#مشاركه
هاي مرة طالب وياي بالكلية هو من محافضتي يعني اني كليتي بغير محافضة يعني صارت صداقة بس سطحية كلش بحيث بس من احتاج شي اروحلة وهو همين وتدرين بغير محافضة مو مثل يم اهلج المهم مرة غاب الولد ماشفتة تقريبا اسبوعين هج او اكثر جنت مرحلة اولى عود دااريد اعرف شنو السالفة رحتلة بالتلي كلتلة اكولك ليش ماتداوم حريمة تروح عليك المواد وهيج شي جان كال اني مداوم بس بغير كروب مو بنفس كروبج 😂😭ثاني يوم رحت اجا وكف كدامي كال ها شفتيني 👀اكثر موقف صدك خجلت بي ومن يومها لحد هسة اني مرحلة رحت رابعة كل مااشوف الولد اختل ورة صديقتي 😹نصيحة لبنات المرحلة الاولى ابد لاتجفصون بالحجي وتتفشلون والله عمركم ماتنسونها


#رد
يافشلتاه😂..
يبووي خليها سكتة ..جفصات الاولى كومه ..
اصلن من اقارن هسه بالاولى احس جنا زعاطيط وهسه كبرنا 😑💔😂..لان فرق وتغيير جبير بكلشي

#مشاركه
مره صار وياي موقف بالجامعه اني وصديقتي دهلنه متاخرات للمختبر فباب المختبر بيها عتبه عاليه يوميه اكول راح اعثر بيها جان بهاذه اليوم الي دخلنه متأخرات عثرت بيها بس شنو من عثره جنت لابسه ترانشوز ورج المختبر رج اني زين ما جتت زرك بالكاع ربكم ستر صديقتي تمشي كدامي واستندت عليها لو ماكدامي جان اجقلبت بالكاع همزين تمشي كدامي الطلتب كلهم يضحكون يضحكون عله الاستاذ بالمختبر نز من الصوت العثره الي بلباب رج المختبر ومن العثره التخبل 🤣😂😂😂ابدد ما انسه هاذه اليوم كلهم سكتو بس اني بقيت اضحك عله نفسي


#رد
هاي غير شوز اللي سويتلهم هزة ارضية 😹بالمختبر

الله ستر ماتشقلبتي..جان استلموج اكس مربع🤣وبعد ادرى بولد الجامعه😒👊يكصون الواحد كص

#مشاركه
مرة جانت الدنيا ماطرة..وغمست بالطين😭

#رد
اووف..موقف يضوج🤦‍♀😣..يله ميخالف تكبرين وتنسيها😂

طبعا فرعنا جان قبل مامزفتي..فمن تمطر يصير عبارة عن نوتيلا🤣
ومن جنت بوكتها ارجع من المدرسه..فد معاناة كلش...من امشي بالطين ..اله اشويه احس حذائي رياضي ابو قيطان رح ينفتح وينلطش بالطين😹💔

#مشاركه
المواقف المحرجه دومها وياي تصير..مرة جنت بالجامعه وداحجي اني وصديقتي ودنكص بالناس

واحد من اللي كصيناهم چان ورانا وسمع كلشي حجينا عليه ومن انتبهنا علينا..جان يكللنا كملن بعد ليش سكتن😂..كلت بوكتها يكاع انشكي وبلعيني ..
صرنا كد طماطه كباله😂😂

#رد
يبوو من لساننا اذا انفتح شيسده😂💔...
سالفه تچر بسالفه لمن نجفص بالاخير يله عود نكعد راحه😓😹😹

ومنا ارشادات..قبل ماتستعملين ديرمابن او ديرمارول🌚👆🏻🌺

#ملوكه

#مشاركه
طبعا اني اكره كرايبنا كلهم فمرة رحنا على عزيمة جبيرة كل كرايبنا هناك فإني وبنات خالاتي جنا بالمطبخ هه حلوة الكعدة هناك ..وجنت اني احجي ع واحد من ولد عمامي واحجي واشتم وكل صوتي عالي ومااحس إلا وهو لازم اذني ويكولي كملتي فأني ردت اضوجة فكتله لا مكملت جان يعبر ايدي قوي 😂 وكمت ابجي 😂 وكتلة والله توبة ومن بعدها كمت ماباوع بوجهه ولا اسلم علية من اشوفة كبل عيوني دمع🌝😹😹


