لبابه.. تروح بسيارتك؟
... لااا جاي اقنع بضرغام بلكي يروح
... مايروح لمرته؟!

... يروح دائما بس لان نسوان يكول
مااحب الجرجره مالتهن...

لبابه... رجعنه نتمشه ونسولف
دخلت للممر جانو يشيلون
بالاكل طبيت للصاله كعدت بصف
رانيا...

حوراء ضربت اختهه الصغيره
ومتنرفزه وكامت تبجي لان
اختهه وكعت التشريب عليهه...

كمل العشه وصار غسل المواعين
بس هالمره ماكمنه ولا وحده كالت
كومن ...

كالو باجر ب٤ الفجر نطلع للنجف
ولازم انبات يمهم لان بليل الطريق
موامان...

بتنه بغرفه الحجيه وب٤ صعدنه
بهاي السياره الريم الجبيره
متروسه بس نسوان..

جراح وعاصم وخالو وخال جراح
بسياره ضرغام لاول مره اروح للنجف
بس تحركت السياره بجينه رايحين
انشوف الماتو غدر...

سياره ضرغام تعدنه وكالو تلكونه كدامكم
واحنه صعد ويانه عباس ابن جبار الجبير...

وصلنه للمقبره ماما شمرت نفسهه ع
قبر شهد كامت تشيل تراب وتخلي
ع راسهه مكتوب ع قبرهه الشابه المغدوره

ساعه نبجي يم قبر بابا المات من خوفه
وساعه نرجع لشهد ونتذكر نظرتهه ودموعهه
النزلت باخر لحظه

هاي المقبره خاصه ببيت جريان
وكفنه يم قبور عائله السبع
ابو وامه واخوته واخته وكلهم مكتوب عليهم
المرحوم المغدور...

رجعنه للسيارات حالنه صاير تراب
ضرغام واكف يم السياره يدخن
من وصلنه كال لجراح روح انت اخذ السياره
واني اجي وراكم للامام

عرفناه راح لعائلته شلون مأساة كل
واحد بيهم دافن عزيز ...

رحنه للامام زرنه واكو اماكن نكعد
بيهه كعدنه وضرغام بعد ماجاي..

شويه وانشوف السبع وتمشي
بصفه عقيق لابسه جادر مال صلاة
وشكلهه متغير وعبالك كبرانه
حته صايره عدهه خدود...

الحجيه.. هله هله بطوايف اهلي
السبع.. باسهه من راسهه وكالهه شلونج
الحجيه.. من شفتك ردت روحي طولت الغيبه
يالسبع

... البارحه يله كملت الشغل وخابرني
جراح وهاي اجيت وراكم..
الحجيه.. شلونج يمه
عقيق.. زينه حجيه

الحجيه.. لاا كبرانه هالمره وراده رويحتج
السبع.. تكبر تكبر خليهه هيج حليوه!!

چااا ضرغام وين؟!
الحجيه.. راح لمرته واولاده لسه مااجه
السبع.. كوم جراح شويه ونجي..

رانيا.. تعبت حيل من الطريق واطفالي
بهذلوني كلساع اكتل واحد صاروا متوحشين
حته يعضون ويتعاركون ...

صبوا غده مااشتهيت اكل ضرغام ماجاي
بعده ليش هلكد افكر بهذا الانسان
وهو كلامه سهام ويشمرهه عليه..

كالو كومن اذا تريدن تفترن الكم ساعتين
وترجعون لهذا المكان كمت اني ولبابه
وعقيق وفجر يمشن كدامي...

اني شايله جنطتي برا العبابه
واول مره البس عبايه بهذلتني
اجيبهه منا توكع منا...

السوك هوسه وسيوف يبجي ع لعبه
وكفت اشتريله ومااحس غير واحد
اخذ جنطتي وركض. ..

صحت وكمت اكمز بنص الشارع
وهو مثل الطلقه ركض وبعدهه اختفه
والناس كلشي ماسوت كالوا هذا دائما يسوي هيج...

رجعت الدمعه بعيني كتلت سيوف
لان من وراه يالعبه يشوفهه وكال اريدهه..

رجعت لنفس المكان وعفت البنات ويه
خديجه مالي خلك كلشي وبابا مدري
وين راح ...

لكيت ضرغام وجراح كاعدين سلمت
وكعدت شويه وكام جراح وسيوفي
ع فد بجيه .

التفت علينه وكال شبي يبجي؟!
رانيا.. كتلته
... ليش!؟
... كل لعبه يشوفهه يريدهه ووكفت اشتريله
وااحد باگ جنطتي وشرد

... عفيه سباعيه ماتعيشين بدون
مغامره!!

... قابل شمدريني شايلتهه فوك العبايه
حته يم الامام واكو هيج نماذج

... وشبيهه جنطتج؟
... مابيهه شي بس فلوس
... ومستمسكات؟
.. لااا ماكو شي

... انتي شكد عمرج؟
.. ليش؟
... اريد اطلعلج جنسيه
... مستفز

... شعلتي ابو ابوي بهاي الحجايه
هسه شكد عمرج ؟!

... ٢٧
... هابعدج بريعان الشباب
... شكرا

جان ضارب عكس وكال لسيوف تعال
كمز بسرعه وراحله انطاه فلوس وكاله
اشتري جانوا يبيعون العاب يتفترون بيهه..

رانيا.. لاتنطي هاي ثالث لعبه
ضرغام.. شعجب ابوهم مايجي عليهم
... الحضانه الي وهو راح اتزوج

ضرغام.. شيشتغل؟
... ضابط
ضرغام.. هااا خيريات الله
رانيا.. اكره الضباط كلهم الخيانه بدمهم

ضرغام.. مااشوف تكرهيهم
رانيا.. شنو قصدك؟
... ليش هو خانج؟!

رانيا.. اي
ضرغام.. الله يعوضج
رانيا.. تسلم..

سحب جكاره وصوت الطكه مال الجداحه
وهو يشعلهه واني ماادري بنفسه
شلون اباوعله

فززني صوته وهو يكول تره انتي تكرهين
الضباط والكدامج ضابط؟!

بالاول مافهمت قصده بعدين استوعبت
كلامه ماتفوته فايته ولازم يفشل
المقابل...

سكتت وسويت نفسي ماسمعت
جانت عائله كاعده كدامنه وبيهم شباب
واكو واحد صافن بوجهي كلما ارفع عيني
الكاه يباوع...

سويت نفسي العب بالعلاكه مال
الالعاب اجاني صوته وهو يكول
عدلي كعدتج ؟!

رانيا... شلون؟
ضرغام ... انطي ظهرج لهاي العائله
رانيا.. انطيك وجهي؟!

ضرغام.. هسه وجهج قحط دديري
يمعوده !!

رانيا.. درت وجهي وغيرت مكاني صرت كدامه
كلما ارفع راسي الكاه ضارب عكس والجكاره
بحلكه وصافن عليه ...

حجيت اكو شي صافن بوجهي
ضرغام... ارسمج ابالي لايام العوز

رانيا.. انت هيج اسلوبك ويه الكل
وخاصه احنه النساء

ضرغام.. صدقه للنساء !! شبي اسلوبي
اني مااعرف اجامل شسوي

رانيا.. الصراحه انت مبين واحد
ملعب ومن تحجي وياي هيج عبالك
اني مثل الي قابلتهن

ضرغام.. يابويه!! انتي ترفعين الضغط
بهذا العقل المجيم العندج

سابقا كتلج انتي النوع المفضل عندي
وازيدج معلومه انتي نسخه بالشكل من
زوجتي الله يرحمهه حته اسمج يصيبني
بتوتر..

رانيا.. معقوله اشبهه بالشكل والاسم؟!
ضرغام.. نسخه نفس الملامح بس هي مطيعه
انتي متمرده !!

رانيا.. الله يرحمهه شلون صدفه
ضرغام.. اااي صدفه
رانيا.. اليوم انت اسلوبك حباب

ضرغام.. اني حباب لو اسلوبي
ستنه الفاضله حته جمله ماتعرفين ترتبين
بس كليلي بيمن فالحه!!

رانيا.. لاخاني التعبير اقصد اسلوبك
مومستفز اليوم
ضرغام.. تكومي ابنج لايضيع تيهتي
وفكيتي حلكج !!

رانيا.. التفتت اشوف سيوفي بين الزوار
ركضت جبته هو منتبه واني صدك فاكه
حلكي ...

لبابه... رجعنه من السوك ويه خديجه
تلكتنه حوراء وامهه وابرار يمشن
ابرار كالت تعالي اشتري ساعه هديه مني

وكفت اختاريت وحده طلعت فلوس
من جنطتهه وانطتني كتلهه عندي والله
جراح انطاني وهسه جان وياي واشترالي...

جانت حوراء ويانه مشينه انريد نرجع
لمكانه هوسه وازدحام تيهنه حوراء
وصلنه للمكان بين ماتجمعنه
وطلعنه للسياره...

شفت حوراء وجراح اجو يتمشون
من بعيد بدون تفكير ضيعت نفسي
من ماما وكمت افوت بين الزوار وصرت وراهم
مجرد مايلتفت يشوفني ..

اجت الكلمه بوسط اذني وهي دكله جراح
هاي موحاله جاي اموت واني اشوف
اهتمامك بيهه اني حبك الاول موهي
انت كلت احميهه ماكلت احبهه!!!!!!!!!!


يتبع.............

#خبايا_الاقدار
❤️♨️

... البارت الثامن عشر


( تم تغير اسم حوراء الى نوال )

لبابه... لحظة انكسار !! خيبة تملكتني
كلماتهه بأذاني وهو يسمعلهه وساكت
وهي تحجي بنبرة عصبيه...

رجليه وكفت بنفس المكان ماكدرت
امشي فوگ الازدحام اختنكت وحسيت
نفسي بقفص مابي منفذ ومحكم الغلق..

اشوفهم يبتعدون وهي تمشي وتحجي
بعصبيه وتأشر بأيدهه وهو منصت
الهه بكل حواسه..

كمت امشي بخطوات ثقيله مابجيت
بس الم قوي بگلبي لان جنت حاسه
عنده شي..

اني ماالومه اذا هو يحب خلي يحب
الي تناسبه بس ليش علقني بي؟!

اني مراهقه وخسرت بابا وانذبحت
اختي كدامي وهو نقذني
هو بده الاهتمام وحماني من جبار...

هو تكفل بدراستي واشترالي هديه
ومن اباوعله اشوف نظره اعجاب
بعينه...

السبع هم حمه فجر بس من اولهه
كالهه اشوف بيج اختي وماتجرأت
فجر تفكر بغير تفكير..

اني ليش خلاني اتعلق بي ويريد نستعجل
بالزواج معقوله هيج سهله جرح المشاعر
وعادي اعيش بالمنتصف...

وصلوا قريب. للسياره واني بعد مسافه عنهم
تعبت لهنا وبعد مااكدر امثل واسوي نفسي
ممهتمه ماتمنيت ارجع وياهم ابد..

باوعت جهه الامام ونزلت دموعي
رجعت درت وجهي ع جهه المقبره
وبجيت بالم !!

وصلت للسياره الكل صاعد
وماما مخبوصه ادور عليه
شافتني ابجي عبالهه لان تيهت..

اجه هو علي يسأل شبيج وشلون
تيهتي موتمشين ويه البنات بس ماكدرت
اجاوبه عفته وصعدت للسياره..

ابرار ونوال كاعدات كدامنه اني وفجر
كلساع تباوعلي ابرار وبعينهه حجي
وتريد تسألني منو وياج وتسكت؟!

