//// البارت السادس عشر ////
من_سيدفع_الثمن ؟؟
بقلم_الكاتبة_شمس

بقيت منتضرة ع نار ..
وكلما خالتي تسأل اطلع حجة شكل ..
حتى غدا ماگدرت اسوي من القلق ..
ولا الي خلگ الأي شي ..

اخر شي ماتحملت گلت اخابر وخلي يعيط بيه لو شيسوي يسوي ..
اتصلت رن هواي يله رد ..
-اني مو گتلج لاتتصلين ..
-قلقت عليك ..
-زعطوط اني وتخافين عليه .. ساعة واجي لاتخابرين بعد وسد الموبايل ..
ليش هيج جاف وياي هاي جزاتي لان خايفه عليه ..
صار العصر ..
سمعت الباب اندگت ..
فرحت عبالي هو ..
فتحتها شفت خالتي ..
-ها خاله وينكم اليوم .. وعذيب شو مامرني ..
-خاله مو گتلج عندة شغل وراح ..
-وانتي شبيج وجهج اصفر ..
-مابيه خاله ..
-شني ماماكله ..
-لااكلت مابيه شي .. ماتدري هي اني لسا بلا ريوگ ولا غدا .. من غير القلق والخوف ..
دخلت خالتي واخذت شهد تلاعبها ..
واني ماگدرت اگعد يمها ملامحي تفضحني ..
گمت التهيت بالعشا اسوي ..
اخر شي ..
گالت . لعد اني اروح للبيت وراح اخذ شهودة وياي يشوفها جدها ..
-خاف متگدرين تشيليها خلي اخليها الج بالعربانه ..
خليتها بالعربانه واخذتها ..
بقيت اني وحدي واكل بروحي ..
سمعت صوتها بالباب تسولف ورجال وياها ..
اي يمكن هو ..
طلعت لااراديا اريد اشوفه ..
اتقربت اي هذا صوته وي خالتي ..
دا تسأل بي ع حالته وتگله شبيك يمة وجهك اسود وشحالك وين جنت وهو يحاول يماطل ويتخلص منها ..
فتحت الباب صارت عيني بعينه خزرني ..
گالها يلة يمة اني ارتاح واجيكم ..
راحت خالتي وهو دخل ..
-الحمد لله ع سلامتك ..
-شعندج فاتحة الباب وطالعه هيج مو منبه عليج ماتطلعين ..
-وين طالعه غير فتحتلك الباب لان سمعت صوتك ..
-وشگايله الامي بس تسأل ..
-والله ماگلت شي ..
-يله ادخلي جوة وبعد مااشوفج تفتحين الباب وتطلعين هيج فااااهمة ..

استغربت من ردة فعله ..
-لزمتوه ..
-منو ..
-هو ..
-يعني حتى نفسيتج ماتتقبل تگولين حبيب اختي ..
-شنو لزمة هالحجي اني شعليه ..
فرك وجههة ..
-اي لزمته وعذبته وانطيته الجماعتي يأدبوه وراح ياخذله حكم زين ..
ماحجيت وتركته ..
-وين رايحة شو مافرحتي ..
-ليش انت فرحان .. اشو اجيت مناك وتريد تذب غضبك عليه شمسويه اني هاي جزاتي لان خايفه عليك ومنتضرة
-واني جزاتي اركض ورى واحد سرسري بأطراف بغداد ومن مكان المكان بسبب اختج وتالي بعين وكحة يجيب اسمها ويضحك بوجهي ويعاندني ..
وج طلعت سلاحي وصوبت على راسه لو ماجماعتي يلزموني ..
اتي تالي عمري كرامتي ومكانتي تنزل بسبب… .
وضرب الطاوله حيل بإيدة من حرگة گلبه ..
اجيت اركض اله .. لزمت ايدة شفتها مفتوحة وتنزف ..
ومنضرها يخوف ..
ماتحملت ووگعت ..
لان مماكله وصار عندي هبوط من القلق واديه من شفتها ..
فتحت عيني لگيته يصحيني بالمي ويغسل وجهي ..
فزيت اباوع الايدة ..
عذاب ايدك ..
جان لافها بقميصه ..
گتله شمنتضر روح للمستشفى ..
-اي رايح بس لاتگولين الاحد ..

طلع هو واني گمت لميت الگزاز ونضفت الگاع ..
احس جسمي كله يرجف مااتحمل ..
ياربي شنو هالمصايب الي تجينا وحدة ورى الثانيه ..
لاهو هربان مرتاحين ..
ولا من لزموه مرتاحين ..
الله اليعلم ذاك الحقير شلون استفزة وخلاه هيج عصبي .
بقيت منتضرة الى ان اجة عذاب ..
مخيطيها الايدة ولافيها ..
وناطيه علاج وابر ..
گتله جان اخذت عمو ليش رحت وحدك ..
-مااريد اقلقهم ولو شايفها مااخلص من الحجي ..
انتي تعشيتي ..
لا منتضرتك ..
-دروحي سوي عشا وجهج اصفر يمكن حتى غدا ممتغديه -وانت هم اكيد مماكل شي ..
-وين اكو نفس تشتهي ..
رحت طلعت برتقال وخلطت عصير طبيعي ..
لان وجهة اصفر لااكل ونزف دم هواي ..
سويت عشا ونطيته العصير ..
بس كان مشغول عني وبعالم ثاني ..
اتصل على واحد وگاله اريدكم تدمروه بالتحقيق لاترحموه هو نكر ادبوه لحد مايعترف ..
گال اني رايح الاهلي ..
طلع ورى شويه سمعت صوت عمي يعيط ..
اكيد هذي البومة العندك السبب شسوتلك ..
عذاب يعيط ويگله مالها دخل ..
وزوج خالتي مصر اني السبب عباله متعاركين بينا ..
رجع مناك گال افرشيلي اريد انام ..
فرشتله واخذت شهد نومتها ..
هو اخذ علاجة ونام ..
اجيت يمة باوعتله .. شوكت نرتاح گلي ..
مو تعبت .. يوم ترفعني السابع سما ويوم تهدني للگاع .
اتنهدت وگمت ..
نمت گعدت الصبح ع صوته ..
يلعب بشهد ويريد ياخذها ..
فزيت ..
عذاب شلون صرت ..
-احسن شفت شهد گاعدة وردت اخذها عنج بس گعدتي
-خلي اگوم اسويلك ريوگ حتى تاخذ علاجك ..
هو اخذ شهد وطلعوا بالحديقه ..
اباوعلهم من الشباك شلون يلعبون سوة ..
اااه ياعذاب ..
الي يشوفك هسا يگول هنيالج ع هيج ضحكة مايدرون عذا عصب محد يوگف بوجهة بس رغم كل هذا ..
گلبي يحبه ومايزعل منه مثل حب ام الاولادها مهما غضبوا عليها واذوها ماتگدر تكرهم ..

إغضـب كـما تشاء ..
وإجرح احاسيسـي كمـا تشاء ..
حطـم اوانـي الزهر والمرايـا ..
فكـل ماتفعلـه سواء ..
كـل ماتقولـه سواء ..
فأنت كـالأطفال ياحبيبـي ..
نحبه

ـم .. مهمـا لنا اساؤوا ..
إغضبْ!
فأنت رائع حقاً عندما تثور
إغضب!
فلولا الموج ماتكونت البحور ..
كن عاصفـا .. كن ممطراً ..
فإن قلبـي دائمـا غفور ..
إغضب!
فلن أجيب بالتحدي
فأنت طفل عابث ..
يملؤه الغرور ..
وكيف من صغارهـا ..
تنتقـم الطيور ؟؟؟
_______________________
كملنا ريوگ گال اني طالع للمقر مالتي اسوي اجازة وتجي علمود ايدي ..
محتاجة شي اجيبه ..
تتأخر ...
-صفن بوجهي وگال فرح بعد لاتسأليني تتأخر او لا مفهوم .. مااحب هذي الكلمة ..
-گتله زين اني راح اروح يم خالتي ..
اساعدها .. اليوم مسويه ثواب للعشا مناسبه وصول معتز بالسلامة…
وراح تعزم عمامك ..
-اي قفلي البيت وروحي واني اجيكم لهناك ..

بدلنا اني وشهودة وطلعنا ..
اجت تماضر هناك ..
وتمارة عندها عطله مراجعه مال امتحانات النهائيه ماشفناها ابد ..
بس من اجو بيت عمها..
صعدت الها عبير وبقوا شويه ونزلوا اثنينهم ..
نضراتهن ماعجبتني مااهتميتلهن ..
رحت للمطبخ وبقيت اني وتماضر ومرت باهل نطبخ ..

للعصر تفاجأنا بجية عمتهم سعاد وبناتها وابنها وجنتها ..
رحبنا بيهم ..
من شافتني گالت ولاعرفتج حليانه صايرة لازم عذيب زين وياج وتضحك ..
وبقت تسأل شعجب ماعندكم اطفال لسا وماراجعتي وووو موتتني بالاسئله واني اتهرب وخالتي تطلع اعذار
وگبالي تمارة وعبير يباوعلي ويضحكن ..
واتوقع تمارة مسولفه كلشي العبير ..

گمت عنهن لان اتنرفز من اشوف حركاتهن ..
شهودة تنوحست من شافت الهوسه ممتعودة ..
اخذتها نومتها ..
واجن بنات عمة سعاد يمي بالغرفه ..
حبابات حيل وفقيرات ..
ومتعجبات يگللي بعدج صغيرة وحلوه شعجبج من عذاب اكبر منج ..
واني اضحك ع سوالفهن ..
يگولن من كنا صغار .. ونجيهم يلزمنا بالصوندة يشبعنا كتل ..
واذا طلعنا بالباب بالطابوگ يشامرنا ..
صدگ متت ضحك .
ومااتغير طبعه من كبرة بعده ع عصبيته ومايحب الغلط
وحتى من كانت منار بحياته هم ميخليها تطلع ..
وكانت تتذمر وتگول حابسني ..
بس هسا عرفت خوفة وغيرته تخليه هيج يتصرف ..
عذاب رغم عنفه وغضبه ووجهه العابس الا انه گلبه اذا حب يوفي ومايغدر ..
وهذا الي خلاني احبه واتعلق بي رغم كل الاذيه الي سببها الي ..

