رجعتنا بسيارتها هي للبيت و خابرت ام امجد انطتها خبر .. هم ما جانوا ناوين يسوون هيج حفلة و صالون و عرس وفندق رادوها بسكوت بس امي كالتلهم :- حتى اذا ما عدكم ميخالف اني انطي مني لعرس بتي هي فرحة حتى لو ظروف

فمنجبرين مسوين كل هذا و حاجزين ..
دخلتني للبيت و شغلت التلفزيون على علاته اغنية :- بلا بلا بلا و تركص هي و اثار كدامي و تعنيني بكلمات الاغنية، جانت كلش مشتهرة خاصة ركص ااراقصات اللي بالفيديو تتمايل وياهن هي و اثار



اي فرحة ما بكلبي و كاني صنم كاعد حاولت تضحكني هواي و تغير مودي بس ماكو جان كلشي منتهي بعيني

دك الهورن بالباب و اندكت الباب و سمعت صوت الهوسة، انقبض كلبي اتمنى اليخطفني هسه و اشرد من هذا كله و اتراجع الدموع غرغرت بعيني خزرتني امي

و اجت يمي :- شماتج هواي ديربالج تنزلين الدمعة كبالهم و تفرحينهم حطي ايدج بأيدة و ضمي البكلبج ابكلبج لا اطلعي لعزيز كلبج امشي بنيتي

و تلكاهم ( هلا و مرحبا تفضلو تفضلو )

فات امجد مبدل و مرتب نفسه
هو طويل جسمة مرتب حنطاوي صاحب عيون نرجسية ضاحكة و شعره خفيف بس يرفعه .. عنده شوارب بس ما عندة لحية




كعد بصفي و كال :- شلونج

هزيت راسي فاتوا خواته و امه و بنات عمة خوات خالد هم جايات وبقن يهوسن و يركصن و يتمايلن ع الاغاني

همس :- طالعة حلوة حيل

ما حجيت اختنكت ردت ابجي و امي تحط ايدها على حلكها و تكشر بخدودها عود اضحكي ، درت وجهي منها

سألته :- مها وين ؟

-بالبيت .

-منو يمها

-اختي دعاء بقت يمها و بتول هم هناك

-تعرف بالعرس
مدنك راسه اليه حتى يستمعلي من الهوسة ، رد :- تعرف اليوم اخذج بس ما تعرف مسوين عرس لان احنه ما جنا ناوين نسوي بس بعد طلبات ام اسامة و ما حبينه نردها

هزيت راسي كامن يصيحن عليه ( حبها ولك حبها لا تخاف من امها ) ابتسم هو اخذ راسي و باسني بگصتي

و همس : الله يقدرني و اسعدج ان شاءالله

هزيت راسي

فات احمد اخوه و خواته دارن ما دايره و كام يهوس وياهن و يدبجون و امجد يباوعلهم مبتسم

فات ابوه و الشيخ وياه كال :- الهم من رخصتكم دقيقة ، كعد الشيخ كبالنا و عقد النا و هن هلهلن

طلع الشيخ و ام امجد كالت الهن :- يلا يمه خلونا نزفهم

هن رفضن و يكللها :- مستعجلة خلينا نفرح و نركص هنا بعد وكت ع الزفة يلحكون يلعبون ختيلان و كاموا يتضاحكون

هو ابتسم و دنك دار وجهه ، تقريبا ساعة و هن يركصن قدمت امي الكيك و خلتنا نقطع هو وكلني و امي لازمة ايدي و تحركني و تكرص بيها و تكلي :- خليها بحلكة

وكومنا احمد من مكانا الا نركص وياه ويا خواته امي كومتني لان بنات ام رافد هنا تريد تحرك كلوبهن حتى يوصلن الحجي لامهن

كمت اني لا ابتسامة لا شي يجيبني منا و يردني منا بس امجد و احمد كاموا يركصون و يضحكون هم و خواتهم

رجعت كعدت و كعد يمي ما بقى واكف وياهم
ابو امجد كام يصيح لان السواق كلهم منتظرين بره و هن مخلصاتها ركص برا

فات اخذنا من ادينا و كاله :- مرتك يابه هاي تصونها و تحميها و تحفظها و تراعيها و انت يابه زلمتج هذا تارعينه و تحفظين بيته و جهاله والله يوفقكم ان شاءالله

وطلعونا برا ذبحوا خروف بالباب و دمروا حذائي بيها امجد شابك ايده بأيدي، ابن عمهم اسمه مازن هو الجان السايق

صف واحد اكرع بس ظهره منطي النه فتح باب السيارة و نزل مازن ، وكف رافد يسحب يلتف و الكاه خالد لابس قاط و مزين اكرع

بقيت صافنه بيه و عيونه مركزة بيه، فتح الباب امجد وراي و هو كدامي و خوات امجد لازماتلي البدلة، صعدت بالسيارة و رافد لازم خالد من ايدة

ويهمسله :- خالد عوفهم يرحون بامان الله لا تسويلهم مصيبة

نكث ايده من رافد و صعد بالسيارة، صعد امجد
اباوع عليه من المرايا العيون مركزهن بيه اكرع و العيون صفر يتلمعن من القهر الواضح بعيونه
يحاول يخفيهن بابتسامة كذابه بس ما جاي ترهم وياه

الحقد واضح بعيونه و هو يشوفني بصف امجد و امجد لازم ايدي، تحسه جاي يفور ع الهادي

جان المفروض ابو امجد يصعد ليكدام بس ابو امجد.داير يوصي ويحجي وياهم بعده ما صعد
هو حرك السيارة و مشى ......

☆☆☆☆

#اتمنى_ان_افعلها


الحلقة_30

رافد :- من يومين و خالد مختفي ما مبين موبايله يدك بس ماكو رد، ابوي انشغل باله عليه حيل و امي تعب حيلها و هي تبجي عليه لان وضعه كلش مو تمام
جان مخلصها سكوت هسه اختفى

ابوي احتار ما خله صديق و اقارب ما خابر عليه حتى يعرف خالد عدهم

جوازه و ملابسه كلهن بالبيت مو مال مسافر
وين راح ؟

كعد ابوي محتار وكلش ندمان لان ما خلاه و ساعدة بزواجته من ديار الى ان وصل مرحلة فقدناه و ما ندري وينه

خالد شخصيته من بيناتنا عنيد و سكوتي و شكد ما بيه حنية بنفس الوقت حقود و ما ينسى الاذاه
ولا يسامح

.... بيت ابو امجد ما جانوا ناوين يسوون لا عرس ولا زفة ولا ابد حفلة صغيرة ابيت ديار و انتهت يلفوها للمره و يرجعوها لبيت عمي و تنتهي

بس ميعاد طالبت رادت بدلة و حفلة و زفة عرس لو غرفة فندق لبتها و كالتلهم اذا ما عدكم ما بلازم اني انطي من عندي اهم شي سعادة بتي

فاستحوا و قرروا يسوون حفلة بس الحفلة ابيتنا لان نا يردون مها تنقهر على زواجة رجلها و زفته

خواتي من سمعن حفلة ابيتنا كلهن التمن عدنا هن و جهالهن، صارت الهوسة بالبيت وكرابتنا زلم اجوا

لا بينا نطلع ندور خالد ولا نكدر نكعد و هو مختفي
اندك عليه ما يجاوب امي تخربطت بيوم العرس و انخبصنا عليها، اخذناها للمضمد طلع ضغطها صاعد انطاها علاج و رجعنا

الكل انقلق على خالد وينه
خواتي ما رادن يروحن لبيت ام ديار لان امي مريضة بس ابوي كال الهن ما دام انتن جايات ع العرس روحن امجن ما عليها شي اني يمها

التموا الاقارب و طلعوا من بيتنا راحوا لبيت العروس .. و امجد وياهم، هم زين خالد ما جان موجود لا جان مات و عرس امجد على ديار ابيتنا

دخلوا ابيت العروس يصفكن و يهلهلن و احنا واكفين برا ، شفت سيارة خالد صفت اباب المحل مالتنا جان كاعد بيه رائد

اني ركضت و رائد طلع اله بسرعة ، نزل من السيارة لابس قاط اسود و مزين صفر

:- وينك يمعود قلقتنا عليك

خالد :- راحوا ؟

رائد :- خالد رحمة لاهلك عوف هالسالفة البنية اتزوجت عوفها ابحال سبيلها

-الخانتني لخليها تعيش شعور الخيانة كل يوم

رافد :- لا تتخبل و ارجع للبيت امي تمرضت من وراك

خالد :--امك تكتل المكتول و تبجي عليه

رافد:- لو شما تسوين غصبا عليك و على راسك تروح تبوس راسها و اطمنها حقها خافت عليك من ابوها و ما رادتها الك

عافنا و مشا

خالد تعال هنا، خاااالد وين رايح
لزمت ايده :- شرايد تسوي

باوع بوجهي، نزل ايده :- ابتعد رافد

-على شنو ناوي فهمني

فات من بينا اني ورائد و راح يسلم على ولد عمي الواكفين اباب بيت ديار، و هو وكف

صفت سيارة احمد نزل الخروف من صندوك السيارة و الكصاب وياه، صحنا عليهن حتى يطلعن و نطلع
ماكو ما رضن بعدهن يركصن

فات احمد يهوس ويا اخواته و البنات و بقى الباب مفتوح و الحفلة بالصالة كبال الباب، ديار ما بينا كدام الباب بس نص من امجد

خالد واكف مستقيم و اديه وره ظهره و يباوع
رائد خابر على ابوي و كاله خالد هذا هنا ، شويه و اجا ابوي سحب خالد و بقى يرزل بيه لان غايب و ضال بالنا عليه

خالد داير وجهه و عينه ع السيارات ولا يمه الحجي
دفعه ابوي :- مو احجي وياك خاااالد

خالد :- حجيتو و فرضتو عليه هواي كبل لا تعتقدون راح اسمعلكم بعد من رخصتك يابه

مشى ابوي راد يسحبه لزمته :- لا تضغط عليه اكثر يابه خاصة بهذا اليوم خليها تمشي على خير

