حضنته و اني احمد الله و اشكره من وصله لهنا سالم و ما صاير بي شي ، رجعت باوعتله :- شلون اجيت شجابك خرب بغيرتك ردت اموت عليك والله

رجع حضني ويضحك، وخرته :- شكد عندك فلوس ؟

-بس ١٥ الف

-كوم خل نجيب لفات و ناكل خطية هذا سلمان كلش جوعان

اسامة- يلا

مشيت السلمان ندهته :- سلمان سلمان احنه رايحين نجيب اكل تجي ويانا ؟

بقى يدفر نايم ما يريد احد يكعده:- هاك كوم خلي الجنطة جوا راسك لا احد يبوكها

كوه شلت راسه و خليت الجنطة جنه حصان يزاكط ما يرضى احد يكعده ، عفته ورحنا اني و اسامة اشترينا لفات فلافل و رجعنا لسلمان كعدنا ردنا ياكل ويانا غاط بنومته و يشخر و ما يكعد ..

اكلنا وكملنا و ضميناله لفة اله من يكعد ياكل :- اسامة اكعد هنا يم سلمان اني راح اروح للحمام اغسل و ارجع مو تتحرك ماشي؟

اسامة:- ماشي

كمت من مكاني واني فرحانه .. كلش ارتاحيت من اجا اسامة وياي احس اني مو وحدي هو كل اهلي و اكدر اعتمد عليه و ارتاح بوجوده .. من هو مو وياي احس اني وحيدة بهذا العالم

رحت للحمامات شصايرة حل وشد و نسوان كومة و ريحة ، خليت الحجاب مالتي على خشمي و شديته على وجهي منا و منا ..

لازم تجاهد يلا تفوت شلون مشكلة كل مجموعة لازمتلها باب، وحدة صاحت :- يبنات اكو حمام لاخ شويه ليغاد ليش كلكم مكومين هنا

حجيت وياها :- وين صاير

-بس اطلعي منا و امشي مسافة تلكينه كبالج مكتوب عليه

اخذت العباية وطلعت، وفعلا مشيت لكيت حمامات نظيفة وسيراميك و فارغة غسلت على راحتي ورجعت ، كعدت يم اسامة نسولف بس كاعدين واحد لازك باللاخ الجو كلش برد و احنه ما لابسين لبس ثخين غطيت اسامة وياي بالعباية لا يبرد وبقينا كاعدين

اجا واحد يشتغل بالمرقد كال :- زايرة هذا الولد خطية صارله ساعة كاش بالبرد ونايم ، اخذي جنسيتج وروحي سلميها للامانات خل ينطوج بطانية و غطي خطية ترا الجو برد حيل
ويتمرض بس يبقى هيج

كمت من اسامة شلت راس سلمان من الجنطة دار وجهه ليغاد و ضم رجليه واديه من البرد مكشكش ، اخذت الجنسير ورحت جبت بيها ٣ بطانيات الي ولاسامة ولسلمان

خليت الجنطة ونومت اسامة على ايدي وخليته بالنص بيني وبين سلمان حتى لا يبرد، طبكت ال٣ بطانيات سوا و تغطينا بيهم ونمنا لازكين ابعض و ادفينا ..

ما حسينه الا الفجر بسبب الهوسة و الرجلين يم راسنا اروح و ترجع، شلت راسي، صوت ضجة ناس و صلاة و الصبح طالع ، باوعت سلمان كاعد و قاعد حواجبة

شلت جسمي من الكاع متكسرة تكسر :- ها صباح الخير

.. ما رد، حجيت :- هاي شبيك الوصخ كالب خلقتك

-جوعان

-مو كعدناك بالليل و ما كعدت جنك مطي و ترافس

-اتي المطي ولي يلا ما اريد اشوفج

-لا تغلط الوصخ

-لا تغلطين ترا اذبحج والله

-خب درووح ما الي خلكك
فتحت الجنطة على كيف حتى لا يكعد اسامة ادور اللفة ماكو
كعد اسامة :- وينها هاي اللفة البقيناها السلمان

- بالعلاكة هنا
الفت :- وينها هنا جانت

:-كوم يمكن شايلينها ، خل نشتري ريوك خطية حيل جوعان

كمنا ولمينا البطانيات ورجعناها و استلمت الجنسية ورجعت السلمان كاعد ويا ناس صايحيله حتى ياكل ..

-سلمان كوم راح اشتري ريوك

حجه الرجال :- الاكل خير من الله اختي تفضلوا

-لا شكرا

....انتظرنا يكمل اكل و طلعنا ، سألت اسامة اذا جوعان، كال :- لا الفلافل لحد الان ابطني حتى توجعني

-حتى اني نفخت بطني

بقينا نفتر بالامام نجي منا و نروح منا .. ورحنا للامام العباس هم زرناه و مشينا بالفروع مال كربلاء ما خلينا فرع يعتب علينا و احنا نمشي سوا ، اخر شي قررنا نرجع للامام .. الظهر تقريبا ب١٢

جان نمشي بالفرع مال الامام و كبالنا القبة الشريفة ، باوعنا واحد واكف اباب مطعم يصيح :- كباب دجاج كص تفضل يزاير

مشا سلمان اله :- خلي اشتغل وياكم

الولد :- والله اني عامل هنا ذاك الحجي و احجي وياه

راح للحجي كاعد ع الكرسي و يشرب جاي :- حجي شغلني وياك

-روح منا ابني

-شبيك شبيك الله عليك الله عليك

-روح باباتي ما نحتاج

-بس اني محتاج اريد شغل جربني جربني

-ابوية تفهم انت لو لا ؟ جاي نكلك ما نحتاج

-مشى سلمان و غم ابو المطعم، صاح عليه :- تعال تعال لك هاي عليمن

سلمان :- شيل ايدك دشيل

ديار:- عمو ما يقصد فدوة عوفه

ابو المطعم :- شايف اذا بعد تعيدها الا اثرمك ثرم يلا منا

سلمان ما كعد راحة ، دفع الطبلة مالته و كاله :- دروووح الوصخ

والتموا عليه لزموه و اني لازمه بالحجي :- عمو عليك الله والله هو مو صاحي مريض عليك الله عوفه والىه بعد ما اخليه يجي يمك

كام يوخر بيه و يكلهم ادبوا، فات حجي جبير بالعمر لابس عكال اسود:- ها يابه خير خير شكو كولو يا الله ؟

هم ابتعدو وابو المطعم وكف كاله :- هلا مولاي والله هذا واحد طايح حظه فات من عدنا راد يشتغل كلناله ما نحتاج و تجاوز و كسر الغراض

الحجي :- خير خير ان شاءالله ، يلا ما صار شي عدوها

ابو المطعم :- و هاي لخاطر سيد حسين نعديها الك و ما نحاجيك بس لو مريت منا بعد و حجيت الا نكتلك

الحجي:- ما صار شي لا تحجي هيج ابو رحمن المسامح كريم و هو بعد ما يعيدها

انتم منين بوية ؟

ديار:- من بغداد عمو والله بعد ما يعيدها و بعد ما نجي منا

-انت شتصيرين منه ؟

-مرته

-رجلج شبيه ؟ جنه مو بوعيه

-لا عمو ما بيه شي والله بس هو عنده خيط

-خيط !! شلون يعني ؟

-بضربة بوش الأولى وكع البيت عليهم امه ماتت و هو عاش بس هيج عاش بيه خيوط بعقله

-هاا ضحايا حرب ، ما صار شي بنيتي اخذي زلمتج و كملو زيارة انتم منين ؟

-من بغداد

-منين من بغداد

-من الدورة

-يا هلا و مية هلا

حجه واحد من العمال :- شهلا سيد تدري بالدورة شكد كتلو بينا

الحجي :- عيب هالحجي اليكتل ماهو منا شيعي جان او سني كلنا اخوان .. هذا الحجي ما اريده ينعاد ، ابو رحمن علم عمالك ما يسمعون الناس حجي عيب

عافنا و مشا و احنا مشينا للامام ، و اني ارزل بسلمان :- طايح الحظ صرت علينا رامبو و كاعد تتعارك هو احنا نعرف احد هنا ؟ لو لازمينك و كاتلينك شنسوي

سلمان:- اسكتي الوصخة اني غير ردت اذبحهم بس ما خلوني

-دنجب غير لو ما هذا الحجي يجي جان سووك طلي مشوي

بقى يعيب عليه بوجه ويسوي : ننننننننن
غميته و مشيت اشترينا اكل و كعدنا نتغدى ورحنا بالأمام تمددنا ...

للعصر انتظرنا احد يجي ماكو، خالد كال امجد من الفجر يجي، وهسه صارت ٥ العصر ومحد بيهم بين ..

رحت اشحن الموبايل و خابرت مها
ديار :- الووو هلو مها

مها:- هلو حبيبتي ديوره شلونج

-الحمدلله بس خالد كال امجد يجي الصبح و ما اجا

-اي والله عمري على اساس يجيج بس عمامج اجو علينا و وياهم ناس من عشيرتهم و ما كدر يجي التهى ويا ابوه بلكي ان شاءالله باجر يجيج صبري عمري

-شصبر انام بالشارع لو مبقيني عد امي احسن خلي نرجع

-ولج هي امج جايتنه هسه خابرت بالطريق النا .. لأن عمامج يردون جهالهم و هي تاهمتهم ماخذين اسامة و تكول جاية بالطريق الا ازين شواربهم

...صفنت ويا روحي اني حاى نسيت اگل لامي اسامة يمي، غلست ما حجيت و كلت :- خالد وينه ؟ هو كال اذا ماكو احد اجاج اني اجيج

مها:- ولج هم خطية خالد البارحة عركته هو و امه و مرته للظالين

-ليش شكو

-هو على اساس يبقى هناك يمج يأمنلج بيت ويرجع، مخابرته امه كايلتله مرتك نزفت و نقلناها للمستشفى راح تسقط هسه تجي ، ليش ما يجي ويلكاهن بالبيت كلشي ما بيهم

-يعني ضحى ما بيها شي ؟

-لا ما بيها بس ما يردنه يتورط بسالفتكم يگلله اطلع

-لا خطية لعد بعد ليجي

-ما تعرفين طبع خالد عناده ماكو مثله يموت ولا يقبل احد يفرض عليه

-يلا لعد روحي و اسأليلي امجد شوكت يجيني

مها:- ان شاءالله عمري ديري بالج على روحج وصيري سباعية

-ان شاءالله

.................

خالد : من خابرت عليه امي و اختي بيداء بالأمام و اني ادور على ديار ايست الكاها حتى بالندائات صحت و ماكو، خابرت امجد كتله :- خوية هذا الحال شسوي ؟

امجد :- ارجع و اني باجر من الصبح اغبش الهم

-وشلون يبقون بالشارع الليلة ؟

-ينامون بالامام ما عليهم شي ارجع لمرتك و من الصبح اطلع

خالد:- ان شاءالله

... رجعت بالطريق خابرتني ديار خايفة قهرتني حيل ردت ارجعلها كالتلي لا ارجع لمرتك مريضة .

فرجعت الطريق اخابر امي اسألها يا مستشفى انتو لا امي ولا ضحى ولا اختي يردن .. ضجت كلش و طفرت روحي

فتت للبيت والكاهن كاعدات بالاستقبال ملمومات و يسولفن و يضحكن ، تفاجئت :- يمه مو خابرتيني گتيلي مرتك نزفت و بالمستشفى ؟!!

الام:- لا مو بالمستشفى ردنا ناخذها بالمستشفى بس هو نزيف بسيط و وكف

-اذا بسيط و ما بيها شي خابرتيني و جبتيني مناك لهنا عليمن ؟

-والله يمه ما اريدك تتورط بسوالف ديار ابوها ارهابي اچفينا شرهم

-يعني جذب ؟

-كتلك يمه اچفينا الشر

اني سمعت هيج و تخبلت كمت اشيل و اكسر فوك روسهم ، كلهن هجن لغرفهن وكفت اتعارك ويا امي ورجعت صعدت لضحى بهذلتها تبهذل، و طردتها من الغرفة و كلتلهم:- انعل والديه اليوصل يمي و اريد اشوف يا كو**** ابن **** يتحكم بيه

... قفلت الغرفة و نمت الصبح كعدت على صوت بيداء :- خالد خاااالد

فتحت الباب :- ها بيداء شكو ؟

-ام ضحى جوا و جايه تاخذ بتها

-و على اي اساس تاخذها ؟

-ما ادري انزل انت و تصرف

-انزلي هسه اني جاي وراج
غسلت و لبست و نزلت جوا لأمها واكفة بالباب:- شنو عمه احد طاردج و لازمة الباب

-البيت اليطرد بتي طاردني

-ومنو طارد بتج ؟

-ما طردتها من غرفتها

-طردتها بالشارع لو كلت الها روحي كابلي امي و ما اريد اشوف خلقتج ؟

-بتي مو فصلية عدكم حتى تطردها من غرفتها و تخليها تنام جوا

-عمه من الأخير انطيني ترا ما لي خلگ، شرايدة ؟

-بتي تروح وياي

-اي الله وياج و وياها درب السلامة

ضحى وهي تبجي :- مع الأسف عليك خالد حسافة كل الحب الجان بيني و بينك هسه جاي تضيعه

-من سوالفج شيجي من ايدج الله يزيدج و احمدي ربج و اشكريه ما سويت شي كلت حامل و اكتفيت بطلعتج من الغرفة

ضحى:- والله خالد اني ما اقبل تروح لديار لو اني لو ديار

-مو اني التحكمني مرة لو توذنين وحق ربج ما تحركيلي شعره

-شعدك وياها ؟ طلعت روحي ديار ديار ديار

-ولج بت الاوادم مو زوجتها و راحت ويا رجلها شعديييييييي بعد بس والله انت فلا ادمية جان المفروض هنا اجيبها و اتزوجها واخليج تبوسين الايدين و الرجلين حتى اباوعلج بذاك الوكت تصيرين ادمية و توعين على روحج بس من محترمج و مقدرج ما يرضيج

ضحى:- اي بالعافية عليك و عليها اني اريد اروح لبيت اهلي ما ابقى عندك

خالد: كمت من مكاني اشرت عليها بأصبعي و حجيت:- باب البيت لو طلعتيه قسما بالله العظيم يا ضحى ما الج رجعه منه ..