صبينا العشا ..
گالت خالتي اصعدي صيحي البنات فوگ ..
ماردت اصعد بس استحيت اگول الاحد يصعد بمكاني ..

من صعدت دگيت الباب وفتحتها ..
هن بسرعه طفرن من مكانهن ..
كانن فاتحات فيديو ويسولفن وي شخص لان صوت رجالي ..
ضجت حيل من شفتهن بهيج منظر وبلا حجاب ولاطخات الوجه ..
ومايخافن احد غيري يصعد ويشوفهن ماشفت هيج جرأة بحياتي ..
گلتلها .. تمارة شلون هيج تسوين ماتخافين ياخذلج صور ويفضحج وج عذاب اذا عرف والله يدمرج ..
-انتي لاتتدخلين افتهمتي .. اتركي النصايح النفسج ..
عبير .. بالاول خلي يدمرج انتي واختج الشريفه يله احنه ع الاقل ممتزوجات مثلها وتخون رجلها ..
فرح .. احترمي نفسج انتي .. واذا ممتزوجة تلعبين بكيفج .. بله انتي متهميني بس تمارة بنت خالتي ويهمني امرها .. اتركيها ولاتخليها تنجرف وياج ..
وربي اذا ماتركتيها احجي كلشي الخالتي واخلي تحجي الامج ..
عبير .. جربي وشوفي شأسوي .. احسن الج لاتندگين بيه . خليج بسمعتج النضيفه نعرف شلون نحافظ ع نفسنا تمارة واضح عليها الخوف بس ماحجت وحاولت تغطي بعياطها ..
يله اطلعي وكم مرة گتلج ماتصعدين الغرفتي ..

نزلت وگلبي عصرني عليهن بنات بعمر الورد راح يضيعن نفسهن المن اشكي او احجي ..

شفت عذاب گبالي والكل يتحمدله ع السلامة ..
وشايل شهد ويبوس بيها ..
ابتسمت واتمنيت اركض واحضنه ..
صايرة اشتاقله هواي اذا غاب ..
ويلومني بنات عمته ..
ليش هذي الهيبه والطول كله وماينحب ..
رغم الي يهمني بي جوهرة مو مضهرة ..

نزلن تمارة وعبير بعدي غاسلات وجهن ولابسات شال ولاكأنه شي صاير .
اني هم مااهتميت ولاباوعتلهن ..
كملنا عشا ..
بقينا ببيت عمو ل 12 بالليل ضحك وسوالف ..
تالي گال گدامهم فروحة نعسان نگوم البيتنا ..

صدگ فرحت من گال هيج گدام الكل ورفع راسي ..
رديت عليه ..
اي عيني گايمة ..
جبت جنطة شهودة وسلمنا وطلعنا ..
بنات عمته گالن تعالي باجر ..
گالهن عذاب . ليش تعالن انتن يمها اذا تردن ..
هن فرحن ..
من طلعنا ..
گتله خطيه ماطالعات ويگولن صار هواي مشايفين بغداد
عذاب .. اذا فارغ باجر نطلعن نفررهن وناخذهن للالعاب شتگولين ..
فرح .. بكيفك ..
باوعلي .. ضحكت اي خلص نروح ..
ضحك. وفتح الباب ودخلنا ..
گال ادخلوا بين ماادخل السيارة لجوة ..

دخلت نومت شهد بفراشها ..
وطلعت دشداشه قصيرة للركبة وربع ردن ..

فتحت شعري ..
ورتبت وجهي خليت بالفرشه بودرة لان اصلا مااعرف اخلي مكياج ..
وخليت كحل وحمرة فاتح مجرد لمعه ..

نزلت فراشات وداافرش ..
دگ الباب ودخل ..
گال ها فرشتي هنا ..
-اي ليش تريد افرشلك بالاستقبال ..
-لا هاهي ..
-اذا تحب نام ع السرير واني انام بالگاع عمود ايدك ..
-هي ايدي قابل رجلي وانام ع السرير ..
لو تردين تفلتين مني ..
-ابتسمت .. عظ شفته وگال ترى انتي الي تتحارشين بيه -شمسويه

..
-هذا كله وشمسويه ويباوعلي من فوگ لجوة ..
يبوووو شگد فشله ..

نزع قميصه كالعادة مايعرف ينام بالقميص ..
وراح لبس لجامة واجة ..
تمدد بالگاع ..
وگال طفي الضوة وخلينا بس ع ضوة التلفزيون ..
طفيته ..
سحبني من ايدي ونمت يمة ..
بقى يگلب بالتلفزيون ..
طلع قناة افلام عربيه وبيها فلم العادل امام ..
بقينا نباوع شويه ..
تالي گلب القناة ع طيور الجنه ووطى التلفزيون ..
گال خاف تگعد شهودة تشوفه وتسكت ..
دار وجهه عليه ..
انفاسه لفحت اذني ..
گال .. مو حارة عليج تنامين بالدشداشه ..
-هاااا لا مو حارة زينه ..
-لا اني اگول حارة انزعيها احسن ..
-عذااااب شنو هاي ..
--ههههههه باسني بخدي .. اموت ع اليخجل ..
-صدگ انت شتحس من تصير يمي يعني كلامك هذا حقيقي لو لا ..
-شنو قصدج ..
-فهمت قصدي ..
-مو گتلج مشاعري جاي تتجه الج بس انطيني صبر ..
-لهذا حجيت اني .. لان من تصير يمي وبحضني اريد كل مشاعرك الي مو بعالم ثاني ويم شخص ثاني ..
-معقوله تغارين من شخص مات وانتهى من حياتي ..

گمت ع وگعدت گباله ..
مااريد اضوجك بس احسها بعدهي بحياتنا ..
شوكت تنساها وماتذكرها ..
-فرح لا تضوجيني بهالليل .. يعني ردت ارتاح وياج تالي تغثيني بهذا كلامج ..
-لعد واني ماانغث من تنام يمي وبحضني وتذكر اسمها
-هي منو .. شبيج انتي ..
-منار منو .. صحيح اختي هي بس هي ماتت وتركتنا كلنا بعذاب خطأها ليش ماتنساها ليش لساتك تحبها ..
-يابة بالقرآن مااحبها وناسيها واكرها بعد .. شنو ماعندي رجوله ابقى احب وحدة خانتني وي واحد مهتلف يلعب عليها وعلى صديقتها ..
-لعد ليش ذكرت اسمها من نمت ..
-جائز صارت سهوا .. صدگي الشغله الوحيدة الي مااگدر انساها بيها هي خيانتها لاغير ..
اطمأني وبعدين هي ميته ..
انتي خبله وتغارين من وحدة ميته ..
سحبني من ايدي دتعالي يمي طولج شبر ومااگدرلج ..
-لااااااا شنو طولي شبر والله طويله بس انتو عمالقه ههههه..
خلاني بحضنه وگال . بداعتي لاتفتحين هيج مواضيع ..
واني اگول عليج فاهمتني من النضرة والي بحياتي ماشفت مرة مثلج حملتني ..
حتى امي ماحملتني بگدج ..

-الغيرة مابيها عقل وفهم ..
-افهم من كلامج تحبيني وتغارين عليه ..
-اي احبك واغار عليك واغار من المخزن الفوگ الي مااعرف شبي ..
خلة ايدة ع حلگي وگال ..
مو صرتي رومانسيه الا تخربيها .. صدگ ماتنعطين وجه ههههه ..
خلي ننام احسن ..
نام هو بس اني بقيت گاعدة ..
اذا هو فعلا ناسيها ليش مخلي غراضها لسا بالمخزن الفوگ ..
وليش ماتخلص من كلشي يخصها ..
اااااه ياربي معقوله الغيرة هيج تموت .. هاي ميته واغار منها لعد الله يساعدة شلون تحمل وجع ونار الغيرة ..

نمت وثاني يوم گعدت من الصبح ..
عذاب گال اني طالع ..
وصارت هذي عادته من يوم الي لزموه يطلع ومايجي للعصر يمكن يروح يراقب التحقيق لان عندة معارف هواي هناك ..

طبخت الغدا وكملت ..
دخلت سبحت ولبست تراك ورفعت شعري ..
اندگت الباب ..
طلعت ..
گلت منو ..
سمعت صوت خالتي ..
فتحت الباب ..
خالتي .. يمة ذني صديقاتج اجن يشوفنج وجبتهن الج لهنا دخلن وراها زهراء وسهير ..
من الفرحة مااتحملت عطت وحضنتهن وهن يبجن واني ابجي ..
حتى خالتي بجيناها ويانا ..
فرح .. ولجن توقعت نسيتني وماتذكرني بعد ..
زهراء .. شلون ننساج والله على بالنا ودايما نخابر امج ونعرف اخبارج ..
بس مااتحملنا بعد ..
وسهير گالت راح تخلص السنه واحنه مشايفيها ..
-وربي احلى يوم عندي اليوم تعالن ادخلن ..
خالتي .. اني رايحة يمة. وخاف تحتاجين شي خابريني
فرح .. اي خاله ان شاء الله

راحت خالتي دخلتهن للبيت ..
صلن ع النبي اول مااجن ..
سهير .. وج فروحة بيتج حلو ونازك ..
زهراء .. اذا فروحة صاحبته شلون ميصير حلو ..
فرح .. حبايبي دتعالن اگعدن اليوم متطلعن تتغدن يمي
زهراء .. لا مو مال غدا طلعنا من وكت لحتى نشوفج وراح تجي الامتحانات ومانگدر ..
سهير .. شلونه وضعج ولو الكتاب باين من عنونه ههههه
زهراء .. اي ولج صايرة تخبلين ولا عرفتج ..
ضحكت عليهن وهن يستجوبن بيه ..
گلتلهن گومن اوريجن شهودة ..
اخذتهن للغرفه شافنها وبوسنها وگرصن خدودها الى ان گعدنها ..
شافتهن استغربت وشمرت نفسها عليه ..ماما ..
-ولجن بعدجن ع خبالجن.. عبالي كبرتن خوفتن بنتي ..
حضنتني سهير .. فدوة للصارت ام وتگول بنتي ..
زهراء.. تركنا العقل الج انتي ام الرزانه .. تتذكرين من ننصب ع الكبلات شلون ترزلينا وتگولين عيب ..

