قۣۗـۙصۣۗـۙصٍ 📖ۆبۣۗـۙسۣۗ 💯
💕
//// البارت الحادي و العشـرون ////
من_سيدفع_الثمن ؟؟
بقلم_الكاتبة_شمس

‏
يامن تخليت عنـي ..‏ كنت أريدك لكن الله أرادَ لي الخير ..

كنا متفقين اني وزهراء نروح سويه ..
وصلنـي بلال وگال اتصلي عليه اذا كملتي ..
كنت ماخذة موبايل ماما وياي ..

شفت زهراء بالباب منتضرة ..
دخلنا الجامعه سويه ..
عبالك اول مرة ادخلها ..
كان شعور يشبه اول دخولي في المرحلة الاولى ..
توتر وخوف وسعادة بنفس الوقت ..

اخذت اوراقي وقدمتها للعمادة وبمساعدة والد زهراء خطيه ماتركني ابد وعبالك بنته او احد اقاربه ..
فعلا مرات يصح غريب يوگف وياك اكثر من القريب ..

كملت المعامله .. گال انتضروا فترة ومن يوافق العميد وتطلع الاسماء نعلگهن بمدخل العمادة ..
گالت زهراء لاتخافين بس يطلعن ان انطيج خبر ..

طلب ابو زهراء يوصلني ..
گتله لا اتصلت ع اخويه راح يجي ..
مالي خلگ بلال وجلال وكلامهم عليه ..
اتصلت ع بلال گال اني بعدني بالدوام راح اخابر جلال ياخذج ..

بقيت منتضرة برة .. والرايح والراجع يباوعلي ..
انهضمت حيل ..
حتى موضفين الجامعه طلعوا واني بعدني ..
طلع ولد بسيارتة…
شافني بباب الجامعة والوقت اتأخر وظهر ..
وگف يمي .. گال خويه اوصلج ..

درت وجهي عنه .. لاشكرا منتضرة اخويه ..
-ها اعتذر ع راحتج ..

تركني وراح .. صدگ جلال هيج تسوي بيه .. رجعت اتصلت ع بلال ..
گال وين جنتي هستوج ذكرتي مارجعتي خابرتيه ..
-شبيك بلال شبيدي اني .. شگد اتصلت بي ميرد ..
-ابقي بمكانج هسا جاي ..

واخيرا اجة وكان شكله ضايج ..
صعدت ..التفت عليه ..اگلج شلون بله نعوف شغلنا ونگعد نوصلج ..
من تداومين شوفي بنات عندهن خط وشكلي وياهن .
-اتنهدت وسكتت .. البارحة گال اوصلج واجيبج بيدي هسا غير كلامة ..

رجعت للبيت تعبانه ..
تلگتني ماما بأسئلتها .. ليش تأخرتي ووين رحتي وبالي يمج ..
سولفتلها الي صار ..
گالت جان اجيتي وي زهراء ليش بقيتي وحدج هناك ..
-تحجين صدگ ماما .. والله لو جايه وياها جان ماقبلتوا ..
ماما اني راح اداوم مو تبقون كل يوم مطلعين سالفه ..
ماتقبلون گولوا من هسا احسن ..

ماما .. ياامي غير نخاف عليج وتدرين بأخوتج شلون ومالي خلگ مشاكل ..
فرح .. يوم اني مو صغيرة والي مريت بي علمني دروس تغنيني عن السنين الماضيه كلها ..
الخاطر الله الي بيه مكفيني ..
بعد شهد عني مدمرني .. تدرين كل شويه اضعف من اشتياقي الها واگول راح ارجع واتحمل الذل بس حتى ماانحرم من ريحتها ..
وتالي اتراجع وادوس ع گلبي واصبر ..
عبالكم اني عايشه .. اني جسد بلا روح ..
الخاطر الله ارحموني ..

دخلت للغرفه بدلت ونمت حتى من غير مااتغدا ..
حضنت المخدة وابجي ..
فتحت الكنتور بقت من ملابسها وي غراضي ..
من جمعتهن ..
اخذت ملابسها الحضني واشم بيهن ..
وج ماماتي وينج اشتاقيتلج ..
شهودة يروحي شلونه حالج بعدي ..

طلعت موبايل ماما من الجنطه واتصلت ع تماضر خالتي من يوم الي صار ماترد عليه ..
الو تماضر شلونج ..
هلو فرح انتي شلونج ..
شلوني يعني .. اريد اموت مشتاقتلها ..
فرح ماردت اگلج بس شهد صارلنا كم يوم داخلين بيها مستشفى مريضه ..

يمة شبيها وليش ماگلتولي ..
-عذاب مايقبل ..
-وهو وين ؟؟ مافكر بيها بأنانيته راح يموتها ..
-هو بالدوام التحق اليوم ..
-بيا مستشفى اني راح اجي هسا ..

سديته ورحت الماما ..
-يوم حبابه گومي خلينا نروح للمستشفى شهد مريضه صارلها كم بالمستشفى مدخليها ..
-وج يمة ماعندج كرامة شلون ترحيلهم وهمة شوهوا سمعتج .. اذا على شهد باجر عگبه تنسى ..
وانتي هم بمرور الزمن تنسين واذا تزوجتي وصار عندج اولاد بعد ماتذكريها ..

-ههههههه تحجين صدگ .. شلون انسانه واني ربيتها تسع اشهر ولما عرفتني امها وتصيحلي ماما ترديني اتركها .
واذا ع الكرامة فلو اريد ادور ع كرامتي جان حتى انتو مااحجي وياكم ولاادخل هالبيت ..
سبق وان گلتلكم شهد خط احمر بحياتي ..
مستحيل اتخلى عنها ..
وهسا ترحين وياي لو لا ..

-هسا بلال نايم مايقبل .. خليه يگعد ونگله ياخذنا ..
-اذا گعد مايقبل واني مااگدر انتضر ..
بنتي بالمستشفى شلون ترديني اصبر عنها .. اذا گلبج ينطيج تصبرين عنا اني مااگدر يمة ليش ماتفهميني ..
-كافي تجريح فرح .. ادري غلطت انطيتج العذاب بس مو معناها اني قاسيه ومااعرف الامومة ..
شمعرفج شصار بيه بعد منار ..
وج هي هنا اخوتج يكتلون بيها واني نايمة فوگها واحميها ومن ماتت اخذت نص حيل والنص الاول راح وي ابوج ..
عبالج اني مرتاحة من اشوف بيتي انهجم خلال هاي السنه ..
وحدة ماتت والثانيه تطلگت ومن غير اخوانج الي صاروا مثل البارود ياهو اليحجي وياهم ياكلوه ويشربوه ..

شفتها تحجي وتبجي حضنتها وبوستها ..
-اعذريني ماما بس المفروض انتي تحسين بيه اكثر وحدة -يمة اني احجي المصلحتج اذا تبقين معلگة بشهد ماراح تخلصين من عذاب وسجنه ..
واني ام واريدج تاخذين الي يستاهلج ويسعدج ..
-خلص يوم لاتعتقدين راح اكرر هالتجربه مرة ثانيه ..
-الله كريم .. يله گومي بدلي خلي نروح .. بس

مانتأخر لااخوانج يحجون ..