#رد
هج موقف يشبه القصص اللي انشرهن😂
ابن عم اذا سمع حجاية عليه..يطلع بطوليته😹🌚بس زين ماقصرتي بالحجي عليه..هههه

#مشاركه

كملنه محاضره رحت اني وصديقاتي لحماماتكم الفيزياء جانت الكهرباء طافيه فلبخت ع الضلمه 😂😂وطلعنه للحديقه واشوف الرايح والجاي يباوعلي وصديقاتي مننتبهاتلي من طلعت من الحمام كتلهن شكو شو كلها دتباوع وجهي بي شي🤔باوعلي خربن ضحك كالن يافشلت الفشله وجهج عبالك بورك بناء لابخته مجلح😂😂🤦‍♀ويخرع بعد مااكدر ارجع للقسم وحده من صديقاتي لابسه عبايه كعدت ع المصطبه غطتني بعباتها وخففت البورك😂😂😂



#رد
ياعزةة😂💔
لو باقية بحمامكم مو احسن.😂🤦‍♀ولو هم ظلمة اهناك من تنكطع كهربا

بهج حالات حته لايتكرر هالموقف قبل لاتطلعين من الحمام🙃..اسالي صديقتج كلليها هاهي زين!!..واطلعي
اني وصديقاتي دائما نسويها. .مكملين كلشي ومعدلين..بس لازم هالاسئله..حجابي عدل لو لا..😹😹حمرتي طوخ لو اخففها ..ينرادلي كحلة لو ميحتاج..وكومه اسئلة😂

#مشاركه
هاي مره اني بالجامعة مرحله اولى جنت اريد اروح اشتري كيكه وعصير وجن اكو ولد كاعد عبالي هو الي يبيع كالته صباح الخير هاي بشكد جان يكول نعم رجعت كتله بشكد هاي جان الولد يصفن عليه كلي العفو اني طالب بالجامعه واني من ساعته كل مااشوفه اطفر 🙊

مواقف كومه بالكليه وكل موقف ماعرف ليش يصير وي هذا الولد نفسه😂
هسه اني رابعه ومن اتذكر سوالف الأولى بس اظل اضحك


#رد
زين كبل كلج طالب قبل لاتجفصين بعد😂
اووف من جفصاتنا..هاي احنا البنات اذا نجفص..ندوس زايد 😹😹
صح اكو مواقف تفشل..بس بالنهاية ذكرى ومتنسي🌚

#مشاركه
طبعا هسه ذكرت الموقف متت من ضحك جان اكو بالممر حاجز خشب مال غرفه كبال غرفة رئيس القسم جان اني امشي ويه الحاجز وضلت نهاية الممر واكو ولد اجه من الممر الثاني بس ماواحد يكدر يشوف الثاني وفجاه طلع بوجهي وتصادمنه شلون فشله باب الغرفه مفتوح شافنه دكتور علي عبد الامير وجهي صار دم معرفت شحجي وهو عاط الله الله 😂😂😂😂فشلتاه


#رد
ياا😂💔هي هنا المشكلة..بهج مواقف من اصير بيها اتمنى اللي يشوفني شخص مايعرفني ومجهول