گلتلهن دتعالن خلي نحظر الغدا مسويه برياني ..
سهير .. اممممم لعد مااگول لا لان مليت من اكل الاقسام وجوعانه ..
زهراء .. وج عيب لايجي زوجها شيگول علينا ..
فرح .. لا ميجي هسا عندة شغل ..
سهير .. هو شلونه وياج .. يعني شلون گدرتي تتأقلمين وياه وهو زوج اختج ..

اتنهدت .. هي هاي الحياة وهسا صارلنا سبع اشهر سويه يعني تعودنا ع بعضنا .. بس ولجن الحب يموت والغيرة تكتل ..
زهراء .. اي والله ..
فرح .. هاي شنو ست زهراء اكو تطورات وماادري ..
سهير .. لعد انتي قديمة عيني البنيه وگعت من زمان ..
فرح .. منو نع

رفه ؟؟
زهراء .. كافي ولجن خجلتني ..
سهير .. معيد ويانا الي كان يگعد بمدخل القسم ويرتب الاوراق او الجداول ع باب القسم ..
فرح .. بس لا مصطفى الجامد ..
سهير .. هههههه اي عيني هو گدرت توگعة زهورة افندي ..
زهراء .. لاتحجن عليه مااقبل ..
فرح .. اي وشلون صارحج ..
زهراء .. اصلا ماحجة وياي .. گبل راح حجة وي بابا ..
فرح .. حلو هيج احسن مما يماطل ..وعقدتوا لو لا ..
زهراء .. لا ع العطله .. ويمكن بس خطوبه لان اني ادرس وهو قدم ماجستير ..
فرح .. اي شعندكم تونسوا .. وعرفوا بعضكم ..
زهراء .. مو ماتجين الخطوبتي ..
فرح .. مااعودج ولو اتمنى بس انتن ماتعرفن عذاب ..
سهير .. وج بس لاتطردين عيون . شو يخبل هو وانتي حليانه وياه ..
فرح .. اي حقجن ماشفتن شگد تعذبت ..
زهراء .. اي اتذكر كنتي تسولفيلنا شلون حب اختج وسوه المستحيل حتى يتزوجها طبعا صعبه عليه ينساها بسهوله .

اااااه حقهن مايدرن الي صارلي ويمكن عبالهن انانية لان اطالب بحبه واريدة بس الي ..
سديت الموضوع وگلتلهن ..
يله خلنا نصب غدا ..
صبينا وسوينا سلطة وروبه ولبن ..
تغدينا وضحكنا وفعلا كنت محتاجتهن ومشتاقتلتهن ..

من رادن يطلعن بالباب تذكرنا سوالفنا وبقينا بالحديقه نسولف .. ويگللي نريد رقمج بس گلتلهن ماعندي موبايل خفت انطيهن ويعصب عذاب ..

سمعت صوت سيارة عذاب جمدت بمكاني ..
اخاف يعصب عليه گدامهن ..
فتح الباب وتفاجأ بوجدنا بالحديقه ..
سلمن عليه .. هو رد السلام عادي ..
گتله .. صديقاتي زهراء وسهير مرة اجن الي تتذكرهن
عذاب .. هااا اي اهلا وسهلا ..
ودخل للبيت .. حسيت براحة شويه ..

هن سلمن وطلعن بسرعة ..
دخلت لگيته بالمطبخ گاعد ..
گال .. شعندهن اجن .
-يشوفني واجن البيت خالتي وخالتي جابتهن لهنا ..
-تدرين بيه حساس من ناحية الصديقات مااقبل تختلطين زايد ..
-بس ذولي مو رحاب .. عمرهم ماحرضوني ع الخطأ .. واعتقد اني عندي عقل واعرف اميز بين الصديقه الزينه والمو زينه مو زعطوطه اني ..
-اختج اكبر منج ومشت ورى صديقتها ..
-اختي ماتمثلني .. اختي تدللت زايد . اما اني اعتمدت ع نفسي بكلشي .. كافي تدخلها بينا بكل كلمة والثانيه ..
رحاب شفتها شنو هي واهلها ..
اما صديقاتي معروفات ..
زهراء .. ابوها رئيس قسم ومثقف .. وحاليا مخطوبه المعيد وطالب ماجستير ..
وسهير .. بنت شيوخ من الجنوب واهلها معروفين ..
يعني مو كل اصابعك سوة ..

اخذ نفس وگال .. صبيلي غدا يله اريد ارتاح ..
صبيتله غدا ودخلت ..
هالمرة ماردت انزل نفسي واگله اي الكلشي ..
صديقاتي لو اعرفهن مو زينات كان اني ابتعدت عنهن من ذاتي ..
كافي دايما يقارني بمنار ..

كمل غدا .. گال اريد اضمد جرحي وين التعقيم الي جبته ..
گمت طلعته اله ..
فرح .. اساعدك ..
عذاب .. لا اخاف توگعين وماتتحملين ..
فرح .. لا عادي ذيج المرة وگعت لا مماكله وصار عندي هبوط ..
عذاب .. امممم يله يسباعيه خلي نشوفج ..
رحت جبت الشاش والتعقيم ..
فتحتها ..من شفتها ماانكر انهزيت بس ماردت ابين اله خوفي ..
عقمتها ورجعت لفيتها ع كيفي وهو يبتسم ..
-طلعتي قويه صدگ ..
ضحكت ..
طلعت علاجة ونطتهيا ..

گال نروح نرتاح شويه ..
-اني عندي ملابس وشغل نام انت ..
راح نام بالغرفه واني طلعت الملابس والشراشف اغسلهن ..
طلعتهن من الغساله ورحت انشرهن بالحديقه ..
سمعت الباب تندگ ..
ترددت افتحها ..
گلت منو ..
سمعته صوت نسائي ..
ردت اگعد عذاب ..
بس گلت خلي اشوف منو وشتريد ..
فتحت الباب ..
وهنا كانت الصدمة ..
اخر انسان كنت اتوقع اشوفه ..
گلتلها شعندج هنا وشمعرفج بالعنوان ..
-فرح عفيه خليني احجي وياج ..
-ماكو حجي بينا روحي لايگعد عذاب وربي يدفنج هنا
-مايهمني هو شنو الي ماسواه بينا بعد ..
-والي سوتيوه انتو قليل .. تستاهلون كل الي يجرالكم
-لاتضلميني .
-كلشي واضح ماكو داعي اظلمج انتي معروفه شنو وهاي حوبتنا وحوبة كل واحد اذيتوه انتي وذاك الكلب بابا ومنار وعذاب وحتى اني ..
-مو ذنبي اني حبيت شخص واختج الي دخلت بينا واخذته
-شتمخرطين انتي ولي منا يله ..
-اي اني حبيته قبلها بس هي اخذته مني وغوته .. وهو انغر بيها وبلبسها وجمالها ..
-ومنو الي دخله الحياتها مرة ثانيه ..
-مو اني هو طلب يعتذر منها ونطيته الرقم ماادري راح ترجع علاقتهم .. واني اكثر وحدة تدمرت لان لثاني مرة تاخذة مني ..
-وليش تنطيه اصلا بعد ماخذلها وتركها ..
-من البدايه گالها ماعندي امكانيه ومااتزوج هسا .. بس هي الحت عليه وهو عباله عبالها دتضحك عليه حتى يخطبها لهذا تركها فترة ..
-مااصدگج تحاولين تبرأين نفسج .. بسببج ماتت اختي اجت والتجأت الج وطردتيها ..
-بابا الي طردها واني نطيتها فلوس حتى تنهزم لان گالت راح يقتلوني ..
-وانتي شسويتي رحتي وانخطبتي للي كان السبب بعذاب صديقتج ..
-لان حبيته ومااتحملت الي سواه عذاب بي .. حتى اضافرة شلعهن وخلاه يتمنى الموت ..
واني حرمني من وضيفتي وخطفني يومين وخلاني بخوف ورعب الى ان نطيته عنوان حسين ..
يعني زوجج مو معصوم .. واكيد هسا ظالمج مثل ماظلمنا ..
-

انتو السبب جرحتوه وخليتوا ينتقم هالشكـل تستاهلون الي صار بيكم ..
-ومنار شنو ذنبها تستاهل يقتلها ودمر شبابها ..
-انتي كذابه مو هو الي قتلها ..
-سألتيه اكيد نكر ..
-ولي منا اطلعي ..
طلع عذاب ع صوتي شافها تخبل ..
هاي شتسوي هنا وليش دخلتيها انتي ..
رحاب .. عذاب كافي الي سوتيه . اترجاك طلعة من السجن وربي مانخليك تشوف خيالنا اصلا احنه ناوين نطلع تهريب لو ماتلزمة ..

تقدم الها عذاب والغضب ظاهر بعيونه ..
سحبني ودفعني لورة ..
گتله عذاب الي سمعته صدگ .. منار انت الي قتلتها ..
-گتلج ادخلي وحسابج بعدين ..
رحاب .. شفتي مو گتلج كلشي توقعي منه هذا گلبه ميت واكيد قتلها بگلب بارد ..
عذاب .. انلصمي واطلعي من بيتي لااكسرها الرجلج اذا عتبتي بعد ..
رحاب .. فرح حبابه گليله يطلعه الي راح راح والله ماندخل حياتكم بعد واصلا مانبقى بالعراق بس طلعوه ..
عذاب .. هههههه نجوم السما اقربلكم اني اخليكم تطلعون وترتاحون والله الا اندمكم..

