شوف عيوبه قبل ميشوف غيرة
بنتي ممسويه شي خطأ ..
ولهنا وكافي .. اذا ماعاجبك روح انت اني ابقى هنا يم فرح ..

هو بقى يحجي وعصب وطلع ..
مااهتميت .. مددت يم شهودة وخليتها بحضني ويمي ..
وهي كل شويه تفتح وتباوعلي وترجع تنام ..
وماتركت اصبعي ابد ..

شويه واجت تماضر وزوجها ..
گعدت يمنا وتبجي ..
وج فروحة شوفي شلون حاضنتج .. گلتلهم مرضها كله بسبب بعدها عنج محد سمعني ..

اووووف مااعرف الومكم. لو الوم الدنيا الي ضلمتها ..
فرح .. كافي تماضر عفية ..
بلا كلشي اني متدمرة وندمانه ..
وج ساعه اگول لو دايسه ع كرامتي وقابله ارجع علمودها جان ماصار الي صار ..
مااتوقعت هيج يصير ..
وبأخر فترة عذاب عاند وراد يعاقبني .. بس طاحت ضحيتها شهد ..
تماضر .. الي صار مكتوب وقدر الله .. بس الاهم علاجها نصفه براحتها النفسية ..
خليج يمها ولاتتركيها ع الاقل الى ان تشفى .

فرح .. وليش منو گلج اتركها بعد .. راح تعيش وياي وين مااكون .. عود اذا يريد اخوج خلي يتزوج ويجيب اولاد بس ماانطيه شهد ابد ..

تماضر .. والله يربي مااعرف اضحك لو انقهر .. وج هو يريدج انتي وشهد مايريد غيركم لسا مافهمتي ..
الي سواه حتى ترجعيله بس اثنينكم دماغكم يابس وعاندتوا ..

اجة عذاب وزوج تماضر دخلوا لان كان منتضر برة ..
عذاب .. ها شلونها ..
فرح .. ع نومتها لسا ماتقبل تگعد ..

سلم زوج تماضر عليه وگال يارب الشفاء العاجل ان شاء الله..
باوع عذاب الماما وگالها ..
خاله خلي اخذج للبيت اني هنا يمهم ..
ماما .. لامااتركهن. شعندي خليني هنا وهاي سدية فارغة يمهم اگعد بيها ..
عذاب .. براحتج بس لان ردت جنسية فرح ومستمسكاتها علمود اسوي جواز ..
ماما .. اي الصبح من اروح روح وياي وانطيهن الك ..
باوعلي وگال .
حتى بس اكملها ويحتاجوج للبصمة اجي اخذج ..
تماضر .. يعني فرح تسافر وياك ..
عذاب .. اي لازم امها وياها تعرفيها من تتمرض تتنحس وماتريد احد ..
تماضر .. عين العقل .. اتركوا كلشي ع جنب وفكروا ببنتكم…

راحت تماضر وزوجها ..
واجو بيت خالي هو. وزوجته ..
بسرعة طش الخبر شلون ماادري ..
ومرت خالي ماتسكت وتگول .. هاي البنية ضحيه وتعذبت لو ماجاية للدنيا احسن .. انهملت لاام ولاابو ومت من هذا الحجي ..
ماما ماسكتتلها ..
ليش انهملت فرح امها وربتها وتعبت عليها وسهرت ويمكن لو امها عايشة ماسوت مثل فرح ..
عذاب .. رجاء مو. وكت هذا الحجي .. الي يجي يسلم ويروح بلا حجي اهلا وسهلا ..
والي مايعحبه لايجي .. هذا مستشفى مو محفل غيبة وگالات ..

هي عرفتها ع روحها سكتت ودور اشرت الخالي وراحوا ماعجبهم كلام عذاب ..

بقيت اني گاعدة ومخليتها بحضني وعذاب گاعد يمي يمسد براسها ويبوس بيها ..
باباتي يروحي .. طيبي ولاتخوفيني عليج والله تدمرت وكبرت عشر سنين من سمعت بمرضج ..
هو. يحجي واني ابجي مااتحملت ..

ماما .. كافي شنو الحجي والبجي اسم الله .. مايصلح مگابلين البنيه بهذي المغربية وتبجون ..
گولوا يله وان شاء الله يشفيها ..

عذاب .. والنعم بالله .. اني طالع شويه برة تحتاجون شي ..
فرح .. لا سلامتك ..
اجة الممرض .. اخويه ميصير مخليتها بحضنج اتركيها بسريرها خلي ننطيها علاجها ..
فرح .. لاعفية خليها بحضني ماترتاح اذا موهيج متشوفها لازمتني ماتتركني ..

راد ينطيها العلاج الكانونة خربانه ..
گال راح اجيب جديدة واجي اسويلها ..
فتحها وسوة الجديدة ..
فزت وگامت تبجي وتفرفح. واني ابجي وياها ..
باوعلي الممرض وگال ..
اذا الام هيج شلون الطفله .. هيا شلون نسكتج لو نسكتها ..
عذاب اجة ماعجبه كلامه ..
وعصب ..
گاله .. اخوية كمل شغلج بسرعه متشوف البنيه ماتت بجي ..
عاد الممرض سكت وكمل الكانونة. وخلالها العلاج ..
وطلع ..

احسها تلوع وتبجي من يخلولها العلاج وماتتحمله ..
ومن اشوفها هيج اموت ..
گال عذاب .. فرح لازم تصيرين قويه .. اذا ضعفتي مانگدر نتغلب ع المرض ..
شهد تباوعلج وتستمد قوتها منج ..
اذا ابتسمتي بوجهها وحسستيها بالامان راح ترتاح وتتطمأن ..

فرح .. عذاب متشوفها شلون تلوع من العلاج .. بعدهي صغيرة ع هيج مرض ماتتحمل ..
عذاب .. شنسوي هذي ارادة الله .. حاولي تكونين اقوى اذا طلعنا للاردن شلون ..
اني من اشوفج ضعيفه وتبجين انهار .. لازم واحد يساند اللاخ ..

مسحت دموعي وهزيت راسي .. ان شاء الله

طلع هو جابلنا عشا واجة..
گالتله امي مو هذا الاكل جابه بلال ..
گاللها بلال جايب دجاج وفرح ماترغب للدجاج بالليل ..
جبتلها شاورما تحبها ..

بقيت صافنه عليه .. معقوله حافظ شنو الي اكله والي مااكله بالليل ..
ماقبلت اكل ..
بس گال الخاطر شهد اكلي ..

ابتسمت ومااتحملت .. گتله .. ماعرفتك وانت حنين وهادئ..

ضحك .. خرب يومج يعني وحتى انتي بأسوء حالاتج مافوتيها الي ..

فرح .. لا بس صدگ استغربت ممتعودة ع حالتك هاي ..
عذاب .. هذا اني وطبعي هيج دايما بس الوكت والضروف ووو .. سكت وگال هي الي خلتني غير انسان وغيرت طبعي ..

گام من مكانه وگال اتعشوا انتو ع راحتكم اني طالع برة اخذلي جكارة وارجع ..

ط

لع شفت نضرات امي العجيبه..
ماما .. شنو هالميانه الزايدة لاتنسين انتي هنا علمود شهد وبس لاتخليني اندم لان وافقت تطلعين وياهم ..
فرح .. صدگ تحجين ماما اني ويني ووين هذي السوالف ماما ...لاتصيرين غبيه وتنسين كلشي بسهوله .. خليج عزيزة وراعي شهد وبس ومعليج بي ..
فرح… اووووف ماما عفية كااافي وربي بعد مااتحمل احس روحي تريد تطلع گوة مصبرة ع نفسي وانتي تگليلي خليج عزيزة ومدري شنو ..

لليل گامت ماما نامت ع السدية الي مقابيلنا ..
وهو. اصلا ممنوع الا مرافق واحد وي المريض بس ماما عاندت الا تبقى ..

وعذاب طلع برى گال اي شي يصير لو تحتاجون شي خابريني ..

بقينا كم ع نفس الوضع ..
عذاب منتضر جوازي يطلع حتى نسافر ..
وبالليل لو ماما لو خالتي يبقن يمي ..
الزيارات انگلبت علينا الكل اجانا ..
اتصلت زهراء وسولفتلها ودموعي تجري ..
گالت هسا اخلي بابا لو مصطفى يجيبوني ..
ماقبلت تجي خطيه شيجيبها ..
بس هي اصرت ..

وصدگ ساعه وجايه .. وحايرة شجايبه وياها ..
خجلتني ..
سلمت ع عذاب هي ومصطفى .. وعذاب ماقصر بالسلام والترحيب ..
زهراء .. شمنتضرين متطلعوها للخارج ..
فرح .. اي راح نطلع للاردن بس اني الي اخرتهم على ماسويت جواز ماعندي ..
باوعتلها ياعيني شلون لازمة ايدج ..
فرح .. هي هاي من يوم الي اجيت لسا مافرگتني حتى من رحت للجوازات ..
اجيت لگيتها ميته بجي ..
زهراء .. خطيه صايرة عندها رهبة خاف تتركيها .. بس حيل ذبلانه ..
فرح .. اي راح ذاك السمن والخدود تتذكريها بعيد ميلادها ..
هسا الي يشوفها يگول بعد كم شهر يصير عمرها سنتين
زهراء .. الله كريم اهم شي تشفى والسمن والعافية يجن وحدهن…
اتصل عليها مصطفى..
گالت اني رايحة لان مصطفى عندة شغل بس راح اتصل واجيج مااتركج ..
ها فروحة اي شي تحتاجيه گولي ..
الله عليج من المليون للعشرة ..
فرح .. لا يعمري عساكم دوم بخير ورزق بس الحمد لله عذاب رتب امورة وباع البيت وعمو بس يصفي شغله يحولنا فلوس ..
زهراء .. ميخالف بس خاف يجي يوم وتحتاجين خليني ببالج ..
فروحة… ادري بيج متقصرين انتي اخيتي الي ماجابتها امي ..
بوستني وراحت ..
سولفت العذاب عليها وموقفها ..
گال هو كلامها كافي .. وحتى خطيبها مبين حباب ارتاحيتله ..

اتعجبت من ردة فعله . حسيته فعلا انسان ثاني ..
مو نفسة عذاب الي عاشرته ولا عذاب الي كانت تسولف عنه منار ..

لليل خليت شهودة بحضني وتمددت بصفها ..
الدكتور گال لتخلوها تسخن حيل سوولها كمادات وشراب شربوها ..

عذاب كالعادة يطلع ويرجع ..
حتى دوامة. ماخذ اجازة وميروح ..
وخالتي نايمة…
تلمستها حرارتها عاليه ..
گمت طلعت خاولي ..
وبللته بالمي .. وبديت اسويلها كمادات ..
بس حرارتها بعدهي مرتفعه ..
خفت حيل .. اخذت شراب شربتها اتقيأته كله .
معدتها ماتتقبل اي دوة ..

حرت شأسويلها ..
سويه وگامت تنفض وترجف بيدي وانشمرت ..
گمت اعيط بلا وعي ..

ركضت اريد ممرض لو احد يجي ماكو ..
خالتي تلطم .. يمة البنيه راحت ربي ارحمها وتدعي وتبجي ..
بلا وعي شلتها واركض ونسيت نفسي حافية گلتلها خاله بسرعه اتصلي ع عذاب ..
وطلعت بس اعيط واصيح اريد احد يجيني ..
احس الردهات كلها طلعت ع صوتي ..
تلگاني الممرض ودكتور مقيم ..
اخذوها مني ودخلوها للغرفه ..
شافني ابجي واعيط ..
طلعني وگال قلقتينا خلينا نشوف شغلنا ..

اجة عذاب يركض وخالتي وراه ..
گال شبيها ..
-عذاب مااعرف الحگها طلعوني ميقبلون ..
دخل عذاب وترك الباب مفتوح ..

اني اباوع وابجي وادعي ربي لاتختبرني بيها .. اخذ من عمري وانطيها ..
موتني وطيبها بس لاتخليني اشوف يومها قبل يومي ..

طلع عذاب .. گال اهدي انطوها ابرة وهسا احسن بس تنخفض حرارتها ناخذها للردهة ..
دخلت اشوفها ..
تباوعلي وتون ..
سودة عليه ياماما وين جانت الج هاي ..
خليت كرسي وگعدت يمها ..
خالتي من الهبطة تخربطت .. اخذها عذاب يقيس ضغطها
شويه ورجع..
شاف ممرضين واگفين ضاج ..
بقى يخزر ..
يله گومي روحي يم امي بالغرفه اني راح ابقى يمها هنا ..
فرح .. شلون اتركها متشوفها تون ..
عذاب .. گتلج روحي متشوفين امة لااله الا الله هنا وانتي بنصهم .. همسلي بعصبيه ..

گمت بسرعة. ومن غير نقاش .. من خوفي ع شهد وقلقي ماشفت الي حولي ولاحسيت منو وكم موجودين بالغرفه ..

رحت الخالتي لگيتها نايمة ..
شافتني گالت ها يمة شلونها هسا ..
فرح .. لا احسن الحمد لله احس روحي راحت من شفتها هيج ..
خالتي .. وج يمة احس گلبي وگف من شفتج تركضين بيها وتعيطين عبالي ماتت اسم الله ..
فرح .. لا اسم الله عسا يومي قبل يومها وربي اموت غير ..
خلينا نتفائل وان شاء الله يفرحنا بشفائها ..

