🌺🌺🌺🌺

#سحر_المقابر

،،،،،،،،،،،بقلم الكاتبه زينب ماجد،،،،،،،،،،،

البارت _3

سنا.. وصلنا للسوك اشتريت ملابس وحجابات وشغلات الي ولربى لان عروس وامي كل ما تروح للسوك تشتري لجهازها

كملنا رجعنا بكيا خمسمية دينار وصلتنا لراس الركن نزلنا اتمشينا للبيت واشوف ايهاب كبالي هذا مو وصلنا للسوك شرجعه هنا

سويت نفسي ممهتمه اتقرب من عدنا ويباوع عليه ويحجي ويه صديقه كاله محمد تباوع للسمه وحق الفوكاك احبك..

ابتسمت على طريقة مغازلته ودنكت راسي.. جان يكوله ولك محمد ادري غمازات لو فلك اسود راح تخبلني

وهذا صديقه يكوله ولك منيلي وجهي جنه طاوه يا غمازات ولك.. ضحكت عليهم شلون يحجون ومدنكه راسي

من شافني ضحكت كاله ولك محمد والعباس لو قابليني بجامعة امريكا ما افرح مثل فرحتي بضحكتك انهجم بيتك شكد احبك وانته ما تحس

اريد اغير ملامح وجهي وابعد الضحكه ما اكدر كلامه يجبرني ابتسم.. اريد اغنتب ماكو وصديقه يكوله ولك شهلفياله التطيرها اليوم شنو تحبني هاي من شوكت هلحجي

وهوه يكوله خب دنجب.. يابه اريد اوصل الباب اختنكت لا اكدر اضحك امي يمي ولا اكدر اصبر وهمه هيج يحجون ..وصلت الباب دخلنا للبيت

ووجهي بعده مبتسم.. كالتلي ربى اختي ها شكو شو تتمضحكين.. كتلها لا هيج اجت سالفه ابالي بالمدرسه صارت ويانه تذكرتها وضحكت

كالت ربي يجعلها ضحكت خير كتلها امين.. رحت لغرفتي بدلت والابتسامه ممفاركه وجهي اتذكر حجيهم باوعت من الشباك علشارع

ما لكيته.. يمكن جان واكف علمودي.. ما اعرف اكو شي بداخلي هيج احساس لطيف اول مره يلامس كلبي..

معقوله هيج حبيته لا لا ويني وين الحب بعدني صغيره.. كملت من الغرفه رتبت غراضي الجبتهن جدد

ونزلت تلكتني امي يمه شنسوي عشا.. كتلها اهوووو هذي اكثر فقره اكرها شلون حيره ..بكيفج ماما شتردين نسوي

كالت خل نسوي كبة تمن ..طلعي اللحم المثروم خلي علنار وكولي لاختج تسوي العجينه مال التمن

كتلها ماشي راحت ربى تسوي العجينه واني سويت الحشو.. كملنا ودينا يم ماما هيه تلف مو مثلنا احنه منظبطها مثلها بس تنطينه كم وحده نجرب وياها علمود نتعلم

خاصه ربى كعدتها يمها وتكلها تعلمي شلون الف.. باجر ابيت عيالج خاف يعيروج يكولون عليج عوبه امها ما علمتها

وهيه تكلها مدام انتي امنا يخسي اللي يعيب علينا وعله نضافتنا.. بدت تتلوك 😒اعرفها علمود تكثرها هدايه بجهازها مال العرس

مكفاها صار خمس جنط ادري راح تسبح بيهن.. طلعت الطاوه خليتها علنار مليتها زيت ونصيت النار للكبه علما تكملها ماما

اباوع علنار واتذكر حجي ايهاب ضحكت.. كمت ادندن ويه روحي.. اول مره تحب يا البي واول يوووم اتهنى يما على نار الحب اللولي والئيتها من الجنه

دا ادندن.. واتذكرت يبوووو 😨 صلاة المغرب ممصليتها خرب بيك ايهاب وخرب بعبد الحليم… من وراكم نسيت فرضي

ركضت كالت امي هااا كتلها نسيت ممصليه.. هوه اذن واحنه بالطريق ومن رجعت واضحك عليهم وملتهيه بهلمشاعر التافها نسيت ربي

اوووووف يا ربي يا حبيبي سامحني والله مو بقصدي انساك بس تعرف بليس شاطر ولهاني..

