#حكاية_سمر ((الجزء الثاني))

،،،،،،،،،،،، بقلم الكاتبه زينب ماجد،،،،،،،،،،،

البارت_19

ديحجي وياي بكر.. طلع عمار.. اندار عليه بكر بحركه..ولك نار بكلبي الله جاببك..

دتعااال ابن السكط تمد ايدك عليها.. وركض لعمار ضربه بوكس وجره من ملابسه تلازمو ثنينهم..

واني ادفع بينهم.. اجر بكر كوه.. دفعوني .. لك بكر عوفه لخاطر الله .. وخر منه .. اصيح محد بيهم يرد..

ويتضاربون بقوه.. خفت اتقرب منهم اكثر يضربوني ويأذون طفلي.. ابتعد ولزمت راسي وصحت بككر..

وسويت روحي دخت ووكعد.. اجه بكر يركض.. وعنار ينفض اديه ويباوعلي.. كومني بكر..

-سمررر شبيج احجي..

-يضرب على خدي بقوه.. كتله دخت راسي.. ساعدني اكوووم.. كومني وخله ايدي على جتفه ويريد يدخلني لبيته..

كتله ما اريد ما اريد.. جيب سويج سيارتك.. هنا انتضرك..

-انتضري هنا لتتحركين ثواني واجيبه..

-راح.. انتجيت على سيارته ووكفت.. لعبت روحي.. احس بعد ما اتنفس..

اجه يمي عمار.. سمر لا تتخبلين ارجعي والله ما عندي شي وياها ..

-رفعت راسي اله بحركه.. ابتعد ابتعد لتخليني ابتلي بيك.. ما عنده شي بس حامل منك..

دا احجي ولعبت نفسي فد مره كمت اتقيئ.. اريد اخذ نفس.. وعمار يكولي شبيج سمر..

واني اضرب بيه وابعد وكوه اتنفس احس عيوني تطلع من اتقيئ.. اجه بكر شاف عمار لازمني ويحجي وياي..

تلازم وياه والك عين تحجي وياها.. انوب باوعلي اتقيئ عاف ويكولي شبيج سمر.. بس تعاي اشربي مي..

جرني للكراج مالته.. جر الصونده.. تمضمضت بالمي وغسلت وجهي.. كتله اريد اروح لاهلي..

-ليش هشكل تتقيئين شنو ضاربج على راسج..

-لااا لان جوعانه.. معدتي مكاعد تتحمل فتقيئت..

-اي دتعاي ادخلي جوه خل اكلي..

-طلعت تضال.. ها سمر شبيج.. كاللها بكر متعاركه هيه وزوجها وطالعه منه.. صرخت بس لا تطلكين..

حجت هيج درت وجهي.. هوه كام يصيح هليها وكاللها طبي جوه وقفلي الباب رايح اوصلها لبيت خالي..

طلعت.. داس هوه من يمه السويج.. انفتح بااب السياره.. فتحته وصعدت.. واجه صعد هوه.

عمار دخل جوه.. ما شفته.. مشى بكر.. اول شي التم السكوت.. وبعدين كال شبيه وياج هذا الكلب..

-سكتت مرديت عنه.. بس دموعي بعيني.. واباوع للشارع.. توقف.. درتله وجهي ليش وكفت..

-نزلي اوكلج..

-ما اريد.. اصعد..

-ما رد عليه.. نزل واجه فتح باب السياره وجر ايدي.. ونزلني وسد الباب..

-بكر خليني اروح لاهلي فدوه دايخه..

-بس تعاي اكلي وارتاحي وروحي..

-اخذني ودخلنه للمطعم دافي.. واني دايخه.. خليت رااسي عطاوله وسكرت اديه..

اجه العامل مال المطعم.. كال شطلبون.. بكر باوعلي.. كتله اي شي.. اصلا ممشتهيه..

-كاله كص لحم.. راح العامل.. كال شنو بيج سمر.. ليش هيج يضربج عمار..

-باوعتله.. صفنت بوجها نزلت دموعي.. درت وجهي ومسحت دمعتي..

-مأذيج..

-هزيت راسي .. لا انته اللي دتأذيني..

- ادري جاي اتصرف تصرفات مو معقوله.. بس سمر تعرفين شنو جنيت.. لج من يوم الرحتي عقل ما ضل براسي وافكر..

-ممتأذيه من تصرفاتك.. ابد.. بس متأذيه من حبك.. بكر مجاي انسى تعبت.. عمار ديخوني لان ما اطدر انطيه حقه الزوجي واسعده..

من يتقرب يمي.. اكره روحي.. احس نفسي خاينه.. لدرجه اريد احرك روحي.. بكر ما احب ومكاعد اتأقلم وياه تعبت اطلع من عقلي اطلع..

دنكت راسي وخليت اديه عل وجهي.. وكمت ابجي..

-ليش اتزوجتي لعد .. اذا مترديه .. ليش دمرتيني ودمرتي روحج..

-مجان كدامي خيار حتى انساك.. افتكرت لو اتزوجت وانشغلت ابيت ورجال واطفال انساك وابعدك من حياتي..

بس صعب صعب.. جاي اتعذب بكر.. مجاي انسى..

-لج لشوكت تضلين هيج ثوله ومتفكرين.. لج الف مره كايلج.. يا سمر من تردين تقررين فكري.. لا تتسرعين.. ادرسي قرارج..

وافقتي بالبدايه على عادل.. وغلطتي وما فاتحتيه بموضوعج.. وخليتيه ينصدم بيج.. ةيعتقدج وحده مو زينه..

رجعتي هسه نفس الغلط.. تكرري.. تنقذين نفسج مني وتشمريها بنار اقوى من ناري..

سمر كتلج بس اصبري وياي.. سمر طاوعيني.. تالي تغلقين جهازج والكاج ابدلة العرس ليش هيج..

-بكر لتزيدها عليه.. بنفسي متندمه والوجع والقهر ذابحني ما متحمله اريد اموووت

اخذ اديه.. وكال اششش .. اهدي كلشي اله حل.. بس اهدي.. تلمس اديه.. بردانه.

-هزيت راسي لا.. بس اطرافي باردات..

- تردين سترتي..

-لااا دفيانه.. دنحجي ونزلو الاكل.. باوعت.. كال اكلي لتهتمين.. كولشي محلول انشالله..

-بديت اكل شفته يضحك ويباوعلي.. شبيك ليش تضحك..

-اضحك على روحي.. البارحه بليل حارك روحي بالليل واشرب جكاير واحرك بكلبي. وافكر شلون احرك دمج مثل ما حركتيني.

وهسه كاعد اواسيج. ومكسور خاطري عليج.. وحاير بيج.. دخت بيج سمر دخت..

-ههه جنت تغنيلي ردت انساك واخلص من كلام الناس.. هسه كل وكت اغني بيها واذكرك.. خاصه لما يكول ردت انساك وخانتني المشاعر..

-ههههه دكيت علطاوله خفيفي باصابعي واباوعلها.. وغنيت.. بعدني اشتاكلك لكننننن اكااااابر ردت انسااااك وخانتني المشاعر..

غصبا علي روحي جابتني عل

يك.. ما احس الا انا ما بين اديك.. كتلك نسيتك يااااااا ترى نسييييت

نسيت اسمي وبقى اسمك على باااالي..

ههههههه اووف يوميه اكعد اعزف واغني.. واطلع قهري بالعود.. على يوم احركه من وراج..

-ههههههه لااا بداعتي.. اتذكرني بيه. .

-ههه اتذكر.. ليش هوه اني ناسي..

-صار لازم انروح يله.. ومشكور على العشا..

-دتحسسيني غريب بأسلوبج هذا

-ليش..

-ولا شي.. يله ..

- عادل شلونه..

-ليش تسألين عليه.

-مو فد شي.. بس هيج.. ذاك اليوم سمعته شلون يحجي عليه كبال همامي.. يا حسافه بس.. جان صديق واقرب اليه من روحي هيج يسوي..

- زين عايش.. ومرته موجوده.. توضف سكرتير.. وكاهد يشتغل..

-ليش طلعت من اهلك..

-تعاركت وي امي..

-علمود ذاك اليوم..

-يله كومي..

-كمته.. ومشيت وياه.. وداني للسياره وهوه مشغل علميني شلونوانسى فهميني شلون انسى..

بس صوت التسجيل بالسياره.. خفت يصير عنده امل بيه.. ويرجع يتأمل..

بكر

-نعم..

-اني حامل.. وباوعتله.. ابتسم ابتسامه بين الحزن والضحك.. وعقد الحواجب..

-شايفه الف خير.. تكومين بسلامه..

-انته اول واحد تعرف بهلخبر..

-ههه ضحك وهز راسه ودنك.. من فكر حظي..

- وصلنه البيت.. نزلت منه.. ولوحتله بأيدي.. اخذ نفس قوي وابتسم..

مشيت للبيت وراح.. دكيت الباب.. طلعت امي.. هلا سمر..

-هلا ماما..

-شبيج..

- بيه ضيم وصيحان حظ شبيه قابل..

-شكو شصاير..

-عنار طلع متزوج عليه ..

-يااااا مو مطلك.. شنو يعني ممطلكها..

-لاااا مدرسه ويايه متزوجها مسيار ويروحلها كل يوم واني على ذمته..

-ليش..

-شمدريني روحي سئليه للخسيس ليش.. عوفيني ارتاح رحمه الربج.. راسي صاير طبل..

عفتها سلمت على بابا.. كال شكو.. كتله ماما.. تكولك شكو وعفته وصعدت..

فتحت غرفتي القديمه.. منضفتها ماما وسادتها.. ومصلحه الغرفه والمرايا.. شمرت نفسي علسرير ونمت..

ههه تيتي تيتي مثل ما رحتي جيتي يا سمر.. ميلام بيه بكر من يكولي ثوله.. شبيه وافقت عليه.. اهمداني..

شوكت فكرت علمود افكر اليوم.. خليت ايدي على بطني. ههه يكفي اخذت منهم بيبي.. ولعابيه تصير اليه اتونس بيها..

اوووف هيج ويصير عندي طفل غير اموت من الفرح بيه..

بقيت ايدي على بطني ونمت.. لليل كولش.. كعدت نزلت.. لكيت ماما وبابا ومحمد كاعدين علصوبه ويباوعون تلفزيون..

كال ابوي تعاي سمر فهميني شصاير..كتله ما فهمتك امي.

-شنو يعني طلع متزوج..

-اي مسيار..

-ومن شوكت..

-من قبل زواجي ولليوم.. والبنيه حامل..احمد دخل.

-هاااا شو هنا شعدج..

-حجه ابوي .. طلع الخسيس متزوج..

-اي وشنو الرجال محلله 4 منو انتي وتعترضين..

-محلله بالعافيه عليه.. لازمته اني مانعته.. بس ما اقبل فكرة يجيب غيري..

-هاي العياره بطليها.. سنتين كاعده ويه عادل وتتمنيه.. وهوه اتزوج عليج وره الزواج مو قبله. وما حجيتي.. هسه هنا تتكبرين وتشوفين روحج على عمار..

-عادل ما جنت حاسبته رجال بحياتي ما رايدته.. وبمجرد ما صارلي رجال متحملته وتركته..

وعلعموم ما اقبل بعد.. عشنو هاينه نفسي يمه.. شناقصتي اشو اني الاصرف مو هوه يصرف عليه..

-اكيد من هذا السانج شاف غيرج..

-اكلك انته اخوي لو اخووو شبيك..

-اكلج سمر دروبج بطليها.. اذا ابالج ذيج السالفه ومسويه مشكله علمود تطلكين.. فحسبي حسابج ادفنج وما اخلي البالج يصير والله..