تحركت السياره واني اباوع من الجامه
شفت سيارة السبع صارت بصفنه وشلون
تضحك عقيق ومخليه ايدهه ع حلكهه

تعدتهم سيارة ضرغام الي كاعد بيهه جراح
واشوف نوال طلعت تليفونهه وكامت تراسل
بس مااشوف شتكتب...

خليت راسي ع الجامه واني صافنه
معقوله راح اعيش حب من طرف
واحد؟!

زين معقوله اقبل بالذل واعيش نفس
عيشة نسوان القصر كل واحد متزوج اثنين
واكثر ..

شهد ليش انهزمت وليش فضلت تموت
ولاتنذل جانت دائما دكول مستحيل اقبل
اعيش مثل عيشتهن ويتزوج عليه...

گوه مصبره ع نفسي لا ابجي
حست عليه فجر حاجتني لبابه
شبيج؟!

لبابه.. راسي يوجعني من الطريق مابيه شي
فجر.. الحجيه كالت راح ننزل بزيد ابن علي
كالت ع الطريق واني تعبت شكد يحبن
يفترن..

لبابه.. خلي نظل بالسياره مننزل
فجر.. منو يخلينه يامخبل منهم فوكاهه
تلاثتهم جايين ..

لبابه.. كلساع ارجع راسي ليوره
وساعه ارتجي ع الجامه لحدماوكفت
السياره كالو انزلو شويه نزور ونطلع..

ماقبلنه اني وفجر ننزل بس ماما
اصرت وكالت محد يبقه بالسياره..

ماعفت ماما ابد امشي بصفهه
جراح ماشفته لان ضرغام ماقابل
يمر وطالع للبصره ...

زرنه ورجعنه واني عيني
ع نوال تليفونهه ماوكع من ايدهه ابد
تراسل ومبتسمه..

جنه واكفين يم السياره ننتظر ومانحس
غير الحجيه كالت انه امك يافاضل
خايبات بيت الشيخ ياسين هنااا

هيام.. اي حجيه شفتهم طالعين من الامام
وجنتهم كالت اليوم اربعين المرحوم

لبابه.. سيارتهم يم سيارتنه هواي نسوان
وكلهه لابسه اسود ومبينات حزينات ومفجوعات
ماسلمن علينه ومن فاتن سمعتهن كالن
الكم يوم يابيت جريان..

احنه مانعرف شي ولانعرفهن منو
بس نعرف الشيخ ياسين ابن عم
جبار وبينهم عداوه..

اجت زلم صعدت بسيارات واحنه نتتظر
سايقنه مدري وين راح شفت رجال هيبه
بعمر بابا بالضبط حته ينطي شبه...

لابس عبايه مال شيوخ وعكال
والسبحه بيده ويمشون ويا هواي
زلم ويمشي ويحجي ويحرك بسبحته..

من وصل يمنه وكفت بطريقه الحجيه
بركات كال السلام عليكم حجيه
عساج بخير..

ودنك ع راسهه وباسهه وهي بجت بسرعه
ودكله ياسين وليدي يالربيتك بيدي
وصرت مااشوفك

ياسين.. گواج الله يمه هذا حال الدنيا.
الحجيه.. چاااا السبع مايدري انت هنا..
ياسين.. طلع چدامنه للبصره ماوكف
هنا.

لبابه.. هذا شيخ وجبار شيخ بالهيئه نفس الشي
كلهم عدهم بنيه ضخمه حته جبار شكله هيبه
وعبالك شباب..

بس الفرق جبار ظالم ونسمع عن الشيخ
ياسين رجال عادل وحته ماعنده عداوات
بس ويه جبار والبداهه جبار ع الشيخه..

جنه اني وفجر وماما واكفين يم الحجيه
حجت واشرت علينه هذني بنات علي
وهاي حرمته !!

رفع راسه ورجع دنگ بسرعه وكال
هله بيهم الله يرحمه برحمته
ويصبركم ...

وكف ع جهه هو والحجيه ويسولفون
واحنه اجانه السايق وصعدنه وهو راح
لسيارته ...

يكولون اكبر من السبع بسنوات قليله
ومربيته الحجيه بركات ابن حماهه يصير
لان امه ميته وتحبه مثل السبع ..

رجعنه للبصره وتليفوني بيدي
اقارن بيني وبين نوال الماوكع من ايدهه
واني ماكلف نفسه ودزلي رساله ...

وصلنه للقصر نزلنه وكل واحد راح
لبيته ظلت وسن وبيت اهل نوال يباتون
وثاني يوم يرحون...

من وصلنه جانت دنيا المغرب
كامن النسوان يسون عشه
واني طلعت برا لكيت عقيق
تغسل بالمغسله..

ابتسمت بوجهي وكالت تعالي
نكعد بالغرفه رحت يمهه كعدت
اتذكرت من دخلت ولكيتهه نايمه ع
رجل السبع...

سولفتلي ع علاجهه وكالتلي شتشوفين
متحسنه وفعلا هي كبرانه جانت ممسوحه
مسح هسه لا رغم قصيره وناعمه بس
بدت ملامحهه الانثويه والملابس كاعد عليهه...

اثناء الكلام مدري شلون انذكر موضوع السبع
وين ينام جاوبت كالت ينام بالمضيف وبغداد
ينام بالصاله...

ذكرتلهه مره دخلت بالغلط وبعد مكدرت
اجي خاف ينام هنا!!

عقيق.. فزيت من كلامهه اني مانايمه قريب
ع السبع ابد ولايوم اخذتني النومه
وهو يمي...

تحجي لبابه واني بالي راح بعيد
معقوله السبع يستغلني بهذاك الوقت
جنت اخذ علاج ومنوم ومااحس ع نفسي

اكعد الكه نفسي مغطايه
بس ماشكيت ينومني ع رجله وفوكاهه
يلعب بشعري وصار هواي ع السالفه
واليوم يله دريت...

طلعت لبابه واني ظليت افتر بالغرفه
شلون احجي شلون اسأله بس بيه
طبيعيه مااكدر اضم اي سؤال براسي
لازم كلشي اسأل واستفسر...

اذن الاذان طلعت توضيت ورجعت
صليت وكعدت انتظره شوكت يجي
واني اعرفه اذا ضرغام وجراح. موجودين
يتاخر يله يمر عليه...

صارت ب٩ تقريبا يله ندك الباب جنت
كاعده ع الجربايه فتحه وكال السلام
عليكم رديت علي...

كعد ع القنفه وكال اخذتي دواج؟!
هزيتله راسي اااي..

السبع..چااا شبيج مكدره ؟!
عقيق.. مابيه شي!!

السبع.. بطلي دلالج واحجي شبيج
وجهج مگلوب

عقيق.. انت صدك نومتني ع رجلك
وتلعب بشعري واني غافيه ماادري
السبع... ااااي...

عقيق... فوكاهه دكول اااي
السبع.. چاااا تريدين اجذب عليج

عقيق.. وليش سويت هيج انت مودكول
اطمئني ومااوصل يمج
السبع.. جنتي متخربطه مومشكلتي مشكلتج
انتي لزمتي ايدي وتهذين مصخنه..

وانه رجال احب اساعد الكل وخاصه
المثلج وسويت واجبي..

عقيق.. انت غريب يعني حته ماتحاول
تعتذر ع الصار..
السبع.. وليش اعتذر شمسوي ترى انتي
حلالي يعني مرتي..

عقيق.. اني مومرتك غير تسوي عرس
مثل الناس حته يكولون مرته
السبع.. شلچ بهاي السالفه

عقيق... والله غير هيج
السبع.. هسه انتي تردين عرس حته
ماتحاسبيني بعد..

عقيق.. لااا انت كلت مؤقت علمود احميج
ويجوز بعد سنه وارجع لاهلي شلون لازم
اصير مطلقه

السبع.. ميخالف عود نطلگ
عقيق.. انت تقشمر عليه احسك تستهزأ بعقلي

السبع.. لابويه عليمن استهزأ تعالي يمي
هنا وخلي افهمج كمت كعدت بصفه
بس وجهي ثگيل علي ..

شوفي يابنت انتي هسه تسمين مرتي
حلالي اذا الزمج واذا اشوف شعرج موحرام
تريدين نوثق بحفلة عرس معناتهه تصير
عليج حقوق ومسؤؤليه وانتي موكدهه
بالوقت الحالي!!

عقيق.. ليش موكدهه لاتستهين بيه
السبع.. ادبريهه؟! حجاهه بابتسامه

عقيق.. اني مااريد اتزوج هيج مرتاحه
بس انت مايصير تنام يمي وتجي
شوكت مايعجبك

السبع.. چااا ع هالحجي خلي نتوكل ونسوي
حفله عرس واخذ حگي مربع

عقيق.. شنو حقك؟!
السبع.. ماتعرفين حق الرجال ع مرته
عقيق.. اعرف تريدني اطبخ وانظف مثل نسوان
القصر وتريد اغسل ملابسك وبعد مايكولون خطيبته
يكولون مرته..

السبع.. رحمه من الله حقوقج بسيطه
چااا يمكن انه شاطح بالي بالحقوق

عقيق.. هسه ماعليه فهمني ليش تجي
واني نايمه
السبع.. مااجي بس هذيج المره لان جنتي
مريضه وننتظر مده اذا مالگينه اهلج
نسوي حفله وتصيرين مرتي قلبآ وقالبآ..

عقيق.. ماانسوي مااريد اشارك نسوان
القصر بالشغل
السبع.. انتي ماجانت عندج صديقه؟!

عقيق.. لااا
السبع.. ولا بنت عم ! مرت عم تعلمج
عقيق.. اعرف كلشي؟!
السبع.. شتعرفين؟!

عقيق.. اعرف انظف واغسل ملابس واطبخ
تمن واسوي دولمه بس مااعرف اخبز

السبع.. الحمدلله العافيه درجات هاي حقوق
القصر اما حقوقي يمكن حصبه وجدري يله
احصلهن..

عقيق.. اغسل ملابسك واكويهن
السبع.. نعمه !!

١٨ سنه عمرج ياعقيق ومنين مااجيبج
ماتستوعبين وعدنه ١٤ سنه جابت ولد

عقيق.. اني عشت ويه بابا بس موزين
اعرف هذني!!
السبع.. لازين تتعلمين شويه شويه..

هسه خليني اروح وانتي اكلي هاي يمج
فواكه ونامي باجر اجيبلج تليفون حته من
تحتاجين شي دكي عليه..

عقيق.. اطلب منك طلب!!
السبع... كولي!!
عقيق.. اضوج هنا واخاف اطلع خلي اروح
ويه لبابه وفجر انت موكلت عندك شغل

السبع.. راحن من زمان باجر اني اخذج
يمهن من اروح للشغل ..

عقيق... طلع وقفلت الباب وراه واني افكر
بكلامه اذا مالكيت اهلي شنو مصيري معقوله
اصير مرته من صدك...

لبابه.. رجعت للبيت بس اريد انام اريد
ابجي وحدي كون محد يشوفني غسلت
وركضت لفراشي بحجه تعبانه

ضميت راسي بالفراش وابجي
اسمع صوت فجر ورانيا يسولفن
ورانيا مقهوره ع جنطتهه وفلوسهه
وتلوم بنفسهه..

فجر نامت وصار هدوء عبالي رانيا نامت
طلعت راسي كالت ها ولج كاعده!!

حجيت واني ابلع الغصه ومبين ع صوتي
كتلهه اي نمت وهسه كعدت
رانيا.. شبي صوتج خاف تمرضتي
لبابه.. لااا مابي شي..

