/// البارت الثالـث ////
من_سيدفع_الثمن ؟؟


كنت داامشي ع دخان اسود وحار .. وكنت حافية .
وفجأة حسيت الدخان التف علية وصار ع هيئة شخص وعند ايد تخنگني ..
مااشوف بس سواد .
اريد اتنفس مااگدر ..
گمت ارافس واريد ابعدة عني مااگدر لان مايلزم مجرد دخان ..
حسيت روحي دتطلع ومحد ينقذني ..
فزيت بسرعة لگيت نفسي مقرفصة بالمطبخ يم الثلاجة
وماخذتني النومة ..
شلون نمت هنا وشنو جابني هنا ..
وهذا شنو الي خنگني اول مرة يصير بية هيج ..
سمعت اصوات ..
گمت شفتهم گعدوا كلهم ..
البيت مگلوب وكل واحد ماخذلة جهة ونايم بيها ..

نزلت دموعي .. سودة علية بابا ..
ماتوقعت كلها تلتم ببيتك بموتك ..
كنت تگول احب الاعراس والافراح .. لان تجمعنا كلنا .
بالايام العادية مانلتقي ولاننجمع احنه واهلنا ..

هاي اليوم كلها مجموعة وراح يطلعون للدفنة مالتك ..
الله ينور قبرك يغالي ويسهل عليك السؤال والجواب ..

سمعت رنا .. گالت حظري الجاي والريوگ للجنانيز لان راح يطلعون قبل الاذان ..

گمت خليت القوري الكبير ع النار ..
وطلعت بيض سلگت . والباقي گليتة ..

بديت اسوي ريوگ الاغلبيه بس شربوا جاي ..
محد اله نفس ياكل ..
ليش هو البيت بعد بي طعم وواهس حتى نعيش وناكل ونشرب بي ..

من اول ليلة غياب خنگني وصار اظلم ..
طلعوا الزلم كلهم للنجف ..
وبقينا احنه ..
الكل يأمر وينهى وتگول البيت الهن ..
بين الشغل والطبخ .. وتعاي وروحي ..
حتى ماگدرت الطم لو ابجي ع بابا ..
اريد احزن واطلع قهري مانطوني مجال ..
وبلال نبه علينا مايريد اي كلمة من عدنا اني ومروة .

طلعت ورى البيت اطبخ التشريب ..
واسمع صوت الملة تقرأ عن الابو…
اول نعت عن الابو ..
مااتحملت ذبيت كلشي من ايدي وبقيت الطم وابجي ..
اي والله يابة مااريد اعيش بلياك ..
انت خيمتنا وبعدك بقينا بلا سند وخيمة ..

سمعني البنات اجن گومني لجوة ..
شفت امي گبالي ماتحجي بس صافنه والدموع تنزل وحدها ..
وعبالك بعالم ثاني ..

صاحني عماتي يمها ..
رحت تقربت منها وحضنتها وابجي ..
بس هي مابينت اي ردت فعل .. وعبالك مو بنتها ..
محتاجتها تواسيني واواسيها ..
گمت بسرعة للغرفه مااتحملت ..

شوية واجت خالتي ..
گالت وين ملابس منار والطفل ..
راح يدخلوها عمليات ..
الطفل مابي نبض ..
گلتلها ماعدها ملابس اجت هيج .. بس غراض الطفلة هاي ماما مجهزتها ..
طلعتلها كم دشداشه مني وملابس داخليه واحتياجات ..
وملابس الطفله انطيتهيا ..
وراحت ..

للنسوان كلها تسأل شكو ..
همزين خالتي گاالتلهم منورة من قهرها متخربطة وراح يسولها عمليه ..

بقيت بقلق ومنتظرة .. صحيح شايله عليها بداخلي بعد الي صار ..
بس مهما يكون اختي وبعد مابيه طاقة افقد شخص ثاني من اهلي ..
مصاب بابا وحدة كسر ظهرنا ..

اتصلت خالتي ..
گالت ولدت منار ..
والطفله بالخدج طلعوها تعبانه ..
وتماضر بقت يم منار ..

فرح .. وعذاب اجه شاف بنته ..
خالتي .. لا مايقبل .. معاند .. وهو اصلا بالنجف شيجيبة
سديته من خالتي ..
واتصلت ع تماضر .. طمنتني ع منار وگالت نايمة لسا

مافكها البنج .. من تصحى اگلج .
______________________
مر يومين وخلصت الفاتحة وكل واحد راح ع بيته ..
اجة بلال وخلة قوانينة ..
بلال .. باعن ولجن .. مدرسة وجامعه بعد ماكو .. انسن
وانتي جيبي الموبايل ..
بعد تحلمن تشوفن الباب ..
هذا گبرجن وتعيشن خدامات هنا ..
وذيج العار بس تطلع ..
ماابقيها هنا ..
نشوف رجلها شيقرر .
اذا طلگها ..
هي وبنتها يطلعن من البيت وماابقيهن دقيقه وحدة ..

فرح .. وين تروح خطيه وبنتها صغيرة .. هي خطأت بس مو تطردها عاقبوها غير هذا العقاب ..
واحنه شنو ذنبنا تحرمونا من الدراسة شسوينا ..

جلال .. انجبي لج كلجن مثلها . باجر تجيبللنا العار اذا عذاب ساكت فمحترم عزانه ..
راح تشوفن شلون نصير علج بحلوگ الناس من وراجن ..

بلال .. يله ولن منا لا بعلي اكسر راسجن ليل مع نهار احترمن وامشن عدل احسن مما اسود عيشتجن .

فرح .. نزلت دموعي .. گتله يابه وينك تعال شوف حالنا بعدك ..
بلال ضربني وسحلني للغرفه ..
ابوجن الي كتلتنا غير .. بسببجن راح ..
ومثل ماطلعت روحة اطلع روحجن ..

بقيت ابجي ومروة مگابلتني وتبجي ..
وتدعي ع منار ..
عطت بيها .. لاتدعين ولج هي بشدة هسا .

كل هذا وامي معتكفة بغرفتها وماتقبل تطلع ..
حتى النسوان الي تجي تعزيها ..
تدخل للغرفه تسلم وتطلع ..