-احمد لتحجي هيج وياي.. بابا مترد شووو ساكت.. لو رايده البالي ما احرك روحي ويه عمار واوافق عليه.. اخاصر طريقي واختار من البدايه

-احمد عوف اختك خليها ترتاح ونشوف شنو الحل..

-الله جابج ضلي.. اصلان خطبتي الجمعه وامي محتاجه وحده تعاونها.. ضلي وي امي ساعديها..

-تستاهل حظرتك..

-شلووون ولج..

-اكول ادلل بعيني..

-عبالي.. كومي سويلي عشا مداام اجيتي..

-شكد اناني لخاطر الله.. كمت سويتله اكل.. وكلت لمحمد ياخذه اله..

كملت صعدت للغرفه.. نمت.. ثاني يوم داومت.. عمار يباوعلي وما اباوعله ولا ححسته انو شفته..

دخلت.. شفت ست نرمين .. عديتها.. صاحت سمرر.. درت وجهي..

-شصار بينج وبين عمار

-خابريه وخل يسولفلج.. حجيت ودرت وجهي

-المهم طلعتي من حياته الباقي سهل..

-بالعافيه عليج..

رحت درست كملت الدوام اخذت اجازه لباجر خميس اساعد امي ..و طلعت.. عمار صار كبالي.. سمر بس احجي وياج..

-ما عندي كلمه وياك.. عندك ذرة كرامه روح للمحكمه وطلقني..

-سمر عايفها والله ما مباوعلها وهيه بايعه روحها وشامرتها عليه.. وج والله جذابه مو حامل بس تريد تبعدج..

-درتله وجهي .. عمار لو عندك احساس.. اتركني و ابتعد.. دا ادور وجهي.. لكيت بكر مكتف اديه وواكف..

-شرايد منها

-وانته شعليك.. زوجتي وجاي اتفاهم وياها انته شكو..

-لا تخليني اشوه وجهك .. ابتعد..

-بكر عوفه.. درت وجهي.. هذا عود جاي ياخذني..

-صعدي..

-اروح وحدي

-كلت صعدي..

-صعدت.. لف هوه وضعد بعصبيه.. بكر لخاطر الله شدسوي..

-شسويت..

-تاخذني كدام عنار وتتعارك وياه.. كال لاهلي عليك هسه ميكولون متفقه وياك علمود اطلك..

-اي ويكلهم

.. مو زين صابر ومخلي عقل براسي وما ناهبج منه..

-تنهبني من منو..

-من رجلج والله اخذج.. وغصبا عليج وعلخلفج تطلكين.. بس اعرف اخ منج والله انتي مال حرك..

-واهلي بكر.. والناس.. انته شنو تخبلت..

-اهلي اهلي اهلي.. من نعال فوك راسج وراس اهلج.. شحصلت منكم غير طيحان الحظ..

-باوعتله . وابتسمت.. انته شبيك. ابتسم

- خبلتيني ومحمد خبلتيني.. هسه غير اطلعج من راسي.. ادري قلة نسوان كاتل روحي عليج..

-متكول لروحك.. ايش جاي تحجيلي.. وتتعارك ويه عمار..

-بلله ما تكرميني بسكوتج.. لعبتي نفسي..

-هههي.. هزيت ايدي.. انته ضاربات عندك.. صوفي شلونه..

-خره بلشت صوفي.. مو طفل الليل كله يبجي.. انوب هاي تكسر خاطري تكوم تبجي وياه..

-سوووده عليه.. مطلعين روحه..

-اكلها مسهرنه الليل كله تكلي مطلعين روحه..

-اي طفل شيفتهم.. يريد يلعب فديته يبووو انطونياه..

-ترديه.. باوعتلها وابتسمت..

-اوووف شفايتلي لو هوه ابني.. جان هسه اني اسعد وحده..

- جان ماكو رجال بكد لو هوه منج.. اكابلكم واكعد .. الا الديا واهلها انساها والله

- اسكت لتحجي هيج.. احس يعذبني من يكول هيج..

-وصلني للفرع.. بكر بداعتي عليك.. لا تجي بعد ابد ولا تتصل.. ما ناقصني مشاكل.. هز راسه ومشا..

دخلت للبيت.. كتلها ها يوم شلونج.. مديت راسي شمسويه.. كالت حامض شلغم.. سمعت الاسم لعبت نفسي..

بساع رحت لاحمام استفرغت.. كالت شبيج.. كتلها لان جوعانه.. من اجوع استفرغ .

-حامل..

-لااا منين ذاك اليوم غسلت..

-لااا حامل.. مثل نساوتي.. جنت بيكم من اجوع استفرغ.. اخذيلج اسبوعين وراجعي..

-انشالله.. اروح ابدل وانزل.. كملت ونزلت يمها.. كتلها منو جايب ملابسي ..

-رجلج جاب جنطه.. كال هاي ملابس سمر.. لعد انتي غير تجيبين ملابسج .. اكو زعلانه تجي بدون ملابسها..

-هوه ضل عقل عندي واجيب ملابس. الكلب فوك شينه كوات عينه ويضرب.. بس حل ما قصر وياااه ببببب.. اجيت احجي وسكتت..

-منو الماقصر وياه..

-واحد مكسر سيارته وخلا طريقه ما يندله.. سطره سطر..

-بكر..

-لااا ...ليش تكولين بكر

- هيج خمنت.. ديري بالج تتصلين بيه او تردين عليه.. مدام زعلتي.. راح يكوم يحوم عليج..

-ان شاء الله.. اخذت نفس.. كمت سويت طماطه تكلاه دسمه وخليتها تلجع.. وسويت جاي..

كالت مو مسويه غدا شكو تكلين طماطه.. كتلها اشتهيتها.. حامضه مالحه طيبه.. يم يم

كعدت اكلت اني وياها.. انوب كنت وياها.. صفينه الكاونتر غسلناه.. السيراميك..

الصاله سعفناها وطلعنه القنفات.. بس اني اصيح محمد يدفع.. ما ادفع اني.. اخاف عل بيبي مال اني 😆

كملنه فرشنه.. الصاله.. دخل ابوي.. صاح سمرر.. كتله هااا بابا.. كال بكر صح ماخذ بيت يمكم..

-اي

-وشعنده

-شمدريني.. روح اسئله..

-هم يحاجيج..

-اي مرات يجيب مرته وابنه ويجينه..

-شرايد هذا.. سمرررر بكر اله ايد بسالفة زعلتج..

-لااا شعليه بكر قابل هوه زوج عمار..

-احذري.. تتقربين منه..

-منين عرفت..

-ما الج علاقه..

-هااا.. عفته ورحت صعدت فوك تمددت بقيت افكر شوي.. و نمت..

كعدت بليل.. على صوت احمدظ.. كومي سويلي اكل..

كمت. نزلت سويتله اكل.. وخليته كاعد يم امي وابوي..

ويحاجيهم علخطبه .. كتله هيه نفسها البنيه مروه..

كال بابا تعرفيها.. خزرني احمد.. كتله لااا منين اعرفها.. بس غير احمد يحبها..

-دار وجه لاحمد.. يعني عندك علاقه بيها..

-لا يابه يا علاقه.. كتلك.. هيج صديقي عرفني على اهلها وخطبتها..

-هذا شبيه.. عود ليش مكايللهم يحبها.. شعليه بي..

ثاني يوم.. اجت نجوى من الصبح.. خبصت البيت بخبالها وحجيها.. تكولي ضامتلج كواني سوالف.. هههه فدوه شكد مشتاقتلها

بقينه انضف اني وياها.. كتلها ماكو طفل لسه.. كالت لا يمعوده.. نخلص الجامعه والماجستير.. يله افكر بطفل..

شكو طاير الطفل.. الحك اشبع ضيم.. كتلها عااابت.. هو اكو احلى من الاطفال.. لو تشوفين ابن بكر يمه يمه كتلت روحي عليه..

لج هلكدوته يخبل..

-بربج صدك بكر مكابلج وكاعد..

-هههه اي..

-يمه يمه شكد احبه.. وج هذا بكر مان.. ماكو شي يصعب بعينه.. قابل مثلج اهمداج يلجبانه..

لج سكتي.. والله عساها ساعة السوده الشفتهم بيها مو بشر.. اي همه مو كرايب رجلج ما تعرفيهم..

-شعرف منهم.. امه اخت عمتي..اكيد مراح تكلي مو زينه.. وعمار اشوفه خوش ولد.. شمدريني بعد بسوالفه..

-يله قسمتي شسوي.. كمنه كملنه تنضيف اللبيت .. للعصر اجن خالاتي.. هم كعده وسوالف..

ليوم الخطبه اتجمعت الدنيا كلها اركان ومرته.. وعمتي رويده وساميه ورنا حتى ابراهيم وكل ولد عمتي..

بس بكر وعادل مجايين. رحت اني ونجوى صالون.. لبست فستان خمري وتصميم بسيط.. و شسورنه الشعر..

ونزلنه ردح .. شعر خصر هز لعبنه لعب اني ونجوى.. خطبة اخونه.. خخخخ.. وهذا لعبنه ولا تكول استهتار..

ونركص اني وياها بالنص.. بعدين اتذكرت حامل.. كعدت بعد ما ركصت.. كعدت يم تمي.. رنا كالت شلونه رجلج الجديد..

كتلها زين.. كالت حلو.. كتلها يشبه ملحم زين بس ما عنده

غمازات.. غمازاته اني ماخذته خخخخخ..

كتلها وانتي ما اتزوجتي.. شنو ماكو.. كالت قابل زركه اني وحظي كاعد والف واحد يتكاتل عليه ويسكر علمودي..

ضحكت.. عود تقصدني... سألتني عمتي.. لعد عيالج وين رجلج وينه.. كتلها عمتي مريضه وملتهي بيها..

-ندستني ام مازن.. كالت خاله شصاير.. كتلها بعدين احجيلج.. اجه ابراهيم.. كال يله اتحظرو راح نرووح..

كتله ابراهيم ابراهيم. .. صاح هااا.. كتله بربك.. صدك اني زركه.. ضحك.. كال هذا يا احول يكولج هيج كتله اوووو يا كثرهم الحولان..

ضحك وكال ولج غير بس رصعاتج تكتل الزلمه وتوكعه بمكانه شتحجين انتي ..

ضحكت ضحكه طويله.. لان اعرف رنا مخليه عينها على ابراهيم وهوه متزوج.. خليته يغازلني علمود افشلها ... يتبع

🌺🌺🌺🌺🌺🌺

#حكاية_سمر

،،،،،،،،،،،بقلم الكاتبه زينب ماجد،،،،،،،،،،

البارت_20

سمر.. ابراهيم ابراهيم. .. صاح هااا.. كتله بربك.. صدك اني زركه.. ضحك.. كال هذا يا احول يكولج هيج كتله اوووو يا كثرهم الحولان..

ضحك وكال ولج غير بس رصعاتج تكتل اكبر زلمه وتوكعه بمكانه شتحجين انتي ..

ضحكت ضحكه طويله.. لان اعرف رنا مخليه عينها على ابراهيم وهوه متزوج.. خليته يمدحني علمود افشلها

هيه كامت تباوع صفح ورافعه خشمه وتزفر.. هفف😤 خخخخخخ.. لبست حجاب وجاكيت وطلعنه للخطبه..

دخلنه لبيت البنيه.. كعدنه قدمولنه كيك وببسي ومنتضرين الموافقه علخطبه علمود نبدي الحفله..

