عقيل وشيصير خل يصير
اخذ اخوي ونطلع ناجر بيت بعد كبرنا واخوي شاغول وايده تذب ذهب
-صدك تححين انت شعليج بيه انتي وعقيل واحد يحب الخ
بس اني ورعد لا اصلا اني معتبرته واحد من الولد
-والله ميقات هاي كدام حسنات وجنات اذا انتي ترفضين اخوي اني هم ارفض عقيل ونطلع من البيت
وللحكاية بقية

#لُحُظٌاتْ مٌنَ الُْعمٌرَ 🍂 الُجْزُء الُاوَلُ
للكاتبة ام مصطفى
البارت الثاني

سارة
شوفي ميقات لو رفضتي اخوي اني هم ارفض اخوج الي يصير خل يصير
فوزية:ولج سارة شنو هذا الي سمعته هاا من شوكت صايرلج لسان وهيج تحجين
-عمة تقبليها ع رعد شنو ناقصة وهيج تفشله وتحرجه كدام الكل
-هي صح غلطت وحرجته بس مو معناها انت ادخلين زواجج من عقيل بيها بعدين رعد ابني وحالة حال الولد تعرفيني ماافرق بينهم ابد والزواج رضى الطرفين مو غصب
وشغلة اطلع من البيت جديده هاي ست سارة تره اكلها لبيبتج وهي تصرف لو عدتيها
-صار عمة
عفت عمتي وطبيت لغرفتنا اني وجنات
جنن حيل مقهورة من ميقات ليش هيج سوت اووف هسة وين راح رعد سوده علي
كلة منج يايمة عمري كلة مااسامحج ذبيتنا ولاسئلتي علينا رحتي ازوجتي شنو فرقج ع عمتي فوزية اشو هم مات عمي ليش ماعافت جهالها وازوجت بس انت ركضتي ذبيتينا 😭
مشتاقتلج ومشتاقةة لابوي
كمت ابجي
فاتت جنات شافتني ابجي
-هاي شبيج سويتيها صدك يمعوده ختولي تتعزز هي ميقات دشوفي اذا ما ازوجته وقبلت بي وتكوم تموت عليه
بس هاي عيارة منها
كافي شبيج
رفعت راسي وضمته ع صدرها
لاتبجين سارة والقران انت ورعد نحبكم مثل اخوانا وعمرنا مافرقنا بينكم بس هاي رعنة ميقات عوفيها بيبي دواها
مسحت دموعي
-مقهورة جنات ليش امي ذبتنا وماسئلت بينه ليش تيتمنا وامنا عدله تدرين رغم اني كارهتها بس مرات اشتاق لايام طفولتنا من جنا عايشين سوه بين امي وابوي
-حبيبتي هسه اهنا مو هم ابونا مات هذا قدر الله
-بس انتوا عدكم ام وربتكم وعوضتكم عن ابوكم
-ليش امي قصرت وياكم فرقتكم عنه
-لا والله بس مهما يكون نبقى بحاجة امنا وابونا
.......
ميقات
شبيهم كبوا علي فد كبة قابل شكلت مو حقي ارفض
حسنات :ميصير روحي اعتذري من سارة
-وسارة شكوو تره هي وحدها سوتلها زعلة والله ياالله
-بس هو اخوها ومن حقها تزعل عليه انت حرجتيه كدام الكل
-هسة هو وين راح
-طلع من البيت مااعرف وين راح
-امم ماادري جني صدك جفصت
-كلش ترة

سارة
رعد طلع وماكوو حتى عشة ماتعشة ضليت قلقة عليه وبيبي كل شويه صايحة علي اخوج مارد
لا بيبي ماكو مارجع
-وين راح الولد كله من وره هالعوبة ميقات
ضليت كاعده مانمت
لحد ماسمعت صوت الباب طفرت افتح الباب
منو
-اني افتحي الباب
-وين جنت ظل بالي عليك
-طالع يم اصدقائي
صاحت بيبي سارة اجه اخوج
-اي بيبي رعد هذا
-روح بيبي خطية ضال بالها عليك
-ادري جاهل خوما جاهل اني دروحي سويلي لكمة تره ميت جوع
-اي تدلل
-اوكفي منو كاعد
-محد بس اني وبيبي
-ديله روحي

طبيت للمطبخ ع السريع كليتله طماطة وفنكر وزلاطة واجيت لكيت بيبي تحجي وياه وهو يكلها الله كريم بيبي
حطيت الاكل تريد شي بعد
-لا روحي نامي اني اشيل الصينية وراي
-تصبح ع خير
-اجمعين
الف الحمد لله من رجع اخوي سوده علي مبين حيل ضايج

الصبح

مسلم
كتبت بورقة اسمي مسلم اشتغل عامل مثل ماشوفين وعمري ٢٠ سنه وهذا رقم مبايلي خابريني عود كتبت الرقم
خليت الورقة بجيبي
وكمت اشتغل وكل شويه اطلع بره اشوفها طلعت لولا
اخر شي شفتها طلعت
شمرت الورقة بالكاع
باوعتلي ابتسمت ودنكت شالتها
وراحت
شكد حلوه جانت جنها شطب ريحان بيضة وناعمة عيونها كبار ورمش طويل واكع ع خدها
دخت ابمعانيها ودك كلبي الها من اول نظره
رجعت يم عقيل اشتغل
رعد مبين عليه ضايج ومالة واهس
كتلة شبيك متكلي بعد ضايج
-لا مبية شي
-يمعود هاي ميقات جاهل ورعنه ماعرف شتحجي ختولي تروحلك فدوه
-لا حقها تره الزواج مو جبر شنو قابل اجبرها بكيفها بعد بس بيبي تلح وياي واني تعرفني مااريد اكسر كلمه الها احبها لبيبي وماعندي غيرها
-صدكني ميقات الك ومتصير لغيرك
-عوفنة من ميقات شعندك انت
-هااا شعندي
-شعندك وي بنت ذول الناس واللك عبالك ماشفتك لو مامنتيهلك
-اخخ اشو من البارحة لليوم مدري شصارلي ضحكتلي لو عبالك الدنيا كلها ضحكتلي
-دير بالك لحد يشوفك ابوها واخوها مبين عليهم شرانيين
-وين تعرفهم
-ليش مو شفتهم من فلشنا وحايطهم يكول انفطر شلون هدوا ع ابو البيت
-همة ذول
-اي يالغبي ركز شبيك
-اي صح تدري ما منتبه ابد
-المهم دير بالك وخلي بالك بس بشغلك يمعود احنه فترة ونروح منا شلك بهاي السوألف وعقيل لو سمع ميقبل اهم شي عنده السمعة
-ان شاء الله ماكو شي هيج مجرد نظرات

