راح ينطيه بوكس من عمر سأل .. منو الاخ ..
زهراء .. اي وربي اني هم گلت ..
فرح .. شگد عيب من مصطفى خربت عليه مفاجئتة ..
زهراء .. لا وج وربي هو ضاج عليج يگول شلون گدرت. تعيش وياه مبين عصبي وماينحمل ..
وعمر هم ضاج ..
ومن گلناله زوجج السابق.
راد يطلع وراكم بس مصطفى ماخلاه ..
فرح . اي هي هاي الناقصتني دور عمر عليه .. حتى عذاب يصدگ شكوكة وتصير مكاتل بالشارع ..
وج هو بلا كلشي ويگلي مامرتاحله احس عينه عليج ..
زهراء .. وج هذا العذاب مو خالي اخاف يشتغل بالاستخبارات .. لان يفهم الشخص من عيونه ..
فرح .. اووووه زهراء كافي مالي خلگ سدي الموضوع ..
انتو شلونها حفلتكم ..
زهراء .. ماكو شي بس اكلنا وقطعنا الكيك وقدملي الهديه جابلي خاتم حلو حيل هسا اصورث وادزة الج .
فرح .. حبيبتي ربي يسعدكم ولو نسيت انطيج هديتج ع باجر اجيبها ..
زهراء .. ولي شنو هديه اصلا انتي وحدج هديه الي الله نطاني اخوات الي كنت اتمناهم ..
فرح .. اي وربي انتو صدگ اخواتي وماانسى وگفتكم وياي ..
زهراء .. يلة روحي نامي وارتاحي باي ..

سديته من زهراء ورجعت نمت ..
بگيت اتگلب الى ان غفيت
گعدت العصر اسمع صوت امي وجلال يتناقشون وبلال گاعد ورنا ..
من شفت الاجتماع گلت الله يستر ..
گالت ماما ..
فرح تعاي راح نخطب الجلال هبة بنت عمج ..
ساعتها عرفت ليش ماما ضايجة هو رنا وبالگوة مدبريها وياها دور هبة لا الله اليستر .
فرح .. اي مبروك ..
جلال .. وشبيج تحجيها من ورى خشمج..
فرح .. قابل شأگول الله يجمعكم وتتهنون سويه ..
رنا .. خاف لان اختي ضجتن لو جايب غريبه جان طگيتن اصبع ولاتگولن بنات عمنا ..
باوعتلها وسكتت ..
ماما .. شنو هالحجي .. قابل شعدهن وياجن مااقبل من هسا يبدي المنابز والكلام الزايد ..
الي بينا مكفينا .. البنية الي تحترم عيالها وتأدي واجبها محد يطخ شعرة منها ..
بلال .. يمة شبيج قابل هي شحجت ..
ماما .. واختك هم ماحجت شي وشفتهر شلون نزلت عليها جريدة مالها داعي ..
جلال .. يووووه گلبتها عركة. لان ردت افرح ويخزر بيه
فرح .. ليش تخزر بالعافية عليكم اني شعليه اشو تارك الي حجت وتخزر بيه ..
ماما .. كافي وربي اذا تبقون هيج تعاملون اخواتكم اقسم البيت واعيش اني وبناتي وحدنا وراسنا بارد ..
وانت جلال لاتخليني حتى خطبة مااحظر اذا من هسا تدوس عليهن باجر اذا تزوجن شتسوي ..

رنا زعلت وگامت ..وبلال وجلال يحجون عليه وع امي ..
درت وجهي ورحت للمطبخ ..
لو ادري ماطالعه ..
هاي بأولها هيج لعد اذا اجتمعن شلون ..

شويه واجوا اعتذروا من ماما ورنا باست راسها ..
لان ماما حلفت بروح ماما تحظر لاعرس ولاخطبة ..

رادوا يسايروها ويعدون العرس ع خير ..
وفعلا بهذي الفترة اتغيروا 180 درجة ..
راحن عماتي وماما خطبن هبة من عمي ..
ولان ولد عم بسرعة حددوا يوم المهر ..
وبدوا يجهزون ..
اني من الدوام للبيت اجي ميته تعب ..
بهذي الفترة گمت اتجنب عمر وماكو بس السلام بينا .
لان اعرف عذاب مايسكت وراح يخلي منو يراقبني واني اصلا ماناقصه مشاكل ..
واخاف يروح يگول الاخواني ويبطلوني .
لو يسوي مشكله بالجامعه وانفضح ..

بيوم گاعدين اني وزهراء وسهير .. وحايرة شألبس بمهر جلال ..
گالت زهراء .. لاتشترين والفساتين غاليه ومو هالگد .
اني عندي فستان اسود طويل وردن شيفون ونازك البسيه بس يرادله كعب عالي لان طويل ..

وسهير گالت خلي مكياج وكذا اني الصراحة مااحب المكياج .. بس البنات گالوا خلي شي خفيف حتى يبرز ملامح وجهج ..

اجة مصطفى اخذ زهراء وراحوا للكافتريا ..
واني گلت السهير راح اروح للمكتبه ..
گالت هم تشوفين عمر .. اشو مختفي ..
فرح .. صار فترة مشايفتة بس مرات ومااحجي وياه بس سلام ..
سهير .. اني هم مستغربه خاف بي شي. .
فرح .. مااعتقد لو هيج جان مصطفى گال . يله اني رايحة باي ..

دامشي رايحة للمكتبه ..
صار عمر گبالي ..
استغربت ..
-شلونج فرح ..
-تمام انت شلونك ..
-اني مو زين ..
-خير شبيك ..
-فرح محتاج احجي وياج بموضوع ..
-ها شنو الموضوع مااگدر .. اقصد اريد اروح للمكتبه .
-انتي ليش تتهربين مني ..
-عمر سبق وان حجينا ..
-بس هالمرة يختلف الوضع ..
كلما احاول اصدة يصر اكثر ..

-زين خليها لمن اطلع هسا مااگدر ..
-زين راح انتضرج بقاعة المكتبه ..

دخلت وافكر هذا شيريد وليش اختفى فجأة وهسا رجع شكو ..

كملت دوامي وطلعت ولگيتة يشرب جگارة وهاي اول مرة الاحظة يدخن ..

گتلة خير عمر قلقتني ..
-لا ان شاء الله خير بالنسبة الي بس انتي ماادري ..
-شنو ؟؟
-فرح ومن الاخير اني اريد اخطبج ..
بقيت صافنة بوجهة واريد استوعب الي گاله ..
-شبيج فرح .. ادري انتي مريتي بتجربه فاشلة وگلتلج اعتبريني اخو او صديق ..
بس ماگدرت ..
اسبوعين احاول اتجنبج وحتى ماافكر بيج .. بس مااگدر
كل يوم گلبي يحن ويشتاق الج ..
-عمر رجاء لاتكمل .. واعتبر اني ماسمعت شي ..
-گتلك مااريد افكر بهيج شي .. وبكلامك هذا قطعت حتى السلام بينا ..
*اوكفي اوكفي . انتي ليش هيج حابسة نفسج بقوقعة ليش متحاولين تبدين حياتج

من جديد وتنسين الماضي ..

-اي ماضي عمر .. ليش انت شتعرف عني .. اني متزوجة بعقد سيد فقط ومطلگة ..
ياترى گلت الاهلك هذا الشي ويقبلون .. اني ماضي تعيس وانت ماتعرف شي عني ..
بعد شبسرعة حبيت وانجذبت واني حتى ماناطيتك امل ..

عمر .. لاتتسرعين واذا خايفة منة صدگي اني احميج ومااخلي يوصل الج .
فرح .. وليش اخاف شبيك عمر .. اني رفضتك مو بسببه ولا بسبب احد ثاني ..
اني الي مااريد ارتبط بعد .. الاهم عندي مستقبلي ودوامي وبس ..

وهسا من رخصتك اريد اروح الخط منتضرني ..
عمر .. مااضغط عليج بس فكري ولاتتسرعين ..

تركته ومشيت .. اووووف شنو من حظ حظج فرح .. تلاگيج المشاكل بكل مكان ..

رجعت للبيت شفتة هوسة وتحضيرات ..
بدلت وتغديت ..
وگمت اساعدهم ..
اتصلت زهراء .. جاوبتها ..
گالت العصر راح اجي اجيبلج الفستان لان باجر المهر ..
گلتلها اي تعالي وعندي شغله وياج ..
زهراء .. شكو.
فرح .. من تجين اسولفلج ..

كملنا شغل ونضفنا البيت دخلت سبحت وطلعت .
گالت مروة اجت زهراء ..
دخلتها للغرفه مالتنا .. لا الاستقبال بي خطار ..

گالت دگومي البسيه خلي اشوفه عليج ..
فتحته ردت البسه بعدة جديد وكارت الماركة موجود بي .
فرح .. هاي شنو زهراء ملابسته هذا .. لا مااريدة اني عبالي لابسته مااگدر اخذة وانتي لسه ممتهنايه بي .
زهراء .. ولي ليش هو يغلى عليج كم فروحة عندي ترى ازعل غير تگولين اخوات ..
فرح .. وج اي اخوات وبس انتي الي تتعبين وتسوين عمودي واني لليوم ماوگفتلج بشي ..
حتى من اتزوجت عذاب خفت منه وتركتجن وماسألت عنجن وانتن ابد ماتركتني ..
زهراء .. انتي ماتركتينا وانما انجبرتي . وذاك الي .. اووووف الله يسامحة هو الي ظلمج وبعدج عنا ..
وهسا لا تنسيني .. گومي البسيه خلي اشوفه وحتى تسولفيلي الشغله الي گلتي عليها مو عبالج نسيت ..
لان الفضول موتني .

-هههههه گايمة ابدل بس ديري وجهج استحي ..
-ههههه خرب يومج يله راح ادور وجهي ..
لبسته .. وطلعت كعب عالي لبسته . طلع يخبل عليه ومخصر ع الجسم ..

