باخر الاسبوع بمشي لعند بيت ستي اتريح عندن وبشوف امي واختي
امي مشلوله اجريها مابتطلع ع مطرح وبتشم هوا الا انا لما بكون عندا بترضى تضهر
وبصير اخدها بكرسيها وحدي اختي ونتفتل
باخدا ع الجنينه نشم هوا نضيف و في بياع غزل بنات دايماً بيمروء من هوني بنشتري وناكل كلياتنا منو ، امي مره كتير هاديه واكابريه وحنونه كتير انا بئعد عندا يومين بس وبرجع كلياتني طائه وحيويه وبنسى كل تعبي حدا دايماً كانت تحكيلي انتبه ع حالي كوني بنت بزهر شبابها كتار الي بدن يئطفو هالزهر وبعدها يرموه
وانا ما كنت اعطي فرصه لحدا رغم اني بمشي واسمع اشكال الكلام وكلها ماكنت فوتها كل مره انا باخد حئي وبمشي وبعلم الي طول لسانو مره ان بالتانيه يبلعو
ماعتمدت ع شي زلمه بحياتي
خيي من وئت الي اجوز ما عدت شفتو هيك بشوفلو شي بوست وبفهم منو حياتو
ومرات كان يمروء لعنا بالاعياد وياريتو ما مر بينكسر ئلبي لما بشوفو كيف متغير وصاير خلخال لابستو مرتو وتتمشى فيه

اما حياتي انا وبيي هي متل الجيره او شي اصحاب هيك عايشين سوا ومتئاسمين بينهن
الاشغال .. بيي بيغيب ايام مع صحاباتو بيفلو لشي مطرح من دون مايسأل عنا او عني انا بالزات كوني عايشه حدو بس بسمعو شي صباح بيدخل ويبوسني يحكيلي كيفك بابا
منيحه بحكيلو اييه منيحه يحكيلي تمام خلي نفطر وننزل ع الشغل سوا
هيدا بيي وهيدي حياتي مابعرف انا لشو محتاجه فيها كتير انا سألت نفسي هالسؤال من زمان وعن جد ماعرفت شو

- كل حياتك توقعتها هالشكل بس هسه انتي مرتاحه بيها ؟

- لا ما بحس انا هون مطرحي عم تفهمني

- اييه افهمك افهمك

- يمكن انا محتاجه لجو العيله ؟

- او يمكن محتاجه ترتاحين كأي بنت عاديه
ليش ماتعيشين ويه امك مو احسن وأامن ؟

- ما فيي اترك بيي شغلي وعيشتي معو بيت ستي بعيد عن المدينه وما بلائي هيك شغل عندن فكرت كتير فيها انا بس انا مابعرف اشتغل بشي غير التصوير كيف بدي عيش ؟

- ماتكدرين تفتحين استوديو خاص الك

- شغله بتكلف بلبنان المصاري مو متل هون عندكن كل اشي عندنا بكزا حساب

- اساعدك بهالشي انا وافتحيلك استوديو خاص الك قريب من امك واختك وتضلين مأمنه على نفسك حدرهم وتخلصين من تعب والدك وبهذلتك وياه على الاقل تكعدين بين اهل امك واختك بينهم تخف وحدتك و تأمنين على نفسك اكثر

- هلاء عن جد بدك تدفعلي مصاري حتى انا افتح شغلي الخاص !

- انا قلتلك اي شي اساعدك بي
والفلوس اسهلها

- يااالله انته ليه هيك طيب زياده

- يولو هاذي فعل خير بيها جبر خاطر

- بس انا غريبه عنك وبدك تعطيني مصاري
وفل من هون وانا اخده مصرياتك معي بدون ماتسئال !!! يعني كيف بتثق فيي هيك وبحكيي بدون دليل ! ماتخاف اني اعطيون لبيي وما بشتغل فيهون !!
مابسدء انك بدك تساعدني بهالاشي

- يولو انا ادحك البني ادم بعيونه و مخليكي تحكي براحتك وانا اقرا تفاصيل هالكلام بعينك وما صنفتك من ضمن اليكذبون
خليتك حدر الي يلزمون رعايتي انا ما همني غريبه او كريبه عسى ما تكوني فضائيه
المعنى عندي يضل واحد
وهو انك حرمه بعازه مساعده
دحكي لو اهلك هين عايشين بلدنا كان انا امنت عيشتكم وماخليكي تعتازي حتى للشغل
بس انتو بعاد وقلتلك اطلبي بشنو اساعدك
ماطلبتي بس هذا الي معتازتلو تتحرري من والدك وتعيشي حدر امك

- بس انا ما باخد منك ولا ليره انا من بيي وامي مااخدت هلاء باخد منك الاف !

- محتاجه لهالحل انتي لو لا ؟

- اييه بس مابيصير مستحيل

-عجل اطلبي غيرو .. دحكي غير حل واطلبيه يلا

- هلاء برايك انا بس اسكن مع امي هيك بتنحل كل حياتي راح عيش براحه اكتر !

- يمكن اي مادري بعد انتي الي تعرفين راحه حياتك شلون تكون

- هلاء انا لو عطيتك صلاحيه تغير بحياتي شي شو راح تغيرو !؟

- ماكدر اجاوبك على هالشي لان ياخذنا لغير مواضيع ويضيع اساس سالفتنه

- كلو متل بعض هو مساعده
جاوبني عنو

- يولو لنا لو تدخلت بحياتك اتصرف على كونك عراقيه مو لبنانيه وانتي ماترضين تعترفين بعراقيتك فخلينا بعاد عن هالامور
هسه شنو عندك شي تطلبيه واساعدك بي
لو تاخذين وكت اكثر تفكرين !؟

- بدي فكر اكتر ما بعرف هلاء انا شو لازم اطلب

- زين فكري على راحتك
راح اخذك لبيتنا ضلي حدر اهلي بين مايتذكر والدك يتصل ويسال

- وبعدا شو راح بيصير

- نتفاهم لوكتها

شغلت السياره وطلعت .. وصلت لبيتنا
ودخلت السياره لاخر الحديقه ونزلت
وهي نزلت وشايله جنطتها على ظهرها
قلتلها ..
-امشي حدري راح اعرفك على اهلي
- يا شيخ بلاها كتير خجلانه منون
- ما تخجلي يابه هنه كلهن حريم هين امي وجدتي ومرت اخوي اكعدي حدرهن بين ما يوصل والدك لهين
- طيب ما تحكيلهن على الي صار
- لااا يابه تطمني تطمني

دخلنا وخليتها تكعد بالربعه وصحت على امي وجدتي .. دخلن ودحكنها وضلن يتصفنن قلتلهن ...
- هاذي ضيفتي من لبنان
راح تكعد بينكم هاليوم احسنو ضيافتها

سلمن عليها وانا دخلت اسبح وطلعت كعدت بغرفه جدتي ودخلت هدى حطت الغدا

وسألتها على ضيفتنا وقالت ماتغدت مارضت
قلتلها خلي تحدر هين ..

انتظرتها ودخلت هي وهدى اشرتلها تكعد
وطلبت من هدى تجيب غداها ..

ضلت ادحكلي وانا اتصل على اخوتي اتطمن انهم رجعو من دوامهم ومن حطت هدى صينيتها يلا بديت اكل .. وقلتلها ..
- اكلي يابه انتي ضيفتنا ومانرضى ضيوفنا يضلون جواعى

صارت تاكل وانا خليتها براحتها والتهيت باكلي وادحك امي تدحكلنا من بعيد
ماهتميت انا اعرف شاسوي ..

شربت الجاي وقلتلها ...
- دحكتي اهلي كلهم طيبين اي شي تعتازيه اطلبيه منهم واذا كان بنفسك تنامي هين براحتك او تصعدي فوك غرف اخوتي كلها فارغه ادخلي افتحي اي غرفه تعجبك ونامي بيها
- تسلم ما بدي نام بالي عند بيي ما بعرف شو راح يصير بعد هلاء
- ما تخافين يصير كل خير

وكفت على المراه لبست يشمغي وتعطرت ولبست العباه وهي قلتلي ..
- بدك تمشي من هون
- اييه
- ما فيك تضل لحتى يوصل بيي
- هو انا طالع حتى انتظرو بديواني ودحكي لو اتصل عليكي ماتردي مفهوم
- ليه يعني ما برد عليه !
- حتى يحدر هين يدورك
يلا انا طالع واذا اعتزتي شي اهلي هين حدرك
- تمام تسلم

وصيت جدتي عليها وطلعت ..
بعدني اتمشى للديوان واتصلت غاليه
جاوبتها وبالعجل قلتلي ...
- الاخبار تسسر الخاطر ياخيي ضيوفك بيتنا اليوم
- ما تفوتك فايته لا والله
- هههه خيي حليوه هالبنت ماقلتلي انها طويله ورشيقه وكت اسالك
-وانا اكعد افصلك جسمها
- اكذب وقول مادحكتو وفصلتو
- بالله مادحكتو مثل ماوصفوه الك
- والله ياخيي مادري كلبيش كلبك لا حن على بنات ديرتك ولا بنات الغرب
- ولا عمرو يحن
- زين خيي ما قلتلي شعدها هين اليوم
- بعدين عندي شغل الحين بعدين نتفاهم
-زين عجل انتظر التفاصيل وكت تكمل
- هههه روحي يولو

سديته ورحت كعدت بديواني واتصلت على
واحد من اصحابي ثقه وكفلتو يمشي لهذاك الخنيث يهدوو ويطلعو من ديرتنا كبل ماتظلم الدنيا ..

وبعد اربع ساعات اتصل حضره الوالد ..
رفضت اتصاله وكتبتله ..' وجهاً لوجه يابه '

كانو حدري ولد عمي ولما وصل الوالد قلتلهم يخلونه وحدنه .. وكفت بوجهو وضليت ادحكلو وهو يمسح وجهو قلتلو ..
- عندك بنت مو ؟ صغيره وشابه وعليها العين وينها تعرف حالها من الصبح لهسه تعرف شي عنها ؟
- شيخ الك احترامك انته بس بحياتي الخاصه ويه بنتي لتدخل
بأي حق تجي تتهجم وتاخذها لبيتك
- انااا مااتهجمت على احد انا فزعت للحرمه الي طلبتني افزعلها بدل ابوها
اذا انته ناسي الغيره والحميه فانا ماعيش الا وهي بدمي تجري
- استغفر الله وينها هييييه وينهااا
جيبها خلي نروح ونجفيك شرنا
- وين تاخذها ؟ هالمره حدر يا خنيث تشمرها !
- بنتي هاي شبيك وين اشمرهه مكعدهه ومدللهه هي الي متكعد راحه ماكافي خسرت نص شغلي اليوم من وراهه
تعبت صارلي شهر ونص مكسور ظهري بالشغل وتاليهه اليوم خربت كلشي
- وشجاب شغلك عليهه !!
البنت تحاصرت من هالارعن الي حاسبو صاحبك ماحسيت عليه انته وهو يدحكلها كل هالايام. !!!! شلون ترضى تخليه حدرها وتمشي
- ماسوى شي الولد اعرفه اخلاق بس هي كبرت الموضوع وراحت خابرتك وهجمت الدنيا خلت الولد مكسر حجي ميكدر يحجي
شسوي هسه اني شسووووي شغلي راح راااح منو فادني هسه هي لو انته
- يووووول احكيلو بنتك هذا متعرضلهه يتحرش بيهاااا تحكيلي شغلي واخلاق !
ول ياااخلاق هاذي الي تخليه يحاصرها بغرفتها يدخللها
- جذابه هاي جذااابه تتمسكن وانته تصدكها على حلاه لسانها
- ووول اكضب لسانك لا اكطمو اااالك
- جيب بنتي وخلي اولي

رفعت ايدي اريد اضربو وجريت نفس ومشيت عنو تالي قلتلو ...
- هسه يعني بنتك تكذب وهذا كلو تلفيق على جناب صاحبك
- مو تلفيق بس هي مفتهمه غلط هي من قبل صاحبه مشاكل وهاي مو اول مره تهرج الدنيا على واحد يحجيله كلمتين وياهه
من قبل مشوفتني الويل من مشاكلهه
ماتطلعلهه طلعه الا تعاركت ويه كوم زلم
لتصدكهه انته تره الولد متزوج ويحب زوجته ماله دخل بيهه مثل ماهي فكرت يتحرش
هو كل الي راده تكعد وياه لان وحده وهاي تحسبهه لبعيد وتحلل بكيفهه

- والله حرام بيك الرجوله
ول انته هم حاسب نفسك على الرجال

-احترم نفسك لا حسبالك شيخ وتشمر بالحجي على الرايح والجاي اعرف حدك
رجال اني وغصبا ما عليك وعلى الخلفك

تكربت عليه وحصرته بالحايط وضليت كاضبو من لوزتو حاصرهه باصابعي
وقلتلو ..
- دحكت وين الرجال هين
هذا يترافس على النفس
انا هين لو اكطع لحمك وصل واشمرو محد يدرى عنك ولا يوكف بوجهي ويعارضني
وانته تستاهل الاهانه بس انا ماراح اهينك
تريد تتنفس وتنفذ لو اكطعو فرد مره ؟

ضل يهز براسو وانا وخرت عنو وخليته يتنفس ويكح براحته وبعدين قلتلو...