من اخذلها اكل ماتقبل وتگول كلشي مااريد منجن بس خلني وحدي ..
بس من يجي بلال يأكلها تاكل من ايدة ..
فگام يصب غدا هو وياها وياكلون من يجي من الدوام ..

بعد ماطلعت منار من المستشفى ..
رتبتلها غرفتنا والسرير مالتي لان هي عمليه ..
والطفلة جابتها خالتي وعلمتني شلون ارضعها والبسها ..

فرح .. خالة ابقي هنا اني مااعرف واخاف يصير بيها شي ..
خالتي .. خالة انتي ادري بيج سباعية لاتخافين ..
بس ابو عذاب مايقبل جان اخذتها وياي ..
وعذاب هم .. زين خلوني ابقى وياهن كم يوم بالمستشفى ..

خلي يمر كم يوم وتنحل السالفه وناخذها ..
سلمت على امي وطلعت ..
وخلت المسؤولية كلها عليه ..

بقيت حايرة شأسوي ..
طفله ولحمة حمرة وحتى اسمها مااعرفه ولاسألت خالتي شسمتها ..
مروة تلعب بيها وتگول وج فرح شوفيها عبالك ملاك تخبل وبيضه همزين ماطلعت علينا حنطاويه طالعة ع امها بيضه
گالت خلي نسميها ملاك ..
على مانعرف شنو اسمها ..
فرح .. لا من اني صغيرة احب اسم شهد .. نسميها شهودة ..
باوعت المنار .. گلتلها شنو اسمها .
منار .. شعليه بيها شتسموها سموها .. وغمضت عينها ..

اووووه وهاي هم بعالم ثاني .. والظاهر كله طاح ع راسج يفرح ..
بقيت بالنهار شغل وبيت لان رنا هاي ايامها وماتگدر ..
وبالليل سهر وي الطفله ومااغمض ابد خاف يصير بيها شي وابتلي ..

المشكلة بحياتي ماشايله طفل ولااعرف شلون يشيلوه
حتى الممة اخلي رقم مي ومكيالة حليب ..
وكلما تجوع وتبجي انطيها ممة لان مااعرفلها ..
وهي ماتنام الا تشم ريحتي تعودت عليه ..

صديقاتي زهراء وسهير .. بعد مااستفقدوني ..
اجو لان غبت عن الجامعه ومحد يعرف اخباري وموبايلي مغلق وعند بلال ..
من سمعوا بوالدي توفى واخواني بطلوني ..
تخبلن ..
وگالن احنه نحجي وياهم .. بس ماقبلت خفت اخواني يحجون شي وياهن وانحرج ..

زهراء يمي ببغداد .. گالت اي شي ترديه گولي لاتترددين واني مااقصر عنج ..
سكتت وماعرف شأحجي وشأكول ..
لان الي صار بينا لايتسولف ولاينحجى ..

مرت الايام واني بين الطفله وبين البيت ..
ومروة خطية بس تبجي وتون من القهر ..
صحيح اني احاول اكابر واصير قويه عمودها ..
بس داخلي يتگطع من الالم ..
ومابيدي شي بس اصبر وعسا وان ينحل كلشي ..

اما منار نافرة بنتها ماشالتها ابد ولاشافتها ..
حتى من فتحت الخيوط .. عايشه بعالم ثاني ..
مثل مسجون ويعد ايامة ومنتظر الحكم شوكت يصدر ..

امي هم نفسها .. مريضه دايما لو تسولف وحدها وتبجي .. لو نايمة ..
ومن اخذلها الطفله تعيط بيه وتطردني ..
ورنا تباوعلها بأشمئزاز عبالك بنت حرام ..
وبيت خالتي لااجو ولاسألوا ..
وعذاب حتى ماشاف بنته..
وماعندي موبايل اخابرها ..
وبقيت ع هذي الحالة ..
الى ان اجة عمو وگال دزينا طارش العذاب ..

بعد يومين اجة عذاب واخوتة وابوه ..
گعدوا وي عمامي ..
ابو عذاب رجل خالتي گال ..
مايشرفنا بعد هيج مرة الابني ..
الي تخون بالتلفون الله اعلم شتسوي من رجلها ماهو ..
والله اني من البداية ماهاويها لان مو من ثوبنا ومغرورة بس لو ماعذاب قاتل نفسه عليها ماوافقت..

عمامي واخواني ساكتين وماحجو ..
بس عمي گال البنية خطأت وتندمت وبينكم بنية ..
سكتة عذاب وگالة ..

شتعرفني يعمي اخذ فضالات غيري لا والله ..
المقر كله يخاف مني ويعرفون مااقبل بالغدر ..
واسم عذاب اذا مر عليهم تهتز شواربهم ويوكفون الي ..
تريد تالي عمري ارضى بمرة تحب غيري وابقيها ع ذمتي ..

.
شگالولك گو….. ..
اني ماردت افضحها وراعيت حزنكم وگلت الشغله بينا تبقى بس اهلها فضحوها وهاي مو مشكلتي ..
من قبل ماتنفضح شمرتها على اهلها ..
تريد بعد ماالدنيا كلها درت واهلنا وناسنا ..ارجعها واصير علج بحلگ العالم ..
لاتخسى والله.. لا منار ولاغيرها تستغفلني ..
واذا ماكتلتها بساعتها ودفنتها مو خوف لا ..
لان ببطنها طفل ..

وهاااا اذا خايفين من يراعي الطفله ..
اني اطلگ والبنيه تبقى يمها ونفقتها توصلها للباب ..

راد عمي يحجي .. بس مانطوها كلمة وگالهم ..
انتضروا كم يوم وتجي ورقتها وهسا اريد گدامكم ارمي عليها الطلاگ ..
وحقوقها كلها توصلها ..
وذاك العار اني وراه وراه مااتيهة ..
حتى لو هي حمتة وكسرت الموبايل حتى مااعرف شمصخمة وياه ومنو هو ..
فلاتنسى السيم كارت عندي ..
واعرفه اعرفة لو وي مئة رقم ..

