رفيف .. گاعدة واسمع . اجه رامي ..
تعاي خانم . هذا الاخ من هسا ضارب ميانه ويگول مريتي شنو السالفه ..
ضحكت هنودة . گالتله اي صدگ مرته قابل مجذب .
رافد ضحك .. گاله عود من تخطب نشوفك شتگول ..
روحي يابه الولد منتظر ..
رامي .. بس مو تاخذج السوالف ..
ماما .. هاي شبيك وي البنيه دا تخجلها ..
رامي .. اختي واغار عليها ..
هند .. يا رجعنا النفس السالفه . نسيتوا شسوه برحيق واحمد . جان يگعد بنصهم بحجة يتشاقه .
بس هسا لان الولد غريب يستحي يسويها .
رافد .. لا هنوده شنو هالحجي . الولد كبر وعقل مو مال هالسوالف ..
بقوا كلهم يضحكون .
وماما تأشرلي. وج فشله الولد منتظر ..
انطتني هند صينيه الجاي ..
ودخلت بيها .
……………………………………..
شافني . گام ومبتسم ..
اني منصية راسي .
گال . ياهلا والله ..
-هلا بيك .
شبي الحلو زعلان
-لا ليش ازعل . ماكو احد معيط عليه بالتلفون .
-ههههههه يايابة .. بس لاتنفجرين عليه .
-ابتسمت .
-اي هيج .. اني اعتذر .
-باوعتله بأستغراب . هاي منو الي يعتذر .
-اني والله . صگر شبيج ماعرفتيني .
-هههههه لا ماعرفتك .
-رفيف احنه ولد عشاير . وعدنا مايصير ناخذ البنيه الي عليها نهوة . عدنا عيبه وماتصير وننفضح بين العشاير.
والي يعقد على بنيه منهي عليها .
لازم يفصخ وياخذها الناهي ..
من سمعت تخبلت . بعد ماصرتي مرتي وعشگتج اتركج مستحيل اتحمل يصير بيه هيج ..

ابتسمت لحجايته الاخيرة ودنگت .
ضحك .. گال ليش تضحكين . لان گلت عشگتج .
اخر شي افكر بي هو اتعذب بدروب العشگ هيج ..
عيب من اهلج اني اروح .. وبس تفظ هاي السالفه نعقد محكمه حتى محد يگدر يحجي بعد ..
ويمكن استعجل بالزواج ..

رفيف .. لا ليش تستعجل اذا نحلت.
صگر .. ويمكن اني اريدها حجه وغمز وكرصني من شامتي الي جوة شفتي ..
استحيت ..
وگتله . خلي اصيح اخواني .

رحت گلتلهم صگر يريد يروح . اجو .
دخلوا سلموا عليه . ويحجي وياهم ع السالفه . وماما يمي واگفه بعباتها ..
واني عيني عليها وهو يحجي ومحروگ دمه . يخبل من يتعصب .. بس من يضحك يطلع احلى ..

اخر . شي گال في امان الله وسلم بأيده . وباوعلي وراح عود يستحي من اخواني لأن واكفين .
ولاعبالك قبل شويه جان يتغزل .
گدام اخواني . يصير فعلا صگر . ومايباوعلي ابد .

طلع . اتصل رافد على عمي حسن وگام يفرفح .
وگاله السالفه صارت تخصهم وراح تتدخل بيها عشاير .وخلي ابن اخوك الصايع عود يصير رجال ويحلها ..

سوينا عشا ودا نتعشا ..
دگ الموبايل مال رافد ..
گال هذا صگر ..
الو .. سلم وكمل . وبقى يحجي وياه بالربع ساعة ..
من سدة .
گاله رامي . ها شگال ..

رافد .. يگول . شيخ غالب . راح يودي طارش الشيخنا . وتصير گعده .
لأن حسين مرتين يتعدا عليهم . مرة من هد هو وصديقه عليهم .
ومرة من راد ينتقم وطلع سالفه النهوة وحدة .

رامي .. اي خليه . بلكي يكسروه من العشيرة ونرتاح .
ماوراه بس المشاكل ..

ماما .. خلونا من سالفه حسين وتعشوا . طلع ارواحتنا مانرتاح منه ابد ..

لليل .. اتصلت عمتي اميرة ..
وگالتلها .. افسخوا الخطبه انتو احسن مما الولد يفسخها لأن حسين مودي طارش لاهل الولد وگالهم اني ماهي عليها . وهمه عشاير ومايرضون ياخذون بنيه منهي عليها واذا فسخوا تصير حجايه على بنتج ..

ماما .. يا يدادة جا ماگالج حسن . الولد اجه لهنا وافتهم السالفه وانگلبت السالفه على ابن اخوج وراح يگاوموهم .
اميرة .. يا شمسوي هو ويگاوموه . لان يريد بنت عمه وهو احق من غيره عليها ..

ماما .. اي دخلي يدرس ويتخرج ويتعين ويصير براسه خير يله يحقله ياخذها . بنتي ربيتها وتعبت عليها وصارت دكتوره حتى انطيها الواحد جاهل .
والحجي صار مو يمنا يم الشيوخ . عود تفاهموا وياهم ..
وسدت التلفون ماما ..

من سولفت شگالت عمتي .. تخبلت . بابا شلون تربى وعاش وي هيج بشر . الحمد لله الي طلع يختلف عنهم

مرت الايام ..
وقرروا يوم الگعدة . بعد مادزوا ع شيخ عشيرتنا .
وحظروا عمامي كلهم وحتى عمو هادي .
واخواني هم ..

كنت بيومها گاعده ع نار ..
للمغرب يله رجعوا ..
من اول مادخلوا واني عيني ع حلگهم اريد اعرف شصار
بس البرود العدهم موتني ..

ماما .. يله عاد صرلكم ساعه . ماي وجاي . ماتسولفون .
رافد .. شنسولف. هاهي انحلت . وحسين اذا حجة او تعدى عليهم او على رفيف ينكسر من العشيرة واعتبروا النهوة باطله ..

ماما .. الحمد لله ..

رامي .. بس السيد ابو صگر . من حجى هز الديوان هز . صدگ حجاي وصاحب كلمه . بحيث خله شيخنا مايعرف يحجي .
خو عمي هادي . بس يتبجبج ويتعذر . واحسبوها عليه وبعد ماتتكرر . ولاتگولون السانه متر من يجينا .

رافد .. اي وگالهم .. من يوم الي عقد عليها ابني صارت بنتي . واي غلط اتجاهه يعتي غلط بحقنا . والي يغلط بحقنا مانعذرة ونگاومة ..

رامي .. اي لو استاذ صگر .. يگول صارت مرتي والي يحط عينه عليها افگس عيونه من غير مايرفلي جفن ..

جاي يحجون واني ابتسم ومستمتعه ..
( فدوة شلون يدافع المرته .. واتخيل شكله من معصب) . ادور اتخيلت شكل عمو من

يحجي وخايف واضحك ع الموقف. اجت رساله ع جهازي .

……………………………………..
فتحتها ..
💬جاهزة تكونين مرتي بالقانون باجر ..
ضحكت . ودزيت .
💬 باجر ?? شلون نلحگ
💬 عليج الجاهز. بس تدخلين تنطين موافقتج للقاضي وتبصمين وهذا هو ..
💬بله اني مموافقه شلون ..
💬 اي عادي من اجي وگوليها وانتي تباعين بعيوني اريد اشوف شلون تگوليها بعد ..
💬 هههههههه تعرف نقطة ضعفي .
💬 اني صگر ماتعرفيني .
💬 لا هسا عرفتك وحفضتك كلش زين .
💬 هههههههه اموت عليج .

ضحكت .. ومااعرف شنو ارد ..
دز 💬 ترى مايرادلها هالگد تفكير . گوليها وريحيني .
💬 استحي ..
💬 تگوليها لو اخليج تگوليها گبالي ..
💬 ههههههه لا حباب انطيني وقت ..

