ضرغام.. حجيه السبع خابرته بلحظتهه ومارد
چنه طالع من البيت وجراح لحگه وحده
واسلاحه بيده وماقبل اروح وياه وخاف يتكاتل
ويه الشيخ

الحجيه.. هاهي الله يرضه عليك جراح عاقل
مايخطي كومي ياساهره صلي وادعي
ابن عمهن لحگهن جراح والسبع يكوفون بوجهه لاتخافين

وانت يا ابني لاتروح بعيد خليك بباب القصر
خاف احتاج
ضرغام.. تامريني شيخه اودعناكم....
...

شهد عمي فدوه لاتكتل اخواتي اكتلني اني بمكانهن
هن بريئات مالهن ذنب اني ورطتهن
كتلهن انروح لبيت جدو بغداد !!

الله عليك عمي عوف اخواتي الصغار لاتذبحنه
احنه مامسوين غلط شردنه من الكتل مالتكم
والله احنه بريئات..

جبار.. ناوشني الحربه ياسعود وتعال كضلي الجبيره الجابتلنه العار خليني اسيح دمهن گبل لايلحك السبع ويمنعني

سعود.. شيخنه السبع ببغداد مايلحك يصل
بس ازلامنه شايفين جراح راكض ورانه
وهسه اكيد يوصل گبل السبع
وبعد تعرف جراح تربات السبع والشيخه بركات؟.

جبار.. چااا شمنتظرين صافنين ماتحجون ناوشني بسرعه خلينه نرجع گبل لايوصل جراح

عمو دخيلك ابوس اديك لاتذبحني كدام اخواتي عوف اخواتي الصغار ابوس رجليك عمو اخواتي بريئات اني بريئه مامسويه غلط ياناااس ساعدوني

صريخ.. ضجيج!!
الم !! حسره !!
انقطعت السبل بهاي اللحظه
غابت الروح مثل ماتغيب شمسنه
ومن تشرق شمسنه على ياظلم وياجبروت !!

واحد لزمني وكتف اديه ليورا
والثاني لزم فجر وكتفهه
واثنين لزموا شهد مثل اللبوه كانت ادافع عن نفسهه

مثل السيف الصغير مدري سجين جبير وحاد
رافعه كدامهه واشوف اشعه الشمس تعكس
ع حافه السجين وتلمع مثل روح اختي البريئه..

قليل الوصف بحقهه مو مأساة
ولا اكول شفت الدنيا صارت سوده
لااااا
حسيت الكاع اهتزت بيه من غضبهه

سحب راس شهد مثل النعجه ونومهه بالكاع
مثل الذبيحه من يدوسون ع رجليهه ويلزمون راسهه

صرخت بصوت عالي فجر سد عيونج
بس الدم اليجمعنه والخوه وروح اختي
البدت تطلع ماكدر ارمش حته رمشه وحده

ذبحهه!!
اااي ذبحهه مثل الحيوان
ذبحهه!! كأنوا طير دجاج!!

عمي اخوي ابويه اليكولون اسمه الشيخ جبار
ذبح اختي!! دمهه سال مثل البوري وانفتح
رجليهه الترفس وروحهه البدت تصعد وتودعنه

اخر ماشفته عينهه المفتوحه علينه ودمعتهه النزلت
وبعدهه صعدت روحهه لرب رحيم عادل ...

دفر شهد برجله بقوه وركض ع فجر سحبهه
واني بديت اصرخ ويسدون حلكي
كلنه راح يذبحنه كلنه راح نموت !!
خلي يذبحني اني اول مااكدر اشهد مقتل اخواتي..

صوتهم مثل صوت الحيوانات
مثل نعيق الغراب!!
صوتهم وضحكهم وواحد يكله
كفووو منك شيخ جبار غسلت عارهن ...

مادعيت ابد ماحجيت اي كلمه بكلبي
بس جنت رافعه راسي لسما واكول ربي
يشوفنه هسه !!

صوت سياره من سرعتهه ماتنشاف بس العجاج
كدامهه وصوت سعود يكله شيخنه هذا جراااااح..

بسرعه ترك فجر واني بحركه سريعه ركضت ع فجر
وكانو اريد احميهه واني ماكادره احمي نفسي ..

عيني ع شهد المذبوحه وعينهه بعدهه مفتوحه
ادور دموع بعيني!!
احساس بكلبي!!
ماكنت احس مجرد اسمع اصواتهم..

نزل جراح وجان وحده
وموجهه السلاح
ع جبار وعينه على شهد..

مثل الفز برعب وبسرعه
حول عينه علينه جنت كاعده بالكاع
وحاضنه فجر ترجف بحضني

جبار..نزل سلاحك عن عمك جبيرك لو نسيت
الاصول يبن اخوي علمك السبع تتمرد ع الاكبر منك

جراح... شسويت!!!! وصاح بصوت رجولي حسيت
كل القريه سمعته وهو يصيح شسويت؟!

جبار.. كتلتهه لنهه عار وهسه اكتل خواتهه وماتوكف بوجهي
انته خاف عبالك تخوفني بهاي وكفتك

لبابه... ماجنت مركزه ع اليصير بس تركيزي
على جثة اختي !! اسمع اصواتهم تتعالى
بس ماركز بالكلام..

بس صوت سعود وهو يصيح لاااا
جراااااح لاترمي عمك الشيخ

وصوت طلقه طلعت من سلاح جراااح
خلتني اكمز من مكاني واجر باختي فجر

اجت عيني على جبار وهو بالكاع ويصيح
ياويلك ياجراح ياويلك !!
والدم سايل من عنده!!!!

يتببببببببببع.....

#خبايا_الاقدار
... البارت الثاني...

ردني ردني
يالبگتني
بليلة أجيتك
دورت روحي اعلى روحي
لا شفتها ولا لگيتك ..
....

ساهره.. بنتتيييييي ياناس ياعالم قتلوا بنتي
ياظالم الله ينتقم منك الله يشوفك اللوعه بجهالك
الله يصليك بنار جهنم

شلون قتلتوا بنتي زغيره بعده اريد بنتي
ياظلام يا ماعدكم مخافه الله وين اخذتوا بنتي!!

الحجيه بركات.. ياساهره ربج يشوف وهسه يصب غضبه
على جبار بس رحمة ربج تخلصنه من هذا الحكم والجبروت
تعالن كومنهه !!

ساهره.. انتي كلتي هسه يلحك عليهم السبع وينه؟!
الحجيه.. مالحك ياساهره مالحك !!

لبابه ..صريخ ماما وشعرهه المنفوش ايدي الترجف
وملابسي الممليه دم!!
جسمي الفقد توازنه واحس نمل ويمشي ويه دمي..

عيوني مغوشه وحلگي متروس تراب
روحي البدت تغيب مثل ماتغيب الشمس !!

هذا القصر اشوفه مثل القبر وانسد عليه
اريد الهوه !! اريد اخذ نفس !!

حته البجي هنا ممنوع كلهه عايشه تحت
جبروت الشيخ ..

اختي!!
ماما!!
بابا!!
كلهم بديت افقدهم بالسره واني طفله
مااذكر غير دم اختي طفر على ملابسي ...

مااتذكر بس رجفتي وعيوني الصورت
المنظر والايد الي حمتني والفت عليه ودفعني وراا

لزمة ايدي واني اصر على تشيرته بقوه
وهو لازم معصمي بكل قوته
ويدفعني ويميل جسمه كلما اتحرك
حته لا اشوف المنظر ...

صوت طلقات متتاليه خلت اذني اطن
ووكعت بالكاع بس بعدهه ايده لازمتني
ويحاول يحميني...
والكل صاااح
جرااااااااااح لاترمي عمك!!!

بديت استعيد وعي وذاكرتي ورجعت لذاك المكان
رجعت لاختي شهد الظلت ع تراب سابحه بدمهه
وعينهه مفتوحه..

جراح ابن عمي بس مشايفته هوايه بالصدفه
كلهم نفس الجبروت واكثر من طلقه طلعت من مسدسه
كل الي اتذكره جبار مات مدري تصوب؟!

سعود مثل مايسمو الذراع اليمين للشيخ جان صوته
طاغي وهو يتوسل بجراح لاترمي عمك ..

الشيخ جان بدون سلاح بس السجين بيده
ينزل دم اختي منه
ولو مارحمه الله جان هسه احنه نايمين بصفهه..

من ضرب الشيخ سعود وكف بوجه جراح
جانوا اثنين وياهم ركضوا على جبار ويسعفون بي
وسعود مثل الثور الهائج تلاوه ويه جراح

جانت عيني تسجل بكل اتقان عمري ماراح
انسه هاي المواقف شلون جراح دفع سعود
بقوه وكع قريب ع الشيخ وضربه طلقه برجله
ماراد يقتله..

ويه كل طلقه تطلع اشد على ايد فجر وحاول اخبي
راسهه ماممكن راح نطلع سلامات بعد هاليوم
والله العالم شنو من مرض راح يصيبنه !!

تقرب علينه جراح ومسدسه بيده صار كدامنه
وكانوا يريد يحمينه بظهره ودار وجهه ع شهد
كل الي سمعته!!

وهو يكول لا اله الا الله مرتين كالهه
ورجع فرك وجهه والتفت علينه !!

نفسهم هو اكيد مدام بسهوله قتل
اكيد هذوله عايشين على الدم مثل ماكال
بابا..

اريد اشوف اختي اريد احضنهه
اريد اكلهه هناك يم العلي القدير
اشكيله وكولي اني بريئه..

(واذا الموؤده سألت بأي ذنبُ قُتلت)

هناك اسألي بأي ذنب انقتلتي وانذبحتي
مثل الحيوان؟!
هناك المكان الوحيد بي امان انتي خلصتي
وارتاحت روحج بس احنه ماراح نطلع من هاي الحفره..

كلما اتحرك جراح يمنعني
صار حاجز كدامنه صاح بصوت قوي
محد يشيل لاجبار ولا سعود !!

بحركه سريعه اندار علينه وسحبني من ايدي
وايده تسحب بفجر ابد ماقبل نوكف
هنااا طلع صوتي وكمت اصرخ شششششهد!!

اريد اختي !! خلي اروح اكلهه احنه مسامحيج
اختي بعدهه عينهه مفتوحه !!
بس ابد ماانطانه مجال خلانه بالسياره

وطلع تليفونه يخابر جان بهذاك الوقت هستوهه
نازله التليفونات وموكلهه عدهه!!

وراح للجنطه مال السياره طلع وصله جبيره
يغطون بيهه السياره وراح ع شهد اني وفجر
انباوع من الجامه الخلفيه..

كعد كدامهه وخله ايده على عيونهه وسدهن
اشوفه يحرك شفايفه يمكن اشاهدلهه
وغطاهه ورجع!!

وجبار فاقد الوعي وسعود يصرخ من الم رجله
بس الواكفين هذوله الاثنين ماخطوا خطوه
والظاهر جراح عنده سلطه عليهم...

صعد بالسياره وحركهه جان يسوق بسرعه
هائله والسياره هدوء بس صوت البجي
مالتنه حته مارفعت راسي وشفت الطريق
لحدما وكفت السياره..

نزل كدامنه رفعت راسي اجينه لجهنم
اجينه للقصر المهجوم شراح اكول لماما
شراح نحجي ؟!