كمت صليت فرض المغرب والعشا.. بس قران مقاريه اليوم وامي تصيح عل

مود العشا.. اني متعلمه 50 ايه يوميه اقراها من القران

تعليمات ابويه لازم ننطي حق للقران من ساعات يومنه واقل شي نقره منه 50 ايه لحته ما نعتبر من هاجري الكتاب الكريم

باوعت من فوك واني بملف الصلاة صحت رببببببى ..كالت ووجع.. كتلها بكلبج حبيبي ممكن تكلين الكبه بمكاني بس اتلو شوي من القران وانزل

كالت ماشي اخذي راحتج.. كتلها شكرا.. دخلت للغرفه.. كمت اتلو بالايات وايهاب صار كبال عيني اهووو اريد انتبه للكلمات واتمعنها ماكو دخت بيه

بقيت اتعوذ من ابليس ماكو بعده ابالي كمت ال50 الايه طبكت القران وبسته وخليته عله كلبي.. اخذت نفس..

وكلت ياربي ياحبيبي لو هلولد وياه سعادتي او كاتبلنه شي بيناتنا وفقنا اله بالحلال ولا تورطنا بالحرام وابعد بليس من طريقنا ونور قلوبنا

اللهم امييين.. كملت لفيت المصلايه خليتها بالخانه ورجعت القران المكانه.. ونزلت لكيت ربى تقريبا مكمله العشا ..

كتلها شسوي كالت بس ثرمي زلاطه درگ لتسويها ثرم ..كتلها ماشي ..سويت زلاطه وخلينا الصينيه ورحنا اتعشينا

كملنا رحنا كل وحده لشغلها تنضف ونغسل ..كملنا صعدت فوك.. اتمددت عله سريري.. اتذكرت كلامه ابتسمت

اخذت المخده لحظني ودرت وجهي لربى.. كتلها ربى هم جربتي شعور الحب من قبل

باوعتلي هيج.. 😠 وانتي شعلمج بهلكلام.. كتلها اسم الله دنسٲل سؤال شنو كفرنا.. عشتو اختي الجبيره واسئلها.. دروحي

درت وجهي منها.. جان تكولي.. سنا.. منو هذا اللي ديرسم الضحكه عله خدودج.. ابتسمت واني نايمه ودايره وجهي منها.. كتلها محد

كالتلي انتي اختي واني حافظتج من النضره كولي.. درت وجهي.. وكتلها ماكو احد والنبي.. بس اكو شخص ديلاحكني صار فتره.. كالت منو..

كتلها ما اكدر اكولج منو.. بس اكدر اسمع نصيحتج الي بهلخصوص.. عدلت كعدتها وخلت المخده بحضنها.. وكالت باعي حبيبي اسمعيني

اني هم كعدت مثل كعدتها وحطيت المخده بحضني.. وكتلها اي كلي اذاناً صاغيه

ربى.. سنا حبيبي.. الحب شي حلو ومفرح ومشاعر حلوه.. واحساس جميل.. بس الناس مو حلوه ومو كلهم عدهم هلمشاعر الصادقه

مرات واحد يعشمج بكلامه ويغرج.. بس تلكين ابليس كاعد جوه السانه.. وانتي تعرفين ابليس من يلعب بعقل واحد.. يقنع اكبر واحد

والدليل قنع ادم وخلاه يعصي ربه وهوه نبي مو مثلنا.. من وره كلامه المعسول واللي تحسيه كله صدق.. بس هوه جذاب بس يريد يخدعج

فلا تصيرين صيده سهله لهيج شكولات من هلنماذج.. كلما عززتي نفسج.. وبينتي للمقابل انتي صعبه وتخافين عله سمعتج وسمعة اهلج المقابل حيحبج وحيحترمج اكثر