-وشعده جاي ولابس قاط عرسه لو عرسها

-هذا النريد نعرفه و مراقبينه

شفنا ابو امجد اجا كلناله يابه :- سد الموضوع خلي الامور تمشي نريد نفتك من هاليوم الاكشر

طلعت الزفة مال العرسان ، ووكف بالباب ديار و امجد ذبحوا كدامهم فداء ، اباوع خالد مشى لمازن قبل لا يصعد، طالب منه هو يسوق

مازن هم ما كال انطاه السويج و كاله :- تعرف وين بيا فندق ؟

-خالد :- اي اعرف كالولي

جاي امشي اسحبه اجوا امجد و ديار يصعدون، فتح الباب الها و هو يباوع بعيونها ، صعدوها هي و البلدلة و هو راد يصعد ، سحبت ايده :- خالد عوفهم يرحون بامان الله لا تسويلهم شي

سحب ايده مني و صعد بالسيارة و امجد صعد، لا اكدر احجي ولا اكدر انزله، بقيت واكف و حاط ايدي ع السيارة مال العرسان

ابو امجد ملتفت يوصي باحمد و داير يحجي وياه، خالد حرك السيارة و مشى بالعرسان،صحنا وراه :- خالد خاااالد

بعدنا جاي انصيح على خالد ،طلعت ام امجد من البيت تصيح :- ابو امجد الحك مها تخربطت بالبيت

التهوا عن خالد و التفتوا لمها كلها فزت للبيت ، بس سيارة ابن عمي هشام لحكت خالد

لزمت سيارتي و جاي اتبع خالد طلعت ميعاد :- اوكف رافد.

-شكو شصار

-بس الحك خالد يمعوده خل اشوفه وين راح

صاح ابن عمي مازن :- نطلع رااااااافد

اشرتلهم اصعدواا

ميعاد :- و الجنطة يمعود ؟

-يا جنطة ميعاد خل الحك

-شتلحك غير جنطة ملابس ديار و امجد اليبدلون بيهن بالفندق خوما يبقون بس بملابس العرس !

-ميعاد ادخلي عوفي الجنط

-شصاير ابتي راااافد

-بتج خالد صعد بسيارة زفتها و طلع و وين طلع محد يدري بيهم، يكلبهم يموتهم يسلكهم ما ندري، عوفيني بحالي بس خل الحك اخوي لا يسويله مصيبة

-اوكف اصعد وياك

ركضت بسرعة صعدت هي و بتها و اسامة بقى واكف اباب البيت ، اخذت السيارة و شحطت بيها ، اخابر على خالد ما يرد

خابرت امجد، رد :- الووو ها امجد

-ها رافد

-اكلك سيارتكم وين ؟.

- بالطريق ماشين انتم ورانا ابوي وين

-وراكم احنا جاي نمشي بس ضيعنا السيارة

-انطاني الشارع
دست بالسيارة و امشي ، خابرت مازن كال احنا ورا السيارة بس خالد كلش سريع بالسياقة مالته و جاي اخابر عليه ما يرد

رافد:- نعلعلا شرفك اذا صدك

ميعاد :- بتي شبيها رافد اخوك وين اخذها

-ما ماخذها يمعودة بس لا تخبصيني رحمة الوالديج

..........

ديار :- حرك السيارة و ابو امجد بعده ما صاعد فتحت عيوني حيل من الخوف و بقيت مفزوعه من شخطته بالسيارة حيل

امجد :- ابوي بعدها ما صاعد على كيفك خالد

داس بيها سريع كلش، باوع الامجد :- ليش هو يصعد خررب عبالي بس انتم يلا يحلگكم عود

رجع باوعلي، ورفع صوت السيارة بصوت عالي كلش على اغنية ( هزي هزي ) ولد عمه لحكوا السيارة و يدوسون بالهورنات ويركصون

قلبي مقبوض خايفة من خالد حيل بس امجد داير وجهه على ولد عمه يضحك وياهم و ذولاكه يصفروله

عيوني مركزة بخالد سياقته اسرع من المعقول، صاحو ولد عمه عليه :- خااااااااااااااالد خف خف يمعود

صاح عليهم :- البيه خير منكم يلحك

وداس بيها و هم وراه .. هم جايبيها بضحك و امجد بضحكة يكله :- خالد خفف يمعود لا نروح بيه

باوعله :- خايف ؟

امجد :- لا بس خاف ديار تخاف

باوعلي :- لا ديار متعودة على سياقتي مو ديار

ما حجيت كلشي بس مدنكة و مغمضة عيوني، فززنا و هو يسوي تفحيط بالسيارة لافها قوي و امجد يضحك ويا بصوت عالي واني لاومة بالكشنات

درت لامجد :- كافي كله خل يخفف

اني حجيت ويا امجد هيج لو هو زاد السرعة حيييل ، بقيت كامشة بالكشن اللي بظهر خالد لان اني صايرة وراه مباشرة

حجيت و باوعت بعيونه :- عفية مو هيج خفف اني اخاف

امجد :- خالد خفف فدوة لا تروح تكلب السيارة

خالد :- فلا اخليهم يسبقون
مسويها بضحك بس عيونه تحجي غير هيج

كام امجد يلتفت وراه :- ماكو خالد ضيعونا خفف يمعود فدوة

زاد بالسرعة و هو يصيح :- لا تخاف كوي كلبك

جلبت بأيد امجد من السرعة هو حط ايده ورا جتف و سحبني اله حظني حتى ما خاف

من شافنا هيج وكف السيارة فجاة رادت تنكلب بينا السيارة، انضربت بالكش ورجعت و انخضينا خض ، كام يصيح امجد :- لا خالد لا مو هيج فدوة

داس بيها سريع و امجد يصيح :- شجاك يمعود دكافي خفف البنية راح تتخربط

كلما يحجي و خالد يزيد، كام يعتعت بالسيارة يوديها منا يجيبها منا،كلبنا تكلب بالسيارة امجد ضاج حيل
وكام يصيح عليه و خالد ما مهتم

ضيعنا ولد عمه كلهم و طلع بينا لطريق مو للمنصور و سريع ، كمت اصيح :- كاااافي خالد دخيلك كافي والله اخاااف

امجد :- خالد رحمة لاهلك مو مال شقة يمعود خفف

لف السيارة و راد يدور و هو بكل سرعته صار صوت عالي بالشخطة كمنا نصيح :- خاااااااااااااااااالد

.........

ميعاد :- دخابر امجد ارجع خابره خل يكله خفف سرعة

رافد:- اخذت الموبايل خابرت على امجد موبايل امجد انقفل !! ... لا لا يا الله

ميعاد :- هااا ؟

- انقفل موبايل عزا العزاني كون شسوا اخوك ابتي رااافد

-كولي بتج شسوت بخالد ميعاااد، ما خلت عليه عقل ليون وصلته بسوالفها

-حيل بيه و ابو زايد يستاهل

-هاي جزاة وكفته ويا بتج هيج مع الأسف عليكم فعلا خيرا تعمل شرا تلقى

-يا خير عيني فدوة يا خير ليش هو ما كالك شنو سوا ابتي ترا لو ما الفضيحة والله ما اسكت بس كوة جارعة السم ابطني وساكته

التفتت عليها :- ليش شصاير ؟

-يعني مسألت نفسك من ديار لمت دكم قميص اخوك من غرفتها و خلتهن بيدك ...شصاير ؟!

-يعني شنو ؟

-خالد سوا اسوايته الشينة يا رافد و الله فلا اخليه يتهنى

-معقولة ! خالد اخوي و اعرفه ما يسويها

-اذا تعرفه ليش خايف يدعمهم هسه ؟ مجذبه عليك كبل حتى تكلي معقول وما معقول ما مقبوله منك رافد

-مو قصدي ام ديار، الا صدددددددك

-شنو

-اتذكرت ! شفت خالد الظهرية بسيارته و جانت حالته غريبة و قميصه مفتح سألته و ما رد معقوله خالد يسويها

-رجع يكول معقولة

-اي يا ميعاد ترا خالد اخوي ووالله هو مو هيج ما توصل بيه يأذي بنية و يدوس عتبة بابها

-بس سواها الله لا ينطي

-كولي شجاي يصير بخالد حتى وصل هالحال

-عساه بارذل حال فوك السواه تبررله، احجيلي هسه وين الكا بتي ؟

-والله يا ام ديار ما ادري شوفة عينج مثل المطي افتر و ما جاي الكاه

-حشاك عيوني رفودة حشاك، بس اني ظال بالي على بتي اااه شلون راح اعيش بدونها و شلون راح اتحمل البيت

- مو بعيدة هي ان شاءالله يمي

-بس غربة البيت تكتل

- اني على بالي

-انت طولتها هواي

-اي شسوي غير الوالد هم معصب و ما يقبل بهالموضوع

-اذا راح تظل ورا اهلك تاليتك تصفى مثل حال خالد

-قصدج تتزوجين و تعوفين

-غير لو يحلا بعيني غيرك شيخ الشباب من فدوة رحت الطولك اني

- ان شاءالله هاليومين اختم هالموضوع ابلغ الوالد و احاول اقنعه

-ابوك يحلل على نفسه و يحرم عليك اي ميصير هيج

-شقصدج ؟

-الاقصدة يمعزوز الگلب والعين ادري بزواجة ابوك من مرت ابو سلمان

-ما ينضم عليج شي انت

-ترا بيتي بالفرع الثاني جان يعني منطقتي و كلهن حبايبي البيه و ماكو سالفة سالفة ما تنضم ع النسوان

-اي اتزوجها صار ٦ اشهر

-اعرف

-بس مو الغاية لان ما بقالهن معيل و الراتب مال سلمان انكطع و حالتهن صارت تقهر وصلت بيها تبيع من بيتها فمختار المنطقة حجه هالشي للزلم و ابوي كال اني خطابها و اتزوجها حتى يتكفلهن

