قۣۗـۙصۣۗـۙصٍ 📖ۆبۣۗـۙسۣۗ 💯


//// البارت الثامن ////
من_سيدفع_الثمن ؟؟
بقلم_الكاتبة_شمس

فتح الباب عليه عطت بي ..
هو بقى صافن ومرتبك وبنفس الوقت معصب حيل ..
گتله اطلع متستحي ..
مااتحملت يشوفني بهيج موقف ..
گمت اعيط بلا وعي ..
لبست وبقيت مترددة اطلع ..
قفلت الحمام وبقيت گاعدة ودموعي تنزل من الخجل او الخوف مااعرف ..

اسمع صوت شهد تبجي ومااگدر اطلع استحي ..
صاح يله فضيها يمعودة البنيه ماتت من البجي ومااعرفلها تقربت يم الباب ..
وگتله .. ادخل للاستقبال وسد الباب حتى اطلع ..
عذاب بعصبيه .. ترى مو الهاي الدرجة سوتيني ماعندي غيرة ولااخلاق ..
صارت لااراديا لاتكبريها ..

-اي ميخالف روح منا ..
-وج عاد زودتيها نسيتي اني عاقد عليج .. ومو حرام اذا شفتج .. واصلا موببالي الي تفكرين بي .. بس قلقت لان ماشفتج بالبيت ..
ماشاء الله اختج كرهتني بجنس النسوان كله ..
فضيها عاد يله بعياااط ..

طلعت بالروب لافته ومخليه المنشف ع راسي وگبل للغرفه دخلت وقفلتها ..

شلت شهد وايدي ترجف من الخوف ..
ياربي ليش دوم هالمصايب لاحگتني ..
دگ الباب ..
ماحجيت ..
-عود جبت عشا وغراض بالمطبخ من تكملين اتعشي ..

رضعت شهد وخليتها ع سريري تلعب ..
ورحت بدلت ومشطت ..
بقيت مترددة اطلع لو لا ..
تذكرته من گال قلقت لان مالگيتج بالبيت ..
قصدة شك وخاف انهزمت ويدور عليه بالبيت كله ..
وفوگاها يگلي انتي موببالي واختج كرهتني بالنسوان..
اووووف عساس اني مهتمة ..

اصعب شعور وموقف اني بي ..
من جهة هو زوج اختي .. ومستحيل اگدر اتعود ع فكرة انه عاقد عليه ..
ومن جهة خوفي منه ومن مستقبلي وياه ..

علاقتي ببيت خالتي كانت ضعيفه لان زوج خالتي مايحب اهلي فماعدنا اختلاط بيهم الا لما تزوجوا منار وعذاب .
وكنا قليل نلتقي بالعزومات ..
لهذا علاقتي بتمارة او عذاب او معتز فاترة ..
ماعدا تماضر كانت دايما تجينا وتزورنا هي وخالتي لهذا متعودين عليها ..

بقيت شويه وطلعت ..
گلت خاف جوعان ..
رحت للمطبخ .. شفت جايب كباب وتكة ومقبلات ..
رتبته بصينية ..
وخليت صمون واخذته اله ..

لگيته گاعد ومنصي راسه يتصفح بالموبايل ..
شافني عدل گعدته ..
خليت الصينيه وردت اطلع ..
گال وين ..
-اروح اشوف شهد ..
-اي جيبيها وتعاي اكلي مااعرف اكل وحدي ..
-بس…
-لاتبسبسين جيبيها وتعاي گلت ..

رحت جبتها واجيت . گال بطريقج جيبي العلاليگ الي بالمطبخ ..
رحت جبتهن واجيت ..
خليت شهد ع القنفه ..
گال افتحيهن ..
فتحتهن .. جواريب صغار وجاكيت فرو صغير وكليته فرو حلوات حيل ..
گال مااعرف قياسها . اذا بيهن كبر او صغر گولي ..

گتله هسا اشوفهن عليها ..
-لا تعشي وبعدين ..
-گعدت اكل بالگوة وگاطعه النفس .. والحرارة صعدت فول عندي .. بس اريد اگوم ..

باوعلي وگال .. هيج اني اخوف ..
-ها لا بس ..
-جانت تگلج عليه وحش ..
-لا…
ابتسم بأستهزاء .. لاتبررين اعرف نضرتج الي شنو ..
ولهذا تتصورين انه منار محقة مو ..
-ماادري لان ماكنت عايشه وياكم ..
-كملي اكلج.. كملي .. ولاتخافين مااكلج لو اموتج .

مااعرف شلون كملت العشا ..
اخذت الصينيه وبقت شهد يمة ..

كملت المواعين ورتبت المطبخ ..
اجيت ردت اخذها شفتة ديلعب وياها .. وهي تضحكله وترفعله ايدها ..

خليتهم سوة ودخلت اصلي ..
بلكي يحن گلبه ويهتم بيها ..

صليت وكملت ..
اندگت الباب ..
اجو بيت خالتي ..
اشو طلعت من الغرفه .. خليت الشال ع راسي .
گالت عمته .. سابحة يمة وتضحك ..
-اي سبحت..
-ها بالعافيه بس دفي نفس لاتبردين ..

خالتي قاطعتها .. يمة فروحة سويلنا جاي وياج ..
لعد وين شهد ؟؟

-شهد يم ابوها بالاستقبال ..
-هاا خير ان شاء الله..

سويت جاي وصبيته .. اول ماقدمت الزوج خالتي وخفت يفشلني ..
-تفضل عمو .. اخذ من غير مايحجي ..
نطيت المعتز .. وعمتهم وخالتي .. بقى بس عذاب ..

صاحته خالتي .. اجه شايل شهد بإيدة اثنينهم وهي ضايعه بحضنه ..
منضرة حلو ويضحك ..
-هاج يمة مااعرف اشيلها ..

خالتي .. تعاي فروحة شوفي شنو جبتلج ..
نطتني علاگة استحيت افتحها ..
وعمتهم جايبة علاگة هم ..
گالت ماجبتلج شي الزواجج هاي الج .. تلبسيهن بالخير ان شاء الله..

اخذتهم ودخلت .. خالتي جايبتلي شالات وتنور وسترة حلوات ..
بس عمتهم عزاااا هاي شنو . كله ملابس نوم ومخلع والوان .. من شفتهن خجلت ..
بسرعة ضميتهن بالكنتور ..

اجة عذاب دگ الباب ..
فتحتها ..
-انتي شعندج تقفلين بالباب من تدخلين ويباوع الايدي وللغرفه ..
-ماكو شي بس لان انزع الحجاب واخذ راحتي ..
-ممنوع تقفليها .. مااحب هذي الحاله فاهمة ..
ويله اطلعي اريد انام باجر اطلع غبشة ..

-انت ليش هيج وياي شمسويتلك اني ..
-ماعندي شي .. يله اطلعي ..
سحب الفرشة .. ونام ع بطنه ..

ردت اطلع .. طفي الضوه گال ..
طفيته وطلعت ..

بقيت گاعدة يم خالتي وعمتهم ..
زوج خالتي ع التلفزيون گاعد ..
وتمارة كالعادة بالغرفه ماتطلع منها بحجة الدراسه ..
خليت شهد بحضني الى ان نامت ..

سعاد .. اگلج عمة ماتخلينا نروح نشوف امج باجر مصيب

تها كبيرة وعيب تسمع جاية ومارحت شفتها وعزيتها .
بقيت صافنة بوجه خالتي ..
خالتي .. اني وياج نروحلها الصبح .. فرح من يومين عدهم وعذاب باجر يلتحق ومايقبل تطلع بغيابه ..
سعاد .. اي حقه .. خوش مو تنسين الصبح ..
اني اروح انام ..

گمت فرشتلها واخذت شهد للغرفه بسكته . فتحت اللايت يم راسها لان خفت افتح الضوة ..

وغطيتها وطلعت .. حسيت نفسي جوعانه ومااكلت بالعشا ..
طلعت الكباب حميته بالمايكرو ..
وحميت الصمون ..
دااسوي لفه ..
اجة معتز ..
فزيت من شفته وراي ..
-شنو جوعانه ..
-اي ماتعشيت ..
-اني هم جعت .. شنو عشاكم ؟؟
-كباب شوي وتكة .. جاب عذاب ..
-سويلي وياج لفه ..
______________________
دااسوي لفة طلع عذاب يكح .. فزيت من مكاني ..
حرت وين اروح ..
حاولت اتصرف طبيعي وماابين توتري ..
ياربي شنو هذا الحظ الي عندي ..
غمضت عيني بسرعة .. ودعيت يدعي هاليوم ع خير ..
بعد ماشفت عيون عذاب ونضراته وهو اصلا من يگعد من النوم تكون عيونه وارمة وحمرة ..

