احببتك رغم كل شيئ

البارت الخامس
الجو مختنك .... ريحة الدخان طاغيه على الغرفة
طاولة مدورة مغطايه بمفرش اخضر ومصفطين عليها اوراق اللعب وقواطي البيرة
العرق البارد اتجمع على كصتي .... جنت صافن عبالك توقف الزمن
اباوع لهذي الشدات الخضر الضيعتها شدة ورا شدة بسبب استهتاري واستخفافي
كلها فلوسنا ...دخل ابويا.....فلوس تجار .....المفروض باجر الصبح ابويا يروح يشتري البضاعة اله والجماعته الي وصوه وامنو بيه وحطو فلوسه يمه +
وهو ابنه الجبير بالمقابل شسوه ؟؟ خسر ...اي ابساطة خسر كل فلوسه على طاوله القمار وبكعده وحدة !!
شسويت بنفسك حيدر ... شصخمت .....
ابوك لو عرف والله يروح بيها لو جلطة لو يموت مباشرة !!!!
ظليت صافن افر بذاناتي اريد الكي حل لمصيبتي ومااعتقد اكو حل يبرد الكلب
اني انتهيت ....ضعت وضيعت اهلي وياي
****
شجابك لهيج مكان جواد !! همستها بداخلي واني اركز على وجه حيدر المصفر
اني ابدا ماحب القمار ولا احب اجي لهيج اماكن قذرة وتهجم بيوت الحمدلله اعرف الحلال والحرام
بس ....اخ بس من شفت ذيج البنيه واحوالي اتخربطت
مدري حسيت حيدر حيهور ويسوي شي
بداخلي انولدت غريزة الحماية تجاها
بس حماية من شنو وليش هشكل مشاعر منجرفه الها ؟
ليش هيه من دون البنات !!!
من راح حسين يسلم على حيدر البارحة واني جنت
اراقبهم من بعيد
شغت شلون حيدر سحبه بعيد من الطاولة الكاعدة بيها خطيبته ...وحقه والله ميلام ...الي مثلها لازم
تنحط ابوفيه مجيمه وينكتب عليها ممنوع اللمس او التقرب !!!
من اجاني حسين حجالي كلشي
عرفت هذي خطيبته وبنت عمه ...وعرفت باجر كطعان المهر ...... والاهم عرفت اليوم حيدر راح يسهر هنا !!
رجعت اركز على وجه حيدر المرتبك
اول مرة العب قمار ...واول مرة اشوف حيدر هيج مرتبك وخايف
علاقتي بحيدر متتعده علاقه صداقه بعيدة بحكم محلاتنا القريبه بالشورجة
اي احنا هم تجار ابويا عنده كومه فروع لبيع الزوالي والمفروشات بكل محافظات العراق
الشدات الخضر مرصوصه على الطاولة
كلها شدات دولارات ملايين ملايين الدولارات
كل عقله هذا جايب هلكد فلوس وياه وجاي يلعب بيهن ؟!
سحبت نفس وعيوني مركزة على عيونه واني اكوله ابرود
_ خلصت فلوسك حيدر وخسرت واني الربحت
جاوبني حيدر مرتبك ومذعور ميعرف شيسوي
- ماعاش حيدر يخسر هسه كلهن ارجعهن
رفعت حاجبي باستهزاء
- وبشنو راح تراهن هلمرة ؟؟؟؟ نصيحة لوجه الله روح قبل لاتخسر هدومك هماتين
ضرب ايده على الطاولة بقوة خلت كلاصات البيرة والقواطي نصهن يوكعن بالكاع
- كتلك راح ارجع كل فلس خسرته وهسه تشوف
سكتت مجاوبته بكلمة ....بس ظليت مركز على وجه
ماعرف شلون وليش خطرتلي هلفكرة
حجيت بهدوء بحيث خليت كل اصدقائه الجايين وياه يسكتون ويصير هدوء عجيب يعني لو ذبيت ابره بالكاع ينسمع الها صوت
- تركونا وحدنا
شفتهم شلون متصنمين بس يباعون علينا صيحت مرة لخ وبصوت اعلى يخوف
- كلت اطلعو وعفونا وحدنا يلاااااااا
وصدك بثانية وحده طلعو كل الولد والحراس وابنات من الغرفه .....بقينا بس اني وياه
والدخان المقزز يفتر داير مدايرنا
حجه حيدر بارتباك وكال
- ل..ليش طلعتهم ؟؟؟
ابتسمت باستهزاء وكعدت مسترخي بمكاني وجاوبت
- تؤتؤتؤ شبيك تخاف مني ؟؟؟ ماظنيتها بيك حيدور
- مو بالحيف حيدر يخاف ....حيدر ابو كلب الاسد ميخاف من احد افتهمت
سحبت نفس وهدات شويه وكمت اضرب بسبابتي على الطاولة وحجيت بهدوء
- حيدر خلينا نكون صريحين ....انت خسرت مبلغ جبير كلش ...واعرف نص للفلوس مو الكم .... يعني انت دخلت نفسك بورطة وسجن محتوم غير الفضيحة الي منتظرتك انت واهلك
انسحب الدم من وجه حيدر وعيونه جحظت وجاوبني

- دا اتهددني جواد ؟؟؟؟

- لا اهددك ولا تهددني ....بس عندي الك الحل وفلوسك ترجعلك
وبسرعة ولهفه كال ....وكانو لكه المنفذ او المخرج للمتاهه الضايع بيها
- شنو الحل ...احجي واني مستعد الكلشي ؟؟

استفزيته متعمد وكلت ..متاكد تكدر اتسويه ؟؟؟
دك على صدره وكال
- افا اني حيدر ومو حي للله
هزيت راسي وحجيت بثقه وعيوني تباوع عليه مثل اسد يراقب فريسته قبل لايهجم عليها وينهش لحمها
- خطيبتك
............