-لعد شتسمي

-اسمي قلة احساس ، ديار شبيج ترا مليت اتوسل منج الكلمة توسل اداري بالعيني و حبيبتي و حياتي، و كلمت حبي ما تطلع من حلكج

لو اجي هموم الدنيا على راسي ما تكليلي شبيك ، عبالج الاهتمام بس نظفتيلي ملابسي و داريتي جهالي و بريتي اهلي

-و شتريد انطيك بعد بشنو مقصرة

-مقصرو بالكلمة الحلوة محسستني انت هنا للخدمةو بس تنظفين و ادارين و ما ابالج تسمعيني كلمة حلوة و لا جنج مرتي ما طلبت منج تهتمين بيه ولا كتلج سويلي شي بس حسي حسي كولي هذا بشر

- احس بشنو كل الاكدر عليه جاي اسوي

-اكو شغلات صعب تنطلب لازم تسويها من ذاتج من اجي تعبان ما محتاج اطفيلي ضوا لو تاخذين الجهال مني حتى ارتاح، احتاجج انت تكليلي شبيك تعبان و احجيلج باعتبارج مرتي

اريد ادخل فد يوم و تتتلكيني بالهلا و الابتسامة الحلوة، ما الكاها منج

-هاي طبيعتي

-لا مو طبيعتج اني جاي احس انت مجبورة بيه الكلمة الحلوة تستحسفينها بيه بينما ويا جهال و اهلي تصيحيلهم حبيبي و عمري و حياتي ولج هذا اخوي احمد انت تصيحيله حمودي ووياي امجد ولا جني رجلج

ويا كل الناس لينة وياي جامدة ليش فهميني

من اكلج ليش تعبانه مو لان جاي اشك بيج بس الاشياء اللي انت ما جلي تسويها اليه اسويلجياها حتى بلكي اعودج و تتعودين على هذا الاسلوب

رايد احسسج اني رجلج مو واحد يصرف عليج لو متوليج .. تشكيلي تفتحيلي كلبج و انت مقوقعة روحج و مخليتني ابعد الناس عنج ليش

كلت الج اخذي الفلوس تعالجي كلت يمكن هالسبب بعده مسويلها عقدة بس طلعتي ما مهتمة فهميني شبيييج

... هو يحجي و اني كعدت عيوني تصب، بكلامة عرفت اني اغبى انسانه لما فكرت اذا اتزوجت راح انسى خالد و اعيش ويا رجلي عادي

هذا القرار خلاني اسلم جسمي و نفسي لزوجي و كلبي عفته معلك بأيد الانسان التركته و بسبب هذا القرار الغبي علكت نفسي بين السما و الكاع ..

لا اكدر اعيش ويا رجلي طبيعي و انسى ولا اكدر ارجع للماضي و احويه، مجبورة ابقى بمكاني هذا جامدة بين السما والكاع لا احساس و لا مشاعر.

من شافني ابجي و ما ارد، كمل كلامه لبس و طلع من الغرفة كلها، خابرت امي ابجي ، ردت عليه :- ها شكو تخابرين مو جوا
سمعتني ابجي غيرت نبرة صوتها :- شبيج صاعدتلج

سدت الموبايل و صعدتلي بساع، فاتت للغرفة اخذتني بحضنها و هي تكلي :- شبيييج

-تعبانه كلش ما اريد ابقى هنا

-شصاير ؟

-كولي لام امجد اخذيني يمج ما دام بناتهم موجودات

-هسه اكللها بس كليلي صاير شي

-نروح و اسولفلج

-بدلي و انزلي اني راح اكللها

بدلت و نزلت جوا، ام امجد تكول لامي :- خطية من الصبح تشتغل تعبانة

.. دايخة كلش ما اكدر اباوع اي احد بيهم راسي يوجعني ، صاحت على امجد كالتله :- مرتك تعبانة تريد تروح ترتاح ابيت امها شوية

باوعلي و كال :- خل تروح ترتاح

اخذتني امي و طلعت من البيت وصلت و بقيت احجيلها هو شنو كالي ، بقتوتلوم بيه و صوجج و شكد اوصي و حقه و الولد ماشي وياج مثل المي انس الفات عوفي دوسي على كلبج

هي تحجي و اني مدنكة راسي و افرك بيه من الوجع، كمت من يمها و هي تحجي

رحت حاولت انام مكدرت من الوجع مال راسي ، لهناك كعدت على صوت رافد و هو يضحك بصوت عالي، و امي تكله اش نصي صوتك

رافد :- منو موجود اصار و هناك شعندج عليه بعد

-ديار نايمة جوا

كال الها :- اهووو اخلص من الصغيرة تطلعلي الجبيرة

اخذها و صعد فوك بعد ما اجا براسي نوم بقيت فاتحة التلفزيون وكاعدة ، اندكت الباب كمت من مكاني، رحت فتحته طلع خالد ، اصطكيت مكاني لا حجيت كلمة ولا نطقت فاتحه الباب و مصتكه

خالد :- رافد هنا

بقيت اباوعله مجاوبت ،رفع ايده و هو يكلي :- هلووو رافد هنا

هزيت راسي بمعنى (اي)

-شنو الفار اكل السانج متجاوبين

-اي هنا
عفته ع الباب و دخلت، فات هو و يكول :- صعديلي كعديلياه

درت وجهي عليه :- مبروك الزواج

خالد :- شكرا الله يبارك بيج ، صعدي يلا

صفنت بيه، حجيت :- صيح انت ما اطيق اخوك و اصعد اصيحه

صاح :- رااااافد

ما جاوب رافد ، حجيت :- مو عروستك بالبيت شعندك طالع

خالد :- لا تدخلين بحياتي ديار يا ريت تبتعدين مني و تخليني اعيش حياتي براحة

صدمني بجوابه، بسرعه درت منه و رحت للغرفة
شكد وترني و استفزني جوابه هذا مو خالد شبيه هيج يحجي وياي

بقيت اروح و ارجع بالغرفة كلش ضجت و دموعي تنزل منه، اندكت الباب و هو مفتوح باوع :- رافد ما جاي يجاوب سويلي حسنه و صعدي صيحيلياه

بقيت صافنة بوجهه، كحيت، مسحت وجهي وردت افوت من عنده اصعد، لزم ايدي و كال :- احساس يوجع و يغث من تهتمين و تنردين مو، قيسيها كم مرة كلتيلياها و بعدتيني

باوعتله :- متأكد اصيحلك رافد ؟

- اجا دورج توكفين و تتفرجين و تشوفين الكبالج عاش حياته و ما اهتملج

-جنت راح اقتنع قبل ساعة ان انت تغيرت و ما عاد تهتم ، لو ما اجيت هسه

دنك و مشا للصالة، صعدت فوك دكيت الباب على امي ورافد، صاح ادخلي، فتت لكيتها متجيه ظهرها على صدره و كاعدة تباوع بالتلفزيون

طلعت من الغرفة بسرعة و اني اكله :- خالد جوا يريدك

كام بسرعة من عدها و نزل جوا، فتحت الباب على امي باوعتلها، كالتلي :- خالد على شنو جاي

-ما اعرف

-اكو شي

ما جاوبتها نزلت، امي واضح حبت رافد من صدك و قررت تبقى وياه لان مشاعرعا الشفتها لرافد ما جنت اشوفها كبل لا لابوي ولا لأي واحد مر بحياتها

نزلت سمعت خالد و رافد يحجون على فلوس بيت ورافد كاعد يبني ، رحت للغرفة هي نزلت وراي،

- تتعشين ؟

- لا ، رافد جاي يبني بيت ؟

- اي ليش

-الج لو لمنو

- الي طبعا، عليمن كاعدين بأيجار عنده قطعة ارض و دبر ٢٠ مليون للبناء و من ١٥ مليون و نريد نبني

-١٥ مليون منين جبتي

-سحبت قرض على راتبي

-قررتي تبقين ويا رافد لو مثل كل مرة

-انت شتكولين ؟

-جاي اشوفج حبيتي

-اي

- شنو البيه ينحب ؟

ابتسمت :- ما ادري بس الوكت مر بيه هواي، رايدة استقر ورافد خوش ولد ووكف وياي رغم يعرفني لا بيوم عيرني ولا بيوم كال و شحده اليجيب اسمي ويسمع احد يحجي عليه سد حلوك الناس كلهم عني
عصام عفته قبل لا هو يطلكني اختار عائلته و سيد جعفر اختار امه و ابوج بعمره ما حاسبته رجل ، رافد يختلف وكف بوجه الكل لخاطري
ورغم عندي راتب و سيارة يدفع ايجار بيتي و مصرفي و مصرف بتي واصل ليش ما اساعده ؟ هي المرة شتريد غير رجال يحبها بكول و فعل و اني شفت حب رافد بالحجي و بالافعال ليش ما احبه و ليش حتى العب عليه ؟

-الله يسعدكم

-و يسعدج يا يمه و يهنيج و ينسي گلبچ ، بعده راسج يوجعج

-ذبحني متت منه

-انطيج براسيتول

-ياريت

كامت راحت للمطبخ شوية و رجعتلي :- ديار

-ها ؟

-دورتج صارلها شكد ما نازله ؟

-ما اعرف ما اتذكر بس اعتقد شهر

-اخاف احمل و ائذيج بالحبوب ولج

-ما عندي لعبان نفس ولا ادوخ بس راسي

-ماما انت عايشة جو المسلسلات التركية هواية، اني جبتكم كلكم ابد ما صار عندي لعبان نفس ولا تقيئ ولا دوخة .. جنت بس ايام نساوتي راسي يوجعني خاف ولج طالعة علية و دوخة راسج هاي حمل مو تعب

-لااا لا تكولين هيج ما اريد

-يا فدوة مو هو ندوسله دكمة و نكله ربي رجعه ما نريد

-لا لا ماما ما حاطة الحمل على بالي عود صدك اصير حامل

-اوكفي خل اوصي رافد يروحلي لراس الشارع يجيبلج تحليل

-عاد لا تشهريني

-دكعدي هسه اجيج

كامت ورحت امشي وراها، راحت رافد كاعد ويا خالد :- اهلين خلودا كيفك

باوعلها :- هلا

-لعد وينها مرتك السورية ليييش ما جبتهااا

-كاعدة يم امي

ميعاد :-، باجر اجيكم و اباركلكم اليوم ما عرفنا منها شي

خالد :- شوكت خططتي و نفذتي بهالوكت توقعت احمد ما يخطب ب٥ اشهور

ميعاد :- و انتظر احد رحت خطبتها بنفسي و حجيت بالسالفة

-و شمقررة تسوين عالسالفة ؟

- والله لهسه ما عندي اي فكرة عود يتزوجون والله كريم ولو هاي العمصة مسجله كل البيت بأسمها

رافد :- شنو الموضوع يا فكرة يا بيت

سولفتله امي، و حجه خالد :- بالعشاير اخذيها

ميعاد :- عشايريش فدوة اروحلك هو اكوم و اكول عمامها و عمامها و هم عمامها خ***يه ما بيهم حظ بس الله كريم هسه بعد وكت خل تتزوج البنية

رفودة حياتي متكدر تروحلي لابو الصيدلي اللي براس الشارع تجيبلي منه تحليل مال حمل

رافد :- مال حمل ؟

-اي محتاجته

-المن ؟.

-احس بديوره حامل جيبلي هالتحليل حتى اتاكد خطية راسها ذبحها

خالد :- اني اكوم اترخص، اااا مع السلامة

رافد :- انتظرني اروح وياك

ما انتظر رافد بسرعة طلع من البيت ، اني واكفة برا اباوعلهم، رحت لامي ترا فضحتيني حامل و حامل منو كال هيج و حجيتي

-تعمدت احجيها كبال خالد لا فرحان بمرته جايبها و يهفي كبالج يقهرج انطيتها اله بكلبه حتى يكعد وزن

-و تروحين تكولين لرافد يمكن ديوره حامل حتى عيب

-بايكته و عيب شو طبي جوا انت

شوية و جابلي تحليل و انطاه لامي، ما حللت خفت رغم شكد لحت عليه امي ما اتجرات احلل خاف اطلع حامل، ثاني يوم حصرتني يم الحمام و سدت الباب و تكلي :- ما افتح اذا ما تنطيني التحليل بأيدي

حللت بسرعة بين خطين حمر ، يابة شكد ضجت و توترت ، طلعت الها خليت التحليل بأيدها باوعته و كال :- صلاوات على محمد ولج صدك حامل كللللللللللوش اروح ابشر رجلج

-عوفي لخاطر الله اسكتي

-يمه و راح يصير عندي حفيد عزااااا

اثار تمشي و تكللها :- شنو ماما شنو

-ولج راح تصيرين خالة يالجلحة

ما افتهمت اثار بقت امي تفهم بيها و اني رحت للغرفة حيل ضجت و انقهرت ، دراستي شغل البيت الجهال امجد شنو طفل يعني عاي عي عود اقبل بطفل
لا ما اريده

امي ما جذبت خبر خلتني ابدي و اخذتني لعيالي ، جان امجد كاعد و ابو امجد و خواته كلهم سلمت و كعدت

باوعلي امجد :- ها شلون صرتي

ميعاد :- ما بيها شي الدوخة من الحمل

امجد :- حمل !

ابو امجد :- صلاوات على محمد حامل صدك

ام امجد :- صدك الله عليج

-اي والله شكيت بدوختها ذكرتني بروحي بحبالتهم هم هيج ادوخ رحت جبتلها تحليل و طلعت حامل

كلهم كامو يباركولي و امجد يحضن بيه كبالهم ومبروك و مبروك و يركص بجهاله و يصيح :- راح يجيكم اخ لو اخت لفطومة ، انتم شتريدووون

اني ما الي اي ردة فعل، باوعلي و هو يسأل :- اخ لو اخت

-ما ادري

-شبيج شو ضايجة ؟

-لا بس دايخة شوية

-اصعدي، اني ما راح اطلع راح ابقى يم الجهال روخي ارتاحي

صعدت لغرفتي شوية بس ما جايني نوم بس راسي يوجعني ، نزلت يمهم حجت وياي امي :- تروحين وياي لبيت ام رافد ؟

-شعدكم ؟.