رجع عذاب شايلها اخذتها الحضني واشم بيها ..
حرارتها زينه وصاحية ..
نطيتها بسكت ..
گامت تاكل شويه شويه وعصرتلها برتقاله وخليته بالممة شربته ..
ارتاحيت شويه ..

عذاب .. مااخليها هنا .. لازم نستعجل هنا العناية ماعاجبتني ..
باجر خاف اطلع من الصبح ومااجيكم .. لان لازم اكمل كلشي بيدي ماتكمل اذا مااوگف ع راسهم ..
وانتي اي

شي تحتاجيه خلي امي تخابر ابوي ..

عمو. ماكان يجي لان مايگدر من رجله ومايتحمل مستشفيات بس كان دايما يتصل ويسأل كل ساعة .

اجت ماما من الصبح هي وجلال وبقوا يمنا وخالتي راحت للبيت ..
للظهر حوالي ساعة 2 يله اجة عذاب ..
گال مابقى شي .. الاثنين الجايه نطلع ..
بس قبلها لازم ترحين للبيت تجهزين جنطتج وتجيبيها لهنا لان منا ونطلع للمطار ..
فرح .. ان شاء الله.
جلال ماعجبه الكلام وعبالهم اتراجع عن السفر ..
مر كم يوم ..
ورحت للبيت يوم الاحد ..
حضرت جنطتي وملابسي ..
ماما شالتلي كم ورقه گالت هذني ضامتهن للزمن اخذيهن بجنطتج خاف تحتاجين شي وتستحين تگولين ..
وطلعت من مجمع قريب ..
اشتريت ملابس الشهد واحتياجات الي ..
كملت كلشي ..
دخلت سبحت وبدلت ملابسي ..
وردت اطلع اودع اهلي واخواني ..
بس جلال سواله عركة وگال ماتطلعين ع جثتي احنة مو گ… ونخليج ترحين وياه من غير عقد ..
يريد ياخذج وياه يعقد عليج ..
بيومها اتهسترت وگمت اعيط ..
بالي يم شهد وذولي يعرضون طريقي ..
تالي اتصلت بعمو وگتله حاجيهم يخلوني اروح ..
اني اگدر احافظ ع نفسي ..
وفهمته وجودي وي عذاب عمود شهد بس ..
گال يصير خير ..
طلعت سمعت عمو يحجي وي بلال ..
وحجى وي جلال ..
اقتنعوا ووافقوا ..
من غير مااحجي وياهم ولااودعهم سلمت ع ماما ومروة وطلعت ..
لگيت عذاب منتضرني اخذ الجنطة مني ..
صعدت واحس گلبي مختنگ ..
گال .. ليش امج اتصلت بيه وگالت تعال اخذ فرح .. ليش اخوانج وين ..مو عساس هم يجيبوج ..
فرح .. ماعندي اخوان .. وسكتت ..
فهم السالفه وگال ..
هينة ان شاء الله ماكو شي يبقى ع حالة بس الاهم هسا عدنا شهودة خلي تشفى والباقي سهل ..

رجعت للمستشفى واحس روحي تختنگ من ادخلها ..
بس مجبورة الخاطر رويحتي وبنيتي ..

ثاني يوم تجهزنا وبدلنا .. الجنط بالسيارة ..
اجة صديقه فارس وصلنا حتى يرجع السيارة للبيت ..
خالتي ويانا راحت ..
هناك لگينا تماضر وزوجها وعمو ..
سلموا علينا وعمو اتقرب وباسني براسي وگال ان شاء الله ترجعون وهي بصحة وعافية ..
حضنت خالتي وگامت تبجي ..
وگالوا خابرونا كل يوم مو تگطعون ..
نريد نمشي اتصل معتز ع عمو ..
گاله عذاب هذا معتز ..
اخذة عذاب وسلم عليه ومعتز يواسيه ..
تالي گاله انطيني فرح ..
مد ايدة عذاب وگال معتز يريدج ..
استغربت .. اخذتة ..
الو ..
شلونج خيتي ..
ع الله انت شلونك ..
اني بعد الي سمعته مو زين . ربي يفرحكم بيها ويشفيها وترجعون سويه واحسن من قبل ان شاء الله..
گتله ان شاء الله.. ومااتحملت بعد انطيت الجهاز العذاب
كانت لحظة اليمة ومااتمناها العدوي ..
تاركين اهلنا وبلدنا ورايحين البلد غريب حتى نعالج بنتنا .
بس احنه وماكو احد يمنا ..
ماكو احد يواسينا ويطيب خاطرنا ..
كنت اخذ نفس واحاول مااخلي دموعي تغلبني ..
وادعي من ربي انه مايخليني اخلي رجلي وارجع للعراق بعد الا وبنتي بيدي وبصحة وعافية ..
وكانت هذي رحلتنا نحو الامل والتحدي والمحاربة معا ضد الالم والمرض الي صاب وردتنا وبنتنا شهودة ..

يتبع ..

قۣۗـۙصۣۗـۙصٍ 📖ۆبۣۗـۙسۣۗ 💯

💕

//// البارت الثامن و العشـرون ////
من_سيدفع_الثمن ؟؟
بقلم_الكاتبة_شمس

وصلنا للاردن وكنا كلنا امل ..
المستشفى كان تعاملها حلو واستقبالها احلى ..
دخلونا للغرفة ..
وكان يشترط الا مرافق واحد وي المريض ..
گال عذاب اخلص اجراآت الدخول ..
واشوفلي فندق قريب ..
حتى اكون قريب منكم…

كان طول النهار يمنا وميفارگنا بس بالليل يروح للفندق ..
ونبقى ع اتصال دائم ..
مرينا بأصعب ايام ..
بس ماضعفنا ..
كنت كلما انهار وابجي من اشوف حالتها بعد العلاج وشلون تتأذى ..
كنت الگي عذاب يمي ويواسيني ..
اطلعللها .. طيور الجنه وتباوع وتضحك ..
ونلاعبها اني وعذاب ..
وعذاب عساس يختل عنها ويطلعلها فجأة وهي تموت ضحك عليه ..
رغم المرض اللعين ذبلها الا انها مافارگتها الضحكة ..
وجودنا يمها ساعدها هواي وخلاها تتحدى المرض رغم صغر سنها ..
لان الدكتور گال بعد ماعرف قصتها انه الحالة النفسية نصف العلاج ..
حاولي تحسسيها بالامان وانه مابيوم راح تتركيها ..
وهذا الي صار ..
كنت وين مااروح اخذها وياي ..
حتى الحمام من اروح ابلغها واطمنها واخليها تشوفني داخله للحمام يله حتى تطمأن اني موجودة ..
عذاب كل شهر كان يرجع للعراق يجدد الاجازة ..
كانت بدون راتب ياخذها لأن منعرف شگد راح نبقى ..
ويجون تماضر وزوجها بداله ..
يبقون يمي ..
مرت اشهر وايام طويله ..
صعبة علينا حيل .. نمثل الابتسامة مقابيلها لكن داخلنا يتقطع الف مرة ..
كنت اخلي ابوها يمها واروح بحجة للحمام ..
واگعد افرغ دموعي هناك وابجي ..
كان عذاب يحاول يقويني ويصبرني ..
-اششششش حبيبتي وداعتج كل هذي الايام تصير سوالف .. صدگيني كلشي راح يعدي ..
وساعتها مااخليكم تفترقون عني ابد ..
فرح .. مستحيل نفترق .. بس خلي تخلص هذي الايام وترجع صحتها وربي مااترككم ولا دقيقه ..
عذاب .. ان شاء الله ننسى الماضي ونبدي حياة جديده وسعيدة يارب ..
رغم مواساته الا گلبي مايخليني ارتاح ودايما عايشة بحالة قلق وخوف ..
ومن تنام شهد..
ماتغفى عيني ابد ..
ابقى اراقب انفاسها واباوعلها احاول اشبع عيوني منها .
بأول الامر من گال الدكتور ..
هذا المرض مينحزر فكونوا متوقعين الاي طارئ ..
واذا مااستجابت للعلاج ..
نسويلها زرع نخاع ..
ولازم اما متبرع او من دمها ..
سألنا الدكتور اذا عندها اخ ..
سكتنا للحظة وگاله عذاب .. لا بس شهد عدنا ..
من طلع الدكتور ..
فرك وجهة واختنگ ..
گال كلة بسببي لو ماممتهور بذاك اليوم ..
كان عندها اخ هسا وماحتاجين ندور متبرع ..

فرح .. عذاب لتلوم نفسك الي صار قدر ومكتوب مثل مامرض شهد قدرنا نشوفة ونعيشة ونتعذب بعذابها ..
ادعي الله تستجيب للعلاج ومانحتاج للزرع ..

بقينا ليل نهار ندعي وكنت مااترك القرآن للحظة ..
دعائي وتسبيحي ماتوقف ..
عندي امل انه الله يباوعلنا ويشفيها من غير مانحتاج زرع
رغم العلاج قوي وهي طفله وماتتحمل ..
بس بدأت علامات التحسن بعد شهر من العلاج ..
ولما سوة الدكتور التحاليل وگال جاي اشوف اكو تحسن والنسبة دتقل ..
ماصدگنا ..
بيومها من الفرح سجدت لله ..
وعذاب جاب حلويات ويوزع ممصدگ ..
اتصلنا ع اهلنا وبشرناهم .. الكل فرح ..
وعمو گال راح اذبح طلي واوزعة الوجه الله ..

بعد صراع من المرض والتعب والحزن ..
ماحبيت اذكرلكم تفاصيلها ..
لان اتعب من اتذكر ذيج الايام والاشهر السودة الي مرت علينا ..
ولااحب اضوجكم واعيشكم الي عشتة والله ليراويه الاحد ان شاء الله..
گدرت شهد تتخطى المرض بفضل الله ودعوات اهلنا والاطباء الي ماقصروا ..

ماصدگنا من كتبلنا الدكتور خروج ..
لكن بشرط .. بين فترة وفترة نسوي تحاليل وندزها اله عبر الانترنيت ..
اتصل عذاب بأهلة وخبرهم برجوعنا ..
كنت فرحانة لان راح ارجع للعراق اشتاقيت الاهلي واخواني حتى ..
عرفت بهذي الاشهر الي قضيتها بالمستشفى ..
انه ماكو داعي للزعل والدم عمرة مايكون مي ..
ماكو احلى من التسامح والعيش بمحبة ورضا وبالتالي نحصل رضا الله ورحمتة النا ..
_______________________
صعدنا الطيارة كنت شايله شهد ونايمة بحضني ..
صار عمرها سنتين بس وزنها خفيف بسبب المرض ..
تحركت الطيارة ..
وكنت اباوع للمنضر من اجينا للاردن ماانتبهت للمنضر من فوگ ..
لان كانت دموعي والمي غالبين علية ..
اما هسا مرتاحة. وكنت بكل ثانية احمد الله ..
واني مندمجة مع المنضر ..
اجتني همسة خفيفة خلتني اغمض ..
فروحة راح ننرجع للعراق خو ماناسية وعدج ..

ابتسمت .. ليش اني شنو وعدتك ..
عذاب .. هاااا بس لا تخلفين وعدج .. مو گلتي مانفترق
فرح… امممممم قصدي ع شهودة اني وياها مانفترق
درت وجهي للشباك وكاتمة ضحكتي ..
عذاب .. بسيطة فرح خانم. خلي نوصل ويصير خير ..
فرح .. شنو قابل تاخذني غصب ..
عذاب .. اتقرب حيل من اذني وگال لو اعرف اخطفج واعقد عليج غصب هم مااتركج ولااخليج تبتعدين عنه بعد..
اعرف روحي اذيتج هواي وضلمتج ..
بس كل الي صار غصب عني وانتي اعرف وحدة بضروفي
كلشي كان

ضدي وكنت عايش بوهم الحب والخيانة ..
بس ثقي بالله ماعرفت الحب وشنو معنى الفراگ الا من عشت وياج وفارگتيني ..
ساعتها حسيت نفسي لاول مرة احب انسانة كانت تبادلني المشاعر وخسرتها ..

باوعتله وگتله .. مو گلنا ننسى الماضي .. نعتبرة صفحة وانطوت لااني اذكرها بعد ولاانت وكأنه اول مرة نتعرف ع بعضنا ..
ابتسم وتنهد .. الله يقدرني اسعدج ان شاء الله..

ماحسينا الا واحنة فوق مطار بغداد .. بسبب كلامة حسيت نفسي فعلا طايرة بالهوا ..

نزلنا وكانت تماضر وزوجها منتضرينا ..
حضنت تماضر ودموعنا تجري من الفرح ..

گال زوج تماضر وين نروح للبيت گبل ..
گال عذاب لا ..
نروح البيت خالتي .. گتله عذاب شهد تبقى عندي مو ..
عذاب .. نروح ويصير خير ..
مااعرف ليش حسيت نبرة كلامة غريبة ..

طلعنا ع بيت اهلي ..
وصلنا ..
دگيت الباب فتحتها مروة وتعيط من الفرح ..
تلگيت ماما حضنتها وابجي حيل مشتاقه الها ..
حتى رنا حضنتها وابجي من گد الفرح ..