فتحت الباب ونزلت واني اسحب بفجر
احسهه راح تنشل ماتكدر تتحرك
هوايه رياجيل جانوا واكفين بس كلهه مدنگه!!

بس من دخلت سمعت جراح يحجي ويه واحد
اسمه ضرغام ويكله حظر السياره الثانيه
واخذ هويتك وياك واذا خابر السبع لاتحجي شي!!

اول خطوه خليتهه بالباب واحس الروح
تهرب مني وارجعهه بالقوه تأبى تدخل لهذا المكان
او بالاحرى روحي ظلت يم اختي المذبوحه..

طبيت اني وفجر نمشي بالطرمه الجبيره
طويله حيل وجانت صبحيه والكل طالعه للشغل
لحدماوصلنه الباب الداخلي واسمع صوت ماما
وهي تصيح بنااااتي!!

الدموع جفت بمحاجرنه
والروح ذابت مثل الشمعه!!
والگلب مثل ورقه واجتهه ريح عاليه ..

دفعت باب المطبخ مااتذكر بالضبط شفت منو؟!
ومنو جانت واكفه بس اتذكر الصوت وهي تصيح
اجن البنات اجن!!

بعدهه مااتذكر اي شي!!
لا اني ولافجر اثنينه لهنا وانتهت الطاقه
وصرنه مثل السنبله الفارغه الضعيفه شكد
تحاول تستقيم بوسط الريح وتاليتهه تنكسر...

فتحت عيني واني راسي بحضن الحجيه
وفجر بحضن عمه زينب ام جراح
وماما منتهيه شبه فاقده!!

لازمات اديهه وجانت مشلعه شعرهه
ومن كدما باجيه وصارخه صوتهه مختفي
ونفسهه ثگيل اساسا هي عدهه ربو وضيق
بالتنفس..

تريد تحجي تريد دكول شلون عفتن شهد
بس ماتكدر بس عيونهه تتحرك ودموعهه
مثل الشلال ..

اباوع بالوجوه شكد اكو ناس بنات عمي عشيره
وجناينهم وبنات عماتي احس روحي
تصيح ارحميني وين جنت ووين صرت؟!

الحجيه.. خديجه الله يرضى عليج يمه كومي
اخذي البنات لغرفتهن وانتي ام جراح عينج على ساهره

ام جراح.. وين ترحين شيخه؟! محد حجه وكل ازلامنه
مخبوصين ومانعرف شكو؟!

الحجيه.. اريدن اروح اشوف ماكو زلمه يحجي
الصار وينه جبار ؟! مو كتل البنت لو صار مثل ابن ادم
حاير شلون يدفنهه؟!

خديجه.. شيخه انه شفت ضرغام وجراح واخذوا واحد
وياهم ماشفته منو وجان جراح عصبي..

لبابه.. حجيت واني اصك سن بسن بعدهم مايعرفون
جبار عدل لوميت اصلا مايدرون جراح هيج
سوه!!

كحيت احس بلاعيمي مجرحه من بين اسناني
وشفايفي الترجف طلع صوتي ..

جراح ضرب الشيخ وسعود وعافهم هناك
وجابنه ورجع اخذ ضرغام!!

بعدني ماكملت كلامه شكو وحده عايشه تحت
سكف جبار الظالم صرخت بصوت عالي!!

صارت وحده تضرب بالثانيه حته عمه زينب
ام جراح كامت تركض وتلطم ع صدرهه وتصيح
يمه ابني !!

زحفنه اني وفجر ع ماما بوسط ضعفهه
والمهه ضمتنه بحضنهه وتبجي وهي دكول
جانت خايفه شهد!!

شهوده الهادئه جانت خايفه!!
كامت ترجف موو؟! وبجت ومحد حماهه؟!

اجتهه خديجه زوجه جبار الثانيه
كومت ماما واحنه وياهه واخذتنه للغرفه
طيبت خاطرهه ع الاقل بالكلام ..

حجت ماما بصوت مبحوح كومي لبابه اخذي اختج
وروحن غسلن وسمي ع جسمج بي دم وملابسج خليهن
بعلاكه وطلعيهن من الحمام ..

كمت اريد اخذ فجر ماتتحرك اسحل بيهه
سحل دكول رجليه مايساعدني
بس ضغطت عليهه واول وحده دخلتهه للحمام
وحضرتلهه ملابسه

سبحت وطلعت واني وراهه كعدت ع طبله صغيره
واشيل مي من النجانه واغسل ودموعي تتسابق
منظر اختي كدامي ..

احس نفسي بعدني ممستوعبه الصار
احس اني بعدني نايمه مثل كل يوم واحلم
بكوابيس واكيد هذا كابوس وراح يخلص
واكعد والكه شهد نايمه بصفي..

اباوع لماما هاي الانسانه العظيمه شكد تحملت
وشكد صبرت ؟! رغم هاي المصيبه ولسانهه ماوكف
عن قراءه الايات

كلساع اسمعهه كالت لاحول ولاقوة الا بالله العلي العظيم..

مدت رجليهه وكل وحده بينه نامت ع رجل
وكمنه نحجيلهه شلون طلعنه وشلون انقتلت شهد..

كلما نكول اسمهه تشهك وتلطم صدرهه
وتصيح يابنتي دمج مايروح هدر..

ساهره.. ليش هيج طاوعتنهه ليش ماحجيتولي
حته احميجن وامنعكم!!

انت تدرن اني قررت اتزوج جبار حته احميكم
ليش هيج؟! اني شلون ربيتكم يايوم ضميتن عني...

لبابه .. ماما غلطنه مافكرنه شهد جانت دكول حافظه الطريق
وبس نروح لخالوا نخلص
ساهره.. واني مافكرتن بيه؟! وخالجن رجال مسالم
يكدر يحميكم من واحد ظالم ..

ساهره.. ليش يابناتي كعدت الصبح مفزوعه ادور عليجن
عبالي ماخذيجن للخدمه من الصبح
طلعتن مهزومات؟!

امجن الجانت شامخه بزود ابوكم
اني المعلمه مربيه الاجيال انضرب وانهان
وانسب ويعيروني بتربيتي

وتالي شحصلت اختجن لاودعتهه ولا حضنتهه
ولاراح يسووله فاتحه مثل الناس وتندفن بدون
ماتوكف امهه على راسهه..

لبابه.. ماما بدت تتعب ونفسهه صار حيل
ثگيل كمت جبتلهه حبايه ع الاقل تنام
وماتسمع الهوسه..

اذني ع البرا كلساع اكول هسه يفوت جبار
علينه ويذبحنه ويكمل علينه
عشنه برعب وخوف

اباوع لفجر مانايمه بس جبرت نفسهه مغمضه
عيونهه والبؤبؤ يتحرك بصوره عشوائيه
وضامه نفسهه بحضن ماما...

تقربت ع الباب وارتجيت ع الحايط
اريد اسمع شصار اخاف اطلع احس
كل الموجودين عدهم القتل عادي..

مرت نص ساعه واني عيني ع الساعه
اباوع شلون تتحرك العقارب واشوف
صوره شهد كدامي..

فزيت على صوت جراح وهو يحجي ويه
الحجيه ويكلهه شايفه واحد عار يموت
شايفه ظالم صار بي شي موالله يريد حطب
لجهنم !!

الحجيه.. واذا كتلته شيخلصك من العشيره
منو راح يكول جبار ظالم راح يطلعوا ابو الكرم
والدووايين

وانت ياجراح هاي اخر سنه وتصير ضابط
وتطلع من كليتك العسكريه اذا سمعوا مو يطردوك

ماتفكر بروحك فكر بامك واختك منو الهن
ويصيرن تحت رحمه جبار واولاده

جراح.. وين عايشين بيا قذاره بيامستنقع
بنيه عمرهه ١٧ سنه تنذبح مثل النعجه
وحته ماعنده دليل عليهه وهن انهزمن من جوره

زينب.. جراح انت عندك كليه موكالك سبع
لاتغلط اي غلط التريده اطلبه من ابن عمك هو يسوو
ليش ماخابرته

جراح.. وليش سبع كبش فداء شكو سالفه عوجه
تشمروهه براسه لان ماعندي اهل وماعنده عائله

زينب.. لا ابني موهيج بس سبع هو يكدر يوكف
بوجه الشيخ موانت ياجراح موانت..

انتظرك يوم يوم تصير واطلعني من هذا الگبر
اني واختك لو ناوي تدفني هناا..

الحجيه.. تعال ياجراح دفنت بنت عمك
وشلون خلصتوا السالفه من الشرطه!!

جراح.. دبرهه ضرغام بهويته
وراحت لرحمه ربهه..

وجبار وسعود كلشي مابيهم مسويلهم عمليه
قصرت ماضربته بكلبه وخلي اروح سجن
المهم اخلص الناس من شره ومن انسان فاشل مثله..

هيام.. والله وكبرت ياجراح وبعدك ماصارت عندك
نجمه حته هيج تحجي ويه عمك

الحجيه... هيااااام انطمي واسكتي امشي عن وجهي
ميلي غاد ..

جراح.. كافي اسكتن جبار مااشتكه وكال طلقه تايهه
وعينكم ع البنات وامهن حالتهن النفسيه تعبانه

العصر يوصل السبع واكيد راح يدري بالسالفه
محد يضم عنه وهاي انه ماراح احجي
اتوقعوا كلشي منه..

سمعت خطواته صعد الدرج البصف غرفتنه
وظلن النسوان قال وقيل لحدماصاحت بيهن الحجيه..

اذن اذان الظهر كمت توضيت وصليت وماما وفجر
غاطات بالنوم ماكعدتهن خليهن يرتاحن
ع الاقل النوم احسن الهن من يكعدن ويصيحن وين شهد..

مديت ايدي ع الباب مترده اطلع لولا
اخاف اطلع والكه جبار بس لا مايجي
اكيد مايطلع هسه من المستشفى..

فتحت الباب بسرعه ومشيت منصيه راسي
مباشرة لغرفه الحجيه الباب مفتوح طبيت وسديته

جانت تصلي كعدت بالكاع واباوعلهه شلون توكف
وشلون تركع بصعوبه..

الحجيه بركات مو ام بابا لااا
جدو ابو بابا متزوج ٣ الاولى حجيه بركات
مخلفه ولد واحد هو عمو ابو السبع متوفي

ومتزوج اثنين وراهه وحده ام جبار وواحد شهيد بحرب
ايران و٣ بنات متزوجات واصلا صايرات حجيات

والثالثه مخلفه ابو جراح وبابا و اثنين ولد رايحين
من هم شباب بسالفه عشائر وقاتليهم

كملت صلاتهه والتفتت عليه وكالت
تعالي هنا يابنتي ..
تقربت من عدهه وكعدت بصفهه وهي بعدهه
ع السجاده وبيدهه السبحه..

الحجيه.. انتي تصلين؟!
لبابه.. بلي حجيه صليت هسه
الحجيه.. فدوه لهالحلك والبلي امج نامت

لبابه .. اي نامت هي وفجر
شيخه ليش ممهتمين لاختي حياتكم ماشيه
موالمفروض هسه عدكم فاتحه

الحجيه.. يابنتي بعدج صغيره ماتعرفين
التنكتل مثل المرحومه يسموو غسل عار مايسووله
فاتحه

ومنو يكدر يسوي فاتحه انروح ننفضح
راح نكول راحت يم خوالهه وشهر ونكول تمرضت وماتت
هناك ..