- نبارك لخالد و مرته نوصلهم رايحين اني و ام امجد و البنات لبسي و تعاي ويانا

-من كل عقلج اروح اباركله ؟

-براحتج

عفتهم و صعدت فوك انام، عمتي اخذت الجهال وياها، امجد من اخذت الجهال صعد يمي شافني الوب من راسي بقى كاعد يمي حاير شيسويلي ما بيده شي فركلي راسي شويه ووخرت من عنده بقى كاعد ع التفزيون، و اني اتكلب بفراشي

دك الموبايل مالتي، كمت و هو يكول :- اني انطيجياه

كلت اله :- لا هذا يمي، اخذته اباوع الرقم خالد
تخربطت احوالي، ارد ابتلي ، اترك يشك ليش ما رديت

كلت خل اعوفه ما ارد، باوعلي :- ردي

-صديقتي بالكلية عود بعدين احاجيها ما الي خلك

انكطع و رجع اتصل، باوع امجد :- جاوبيها خطيه خاف رايدة شي اجاوبها ؟

كمت من يمه و رديت :- ها عذراء

خالد :- شطلع التحليل ؟

امجد يمي شجاوب بقيت امتمت ، طلعت برا الغرفة و هو يكلي :- حامل انت

-انت شنو تريد تورطني امجد هنا

-امجد هنا موو

-شرايد مني

سده بوجهي

رجعت للغرفة هم زين امجد ما شاك بشي، باله يمي اذا راسي بعده يوجعني ، طفيت الموبايل كله و تمددت

....... من بعد هذا الاتصال
خالد غاب عن البيت يوم كامل
اهله جانوا قلقانين عليه و مرته تسأل عنه
و ضحى شادة وياها و مستغله غيابه
اجا ابو رافد يشكي خالد يم ابو امجد و محتار بيه
ثاني يوم راجع ماخذ مرته السورية و راجع للاردن
مبقى هنا

.... الكل يكول انو ماخذها على حب ، البنية عاجبته و متزوجها بس اعرف الحقيقة شنو خالد اللي اعرفه معقوله بلش بعلاقة جديدة و نسى ؟
ما اعتقد

... مرت هاي الفترة
ايام النساوة جانت ثكيلة دوخة حيل و ما اشتهي من الاكل غير الطرشي ، لدرجة امجد كام يجيب دبات دبات مال طرشي بس حتى اكل لان الزاد مو كلش احبه ما عندي شهيه ، اكعد من الصبح اكل طرشي

... عمتي طلبت مني السلفة تاخذها تزوج بيها احمد تنطي لام الحصة فلوس و تقنع المشتركين يقدم الاسم و تستلم ، وافقنا اني و امجد و اخذت السلفة
هم ٥ ملايين يطلبونا و خمس النا فهي اهذتهن كلهن و كالت من يصير عند ابو امجد يرجعهن لامجد و تتطوهن للدين

امجد اخذ غرفة نوم تركية لاحمد على راتبه بالتقسيط
و انطيناه غرفة مها و غرفة احمد الصغيرة بقت اسامة يكعد.بيها من يرجع من الشغل
رتبتها اله و اشتريتله سرير ابو النفر و كنتور ابو البابين و نظفتها سويتها تخبل اله حتى يرتاح بيها و يفرح

هاي الاحداث جانت وكت امتحاناتي لان يريدون يزوجون احمد ورة العطلة مباشر

جنت من صدك اجاهد منا البيت و الجهال و الدراسة و الحمل وتحضيرات العرس من صدك طلعت روحي لحد ما كملت ورا العرس الامتحانات مباشرة زوجنا احمد
راح هو وياها لأربيل هناك شهر عسل يتونسون

هنا امي بدت شغل ..
راحت لبيت حليمة حاجية وياها على ورث مال سلمان
، حليمة متخبله :- ما الها ورث يمي و شعدكم عليه و منيلها حصة و سلمان مات و بتج اتزوجت و ما الها يمنا اي حق

كايلتلها امي :- انت هم اتزوجتي على اي اساس تاخذين بيت ابو سلمان و تكعدين بيه انت ورجلج
شنو نسيتي من جنت اموته سلمان المرحوم جوع نسيتي من تكتلينه و اطردينه بالشارع
لا برد يكتل ولا خر يذبحه ما تحمله المسكين ع الرصيف من وراج حتى جان يكول تكهربني ومحد يصدكه من وراج تصيحيله المرعوص المرعوص و مشيتي عليه هاللقب وخليتني الناس ما تصدكه بكلشي يحجي

حليمة :- سلمان ما اله كل حق بالبيت و هو مات و ماتت حصته وياه ربع ما اله

ميعاد :- لا والله حبيبيه اله حق و الحق الاكبر بعد بتج الها نص حقه و انت ربع و هو اله الحصة الجبيرة على اي اساس اموتتها ابطنج بتي التشردت بيه و بتي الاحتارت بمرضه و من دكتور لدكتور و من مستشفى لمستشفى .. دارته و حتى جانت تشيل من جوا اني جنت اروحلها و اشوفها بعيني هي الجازته انت شجازيتي و تاخذين حقه ؟

حليمة :- البيت بيت بتي و ما انطي منه طابوكة

ميعاد :- اذا بيت بتج كليلنه نروح لبتج ناخذ حقنا منها و اذا يمج حقنا منج نريده

حليمة كايمة متعاركة ويا امي و تصرخ ما الكم حق يمي بالقانون البيت بأسمي و يا حايط يعجبج ركعي راسج بي البيت الي و ما انطي لاحد ..

طالعة امي منها و كايلتلها :- بسيطة سهلة ان شاءالله

قانون ماكو و عشيرة ما بيها خير، ماخذه رقم ابو و مخابرته :- الو

اسماعيل :- الو منو ؟

-اني ميعاد اسماعيل

- ها هلا ميعاد خير اكو شي

-اي اكو شي بتك الها حق و حقها ضايع بالقانون تكدر ترجع حق بيتك لو مو زلمة و اطلعه

-احترمي روحج شنو هالحجي

-اسمع اسماعيل سلمان تعرفه و تعرف بيت ابوه و بتي جانت مرته و هي الشافت و تعذبت وياه ، حليمة مرت ابوه مسجلة البيت بأسمها وكارصة بيه هي ورجلها وتكول بتج ما الها حق يمي تقبل حك بتك ب٤٠ مليون يروح لحلك حليمة العمصة تكدر ترجع حق بتي لو اشوف غيرك

اسماعيل :- خليها يمي اني احلها

عافت السالفة امي على ابوي، يومين و واصل تهديد لبيت حليمة ( ورث سلمان من حق ديار يرجع خلال اسبوع واحد بس وراها لو ما رجع تلكون روسكم بصفحة و الاجساد بصفحة )

هنا ابو رافد انضرب على راسه تهديد ووصل مرته وروسكم مو راسج يعني هو مجموع وياها ، جاي لعمي يرجف ومنطي التهديد

اجتمع رافد و امجد و عمي و خالد بالبيت و كلها تكول منو اليهدد ، سألوني كلت الهم ما عندي اي علم بالموضوع اجت حليمه و كايلتله :- بس ميعاد الفاتحتني بورث سلمان و كالتلي بسيطة يصير خير التهديد منها

رفع رافد الموبايل على امي و كال الها :- هسه تجين لبيت عمي فورا

ربع ساعة و اجت امي كعدت كبالهم و حليمة تصيح :- هي التهددني والله ماكو غيرها

ميعاد :- شعندي يمه مافيا و اهددج شصاير

انطو الورقة لامي، ضحكت الهم و كايلتلهم ما ادري عن هاي الورقة ديار الها حق بالبيت من حق سلمان و اني طالبت حليمة ما انطتني خابرت ابوها و كلت اله حق ديار انت الترجعه

هم سمعو ابوي و خرطو العافية ..
هم يعرفونه ارهابي و الشرطة ما كدرت تلزمة لا وصار بالدولة ضابط و دمج و اهل الدمج كل الشر منهم و من اديهم منو يكدر يواجهم

لان ضباط الدمج اجو عن طريق واسطة احزابهم
لا دارسين ولا فاهمين عن طريق الاحزاب صعدوا للدولة حتى يخدمون احزابهم .

يا عمام و يقانون يكدر لواحد مثل ابوي مجرم
حجو ويا امي كالتلهم ما ادخل اني حق بتي يم ابوها و هو اللي يرجعلها حقها مو هي اكلت حقها و سجلت البيت بأسمها خل تواجه اسماعيل لو تكدر

حليمة تصيح :- اي اواجه و لو اعرف اموت والله ما انطي ربع

ابو رافد كايل الها :- اذا صدك ما تنطين اني اطلكج و اطلع منها ما بيه حيل اواجه اسماعيل ، لا اكدر احقه بقانون و لا اكدر اجيه بعمام و اني عندي ولد و احفاد اخاف عليهم

حليمة :- اي طلكني بس ما انطي ولا طابوكة من بيتي ولا اتنازل و اني اروح باجر للشرطة اخليهم ياخذون ديار و امها

ميعاد :- ههي لا صدك والله خاف ما عندج تريدين اجي وياج خاف تستاحشين بالطريق

هاي متخبله شلون امي تكللها هيج و تصيح :- تريدون تبوكوووون فلوسي حراااااامية تريدون تاخذون بيتي

كام يصيح عليها ابو رافد و شاحتها ، فاتت ام رافد للمطبخ ، و كالت :- ها ولجن هااا

باوعنالها :- ها

- خايب هو و خايب هو

ام امجد تصيح :- خايب هوو

-العمصة و طلكوها
خايب هوو
وفلوسها خذوها
خايب هوو
و من بيتها طردوها
خايب هوو

وصلاوت على النبي و عموصة صارت لبلبي
وصلاوات على النبي عموصة صارت لبلبي

وكامت تهوس بنصنا و احنا نصفك و نضحك وياها خربنا ضحك و الزلم مخبوصه بالاستقبال حايرين بالتهديد سمعوا صوت الركص و الهوسات

صاحو :- شنو هالركصصصصصصص

ام رافد :- صخام الصخمني وخرن ولجن خل اشرد البيتي لا الحك العمصة
ركضت كدامنا و احنا طكيناها ضحكة ....

☆☆☆☆☆☆

#اتمنى_ان_افعلها


الحلقة_43

ليتني استطيع ان اجعلك بقربي كما انت بقلبي 🖤
ليتني ....

.....

جانو كاعدين كلهم بالاستقبال و متوترين و ضايجين من التهديد و من حليمة اللي ما تتنازل، صاحلي امجد جنت كاعدة ويا النسوان بالمطبخ ، كمت رحتله

دخلت حجه وياي ابو امجد :- تقربي بنتي

كعدت كباله يم امجد، حجه :- انت راضية باللي جاي يصير ؟

-يعني شلون

-بتهديد ابوج

-اني ما ادري عن ابوي شي ولا مخابرته ولا كايلتله رايده ورث حتى بالتهديد ما واضح اذا ابوي المهدد لو لا

-مو امج كالت طلبت من ابوها يطلع حقها

-اي بس ما كالت هدد و لو ما استبعدها من ابوي بس هم ما اعرف بيه اذا هو او لا لأن ما متواصلة وياه

ابو رافد :- بس انت اتزوجتي عمي و ما الج حق بعد بالورث يعني هم لازم تفكريلها هاي

خالد :- و اذا تفكرلها فحليمة هم اتزوجت يابه شلون راضيلها تاكل حق سلمان

-اي غير سلمان مات

خالد :- احجي حق الله يابه من هو جان عايش الله يرحمه و هي موقعته على التنازل لو مطالبين بورثه على زمانه جان عاش ملك و يمكن حتى متعالج و ما ميت هسه، مو عاش عمره متشرد سادة بكربله يتفضلون عليه و يكعدونه و هو عنده ورث ب٥٠ بليون حق هذا

ابو رافد :- هسه شلون كلولي شلون احلها، ديار ما تتنازل و ام رغد ما تتنازل شلون انفكها

ديار:- عمو هي مو قضية ما اتنازل بس ما طالبين منها حقها ولا ماخذين من عدها حرام، الي حق يمها تنطينياه ما الي حق ما اريد منها شي

ابو امجد :- تريدين الحق عمي لا شرع ولا قانون الج حق

ديار :- لعد ما اريده

خالد :- شلون ما الها حق ؟ عوف الشرع و القانون على صفحة ، من عاشت وياه مشردة و تعبت عليه و سنين هي تخدمه ما الها حق، و حليمة الجانت اتطرده و تكرهبه الحق الها انت شلون جاي تحكم يابه

ابو رافد :- خالد ابني بس من رخصتك لا الك ناقة بيها ولا جمل عليش محروك

-يابا ديار اني زوجتها بأيدي السلمان و اني الطرحت عليها فكرة الزواج و اني الخليتها تاخذه و تشرد الكربلاء و من زوجتها جان ابالي سلمان ياخذ حقه و تعيش بجال سلمان .. و صفت لا قانون و لا عشيرة تالي تعلعلت بيه و تنتظر اللي يدك بابها و يكللها من مال الله و يتصدق عليها احجي حظك و بختك عمي مو جانت تجي هنا احنا نلم الها و ننطيها نساعدها لو لا

رافد :- خالد عوف الموضوع

خالد :- لا مو جاي يحجيلي حك، حك حليمة تخليه بهالحالة و تاخذ العنده و الماعنده في حين جان المفروض ديار تعيش مدلله هي ورجلها لو ماخذين حقوقهم