تعرفين ليش لان الشخص لو راد يتزوج.. اكيد مراح يتزوج اللي تطلع وياه وتنطي شنو يريد.. احنه عايشين بالعراق وكل رجال عدنه تفكيره شرقي

يعني يفكر يكول مثل مطلعت وياي.. تطلع ويه غيري.. مثل محاجتني هيج.. تحجي ويه غيري ويسترخصها واكيد مراح يتقبلها كزوجه اله وجنه لاهله تشيل اسمهم وهيه بايعه اهلها علموده

مراح يقدر لو انطيتي عيونج وحبيتي بكد العالم مراح يصير بعينه لان يشوفج رخيصه ومو مناسب يخليج تشيلين سمعته يخاف تخونيه مثل مخنتي ثقة اهلج وياه

سنا.. بس انـّ'ℳέ'ـّيٌ ما عندي شي وياه ابد بس هوه يغازلني ويباوع..

ربى.. معليج بيهم.. لو انتي اخته يقبل احد يباوع عليج لو يغازلج.. اكيد مراح يقبلها فلا تٲمنين بيه

سنا.. ٱפگـيہ ماشي شكرا.. دنحجي وخابر عليها خطيبها.. كالت يله تصبحين عله خير خابر حمودي.. كتلها الله يسعدكم.. وانتي من اهلو

درت وجهي.. وبقيت افكر.. بلي كالته ربى فعلا كلامها صحيح.. لازم ما اصير رخيصه واضحك بوجها.. واكسر سمعة ماما وبابا اللي تعبو عليه..

باوعت للسما.. كلت ياربي يا حبيبي.. نور كلبي بنور ايمانك وابعد عني السوء وين ما كان

غطيت راسي ونمت.. مرت الايام.. واني اجذب لو كلت ايهاب نسيته لو راح من بالي كٲي بنيه صغيره يدخل كلبها هيج شي ما تكدر تمنع عقلها ومتفكر بيه

خلصت العطله واجت المدرسه داومت اول يوم استقبلتني غدير اخت ايهاب ..باوستها ورحنا للصف كعدنا.. مشتاقين لصديقاتنه اول يوم كعدنا بس نسولف

ماكو دراسه.. حسيت غدير هوايه تسولف بٲخوها معقوله تعرف شي.. سويت نفسي ما اعرف

مرت الايام والتهيت بالدراسه وابد شلت هلفكره من راسي حته لو اخته تسولفلي عنه اجبر نفسي حته ما اتٲثر بي

كملنا النصف الثاني من السنه وانطونا النتائج طلعت اعفاء عام.. يعني حته ميحتاج امتحن شفهي او اشارك.. رجعت كعدت بالبيت

بس اخر يوم بالامتحان رحت وياهم داومت علمود اشوف صديقاتي واودعهم.. دخلو القاعات الامتحان واني بقيت كاعده بالساحه

الدنيا حاره نهاية الشهر الخامس تسمط سمط.. اوووف شجابني لو باقيه نايمه بفراشي مو اشرفلي..

كملو طلعو كتلهم هااا شنو الاخبار سهله صعبه الاسئله كالو صعبه تكتل ..اخذت ورقة الاسئله وكعدنا نحل اني وغدير

كتلها سهله كلها بس انتو مقارين.. غدير كالتلي لو لابسه وجهي وممتحنه ابدلي مو احسن.. كتلها يجوز ههههه.. طلعنا نسولف ونضحك

صفطت سياره ونزل الجام مال شباك.. شفت ايهاب منها ش

لون حلو ولابس نضارات وقميص ابيض وبنطرون اسود وشكله مرتب ولحيته تخبل

صارت عينه بعيني دنكت.. كتلها يله غدوره اترخص اروح للبيت كالت وين هوه بيتكم بالفرع مالتنا امشي نوصلج ويانا

كتلها لا والله ما اكدر هسه اخذ فورتات منا وارجع ميحتاج.. كالت ازعل عليج والله.. كتلها ٱפگـيہ صعدت ليوره وهيه كعدت يما ليكدام.. حسيته فرح ابتسم