- صاحبك مشى من هين
- اي
- زين
- شتريد انته فهمني
- بنتك تتعرض للتحرش من هالناس وانته عقلك محشيه حجر ماتفهم مشاكلها هاذي ادافع عن نفسها لو انها رخصت نفسها ماكنت طردتها و خليتها منبوذه
- مااصدكها هاذي ملعبه

- ليش يوووول لييش ولك بنتك هاذي مو صاحبتك بنتك يااالله ول بنتك ول انته تفهم شنو بنتتتك عرضك هاي شرفك ماي وجهك
شلون متصدكها
- انته شفتها مرتين واني عايش وياها العمر كله وهي تجذب تريد بس تتمسكن وتسويلها سالفه وتشرد لامهه اعرفها تعاليم اهلها
لو هي بيهه خير ما جان دكت على الغريب وتكوله تعال هنا يتحارشون بيه شنو هذا احسن من ذاك
- هاااااا عجل ماافزغتلها انته من اتصلت عليك
- ماتصلت لو متصله اجاوبها
- لاااا اتصلت عليك وانته طنشتها
- مااتصلت جذابه
- زين هسه انته تريد تاخذها
-اي
-وين تروحون
- ارجع لبغداد اشوفلي واحد يساعدني اكمل شغلي
- وين تكعدون بغداد ؟ بيت اهلك يعني
- لا بيت اهلي مقسم مال ورثه انأجر بفندق
- وتنعااااد نفس السالفه من جديد هم تهج من صباح الله وتخلي البنت متهجوله
- يطبها مرض هي رادت تجي وتتحمل هالعيشه هاي عيشتي شسويلها يعني وين اكعدها
- زين ضل هين لا تتحرك

عفته وطلعت وانا الف شك براسي امشي واقول ممعقوله والدها يجذب وجايز هي تطلع مشيطنه ومافهمتها ...
دخلت بالعجل لبيتنا وصحت عليها ..
- يووولي لينااا وينك حدري هين

حدرت وبالعجل قلتلها ..
- محتاج ادحك تلفونك يصير ؟
- خير شو في
- يصير لو لا
- اييه بيصير بيصير

راحت وانا ضليت واكف وادحك بوجه امي الي كانت تسألني شنو الصاير ومارديت عليها
رجعت وانطتني تلفونها اخذتو وطلعت بره وكفت ..
دحكت سجل المكالمات ولكيت اسم ابوها ومتصله عليه الصبح وخمس مرات
وهو ممجاوب ودخلت للرسايل دحكت
رسايل غراميه من رقم غريب وكلها ممردود عليها ... دخلت واشرتلها تلحكني ودخلنا غرفه جدتي .. قلتلها بصوت ناصي ...
- هالرقم هذا مال الولد نفسو
-اييه هو
- لينا تضلين هين تكدرين ؟
- مافهمت
- والدك عندو شغل راح يرجع لبغداد ويدور واحد يشتغل من جديد يكمل وياه لان الظاهر هالولد ساحب نفسه منه ومتخاربين بشغلهم
تضلين هين لحد ماهو يكمل شغله ويرجع ياخذك وتسافرون ؟
- كيف بدي ضل هون عندكن مابيصير
بيي مابيرضى
- انتي اريد جوابك انتي
تضلين هييين حدر اهلي والله تضلين بامان ماحد يمسك بكلمه وان كنتي تخجلين من اهلي هين عندي بيت ثاني فارغ اكعدي بي وقفلي بابو عليكي حتى انا مااصلك والله ولا ادحكين حتى خيال رجال يمر حدرك
- شيخ صعبه كتير كيف بدي عيش هون بدون بيي وليش لضل بعيده عنو
- والدك راح يتركك بالفندق ويطلع لشغله ترضين تكملين بعد هالشكل وياه
- لاااا مابيتركني ننزل نشتغل سوا
- استغفر الله يولي افهميها
مايضل عليكي اهتمام تضلين تتعرضين لهالاشكال كل يوم ووالدك مايوكفلك والله
هين أامن الك بين مايكمل شغلو
- ما بعرف لشوف بيي بيرضى لهالشي

كنت محتار بامرها ومادري اذا هالتصرف صح او لا بس حز بخاطري اخليها تمشي ويه هالرجال وضليت اتمشى بالغرفه وقلتلها ..
- ارجعك لبنان مو احسن ؟
خلي والدك هو يدبر شغله وانتي ارجعي لامك احسن وأامن الك
- ما فيي اترك بيي انا شريكتو بالشغل كيف بدو يكفي شغلو بدوني
- استغفر الله استغفر الله
-انته ليه تعتل هم وجودي حد بيي هيك ؟
في شي انا مابعرفو
- لينا ارجعي للبنان وعوفي الشغل هذااا عوفيه يولو سترك ونفسك اهم من شغل والدك ارجعي واستري على نفسك حدر اهلك

ضلت ادحك بنص عيني وساكته تالي قلتلي ...
- بيي كزب حكياتي لالك ما هيك
- نفس الموقف كل مره مو
- لااا هالمره اهون بكتير هالمره في مين موئف حدي ويعتل همي كبنت
- لينا مايستاهل تخاطرين بنفسك وياه
والله لو ادري بيه يحميكي كان اخذتك الحين حدرو واودعكم بالسلامه بس انا ادري راح يضيعك

تكتفت وقلتلي ..
- بتعرف خليتني حب نفسي واعتل همها
اعمول الي بتشوفو مناسب لالي انا بثق فيك
- زين عجل انتظري مني خبر

رجعت للديوان ودحكتو كاعد وصافن بالسكف قلتلو ..
- اسمع يابه الحك وعرفناه المن
و لو كعدت انبهك على الواجب يصير مااخلص لليل خلينه نخصم كعدتنا بكلمتين
يا تسفر البنت لاهلها يا تكعدو هين بينا
- وانته شنو مسؤول بينا ! وتحط شروط وتحجي معلك
- دحك هو صح لا انا طايقك ولا انته الي طايقني بس لزوم تتحملني واتحملك لان بالنص حرمه بينا
- وشدخلك انته بنتي شدخلك بيهه
- بنتك كفلتني انوب عنها بحمياتها ومن اول يوم هي طلبتني حماي الها واحنه رجال نفزع لليطلبنا ونتكفلو بزينه وشينه
- لااا هاهيه صارت هسه بنتي تكفل الغريب يحمايلها من ابوها !
- لو ابوها هذا براسو خير ونخوه كان مالتجئت النا يول استحي على دمك مجرجر البنت لهين وحيده وتشمر بيها من مكان لمكان وماتسأل عنها يول وين خوفك على عرضك
وين نشامتك وينها ابوتك وينها
- شدخلك انته بنتي اذبحهه اشمرهه اصلخهه معليك انته ومحد اله حق يدخل
- دحك يول لا تزامط براسي هين
لا تنسى انته ضيف وانا شيخ
وعلى سالفه بنتك انا بخمسين جهه اكدر اشتكي عليك واشكال الكلام اسفطو عليك
وبنتك كذابه موو هم راح تشهد ضدك كذب وتتمسكن للامن وتروح انته بالرجلين
اسمع يول لا الديره ديرتك ولا الناس ناسك
ويه اسياد هالكاع لا تلعب

وانا ما حكيتلك زور ولا رايد اتعدى على حكك او حك بنتك رايدلها الستر
احنه رجال مانتهاون بشرف حرمه ولو كنت ابوها لزوم عليك تصونها وتدحك زين كلامي الك لا تصكعنا بهرج الصوت
اوزنه لعقلك ودحك زين بنتك وين وقلتلك يا تسفرها يا تكعدو هين الكم بيت خاص بيكم اكعدو وانسترو بين ماتفض شغلك وترجع لاهلك وهناك مالي دخل بيكم بعد

ضل ساكت ويفرك بايده تالي قال ..
- شلون اكعد هنا واني لازم ارجع لبغداد للقناه ادورلي فريق اكمل شغلي وياهم
- هو الشغل مكلفيه الك لو مشارك ويه احد بي
- مشارك وياهم احنه فريق تكفلنا بهالفقره
يعني هسه اخذو همه كل الشغل ع الحاضر وصفيت اني بنص شغل فلسين مايطلعلي منه
- هاااا يعني لازم تروح ادورلك فقره ثانيه تشتغل بيها هاي بعد راحت
-اي من وره تسرعكم خسرتوني كومت فلوس جان اني منا لاخر الاسبوع مسلم مال الانبار وطالع لدهوك و هم اسبوع واخلصه ولكل منطقه ذاك الحساب
- يول تفضل الفلوس على بنتك
ول فلوسك هاذي تنرزق غيرها وبنتك لو ضاعت من ايدك تخسر دنيا واخره عليها
- ما تحفظ نفسهااا هي ماتحفظها شلون اضل اني مكابلهه وكاعد احفظ شرفهه
بيهه خير هي ادافع لنفسهه
- مو دافعت وانته شرديت ؟ كذبتها وتضل تكذبها انته مشكلتلك ماتريد ادحك نفسك مقصر بحكها وماتعرف تصونها تريد تخلي الغلط كله عليها
تخاااف تواجه مشاكلك
- هسه انته شتريد مني والله خبلتني شتريد
- خلي البنت هين وروح اشتغل وارجع اخذها من تكمل وتريد تسافر
- خليها دخليها ساعه السوده الي ابتليت بيها
بقيها يمكم وشيصير عليها انته المسؤول
- ايييه انااا مسؤول بيها
ولاخليك ادحك المسؤوليه على اصولها شلون تصير
- زين هي تلفونها وين
- عندي تلفونها ليش
- رجعه الهه خلي تجاوبني
- زين بعد ؟
- راح امشي ديربالك عليهه
- ههه والله الكلام واكف هين على طرف لساني و ابلعو
روح يابه توكل توكل

طلع مستعجل وانا استغفرت ربي
هالبشر يصفنوني عليهم والله
شلون يكدر يرخص بنتو هالشكل !!!
بالله دايماً مشاكل الحريم تسطر الراس

اتصلت عليها وقلتلها ...
- ها يابه شلون حالك
- بخير شو صار معكون
- والدك امنك عندي راح اضلين بيتي
دحكي شنو الي تعتازيه وانا ارسل يجيبوه الك
- لااا تسلملي ما بدي شي انا معي كل اغراضي الي بعتازها لليوم بس بيي وينو راح يعني
- اييه طلع قال راح يتصل ويريدك تجاوبي
اذا صار بينكم نقاش مارضيتيه احكيلي عنو زين
- ايييه تمام بحكيلك
- زين عجل يابه اخذي راحتك

سديت الخط وطلعت كضيت كم شغله ولليل يلا رجعت للبيت .. كنت متعشي برا بس
غسلت ودخلت غرفه جدتي دحكتها نايمه
و لينا بمكاني هين نايمه ..

سديت الباب وصعدت لغرفه عباس نمت بيها
انا بطبعي مااخلط شي ويه شي
وكت الي اريد انام انام ما خلي التفكير ياخذني
ووكت الي اريد اشتغل شي اشتغلو ماخلي شي بالبال ياثر عليه
وكت الي اجوع وانا بعدني بمشكله اعزلها لوكت مااكل واشبع وارجع احلها
كل شي بحياتي انطيه حكو ...

ثاني يوم اريد ابدل واطلع لدوامي وهاذي نايمه هين .. صعدت دكيت الباب على امي
وطلبت منها تنزل تاخذلي ملابسي من الغرفه
وضليت انتظرها بالباب .. اخذتهن منها بدلت وطلعت لدوامي ..

اتصلت غاليه ومن سمعت انها ضلت هين عايشه بينا قالت راح تحدر هين حتى ادحكها
والخميس راح ترجع ويه اخوتي ...

ضلت هالايام لينا بيتنا كلامي وياها مره وحده صار على التلفون وصيتها ماتطلع لمكان ولا تحكي شي عن حياتها لاحد من اهلي
وبعدها وصيت رماح ما يضل بالبيت ومن يرجع بوجهه لغرفته ..
انا اطلع لشغلي من الصبح وماارجع الا نص الليل الكل نايم اغسل واصعد فوك انام
ماعرف شي عنها الا انها زينه مرتاحه هين وهذا عرفتو من غاليه ..

صار الخميس وبالليل وصلو اخوتي واخيتي غاليه وبنيتها .. حضرت العشه بالبيت لخاطرهم بس لينا ما كعدت ويانه ضلت بغرفه جدتي ..

تعشينا وتعللنه سوه اصوات اخوتي هين بالبيت هي راحه عيشتي .. تطمنت على كل واحد بيهم و بعدين وصيت غاليه تاخذ البنت
وتنتظرني عند الباب حتى اوصلهم لبيتهه

طلعت وهين يلا دحكتها من بعد ذاك اليوم
سلمت عليها ومشيت على يمينهم وشايل بيدي مزنه . .

وصلتهم للبيت واول مادخلو انا ترخصت وطلعت .. رجعت لاخوتي سهرت وياهم
وبعدين كل واحد مشى لغرفته ينام وانا رجعت لمكاني ..

دحكت هين حدر مخدتي ماشات شعر
وسماعات ومبرد اظافر .. ضحكت وكفيتهم على جهه واجيت انام اول ما غفيت دحكت وجه عمتي الله يرحمها ..
دحكتها بوجهي صار وجهها وهي تبتسم
بس هالشكل دحكتها وفزيت ..

ضليت صافن شجابها على بالي الحين ؟
قريتلها الفاتحه ورجعت نمت ..

ثاني يوم الجمعه متعودين على ثواب الغدا لابوي وعمتي بهاليوم واخوتي رادو يشوون سمك وراحو صيدو وكضوها شوي
و وكت ما صار الغدا اتصلت عليه غاليه
جاوبتها بس سمعت صوت لينا .. قلتلها..
- هلا يابه
- كيفك شيخ
- الحمدلله بخير .. عجب متصله من تلفون اخيتي
- هو انا ما عندي وحدات لهيك اتصلت من هون بدي احكيك
- اسمعك يابه

- هو انا سمعت من اختك هلاء في عندكن تواب لاهلكن والكل بدو يتجمع ع الاكل
فيي انا كمان احضرو ؟
يعني انا ما عشت هيك جو فيي جرب جو العيله الكبيره حدكن اليوم لو سمحت
- ماشي بس تلبسين حجاب
- اييه مو مشكله بلبس هلاء
- زين يلا تعجلي
- ههه تمام شكرا

سديت الخط وضليت ادحك للتلفون
وبعدها دخلت كعدت براس السفره والتمو اخوتي حدري وامي وجدتي وضلن البنات
تاخرن وانا انتظرتهن ما سميت للاكل
لحد ما دخلن واخوتي ضلو يدحكون بوجهي
قلتلهم ضيفتنا هاذي بنيتنا ..
دحكتها لابسه حجاب وثوب طويل وكعدت حدر غاليه وهدى ..
سميت باسم الله وبدينا ناكل وهالمره بهدوء
اعرف اخوتي مستحين من كعدتها هين ولا كان هرجو البيت بصوتهم ..

من دحكت الكل كمل اكلو بديت اقرا اهداء الثواب واخوتي يرددون وراي وبعدها قرينا سوره الفاتحه وختمناها بالصلاه على النبي

اخوتي ساعدو بلم السفره وانا غسلت وكعدت حدر جدتي الي هي بدت تسألني عن حال البنت وشسالفتها .. قلتلها ضيفه ابوها امنها عندي وراح لشغلو بغداد ... وسدينا السيره

شربت الجاي وطلعت برا تمشيت شويه ورجعت لغرفتي نمت ساعتين وكعدت
وطلعت دحكت رجالنا .. .

بالليل وكت رجعت للبيت دحكت غاليه كاعده بالربعه تنتظرني .. كعدت حدرها وقلتلها ...
- وين بنتك يولو
- نومتها حتى اتفرغلك خيي
- هاا خير ان شاء الله
- مشتاكتلك ياخوي زمان ما كعدنا هالكعده
- ايييه بالله وانا مشتاكلك يولو
- جراح لايمتى لينا تضل هين
- ماعرف والله لايمتى ما والدها يخلص شغله ويريد يسافر هي تطلع من هين
- زين خيي عندي سؤال
-اييه
- ما كلبك رف عليها ! ؟
-هههههه يولوووو
- بروح ابوي احلفك بروحو ما تحركت هالحجاره من مكانها شبر واحد بس شبر
- لا ماتحركت وعمرها ماتتحرك
- يعني والله بالك ولا يمها !
- لا شعندي وياها مادحكتيني انا شلون اتصرف وياها مافهمتي يعني !
- ياخيي كل هالجمال والدلع والصوت الحلو
وما رف كلبك ! عجل شنو الي يكدر عليه بس فهمني انته من شنو مخلوق
- يولو انا كلبي كاضبو بعقلي ولا يمكن بيوم ينبض نبضه بدون شور عقلي فلا تتعبين نفسك وياي انا لا الجمال ولا الدلع ولا اسم حرمه يكدر يفر موازين عقلي
- ليش ياخيي ليييش
- هذا انا وهذا تفكيري عوفيني مرتاح شكو تنبشين بهالسوالف
- يعني تضل ماتتزوج
- الفين مره قلتلك ماتزوج جديده عليكي !
- بس انا ضليت بامل تطلع بيوم بنيه بحياتك تغير هذا رايك ودحكت لينا اكبر فرصه لتغييرك وهم عقلك بعدو مقفل على كلبك
- يولي انتي تعرفين شي وانا اعرف شي
انا تفكيري ابعد بالف متر من تفكيرك فاسكتي
وسدي هالسيره
- زين سكتت
- يولي انتي عايفتها وحدها بذاك البيت ؟
- لا بعدها هين بغرفه جدتي كاعده على اللابتوب
- زين ما تمشن تنامن ترا انا مطفي وتعبان
مابيه حيل سهر
- ننام هالليله هين لان بنتي نامت بعد ماكدر اطلعها
- يلا زين عجل افرشيلي هين وانتي نامي حدرها

كنت اتثاوب وانا احكيلها وهي راحت وجابتلي الفراش كبل انجضعت وكبل مانام تذكرت انها ماعدها رصيد ..
اخذت تلفوني وحولت لرقمها الفين وبعدين نمت ..

