فوك النص ساعه ابجي وحدي اخذتهن
وطلعت لماما هي شافتني وقرتهن بجت
وياي انعاد العزه بيومهه وظليت يومين
مااروح للمدرسه ونايمه بالفراش...

كامت تمشي الاشهر سريعه
وماكو اي خبر من عنده كلمن رجع لحياته
طبيعيه بس احنه اني وامه واخته ظلينه
مكسورين وعينه ع الشارع بلكي يجي
طارش ...

السبع.. عقيق لاتعصبيني عليج الحمل
العليه كافي مو انوب انتي تزودين الهم ..

عقيق.. اني شحجيت بس كتلك لاتروح
لكركوك بعيده واني شلون اظل وحدي مده
٣ اشهر هواي..

السبع.. مواكلج امشي وياي ماتقبلين
اسمعي يابنت الناس انه حياتي هاي
ماعندي بيت يوميه بمكان ع رزقي..

عقيق.. ع كيفك ماحجيت اني
بس شلون اروح وياك هلكد ومنو يدرسني
وانت تجي المغرب واظل ٣ اشهر وحدي

السبع... فرك وجهه حيل وكال استغفر الله
عقيق عوفيني ارتاح شويه..

عقيق.. صاير مايتحمل كلمه من وفاة
جراح شفت جانب حزين من عنده
عينه ع التليفون بلكي يوصل خبر

ظل وحده السبع حته ضرغام راح يصير
اسبوع من سافر لاربيل دوره للاستخبارات
وظل السبع وحده من المشاكل مدري
من حزنه ع جراح...

عافني وطلع من البيت لليل يله اجه
دك الباب جايب مسواك اخذته خاله
ساهره واشرلي اجي يمه..

طلعنه برا كال اخذتي دواج؟!
عقيق.. اي اخذته انت بعدك عصبي!!
السبع.. لااا باجر اخذج وياي من الفجر
تحضري واخذي ملابسج لان هناك بارده

عقيق.. ونظل ٣ اشهر
السبع.. الله كريم التسهيل من الله
اخذي كتبتج وياج واني هناك اشوفلج
حل للدراسه..

عقيق.. سكتت رحت حضرت جنطتي
يوميه بمكان ماكو محافظه تعتب عليه
وين مايروح ياخذني وياه ...

ثاني يوم طلعنه لكركوك طريق طويل
ادمرت من الكعده كلساع ننزل باستراحه
بس تعبنه حيل..

وصلنه المغرب تعشينه بالمطعم وهو
متفق ويه المهندس الوياه ومأجرلنه
شقه قريبه على الشغل ..

جنت تعبانه حيل حته مااكدر اكوم اصلي
شمرت نفسي ع القنفه وهو راح للحمام سبح
وطلع صلى واسمعه يقره قران واني مركزه
وياه..

كمل واجه كال هاي لسه ولج مدده كومي
اسبحي وصلي شنو هالكسل!!
عقيق.. تعبانه حيل من الفجر كاعده بس اريد
انام..

السبع.. كومي اسبحي وصلي ونامي
واكو فواكه بالثلاجه من تجوعين اكلي..
عقيق.. كمت للحمام سبحت وطلعت
فرشت سجادتي اصلي وهو جان يخابر..

كملت صلاة ومدنگه اسبح باصابيعي فززني
صوته وهو يكول انتم على
المذهب السني؟!

التفتت علي واني الم بالسجاده كتله اي
متدري ؟!
السبع.. لااا ماادري ماشيفج تصلين كدامي..

عقيق.. من رحت سألت عن عمامي ماعرفت
حته اسم عشيرتي سني!!
السبع.. ماادري قابل اروح اسأل سني لو شيعي
اني سألت عن عمامج موبالي هيج شغله

عقيق.. ضجت لان اني سنيه؟!
السبع.. ليش اضوج ؟! شوتعالي يمي
عقيق.. نزعت حجاب الصلاة وكعدت بصفه

سحب ضفيرتي خلاهه ع كتفي
نزلهه صفح ولزمني من كتفي
وميلني علي صار راسي ع صدره..

حجه وهو يحرك بضفيرتي هاي الايام
اني عصبي وماجاي اتحكم باعصابي
من تشوفيني هيج لاتحاجيني..

رفعت راسي علي كتله لا موعصبي
واني مقدره وضعك
السبع.. غير شارد منج حته لا اگب
عليج جرااح اااخ ياجراح ياكل ويشرب
وياي ولاول مره احس روحي عاجز
عن اي تصرف..

عقيق.. جان يحجي واني اسمعه تعبانه
بشكل ونعسانه ماحسيت شلون غفيت
ع سوالفه وغطيت بالنوم..

ماادري شكد نمت بس فزيت واني
نايمه ع رجله وجسمي ع القنفه
وهومدد رجلي ع الطبله..

كمزت من مكاني كتله شكد صار
من غفيت ماادري بروحي..
السبع.. كومي نامي ابمكانج مبينه تعبانه
وخلتيني اسولف وحدي..

رحت للغرفه بس خليت راسي
غفيت وهيج مرت الايام بالنهار اقره
الي اكدر علي وبليل يجي نسولف شويه
وينام تعبان من الشغل...

مارجعت عليه حاله الكابوس وعادي اطفي
الضوه وانام اخابر البنات اسال على لبابه
ع وضعهه لاتحجي ولاتختلط..

مر شهر احنه بكركوك وابد مااطلع اصلا
هو مايلحك غير بس بليل يرجع وبسرعه
ينام...

رانيا.. اي خبر ماكو من جراح وهذا الشهر
الثالث وكلشي ماكو واحبابه بوسط
حزنهم...

عايشين بحمايه ياسين وابد مايوصل
يمنه ولاانشوفه ومحترم العقد بس حمايه
وماطمع اكثر..

دوامي طبيعي ومستمره وشويه شويه
بديت ارجع طبيعيه وماما عايشه
بحزنهه...

بيوم منهن دك عليه رقم غريب هواي
ماجاوبته لحدمادزلي رساله وكاتب
افتحي اني وسام لا اجيج للبصره
احرگهه ع راسج..

بس الله يعلم خوفي بذاك اليوم
ركضت لماما ابجي واكلهه راح
يجي يتخيلي واكف وره الباب
وراح ياخذ جهالي..

ابجي واحجي لج ماما ماانطي
اطفالي حاضنتهم وابجي
اعرفه يسويهه وياخذهم...

ساهره.. يمه ع كيفج راح تموتين
هي بكيفه ياخذهم الحضانه الج..
رانيا.. عمه اذا عرف عايشه بقريه
ويوميه ابيت ومنطقتنه ابغداد مهجومه
هسه يداعي بيهم بحجة مو امان وين اولي!!

ساهره.. انطيني تليفوني فجر خلي اخابر
ع السبع ننطي خبر خاف يجي لهنا
دكت عمه ومارد السبع طلعت رقم ضرغام
وخابرته...

رد عليهه وحجت وياه خاله ومااسمع
شكالهه بس سدته كالت لاتخافين
هسه يشوفون حل..

ظليت كاعده ابجي واخاف الزم التليفون
شويه ودك وسام ايدي ترجف نقطة ضعفي
اطفالي بسرعه رديت

نفس اسلوبه وصياحه اول مافشر ****
ماخذه ولدي يم الغربه ماقبلتي اترجعيلي
وظليتي تسرحين وتمرحين

سمعي لج لو بسابع ارض اطلعج واخذ
ولدي غصبا ماعليج وبأشاره اصبع
اخليج تفتريز بالشوارع ...

حجاهن دفعخ وحده وسده واني
لاكدرت اجاوب ودموعي تجري
اعترف بضعفي بهذا الموضوع..

بس سديته دك التليفون عبالي هو
بس الاسم ابو ليث جاوبته واني
اشهك اريد اكول الو ماتطلع كامله..

ضرغام.. ياستار عليمن البجي منو كالج
ماكو قانون وطليقج سبع البرمه ويأمر وينهي

رانيا.. احجي وابجي والشهكه لزمتني
كتله ياخذهم هو عنده معارف وعمه بالمحكمه
والله ياخذهم من عندي هو حقير ..

ضرغام..بطلي بجي حته اكدر احجي
وياج بنص الشمس اني وابو ابوي مسموط
وانتي تبجين لا يابه هواي عليه..

رانيا.. الله عليك انت اب وتعرف الشعور
ماعندك معارف والله اذا عرف بسلاح وقتل
ياخذهم والحق وياه لان يريد يأمن عليهم

ضرغام.. رحمه لابوج بطلي تشهكين!!