اتصل فيديو ..
يااااا عزا باوعت الروحي بالمرايه حلوه . سحبت شال وفتحته ..
هو نايم ع السرير لابس تشيرت ربع ردن وعضلاته باينه حلو شكله وحتى استحيت اباوع .
گال .. بله هذا شنو الي لابسته على راسج . من ذيج المره شفتج وگلت يمكن تستحي من اخوانها .
بس هسا احنه وحدنا وانتي مرتي ..
اريد اشوف شعرج هو نفسه بالعقد . لو مستعار .

-يا شنو مستعار والله شعري .

-اي دخلي اشوف واتأكد ..

-سويتها عناد ونزلت الشال . كنت رافعته الشعري . درت وجهي وگتله شوف والله شعري .
گال .. ايباااااه هسا ردتلي روحي .
-ضحكت اني ..
-گال يله گوليها .
-شنو ??
-مو گتلج اذا ماكتبتيها اخليج تگوليها گدامي .
-لاعفيه استحي .
-ماتگليلي انتي دكتوره وداخله تشريح واشكال شايفه المفروض تكونين جرئيه. اشو دومج ترجفين . وين ذيج رفيف القويه الدكتوره الي رزلت صگر بالمستشفى.

-هههههههه راح تبقى لازمها عليه . اي لازم اكون قويه گدام الغربه والمااعرفهم لان اذا اضعف يستغلوني .
بس هسا انت صرت غير ..

-بااااوعلي وگال بالقرآن احبج ..
-گتله واني هم . طلعت لااراديا ..

-اگلج مرمرتي گلبي . الاحسن باجر نعقد محكمه ووراها بأسبوع نتزوج ..

-لا شنو هاي مو گلت نتعرف هالشهرين .

-صار عشر ايام نتعرف مو كافي . عرفتج وعرفتيني . ومن نتزوج تعرفيني اكثر . خير البر عاجله .

-انت تحجي صدگ .

-اي بعلي شبيج .ماگالولج اخوانج . ابوي گالهم ناخذ البنيه من وكت عن المشاكل ..

-لا عفيه كلشي ممسويه ولامشتريه .

-شني هي يوم واحد اشتري المهمات . والباقي اخذيهن من دبي ..

-دبي شنو .

-اي لان سنويه اسد ماطالعه .. قررنا نتزوج ونطلع الدبي فترة ونرجع .. وهناك عندي شغل يعني بيها وبلاها احنه طالعين هم شغل وهم شهر عسل ..

-لاصگر دا تفاجأني .. دوامي شلون .. لا لاتخليني امام الامر الواقع ..

-قابل اني گتلج بطلي .
اني ارتبها واسويلج اجازة شهر ..
نروح ونرجع بيهن ..

-شلون ترتبها ..

-عندي طرقي الخاصه عليج الجاهز ..
وهو اول وتالي انقلج يمنا ..

-ماادري خلي اشوف اموري . ماالحك مالحك .

-هههههه لاتدوخين . ارتاحي وعلكيفج اشتري واطلعي واذا تردين اني اجي اخذج لو ادزلج وحدة من البنات ..

-لا شكرا ماما وهنوده يمي ..

-شبيج انخطف لونج . لاتخافين بعدنا مامحددين موعد . لاتتوترين .

-ها زين ..

-يله حبيبتي روحي اتعشي واكلي زين ترى ضعفانه . ولو ادري بيج من التوتر ماراح تاكلين اليوم العرس ههههه

-ههههههه اي اضحك عليه .

-اموت عليج ..

-احبك ..

-ههههههه واخيرا . اني هذا عشاي تعشيت ..

كملت المكالمة .. طلعت لگيتهم صابين العشا .
گالت ماما . دريتي بموعد الزواج ..
واني ضايجه . گلتلها اي ..
رامي .. وشبيج عفستي وجهج . بس لا بطلتي ..
رفيف .. لا بس مالحگ كلشي ممشتريه لسا .
ماما .. عادي من باجر كل يوم نشتري شويه . بس دوامج شلون ..
رفيف .. صگر گال اني ارتبها واخذلج اجازة ..
رامي .. عاد انطينا من وقتج خلينا نشبع منج قبل لاترحين ..
نزلت دموعي وحضنته .
رامي .. لاتبجين يوردتي . كل اجازة اجي اشوفج حتى اذا بالمستشفى واخلي استاذ صگر يجيبج النا .
رفيف .. انت باجر تلتحق . وبعد كم يوم يله تجي . بس لا بزواجي يصادف دوامك ومااشوفك من اروح الدبي ..

رافد .. هلا ياب دبي شنو .
رفيف .. اي نتزوج ونسافر الدبي . عنده شغل . ولان سنوية اخوه مطالعه .
رامي .. والله لو للمريخ الحگج . بس لتخافين من يتحدد الموعد اخذ اجازة اذا دوامي واجيج . كم رفيف عندي ..

من هسا گمت اشتاق الاهلي . واخواني . وعبدووو حبيب عمته .
تعشينا وكملنا . اتصلت على رحيق . گلتلها .
تخبلت گالت ليش هالسرعه .
گلتلها من ورى ابن عمج الغبي غير ..
رحيق .. يله كلشي بالقسمة . جائز مقسوملج بهيج يوم تتزوجين . وترحين الدبي بعد عيني عيني .
رفيف .. ههههههه دعوفينا . اريدج تاخذين اجازة من استاذ احمد . مو تجين مثل العقد بنفس اليوم ..
رحيق .. لا اجي قبل اسبوع ..
رفيف .. ها اوك يله باي ..

رحت نضفت المطبخ .. وكملت . دااحظر لبس الباجر .
اجتني ماما . گالت رفيف .
خليلج ورقة وقلم واكتبي احتياجاتج كلها حتى متنسين وبالسرة تشتريهم وماندوخ ..
يعني شغلة الكماليات والمكياج اكتبيهن وحد .
والملابس وحد .

رفيف .. ان شاء الله ماما .
وصدگ طلع

ت ورقة وقلم . وگعدنا اني وهنودة نكتب .
بعدين گالت . هم تشتريله نيشان .
گلتلها اي لان همه عشاير وخاف هالشغله عادة عندهم .اشتريله ع ذوقي وبعد ماادري اذا عجبه ..
هند .. وشلون تعرفين قياسه ..
رفيف .. اخذ رقم منى من جهاز ماما . واحجي وياه ..

ثاني يوم بدلت وتشيكت .. ورحت للمستشفى بعدها اخذت اجازة وطلعت .
اجه صگر اخذني وطلعنا ..
كان مجهز كلشي . اوراق الصحة وكذا .
بس عقدنا وطلعنا ..
گتله اليوم غداك عدنا تگول ماما .
گال . خوش جا خلينا اليوم ناخذ صور .
رفيف .. ياصور .
صگر . جا شتردين تضيعين عليه الفستان الي اشترتيه ومالبستيه الي ..
ضحكت اني .
گال بس كون اخوانج ماهمه زحمة منهم ..
رفيف .. لا رامي التحق . ورافد ميفوت نومة الظهر لتخاف هههههه .

رحنا البيتنا وباركولنا اهلي .. ماما وهنودة مبدعات بالطبخ .
سمج وبرياني ودولمه وتبسي ومقبلات وفواكه وخلاوة وخيرات الله كلها ..

صگر .. اليوم حالفين تموتوني .
رافد بأستغراب .. ليش
صگر .. هذا الاكل كله مايتفوت ووين اخليه ومنا المره خاف تخترع من تشوفني هالگد اكل ..
رفيف .. لاعادي اكل بالعافيه ..

ضحك رافد وگال .. عمه سيسنا احنه ..
ماما .. هههههه بدت الغيرة ..