جنات

جنت اكنس واسمع صفارة وليد جانت اشارة الي حتى اصعد
استعجلت وخلصت وركضت صعدت الدرج ع السريع جان كل باية اصعدها كلبي يدك الف دكة
وصلت فوك اشوف وليد ع الحايط صاعد
-تعاي لج
-ها شلونك
-انت وينج من البارحة اختفيتي
-جوه مكدرت اصعدلك العصر الولد موجودين
-صدك تحجين ولج جنات متدرين شكد اشتاقلج بودي اكابلج ليل نهار
-امم هالشي بيدك تعال تقدملي وراح تكابلني ليل نهار
-كشش عاااا وكام يطيرر بيده
ولج متكليلي منيلي فلوس واجي اخطبج واهلج راح يقبلون لو اتقدمتلج
-اي شوفلك شغل تضل بس اتطير ياع

يني
-اووف هو وينه الشغل جنونه حبيبتي والله الف واحد موصيه ع تعيين ع الشرطه ع الحرس ماكو
-اطلع اشتغل عمال حمال اي شي
-الله كريم دعوفينا من حجيج هذا اليوم شلابسة
باوعت ع روحي صاعدتلة بتراكسود النوم عزززا هاي شنو
-شبيج
نسيت وصاعده بتراكسودي
-عادي خليني امتع ناضري
-وليد عيب خل انزل
-وين لج بعد وكت ابقي يمي
-شسوي اطير طيور روح انزل لحد يشوفك يله راح الم الملابس وانزل

لميت الملابس ونزلت شافتني ميقات
-اكولج ذابة سرج باسطح شكو
-اووي شبيج فوك ماالم الملابس قبل لا تحركهن الشمس
-ها والله شاطره وماادري بيج
صاحت بيبي ولج ميقات شو تعاي يمي
-اوووو راح تبدي المحاظرة من بيبي
-دروحي روحي
-ها بيبي
-ولج تعاي ليش البارحة هيج كلتي لابن عمج
-بيبي هو مايريدني واني مااريده وانت تردين تزوجينه كوه
-شني ولج ياهو كلج مايريد
-مبين من تصرفاته كوه عليه
-ولج رعد يريد يابعوبة بس هو يستحي مايحجي
-بيبي هو كلج
-اي كلي واكثر من مره بس انت اخ منج ومن لسانج جم مره اكلج اضحكيلة سولفي وياه شمالج غمة شوفي ساره شلون لافة عقيل جوه ايدها ومدوخته بيها
-بيبي عقيل يحب ساره
-خيبة ورعد هم يحبج بس انت ماتعرفين مصلحتج
-هسة شتردين بيبي
-يجي ابن عمج واعتذريله
-الله كريم
امج اجت من السوك
لا بعدها ماجاية

اندك الباب
اكوم اشوف منو بالباب خاف امي اجت
صحت منو
اني يمة افتحي
فتحته
كالت فوت ايمن عمة فوت
-منو اجه
-ايمن ابن خالج خطيه شافني شايله العلاكة ركض شالها بدالي
طب ايمن
هلوو ميقات شلونج
هلو عيني وين ماوين مشتاقتلك واني اكثر
دفوت فوت
طب يمنا واجن البنات يسلمن
امي حلفت عليه مايطلع يبقى ع الغدة
وطبعا احنه وايمن ميانه ضحك وسوالف
كعدنا وياه وهو يسولف النا نكت ويحجي ع خوالي

للوحده ونص طبوا الولد من الشغل
سلموا ع ايمن
واني لازكة بصفة
طب مسلم وعقيل يغسلون
بس رعد ضل واكف يمنا
واني مااهتميت ولا اعتذرت اله ع شنو اعتذر
-اي ايمن الله عليك بعد نكته

حجالي نكته وضحكت طكيت ايد بيده
رعد كام
صاح ميقات تعاي
اوو شيريد
كمت -ها خير
-حضريلي ملابسي اريد اسبح
تفاجأت مو بالعاده ينخيني هو يأمر سارة
-لعد سارة وين
-تشتغل وي عمتي بالغده
-امم اوكي هسة صدك رعد اني اسفة ع البارحة بس الصدك حسيت هالشي من جانبك ليش بيبي تحرجك وتجبرك بيه
كلت اني اكولها واخلصك
باوعلي بنظره اول مره يباوعلي بيها
-وليش تجبرني ليش الكة احسن منج
-هاااا. سكت
واني سكتت بس وجهي بوجهه
اروح اجيبلك ملابس
طلعت ملابسة واتصفن اكيد هاي بيبي كلتله هيج احجي مثل ماتكلي اي اكيد
طلعت ملابسة وخليتهن بالحمام
رحت يمة
اكولك حضرتهن تريد شي بعد
-اي
-شنوو
-روحي يم البنات شكو كاعده يم ايمن ولد انت وعض شفته
-عادي تره ابن خالي وانت شكو والله يا الله
عفته ورحت
اجوي الولد يمنا كمنا هم نسولف

بعدين عفتهم وكمت وي البنات
نصب اكل سارة تطلع واطب وتسولف وي عقيل
رجعت اخذت السفرة
لكيت رعد كاعد وياهم دنكت افرشها جرها مني روحي اني افرشها وخزرني
اوو هذا شبيه اليوم تنحس كلش

تغدوا وايمن راح
صعدوا الولد لغرفهم

مسلم
صعدت اتمدد
وجان يدك مبايلي رقم غريب
حسيتها هي بسرعة جاوبت
الو
جاوبت بصوت ناعم
الو مسلم
اي مسلم منو
-اني ورود
-هلو شونج زين خابرتي جنت منتظرج بفارق الصبر تخابرين
-ليش
-حتى اسمع صوتج واكلج اني معجب بيج
-واني هم الصراحة انت حلو
-احمم مو احلى منج صدقة لعيونج

بيا صف انت
رابع عام
ها عاد شاطرة لو كسوله
-لا والله شاطره زينه بس بالبيت ع ضغوطات
-شنو
-اخوي يريد يبطلني وكوه امي واكفاله
-ليش يريد يبطلج
-مايريدني اطلع
-امممم حقة جنج كمر يخاف عليج اكيد من الناس ...
ضليت احجي وياها نص ساعة بعدين سديته
شكد فرحت بصوتها احساس حلو وشي جديد بحياتي حب احس دك باب كلبي واني من نوع العاطفي واحب الحببيات

.......
ميقات
مديت راسي من الباب الظهر ردت احد يجيبلي عصير
طلعت وكفت بالباب اباوع ماكو احد ضليت واكفة
اسمع صوت رعد وراي جرني
شعندج بالضهرية واكفة هاا شكو عندج
دفعني وطلع باوع يمنا يسره ورجع فات
شعندج متحجين
طلعت اريد احد يجيبلي عصير شبيك رعد خرعتني
لزم ايدي
طالعة الضهرية ولا حجاب وواكفة نص الفرع وتكلي شبيج انت متستحين
-اوو شعليك انت ابوي اخوي
شمرت ايدها ولي من وجهي يله
ركضت للدرج الي جان قريب ع باب الشارع
جانت صونده اكو مصعدين بيها مي للمبردة
عثرت ووكعت بيها صرخت
اجة رعد يركض شبيج وتاذيني
رفع راسي بيده جان يرجف والخوف مبين بعيونه ميقات احجي بيج شي تاذيتي
بقيت صافنه بعيونه واني اشوف الخوف بيهن علي اول مره اشوفة واركز بملامحة رعد حلو
وهو صافن بيه
انفاسة دافية وقريبة علي صارت
تقرب علي اكثر وبصوت مبحوح
ميقات بيج شي
-ها لا
صارت نظرات غريبة الي ويتمعن بوجهي