سمعنه الراجيل على صوتهم ويصيحون نتشكر منكم انشالله زواجة خير.. هلهلت امي وبقت تصفك وتهوس

نتشكر من عمها وبوها نتشكر من كال اخذوها.. واني ونجوى وكعنه هلاهل وصفكات.. اخونه خوش اخو يستاهل الهوسه 💃.. (شلون جذب😒)

اجه هوه وكعد يمها وفرحان وحاظنها بأيده.. شكول عليك احمد.. من حللت لنفسك وحرمت هلفرحه عليه..

شصاير لو مخليني افرح مثلك.. لا حرام ولا عيب.. بس اوووف .. شكول ..الله علظالم.. اريد حقي منه..

عقدلهم الشيخ وصفكنه.. امي احس كلبها طاير من الفرح بيه.. وتصيح يمه وليدي حمودي صار عريس..

كملنه الخطبه ورجعنه للبيت.. كعدو يسولفون شوي انوب كلها طشت.. بقو بس خالتي لان بيتهم بعيد.. بقو يباتون عدنه..

بدلنه و وراها كعدنه انضف شوي نجوى راحت وي زوجها.. واني صعدت.. لغرفتي..

ورى ايام جنت نايمه و كعدت على صوت امي..

-سمر اكعدي بساع سمر

-هاها يوم هاا

-عيال نجوى ابو مازن وامه ورجلج وعمتج جوه.. بدلي وانزلي بساع..

-اهووووو يوم من هسه اكولج ما اريد ارجع..

- هسه دنزلي والله كريم.. خل نشوف شنو الحجي.. وحدي بالمطبخ كومي ساعديني بالتقديم

-اي كايمه.. رحت للحمام.. غسلت وجهي و عدلته بمكياج.. مو فرحانه بيهم.. بس لو شافو وجهي مابيه روح..

يكولون ضايجه عليه.. يسووها حجه.. لبست تراكسود شتوي ونزلت.. صبيت العصير ووالكيك..

وطبيت سلمت وقدمت.. عمار يباوعلي ويضحك.. وبودي انطيه دفره قاضيه من دفرات جون سينا بوجها ..

عشنو مبتسم عصخام وجها.. ردت اطلع.. كال بابا سمر بنتي كعدي شويه.. نريد نحجي وياكم..

-تأمر بابا.. كعدت يم امي.. علقنفه..

ابو مازن.. ابو احمد احنه نعرفكم ونعرف اخلاقكم واخلاق بناتكم ونعم التربيه..

عندي بنتك نجوى مثل الشمعه.. والله شاهد مثل بناتي.. واني جاي عليك بسالفة عمار وسمر لان اعرفك طيب وما ترجعني..

ابويه.. على عيني وراسي نتشرف بيكم ابو مازن..

ابو مازن.. ابو احمد اني اليوم ما جاي ابرر فعل عمار لو ادافعله.. لااا ثنينهم ولدي..

بس يا عيني المرا الماتنطي حق رجلها.. ما ينلام الرجال لو دور عليها..

ابويه.. ليش سمر بشنو مقصره..

- ما بيها قصور البنيه حبابه وخدومه واصيله.. وعمار يمدح بيها.. حتى مساعدته بمليون من جيبها الخاص لما تفلشت سيارته ..

وما خلت رجلها يحتار.. وهاي ادل على طيب اخلاقها بس يا ابو احمد.. الرجال يتزوج هم يريد من مرته ضحكه سالفه..

هوه ما متزوجها للخدمه.. وهيه موضفه.. متزوجها حتى يشوف نفسه وياها.. هذا هوه كدامك و اسئله..

يابه عمار احجي.. مو تكول سمر لا سالفه ولا ضحكه ودوم تصيح تعبانه.. وحاجتك بتواسيل تاخذها..

عمار هز راسه.. واني اسمع..

-بويه هوه الرجال عليش متزوج.. غير يريد من مرته.. اذا مانعته كلش طبيعي يروح يدور عليها ويتزوج..

سمر.. لحظه عمو بس...... جاي احجي صاح ابويه سمررررر اسكتي خل الرجال يكمل كلامه..

لا بابا العفو مو القصد اقاطعه لعمو.. بس اوضح شغله.. عمار متزوج قبلي.. يعني قبل ميتزوجني.. وبقى مكمل بعد زواجي.. وياها..

عمار.. متزوج قبلج اي.. بس بمجرد خطبتي منج.. اني قطعت علاقتي بيها.. ولا رجعتلها ابد.. الا بعد ما تعاركنه ذاك اليوم.. رجعت وياها ليله وتركتها ..

وقسم بذات الله مو حامل ولا شي حجت هيج فقط علمود تخليج تبتعدين..

-اي تضايقت منك.. ودرت وجهي. يعني كل ما اتضايق منك وامنعك تتزوج عليه.. هذا مو منطق عمو..

عمار.. سمر انتي مو بس هاي.. هاي كدامك عمي وسألها.. خاله انتي احجي.. بربج اكو عروس تنام يم رجلها بكلابيه..

اني سايق واشكال الوان النسوان تصعد وياي وتغريني غير اريد املي عيوني بمرتي..

مو اجيها الكاها مجودره من كل مكان ونايمه.. ماكو واحد بينه غريب يا ناس احجو من حقي تتزينلي لو لاااا ..

تتمكيج بس للدوام الصبح.. من تكعد يمي وجها انضف من وجهي.. الكحل متخلي اليه.. ومن اريد منها

تعبانه ما الي خلك.. ادري يا عمي اني المن ماخذها.. اشو هيه موضفه وتجي تنام وعود بليل تنضف وي اختي..

حتى جهالي على اهلي.. الامانه لله هيه تقري ابني وتنضف ملابسهم.. بس مداراتهم على اختي..

زين اني ماخذها اصورها لو اباوعلها.. هاي عرسان وهيه هيج وياي سنه سنتين شلون.. يا خاله انتي هم احجي وياها.. مليت من الحجي وياها ما ترد..

وفوك هذا كله تجيب ابن عمتها عليه وتخليه يتهجم عليه اباب بيتي..

ابوي

.. ابوي ابن عمتها منو

-بكر .. مو اجر بيت كدامنه.. طلعت صاحته عليه وتلازم وياي اباب بيتي.. بعدين رادت تتخربط اخذها ووصلها الكم .. ليش ما تدرون بيه هوه وصلها

ابويه دار وجها عليه بخزره حسيت النار طلعت من عيونه.. انوب دار وجها على عمار.. اي لااا ادري بيه هوه وصلها عدنه علم..

ابو مازن.. بنتي سمر اعرفج خوش بنيه وحباابه وعاقله.. اكسبي زوجج وكومي روحي وياه

وهوه اصلا ما يريد ذيج وعايفها بس هيه لازكتله وتريده يطلكج بكل وسيله لا تنطيها الفرصه..

-عمو الخان مره يخون عشره.. رجعه وياه ما اريد خل يشوف التناسبه بالعافيه..

جاي احجي وكرصتني امي وخزرني ابوي..

ابو مازن.. انطي فرصه يصحح غلطه عمو انطي فرصه.. الطلاق مو حل حتى مو زين بحقج..

ما صار على زواجج شهرين وتطلقين.. يعيبوج انتي مو هوه.. كومي وياه هلمره ولو غلط.. مره ثانيه النه غير تصرف وياه..

سمر.. طلعت روحي من كالولي ارجعي وياها وامي وابوي صارو نار من سمعو بكر موصلني..

طلعت منهم ورحت جوه للمطبخ.. وكفت انتجيت على الكاونتر وابجي.. اجت امي.. على شنو تبجين ولج على صخام وجهج..

ولج بكر مكابلج وكاعد وما تكولين.. لا يكون تردين تطلكين علموده يذبحوج ويشمروج للكلاب والله وج يمه ستري علينه..

ولج موصلج للبيت وما تكولين.. اجه ابوي.. لزمني من اذني. صحت اخ بابا. صاح نفس واحد اخلي طلقه براسج واخلص.. اشششش واصعدي وياي بدون نفس..

لزمني من ايدي حيل.. وجرني صعدني.. لفوك.. دخلني لغرفة محمد اخر الدرج بعيده وما تنسمع..

اول ما دخلت ضربني راشدي.. لج بنت الكلب شعندج ويه بكر وتجين وياه.. ولج تردين تمشين المي من جوانه حقيره..

كام يضرب ويغلط وامي تلزم بيه وتكله صحتك..

-ولج يااا صحتي ولج هاي تريد تخزيني تريد تكسر وجهي.

-بعد كل هذا واكسر وجهك.. ما كافي تركت كلشي وخليت روحي بنار وتزوجت وتكلي كسرت وجهك..

-بكر شعنده يجيج ساقطه..

-شعليه اني ابكر.. هوه شال وكعد كبالي قابل بكيفي.. دفرني حيل ويكلي لج الصمي لا اذبحج والله ما جايبج لهنا واحنه ما ندري..

انطيني موبايلج.. انطينييي.. صرخ

-مو يمي بالغرفه شتريد منه..

-رجاء روحي جيبيلياه..

-راحت امي جابته واجت.. كال افتحي.. فتحته.. دور بالرسائل ماكو رسايل لبكر بس عمار وصديقات الي وطالباتي ورسائل الشركه..

دور بالاتصالات.. كاللها رجاء تعرفين رقم بكر.. كالتله لا والله.. كتله بابا انته متثق بيه.. صاح اسكتي لا انعل الخلفج..

طلع موبايله وخابر على عمي.. كاله رقم بكر ابن خليل عندك. ..

-اي شكو

-ابن الكلب هذا ما كفاه فضيحتي بالمنطقه.. حتى كدام نسابتي يريد يفضحني.. ردلي الرقم وباجر اريدك يمي لازم انأدبه ..

رد الرقم.. ابوي كتبه بموبايل.. ما لكاه مسيف.. دور عليه.. دور عليه لكاه بقائمة الرفض.. كال شنو هذا..

كتله هاي من تزوجت خليته بقائمة الرفض علمود لا يتصل بيه.. وارجعله.. وضحيت بكولشي ودست على كولشي بسببك..

وهسه انته جاي ادور بموبايلي وتشكك بيه بعد كل الصار.. اخذت موبايلي من ايده.. وكتله ما اكول غير حسبي الله ونعم الوكيل عليكم..

دمرتوني وراح ادمروني وقابلين بتميري علمود انتو تعيشون مرتاحين.. راح البس واروح ويه عمار..

واوعدك والله ما ارجعلك زعلانه ابد.. لو مليت وما تحملت الوضع بعد.. لا تلومني لو سويت شي..

لان تعبت منكم ومن انانيتكم.. اضحيلكم دوووم وما محصله بس الضرب والكتل منكم..

حجيتها بوجها وعيوني تجري وطلعت.. دخلت اخذت جنطتي جمعت ملابسي.. بدلت ونزلت..

طلعو همه للباب.. بوستني امي.. واني بس دموعي تجري.. وطلعت.. ابو مازن وامه ركبو بسيارتهم..

واني ركبت ويه عمار وامه.. كعدت وره.. وهوه يباوعلي من المرايا .. اني احس نار تطلع من ضلوعي.. لان رجعت

مو بيدي يا ناس والله مو بيدي.. ما اتحمل وجوده.. ما اريد.. ما جنت اعرف افشل قرار من تقرر تنسى شخص بالزواج من شخص ثاني..

خليت نفسي بنار اكبر من ناري.. شبيه تزوجت.. ليش اخخخ.. وصلنه لباب بيتهم.. باوعت لبيت بكر..

سيارته بالباب.. يعني موجود.. اووف ربي بس طلعه ظن بالي دخيلك والله متت.. دخلت البيت.. اجت نوره و وليد بوسوني..

كوه بوستهم وضحكت بوجهم.. احس رجعت روحي للسجن الحكمته على نفسي.. صعدت الغرفتي..

