ردينا المعايده الي عايدنا بس ضلت معاني الحزن على بيتنا
بعد اربعين وفاه ابوي ماطلعت ..

اخذتهم للمكبره زرنا اعزازنا وقرينالهم الفاتحه وانا مابيوم نسيتهم كل صلاه اذكرهم واقرالهم الفاتحه .. وماكطعنا بثواب الهم

الشتلات الي زرعها حسين هين كبرانه ومورده وهو بايده سكاهن وكان يتلمس اسمها ويقولها ..
-يمه وردتي تسلم عليكي وتقولك حفظت الامانه وماخنت الوعد

كل اهلنه رجعو للبكي والمناحه هين
بس انا واكف وادحكلهم ومانزلت مني الدمعه
كنت احس ابوي هين يدحكلي ويرجع يوصي عليهم وانا بالي يروح على كل واحد بيهم افكر اذا كصرت بحكو لليوم وغفلت عن شي يخصه !؟
وتذكرت امي وغاليه وعلاقتهن الي تخربطت
انتظرتهم لحد ما فرغو الي بكلوبهم من كلام ودموع و وكفت بين هالكبرين وقلتلهم ...

- ول يابه دحكو هين
الحين احنه حدر منو واكفين ؟ حدر ابونا وعمتنا واثنينهم ماراضين علينا
لان بينا صاير خلاف ومذمه
دحكي غاليه يااخيتي اهلك مايرضولك الزعل ويه امنا وابونا ماتهون عليه بنيته ماتدخل بيتو وعازله نفسها عنا
وانتي يمه هم لاتنسين ان ابونا يعز اخيتنا وهي حبيبته ومالها ذنب بشي وتسمع شين الكلام عليها او على امها واثنينهن عزاز ابوي ومايرضى عليكي الزعل وياهه
وهذا عيد الله رجعو النفوس متصافيه
لاعمر ابوي كان يطول بعيشه عمتي ولا يكصر هذا قدر وابوي نال حسن الخاتمه
الخلاف بعد موتهم عيبه بحكنا كلنا لان احنه اهل عشنا الحلوه والمره سوه واليوم ضلينه واحدنا سند للثاني ماترهم نفكك علاقتنه
ويضل كل منا بصوب
انا لا ارضى لغاليه تصد عن امي وما تسلم عليها ولا ارضى لامي تكره اخيتي وتنبذها
والحين ان ماتراضيتن تحلمن بعد برضا ابوي وزياره كبرو وانا تخسرني ماتلاكن مني بعد غير الصد
لان الي مايريد صله الرحم وحك الاهل مايهمني بعد

ضليت ادحكلهن وهنه وحده تدحك للثانيه
تالي جدتي صاحت غاليه وجرت ايد امي
وخلت ايد بايد وهنه تباوسن وتصالحن
قلتلهم ..
- الحين ودعن ابوي وامشن للسياره

ودعنه وراحن ويه اخوتي وضليت انا وجدتي هين .. ندحك لهالكبرين وساكتين تالي جدتي
قالت ..
-الوداع يااهل الهوى الوداع

كضبت ايدها واخذتها لسيارتي ورجعنا لبيتنه
كان هذا اول عيد بدون حلويات عمتي وعيادي ابوي وذبايح المعازيم ..

خلص العيد ورجع كل واحد لحياته
ورجعنا التمينا على اربعين ابونا وقمنا بالواجب وبعد الاربعين سمعتهم وصيه ابوي
الي تخص حسين والي تخص البقيه

رماح صار عنده ولد سماه انمار . .
كان هالولد جيتو علينه فرحه
صرنا على اسمه عمام وكل واحد منا حاير شلون يدلل هالولد ...

اخوتي حر واسر امتحنو بنص هالاحزان
وطلعو بمعدلات بالسبعين ما نالو المعدل الي بالهم بس انا ماخليت امنيتهم بالهندسه اضيع
وقلتلهم اختارو الجامعه والقسم الي يناسبكم وانا ادفع كل مصاريف دراستكم ..

وضلو محتارين بين يدخلون تحليلات على راي رماح او هندسه طيران على راي اسامه
تالي بالليل حدرو مشترين كنافه وخلو الماعون كدامي وكعدو يتبسمون قلتلهم ...
- شعدكم من سالفه
حر - ياخوي هو خريج السادس شنو سالفته غير التقديم
- اييه قررتو وين ؟
اسر - احنه قررنا نختار الي يعجبك منهن
- قولولي الي بالكم خلي افهم
اسر - ياخوي من الاخر اقساط الطيران خمس ملايين
حر - واقساط التحليلات ٣ ونص
- ههههههه ادحك براسكم كلام اسامه مطبوع
يا جامعه ؟
حر - الفراهيدي

اخذت الماعون بايدي واكل وهمه يدحكولي وانا اتأنى بالاكل تالي اسر قال ..
- حلوه التحليلات زينه هم حلوه عاجبتنه
حر - ايييه شكو بيهه محللين نصير

خليت الماعون بالكاع ومسحت يدي وقلتلهم ..
- يعني عشر ملايين بالسنه
سهله ترخص لعينكم

ضحكو وكربو حدري قلتلهم ..
- العشر ملايين و وياها مصرف كل شهر وفلوس الملابس وحتى العطور تاخذوها اصليه من الي تعجب ذوقكم بس شرط
ان النتيجه ما توصلني الا جيد جداً او امتياز
ويا مره ادحكها تنزل عن هذني الدرجتين
اكطع عنكم كل هذا وحيرو بنفسكم وكتها

حر - انا عن نفسي شاطر وذكي واقدر هالكرم
اسر - وانا اتعهدلك اسر خاطرك ومااطلع الا من الاوائل

- زين عجل نتوكل عليها دحكو يايوم يعجبكم واتفرغلكم ونروح نقدم

دحكت فرحتهم لموافقتي عليها كانو مترددين على سالفه الفلوس مايدرون انا ارخصلهم روحي بس كون ينسعدون بمستقبلهم ...

وبعد كم يوم اخذتهم لبغداد وقدمتلهم ودفعت اقساطهم و ضل السكن ..
ابو سالم يريدهم عنده ويحلف يمين مايكعدون بغير بيته وخوال حسين يريدوهم عندهم
وحسين يقوللهم نسكن بيت واحد هين نأجر ونستقر وهمه على الكل مايرضون ويريدون اقسام داخليه ..

تالي خصمها الخال علي كان رايد ينتقل بشقه مشتريها من زمان ومتماهل بهالسالفه لان وحده وعلى واهسهم قرر ينتقل الها وهمه وافقو لان وحدهم وياه ما ينحرجون من الاهل
وشاركو بتأثيث الشقه ومسواكهم كامل مال شهر اخذه الهم رماح واستقرو بغداد على بدايه الدوام ..

حسين قفل البيت وبقى مفتاحه عندي ورجع لدوامه وعرسه تأجل رغم مشاكل من اهل حرمتو لانهم مايرضون بنتهم تضل معلكه هالشكل بس رضو بالامر الواقع لان سنه اهلو بعدها ماطلعت ..
وصار يداوم هو وحرمتو بالمرحله الثالثه

ورجع الشته وكل شي تغير بصيف واحد
ضل من زمانا ذاك الاولي بس حياطين الذكريات . .

جدتي صار انيسها ابن رماح انمار هي الي ربتو ...
ورماح اخذتله السياره الي وعده بيها ابوي
وكل واحد عاش منهم مستقر الحال ...

دخلنه شهر ال ١٢ وانا كنت بغداد ادحك فرعنا الجديد وشغله .. مكلف حسين بالعصريه يروح يشرف عليهم وينطيني كل الاخبار وهالمره وصلني خبر على كم مشكله تخربط قرار حلها عندهم ورحت سمعت من الطرفين وحليناها ورجعت لحديثه ..

اول مارجعت دخلت ديواني منتظريني هين خمس رجال وتعذرت منهم على تاخيري وكعدنا نتفاهم وبنص كلامنا دخل الكهوجي ووياه ولد اثنين باول شبابهم وبنيه ..

البنيه كانت مفرعه ولابسه بنطرون وبلوز مكشف ركبتها وقمصله جلد كصيره وواكفه بنص ديواني وبين هالرجال وتدحكلي

دحكت لكل رجال هين يدحكولها
صحت بيهم ..
- رجااال

وهمه نزلو راسهم وانا بالعجل مشيت حدرها وهي ترفع بشعرها عن عينها
غاضني شكلها هذا بنصنا وبالعجل نزعت
عباتي وخليتها على راسها ولفيتها عليها وقلتلها ...
- امشي كدامي

طلعت وهي تدحكلي وانا اشرلها تمشي
وكفتها باول حديقتنا وقلتلها ..
- انتظري هين لاتتحركين

ورحت بالعجل صحت هالولد وقلتلهم ..
- خير يابه شهالمنظر الي دحكتو !
شسالفتكم

واحد منهم قال..
- شيخ هي رادت ادحكك وقلتلنا اريد شيخكم وينو اخذوني عليه
- وتدخلوها هين بنص الرجال ما تعرف تحدر تحكيلي هالشي واطلع ادحكها
- هي مانطت مجال للتفاهم
-زين زين يعني ماتكربكم شي هالبنت
-لا غريبه عنا
- زين توكلو يلا

دحكتهم مشو ورجعت لهالبنت .. دحكتها تتلمس اطراف العباه ومنزلتها عن شعرها
الكصير قلتلها ...

- ياابنت انتي من وين اصلك مبين ماانك من ديرتنا
- انا بيي من هون وكنت اتفتل وانا عم انطرو يخلص شغلو .. دخلك هلاء انته الشيخ ؟
- ايييه انا الشيخ هين وشعندك من مطلب ؟
- تئبرني مااحلاك
- تحشمي يابنت ما هيك الحكي ياصغيره اكضبي لسانك بحضور الرجال شنو تطلبين تأمرين بشي ! معتبه ديواني شنو عندك من امر احكي يا بنت الناس فهمينا
- يا خيي انا مصوره هون وكنت اتفتل
وهالزعران الاتنين الي كانو معي سمعوني اشكال الكلام الي يسم هالبدن قال شو انا غزاله وهنه احسن الصيادين ومابيفوتو هيك غزال الا ما يأسروها
وكمان صار يلطشو بالحكي وماعندهم جنس الحيا وانا قلتلهم انتو تبع اي عشيره
وصارو يتضحكو عليي
بس انا ماسكتت عليهم صح اني بنت وصغيره وغريبه هون بس بعرف كيف احمي حالي والي يدعسلي على طرف بادعسو باراضيو ومابسال عنو
هدول انا قلتلهم مااحكي مع الصغار انا بدي كبيركن ماعندكن هون شيخ عشيره يعطي حقوق الناس و ينوب عن اهلو بمشاكلهن
انا بدياه
- ايييه وهذا انا شيخهم هين تفضلي اسمعك
- بتاخدلي حئي متل ماتاخد لاهلك
والكلمه الي مستني من تمهون تردها الهن
بطريئتك مابيهمني كيف بتتصرف معهن
بس انا دعست ارضكون ضيفه والي حئي هون بحمايتي من هالاشكال الوسخه
- زين يابه زين
حكك منهم يناخذ ابشري
الحين ادخلي لبيتي حدر اهلي ارتاحي واتصلي بوالدك خليه يحدر هين ونتفاهم على هالشي وياه
- تسلم انا مابدي ادخل هون بدي كمل شغلي
وبيي مابدخلو بهيك مشاكل انا باخد حئي بنفسي ما بنطرو يدافعلي
- يابه هين اصولنا هالشكل
والدك يحضر يكعد حدرنا ونتفاهم احنه مانتفاهم بحكوك ويه الحريم
- وانا غير عن حريمكن بتاخدلي حئي هلاء
وامشي من هون مرفوعه الراس وكلمن بعدها بيئعد مطرحو

ضليت ادحكلها وهي ترفع بشعرها وكاضبه
العباه بايدها الثانيه ..
فكرت بسالفتها وقلتلها ...
- قلتيلي والدك من هين يعني عراقي ؟
-اييه بيي عراقي وامي لبنانيه
- يعني والدك من حديثه موجود هين هو
- لا بيي من بغداد وهو بزمناتو سافر للبنان وتعرف على امي واجوزو واستقر بيي بلبنان
امي بتصير بنت خالتو الي هي اجوزت كمان بلبنان
- حياكم الله بديرتنا ياهل لبنان ونتعذر على الي بدر من هالشباب الطايشه لا تضل بالك علينه فكره الشينه احنا ديرتنا معروفه باصاله رجالها
- ايييه بعرف هالشي بيي حاكيلي عنكن وانا كنت بزياره لعنه والرمادي وعرفت كرمهن وطيبه نفسهن ومابظن هون حديثه تقل عنهن
وانا اتفهم ان لكل قاعده شواد عادي
بس كمان تاخدلي حئي منهن وهلاء
- زين يابه ابشري
شلون تريدين الحك ؟
- مابعرف اي شي المهم يعرفهون قدر نفسهون وان للبنت كرامتها وكيانها ما من حئهون يتعدو عليها
- زين عجل انتظريني هين
- ما بتاخد هي

انداريت دحكتلها وقلتلها ..
- حنا ماناخذ عطايانا يابه حلال عليكي

مشيت لديواني وصحت الكهوجي وقلتلو يروح يجيبلي هالاثنين بالعجل ..
وضليت واكف انتظرهم لحين ماحدرو
بالعجل اشرتلهم يمشون وراي ..
واخذتهم حدرها .. قلتلهم ...

- ولو انكم ولد عشيرتي بس اليوم انا للغريب طلاب حك من اهلي
ليش يابه تسمعون البنت شين الكلام
هالشكل احنه مربين ولدنا على العين الزايغه وقله الحيا ! مو احنه الي توارثنا بدمنا الشهامه وحمايه العرض ! اليوم على الغريبه ننسى اصول رباتنا !
يول ترضوها على حريمكم الي صار
ما كنتو تحركون الكاع بالي يرفع عينو عليهن
لو انا غلطان بالكم غير شكل الاخلاق ؟

ضلو منزلين راسهم وهي تتبسم وادحكلهم
رجعت قلتلهم ..
- واجب عليكم تتعذرون من ضيفتنا

ضلو يدحكولي ومايرضون يتعذرون وانا جبرتهم على الاعتذار وتعذرولها وكبل لا يمشون قلتلها ...
- دحكي يا بنت الناس ان كان انا اليوم وكفتلك واخذتلك حكك بكرا غيري جايز يعيل ويتمصلح لاجل هالحك
احنه بديرتنا وبعشايرنا مانعرف الا نسند اهلنا بكل زينهم وخطاياهم بينا نعدلها بس حدر الغريب ماننطي بولدنا واليوم لانها سالفه شرف انا نطيت بولدنا واجبرتهم يتعذرولك
لانك طلبتيني بالاسم و وحيده هين لو كانو اهلك حاضرين كان قلتلهم الحك على بنتكم هي الي ماحفظت نفسها وخلت الزين والشين يدحكلها
اليوم اخذتي حكك ورجعتي مرفوعه الراس
بس مره الثانيه احفظي سترك والي يتدنالك بعدها يحك عليه الموت بكاعو

- بس انا

اشرتلها تسكت وصرفت الولد من هين
هالكلام انا تقصدتو على مسمعهم حتى لا يلوحني كلام على ان الشيخ غرتو البنت ويفزعلها ونسى اهلو ...