تالي هز راسة
تكدرين تكومين
ها اي
كومني ورجعت اصعد واتلفت عليه
كلبي كام يدك احس ن

غزه بكلبي وشعور ماعرفت اوصفة
معقولة يحبني لو يظاهر
بس اول مره انتبه عليه رعد كلش حلو
كمت العب شعري ياترى يحبني صدوك
لو بيبي كلتله هيج يسوي
امنيتي اعيش قصة حب قبل لا ازوج
وللحكاية بقية

#لُحُظٌاتْ مٌنَ الُْعمٌرَ 🍂 الُجْزُء الُاوَلُ
للكاتبة ام مصطفى
البارت الثالث

صعدت فوك ارجف جان بيتنا طابقين فوك ٣ غرف وجوه هم ٣ غرف وعدنا سطح طابق الثالث
اني غرفتي فوك اني وحسنات وجنات وسارة جوه
وعقيل غرفته وحده مسلم ورعد كاعدين بغرفة
الي كبال غرفتنا فوك
بقيت صافنا واكفة اباب غرفتي واتبسم
اشو رعد عيونه حلوه
ولا مرة منتبهة عيونه نرجسية وبيهن لمعة جانت مافسرتها معقولة حب
ضليت الف بشعري واتبسم واكفة
صار بوجهي رعد رايح لغرفته
كمزت
-شنو شفتي بعبع
-ها لا بس جنت صافنة وانت خرعتني
-بيمن صافنة ياترى مثل تفكيري
-وشنو تفكيرك
-اول مره اشوف عيونج
-هاااا
راسا طبيت للغرفة عزااا شعرفة هيج فكرت
حسنات جانت تقرة فتت ركض سديت الباب حيل
-شكو شبيج ترجفين وشبي رعد شكلج
-ها ماكو شي
-ميقات احجي شبيج تره مو علي
-التهي بدروسج مالج شغل
-اكلج صدك سمعت بيبي دكلة لرعد تقرب من ميقات احجي وياها خلها تحبك
-هاي شوكت
اليوم الصبح من جاي يطلع للشغل كعدت من اوكت اراجع الامتحان ونزلت جوه لكيت بيبي لازمة رعد وتحجي باذنه
-هاا يعني جاي يمثل علي شلت المخده وشمرتها ع حسنات جان خليتيني اعيش اللحظه خرب حضي
خابت كل امالي عبالي صدك اكو احساس بينا مداني من فكرت يحبني هو هذا مال حب
-وين صفنتي شبيج شكوو
-يحضي رعد يطبق كلام بيبي وع اساس يتقرب مني
-شكو بيها تره رعد ميتعيب
-انتم محد يفهمني اني ماحاجية عليه بس اني اريد شخص احبه ويحبني واعيش وياه قصة حب
-هي هي انت عايشة اللحظه ياحب يابطيخ متاثرة هواي بالمسلسلات التركية ...........
مسلم
يوم وره يوم صارت علاقتي تقوه بورود ويومية انتظرها تروح وتجي ونتخابر ارتاحيت الها هواي ملعونه لسانها حلو ودلوعة
اليوم قررت الحكها لمدرستها حتى اندلها وين خاف نخلص شغل بالبيت
وبعد مااكدر اوكف هنا ع الاقل اوكف الها بركن المدرسة
انتظرت تطلع الصبح
فاتت مني واني كلت لرعد رايح وراها اذا سئلك عقيل كلة راح للاسواق هسه يجي
-وك شبيك تخبلت وين رايح
-هسة اجي هسه
-تخبل هالولد لا لله الا الله هيج الحب يسوي اخ اويلي عليج ميقات لو بس تحسين بية

مسلم
مشيت وراها
بس بس
التفت عليه
-ها شجابك وراي
-امشي سوي روحج متعرفيني انداري واني اكولج
اجيت اندل مدرستج لان البيت خاف يخلص هذا الاسبوع شلون اشوفج بعد
-اكيد تتخابر ونتشاوف
-اكيد مع ذالك خل اندل المدرسة
-وصلنا ترة ذبج هي مدرستي
-زين لعد روحي اوكفي وره ذيج السيارة الجبيرة
-اوكي
راحت ع السريع وكفت اهسه مالهفة علي اكثر مني
اجيت يمها ختلنا وره السيارة محد يشوفنا بضهرنا حايط المدرسة وكبالنا السيارة
-شلونج
-زينة
جانت فرحانه وتضحك
مديت ايدي بجيبي
طلعت مبايل صغير دفتري بناتي لونه وردي اشتريته الها من المحل الي بصفنا
-هاج
-شنو هذا
-مبايل بي خط ورصيد هذا هدية مني الج حتى نتخابر ع طول وماكو داعي تبوكين مبايل امج وتخابريني
فتحت الكارتونا
-الله يجنن حلو ذوقك شكرا
-تستاهلين عيوني الج
-يله اروح
-ديري بالج ع نفسج
-اوكي
اخذته وراحت جانت فرحانه واني طاير بيها حلوه وصغيرة ودارسة شريد بعد وفوكاها تحبني واني عامل
جريت نفس فرحان بيها ورجعت للبيت
رعد واكف
-وينك يمعود سئل عليك عقيل خبصني ضل يصيح
-يله جاي جاي
ركضت شلت السيراميك وفتت للبيت
-وين جنت
-رحت للاسواق اشرب عصير ماعنده بارد
رحت لغيره شربت واجيت
-ديله خل نخلص شكد تسخت لخاطر الله
............
ميقات بهاي الايام الفاتت رعد يحاول يتقرب مني
بس اني كمت انهزم منا المكان اليفوت بيه اطلع منا لان عرفت بيبي هي الي تعلمة وتجبره هيج يسوي اني اريد هو يحبني من كيفة مو بيبي تعلمة
امي لزمتني وحجة وياي ع موده كتلها مااريد ازوج يوم عوفوني هسه
-وج مو اخوج عقيل يلح علي ع مود ازوجه ساره
-واني شكوو زوجوه يمة مالي دخل بيهم
اني رعد مامتعوده علي ومااحبة معتبرته واحد من الولد
-وج يمة دعقدوا هسة وتتعودين عليه وراح تحبيه
-ماما عفية لا تورطوني كتلج مااريده
-اوف منج شكد عنديدة لخاطر الله ....
التمينا ع العشة
وبيبي هم كالعادة فتحت المضوع امي كالت الها نخلص عشة ونحجي بالموضوع
اي نريد نفرح بيهم
باوعت ع رعد يباوعلي ويبتسم
رجعت درت وجهي منه
شلنه العشة بيبي صاحت علي وع ساره تعالن اكعدن يمي
ها بيبي اجينه
والولد كاعدين هم كلهم
-سارة جده ترضين بعقيل رجل الج
-اي بيبي تقبل
دنكت تستحي
رجعت بيبي
-عقيل ترضى بسارة بت عمك تزوجها
-اكيد بيبي اخليها بعيوني
خش وانت رعيد ترضى بميقات مره الك
-اي بيبي بكيفج اني شتقررين اني انفذ
يعني بكيف بيبي لخاطر بيبي مو لان رايدني ضجت من كال هيج
التفتت علي بيبي وانت ولج ميقات راضية برعد
-لا بيبي اني ماراضيه
-شني ليش ولج ماترضين بيه شناقصة ها
وضربتني بعوجيتها
-غصب عنج ترضين وباجر اجيب السيد يعقد الكم رضيتي والمارضيتي
كال رعد
-لابيبي خلص اني ماازوج وحده ما