كمت و امها كامت تتصايح ، اخذت باكيت جكايري و محفظتي و سويج سيارتي و طلعت للاستوديو كعدت اشتغل
مشيت صور معاملات و شغل ع الحاسبة و اظهر تصوير عرسان ، ضحى ما سكتت مخابرات انطيت الجهاز صامت ما رديت وعفته على صفحة

فرغت شوية العصر قفلت الاستوديو و كلت خل ارجع لبيت عمي اشوف شكو ماكو، وصلت لهناك و الكى امجد كبالي :- ها امجد شو هنا ؟

-والله ما كدرت اروح ذوله اخوة اسماعيل و عمامه جايين يطالبونه بولدهم و شلون نزوج بتهم بدون علمهم

-ولك وديار هناك وحدها يعني

-شسوي والله ما كدرت

-من خرب بيومك غير تحجي تكول
جاي ارفع الجهاز اتصل، فاتت ام ديار وبتها الصغيرة على ايدها
التفتت لأحمد :- هم عمام اسماعيل مو اجو الصبح ؟

احمد : كالو نرجع العصر و هل منتظرينهم

كعدت ميعاد تشكي و تبجي على اسامة ابنها ماكو و تشكي لابو امجد ، ندسني رافد :- خايب شوف القهر شلون تبجي يا بوية مال الفها بحضني و اسكتها

-رافد رحمة لدين محمد ترا كلش مو وكتك

رافد:- خب دروح انت ملتهيلي بالبنتاية و عايف الاماية

خالد:- البنتاية شنو شبيك رافد احجي عدل

رافد:- لا تفرها خوية ترا اذا مرتك و امي مشت عليهن احنه اخوة و زلم بيناتنا نفهم بعض

-شتقصد ؟

-غمز الي :- ترا البنية متزوجه

-ما حجينا شي بس اهتمامك بيها كلش زايد عن اللزوم ، هاي امها هنا كاعدة تبجي على ابنها و ما مهتمة لبتها هناك شبيها و شحالها ، انت الوحيد المحارك بيناتنا ، يلا يخوي الحب ما يعرف مسميات ولا اله احدود

-حبيش انت خليني محترمك و كوم مني، لا اشو اني اكوم منك

.. كمت منه و اني اسأل نفسي:- الكل منتبه الي اني مهتم بديار اكثر من اللازم حتى اكثر من امها ، امي تضايقت مرتي غارت اخوي يبسمرني .. رغم البنية زوجتها بأيدي و هيج حجيهم .. الخلل بيهم لو بيه ؟

اني بالنسبة الية اشوف هي بنية مسكينة لا حول ولا قوة التجئت الي ساندتها و عاونتها .. زحمة بنية تفتح كلبها الك و تبقى بس تستمع ..

بس هم شكوكية من الحباية يسوون كباية شعندي قابل وياها، البنية تزوجت وراحت بحال سبيلها الله يوفقها

... و اني دا افكر واحجي بهالسالفة، دكيت رقم ديار بلا وعي و اتصلت ، تسائلت ويا روحي :- حتى رقمها حافظه هه
هزيت ايدي ... ردت

ديار :- الو خالد

-ها ديار هسه شفت امجد هنا والله تخبلت شلون ما جايج ، انت وينج كون محتاجة شي شصاير وياج ؟

-لا زينه كاعدين بالامام ما علينا شي، بس خالد اگلك شغلة

-شنو هي كولي

-اسامة اجا لكربلاء يمي محد يدري حتى امي ما كلت الها

-شجابه يمج هذا شلون اجا الدنيا مكلوبه عليه هنانه امه هاي كدامي جاي تبجي

-ما ادري اني نسيت اخابر امجدي احجيلها بس من كالتلي مها عمامي جايين ما حجيت على اسامة خفت احد منهم يكول هو رايح لكربلاء ويتبعونه

-لا شيجيبهم لكربلاء، هو دخول كربلاء سهل غير گلبوني على البطانة يلا دخلوني السيطرة مو انوب اسماعيل و جماعته

-ما ادري اذا هيج كول لماما اسامه يمي لا تبجي وخل تخابرني من ترجع للبيت

-انت محتاجة شي خايفة ؟

-لا خالد اني ما اريد اثكل عليك سمعت انت و امك و مرتك متعاركين بسببي اني ما اعرف اجازيك مو ازيد عليك

-تؤ ملج علاقة لا تشيلين هم لهالحجي اني الكتلج تروحين كربلاء و اني اتحمل اثار حجايتي ما اعوفج وحدج لا تخافين
بس اتحملي باجر اذا صدك ما اجاج امجد اني الظهر يمج

-ماشي

-ديري بالج على نفسج و اذا احتاجيتي شي لا تترددين اتصلي و ما الج علاقة عسى ما ب٣ بالليل اخذ سيارة رافد واجيج

-مشكور وما قصرت والله ما اعرف شلون اجازيك امي وابوي ما وكفولي بعمري بكدك

-لا تحجين هيج الناس لبعضها قابل شكو ، يلا ديري بالج على نفسج

-ماشي مع السلامة

-الله وياج
قفلت الخط منها، صفنت: حتى هي منتبهه عليه مهتم بيها اكثر من امها مو بس رافد

ميعاد :- والله گلبي خلص يا ناس ابني ما هو وين الكاه

رافد :- ام ديار ما بلغتي عليه ؟

ميعاد :- لك عيني بلغت البارحة يكلولي لازم تمر ٢٤ ساعة يلا يعتبر مفقود

رافد :- بس هسه مرت ٢٤ ساعة على غيابه اخذج نبلغ الشرطة و ندورة

-لا يا عيني اتعبك هسه يجون عمامه الا ازين شواربهم بالقندرة والله ماكو غيرهم ماخذين ابني

رافد:- لا ام ديار لا تظلمين بختج ترا الناس احنا ضدهم مو وياهم بس اجو الصبح و كامو يهددون يردون ابنهم يعني لو عدهم ما جان حجو و ذوله ولد عشاير الجايين مو هيج

ميعاد:- يمه عزا العزاني ابني لعد وينه ؟
ودنكت تبجي و تشكي و بتها يمها تبجي مثلها

رافد :- كومي يابه كومي ندورة بسيارتي نفر على نقاط الشرطة لابد مار عليهم

خالد:- اكعد بمكانك الولد بخير يطلعون عمامه و اكلها بمكانه

رافد:- اذا حجيت ادوس ابطنك و القران خليني استفاد

خالد:- طلعها من عقلك رافد المرة بعقلها واحد لاخ

رافد:- انجب و خليني اشوف رزقي ، كومي ام ديار اني منتظرج بالسيارة اليوم ما اخلي نقطة ابغداد ما ادورها ولا يهمج

ميعاد:- والله انتم ما اعرف شلون اجازيكم اخوك خالد الما عاف بتي لو بيت ابو امجد الما تركونا لو انت بالعافية عليكم هالنفس الطيبة اي والله

رافد:- شدعوة ترا احنا اهل

ابو امجد :- هسه انت وين ماخذ المرة ؟

رافد:- عمي ندور خوما نكعد هيج و الولد ضايع، واحسن لا يجون عمام اسماعيل و تتصادم وياهم ما بينا حيل مشاكل ذوله يدورولهم حجة اذا نعرفهم مو هم الماخذين الولد نزيد المشاكل ليش

ابو امجد :- بس دير بالك ابني

رافد:- لا توصي حريص ابني

ام رافد:- رافد يمة بس تعال شويه

رافد :- رايح يمه محتاجة شي ؟

ام رافد :- اي يمه گبل لا تطلع بس تعال مرتك تريدك

خالد: شفته راح ضحكت :- روح بيها رافد انغسلت

كمت من مكاني ورحت وراه لكيت امي تتعارك وياه شلون يروح وياها و تگله :- انت و اخوك ربيتولي علة راح تسوون بيه جلطة ولكم جوزو من هالعاىلة فكونا ما بيه حيل اخسرلي واحد منكم و يتصخم راسي

باوعلي رافد و ضحك، ابتسمت :- رافد ترا صدك زايدة منك تروح وياها جاي اكلك مكان الولد اعرفه هسه اگللها وفضت

ام رافد :- يمه عزا العزاني يممممه الصخام الصحمني انوب خاطف الولد يمة ، راح يجلطوني ذوله

وكعدت بالكاع تلطم على راسه :- شقصتج يمه والله ما خاطفة الولد يم اخته

رافد :- اسمع لك اموتك دك بالنعال لو حجيت تلصم و تسكت لحدما ارجع

ام رافد :- انوب مخلي عينك ع المرة عزا العزاني كون يمه يما يرتاحون ذوله اذا ما يجلطوني ولك قااااااااسم تعال شوف ولدك شووووف

رافد :- يمه بس لا اطيرين رزقنا دكااافي رايح افر شوية وارجع

ام رافد :- والله اكول لمرتك واسويها سودة مصخمة عليك ولك انوب ادور وحدة بكد امك

-اكلج ذيج مرتي تريدين تروحين تحجين احجي مو اني النخوفني مرة، و من ثم اني وياها نفس العمر منين سويتيها بكدج حجية تريدين تصغرين بروحج بس بروح ابوج تسويلي فضل لو خليتي مرتي اطير لاهلها حتى اتزوج ميعاد بمكانها

خالد:- مو هيج الحجي رافد احجي عدل هاي شبيك

رافد :- طير انت ، باااي ادعولي بالتوفيق و الرفاه والبنين و الولد الصالح

رائد:- هذا وين رايح

خالد:-اسكت رحمة لدينك و كابلني نرضي الحجية ترا اذا بقت هيج والقران اطك و تموت من ورانا

دنكنا على امي وهي تلطم و ادك على راسعا و ادعي عليهن، بست راسها :- هاي شبيج يمه تحجين صدك

رائد:-غير افتهم حتى اعرف امي الحلوة شبيها

كعد وتمدد بحضن امي :- شصاير يمه

كعدت يم امي لفيت ايدي على جتفها و حضنتها و حجيت:- رافد اخذ ميعاد يفتر وياها شوية مضيعة ابنها

رائد:- رووووح رافد ايدك بالدهن يااااابه

نكثتنا من حظنها وكامت على حيلها :- من انعل ابوكم لابو ميعاد وياكم كواو****

وطشرتنا ... كمت من يمها اضحك، باوعت ضحى بالمطبخ ، غمزت الها .. عافتني ومشت زعلانه
هزيت ايدي ومشيت لبيت عمي

.............

ديار :- مر اليوم بكاملة بملل نمشي منا و نروح منا
بس الحلو بالموضوع انو نفتر ما خلينا مكان يعتب علينه تعرفت على مدينة ما جنت اعرفها غير بالجغرافية لما نعدد محافظات العراق ..

ولا جني اني هنا، حجاب و عباية و متخرذله تخرذل ما اعرف البس الحجاب مو انوب الحجاب و العباية بس هم هنا ما يقبلون وحدة سافر، كلش كلش لابسات عباية اسلامة جبه

بس ما عندي اشتري منها و امشي براحتي باقية انحثل بالعباية ... بالليل جعنا ردت اجيب اكل بالفلوس الظلت
ادور جيبي ماكو
سألت اسامة دور ... ماكو
سلمان ما عده

لعد هسه شلون راح نشتري اكل ؟

اسامة:- اروح اطلب منهم ؟

-منين ؟

-من ذوله
يقصد الحاشية اللي تشتغل بالامام

... لا يمعود ما ينطون اكل

-لعد شلون نضل جوعانين

طلعت جيسين فستق اشتريته من بسطية كتلهم خلي ناكله و انام شنسوي لحد ما باجر

اكلناه و ردنا انام ، سلمان عاقد وجهه عوزه بس يبجي ، سألته :- شبيك سلمان ؟

-اني اريد ارجع لأهلي ما اريد ابقى هنا

-وين نرجع ما شفت بابا يهدد بينا

-معليه اني اريد ارجع ما ابقى
باوعتله شو هذا بجى

-هاي شبيك سلمان قابل طفل انت

-معليج اتي الوصخة اني اريد اهلي

-يا اهلك حليمة العمصة الدك على راسك لو رغيدة المسويتك خادم عدها ؟

-انجبي اتي معليج لا تحجين عليهن يلا

باوعت هذا تخبل عليه بهالليل بلا وين اروح بيه، عفته يبجي جبت بطانيات و نمنا اني و اسامة هو بقى يون بمكانه لحد ما نام ، غطيته ورجعت نمت بصف اسامة ..