عذاب .. شتسوون ..
معتز .. شنو شنسوي شبيك ؟؟
عذاب .. احجي وياج شعندج هنا تالي الليل .
فرح .. هاا جوعانة ردت اسوي لفه ..
عذاب .. وماعرفتي تسويلج لفة وتتزقنبين بالغرفه ..
معتز .. شبيك عذاب ترى زودتها .. اني الي طلبت منها تسويلي لفه وياها . شنو قابل غريب وتمنعها توگف يمي ..
عذاب .. معتز لاتتدخل وانتي امشي گدامي ..
واحمدي ربج عمتي موجودة ..

معتز .. اوگف شنو تمشي شسوت وتهددها .. ملاحظ روحك شلون تعاملها ..

اني رجل تطبگ برجل .. وهذا معتز مايسكت لساعه حسيت راح يغمى عليه من الخوف ..
عذاب دفع معتز للحايط وهمسله .. انت لاتتدخل ذني مايمشن الا بالعين الحمرة .. لايغرك هدوئها ياما من تحت السواهي دواهي ..
سحبني من ايدي حيل ودفعني للغرفة ..
رحت امشي من غير ماالتفت وراي ..
بقى معتز وعذاب يتهامسون بالمطبخ وخايفة لا يطلع احد ويسمعهم واكيد راح تطيح براسي ..

من التوتر ماعرفت شأسوي ..
گعدت شهد ..
رحت شلتها واهز بيها رغم هي ساكته ..

اجة عذاب وجهه ميتفسر .. اتقرب واني حاضنه شهد عسا ان يشوفها بحضني ويسكت ..

عذاب .. خلي الطفله بفراشها ..
فرح .. والله ممسويه شي شبيك ..
عذاب .. تدرين بيه مخبل ومااقبل تختلطين وسبق وان حذرتج ترخبين بيني وبين اخوي ..
طلعتي بالليل متعمدة مووووو.
فرح .. لا وربي انت تخلق افكار من كيفك ..
بس المهم تطلعني غلطانه وتقسى عليه ..
معتز مثل اخويه وواجبي اسويله اكل اذا جوعان ..
قابل امشي واتركة ..
عذاب .. وج سوالفج ماتعبر عليه .. عيونج واللسانج كلهم حقد عليه كافي تمثيل ..
طلعي وجهج الحقيقي مثل اختج لاتمثلين الطيبة والبرائة
هو يحجي ويعيط عليه ..



واني ابعد عنه ..
گتله انت شنو ماعندك احساس .. ماتشوف الطفله بيه .
حرام عليك كافي ..
اذا تريد تنتقم انتقم ..
تريد تعذب عذب ..
تريد تموتني موتني وخلصني ..
كافي تعبت ماعندي طاقه اتحمل ..
صار ثلاث اشهر متحملة خوفك ونضراتك وشكك وعصيبتك على شنو وانت اصلا ماتهمني ولااهمك ..
انت شنو ماتگلي شنو ؟؟

حسيت تراجع وگال نيميها بسرعة ونامي .. كافي فضايح بس ها ورفع ايدة ..
لاعبالج انتهى كلامنا ..
سكتت بسبب عمتي والطفله الي مخليتها بحضنج والا اتصرف وياج تصرف ثاني ..
ولي مني ..
فرشت بسرعة ونزلت شهد يمي ..
نومتها ..
باوعتله ..
نايم ومخلي ايده ع راسه وصافن ع السگف ..
اااااه ياعذاب شوكت راح يخلص ثارك وعذابك ؟؟
_________________
اني عذاب ...
ذنبي اني حبيت مثل باقي البشر .. بس الفرق حبي مجنون ..
عشگتها من صغرها .. وتعلقت بيها ..
بس كان طبعها الغرور والدلال .. عذرتها وگلت تستاهل الدلال .. حلوة .. وصغيرة .. وعيونها تكتل ..
لو شامة شفافها الدمرتني ..
اختاريتها من بين بنات بغداد كلها واتحملت دلالها ورفضها وبقيت وراها الى ان گالت اي وصارت من نصيبي ..
وهذا كان اسعد يوم بحياتي ..

عذاب .. الكل بالمقر يگلولي اسم على مسمى من الزم ارهابي لو داعشي ماارحمة اذا وگع بيدي ..
ويسموني ابو نشمي ..
لان ساعة الي يحتاجني يلگيني يمة واذب روحي للموت الصحباني واهلي ..
طبعي مر بس گلبي ابيض ..
مااحب الي يراوغ ويدور دغش وياي ..
احب الي يمشي بالعدلة ..

شفت نسوان اشكال .. وحجيت وي اشكال وعرفت طينتهن شني .. من نضرة اعرف غاية كل وحدة بيهن .
بس ماگدرت وحدة تهز او توگع ابو نشمي الا منار ..

هاي كانت قطعة من گلبي ..
حبيتها حب اعمى ومن طرف واحد ..
شگد ردت اعودها عليه واخليها تحبني بس هي تتدلل وتغتر بروحها ..
گلت ميخالف يعذاب .. حقها تدلل عليك اذا شايله حسن الكون كله ..
گلبي وعيوني انعمن عن اخطائها وعيوبها ..
وحبيتها حب خلاني انذل خمس مرات واخطبها وبكل مرة احصل الرفض وابوي يحجي وعمامي يضوجون ويگولون مانروح بعد ..
واصبر وارجع اقنعهم واحاول مرة ثانية وثالثه ومامليت الى ان وافقت ..
اهلها طلعوا حجة الدراسة واني اعرفها هي الرافضه .
من كانت تصغير تسميني الوحش ..

لان كنت اصيح بيهن واخوفهن اذا طلعن يلعبن

بالباب لو وي جيرانهم ..
غيرتي عليها من هي صغيرة ..

من صارت الي ماصدگت وصارت طلباتها اوامر..
احلى خطوبه واحلى عرس سويتلها ..
رغم كلشي اتحملتها صح مرات اعصب عليها واعيط واضوج بس عسا وان تحبني لان مهما تعاشرني واعاشرها فالرجال يحس بالمرة الي تحبة ويحس بشغفها اله من خلال العلاقة الزوجيه ..
واني كنت احس ببرودها وياي ..
وهذا الشي يضوجني ويخليني اتعصب ومااشوف بعيني

اخذنا فترة كم شهر زينه واحسها بدت تتقرب الي وعلاقتنا تحسنت وتغيرت ..
وصرت بيها اسعد مخلوق ..
وكنا نطلع ونفتر ودايما نتعشا برة اذا اني مجاز ..

الى ان حملت كثرت المشاكل بينا بالفترة الاخيرة وع اقل شي تزعل الاهلي وتبقى يم امي ..
وحجتها مااريد احمل هسا بعدني صغيرة ..
وامي تهدي بيه وتگلي على كيفك وياها حامل خطيه .

اني كنت فرحان بطفل يجمعنا ويقربنا البعضنا وخاصة بعد اشهر من زواجنا ..بس هذا الحمل زادها توتر وعصبيه ..
والاسوء تگلي من تتقربلي استفرغ ..
وگعدت ابحث عن هذا الشي وسألت .. وعرفت اكو فعلا نسوان تكره ازواجها وعطرهم بفترة الحمل ..
هم صبرت عليها ..
ماانكر اني كنت اتعصب واتعارك وياها ومشاكلنا كانت مستمرة ..
بس حبي الها ماانتهى وكنت متأمل بيوم تتغير او بعد الولادة ..
الى ان نزلت بيوم الظهر تعبان ..
اني دوامي بين يوم ويوم .. يعني يوم ابات ويوم ارجع . بيوم الدوام هي للعصر تروح تبات عند اهلي ..
بيومها اني مالي خلگ .. استأذنت .
ورجعت للبيت ..
فتحت الباب ع كيفي گلت خاف نايمة ..
واسمع صوتها تسولف بالموبايل .
بالاول ماانتبهت الا لما سمعتها تگلي شبيدي ياحبيبي غير هذا حابسني وميخليني اطلع الا وياه ..

الي سمعته شل جسمي كله وماشفت بعيوني ..
مااعرف شلون صبرت واتحملت حتى اسمع اكثر ..
من شفت غزلها وكلامها زاد ..
وگالتله حسوني .. تدلعه بنت اللذين واني بحياتي ماصاحتلي حبيبي او دلعتني ..
دفرت الباب برجلي انكسرت الرزه من الدفرة ..
هي عاطت ووجهه اصفر وطفرت ع الجهة الثانيه من السرير..
عذاب .. وج منو. هذا الي تصخمين وياه .
منار .. وانت شعليك احجي وي صديقتي ..
عذاب .. انطيني الموبايل .. ياصديقتج ولج الي تگليلها حبيبي وحسوني . تخونيني بنت الكلب ..