دفعها وطلعها .. وهي تدعي عليه وتگله مجرم راح تقتله مثل ماقتلت منار الله ليوفقك والله الا افضحك ..
سد الباب بوجهة واجة اتقدم الي ..
-ليش دخلتيها وشعندج تسولفين وياها ..
فرح .. بالاول جاوبني انت ..
منو الي قتل منار .. شسويت المنار گلي الي گالته رحاب صدگ لو جذب ؟؟

يتبع .…

،
//// البارت السابع عشر ////
من_سيدفع_الثمن ؟؟
بقلم_الكاتبة_شمس

دفعها وطلعها .. وهي تدعي عليه وتگله مجرم راح تقتله مثل ماقتلت منار الله ليوفقك والله الا افضحك ..
سد الباب بوجهة واجة اتقدم الي ..
-ليش دخلتيها وشعندج تسولفين وياها ..
فرح .. بالاول جاوبني انت ..
منو الي قتل منار .. شسويت المنار گلي الي گالته رحاب صدگ لو جذب ؟؟

انتي خبله .. تصدگين بوحدة مثل هاي ..
لعد ليش مانكرت ماحجيت گدامها ؟
واني انزل رجولتي واحجي وي هاي الساقطة .. انتي تعرفين شمسويه وياه وتريدة يطلع ..
خلينـي ساكت لاتحجيني ..

گتلك ريحني وگلي منار شلون ماتت لاتخلي الشك بگلبي ..
فرك وجهه واتقرب حيل مني .. رفع اصبعة باعي فرح سبق وان گتلج مالي علاقه بموتتها وماصدگتيني وهسا صدگتي رحاب وشكيتي بيه ..

مو اني الي اقدم تبربر وادافع عن شي ممسويه ..
اختج هي الي راحت للموت برجليها ..
وج اني الي نقذتها من اخوتج وسحبتها منهم ..
خليتها بسيارتي وناوي اجيبها لهنا ..
احبسها واخليها خدامة ومربيه البنتها لاغير ..
ماانكر ردت اعاقبها بطريقتي ..
واتندمت لان وديتها الاهلج من البدايه ..
كان المفروض اخذ حقي بيدي ..

بس هي شسوت .. عاط وزاد غضبه ..
تدرين شسوت .. شمرت روحها من السيارة .. وادت تخلص مني ..
شمرت روحها وانضرب راسها بالصبات ..
نزلت اركض ملهوف عليها واخاف صار بيها شي ..
لگيتها تنزف من خشمها واذنها ..
صاير عندها نزيف داخلي ..
وجسمها بسرعة صار ازرگ من النزيف الداخلي وورمت وهي اصلا ماعدها مناعة لان عمليه وصاير عندها التهاب
ماتت ..
عرفتي هسا شلون ماتت .. ماهان عليه اگول اختارت الموت عليه ..
ماگدرت اگول تركتني مرتين .. مرة خانتني ومرة اختارة الموت عليه ..
عرفتي ليش متأذي منها ومقهور ..

هو يحجي واني مااتحملت الموقف واتخيلها شلون كانت بلا حول ولاقوة .
عبالها عذاب كان ناوي يأذيها ورادت تنجي بنفسها بس انضربت بالصبة .
رادت تخلص من الموت بس الموت لاحگها ..
بجيت بلا وعي واحس روحي اختنگت ..

هو طلع جكارة ورثها وعيونه حمر من الغضب ..
عذاب .. بعد ماعرفتي كلشي .. مامسموح بعد تجيبين اسم منار او اي شغله تخصها بالبيت ..
اذا تردين تختبرين غضبي حاولي تفتحين هيج مواضيع ..
گتلج اريد ابدي حياة جديدة ..
وانتي تضغطين عليه ..

گومي ارتاحي بالغرفه ..
وها .. بعد الباب ماينفتح لأي شخص ماعدا امي .. لاتخليني ارجع اقفل ..

ردت اگوم ماحسيت بشي ووگعت ..
احس شي خانگني وكاتم ع صدري ..
شكلها من شفتها بالمغتسل مافرگ خيالي ..
گعدت اشهگ ..

شفت يمي خالتي ..
گالت .. يايمة شجاج .. من گالي عذاب متخربطة اجيت اركض شحلاتج ومابيج شي ..
شجاج وتخربطتي ..
تحسين بشي .. اكو شي مضوجج ..
عرفت عذاب ماگايل شي ..

گلتلها لاخاله مابيه بس تذكرت بابا وضجت ..
خالتي .. اي يمة حقج .. صار هواي مزايرته ..
اني احجي وي عذاب ياخذج ..

صارت عيني تدورة بالغرفه مموجود ..
اني شجابني لهنا ..
اكيد هو ..
بس وين راح ..
اكيد ضاج لان رجعت فتحت جروحة .. بس كان من حقي اعرف الحقيقه وارتاح ..

ردت اگوم ..
گالت خالتي ابقي لاتدوخين ..
-روحي انتي خاله مابيه شي .. عيب من عمة سعاد هسا شيگولون تاركتهم وگاعدة يمي ..
خالتي .. اي والله يمة .. وتدرين بسعاد شلون شكاكة وخاف تحس بشي ..

شويه واندگت الباب ..
گالت عذاب ماهو طالع خلي اروح افتح الباب ..
راحت واجت گالت گومي بسرعه اطلعي ..
لاتدخل سعاد لهنا وتشوفج ..

طلعت لگيتها بالصاله ..
هاعمة خيرج .. من گالت تمارة متخربطة اجيت اركض .
اااه ياتمارة اكيد عندج غايه من گلتيلها ..

-لاعمة مابيه بس صار هبوط ..
-وج عمة خاف حامل وضامة علينا ..
بقيت صافنه بوجه خالتي ..
-لا مو حامل .
-يمة صارلكم شگد معقوله ماگدرتي تحبلين بطفل وتجذبيه الج ..

خالتي .. بعدهي صغيرة وشهد متعبتها خلي تكبر شهودة وعود يسون طفل ..
يله خلينا نروح حتى هي ترتاح ..
-اي رايحين .. عود البنات رادن يجن يمج .. بس يله غير يوم ويجن ..

ماصدگت طلعن .. لان راسي يريد ينفجر من الالم ..
وعذاب مااعرف وين راح وشيسوي ..

خالتي اخذت شهد وياها ..
واني قفلت الباب ورحت بالغرفه ونمت بفراشي ..
احس راسي مصدع ومالي خلگ ..

للمغرب سمعت صوت الباب اتفتحت ..
گمت شفت عذاب دخل ..
گتله اسويلك عشا ؟؟
-لا بدلي وخلينا نروح .. وعدت عمتي والبنات نطلعهم ..
وخابرت زوج تماضر يطلعون ويانا حتى نصير سيارتين ..
-لو مأجلها مالي خلگ اليوم ..
-اني هم مالي خلگ .. بس وعدتهم من الصبح ومااگدر اعتذر تدرين بعمتي تشك وتطلع سوالف من جوة الگاع ..
رحت للغرفه بدلت وكملت .. لگيتة منتضر بالصاله ..
گال شهد خليها يم امي خاف تعبج ..
-لا هاي اخذتلها ملابس وناخذ العربانه مالتها ماتعبني ..
-اي زين .. بس وجهج هذا غيري ولاتعبسين .
-ان شاء الله..

طلعت قبله رحت البيت خالتي ..
شافتني شهودة شمرت نفسها عليه ..
اخذتها وا

شم بيها عبالك يوم كامل مشايفتها ..
سعاد .. يمة خنگتي الطفله شبيج هي عصريه فارگتج .. لاتعوديها على هيج بعد ماتفارگج . هي كل شويه وتزحف وتدور عليج وتگول ماما ..

خالتي .. اي هن متگابلات وجه بوجه مايتفارگن ..
بدللتلها .. وكملت ..
طلعن بنات عمتهم لابسات عبايات ..
گالتلهن خالتي يمة لو لتبسات جبب مو جايبات احسن الجن تتبهذلن بالعبايا ..
سعاد .. مو گلتلهن بس اخوهن ماقبل يگول عيب ..
خالتي .. لا اني اخلي خاله يحاجيه .. خطيه يبهذلهن ..

راحت خالتي حجت وي زوج خالتي ..
وگدروا يقنعوه يلبسن جبه بدل العبايه ..
كملنا واجو تماضر وزوجها ..
بس تمارة ماقبلت تروح تگول المعدان كلها رايحة مااروح بقلمي_الكاتبة_شمس
___________________
قصدها ع بنات عمتهم ..
تحس نفسها اثقف منهم .. عبالها الثقافه لانه گاعدة ببغداد وهمة بالناصريه ..
ماتدري عقلهن وتفكيرهن اثقف منها ..

طلعنا كلنا .. عمتهم ماقبلت تروح تگول انتوا شباب رايحين اني ابقى يم ام عذاب روحوا تونسوا ..
بناتها صعدن ويانا .
وابنها وزوجته صعدوا وي تماضر وزوجها ..

اخذنا عذاب للزوراء .. تعشينا ولعبوا وتونسوا وبعدين اخذنا للمول ..
هم افترينا وتونسنا ..
وكل شويه يجي يمي .. اذا محتاجة شي اخذي ..
گتله لا مامحتاجة .. واصلا اني لابسه اسود يعني قابل شنو اشتري ..
راح همس التماضر ..
اتقربت يمي .. وساعة تگلي هذا حلو . وهذا حلو ..
عرفت عذاب گلها ..

ماردت اكسر بي .. تالي عجبني حذاء حيل نازك وحلو .. گلت التماضر گالت حيل حلو اخذي ..
اجة عذاب اتقرب منا ..
گال اي حلو والاهم حتى يطولج شويه من تمشين وياي .والابتسامة مبينه ع وجهة
-شنو قصدك لان اني قصيرة…
-انتي گلتي مو اني .. تركني وراح دفع حسابه..
ابتسمت .واخذته وطلعنا .
بعدين وصى تماضر تشوف هدايا للبنات ياخذولهن ..
كل وحدة اشترولها قطعه ..
خطيه ماقبلن بس عذاب اصر وگالهن انتن مثل اخواتي ..
كملنا ورجعنا للبيت ..
سولفن الامهن وفرحانات وممصدگات تحسهن فقيرات وطيبات حيل ..