قلتلها ..
- اسمعك
- شو هالحئ هاد الي تبهدلني عليه بينهن
- حكك بالاعتذار واخذتيه وحكي على الشين ماينسكت ...
يعني اسألك بالله انتي ماتعرفين اطباع ديارنا ؟
- اييه اعرفها بس انا ماخصني فيها انا غريبه عنكن بتصرف وبلبس متل ما يحلالي
- دحكي يابه
احنه مو قوم متخلفين ولا مانعرف الثقافه او الحريه الشخصيه
نعرفها و مطبقيها على اساس الدين والحرام
وان كان ماتعترفي بتعاليم دينا فاحكيها الك
من باب العقل
البنت سترها زينتها البنت المكشفه هاذي تترخص بين خلك الله
انا مااشكك بعفتك وشرفك واصلك وكله على هالراس واحيي ذاك الاب الي ربى هاللبوه
وعلمها ماتنام ولا ادير ظهرها الا وحكها بايدها
احنا رجال نربي بناتنه على القوه والجراءه
بس ستر الجسد والراس ماله زمان ومكان
يا يابه هذا ينبع من ذاتك وحرصك على نفسك
دامك انتي نفسك عزيزه وابيه لا تسمحين للرخاص يدحكون غالي ماتملكين
وانا اتعهدلك لو بعد هالستر تعرضلك احد
ماخليه يشم النفس بعد هاليوم ومحد يكدر يحكني عليه

كانت على طول الكلام تدحك لعيني وبالاخر صارت تتلفت بعينها على المكان ونزلت دمعتها ..
قلتلها ..
- يولو دحكي هين

دحكتلي وهي زامه شفايفها وتنزل دموعها قلتلها ..
- خير يابه ليش الدموع
- مافي شي بدي فل هلاء
- استغفر الله
وين كاعده اخلي اخوي يوصلك صار الغروب ما يجوز تمشين وحدك
- مابدي خييك ولا بدي شي تاني خلص اخدت الي كان لازمني وانتهينا اسمحلي بدي فل

مشت من حدري وعبرت لاخر الحديقه
واندارت تحكيلي ..
- هاد الشارع لوين بيوصل ؟

كانت تكصد على الشارع الي يطلع من بيتنا لوره بيت عمي ابو حسن وينتهي بيت عمتي الله يرحمها ... ضحكت ومشيت حدرها وقلتلها ..
- امشي على يساري

اخذتها منه ووكفتها بركن بيت عمتي وقلتلها ..
- وين العنوان الي كاعده بي ؟
- نازله باوتيل هون بوسط المحلات
- وين هذا ؟ احنا ما عدنا فنادق هين ؟
- مابعرف بيي حصلو وهو صغير كتير
- زين والدك وين ؟
- عندو شغل مابيرجع للمسى
- ومخليكي وحدك !
-اييه وشو فيها ؟
- لا يابه مابيها شي براحتكم
قلتيلي فندق مو زين تندلين العنوان بالضبط
- كاتبتو هون
- زين

طلعت تلفوني واتصلت بواحد من ولدنا وجابلي السياره .. نزل هو وكبل راح وانا قلتلها ..
- اصعدي يلا
- بس
- شنو ؟
- بس انته معلي حالك عليي وحسبتني رخيصه لشو كل هيدا

رفعت يشمغي وفتحت الباب وكبل مااصعد دحكتلها وقلتلها ..
- لان انا رجال ومشيه الحرمه من بيتي بالليل وحيده هاذي عيبه بحكي
وانا ما مرخصك نصحتك لتحفظي غلاكي

صعدت بالسياره وسديت الباب وهي من وحدها حدرت وفتحت باب الصدر وكعدت
وفتحت تلفونها ومدتو الي .. دحكت العنوان ومستغرب منو ...
قلتلها ...
- هالمكان اول شي بعيد عن هين وثاني شي هذا انا متاكد ماكو بي فندق وين كاعده فهميني بالضبط
- هو عماره و بيي مستأجر فيها اوضتين ومطبخ صغير
- يعني شقه كاعدين
-ايييه بس معنا مستأجرين فانا حسبتو متل الاوتيل وحكيتلك عنو
- يعني كم مستأجر اكو ؟
- شي اتنين بس نحنا ساكنين اربعه
انا وبيي وصاحبو ومرتو
- هاا وهاي انتي ووالدك بغرفه وهمه بغرفه والحياه سعيده بينكم
- اييه
- زين زين
وشوصلك لهين وحدك؟
- نزلت اتفتل انا بشتغل مصوره وصارلي كزا اسبوع بعمل تقرير عن اثار البلد بديتها من بابل ووصلت لهون كنت على الجنب التاني شو كان اسمها
-الحقلانيه
-اييه هي ابتديت فيها كانت كتير حلوه وضليت فيها يومين صورت كل صغيوره في ارضها وبعدها انتئلت لهون لحتى كمل هالمشوار واليوم كان اول يوم لالي فيها
وماحضيت غير بصورتين

- زين وانتي تفترين من منطقه لمنطقه وحدك
- اييه لان بيي مشغول وانا معتمده ع حالي
- شيتشغل والدك؟
- مهندس صوتيات
بيطلع هو وصاحبو ومرتو من الصبح يتفتلو وبيعملو دايلوك مع شي حدا هون
حكيتلك انو عنا تقرير نعملو على هالبلاد
وهنه بيعملو الفيديوات والدايلوك وانا بجمع الصور لكل منطئه
- زين والدك مو شغلو مهندس صوت شيطلعه وياهم
- بيعرف شي على شي وينبه عليهم ويتساعدو سوا كونهن تيم وهو بالليل يصير يرتب كل شي بالابتوب خطي بيي كتير بيسهر ويتعب هالايام
- خطيه الله يكون بعونه
- ويعين الجميع
- زين ليش تضلين وحدك ماتطلعين وياهم تصورين نفس الشغل انتو !
- مابحب هيك انا الي جوي الخاص
بحب اتفتل وصور ع روائ
- يابه انتبهي هين مو لبنان
- ياخيي فهمت ماعاد يلزم تعيد بالحكي

تكتفت وضلت تحرك بشعرها عن وجهه
وانا ضحكت .. اسكت لاني اضحك لهجتها تضحكني ...

وصلتها للمكان وقبل ماتنزل قلتلها ..
- اتصلي على والدك خلي اسلم عليه
- اوك

اتصلت وقلتلو ..
- هاي داد
في هون زلمه بدو يحكيك
عملي معروف كبير ياريت تتشكرو

مدتلي التلفون .. واخذته وهي ادحكلي وتبتسم
قلتلو ..
- سلام عليكم يابه
- هلا يابه هلا عيني شلونك
- الحمدلله بخير .. يابه سمعت انكم ضيوف ديرتنا واحنه ضيوفنا منين ماكانو عزاز
انا ماعرف اسمك بس اعرفك ضيف وحك الضيافه علينه واجب
انتظرك باذن الله على الغدا بكرا بديواني
اسأل هين على بيت الشيخ جراح ويدلوك
- تسلم شيخ تسلم كلك ذوق واصول مانريد تعبكم احنه هنا بشغل نكمله ونرجع
- اجلو شغلكم يابه مايطير
حسب حسابك انته والاهل غداكم عندي بكرا
باذن الله لزوم تحضر زين يابه
- هاهيه يابه زين باجر عدكم احنه تدلل
- كل الهلا يابه كل الهلا
بنتك هين وصلتها للشقه لاتتاخرون عليها دنيا ليل صارت
- لا لا اني بالطريق راجع شغله ربع ساعه اوصل
- زين عجل يابه تصلون بالسلامه
- الله يسلمك

مديت التلفون الهه وهي سدته وقلتلي ..
- بيكفي معروف
ماتعتل همنا نحنا مرتاحين هون
- بعدنا ماسوينا شي يابه هذا كله سلام
خفيف
- هههه طيب تعا لضيفك شي بين مايوصل بيي
- لااا تسلمين يابه انا لزوم ارجع
انزلي انتي وانتبهي على نفسك بعد
- ماتعتل همي شو حكينا من ساعه سميتني لبوا شو تغير هلاء !
- هههه ماتغير شي يابه تضلين لبوه
- طيب

تبسمت وفتحت باب السياره واندارت قلتلي .
- صحيح انته اسمك جراح ؟ متل ماسمعتو
- اييه جراح
- انا لينا
- تشرفنا

تبسمت ونزلت وضليت ادحكلها بعدها عباتي على جسمها .. تتمشى وتتلفت عليه ..
دحكتها صعدت وانا حركت السياره ومشيت
وانا اقول ..
لينا .. لينا
لندحك شلونهم ناسك يا لينا

ثاني يوم رجعت من الدوام من وكت وانتظرتهم وفرغت ديواني الهم
وساعه ١٢ وصلو هين اربعتهم ...

رحبت بيهم وضيفناهم الكهوه وصرت ادحك لابوها رجال بعدو بشبابو كاعد وحدرو بنتو لينا لابسه جاكيت نيلي وبنطرون ابيض وشعرها الكصير رافعته هالمره عن عينها
الها شبه من ابوها بالعيون بس تقسيم الوجه
ونعومتو لبناني مأصل ..

صاحبهم رابط شعره ذيل حصان وبيده ساعه واساور رفيعه سود ماعجبني شكلو بكل شي بي و حرمتو هم مفرعه بس لبسها محشوم
كانو همه بغدادين ومتعرفين على ابو لينا
عن طريق شغلهم والقناه ..

تغدينا وبعدها اخذت ابو لينا وطلعنه بره
تمشينا وقلتلو..
- يابه ليش ما تكعد هين انته وبنتك بضيافتنا وتخلي الشقه لصاحبك وحرمتو
- لاا شيخ تسلم احنه مرتاحين بكعدتنا وهي كلها شغله يومين ونطلع نكمل شغل بدهوك
- وان كان نص يوم مو راهمه كعدتكم هالشكل وانا هين انطيكم بيت بوسعو الكم
بس هالكعده زحمه يا يابه افهمها
- شفهم الله يخليك هنه كلهن يومين ورايحين
واصلا احنه ماكاعدين بالشقه على كد العشى والنوم ويومنا كله نشتغل
- براحتك يابه براحتك
بس اتمنى لو غيرت رايك تتصل بيه و اخليكم بهالعين
- يسلم عينك شيخ ماتقصر ومشكور على ضيافه اليوم

تبسمت بوجهه بس انا ماطايقه بصراحه حسيته اب مهمل زياده وماعليه الاعتماد
وره شويه مشو ضيوفنا ..

اتصلت غاليه وانا كنت منطيها الاحداث اول باول ورادت تطمن وتعرف الصار وقلتلها
عاجلاً او اجلاً البنيه ضايعه من ايد ابوها ..

.
.
يتبع

#شقراء_بغداد

الجزء_الثاني_بارت_٣١


اتصلت غاليه وانا كنت منطيها الاحداث اول باول ورادت تطمن وتعرف الصار وقلتلها
عاجلاً او اجلاً البنيه ضايعه من ايد ابوها ..

وظني بيها ما خاب ..
وره يومين على مشيتهم اتصل عليه رقم غريب وانا بالدوام حوالي ساعه ١١ الصبح
جاوبت و سمعت صوتها ناصي ضليت اعلي صوت تلفوني وقلتلها..
- الو ؟
- شيخ جراح ما هيك
- ايييه يابه تفضلي
-عرفتني انا لينا
- عرفتك يابه تفضلي
- هو انا مابدي زحم عليك بس
- يولو ماتعلين صوتك وخلي افهمك زين
بدون شي انا اسفط الحروف تسفط علي صوتك
- ما انا عم احكيك من تحت اللحاف مافيي علي صوتي هون
- خير يابه فهميني !عندك مشكله !
- انا هون بالاوضه صحيت هلاء ولقيت هيدا صاحب بيي هون ماطلع على شغلو معهون
عم يسمعني حكي من بره انو اصحى قال عم يشتئلي وان ما صحيت بدو يدخل يصحيني بطريئتو
هلاء انا كتير خايفه مابعرف هيدا انا مارتحتلو وبيي ماعم بيرد عليي تلفنتو شي خمس مرات ومابيرد لهيك تلفنتلك مابعرف حسيتك متل بيي
- لا اله الا الله يولو كومي البسي واطلعي من الشقه انا الحين طالعلك
- كيف بدي اضهر وهيدا هون عند الباب
- انتي مقفله الباب
- مابتتقفل هيدي بس مربطتا
- استغفر الله يولي اطلعي انزلي غافليه يلا
- طيب روء انا راح البس على ماتوصل وانزل لعندك
- يلا بالعجل وخلي التلفون بايدك اي شي يصير اتصلي زيين
- تمام

سديت الخط وطلعت بالعجل للكراج اخذت سيارتي وكبل رحتلهه اتصلت بالطريق عليهه وهي فتحت خط وقلتلي ..
- دخلك تعا لهون مافيي انزل هيدا
هيدا
- شبي شبببييي شسوا
- انا هون باوضتي ومسكره الباب بس مافيي اضهر مافيي احكي كتير
- بقي الخط مفتوح انا ماضل شي واوصل

ضليت فاتح السبيكر وامشي سرعه واسمع بس دكه الباب و صوتها وهي تصيح
لك استحي ع حالك انته زلمه مجوز

و صلتلهم وبالعجل نزلت وعفت السياره مشتغله .. صعدت وماعرف اي شقه همه
دحكت الاتصال مكطوع رجعت اتصلت وهي ردت ..
- يولو ياشقه
- الرابعه
- زين

صعدت للشقه الرابعه ودكيت الباب مايفتح ضليت ادك بكل قوتي لحد ما فتحو ودحكتو
بس بالشورت بالعجل كضبت راسو وضربتو بالحايط مرتين وهي طلعت قلتلها ..
- انزلي للسياره يلاااا
- دخيلك اتركو هون بيي بيتصرف معو
- يولو انزززلي يلااا انزلي ماتدخلين

كنت كاضبو من شعر راسو وايده لاويهه لظهره وبس هي نزلت انا دفرتو للكاع وكعدت على صدرو وبلا كلام بينه اشتغلتو ضرب و اخر شي قلتلو ..
-دحك يول وكت يرجع ابوهااا هين تقلو
بنتك اخذها الشيخ جراح احكيلووو كسر راسي واخذها لبيتو ويطلبك تحدر عليه وانته تاخذ حرمتك وتولي من هيييين ماتكعد بديرتنا بعد ولليل لو وصلولي خبرك بعدك هين هالمره ازوعك احشاك وجرب تتهاون بكلامي

عفته مدد ونزلت وانا اعدل قميصي بالبنطرون ، صعدت بالسياره وبالعجل حركتها ومشيت وانا بعدها رجفه الاعصاب بايدي تالي طبكت ونزلت لمحل اخذت بطلين مي ورجعت للسياره ...