ثاني يوم اخذت اخوتي وطلعنه لبساتينه
غيرنا جو الشغل والدراسه وصار غدانا بنص الزرع وعلى سوالفهم وضحكهم ماحسينا الا العصر وصار لازم يرجعون لبغداد ..

خليت مصرف كل واحد بايده و ودعتهم ورجعو بس غاليه ضلت هين ...

رجع الدوام وكل يوم نفس الشي انا اكضيه من شغله لشغله وارجع تالي الليل تعبان بالعجل انام ..
ليوم الاربعاء غاليه اتصلت وقلتلي راح ترجع واسامه بالطريق ..

رجعت للبيت حتى اسلم عليها .. وهي كانت بيتها وحدرها لينا .. سلمت على لينا ودرت وجهي عنها ضليت مركز باخيتي ..
قلتلها ..
- يولو ماتخليلنا مزنه
- ماخليها عيني بنيتي ماكدر بلياها
- زين راح اشتاكلك
- يابعد عمري ماتخاف اضل ع التلفون وياك
ماخليك ترتاح مني
- هههه بس فكي من الاسطوانه نفسها رحمه لاهلك
- افكر مادري بعد
خيي امشي قفل السخان مادخلتلو انا لان هين ريش حمام منثر واخاف تطلع مذبوحه هين
- هههههه يولوو ايمتى تتغيرين
- انا كلبي مقفلو عقلي ماتغير

جريت خشمها وضحكت ورحت طفيت السخان ودحكت حواليه وقلتلها ..
- يولي هين بس ريش الحمامه صارت ببطن صيادها
- عساه ماتهنى بيها وسم تصير بحشاه يااارب

سديت الباب وضحكت وهي وكفت حدري وشاورتني ..
- جراح ياخيي تلحلح شويه دحك هالي حدرك
- غاااليه يابه شسالفتك انتي كل يوم نعيد نفس الكلام
- ياخيي البنت تحبك ذابحه روحها على نظره من عينك
- لاا بربك
- والله ياخيي هذا الي بالها
-هي قلتلك هالشي لو افكارك هاذي
- مااسمحلك تهين افكاري خي
انا استنتاجي بمكانو ودحكلها مرتين ويثبتلك صحه افكاري
- وكفتي كلبي عبالي صارحتك بهالشي
- ياخيي والله تحبك انا دحكتها تتصفن بصورتك بجهازها ودايماً تسال عن كل شي يخصك و حتى صورتك من انته وصغير حلفتني اخذها الها وتصورها بدون ماتدري جدتي ول خيي البنت فكرها مشغول بطاريك
دحكها لخاطر نبينا لخاطر اسلامنا ودينا دحكها

مارديت عليها ومشيت للباب وقلتلها..
- اتصلتي باسامه وين وصل الحين؟
- ما تصلت بعد
- زين عجل انا راح انتظره بالديوان
- خيي راح تضل لينا وحدهه هين
ابقى لحد مايوصل اسامه حتى ترجعها لبيتك

دحكتلها وهي تتبسم قلتلها ..
- بالباب راح اوكف

طلعت برا وضلت سالفتها هاذي بالي
لو طلعت صدك شلون اتصرف بهالحال؟؟؟

وصل اسامه سلمت عليه ودخلت صحت لغاليه وصعدو بالسياره وبالعجل مشو هذا طبع اسامه جيتو خفيفه سلام واودعناكم ..

دخلت للبيت ودحكتها كاعده جوه قلتلها ..
- يلا نمشي
- شيخ بدي احكيلك شي
- اييه اسمعك
- انا بيي طلع ع سليمانيه و سالتو ايمتى بترجع وبحكيلي مابعرف انو اشي اسالو يردلي مابعرف عم حس بيي كرهاني
مو طايئني حتى شو لازم ساوي
- طنشيه يابه
- ما فيي
- يولو خليه بكيفه يشرق ويغرب مالك دخل بي بعد و انا بالي نتفاهم بهالموضوع
بس ماصار مجال
- شو في بالك
- دحكي يابنت الناس
صح هالكلام يجرحك بس لزوم تسمعيه وتعقليه .. والدك يضر ما ينفع بحياتك
وانتي بنت قويه ومو بحاجته معتمده على نفسك اريدك تضلي هالشكل
من ترجعين بسلامه لديرتك روحي انتقلي عيشي حدر امك و اشتغلي شي بسيط
كوني نفسك و خلي التصوير هوايه مارسيها
بحياتك لحد مالله يمكنك وتفتحين استوديو خاص الك واستقري بحياتك بعيد عن والدك ومشاكلو على الاقل حدر امك تلاكين اهتمام ونصح ورعايه تلاكين احد يصدكك ويثق بتصرفك وكلامك تره العيشه ويه انسان شكاك وهمه نفسو وبس هاذي عيشه مر
وانتي ماعندك شي يجبرك على المر روحي حدر ناسك الي على مايك وعيشي بينهم

كل كلامي وانا مادحكلها وهي ساكته وضلت على نفس السكوت والهداوه لحد ماانا قلتلها..
- فهمتيني ؟
- اييه طبعا فهمتك
- زين يعني راح تسوين هالشي
- اييه بنتقل عند امي احسن وبيي بكل الاحوال مابيهمو اشي
- زين واذا احتاجيتي شي اتصلي
- تمام
- يلا نمشي

طلعنه ورجعتها للبيت ورحت لديواني
ولليل غاليه دزتلي صور محادثه هي ولينا
كانت تسألها اذا تطلب مني اخذها لبساتينا اقبل لو لا وغاليه رادتلها هو ماعنده وكت خلي هدى ورماح ياخذونك وهي ماقبلت
كاتبتلها .. اريد اطلع ويه جراح نفسو ماارتاح الا وياه ..

كتبت لغاليه ..' احكيلها جراح مايتنزه ويه الحريم وشغلو لفوك راسو '

طفيت النت بعدها لان اعرف الرد من اخيتي شلونه ..
عدت ايام وانا مادحكها وغاليه مستمره تناقشني بسالفتها وانا اطنشها اردلها رد بارد بعيد عن سالفتها اضل اضحك على اعصابها و اطلع من الموضوع ..

صارت رأس السنه ..٢٠١٨ .. كاعد انا بالبيت لان اتجنب اجواء الاحتفالات بكل اشيائها كون الحزن بعده بيتنا ..

منجضع بفراشي واكلب بالتلفون واول ما دكت ١٢ وصلتني رساله من لينا مكتوب بيها
' بتمنى هالسنه تكون عليك سعيده ومافيها احزان '

رديتلها..' شكراً ربي يجعلها سعيده للجميع'

ردتلي .. ' بدي شم هوا هلاء فيي اضهر '
كتبتلها .. ' براحتك بس لا تعبرين اكثر من الحديقه '

سمعت صوت الباب الثانيه انفتحت ورجعت انا اكلب بالتلفون واتصلت غاليه .. جاوبتها..
- ها يابه
- كاعد بعدك كاعد ! خيي ماتمشي حدرها
-يولي وين امشي لا تخبليني
- مو تصخمت البنت وطلعت للحديقه ماتطلع توكف وياهه دحكها شبيها
-وانتي شعرفك هي طلعت؟
- هي قلتلي خابرتني تبكي البنيه متعوبه خيي روح حدرها اسمع منها دخيل الله تحرك
- يولي وانا شخصني بتعبها النفسي
مو انتي تسولفين وياهه انا شكو بعد شكووو
- هي تريدك انته ترررريدك انتتتتتته خيييي تلحلح شلعت فادي
- يوووولي انتي وينو رجلك عنك ماعندك شغله غيري يولي عوفيني بحالي
- والله ان مارحتلها الحين اتصل عليها واحكيلها اخيي يحبك ويراقبك من بعيد ويستحي يعترفلك
- لابالله افصمو لراسك من ركبتك
- اصبرلي ثانيتين اكلبها لحياتك
- يولي اركدي عاد بطلي خبال شسالفتك انتي كوه تلزكينا مانرهم يابه ماااانرهم
- ماشي لاترهمون بس امشي طيب خاطرها ول خيي كلبي مكسور عليها بروح عزيز كلبنا روحلها هي بس ادحكك حدرها تطمن والله البنت هين تحس بغربه وماتشكي
- استغفر الله ول انا امها !! انا حالي حالك غريب عنها شمعرفني شسويلها واطيب خاطرها طيبيه انتي
- يااااربي الصبرررر ياربي
خيي البنت متعلقه بيييييك تريدك انته حدرها ادحكها تهتملها احكيلو ذابحه نفسها على كلمتين وياك انته بس وكف حدرها هو الكلام يطلع بس تحررررك يااايابه يا كلببي
- زين زييين بس فكينا

سديت الخط و كمت لبست القمصله وطلعت
دحكتها واكفه حدر النخله وميله راسها عليها
مشيت حدرها وكفت وراهه وقلتلها ..
- خيرك يا يابه

اندارت دحكتلي وهي تبكي وتكربت بالعجل حضنتني ... انا بس ضليت فاك عيوني وايدي بجيوبي وهي تتشاهك وتبكي ...

ماعرفت اسوي شي او يبدر مني كلام
ضليت على وكفتي وساكت وايدي ماحركتها من مكانها ... صارت تحكيلي ...
- رجعني ع لبنان بدي روح عند امي
مابدي ضل هون ما بدي بيي بعمرو مابيرجع وياخدني
- يرجع يابه يرجع

- لااا مابيرجع هو اشتغل هون بالقناه ما فيه يترك شغلو وينتبهلي مابيهتم لايمتى بضل هون وحيده مابيهمو
- لينا دحكيلي يابه

رفعت راسها ودحكتلي بس ايدها ما وخرتها عني وانا تجنبناً لاحراجها قلتلها ..
- اكعدي هين خلي نتفاهم

كعدنا وقلتلها ..
- وصلك خبر من والدك بهلخصوص ؟
-اييه تلفني من كزا يوم وحكالي انه اشتغل هون رسمي بالقناه وعندو سكن مع صحابو بالشغل
- زين وبعد
- هو سالتو ايمتى بدك ترجعني ع لبنان حكالي بس افضى ولليوم مافضي يتلفني حتى
- عجل ما قلتيلي هالكلام من كبل
- انته كمان ماكنت تفضى
- بس تكدرين تتصلين وتعرفيني اجاوبك
- ما بعرف ليه ماتصلت
- زين هسه تريدين تسافرين مو
-اييه ما في ضل هون اكتر من هيك
-ليش هين صار شي ضايقك
- عم اتكأب انا عم اتعزب لحالي بدي فل من هون بدي انسى كل اشي ونام ع ايد امي
بدي كون حدا واحكيلها الي فيي هي بس بتفهمني وماتخليني ضايعه هيك
- زين يابه زين
تكدرين تسافرين وحدك ؟
-اييه
- عجل راح احجزلك وانتي انطي خبر لوالدك برجعتك
- مافيي ارجع بلاه مصاريي مابيكفو
- ماتهتمين لهالشي
- ما بحكيلك لحتى تدفعلي انا مابحب هالشي
انا اجرتي عند بيي ضلت مااخدتا منو
نطرتو يعطيني بس هو مارجع لعندي
- ميخالف يابه اعتبريهم هديه
- مالها لزوم الهديه بيكفي الي عملتو كل هالايام لالي انته واهلك
- هذا واجب الضيافه يابه
وانتي صرتي بامانتي ومسؤوليتي حكك علي امنك بكل شي وسفرك يامسهلو عندي
لاتعتبريه شي كبير
- يعني روحتي من هون سهله عندك!
- لاا يابه كصدي بالفلوس انها سهله للسفر
هسه لا تفكرين وتهتمين كم يوم وترجعين لامك وتستقرين ان شاء الله
كومي نامي يلا

وكفت ونفضت ملابسي ودحكتلها وهي دارت وجهها عني قلتلها..
-يلا ما تدخلين
- لاا بدي ضل هون شم هوا
-زين براحتك

مشيت وعفتها كاعده ورجعت انجضعت ودحكت رسايل غاليه تسال عن الصار
كتبتلها ..
' حضنتني '
قرتها واتصلت ..
- بربك خيي حضنتك
- ول والصكع فضحتينا
- ايييه شلون صارت احكيلي شسويت
- ماسويت شي عادي عفتها وهي وخرت بعدين كانت تبكي مشتاكه لامها
- اييه يعني مابادلتها الحضن
-لاااا
-يااابرود كلبك زين شنو صار بعد شحكيتو
- تريد تسافر وقلتلها احجزلك هاليومين وسافري
-اييه وارتاحت يعني هدات
-لاا شو هاذي دلغمت بالزايد قلتلها لا تهتمين وتفكرين بعد بهالسالفه ترجعين لامك ان شاء الله وامشي نامي شو هاذي مارضت وكلبت وجهها رادت تضل كاعده برا قلتلها براحتك
- وعفتها ودخلت ؟
-عجل اضل فوك راسها نعسان انا
- يااااخييي تمنيتو حسين يا يابه كان سفطها وخلاها بجيبو
يعني انته ماتحس ابد ابد ماتحس
-رجعناااااا لا اله الا الله
- يعني البنت ضاجت لانك ماتهتملها تريدك ياخي الف مره حكيتها افهمها عاد
- يولو شدخلني بيها ... مشاعر الناس لنفسهم
عسى ما تموت بيه انا شخصني اهتم وافهم
موبالي هي تفهمين انتي لو محشيه راسك كطن هالايام
-اييييه افهم افهم
- زين عجل فهميها هالشي بدربك
يلا خليني انام

سديت الخط وضليت افرك براسي اتهدا شويه وبعدين نمت ...

مادحكتها بعد لحد اليوم الي كملت بي اجراءات سفرها اتصلت عليها وقلتلها تحضر نفسها حتى الصبح نطلع للمطار ..