-ولد ابليس انتم مال الكم امان وكت التحطون ابالكم الف حجة و عذر اطلعون

-دخل نشوف خالد وين والله كريم نحجي بالموضوع ، بس ياريت محد يعرف بالموضوع لان امي ما تدري

-لا لا اطمن لا تخاف قابل اروح و احجي لامك و اكلها رجلج اتزوج عليج و احرك كلبها، لا يا ... حرام ما اسويها

رافد :- خابرت على ولد عمي :- ها ما حصلتو خالد

-ما جاي يرد

-وامجد موبايله مغلق

مازن :- هسه شلون نروح نبقى مو منتظرينهم اني و ابو ابو نور و عوائلنا

رافد :- ارجعوا يابه هو يوصلهم و يرجع هو عرس و تبطنش بيه بوكعة مها، روح روح يابه

.. سديت ، رديت خابرت على خالد ما يرد :- خرب بغيرتك اذا صدك
رجعت خابرت على عمي ابو امجد

-ها عمي شصار

-والله يا عميهالبنية هاي درت مسوين زفة لامجد و راح ناخذهم للفندق و تخربطت احوالها لحد ما وكعت

-اي مو هي الرادت اتزوجه و نكت براسه بعد شكو ؟

-ما تعرف النسوان و غيرتهن رجلها يابه حقها مو سهله

-منو كايللها مو صينا محد يفوت يمها ويحجي

-الجهال حاجين، امجد و مرته وصلو لو لا جاي اخابر على امجد مغلق

-والله يا عمي ما ادري و اني هم جاي اخابر ما جاي احصل احد بيهم

-ولك خاف صار وياهم شي ما معقوله كل هالوكت ما يصلون للفندق

-لا تخاف عمي كول يا الله يمكن طول الهم بالزفة يتونسون

-ان شاءالله، يابه هاي ام امجد دكول ملابس امجد بالجنطة اخذتوهن

-يمكن بقن بالبيت لا

-اخذهن ووديهن الهم للفندق ابيش يجون

-ان شاءالله عمي ان شاءالله

سديت منه :- الجنطة وين ؟

ميعاد :- بقت بالبيت

-نرجع نجيبهن بعد شعدنا ظالين نفتر عمي ابو امجد بسيارة احمد هو و عمي ويا مها بالمستشفى منو يوديها

-هو انت لكيتهم حتى تودي

- غير لو بس يررررررد هالبشر هذا

............

رادت تنكلب السيارة بينا الا شوية وكفها و امجد عصبي حيل وهو يحجي ويلوم بخالد، اشرتله راح اتقيئ فتحت الباب و نزلت

نزل خالد بسرعة و امجد اجا ، بعدتهم و اني اتقيئ
ذبيت من راسي على كد ما گلب بينا بالسيارة

طلعلي كلينس من جيبه و امجد اندار يدور مي بالسيارة حتى يشربني

خالد :- عدت بقدرة ربج لا تخافين

خزرته و حجيته بهمس عصبية :- وخر مني حيوان الله لا ينطيك

رجعت اذب من راسي:- لا تخافين احتمال حامل يروحي

انقبض كلبي من كلمته و مر على بالي هالشي
يعني معقوله يصير من اول يومين ، لزمني امجد و هو يكول :- هاج اشربي يابه بس اشربي

من الخوفه الصارت بيه شرگت بالمي اريد ابلعه كمت اكح بقوة و خالد يكول :- صحة يمعودة صحة

امجد :- ابتعد خالد لخاطر الله السويته كلش ما معقول تدري ردت تموتنا

-لا تكبرها يربك كلها يله سرعنه شويه ، امشوا خل اوصلكم

ديار :- امجد انت اخذ السيارة و سوق و خلي خالد يرجع للبيت بتكسي

خالد :- هاي شبيج خلو اوصلكم و ارجع

امجد :- بس بدون سرعة خالد ترا كلبت العرس ولصته و نعلت ابوه

-اصعدو

-رجعنا صعدنا فوتنا بأزدحام يخنك

امجد داخ كلش الجو حار و المكيف بالازدحام يقل، حجه :- جان مشيت مناك

-ما بقى شي وصلنا، غمز اله تلحك يا بطل

-دار وجهه امجد ما ضحك كلش ضايج

كوة كوة وصلنا للفندق محد موجود، امجد الموبايل مالته واكع و طالعة البطارية ومنطفي اخذه خلاه بجيبه

ونزلنا ما خلانا نتهنى بالعرس كله كلبه فوك روسنا
للحظة خطرلي ان هو راح يضرب السيارة بينا بس الحمدلله ما سواها و عدت .. او يمكن ما اتجرئ لان جانت اعصابة كلش مشدودة

كعدنا بالانتظار على ما شاف الحجز هو و اجا ، انطا البطاقة الامجد ، عيونه بيهم الف قصة و الف تفسير يحجيهن .. باوع عليه بنظرة تنهد دار وجهن وطلع

امجد كام يباوعله :- والله مخبل مو صاحي انعل يومه كرهني بالعرس كله

اخذتنا موضفة بالفندق ووصلتنا لغرفتنا، سد الباب
تفكيري كله بنظرات خالد و كلمته من يكلي (حامل حياتي) يعني معقوله يصير عندي حم و اني على ذمة امجد

شنو هاللعبان نفس الخليت نفسي بيها، كلش دخت ودخلت للحمام اتقيئ و ابجي امجد واكف راي بدون ما يتحرك بس مجتف اديه

غسلت و طلعت ، حجه :- ديار شنو اللي جاي يصير ؟

ديار :- شنو مفهمت ؟

-بدخلة عرسج تبجين هالكثر وقبل يومين تصيحين بيه و من يوم انحجه بالموضوع و انت ما تحجين ولا تنطقين انطيني تفسير للي جاي يصير لان تعبت و اني افسر

-ما بيه شي

-هالشي ما تقنعيني بيه اكو احد بحياتج و حرجتج مها و غصبتج ع الزواج احجي تعرفين احد بالجامعة و هيج مدمرة من عرسج

-بقيت ساكته

-لا تسكتين احجي تحبين احد؟ ترا مو عيب تحبين بس العيب تبقين على ذمتي و انت بكلبج احد ثاني

-اني بس دايخة شوية ما بيه شي

-اذا اكو شي كولي حتى اتراجع عن هالزواج لان من صدك ما كمت اتحمل

-سكتت تقرب مني، صار كبالي و قريب من وجهي :- راضية بيه ؟ كليلي رايدتك قنعيني لا تبقين بهذا سكوتج

بقيت اباوع بعيونه، نزلت دموعي :- اني والله تعبانة

ضرب الحايط بقبضة ايده بعصبية فزيت و شلت اديه فوك راسي منه

-روحي نامي ديار

-مشيت للسرير من الجهة الثانية انطيت وجهي للشباك وكعدت حطيت راسي ع السرير، كعدت ابجي بكل قوتي، من صدك حطني بمستنقع و حركني لا اكدر اتقبل نفسي بهالوضع ولا اكدر اتراجع و كل ما تمضي بهالزواج خطوة جاي اتورط اكثر
بودي اكول لامجد كل البكلبي و اخلص
بس اكيد راح يطلكني بساعتي
ساعته شيكولون عليه و منو راح يرحمني
بنية تطلك بليلة دخلتها !

سمعت ضرب الباب قوية كمت ابجي حيل بكل قوتي ربي خلصني دخيييييلك، شلون لو حملت من خالد من صدك ؟ اصير مثل امي معقولة و احط طفل رجال بأسم رجال ثاني ؟

اكتل نفسي ولا اقبل بهيج شي ما اتحمل
حركني و دمرني وكلب كل حياتي فوك راسي شراح اسوي و شلون راح احل هالموضوع

رجع فات امجد من سمعني ابجي كلش تضايق ، تقرب بعصبية لزم ركبتي :- منو هذا الجاي تبجين عليه بليلة عرسنا منووووووو

كمت ابجي صوت عالي، سحبني من راسي قوي :- تحجيييين لو ابتلي بييييج ولج احجي

كام يضرب براسي بالفراش و هو فوكاي و يصيح :- احجي احجي احجييبييي

اندكت الباب كام من يمي، دخل النا المضيف العشا ما ادري شنووجان ولا باوعته، جنت لامة نفسي و دايرة وجهي حتى ميشوفني و اني ابجي

انطاه بغشيش امجد و طلع، رجع لم الموبايل و رتب البطارية و خابر على ابوه يريد منه الجنطة كاله :- الجنطة راح يجيبلكياها رافد

قفله من ابوه بسرعة، بسرعة اتصل رافد:- الو ها يمعود

امجد :- رافد الجنط مال الملابس وين اريد اتجفن ابدل وينهن

-شبيك

-ما بيه شي

-خالد يمك

-انعل ابو خالد اكلك الجنط تكلي خالد رافد شبيك

-هسه جايبيهن و جايين وصلنالكم قريب

-استعجلو

بقى يفتر بالغرفة يروح و يرجع ما يحجي وياي بس ينفخ .. كمت حتى اخاف ابجي كدامة حاضنة روحي و اباوعله بخوف .. كلما تدمع امسحهن حتى ما يرجع عصبي و يهد علية بس الشهكة تطلع من صدري غصب عني

كعد بطرف الجرباية من الجهه اللخ و انطاني ظهره
هدووووء حتى الشهكة كمت احاول ما اطلعها و اوتره
دموعي تنزل بهدوء بسكوت عنه

اندكت الباب كام هو حتى يفتح فاتت امي و اثار و رافد بالباب، بس شفتها صحت :- ماما
وبجيت من كل گلبي