لبابه.. واختي محد ياخذ حقه!؟
الحجيه.. حقهه؟! ربج ياخذه

خلت ايدهه ع رجلي وطبطبت عليهه
لاتخلين ابالج ثار ولاتفكرين تاخذين حق اختج
ترى تضيعين مثل ماضاع السبع بالثار!!!

بعدهه تسولف وصافنه بوجهي انفتح
الباب بصوره سريعه ..

شفت الضحكه والعيون لمعت وكالت هله
هله بطوايفي هله بسبع بيت جريان..

التفتت علي اول مره اشوفه شكد اسمع بي
وبين سطر وسطر ينذكر بس ماتوقعت راح
اشوفه..

السبع ابن عمي عمره بالثلاثين دنك ع الحجيه
باسهه من راسهه واني ادنيت على جهه

جان لابس دشداشه نيلي ولاف غتره نيلي
وبيهه نقط حمره خفيفه
ع راسه اكو اثر بحاجبه مثل الطبره
بشرته سمره بصراويه اصيله..

الحجيه.. ليش تاخرت هالمده؟!
السبع.. عندي شغل جده شبي وجهج مكدر ومهموم؟!

الحجيه.. مكدر ع فراكك وفراك عمك المرحوم
السبع.. الله يرحمه والتفت عليه..

ورفع حاجبه عين ع الحجيه وعين عليه
ويحجي اول مره اشوف هيج شخص متحكم
بعيونه وراسه ويكدر يباوع لشخصين بلحظه وحده

سألني منو انتي؟!

الحجيه.. حقك ماتعرفهه هو انت منو يشوفك
هاي بنت عمك
المرحوم لبابه الوسطانيه .

لبابه.. ماحجه اي كلمه بسرعه كام
ونظرته انكلبت بعصبيه مدري بحقد
يمشي ويحجي ..
انه راح اروح لغرفتي ..

موقفه ظل ابالي شبي؟!ليش ضاج
من شافني وسمع بنت المرحوم
ردت اسال واكتفيت لهنا لان بين التعب عليه..

كمت من يم الحجيه ورجعت لغرفتنه حشكت
نفسي بصف ماما واحاول اطلع صور اختي
بس لكيت نفسي اشهك من البجي...

نمنه كلنه بدون اكل وشرب
كل وحده بينه دموعهه يابسه ع خدهه

مافتحت عيني غير على صوت اذان المغرب
باوعت الغرفه فارغه خفت حيل خفت اخذوا
ماما وفجر..

كمت بسرعه فتحت الباب وطلعت صار الهول
كدامي لكيت ماما كاعده وفجر بصفهه
وعماتي الي انكول عماتي وحته مااميز بيناتهن

كلهه كاعده بوسط هدوء يعزن ماما مدري
يشمتن مدري يذمن ماعرفت الغايه بالضبط!!

كعدت بصف ماما وعيني عليهن
وحده وحده يضحكن طبيعي ويسولفن
مدري شلون عايشات

وهن من الصبح ياخذوهن يكربون عليهن بالزرع
اني سامعه يكولون نسوان الشيخ يكونن معززات
مكرمات

لا هنا بالعكس هن اتزوجوهن للخدمه
وقابلات بالوضع وفرحانات ونسوان الشيخ
يتاسبقن منو تفوز بالشيخ قبل الثانيه..

جبار عنده ٣ بنات اثنين متزوجات ووحده
ممتزوجه تقريبا بعمر شهد الله يرحمهه
بس ابد متحجي ويانه اسمهه ايناس..

اثناء ماكاعدين وانسولف كالت الحجيه
كومي خديجه شوفي السبع وين؟!

دزي ضرغام يكله الحجيه تريدك طلع من حجرتي
وماشفته بعد ماادري دره بسالفه بنت المرحوم
لوبعده ..

ايناس.. كمزت من يمهه شيخه اني راح
اشوفه لان هو من طلع من حجرتج شفته
راح لصوب البستان القديم..

لبابه.. خزرتهه امهه هيام كعدت وظلت ساكته
بس الحجيه من كالولهه للبستان القديم
مدري شصار بيهه

هي وام جراح حته خديجه انخبصن ويكللهه
خلي يجي ضرغام ياخذج شيخه هم رجع
للبستان القديم..

مااعرف شبيهن بس عيني جانت تراقب
واذاني تسجل كلشي ممفتهمه كلشي
غريب هنا!!!

عيني سرحت بالفراغ ومرت نسمه هوه
دافيه واني عبالك شميت عطر بابا
واختي ..

وراحت ذاكرتي للبعيد رجعت لحياتنه
القديمه والابتسامه مرسومه ع وجهي...
.
#يتببببببببع...

#خبايا_الاقدار
البارت الثالث


لبابه... نسمه الهوه الدافيه والعطر
اجتاحني مثل المسك بين الوعي
وبين الوهم تخيلي هذا بابا وهايه شهد!!

طار فكري وسرحت لايامنه الجميله
لاخر يوم عشناه ببغداد قبل لنجي
لهنا انرسمت ابتسامه راحه على وجهي
واني اتذكر حياتنه..

بيومهه دك الجرص يعلن نهاية دوام
جمعت كتبي وشلت جنطتي لبستهه صفح
وباوعت بالرحله خاف ناسيه شي..

طلعت من الصف امشي بالممر الياخذنه
لباب المدرسه الكه اخواتي واكفات هناك ينتظرني
مثل كل يوم ...

طلعنه نمشي سوه
جان الفرق بيناتنه سنتين شهد عمرهه ١٧ بالخامس
علمي واني بالثالث متوسط وفجر اخرنه بالاول
متوسط..

من فتحنه عينه ع الدنيا ماعدنه عمام
بس خال واحد وخالات وكلما نسأل
ماما كالت ابوكم وحيد ماعنده اهل...

شكد نتمنى عدنه بيت جد اهل بابا
ونروحلهم بس دائما الحجايه تتكرر ماعدكم عمام..

المدرسه قريبه ع بيتنه انروح مشي نخلص الطريق سوالف لو نحجي ع المدرسات لو على طالبات لحدمانوصل البيت..

هالمره تختلف عن كل الايام
بعدنه براس الفرع مالتنه وشفنه سيارات
بكيم واكفات بالباب
وهاي اول مره لان محد يجينه غير خالو وماعنده سياره..

سرعت خطواتي قبلهن حته اوصل
اشوف شكو اسمع صوت شهد
تصيح عليه بس اني اول وحده وصلت ..

الباب جان مفتوح دخلت للبيت
اسمع صوت رياجيل وصوتهم عالي وبابا صوته اعلى منهم ويگلهم عوفوني بحالي اني ماعندي اهل ...

دكيت شباك المطبخ فتحته ماما
وجهه اصفر موع بعضهه
انزع بجنطتي واحاجيهه ماما شكو شبي بابا؟!

... ماكو شي وين اخواتج شو وحدج؟!
.. هذني اجني ورايه بس اني وصلت قبلهن ماما منو يمنه؟!
.. خطار ع ابوج روحي بدلي حته نتغده..

.. ماما موطبيعيه وبيهه شي حته مرتبكه وخايفه
مابدلت رحت كعدت بالصاله تصير لزك بالاستقبال
واسمع حجيهم بس مامفهوم بس بابا مبين خايف ويكلهم
ماعندي اهل..

لمحتني ماما كاعده اشرتلي بالخاشوكه
اللازمتهه بسرعه كمت للغرفه بدلت
واسمع اخواتي وصلن ويسولفن ويه ماما..

رحت يمهه بالمطبخ وهن راحن يبدلن
شفتهم طلعوا
جانو ٤ رياجيل وبابا يفرك بوجهه سد الباب
وراهم ودنك راسه بالمغسله يغسل..

ماما فتحت باب المطبخ وركضت بيدهه المنشفه
وتمسح بوجهه ومدري شيحجون
هاي علاقه بابا وماما من اجينه للدنيا
مايوم زعلته ولاهو رفع صوته عليهه...

دائما اسمعه يكلهه انتي نسمه انتي هديه ربي
لان فعلا قايمه بواجبه و٢٤ ساعه تشتغل وماتكعد
بحيث البيت على اخر حبه ..

ماما معلمه متعودين عليهه تكعد الفجر
تسوي الغده وتنظف قبل لتروح للدوام
متخلينه نشتغل غير كلمتهه المعتاده
عليكم بدراستكم ...

ساعدت ماما تصب الغده بس
بالهه مويمهه وسارحه
وبابا حته مااكل هوايه
كال مااشتهي وبسرعه كام...

احنه موصغار كبرنه وصرنه نسأل
وين اهلنه مرجعنه المن
لازم عدنه عمام وعمات حته
اذا بابا وحيد هم عنده ولد عم
ليش ميذكرهم ..

بابا لهجته تختلف جذريا عن ماما
لهجته جنوبيه بصراويه
وماما بغداديه ومن نسأل عن
اصل بابا دكول ماما لاااا ابوكم من اطراف بغداد....

مواعين الغده على فجر لملمت السفره وكامت
تغسلهن
شهد راحت للغرفه اعتبرهه مثلي الاعلى
هادئه وشاطره بشكل موطبيعي

درجاتهه ماتنزل عن ال٩٩ كلما يطلعوهه
بالاصطفاف احس بفخر واني اشوفهه واكول هايه اختي..

كل وقتهه دراسه حته من نحجي
بمواضيع مختلفه متشارك
او حدهه كلمتين وركضت لكتابهه
اقرب وحده على بابا
يعزهه معزه خاصه وحلمهه تصير طبيبه ..

ركضت وراهه للغرفه سديت الباب
وكعدت ع جربايتهه
جانت مطشره كتبهه وترتب حسب جدول باجر

لبابه ...شهود متعرفين بابا شبي؟!
شهد.. انتي ليش حشريه موسألنه
وكالو ماكو شي يعني ميريدون
يحجون يجوز بالشغل صايره مشكله

لبابه... لا اني وصلت قبلكم وسمعته
عصبي ويصيح
ماعندي اهل شهد احنه ليش ماعدنه عمام

شهد... واذا عندج شراح تسوين
بيهم ادعي الله يحفظ النه بابا
مايفيد لا العم ولا الخال الاب هو السند..

... بس احب اعرف ليش
ماعدنه وليش بابا يضوج
من طاري اهله؟!

شهد...اني اعرف بابا عنده اهل
مره سمعتهم بس ميريد
يذكرهم كومي باجر موعندج
امتحان شكو حاشره خشمج بهيج سوالف..

لبابه...كالعاده ماحصل من شهد
بس الرزاله كمت لكتبي طلعت الرياضيات
عندي امتحان اقره واسمع صوت بابا وهو يكح
من يعصب صدره فدمره يصير..

لليل بعد ماتعشينه صاح بابا يبناتي تعالن هنااا
كلنه كعدنه داير مدايره وهو
جان مدد رجلي بالكاع وماما كاعده بصفه

علي.. صار الوقت الي لازم تعرفون قصة ابوكم
ساهره.. علي ارتاح واني احجيلهن
علي.. لا عوفيني افهمهن لازم يعرفن ابوهن مطلوب ثار

شهد.. شنو بابا ثار شنو؟!
علي.. يابناتي الحلوات اني اصلي بصراوي
ابن ريف وبذاك الزمن
تهموني انه ناهب مره من قريه بصفنه واني والله ماوصلت لهناك صديقي النهب وصارت براسي..