خليت بايدها واحد والثاني شربته كله وضليت افرك براسي ماكدرت اسوق بعد ..
قلتلي ..
- فيك شي ؟

مارديت عليها وضليت افتح واسد بايدي اريد تروح رجفه الاعصاب واركز بالسياقه
مديت ايدي اخذت البطل ودحكتو مخلص
وهي مدتلي بطلها .. دحكتلها وبعدين اخذتو
شربت نصه وقلتلها ..
- دحكي انا لو الحين ياخذوني بنص الجبهه وتكون معركه موت وادحك حدري كل ناسي واهلي يتذبحو و دوري وصل للذبح والموت حدرهم مايرفلي جفن بس لما السالفه تتعلق بالحريم هيييين انا يرجف طولي خوف
وييبس ريكي تدحكين هالرجل انا مادري شلون مشيت بيها كبل شويه الحين هالرجل بادت

رجعت شربت مي وقلتلها ...
- على كثر مااتفور اعصابي وياكلني الخوف عليهن بلحظتها على كثر ما يزيد تعبي بعد ماتطمن عليهن
يولي هذا والدك براسو مخ لو حجار فهميني

- ما تحكي ع بيي
- لاااا احكي عليه لانه غشيم طاير بمشاغله وناسي انه اب وبركبتو بنت وحيده هين شامرها يولو لو صايرلك شي كان نفعك هالوالد ! كان سامحتيه انتي تسامحيه لو متاذيه اليوم من هالكديش !

وكعت تلفونها حدر رجلها وضلت تبكي وانا ساكت وادحكلها وهي زادت بالبكي زادت تاليها قالت...

- بيي مو متلكون بيي ماعندو اهم من نفسو
و كل اشي عندو بيصير وانا امينه حالي لو انا صارلي شي كنت انا الي بتحاسب ع حالي وبيي ماكان بيسامحني مو انا الي مابسامحو
كان راح يبعتني باول طياره ع لبنان بسكن عند ستي وخلصت حكايتي ماعاد بيهمو اشي

- عجل على شنو تدافعيلو !

- انا بهون عليه بس هو لااا بيي مابيهون عندي

- يولي انتي ليش هالشكل حياتك تكرهيها وتمشين بيها !

- معتره ماسامع بالمعتر

- استغفر الله. امك وينها عنك ؟

- امي مريضه وساكنه مع ستي هي مشلوله من اربع سنين وانا عايشه مع بيي بزورها كل اسبوع

- الله يشافيها ماعندك اخوه ؟

- عندي اخ مجوز اكبر مني واخت صغيره بالابتدائي ساكنه مع امي

- ليش اهلك منفصلين بسبب مرض امك يعني !

- ايييه امي هي طلبت تنفصل عنو مابعرف مشاكلهم خاصه مابعرفها انا بس لقيت مكاني صار عند بيي واختي عند امي
- واخيك وينو عنك ؟
- خيي خي مراتو وانا بحلف بحياتو
خيي انا ارجل منو
- عال والله عااال عال

شغلت السياره و مشينا قلتلي ..
- شيخ هلاء انته لساتك متعصب
- انا مخنوك
- شو سبب
- بعده الصار كابت على نفسي
لينا انا معقد ستر
معقد حريم وشرف معقد بيهم فوك ماتتصوري قلتلك عندي ذبحي اهون عليه من اسمع او ادحك احد يريد يتعدا على حرمه
- بس الحمدلله نفدنا
- لو انا تاخرت عنك !لو انتي ماتجرأتي واتصلتي بيه ! لو هالارعن كان
استغفر الله استغفر الله انا هذا ابيك اليوم اصحيه على دمو وهذاك الا اخليه يمشي ويتلفت
شعنده هو هين ضل ؟
- هو ع اساس انه مكرب
هيك كان يحكيلي
- يعني مسوي نفسه مريض وباقي. !
-اييه
- شنو حكالك بعد
- ما في شي تاني
- تكذبين
- مابدي تعلئو زياده خلص بيكفي لهون
- اعيدلك سؤالي
شنو حكالك بعد ؟
- يعني ما في نقاش عندك
- اريد جواب
- من اول ماشتغلنه سوا وكنا نطلع سوا
هو بيتحرش بالكلام بيلطش ع الماشي
صرت انا مابطلع معهون وبكفي شغلي لحالي
وهو صار يحكيني وبدو نصير سوا ع علائه
وهيك يعني وحكي الخريط هذا تبع انا بعشئك ومابئدر بلاكي وبشو بدي احلفلك مابتمنى غيرك وهالكلام ع الطالعه والنازله
واليوم صحيت على صوتو باوضتي
يفتح البرادي وداخل ع اوضتي يحكيلي انا مكرب وبدي اياكي تكوني حدي بدي تهتمي فيي وانا طردتو وطلع هو ويضحك وقال ينطرني برا وبعدا انا اتصلت بيي تا افهم منو شو عندو هيدا هون وبيي ماكان بيرد عليي
ورجع هو دخل لاوضه وبهيدا شكلو الي شفتو ويحكيلي مشتئلك وبدي تضلي حدي
قمت انا ضربتو بالمنفضه وطردتو برا وصرت اتصل ع بيي وافتح سبيكر وهو طلع وبعدا حاولت قفل الباب ماتقفلت قمت ربطتا
و اتصلت فيك ومن بعدا صار هو بدو يدخل لعندي ويحكي كتير حكي بيخجل
هيدا الجواب كافي ؟

- كافي ايييه كافي كافي

دحكت ماضل على بيتنا غير شارعين
دحكتلها وقلت..
- لينا اذا وكفنا بمكان شويه ابعد عن بيتنا بس نحكي كلمتين عادي
اعذريني على هالطلب بس انا هالشارعين بس اعبرهم بعد ماكدر ادحك بوجهك ولزوم يصير بينا كلام
- تمام مو مشكله
- مشكوره على هالثقه
- انا لازم اتشكرك كل يوم انته تعملي معروف كبير وصرت مابأمن الا حدك
- كل الي سويته واجب عليه

غيرت الطريق ورجعت وعبرت منطقتنا
دحكت ساعه ١٢ ونص وهذا وكت انا متعود اتصل باخوتي واتطمن على كل واحد منهم

اخذت تلفوني و اتصلت بحسين سألت على احواله و عرفت ايمتى يرجع وسديت منه اتصلت بعباس وهم سمعت اخبارهم ورجعت اتصلت باسر وسألت عن احوالهم وبعدها اتصلت بجماعتي بالدوام وصيتهم يحسبوها الي زمنيه ويدبروها وبعدين سديت التلفون
و هي قلتلي ..
- انته موظف ؟
-اييه
- موظف بشو ؟
- مهندس موارد مائيه اشتغل بالسد هين
- ماشاء الله و انته بتشتغل وبدير امور العيله سوا
- اييه
- بيك وينو. ؟
- توفى كبل كم شهر
- ربي يرحمو العمر الك اسفه
- عادي يابه عادي
- عندك اخوات ؟
- عندي ست اخوه واخت وحده
- يا ماشاء الله هدول الي كنت تحكيهم اخواتك
-اييه هذوله خمسه بغداد يدرسون
وانا متعود اتطمن عليهن بكل خطوه
- يعني هون ضل عندك اخ واحد
- اييه
- واختك مجوزه
-اييه
- وانته مجوز !

طبكت السياره ونزلت الجامه شويه وقلتلها..
- لينا مواقفنا رغم انها تشيط اعصابي بس الزين بيها جرأتك وقوتك بالكلام
تكدرين اضلين هسه نفس الشي ؟
- ما فهمت يعني بدك كون صريحه !
- اييه الي اسألك لا تضمين جوابه عني
صح انتي مامجبوره على جوابي بس حتى افيدك
- تمام اسآل
- انتي محتاجه مساعده بشي ؟
اي شي كان اي موقف او حتى كلمتين بالك ما رسيتيهم على بر محتاجه مساعده بيهم قوليلي عليها

ضلت ادحكلي وترمش وبعدين قالت ..
- ما بعرف يمكن اني محتاجه ويمكن لا مابعرف يعني عن جد مابعرف
- فكري
- ما بحسن فكر هيك بس بدي اسألك ليه تعتل همي هيك ؟
- مو قلتلك انا معقد ستر معقد حريم
والي انتي بيه انا مااحملو ماكدر اسكت عنو
- هلاء انته كرهاني ع شكلي وحريتي
- ماكرهك يابه انا خايف عليكي
رايد بكل طريقه اساعدك ومادحكك تضيعين من وره اهمال اهلك
- بشو متلاً تساعدني انته مابتعرف الا كم اشي عني !
- مو انا سألتك بشنو اكدر اساعدك !؟
وتاانتظر جواب
- ههه مابعرف كيف جاوب عليه
- زين احكيلي عن حياتك وانا ادحك اليلزم مساعده
- حياااتي
حياتي عباره عن شغل
انا ساكنه مع بيي بشقه صغيره بشتغل انا بالتصوير و بيي عندو استوديو صغير هو وشريكو وانا مخصصه مطبعه صور عندن لالي .. انا بصور حفلات اعراس اعياد الميلاد اكلات المطاعم وعندي قناه ع اليوتيوب بنزل فيها شي عن سفري للمناطىء الي بصور فيها و مرت فترا نزلت دروس تصوير بسيطه وهيك يعني يومي ماشي من مطرح لمطرح انا بتفتل مع كامرتي هيدي
انا بصرف ع حالي ما باخد من بيي شي
وانا بطبخ وبنظف وبنزل ع سوبر ماركت اتسوء وبيي بس بيدفع الاجار والفواتير

باخر الاسبوع بمشي لعند بيت ستي اتريح عندن وبشوف امي واختي
امي مشلوله اجريها مابتطلع ع مطرح وبتشم هوا الا انا لما بكون عندا بترضى تضهر
وبصير اخدها بكرسيها وحدي اختي ونتفتل
باخدا ع الجنينه نشم هوا نضيف و في بياع غزل بنات دايماً بيمروء من هوني بنشتري وناكل كلياتنا منو ، امي مره كتير هاديه واكابريه وحنونه كتير انا بئعد عندا يومين بس وبرجع كلياتني طائه وحيويه وبنسى كل تعبي حدا دايماً كانت تحكيلي انتبه ع حالي كوني بنت بزهر شبابها كتار الي بدن يئطفو هالزهر وبعدها يرموه
وانا ما كنت اعطي فرصه لحدا رغم اني بمشي واسمع اشكال الكلام وكلها ماكنت فوتها كل مره انا باخد حئي وبمشي وبعلم الي طول لسانو مره ان بالتانيه يبلعو
ماعتمدت ع شي زلمه بحياتي
خيي من وئت الي اجوز ما عدت شفتو هيك بشوفلو شي بوست وبفهم منو حياتو
ومرات كان يمروء لعنا بالاعياد وياريتو ما مر بينكسر ئلبي لما بشوفو كيف متغير وصاير خلخال لابستو مرتو وتتمشى فيه

اما حياتي انا وبيي هي متل الجيره او شي اصحاب هيك عايشين سوا ومتئاسمين بينهن
الاشغال .. بيي بيغيب ايام مع صحاباتو بيفلو لشي مطرح من دون مايسأل عنا او عني انا بالزات كوني عايشه حدو بس بسمعو شي صباح بيدخل ويبوسني يحكيلي كيفك بابا
منيحه بحكيلو اييه منيحه يحكيلي تمام خلي نفطر وننزل ع الشغل سوا
هيدا بيي وهيدي حياتي مابعرف انا لشو محتاجه فيها كتير انا سألت نفسي هالسؤال من زمان وعن جد ماعرفت شو

- كل حياتك توقعتها هالشكل بس هسه انتي مرتاحه بيها ؟

- لا ما بحس انا هون مطرحي عم تفهمني

- اييه افهمك افهمك

- يمكن انا محتاجه لجو العيله ؟

- او يمكن محتاجه ترتاحين كأي بنت عاديه
ليش ماتعيشين ويه امك مو احسن وأامن ؟

- ما فيي اترك بيي شغلي وعيشتي معو بيت ستي بعيد عن المدينه وما بلائي هيك شغل عندن فكرت كتير فيها انا بس انا مابعرف اشتغل بشي غير التصوير كيف بدي عيش ؟

- ماتكدرين تفتحين استوديو خاص الك

- شغله بتكلف بلبنان المصاري مو متل هون عندكن كل اشي عندنا بكزا حساب

- اساعدك بهالشي انا وافتحيلك استوديو خاص الك قريب من امك واختك وتضلين مأمنه على نفسك حدرهم وتخلصين من تعب والدك وبهذلتك وياه على الاقل تكعدين بين اهل امك واختك بينهم تخف وحدتك و تأمنين على نفسك اكثر

- هلاء عن جد بدك تدفعلي مصاري حتى انا افتح شغلي الخاص !

- انا قلتلك اي شي اساعدك بي
والفلوس اسهلها

- يااالله انته ليه هيك طيب زياده

- يولو هاذي فعل خير بيها جبر خاطر

- بس انا غريبه عنك وبدك تعطيني مصاري
وفل من هون وانا اخده مصرياتك معي بدون ماتسئال !!! يعني كيف بتثق فيي هيك وبحكيي بدون دليل ! ماتخاف اني اعطيون لبيي وما بشتغل فيهون !!
مابسدء انك بدك تساعدني بهالاشي

- يولو انا ادحك البني ادم بعيونه و مخليكي تحكي براحتك وانا اقرا تفاصيل هالكلام بعينك وما صنفتك من ضمن اليكذبون
خليتك حدر الي يلزمون رعايتي انا ما همني غريبه او كريبه عسى ما تكوني فضائيه
المعنى عندي يضل واحد
وهو انك حرمه بعازه مساعده
دحكي لو اهلك هين عايشين بلدنا كان انا امنت عيشتكم وماخليكي تعتازي حتى للشغل
بس انتو بعاد وقلتلك اطلبي بشنو اساعدك
ماطلبتي بس هذا الي معتازتلو تتحرري من والدك وتعيشي حدر امك

- بس انا ما باخد منك ولا ليره انا من بيي وامي مااخدت هلاء باخد منك الاف !

- محتاجه لهالحل انتي لو لا ؟

- اييه بس مابيصير مستحيل

-عجل اطلبي غيرو .. دحكي غير حل واطلبيه يلا

- هلاء برايك انا بس اسكن مع امي هيك بتنحل كل حياتي راح عيش براحه اكتر !