نزع نضاراته وبقى يباوع من المرايا واني مدنكه عيوني.. طلع اغنية باسم العلي.. مشتاكلك مووووت.. مشتاك لعيونك حبيبي مشتاااااكلك موت

بقت مدنكه والاغنيه احسه يقصدني بيها.. خلصت نصاه. الراديو .. وحجه ويه غدير.. كالها شلونج بالامتحان.. كالتله زينه

كالها من كلمتج مبينه مصخمه وملطمه.. كالها وصاحبتج هم مثلج.. دنكت خجلت.. كالتله لا سنا اصلا اعفاء عام بس اجت اليوم تودعنا لان اخر يوم بالمدرسه

باوعلي وابتسم ورفع حاجبه وكال اممم جيد.. ابتسمت ودنكت

ايهاب.. اجيت اخذ غدير للبيت لان بالامتحانات ما خلينالها خط.. ابو الخط قفاص.. هوه ايام الامتحانات 12 يوم يريد اجره مال شهر

ابويه راد ينطي بس اني مقبلت شنو يقفص علينه كتله يابه اني اخذها وارجعها شيرادلها واني ما عندي شي عدنا اجازه نقره بيها ..ما اطول اوديها واجيبها يوميه بسياره

وصلت لباب المدرسه.. جنت اتاني كل يوم بلكت اشوفها لسنا بس ابد ممصادفها صار شكدددد اشوفها هيج خطف لما ينفتح الباب مالتهم

بس ما اباوع استحي ابصبص عله بيوت العالم.. اليوم عيوني صارت بعيونها احس كلبي طار بشوفتها وهيه متحجبه بحجاب اميره شلون نازك عله وجها يخبل

اصرت غدير عليها الا تصعد ويانه فرحت.. صعدت كمت اباوعلها وابتسم وهيه متباوع ابد.. شغلتلها اغنيه عبرتلها عن اشتياقي الها وردت احسسها اني ما نسيتها كل هلفتره

هيه ابد مشالت عينها بعيني.. سٲلتهم علامتحان كالتلي هيه اعفاء.. باوعتلها ورفعت حاجبي كتلها جيد.. باوعتلي وبسرعه دنكت راسها وبسمتها تحاول تخفيها بٲرتباك

يبووو كطعت روحي عليها.. وعلي لو هيه لو ما اريد.. لو اعرف اهد الكون اخذها اخذها.. لو اتانيها العمر كله

سنا.. بقى يباوعلي واني ميته خجل وبكلبي هيج اكو فرح منزله عيني واباوع عله ايده شلون متجيها علجانب.. ايده مشعره بس بيضه حلوه

وساعته الفضيه لايكه عليه.. وهيئتها حلوه.. بقيت مدنكه.. وما اعرف كمية الاحساس والمشاعر بوقتها هيج مخبوصه بين الحب والخجل وشغلات مفرحه

وصلنه للبيت كتلهم شكرا بصوت ناصي..يتبع

🌺🌺🌺🌺🌺
#سحر_المقابر

،،،،،،،،،،،بقلم الكاتبه زينب ماجد،،،،،،،،،،،

البارت_4

وصلني للباب كتلهم شكرا هوه باوعلي كال ادللي وابتسم.. ما اعرف ابتسمت بوجها ابتسامه عفويه هيج اجت بدون قصد بس شكد استحيت منها

ايهاب.. يافرحتي من ضحكت بوجهي.. احس ملكت الدنيا.. دخلت للبيت شمرت السويج مال السياره وكمت اردح

ويشيب الراس يا عشك الزغيرون👏👏👏 هله هله.💃💃💃👏👏..كاعد اركص ويه روحي باوعتلي امي..

الام.. هاي شبيك يمه اتخبلت

ايهاب.. يمه ابنج عاشك هله هله هله 👏👏💃💃

الام.. يا الله منيه يمه كول اخطبلكياها..