عوفيهه وراي اني احلهه بس انطيني
اسبوع واحد تمام؟!

رانيا.. تمام تمام راح اغلق تليفوني
خاف يتصل!!
ضرغام.. غلقي اني اخابر ع ام شهد
واذا احتاجيتي شي خابريني ..

رانيا.. سديته واني مااعرف شسوي
كال اسبوع اثق بي نقذني هواي
وان شاء الله يكدر عمه ساهره خابرت
السبع وكالهه لاتخاف...

مرن ٤ ايام من الاسبوع واني احسب
دقيقه دقيقه وضرغام راح يصير فوك الشهر
ماموجود عدهم دوره ولا خابر بس كال
اسبوع ...

بيومهه دك تليفون ماما ونفس الرقم
مال وسام ومدري منين جايب ارقامنه
ماردت علي دز رساله

لاتردن عبالجن مالكاجن حضرن جهالي
جاي بالطريق لابو الخصيب وهاي بنتج
اله اكسر راسهه ع هالدكه ...

بدون شعور وبدون وعي ومن خوفي ع
اطفالي لبستهم قماصلهم ولبست وخليت
الي بالبيت يلتهن وطلعت مااعرف وين اروح...

ادري مايخلني اطلع وماما كلامهه مومنطقي
تكلي خلي ياخذهم وشكم يوم ونرفع دعوه
محد حاس بالمي...

طلعت المغرب وبدون تفكير والدنيا
راح تظلم وكلشي مااندل اشحط بيهم
بالبستان وهذا اكبر من ذاك وتيهت ابجي
وادعي وصوت الكلاب قريب والخوف اخذني

اني ابالي اروح احتمي يم ام جراح واكلهه كولو
ماكو بس اعرف غلط وغبيه بس ماادري شصار
بيه وطلعت بدون تفكير..

ليل موحش والحيوانات غريبه
جهالي بحضني وتيهت الدرب للقصر لان ماردت
افوت من الباب الامامي وتيهت

ظلام دامس والجو ثلج وكلهه كعدت ببيوتهه
واني مثل المجنونه صرت حته تليفون
ماجايبه وياي بس المهم ماياخذهم...

هسه اجه !! هسه تعارك ويه ماما
وهسه يدورون عليه لو اموت وماانطيهم
كمت امشي ع الاضويه وصلت للشارع
طلعت اني رايحه جهه الشارع...

شفت سياره اجت بسرعتهه
نزلت ع شارع القصر ويمكن ثواني
وكامت السياره ترجع ليوره وصعدت الشارع
واجت بسرعتهه باتجاهي!!!!

.
يتبع........

#خبايا_الاقدار
❤️♨️

البارت الرابع والعشرون


رانيا... كمت ارجع ليوره واضويه السياره
بوجهي رضاوي كام يبجي وسيف يكول
ماما وين ماخذتنه..

هي امك ماتعرف وين شطلعني
شلون هيج فكرت اني بنص شيوخ قابل
يسحبهم غصب عني ورغم هذا وسام
مااخذهم يوم واحد من عندي بس لان سمع
بيهم مو بامان هيج ..

طبكت السياره بعد مسافه عني واني
لازكه بين الاشجار اليم الشارع
الشارع العام اظلم حته اضويه مابي وبس نخل
واشجار عاليه..

نزل واحد من السياره واجه علينه وبيده
تليفون يضوي بي اول مره اشوف
هذا الشخص ..

كال محتاجه شي اختي ليش واكفه
هنا وانتي منين؟!

رانيا..لاشكرا مامحتاجه شي ودرت
وجهي .. رد عليه انتي واكفه بنزلة
الشيخ ياسين يعني انتي طالعه منا
ووياج اطفال بنص الليل..

.. كتلك ممحتاجه شي !!
ردعليه باسلوب جدآ هادىء كال اني
ابن الشيخ ياسين وكفتج موحلوه
الرجال يخاف يطلع وحده بالليل موانتي
ووياج اطفال..

اخذت نفس حسيت اتنفست هوه
البصره كله من الراحه من سمعته
كال ابن الشيخ سألته انت اواب!؟

اواب.. ااي وين تعرفيني
رانيا.. الله يرضى عليك رجعني لبيتكم
اني من طرف السبع وطلعت وتيهت..

اواب.. مشه كدامنه للسياره وصعدنه وكال
انه رايح لاهلي بس شفتج واكفه ع الشارع
ورجعت شلون تيهتي هو بستان...؟

رانيا.. شحجي وشكول اكتفيت بكلمه
تيهت الطريق وسكتت هم يفوتون بشارع القصر
وينزلون ع طريق ترابي لشيخ ياسين..

اواب شاب بس مبين اكبر من عمره
ضخم ولاول مره اشوف هيج رجال هادىء
حته طريقة كلامه ...

فاتح ضوه السياره الداخلي علمود اطفالي
جان مخلي كتبه وصدريه بيضه وعلاكه
بصفه ورضاوي كلساع وكال عمو انت
طبيب.؟

وصلنه لباب اهله جان بابهم مفتوح
دك هورون ونزل واني نزلت ونزلت
جهالي طلعت امه تركض وطلع الشيخ
ياسين عاف ابنه وحجه وياي بحديه

ليش هيج يابويه تالي عمري مااصون
الامانه وخليتينه ندور شبر شبر
بالبستان وانتي جبيره موصغيره؟!

عمه ساهره ولبابه كلهن اجن والظاهر
كلهه جانت ادور واني خجلانه مدنگه
سوده بوجهي ع هاي الدگه...

الشيخ حضن ابنه وامه تبوس بي
حته نسوا يستقبلون ابنهم بسببي

رحت للبيت وعمه ساهره شبعتني
رزايل ماما لعبت بيه لعب يرزلون بيه
واني ساكته

سألتهم مااجه وسام؟!
ساهره.. امداج ثاري بس طول وجمال مابيج
حظ اليشوفج يدخل عليج ياام عقل..

شكلتي لروحج من شحطتي هاي الجهال
وين موليه ماخفتي عليهم؟
وسام راح يجيب سيف ويوكف ع راسج؟!

شنو هالعياره فرفحتي كلوبنه
زعطوطه عمرج ٢٧ سنه يوميه
موكعه نفسج بورطه وكاتلج الثول؟!

رانيا.. ماجاوبت شحجي اكلت رزاله
غسل ولبس من مامت وعمه وظليت
ساكته

وسام ماجاي ومامتصل بعد بس عمه
شمسويه من صاير الليل مخابره السبع
وراجعه مخابره ضرغام

اسال بفجر وهي تاكل اجر الحجي منهه
جر صحت بيهه احجي ولج شكالو؟!

فجر.. كولت بيبي بغكات شبيج مسطوغه
واذا دغوا ؟!

رانيا.. شنو مسطوره ولج فشله شيكولون
يوميه طلابه

فجر.. والله السبع كال تحجي صدك
هاي من طلعت وين موليه شعبالهه
احنه ببغداد

وضغام اني خابغته كتله الحك
ام سيف هجت وماندغي بيهه
كال وين ولت من كون ولت غوحهه

رانيا.. صدك هيج كال؟
فجر.. وكال الله بلاني بيهه يوميه
سالفه لاتكعد ولاتهجع شبيهه كون
امغهه بيدي !!

رانيا.. ام السان المكسور شكو خابرتي
عبالي عمه مخابرته متعرفي يكوم يقسم

فجر.. شوفي بنت خالي عيب احجي ويه
مدغستي هيج بس اني اعغف كلشي
وانتي منطيه مجال لضغام لان مخليته
ابالج؟!

رانيا.. كومي لااطيح حظج ولج شو
متستحين وتحاجيني هيج ؟!
فجر.. ماحجيت شي ليش تزعلين من
الحقيقه انتي تفكغين بي وعذغآ ع الكلمه
يصيبج الثول كدامه..

رانيا.. طايحة الحظ اوكفيلي اليوم اله
املص اذاناتج ام السان ومديت ايدي
ع اذنهه جريتهه

فجر.. هدي اذني واكلج شي جبير؟!
رانيا.. احجي قبل مااكوم اموتج!
فجر.. انتي بسرعه تتقشمغين !!

بس غاح اكلج الي احس بي انتي
تزوجين ضغام وغاح يشوي ع اذانج
البصل !!