صاح عمي منار .. لبستها عباية ماما ..
وگفت بالصاله ماقبلت تدخل الاستقبال ..
اجة عذاب گابلها ..
وعيونة دم من الغضب او الدموع او القهر مايتفسرن ..
گالها انتي الخسرتي مو اني ..
كانت الناس كلها بكفه وانتي بكفه وهسا صرت كابوس واريد اخلص منه ..
منار انتي طالگ طالگ طالگ ..

وهسا نترخص احنة .. يله يابة ..
طلعوا ..
منار ماتحملت بسرعة وگعت ..
شلتها للغرفه ..
واجت مروة نقلتنا الكلام كله الي صار بينهم ..
واني اخزر بيها وماكو ماتسكت ..
منار بس ساكتة ..
واني بحظني شهودة ارضعها ..
اندفرت الباب بسرعة ..
ودخل بلال لزمها من شعرها وشبعها كتل ..
عار فضحتينا الله ياخذج ..
ارتاحي راح يطلگج وذاك العار انهزم شحصلتي غير صخمتي وجهنا ..

عمي سحبه ..
وولد عمي هم ينهدون عليها ويغلطون .. ويگلون حرام وحدة مثل هاي تعيش ..
بسرعة شلت الطفله وگلت المروة اخذيها بغرفه امي ..

گتله عمو مو هيج عمليتها بعدهي ماملتحمة زين ..
عمو علي گال .. بعدج تدافعيلها مو بسببها راح تعنسن ومحد يدگ بابجن بعد ..

سكتت وماحجيت ..
ردت اشوفها شبيها دفعتني .. وخري عني خليهم يقتلوني ..
مااريد اعيش بعد ..

طلعوا عمامي والولد كلهم بالاستقبال ..
وقرروا بس تتطلگ يزوجوها الاقاربهم بالعرب ويخلصون منها ..

هي من سمعت تخبلت وگالت والله انهزم لو اقتل روحي مااتزوج بعد مو كافي حطمتوني ..

رحت الماما وسولفتلها ..
گالت همة اعرف لاتتدخلين .. مو زين ماكتلوها ع سوايتها .. خسرت ابوكم بسببها بعد شتتوقعين اسوي .
اقبل واحميها ..

لليل كنت حايرة بالطفله مانامت وبس تبجي واني مااعرفلها ..
رحت الماما گعدتها ..
-يوم عفيه بس گليلي شأسوي مااعرفلها والله بس تبجي ..
شنو ذنبي اني حملتوني هيج مسؤوليه ..
گالت خاف ممتونة لو عندها غازات ..

اخذتها سوتلها متن وهاي اول مرة تلمسها ..
واصلا بس كملت گالت اخذيها نيميها يله ..

مااعرف ليش هيج الكل نافر هالطفله شنو ذنبها خطية
ماسوت شي ولااذنبت ..
يعني الاهل يخطئون والاطفال تتحمل النتائج ..

كانت دموعي ماتنزل بس ع بابا وع هذي الطفله الي متعلقه بيه وعبالها اني امها ..
ومن اشيلها تشم بملابسي وتهدأ ..
عشرين يوم عمرها .. بس عبالك تحس الدنيا ظالمتها وشكلها يكسر الگلب ..
_______________________
رجعت للغرفة مالگيت منار ..
توقعت بالحمام ..
نومت شهودة وفرشت بصفها
انتضرتها ترجع ماكو ..
يا ربي وين راحت هاي ..
خاف سوت بروحها شي ..

طلعت ادورها ماكو ..
ياالهي استر ..
گعدت مروة ودورنا البيت كله ماكو ..

طلعت للطارمة ماكو ..
رجعت الامي ..
لگيتها تقرأ قرآن ..
بخوف وقلق ..
يمة الحگي ..
صدقت وسدت القرآن ..
-فرح كافي بعد مابيه قهر .. شكو شبيج ..
-يمة منار ماهي دورت البيت كلها عليها ماكو…

-عزا العزاجن .. لطمت ع وجهها بس لاانهزمت .. يربي ليش هيج مكتوب عليه بناتي يصخمن وجهي ..
عساني لاولدتجن ولاشفتجن ..

-مروة .. كافي يمة شعلينا احنه .. ليش تجمعونا مو منار انهزمت من ضربكم وضغطكم ..

-انجبي ولج وروحي گعدي اخوانج خلي يدورون عليها ..

بقينا اني ومروة وحدة تشمرها براس الثانية ..
اني اگلها روحي انتي گليلهم ..
وهي تگلي مااخاف ..

تالي صعدت وگعدت جلال .. گتله امي هسا تريدك انت وبلال روح گعدة وانزلوا ..

گال شكو .. گتله منار ماهي ..
طفر من مكانه ودفعني حيل بالگاع ..
اخذ قميصه وكسر الباب ع بلال ..

گاله منار انهزمت وي صاحبها ..

بلال تخبل وركض للغرفه طلع سلاحة ونزل يركض..
واني اركض وراهم ..
يمة الحگي راح يكتلوها يمة الزميهم ..

بلال .. اني الها والله الا ادفنها بيدي ..
ماما .. يمة لاتتهور كافي فضايح .. منو يگول راحتله جايز خافت وانهزمت .
دوروها عند صديقتها لو خاف راحت البيت خالتك ..

بلال .. والله دخلي الگيها وشوفي شراح اسوي ..
وانتي يمة لاتتدخلين ..
منار حرام تعيش بعد .. كسرت وجوهنا وموتت ابوي وهسا انهزمت وتردين اخليها عايشة ..

طلع موبايله خابر ع عمي ..
وبنص ساعة الكل ببيتنا ..
وعمي يحقق وياي يگلي خاف انتي شردتيها ..
حلفتلهم ماادري بيها وكنت يم امي ورجعت ماهي ..

گال ندور عليها منا ومنا ..
وللصبح اذا مالگيناها ..
نخابر عذاب عندة علاقات ومعارف ..

بلال .. بيا وجه نخابرة ..
عمي .. اذا مو زوجها فهي بنت خالته مانريد الناس تحس لازم ندور بهدوء ..