شافتني زهراء گامت تصوفر .. وج لو اني لابسته ماطلع هيج حلو عليه .. تخبلين طالعه بي .
فرح .. اي بس شلون اطلع بي هيج الردن شيفون ..
-لاتخافين حاسبه حسابي ..
هذي سترة فرو وياه جبتلج .. هم فيكة وهم مايطلع شي منج وهناك عود انزعيها ..

السترة فرو رصاصي واسود مخلوط .. لبستها طلعت فد شي ..
حضنتها بوستها .. ربي مايحرمني منج ..
گالت وياها مكياج خفيف وماسكرة ورميل تطلعين انتي. العروس

گعدت يمها .. بخصوص سالفه العروس .. تدرين شفت عمر اليوم ..
-عمر صديق مصطفى.. وين مختفي جان .
-مااعرف .. بس گال ردت ابتعد عنج وماگدرت ومن هذا الحجي ..
-هاي شنو .. اگول مصطفى يگول عمر مو ع بعضه واكو شغله شاغلته ..
-وج الاسوء من هيج .. گال اريد اخطبج ..
-عليج الله .. وشگلتيله .
-شأگول يعني تعرفين ردي شنو ..
-والله لو مارافضه كان استغربت اعرفج بعدج تحبيه العذاب مو ..
-لا الشغله مو يم عذاب .. بس اني الي مااريد .. من اول يوم حسيت بعمر وراه شي بس كنت اكذب نفسي وگال خلينا اخوة وزملاء واني اعرفه عندة شي ..
بس مااردت اضلمة ..
زهراء افهميني .. انتي گلتي اهلة من ناس معروفين وحالتهم المادية فوق العال ..
شنو الي يخليه يترك بنات الجامعه كلهم ولبسهم وشكلهم ومكانتهم ويجي ع انسانة مطلقه وبائسة مثلي ..
اني مااريد اضحك ع نفسي وعليه ..
اني مستحيل اگدر ارتبط واحب بعد الي صار ..
حياتي هسا يله بدت تستقر مااريد اخربها بأشياء اني نفسي ممقتنعة بيها ..

زهراء .. بس انتي هيح تضلمين نفسج .. اعرفج ومن غير ماتحجين انتي گلبج يم عذاب ..
بس مستقبلج مو يمة .. انسان مريض بالشك وتهمج بشرفج شلون راح ترجعين اله وتعيدين معاناتج السابقه ..
فرح .. ومنو اگلج ارجعلة .. لو ردت ارجع كان ماطلبت الطلاگ ..
الي شفتة من عذاب مو شويه حتى ارجع اوثق بي واصدگة ..
زهراء.. خلص مثل فكري ولاتستعجلين .. مااگلج جربي وحبي وسولفي وياه ..
بس مدام طلب يخطبج يعني نيتة جادة وشاريج .. واني راح احجي وي مصطفى يحجي وياه ويختبرة الج ..

فرح… اووووه شبيج زهراء اني ماارتبط بعد مااريد تعبت من التجربه اريد اكمل واتخرج واشتغل واشوف حياتي ..
زهراء.. مثل متحبين يروحي .. هسا اني اگوم عيب من اهلج عندكم خطار وهوسة ..
بالدوام نسولف اكثر واذا سمعت سهير تتخبل لان مگلنالها ..
بس لو تشترين موبايل حتى نسولف براحتنا ..
فرح .. اني هم هيج مفكرة .. خلي احجي وي ماما واشوف حتى اشوفلي واحد بالاقساط واخذة ..
زهراء.. ان شاء الله يقبلون وعمي اني اشتريه الج هديه بمناسبة عيد ميلادج اذا قبلوا ..
فرح .. هههههههه لا مو الهذي الدرجة .. صدگ نسيت هديتج ولو بسيطة ..
زهراء .. كلشي منج حلو .. فتحتها اني مشتريتلها گلادة فضة اول حرف من اسمها واسم مصطفى..
فرحت بيها وعجبتها ..
-وج تخبل .ونازكة حيل ..

بوستني وراحت ..
شوفت الماما الفستان تعجبت عليه ومروة ضاجت وگالت راح تطلعيني كسر هههههه ..
بس المهم تطلعين احلى من هباوي الجگمة

..
ضحكتنا هههههه..

ثاني يوم لبست الفستان ورفعت شعري وخليت ميك اب خفيف طلعت حلوة ..
لبست السترة والشال لان ولد عمي عدنا وهوسة .
بس كانت الانضار عليه ..
مرت خالو ماسلمت من اللسانها ..
الج خلگ ماصارلج كم شهر مطلگة وهيج لابسه ومبدله ..
ماما گالتلها .. مطلگة قابل ارمله ..
وبنتي بعدهي صغيرة وحلوة والف واحد يتمناها ..

ضحى كانت عينها ع الساعة وعبالك منتضرة احد ..
من شافت اجت خاله ام عذاب وتماضر هي طفرت وبوستهن ورحبت بيهن ..
واصلا هي رايحة للصالون ولابخة وجهها ..
كل هذا حتى تدخل بعين خالتي وتخطبها ..

بس خالتي من شافتني تخبلت وگامت تصلي ع النبي .. وتماضر تگلي وج شنو هالجمال ولاعرفتج ..
بس اني كانت عيني ولهفتي ع وحدة بس ..
بنتي حبيبت گلبي ..
اخذتها الحضني وهي تبوس بيه ..
كل يوم تكبر وتصير احلى من قبل ..
وصايرة تگول احبت .. عود احبج ..

مافارگتها طول الحفله ..
اجت السيارات وكلها صعدت ..
فأني صعدت وي هاشم ابن عمي حسن ..
اني ومروة وزوجته بالصدر وشهودة بحضني ..

وصلنا لهناك .. ودخلت رافعة راسي رغم الكل يهمس من وراي ..
واكيد رأيهن نفس رأي مرت خالي .. مطلگة ومبدله ومتمكيجة وووووو وعبالك اموت اذا تطلگت ومو من حقي اعيش ..

من دخلنا فتحوا الديجي ..
وسون هوسات .. سو درب الاخت الولد خلوها تلعب جوله ..
رغم اني ماردت اگوم او ارگص .. بس عناد بيهن گمت
نزعت السترة الي ع الثوب ..
وگمت ارگص مابقيت شويه وگعدت ..
وخالتي وتماضر يصفگن ويضحكن ..
ودور شلت شهودة وارگص بيها وهي تضحك ..
تالي گالوا راح يجي السيد يعقد ..
لبسنا وگعدنا ..
بين ماعقدوا ودخل لبسها الحلقات وكذا ..
بقينا شويه وطلعنا ..
خالتي گالت راح ارجع للبيت .. انطيتها شهودة وكالعادة بالگوة تتركني وتبقى تبجي وياخذوها غصب ..

رجعت ضايجة عليها ..
اثنينه نتأذى من يبعدونا عن بعض .

نضفنا البيت اني ومروة وسوينا عشا لان رنا بقت عند اهلها ..
اتصلت تماضر ع خط ماما ..
صاحتني ماما اخذته منها ..
گالت روحي وحدج بغرفه ..
استغربت بسرعه دخلت للغرفه ..
گلتلها ها تماضر صرت وحدي خير ..

سمعت صوت فززني من مكاني ..
-وج انتي ناوية تخبليني عناد بيه هيج تسوين ..
-شنو شمسسويه شبيك ..
-وج شلون لابسه مخلع وترگصين والناس تصورج ماتخافين ع روحج ..
-وين شفتني واصلا اني لبسي محتشم وهي خطوبه اخويه ومو من حقك تحاسبني ..
-وج تسمعيني لو اجيج هسا بهالليل .. اذا اخوتج مابيهم حظ اني الي احاسبج .. ممنوع هيج تلبسين وتفترين بجسمج ولابس كعب شبر وتتمايلين حتى تغرين الناس ويخطبوج .. ع الاقل انزعي الكعب حتى ماينغشون بطولج ..
-ههههههه لا انت صدگ زودتها .. عذاب اصحى انت ماتعني الي شي فاهم ولااني اعني الك يابة روح شوف مستقبلك واتركني الخاطر الله ..

طبگت الموبايل بوجهة ومدري اتعصب مدري اضحك ع كلامة ..
وفوگاها يتحكم بيه .. بس وين شافني معقوله تماضر گالتله ..
شويه ودزيت رساله التماضر ..
-شمعرفه عذاب بلبسي انتي گلتيله ؟؟
دزتلي ..
-لا وربي ماادري منو الي دازله لان عندة صور بجهازة ..
صفنت منو الي اله مصلحة يدز الصور ..
محد عندة تواصل وياه بس ضحى اكيد هي لو امها .
لا اقربائنة محد يعرف رقمة او عندهم تواصل وياه ..

رحت الماما وگلتلها تخبلت ..
اتصلت ع مرت خالي .. ومرت خالي نكرت وگامت تحلف وتگول والله بنيتي مادازة وهاي يمي هي وليش تتبلون عليها ..
وسوتلها زعلة ..

گالت امي بعد ابد ماترگصن ولاتگومن مالي خلگ فضايح الناس تريدلها حجة عليجن ..
وحتى اذا انتشرت الصور مايگولون وحدة تكره ونشرتهن يگولون هن الي نشرن ارواحتهن ويرحون يحفرون بماضي منار ويطلعوه ..

من داومت .. شفت سهير زعلانه وتحجي بثگل حاولت اعرف شبيها بس مانطتني مجال ..
وزعلت لان ماگلتلها ع عمر ..
فرح .. شبيج سهير اني اصلا ماقابله وگلت الزهراء من اجتني واصلا كلت اگلج بس انشغلت بمهر اخوي وگلت اكيد زهراء تخبرج واحنه اول وتالي راح نلتقي اليوم ونسولف ..
سهير .. لا انتي باعدتني عنج ومفضله زهراء عليه .. لتخافين مااخلي عيني عليج .. ولااخذة منج ..

فرح .. شبيج سهير شنو هالحجي .. انتي اختي ومستحيل افكر بيج بهيج طريقه ..
وشنو تاخذيه وشنو عين ..
انتن اثنينجن عندي اغلى من روحي ..

گامت تبجي وكأنه اكو شي بداخلها مخفي ولهذا مااتحملت وبجت ..