رانيا.. منيلج هالحجي يوميه حاسه بشي؟!
فجر.. اني احس مااحجي قبل مااتاكد
ويجي يوم وكولي فجوغه كلامج صحيح..

رانيا.. انجبي وكومي ولاتحجين كدام
احد هيج اليسمعج شيكول
فجر.. صاغ مااحجي ...

لبابه.. اسمع مداهرهن سوه وفجر احساسهه
مرات يصيب ومن تحجي تحجي بكامل الثقه
بس ماادري شلون هيج تحس..

ثاني يوم صعدت للسطح عندي امتحان
كعدت اقره وكلساع يجي ابالي جراح
وارفع راسي لسما ادعي كون نلكا ولو كلبي
احسه ميت من اي شعور..

سمعت حركه وراي التفتت واشوفهه فجر
بيدهه مكناسه وصونده شكلتهه
بالتانكي وكعدت تجلف بالسطح

حاجيتهه شكو تكنسين منو يصعد وهو شته
قابل صيف
فجر.. النظافه بس بالصيف شوفي شلون
تكعدين بي اني علمود لان انتي هواي
تصعدين غير انظفه الج..

لبابه.. هسه انزل لاتعبين نفسج!!
ذبت المكناسه واجت كعدت يمي
وكالت لبابه باوعيلي ..

رفعت راسي اباوعلهه كالت لاتحركين
عيونج ظلي مركزه ع مكان واحد
ركزت ع خدودهه صايرات منفوخات..

عافتني وكامت كتلهه انتي خبله؟!
ماجاوبتني كعدت بركن الغرفه وظلت
صافنه ع السما واني اباوعلهه ...

يمكن ربع ساعه وكامت نفظت نفسهه
واجت عليه واكفه فوك راسي وكالت
راح اكلج شي اسمعيني..

فجر.. جغاح ماميت وغاح يغجع
وغاح دكولين ياغيت ماغجع!!
وغاح يكون هو جغح حياتج كلهه ..

لبابه.. فززني كلامهه كتلهه شنو هالكلام
خلي يرجع سالم لامه

فجر.. يغجع وهسه تشوفين وانتي
غاح تتعذبين وياه وغاح تاخذين
نصيبج من اسمه...

لبابه.. عافتني وشالت المكناسه وتكنس
جمعت سطل متروس زبل
كالت كومي خلي انزله خاف يطيره الهوه

نزلته اني وياهه جانت عصريه ماما وخاله
جوه ورانيا تتظف بالحديقه بحيث
انترس سطل جبير بس ورق وزبل ..

البيت من جهه اليمين لزك ابيت الشيخ
ياسين ومن اليسار فارغ شارع ياخذ
للبستان..

تعلمنه اذا زبل مال اشجار ورق لو مسودات
نشمره من السياج وتطلع ماما ثاني
يوم تحرگه ...

فجر خلت برميل فارغ وصعدت وكامت
رانيا تترس الهه وهي تشيل تريد تشمر
ترست سطل وشالته مدت اديهه وشمرته
من السياج..

وماانحس غير صوت واحد صاح
اشتعلواا اهلكم هذا ياناقص
سوه هيج..

فجر كعدت ع البرميل وحابسه الضحكه
مالتهه وماندري على يامسكين وكع الزبل
نزلت تركض وتصيح بسلا ع الشيخ ياسين!!

البيهه مايخليهه فتحت الباب تريد تشوف
اثار جريمتهه وفات ولد شاب لابس تراك
اسود وصاير رصاصي من التراب
وشكم ورقه لازكه بتشيرته وع شعره..

هو بسرعه كال هاي انتي شمرتي الزبل؟!
اكو واحد يسوي هيج مادكولين طريق
ناس تمر بي؟!

انسطرت بالباب واني وراهه الباب مفتوح
على حيله وهذا معصب عليهه وهي
واكفه مصدومه بجريمتهه

ظلت مخلوسه وساكته سدت الباب بسرعه
والولد مانعرفه منو بس رانيا عرفته
كالت عززه هذا ابن الشيخ ياسين

فجر.. اني سامعه بيبي دكول عندج
لحية الشيخ مكناسه وهسه سويت ابن
الشيخ ازيد من المكناسه..

رانيا.. مكيفه فوكاهه ولج متجوزين
من طلعاتج
فجر.. شوف منو يحجي انتي ام الطلعات
بس لدكولون لماما خاف تغزلني ..

لبابه.. طلعنه من جو الكأبه ويه فجر
وهي كلساع تتذكر الصار وتخرب
ضحك...

عقيق.. اليوم طلعنه من الفجر ورجعنه
للبصره بس هالمره نزلنه بغداد ويندل هو اماكن
اشترالي هواي شغلات من ملابس
وملازم للدراسه..

مشتاقه للبنات هوايه صار ٣ اشهر ضبط اني
بعيده عنهم وحدي اتصفن بالشقه لحدما
يرجع من الشغل..

وصلني لباب البيت وراح مادخل كال
بليل اجي جنت مشتريه لكل وحده شغله
خاصه خاله ساهره احسهه بمثابه ماما

بدلت وكعدت اسولف لفجر
هاي الايام الخلصتهه وحدي
وهي سولفتلي وضع لبابه وشصار برانيا
قبل شكم يوم ولحد الان هدوء وضرغام
هم بعده ماجاي..

بليل اجه السبع بس شفته ابتسمت
جان مزين ومحدد اللحيه من وصلني
رايح للحلاق كعدت بصفه وكلساع
تغمرني ابتسامه ..

ومن اباوع لفجر الكاهه تسويلي حركه
باسنانهه اطلعهن لان تشوفني هيج مبتسمه
وتخليني اضحك اكثر..

السبع.. ام شهد حضري الاستقبال
راح نكعد ونتفاهم ونحل هاي الخرابيط

ساهره.. يجي احد غريب؟!
السبع.. ضرغام وياسين وخاف احد من جماعه
ياسين لان اكو تطورات ولازم نخلي صورة حل ..

ساهره.. كومي فجر رتبي الاستقبال
وفتحي شبابيكه شويه وسديهن الجو بارد

فجر.. مااكوم خلي تكوم عقيق
ساهره.. فجررر شو صايره وكحيه اشكيج
للسبع ترى مو كبرت سنه شاشت علينه

السبع.. تعاي يمي تعاي شبيكم وياهه
انه اريدهه سباعيه
فجر.. والله ممسويه شي بس حايط نصيص
جيبي فجغ غجعي فجغ بس اني بالبيت
شوف اديه من غسل المواعين صارت
مكغمشه ..

السبع.. بابستامه ع كيفكم وياهه
ترى هي المدلله وتبقه مدلله
عقيق.. اني راح اكوم ارتبه
فجر.. هو اني اغيد اكومج لان حلكج غاح
ينشك..

لبابه.. مداهرهن مايخلص فجر عدهه نوع من الخباثه
تحب تخبث من اتشوف الواحد مستمتع وكومت
عقيق بالعناد ...

السبع يمنه شويه واندك الباب كام فتحه
ودخلوا للاستقبال ماما كالت سوو جاي
جان الشيخ ياسين وضرغام
والسبع ماكو غريب..

السبع طلب الكل كال حته ام رانيا لان كملت العده
مالتهه كل واحد يحجي العنده ويحجي المشكله
ونعالجهه..

طبينه كلنه سلمنه وكعدنه بالاول سوالف عاديه
وبعدين حجه الشيخ ياسين كال راح احجيلكم
الصار بهاي الفتره ..

ثار اخوي للاسف مااكدر اخذه لان من انسجن
جبار وابنه ع كتل اخوي اجه واحد من ازلام
جبار وكال انه الكتال وهو انحكم وطلع منهه
جبار..

وهسه اذا اخذت ثاره عنوةً راح اول مايحاسبني
القانون بحكم الكتال معترف ومحكوم
وهاي كلنه نعرفهه..

نجي ع سالفه تدخله بالبنات وبيكم
العجيب والغريب عقدي ع ام البنات
مابدر من جبار اي رد فعل..

احنه مخططين لشي وردنه نلزم علي
غلطه وتوقعنه يجي هاد علينه
ويطالب بالبنات ونحسبهه نقطه ضده
بس عبالك افتهم غايتنه وجان متقبل الموضوع..