اكلنا وكملنا شلنا المواعين كلها وصبينالهم جاي .
اخذت هند ع جهة .
وج هنوده رجلج ماناوي يگوم . واني وصگر متفقين ناخذ صور لان مااخذنا بالعقد ..
هند .. دروحي البسي وعدلي .. واني احجي وياه اصلا هو تلگيه نعسان بس يستحي من صگر يتركه وحده ..

رحت للغرفه . شفت موبايلي بي رساله فتحتها .
💬 هذا اخوج الظاهر ماينشلع من مكانه راح يشلغم
💬 ههههه لتخاف راح ادز القوات تاخذة .
💬 هههههه ياالله مو تتأخرين .
💬 لا مااتأخر . بس ابدل .
💬 منتظر على احر من الجمر .

لبست الفستان . كان طويل ومخصر ع الجسم لونه بيج وردانه شيفون . مشطت شعري . وسحبته ع جهه
وخليت مكياج حلو وطوخت الشامه لان يحبها .
صبغت اضافيري ماروني وهمه اطوال طلعوا يخبلون .
لبست التراجي . ورشيت عطر.
لبست حذاء عالي . لان رغم اني طويله بس هو اطول مني .

فتحت الباب الهنوده . گالت صعد يله .
اخذت علبة الذهب . وگلتلها موتتأخرين نيميه هو وعبدووو وتعالي اخذيلنا صور ..
رحت للاستقبال واتمايل بمشيتي .
هو مدنگ ويلعب بالموبايل يمكن ديدزلي رساله ..
رفع راسه . صفن بوجهي وابتسم ..

يتبع……

///البارت التاسع///
درب_العشگ🔥
بقلم_الكاتبة_شمس

رحت للاستقبال واتمايل بمشيتي .
هو مدنگ ويلعب بالموبايل يمكن ديدزلي رساله ..
رفع راسه . صفن بوجهي وابتسم ..

گال .. اوكفي خليني استوعب ..
رفيف .. هههههه شبيك ..
صگر .. تعالي يمي گام وسحبني من ايدي . وگعدت يمه ..
هو هذا نفسه مال العقد ..
رفيف .. اي ومالبسته .
صگر .. خرررب غير ابوي دومه مستعجل . بس همزين مالبستيه . جان شلغمت عدكم هههههه .

دگت الباب هند ..
هو ابتعد عني بسرعه .. خلة بينا شبيرين .
صدگ ضحكني ..

هند .. نيمتهم مؤقت واجيتكم ..
صگر .. راح انزحمج خويه ..
هند .. لا على بختك خويه شمسويه هسا اني ..

انطيتها موبايلي .. ونزعنا حلقاتنا ..
لبسني ولبسته الحلقات وهند تصور ..
وهو خجلان ومستحي منها ..
بعدين بدأ يلبسني الذهب ..
ودور گمنا ناخذ لقطات .. بس ولاتگولون ذاك صگر الي يتغزل .. انگلب انسان خجول ..

كملت تصوير وطلعت ..
گال .. هفففففف واخيرا . حتى النفس گطعته ..
رفيف .. ههههههه معقوله هيج خجول ولاعرفتك .
گال .. لاتشوفيني وياج جريئ غير انتي مرتي ..
بس وي غيرج لا ..
واني المرة الها حرمة عندي .. مااباوع الا الحلالي ..
گتله .. احم احم ..
صگر .. اگلج راح اروح وكلشي ممحصل ..
رفيف .. يمكن رافد نزل .. خليني . اروح .
صگر .. لا عليج الله . وراح گعد ع التخم .
خربت من الضحك عليه .
هيج تخاف ..
صگر .. خوش اطلبج وحده . وبعدين مو صگر الي يخاف بس احتراما الهم وببيتهم ..
والا انتي مرتي شرعا وقانونا بعد لويش اخاف ..

ضحكت اني ..

صگر .. بسيطه اشبعي ضحك هسا .. ويلمس بليحته ويتوعدلي ..
گتله اروح ابدل واجي لايگعد احد.
رحت بدلت . وسويت جاي وكعك وجبته يمه ..

لگيته يشرب جكارة ..
گتله ابد مااحب ريحتها ..
نفخ بوجهي وگال . وليهمج حطفيها ..
دور باوع وگال . شماتلبسين بعد مايحلالي الا ذاك الثوب .
صدگ حوليلي الصور كلهن .. خليني اتمعن بيهن زين .
رفيف .. ما ماادزهن .
گام يتلاوه وياي ع الموبايل . اندگت الباب طفر .وابتعد عني ..
ضحگت وگمت .. لگيتها ماما .
گالت اخذتني النومه خالة اعذرني .
صگر .. لا خاله على راحتج .. وگام يشرب جاي ويضحك .
شويه ونزل رافد وهند ..
گال صگر . جا اني اترخص ..
سلم على اهلي وعليه وراح ..

دز رساله وهو بالسيارة يمكن ..
💬اوصل للبيت الگي الصور كلهن مرسولات الي ..

ابتسمت كسر خاطري ..
رسلتهن اله ع الواتساب ..

واخذتلي غفة شويه ..
گعدت الاذان يأذن .
صليت وكملت وگمنا نسوي عشا اني وهنودة ..
اجه عبدووو جايب الموبايل ..
يگول اوووو اووووو . هو يسمي الموبايل اووووو .

باوعت صگر ..
-صح النوم ياحلو
-هههههه شمدريك نايمه ..
-گلبي گالي ..
-ههههههه .
-اگلج حب . الشيخ يگول غداهم عدنا باجر . اني خابرت رافد وگلت انطيج خبر ..
-الا باجر يعني . مو عندي خفارة ..
-اي عادي . من تخلصون غدا اخذج اوصلج اني للمستشفى..
-لاشيجيبك . عادي اخلي اهلي يوصلوني اول .
-تدرين صار ساعة مخلي الصور واباوع .. وحتى راويتهن الامي . وگامت تصلي ع النبي .
تگول جنتي تخبل ..
-هههههه لا شگد عيب . هسا شتگول عليه .
-شتگول يعني . رجال ومرته ماخذين صور جريمه لو شنو ..
-هههههه اممم زين راح اروح يصيحولي .
-على راحتج حبيبتي .
باي
باي ..

تعشينا وكملنا . گال رافد غدانا عند اهل صگر باجر . سويت روحي ..
گلتلهم اني باجر خفارة مو تبقون هواي هناك حتى توصلوني للمستشفى وترجعون للبيت ..
رافد .. اي موتتدللين .

ثاني يوم رحنا الضحويه الهم .. بيتهم كبير .
ببداية البيت . مضيف كبير معزول ..
وبعدين ندخل للبيت .
صالة كبيرة واستقبال مفتوح عليه ..
لجوه مطبخ ووصاله صغيرة داير مدايرها غرف ويم المطبخ ممر للصحيات . ودرج يصعد للطابق الفوگ .

بيتهم واسع وحلو والاهم نضيف ..
سلمت على خاله ام صگر واخواته الكبار . وعماته جايات ..واخواته الممتزوجات اني مشايفتهن .. اجن ورحبن بيه
ومايحجن ولايطلع صوتهن بس يبتسمن . دور راحن للمطبخ وبعد ماشفتهن ..
گعدنا يم خالة ام صگر . بالغرفه مالتها ..
صگر ابد ماشفته بعد . عندهم عادة اذا اكو نسوان بالبيت ماكو اي رجال يدخل ..
عندم ممر خارجي يودي ع المطبخ مناك ياخذون احتياجاتهم ويطلعون للمضيف .
طبعا .. رافد دخلة صگر للمضيف وي ابوه وعمامه ..