بسرعه فتحت اللايت بوجهي شافت عيوني
منفوخه ودموعي ع خدي كامت من فراشهه
واجت يمي بسرعه بجيت ..

سحبتني من ايدي واخذتني للاستقبال
فارغ سدت الباب ولزمتني من خدودي
مسحت دموعي وكالت منو وياج لبابه؟!

لبابه.. جراح مايحبني وشهكت!!
رانيا.. منوكالج مايحبج شو اكعدي سولفيلي..

لبابه.. حجيتلهه كلشي وهي ساكته
رانيا.. كومي دكي علي وانطينيا اني اعرف
شلون احجي وياه
لبابه.. خلي يولي

رانيا.. لا ماكو خلي يولي محد كاله احنه بناتنه
عديمات مشاعر ويجرحن ويطيب مشاعر بنت خاله
ولج كلهم الزلم والضباط هيج كومي اتصلي

لبابه.. خاف يحجي عليه؟!
رانيا.. فوگ شينه گواة عينه ليش يحجي
عليج ماعندج اخت جبيره توكفلج مومعناتهه
يستغل ضعفج

لو لان امج تخاف من جبار مستغل هالشي
محد كاله يدك صدره واني واني ويطلع
عنده بنت خاله

اول شي عمرج صغير ومايسمح لاي شخص
يتلاعب بمشاعرج وتظل ندبه بحياتج وهواجس
وخوف من الارتباط بسبب تجربه فاشله

وثاني شي جان صارحج وكالج اني مجرد
احميج حته متحبي وتتعلقين بي

لبابه.. كمت دكيت علي جانت الساعه ب١١
جاوب الو انطيته لرانيا كالتله السلام عليكم
اني ام سيف

جراح.. اهلا وسهلا بيهه شي لبابه
رانيا.. شدكول بنظرك وحده تكتشف خطيبهه
وابن عمهه والدگ صدره الهه وفوكاهه مستعجل
بزواجه يطلع يحب بنت خاله

جراح.. منيلج هالحجي وين لبابه ؟!
رانيا.. اعتبرني اختهه الجبيره موبنت خالهه
وجاي احاسبك ع تلاعب بمشاعرهه شنو مصيرهه
وهي بهيج عمر تنكسر

جراح.. رجاءا لتدخلين انطينياهه نتفاهم
وحدنه انتي خارج قوس

رانيا.. مالك كلام وياهه مدام متريدني اتدخل
انتظر اسولف لامهه هي تتفاهم وياك بس لتعتقد
امهه راح تكسر بخت بتهه علمود تحمي نفسهه

انت عميت ع الكل حته امهه اذا سمعت راح تفسخ
خطبتهه من عندك وراح ترضى بانواع الظلم حته
متشوف بتهه مكسوره وتعاني ..

انت عندك اخت تقبلهه واحد يتلاعب بمشاعر
اختك لو لان لبابه وحيده وماعدهه رجال
يدافع عنهه

جراح.. انتبهي لكلامج وشي بيني وبينهه
لتدخلين
رانيا.. ماشي ماراح اتدخل بس انتظر امهه
تتفاهم وياك احسن..

سديته من عنده وكلبي يفور تذكرت خيانه القذر
العندي وبيومهه شلون عشت خيبة امل
وهاي المسكينه بعدهه طفله ودموعهه ع خدهه

يقشمر بيهه يحضن ويبوسهه وهي تتعلق
بي من كلامه المعسول واني مااعوفج للموت
واني واني وهي مصدگه..

لبابه .. شسوي هسه
رانيا.. تحجين لامج كلشي وهي تصرف اذا ظليتي
ساكته والله يستغلج هذا ماعنده ضمير

لج تخيلي لو اخته هيج جان شسوه
موحماهه ودرست وهسه تاخذ واحد
صيدلاني لو طبيب وتطلع من مستنقعهم
وانتي جابج وقشمرج حته تغرگين وياهم..

لبابه.. بس ماما خاف دكول اتحملي لان
اذا تركته جبار مايسكت ولا ولده..

رانيا.. احجي لامج واحجي للسبع
واذا ماكو حل اقطعي علاقتج بي
منا لمن تكملين دراستج ..

لبابه.. بس غير اعرف ليش سوه هيج
رانيا.. واذا عرفتي بابا لتصدكين باحد
ولج كلهم نفس الصنف بالحجي استاذ
وعدهم كلب كوستر يوميه وحده..

وكذب هذا العرگ دساس منو عمه موجبار
شوفي القصر كلهه متزوجه اثنين وتلاثه
وانتي مصيرج مثلهن ..

لبابه.. كلام رانيا استوعبته بكد مامجروحه منه
واحس نفسي مغفله وتلاعب بمشاعري
جان يجبر نفسه يهتم بيه لو يروح شهر
مايحاجيني بحجة تغطيه ماكو...

عدت هاي الليله ونمت بصف رانيا
احسهه مثل ماما بحنيتهه ظلت تلعب بشعري
وتهدي بيه بكلام ايجابي يله غفيت...

ثاني يوم كعدت ع صوت فجر وهي دكول
كومي جغاح هنااا...

ماخفت ولا ارتبكت بالعكس حبيت اواجهه
وكدام الكل كمت غسلت وطلعت لكيته
بالاستقبال هو وماما..

ماما كامت تريد تعوفنه وحدنه كتلهه لاماما
ظلي اريد احجي كدامج باوعلي بنظره
عدم قبول وكال خلي نحجي احنه بالاول..

لبابه.. ماكو حجي بيناتنه ماما السند الوحيد
العندي ولازم تعرف
ساهره.. شكو ياستار..

لبابه.. ماما جراح يحب بنت خاله نوال
واني صرت عاله علي يعني حته وكفت
بطريقهم وانجبر يخطبني

جراح.. لباااابه بطلي هالحجي محد يجبرني
ع فعل شي مارايده

ساهره.. ع كيفج ماما ومدت ايدهه
لزمت ايدي شافتني ارجف ووجهت كلامهه
بحديه لجراح صدگ هالكلام؟!

جراح..مدام حابين تسمعون الموضوع خلي احجي
اني بنت خالي اريدهه من زمان من قبل لاتجون
وجان جبار مايقبل يخطبهه الي..

قبل لا اتخذ قرار بخطبة لبابه وحمايتهه
حجيت ويه جبار وكتله اخطبلي بنت خالي
لان خالي مصر ماينطيهه اله يجي جبار يخطبهه

ونفس الحجي رفض وكال اخر وحده تفكر
بيهه وهددني حته باختي يزوجهه لعاصم
لان طلعت من حماية السبع..

ماجان عندي حل غير اتخذ قرار واعوفهه
ورحت وحجيت وياهه ويه امهه كتلهم
قسمه ماكو وابتعدنه كل واحد بطريق..

اجت لبابه بطريقي وواجبي احميهه
وحته اذا مواني ضرغام لو السبع
هم يسوون نفس موقفي..

من طلبتهه من جبار وعباله مثل السبع
من وكف ابرار بس من شافني مهتم
بلبابه واحجيهه كدامج صح احب نوال
بس حسيت لبابه هديه وجبر خاطر

بديت اميل الهه يوم عن يوم اعزهه اكثر
بس تفاجأت من خابرتني امي وكالت
جبار ماخذ اولاده ورايح خاطب
نوال رسميا وابوهه قابل ...

شيفيد بعد تعاركت حجيت كال انت موتريدهه
وكلت لبابه بس احميهه بعد شحجي لخالي
يعني الف مره خطبتهه من عنده وهسه اروح
اكله مااريد بنتك...

خالي يدري اني عاقد ع لبابه وجبار
مفهمه بان مجرد حمايه مثل السبع
ويه ابرار..

لذلك ردت استعجل بالزواج حته اخلص
من خالي ومستحيل ينطي بنته ع ضره
وكلما اريد افهم لبابه مااكدر اكسر خاطرهه

جنت احاول احل الموضوع بأي حل
المهم ماينكسر خاطرهه وتحس نفسهه
عاشت خيبة امل..

ساهره.. ليش ياابني من حطيت ايد
بنتي بايدك جنت واثقه منك وكتلك هاي
يتيمه وامانه عندك

جراح.. حقج بس مابيدي شي لبابه ماافرط
بيهه ابد ومو خوفا منهه احجيهه اني
اريدهه هي زوجة وكتلهه قبل الحب موكلشي

ساهره.. تريدهه زوجة ثانيه للخلفه والشغل
لان ماعدهه اب مثل خالك ويرد اعتبارهه
وتجيب نوال عليهه للدلال وبنتي للخدمه

جراح.. لا موهيج ولامن شيمنه من قررت اتزوج
لبابه واستعجل بالزواج مستحيل بعد ارتبط بغيرهه

ساهره.. وشلون اثق بيك ؟! بنتي عمرهه
١٧ سنه تتقشمر بكلمتين واني مأمنه بيك
واكول عرضه ومايأذيهه وتالي هيج عيونهه
وارمه لان تحبك

جراح.. خاله انطيني مجال افهمج اني بنص
نارين شنو البيدي ومااسوي جاي اجازف حته
اطلع من القصر لخاطر لبابه لان نوال عدهه عادي
تعيش هنا..

ساهره.. ارجع لبنت خالك ولحبك وبنتي احسبهه
مثل ابرار وحمايتك الهه خليهه من توكف ع رجليهه
انطيهه حريتهه

بعدهه طريه وجرحهه وكسرتهه تتعالج بمرور
الوقت بنتي اشوفهه طفله واكعد ابجي عليهه
من اشوف الحلقه بيدهه لان ماعاشت مثل
البنات وراح تندفن بزواج ورجلهه كلبه يم غيرهه

جراح.. موهيج الحجي خاله خلينه نتفاهم
لبابه مااتركهه واني لو اريد بنت خالي وافضلهه
ع بنتج جان هسه ارمي يمين الطلاگ

لبابه.. كمت مااتحملت اسمع بعد
شكد متأذيه وشكد مهضومه بس وكفة
ماما بجانبي وجنت افكر خاف يكتلهه الخوف
وتوكف ضدي...

طلع جراح وماما ماحجت وياي تحاول
تلطف الجو حته ماانقهر اجت عقيق وره
الظهر وكالت اظل شكم يوم يمكم
شويه كدرت استعيد قوتي..

تليفون موبحاجته اخذته ماما وقفلته
وكالت ممنوع يجي واطلعيله
خلي يحس عندج عزة نفس وموانتي
التقبلين القسمه على اثنين...

مرت الاشهر هدوء جراح شكد يجي
بس مااطلعله حته طلع عمال يبنون طابق
ثاني واني مااشوفه ابد...

صادفت مثل هيج وقت زيارة الاربعين
وبيومهه بليل اجت الحجيه والسبع وضرغام
مسيرين علينه كلنه كعدنه حته رانيا وامهه

خالو والحجيه منطلقين يسولفون ع اهل
قبل حجه السبع كال تعرفون هذا البيت بي بناء
وهاي الايام زيارة الاربعين وراح تبدي الناس
تمشي ..

واحنه عدنه بيت ع درب كربلاء كل سنه انروح بي
تخلص الزياره ونرجع والاسبوع الجاي انروح
احسن الكم تعالو ويانه هم تكسبون ثواب
وهم تخلصون من هوسه العمال..

بعد اخذ وعطه بالحجي قررنه انروح ونعيش
هاي الاجواء البيت مشترك بين ضرغام
والسبع وتروح عمه زينب وخديجه لان هوايه
زوار يباتون هناك...