اجت زهراء وهدأناها ..
گلنالها اكيد ممتريگة تعالي نريگج ع حسابنا ..
ابتسمت ..
اي اذا بببلاش اروح ..
بس احسبن حسابجن عقاب الجن اليوم كلشي اطلب يتنفذ ههههه ..
رحنا للكافتريا .. طلبنا شاورما وعصير ..

سهير .. لاصدگ فرح انتي شنو رأيج بعمر يعني راح توافقين ..
فرح .. طبعا لا اني ماافكر بالزواج بعد ..
سهير .. يعني اعتراضج مو ع عمر ع الزواج ..
فرح .. لا اصلا الفكره كلها ماببالي ..
سهير .. ليش متگولين لان بعدج تحبين عذاب وماتگدرين تنسيه ..
زهراء .. يمعودة شنو شافت من عذاب غير الضيم . ع الاقل عمر واعي ومثقف ومتأكدة راح يسعدها ..
سهير .. ومنو يگول اهله يقبلون هو اخر العنقود معقوله

يزوجوه الوحدة مطلگة ..

صفنت بيها ودنگت .. گرصتها زهراء ..
سهير .. اعتذر فروحة ماقصدي بس مااريدج تنجرحين بعد ..
فرح .. صح كلامج حتى اذا هو مقتنع فمستحيل اكو اهل تقبل .. بس وربي مو لهذا السبب رافضه او غيرة .
اني صارلي ست اشهر من تطلگت ومااريد ارتبط اريد اعيش حياتي الي خسرتها ..
وهسا لازم اروح بنات اعذروني ..

گمت لان ماردت انطي هذا الموضوع اكبر من حجمة ..
طلعت بطريقي للمكتبه شفت عمر گبالي ..
صباح الخير ..
صباح النور ..
-فكرتي ..
-اي وماتغير كلامي عن قبل .. اني اعتبرك اخ الي فرجاء لاتضغط عليه ..

تركته. ومشيت اعترض طريقي .. متأكد راح تغيرين رأيج لان اني مو اخوج ولاتگولين هاي الكلمة ..

سؤال واحد عمر ..
اهلك يعرفون بيه .. يعرفون منو اني وشنو ..
-اني الاختاريت مو اهلي .. واكيد ماراح يرفضون سعادتي واصلا منتضر موافقتج حتى افتح الموضوع وياهم ..

فرح .. ارجوك عمر كافي .. وكفتنا هيج محلوة لاتحرجني بعد ..
تركته ومشيت ..
احس عقلي ملخبط وكل الاصوات متداخله براسي ..

مر فترة ونسيت الموضوع وبعد ماشفت ولاالتقيت بعمر وحياتي حلوة وهادئة ..
اشتريت موبايل بالاقساط بعد مابالگوة وافقوا اخواني وبحجة اتأخر مرات بالجامعه ولايصير شي ..
خليت ارقام معدودة ..
بس ماما واخواني وخالتي وتماضر ..
وعذاب كنت اني حافظة رقمة بموبايلي بس مااخابرة ومااعرف ليش حفضته بجهازي ..
اما صديقاتي فهم اول من عرفوه ونبقى الليل كله ندردش بگروب الفايبر ..
بس سهير متغيرة من ناحيتي ..
ودايما تفتح سيرة عذاب گدامي وتگلي يحبج ومبين من عيونه ويغار عليج وكذا ..
ودايما تنتهي المناقشة انه اتركهم واگوم ..

بعد فترة اتفاجئت ..
بوحدة مرتبة وبعدهي صغيرة مو كبيرة كلش وسافرة بلاحجاب ..
اجت للمكتبة ..
گالت انتي فرح ..
-اي بلي اني ..
-اني والدة عمر ..
استغربت ..
رحبت بيها ..
-اريد احجي وياج ممكن ..
-ام ثابت ضحكت وگالت روحي .. ومتفهمت ضحكتها شنو
طلعنا اني وياها ..
گالت خلينا نروح بالكافتريا اذا تحبين ..
-اي عادي ..
ورحنا للكافتريا
گعدت وخلت رجل ع رجل وهي شيك حيل. .
ومبين عليها الوقار ..
يعني اول مرة اصادف هيج انسانة بحياتي ..
گالت اني واولادي مثل الاصدقاء ..
عندي ثلاث اولاد بس الله مارزقني ببنية ..
اني طبيبة وماانكر كنت انشغل عن بيتي بحكم شغلي وابوهم خاني وهم بعدهم صغار ..
مااتحملت خيانته وتطلگنا ..
فكبرتهم ودرستهم وتعبت عليهم واعتبرتهم سند الي واصدقائي مو اولادي ..
فبيوم الي اجة عمر وهو اخر ولد عندي والي اعزة اكثر من روحي ..
وسولفلي عنج .. وشفته شلون يريدج وانتي رافضه لان كانت عندج تجربه فاشله ..
فمااتحملت وطلبت منه يعرفني عليج ..
اني ماجاية اگلج او اجبرج تقبلين ابني ولو ميهون عليه .
بس اگلج .. كلنا مرينا بتجارب وانتي بعدج صغيرة وماعندج اولاد ..
تحتاجين شخص بحياتج تعتمدين عليه ..
رغم دلالي الولد وماقصرت عنهم علمتهم يعتمدون ع نفسهم ..
ورغم اني دكتورة وفرتلهم شغل وهم يدرسون يشتغلون لان ماردتهم يتكلون عليه ..
واذا عبالج لان انتي شيعيه او لان انتي مطلقه ونرفض هذا الشي فابدا ماببالنا هيج عادات متخلفه ..
كلنا اسلام ..
وماضيج مايعنينا الاهم من كل هذا اللحظة الي تدخلين بيها بيتنا ..
وانتي مبينة عليج حبابه وبنت ناس ..
واكيد راح تختارين الي يناسبج ..

من گد رقي واخلاق وكلامها الي يدل ع ثقافتها ماعرفت شنو احجي او شنو ارد عليها ..
بعدها گامت واستأذنت ..
وگالت .. اتمنيت ابقى وياج اكثر من هيج لكن عندي عملية بعد نصف ساعه ولازم اروح ..

طلعت وياها بالطريق وشفت عمر اجة بأتجاهنا ..
سلم ع والدته وراحت ..
باوعلي وگال عندج محاظرة لو للمكتبة ..
گتله لا للمكتبة ..
گال ع راحتج اني عندي كم مصدر محتاجهم اذا متوفرات يمكم شويه واجي اخذهن ..

كلامة عادي وابد ماجاب سيرة ولادته ولاسألني شي ..
وهذا الشي عجبني ..
كنت اتصور عمر انسان تافه همة البنات وبس لان شكله وموديل سيارته وكلامة يدلون ع هذا الشي .
بس من شفت والدته وعرفت انه تربى من طرف امة ورغم كل هذا معتمد ع نفسة وانسان ناجح كبر بعيني ..
وهذا خلاني اصر ع رفضي اكثر ..
لان لااگدر اگله ع منار والي صار ..
ولااگدر اخدعة واقبل بي ويجي يوم ينكشف كلشي واصير بنضرة كذابه ومخادعة ويتكرر الماضي واتعذب بسبب خطأ منار الي مرافقني طول حياتـي ..

يتبع ..

//// البارت الخامس و العشـرون ////
من_سيدفع_الثمن ؟؟
بقلم_الكاتبة_شمس

بقى بالي مشوش من التفكير ..
وصلت للمكتبة ولگيت ام ثابت وام نور يباوعلي ويضحكن
ام ثابت .. فروحة تدرين گلبي حاسني عمر مخلي عينه عليج .. والله هو وردة ومبين ابن ناس وحباب. .

ام نور .. اكيد امة جاية تشوفج ..
فرح .. اي بس ..
ام ثابت .. شنو بس يافروحة هاي قسمة ماتتفوت والدكتورة حبابة ومتواضعه واني اعرفها ..
عائلتهم زينه ..
بس ابوهم مو خوش بس شعليج بي اصلا ماعايش وياهم
فرح .. خاله اني اصلا ماافكر بالزواج .. اريد اكمل واشوف مستقبلي يله ..
ام نور .. واكيد عمر مايمنع هذا الشي هو مثقف وراح يساندج ويخليج تكملين حتى ماستر ان شاء الله..

ابتسمت الهن وگمت مااريد اطول بموضوع منتهي بالنسبة الي ..
گمت داادور المصادر الي گال عليهن عمر ..
سمعته يسأل عليه ..
ام ثابت .. ادخل جوة تلگاها تدور مصادر ..
ثواني وشفته واگف يمي ..
-ها لگيتيهم ومخلي ايدة بحيبه ..
-لا بعدني ..
-لعد خليني اساعدج ..

بقينا ندور بصمت الى لگيت اثنين منهم ..
گتله لگيت ذولي ..
-بقى واحد غير مرة اشوفه .. شكرا تعبتج وياي ..
تركني وطلع ..

رجعت المكاني .. هذا شبي هزيت ايدي ورحت المكاني .
بعد ماخلص الدوام طلعت واشوف زهراء وسهير منتضراتني ..
ابتسمت ..
-اكيد وراجن شي ومنتضراتني مو لله ..
زهراء .. هههههه اكو عصفورة گالتله خبرية واجينا نتأكد
سهير .. صدگ اجت ام عمر وحجت وياج ..
فرح .. اي اجت .. مااگلكم شلون انسانه متواضعه ومثقفه الصراحه عجبتني ..
سهير .. اممممم يعني افهم من كلامج موافقة ..
زهراء ..
شنو عيني تردين تسولفينا واحنه واگفين ..
تعالوا اعزمكم ع لفات بالكافتريا وسولفيلنا ..
فرح .. لا ولجن خاف اتأخر ع الخط وعيب اخليهم ينتضرون ..
زهراء .. اني اوصلج بطريقي .. دروحي گليلهم يرحون ..
فرح .. اممممم اوك اروح اگلهم واجي خلو جنطتي يمكم وكتبي مااتأخر ..