ركضت بدلت وكملت وطلعنا ..
خبرنا مروة تگلهم رحنا للسوگ ..

رحت للمستشفى ادور بالغرف مثل المخبله ..
كلما اسمع صوت طفل يبجي ..
اركض اله ..
دخلت الممر الثاني ..
اول ماسمعت صوتها ركضت دخلت شفت خالتي وتماضر يمها ..
من غير وعي گمت اركض بالردهة ..
اخذتها وحضنتها واشمها وابوسها ..
نسيت الكل وماشفت غيرها ..
هي اول ماشافتني بقت تشهگ وتباوعلي وتبجي وعبالك دتعاتب بيه ..
دور لازمة ملابسي ونايمة ع صدري ماتقبل تگوم ..
بقيت حاضنتها الى ان غفت بحضني وع صدري ..
دور كل شويه تفز وتباوعلي خاف تركتها وترجع تحط راسها ع صدري وتنام ..
اباوع الخالتي وماما بس يبجن ..
گلتلها شلونج خاله نسيت اسلم عليها من لهفتي الشهد ..
گالت .. زينه اني يمة انتي شلونج والله مستحيه منج وحتى مااحاجيها لسا وغضبانه عليها ع السوته ..

-لاتتعذرين خاله انتي مالج ذنب ..
تماضر .. لا والله اني هم گلت الامي انتي حجيتي وگلتي وماصدگناج .. ضلمناج كلنا مو بس عذاب ..
دوووم اگل الامي خليها گبال عينج بالغرفه الجوة ..
تگول لاخطيه تدرس فوگ احسن الها هدوء..
ماما .. العندة بنات يبقى عمرة كله مو مرتاح ..
خالتي .. لا والله مو كلهن . لازم تطلع وحدة زينه ووحدة شينة ..
مو هاي فروحة درة واختها .. اوووف الله يرحمها ..
وحتى تماضر وتمارة فرق بينهن كبير ..
بس دلالنا هو الي خلاهن هيج ..

ماما .. يله فرح لااخوانج يحسون وتصير مشكله ..
فرح .. يوم صدگ تحجين شلون اتركها هيج متشوفيها شلون لازمتني وماتقبل تتركني ..
اذا گعدت وشافتني ماهي تموت والله ..
ماگلتيلي خاله شبيها .

تماضر .. بس تتقيأ وتسخن وتبجي حتى رضاعة ماتقبل ولاتاكل لما صار عدها سوء تغذيه ..
فرح .. سودة عليه حتى خدودها ذبلانه .. خاله قنعي عذاب ليش يعذبها ويعذبني هيج ..

خالتي .. انتي عاشرتي وعرفتيه وتدرين بي شلون راسة يابس ..
فرح .. اووووف رغم كل هذا ماشكيت ولاحجيت وتالي خوش جازاني ..
خالتي .. وج يمة درجعي ولو ادري بيج گلبج ملجوم منه بس الخاطر هالطفله ..
فرح .. واني خاله منو يهتم الي .. مستحيل ارجعله وانزل كرامتي ..
خلص حياته يتهمني بذنب منار ويعاقبني .. وهو مخلي غراضها بالمخزن ومايهون عليه يذبهن ..
يعني شمااسوي اله مراح يحبني ولايتقبل وجودي بحياته خليني اعيش حياتي احسن مما ادفن نفسي وياه ..

حضنت شهد حيل وشميتها وخليتها ع السرير فزت بسرعه وشمرت روحها عليه ..

بحيث حتى النسوان الي بالردهة . انقهرن ويگولن خطيه ليش تاركتها شلون نطاج گلبج تتركين الطفله عند ابوها وتزعلين ..
الظاهر كانن يتنصتن علينا بس مافهمن السالفه وحكمن عليه من غير مايعرفني ..
امي ماتحملت وگالتلهن .. شعرفتن وحكمتن عليها .
بالگوة تماضر سكتتها ..

گلتلها خاله خلينا انطينياها اليوم .. وعذاب اصلا التحق ..
شهد محتاجة الي مو الطبيب ..
علميني ع علاجها واني انطيهيا بوقته والابر بالكانونة ..
خالتي خافت من عذاب وترددت ..
بس تماضر قنعت خالتي ووافقت ..
ماصدگت اخذتها الحضني ..
وماما شالت غراضها وراي ..
وقعنا ع مسؤوليتنا وطلعنا ..
طول الطريق مخليتها بحضني واشم بيها وهي ابد ماگعدت ..
ماما تباوعلي وتهز براسها وكأنه خايفه لو مترددة ..

وفعلا اول مادخلنا البيت بدأ التحقيق ..
واول ماشافوا بيدي شهد ..تعصبوا ..
بلال .. هاي شتسوي هنا ..
جلال .. مو عساس مااريدة وطلگوني شنو حنيتي عليه
ماما .. الطفله مريضه جبناها كم يوم بس تصير زينه ونرجعها واصلا هو ماهو بس خالتكم وللمستشفى رحنا ..
فرح .. ماما شنو تبررين .. شهد بنتي ومن حقي بأي وقت اجيبها هنا . والها مثل ماالي بالبيت ..
لو ناسين حصة منار من حقها ..

اتخاطفت الوانهم ..
بلال .. خوش والله بعدج مااجيتي وگمتي تفكرين بالحصص هي هاي جزات وگفتنا وياج ..
جلال .. فرح والله اذا تطاولتي ويانا هيج اظلم الدنيا عليج امشي زين حتى متعبين ..
فرح .. لاعبالكم انسى شلون بعتوني ..والي سوتيوه قبل ولاعبالكم ماادري دفاعكم مو عني بس حتى تذلون عذاب
لو انتو اخوتي صدگ وتفكرون بيه ..
جان اجيتوا بليله من الليالي ..
وگلتولي شبيج وشتحسين وشمحتاجة ..
ادري رجوعي حمل عليكم ..
ولهذا قررت اشتغل حتى ماتشيلون حملي ..

ماما .. كافي صايرين ماتستحون ولاتهابوني .. الي يشوفكم يگول اعداء مو اخوان ..
حسافه ع البطن الي حملتكم ..
روحي انتي نومي الطفله خطيه ..
وانتو كل واحد يروح الشغله لو وين ماكان بس مااريد مشاكل بعد كافي تعبت ..
انسوا الي فات وابدوا من جديد ..
لاوربي اقسم البيت واگعد اني وبناتي وحدنا وراتب ابوكم يعيشنا وكافي علينا ..
وعود انتوا ابقوا وحدكم وعيشوا من غيري ..

اخذت بنيتي ورحت الغرفتنا واجت وراي مروة ..
خليتها بحضني ونمنا اني وياها ..
جابت مروة موبايل ماما واخذتلنا صور ..
وكانت هاي اول صور النا ..
گلتلها مروة اخذي صور الها وحدها .. لان بداخلي متأكدة عذاب مراح يخليها الي وياخذها ..
فعسا ان تكون صورها انيسة الي بعدها ..