سولفت خالة ام صگر . ع الزواج وگالت استعجلوا الزلم واني جنت ماناويه ازوجه الا لمن تطلع سنوية اخوه ..
بس بعد كلشي بالقسمة ..
فالاحسن . ياخذ مريته من بيتها للفندق . ومناك يسافرون الدبي ..
وهو هم عنده شغيلات يگضيهن ..
ولو هو تيه الشغل كله من يوم الي خطب وتضحك ..
استحيت من حجايتها ..
ماما .. كلهم هيج علويه .. من يخطبون ينسون الدنيا بفرحتهم .. وبعدين يلتفتون للعيشه والمسؤوليه ..

ام صگر .. شأريد منهم اهم شي سعادتهم واشوف ولدهم .. مو ذاك اسد الي راح وعاف اثنين بنيات صغار

ماما .. خطيه الله يرحمة وبناته يربن بوجودكم ان شاء الله.
ام صگر .. ردته يشيل جنازتي تالي اني

الي شفت جنازته وگبرة .. وگامت تبجي ..

بقينا ساكتين شويه .. دور گالت منى . مابقى شي ع الزواج تلحگين تجهزين .
رفيف .. ان شاء الله من باجر نطلع والله كريم .
دور اشرتلها اجت يمي ..
گلتلها .. اريد اعرف قياس ملابس صگر .. حتى اشتريله .
گالت گومي وياي .. واخذتني الغرفته ..
افيييش ياريحة هلي تخبل الريحة ..
والغرفة مرتبه .
دشداشته معلگة . انتبهت هواي يلبس دشاديش .
رحت اباوع للحجم مالها .
…………………………………
گالت منى .. اني رايحة وشويه وارجعلج .
راحت ..
بقيت اتلمس بغراضه واشم بدشداشته .. ريحته مميزة .
فتحت الكنتور .
اباوع الملابسه شلون مصفطه .
اباوع للقياس مالهن واتلمس بيهن ..

سمعت صوت .. استحيت . طلعت بسرعه گلت لايشوفني واحد شيگول عليه .

لاگتني منى .. ها اعذريني عفتج وحدج ..
رفيف .. لا عادي . بس اريد اروح للمغاسل ..
گالت اكو فوگ .
بس يله تعالي .
رحت وياها ..
مريت ع المطبخ . البنات يطبخن بهدوء وماكو اي صوت ..
رحت للمغاسل ورجعت ..
گلتلهم بنات تحتاجون شي اساعدكم ..
گالن لا ..
انتبهت اكو بنيه گاعده وياهن .. گلتلها السلام وعليكم .
گامت . وعليكم السلام .
حجت منى .. هاي مرت اسد الله يرحمة ..
من گالت مرت اسد .
كسرت خاطري حيل . لابسه سواد من فوگ لجوه .
گلتلها البقيه بحياتج . والله يصبرج .
گالت شكرا ..
طلعت واني گلبي مكسور عليها .

رجعت يم ماما والنسوان بالغرفه . عبدووو يبجي مستغرب لأن من اجينا كان نايم وگعد شاف نسوان وبيت غريب خاف . وهو ممتعود بس علينا ..

صاحت منى .. صيحوا الق وبنين يجن ياخذنه ويلعبنه بالحديقه ..

شويه واجن وحده عمرها اربع سنوات .. ووحده سنتين
يركضون ويلعبون . الشعر اشهب وحلوات . على امهن حلوه .

اذن الاذان كلها گامت تصلي ..
كملنا صبوا الغدا . طبعا اخوات صگر .الممتزوجات
هيلين وشيرين اسمائهم ..
عبالك مكينه .. وبدون صوت . عجبني حيل ..

گعدنا نتغدا كلنا . صاحت خالة ام صگر ..
وين ام بنين ماتجي .
منى .. تستحي . خليها يم البنات بالمطبخ ..

واحنه نتغدا .. گالت خالة ام صگر ..
گالج صگر لو لا ..
گلتلها .. شنو
گالت .. اسمعي يمه انتي بعد صرتي بنيتنا . احنه من راد صگر يخطبج الشيخ ماقبل ومن غير مايعرف انتي منو ولان احنه عوايدنا السيد ياخذ علويه ..
بس لان صگر هاويج .. الشيخ گاله اذا اخذت عاميه . تلبس لبسنا وتاخذ طبعنا ..

صفنت عليها .. انحرجت لأن الكل گاعد وحجت . ومااگدرت احجي شي ..
گالت .. يعني تلبسين عبايه مثلنا وتاخذين طبعا شلون البنات يلبسن تلبسين .. وخفارات مانريد لان مو حلوة جنة الشيخ والساده تبات برة بيتها بالليالي ..

احس روحي تغلي وهي تحجي .
گالت مو تزعلين انتي حاله حال بناتي ومثل ماانصحهن انصحج . المرة مالها . غير بيتها ورجلها .
وهاي ام بنين .. من اخذت اسد جانت تدرس . بس بعدين تفرغت البيتها ورجلها وبناتها .

هي تحجي واتي ساكتة احس روحي بدوامة مااعرف شنو تاليها ..

تغدينا وكملنا او بالاصح بس انقش .. لأن من قهري ماگدرت اكل شي ..
.. شويه واشرتلي منى . گالت تعالي .
رحت . گالت صگر فوگ يريدج ..
گلتلها خاف عيب ..
گالت لاعادي وانتي مرته بعد ماكو عيب .
واني هنا اداري عليج اذا سألوا ..

صعدت ورجليه تصعد بثگل ..
شفته واگف فوگ ويضحك ..
سحبني ودخلني للغرفه ..
بوسني بخدي . وبالعاده اني استحي ومااخليه . بس من التفكير. مابديت اي ردت فعل ..

صگر… شبيج حبيبتي بيج شي . احد سمعج حجايه ..
رفيف .. لشوكت ناوي تضم عليه .
صگر .. شنو .
رفيف .. شنو الاتفاق الي بينك وبين اهلك يله وافقوا عليه ..
صگر .. شنو منو گلج .
رفيف .. امك عبالها انت گايلي . واضطرت تحجي .
صگر .. شگالتلج?
رفيف .. صگر انت من اخذتني اني هذا لبسي واقتنعت بيه . وتدري بيه اخذ خفارات ..
تخطب وبعدين تخليني امام. الامر الواقع . ماتصورتك هيج تطلع . ليش ماحجيتوا من البدايه ليش هسا .

صگر .. رفيف .. انتبهي النبرة صوتج ..
اني اتفقت وي اهلي بس گلتلهم هي دكتورة مو ربة بيت والبسها عبايه . وگلتلهم بعدين اني وياها نتفق على طريقه لبسها محد يتدخل . والجان ع الخفارات گلتلهم من تنقل هنا بعد ماكو خفارات .
ماادري بأمي تسبق الحجي وتروح تحجي وياج ..

رفيف .. وشبي لبسي . لابسه حجاب ومستور .وبعدين شمنتظر يله تگلي ع رأيك بلبسي لمن نتزوج ..

صگر .. لا اني گلت مو وكتها واحنه راح نتزوج ونروح الدبي . گلت بعد مانجي . افاتحج بموضوع الجبه لو عبايه اسلاميه تلبسين شنو الي يريحج ..

رفيف .. هذا رأيك لو رأي اهلك .
صگر .. شنو شايفتني زعطوط . لو اريد اخذ حجيهم من البدايه گتلج . بس اني ردت نحجي بهداوة . ولان هنا منطقه شعبيه مايعرفون دكتوره وشي .
اسمج مرت صگر ابن الشيخ غالب . ومرت سيد .
تضل تنتقد .
خارج الگرنه مااحجي وبكيفج . بس للدوام تلبسين ..

رفيف .. مو گتلك لانستعجل . خلينا نعرف بعض اكثر .
اني اختاريتك لان دارس وفاهم وماتهمك هيج شغلات .ولان شفتني ع طبيعتي واختاريتني ..