- يمكن اي مادري بعد انتي الي تعرفين راحه حياتك شلون تكون

- هلاء انا لو عطيتك صلاحيه تغير بحياتي شي شو راح تغيرو !؟

- ماكدر اجاوبك على هالشي لان ياخذنا لغير مواضيع ويضيع اساس سالفتنه

- كلو متل بعض هو مساعده
جاوبني عنو

- يولو لنا لو تدخلت بحياتك اتصرف على كونك عراقيه مو لبنانيه وانتي ماترضين تعترفين بعراقيتك فخلينا بعاد عن هالامور
هسه شنو عندك شي تطلبيه واساعدك بي
لو تاخذين وكت اكثر تفكرين !؟

- بدي فكر اكتر ما بعرف هلاء انا شو لازم اطلب

- زين فكري على راحتك
راح اخذك لبيتنا ضلي حدر اهلي بين مايتذكر والدك يتصل ويسال

- وبعدا شو راح بيصير

- نتفاهم لوكتها

شغلت السياره وطلعت .. وصلت لبيتنا
ودخلت السياره لاخر الحديقه ونزلت
وهي نزلت وشايله جنطتها على ظهرها
قلتلها ..
-امشي حدري راح اعرفك على اهلي
- يا شيخ بلاها كتير خجلانه منون
- ما تخجلي يابه هنه كلهن حريم هين امي وجدتي ومرت اخوي اكعدي حدرهن بين ما يوصل والدك لهين
- طيب ما تحكيلهن على الي صار
- لااا يابه تطمني تطمني

دخلنا وخليتها تكعد بالربعه وصحت على امي وجدتي .. دخلن ودحكنها وضلن يتصفنن قلتلهن ...
- هاذي ضيفتي من لبنان
راح تكعد بينكم هاليوم احسنو ضيافتها

سلمن عليها وانا دخلت اسبح وطلعت كعدت بغرفه جدتي ودخلت هدى حطت الغدا

وسألتها على ضيفتنا وقالت ماتغدت مارضت
قلتلها خلي تحدر هين ..

انتظرتها ودخلت هي وهدى اشرتلها تكعد
وطلبت من هدى تجيب غداها ..

ضلت ادحكلي وانا اتصل على اخوتي اتطمن انهم رجعو من دوامهم ومن حطت هدى صينيتها يلا بديت اكل .. وقلتلها ..
- اكلي يابه انتي ضيفتنا ومانرضى ضيوفنا يضلون جواعى

صارت تاكل وانا خليتها براحتها والتهيت باكلي وادحك امي تدحكلنا من بعيد
ماهتميت انا اعرف شاسوي ..

شربت الجاي وقلتلها ...
- دحكتي اهلي كلهم طيبين اي شي تعتازيه اطلبيه منهم واذا كان بنفسك تنامي هين براحتك او تصعدي فوك غرف اخوتي كلها فارغه ادخلي افتحي اي غرفه تعجبك ونامي بيها
- تسلم ما بدي نام بالي عند بيي ما بعرف شو راح يصير بعد هلاء
- ما تخافين يصير كل خير

وكفت على المراه لبست يشمغي وتعطرت ولبست العباه وهي قلتلي ..
- بدك تمشي من هون
- اييه
- ما فيك تضل لحتى يوصل بيي
- هو انا طالع حتى انتظرو بديواني ودحكي لو اتصل عليكي ماتردي مفهوم
- ليه يعني ما برد عليه !
- حتى يحدر هين يدورك
يلا انا طالع واذا اعتزتي شي اهلي هين حدرك
- تمام تسلم

وصيت جدتي عليها وطلعت ..
بعدني اتمشى للديوان واتصلت غاليه
جاوبتها وبالعجل قلتلي ...
- الاخبار تسسر الخاطر ياخيي ضيوفك بيتنا اليوم
- ما تفوتك فايته لا والله
- هههه خيي حليوه هالبنت ماقلتلي انها طويله ورشيقه وكت اسالك
-وانا اكعد افصلك جسمها
- اكذب وقول مادحكتو وفصلتو
- بالله مادحكتو مثل ماوصفوه الك
- والله ياخيي مادري كلبيش كلبك لا حن على بنات ديرتك ولا بنات الغرب
- ولا عمرو يحن
- زين خيي ما قلتلي شعدها هين اليوم
- بعدين عندي شغل الحين بعدين نتفاهم
-زين عجل انتظر التفاصيل وكت تكمل
- هههه روحي يولو

سديته ورحت كعدت بديواني واتصلت على
واحد من اصحابي ثقه وكفلتو يمشي لهذاك الخنيث يهدوو ويطلعو من ديرتنا كبل ماتظلم الدنيا ..

وبعد اربع ساعات اتصل حضره الوالد ..
رفضت اتصاله وكتبتله ..' وجهاً لوجه يابه '

كانو حدري ولد عمي ولما وصل الوالد قلتلهم يخلونه وحدنه .. وكفت بوجهو وضليت ادحكلو وهو يمسح وجهو قلتلو ..
- عندك بنت مو ؟ صغيره وشابه وعليها العين وينها تعرف حالها من الصبح لهسه تعرف شي عنها ؟
- شيخ الك احترامك انته بس بحياتي الخاصه ويه بنتي لتدخل
بأي حق تجي تتهجم وتاخذها لبيتك
- انااا مااتهجمت على احد انا فزعت للحرمه الي طلبتني افزعلها بدل ابوها
اذا انته ناسي الغيره والحميه فانا ماعيش الا وهي بدمي تجري
- استغفر الله وينها هييييه وينهااا
جيبها خلي نروح ونجفيك شرنا
- وين تاخذها ؟ هالمره حدر يا خنيث تشمرها !
- بنتي هاي شبيك وين اشمرهه مكعدهه ومدللهه هي الي متكعد راحه ماكافي خسرت نص شغلي اليوم من وراهه
تعبت صارلي شهر ونص مكسور ظهري بالشغل وتاليهه اليوم خربت كلشي
- وشجاب شغلك عليهه !!
البنت تحاصرت من هالارعن الي حاسبو صاحبك ماحسيت عليه انته وهو يدحكلها كل هالايام. !!!! شلون ترضى تخليه حدرها وتمشي
- ماسوى شي الولد اعرفه اخلاق بس هي كبرت الموضوع وراحت خابرتك وهجمت الدنيا خلت الولد مكسر حجي ميكدر يحجي
شسوي هسه اني شسووووي شغلي راح راااح منو فادني هسه هي لو انته
- يووووول احكيلو بنتك هذا متعرضلهه يتحرش بيهاااا تحكيلي شغلي واخلاق !
ول ياااخلاق هاذي الي تخليه يحاصرها بغرفتها يدخللها
- جذابه هاي جذااابه تتمسكن وانته تصدكها على حلاه لسانها
- ووول اكضب لسانك لا اكطمو اااالك
- جيب بنتي وخلي اولي

رفعت ايدي اريد اضربو وجريت نفس ومشيت عنو تالي قلتلو ...
- هسه يعني بنتك تكذب وهذا كلو تلفيق على جناب صاحبك
- مو تلفيق بس هي مفتهمه غلط هي من قبل صاحبه مشاكل وهاي مو اول مره تهرج الدنيا على واحد يحجيله كلمتين وياهه
من قبل مشوفتني الويل من مشاكلهه
ماتطلعلهه طلعه الا تعاركت ويه كوم زلم
لتصدكهه انته تره الولد متزوج ويحب زوجته ماله دخل بيهه مثل ماهي فكرت يتحرش
هو كل الي راده تكعد وياه لان وحده وهاي تحسبهه لبعيد وتحلل بكيفهه

- والله حرام بيك الرجوله
ول انته هم حاسب نفسك على الرجال

-احترم نفسك لا حسبالك شيخ وتشمر بالحجي على الرايح والجاي اعرف حدك
رجال اني وغصبا ما عليك وعلى الخلفك

تكربت عليه وحصرته بالحايط وضليت كاضبو من لوزتو حاصرهه باصابعي
وقلتلو ..
- دحكت وين الرجال هين
هذا يترافس على النفس
انا هين لو اكطع لحمك وصل واشمرو محد يدرى عنك ولا يوكف بوجهي ويعارضني
وانته تستاهل الاهانه بس انا ماراح اهينك
تريد تتنفس وتنفذ لو اكطعو فرد مره ؟

ضل يهز براسو وانا وخرت عنو وخليته يتنفس ويكح براحته وبعدين قلتلو...

- صاحبك مشى من هين
- اي
- زين
- شتريد انته فهمني
- بنتك تتعرض للتحرش من هالناس وانته عقلك محشيه حجر ماتفهم مشاكلها هاذي ادافع عن نفسها لو انها رخصت نفسها ماكنت طردتها و خليتها منبوذه
- مااصدكها هاذي ملعبه

- ليش يوووول لييش ولك بنتك هاذي مو صاحبتك بنتك يااالله ول بنتك ول انته تفهم شنو بنتتتك عرضك هاي شرفك ماي وجهك
شلون متصدكها
- انته شفتها مرتين واني عايش وياها العمر كله وهي تجذب تريد بس تتمسكن وتسويلها سالفه وتشرد لامهه اعرفها تعاليم اهلها
لو هي بيهه خير ما جان دكت على الغريب وتكوله تعال هنا يتحارشون بيه شنو هذا احسن من ذاك
- هاااااا عجل ماافزغتلها انته من اتصلت عليك
- ماتصلت لو متصله اجاوبها
- لاااا اتصلت عليك وانته طنشتها
- مااتصلت جذابه
- زين هسه انته تريد تاخذها
-اي
-وين تروحون
- ارجع لبغداد اشوفلي واحد يساعدني اكمل شغلي
- وين تكعدون بغداد ؟ بيت اهلك يعني
- لا بيت اهلي مقسم مال ورثه انأجر بفندق
- وتنعااااد نفس السالفه من جديد هم تهج من صباح الله وتخلي البنت متهجوله
- يطبها مرض هي رادت تجي وتتحمل هالعيشه هاي عيشتي شسويلها يعني وين اكعدها
- زين ضل هين لا تتحرك

عفته وطلعت وانا الف شك براسي امشي واقول ممعقوله والدها يجذب وجايز هي تطلع مشيطنه ومافهمتها ...
دخلت بالعجل لبيتنا وصحت عليها ..
- يووولي لينااا وينك حدري هين

حدرت وبالعجل قلتلها ..
- محتاج ادحك تلفونك يصير ؟
- خير شو في
- يصير لو لا
- اييه بيصير بيصير

راحت وانا ضليت واكف وادحك بوجه امي الي كانت تسألني شنو الصاير ومارديت عليها
رجعت وانطتني تلفونها اخذتو وطلعت بره وكفت ..
دحكت سجل المكالمات ولكيت اسم ابوها ومتصله عليه الصبح وخمس مرات
وهو ممجاوب ودخلت للرسايل دحكت
رسايل غراميه من رقم غريب وكلها ممردود عليها ... دخلت واشرتلها تلحكني ودخلنا غرفه جدتي .. قلتلها بصوت ناصي ...
- هالرقم هذا مال الولد نفسو
-اييه هو
- لينا تضلين هين تكدرين ؟
- مافهمت
- والدك عندو شغل راح يرجع لبغداد ويدور واحد يشتغل من جديد يكمل وياه لان الظاهر هالولد ساحب نفسه منه ومتخاربين بشغلهم
تضلين هين لحد ماهو يكمل شغله ويرجع ياخذك وتسافرون ؟
- كيف بدي ضل هون عندكن مابيصير
بيي مابيرضى
- انتي اريد جوابك انتي
تضلين هييين حدر اهلي والله تضلين بامان ماحد يمسك بكلمه وان كنتي تخجلين من اهلي هين عندي بيت ثاني فارغ اكعدي بي وقفلي بابو عليكي حتى انا مااصلك والله ولا ادحكين حتى خيال رجال يمر حدرك
- شيخ صعبه كتير كيف بدي عيش هون بدون بيي وليش لضل بعيده عنو
- والدك راح يتركك بالفندق ويطلع لشغله ترضين تكملين بعد هالشكل وياه
- لاااا مابيتركني ننزل نشتغل سوا
- استغفر الله يولي افهميها
مايضل عليكي اهتمام تضلين تتعرضين لهالاشكال كل يوم ووالدك مايوكفلك والله
هين أامن الك بين مايكمل شغلو
- ما بعرف لشوف بيي بيرضى لهالشي

كنت محتار بامرها ومادري اذا هالتصرف صح او لا بس حز بخاطري اخليها تمشي ويه هالرجال وضليت اتمشى بالغرفه وقلتلها ..
- ارجعك لبنان مو احسن ؟
خلي والدك هو يدبر شغله وانتي ارجعي لامك احسن وأامن الك
- ما فيي اترك بيي انا شريكتو بالشغل كيف بدو يكفي شغلو بدوني
- استغفر الله استغفر الله
-انته ليه تعتل هم وجودي حد بيي هيك ؟
في شي انا مابعرفو
- لينا ارجعي للبنان وعوفي الشغل هذااا عوفيه يولو سترك ونفسك اهم من شغل والدك ارجعي واستري على نفسك حدر اهلك

ضلت ادحك بنص عيني وساكته تالي قلتلي ...
- بيي كزب حكياتي لالك ما هيك
- نفس الموقف كل مره مو
- لااا هالمره اهون بكتير هالمره في مين موئف حدي ويعتل همي كبنت
- لينا مايستاهل تخاطرين بنفسك وياه
والله لو ادري بيه يحميكي كان اخذتك الحين حدرو واودعكم بالسلامه بس انا ادري راح يضيعك

تكتفت وقلتلي ..
- بتعرف خليتني حب نفسي واعتل همها
اعمول الي بتشوفو مناسب لالي انا بثق فيك
- زين عجل انتظري مني خبر

رجعت للديوان ودحكتو كاعد وصافن بالسكف قلتلو ..
- اسمع يابه الحك وعرفناه المن
و لو كعدت انبهك على الواجب يصير مااخلص لليل خلينه نخصم كعدتنا بكلمتين
يا تسفر البنت لاهلها يا تكعدو هين بينا
- وانته شنو مسؤول بينا ! وتحط شروط وتحجي معلك
- دحك هو صح لا انا طايقك ولا انته الي طايقني بس لزوم تتحملني واتحملك لان بالنص حرمه بينا
- وشدخلك انته بنتي شدخلك بيهه
- بنتك كفلتني انوب عنها بحمياتها ومن اول يوم هي طلبتني حماي الها واحنه رجال نفزع لليطلبنا ونتكفلو بزينه وشينه
- لااا هاهيه صارت هسه بنتي تكفل الغريب يحمايلها من ابوها !
- لو ابوها هذا براسو خير ونخوه كان مالتجئت النا يول استحي على دمك مجرجر البنت لهين وحيده وتشمر بيها من مكان لمكان وماتسأل عنها يول وين خوفك على عرضك
وين نشامتك وينها ابوتك وينها
- شدخلك انته بنتي اذبحهه اشمرهه اصلخهه معليك انته ومحد اله حق يدخل
- دحك يول لا تزامط براسي هين
لا تنسى انته ضيف وانا شيخ
وعلى سالفه بنتك انا بخمسين جهه اكدر اشتكي عليك واشكال الكلام اسفطو عليك
وبنتك كذابه موو هم راح تشهد ضدك كذب وتتمسكن للامن وتروح انته بالرجلين
اسمع يول لا الديره ديرتك ولا الناس ناسك
ويه اسياد هالكاع لا تلعب

وانا ما حكيتلك زور ولا رايد اتعدى على حكك او حك بنتك رايدلها الستر
احنه رجال مانتهاون بشرف حرمه ولو كنت ابوها لزوم عليك تصونها وتدحك زين كلامي الك لا تصكعنا بهرج الصوت
اوزنه لعقلك ودحك زين بنتك وين وقلتلك يا تسفرها يا تكعدو هين الكم بيت خاص بيكم اكعدو وانسترو بين ماتفض شغلك وترجع لاهلك وهناك مالي دخل بيكم بعد