ثاني يوم كعدنا، بطونا ميته جوع، خابرت امجد يدك الموبايل ومحد يشيله .. لا عندي فلوس وارجع ولا اكدر اتحمل بعد كلش ضاكت الدنيا بعيني و سلمان بعده مطنكر

كتلهم كومو خلي نمشي نسأل اي احد بلكي يوزع ثواب
مشيت لاواحد كاعد اباب السياج مال الحرمين

حجيت وياه :- هلو

التفت اليه :- مرحبا اختي تفضلي

-بس اريد اسأل اكو احد يوزع ثواب هنانه شي

-محتاجة شي ؟

-ضاعت فلوسنا و ما نكدر نشتري و جوعانين

-انتم منين

-من بغداد

-يعني قصدج ما عدكم فلوس كروة ترجعون ؟

-لا اكل هذا مريض خطية جوعان

-جايين هنا شنو اقامة لو زيارة لو شنو مفتهمت ؟

-جايين نعيش هنا

-تعيشون هنا شلون و ازتم حتى فلوس اكل ما عدكم؟ على العموم خوية كومي وياي نضيفج بمضيف الامام الحسين و ان شاءالله الله يحلها

اخذنا الرجال و ودانا لمكان يوزعون بيه اكل، جابلنا ٣ صواني صغار كل صينية بيها صمونه و جبن مثلثات ٢ و بيضة سلك حطاه، كال :- خوية تريدون جاي ؟

سلمان :- اي اي جيب عمي جيب

راح الولد جابلنا كلاصين جاي حار و خلاه كبالنا و كال :- الف عافية ثواب ابو عبدالله من تكملون اقروا الفاتحة

سلمان:- شكرا عمي شكرا

بقينا ناكل بس الولد كام يحجي ويا البصفه ويسأل و يباوعون علينه، خلونا نكمل ريوك و اجو يمنا حجو :- خوية انتم جايين هنا المن

سلمان :- هذا ابوها ارهابي و يريد يكتلنا و اجينا هنا

ندست سلمان و خزرته :- لا عمو مو هيج بس احنا اليوم يجي ابن عمي و ياخذنا

تقرب الولد :- خوية احجيلي الصراحة مال تندسين الولد بعد حجايته الكالها ما مقبوله

ديار :- لا والله عمو ماكو شي احنا منتظرين ابن عمي يجي ويروح

-انت قبل شوية كلتي نريد نعيش هنا ، هسه دكولين اروح و هذا الولد حجه حجاية جبيرة ، انتم منين خوية ؟

-كتلك من بغداد والله ما عدنا شي

-منين من بغداد ؟

-من الدورة

بقى واحد يباوع بوجه اللاخ ، حجه واحد بيهم :- كاظم اني ما مرتاح لهالسالفة خل نبلغ الامن يجون يتصرفون وياهم

ديار :- لا عمو والله هسه نروح بس لا تبلغ والله ما عدنا شي

-اختي ما تروحين هاي انسيها ، احنا كاعدين هزا يا تحجين سالفتج النا يا مضطرين نبلغ الأمن يتصرفون وياكم

جاي نحجي و فات الحجي اللي البارحة خلصنا من المطعم ، من شافنه عرفنا تقرب

سيد حسين :- ها هالمرة شمسوين ؟

حجه الولد :- سيد تعرفهم ؟

السيد :- لا والله بس البارحة تعارك هذا الولد ويا ابو رحمن ابو المطعم و مبين الولد مو تمام طلع ضحايا حرب خطية ليش شصاير

- سيد البنية كالت احنه نريد نعيش هنا و الولد هذا كال ابوها ارهابي و شاردين منه، و هي نكرت كال لا ابن عمي راح يجي وياخذنا

السيد :- شسالفتكم بوية البارحة الولد تعارك ويا الحجي ابو رحمن يريد شغل انتم زوار لو جايين بسالفة احجولنا

اني بقت دموعي تجري خفت حيل و سلمان يخربط بالحجي وياهم ، كالو :- مضطرين نسلمكم لامن العتبة لأن هذا خطر ع العتبة و العتبتين الحسينية و العباسية مهددات بالتفجير و اعذرونا سالفتكم ما ارتاحينالها

اني حجه هيج كمت اتوسل بيه و دموعي تجري و اسامه من شافني هيج كام يبجي ... حط ايده السيد على راسي و كال :- اتهدي بالله بوية و اذكري الله انتم بحمايتي محد يكضكم

بس كعدي ، وينهم ولدنا بطلين ماي على السريع يلا

جابولنا مي و كال :- تهدي بوية اذا جايه شاردة و وراج سالفة احنا خدام ابو عبدالله و حاشى نطرد احد لابد بسده

اني وياج و اعتبريني ابوج و احجيلي بنيتي السالفة كلها حتى اساعدج ..

اطمنت للحجي شوية و جنت مضطرة احجي حتى ابري نفسي و ابري سلمان لان شكوا بينا خاصة لما عرفوا بينا من الدورة ، لان هاي المنطقة هواي راحو بيها ضحايا الطائفية

حجيت السالفة للحجي كلها ...
بدون ما يشوف جناسينا ولا يعرفنا .. جان يباوع لسلمان و كال :- انت سيد بوية مو ؟

بقيت صافنة هذا منين عرف سلمان سيد ؟.....

☆☆☆☆☆

#اتمنى_ان_افعلها

الحلقة_13

لابد ان يشرق الضوء في اخر النفق 💙

........

(ومن يتق الله يجعل له مخرجا و يرزقه من حيث لا يحتسب ومن يتوكل على الله فهو حسبه ان الله بالغ امره قد جعل لكل شيءٍ قدرا )

الثقة بالله ما هي الا حبل نجاة ممدود من السماء الى الارض فتمسكوا بذلك الحبل جيدا ❤

...........

سيد حسين :- اسمعوا بوية چفيلكم العباس اخو زينب انا ذوله الناس لا اعرفهم و لا شايفهم بحياتي
واشر علينا ...
غير مرة وحدة شفتهم بمطعم ابو رحمن يتعاركون وياه و فاككت بيناتهم.

التفت علينا : انا اسمي سيد حسين ابن السيد صادق ابن السيد حسين، اهل كربلة يعرفوني نذرت عمري من ٦٠ سنة لخدمة الأمام الحسين.

(قل لا اسألكم عليه اجرا إلا المودة في القربى ) و الرسول يگول حسينا مني و انا من حسين احب الله من احب الحسين )

وانا حبا و اجرا لرسول الله حبيت ابن بنت نبيه ، شعر راسي شاب بحب الحسين ... ما يوم ملت عن طريقة ولا يوم مليت من خدمته ، وسام شرف اليه بالدنيا و الاخرة خادم للحسين.

البارحة و اني بالطيف، جن جدي حسين اجاني مغضب و اسمعه يصيح (انهض يا سيد حسين ) شلت راسي واذا بجدي حسين جدامي

تريدون الصدك جدي ميت كبل ٩٠ سنة و انا ما ملحك عليه ولا شايفة بس بالطيف جن هو جدي هاذ الكبالي

جن مغضب و متضايك مني وكال : انا شايل بخاطري عليك سيد

كتله : ليش جدي شصاير ؟

كال :- ابني يجي دخيل عدي و ليلتين يبات بيهن ابيتي و هو جوعان و متكدر ليش هيج سيد ما رضيتها اعليك

كتله : وجدي محمد ما ادري عنه

كال :- لا، انت شفته وحجيت ويا وما عاونته وانا شايل بخاطري اعليك.

فزيت من النوم ويا صلاة الفجر ، سألت المرة و كلت الها : يا مره احد جاي لبيتي وما مضيفينا

كالت :- لا والله سيد محد جاي

كتلها :- جا منهو هاذ الجدي يكول عليه ابني و جاي دخيل ونام جوعان ...

تريدون الصدك اني اجيت هنا صليت الفجر جماعة بالامام و نسيت الطيف، هسه من حجتلي هالمرة هاي قصة هاذ الرجال المريض وكالت عنه البارحة بجا يريد اهله و نام جوعان اتذكرت الطيف

التفت عليه :- رجلج سيد بويه مو ؟

ديار :- ما اعرف بس هو عشيرته بالجنسية قريتها حسيني

بعدني هسه حجيت شو ذوله كلهم صاحوا ( اللهم صل على محمد وال محمد ) دخيلك يا ابو عبدالله
وهذا البجا و هذا الشال اديه للكبه و يصرخ :- يا ابو علي دخيلك انا يا ابووووو علي

وناس التمت و ناس تحجي لناس و صارت عيونهم تبجي بجي مو طبيعي ، اباوعلهم :- ذوله شبيهم ؟

واحد منهم كعد بالكاع يبجي من كل گلبه، ومرة كامت تمسح بقميص سلمان و تبجي و تكول :- من بختك سيد

اني صافنه مستغربة ممصدكه كل اللي جاي يصير ، طيف شنو اجاني بالحلم شنو ، بس الصدك والله حصرتني الضحكة وكوة ضامتها بگلبي لان عيب الناس تبجي و اني اضحك ما يصير بس الموقف غريب و هاي العالم لازمه بسلمان و تبوس بيه ..

الرجال يطلع عمرة ب٨٠ سنة وجهه مجعد و لابس عكال و غترة سودة او اهل كربله يسموها (شطفة ) سودة ، حط ايده على جتفي و كال :- ما مصدكه بتي ؟

-لا عمو مصدگه والله

-اسمعي بنيتي زلمتج زلمة مبخوت الله انتشله من الارهابيين الرادو يخلونه انتحاري و جابه هنا و صدكي و ثقي و تذكري حجايتي راح تشوفين وياه خير بعمرج ما راح تشوفين مثله ديري بالج عليه و انا شفتج البارحة تغلطين عليه و ترزلين بيه ما يجوز

ديار:- لا عمو بيناتنا احنه متعودين نغلط هيج هو بالمنطقة احنا نسمي سويج

-يعابيه الله كلمن يعابيه ليش بويه هيج وياه خطية تراه سيد و بخيت و من اهل الله ما يجوز ... بئس الاسم الفسوق بعد الأيمان .. من تنعتين احد بغير اسمه استهزاء هاي بأعتبار طلعتي من الدين كله و صرتي فاسقة لا بوية حرام ما يجوز

-لا حجي والله يعني مو قصد هيج

-لا بتي ما يصير السيد ينغلط عليه ولو هو مو كل سيد سيد بس اكو سادة من اهل الله و بختهم شكبره و اكو الله يهديهم ما نكول غيرها .. بس ما يصير يا بنيتي

هزيت راسي و اني بعدني ما مستوعبه كل الموضوع

رجع حجا وياي رجال واكف هم جبير بالعمر :- بتي هسه انتم ما الكم احد هنا يعني تستقرون ؟

ديار :- عمو هو هددونا و شردنا هنا على اساس ولد عمي يجون بس تأخروا و صارلنا يومين انام بين الحرمين

سيد حسين :- احجيلي البارحة ليش نمتوا جوعانين مو اكو مضيف و ثواب نوزع يومية بثواب الامام الحسين ليش ما اخذتوا

-ما اعرف ما اندل اني بعمري ما زايرة الامام هاي اول مرة

-هلا بيج و كل الهلا ، هو وين اهله ؟

-عموا ابو مات صار سنين و جان عايش ويا مرت ابوه اخذت حقه بالبيت و يومية جانت تكتله بس هو البارحة يبجي عليهم يكول اهلي اريد ارجع

هز راسه الرجال انقهر و اثنين زلم حاظنين سلمان و عيونهم مدمعة .. كام من مكانه و اخذ سلمان لزم ايده و كال :- تشوف ذيج الگبة هذا ابوك الحسين، و هاي الكبة يصير عمك العباس و هذا بيتك و احنا اهلك بوية

يا بختك عد الله من قدر كل هالاقدار و نجاك من الموت وجابك هنا بنصنا ، لا تخاف بوية احنا اهلك و اني عدي بيت ائجره للحملات اللي تجي من الدول زيارة و بالاربعين و زيارة عاشوراء افتحه للزوار مكان استراحة .. راح اخليكم تعيشون ما اريد ايجار منا لما الله يفرجها عليكم و تكدرون تنطوني حق ايجاري

كام رجال كال غرفة نومهم عليه سيد بثواب الامام
ذاك كال براد مي بثواب الامام الحسين
ومرة كالت فراشاتهم عليه بثواب ابو عبد الله ..

بقيت اباوع ، بحلم بعلم حقيقة اللي جاي يصير لو شنو ؟
اسامة واكف بصفي بس صافن مثلي ، دار وجهه عليه :- ديار عود صدك راح ينطونا بيت

-والله ما ادري يا اسامة لهسه ما مصدكة اللي جاي يصير حقيقة

الحقيقة إن كربلاء هي مدينة المعجزات، ربما من يسمع قد لا يصدق أو يعتقد إنها خرافة او اختراع من عقول البشر.

لكن لو جلست و تعايشت مع اهل كربلاء لأستمعت لعشرات القصص المماثلة التي سيرويها لك الكربلائيون بكل يقين و ثقة.

الأرض التي كانت صحراء فتحولت قبلة للعاشقين بمصرع الحسين في الطف يقصدها الملايين بقلوب محبة و عيون مدمعة.

إحصائية سنوية تشير إلى إن أكثر من ٣٠ مليون زائر سنويا يطئ أرض كربلاء لزيارة قبر الامام الحسين.

أكدت الإحصائيات العالمية إن أضخم تجمع سنوي في العالم يحدث في كربلاء، و أعظم مسيرة راجلة عالمية هي مسيرة الأربعين حيث أن الناس تقصد الحسين بن علي مشيًا على الاقدم من مسافات بعيدة.

فإن كانت الكعبة المشرفة قبلة المصلين
فإن قبر الحسين قبلة العاشقين
تهوى اليه أقدام المحبين من كل مكان و في كل حين
ففي الحسين لغز لا يعلمه إلا من تعلق قلبه بحب الحسين.

ديار :- حقيقة جنت ممصدكة كل اللي يصير
اخذونا اني و سلمان و اسامة لبيت يصير قريب من الامام
دخلنا بيه هذا الرجال السيد ..