هي من شافتني تقربت الها ..
بسرعة رگعت الموبايل بالحايط وفلشته ..
ركضت عليه مايشتغل ..
هذا الشي اكدلي سوالفها ..
لزمتها من شعرها وشبعتها ضرب .. ونسيت هي حامل
عيوني بعد ماتشوف شي ..
من صوت عياطها اهلي اجو يركضون النا ..
حاولوا يبعدني وامي تگلي حرام عليك حامل ..
واني اصلا مو بوعي وحتى الطفل الي ببطنها كرهتة ..
لا بعد هذا الحب والانتضار تخوني وتستغفلني ..
ردت اقتلها بس لعنت الشيطان لان اعرف اذا قتلتها بيدي مااتحمل اعيش واموت ..
سحبتها بملابسها للسيارة وامي تركض وراي ..
وابوي يلوم بيه ويگلي هي هاي القتلت نفسك عليها ..
شمرتها عند اهلها وحجيت وي ابوها بساعة عصبيه كل الي خطر ع بالي وطلعت..
بيومها مارجعت للبيت . كرهت كلشي بحياتي ..
ماردت احد يعرف .. وماردت ابقيها يمي وااذيها .
ردت اعاقبها بالهجر ..
او اصحى من صدمتي وبعدين اخذ قرار ..
بس موت ابوها غير الموازين ..
والسر انفضح .. والكل عرف ..
وبقيت اني بداومة اكبر .. والتفكير موتني ..
وردت اعرف بأي طريقه منو الي فضلته عليه وخانتني وياه ..
بقيت ادور وماسكتت بس مابينت .. انعزلت عن اهلي وكرهت بيتي ..
وصرت كل يوم اخلصه بفندق لو يم واحد من جماعتي ..
رغم اني حضرت فاتحتة ابوها ومابينت الاحد ..
بعد فترة دز عمها طارش ..
ورحت وختمتها وياها وطلگتها ..
رغم گلبي متمسك بيها ..
الا ان كرامتي ماسمحتلي ابقى وياها وانسى خيانتها .
حتى من ولدت ..
اجيت وشفتها من غير ماتدري ..
ولااحد يدري حتى امي . ماعدا تماضر الي مهدتلي الطريق..
بس ساعتها عرفت اكو حاجز بينا مستحيل ينهدم ..
والطفله الي كنت اتمنى تجي للدنيا ..
تمنيتها مااجت ولاكانت امها منار ..
كرهت كلشي متعلق بيها ..
واحس كرامتي المسلوبه .. طلقة ومزروعة بگلبي ومااگدر اطلعها الا اذا لگيت ذاك النذل ..
بس صار الي ماكان ع البال ..

يتبع ......

//// البارت التاسـع ////
من_سيدفع_الثمن ؟؟
بقلم_الكاتبة_شمس


عذاب .. الخيانة مو فقط جسدية .. مجرد مايفكر الانسان بشخص اخر غير زوجة واو حبيبه تعتبر خيانه ..

وخاصه اذا كنت تحب بجنون وتكتشف انه خانك .. كان بودي اقتل حبي بيدي وادفن گلبي وياه ..
لكن ماگدرت ..
بمرور الوقت تحول الحب الى لعنة وصرت اكره كلشي يذكرني بيها ..
حتى اختها وبنتي الي تشبهها .. احسهم لعنة بحياتي ..
من ماتت ونقدت روحها مني..
عبالها راح ترتاح .. مستحيل اخلي روحها الي غدرت بيه ترتاح وگلبي جمر وروحي لسا تفرفح بسببها ..

شمرت ملابسها وغرفتها وكلشي يخصها بس ماگدرت انساها وانسى افعالها ..
امثل القوة بس داخلي يغلي ..
وخاصة من اشوف اختها تحوم گدامي ..
وعبالك هي الي تمشي .. ومرات اتخيلها هي وودي اخنگها بيدي ..
بس العن الشيطان واتراجع ..
تركت اسرار هواي وراها .. بس سرعان مااكشفها وانقذ روحي من حبها الملعون ..

باوعت للساعة راح يصير الفجر واني افكر بالراحت وتركت رمادها يعذبني وبأختها الغامضه الي مااعرف شلون ناوية تخرب حياتي وتشتتنا ..

گمت من مكاني حسيت عليها غمضت ..
كأنه تراقبني ..

اتقربت الشهد ..
اباوع نايمة مثل الملاك ..
غمصت وتنهدت وطلعت ..
غسلت وتوضيت ..
گعدت صليت عسا وان ارتاح شويه ..
كملت الجو بارد الفجر .
سويت كوب گهوة ..
وطلعت برة اشربه ..

رغم برودة الجو الا ان حرارة گلبي صهرت جسمي وماحس بالبرد ..

سمعت حركة بالمطبخ ..
شفت عمتي مدت راسها ..
-هذا منو تارك الباب مو الجو بارد ..

شفتني اني دنگت ..
-يا عذيب .. شعندك هنا عمة… الجو بارد وعايف مريتك دگوم تدفى بحضنها ..
-شبعت نوم وگمت صليت وجاي اشرب گهوة بعد شويه التحق ..
مااگدر ارجع انام ..
-اي عمة بس الجو بارد .. اروح اگعد مريتك خاف تحتاج شي ..

ذكرت فرح نايمة بالگاع ..
گمزت من مكاني .. لاعمة تعاي خليها تنام خطيه شهد ماتركتها تنام ابد ..
-اي خطية .. تحملت حمل اكبر منها .. بس هي مبينه فقيرة مو . مو تزعل اختها اللسان ..

ردت اغير الموضوع .. تعاي عمة خلينا ندخل باردة عليج
دخلنا للمطبخ ..
-خليني اتوضأ واصلي واجي اسويلك ريوگ لاتطلع على لحم بطنك ..

ضحكت .. عمة لهجتج صايرة مثل اهل الناصرية ..
عمتي .. اي عمة ماسامع من عاشر قوم اربعين يوما صار مثلهم .. مو دور عشرة ثلاثين سنة ..

عذاب .. صدگ سوداج لهناك ..
سعاد .. الحب يعمة ..

ضحكت .. لاصدگ عمة معقوله ..
سعاد .. جا شنو يعذيب بس انت تعرف الحب . بس قبل حبنا مو مثل هسا ..
والله حبيته بگلبي وماحجيت بس عيونه تسولف ..
كملت المعهد . من غير مايحاجيني اجة خطبني ..
واهلي رفضوا وماقبلوا ..
بس من سألوني وشافوني موافقه واني الوحيدة عندهم مارادوا يكسرون بيه ووافقوا ..
بس ابوك ..
اخ ياابوك .. هو الي وگف مثل الشوكة وراد يخربها بس القسمة تسكت حلوگ ..
بس ابوي گال موافق هو سكت ..

عذاب .. لاعمة تعلميني بأبوي طبعة الرفض والمعارضة اسأليني الي .. بس المهم تزوجتوا ..
سعاد .. الحمد لله ..
يله عمة اني اخرتك .. گوم بدل على ما اصلي ..

فرح .. بعد ماعاط بيه وراد يضربني .. اخذت شهد تحميني وفدوة نامت ع صدري وفعلا نقذتني من عذاب ..
الي حسيت بي راد اقل خطأ حتى يعاقبني ..
وكأنه اني الي عذبته مو منار ..

نمت بس من خوفي گمت اتخيل اشياء .. ساعة اگول خاف يكتلني واني نايمة ..
بقيت مراقبته ..
وهو مبين مانام ابد لان بس يتنهد ومختنگ ع ساعة ينفجر تالي وي الاذان گام اني بسرعة غمضت ..
ومن گد مانعسانه غفيت ..
اول ماغفيت شفت منار بهيئة مو حلوة وتركض وراي ..
واني اركض وابجي واگلها تركيني وهي تگلي ..
رجعيلي حياتي ..
رجعيلي .. واني ابجي واركض ..

فزيت ع صوت عذاب يصحيني ..
-شبيج تعيطين ..
-اباوعله مستغربه وكأنه اول مرة اشوفه ..
اريد احجي احس شي خانگني ..

عذاب .. گومي غسلي وارتاحي .. ها دوم هيج يصير بيج
فرح .. مو دائما مرات ..

طلعت من الغرفه وخليته يبدل عندة دوام ..
شفت عمته تسوي جاي وريوگ ..

فرح .. صباح الخير ..
سعاد .. صباح النور .. خطيه عذاب ماهون بيج يگعدج تسويله استكان جاي .. يگول خطيه سهرانه وي الطفله

استغربت .. داتحجي عن عذاب لو غيرة ..
فرح .. روحي عمة نامي اني اكمل الباقي ..
سعاد .. هو كامل بس صبيله ..