ضل ساكت ويفرك بايده تالي قال ..
- شلون اكعد هنا واني لازم ارجع لبغداد للقناه ادورلي فريق اكمل شغلي وياهم
- هو الشغل مكلفيه الك لو مشارك ويه احد بي
- مشارك وياهم احنه فريق تكفلنا بهالفقره
يعني هسه اخذو همه كل الشغل ع الحاضر وصفيت اني بنص شغل فلسين مايطلعلي منه
- هاااا يعني لازم تروح ادورلك فقره ثانيه تشتغل بيها هاي بعد راحت
-اي من وره تسرعكم خسرتوني كومت فلوس جان اني منا لاخر الاسبوع مسلم مال الانبار وطالع لدهوك و هم اسبوع واخلصه ولكل منطقه ذاك الحساب
- يول تفضل الفلوس على بنتك
ول فلوسك هاذي تنرزق غيرها وبنتك لو ضاعت من ايدك تخسر دنيا واخره عليها
- ما تحفظ نفسهااا هي ماتحفظها شلون اضل اني مكابلهه وكاعد احفظ شرفهه
بيهه خير هي ادافع لنفسهه
- مو دافعت وانته شرديت ؟ كذبتها وتضل تكذبها انته مشكلتلك ماتريد ادحك نفسك مقصر بحكها وماتعرف تصونها تريد تخلي الغلط كله عليها
تخاااف تواجه مشاكلك
- هسه انته شتريد مني والله خبلتني شتريد
- خلي البنت هين وروح اشتغل وارجع اخذها من تكمل وتريد تسافر
- خليها دخليها ساعه السوده الي ابتليت بيها
بقيها يمكم وشيصير عليها انته المسؤول
- ايييه انااا مسؤول بيها
ولاخليك ادحك المسؤوليه على اصولها شلون تصير
- زين هي تلفونها وين
- عندي تلفونها ليش
- رجعه الهه خلي تجاوبني
- زين بعد ؟
- راح امشي ديربالك عليهه
- ههه والله الكلام واكف هين على طرف لساني و ابلعو
روح يابه توكل توكل

طلع مستعجل وانا استغفرت ربي
هالبشر يصفنوني عليهم والله
شلون يكدر يرخص بنتو هالشكل !!!
بالله دايماً مشاكل الحريم تسطر الراس

اتصلت عليها وقلتلها ...
- ها يابه شلون حالك
- بخير شو صار معكون
- والدك امنك عندي راح اضلين بيتي
دحكي شنو الي تعتازيه وانا ارسل يجيبوه الك
- لااا تسلملي ما بدي شي انا معي كل اغراضي الي بعتازها لليوم بس بيي وينو راح يعني
- اييه طلع قال راح يتصل ويريدك تجاوبي
اذا صار بينكم نقاش مارضيتيه احكيلي عنو زين
- ايييه تمام بحكيلك
- زين عجل يابه اخذي راحتك

سديت الخط وطلعت كضيت كم شغله ولليل يلا رجعت للبيت .. كنت متعشي برا بس
غسلت ودخلت غرفه جدتي دحكتها نايمه
و لينا بمكاني هين نايمه ..

سديت الباب وصعدت لغرفه عباس نمت بيها
انا بطبعي مااخلط شي ويه شي
وكت الي اريد انام انام ما خلي التفكير ياخذني
ووكت الي اريد اشتغل شي اشتغلو ماخلي شي بالبال ياثر عليه
وكت الي اجوع وانا بعدني بمشكله اعزلها لوكت مااكل واشبع وارجع احلها
كل شي بحياتي انطيه حكو ...

ثاني يوم اريد ابدل واطلع لدوامي وهاذي نايمه هين .. صعدت دكيت الباب على امي
وطلبت منها تنزل تاخذلي ملابسي من الغرفه
وضليت انتظرها بالباب .. اخذتهن منها بدلت وطلعت لدوامي ..

اتصلت غاليه ومن سمعت انها ضلت هين عايشه بينا قالت راح تحدر هين حتى ادحكها
والخميس راح ترجع ويه اخوتي ...

ضلت هالايام لينا بيتنا كلامي وياها مره وحده صار على التلفون وصيتها ماتطلع لمكان ولا تحكي شي عن حياتها لاحد من اهلي
وبعدها وصيت رماح ما يضل بالبيت ومن يرجع بوجهه لغرفته ..
انا اطلع لشغلي من الصبح وماارجع الا نص الليل الكل نايم اغسل واصعد فوك انام
ماعرف شي عنها الا انها زينه مرتاحه هين وهذا عرفتو من غاليه ..

صار الخميس وبالليل وصلو اخوتي واخيتي غاليه وبنيتها .. حضرت العشه بالبيت لخاطرهم بس لينا ما كعدت ويانه ضلت بغرفه جدتي ..

تعشينا وتعللنه سوه اصوات اخوتي هين بالبيت هي راحه عيشتي .. تطمنت على كل واحد بيهم و بعدين وصيت غاليه تاخذ البنت
وتنتظرني عند الباب حتى اوصلهم لبيتهه

طلعت وهين يلا دحكتها من بعد ذاك اليوم
سلمت عليها ومشيت على يمينهم وشايل بيدي مزنه . .

وصلتهم للبيت واول مادخلو انا ترخصت وطلعت .. رجعت لاخوتي سهرت وياهم
وبعدين كل واحد مشى لغرفته ينام وانا رجعت لمكاني ..

دحكت هين حدر مخدتي ماشات شعر
وسماعات ومبرد اظافر .. ضحكت وكفيتهم على جهه واجيت انام اول ما غفيت دحكت وجه عمتي الله يرحمها ..
دحكتها بوجهي صار وجهها وهي تبتسم
بس هالشكل دحكتها وفزيت ..

ضليت صافن شجابها على بالي الحين ؟
قريتلها الفاتحه ورجعت نمت ..

ثاني يوم الجمعه متعودين على ثواب الغدا لابوي وعمتي بهاليوم واخوتي رادو يشوون سمك وراحو صيدو وكضوها شوي
و وكت ما صار الغدا اتصلت عليه غاليه
جاوبتها بس سمعت صوت لينا .. قلتلها..
- هلا يابه
- كيفك شيخ
- الحمدلله بخير .. عجب متصله من تلفون اخيتي
- هو انا ما عندي وحدات لهيك اتصلت من هون بدي احكيك
- اسمعك يابه

- هو انا سمعت من اختك هلاء في عندكن تواب لاهلكن والكل بدو يتجمع ع الاكل
فيي انا كمان احضرو ؟
يعني انا ما عشت هيك جو فيي جرب جو العيله الكبيره حدكن اليوم لو سمحت
- ماشي بس تلبسين حجاب
- اييه مو مشكله بلبس هلاء
- زين يلا تعجلي
- ههه تمام شكرا

سديت الخط وضليت ادحك للتلفون
وبعدها دخلت كعدت براس السفره والتمو اخوتي حدري وامي وجدتي وضلن البنات
تاخرن وانا انتظرتهن ما سميت للاكل
لحد ما دخلن واخوتي ضلو يدحكون بوجهي
قلتلهم ضيفتنا هاذي بنيتنا ..
دحكتها لابسه حجاب وثوب طويل وكعدت حدر غاليه وهدى ..
سميت باسم الله وبدينا ناكل وهالمره بهدوء
اعرف اخوتي مستحين من كعدتها هين ولا كان هرجو البيت بصوتهم ..

من دحكت الكل كمل اكلو بديت اقرا اهداء الثواب واخوتي يرددون وراي وبعدها قرينا سوره الفاتحه وختمناها بالصلاه على النبي

اخوتي ساعدو بلم السفره وانا غسلت وكعدت حدر جدتي الي هي بدت تسألني عن حال البنت وشسالفتها .. قلتلها ضيفه ابوها امنها عندي وراح لشغلو بغداد ... وسدينا السيره

شربت الجاي وطلعت برا تمشيت شويه ورجعت لغرفتي نمت ساعتين وكعدت
وطلعت دحكت رجالنا .. .

بالليل وكت رجعت للبيت دحكت غاليه كاعده بالربعه تنتظرني .. كعدت حدرها وقلتلها ...
- وين بنتك يولو
- نومتها حتى اتفرغلك خيي
- هاا خير ان شاء الله
- مشتاكتلك ياخوي زمان ما كعدنا هالكعده
- ايييه بالله وانا مشتاكلك يولو
- جراح لايمتى لينا تضل هين
- ماعرف والله لايمتى ما والدها يخلص شغله ويريد يسافر هي تطلع من هين
- زين خيي عندي سؤال
-اييه
- ما كلبك رف عليها ! ؟
-هههههه يولوووو
- بروح ابوي احلفك بروحو ما تحركت هالحجاره من مكانها شبر واحد بس شبر
- لا ماتحركت وعمرها ماتتحرك
- يعني والله بالك ولا يمها !
- لا شعندي وياها مادحكتيني انا شلون اتصرف وياها مافهمتي يعني !
- ياخيي كل هالجمال والدلع والصوت الحلو
وما رف كلبك ! عجل شنو الي يكدر عليه بس فهمني انته من شنو مخلوق
- يولو انا كلبي كاضبو بعقلي ولا يمكن بيوم ينبض نبضه بدون شور عقلي فلا تتعبين نفسك وياي انا لا الجمال ولا الدلع ولا اسم حرمه يكدر يفر موازين عقلي
- ليش ياخيي ليييش
- هذا انا وهذا تفكيري عوفيني مرتاح شكو تنبشين بهالسوالف
- يعني تضل ماتتزوج
- الفين مره قلتلك ماتزوج جديده عليكي !
- بس انا ضليت بامل تطلع بيوم بنيه بحياتك تغير هذا رايك ودحكت لينا اكبر فرصه لتغييرك وهم عقلك بعدو مقفل على كلبك
- يولي انتي تعرفين شي وانا اعرف شي
انا تفكيري ابعد بالف متر من تفكيرك فاسكتي
وسدي هالسيره
- زين سكتت
- يولي انتي عايفتها وحدها بذاك البيت ؟
- لا بعدها هين بغرفه جدتي كاعده على اللابتوب
- زين ما تمشن تنامن ترا انا مطفي وتعبان
مابيه حيل سهر
- ننام هالليله هين لان بنتي نامت بعد ماكدر اطلعها
- يلا زين عجل افرشيلي هين وانتي نامي حدرها

كنت اتثاوب وانا احكيلها وهي راحت وجابتلي الفراش كبل انجضعت وكبل مانام تذكرت انها ماعدها رصيد ..
اخذت تلفوني وحولت لرقمها الفين وبعدين نمت ..

ثاني يوم اخذت اخوتي وطلعنه لبساتينه
غيرنا جو الشغل والدراسه وصار غدانا بنص الزرع وعلى سوالفهم وضحكهم ماحسينا الا العصر وصار لازم يرجعون لبغداد ..

خليت مصرف كل واحد بايده و ودعتهم ورجعو بس غاليه ضلت هين ...

رجع الدوام وكل يوم نفس الشي انا اكضيه من شغله لشغله وارجع تالي الليل تعبان بالعجل انام ..
ليوم الاربعاء غاليه اتصلت وقلتلي راح ترجع واسامه بالطريق ..

رجعت للبيت حتى اسلم عليها .. وهي كانت بيتها وحدرها لينا .. سلمت على لينا ودرت وجهي عنها ضليت مركز باخيتي ..
قلتلها ..
- يولو ماتخليلنا مزنه
- ماخليها عيني بنيتي ماكدر بلياها
- زين راح اشتاكلك
- يابعد عمري ماتخاف اضل ع التلفون وياك
ماخليك ترتاح مني
- هههه بس فكي من الاسطوانه نفسها رحمه لاهلك
- افكر مادري بعد
خيي امشي قفل السخان مادخلتلو انا لان هين ريش حمام منثر واخاف تطلع مذبوحه هين
- هههههه يولوو ايمتى تتغيرين
- انا كلبي مقفلو عقلي ماتغير

جريت خشمها وضحكت ورحت طفيت السخان ودحكت حواليه وقلتلها ..
- يولي هين بس ريش الحمامه صارت ببطن صيادها
- عساه ماتهنى بيها وسم تصير بحشاه يااارب

سديت الباب وضحكت وهي وكفت حدري وشاورتني ..
- جراح ياخيي تلحلح شويه دحك هالي حدرك
- غاااليه يابه شسالفتك انتي كل يوم نعيد نفس الكلام
- ياخيي البنت تحبك ذابحه روحها على نظره من عينك
- لاا بربك
- والله ياخيي هذا الي بالها
-هي قلتلك هالشي لو افكارك هاذي
- مااسمحلك تهين افكاري خي
انا استنتاجي بمكانو ودحكلها مرتين ويثبتلك صحه افكاري
- وكفتي كلبي عبالي صارحتك بهالشي
- ياخيي والله تحبك انا دحكتها تتصفن بصورتك بجهازها ودايماً تسال عن كل شي يخصك و حتى صورتك من انته وصغير حلفتني اخذها الها وتصورها بدون ماتدري جدتي ول خيي البنت فكرها مشغول بطاريك
دحكها لخاطر نبينا لخاطر اسلامنا ودينا دحكها

مارديت عليها ومشيت للباب وقلتلها..
- اتصلتي باسامه وين وصل الحين؟
- ما تصلت بعد
- زين عجل انا راح انتظره بالديوان
- خيي راح تضل لينا وحدهه هين
ابقى لحد مايوصل اسامه حتى ترجعها لبيتك

دحكتلها وهي تتبسم قلتلها ..
- بالباب راح اوكف

طلعت برا وضلت سالفتها هاذي بالي
لو طلعت صدك شلون اتصرف بهالحال؟؟؟

وصل اسامه سلمت عليه ودخلت صحت لغاليه وصعدو بالسياره وبالعجل مشو هذا طبع اسامه جيتو خفيفه سلام واودعناكم ..

دخلت للبيت ودحكتها كاعده جوه قلتلها ..
- يلا نمشي
- شيخ بدي احكيلك شي
- اييه اسمعك
- انا بيي طلع ع سليمانيه و سالتو ايمتى بترجع وبحكيلي مابعرف انو اشي اسالو يردلي مابعرف عم حس بيي كرهاني
مو طايئني حتى شو لازم ساوي
- طنشيه يابه
- ما فيي
- يولو خليه بكيفه يشرق ويغرب مالك دخل بي بعد و انا بالي نتفاهم بهالموضوع
بس ماصار مجال
- شو في بالك
- دحكي يابنت الناس
صح هالكلام يجرحك بس لزوم تسمعيه وتعقليه .. والدك يضر ما ينفع بحياتك
وانتي بنت قويه ومو بحاجته معتمده على نفسك اريدك تضلي هالشكل
من ترجعين بسلامه لديرتك روحي انتقلي عيشي حدر امك و اشتغلي شي بسيط
كوني نفسك و خلي التصوير هوايه مارسيها
بحياتك لحد مالله يمكنك وتفتحين استوديو خاص الك واستقري بحياتك بعيد عن والدك ومشاكلو على الاقل حدر امك تلاكين اهتمام ونصح ورعايه تلاكين احد يصدكك ويثق بتصرفك وكلامك تره العيشه ويه انسان شكاك وهمه نفسو وبس هاذي عيشه مر
وانتي ماعندك شي يجبرك على المر روحي حدر ناسك الي على مايك وعيشي بينهم

كل كلامي وانا مادحكلها وهي ساكته وضلت على نفس السكوت والهداوه لحد ماانا قلتلها..
- فهمتيني ؟
- اييه طبعا فهمتك
- زين يعني راح تسوين هالشي
- اييه بنتقل عند امي احسن وبيي بكل الاحوال مابيهمو اشي
- زين واذا احتاجيتي شي اتصلي
- تمام
- يلا نمشي

طلعنه ورجعتها للبيت ورحت لديواني
ولليل غاليه دزتلي صور محادثه هي ولينا
كانت تسألها اذا تطلب مني اخذها لبساتينا اقبل لو لا وغاليه رادتلها هو ماعنده وكت خلي هدى ورماح ياخذونك وهي ماقبلت
كاتبتلها .. اريد اطلع ويه جراح نفسو ماارتاح الا وياه ..