السالفه طويله بس اخوي وكف ضدي
ولازم يسلموني
وانه ماعندي مره وانهزمت من البصره
ظليت تقريبا سنتين مهزوم لان ناويين على قتلي..

وبيوم اجه واحد من ولد عمامي لبغداد وشافني
وراح كال لابوي الشيخ وابوي اجاني برجله
وكال فضت السالفه وتعال ارجع ..

رجعت ويه ابوي بس مرت ابوي وابنهه جبار
جان يضدني لان المره الي نهبهه صديقي
من كرايب مرت جبار ..

ماادري يابناتي ماادري بيوم وليله
موتهمهه لا قطع رقاب بيهه صارت جريمه
قتل اخوي الجبير ومرته وعنده اثنين بنات
وطفل رضيع ذبحوهم وذبوهم ..

وانه جنت بالشغل اجيت امشي
ماادري شكو بس حاوطتني الزلم
ويصيحون قاتل اخذوني لغرفه
بعيده وانحبست بيهه ايام وليالي

لا اكل ولا مي ومااعرف الليل من النهار
عشت ع رحمه الله واني مااعرف قاتل منو
وليش انحبست هنا

ابوي الشيخ وينه وامي محد اجاني
ولا اخوتي بس ظليت انتظر رحمه الباري
وحاشاه ينسه عبده..

انتظر ايامي واعد الدقايق بلكي
يجي واحد يطلعني سمعت حركه يم الغرفه
جانت قبل اكو ماطورات يخلون يمهم غرفه
من طين خاف يرتاح بيهه الحارس..

انفتح الباب عليه وماكدرت افتح عيوني
من الضوه لان ايام وانه بالظلمه بس سمعت صوت
مره عرفتهه هاي مرت ام جراح..

جايبتلي مي واكل وملابس ولثام
وكالت اكل وانهزم سالتهه شكو
وليش دكولون قاتل؟؟

وياريتهه ماجاوبتني كالت لكوا سلاحك وخنجرك
يم جثث بيت اخوك انت قاتل اخوك وعائلته
كلهه تصيح انت بس ابوك الشيخ يريد يكمل
الفاتحه ويلتفت الك..

بس اني مامصدكتهم انت ماتسويهه
روح من البصره روح لارض الله الواسعه
ترى جبار يقتلك وابوك..

ردت اطلع واواجهم شلون اخوي فاضل
الجبير العود الشيخ من بعد ابوي منو قتله؟!
وشلون يتهموني بقتله واني ربيت على ايده..

بس ام جراح منعتني وكالت هسه اصرخ
والم الناس عليك وماجان عندي حل غير
انهزم واجيت لبغداد

وهذاك يوم وقبل سنتين يله لگوني
ورجعت الدائره ادور وصار ابن اخوي
المغدور ويطالب بثار ابوو واخوته...

هاي سنين وجدكم ابو امكم
جان حداد واشتغلت وياه
والناس ع فطرتهه وصدگني
اني يتيم وزوجني امكم..

هسه اهلي عرفوا بيه عايش وهاي صار فوك السنه
يدورون عليه المشكله
موهنا المشكله ابن اخوي مدري
شمطبعين براسه وعباله اني كاتل ابو ويريد ياخذ ثاره من عندي..

اني مااملك بالدنيا غيرجن انتن وامجن اضحي بروحي
بس حته تعيشن بسلام
وترفعن اسمي هاي دنيا وفانيه
اذا صار بيه شي اريدجن قويات وبالف رجال

لبابه...كلنه صحنه اسم الله بابا وفجر
شمرت نفسهه بحضنه وهو يحجي تعبان لاول مره اجرب شعور الخوف الحقيقي عبالي من يوزعون الاسئله مال الامتحان هو هذا الخوف

ساهره.. علي احنه وياك ابن اخوك داز
عليك يكول اريد اكعد وياه واتصافه لان حمل الثار ثگيل
علي.. كل عقلج ولج هذا اسمع
عنه مجرم قاتل فلوس وقصور
وحمايه واكبر شيخ مايكدرله..

ساهره... ربك يكدرله اني اكول دز علي ويجي هنااا
اتفاهم وياه انت بريء وهو موصغير رجال واله هيبته
اكيد يخاف الله...

علي.. ماسمعتي شكالوا كالو
انت ماتعرف السبع من عمره ١٠ سنوات
هو ينام بالبساتين حته مو بالبيت وينام بسلاحه
وعايش ويه الدم تردين اضحي بيكم..

ساهره... هو اندل مكانه بعد وين انروح
واحنه ماعدنه غير هال٥٠ متر لازم
تنحل بالتفاهم السبع اباله انت قاتل ابو بس انت بريء..

علي... باجر اروح لشيخ عشيرتكم
واحجيله السالفه وخلي يدز ناس للبصره
عفته عمره ٤ سنوات شوكت كبرت وشوكت صرت تمشي كلمتك ع شيوخ العشيره..

لبابه... طبع كلام بابا براسي حته بيومهه ماكدرت اقره
ورحت ثاني يوم بدون تحضير
حسيت بخوف موطبيعي خاف افقد بابا ماعدنه سند
بس هوو..

مرت ٣ ايام صادفت جمعه واجه بابا كال حظروا مي
وجاي راح تجي ناس نتفاهم انخبصنه ويه ماما
واكفين نباوع من الشباك

دخلوا هوايه رياجيل واكو كبار بس الغريب
مسلحين وعبالك جايين يقتلونه بس اطمئنيت
من شفت خالو وياهم ع الاقل بابا مو وحده...

اخذوا الجاي واحنه كاعدين نسمع الحجي
ناس تجر طول وناس عرض اخر شي
دك تليفون واحد بيهم مدري شيحجي
بس لهجته غريبه ...

بس سمعنه تامر التريده يصير
وسده وكال هذا السبع يكول ..

خلي ينسه سالفه الثار خلي يجيني هو للبصره
واكعد واتفاهم اريد قاتل ابوي ..

ظلوا هوايه يحجون شيوخ تعهدوا السبع
مايأذينه انروح سالمين ونرجع سالمين
بس شرط السبع بابا ميجي وحده يجي هو وعائلته..

بابا انسان فقير حيل اقتنع وكال اني بحفظ
شيوخ العشيره وفعلا قرر ياخذنه وكال بلكي تنتهي
هاي العداوه ع خير...

كلهه تكفلت وانطوا وعد مجرد تفاهم ويرجع
لبيته للاحد بابا اخذلنه اجازه واخذنه شكم قطعه ملابس
وطلعنه من بغداد ..

جانت سياره ويانه هو الي اتكفل بابا
ميصير علينه شي بالطريق بابا مدري
شبي كلساع وكال مالي خلك وتعبان..

حته يوكف السياره كلساع وياخذ نفس
ويشرب مي يمكن ضغطه ارتفعه مع العلم
جان ماخذ علاجه ...

وصلنه للبصره والسياره تمشي كدامنه
وكلما نتقرب على منطقه اهل بابا اشوفه يتعب اكثر

لحدماوصلنه لمنطقتهم شارع عام بس بساتين
على الجانبين من الطريق كلنه كلوبنه انقبضت
حته ماما كالت عبالك دخلونه بنفق..

لزمنه الشارع الي ياخذ للقصر جان طريق
عثر مخلين بي تراب جديد بس بي هوايه
عثرات ..

لحدماوصلنه اباب القصر كلنه شهكنه
اول مره انشوف هيج بيت جبير حيل
وداير مدايره رياجيل واكفه

بيت طابقين وبي بالكونات بس بنينانه
قديم وكل بالكونه بيهه جام اسود معتم
ركبتي انكسرت من كدما انذهلت بي
بس بالتلفزيون شايفه القصر وهسه شفته بالحقيقه..

نزلنه تلكانه واحد بعمر بابا صاح تفظلوا
وصاح ام جراح تعالي لخطارنه...

طلعت عمه زينب منكول متوسطه بالعمر
بس كبيره ومتعوبه ولابسه اسود حته جواريب
وشال اسود...

ابتسمت بوجه ماما وبوستهه وهي تصيح
اهلا وسهلا تفظلوا البيت بيتكم..

دخلنه لصاله جبيره كلساع تجي وحده تسلم
ويعرفونه عليهن ومانحفظهن بس عرفت الحجيه
الكال عليهه بابا...

يمكن ساعه او اقل اجه طفل عمره ١١ سنه
يصيح الحگوا الحگوا الرجال الجاي من بغداد
ماااات...

كلشي مر مثل الحلم مثل الطيف المرعب
بابا مااات ؟!
بابا هسه اجه ويانه وراح لمكان يسموا المضيف
شلون مااات!!

ماما ركضت واحنه وراهه بس النسوان
لزمنهه ماعدهم وحده تطلع
بس فعلا بابا مات ...
اول ماكاعد يكولون متخربط وراكضين بي
لاقرب مستشفى ومتوفي بالطريق

كلهه كامت تصرخ ماما واحنه مثل طيور الحمام
والهدموا عشهه وظلينه انرفرف
بأجنحتنه المكسوره...

سوو فاتحه جبيره لبابا وجنت ممصدكه وفاته
كلت السبع هو قتله بس وصل بس
اساسا السبع جان مموجود لحدمخلصت الفاتحه
يله اجه..

بابا جاي يصالح ويبري نفسه
وراح وظلت الحقيقه مدفونه
واكيد السبع راح يظل ثاره مستمر...

فززتني من ذكرياتي صوت هيام وهي تصيح
محد يكدر يروح ورا السبع للبستان ..

الحجيه.. عوفنه خلنه يرتاح جروحه صارلهه ٢٥
سنه ومانشفت ولاراح تخمد ناره عوفنه لادزن جرااح
لايتعارك وياه..

لحد الليل واشوفهن مخبوصات وكلهه تصيح
البستان القديم جانت اكو بنيه بكد فجر اسمهه
نور تصير بنت عاصم ابن جبار ..

اجيت بصفهه كتلهه شكو
شبي البستان القديم؟؟
ردت عليه وهي تهمسلي وتتلفت
خاف واحد يسمعه..

نور.. لا تحجين بس احنه نعرف السبع
من يروح للبستان يرجع عبالك مجرم
اول واحد يأذي الشيخ وشوفي حته
ابوي هم مره ضربه

لبابه.. ليش،؟!
نور..يكولون البستان انكتل بي عمي المرحوم
ومرته والسبع يروح لمكانهم ..

لبابه.. هو منو قتل ابو السبع؟!
... جاا انتي ماتدرين منو؟ ابوج كتلهم لان راد
ياخذ فلوسهم لان ابوج يكولون ماعنده فلوس

لبابه.. منيلج هالكلام بابا بريء منو طبع
بعقلكم هالحجي؟!
نور.. انه شمدريني غير كلهه تعرف السبع
حته ماينام مثل الوادم يكول اله اخذ بثار
ابوي..

لبابه.. ومن يرجع خومايكتل النسوان؟!
نور.. هو مايفوت هنا بس من يشوف الحجيه
لبابه.. لعد وين ينام..

نور.. شوفي هذيج الحجره معزوله من البيت
بابهه على البستان هذيج حجرته

لبابه...الشيخ جبار يخاف من السبع؟!
نور.. جدي الشيخ بطل مايخاف من احد
بس السبع يكتل وتقربت عليه وشاورتني
السبع مجرم هواي كاتل ناس..