طلعوا بلال سلمت عليه وحضنته .. ابتسم وگال الحمد لله ع سلامتكم ..
من شاف عذاب استغرب ..
بس رحب بي ودخلة ..
گعدنا وشهد من ايد الايد طايرين بيها ..

شوية ودخلوا جلال وهبة صفنت ..
ماما .. ماگنلنالكم لان مشغولين بشهد وهمكم كافي ..
اضطرينا نزوجهم بسرعة بسرعة ..

ابتسمت وگلتلهم مبروك .. گمت بوسته وبوست هبة ..
صحيح ✔ ضجت بداخلي ..
لان بين كل الي بي احنه كالعادة جلال فكر بنفسة وبس هذي عادته من صغرة ..
لكن الحمد لله انه الافراح التمت علينا ..

عذاب گام وسلم عليه وباركله .. وگاله لو ندري ع الاقل اشتريت هديه الكم ..
جلال .. مشكور هي صارت بسرعه لان طولت الخطوبه والعطله خلصت ..

عذاب .. الله يتمم ع خير ويرزقكم الولد الصالح .. واني جيتي هم على هذا الشي ..
طول السنتين الي فاتو شفنا اشكال بحياتنا ومر علينا هواي ..
جرحنا بعضنا واذينا بعض ..
والزعل دخل بيناتنا .. بس هذي حال الدنيا ..
لكن يبقى التسامح الشي الوحيد الي ينهي الخلافات وينضف القلوب ..

اني اجيتكم هسا من شدة بنتي يعني بعدني بأختبار ربي العالمين .. وطالب ننسى الماضي واذا غلطان بحقكم سامحوني واذا عني فمسامح ع كلشي ..

وانتي هم خاله سامحني .. وگام باس راس امي .
ورجع باس راسي وانتي فرح رغم اذيتي الج الا انه ماكو انسانة وگفت وياي بگدج ..

فرح .. شهد بنتي والي سويته نابع من گلبي يعني مو منخية .. وبعدين اذا الله يسامح ويغفر احنه منسامح ..

بلال .. والله ياخوية جيتك هاي على راسنا وثبتت انت احسن منا .. ومثل ماگلت الخلافات تصير وبعد ماكو حجي نزيدة على كلامك ..

گاموا بلال وجلال سلموا عليه وتسامحوا ..
فرحت بمبادرة عذاب الي لمت جمعتنا وصفت القلوب ..

عذاب .. هسا نجي للاهم .. هذي الامانة رجعتها الكم بالحفظ والصون ..
بس اريد ابقيها مؤقت عندكم على مااصفي اموري واداوم واجي اخطبها منكم على سنة الله ورسوله ..
شتگولون ..

من گال هيج صدمني وخجلني مااتوقعت يفتح هذا الموضوع هسا ..

بلال .. بهاي مانحجي الرأي رأيها واذا فرح موافقه من باجر گبع واخذ ..
ماما .. لاعيني شنو گبع واخذ .. بنتي ماشافت عرس وفرح مثل البنات ولااتهنت ..
اريد حنه وزفه ومهر ..
تماضر .. طبعا نسويلها ليش احنه كم فروحة عدنا ونسوي حفله لحنتهم ولسلامة شهودة ..

ماما .. بس انت بعت بيتك اكيد ماناوي تگعدها وي تمارة بنفس البيت ..

شفت ابتسامة عذاب اختفت ..
عذاب .. تمارة ماتگدر بعد تسوي شي الها ..
وحتى اريحج خاله .. راح ارتب الطابق الفوگ الها بين مايستقر وضعي واشوف بيت ..
يعني راح تعيش وحدها ..
بس علمود امي خطيه مااگدر ابعد شهد عنها ..

ماما .. لا طبعا خطيه اني مااقبلها .. هذا هو مدام هيج شايفين الف خير ..

گامت تماضر باركت .. ومن غير ماانطي موافقه اصلا لان عيوني كانت فاضحتني ..
اذا كنت احبه ومااضهر هذا الحب ..
فحاليا عيوني وكل حواسي فاضحيني ..

عذاب .. فرح راح تبقى شهد عندج منا الى ان نتزوج ..
بس هسا ابوي مسوي غدا الوجه الله وذابح خرفان وعازم عمامي وعمتي وكلها هناك ..

انتو هم گوموا ونلتم كلنا ع الغدا ..
گاموا اخواني ونسوانهم بدلوا ..
وماما ومروة ..
وطلعنا سيارتين البيت اهل عذاب ..
اول ماوصلنا زوج تماضر گام يدگ منبه ومسويها مثل النغمة ..
طلعت كلها للباب ..
والفرحة مالية وجوههم ..

نزلت بيدي شهد ..
اخذها عذاب مني وذبحوا الخروف ع رجلها ..
بس من غير ماتنتبه ..
بقت من ايد الايد .. اشرلي ادخل جوة ..
دخلنا كلنا وتلگتنا خالتي بالجكليت ..
والهلاهل ..
____________________
كانوا حتى بيت خالوا هناك الكل موجود ..
حتى عمتهم سعاد ..

خالتي .. اتأخرتوا يمة واحنه منتضريكم من الصبح ..
تماضر .. اي مو رحنا كلنا وخطبنا العروس من اهلها ..
خالتي .. صدگ فريحة يعني راح ترجعون وگامت تهلهل .كان گلتولي واجي اخطبها اني ..
تماضر .. ان شاء الله تاخذين ذهبها بيدج الها ..
سعاد .. اي يمة ارجعوا كافي دلال وزعل .. انتو انخلقتوا للبعض ..
وينة عذيب اموته اذا ماسوة الزواج

بأسبوع ماطولني هنا شيوديني وشيرجعني ..

انتبهت ع مرت خالي وضحى ضايجات ..
ارتاحينا وگعدنا ..
والكل يسأل واني اجاوبهن عن معاناتنا والي صار ..
كانت دموعي تحجي ع الموقف مو اللساني ..

خالتي .. يمة كافي رحمة الابوج بعد مانتذكر الي صار وكأنه ماصار ..
ام باهل .. يعني گالولكم خلص بعد مابيها ..
فرح .. ان شاء الله بس گال لازم نسويلها تحاليل مستمرة ونبقى حذرين خاف يرجع ..
وحذرنا هواي من السخونه لازم ماتسخن ..لان تعتبر بفترة نقاهة ..

ام عذاب .. الحمد لله والشكر .. لا دور نخلي بالنا عليها وانتي فرح تزعلين ماتزعلين ماتتركيها ابد ..
لو مو دوام صحتها اهم ..

فرح .. الله كريم ..
بهذي الاثنااء .. اجت تمارة گدام الكل واعتذرت مني وسلمت ماگدرت احجي اي شي بس استقبلتها عادي .
مراهقة وخطأت واخذت جزاتها ومااعتقد راح تكررها بعد
كان يوم متعب بس مليئ بالبهجة والفرحة .. والكل كان فرحان السلامة شهد ورجوعنا البعض. .

الي فاجأني اكثر ..
دخول عمو .. وصاحني وحضني واعتذر مني گدام الكل ..
وگال الي الشرف ترجعين جنتي وبنتي ..
وگال الخالتي باجر تاخذين سعاد ونسوان اخوتي وترحين تاخذيلها مهرها ..
واالمشية تجيكم بعدها بيوم ..

فعلا حلو من احد يعترف بخطأه ويصححة ويكسب گلب المقابل ..
الي صار قادر انه ينسيني هموم السنين الفاتت كلها ..

بعد الغدا ..
گال بلال يله نروح ..
اخذ شهودة ورجعنا للبيت ..

لليل اجونا عمامي كلهم .. وهم جايبين هدايا ويباركون السلامة شهودة ..
بلال فتح موضوع خطبتي من عمو ..
گاله تدري اتصل ابو عذاب وخابرني ع المشيه .. گتله ماكو داعي بس هو اصر ..

بعد هذي الهوسة كلها نسيت اتصل بزهراء واگلها رجعنا نومت شهد واتصلت عليها ..
الو وج بذات شنو رجعتوا ..
-اي اليوم بس ماشفت شي من التعب وبيت خالتي مسوين غدا ورجعنا هنا عمامي متجمعين ..
-شلونج انتي شهودة شلونها ..
-الحمد لله اثنينه ..
-وج لو ادري بيج جان اجيتج ..
-عادي تعالي باجر الخطوبتي ..
-خطوبتج شنو ..
-ههههههه غير حبيبي المستعجل اول مااجة خطبني من اخواني وقرروا باجر المهر وبعدها المشيه ويمكن ع هذا الاستعجال ميطول اسبوع ونتزوج ..
-وج خبيثة اني اخرت زواجي وگلت مااتزوج الا ترجع فرح وتالي تتزوجين قبلي ههههه ..
-هههههه احنة اولى حبي عدنا بنية ..
-هههههه وج فروحة صوتج وفرحتج اول مرة اسمعها حبيبتي ربي يهنيكم ويسعدكم ويبعد عنكم اولاد الحرام
-امين يارب ويسعدج زهورتي .. داومتي ؟؟
-اي داومنا حتى سهير سألتني عنج وگالت شنو فرح بطلت .. وخطيه دايما تسألني عليج ..
فرح .. اي ماما تگلي .. تخابر الماما وتسأل وهي ماكو شي جديد ..
زهراء.. لا بعدهي ع وضعها .. واصلا الي ببالها مو يمها وسألني عليج وسولفتله وانقهر حيل ..
گال ماتستاهل ..
حتى ام ثابت وام نور هم سألن ..
وضاجن حيل .. وگالن ولامبين عليها عندها هيج هموم كتومة ..
فرح .. اي خطيه كانن يتصورن اني ممتزوجة ويخطبن بيه ههههه وربي اشتاقيتلهن ..
فترة اشوف عذاب وارجع اداوم .. بس الظاهر مقسوملي اسوي بين سنة وسنه الجامعه ..
زهراء .. باعي فروح باجر من الجامعه واجيج واحظر مشية النسوان بصفتي اخت العروس ههههه
فرح .. واروع اخت وربي .. من نتزوج اخلي عذاب يعزم مصطفى حتى يتعرفون ع بعض لان ذيج المرة مدحة وگال خوش ولد مبين .
زهراء .. احم احم اهم شي سيادة الضابط اقتنع بخطيبي بعد مااتحاجة ههه ..
فرح .. وج لاتقلدين ع حبيبي ..
زهراء.. عيني عيني اي ليش لا نيال استاذ عذاب ع هذا الحب الصراحة غرت ..
فرح .. لاتغارين يروحي انتي اختي وحبيبتي وهو ابو بنتي وزوجي المستقبلي ..
ومعزتج انتي اكثر لان انتي خيتي وصعب الگي مثلج اخت ..
زهراء .. ولي يله راح تبجيني .. روحي ارتاحي وباجر اجي اخبصج ..
ها شراح تلبسين ..
فرح .. مادري ..بعدني ..
زهراء .. اني اجيبلج فستان قصير وياي ..
فرح .. فديت اخيتي دوم تفكر بيه ..

سديته منها من التعب ماحسيت ع روحي . اخذت شهد الحضني وغفيت ..

للصبج كعدت .. شفت ماما والبنات مخبوصات ..
تنضيف وترتيب ..
ويسون كيك وكليجة ..
-صباح الخير ..
مروة .. هلا بعروستنا اليوم غبت علمودج ..
فرح .. وج والله نسيت اباركلج .. كبرتي وصرتي بالاعداديه .. بوستها ..

گعدت شهد تبجي اخذتها ورحنا بالمطبخ يم البنات ..
سويت ريوگ اني وبنتي وكملت ..
بديت اساعد البنات ..
للضهر كملت ودخلت اسبح ..
طلعت سرحت شعري ..
ورنا اخذتلي وجهي بالخيط ورتبت حواجبي ..

اندگت باب الغرفه ..
انفتحت شفت زهراء گبالي ..
يااااي عطت وركضت الها حضنتها وابوس بيها ..
گالت مااجيت وحدي ..
ابتعدت وشفت سهير وراها ..
حضنتها بسرعه وبوستني ..
گالت .. معقولة تنخطبين ومااجي ..
فرح .. فديت اخواتي ..

صبت ماما غدا وتغدينا سوية وضحك وسوالف كنت مفتقدة هيج شي من زمان ..

بعدها طلعت زهراء ثوب قصير ومخصر ع الجسم لونة رصاصي وبي تطريز وردي .
وخلتلي مكياج خفيف ..

للعصر اجت خالتي وتماضر ونسوان عمامهم وعمتهم سعاد ومرت خالي ام ضحى ..

دخلت بالعصير ووراي مر

وة بالكيك والكليجة ..
اول ماشافتني خالتي صلت ع النبي ..

سعاد .. يمة عبالك تفاحة تخبل .. عرف قيمتج عذيب وندم ..
ضحكتنا .. اجت شهودة تتمشى وراي ..
ماما ماما ..

ام ضحى .. بله لو عاقدين وفاضيها مو احسن بنتهم سنتين عمرها وهم يفكرون بالزواج والمهر ..

خالتي .. حقها فروحة ليش منو احسن منها ونسويله عرس ..
طلعت تخم ذهب مشتريته گالت اذا ماعجبج غيريه ..
ونطتني وياه ضرف فلوس گالت تستاهلين اكثر من هيح بس تعرفين ضروف عذاب وماعندة راتب ..
ان شاء الله يعوضج اكثر ..