تريد تحجي كلمة الحق زوجتك باطله و ماكله حق
احجي

حجا هالكلمة و كام طلع من الغرفة
كلهم تضايقوا من كلامه امجد كاعد ضاج كلش و هو يسمع خالد يطالب،امي واكفة بالباب، حجت :- يعني هسه انتم كدرتكم على بتي اتنازلي حتى حليمة تلف الاول و التالي ابطنها من شنو خايفين ؟

ابو رافد :- احنا نخاف على اولادنا يا ام ديار ما الك حيل مشاكل

-محد هدد ولدك ولا هددوك بس اذا ما رايد تتأذى لو تضغط على حليمة تتنازل لو تعوفها وحدها الا بأي حق تاخذ البيت و تعي

ما قابل بالكلام كام من المكان و هو يستغفر ، طلع امجد صاح ، رحت وراه :- منين اجتج سالفة الورث هاي ؟

-امي فكرت بيها

- ما النه حيل مشاكل حليمة تريد تنطي تنطي ما تنطي ختولي

-اني لا طالعة و لا مطالبتها امي و ابوي اللي جاي يطالبون بيه

-و خالد مهتم اكثر منهم

-المضوجك بالموضوع خالد ؟ ترا خالد من يوم يومه مهتم بموضوعي اكثر مني من جنت بنية و انت جنت زوج بت عمتي الف فضل عليه لو ما هو جان ابويه مزوجني لواحد ارهابي صديقه و كاتل سلمان هو اللي بيده طلعنه وما عافنه ولا لحظة جان يتعنى كربلاء خاف محتاجة شي و ما بطل يسأل لو يعوفني بيوم محتاجة هسه ابتعد لان انت جاي تتحسس منه

عافني احجي و صعد ما راد يسمع الباقي

اجت يمي امي توصي بيه ان :اسكتي لا تحاجين احد شما يحجون وياج اسكتي احنا نتصدى للحجي مز تحجين كلمة يحسبوها عليج خليني اني الاحجي

- بس خالد ما جاي يسكت شفتي من حجه كلها ضاجت

-ما حجه غير الحق هم المو حقانيين معليج انت بس اسكتي ويجيج الصافي

.. ابو رافد وولده راحو لبيتهم و خلو الحجي على ايد عمي ابو امجد و ابو امجد كعد ويا امي راد يقنعها يسدون الموضوع مو وكته و المرة مريضة تالي امي لبكته بالكلام و سكتته ، كام و كال بعد ما ندري بس السالفة هاي كلها اني ما راضي بيها

مرت ٤ ايام هدوء ماكو شي ع السالفة
الكل ساكت ..
رجع احمد و رغد من اربيل ، استقبلانهم و بيومها امجد كالي لا اتطبخين لان تعبت بالتنظيف و الجهال و بطني جاي تكبر كال راح ادز غداهم دجاج مشوي من برا و

سوينالهم سفرة شطولها ، بس رغد محملة عليه ضايجة مني على سالفة امها، كملت كل السفرة و تقدموا، و كعدت يم امجد جان تكول رغد :- نسيتي الخبز ديار كومي جيبي

امجد باوع كال الها :- بطنها خطية ما بيها تكوم

كلت اله:- اني اكوم ..
ما قبل راد هو يكوم عني
عمتي كعدتنا اثنينه و هي راحت جابت
احمد يخزر برغد و يهمس بأذنها و هي تكله :- شبيك عمري حامل مو فد عجبه ذوله الاجانب بالتاسع و هن يلعب رياضة ما عليها شي لو كامت

امجد :- اكلو يابه كولو بسم الله
... راد يقطع الكلام لان اول دخلتها ، هي ضاجت عافت السفرة و كامت

احمد صاح وراها بصوت عالي :- رررررغد رجعي كعدي

ابو امجد :- عوفها ابني شنو القضية لا تصيح

احمد :- يابه تتزعل هواي

ابو امجد :- ميخالف ابني بعدها جديدة ع البيت و مستغربتنا على كيفك وياها

ام امجد :- على مود الخبز ضاجت شبيها ؟

احمد :- عوفيها يمة لا تشغلين بالج بيها

ام امجد :- على كيفك وياها وليدي بعدها عروس

امجد ساكت مراضي بالوضع حاط الجهال بيناتنا ساعة يحط دجاج كدامي حتى اكل و ساعة يوكل بجهالة ، سوالي حركة بوجهه بمعنى ( عوفيهم اسكتي)

ما اشتهيت اكل، نقشت على الاكدر عليه و كمت للمطبخ، ورحت للمطبخ كملت تنظيف و هم كلهم بالهول مجتمعين

نزلت رغد :- اسمعي هنا مو عبالج من تالي جاية تريدين حق من امي و تاخذين بيتنا فلس احمر ما الج افتهمتي

باوعت بوجهه، كلت الها :- ماشي
اتنرفزت اكثر دفعت سلة الخواشيك ع السنك و طلعت من للمطبخ

اجت عمتي :- شكو شنو هالصوت ؟

-ضايجة على امها عوفيها

-هذا اول يوم الله يستر من تاليها والله يربي اكره المشاكل و ما احبها ابيتي و خايفه هالبنية لا توجع راسنا

-تتعود على طبعا

صعدت لغرفتي، فتت امجد حاط فطومة بحضنه تمددت و هي تمسح على بطني و تكول (هنا اخوي )
ابتسمت الها و امجد تمدد يم بطني و بقو يمسحون عليها و يبوسون بيها هو و بته و اني ابتسم الهم

سحب نفسه و اجا يمي اخذني بحضنه :- شبيج عمري ؟

-راسي

-اي ارتاحي لا تنزلين ترا والله امي ما تحجي

-مو على حجيها بس خطية رجليها كوه يعننها ع الوكفة مو مال توكف تنظف و تغسل

-ميخالف لبين ما تعدي هالفترة

هزيت راسي و فطوم تشبك بيه و تبوس بصدري و تكول ( احبج و الله احبببببج ) ضحكت و بست راسها
سحبتها لحظني ، حظنتها و نمت و امجد حاضني من ظهري، تالي كل احنا غفينا

اندكت الباب فز امجد فتح الباب، اثار و سارة يلبكن بالحجي الافتهمه منهن ان ابوي جوا جاي

كمت بسرعة من فراشي و نزلت للاستقبال ابوي كاعد عمي ما جان موجود طالع بس عمتي و ما كاعدة يمه

نزلنا اني و امجد ، باوعته كاعد لو بودي ازوع من اشوف خلقته شكد اتضايق و يضيق صدري بشوفته

بدون سلام كتله :- شرايد جاي

امجد سلم عليه و كعد و اني بقيت واكفة ، حجه ابوي :- اني سألت على البيت مال سلمان و قدرت سعره عد واحد .. يطلع حق سلمان منه ٨٠ مليون مو ٥٠

-عوفه ما اريده لا تدخل

-ما ادخل شنو مو تريدين حقج

-حقي بأية الناس ما اريدها المرة مريضة و دازلها تهديد ماتت صار بيها شي منو يتحمل

-اسمعي لج اذا انت ما تريدين حقج فأني حق بتي ما اعوفه

-هسه صرت بتك و ادور حقوقي بس هو مو صوجك صوج امي الدخلتك بالسالفة

-غصبا ما عليها تنطيني من البيت ٨٠ مليون ٢٠ الي اني هم ابوج و ٥٠ الج تصرفي بيهن

-ما اريد حق ولا اريد تجيبلي فلوس اطلع منها

-مو بكيفج هاي السالفة بعد ما اعوفها

-انت ما ميت عليه ميت على الفلوس الا انت من يا وكت حاسبني بتك تريد اذكرك بذيج الايام لو لا

ظل يصيح عليه وراد يرفع ايده، كام امجد سحبني منه و صار كدامه و هو يكله :- العفو خليتك تحجي وياها و ما ادخلت بس ما اسمح ايد تنمد على مرتي و ابيتي كاعد على ابساطي ما اريد اطلع عن اخلاقي بس ياريت تعوف ديار و تعوف سالفة ورثها احنا نحلها

كام ابوي من مكانه يصيح علينا و يهدد و ما اعوف حقها و اله اخذه و اسوي و افعل لحد ما طلع من البيت

امجد :- يسالفة الورث الطلعت النا من تالي والله هالورث هذا راح يسويلنا مصيبة رجال مات و شبع موت متذكرين شنو

يحجي و يقصدني بالكلام بس ما يحجي وياي مباشر كام يصيح و طلع ، كعدنا اني و عمتي بالاستقبال نحجي

نزلت فطومة و بيدها الموبايل مالتي يدك، كمت الها بسرعة، باوعت الرقم خالد اخذت الموبايل و صعدت فوك

رديت :- الو ها خالد

خالد :- ابوج شعنده اجا ؟

-رايد ورث

- هه

-تضحك هي كل هالسالفة طلعت من وراك انت التذكرتها

-اي والله عمي صح كلها من وراي، اسمعي حق سلمان لا تتنازلين عنه

-ولو اذاها للمرة ؟

-ميصير عليها شي هو انطاها مهله و خوفها ، اذا تخاف على روحها خل تنطي و اذا بايعه روحها علمود الفلوس بعد.هي الكاتله روحها على هالورث محد كاتلها

-خالد هالحجي يخوف والله اني ما الي خلك مشاكل

-ابوج لا تتصادمين وياه و هي المشاكل ما تجيج

- ما تصادمت وياه بس هو يريد حق من الورث

-شكد ؟

-يكوله حقه ٨٠ اخذ ٢٠ والج ٥٠

-هو صح اني هم سألت على سعر البيت و طلعت حق سلمان من الورث ٨٠ مو ٥٠ ولا ٤٠

- كل السالفة ما مقتنعة بيها

-يربج لتقتنعين اكعدي بمكانج و حقج يجيج و ابوج لا تتصادمين وياه اءا ما تريدين مشاكل اني بالباب من سمعت صوت صياحج وياه هالشي مو من صالحج ديار

-غير نرفزني هسه عرفني بنته ويريد حق

-عار نعرفه بس عار و يطلع الج حقج هلا بيه، اني راح امر على امج اكللها الحجي حتى تخابر ابوج تفهمه ، و انت روحي هسه لان امجد دخل للبيت لا يشك بأتصالج امشي

- اذا تخاف عليه يشك ليش تخابر

-مخابرج متغزل بيج اني شبيج فوك ما رايد حقج، امشي روحي هسه خل اروح لامج

سمعت صوت امجد جوا يحجي ويا امه كلت اله :- ليش مصر تاخذ حقي ؟

-لان اني وعدتج من كبل لا ازوجج سلمان حقج من ورثه يرجعلج اتزوجتي و شبعتي ضيم وياه بس ما كدرت للورث هسه صارتلي الفرصة .. مع السلامة

سده بوجهي، تنهدت :- يالله هالحق هذا اللي الكل يطالب بيه و كاتل نفسه عليه ما عداي

درت وجهي لكيت رغد واكفة تباوع و تراقبني، عقدت حواجبي :- شبيج

-امي اذا صار بيها شي محد يخلصج من ايدي

-اسمعي رغد اليوم اجيتي لهنا و محترمتج عروس و ساكته من تقللين احترامج اوكفج و ما اسمحلج افتهمتي مو انت التهدديني

رغد :- سهله

نزلت جوا امجد كاعد ، سألته اذا يحتاج شي كال :- لا ما اريد

-كوم طلعنا اني و الجهال ضجت من البيت، خلصت الجامعة و صار عرس احمد هلكنا من التعب و من سافرو لليوم ما طالعين مدام عطله و اليوم اجو كوم طلعنا

حجيت و فطومه كامت تكمز كدامي وهي تبوس بابوها حتى ياخذنه و الجهال يتراكصون، كال :- امشي اطلعكم اونسكم برا

صعدت بدلت للجهال بسرعة و نزلت
عمتي كاعدة كلت الها :- كومي ويانا

شفتها بنفسها تطلع بس ما تريد تخرب طلعتنا لان بس اني و امجد كامت تتحجج بمرت احمد جديدة و عيب

كومتها غصب عنها و كلت الها :- ما نتأخر و رجلها يمها
طلعنا و هي كعدت بالصدر و احنا ورا

مرينا من بيت امي، سيارة ابوي بالباب ، حجه امجد :- هو رافد موجود و ابوج داخل للبيت

ما رديت لان لفت نظري خالد واكف بالمحل بس ظهره للشارع ما منتبه النا ، بقت عيني معلكة لحد ما عبرنا المحل شلت راسي لامجد حتى اكله :- ها
لكيته مركز بيه

اني غبيه ما تلامي بيه امي من تكول اتجيبين الشك لو طار لسابع سمه عيونج يفضحنج

كلت اله :- وين راح تاخذنا

- ما رد .. بقى مركز بطريقة

كلت اله افتح :- اغاني خلي الجهال يتونسون و يركصون

شغل الهم اغنية كلب كلب الجهال تموت عليها هالاغنية كانما نشيد وطني عدهم حتى حسوني و حساني يصيحون بسبس ميو

نزلنا بمتنزه العاب هو اخذ الجهال يلعبهم و اني و عمتي كاعدات لا اني بيه افتر ولا هي رجليها يعننها
بقت تحجي وياي و تكلي :- من ماتت مها جنت شايله هم لهالجهال و حيل انقهرت عليهم بس هسه كلش مرتاحة من اشوفهم مرتاحين وياج و مداريتهم ما محسستهم بغياب امهم

-هي وصتني بيهم و اساس زواجي من امجد همه .. شلون اعوفهم

-ميخالف بتي حتى لو هم بس امجد هم يستاهل الاهتمام منج هو مرات يحجي وياي بس اني ارده اكله تعبانه حمل و جهال و بيت شتصير لا انت عليه بس الصدك هو هم خطية ما رايد غير كلمة الحلوة منج لا تبخليها عليه الحبيبي و الحياتي ما تخسرج لو حجيتيها اله و هو يتمناها منج