لبابه.. خوفتني بسرعه ركضت لماما للغرفه
مااريد اعرف شي بعد كلشي غريب
شلون ايام سوده مثل سواد كلوبهم..

ماما تقره قران وفجر نايمه ع ظهرهه
وعينهه بالسكف هي حالتهه لاتحجي ولانسمع
صوتهه ...

افتريت بالغرفه ماكو شي اتلهه بي
جانت شهد اكعد واسولف وياهه وتحجيلي
اذاصارت طبيبه شلون تساعد الناس

نزلت دموعي بغزاره شافتني فجر كامت
تبجي ماما صدقت وصوتهه المبحوح وكامت
تنوح وتصيح بنتي...

وحده اضعف من الثانيه
مثل القارورات الهشه تكسرت
وصارت تجرح محد تكدر تجمع حطام الثانيه..

هدئنه شويه ورجعت ماما تقره قران
وراس فجر بحضني العب بشعرهه
وصوت طلقات متتاليه مثل الجبهه
حسيتهه راح تفوت علينه من الشباك...

بدون وعي ركضت فتحت الباب واسحب بفجر
واصيح ماما اطلعي عبالي راح تفوت لغرفتنه

والصوت مستمر ماينقطع اكو واحد يضرب
واكو مجموعه يردون علي..
هاي شايفتهه بس بالافلام ...

من فتحت الباب وطلعت النسوان والجهال
كلهه تصارخ والحجيه تصيح خلي يحلكون
البستان السبع وحده..

جنت واكفه يم الدرج واجه جراح
مثل الطلقه يعبر كل درجايتين سوه
وامه تصيح ورا لاتعوف ابنك عمك وحده..

الوحيده هاي الانسانه عادله بهذا البيت
هي والحجيه ومثل مايكولون راضعه
حليب طاهر...

جراااح صعد سريع ونزل اسلاحه بيده
ويه نزلته اني تحركت ردت اسويله
مجال

ضربني حيل بكتفي ردت اوكع
التفت عليه بنظره غريبه
مدري اني حسيتهه هيج...

دقايق قليله بعد طلعة جراح هدء الجو
طلقات ماكو اصلا يمكن بعده بالباب مالحك
يوصل..

بس الي اسمه ضرغام حاجه الحجيه
من ورا الباب بس انتبهت على السلاح
بحزامه وسلاحه يختلف عنهم
بلحظه شكيت بي هذا بالجيش..

صاحت الحجيه بركات ضرغام وين
السبع المن هالطلق منو يضرب ويرد علي.؟!

رد عليهه ضرغام ماكو شي حجيه
ماقبل ندخل البستان وواجهم وحده
موكتلج السبع مستميت !!

بس عرف بسالفه البنات
واذا مامنعه جراح ولحك علي
ماراح يطلع الشيخ منهه هالمره!!!
.
#يتبع.......

#خبايا_الاقدار

... البارت الرابع


لبابه.. صاحت بينه ماما انفوت للغرفه جانت واكفه بالباب
وتأشر بيدهه تركناهم بهوستهم ودخلنه
ساهره.. لتخلطن بيهم مابيه خساره بعد..

لبابه اكعدي وبطلي فضول موهاي اختج
ماتطلع من الغرفه ؟!
لبابه.. ماما ممسويه شي بس الصوت فززني
ساهره.. خلن ابالجن هذا مو مكانه ولا راح يصير
مأمن النه ..

فجر.. ماما هو منو السبع بابا حجه
علي بس ابد ماشفناه؟!
ساهره.. والله يابنتي هو اني شفته مره وحده
والظاهر حاقد علينه حته ماسلم عليه

لبابه.. اذا عباله بابا القاتل شلون ميحقد علينه
اني شفته؟!
ساهره.. وين شفتي؟!
لبابه.. يم الحجيه اجه سلم عليهه وكالتله
هاي بنت المرحوم وفز ومثل الضاج وطلع بسرعه..

ساهره.. عاطت بيه وجرتني من ايدي وحق الله يالبابه
اغضب عليج اذا اختلطي بيهم ماطلعين من الغرفه
بس للحمام والاكل

ارحمني كااافي تريدني اموت انفعلت ماما وكامت تعيط
وتضرب ع وجهه رغم صوتهه تعبان ودموعهه
تتسابق..

ساهره.. عبالج جبار المسمي نفسه شيخ يعوفني
بحالي ولجن من اول يوم وفاة ابوجن ودزلي عمتكم
الجبيره ينتظر تخلص العده ويتزوجني..

وهسه راح يستغل ضعفي وخوفي عليجن
ويخيرني واني شسوي اني تالي عمري
هيج يصير بيه ..

فجر.. ماما اهدئي هي شهد وماتت ليش
تقبلين تتزوجي اذا حجه كليله انت قتلت
بنتي..

ساهره.. ااااخ يا علي ياسندي ورفعة راسي
عشت طول عمري بفخر مايوم رفعت صوتك
عليه وقللت من شأني..

وهاي صار ٦ اشهر على وفاتك وساهره
انكسرت ودنگت راسهه بنتي الجبيره
حبيبتك ماتحملت فراكك واستعجلت وراحت وراك

واني صرت بين ناريين لو اشوف لبابه وفجر
يتعذبن كدامي ويطلعوهن من الفجر للشغل
والخدمه وهن عودهن طري

لو اتزوج القتل بنتي وايده تلطخت بصغيرتي
البريئه؟!

امتحانك صعب ياربي لا اعتراض على حكمك
بس اطمع برحمتك ترحمني وترحم هذني اليتامى ..

لبابه... ماما تخربطت بسرعه انطيناهه علاجهه
نفسهه صار ضيق ومختنكه اخذت علاجهه ومددت
فجر تفرك برجليهه واني لازمه ايدهه لحدما غفت ..

التفتت على فجر صافنه عليه هزيتلهه راسي
شكو فجوره بيج شي؟!
فجر.. ااي اريد اشوف السبع انتي موشفتي؟!

لبابه.. تفاجأت بكلامهه اساسا هي متحجي ومتطلع
من الغرفه ليش تشوفي شسوين؟!

فجر.. بابا هوايه حجه علي اريد اشوفه
مو ابن عمي؟!
لبابه.. ماسمعتي ماما هسه شكالت ممنوع نختلط
بيهم..

فجر.. موهاي كومه بنات عدهم اسمعي
هوستهم احنه انظل هنا كاعدات ومانعرف شي
ويكولون ابوكم قاتل..
لبابه.. كومي خلي نطلع يم الحجيه واساليهه
الي ابالج..

طلعنه من الغرفه كل واحد رايح لغرفته ولاعبالك
قبل دقايق عاشوا بجبهه وقلق وخوف
ولامهتمين ابد يمكن عدهم زلاطه..

باب الحجيه مفتوح دكينه الباب ودخلنه
جانت مموجوده بس نور بنت عاصم
كاعده ..

كعدنه وسالناهه على الحجيه
نور.. راحت لحجرة السبع هسه تجي اني اليوم ابات يمهه
لان خاف تتخربط بليل ابوي دزني يمهه

لبابه.. هو انتم متعودين على هيج وضع
وهيج طلقات واخر شي تنامون ولاحكومه ولا
شرطه؟!

نور.. ياحكومه انتن حضريات وماتعرفن
سوالف العشاير عدنه عادي يوميه طلابه
وجدي الشيخ يحل كل مشاكل الناس عبنه
عده حكمه وكلهه تحلف براسه..

لبابه.. الشيخ عنده حكمه موقتل اختي وذبحهه
هذا ينحلف براسه
نور.. چااا غير فريتن من القصر احمدن الله
ماذبحجن وياهه ..

لبابه.. انتي شكد عمرج؟!
نور.. امي دكول صرتي ١٥ سنه
لبابه.. ماعدكم احد يدرس
نور.. كلنه نوصل للرابع ابتدائي نكوم نعرف
نقره ونكتب ويبطلونه عيب الحرمه تدرس وتشوفهه
الاغراب..

لبابه.. بكلبي حجيت غراب براسج وراس جدج
الشيخ كلامهه يخلي الواحد يتنرفز بس هي من النوع
الفتان وتحجي كلشي بس اضغط دكمه بيهه تنطلق!!

فجر ... انتو هوايه كاعدين هنا ليش موعدكم
اراضي خير من الله ليش مطلعون كل واحد ابيت

نور.. يااا غير كلنه جوه جنج الشيخ اليطلع
يغضب علي الشيخ ..

لبابه..كاعده تسولف وصوت الي اسمه ضرغام
يصيح عاااصم!!كامت نور صاحت ابوهه ورجعت!!
سألتهه ضرغام شيصير منكم!!

نور.. جااا انتن شمالجن كلشي ماتعرفن ضرغام ابن عمتجن
المرحومه اسمهه فاطمه ماتت وهي صغيره.

لبابه.. يعني ماعنده عائله عبالي من حمايه القصر
نور.. اااوف ضرغام قصته قصه متشوفنه لابس
اسود ماينزعه ابد

لبابه.. ليش ؟!
نور.. سالفه طويله بعدين اسولفهه الكم
بس هو ماتت مرته وابنه وبنته محتركين
وهو يحب مرته حيل اخذهه گوه على اهلهه و صار
هيج من ماتت...

لبابه.. خطيه شلون ماتوا كلهم؟!
نور.. يوم نكعد واحجيلكم جانت مرته تخبل
ومن ماتت تسودن وراهه وهو من صغره عايش يمنه..

لبابه.. باجر يطلع الشيخ من المستشفى؟!
نور.. جااا ماسمعتي ضرغام شكال السبع
هاد على الشيخ علمود اختج الله يستر..

لبابه.. انتي مودكولين الشيخ بطل وقوي شنو قابل
يخاف من السبع؟!
نور.. اااءءء هو قوي بس السبع يطك
بالسلاح ويخاف منه

لبابه.. هاااا يعني هسه راح يحاسب الشيخ
على قتل اختي كومي دليني حجرته اني اريد
اروح احاجي..

نور.. عزااا العزاني تريدين يموتوني
ومنو تدخل حجرة السبع بس الحجيه استري
على روحج خايبه..

لبابه.. من سمعت الشيخ يخاف من السبع
مدري منين اجتني القوه اني وفجر بسرعه كمنه
وهي تركض ورانه بس ماقبلنه نوكف فتحنه الباب
وطلعنه

جانت غرفته خارجيه بابهه على البستان دنيا ليل وظلمه
واكو رياجيل واكفه شلون انفوت ترددنه نكمل طريقنه
وظلينه واكفين بمكانه وحده دكول لثانيه
امشي بس رجلينه متساعدنه!!

بس نقذنه ضرغام جان طالع من المضيف
اول مره انتبه علي طويل وصاحب بنيه ضخمه
مبين متدرب جسمه صلب

تقرب علينه واحنه نرجع ليورا بس جانت ظلمه
واكو ضوه خافت بسرعه انفتح الضوه مال الطرمه
فزينه هو فتحه طلعوا بليل يطفوا..

جان لابس بجامه سوده وتشيرت اسود ساده
ربع ردن رغم برودة الجو بس الظاهر فعلا نار
قلبه اقوى..

حواجبه من حالهن مرفوعه ووجهه شاحب مابي
ابتسامه حجه بحديه وين
رايحات هم ناويات تنهزمن؟!

لبابه.. حجيت بتعلثم اخاف منهم كلهم احسهم
القتل عدهم عادي كتله لاااا بس بس !!