گلتلها خاله .. السعادة اهم من الفلوس. .
وهم اصلا ممقصرين تخم راقي ومليون ونص ملابس ومكياج ..
واعرفة خطيه ماعندة .. راتبة قاطعيه بسبب الاجازات
وبيته بايعة لهذا اصلا ماقبلت اثگل عليهم ..

بعد ماطلعت خالتي ..
زهراء گالت والله مااطلع اذا مانرگصلج شوية شغلن اغاني وبقينا نرگص تونسنا ..
اتصل عذاب تركتهن ورحت للغرفه ..
-هلا بالحب مالي ..
-صدگ عذاب يعني تحبني ..
-وج كل هذا وتسأليني اذا احبج اولا .. مو زحفتيني تزحف وراج وضاعت الهيبه والكاريزما مالتي ..
-فديت الهيبه والكاريزما ..
-فرح ؟؟
-عيونها ..
-خلي نتزوج هذا الخميس بعد مااتحمل !!

يتبع .

قۣۗـۙصۣۗـۙصٍ 📖ۆبۣۗـۙسۣۗ 💯
💕
//// البارت التاسع و العشـرون ////
من_سيدفع_الثمن ؟؟
بقلم_الكاتبة_شمس

لاتسأليني لماذا أحببتكِ..؟
إسألي قلبي لماذا أحبكِ..؟
إسألي مشاعري لماذا إحتوتكِ..؟
ستجدي القلب يصرخ لأنكِ النبــض،
وستسمعي المشاعر تهمس لأنكِ الحــياة..
أنــــا لست بعيد عن قلــــبكِ
أنــــا أقرب من طرف العــيون
ربما في دمــــــكِ أكون
فإن كان قيس قد جن بليلى
فأنا قــسماً بربــــي قد تعديت مرحلة الجنون...!

-لاعذاب تحجي صدگ شنو الخميس يعني بعد ثلاث ايام ماالحگ ..
-شتلحگين ياعيني اشتري الضروري والباقي اني وياج الي ترديه نشتريه ..
-حبيبي خليها ع الاسبوع الجاي افضل وانت بعد تجهز الطابق الفوگ وين تلحگ ..

-شگلتي شگلتي ..
-اجلها ع الاسبوع الجاي ..
-لا الي قبلها ..
-امممممم حبيبي ..
-اويلي يابة تعال الابنك ضاع بحب الگصيرة ..
-هاااا عذاب ترى ازعل ..
-وج ماتكيفين شايفه شلون عشگ الگصيرة حلو .. لو شما تكبر تحسها طفله بحضنك ..
-اي قشمرني ..
-هو اني الي قشمرتج لو انتي الي خبلتيني بحبج وقشمرتيني ..
-عذاااااب عفية اجلة للاسبوع الجاي ..
-وتتحملين تبعدين عني كل هذي الفترة .. بالنسبة الي مااگدر ابعد عنج وعن شهودة ..
-اي غير حتى اجهز نفسي واتهيأ واجيك عروسة ..
-خررررب اشتعلوا ليش هو شمصبرني غير اليوم الي اشوفج بي بحضني ..
بالقرآن اطلع قهر الايام الراحت كلها بيج .. ادمرج واهليج تتوبين تتركيني وتتعززين عليه ..
-لعد بطلت مااتزوج !!
-ها خفتي .. هذي ضريبة البعد خاف فد يوم تفكرين تبعدين عني ازود العقاب ضعفين ..
-عذااااااب غير گلنا نفتح صفحة جديدة وعساس نتعرف هستونا .. هيج تعامل حبيبتك وتخوفها ..
-هااااا السالفه الماتصرف تگلبيها .. بااااعي دور اذا جريتي اسمي هيج وبدلع ترى مااقاوم اخليها باجر وربي هي مشية هي عقد وزفه ..
-لاخلص بطلت بعد مااحجي ..
-عفية بحبيبتي العاقلة .. والخاطرج راح اخليها ع الاسبوع الجاي وامري لله ..

ضحكني بسوالفه ساعات احس روحي دااحجي وي شخص ثاني مو عذاب نفسة ..
اتنهدت ودعيت الله يديم السعادة علينا والمحبة ..

طلعت خبرت ماما والبنات ..
زهراء گالت اعرف مركز حلو ناخذ الثلاثاء ونسوي شعرج ونتفق وياها تجهزج ع الزواج ..

ثاني يوم اجت المشيه واتفقوا ع يوم الزواج ..
والعقد ..
اتصل عذاب وگال جهزي نفسج نعقد محكمة باجر ..
وعقد السيد نخليه بيوم الحنه ..

رحنا عقدنا محكمة وكانت اول خطوة بحياتي اتخذها واني مقتنعه بيها ..
همسلي من طلعنا لان كان بلال وماما ويانا ..

-فروح صرتي مرتي ..
اشرتلها ع بلال ضحك .. گال كلها كم يوم وتجيني واعلمج ع هذا الدلال ..
وصلنا البيت اهلي وهو راح ..

بدينا نجهز ملابس واخذت فساتين ومكياج وملابس طلعة ماعندي ..
بقت ملابس النوم اخذت كم قطعة واصلا عندي اكو ملابستهم بباكيتهم موجودات ..
يله لحگت كم يوم اجهز ..

اتصلت تماضر تسأل اذا محتاجة شي ..
گالت عذاب رتب الطابق الفوگ وصبغة واشترى غرفه تخبل لونها صاجي وماروني ..
ابتسمت لان البارحة دز كم غرفه واختارينها سوة ..

يوم الاثنين .. اجت زهراء وتماضر ورحنا للمركز الي اتفقت وياه زهراء ..
بلاول سوتلي تنضيف الجسم كله والوجه بالشمع البارد .
وبعدين صبغت شعري اشقر رمادي ..
وسوالي حواجبي 3D طلعت غير شكل ..

طلبت منها تسويلي وشم مؤقت ع كتفي گالت بيوم الزواج اسويلج ..

طلعنا من المركز استأجرنا فستان الزواج كان بسيط ونازك ..

رجعت للبيت تعبانه حيل وشايله شهد ماتقبل تتركني ..
لگيت عذاب خابص الجو بالاتصالات وماسمعت الموبايل ..
نطيت شهد المروة ودخلت للغرفه ..
عذاب .. وج دمرتيني وينج اتصل وماكو الف حسبه اجت ببالي وتماضر جهازها مغلق شكو ..
شهد بيها شي ..

فرح .. مابيها شي حبيبي شبيك بس لان مشغوله وتاركته بالجنطة لهذا ماسمعته ..

عذاب .. فتحي فيديو خلي اشوفج ..
فرح .. نو نو ميصير ..
عذاب .. وج غير مرتي ليش ميصير..
فرح .. مرتك قانونا مو شرعا ..
عذاب .. حيل بيه واستاهل لو ماخذج من الخميس الفات مادللتي عليه هيج ..
فرح .. لا حبيبي اتحمل حلاتها بالانتضار ..
عذاب .. مو اشتعلوا اهلي بالانتضار صار سنه منتضر ترى اني هم بشر والي حد الصبري ..
وصبري فاض ومااتحمل بعد ..
فرح .. اممممم تصدگ قهرتني .. حدزلك عيوني بس والباقي ع الزواج ..
عذاب .. بسيطة فرح اذكرج بهذا الحجي .. وين شهودة خلي اسمع صوتها اشتاقيتلها .. شلونها ..
فرح .. زينه بس ماتقبل تتركني ابد حتى بالصالون مخليتها بحضني وتشتغل البنيه بشعري ..
عذاب .. شلون سالفه هاي خاف بليلة العرس وتطنگر عليه ..
فرح .. اي خطيه خليه تنام بوسطنا شتريد منها ..
عذاب .. لا عمي اتزوج بالفندق احسن الي حتى لاشهد ولاهم يحزنون ..
فرح .. عذاب صدگ احجي شهد شلون راح نتركها ماتتحمل تبعد عني بعد ..
تدري من كم شهر وهي بحضني تنام واخاف يصير عليها شي لو تبجي وتنتكس ..
عذاب .. لا تخافين لازم تتعود شويه شويه .. يعني خو كو العمر كله تبقى بحضنج اني خليت سريرها بغرفتنا يعتي لازم تتع

ود تنام وحدها ..
فرح .. بس هي بفترة نقاهة هسا ولازم نصبر عليها .
عذاب .. الله كريم بس هي الليلة وحدة ماتأثر ..
فرح .. لهذا گتلك خلينا نتزوج بالبيت احسن .. حتى اذا صار شي احنه قريبين منها ..
عذاب .. الله كريم ..

سديته من عذاب ماما خوفتني گالت تعالي شوفي حرارة شهد ..
مااعرف شصار بيه بسرعه اخذت المحرار وخليته جوة ابطها وقستة ..
طلع مرتفع قليل .
بسرعة سوتيلها كمادات وشربتها علاج ..
وبيومها بقيت للصبح سهرانة ومگابلتها خاف ترتفع ..
اكيد لان طلعت اليوم والمركز بارد من السبالت ..
بقيت الوم بروحي وابجي ..
خفت يصير عليها شي ..
وماما تحجي عليه ..
وتگلي وهواسج هذا هو الي يمرضها ..
حرارة خفيفة وراحت لاتخافين ..
فرح .. حتى اذا باجر الصبح اخذها للمستشفى اتأكد ..
ماردت اتصل ع عذاب واقلقه بالليل ..
وخاصة بعد مانزلت حرارتها ..
بس بقيت گاعدة الى ان اذن الفجر صليت وگعدت ماما گالت نامي انتي اني راح ابقى يمها ..
عاد شويه طمأنيت وگدرت انام ..

بحيث الصبح گعدت مصدعة والكل يگلي شبيها العروس ضايجة ..
شگد كنت فرحانه بس خوفي عليها قلقني ووترني ..

شفتها صارت زينه وگامت تلعب ..
گالت ماما هذا هو لتخافين ..
بس گلت لازم انطي خبر العذاب ..
گتله تخبل وگال ليش مااتصلتي ناخذها للمستشفى

طمنته وگتله هسا احسن ..
عذاب .. بعد الزواج ناخذها نسويلها تحاليله شامله ..
فرح .. اي احسن حتى يرتاح بالي ..

اتصلت زهراء گالت اخذت موافقة من مصطفى واخذلي اجازة يومين عمودج ..
اربعاء وخميس .ابقى من الصبح لليل يمج ..
فرح .. ابقي باتي يمي بيوم الاربعاء ..
زهراء .. ليش الاربعاء خو خليها الخميس ابات يمج احسن فرح… هههههه والله اتمنى بس اخاف عليج .. لان عذابي منتضر يوم الخميس ساعة ساعة ودقيقه دقيقه غير يطلع قهرة بيج ..
زهراء.. والله جاي اشوفج انتي هم حاميه وياه ..
فرح .. تردين الصدگ مشتاقه مو حاميه .. اشتاقيت الحضنه والهمساته ..
زهراء .. ع الاقل ارحمي بحال صديقتج الي بعدهي مخطوبه ومنتضرة الفرج ..
فرح .. غير بسببي اتأجل وتالي اجة الدوام ..
زهراء .. مصطفى گال ع عطلة نصف السنة والله كريم
فرح .. ان شاء الله ولو مااوفي وگفتج وياي بس مااقصر بحيل الله ..
زهراء .. وج فروحتي وجودج وياي بكفيني مو اله تسويلي شي ..
يله روحي كملي امورج وباجر من الصبح اجيج ..

شويه واجو عذاب وخالتي يشوفون شهد مااتحمل خطيه
بس من شالها وشافها زينه ودتلعب اطمأن ..

مااتأخروا بس شافوا شهد واتفقوا ع الحنه وعذاب گال الماما كلشي لتشترون اني ادز الصبح الكيك والعصير وكيكة جاهزة وباقي الاحتياجات ..
رغم اعرف ماعندة بس ديحاول يسوي كلشي لحتى مايقصر وياي ..
خالتي نطت فلوس الفساتين والصالون الماما ..
وراحوا ..

بيوم الحنة اجت زهورة من الصبح جايبة نشرات ودانتيلات وزينه ..
وبدأت تزين الاستقبال هي ومروة وبنات عمي هم عدنا .
بعد ماخلصن رحنا للصالون سويت شعري تسريحة بسيطة ولبست فستان اوڤ وايت قصير ومنفوش ..
وكعب عالي ..
ومكياج هادئ وملائم البشرتي ..

رجعت للبيت الكل صافن بيه شفت سهير جايه فرحت ..
وهم جايبتلي هديه ..
شويه واجو اهل عذاب وبيت عمامهم وعمتهم وبناتها لان رجعت للناصرية وجايه اليوم الصبح وياها البنات ..
ماما ممقصرة عازمة الجيران كلها ..

بحيث الاستقبال صارت خنگة..
قبل منبدي بالحفله ..
اجة بلال وگال ادخلوا للصاله الكل ..
اجة عذاب والسيد راح يعقدون ..
بقينا بالصاله الى ان عقد السيد وكمل ..
حسيت بفرحة غمرتني حبيبي رجعلي ومااخلي اي شي يفرقنا بعد ..
تعلمنا من اخطائنا هواي .. وصارت عبر ودروس النا ..