رحت بسرعه الام ثابت گلتلها راح اتأخر انتو روحوا لتنتضروني ورجعت للبنات ..

لگيت زهراء جايبتلنا لفات وكولا ومقبلات ..
فرح .. اي هذا الحجي وربي ميته جوع ..
اكلنا واسولفلهم ع ام عمر وكلامها ..
زهراء .. خطيه يعني خاينها زوجها وتاركته ..
سهير .. اكيد لان مطلقه مثلها قبلت بيج لو مامطلقه ماكانت وافقت ..
استغربت من كلامها ..
وزهراء خزرتها ..
فرح .. هاي شبيج سهير واذا مطلقه قابل مو بشر مو من حقها تعيش حياتها ..
اني مااحجي عن نفسي بس احجي ع الكل ..
يعني المطلقه مو من حقها تتزوج مرة ثانيه وتعيش حياتها لو بس للرجل الحق انه يطلق ويتزوج ويعيش حياته .. ترى صايرة تصدميني بتفكيرج ..
سهير .. يوووووه ليش اخذتيها من هذا الجانب . اني حجيت لااراديا مو قصدي ..
خو مازعلتي ..
فرح .. لا انتو اخواتي ماازعل عليكم بس مااتوقعت هيج ردج لان اني اعرفج مو هيج ..
سهير .. اعتذر اذا جرحتج صدگي مو قصدي بس لان نهاية دوام وتعبانة والعصر انزل الاهلي ..
فرح .. ها اليوم تنزلين ..
سهير .. اي راح بجي اخويه ياخذني ..
زهراء .. يله گولي يعني هسا وافقتي لو لا .
فرح .. شبيج زهراء يعني شنو الي تغير برأيج .. باعي يمكن لو متعرفه على عمر قبل كل هذي الاحداث يمكن وافقت ..
بس حاليا لا او شبه مستحيل .. حياتي مابيها بس مستقبلي وشهد غيرهم ماكو ..
سهير .. ليش متگولين حبج العذاب هو الي مانعج .. انتي تحبيه فرح وهذا الشي ظاهر عليه ..
وحتى من اجة بالمطعم وشفتيه ارتبكتي وگمتي وياه من غير معارضه ..
فرح .. ليش متگولين اعرف طبع عذاب وخفت ليسوي فضيحة بالمطعم وماردت اخرب ع زهراء ومصطفى وطلعت وياه ..
سهير .. ههههههه واضح ..
فرح .. اووووه صدگ تنرفزوني بهيج طريقه .. خلي اروح احسن والافضل تغلقون الموضوع لا عمر ولاعذاب اثنينهم ماارتبط بيهم ..
زهراء .. خلص لتعصبين گوموا خلونا نروح ..

گمت من غير مااحجي الطريق كلنا الى ان وصلت للبيت .
دخلت للبيت تعبانه ..
گالت ماما خالتج ماخابرتج ..
فرح .. لا خير شكو ..
ماما .. تگول شهد مسخنه ومريضه ..

تخبلت .. شبيها وليش ماگالتلي ..
بسرعة طلعت موبايلي واتصلت ..
دگ ومحد يرد هيج وقت خالتي نايمة ..
رجعت اتصلت ع تماضر ..
-الو تماضر شبيها شهد ..
-خوفتيني فرح شبيج .. اهدأي . مابيها شي لتخافين
بس مسخنه وتتقيأ ومتاكل يمكن بلاعيمها ..
فرح .. واخذتوها للطبيب ..
تماضر .. اي اخذتها امي وعذاب ونطاها علاج وهسا احسن ونايمة ..

فرح .. اوووف تخبلت من گالتلي امي .. اشوف ماما اذا قبلت اجي العصر اني وماما واشوفها ..
تماضر .. هلا بيكم اني العصر هم اروحلهم نلتقي هناك ..

رحت الماما وگلتلها ..
ماما .. اي ان شاء الله دنامي شويه وارتاحي ونروح بعد ساعه ..
فرح .. شنو ا

نام ماما هو النهار قصير .. خلينا نروح ونرجع من وكت ..
ماما .. يله روحي بدلي ..
دخلت مروة جاي تقرأ عندها امتحان ..
هلو مرو شلونج بالدوام ..
مروة .. زينه شلوني .. تدرين لويگلولي ترجعين للمدرسه وتحبيها هيج وتدرسين وتحاولين تنجحين مااصدگ ..
صدگ كل تأخيرة وبيها خيرة ..
من بطلوني ضجت وانقهرت وحسيت بطعم النجاح من استلمت نتيجة نصف السنه وشفت درجاتي ..
حتى المدرسات ممتوقعات اجيب هيج درجات ههههه ..
فرح .. ضحكتيني ههههه المهم رجعنا ودا ندرس وننجح وان شاء الله نثبت بلناس كلها احنه شنو..
مروة .. ان شاء الله .. وين رايحة ..
فرح .. راح اروح اني وماما اشوف شهودة مريضه ..
مروة .. اووووف وراح تخلوني وي رنا .. هسا تدور الف سالفه حتى تگومني اشتغل لو اهتم بأبنها ..
فرح .. لا ان شاء الله مانتأخر ..

طلعنا اني وماما ..
اتصلت ع تماضر ..
سألتها ع عذاب هنا .. واذا موجود تحاول تطلعه الاي مكان مااريد التقي بي ..
تماضر .. لتخافين ماهو اليوم زواج صديقه وطلع من وقت ..
فرح .. امممم الحمد لله احنه اجينا بالطريق ..

وصلنا البيت خالتي ..
دخلت تلگتنا تماضر بوستني وسلمت ع ماما ..
شفت خالتي تتصل وي معتز وتبجي من اشتياقها ..
دخلت گبل للغرفه ..
شفت وردتي نايمة وذبلانة ..
رفعتها من سريرها وحضنتها .. وگمت اشم بيها اووووفيش هذي الريحة ..
اوووف ياماماتي ولا ارتاحيتي من يوم الي تفارگنا ..
من مرض المرض ..
اخذتها وطلعنا ..
سلمت ع خالتي ..
فرح .. خاله شهد ابد ماعاجبتني .. ليش هيج ..
خالتي .. يمة والله ممقصرة وياها تاركة الشغل كله على تمارة وگاعدتلها ..
بهذي الاثنااء نزلت تمارة ..
گالت السلام عليكم .. رديت بهمس بس مااهتميت الها ..
عبرتني وراحت الماما رادت تسلم عليها ..
ماما دفعتها وماقبلت تخليها تبوسها ..
هي دارت وجهها وراحت للمطبخ ..

خالتي .. ادري بيج مغثوثه منها بس هي طفله وطايشه وعرفت غلطها ..
ماما .. هي لا بالكبر ولابالصغر .. كل شخص وتربيته
شفتي الي صار بينا منار اكبر من فرح ومروة بس همة اعقل منها ..
ليش السبب احنه ودلالنا ..
وكم مرة گتلج لاتدللين بنتج وتخليها ع راحتها ..
وهاي النتيجة ..
اوووووف لاتخليني احجي اني جايه علمود شهد والله لو ماهي ماادخل البيت ..

گعدت شافتني صاحت ماما وتضحك رغم هي مريضه ..
حست بحضني ..
گعدت ..
راحت تماضر سوتلها حليب وبسكت ..
گعدت اوكلها وتاكل مني ..
وسوتلها حليب ورضعته ..
سألت خالتي على عمو ابو عذاب وحاله ..
گالت احسن وخاصه بعد ماعشيرته فصلت وعذاب اخذله قرض ورجع شغله صحيح ✔ مو مثل قبل بس زين ومدبرها ..

ماما .. يله يمة لايصير المغرب واخوتج يجون احنه ماگلنالهم ..
خالتي .. ابقن تعشن يمنا واخلي عذاب يوصلجن ..

طلع زوج خالتي من الغرفه يمشي ع العكاز وحالته زينه
شافنه رحب بينا ..
گمت سلمت عليه ..
وسألني عن حالي واصر نبقى نتعشا ..
الصراحة استغربت من موقفه…

بس ماما ماقبلت وگالت غير مرة هسا مستعجلين ..
طلعنا اني وماما قبل مايجي عذاب همزين ..
مااريد التقي بي ..
اخذنا تكسي ورجعنا للبيت ..
ولگينا القيامة قايمة ..
بلال .. انتن شلون ترحن لهناك ماكو زلم وتطلعن وتمشن بكيفجن…
ماما .. اني الام هنا والرأي الي بعد شنو اگلك .. وبعدين احنه وين رحنا الطفله مريضه شفناها ورجعنا ..
بلال .. بحجة الطفله ماخذة بنتج لهناك حتى تتوسلين بيهم يرجعوها ..
فرح .. شنو يرجعوها لو اريد ماكنت طلبت الطلاگ ..
رفع ايدة عليه .. انتي تسكتين لا الطمج ع وجهج . وج الظاهر طلعت عينج لان تداومين وتشتغلين ..
ماما .. بلال صير رجال ولاتخلي الرايح والجاي يوزك ..
انت شمدريك رحنا لهناك لو مااحد گايلك ..
والبنية بنتنا والنا حق نشوفها ومالك حق ترفض ولو ماادري عذاب مو هناك كان مارحنا ..
رنا .. شنو قصدج عمة اني الي اوزة ..
ماما .. انتي ماتتدخلين من احجي وي ابني فاهمة .. المفروض ذني بنات عمج مو غربه وهيج تحاربيهن ..
جبتها سنة ونص مستقويه وتشمرين حجي واني اسكت ومااريد اهجم بيتي ..
بس لهنا وكافي بعد البيت لازم يمشي على نضام ابو بلال من كان عايش ..
ماكو. احد يفتح حلگة بوجودة ..
هسا عود كبرتوا وگمتوا تستقون عليه ..
رنا زعلت .. شوف بلال مو گتلك هسا تطيح السالفة براسي ماصدگت .. فوگاها اني الغبية راح اجيب اختي وياي للضيم ..
تركتنا وصعدت ..
دخلت بدلت ومروة گالت اجة گلب البيت وگتله ماادري وين راحن خفت احجي ..
فرح .. عرفتها رنا الي گايلتله ..
البيت متوتر .. احنه تعشينا وحدنا وجلال يم خطيبته عند بيت عمي ورنا وزوجها وحدهم ..