راحت واني غسلت وبقيت گاعده بالمطبخ ..
طلع لابس عسكري .. وشكله حلو اول مرة اشوفه بهيج هيئة ويمكن مامنتبهة عليه ..

هو ديعدل بالنطاق مالته .. رفع راس

ة .. نصيت بسرعة وگمت اريد اصيله جاي ..
بقلمي_الكاتبة_شمس
_________________________
گال روحي انتي نامي اني اصب ..
رجعت القوري المكانة ..
گال اني رايح كم يوم وارجع ..
خليت فلوس عندي امي اي شي تحتاجوه خبريها ..
وها اياج تسوين شي من وراي واعتقد فهمتي قصدي ..

فرح .. لاتخاف بحياتي ماغلطت مو لأجل احد بس الاجل نفسي وتربيتي ..
عذاب .. دكافي محاظرة وروحي دخلي لاتبقين تفترين ..

ضجت منه حيل ..
كلما احاول الگي عذر التصرفاته يخليني اكرهة اكثر ..

رجعت للغرفه شفت شهد نايمة وتدور منا ومنا ع الممة جوعانة ..
سوتيلها ممة ورضعتها ..
تذكرت منار وشكلها ..
ليش هيج اجتني وتركض وراي شتريد مني ..
اشو حتى بصلاتي ومن اقرأ قرأن اذكرها وادعيلها ..
ليش دايما تجيني بأحلامي ..

گعدت الصبح ..لگيت خالتي وعمة سعاد مبدلات يردن يرحن الاهلي ..
اتمنيت اگلهم اخذوني وياكم مشتاقة الريحة بيتنا ..
وگعداتنا وبابا ومزحاتة وضحكاته ..
وتصنيف اخواني علينا ..
لو اكلات ماما وسوالفها ويانا تالي الليل ..
خنگتني العبرة ودخلت مااتحملت احد يشوفني هيج ..

بعد مارجعن من اهلي ..
سألت خالتي ع ماما .. گالت زينة لاتخافين وسألت عليج ومحضرة كليجة الج هاي دزته ..
اخذت الكليجة اشم بيها مو جوع وانما اريد اشم ريحتها بيها ..
گمت اكل بشراهة وهمتهم تضحك عليه تگول..
يمة ماضايگة كليجة لو لان من ريحة اهلج ..
حسيت ع نفسي واستحيت ..

بعد الغدا گامت عمتهم تجهز بغراضها تريد تروح .
عمو ابو عذاب ماقبل وگالها ابقي كم يوم ..
ماقبلت وگالت ..
الاولاد مناك معتمدين عليه ان شاء الله ع عطلة نصف السنة اجيب البنات واجي ..

اخذها معتز يوصلها ..
من رادت تطلع خلت بإيدي خمسة وعشرون الف وراحت ماقبلت اخذها بس هي اصرت وگالت اعتبريها هديه عرسج ..
فرح .. غير اشترتيلي هدية كافي ..
سعاد .. هذيج صوغة من الامام معليج بيها ..
بوستني ورادت تطلع ..
التفتت وگالت العمو وخالتي ..
هاي البنيه مبينة جوهرة خلو بالكم عليها ..
خالتي ضحكت وفرحت ..
بس زوج خالتي ماعجبه الوضع وضاج ..
گالتله .. احسن من ذيج بنتك الي ماكلفت تنزل تسلم على عمتها ..ليل ونهار بغرفتها ..
ابو عذاب .. غير سادس وتدرس فوگ لان هدوء ..
سعاد .. لاوالله ابد ماتعجبني بنتك وتعرفني ماعندي مجامله واعرف البنية من مشيتها ..
مو ذيج اختها شحلاتها ..

ابو عذاب .. يلة معتز بسرعة وصل عمتك خطية لاتتاخر ..
سعاد .. اي عبن ماعجبك كلامي گمت تزيح بيه .. رايحة خويه رايحة ..

طلعوا ومعتز كان يحاول يلمح او يحجي شي بس مانطيته مجال ماناقصني مشاكل ..
احاول ابتعد عنه مو خوف لان اني عندي ثقة بنفسي بس المقابل ماعندة ثقه والي سوته اختي خلتني اسكت ومااگدر ادافع عن نفسي ..

بقيت كم يوم متجنبة معتز ومن يريد يحجي وياي اطلع حجة واتهرب ..
-دايما يسألني اذا عذاب يأذيني او لا ..
فرح .. معتز الخاطر الله اتركني ولتدافع عني .. عذاب يشك بنفسة مو بس بيه ..
لهذا ماناقصني مشاكل ..

كانت تمارة تتنصت علينا اعتقد ..
راحت خبرت ابوها ..
واني كنت امسح بالمطبخ وخالتي تطبخ ..
اجتني دفرة بظهري ..

اريد اخذ نفس مااگدر ..
احس كلياتي وگفن ..
نفس المكان الي ضربني بي بلال من دافعت المنار ..
بس هالمرة اتأذيت اكثر ..

لزمتها بإيدي وشهگت ..
خالتي گامت تعيط .
-ليش هيج حرام عليك شمسويه البنية .
-اسأليها شمسوية .. وين ميروح معتز وراه .. وتتشكى اله حتى تغويه وتكسب تعاطفه ..
اختها وي الغريب وصخمت وجهنا ..
وهسا اجت هي تخرب بيتي وتخلي ولدي يتقاتلون ..

سمع معتز اجة يركض ..
-شنو هالحجي يابه مامقبوله منك .. فرح مو هيج . واصلا هي الي ماتقبل احجي وياها وتتجنبني ..

ابو عذاب .. لاتدافعلها .. خلي تولي من بيتي مااريدها
ام عذاب .. كافي والله اذا طلعت اني اطلع وياها ..
حجيت ع منار وغلطت وسبيت حتى اهلي وسكتت لان بنت اختي غلطت ومانطتني حجة ادافع بيها عليها ..
بس فرح لا .. متشوفها البنيه گاعدة بين اربع حيطان .
ضاع مستقبلها وحياتها وداتخدم بيكم وببنت عذاب ..
ومايوم شكت او حجت ..
اعرفك تريد تجيب بنت اخوك المايعه .. بس لو يبقى اخر يوم بحياتي ماادخلها بيتي ..

هم يتعاركون ويحجون واني الالم موتني ..
لدرجة صار عندي غثيان ..
اريد اگوم مااگدر ..
سندت نفسي ع الطاوله ووگعت من الالم وصرخت ..
اجت خالتي ومعتز ساعدوني ..
خالتي .. شبيج يمة ..
فرح .. خاله كلياتي بعد مااتحمل الحگيني ..
خالتي .. سودة عليه يمة .. گوم معتز بسرعة شغل السيارة خلي ناخذها ..
ابو عذاب .. گامت تتماوع كلشي مابيها ..
فرح .. حرام عليك شمسويه الك .. لو بنتك تقبل احد هيج يضربها ..
ابو عذاب .. تخسين اذا تجيبين بناتي الجن گ…
معتز .. يابة كاااافي .
خالتي .. گومي يمه عمج مايفيد بي الحجي . الي يحبه يحبه والي يكرها يعاديه ..
فرح .. لا خاله مااروح هسا بس ارتاح يروح الالم ..

دخلوني للغرفه .. گالت خالتي نامي وراح اخذ شهد يمي حتى ماتزعجج ..

لفيت نفسي بالبطانية وابجي .. من الالم وحرگة گلبي

.
ااااه يمة وينج .. محتاجة الحضنج الحرمتيني منه ..
هم گلبج يحس من ابجي لو اتأذة ..
هم تفكرين بيه وشلون عايشة وشيسون الي ..
بقلمي_الكاتبة_شمس
_______________________
بقيت اون الى ان هدات وغفيت ..
گعدت العصر ..
الم قليل بس احسن من الصبح ..

سألتني خالتي گلتلها زينه بس مشتاقة الامي اريد اشوفها ..
گالت اخذج ونروح ..
فرح .. لاخالة مااگدر من جهة عذاب يعصب .. ومن جهة حلفي ماادخل ذاك البيت بعد ..

خالتي .. لعد هسا ادز معتز يجيبها هي ومروة تشوفيهم فرح .. صدگ خاله راح تجيبوهم .. بس شلون مو ماما حادة..
خالتي .. واذا ياامي .. هو معتز يجيبها وعمج ماهو لليل يرجع ..

من سمعت راح تجي ماما فرحت ..
دخلت بدلت وبدلت الشهودة .. ماما مشايفتها من هي صغيرة وماتقربتلها ..
گمت خلطت كيكة بسرعة وخليتها بالفرن ..