تريدني خليها ع راحتها يجوز تريد غيري
كام عقيل ولج انت شنو هالصلافة وهيج تحجين
لزمني ضربني راشدي
كتله كوه خوما كوه مااريده لزكة
طفر مسلم وكام يدفر بيه وعقيل هم ظل رعد يجر بيهم عوفوها شبيكم صدك كوه قابل حقها البنية معتبرتني اخوها
مسلم ركض اليوم اذبحها
حيدر هم استلمني وبيبي بالعوجية حيل بيها تصيح
جرني رعد من بينهم حيل وركض بيه
دخلني للغرفة
جان فحطان كلي فوتي وقفلي الباب عليج فوتي بسره لا يضربوج
بسرعة طبيت وكعدت بالكاع ابجي شسويت اني شيويت
اسمع عقيل يكله ليش ماخليتنا نذبحها
-صدك تحجون عليمن تره البنية حقها احنه رابين سوه ومعتبرتني اخوها ع شنو تضربوها
قسما بالله اذا احد يضربها اغوف البيت واطلع بعد مشوفوني ابد
-عليمن تعوف البيت ختولي ماتزوجك طبها مرض
والله لزوجك جنات اشو اصغر منها واحلى وهي راح تظل هاي ضلتها اله اخليها تشيب وماتزوج

جنت اسمع الهم وابجي مااعرف اني الصح لو هما بس اني مااريد ازوج واحد ميحبني ويمشي بكيف بيبي

جنات سمعته هيج كال لو راحت روحي عززه انوب رجعوا علي بس لا صدك يسووها
لازم اكولة لوليد يجي يخطبني يستعجل بالخطبة
كال رعد لا عقيل لا جنات ولا غيرها بطلت ماازوج اتزوج انت الله يوفقك اني هسه مااريد ازوج بس بيبي هي تجبرني
-رعد ازوج جنات واكسر خشمها لميقات
-لا بيبي مااريد شنو اكسر خشمها قابل غريبه هي بنت عمي بعدين صغيره وحقها تريد تزوج الي يعجبها
بيبي ضلت تحجي
والله وكت ضلينا نمشي بكيف النسوان وين راحوا ولدي اخخ امده الكاع الضمتهم ......
جانت ليله سوده علي
ضليت محبوسة بالغرفة
بس حسنات تفوت يمي
يومين مااطلع اخاف اوصل باب الغرفة
ورعد يومين ماطالع للشغل بس نايم بغرفته
حسنات حجتلي
-لج رعد هم صارله يومين حابس نفسة بالغرفة
-ليش!
-ماادري بس اكيد من وراج وحتى للشغل مايطلع وساره تصعدلة الاكل خطية انت ليش هيج وياه
-حسنات اني مو اكرها بالعكس مرات احس احبه بس هو ميحبني وبيبي تفرضني عليه جاي اريده من يزوجني كون حابني ويعشكني مثل ماعقيل يحب ساره مو كوه عليه
-حقج انت بس هم خطية مبين عليه متأثر هواي ولو تشوفين بالعركة من ضربوج شلون يرجف جان عليج وشلون من جرج كلنا انتبهنا عليه جان خايف عليج مبين
-اه مااتدري هم مرات احسه يحبني ومرات لا احسة ينفذ حجي بيبي اووف بيبي تخطط بكيفها اليكول احنا مو بشر عدها ........

جنات
صعد لوليد وحجيتله كتله لازم تجي تتقدملي
وليد اخاف صدك يزوجوني لرعد واني احبك
-شنوو يزوجوج لرعد والله غير احرك الدنيا حرك وج انت الي ماتصيرين لغيري
-لعد تحرك وليد باجر خطوبة عقيل وسارة واحتمال اذا ماوافقت ميقات ع رعد يرجعون علي واني احبك مااكدر ازوج غيرك
وج لا تحركيني هيج روحي انزلي واني راح احجي لمي وان شاء الله يصير خير
.......

سارة
صعدت لرعد فوك
خوية ليش ضايج ختولي ميقات الف وحدة ازوجك اروح لخوالي كومه عدهم بنات واخطبلك
-خوالي شذكرج بيهم ولج
-ليش ناسبتهم دوم ع بالي وبعدين دائما اتواصل وي ريام بنت خالي وعدي رقمها اخابرها من عمة فوزية
-وين عرفتيها
من المتوسطه جانت وياي وضلينا صديقات سئلتها مره ع امي كالت مزوجه بالنعمانية قريب ع الكوت
-ها الله يوفقها
-المهم خوية انسى ميقات
-مااكدر انساها احبها ساره والمشكله هاي متحبني
-اذا تحبها ليش ماتصارحها ليش ماتحاول تتقرب منها ذبلها حجاية حلوه غازلها
-استحي شبيج مو عيب كاعد ابيتهم ووي اخوانها اشتغل ومامنيني ع عرضهم
واروح اسوي علاقة وياها لا لا مااكدر
اريدها تحس وحدها
هي لو بس توافق نزوج والله لعوضها ع كلوشي واخليها اسعد وحده
بس هي كارهتني اخخ هم حضي هذا شناقصني هسه اني ليش سارة ليش الي نحبهم مايردونه ونفقدهم
ابوي مات وعافنه وامي ازوجت وعافتنا
ميقات الي من صغري احبها متريدني
اخخ لازم انساها واعوفها خل تشوف طريقها الله يوفقها
-المهم خويه باجر نعقد اني وعقيل واني ماقابله اكلهم شلون ورعد
-لا ليش معليج بيه عقيل يستاهل حبيبتي عيشي حياتج اني اهم شي انت اامن عليج اني رجال ماعلي شي
ثاني يوم لبست دراعة ومكياج خفيف خليت
والبنات بدلوا بس ميقات ماطلعت من غرفتها
جابو سيد يعقد النا رغم جنت حيل فرحانه بعقيل بس اكو غصة بكلبي هي اخوي جان المفروض هم اليوم يفرح بس مامكتوبله الفرح

مسلم نزلت جوه لخاطر اختي جنت حيل مخنوك مااريد اشوف احد
بس اليوم عقد اختي وهي ماالها غيري لازم اوكف الها
نزلت جوه بيبي شافتني وكامت تبوس بيه
-توه نور البيت يبيي يروحلك كلهم فدوه
بيبي تحجي واني ادور عليها بعيوني ماكو
البنات كلهن مبدلات وموجودات ساره حسنات وجنات
بس هي ماكو
فوك اكيد بس من جنت فوك ماسمعت الها صوت