-ان شاءالله

-والله يا بنتي ما رايده من الله غير يصفي كلوبكم و يخليكم كلب على كلب ساعتها لو متت اني مرتاحة

-عمرج طويل خالة

اجا امجد كعد يمنا :- شمشتهيات اجيبلكم ؟

باوعتله :- مو كانك صرفت هواي اليوم

ضحكو اثنينهم : اي غير لخاطركم قابل صارف على منو اني

-ونهاية الشهر رحمة الله والديه اليدايني خمسة مو

-هسه الله كريم منا لنهاية الشهر قابل كاعدين بالشارع
عود نكسر قاصة امي و ناخذها

- خو حطيت عينك على هالقاصة

ضحكنا اثنينا ، كالت :- الله يسعدكم يمه قابل كاعدين بالشارع تخلصون احنا موجودين

بقى هو يتغزل بامه و راح كام جاب الجهال و اشترالنا لفات همبركر
كلت الها :- خل نكوم مرت احمد جديدة لا نطول

كمنا كلنا و هو شال ولده التوم على اجتافه وراح يجيب السيارة من الكراج و اني و عمتي و فطومة نمشي على كيفنا

جاي نعبر الشارع اجت سيارة سريعه اني سحبت فطوم من ايدها و ركضت بسرعة .. السيارة اجت بقوة داست بريك صار صوت قووووي راد يوكف ضرب عمتي كبل لا يوكف

انشمرت لهناك صرخت و ركضت الها نزل السايق يركض ، وجهه مضروب بالكاع الدم كام ينزل على وجها و هي كوة تحجي :- ولك يمة امجد يمة امجد

اباوع وجهها تخبلت كمت اصيح بالشارع :- امجددددد ، خالة احجي وياي باوعيلي ، امجدددد

التموو الناس عليها هي بس تردد امجد و امجد اجا راد يشيلها رجال ينقلها امجد اجا يركض من بعيد كام يصرخ و يصيح

هي ما فاقدة الوعي بس الدم اللي على وجهه رعبنا شالها امجد و ركض للسيارة ركضت وراه صعدها و خليت الجهال ليكدام و صعدت يمها
داسلها و هو يصيح و يغلط و ما خله حجاية ما كالها
اني ساكته ما رديت عليه اي كلمة الوم بروحي شعندي طلعت و شبيه و لو ضاله بالبيت مو احسنلي
مو تني وجوه طلعه و جه راحة الله غاضب عليه ما تهنيت بشغلة بحياتي ابد

وصلنا للمستشفى هو نزلها و اني بقيت يم الجهال ما فتت وياه، هو خابر اهله بالسيارة بس رجعت خابرت عمي، يصيح بأذني شلون و شلون ما افهم بيه و هو يصيح فقد عليها .. انطيته اسم المستشفى و سديت الخط

السايق اللي دعمها اجا صف سيارته و كال :- يابه اني خساركم والله بس والله ما جزت قاصد هي طلعت بوجهي

-الله يا طلعت بوجهك غير انت اجيت طاير

-هسه خوية اني شسوي

-شمدريني زوجي فوك هو يتفاهم وياك

ردت ادخل للمستشفى رجال يصيح :- خوية هاي السيارة الكم ما يصير توكف هنا

بقيت اشرحله حادث يمعود حادث و هو قفل ما يصير و ما يصير .. شوية و اجا احمد سابق ابو امجد ، صاح :- امي وينها شصار وياها احجي

الولد لزمه هاي السيارة الكم
احمد يصيح يريد يفتهم مني و هذا لزك اله .. طك وياه كام يصيح عليه ، كمت افرك بوجهي عفتهم و طبيت
المستشفى جبيرة اضيع وين امشي ما اندل بس دموعي تتجارة و اني الوم بحظي

كعدت الجهال ع المسطبة و كعدت ابجي وحدي فات احمد من عدنا و فات جوا، اباوع الناس تروح و ترجع ذكرت و جه الخنزير ابوي بس يطلع بوجهي تصير مصيبه عساني لا شفته ولا اجاني

اجا ابو امجد يركض شافنا صاح :- ها وينهم ؟

-ما ادري فاتو جوا ما دخلت الجهال

عافني و مشى كمت اخذت الجهال و مشيت وراهم نوب الجهال تعبوا التوم نطو من البجي اشيل واحد يصرخ اللاخ و فطومة نعست هم كامت تنغوص ، خابرتني امي فتحت خط كلها تصرخ حتى اني ابجي وياهم

-شبيج ديار الحادث وياكم لو بس عمتج شبيج تبجين ولج ابدال ما تسكتين الجهال تبجين وياهم

كمت اغلط على روحي اني فكر اني مفكورة من يوم الجبتيني ساعة السودة الاجيت بيها لهالدنيا لو عايفتني بالزبالة و ما مرجعتني اشرفلي

و هي ترزل بيه و تكلي بس خل افهم علعلتيني يمه
سديت الخط منها و اني ابجي، سألت الاستعلامات على عمتي وصفتله الحال حادث و هيج شي

دلاني على مكانها اخذت الجهال و مشيت امجد كدامي لكيته اخذ مني واحد من جهاله و اني ابجي هو تعبان كلش ، كال :- كافي اسكتي منا الناس

-شلونها عمتي

-زينه خيطو الجرح البراسها ٦ خياطات و بس رجلها حولونا ع الاشعة هسه راح ناخذها

-الجهال تعبو لازم نرجع للبيت

-هسه احمد ياخذكم

صاح على احمد كاله مرتك جديدة لا تبقيها وحدها ارجع و اخذ وياك عائلتي

وكف السايق الدعم عمتي :- خوية امانة الله ورسوله شتحتاجون خابروني اني رقمي انطيته للحجي

امجد :- روح خوية توكل قضاء و قدر هذا الشارع بس ادعيلها بالسلامة

بقى يتشكر منهم و راح كلت اله :- ليش عفته يروح ترى السبب من عنده جان طاير

-شنسويله هذا قدرها ما نريد مشاكل امشي ويا احمد و ديري بالج على نفسج و الجهال

اخذت الجهال و رجعت ويا احمد للبيت، لكيت خالد و ابوه واكفين بالباب ، اول ما نزلنا من السيارة صاح خالد بأحمد :- مو نخابر رحمة لدينك محد منكم يرد بيا مستشفى انتم

احمد :- زينة يمعود بس راح يفحصون رجلها بس زينة ما بيها شي

باوعلي :- انت زينة شصار وياكم وكتها يعني الا اطلعون

دخلت جوا هو فات وراي :- شبيج تبجين انت متأذية شلون صار الحادث

-لا بس حظي فكر ما تهنيت بشي بحياتي تضايقت من ايوي كلت اطلع تالي انككفخت بوجهي

-فدوة المهم سالمين

ابو رافد لزم احمد يحقق وياه و يسأله و خالد فات جوا يطمن علية ، كعدت بالهول ما اكدر اصعد بعد .. انوم بالتوم اخذ من عندي واحد و كال :- راح اصيح بتول تجيج

ما رديت عليه اخذ حسوني وراح ، رغد نزلت :- ها شصار ويا عمة

-زينة

-كله صوجج لو ما طالعة ما يصير ويها هيج خطية هيج احسن يعني شستفاديتي من طلعتج

-اكلج تروحين من عندي لا والله ابتلي بيج اليوم جايه و السانج شطوله ما الي هلكج روحي عني

-شنو كاعدة ابيت ابوج و تكليلي اليوم جاية ترا جاية لبيت رجلي ما جاية لبيتج

فاتت امي و هي تسمعها :- بت العمصة بدال ما السانج هالطوله شيلي الطفل عنها و ساعديها الخبث يجري بدمج و بدم امج

شالت عني فطومة و هي تنوم بيها و كعدت يمي :- شلونج باع حظي الوجه انخرط من الخوف شصار وياكم

-تعبت بس اريد انام دخت

-اصعدي عوفي الجهال اني و اثار هنا روحي

-ما بيه اصعد
فاتت بتول تسأل و خالد و ضحى اجو وراها، تمددت ورا ظهر امي ، فات ابو رافد و احمد و ام رافد اجت

كلهم يسألون بأحمد و يخابرون بعمي كال الهم ماكو داعي تجون كسر برجلها و صبيناه و راح نجي

اني مغمضة عيوني من التعب و من دوخة راسي، فتحت عيني صدت بعين خالد دار وجهه مني و هو يتنهد
رجعت غمضت راسي ذبحني من الالم

حجيت ويا امي بصوت ناصي :- شحجه وياج ابوي اليوم

دنكت راسها حتى تسمعني، كالت :- بعدين نحجي ارتاحي هسه، فطومة نامت راح اوديها بالغرفة

كامت ، اني كعدت لان كلهم كاعدين مو مال اتمدد كبالهم، حجه خالد :- ما تروحين تنامين شمكعدج هنا

بتول :- تريدين اساعدج

هزيت راسي و كمت وياها، ضحى مركزة بيه و تسولف ويا رغد ، فتت لغرفة عمي و عمتي نمت يم الجهال غطتنا امي و طلعت

لهناك ابو امجد و امجد جابو عمتي من شافونا نايمين كامو يصيحون اس و اس ، خلوها ع السرير

شلت راسي من الكاع شفتها خلوها ع السرير كمت من مكاني بسرعة ، ويا كومتي افترت الدنيا بيه اريد الزم و اوكف وكعت التفت امجد وراه :- دييااار

كعدني :- شبيج اتخربطتي

-لا دخت افتر راسي واختل توازني

ابو امجد :- رجعي لنومتج بابا ارجعي هم تعبتي انت و حامل ، رجعها امجد لفراشها غطيها

ساعدني اكوم رحت لعمتي غافيه من التعب بست راسها و ما حجيت وياها ، كتله :- شكالولكم عليها ؟

- كسر قوي برجلها صبوها ٥ ايام و ترجع للفحص اذا ماكو تحسن يسوولها عملية

-كله صوجي

-لتلومين بنفسج هذا قدرها، روحي ارتاحي

حجاها و نزل للكاع تمدد يم جهاله :- راح تنام هنا

-اي اذا كعدت امي و احتاجت حمام لو اي شي منو يشيلها و يساعدها

فتحلي ايده و هو يأشرلي تعاي نامي :- اصعد اجيبلك تراكسود تلبسه حتى ترتاح

سكت، طلعت لكيتهم بعدهم كاعدين بيت ابو رافد بس خالد ماكو و رغد و احمد صاعدين

رحت جبت ملابس لامجد و اجيت بدل و نام و اني نمت يم الجهال من الجهة الثانية
بس ما نمت كل شوية اكوم لعمتي تتأذى ساعة تكلي جيبي رجلي منا و ساعة تكلي انطيني مسكن وبقيت سهرانه وياها

ثاني يوم و ثالث يوم .. هلكت بيهن ناس كرايبهم كلها اجت تزور عمتي و كل واحد يجي محمل ويا ابطالة بيبسي لو فواكه و ينراد جاي و عصاير

رغد معتبره نفسها عروس لان مصارلها يومين من اجت من اربيل يا بغرفتها يا تكعد يم الخطار ويا عمتي من يجون

احس ظهري طك من التعب بس بتول تجيني عصرية و امي تجي تشيل عني بس الجهال هي و اثار هم تاخذهم تلعبهم ..

حليمة ما تنازلت عن ورث حتى من وكعت عمتي ما اجت خاف احد يحجي وياها على ورث بس خابرت عمتي و بالموبايل سلمت عليها ما اجت

طلعو الناس بالليل سمعت امجد يكول لامه :- يمه احجي ويا مرت احمد تكوم تعاون ديار تره حامل و فرد وكفة للطبخ و البيت و الخطار و الجهال ما يصير

حجاها و هو يريد يصعد اني واكفة بالمطبخ اكفه قبل لا اصعد، دزت فطومة على رغد ، شوية و نزلت رغد لعمتي

-ها ماما كولي

-بنيتي انت صرتي وحدة من هذا البيت و انت و مرت امجد اثنينجن اعتبرجن بناتي عاونيها هي هم اخيتج ما يصير وحدها و هي حامل

رغد :- شسوي ماما احمد ميقبل اطلع من الغرفة كلما اطلع يصيحلي

-اني احجي ويا احمد بس انت عينج عليها انتن اخوات

-ان شاءالله ماما

كامت من يم عمتي اجت للمطبخ :- شنو بدينا بشغل الحرك

-شنو ؟

-تحجين و تحرضين بعمتي عليه و هسه راح تحجي لامجد و تحرضه عليه

-اكلج رغد عندج شي وياي شبيج من جيتي و لهسة ما تكابليني

-تسوين روحج بريئة و ابوج مهدد امي

-حجيت ويا ابويه و تعاركت وياه حتى يعوف امج بحالها و ما رضى اني شعليه امج خايفة على حياتها تتنازل بحصة سلمان

-و تبيع بيتها لخاطر شكولج

-احترمي نفسج و احجي عدل ترا من من تصعد عندي والله العظيم افتك بيج

- جربي و شوفي شتشوفين مني ، تهدد

تنهدت و هي طلعت :- يربي والله ما ناقصتها لو ما مزوجينها لاحمد اشرفلي لا اريد ورث ولا فلوس

راحت يم عمتي اسمعها تكللها :- حجيت ويا ديار و ما تقبل اشتغل تكلي روحي اني اكمل

هزيت ايدي و طلعت برا حتى اشمر زباله، سمعت طلق عالي بالمنطقة، فتحت الباب و مديت راسي اباوع شنو الموضوع

طلع عمي :- شنو هذا الطلق ؟
وكف بالباب يباوع و اني اباوع وياه صوت الطلق عالي
كالو بالفرع الثاني