بقيت مگابله باب المطبخ وگاعدة ..
منتضرة شوكت يدخلون ..
من انفتحت الباب ..
ودخلت مروة بالاول ..
فتحتها وركضت .. اول مرة افرح هيج فرحة بعد الي صار حضنت مروة وابجي وهي تبجي ..
وتضرب ع ظهري وتگلي .. ليش تركتني ليش بقيت وحدي بالضيم ..
( وعبالها اني هنا مرتاحة )
ماما رفعت العباية عن وجهها .
دموعها نازله .. ومنتضرة ردة فعل مني ..
فتحت دياتي الها وحضنتها قوي ..
اخذت اديها وبوستهم ..
سامحيني ماما .. مشتاقتلج هواي ..

معتز .. كافي بجيتوني . ادخلوا جوة وكملوا ..
حضنت ماما من ايدها ودخلنا ..
استقبلتها خالتي ودخلنا للصاله ..
رجعت فتحت ايدها ..
گعدت يمها وخليت راسي ع كتفها .. ردت احس بالامان
اريد ارجع مثل قبل صغيرة ومااريد اكبر واشوف الي شفته ..

خالتي گامت للمطبخ ..
همستلي ماما .. شلونهم وياج ..
گلتلها .. ماشيه ع الله ..
ماما .. اعرف زوج خالتج مايعديها اكيد ديأذيج ..
ابتسمتلها ورجعت نمت ع كتفها ..
مروة اجت من الجهة الثانية .. وحضنتنا ..

نزلت تمارة سلمت بس ببرود وگالتلها اعتذر خالتو مااگدر اگعد وياكم عندي دراسة ..
سمعت صوت شهد طفرت ..
دخلت للغرفة اجت وراي مروة ..
گعدنا شوية بالغرفة ..

گالت هم يأذوج لو يعايروج ..
فرح .. يعني شتتوقعين قابل راح ياخذوني بالاحضان .
مروة .. ع الاقل ذولي اغراب عنج . لو شايفه اخواني مسوين حصار عليه ..
من غير رنا الي مشغلتني خدامة عدها بحجة عندها طفل وماتگدر ..
بس ماما ماتنطيهم مجال زينه ..

فرح .. لزمت اديها اثنينهم .. اتحملي مراوي هذا قدرنا ..
بقت بس ماما عدنا اذا خسرناها معناها خسرنا حياتنا كلها ..متشوفين ماحجيت وياها عن اي شي ..
لان وضعها ماعاجبني وضعفانه حيل ..
مروة .. اذا هي كل يوم وگعة وضغطها مرتفع ..

شهد تناغي .. گلتلها خاله باعيلي اني كبرت وگمت اسولف ..
گامت مروة شافتها ..
مروة.. ياااي صايرة تخبل وكبرانة ..
شالتها مروة گامت تبجي استغربت ..
مروة .. يمة طالعه ع ابوها وحشية ..
فرح .. هههههه خلي يسمعج ياكلج بعيونه .
مروة .. الله يساعدج شلون عايشة وياه يخوف ..
فرح .. يمكن احنة نشوفه يخوف بسبب الصورة الي رسمتها النا منار ..
مروة .. يعني شنو قابل كذب مو عصبي وع اقل شي يعيط.
فرح .. اي صحيح ✔ هو عصبي واذا عصب ميشوف گدامة بعد .. بس هذي العصبيه جواها انسان مجروح ولاتنسين اختنا خانته وقللت رجولته واي واحد بمكانة هيج يسوي واكثر ..
مروة .. خير فروحة اشو تدافعين عنه ..بس لا…
فرح .. لا ابدا .. اصلا اكرهة ومااحب تصرفاتة ..
ولان بيوم كان زوج اختي مستحيل اگدر افكر بي . ولاهو راح يفكر بسببها ..
يعني اطمأني ..
مروة .. لعد ليش تداافعيله .. كلهم نفس الصنف .. شمدرينا ماهو الي وصل منار الهيج ..
واصلا مدام هو ضابط يعني يصير قاسي وماعندة گلب فشلون ترديها تحبه ..
فرح .. مهما يكون . اكو شي اسمه محكمة وطلاگ . اذا يأذيها تتركة بس ماتخونة وتنزل شيبات بابا بالگاع ..
وصارت السبب بموته ..
حتى اذا اعذرها ع كل الي سوته بس مااسامحها لان حرمتنا من بابا ..
وج لو ناكرة لو ممعترفه ولاتحجيها بعين وقحة وتگول بس مكالمات بينا ماملتقين..
يعني ماكو داعي تسويها مضلومة وهي الي ضلمت نفسها وضلمتها ..
اووووف الله يرحمها ليش تخليني احجي واني ابد مااحب احجي عليها من بعد ماماتت ..
گومي خلينا نروح الماما ..
ضجت من نفسي لان ذميتها .. ويمكن احلامي بيها اثرت عليه وصرت اخاف او اضوج منها ..

فتحت الباب صار مقابيلي عذاب فزيت .. هذا شجابه ؟؟
عذاب .. ها خير شفتي بعبع گبالج ..
فرح .. لا بس ..
عذاب .. وخري من وجهي اريد اطلع ملابسي وغراضي من الغرفه ..
طلعنا اني ومروة همستلي ..
وج هذا الوحش والماعندة كل ذوق تگولين عليه طيب .
وج رجلي تطابگن من گال اطلعن اريد بس افلت .
حتى سلام ماسلم گبر ..

رحنا للاستقبال ماما وخالتي منتقلات هناك ..
اخذت شهد الماما شافتها نزلت دموعها ..
خليتها بحضنها ..
گالت ولج هاي ممخليه شي من منار تشبهها حيل ..
خالتي .. وهذا الي مخلي عذاب ينفرها ..
ماما .. اووووف يدادة مااعرف شأگول الله لاينطي الكان السبب بمصايبنا هاي ..
خالتي .. لاتقهرين روحج .. الل

ه يرحمها وينتقم من ذاك الكلب ..
ماما .. مو گلتي عذاب لگاه شسواله ..
خالتي .. ماادري والله تدرين بعذاب كتوم مايحجي بس بقى يومين غايب ورجع معصب حيل ..
مروة .. خاف ذبحة .!!
خالتي .. لا مو الهلدرجة بس گال خليته يتمنى الموت ..
ماما .. الله يجازيه وكما تدين تدان . يجي يوم واحد يضحك ع عرضه ..
ماابرر البنتي بس لو مايقشمرها بسوالفه جان ماتقشمرت ..
همة يسولفون واجت ببالي رحاب ..
ياترى شنو سوالها . اتذكر معتز من گال انتقم منهم كلهم ورحاب وياهم ..
فعلا غامض عذاب وماينحزر شنو يطلع منه ..

راحن ماما ومروة بالليل رجعهم معتز بقن ع العشا بس احنه البنات وسوينا للولد العذاب وعمو وحدهم لان معتز طالع ..
وتمارة اكلت وي ابوها وعذاب مقبلت تگعد ويانا ..

دخلت ارتاح بعد مانضفت المطبخ ..
اندگت الباب حيل ..
فتحتها عذاب ..
تعاي اطلعي شويه ..
طلعت شفت خالتي وزوجها بالصاله ..
گاله يمة من باجر ارجع البيتي وفرح وشهد وياي ..
اني بقبت صافنة ومستغربه ..
شنو الي تغيير وليش ..
وشلون راح اعيش وياه ببيت واحد الوحدنا ..
باوعت الخالتي كانت رافضه ..
بس زوج خالتي .. گال احسن مايخرب بيتنا .. خوش قرار..
شنو من بشر ياالهي .. اكيد وصلوا العذاب غير كلام وخلوه يعزلني بذاك البيت ..
طبعا ابوها وتمارة يمكن ماقصروا بالزن عليه ..
هو هذا البيت وبي ناس وخالتي واحس روحي مخنوگة لعد هناك شراح يصير بيه .. يمكن يسويه سجن عليه وهو سجاني ..

يتبع .… ..

//// البارت العاشـر ////

من_سيدفع_الثمن ؟؟
بقلم_الكاتبة_شمس

ثاني يوم من الصبح سمعت صوت حركة وهوسة ببيت عذاب ..
شفت خالتي بالمطبخ ..
-صباح الخير خاله ..
-هلو ماما صباح النور .. همزين گعدتي .. تريگي حتى تجمعين غراضكم ..
بس الولد يكملون شغل تنتقلون ..

-ياولد ؟؟
-عذاب وجماعته دينصبون بالغرفة ويحملون الغراض الزايدة للمخزن ..

باوعتلها بتوسل وگعدت ع الكرسي ..
-تحجين صدگ خاله .. شلون راح اگدر اعيش وحدي .. وربي مااتحمل الي مصبرني وجودج يمي ..