وكال :- هذا بيتكم بوية تعيشون بيه بالهنا

للبيت جان بسيط عبارة عن غرفة نوم و هول و مطبخ و حمام و كراج بنص البيت الكاع مالته شتايگر
المطبخ بيه طباخ منضدي صغير و ٣ رفوف عليه مواعين
الهول بيه حصير و ٣ مخدات
وغرفة النوم بيها سريرين منفصلات حديد و اكو ديلاب طلاقتين

امشي بالبيت و ما مصدكة لهسه كل اللي جاي يصير
يحجون وياي و يسألوني و اني اصفن و لهناك انتبه يسألون و اكلهم :- ها ها شنو ؟

من كد ما انضرب عقلي بالشيء اللي صار وياي
كعدنا الحجي بالغرفة و كال :- هذا بيتكم بويه وانا من باجر ادور شغل لسيد سلمان يطلع يشتغل و يكد عليكم

اباوع مدري اضحك مدري ابجي
سلمان المرعوص صار سيد سلمان لا و يكومونه بمولاي و يكعدونه بمولاي و سيدنا

هو خطية حيل فرح من شاف الناس اهتمت بيه وكاموا يمدحون بيه طار من الفرح تباوع الوجه ما كامت الضحكة تفارك اسنونه ، جارخ حلكة على اوسع نطاق وهو يضحك

دار وجهه الحجي وحجة :- شلون عقدتو عقد زواجكم ؟

-ديار ما اعرف هو عد بيت عمي ابو امجد دخل علينا شيخ و كالي كولي انت وكيلي و كلت

-تتضايكين لو رجعت عقدت الكم من جديد

-لا عادي

صاح اثنين زلم يعرفهم و كعدنا بالغرفة و عقد النا و كال :- راح اسعى و اشوف شلون اكدر ازوجكم قانونيا بدون حظور ابوج

هزيت راسي (اي) ... طلع

طلعو من البيت و عافونا وحدنا ، اسامة يركض بالبيت يضحك و سلمان نافخ روحه ويكلي :- الوصخة بعد كله تكليلي السيد افتهمتي

اني منا وهيج اسمي السيد سلماااان

ضحكت ، كعدت هيج لحظة اتأمل بيها اللي جاي يصير
تذكرت ( يا سند من لا سند له ) رفعت راسي لربي و كلت :- الحمد لله رب العالمين

صفنت ... يمكن اني بعمري ما مصلية لالله
لا امي بيوم علمتني على صلاة ولا ابوي صلاة كبالي غير لما صار ارهابي

بس هسه صارت عندي رغبة اصلي من صدك و اشكر الله لأن الصار اليوم اللي لحد هسه ما مصدكة بيه ابد ما يخطر على بال بشر

معقوله الله هيج عوضني ؟
بعدني من ابوي و من مستنقعات امي و جابني هنا و انطاني بيت ! يعني هاهية اني استقريت و هذا بيتي ؟!!

دا افكر و سلمان و اسامة يتراكضون بالبيت اندك الباب
ردت اكوم افتحه حجة سلمان :- اني رجال البيت ممنوع المرة تفتح الباب افتهمتي

:- خب دروووح

فتح الباب طلعت مرة جايبتلنا صينية بيها تشريب لحم و ماعونين تمن برياني و زلاطة و فواكه و كالت :- خالة اني جيرانكم هنا شتحتاجين امانة الله ورسوله تكولين احنه نعرف سيد حسين و نقدره و ان شاءالله نصير جورة طيبة

اخذت منها الصينية :- مشكورة خالة الله ينطيج ان شاءالله

حجت :- بعد عمري حبيبتي اعذرينا ترا من غدانا جبتلكم لان وصانا عليكم سيد حسين

-ما تقصرين الله يحفظكم خاله و يحفظ السيد حسين

-هلا بيج حبيبتي شتحتاجين كولي

- ان شاءالله

خلينا الصينية وكعدنا نتغدة اني و اسامة و سلمان ، سمعت صوت الموبايل يرن .. كمت اله .. باوعته رقم امي

رديت :- الو

ميعاد :- وين صرتي لخاطر ربج من البارحة ادك عليج وماكو شصار بيج

-ما ادري بالموبايل بالجنطة ، ليش شكو شصاير

-اني و ابو امجد و امجد جايين عليج بالطريق اسامة يمج و ما تكولين طايحة الحظ حيلي راح عليه عبالي الولد ضاع

- ماما كلت الخالد يكلج

-وخالد شنو ما تعرفين تتصلين و اطمنيني الى متى تبقين شالعة گلبي شلون وياج ؟

-هسه انتم وين ؟

-احنا بالطريق لا تتحركين ابقي بالامام احنا جايين

-احنا مو بالامام

-لعد وين ؟

-لكينا بيت حجي سيد هنا انطانا بيت و كعدنا

- منو هذا ولج ؟

-ما اعرفه سيد يشتغل بالامام

-تحجين صدك انت ؟

-اي والله شبيج قابل اجذب عليج

-ابيش اجرلكم البيت

-عود من تجين نسولف براحتنا

-ماشي يلا

... قفلت الخط منها ، باوعت خالد متصل ٧ مرات
رجعت رمشت عليه لان ما بقى عندي رصيد
بس ما اتصل

تركت الموبايل و گمت انظف بالبيت و اغسل ... سلمان راح جاب من الجيران ماسحة و مكناسة و غسلو وياي هو و اسامة

سمعت الموبايل رن ، رحتله ركض
رديت طلع ابو امجد :- ها يابه احنا بالأمام هسه انتم وين ؟

ديار :- هسه عمو احنا جايين

لبست عباتي و ردت اطلع سلمان ما قبل كال اني اروح، اتصلت بعمو :- عمو انتم وين سلمان يريد يجيكم

-والله بنتي احنا كبال باب القبلة استعجلوا شوية

-ماشي
غلقت الجهاز من ابو امجد كتله :- تلكاهم مقابيل باب القبلة اركض بسرعة ، تندل البيت ؟

-اي اييي اندل

-ديلا روح

راح واني بقيت بالبيت رجعت فرشت الحصيرة ورتبت المخدات حتى يجون يشوفون بيتي نظيف .. طلعت الزبالة برا رتبت الجراجف ع الأسرة

اتصل بيه عمو ابو امجد :- ولج يابه هذا سلمان تيه البيت منين نجيكم

-مو كتله اخ منه ،
لبست العباية و كتله :- ابقى هنا
وطكيتها ركضة بعباتي .. اول ما طلعت فرعنا صاروا كبالي

حضنت امي و سلمت عليها و هي باستني و تحضن بيه مشتاقتلي شلت عنها اثار و سلمت على عمو ابو امجد و على امجد و تمشينا للبيت و هم يسألوني

ابو امجد :- ولج بابا هذه سالفة ما تخش بالعقل شنو حلم شنو انطوكم بيت انت صاحية ؟

-والله عمو هذا الصار واحد حجي يكول جدي اجاني بالحلم على سلمان

-خاف يعرفكم خاف من جماعة اسماعيل والله يابه اني خفت ما مطمن للسالفة

-لا عمو شو احسهم خوش ناس لان الحجي يشتغل بالامام الحسين يعني مو مال ارهابي ويا ابوية وبعد ما ادري هذا كل الصار و كاعد انظف بالبيت اني و سلمان

امجد :- والله يابه مو بعيدة على الله اثنين مثل ديار و سلمان و ضاكت بيهم الدنيا وهم بهالحال ليش الله ما يسوي بيهم معجزة

ابو امجد :- والله يابه ما ادري شلون ما اجيبها ما جاي تخش بعقلي

ميعاد:- هسه شلون و ليش المهم استقروا و كعدوا بلكت هذا الرجال يلكى شغل لسلمان ما كلتيله

ديار :- لا كال راح ادورله شغل و هم كال راح اسعى ازوجكم بالمحكمة بدون حظور والدج

ميعاد:- وين الله بلكي ربي هذا يوكف وياج ويساعدج

... دخلنا للبيت كام ابو امجد يفتر بالبيت و امجد ويفرون براسهم و اثنينهم ما مصدكين

-بيت ينطوكم بس لان شافو بيه حلم

-عمو مو بس هيج تبرعوا بغرفة نوم وبراد مي بثواب الامام و فراشات ..

-شنو السبب

-يكولون سلمان دخيل عد الامام الحسين و الحسين ما يرد دخيله

ميعاد:- من هاي يصيحون دخيل ابو عبدالله اثاري الدخيل اله قيمة هنا

-ماما لو شايفتهم شلون يبجون مدري تضحكين من الصدمة مدري تبجين

امجد :- ليش يبجون ؟

-ما اعرف لزمتني الضحكة والله ولزمولك سلمان ابو راس تبوس

امجد :- هههههههههههه والله يلوك للمرعوص شيريد بعد

-انجب الوصخ احترم نفسك اته ابيتي

امجد :- ههههههههههههه والله عمي خوش انا شكبرني و عليه العتب وكاعدلي بغرفة هالكدها ابيت اهلي ما عدي بيت و انت المرعوص صار عدك بيت

ديار :- هههههههشحدك تكول عنه مرعوص يمعود صار اسمه مولاي و سيد سلمان
صدك اكلك عمو هو من شوكت سلمان سيد شو ما ادري بهالسالفة

ابو امجد :- من زمان ندري بيه و مو بس هو حتى احنا المشاهدة سادة بس احنا ما عدنا تقديس الانساب .. عدنا الانسان هو وعمله سيد مو سيد ما تفرق عدنا بس بالمذهب الجعفري تختلف عدهم مكانه للسادة

ديار :- عمو والله ما شفت اشسوو بسلمان

ابو امجد :- لا تستهزئين بنتي ترا سلمان احنا اهل المنطقة كلنا نعرفه رجال بخيت و من اهل الله صح ما نميزه و نكول عنه سيد بس نعرفه من اهل الله يتيم و مريض شلون ما يصيرله مكان يم الله

ميعاد :- بلكي يا بنتي هيج و بجال سلمان تعيشين بخير و ما تحتاجين لاحد

.....دنحجي اندكت الباب
طلع امجد فتح الباب .. طلع سيد حسين و ابنه
استقبلهم ابو امجد و كعدوا بالاستقبال و اني و امي وكفنا بالباب نستمع الهم

...بقى سيد حسين يسأل ابو امجد على سالفة حرك جسمي و عن وضعي و وضع سلمان ويا اهله و صار يسأله عن ابوه و عمامة

وعرف ان اله حق ابيت ابوه و مرت ابوه ماخذه حقه التفت حجي حسين لسلمان و كالك :- حقك يرجع نحجي ويا مرت ابوك ونخليها تنطيك البيت

سلمان :- لا لا لا لا تدخلون باختي و بحليمة

السيد :- ما تريد حقك ؟

سلمان :- لا ما اريد بيت شنو تريدون اطردون اختي

السيد :- والله يا بوية انت صدك الله باليك بس مبتليك بكلب ابيض بالعافية عليك كل الصار وياك ما ترضى اختك تصفى بالشارع و النعم منك

ابو امجد :- هو ابن منطقتنا و نعرفه من زمان زلمة غيور و صاحب نخوة لو ما شوية سوالفه مو سلمان

ضحك و فتح حلگه طلاقتين

السيد :- لا لا هو خوش زلمة و انا راح ادورله شغل و يشتغل و يكد على عائلته باوع لأسامة هذا اخو البنية مو ؟

ابو امجد :- هذا هم سالفته سالفة والله يا خوية اجا مناك لهنا وكف عقولنا حسبالنا صار بيه شي ما خلينا شارع ما دورناه عليه تالي جلي تابع اخته ما راضي يعوف اخته وحدها

-زلمة عفية عليه ، انت طالب ؟

امجد :- اي والله طالب خطية بس بسبب سوالف ابوه كعدوا

ابو امجد :- خوية تريد الصدك اني من سولفتلي البت و لهسه اني ما مصدك الصار

سيد حسين :- حجي من تجي لكربلاء تصير هاي السوالف عندك عادية احنا بكبر الامام الحسين يومية نشوف المعجزات ..