صگر .. وفعلا ماتهمني .… قاطعته ..
ر

فيف .. اني حتى اخوك مادريت بي متزوج وعندة بنات الا هسا
حتى اخواتك الممتزوجات ماشايفتهن ولا اعرف اساميهن ..شفت شلون مااعرف شي عنكم وعن عائلتك .
احس روحي غريبه بينكم ..

صگر .. شنو غريبه .ليش تتحسسين. شي طبيعي باول فترة هيج وبعدين تتعودين ..
واني نفسي مثل ماعرفتيني ومااتغير ..
وبعدين اني عبالي تدرين بمرت اسد .
ومااجه ببالي اذكرها . لأن هي خلصت العدة عند اهلها . وبعدها تجي فترة وتروح . واني بحكم شغلي مامتواجد وناسيها والله ..

سكتت ودموعي نزلن . رفع راسي بإيدة وگال . لاتاخذين الامور بجديه . والعمر گدامه تعرفين كلشي عنا وتتعودين .
مااريد اشوف دموعج .. اضحكي يله ..
ابتسمت بس داخلي يغلي ..
گال .. اي هيجي اضحكي . واني احرگ الگرنه كلها علمودج ..
……… .…… …………………………… ..،.
گال خلينا ننزل . ومن توصلين نتخابر ونسولف على راحتنا ..

نزلت . هو راح للمضيف . واني رحت يمهن .
اباوع على ماما تريد تنفجر . وساكته ..
شويه . وگالوا رافد دز عليكم يگول يله ..

حسيت انطوني افراج . بس اريد اطلع ..
سلمت عليهن وبوستهن كلهن وطلعنا .
طبطبت ع ظهري خاله ام صگر وگالت ..
مو تزعلين مني يمه ..
ابتسمتلها وطلعت ..

شفت صگر والشيخ بالباب . سلمت عليه وبوست ايده
گال الله يرضى عليج بنيتي ..
يوم الي تنورين الگرنه من صدگ ..

صگر عينه عليه ويبتسم ..
صعدنا بالسياره ومشينا ..
الطريق كله ساكتين . ومانحجي ..

رافد .. اين انتم ياقوم . شنو السالفه شكو صاير شي .
ماما .. مو وكتها خلينا نوصل وبعدين ..

وصلنا . دخلت گبل الغرفتي بدلت .
صاح رافد .
طلعت . گال فهموني شصاير ..
سولفتله امي كلشي ..
ضاج وگال ..
ليش ماحجوا من البداية وخلوا شروطهم شنو يخلونا امام الامر الواقع ..
اذا احنه اخوتها وراضين على لبسها وحجابها قابل هي طالعه عريانه ..

ماما .. يردوها مثل بناتهم يأمرون وينهون عليهن . اربي واكبر واوصلها تالي الغرب يمشوها ع مرامهم .. اني امها ومايوم ضغطت عليها بشي .
وفوگاها تقارنها ببناتها ومرت ابنها . وتفتخر لأن بطلوها من المدرسه . هالترملت وبقت لاوضيفه التنفعها ولارجل .
رافد .. يمه كافي . مو عوايدج هيج تحجين بمكان ماتهديها تشعليها .

ماما .. اسكت يمه من قهري احجي . لو حاجين من البدايه جان تفهمنا موقفهم . بس مو عقدوا سيد ومحكمه ومابقى شي ع الزواج يله يحجون ..

رافد .. صحيح حجيج يمه .. بعدين هي عليها برجلها ولو يريد هو يگلها. ورفيف عاقله وبالكلمه الحلوه والضحكة تخلي الناس غصبا عليها تقدرها وتحترم مكانتها ووضيفتها ..
تركتهم يتناقشون ورحت . اتصلت ع سوزان .
حتى الدوام نسيته .
گلتلها تاخذلي اجازة ..
سوزان .. ليش اكو شي ..
رفيف .. لا بس هسا اجينا من بيت اهل صگر وتعبانه .
سوزان .. عيني عيني . قابل مثل حظي مگابله المراجعين بلكي يجي واحد مثل صگر ههههه .

ضحكت وسولفت وياها بس على عيوني .
سديته منها ونمت . من اضوج او اتعب علاجي النوم ..
گعدت بالليل مكسر جسمي تكسر ..
شفت اتصالات من صگر ورامي ..
صگر مااگدر احجي وياه بعدني ضايجه منه .
اتصلت على رامي ..
رد عليه .. هلو حبيبتي شلونج گالولي ضايجه وحتى دوام ماداومتي ..
رفيف .. ماكو شي حبيبي تسلم ..
رامي .. اگلج رفيف .. اذا تحسين نفسج تورطتي او تندمتي گولي . مدام بعدكم بالبدايه . مو اول ولا اخر وحدة تفسخ خطوبتها .
عندي سعادتج وراحتج . اهم من حجي العالم .
رفيف .. اووووف هاي ماما گالتلك . ماكو شي تفاهمنا اني وصگر وخلص . ماما وحدها كبرتها ..
رامي .. اكييييد . اطمأن .
رفيف .. وعيونك حبيبي . لو احس نفسي متندمة من غير متگول انت ..
رامي .. ريحتيني . الله وياج يبعد اخوج .
رفيف .. الله وياك حبيبي. دير بالك على نفسك ..

سديته منه .. اتصل صگر ..
رفعته .. گال شفتي مكالماتي شگد ..
رفيف .. كنت نايمه ماادري .
صگر .. وهسا مو مشغول ..
رفيف .. اي اتصل رامي وجاوبته ..
صگر .. كلها تطمنيها عليج وكلها اهم .. الا صگر. لو يشتعل من الليل للصبح ماتهتميله ..
رفيف .. صگر شبيك .... گتلك نايمه وهسا گعدت واتصل رامي وجاوبته بيها شي .
صگر .. لا مابيها . اني الغلطان . عود من تصحين اتصلي بيه . خليج ع راحتج ..
مع السلامه .
گتله باي . وسديته . لأن فعلا ماعندي مود اخذ وانطي وياه بالحجي . وبعدني ماصاحيه .
فتركته ع راحته .…

يتبع………

///البارت العاشر
درب العشك
للكاتبه شمس ❤
وإن للعشق دروب لا يسلكها إلا ساكنيه….

عصب صگر عليه وسد الموبايل ..
گمت غسلت وحسيت بجوع .. فتحت الثلاجة شفت اكو كباب عروك . ومطيب اذا بارد .

واكو قشطة .. طلعتها وسويت جاي .
وحميت خبزة . خليتهن بالصينة نزل رافد ..

واخيرا گعدت الزعلانة ..
ابتسمتله ..
والله انتي خوش اخت . خليلي گوب وياج . جعت .
خليتله كوب جاي .
وگتله خلينا نگعد بغرفتي .
لا نگعد ماما ..

جاب مي واجه وراي ..
گعدنا بالگاع . وخلينا الصينيه . واحنه دا ناكل .
گال .. باعي رفيف . انتي واعية وكبيرة وماكو داعي اعرفج مصلحتج ..
بس لاتأثرين على سعادتج وحياتج بأمور تافهه ..
عندج مشكله حليها بالهداوة .
واحجي وي صگر بتفاهم مو تزعلين وتتخذين موقف .
مو من اول غلطة تاخذين موقف ..
انتو بعدكم. بأول الطريق . ومتعرفون بعض .
بمرور الزمن تتعودون وتعرفون شلون تحلون مشاكلكم من خير اي تدخلات ..

رفيف .. اني مزعلانه عليه . بس ضجت شويه .
رافد .. اعرف اني جاي احجي وياج بصورة عامه وللمستقبل . مثل ماتحترميني احترمي زوجج .
شلون من اعصب عليج واضوج تجين تقشمريني بسالفه وضحكة وتنسيني ..
ساسي زوجج هيج . وعامليه شلون تتعاملين ويانا .
صيريله زوجة وحبيبه وبنته وكلشي .
حتى هو بالمقابل يحتويج ويتصرف وياج صح ومايفكر يزعلج .. كسري عينه بالكلمه الحلوه ..