بعد ماطلع السيد ..
اجة بلال گال جيبي شهد وادخلي للاستقبال ..
كانت شهودة مشتريتلها تقريبا نفس فستاني ..
دخلت شفتهم محضرين مفاجأة ..
مسوي كيكة بصورة شهد ..
وگال اريد عيد ميلادها وي زواجنا نسويه ..
صارت الحفله حفلتين ..
طبعا بالاول. محد دخل بس اقاربنا ..
احتفلنا بعيد ميلاد شهودة وقطعنا الكيك ..
وبعدها لبسني الذهب واكلنا كيك وعصير واخذنا صور..
كانت زهراء متكفله بالتصوير بس بموبايلي طبعا لان عذاب ماقبل اي موبايل يصور غير موبايلي ..
هي لابسة عباية اسلاميه فوگ فستانها ..
اجت سلمت على عذاب..
هو رد بخجل ..
اول مرة اعرفه خجول ..
ويمسح بوجهة من العرگ لان داير مدايرة النسوان وبس هو بالاستقبال ..
كملنا سلم وقبل ليطلع همس بأذني ..
اني اعلمج على هذا القصير اللابستة حرگتي اهلي بي
بسيطة…
وطلع .. خربت من الضحك عليه ..
زهراء گالت .. وج فروح عذاب مبين اشتعل نار من شافج ..
وج انتي اتقطعين بالكيكة وهو فصلج من فوگ لجوة ..
وطلعتلي التصوير شلون يباوع صدگ تفشل نضراته ..

دور هو گاعد ع القنفة واني دنگت اشيل شهد وهو يباوع ميستحي ..
وخلى زهراء وسهير يصنفن عليه ههههه ..

اشتغل الديجي وكلها ترگص وفرحانه ..
وخاصه عمته سعاد .. ماتت من الرگص خطية مبين عليها الفرح ..

كملت الحنه والكل راح ..
من التعب ماحسيت ع روحي ..
بسرعة بدلت واخذت بنتي ونمت ..
ماگع

دت للصبح ..
وي جية زهراء ساعة عشرة ..

تريگنا سويه حتى مااشتهي بس جاي شربت لان من الارق راسي يأذيني ..

اخذنا الفستان وطلعنا للصالون ..
بعد ما رنا سوتلها زعلة ورادت الا شويه تخرب العرس وحرجتني گدام زهراء ..
لان مااخذتها للصالون وياي ..
تگول تاركة مرت اخوها الكبير وماخذه هاي اللوگية وياها ..
شنو ماعدها اهل يسألون عليها .. كل يوم والثاني يمنا وتخلصها من الصبح لليل عوزها بس تبات هنا ..

صدگ تنرفزت من كلامها وگلت الماما تسكتها ..
وسمعت هبة راحت وصلتلها حجي ماحاجيته اني اصلا ..

وتالي رجعت عليه تعايرني وتگلي .. صرتي شيخة لان عذاب باوع بوجهج والا انتي منو يگلبج لو ماعذاب ستر عليجن ..

ماما رادت تحجي سكتتها .
گلتلها يوم .. خلي اليوم يعدي وعود احجي وي بلال مو وياها ..
واذا ماكو اني احجي وي عمو يسويلها حل ..
سوت مشكله كبيرة ع شي ميسوة ..
لو گايله اروح وياجن والله مانعارض بس هي گبل حجت ورزلت ..

زهراء اشرتلي مااهتم واخذتني وطلعنا ..
لازم شي ينغص فرحتي ..
-ياعيني اتركيها خليها تحجي . انتي فكري بالليله تالي تترحمين ع عركة رنا هاي ..
-هههههه ضحكتني السخيفه ..

قبل ماابدل بالصالون بدلت الشهد ورتبتها ومناك تماضر اجتنا وتكفلت بيها ..
على ما سويت شعري والميك اب ..
بدلت وخلتلي الطرحة ..

اتصل عذاب .
-ها حبيبتي كملتوا ..
-اي ليش ؟؟
-زين اني بالباب اطلعي يله ..
بس البسي شي مااريد احد يشوفج غيري فاهمة ..

باوعت التماضر وزهراء ..
هذا عذاب بالباب ..
زهراء .. مو گتلج زوجج خبل . تالي باوعت التماضر وگالتلها . سوري مااقصد .. خجلت حيل هههه ..

تماضر . اي گال ياخذج للاستديو اول شي وبعدين يوصلنا للبيت ..

لبست البرنص وونزلت الغشاوة ع وجهي ..
تماضر شالت شهد ..
طلعنا فتحلي باب الصدر گعدت يمة ..
طالع يخبل بالقاط والفيونكة ..
وزهراء وتماضر گعدن ورانا ..

سلم ع زهراء ..
وهي من كل عقلها توصي بي عليه وتگله اخوية فروحة امانه عندك ترى هي طيبه وتحبك لاتضوجها بعد ..

خربتنا من الضحك .. هو سحب ايدي وبوسها وگال شعندي غيرها مستحيل افرط بيها بعد ..

تالي فتح اغنية اشهد الكاظم الساهر وربطة بالسيارة ..
وگام يغني وي كاظم ..
ونسى زهراء وتماضر ويانا .. خجلت حيل ..
بس الفرحة الي بعيونة خلتني اروح وياه الغير عالم وكأنه بس اني وياه بالسيارة ..
الصراحة شعور لايوصف ..
تالي شهد بجت وتريد تجي يمي ..
سحبها عذاب وخلاها بحضنه ويسوق ..
وتباوعلي ومستغربه لان الغشاوة ع وجهي ..

وصلنا اخذنا صور بالاستوديو ..
واول مشافني صوفر خربت عليه المصورة ضحك ..

دور جبنا شهد اخذت ويانا صورة ..
واني اگلها ماما وعذاب يگلها يله بابا انتي اول وحدة بالعراق تاخذ صور وي اهلها بزواجهم ..
بقت المصورة صافنه ويمكن راح بالها لبعيد ..
لاهي سألت ولااحنه فسرنالها ..
تركناها بخيالها وطلعنا ..

وصلنا البيت اهلي وراح ..
بعد ساعة ..
اجت الزفة ..
ورحت وي حبيبي البيتة ..
وكانت بنتتا بنصنا ..

ماما شگد وصت عذاب بيه ..
طلعت واني كلي امال ابدي حياتي الجديدة من البداية
ومجرد ماطلعت من بيت اهلي تركت الماضي عندهم وطلعت ..

وصلنا البيت خالتي ..
دخلنا بسرعة لان هوسة ورجال بالباب ..
بقيت شويه گاعدة وصعدتني تماضر فوگ ..
شهد بس تبجي ونعست ..
صعدنا للطابق الفوگ ..
تفاجأت من شفته شلون مرتب ..
الصاله الفوگ والحمام مرتبهن ..
وجايب قنفات جديدات ..
لان هو اثاثنا كله باعة ..
وفاتح غرفتين وحدة ع الثانية ومسويها مثل السويت ..
ومخلي غرفتنا والجهة الثانية غرفة شهد ..
مرتبة حيل ..
بهذي السرعة گدر هيج يسوي والوقت قليل ..
رغم تلحيظات بسيطة ومو صعبة بس تغيير رائع ..

نامت شهد گالت تماضر راح اخذها يمي انومها وهي تعبانه للصبح يله تگعد ..
فرح .. اي بس عفية تماضر اذا گعدت تبجي گليلي ..
تماضر .. الليله اجازة .. فكري بعذاب وبليلتكم .. عيشوا حياتكم ولا تفكرون بشي ثاني ..

دخل عذاب .. استأذنت وشالت شهد .. هو دنگ باسها وطلعت ..
قفل الباب بالفتاح وسحبه ..
باوعلي وضحك ..
گال للاحتياط خاف عندج نية تنهزمين مني اليوم ..
فرح .. عذاب شناوي ..
عذاب .. كل خير ان شاء الله حلالي وبكيفي .

اتقرب .. سحبني من خصري وحضني حيل .
-فرح؟؟
-حضنيني حيل ..
رفعت ايدي ع رگبته والحمد لله ساعتها مانازعة الكعب العالي يعني گدرت اوصل الكتفه ..

هو عبالك مثل الطفل المفطوم عن امة ..
گام يشم رگبتي ووجهي وويبوس بية من كل جهة حسيتة فقد واني ذبت بييدة وبحضنه ..
سحبني للسرير ..
وصار فوگاي ..
فرح .. اعذريني بس اشتياقي ولهفتي وشغفي اقوى مني ..
كنت اباوعله بنضرات ذايبة ومااگدر احجي ..
بس كان گلبي موافق وراغب الكل لمسة منه ..
بحيث اتفاعلت وياه وكنت جريئة معاه ع غير عادتي ..
الى ان……….. وغفينا اثنينا بحظن بعض ..
حتى نسينا العشا والناس وكلشي بالدنيا ..
وكأنه احنة وبس بهذا العالم ..

صحيت ع لمساته ..
كان متكي ايد ع المخدة وايدة الثانية تلامس وجهي وشعري ..
باوعتلة بأبتسامة ..
گال

صح النوم يعروسة ..
شلونج مرتاحة ..
يبووووو خجلني غطيت وجهي بالبطانية ..

سحبني الحظنة وگال صرتي مرتي وحبيبتي مااريدج تخجلين بعد مني ..
خلينا نعيش ونعوض ايامنا الفاتت ..
گال راح اسبح وانزل اوصيهم ع العشا ..
بين ماتسبحين ..

هو دخل سبح وكمل واني بعدة سبحت وبدلت ..
ودا اجفف بشعري دخل وبيدة الصينية ..

-يله حبيبتي ترى ميت من الجوع ..
لفيت نفسي بالروب وگعدت يمة ..
-بالي يم شهد نايمة لو گاعدة ..
-لا هسا شفتها نايمة .. وترى اني اغار الليلة ليلتي وتفكرين بضرتي هههههه ..
-ههههههه هاي شنو گمت تغار ..
-حقي ترى .. اريد اعوض ونسيتي اطلبج ثار .. بس تغذي زين لان اليوم صباحي ..

وصدگ للصبح يلة نمنا بسبب وكاحة عذاب ..
عشت ليلة وياه ولابالاحلام ..
للصبح اندگت الباب حيل ..
طفرنا من مكانة ..
فتح الباب عذاب ..
رجع بسرعة للكنتور طلع ملابس ..
فرح .. شكو عذاب ..
عذاب .. شهد تگول امي مسخنة حيل ..
راح اخذها للمستشفى ..
طفرت من مكاني بلاوعي ..
اروح وياك انتضرني ابدل ..
-وين ترحين ابقي هنا .. تماضر تروح وياي ..
-عذاب تحجي صدگ مستحيل اتركها ..
عذاب .. بسرعه يله اني راح اطلع السيارة ..
غسلت بسرعه وبدلت وخليت الحجاب شلون ماكان ..
نزلت اركض والكل يابارك ويصبح ..
واني بالي يم شهد واحس فرحتي كلها طلعت من عيني ..
هي هاي الدنيا .. ماتحب تشوفني فرحانه لازم تنغص علية حياتي !!

يتبع ..

قۣۗـۙصۣۗـۙصٍ 📖ۆبۣۗـۙسۣۗ 💯

//// البارت الثلاثون والاخيييير ////
من_سيدفع_الثمن ؟؟
بقلم_الكاتبة_شمس

بدلت بسرعة ونزلت اركض ..
الكل كان يبارك الي ويصبح .. وانـي بالي يم شهد ..
كانت تماضر شايلتها اخذتها بسرعه ولفيتها وركضت طلعت ..
خالتي تصيح وراي وماقبلت اروح تگول بعدج عروس وخلي تماضر تاخذها ..
واني ماهمني ..
لان عقلي توقف وماافكر بشي غيرها ..
هي تهذي وتبجي واني ابجي وياها ..
صعدت يم عذاب بسرعة وحرك سريع ..
بحيث گمت اتشاهد من سرعته ..
وكل شوية اغمض من يوصل قريب ع السيارات المقابيلنا من سرعتة خفت حضنت بنتي وابجي اكثر ..
عذاب .. لاتخافين هسا نوصل ماكو شي ان شاء الله
فرح .. عذاب بهاي سرعتك راح تموتنا كلنا شبيك ..

ماصدگت وصلنا للمستشفى اخذها مني ودخل للدكتور وشرحله حالتها ..
الدكتور بسرعة دخلها مستشفى وطلب تحاليل ..
وكتبلها ادويه وابر ومغذي ..

دخلناها واحس راسي داخ من ريحة المستشفى وكرهتها ع گد ماسكنت بيها ..
گمت ادعي بداخلي .. الله ليراوينا ذيج الايام ..
ربي لاتعيشين ذاك الالم مرتين ..
ياالهي اذا صبرت مرة مستحيل اتحمل مرة ثانية ..

طلب الدكتور تحاليل من برة ..
دزانه ع مختبر خاص بهيج امراض ..

تخبلت من سمعت .. معناها الدكتور شك برجوع المرض الها ..
والي اكدلي وجه عذاب الي مايتفسر ..
سألته گال فرح الدكتور ظلمها عليه .. ويگول المرض وارد رجوعة مادامها بعدهي تسخن ..
وحطم معنوياتي كلها ..

فرح .. لا عذاب لاتگولها .. خلي الله ياخذ روحي هالمرة ولايعذبها هيج ..
شنو ذنبها تتحمل هالالم كله .. وبعدهي صغيرة ..
قاومت بمافيه الكفاية ..