شويه واجت مروة جايبه صينيه العشا ا

ني وياها وماما ..
گالت رنا وبلال راحوا الاهلها وجلال طلع بس احنه اليوم

گعدنا سوالف وضحك وناكل ونتشاقه ..
گعدت شهودة واگلتها شويه ورضعتها ..
وماتقبل تروح لا الماما ولا المروة مستغربتهم ..
بس شويه صارت زينه ..
ونطيتها علاجها ..
خلال كم يوم بدت تتشافى واستعادت عافيتها ..

واجة اليوم الي كنت خايفه منه ..
بيومها تكسرت الباب ..
همزين كان الوقت صباح ..
واخواني مموجودين ..
طلعت امي ..
گالها اريد شهد بسرعه جيبوها ..

گلتلها يوم گليله شهد مريضه ونايمة حرام ياخذها اخاف تنتكس ..
راحت امي ورجعت .
گالت يگول ..
اذا تريدها خلي ترجع وياها .. بس مستحيل اخليها عندها هنا وحدها ..

كان يحاول يضغط عليه حتى ارجع ..
طلعتله من ورى الباب وحتى ماشفته ولاخليته يشوفني..
گتله ابو شهد اعتقد احنه كبار وماكو داعي الوگفتك بالباب وتهديدك ..
تدري ماارجع بعد ..
وسبق وان گلت الخالتي بيتك وانت حرام عليه ..
عذاب .. ومنو گلج ترجعيلي . قصدي مثل مااول يوم اجيتي تربين شهد وبس ..
فرح .. افهم قصدك .. واعرف اني لاشئ بالنسبه الك وكنت مجرد تتسلى بيه حتى تنسى غيري ..
فلهذا اطمأن انت هم ماعدت تعتيلي شي والي كان بينا انتهى بوقت الي تهمتني بشرفي ..
واعتقد انت تعرف بالاصول والمفروض تروح وماتتعدا حرمة بيوت الناس ..
عذاب .. يعني هذا اخر حجي عندج .. بسيطة ..
خليج اشبعي منها الى ان تطيب ..
بس ثقي اضفرها مااخليج تشوفيه ..
كم يوم وتجي امي تاخذها .. اذا عصيتي لو ماانطتيها تصير موحلوة ..
لاتخليني اسوي شي ماراغبة ..
طبگت الباب من غير مااحجي وياه ..وگعدت مختنگة بالگاع ..
اخذن نفس ع شكل شهيق وزفير ..
بس اريد امتص حزني وماابجي مااريد اضعف ..
مااريد استسلم ..
عذاب يوم عن يوم يثبتلي انه كنت غلطانه بحبي اله ..
يتصرف وياي كأنه عدوته مو انسانه اعترفلها بحبه بيوم ..
حتى مااعتذر عن الي سواه .. وكأنه هو الزعلان مو اني ..
اجت مروة گالت شهد فزت وتبجي ..
رحت اركض الها ..
سمعت ماما وخالتي يسولفن ع عذاب لان اجة ..

مااهتميت ودخلت ..
سكتت شهودة شغلتلها التلفزيون وتباوع وتصفگ استرجعت عافيتها ..
مر يومين واجت خالتي وگالت عذاب منتضرني بالسيارة
گامت تبجي وتمردت ..
مااتحملت نطيتها الخالتي ودخلت مااريد اشوفها وهي تبجي عليه ..
يمكن لازم اتعود ع بعدها واصبر ..
لان عذاب مستحيل راح يخليني اشوفها بعد ..

خابرتني زهراء وگالت اسمج طلع .. ولازم باجر تباشرين ماگدرت افرح من حزني ..
گالت شبي صوتج صاير شي ..
سولفتلها ع شهد ..
گعدت تواسيني وتحاول تهدي بيه ..
رغم ماكو شي بالكون يواسي ام مقهور گلبها ع ضناها ..
ثاني يوم بدلت واخذني بلال للجامعه ..
گال مثل ماگتلج شوفي بنات وشكلي وياهن بخط ..
گتله .. ان شاء الله
نزلت ورحت للعمادة اخذت الامر ورحت للمكتبة .
باشرت ..
الشغل حلو بس متعب ..
بأول يوم لازم نرتب الكتب حسب قوانين واكو حسب حروف وكذا ..
لان مابقى شي للدوام ..
واكو طلاب تجي للمكتبه عمود بحوث تخرج او دراسات ..
كانت اكو وياي موضفات بس اكبر مني بهواي يعني مو من عمري ..
واحتاريت شأگلهم تالي گالوا گوللينا بأسماء اولادنا ..
وحدة ام ثابت ..
والثانية ام نور ..
علمني ع الشغل ..
واكو قوانين للمكتبه واذا كتاب ضاع اتحمل المسؤوليه لهذا ماانطي كتب بس للي عندهم هوية ..مو اي احد يگدر يستعير كتب ..

بعد ما تقريبا فهمت شويه الشغل.
صاحتني ام ثابت مسويه جاي بالغلاية وجايبة وياه جرك
ريحة الجاي بديعة ..
امممم مهيل وحار ..
شكله يشهي ..
سحبت كرسي وگعدت يمهن ..
قسمت الجرك واريد اكل ..
سمعت صوت ولد .. صباح الخير ام ثابت الكتب الي وصيت عليهن حضرتوهن ..
رفعت راسي هو نفسة الي ذاك اليوم گال اوصلج ..
بس كان مرتب شكله ومو عبالك طالب عادي ..

دنگت بسرعة وسويت نفسي مااعرفه ولاشايفتة ..
يمكن الي صار بيه خلة عندي رهبة وفوبيا من الشباب كلهم ..

سأل ام نور .. شنو البنيه جديده ..
ام نور .. اي اليوم اول يوم ..
-هاااا اهلا وسهلا ..

اضطريت ارد عليه .. شكرا ..
گمت اخوط بالاستكان ورفعته دااشرب ..
صارت عيني بعينه دنگت. .

گال الام نور .. الجاي يشهي وريحته تخبل ..
-تريد اصبلك ..
-والله اني من عشاق الجاي مااگول لا ..
جابت كوب سفري وصبتله .
نطتة جرك گالها شكرا مااريد ..
بس جاي ..
اجت ام ثابت جابت الكتب ..
اخذهن بأيد واخذ كوب الجاي وتشكرهن وبعدين گال ..
ان شاء الله ماتأخرتي ذيج المرة ..

رفعت راسي وردت اغص بالجاي ..
-ها لا اجة اخوي اخذني ..
-امممم الحمد لله ..
يله في امان الله ..

بقيت مستغربه عليه .. هذا شذكرة بيه .. ابد ماعجبني مسوي نفسه فهيم ومرح وكذا ..
وتلگيه مثل وجه عذاب من يعصب ..

ردت اسأل ام ثابت وام نور واستحيت ..
كملت الدوام وردنا نطلع ..

گالت ام ثابت .. عندج خط لو يجي عليج احد ..
فرح .. لا ماعندي خط .. بس اخويه يجي ياخذني ..
ام نور .. اذا تردين احنه نوصلج ..
گلتلهن لا شكرا .
اخويه ياخذني على ما احصل خط. .
ام نور .. اي انتي وين بيتج احنه بس

اثنين بالسيارة ..
گلتلها ع منطقتنا ..
گالت اي قريبه عليه ..
يعني انزل اني وبعدين انتي وراها يودي ام ثابت ..
ارتاحيت من گالت هيج ..
مااحب ابقى اخر وحدة بالخط ..
اتصلت ع بلال وگتله .. ماصدگ بسرعه وافق .. بس گال منو وياج ..
گتله موضفات كبار .. اقتنع ..