سحبت الكرسي وگعدت مقابيلي ..
-باعي ماما .. الله شاهد شلون اعزج .. بس يمكن هيج احسن الكم .. صحيح اني مموافقه تبتعدين عني وانتي وشهودة بس وجودج هنا يأذيج اكثر ..
-خالة بس…
-اعرف قصدج .. واعرف عذاب عصبي وماينحمل . وهذا كله بسبب الي صار .. مااجبرج واگلج حبيه وخليه يحبج ..
بس عذاب اذا ماينسى منار والي سوته مايتغير ..
وراح يبقى يعذب نفسة ويعذبج ويعذبنا وياه ..
انتي هناك ماعليج بس بشهد وبالبيت مالج علاقه بي ولاتحجين وياه ..
واني كل يوم يمج وكل ساعة ..
بس دگيلي الحايط تلگيني يمج ..
ضحكت من گالت هيج ..
-اي شبيج .. حايط غرفتنا ع غرفتج وبس تحتاجيني تلگيني يمج ..
-يعني مكتوب عليه اعيش وحدي ؟؟
-ليش وحدج اني يمج وشهودة مالية عليج الدنيا .. اشو دتعتنين بيها اكثر مني ومن ابوها ..
واذا كلش من يلتحق عذاب .. اخلي امج ومروة يجن يمج وتغيرين جو وياهن ..
-فرحت من گالت هيج وزرعت الامل بيه ..

گمت اسوي ريوگ .. ذكرت شغله معتز ..
گلتلها خاله .. ترى معتز مثل اخويه .. ومرات يسألني اذا محتاجة شي وهذا الشي طبيعي بس عمو البارحة ضلمني والله مالي ذنب ..
خالة .. اعرف كلشي .. وحتى معتز اعرفة وفاهمة الي يصير .. بس مدام اكو شك بالوسط راح الكل يقلب الامور حسب عقليته وفهمة للامور ..
واني نبهت ع معتز يتجنب الكلام وياج ..
مو لأن ماعندي ثقه بيكم بس حتى مايجي كلام عليكم ..

تنهدت وصبيت جاي ..
بس اكلت اول لگمة .. دخل عذاب ..
بدون كلام ولاسلام .
اذا كملتي لمي ملابس شهد وغراضج ..
اني جبتلكم غرفه الكم وكملنا نصبها ..
بعد الغدا تدورين لهناك ..

هزيت راسي بمعنى اي ..
گال سمعتيتي شحجيت ..
-اي سمعت ..
-لعد متحجين تهزيلي براسج ..
غمضت عيوني .. يارب صبرني ..

هو صعد لفوگ واني كملت بسرعه ورحت اجمع غراضنا اني وشهودة ..
اندگت الباب ..
-شيلي شهد من سريرها اريد اخذة لهناك ..

گمت شلتها وخليتها ع سريري ..
اجة شال السرير وطلع ..

كملت جمع الغراض ..
رحت وي خاله نسوي غدا ..
گالت العذاب تعال تغدا ..
گالها مااشتهي ..
واني هم مااشتهي لان اكلت قبل ساعتين ..
خالتي .. لعد شويه وادزلكم الغدا للبيت ..
گال يله گومي حتى تلحگين ترتبين غراضكم مدام شهد نايمة ..
من گال هيج انقبض گلبي واحس رجلي ماتعيني امشي
شلت شهد بيدي وخالتي هم اجت ويانا ..

وصلنا للباب .. دخلت تمارة ..
-ها وين ..
تركنا عذاب وراح گدامنا للبيت ..
خالتي .. راح ينتقلون البيتهم ..
تمارة .. هففففف واخيرا راح نرتاح يعني .
خالتي .. احترمي نفسج ويله ولي للبيت بع بعدين حسابج ..
تمارة .. اريد اعرف منو بنتج هي لو اني .. شحصلتي من الي قبلها يله تدافعين عن هاي ..

خالتي .. وربي اذا ماتدخلين من وجهي لأسحلج سحل لجوة لاعبالج كبرتي ومااهينج او اضربج ..
الي يتجاوز ماله احترام عندي ..

دخلت لجوة وتشمر حجي ..
واني اصلا مو يمها واصلا خالتي ماسكتتلها ..
رحنا البيت عذاب ..
اول ماخليت رجلي اقشعر جسمي واحس روح منار دخلت وياي ..
ياربي عديها ع خير ..
اباوع للحديقه والطرمة عبالك مهجورات ..
حتى البيت تحسة حزين ومهدوم بعد الي صار ..
دخلت للمطبخ ..
مترب بس اثاثة نضيف وجديد ..
عبالك ماطابخين بي ولامستخدمي ابد ..

اول مادخلت صارت عيني ع غرفه منار ..
شفتها مسدودة ..
اشرلي ع الغرفه الي بصفها ..
گال هنا غرفتجن ..
روحي نوميها ..

دخلت تعجبت ولاتوقعت عذاب يشتري هيج غرفه الي ..
والله گلت راح ينومني ع الحصيرة ..
كان مشتري غرفه مال نفر واحد كنتور وسرير وميز مراية ..
وسرير شهد بصف سريري ..
ومشتريلها كنتور صغير الغراضها ..

خالتي تعجبت ..
هاي شوكت اشتريتهن اثاريك مو قليل وتضحك تحاول تلطف الجو ..

عذاب يفرك بلحيته ووجهة ..
مو اني اختاريتهن .. وصيت مازن صاحبي وگتله يختارهن ويحجزهن ..
ماتدرين اني دوام كنت وين الحگ الهذي السوالف ..

خالتي بقت تفتر بالبيت ..
فتحت غرفتهم القديمة ..
فارغة مابيها بس كومدي صغير ..
وعبالك صحراء جافة مو غرفه ..
سحب الباب من خالتي وسدها ..
اني دخلت نومت شهد بسريرها وطلعت ..
حتى انضف البيت ..

سمعت صوت تمارة من الطارمة ..
ماما تعالي اجة بابا ..
گلتلها خالة تمارة تريدج اجة عمو ..
گالت اني اروح ..
وانتي نامي للعصر اخابر تماضر وتجي تساعدج بالبيت وتنضفوه ..

طلعت وتركتنا وحدنا ..
عذاب .. روحي نامي لو ترتبين غراضج ..
اني طالع عندي شغل شويه وارجع ..
طلع وقفل باب المطبخ وراه كالعادة ..

بقيت صافنة بالبيت ..
احس كل ركن بي ينطق بأسمها ..
بقايا منار موجودة بكل مكان ..

المشكله شكو شغله مختارتها هي ..
بايعها .. البيت شبه خالي من الاثاث ماعدا المطبخ كامل ..
لان كانت ماتحب المطبخ والطبخ لهذا يمكن بعدة اثاثة جديد..
بس ديكور الصاله وترتيب الاستقبال كان ع ايدها واختيارها ..
لهذا عذاب متخلص من كل اثر الها بالبيت ..

_______________________
دورت منضفات وماسحة ..
ورحت طلعت بجامة وبلوزة لبست ..
وبلشت من فوگ تنضيف وغسل ..
فوگ اكو مخزن مااعرف غرفة متروكة بس مقفوله ..
حاولت افتحها ماگدرت ..
فتركتها وبديت انضف من الدرج لجوة ..
غسلته كله ..
ونزلت للصاله نضفتها بس غرفتنا مسحتها لان شهودة نايمة ..
ردت ادخل الغرفة منار وعذاب انضفها وترددت ..
تالي دخلت .. بعدني بس فتحت الباب سمعت صوت وراي ..
شعندج داخله ..
التفتت بسرعة . هااا اريد انضفها ..

بقى يباوعلي دور باوع للبيت ورفع راسة للسطح ..
هاي صعدتي فوگ ..

-اي غير غسلتة البيت كله تراب ..
فرك لحيته ووجهة .. باعي يابنت الناس ..
اذا تردين تعيشين ومااذيج .. لاتعاندين ..
من اگلج على شغله لا تسويها ..
الطابق الفوگ والطارمة ممنوع تطلعيهن ..
عندج هذا البيت كله طاردي بي ..
وهاااا هاي الغرفة فارغة هم مالج دخل بيها ..

-يعني شنو راح تحبسني ؟؟
دار وجهة وراح للاستقبال .. شتفهميها افهميها هذا العندي وروحي صفي المسواگ خليته بالمطبخ ..

نطاني ظهرة وراح ..
ساعتها ردت اعيط وافرغ كل همي عليه ..
شايف نفسه !!

كملت البيت مسح
ورحت للمطبخ ..
صفيت المسواگ .. وطلعت اللحم قطعته وجبات وخليته بالمجمدة هيج كانت ماما تسوي ..

شفت جايب دجاج منضف بس ممفتوح بطنة .. بقيت صافنة هاي شلون راح افتحها ..
الصراحة بحياتي مافاتحة دجاجة ..
صح نشتغل ببيت اهلي ونطبخ ونساعد ماما ..
بس هيج اشياء كانت ماما تسويهن ..