ام شهد ع ذمتي وراح تكون بامان اكثر
وانتهه خوفهه من جبار بس بقت البنات
فجر ماخايفين عليهه لان من اول يوم هي
بحمايه السبع

وماتحتاج واحد يحميهه ولاتحتاج بيوم
عقد اضطراري راح تظل بامان وهو مامتعرضلهه
ابد

بقت لبابه خاف يستغل سالفه اختفاء جراح
ويضغط علينه وياخذهه لابن عباس مثل
مامخطط..

ضرغام.. من رخصتك ابو اواب اذا اختفه جراح
واذا لاسامح الله مات شهيد هذا مايعني لبابه
طلعت من حمايته وهي بخطر

وصية جراح بكل مايلتحق هي ديربالكم
ع لبابه هو مكانه بعيد وطريقه خطر
وحاسب هاي الامور يعني سابع المستحيلات
عن نفسي احجيلك اخلي جبار يمارس
نذالته ويه امانه جراح..

ياسين.. انت تعرف جبار زين مايكدر
يطلگهه بحجه مفقود ويزوجهه لابن عباس
بحجه حمايه

ضرغام.. ماكو زلم ترده جبار ترى راح يصير
٢٠ سنه واكفين بوجهه نطلع من مشكله نطب
باتعس منهه ..

ياسين.. يا ابو ليث انه حلي ندز ع اهلنه
الي بالناصريه ويجي الشيخ ويكعد جبار
ويصير حجي مكاشف مال زلم وانشوف

السبع.. جبار مايخاف ولايستحي راح يكول
اي وحاضر وهن بناتي بس وره اسبوع
يدك دكته واحتمال حته يكتلهه هذيج الساعه
منو راح يوكفلنه ابو الناصريه ..

ياسين.. چااا شنو حلكم هاي فوك ال٣ اشهر
احنه بدون حل والبنات حته روحتهن للمدرسه
برعب..

ضرغام.. حل واحد اكو تروح ام شهد للمركز
تقدم دعوه ع جبار وتحجي كلشي لبابه صغيره
الدعوه تكون باسم بتهه وهي الوصي مالتهه

راح ينجر للمحكمه غصبا ع راسه
حته اذا انسجن يومين وطلع بكفاله
راح ياخذون علي تعهد بمبلغ مبالي ضخم
وينحكم اذا عادهه

هيج انسان ماترده العشاير لان يمارس
ظلمه تحت مسمى شيخ وابن شيخ
وشافعله نسبه واهله اب عن جد

ياسين.. تعتقد برأيك راح يلزمه القانون
ضرغام.. يلزمه!! اذا عاد تصرفه مجرد ماتحرك
الدعوه ام شهد يطيحون حضه ..

ياسين.. هااا يالسبع شنو رايك؟
السبع.. هن حلين لو ينكتل ونخلص منه
لو يلزمه القانون ماتلزمه انت وغير شيخ
هاي سالفه ..تعبنه يوميه اسلاحنه
وفازه النسوان والجهال

ياسين.. چااا نتوكل باجر ونقدم دعوه
بس نجي ع سالفه بنت المرحوم ام سيف
والصار قبل اسبوع

رانيا.. جنت مدنگه من كال ام سيف رفعت راسي
اجت عيني ع ضرغام خزرني بسرعه
رجعت دنگت ..

حجه ياسين يابنتي السويتي اكبر غلط كلنه
عدنه الضنه غالي بس انتي بطلعتج عرضتيهم
للخطر ماحميتيهم

لوما اواب شايفج بذاك الليل جان
شصار بيج بهيج وضع ولو جبار لوعامر
لاگيج والله محد يرحمج وراح ماتاذين نفسج
حته ام شهد وبناتهه يتأذن..

السبع.. فهمينه السالفه مال ابو الجهال
حته انروحله ونفتهم منه

ام رانيا.. اني افهمك يمه بنتي من اطلقت
ماقبل هو وسحبهه لبيت الطاعه وهي ماقبلت
ترجع وتنازلت عن كل حقوقهه وهو عنده واسطه
وناس بالمحكمه وكال اذا تزوجت اخذ جهالي

هسه هي مامتزوجه ولاتفكر بالزواج
بس من سمع اولاده بالبصره وبمكان هيج
خطر مدري منو موصله الحجي خابرنه
يهدد ويحجي..

ضرغام.. لحد يلومه حقه اني لوبمكانه
مااعوفهم يوم واحد اول شي بمكان خطر
وابوهه مات ماعدهم سند ويوميه ابمكان
يبقون ولده

ام رانيا.. يعني ماراح تساعدونه اذا اخذوا
جهالهه تموت هاي لعد هي عليمن عايشه

ضرغام.. محد مات وره احد بس السبع
انت روحله لو ادزون علي هنا واحجوا وياه
لانحكم ع الشخص بدوم مانلتقي بي
والحق وياه اولاده بخطر

رانيا.. موحقه هو تركهم وراح اتزوج وحته مايسال
عليهم هسه تذكرهم
ضرغام.. غير مأمن عليهم يم جدهم بس جدهم
مات وياريت ساكنه بمنطقه امينه انتي عايشه
بنص الموت ..

السبع.. ام سيف اي رجال واي اب راح يتصرف
مثل تصرفه رغم مساوئه بس يبقون اطفاله
بخطر هو مأمن عليهم بس من تغيرت الموازين
اكيد راح يطالب بيهم ..

ياسين.. والحل ؟!
السبع.. الحل العندي بيت ضرغام مناصفه هو وجراح
الطابق الثاني كمل ماوگفنه البناء وهسه البيت كامل
يرجعن يكعدن بي ..

ام جراح وابرار يجن يكعدن ابيتهن كافي
مذله وهن بحزنهن وماخلصانات وهم بره القريه
وهم امن من هنا وقريب ع المدارس..

اما ابو الجهال نخابره ويجي نتفاهم وياه
وناخذه للبيت ويشوف هنه بامان
ونتعهدله احنه بحمايتنه واذا عنده مقترح
ثاني انشوف..

ام شهد.. وشلون احنه نسوان نعيش وحدنه
ضرغام ... نخلي حارس الكم والمنطقه نعرفهه
واغلبهم من الگرايب يعني مو بجزيره..

ياسين.. هاهي يبقه هذا البيت راح اكمل
اثاثه ويبقه الكم تجون تكعدون بي بين
كل مده تغيرون جو ..

هسه انحلت هاي الامور نجي ع سالفتك
يالسبع؟!
السبع.. انه شبيه؟!

ياسين.. انت عاقد ع البنت وشغلك وهوسته
مايخلص لازم اتمم زواجك وتعلنه

السبع.. يا ابو اواب جراح بين عيوني
صاير شلون افرح وشلون اسس حياتي
وهو مختفي لادفناه بدينه ولا شفنه اله اثر

ياسين.. مواله عرس ياخوي بس احسن
من حجي الوادم انه احجيلك لان اعرف
جبار مستعد يتهم

السبع.. اترس حلكه رصاص اذا نطق بكلمه
بحقهه من هاي الناحيه اطمئن مايحجي

ياسين.. خوش يابه ولو مو بأوانه الحجي
بس انه اريدكم وياي اخوتي وولد عمي
انريد نخطب لأواب ؟!

السبع.. هاااا بيهه الخير منين هذا القرار
المفاجىء موجان رافض !!؟

ياسين.. هم الشباب ينحزرون صار مده
يلح عليه بنيه وياه وخوش ناس سألت عليهم
من بغداد ومابيهه شي خير البر عاجله..

لبابه.. ظلوا يحجون بموضوع اواب
رانيا ابنهه شعوطهه كامت رجعنه صبينه
جاي وشويه وكاموا

الشي الحلو والزاد احترامنه للشيخ
مارفع عينه ع ماما من يحجي مدنگ راسه
وكانما غريبه كدامه وفعلا شيخ وابن اصول..

من طلعوا للباب ضرغام وصل للباب ورجع
كال صيحي بنت خالج بس لاتخلين احد
يحس هنا واكف بره..

لبابه... ادري بي متحمل عليهه طول
الكعده هو خازرهه ضرغام كلنه حاسين بي
يريدهه بس يكابر ومايحجي..

رحت لرانيا كتلهه يريدج بره واني اوكفلج
كالت مااطلع بين الخوف عليهه شكد حاولت
وياهه وماقبلت كالت مااطلع..

رجعتله اريد اكله مالگيته هو كال
هنا انتظر بس وين راح سديت الباب
ورجعت ..