رحت وياهن ..
وكانن حبابات وام ثابت گالتله توصلها للباب ..
مر كم يوم اتعودت ع الدوام ..
وزهراء تخابرني وتحاول تطمأن عليه ..
وتلهيني ..
بالنهار التهي بالدوام وبالبيت وي زهراء وسهير يخابرني ع جهاز ماما ..
بس الليل موحش ..
احسة عدوي ..
يقلب ذكرياتي واوجاعي ..
اشتاق الشهد وصوتها ..
انام وافز اسمعها تبجي واتلفت بالغرفه ماكو الها اثر ..
اكتم صوتي ودموعي واخنگة بگلبي ..
اطلع ملابسها واشمهن…
صارت عيوني ع ايدي ..
اول مرة اشوف الحلقه ناسيتها بإيدي ..
حتى عيوني تريدة ..
وعمتني وماخلتني انزعها ..
سحبتها من ايدي ونزعتها ..
مثل ماخلعني من حياته وحطمني ..
شلتها وخليتها بالكنتور .
وقفلت عليه ..
اني ماارتاح الا اذا طلع نهائي من حياتي ..
صبحت گلت الماما قبل مااطلع يوم ..
اريد تخابرين خالتي ..
اذا عذاب موجود ..
يجيب سيد ويطلگ ..
ماما .. يمة اسم الله شبيج حلمانه ..
فرح .. لا بس كنت منتضرة الوقت المناسب ..
ماما .. الله يعوضج بالاحسن منه والي يقدرج ..
فرح .. خليني بس ارتاح وانام مرتاحة وكلشي مااريد. .
اذا اني ليلي لو خنگة وكابوس لو صوت شهد يطير النوم من عيني ..

طلعت بالحديقه انتضر واشم بالهوا ..
واتخيل من كنا نطلع بالحديقه اني وياه وشهد ..
لو من يغسل الطارمة حتى مااطلع اني ..
ويبقى بالفانيلا…
ااووووووه وين رحتي فرح ..
طردت كل الافكار من راسي وطلعن ع صوت منبه السيارة ..

طول الطريق ساكته .. وام ثابت وام نور يسولفن ع اولادهن وبناتهن وع الغدا والبيت وكذا ..
وعبالك راديو من الصبح ..
وصلت اني بطبعي مااحب امشي بطئ..
دايما امشي سريع ..
وزهراء وسهير كانن يگوللي عبالك بيب بيب بمشيتج ..
بس لازم اساير ام ثابت وام نور ..
عيب اسبقهن وامشي قبلهن ..

مرت سيارة من يمنا .. دگ منبه ونزل الشباك ..
صباح الخير صبايا ..
ضحكن هن .. صباح الخير يمة .. ولك وينا ووين الصبايا صرنا عجايز ..
بس فروحة صبية حلوة بينا ..
الصراحة خجلت وممتعودة ع هيج مزاح ..
رجع گال صباح الخير ست فرح ..
گتله صباح النور ..
صدگ غثيث .. شلون يتمازح بميانه زايدة ..
ولو هم نسوان كبار ..
بس ع الاقل استحى من وجودي وياهن ..

اتجرأت وسألت ..
هذا استاذ هنا ..
ام ثابت .. منو قصدج عمر .. لا هذا طالب ماجستير .. بس وردة مال الله .. من هو طالب متعود يقرأ بالمكتبه ويجي يمنا مثل وليدنا صار ..
والله يسلمة شاطر وكل سنة امتياز ..

اممممم اصلا مامبين عليه .. احسه خفيف ومو رزن وشكله من ذولي الي كانوا يفوتون للمحاظرات ويخلصوها فرة بالجامعه ..
بس غريبه ولامرة شايفته من كنت مرحلة اولى ..
(احجي بداخلي)..

ماصدگت يكمل الدوام .. الجامعه بلا اخواتي وصديقاتي محلوة ..
شگد كنا نخلص وقت حلو نتونس ..
ويمكن الملل الي احس بي بسبب وقتي الي اخلصة بين ام ثابت وام نور وكلامهن ع الحياة والبيت والمسؤوليات
بس الحلو بيهن ابد ماتدخلن بحياتي او خصوصياتي ..
ولايوم گالن متزوجة مخطوبه كذا ..
بس دايما يذكرني بأكلهن وشربهن ..
حتى مرات استحي يحسبن حسابي الكلشي ..
فگمت اسوي اي شي بالبيت واجيبه عيب كل مرة هن يجيبن واني بس اكل ..

صار ترتيب الكتب مثل واهس بالنسبه الي ..
والكتاب الي يلفت انتباهي ..
اگعد اقرأ بي الى ان يكمل الدوام ..
لان عطله فالدوام قليل وماكو تعب ..

عذاب بعد مااجة من دوامة بنفس اليوم الي خالتي خبرته ع قرارنا ..
جاب سيد واجة ..
وكأنه مستعجل ..
طلگنا .
لبست عباية ماما وماطلعت حتى عيوني منها ولاخليته يشوفني ولا شفته اصلا ..
احس رجلي من التوتر ماتشيلني ..
من تطلگنا ..
حسيت الدنيا افترت بيه ..

بالگوة وگفت ع حيلي ..
اتقرب مني وگال .. يمكن الله ماقسملنا نكون البعضنا ..
الله يسعدج ..
واعتذر للي بدر من عندي ومن اهلي ..
وبخصوص شهد شوكت متحبين خابري امي وتجيبها الج بس ياليت بأيام دوامي مو بأجازتي ..

وتركني وطلع وكل هذا واني مارفعت راسي ولاشفته
گلبي يگلي روحي الزميه ولاتتركيه ..
حس ع غلطة واعتذر لاتضلمون گلبكم ..
وعقلي يگلي .. ماكو حب بينكم كلشي صار بالماضي ..
لاتعيشين نفس بأمل كاذب لمجرد اعتذر ويحاول يرضي ضميرة ..
من گالج هيج مو حبا بيج .. بس كان يريد يكفر عن اخطائة ..
طلعت من الاستقبال للغرفه گبل ..
اخذت الحلقه من الكنتور ..
ورحت الجلال بالباب ..
-هاك جلال انطيه هذي الحلقه ..
اخذها وسمعته يگول الجلال . هذا حقها مااخذة ..
جلال .. اخذة ماتريدة ولابعازة هالحلقه ..
سمعت سيارتة حركها سريع وراح ..
وراحت ايامي وياه ..
وبقت بس الذكريات ..

كنت صافنة بين كل هذي الذكريات .. وفززني صوت سهير ..
وج يله تعالي ادخلي المحاظرة حتبدي .. وين راح بالج لو بعدج تحنين ..
فرح .. لا ولج يااحن .. بالي يم

شهد اليوم تجيني اشتاقيت الها .. الجمعه راح اسوي عيد ميلادها مو ماتجن هي حفله بيناتنا مو كبيرة لان سنة بابا ومنار ماصارلها فترة من طلعت ..
سهير .. اويلي طبعن نجي غير احنه خالاتها واول من يحظر ..
فرح .. هههههه فديت خالاتها يله خلينا نروح للمحاظرة وست زهراء وينها اكيد يم حبيب الگلب ..
ضحكنا ورحنا للقاعة ..!!