اجت حضنتني ، حضنت خصؤها حيل و ابجي بكل قوتي بحضنها :- عزا بتي يما شسويتلها ولك

امجد :- اسألي بتج ليش تبجي بليلة عرس على منووو

ميعاد :- تبجي على توالي اهلك اكو عروس بليلة عرسها ما تبجي حتى هيج مسوي بيها

-وهي تبجي و كالتله روحها لا تقنعيني ماكو هيج

-وعساك لا اقتنعت شنو غريبة عليك ديار لو ما تعرف بحالتها النفسية حتى هيج جاي تحجي عليها بس هالكلام ما ارضاه و هسه اخابر ابوك و عمامك و اجيبهم هنا دا اشوف شلون تسوي ابتي هيج بليلة عرسها و تطعن بيها و تشكك

رافد :- ام ديار اهدي الولد خايف عليها لا اكثر

امجد :- مو هيح ولكم ما راضية بيه تعرف شنو ما راضية بيه

ميعاد :- شتريدها يمه اطكلك اصبع لو تهزلك جتف وفرحانه بعرسك، متزوجتك لخاطر مرتك وهذا الشي الجبرها عليه وكت الاخذتها من بيتي اصونها و اصونها شصنت بسم الله بعدنا باول ليلة شككت ابتي و طعنت بيها

رافد :- كولو يا الله يمعودين اتهدوا عروس و خايفة طبيعي

امجد : مو اول زواج الها حتى تخاف

-زواجيش انت خذت الها واحد بنص عقل وتكلي زواج لو ما هي اخذت روحها حتى ما تنقص من برجلها لان بنية شريفة و مرباية و ما انطت بيه ولا حجت ، ليش تخلينا نفتح مواضيع عيب نحجي بيها

كافي ما رايد بتي عوفها ما تايهتلك هي حتى هيج مسوي بيها، وكت الردتوها خدامة ركضتولها بالزواجة ركض ووكت البجت هي و تاذت صرت الها فرعون تفر على راسها

كومي امي كومي هيج زواجه هم ما اريدها و اني اعرف اتصرف الا اكعد.عشايرة و اطلع حقج من عيونهم دا اشوف منو اليرضى يصير هيح ابته و هي عروس

رافد :- هاي شبيج ميعاد كولي يا الله ما يصير هيج

امجد :- اعتذر ام ديار هي لا كالتلي خايفة ولا كالتلي اي شي اكلها تفكرين باحد تبجي فكرت تبجي لهسبب بس والله مو قصدي اطعن بيها

ميعاد :- هالمرة راح اعديها بس لان ما اريد اجيب الشبهه البتي و تجيها حجاية على ابو ليلة عرسها صارت مشكلة

بس ثق بالله يا امجد لو اذيتها مرة اللخ لا تتوقع ابوها عار و عمامها عارات وحدي بمية رجال والله الدنيا ازلزلها جوا رجليكم افتهمت و هذا مو تهديد هذا تحذير ما تأذي بتي

هو طلع برا من كلمتها ما راد يرد عليها و رافد كاللها :- كلش طوختيها الحق اله و كلبتيها عليه

-اشش و اطلع مني، اشو ماما اشو سودة عليه حبيبتي يماااي باع العيون حباية بكلبك يا خالد هم سوالكم شي ولج احجي

-انطيني ملابسي اريد ابدل خنكتني البدلة

طلعتلي سيت نوم من الجنطة و حطته كبالي

-منتظرتي البس هذا ماما اخذي مني

-والله يمه اعذريني ما وصيتيني اجيبلج جفن تلبسينة بليلة عرسج ، دكومي لا اكطع القندرة على راسج ما كافي مسويتلج فلم هندي ومخبلة الرجال و مخلية عقلة يوكف

-هالملابس ما البسهم

-اني العلية راح اخذ البدلة و عود ابقي عريانن شعلية بيج يطبج طوب

ديار :- ماما ضميلياها اتذوج بيها

-اسكتي انت حصو فصو من هسه مفلفلة ع الزواج من تكبرين شتسوين

انجبرت البس روب النوم و البس فوكاه الروب الطويل

كعدت امي :- خفنا لا خالد يسويلكم شي

-راد يسوي و تراجع باخر لحظة وصلنا الموت كرهني بروحي

-كافي وله و ما سوا شي، انسي هسه و ديري بالج على رجلج و بطلي لطم كبال الرجال مو ليلة عرسه و تزوعيهياه

لبستني وفتحت التسريحة مالت و صفطت شعري ، وجهي معبس جرت اخدودي :- فرديهن ضحكي كافي لطم، فكرتي روحج بهالوجه اليلطم

طلعوا من الغرفة و بقتني وحدي، امجد ما فات للغرفة ابد، اخذت الموبايل و باوعته مكالمتين من رافد

دنكت راسي و الف فكرة ذابحتني
جريت الموبايل، طلعت رقم خالد باوعته بجيت
دزيتله (دمرتني )

ماكو رد .. صفنت و مر على بالي كل السواه بيه بالسيارة عيونه نظراته حتى شكله الجديد و هو اصلع

اجت رسالة (لسة ما شفتي شي )

رجعتله رسالة ( ما يحتاج تسوي شي اقسملك بالله لو فعلا اني حامل منك انتحر و انت السبب والله لا يبريك الذمة )

فات امجد للغرفة ارتبكت اريد اندل منين امسح الرسايل ما جاي اسيطر ع الموبايل

حجه هو :- شبيج ؟

رن الموبايل بمسج من خالد

امجد ويا منو جاي تحجين ؟ .....

☆☆☆☆☆☆

#اتمنى_ان_افعلها

الحلقة_31

‏ترفضُ دائماً أن تتحدث عن ما يؤلمُها لكن ما يؤلمُها يلمع في عينيها 🖤

.............

امجد :- ويا منو تحجين ؟

ديار :- اااا شسمه ولا احد يعني اا

امجد:- شبيج ارتبكتي !؟ جاي اكلج ويا منو جنتي تحجين ؟

-ويا امي

-شو

مد ايده يريد الموبايل، بلعت ريگي :- ما تثق بيه ؟

-مو شغلة ثقة بس حاب اعرف ما بيها شي، انطيني اشوف

دك الجهاز ، احس كلبي الدك مو هو ، اريد اباوع بالأسم كل جسمي كام يرجف ، سحبه من عندي ، باوعه :- خالد هذا شعنده ديتصل بيج هسه

-ما اعرف ااا انت جاوب يمكم نسى يعني شي

-لا جاوبي انت و افتحي سبيكر

تغوشت اعيوني، اذا ذبحوني ميلكون قطرة دم بيه من الهوف، اخذت الموبايل من عنده، كلت بداخلي يارب دخيلك ساعدني و رديت :- الوو ها عيوني خالد اكو شي

هو اخذ نفس و تنهد سكت شوية و حجة :- امجد وينه

راح يغمى علية من الخوف ، امجد يأشرلي اسأله شتريد، كلت اله :- هذا امجد يمي ليش يعني شسمة شتريد

سكت و طلع اه من گلبه انوب حجة بنبرة كوة ديحجي بيها مخنوك كلش :- اتصلت عليه ما حصلته فخابرتج

-هاا، اي .. تريده ؟

-لا بس ردت اكله مها بالمستشفى نقلوها و حالتها كلش صعبة

امجد فتح عيونه ، طلع الموبايل من جيبه ، ورفعه يخابر و طلع برا و الباب مفتوح

همست :- روح بعد لا تخابر الا شوية جان متت

خالد :- والله دنعل اليوم الشفتج بيه يا بنت الكلب هديتي حيلي

قفلت الخط بوجهه و امجد يخابر بأبوه و يحجي وياه، حذفت الرسايل بسرعة، و اني اردد (الحمدلله رب العالمين شكرا الك ربي )

فات :- هاي صدك مها واكعة و متخربطة

-ليش ؟

-سامعة ان مسوي حفلة و راح نروح للفندق طالعة و سامعة صوت الهوسة و العرس ومتخبلة لحد ما واكعة

ما حجيت الهبطة بعدها بدمي ما جاي يطلع من الساني اي شي اواسي بيه، بقيت واكفة اباوعله

-لازم اروح بس ابوي يكلي لا تجي كلنا وياها

-لا عادي روح

-ما ادري ، بس لازم اروح اشوفها ابقي انت هنا ما اطول ساعة ساعتين و ارجع، اووو بس شلون مشكلة سيارة ما عندي !

-روح تكسي

-اي هو هم هيج طلعيلي ملابسي البنطرون و القميص بالجنطة ما اريدها تشوفني بالقاط تتأذى، يلة استعجلي شبيج تصفنين

التفتت للجنطة اطلعله الملابس بس ايدي بايدة من الخوفة ما جاي تاخذ، نزع هو القاط، و التفت اليه:- شبيج متكليلي مو ذن كدامج انطيني

مديت ايدي اسحب البنطرون، هو دنك بهمة سحب البنطرون و القميص و كال :- تبقين هنا ما تخافين

هزيت راسي بمعنى (لا )

-زين لعد اقفلي الباب لحد ما اجي ماشي ؟

-هزيت راسي بمعنى (اي)

طلع من الغرفة سديت الباب وراه :- اوووه تنفست اصعداء جان متت لو عرف
بجيت بمكاني على حالي شلون راح اخلص
كل ما تمر لحظة اتورط اكثر و اكثر
كمت من مكاني، اخذت الموبايل و خابرته

رد، اتهديت بيه :- يا حقير يا نذل بعد اذا خابرت والله اكلب الدنيا فوك راسي فك مني عاد

-انت الدزيتيلي رسالة و انت البديتي مو اني احمدي ربج و اشكري ما فلتتها كدامه جان هسه انت من عداد الموتى

-و انت تتمنى تسويها و جاي تحقر وياي

-جان سويتها بس متستحقين اخلصج من هالموضوع ابساطة اصبري على رزقج بعد جايتج ايام الا تبجين دم عليها

-شسويتلك اني فك مني الله عليك

-السويتي انت هسه هناك و هو وياج بينما جان المفروض اني، السويتي حركتيني ورحتي لحضنة ترتاحين