باوع الرنا بنته وگال راح نطلع مجموعات .. اقفلي البيبان وخلي المفتاح عندج ..

صدگ ضجت يعني يخلي بنته حارس علينا خاف ننهزم .
بلال گال اذا عرفت الجن ايد بشردتها الا اموتجن وياها ..
طلعوا ورحنا يم ماما تخربطت .. انطيتها دواها ..
وهي تدعي وتبجي ع منار ..
وتگله يربي موتها ولاتصخم وجوهنا اكثر ..

شگد كنت متعاطفه وياها المنار .. بس الي سوته خلاني احقد عليها ..
تركت بنتها لحمة حمرة .. وانهزمت ..
مافكرت باهلها واخواتها وسمعتهن ..
اكيد اذا عرفت الناس انهزمت راح يلفقون حجي اشكال ..
ومايعرفون هي انهزمت من الضرب والتعذيب ولان حيزوجوها ..
صحيح هذا مو مبرر ع الي سوته ..
بس الضغط يولد الانفجار ..
واحس عقلي انشل ومااگدر افكر بأي شي بعد ..

بقينا اني وامي ومروه متگابلين ..
ورنا تفتر ع روسنا حرس ..
والطفله ماتسكت تبجي وعبالك گلبها يحس بالي يصير ..
ردت اگوم اسويلها ممة ..

رنا .. ها وين ؟؟
فرح .. شنو وين . متشوفين الطفله تبجي ..
رنا .. اي بسرعة سويلها وتعاي ..
فرح .. ترى مو انتي الي تعلميني شلون اتصرف .. اگدر احافظ ع نفسي ومابحاجة حراستج ..
رنا .. اي واضح اختج هم واعية وكبيرة وصخمة وجوهنا ..حتى اخواتي راح يتضررن بسببها الله اليعلم وين هي هسا ..

نرفزتني باوعت الامي .. هزت راسها وسكتت .
حقها شتريد تحجي وتدافع بعد الي سوته منار ..
تعالج الخطأ بالخطأ ..
حطمت حياتها وحياتنا من لاشئ ..

الله لاينطي الي ضحك عليها وقشمرها وهسا هو مرتاح وهي المتعذبة ..
ولاينطي رحاب الي رجعت علاقتهم ..
ساعة اگول احجي كلشي واخلي رحاب وذاك العار يتعاقبون حالهم حالها ..
بس اخاف واتراجع .. ولايتصورون اعرف كلشي وساكته .وتطيح الشغله براسي ..
واني اصلا ماناقصني ..

سمعت صوت امي تبجي ..
اجيت شفتها متصله بعذاب وتبجي ..
يمة ادري مالي عين احجي واطلب منك ..
بعد الي سوته منار مستحية اباوع بوجهك ..
بس من الضرب والتعذيب منار انهزمت ومانعرف وينها ..
واخوانها حالفين اذا لگوها يكتلوها ..
دورها قبلهم ..

سمعت صوت عذاب يعيط ويفرفح .. وخفت لايهجم من الموبايل ع عصبيته ..
وامي تبجي وساكته ..
تالي سدته ..

گالت حقه لو شما يحجي ..
فرح .. شگال ..
امي .. يگول لو قاتلها من البدايه ومنضف عارها ماصار الي صار ..
بس والله اذا لگيتها محد يخلصها مني ..
اربطها بالبيت مثل الجلب واعذبها ..
وحتى موت مااموتها واخليها ترتاح ..
وخاصه اذا طلعت منهزمة وي ذاك ..

بداخلي اگول كون يلگاها عذاب ويحبسها احسن مما يقتلوها .. مهما يكون هاي اختي وماتهون عليه ..
وبنتها خطية شنو ذنبها تعيش يتيمة…

بقينا منتضرين ومانمنا للصبح ..
سمعت صوت بلال ..
گال رحنا الصديقتها وهددنا ابوها وگلناله اذا ضاميها وماتگولون نشتكي عليكم ..
وگال هي صدگ اجتنا ورادت تبقى عدنا ..
بس خفت ابتلي بيها وطردتها وماادري وين راحت ..

من سمعت مااتحملت .. واتنرفزت وابجي
گلت .. الله لينطيه ماخاف تنخطف لو تنقتل شلون نطاه گلبه يطردها وهي بنته السبب بكل الي صارلها ..
من حجيت هيج ..
فتحت ابواب جهنم عليه ..

يتبع ....

//// البارت الرابـع ////

من_سيدفع_الثمن ؟؟
بقلم_الكاتبة_شمس



لزم جلال ايد وعصرها حيل ..
تعرفين كلشي مو وساكته ..

-ها لا مااعرف شأعرف قابل ..
-احجي ولج لاانتقم منج اختج وين .. وليش گلتي رحاب السبب ؟؟

من شفت الامر زاد والكل يتهمني .. الصراحة خفت ..
والاصح انه اگلهم كلشي ..

-اني مااعرف اي شي .. بس منار سولفتلي . تتذكرون الولد الي اجة وصلها من الجامعه قبل لتتزوج ..
وبلال ضربها علمودة ..

فرك وجهه بلال .. ايا ساقطة يعني تزوجت وماقطعت علاقتها بي ..

گتله .. لا والله لا .. اصلا من انخطبت كسرت السيم كارت وتركته وگالت راح ابدي حياة جديده ..
بس قبل فترة .. الولد متندم لان تركها وطالب من رحاب رقمها عساس يعتذر بس ..

وهي اصلا مانطته مجال وماترد عليه .. بس گام يدزلها رسائل ويتوسل بيها ويگلها متندم ومن هذا الحجي ..
ومقشمرها بسوالفه ..

جلال .. والعوبة صدگت وانجرفت وياه .. اااااه لو لازميه وقاتليه بذاك اليوم جان ماعشنا كل هذا ..

اجة بلال لزم ايدي .. باعي ولج .. هذا الحجي دير بالج احد يسمعة لو عذاب يعرف ..
اصلا هو بلا كلشي عيونـة تنط شرار .
دور يسمع هيج وعندة علاقه وياها قبل لتتزوج ..
يتصور كلنا ندري وراضين ..