بقيت الليل كله ادرس وانقا المحاظرات الفايتتني ..
الكل نايم وجلال رجع وصعد نام ..
بس اني ومروة گاعدين ..

اتصلت عليه زهراء ونسولف ..
وگالت عمر فاتح الموضوع وي مصطفى ..
ويگله اني متمسك بيها ومستعد انتضرها الى ان توافق لان ماشفت بأخلاقها بالجامعه ..
وج ياعوبة الولد شاريج ويحبج ..
فرح .. ها زهراء رجعنا .. اگلج صدگ هم خابرتي سهير وصلت لو لا ..
زهراء .. اي اتصلت عليها واصله ونايمة

من التعب ماحجيت وياها هواي ..
فرح .. الله يساعدها اكيد طريقهم متعب ..
زهراء .. اي خوش تغيرين الموضوع ..
فرح .. ههههههه باوعت للجهاز عذاب يتصل وباقي ع الانتضار ..
استغربت وحسيت ايدي گامت ترجف ..
گلتلها .
زهراء مااعرف منو يتصل بعدين اخابرج يله باي ..
سديته منها ..
وبقيت اباوع ماردت ارد ..
بس هو اصر ع الاتصال ..
هذا منين جاب رقمي .. اوووف اكيد اخذة من خالتي ..
بس شيريد مني هيج وقت ..

اجة مسج منه .. ماتردين مو .. المن انتضار صار ساعه .
اني بالباب اطلعي ..
تخبلت من سمعت گال بالباب .
اتصلت عليه ..
رفعة ..
وينج انتي بالباب .
-لا طبعا شنو بالباب شعندك هناية روح ..
-فرح لاتكفريني اذا ماتطلعين اكسر الباب وادخل غصب .
-شنو غصب هي گوة يااخي انت شتريد مني كل واحد راح بطريقه بعد شعندك ناطلي كل شويه ..
-اي طبعا تردين تبقين ع راحتج وي عمر افندي .. مو گتلج ماارتاحله ..
فتحت عيوني .. هذا شمعرفه بعمر ..
ياربي دااحس مخلي مراقب يراقبني راح اتخبل ..

-ها وين رحتي تفتحين الباب لو ادگ الجرس واصحيهم كلهم ..
-لا طالعه بس بسرعه احجي من ورى الباب الي تريدة وروح ..
سديته منه وكل جسمي يرجف ..
هذا مايرتاح اذا مايسويلي مصيبه ..

مروة .. شرايد منج هذا ..
فرح .. ماادري وج المشكله لايگعد احد وتصير مصيبه شسوي ..
مروة .. خلي يولي ولاتطلعين اله شيسوي يعني ..
فرح .. خبل هذا والله يكسر الباب اذا مااطلع اعرفه وتصير سالفه شكبرها .
مروة .. يعني راح تطلعين ..
فرح .. اي بس انتي گومي اوگفي يم الدرج ..
خاف يطلع واحد گليلي ..
مروة .. والله من هسا گلبي يدگ من الخوف ..
فرح .. لعد اني شأگول يله گومي ..

طلعت بسكته وبقت مروة تترقب الطريق ..
وصلت الباب الشارع ..
گتله .. عذاب الخاطر الله روح لايگعدون اخواني وتصير مشكله ..
عذاب .. هااااا تخافين يعني .. افتحي الباب خلي احجي وياج بسرعه واروح مااتأخر ..
فرح .. عذاب فدوة روح .. واني اتصل بيك واحجي الي تريدة بالموبايل ..
عذاب .. هااااا اشو صرتي مطيعه هسا وتگليلي فدوة وين فرح القويه الي وگفت بوجهي ذاك اليوم ..
لاتحاولين تقشمريني بهذي السوالف افتحي گتلج جان هسا اني گايل الي عندي ورايح ..

خليت ايدي ع الباب وهي ترجف .. اعرف عذاب هسا صاير بركان ..
فتحته بسرعه فتحه وسداه وراه وحصرني ع الباب وصار گدامي ..
كان لابس قاط والرباط مفتوح ومخليه ع رگبته يمكن من العرس واجة لهنا ..
اتقرب الوجهي واني بالگوة اتنفس ..
حتى حجاب ماخليت ع راسي من الارتباك وماعبالي افتح الباب ..
-ها يفرحتي هيج نسيتي عذابج وقررتي تنخطبين الغيرة
شگالج وقبلتي بي ..
-عذاب ابتعد عني خليني اخذ نفس ..
-اني نفسج واذا ماتشتمين هواي مااخليج تشتمين هوى غيري ..
-دفعته بأيدي .. انت شدتحجي .. مو انت الي بعتني وطعنتني وهسا جاي تتحكم بحياتي ..
شنو هذي الانانية .. لاترحم ولتخلي رحمة الله تنزل ..
وبعدين الي وصلك المعلومة نطاها الك بالغلط ..
صحيح الولد اتقدملي بس اني ماوافقت ..
-لا والله ومسويه فضل .. وشمنتضرة وافقي واعقدوا بسرعه ..
-وانت شنو .. لاعبالك رفضت علمودك .. لا غلطان .. رفضت لان كرهت الرجال كلها بعد ماعرفتك ..

ضحك ضحكة كبيره يمكن الكل راح يگعد بسببها ..
واتقرب الي اكثر ..
خلى عيني بعينه ..والدنيا ضلمة بس الگمر ضواه ساطع عليه ..
-گولي والله ماتحبيني وعينج بعيني ..
-عذاب كافي اطلع ترى حرام وجودك يمي اصلا .. بحياتي ماسويت الغلط وبسببك هذا اول غلط بحياتي ..
-لا مو غلط لأنج الي وحلالي والي صار غصب عنا اثنينه .. والدليل ماگلتي مااحبك وغيرتي الموضوع لان ماتگدرين تگوليها مو قزومتي ..
-لااگدر وماخايفه اني فعلا مـا… .. قاطع كلامي وخلى شفايفه ع شفافي وسحبهم حيل لدرجة اختنگت وماگدرت اخذ نفس ..
احس روحي راح يغمى عليه ..
وعيت ع حالي بالوقت المناسب وقبل مايضعف گلبي ويخذلني ..
دفعتي حيل وضربته ع صدرة ..
اطلع برة ماتستحي شلون هيج تسوي ..
الغلط مني الي امنت بيك ..
اطلع وادفع بي ..
وهو يضحك بسخريه ويگلي ..
اخذت جوابي منج ..
وهذا الحلو الي يحوم حولج اذا ماخلتيه يبتعد عنج اني ابعدة بطريقتي ..
تصبحين ع خير مرتي وام بنتي ..
سديت الباب بوجهة ..
ولسا ماواعية ع الي صار ..
وصافنه ع جرأته ..

دخلت ركض للبيت وايدي ع گلبي ..
رحت للمغسله غسلت حلگي بسرعه وعبالك الكل راح يشوفها لو يحس بي الي سويناه ..
اجت مروة قفلت البيبان ..
-ها شراد منج وشبيج وجهج اصفر وترجفين شسوالج ..
-ماسوة خلينا نروح ننام بسرعه .

تركت كلشي ونمت جوة البطانيه ..
ياربي استغفرك ..
الي صار غصب عني .. لا بس اني الغبية شلون وثقت بي وفتحت الباب ..
بقيت استغفر والوم بنفسي ..
ونسيت افكر منو الي گاله ..
وهو اصلا محد يدري ..
واني اصلا ماگلت الاحد ..

ماصدگت صار الصبح وخابرت زهراء وسألتها اذا احد ساألها هي او سهير..
زهراء .. لا وربي ماادري وحتى رقمة مااعرفه .. وسهير هم شمعرفها بي ..
فرح .. ماادري بس اجة يهدد وكأنه واثق من الشغله منو ا

لي گاله واصلا محد يعرف بهذي السالفه بس اني وانتن ..
زهراء .. ماادري .. بس انتي شكو خايفه واذا عرف .. والله اني منج اقبل وع عنادة ..
عذاب مايستاهلج احسة واخد همجي واناني ..
اذا يحبج شكو بهذلج وطلگج ..
وليش اصلا تزوجج اذا ميريدج وحطم حياتج ..
فرح .. اووووف زهراء مااعرف شأكلج .. بس الشغله مو مثل ماتتوقعين ..
زهراء .. لعد شنو .. فرح جاي اشوفج تحاولين تبررين افعاله .. الي سواه ماله مبرر ..
ضربج واهانج وصدگ اخته وتهمج بشرفج وسقط ابنج هذا كلة وبعدج ترديه ..
لج هذا گلبه ميت بحكم شغله وماعندة رحمة ..
فرح .. شبيج زهراء الي يشوفج يگول راح ارجعله باجر .. اعرف كل الي گلتيه ..
بس المشكله شلون اخلص من عذاب وتحكمة ..
كلما ابتعد عنه الگيه قريب مني وحولي ..
زهراء .. والله الحل انه توافقين ع عمر وبفترة الخطوبه تحاولين تعرفيه وتحبيه شويه شويه الى ان تنسين عذاب وتبدين حياة جديدة ..
فرح .. حاليا ماافكر بأي شي .. الاهم امتحاناتي والسنة راح تخلص ولازم اطلع معدل .. مااريد معدلي يقل عن المرحله الاولى ..
زهراء .. لاانتي ضايع وياج الحجي .. نلتقي باجر ونسولف ..

اليوم كله افكر بلي سواه عذاب .. شنو هالجرأة الي عندة بكل وقاحة جايني بسهولة ويريدني ارجعله واسامحة وهو حتى ماكلف نفسة يعتذر او يخليني اسامحة كلشي عندة امر ونهي ويريدني اطيع ونسى عبالك شرطي عندة ..