-والله ما جاي ارتاح

-لأن ما جاي اخليج، ليش اليعذبني يرتاح ؟
تتعذبين مثل ما اني جاي اتعذب، كلما يضيك صدري اضيك الدنيا عليج و اخنكج وما راح اخليج ترتاحين

بجيت:- والله كل الردته ترجع لعائلتك، جنت صغيرة اتمنى امي تحتويني ليش احرم بناتك من شي جنت اتمناه، عفتك لان نا اكدر اشاركك والله

-عذرج اتفه منج

مسحت دموعي، وحجيت بعصبية :- اتفه ما اتفه تبتعد مني ولا عاد تشوفني وجهك ثاني ما اريدك اتزوجت ابتعد مني و خليني اعيش ويا رجلي براحة

ضحك ضحكة طويلة :- لو شريفة ما تتصلين بيه و تتبجبجين علية و انت بغرفة عرسج و ليلة دخلتج، مو كلت الج انت وامج واحد الفرق انت تدعين البراءة و هي تدعي الشرف .. و اثنينكم عملتين لوجه واحد

-بسببك اطلع من حياتي و اني بخير معليك بالباقي يلا ولي

-وارجع و اكول انت البديتي و انت المتصلة بيه مو اني

-لازم نسيت شسويت بينا بالسيارة اني كلت الك تجي تسوق النا، انت تفر بيه و تذب الصوج علية اليوم جان متنا بسبب و بسبب عقلك السخيف

تنهد:- هسه صار عقلي السخيف، من لما جنتي تلتجئيلي اخلصج من مصايبج ما جنت سخيف، زيدي بعد خل اكرهج

-اني كرهتك و متت منك و ما منتظرة تزيد ولي يلا

قفلت الخط بوجهه

رجع اتصل ، حطيت ايدي على وجهي و نزلت راسي، رديت :- كافي خالد الله عليك والله تعبت
كمت ابجي بقوة و هو يستمع الي

شفت ماكو جواب منه، مسحت دموعي و سحبت نفس مثل المنشولة من البجي:- ابجي بعد خليني احس مو بس اني وحدي الجاي اتعذب، ابجي بعد خليني ارتاح

-لو تحبني صدك ما جان اذيتني لأن اليحب ما يأذي

- من خر** بحبج احبج ليش اني رايد اكرهج شستفاديت منج ومن حبج الفاشل كالت لو تحبني هههيي

-قفلت الخط و سديته شرايد بعد

-شعور الخيانة، ما جاي تحسين نفسج فد وحدة وصخة و ساقطة من جاي تردين على اتصالاتي بليلة دخلتج و ما تغلسين ؟

قفلت الخط بسرعة :- ياربي خلصني منا فدوة والله بعد ما اتحمل

دز مسج (ابجي ادري ابجي والله لعيشج هذا الشعور كل يوم وما اخليج تتهنين والقران ما دام سويتي بس البمخج واصريتي على سوايتج وما تنازلتي)

مسحت الرسالة و قفلت الخط و شمرت الموبايل، التفيت بفراشي و درت وجهي :- فعلا جاي يحسسني اني وحدة وصخة كلما جاي يقترب و اتورط و اجءب و اخفي جاي اكره نفسي كلش

لازم ابتعد منه نهائي و ما اتقرب، حتى لو اتصل ما ارد
ما لازم انطي فرصة، حتى حرام علية الجاي اسوي
ولو اي حرام و هو خلاني وسط الحرام
لو احرك نفسي هسه ما اطهر منه
كرهني بروحي النذل صرت اكش حتى من نفسي

ظليت بمكاني ابجي و انوب افتريت بالغرفة، مرت ٣ ساعات و امجد ما اجا، دخت و نعست كلش من هوسة العرس و الخوف و الهبطات الوكلنياها اليوم

كلبه عليه عزا مو عرس
حطيت راسي و نمت ...

لهناك حسيت امجد ديدخل ايدة جو راسي و طبك على جسمي من ورا حظني، حسيت بجسمه عريان الصدر
فزيت من مكاني، باوعته بس بالشورت ومتمدد يمي

ابتعدت منه :- شبيج اسم الله ليش فزيتي

-ما حجيت كمت على نفسي و اتلملمت بالروب حيل

-ديار حتى لو هذا الزواج صار غصب عن ارادتنا بس احنا صرنا متزوجين

-بس مها بعدها بخير ما ميته ما اكدر

-هي الزوجتني و حتى من رحتلها هسه كالت لا تعوفها وحدها بالفندق ارجع الها

-وتخربطت على مودك لان سمعتك اتزوجت

-مهما يكون الصار صعب عليها و جاي تحاول تتفهمه لأن هي الرادت هذا الشي مو احنا

-ما اكدر ائذيها ما اريد

-هي وينها حتى تأذيها يعني الصار او ما صار شي بيناتنا هي ما راح يفرق وياها لان متوقعه هالشي حتمي

- حتى ولو ما اكدر اعذرني

-مها بس الواكفة بعينج ؟

درت وجهي منه و رحت للحمام قفلت الباب، وكفت كدام المغسلة اغسل بوجهي و ابجي، باوعت بوجهي تلغمط دموع و مكياج العيون و الحمرة

كمت امسح بوجهي و دموعي تجري، مو بس من موقف خالد، اني هيج موقف من يتقرب مني الرجال اتخبل منه اكوم احس روحي تريد تطلع و يضيق نفسي ما اتحمله ..

هالشي وعيت عليه من جان عمري ٥ سنوات و امي تعوفني بأيد الغريب و هو يسوي هيج شي .. ما جانوا يتقربون بس يتحرشون و احس بقبضة ايدهم و جسمهم ومن اتذكرهم اكوم ارجف

كملها ابوي لما كبرت شوية عشت ايامي وياه بخوف من ايوصل لهالحالة

رجع خالد كملها و حطني بهالموقف
احس كلش كرهت روحي ما جاي اتقبل نفسي

جنت اتخيل خالد بس الخيال كلش يختلف عن الواقع
بالخيال اني ما بيه اي مرض، بالواقع اني عقدة نفسية من هذا الموضوع ما اكدر اعيش طبيعي

بقيت ابجي بقوة اتمنى لو مخلصة عمري كله ويا سلمان بحالته و لا اصير بهيج موقف

دك الباب :- ديار شبيج، شكلت الج اني حتى هيج تبجين

ما رديت عليه زدت بالبجي، رجع حجه :- ديار افتحي الباب خلي نحجي

غسلت وجهي حيل بصابونة و طلعت، باوعلي :- ليش كل هالبجي

-ما اكدر

-وهو شنو الما تكدريله، من وافقتي تتزوجين شجنتي متخيله الزواج يعني، احنه حتى ما اتفقنا ان يكون زواج شكلي

مشيت كعدت ع السرير امسح بوجهي و اجر نفس مثل المنشولة ، دار وجهه عليه و كتف اديه و هو ينفخ :- تريدين تقنعيني كل هذا البجي لان ما تريدين تخونين مها

هزيت راسي بمعنى (لا)، سحب الطابورية و كعد كبالي :- زين لعد اريد اسمع السبب الحقيقي وبدون كذب

باوعتله كاعد كبالي بس بالشورت، كحيت اخذت نفس تنهدت :- البس بالاول

مد نفسه سحب البيجامة كام لبسها و لبس بس الفانيلة الداخلية :- احجي يلا

-امجد انت تعرفني من اني وصغيرة عندي حالة نفسية بس اكو امور هواية ما تعرفها عني غير ان حالتي بسبب التشوه البجسمي

-و شنو غيره الما اعرفه

-اني
اخذت نفس اختنكت ، فركت وجهي و هو يراقبني منتظرني انطق

-احجي ديار، البگلبچ احجيه، اذا اكو شي لا تضمين علية واخذيها وعد مني قسم بالله العظيم لو شما مسوية و شصاير وياج ما راح اذيج ولا افضحج، انت مو غريبة عليه حتى انويلج شر و اعرف الزواج صار خارج عن ارادتج

-اني تعرضت لتحرش لما جنت صغيرة

عقد حواجبة :- من منو ؟

عصى لساني ما كدرت انطق و احجي بالحقيقة، فحجيت جزء من الحقيقة و كلت اله :- من جانت تاخذني امي وياها للشغل و تبقيني عند رجال حتى تكمل شغل هذا الرجال جان يأذيني

-بس ديار هذا مو زواجج الاول

-سلمان ما جان زوجي

-شلون يعني مو زوجناج ابيتنا ووكتها بشرونا ان فض كلشي وتم العرس

-جذبت ما ردت اخلي الناس يستنقصونه وويباوعوله بالعين الزغيرة بسبب شي هو مو بيدة و اكو تقارير تثبت هالشي، و مكلت لأي احد بهالموضوع
انت اول واحد والله

امي من جانت تبات عندي بالبيت عرفت ان علاقتنا بس ع الورق سألتني و نكرت بس هي جان تعرف لأن ما جنا انام بغرفة وحدة ولا بيناتنا اي شي يدل احنه متزوجين

فما عشت الزواج و اخاف ما اكدر وهذا سبب خوفي ورفضي من الزواج

-وهالشي الى متى ؟ ديار اني هسه زوجج على سنة الله ورسولة اكيد ما دفعت حاظر و غايب و نيشان و كل هذا الصرف حتى احط مرة زواجي منها شكلي

-ما اعرف انت من حقك كلشي تسوي لان اني اعرف نفسي ما راح اكدر اصيرلك زوجة مثل اي زوجة

-لا تحجين هيج هالموضوع مو نهاية العالم، اخذج دكتور نفسي و شوية شوية ينحل الموضوع عندج، بس لا تشيليله هم و اتعبين نفسج مراح اضغط عليج