سمعت شهودة تبجي .. ركضت الها حتى اخلص من سؤالهم ..
اباوعلها واگلها .. ليش هيج حظج من دون الاطفال ..
لاام ولااب يردوج ..
هي تباوعلي وصافنه عليه عبالك تفهم شنو احجي ..

واني من شفتها صافنة عليه .. نسيت روحي واسولف وياها واشكيلها ..
لأن اول مرة احد ينتبهلي من احجي هالشكل ..

بعدها تعودت اسولف وياها وهي تباوع .. وساعات تناغي الي وتضحك كأنه تعرف شنو احجي ..

صارت جزأ مني وشگد كنت اضوج واتعب بالبدايه منها ..
بس هسا مااخلي حتى مروة تلمسها ..
احسها ملكي الله نطانيها وخلاني اربيها واتعلق بيها هيج ..

مرت الايام وماكو شي جديد ..
ولد عمي واخواني مسوين مجموعات ويدورون عليها ..

امي تدعي وتگول كون مدعومة وميته حتى نگول ماتت وماننفضح ..
وساعات تبجي وتگول وين راحت . وين تاكل وين تشرب شلون عايشه ..

بيوم اجة بلال گال البسي بسرعة وتعاي وياي ..
گتلة وين ..
-لاتسألين بسرعة يله ..

الصراحة خفت ابدل وابجي ياربي شوكت يخلص كل هذا ونرتاح ..
اجت مروة وصيتها ع الطفله وعلمتها شلون تسويلها ممة وترضعها ..
عبالك ماراح ارجع ..
مااعرف ليش الخوف امتلكنـي ..

صعدت وياه بالسيارة .. وبالصدر واحد من ولد عمامي ..
گال راح اخذج البيت رحاب ..
وهي تعرفج .. حاولي تعرفين شي منها ..
واذا گدرتي تطلعيها من البيت طلعيها ..

فتحت عيوني حيل .. شتردون تسوولها ..
-انجبي ولاتحجين الي اگلج عليه تسويه ..

وصلنا البيت رحاب ..
نزلت ورجلي تتطابگ وحدة بالخ ..
منطقتهم شعبية واي صوت ننفضح .. وخايفه حيل ..

دگيت الباب طلعت بنيه صغيرة گلتلها صيحي رحاب ..
شوية واجت رحاب شافتني تخبلت ..
انتي شعندج هنا وشرايدة ..
-رايدة اختي .. الي قشمرتيها وضحكتي عليها انتي وذاك السافل ..
احجي بحرگة ..

-اني ماادري لاتورطوني ..
-ماكو داعي نورطج .. لان انتي اصلا متورطة .. واختي وابوي الي راحوا بسببج تتحملين النتيجة ..
لو اخواني يشتكون عليج وتتجرجرين بالمحاكم والمراكز .

طبعا هذا الكلام كله كان تلقين من بلال ..
والا اني الخوف ماخذني ومااعرف احجي ..

كنت اتمنى تگول مااعرف مكانها . لان بلال واگف بصف الباب يتنصت ..
بس هي من خوفها گالت ..
راح اگلج هي وين بس تتركوني بحالي وماتدخلوني بعد ..

اني صفنت بوجهها واتمنى ماتحجي ..
اكيد بلال اذا لگاها مايرحمها ويقتلها ..

گالت من ابوي طردها ومااستقبلها .. خفت عليها وطلعت بسرعة وراها ونطيتها فلوس وگلتلها روحي للامام الكاظم اگعدي هناك محد يوصلج ولاتخطر ببالهم هيج مكان ..
اذا تحبين روحي اتأكدي بس لاتگولين الواحد خطية حلفتني ..

من قهري گلتلها تف عليج يانذله .. ضيعتيها وتگولين خايفه عليها ..
اريد الله ياخذ حقنا منج ..

عاط بلال .. يله ولج بسرعة اصعدي ..
رحت صعدت والطريق كله احاول اهدأ بيهم ..

-بلال لاتتهور شفت ماراحت شو وين التجأت الاهل البيت حتى يحموها ..

بس هو مايسمعني ورزلني وسكتني ..
اما ابن عمي التحفه بمكان مايهدي الامور .. يحرض بي ويگله اذا لگيناها لاترجعها للبيت ناخذها الغير مكان ..

نزلوني بسرعة يم بابنا وراحوا ..
ركضت لجوة ابجي ..
يوووم بسرعه اتصلي بعذاب .. گليله منار بالكاظم راحت خلي يلحگها قبل ما يوصلولها اخواني ..

امي ايدها ترجف .. اخذت الموبايل منها واتصلت بعذاب ..
اول مارد گال .. نعم

گتله عذاب عليك الله الحگ منار .. راح يكتلوها وياخذوها مدري وين ..

عذاب .. اهدي واحجي عدل .. هي وين هسا ..
فرح .. بالامام الكاظم . صديقتها گالت ..

عذاب .. يله روحي هسا اني ادورها ..
-گتله عليك الله لاتقتلوها ..
طبگ الموبايل بوجهي .. ومااعرف اذا كان يرحمها لو يصير جلاد عليها مثل اخواني ..

امي تبجي وتون وتگول ليش هيج صار بينا ليش ..
وتفاجأت بوجود مرت عمي ام رنا بالبيت ..
گالت .. واخيرا لزموها خلي ينضفون عارها ..

ماتتحملت وعطت بيها .. حرام عليج مهما خطأت هاي روح مو بكيفكم تاخذوها ..
احجي يوم هي مو بنتج .. ليش ساكته ومخلية اليسوة والمايسوة ينهش بينا ..
_________________________
مرت عمي عوجت حلگها وهزت ايدها وطلعت من الغرفة واحنه بقينا يم ماما بالغرفه ..
امي خلصتها بواجي ..
واحنة يمها ..
ادعي من الله مايسولها شي ..

بقينا لليل مترقبين ..
وماكو شي ..

خالتي خابرت الامي .. وتحجي بهمس ..
اگلج دادة ابو عذاب منبه عليه مااخابر بس گلبي ماينطيني وج لگيتوها المنار لو لا ..