خالتي اخذت عذاب ع جهة ومااعرف شگالتله ..
راح بسرعة ودخل غرفه زوج خالتي ..
مااعرف شبيهم ..
واصلا زوج خالتي هالفترة دايما صافن وضايج ..

شهودة نعست نومتها بحضني .. اجة عذاب ..
گتله شهد نامت ..
گاله يله نروح ..

رجعنا للبيت بدلتلها ونومتها بفراشها ..
عذاب ..
فرح افرشيلي بالاستقبال ..
استغربت .
معقوله زعلان شبي ..
مارديت ورحت فرشت اله ..
گال حضري روحج باجر نروح للنجف ..
ماصدگت من گال هيج ..
واخيرا راح اجيك بابا ..
راح احضن گبرك وابوسك ..

طلعنا من الصبح ع البرد ..
اني وياه وشهد ..
دز رساله الخالتي وخبرها ..
طول الطريق ساكتين ومانحجي ..
مخليه شهودة بحضني ..
من وصلنا شهگت .. فزت ع صوتي ..
اني مااتذكر وين قبرة ..
لان من دفنوا منار اجينا وبعد مااجيت ..

عذاب يندل ..
وكانه حافظ الطريق ضجت حيل ..
گتله .. زين مانسيت الطريق ..
-لاتخافين مااجيت من يوم دفنتها حاسبتها وخلصت وماتستحق اجي وازورها مرة ثانيه ..
واذا ع الطريق فطبعي مرة وحدة واحفظ الطرق لايروح بالج لبعيد ..

نزلنا مسافة عن قبر بابا ..
گال انطيني شهد وروحي انتي ..
اخذها مني ونزلت اركض ..
اااااه يابه .. اجيتك اني فرح ..
عرفتني .. ليش رحت وتركتنا للدنيا هاي ..
ليش مااخذتنا وياك ..
اشتاقيتلك حبيبي .. هنيال اليجي ويزورك ويشبع منك . رفعت راسي صارت عيني ع قبرها .
اتنهدت وگلتلها ..
ها يمنار حتى بهاي محظوظة .. ماكنتي تفارگيه لا وانتي عايشة ولامن توفيتي ..
گمت قرأت الفاتحة البابا ..
اجة عذاب بيدة دبة مي ورد . گال هاج رشيها ع القبر ..
ولاتبجين بعد تعذبيه هيج ..
مسحت دموعي ورشيت قبره وودعته ..

عذاب .. يله نمشي ..
فرح .. اوگف لحظه .. اخذتني خطواتي الگبرها ..
قرأتلها الفاتحة ..
اخذت نفس وگلتلها .. مااجيت اللومج لو اعتب عليج ..
بس اريدج تنامين وترتاحين ..
شهودة كبرت .. وربيتها بماي عيوني .. وعذاب تحمل بما فيه الكفاية .. واني دخلت عالم مو عالمي .
بس اتأقلمت وتعايشت وصبرت ..
وبعد ماتعودت .. لاتحرميني من الي حبيتهم .. ابتعدي عني وعن حياتنا ..
خلينا نعيش بأمان ..
راح تبقين اختي ومايوم اقصر وياج لا بدعاء ولابزيارة ..
بس لاتحطمين حياتي بكوابيس وتجين الاحلامي ..
خليني ارتاح ولو يوم بحياتي ..

اجة عذاب گال يله ياعيني مايفيد الحجي .. اجيت قبلج وحجيت الي بداخلي كله ومافاد ..
وجودنا هنا عذاب النا اثنينه ..

اخذني من ايدي وراح .. وعبالك ديگلها .. انتي تركتيني بس الله عوضني بغيرج ..
وكأنه يگلها نسيتج وحبيت غيرج ..

طلعنا من المقابر واحس گلبي مختنگ ومتشنج ..
اريد اخذ نفس ماكو ..
نزل جابلي مي وشربت وغسلت وجهي يله ارتاحيتي ..
گال اكيد جوعانه خلينا نتريگ بمطعم ..

رحنا المطعم تريگنا وبعدها للامام زرنا ورجعنا البغداد ..
الطريق كله ساكته ومااحجي ..
توقعت من اروح ازور بابا ارتاح ..
بس من شفته ..
جوة التراب ومااگدر احضنه لو اشكيله .. تأذيت حيل ..
وتأذيت لان عاتبت منار وطلع

ت قهري ..
المفروض مالازم احرگ روحها وهي جوة التراب ..
حتى ماخليتها تشوف بنتها. .
ع الاقل لو گايلتها هذي شهد كبرت وخليتها تحس بوجودها يمها ..
بقى الندم والالم ياكلون بگلبي طول الطريق ..

من رجعنا گبل نمنا للمغرب يله گعدنا ..
اجت عمة سعاد وبناتها يمنا ..
گالن باجر رايحين ..
فعذاب گالهم عشاكم هنا ابقوا ..
راح جاب عشا واجة ..
وعاتبتني عمتهم .. ليش عمة ماگلتوا رايحين للنجف جان رحنا وياكم صار هواي مازايرة ..
استحيت ..
گلتلها والله عمة اني هم ماادري فجأة عذاب گال باجر نروح ..
حسيتها ماصدگت ..
اجت خالتي يمي ارتاحيت ع الاقل تگعد تسولف وياها ..
تعشوا وكملوا وراحوا ..
خالتي گالت عزليلي عشا التمارة لان بدت امتحاناتها وماگدرت تجي ..
خطيه تطلعلها اعذار وعبالها مااعرف تمارة ماتطيقني ولاتحبني ..

مرت الايام واني وعذاب نفس الوضع .. او رجعنا للبدايه ..
كلامنا عادي وناكل ونشرب سويه ..
وهو مجاز مايطلع ايدة تحسنت وفتح الازرار واحنه عبالك مثل الاغراب ببيت واحد ..

وكأنه يعاقبني لان شكيت بي وطلبت اعرف الحقيقه ..
يعني اي واحد بمكاني كان فكر هيج ..
وخاصه غضب عذاب يعميه ومايخلي يشوف گدام عينه ..

اجة گال اجازتي خلصت وباجر راح اداوم ..
ملابسي جاهزة ..
گتله .. ليش هيج تعاملني .. ترى تعبت ..
عذاب .. انتي الي ردتي هيج .. واعتقد ماامأذيج بشي . احجي واسولف وياج .. يعني الا فراش واحد يجمعنا يله ترتاحين ..
واصلا انتي ماتردين قربي ليش بعد تضوجين ..

-وانت ليش هيج تفكيرك دايما هيج .. اني الي سويته من حقي .. انتي لو واحد گايل عليه شغله ماشكيت ..
واني اصلا ردت اعرف الحقيقه وهذا الشي من حقي ..

-لا مو من حقج .. لان اكو تقرير طبيب الشرعي والشرطة وكلها تدل الي صار حادث ..
ها وخاف عبالج اني الي دفعتها ..
ترى هي گعدتها بالورى لان كانت تعبانه حيل وگلتلها نامي ورى وارتاحي ..
يعني مو يمي ..

-ابد مافكرت هيج .. بس انتوا السبب كنتوا غامضين وماسولفتوا شي ..
-لان ماردت اتذكر .. وگتلج لاتفتحين هيج مواضيع ورجعتي فتحتي .. ليش تنكدين عليه ..
يعني گلت واخيرا راح ارتاح ..
تالي كل يوم تطلعيلي بسالفه شكل ..
مو زين ماعاقبتج ع فتحج الباب من وراي وتدخلين ناس بكيفج ..
-شنو عقاب .. زعطوطه اني .. ومادخلت احد اني ..
اولا صديقاتي جابتهم خالتي .. ومااعرف بجيتهم شتريدني اطردهم ..
وثانيه رحاب مااعرف شلون اجت ووصلت لهنا سمعت صوت نسائي عبالي وحدة من بنات عمتك ..
-كافي تجيبن اسم صخمة ..
واغلقي الموضوع مالي خلگ ..

-من يصير الحق وياي تسكتني .. هذا هو عذاب براحتك ..
دخلت حضرتله غراضه ..
وصبيت العشا تعشينا ودا اكل شهودة..
سحبها مني وباسها ..
اوفيييش هالريحة .. مااشتاقيتي البابا ..
اليوم نامي بحضني ..
لان ابوج مسكين ووحيد محد ينام يمة ..
عرفته گام يحوس .. ولاعبالك هو الي بعد روحة عني .. وكان نيته اتنازل واجي يمة ..

سحبتها منه .. نطينياها خلي اكمل عشاها .. ابوها هو الي قرر ينام وحدة محد گاله روح ..

ضحك ضحكة طويله .. لدرجة اني انصدمت وبقيت صافنه بوجهة ..
خوش تردين البسامير موو وغمز ..
ضحكت بخفية ونزلت راسي ماردت يحس بالانتصار ..

كملنا عشا ولگيته نايم بسريري ومخلي بحظنه شهد ..
نزلت فراش وخليته بالگاع ونمت ..
گال هيج صارت مو براحتج ..
دار وجهة ونام ..
اخذت شهد نومتها يمي لان صايرة تتضايق بسريرها صغير ..
وعود ردت اگلة يجيبلها سرير وماگتله لان متزاعلين ..

شفته شلون نايم . كسر گلبي ..
وصار كم يوم احنه مبتعدين عن بعض . الله لينطيج يرحاب هجمتي البيت بجيتج ..