كتبت لغاليه ..' احكيلها جراح مايتنزه ويه الحريم وشغلو لفوك راسو '

طفيت النت بعدها لان اعرف الرد من اخيتي شلونه ..
عدت ايام وانا مادحكها وغاليه مستمره تناقشني بسالفتها وانا اطنشها اردلها رد بارد بعيد عن سالفتها اضل اضحك على اعصابها و اطلع من الموضوع ..

صارت رأس السنه ..٢٠١٨ .. كاعد انا بالبيت لان اتجنب اجواء الاحتفالات بكل اشيائها كون الحزن بعده بيتنا ..

منجضع بفراشي واكلب بالتلفون واول ما دكت ١٢ وصلتني رساله من لينا مكتوب بيها
' بتمنى هالسنه تكون عليك سعيده ومافيها احزان '

رديتلها..' شكراً ربي يجعلها سعيده للجميع'

ردتلي .. ' بدي شم هوا هلاء فيي اضهر '
كتبتلها .. ' براحتك بس لا تعبرين اكثر من الحديقه '

سمعت صوت الباب الثانيه انفتحت ورجعت انا اكلب بالتلفون واتصلت غاليه .. جاوبتها..
- ها يابه
- كاعد بعدك كاعد ! خيي ماتمشي حدرها
-يولي وين امشي لا تخبليني
- مو تصخمت البنت وطلعت للحديقه ماتطلع توكف وياهه دحكها شبيها
-وانتي شعرفك هي طلعت؟
- هي قلتلي خابرتني تبكي البنيه متعوبه خيي روح حدرها اسمع منها دخيل الله تحرك
- يولي وانا شخصني بتعبها النفسي
مو انتي تسولفين وياهه انا شكو بعد شكووو
- هي تريدك انته ترررريدك انتتتتتته خيييي تلحلح شلعت فادي
- يوووولي انتي وينو رجلك عنك ماعندك شغله غيري يولي عوفيني بحالي
- والله ان مارحتلها الحين اتصل عليها واحكيلها اخيي يحبك ويراقبك من بعيد ويستحي يعترفلك
- لابالله افصمو لراسك من ركبتك
- اصبرلي ثانيتين اكلبها لحياتك
- يولي اركدي عاد بطلي خبال شسالفتك انتي كوه تلزكينا مانرهم يابه ماااانرهم
- ماشي لاترهمون بس امشي طيب خاطرها ول خيي كلبي مكسور عليها بروح عزيز كلبنا روحلها هي بس ادحكك حدرها تطمن والله البنت هين تحس بغربه وماتشكي
- استغفر الله ول انا امها !! انا حالي حالك غريب عنها شمعرفني شسويلها واطيب خاطرها طيبيه انتي
- يااااربي الصبرررر ياربي
خيي البنت متعلقه بيييييك تريدك انته حدرها ادحكها تهتملها احكيلو ذابحه نفسها على كلمتين وياك انته بس وكف حدرها هو الكلام يطلع بس تحررررك يااايابه يا كلببي
- زين زييين بس فكينا

سديت الخط و كمت لبست القمصله وطلعت
دحكتها واكفه حدر النخله وميله راسها عليها
مشيت حدرها وكفت وراهه وقلتلها ..
- خيرك يا يابه

اندارت دحكتلي وهي تبكي وتكربت بالعجل حضنتني ... انا بس ضليت فاك عيوني وايدي بجيوبي وهي تتشاهك وتبكي ...

ماعرفت اسوي شي او يبدر مني كلام
ضليت على وكفتي وساكت وايدي ماحركتها من مكانها ... صارت تحكيلي ...
- رجعني ع لبنان بدي روح عند امي
مابدي ضل هون ما بدي بيي بعمرو مابيرجع وياخدني
- يرجع يابه يرجع

- لااا مابيرجع هو اشتغل هون بالقناه ما فيه يترك شغلو وينتبهلي مابيهتم لايمتى بضل هون وحيده مابيهمو
- لينا دحكيلي يابه

رفعت راسها ودحكتلي بس ايدها ما وخرتها عني وانا تجنبناً لاحراجها قلتلها ..
- اكعدي هين خلي نتفاهم

كعدنا وقلتلها ..
- وصلك خبر من والدك بهلخصوص ؟
-اييه تلفني من كزا يوم وحكالي انه اشتغل هون رسمي بالقناه وعندو سكن مع صحابو بالشغل
- زين وبعد
- هو سالتو ايمتى بدك ترجعني ع لبنان حكالي بس افضى ولليوم مافضي يتلفني حتى
- عجل ما قلتيلي هالكلام من كبل
- انته كمان ماكنت تفضى
- بس تكدرين تتصلين وتعرفيني اجاوبك
- ما بعرف ليه ماتصلت
- زين هسه تريدين تسافرين مو
-اييه ما في ضل هون اكتر من هيك
-ليش هين صار شي ضايقك
- عم اتكأب انا عم اتعزب لحالي بدي فل من هون بدي انسى كل اشي ونام ع ايد امي
بدي كون حدا واحكيلها الي فيي هي بس بتفهمني وماتخليني ضايعه هيك
- زين يابه زين
تكدرين تسافرين وحدك ؟
-اييه
- عجل راح احجزلك وانتي انطي خبر لوالدك برجعتك
- مافيي ارجع بلاه مصاريي مابيكفو
- ماتهتمين لهالشي
- ما بحكيلك لحتى تدفعلي انا مابحب هالشي
انا اجرتي عند بيي ضلت مااخدتا منو
نطرتو يعطيني بس هو مارجع لعندي
- ميخالف يابه اعتبريهم هديه
- مالها لزوم الهديه بيكفي الي عملتو كل هالايام لالي انته واهلك
- هذا واجب الضيافه يابه
وانتي صرتي بامانتي ومسؤوليتي حكك علي امنك بكل شي وسفرك يامسهلو عندي
لاتعتبريه شي كبير
- يعني روحتي من هون سهله عندك!
- لاا يابه كصدي بالفلوس انها سهله للسفر
هسه لا تفكرين وتهتمين كم يوم وترجعين لامك وتستقرين ان شاء الله
كومي نامي يلا

وكفت ونفضت ملابسي ودحكتلها وهي دارت وجهها عني قلتلها..
-يلا ما تدخلين
- لاا بدي ضل هون شم هوا
-زين براحتك

مشيت وعفتها كاعده ورجعت انجضعت ودحكت رسايل غاليه تسال عن الصار
كتبتلها ..
' حضنتني '
قرتها واتصلت ..
- بربك خيي حضنتك
- ول والصكع فضحتينا
- ايييه شلون صارت احكيلي شسويت
- ماسويت شي عادي عفتها وهي وخرت بعدين كانت تبكي مشتاكه لامها
- اييه يعني مابادلتها الحضن
-لاااا
-يااابرود كلبك زين شنو صار بعد شحكيتو
- تريد تسافر وقلتلها احجزلك هاليومين وسافري
-اييه وارتاحت يعني هدات
-لاا شو هاذي دلغمت بالزايد قلتلها لا تهتمين وتفكرين بعد بهالسالفه ترجعين لامك ان شاء الله وامشي نامي شو هاذي مارضت وكلبت وجهها رادت تضل كاعده برا قلتلها براحتك
- وعفتها ودخلت ؟
-عجل اضل فوك راسها نعسان انا
- يااااخييي تمنيتو حسين يا يابه كان سفطها وخلاها بجيبو
يعني انته ماتحس ابد ابد ماتحس
-رجعناااااا لا اله الا الله
- يعني البنت ضاجت لانك ماتهتملها تريدك ياخي الف مره حكيتها افهمها عاد
- يولو شدخلني بيها ... مشاعر الناس لنفسهم
عسى ما تموت بيه انا شخصني اهتم وافهم
موبالي هي تفهمين انتي لو محشيه راسك كطن هالايام
-اييييه افهم افهم
- زين عجل فهميها هالشي بدربك
يلا خليني انام

سديت الخط وضليت افرك براسي اتهدا شويه وبعدين نمت ...

مادحكتها بعد لحد اليوم الي كملت بي اجراءات سفرها اتصلت عليها وقلتلها تحضر نفسها حتى الصبح نطلع للمطار ..

واخذتها الصبح لمطار بغداد وضليت كاعد حدرها ننتظر الطياره وهي قلتلي..
- فيك تجاوبني لاخر مره على سؤالي
- اسألي
- ليه ما بدك تتجوز ؟

عدلت كعدتي ودحكتلها .. قلتلها..
- الزواج لمثلي نقطه ضعف وانا بعدني باول دربي ناسي تدور نقاط ضعفي وتستغلها
وانا مااريد احد بيوم يخرب الي ابنيه لاهلي
كثير اشياء تمنعني من الزواج
براسي مسؤليه اهل واملاك ماخاطر بحي الله مره تكعد بينا وتخرب هاذ على هاذ انا رايد الم شمل اهلي الزواج شي منسي عندي
- بس انته مكبر الموضوع كتير
يعني ما بيك كان مجوز وتنين كمان وهو شيخ و اب
- والدي يختلف عني
هو كان وحيد لامه ويريد ولد يصيروله عزوه
فتزوج الاولى وبعدها حب وتزوج الثانيه
وانا لا من الي ادور ولد ولا من الي احب
انا ولدي وحبي همه اخوتي وعايش الهم
- بس هيك عمرك بيمشي وهنه بيجوزو ويصير عندن ولاد وعيله ويكبرو ومابيكونو بعازتك بعدا وتضل انته وحيد وتلعب ولادن
- المهم انام مرتاح البال

ضلت ادحكلي وانا افر بمفتاح السياره
ورجعت سألتني ..
- ليه انته هيك قوي الشخصيه ؟
- وراثه
- بحبك

دحكتلها وهي نزلت دمعتها مارديتلها شي
وهي قلتلي ..
- كتير كنت امنع نفسي احكيها بس هلاء في شي عم يجبرني احكيها خايفه لااندم بعدين اني ماحكيتها للرجال الوحيد الي بيستحق يسمعها مني
بحبك انا من اول يوم انته ملكتني بدون ولا اشي منك ولا حتى نظره لعيني
طعتك لاني بحبك ماكان فيي اتمرد ع كلمتك
ولا اني عند معك كنت بكتفي ارضيك
وباسمع صوتك عند الصباح وانته توصي امك عليي
حفظت رسمك بخيالي صورتك باحلى صوره ممكن اني صورا بعمري

تفاجأت بكلامها وضليت متصفن بوجهها
بعد سكوت طويل قلتلها ..
- تحبيني بس متكدرين لعيشتي
- بعرف هالشي بعرفو راح تحكيه

بس مع هيك بحبك وبعمري ما بنساك
- ضلي تذكري زين نصحي الك
- بكل شي انته بتكون حاضر معي
انته صرت عيلتي الي كنت مضيعتا من زمان
كتير حكيتلك اني بأمن حدك
انته الزلمه الوحيد الي انا احتجتو واعتمدت عليه بعمري وبضل انطرك كل العمر
- تنتظريني ؟
- اييه انطرك تا تكفي مشاغلك وتغير فكرك بالجواز
- يعني حتى لو غيرت فكري وردت اتزوج
ليش واثقه راح اختارك؟

تبسمت وكربت راسها لاذني وقلتلي ..
- لاني راح اتحملك بكل ما فيك و ما بكونلك نقطه ضعف انا مره قويه بسند الزلمه الي بيخليني ع اسمو كفي العمر
انا حبيتك لانك معقد ستر ومعقد حريم
انا بدي عيش بتعقدك بدي طيعك فيه بدي عيش حدك بسكوت وضل اطلع فيك وانته عم تحكي
انا بدي شيل الصخر عن داك الزهر وبنطرك تسمحلي بهالشي

دحكت لعينها وقلتلها ...
- يجوز يغيرك الزمن ؟ ويغير مشاعرك ؟
- ايمتى ما بترجعلي راح ارجع فتح هالزمن الي عشت فيه حدك
- بس انتي طيره حره ماتكدرين لعيشتي
- وهيدي انته طيرتني لحتى ضل حره
وانا مهما طير وعلي بالاخر اتعب وبدي حط بشي مطرح امن في وبدياك بالاخر انته الي حط ع ايدك
- انا لو خليتك تحطين بايدي ماارجع
اسمحلك اطيرين تضلين حدري بس
- هون انته بتخليني طير حدك من غير جناح
- انتي واثقه وفاهمه شعورك بس انا لا
ما مفكر لهالشي
- مابدي شي هلاء وانا بعرف انك مامفكر بهالاشي بس حبيت احكيلك لحتى تعرف ان بهالدنيا في بنت بتتمناك وتنطرك حتى وان طلع الشيب براسك راح كون بستناك بارضي هالمره لحتى عيشك فصل حياتك بعد ما تأمن فصل حياه اخواتك
انطرك انا لو ضل بعمري يوم راح اتمناه يكون ع ايدك

ضحكت وانا ادحكلها وقلتلها...
- راح تنسيني
- لا راح عيشلك انا ماني مراهقه انا واعيه للي حكيتو وبعرف ان الحب مرا مابيصير اتنين
- ليش حبيتيني لان ساعدتك؟
- لااا
- عجل شنو ؟
- وئت تجي ع لبنان بحكيلك
- مااظن هالشي يصير
- بنطرك ع امل تهتم لحياتك بيوم
- واذا صار واهتميت يجوز ماذكرك بوكتها
- انا مرا مابنتسى
- اثبتيلي هالشي؟
- هلاء !
- ايييه اثبتيلي اني مراح انساكي

ضحكت وضلت ترفع بشعرها وبعدين
قلتلي ..
- غمض عيونك
-ليش
- بتعرف يلا لو سمحت

غمضت وحسيت بنفسها بركبتي قريب اذني
واصابعها براحه ايدي .. باستني من طرف لحيتي وانا ضغطت على ايدها وفتحت عيني دحكتلها ماراضي لهالشي وهي قلتلي...
- انا ما لمست غيرك ولا همت بعطرو
وانته مالمست غير ايدي وما سمحت لغيري تعرفك لهالحد
لا انا بنسى اول زلمه بحياتي ولا انته بتنسى اول من لمست واول بوسه بعمرك

- هالشي عيب واحنه بنص الناس كاعدين

- ما بشوف غيرك هون انو ناس تحكي عنون؟

وخرت منها وضليت اهز برجلي وهي قلتلي
- ارتحت انا هلاء لاني حكيتلك كل هيدا
كبت المشاعر متل شي حجره ع الصدر
فرحت لاني ما ضيعت هالفرصه عليي معك
كنت راح اندم لو ماحكينا هالحكي

ضليت ساكت مارديتلها وافكر بكلامها
اخر شي سمعت نداء طيارتها وهي وكفت ولبست جنطتها واخذت الثانيه بايدها
وكفت وقلتلها ...