ميقات
اسمع صوت الهلاهل جوه تمنيت انزل بس اخاف من الولد خاف يطردوني
ضليت فوك
سمعت الباب اندك
كلت منو
اني رعد افتحي الباب
شيريد رعد كمت مسحت دموعي
وفتحت الباب
باوعلي
شلون صرتي
الحمد لله زينه
ليش ماتنزلين يم البنات
دنكت واحجي
لا خل

ي ياخذون راحتهم خاف يشوفوني وتصير مشكله
-راحتنا بوجودج بينا انزلي ميقات انت بحماي محد يتقربلج
-لا ماانزل روح رعد
جر حصره
انت ليش عود تعاندين امشي انزلي اكولج بحماتي
-اوكي
طلعت وسديت الباب ونزلت وهو كدامي
كلها شافتني عبست وجوها
رعد كال
ميقات اني نزلتها الي يحجي وياها ازعل عليه وبعد ما احجي وياه
سكتوا محد حجة

السيد عقد لعقيل وسارة وطلع واشتغلت الهلاهل والجكليت وبيبي تهوس
ضليت كاعده بينهم عبالك غريبه
كل شويه اباوع ع رعد وهو يباوعلي
جان حيل ضايج ولا جنها خطبة اخته
اخر شي خلصت الحفله كلمن صعد لغرفته وره ماتعشينا

جنات بقيت اكنس بالحوش والم اوراق الجكليت والهوسة كلمن طب لغرفته بس اني جان علي التنظيف مال البيت
سمعت صوت صفارة وليد معقوله صاعد بالليل شيريد
ذبيت المكناسة وصعدت ع كيف
شفته ع الحايط
-وليد عزه شعدك بالليل
-لج وينج انت انسمط ابو ابوي مو
-يا شكوو
-لج سمعت صوت الهلاهل عدكم خفت لا صدك انخطبتي
-وانت كلش مهتم ع اساس لخطبتي مو كتلي ادز امي وينها امك روح وليد روح يله مااحجي بعد وياك الا تجي امك
اوكفي وين رايحة
راح انزل ومتشوفني بعد
اوكفي اوكفي تره والله اطفر عليكم
درت وجهي منه وردت انزل جان يكمز علينا
رجعت عليه عزه وليد ارجع الولد هنا
لزمني من ايدي وجرني عليه لج شبيج وياي ليش تشلعين كلبي والله احبج احبج
لزمني من ضهري خال ايده ع ضهري من وره وايد الخ يمشي اصبعه ع خدودي بيها
احس روحي راحت ...

مسلم كاعد اخابر بورود ونضحك
واسمع صوت دبجه ع السطح مثل الواحد جيت علينا سديته من ورود وصعدت ع الدرج وشغلت لايت المبايل وامشي
صعدت القاط الثالث واشوف اثنين متحاضنين ضويت عليهم وخروا
اباوع هاي جنات
وللللججججج جنناااااات
وللحكاية بقية

#لُحُظٌاتْ مٌنَ الُْعمٌرَ 🍂 الُجْزُء الُاوَلُ

للكاتبة ام مصطفى البارت الرابع

جنات
جنت واكفة ووليد لازمني من ضهري
لا تضوجين عمري والله ادز امي هالايام
جان يصير ضوه بعيوني مشفت منو بس واحد مشغل لايت علينا راسا رجعت ليوره
واسمع صوت مسلم جنااات
رجعت ع الحايط لزكت وكلبي احسة راد يوكف ويدك سريع
ركض مسلم ع وليد
وليد راد يطفر من الحايط بس ملحك لزمه مسلم وضربة بوكسات لك حقير ساقط ابو الطيور اليوم تموت ع ايدي
ضليت مصتكة بمكاني ورجف دخيلك ياربي خلصني يمةة اليوم يموتوني وين اروح
اباوع ع وليد مسلم شبعة بوكسات
تالي وليد دفع مسلم حييل ع ضهر شمره وصعد بسرعة الحايط وطفر ع بيتهم
صاح اوكفلي وين تروح مني ركض صعد وراه
اني راسا ركضت نزلت
صار بوجهي عقيل ورعد
-شكووو شكوو شبيه مسلم يصيح
-هااا مممممم
ضليت مااعرف شحجي ركضت نزلت ع السريع وهمة صعدوا
نزلت جوه طبيت بالغرفة الحكيلي سارة
-شكوو شبيج شصاير
-مسلم لكفني احجي وي وليد بالسطح
-يمةةة عزه العزاج وانت شصعدج بالليل
-وج عوفج مني دبريني شسوي اليوم يموتوني اكيد
دخيلك ياربي شيخلصني يارب ساعدني توبة لو صعدت توبه يربي شلون بيه

مسسسسلم
من شفتهم ركضت ع وليد وبوكسات راد يشرد لزمته وشبعته كتل وبعدني مامرتاح اريد اموته دفعني حيل وطفر ع السريع مطيرجي ومتعلم ع التطفر ع السطوح
ركضت صعدت ع الحايط وطفرت عليهم
بس هو نزل وقفل باب البيتونة
ردت اركض ادك الباب لو ادفره وافلشه
بس بعدين كلت خاف ننفضح بالمنطقة والتاس تسمع
اذكرت جنات اليوم شيخلصها مني اليوم اذبحها خلاص
رجعت طفرت ع بيتنا لكيت رعد وعقيل
شكوو شصاير وشعدك طافر ع بيت ابو وليد
-لك هذا وليد الكلب لكيتا طافر ع سطحنا وحاضن جنات
-شنووووو
-جنااات
نزل عقيييل يركض