ضرغام.. بس شنووو؟!
لبابه.. احنه اني واختي انريد انروح للسبع
نحجي وياه..

ضرغام.. شتحجن ؟! رجعن لمكانجن وصيرن
عاقلات مالنه خلك خبال تالي الليل..

فجر.. ليش متخلونه نحجي تعال انت ويانه
بس انريد يساعدنه ماما مريضه والشيخ
بس يطلع يقتلنه..

ضرغام.. امشن وراي ومد ايده ع الكهرباء
سدهه رجعت ظلمه ومشه كدامنه من يمشي
رجله اطك اعظامي مثل التلفانه..

وصل لغرفته دك الباب وفات كدامنه وفتح الباب
على حيله وصاح دخلن ...

رهبه وخوف خفت اواجهه خاف يكول ابوكم
قاتل !! خاف يسب بابا لو يغلط بغلط موحلو
ومااكدر اجاوبه ..

دخلنه واحنه منصين ضرغام طلع
رفعت راسي الحجيه كاعده وهو كاعد
ومرتجي ع الحايط وماد رجليه..

الحجيه.. هاا يبناتي خوما ساهره بيهه شي
لبابه.. لا بيبي نايمه ماما بس اجينه نحجي ويه
السبع..

السبع.. خير ؟!
لبابه.. مدري شحجي ضاع الحجي بحلكي كله
فجر انخرست واني اريد اجمع الحروف مدري
شجاني؟!

طريقه كلامه بعصبيه كعدته توتر المقابل
عيونهم هو والحجيه مصبوبه علينه
ولافجر بيهه حظ وتحجي..

الحجيه.. احجن يمه هو ابن عمجن مالجن علاقه
بعداوت الكبار ابن العم يسمه ولي وشايل الهم
احجن لاتخافن..

لبابه.. احنه انريد حل!! حجيت بس هالكلمات
وسكتت

السبع.. شو رفعي راسج واحجي
عليمن خايفه مخلي سيف ع ركبتج

لبابه.. لا ماخايفه بس انريد حل!! ورفعت راسي
ماباوعت علي بس ع الحجيه بس انتبهت
على نظرته جانت متجهه على فجر..

السبع.. شنو الحل على ايش؟!

فجر.. بابا مات واختي انقتلت كدامنه وماما مريضه
والشيخ يريد يتزوج ماما غصب واحنه يطلعونه
يوميه الفجر للشغل ..

جانت فجر تحجي كلامهه دفعه وحده تفاجأت
بيهه هي مومن النوع هذا خجوله وخوافه
والاكثر من هذا نظرته هو جانت مركزه بصوره
موطبيعه على كل كلمه دكولهه فجر ..

ختمت كلامهه وهي تلهث عبالك بسابق
جانت بس هو عدل كعدته وعيونه غريبه
حيل ماتشبه اهل بابا مااعرف شلون اصفهه
بس مومجروره هيج مثل الجفنهه نازل..

بنبره هادئه حيل ولاكانو نفسه الجان يحجي
جان يكول انتي شسمج؟!

فجر.. رديت علي واني منصيه راسي
وكتله فجر اني عندي رتله بالراء..

السبع.. انتي الصغيره شكد عمرج؟!
فجر.. عمري ١٣..
السبع.. اي كملي ..

فجر.. كملت!! ظل ساكت وكلهه ساكته
جان يكول اختكم ماتت الله يرحمهه ولو هنا جان
ماصار هيج بس حد يومهه هذا ..

حقهه اخذه موعلمودكم بس امام الله
لازم الانسان يدافع عن المظلوم وامكم انه مااعرفهه
وحتلو هي زوجة عمي قاتل ابوي بس مالهه ذنب..

فجر.. بابا موقاتل بابا اجه برجليه الك يريد
يوضحلك الحقيقه بس توفى هنا بسرعه
وحته ماشفناه ..

السبع.. منو كال بابا موقاتل هو كالج؟!
فجر.. انت متعرف بابا شنو حقك لان عايشين
هيج حياة بشعه وكل همكم ثار ودم مثل مانقتلت
اختي

وحته محد مهتم على وفاتهه صارلهه يومين بس
ونخاف نبجي كدامكم لان مرت الشيخ ماتقبل

السبع.. الظاهر متحمله ؟!
فجر.. اني احجي الحقيقه هن متعودات احنه ماعايشين
هيج حياتنه تختلف حرام عليكم رجعونه لبغداد
نعيش يم خالو...

لبابه.. فجر اصغرنه وجانت اكثر وحده مدلله
يعني بس اتخيل نكعد ب٤ ياخذونه للبستان
انشلع حشيش مدري شنو بدينه وين نعرف احنه؟!

لو مرت الشيخ اسمهه هيام تخلينه انشيل
هيج عبايه متروسه على ظهرنه الله يقبلهه؟!
احنه يتامى وواجبكم تحمونه موتذلونه

بسرعه التفت على الحجيه وكالهه
صدك هالحجي؟! بنات يطلعن وين الفلاليح

الحجيه.. جبار لازم امهن لو تزوجيني لو اعذب بناتج
ومرت عمك مره اصيله دكول مااكدر خلي يكتلني
ولا اقبل اتزوجه ..

السبع.. والبنات شلهن غرض مايطلع بنات هيام
موعنده عشيره نسوان شو جنج ساكته عن الحق
يشيخه وماكمتي ادافعين ؟!

الحجيه.. المغلوب ع امره شيسوي انت تدري
مابيدي سلطه بس ع النسوان اكدر الجبار اني..

لبابه.. انت تخيل عندك اخت تقبل تنذبح
وتسكت عن حقهه؟!

مدري شلون حجيت هيج نسيت قصته ونسيت وضعه
عبالك واحد ودار علي تيزاب بسرعه كام بعصبيه
متمالك اعصابه

شفته راد يحجي بس طلع بسرعه والحجيه لطمت
على صدرهه ولج ليش تذكري باخته ولج سوده بوجي
وجه ابوي على هالقسمه الفاينه..

لبابه.. ماقصدت والله؟! وين راح
الحجيه .. اكعدن واسكتن خاف اطلعجن
ويهيج عليجن خلي يبتعد ..

شفتنه ولجن حته مايكدر يحجي من ينذكر
طاريهم اااخ ياابني شوكت تخمد نارك.!
والله لو ماانتن بنات جان وكع اسنونج بحلكج..

لبابه.. هو اني عايزه صدك لاكالو اجت تكحلهه
عمتهه هاي اني فجر احسن مني حجت خوش حجي
واني خربت الاول والتالي..

كامت الحجيه وكمنه وراهه جانت الساعه ب١١
بليل طلعنه وسدت الباب وصاحت الحجيه ضرغام
ماكو صوت تقربت على الباب وصاحت يضرغام؟!

سمعنه صوتهه كالهه ماكو شي حجيه
ادعي لجراح يطلع منهه سلامات !!

الحجيه.. سوده بوجه جبار يله من ورا السانج
راح يصب غضبه بجراح..

لبابه.. الحجيه تمشي للباب الخارجي واحنه وراهه
تمشي وادردم فتحت الباب ضرغام جان مرتجي ع السياج
وبيده جكاره ويباوع ليكدام..

الحجيه قصيره احنه اطول منهه هي تحجي
وسوده بوجهي ووجه ابوي ولك الحكه
واني مصدومه بالمنظر..

كدام القصر ساحه جبيره جانبيه وبيهه شكم
نخله والسبع يتضارب هو وجراح
مثل الملاكمه ...

واحد يضرب بالثاني ويتعبون ويرجعون
اقوى لحدما وكع جراح بالكاع والحجيه تخاف تصيح
دنيا لليل وخاف يفزون ..

وضرغام ماتحرك ابد جكاره ورا جكاره ويكلهه
ماتعودتي على خبالاته مسكين جراح لشوكت
يتحمل السبع؟!

حسيت كلبي انقبض من المنظر صح ظلمه وماانشوف
الوجوه بس كله بوكسيات ودفرات يمكن امعائه
تكطعت..

التفت ضرغام وجه كلامه للحجيه رحمه لامي
ماطببيهن جوه من وراهن هذا تخبل
خاف عوزنه قهر..

صاحت الحجيه وطبت وضرغام راح يفكهم
اسمعه صاح هاهي ارتاحيتوا مخابيل
واحد فرغ قهرهه بالثاني؟!

طبينه للغرفه ماما بعدهه نايمه فجر
شفايفهه ترجف وكلساع وكالت هو هذا
السبع ؟!

هاي الليله مدري شلون نمنه بيهه احس نفسي
كلما ارفع رجليه خطوه اتقدم
ادوس على لغم جديد..

ياربي لاجبير ولاصغير بيهم طبيعي
شنو من حبتة بائسه عايشين بيهه؟!

ثاني يوم الصبح كعدنه لكينه ماما تقره قران
كمت غسلت وفجر كامت وراي
تريكنه بغرفتنه عمه زينب جابتلنه الريوك...

ل١٠ وكالو راح يطلع الشيخ من المستشفى
وذبحوا طليان ع سلامته..

ماما متوتره وخايفه وبس دموعهه تنزل
ماتعرف شتسوي واحنه وياهه من انشوفهه
هيج كل حيل مايظل عدنه..

قفلنه الباب وحبسنه نفسنه بالغرفه
اكو شغلات منعرفهه بس ماما تعرفهه
مبين من خوفهه يمكن يتزوجهه غصب..

مر الوقت ومااجه كمنه نسمع صوت
النسوان وهوسه وصوت الحجيه تصيح بيهن
اسكتن لاتظلن توشوشن ..

فتحت ماما الباب وطلعت تلكتهه هيام
دفعت ماما حيل رادت توكع وتدعي وتغلط
حته ع شهد اختي

حجايه منا وحجايه منا صارت عركه ماما
تتعارك وهي لازمتهه تريد تضربهه مانكدر
نحميهه عبالك موهيام مثل الملاكم

بس فجر طلعت خوش طلعه جانت العركه
يم الدرج شفت فجر وكفت على الدرج
وعضت هيام عضه ولزكت بيهه

صريخ هيام وتدفع بفجر وهاي اسنانهه
نبتت بزندهه وماترضه توخر لحدما هيام
شاغت روحهه وكامت تصيح بعلو صوتهه
الحكولي..

ماما سحبت فجر ودفعتهه للغرفه وهيام
تغلط وبتهه ايناس اضرب منهه بس هيج
برد كلبي ..

دخلنه بالغرفه وماما اجت هي والحجيه
بس شافت فجر ضربتهه خفيف على راسهه

الحجيه.. يمصكوعه سنون لو بسامير
شالعه زند المره ..
البارحه خبلتن السبع خليتنه الليل كله
مانايم وهسه المره تون

دهر دهرجن يكولون البغداديات هيج
ناعمات وطريات جنهن تمره برحي

ساهره.. حجيه من الجور صارن هيج والله
عمرهن مايتجاوزن ع احد

الحجيه.. هسه ماعلينه خليجن حبابات
والسبع متضارب ويه جبار ومنتكسه حالته
ورادي للمستشفى..

ساهره.. حجيه السبع ضدنه اخاف ع بناتي
والله صرت مااعرف العدو من الصديق...