عذاب .. كافي لاتبجين .. شهد من تشوفج هيج تخاف وتتأذى ..
هو يسوق ويضرب ع الستيرن وضايج ..
احلى يوم بحياتي صار اسوء يوم بالنسبة الي ..

اتصلت خالتي واحنه بالطريق ع موبايل عذاب ..
مارد عليها ..
-ليش مرديت ليقلقون ..
-مااگدر شنو اگلهم اخاف انطقها اصلا ..

رجع دگ الموبايل.. باوع گال هذي امج ..
اني تركت موبايلي بالغرفه ..
فأتصلت ع عذاب ..
گال ردي انتي ..
رديت ..
الو ماما ..
-وين انتو ليش متردون ع خالتج .. شبيها شهد اجيت الصبح وگالولي .. الطبيب شگاللكم .
-مااتحملت احجي وابجي .. يوم مااگدر احجي هسا دزونا نسوي تحاليل ..
شاكين المرض راجعلها ..

امي عاطت بصوت . وخالتي اسمعها تبجي وتدعي ..
گلتلها ماما وصلنا راح اغلقه ..
سديته بسرعة لان مااگدر احجي ..

وصلنا واجة الممرض يريد ياخذ دم منها ..
بجت وضمت راسها بحضني ..
سودة عليه .. تعبت وكرهت الابر والمستشفيات والادويه
اخذوا دم منها وحاسبهم عذاب وطلعنا ..
رجعنا للمستشفى ..
دخلوها وخللوها مغذي والادويه شويه هدأت ونامت ..
الدكتور گال ابقوا هنا اليوم الى ان نتأكد من حرارتها وتطلع التحاليل الي سويناها الها هنا بالمستشفى..

عذاب .. راح اروح للبيت اجيب ملابس الها وموبايلج .وبعد شنو تحتاجين ..
فرح .. ماادري عقلي ميجمع هسـا .. اتركهن شويه لاتخليني وحدي اخاف يصير شي منو النا ..
عذاب .. مااترككم حبيبتي بس هدأي وگولي ياالله ..
ان شاء الله ماكو شي ..
فرح .. والنعم بالله هو اعلم بحالتنا والي صار بيها ..
عذاب .. زين راح اتصل ع تماضر واگلها تجيب ملابس وغراض شهد وتجيبلج بطانية ومخدة وجرجف نضيفات ..

هزيت براسي اله .. لان فعلا بعد ماعندي قوة اگدر احجي بيها ..
احس الدنيا ظلمة بعيني .. لحظات مرت عليه رجعت المعاناة الي عشناها بالاردن ..

شفت عذاب شلون مگابلنا ومخلي ايدة ع راسة ومنصي عينه للگاع ..
مايگدر ياوعلنا ويشوف نفسة عاجز امام قدر وقضاء الله ..
يمكن دايفكر بلي افكر بي ..
وتذكر ذيج الايام ..
لاگدرت احجي واواسي واني نفسي مااعرف اذا فعلا اكو امل او لا ..

گام من مكانه طلع برة مدة قصيرة ورجع بيدة لفات وعصير ..

-هاج حبيبتي اتريگي مايصير تبقين جوعانة ..
فتح اللفة وسحب طرف الصمونة لان يعرفني مااحبة ..
ونطاني اللفه ..
الخاطري اكلي خليني افكر بوحدة بيجن مو اثنينجن تهدن حيلي ..

الموقف والكلام كلة تكرر بالنسبة الي ..
وكأنه الزمن يعيد نفسة ..
نفس المنضر والكلام .. صار وسمعته من كنا بالاردن ..
كان يگابلني ويگعد يضغط عليه حتى اكل ..
ويگلي فكري بيه اذا صار بيج شي ..
شلون اگدر اداريجن اثنينجن ..
صيري قويه وسانديني ولاتضعفين ..

نزلت دموعي وشهگت .. عذاب ملاحظ المنضر هذا دينعاد علينا ..
عذاب .. اعرف حسيت بي .. بس ان شاء الله هالمرة يخذلنا الله ومايخلي تفكيرنا يطلع صحيح ..
فرح .. احس داخلي مرتاح بس عقلي مايخليني ارتاح التفكير موتني ..
عذاب .. اكلي ولتخافين .. وهاي اني راح اكل وياج ..
اتلمس شهد ..
-شوفي حرارتها انخفظت هذا عارض وراح الحاله يلة اكلي ياعيني ..

اخذت اللفة منة وگعدت اكل ..
ربع اللفه وگتله مااگدر بعد . اخذت العصير دااشرب ..

اتقربت مرة يمي ..
داخلة بحفيدها مستشفى..

-خاله صار اعذروني .. بس صار ساعة اسمع كلامكم واتگطع گلبي

..
بنيتكم شبيها ..
مسحت دموعي واخذت نفس ..
عذاب گام طلع برة لان اتصل عليه زوج تماضر ..

فجاوبتها اني ..
خاله بنتي مصارلها اسبوعين من خرجناها من مستشفى السرطان بالاردن ..
وكنا فرحانين بيها وبشفائها بفضل الله ودعائنا ودعاء الناس الها ..
بس هسا رجعت تسخن وتخربطت ..
والدكتور محذرنا من السخونه ..
والاهم اعراض المرض السخونه العالية والغثيان وعدم الشهيه ..
هسا هي ماعدها بس السخونه .. والدكتور الي شافها خوفنا وطلب تحاليل جديدة ..

المرأة اني احجيلها الي صار ويانا وهي تبجي ..
-الله يساعدكم يخاله .. الي شفتوه لو جبل كان انهد الم الضنا صعب وماينحمل ..
اني ابن ابني متنگ واحنه كلنا متخبلين بالبيت ..

اريد من الله واحلفه برقية بنت الحسين انه يشافي هذي الطفله ومايشوفها شر ..
اطلبي مرادج منها يخاله ..
رقية مضلومة ودعائها مستجاب عند الله ومكانتها قيمة عند ربي العالمين ..
اندبيها والله يوگفلج بجاهها عندة ..

اجت تماضر وزوجها دخلوا وي عذاب ..
استحت المراة وراحت ..

شفت تماضر وابجي .. وهي تواسي بيه ..
اتقربت الشهد بوستها ..
-عماتي حبيبتي يروحي بيه ولابيج شنو شفتي من عمرج بس المرض والالم ..

اسمعها وبداخلي اندب .. يارقية ..
يارب برقية بنت الحسين ..
ذيج طفله وهذي طفله .. وبمنزله رقية اريد شفاء بنتي ..
عهد علية بس تطيب ومابيها شي ..
اخذها واروح الرقية الي بعمري مزايرتها ..
واخذلها الي اگدر عليه ..
كانت الاوضاع بسوريا صعبة ..
وهسا يله هدأ الوضع بيها ..
بس كنت مصرة اروح وازورها لو اعرف اخر يوم بعمري المهم الله يشفي بنتي ويطيبها ..

بقت تماضر وزوجها يمنا فترة وگالت راح اروح ..
امي گلبها النار ع شهد ..
بس استحت من عمتي والبنات والخطار العدنا .
للعصر اخلي ابو تمام يجيبها يمج هنا تبقى ..

عذاب .. لا وين تبقى خطيه هي تعبانه ..
تماضر .. تدري بأمي گلبها ماينطيها ..
باوعتلنا وگالت .. شبيدي عليكم اذا حتى بزواجكم ماتهنيتوا .. اكيد هاي عين ماصلت ع النبي ..

اتنهد عذاب وگال .. دخلي تطيب شهد ومادامهن بخير واني طيب اخلي ايامهن كلها عيد وونسة واعوضهن ع الي راح ..

تماضر .. ان شاء الله.. يله فروح اني رايحة ..
هاي الغراض الي ردتوها كلها هنا ..
بس قبل مااروح لو مخليتني ارتب السرير ..
فرح .. مشكورة رحم الله والديج ..
اني ارتبه ..

من ارتاحيت شويه ..
اخذ عذاب مني شهد .. لان مااگدر اخليها بسرير المستشفيات اخاف عليها ..
فرشت السرير ورتبته ..
وخليت المخدة مالتنا وعليها خاولي نضيف ..
ونومتها عليه وغطيتها ببطانية جديدة الي جابوها ..

گال عذاب .. تمددي يمها وارتاحي تعبتي .. واني هنا بالممر يمج ..
بس عيب منا نسوان وزحمة ابقى ..

طلع من الردهة ..
واني مخلية شهد بحضني . واحس عيوني يتطابگن من البجي والنعاس ..
غفيت ..
گعدت ع صوت خالتي وماما يبوسن بشهد .. فزيت
ماما .. يمة اسم الله شبيج ..
فرح .. مااعرف عبالي شو شبيها ..
خالتي .. سودة عليه ولاتهنيتي بحياتج جبتيها ضيم بضيم
فرح .. راضيه بكل شي بس خلي تطلع التحاليل نضيفه ومابيها شي ..
اتحمل كل الضيم الي بالدنيا ..
ماما .. شفتي يمة معزة الضنا غاليه وماتنحمل ..

بقن يمي لليل .. اجة عذاب جايب عشا ..
اني مااشتهي بس اصر عذاب اكل شويه ..
خالتي گالت ..
اني ابات يمج لان عذاب مايصير يبقى هنا وخاف تحتاجين شي ..
عذاب .. لا راح ابقى بالسيارة ابات واذا احتاجت شي تتصل عليه واجي ..
خالتي .. بلكي اذا راحت باجر عمتك اني اجي الصبح ..

راحت ماما وخالتي وبقيت وحدي .. بين ماوصلهن عذاب ورجع ..
اتأخر يله اجة ..
جايب علاگة كبيرة ..
كانت شهودة گاعده بحضني ..
گالها شوشه حبيبتي جبتلج لعابه ..
گالتله .. بعابه .. وتضحك ..
طلعها الها گامت تصفگ وتضحك ..
باوعتلي ..
ماما بعابة .. فرحت خطيه .
بقت تشغلها واللعابه تغني وي فرحانه ..
شويه صارت زينة ..

طلع علبة صغير .. گال وهاي الامها وحبيبتي ..
فرح .. شنو هاي ..
عذاب .. افتحيها وشوفي ولو بسيطة بس ان شاء الله اعوضج بالاحسن منها ..
فرح .. وجودكم يمي اكبر هدية .. فتحتها سوار رفيع حيل وبي خرز عيون زرق حلو ونازك ..

ضحكت .. گتله يرادلنا عيون كبار مو صغار ..
عذاب .. ههههههه عجبني وجبته واخذت رأي خالتي وامي گالن حلو ..
فرح .. بس ماكو داعي كافي المصاريف الي صرفتها ع الزواج انت شعندك ..
عذاب .. مدامكم يمي وبخير الله الرازق ان شاء الله
فرح .. والنعم بالله ..

خطيه لليل راح نام بالسيارة واني بقيت سهرانه اخاف ترجع تسخن ..
للصبح يجي عذاب انام شويه وهو يبقى يم شهد ..
الى ان طلعت التحاليل ..
گال راح اخذهن للدكتور يشوفهن ..
فرح .. اني وياك اروح لازم اسمع بأذني ..
عذاب .. فرح ماكو داعي ابقي هنا احسن .
فرح .. عذاب اترجاك خليني اروح واطمأن ..

رحنا الغرفه الدكتور .. باوع للتحاليل ..
وباوعلنا اني گلبي يدگ حيل ولو يذبحوني مايلگون قطرة دم بيه ..
ابتسم وگال الحمد لله لتخافون ..
ماكو شي يخوف ..
بس للاحتياط راح انبقيها اليوم ..
و

لازم تخلون بالكم عليها اكثر وماتسخن ..
وراح اكتبلكم علاج اذا تمرضت تستخدموه ..

الفرحة ماوسعتني ..
حضنتها وابجي وهي تضحك ماتعرف السالفه شنو .
وعذاب اتنهد وگال الحمد لله ..
خليت عذاب يم الدكتور ..
ورجعت للردهة اريد ابشر المرأة الي بشرتني والي دعت الله برقية عليها السلام ..

باوعتلها مكانهم فارغ .. سألت عليها گالوا طلعوا الدكتور خرجهم ..
ضجت حيل .. بس دعيت الها ربي يوفقها وين متكون ..

اجة عذاب .. ها حبي شبيج ..
فرح .. تتذكر المرأه الي سولفتلك عليها ..
ماهي طلعت عبالي ابشرها ..
عذاب .. الله يبشرها بكل خير .. وان شاء الله بس تتحسن اوضاع سوريا ناخذ شهد ونروح نوفي النذر ..

ثانـي يوم طلعنا من المستشفى والفرحة ماسايعتني دخلتلها ابجي وطلعت منها اضحك ..
سبحانك ياالهي بيدك تقلب الانسان من حال الى حال الف الحمد والشكر الك ..

گتله عذاب خلينا نروح للامام الكاظم ازور شهودة قبل لنروح للبيت ..

دخلنا ع الامام ودموعي سبقتني ..
وشكرت الله واهل البيت ع عطاياهم ..
طلعنا للبيت بعدها ..

وريحة الاكل واصله للشارع .. اكيد خاله مبدعة كالعادة
دخلنا وگامت تطش جكليت علينا ..
اجت تمارة سحبت شهد مني وبوستها ..
وتماضر وعمو ..
اخذوها من ايد الايد ..