ايهاب.. هااا😐يمه بعدها صغيره ما اضن اهلها يوافقون

الام.. دكول منو هيه اكو وحده ترفض ابني المهندس كول يمه كول

ايهاب.. ااااا سنا بنت ابو مسلم.. بس وداعتج يمه حب شريف ميت عليها وهيه ممباوعتلي واني ميت بخجلها

الام..هاي تحجي صدك طفله هاي مو زغيره.. يمه انه اريد ازوجك وانته عاشكلي طفله ..اني مخيله عله بت خالتك تخبل بيضه وحمره تبرك اخطبها الك

ايهاب.. خب والله لو تصير نانسي عجرم ما اريد الا سنا ام شعر الطويل.. لو اعرف اتانيها طول عمري ما اريد غيرها

الام.. ياستار ياربي شنو يمه ساحرتلك هاي.. اعرفها امها مو خوش مره ادور سوالف سحر وهيج ابتعد عنهم يمه

ايهاب.. هلله هلله هلله بساع سويتيها ام السحوره مو جيرانه ونعرفهم بساع شمرتي عليهم تهمه.. وعليمن تسوي سحر..

هيه بتها بعدها بكد الكف حته ممفكره تزوجها..و البنيه اعفاء عام خو ما مثل بنتج دواويح حمر تترس الشهاده

الام.. هاي من هسه عيرت اختك ومدحت بهاي لعد لو تصير عدك شتسوي.. استرجل يمه لا تصير اخو مريتك

ايهاب.. خب يمه شبيج يا ستار هوه بعدني بس معجب بيها وكل هلحجي حجيتي لو اتزوج شتسوين تهججيها

الام.. والله يمه انسه هسالفه.. اني اريد افرح بيكم قبل لا اموت شنو تروح تنتضر بت العالم شوكت تكبر

ايهاب.. يمه والله وعلي ما اتزوج غيرها ما اريد سدي السالفه

الام.. زين اروح اخطبها واحجزها الك اذا ما قبلو.. اخطبلك بنت خالك.. شتكول

ايهاب.. تخطبيها وتحجزيها.. اممم فكرت بيها خوش فكره بلكت هيج ويوافقون وابقى اتواصل وياها وتربى عله ايدي من هيه وصغيره اني اعلمها عله كل سوالف الدنيا

كتلها ماشي موافق..

سنا..رجعت من المدرسه اووف يا فرحتي بي احس روحي طايره.. دخلت الساعه 10 ونص للبيت.. دخلت غرفتي

بقيت اباوع بالمرايا واضحك واعدل بشعري واسوي هيج😗 واسوي حركات ويه روحي بالمرايا وادندن

(هاي عيونك لا يابه لا لا يابه.. ما معقول

ه لا يابه لا لا بابه)

وادك واركص ويه روحي.. دخلت اختي كالت ها ولج اشو تغنين وتضحكين ويه روحج.. كتلها.. ربى.. ما اعرف لج هيج فرحانه اكو بداخلي مشاعر وفرح مينوصف

ربى.. شكو ولج احجيلي..

سنا.. تعرفين ايهاب ابن ام ستار

ربى.. اييييي وشبيه😒

سنا.. لج معجب بيه واني هم معجبه بيه

ربى.. سناااا.. قاطعتني

سنا.. بس والله مو اللي ابالج ابد ما بيناتنا شي غير نضرات حب عفويه وحته اني ما اباوعله ابد بس من يمر من يمي يبقى كلبي يدك بسرعه

ربى.. لج سنا من كل عقلج ايهاااااب ولج جبير ..هذا يلعب عله عقلج

سنا.. هاي شبيج ربى هوه شنو البيناتنا ويلعب عليه اكولها والله بس نضرات ومنه مو مني.. بس اني عندي مشاعر اتجاهه ما اعرف احس روحي

ربى.. سنا ديري بالج منه

سنا.. هووووف انشالله افتهمت.. درت وجهي للمرايه اخذت المشط ومشطت ..