يتبع ..

قۣۗـۙصۣۗـۙصٍ 📖ۆبۣۗـۙسۣۗ 💯

//// البارت الثانـي و العشـرون ////
من_سيدفع_الثمن ؟؟
بقلم_الكاتبة_شمس

‏
كنت صافنة بين كل هذي الذكريات .. وفززني صوت سهير ..
وج يله تعالي ادخلي المحاظرة حتبدي .. وين راح بالج لو بعدج تحنين ..
فرح .. لا ولج يااحن .. بالي يم شهد اليوم تجيني اشتاقيت الها .. الجمعه راح اسوي عيد ميلادها مو ماتجن هي حفله بيناتنا مو كبيرة لان سنة بابا ومنار ماصارلها فترة من طلعت ..
سهير .. اويلي طبعن نجي غير احنه خالاتها واول من يحظر ..
فرح .. هههههه فديت خالاتها يله خلينا نروح للمحاظرة وست زهراء وينها اكيد يم حبيب الگلب ..
ضحكنا ورحنا للقاعة ..!!

هي دخلت المحاظرتها واني رحت لمحاظرتي ..
رغم ضايجة لان زهراء وسهير مو وياي بنفس المرحلة ..
بس المهم رجعت للجامعة .. واشوفهم وقت مااريد ..
وابد ميتركوني ..
اذا اني بالمحاظرة يبقن ينتضرني بالباب الى ان اطلع ..
بس كنت اخلص محاظرة بسرعة اروح للمكتبة ..
فكنت محاظرة احظرها ومحاظرة لا .
ومرات ام ثابت وام نور .. ميخلونـي اغيب عن المحاظرة كلش حبابات وياي ..

يمكن الله يحبني وعوضني بناس وگفت وياي بأزمتي ..
ومنهم ابو زهراء ..
ايضا وصى عليه رئيس قسمنا والاساتذة حتى ميسجلوني غياب اذا اتأخر ..
لان حيل دااتعب ..

مرة من المرات .. اجيت امشي سريع من المكتبة القسمنا حتى الحگ للمحاظرة ..
وتعثرت وردت اوگع ..
وصار بوجهـي عمر ..
الله الله ع كيفج لويش هالركض صاير شي ..

-لا شكرا بس اريد الحگ ع المحاظرة ..
-ليش انتي طالبه هنا ..
-اي من رخصتك ..
تركته ورحت ..
الظاهر يريد ياخذ وينطي بالحجي واني مستعجلة وفوگاها لابسة گعب عالي دمرني ..

بعد ماطلعنا من المحاظرة .. وكانت الاخيرة ..
شفت زهراء وسهير منتصراتني ..
زهراء .. ها حبي هم اليوم راح تتأخرين ..
فرح .. اي مو تدرون لازم يكمل الدوام واطلع ..
سهير .. بس غير اليوم تجي شهودة توقعنا تطلعين .
فرح .. اي وربي مشتاقتلها موت .. بس عيب من ام ثابت وام نور .. دايما يسدن مكاني بالمحاظرات ..
ماأگدر اتركهن واروح لازم نخلص ونطلع سويه ..

زهراء .. لعد خالينا نوصلج للمكتبه ..
سهير .. اي عساس ميته عليها الحنينة .. تدري بحبيب الگلب هنا بالمكتبه لهذا اقترحت توصلج ههههه ..
زهراء .. وج شنو حبيب الگلب ليش هو اغلى من فروحتي وحضنتني ..
سهير .. ها زين دخلي اشوف استاذ مصطفى والا اگله زهراء هيج تگول ..
فرح .. وج سهير خطيه لاتحرگين عليها الجو خليها تصبغ بيه وبي ..
زهراء .. ها فروحة هيج صارت .. بسيطة سهير يجي يوم الله يوگعج بواحد وشوفي شأسوي ..
سهير .. اي وينج يله دحاجي خطيبج خلي ينسق وي صاحبه ويجي يخطبني ..
زهراء .. هههههه اي گولي هيج مخليه عينج ع صاحب مصطفى ..
سهير .. اي والله يختي من شفته لليوم دخل بعقلي .. ع الاقل يضحك ويفرفش احسن من خطيبج الجامد ..

فرح .. تعالن ولجن اشو اني اخر من يعلم ..
زهراء .. معليج بيها فروحة هذي خبله .. كل الي تشوفة تگول اريدة .. وتالي تاخذ واحد من ولد عمها وتنحبس بالبيت ههههه ..
سهير .. يمة اسم الله غير اموت .. لو بغدادي لو مااريد
ضحكنا ع عقل سهير ورحنا ..
اني رحت الشغلي وهن راحن للقاعة مال قراءة ..
گالن تعالي سلمي ..
استحيت .. گلتلهن لا غير مرة عيب اتأخرت ..

رحت شفت ام ثابت وام نور .. دا يرتبن بالكتب مجموعة جديدة اجت ..
اخذتهن منهن ورتبتهن ..
بقينا النهاية الدوام وطلعنا ..

رجعت للبيت تعبانه وشفت حبيبة گلبي جايبتها خالتي الصبح ..
صايرة تمشي خطوات وتوگع ..
گامت تتمختر بمشيتها ومادة ايدها الي وتصيح ماما وتضحك ..

اخذتها الحضني وبوستها واشم بيها .. تروحلج فدوة ماما ودي افتح گلبي واخليها بي ..
ومااخلي احد ياخذها مني ..
بقيت اليوم كله وياها متونسة ..
ثاني يوم گلتلها ماما راح استلم راتبي اليوم من اجي نطلع نتسوگ الشهودة العيد ميلادها ..

داومت بين مارحت للمكتبة ورجعت شفت البنات بباب القسم ..
رحت يمهن ..
سلمت عليهن وبوستهن .
ودا نسولف ع عيد ميلاد شهودة .
گالت زهراء اذا تردين اطلع وياج اني نخلي ماما تاخذنا بالسيارة ونفتر ع راحتنا شتگولين ..
گلتلها ماادري اشوف ماما وارجعلج خبر ..

سمعنا صوت ورانا ..
صباح الخير ..
التفتنا . مصطفى خطيب زهراء ..
شلونكم بنات جمعة خير ان شاء الله
زهراء ابتسمت .. هلو صباح النور ..
واحنه هم ردينا ..
همستلي سهير .. وج الجامد يعرف يحشش طبعا هي ناصبه عليه حتى تضوج زهراء ..
گرصتها .. زهراء حست علينا وخزرتها ..
مصطفى ديسولف وي زهراء ع استنساخ مااعرف شنو .
اجة ولد سلم عليه وتباوسو ..
غمزتلي زهراء وضحكت ..
انتبهت هذا نفسة الغثيث .. اوووف ربي هذا وين مااروح الگاه ..
سهير تگلي دشوفي بربج هذا الدم الخفيف مو خطيبها الجامد ..
باوعلي واتقرب ..
گال صباح الخير فرح مو…
اخذتني الصفنه .. ها اي ..
سهير تگرص بيه ..
مصطفى .. شنو تعرفون بعض ..
فرح .. لا م

ااعرفه ..
عمر .. لا بس بالصدفة شفتها بالمكتبه تداوم وزاد استغرابي من شفتها تدرس هنا ..
يعني الصراحة حلو الواحد يدرس ويعتمد ع نفسة ..
ونضراته كانت تحجي غير شي ..
ارتبكت وگلتلهن يله خليني اروح اتأخرت ع المحاظرة ..
اجن وراي زهراء وسهير ..