قررت احاول واجرب حتى لو تلعب نفسي او مااعرف بس مااخلي عذاب يشمت بيه لو يحجي عليه ..

جبت صينيه وخليتهن بيها ..
وگعدت بالگاع .. البيت ممفروش والگاع باردة واني كنت اغسل بالبيت ومبلله ..
حسيت بالبرد . بس كابرت وبقيت گاعدة احاول وياهن ..
فتحت اول وحدة ونضفت احشائها والحمد لله عدت ..
الي يشوفني يگول داخلة عمليه جراحية ..
مو هي دجاجة افتحها ..

اوووف الله يساعدج ماما لعد شگد كنتي شايله عنا ومتحمله ..
باوعت النفسي انقهرت ع حالي ..
هاي وين صفى بيج الوكت فرح ..
لابسه دشداشة وجواها بجامة ..
ولافه الحجاب ع راسي ..
وگاعدة بوسط المطبخ والتنضيف ..
والمسواگ حولي ..
الي يشوفني يگول بالعلوة گاعدة ..
من غير صوت شهد اسمعه يبجي ومااگدر اگوم واترك الي بأيدي ..
صدگ انهضمت واحس روحي تريد تطلع ..
حصرتني البجيه واختنگت ..
اندگت باب المطبخ ..
گمت اريد افتح ..
مقفوله ..
باوعتلي خالتي من الشباك مال مطبخ هي وتماضر ..
بقيت صافنه بوجهن والحسرة بعيوني ودموعي ..

اجة عذاب . درت وجهي ماردت يشوف ضعفي ..
گال متسمعين شهد تبجي ..

رحت للسنگ دااغسل ايدي ..
دخلت خالتي وتماضر ..
خالتي .. ليش هيج يمة مو گتلج انتضري خيتج من تجي تساعدج ..
فرح .. ماعندي شي گلت خلي ابلش بالبيت ..
تماضر اجت بوستني ..
وگالت .. شبي الحلو ضايج اكو شي صاير ..
من گالت هيج مااتحملت نزلت دموعي ..
حضنتني وگالت ..
ابجي حبيبة فرغي لاتستحين اني اختج الجبيرة فرغي حملج بحضني ..
فعلا كنت محتاجة احد يگلي ابجي وفرغي همج ..
لزمتني من وحهي وگالت ..
روحي غسلي وبدلي ملابسج مبلله مي ..
وشوفي شهودة شبيها ..
واني راح اصفي للمطبخ هنا ..

خالتي .. روحي يمة واني جبت الغدا راح احميه بين ماتكملين ..
طلعت من المطبخ ..
وسمعت تماضر تگل الخالتي ..
يمة خطيه هاي البنيه برگبة منو ..
درت وجهي ومشيت ماردت اسمع اكثر وانقهر ع روحي وقدري المكتوب ..

دخلت للغرفة شفت اولاد تماضر ديسكتون بيها وعي تباوعلهم وتضحك ..
اروح فدوة الهاي الضحكة وج من اشوفج وجهج انسى كل همومي ..

بدلت وكملت ..
وبدلت الشهد وطلعتها ..
خليتها يم خالتي ورحت اخذ الملابس للحمام ..
باوعت اكو مخزن صغير للغساله .
كانت اوتماتيك ومثل الغرفة مسوي خاصه بالغسيل والنشر ..
اووووف يمنار مدري احسدج ع الي كنتي عايشة بي ورفستي بيدج ..
مدري اصدگج واگول هالامور والاثاث والبيت والدلال كله مايسوة بلا المعامله الحلوة والكلمة الطيبه ..

خليت الملابس بالسلة وطلعت ..
شفت تماضر كملت الدجاج وداتصفي بالمطبخ ..
جابت خالتي الغدا وگالت يله تعالو تغدوا خلته ع الطاوله اجة هو گعد ..
ترددت اگعد بس خالتي اشرتلي وانجبرت اگعد ..
بقيت انقش وياه ..
وهو مبين جوعان .. كان مامهتم ودياكل ويسولف ويتشاقى وي ابن تماضر وبنتها ..
ويصنف عليهم ويتمازح ..
يعني هذا الوجه العابس هم يعرف يتمازح ويضحك ..

كملنا اكل .. گال عذاب .. تماضر اليوم ابقوا يمنا تعشوا راح اطلع المنقله ونسوي مشاوي ..
تماضر .. مااعرف خلي اخابر ابو تمار واشوفه ..
اتصلت ع زوجها وگلها اكمل شغلي وامر بيكم ..

گالت اي

راح يجي بالليل .
باوعلي عذاب وگال فرح ..
فزيت من مكاني . معقوله وياي ..
طلعي لحم ودجاج مسحوب جبت ..
خلي اقطههن واتبلهن من هسا ..

فرح . لااني اقطعهن اذا تريد ..
عذاب .. لا هذا اختصاصي المشاوي انتي بس نطيني بهارات ..
فرح .. مااعرف اذا اكو بالبيت بس راح ادور ..

تماضر تباوع تضحك .. اشرتلها شكو دارت وجهها ..
وعيت ع روحي ..
فعلا هذي اول محاورة بينا بدون عياط وتفاهم ..
اكيد هذا الشخص بي انفصام .. كل شويه بحاله ..
خالتي .. لايمة ماكو هنا لان المرحومة ماعندها واهس بهيج شغلات ..

عذاب من سمع كلام خالتي ضاج ..
اني طالع بالسيارة اجيب واجي .. بعد اي نوع بهارات تردون ..
طفرت من مكاني بلا وعي ..
كركم كاري بهارات برياني وگص وتشريب وبهارات جدر

صفن بوجهي .. گال راح تفتحين محل بيهن ..
سكتت ..
گالت خالتي .. فدوة للنادرات ولك يمة انت شعرفك بالبيت ذني البهارات المفروض بكل بيت موجودات ..
بقلمي_الكاتبة_شمس
___________________
زين تماضر دزيهن الي برساله بين اطلع السيارة ..
كتبتهن تماضر ودزتهن ..

گمنا اني وتماضر رتبنا البيت وفرشناه كله والصاله مابيها اثاث هواي ..
فارغة .. خلينا مدات داير مدايرها .. وجبنا بوفية وتحفيات من الاستقبال خلينا بيها ..
گالت بقى بس التلفزيون ..
من يجي عذاب اگله ينصبه الج بالصاله حتى تتفرجين عليه ..
كملنا كلشي بين مااجة عذاب ..
قطع اللحم وتبلى .
واجة زوج تماضر ..
وطلعوا المنقله وبدأ يشوون ..
اني گمت اسوي مقبلات وهذي هوايتي من كنت عند اهلي .. تفننت بيهم ..

كملنا وفرشنا السفرة بالصالة ..
عذاب ماكان يقبل اگعد يم واحد .. بس هنا مامانع يمكن لان يعتبر بيته وعيب مااگعد او شي ثاني مااعرف .
بس لامنعني ولاخزر ..
زوج تماضر ياكل ومتعجب .. يگلي هي مقبلات شنو هالنفس الي بيهن ..
بعد شتريد استاذ عذاب ..
ويضحكون .. الا الوجه العابس ماكلف نفسة ويجامل شويه ..

تماضر .. عذاب البيت فارغ مابي اثاث لو تشتري كم حاجة اله حتى يترتب ..
عذاب .. اي هو هيج . اني ردت اغير الديكور لهذا بعتهم كلهم .. بس افرغ اشتري قنفات للصاله والاستقبال واغير الالوان ..
تماضر .. خلي فرح تطلع وياك ع ذوقها ..
عذاب… لا اني اشتري ماكو داعي .. حجاها بنتر ..
عرفت متضايق لان الاثاث السابق من اختيار منار كان ..

خالتي راحت لان عمو اجة وگالت يضوج اذا ميشوفني بالبيت واخذت وياها شهودة گالت خاف تضايفج ومتخليج تاكلين ..

بعد العشا اخذتني تماضر وگعدنا بالغرفة ..
تماضر .. باعي فروحة .. الفرق بيني وبينج هواي وعندي تجارب اكثر منج .. واحسبيني اختج ولو احنه اخوات ان شاء الله..
فرح .. الله شاهد انتي اكثر من اخت الي ..
تماضر .. حبيبتي وانتي هم .. بس اريد اگلج شي وسبق وان گتلح ..
عذاب مثل الاسد الجريح… كل الي يشوفه گدامة يهاجمة ومايبطل الى ان يشفى ..
فرح .. والله الي اشوفه مايهاجم بس فرح .. تگول يطلبني ثار ..
ضحكت وگالت .. ماانتي لبوة هالاسد وبيدج تشفيه وترجعيه احسن من قبل ..