امي تبجي وتحجي .. وج دادة لسا ماكو خبر .. واذا لگوها مايخلوها تعيش اني اعرفهم ..
ولدي حتى لو عندهم رحمة اتجاه اختهم ..

عمامهم وولد عمهم مايرحموها وراح يحرضوهم ..

بقن اثنينهن يسولفن ويبجن ..
طگت روحي ..
گلتلها ليش تبجين عليها .. مو انتي تدعين عليها تموت .
مو تشوفيهم يضربون بيها ويعذبوها وانتي تتفرجين ساكتة ..
اذا ماتفكرون بيها ..
فكروا بهاي الطفله شنو ذنبها تعيش بلا ام ..

امي سكتت وماحجت وهاي اول مرة ارفع صوتي عليها هيج بس فعلا بعد مااتحمل ..
هي خطأت والي سوته مو قليل .. بس مو مبرر القتلها .

گاعدين بغرفة ماما واجت رنا تركض ..
عمة لگوها المنار ..

طفرنا كلنا .. وينها ..
گالت بس .. وسكتت ..

وج شبيها احجي ..
منار ماتت ..

من سمعنا هالكلام .. احس روحي طلعت ..
وامي وگعت ..

صدمة الي اني بيها خلتني مااشوف بعيني ..

گمت اعيط واكسر كلشي گدامي ..
دخلوا اخواني وعمامي ..
ركضت بأتجاههم ..
قتلة مجرمين .. الله ياخذ حقها منكم ..
من اليوم لاانتو اخواني ولاانتو اهلي ..

من العصبيه ماعرفت شأحجي ..
بس حسيت ضربة ع وجهي قوية اجتني ..
وگعتني بالگاع واحس عيوني غوشن مااشوف بيهن ..

گعدت البيت مليان ناس ..
وامي تعيط وتبجي ..
عبالك اني بحلم ..
ركضت الامي ع صوتها ..
يوم منار وين ..

هي منصية راسها وتبجي ..
گالت مروة .. وج مخليها بالطب العدلي ..
والصبح يدفنوها ..

گمت ع حيلي ..
واباوع الامي .. اشو گاعدة گومي خلي نروح نشوفها ..
هذي اخر ايامها ..
محتاجتنا يمها ..
يمة انسي كلشي وودعيها ..
لاتخليها وحدها وهمة يغسلوها ..

باوعت امي الرنا .. گالتلها صيحي بلال ..

اجة بلال وبنص النسوان ..
گالتله باجر بس اني واخواتك نروح وياها ..

بلال .. محد يروح .. انغسلها وناخذها گبل ندفنها ..

عاطت بي ماما .. لحد هسا ساكته وخليتكم ع مرامكم .
بس منار تتغسل وتندفن بوجودنا .
مااخليها وحدها ..
حتى ابوك مايقبل بگبرة ..

بلال .. يمة لاتخليني احجي ..
ماما .. ولاكلمة . روح من وجهي يله ..

دخلت للغرفة وشفت فراشها وملابسها ..
تلمستهن وابجي ..
ليش هيج منورة .. وج حتى اربعين ولادتج ماطالع ..
هيج استعجلتي ع موتج ..
لو باقية يمنا مو اهون ..
شسولج من شافوج ..
شلون طلعوها الروحج ..
هم تعذبتي .. لو گلتي اااه يمة الحگيلي ..
بحياتج ماحسستيني انتي اختي الكبيرة ..
بس فراگج موتني وشل حالي ..
وان شاء الله يعاقب كل واحد اشترك بموتج ..

للفجر بدلنا وطلعنا بسيارة معتز ابن خالتي اني وامي ومروة ..
واخذت وياي شهودة لان ماامن اخليها عند احد ..

الطريق كله مافارگتنا الدمعه ..
ومعتز يباوع من المرايا وضايج ويحاول يواسينا ويهدأ بينا
اني عيني ع شهد وابجي ..
وج شهودة هاي امج رايحين ندفنها ..
حتى ماشفتيها ولاشافتج ..
لاشميتيها ولاشمت ريحتج ..

بهذا كلامي زاد ونين امي وگالت كافي حرام عليج راح تموتيني ..
منين اجتنا ع المصايب ..
يربي لو موتني ولاشايفه هاي الايام الي راح بيها ابو بيتي وبنتي ..

نزلنا للمغتسل ..
خليت مروة بالسيارة وبحضنها شهودة لان تخاف تنزل وتشوف منار وهي ميتة ..

نزلوا منار ودخلوها ..
اني كنت مامنتبهه ..
بس من دخلت وشفتها شهگت ولطمت ..
وج يمة هاي مو منار ..
وين الجمال ذاك ..
جسمها كان ازرگ كله ومنفوخة كلها وضايعه ملامحها ..
ومخلين گطن بخشمها واذنها ..

عساني لاشفتها ..
اريد اتنفس مااگدر .. وامي طلعت مااتحملت ..
گابلتها وابجي بصوت ..
ام المغتسل گالت عيني اطلعي بعدج شابه لاتنداسين ..

طلعت لان ماتحملت منضرها ..
صاروا گبالي اخواني وعمامي بس بعدين واگفين يم السيارات ..
دعيت عليهم بگلبي ..
عسا الله لينطيكم شمسوين بيها .. وفوگاها جايين تدفنوها بيدكم ..

ردت اروح للسيارة ..
شفت عذاب حاضن امي وعيونه دم ..
اتقربت منه ..
وگتله انت هم مشترك وياهم بموتها الله لينطيكم ..

باوعلي بنضرة حادة ومعصب ..
انتي شتحجين .. اذا متعرفين شي لاتمسلتين فاهمة ..

مااهتمين اله ودخلت للسيارة ..
اخذت شهودة بحضني وابجي هو انتبه علية واتقرب ..
گال انطينياها ..

باوعتله بحقد .. وخفت انطيها ماادري ليش حسيتها ملكي وخاف ياخذها مني ويأذيها مثل مااذوا منار ..