گالت خالتي صعدوا ارتاحوا يمة .. واحنة هنا يمها مانتركها ..
ترددت اتركها .. بس عذاب اشرلي براسه ..
گلتلها خاله اي شي يصير صيحيلي ..
خالتي .. ان شاء الله ماكو شي .. انتو نامو ساعتين بين مانكمل الغدا ونگعدكم ..

صعدت لفوگ .. احس ريحة المستشفى بيه ..
طلعت ملابس وگلت العذاب راح اسبح واجي ..
عذاب .. مو تتأخرين مشتاقلج مووووت ومالحگت اشبع منج ..

اخذت المنشفه ورحت للحمام ..
فتحت الدوش ودخلت جواه ..
حسيت بأنتعاش واحس جسمي كله نحول من التعب ..
اندگت الباب ..
-منو ..
-اني فرح افتحي ..
-لا عذاب ما روح ..
-وج شنو روح هو اني غريب غير زوجج تستحين مني ..
-اي استحي ..
-اشو بالغرفه ماتگولين هيج ههههه .. افتحي منا اهلي ليسمعون شبيج ..
-اي راح افتح بس بشرط .
-شنو ؟؟
-راح اطفي الضوة وانت جيب شمعة موجودة ع الكومدي بالشمعدان واشعلها وجيبها ..
-امممممم قصدج جو رومانسي .
-لا قصدي حتى متشوف وكذا ..
-ههههههه اني اعلمج شلون تستحين ..

راح شعل شمعه وجابها ..
گتله طفي الضوة ..
طفاه ودخل .
خليت الشمعه ع الشباك .. حضني .. احس جسمي ارتعش ..
گال اتركي اني اسبحج بيدي. .
نزع ملابسه وعلگهن ..
واخذ الليفه وخلالها غسول وبدا يمشيها ع جسمي بخفة
فعلا حسيت بأسترخاء ..
بحياتي كلها ماعشت هيج احساس ..
حلو من انت گاعد واكو من يسبحك ويهتم بيك ..
بس اكيد عذاب ماگعد راحة واخذ مقابل ع اهتمامة ..
عشنا جو حلو جو الدوش وبالحمام ..
وكنت مغمضة عيني واتخيل بنفسي جو شلال واني وياه وحدنا بجو رومانسي ..
كملنا وسبحنا وطلعنا .
دخلنا الغرفة .
طلعت ثوب قصير لونة اسود وذهبي ..
جففت شعري ..
بين مانزل عذاب بطانية من الكنتور لان اني قزومة ههههه وهو متكفل بهذا الشي ..

نمت بحضن حبيبي وماحسينا بأرواحتنا الا للعصر يله گعدنا من التعب ..
سمعنا تماضر تدز رسائله ع الفايبر ..
فتحتها ..
فروحة گعدتوا لو بعدكم .. بيت عمي هنا اجو يردون يسلمون عليكم ..

عذاب .. منو ؟؟
فرح .. تماضر تگول بيت عمك هنا خلي ننزل عيب ..
عذاب .. عيب شنو يابة احنه بعدنا عرسان جدد ..
فرح.. ههههه بس تدري هسا بالاربعة العصر شگد نمنا
عذاب .. ولاحسيت بالوقت وانتي بحضني .. ماتخلينا ناخذ شوط ثاني ههههه ..
فرح .. عذاااااااب شنو هاي ..
عذاب .. اويلي يااااابة مااتحمل بعد ..
گمت نمت ع بطني ووجهي بوجهة ..
لزم حنجي وگال .. ابقي دوم هيج ولاتتغيرين وربي اخليج اسعد انسانة بالدنيا ..
فرح .. مستحيل اتغيير انت روحي ليش اكو احد يتغير ع روحة ..
عذاب .. دگومي بدلي وخلي ننزل لا اهريج اشواط لحد الليل ..
فرح .. هههههه لا گايمة والله ..

گمت لبست گلبية حلوة ورتبت نفسي وخليت مكياج ولفيت شالي ..
وعذاب لبس تراك ونزلنا ..

كانوا متجمعين بالصاله كلهم ..
صارت عيني بعين عبير .. جاية وياهم ماشفتها بالزواج ..
سويت نفسي ماشفتها وخليت ايدي بإيد عذاب ..
عصر اصابعي بأصابعه وشبكهن حيل ..

من نزلنا هديت ايدة ..
رحت سلمت ع مرت عمهم ومرت باهل .. اتقربت عبير بوستها بوسة وحدة وتركتها ..

سلمت ع عمهم وباهل ..
باركولي وتحمدوا ع سلامة شهد ..

سمعت صوت شهد گعدت ..
رحت جبتها واجيت ..
اخذتها مرت عمهم .. ماقبلت لان هسا گاعدة من النوم فتتنحس واحد يشيلها غيري ..
جبتلها ملابس وبدلتلها ..
الدكتور گال اهم شي لتخلوها تعرگ ولتبرد ..

للمغرب .. ردت اسوي وي البنات عشا ..
ماقبلت تماضر وتمارة ..
تمارة .. روحي يم شهد اگعدي لاتبجي خطيه ..

بقيت مستغربه ع تصرفاتها ..
وحسيتها متغيرة ..
جبت شهد يمي وداسوي سلطة ..
اجة. عذاب گعد يمي ..
اووووف مرتي اشتاقيتلج ..

همستله عيب منا بنات ..
رفعت راسي شفت عبير گبالي ودها تاكلني من الغيرة .

ضجت حيل .. گتله عذاب گوم منا ..
ساع

تها خفت من عينها ..
مااعرف ليش تضوج من تشوفني وي عذاب ..
مرات احسها تميل اله او تحبه ..
بس اگول ممعقوله هو كبير بالنسبة الها ..
وبعدين هي دخلت جامعه واكيد شافت الاصغر والاحلى منه ..

كانت تتفيك وتحجي بالجامعه ..
ورحت وكذا ..
اووووووف من كلامها اشتاقيت للجامعه والصديقاتـي ..

صارت عيني بعين تمارة شفتها ضايجة وتتحسر ع كلام تمارة ..
وعرفت غاية عبير شنو .
متقصدة هيج تحجي حتى تغيضني وتغيض تمارة ..

من تعشوا بيت عمهم وكملوا ..
شال عمهم ضرف بي مبلغ وگال هذي هديتهم والسلامة شهد ..

گلت العذاب يصعد وياه شهد بين مااسوي صحن فواكه الها لان تگعد مرات جوعانه ..

سويت صحن فواكه الها والنا ..
خليته بصينية...
دخلت تمارة للمطبخ ..

ردت اطلع ..
صاحتني ..
فرح اريد احجي وياج ..

رجعت .. احجي ..
-تعالي اگعدي ..
گعدت ..
-فرح اعرف اني ضلمتج هواي بس تگدرين تگولين مرحلة طيش وتصرفت بلا وعي ..
وكانت عبير توز بيه ..
وبدون زعل .. عبالي انتي مثل منار ..
اخذت نضرة عليج بسببها ..
الله يرحمها مااريد اذمها ..
بس كانت مغرورة ومتحب تخلط بينا ..
وتگلي انتي زعطوطة ماتفهميني ودايما تقلل من شأني
حتى مرات عذاب يگلي اطلعي ويانا ..
وابدل تشوفني تسويلها زعلة وماتطلع ..
الى ان خطيه صار بينا ..
لايگدر يكسر بخاطري .. ولابخاطرها لان يحبها ..
صحيح المفروض افرق بينجن ومااحكم ..
بس بسوايتها الاخيرة خلتني اكرهجن كلها ..
ماانكر اني هم غلطت ومشيت ورى عبير وغرتني بالحب وكذا ..
وتالي الله عاقبني وانحرمت من ثقه اهلي وجامعتي ..
بينما عبير هي سبب البلاوي كلها واهلها مامنعوها لا من جامعه ولاموبايل ولاطلعه ..

شگد احاول ابين الهم انه اني كبرت وعقلت مايفهموني
وهذي مرحلتين فاتتني ..
ع الاقل انتي سامحيني ..
احجي وياي لاتخليتي وحيدة محتاجة صديقه او اخت تگلي هذا الصح والخطأ ..
تماضر من. كنت اشوفها قريبه عليج اكثر مني اضوج واغار .. لان مايوم بحياتها اعتبرتني صديقه الها ونصحتني ..
ودايما تگلي بعدج طفله ماتفهمين ..
ادري هسا تضحكين عليه وتگولين تحاول تبرر افعالها .
بس اكيد انسانه مثلج ضحت كل هذي التضحيات وسامحت الكل راح تسامحني ..

ماانكر شگد كنت ضايجة منها .. بس من شفت دموعها وكلامها نابع من گلبها اتأثرت ..

گمت وگفت وهي صافنه عليه ..
فتحتلها ايدي .. تعالي الحضني طبعا اسامحج ..
گمزت الحضني وحضنتني وتبجي وهي اطول مني ..
منضرنا يضحك ..

گلتلها ارجعي اگعدي فضحتيني بطولج هذا ..
ضحكت وگعدت ..
گلتلها .. هسا اخوج يخبصني لان اتأخرت ..
الايام هواي ونگعد نسولف ونفتح گلوبنا البعض ..
بس من وجاي اعتبريني اختج ولاتتصورين اضوج او امل بالعكس شگد كنت اتمنى نگعد ونسولف بس انتي الي كنتي مبتعدة ..
ع سالفه عذاب .. الفات مات وعلينا بالحاظر ..
افتحي صفحة جديدة وي نفسج بالاول ..
واكيد الكل راح يشوف تغيرج ويرجعون يثقون بيج ..

اخذت المواعين وصعدت ..
فرحت للي صار واخيرا صار كلشي مثل مااتمنى ..

شافني عذاب ..
صفگ هو بنته ..
هذي ماما اجت ..
ضحكت .. هاي شنو. منتضريني ..
خليت المواعين ..
خبصتنا شهودة
نطيتها ماعونها وگعدت تاكل ..
واني دخلت ابدل بجهة غرفه شهد..
الغرفه قسمين ..
جهة غرفتنا والجهة الثانية الغرفه شهودة ..

رجعت شافني عذاب وگال ..
-يله شهودة بابا بسرعه اكلي ونامي .. ترى ابوج بعد مايتحمل .. وصعدت الحماوة عندة ..
وراح تبدي المباراة قبل موعدها هو يحجي واني خربانه ضحك ..

فرح .. ماادري بيك تحب مباراة كرة القدم ..
عذاب .. شلون مااحبها وانتي بيها .. اصلا وياج اتحدى كريستيانو اذا يلحگني ..

اتقربت منه ..
عذااااااب حبيبي اترك المزح شويه اريد احجي وياك ..
باوعلي بجديه احجي حبيبتي ..
- امممم بخصوص تمارة خطيه شوكت ترجع تداوم .. جماعتها صاروا ثاني مرحله ..

عبس وجهه..
-اغلقي الموضوع فرح لاتفتحيه احسن ..

باوع حبيبي .. البنية ندمانه وهسا جوة اعتذرت وتبجي وشرحتلي ليش كانت تضوج مني ..
واني بالنسبة الي سامحتها ..
اذا الله ويسامح احنه شنو ونتخذ موقف ونبقى زعلانين ونعاقب بكيفنا ..

عذاب .. انتي شنو فرح .. وج اني متزوج جوهرة نادرة وماادري .. لعد شلون ماشفتج من قبل هيج اعمى ومافرقت بين اللماز والفالصو ..

فرح .. فديت عذاااابي مو خجلت ..
عذاب .. اويلي ياربي غير تنام شهد ولو اذا هي خلصتها نوم للعصر شلون تنام بعد ..

فرح… هههههه مستعدة انومها الك بسرعه بس گلي شگلت بخصوص تمارة ..
عذاب .. والله عبالي تگولين ع دوامج واني اگول شعجب مافتحت موضوع دوامها ..
فرح .. اني السنه راح اجلها الخاطر بنتي محتاجتني اكثر راح اخذ محاظرات وادرس بالبيت حتى السنة الجايه اخذ امتياز ..
عبس وجهة عليه ..
هاااا اشو عبست بس لامتخليني اكمل ..
عذاب .. لا شلون مااخليج اصلا مو من حقي احرمج من مستقبلج وانتي الي جاي تضحين بي الخاطر شهد ..
فرح .. قصدك اضحي الخاطر بنتي ..
عذاب .. طبعا بنتج لان انتي الي تعبتي بيها وربتيها والفضل لله والج الشفائها ..
حضني وباسني ب

راسي…
الي ترديه يصير بس مو السنه ..
السنه الجاية انتي وياها تداومن سويه واصلا مابقى شي ع نص السنه اكيد بعد ماكو جامعه تقبلها بعد ..

طفرت الحضنه وبوسته .. يومة شنو انت طلعت كيوت وحباب ..
عذاب .. كيوت شنو هاي النوب ..
فرح .. يعني حلو ..
عذاب .. ليش اني مو حلو .
فرح .. تخبل فديت عذابي انا ..
وهسا راح اخذ شهودة انومها واتفرغلك يحلو ..
عذاب .. اويلي .. واني منتضر على نار ياعسل وغمزلي

نومتها ورجعت يمة وكالعادة مايبطل سوالفه ..
بس الحلو بي رومانسي ويعيشني بغير اجواء ..