ثاني يوم صادفت جمعه جمعنه غراضنه
شي قليل بس الملابس لان هذا راح يظل
البيت النه ونجي بي اجتنه ام اواب
ومسويتلنه اكل حته ناخذه ويانه

هي وماما مثل الصديقات ماما تحبهه حيل
وام اواب مبينه طيبه وع نياتهه ابد مابيهن
حزازيات ولا متحسسه من الموضوع..

جابلون كيه واحد من زلم الشيخ ورحنه
للبيت بس نزلت ووكفت بالباب حسيت كلبي
انقبض شكد تعب بي وشكد جان يخابر ويهتم
وتالي ماشافه ولاكعد بي..

افتريت بالبيت وخاصه بالطابق الثاني
٣ غرف فوك وصاله ومطبخ وصحيات
وباب ينزل ع درج خارجي كلشي فارغ
وبس صدى الذكريات تحوم بالمكان...

استقرينه هنا رجعنه لحياتنه الهادئه
عمه زينب وابرار اجن وانتقلن يمنه
بالطابق الثاني وماتنزل ابد لان كل وقتهه
هي تبجي وصوتهه يوصلنه ليجوه..

اكو حارس بالباب وساحه كدامنه
وخلوله كرفان تقريبا مرتاحين
السبع اخذ ماما وقدموا دعوه
احتاجوني اشهد بأن هددني يزوجني
واني ع ذمة رجال...

طلعوا القاء قبض علي وانسجن ٣ ايام
واخذوا تعهد علي هو واولاده بأن اذا
تعرض النه ينحكم ...

اما طليق رانيا دزو علي واجه لمضيف
الشيخ ياسين واخذوا الجهال شافهم
وتفاهموا وياه وفهموا السالفه وحته
جابو للبيت شافه

مبين عصبي وكالهم احملكم مسوؤليه
واني اخذت كلمه شيخ اذا صار شي
ع اولادي الله مايخلصكم

جان بس السبع والشيخ موجودين
ضرغام بالدوام انحلت مشاكلنه وكمنه
نام براحه اله اني بس اخلي راسي
ع المخده اتذكر جراح

مرت الاشهر سريعه وهذا الشهر
السادس وجراح اي خبر ماكو عنه
احنه نتحضر للامتحانات النهائيه
وعمه زينب كامت بيهه وماتتعب
صارت بس جسد...

ايام مره مثل العلقم مرت على
احباب جراح تجي الحجيه بركات
تكعد بنص الطرمه تنعي بكلمات
تبجي الصخر وعمه زينب تبجي لحدما
تنهار وتتخربط...

ماراح انساك ياجراح للموت ولاراح
يمر يوم بدون ماادعيلك راح اظل عايشه
ع امل رجعتك بيوم ..

قبل الامتحانات الشفهيه المدرسه كامت
تنطي سعيات وسوو اجتماع اولياء امور
وانطونه اوراق حته نحضر الاولياء

رجعت للبيت انطيتهن لماما خابرت
ع السبع كالهه اني موهنا بالقرنه
عندي شغل راح اخابر ضرغام

ثاني يوم داومنه رانيا بالدوام تلبس
تنوره وستره لو قميص بس مرتبه حيل
مدرستنه بس بنات ومدرسات دائما يكولن
ام الحاسوب البغداديه حلوه ..

بيومهه جانت لابسه تنوره سوده صايره
قالب ع جسمهه ولابسه قميص جرجيت
اسود فضافض ومعبيته بالبتنوره كلساع
واكلهه طالعه حلوه..

طلعونه من الدوام من وقت بس احنه ظلينه
ننتظر السايق اجه ضرغام دخل للادره وجاب
درجاتنه زينه وكال امشن اني اوصلكم واخابر
السايق..

رانيا.. طلعت وهن بالسياره وهو مرتجي
ع بنيد السياره طول ماامشي هو عينه
تصعد وتنزل لحدماوصلته

سلمت علي صافن مارد السلام صعدت وره
وهو اجه صعد لبس نظارته وحرك السياره
اعرف هاي الحركه من يلبسهه حته يباوع
بكيفه..

من وصلنه نزلن البنات واني نزلت من جهه
الصدر مالته كاعده صرت يم الباب
جان يكول بليل اخابرج افتحي تليفونج!!

ماحجيت دخلت للبيت واني صافنه
شو هادىء من يحجي وشيريد
يخابرني ؟!

طبيت جوه اسمع صوت لكيت وسن
وايناس وهيام جايات يشوفن
ام جراح سلمت ودخلت جوه بدلت وطلعت..

ظلن يمنه للعصر وجايبات وياهن اكل
وخبز الوضع حاليا هادىء حيل
وحته جبار يكولون راجع يحجي ويه
ياسين ومعتذر منه ومهني ع عقده ع ساهره...

السبع..اشتاگيتلج؟!!!
عقيق.. شبسرعه موهسه جنت يمي!
السبع.. شسوي بس صعدت بالسياره
اشتاگيتلج.

خوما بعدج تبجين؟!
عقيق.. لااا ماابجي انت زعلتني
السبع.. اوويلي ع دموعج هيج احطج بنص گلبي

غير انتي صايره مهمله وعصبت عليج
علاجج ماملتزمه بي وحته دراستج!!
عقيق.. انساه اله انت تذكرني

السبع.. مويوميه اذكرج اني مرات شغل
والتهي انتي صيره حريصه ع صحتج
وع مستقبلج..

عقيق.. مازعلانه منك
السبع.. طبعا ماتزعلين شعندي اني غير
هالحلوه الدافيه تدلل عليه..

عقيق.. سديته منه مبتسمه راحت الزعله
من اجه عصب عليه لان مماخذه علاجي
وماقاريه وبجيت ...

من بجيت بسرعه سكت جان يرزل بيه
وظليت مخليه اديه ع عيوني سحبهن
وحضني وايده تمسح بدموعي...

بس جانت خاله ساهره موجوده وابتعد
ورجع خابرني ..

اجت وسن وايناس وهيام وجايبات اكل
وحلويات من الزياره اشتهيت اكل حلا شويه
جانت بقلاوه وحلاوه شكريه ...

اكلت شويه وكمت اقره وهن بره
تأخرن يله راحن واني احس نفسي
موتمام..

كلساع اريد اوكع والدوخه لازمتني
يمكن الساعه ب١٠ بليل بعد ماتحملت
اخذت تليفوني وطلعت اريد اخابر
للسبع اكله شاخذ علاج ؟!

البنات يقرن وخاله ساهره نايمه
فتحت باب الغرفه وصلت للمطبخ
وانصدم برانيا واكعه عبالي نايمه ..

هزيتهه ماكو بس دم برجليهه
ويمكن بيهه شي من خوفي عيطت
ورحت اركض للغرفه كعدت امهه وخاله

انخبصنه بيهه شمرنه عليهه مي
وهي تفتح وتسد بعيونهه وتصيح
بطني ..

خاله ساهره عيطت ع فجر تخابر واحد
منهم وتصيح البنيه تنزف راح تموت
لازم ناخذهه للمستشفى..

نص ساعه واحنه نذب عليهه مي تصحه
شويه وترجع تغمض عيونهه يغمى عليهه
اندك الباب حيل طلع ضرغام والسبع..

طلعناهه للسياره اخذهم ضرغام
والسبع يحجي كال الحارس وين
ليش عايف مكانه وين راح؟!

يمكن هي دقايق بحدود الربع ساعه
من طلعة ضرغام والسبع اشوفه قلق
ومامرتاح وحته قفل الباب علينه

ومانسمع غير طلقات ماادري منين
تطلع ومنين تجي بس شفت
من الشباك السبع اسلاحه بيده
وطفر من السياج...


يتبع......

#خبايا_الاقدار
❤️♨️
... البارت الخامس والعشرون


لبابه.. ظلينه وحدنه بالطابق الفوك عمه زينب وابرار
من سمعن الصوت نزلن يمنه وخاله وماما راحن
ويه رانيا...

شويه ونسمع صوت طلقات عمه زينب صاحت
روحن للغرفه ولاتتقربن يم الشباك
عقيق واكفه بالمطبخ نسحب بيهه ماتقبل

هي طلقه وحده بس عقيق كامت تبجي
وتصيح عمه السبع بيده سلاح
تقربت شويه من الشباك وانشوفه
عبر السياج ومطفي الضوه مال الطرمه..

دب الخوف بداخلنه عمه زينب سحبتنه
للغرفه وتقره وتدعي مانعرف شيصير
وليش هيج عقيق بدت تتخربط ورانيا
شجاهه الصبح مابيهه شي..