باجر يلتحق واخاف يصير عليه شي وهو زعلان ..
تجرأت وگمت ..
فتحت شعري ..
واتقربت يمة ..
حس بيه فتح عينه ..
ابتسم ..
سحبني من ايدي ..
ردت احجي .. قاطع كلامي ببوسه .. اخذ شفافي بشفافه ..
حاولت اقاوم .. بس الرغبة والشغف منعوني ..
كنت مشتاقه الحضنه .. وبلمساته اخذني الغير عالم ..
ماتوقعت راح اتجاوب وياه وانتهي هيج ..

كانت عيونه تباوعلي مثل الشخص الثمل ..
انفاسه وحركاته ذوبوني غمضت عيوني واستسلمت اله ..
شالني بحركة سريعة واخذني للفراش جوة ..
انتبهت الشهد ..
همستله شهد ..
گال .. اششش
اخذها السريرها واجاني ..
كل هذا واني بعالم ثاني ..
وگدر ياخذني العالمة .. ولدرجة ماحسيت بي من جردني من ملابسي ..
لفلفني بحضنه ورحت وياها وماعريد اصحى ..
كنت خايفه من انه يأذيني بس هالمرة كان غير ..
ماحسيت الا. ووووو💑..
وبعدها اخذني الحضنه ..
وگال .. فرح احبج وباس راسي ..

هنا حسيت ملكت الدينا .. يعني كان واعي هو وياي ..
كان واعي بلي يسويه ..
شگد كنت مترددة من هذا الشي ..
وماردت يتقربلي لا وهو مقتنع بحبه الي ..
بس كان حبي وشغفي اله يفكرون قبل عقلي ..
سبقوني وراحوا وياه العالمة ..
وعشت ليله حلوة وماانكر زاد حبي واشتياقي اله اكثر وغمرت راسي بحضنه ونمت ..
هسا حسيت بالامان ..
هسا صار عذاب زوجي ..
اي هذا عذابي الي .. راضيه بحبه وعذابه بس المهم يبقى الي ..

صحيت ع همس

اته .. وكان يمرر اصبعه ع كتفي العاري
صحيت ع نفسي ..
اخذت البطانيه وغطيت بيها وجهي ..
ضحك ..
-بعد شنو تتغطين .. اشو البارحة تلبطين مثل السمجة وهسا تستحين ..
حبيبتي البارحة صرتي مرتي ..
يعني منا وجاي اتدلل بكيفي ..
سحب البطانيه ونطاني بوسه بشفافي ..
كان مبدل ومكمل ..
گتله .. اطلع بين ماالبس شي واجي اودعك واقفل الباب ..
-شنو اطلع .. مااريد خجل بعد ..
-ضحكت .. عذااااب ..
-هههه أبقي انتي لاتگومين .. راح اخذ نسخة من المفتاح واقفل وراي ونسخة اخليها الج بالمجر مال كاونتر ..

هزيت براسي .. گال ها واحسبي حسابج .. راح ادور غرفه نفرين النا ..
او من اجي نطلع ونختار شتگولين ..
هزيت براسي اله .. بس اريدة يطلع متت خجل .ولاعبالك عشت وياه ليله البارحة برغبتي ..
عذاب .. وحتى نعقد محكمة وتصيرين مرتي رسمي وغمزلي ..
ابتسمتله ..
-اويلي ع الخجل النازل اليوم .. خلي اروح قبل مااغير رأي واحي اعلمج الخجل شلون ..
-لا حباب خلص روح ..
بوسته وراح ..
رجعت لفراشي امممممم فعلا الحب بالحلال شي ثاني ..
ودي اعيط بكل صوتي واگول عذاب زوجي وحبيبي ..
رجعت نمت وماحسيت الا شهودة تصيح ماما ماما ..
فزيت ساعة عشرة ..
يووووه هاي شگد نمت ..
گمت لبست بسرعه ماردتها تشوفني لهيج منضر ..
وطلعتها بحجلتها ..
ودخلت بسرعه سبحت وطلعت ..
سوينا ريوگ اني وبنتي الحلوة وگعدنا نتريگ ..
حبيبتي ماشاء الله اسويلها بيضتين سلگ تاكلهم ..

گرصتها من خدودها .. فديت الكبرت وگام تاكل .. كم شهر وتصيرين سنه واسويلج احلى عيد ميلاد يروحي ..
حسبت الها .. يصادف بعد سنة بابا ..
وماما گالت تسوي سنه بابا ومنار سويه .. لان فرق شهر بينهم ..

جبت ورقة وقلم .. وسجلت الاشياء الي نحتاجها ..
لازم اسويلها احلى حفله ..
تعبنا طول هالسنه ولازم نفرح شويه ..
ماخليت شي ماكتبته ..
اتصلت بتماضر ..
گلتلها ضحكت عليه لان بعد كم شهر واني من هسا احظر گالت يمعودة منا الذاك الوكت اكو بيجات خاصه تجهز عيد ميلاد وتسوي كيك .
وعود نتفق وياهم ونحجز ..
دور گلتلها راح نعقد محكمة وفرحت وگالت معناها عذاب قرر يبدي حياتة وياج ..
وگدرتي تخليه يحبج عفية عليج والله ..

سديت منها الموبايل ..
تذكرت من گال اشتري غرفه .. لعد وين نخليها ..
مستحيل انام بذيج الغرفه ..
ويبقى يتذكرها ..
اگله يحول الغراض كلها لهناك ..
ويبقي بس سرير شهد ..
حتى لو كانت هاي الغرغه اصغر من ذيج ..
طول فترة دوامة اني اخطط وافكر ..
فعلا تحمست وصرت اشتاقله بكل دقيقه ..
ومن اتذكر اخر ليله قبل ليروح ..
اووووف احس روحي بحلم وصحيت منه ..
باجر موعد نزوله ..
گلت الخالتي ماابات عندهم لان اريد انضف واحظر معجنات واكلات الجية عذاب ..
گالت روحي والله يسعدكم يمة ..
الصراحة بيت خالتي من اروح ماارتاح ..
تمارة امتحانات .. واصلا هي ماتگعد يمنا من زمان ..
وزوج خالتي عندة مشكله بشغله ومايگولون شنو بس مبين عليهم ..
وخالتي دوم صافنه وضايجة مع العلم دايما معتز يخابرها ويسأل عليهم .. اكيد علمود عمو ابو عذاب ..

رجعت للبيت .. نضفت وسويت كيك ومعجنات ..
وغسلت ملابس ..
وكويت ..
لليل سمعت عياط ببيت خالتي ..
متت خوف ..
ورجلي ماتشيلني بعد ..
اتصل ع خالتي محد يرد ..
ودنيا ليل واخاف اطلع ..
خابرت الماما ..
گالت .. ماادري اني ملتهية وي اختج باجر عمليتها .. ضجت حيل وعاتبتها لأن ماخبرتني ..
گالت ادري بيج محد يجيبج ليش اشغلج ..
سديته منها ..
واخذت شهد وقفلت الباب ورحت البيت خالتي ..
شفت عمامهم وولد عمهم اجو دخلوا يتراكضون ..
اريد امشي مااگدر ..
دخلت البيت شفت خالتي تعيط وتمارة تلطم ع وجهها وتبجي ..
ياربي سترك .. مو عذاب ..
ياالهي لاتفجعني بي .. اموت وربي مااتحمل بعد ..
كافي راحوا الي اعزاز هواي بعد مااتحمل ..
جمدت رجلي بمكاني وبعد مااگدر اتحرك ولااريد اسأل مااريد اعرف منو وانصدم ..
ردت ارجع للبيت واسد بابي ومااطلع الا لمن يجي عذاب بخير وسلامة ..
بين دموعي وخوفي على عذاب .. مروا ولد عمهم شايلين زوج خالتي گبالي ..
وحلگة اعوج وعبالك جثة ..
من شفته مااتحملت .. غوشت عيوني ووگعت ..

يتبع .…

//// البارت الثامن عشر ////
من_سيدفع_الثمن ؟؟
بقلم_الكاتبة_شمس

احيانـاً كثيـرة .. تتمنـى لو ان الوقت والعالم يتوقف ..
على لحظةٍ مـا !!
تتمنى لو انـك تستبدل هذه اللحظات .. من ومضات سعيدة عشناها لتعيد الذاكرة استرجاعها ..
وتنسينا ماقد يصادفنا من الم او حزن في تلك اللحظة !!

ـــــــــــــــــــــــــــــــــــــ

دخلت للمطبخ واحس رجلي مربطة ومااگدر امشي ..
بين دموعي وخوفي على عذاب .. مروا ولد عمهم شايلين زوج خالتي گبالي ..
وحلگة اعوج وعبالك جثة ..
من شفته مااتحملت .. غوشت عيوني ووگعت ..

گعدت مختنگة واشهگ ..
باوعت التماضر تبجي ..
لزمتها من ايديها ..
-تماضر عذاب وين .. عذاب شبي گولي ..
گالت وهي مستمرة بالبجي ..
-گومي ياعيني لاتخافين عذاب بخير مابي شي ..
-لاتكذبين عليه اني سمعت العياط وشفت عمو واگع وخالتي تملخ بنفسها .. گولي شبي عذاب ..
-وج والله مابي شي .. واصلا هسا راح يجي بالطريق ..
بس بابا صابته جلطة وانشل الجزء الايسر من جسمه ..

اخذت نفس قوي وشهگت .. گمت اشهگ بلا وعي ..
مااعرف احمد الله انه مو عذاب الي متأذي ..
لو اضوج ع الي صاب زوج خالتي ..

بس للحظة حسيت براحة من گالت عذاب مابي شي ..
الكل عباله ابجي واشهگ ع زوج خالتي ..
بس مايدرون من الخوف الي عشته گمت مااعرف ابجي لو اسكت من عرفت عذاب بخير ..

شهد خافت من شافتني بهيج حاله وتبجي ولازمه بيه ..
گمت غسلت .. ورحت يم خالتي بوستها وواسيتها خطيه فد مرة حالتها ..