جنات سمعت صوت عقيل يصيح
وختلت وره ساره فدوه ساره لا تفتحين الباب والله يذبحوني
دك الباب عقيل جنات افتحي الباب
ولج س .. شعندج وي وليد
اسمع صوت امي شنوو شكووو
يمةة بنتج لكيناها بحضن المطيرجي وليد نص الليل بتج فضحتنا السوم نذبحها خلاص
واذبح هذا المطيرجي وراها
-يمةةة صخام الصخمني شلون لكيتها ومنو لكاها
مسلم .. اني لكيتها اليوم بتج تموت اليوم اشرب من دمها وهذا وليد هم
كام عقيل يدفر الباب سارة افتحي الباب
لا اكسره واذبحج وياها
جلبت بساره لا تفتحينه فدوه والله يذبحني الله يخليج الله يوفقج بروح ابوج
-ولج شسوي مسمعينه راح يكسرة للباب
عزه العزاج جنات هاي سوايه تسويها انوب كام يطفر علينا نص الليل وج حقهم اخوانج لو ذبحوج
-الله لا يوفقني الله يكسر ادي ورجلي شصعدني هسه اني منيتي لو حضي المصخم
تفلش الباب تفلش وبيبي تصيح ع كيفكم لميتوا الناس علينا راح ننفضح
-بيبي انفضحتا الله اليعلم جم واحد شايفه وهو يطفر علينا والله اليعلم من شوكت يطفر يجوز يومية تصعد ويجي يمها افتحي الباب جنات
ضرب الباب حيييل طار القفل وانفتح الباب
ركض عقيل جرني من شعري ودك علي انداروا علي عقيل ومسلم وحتى حيدر اخوي
ودك دفرات ع بطني وع راسي ع وجهي دموني ادمي اخر شي بيبي نامت فوكاي كالت اضربوني بدالها
وخروا مني
عقيل كال بيج بخت ابيبي اني الج
فتحوا الباب وركضوا لبيت وليد
واني انتهيت كل جسمي جان يخر دم
شالني البنات شييل وطببوني لعرفة بيبي
خشمي يجر دم وحلكي وراسي وادي ورجلي كلشي يخر دم بجسمي
نومتني بيبي ع قريولتها وغطتني ابطانيتها وطلعت وقفلت الباب
مسلم
هاي الحقيرة موتناها وماشفة كلبي بعد
اخذتها بيبي
واحنه رحنا لبيت ابو وليد دك الباب عقيل
طلع ابوهم
عقيل كله انتم كوم حضروا روحكم راح اندكم
-خير وليدي شصاير الله يستر
-ليش مكلك ابنك
-لا والله شكوو
-عمي ابو وليد ابنك المطيرجي لكيناه طافر ع سطحنا دايس بيتنا وواكف بحجي وي اختنا نص الليل فخل اكلك وين مانشوفة نكتله خلاص ووع ديست البيت هم هاي يرادلها فصل
-لا ياكلب وليد هيج مسوي عمي امسحها بوجهي والله اليوم اذبحه خلاص
-عمي شنمسحها اكلك لكيناه ابيتنا قضية شرف هاي
بيكم بخت بالناس مانريد الجيران تدري جان هسه افوت عليه اكتله بنص بيتكم
بس اخاف من الفضيحة
عمي اني اجيبه واجيكم
لا تجيبه ولا شي بس حضروا عماكم دوست البيت

عفناه ورجعنا
لكيت امي تبجي وشاكة ثوبها وبيبي تلطم
يمةة. انفضحتا بين الناس
ضلينا نتصايح بالبيت
عقيل كال بعد الصطح ينقفل ومنوع وحده تطلع باب الحوش وانت حسنات ماكو مدرسة
-واني شعلي يمعود
-بس ماكو مدرسة
وانت ميقات تقبلين برعد واجيب السيد يعقد الكم والله لنعل والديجن
جناات
اسمعهم وابجي جان جسمي كله يون علي خشمي يجري دم امسح ابطانية بيبي وارجع ليورة
شسويت بروحي اني شصعدني هسه نص الليل يربي شجاني

سمعت الباب اندك
مسلم طلعت فتحت الباب
واشوف جيرانه ابو وليد ساحل وليد مدمه ادمي يجري دم خشمة وحلكة وراسة دفعة وكعة جوه رجلي
وطب ومرته وراه تصرخ وتبجي
كال عمي سويلي طريق خل افوت
فتت صحت فوتن جوه

كلجن يلله لحد تكمد راسها
عقيل كال شكوو
ابو وليد ووليد اجو
حيدر طفر والله اذبحة اليوم
لزمة رعد اوكف لا تسوولنا ستلفة خل نفهم شيردون
طلع عقيل كلهم فوتوا
جر ابنه وطاب وام ولييد وياهم طبت دخيلكم ودخيل الله ركضت ع ايد بيبي باستها حجية ابوس ايدج ابوس رجلج ابنه غلط سامحوا وشتردون احنا حاضرين والله الصوج بيه اني من البارحة كلي اخطبيها الي واني اجلت
-بس احنه مو هيج تربينا يا ام وليد ترضيها ع بناتج واحد من ولدنا يطفر عليهن
مو احنه جورة وعشرة عمر
ابو وليد كال
والله والنعم من جورتكم وهذا ابني كدامكم كسرته تكسر ابوري حديد
وجبته واجيتكم يابوية هذا كدامكم تكتلونه مستحق
بس مراح تنحل السالفة واني اريد احلها بالتراضي
بويه عقيل الولد يحب البنية والبنيه هم خل نزوجهم ونستر ع الموضوع بله ماجيب عمك وجيب خالك
اني اكدر اجيب عمامي واجيكم وانطيح عليكم بس بذاك الوكت كلها راح تدري وتصير فضيحة لاختكم بله ابني ولد محد يحجي عليه
واني يابويه حاضر الكم شتكولون

سكت عقيل وباوع البيبي
بيبي هزت راسها بالقبول
كال عقيل خلص هاي لخاطرك ابو وليد وانت عزيز علينا ونعرفك رجال حقاني
وتخاف الله
البت الكم بس لحد مايتزوجون مااشوفة وليد لا بالباب ولا بالسطح ولا ابيتنا بس تجيب الشبخ يعقد عليها وناخذوها
-يابعد عمك هذا الحجي المعدل
ام وليد كامت تبوس بامي وبيبي وتهلهل
وهو ولا شال راسه جان مكسر صدك تكسر شلون اجة يمشي مااعرف

جنات
ماعرفت منو اجة
جانت غرفت بييبي جوه كلش
من شدت الوجع نمت وماكع وماكعدت اله الصبح

ميقاات
شسوت ينا جنات الحقيرة بسببها راح اتزوج عقيل وحسنات بطلوها من المدرسة بودي الزمها اكطعها فوك كتلتها مال البارحة

العصر عقيل صاح علي
كال تعاي ميقات
راح اجيب السيد نعقد الكم انت ورعد
هزيت راسي اي حاظر
رعد سمع
كله من رخصتك عقيل بس اني مموافق بجنات وماريد ازوجها
-شنوو ليش
-عقيل لا تضغط علي رجائا اني مااريد ازوج
ميقات ضليت صافنه يعني اني قبلت انوب هو الماقابل فوكاها بعد احسن خفتا وراحة كلت
طلع رعد
وعقيل اندار علي شفتي كله من وراج الله لا يرضى عليجن فضحتنا خبلتنا الله اليعم هم انت شعندج وترفضيه جنتي حقة الولد لو مايردج بعد
وللحكاية بقية

#لُحُظٌاتْ مٌنَ الُْعمٌرَ 🍂 الُجْزُء الُاوَلُ

للكاتبة ام مصطفى
البارت الخامس

جناات
نمت للصبح كعدت بس خايفة اكوم جنت مكسرة تكسر والدم يابس ع وجهي وراسي حركت روحي كولشي بجسمي يوجعني جان
اخخخ ياربي شسويت بروحي اني
جانت الساعة تسعة
بيبي مو بغرفتها
اسمع صوتهم كاعدين ويحجون
جنت عطشانه حييل احس حلكي يابس
باوعت يمنه يسره ماكو مي يمي
بقيت بمكاني اخاف اكوم اطلع

