وكام يبجي وكلنه لبيبي
وبيبي تعاركت وياهه ..

رانيا.. رضاوي خجلان ومدنگ ابد مايوم سواهه ع نفسه
يكعدني بنص الليل ماما اروح لتواليت شلون هيج صار
قاريه وشايفه هيج حالات الطفل من مايحس بامان
وخايف يدرر ع نفسه..

ضميته لصدري حيل وكتله ميخالف ماما هاي تروح
بس سيوفي لاتحجي كدام احد وهاي مرت عمكم
اني اكول لابوكم يحاجيهه...

رضاوي.. ماما تكتلني تضربني ع ظهري دكول انت وكيح
ومن اجي العب ويه بتهه تضربني ع ايدي واني اخاف
منهه..

رانيا.. هو يحجي واني اغلي من داخلي ياحقيره
كسر باديهه وسوده بوجهج رانيا هيج نايمه ليلج
وابنج خايف من مرت عمه وتضربه ..

خابرت ام وسام حجيتلهه ظلت تتعذر وكالت رضاوي
وكح بعدهم هسه يتعودون واسمع صوتهه يلعلع
دكلهه تريد تعرس وشمرت جهالهه علينه ...

خليت ايدي ع خدي وصافنه بزماني يارانيا شسويتي
كلبي مامرتاح مدام اكو نسوان غربه يمهم اكيد
ماراح يرحمهم لان النفوس تغيرت..

ظل يمي يومين واخذهم السبع رجعهم واني اوصي
بيهم واشتريتلهم العاب احسهم تعودوا يوميه
بمكان وكاموا يميزون اليصير..

وره 4 ايام ضبط مستمره اخابرهم ويكولون
زينين باليوم الرابع دك تليفوني ام وسام فتحت
خط كلت الو ويجيني صوت رضاوي يبجي
ويكلي ماما تعاي اخذيني عمو كتلني

يشهك بالسماعه ويصيح تعاي ماما ظهري يوجعني
اخذه منه سيوف ونفس البجي يكلي ماما احنه نخاف
هنا من مرت عمو دكول اذا حجيتوا لابوكم اجويكم
وبابا ماموجود ...

تخبلت كتلهم انطوني بيبيتكم حاجيتهه وابجي
حرام عليكم جهال هذوله ولكم ماتخافون الله
اخذتوهم مني اذا موكدهه ليش حرمتوني منهم..

اسبوعين هيج صار بيهم مااتحملت ابد
حياتي ومستقبلي مااريدهم اكعد ع جهالي لو بغرفه
طين قابله والباقي مااريده ..

بيومهه من كدما لطمت ع وطهي حته خدودي
تجرحت بس شفت ضرغام طب لبيته ركضت
بعد قرار نهائي حته ملابسي حضرتهن بس فتح الباب
كتله ضرغام بعد مااكدر جهالي متعذبين لهنا
وتعذرني انت ام وتعرف الضنه غالي...

.
يتبع.............

يي حبي ماركه دوف زينه🌚🌺

#ملوكه

عمري هو نوعية وحده مابي اصلي وتقليد وماادري سعره بالضبط
لان كل محل يبيعه شكل☹️

#ملوكه