اسولفلك سالفة و عليه العباس اخو زينب بكل كلمة اكولها الك ... مرة من المرات بالثمانينات جانت علينا ولية و اليقرأ للحسين يكضونه يذبونه بالحبس ولو يموت لو بقدرة الله يطلع

مرة من المرات والدي الله يرحمة ويرحم اهلك

-الله يرحمة

-جان واكف و هو رجال چبير و ينعى الأمام الحسين بليلة عاشوراء ويبجي و الناس ملتمة عليه تحيي الليلة و تبجي

اجا الامن لم الموجدين وصعدهم بسيارة و رادوا ياخذون والدي ، وكف والدي وحك هو العباس ابو فاظل تجى ايده ع السيارة و كال

:- وجدي محمد السيارة ما تتحرك الا تنزلون كل الاعتقلتوهم
يريدون يمشون السيارة يدفعون بيها السيارة وكفت ما تتحرك

نزلوا الاعتقلوهم اشتغلت السيارة ، صعدوهم وكفت الله شاهد .. جان يكضون بوالدي و يكلوله (دخيل بخت جدك سيد اعذرنا ) و يعوفونه و يروحون ولا اخذولهم واحد ولا سجنوا احد كلها كرامات ابوا عبدالله

ابو امجد :- والنعم من الامام الحسين ، والله يا عمي جنه نجي و نزور الامام كبل ونكعد بالامام لا نعرف سني ولا شيعة رب الخلانا هسه لازمين كلوبنا و احنا ندخل كربلاء

السيد:- لا كربلاء امن لا تخاف احنا اهل و اخوة

ابو امجد :- والله عمي اخوة بس هالطائفية الدمرتنا الا بشرفك نتوكف بالسيطرة و نتحاسب احساب الارهابيين والله لان جنسيتي لقبها سني وين صايرة بيا عصر ..
اني داخل محافظة عراقية انذل بجنسيتي

السيد :- لا حشاك من الذلة بس اسألك سوال و عليك بعزيز كلبك تجاوبني

-اي

-من مريت بفرع الامام كم وحدة تفتيش كضتك ؟

-اكثر من وحده هواي

-اكو بيهن وحدة كالتلك طلع جنسيتك منين جاي شنو انت على يا ملة ؟

-لا والله

-دخلت الامام و صليت ؟

-الحمدلله

-اكو احد كالك ليش تصلي مجتف لو احد ادخل بشؤون صلاتك

-لا والله الله شاهد

-بويه السبب مو بينا السبب بالحكومة من تلزم جنسية العراقي و تصنف انت سني و انت شيعي المفروض واجبهم يحفظون الامن بدون ما يفرقون احد عن احد كلها محافظاتنا وكلنا عراقيين بس هاي سووها ويانا فرق تسد وخلو ناس تضرب بناس و باكو الجوانا و الورانا

....بقوا يحجون و تعرفوا على بعض و عمو ابو امجد اخذ موبايل سيد حسين و امنه علينا و بقى يوصي علينا

درت وجهي على امي تهز ايدها بحيرة :- والله يا يمة الله باوعلج بهذوله الناس مدري وين جان الله ضامهم

ديار:- الحمد لله

طلع السيد حسين و سلم على امي و هو مدنك ، اشرت لامي تلف عبايتها زين .. لفتها و سلمت عليه و شكرته على وكفته وياي

هو رحب بيهم و طلع

ابو امجد كعد يحجي وياي : ديري بالج على رجلج و صيري سباعية و احنا عود جنه ناوين نشتريلكم غرفة نوم بس الناس تبرعت الكم و السيد ما قبل كال بثواب الامام غرفتهم واصلة

فبهاي الفلوس راح اروح اشتريلج ثلاجة و نجي اني و امج مو احسن الكم ؟

- تسوي فضل عمو

-يلا ام ديار امشي ويانا، امجد يابه انت اوكف ويا اختك شوفلها نقط الكهرباء شتحتاج شعطلان روح اشتريه و صلحه الها و استعجل حتى نرد لاهلنا الظهر

امجد :- اي يابة ادلل

كام امجد فحص كل نقاط الكهرباء و الاضوية و الشمعات و الما تشتغل فتحها وراح اشترى جدد و شكلهن وبقى يشتغل و سوا واير السحب و اهل المنطقة كاموا يساعدونه

ماما و عمو امجد راحوا اشترولي ثلاجة ام البابين تخبل بيضة .. الفرحة ما وسعت گلبي و اني اشوف صار الي بيت و غراض كامو يجيبون البيتي

امي منها اتبرعت و اشترت الي على درزن درزن مواعين كوس خواشيك قوري ومن هالسوالف ب١٥٠ الف و اجت جابتلياهن ..

وكعدنا اني وياها نرتبهن بالمطبخ ، حجيت وياها :- شحتسوين راح تظلين ابيت عصام ؟

-اي لعد شسوي وين اروح

-تعاي هنا و عيشي وياي هنا و عوفيه

-لا يمه اعوف بغداد شبيه ما اكدر دوامي شغلي ابقي انت هنا و ديري بالج على نفسج

-اسامة لا تخلينة ابالج يبقى يمي

-لا يروح وياي مو بكيفه خل يولي

-يروح يشرد مره لخ ؟ وخاف ذيج المرة الله سترها هالمرة يضيع من صدك عوفيه

-لا خلي يولي انقله هناك و ارجعه لمدرسته

صفنت ... هم رحتي لبيت خالد ؟

-بعدج تسميهم بيت خالد
باوعتلي صفح :- ادري بكلبج يهواه

-هو متزوج و اني متزوجه بعد حتى لو جنت اتحلم هم بعد ما يصير

-اول واتالي خالد يتزوج

-ليش ؟

-مرته نكديه مكفرته عيشته

-بس يحبها

-الحب مو كلشي يمة خاصة النكد يكتل ابو الحب و يخلي الرجال يكوم يدور الراحة بغير بيته

-هي تغار عليه هوايه سمعته متعارك ويا مرته البارحة

-اي ادري

-منو كالج ؟

-رافد

-شنو وين حجيتو

-طلعنا ندور على اسامة اثاري خالد العينتين يعرف مكانه و ما كايلي

-يعني شسولفلج على خالد ؟

-السولفلياه يحبج

انصدمت، توكفت اديه عن الشغل :- منو يحبني ؟

- خالد

-لا خالد ميحبني متعاطف وياي اني اعرف

- ماكو احد متعاطف لهالدرجة ديار ، خالد يحبج بدون ما يدري و اهله كلهم منتبهين لهاي السالفة بس هو ينكر

-لان حجيتله و نخيته هو غيرته ما سمحتله يتركني بس ما اعتقد عنده شيء

-بكيفج .. تجي الايام و تعرفين اذا صدك جان يحبج لو تعاطف .. بس اتذكري اليحب راح يستمر و التعاطف راح ينكطع بمجرد ما تصيرين بخير منها و احكمي

... بقيت صافنة :- معقولة يعني !!
مستحييييل اخر شي ممكن افكر بيه بيوم ان خالد يحبني ..
رجعت سألت ماما :- ورافد ليش سولفلج هالسوالف

-رافد صار محبس بأيدي

-شلون يعني ؟

-يحبني

-بس انت مو تحبين عصام ؟

-زيادة الخير خيييرين يبنيتي

-اكلج يوم لهنا وكافي خيرين شكو لا تخربين سمعتنا كدام بيت ابو رافد و ابو امجد هو ما النا اقارب بيهم حظ غيرهم

-لا و اني امج غلست بس خلي محسيته اني ما ادري و هو يصيرلي خادم بس حتى يثبتلي حبه

-و شتستفادين ؟ ترا اللي تحبينه ضابط و لواء و ما ناقصة شي ليش ما تبطلين سوالفج يوم ترا لعبت نفسي

-اني كتلج حبيته ؟
كتلج صادقته ؟
كتلج انطيته مجال ؟
لا .. كل القصة بعت عليه ثكل على شوية دلع و الا صاير حجل برجلي امشي بيه وين ما اريد

-لو ضاله على ذمة ابوي هواي اشرفلنا هسه كمتي تشتغلين زوجي

-لج ماما اني مو غبيه و اجي اخبط ، بس هاي ام رافد صايرة تسمعني حجي و ادوس بمصراني فمن تريد ادوس زايد اكفخها بأبنها الجبير على حلكها و اسكتها

-ما ادري انت شلون تفكرين بس هالتفكير اني ما احبه

-اكول ظلي بتي ظلي بهذا تفكيرج احسن

هزيت ايدي و بقيت اشتغل سكته
كملنا شغل و تقريبا رتبنا البيت و نظفنا ، اسامة اجا همس بأذني:- ديار راح اروح البد فوك لا تكولين لأحد و اذا سألت عليه ماما كوليلها راح

-ليش ؟

-ما اريد اروح وياها و هي ما تقبل

-معليك اني ما اعوفك تروح لو هسه الدنيا تنكلب

.. رغم حجيته بس هو خوفه بگلبه راح من صدك لبد ساعة هم كاعدين و هو ما مبين

من رادو يروحون امي بقت تصيح على اسامة، دفعتها برا كتلها من تالي جاية تكولين ابني كل عمري اني اربيه و تخذينه ع الحاظر الام الربت مو جلبت و اني امه

ضحكت و كال :- ولج و مدرسته اريد انقله

-انقله لهنا و اخلي يكمل معليج بيه

رضت عافته، التفت عليه ابو امجد :- هاج يابه هاي ٣٠٠ الف مصرف دزهن خالد الج جان ناوي بيهن يعاونج بس من ضيعج ورجع لبغداد انطانياهن و كال اسلمهن الج

-سلملي عليه هواي و اتشكرلي منه

.... بقيت بالبيت و سلمان اخذ اسامة و راحو للامام هتاك يفترون .. فرغ عليه البيت ، كعدت بالكراج

بحلم بعلم اني كاعده و هذا بيتي
جاي افكر بالبيت و خطر على بالي خالد و كلام امي
بقيت افكر بيه، اتذكرت الموبايل ما ادري عنه و اني رمشتله ..اكيد هسه خابر

رحت طلعت الموبايل لكيته متصل ٣ مرات
ورقم غريب متصل .. عرفته هذا رقم ابويه الخابرني منه، تجاهلت لا رديت ولا اتصلت .. بس رمشت لخالد

بسرعة خابر :- الووو

ديار :- هلو خالد شلونك

-لوني مثل لونج شلونج اليوم

-اليوم عال العال

-يا الله اجوج بيت ابو امجد شافولكم بيت

-لا يا بيت ابو امجد

-لعد شكو ؟

...سولفتله السالفة
بقى يكول :- تحجين صدك ؟ ، الله عليج

-اي والله

بقى ساعة ما مصدك بالقصة اخر شي :- الحمدلله عسى ان تكرهوا شيئا و هو خيرا لكم .. عسى يكون سلمان وجه خير عليج و تخلصين من كل شي

-ان شاءالله، صدك خالد اجيت اكلك

-شنو ؟

-مشكور ع ال٣٠٠ الف ما جان اكو داعي و مرتك حامل

-لا تحجين هيج ما بيناتنا شكر و مرتي الله كريم علما تجيب و عندي خير من الله والولادة تسهيل من الله

-ان شاءالله تكوم بالسلامة، هي حامل ببنية لو ولد

-والله اخذت سونار و تكلي ما مبين بعد الله كريم

-انت شتتمنى

-ماكو رجال ما يتمنى الولد بس شيجي من الله رحمة

-ان شاءالله يا ربي يرزقك بالولد الصالح على وكفتك هاي وياي

-عاد كلما نحجي راح تكليلي وكفتك شسويت يربج لا تحجين هيج

- هههه مشكور

-اووو هم كالت مشكور ، اكول روحي روحي احسن

ضحكت:- يلا مع السلامة

-الله وياج بس لا تنسين شتحتاجين لا تترددين و شيصير وياج طمنيني

-ماشي باي

-هلو

..... نهيت الاتصال و تمددت افكر بيه و سرح خيالي و كأني ما متزوجة .. بعدين اندك الباب و دخل سلمان و اسامة

انتبهت على روحي :- اني حرام عليه اسوي هيج اللي جاي اسوي ما يفرق شي عن اللي جانت تسوي امي ، خيانة ..

لازم اخذ وعد على نفسي بعد ما اخابر على خالد و احاول ما اتخيله و اسرح بيه بخيالي

بس هالشي ما صار ..
على الرغم جنت متزوجة يس زواجي من سلمان شكلي لا اكثر داخلي ما بيه اي مشاعر لسلمان هو مثل اخوية بالضبط، مثل ما احب اسامة احب سلمان .. بس اسامة اكثر.

بقيت اسرح بخيالي و اني اتخيل خالد و شكد ما احاول انسى نفسي و ارجع اتخيل ..
بس اخذت وعد ما اتصل بيه
وفعلا ما كمت اتصل الا لما هو يتصل يستفسر علينا

... بهالأيام الناس جابولنا غرفة نوم حلوة النا اني و سلمان .. و جابولنا البراد و الفراشت و الزوالي

و ال٣٠٠ الدزهن الي خالد اشتريت بيهن كاونتر صغير على كدي و سنك .. وصفطت غراضي بيهن

السيد راد يشغل سلمان بالعتبة بس جان امي مدارس يمكن بس صف اول ابتدائي و مبطلينه اهله
فلكاله شغل بمطعم قريب على الامام الحسين
يوميته ٢٥ الف ..
يومية يطلع من الساعة ٥ الصبح يرجع ب٥ العصر
خطية يرجع تعبان يبقى طول اليوم نايم .. ما يكعد الا كم ساعة و يرجع ينام لأن وراه شغل

يجيب اليومية مالته يخليها بيدي و يروح ينام لا يحاسبني لا يكولي وين فلوسي ، حتى اكل لا يطلب ولا يتأمر شكو بالثلاجة يطلع ويا صمونة صغيرة و يكعد ياكل بهدوء بدون ما ادري بيه

..خابرت امي على نقل اسامة بس التفاجئت بيه خالد حاجي ويا امي على رجوعي للمدرسة على رغم المدرسة فاصليني بس منطي فلوس للمدير مرجعني و ماشي بيها و ناقل اوراقي و اوراق اسامة و جابهن لكربلاء ..