جنت متشوقه اعيش هيج شعور رغم
غصة جراح بس ماما ورانيا دائما بكلامهن
يحثني ويبعثن القوه بداخلي...

رانيا... ضرغام ماشفته غير شكم مره
وماصار اي حديث بيناتنه اني اتجنبه
لان كلامه عبالك اسهام تمطر مطر عليه..

ماادري ليش جنت حاسه ضرغام ماقابل
ع خطبة جراح ولبابه لان جانت لبابه تحجيلي
دكول دائما يكبسنه ومايقبل نكعد وحدنه

بيوم منهن عندي رضاوي الصغير صاير
يكذب هوايه اكو عمال ومرات المغرب يجي
لو السبع لو ضرغام لان جراح بالدوام

رضاوي جان يلعب فوك بالطابق الثاني
ووياه اخو ومطمئنه لان ضرغام فوك
شويه ونزل يبجي ويشهك اخذته غسلتله
كتله منو وياك؟!

جان يكول عمو ضرغام ضربني ويأشر
ع راسه وع خده وفعلا خده احمر
هنا تخبلت بأي حق يمد ايده ع طفل..

لبست شالي وصعدت اخذت رضاوي
لكيته واكف يخابر بالغرف الفوك
ويحجي ويه جراح انتظرته سد التليفون

والتفت عليه وكال خير ياطير؟!

رانيا.. انهديت بي بعصبيه وكتله باي حق
تضرب ابني متشوفه طفل لوماعدكم تفرقه
لاطفل ولامره

ضرغام.. حجه بهدوء لتصيحين !!
محد ضربه منو ضربك ؟!

رانيا.. رضاوي ختل وراي واني كلبي محروك
ع ابني لان خده احمر وهدومه كلهه تراب
احجي واشر باصبعي

كتله رجاءا مو وين مانولي تلحكونه
حته ابني ماسلم من همجيتكم

ضرغام.. كتلج ماضربته وحاجه رضاوي
روح عمو العب يم اخوك ع السطح..

رانيا.. رضاوي بسرعه ركض للسطح
واني جنت واكفه اباب الغرفه وهو بوسطهه
مد ايده سحبني من ايدي حيل وضرب ظهري
بالحايط

جان بس طابوگ اعظامي تكسرت
ولزم اصبعي الجنت اشر بي وضغط علي
بكل قوته احسه راح يفره ويكسره

موهذا المستفز ولاهذا الي كلما اشوفه
بارد لا هسه شفت جانب ثاني من ضرغام..

صحت ااااخ اصبعي عوفه رد عليه وروح
اولادي اذا رفعتي صوتج مره ثانيه ماتلومين
غير نفسج

مواكول غريبه وعيب وانتي ماعرفتي العيب
شنو اكثر من مره عليتي صوتج واتجاوزته
بمزاجي..

بس مال جايه وتهدين تلعلعين جنج دلاله
وانه اكتل طفل وفوكاهه تعالي اخذيلج
راشدي..

رانيا.. جنت اباوعله شلون حواجبه مرفوعه
ومخنزر من كاعه كتله هو كال عمو ضرغام
ضربني ..

ترك ايدي وابتعد واني لزمت اصبعي
واصيح اااخ كام يسعر بكلبي
شنو من قساوة شايلهه..

فرك وجهه بعصبيه وبدون مايلتفت عليه
كال ماضربته هذا اخو ضربه واني فكيتهم
انزلي رحمه لابوج ...

نزلت بوجهي للحمام احس نفسي
صرت نار اغسل وامسح بركبتي
واني الوم نفسي دائما اتعرض لمواقف بايخه..

طلعت من الحمام للغرفه احاول اهدي نفسي
يمكن نص ساعه واني ع نفس الوضع والزاد
تعجبي شلون شخصيه متقلبه جنت اكول
مستحيل اشوفه عصبي من البرود العنده..

دك تليفوني ومشتريته جديد حته خطي
جديد رساله عبالي من الشركه ماكمت فتحتهه
رجع دك هم رساله كمت فتحته واشوفهه من
رقم غريب..

مكتوب عبالج تفلتين بعملتج مو
موادري راح تلعبين بذيلج وصورتج للاحتياط
بكل الوضعيات وانتي بالغرفه الخرابه..

الرساله للثانيه مكتوب خلال ٢٤ ساعه راح
ادز صورج ع الوسائط شكو واحد
عنده تليفون حديث راح يشوف
ابداع الخالق لوهيج المطلقات لوماتنراد...

رانيا.. وكع التليفون من ايدي واني ارجف
بذاك الوقت ماجان اكو انترنيت منتشر هوايه
خاصه بالقرى والارياف كلهه ادز صوره
عن طريق الخط يسمو وسائط...

دنكت شلت التليفون وسويت
الدرج طفرتين بدون تفكير ولا وعي
لكيت نفسي ادور ع ضرغام..

جان كاعد ع السطح يدخن وسيوفي
ورضاوي يلعبون يمه وهو صافن
عليهم...

وكفت يم وكتله ضرغام بس حجتهه
بعبره رفع راسه وهو مضيق عيونه
وكال بعد هالمره كتلتمن؟!

الله عليك ساعدني تعال شوف شدزولي
رساله من رقم غريب!! كام طب للغرفه
واخذ التليفون قراهن والجكاره بيده
ماوكعت...

دموعي تنزل كل عشره سوه ومدنكه
راسي وابجي ع حالي وغبائي وين
وصلني والقاهرني ردة فعله مستمر يدخن
ويتمعن بالرساله..

جان يكول اول مره تفرحيني
وتجيبيلي خبر حلو هذا الشغل الزين
من زمان منتظر هاي الرساله....


يتبع....

#خبايا_الاقدار
❤️♨️
... البارت التاسع عشر


رانيا.. سألته شراح تسوي ؟!
ضرغام.. اني اعرف شغلي لتحجين لاحد
واذا اجتج بعد رساله انطيني خبر واذا اتصال
لاتردين..

رانيا..خاف ينشرون صوري ويدزوهن لاقربائكم
والله اقتل نفسي اني مالي ذنب ..

ضرغام.. مايسوون شي اني راح اعرف
منو الوراهه انزلي واخذي الجهال وياج
ولاتغلطين بأي تصرف..

رانيا.. اخذت جهالي ونزلت وكلبي نار
صح ضرغام گدهه ويكدر ياخذ حقي
بس خايفه من الصور اني مضروبه ع راسي
وكعدت لكيت نفسي بلاملابس!!

خاف مسويلي شي ؟! خاف استغلوني
واني فاقده وموثقين بصور ؟!
مااكدر احجي صرت مثل بلاع الموس

روحي تطحن طحن والوقت يمشي
واني احسب الساعات وضرغام راح
ومااعرف شسوي..

بليل بعد مااتحملت حته مااتعشيت
اخذت التليفون اتصلت بضرغام دك
دكه كامله وماجاوب رجعت دكيت مره ثانيه
انطاني مشغول...

قلقت اكثر للصبح اني مانايمه
تعبت من التفكير اباوع لاطفالي
شنو ذنبهم غباء امهم وماعرفت اتصرف

ب٧ الصبح دك تليفوني كلهه نايمه فتحته
ضرغام اخذته وطلعت للاتستقبال فارغ
جاوبته ها ابو ليث بشر!!

ضرغام.. صباح الخير
.. صباح النور اسفه متوتره
.. اريد منج شغله تكدرين تنطيني الخط
بس اليوم؟!

رانيا.. ليش؟
.. اريد احدد الموقع ولازم من خطج
.. ميخالف تعال اخذه كلهم نايمين قبل لايكعدون

ضرغام.. اني راح اطلع للبغداد راح اوصلكم
من ادكلج اطلعي انطينيا وباجر ارجعه الج..

رانيا.. ابو ليث الله عليك امسح الصور
خاف يخزنوهن بغير تليفون ويهددون بيه

ضرغام.. هسه خلي احدد الموقع
واعرف منو الوراهه واريد اشوف يارجال
يحفظ الصور ..

رانيا.. سديته واني الوب خوف وقلق
شويه ودك عليه طلعت الخط ومديت
ايدي من الباب اخذه ماشفته ولا هو دخل..

يوم عصيب مر بوسط تخيلاتي
وكمت اجيب افكار سوده واتخيل نفسي
كلهه مخليه الصور وتتمعن!!

اتخيلت طليقي اذا عرف راح ياخذ
اطفالي وهذيج الساعه اتخبل لو
اموت نفسي هم المصبريني ع حظي العاثر...

مر اليوم واني فاصله عن الكل المصايب
كامت تتواله ع راسي اجت ام جراح وصدمتنه
بخبر جبار طلع من السجن

شلون واني شهدت كدام القاضي شلون
طلع واني سمعته بأذني؟! تساؤلات هوايه
براسي وماعندي جواب الهن ..

ام جراح.. والله ذبحوا الذبايح وشيوخ
اجت تتحمدله ع السلامه طلع واحد من ازلام
جبار رايح وشاهد وكايل انه الكتلت اخو ياسين
بيناتنه عداوه

وطلع جبار وعامر بعده بالسجن ضرغام
مامتنازل عنه وجبار اول ماطلع تعارك
ويه السبع يكله اريد عامر من بين عيونكم

وهذا ضرغام يكله لوتموت مااطلعه
وحته انته ارجعك ارجعك موعبالك الحزب
الوراك شال التهمه براس مسكين وطلعت منهه

ساهره.. داده شوكت يتعض والله هذا كتله
حلال شلون خليتو شيخ بس فهموني؟!

ام جراح.. سالفه طويله ياساهره اصلا الشيخه
جانت عند ابو ياسين ينحلف براسه مضيفه عامر
والكل تشهدله بالمواقف

بسنين الحصار جان يوزع من حلاله
ويفتر ع الفقره ينطيهم القاسمه الله
وكلهه من تحجي يكولون ابو ياسين
وبس!!

ابو ياسين اسمه خضير وعنده اخوان
اثنين ابو جبار اسمه جريان وواحد راح
شهيد...

الشيخ الجبير ابو جريان وابو خضير هذا
جان شيخ المشايخ مال كل عشايرنه
حته بغير محافظات..

من مات وصه الشيخه لخضير ابو ياسين
وصار خضير شيخ وجريان ويه خضير
سانده واخيه ويحبه ..

خضير عنده ياسين وطه ومحمود و٢ بنات
وجريان عنده جبار وابو جراح وفاضل واثنين
شهداء...

من انكتل فاضل ابو السبع هذا جان
الضلع مال عمه خضير ويحبه حيل
وتهموا علي الله يرحمه وانهزم وراهه باشهر
مات جريان ابو فاضل وظل الوصي جبار
هو الجبير..

من هنا بدت العداوه بين جبار طايش وبعده شاب
وبين عمه خضير كام جبار يتهم خضير بهزيمه
علي وكام شكو سالفه عوجه يذبهه براسهم...

مات الشيخ الجبير فاضل وجان ياسين
صغير واجتمعوا الشيوخ وكالو الشيخه
تتحول لجبار لان جبار اكبرهم

ساهره.. شكد عمره الشيخ ياسين
ام جراح.. هسه عمره ٤٠ سنه بينه وبين
السبع ٤ سنوات

ساهره.. مبين اكبر من عمره انطيته عمر
بكد علي الله يرحمه
ام جراح.. لعد همه موكبار تدرين السبع عمره
عشر سنوات من ماتوا اهله

من مات فاضل بسنه ١٩٨١ وجان علي الله يرحمه
هيج يطلع عمره ١٧ سنه يمكن وياسين عمره
١٤ سنه مابينهم فرق قليل وجانو اصدقاء..