واخذتها الصبح لمطار بغداد وضليت كاعد حدرها ننتظر الطياره وهي قلتلي..
- فيك تجاوبني لاخر مره على سؤالي
- اسألي
- ليه ما بدك تتجوز ؟

عدلت كعدتي ودحكتلها .. قلتلها..
- الزواج لمثلي نقطه ضعف وانا بعدني باول دربي ناسي تدور نقاط ضعفي وتستغلها
وانا مااريد احد بيوم يخرب الي ابنيه لاهلي
كثير اشياء تمنعني من الزواج
براسي مسؤليه اهل واملاك ماخاطر بحي الله مره تكعد بينا وتخرب هاذ على هاذ انا رايد الم شمل اهلي الزواج شي منسي عندي
- بس انته مكبر الموضوع كتير
يعني ما بيك كان مجوز وتنين كمان وهو شيخ و اب
- والدي يختلف عني
هو كان وحيد لامه ويريد ولد يصيروله عزوه
فتزوج الاولى وبعدها حب وتزوج الثانيه
وانا لا من الي ادور ولد ولا من الي احب
انا ولدي وحبي همه اخوتي وعايش الهم
- بس هيك عمرك بيمشي وهنه بيجوزو ويصير عندن ولاد وعيله ويكبرو ومابيكونو بعازتك بعدا وتضل انته وحيد وتلعب ولادن
- المهم انام مرتاح البال

ضلت ادحكلي وانا افر بمفتاح السياره
ورجعت سألتني ..
- ليه انته هيك قوي الشخصيه ؟
- وراثه
- بحبك

دحكتلها وهي نزلت دمعتها مارديتلها شي
وهي قلتلي ..
- كتير كنت امنع نفسي احكيها بس هلاء في شي عم يجبرني احكيها خايفه لااندم بعدين اني ماحكيتها للرجال الوحيد الي بيستحق يسمعها مني
بحبك انا من اول يوم انته ملكتني بدون ولا اشي منك ولا حتى نظره لعيني
طعتك لاني بحبك ماكان فيي اتمرد ع كلمتك
ولا اني عند معك كنت بكتفي ارضيك
وباسمع صوتك عند الصباح وانته توصي امك عليي
حفظت رسمك بخيالي صورتك باحلى صوره ممكن اني صورا بعمري

تفاجأت بكلامها وضليت متصفن بوجهها
بعد سكوت طويل قلتلها ..
- تحبيني بس متكدرين لعيشتي
- بعرف هالشي بعرفو راح تحكيه

بس مع هيك بحبك وبعمري ما بنساك
- ضلي تذكري زين نصحي الك
- بكل شي انته بتكون حاضر معي
انته صرت عيلتي الي كنت مضيعتا من زمان
كتير حكيتلك اني بأمن حدك
انته الزلمه الوحيد الي انا احتجتو واعتمدت عليه بعمري وبضل انطرك كل العمر
- تنتظريني ؟
- اييه انطرك تا تكفي مشاغلك وتغير فكرك بالجواز
- يعني حتى لو غيرت فكري وردت اتزوج
ليش واثقه راح اختارك؟

تبسمت وكربت راسها لاذني وقلتلي ..
- لاني راح اتحملك بكل ما فيك و ما بكونلك نقطه ضعف انا مره قويه بسند الزلمه الي بيخليني ع اسمو كفي العمر
انا حبيتك لانك معقد ستر ومعقد حريم
انا بدي عيش بتعقدك بدي طيعك فيه بدي عيش حدك بسكوت وضل اطلع فيك وانته عم تحكي
انا بدي شيل الصخر عن داك الزهر وبنطرك تسمحلي بهالشي

دحكت لعينها وقلتلها ...
- يجوز يغيرك الزمن ؟ ويغير مشاعرك ؟
- ايمتى ما بترجعلي راح ارجع فتح هالزمن الي عشت فيه حدك
- بس انتي طيره حره ماتكدرين لعيشتي
- وهيدي انته طيرتني لحتى ضل حره
وانا مهما طير وعلي بالاخر اتعب وبدي حط بشي مطرح امن في وبدياك بالاخر انته الي حط ع ايدك
- انا لو خليتك تحطين بايدي ماارجع
اسمحلك اطيرين تضلين حدري بس
- هون انته بتخليني طير حدك من غير جناح
- انتي واثقه وفاهمه شعورك بس انا لا
ما مفكر لهالشي
- مابدي شي هلاء وانا بعرف انك مامفكر بهالاشي بس حبيت احكيلك لحتى تعرف ان بهالدنيا في بنت بتتمناك وتنطرك حتى وان طلع الشيب براسك راح كون بستناك بارضي هالمره لحتى عيشك فصل حياتك بعد ما تأمن فصل حياه اخواتك
انطرك انا لو ضل بعمري يوم راح اتمناه يكون ع ايدك

ضحكت وانا ادحكلها وقلتلها...
- راح تنسيني
- لا راح عيشلك انا ماني مراهقه انا واعيه للي حكيتو وبعرف ان الحب مرا مابيصير اتنين
- ليش حبيتيني لان ساعدتك؟
- لااا
- عجل شنو ؟
- وئت تجي ع لبنان بحكيلك
- مااظن هالشي يصير
- بنطرك ع امل تهتم لحياتك بيوم
- واذا صار واهتميت يجوز ماذكرك بوكتها
- انا مرا مابنتسى
- اثبتيلي هالشي؟
- هلاء !
- ايييه اثبتيلي اني مراح انساكي

ضحكت وضلت ترفع بشعرها وبعدين
قلتلي ..
- غمض عيونك
-ليش
- بتعرف يلا لو سمحت

غمضت وحسيت بنفسها بركبتي قريب اذني
واصابعها براحه ايدي .. باستني من طرف لحيتي وانا ضغطت على ايدها وفتحت عيني دحكتلها ماراضي لهالشي وهي قلتلي...
- انا ما لمست غيرك ولا همت بعطرو
وانته مالمست غير ايدي وما سمحت لغيري تعرفك لهالحد
لا انا بنسى اول زلمه بحياتي ولا انته بتنسى اول من لمست واول بوسه بعمرك

- هالشي عيب واحنه بنص الناس كاعدين

- ما بشوف غيرك هون انو ناس تحكي عنون؟

وخرت منها وضليت اهز برجلي وهي قلتلي
- ارتحت انا هلاء لاني حكيتلك كل هيدا
كبت المشاعر متل شي حجره ع الصدر
فرحت لاني ما ضيعت هالفرصه عليي معك
كنت راح اندم لو ماحكينا هالحكي

ضليت ساكت مارديتلها وافكر بكلامها
اخر شي سمعت نداء طيارتها وهي وكفت ولبست جنطتها واخذت الثانيه بايدها
وكفت وقلتلها ...

- تتحمليني بعصبيتي
- واحولها لهدا
- تتحملين غيرتي الزايده تتحملين مادحكك غير عيني
- ما همني غير عينك انته عندي كل هالناس
- تغيرين نفسك الي
- و بعيش حياتك كلها
- انا اناني بملكي اناني ومعقد وحرمتي بس حدري يحكلها تتكشف حتى عن الحريم انا ابعدها انا اغار من وصف الناس الها اغار من الي يسمعو صوتها ويميزو خيالها
تكدرين ترضين بكل هذا تضلين مثل سري بغرفتي وحدي انا اعرفو واعيشو
- بكل هيدا انا بحبك وهو بكل هالوطن انا مابهمني غيرك لو عشت فعيشتي هون الك
- تنتظريني يعني لو طولت سنين وكبرنا بالعمر
- بنطرك بس اوعدني تيجي لعندي شي يوم

سكتت وهي ادحك للساعه وترجع ادحكلي
قلتلي ...
- تركتلك كل اشي ومابدي غير وعد انك ترجعلي

متردد من هالشي كنت وهي تكربت وقلتلي ..
- جراح بس وعد لكفي طريئي من هون
- تنتبهيلي على نفسك تضلين لبوه مثل ماعرفتك و تسلميلي على امك وتقوليلها
انا امانه عندك ليوم ما يرجع شيخي ياخذني منك مفهوم
- مفهوم ياشيخي مفهوم بنطرك كل العمر ماتنسى تعيش لنفسك انا راح عيشلك لهاليوم
- راح اعيش هاليوم بس بعد ماامن على اخوتي واهلي
ما تنزلين دموع زين انا اكره الحريم الي يبكو
- تمام تمام

طلعت ظرف الفلوس الي محضرو الها
وخليته بيدها وقلتلها...
- محضرو الك هديه حتى ماتتعبين بعيشتك
و صار حك عليه انطيه الك
لا تخلين احد من اهلك يعرف بفلوسك باي يوم من الايام عيشي انتي اهل نفسك واحفظيها زين تعرفيني نحس انا وكت اتخير واملك لا تخليني اندم لاني وعدتك وسمعتلك
- انا ما بخون نفسي
-لينا بأي يوم تحتاجين شي اتصلي زين
- تمام بخاطرك هلاء
- محفوظه باسم الله

مشت وهي ادحكلي وتبتسم وراحت وانا صفنت على الصار ...
مالكيت نفسي غير كاعد واتصل بغاليه
قلتلها ..
-يولو الحكي
-ها خيي خير
- اخيك انطى وعد بالزواج
- بصلاه محمد عليك خيي ايمتى !
- بعد على مد العمر
.
.
.
يتبع

#شقراء_بغداد

الجزء_الثاني_بارت_٣٢ الاخير


بين ضحكه امي بصورتها الي تعكسها الي شاشه التلفون وهديتها الاخيره الي بين ايديه
اتلمسها .. تتنقل عيني بين نظره اشتياق للصوره ونظره تمعن بتفاصيل عقد اللؤلؤ الي بايدي ...

مسحت دمعتي ورجعت العقد بعلبته واخذت دفتر المذكرات .. هاذي اول مره المسو
من وكت الي اخذتهن من غرفه امي ورجعت انا وحسين ويه عمي مافتحتهن ولا لمستهن
حتى ، انتظرت افرغ من كل شي واكعد وحدي ادحكهن وافهم امي شنو كانت ضامه الي من سنين ..

هالليله انا تفرغت الهن ..
هالطقم انا ماكنت اتصور بيوم امي تهديني اياه .. اذكر اني وكت كنت ادحك صور عرسهم ادحكو بركبتها وهي حكتلي انه هديه ابوي الها من كبل العرس وانه لؤلؤ طبيعي
اشتراه ابوي الها هديه شكر وكنت اسألها شكر لشنو؟ تحكيلي مواقف بينا حلوه
عمرها ماقلتلي انها تعرضت لحادث وخسرت كليتها لانها حامت لابوي ...
ماعرفت هالشي الا وكت ما وكعت من مرضها ..

صار اليوم هالطقم ملكي بس ما فرحانه بي
مااحس انا استحقو من بعدها ..
هذا هديتها لانها تستحقو انا مستحيل البسو
و مااخلي غير لامي ..

هذا الي كان يتردد بالي وانا اقفل علبتو
وقررت ايمتى مااروح لحديثه ارجعو لغرفه امي ..

اخذت الدفتر وانجضعت وفتحت اول ورقه منه كان مكتوب ..
' اهداء الى ابنتي غاليه '

نزلت دمعتي لوسط اذني ومسحتها وكلبت الورقه الثانيه .. العنوان كان مكتوب ..
' حديثتي الشقراء '

دحكت التاريخ ..١/١/٢٠١٨

بدايه هالسطور كانت ...

بحمد الله و نعمته هذا صباح جديد في اول يوم من سنه اخرى في عمري الخمسيني ..
حولي احبائي بنعمه وخير وعافيه
امنيتي بهذا اليوم ان يحظى كل فرد منا بخيرٍ وحظ وفير في هذه السنه ..

كلبت الصفحه و دحكت العنوان نفسه وصرت اقرا تفاصيل يوم امي .. ضليت اكلب الصفحات واقرا لحد ما وصلت يوم ولادتي
يوم ١١/٢ ..
قريته بتمعن ..
' اليوم قد اثمر الشيب
اليوم قد رزقت بحفيدتي الاولى مزن
حين حملتها شعرت كأني حملت نفسي مصغره لا وجود لشبه في المعاني بيننا
لكن انها بضعه ممن هي مني
ابنتي الوحيده وحفيدتي الوحيده لليوم
قد احيينني ببضع لمسات مجدداً في منبع طفولتي ..
في كل نظره مني لابنتي اراني وفي كل لمسه لابنتها ارى جزئين مني وكلاهما بالقرب مني
يعود بي النظر لمن هو بجانبي فأرى جزئي الاول الذي اليوم اصبح مغزا ضياعه واضحاً
و يعود بي الفكر لجزئي الثاني باتصال
من ملك هذهِ المملكه .. فأجيب واصف له حفيده مملكته الاولى ...
لربما كان ضياع الازمان لسكينه وبهجه هذا الملتقى ..
ولاده جديده اظنها ستكون ولاده فصل جديد كما حصل لي من قبل والفرق هو الزمان فقط .

عدت قرائته اكثر من مره واركز باخر السطور ومافهمت منو شي .. سديت الدفتر
ورحت لبنتي كعدت .. ضليت حدرها انومها
وبعدها رجعت ادحك بالدفتر ..

وصلت لحادث حسين ...
كان بدايه هالصفحه مكتوب ..
' اليوم قد خَرقت الاقدار روحي

هذهِ الدنيا سلاحها واحد ضدي دوماً
هي تحاربني بولدي ..
في كل مره انجو لكن هذه هي الاخيره
لا اظن النجاه منها ..
انها في فصل خريفي وقت ما باتت اوراق شجرتي تنفذ .. منذ ايام وانا عروقي بدأت تتيبس ولا زلت بها شامخه لكن لبه قلبي
قد أنهكها الخوف ..
حسين به ابتدأت حياتي الاخرى وبه انتهي '

ماكدرت اكمل بعد هالحدث ..
حسيت بكل كلمات امي تجسد كبر تعبها
هي تعرف انها ماتعدي هالازمه
كانت تدري انها تكتب نهايتها وكتبتها بقليل الكلمات غالبه المعاني ..

نمت وانا افكر بيها وكعدت على صوت دكت الباب .. اعرفها دكه عمي ..
لبست الروب الطويل وفتحتلو ..
- صباح الخير عمي
- صباح النور بنتي يلا وينج نزليلي هالمزنه
خلي اتشمس اني وياهه
-صار عمي هسه ماتاخر
- اي واريدج تحضرين ريوك لحسين مرتب
اهم شي تخلين كلاص حليب وتحليه بالعسل
- صار عمي
هو كعد ؟
- لا بعده راح انزل اكعده بس انتي استعجلي
اريد اسكي الزرعات يلا نزليلي المزنه
- تآمر عمي نزاله وراك ماتاخر

ضليت انتظره وصل للدرج وانا رحت دخلت الحمام وبعدين طلعت وبدلت ملابسي واخذت بنيتي حطيتلها البوطره ورتبت شعراتها ولبستها ونزلت ..

عمي واكف حدر الدرج اول مانزلت اخذها مني وصار يهرج البيت بصوتو هو ويناغيلها
طلع بيها للحديقه .. متعود يشيلها بيد والثانيه يسكي بيهه الزرعات ..

صبحت على الحجيه وعمتي وام سالم
دخلت وراي المطبخ وقلتلي ..
- هذا حسين اخوج من امج مو
- اييه هذا اخوي الوحيد من امي
- وشعجب اخوتج رضو يبقى هنا ؟
- والله اخوتي ما يرفضولي طلب وانا ردت اخوي حدر عيني اداريه وقبلو
مضايقك اخيي بكعدتو هين ؟
- هو انتو كلكم مضايقيني ضلت عليه
خلي يكعد شسويله

طلعت وانا ضليت احضر الريوك وابكي
بهاليوم انا كل جروحي مفتحه
كل الاحبهم تركوني لا اهل ولا اخوه بس هالوحيد وياي ...

رتبت الاكل على الميز ورحت صحت لعمي
وبعدين دخلت لغرفه سالم الي كعد بيها حسين

دحكتو يعدل باللزكه على جرحو وانا عدلت ملابسه واخذت بايده وطلعنه ..

دحكنا عمي دخل وهو يتبسم ويقول ..
-يامحلى هالصباح شلونك ابني زين ان شاء الله

حسين بس هز براسو وكعد وانا اخذت مزنه
من عمي وراح هو غسل وكعد حدر حسين
عفتهم ياكلون ورحت خليت مزنه بحضن عمتي وانا متعوده اتريك وحدي
لان عمتي والحجيه يتريكون وحدهن وعمي توقيتو ثابت ومابيوم شاركتو بالاكل
يااما اتريك انا واسامه او وحدي بالمطبخ
وهاليوم مااكلت شي .. روحي معلعله وحتى ريكي مر .. كطعت الرضاعه لبنتي من يوم وفاه امي من بعدها ماهتميت لاكل بس بشغل البيت ...