صعد عمار وراي.. كتله لا تتقرب مني رجاءا .. لا تعتقد راجعه على مودك او سامحتك.. رجعت لخاطر ابويه استحى من رجل خالتك مو لخاطرك

-اوك براحتج بس اهدي..

- اخذت نفس حيل.. وكمت اطلع ملابس من الجنطه واصفطها بالكنتور.. اجه حظني من ورى ومشبك اديه حيل..

عمااار وخر .. ابتعدد

-والله احبج شبيج مخبله .. من كل عقلج انتي ابدلج بوحده مثل نرمين..

-ابتعد كتلك.. بقى يهمس ويبوس بيه.. كتله عمااار ابتعد ما اريدك..

-والنبي احبج سمر احبج.. بس هلمره.. ذبحيني لو غلطت مره ثانيه ..

-احس لعبت نفسي منه.. وهوه يتقرب.. دفعته حيل ورحت للزباله استفرغت..

-هاي اشبيج.. سمر يمعوده كولي شبيج..

-كوه اوخر بيه روحي تطلع من اتقيئ.. كوه طلعت من حلكي وكتل

ه مي.. ركض جاب وشربني..

كعدت وهوه ينفخ بوجهي ويمسح على شعري بأديه ويكولي اسف والله ما جان قصدي اضايقج بس مشتاقلج..

-مو هيج..

-لعد شنو

-اني حامل.. وابداية حملي.. لهيج تلعب نفسي من تتقرب يمي..

-صدك حامل يروووووحي..

-حظني حيل.. كتله وخر.. بيك عطر.. ما اتحمل العطور..

-اسف ايف بس والله فرحان يعمري حيصير عدنه طفل .. وهيج رصعاته تخبل مثل البخدودج..

-ابتسمت.. هوه ما عون من ابتسم.. اخذ اديه وبوسهم.. كتله.. حامل وراح ادلل عليك هواي هم تروح تخوني وتكول ما تنطيني حقي..

-لا والله مستعد اتحملج 9 اشهر سبي اهلي لو شكيت.. اهم شي راحتج وتكوميلي سالمه.

-باسني بكصتي.. ابتسمتله.. خلاص ماكو امل.. لازم اتأقلم وياه وانسى كولشي بداخلي..

جرني من ايدي.. واتمدد وخلاني على ايده.. اخذت نفس .. ضحك هوه.. كتله شكو.. كال ثنينه نمنه..

منو راح يكوم يطفي الضوا..

-انسى سوي روحك اعمى ..مو عبالك اكوووم ماكو ..

-هذا شغلج انتي مره كومي طفي..

-انسى ولااا اكوم.. انته شنو شغلك بس فرفره بالشوارع بالشيري مالتك..

-ههههههه الرجال قوامون على النساء كووومي

-رفقا بالقواريرا.. كوم انته

-هههه احسن شي.. اشيل هاي التحفيه واكسر الضوه..

-ههه اكوووم وامري لله.. كمت.. طفيت الضوه.. ورجعت جريت ال المخده ونمت..

-شوو بعدتي..

-بيك عطر يضايقني..

-وهاي نزعت قميصي.. تعاي يمي..

-.. درت وجهي منه.. وكتله نااااام.. اتقرب يمي وما قبل الا يمي. ياربي شلون اتقبله احس روحي تطلع من يجي يمي..

كعدت الصبح.. سبحت وبدلت.. وحظرت نفسي كعد هوه.. يحظني واني امكيج.. كتله دروووح بدل روح..

دا امكيج.. كال ماشي ماشي.. راح سبح واجه.. يضحك.. وهم يمي.. كتله شبيك وخر.

لج بعد يوميه ازعلي وارجعج.. احس نفسي رجعت عريس..

-دوخر هههه عبالي مدري شكو.. نزلت وليد.. كاله بابا وصلني وياكم.. جاي تمطر.. كاله امشي..

صاح سمر جيبي المضله.. خل نطلع المطر كولش قوي.. بس نطلع للكراج نتبلل. كتله ماشي..

رحت جبت مضله.. وانطيتها اله.. فتحها.. وحظني.. واني اخذت وليد يمي لزمت ايده.. وطلعنه جوه المضله..

رحنه نركض مثل البطاريق من المطر جوه المضله للسياره.. صعدت وليد بسرعه.. وعمار وراي لازم المضله..

درت وجهي.. بقى يباوعلي.. كتله شبيك..بوسني بخدي.. وفتحلي باب السياره.. صعدت.. ابتسم..

درت وجهي..على عمار وهوه يريد يلف يصعد .. اباوع لسيارة بكر.. كاعد ويباوعلنه..

بقيت مصدومه.. بيه.. لا يا الله.. شلون موقف.. اوووف.. طلع عمار.. واني بالي يم بكر وشلون جان يباوعلنه بأستغراب..

وصلنه وليد للمدرسه.. وانوب رحنه للطالبات.. اخذناهم.. ورجعنه.. وصلنه للمدرسه.. ردت انزل..

صاح عمار سمررر.. درت ها.. مد راسه. وباسني بخدي.. وكال ديري بالج على سيوفي..

-عقدت حاجبي.. منو سيوفي..

-غمز ..ابنه..

-ههههه ومنو كال ولد..

-هيج حاس..

-واذا بنيه..

-سميها براحتج..

-امم يعني متريد بنات..

-لااا والله شفايتلي علبنات.. عمي اسميها قمر بلكت تطلع قمر على امها..

-اممم بس امك تكول اني زركه مو قمر..

-امي كبرت وكامت متشوف زين.. عيونها تغوش وتشوف الكمر ازرك

-ههههههههه مجامله حلوه.. انطيني المضله خل انزل..

-فدوه لهضحكه.. خدودج بدي اكلهن من تضحكين..

-اخذت المضله ونزلت.. لكيت نرمين واكفه.. جوه الكشك اللي يم المدرسه.. تسوي روحها.. تباوع علغراض وعينها علينه.

سديت سيارته وابتسمتله. ولوحت. وطبيت. اجت هيه.. انتي شنو متفكين منه..

-لو تكلمتي وياي اشكيج للاداره وافصلج.. ابتعدي.. قذره رخيصه.

-هاي منو القذره.. لزمتني من ملابسي.. اجه الحارس مال المدرسه.. رجاء ست نرمين ميجوز هيج تصرفات..

-سهله سمر بعيني..

-عفتها ودخلت للمدرسه.. كملت رجعت للبيت. اني وعمار.. صفينه السياره وشفت عمامي وسياراتهم اباب بيت بكر.

يا ستار ربي شكو.. كال عمار.. شكو اليوم شو كله سيارات باب ابن عمتج..

-شمدريني.. طبيت وياه.. بدلت ونزلت سويت غدا وكعدنه.. شوي وسمعت العياط مال عمامي ابيت بكر..

طلعنه نتراكض اني وعمار.. عمي سليمان شاف عمار سكتهم وسلم على عمار.. كاله تعالو نستضيفكم..

كاله لا والله مستعجلين.. وجاين على ابن اختنه نحجي وياه بسالفه.. كاله براحتكم..

بكر يباوعلي بغضب.. حقه ما اجاه من وراي غير العرايك والمشاكل..

راحو عمامي.. وطبينه اني وعمار. لميت الليت وكملت.. عمار راح نام.. كتله راح اكعد بغرفة الجهال اقريهم..

كال ماشي.. رحت كعدت خابرت ماما.. ها يوم شنو هوسة عمامي ويه بكر.. تعاركو وياه بنص الفرع..

-ييمه والله هذا واحد مصيبه وابتلينه بيه. خبل..

-شبيه.

-ولج اليوم الصبح ابوج وعمامج راحو على خليل.. وتعاركو وياه.. كاللهم ما عندي سيطره عليه ما يرد..

رايحين لبيته وكايليه تشيل من كدام بيتها لا تخلينه نتصرف وياك بالقوه.. شو هذا هاد على ابوج ويصيح.. طلع سكران.. وهاد عليهم

-سكران الصبح..

-شمدريني اكو واحد يسكر الصبح ..

-اتذكرت من شافني اكيد بسببها شرب

حتى ينسى..

عفتها وسديته منها.. ياربي شلون بيه هذا الولدد.. يارب نسيه طلعني من باله ووفقه ويه عائلته دخيلك..

عفتهم وصعدت فوك.. اتمدد علسرير.. واباوع تلفزيون.. اجه يمي عمار.. كتله خل نطلع نشم هوى..

الجو رطب و وهادئ مدام توقف المطر..

-امريني وين تردين..

-اي مكان احس روحي مختنكه..

-ماشي.. كومي اخذج نفتر ونروح لمطعم نتعشى..

-ماشي.. كمت بدلنه اني واطفاله نور ووايدد. اخذناهم فريناهم.. مول واشترينه..

لليل رحنا اتعشينه.. كملنه رحنا للسياره صعدنه وعمار يمشي.. والجو رطب وبارد حيل..

باوعت الساعه 10.. حولت التسجيل للاذاعه.. ودرتها سومر FM رجعت استمع لصوت علي.. ولمشاكل الحب..

وعمار يسوق.. خابره بكر.. كمزت.. كال شبيج عمار.. كتله هااا لا عبالي نسيت موبايلي بالمطعم..

هذا .. عليت المسجل.. وكمت استمعله يحجي.. كاله علي. شلونك..

-علاوي دمرتني.. ساعه اشوف الامل بعيونها.. وافرح وتردلي روحي.. وساعه اشوف الضحكه بعيونها لغيري وتطلع روحي..

فهمني اكو دوى علاج اكدر انسى بيه تعبت..

حاجاه علي.. الله يعينك.. عودتنه على عودك.. اعزف وخلي العود يحجي همك..

ضحك بكر.. وكاله ادلل.. اني استمعله واحس نار تطلع من كلبي.. وبدى يغني.. شفتج بعيني شفتج بعينييييييي .. شفت ادينج بين اديه..

شفتج بعيني انه شفتج بعيني وانتي ملهوفه عليه..يتبع

🌺🌺🌺🌺🌺🌺

#حكاية_سمر

البارت_21

سمعته يغني.. احس روحي طلعت.. كوه كتمت دموعي.. قفلت المسجل بسرعه..

رجعنه للبيت.. فرشت للجهال ونومتهم.. وصعدت.. لكيت عمار غافي بحذائه عل السرير..

نزعته وغطيته.. طفيت الضوه.. شفت موبايله يدك.. باوعته نرمين.. رديت الو...

الو... وين عمار..

-هياته يمي نايم شتردين منه..

-اريده انطينياه..

-باعي حبيبتي.. لتتصورين فد يوم يحبج او يعترف بيج.. مدام رخصتي نفسج كدامه.. لتعتقدين فد يوم يغلي سعرج..

اتزوجج اي بس زواج ما معترف بيه.. لان ميريد يسوي الحرام.. فستخدم الزواج طريقه لحتى ميعصي الله الا انتي حالج حال اي رخيصه.. متفرقين عنها شي..

ياريت تبتعدين عنه .. ولا تلطشين عيب.. وعفكره اني وياه جاينه طفل وقررنه نسميه سيوفي..

بااااااي.. سديته.. ورفعت رجليه للسرير اريد انام.. لكيته. كاعد ومنتجي على ايده.. باوعتله ابتسم وهوه مطفي..

ابتسمت.. وخليت راسي علمخده ونمت..

ثاني بليل اجه عمار ميت قهر.. هااا شبيك.. كال اخذو سيارتي مني. كتله منو.. كال ما اعرف جنت راجع كروه من الطوبجي..

وكفولي ثنين ملثمين انزل لنزل.. اخذوها مني وطلعو وهاي رجعت تكسي.. بلله كليلي هسه شسوي..