للعصر اتصلت بيه تماضر ..
وگالتلي صدگ اكو ولد خاطبج ..
عرفت عذاب گاللها ..
-اي بس ماوافقت شدعوة عذاب گلب الجو يعني مو من حقي اعيش حياتي ..
لو يحاول يبقيني بسجنه وتحت امرة ..
-اي من حقج فروحة وهذي حياتج ولاتعتبريها تدخل .
بس عذاب حيل ضايج وعصب عليه وحلف حتى مايخليج تشوفين وجه شهد اذا تزوجتي ..
-ههههههه تحجين صدگ تماضر .. هذا تخبل رسمي ..
-وليش متگولين يحبج ويخاف من خسارتج ..
اول مرة اشوف عذاب هيج ضعيف ومايسيطر ع نفسة.
-عذاب هو هذا طبعه من زمان .. كلشي يريدة ياخذة وين كان من كنت ببيته وجوة جناحة .. اهتميت بي وحاولت بكل الطرق انسيه الي عاشه ..
اتحملت مذلته وحبيته وماشكيت بيوم ..
تالي مسحني بلحظة وحدة وصدگ كلشي طلع عني وعذبني وموت طفلي..
وهذا الشي مو بالسهوله انساه ..
البارحة گتله اني رفضت وهو مستمر يهدد ..
اذا يبقى يضغط عليه راح اضطر اوافق حتى اخلص منه ومن جبروته ..
واذا ع شهد هو اصلا باعدها عني ويتصدق عليه من يدزها يومين بالاسبوع ..
وحتى مااشبع منها ..
تماضر .. اني ماقاهرني غير هذي الطفله ..
فرح .. ليش ماهو فكر بيها قبل مايتهور .. اصلا هو هاملها وداتذبل يوم عن يوم وهو حاير بنفسه وبس ..
عذاب مايحب ينزل نفسة وكبريائة يمنعه يعتذر بس يريدني اني اذل نفسي واگله انسى كلشي وخلي نرجع
واني مستحيل اذل روحي اكثر مانذليت ..

سديت المكالمة وي تماضر واحس راسي صدع ..
اجت ماما دخلت ..
-شنو متقدملج شخص ..
-ياساتر راح تخبلوني .. اكيد اكو اجهزة مراقبه وراي تمشي ..
-يعني صدگ ..
-منو گلج ..
-خالتج سامعه عذاب يحجي وي تماضر بالتلفون وسائلته وماقابل يحجي وخابرتني تستفسر وتالي طلعت اني مثلها اخر من يعلم ..
فرح .. ماما ماكو شي احجيه .. الولد طلبني واني رفضت وانسدت السالفه ..
-منو هذا ووياج بالجامعه ..
-اوووه ماما موگتلج السالفه خلصت ورفضت ..
-اي گولي منو طالب وياج ..
-لا متخرج ويدرس ماستر ..
-منين ..
-امة دكتورة……. اذا تعرفيها ..
-صدگ ولج شلون مااعرفها .. وانتي شلون ترفضين من غير ماتفكرين لو بعدج ورى عذاب وترديه ..
-لا ماما عفية مو انتي هم عليه .. اني اريد اكمل مصارلي اشهر من تطلگت وتردين ارجع اتزوج ..
-مو كل اصابعج سوه .. وهيج قسمة ماتتفوت . ولد مثقف ودارس واهله مثقفين قابل مثل عذاب ..
-اشو ماكان هذا كلامج من اجوا عقدو عليه العذاب ..
كنتي تحاولين بكل الطرق تقنعيني وتوصيني اقبل واريح بابا بگبرة ..
ماما .. ردت اخلص من ضيم اخوانج .. وذاك الوقت كان صوابنا جديد وماگدرنا نوزن الامور ونفكر ..
فرح .. خلصتيني من ضيم اخواني ودخلتيني بضيم اكبر لسا نتائجة ملاحقتني ..
الخاطر الله اغلقي الموضوع ..
گمت وتركتها .. بس هي ماتركتني وبقت وراي بكل دقيقه ..
وتگلي راح اخلي اخوانج يسألون عليه واذا خوش ناس وافقي لاتضيعين هيج فرصه ..
والاكثر من گلتلها اجت امه وحجت وياي عساني لاگلت ..
عبالك هم ع گلبها وتريد تزيحني ..
تالي طگت روحي وگلتلها ..
بله اذا عرف بالي سوته منار تتوقعين راح يقبل ..
-اذا ولد مثقف راح يتفهم انتي مالج دخل بأختج .. وبعدين هو شمدريه واحنه اصلا محد يدري بس عمامج
فرح .. ماما الخاطر الله اني مااگدر ابني حياتي ع كذبه

ماصدگت داومت وخلصت من زنها ..
التقيت بسهير وزهراء وسلولفتلهم ..
شفت سهير ارتبكت من گلت مااعرف منو الي وصل العذاب عمر خطبني ..
بس استبعدت هالشي لان ماتعرفه ولاتعرف رقمة..
شفتها غيرت الموضوع ..
وگالت راح اشتري شي ناكله واجي ..
باوعت الزهراء وسألتها ..
زهراء بيوم الخميس من بقينا بالكافتريا وتركت موبايلي وجنطتي يمجن

هم احد اتصل عليه ..
زهراء .. لا اني اصلا رحت اشتريت لفات وعصير بين مااجيتي بس سهير بقت گاعده ليش سألتي ..
فرح .. مااريد افكر هيج .. بس اني شاكة بسهير هي الي اخذت رقم عذاب وگلتله ..
زهراء.. لا فرح لاتنسين هذي سهير مستحيل تخونج ..
فرح .. واني ماگلت تخوني بس ملاحظة تصرفاتها ودفاعها العذاب وتحاول تقربني اله وتبعدني عن عمر ..

زهراء.. اذا تردين نسألها بطريقه غير مباشره ونشوف
فرح .. لا خاف اجرحها .. مااحجي اذا مااتأكد ..
زهراء.. هذا موبايلها خلينا نشوفه .
فرح .. لا وج عيب بله شافتنا شتگول علينا ..
زهراء .. اني وياها عادي متعودين وحدة تفتح موبايل الثانية ونطلع نغمات ..
فتحت زهراء الموبايل وبقت تدور بالمكالمات ..
گالت هذا رقم هواي متصله عليه ودازتله رساله ..
فتحنا الرساله كاتبتله اخي ارجوا ان ترد صار ساعه اتصل الشغله تخص فرح ..

اني قرأتها انصدمت ومااتوقعت بيوم صديقتي واختي تخذلني وتتفق من وراي ..
ليش وشنو سويتلها ..
اجت شافتنا لازمين الجهاز ارتبكت ..
وبسرعة نزلت الي بيدها ع الطاوله وسحبت الموبايل من ايد زهراء ..
-شتدورن ؟؟
فرح .. ياحسافة اعتبرتج اخت الي وتالي طلعتي تطعنيني بظهري ..
ليش كل هذا عمود شنو..
سهير .. فرح اوگفي خلي افهمج .. راد تلزمني ..
بعدت ايدي منها ..
رجاء ً سهير مو هسا اتركيني ..
تركتهم وطلعت وهي تبجي وتحاول تبرر الزهراء ..
طلعت وماردت اسمعها بساعة غضب ولاردت اسمعها كلام يقضي ع كلشي بينا .. ولو الي سوتة مو قليل .
وحتى وان سوت هالشي بنيه طيبه . المهم اتصرفت من غير اذني ومن وراي بعد شلون اوثق بيها واحجي الها اسراري وعن حياتي ..
وشلون اعتبرها اختي ..
للاسف اصعب شي الخذلان بحياة الانسان .. واني هواي الخذلونـي وطلعوا من عيني ..

يتبع ..

قۣۗـۙصۣۗـۙصٍ 📖ۆبۣۗـۙسۣۗ 💯

💕
//// البارت السادس و العشـرون ////
من_سيدفع_الثمن ؟؟
شبقلم_الكاتبة_شمس

عندمـا يخذلك انسان .. فكأنه قطع ذراعيك ..
يمكنك أن تسامحه .. ولكنك لا تستطيع عناقــــــــه ..!!

مشيت طول الطريق وانـي مصدومـة بسهير ..
مستحيل توصل الجرأة بيها تفتح جهازي وتاخذ رقم عذاب وتحجي وياه ..
مااتحملت اتصلت بعذاب ..
بسرعة رد ..
-الو فرح شلونـج ..
- معقوله وصلت الحاله ان تحجي وي صدقتي وتاخذ اخبار عني ..
-هوب هوب اوگفي .. اني لااعرف صديقاتج ولاحجيت وياهن .. كنت بعرس صاحبي ودگ رقم غريب وبقى يصر ومارديت الى ان دزت رساله وگالت الشغله تخصج يله رديت .. واسمع صوت بنية تگلي اني صديقه فرح .. واكو ولد ديريد يخطبها بس ماواثقه بي وعندة بنات وسوالف وكذا وخايفه ليضحك عليها ..
البنيه حبت تنبه لااكثر ..
-هذا هو عذاب فهمت الي اريدة واتمنى تبتعد عن حياتي وسواء وافقت او لا فهذي حياتي واتزوج الي يعجبني ..
بساعة عصبية حجيت كل الي يخطر ببالي ..

ماعرفت وين اروح .. اخذت نفس وگعدت ع المصطبه ..
غمضت عيونـي واتنفس بقوة ..
سمعت صوت عمر ..
فتحت عيونـي ..
-فرح شبيج ليش هنا گاعدة صاير شي ..
-لا ماكو بس مختنگة ..
-امممم سلامتج .. اريد احجي وياج اذا فارغة ..
-هسا عندي محاظرة اذا تحب من تخلص لان اني هم اريد احجي وياك ..
-خلص انتضرج ..

تركتة وگمت ..
شفت سهير اجت بأتجاهي هي وزهراء ..
ماردت احجي بالموضوع لأن لسا ممستوعبة الي سوته ..
زهراء .. فرح اوگفي انطيها فرصه تبرر احنه اخوات واكيد مانشك ببعضنا ..
فرح .. شلون مااشك شلون .. وهي تاخذ الرقم من موبايلي وتخابر عذاب ..
يعني متعرفين عذاب شنو اذا تعصب .. وزين مااجة وفصحني بالجامعه ..
سهير .. وج والله لو ادري بيج ماتحبيه ماكان خابرت ..
بس اعرفج تحبيه واعرفج ممقتنعه بعمر ..
ماانكر كان عمر عاجبني من البداية ويمكن اتصرفت بتسرع وانانية ..
بس والله ماقصدي اأذيج .. انتي اختي بس گلبي وانانيتي غلبوا عليه ..