.... اندكت الباب ، جنت وحدي بالبيت اسامة ويا سلمان بالشغل .. فتحت الباب خالد كبالي

ارتبكت :- هلو خالد هلو شلونك

-شلونج يابه شنو هالبيت هذا

راد يدخل البيت، شافني ارتبكت :- ها ما مرحب بيه ؟

-لا بالعكس بس سلمان ما موجود بالبيت ، اجيب عباتي و نروح للامام

-يخبله سلمان الوصلني للباب هذا وراي قابل شميت ايدي و اندليت البيت

والله صدك وسلمان يدخل وراه اثاري جان شايل على جتفه اكل النا ومشي اسامة وياه بس اسامة موكع شوية و كاعد يصكع براس اسامة شلون موكع الاكل

فات سلمان و هو يرزل بأسامة .. ناوشني الاكل وهو عصبي عود يأشرلي فوتي جوا

دخلت للمطبخ وراح هو وخالد للاستقبال
باوعت الاكل .. جايب كباب و دجاج شوي

هو يشتغل بمطعم .. و شيزيد هناك ينظفه و يجيبه النا للبيت صمون كباب لحم دجاج اشكال الوان .. حتى نادرا ما اطبخ على كد ما سلمان ينگل النا

اسمع خالد يمدح بسلمان و هذا ينفخ بروحه ويحجيلة اني هيج اشتغل و هيج اجيب و هذا مستلمه :- عفية و عفية

سويت صينية غدا النا و رحت وديتها للاستقبال ، كام خالد من مكانه ياخذ الصينية من ايدي :- يابه شنو هالزحمة هاي

-رحمة يمعود هلا بيك

باوعلي وضحك :- شفتي مو هذا الزواج البجيتي دم ما تريدين تتزوجين ؟ شفتي الله شكاتبلج ؟

ابتسمت :- الحمدلله رب العالمين جان اختياره الي احسن من اللي اني اختاره لنفسي، شعدنا غير سلمان يابه

سلمان ضحك و كام حضني و باسني كدام خالد
كام يضحك :- هههههههههه لك سويج مو هنا تحضنها يربك لا كدامي

كمت ادفع بسلمان وهو واكع بوس بخدي ويكلها :- اخبها هاي مرتي مرتي هاي

خالد :- الله يديمها عليكم

ديار:- اكعد عيب خلي الرجال يتغدا ، اسامه روح جيب مي من الثلاجة

كعدنا ناكل
سلمان :- اكل اكل تره هذا اني جايبه الاكل

خالد :- عاشت ايدك

دنك ياكل ورجع كاله :- طيب الكل خالد مو اني جبته

خالد :- اي اي طيب عاشت ايدك

رجع باوعلي :- ها ديار طيب

-اي اكل
خزرته

رجع باوع لاسامة :- ولو اته ما تستاهل تاكل بس يلا اكل يالجايف

اندار لخالد :- ها طيب الاكل الجبته ؟

خالد طكها ضحكه :- ولك ابن الخوش مرة جايب اكل انت لو مان علينا مو وكف بزردومنا شجاك

كمنا نضحك .. وعود تاب كل شوي و عاده طيب الكل الاني جبته ؟

خلصت الغدا صبيت جاي و فتح خالد الموضوع ويا سلمان و كاله :- خلي ديار ترجع للمدرسة و هاي نقلت اوراقها مناك و جاي هنا

سلمان ما عارض كاله :- اي اي اني اريد تصير دكتورة حتى تعالج رجلي

خالد:- ان شاءالله تتعالج رجلك و تكوم تمشي بطولك

ديار:- بس فاتتني كل الدروس و هذا ثالث صعب شلون راح اقرأ

-ديار لا تكولين شي صعب .. الصعب خلي كدامج اقري وسوي صعب .. انت كاعدة بالبيت بدل ما باقيه تروحين منا و ترجعين منا اقري

-مو اني جنت مفكرة السنة تجي ارجع

-لا صارتلج فرصة هسه ترجعين استغليها ..

.... بقى يسولف وياي و يحجي و اني سرحت راح بالي بعيد .. وكام خيالي يجرخ هو كاعد و استكان الجاي كباله كدامه و يحجي و اني صافنه بيه

شال راسه باوعلي ، شافني مركزة بوجهه .. ابتسم
كمت من مكاني ورحت للمطبخ

بعدها كام راح ويا سلمان و اسامه للامام
واني بقيت بالبيت ..
عقلي انضرب بيه

هو حيل حلو و شخصيته حلوة ... تجذب
شكد ما سلمان جان نعمة بحياتي بس ابقى اتمنى رجال هيج مواصفاته .. مو بيدي شكد ما اكول حرام .. عقلي يجرخ بكيفه ..

بات ليلتها عدنا، باوعته و هو نايم بالأستقبال و اسامة نايم شوية عنه و سلمان .. بقيت مركزة بطوله و هو نايم

اخر شي حسيت على روحي عفت ورحت للغرفة بس بيومها طلع الصبح و اني ما نايمة

طلع سلمان الفجر للشغل و اني طلعته للباب و رجعت باوعت بالأستقبال .. اسامه نايمة و هو هم نايم على بطنه ووجه صفح و حاضن المخدة

فجأة شال راسه و كال ... ها طلع ؟

ارتعبت من كعد و ارتكبت .. حتى ما عرفت شجاوب

ابتسم و كام من مكانه و تقرب يمي .....

☆☆☆☆☆

#اتمنى_ان_افعلها


الحلقة_ 14

وكأنك اقسمت ان تكون بفكري دائما 🤚

......

- ها طلع ؟

ارتعبت من كعد و ارتبكت .. حتى ما عرفت شجاوب
ابتسم و كام من مكانه و تقرب يمي، تراجعت بخوف منه و ردت اطلع

-شبيج

- ااا اريد اروح لغرفتي

-ليش جنتي تراقبيني طول الليل ؟

بلعت ريكي من كال هيج ، ارتبكت حيل :- م ما ما جنت اراقبك .. اجيت اشوف اسامة خاف متكشف

-اسامة كبال الباب و انت ماخذة زاوية تصير مقابيلي وطولتي بالنظرة .. المهم ما اريد اخجلج بهالموضوع بعمرج طبيعي تصير هيج امور
اللي اريد اسأل عنه هو :- مرتاحة انت بزواجج ؟

-راح اروح اسوي جاي

ابتسم :- ماشي

عفته و رحت للمطبخ ، هو كعد اسامة حتى يروح للحمام .. سويت جاي و ريوك و هو كاعد بالاستقبال

صحت على اسامة يشيل الفراشات ويخليهم بالغرفة حتى اصفطهم .. كملت الصينية و دا اخذها

لكيت اسامة نايم وهو كاعد و خالد اللي جاي يصفط بالفراشات :- لا اتركهم اني اصفطهم

:- ما عندي شي اخذي راحتج
ترك من ايده الفراش و كال :- لا ادنكين انطيني عنج
واخذ الصينية و خلاها بالكاع

-كعد اسامه على ما اجيب الصمون
ركضت للمطبخ اجيب صمون و رجعت يكعد بأسامة ذاك حيل نعسان ما يكدر يكعد

خالد:- ما جاي يكعد عوفيه و تريكي

-لا لازم يكعد ورانا نروح للمدرسة غير

-بعدها الساعة سته منا لساعه و نص يلا نطلع

-ماشي
كعدت ع الصينية و هو كعد .. هدوووء بص صوت حركتنا و هو يشيل اشكر و يصب و اني اصب بالجاي

بلش هو ياكل و اني استحي لا يطلع صوت من حلكي كدامه على هالهدوء ... بقيت مركزة بحركاته

خالد:- شو ساكته

ديار:- شحجي

-سألتج سؤال قبل شوية ... ديار اني رغم جاي اشوف استقريتي ابيت و زوجج خوش رجال و ما مقصر وياكم بس لهسه خايف اكون ظلمتج بهذا الزواج

-احسن من وضعي لما جنت ويا امي او بيت ابوي

-يعني مرتاحة ؟

-تسألني و تهتم لوضعي اكثر مما امي تهتم ،

من حجيت هيج بقى لازم الأستكان و هو بالماعون و مدنك ما رد ... رفع راسه :- مستغربة افعالي ؟

-مو هيج .. جان المفروض امي تسعى بنقلنا و هي اللي تكون حريصة على دراستي .. بس انت جنت احرص

-اني اللي خليتج تبطلين مناك

-مو انت ابويه و وضعه هو الجبرنا على كل هذا

-الأفهمه ان انت ما حابة تدخلي بهالموضوع ؟

-بالعكس لو ادور الدنيا ما راح الكا انسان مثلك ساعدني و وكف وياي ، بس هالمساعدة...... سكتت

.. مدنك، رفع عينه باوع :- كملي

... اخذت الجاي و شربت و الكلمة ما جاي تطلع بالساني

خالد:- اسأل نفسي ليش مهتم ؟
وشعليه ؟
عندج ام و عندج اب و اخ و زوج .. واقارب
اني ليش

... باوعت بعيونه

خالد :- ما جاي الكا جواب
يمكن من لما شكيتيلي غيرتي دفعتني لمساعدتج و تعودت اساعدج

بقيت اباوع عليه و هو مدنك يحرك بالأستكان ، فجأة لم اديه من الصينية شبك اصابعه و قبض اديه :- البدلة البيضة و العيون الحمر و الشهكة و جملة (انت بيه)
كل ذوله ما جاي يطلعون من راسي

كل ليلة قبل لا انام ذاكرتي تسترجع موقفج هذا و ابقى افكر للصبح و اسأل نفسي ( اني ظلمتها ؟)
يمكن اني جنت مركز بوضعج و كل فكري اطلعج من الوضع الجنتي بيه بس ما فكرت بمشاعرج انت كبنية .. و هذا اللي خايف ظلمتج بيه

ديار:- انت گلتيلي ايه قرانية (عسى ان تكرهوا شيئا و هو خيرا لكم ) صح يمكن سلمان مو هو هذا الفكرت بيه

بس لو متزوجة غيره اكدر اعيش مثل العيشة الهنية الجاي اعيشها ويا سلمان ؟
لو اخذت صاحي ما راح يعيرني بوضعي ؟
و لو عالجني مراح يكلي بفضلي ؟
و حتى لو اخذت واحد خوش ولد ..
راح يعيشني ابيت وحدي و يكد عليه و يبعدني من الناس حتى محد يسمعني حجاية و يأذيني

مراح الناس تقارن بيني و بين اللي اخذته و يأذوني و يتعبون نفسيتي ؟

اني گلتلك اختيار الله اليه جان احسن من اللي اني جنت اريد اختاره لنفسي .. الله فكر بكل الظروف التحاوطني و ممكن تأذيني .. بس اني جنت افكر بس بفارس احلام كذا مواصفاته .. حتى اعيش مثل الافلام و قصص الحب الأسمعها .. متناسية الواقع

الحياة هيج لازم تتنازل حتى تعيش
واني اتنازلت بأحلامي بس بالمقابل تخلصت من وضعي الجنت بيه ويا اهلي

بعد ما جان حسرة عليه اللبس و التراكسود شتا و صيف البسه هسه جوزاداني مليان وادخل السوك و بكيفي اختار

بعد ما جنت اكل خبز وجاي وايام انام بيها بدون عشى هسه انواع اشكال الاكل ينكله سلمان الي و لاخوي

بعد ما جنت اعيش يومي و اني اشوف ابوي يسكر لو امي تخون هسه اعيش يومي و اني افتر بالامام و اشوف اللي يصلي و اللي يدعي و حياة نظيفة

دراسة و راح ارجع
راحة بال و مرتاحة
برأيك هذا ظلم لو النعمة بذاتها ؟

ابتسم و تنهد :- ريحتيني

-خالد انت ما ظلمتني اني كلت الك انت اكثر انسان بهذي الدنيا ساعدني من بعد الله الفضل الك براحتي هاي و اعيش عمري كله ممنونتلك

-يكفيني تظلين مرتاحه يربج قابل شرايد اني ؟
وهسه يلا لمي الاكل و البيت و حظري نفسج حتى اخذكم اكمل معاملة النقل ..

راح اطلع للامام ازور حتى تاخذين راحتج بالشغل وما تتقيدين بوجودي

-ماشي
كمت رحت للمطبخ و هو مام يبدل بالغرفة كمل و طلع
بقيت اني لميت المطبخ و باقي البيت وكملت تنظيف و سبحت و كعدت اسامة لبسته و اخذته وياي

وصلنا الامام الساعة ٩ ونص الصبح
خابرته كال :- اني مقابيل الامام العباس قريب تعاي انت حتى نروح للسيارة مخليها بالكراج

مشينا اني و اسامة و صدك لكيناه كاعد ثاني رجل و مخلي الكاميرا بالكاع ويصور مرقد الأمام الحسين من بعيد و الزوار بطريق الحرمين تمشيله
اخذ الصورة و كام اجا يمنا :- هااا

ديار :- دا تصور

-المنظر كلش حلو جان على بالي اصور الحرمين لهذا جبت الكاميرا وياي ، باعي .. شرأيج ؟

شوفني الصور .. دقة عالية و التصوير يخبل فكلت اله :- لقطات تجنن

:- اي الحمدلله الصور طلعو حلوات .. يلا خلي نمشي

اخذنا للكراج و راح سأل عن المدراس القريبة و اخذ معلومات وودانا .. بس ما كملها .. ما قبلو لان جنا جايين نهاية السنة الدراسية ما باقي للامتحانات اقل من شهر

كلت اله خل نروح على سيد حسين هو يشتغل بالعتبة الحسينية و الناس هنا كلها تحترمة و ما تردله حاجة

ما كال شي و بالفعل رجعنا للأمام الحسين سألنا عن سيد حسين كالو ابيته ، اندل بيته كلت الخالد:- اني اوصي السيد انت بعد ارتاح خاف وراك طريق

خالد:- هي بقت على هاي خل انطي الاوراق لهالرجال و اتوكل لبغداد ، امشي

... رحنا لبيته و دكينا الباب ، طلع النا ابنه اسمه ( جعفر ) ، سأله خالد عن السيد كاله :-، الجواب على الباب شنو مطرودين فوتو فوتو جوا و السيد هسه يطلع الكم

دخلنا للبيت المرة صاحتلي، دخلت بغرفة و الولد اخذ خالد ودخله للأستقبال ..