راح تروحين انت وامج لبيروت تتعالجين من التشوه و راح اسعى لمعالج نفسي يعالج المشاكل النفسية العندج وراح تنحل كل الأمور ما يحتاج كل هالبجي و التعب

اجا يمي كعد يمي،مد اديه الاثنين مسح الدموع من عيوني و باسني بگصتي :- لا تخافين
اخذ ايدي و كام و كومني وياه، تمدد على السرير و سوالي مجال يمه و اشر على المكان البصفة :- تعالي لا تخافين ما راح اضايقج بشي وعد

اخذت نفس و تمددت يمه، ايدي وجسمي كلها ترجف من الرهبة، دكات گلبي مو طبيعية يدك بقوة لدرجة احسه راح ينشلع من صدري على كد الرهبة البداخلي

مد ايده جوا ظهري و سحبني خله راسي على صدره، باس راسي :- كافي يلا نامي ما اريد شي

حط راسي على صدره صفح، دموعي نزلت بسكوت من عيني على فانيلته :- فعلا خلاني وحدة قذرة، احساس القذارة اللي حسيته بهاي اللحظة ما ينعاش
تمنيت نفسي ميتة ولا اعيش هالاحساس القذر

تجمد جسمي كأني عصة متشنجة ، هو عرف اني ما مرتاحة بنومتي مجبورة عليها، سحب ايده من جواي حط راسي ع المخدة و انطاني ظهرة و نام

انداريت عنه التفيت بالروب مالتي و ما تغطيت وياه
بس حالي جان بأتعس حال

مرات الوم نفسي و اكول ورطت روحي
ومرة اكول لا هايهيه فترة اني اتعود و خالد يتعود و كل واحد بينا يعيش حياته، هو يرجع لعائلته و اني اعيش ويا عائلتي الجديدة و امجد اعرفه و اعرف اسلوبه من جان ويا مها رجال طيب و خوش ولد

تبقى الذكريات و الليل ودكات كلبك و نبضاته اللي ماتنسى ولا تكدر تقنع كلبك لو شما صار بيه و تأذيت

بس لازم ادوس على گلبي و من هالليلة ابدي حياة جديدة.

.........

ميعاد :- حيل ظال بالي على بنيتي و كلش متأذية على مودها

رافد :- هي الاذت نفسها محد اذاها

- اذت نفسها لان كلبها طيب لا رادت ترد ضحى ولا كدرت تخيب مها و الطيبة غباء بهذا الوكت

-وخالد !!

-خالد يوم يومين و يرجع العائلته و تنتهي

-بهالبساطة !! المرة لو رادت تنسى تحب واحد جديد لو تقبل بأي واحد يتقدملها لأنها عاطفية، بينما الرجال لا .. الله ما خلقه عاطفي
كلشي يصير وياه يدك بعقله و مو بسهولة ينسى خصوصا لو تأذى

قصص الحب التاريخية تشهد
عنتر مات لأجل عبلة
و قيس انجن و ليلى بخير
الرجال ما ينسى بسهولة ميعاد مستحيل، ولو حب الف مرة و اجمل مرة ما تعوض مكان اللي حباها بگلبه

ميعاد :- هاي سوالف حب لا تودي ولا تجيب وكلها تصفيط حجي، ما جان يحب ضحى و تعارك عليها حتى ياخذها ؟ وذيج هي ضاربها بقندرة لا معبرها ولا اباله

لا اكلك ولا تكلي رفودة عيوني كلوبكم يبعد عمري كوستر و التصيح نازل تصعد وحدة لخ تكعد و تعوض مكانها، و بس الغبية التتعلك بذيالكم .. تخلص عمرها تعلعل

-يعني هسة انت ما متعلكة بيه

-انت شيخ الشباب الماكو بحلاته و رجولته اروح فدوة الطولك اني احد يلحكك يبعد عيوني انت، بس اني ما اتعلك بذيال احد ، اني احط ايدي بأيد الأمن اله وارتاحله و من تجويني انترها و ابعدها مني

- يعني وكت التتأذين مني راح تعوفيني وتبتعدين مو ؟

-ليش تكول هيج يبعد النفس اليصعد و الينزل، باوع للموضوع من الجانب الثاني، اذا ما اذيتني راح ابقى وياك طول العمر يبعد اهلي انت

-ترا هيج راح تخليني اتوازه على كيفج وياي

-اي استعجل و اني ما عندي شي كاملة مكملة

-يعني هالمكياج و اللبس و الاناقة كلها و تخليني اتحسر عليها و اروح

-شسوي اني بيدي، اتمنى هسه نعقد و نتزوج بس غير انت الله ينطيك مطوله ومعرضه للموضوع

-ابنيتج نامت

-اي سودة علية نط كلبها تريد تتزوج شلون بس ديار تزوجت تصيح اني اريد اريد اصير عروس

-اي مو لابسه بدله و مسوية شعرها بعد شتريد الملعونة

-تريد الها عريس هالمعزاية

-ههههههههههههههه حقها، اني ازوجها لابني مهيمن

-يااا و هالزركة الچلحة تزوجها لمهيمن ابو عيون الزرك ووجهه وجه مرايا من البياض

-هههههههه يلا غصبا ما عليه بس هي من الله الحلو و اشكر يتزوج سميرة

-غير الله راحم بينا لو كل اجلح يتزوج جلحة الخلفة تكوم ما يتباوع بيها جعامير جعامير عاد الله لطف بهالعباد وحسن النسل

-بس انت حلوة و اني عاشكج

-مو انت حلو وما تلوكلك غير الحلوة مثلي

:- ايابه هههههههه

:- ضحكة خير يا ربي و هاي وصلنا، يلا ماما اثار اكعدي

:- عوفيها عوفيها نايمة اني انزلها افتحي الباب انت

نزلت مبتسمة، دكيت الباب محد طلع :- يمكن اسامة مو بالبيت

طلعت المفاتيح من الجنطة و فتحت البيت ودخل هو شايل اثار

-وين احطها

-يمك هنا نومها، عود اني اصعدها .

-لا خل اصعدها بعد فد مرة بس دليني منين

-منا يبعد عمري ولو تعبتك

صعدت و هو صعدها وراي، خلاها ع الجرباية و اني رحت اطلع الها غطا و حجيت :- سودة علية يا ديار يا ماما ما ادري هسه شحالها عفتها ناطة من البجي

غطيتها، حط ايده على خصري :- تلكينها غاطة بحظن رجلها و نايمة بالعسل وناسية ابو الدنيا، لا تحيرين بيها حيري بروحج و بوحدتج بهذا البيت

-البيت هذا ينتظرك تجيه و تصير زلمته، كافي رفودتي طولت و اني انتظرك

-طولتها و بعد ما بيه اطولها ساعة وحدة اريدج

ابتعدت :- لا لا عفية ما اكدر اني مرة عندي جهال و بيت على بختك ما اكدر

-اتزوجج والله بس بعد ما بيه اطلع اموت هنا يمج لو ما رحمتي بحالي

-اسم الله عليك من الموت رفودتي لتكول هيج ما اقبل، بس

-لا بس ولا تبسبس راح اموت ترا كافي

-ما اكدر رفودة اني كلت الك من جنت ويا اسماعيل جنت مجبورة تغيرت و اني مو مثل اول، ما اريد اعيد اغلاطي

-ما تعيديها اني رايدج بالحلال والله و بس اطلع منا افتح هالموضوع و هالايام انهي بس ارحميني كافي عاد

-وسمعتي ؟

-اشك حلكة اليجيبج بطرف السانة ولج انت عرضي، جمالج تعبني صار اسنين ارحميني

-رفودة

-اششش................

.......... اسامة :- مامااااا اجيتو ؟
يوووم وينج ، ديار شلونها ؟
مامااااا وين انت

ميعاد :- عزا العزاني كوم كوم اجا ابني

-اقفلي الباب بسرعة

-دكوم

دا اروح للباب فتحه اسامة، وضعي مخربط ورافد بس بالبنطرون القميص نازعه ..

بس شافنا هيج نزل بسرعة :- يمه عز العزاني راح ابني رافد الحك

ركص كدامي نزل و اني رتبت نفسي و نزلت وراه ، اسامه يدفع برافد :- اصبر ابني بس اوكف

-لا تكول ابنك ووخر ايدك من عندي دوووخر

-اني زوج امك احنه متزوجين و انتظرنا نخلص زواج ديار حتى نكللكم هالموضوع

ميعاد :- اي ماما متزوجين حبيبي جان المفروض ادك الباب ابني عيب اللي سويته هو مثل ابوك

اسامة :- انت وياه تروحون فدوة لابوي لا تجيبين طاري ابوي على السانج وخري يلا خل اروح

ميعاد :- وين تروح ابني استر عليه شتريد تسوي انت

-اذا هو رجلج ليش خايفة تنفضحين وخري مني

رافد :- ابني خبيبي كلت الك لهسه ما عالنين زواجنا و باجر افتح الموضوع للكل و احجي كلشي

-بالعافية اني اريد اروح

ميعاد :-، ولك ماما بس اصبر فدوة دوكف شبيييك، وين تريد تروح

-لأي مكان ما بيه انت

-انجب حيوان اني امك

-واني ما اريدج اريد ارجع لابوي ما اريد اظل وياج

-فوت للغرفة وبلا كلام زايد

رافد :- ميعاد ما اسمحلج تتعاملين ويا اسامه هشكل هو زلمة و حقه تفاجئ بالموضوع خليه براحته و لما راح يهدأ راح يرجع

-وين يروح بهالليل رافد لا تخبلني

-لبيت ابو امجد صار بيت اخته ويكدر يروح هناك يرتاح لحد ما يتفهم الموضوع ويرجع، مو هيج يا بطل

اسامة :- وخري ايدج مني

ميعاد :- حبيبي ماما بس اصبر، وين تروح و شتحجي ابقى بغرفتك وهسه اني اكعد وياك و افهم الموضوع