بس ياسين اتزوج من هو وصغير وهسه صلوات
ابنه بطوله هنا بابة عرب يتزوجون من صغرهم..

ساهره.. هسه اني عندي عتب وياج
عتب حبايب شلون ياداده تدرين بابنج يحب
بنت اخوج وقبلتي بنتي تنظلم

ام جراح.. حقج والله ومااعرف شلون
اعتذر لبنتي لبابه بس وروح المرحوم ابو
جراح كلشي انتهه وقرار ابني من خطب
لبابه جان صحيح وراد يبدي حياته وياهه

بس جبار راد يلوي اذراعج ابنتج فكرته
ماتقبلين بنتج تاخذ ع ضره واكيد راح
اطلكيهه من جراح وهو يتزوجج يعني
يرجع لنفس المكان...

اخوي صعب وعندي بس هذا الاخ
لو كايله جراح اني مااريد بنتك والخطبه
غلط يتبره مني واني مستقويه بي
اذا بطش بينه الشيخ عاد عندي اخو..

ساهره.. جان اجيتي وسولفتيلي
ليش خله بنتي تتعلق بي وهي طفله
ومراهقه

ام جراح.. الحجي بيناتنه ترى جبار
رايد لبابه وحابهه ولو يخيرو بين لبابه
ونوال والله يختار بنتج بس نوال انفرضت علي

وتدري هي وحاجيلهه وكايلهه ترى
مااتخله عن بنت عمي والخطبه مالتج
غلط واني حجيت وياهه ويه امهه وضمن
الموضوع عن ابوهه وكالن مره ماتاكل مره

ساهره.. تعذريني بنتي ماانطيهه بوسط
هيج بيئه ولا اعيشهه شعور الخيبه وعينهه
ع رجلهه يوم يمهه ويوم يم غيرهه

ام جراح.. هسه راح يكمل البيت ولازم يتزوجون
اذا رفضتي نرجع لنفس الطلايب الاولى
تقبلين تزوجين جبار..

ساهره.. شوفي داده اني معلمه وخسرت وضيفتي
وجنت انسانه مسالمه ماعندي غير بناتي وسعادة
زوجي..

بس من اجيت وعاشرتكم وشلون گلبي تغلف
بالقساوه تشوفيني هيج قويه لخاطر بناتي
واله اني يوميه انام وافز ع طيف شهد بنتي
الطفله البريئه

اليتقرب من لبابه وفجر والله اسوي
الماسوته نسوانكم وخلي كلامي يوصل
لجبار واولاده مو مره اني اصير
رجال بس واحد يتقرب منهن

ابنج خلي يرجع لبنت خاله هي اوله من لبابه
هي حبه الاول وبنتي تعتبر دخيله على جراح
واخذته منهه...

ام جراح... والله مااعرف شحجي وكل الحق
وياج بس اذا يحبهه ويريدهه لاتقسين عليهم

هسه هو ساكت خلي يكمل البناء
ويحاجي خاله وينهي هذا الخراب
وترجع لبابه ونفرح بيهم

ساهره.. لا داده لبابه صغيره وانتي تدرين
اني من قبلت ع خطبتهه جنت مجبوره
وخايفه عليهه واريد احميهه باي طريقه

بس هسه لااا مااخاف بعد والله اقتله
اليتقرب لبناتي ياريت جراح يكون
كدهه ولايستغل خوفنه ويوكف ويه جبار
ضدنه

ام جراح... شنو هالحجي جراح سند الهه
ابن عمهه واخوهه وابمكان ابوهن هي وفجر
لاتفكرين هيج ابني مومن هذا النوع..

لبابه.. اسمع كلامهن واني ساكته تأكدت
البداخلي مو حب قوي لان جان تأثرت
مثل مايسولفون عن الحب

بس يمكن اعجاب وبوادر حب احسن
خطوه واحسن قرار هو خلصت واني
باول الطريق يمكن لو ماره بعد اكثر من سنه
اتعلق بي ومااكدر اعوفه...

صح يجي ع بالي ومن ينذكر اسمه
شعور غريب يتملكني بس من اتذكر
كلام ماما ورانيا ويذكرني كدامي عمر
طويل ابعده من راسي..

ماشفته ابد ولا اجه لبيتنه
وحته من يجي مايدخل كل الشغل
تكفله ضرغام والسبع مااعرف ليش
يهرب من المواجهه!!

عمه زينب ظلت يمنه ومر اليوم
طبيعي عقيق انسانه هادئه الى درجه
ولاحظتهه قليله الكلام بس من يجي
السبع تسولف هواي وتنطلق ..

واذا مااجه يخابرهه بليل والفرحه
شكبرهه وهي تكمز تاخذ تليفونهه
وتطلع تحاجي ودائما من تحجي وياه
مبتسمه ...

يومين مرن وجنه نحضر حته نروح لكربلاء
صادف يوم احد وكالو انروح باجر
عمه زينب وابرار كالن انروح كل سنه

بيومهه اندك الباب حيل طلع خالو شاف
منو طلع عاصم وجايب ايناس ونور
وخديجه لان يريدن يروحن ويانه...

نور بحلكهه حجي وتباوع بس تريد
تفلت من يمهن بطنهه جبيره صايره
كالت اريد اكوم ابدل اخذتهه للغرفه
وانطلقت..

نور.. ولجن خايبات ايناس مراقبه حلكي
ماتخليني احجي بس انه مااكدر اسكت

لبابه.. شكو صاير شي هناك؟
نور.. چاااا غير بلاوي ولجن ضرغام نعنع
اعظام وسن وخلاهه تزحف مثل الجاهل..

لبابه.. عليج الله احجيلنه شكو وشمسويه
وسن ؟
نور.. خلني ابدل ونشوفلنه كعده وحدنه
ايناس وصتني بالدرب كالت اذبحنج
اذا حجيتي ...

لبابه.. ركضت ع رانيا جانت تبدل لجهالهه
كتلهه ولج مدري شصاير ضرغام كاتل
وسن اشو هاي كمزت من مكانهه
وكالت خوما حجوا عليه..

رديت عليهه لا شحجو بس نور راحت
تسولفنه السالفه خلي فجر تلهي
ايناس

اخذنه نور للسطح وكعدنه نستمع الهه
كالت منين ابدي بس ماتحجن ودكولن نور
كالت!!

اول البارحه اجه ضرغام ع السبع
وطلعوا للعصر يله اجو وبعدين ضرغام
راح لبغداد وجدي الشيخ طلع ومااجه سلم
علي وخابره ابوي وكاله ضرغام الشيخ
يسأل عنك ومدري شحاجي خله الشيخ
يشب وينطفي..

تالي من اجه من بغداد جنه عفريت
كال لجديتي هيام الج ساعه وحده
الكه وسن هناا واذا مااجت افوتلهه
لنص عيالهه اشحطهه شحط..

راحت جديتي جابت وسن ولجن
لزم وسن دفرات ع بوكسيات
ابوي وابن عمي عباس كاضينه يريدون
يفكو وماكدرو

حته ابوي حصله دفره ابطنه سوده
عليه واجه الشيخ يصيح ترى ارميك
وخرر عن الشيخه وسن

وهذا ضرغام يفشر ع جدي الشيخ
وخله وسن تزحف بالكاع يله
عافهه ..

طلع بسيارته واجه السبع سولفله
الشيخ وكاله انت تدري بي مسودن
شكو تعيلون بي اتجازوا انتو ويااا

وللعصر واجه ابوي يركض يكول
ضرغام كاض اسعود تعرفنه واحد من
ازلام جدي ايده اليمين ومعلگه من رجلي

مسكط الرجال تسكط معلگه ابستان
السبع ولاعب بي فلقه بس عليمن
ماندري ..

وجدي كال هذا ضرغام مستسبع
بالحكومه وكام اخذ اسلاحه وراح وراه
كال اليوم ارمي واله يكولون الشيخ
كتل ابن اخته..

بس جذب جدي انه اعرفنه شكد مايهاب
السبع يخاف من ضرغام السبع عنده حكمه
وتصرف بس ضرغام هذا يختلف

وتالي اسعود ظل معلك يومين
ووسن انحبست بالغرفه واجه رجلهه
ومدري شحجه ويه ضرغام وطب عليهه
صلخهه صلخ فوك الكتله مال ضرغام

وخطيه وسن شايفه روحهه علينه
وكلنه نخاف منهه بس ريح كلوبنه
ابو ليث وعلي كلما تحجي يضربهه
ع حلكهه ...

لبابه.. عزااا ولج شنو السبب غير صاير
شي؟!
نور.. ماندري هو جرهه من شعرهه وداس
ع اصابع ايدهه بحذائهه وكالهه هالمره كسرتهن
الج المره الثانيه اشكج بالنص

لبابه.. عاد هو السانه ولا يستحي
نور.. چاااا غير يفشر ع الشيخ والحجيه
بركات دكله خايب انچلبت السانك متبري
منك..

لبابه.. ولامبين علي هيج عصبي؟!
نور.. من جانت مرته المرحومه مويروح للدوام
جان دوامه بعيد ويجي يلكاهه مكتوله يجيبهه
للگصر ويگلهه اشريلي منو مدت ايدهه عليج

مره كالتله ايناس وكتل ايناس ومره
هان جديتي هيام وطردهه لاهلهه
ومره عمي عامر كتلهه وهو شسوه بعامر

لبابه.. خطيه هو مبين مايقبل بالغلط
وحياة القصر ماعاجبته
نور.. هو علمود السبع وجراح باقي
چااا هو من زمان طلع..

لبابه ... هو حته لهجته تختلف عنكم
ومايكول انه ولايكول چااا بالصدفه يكولهه..

نور.. مو ضرغام الوحيد بيهم دارس
كليه مدري شيسموهه اقتصاد يمكن
ودرس ابغداد وعاش هناك وحده وراهه صار
ضابط ودوامه كله هناك

هاي من ماتت مرته كام يجي هنا علمود
السبع حته مايشتري گاع يم الگصر يكول
خرابه بالمدينه ولا گصر يم جبار ...

رانيا.. اسمع كلامهه واني بوسط ضجيج
شنو يعني وسن هي المصورتني ؟!
زين اذا اسعود اني حته ماشايفته شلون
صورني من اتذكر الموقف روحي تطلع..

خطي مارجعه ولاشفته بعد وكلبي
نار ومااعرف شحجي والمن اسأل
صرت مثل بلاع الموس..

لليل كلهه مخبوصه تحضر بالغراض
اله اني احس كلشي مر مثل العلقم
عيني ع الباب كلساع اكول هسه يجي
وماكو..

ثاني يوم الصبح ب٦ اجه السبع بسيارته
وسياره ثانيه كيه احنه صعدنه بيهه
والسبع اخذ بس عقيق وياه ...

طول الطريق سارحه بعالم ثاني
اجت الف فكره براسي وكلساع
يتخيلي ضرغام شاف الصور
شلون راح اباوع بوجهه وارجع اتذكر
هو شافني ع الحقيقه ...

وصلنه لكربلاء وهاي اول مره نجي
بهيج ايام مزدحمه البيت جبير وابابه ناس هوايه
وكلهه تطبخ ...

ام جراح.. تعالن النه بس هاي الغرفه والباقي
للزوار بليل هواي ناس تبات هنا احنه
علينه نطبخ ونصب وانظف علينه المطبخ...