على التوقيت الي حافظتو لعمي رحت حتى الم المواعين ودحكتو يلف بالصمونه ويكربها من حسين وهو مايرضى ياكل وعمي يقنع بي
وتالي اخذها اكلها ...
ضليت واكفه باب المطبخ وادحكلو شلون يجبر حسين يكمل كلاص الحليب وبعدها هو صاحني .. رحتلو وحكالي ..
- عاشت ايدج بنتي ولو انتعبج بس اخوج تعبان اكثر ويريد دلال
- هو انا هين حتى ادللو
- يحفظج الله ، جيبليه وحده من هاي المحارم الي يجيبهه اسامه ومره الثانيه انتبهي تكون حاضره هنا على الاكل يمه
- ماشي

اخذت المواعين ورحت للمطبخ عدنا هين علبه اسامه كل فتره يمليها بمحارم مبلله يوزعوها الهم وهو يخليهن هين ..
كانو قبل يخلونها حدر مواعينهم وكت مايرتبون الاكل بس انا دحكتو اتكيت زايد
وشلتها هي المغسله قريبه عليهم شدعوا هالسوالف !
عاد الحين رجعت بنفسي خليتهن حدرهم
لخاطر حسين ..

كلشي بالبيت مرتب ونظيف انا مااصعد لغرفتي بالليل الا وانا ملمعه كل شبر بي
اخاف لاعمي يدحكلو فد تفصيل الصبح واترزل عليه اول مااصبح بوجهو ..

رحت ادحك حسين ولكيت عمي واكف حدر البلازما بالغرفه ويربط بالبلي ستشين
وحسين كاضب الجاستيكه ويأشرلي عليه

انا بعز حزني ضحكت وقلتلو ..
- هاي شنو راح تلعبون كيم ؟
- اي لعد شلون اونس حسون
- ههه عمي تعرف تلعبها ؟!
- اطكطك شويه بس اخيج كال مضبوط بيها
- زيين عجل انا ارتبلكم شويه فواكه تزيدكم طاقه
- ديلا لعد استعجلي

رحت للمطبخ وشيفت فواكه واخذتلهم وضليت كاعده حدرهم وادحك لعمي يجبر حسين يختار نوع اللعبه وصارو يلعبون
وعمي يضحك ويشاقه ويه حسين واخيي بس يتبسم مايعلق على كلامه ..

ضلو للظهر يلعبون وبعد الغدا عمي صعد لمكتبو وضليت انا حدر حسين هو راد ينام وانا خليته وطلعت كعدت ويه بنتي
بس اكعد وحدي اتذكر كلهالاحزان ودموعي من وحدها تنزل ..

للعصر عمي طلع و نص ساعه رجع وياه مضمد صار يدحك جرح حسين وطمنه عليه وراح وعمي صاحلي حتى احضرلهم كعده بالحديقه ..

ورحت خليت الكراسي والطبله وسويتلهم كهوه وحدر عمي وهو كاضب ايد حسين
وكعدو وبعدين كعد شرب كهوتو وطلب اصعد لمكتبو واخذلو علبه الدومنه

صعدت بالعجل وانا اعرف مكانها اخذتها ونزلت خليتها كدامه وهو قالي..
- يلا بنتي جيبيلج كرسي واكعدي نلعب
- لا عمي تسلم مالي واهسها
- شوفو يابه اني ادري بعدكم بحزن ولا عبالكم اني ما همني خساره الوالد تره جان نعم الاخ والسند الي وحزين على فراكه
بس هالدنيا علمتني ادفن عزيز منا وامشي منا
لان راح يجيني يوم ماله داعي اموت نفسي وادفنها بايدي ،يومي مكتوب وبساعته ماتعب بشي كله يجيني حاضر
مهما وصل بينا الحزن احنه نبقى احياء
نكمل حياتنه والمطبات نعبرهه لان كل واحد بينا بركبته مسؤوليه مادام بيه نفس هو لازم يكون كدها

جر ايدي وكعدني على الثيل وصار يتلمس براسي قلتلو ..
- عمي احنه جرحنا بعد عمره مايطيب ردنا بابونا ننسى امنا تاليه حفر ذكراها بينا ازيد بوفاتو

دحكت لحسين وانا امسح دموعي وهو مدنك راسو وساكت .. عمي قال..
- كل جرح مصيره يطيب صح يضل تارك بينه اثر بس مايوجع بعد
مو بس انتو خسرتو اهلكم اني هم خسرت اهلي وبظروف اصعب من ظروفكم انتو اهلكم ماتو بفراشهم اني اهلي ماتو مذبوحين
خسرت اخوه و ولد عم واب وخسرت وطن
وخسرت حتى ابن وبعدني عايش واواسي غيري اخفف عليه حزنه باحزاني

دحكناله انا وحسين وقلتلو ..
- عمي اي ابن هذا خسرتو ؟
- جان عندي ولد وخطفوه وذبحوه من جنت بعمان محد يجيب طاريه هنا لان يفتح جروح لامه
- الله يرحمو
- ابني لو هسه باقي عايش جان هو بعمر حسين

ضل يبتسم ويدحك لحسين و اخيي سألو ..
- ليش كتلوه عمي ؟ هناك مو امان !
- ماكو امان بالشارع الامان بس بالبيت بين الاهل يابه
ابني هم راح ضحيه شغلي
هواااي ناس انسلبت ارواحهم من وره شغلي
بلا ذنب يذبحوهم .. ابني جان بعده خامس ابتدائي ويروح بالباص للمدرسه وهناك اول مانرل همه مترصديه وخطفوه ابتزوني بي
جانو هذوله الولد الهمج اذا شايفيهم يطلعون عليهم افلام وتقارير يسمون نفسهم قراصنه
هذوله يشتغلون على السفن ياخذون خزينتهم ويعوفون البضاعه اني جنت متابعهم سنه ونص وهمه واحدهم هالكده ضعيفون واسود كاتلهم الوصخ والجوع وعايشين على البوك ونص منهم عايشين بالتهريب

جنت اني بعدني جديد هناك بشغلي وهالقضيه لو كملتهه اثبت نفسي بدولتهم وجنت محتاج لهالشي وبالاخص الثقه بشغلي هي الربح
اهم من المنصب عندي فخليت كل عقلي وياهم خنكتهم من كل جهه ولزمتهم اول اسبوع الهم بالحبس وجماعتهم خطفو ابني
جان المقابل لابني مو طلعت هذولاك من السجن لان يعرفون ميفيدوهم بعد
ف رادو اسويلهم تعميم على السواحل ان هالجماعه اسمائهم تعبر شوكت مايعجبهم وبلا تفتيش رادو يدخلون ممنوعات براسي
كلتلهم تحلمون بهالشي حاولو ويايه مرتين
و دزولي بظرف صور لابني يضربوه ابر
ومزوركه ايده منهن جانن مخدرات ومغيرين حتى شكله وجهه مصخميه مثلهم وشعره مزينيه صفر وضلو يريدون امشيلهم هالشغله
واني مااقبل وجماعتي بالشغل كلها عرفت بهالشي ومن واحد لواحد عرفنا مكانهم
بس هالحجي بعد اسبوعين على خطفه
ومن وصلناهم جانو عايفيه مذبوح وشاردين

كنت ادحكلو وابكي وهو يدحك بالسمه ويحكيلنا عنو وبعد ماسكت ثواني رجع قال ..

- اخذته بايدي شلته وجان حتى دم وريده ناشف على جسمه بوجهي اخذته دفنته
ورجعت بعد يومين للبيت كلتلهم الولد مات من كد ماتعاطى مخدرات
مايعرفون لليوم هو جان مذبوح
صبرتهم و واسيتهم بان الموت احسن اله من عذاب العيشه وهو بدمه ادمان المخدرات
ويمكن اني هم صدكت الجذبه الي جذبتها
وقنعت نفسي بهالشي وعشت

كضبت ايده وقلتلو ..
- ياكبر صبرك

ابتسم وقالي ..
- هاي جانت الميه من بعد التسعه وتسعين
بس ما وكعتني ولا غيرتني لان الي قبلهه خلن هالكلب مبنج لحد هاليوم

حسين قال ..
- الله يرحمه مكانه الجنه ان شاء الله
بس عمي ماخذت بثارو ؟
- اخذت شلون مااخذت
هههه يابه انته متعرف عمك شلون جان
اني ما طلعت اليوم السابع على دفنته الا وماحيهم محي .. قهري على ابني حولته
دم .. حسبتهم ١٧ جثه تجطلو كدام عيني
بيومها و خليتهم يدفنوهم بحفره وحده
وضليت وره هالسالفه لحد ما الخليه كلها صفرتها .. اربع سنين اني الاحكهم واحد واحد افرغ عقله على الميز وبعدها الحكه بجماعته
اني ماعوف حكي بيوم ولو طال الزمن اخذه
ومحد عال وياي الا مااخذت الحك من نص عينه

- كفوووو والله عمي لازم نتعلم منك
مبين عندك ماخفي اعظم

- ههههه ولك يابه هاي حصاد سنين
حصاد مصايب لو احجيلك بعد اسبوع مانخلص
بس هسه خلو بالكم ان الزمن كفيل بكل شي
ولا تحسبون نفسكم بدون اب
اني اصيرلكم الاب اني من يومي ابو الايتام
عيشتي لهالشي وكلبي مايرتاح اذا مو يمهم
اسمعو كلمتي وضلو وياي واني اعبركم هالشده
يشهد الله معزتكم بكلبي مالها حدود ويمكن لو احجيلكم عنها تكولون عمنا يبالغ
اقلها اني مااضحك الا وياكم هاي اقل شي عندي بمعزتكم ومااريد اشوف هالعيون الحلوه ذبلانه اريدكم تشدون حيلكم الدنيا بعدهه ماوكفت
انتي يابه عندج بيتنا مسؤليتج ورجلج كم يوم ويرجع من دوامه يريد اهتمام وبنتج بعدهه باول عمرهه تريد رعايه مو كلشي تهملينه
تره اليعذرج يوم يومين مايعذر العمر كله

اخذت نفس وتذكرت كلام جراح نفسو بوفاه امي .. قلتلو ..
-ان شاء الله عمي ان شاء الله
- انتي خلي ايدج بايدي واني اعبرج هالحزن
اني اعرف الكلوب شلون تداوى

ابتسمتلو وهو مسد على شعري ودحك لحسين قلو ..
- وحسون خطيبته تنتظره لازم اول مايطيب جرحك تروحلها عيب الهجر هذا بحق البنيه
- عمي انا اريد افسخ الخطوبه

من سمعتو لطمت على صدري وقلتلو ..
- ياويلك من الله شذنبها البنيه !!!

عمي شرب مي وقلو ..
- ليش ؟
- ماكدر اتزوج بعد
- ليش متكدر ؟؟ البنيه سامع عنها شي مو زين !
-لاااا عمي لااا البنيه دره واخلاق واهلها زينين بس انا مالي نفس زواج بعد
امي مو هين شلون اتزوج ! منو الي تحضر لعرسي ! ؟ ابوي ينوبون عنه اخوتي وانته
بس امي ماينوب عنها احد
وانا حزني مطول ليش اعذبها وياي واخليها تنتظر خلي تمشي لحال سبيلها احسن
- حلو .. وجهه نظر سديده
بس يمكن انته محسب لحزنك وما محسب لرجولتك ، سمعه البنيه ، وكلبها بالاخص
- عمي شدخل رجولتي هين
انا كلبي مليان حزن على اهلي مو بحال زواج
- اي لا تتزوج هسه تكدر وره سنه او سنتين تتزوجها
- ماكدر كلبي ماينطيني اسوي عرس وامي ماتحضرو
- لو طولت عشرين سنه هم تاليتك تتزوج
بس هذاك الزواج راح يذكرك بهالبنيه
وتعيش كل عمرك متندم على خسارتهه
- عمي ماتفهمني بهالشي انا احكيلك اهلي وانته تحكيلي البنيه
- الأهل راحو بس البنيه باقيه بعدها بذمتك
هي المفروض تفكرلها
ماكو فد طقوس تسويها بنفسك وترجع الراحو
بس تكدر تعيش وتوفي حقهم عليك
ابني من وصايا الانبياء واهل البيت ان
الاهل حقهم على الولد بعد موتهم هو ذكرهم
بعد عندك حق لازم توفيه
همه بدار اخره يفرحون بالصدقه الي تشيل اسمهم من ايد ابنهم
يفرحون بذكرهم بعمل خير او حتى بنجاحك
انته اذا نجحت بحياتك واسست حياه حلوه متكامله واطبق بيهه تعاليم اهلك بتربيتك
راح يفرحون لان هاي ثمره تعبهم يشوفوهه بيك بنجاحك

لا تتوقع فد يوم اذا بجيت وكسرت وعتمت دنيتك بالحزن عليهم همه راح يرضون لهالتصرف او يكولون اي والله ابني مانساني عاش عمره حزين عليه !
ابد هالشي شيله من راسك

- ليش يعني ؟؟!

- لان الميت يعرف قيمه الحياه
ان جان مصيره جنه او نار هو يعرف قيمه الحياه شلونها ويمكن لو نسمعهم جان اول شي يحجوه النا عيشو يومكم بمايرضي الله
عيش ابني الموت لاحكين عليه

- عمي كلامك اعقلو بس مالي حيل عليه

- يصيرلك حيل يومين ويرجعلك الحيل
احنه مو عيب نحزن ونضعف بس لكل شي وكته ..
اخذ كفايتك بالحزن وارتاح شويه وبعدين ارجع اوكف على حيلك الطريق الي بديته لازم تكمله ، مانخلقت الرجال حتى تكعد بنص الطريق
لو كعدت هالكعده انته مو رجال قوي الكلب تنحسب بعدك ولد
ولاتنسى على ذمتك مره منين ماادير وجهك تتحاسب عليهه وانته حر تريد تطلع مقصر
تريد تصير كدهه

عمي كلامو كله بهداوه و ثقه ماتحرك الا حتى يشرب مي مره ثانيه ورجع قال ..

- و اهم شي تخليه بالك هو انك من تعوف البنيه غيرك ياخذها
وبعد انته وكلبك .. يكدر يشوف الي جااانت مرته هسه تتمشى ويه غيره !
اصفنلها شويه حتى لاتندم بعدين وتاكلك نار الغيره والعتب

حسيت هين عمي ضرب على الوتر الحساس لحسين .. لانه ضل رافع حواجبو وصافن على عمي ..
عمي قال..
- غاليه صايره مو خوش هالايام
-ليش عمي
- لا حلاوه لا جاي عايفتني اتصفن حتى المي خلص
- حكك علي عمي الحين اسويلك اطيب جاي
- عفيه يلا استعجلي

رحت اسوي الجاي وضليت صافنه وافكر بكلامه .. عجيب شلون كدر كلبه يحمل كل هالمصايب ! اخوته وابنه وابوه وحلاله وكدر لليوم يضل شامخ !!!!
حسيت كلامه رجعني لوعيي وصرت افكر بعايلتي و وصايا امي وقررت اخلي ايدي بايد عمي واخليه يعيني على هالمصاب ..

اخذتلهم الجاي والكعك ولكيتهم يلعبون دومنه
وانا ضليت حدرهم كاعده احسب نقاط

لحد الليل احنه كعدتنا واكلنه سوا .. صرت ادحك شخصيه عمي لاول مره من يوم زواجي لهاليوم يلا كدرت اتقرب منو وادحك هالشخصيه الي من يومي وانا كاتلني الفضول عليها ...