-ما راح اكول لاحد لكيت زلمة بغرفة امي حتى يكلولي ابن الكح.... ارتاحي بس وخري مني يلا

دفعني وطلع :- العزا العزاني لك عيني شراح اسوي، شوف كله صوجك كلت الك ما اكدر كله مناك اوووف يمه وليدي

رافد :- تهدي ميعاد اني راح احل الموضوع

-شتحل والولد شافنا بهالوضع شتحل

-كلت الج ما راح اخلي احد يجيب سيرتج اعتمدي و اطمني ، روحي اصعدي نامي يم بتج و اني اشوف الموضوع و اخابرج

-اعتمد عليك فدوة عيني ما اريد ابني يضيع من اديه

-اي بس اصعدي جيبلي الفانيلة و القميص بقو فوك.. اصعدي

-اي اي هسه اجيب

-المحفظة و الموبايل وياج ميعاد

-اي
رحت جبتله غراضه بسرعة و نزلت ، بدل ملابسة و حط الموبايل و المحفظة بجيبه و باوعلي :- تحتاجين شي

-لا عيني بس الحك اسامه شوفه وين راح فدوة

تقرب مني باس كصتي و حجة

رافد :- اطمني حياتي ولا توتريلي نفسج اني احل كلشي، ارتاحي

طلعت من بيت ميعاد اخذت سيارتي وسقتها لبيت عمي ابو امجد، جاي اصف حتى انزل، باوعت خالد صاف سيارته اباب بيتنا نازل منها و منتجي و يفرك بوجهه بتعب

نزلت :- ها ابو الوليد

باوعلي و دار وجهه، مشيت وراه :- تعال هنا يا ولد شبيك متكلي دكافي انسى

-شنسى ، انسى هي هسه بحضنة لو شنسى ؟
انسى انو لازم اني اليوم بمكان مو هو لو شنسى رافد شنسى وعودها ذكرياتها مذكراتها و خيالها وكل كتاباتها و خواطرها الية شنسى رافد كلي ؟

-اللي لازم تتذكره هي بألف خير بحضن غيرك و انت جاي تتعذب على وحدة ما تستحقك ولا تسوى دموعك

-مو هذا اليأذيني رافد الجنت اعتبرها عرضي و شرفي و اخاف عليها من روحي و صاينها هسه هي تتكلب بحضن ابن عمي ولك ما لكت غير اقرب الناس الي ، دمي احترررررررك رافد راسي راح ينفجر

-والله حقك دگتها وياك ناقصة و ما تتراوة

عافني و دار وجهه و فات للبيت، دخلت وراه امي جانت نايمة بالهول و خواتي يمها و الناس طاشه لاهلها ضالين بس عيال بيتنا

من شافت خالد فزت عليه :- يمه خالد وليدي يمه

رادت تحضنه، لزم اديها :- جايه تحضنين ؟ و بعديش بعد ما خليتيني تراب، بعد دمرتيني

-اسم الله عليك وليدي والله اخذلك الاحسن منها

-يممممممممه وخري مني

-كاتل روحك على وحدة ما تسوى ظفرك ولك ردت اموت وليدي يمه حسبالي بيك شي

-شي واحد !!! هو شنو الما بيه يمممممممه
كلت الج لا تدخلين بموضوعي تروحين تطعلين روحها و تحركين روحيييي ليييش

جبتها الج ؟ حطيتها ابيتج تروحين تكليلها المشوهة و ما تناسبين ابني لييييييش

-صدك يمه تناسبك والله ييمه انت كمر وهي ما تنحط وياك

-ما تنحط وياي اي، يمه انت خليتني اصير اكبر عار
الكلت الكم رايدها بشرف خليتوني ناقص شرف بعمايلكم ...
انت راح تخليني اعيش و عيني معلكة بمرت ابن عمي
راح تحركين روحي كل يوم و اني اشوفه وياها

هسه جاية تكليلي شلونك يمه، ابتعدي مني

احجي و بناتي تلازمن برجلية لان صار يومين ما طاب للبيت، شلت نورة على صدري ورحت للاستقبال كعدتها يمي و خليت الموبايل بيدها و اني طلعت باكيت جكايري و دخنت و هي تلعب يمي، درت وجهي منها و ادخن و صافن بزماني

فاتت بتول و بيداء خواتي، حجت بيداء :- خوية دخيلك فدوة لا تحرك روحك والله امي وابوي حال الضيم يا حالهم عليك فدوتك خوية

بتول :- اطلع سافر لا تبقى بناتك اخليهن بعيني والله ما اخليهن يحتاجن شي و عيني عليهن حالهن حال جهالي لا تفكر بيهن بس لا تبقى هيج

-ما بيه شيخوية بس رايد ارتاح شوية

فات ابوي للأستقبال:- لك انت ما تستحي ابن الكلب يومين نفتر وراك ندورك و اليوم تطلع مكورع راسك و ماخذ سيارة الزفة و شارد حيووووان

رافد :- يابه يابه على كيفك بس عوف، بس تعال

-ولك راح يصير عمره ٤٠ وهو هذا حاله، ولك ما يرتاح هذا لا ما يجيبلي الجلطة

خالد :- داير وجهي من عنده و منزل الجكارة منه

رافد :- يابه كلش مو وكتها غير مرة و اكعد تعاتب وياه

- ولك وكف كلوبنا عبالي تفجر انخطف مات اتعزه، نخابر وما يرد على احد والله شنو وحدة برب**** عايفتها ولك ولدي شبييييكم كلولي

بتول :- فدوة يابه انت تعبان و هو تعبان ارتاحو وعود باجر تحجون و تتفاهمون لا تخلي اطك روحه و يرجع يطلع

بيداء :- خالد خوية فدوة رحتلك اصعد فوك شوف بنياتك والله مشتاقاتلك دكوم

رافد :- يابه تعال وياي دتعال خل تحجي وياك

طلعت ابوي بره و خالد كاعد ولا كانه يسمع احد، وكفت ابوية :- يابه صدك تحجي يعني من تتعارك وياه و هو بهالوضع شمتوقع يجي يبوس راسك ويكلك حقك يابه

-ولك ما تشوفه شحالة

-يعني حاله هذا ما تصيح عليه لو تتفهمه تبتعد عنه

-وشلون يظل هيج ؟

-ما يظل بس كول يا الله هو جاي من العرس تعبان يعدي اسبوع و عود الله كريم اكعد و احجي وياه بهداوة، دروح هسه روح ارتاح لا يرتفع ضغطك

بتووووووول تعاي اخذي ابوي خلي يرتاح بغرفته

عافني ومشى طلع، طلعت بتول و منى نزلت من فوك حجت :- يا واخيرا شرفت واجيت

-شرايدة ؟

-وين جنت

-بالعرس وين جنت يعني

-بالعرس لو ويا ميعاد

-بالعرس وويا ميعاد و اتفقت وياها الاسبوع الجاي عرسنا بعد عندج شي تريدين تعرفينه

-يا فدوة غير اكلب الدنيا

-اكلبيها عود ابيت ابوج

-رافد ناوي صدك

-اي والله

بتول :- خوية مو وكته الموضوع اهلي هسه بوضع مو مال هيج مواضيع الجو متوتر

-شعليه باهلج اني راح يتزوجها لو راح اكعدها وياهم كافي وكفوا بوجهه خالد بوجهي لا يتوقع احد يوكفلي اسحك و افوت

منى :- شتقصد عود ؟

رافد :- الاقصده اني متزوج متزوج حطي هالشعلة براسج وافهميها

-والله ما ابقالك يوم واحد

-اي لا تبقين روحي لبيت ابوج و كابلي نسوان ابوج ال٣ وكليلة يابه رافد تزوج عليه وحدة وعود خل يرجعج عليه بالجلاليق

-جاي تعيرني رافد

-ما جاي اعيرج جاي اذكرج ابوج متزوج ٣ على امج و اخوج ٢ و جاية يمي ادورين حقوق، روحي يابه اصعدي لغرفتج و كابلي ولدج لا تخلين اعصابي تتطلع عليج

-لو مو اخوي و ابوي زواج ما تتزوج

-عود احجيلج وياها

طلعت منها و هي تصيح وراي و بتول تجر بيها و تهدي ، رحت لبيت عمي، دخلت لكيت بنات عمي موجودات، سألت اسراء :- اسامة ابن اسماعيل اجا لهنا ؟

-اي فوك بغرفة احمد

-ياهي غرفة احمد ؟ مو اخذها امجد خلا بيها غرفته الجديدة

-اي مو حولنه غراض احمد بالغرفة الصغيرة ورتبناهن و اسامه صعد كال امي ما موجودة و البيت فارغ كلناله اصعد نام بغرفة احمد

-ها زين لعد، ديرو بالكم عليه لعد

-هو موجود شعليه، بس امه وين ؟

-ما ادري بس كلت خطية خاف وحدة بالبيت رحت للبيت ما لكيته كلت خاف هنا و اجيت اسأل، خل اصعد اطمن عليه

-خابرت امجد، درى بمها ؟

-اي درى وراح للمستشفى

-وهسه ديار وحدها بالفندق

-لا ما قبل عمي كايله ارجع لعروستك احنا هنا ويا مرتك و حتى مها ما راضية يعوفها وحدها

-حرنا ويا هالمها الكاللها ما اريد زعلت و اتخربطت الكاللها صار و اتزوج زعلت و اتخربطت وهسه من عايف عروسته و جايها هم ما راضية شيسوي بعد الولد

-هاي بعد غير نسوان لو يجي ابو الهول ما يفهمجن

ضحكن ، عفتهن و صعدت لاسامة، دكيت الباب و فتحته، من شافني جر الغطا وراد ينام

:- ابني شبيك فهمني

-اطلع و عوفني

-اني اطلع بس ظل بالي عليك كلت اشوف خاف متضايق
ما رد .... الشفته مو عيب اني و امك متزوجين و هي مرتي كل الموضوع ما رادت تفاجئكم بالموضوع كالت ينتهي عرس ديار و تحجي، اختك اتزوجت و انت صغير و اختك صغيرة و براسها و تحتاج اليساعدها و انت بطل اعرفك راح تفتهم هالموضوع و تفهم شحجي موو