تعالي ولج تعالي ..
سهير تحجي .. خرب يومج طلعتي تعرفيه وماتعرفيني عليه ..
فرح .. شبيج انتي مااعرفه والله هي كم مرة شفته ياخذ كتب من المكتبه ..
سهير .. بس يعرف اسمج ..
فرح .. جائز من ام ثابت او ام نور سائلهن ..
زهراء .. بس شفتي عيونه شلون يباوعلج ..
سهير .. اي شفتهن لو اني هيج يباوعلي جان ذبت .. وفرح خانم ماعاجبها ..
فرح .. انتن اكيد تخبلتن .. اني وين وانتن وين .. ليش هي الي مثل وضعي تفكر بهيج اشياء ..
وماصار فترة من تطلگت شتحجن انتن ..

سهير .. لاتگليلي بعدج تحبين ابو صلعه .. شعاجبج منه اشو حتى اكبر منج واضخم والصراحة مالايگلج .. عصبي ودمة ثگيل وطابگ حواجبه كلما اشوفه ..

فرح .. حيييييل هذا كله عرفتيه بي من مرتين شفتيه بيهن .
سهير .. اي لعد شعبالج اني المحلله مال ولد اعرف الزين من الموزين من نضرة ..

ضحكتني .. سهير مرحة وتحب تصنف ع الولد وتحجي وتنعجب بهذا وذاك وتقريبا الكل معجبه بيهم ..
بس بالجد ثگيله ومايوم سلمت نفسها الاحد ولا اتقربت من احد .. محافظة ع نفسة بس بنفس الوقت مو. معقدة وماخذة الامور بسهوله ..
بعكسنا اني وزهراء.. دايما جديات وخاصه اني ههههه ..
لهذا يگللي المعقدة ..

بين المحاظرات والمكتبه خلص اليوم ..
استلمت راتبي وممصدگة ولو قليل ويطير منه للخط ومصرفي ..
بس ماما نطتني من راتب بابا مبلغ وگالت جهزي بي الي يعحبج هذي اول سنه الها خطيه ..
كنت مفكرة اسويه بمكان بس راح يكلف هواي واني ماعندي هيج تكلفه ..

طلعت من المكتبة وردت الحگ بزهراء وماعندي موبايل اخابرها .. لازم احجي وي ماما واشتري واحد صغير ع الاقل بس للضروريات استخدمة ..

كنت امشي سريع بلكي الگاهم بالباب واليوم خميس وطلعنا من وقت ..
سمعت صوت سيارة وراي تدگ منبه ..
اخذت جانب الطريق عنها واستمريت امشي من غير مااباوع ..

وگفت السيارة ..
فرح . محتاجة شي ..

باوعتلها .. ياالهي هذا شگد لزگة ..
-لا شكرا ..
-ام ثابت وام نور وين مو ترحين وياهن انتي ..
-ها . اي بعدهن وراي اني طلعت حتى الحگ بزهراء ..
.. نزل من سيارتة
-هستوهم طلعوا هي ومصطفى قبلي ..
اتصلي بيها وشوفيها ..
-ماعندي موبايل .. يله شكرا ..
-اوكفي اوكفي معقوله طالبه بالجامعه وموضفه ماعندج موبايل ..

هسا اني شعندي واگفه واخذ وانطي بالححي وياه ..
ع اذنك .
وتركته ..

سمعته اتصل بمصطفى وگال انتضروا فرح اجت للباب ..
طلعت مستعجله ..
شفت مصطفى رجع بسيارتة ..
وبالصدر زهراء گاعدة .. استغربت لان مو من عوايدها تطلع وياه هي عندها خط وي سهير وبعد بنات ومرات تروح وي ابوها ..

نزلت .. ها فروحة خابرنا عمر ورجعنا شكو ..
-اووووف ماعبالي انتي وي مصطفى اسفه حبي ..
-لا عادي حبيبتي .. بس اليوم معزومة ع عدا عند اهلة وگال بابا روحي وياه ..
-ها لعد روحي مااخرج واسفه مرة ثانيه ..
-وج احنة اخوات شنو تتأسفين ..
اجة عمر يم مصطفى ..
گلتلها روحي عيب .. ردت احجي وياج ع الحجز مال كيك عود خابريني بعدين ونتفق ..
-اممممم معليج بحجز الكيك .. كيكة شهودة حاجزتها وعليها صورتها بعد ..
-صدگ تحجين.. لا زهراء دااكلفج وياي ..
-ازعل وربي .. وبعدين اني ماخذتلها صور من اجيتج واختاريت وحدة ونطيتها الهم ويمكن هسا ديجهزوها ..
-حضنتها من فرحتي .. ربي ميحرمني منج يروحي .

مصطفى .. سمعت كيكة شكو عيد ميلاد منو ..
زهراء .. عيد ميلاد شهودة ..
عمر .. شهودة منو
زهراء .. بنت اخت فرح ..
ضجت من گالت زهراء بنت اختي .. گلت لا بنتي ..
وسلمت ع زهراء ورحت لان شفت ام ثابت وام نور طلعن ..

عمر .. هاي البنية يوم عن يوم تزيد استغرابي واحس عيونها بيها حزن والم ..
وبداخلها جبال ..
تختلف عن البنات الشفتهن وعرفتهن .. ثگيله ورزنه وبنفس الوقت غامضه مااعرف ليش احسها لغز ..
مو بسهوله تجذبني وحدة بس فرح جذبتني ..

فسألت زهراء عليها .. شنو بنتها وانتي تگولين بنت اختها مافهمت ..
زهراء .. اووووه فرح سالفتها سالفه .. خطيه خلال سنه انقلبت حياتها قلب ..
ومصطفى مسولفتله عليها ..
مصطفى .. مگرودة والله .. بس حبابه واعزها حيل ودوم اگلها الزهراء .. لاتتركيها ماكو هيج بنيه مثلها بهذا الوكت ..
عمر .. لا شديتوني اكثر القصتها ..
مصطفى.. هسا تعذرنا .. الاهل منتضرينا ع الغدا . اذا انت عزابي ومحد يسأل عليك ..
اني وياي مرتي واريد اروح يله في امان الله ..

عمر.. راحوا من غير ماارتاح واعرف قصتها ..
بقت عيوني عليها الى ان اجة الخط وراحن .. صعدت سيارتي واخذتني لااراديا ورى سيارتهم ..

فرح .. ماعجبتني تصرفات عمر نهائيا .. كانت نضراته الي وتدخله بحياتي ابد محلوة ..
يعني وين مااروح اشوفه ..
حتى من وگفت وي زهراء ومصطفى ودااحجي وياها ..
نزل من سيارتة واجة يمنا ..
وعبالك

يتقصد هيج يسوي ..