انفتح الباب رجعت ليورة خفت
باوعت منو طب
شفت سارة
اجت يمي
-جنات كومي امشي نروح لغرفتنا بيبي تريد تفوت للغرفة
-ساره خاف يضربوني هم
-لا ميضربوج خلص خلصت الشغلة
-شنو شصار
-دمشي وهناك نحجي كومي يله بيبي تصيح
-اكولج بس فراش بيبي انترس دم
-يبووي شيخلصنا منها اليوم
دكومي عود اخذه اغسله اني
-مااكدر مكسرة تكسر
-تعاي اني اكومج يله امشي اووف شسويتي بنفسج غبيه اكو احد يسوي سوايتج هاي
كومتني ساره ولازمتني وامشي احس واكعة من عاشر طابق
طلعت من الغرفة بيبي شافتني ودارت وجها
وامي هم كامت راحت للمطبخ
وحسنات غمتني باديها ودارت وجها
وميقات خزرتني حييل
كرهت روحي بوكتها حسيت محد يريدني وكلها كارهتني
بجيت واني امشي لحد ماوصلت لغرفتنا
-طبي جنات يله روحي اكعدي
-بس اغسل وجهي وادي شوفي الدماية
-تعاي يله امشي اسبحي فدنوب واني اطلعلج ملابس امشي اووف منج ثولة وج بله هاي سواية تسويها خبطتي البيت خبط وكلها تاذت بسببج
-الله لا يوفقني الله يكسر ادي ورجلي شصعدني هسه اني
-دمشي ميفيد بعد شي صار امشي فوتي اسبحي
-طبيت للحمام
اذب مي ع جسمي كله يون علي ويوجعني عبالك تيزاب مو مي
حتى مكدرت اليف بس بصابون فومت جسمي وذبيت مي علي ميقات جابت الملابس لبستهن وطلعت
صارت حسنات بوجهي
-الله لا يوفقج كون ياجنات كله من وراج اليوم عندي امتحان وراح علي حاطة الله وياج
-شبيج اني شكو شبيجن وياي عود خواتي انتن
-خواج البين وطكج بعصتين ولج هاي سوايه تسويها شعدج وي المطيرجي نص الليل هاا من وراج عقيل بطلني حقيرة
باوعت عليها وعفتها وفتت للغرفة
ضليت بس ابجي اووف ياربي شيخلصها شلون ارجع مثل قبل طبيعي اعيش وس اهلي شسويت اني صدك غبيه
ضليت بس ابجي والوم بروحي بس شيفيد البجي واللوم بعد خسرت ثقة اهلي وحبهم الي خسرت امي واخواني اووف العن ابو الحب شكد صعبه صعبة كولش
دخلت سارة بيدها صينية اكل طبت وسدت الباب
يله جنوو حبيبتي كومي اكلي
-مااريد خليني اموت شفتي حسنات عود هاي اختي شفتيها شتكلي
-حقها ياعيني مو عقيل حرك عليها تداوم بعد مو بس هي احنه كولنا كال بعد ممنوع وحده تطلع باب الحوش والسطح قفلة يعني انت عميتي علينا كولنا مو بس ع نفسج
دككلي ياعيني اكلي
هاج اشربي مي حلكج يابس واكلي شبيج باجر عقدج 😉
-شنوو عقدي
-راح يتزوجج وليد بعد شتردين ربما ضرة نافعة
-مافهمت شنو
دتعاي افهمج .......
مسلم
اليوم اخر يوم النا بهذا البيت
جنت ضايج من سالفة جنات الحقيرة
خابرتني ورود كالت اصعد فوك اريد احجي وياك من السطح
مااعرف رسا اذكرت الموقف مال جنات
كتلها لا مااكدر اسعد
-ليش مسلم مو مشتاقتلك والله
-مااكدر ورود اخوانج كاعدين يصعد واحد يلكفني وياج لا مااكدر
شوفينا يوم نطلع سوه جايبلج هدية
-شنو الهدية
-مغاجأة حبيبتي بس انت شوفيلنا يوم نطلع مكان
-وين
بكيفج حبي
باجر استراحة واليوم اخر يوم الي هنا اجيج للمدرسة ساعة عشرة اضربي الدوام وتعاي نطلع
-اممممم اوكي ولو مااسويها احب دروسي بس لخاطرك حبيبي كولشي اسوي
-اموت عليج
-واني هواية احبك
-ديله اروح عقيل كام يصييح
-اووف اخوك هذا مكروه ومعقد كلش
-لا لا كلشي ولا عقيل مااقبل تحجين عليه
-ديله عيني منحجي روحي لا يكتلك باي
-باي
سدته
هههههه ملعونه شكد قوية ولسان بس احبها. فدوه اروح الها
......
جنات
-صدك تحجين سارة عليج الله
-اي والله شبيج باجر يعقدولكم ويبقى بس العرس مااعرف شوكت بس ابو وليد تكفل بالعرس
وكلها وافقت بعد شتردين متو جان يتصور راح يقبلون بوليد
مو كتلج صاحت صيحة من بخت صبيحة ع كولة بيبي هههههههه
دكاي عيني اكلي بس عميتي علينا كولنا
الف مبروك حبيبتي
-الله يبارك بيج حبيبتي سارة اشكرج للن انت احسن من خواتي وكفتي وياي مراح انساها الج طول عمري
-يله لج قابل اني مو اختج
-لا والله اختي واكثر

ميقات
انصدمت بيه ماعرفته يكرهني يحبني يريدني لا
ماتعرف حسيت بالذنب اتجاها من شفته كال لا اني مااقبل
احس فشلت اني يجوز لان رفضته مثل مكال عقيل
رجعوا من الشغل والبيت جان كلة متكأب من ورة جنات العووبة
محد يحجي كولها ساكته
امي كالت ودي الاكل للولد
جنه مسوين فاصوليا وتمن وخضروات
حطيتهن بصينية جبيرة وسويت تشريب هم لان الولد يحبوها
شلت الصينية ورحت خليتها كدامهم دنكت رفعت راسي
رعد يباوعلي بحزن بعدين دار وجهه مني جان مبين عليه كلش مقهور وضايج
حسيت بالذنب اتجاها
طلعت من الغرفة
صاح مسلم
ميقات بصل جيبيلي مد

ام تشريب
اي صار
رحت جبت بصل وانطيته اله
اي عاشت ايدج
صار عندي فضول كل شوية باوع ع رعد
جان ياكل ورافع عينه علي عبالك يحاجيني بعيونه
اووف شيخلصها يربي

جنات
مااعرف شنو شعوري متلخبط جان فرحانة مقهوره
ماادري بس جنت اتمنى اهلي كلهم يحجون وياي جنت اتمنى انخطب الها بس مو بهيج ضرف
اووف سوده علي هو هم متأذي مثلي تكول سارة متكسر تكسر عمت عيني عليك
زين بس احنه خطوبتنا مزوركين يربي هسه السيد شيكول داخلين معركة
من امداني حتى الفرح مامكتوبلي
هسه اريد اصالح امي شلون اطلع
ماكو بس سارة تفوتلي وادخلي اكل
انوب الولد اجوي بعد كلش مااكدر اطلع