كال فوتي:- باباتي احتمال عرس

دخلنا شوية و اجا مهيمن يركض يكل لعمي :- جدو حليمة خابرت جدو داكين بيتها بالسلاح و هي تصرخ

فز عمي طلع لبيت ابو رافد رغد فوك ما تدري بشي، كعدت سم عمتي :- دخيلك ربي بس لا يصير بيها شي و نبتلي شلون اني ويا ابوي شغلة و صارت بيها فلوس والله بعد ما يفك

نزلت رغد تصرخ :- امي راح تمووووت اميييي
نزل احمد وراها يريد يفتهم شنو الموضوع

اجت كبل عليه لزمتني من راسي و تصيح :- كله منج المشووووهة

دفعها احمد من يمي وضربها راشدي و يكلها :- فهمينا شكو و عمتي تصيح من يمها و تهدي بيهم

اني وكفت على صفحة بس ابجي ما رديت عليها لان رجلها ضربها ،نزل امجد ويا هالموقف باوعلي :- ضربتج ؟

- ضربها رجلها

-صعدي فوك

هي تصرخ و تعيط ،امجد ردها :- بعد اخوج هذا بيت مو شارع و تعيطين هيج

احمد :- دكو بيت حليمة

امجد.:- صدك ؟!!
حجوها و هم يطلعون،رغد صعدت تلبس ملابسها حتى تروح لبيت امها، اني ما صعدت بقيت يم عمتي

عمتي :- يمكن غلطنا من اخذناها

-كولي الله يستر و ما يطلع بامها شي هسه اتمنى روحي اطلع و اعرف شكو تسمعين الصياح برا

شوية و جابوا حليمة و اجو، رغد حظنتها و كامت تبجي ، ابو رافد كام يحجي عليه و ابوج ما يستحي و ناس ادور فلوس والله لا يوفقكم و المرة راح تموت

رده امجد :- عمي من رخصتك هذا الكلام ما اقبله لمرتي اجا ابوها و تعاركت وياه و كالتله ما اريد فلوس و اسماعيل هو الداك رجل على مود الحصة شعليها ديار

ابو رافد :- كله من امها

فات خالد.:- شصار سولفولي بس كالولي دكو بيت حليمة صدك

ابو رافد :- ما يرتاحون الا يجلطوها للمرة

خالد :- خل تنطي الحصة و ترتاح الفلوس مو اغلى من النفوس

-اني لو ادري انت شمحصل و حاط روحك بسالفة هالورث و اطالب بيه

حليمة :- ما انطي بيتي ما انطي لو يشيلوني جنازة فلس ما انطي والله

ابو امجد :- ابو رافد ظلتها هنا شنو معناها دخيل بختكمو مطرود اشيلكم على راسي بس ترا اني هم عندي عائله ما الي خلك اسماعيل و عمايله

ابو رافد :- خليها هنا ما دام بته هنا ما يأذيكم

خالد :- انت تأمن لارهابي يابه شنو هالحجي بيت عمي شعليهم و ادخلهم بالسالفة تريد تتنازل و تخلص لو تروح تكعد ابيتها و تواجه اسماعيل

تحاجه ابو رافد و خالد امجد و عمي اخذوا جانب السكته لأن ما يردون حليمة تبقى عدنا، اني يغلطون و يصيحون ما ارد

عاند ابو رافد يعوف حليمة هنا ، رضوا ما عدهم حل عمي كال :- منا الباجر الله كريم عوفو السالفة

امجد كال :- اصعدي بعد كافي لا تنزلين الجهال و نومتهم فوك اصعدي

عفتهم و صعدت ، صعد وراي هو :- عمتي منو بقى يمها

-ابوي و احمد و رغد نزلو يم حليمة جوا لا تشغلين بالج

تمددت انام، اجا هو يمي حضني و بقى يداعبني ويحاول وياي ..
رغم تعبانة بس هو هم حقه .. طاوعته
بعدها لزمني وجع بمثانتي قوي
حاولت انام مكدرت كمت كل شوية اروح للحمام و ارجع ، هو نام ما يدري بيه اتألم الجهال نايمين
نزلت جوا صوت حليمة و بتها بعدهن يحجن ما نايمات

صعدت لغرفة اسامة كعدت اسولف وياه عن ابوي، تالي شفت الولد يغفي من التعب بسته و غطيته و طلعت

بقيت افتر من الوجع بالبيت ، طلع عمي للحمام شافني كالي :- شبيج بابا ؟

-ما بيه شي

عافني وراح
صعدت انام وجع ذبحني ، اكعد امجد شيسويلي ووراه دوام خطية ، اكعد منو يا الله متت من الالم

اخذت الموبايل كلت اخابر على امي مرة وحدة ردت ردت ما ردت اعوفها نايمة .. خابرت .. دكة دكتين

ردت عليه و هي نايمة :- ها ديار

-لزمني وجع من قبل ساعتين و لهسه ذبحني عادي لو تقلصات ؟

-وجعيش يا ستار

-ما ادري متت حتى نوم ما جاي يجي العيني راح اموت

-اجيج هسه ؟

-نايمين

- نايمين شلون تموتين يعني اصبريلي هسه اكعد رافد و اجيج

-لا عوفيها للصبح اروح

-تتحملين ؟

-اي شسوي

-ولج خاف صاير شي بالطفل خاف يصير بيج شي

كلهم نايمين

معليج اني راح اجيج كعدت امجد و كتله هيج و هيج كام بسرعة، كال البسي خل اخذج

دكت الباب امي نزل امجد يمشيني كالتله :- ارجع وراك دوام اني اخذها بسيارتي اذا بيها شي اخابرك و اكلك تعال .. ارجع ما احتاجك
بس هو ما قبل الا يجي
كلت اله هي مستشفى نسائي راح اروح حتى لو رحت تبقى بالباب
ما قبل الا ياخذني هو ..

اخذنا للمستشفى دخلتني ع الفحص كالتلي عنق الرحم مغلق ماكو شي يحتاج سونار و السونار يفتح الصبح ماكو هسه سونار
رجعنا للبيت من التعب اخذت فاليوم و نمت ما حسيت بعد ما كمت، امجد موصي امه عليه، امي جايبه اثار و باقية يمي

متعاركات امي و حليمة ذيج تصيح تريدون تبوكون فلوسي و امي تكللها انت البواكة و عمي متضايق من الوضع

مخابر ابو رافد كايله تاخذ مرتك و حاجيه ويا امي كايل الها اخذي ديار ترتاح يمج شوية

امي كايلتله خفتا وراحة، صاعدتلي .. كعدتني و كالتلي كومي وياي نروح للبيت

مشيت وياها للبيت مشي ، بالطريق و اصتكت رجلية من الوجع لزمت ادين امي و كلت الها :- ماما الم ما اكدر امشي ااااخ

-عزا العزاني كون ، امشي بس وياي خل اوصل للسيارة

-ما اكدر

احتارت بيه تعوفني لو تمشيني،اجت اثار تركضلي ومهيمن وياها جانو رايحين يشترون كللتلها امي :- لزمي اختج بس اجيب السيارة

كمت ابجي من الوجع و اني اعصر بأيد اثار هي نطت من البجي عبالها راح اموت كامت تحضن بيه و تبجي و مهيمن لازمني

اجت امي صعدتني بالسيارة و مشت

ساقت بيه السيارة للمستشفى و اني اصرخ من الوجع
امجد ما جان موجود .. ابو امجد و عدهم خطار بس احمد رايح على بتول جايبها و لاحكني للمستشفى

دخلوني ع الدكتورة بسرعة لان جنت اصرخ من الالم، حطو جهاز النبض على بطني الطفل ما بي نبض .
اخذوني للسونار .. تبين الطفل ميت صارله يوم
حولوني للعمليات بسرعة .. حتى يسقطون الطفل

طلعت من الدكتورة كالتلها للعمليات بسرعة الطفل ميت ، كامو يجرون ١٠، ١٠ من الخوف

امي فرفحت ، حضنتني و هي تدعيلي و تبجي
عفتهاو مشيت و امي تصيح ورايه و تقوي بيه
هو صحيح اني شفت اقوى انواع الالم و هو الحرك
بس اخاف من المستشفيات و العمليات و هيج شي
خرطت العافية من الخوف
و الالم ذابحني لحد ما خدروني و بعد ما دريت بنفسي ..

طلعوني و اني فاقدة ... و بالبنج ما انطق
خلوني بالغرفة .. احمد واكف و بتول وعلى راسي .. و اني فاقدة

اصيح :- ماما اريد خالد

ميعاد :- يمعزاية لا تشهرينا الحمد لله ع السلامة امي حبيبتي

-اريد خالد

احمد :- الحمدلله ع السلامة

بتول :- ديار اصحي حبيبتي الحمدلله على السلامة

-خالد وين

احمد ظال يباوع ،امي حاجية :- خالد ابيته ماما شوف الحظ انوب كامت تهذي

- روحي خالد ماما حبيبي خالد

امجد :- ها شلونها شنو سقطت
الحمدلله ع السلامة .. باس راسي

:-اريد خالد .....

☆☆☆☆☆☆

#اتمنى_ان_افعلها


الحلقة_44

يالمبتعد عني ابتعد مني
شثگلهن ذكرياتك تعبني

........

امجد :- الحمدلله ع السلامة

-اريد خالد

ميعاد :- شوف الحظ بالله هاي تذكرني بروحي من سويت عملية المرارة طالعة من العملية اكللهم وين مؤيد و هو مؤيد المدير مالتي لا عرف ولا ولف وياه شجابه على الساني ما ادري

بتول :- هو اللي يتبنج يكوم يحجي شيش بيش ما يدري بروحه

امجد :- اني برا اذا تحتاجون شي خابروني

ميعاد :- روح خالة لا تخاف عليها كم دقيقة و تصحى
راح و احمد طلع وياه
باع الحظ هي ما نطقت الا كبالهم بس كون الله يسترنا و يعديها

بتول :- شهرتنا المكرودة هم خطية ما تدري بروحها

-الف مرة اكلها بطلي تفكير بخالد ولج بطلي حرام اذا ترد

-مو بالكيف خالة النسيان مو شي سهل مرات تحاولين ويا نفسج ما تفكرين بشي تلكين روحج جاي تفكرين بيه بلا ما تدرين

ميعاد :- يخالة بس كون الله يسترها و تمضي على خير

ديار :- جنت بحالة لا اني صاحية ولا اني فاقدة، احس اكو ناس يمي و احس بيهم يجون و يبوسوني ويحجون وياي و اني احجي وياهم بس شحجي ما اعرف ..

لحضات الافاقة من التخدير جان شي اشبه بالحلم

بعد ما وعيت وراح تأثير البنج جان اكو وجع بجسمي، احس بأمي واكفة فوك راسي و بتول يمها
حجيت :- ماما نزلو الطفل ؟

-اي بنية جانت خطية الله يعوضج بالاحسن

بقيت ساكنة بمكاني رجعت حجيت :- امجد وينه هم اجا ؟

ميعاد:- كبل شوية تريد خالد و هسه امجد شلون بحظي اني، هسة اطلع اصيحه الج

.. طلعت ورجعت :- مموجود خابرته هسه يجي

ديار :- شوكت نطلع للبيت ؟

-غير الدكتورة تكللنا حتى نطلع يا بنيتي ارتاحي انت

-عندي وجع ابطني كلش ديوجعني

-هسه اصيح السستر تجي اشوفج

رجعت غفيت كعدت على صوت امجد يحجي ويا بتول و يسأل عني، بس ما تقرب مني ولا سألني

انطوني مغذي و ابر مسكنه كلت الها :- اريد ارجع للبيت ما اريد ابقى هنا

كتبتلي خروج امي على حسابها وردنا نطلع، امجد ما جان بالمستشفى طالع مدري وين خابرته امي حتى تكله راح نطلع ما رد ،

احمد باقي راد ياخذنا بسيارته امي كالتله لا اني جايبة سيارتي اني اخذها لبيتي تبقالها كم يوم ترتاح و الله كريم

سندتني و طلعتني من المستشفى، بقت يمي بتول لحد ما امي جابت سيارتها و اجت صعدتني على كيف و بقت تمشي بهدوء

وصلتني للبيت اسامه جان طاير گلبه عليه اول ما نزلت من السيارة لزم ايدي :- ها ديور حبيبتي

سندت راسي عليه باسني بخدي و اخذ ايدي يمشيني دخلوني للبيت ، تقريبا الساعة ١٠ بالليل دخلنا البيت،نومتني بالغرفة الصغيرة الجوا و انطتني الدوا مالتي و منوم حتى انام ..
اجا ابو امجد تحمدلي بالسلامة و هو واكف وراح

غفيت بمكاني، شوية لهناك تقريبا ب١ بالليل
حسيت احد نزل على راسي باسني بكصتي
اشتميته (خالد) فتحت عيني و هو يسأل امي :- شلونها هسه شنو وضعها

ميعاد :- زينة هسه بس ابعد منها خليها تعيش ويا رجلها كافي السالفة السوتها اليوم بالمستشفى

خالد :- اجيت بس اطمن عليها حجتلي بتول و ضل بالي يمها من طالتني و اني ماكو ما ادري بكل خبر من اجيت هسه بالليل يله كلتلي محد كالي هي بالمستشفى

رافد :- و هسة دريت شراح يتغير خالد انسى بالكلبك و انساها و دوس على نفسك و ابتعد

-الله كريم، راح اروح و باجر اجي اشوفها اذا كاعدة، من تحتاج شي خابريني

ميعاد :- ان شاءالله

اني مغمضة عيوني مفتحتهن ولا حجيت وياه بقيت بس اسمع نبرة صوته و هو يحجي وياهم بهدوء

احس خالد صار شي بعيد مثل النجمة اتاملها كل يوم و ما اكدر اوصلها .. خلص وكته و لازم اتعود ان دوره انتهى من حياتي