اول ماوصلت .. بدلت وكملت تغديت ..
گلت الماما زهراء امها توصلنا .. گالت خاف عيب ..
فرح .. هي طلبت هالشي. .
ماما .. لعد اذا هيج اني مااگدر اروح اخذي رنا وروحي ..
ضجت بداخلي واعرف رنا راح تعلق او تحرجني اذا راحت بس اذا مااخذتها اكيد بلال ميخليني اروح وحدي ..

گلتلها اوك خليها تروح ..
راحت ماما گالت البلال ..
گالها منو وياها يروح ..
گالتله خلي رنا تروح وياها ..
رنا فرحت وهيج بلال مارفض ولاعارض ..
بدلت الشهودة واخذت عربانتها ويانا ..

اجت زهراء وامها وطلعنا ..
اخذت مني شهد وتبوس بيها ..
وج فرح شنو هالجمال بس مو ضعفانه ..
-اي صحيح ✔ لان فترة تمرضت ..

وصلنا اخذتلهـا بدلة وحذاء وتاج ابو الورد .. والزينة والبالونات وحلويات وكرزات وكذا ..
دا نمشي واني ادفع بالعربانه .. گالت رنا .محتاجة شغله هسا اجي .
راحت .. وتذكرت الشمعه نسيتها ..
رحنا ندور شمعه ..
گالت زهراء ..
فرح ماكو عمر سألني عنج ..
-رجاء زهراء لتنطيه وجه .. هواي ديضوجني .. دگوليله متزوجة وخلي يولي ..
-وج والله حباب لتشوفيه يضحك ويسولف بس صاحب غيرة ونخوة ..
اني هم كنت ماخذة عليه نضرة بعد ماسولفلي عنه مصطفى وعرفته زين غيرت نضرتي ..
فرح .. زهراء اذا تحبيني سدي الموضوع ..
زهراء .. بعدج تحبيه مو .. يعني معقوله بعد كل الي سواه مانستيه..
فرح .. اووووه زهراء.. الاحسن روحي اخطبيه السهير مو تريدة ..
زهراء .. عاد انتي ماتعرفين سهير كل الي تشوفه تگول هذا فارس المستقبل .. وبعدين عمر سني ومستحيل اهلها يوافقون لو صارت ..
لهذا الاحسن ماتتعلق بي ولاتتقرب الة ..
فرح .. واذا سني او شيعي .. ماتفرق اذا حبوا بعض من صدگ ..
زهراء .. انتي الكلام وياج ضايع الاحسن اسكت ..

كملنا شغلنا ورجعنا للبيت ..
شهودة فرحانه .. بالبالونات والزينه ..
دور لبستها البدله وهي مكيفه وتباوع النفسها وتضحك ..
خابرت الخالتي گلتلها تجي باجر ..
واتصلت ع تماضر وخبرتها ..
ورنا عزمت اخواتها ..
فأضطريت اگول البيت خالي وعمي حسن ..
سويناها بس بنات احسن ..

اني ردتها حفله صغيرة .. بس رنا اتصلت وعزمت من غير ماتگلي ..
وماما گالت عيب من خالج اعزمي اهله ..
واني اصلا ماراغبة مرت خالي .. لان اكيد راح تسم بدني بكلامها ..

لليل گاعدين نزين بالاستقبال ونرتبها ..
گالت ماما .. يمة صار شهرين من طلعت سنة ابوجن واختجن ..
والاسود مايصلح .. والحزن بالگلب ..
وباجر كلها لابس الوان وانتن مسودات .. هم الله مايقبل وابوجن يتعذب ..
كافي انزعن ..
اني ومروة ماقبلنا ..
وگالتلها اصلا اني اشتريت ملابس للمدرسه اسود شلون بعد انزعه والبس الوان استحي ..
ماما ماقبلت وحلفتنا بأبويه وروحة ..
وطلعتلنا من ملابسنا القديمة الوان ..
ونزعتنا بالحمام ..
بالگوة طلعت مستحية وعبالك ابويه ديعاتبني ..
بيومها شبعت بجي ..
واحس روحي مرتكبة ذنب ..
او يمكن من گد السواد الي شفته بحياتي .. اتعودت عليه وماردت انزعة ..

ثاني يوم التهينا بالتعديلات ..
بعد الظهر اجو كلهم وخالتي وتماضر واولادها ..
اني لبست شهودة بدلتها وطلعت تخبل ..
وشعرها كيرلي خليت عليه تاج الورد طلعت اميرة ..
اتصلت ع زهراء .. گالت بالطريق رحت جبت سهير من القسم واجيت ..

اني لبست بنطرون جينز من ملابسي القديمة وقميص وردي ترابي .. وتركت شعري مفتوح .. وكلشي مخليت غير الكحل ..
بس فعلا الالوان غيرني كلش ..
وكل الي يشوفني يتعجب ..
بس خالتي گامت تبجي .. وتگول خسرت بنتي مو جنتي

دخلت للغرفه .. اجت وراي تماضر ..
گالت فرح . اريد اگلج شغله ..
-تماضر اذا شغله تخص عذاب مااريد اسمعها ..
-شبيج بس اسمعي وافهمي عذاب متندم ..
-تماضر احنه اخيات بس اذا فتحتي موضوع عذاب تزعليني ..

سكتت وطلعت .. ويمكن اخذت ع خاطرها ..
بس مااريد اتأمل وارجع اتذكر واتعذب ..
عذاب صفحة. وانطوت بحياتي ..

اجت مرت خالو .. هي وضحى ..
وطبعا ضحى ع سنگة عشرة .. تگول جايه الحفله زواج
او يمكن تريد تدخل بعين خالتي گوة. .
لأن گعدت بصف خالتي وتتماوع عمة وعمة ..

اجت مرت خالوا .. بالعافية نزعتي الاسود .. جا لمن تطلگج عذاب يله نزعتي ورتبتي نفسج ..

-خاله ترى اني الي طلبت الطلاگ مو هو ..
-والله الولد ميتعيب والف وحدة تتمناه بس انتي واختج عايبات وماعرفتن تحافظن عليه ..
باوعتلها وعيني بعينها ..
-اي خاله انطيه الي تتمناه . واشرت ع ضحى بعيني ..
تركتها ومشيت ..

شفت زهراء وسهير دخلن ..
رحت الهن .. بوستهن .. وباركلي لان نزعت الاسود ..
وگالن ..
وج لو گايلتلنا نجيبلج هديه ..
-ولن انتن اخواتي قابل بينا هديه ..
دخلتهن جوة نزعن الحجابات ورتبن نفسهن ..
اني طلعت الكيكة الي جايبتها زهراء تخبل ووياها كب كيك جايبه . فدوة الهيج صديقات عبالك اكثر من اخوات ..
سهير نطتني علبه كبيرة مال بقلاوة وكنافه جايبه ..

رتبناهن وخليتهن بالطاوله .. العيون كانت ع صديقاتي ..
وخاصه سهير .
حلوة ومرحة تجذب النظر ..
وهي تگلي يالله بلكي احصل عريس .. وتضحك .
گلتلها حتى تكرهين اليوم العر

فتيني بي ..
نصيحة الوجه الله عشيرتي ماتفيدج . ونضحك ..