هو يحجي واني منصيه واستمع ..
گال .. لاتخجلين مني . اني اخوج الكبير . ومو تگولين انت بمكانة بابا . اعتبري ابوي جاي يحجي وياج .

گمت حضنته وابجي وهو يطبطب ع ظهري ..
گال يله كافي مو الجاي برد ..

ضحكت . گاتله ثلج ..
خلي ابدله .. گال لا خليه .
اكلنا شويه وكملنا . راح رافد الغرفته .
واني غسلت المواعين ورجعت ..
گعدت ع السرير . وفتحت الموبايل ..
دزيتله رساله ع الواتساب ..
💬نمت لو بعدك گاعد ..
بسرعة دزلي ..
💬منتظر رحمة الله تنزل ..
صدگ ضحكني ..
رجع اتصل ..
گتله . الو
گال .. شلونج هسا صحيتي .
-ليش تتخذ موقف بسرعه . والله كنت تعبانه وضايجه ونمت واني حتى اهلي يعرفوني اذا اضوج علاجي النوم .
-وشنو الي ضوجج حجايات امي .. گتلج انسيهن اعتبريها ماحجت . والي ترديه يجرالج .
انتي الي اتخذتي موقف وعبستي وجهج لان گالج البسي جبه . شبيها اذا غرت عليج . مايحتاجلها كل هذا التعصيب والزعل .

رفيف .. يعني اني الغلطانه ..
صگر .. لا آنة .. آنة الي غلطت . آنة .
رفيف .. شبيك صگر . ليش متتفاهم ..
صگر.. رحمة الذاك الاب الطيب . سدي الموضوع .
اني اختاريتج لان واعيه وتتفهمين الامور . بس هسا انتي على اتفه الاسباب تنفعلين ..
رفيف .. يعني اكتشفتني غير مو . براحتك اذا تريد تبطل مااجبرك ..
صگر .. وج مو انة الي اترك مرة بنص الطريق . وخاصه اذا كانت المرة الي اختارها گلبي ..
استغفر الله . انتي ليش تفسرين الامور على هواج ..
رفيف .. امممم خلص راح اسكت ..
صگر .. هفففف حبيبتي يروحي افهميني . امي حجت بعفويه اني شنو ذنبي . اني گتلج مموافق على شروطهم . وگلتها الهم .. بس سكتت الخاطر تكمل خطبتنا وتصيرين من نصيبي ..
رفيف .. يعني اهلك مارايديني وانت الي جبرتهم ..
صگر .. من اشتعلوا اهلي .. اتركيهم يابه انسيهم انتي عليج بيه وبس . اني اهلج واهلي . اني اصيرلج كلشي بس اريدج تحبيني وتسعدني كلشي مااريد منج بعد .
وگتلج مستعد اوگف بوجه الكل علمودج ..

بقيت ساكته ..
صگر .. يله سمعيني ضحكتج . ترى انه ضايج واريد اسمع ضحكتج لان بس هي الي تريحني ..

ضحكت عليه فعلا. شلون گدر يقلب الموازين الصالحة ويقنعني ..

صگر .. اي هيج من الاول . ليش خليتيني من طلعتوا لسا على نار . بالقرآن لسا مامتعشي ..
محترگة روحي . شفتي كم مكالمه متصل عليج .
حتى ماسنجر حاجيتج وماكو .

رفيف .. ماشفتهن ..
صگر .. متعشيه لو اعشيج انة ههههه .
رفيف .. اي هسا اكلت شويه .
صگر .. اويلي ع الشبعان وتاركة رجلها جوعان .
رفيف .. هههههه من اصير يمك اعشيك بيدي ..
صگر .. منتظر هاليوم ساعه ساعه ..

تصالحنا .. وبقينا سهرانين للصبح نخطط الزواجنا والسفرنا وشنو ناخذ ويانا وكذا .

الى ان طلع النهار . گتله روح نام شويه خطيه مانام من وراي ..
واني رجعت نمت ولل 11 الضحى يله گعدت .
شربت كابتشينو بس .
لأن يحرمني الغدا ..
وگلت الماما . نطلع من وكت ورى الغدا . نبدي نجهز .
كانت نضرات امي باستغراب .
كنت مرتاحة ومتحمسه حتى اجهز ..
الي يشوفني البارحة ميگول هاي نفسها اليوم ..

تغدينا وكملنا .. نضفت المطبخ . ودخلت سبحت وبدلت .
وماما بدلت . وهنودة هم اخذناها ويانا .
وعبدوووو بقى يم رافد . واخذت سيارته اني اسوق حتى نفتر براحتنا ..

ماخلينا مكان يعتب علينا .. اول مابديت اشتريت جهاز صگر . ماخليت شي مااشتريته اله حتى الفرشاة والمعجون .. العطور من الغالي والمعطرات ..
واشتريتله جنطه حتى اخليهن بي ..
اني اشتريت كم حاجة ووازانا الوقت .
رجعنا ..
صگر سوالي اجازة ومااعرف شلون رهمها ..
بقيت كل يوم اطلع .. اش

تري حتى اكمل جهازي ..
لفت انتباهي محلات الجبب .
دخلت عليهن . الجبب يخبلن تگول فساتين مو جبه ..
اخذت كم جبه الوان مختلفه . حلوات حيل .
ورهمت شالات وياهن .
گلت اسويله مفاجأة الصگر .

………………………………………
من وصلنا للبيت . لبست وحده واخذت بيها صورة ودزيتها . كتبتله 💬 شنو رأيك ..
بقى شويه يله شافها . اني انشغلت بترتيب الغراض .
اجيت شفت الرساله💬 تخبلين يروحي اصلا زادتج جمال كبرتي بعيني هواي . شكرا الج ..
دزيت 💬 كلشي يهون الخاطر حبيبي ..
💬 ههههه اموت عليج . صايرة تدلليني هواي وترى گلبي رهيف ومااتحمل ..
💬 ههههههه اتدلل عليه تدلل .
💬 اتعبج مو…..
💬 تعبك راحة كبد
💬 خرررررب شتعلوا ال تميم كلهم .

ضحكني ..
اجه رامي همزين صادفت اجازته قبل زواجي ..
بقى كم يوم على زواجي واحس نفسي عندي نواقص هواي ..
صگر يهدي بيه ويگلي لاتشترين هواي اشياء من نسافر نشتري ..
وفعلا بقيت هواي اشياء اخذها من دبي .
اخذت فساتين للحنه .
وملابس نوم وملابس للطلعه هناك البسهن وتراكات ومكياجات ..

اجت رحيق قبل كم يوم . وهم تساعدني خطيه . اخدنا رامي للسوگ . اشتريت غراض الحنه والصينيه وهاي السوالف ..
وحجزنا فستان الزواج والحنه . واخذت فستان الزواج بي فتحة بالضهر طويله . يعني طالع ظهري كله .
والردن شيفون . وبعدين رحنا حجزنا صالون ..
حسيت روحي ميته من التعب ..
رجعت گبل نمت ..

قبل يوم الحنه بيوم . بدت الوفود قادمة من بغداد .
خالاتي وبناتهن وبنات خوالي ونسوانهم وحتى بيبي اجت كانت فرحة لاتوصف .
عماتي ماقبلن يجن زعلانات ..
بس بيت عمو حسن گالوا نجي ..

رحنا قبل يوم للصالون اني وهند . حفينا وجهنا وسوينا ماسك . صبغت شعري اشقر رمادي فاتح حلو حيل .
گلتلها . اريد وشم ع ضهري .. سوتلي زخرفة وبوسطها اسم صگر ..
صورتها الي هنوده . حلوه حيل ..
رتبت اضافري وسويت تنضيف بشرة الجسمي كله .
طلعت توب . ب 8 بالليل يله خلصنا من الصالون .
طلعت حلوة حيل وتغير شكلي جذريا ولاعبالك ..
اني نفسي .. حتى اهلي وكلها تعجبوا بيه ..