الحجيه.. كولي يالله مدام عرف بيهه السبع
هاهي هو يمنع جبار لايتزوجج ولا يعذب البنات

لبابه.. طلعت الحجيه ارتاحينه شويه
مر اليوم هادىء بليل جنت اغسل مغسلتهم
جوه الدرج سمعت خطوات ع الدرج

رفعت راسي شفته جراح مبدل كل مااشوفه
لابس دشداشه بس هالمره لبس عادي بنطرون
بيجي وبلوز زيتوني ولفاف على ركبته
وجنطته بيده..

طول ماينزل هو يباوع عليه لحدما خلص الدرج
التفت نفس نظرته السابقه بس ماحجه
طلع واسمع صوت القفل وهو يقفل الباب..

حجيت ويه نفسي دنيا ليل وشته شلون
يروح لبغداد بهيج جو وخاصه الوضع موامان

رجعت للغرفه كلما اغمض عيني تنرسم كدامي
صوره جراح
اتعوذت من الشيطان وارجع لنفس الدائره

اتذكرت البارحه شلون تضاربوا هو والسبع
واليوم مامبين ولاخدش بي لعد الضرب مال
البارحه وين بس جان كله دفرات ببطنه
وهم بحاله مصارعه...

لحد الفجر واني ماخليت ايه ماقريتهه
وصورته وحركاته كدامي كمت اجبر نفسي
حته اتذكر شهد واحقد عليهم..

داهمني النعاس وغفيت فزيت الساعه
ب٩ فتحت عيني بس فجر
بالغرفه وكاعده وحدهه

بس شلت راسي وارفع بشعري
جان دكول تدرين السبع شنو اسمه الحقيقي
.... شنووو؟!
اسمه جمره....


#يتبع ......

#خبايا_الاقدار

... البارت الخامس


لبابه.. اسم الله حلمتي بأسمه لوشنو؟!
فجر.. نوغ كالتلي اسمه جمغه
لبابه.. اسكتي ليسمعج هم جمره وهم لعبتي بيهه
لعب بلسانج .

لميت شعري وكمت عدلت فراشي خليت
البطانيه رتبتهه وهي صافنه هزيتلهه راسي
شكو اليوم شبيج؟!

فجر.. كلهه ضحكت عليه لان مااعرف
الفظ اسمه صحيح
لبابه.. لتخلين ابالج هيج شي كولي السبع
اصلا السبع احلى من جمره..

لعد ماما وين؟!
فجر.. طلعت للمطبخ كالت يحجون على الشغل
وهي تشتغل ابمكانه

لبابه... طلعت للمغسله غسلت شفت عمه
زينب ام جراح كاعده اباب الممر وتنظف بالتمن
ظليت واكفه اباوعلهه مدري ليش اتذكرت
جراح..

رحت للمطبخ جانت ماما وخديجه زوجه جبار
الثانيه ماما سوتلي لفه اكلتهه وعفتهه تغسل
مواعين ..

اريد ارجع للغرفه لكيت فجر كاعده يم عمه
زينب رحت كعدت يمهه احسهه تختلف عنهم
ابد مومن هاي العائله..

زينب.. صيرن سباعيات واحمن امكم لتخلنهم
يكولون ماتعرف تربي
لبابه.. عمه احنه شفتي بعينج شكد مظلومات

زينب.. كلهه مظلومه هنا بس اكو فرق
بين المتونس وخاضع للظلم وبين المجبور
ماعنده لاحول ولاقوه..

لبابه.. سمعتج ذاك اليوم دكولين لجراح
اني واختك بس لحد الان ماشفناهه عندج
بنيه..

زينب..اني مومن هاي العشيره وجنت ساكنه
بالبصره بالمركز وابوي الله يرحمه صديق
الشيخ المرحوم وخطبوني لابو جراح

واجيت هنا وشفت العجب اني جنت معهد
معلمات وبطلوني من الدراسه وهم يدگون على
راسنه شغل ومات عمج ابو جراح وظليت
تحت رحمتهم .

عندي جراح وابرار بس ماعدنه لاورث ولاسند
ولاكاع كل هاي الاراضي بأسم الشيخ جبار
وهاي متحمله وساكته انتظر جراح يطلعني
ويرحم ايامي الباقيه ..

لبابه.. وينهه ابرار متزوجه؟!
زينب.. لاا ابرار اول سنه كليه الوحيده
من هاي
العائله درست جراح وياهه
خطوه بخطوه لحدماوصلت وانقبلت صيدله

والشيخ سوهه ظلمه وراد يكتلهه بالسلاح
ووكعت الطلقه بيومهه بجراح ولوما السبع
وضرغام ساندوا جراح جان راح ابني وبنتي..

والحمدلله وديتهه يم بيت اختي ماعدهه خلفه
تكمل دراستهه بيت اختي قريب ع جامعه البصره
واني ماخليهه تجي ليا ظلم خليهه هناك مرتاحه..

لبابه.. احنه صار ٦ اشهر هنا ومشفناهه
زينب.. اجت بفاتحه ابوج الله يرحمه بس
ماشفتيهه ملتهيات ورجعت يم خالتهه
للعطله وتجي اخاف عليهه ...

لبابه.. كلهه هنا ماتدرس ومدرستنه احنه
شلون؟!
زينب.. اسكتن هسه الوضع مومال تحجن خطيه
امكم هي تتاذى ...

فجر.. هو جراح شنو يدرس ؟!
زينب.. كليه عسكريه بعدله شكم شهر بعد كلبي
ويصير ضابط وافرح بي ..

لبابه.. ماادري ليش من حجت وذكرت اسمه حسيت
بشعور حلو مع العلم تعارفنه جان ابد موحلو
من مقتل شهوده اول مره اشوفه بيهه..

ماانختلط بالكل ماما خلصت شغلهه
وصاحتنه للغرفه مانحجي ويه الموجودين
لا ايناس ولا امهه بس نور بنت عاصم احسهه
فطيره وانطيهه اخبار العشيره كلهه عدهه..

للعصر طلع الشيخ جبار الظالم صوت طلقات
وهوسات غريبه احنه بالغرفه كاعدين العجيب
ابد مادز علينه وحته ماما جانت نوعا ما مرتاحه..

كلساع نكول هسه يدز علينه
هسه يدفع الباب ويفوت علينه
يكتلنه الخوف والقلق استحوذ علينه...

صار العشه اتعشينه وهوسه كلساع كالوا
اجه خطار ع الشيخ بس ابد ماشفنه شكله

تقريبا صارت الساعه ب١٠ والناس راحت وكل واحد
كام يروح لغرفته احنه بغرفتنه قافلين الباب
اندك ونسمع صوت نور تصيح عمه ساهره يريدوج..

ماما كمزت تلبس بحجابهه ووجهه تغير لونه
وحايره شلون تطلع وشلون تواجه ويه قاتل
بتهه لو احنه شلون انشوفه واتذكر شلون ذبح
اختي ..

كلما تريد تفتح الباب تتردد وتبطل
لحدما صاحت الحجيه ساهره تعالي
انتي والبنات السبع يريدكم..

فتحت ماما الباب وطلعنه تلكتنه هيام
هزت ايدهه وذبتلهه حجايه على ماما
ومشت..

زينب.. تعالي خيه هنا بالصاله الثانيه
كاعدين وانتي هيام هم يريدوج كلهه تكعد

نمشي ورا عمه زينب طبينه للصاله
كلنه مدنگين بس احس الصاله رغم كبرهه
تريد تخنكني حسيت بقاتل اختي كاعد ويانه
واختي اندفنت بالتراب..

كعدنه بصف ماما ورفعت راسي جانو ضرغام
والسبع وعاصم وجبار كاعدين والنسوان كلهه

السبع.. انتن شفتن الشيخ كتل اختك؟!
لبابه.. اي ذبحهه وياه ٣ واحد اسمه سعود

الشيخ.. يرادلج كص اللسان لازم ماتدرين ليش
كتلت اختج الزانيه ..

ساهره... حسبي الله ونعم الوكيل بيك الله ينحرك
على ايد ظالم مثل مانحرت بنتي وتهمتهه وهي بريئه
ياظالم يانذل ياماعندك مخافه الله
صير رجال وكول اني مابيه خير واني موخوش ادمي
وساتر عيوبي بهذا العگال الي ع راسك..

لبابه.. ماما انفعلت هو بسرعه كام ورفع ايده على ماما
راد يكتلهه بس ضرغام صار كدامه ورفع ايده مثل
علامه استوب كدام الشيخ ..
والسبع على كعدته ماتحرك ابد

جبار..توكف بوجهي يضرغام بوجه الشيخ جبار
انت منو تخوفني برتبتك ولك؟!

ضرغام.. اذا لزم الامر استخدمهه رتبتي واخلي
السجن يشهد عليك لهنااا وبس !!

شعندك وياهن ندري الشيوخ يستقوون على الزلم
مو ع النسوان من اجن لسه انت شاد وياهن ..

السبع.. اكعد ابو عاصم ضرغام اكعد خلي نفتهم
البنيه راحت للرحمه واذا انريد ناخذ بحقهه لازم
ننحر الشيخ ونعلك راسه بالباب وهم ماراح تبرد
نار امهه..

بس الحساب يا ابو عاصم بي ومايثگل
وانه اريده يثگل حته مومره وحده انحرك
انت وشكو واحد وياك باطل..

جبار... بنت زانيه صعدت ويه واحد وشرد
وورطت اخواتهه وانت ادافعلهه اااافا يالسبع
صرت ماتميز من ثارك العمه عيونك..

السبع... هسه اذا اكوم افرغ هالشريط براسكم
اكو كوووا... يكلي خطيه وليش!!
بس كلشي بأوانه ...

اسمعوا الكل عاصم تبلغ اخوتك من يجون
من الشغل المشتمل الكاعد بي عامر اخوك يفرغ
منا لباجر ويرجع يكعد بنفس غرفته القديمه
ويتحولن البنات وامهن بي ..

جبار.. اااافا تمشي كلمتك عليه
السبع.. مامتعود اعيد الكلام مرتين منا للصبح
اني بغرفتي المعترض خلي يجيني واني ارضي..

البنات اذا لمحتهن لو سمعت بيوم طالعات للشغل
ابمكان نسوانكم وحالهن حال الزلم وروح امي
ادوس على راسكم واحد واحد ..

وانت ياابو عاصم يمكنهه عاقبتك موخوش
وكمت تخربط احفظ مي وجهك وكرامتك
قبل ما افقد اعصابي عليكم..

لبابه.. من يحجي الكل ساكت انطه
اوامر مشت على الكل
رفعت راسي شفته يباوع لفجر وهي صافنه
بوجهه..

هاي شديصير ليش هلكد يباوع لفجر ونظرته
تختلف تماما من الي يباوعلي بيهه نظره حنيه
حته جفنه ينزل مثل الينعس..

كام هو وضرغام وجبار ماحجه حرف ماما
ركضت للغرفه واحنه وراهه مرت عامر تحجي شنو
ياخذون المشتمل مالتي وشنو الشيخ ساكت !!

ماما غسلت ونامت واني وفجر كاعدين
ناموا كلهم واحنه طلعنه لغرفه الحجيه بيهه
تلفزيون هي تنام ونور تبقه تشوف مسلسلات..

فتحنه الباب جان مسلسل هندي وهي نايمه
بالفراش ومتغطيه والحجيه غافيه
كعدنه يمهه كامت وقللت الصوت..