شويه وصار رمي متقطع واحد يرمي
والثاني يرد علي هنااا تخبلت عمه زينب
تريد تطلع واحنه لازميهه

كامت تعيط وتصيح مابيه افارگ
بعد عوفني السبع وحده وليدي
الربيته غدر بي جبار عمه ..

كلنه نبجي وخايفين فجر ركضت ع تليفون
ماما خابرت ع ضرغام وكالتله اكو رمي علينه
وشفنه السبع عبر السياج وبيده مسدس

والحارس مختفي ومدري منو يرمي
علينه واحنه وحدنه بالبيت
صوت ضرغام عالي كالهه سدي
واقفلن الباب هسه اخابر ع السبع..

زينب.. يمه جراح يبعد امك بكل
عركه تفزع لابن عمك وهسه ابن عمك
وحده جانت كاعده وتضرب ع رجليهه وتبجي..

عقيق عرگانه رغم الجو بارد
وهي عبالك منگعيهه بالمي مددناهه
بالكاع ونفرك باديهه

سألتهه كلبج يوجعج؟! هزت راسهه لااا
بس روحي رايحه وعيوني مااكدر
افتحهم..

بوسط هوستنه واحنه محتارين بعقيق
ونسمع هوسه بالطرمه وصوت السبع
وهو يكله ياعار تطعني بظهري
وطلقه طلعت من اسلاح السبع !!

ركضنه بدون شعور للمطبخ
وعسانه مارحنه ولاشفنه
المنظر بوسط صدمتنه ومانسمع
غير الوكعه مال عقيق تكومت بالكاع...

عامر واكع بالطرمه وسابح بدمه
والسبع مذهول وواكف ع طوله فوك
راسه !!

عمه زينب لطمت ع وجهه
انذب مي ع عقيق عدهه حاله
اغماء شلناهه اني وابرار للصاله..

اندك باب المطبخ واسمع صوت عمه وهي
تصيح شلون كتلته ولك ليش يالسبع
طول عمرك ايدك نظيفه ..

كمت وعفت عقيق يكعدن بيهه
وكفت واشوفه مذهول السبع رغم
قساوته والكل يعرفه بس عمره مامأذي
احد ..

فرك وجهه واستغفر اكثر من مره
وعمه تلوم بي وتحجي حجيت من وسط
خوفي كتله عقيق متخربطه..

بسرعه التفت ومشه للصاله مخليهه بالكاع
وابرار تفرك بايدهه من شافت السبع
ابتعدت ..

كرفص كدامهه وخله ايده ع كصتهه
حجه وياهه عقيق تسمعيني!؟؟
هزت راسهه بس متكدر تفتح عيونهه

التفت علينه كال جيبي علاجهه
بسرعه ركضت للغرفه جبته
طلع حبايه صغيره ورفع راسهه خلاهه
بحلكهه بدون مي..

كام وكال لاطلعن بس جان يحجي
وهو ضاغط ع اعصابه بالقوه
تليفونه بيده ومدري المن خابر..

التهينه بعقيق بس كلنه وجوهنه
صفر عامر ميت بره وشلون؟!وليش
هجم علينه والسبع ليش كتله واكيدمات؟!

نص ساعه واجت سياره مدري منو
شالو عامر واخذوا والسبع ظل بالحديقه
حته مادخل لعقيق بس حالتهه احسن

جنت واكفه يم السنك اغسل واشوفه دنگ
راسه بالحديقه وفتح الصونده وغسل
راسه رغم المي ثلج ...

نفض راسه ووكف يرجع شعره
ليوره ويفرك براسه مثل المصدع
صوته جان عالي وهو يكول استغفر
الله واتوب اليه اللهم لانسألك رد القضاء
ولكن نسألك اللطف به..

عفته ورجعت يم عقيق شويه
واجه دخل كعد يمهه وكالهه شلون
صرتي؟!

بس تبجي ماتحجي وتهز راسهه
ايدهه ترجف وتباوع للسبع بخوف
لان شافت منظره القتل..

صاحتنه عمه زينب كلنه كمنه وظلوا
وحدهم بس سمعت صوت شهكتهه
بسرعه بجت..

السبع.. لاتبجين !! ادري موحمل
هيج مواقف وهيج مناظر كدام وحده
مثلج ..

عقيق.. ليش قتلته؟! انت هسه يسجنوك
السبع.. لاتفكرين شيجي من الله هله
بي هو الي اعتدى علينه وغدر بيه

عقيق.. سحبني لحضنه وضمني لصدره
بقوه حسيت اظلاعي راح اطك بين اديه
الخوف مسيطر عليه..

رغم المنظر الي اول مره اشوفه بس
خوفي ع السبع وراح يدخل سجن
وهسه يتسمه قاتل!!

ابجي بحضنه وهو ايده ع راسي
تمسح ع شعري رفع راسي بيده
وباصابيعه مسح دموعي...

السبع.. موتدرين دموعج ادمرني
لاتبجين بسببي ماكو شي ليش خايفه!!

عقيق.. هسه تنسجن وتروح عني
السبع.. وين اروح ؟! ماانسجن دفاع
عن النفس بس هدي حالج..

شوووو وخله ايده ع كلبي وكال
موهاي نبضاتج سريعه اهدي عقيقتي
الحلوه!!

ورجع راسي ع صدره وهو يهدي
بيه وايده ع كلبي يحركهه بحركات
دائريه مثل كل مره..

حسيت نفسي هدئت بس دموعي ماوكفت
احس نفسي بعدني مصدومه ومامستوعبه
السبع قتل عامر ومات!!

صوت سياره ضرغام واندك الباب حيل
ابتعد عني بسرعه وكام طلعن البنات
كلهن ودخلن خاله ورانيا ساندتهه امهه
وبيدهه كانيولا..

ضرغام بسرعه لزم السبع من اكتافه
وقلق وخوف مثل خوف الام ع ابنهه
يگلب بي خاف متأذي ويكله خومابيك شي؟!

السبع.. مابيه شي ع كيفك
ساهره.. شلون هيج يالسبع شجاب عامر
وشلون تقتله انت العاقل وماتحب الدم؟!

السبع.. تعالوا اكعدوا ع كيفكم جان يحجي
بهدوء عكس الثوره البداخله وكأنوا هو المصدوم
شلون لطخ ايده بدم ابن عمه..

جاوبهم من طلعتوا رحت ع الحارس ماموجود
وهالشي خلاني اشك الرجال امين ومايترك مكانه
وصاحب عائله اتصلت بي مغلق..

ظليت افتر داير مداير البيت بس مامرتاح
البيت الكدامنه هيكل شفت حركه بي
ومثل التورطوا ماكدروا يطلعون..

مامتوقعين جيتنه اثنينه عبالهم اذا تخلصوا
من الحارس يبقن بس نسوان ضربت طلقه بالجو
شفت واحد طلع ركض من الهيكل...

عبرت السياج ومالحكت علي صعد بدراجه
وشرد رجعت سويت نفسي لحگته
وافتريت وره الهيكل بس عيني ع البيت
شفت واحد عبر الباب لحگت علي

والكاه عامر بيده السلاح وناوي يفوت ع المطبخ
يعني ابن عمي جاي كتال ع مرتي وع بنات عمي
شتتوقع مني شريد اسوي غير اضربه

ضربته من وره مالحك يشرد
وخابرت ع الزلم اجو اخذوا ميت
ابمكانه..

جان يحجي السبع بس تأنيب الضمير
مبين علي مامتعود يأذي احد ويظلم بشر
وهيج طلعت منه طلقه وكتلت شخص
حتلو كان ظالم..

ضرغام.. اني اشيلهه البيت بيتي واني
بحكم عملي وهو تعرضلي بالمحكمه
وعندي دعوه ضد واكول اجه لبيتي
ودفاع ع النفس..

السبع.. لايابه انت مكانك حساس
مااريد تصير ثغره عليك وانت ع ابواب
ترقيه ..

اني باجر اروح اسلم نفسي
والقانون ياخذ مجراه الي عندي
اكوله والله الكاتبه يصير

ضرغام.. لاتعاند جمررره اني ماانحكم
لان تهجم يعتبر ع بيت رائد بالجيش
وماراح انسجن ولا انحكم

السبع.. ضرغام عوف السالفه بعدين نحجي
هسه اريد اعرف الحارس وين الرجال صاحب
عائله شنو ذنبه؟!

ضرغام.. خابرت ع زلم ياسين كالو احنه
راح انشوف وين وهسه ياسين راح
يجي ياخذ البنات خاف تطلع الشرطه
كشف باجر..