ثاني يوم دحكت اخيي جراح هين وعرفت نيتو صلح بينا .. ياويل حالي بلياه احس اني كل يوم ينعاد عليه عزا اهلي وانا مفاركه اخوي جراح ..
صح اني كنت مدحكه الفيديو لموقفو بيوم الي طلعت منهم بس يوم الي دحكتو تعنى لخاطري رضيت اكثر ..
ساعه الي حضنتو رجعلي كل حيلي وحتى روحي احسها رجعت احتيت بعد ماكانت ذابله
بلياه ..
يوم ما امي ماتت ماطفت الدنيا بعيني لان جراح كان حدري متقويه بي بس وكت الي هو ابتعد عني انا هين حسيت الدنيا طفت بعيني وراحت كل روحي وياه ..
ماصبرني على فراكها غيره وما رجع همتي
بعد فراك ابوي غير عمي ...
تأثيره كان كبير علينه ..

من بدا حسين يتعافى جرحه صار ياخذو من الصبح يطلعون يتمشون رياضه واول مره ادحك عمي لابس لبس رياضي وراجع شباب
حتى اكلو زاد وصار على واهس حسين يتشهى اكلات وحلويات ياخذ حسين ويطلعو بسيارتو يتعنون لمناطق بعيده حتى يشترون كيلو منها ويرجعون ..

عمي كان كل عصريه ياخذ حسين ويطلع
وعشاهم برا يصير ومن يرجعون مشترين حب ونخلي مفرش بالحديقه ونكعد انا وياه وحسين ويصير هو يحكيلنا على شغلو بعهد صدام وبعدين يرجع لايامو بحديثه وحسين يناقشو بهالاشياء وانا بس استمعلهم
وبوحده من هالليالي عمي قالي ..
- غاليه يابه علاكتين اكو بالسياره بقن شوفيهن وانطينا رأيج

رحت اخذتهن ورجعت حدرهم كعدت وفتحتهن .. دحكت وحده بيها ثوب اسود
بس كشخه والثانيه ثوب ماروني وكصيف
قلتلهم ..
- هذني لمنو ؟
- الاسود الج والماروني لجنتنه الثانيه
- ياويل كلبي منو الثانيه !
-هههههه ولج مرت اخوج هو اختاره الها
حلو لا !
-ايييه عمي قول ورود وخلصنه
حلو بالعافيه تلبسو بالهنا والاسود ذوقك حسين؟
- لا ذوق عمي هو قال انا خبير باالاسود
-ههههههه والله عشت عمي شي كشخه
راح البسو وكت مايرجع اسامه ان شاء الله

ضل يدحكلي ويبتسم وبعدين قالي ..
- حتى يطلع احلى بعد ارفعي شعرج وياه
ولا تلبسين كلايد ولا اي شي عوفي هو بساطته حلو
- ماشاء الله عمنا ذوقو رفيييع

ضل يضحك وبعدين قالي..
- باجر رايحين لبيت ورود تجين ويانه ؟
- صدك والله !
-اي لعد اجذب عليج داكلج رايحين !
- بس لا تفسخون خطوبه !
- يعني انتي برايج واحد يشتري ثوب مثل هذا حتى يوديه ويكللها طالك !
-هههههه عمييي شدراني انا بافكاركم
عجل ماتخلوني اعرف بهالقرار من كبل
ليش ماقلتلي يول تريد ترجع لحرمتك !!!

حسين انجضع على الثيل ويكرز حب ويقولي ..
-اسرار يولو مايصير واحد عندو اسرار
- مو على اخيتك يول
- يلااا هسه عرفتي شتردين بعد
- اريد اعرف شلون غيرت رايك !!!!؟؟؟
- كييفي انا اغير رأيي ارجعها او اطلكها كيفي لا تصكعين راسي يولو خليني افكر بكلام بكرا شلون ارتبو
-هههههههه خيي حسب حسابك راح تطلع الفراك هذا من عيونك وتذكرني وكتها
-ليش يولي!
- هاااذي سوالفنا بعد وبكيفننناا

عمي ضحك وقلو...
- صح حجايتهه هسه بعد مهمتك ادللها

- ايييه انا من كبل مدللها شنو التغير؟
- مو هسه حتى ترجع الثقه والمحبه بينكم لازم تتعبلها شويه
- ولييييييييه مالي خلك هالسوااالف كلش مو وكت تمضيك
- ههههه عند عمك حلها لاتهتم
- حييييوو لعمنا لكل شي عندو حلول

دحكت نفسيه حسين تغيييرت للاحسن ويه عمي من صدك كان كد كلمتو وكدر يطيب كلبو ويتعامل وياه بهداوه وشاله من بير الحزن الي كان واكع بي حسين ...

ثاني يوم حسين متأنق لابس كلشي اسود بس مرتب لحيتو وشعرو وعمي نفس الشي تأنق وسلم السياره لحسين وراحو لبيتها ..
بس وكتها رجع عمي وحسين مو وياه
ومن سألتو قال .. عافهم يطلعون وحدهم يتفاهمون وهو رجع بتكسي ..

و بيومها استلمتو تحقيق لحسين وهو حكالي
رضت بالعجل وقلتلو انته امك امنتك عندي وانا اهلي ماعلموني اخون الامانه و كنت منتظره تهدا وترجعلي ..
ورايحين متمشين ومتغدين سوا و رجع حسين يومو كله على التلفون وياها ..

صار يريد يرجع وعمي ماخلاه رغم هو يحلفلو يمين صار زين وجراح كل ساعه يخابر ويسال ايمتى يرجع بس عمي مارضى حسين يروح وكان السبب هو انه تعود عليه
و بعدو ماشبع من كعدتو هين ..

كنت افكر دايماً بنزول سالم وتاخر هالمره مانزل وسألت اسامه عنو قلت خاف صايرلو شي الرجال وماندري عنو بس طلع عمي موصيه مايرجع هين الا وكت مايمشي حسين
وهو مايرضى حسين يروح ضال بس يحلف يمين لجراح انه يداريه ومايخليه يعتاز شي بس يبقى يومين واليومين تجر اسبوع
عاد انا قلتلو لجراح على سالفه ابنو الميت
وفهمتو عليها يلا قنع وخلاه براحتو ..

حسين كل يومين والثالث يطلع العصريه لبيت ورود وياخذها ويطلعون ومايرجع لليل
بس كلها مصاريف لاهلها حلويات من افخر الانواع ومعجنات حتى يكسبهم شويه ومايجادلوه بسالفه طلعتهم لان هو يستحي يضل كاعد بيتهم واخوتها موجودين ..
كان يصرف على اهلها اكثر من الي يصرفو عليها ..
وعمي هو متكفل باختيار الاماكن الي يطلعولها ويوصفها اله بالضبط ويحددلو هاليوم ينفع لهالمكان اخذ السياره وتوكل
واخيي روح عمرو الفرفره وحدرو حبيبتو
مااصير اسمع الا صوت السشوار وغاليييه امسحي الحذاء هذني الي حفظتهن منو ..

مارجعنا الا للعيد وبااربعين ابوي تلاكيت ويه اخوتي .. تصافت بينا النفوس ورجعنا اهل
وعايله وحده ..

بهاليوم انا تذكرت كلام امي عن غراض كانت ضامتها ويه حسين .. ورحت قلتلو عليها ضل صافن وبعدين مشى بالعجل للحديقه ضل يتلمس تربتها وقالي ..
- يولو هين انا من يوم ماطلعنا من حديثه وكت الدواعش دفنت هين كارتونه بيها غراض امي قالت اعزاز عليها
- عجل يلا احفر وطلعها

ساعدتو وشلنه السنادين وصار هو يحفر
لحد مادحكناها واثنينا تعاونو عليها وطلعناها
مسحت عنها التراب وشلت اللاصق وفتحتها

كنا كاعدين بعدنا حدر الحفره وصرنا نكلب بالغراض الي بيها ..
دحكت هين دفاتر وكل واحد افتحو بنفس الاهداء والعنوان الي بالدفتر هذاك
فرحت وقلتلو ..
- حسين هاذي دفاتر مذكرات امي من شبابها
- عجل ليش هي مخصصتها الك !
- ماعرف هي قلتلي اخر مره انها هديه الي ضامتها من اول مانولدت
- اخذيهن الك ماتدخل بهالاشياء انا
بس اذا مكتوب شي يخصني تحكيلي عنو
- ايي خيي اكيد احكيلك

عزلنه الدفاتر على جهه وصرنا ندحك الباقي
كانت علبه موسيقى قديمه من هاذي ام الابره
عجبتو لحسين وقالي خليها عندي
وكيس قماش صغير احمر مخروط بخيط
فتحتو وبداخلو دحكت كلاده بشكل مقود السفينه لونها فضي وزنجيلها عباره عن خيط اسود .. ومحبس فضه وبي شذره زركه
وسوار كان فالت من جهتو الثانيه بس مشكل بالقفل .. شكلو كان كف ايد ازرك وهو فضه مايله للسواد لانها قديمه بس عليه حفر بالجهتين ..

ودحكت هين البوم صور صرنا ندحكهن انا وحسين .. كانت صور امي بالجامعه وصورها ويه ابوها وجدتها و زملائها
تمنيت الكى صوره الها بزواجها الاول
بس مالكيت اي اثر اله ..

دحكت هين اخر شي كانت علاكه بيضه فتحتها وبداخلها كان يشمغ فلسطيني
حسين سألني ..
- تتوقعين المن هذا ؟
- ماعرف والله امي عمرها ماجابت طاريه
- ركزي بالمذكرات بلكت كاتبه شي عليه
- اييه بس هذا خليه عندي
- اخذ الصور الي
- اخذ كم وحده انا والباقي الك
- يلا اختاري بس مو اكثر من اربعه

اختاريت وحده هي واهلها و اثنين بالجامعه و وحده الها وحدها كاعده باب بيت و حدرها بنيه صغيره تضفرلها شعرها ..
هذني صارن حصتي من الصور
بقيت لحسين من بين كل هالغراض بس الالبوم وعلبه الموسيقى ..

هو اخذهن لغرفتو وانا لميت الباقي بنفس الكارتونه ودخلتها للبيت ..
عفت حسين يعدل التراب وصرت اتمشى بغرفه امي ...

غرفتها لهاليوم مثل مااخر مره تركتها
كل ماانظفها ارجع كل شي مكانو

الفرشه الكريميه نفسها .. ثوب امي الابيض الي اخر مره لبستو وابوي غيرو الها كبل ماندخل ندحكها هين بعدو معلك بالزاويه
وحدرو دشداشه ابوي السوده الي نزعها بيوم مامرتو بالمنام ..

المشط على حطتو عفتو على الميز بس امسح عنو التراب واخليه نفس ماكان ..

تلفون امي مقفول ومحطوط على الميز بجهتهه من الفراش وتلفون ابوي نفس الشي على جهتو مقفول ونفس مكانو ..

ماعون التمر بالوسط على الفراش ما شلتو من هين بس اغير التمرات الي بيه وارجعو مكانو ..

البطانيه بس اشمسها وارجعها مسفطه مثل ماامي تحب ترتبها هين بالطول على الفرشه بالنص الاخير منها ..

كنتور امي بعدو نفسو بترتيبها مالمسنا منه شي .. بس ذهبها اخذتو جمعتو وخليته على الميز حتى انطيه لحسين وهو من دحكو
قالي رجعيه وين ماكان هذا ماتلبسو غير امي
قلتلو هي وصيتها هذا الك قالي لو اموت من الجوع ماابيع منو شي ولا مرتي تلمسو
وهو بنفسو اخذه ورجعه بالكنتور وقفل عليه
والفلوس الي خلاهن جراح هين هم مااخذ منهن شي بس هذني قال وكت مااعتاز اخذهن ... الا الذهب قفل عليه فد قفله

وانا خليت حدرو طقم اللؤلؤ هذاك هم
قلت ان مايستحقو غير امي ويضل شاهد على ذكراها ..

قفلنا الغرفه وعفناها نفس مااهلنا عافوهه
وكل بيتنه على حطه ايد امي ...

تفاهمت ويه حسين على هالبيت وقلتلو اكعد بي وكت تتزوج لاتخلي بيت اهلنا فارغ
و هو قالي هذا بيتك اخاف رجلك مايرضى
قلتلو بيتي وانا اريدو لاخوي ماله حك يتدخل
بس هو ماقتنع وقالي نتبادل اسلمك سند الكاع
وايمتى ماتحبين تبنيها انا ادفعلك فلوس البنيان واخذ البيت باسمي يصير وانا وافقت على هالشي .. و حكينا هالشي لجراح وهو مااعترض قال حلالكم وانتو احرار بي
وصار البيت لحسين والكاع الي
اسامه اصلا مادخلتو بهالشي لا من كبل ولا اليوم يعني مايدري انا كان ورثي بيت وبعدين تحول كاع الي عرفو بالاخير انا امي تاركتلي كاع هين حدر بيتنا ...

وكت رجعت لبيتي قررت اكمل قرايه مذكرات امي ...
الايام الي راحت انا تركتو لان التهيت بحسين
وشغل البيت ودلال اسامه وكت مايرجع نن سفرو يتدلل لحد ماانا ابزع واصير ادورلي زعله ...

رجعت فتحت دفتر امي الاخير الي بديت بيه
وهالمره كلبت لاخرو ودحكت مكتوب ..

''
العنوان / حديثتي الشقراء
التاريخ / ٢٩-٥-٢٠١٨

حياه مليئه بالنعم
هكذا سأختم سيرتي الذاتيه هنا على هذه السطور
كثيراً ما كنت افكر كيف ستكون نهايه ماابتدأت بهِ من تأريخ لحياتي ؟ لكن اليوم
اختصرتها باجمل ماحملت من معنى ..
انها النِــعَـم هي كل ماحصدت في كل يوم
كانت حياه مفعمه بالحب والقوه والكثير من المحن التي أتت وذهبت بفضل الله ورحمته
كانت ' حديثه ' هي موطني ومأمني وحبي الاول ، انا قد احببت الارض قبل الشخص
واليوم ككل صباح انا أُمعن النظر في صفاء سمائها واراقب مشرق الشمس على ارضها
في حديثتي سماء لم ولن تصفها كل ماكتبت من كلمات .. في حديثتي انا ارى نفسي من قبل ان اولد .. كل ما تمعنت في جوها الخلاب يراودني احساس بانني كنت هنا يوماً ما دون ان اعلم انها قدري وفي تربتها محطتي الاخيره .. قد عشقتها عشقًُ قدستهُ بالبر في اهليها .. لو ننظر للكم الغير محدود من النعم التي رُزقت بها فور مجيئي هنا سوف ينتابُنا شعور الذهول وبعض العظمه لها لكن
بعيداً عن كل هذا كان رزقي الابدي منها هو شعور الرضا بين تلك النسمات التي لم تنفك يوماً تداعب وجنتي بلطيف بردها
كأنني اتبادل ابتسامه من القلب معها
انا مُتيمه العشق بها .. عشقتها على الصيت
في ليالي بغداد كنت اراقب القمر وانا اتخيل صافي الفرات في ارضها يسري
واتخيل ذالك الجسر الذي يعوم على مائه
واتحسس النسمات برأتي وابادلها الابتسامه على ضوء القمر .. ابعث السلام لارض لم تكن يوماً لي مجهوله فقد كنت دائمه السؤال عنها حتى يوم اللقاء ....
قد احتوتني في أضعف وقتي ، لملمت حطامي وارجعتني في زهر الشباب
قد عالجتني ' عيون حجلان ' و اطعمتني اشجارها لذيذ الفاكهه و احبتني يوم اهدتني لشخص كان يصب فيي جُل حبه لها
و ستحتويني تربتها هذا اكثر مايفرح قلبي اليوم .. قد تحققت جميع امنياتي معها
لم يكن سيفرحني اكثر من كوني سأدفن فيها
بين ثنايا عشيقتي سانام براحه وهناء للأبد..