لثاني يوم كعدت ب٥ الصبح امي نايمة يمي و اسامه و اثار ، بطني الم خفيف و راسي دايخ فد مرة ...
المنبه مال اسامة يدك
مديت ايدي انده بيه .. خطية كعد على حيله صفن شويه و كام .. صار يشتغل شفتين حتى يحصل ٢٠ بدل ال١٠
بس يتعب من الخمسة للصبح ل١٢ بليل
شكد احجي وياه ما يفيد هو قابل هيج بس يشتغل

رغم امي محددتله مصرف كل شهر تنطيني اله ١٠٠ الف و ما يقبلها كمت اضمهن اله بلكت تلم و كم سنة و اشتريله سيارة بلا هذا التعب

عمره ١٤ سنة راح يدخل ع ال١٥ بس شايل حمل اكبر من عمره و تفكيره بعيد و ما يحب يضل بذلة احد لهيج مخلص كل وكته بالشغل ما يجي الا وكت النوم ما يشوف احد ولا يكابل احد

للظهر و امجد ممر علية ولا احد من بيت ابو امجد اجاني بعد، استغربت عدم اهتمام امجد، جان اذا يروح للدوام يخابرني كم مرة، هسه ولا مرة ولا حتى اجا يسألني شلون صرت

سألت امي امجد ليش ما اجا ولا سأل عني ؟

-احتمال متضايق منج ؟

من شنو ؟.
سولفتلي السويته البارحة كمت اصفن ، اني حاجيه هيج شوكت ؟! والله ما ادري اني هيج حاجية

اندكت الباب طلعت امي للباب، صديقاتها اثنين جايات لأن صار يومين ممداومة و طالبة اجازة، كعدن بالهول و طلعتني امي اكعد يمهن يسلمن علية لبين ما تحظر هي للضيافة

بقن يسألن عيالج وين و سبب الاسقاط و الظاهر امي حاجيتلهن عني شوية فبقن يستفسرن مني على حالتي مشفقات عليه

جابت امي الضيافة و ثدمت الهن وكعدن يحجن و يضخكن، فات رافد بلا ما يدري للهول شافهن نسوان اعتذر و رجع بسرعه

هنا اتعدلن و كامن يتعذرن منهن فات هو مرة لخ اعتذر و سلم عليهن و اخذهن بالسلام بالسانة و ترخص و صعد فوك

اندارتلي وحدة منهن اسمها رباب :- هذا زوجج الله يخلي ؟

ميعاد:- يا ولج يا رجلها هذا رافد رجلي شبيج

رباب:- يااا حسبالي رجلها شو زغير ؟

ميعاد:- لا اني وياه نفس العمر مو صغير

رباب:- هي المرة تكبر بساع الرجال ما يبين عليه كبر

ميعاد :- شبيه و بين عليه الكبر بعدني شباب ام العشرين ما تصف يمي و كافي هو عاشكني و ذايب بيه شريد من الله بعد رفودتي هذا

رباب:- الله يحفظكم البعض بس الله يخلي كلش حلو شخصيته و طوله ، عيونه ملونه مو ؟

-اي عيونه خضر ،عيوني لا تحسدنه خمسة و خميسة بعين الما تصلي ع النبي

وبقن يتراددن بضحك و يسولفن لحد ما كامن حطن كل وحدة ٢٥ جوا راسي و سلمن وطلعن صاحت امي على رافد من فوك كالتله :- خالد بالباب

نزل رافد بسرعة جوا، شوية و فات هو وخالد للهول :- ها شلونج ديار

-هلا خالد

-شلون صرتي ؟

-زينة

-تعبانة شكلج حيل
باوعلهم :- ترا تحتاج اكل تعويض الها شتغدت شتريكت

ميعاد :- ريوك ما اشتهت عود قبل شوية جابتلها اثار كيكة و عصير و اكلت

-من هاي وجهه حيل تعبان

-رافد و انت شرايد تسوي البنية الها ام خالد

- ما رد عليه و رجع حجه وياي :- تحتاجين شي ؟

-هزيت راسي بمعنى لا ( لا )

-اني باجر طالع للاردن ان شاءالله راح ابقى اتواصل ويا امج حتى اعرف اخبارج

ميعاد :- و زوجتك السورية شخبارها ؟

-بخير الحمد لله،يلا اودعناكم

سلم و طلع و عيوني تراقبه و هو يطلع، سدت الباب امي وراه هو و رافد و رجعت :- باله يمج، والله ما اعرف شحجي انتم خطية لو جاي تورطون بارواحكم

-امجد ما اجا ولا خابر ابد خاف زعلان صدك

-و زعلتهم اتمنى من الله يطول و ما يخابر

- شتسوين

-اطيح حظهم والله، وكت اللي يسقط طفلج من بطنج من كثر التعب و الضغط و تعاي ديار و صعدي ديار و ما كالو حامل خطية خل نرحمها، بس من تزلك منج كلمة بساعة لا وعي حدو اسنانهم عليج و عافوج و ازت و الميته سوا

بساعات صحتج و عافيتج تعاي ديار اخدمي و ساعة المرض يشمروج و محد يسأل عنج

هو اني اتمناها من الله محد يخابر حتى اكلبها عليهم ازين شواربهم والله

-بالي يم الجهال

-ما عليهم شي اثار قبل شوية جانت يمهم و مشتريتلهم من الالف مالتها لا تخافين عليهم ارتاحي انت

... ثاني يوم سمعت خالد طلع للأردن
هالفترة صابتني كأبة كلش قوية، نفسيتي ادمرت حيل حسيت نفسي ما الي قيمة بهالحياة، لما جنت بحيلي منين ما ادور كلها تصيح (ديار) ما الحك احك راسي، و من وكعت حتى الجهال ما مروهم عليه اشوفهم .

ثالث يوم سمعت مرجعين ام امجد للمستشفى للفحص ورجلها مو زينه و قرروا باجر يسوولها العملية، ابو امجد جاب الجهال بالليل خلاهم يمي و من الباب ما فات جوا

سوولها ثاني يوم العملية ورجعوها للبيت بنفس اليوم
كلت لامي: خل نروح نشوفها و نطمن عليها

كالت الي : اتركيهم ارتاحيلج فترة و اخذج الهم ارجعج لغرفتج

.. بالليل و الناس نايمة جانت حليمة نايمة و ابو رافد وياها بالبيت چافتين اثنين ملثمين حاطين السلاح براس ابو رافد و براس حليمة و مهدديهم ( اذا ما تنطون الحق من الورث خلال اسبوع واحد بس الطلقة هاي تنحط بروسكم و هذا اخر انذار تهاونا وياكم الى ابعد حد و ننتظر ) و مطلعين الطلقة من للشاجور و مخلين كل واحد طلقته بأيده و كايليلهم ( المرة جاية نحطها بروسكم مو بأيدكم ) و طالعين.

ابو رافد متخبل شلون يهددونه و يهددون مرته مخبر عمامه و عشيرته و خابص الدنيا، متهجمين على رافد ان كله من ورا مرتك

رافد ممقصر بيهم و كايل الهم :- مرتي شلها علاقة بالموضوع ؟ بتها الها حق بهالبيت و حليمة ماخذه كلشي و حاطته بأسمها و ما رايدة تتنازل و ابو ديار هو المتكفل الموضوع مرتي شنو الها بالنص ؟

تريدون روحو على اهل اسماعيل و كاوموهم مو تجون على مرة و تكولون مرتك، هي شبيدها و شيطلع منها حتى تكعد تهدد

ملتمين ورايحين لبيت عمي عماد و كايليلهم هيج داخلين على بيت ابو رافد و اسماعيل المتهم

عاد عمي رادهم و كايل الهم :- وكت التنطونه دليل ان اسماعيل هو الهددكم و دز الكم الجماعة الكم حك يمنا ما دام ماكو دليل كل حك ما الكم يمنا

اللي داخلين البيت بالليل ما معروفين منين ولا حتى ذاكرين اسمي او اسم اي احد بس رجعو الحك لصاحبه بس !

فالعشيرة حتى يلموها بيناتهم جامعين ٥٠ مليون و مداينينهم لابو رافد و كايليله تجبر مرتك تبيع البيت و توفي الديانه غصب عنها واذا انت تتكفل الموضوع وتكول اني سداد للدين خير على خير

هو كايل الهم :- لا بأقرب وقت ينباع البيت و ننطيكم حقكم

اجا جايب الفلوس لامي و حاجي وياها حتى تحجي ويا ابوي يعوفهم بحالهم، امي ماخذة من عنده الفلوس و مطمنته ان راح تخابر ابوي و تحجي وياه
الكعدة جانت بحظور رافد و عمه

طلعوا امي خابرت على ابوي و كالتله :- حق ديار صار عندي عوفهم بعد

كايل الها :- شكد سلموج ؟

-٥٠ مليون

-خل يولون حكها ٨٠

-اكلك شوف ما النا خلك مشاكل كافي عليه بتك مسقطة وواكعة عندي و بالضيم يا حالي لا تزيد عليه اساسا حق بنتك ربع لان سلمان اله اخت من ابوه و هي اتزوجت يعني حتى ما الها حق .. بس هذا الحق جان المفروض تاخذه و هي على ذمة سلمان بس حليمة العمصة هي العصت بي و هسه طلع

-حضريلي منهن ٢٠ مليون

-انت شكد نذل حتى بفلوس بتك تريد تستفاد عوفها اشتريلها بيت و اضمن حقها بعد يومين توكع عليمن تستند عليك الكلشي ما شافت منك بس السوالف المكسرة

باقين متراددين هو وياها خصم الحجي كايلتله الك يمي ٥ ملايين بس تريدهن تريدهن ما تريدهن بكيفك

كايللها :- حضريهن الي و اني اجي اخذهن و الفلوس لا تخليهن بالبيت روحي حطيهن بالبنك

-امي ما مجذبة خبر رايحة للبنك هي عدها حساب فاتحة ضمت الفلوس هناك و اجت

خابرني خالد على موبايلي، شفت رقمه رديت :- الو

خالد:- واخيرا هسه ارتاحيت

-ليش ؟

-لان وفيت بوعد قطعته عليج صار اسنين و ما كدرت اوفي

-قصدك الورث مال سلمان

-اي ، اخذته امج مو ؟

-اي بس ابوك الدفعه

-راح يبيع البيت غصب عنها و ياخذ منه ويوفي للدين

-خالد

-اي

-اشكرك

-اني ما سويت شي بس ذكرت اهلج بحقج

-مع هذا اشكرك

-اني خادم

- تخدم ربك ، انت بالردن بعدك ؟

-اي

- زوجتك وياك

-اي

-هاا

سكت ما جاوب، رجع حجه:- الاسبوع الجاي ارجع لبغداد تريدين شي من عمان اجيبه الج ؟

-لا شكرا

-امجد بعده ميحجي وياج

-اي

-ليش ؟

-اذا انت تعرف ميحجي وياي فاكيد تعرف السبب

-لأن ذكرتي اسمي

-ما جنت ادري

- بس كلبج يدري

- من يوم التزوجت ما كمت اسمع لكلبي اصم اذني عنه

-و هو الأحسن، الله يوفقج بحياتج

-و يوفقك انت و مينا

ضحك :- شو احسج متقصدة تذكرين اسمها

-اي انتم مو تحبون بعض فأني جاي ادعيلكم

-اي

-شنو اي ؟

-منتظرة مني جواب لاخ ؟

-لا

- ها زين

-بس هاي ؟

ضحك و هو يكلي :- والله السوالف وياج تونس

-شلونك انت وياها ؟

-زينين حالنا حالكم

-احنا مو زينين

-هسه د، بس جنتو احلى من العسل

-يعني انتو هسه احلى من العسل

-الحمدلله

-شعجب مرتك ما حبلت

-بلي حبلت بشرتني بهاي جيتي اول اسابيع حملها

-هاا

-اي

-ما تغار من تشوفك تخابر

- و تغار شنو يعني ؟ احلى شي يشوفه الرجال بالمرة غيرتها، و بعدين اني ما خاينها انت هسه صديقتي و خابرت حتى اطمن عليج حقج وصل و اكلج وفيت الوعد

- و ضحى ؟

- شبيها ؟

- شلونك انت وياها

- الصراحة مرات استخطيها و مرات اكرها من وره تصرفاتها و ماشية هيج كوة كوة

-راضية بزواجك هي

-انت شتكولين ؟

- لا

- ماكو مرة تقبل بزواج رجلها بس من افعالها

-اصعب شي ع المرة تشارك رجلها

-الصوج منها

- مو كل الوقت لا الاكثر من الرجال نفسه يحب يجدد

-ممكن بس اني مو هيج، اني وكت الاشوف الوضع بحياتي ويا زوجتي مو زين و متعبتني اروح اشوف اللي تريحني غيرها، اذا هي ممقصرة ليش حتى ادور غيرها

- تمدح نفسك هواي

- ما جاي امدح جاي اشرح

- اي ، سلملي

- على منو ؟

- مرتك

- اذا تسمع بأسمج هسه نطلك

- ليش ؟

- حاجيلها عليج و على كل الصار بينتنا رغم هسه كلت الها احنا اصدقاء بس السالفة متخش مخها تكول ( مبيمشي معي هالحكي في صداقة بتتحول لحب بس ما تقنعني ان الحب بيرجع صداقه مشان هيك ما بدي شوفك و انت عم تتصل فيها )

-تغار عليك هواية

-حقعا غير رجلها

اخذت نفس و اتنهدت :- الله يوفقكم يلا مع السلامة

-ديري بالج على نفسج ولا تفكرين

سديت الخط من عنده بقيت اضرب صفنات، حامل منه و تغار عليه ، اشايفه من عنده حب و اهتمام حتى هيج مستقتله عليه و تغار

حجيت لامي على خالد و هيج خابرن و هيج حجينه

كالت :- انت ركزتي مرته تغار عليه منج بس ما ركزتي ان هي ما تغار من ضحى و ما مهتمة الها

-يعني شنو ؟

- يعني شايفتج انت المهدده زواجها و حبها الخالد مو ضحى بكل بناتها

-تعرف خالد بطل يحب ضحى

- يعني لو نباوعلها من الكفة الثانية يعني ما بطل يحبج

-وين تريدين توصلين بهالكلام ؟

-ماكو شي مجرد جاي احلل كلامه

سكتت درت وجهي عنها افكر بكل اللي جاي يصير
وره يومين بعد ما قبطلي ٩ ايام و اني عند امي .. ابو امجد اجانا كم مرة و هو يسأل ع الجهال و ينطيهم مصرف، و ام امجد خابرت مرتين و امجد لا خابر ولا اجا ..