ساهره.. يعني مانرتاح يوم واحد
وهسه القصر عدهم عزه شيخلصنه
يالسبع!!

السبع.. يدرون بي مذنب هاي اذا ماطلعوا
مساعدي شمعنه اجن وسن وهيام وبليل
هجم عامر..

ساهره.. شيريد اريد افتهم فهمني
احنه شنو مأذي كل همهم لبابه
موهاي فجر محد طخهه وانت حميتهه
هسه ماتكدر تحمي لبابه!!

السبع.. شلون مااحميهه لبابه حالهه من حال فجر
بس من الاساس جراح كال اريدهه وصار هو المسؤؤل
عنهه بس مومعناتهه اذا راح جراح
بناتنه بخطر..

ضرغام.. اني اعتقد جبار يريد يكتل لبابه
والسبب مره اسعود حجه كدامي بأن
المرحوم خالي ابو شهد ع اساس وحده
من بناته تدري بالقصه كامله مال عائله السبع
وابوهه حاجيلهه منو القاتل ..

وهو تخلص من شهد وظلت لبابه مشكله
خطر علي لان وكفت بوجهه اكثر من مره
فجر شايلهه من القائمه لان من اجت صغيره
وهو يدري سر عائله السبع عند وحده من البنات...

ساهره.. عند شهد.. علي الله يرحمه مره كالي
من يصير عليه شب اخذوا الحقيقه من شهد
مايدري شهد تلحگه بشهرين..

السبع.. انتي مرته وعشرة عمر ماحجالج
ساهره.. وروح عزيزة گلبي ماحجالي
سولفلي شلون تهموا وشلون ساعدته ام
جراح والحجيه بركات بس ابد ماحجالي
بدليل ..

بس من دزيت علي انت كال امور دنيا
هاي الحقيقه عفتهه عند بنتي وهي تلتقي
بابن عمهه بيوم وتحجيله...

واني نسيت التهيت وانفجعت بوفاته
ونسيت اسأل شهد عن الحاجي الهه
ابوهه وتالي راحت لربهه ومااعرف
بس اني ادري بشهدتعرف القصه كامله

لبابه.. دك تليفون السبع الشيخ ياسين
وصل بسرعه جمعنه شكم قطعه ملابس
وطلعنه ...

رانيا حيل مدهوره حالتهه عدهه كتله
ع الرحم وحولوهه ع الخاص وصارت هاي
السالفه..

طبينه للبيت اليم الشيخ ياسين
هوايه زلم تحرس هدوء القصر
والظاهر ماواصلهن الخبر..

يمكن نص ساعه واجانه صوت الصياح
مثل فزعة جراح واكثر وكلهه تصيح
زلم ونسوان السبع كتل ابن عمه

شفت جبار مثل المخبل بدشداشته
وبدون عكال ويفرفح ع ابنه ويصيح
يابويه عامر غدر بيك ابن عمك..

احنه بس نباوع من بعيد
والناس كلهه اتجمعت فاجعه جبيره
بالنسبه للقصر..

عمه زينب وابرار اخذهن السبع يم
اخوهه كالهه لتفوتين للقصر والسبع
وضرغام مدري وين راحوا..

طبينه لبيتنه وكعدنه شنو مأساة احنه
شنو ذنبنه حته ابن عمنه الجبير بمثابه
الاب المفروض مثل عامر هيج يشيل
اسلاحه ويريد يكتلنه..

هاي الليله مانمنه من العياط صوتهن يوصل
يمنه يمكن ويه اذان الفجر جابو للبيت
لو صوتهن رج القريه رج زلم ونسوان
تبجي عامر جبار الثاني واله كلمته ...

جان الصبح طالع والجو متكشف واحنه
مانايمين وقرية الشيخ ياسين كلهه طالعه
الي لشغله والي يباوع ع القصر

بينه وبين القصر بس بستان بي نخل متفرق
يعني ماكو اشجار نكدر انشوف بس من بعيد
وهم هم يشوفونه..

جنت احجي ويه ماما اكلهه السبع ماراح
يجي الهم قابل ينهزم جاوبتني لا مو من
شيمه الهزيمه ..

وصدك شويه واشوف سياره ضرغام
اجت ونزل منهه السبع جبار واكف
وجه بوجه هو والسبع وعبالك يتواجهون

توقعت جبار راح يضربه حته انخبصنه
وانصيح راح يكتله بس ماسوه شي ظل
مدنگ وكلهه ساكته

عاصم شمر روحه بحضن السبع
ويبجي افقر واحد هو عاصم
ويمكن عرفوا الذنب بابنهم ماادري
عدهم غايه بسكوتهم..

طبيت للبيت عقيق هستوهه كاعده
سويتلهه حليب وكعدت يمهه
كتلهه شتحسين ..

عقيق.. احسن شويه السبع وينه
اخذته الشرطه ؟!
لبابه.. لا هذاك يم القصر موكلج لتخافين
عقيق.. شلون مااخاف واذا انسجن
لبابه.. لاتفاولين علي ماينسجن هسه يحلوهه

كومي تريكي واني راح اشوف رانيا
رحت لكيتهه كاعده بالمطبخ وحدهه
سألتهه شلونج كالت الم عندي ببطني

لبابه.. شكالولج؟!
رانيا.. كالت عندج كتله ع الرحم وسوي
فحوصات وتقرر لو عمليه لو بالعلاج
تروح..

لبابه.. انتي شو مالج خلك صاير شي؟!
رانيا.. ااوف يالبابه شحجيلج مرات الانسان
مو بالعمر وبيه حاله موحلوه اني لا اباليه
وماافكر بالعواقب..

لبابه.. احجيلي شبيج ياعيني؟!
رانيا.. شوفي اني غلطانه ومتندمه والله العظيم
وروح بابا اي تصرف يبدر مني بدون قصد
ولا بنيتي غير شي بس المقابل يفكر بغير
نيه..

البارحه من نزلنه ضرغام كال اخابرج بليل
المفروض اكله ليش؟ وشتريد؟ وبصفتك
شنو؟! بس هذني كلهن ماحجيتهن مدري شبيه
مو بس وياه ويه اي موقف يصير حته بدوامي
بلحظتهه الصم ومااعرف ارد..

من رجعت للبيت فكرت شيريد مني؟
طبعه وياي مستفز اول ايام اجينه بيهه
يمكم جان جدا محترم هسه كمت احسه
يشوفني وحده خفيفه..

دك عليه بليل وجنت ناويه احجي واكله
شتريد وليش ادك لان بوقتهه ماحجيت
وسالتك بس تدرين يالبابه ماتوقعت هذا
الانسان شراح يحجي..

اول مادك سلم وسألني ع اطفالي جان
يكول تعرفيني صريح وجربتيني اكثر
من مره لذلك اريد احجي ولاتقاطعيني..

كال من كتلك اريد اخابرج بليل ليش
قبلتي؟! ومن صارت سالفه الخطف مالتج
ورقم دزلج رساله ليش طلعتي ؟!

انتي مو انسانه واعيه وجبيره ليش
سامحتلي ادخل وشوكت مايعجبني
احاجيج ؟! سؤاله جانت مثل الضربه
ع راسي يعني بشنو يفكر حته هيج
يحجي..

كتله اني طبيعتي هيج وراهه صار الحجي
براسي وردت اكلك بس تخابرني وهاي
انت سبقتني...

ضرغام.. شوفي يا ام سيف بتصرفاتج
هاي تخلين الواحد يحكم غير شي
واني احجيلج الحق اخذت نظره موحلوه
من اول يوم انطيتي مجال لذلك من تسمعين
كلامي حته ماتحاولين ترديني !!

زين انتي ويه الكل هيج اي واحد
ياخذ ميانه وياج عادي تتقبلين
وماترفضين؟!

لبابه.. افتهمتي قصده؟! ترى ضرغام بنظري
مايقل عن اخلاق السبع واكثر اخلاق وصاحب
غيره وشهامه

رانيا.. افتهمت يالبابه تصرفاتي الي ع نيتي
وماماخذه حذر ومامخليه حدود بيناتنه
وهو رجال غريب خلته ياخذ غيرنظره
عليه وعباله اني اتودد اله او انطي مجال

بالعكس عجبتني صراحته ولو واحد غيره
يستغل هاي النيه ويظل يشمر حجي والثوله
المثلي تظل تسمع وتسكت وتحسبه شقه

بس هو كل كلامه جان ينتظر مني موقف
وللاسف ولامره اني انطيته موقف ومنعته
ابلعهه واسكت واصلا حته ماافكر

لبابه.. الظاهر ضرغام مايحب هيج
لذلك نبهج يمكن حس عليج تتصرفين
ع نياتج؟!