جهالي عند بابا اخذهم بره واني اشتغل
وياهن بس بالي مويمي وينه ضرغام
ليش مااجه وليش ماطمني !!

هوسه وروحي بخشمي وشغل فضيع
واكل موبانصاف يطبخون صار دنيا المغرب
وكامت مدري منين تجي الناس تبات
وكلهه من محافظات بعيده ...

بالغرف النسوان وبالاستقبال الزلم
صايره لخه واحس راسي صدع
ومالي خلك اشيل خاشوكه..

لهنا خلص حدي كعدت ع الدرج كمت ابجي
اول شي ممتعوده ع هيج شغل والشي الثاني
وضعي المجهول وضرغام عايفني ع الشحن...

صبينه العشه واحنه ننتظر يكملون ونغسل
المواعين كلهه تشتغل وهي ساكته
الشي المطمني محد يباوعلي او حاسين
بشي معناتهه محد يعرف...

كملنه المواعين ومددت شويه بالغرفه
عقيق وفجر يم راسي كاعدات يسولفن
واني حسبه تاخذني وحسبه ترجعني..

فززني من صفنتي صوته وهو يحجي
ويه ام جراح ويكلهه هسه وصلت
جان عندي دوام ...

كمزت من مكاني عدلت حجابي وطلعت
جان واكف اباب الممر شافني ورجع
دنك يحجي ويه ام جراح..

بس عافته راحت للمطبخ بسرعه طلعت للممر
صحت ابو ليث التفت عليه جكارته بحلكه
طلعهه شمرهه بالكاع وداس عليهه

تقرب عليه وكال هااا الله يساعدكم!!
رانيا.. ويساعدك بشرني شسويت خطي
وينه تاخرت واني كلبي نار..

ضرغام.. سلامت گلبج ومد ايده ع جيب
بنطرونه طلع محفظته وطلع منهه رام
صغير كال هذا افتحي وامسحي الصور

رانيا.. لكيتهن؟!
ضرغام.. ااي وهذا نتيجة الثول العندج منطيه
رقمج لوسن وهي سامعتج من حجيتي وياي
بليل ومتفقه هي وسعود

رانيا.. ضربت صدري عزا العزاني يعني
يتفرج عليه سعود
ضرغام.. حسب اعترافه حلف مامصور هو
هو بس خاطفج ووسن مسويه الباقي وحته
الصور والرام عند وسن لكيته

وهاج هذا خطج مشكوره مااحتاجيت موقع
والسالفه محد يدري بيهه احسابي الهم
شغلة بنفسي وعلمتهم مايحجون ولاينذكر
اسمج..

رانيا.. يعني الشيخ مايدري بالخطف
ضرغام.. طبعا يدري وسوه هاي المشكله حته
يحگ ياسين بس مايدري بالصور عباله
مجرد خطف هاي الصور حته اسعود مايدري
بيهه وسن مسويتهه

رانيا... عابتلهه اني بشنو مأذيتهه
متخاف الله يبهذلهه هيج شهرت بيه

ضرغام.. هسه ماعلينه اعتقد الصار درس
الج وياريت تتحكمين بتصرفاتج انتي موصغيره

خوما اظل طاير وراج ماعندي شغل
وعمل بس انقذ رانيااااااااااا.....

رانيا.. كال اسمي وطول الالف وهو يباوعلي
كتله لابعد ماعليه بأي شي مشكور وماقصرت
وجزاك الله خير ...

رجعت للغرفه وهو راح هم وانزاح
فتحت خطي وخليت الرام الصور ماينلبس
عليهه ثوب اني فاقده الوعي وابشع الوضعيات
شكيت بيهه رجال مو مره التسوي هيج..

فرشت لجهالي نومتهم وعقيق كاعده
كلنه تعبانين والبنات نامن بس هي
كاعده كتلهه نامي كالت منعسانه...

مددت بصف سيوفي واني احمد الله
انسترت والله هيئلي ضرغام سمعت
صوت تليفون اهتزاز باوعت عقيق
كامت من مكانهه وطلعت...

اني مااتوب الفضول كاتلني
كلت خلي اشوفهه وين تروح
كمت وراهه طلعت للممر

شفتهه شلون مشت بخطوات سريعه
مثل الطفله وتعلگت برگبه السبع
وهو حضنهه ورفعهه ليفوك....


يتبع..

#خبايا_الاقدار
❤️♨️

... البارت العشرون

....

رانيا.. ظليت مسطوره مدري ليش
مصدومه مع العلم خطيبته بس اشوف
هاي الهادئه هيج واني عبالي تنام بجواريبهه..

اتسحبت للخلف بس بعدني عيني عليهم
اجاني صوت من وراي فززني وهو يكول
من راقب الناس مات همآ...

كمزت من مكاني وكلت باسم الله قول
من رب الرحيم فزيت فزه احس
كلبي وكع بالكاع

هدوء وكلهه نايمه منين طلع
وبدون احم وسوابق كتله فززتني
اسم الله !!

ضرغام.. موعيب تباوعين مره ورجالهه
حاشرة خشمج شكو؟!

رانيا.. هيج بالصدفه شفتهم ماكايلتلهم
يجون كدامي؟!

ضرغام.. تقنعيني ماجنتي متعمده
والله مااقتنع بيج مدري ليش؟!

رانيا.. غيرت الموضوع اني ادري بي
جان يتعشه كتله كملت اروح اغسل مواعين

ضرغام.. ااي بدون امر عليج كوب جاي وياج
رانيا.. رحت للمطبخ وهو واكف اباب المطبخ
فتحت النار اسويله جاي..

اجه ابالي جراج كتله ممكن اسألك سؤال
رد عليه كووولي؟!

رانيا..قبل جانت لبابه تجي مفزوعه
لان دومك تكبسهم وهم هم مخطوبين
حالهم من حال السبع شمعنى هذولاك تكبسهم
وهذوله شفتهم وتغاضيت؟!

ضرغام.. رفع حاجبه بابتسامه وكال سؤال
وجيه شكد شايف فضوليات بس مثلج
ماشايف !!

المهم جراح يختلف من كل النواحي اول شي
لبابه صغيره عمرهه ١٥ سنه من خطبهه بعز
المراهقه وهذا السن خطر تتقشمر بسرعه

والشي الثاني جراح مومنصف ومايعرف
شيريد ومامنطيهه حب برأي هذا استغلال
ولعب بمشاعر مراهقه ..

اما السبع يختلف يعرف يتصرف
وماعنده تناقض والبنيه ضروفهه
تختلف عن لبابه اول شي اكبر
والشي الثاني وحيده ماعدهه حل ثاني

رانيا.. اذا تعرف بجراح مايحب لبابه
ليش مامنعتوا؟!

ضرغام.. كال احميهه قابل نتحكم بمشاعرهم
شمدريني صدك حبهم لو نزوه

رانيا.. انطيته كوب الجاي وطلع
شفته واكف ويه السبع يحجي..

...

عقيق... خلصت الايام يم البنات ع الاقل غيرت
جو شويه السبع اشترالي تليفون عنده شغل
يوميه بليل من يكمل شغله يراسلني

يسأل شلونج خومامحتاجه شي
بين كل يومين يمر عليه هدوء
حته بديت انسه موضوع اهلي ..

بيومهه دزلي رساله بليل كال باجر
تحضري امر عليج اخذج لكربلاء
اني متحضره ويه البنات بس كال
لا هم بسياره واحنه بسياره..

الصبح اجاني طلعنه قبلهم اول ماصعدت
كتله صباح الخير رد عليه وهو يخابر
ويه ضرغام..

من سده كال شلونج؟!
... زينه
.. دواج جبتي؟
.. ااي جبته هن والتقارير الكتلي عليهن..

السبع.. اكو مركز تأهيلي مال قلب
مدامنه رايحين قبل لانروح للبيت
انمر علي خلي انشوف اكو تحسن
بصحتج ...

عقيق.. مو انراجع يم هذا ابو بغداد
السبع.. ميخالف انشوفه نفس الكلام
ماناخذ العلاج بس نطمن اكثر وهم انشوف
علاج النمو مالتج..

عقيق.. ابتسمت وسكتت هو يباوع
ع الطريق واني كلساع التفت علي
اشوف جهه خده وشلون محدد اللحيه

يوم عن يوم احترمه اكثر
وافكر بي اكثر اشوفه شي جبير
كدامي وانسان عظيم كل حنيته واهتمامه
يذكرني ببابا...

وصلنه لمركز القلب نفس الهوسه
مال الفحوصات وازدحام الطريق
وظلينه ننتظر النتيجه جابلي لفه
وبيبسي حسب جدول التغذيه...

طلعت الفحوصات وهالمره زينه
واكو تحسن رغم جنت فرحانه بحالتي

الدكتور من يحجي يثني عليه
وع التزامي بالعلاج لان بالموعد المضبوط
مااتاخر ولا ثانيه وهالشي هو الساعد
بالشفاء

طلعنه من المركز اكو فرحه خفيه
بداخلي احلم اعيش حياة طبيعيه
ومايكعدني الالم نص الليل

حجيت بالسياره لان جنه نمشي بالازدحام
وساعه نوكف بالسير لان سايد واحد
كتله ليش هذيج السنين من عمري سنه
لحد متوفه بابا وهو ممخلي دكتور
يعتب علي ليش ماتحسنت؟

السبع.. جان علاجج متقطع خاف؟!
عقيق.. ااي حسب امكانيه بابا اذا ماحصل
شغل اقلل من العلاج اذا حبايه باليوم اخذ
نص ومرات مااخذ مده ايام لان هو شغله يومي

السبع.. طبعا الالتزام بالعلاج اله دور
وكل الاطباء كالو حالتج مو مستعصيه
بس مكلفه لذلك جان علاجج وقتي ولان يوميه
تغيرين دكتور

عقيق... مومااتحسن وابدل الطبيب
وصح العلاج مكلف انت هوايه خسرت عليه
شوف هاي مكتوب عليهه العدد ١٥ حبابه
ب٢٥ يعني بشهر ٥٠ بس نوع واحد

السبع.. اهم شي اطيبين وبعدين اخذهن
منج
عقيق.. توعدني؟
السبع.. اوعدج بس انه احدد؟!

عقيق.. شنو تحدد؟
السبع.. اني احدد معنوي لو مادي
عقيق.. اتفقنه نكعد ونحسبهن وارجعهن الك

من حجيت هيج ابتسم وظل ساكت
شويه وكال اكو شي ابالج تتمني؟!

عقيق.. صفنت شويه ورفعت عيوني
ليفوك وكتله ااي امنيه وحده
السبع.. شنهي؟!

عقيق.. كون ادرس مثل البنات ومحد يتنمر
عليه شوف السبع ايدي واشرتله بالمعصم
شوفهه شلون صارت سمينه وحته عظمهه
قوي..

السبع.. اللهم زيد وبارك بعدنه صار ٣ اشهر
ع العلاج بعد سنه اندورلج منحفات ونجبرج
ع الرجيم

عقيق.. لا مااحب اصير سمينه اني قصيره
جانت عمتي قصيره وسمينه وبنات عمي
من يضوجني يصيحن وراي مثل عمتج
ليالي واني اظل ابجي اخاف اكبر واصيرمثلهه

حجيت ولغيت شكد هو ابتسم
كتله هواي اسولف مو؟!

السبع..محد صارع راسي بس انتي وضرغام
انتي الوحيده استمعلج للنهايه
وضرغام كذلك..

هسه ماكتيلي انتي جنتي شاطره
لو كسولي؟!