ثاني يوم گاعدين ع الغدا ..
هو اصلا عساس اني يسويلي عذاب مطبخ فوگ وحدي واطبخ بي ..
بس ماقبلت لان خالتي خطيه تحب ننجمع وياها ع السفرة فأحنا دا نتغدا ..
وعمو گاعد ..
عذاب گال التمارة ..
تمارة السنة الجاية نشوف معدلج شيقبل ونقدملج ع اي جامعه حتى لو اهلية ..
او مسائيه ..

تمارة فرحت وگامت تبوسه .. گالها الفضل الفرح ..
لو ماگلبها طيب ماكانت سامحتج ولاكان اقتنعت ترجعين بعد سوالفج الاخيرة ..
هي گامت تعتذر وتبجي وگالت غلطة وغلطتها شوكت تسامحوني وتثقون بيه بعد ..
گامت من الغدا ..
گمت وراها ..
گلتلها .. وج والله عذاب گلبه طيب واكيد تعرفيه لان اخوج قبل ليصير زوجي ..
بس هو گال هيج لان يريد ينبهج لااكثر ..
وبعدين المهم راح ترجعين تداومين ..

هدأت .. وطلعت من الغرفة سمعت عمو يحجي وي عمتي ..
يگلها والله ضلمتها الهذي البنية طلعت اصيلة ..
خالتي .. فروحة وردة وكم مرة گتلك لاتحكم عليه بسبب اختها وانت مااقتنعت..
عمو .. الحمد لله من عرفتها قبل فوات الاوان ..
فرحت بداخلي من سمعت كلامه ..
صعدت فرحانه العذاب ..
وخبرته ..
گال الي يشوف گلبج طبعا يتندم ويحبج ..
وتورطت رحت قشمرني ومانزلت للعصر ..
حتى المواعين خطيه تمارة غاسلتهن بسبب عذاب اخرني وماگدرت انزل ..

مرت الايام ..
وعذاب رجع للدوام .. لان عندة ديون ولازم يوفيها وهو كان بلا راتب ..
عمو يساعدة وينطيه جزء من الارباح لان اصلا عذاب شريك وياه ..
وبالاجازة مالته يروح يشتغل وي ابوه لان عمو تعبان ومايگدر وحدة ..
ويتساعدون حتى يرجعون افضل من قبل ..

اما تمارة علاقتي بيها تحسنت كلش ..
وصارت تتقرب الشهد وتهتم بيها ..
وبيتنا صار حلو كله ألفة وحب ..

اما شهد فبدت تتحسن ..
ودايما ع تواصل وي دكتورها بالاردن وكان يطمنا اول بأول ..

صارت عطله نصف السنة واجت زهراء ومصطفى عزمونا ع الزواج بالقاعة وحفله مختلط ..

عذاب ماقبل لان مختلط ..
بس گتله عيب والبنية وگفت وياي بزواجي ..واجو لهنا وعزمونا ميصير منروح ..

تالي بالگوة اقتنع ..
كنت حايرة شنو البس .. واستحي اطلب من عذاب واشتري فستان ..
لان اعرف ماعندة واذا گتله مايقصر اعرفه ..

بالحنة ماتركتها وبقيت وياها من الصبح لليل ..
اني وتمارة ومروة رحنا ..
بيتهم ماشاء الله بالمنصور عبالك قصر ..
والكل لبسهم راقي وحلو ..
وصحيح احنة ماقاصرين ..
بس اكيد مانعلى عليهم باللبس ووالاناقة ..

كنت مخلية شهد بحضني وگاعدة ..
دخلت وحدة شايفتها واعرفها بس مااتذكر ..

صفنت عليها اتذكرتها ..
معقولـة هذي ام عمر .. شجابها هنا ..

شافتني ابتسمت وبوستني ..
سألتني عن حالي وشافت شهودة وبوستها ..
گالت .. حياتـي هذي بنتج .. تخبل فدوة ..

صارت عينها ع تمارة ومروة ..
گالت ذولي اخواتج ..
فرح .. هذي حماتي وهذي اختي ..
ام عمر الله يخليهم حلوات ..

كملت الحفله ورجعنا ..
ثاني يوم الصبح ..
گال عذاب خلي شهد عند امي وتمارة وخلينا نطلع ..
فرح .. وين ..
عذاب .. شعليج بسرعة گومي ..
بدلت وطلعنا وتفاجأت ماخذني المحل فساتين للمحجبات راقي حيل ..

گال اختاري ..
باوعتله .. لا عذاب مبين المحل غالي ..
عذاب .. واذا مايغلى عليج ..
فرح .. بس ..
عذاب .. اووووه ياعيني لاتشيلن هم .. سامعة المثل اصرف مافي الجيب يأتيك مافي الغيب ..
فرح .. هههههه خوش مثل ..
عذاب .. يله ادخلي ولاتشيلين هم. والا احلى وارقى واحد تختارين ..

اختاريت فستان جويتي .. طويل حلو ..
ورهمت حجاب وياه ..
وهو هم اختار قاط جويتي حلو ..

رجعنا للبيت .. اخذت حذائي والفستان ..
ورحت الصالون قريب علينا ..
سويت ميك اب ..
وبدلت ولفيت الحجاب لفه مناسبه للفستان ..
ولبست كعب عالي ..
اتصلت بعذاب اجة اخذني ..
شافني تخبل ..
وج شلون بيه اليوم يمكن اگضيها عرك بسببج ..
شطالعه ..
فرح .. غير زواج اختي شلون مااطلع حلوة واني اخت العروس ..
عذاب .. وشنو ذنب زوج اخت العروس يخلصها غيرة. وقهر ..

اخذني ورحنا للقاعة .. شهد تركناها عند خالة وتمارة ..
دخلت واني لازمة ايد حبيبي ..
كنت مرتبكة ومتوترة بس حبيبي وهيبتة ومشيته نطتني القوة والثقه ..

الكل كان يباوعلنا ..
والاجمل هواي ناس تعرفت ع عذاب وسلموا عليه ..
ويگلوله نقيب عذاب ..
بقيت صافنة .. شنو نقيب هو غير ضابط ..
همستله .. عذاب اشو يگولون نقيب ..
ابتسم .. اشششش حبيبي مو مهم شنوو اني المهم اني عذاب وبس يمج ..
ضحكت .. دايما يعرف شلون يتوهني بالكلام ..

دخلوا العرسان ع

اغنية عرس الغوااالي ..
كان الترتيب واختيار الاغانـي كلشي راقي ونازك ..

دخلوا .. وحبيبتي زهورة طالعة تخبل وكانت لابسة بدله وحجاب وتاج وبرگع طالعه فد شي ..

وصلها مصطفى للكوشه واخذوه جماعته يدبكون ويرگصون ..

گتله حبيبي راح اروح اسلم ع زهورة ..
-روحي حبيبتي ..
رحت بوستها وحضنتها..
-وج زهوري طالعه تخبلين ..
-فديتج فروحتي وانتي جمال .. شعجب عذاب خلاج هيج تجين ..
-هههههه اسكتي ليسمعج ..

ضحكت گالت دباعي زوجج ..
التفتت لگيت مصطفى ساحبة وديدبك وياه ..
بقت عيوني تراقبة وهو ينزل للگاع ويصعد وجكارتة بيدة والهيبة مالته التسطر ..

كنت اباوع للولد كلها والشباب الي ترگص ماكو بهيبتة وشخصيته ..
وعيوني تراقبة وفرحانه صارت عيني ع عمر يرگص گباله احس غصة ببلعومي ..

-وج زهراء باعي منو گبال عذاب ..
-اگول زوجج يبدع تالي المنافس مالته ..

-لاتضحكين حبيبتي ترى بحركة من عمر عذاب يخرب عرسج كله ..
-لا بطلت مااضحك ..
وبقت تدعي ههههه وتگول اللهم بردا وسلاما ..

كملت الاغنية الكل رجع المكانه ..
اجة مصطفى دااسلم عليه . اجة وراه عمر ..
كانت نضراته عتب او حسرة ..
گال ..شلونج فرح ان شاء مرتاحة ..

بعدني ماحجيت ولارديت ..
حسيت بإيد لزمت ايديه ..
-يله حبيبتي تعاي يمي ..
واخذني ..

گال .. هذا بعدة عينة عليج شفتي نضراته ..
فرح .. گعدت مقابيله وخليت ايدي ع خدي وايد الثانية لزمت ايدة ..
وگتله .. المهم عيني المن تشوف وگلبي المن يريد ..
ابتسم ودار وجهة ..
بس بقى يراقبة ويخوزر بي ..
تعيشنا وكملنا .. باركنا للعرسان قبل ليطلعون ..
وگلتلها بس ترجعون اجيج للبيت ..

ماصدگت كملت الحفله وطلعنا ..
زهورة طلعوا الاربيل سافروا ..
وسهير خطية تتصل وفتحنالها فيديو.. شگد تمنت تجي بس اهلها ماقبلوا ..

رجعت تعبانه للبيت ..
ولابسة كعب عالي ورفيع ..
اول مادخلت كانت الطرمة كاشي وعذاب بعد برة ..
كنت امشي سريع مشتاقه الشهودتي ..
ماحسيت الا تزحلگت ووگعت التوت رجلي ووگعت وايدي صارت ورى ظهري ..
وعبالك كل جسمي انشل من الالم ..
صحت بعلو صوتي ..
اجة عذاب يركض وطلعت خالتي وتمارة يركضون ..

راد يگومني عذاب مااتحملت الالم ..
گتله عذاب راح اموت مااگدر اگوم ..
عذاب .. ع الاقل خليني اشيلج للمستشفى ..

شالني عذاب وركضت تمارة گدامة فتحت الباب همزين ليل ومحد اكو بالشارع ..
خالتي جابت عبايتها واجت تركض ورانا ..
گلتلها تمارة خلي بالج ع شهد ..
وجيبيلي عباتي الاسلامية بسرعه ..

ركضت جابت عباتي واجت والالم موتني ومااگدر اگعد لو اتحرك ..
بس دموعي يجرن ..

عذاب سوة الطريق دقايق وخالتي كل شويه تگلي راح تدعمنا ..
وصلنا للمستشفى ..
نزل يشيلني گتله خلي العبايه ع جسمي استحيت ادخل بهذا شكلي ومكياجي مبين جايه من حفله ..

دخلت للمستشفى وعذاب شايلني واحس الكل يباوعلنا ..
ضميت راسي بكتفه وابجي من الالم .

الدكتور كتبلنا اشعة بسرعة ..
طلع كسر برجلي وايدي اليسرى ..
جبروا رجلي وايدي ..
والحمد لله ظهري والحوض سليمات كان تدمرت ..

بس عشت بمعاناة حقيقيه ..
لااگدر اگوم ولااگعد ..
اذا هنا عذاب هو يشيلني ومعتمدة عليه ..
وحتى الغرفتنا يصعدني ووننام ..
بس بعد ميروح للدوام .. اتازم حيل واستحي اگول التمارة والخالتي فتعذبت حيل ..

وشهد ماتقبل الا اني ابدللها وانومها ..
ومن تشوف حالتي واگلها اواه ..
تگلي وين بباب يعني عذاب .. ماتصيحله بابا ..

عذاب ماتركني وهو الي يبدلي ويغسلي وراعيني وماخلاني احس بعازة ..
وماما هم ماتركتني گامت تجي بعد ماعذاب يداوم ..

ولو هي الي بيها كافيها .. ودايما مشاكل واخواني مثل ماهم ماتغيروا ويمكن زادوا بعد مااجتمعن الاخوات ..

مرت الاشهر واني صرت زينه ووگفت ع رجلي ..
وكان عذاب يلح عليه بطفل ..
وكنا نحاول هواي وميصير ..
وشگد راجعت بس الله ماقاسملنا بعد ..

زهراء حملت من ليلتها وماقطعت عنها ابد وهي هم بفترة مرضتي تجيني دايما بس سهير مو دايما تتواصل وانعزلت حيل ..

من فاتت السنه .. داومت اني وتمارة وكانت فرحانه خطيه واحسها كبرت وعقلت ..
بس كنا كل فترة ونشوف عذاب ناط النا بالجامعه ..
سواء اني او هي ..
واني ماكنت احسسه بالعكس اگله همزين اجيت افرح تجي تشوفني هنا او تاخذتي حتى اتباهى بزوجي بالدوام وهو يفرح ..

ام ثابت وام نور ماقطعت عنهم ودايما ازورهم ..
كملت الجامعه وگعدت بالبيت صارلي سنه ..
واكيد ماراح انتضر التعيين وحاليا وبعد الحاح وتوسل حكمل ماستر ..
شهودة كبرت وحالتها الصحيه زينه بس لسا مااتركها واراقبها ودايما نسويلها تحاليل شامله مع العلم هسا هي بالروضه واخذها وارجعها بيدي ..
وصاير اللسانها شطوله هههههه ..
ولحد الان تتعارك هي وعذاب عليه وتگله هذي مامتي انت روح المامتك جوة تقصد ع خالتي ههههه ..
وعشمي بالله انه يقسملي بطفل لاخ واخو الشهودة ونفرح بي ..
زهورة صار عندها ولد وسمته أدم ..
وبنيه اسمها درة عمرها اقل السنه ..
معتز مارجع بعد واستقر هناك ..
تمارة خطبها زميل وياها واين ناس ومحترم ..

اهلي باعوا