كملت رحت الشباك بيتهم علصفحه مال بيتنا و بعيد بيناتنا 7 بيوت تقريبا يعني ما اكدر اشوف بابهم

بقيت لازمه الشباك بلكت يمر.. ماكو.. سمعت الاذان رحت صليت.. وقريت.. دا اقره صاحت ماما تعالن اتغدن.. نزلت.. الله سمممممممج😍 عشقي

مسويته ماما شوي ومزينته بالصلصه الثوميه والليمون والبصل ..طالع يخبل.. اكلنا كملنا غسلنا ايدنا..

ورحنا نضفنا.. كملنا رحنا اخذنه غفوه شوي الضهر ..كعدت الساعه 4 دخلت سبحت وبدلت عصريات سوينا جاي وكعك وكعدنا اني وامي وربى نسولف

لشوي اندكت الباب.. طلعت ماما فتحت الباب.. طلعت ام ستار ووياها مره.. كالت ماما سوو جاي وكعك للضيوف

اني شفتها ام ستار طار كلبي هاي ام الحب ههههه.. ربى حمت الجاي واني خليت الكعك بالماعون..

رحنا قدمنا المي والعصير والكعك وطلعنا كعدنا بالهول والخطار بالديوانيه.. بقينا نتصنت.. يسولفن ام ستار هواي تسولف بٲيهاب

عرفت قسمه مهندس نفط.. وااااو يعني تحفه.. بقت تحجي بيه وتنفخ هاي شكو حاسه بشي.. لشوي تكولها ام مسلم اريد بنتج سنا لأبني ايهاب

فتحت عيوني هيج😮..هاي عود صدوك.. ربى ضلت تضحك.. كالت ولج هذا طلع صدوك يحبج.. ضحكت..

كتلها باعي كلبي حس بحبه وحبيته 😌..بس اكيد جنت اعوف رٲي ماما بدون متكول اي شي اعتذرت حتلو عندي مشاعر اله مومعقوله اتزوج هسه

بعدني هسه يله نجحت للثاني متوسط اريد اكمل دراسه.. امي كالتهم نتشرف وعلعين وعلراس بس البنيه بعدها صغيره ومنريد نزوجها وومخلين ابالها هيج فكره

بقت تكلها ابني ما ينرد وابني الف وحده تتمنا بس لان احنه جيران ونمون عله بعض اجينه ناخذ منكم.. الا البنات يتمنن شعره من راس ايهاب

امي كالتها شايف الف خير شنريد منه بس يم ستار بتنه صغيره اذا يريد يتزوج بكيفه.. شنريد منه قابل

حسيت امه ضاجت وطلعت.. سويت نفسي ما ادري بكولشي.. كتلها ماما عشنو جايين كالت لا هيج تسٲل عله ناس بالمنطقه.. كتلها امممم
……… .

ايهاب.. ها يمه بشري شصار

الام.. ما قبلو يكولون البنيه صغيره.. معليك بيهم يمه انته شاب تخبل وعين الله عليك والف وحده تتمناك

ايهاب.. يمه واني ما اتمنه غير سنا

الام.. ايهاب لا تلعب وياي اتفقت وياي اذا ما وافقو اخطبلك بت خالتك

ايهاب.. يمه لا اتفاق ولا شي كتلج اني ما اشوف غيرها واذا صغيره ومافقو عادي كم سنه تكبر واخذها

الام.. ايهاب لا تعاند جوز من ذوله.. فوك ما ردونا وما احترمونه تريد تاخذ منهم

ايهاب.. يمه ما احترموج شنو ما ضيفوج ما دخلوج بيتهم.. غير بتهم صغيره ورفضو.. هسه انتي تقبلين تزوجين غدير غير صغيره.. عفتها وطلعت
………………

سنا.. مر 4 اشهر ورجعت داومت ثاني متوسط.. وايهاب اشوفه مرااااااااات قليله.. بس ابد ما اباوع بوجها استحي

وهوه هم ابد محجه مجرد بس يباوعلي .. مشاعر مكتومه ..فد يوم اجه احمد خطيب ربى.. كال الاسبوع الجاي زواجنا

ما اعرف فرحت لاختي بس الغصه بكلبي شلون حتروح مني شلون حفاركها.. فرحتلها والدمعه بعيني تلمع