فرح .. يالبوة سواني بزونه كل شويه ويدمغ بيه ..
تماضر .. هههههه والله عندج سوالف ..
بس وراكم مشوار طويل ولازم تتحملين .راح يشك ويقفل عليج وهذا الشي حسيته من اجيت .
ومايخليج تطلعين ..
وكل ضنه انه اذا سوة هيج راح يحمي نفسة وكرامته .
بس مدام هذا الشي يريحة اصبري واتحملي .
واكيد من يشوف طيبتج وادبج راح يراجع حساباته واني وياج ومااتركج .
وراح احجي وياه هم .. بس المهم لاتضعفين گدامة وخليج قويه ..
اختنگتي .. ادخلي للغرفه وابجي وفرغي همج ..
خلي سجادتج وصلي واستغفري وادعي الله يعدي محنتج وصدگي من تشكين الله ترتاحين .. لأن الشكوى الغيرة مذلة ..
ويمكن ماتصدگين اذا اگلج عذاب مو هيج عذاب صار انسان ثاني بعد مااتزوج منار ..
ولو ميجوز الحجي ع الميت ..
بس منار كانت تخليه يتعصب ويضوج بتصرفاتها ..
ماگدرت تحبه ولاتتأقلم وياه او هي ماحاولت تحبه .
لان هو كان يحبها وتعرفين شگد حارب عمودها ..
ولو هذي اسرار بيوت وميجوز اطلعها ..
بس انتي اختها ..ولازم تعرفين .
كان يجي من بيته معصب ومحترك ..
يفرغ عصبيته علينا . ويعيط ع امي ويگلها روحي احجي وياها وعقليها ..
وكم مرة اني حجيت وياها .. بس كانت ماتسمع لو تتذمر وهواي سوالف مو وكتها ..

الرجال لو وحش مثل ماتگول هي جانت ..
المرة بيدها تروضه وتخليه يحبها ويعشقها بعد..
مااگلج حياتي مابيها مشاكل ..
بس كان شعاري الوحيد الكتمان .. لليوم مااتعاركنا ورحت گلت الاهله او اهلي ..
عرگنا ومشاكلنا تبقى داخل بيتنا .
وهذا الي كبرني بعين زوجي ..
لليوم ماحجيت مشاكل اهلي وخصوصياته الزوجي ..
ولحد الان مايعرف شي عن شغله منار والي صار ..
ماعدا انها ماتت بحادث وتزوجج عمود بنته ..
هذا الشي الي ماسوته منار وكانت طايشه واذا صارت اقل شغله بينهم احسبي اهلي واهلج عرفوا وكبرت السالفه ..

ولو دوخت راسج بس اكيد راح تحتاجين هالامور للمستقبل .
-فعلا كلامها فادني وگمت اشوف الامور من غير منضور وراجعت كلام منار وكل مر

ة تجي تشكي وتبجي بيها ..
مايوم ذكرت محاسن عذاب او شنو سوالها وسنو اشترالها ..
الا وقت ماتتباهى گدام رنا وبنات عمي ..
اوووف الله يرحمج ويريح بالي من التفكير لان بعد مااعرف منو الظالم ومنو المظلوم ..

مرت الايام واني احاول اتأقلم وي الوضع والبيت ..
صار واهسي بي ..اشغل روحي بالشغل والتنضيف لو اغير الديكورات كل فترة شكل ..
وخاصه بعد ماعذاب وصى ع قنفات وتحفيات ..
بديت اهتم واعتني اكثر ..
وخالتي من تدخل تنبهر بالترتيب والنضافه ..
من عذاب يداوم ..
يخليني يم اهله ..
ومن يرجع ياخذنا للبيت ..
شهودة يوم عن يوم تكبر وتحلى اكثر بشكلها وسوالفها .
حتى ابوها غيرته وصار يتقربلها ..
لان كانت تناغي وتسولف وياها وتضحك وهو يلاعبها
بس فترة انشغالي عنها ..
من يشوفني اجيت يغير ملامحه ويگلي هاج سكتيها او اخذيها ..
كأنه يحاول يگلي مامهتم او يكابر ..
بس اني اعرف لهفته عليها من اروح المطبخ اطبخ او اشتغل ..
وهو يستغل هالشي ويروح يشوفها ..
او بحجة خليها يمي وخلصي شغلج ..
واني اختلس النضر واباوعلهم ..
فعلا ينگلب انسان ثاني وياها ..
وساعه يبقى صافن عليها وتدمع عيونه او يححي وياها وكأنه يحجي وي نفسه ..

اما علاقته وياي ماتغيرت ابد وع اقل غلطة يعيط من غير تركي وحدي وقفل الباب عليه بالساعات ..
الى ان احس راح اطگ واموت من القهر ..
فأدگ الحايط ع خالتي تجي يمي .
عندها نسخة من المفتاح خاف يصير شي بغيابه نخلي نسخة عندها ..
دايما تواسيني وتگلي شبيدي عليج وهذا راسه يابس ومايسمع كلام ..
وساعة تتعذر مني وتگلي اني السبب بحبستج هاي .عبالي انقذج من اخوانج .
بس طلع ابني مايرحم اكثر منهم ..
من اشوفها تلوم نفسها هيج انقهر عليها واگلها لاخاله هذا مقسوم عليه وقدري ولازم اتحمل ..

بيومها .. انتضرت عذاب وسويت عشا ..وهو للعشرة وماجاي ..
رحت للغرفه تمددت واخذت غفة .. فزيت عبالي اجة ..
باوعت ساعة وحدة بالليل ..
ياربي وين راح مو عوايدة يتأخر ..
اول مرة اخاف عليه هيج واقلق ..
وماعندي وسيله غير الحايط ..
دگيته حيل ع خالتي ..
واسمع صوت عمو يعيط.
يمكن نايم وفززتهم ..

شويه واجت خالتي للبيت وياها معتز ..
خايفه ومرعوبه .. هايمة شبيج شسوالج عذاب .

-خاله عذاب لسا مااجة ومو عوايدة كل مرة اذا اتأخر للتسعه ويرجع ..
معتز .. ماگالج وين راح ..
فرح .. هو طلع المغرب ومارجع وتدرون بي لايخبرني وين رايح ولا منين اجه مااعرف اي شي ..

معتز .. گومي جيبي شهد وغراضها وتعالن البيتنا واني راح اخابر عليه او جماعته واشوفه وين ..
بسرعة لبست واخذت شهد وغراضها وخالتي قفلت الباب ورحت البيتهم ..
طبعا اخذت المقسوم من زوج خالتي . واتهمني بغيابه
وگال ..
فگر ضيعتن الولد مني . اكيد طلباتج الماتخلص هي الي طلعته وخلته مايرجع .الله اليعلم شو شصارله والله ماارحمج اذا مارجع ابني ..
كنت اني المتهم الوحيد بغيابه ..
وعبالك عذاب طفل وطلعته وضاع ..
وعساس هو يسمع كلامي اذا منعته من الطلعه ..
خالتي ومعتز سكتوه وگالوله مو وكت هالحجي والبنيه شبيدها ماتعرف عذاب وراسه اليابس ..

معتز .. هو ماخذ سلاحة ..
فرح .. اي هو متعود دايما ياخذة بعد مااعرف ..

الكل قلق ويتصل .. وخالتي تبجي ..
واني ادعي يرجع ع الاقل الخاطر بنته خطيه تتيتم من الاب والام وهي صغير ..
اوووف اسم الله عليه .. شبيه گمت اولف للولد ..
معتز اتصل ع عمامة وولد عمة وانگلب البيت كله بنص الليل ..
حتى تماضر وزوجها اجو..
والكل يتصل وماكو ..
الولد سووها وجبات وطلعور يدورون عليه وعمو واخوانه راح للمركز يبلغون ..
واحنه بقينا وحدنا بالبيت وحدة تواسي الثانيه ..
شهد من الهوسة بس تبجي ..
اخذتها ودخلت للغرفه ..
اتباوعتلها . ودعيت الله . خاف فد يوم دعيت عليه بگلبي او دموعي دعت عليه .
ياربي لاتستجيب الدعواتي الخاطر بنته .
صغيرة وتتبهذل بهذي الدنيا ..
بقينا للصبح گاعدين وماكو خبر ..

يتبع ..…

حبي اذا تريدني معايده 👇🏻🌚

•كل عام وأنت قمري🌙
•كل عام وأنت أول أفكاري😎
•كل عام وأنت مصدر سعادتي😻
•كل عام وانت روحي🙈
•كل عام وأنت بألف بألف خير حبيبي..🥰
ان شاء الله تحقيق الأماني وان شاء الله ننجمع وتصير قسمتنا بالحلال😇🤲🏻❤️



وهذيني صفحات اللي اعرفهم👇🏻 يرسمون
واللي تعرف ترسم او تعرف بتصميم فراسلو هالبنوتة عل يوزرها🙃

#ملوكه