-يمعود بالكزيز ولا بالعزيز.. الحمدلله على سلامتك. لو صاير بيك شي منو لذوله الجهال..

-سمر شناكل شنشرب..

-اي يا عيني قابل راح انموت.. عندي راتبي اساعدك بيه لحد ما تشوفلك شغل..

خطيه انكلبت احواله كلب.. الله لا ينطيهم هيه شيري لو كامارو جان شسوو..

ما ضل شغله ما دورها وماكو شغل.. اخر شي.. قدم جيش.. وتعين... كتله خطر عليك. كال لا ابغداد ما عليه شي..

بس دوامه 10 ب 10.. يداوم 10 وايام و يكعد 10.. حياتي مشت وياه زين.. بديت اتقبل وضعه واتأقلم..

كمت احاول ابعد بكر من راسي.. وهوه هم من يوم الرجعت ابد ما حاول يتقرب.. قطع مني..

ورجع لعائلته.. مرات اشوفه يغسل سيارته يتسوك.. وكأنو غربه.. مجرد نضرات كئيبه بيناتنه..

صار عرس احمد اخويه وجنه كولش فرحانين بيه.. عمار ويايه بالعرس.. وكلنه ملتمين وفرحانين..

مرت احمد حيل حلوه بس متكبره.. جنت كاعده بالعرس مال احمد ما بيه اركص عليه 5 اشهور.. شفت مرت بكر وعمتي ساميه..

كالت عمتي سمر دريتي.. كتلها بشنو.. كالت مرت بكر حامل.. احس مو خبر سجين صار بخاصرتي بس شكول ابتسمت..

وكتلها علخير.. هم زين تحسنت علاقتكم.. كالت اي صار زين.. كتلها وياج ما عنده اشكال .. عادي..

كالت لاا تغير ابد .. حيل يهتم بينه وبمصطفى علاقتنه حيل تغيرت.. ابتسمت.. الله يسعده ..

غير كون ما اهتم.. ليش احس اختنكت.. اني مو شفت حياتي.. الله يسعده ليش اضوج اذا شاف حياته من حقه ..

صعدت منهم.. احس روحي نااار.. زفينه احمد وكملنه ورجعت ويه عمار للبيت.. خلاااص بكر صار ماضي لازم اعترف بيي..

مرت هواي ايام.. ودخلت بشهر التاسع.. نايمه وما احس الا نجوى تتصل.. وتصيح كتلها هااا..

كالت سمر مصيبه.. لج شكووووو

-احمد داخل لغرفته ولاكي مرته تخابر بصاحبه.. طلع عدها علاقه بيه..

-يااااااا وشسوالها..

-شسوالها ولج.. كاتلها ورايح لصديقه وضاربه طلقه.

-يمممممه عزا عزا ..

-تعاي بسرعه امي تره ما ضل بيها حيل..

-جايه بساع.. انوب عمار مو هنااا يربي.. رحت تكسي بساع لبيت اهلي لكيت عمامي كلها كبالي..

طبيت لأمي متخربطه يصحون بيها.. ماماااا شبيج يووم اصحي.. اخذتها من اديهم شمرت عليها مي..

صاحت يمه وليدي رراح يكتلوه.. كتلها ميكتلوه يمه ميكتلو..

-يمه وليدي راااح الله لا ينطيييج مروى.. ابوي وعمامي ولد عم ابوي واكفين برا.. الدنيا ملتمه..

يدورون على احمد ماكو .. لهناك و كالو اهل الولد الكاتله احمد لازمين احمد.. ابوي سمع هيج بساع خر ووكع..

شالوه عمامي للمستشفى.. انخبصنه خبص اقاربنه كلها التمت حتى عادل وبكر واركان وخوالي الساده كلهم اجو.. امي كلساع تتخربط..

انجنينه نريد نعرف احمد شبيه.. ابويه ضربته جلطه ثانيه وبالمستشفى.. بقيت ادك والطم عليه..

ساعه اكول احمد خويه وساعه ابجي على ابويه.. بليل صاحو سمر كومي سوي جاي.. كتلهم اي..

واكفه بالمطبخ جاي اسوي جاي للرياجيل.. واحظر بالستكاين.. باوعت للشباك بكر طلع من الاستقبال..

للكراج.. كاعد اباوع لطوله .. وهوه يمشي. . وما احس الا الرمي صار علبيت مالتنه..

احس كلبي طار.. لا فكرت بروحي ولا بطلق والرمي.. كلت بكر راااح.. فتحت باب المطبخ واصيح بكرررررر

هوه من الخوف اجاني طاير للمطبخ بساااع. اترادمنه اني وياه بالباب. . حط ايده على راسي وكعدني حيل للكاع..

وصار فوكاي.. والجام مال المطبخ تفلش فوكانه من الطلق.. اني من الكعده القويه.. صار عندي الم طلوك قوي..

كمت اصرخ.. وهوه هلى ضهري ويدفع بيه للمطبخ كوه علمود يوخرني من الطلق.. احس الالم فرفح كلبي..

اوخر بيه وادفع اريد اكوم.. وهوه يصرررخ لج ثوووووله اكعدي طلللق.. الالم موتني

والرمي استمر فوك ال10 دقايق فوك بيتنه.. ما اسمع غير بس صياح النسوان وصراخ الرياجيل طبو جوه ومدنكين..

حسيته يوم ال

قيامه مو دقايق رمي.. بس اني بالمطبخ والمطبخ واجهيته البيت وكله شبابيك..

تفلشت الشبابيك تفلش.. والطلق صار بالكاونتر ويوكع يمنه.. لحظات رعب متنا.. وموتني الالم..

نزل عندي المي.. هوه بعده مخلي ايده على راسي.. وجارني كوه ليم السنك.. لا حايط وانوب سنك ما يوصلنه الطلق..

لكن بس انكوم الطلق يصير بوجهنا.. والباب منا اتزرف تزرف.. اريد اكوم روحي فرفحت من الام ما اكدر اكعد

وهوه ضاغطني.. للكاع ولازمني.. بكر راااح اموووت وخرر..

-لج تموتين لو كمتي ثووووله.. بس اصبري يخلص هلغضب.. كمت ما اكدر اكتم الالمي..

اصرخ من كل كلبي.. ولج يمممممممه راح اموووت الحكيليييييي اخ يمه متت تعاااي..

-لج سمر بس شوي خل يهدئ الوضع..

-لك راح اموت شهدء الالم ذبحنيييييي.. سكت الرمي واني اصرخ.. هوه كام يباوع منا ليفوك..

التمو عمامي على صريخي.. عبالهم انضربت بالطلق.. كاللهم تطلك راح تجيب..

كومني محمد اخوي وكام يسند بيه هوه وبكر.. كمت مكاني كله دم ووصاخه.. صرخو راح تجيب هاي لحكو عليها..

اديه صارت ثلج.. اريد بس اصبر ماكو.. شالني بكر وعمتي رويده ياخذوني للمستشفى صرخ بكر عبايه اي شي بس خل نلفها شلون تطلع هيج..

خلو عبايه على راسي.. ومشوني للسياره.. سيارة بكر مفلشه هيه وسيارات عمامي ومبنجريها..

كاللها خاله بس اجيب تكسي واجي صبريها.. اني احس الالم موتني.. لو ادري هيج الطلوك لا احبل ولا اريد الطفل يااابه شلون راح يطلع

هوه بداخلي وموتني.. بقيت ابجي بالشارع. جاب بكر تكسي واخذني للمستشفى.. جان مستشفى حكومي قريب..

دخلت فحصوني.. كالت الدكتوره عندج ولاده وضارب مي الراس بس الطفل على مقعده والجاره منفطره..

لازم عمليه.. والعمليه صعب نسويها هنا.. حولتني على غير مستشفى.. واني الالم ذابحني.. اريد امووت..

طبت عمتي رويده .. حجت وياهم.. خاله البنيه راح تموت من الوجع يا تحويل هذا.. كالتلها خاله حالتها صعبه..

ما نكدر نجازف.. اذا انفجرت الجاره ابيدنه احتمال اتسببلها الوفاة.. هاي المستشفى بيها دكتوره زينه حولتكم عليها...

اخذتني وطلعت البكر.. كال هاا شو رجعتو.. كالتله هيج وهيج حالتها.. صراحه كل عمري اتمنى الموت بس من كالولي احتمال تموتين..

عزت روحي.. كمت ابجي من الخوف.. هوه سمع هيج.. تخبل.. ويشوفني ابجي.. كال بس لا تبجين والله ما عليج شي لا تخافين..

كالتله عمتي اخذها للراهبات هناك احسن شي.. كال يله.. اخذني ورحنه للمستشفى.. واني الزم بأيد عمتي واعصر من الوجع وابجي من الخوف..

خابر عمي على بكر كاله وينكم.. كاله ماخذها لمستشفى الراهبات هيج وهيج حالتها..

كاله عمتها تريد تعرف مكانها.. سد منه.. وصلنه المستشفى فحصوني كالو عدها ولاده قرو التقرير راحو سوولي سونار ثاني..

طلع نفس الكلام.. لبسوني ملابس العمليه وكعدت.. باوعت بوجه بكر.. كتله بروح اهلك لو متت سامحني علسويته بيك ..

خلى ايدى على راسي.. وكال لا تحجين هيج سمر انشالله تكومين بسلامه بس لا تخافين.. بقيت اباوعله وابجي.. وعيونه كامت تلمع.. بس ما نزلها ويصبر عليه..

صاحو سمر فرحان.. كمت واحس روحي راحت.. مشيت وياهم.. وصلت الباب الصاله.. درت وجهي البكر.

شفته كعد علكاع وانتجى علحايط ويباوع للسما ويحجي.. دخلت للعمليات ... نوموني 3 رجال.. ثنين لابسين اخظر وواحد ابيض..

وثنين بنات.. واحد اخذ ايدي يشكل كانونه.. الثاني اخذي ايدي الثانيه ويقيس الضغط.. والثالث نزل الضوا خلى بوجهي..

وجاب شي خلاه بخشمي.. ريحته مو طيبه.. البنات ما اعرف شنو ديسون بيه من رجليه..

خله هاي بخشمي.. وكال شسمج يبنيه.. كتله سمر.. ابوج بعد ما اتذكرت كمت اغوش بس البياض مال الضوا اشوفه..

للحظه حسيت انقطعت عن العالم ولا كأنو اني بيه.. بديت اصحى وهمه بعدهم ينضفون الجرح والخياط..

احس الالم روجات روجات.. حلكي ثكيل ما اكدر احجي.. ومن احجي اخربط.. احس بالوضع الاني بيه بس ما احس شحجي..

كال الولد هااا شنو اسمج.. كتله بكر.. ضحك.. اني اتذكر اشوف ناس كبالي واتذكر يسألوني..

بس شنو اجاوبهم ما اتذكر.. باقيه اهذي واصيح بكر لا تروح بكر حبيبي.. هم زين عمار مو وياي بس عمتي وبكر..

عمتي تكول خربنا ضحك وبجي عليج وعلى هذيانج.. ماكو شي بكلبي ما زايعته ..

السولفتلياه عمتي بعد ما كعدت.. سائليني شبيج..

-هذا ابوي موتني ااااخ لو الزمه الا اسوي تكه

-شبيه ابوج

-حرمني منه .. كتله ما اكدر اعيش بدونه.. ما فكر بيه فكر بس روحه وخلاني عايشه بدون روح..

بكر يسمع ويبتسم.. كالت وهسه ردت روحج.. كتلها روحي يمه ما ينطينياها. كالت وين يمه..

