هين دحكت وجه امي القوي شلون يصير
دحكتها لبست ووكفت حدر الباب كاضبه يده الباب ومدنكه راسها اخذت نفس وهمست بشي ماسمعتو وبعدها مشت بكل حيلها وراحت توضت وصلت حدر ابوي وحسين

ضلت عيني عليها اليوم كله .. ادحكها تمشي وتشرف على الغدا وترجع تخابر بحسين وتسألو ايمتى يرجع من الحلاق وعزلتلو الاكل لحد مايرجع ...

صار غدانا ساعه ١٢ كفينه الغدا والعالم بعدين صلينه وتحضرنا ...
اخوتي كلهم فوك حدر حسين وامي انا مستلمتها ارتب شالها ومكياجها واتعطر واعطرها ... ادحك بعينها الفرحه امي بهاليوم ودها تاخذ حسين ووحدهم يمشون يخطبون
مستعجله وتحسب الوكت علينه حساب

طلعنه ساعه ٢ ونص لبغداد وعمي هو وعمتي وهديل تلكونه باول القاهره وبعدين مشينه كلنه لبيتهم ...

خليت بنتي بايد عمتي ودخلت ..
امي تبوس بورود وبامها وتسمي عليها وجدتي وعماتي ترسن الكاع بالجكليت
دحكت ورود مسويه ميز حلو مرتب ومن
اخذوها حتى يعقدلهم الشيخ كعدت وحطت رجلها بمي وبيه ورك وورد وعليها شال ابيض عريض مخطيها ومخطوط عليه بالذهبي ورورد وحسين واشياء حلوه مرتبتها
وهي نازكه البنيه ناعمه ...
لابسه بالاول قفطان كريمي وذهبي ومن كملو العقد راحت بدلت ولبست فستان وردي ولماع
صاير منفوش من الخصر وقصير لحد الركبه ومن وره طويل ومابيه شيالات محدد على الصدر وشعرها تسريحتو نازله طوله للخصر
فرحت قلت هذا الي يتمناه حسين عندها ..

دخل حسين وامي تدمع عينها وتبوس بي
ادحكو شلون حاضن امي بس عينو على ورود .. كعد حدرها ويدحكلي ويمسح بوجهو
وايدو ترجف والله لو مالعيبه وهيبتو هين
لاخزيه واطلع حيفي منه الحين واتمضحك عليه ..

اثنينهم خجلانين وحسين وجهو احمر وامي واكفه حدرو تشاورو على كل شغله وهو على تعاليمها يلبسها الذهب ويقطع الكيك
وانا اهلهل ومامصدكه حاضره مهر اخوي الخبل المدلل حسين ..

لبستو ساعه ومحبس فضه وبيه شذره سوده
وحسين طلب مني بكل ادب واخلاق وهدوء
ان اصورو رمزيات حلوه بتلفونه لاول مره بعمري اكضب تلفون حسين حتى صرت حذره لا يوكع من ايدي بنص هالهوسه

اخذتلو صور اثنينهم وبعدين ويه امي وجدتي وعماتي وهو صار يتململ ويريد بس يطلع
وتالي باس راسهه وطلع وانا احكيلو بكلبي صبر ياحسين صبر لما اخليك تختل بنص فراشك اليوم ..

ضلينه بعدها نص ساعه وسلمنه على العروس وطلعنه ادحك من جوه الخمار
هالشارع مليان زلم واكثرها شباب
واهل العكل كلها اعرفها من اهلنا
الكراسي على طول الشارع والسيارات من الفرعين طابكات ..

صعدت انا وامي وعمتي ام جراح وهدى
بسياره ابوي الي يسوقها رماح وحدرو جدتي
وحسين ويه جماعته من اهل القسم بسياراتهم اول شي طلعو وخبصو الشارع بالهوسه

امي طول الدرب تضحك وحاطه بحضنها مزنه تبوس بيها وتناغيلها وبنتي بس ادحك بالوجوه متعجبه ...

وصلنه لبيتنه بالليل و كلنه ندحك بالوجوه منو منا تكوم تسوي العشى !
تالي وكعت براسنا انا و هدى ..