رجعت للبيت تعبانه حيل .
لگيناهم فارشين السفرة ع طولها واللمه الحلوه .
وكلنا بنات . بس رامي ورافد بنصنا هههههه .
تالي البنات طردوهم بعد العشا .
گالولهم رحوا كوفي وين ماكان بس مترجعون قبل ال 12 ..

بعدها دخلنا للاستقبال . بنت خالي تعرف تسوي كوشات مال عرايس ..
سوالي كوشه حلوه ورتبتلي جانب من الاستقبال وخلت طاوله وعليها صينيه البخت مثل ميسموها . وقراأن وشموع وبعد شغلات . طلعت فد شي راقي .
كانت الكوشه باللون الابيض والذهبي على لون بدلتي مال الحنه ..

بعد التعب رادن يرگصن ويدگن . گلتلهن راح اغفى هنا بعد مااتحمل ..
گالن .. لعد باجر ماكو حجة سهرايه نسوي وداع العزوبيه ..
گلتلهن اوك . بس اريد اخلص نعسانه .

رحت لفراشي ..
اريد انام اتصل صگر .. خطيه اليوم نسيته وانشغلت عنه بس مرة بالصالون خابرته ..

رفعته وگلت الو .
صگر .. هلو حبيبتي اليوم ناسيتني .
رفيف ..اسفه حبيبي تعرف تجهيزات وصالون وباجر حنه وهوسه ..
صگر .. هنيالكم الا اني اكسر الخاطر . ولاعبالك باجر حنتي ..
رفيف .. اي صدگ نسيت .. عادي تعال باجر حنيني واحنيك وروح .
صگر .. لا زحمة وبنص النسوان داخل .
رفيف .. لا تعال واگعد يم اخواني . من يرحن النسوان واني اصلا عازمه بس اقاربنا ماكو غريب . بس علمود الصور ..
صگر .. لا مااگدر شيجيبني .. وعندي شغل ..
رفيف .. على راحتك ..
صگر .. شو ماراوتيني شسويتي .
رفيف .. لا خليها سبرايز ..
صگر.. وشيصبرني . مو يومين راح يصيرن سنتين .
رفيف .. هههههه الي يريد الحلو يصبر على مرة ..
صگر .. ماتشوفيني صايم ومتحمل كله علمود اضوگ الحلو ..
رفيف .. ههههه وگمت اتثآب .
صگر .. الحلو نعس .
رفيف .. اي والله نعسانة وتعبانه .
صگر .. اشوفج بالفندق تعوفيني وتنامين
رفيف .. والله اذا تعبانه انام ليش لا .
صگر .. لا والله . دروحي نامي ولاتگدين باجر واشبعي نوم . ترى بالعباس لو تونين وتبجين مااخليج تنامين .
رفيف .. ههههههه لا ادري بيك تحبني وماتسويها .
صگر .. روحي نامي واراويج منو صگر ..
رفيف .. هههههه باي .
صگر .. الله وياج .

ماادري غلقته لو لا بس بسرعه غفيت . نمت نومه عميقه من التعب.
ماگعدت على صوت الفيلق مالتي . كلها تگول. گومي صارت التسعه شوكت بعد ترحين للصالون .
خبصني خبص .
گمت وجسمي مكسر .
گامن يدگن ويرگصلي بالغرفه .
اجت ماما گالت روحي اسبحي حتى تصحصحين . وتجففين شعرج .
سبحت وجففت شعري ..
وتريكت شويه علمود الجاي .
وبدلت . گالت رحيق يله رامي منتظر .
اخذنا رامي وطول الطريق مشغل اغاني ويصفگلي .
يگلي ..
اها وين لاگيه هيج اخو ويرگص بحنة اخته ..
گتله .. طبعا ماكو انت عمله نادرة حبيبي ..
وضحكنا .

وصلنا للصالون .
بدن يسولي منكير وبدكير ..لبست العدسات وكانت لونهم رصاصي فاتح .. ووياها رموش طلعت فد شي .. وبعدين سوولي تسريحة ومكياج يرهم لجميع الفساتين .
مالبست بدلة گلت من اروح للبيت .
اجه رامي اخذني گعدني يمه وگ

ال الرحيق اگعدي ورى هههههه . وگال اول واحد ياخذ سلفي وي العروس اني وهم شغل اغاني الى ان وصلنا .

دخلت البيت ولبست البدله بسرعه .
واخذت صور بالكوشه .. ودور اخذنا صور جماعيه اني والبنات .
واني وماما واخواني ..
وبعدين بدوا يجون المعازيم . واجن صديقاتي دكتورات وسوزان وياهن ..
كانت حفله روعه .. تونسنا حيل ..
گمت كل ساعه البس وانزع شكل ..
الى ان المله گالت يله خلونا نجليها ..
………………………………………
سوينا الجلوه .
وكملنا .
وبدت تخف شويه بقوا بس اقاربنا حتى صديقاتي راحوا
گالت ماما ارجعي البسي بدلتج الذهبي .
گلتلها لا هيج اريح ذيج نفخ مااريدها .
گالت . لا روحي البسيها حتى ناخذ صور وياج بيها . قنعتني بحجايتها . ورحت لبستها ..
واجيت تفاجأت الكل لابسات حجابات ومستورات . شكو . باوعت .. واشوف صگر يم الكوشه ..
انصدمت واضحك ممصدگة..
هو شافني انصدم ويبتسم . بس عيونه اكلتني من فوگ لجوه ..
تقدمت اله . باسني براسي ..
گاله شوكت اجيت .
گال . صار ساعه مصلوب يم اخوانج . وكل ساعه يگولون خلي يرحن الغربه يالله ..
رفيف .. حبيبي اجيت وخجلتني ..
صگر .. جيتي مو خسارة بهالجمال . وين ضامته هذا كله ..
ضحكت اني ..
گال .. نص ساعه واروح ..

گامت رحيق تاخذلنا صور . وحنيته بإيدة وهو هم حناني بإيدي اللخ ..

بعدين اخذته للغرفه نطيته جنطة الجهاز مالته .
بقى يگلب بيهن ويضحك .
يگول شنو الرجال هم يجيبوله جهاز .
وعجبه ذوقي كلش . وباوع للساعه وضحك .
گال . اممممم ماركه ويغمز ..
بعدين گال . عيب اطلعها گدام الجيش الي برة .
گتله . هسا اگل الرحيق تطلعها بالحديقه .
صحت رحيق اخذتها طلعتها ..

وصگر بقى شويه وراح . واخذ روحي وياه . اشتاقيتله وهو يمي . ودي اخبيه من عيون الي يباوعن كلهن ..
حسيت روحي گمت اغار . هذا صگري بس اني الي الحق اباوعله .
وهو شطالع يخبل ..

كملنا الحنه . اخواني دزوا عشا من المطعم .
تعشينا وبدت سهرتهن ..
طردنا اخواني كالعاده ..
وبلدن . وگامن يرگصن ولايتعبن ..
بعد مارجعوا اخواني . جايبين جبس بتيته وكرزات وقواطي كولا .
وگالوا اجه دورنا نسهر وي دلوعتنا .
خلوني بنصهم .. وبقينا ضحك وسوالف واسترجعنا ايام قبل . واتذكرنا وبابا .وبين دمعة وضحكة خلصت سهرتنا وكلمن راح لفراشه تعبنا حيل .
ولگيت حبيب الگلب خابص الدنيا بالمكالمات والرسائل .
دزيتله رساله ..
💬حبيبي اعذرني انشلغت عنك . لان اليوم سهرت وياهم بأخر ليله الي هنا . ومن باجر اني يمك وملكك بس حاليا . خلص شحني ونعست وراح انام .
احبك ..
دز 💬 هههههه حياله . اشبعي نوم اليوم سماح . تصبحين على خير مريتي .
دزيتله . 💬 احبك زوجي 😚

ونمت .. وكالعاده گعدني بدگ ورگص . بس هالمره طفرت بسرعه ..
لان ممحظرة غراضي . گمت . غسلت واجيت .
گلتلها رحيق طلعي الجنطه . طلعناها .
جهزت الي احتاجهن للسفر والفندق . كلشي احتاجه خليته صارن جنطتين كبار ..