-يم وائل كفوري

-اشرررد شبيه وائل كفوري هههههه

-يلعب ابرشلونه

-هههههههههع

-كبر طمج انتي هواي تضحكين..

بكر.. زين وعمار شلونج وياه

-اهوووو اجاني دانبي ابو حلك الفاهي شعليك انته بابا لا تصير لوكي

-هههههه شبيه حلكي فاهي يلثوله

-تغار مني لان امك زركه ابن تغريد العمصه.. (تغريد اسم ام عمار )... وباقين يصنفون ويضحكون..

بديت احس علوضع واص

يح من الالم شيجاوبوني ما احجي بس اصيح من الالم..

كعدت ابجي واكلهم بس سكنو الالم مال بطني راح امووت احس بطني مشكوكه.. اجو خلولي مسكن بالمغذي..

لشوي طبت االمرضه جايبه الطفل وخلته يمي.. وكالت هذا الولد بخير وصحه لا ترضعوه الا بعد مرور 3 ساعات علعمليه..

خل البنج ينزل من حليبج.. اني اغفي واكعد.. جابت الطفل.. ابتسمت.. شلت راسي.. بس ما اكدر احرك اصبع من جسمي من الالم..

اخذته عمتي.. ولفته وجابته يمي... بوسته بخده ما مصدكه هلملاك الي لاا ابدد كل المي ووجعي ما احس بيه..

اذا كل هلالم والوجع نتيجته هيج ملاك يخبل راضيه بالوجع.. كتلها عمه اخبار احمدد كالت طلعو الشرطه ماخذيه ومسجون..

والدكونه اهل الولد.. لان احمد كاتل ابنهم. وعمامج هسه كلها هاده ومسلحه على بيت اهل الولد..

واهل البنيه محتجين على عمامج.. شلون يكتل بتنه. يكلون ما شايفها وياه.. شايفها تخابر..

-عمه خااف صدك انضلمت احمد اعصاب نار ما يتفاهم..

-والله يا عمه ما ادري البنيه ما ميته طلعت بالمستشفى وحالتها صعبه.. والولد هم ما ميت بس حالته هم صعبه..

بلكت بيها امل.. تنكشف ويطلعون.. دنحجي وطبت ام عمار.. كالت هااا الحمدلله عسلامه..

كتلها الله يسلمج.. اخذت الولد وبوسته.. وكالت منو دفع فلوس المستشفى كالتلها ابن عمتها دفع فلوس العمليه والتكاليف..

كالت ايي هم زين شالهن.. يعني ما ندفع احنه.. كتلها لاا عمه عيب.. عمار مو ضام يمج مليون لجيابتي انطيها اله..

صاحت ياااا وين منطيني.. لا منطيني ولا ابد.. هوه ابن عمتج قابل غريب..

-عمه واذا ابن عمتي قابل واكعه براسه ويشيل مصاريف جيابتي.. ما عندي رجال..

-اكلج بله حتى وانتي ميته تحجين دسكتي..

-درت وجهي لعمتي رويده اكول عمه هوه شوكت جاب فلوس.. واجه معقوله شايل واياه هيج مبلغ..

-لااا خاله كاللهم ابدو بالعمليه واني رايح اجيب فلوس واجي... بس دخلتي العمليات.. هوه راح جاب من بيته واجه..

-خطيه.. اني اكول لعمار يدفعله.. نمت يوم بالمستشفى باتت ويايه عمتي ام عمار وعمتي رويده رجعت..

بس علت كلبي.. ولا تحرك نفسها واني عمليه ما اكوم.. والطفل يبجي اصيح ما تكعد اضطر..

اضغط على المي واجيب الطفل وارضع وانومه وهيه نايمه.. للصبح اجه عمار طبلي يركض بملابسه العسكريه الحمدلله عسلامه ام سيوفي..

باسني براسي.. واخذ الطفل بوسه واذن بأذنه.. وخلاه بحظني.. كتله على فلوس بكر.. كال لا تشيلين هم اني ادفعها.. بس ارتاحي

رجعت للبيت عيالي.. اهلي بيتهم مكلوب.. احمد انسجن.. مرته مااتت.. والولد عاش... بس احمد انحكم سجن سنوات..

لان الموبايل الخابرت بيه.. بس مكالمات وما اعتبروها دليل كافي علخيانه..

اما اهل الولد عمامي تفاوضو وياهم.. طلعو ولدهم الشباب حامين وداكين بيتنه.. ولان سوو هيج..

عمامي كاوموهم.. واعتبرو الصار خيانه صديق وضربه.. العرف العشائري انطه الحق لاحمد بس القانوني لااا اعتبرها جريمة قتل لمرته..

لان ماكو دليل يثبت انو هي خاينه.. لهيج انحكم.. ابوي ضربته جلطه ثانيه من القهر على احمد..

امي شكل وياها سكر وضغط وبس تبجي وتنوح ابني ابني لا ليلها ليل ولا نهارها نهار..

واني عايشه ويه ملاكي اللي اجه الي.. نسيت الدنيا بيه اعز من روحي.. روحي من الدنيا هوه..

جنت اكول احب بكر.. لااااااا طلع ماكو شي اعز من البزر.. لا اهل و لا رجال.. ابني كل حياتي..

الليل كله اسهر عليه والعبه ولا اكوول تعبت.. اباوعله كل يوم واكول الحمدلله عوضني بي.. صار عمره سنه ونص.. انطلق السانه..

ممر يكول عليه. عود سمر.. ابه .. على عمار.. ديدي اذا يريد يرضع من صدري .. نيني اذا نعس ويريد ينام..

صح عنده سرير بس ما ارتاح اذا ما اخليه بحظني واشبكه حيل وانام.. اذا عمار ضاج منه ونومه بقريولته..

اخلي عمار يغفى واجيبه يمي.. لان ما تغفى عيني بدونه.. حسيت بهطفل تعويض الي على كل الالم الشفته.. واحلى تعويض..

فد يوم كالت عمتي طلعي الفرش وغسليهن يمكن شامرين عليهم مي.. اكو ريحة خمخمه ..

جان شهر الواحد.. والبرد يكص كص.. كتلها عمه عوفيها اليوم بارده والله.. كالت شلون اذا بارده نخيس

ما قبلت الا اطلعهم.. سحبت الزوليه مال خباثه للكراج وشمرت عليهم الصونده وكالت غسلي..

شلت سيوفي وخليته يم شيماء.. جانت لازمه الموبايل وتتصفح.. كتلها شيماء بس خلي سيوفي يمج..

لا تخليه يجيني بارده حيل بره.. كالت روحي.. وعينه بالموبايل.. كمت اغسل.. واشوفه طالع برا.. وارجع ادخله واسد الباب .

يكوم يبجي عليه يريد يطلع.. يفتحوله الجهال ويرجع يطلع يتبلل.. لعبت نفسي.. اخاف عليه يتمرض بارده

صحت على شيماء لو تجين تكملين بمكاني لو تلزميه..

كالت اي اجيته.. اخذته وطبت جوه.. اني كمت اغسل واخذني التفكير بالنص ساعه يله لفيت الزوليه وسميت عليها..

ردت اشيلها ثكلت عليه.. درت وجهي اريد ادخل للبيت اصيح عمار يشيلها ويايه.. واشوف رجلين يم الماطور مال المي..

شنو هذي.. مشيت واوف يمه شفت سيوفي نايم بالكاع يم الماطور وكله مي ..

اريد رجليه تع

يني وامشي كل حيلي انهد..كمت امشي واتزحلك واوكع.. اخر شي زحفتله ازحوف ورحت يمه..

اضرب على خده ولك ماما سيف اكعد.. ولك عماااااار تعال سيف ما يكعد عمااااار.. ولك حبيبي ماما بس باوعلي ينور عيون امك انته..

احسه مثل المي بيدي مابيه روح.. ولك عمااااار الحكلي عماااااااار سيف ما يحاجيني..

اجه اخذه من اديه ويصرخ شبييييي ولك بابا سيوفي.. لك ابني اكعد.. عمار ابني مااات عمااااار

شاله وركض بيه.. اني اخذت العبايه واركض وراه.. طلع بكر من بيته يريد يصعد بسيارته كبالنه.. حاجاه عمار خويه فدوتك سيارتك بس ناخذه بساااع ابني مدري شبيه..

بكر صاح اصعدو بسرعه.. صعدنه.. وطار بينه للمستشفى.. دخل عمار يركض واني وراه..

من كد ما راسي افتر وكلبي احس بيه طار انعثرت ووكعت ما اشوف دربي.. كومني بكر كملت ركض وره عمار..

لكيته مخلي عسديا والطبيب يفحص بيه.. هز راسه الدكتور.. ويكللنه البقيه بحياتكم والعوض بالله..

صرخت لااااااا ابني ميموت لااااا عمار كولي ابني ما مات دخيلك عمار اريد ابني .. شلت من السديا وخليته على كلبي وكعدت بالكاع

ولك يمه فدوه اكعد... حبيبي سيوفي يمه ما اعيش بدونك والله .. ولك ماما حبيبي.. اباوع لوجه وارجعه الكلبي..

وعمار كاعد وحاظني ويصرخ.. وبكر يجر من ايدي.. ويصرخ ساعوني اخذه منها راح يوكف كلبها..

كتلهم متاخذو هذا ابني لوحدي ما انطيييييي ما انطييييي.. سيوفي ماما ما تكدر بدوني كوووم

حبيبي كولي ممر اليد ديدي.. لك ماما صدري يدر عليك كووووم.. فدوووه حبيبي ولكمممممم ابني ماااات ما يحاجيني..

سحبوه من ايدي كوه بس احس سحبو روحي ما سحبوه.. كمت وياهم واجر بيه انطونياه ابني ما يحقلكم تاخذوه مني انطونياااااه..يتبع

🌺🌺🌺🌺🌺🌺

الله يساعد كل ام تفقد ضناها.. هذا طفل وجن قلب سمر عليه.. لعد الله يساعد ام الشاب اليمشي ويضحك ويحشش وتالي يجيبوه شهيد..

شحال كلب امه.. ااااه الله يعين كل ثكلى انفجعت بولدها..

متابعه مؤلمه.. 😔

#حكاية_سمر

،،،،،،،،،،،،،بقلم الكاتبه زينب ماجد،،،،،،،،،،،،،

البارت_22 والأخير

سمر.. ااخذو سيوفي مني چن روحي اخذوها .. اصيح واصرخ رجعولياااااه.. لازمني عمار ويبجي..

عمار كولي ابني يرجع حرام عليك عمار فدوه ابني .
حظني وكام يبجي.. واني اضرب بيه واكوله ابني رجعوه الحظني حرام عليكم...

فقدت من الصراخ.. وكعت.. اخذني عمار وكعدني بره بس ابجي واصيح ابني اجت عمتي تكول ها شبيه..

كمت عليها بودي اكلها.. من وراج ومن وره بنتج مااات ابني.. الله لا ينطيكم .. موتو ابني.. الله يشوفكم ناااااار كلبي..

عساج بنار اكبر من ناري .. ليييش كتلكم بس لزموووووه.. ليش هيج خليتوه يمووووت ليييش حرام عليكم..

اجت امي.. للمستشفى تركض.. ارتميت بحظنها ماما ابنييي ماااات.. يوم سيوفي راااح.. بقت تبجي وتصبر عليه..

طلعوه من المستشفى وسوو شهادة الوفاة.. واخذوه يغسلوه واني احس النار تطلع من ضلوعي..

ودوه للغسل.. ما خلوني اروح وياه.. عمار يكولي هيج وكلبج وكف شلون لو شفتيه يغسلو تموتين .. توسلت بيه ما قبل..