- تتحمليني بعصبيتي
- واحولها لهدا
- تتحملين غيرتي الزايده تتحملين مادحكك غير عيني
- ما همني غير عينك انته عندي كل هالناس
- تغيرين نفسك الي
- و بعيش حياتك كلها
- انا اناني بملكي اناني ومعقد وحرمتي بس حدري يحكلها تتكشف حتى عن الحريم انا ابعدها انا اغار من وصف الناس الها اغار من الي يسمعو صوتها ويميزو خيالها
تكدرين ترضين بكل هذا تضلين مثل سري بغرفتي وحدي انا اعرفو واعيشو
- بكل هيدا انا بحبك وهو بكل هالوطن انا مابهمني غيرك لو عشت فعيشتي هون الك
- تنتظريني يعني لو طولت سنين وكبرنا بالعمر
- بنطرك بس اوعدني تيجي لعندي شي يوم

سكتت وهي ادحك للساعه وترجع ادحكلي
قلتلي ...
- تركتلك كل اشي ومابدي غير وعد انك ترجعلي

متردد من هالشي كنت وهي تكربت وقلتلي ..
- جراح بس وعد لكفي طريئي من هون
- تنتبهيلي على نفسك تضلين لبوه مثل ماعرفتك و تسلميلي على امك وتقوليلها
انا امانه عندك ليوم ما يرجع شيخي ياخذني منك مفهوم
- مفهوم ياشيخي مفهوم بنطرك كل العمر ماتنسى تعيش لنفسك انا راح عيشلك لهاليوم
- راح اعيش هاليوم بس بعد ماامن على اخوتي واهلي
ما تنزلين دموع زين انا اكره الحريم الي يبكو
- تمام تمام

طلعت ظرف الفلوس الي محضرو الها
وخليته بيدها وقلتلها...
- محضرو الك هديه حتى ماتتعبين بعيشتك
و صار حك عليه انطيه الك
لا تخلين احد من اهلك يعرف بفلوسك باي يوم من الايام عيشي انتي اهل نفسك واحفظيها زين تعرفيني نحس انا وكت اتخير واملك لا تخليني اندم لاني وعدتك وسمعتلك
- انا ما بخون نفسي
-لينا بأي يوم تحتاجين شي اتصلي زين
- تمام بخاطرك هلاء
- محفوظه باسم الله

مشت وهي ادحكلي وتبتسم وراحت وانا صفنت على الصار ...
مالكيت نفسي غير كاعد واتصل بغاليه
قلتلها ..
-يولو الحكي
-ها خيي خير
- اخيك انطى وعد بالزواج
- بصلاه محمد عليك خيي ايمتى !
- بعد على مد العمر
.
.
.
يتبع

#شقراء_بغداد

الجزء_الثاني_بارت_٣٢ الاخير


بين ضحكه امي بصورتها الي تعكسها الي شاشه التلفون وهديتها الاخيره الي بين ايديه
اتلمسها .. تتنقل عيني بين نظره اشتياق للصوره ونظره تمعن بتفاصيل عقد اللؤلؤ الي بايدي ...

مسحت دمعتي ورجعت العقد بعلبته واخذت دفتر المذكرات .. هاذي اول مره المسو
من وكت الي اخذتهن من غرفه امي ورجعت انا وحسين ويه عمي مافتحتهن ولا لمستهن
حتى ، انتظرت افرغ من كل شي واكعد وحدي ادحكهن وافهم امي شنو كانت ضامه الي من سنين ..

هالليله انا تفرغت الهن ..
هالطقم انا ماكنت اتصور بيوم امي تهديني اياه .. اذكر اني وكت كنت ادحك صور عرسهم ادحكو بركبتها وهي حكتلي انه هديه ابوي الها من كبل العرس وانه لؤلؤ طبيعي
اشتراه ابوي الها هديه شكر وكنت اسألها شكر لشنو؟ تحكيلي مواقف بينا حلوه
عمرها ماقلتلي انها تعرضت لحادث وخسرت كليتها لانها حامت لابوي ...
ماعرفت هالشي الا وكت ما وكعت من مرضها ..

صار اليوم هالطقم ملكي بس ما فرحانه بي
مااحس انا استحقو من بعدها ..
هذا هديتها لانها تستحقو انا مستحيل البسو
و مااخلي غير لامي ..

هذا الي كان يتردد بالي وانا اقفل علبتو
وقررت ايمتى مااروح لحديثه ارجعو لغرفه امي ..

اخذت الدفتر وانجضعت وفتحت اول ورقه منه كان مكتوب ..
' اهداء الى ابنتي غاليه '

نزلت دمعتي لوسط اذني ومسحتها وكلبت الورقه الثانيه .. العنوان كان مكتوب ..
' حديثتي الشقراء '

دحكت التاريخ ..١/١/٢٠١٨

بدايه هالسطور كانت ...

بحمد الله و نعمته هذا صباح جديد في اول يوم من سنه اخرى في عمري الخمسيني ..
حولي احبائي بنعمه وخير وعافيه
امنيتي بهذا اليوم ان يحظى كل فرد منا بخيرٍ وحظ وفير في هذه السنه ..

كلبت الصفحه و دحكت العنوان نفسه وصرت اقرا تفاصيل يوم امي .. ضليت اكلب الصفحات واقرا لحد ما وصلت يوم ولادتي
يوم ١١/٢ ..
قريته بتمعن ..
' اليوم قد اثمر الشيب
اليوم قد رزقت بحفيدتي الاولى مزن
حين حملتها شعرت كأني حملت نفسي مصغره لا وجود لشبه في المعاني بيننا
لكن انها بضعه ممن هي مني
ابنتي الوحيده وحفيدتي الوحيده لليوم
قد احيينني ببضع لمسات مجدداً في منبع طفولتي ..
في كل نظره مني لابنتي اراني وفي كل لمسه لابنتها ارى جزئين مني وكلاهما بالقرب مني
يعود بي النظر لمن هو بجانبي فأرى جزئي الاول الذي اليوم اصبح مغزا ضياعه واضحاً
و يعود بي الفكر لجزئي الثاني باتصال
من ملك هذهِ المملكه .. فأجيب واصف له حفيده مملكته الاولى ...
لربما كان ضياع الازمان لسكينه وبهجه هذا الملتقى ..
ولاده جديده اظنها ستكون ولاده فصل جديد كما حصل لي من قبل والفرق هو الزمان فقط .

عدت قرائته اكثر من مره واركز باخر السطور ومافهمت منو شي .. سديت الدفتر
ورحت لبنتي كعدت .. ضليت حدرها انومها
وبعدها رجعت ادحك بالدفتر ..

وصلت لحادث حسين ...
كان بدايه هالصفحه مكتوب ..
' اليوم قد خَرقت الاقدار روحي

هذهِ الدنيا سلاحها واحد ضدي دوماً
هي تحاربني بولدي ..
في كل مره انجو لكن هذه هي الاخيره
لا اظن النجاه منها ..
انها في فصل خريفي وقت ما باتت اوراق شجرتي تنفذ .. منذ ايام وانا عروقي بدأت تتيبس ولا زلت بها شامخه لكن لبه قلبي
قد أنهكها الخوف ..
حسين به ابتدأت حياتي الاخرى وبه انتهي '

ماكدرت اكمل بعد هالحدث ..
حسيت بكل كلمات امي تجسد كبر تعبها
هي تعرف انها ماتعدي هالازمه
كانت تدري انها تكتب نهايتها وكتبتها بقليل الكلمات غالبه المعاني ..

نمت وانا افكر بيها وكعدت على صوت دكت الباب .. اعرفها دكه عمي ..
لبست الروب الطويل وفتحتلو ..
- صباح الخير عمي
- صباح النور بنتي يلا وينج نزليلي هالمزنه
خلي اتشمس اني وياهه
-صار عمي هسه ماتاخر
- اي واريدج تحضرين ريوك لحسين مرتب
اهم شي تخلين كلاص حليب وتحليه بالعسل
- صار عمي
هو كعد ؟
- لا بعده راح انزل اكعده بس انتي استعجلي
اريد اسكي الزرعات يلا نزليلي المزنه
- تآمر عمي نزاله وراك ماتاخر

ضليت انتظره وصل للدرج وانا رحت دخلت الحمام وبعدين طلعت وبدلت ملابسي واخذت بنيتي حطيتلها البوطره ورتبت شعراتها ولبستها ونزلت ..

عمي واكف حدر الدرج اول مانزلت اخذها مني وصار يهرج البيت بصوتو هو ويناغيلها
طلع بيها للحديقه .. متعود يشيلها بيد والثانيه يسكي بيهه الزرعات ..

صبحت على الحجيه وعمتي وام سالم
دخلت وراي المطبخ وقلتلي ..
- هذا حسين اخوج من امج مو
- اييه هذا اخوي الوحيد من امي
- وشعجب اخوتج رضو يبقى هنا ؟
- والله اخوتي ما يرفضولي طلب وانا ردت اخوي حدر عيني اداريه وقبلو
مضايقك اخيي بكعدتو هين ؟
- هو انتو كلكم مضايقيني ضلت عليه
خلي يكعد شسويله

طلعت وانا ضليت احضر الريوك وابكي
بهاليوم انا كل جروحي مفتحه
كل الاحبهم تركوني لا اهل ولا اخوه بس هالوحيد وياي ...

رتبت الاكل على الميز ورحت صحت لعمي
وبعدين دخلت لغرفه سالم الي كعد بيها حسين

دحكتو يعدل باللزكه على جرحو وانا عدلت ملابسه واخذت بايده وطلعنه ..

دحكنا عمي دخل وهو يتبسم ويقول ..
-يامحلى هالصباح شلونك ابني زين ان شاء الله

حسين بس هز براسو وكعد وانا اخذت مزنه
من عمي وراح هو غسل وكعد حدر حسين
عفتهم ياكلون ورحت خليت مزنه بحضن عمتي وانا متعوده اتريك وحدي
لان عمتي والحجيه يتريكون وحدهن وعمي توقيتو ثابت ومابيوم شاركتو بالاكل
يااما اتريك انا واسامه او وحدي بالمطبخ
وهاليوم مااكلت شي .. روحي معلعله وحتى ريكي مر .. كطعت الرضاعه لبنتي من يوم وفاه امي من بعدها ماهتميت لاكل بس بشغل البيت ...

على التوقيت الي حافظتو لعمي رحت حتى الم المواعين ودحكتو يلف بالصمونه ويكربها من حسين وهو مايرضى ياكل وعمي يقنع بي
وتالي اخذها اكلها ...
ضليت واكفه باب المطبخ وادحكلو شلون يجبر حسين يكمل كلاص الحليب وبعدها هو صاحني .. رحتلو وحكالي ..
- عاشت ايدج بنتي ولو انتعبج بس اخوج تعبان اكثر ويريد دلال
- هو انا هين حتى ادللو
- يحفظج الله ، جيبليه وحده من هاي المحارم الي يجيبهه اسامه ومره الثانيه انتبهي تكون حاضره هنا على الاكل يمه
- ماشي

اخذت المواعين ورحت للمطبخ عدنا هين علبه اسامه كل فتره يمليها بمحارم مبلله يوزعوها الهم وهو يخليهن هين ..
كانو قبل يخلونها حدر مواعينهم وكت مايرتبون الاكل بس انا دحكتو اتكيت زايد
وشلتها هي المغسله قريبه عليهم شدعوا هالسوالف !
عاد الحين رجعت بنفسي خليتهن حدرهم
لخاطر حسين ..

كلشي بالبيت مرتب ونظيف انا مااصعد لغرفتي بالليل الا وانا ملمعه كل شبر بي
اخاف لاعمي يدحكلو فد تفصيل الصبح واترزل عليه اول مااصبح بوجهو ..

رحت ادحك حسين ولكيت عمي واكف حدر البلازما بالغرفه ويربط بالبلي ستشين
وحسين كاضب الجاستيكه ويأشرلي عليه

انا بعز حزني ضحكت وقلتلو ..
- هاي شنو راح تلعبون كيم ؟
- اي لعد شلون اونس حسون
- ههه عمي تعرف تلعبها ؟!
- اطكطك شويه بس اخيج كال مضبوط بيها
- زيين عجل انا ارتبلكم شويه فواكه تزيدكم طاقه
- ديلا لعد استعجلي

رحت للمطبخ وشيفت فواكه واخذتلهم وضليت كاعده حدرهم وادحك لعمي يجبر حسين يختار نوع اللعبه وصارو يلعبون
وعمي يضحك ويشاقه ويه حسين واخيي بس يتبسم مايعلق على كلامه ..

ضلو للظهر يلعبون وبعد الغدا عمي صعد لمكتبو وضليت انا حدر حسين هو راد ينام وانا خليته وطلعت كعدت ويه بنتي
بس اكعد وحدي اتذكر كلهالاحزان ودموعي من وحدها تنزل ..

للعصر عمي طلع و نص ساعه رجع وياه مضمد صار يدحك جرح حسين وطمنه عليه وراح وعمي صاحلي حتى احضرلهم كعده بالحديقه ..