اخذتني امي اني و الجهال و رحنا لبيت عيالي، كاعدة ويا عمتي و طالبة ابو امجد يكعد و امجد
بس ابو امجد جان موجود، اجا كعد

كالتله :- بتي صارلها بال١٠ ايام عندي مريضة و ابنك لا وصل ولا سأل عن مرته اريد افتهم شنو السبب بتي بيها صوج

ابو امجد :- متضايق من ساعة الجانت بالبنج و ناطقة بغير اسمه و لليوم هو يسأل و احنه نكله ما عدها شي و هو شاك...... قاطعته

-ابو امجد هالحجي هذا مو وياي و عيب شنو شاك بيها شنو متضايق بتي سقطت ضناها من الوكفة ابيتكم و الخدمتكم و لا ساعة شكت ولا مرة كالتلي تعبت منهم
شنو انتم منتضرينها تغلط حتى اتحدون اسنونكم عليها

ابو امجد :- لا ام ديار ميصير هالحجي هي هم بنيتنا

-بنيتش ابو امجد الله يخليك بنيتيش لا احد منكم سأل ولا احد منكم شاف احوالها

-ليش اني كم مرة اجيتكم

- اجيت على مود احفادك مبقيهم عدها و هي مريض ومن الباب و تروح حتى ما تدخل تشوف ديار شلونها شلون صحتها و رجلها لا اجا ولا شفنا طوله

تشتغل هنا شغل المطي لحد ما فطست و من توكع محد منكم يسأل والله نطقت كلمة بساعة لا وعي منها ؟ هو منو صاحي بالتخدير ويحجي الصدك شو كل اليطلع من البنج يكوم يهذي و انتم اخذتم هذيانها حجة حتى تعادوها

-ما عاديناها ..... قاطعته

-اقصد ابنك ٦ ايام جهاله و مرته عندي بالجذب ما اجا ولا سأل

- متضايق شوية مو قليل عليه امه و و مرته تسقط يعني واحد هم يعذر

-لا ابو امجد لا عذرت يوم يومين ٥ .. عشرة بس ابنك طوخها، بتي ما لاكيتها بالشارع ولا طالعتلي بالحظ يا نصيب حتى هيج يصير بحالها تسقط و محد دايرلها بال و اسكت، تقدرونها يا ابو امجد خير على خير
ما تقدرونها و تبقون كل يوم ادورولها حجة و تشككون بيها كللولي خاطر ارفع دعوة لطلاكها و يا دار ما دخلج شر

ام امجد :- لا الله يبعد الطلاك اسم الله بيش طالبتهم بس هو

- لا تكليلي هو مصل ما هو متأذي هي هم متأذية كافي سكتت هواي و اكول عيب و احترم بس ما لشوف احد جاي يحترم مو هين عليه بتي كاسرة ظهرها ب٣ جهال ورجال و هي طالبة بس غير لخاطركم و نكول انتم ناس زينين و تستاهلون بس من تقصرون بحقها و تكعدولها ع الزلة لا ما اسكت

بقوا يتعذرون من امي و نحطها على راسنا و بنيتنا و ما النا غيرها ولا نلكا مثلها و مثل اخلاقها و ادبها من دخلت لهالبيت و لليوم حسها ما سمعنا رغم الصار وياها
وكامو يقارنوني بمرت احمد و يقنعون بأمي

كالتلهم :- هاي اني جبتها الكم و سالفة لما تكلي اخذي بتج و روحي لبيتج وكت التحاجيت ويا ام رغد مو هينه عليه و هيج تكلي و لا بالعته بس يكلك لأجل عين الف عين تكرمون و اني لخاطر بتي ساكته و اعدي بس يا ابو امجد كثر الدك عل الحديد يفل فلا تخلونه نفل وياكم .. بنية خادمتكم و تحبكم و معتبرتكم اهلها بس من تهيونوها و تأذونها وكتها عذروني ما راح اطلع الكم بهذا وجهي

بقى ابو امجد يمدح بيه و اجا باس راسي و كال الها :- والله وحده من بناتي اعتبرها و لا يضل ابالكم و التهينا منا خطار و منا ام امجد و بعد الدنيا تلاهي ولو حقكم علينا ..

.. و هيج طلعتني امي من مشكلة جانت المفروض تنحسب عليه سوتها اليه حق و هم الغلطانين.

سلمت عليه و كالتلي :- ديري بالج على نفسج و على اخوج و شتحتاجين بس خابريني

-كلت الها ماشي

صعدت لغرفتي فوك اول ما دخلت ، اجت وراي مرت احمد :- الحمد لله ع السلامة عيوني ان شاءالله تهنيتي بالورث مال ابوي ؟

باوعتلها:- الله يسلمج

- انت ما تستحين شلون تاخذين شي مو الج ؟

- احمد هنا ؟

- معليج باحمد جاوبيني ابوج الحيوان يهدد امي و يدز احد يطبلهم للبيت و يحط طلقة بايدها ما خفتي تموت تنجلط لو كل اليهمج الفلوس !

- هي ليش ما خافت على روحها ؟

-ترا فلوسنا هاي و احنا احرار انت شنو و حاطة روحج

-اريد ارتاح رغد ياريت بلا مطرود اطلعين من الغرفة

باوعتلي باستنفار، شمرت التحفية اللي ع الميز للكاع كسرتها و دارت حتى تطلع، امجد صار بوجهه

رادت تطلع كاللها :- بعد اخوج لمي الوصاخة السويتيها

- خلي مرتك تلمها مو بس فالحة تلم ورث

امجد :- رغد خوية جاي اكلج لمي

- ما المها

- روحي
ردت ادنك الم صاح :- عوفي كلشي هي التجي تلم

-لا تكبرها

-كلت الج كووومي

عفت من ايدي وكعدت ع الجرباية هو طلع، خابر احمد كاله :- من مرت اطب غرفتي وبلا احترام تكسرها و توكف بعيني بكل صلافة تجاوبني كدامك خيارين يا تجي تعلمها الاصول يا البيت يتعذرها و بقت يمك

لهناك اجا احمد صعد فوك و جبر مرته تنظف غرفتنا و تجي تعتذر من امجد بس وجها محتقن و عيونها حمر احتمال ضاربها

اعتذرت من احمد و كالت اله :- بعد ما ابقى هنا اريد ارجع لبيت امي

احمد :- الله وياج عود خابري امج تجي تاخذج

ضاله تبجي و ابو امجد يحجي ويا ابنه و يهدي بيناتهم و هي عاندت الا تروح، احمد ما متحمل دوختها ماخذها و موديها لامها ابيتهم

صعدت للغرفة بالليل امجد كاعد متضايق، فرشت للجهال نومتهم هو ما حجه ابد، كملت ورحت يمه

:- انت ليش داير وجهك عني و ما تحجي وياي ؟

-ما حجه

تقدمت و بست راسه و كلتله :- اذا ضوجتك بكلمة اني اسفة بس والله ما جنت ادري بكل اللي طلع مني ولا متقصده ولا ابالي هالحجي اساسا بس ما اعرف شلون هيج حجيت

-لا ابالج ولليوم تضمين عليه و ما تحجين و لهسه صابر و ما غالط وياج لأن منتظر الزم شي حتى اذا تأكدت وكتها محد يلومني لو شما سويت

-راح يصيرلي وياك سنة شفت مني شي؟

-ما حجه

-كل مرة تتهمني و اني اكلك ما عندي شي، لما اتزوجتك قررت التهي بيك و بأطفالك و ما التفت وراي و هذا اللي سويته لا يوم قصرت وياك ولا يوم قصرت ويا جهالك و اعتبرهم جهالي

-اكو شي بداخلج انت ضامته عليه و ما جاي تحجين، انت متزوجتني و مداريتني بس اني ما جاي احسج انت مرتي ولا اشوف منج اللي لازم اشوفه من زوجتي كلبج بعيد عني و كلمة حبي ما تطلع وياج
اكو بداخلج شخص ثاني ؟

- لا

-شلون لا و انت هيج

- المطلوب مني هسه شنو لا اذنب ولا اجرمت ولا اعرف شنو ذنبي و كل اللي يطلع وياي جاي اسوي اكثر من هيج شنو مطلوب مني

باوعلي ، ركز بعيوني، دنك و هو يتنهد و يهز راسه و كال :- ولا شي مطلوب روحي نامي

عفته ورحت للجهة الثانية نمت، شفته نام اخذت موبايله و كمت العب بيه ، اجت رساله اله على برنامج الواتساب

باوعتها من نزلت بالأشعار ، الصورة صورة بنية و مكتوب بيها ( نمت ؟ اشتاقيتلك ) فتحت الرسالة و باوعت محادثات بيناتهم قليل الواضح اكثر الكلام جان اتصالات

رحت دورت بالاتصالات لكيت مقضي وياها بالساعات و هم يحجون البنية اسمه (سمية )

الغريب .. انو و اني اكلب و ابحث ما الي اي ردة فعل لا انقهرت ولا ضجت ولا اي احساس صابتي غير الفضول اعرف شكو بيناتهم .. و كأني دا اقلب كتاب مو خيانة لزوجي ..

لو اقيس احساسي هسه ويا الاحساس اللي حسيته لما خالد يحجيلي عن زوجته فاختلاف فضيع، هناك لما يحجي احس اختنك ويا كل كلمة يحجيها ، هنا ولا احساس .. مو بيدي بس هو احساسي هيج

درت وجهي هو نايم ، ما اعرف جاي اظلمة لو جاي اظلم نفسي

نمت ٣ ساعات و كعدت وياه للشغل حضرتله ملابسه و الريوك، و هو بعده كاعد لازم الموبايل و يراسل

لما صحت عليه ما جاوبني اجا تريك و طلع من البيت
رجعت نمت ولا كان شيء حدث

كعدت الصبح الساعة ١٠ رتبت الغرفة و الجهال و نزلتهم جوا، واكفة بالمطبخ، اجا احمد اليه يسألني ع الريوك و حجه

:- رغد خابرتني

- على شنو ؟

- تكلي اشتاقيتلك و تريديني اجيبها

- اي روح جيبها

- اني اريدها شوية تحسن اسلوبها لان اسلوبها بالبيت كلش مو زين لا صوت ولا تصرفات

-و هي هناك شلون راح تعلمها ؟ امشي الها هسه وروح اشرط عليها و دليها حدودها و علمها على طبعنا شوية شوية و لا تبعدها منك الواضح انت مشتاقلها اكثر مما هي مشتاقتلك

ابتسم بخجل :- ديار اني احبها بس تعبتني

- كل زواج بيت تعب خاصه بالبداية لان مماخذين على اطباع بعض وماكو زواج ما يصير مشاكل

- امي هم تكلي خطية روحلها و اني البارحة وديتها

- ميخالف روح جيبها خطية

- كملي الريوك و نروح سوه حتى اشرط عليها ما تتعارك وياج

- لا اعذرني ما اروح الهم و عمتي منا محد الها روح انت

بقى يحجي ويحاول مقبلت اروح، هو يحبها بس هي خبيثة متعبته بسوالفها .. يلا كلنا متعبين ازواجنا و هم امتعبينا هاي الحياة

راح جابها و شارط عليها ما تتجاوز عليه لان امجد يتضايق و كايله: التجاوز على مرتي اعتبره عليه لان كرامتها من كرامتي فلزم مرتك حدودها

جابها غير اتوب هم يطلعون و هي تكعد تسمع حجي
كبال امجد و عمي و احمد من يكعدون جوا ما تطلع من المطبخ ولا تصعد الغرفتها و هي اسمها واكفة بالمطبخ و اطكطك كلشي متسوي و من يرحون تلزم التفزيون بالهول لو تصعد لغرفتها

عمتي تكلي عوفيها خل تولي
كم مرة حاجتها و تشكي عمتي لعمي تكله :- شوفة عينك اشتغل ليل نهار و عمتي ما ادافع بس لديار اني مو مثل بتها شنو الفرق بيني و بين ديار

اني ما احجي و ما ادخل لان عمتي هي المتصديه للدفاع عني فليش ادخل روحي، باقية بس اعتني بعمتي و بالجهال و ما ادخل بيها ..

امجد راقبت موبايله كم مرة العرفته عنده علاقة حب ويا ابنية بس ابد ما كايلي على شي، هجرني اسبوع و بعدين رجع على كد حاجته و يبتعد مني لا يطالبني بشي ولا يكلي ليش ما تحسين بيه و ليش ما اديرلي بال .. و الصراحة هالشي ريحني من ما يحاسبني

مو بكيفي و لا المحبة بكيف احد
اني ما احمله بكلبي غير الود ..
الود عن الحب .. شي مختلف تماما عن الاخر

بس الامانة لله لا فد يوم قلل احترامي او هاني او حجه عليه حجاية مو حلوة كدام اهله، محترمني و مخليهم يحترموني ، و يتخبل لو رغد قللت احترامها وياي

احمد و امجد يختلفون بالاطباع
احمد شراب عرك بطل فترة ورجع ، و بسبب الخمر من يسكر بالليل يشوفها الويل يكوم يضرب و يأذيها و الصبح يراضيها و كل ليلة نسمع صياحهم، غير ان عادته بسبب العرك و اكثر الاوقات هو بلا وعي، كلماته فشار عليها كبال اهله كل حجيه غلط حتى لو بالضحك

بينما امجد يختلف، امجد انسان هادئ ما يحب المشاكل و يحاول يتلافاها باي طريقه حتى يصفي جو عائلته و اهله، لا يقرب الشرب ولا يحب السهرات ..