اخذه وراح.. واني وناس اخذوني للمكبره.. الدنيا باااااارده.. وصلنه ديحفرون بالكبر مالته صغير.. كعدت علكاع وابجي واشيل ترابه واصرخ..

لهناك وجابوه بتابوت زغير.. فرفحت روحي.. كتلهم بس اشوفه لا تحرموني من شوفته بس اخر مره..

الدفان يريد يدخل واني اكوله دخيلك بس اشوفه الدفان يباوع لعمار..

عمار..خل تشوفه..

الدفان.. ميجوز والله

عمار .. خل تشبع منه اخر مره يضل حسره بكلبها

جابه الحظني بالكفن مالته.. فتحت وجه. اووووف يمه وجها مثل الملاك نايم.. شعره مبلل ولك سيوفي ماما لا تعوفني.

خليته على كلبي واصرخ.. لا ادفنوه بارده مبلل لا ادفنو شعره مبلل يستبرررد.. اخذوه مني جر كمت اصرخ بعلو صوتي..

واشيل روحي واكعد وامي ونجوى وعمار لازميني.. لا ادفنووووو بارده ما ينام الا بحظني واغطي من البرد عووووفو..

ولكم دفنوني وياااااه.. اريييييد ابنيييي..دفنوه وهلو عليه التراب صوتي انبح.. حيل ما ضل بيه.. غير امووووت ليش ما اموووت تعبت..

اخذوني رجعوني للبيت.. طبيت وشيماء تكولي البقيه بحياتج.. ولج يا حياة هاي لزمتها من شعرها وضرب يا حياة البقيتيلياااها ..

وج كتلج بس نص ساعه الزمييييي شخسرانه لو لزمتي.. ولج ذبحتي روحي.. كمت عليها ضرب..

منين اجتني القوه ما اعرف.. كل نار بداخلي شمرته بيها كعدت عليها دميت وجها.. واصرخ حرمتيني من ابنييييي ليييش..كوه شالوني منها..

كتلهم ما اريد تبقى كدامي ما اريييييد.. صاحت امي على عمار.. كالتله خاله راح اخذها للبيت.. كاللها خاله والعزا..

كالتله عزاكم انتو لزمو هاي راح تموت ربحي بيمن..اخذتني امي.. بسيارة مازن ونجوى شابكتني وبس دموعها وي دموعي تنزل وتباوع لعيوني..وتصبر عليه

رحت لبيت اهلي.. الناس كامت تجي تعزيني اقاربي المدرسات وياي طالبات هم اجو.. ناس كومه اعرفهم..

خالاتي اقارب عمار هم اجوني.. واني بالاستقبال نايمه.. ما بيه طاقه اكوم واصرخ.

كلبي نار ودموعي نشفت.. وجسمي باد.. اليجي يبوس راسي ويكولي الله يصبرج..

كف العزا وكلمن راح البيته وعمار اجه لاهلي يبقى يمي.. ساعه يبجي وياي وساعه يصبر بيه..

3 اياك ورجعني للبيت وكال سمر رجعي وياي لوين تبقين هنا.. حاولت امي وياه ما اروح بس اصر..

دخلت الغرفه.. انجنيت.. اسمع صياح سيوفي بأذني.. اتخيله كبالي يلعب بالكاع..

فتحت الكنتور.. طلعت العابه.. كمت اصرخ وابجي.. طلعت اهدومه فقدت جنه هسه ماااات..

ولك ماما هاي اهدومك.. نايم بكبر وراضي بكفن ابيض ليش.. صدري لليوم يدر عليك ارجعلي حبيبي..

.. ولك ماما كولشي بيه يريدك.. ابنييي اباوع لحظني.. فارغ.. اتذكره من جان يرضع ويرفع رجله بوجهي ويضربني واني ابوس بيها..

كعدت بين بين ملابسه والعابه.. ابجي واصرخ لحد ما نمت.. شايلني عمار للسرير.. نايمه.. واسمع صوته. ممر ديدي واسمعه يبجي..

كمت اضرب على ايدي كل ضني نايم على ايدي.. فزيت.. شفته ماكو.. كمت اصرخ مثل المخبله بليل..

ارررررريد ابني.. ومخليه اديه على راسي.. عمار يسكت بيه.. واكوله عمااار اريد ابني.. فدوه عمار جيبلياه..

جوووعان جيبلياه بس ارضعه.. وهوه يبجي ويمسح بدموعي.. ويكولي فدوه كافي تعبتي كافي..

بقيت ابجي للصبح.. يله نمت من التعب.. كعدت الضهر على صوت همتي وصياحها

ويه عمار تكله ما طلعت هاي.. نسوان يموتلها شباب وحدتهن كل الحيل بيها.. وهاي تتعاير علمود طفل هلكده..

اني سمعتها.. تحجي هيج.. نزلتلها بحركه.. فوك ما كاتلات ابني والكم عيييين تحجوووون..

هذا الهلكده طلع من روحي.. تعرفين شنو طلع من روحي.. ما اكووول غير بس عساج بنار وبنفس قهري..

عمار كام يتعارك وياها.. وهيه تتعارك.. اخذني ووداني لبيت اهلي..

كالتله امي.. هااا شو رجعتو..

-الليل كله ما نامته خاله هاي لو بقت هناك تموت..
خليها يمكم..

-خليها ترتاح احسن عرفتها تتعذب هناك من تشوف غرفتها..

اكلك صدك خاله البيت مابيه بس اني و عمك ومحمد.. ليش

ما تجون هنا تعيشون..

-هااا خاله والله ما اعرف..

- اذا تردون.. ننطيكم الصاله والغرفه اليمها رتبوها وكعدو بيها..

ليش مبقيها هناك.. وتتعارك تره بعد مابيها تتحمل بعد.. تموت لو بقت.

- ماشي شوفي سمر واللي يريحها اني حاظر

.. فتح الصاله علغرفه وبنينه ورتبناها

وسوه غرفة نوم وغرفه ثانيه صغيره وبابا خاص بينه وحمام.. بس عدنه بابا مفتوح ويه اهلي.. وعشت ويايهم

بس عيشتيش ..عايشه بلا روح.. عمار هجرته فد نوووب الدنيا هملتها حتى نفسي..

.. ضربتين على كلبي ما تحملت.. الاول بكر والثاني سيف.. كلت عوضني وتالي راح..

احس فقدت الحياة.. ما احس اني عايشه.. اروح للدوام وارجع كئيبه جدا.. واليل يمر اتذكر ابني

وابجي.. ايامي صارت عباره عن غبار اسود يحيط بكل حياتي.. لا كادره انسى ابني وجروحي ولا اكادره اعيش.. فقدت الاراده بالحياة

🍃🍁🍂

ماكو واهس للجرح بلكت يطيب..
المنكسر گلبه صعب تجبيره..

كاسرين بخاطري كسرة يتيم..
وعايفيني وكل حياتي بخيره..

حلليتو الكلشي الكم واني هيج..
بايعيني منهد چنت زغيره..

توسلت يهل الرحم مامش رحيم..
يحن عليه جروحي صارن ديره..

شما اصدلكم اعاتب بله ليش..
بس علي هذا القهر تبذيره..

ياگلب يحملهه ابن بطني وراح ..
والقبله ابن روحي االتركته بحيره..

مالومكم بس العتب حيل چبير..
والقاسمه الله من الصعب تغييره..

(الشاعره اسراء الخالدي)

شهرين.. وطلعت حامل لان عمار كال لازم يصير طفل عندج ينسيج سيف.. حملت ونساوه ولعبان نفس واني روحي تعبانه..

مو ذيج سمر القويه وتضحك وتتحمل.. اقل موقف يبجيني.. اقل كلمه تهزني.. بعد ما بيه حيل لكولشي..

اخبار بيت عمتي ساميه توصلها النه عمتي رويده. . حنين كاب التنور عليها ومحتركه.. ومتشوها كليا..

ما متحمله وضعيتها وتشوها ذابحه روحها وميته.. عادل متعارك ويه عمتي وطالع منها زعلان منها

ويكلها انتي سبب موت حنين و عايف اهله و مهاجر بحري.. وما متواصل ويه احد ابد..

عمتي ساميه تمرضت حيل من وره عادل.. ما تعرفه ميت لو عدل.. ناس تكول غرك.. ناس تكول شفناه بهولندا..

ناس تكول باوكرانيا.. ضاع اثره.. بكر حيل انكسر عليه ويدور بس يريد خبر عنه..

صاير عنده طفلين مصطفى ونغم.. ومتعارك ويه مرته من وره الجهال والملابس وهيج شغلات..

مدخله عمتي رةيده ورايده ترجعها.. تكلهم ما ينحمل طبعه مر دوم يصيح وما يقبل بكولشي..

هوه سامع هيج.. معاند اكثر و ما يرجعها..هيه دازتله الجهال.. علمود تخلي يحتار بيهم.. هوه هوه منطيهم الرنا ومسويلها راتب.. وهيه اداريهم..

عمار.. بداية دخول داعش.. نقلوه للرمادي.. خفت عليه الوضع يخوف.. كتله اكعد من لداوم.. كال شناكل وين نروح اذا ما عندي راتب..

كتله واذا صار بيك شي.. اني شسوي.. وابنك ابطني.. استر عليه بعد ما بيه حيل صدمات.. خطيه كعد من الجيش..

بقى يدور شغل.. اشتغل خلفة همبركر باحد المطاعم المعروفه ابغداد.. ويوميته ممتازه مشت حياتنه..

بس بدا يمل مني.. لان كئيبه يكولي لشوكت راح تظلين هيج.. موت ابنج مو نهاية الدنيا..

اكله هوه بقى شي يستاهل اعيش واضحكله.. كلشي حلو بداخلي مات.. ينذمر مني ويتركني..

سمعت امه مرجعه مرته القديمه.. لان هيه ما قبلت تنطينياهم من شلنه لبيت اهلي.. كالت ذوله ولدنه ميعيشون عد الغربه.

رغم سمعت هواي حجي بس هوه نكر وكال ماكو ممرجعه ولا اريدهاا.. بس اني اشك بيه لما يكولي

ابات بالمطعم.. وعندي احساس.. يروح لبيت اهله يبات يمهم.. مو بالمطعم

بس ماكو واهس اغار وهسوالف.. ابد كل احساس بالحياة فقدته.. شيريد يسوي خل يسوي

فد يوم جنت بالدوام.. خابرتني امي..

كالت تعاي بساع.. كتلها شكو.. كالت توصلين وتعرفين.. رجعت للبيت بسرعه.. شفت امي تبجي..

كتلها دخيلج.. حيلي انهد ما بيه بعد هبطه.. حظنتني وتكلي البقيه بحياتج.. راح.. احس كلبي كام من مكانه..

ما اعرف ليش حسيته بكر.. لا تكولين بكر.. هنا اموووت والله.. كالت عمار.. انفجار بمطعم حبايبنا وهوه بيه... وراح شهيد..

بقيت اباوعلها.. احس طلبي صار صخر.. بقت تبجي وتحاجيني.. واني صافنه.. لحد ما وكعت.. اغمى عليه..

فتحت عيوني.. بقيت ابجي بحركه.. وهذا البطلته من الجيش علمود لا يموت يجي هنا يموت..

كل حيل مابيه اصرخ بعد.. خليت راسي بين رجليه وابجي على حظي.. اوووووف يا كلبي..

رحت لبيت اهله. لكيت امه تصرخ وتبجي واخته ومرته طلع صدك مرجعها. شافتني امه.. كامت تتعارك وياي..