ورحت خليت الكراسي والطبله وسويتلهم كهوه وحدر عمي وهو كاضب ايد حسين
وكعدو وبعدين كعد شرب كهوتو وطلب اصعد لمكتبو واخذلو علبه الدومنه

صعدت بالعجل وانا اعرف مكانها اخذتها ونزلت خليتها كدامه وهو قالي..
- يلا بنتي جيبيلج كرسي واكعدي نلعب
- لا عمي تسلم مالي واهسها
- شوفو يابه اني ادري بعدكم بحزن ولا عبالكم اني ما همني خساره الوالد تره جان نعم الاخ والسند الي وحزين على فراكه
بس هالدنيا علمتني ادفن عزيز منا وامشي منا
لان راح يجيني يوم ماله داعي اموت نفسي وادفنها بايدي ،يومي مكتوب وبساعته ماتعب بشي كله يجيني حاضر
مهما وصل بينا الحزن احنه نبقى احياء
نكمل حياتنه والمطبات نعبرهه لان كل واحد بينا بركبته مسؤوليه مادام بيه نفس هو لازم يكون كدها

جر ايدي وكعدني على الثيل وصار يتلمس براسي قلتلو ..
- عمي احنه جرحنا بعد عمره مايطيب ردنا بابونا ننسى امنا تاليه حفر ذكراها بينا ازيد بوفاتو

دحكت لحسين وانا امسح دموعي وهو مدنك راسو وساكت .. عمي قال..
- كل جرح مصيره يطيب صح يضل تارك بينه اثر بس مايوجع بعد
مو بس انتو خسرتو اهلكم اني هم خسرت اهلي وبظروف اصعب من ظروفكم انتو اهلكم ماتو بفراشهم اني اهلي ماتو مذبوحين
خسرت اخوه و ولد عم واب وخسرت وطن
وخسرت حتى ابن وبعدني عايش واواسي غيري اخفف عليه حزنه باحزاني

دحكناله انا وحسين وقلتلو ..
- عمي اي ابن هذا خسرتو ؟
- جان عندي ولد وخطفوه وذبحوه من جنت بعمان محد يجيب طاريه هنا لان يفتح جروح لامه
- الله يرحمو
- ابني لو هسه باقي عايش جان هو بعمر حسين

ضل يبتسم ويدحك لحسين و اخيي سألو ..
- ليش كتلوه عمي ؟ هناك مو امان !
- ماكو امان بالشارع الامان بس بالبيت بين الاهل يابه
ابني هم راح ضحيه شغلي
هواااي ناس انسلبت ارواحهم من وره شغلي
بلا ذنب يذبحوهم .. ابني جان بعده خامس ابتدائي ويروح بالباص للمدرسه وهناك اول مانرل همه مترصديه وخطفوه ابتزوني بي
جانو هذوله الولد الهمج اذا شايفيهم يطلعون عليهم افلام وتقارير يسمون نفسهم قراصنه
هذوله يشتغلون على السفن ياخذون خزينتهم ويعوفون البضاعه اني جنت متابعهم سنه ونص وهمه واحدهم هالكده ضعيفون واسود كاتلهم الوصخ والجوع وعايشين على البوك ونص منهم عايشين بالتهريب

جنت اني بعدني جديد هناك بشغلي وهالقضيه لو كملتهه اثبت نفسي بدولتهم وجنت محتاج لهالشي وبالاخص الثقه بشغلي هي الربح
اهم من المنصب عندي فخليت كل عقلي وياهم خنكتهم من كل جهه ولزمتهم اول اسبوع الهم بالحبس وجماعتهم خطفو ابني
جان المقابل لابني مو طلعت هذولاك من السجن لان يعرفون ميفيدوهم بعد
ف رادو اسويلهم تعميم على السواحل ان هالجماعه اسمائهم تعبر شوكت مايعجبهم وبلا تفتيش رادو يدخلون ممنوعات براسي
كلتلهم تحلمون بهالشي حاولو ويايه مرتين
و دزولي بظرف صور لابني يضربوه ابر
ومزوركه ايده منهن جانن مخدرات ومغيرين حتى شكله وجهه مصخميه مثلهم وشعره مزينيه صفر وضلو يريدون امشيلهم هالشغله
واني مااقبل وجماعتي بالشغل كلها عرفت بهالشي ومن واحد لواحد عرفنا مكانهم
بس هالحجي بعد اسبوعين على خطفه
ومن وصلناهم جانو عايفيه مذبوح وشاردين

كنت ادحكلو وابكي وهو يدحك بالسمه ويحكيلنا عنو وبعد ماسكت ثواني رجع قال ..

- اخذته بايدي شلته وجان حتى دم وريده ناشف على جسمه بوجهي اخذته دفنته
ورجعت بعد يومين للبيت كلتلهم الولد مات من كد ماتعاطى مخدرات
مايعرفون لليوم هو جان مذبوح
صبرتهم و واسيتهم بان الموت احسن اله من عذاب العيشه وهو بدمه ادمان المخدرات
ويمكن اني هم صدكت الجذبه الي جذبتها
وقنعت نفسي بهالشي وعشت

كضبت ايده وقلتلو ..
- ياكبر صبرك

ابتسم وقالي ..
- هاي جانت الميه من بعد التسعه وتسعين
بس ما وكعتني ولا غيرتني لان الي قبلهه خلن هالكلب مبنج لحد هاليوم

حسين قال ..
- الله يرحمه مكانه الجنه ان شاء الله
بس عمي ماخذت بثارو ؟
- اخذت شلون مااخذت
هههه يابه انته متعرف عمك شلون جان
اني ما طلعت اليوم السابع على دفنته الا وماحيهم محي .. قهري على ابني حولته
دم .. حسبتهم ١٧ جثه تجطلو كدام عيني
بيومها و خليتهم يدفنوهم بحفره وحده
وضليت وره هالسالفه لحد ما الخليه كلها صفرتها .. اربع سنين اني الاحكهم واحد واحد افرغ عقله على الميز وبعدها الحكه بجماعته
اني ماعوف حكي بيوم ولو طال الزمن اخذه
ومحد عال وياي الا مااخذت الحك من نص عينه

- كفوووو والله عمي لازم نتعلم منك
مبين عندك ماخفي اعظم

- ههههه ولك يابه هاي حصاد سنين
حصاد مصايب لو احجيلك بعد اسبوع مانخلص
بس هسه خلو بالكم ان الزمن كفيل بكل شي
ولا تحسبون نفسكم بدون اب
اني اصيرلكم الاب اني من يومي ابو الايتام
عيشتي لهالشي وكلبي مايرتاح اذا مو يمهم
اسمعو كلمتي وضلو وياي واني اعبركم هالشده
يشهد الله معزتكم بكلبي مالها حدود ويمكن لو احجيلكم عنها تكولون عمنا يبالغ
اقلها اني مااضحك الا وياكم هاي اقل شي عندي بمعزتكم ومااريد اشوف هالعيون الحلوه ذبلانه اريدكم تشدون حيلكم الدنيا بعدهه ماوكفت
انتي يابه عندج بيتنا مسؤليتج ورجلج كم يوم ويرجع من دوامه يريد اهتمام وبنتج بعدهه باول عمرهه تريد رعايه مو كلشي تهملينه
تره اليعذرج يوم يومين مايعذر العمر كله

اخذت نفس وتذكرت كلام جراح نفسو بوفاه امي .. قلتلو ..
-ان شاء الله عمي ان شاء الله
- انتي خلي ايدج بايدي واني اعبرج هالحزن
اني اعرف الكلوب شلون تداوى

ابتسمتلو وهو مسد على شعري ودحك لحسين قلو ..
- وحسون خطيبته تنتظره لازم اول مايطيب جرحك تروحلها عيب الهجر هذا بحق البنيه
- عمي انا اريد افسخ الخطوبه

من سمعتو لطمت على صدري وقلتلو ..
- ياويلك من الله شذنبها البنيه !!!

عمي شرب مي وقلو ..
- ليش ؟
- ماكدر اتزوج بعد
- ليش متكدر ؟؟ البنيه سامع عنها شي مو زين !
-لاااا عمي لااا البنيه دره واخلاق واهلها زينين بس انا مالي نفس زواج بعد
امي مو هين شلون اتزوج ! منو الي تحضر لعرسي ! ؟ ابوي ينوبون عنه اخوتي وانته
بس امي ماينوب عنها احد
وانا حزني مطول ليش اعذبها وياي واخليها تنتظر خلي تمشي لحال سبيلها احسن
- حلو .. وجهه نظر سديده
بس يمكن انته محسب لحزنك وما محسب لرجولتك ، سمعه البنيه ، وكلبها بالاخص
- عمي شدخل رجولتي هين
انا كلبي مليان حزن على اهلي مو بحال زواج
- اي لا تتزوج هسه تكدر وره سنه او سنتين تتزوجها
- ماكدر كلبي ماينطيني اسوي عرس وامي ماتحضرو
- لو طولت عشرين سنه هم تاليتك تتزوج
بس هذاك الزواج راح يذكرك بهالبنيه
وتعيش كل عمرك متندم على خسارتهه
- عمي ماتفهمني بهالشي انا احكيلك اهلي وانته تحكيلي البنيه
- الأهل راحو بس البنيه باقيه بعدها بذمتك
هي المفروض تفكرلها
ماكو فد طقوس تسويها بنفسك وترجع الراحو
بس تكدر تعيش وتوفي حقهم عليك
ابني من وصايا الانبياء واهل البيت ان
الاهل حقهم على الولد بعد موتهم هو ذكرهم
بعد عندك حق لازم توفيه
همه بدار اخره يفرحون بالصدقه الي تشيل اسمهم من ايد ابنهم
يفرحون بذكرهم بعمل خير او حتى بنجاحك
انته اذا نجحت بحياتك واسست حياه حلوه متكامله واطبق بيهه تعاليم اهلك بتربيتك
راح يفرحون لان هاي ثمره تعبهم يشوفوهه بيك بنجاحك

لا تتوقع فد يوم اذا بجيت وكسرت وعتمت دنيتك بالحزن عليهم همه راح يرضون لهالتصرف او يكولون اي والله ابني مانساني عاش عمره حزين عليه !
ابد هالشي شيله من راسك

- ليش يعني ؟؟!

- لان الميت يعرف قيمه الحياه
ان جان مصيره جنه او نار هو يعرف قيمه الحياه شلونها ويمكن لو نسمعهم جان اول شي يحجوه النا عيشو يومكم بمايرضي الله
عيش ابني الموت لاحكين عليه

- عمي كلامك اعقلو بس مالي حيل عليه

- يصيرلك حيل يومين ويرجعلك الحيل
احنه مو عيب نحزن ونضعف بس لكل شي وكته ..
اخذ كفايتك بالحزن وارتاح شويه وبعدين ارجع اوكف على حيلك الطريق الي بديته لازم تكمله ، مانخلقت الرجال حتى تكعد بنص الطريق
لو كعدت هالكعده انته مو رجال قوي الكلب تنحسب بعدك ولد
ولاتنسى على ذمتك مره منين ماادير وجهك تتحاسب عليهه وانته حر تريد تطلع مقصر
تريد تصير كدهه

عمي كلامو كله بهداوه و ثقه ماتحرك الا حتى يشرب مي مره ثانيه ورجع قال ..

- و اهم شي تخليه بالك هو انك من تعوف البنيه غيرك ياخذها
وبعد انته وكلبك .. يكدر يشوف الي جااانت مرته هسه تتمشى ويه غيره !
اصفنلها شويه حتى لاتندم بعدين وتاكلك نار الغيره والعتب

حسيت هين عمي ضرب على الوتر الحساس لحسين .. لانه ضل رافع حواجبو وصافن على عمي ..
عمي قال..
- غاليه صايره مو خوش هالايام
-ليش عمي
- لا حلاوه لا جاي عايفتني اتصفن حتى المي خلص
- حكك علي عمي الحين اسويلك اطيب جاي
- عفيه يلا استعجلي

رحت اسوي الجاي وضليت صافنه وافكر بكلامه .. عجيب شلون كدر كلبه يحمل كل هالمصايب ! اخوته وابنه وابوه وحلاله وكدر لليوم يضل شامخ !!!!
حسيت كلامه رجعني لوعيي وصرت افكر بعايلتي و وصايا امي وقررت اخلي ايدي بايد عمي واخليه يعيني على هالمصاب ..

اخذتلهم الجاي والكعك ولكيتهم يلعبون دومنه
وانا ضليت حدرهم كاعده احسب نقاط

لحد الليل احنه كعدتنا واكلنه سوا .. صرت ادحك شخصيه عمي لاول مره من يوم زواجي لهاليوم يلا كدرت اتقرب منو وادحك هالشخصيه الي من يومي وانا كاتلني الفضول عليها ...

ثاني يوم دحكت اخيي جراح هين وعرفت نيتو صلح بينا .. ياويل حالي بلياه احس اني كل يوم ينعاد عليه عزا اهلي وانا مفاركه اخوي جراح ..
صح اني كنت مدحكه الفيديو لموقفو بيوم الي طلعت منهم بس يوم الي دحكتو تعنى لخاطري رضيت اكثر ..
ساعه الي حضنتو رجعلي كل حيلي وحتى روحي احسها رجعت احتيت بعد ماكانت ذابله
بلياه ..
يوم ما امي ماتت ماطفت الدنيا بعيني لان جراح كان حدري متقويه بي بس وكت الي هو ابتعد عني انا هين حسيت الدنيا طفت بعيني وراحت كل روحي وياه ..
ماصبرني على فراكها غيره وما رجع همتي
بعد فراك ابوي غير عمي ...
تأثيره كان كبير علينه ..

من بدا حسين يتعافى جرحه صار ياخذو من الصبح يطلعون يتمشون رياضه واول مره ادحك عمي لابس لبس رياضي وراجع شباب
حتى اكلو زاد وصار على واهس حسين يتشهى اكلات وحلويات ياخذ حسين ويطلعو بسيارتو يتعنون لمناطق بعيده حتى يشترون كيلو منها ويرجعون ..

عمي كان كل عصريه ياخذ حسين ويطلع
وعشاهم برا يصير ومن يرجعون مشترين حب ونخلي مفرش بالحديقه ونكعد انا وياه وحسين ويصير هو يحكيلنا على شغلو بعهد صدام وبعدين يرجع لايامو بحديثه وحسين يناقشو بهالاشياء وانا بس استمعلهم
وبوحده من هالليالي عمي قالي ..
- غاليه يابه علاكتين اكو بالسياره بقن شوفيهن وانطينا رأيج

رحت اخذتهن ورجعت حدرهم كعدت وفتحتهن .. دحكت وحده بيها ثوب اسود
بس كشخه والثانيه ثوب ماروني وكصيف
قلتلهم ..
- هذني لمنو ؟
- الاسود الج والماروني لجنتنه الثانيه
- ياويل كلبي منو الثانيه !
-هههههه ولج مرت اخوج هو اختاره الها
حلو لا !
-ايييه عمي قول ورود وخلصنه
حلو بالعافيه تلبسو بالهنا والاسود ذوقك حسين؟
- لا ذوق عمي هو قال انا خبير باالاسود
-ههههههه والله عشت عمي شي كشخه
راح البسو وكت مايرجع اسامه ان شاء الله

ضل يدحكلي ويبتسم وبعدين قالي ..
- حتى يطلع احلى بعد ارفعي شعرج وياه
ولا تلبسين كلايد ولا اي شي عوفي هو بساطته حلو
- ماشاء الله عمنا ذوقو رفيييع

ضل يضحك وبعدين قالي..
- باجر رايحين لبيت ورود تجين ويانه ؟
- صدك والله !
-اي لعد اجذب عليج داكلج رايحين !
- بس لا تفسخون خطوبه !
- يعني انتي برايج واحد يشتري ثوب مثل هذا حتى يوديه ويكللها طالك !
-هههههه عمييي شدراني انا بافكاركم
عجل ماتخلوني اعرف بهالقرار من كبل
ليش ماقلتلي يول تريد ترجع لحرمتك !!!

حسين انجضع على الثيل ويكرز حب ويقولي ..
-اسرار يولو مايصير واحد عندو اسرار
- مو على اخيتك يول
- يلااا هسه عرفتي شتردين بعد
- اريد اعرف شلون غيرت رايك !!!!؟؟؟
- كييفي انا اغير رأيي ارجعها او اطلكها كيفي لا تصكعين راسي يولو خليني افكر بكلام بكرا شلون ارتبو
-هههههههه خيي حسب حسابك راح تطلع الفراك هذا من عيونك وتذكرني وكتها
-ليش يولي!
- هاااذي سوالفنا بعد وبكيفننناا

عمي ضحك وقلو...
- صح حجايتهه هسه بعد مهمتك ادللها