فرح ... يعني افهم من كلامج تحبين عمر .. زين عمر لمحلج بشي…
اني كان اعتقادي اعجابج مزح مثل كل مرة .. ولو گايلتلي بصورة صريحة كان نهيت الموضوع ومااخذ اكبر من حجمة ..
زهراء .. اكيد مو احنه الي نخرب عمود رجال .. بس سهير هالمرة اني وي فرح .. انتي انعجبتي بعمر كشخصيه ومكانه .. وهذا طبعج دايما تتمازحين والي تشوفيه تنعجبين بي بيناتنا وتحششين عليه ..
يعني ماكو جدية عندج بهيج موضوع حتى نعرف كلامج جد ولا مزح ..
والمفروض اول ماتقدم الفرح انتي تسحبين نفسج .. انتي تدرين بعذاب اذاها هواي شلون ترحين تتصلين عليه وتبلغيه ..
سهير .. ماادري مو گلتلجن اتصرفت من غير تفكير ..
ردت ارجعها العذاب لان اعرفها ماراح تنساه وراح تعذب نفسها وتعذب عمر وياها ..

فرح .. هذا مو مبرر ع الي سوتيه .. ليش انتي تقررين حياتي اني ماعندي عقل وافكر منو الي يناسبني ومنو الي يضرني ..

سهير .. يعمي ماراح تسامحيني ..
فرح .. ماادري سهير .. مااگلج راح الومج لو اكرهج بس مااعتقد علاقتنا راح ترجع مثل قبل ..
مااگدر اوثق بيج بعد ..
وهسا عندي محاظرة اعذروني ..
دخلت للمحاظرة واني ضايجة ومقهورة بخسارة اخت الي ..صحيح داخلي مايحمل ضغينة وكره الاحد بس مو بالسهوله اگدر انسى الاذية وكأنه لم يكن ..

كملت محاظرة وطلعت .. طلعنا اني وبنية .. تريد تاخذ المحاظرات مالتي تستنسخهم ..
نطيتهيا ورفعت راسي ..
شفت عذاب مقابيلي ..
كان لابس جينز وقميص وسترة .. ومخلي ايدة بجيبه ويباوعلي بحديه ..
اتقرب مني ..
بقيت اتلفت واني اشوف البنات كلهم يباوعون ..
لان شكل عذاب ملفت للنضر ..
وواضح انه مو من الجامعه ..

شلونج ست فرح ..
-عذاب شتسوي هنا .. عفية اعتقني وين مااروح وراي شكو ..
عذاب .. اجيت احاسبج ع كلامج بالموبايل وتالي تغلقين الخط بوجهي من غير مااحجي ..
-امممممم اسفة سيدي صحيح ✔ نسيت انه ميصير اغلق الموبايل بوجة سيادة الضابط ..
-صايرة تحششين فروحة… معاجبج سيادة الضابط .. لازم نسيتي شلون ذبتي بيدي من بستج ..
لو نسيتي الليالي الي گضيناها سويه وبحضني ..

-اي نسيت كلشي ودااحاول ابدي حياة جديدة من غيرك اريد ارتاح الخاطر الله اعتقني ..
-هاااا من غيري .. لازم هالعمر عاجبج وناوية توافقين
احسبي حسابج حياة من غيري ماتعيشين مو فتحتي گلبي من جديد وتحاولين تنهزمين ..
ليش ماتركتني بضلمتي وعذابي ..
ليش خلتيني احبج ليش ..

-تدري ليش .. لان عبالي انت انسان جريح بداخلك انسان مضلوم وحاولت اتقرب منك واطيب جرحك بس اتضح انت انسان مريض وظالم وماترتاح الا اذا مرضت كل الي حولك وياك ..

-خلينا نطلع ونحجي بغير مكان ..
-مااطلع عندي دوام مااگدر وبعدين كافي فضايح احس الطلاب كلها تباوعلنا ..

سمعت صوت وراي .. فرح خير شكو ..
-لا عمر ماكو بس عذاب عندة كلام وخلص وحيروح ..
-ايبااااه وانت شكو وتتدخل بين رجال ومرته

..
-احب اذكرك انت طليقها مو زوجها ..
-باوع لاتسوي نفسك مثقف براسي .. ابتعد عن فرح وحياتنا احسن الك ..
-وشتسوي مثلا .. تخوفني برتبتك لو تسجني ..
-لا هاي ولا هاي .. بس اراويك الامهات شتجيب ..
-يعني بالضرب والهمجيه ..
هاي ويامن ولك ..
راد يضرب عمر .. صرت بالوسط ..
گتله عمر الخاطري روح مااريد فضايح الطلاب كلها تباوع
عمر .. راح اروح الخاطرج فرح بس ماابتعد عنج هواي اذا احتاجتيني گولي ..
هزيت براسي اله .. وراح ..

عذاب .. هههههه طلعت مغفل وعبالي تحبيني وتكابرين وانتي مااستحيتي وواگفه وتدافعين عنه گبالي وفوگاها. تگليله الخاطري هيج اني مو بعينج ..
يمكن احساسي غدر بيه من توقعتج تحبيني بعدج ..

كانت نضرات بيها حزن وندم ..
كان بيها توسل وخوف من الخسارة ..
اخر شي گال ..
براحتج فرح اذا سعادتج تكون من دوني فالله يهنيج ويسعدج راح اطلع من حياتج والافضل تنسين كلشي يخصنا وحتى شهد لان مااريد شي يذكرج بينا ..
وباجر عگبة تتزوجين ويصير عندج اولاد غيرها وتربيهم .

تركني وراح… بقيت تايهة واحس روحي بدوامة ..
منو الجاني ومنو المجني عليه ..
اشو بكلشي اسويه اطلع اني المذنبة ..

اتقرب عمر گال تروحين للكافتريا ..
اخذت نفس ورحنا سويه ..
كنت اشوف نضرات زهراء وسهير يترقبني من بعيد ..
گعدنا وجاب عمر مي واجة ..

نطاني ..
باوعت بعيونه وشكرته ..
گتله عمر .. لازم احجي وياك ..
عمر .. گولي فرح اسمعج ..
-باوع عمر انت انسان رائع والف وحدة تتمناك بس اني ماانفع الك اني مااگدر اسعدك ..

-هو. السبب مو هددج لو شنو
-لا بلعكس اصلا نهيت كلشي وياه اليوم .. بس اني مااگدر اكذب عليك مشاعري مو الك واكو اشياء بحياتي صعب افسرها الك ..
مااريد اقبل واتزوجك وتالي اظلمك ومااسعدك ..
من اباوع بعيونك مااحس بشي اتجاهك .. گلبي بمكان ثاني حتى لو ماگدرت انجمع بي ..
بس قابله ابقى وحيدة ولااكذب واخدع احد بزواج عمرة مايكون حقيقه ..

عمر .. ارجوج فرح لاتتسرعين .. خلينا نلبس الحلقات ونتعرف ع بعضنا حتى لو بقينا سنين الى ان تكملين مايهمني ..
ومتأكد راح تغيرين فكرتج عني وگلبج راح تتغير مشاعرة
فرح .. ارجوك عمر لاتصعبها عليه .. انت الف وحدة تتمناك مااگدر اعذرني ..

طلعت واحس حمل وانزاح مني ..
بس مااعرف ليش مختنگة ومحتاجة ابجي.
اجت زهراء .. ها فرح شكو شيريد عذاب ..
فرح .. اوگفي خليني ارتاح شويه ..
گعدت وسولفتلها كلشي ..

زهراء .. تحجين صدگ فرح فوتي فرصه كبيرة بحياتج عمود شخص مايسوة شخص باعج وتهمج ..
فرح .. افهميني زهراء كنت اضن نسيته وكرهتة بس من ودعني ونهى كلشي اختنگت ..
عذاب اول حب الي .. فتحت عيني عليه وع حبه ..
ماانكر ضلمني بس ماگدرت اكرها ولااگدر ارتبط واحب غيرة ..
عمر ابد ماحسيت شي اتجاهة .. ولاراح احس وخاصه بعد ماحسيت بحب سهير اله ..
شلون استمر وياه واني اعرف صديقتي تحبه ولااني الي راح احبه واسعدة ..
جائز بيوم يشوف حبها ويتقبله ويصير من نصيبها ليش اصير اني الانانية واخذ الامل الي بعيونها ..

زهراء .. وج فروحة انتي شنو من گلب عليج .. حضنتني وتبجي وج لو وحدة غيرج كانت فكرت بمصلحتها وبس ومافوتت هيج فرصه ..
الله لينطي عذاب لان دمرج وعذبج وهو الي خسران لان فوت من ايدة هيج جوهرة ..

فرح .. لاتدعين عليه انتي متعرفين الي مر بي ..
زهراء .. بعدج تدافعين عنه ..
فرح… لا ماادافع بس يمكن تعذريه وتبطلين تدعين عليه ع الاقل الخاطر شهد ..
لاتخافين اني ماارجعلة بس مااريد احد يدعي عليه ..
زهراء .. شكو گولي ..
فرح .. اعرف ثقيتي بيج كبيرة واعرفج انتي غير عن سهير بس الي اگوله مااريد اكبر شخص يعرفه ..
زهراء.. طبعا مااگول سرج سري ..
فرح .. تعرفين ليش عذاب هيج متوحش ويشك بكلشي وتعرفين ليش صدگ اخته وظلمني ..
زهراء .. ليش ..
فرح .. اني اگلج .. قبل متموت منار……… وسولفتلها السالفه كلها ..
كنت احجي وابجي وهي تبجي وياي ..
اخر شي حضنتني وگالت كافي ولج ..
هاي شلون تحملتي هيج .. شلون صبرتي وكابرتي ودستي ع نفسج وحياتج ..
ولا عذاب الي ضلمته .. وج حقة لو يكتل كل بنية يشوفها بالشارع ..
اعذريني اذا انفعلت لو حجيت ع المرحومة .. بس اختج دمرته .. هي الي صنعت وحش منه ..
وج اتذكر من كنتي تگولين شلون مدللها وكل عطله ياخذها الاربيل ..
وصورهم من جبتيها شلون كان يباوعلها بالبدله والذهب الي لابسته ..
وكانت سهير تگول الله يرزقني مثله ..
وج الله يسامحني شگد حجيت ودعيت عليه .. ولو كاله حق يسوي بيج هالشكل ويعذبج ..
بس فرح ع الاقل سامحيه واتصرفوا عادي مو مثل الاعداء ..
الخاطر شهد لازم واحد بيكم يتنازل ..