هو بقى صافن بيها نزلت دمعته عليها باس راسها وانطاها الي ولبس نضاراته بسرعه وراح من يمنا ..

باوعتلها ..
سبحان الخالق ماخذة شكل امها وجمالها حباية ومقسومة منها ..
لهذا مااتحمل عذاب ورجعها بسرعه ..
لان تشبه منار ..

اخذوها دفنوها واحنه بقينا بالسيارة نباوع ونبجي ..
قبرها شويه عن قبر بابا ..
گمت احجي وي بابا ..

ها حبيبي بابا .. اجيناك قبل الاربعين .. وخلينا منار امانة يمك ..
انتو الاثنين كنتوا متتفارگون ابد .. وحتى بموتتكم ماتفارگتوا .
خلي بالك عليها وسامحها ..
ترى الليله موحشة عليها ومحتاجتك ياغالي ..
دير بالك عليها ..

بعد ماكملوا وراحوا كلهم .. تقربنا يم القبر لان ماما كانت حادة وباقية بالسيارة ..
قرأنا الفاتحة ويس ورشينا ماي ع بابا ومنار ..
ماما مافارگت گبر بابا حضنته وتبجي ..
بالگوة شالوها بلال وجلال وصعدوها ..
_______________________
من تحركت سيارتنا ..
انتبهت ع سيارة عذاب رجعت ..
التفتت وشفته نزل يم قبرها .. وقرفص ونزع نضارته ..

اكيد ماكفاه موتها ونزل يعاتبها ويحاسبها ..
ااااه اباوع الاخوتي .. منو منكم الي تلطخت ايدة بدمها ..
شلون راح تگدرون تنامون وتعيشون حياتكم وانتو الي قتلتوها ..

رجعنا وسوينالها فاتحة ..
وكملت فاتحتها واحنه مانعرف شلون ماتت او من الي قتلها ..
منضرها مايروح من بالي ..
وين ماامشي اشوف شكلها وصرت اتخيلها بكل مكان ..
حتى من انام اشوفها وافز مرعوبة ..

بس اگعد اقرأ قرآن شويه ارتاح واهدأ ..
مرت الايام ..
وطلعت اربعينية بابا ..
سويناله قراية وعشا ورحنا للمقبرة ..
كلنا محاوطين بابا ونبجي ومنار محد وصللها عبالك منبوذة ..
حتى قبرها ممكمليه ..
الي يشوفه يگول صارلها مئة سنة مدفونه مو اسبوعين
گلتلها ماما ليش هيج قبر منار ..

عمتي گرصتني وگالت لاتهيجين العالم مالج دخل ..
رفعت راسي الها وگلتلها عود من تموت بنتج لاتسويلها قبر ..

هي ضاجت وگالت اي منين تطلبيها وحدة تافله بحلگ الثانية ..ماتفرفين عنها ..
اخذت نفس وردت اگوم احجي وياها ..
سحبتني امي وعصرت ايدي ..
گالت مااريد فضايح ..
خليهن يطلعن سمهن معليج بيهن ..

من ردنا نروح ..
گالت ماما البلال .. خابر الدفان هسا گدامي يسوي قبر اختك ..
راد يحجي بلال ماانطته مجال وگالته والله اتبرأ منك اذا مسويتلها قبر ..

اعتقد عمامي وعماتي كانوا ناوين مايبنولها قبر حتى يضيع قبرها ومحد يزورها ..
اااااه يالبشر حتى الميت ماخلص من حقدكم ..

بعد مارجعنا ..
انشغلنا برنا ولدت واجاهم ولد ..
وبلال قبل كلشي هو شايلها ع روسنا بعد ماجابتله الولد شراح يسوون ..
سموه ع اسم بابا وهي راحت الاهلها گالت هنا ماكو راحة كل يوم مصيبة واني نفسة ..

همزين راحت ع الاقل نرتاح من امها لاتجي وتگعد ع گلبنا ..وتذب سمها علينا ..

كم يوم .. واجت خالتي ..
گالت عذاب يريد بنته ..
اني كنت بالحمام اسبحها ..
من طلعت وشفتها انقبض گلبي ..
گلتلها ماانطيها .. هستوة ذكر عندة بنت ..
اذا من يوم الي جابتها امها لسا محد سأل عليها ..
هذي امانة منار وماانطيها ..
رادوا حجوا مااهتميت ..
قفلت الباب وگلت الخالتي روحي ماانطيها ..

بعد كم يوم اجو عمامي وصاحوني ..
تعاي بويه هنا ..
استغربت الصراحة ..
اول مرة اشوف حنيتهم من يوم الي صار ..
اخواني گاعدين وكأنه يعرفون الحجي شنو ..
بس ماما بالغرفه ماتطلع لان حادة ..

عمي الكبير .. بابا فرح شفتي شصار بينا والناس تاكل وجهنا .. ولازم نرجع ماي وجهنا الي اختج ماحافضت عليه ..

ضجت حيل من كلامة .. وحسيت وراه مصيبة ..
گتله وشنو المطلوب مني ..

گال قررنا ننطيج عطوة العذاب ..
بعدة ماكمل .. طفرت من مكاني ..
ههههه تحلمون ..
بطلتوني من الجامعه وحطمتونا .. وهسا تردون تنطوني عطوة .. شنو اني كبش فدا ..

بلال عاط بيه وراد يضربني ..
گتله اي گوم يابن ابوي .. اضربني او اكتلني مثل ماكتلوا منار وخلصتوا ..
خلصوني اني هم لان بعد مااتحمل هالعيشه ..

گام جلال دفرني وگال السانج طايل كلجن نفس الشي .
ولاتضلين وين ماتگعدين تگولين كتلتوها مالنا دخل فاهمة ..

-لعد منو الي اله دخل . كلكم اتفقتوا عليها والله اليعلم من الي موتها انتو او عذاب المجرم الي دمر اختي وهست يريد يدمرني .. انسوا مستحيل هالشي يصير .

تركتهم ورحت الامي ابجي ..
يمة سمعتي .. ماتحجين ليش ساكته ..
تقبلين يحطموني وينطوني العذاب ..
شلون تقبلوها اخذ زوج اختي والي دمر حياتها ..