نور.. هاا ولجن جااا انتن مانمتن؟!
لبابه.. لا منعسانين اجينه يمج..
نور.. هله بيجن انه ماعندي اخوات بس اثنين ولد
اكبر مني بسنه..

لبابه.. باجر انروح بالمشتمل بعيد لوقريب
نور.. هذا بصفنه وبي باب على القصر
هذا المشتمل مال ضرغام من ماتت مرته
هجره.

لبابه.. هي مرته شلون ماتت ماحجيتي النه؟!
نور.. تعالن احجيلجن عنهه الله يرحمهه اسمهه رانيا
هي من الكوت مومن البصره..

ضرغام وحيد امه الي اتوفت بمرض خبيث
وظل وحده تربه ويه السبع جدي الشيخ جان
قاسي ويه ضرغام بس السبع جان يدافع لجراح
وضرغام وياكل الكتل ابمكانهم

هذا الحجي الشيخه بركات تسولفنه النه
دكول السبع كام يطلع ابمكان ضرغام للشغل
لان الشيخ مقسم عليهم ايام وضرغام يدرس
بالمدرسه

اليقصر بشغله يكتله بالخيزران وجان السبع
ياكل الكتل ابمكانه لحدماكبروا وكام الشيخ
مايكدر للسبع لان يلزم الخيزران ويرده ع الشيخ

لحدما كمل دراسه ضرغام وطلع من السادس
وراح هاي المدري شيسموهه كليه وانوب صار
ضابط استخبارات وكام الشيخ مايحجي وياه
عبنه بالحكومه..

ضرغام يطلع على الجامعات مال هذني اليدرسن
ومره من المرات جايته بنيه تبجي كايلتله
ساعدو بنت خالي ..

لبابه.. شبيهه بنت خالهه
نور.. البنيه تصير بنت خال رانيا واجت طلبت مساعده
من ضرغام رانيا تدرس هنا بالبصره وتگص صور
هواي ليش ماواحد بايگ الصور ويهدد بيهه

كايلهه لو تحبيني لو اوديهن لهلج اكلهم بتكم انطتني
صورهه وهم اهلهه مايدرون تكص صور وهم
ابوهه مثل جدي الشيخ مايقبل بالعيبه..

بنت خالتهه سامعه ضرغام ضابط ومسؤل عن امن
الجامعه مدري شنو وجايه تطلب مساعدته
وهو كايلهه جيبي بنت خالج وتعالي..

وصدك جايبه رانيا لضرغام وحاجيتله
شلون باگوا صورهه من السجل وهي بالامتحان
ويهدد بيهه

وضرغام رايح للولد وماخذ الصور منه
ومدري شمسويله المهم بعد ماتعرض
لرانيا..

وراهه ضرغام كام يحب رانيا حته انقل
لغير مكان وظل يحبهه واجه كال لجدي
الشيخ وجدي تكهرب كاله ماندخل الغريبه لدارنه

عندك بنات عم وخال وتاخذ منهن الغريبه
وام الجامعه مو من ثوبنه..

بس السبع هو وكفله وكال لجدي الشيخ
احرك القصر عليك اذا ماخطبتهه اله
وهم جدي ماقبل يسميهه ام تنوره ام سيقان..

وتالي كوم السبع وتضارب ويه الشيخ
وصارت فضيحه جبيره السبع تعده
ع الشيخ بس محد حجه وكلهه سكتت

وجدي راح خطبهه وابوهه هم ماقبل ينطيهه
من الكوت للبصره وظل ضرغام يوميه
يدز مشيه لحدماقبلوا وتزوجهه

يمه شحجيلجن كل بناتنه ماتن غيره
بنالهه بيت وهي حلوه ماينشبع منهه
كلما انشوف ضرغام يشاور بيهه
وهي تضحك..

وصاروا عنده اثنين جهال ولد وبنيه
يخبلون توم وكام ضرغام يداوم ببغداد
وهناك صايره جريمه مال مخدرات لواحد
جبير

والمسوؤل عنهه ضرغام وهددو لو يشهد
باطل لويكتلوا وهو ظل لازم القضيه
لحدما انسجنوا ..

رانيا مرته كامت هيام تاذيهه وتخلي تشتغل
من يروح ضرغام وتضربهه وهي فقيره
حته جامعتهه عافتهه لان جدي الشيخ ماقبل
يخطبهه اله تبطل وهي عافت كلشي لأجل ضرغام..

تالي ضرغام اخذ رانيا وجهالهه وراح لبغداد
مأجر بيت وكعد بي كال ماامن عليهه هنا
لان كام يجي يهد علينه ويتعارك يلكه جسمهه
ازرك من الكتل مال هيام والشيخ..

وظل ضرغام ابغداد شهرين وبيوم
اجانه طارش كالو بيت ضرغام محترك

طلع هذا المجرم هو يمكنه الحرك البيت لان
هدده واحتركت مرته وجهاله اثنينهم وهو بالدوام
وحته طلعت رانيا حامل بالثالث ..

من ذاك اليوم ضرغام مانزع الاسود واكثر
واحد يشرب جكاير وهذا مشتمله التزوج بي
مادخله بعد...

وعاش ويه السبع وجراح ويروح لدوامه
ويرجع بس بعدين حول هناا بالبصره
كل يومين تلحگه خفاره.

لبابه.. شنو هاي معقوله هيج ناس
شنو ذنبهه مرته وجهاله وفوكاهه حامل
الله يساعده ضرغام همزين مامات..

نور.. جااا متشوفنه شلونه حزين حته مايضحك
وشكد كالوله اتزوج وماقبل ابد

لبابه.. شكد صارلهه مرته من ماتت؟!
نور..امي دكول اتزوج ب٢٠٠٢ وماتت مرته
ب٢٠٠٥

لبابه ... هو وين ينام؟!
نور.. مرات بالمضيف ومرات ويه جراح بس
هو مايفوت للقصر مدري ليش...

لبابه.. نعسنه ع السوالف وقهرتني قصة
ضرغام كمنه من يمهه فجر راحت للغرفه
واني رحت للمطبخ اشرب مي..

الباب مامقفول فتحته شويه اشتميت هوه
بس ماطلعت بس مديت راسي استنشق
هوه نقي...

جنت مغمضه عيوني واخذ نفس
فتحت عيني مفتوح الضوه مال لايت
بوجهي ويحرك الضوه يشتت بي..

ضرغام... شعندج؟!
لبابه.. ماعندي شي ردت اشتم هوه
ضرغام.. اشتميتي ؟!
لبابه.. ااايي
ضرغام.. دخلي لعد وقفلي الباب ..

لبابه.. طبيت وقفلت الباب شكد مستفز
يحجي كلمه وحده ويسكت ..

رحت لفراشي جنت نعسانه بسرعه
غفيت حلمت احلام مخربطه
شفت شهد شفت بابا شفت جراح
بس مااتذكر تفاصيل الاحلام..

ثاني يوم الصبح كعدتنه ماما من وقت
جمعنه غراضنه بس ملابس ماعدنه شي
وحولنه بالمشتمل غرفه نوم وحده وصحيات ومطبخ
وصاله صغيره ...

اشوف ماما رجع الدم بوجهه ارتاحت
ع الاقل انام وناكل بدون محد يحاسبنه..

اخذنه ملابسنه اني وفجر انرتب
بيهن بالكنتور لان مأثث كامل وماما كالت
اسوي غده..

كاعدين انرتب بيهن هن شكم قطعه جانن اكو
جرايد مفروشه بكل خانه شلتهن اريد
انظف الجواهن وكعت صوره بكد كف الايد..

شلتهه اشوفهه عقلي طار اباوع للصوره
وارجع اباوع لفجر اختي هاي فجر!!

الصوره بنيه مبينه صغيره ابيض واسود
يطلع عمره عشر سنوات وولد بصفهه
حاضنهه واثنينهم ضاحكين ..

بس حضنه الولد الهه توحي بهواي
شغلات كانما متعلق بيهه وبينهم
ارتباط روحي...

كلبت الصوره مكتوب عليهه التاريخ
١٩٨٠ الساعه العاشره صباحا
جمره+ ريتاج..

بسرعه اخذتهه فجر تباوعلهه ودكلي هاي
اني شنووو؟!
هنااا عرفت السبع ليش يباوع لفجر بغير
نظره !!

عرفت ليش الحنيه تنصب بعيونه
طلعت تشبه اخته المقتوله ...

رجعت الصوره بمكانهه ورجعت الجريده
عليهه بس شجابهه هنا ماادري
فجر اكلت راسي كلساع وكالت تشبهني
نسخه...

مر اليوم هادئ رغم شوقنه لبابا وشهد
والبجي مال ماما بس ع الاقل احسن بهواي
من ذاك القبر الي يسموا قصر..

ماما نامت من وقت وبقينه وحدنه
وين انروح نور وماكو ع الاقل جانت تسولف
قصص العشيره هنا حته تلفزيون ماكو ..

المشتمل بابه يطلع ع الحديقه مال القصر
فتحته شويه بس صوت الكلاب بس هالمره
ممطفين الضوه القصر مضوي كله..

فجر تسولف وياي ولمحنه واحد
طلع من المطبخ مال القصر
جنطته بظهره ويمشي ويعدل
بقميصه...

عرفته ضرغام لان لابس اسود ماانتبه علينه
شغل السياره وطلع الظاهر هم راح لدوامه
شنو سالفتهم كله بليل يرحون..

مرت الايام هادئه كدرنه نتكيف ويه الوضع
نوعا ما رغم الغصه الي بگلوبنه بس
احسن من قبل...

بعد مرور تقريبا شهرين على وفاة
شهد ماكو شي جديد جبار نهائيا منشوفه
واساسا لا احنه ولاماما نوصل القصر
يدزولنه مسواك بيد واحد من الحمايه
ناخذه من الباب ونقفل علينه...

بيوم منهن كاعدين العصر وكدامنه قوري
الجاي وكعك وماما تقره قران
اندك باب المطبخ كامت فجر صاحت منوو..

فجر.. ماما هاي عمه زينب
ساهره.. اهلا وسهلا ام جراح تفضلوا عيوني
ام جراح.. وبالمهلي خيه اليوم ابرار اجت
هستوهه جابهه حراح وخبصتني اله اروح اشوف
البنات..

لبابه.. ابرار اول مره اشوفهه طويله وضعيفه
لابسه نظارات دائريه مابيهه لحمه ابد بس اعظام
بس هادئه بشكل صوتهه كوه ينسمع
ملامحهه عاديه حيل بس مبينه روحهه هي الحلوه..

سلمت علينه وكعدت جانت علاكه بيدهه
فتحتهه وطلعت منهه شالات اثنين حلوات
جان موديلهن واحد الي وواحد لفجر
ولماما حجاب جبير للصدر مال صلاة ابيض..

شكد ذوق وشلون تعرف الاصول
تستاهل اخوهه يتعب عليهه وتدرس..

ابرار.. اليوم جراح راح يطلعنه للولايه
تنزلون وياي
ساهره.. اخاف عليهن مااطلعهن ابد
زينب.. لتخافين ويه ابن عمهن وابرار وياهن

ساهره.. شلون وحدهن داده
زينب.. شعليهن موكل مره ياخذ اخته
تغير جو ويرجعهه

ساهره.. والشيخ خاف مايقبل ويسوي سالفه
زينب.. ع بختج مدام جراح والسبع هنا اطمئني
مايكدر يكلهن بخ..