ما رد .. طلعت ١٠ الاف من جيبي خليتها يم راسه :- هذا مصرف الك، وشتحتاح اعتبرني مثل ابوك ولا تستحي مفهوم يا بطل

ما باوعلي، عفته و طلعت بسيارتي، خابرت على ميعاد كلت الها :- لا تخافين هو ابيت عمي نايم و مسترح و ما راح يحجي شي اطمني

-و الشافه عيني مراح يتحمل اوي يمه وليدي

-اني كلت اله احنه متزوجين و هالشي راح يتحقق بأقرب وقت و غصبا عن الكل، اساسا اني ما راح اتحمل اكثر حتى تصيرين بحظني ابن المطي اجا بلحظة كلش مو وكته

-هههههه من نتزوج راح اعوضك عن كل الايام التمنيتني بيها و ازيد شوية

-اموت على الزيادة

-بس رفودتي

-گلب رفودتج بس امري

-اشلون و البيت

-شعليه البيت اني اشيل الايجار عنج

- ونبقى هيج

-هسه دخل نتزوج و التامرين بيه تاخذينه من عيوني

-اويلي شلون عيون يمه هو اني شطيحني بحبك غير عيونك الخضرة

-كلهن الج

-بس هنا

-راح تخليني افر السيارة و ارجعلج

-هههههيييبيي هلمرة تلزمنا المغاوير مو بس اسامه

-لو مو المغاوير لو الانتربول بعد ما بيها مجال حركتيني حرك بنت الاوادم بس حجل رجليج يدك بكلبي ، اخ يا يابة شتحمل منج

ميعاد :- ههههههههههههييي سلامتك من الاخ رفودتي

...........

ديار :- فتح عيوني الضوا طالع بالغرفة، مديت ادية امط بروحي، وكعدت ، باوعت، البطانية على جسمي ، التفتت امجد ماكو بالفراش

نزلت رجلية من الجرباية اخذتلي صفنة حتى استوعب الدنيا شوية من كد ما تعبت و بجيت البارحة احس راسي هالكبره صاير من الوجع

سمعت صوت بالحمام مي عرفت امجد جاي يسبح، اخءت نفس و تنهدت :- اول يوم بزواجي، لازم ابدي حياة جديدة و انسى الفات و لو شكد ما اتوجع لازم اخلي بعقلي ان الوجع ما يفيد و ان لازم اصبر و اتناسى و اعيش

انفتح الباب مال الحمام طلع امجد بس بالخاولي كبالي لافه ع الوسط، حجه :- صباح الخير

-نزلت عيني منه :- صباح النور

-كومي شوفيلي ملابسي بس ابدل

-اي
كمت رحت جمعتله ملابسه و خليتهن ع السرير بدون ما اباوعله، ورحت للحمام بسرعة اسبح ، وكفت جوا الدوش بدوم ما اتحرك

بس التفكير ياخذ ويودي
هسه خالد وين ؟
وشحاله ؟
يتألم لو يتوعد مرتاح لو محترك دمه

رفعت عيني لربي :- اللهي وربي فدوة نسيه و لا تخلي يتأذى اسعده وابعده مني يارب

بقيت بس واكفة جوا الدوش، اندكت الباب:- ديار

-ها

-كملتي ؟

-لا هسه

-يلا كملي حتى اخذج

-وين ؟.

-ما الج علاقة بس اطلعي

سبحت كامل و غسلت، ردت تطلع :- لا جايبة ملابس ولا خاولي

شلون يربي اكله جيبلي ملابس ؟ حتى عيب ما اكدر انطقها يروح يدورلي بالجنطة كلابس داخلية لو اموت

رجع حجه :- ولج شنو وكعتي شو طولتي ؟

- لا بس

-ها ها ، شوفي اني راح اطلع اخابر ابوي، و انت اقفلي الباب وراي بدلي و كملي و صيحيلي ماشي

- ماشي

فعلا طلع و اني رحت قفلت الباب وراه، ورحت بدلت ولبست حجابي رتبته و لميت غراضنا كلها بالجنطة و فتحت الباب:- ها كملتي ؟

-اي، عندك شي بعد بالغرفة لان لميت كل الغراض

-تأكدتي من كلشي ؟

-اي

-يلا لعد خلي ننزل
اخذني و نزلنا سوية طلعنا من الفندق، راح وداني لمطعم كلش راقي نزل كاهي و كيمر عرب و عسل و جاي وحلويات غربية

ما جنت اشتهي شي، بس انقش حتى لا يعلق هو ويتسائل شبيج وليش ما تاكلين ويحس انو اني ما راضية بهالزواج لازم اتأقلم ويا هالوضع

كملنا و طلعنا، دخلني على محل مجوهرات، كال للولد اريد حلقات ، طلع اله الصايغ اشكال الوان الموديلات، حجه امجد :- تعالي ديور اختاري

باوعت، كلهن حلوات بس اني احب البيه كرستال و هو شفته يكلب بالحلقات اللي تصير كلها صب ذهب، انطاني حلقة و ديكلي :- جربيها
شاف بأيدي حلقة لخ

:- البيدج اذا عاجبتج اخذيها

-لا عادي

اخذها من ايدي وحطها بأصبعي بس شفته يكلب بأيدي ويركز بالتشوه مال ايدي، سحبتها منه :- عوف الحلقة ما يحتاج اساسا ما عندك

- اني راح اخلي امج بأقرب وكت اطلعج البيروت و تعالجج

-هزيت راسي

اخذ الحلقة و كاله :- شوفلي هاي

قاسها طلع سعرها ب٥٨٠ الف

طلع محفظته، حسب كل الفلوس العنده ٤٢٠ :- شوفي غيرها و اذا عاجبتج عوفيها نرجع للبيت اكمل فلوسي واجي اخذها الج

-ما يحتاج والله اصلا ما احب البس شي

-ما اقبل مدام متزوجتني الحلقة ما توكع من ايدج

-هزيت راسي اي

-هسه شتريدين ؟

-اي وحدة

سحبني كدام الحلقات كمت البس و اقيس الحد ما لكيت حلقة تعجبني ب٤٠٠ اخذها حطها بيدي ودفع فلوسها و طلعنا

صعدنا تكسي هو ما كعد كدام، كعد وياي ورا، حجه :- ديار هالزواجة انفرضت عليه و عليج و الصار صار ولازم نتماشى ويا الوضع، اذا واحدنا بيه عيب فنتعاون مع بعض ونصلح بعض

مرتي و جهالي امانه بركبتج ادارينهم و تعتنين بيهم حتى لو تقصرين عليه اني راضي بس هم بحاجتج
امي تعينينها و ابوي تحترمينه
واني ما اقصر باحترامج وواجبي ما اخلي احد يقلل احترامه وياج لو يقلل منج حتى لو جان اقرب الناس الية

مها انسانة طيبة ما يحتاج احجيلج بيها انت تعرفينها اكثر مني، صح هي رادت هالزواج بس راح تغار هواي فلا تضوجين منها لو شما يطلع منها

كدامها اني وياج اصحاب ووراها حكج عليه ادللج و اوفيج حقج كزوجة

-اني ما رايده شي الية، اني اتزوجت حتى اساعدها

-الزواج مو لعبة ولا صفقة و اني منتظر تتحسن نفسيتج و اخلي هالزواج حقيقي

سكتت

حط ايده على ايدي :- ما راح اضغط عليج، و خلي اكلج شغلة كلام امج البارحة ما قنعني ولا خش بعقلي و اني كرجال بعدني شاك اكو شي انت ضامته عليه، اذا اكو شي او لا ميهمني اليهمني تصونيني و تصونين سمعتي ولو وصلتي لحد ما تكدرين تكليلي اطلكج وروحي لحال سبيلج مستحيل اوكف بطريقج، وحتى كليتج اني ما امنعج منها بس اذا صدف و لاحظت شي عليج ما ارضى بيه وكتها سلاحي هو يتصرف
خلي هالشي ابالج

هزيت راسي اي

وصلنا للباب مال بيت اهله، وكف التكسي باوعت خالد كاعد بالسيارة داير وجهه عنه قابض ايده ومخليها على حلكة و يباوع للجهة الثانية

نزلت من التكسي و اني عيني علية اخذت نفس و اتهدت و اني اباوعه، هدوئه بشكل يخوف

طلعو الجهال من البيت وامجد.يشيل بيهم و يشمرهم بالهوى و يضحك، اني واكفة بمكاني نسيت نفسي و اني اباوعه، صاحت علية اخته

انداريت عليها و طلعن خواته يستقبلني و طلعت ضحى لابسة جبه و جنطتها بأيدها و هي تكلي :- هم زين اجيتي ردت اروح، اجيت عليج ردت اباركلج عيوني شايفة الف خير ان شاءالله خطية مها محتاجتج تخدمينها

و ضربت على جتفي و هي تكول :- يلا حبيبتي يلا الله يعوض عود

صاح خالد من وراي :- ديااااااار ....

☆☆☆☆☆☆

حييل ليسه تذكرين قصة جلال😅🌚والله عمي زين

ان شاء الله حبيبتي واطمنو حتلو صار عندي ظرف واتاخرت بالنشر ..فاكيد اعوضكم ببارتات اضافية😎

#ملوكه

ههههه..وفف 🤧🤦‍♀حرت
وهم حقج كله محاضرات ومنا شغل بيت فيادوب واحد يلحك..

فاذا انتي طالبه ومتلحكين ..خلي وقتج للقصص بليل قبل نوم ..
اني دوم اسوي هج..هسه اني متخرجه 😅💔ومرات مالحك اقره القصة..
فاخلي كل يوم قبل نوم ..وهج بنص ساعه اكمله

#ملوكه