اخذتي ابني مني.. دعيتي عليه.. ما بيه ارد عليها.. درت وجهي ورجعت وي امي ابجي بالبيت.. والناس تعزيني عليه.. فعلا تحطمت

بقيت ابيت اهلي اني والحايط ابجي وارجع ليوره.. متت كل روح ما بقت بيه انتهيت..

صار عليه 9 اشهور اخذتني امي و عمي سليمان اللي انتقل ابيتنه كعد.. بعد ما اتهجر من الرمادي وكعد عدنه..

اخذوني. . بدون وجع.. لان عمليه ومقررين موعدها. كعدت لكيت ابني يمي.. اخذته وبوسته وحظنته وابجي..

ابتسمت بوجه.. ويمكن هاي اول ابتسامه تمر على وجهيمن مات عمار لليوم.. رضعته.

. كالت امي شتسميه.. كتلها علي..

بقيت اعتني بأبني وبس.. نسيت كولشي بحياتي .. بكر التهى ابعادل ودوارته عليه.. همه الفوك راسه..

ورى سنتين من وفاة عمار.. اجه بكر وعمتي وعمو خليل.. كتلها لامي.. شكو.. كالت ما اعرف..

تقدم وطلب ايدي للزواج.. عمي كاله نشوف ونرجعلك خبر.. اجه كالي.. بقيت صافنه واضحك..

احس اللهفه مالتي اله..راحت.. بهتت روحي.. كولشي بداخلي مات.. وهوه انقطع مني.. ايست منه وايس مني..

سنوات مرت واني وياه صرنه مثل الغربه.. معقوله هسه يرجع.. بقيت اضحك علوضع..

والضحكني اكثر.. هوه لمة عمامي وقرارهم.. بزواجنه.. يكولون اي شكو بيها انطوها اله..

مره اطلكت وترملت وعدها طفل منو يباوعلها بعد.. وهوه رجال تاركته مرته وجهاله عد اخته تريد تتزوج ومبتليه بيهم

انطوها اله خل يلمها ويستر عليها وهيه هم تلم جهاله.. شو اخوه واختفى محد يعرف بيه..

بقيت صافنه.. هههه ما قبلو ينطوني من البدايه الا بعد ما انهد حيل وادمرت ومتت كالو انطوها..

ههه الحلال اللي الله اختصره عليه بعدة طلاق.. يحرموه الا بعد ما يتهدم الانسان ويتعب يكولوله ياه انطيها..

كالو شنو رأيج بالزواج تردين تتزوجين لو تبقين على اثر المرحوم.. صفنت بيهم..جاوبت امي عني.. لا هاهيه تتزوج وترتاح..

كافي شحصلت والولد يريدها من زمان.. كالو راح نخابره يجيب الشيخ ويعقد عليها.. خابروه..

كاللهم لاا اجيب ناس وخطبه كامله اسويها.. ما المها بساع.. هاي كلها واني ما حاولت اتواصل وياه ولا هوه

الا بيوم الخطبه كلها ملتمه.. دخل هوه والشيخ وعمي وامي.. كعد يمي.. حجه الشيخ هل تقبلين ب بكر خليل زوج لك..

احس رجفه صارت بكلبي.. للحظه غمضت مرت كل حياتي كبالي.. مثل الحلم.. فتحت.. دموعي وكعت..

درتله وجهي.. لكيته منزل راسه ومغمض.. كلت موافقه واني اباوعله ابتسم فتح عيونه وباوعلي..

نضرته جانت مثل قطرات مطر واكعه على كاع يابسه ما بيها كل روح وحيت بقطرات مطرها... نضرته رجعت بيه كولشي حلو بداخلي..

سأله موافق.. كال موافق.. عقد الشيخ واني عيني بعينه.. كل ذاك الحب البدته السنين رجع التم..

طلع الشيخ.. وكفنه. اتقرب مني.. اخذ اديه.. كولشي بجسمي يرجف.. حتى دمعاتي.. اتقرب باسني بجبيني..

غمضت عيوني.. احس كلبي مو بمكانه. وين طار ما اعرف كل الاعرفه اني مو علكاع.. روحي طاااارت طارت

ورجعت لجسمي.. ورجعتلي ابتسامتي العريضه اللي رسمتها لوجهه اخذ اخدودي كرصهم..

واخذني لحظنه حيل ويهمس والله ما مصدك .. ابتعدت كتله احنه بحلم لو وين..

كال احنه برحمتة الله اللي شملتنه بعد كل سنين العذاب الشفناه.. رجعت حظنته حيل ودموعي تجري..

و اهمس الحمدلله .. الحمدلله .. اشكرررك يارب..

اخذ ايدي ومشى بيه للصاله والهلاهل والجكليت فوك روسنه..

خلصت الخطبه.. وبدينه بتجهيزات العرس.. اثثنه البيت اللي جان بيت احلامه.. اثاث مثل ما احب ويحب هوه.. ديزاين ايطالي..

كاونتر خشب اسود.. القنفات جلد اسود الديكور كله تصاميم ايطاليه.. مثل ميحب بكر وعلى ذوقه..

احمد بالسجن.. ابويه هوه والميت سوه.. على احمد.. محمد صار شاب عين الله عليه..

عادل مفقود.. مرت بكر بعد الخطبه طلبت الطلاق.. طلقها.. علاوي ابني عمره سنتين تقريبا..

ونسخه مني.. يشبهني هواي وبكر متجنن بيه.. من اشوفه شايله ويلعب بأيده ابتسم.. احسهم النورين اللي نورو حياتي بدخولهم..

اروح احظنهم.. وابوسهم.. ويبوسوني ثنينهم.. هههه

صار يوم العرس.. وجان عازم الدنيا.. يحس نفسه انتصر.. كملت صالون اتجهت للقاعه..

كعدت بغرفه طب عليه هوه فرحاااان.. كتله راح نتزوج مووو هز راسه ويضحك.. اخذ ايدي وطلعنه..

اشتغلت الهلاهيل والاغاني والافراح والرقص.. صديقاتي اقاربي اختي كلها موجوده..

طلعت اغنية ليلة الالبسلك الابيض واصير ملكك والدنيا تشهد.. اخذت ايده وعصرتها حيل كام يضحك ويبوسني بكصتي..

اجه ابراهيم ضرب على كتفه.. يله كوووم بطل اليوم يومك.. اذا مو بيوم عرسك تغني شوكت تغني لعد.

ضحك.. ودارلي شغني.. ضحكت.. كوه كوه .. كال لااا حسين البصري اعتزلته بعد ما اريده.. شبعني قهر يذكرني بأيام الضيم..

ضحكت.. ههههههه بكيفك.. كام واني وكفت.. راح للديجي.. ربع ساعه يحجي وياهم ايست يغني..

انفتح الديجي.. وغنى هوه اهاااا اهااا .. ضحكت

-اهاها اهاهاا بس اخذك يحبيبي وامشييييي

ما رايد من الدنيا كوووولشي .. بس اخذك يحبيبي وامشي .. فضلتك على الناس كلهاااا ميهمني الدنيا واهلهاااااا

وتدري العشك شي احلى من شي .. ارد اخذك .. والله اخذك.. راح اخذك يحبيبي وامشييييي..

اني اضحك واباوعله واتمايل ويه الاغنيه واصفك.. كمل كال كااافي بعد ما اتحمل انطونياااها ههههههه

اخذ ايدي.. باركولنه وهنونه.. ردنه نطلع.. كتله وعلاوي..

-احترك بيت اهل علاوي.. اليوم ملكي مو ملك احد

-هههههههههه.. ضحكت.. اخذ ايدي وصعدنه بالسياره ومشينه للبيت وهوه لازم بيدي

وتايهين ابعض.. على نغمات عمر ذياب..

حبيبي الليله تعال ننسى فيها اللي راح تعال جوه حظني و

ارتاح دي ليله تسوى كل الحياةةةة..

وصلنه البيت.. نزلني.. لبيت احلامي.. دخلنه للبيت.. وكفت وهوه يقفل الباب كدامي.. خليت اديه على حلكي ودخلت موجة ضحك..

هوه يباوعلي ويباوع للبيت.. اتقرب يمي.. احنه ابيتنه مو..اضحك واهز براسي ايي..

اخذ اديه وقربني منه. وهمس احبج .. امووت عليك

حبينه وتركنه الناس للناس..
وتلاگينه وحچت بيناتنه عيون..

استحيت وگتلي فدوه ويستحي الياس..
وحجينه گبالهم بس ما يفهمون..

كلش علمتني اهواك واهواك..
بعيد وجنت اقرب اليه من الجفون..

حبيتك واخذتك وانتهى الصار..
حلم واتحققت واحساسي ميخون..

كلش مستحيل وجان ميصير..
عشگ كلش صعب وبگلبي مدفون..


سمر روحك گبالك يابكر عيش..
عيش وياي گد ما انعشگ كون..

ثلثين الولد گالوهه عالخال..
اذن ثلثين عشگك عاليوافون..

كسر كل القواعد والتقاليد..
حبك جان انقى من اليحبون..

اختبرونه شكثر ياعشگ الزغار..
لحد ما علميناهم شلون يعشگون..

هذي حكايتي.. حكاية سمر والزمان.. اخذ مني هواي وبجاني هواي.. وضحكني وعوضني.. بحب ابن وزوج.. هم اجمل شي بالدنيا..

اصفن.. واحسب ايام وسنين الخلصتها..بممارسة الحرام.. واقيسها بأيام العذاب.. تطلع الناتج يساوي

السنين اللي عصيت بيها ربي بجهل.. وتبت.. من يومها بدا حسابي.. واتحاسبت على اخطائي

وحده وحده.. كل غلط جنت اسويه جنت ادفع ثمنه غالي.. لحد مااا تعبت وانهد حيل ومن صدك فوضت امري لله..وما قاومت بعد..

وحاشى لله يرد عبد التجئ اله.. لمني برحمته بعد ما فقدت الحياة والصار الموت هوه الراحه..

تعلمن من اخطائي.. ان حرام افضل من العيب اعلمه لاطفالي..

تعلمت من اخطائي.. ان ما احب شي مو الي.. ولو مشيت عكس السير راح اواجه الموت الف مره

تعلمت من اخطائي.. ان افكر قبل ما اتصرف..

تعلمت من اخطائي.. ان الاب والام مهما قسو وياك فهمه مستحيل يكرهونك.. ومهما كان مو لازم اكسرهم..

تعلمت من اخطائي.. ان كل شي اطلبه واطالب بيه.. يصعب.. لكن لو تركته لله وما فكرت بيه يتحقق بلطف الخالق..

تعلمت من اخطائي.. انو افشل قرار هوه قرار الارتباط بشخص لنسيان شخص اخر ..

تعلمت من اخطائي .. كيف اثق بالله واردد ولا تيئسوا من روح الله..

تعلمت من اخطائي.. كيف اقول حسبي الله ونعم الوكيل لأنتصر..

حكاية سمر ... النهايه ...

🍃🍃🍃🍃🍃🍃🍃

لهنا حبايبي تنتهي قصة سمر.. اتمنى تكون وصلت رسالتي لكل لامهات.. كيف يحافظون على بناتهم
وبينت العادة من حرامها ولعنة الرب فيها وسخط رسوله على فاعلها..

لاحظت ردة فعل قويه للبنات .. بعد هذا القصه.. ودعوات كثيره لان كان يستخدموها ومو عارفين بحرامها ولا بلعنة الرب ولا بمضارها الجسديه..

اتمنى تكون سمر واخطائها وعذابها عبره لكل بنت ما ترتكب اللي ارتكبته.. والا يمكن راح تواجه الاصعب

وفي النهايه لا يسعني الا ان اقول.. دمتم ودامت اوقاتكم بسعاده.. وييحفظكم الله من كل سوء