عقيق.. اني بس خلصت السادس
بس نجحت وبابا يقريني بس هسه
نسيت حته ايدي مااخذت ع الكتابه

السبع.. يعني بيج امل لو لا؟!
عقيق.. اني هسه احب ادرس لان صار
عندي امل
السبع.. خير ان شاء الله..

عقيق.. سكتنه اثنينه لحدماوصلنه للبيت
سولفت لخاله ساهره حيل احبهه وتنصحني
دائما شافت الفرحه بعيوني كالت تعالي احجي
وياج..

رحت للغرفه بس اني وياهه كالت انتي مثل
فجر رغم اكبر منهه بس اشوف بيج برائتهه
اني مثل امج احجيلي بشنو تحسين؟!

عقيق.. فرحانه لان بديت اتحسن واكبر
ساهره.. بس هيج؟!
عقيق.. اي شوفي خاله وكمت افتريت
كدامهه شوفي كبرانه وسمنت

ساهره.. يابنيتي بعدج تريدين ترجعين
لاهلج؟!
عقيق.. اي خاله هو السبع وعدني
وكال شوكت ماالكاهم ارجعجج

ساهره.. انتي موكلتي من جان ابوج عايش
محد سأل عليكم وهسه انتي وحيده
ويتيمه ومريضه منو بحالج ويتكفل علاجج

عقيق.. لعد اظل هنا؟خاله بس السبع وانتم
زينين وياي القصر اخاف منه حته اصواتهم
تخوف ويوميه يتعاركون بالسلاح

ساهره.. اني مااكلج حبي القصر بس انتي
جبيره صح عمره ١٨ بس اكو عمرهه
٣٠ وعدهه سند اخوه واخوات واب وعمام
تلگيهه معتمده ع ابوهه واهلهه وتحس نفسهه
صغيره

واكو بعمرج وحيده ملزمه تعتمد ع نفسهه
وتفكر تفكير صحيح وتحسب نفسهه
مو ١٨ لا كون تفكيرهه ناضح مال وحده ٢٥

تدرين ليش؟ لان ماعدهه احد واذا ظلت
بدور الطفوله ماكو ظهر يحميهه لازم
تكبرين وتعتمدين ع نفسج

انتي ماتعرفين شي غير مرضج وابوج
المرحوم بس هسه اختلف انتي ع ذمة
رجال فكري زين شوفي السبع يكدر
يكون سند الج ؟!لوعمامج يحموج ويسندوج
اكثر منه؟!

عقيق..شنو قصدج خاله؟!
ساهره.. قصدي حددي موقفج وابني حياتج
لدكولين عمري صغير لان اكو بعمرج واعتمدن
ع نفسهن واتخذن قرار مدام تعديتي مرحله
المراهقه فكري بعقلج..

عقيق.. مافهمت شي من كلامهه بس الي افتهمته
اظل يمهم وماافكر بعمامي كلامهه صحيح
من جان بابا موجود محد سأل عليه

واحد من عمامي جان يكول انت والله صارف
عليهه دم گلبك خليهه وين ماتوصل تريد
تموت خل تموت ..

خوالي اصلا مااعرفهم ولايوم سألو
عليه ومااندلهم وين ؟ ظليت افكر بكلامهه
صح هنا محد اذاني ومعززه مكرمه
احتمال اذا رجعت اخسر واتعذب

بس لشوكت اظل لهنا واني احس نفسي
ثقلت ع السبع صح حنين وموبس ويايه
ويه الكل شكد يحب فجر ويكول هاي
اوكف العشيره علمودهه لان اشوف اختي بيهه

يعني هو طبعه حنين وكريم
بس كمت اخجل من كدما يصرف عليه
وعلاجي غالي بس هو ميحسسني ابد

كل هذا ماجنت افكر بأي موضوع حب
وعشگ ولازم اخذه ولازم اسيطر لان
ماعندي احد ابد ماخطرت ابالي هيج
اشياء

مجرد جنت اشوفه انسان شهم وحنين
والله موفقه حته يساعد الناس والاهم
من هذا الله يحبني وماخلاني ضايعه
بالشوارع..

حته هو ماجان يحسسني بغير اشياء
كلامه اغلبه ماافهمه واجاوبه ع كد فهمي
للحياة !!

نظراته جدا طبيعيه حته من تجي عيني
بعينه بسرعه يدير نظرته واني من احجي
ابد مااباوعله لذلك ماجنت احس اكو شي
لان اني ممفكره بهذا الموضوع

الاهم من هذا جنت اتصرف ع طبيعتي
وع نيتي كل تصرف يصير بيناتنه
فهو حلال ومدام هو انسان خايف الله
وملاحظته رزن ومتحكم بتصرفاته
كل تصرفاتي نابعه عن فطرة ...

خاله ساهره يوم عن يوم احبهه اكثر
ويعز عليه بيوم اعوفهم تعاملني مثل
بناتهه تنصحني تعلمني كمت شنو اليجول
بخاطري اركض احجي الهه ..

ماخلتنه نشتغل اني وفجر بس
شغلات خفيفه انطتنه نسوي زلاطه
وكعدنه بالغرفه نسوي ونسولف

فجر.. السنه غاح اغجع ادغس السبع كالي
عقيق.. انتي بيا صف؟
فجر.. اول متوسط

عقيق.. انتي متشبهين لبابه؟
فجر.. اني اشبه بابا بس عيوني ملونه
عقيق.. وينهن ملونات عيونج عسليات
فجر.. لاا ولج هاي لان ظلمه بالنهاغ وبالشمس
يصيغن خضغ

عقيق.. هههه يعني كلساع يتغيرن
فجر.. لاتضحكين تغاغين لان عيونج سود حيل
عقيق.. عيونج احلى من عيوني وكبار

فجر.. ااي عيني جان بابا يبوسني منهن
يكول كلساع ينطن لون
عقيق.. اني اريد اظل يمكم مااريد ارجع للقصر

فجر.. كولي للسبع انتي شبيج تستحين
السبع حباب حيل اني اگله عوف عقيق يمنه

عقيق.. خاف فشله منكم؟
فجر.. انتي شبيج فاهيه شوفي اول ماجيتي
ماحبيتج تذكغين شلون عيطت عليج

عقيق.. ااي وكمت ابجي وحدي بالغرفه
فجر.. اني السبع احسه مثل بابا وعبالي غاح تمنعي
يحمينه لان كالو هاي مغته

عقيق.. نور سولفتلي كالت السبع مايقبل
ع اذية لبابه وفجر
فجر.. غيغ جباغ يخاف مني مايحجي وياي
ابد لان اغوح اشكي للسبع

اكول انتي ليش اسمج غغيب؟
عقيق.. بابا سماني ع نوع من الاحجار انتي هم
حلو اسمج؟
فجر.. ماما دكول اجيتي الصبح ويه الفجغ
وسموني..

عقيق.. اثنين عندي ساهره بمثابه ام
وفجر بمثابة اخت واحجي وياهن
اي شي يدور براسي ..

بليل ظليت كاعده انتظر السبع لان
ماشفته ابد وتوعدت يوميه قبل لا انام
يسألني اخذتي دواج ويطمن صار تعويد

اجتني رساله من عنده مكتوب بيهه
تريدين ادرسين ويه فجر؟!

احس الحروف ابتسمت فرحه موطبيعيه
سيطرت عليه بسرعه رديت علي اااي اااي
كتبتهه مرتين

رد عليه برساله هاهي بس اذا كسلانه
اسحب كلامي!!

الفرحه ماتنوصف حلم الدراسه عندي
اكثر من حلم شفائي جنت حته باحلامي
اشوف نفسي لابسه صدريه وشايله كتبي..

جاوبته والله ادرس اوعدك مارد عليه بس
ظليت كاعده بالغرفه مدام ماكال تصبحين
ع خير معناتهه راح يحاجيني بعد..

وره ساعه دزلي رساله تعالي بالممر
مااكدر افوت كمت من مكاني لان
نسوان نايمه ومحد يفوت منهم

تصرفي لا ارادي ابد مافكرت بشي
بس جنت فرحانه بس شفته وكانو
تخيلي بابا فرحان وياي اريد اشكره
مااعرف شلون؟!

هو فتحلي ايده موبقصد جان بنيته يأشرلي
بس اني من شدة الفرحه البداخلي ركضت
حضنته حسيته تفاجىء ردت ابتعد بس
هو رفعني ليفوك...

سمعت دكات كلبه قويه حيل حته
استغربت ليش هيج السبع دائما هادىء
احس كلبه يدك بنص صدري..

نزلني وخصلة من شعري نازله ع وجهي
بعدهه وخلاهه ورا اذني وكال اخذتي
دواج؟!

هزيت راسي واني مبتسمه كتله شكرا
ع كلشي! حسيت بخجل هسه انتبهت ع تصرفي
كتله اسفه!!

السبع.. عليمن؟
عقيق.. على هسه ودنگت!!
السبع.. لتحجين لأحد ماريد موضوع الدراسه
يطلع اني احجي من يمي

عقيق.. اسمعه ودنگه اهز براسي شتت بالي
وابد ماعلق من كتله اسفه هو هذا دائما من يشوفني
اخجل يغير الموضوع وكانو شي لم يكن...

اني مسويه شعري ضفيره لوسط
ظهري بس صايره صفح ع كتفي بعدهه
ليوره وكال يله روحي نامي موزين عليج السهر

كتله تصبح ع خير ودخلت جوه احساس
غريب فرحه ع خجل مااعرف اوصفه

كعدت فجر جانت نايمه هزيتهه اريد
ابشرهه كتلهه فجر اكعدي السبع كال
راح ادرسين؟!

صاحت بيه ماتتحملين للصبح خليني نايمه
واكيد كالج لادكولين وانتي مثل لبابه اجيتي
كلتي؟!

ظليت صافنه صدك هو كال لتحجين لاحد
دائما تفاجأني فجر واحسهه عمرهه ٢٠ سنه
مو ١٤ ظليت ساكته ...

لبابه...كعدنه الصبح كالو اليوم ضباط ويه ضرغام
يوصلون المغرب ولازم عشه زين

اشتغل واني ساكته بس مااعرف ليش
ممرتاحه اكو شعور موحلو بداخلي

صارت ب١١ واتفاجئ بنوال وامهه وابوهه
مااتحملهه لان نظراتهه مستفزه وتحجي حجي
تخلي المقابل حته يستصغر نفسه

ماطلعت من المطبخ وهي اسمعهه
تسولف وتضحك حته عمه زينب كالتلهه
صوتج عالي ..

ورا الظهر كلهه مخبوصه واجت وكفت بالمطبخ
جنت اغسل بالسنك مااحسهه غير بصفي
مدت ايدهه غسلت جان دكول لاتصيرين
طماعه همزين عرفتي نفسج وانسحبتي!!

هنا تخبلت يعني ماكفاك ياجراح السويته
رحت فرحتهه وطمنتهه بان افترقنه
التفتت عليهه كتلهه بشنو اطمع بجراااح؟!

لاحبيبتي جراح من الاساس مجرد وسيلة
حمايه بس انتي ماخذه الموضوع حسب
تفكيرج

نوال... صدك انقهرت عليج بابا بكدج اني
جانت ماما تغسل ملابسي وانتي ادورين
حب..

لبابه.. منو كالج احب جراح انتي ليش تكذبين
الكذبه وتصدگيهه جراح ابن عمي حاله من حال
السبع وواجبه يحمينه ...