عيشته شغل يرجع ينام ساعتين يطلع يتونس كم ساعة رجع للبيت كعد ويانا شوية و صعد نام لان ورا دوام .. ما اله حس

غير الاختلاف البيني و بين رغد . هي حساسه تبجي بسرعة تتضايق بسرعة عصبية ووقت عصبيتها يفلت السانها و يعمي عليها

اني باردة الواحد لو يحجي منا لباجر اباوعله كانما اباوع لتلفزيون، كل شغلي بهدوء اشتغل و ما احجي ولا اشكي،مرات يوصل بيا التعب لحد ما دموعي دكوم تشكي وكتها امجد يحس ويكوم يحجي عني و يخليني ارتاح

الفرق بيني اني و امجد يختلف بين الفرق بين احمد رغد ، و حتى ابو امجد و عمتي لاحظو و كلما يحجون يذكرون الفرق، سببو عقدة حتى لاحمد و رغد كامو يتقارنون بينه.

... امي باعت البيت اللي بالشعب مالتها جابلها ٥٧ مليون بعد ما اشتراه السيد الها ب٤٠ .. جملت الفلوس اللي اخذتهم من ورث سلمان على فلوس البيت و اشترت بيت زين و احسن و اجرته ب٤٠٠

ايجار بيته انطتنياه كالتلي:- مصرفج هذا حتى ما تحتاجين للرجال و عازة الرجال المرة الساندة ظهرها براتب ماكو شي يكسرها فلا تخلين احد يكسرج

اني حاجيتلها على البنية اليحبها امجد لهذا جاي تامن حياتي حتى ما احتاجله

الفلوس اللي انطتنياهن امي، كمت اخذ منهن ٢٠٠ انطيهن بثواب سلمان للمؤسسات الخيرية لان هذا ورثه و هو كلشي نا اسفاد من ورثه خلصها تشرد ع الاقل تجيه الرحمة و الثواب بجال هالورث

و ال٢٠٠ البقية كلت اجمعهن بلكت اكملهن من امجد و اعالج نفسي بيهن و اكمل النقص اللي بجسمي.

حليمة بعد شهور زعل و ضغط و مطالب من ابو رافد حتى تبيع البيت و تفك دينه، قررت تبيع البيت و تشتري بيت اصغر .

...كاعدين الصبح اندكت الباب ، امجد كاعد يتريك يريد يطلع لدوامه و اني منتظرته يكمل حتى اغسل مواعينه و اروح لجامعتي

سمع الباب تندك راح فتحه، طلع رافد فات للبيت و كاله :- رغد وين

-فوك جاي تبدل تريد تطلع لجامعتها ليش اكو شي

-امها بالمستشفى

ديار :- يا ستار شصاير ؟

رافد :- مو باعت البيت البارحة و ساطين اثنين امسلحين حاطين السلاح براسها و مهددينها ادليهم على الفلوس

امجد :- هذا عرف ما دامه يعرف عدها بهالليل فلوس

-مبين عرف و ابوي ما جان بالبيت ،  بايت يم امي البارحة و ساطين عليها و خطسة متخربطة و نقلناها للمستشفى

ديار :- كون متأذاية ؟

رافد :- والله جلطة صابتها هسه بالمستشفى اجيت حتى اخذ بتها

امجد :- لا اله الا الله مو خوش خبر

رافد :- ديار تعرفين شي عن ابوج ؟ ما سامعة اذا هو اله ايد بالسالفة

-ما متواصلة وياه ابد ما اخابره

نزلت رغد حتى تطلع للجامعة صبحت علينا ورادت تمشي، صاحها امجد اجت تقربت من عدنا، دموعي نزلت الله لا يحطني بهالموقف لو صار بامي شي يمكن انجن

كال الها :- عوفي الجامعة و كعدي رجلج روحي وياه للمستشفى

رغد :- خير امي بيها شي ؟

امجد :- ما بيها شي بس تعبانة و شايلينها للمستشفى

صرخت وووكعت الجنطة من ايدها و هي تصرخ :- شبيها امي احجو شبيها امي كوووولو

امجد :- ديار اصعدي كعدي احمد

صعدت و اني امسح بعيني، خبرته نزل ركص و اني اسمع صوت صريخ و بجي رغد.

سألتني عمتي و كلت الها كامت تبجي و هي تكول :- لا حول ولا قوة الا بالله العلي العظيم

طلع احمد اخذ رغد و طلع للدوام، امجد كال :- اني رايح للدوام عود من اجي اروح للمستشفى

اني بقيت كاعدة ابجي اني و عمتي ، باوعت الساعة ٨ و عشرة ، يا عزه بعيني الخط مالتي ماكو
خابرته، رد عليه ، سألته ، يكلي :- والله اختي دكيت هواي و انتظرت و ما طلعتيلي

كمت من مكاني ، كلت الها :- خالة راح اخذ تكسي و اروح للجامعة ابو الخط رايح و عايفني

- تريدين فلوس عندج مصرف لو انطيج

- لا خالة عندي مشكورة

طلعت من البيت مستعجلة مشيت بالفرع، مريت من المحل اللي براس الفرع شفت خالد بالمحل، فتت :- صباح الخير

-هلو ديار صباح النور

- سمعت بحليمة

- اي دريت

- تتوقع ابوي

- ما ادري، يمكن اي ويمكن لا ، اللي اشتروا البيت و كرايبهم هم المتهمين لان محد يعرف ان بهاليوم تسلمت الفلوس لام رغد غيرهم، احتمال هم و احتمال ابوج مراقب

-و احتمال هاي كلها خطة من ابوي

- و بأحتمالج هذا راح تخلين المصيبة على راسج و هي بعيده عنج ، ابعدي ابوج من السالفة و اليشك بيه كليله اذاك ابوي و هنيالي لو بشرتوني بقتله، و اتبري منه

-بس حيل انقهرت عليها صار ساعة ابجي

- بالعكس اني ما انقهرت

- ليش خطية

- و سلمان هم خطية من جانت تضوكه انواع العذاب و جردته من بيت ابوه و جانت بعز الصيف اطرده بالحر و بعز البرد تكعد جوا المطر و ما عاش بخير ابوه و خلته يتنازل الها و تالي تشرد بالشوارع لحد ما مات و هو ما شايف ذرة من خير ابوه تتوقعين واحد مثل سلمان و براىته ما تطلع حوبته ؟

الله يمهل ولا يهمل، و امهلها وكت هواي حتى اتوب و هي كلما جاي تكتل روحها على هالبيت ومجفجفة على الفلوس لحد ما هذا البيت الكتلت نفسها عليه كتلها.

- الله يرحمه شكد عنده حوبة يم الله و طلعها

-ماكو انسان مظلوم ما اله حوبة و لابد بيوم الله يطلع حوبته شلون بسلمان و هو رجال مريض ما مأذي احد

-الحمدلله على كل حال، يلا اترخص اروح

- خطج وين لعد ؟

-منتظرني هواي و اني جنت ابجي ويا عمتي ما سامعته ورايح

- اقفل المحل و اوصلج

- لا راح اخذ تكسي و ارجع للبيت، شوكت رجعت من الاردن

- قبل ٤ ايام اني هنا

- هاا ، شوكت تجيب

ابتسم:- بعدها بالشهر السادس

- هاا اي ، مع السلامة

- انتظري اوصلج

-ما اريد شكرا

عفته و طلعت و هو يحجي وراي ويصيح، وكفت تكسي كبال عينه، هو اجا حاسب التكسي و انطاه الكروة

و ضرب السيارة و كال:- يلا توكلي و ديري بالج على نفسج

... مشيت للجامعة
اعز الاصدقاء صارو اليه هم مريم و عذراء و وسام و مهند صارلنا ٣ مراحل ممتفاركين و الكل تعرف صداقتنا من صدك محد بينا ينطي بالاخر وشكد ما حاولو يخربون بيناتنا احنا نفهم بعض و ماكو احد كدر يدخل بينا

عذراء يتيمة اب و امها انسانة بسيطة كم مرة اني رحت وياها للبيت زرت امها و هي مرتين جاية الية مرة عند عيالي و مرة عند بيت امي

وسام و مهند ما يكفون اتصالات لو صار ويانا شي وكانهم اخوتنا من صدك نستند عليهم
وسام فسخ خطوبته ويا بت عمه ، ومريم تحبه من ذاك اليوم لهذا اليوم بس ما مصارحته و منتظرته و هو ما حاس عليها

امجد يتضايق منهم بس اني باعدتهم عن امجد و ابد ما احجي بيهم كدامه و لما اريد اطلع وياهم، اطلع و اكمل و ارجع اكله طلعت ويا زملائي اليوم، ميحجي

لان اذا اخذ اذنه قبل لا اريد اطلع يكوم يحقق منو هم ووين رايحن وشكد راح تبقون و يبقى يدقق بكلشي و من ارجع يبقى يسأل ويتحقق وياي كأني مسوية شي بس جربته اطلع يلا اكله شفته يسكت فاخذتها طريقة احسن

... حليمة صابتها جلطة و بيت ما عدها لان باعته، قرر ابو رافد يأجر بيت الها يتشاركون بأيجاره هو و احمد و تجي رغد تكعد ويا امها اداريها

ابو امجد و امه ما عارضوا كالوله :- ما بيهاشي مرة مريضة و تحتاج بتها اداريها اخذ مرتك و اعزل
و حتى يخلصون من المشاكل لان من يوم التزوج احمد القال و القلت ما يخلص بالبيت خصوصا عيالي كلش يكرهون هاي الصفة ما يحبوها ولا يحبون المشاكل يحبون يعيشون حياتهم بهدوء و كلشي بعقل ينحل

فاحمد اجر ويا عمه و طلع عزل من عدنا، بقى البيت النا اني و امجد و اسامة وياي سويتله غرفته تجنن و الامانه لله ما فد يوم واحد من عيالي سمعني حجاية عليه بالعكس كلش يحبوه

لان هو محلي خبزته وياهم يجيب هداية لعمتي ، من يجي من الشغل يذكر عمي اباكيت جكاير و لو احتاج البيت يتسابق ويانا حتى يصرف خطية رغم امنعه بس هو ميقبل يحب يجيب بنفسه و يفتخر ان هو جايب

كلش افرح من يدخل عليه و جايبلي هدية لو اقل شي اكوم ابجي الولد الربيته بأيدي كبر و كام يجيبلي ، من صدك احسه ابني و مداريته حالة حال جهال امجد

بس هو هادئ مثلي ما يحجي ولا يرد على احد صوته يا دوب ينسمع مرات اتفاجئ ويا اصدقائه يضحك و يطلع صوته عالي لان هو كلش هادئ

عكس اثار كلما تكبر يطول السانها وياها يومية جايتني هي و سارة بت خالد انوب البنية جانت فقيرة من صادقت اثار كام السان ما يتلاحك عليه

من تجي يمي اتساعدني بالجهال يبووو شكد تحجي و شكد تسأل و تحير بغراضي شتسوي يا مكياج يا ملابس يا احذية يا اكسسوارات تلعب هي و فطومة و سارة ازياء و حسوني و حساني متفرجين
وتكلبلي الدنيا ، مرات يطك بعقلي اهججها من البيت و اكتلها و مرات لا اتحملها هي زعابيلها

عمرها ٩ سنوات بس روحها بالحمرة و الكحلة كلما اصعد الكاها ملغمطة روحها بمكياجي، اني ما احط بكدها ولا عندي واهس بالمكياج مثلها

مشت حياتي طبيعي بهالفترة ..
بس بقت حياتي ويا امجد جامدة مثل ما هي و هو تعود على هالشي كام يعوض هالموضوع بالمراسلات ويا البنات

ما فكر فد.يوم يتزوج ولا فاتحني بموضوع، رغم يعرف اني ادري بكل مراسلاته و مرات احسه يتعمد يخلي الموبايل قريب مني وبلا رمز حتى افتح و ادور بيه حتى احجي، بس ما حجيت كل مرة نفس اول مرة ما اهتم.

.......

خالد :- دخلت المحل المغرب لكيت رافد كاعد سلمت عليه : ها ابو مهيمن شلونك

- هلو خالد

-كالت امي كملت بيتك

- اي والله

- و شوكت ناوي تنتقل بيه ان شاءالله ؟

- والله اليوم ناوي احجي ويا ميعاد حتى نفضي نفسنا يوم ننتقل هناك

- ميعاد ليش ؟ ليش انت راح تخلي ميعاد بذاك البيت

- اي غير هي الساعدتني حتى ابني فوك ال١٨ مليون صرفت وياي على بنائه

- بس اني اشوف منى و جهالها افرض

- ادري بس ميعاد.....

-شاركتك ، اي عادي تكدر ترجعلها فلوسها دفعات على ما يصير عندك ، فكرلها رافد ابنك مو صغير و جهالك كبروا الى متى انت حاصرهم بالطابق الثالث بغرفتين
حق الله منى صبرت وياك صبر ما يتجازى لا ب١٨ مليون ولا باكثر منه.

و بعدين ميعاد كاعدة ابيتها لو شلتها بهالبيت ما راح يتغير عليها شي غير ان غيرت بيتها انت كاعد تدفع ايجار و هي ابيت وحدها بس هي و بتها.