الي فهمته .. شريك عمو ماخذ 100 مليون ومنهزم بيهن .. وعمو كان مامتأكد ويدور عليه ومكلف جماعه يدورون وياه بس اجاه الخبر انه ماخذهن وماخذ عائلته ومنهزم الخارج العراق ..
فهو مااتحمل ووگع ..
والي اعرفه عذاب شريك وياهم برأس المال .. عندهم مجمع كبير ولازمة عمو وشريكة ..

صدگ ضجت .. خطية عذاب منين راح يلگاها ومنين ..
من ابوه الي حالته خطرة وبالمستشفى ..
لو فلوسهم الي راحت كلها بيوم واحد ..

شنو من بشر هذي ووين عايشين احنه .. ناس بعد ماتعرف الحلال من الحرام .. والاهم عندها مصلحتها وشگد تگدر تبوگ وتربح ..

بقينا گاعدين كلنا وننتظر الاخبار ..
بيت عمامهم كلها موجودة ..

دخلت شهودة نومتها .. بالي يم عذاب ..
غفيت شويه ..
سمعت صوت عذاب فزيت ..
شفتة حاضن خالتي وتبجي ..
-بشرني ابوك شلونه ..
-ان شاء الله.. زين عدت الحمد لله . لاتخافين
-وذاك الحرامي ماعرفتوا شي عنه ..
-حقنا ناخذة منه لو بسابع ارض .. بس خلي ابوي يصير زين ويگوم واني اروح العمامة واحجي وياهم ..
اااااخ يابه .. شگد گلتله سولفلي شكو وشبيك ماقبل .
وگال امور بسيطة بالمجمع وتنحل ..
لو گايل جان لزمته قبل ماينهزم ..

باوعلي .. گتله الله يساعدك شلون صار عمو ..
هز راسة الي وگال ع الله .. تعاي وياي للبيت بس ابدل وارجع رحت گبل للمستشفى بملابسي هاي ..

گلت التماضر تخلي بالها من شهد ورحت وي عذاب ..
فتحت. الباب ..
شفت الكيك والمعجنات الي مسويتها ع الكاونتر باقية ..
باوعلهن ..
گتله اسويلك جاي وياهن ..
گال مااشتهي ..
بس اريد اسبح وارتاح ..

طلعتله ملابس ونطيته منشف ..
سحبهن مني وسحبني وياهن ..
ااااه فرح ..
محتاج حضنج هسا ..
-اني اكثر .. لو تعرف شگد خفت عليك من سمعت العياط ..
رفع راسي بإيدة .. يعني هيج تحبيني ..
ضربته خفيف ع صدرة .. شنو هالحجي لسا مامتأكد من حبي ..
ابتسم وباس راسي ..
اشتاقيت لسوالفج بس لازم ارجع للمستشفى بسرعة
واريد اروح اقدم شكوى ..

راح للغرفه يبدل ..
اخذت حافظة ..
وخليت بيها الفطاير وقطع الكيك .. وخليتهم بعلاگة ..
من راد يطلع ..
گتله هاك هاي الحافظة .. اكيد هناك تجوعون ومالكم خلگ تشترون لو تاكلون ..
-ماقبل ياخذهن بس اصريت ..
گال فروحة اقفلي الباب واخذي ملابسكم وابقوا عند اهلي هناك ..
گتله ان شاء الله بس انت طمني ..

من طلع اخذت جنطة صغيرة وخليت بيها ملابس شهودة وغراضها وملابس الي والعذاب ..
واخذت الي بقى من الكيك والفطاير خليتهم بماعون وقفلت البيبان ورحت ..

دخلت للبيت .. شفت مخليات صينيه الريوگ .
خليت الماعون بالوسط ..
وگلت التماضر .. هذا البارحة سويته العذاب لان راح يجي اليوم واحسن ممايبقى هناك . نطيت منه للمستشفى اخذة عذاب وهذا الباقي ..

سمعت صوت وراي ..
اي ليش لا . افرحي اصلا هذا يوم سعدج .. تسوين كيك وتحتفلين لان بابا وگع ..
واصلا اذا مات يمكن ترگصين .

التفتت الها .. انتي شتحجين ليش هو المرض بي شماته
تمارة .. اعرفج تكرهيه ولان هو ميحبج اكيد فرحتي وتشمتي ..
تماضر .. احترمي نفسج تمارة ويله ولي اصعدي مو عندج امتحانات روحي اقرأي ..
تمارة .. اي كلكم عليه ومتحجون وياها اصلا انتي وماما الي عليتوها ع روسنا ..
خالتي .. گومي ولي منا .. ابوها بالانعاش وهي حايرة تتعارك وتتمالخ ..
منا وجاي مااشكيله ولااتعبه .. كلشي اگل العذاب وهو يتصرف ..
كافي بعد مااتحمل مشاكل والم ..

__________
سكتت عنها وخليتها تحجي ورحت للمطبخ ..
صاحتني تماضر

اتريگ ..
گلتلها مااشتهي ..
خالتي .. تعاي اكلي لگمة انتي ماتتحملين لاتوگعين ..
اجيت خليت شهد بحضني وريگتها اكل شويه وشربت جاي ..
وگمت احس نسوان عمامهم تباوعلي مااعرف ليش ..
گمت اشتغل بالمطبخ ومادخلت يمهم ابد..

اتصلت ع ماما وگلتلها ..
گالت الله يگومه الاهله .. بس ماانسى الي سواه بينا ..
فرح .. لا ماما لاتگولين هيج مهما يكون هذا اب لو شايفه خالتي خطيه شلون حالها ..
ماما .. لايمة مااتشمت واني بنتي هسا بالعمليه وهم اطلب الفرج ..
فرح .. اذا طلعت گوليلي بالي يمها بس لو ماالي صار اني اجيت ..
ماما .. اني واخواتج هنا .. خلي بالج ع بيتج ورجلج ..
فرح .. زين حظروا عمليتها ..
ماما .. الله يهديهم ..

غلقته من ماما شفت تماضر وراي ..
-شنو اليوم عملية مروة ..
-اي دخلوها وبعدهي جوة ..
-الله يگومها بالسلامة .. التمن علينا من كل الجهات ..
-الله كريم ..

مر كم يوم وعذاب ماشفته من المستشفى يجي يسبح ويبدل ويروح .. اذا كلش كلكتين نحجي ..
والبيت مافرغ من اقاربهم ..
حتى گمت ادعي الزوج خالتي يگوم بسرعة حتى يرجع عذاب واشوفه ..

بقوا فترة بالمستشفى الى ان استقر وضعة وطلع ..
بيومها عذاب ذبح خروف جوة رجل ابوه ..

من دخل زوج خالتي وشفته استغربت .. حيل ضعفان وحلگة بعدة اعوج ..
وع الكرسي مخليه لان رجله اليسرى وايدة مايگدر يحركهن ..

ولاعبالك ذاك نفسة الي كان يعيط ويحجي بالبيت ويمشي ع طوله ..

الكل سموا عليه .. اتقربت سلمت عليه وبوسته هز راسه وگال تسلمين ..
ماتوقعت هيج يرد .. بس يمكن المرض غير نضرته وخلاه يوعى الحاله ..
وانه الانسان مهما على شأنه وصار عندة فلوس وجاه .. فماكو شي دائم للابد ويجي يوم ويزول كله ويبقى بس الكلام الحلو والسمعه الزينه ..

دخلوه الغرفته يرتاح ..
وعذاب انطه قرار بالبيت محد يدخل يمة ويتعبه بالحجي ..
خالتي بقت يمة ومافارگتة ..
فعلا الانسانة الاصيله تبين بهيج موقف .. رغم هو كان مأذيها حيل وكان دايما يعايرها بينا ..
وماانكر اذيتها كانت بسببنا احنه ..
الا انه بشدتة وگفت وياه ..
وگالتله فلوس الدنيا كلها فداك .
بيع الگاع والبيت وذهبي واوگف ع حيلك لو حتى نگعد بإيجار ..

بيومها بقوا كلهم عدنا وسوينا غدا ..
وبعد الغدا ..
اجتمعوا رجال من عشيرتهم وشيخهم .. ودزوا طارش الشيخ شريكهم ومنتضرين الرد ..
عذاب گلهم .. مااريد ابوي يدري بأي خطوة نخطيها منكم الي مااريدة ينقهر ..

كنت مااشوف عذاب بس بالليل ..
انتضرت الليل بفارغ الصبر ..

تماضر وولدها عدنا بقوا ..
فأخذنا غرفة معتز الفوگ النا ..
طبگت سرير بصف سرير ..
وفرشتهن فرشة حلوة ونومت شهد ونزلت ..

صارت گبالي تمارة ..
-شتسوين هنا ..
ماحجيت وياها ردت انزل ..
-مو احجي وياج هييي ..
-احترمي نفسج شنو هييي ع الاقل اكبر منج ومرت اخوج شلون هيج تحجين وياي ..
-ههههاااي اذا هو اخوي مارايدج وتعرفين نفسج شلون اجيتي لهنا .. مو زين ستر عليج ..
هزيت ايدي عليها ..وگلتلها ..
شوف منو اليحجي ..
-شنو قصدج ..
-باعي تمارة .. رجاء دتشوفين البيت ماناقصه مشاكل .. وبدل متدورين سوالف وياي وتتمشكلين ..
فكري بأهلج ..
-ومنو انتي وتعلميني انتي نقطة ع الشمال بالنسبه للبيت كله .. لاتشوفين ماما ناطيتج وجه ..
مصيرج مثل اختج بالاخير ..
-باعي لج اني هواي صبرت وتحملت مراهقتج ونزواتج .. بدل متعايريني شوفي نفسج انتي وبنت عمج شداتسون وتصخمن .. لاتجبريني احجي العذاب واخليه يتصرف وياج بعد مااسمحلج تعتمليني هيج ..
ويله وخري عني ..