بس احنا مواقفنا لازم تصير بكدام شخصيات يعروفنا😂 ونضل يوم كامل نفكر بالموقف😑

#مشاركه

ببداية الدوام يعني اول اسبوع الي مداومة.. كلت لصديقاتي خلينه نروح ناكل شي
بالنادي.. المهم رحنه اني طلبت گص دجاج وكفت انتظر شوکت
يخلصهة الرجال.. جانت اکو مجموعه شباب بصفي عاد اني دايره
وجهي عنهم منطتهم ظهري.. اجت بنيه طويييله ومليانه شويه
ودفعتني وماحجيلكم الا شويه ردت اوگع گوه سندت روحية
موهنا المشكله المشكله انه ماسمعلكم الا واحد صاح ااااخخخخ
اني درت وجهي واشوفلكم الولد حاقد عليه طلعت دایسه عل
رجله وبوكتهه جنت لابسه كعب عالي بسمار.. عاد اعتذرت هواي من
شافني صرت شحالني هوه رأسا کال عادي مصار شي وابتسم
وطبيعي.. المهم بقيت انتظر واذا تجي هاي البنيه مره ثانيه
ودفعتني دفعه اقوه اني هناا كلت لااااا لازم اتدخل درت وجهي
عليهه حيييل وجنت شايله جنطه جبيره عل كوله ماما طابوگه
جايبه كل الكتب والملازم لان ماعرف الجدول.. حسيتهه انركعت
بفدشي سمعت واحد يكول اففففف.. درت وجهي واذا هوه نفسه
الولد الدست عل رجله شافني كام يضحك اني هنااااا
متتتتتت من الفشاااااله بقوا جماعته يضحكون وماعرف
شيكولون ردت ابجي والله عاد هم اعتذرت منه هوه عادي
مصار شي.. عاد اكو كبال المشوايه مال الگص مثل الجام طوييل
يعني مثل المرايه نعدل نفسنه بي من الاحراج اريد الهي روحي
بقيت اعدل بشالي بهاي المرايه وصدفه ولد جان دیعدل شعره
ورايه.. ف اني صدفه صارت عيني بعينه طلع نفسسسسس
الولددددددد !!!!! عزاااا متتتت هوه بعد ماتحمل كااام
يضحككك.. (هسه شيكول بله ) اني انتيهيييييت رحت اتعارك ويه
صديقاتي لييييش عفتوني وحدي انوب اجت صديقتي تزيد
الطين بله تكول خاف عباله دتتحرشين بي انوب خلتني

انهار اني صرت شحالني واليوم كووووله اني كالبه
الخلقه بعد هذا الولد لا شفته ولا شافني الحمد لله حتى
لو شايفته مره ثانيه مرح اعرفه لان منتبهت عل شكله تلگوه کال
التووووبه اروح للنادي بعد وره هالهزله الصارت

#رد
خررب...😂😂بنفس الولد يصير نفس الموقف
هاي اني لو بدالج اتعارك وي ضخمه..اكللها عفتي كل مكانات تجيني عليه
يله زين الولد طلع حباب وسبورتي😂💔..وغلس عن الموضوع..هاي لو غيره جان يسوي سالفه طول وعرض

وهذولة صديقاتج ينرادلهن كتله..بدال ماينقذوج من هالموقف..عايفنج عل راحتج..عبالهم ديصارحج😂

#مشاركه
طبعا صار وياي موقف مستحيل انساه 😭😭
أول يوم داومت بالجامعه جنت اطرش بالزفه ما اندل اي شي بس قاعتي بيومها جان عندي مختبر واني ما اندل المختبرات وانتي تعرفين كروبات ومو كل الطلاب سوه ف اني ما اعرف سالفة الگروبات ف رحت ويه بنيه جان وياي بالقسم ومن محافظتي وگعدت بالمختبر جان تگلي انتي مو ويانه بغير گروب طلعت شفت مختبر ثاني گدامي دخلت گعدت واندمجت ويه الدكتوره شويه جان يسجلون حظور اسمي ماكو گمت للدگتوره دكتوره شو اسمي ماكو گالت مو بهذا الگروب اوف ما تصورين شلون انحرجت 😂 من لطلاب كلها تباوع عليه ويضحكون 🤦🏼‍♀️ بعدين صفيت المختبرات على أيدي 👐 يله لگيت گروبي بيومها متت تعب وقهر ودخلت للمحاظره متأخره لان فريت كل المختبرات 😂😂😂😭💔🤦🏼‍♀️



#رد
ياا😂..اول يوم الي بالجامعه خليها سكته
خاصة بكليتي التربية..من طبيت بيها عبالك طابة متاهة...
منا اطلع واطب منا ..واباوع صفح للمكان اكول يربي اشون رح احفظ هالفروع😂
ضليت يومين عل هالوضع ..وخطية صديقتي جانت وياي وهم نفس دوخة..احلى شي سالت واحد من الولد. كتلله خويه وين طابق الارضي..كللها هو انتي بالطابق الارضي😹😹..لمن ثالث يوم عود يله حفظتهن الممرات..هههه