رانيا.. هو مبين شايف اشكال ويعرف
كل انواع النساء واحتمال غايه براسه
ونبهني يعني بين قوسين يكلي التتصرف
مثلج بنظرنه خفيفه وتنطي مجال ..

لبابه.. لاحشاج بس هو ضرغام صريح
وحلو من نبهج اني اعتقد مخليج اباله
ويريدج باحسن صوره وهيج حلو من كلج
حته تنتبهين لان الناس تاخذهه بغير شي

جانت ضايجه حيل وحته دمعتهه بعينهه
تصرفهه ع نيتهه بس احسن نبهه
لان عبالك وعت ع حالهه حته صار من يجي
ابد متطلع ...

اما سالفه السبع راح سلم نفسه
وتوقف ع ذمة التحقيق وعقيق
وفجر نسكت وحده تبجي الثانيه ..

بيومهه اجه ضرغام وكال جبار تنازل
عن السبع واعتبروا القضيه دفاع
عن النفس والمذنب عامر بس القاضي
حكم ب٦ اشهر يسمو الحق العام..

هنا كلنه انهارينه السبع خيمه وعايشين
جوهه شلون بينه ٦ اشهر نعيش بدونه
رغم ضرغام مامقصر بس عقيق وفجر
متأذيات حيل..

رجعنه لبيتنه وبالطريق حجالنه الشيخ
ياسين كال الحارس خطيه جاي عامر مهدده
وكايله ترجع لبيتك وماتحجي والحجي خايف
وعايف مكانه..

بدلو الحجي وخلو غيره وضرغام لان بيته
طلب حمايه وخلو دوريه شرطه ابابه
لان صارت جريمه ابيته ...

رجعنه لحياتنه وهدوء ماكو شي
بدت امتحاناتنه وماكو خبر عن جراح
والسبع بالسجن ...

عقيق انتكست حالتهه كام العلاج مايفيدهه
تتخربط وتوكع ونركض بيهه للمستشفى
وينطوهه علاج ومايفيد ..

حجزلهه ضرغام عند دكتورهه السبع مفهمه
واخذتهه ماما وضرغام وراحت وياهم
خاله ام رانيا كايلهم بسبب حالتهه النفسيه

عقيق.. ماعندي شي اخسره بعد بابا
غير السبع رغم محد مقصر وياي بس حسيت
بنقص ومرات احتاج شغلات استحي اطلبهه

جنت بدون مااكول يجيبلي اشتاقيتله
حيل تعودت ع اهتمامه يوميه يخابرني
جان ويذكرني بعلاجي هسه من يوم
الي انسجن واني احس قطعه من روحي غايبه

احس كلبي رجع مثل قبل وهم الم يجيني
ومن اتذكر شلون يهتم بيه وشلون يهديني
تزود حالتي لان انقهر...

اخذني ضرغام للبغداد ودخلت وياي خاله
السبع منطي عنوان ابو التغذيه وابو القلب
وضرغام ماقصر سوالي كامل الفحوصات
والطبيب شدد ع حالتي النفسيه..

جنت كاعده الظهر ودك تليفوني رقم غريب
مافتحته لان مااعرفه بس اجتني رساله
جاوبي يانسمتي الحلوه!!

دموعي سبقتني اريد اجاوب مااكدر
بس اشهك كلت الو وانفجرت ابجي
وهو يكلي لاااا لاااا موهيج عقيقتي ..

هدئت واخذت نفس اول كلمه كلتهه
اله مشتاقتلك اسمعه اخذ نفس عالي
وكال موبگدي!!

صورتج بين عيوني ماتوقعت راح
افكر بيج هلكد خلصن بعد ٦٤ يوم اكعدي
احسبيهن وغمضي فتحي تلگين نفسج
بحضني..

اخذي دواج واكلي زين واقري
واهتمي بنفسج ويوميه من تنامين
تذكري السبع ميت ع شوفة عيونج...

عقيق.. ماحجيت اي كلمه بس ابجي
خلصنه مكالمه وسديته وظليت
اعد بالايام يوم يوم شوكت يخلصن
٦٢ يوم..

البنات امتحنن ونجحن رانيا تراجع
وصحتهه احسن بس ملاحظتهه
معتكفه ومن يجي ضرغام ابد متطلع
وحته هو متغير ...

حته حجيت ويه لبابه كتلهه احسه
رجع مثل اول يوم شفته بي
الضحكه ماادور ع وجهه ابد...

مرت الشهور وصار سنه كامله
ع اختفاء جراح وماكو خبر عنه
اما السبع بعد يومين ويطلع...

الشيخ ياسين حضر الذبايح
واخذنه يمه وكال كلنه نفرح
بطلعته جنت متلهفه ع شوفته
شوكت يطلع واشوفه اكيد هسه متغير

اليوم كعدت من الفجر لان السبع كالو ب١١
يطلع بيت الشيخ ياسين مهوس وكلهه
تطبخ وفرحانه عبالك اهله الحقيقين

بس لازم الفرحه ماتكمل رغم اني
ماعندي اذيه ع احد ولا يوم قللت
من احترام احد لامن بيت ياسين
ولا من القصر ....

مرت اخو ياسين ام علي تطبخ
ويه خاله ساهره وام اوب
جنت واكفه ويه لبابه وبناتهه
بس مااعرف ليش دزتني ع مصفي من البيت مالتنه
من دونهن

حته بتهه كالت اني اروح خزرتهه
اني ماكلت شي كتلهه راح اروح
اجيبه فكري وكلبي المنشرح كله
يم السبع حته مامنتبهه ع اليصير داير مدايري

ع نيتي بس يمكن حبي للسبع
وحمايته الي جانت مأثره عليهم
اتذكره من كال انتي نقطة ضعفي اذا يريدون
يأذوني بس بيج...

وين جانت فرحتي بطلعته واتخيله شلون
متلهف على شوفتي مثلي ومبين من كلامه
بس للأسف ماراح تكمل هاي الفرحه

اصعب من وفاة بابا !!
واتعس من اي يوم عشته !!
لحدالان اثاره موجوده هذا اليوم
وبكد فرحتي شربت المرار.....
.
يتبع......

#عناية_لشعركِ

نصائح للوقاية من تساقط الشعر:🔮🙍‍♀

📌1- مساج الشعر على الاقل في الاسبوع مره لتنشيط الفروه.
📌2- الاكثار من الفيتامينات.
📌3- التنويع في الوجبات بحيث تغطي السوائل والكالسيوم والدهون والبروتينات والكربوهيدرات.
📌4- الاكثار من الوجبات الصحيه.
📌5- الاكثار من السمك.
📌6- الاكثار من الخضروات الخضراء (الجرجير والخس والرويد والسبانخ).
📌7- معرفة سبب التساقط واخذ العلاج المناسب.
📌8- استخدام نوعية المشط المناسب.
📌9- تقليل من الستخدام الاستشوار في الاسبوع مره يكتفى.
📌10- تجنب الاصباغ واستخدام المواد الطبيعيه مثل الحناء.
📌11- تجنب التمليس واستخدام مواد طبيعيه.
📌12- تغيير الشامبو والبلسم والكريم كل 4 اشهر مره يكفي.
📌13- استخدام خلطه معينه وزيت معينه والاستمراريه عليه لفترات متباعده وليس بشكل يومي.
.

#اعادة_توجيـهہ_لصديقتج
#ملوكه
@stylegrils

عيوني اني سامعه عن حبوب الكولاجين اكو جم بنية استخدمته واستمرت عليه وماشافت اي نتيجة 🤦‍♀💔
وهو اساسا الكولاجين ماله علاقة بالشعر ..
فاذا انتي مالكيتي اي مجرب..فماانصحج تاخذي

واللي مجربته وشافته نتيجة..فخل تنصح هالبنوتة

#ملوكه

ومشاركة من هالبنوتة
صح معشتي اجواء العرس كاملة بس كبرتي بعين زوجج من ساعدتي ووفيتي دينه

وان شاء الله يعوضج بأحسن🥰💜

#ملوكه

مافهمت عليج😕؛:

#ملوكه

عمري بهالبيجات تلكين 👇🏻🥰فساتين وبدلات

#ملوكه