سوينا عيد الميلاد ..
وتماضر اخذت صور هواي الشهد حتى تدزهن الابوها ..
وحبيبتي تتعارك وياي ع الشمعه تريد تنفخها ..
نفختها وياها گامت تصفگ فرحانه ..

تونسنا حيل .. وهذي كانت اول فرحة النا من بعد سنة ..
انتهت الحفله وطلعوا ..
خالتي گالت لعد راح اخذ شهد وياي لان باجر ابوها يجي بس شهد گامت تبجي وماقبلت تتركني ..
گالت تماضر خليها اليوم ..
واني امر عليها باجر العصر اخذها ..
خالتي من طلعت نطتني 25 الي و25 المروة ..
گالت هذا مال افكاك الحزن مالجن .. انتن اشترن الي تردنه ..
ماقبلت اخذ بس اصرت .. والصراحة كنت حايرة شألبس بالدوام . واني ملابسي كلها قديمة ..
ع الاقل اخذلي سترة حلوة لو شو شنو ..

بعد ماراح الكل ..
گعدنا اني ومروة ننضف ..
وكملنا اجو اخواني جايبين العاب الشهودة هديه ..
احنه مااتعشينا لان اكلنا هواي بالعيد ميلاد ..
كان كلشي حلو رغم بساطة الحفله ..

ثاني يوم بعد ماتماضر اجت واخذت شهد . رحنا اني وماما للسوگ اخذت سترة جويتـي وماما اخذتلـي حذاء وشال مشجر بلونها ..
ومروة اشترت شال وقميص للمدرسه ..
ورجعنا ..

بالدوام .. لبست تنورة وسترة ولفيت الشال خليت شي خفيف ..
ماما گامت تصلي ع النبي ..
بس جلال عصب من شافني وگال شنو طالعه هيج ..
وگام يلوم ماما لان نزعتنا الاسود ..
وتعاركوا من الصبح ..
اني اصلا ماحجيت وياه وسكتت ..
اجة السايق ..
گلتلها ماما اني رايحة ..
وطلعت ..
كل الي يشوفني يگلي طالعه حلوة فعلا الالوان غيرني هواي ..
دخلت الجامعه ومستحيه عبالك ملابسه ملابس ..
امشي واتعثر ..
ماصدگت وصلت للمكتبه ..
بقيت گاعدة ماگمت ..
ام ثابت گالت تخبلين طالعه والله لو تقبلين جان اخذتج الابني ادورله مرة وهو ماقاصر يشتغل بالشرطة وعندة سيارة ..
اختنگت من سمعت شرطة ..
بگلبي اگلها لاخاله الداخليه شبعوني ضيم مااريدهم ..
حقها تحجي لان ماتدري بحياتي شبيها ..
لو تعرف قصتي ماحجت بيه اصلا ..

گلتلها خاله عندي محاضرة راح اروح ..
اخذت جنطتي والسجل ومشيت ..

وصلت قريب القسم ..
شفت شخص اجة بأتجاهي ..
گال صباح الخير ماعرفتج ..
-صباح النور ..
نطاني علاگة ..
-شنو هاي .. شكرا مااريد ..
-شبيج اوگفي هاي مو الج الشهودة ..:
تفشلت من گال هيج ..
-بس انت متعرفها شنو المناسبه جبت هديه الها ..
-طبعي احب الاطفال وحبيت افرحها لا اكثر .. اذا ضوجتج اعتذر ..

انحرجت واحس الكل يباوعلنا .. اخذتها ومشيت حتى ماشكرته من التوتر .
ركضت للقسم ..
شفت زهراء وسهير ..
گالن شبيج مضيعه جمالج هذا بوجهج العابس ..
سولفتلهن ..
ضربتني سهير ..
وج والله انتي مو وجه نعمة لو اني هيج يهتم بيه جان طرت ..
فرح .. طبعا اضوج لان دااشوفه بكل وقت وراي وعبالك متقصد ..
باوعت الزهراء .. اني مو گتلج گليله متزوجة وخلي يولي وجودة حولي يسببلي مشاكل واني جايه لهنا اشتغل وادرس لاغير ..
..
زهراء .. ها اي دتركينا من عمر ..
باعي .. هاي جبتلج شي بسيط بس كون يعجبج ..
وسهير هم نطتني علاگة ..
فرح .. لا شنو هاي مو گلتلجن لتجيبن شي ..
باوعت جايباتلي ملابس ..
اوووف ليش هيج تسون احنه بينا هيج شي ..
گالن .. وشبيها غير احنه اخوات وماكو فرق بينا ..

دخلت للمحاظرة معبسه وتندمت لان اخذت الهديه اخر شي ..
گلت الزهراء .. هاج رجعيها .. اني اخذتها لان ماردته يحرجني مقابل الطلاب ويم القسم ..
وياليت انتي لو مصطفى تگلوله مايتعرضلي بعد ..

تركتها ومشيت للمكتبه وصدگ ضايجة ..
عمر ..
گاعد اني ومصطفى بالكافتريا ..
واجت زهراء وبيدها العلاگة الي نطيتها الفرح ..
استغربت ..
اتقربت سلمت .. ردينا السلام ..
-هاك عمر هاي فرح مااخذتها وعصبيت حيل رجاء لاتتعرضلها بعد .. فرح مو من هذا النوع .. فرح انضلمت هواي وبالگوة يله خلوها تكمل دراستها وتشتغل حرام يضيع مستقبلها ..
عمر .. شبيج والله ماعندي غايه وياها .. اصلا اكو شي دايجذبني الها وخاصه من سمعت قصتها من مصطفى ..
يعني انسانه انجبرت تتزوج زوج اختها وتربي بنت اختها وانضلمت وتعذبت وتالي رجعت وگفت ع رجلها ومحافظة ع نفسها .. هيج انسانه تستحق التقدير ..
واني ردت اتقربلها بغرض الزماله لااكثر ليش كبرتوا السالفه ..
زهراء.. تعرف ماكو زماله عدنا هنا .. وخاصه اهل فرح ويمكن تعرف مصطفى لمن عقدنا يله گمنا نلتقي ..
احنة مجتمع شرقي ماعدنا الي انت تفكر ..
اذا انت منفتح غيرك لا ..
عفية مااريد اخسر صديقتي بسبب احد ..
مصطفى.. اهدي زهراء عمي راح اغار من فرح ترى .
وضحك ..
وانت عمر .. لاتضوج مرتي واترك صديقتها ويغمزلي ..
عمر .. صدگ ضجت .. ليش فكرت بيه بنيه سيئة .. واني كنت متعاطف وياها واحاول اطلعها من جو الحزن والخوف الي هي بي ..
حتى لو كانت تمثل القوة .. بس كانت عيونها تحجي غير شي ..
ومو من حقها تحكم عليه هيج ..
واذا عندها شي خلي تحجيه بوجهي ..
تركت مصطفى وزهراء يسولفون واستأذنت بسرعة واتوجهت للمكتبة ..

يتبع ..

حبي هذيني البيجات☺️👇🏻 اللي اعرفهن مال ألبسة رجالية

#ملوكه