حجت المرة :- انا مرت السيد حسين و ذوله جنايني اثنين انت مرت سيد سلمان مو ؟

-هلا بيكم خالة، اي والله اني مرت سلمان

-والله سيد سلمان طيب شلون ولد ينحط بالگلب

-الله يسلمج خالة

-خالة انت لا تظلين بالبيت عصريات لو ضجتي تمشيلنا و تعاي ويا البنات هنا تونسي هم مرات يجتمعن ويروحن للامام يزورن صفي وياهن ليش عاكفة على روحج بالبيت ترا احنا اهل

-والله خالة ياريت كلش ضوجة بالبيت

-لا احنا هنا كل اسبوع نسوي لمة بيناتنا بالمنطقة و نروح للنجف للكوفة لزيد بن علي لعون هواي مراقد كل اسبوع نزور مرقد اذا تريدين كليلي حتى من نريد نروح ادزلج خبر هم منها تتعرفين على نسوان المنطقة ما تظلين اوحيده

-ان شاءالله خالة من تريدون تروحون گلولي اگل لسلمان و اجي وياكم

-ان شاءالله

سمعنا السيد يحجي ويا خالد ومنعه من الطلعة و كاله :- ضيف من بغداد و تطلع ابد والله تتغدا و تروح لاهلك

حرجو خالد و خلوه يوافق يتغده، حاجاهم على المدرسة كاله سيد حسين :- لا تشيل همهم انا اتكفل بالموضوع و ادز احد يگضي شغلتهم سهلة

.. شكره تغده و كال الهم :- مشكورين ع الضيافة و الله يزيد النعمة
وطلبني يحجي وياي قبل لا يروح ..
رحت اله هو واكف بالباب ، طلعت اله :- ها خالد

خالد :- ها عيني اني رايح هم ياله اوصل بغداد كبل لا يصير المغرب محتاجة شي ؟

-لا سلامتك سلملنا ع الأهل و على بيت عمو ابو امجد

-ان شاءالله يوصل، بس تحتاجين شي لا تترددين اتصال واحد و احنا يمج افتهمتي

-الله يحفظك ان شاءالله

-يلا مع السلامة

-الله وياك ..
درت للبيت ، صحت اسامة حتى نروح ، طلع السيد يريد يروح للامام .. كال:- اني اوصلكم بطريقي امشو

سلمت على البنات و طلعنا .. اخذنا و هو يمشي كبلنا مدنك و احنا وراه، سألني :- الولد خالد شيعودلج

-ابن عمي تقريبا يعني من كرايبنا

-بايت عدكم جان ؟

-اي عمو

-بنيتي اعتبريني مثل ابوج و انصحج، زلمتج لا مو بالبيت لا تقبلين احد يبقى ابيتج ترا زحمة و المنطقة هنا زغيرة و الكلمة ما تضل مچودرة لابد تنكشف وانت بعدج جديدة هنا خلي السمعة الطيبة تلوحج

-عمو و هو هيج الله شاهد من طلع سلمان للشغل هو تريك و طلع ما بقى بالبيت انتظرنا بالامام

-عفية بالسباعية اريدج ام بيت و حافظة بيتج و صاينة زلمتج انت صغيرة و الشاهد الله اخاف عليج مثل ما اخاف على بناتي

-الله يديمك سيد

وصلنا للبيت وطلع ..
ثاني يوم الساعة ٩ الصبح اندكت الباب لبست حجابي و من ورا الباب صحت :- منووو

-العفو خوية انا سيد جعفر ابن السيد حسين دزني الوالد حتى اخلص الكم معاملة النقل ياريت لو تبدلين لاخوج حتى اخذه وياي

-هاا هلا خوية، هسه ابدله

كمت بدلت الاسامة بسرعة و طلعته من البيت و حجيت من ورا الباب و هو مدنك :- بس خوية اسألك اذا تكدر و بمعرفتك تسأل المدرسة اذا عدهم كتب حتى لو قديمات لأن كتبي بقن ابيت ابوية

كال:- سهله بعيني حتى لو اشتريهن

-لا تسلم اذا عدهم جيب و اذا ما عدهم اخلي سلمان يشتريهن

-احنا اهل يابه عيب هالحجي

-تسلم الله يحفظك

اخذ اسامه و راح لساعتين رجعه و كال :- المدير طلع يعرف ابوي و طلبت منه كتب و هاي ذني

وقدم علاكة و بيهن الكتب، كلت اله :- مشكور ورحم الله والديك ما اعرف اشلون اجازيك و اجازي السيد حسين

-ادعيلنا يم الله بالصحة و السلامة تكفي ، اااا بعد اخوج المدير كال تباشر بالدوام من باجر و لازم تجيبين صور وتوديها الهم حتى يسولكم بطاقة امتحانية

-ماشي ان شاءالله، مشكور

-هلا بيج، ياله مع السلامة

-الله وياك
سديت الباب و انتظرت سلمان يجي حتى نروح ناخذ صور، اجا سلمان تعبان ما قبل يمشي ، كلتله :- نروح اني و اسامة

-لا

-اكلك شو انت شايف روحك فد مرة ، اريد صور للمدرسة

-ما اقبل مرتي تطلع

-خب دروووح

-تره اكوم اكسر اضلوعج الوصخة

كمت على حيل :- تكسر اضلوع منو ؟

ضحك وكال :- هاي شبيج شبيج اضحك وياج

-اضحك عدل ولا تتجاوز افتهمت

جر بوش و دار وجه و نام و هو يحجي بينه و بين نفسه عود يغلط عليه و ما راضي

عفته و حتى ما طلعت خل ينام واكعده بالليل تروح نكص صور .. لورا صلاة المغرب كعدته صلى و سويتله عشا و بدلت و طلعت كباله

هو اجا وراي ، يحجي وياي ما ارد

حجه :- ديار اتي زعلانه مني ؟

-لا

مشاا ، خمس دقايق ورجع حجا :- لا اتي زعلانه مني

-ترا كتلك لا

ضحك وفتح حلكة و طلع سنونه بضحكته و حما زيادة وضرب اسامة علابيه

اسامة :- اااااخ لا تضرب

-انجب الوصخ هاي اني جبتلك الملابس

ديار:- انت شنو تعير اخوي

-انجبي الوصخة هاي اني جبتلج الملابس

-تعيرني

-و الشحاطة هم

-ترا انزعهن بالشارع والله

-والحجاب

-سلماااان

-ديار اتي زعلانة مني ؟

-كلتلك لااااااا بس صم حلك

شو هذا بنص الشارع حظني و كعد يمطك بخدي ويبوس :- مرتي الوصخة احبها

-دوخر منا الناس وخرررر ، وبعد لا تعيرنا افتهمت ترا اعوفك واروح

-لا لا لتروحين والله بعد ما احجي حتى هذا الوصخ اجيبله بعد بس لا تروحين

-اي لعد.اسكت

دار وجهه و مشى ما حجا شاف مرة كاعدة رفع ايده و صاح :- ام حيدر الوووووصخ شلونج خاله

باوعت عليه و ضحكت و كالت :- هلا بسلمان شلونك خاله

-معليج

ضحكت و كالت اله :- ما تجي تقرأ الفاتحة على راس ابن ابني خطية مريض اريد من بخت جدك يشافيه

-شتنطيني ؟

-ههههه والله نذر عليه اذا طاب اجيبلك صوغة ذهب

-لا لا خالة اريد تجيبين لمرتي محبس يخبل يخبل

-والله اجيبلها بعيني بس خل يطيب

فتح جف ايده حيل وكام يصفك :- هله هله هله

حط ايده على الولد :- كصته حيل جبيرة شني

ام حيدر :- جا شسويله يا خالة غير خلقة ربك، لو على كصته رحمة معلعلنا يومية واكع

-كصته جبيرة حيل تلوك ع الكاع

ديار :- سلمان اقرأ بسرعة خل نروح

حط ايده على الولد وكام يقرأ سورة الفاتحة مخربط :- غير المغلوب عليهم ولا ضارررين

-ترا هاي مو سورة الفاتحة هاي سورة سلمان

-معليج اتي الحولة

درت وجهي منه واهز بيدي:- هاي الناس هم على نيتها تصدك بهذا المرعوص و يطلبون منه يقرأ و هو حتى سورة الفاتحة كالبها

كمل من الطفل واخيرا كمت ادفع بيه بس حتى يمشي راح يعزلون اهل التصوير .. اخذني لواحد مصور يكله :- اريدك اطكنه صوره بس كون اطلعنا هيج نلمع

كرصته:- اطكنا شنو غير اني جاية اخذ صورة

-وحدج ؟

-لعد شنو تحط وجهك وياي ابطاقتي الامتحانية

-اي غير حتى يعرفون اني رجلج

-خب دروووخ

-امشي ماكو صورة

-سلمان لا تخليني ادفرك

-ماكو

-سلمااان

-ما عدي مرة اطكطك صور وحدها لو اني وياج لو ماكو

-شوف اذا رجعت للبيت و ماخليتني اخذ صورة الم ملابسي و اروح لبغداد و اعوف

-امم عود هي تهدد الوصخة

... عفته و مشيت ما رجع وراي
عاد هيج طنكرت لزمتها مشي ما انداريتله ابد لحد ما وصلت البيت، رحت للغرفة مالتي قفلت الباب و بعد ما طلعت ابد

اجا هو دك الباب راد فراش ينام بالاستقبال ما انطيته ، خله وراح نام بلا غطا ... شوية اجا اسامة كال :- ديار خطية سلمان بردان انطيني غطا

فتحت الباب و كلت اله اخذ افراشات الك و اله افرش وكعده خل ينام .. و كمت حظرت الجبة و ملابس الباجر حتى اروح للمدرسة ...

ثاني يوم كعدت من الصبح الساعة سته، سلمان طالع للشغل .. بدلت و لبست و بدلت لاسامة و رحت للمدرسة

اول يوم جان صعب ما اندل بالمدرسة و ما متعودة ع المدرسين ومخلصين المادة كلها انسطرت: هذا شيحفظلياه شيدرسني

كلش ضجت و ظليت العن بأبوية الف مرة .. طلبوا مني صورة للبطاقة الامتحانية كلت الهم :- باجر اجيب ما جنت ادري
عادي ما حجو

بطريق الرجعة من رجعت مريت ع الاستوديو اخذت صور و انتظرت نص ساعة اني واسامة يلا طلعهن

بهذه الفترة التهيت كلش بدراستي و بدراسة اسامة ، ما احك راسي على كد ما مشغوله بالدراسة

سلمان عيشته شغل و نوم ..
بس خطية كام يشكي من رجله من يمشي و يلح عليها كامت تأذي مرات اشوفه يعصر بروحه بالليل ما ينام و من اسأله :- شبيك

يجاوبني:- معليج

وما يقبل يكول هذا الشي يوجعه لأن يخاف يضرب ابره ، رغم احجي وياه اشرح ماكو بعقله حجارة ما يستوعب لو اكعد اشرح منا الباجر

ورغم ما ينام الليل بس يكعد الصبح للشغل ويرجع جايب يوميته ..

راتب الرعاية الاجتماعية مالته بعده عد حليمة العمصة، ردت اسعى اجيبه منها حتى احنا نستلمة كال :- لا خطية هم ما عدهم اكل

يقصد ان هن ما يشتغلن ولا عدهن احد يصرف عليهن ميقبل يجيب الراتب مالته باقية هي تستلم بيه ..

رغم اشوفها ما استاهل لأن كل هالفترة ورغم مرينا بأسوء الظروف لا هي ولا بتها خابرن و كالن (شلونكم )

ما رايدين منهم شي بس سؤال حتى نكول والله يسوون . بس كلشي ما طالع منهن بس هذا الغبي كاتل روحه عليهن و هواي يحن الهن

مرات اطك بعقلي ارزله و اكوله :- كافي تشتاقلهن و تتنازللهن من جنت عايش وياهن يكتلنك و يخلنك نايم بالشارع بس انت مثل البزون تحب خناكك

ما يقبل يكوم يضوج ويغلط عليه الوصخة و الوصخة
ويكلب وجهه و ينام بعد ما يحجي ويا احد بس نسمعه ندردم و هو متدد و داير وجهن شيدردم محد يدري
ومن اسأله ما يجاوب مطنكر

عاد اعوفه و اكوم ..
بس وضع رجله كلش قالقني وما مرتاحة الها لان يتألم
قررت اخلص امتحاناتي و اروح لبغداد لشوفله دكتور واخذه اعالجة حتى لو غالي المهم يطيب

... خالد ما كطع عني كل يومين يتصل :- شلونكم شخباركم و يسده

ابو امجد كل فترة يتصل و يسأل اذا محتاجين شي

امي يومية اخابرها و احجي وياها و ويا اثار اختي

مها كل فترة اخابرها بالليل تكعد تحجيلي الاخبار كلها .. خاصة اخبار خالد و مرته .. متأزمة بيناتهم كلش
وهو كلش ضايج منها حتى ما كايم يلفي البيت من ورا مشاكلها ..

اسأل مها تكول:- تغار هواي عليه وهالسالفة كرهته بعيشته، حسرة يدك موبايل لو يطلع تسويلها زعله و تهدده اروح لاهلي و هو يطك وياها ويتعارك و على هالرنة باقين

و امه كلش مأذيتها لأن شاكة بيها بنية، رغم ضحى عليها هسه الثامن و ليومها ما كايلتلهم شنو جنس الطفل، كلما يسألوها تكللهم :- الدكتورة تكول ما مبين

و امه تكول :- هاي سوالف النسوان من يدرن برواحهن بنية يكومن يتحججن بالدكتورة و ما يكولن البطنهن شنو

ديار :- وهي شعليهم بيهم ولد بنيه شدخلها

مها :- ما تعرفين ام رافد حتى بنومة ولدها تدخل من يكوم ابنها من النوم تدخل وراه و تحاسب مرته انطيتي حق ابني لو لا

ديار :- عليج الله صدك ؟

مها:- اي والله شبيج، واذا حست ان كم يوم ابنها ما مجامع مرته .. تكوم تشيش بولدها على مرته

ديار :- و شعدهم باقين وياها ليش ما يطلعون

مها :- شحدهم غير تزعل و تكلب الدنيا عليهم عدها بس خالد جالطها تسمي العنودي لان ما ياخذ بشورها طنكر وياها اخذ مرته وراح لسوريا عاش

بس شغله نزل بسوريا و اضطر يرجع لبغداد، و هسه مخلي اباله يسافر للاردن، الا رافد شتكول امه يگلها تم وشحدها مرته تحجي

مها :- اني ادري بيها متسلطة بس مو هيج، على الرغم اني احبها لأن مرة حبابة جانت من تشوفني تصيح (هلا بالحلوة )

-اي ويا الناس بس ويا عيال بيتها ملوعتهم، وهسه مرت خالد طاكة روحها من امة

-خطية

.... بقت مها كل فترة تجيبلي اخبارهم و تخبار بيت عمو ابو امجد .