هنا سأختم هذه السنه بهذا اليوم
لا قدره لي على كتابه المزيد ساكتفي بكوني هنا احمل بعض القوى ..

من يقرأ هذا من بعدي فليكمل التأريخ ان احب

اودعتكم نفسي في ثنايا الصفحات
فرفقاً بما بين ايديكم .

''

بكيت هالمره بكي ماله صوت ولا حزن بس بكيت فرح .. انا ورثت كل سيره امي وحياتها
كلبي مايسع هالفرحه عبرتها بدموعي
ومن وكتها قررت انا اكمل كتابه الصفحات باحلى الكلام الي يليق بذكرى امي ..

بعد كم يوم سمعت من جراح ان بديرتنا ضيفه لبنانيه .. ماخليتو ينام الليل اذا مو انا عندي كل التفاصيل عليها .. وقلت خير يارب عساها فال خير علينا ..

وكم يوم وعرفت انها صارت دخيله بيتنا
وضيفه جراح وموصي عليها قلت يالله اخيي تلحلح شويه وصار يتمعشك ..
بس هالفرحه مادامت كان كل يوم يثبتلي اني بوادي وهو بوادي ثاني !

قلت لازم اروح ادحك البنيه .. ورحت دحكتها بنيه طويله وضعيفه بشرتها حنطيه جسمها رشيق صوتها ناعم وهادي وشعرها قصير
يوصل لنص ركبتها ولونه اسود ..

اصابعها رفاع واظافرها طوال مزيدتها نعومه .. كانت ماتحكي شي بس تسمعلنا
واذا صار وحكت فتسأل عن جراح وحياتو
وانا مااقصر امدحلها باخوي واحكيلها علتو الزواج مايرضى يتزوج وبعمرو ما مدحكلو حرمه ولا عندو صاحبه حياتو كلها شغل وكونات وسلاح والحين صارت مشيخه

دحكت البنت مصورتو بتلفونها وهو واكف بالحديقه ويه اخوتي وتقربها عليه وتضل ادحكلو بالليل .. حسيتها معجبه بي وتاكدت من هالشي وكت ماصارت هي تحضر ملابسو للدوام تكويها وتعلكها اول شي وعمتي الصبح تحدر تاخذهن بالعجل لان كاملات وكل ظنها انا مرتبتهن ..

كانت تغطي على هالسالفه بحجه انها فارغه ماعندها شي تتلهى بي وتحب تساعدني
وتاخذهن تكوي بدالي وانا امشيها ...
وشكثر قلتلو دحكلها اهتم بيها شويه البنت تحبك وهو كل رد يردو يشيط اعصابي
وبالاخص ساعه الي حضنتو ضليت اكفش بشعر راسي واقول هذا اخيي بي شي مو خالي ! مامعقول ماعندو ولا ذره احساس وهو شاب وبنيه مثل الورد تحضنو ويضل صافن عليها وينتظرها توخر وتالي يعوفها حتى ينام نعسان !!!!
وصلت بيه اقولو .. انته شاب لو حجاره؟!
يقولي شاب بعقل محجر لاتعبين نفسك

يكتلني ببروده بهالشي يذبحني .. صارت عندي امنيه يقولي راسلت بنيه . دحكت حساب بنيه وعجبتني حتى لو ممثله
هم افرح والله بس اريد احس اخوي رجال طبيعي ،، اخوتي البقيه كاضيها طلعات بكروبات و حفلات بجامعاتهم وكل واحد عندو درزن زميلات وهالجراح يقولي
شسويلها ؟ وراح ارجعها لبنان !!!

ضليت افكر بوكتها ان الحرمه الي تكدر تجذب عين اخوي وتكسر عقلو هاذي البسها شاره ذهبيه واوكف اهوسلها احلى الهوسات احتفل بدخلتها لحياتنا عساها كانت من المريخ
هم اركض احضنها وافرشلها الكاع ورد بس خلي تغيرو وتسعدو مثل هالشباب ...

بس اجاني هالخبر منو مثل ضربه على الراس ... ساعه ماقالي ..
- يولو الحكي
- ها خيي خير ؟
- اخيك انطى وعد بالزواج
-بصلاه محمد عليك ايمتى !!؟
- بعد على مد العمر
-شلووون ولمنو وايمتى صار هالوعد

صار يحكيلي على لينا وشصار بينهم وانا بس شاكه الحلك بالضحكه وحتى ماكدرت اكعد
افتر مثل المهبوله بالبيت وانا اهوس واضحك
وهو قالي..
- يولي انا مدري شضرب على عقلي وانطيتها هالوعد
-ها خيي بسم الله بعدك الحين تندمت !
-اي والله تندمت عجل يابه انا وين وهي وين
- خيي ماقلتلك البنت بكل شي راضيه وعلى امرك تصير وتحبك
- سوالف جهال هاي انا ماتوكل عندي
غلطت والله غلطت غلطططت تسرعت
مادري شلون قلتلها هالكلام ياااالله شسويت اناا ياربي
-خيي سمي بالله شسالفتك هي كلها كلمتين
- يولي انا مو من الي يخلف بوعدو والحين شلووون بيه !!!
-اي ولا تخلفو هالمره شيصير يعني
-ول احكيلها انا ماريد اتزوجها لا احبها ولا مقتنع بيها بس مادري شجاني وانطيتها وعد
مادري يمكن غرتني شكل الحياه الصورتها الي بعدين مادري والله ماعرف شجاني و وعدت
- خيي ان تعيشلنا فاحنه كلمن يستقر بحياتو ويتهنى بشبابو وتضل انته لاعشت لنفسك ولا تهنيت مثل هالشباب فكر بنفسك مابيها شي
وعيش مثل تتمنى النه
- غلوي انا مهني نفسي بعيشتي
- لاااا والله ما مهنيها
خيي العيشه بالشغل والاصحاب شي و ويه المره والخصوصيه والمشاعر شي ثاني
ياخيي تتندم لو ماجربت هالشعور تتندم لو ماكانت الك عايلتك الخاصه
- مو وكتها غاليه مو وكتها هالسوالف بعيده عن افكاري هسه وابد ماتقربلها لان تخربلي الاول والتالي
- ايييه ما البنت قلتلك انتظرك
وانته ايمتى ماادحك صار الوكت مناسب
روحلها وعيش حياتك
- لاااا ماروحلها هاي غلطه غلطتها بالوعد
واخلفو للوعد بس مااروح
- اييييي جرااااح كبرتهاااا والله
- ماكدر غاليه ماكدر هاي مو من ثوبي
تعبني واذا فكرت بيها كزوجه ماتحمل ابقيها دقيقه وحده بلبنان لازم اجيبها هين والزواج مو وكتو الحين فخليني معتبرها غلطه وصارت وسبحان الي مايغلط
هاي غلطه الشاطر بعشره وهاي غلطتي انطيتها وعد وراح اخلف بي من هالساعه
- بس البنت راح تنتظرك
- على السنه الجايه اوصللها خبر بزواجي وانتهت السالفه
- حرام خيي البنت حبتك من كلبها والله تعيش وياهه احلى شعور حتى لو بعد عشر سنين
- لا عمره مايكبر هالحب ويصير عندي
انا مامستعد لهالاشياء وعقلي مامقتنع بيها
ايمممتى مايقتنع عقلي يلا افكر ارتبط وهالمره غلطت ويمكن غرني كلامها ولحظه الوداع هاذي بس هسه صحيت على نفسي
وعرفت كااان غلط كل شي صار غلط

ضل مصر على موقفو ويلوم بنفسو على كلمتو الها وانا خليتو براحتو قلت يمكن بيوم يغير رأيو ...

شهر الثاني من سنه ٢٠١٩ ..
صرت حامل والبيت كله فرح لهالخبر
اسامه قرر يرتب غرفه للاطفال ونعزل بيها اغراضهم حتى نخفف من غرفتنا
وانا الي على حملي شهرين واسامه مسافر
و بنتي مخلصه حليب وصيت عمي يشتريلها
و كنت بغرفتي مشغله التلفزيون الها على اغاني الاطفال وانا واكفه واجرب الف اليشمغ الفلسطيني على راسي مثل ماكانو اخوتي يلبسوه ...

رتبتو وخليت حمره طوخ وصرت اخذ صور بي وارسلتها الهم وصرنا نتراسل ونضحك

- يعني كان مكتوب عني بالدفاتر الي عندك !
-لا اني اعرفج بنت محمد من زمان
هالدفاتر ماجابتلي هالمعلومه عيوني هي الفهمتهه
- شلون عرفت هالشي بعيونك ! يعني لان فارق العمر بيني وبين حسين
- لا بس لون العيون هذا اني مانساه حتى بكبري اضل اتذكره
انطيني الدفاتر وبعدين نكمل حجي يلا بنتي

دحكت عندو كلام مهم لكل حياتي لازم اسمعو
وبسبب هالشي رحت واخذتلو الدفاتر
لسنه ٩١،٩٢،٩٣
قلتلو...
- هذني اظنهن كافيات حتى تلكى جوابك

اخذهن من ايدي وطلع بدون اي كلام
وانا ضليت سهرانه للصبح افكر بسالفتهم
و نزلت حضرت الريوك وهو كعد ياكل
ومابينه اي كلام ... كمل اكلو وصعد لمكتبو
وضل طول اليوم فوك مانزل حتى للغدا

نمت هالليله من تعب التفكير والسهر
واول ماصبحت اخذت بنتي خليتها حدر هديل
وكفيت الريوك وانتظرتو يصعد وبعدها شاورت عمتي وقلتلها عندي موضوع خاص ويه عمي راح اطول عندو لا تصيحوني
ورحت لمكتبو ..

دكيت الباب ودخلت دحكتو يشرب دواه
اشرلي اكعد وراح كعد وره مكتبو ..

قلتلو ..
- على وعدنا عمي !
- اسألي يلا اسمعج
- قبل كلشي احكيلي لكيت الجواب ؟
- اي لكيته
- زين
شلون صارت امي حبيبتك ! وشوصلها لحديثه وتزوجت الشيخ !! ؟
- هذا كل سؤال قصه بحاله
راح احجيلج من البدايه احسن بس بالمقابل
تحلفين يمين الله هالكلام مايعرفه لارجلج ولا اخوتج ولا احد من اهلنا حتى لو متت اني
ماتحجين لاحد
- لا والله مااخلي احد من اهلنا يعرفون بكلامنا مااشهر باامي انا كل عمري حافظه
لسرها
- زين يابه زين

ضليت ساكته وادحكلو وهو رجع راسو على الكرسي وضل يدحك للشباك وقالي ..
- اكيد وصلك خبر عن قصتي قبل ماتزوج ام سالم
- اييه بس الي عرفتو من بعد ما نجبرت بالزواج بس عن البدايه ماعرف شي
- حجولج شكد جنت مخبل عليهه
وشكد سىويت مشاكل ؟
- اييه كل هذا عرفتو
- عرفتي بهالمشاكل السويتهه ويه ابويه
بس اكيد متعرفين شنو الصارلي بوكتهه وليش تخبلت هيج عليهم
- عجل خليني اسمعهه منك بالتفصيل

فتح الكتاب واخذ كلاده امي ولفها على اصابعو وضلت عينو على الشباك وقالي ..

- جنت طالع من معركه خسرانه
اول مابديت اخسر بحياتي
كاعد بيت صغير وبي سبع نفرات وجهال
وخسران اخوتي ٣ وحلالي كله ديرتي طلعت منهه مكسور وانحرمت من ترابها
فقير جنت وبراسي مسؤوليه البيت وايهاب الله يرحمه جان فلوسه على كده معلم جان وماعنده وظيفه بغداد بعده وصار يشتغل بالسوك على كد الي يطلعهن يوميته يعيش بيهن هو وعياله واني متكفل بالبقيه
جنت اشتغل بالنجاره واخذوني ناس من الدوله بليله وضحاها صرت عميل عدهم
اشتغل بالمخابرات ، كدرت شويه اعين اهلي
ومن تحسن حالي قدمت على الكليه ودخلت علوم الرياضايات ماجنت احبهه بس هي صارت قسمتي بعد وجنت محتاج لاي شهاده جامعيه حتى استفاد منهه بشغلي
داومت اول اسبوعين عادي والثالث بيه عرفتها ...
جانت طفله هادئه ناعمه مالها حس حتى لو ضحكت ماينسمع صوت لضحكتهه بس تبين هالسنون وتضحك على كلمه يولو من احجيها
جانت ضعيفه بكم ماده واني اجمعهه ويه اثنين من صديقاتها واشرحلهن وانتظرها تطلع من الامتحان حتى اراجع وياها سؤال سؤال هي تجاوب بس صديقتنا الثانيه تكضيهه بجي كلشي متحل
صرنا نطلع سوه نشرب الكهوه واني احجيلهه على حديثه انطيتهه كل تفصيل بيهه
جانت تمنعني من التدخين وتنطيني بدل كل جكاره نستله صغيرونه اكلها واني فرحان
لانها تهتملي وبيهه نسيت كل تعبي كلشي بشغلي واحنه بوكت حرب نسيته يمهه
جانت ثكيله ورزنه الكلمه ماتحجيهه الا بمغزى وباقي الحديث بس تبتسم وتستمع
اكثر ماحبيته بيهه تستمعلي وتفهمني بكل تعبي وتعذرني حتى لو اني مقصر وغلطان
صرت اراسلهه بالعطله اكتبلهه بالورقه واحطهه يم باب بيتهم بالليل واشمر الحصو على شباكهه .. شايفته هذا شباك بيوت الشناشيل قبل من خشب واني اطكطك عليه بهالحصو واضل خاتل بالظلمه انتظرها تنزل وتفتح الباب واباوعلهه اشبع عيني منها واضل انتظر رد الرساله
مرات اخذه بنفس الليله ومرات لا اذا جنت كاتبلهه راح اطلع لفد مكان واتاخر متردلي الا من ارجع مره ثانيه
هنا بهالرسايل اعترفتلها بحبي مره ثانيه
جنت معترفلها مره قبل بالدوام وماقبلت
كالتلي ماكدر انطيك كلمه لان ابويه قاري فاتحتي لواحد من ولد خواله
مابعدني هالشي عنها ولا لحظه ضليت متعلق بيها وانتظرت هالفرصه واعترفتلها مره ثانيه
و وافقت صارت بينا هدايا ومكاتيب هواي
وانجنيت بحبها من كد ما تعلقت بيها جنت اسميها امي .. حبيتها بكل ذره شعور جانت بيه .. بس صارت بينا مواقف بسبب الشغل وغبت عنها فتره بسبب الحرب ومن رجعت لكيتها مخطوبه
جانت تبجي مراضيه بهالزواج وابوها جبرها عليه وامها جانت مو خوش هم الها ايد بالسالفه و صارت هالخطوبه
تاذيت وانهاريت بهالخبر خفت تضيع من ايدي راحتي الوحيده بهالدنيا
جنت وياها مرتاح ماجذب بشي على طبيعتي
وهالشي اني مفتقده بحياتي بسبب الشغل
ماردت اخسر المكان الوحيد الي يحتويني بدون ماخجل او احسب حساب لشي

- لاا زين ماسويت والله بردتلي كلبي
وارتاحيت لان بهالدنيا اكو الي اخذ حك امي
وماخلى ظلامها يتهنون
انا مايفرق عندي ذكر محمد يبقى ابوي الشيخ خالد وهذاك لا رحمه الله عليه عساه ماتهنى
- عوفج منهم يابه راحو بعد
لاتخليهم بالج .. امج لكت الي عوضها وعاشت باقي عمرها متهنيه وسعيده
- امي ما حبتك مثل حب ابوي
-مادري
- لاا انا متاكده من هالشي ماريد اقهرك بهالكلام بس هذا الي عاشتو امي بالحقيقه
- مادري يمكن
بس انتي لو سامعتهه من تكول ايوب
جان شكيتي بهالشي اليوم مثلي

على هاذي كلمتو خلاني اتصفن معقول
حبو اكبر من حب الشيخ حبيبها الي ضحتلو بعافيتها؟

قالي ..
- تاخر الوكت يلا خلي انام وسدي على هالمواضيع بعد لاتخليهن يعيشن وهنه بالاصل ميتات

طلعت وهو نزل وطفى الاضويه الجوه
رحت لغرفتي وضليت افكر باخر كلامو
واخر شي قررت اكتشف هالشي بنفسي من كلام امي ..