بقت نجهز العرسها.. نظفنا البيت وغيرنا بالديكور شوي.. ورحت هيه للصالون تعدل ورحت وياها بس ماما ابد مقبلت كولشي اسوي لا اخذ خيط لحاجبي ولا لوجهي ولا مكياج

تكول ممنوع لحد متتزوجين.. اوووف يا ماما.. شوكت تتطورين.. مجرد سويت تنضيف بشره وسويت جسمي وياها رجليه واديه

اجت يوم الحنه بالبيت جانت اختي ملاك تخبل اني لبست فستان ماروني قصير وعقد كرستال نازك.. وسويت تسريحه لشعري عله طوله

صار يخبل..اجت غدير وام ايهاب سلمت عليهم ووكفت غدير تركص ويايه.. وام ايهاب ابد منزلت عينها عني وتباوعلي بتعجرف

عرفت لان رفضتهم ماما.. كالتلي غدير.. لج سونه شطالعه والله تخبلين.. كتلها من ذوقج حًِــℓσνєـًِبٌُيُ.. كالت اشو ممبينه فرحانه ليش

كتلها تعرفين شكد احب اختي وما فرحانه بزواجها لان حيخله البيت عليه.. وراح افتقدها.. كالت حبيبتي الله يخليها الج.. ضحكت بوجها..

كملت الحنه وصار يوم العرس جنه مخبوصين فد مره.. رحت ويه ربى للصالون ..اباوعلها وابجي بسكوت.. اخاف احسسها بس مبين من عيوني ورمن

تسٲلني واكولها من النعاس لان منايمه.. كلمت هيه اني لبست بنطرون ازرك وقميص احمر

واكسسوارات وحجاب

ورجعنا للبيت بس اريد عيوني يوكفن من الدموع ماكو.. كل ما اباوعلها واعرف اليوم تروح مني دموعي يجرن..

بقيت كاعده بالمطبخ.. ابجي.. لحد مكالو اجت الزفه.. مسحت دموعي وطلعت اجه احمد كعد يمها وبقو يصفكون ويركصون

ابتسمت واصفك والحزن ماكل كلبي عليها.. انوب اجه ابو احمد كومهم ربى شبكت امي وبقت تبجي امي كالتلها

لتبحين ليخرب مكياجج.. انوب باوعتلي ومدت ايدها عليه.. وكعت بحضنها وكمت اشهك بجي واكولها ربى لتروحين ابقي يمي

ضلت تبجي واحمد يكولي والله اجيبها الج بس اليوم خليها الي هههه.. بعدت منها. وكتلهم الله يهنيكم.. مسحت دموعي بسرعه رحت غسلت وجهي وطلعت

وهم اباوعلها ودموعي يجرن ..طلعت السياره مال الزفه من البيت جن اخذو روحي.. كاعد ابجي وطلعت من باب الشارع انضربت بشخص

رفعت عيني ايهاب.. نسيت نفسي ونسيت حته ربى بقيت صافنه بعيونه😳😳😳..هوه هم صافن بوجهي

اخذ المنديل مالته وانطانياه.. كال امسحي دموعج ..انتبهت عله نفسي.. اخذت المنديل من ايده وكتله شكرا

ودنكت ومشيت.. صعدت سيارات الزفه. الناس.. تصفك وتركص وموسيقى عالي.. بس اني سارحه بعالم غير عالمهم.. بقيت افكر بٲيهاب

شلون حلو ومرتب ولحيته ابد متروح من بالي.. ونضرته اللي تاخذ عقلي.. لشوي شفت اختي بسيارة العرس تباوعلي ..ابتسمت الها

دخلنا ببيت العريس.. ونزلو ركص وموسيقى ودبچ.. اني واكفه واباوع عليهم.. كملنا اتعشينا.. اجو رادو يزفون العروسين

زفوهم لغرفتهم.. لشوي كالو اهل العروس اصعدو سلمو عليها قبل لا ترحون.. صعدت بقيت بس ابجي عليها واكولها شلون حنام وانتي مموجوده ويايه بالغرفه