سمعت صوت عذاب .. فرح وينج ..
تركتها ونزلتها وخليتها تهدد وتتوعد .. زعطوطه اذا اسكتلها تتمادى ..
نزلت ..
عذاب .. وينج اصيح صار ساعه ..
فرح .. كنت بالغرفه الفوگ افرش ونومت شهودة ونزلت
عذاب .. وليش مافرشتي بالاستقبال حتى قريب على ابوي خاف يحتاج شي ..
فرح .. خالتي گالت افرشوا فوگ حتى تبقون ع راحتكم لان الصبح يجون عمامك او خطار وعيب احنه نايمين بالاستقبال ..
وبالغرفه تماضر وولدها ناموا ..
اتقرب مني وهمسلي .. شفتي امي شلون تهمها راحت ابنها .. تريد تخلينا ع راحتنا ..
زين سويلنا جاي واصعدي وشويه واصعد وراج ..
بس باجر گولي التماضر يصعدون فوگ واحنه ننزل جوة مااگدر اعوف ابوي وحدة ..
فرح .. ان شاء الله وابتسمتله ..
عذاب .. ديله روحي لاتخبليني ..

رحت سويت جاي وقفلت الابواب وصعدت ..
مريت من يم غرفتها سمعتها معصبه وتحجي وتشكي ..
اكيد تشكيني البنت عمها ..

طبعا وجود عذاب بالطابق الفوگ ويم غرفتها مايخدمها لان متعودة ع السهر ..
اني ادري شلون راح تكمل امتحانات وتنجح هاي ..

رحت للغرفه .. بدلت وبقيت ع السرير گاعدة العب بلعبة الدودة مال الاجهزة القديمة ..

شويه واجة عذاب .. اويلي حبيبة ابوها نايمة ..
وبوسها ..
-لا عذاب لتگعد اتركها ..
-ماتگعد هذي ع گلب ابوها للصبح تبقى نايمة يهمها راحته ويغمز تتذكرين اخر ليله ..
-ضحكت ..اممممم عرفتك راح تگلب الحجي وتتذكرها ..
اولا بنتك اني عودتها تنام بأنتضام .. وبعدين هي كبرت واستقرت نومتها ولاتنسى

تزحف وبالحجله طول النهار فأكيد تتعب وتنام بالليل ..
-اي طبعا غير امها نادرة وتطلع عليها ..
ابتسمت من گال امها ..
اجة يمي گعد .. اووووف شگد تعبان من اجي يمج التعب كله يروح ..
-الله يساعدك طول النهار ركضة من غير الخطار اليجي
-ماارتاح اذا مااخذ حق ابوي .. لو ارجعله جزء من الفلوس ..
ابوي مامتعود ع الگعدة يموت بلايه شغل ..
اااااخ لو الزمة الهذا الكلب ..
-لاتصدگ يربح بيهن .. يحي يوم الي يطلعن انتقام عليه وتوگع بي وبعائلته الحرام ميدوم ..
-دطفي الضوة وتعاي بحضني وخليني انسى الدنيا ومابيها ..
-طفيت الضوة واجيت ..
دفعني استغربت شكو ..
گلت نامي بحضني بس مو بثوبج .. مااريدة اريد جسمج يلامس جسمي ..
-عذااااب شنو هاي ..
-دتعاي خجلتي لعد الي هيجتني ذيج المرة منو ؟؟
ويضحك خليت راسي بحضنه عصرني بإيدة ..
-خنگتني ..
-تدرين هسا شبيدي ..
-شنو ..
-اخليج بقفص واحبسج ..ومااخلي احد يشوفج بس اني مااريد احد بينا بس احنه .. ع عيوني هنا باقي بس لو ماابوي يحتاج رعايه وواحد يگومة ويگعدة ..
-اكثر من هذي الحبسه يعني .. نسيت شلون قبل تقفل عليه هههه..

-اشششش لاتفتحين مواضيع قديمة خلينا بالحاظر .. كلما بقيتي هيج صافية ونقية وياي كلما رجعت ثقتي بالناس وبنفسي اكثر واكثر ..
انتي علاجي فرح .. لاتكذبين عليه بيوم ولاتخذليني ..
-مستحيل اخذلك بيوم ثق بهذا الشي ..

باسني براسي وغفينا ..
حضنته حيل واشم بي ..
فتحت عيني ع خيال من جوة الباب ..
فزيت ..
هاي اكيد تمارة ..
لان محد يصعد لهنا وبس هي گاعدة ..
معقوله كانت تتنصت علينا ..
شنو من نفسيه عدها ..
باوعت العذاب غافي من التعب ..
لبست وطلعت باوعت ماكو احد ..
رجعت قفلت الباب ونمت ..

بقينا هالفترة كلها عند بيت خالتي .. وعذاب خطيه من مكان المكان يركض من غير عمو ياخذة مراجعات وعلاج طبيعي وكذا ..
خالتي هم حايرة بعمو ..
واني وحدي بالبيت مالحگ وشهودة منا .. رغم تمارة خلصت امتحانات بس ابد ماتحرك ساكن ..
اما زوج عمتي فصار احسن وياي ..
لان قايمة بواجبه واسويله كله اكل صحي واجيبه العندة
صحيح مايشكر ولا يحجي بس واضح هالشي من تصرفاتة
ماما كل يوم اتصل بيها واسأل على مروة .. ومااگدر اگول العذاب حتى اروح اشوفهم ..
رغم حالفه ماادخل بيت اهلي ..
بس ماما گالت اني اجيب مروة ونجي عيب من خالتج ..
ماصدگت من گالوا راح نجي ..
بقيت منتضرة الى ان اجو ..
فرحت حيل .. بوست ماما ومروة رغم خشمها بعدهم لافيه ممفتوح ..
وتفاجأت من شفت اخواني ورنا وابنها كبران وابد مشايفته بس يشبه بابا حيل ..
تنازلت وسلمت .. وهم سلموا عادي وسألوني شلوني وسألوا ع شهد ..
بقيت ممصدگة .. معقوله الي جاي اشوفه ..
اخواني اجو ويسألون عليه وع شهد الي رادوا يقتلوها وهي ببطن امها ..

جبتها الهم شافوها تخبلوا ع جمالها وشالوها وبوسها وهاي كانت اول مرة اشوف لهفتهم بهذي الطريقه ..
اخذت ابن جلال مستغربني لان ميعرفني بس يبجي بوسته وشميته عبالك ابويه مقابيلي ..
شهد هم مستغربه ..
تأشر عليه وتصيح ماما .. ماما ..

رادوا يطلعون .. عذاب گالهم تعشوا يله ترحون ..
اشرلي احظر العشا ..
ماصدگت گمت سويت اشكال وبدعت ..
وكأنه منتضرة هاللمة من زمان .. وگلبي الي كان حاقد وشايل عليهم كل هذي الاشهر ..
بلحظة نسى كلشي ..
تعشوا وطلعوا وكان يوم ماينسى ..
نطيت شهد الابوها وگلتله انضف المطبخ واكمل واجيكم .
نضفت وكملت .. طلعت للطرمة غسلتها ..
وسمعت صوت عذاب هز البيت هز ..
فرررررح ..
اجيت اركض عبالي شو شصاير ع شهد لو عمي ..
وصلت الباب المطبخ ..
ماحسيت الا براشدي قوي من عذاب .
وسحبني من شعري حيل لجوة ..
اريد اعرف شصاير ماادري ..
ومستمر بضربي واني ابجي واعيط ..
وخالتي تعيط وتگله شبيك تخبلت راح تموت البنيه ..
گالها ..
خليها تموت . تعبت منهن اعرف رسهن اعوج وماينعدل شورطني ..
بس انتي الورطتيني انتي ..
اختها عار وخاينه هي شتطلع اكيد مثلها ..
احس حلگي ينزف .. بلگوة خلصت روحي منه وابجي ..
-مااسمحلك شنو خاينه كم مرة گتلك لاتقارني ..
-وهذا شنو .. رفع الموبايل ..
منو هذا الي خابرج ويسأل عليج وقلق لان مامخابرته اليوم وفوگاها يگلج حبيبتي .. منو احجي ..
ودازلج رسائل ..
گولي منو هذا العار الي تخونيني وياه احجييي ..

من گال هيج احس الدنيا تعصر بيه وعبالك اني بكابوس مو حقيقه .. لا مستحيل .
هذا منو اني حتى مااخابر بي الاحد بس ماما وعذاب وخالتي وتماضر يعرفوه ..
لا ياالهي استر عليه ..
بقيت احلف وابجي ومايصدگني ..
اجة بكل قوته سحبني من خالتي وعمو مناك يعيط شكو وشبيكم ..
احس نفسي ضاگ وبعد مااتحمل ..
اختنگت حيل وبالگوة اتنفس ..
غوشت عيوني ..
لزمته من قميصه وسحبته ووگعت بحيث حسيت قميصه راح يتمزگ بيدي ..
ياليتني متُ في تلك اللحظة التي رأيت فيها نضرات الشك وعدم الثقة لحبـي ووفائـي لك 💔

يتبع

طبعا اغلب بنات يعانون من هالشي🤦‍♀ ..عمري هاي معناه عندج خربطات هرمونية

وزيت الورد عادي حبي استعملي مايضر🥰
#ملوكه

حبيبتي الحبوب..اكو انواع ☹️💔اكو تصير مثل حبوب بيض..فهاي دهنية
واكو يصير لونهن حمر ويطلع بالحنج فهاي من الهرمونات او الاكلات

واكو تصير بالكصه حبوب حمر ناعمه فهاي من الحر والاكلات الحارة والحلويات
واكو حبوب لحمية او شامه وتصير حبايه

فلازم تعرفين شنو نوعهن ..حته تعالجي او تراجعين دكتور🌸

#ملوكه

يي حبي عادي تستعملي للوجه والجسم..
واذا استعملتي ووجهج بسع زيت ..فرطبي بس للجسم

طبعا اللي بشراتهم جافة🌚🌺 فهالمرطب يفيدكم

#ملوكه

عمري اني اعرف بيجات عل الانستا😻👇🏻
وكلشي عندهم من هدايا واسعارهم مناسبة

واللي تعرف قناة بالتلي الهدايا ..فخل تدز🙃

#ملوكه