قربت امتحاناتي و توتري فول ثالث متوسط و الدروس صعبة و كوة جاي افهمهم و نصهن ما ماخذتهن اني جاي احفظهن من نفسي .. وكلش دايخة

خابرت امي و اني جاي ادرس رديت عليها :- الوو هلو ماما

-هلو ديار اشلونج امي

-الحمدلله انت شلونج

-والله يا ماما اني حايرة

-ليش ؟

-اول شي خل اخبرج

-خير ؟

-الأسبوع الجاي زواجي اني و عصام

-خير يا الله شنو خلصتي عدة ؟

-اي خلصت صار ايام و كلتله بعد ما اتحمل الوضع لازم تحط حد يا تتزوجني يا تخليني ، كال ما اكدر بدونج و اني رايدج على سنة الله و رسوله

-هههه يعني خليتي بجيبج ؟

-شبيج ماما هو اكو رجال يعصى على امج غير ازين شاربه بالقندرة

-ههههههههه مبروك ، بس سولفيلي مهر غايب حاظر شكد ؟ نيشان

-والله هو حاظر و غايب اتفقت وياه ١٠ ب١٠

-زين، و البقية ؟

-عرس ما راح انسوي مو صغار احنا قررنا نطلع اجازة شهر عسل لتركيا

-تركيا مرة وحدة

-اي بلكي هناك اشوف اسمر و اعوف عصام و اجلب بأسمر

-يا اسمر ؟

-ولج يمه هذا بمسلسل وتمضي الأيام مو زلمة يسحل الروح

- هههههههههههه ليش مو مهند

-لا ايييي ما اريده هذا الفاهي

-هسه كليلي عصام لو اسمر تتزوجينه

-عمت عيني هو اني لاگية اسمر و ما مكوشة عليه يا يمة

ظليت اضحك :- و الله يا ماما سوالفج مال وحده كون ما عدها شغل و عمل وتكعد تكابلج وتضحك

-انهجم بيتج يم ناطحات السحاب شعدج لعد؟

-غير مدرسة و امتحانات هلكت

-اي اي ادرسي اجتهدي احسن ، الا تجيت اكلج يمه ، احنا قررنا نسافر نتونس شوي بزواجنا بس احتاريت بأثار وين اوديها ؟

-يوم ما اتعاجز من اثار بس وين اخليها اني و اسامة مدرسة و سلمان يشتغل على باب الله بعد البنية وين امنها

-والله يمه وين ما تريدين تأمنيها امنيها اني عندي سفرة و هو رايح شهر عسل خوما ساحلة بتي وياي فحسبي حسابج عكب باجر اثار يمج

-لا ماما الله عليج والله ابتلي بيها وين اخليها عندي مدرسة و نفسيتي زفت من الامتحانات

-انت بعد شلون تحليها حليها انت هم اختها خوما بس اني هنا دوام و مبتليه بيها اخذها و اردها حتى خطية متعلعله من السبعة الصبخ اكعدها البسها و اخذها

-ماما شوفي غيري والله ما اكدر

-هسه الله كريم متا لعكب باجر تنحل

... نهيت الاتصال وياها وبقيت مكملة ادرس
اندكت الباب .. كمت من مكاني ، لكيت اسامة قبلي رايح للباب و سلمان يصيح وراه :- الخايس اني زلمت البيت اني افتح عوف الباب

بس اسامة ما رد فتح الباب بسرعة طلعت ام حيدر .. اول ما فتحنا الباب طشت جكليت و هلهلت و دكول لسلمان :- دخيل بخت جدك طاب حفيدي سيد يمه ما ما مصدكة من كال الدكتور و بشرني

وتهلهل بنص البيت ضحكت و باركتلهة وتحمدت الها بسلامته، كالت :- خالة نذرت انا و اوفي نذري .. طاب ابن وليدي و على بخت سيد سلمان صوغة ذهب الج

-مشكورة خالة ما يحتاج المهم سلامة الطفل

سلمان:- ولي اتي شني اني اقرأ سورة الفاتحة ابلاش ، جيبي جيبي خالة

ضحكت و باست راسه و دعتله بالسلامة وراحت التفتت اله :- اكلك انت شنو تضحك ع العالم هو حتى سورة الفاتحة انت ما حافظها ما ادري شلون تصلي

-معليج اتي الهايسة ما تريدين المحبس انطينياه ابيعه

-يا والله ليش ما اريده .. شناقصني و ما البس ذهب

-اذا ما اترسج من فوك ليجوا ذهب اخليهم كلهم يكولون ابوووووو شوف مرت سلمان كلها ذهب
ويحسدنج

-بفاتحتك المكلوبة مو

-اتي مو صوجج اتي مال البسج نعال احمر واسربتج حتى شحاطة بعد ما اجيبلج

-جبتلي شحاطة و سبعتالاف مرة عيرتني بيها

-اي غير اني جبتها الج

ضحكت هزيت ايدي و مشيت اقرأ
للصبح ثاني يوم اجت ام حيدر مشتريتلي محبس وزنه اكثر من مثقال شلونه يجنن بقيت ابوس بيها و اتشكر منها و هي تبوس بيه و تدعي لسيد سلمان

نسوان المنطقة درن بالسالفة كامن يتعنن لسلمان و يكلله :- دخيل بخت جدك سيد نريدك تقرالنا الفاتحة بنية قضاء حاجة ..

وهو يقرالهن و ينذرن اله بالذهب و الفلوس لو زيارة لمشهد على حسابهن و اشكال الوان النذورة نذرن على بخت سيد سلمان

بالليل رحت لبيت سيد حسين اسلم على اهله ، فكعدت و سولفتلهن السالفة و اضحك مرت السيد ما قبلتلي

كالت :- لا خالة ما مرضية منج تضحكين بخت السادة مو شوية

ديار:- هو الله المشافي خالة العبد ما يشفي

-و النعم بالله بنيتي احنا ما نشرك بالله ونكول احد يشافي غير الله بس اكو بشر بختهم يم الله جبير و بجاهم يشافي

لو على كلامج هذا ليش النبي يوسف ما دعا لابوه، ليش دزله القميص لما حط القميص على عيون ابوه اتشافت عيونه .. معقوله القميص يشافي اكثر من الله ؟

لو نكول النبي يعقوب اشرك لأن طلب شفاء عيونه من القميص ؟ بس لا يا خالة ابركة هذا القميص ولان عنده شأن يم الله اتشافى النبي يعقوب

و حتى النبي محمد جان من يحط ايده على انسان مريض يشافيه .. هم نكول شلون النبي يشافي المشافي بس الله ؟

ولا تكولين لأن نبي .. الله يكول ( وما محمد الا بشر مثلكم ) بس مكانته يم الله تختلف لهذا من يحط ايده على احد يطيب بجاهه عد الله

.و سيد سلمان يا خالة رجال مريض و سيد ابن رسول الله و كلبه طيب و اله يم الله كرامات حتى لو يقرأ الفاتحة غلط و حتى لو ما قراها الاعمال بالنيات .. يمكن اله دعاء يم الله مستجاب من يدعي لأحد يستجاب منه و يشافي

لا تستهينين باحد خالة حرام

-لا خالة والله اني ما مستهينة بس لأن اكول ماكو هيج لأن بس الله اليشافي

-و النعم بالله بس اكو ناس من يدعون الله يستجاب منهم بسرعة و لهذا الناس تجي يمهم و تطلب منهم يدعولهم و ينذرون و هاي خالة هم باب خير الج و لرجلج

-الحمدلله مشكورة خالة، اني اروح للبيت
ظليت افكر بكلامها ، يمكن صدك سلمان على نياته و دعاءه يم الله مستجاب لعد يحظي ما تدعي لروحك تدعي للعالم و انت مريض

رحت للبيت .. ثاني يوم الصبح اندكت الباب فتحتها ، واله امي و اثار بالباب

-لا تكليلي جايبتها تخليها يمي

-طاح حظج يالعوبة دكولي هلا يمه شلونج استقبليني تظلين بلا عقل انت

-يوم الله عليج جايبتها تبقيها يمي ؟

-اي لعد شتردين اخذها وياي ؟ لو انومها بنصنا و اني عروس

-ليش هو ما يعرف انت عندح بنية مسؤليتج

-يدري بس اني اريد اتونس و اخذ راحتي ماخذه اختج انحثل بيها شكو، روحي جيبيلي مي نشف ريكي اوووي

هزيت ايدي ورحت طلعت من الثلاجة مي و كلت الها :- فوتي جوا ع المبردة اكعدي

-خليني هنا اشتم هوا الله ، بس حظريلي الحمام اسبح الدنيا صايرة تكتل هاي عود سابحة الصبح و طالعة و ملابسي انترست عرك

دفوتي الخاولي جوا و اني اشوفلج شي تلبسي من ملابسي ..

-اي والله يمة، اسامة بالمدرسة مو ؟

-اي بعده ما جاي

-انت شوكت امتحاناتج ؟

- الشهر السادس

-ما بقى شي

-اي ٤ ايام

فاتت للحمام و اني رحت طلعت الها ثوب نفنوف خفيف جابولياه بالنيشان مال عرسي بس ما لابسته .. مدلع و ما بيه اردانات ما البس هيج

انطيتها الملابس .. و باوعتها خطية متسوكتلي اشكال الوان المسواك لبيتي، عزلت المسواك و حطيت دجاجة ع النار كلت اسويلها دجاج و تمن برباني غدا الها

طلعت هي من الحمام ، و وكفت رافعة الثوب لفوك ركبها ولازمته على خصرها ، و انتجت على الحايط تحجي وياي و تسألني على وضعي

الباب مفتوح ، اندكت الباب و صاح رجال :- ام اسامة هاي البنية الكم ؟

.. اني بالمنطقة يصيحولي ام اسامة لان عدهم عادة ما يصيحون للمرأة بأسمها اله ام فلان احترام الها ..

فأمي عبالها ديصيحون عليها ، الرجال كبال الباب و امي رافعة الثوب اندارت و ابن سيد حسين كبالها

هو رجال يطلع عمره بالأربعين معدل و مرتب ، من شافها دنك و اخذ جانب و كال :- العفو البنية ضليعة بالفرع شبهت عليها تشبه اسامة وجبتها الكم

اندارت اله امي بلبسها المخشلع نزلت الثوب ومشت :- يا فدوة الكلبك هم زين ذكي و شبهت عليها يا عيني الا لو ما انت اني وين الكا بنيتي، يهنيال اهلك بيك الله يحفظك ان شاءالله

الرجال خجل و هو مدنك ولازم الطفله ، دار وجهه وكال :- الحمدلله بتكم ضموها داخل لا اطلعوها

ميعاد :- حريص على بنات الناس الله يستر على بناتك يعيوني وين اكو زلم مثلك بعد فدوة الگلبك

جعفر :- هلا يابا
حجاها و هو داير وجهه وراح

ديار :- عزا يمه حجيتي ويا الرجال بهذا لبسج وشافج هيج

-شسوي غير اجاني فجأة و بعدين هو استحى و دار وجهن ما باوع شكد عجبني

-شعجبج يمه هذا السيد جعفر ابن السيد حسين ذوله معقدين بالبس ما عدهم مره هيج

-يااا ابن الحجي اليشتغل بالعتبة ، تلكيهم مليانين فلوس مو ، فدوة انوب غيور ما باوع شلون خش بعقلي هالرجال

جريت بك :- يمممممه ترا عروس و بعد يومين شهر العسل مالج و ويا واحد ضابط ما ناقص

-اووو هسه شگلنا عاد ، رجال حلو و مرتب و يعجب خوما تزوجنا لو كوشنا عليه ، ال اكلج هو متزوج مو ؟

-لا ارمل ، مرته ميته خطية بالسرطان

-يا سودة عليه يعني حتى ماكو وحدة بحياته مدلعته ، كسر خاطري مال اعوف عصام و اباوعله

بس لا يمة يروح يلبسني بوشي وتعاي كباليني ما اتحمل خليني على عصام يفرفرني بتركيا احسن الي

-يمه انت عالمج وحد عن الناس لو هسه اجيب النبي يوسف هم ادورين غيرة

-اوف يمه شسوي اذا الزلم واحد احلى من اللاخ شلون اسد عيوني .. حلوين حلوين يعني ما اكدر
بس احجيلج الصدك فلوسهم هم حلوة

- ههههههه يمه توبي رحمة لشيبات عصام توبي

-كعدت و هي تضحك بصوت عالي

.. خليتها كاعدة بالغرفة و اني رحت للمطبخ اكمل الغدا و اثار مكعدتها يمي اتشاقى وياها صايرة عدها سوالف تجنن

شوية و احس الباب انطبكت ، صحت:- يممممة
ركضت وراها للباب، باوعت لابسه العباية و ماشية

:- عزا العزاني راح الرجال......

☆☆☆☆☆