بعدين سبحت ورحت للصالون . هالمرة طلبت تسريحة الكل شعري حتى يبين ضهري من البدلة ..
طلعت اخبل . وخلتلي تاج كرستال ولبست طقم كرستال
مالبست ذهب بس الحلقه والخاتم ..

رجعنا للبيت . وكانت عبالك مناحة .
امي واخواني يبجون عليه . اني بالنسبه الهم اغلى شي
صحيح اخر العنقود مثل ميگولون .
بس كنت عايشه بجنه عندهم دلال وعز . قبل مااطلب الحاجة تجيني .
اخواني سندي . اتذكر من كنت صغيره . وابجي على شغله يجمعون مصرفهم ويشتروها الي .
وماياكلون اذا ميذكروني بالاول .
لو شگد مااحجي مااوفي حقهم عليه ..

خالاتي گامن يحجن كافي خربتوا مكياجها ..
هنوده رتبت وجهي ..
واجت ساعة الصفر . اجه صگر ووياه سيارات زلم بس ووياهم اخته وعمته نسوان .

اني خليت البرگع ع راسي . ولبست برنص . بحيث سترت روحي وماخليت شي يطلع ..
دخل صگر والشيخ .
ومن غير مايشوفني اخذوني بسرعه عن اهلي ومالحگت حتى اسلم عليهم وعلى امي واحضنها .
راحت وياي رحيق وهنوده للفندق ..

الطريق كله احس روحي مخنوگه . يحجي صگر وياي ومااحجي . منا السايق والشيخ بالصدر استحي .
طلعت القرآن الي بيدي وگمت اقرأ .
گلت بلكي ارتاح وتروح الخنگة ..
صگر كل ساعه يهمس ويحجي واني مااحجي .
تالي همسلي ..
ختمتي القرآن لو بعدج .
صدگ ضحكني ..
الى ان وصلنا للفندق ..
نزلنا ماكو لادگ ولارگص .
بس جماعته گاموا يصلون ع النبي .
ضربوا كم طلقه بالجو .
اني بسرعه لزمت بصگر حيل .
صگر .. ابوسه بحلگه الضرب طلقه .
الشيخ گام يحجي . لحد يرمي .
دخلنا للفندق . بقينا بالرسيبشن .. شويه واجن رحيق وهند . احس رجعتلي روحي .
گلتلهن وين عفتوني .
رحيق .. وين عفناج غير اجينا وراكم .
هند .. هسا وين عفتوني وبعدين ماتعرفينا وين .
وگامن يضحكن .
اجن عمة صگر ومنى سلمن وباركن .
تالي اجه صگر . گال يله نصعد .
صعدنا بس اني واخواتي وعمته ومنى وهو ..
رفعن البرگع والبرنص .
ورتبني .. رحيق گالت انتي جبيره ودارسه مو تفشلينا .
گلتلها . كافي . گايلتلج احجي اني .
مااحب احد يسولف بهيج مواضيع ..

سلمن عليه وراحن . رجعت هند . گ

الت التبتوعه مالتج
( يعني اهل العروس يحضرون عشا البنتهم بليله الزواج) خليناها وي الجنط خاف يصعدوها.
ورافد جابلج الاكلات الي تحبيها ..
ضحكت . گلتلها بوسيليا .

راحن كلهن . ودخل صگر . دا يدخل بالجنط .
گال شمخليه بيهن ويضحك .
دار وجهه . گام يصفر واجه يمي لزمني من ايدي ويفر بيه .
دور شاف ظهري والوشم تخبل .
گال . مبروك عليه انتي ووووو💑

دخلت سبحت قبله .. وطلعت ..
هو دخل اني بدلت وجففت شعري .
وگمت ادور ع الكارتونه مال تبتوعه .
فتحتها .
وگمت ارتب ع الطاوله ..
اني مخليه شموع حمر معطره بالجنط . طلعت شمعتين وشعلتهن .
سويت جو رومانسي .
ورافد ممخلي جايب بيتزا بالگص وصاج وكنتاكي ومقبلات وفنگر . وكولا .
طلع من الحمام . گال هاي شنو منين جبتيها .
گتله رافد جابهن .
صگر .. ليش يجيب اني وصيت
رفيف .. حبيبي . هاي عادات واسأل خاله البنيه يجيبولها اهلها تبتوعه او عشا .
صگر .. اول مرة اسمع ..
رفيف .. اسأل وشوف ..
صگر .. بس الترتيب حلو والجو رومانسي .
رفيف .. يله تعال ليبرد .
صگر . امشط واجي ..
گعدنا ناكل .. وهو يريد يغيضني . يگول شنو هالاكلات هسا كون قوزي .. ويضحكني ..
اكلنا ورتبت الغراض .
اندگت الباب . اجه ابن عمه جايب اكل .
گال .. خرررب نسيت اگللك لتجيب . رجعه خويه تعشينا المرة جايبه عشاها وياها .
ودخل يضحك .. والله اني مدلل الليله . هم مرة مثل الگمر . وهم عشا . اهلج مدلليني هواي ..
نمنا ع السرير وخلاني بحضنه . وبقى يسولف ويتغزل واني ماادري بنفسي الا غافيه .
شگد عيب باول ليله تركته ونمت .

يتبع...

حبايب ان شاء الله عل باجر اكملها اللعبه
لان اليوم مالحك ..منا شغل البيت مايخلص🤦‍♀😂 ومنا كاعده متاخره

#ملوكه

حبي يرطب البشرة ويمنعها من الجفاف ..فنفس كل مرطبات
ويناسب كل البشرات🤗✨

#ملوكه

هههه..اللي انمسح فااقري عليه السلام
حبي طبعا مايرجع..فانسيهن🥺✨

#ملوكه

فدووة الله يحفظها😍🦋 وتتربى بعزكم

والاسماء كومة اكو حلوات بس رح اذكرلج اللي مو اهواي متكرر..
عندج روان ؛ لجين ؛حنان ؛ لمى؛ نرجس ؛ مها ؛ مينا؛ حنين ؛ ندى ؛ شمس ؛ اريج ؛ هديل ؛ ريهام ؛ ميس ؛ منيرة ؛ غزل ؛ فرح ؛ علا

#ملوكه

حبي اذا هو مخلص ثالث..ماكو شي معين موقع للتقديم🤦‍♀💔

كون يروح ويدور بنفسه..ويشوف شنو اكو مكانات يحتاجون موظفين مثل بالمحلات والمولات او بشركات
وحتلو لو يسأل جماعته واصدقاىه اكيد هم يعرفون


#ملوكه

عمري هو بكل مرطبات تلكين عطر خفيف..فمااتوقع المرطب يسوي تحسس لانو تركيبته خفيفة..اني وصديقاتي نستعمله..ميطلع اي حبوب بالعكس🥺💫 يسوي البشرة ناعمه

فانتي شتسوين 3 ايام غسلي بصابون ركي وباليوم مرتين..واذا عندج عصارة فيوسيدين هم استعمليها لمدة 3 ايام

فمن يروح الحب جربي رطبي البشرة عل نص وجهج..وشوفي منه السبب لو من غيرشي

#ملوكه

حبي السنفرة نفس التقشير😅 ومرة بالاسبوع تقشرين بشرتج واذا دهنية فمرتين

واكو كومه مقشرات طبيعية..هسه اوجهن🙃

#ملوكه