ضحكت ومسحت دموعي .. هذا منو الي يحجي مو قبل ساعة تحجين عليه وتقنعيني اوافق ع عمر ..

زهراء .. اي شمعرفني اني .. عبالي هو هيج طبعه متوحش .. هسا عرفت ليش كان ساجنج ومايخليج تتواصلين ويانا وماعندج موبايل ..

اوووف اكيد عباله احنه مثل ذيج الحيه رحاب ويتصور احنه الي بعدناج عنه ..
والله وطلع سبع هالعذاب واخذ حقه منهم بس حرامات لو مكسرها

الهاي رحاب ومخليها تزحف ..

فرح ..هههههه وج كافي ضحكتيني گد مابجيت سبحان المغير الاحوال ..
زهراء .. لاشبيج دااحاول اكفر عن الذنوب الي اخذتها من عذاب بسببج ..
فرح .. بعد مااوصيج مااريد احد يعرف وخاصه سهير ..
زهراء .. بعدج زعلانه منها ..
فرح .. لا بس مااگلج اگدر ارجع وياها مثل قبل .. يمكن مع مرور الايام ..
روحي بلغيها برفضي العمر وخليها ترتاح .. ويارب يجمعهم سوة ..
زهراء .. يمة فروحة ام گلب الذهب امواااح .. وين راح ترحين ..
فرح .. راح اخلص الدوام كله بالمكتبه مااجي للمحاظرات لان عيب منهن هواي يسدن مكاني ..

رجعت للمكتبة وكملت دوامي ..
مرت الايام ..
وسهير مايجمعنا بس السلام ..
وعمر كذلك .. رغم مرات يسلم ويسأل اذا محتاجة شي ويروح ..
ماحاول يبين انه شايل بگلبه عليه لان ماوافقت ..
سهير كانت تباوعلني من بعيد ..
وكلما تحاول تجي اني اطلع عذر واگوم اشغل نفسي بشي ..

اما عذاب فماشفته ولاعرفت عنه شي بعد ..
حتى شهد مايدزها الي ..
وبس بالفايبر اشوفها من اتصل فيديو ..
ماما تضغط عليه بشغله عمر .. وتخبلت من عرفت رفضته ..
وگالت ضيعتي من ايدج فرصه ذهبية وراح تتندمين طول عمرج بسببها ..
بعد الي صار انشغلت بدراستي وشغلي وامتحاناتي ..
لان شارفت الامتحانات النهائية ولازم اطلع معدل ..

كانت حياتي طبيعية بس ناقصها شهد بحياتي ..
الي كلما اتصل ع خالتي تگول مريضه لو عذاب مايقبل .
اني اعرف عذاب ديحاول يمنعها مني ..
كل اعتقادة اني وافقت ع عمر ..
وكأنه ديعاقبني ..
واني هم لاوصلتله كلام ولابينت رفضي ..

كملت امتحانات وبآخر يوم ..
ودعت صديقاتي .. وعمر هم ودعته .. گال اكيد راح نلتقي بالعطلة بالمكتبه .. كزملاء طبعا ويضحك ..

فرح .. طبعا .. ربي يكتبلك الانسانه الصالحة الي تسعدك والي تحبك وتتمناك .
وباوعت السهير الي جاية بأتجاهنا هي وزهراء ..
باوعلها ورجع باوعلي وضحك ..
-شتقصدين ..
هزيت راسي .. ماادري وابتسمت ..

زهراء .. وج فروح اليوم اخر يوم شلون راح نتفارگ وحضنتني ..
كانت سهير مترردة وواگفه تباوع ..
عمر استأذن وراح ..
فرح .. وج زوزو اكيد بأي وقت نلتقي ..
سهير .. بس اني ماراح التقي بيج معقوله ينطيج گلبج اروح من غير ماتسامحيني وتودعيني ..
ابتسمت ومديت ايدي الها وحضنتها…
گامت تبجي وتتعذر ..

بعدها رجعت تعبانه للبيت ونمت ..
ومن زمان مااجتني الخنگة ..
بس هالمرة غير .. احس شهد بحفرة وتبجي وتمد ايدها الي واني مااگدر اطلعها .
والحفرة كل مااتقرب الها تكبر وتضيع شهد بداخلها ..
فزيت وگمت ابجي واعيط ..
مروة يمي ..
شبيج فرح .. اووووف ياربي راح اموت واطگ ولكم صار شهرين ماشايفتها الله محمد يقبل ..
راح اطگ .. حاسة شهد بيها شي ..
حتى خالتي جهازها مغلق ..
واتصل ع تماضر تگلي اني مو يمهم وجهاز امي مكسور
وعذاب حاضرني من الاتصال ..
شأسوي اروح اتوسل ببابهم يخلوني اشوفها ..

اجت ماما .. شبيج فرح صوتج واصل للشارع ..
-ماما راح اموت اريد اشوفها ارحموني ..

ماما .. اني راح اتصل بعذاب ولو مااحب احجي وياه بس علمودج وع الطفله خطيه ..

اتصلت ماما شگد مايرد ..
بعدين رد .. بسرعه اخذته منها ..
-عذاب الله يخليك خليني اشوفها ولو ساعة .. جيبها بإيدك ورجعها .. لاتعاقبني بيها ..
مو كافي شهرين باعدها عني ماخلص عقابك الي شهد شنو ذنبها تحرمها مني ..

اوگفي فرح اسكتي خليني احجي ..
كان صوتة مخنوگ وهادئ بنفس الوقت ..
استغربت ردة فعله ..
-فرح شهد مريضه حيل ..
-مريضه شبيها شنو بعدهي تسخن ومتاكل وتتقيأ ..
-اي بعدهي ودخلناها مستشفى ..
بس من حالتها استمرت ..
شكو بيها مرض وسولها تحاليل ..
-مرض شنو .. وشطلع بيها التحاليل ..
-فرح .. شهد طلع بيها سرطان وماگدرت اگلج لان ادري ماتتحملين ..
من گال هيج احس اذني بيها طنين .. وكأنه واگفه وقطار مر من يمي وماعدت اسمع شي ..
اريد اخذ نفس مااگدر ..
وگعت من طولي ..

صحيت وشفت امي ومروة يبجون يم راسي ..
واخواني يگعدون بيه ويواسوني ..
گمت .. لا گولوا الي سمعته مو صحيح ✔..
لاتگولون شهد مريضه شهد ماتموت شهد قوية مثلي اني ربيتها وتعبت عليها ماتروح وتتركني ..
ماما .. وج يمة گولي يله بيش مفاوله ع الطفله ..
-اخذوني الها اخذوني ..
-بلال .. گومي بدلي يله وخلينا نروح ..
گمت واحس رجلي ماتشيلني ..
ماگدرت البس شي .. خليت العبايه الاسلامية ع ملابسي ولبست شالي وطلعنا ..
اخواني واني وماما .
الطريق كله ابجي وادعي ع روحي الي فكرت بنفسها ومافكرت بشهد ..
شهد تمرضت بسببي اني السبب تركتها وعذبتها ..
لو باقية بالذل ولاتاركتها ..
شلون راح اباوع بوجهها وشلون راح اتحمل اشوفها بهيج وضع .
يارب اخذ من عمري وانطي العمرها ..
اخذ من صحتي وعافيتي وانطيها ..
ربي لاتحرمني من اغلى شي بحياتي ..
طول الطريق ادعي واتمنى يطلع اكو خطأ بالتحاليل وشهودة مابيها شي ..
بس خابت ضنوني بعد مااگدلي طبيبها الخبر ..
گعدت ع حيلي واتوسل بي يعالجها ويطيبها ..
حتى ماگدرت اروح اشوفها واخلي عيني بعينها ..
الى ان اجة عذا

ب ..
باوعتله عيونه حمر ..
گعد گبالي ..
دفعته ..
انت السبب انت انت الي بعدتها عني انت الي مرضتها .
فقدت وگمت اعيط وابجي واحاول افرغ همي والمي بلومي اله والنفسي ..
سحبني الحضنه وشهگ ..
بقينا نواسي بعضنا بدموعنا وعتابنا ..
كان حضنه بالنسبة الي اطمئنان وامان ..
وكان مرض شهد حبل مشنقة بالنسبة الي .. وبأي لحظة ينزلق الكرسي الي جواي واموت ..
لان فعلا احس روحي ضعيفه ولاحول ولاقوة الي ..

يتبع… .

عمري..مدام حامل فهذيني تاثيرات كلش عادي😅💔..واهواي من حوامل تصير عدهن
لأن هرمونات تكون مخربطه

فانتي بس كثري من شرب الماي..ورطبي بشرتج بس هذيني سويهن
وغذي نفسج بالفيتامينات والفواكه☺️

#ملوكه

يعمري تسلمين🙈💋

وان شاء الله مايصير اله كل خير✨

#ملوكه

هههه..عيوني القرفة☺️✨ (دارسين) تنزل دورة
يعني تجيبين حليب او ماي دافي وتضيفله فد نص خاشوكه قرفه ..فد جم يوم استمري عليه لمن تنزل

واذا حامل😅..بعد شنو ماتسوي شي اكيد ماتنزل عدها فكون تحلل

#ملوكه