امي .. اسكتي ولج .. عذاب جان يحبها ويموت عليها اختج الي دمرت روحها بروحها ..
وبعدين انتي مو تردين شهد وماتنطيها ..
اقبلي علمودها وربيها ..
لان محد يحاف عليها ويربيها غيرج ..
وباجر عگبة اذا تزوج عذاب ..
مرت الابو ماترحمها ..

باوعتلها وضحكت .. هههههه يعني كلكم طابخيها سويه واني اخر من يعلم ..
بس هاي اني اگلكم لو تموتني مااقبل ..

طلعت وسديت الباب حيل ..
دخلت الغرفتنا وابجي حضنت

شهودة ..
اجت مروة حصنتني وتبجي ..
گالت فرح لاتعوفيني وحدي وترحين .. والله يموتني هنا
وبعدين شلون ترحين الذاك الوحش الي قتل منار ..

باوعتلها بأستغراب ..
شمدريج هو قتلها ..

-ماادري بس سمعت بلال يسولف وي رنا ويگلها لو ماعذاب اخذها منا كان احنه لازميها ..
اكيد هو قتلها واله معارف وطمطم السالفه وهو ضابط .
وبلال يمكن هم مشى السالفه بالمستشفى لان هو يشتغل بيها ..

من حجت هيج مروة اقتنعت بكلامها .. اي هم الي قتلوها وسدوا السالفه بمعارفهم ..
الله لينطيهم ويردون يزوجني هالمجرم ..

مرت ايام واني قافلة ومااقبل ..
الى ان اجة اليوم الي ماكنت متوقعته ..
فجأة شفت عمامي ووياهم عذاب دخل وخالتي تمشي گدامهم ..
اول ماشافتني بالمطبخ ..
سحبتني الغرفه امي وسدتها ..
سلمت ع امي واني منتضرة اعرف سبب جيتها لان هي حتى بفاتحة منار ماحظرت زوجها ماقبل ..
اكيد هسا جايين ياخذون شهد ويرحون ..
بسرعة گلتلها خالة انتو جايين تاخذون الطفله مني ..
امي گالت اگعدي فرح واسمعي من خالتج ..
گعدت ولازمة گلبي ..

خالتي .. باعي يمة الله شاهد شلون اعزجن وحتى منار جانت قطعه من گلبي لو ماسوالفها العمت عليها ..

بس ابني تدمر اكثر منها .. وكره النسوان كلهن ..
وحتى بنته مايريدها ..
واني الي اقترحتله ياخذج ..

گلتلها شنووووو ليش هيج ..

يمة اسمعيني .. وج اني گلبي يطفطف عليها وادري بيج شلون تحبيها. ..
اخذج هناك بس علمودها تربيها ومالج دخل بعذاب وبغيرة .. وعقدكم يكون هيج بس گدام الناس ..

گلتلها مستحيل اقبل .. اني مو جارية وبكيفكم تقررون مصيري ..

وج يمة هنا اخوانج مايرحموج وراح تتعذبين ومن حجيت وي امج گالت ريت تاخذيهن اثنينهن وتخلصيهن من ضيم اخوانهن وعمامهن الي يردون يزوجوهم الولدهم ..

فتحت عيوني .. يازواج ومنو ولد عمي ..اغلبهم متزوجين

ماما .. اي هذا قرار عمامج .. ياخذوج الواحد من الولد حتى لو متزوج حتى ماتجيبن العار الهم ..

فرح .. ههههه احنه وين عايشين .. شنو هالتخلف يعني وحدة خطأت وراحت الدار حقها .. ليش تضلمونا كلنا ..

ماما .. هذا الحجي لو ابوج موجود .. بس هسا اني هالتشوفين كل يوم وگعه ومادايمة الجن ..
ومن خالتج قنعت عذاب ..
وگالت بس ع الورق وماله دخل بيها ..
وافقت علمودج ..
احسن مماترحين العمامج ويسوج خدامة ..

خالتي .. عذاب طلبج عطوة لان يدري بيهم ماراح يرفصون وهم خجلانين منه ويردون رضاه ..

فرح .. اي رضا بعد مو انتقم منها واخذ روحها بعد شيريد ..

خالتي .. لاتظلمين بختج يمة .. موتت منار قضاء وقدر ..
فرح .. هههههه اي صحيح .. والله كلهم اشتركوا بقتلها والله راح ينتقم منهم واحد واحد ..

شگد حاولت ارفض واتمرد بس عمامي حاسمين الموضوع ودزوا ع سيد يعقد ..
وخلوني امام الامر الواقع ..

يتبع ........ ..

طبعا اليوم فدمرة انشغلت☹️💔ومالحكت انزل استفسارات..
فاعذروني عل تاخير وهسه رح انزلهن بالسرة🥰

#ملوكه

اذا عندج هالواهس بالرسم كلش حلو😍❤️ واشجعج انو تتدربين اكثر وتطورين من نفسج

واكو كومه قنوات تلكين عل اليوتيوب..اكتبي تعلم الرسم من الصفر كلشي رح يطلعلج

وهاي وحده من القنوات اذا تحبين تابعيها..شرحها كلش واضح🥰👇🏻

#ملوكه

Watch "تعليم الرسم للمبتدئين خطوة بخطوة في 2020 | تعلم الرسم بالرصاص بسهول | مع نور ياسين" on YouTube
https://youtu.be/3_h6ICwIMYA

هههه..هو طبعا اكثر متزوجات مايلحكن عل هالسوالف🌚💔..لأن وقتهم مامنظمين
كون تسوين مثل جدول..اكتبيهن بالورقة وخصصي لكل شغلة وقت
حتلو تحطين باليوم ساعه..للقراءة كلش زين
اهم شي نظمي وقتج🥰

#ملوكه

ههههه..وين هالغيبة😅
ذكرتني باللعبة من افرغ هالايام..هم ارجع العبكم حته تروح ضوجه وتتونسن 😇

يعمري تسلمين😍❤️ ويوم نجاحج وتفوقج

#ملوكه