شلون راح ادخل البيت وانتي ماكو.. بقيت ابجي وهيه تبجي.. لحد ما سحبوني منها وطلعنا السياره خلصتها بجي

وصلنا الفرع مالتنا فتنا من باب بيت ام ستار شفت سيارة ايهاب صافه بالباب.. اتذكرته شلون صفن بعيوني وانطاني المنديل

دخلت للبيت وربى ماكو.. اوو يا دموووع العين صبي.. رحت للغرفه واباوع لمكانها ..كمت دا ابدل وكع المنديل من جيبي مال البنطرون

دنكت اخذته وشميته اوووف عطره يخبل ابتسمت.. بدلت ملابسي.. وطلعت كعدت بالبلكونه اللي اطل علشارع وطفيت الضوه حته محد يشوفني

كاعده اباوع علفرع واشم هوه.. واشتم بالمنديل مالته.. جان يطلع هوه بسيارته مر. كمت عله حيلي من الفرحه..

هوه انتبه بسرعه وكف السياره وابتسم.. دنكت وكعدت.. اباوعله من الدنكه مال السياج وخجلانه شلون هيج سويت يبوووه عزززه

…… .
ايهاب.. وكفت بالزفه مال بت بيت ابو مسلم.. موسيقى والناس ملتمه.. طلعو السياره مال الزفه واحنه واكفين بالباب

دا امشي وانصدمت بشخص باوعتها سنا.. يبو كلبي راد يوكف شفت عيونها حمر من البجي.. اخذت منديلي وانطيته الها

هيه شكرتني وراحت ركض.. بقيت اباوع عليها شلون تصعد بالسياره تخبل يربي.. شوكت تكبر وتصير الي

راحت الزفه.. رحت للبيت.. بقيت اقره.. هاي اخر سنه اليه لازم اشد حيلي واخذ شهادتي بلكت اتعين ويستقر حالي..

لساعه 9 بليل صاحتني امي كالتلي تعال اتعشه نزلت تعشيت وكملت وطلعت بسيارتي

عادتي كلنا امر من بيت سنا اباوعله ..هلمره مريت جان هيه تكمز وتطلع كدامي علبلكون وكفت سيارتي بسرعه.. ووكفت اباوعها ومبتسم

هيه خجلت بسرعه دنكت وكرفصت جوه السياج بس مبينه من الفتحات مال السياج شلون مدنكه راسها

ضحكت عله خجلها.. صحت بصوت عالي ..يابه وعلي حلالي لو اموووووت هم اطلع من كبري واخذج... يتبع

🌺🌺🌺🌺

عمري اذا العرس كرايب او صديقة فالبسي فستان احلى😻💫

فانزلي للسوك وشوفي شمنزلين فساتين واختاري لون فستان يناسب بشرتج

#ملوكه

عيوني اذا بشرتج مو جافة..فاستعملي ماسك الشوفان لمدة 3 ايام وتروح الحبوب..وتغسلين بصابون ركي

وعصارة فيوسيدين ابو الخط الأحمر..هم زين للحبوب 3 ايام تستعملي🌚🌺

#ملوكه

حبي لوريال وكلينيك👇🏻☺️ مقشرات للبشرة الجافة
والبقية للجسم

#ملوكه

حبي يجوز هالحبوب من الدورة..اكو بيهم تطلعلهم حبوب وتصبغات قبل الدورة واكو بعده

فعادي لاتلمسيهن كم يوم وتروح
غسلي بصابون ركي واذا بشرتج مو جافة سوي ماسك الشوفان لمدة 3_4 ايام وتيبس الحبوب☺️🌸

#ملوكه

عيوني بايوات انستا وجهتن هذيج المرة..فهسه اوجهن😇

#ملوكه

منا وليجوة توجيهات عل بايوات انستا..فاضغطي عليهن ويطلعلج توجيه🥰✨

#ملوكه

حبي هذيني البيجات 👇🏻🙃عدهم ستر جلد

#ملوكه