شسوي يربي بقيت بمكاني لاكدرت اطلع ولا اتحرك بس خايفة اووف الله لايخلي وحده بموقفي هذا وي اخواني

مثل الغريبة بالبيت يومين مااطلع من الغرفة
بس سارة تفوت علي
بالليل اجت سارة كالت جنات ابو وليد اجة يمنا بالاستقبال كاعد وي والولد
-شمو شيريد
ماادري بس يمكن ع موضوعكم
-زين هو ويامن اجة
-هو ومرته ام وليد
طبت يم عمتي وبيبي وهو يم الولد بالاستقبال
ياترى سارة يحجون ع مود الخطبةة
اي اكيد لان عقيل كلهم ع باجر تعقدون
-اه تمنيت ازوج وليد بس مو بهيج ظروف
اوف يربي ماتكمل وياي
-هسه ينسون حبيبتي فترة وينسون وتصالحون وتصير سوالف
يمته يارب يسمع منج
اهم شي هسه روحي صالحي بيبي وعمة والولد بعدين
-اي هم كلت اني باجر بس يطلعون الولد اروح اوكع عليهن
يحضي باجر استراحة الولد كاعديين
يبووووي
شلون بيه
باعي بالليل يصعدون لغرفهم وانت روحي اوكعي ع بيبي وعمة بس خل نفتهم شيردون هسه
-اي ان شاء الله

سارة طلعت
اتسمع عليهم
لكفني عقيل
شعندج هنا واكفة
يمةة شبيك كمزتني
-كمزتج شعدج ولج
شعندي قابل كلت اشوف شيردون تعرفني فضولية واحب اتسمع
-سارة مو مال شقة بيا حال احنه
-حبيبي عقيل شبيك فك شويه الصار صار بعد كافي راح تزوج جنات وخلصت
-والله عادي عدجن
-لا تحجي بلغت الجمع اني معلي ترة
اني علي بعقولي حبيبي
ابتسم
والله انت صايرة متنكدرين
-شبيك فقيرة ويتيمة
-اي اي دك اليتيمة دمشي صبي جاي مرة ثانية
-بس الله عليك سؤال
-احجي لج
اكول عقيل شيردون راح يعقدون لجنات وليد
عض شفته
-سارة ولي من يمي لا ابتلي بيج
-رايحة رايحة لا تعصب حبيبي
رحت للمطبخ صبيت جاي ووديته
ورجعت افتهم شكو من بيبي
سمعت ام وليد دكلها التردوه حاضرين
بس ع كيفكم ويانه شويه حالتنا ع كدنا
-بيبي كالت الها نريدة يترك ملة الطيور ويشتغل
اي ان شاء الله يشوفله شغل بعد منا وهيج بس هي وينها اشوفها اريد
-والله حابسيها اخوانها بغرفة خليها ع باجر من تجون تعقدون
وهاي اكلج ام وليد مانريد هوسة وناس بس انت وابو وليد ووليد والسيد اليعقد
لان البنية مدماية مو مال احد يشوفها بهيج وضع
-لا هاي هي احنه هم سوده علي وليد وجهه كله مزورك الله كريم ربي يوفقهم كون
ساره
طفرت لجنات
وج جنات جيبي بشاره
ها باجر يعقدولكم
-صدك وبهيج وضع
اي ماكو لا هوسة ولا ناس بس عقد وبس

مسلم
كعدت من الصبح تريكت وطلعت جنت مشتري ساعة هدية الها
كمت حيل احبها واريد ادللها اريد كولشي بنفسها اجيبه الها
جانت صغيرة وحلوه ودلوعة
وكفت الها الساعة عشرة اباب المدرسة دكيت عليها
وطلعت بسرعة
كالت يله بسرعة
شنو شبيج
يمعود شردت الحارس دخل للادارة وطلعت مو ممنوع وحده تطلع اله ولي امرها
صارلي ساعة خاتلة اريده بس يتحرك من الباب
-ديله امشي كدامي
مشيت
للشارع اجرت تكسي واخذتها ورحت لمكان متنزه عام كعدنا بيه جنت حيل فرحان بيها
ورردتي حلايانه
-اكيد احلى الورده من واحد يداريها تفتح وتصير حلوه وانت فديتك ممقصر وياي
-اريد اسئلج سؤال
-كول
شنو عجبج بيه وحبيتيني
-الصراحة شكلك وطولك وجسمك عضلاتك عبالك لاعب كراتيه
وبعدين كلامك وبعد الاكثر شفتك حبيتني وحبيتك
-اي والله حبيتج
-وانت شحبيت مني
-كلك ع بعضك حلو
-اممم شكرا
صدك غمضي
-اممم يله غمضت
-فتحي
-شنو هاي ساعة الله شكد حلوه تخبل
-الحلو للحلو
البسبها الف عافية عليج
-شكلها غاليه
-صح بس متغلة عليج
-حبيبي الله يخليك الي
-وردتي اذا اتقدملج اهلج يوافقون
-ماادري بس اني اريد اكمل دراستي امنيتي اصير دكتوره
-عادي حبيبتي اخليج تكملين
-صدوك
-اي اذا صدك شاطرة اخليج تكملين وادرسين وتصيرين احسن دكتورة
-ياريت مسلم اخوي شاد وياي فد شدة يريد يبطلني
-دخلصي هاي السنه وبعدها اخطبج ونزوج ووعد علي اخليج تكملين بعد شتردين
-حبيبي فدوه اروحلك بس ترة دراستي صعبة وتريدلها اتفرع وفلوس مدرسيين وتعرف اهلي ع كد حالهم مو مال يخلولي مدرسين واني حلمي اصير دكتوره
والله لحقق حلمج وكولي مسلم كال
وللحكاية بقية

خوش سؤال ..طبعا حبيبتي الكعدة زايده عل جهاز او الحاسبة تضعف☹️💔بالنظر

خاصة احنا طالبات جامعه. شغلنا كله بالجهاز ..من دراسه وتقارير

فالتقرير..عما تبحثين من مصادر ونسخ وترتيب..يعني اقل وقت..ينرادلج ساعتين ونص..وهالشي يتعب العين وبالكثره يسوي هالات😢 ويضعفها

فحاولي كل نص ساعه..تاخذين بريك
فد 8دقايق...حته تريح العين..ودايما سوي مساج للعين..يعني غمضي وفد دقيقتين دلكي بالعين ..هالشي زين و يعتبر كرياضه وينشط الدورة الدموية☺️

#ملوكه

حبي ميفيد واني هم حجيت قبل عن الليزر المنزلي
يعني نتائجه تطول😑..يله تشوفين فرق

مو مثل الليزر بالمراكز..ذاك نتائجه سريعه يعني بنفس الجلسة ..تشوفين فرق

اما المنزلي..ينرادلج كومة جلسات تسوين يله تشوفين نتيجة

واللي مجربته او عدها معلومه عنه. خل تنصح هالبنوتة🙃🧡

#ملوكه