وبعدين اذا اريد احبه توكفين انتي بطريقي؟
بس اني ابتعدت وتراجعت عن امارس دور
المخطوبه لان مااكدر مثلج انتي عادي
عندج تعيشين بالقصر

وعادي عندج يتزوجني وتعيشين ع ضره
بس اني مااكدر للذلك جراح الج وياريت
تسيطرين ع مشاعره لان بسرعه تتغير

ماخلتني اكمل بسرعه انسحبت
وراحت للغرفه رغم حجيت بقوه بس
داخلي نار ابد مامهتمه اله بس مقهوره
شلون امنت بي وصدكته ...

صار العشه وضرغام وكفنه تك رجل
يريد كلشي منتظم حته تصايحوا
هو والسبع ...

بيومهه تعبنه حيل وخالو وره العشه كال
نعسان اريد انام اخذ جهال رانيا وراح
للغرفه احنه التهينه بالشغل ل١٢ يله كملنه

جنت كاعده ع الدرج استراح وعقيق
وفجر واكفات ع راسي وطلعت خاله تركض
وتصيح ساهره الحكيلي ابو رانيا مايتنفس..

كلنه فزينه ورانيا جانت بالحمام
ركضنه لخالو تهز بي ماما وتبجي
وهو وجهه مبتسم وجسمه ثلج...

عاطت ماما بصوت عالي وركضت ليبرا
اصيح واحد منهم دكيت باب الاستقبال حيل
اجه السبع وضرغام وابن عباس ...

من هول الصدمه مااتذكر غير
العياط وكل الي عرفناه خالو توفه
لان السبع غمض عيونه واتشاهد يم راسه..

خاله تعيط وماما تضرب ع وجهه
السبع طلع عقيق من الغرفه واني ركضت لرانيا
جان الحمام خارجي وماتدري..

طلعت رانيا لافه شعرهه بالخاولي
وتحجي كالت مخلصين المي شلون
سبحه گشره واني واكفه كدامهه ابجي

رانيا.. شبيج لبابه شصاير؟
لبابه.. خالو مات حجيتهه وبجيت

رانيا.. بين السمعته وبين اني بحلم
استوعبت كلامهه دفعتهه حيل وركضت للغرفه
ناسيه وضعي وناسيه ركبتي وصدري ولابسه
ربع ردن لان جنت ناويه انام

بابا سندي !
احزام ظهري اهز بي ومااسمع اصواتهم
مااسمع منو اليصيح بس بابا يتشاقه وياي
مايموت هيج فجأه ويعوفني...

احس ع ادين ترفعني بس فقدت الطم
ع وجهي واصرخ بعلو صوتي
ياربي لاتفجعني ماعندي بالدنيا بس هو
وين انروح وين انعيش بدونه؟!

( اعتذر عن ذكر الاحداث الحزينه مراعاة لمشاعركم
والله يرحم االاموات ويحفظ ابائكم)

لبابه.. اخذوا خالو للمستشفى هذيج
الليله فاجعه النه مثل وفاة بابا هيج
مفاجئه هسه جان واكف بطوله
شلون غمض وراح..

رانيا اكثر وحده انهارت لاماما مثلهه
ولا امهه تخبلت شعرهه طويل
جوه الورك كامت تشلع خصل كامله
من عنده وتصيح لاتاخذوا

صاح بيه ضرغام جيبي شي
الهه لان زنودهه طالعه وهي بيضه
والسبع جان موجود ...

جبت جادر مال صلاة شمرته عليهه
من شالو خالو ركضت وراهم لزمت ايد
ضرغام بتوسل وكالتله بروح اهلك اخذوني
وياه ..

ضرغام.. خله ايده فوك ايدهه وكالهه شسوين
بس نطلع شهادة وفاة ارجعي الله يصبركم

رانيا.. بلكي يكعد اذا سمع صوتي
يكعد
ضرغام.. صاح ام جراح تعالي اخذيهه

طلعوا وعافونه بوسط عزانه ماادري
شلون خلصت الايام وره الدفنه رجعونه
للبصره وسووله فاتحه هناك

ايام صعبه حته من اذكرهه گلوبنه توجعنه
وينعاد علينه المصاب رحيل خالو اثر بينه
كلنه بالذات رانيه صارت مثل الورده
وانقطع عنهه الماي ...

مر اسبوعين بالضبط واحنه الحزن مخيم
ع الكل مالنه واهس بأي شي خاله ماتعرف
شتسوي وين تروح وشلون تعيش وهن
نسوان برگبتهه مطلقه

عدهه اخ واحد وبكركوك حته اتصال قليل
وسهاد بتهم الجبيره بالشهر مره تخابر
لان بالخارج ...

مرت الايام ورانيا بالتواسيل
يله تاكل وليل نهار تبجي حته اليجي
يعزينه يبجي ع حالهه

صار الاربعين مال خالو وجان بوقتهه انفجارات
وذبح ع الطريق كالو غير مره انروح..

قرب موعد المدارس وراح انداوم جنت خايفه
خاف اكو عراقيل لو جبار مايقبل وفعلا
جان احساسي صحيح

بيومهه اول مره اشوف جراح بعد
هاي المده الطويله مجرد اخذ من خاطرنه
وكدام ماما انطاهه مبلغ وكالهه هذا خاص
بلبابه اني عندي دوره بسليمانيه وراح اغيب
شهرين اوكثر..

ماقبلت تاخذهن ماما بس هو اصر وكالهه
هذا واجبي واني مكمل نقلهه ومسويلهه
خط والسبع وضرغام موجودين ابمكاني

جان مايخلي عينه بعيني سلم وطلع
وبيومهه بليل راح وامه شكد بجت علي
دكول ماشبعت منه شوف من وره دوامه

وره روحته باسبوع اخذتنه ماما للعشار
واخذت عقيق ويانه وصلنه عاصم
واشترينه ملابس اني وفجر وعقيق
اشترت ملابس بيت ورجعنه..

لليل تكسر الباب جانت خاله كاعده بسرعه
كامت لان لازمه عده ورانيا اخذت جهالهه
وكامت وانشوف عامر وجبار وهيام
وعباس الجبير

حته ماردوا السلام شحطني من ايدي جبار
وكال هاي التكسر كلامي وتريد تدرس
وجنطتهه بظهرهه ادزلج راسهه بعلاكه

ساهره.. تخسسسه يانذل وجرتني من عنده
خلتني وره ظهرهه متستحي الشوارب العندك
شنو موقعهن؟!العكال الي ع راسك لبسه لمره
احسنلك

وروح اخوي وترابه الاخضر العب بيك
لعب واخليك فرجه لشيوخ اروح عليك
للناصريه لشيخكم الجبير واكله ع عمايلك

اطلع منا قبل ما اجيب السجينه واغرسهه
بكلبك الاسود خاف عبالك مره وتخوفني

جبار... * تعلين صوتج عليه
تفسخين خطبه بنتج وامنتي وادزيهه مدرسه
وانه ماادري تلعبين من وراي سويهره

ساهره.. مرت اخوك اني يامتعرف العيب
يالماعندك حشمه ولسانك قذر جرب تمد ايدك
علينه خاف استقويت ماورانه رجال

عامر.. بويه لاتعب نفسك وياهه امشينه انروح
وباجر من الصبح نسحلهه هي وبتهه هي تعقد عليهه
وبتهه يطلگهه جراح ويعقد عليهه ابن عباس

هيام.. لزوم ياساهره ينكص السانج تمردتي
هواي وعميتي ع نفسج وانه راح اطش الجكليت
من يعقد عليج الشيخ..

لبابه.. طلعوا بسرعه وماما تفتر بالبيت
السبع ببغداد وضرغام بالدوام وعقيق يمنه
جراح التحق وصفت الساحه الهم

هذيج الليله ماما مانامت ابد من الصبح دك
تليفونهه ام جراح بس كالت الو كالتلهه
ساهره اطلعي من البيت دزيتلج سياره
خايبه اطلعي وروحي احتمي يم الشيخ
ياسين .

ساهره.. شصار زينب وين اولي وبناتي بركبتي
ومرت اخوي وبنته وجهالهه وعقيق وين
انطي وجهي

زينب.. سويهه ياساهره واستغلي الوضع روحتج
لشيخ ياسين وعقيق وياج راح تخلي السبع
يهد القصر ع جبار بس يجي..

لبابه.. المشكله كلنه غفلنه بهذيج الليله
ماخابرنه لاضرغام ولاالسبع ولاجراح
عبالنه يهدد مثل كل مره

بس عمه زينب كالت ناوي ع شر
وراح يتزوجج غصبا ماعليج
وبناتج ياخذهن منج ومنا لمن يجي السبع
بهاي الساعات انتي مرته يهددج وعنده غير
اساليب يتبعهه وبركبتج كومه بنات..

اجت السياره وماما مادري بيمن تفكر
اخذتنه بالصياح واخذنه ملابسنه المهمه
وصعدنه رانيا كلساع تتخربط ضغطهه يهبط

وامهه تبجي وتصيح شلون انكمل وهذني
اول شهرين بغيابه وهيج صار بينه
رغم خالو انسان مسالم بس جانو مبتعدين
عنه لان موجود ويانه

كلما نبجي ماما تصيح بينه ردت اخابر ضرغام
منعتني عقيق رادت تخابر السبع ومنعتهه
قفلنه البيت وطلعنه مهزومين

ماما مابجت ابد واشوفهه حته تحجي ويه
نفسهه وتصيح اني الك مااخليهه تفوت
بجيبك هالمره..

السايق موصيته ام جراح لحدما نزلنه يم
باب المضيف مال الشيخ ياسين
نزلنه وازلامهم يباعون علينه وواحد منهم
صاح صيحوا الشيخ كلوله عندك ضيوف

طببونه للمضيف لان ماما كالتلهم احنه دخلاء
عند الشيخ ماكالت خطار ولاعرفت بنفسهه
بس سألهه منين؟ كالتله داخلين بحماية الشيخ
ياسين..

رانيا انتهت من البجي نفسهه عزيزه حيل
ماكدرت تتحمل كلساع تريد تطلع وماما تلزمهه
واحنه كاعدين ننتظر الشيخ..

شويه واجه بنفس هيئته الشفناهه بالنجف
وعباته والسبحه بيده كمنه انريد نوكف
مانعرف اصولهم اشر بيده وخله ايده
ع صدره لادكومن الحرمه ماتكوم...

جانوا اثنين زلم واكفين وماما مدري
منين جابت هاي القوه وحسيتهه هي
مرت شيخ وتعرف كلشي ..

حجت بنبره قويه كالتله ياشيخ
انريد نحجي وياك سر اهل !!

هو بسرعه اشر بايده ع الزلم الواكفه
يطلعون ورفع راسه ع ماما وايده ع
ركبته وكالهه عد عيناج !!

ساهره.. تعرفني اني مرت المرحوم ابن
عمك علي وهذني بناتي وهاي مرت اخوي المرحوم
وبتهه وهاي مرت السبع..

هي كالت مرت السبع وسع عيونه بغضب
وكال مرت السبع دخيله عند الشيخ ياسين؟!!

ساهره.. كلنه ندخلاء عندك جبار يريد
يتزوجني بالغصب ويزوج بناتي وهن قاصرات
ومرت اخوي لازمه عده وبنته بركبتهه اثنين جهال
وماصان الامانه واجه تهجم علينه

ماخله ماما تكمل اشر بايده كافي
وكال الجن الامان بس مرت السبع
ماتدخل دخيله عند ياسين لان هو رجلهه مالك
هاي الكاع واحنه كاعدين بحلاله !!!!

#يتبع......