وصرت اعيش كل يومي على هالدفاتر واقرا بدايه حب امي وابوي وبدايه زواجهم وطفولتنه ،زعلهم ورضاهم وكلام الغزل بينهم قريت لاخر كلمه انكتبت منها ومادحكت الها اي ذكر لعمي هين بأشتياق او محنه كلشي من بعد ذاك الزواج هو يخص
ملك هذه المملكه .. هالوصف هو لابوي
الشيخ وماتداخل بوصفو اي اطياف من الماضي ...
بس مره وحده ذكرت شي فهمتو يخصو
كانت كاتبه ..
' ا
رجعت ويه اخوي حسين لحديثه يوم الجمعه
ودخلت غرفه امي وسلمت عليها مثل كل مره من ادخللها ، سلمت على ابوي وبوست ثوبو
ومخدتو وامي نفس الشي ..

حاولت اخلي هالزواج يخرب وماكدرت
وضع الحرب بوكتها ماجان ينطيني مفكه حتى اشوف حل وياها وضال على الحدود وبين العدو رافع عيني للسمه وادعي يتاخر هالزواج بس اكمل هالمهمه وارجع يومين
ويدزوني لمهمه ثانيه وضاع الوكت بالشغل
وما كدرت احل شي
اخر شي رحت حاولت ويه ابويه لان جنت منطيها كلمه تنتظرني بس كم يوم واجي احاجي ابوهه وخلي الي يصير يصير
بس الله يسلمه ابويه ماقبل وكالي انته مو شريف و واحد دوني ماعندك غيره تحط عينك على عرض غيرك وتريد تورطنا بالحرام وماامشي وياك بهالشي
اكوله هاي مرتي اني حبيبتي الي وهمه الاخذوهه مني شلون اعيش وهي ياخذها غيري مافهمني ولا قبل وتعاركنا اني وياه
وضليت محتار شلون اواجهه بيا عين اروحلهه ! شاسوي وموعد عرسهم قرب ؟
ضليت متمرمر لحد ماعرفت يوم عقد المحكمه كلت اكتله وماخليه ياخذها مني
ورحت من الصبح مصمم اكتله والسلاح شايله وياي بس ربج ماقاسمله الموت على ايدي .. واحد صاحبي مراقبني ويعرف بسالفتي ولزمني ماخلاني اكتله
شفتهم يطلعون كدام عيني حتى يكطعون مهر
وهو مجلب بيه ويحلفني يمين الله اعوفهم ومو قسمتي وشرف البنيه وسمعتهه تروح لو تهورت ورحتلهم
خفت عليهه شلون اروح واخلي عليهه حجايه
وكفيت عنهم
وره يومين ابويه جابلي مره ويكولي هاي صارت الك على ذمتك بعد
يابه شلون على ذمتي وين شايفهه اني
وين اهلهه يكولي هاي اني اختاريتهه الك وطلبتهه من اهلهه واخذتهه بعباتهه هنا تكطعون مهر المحكمه وتتزوجون
ردت وياه يعوفهه ماتزوجهه مالي نفس بيهه
ماقبل عفتهه كاعده عدهم وهجيت وره عرسهم يلا رجعت
رجعت واجاني اتصال من صديقتنه جانت بينا مرسال .. ورحتلهه جان تنطيني الي صبرني على فراكها كل هالسنين

دنك وفتح المجر وطلع بوكس اسود ودفعه لجهتي .. اخذتو وخليتو بحضني وفتحتو
دحكت ورقه مطبكه صغيره اخذتها بايدي وقلتلو ..
-افتحها ؟
- اي افتحي واقريلي الي بيهه

فتحتهه ودحكت مامكتوب شي هين
الورقه فارغه !
كلبتها بالجهتين ومابيهه ولا حرف بس
نقطه بحبر اسود هاي كل الي بالورقه
قلتلو ..
- مامكتوب بيها شي !
- عوفيهه هسه شوفي الباقي

خليتهه حدري واخذت الثوب
كان اسود وبيه دكه بيضه بشكل ورد صغير
الثوب نص ردان ومابيه شي غير دكم صغار على طولو .. كان حجمو صغير قلتلو ..
- هذا ثوب امي !
- اي ثوبها جانت تلبسه بالجامعه واني مره وصيتهه ماتلبسه بعد لان ماجنت اتحمل اشوفهه بي تفتر بين الطلاب
جان هالثوب ميزهه بين كل الطالبات
تطلع بي ناعمه مثل الحرير
- يعني هالثوب محتفظ بي طول هالسنين !
- عشت بي جان حاضر وياي بكل زمان ومكان
- زين شنو الي قلتلي اقراه ! مادحكت شي
- هو هنا رباط السالفه
ان هالورقه مايكدر يقراهه ويفهمها غيرنه
دتشوفين اكو نقطه بس بكل الورقه
اني اعرف اقراهه لهاي النقطه بس انتي حسبتيهه ولا شي
- يعني شتقرا من نقطه !!! امي شتقصد بيها!
- تقصد بيها النهايه
شوفي هالثوب هي بعد مانفذت كل محاولاتهه بمواصلتي وكل الصبر والتعب ضاع
هي اختارته الي تذكار منهه
رغم اني خذلتهه ومااجيتها على الموعد ولا حتى اعتذرتلها بس جانت تفكر بيه واختارته الي حتى اهدء بي نفسي
شي من ريحتهه يضل وياي املكه كل العمر
اني ادري الكلام والعتب جان بصدرهه هواي
بس اختصرته كله بنقطه .
دتكولي معناهه هنا النهايه .. نهايتنا ..
وفهمتها وفهمت وجعها باخر ليالي بيت ابوهه
حسيت حتى ان هالثوب شايل دموعهه كلشي جنت افهمه منها
هالمره اني قاريها قرايه اعرفها حتى بغيابي شلون تتصرف وتعيش
وكل يوم اني اشيل بي الثوب اقرا بي النهايه
واكول بعدنا مانتهينا لابد بيوم الكاج

تلمست الثوب و تخيلتها لابستو .. قلتلو ..
-امي دايماً بليغه الكلام بس اليوم فاقت كل ظنوني بيها
ههه نقطه ! بلاغتها وصلت تودع بنقطه !
ماتخطر على بال بشر والله
- شفتي هاي المره البليغه هي حبيبتي
هاي الي كدرت تلين عودي
- زين امي شلون عاشت بذاك الزواج !
تعرف شي عنو ؟ هي عمرها ماذكرتلي شي يخصو

ضل يدحكلي وبعدين رجع لنفس كعدتو ويدحك للشباك وقالي ..
- ما توفقت وياهم واطلكو
- مااحسك صدكت بهالكلام
- بس ماجذبت همه اطلكو
- بدون ذكر تفاصيل ؟
- مااعرفها
- بس قريت كل الدفاتر الي بذاك الوكت
- من تقريها نحجي بالموضوع
- زين اخر سؤال وامشي
- اسألي
- ليش ضليت الها وفي كل هالسنين ؟!
- اذا تقصدين مادخلت علاقه بعدها فاني صارت عندي علاقات بعدها هواي
- واااالله !؟
- اي والله هواي صادقت بنات بس كلهن اسبوعين واعوفهن اكثر وحده طولت وياي شهر وعفتهه
- ليش يعني ! فهمني اكثر عمي فدوه
- شوفي اني جنت رافض فكره اني اعيش بدون حب هالشي اني جنت محتاجه واتأمل بيوم الكاه مره ثانيه
بس المشكله اني جنت ادورهه بكل وحده
كل مره اقابلهه ادور بيها شي منها شي يشبهه
ردت الكى نفس حبها نفس طريقتها بمحاورتي بس بغير انسانه ومالكيت عبث جنت احاول بهالشي وصارت تكضيه وكت
لا اكثر

تخيلي جنت البنيه الي اختارها لازم حنطاويه وعيونها سود وضعيفه اول ايام اضل استمعلها واقارن مرات اشوف شي مقارب الها واكمل وياهه بس اشرط عليهه تسويلي شعرهه اسود وبيهن مايقبلن كبل اكوللهه اودعناج واعوفهه تهوس وحدهه
وهاي الي طولت وياي شهر قبلت بكلشي كلتلهه عليه .. جانت تضفر شعرهه صفح
و ماتخلي من المكياج غير الكحله ومرطب شفه وعافت لبس البناطير والفساتين الكصيره والتزمت بذوقي وشروطي بتغييرها لمده شهر
وبعدين كالتلي ماكدر اضل هيج هذا مو ستايلي ولا شخصيتي تقبلني مثل مااني
كلتلهه ماتفيديني واودعناج
هاي علاقاتي كلهه هيج
تالي اقتنعت ان ماكو مره تشبهها وماتكدر وحده تصير مثلها بعيني حتى لو بايدي سويتها يبقى بيها نقص وعاد بطلت اصادق بنات

كنت ابتسم وادحكلو .. شي داخلي فرح ان امي ماتعوضها مره ، و مالها بديل ولا مثيل
قلتلو ..
- زين وعمتي ام سالم ما حبيتها ولا جربت تخليها تصير مثلها
- احترمها المره تحملتني وصبرت وياي كل هالعمر وهي ام ولدي معزتها ماتتعدى هالشي
وبعمري ماجربت اخليها تصير مثل الي بالي
مادري بس النفس وماتهوى

بهالحظه صاحتني عمتي وتحكيلي صار الغدا
وقطعنا حديثتا ونزلنا نتغدا وهين تذكرت انا
شلون ماسألتو ايمتى التقى بامي مره ثانيه وشلون ؟!

كملنه الغدا وقلت اروح اسألو بس هو دخل غرفتو عاد انا صعدت لغرفتي وضليت ادحك لنفسي بالمرايه .. اريد ادحك شي مني يشبها
بس انا افرق عن امي
الشي الوحيد بملامحي يشبهها هو تقسيم الوجه
خدود مرتفعه وخشم رفيع مثلها الباقي مو شبهها .. تمنيت لو اني اشبهها بكل شي
تمنيت لو اني ضعيفه وناعمه مثلها
لو ان شعري اسود مثل شعرها

انجضعت وضليت افكر بهالكلام وتعجبت منو
وانقهرت على امي شلون عاشت هذيك الايام
بلوعه كلبها ! وضل بالي سؤالين ..
شنو الصار بزواجها ؟
و هي مشاعرها لعمي شلون صارت بعد الفراك ؟

لليل رحت لعمي واخذت منه الدفاتر وبديت اقراهن ....

قريت وصفها لحبها الاول وخذلانها منو
وطول سهرها وانتظارها وبدايه زواجها
يمكن هذا الجزء كان الاكثر فضول عندي
قريتو بهداوه بعد يومين من بدايتي بهالدفاتر
وفهمت منو ان عيشتها كانت بالجنوب
وتعبت بيها ...

لليل وصلت لموقف كان ويه ولد عمهم
وكلبت الصفحه ودحكت هين فارق بالتاريخ
بيوم واحد وكلبت بعدها حتى اتاكد ودحكت بالاخير هم فارق بتاريخ يومين !!!!

رجعت قريت الاحداث وضل بالي سؤال عن اخر موقف !؟
ثاني يوم بديت بدفتر جديد وهم دحكت بيه نقص .. بس استمريت اقرا لحد ماوصلت
انتقالهم للعيشه ببغداد من بعدها باقي بس ورقتين فارغه ! وينتهي الدفتر !
وامي كانت هين دامجه الكلام كله بسنه
٩١ من بعد ماولدتني كانت تكتب هالاحداث
ماخرتهم عن ذاك الدفتر .. وهين مالكيت التكمله !
فتحت دفتر ثاني وتاملت ادحك التكمله هين
ومالكيت غير بدايه لسنه جديده ويه ابوي
بالمعمل ...

هين بدا الشك عندي بعمي ورحتلو
هو يسهر بمكتبو دكيت الباب وانا شايله الدفتر الاخير .. من سمحلي ادخل بالعجل قلتلو ..
- وين الاوراق الباقيه !؟؟
ليش شلعتهم من الدفتر هي هاذي الامانه !

دحكلي ورافع حاجبو وقالي ..
- صوتج

كضبت راسي وقلتلو ..
- اسفه عمي عليت صوتي بوجهك بس افهمني انا كلبي محروك على هالاوراق
وينهم !؟ بيهن اهم شي لازم اعرفو
متاكده هنه عندك
- مايفيدنج بنتي
- لااا يفيدني اريد اعرف شصار وامي تطلكت ! ليش محمد عمري مادحكتو ولاسمعت عنو خبر ولا عن اهلو !
ليش امي ولدتني بحديثه مو بغداد !
ليش انا باسم الشيخ خالد مو باسم محمد !!
كلها جوابها هيييين واريد اعرفو

وكف حدري وتلمس وجهي مسح دموعي وقالي ..
- اني احجيلج عليهن
-لااا اريد اقراهن بنفسي
- غاليه اخاف عليج والله راح تضلين متعبه نفسج بيهن وهنه راحن انتهن
- لازم اعرفهن عمي هاذي اساااس حياتي لازم اعرفو
- اني اجاوبج على كلشي
-لاا اريد الاوراق اريد اقرا وادحك ااامي شلون كانت عايشه الي صار هي كتبتو الي
حتى انا اقراه واعذرها على ضياع نسبي ذاك
هي كل هالدفاتر كتبتهن وضمتهن الي حتى تجاوبني على الي ماكدرتلو بحياتها
اريد اعرفو منها مو منك عمي الله يخليك
انطيني الاوراق
- زين بس تقريهن يمي هنا مو وحدج
-ماشي بس انطيني خلي اقرا
-اكعدي ارتاحي

كعدت وهديت نفسي وهو طلعهن من بين كتبو وخلاهن بايدي ... وصرت اقرا من مواقفها ويه ابن عمهم وعيشتهم بغداد
وظيفتها وفاه اهلها وجعها وغربتها عتابها لاهلها وذكرها لعمي وبالاخر .. عذابها على ايدهم .

امي بنهايه هذا كله كانت كاتبه ..
' اليوم انا قد استجمعت قواي وذكرت لكِ ما كنت اتهرب من ذكراه كل مساء
لا علم لي ان كنت سأشفى من اثار هذهِ الايام لكن انا لن اطيق العيش بها كل يوم
ياخذني الخوف والهلع حيناً واخر اجملهُ بقدر ولادتك
رغم كثره وحدتي والمي المكبوت الا انني اتقوى بكِ ولاجلكِ '

هين عرفت انا شلون كانت بدايتي
وتخيلت منظر امي بهذاك العذاب منهم وكرهت نفسي وبكيت
انا صرتلها الذكرى على اذاها