كملنه العشه وصفينه البيت ورتبناه وكعدت على التلفون ارسللهم بالكروب ..
' الكل تتجمع هين وياويله الي مايحضر
عندي اخبااار كاتمه على كلبي ان ماحكيتها انفجر '

اول ما جاوبني هو حر وحكالي ..
' احنه متجمعين وحدنه ومرتاحين عليش نحدر ! شنو اليسوى '

قلتلو ..' مثلاً كيك وببسيات لكل واحد '
ردلي ' بعد ما تسوى الكعده '
قلتلو ' خييير يعني شحطلك بعد ماكفى العشى الي ساعتين انا احضرو لبطنك '
ردلي ' عجل ما المهم ونسهر حدرك نضل هين على الهوا الطيب '
قلتلو ' اطلب عاد لا تماطل '
ردلي ' مزنه ووياه ممتها وقوطيه الحليب وترمز المي وتبات حدري انا واسر '
قلتلو ' تنامو هين بيتنا واخليها حدركم
غير هذا اروح اتصل بجراح واحكيلو وحدو '
ردلي ' يلا يلا حضري الكيك راح افزعهم لخاطرك لا تصكعينا عاد '

ضحكت وبالعجل رحت حضرت الكيك والببسي وخليتهم بالصينيه وحطيتها بالاستقبال حتى نسد بابنه ونكعد
وضليت انتظرهم .. دخلو كلهم عفتهم ورحت على جراح حضنتو وهو يضحك ويكرص بخدي ويحكيلي ...
- هاا خير شعندك من اخبار
- خيي ياخيي اليوم اريدك عون
- ابشري
- يابعد كلبي اليوم عندي حيف سنين راح اطلعو

كعدو كلهم التمو على الصينيه اخذو مواعينهم وصارو ياكلون وحسين يحكيلي ..
- ادري ادري ومستعد غردي يلا
- هههههه اييييه يالخجلان يالاحمر ول فاتتكم مادحكتوه صار هالكده حسين ابو ريشات المنفوشه صار كتكوت هالكدو حدر حرمتو الكتكوته

ضلو اخوتي يضحكون وهو شمر عليه الكوشه ويحكيلي ..
- واذا اخجل هسه على اساس مخجلتي من كطعو مهرك
- اناا بنيه اختلف لزوم اخجل
-وانا لزوم اهز كتاف بينهم يعني !
- يلااا خلي الخجل يروح احكيلهم علىىىىىى
- شنو على !
- على رجفه ايدك ماتدبرها تكضب الكلاص وتشربها مثل الاوادم كضيتها رجف رجف
زين ماخربت فستانها وفشلتنا
- يولي غاليه استري على روحك احسن
- واااالله وشتكدر تسوي اخوي الكبير هين حدك تتكرب

ضل يفرك بوجهه وجراح فاتح تلفونه يكلب ومخلي راسو بحضني ومتمدد وحر صار يحكيلو ..
- هااا يول طلعت خيخه

طكيتها بضحكه مال فجع وهو صار يكفخ بحر وانا احكيلهم ..
- هااا ونسيت احكيلكم تيه دربو من لبسها الذهب صار احول مايندل وين يدحك

ضلو يضحكون وهو يسكت بيهم ويهدد وراد يمشي ورماح كضبو كعدو بالغصب وضل عاصر راسو بين ايديه وانا احكيلهم ..
- وعود صاير ابو الاخلاق حدرها يحكيلي غاليه اخذيلنه صور مرتبه من ايدك فدوه
تخيلو بس تخيلو حسسين ابو لسان يحكيلي فدوه والله لوما العيبه لا ردها الك بساعتها بس جمعتهن خيي جمعتهن
- خرررررب غاليه بالحرام اكوم اكسرلك هالفك لا تضلين تلحين وياي قلتلك انا احترمتك من جيه بنتك بعد ليش تلحين وتجيبين الاهانه لنفسك
- خييي مسيطره انا وكييييفي اريد افضفض لاخوتي الي بكلبي مايعجبك روح احنه نحكي وحدنا عليك ونسهر نصنف على حالك
- ول هدني هاذي تريد نتكاون بالغصب
مايفيد الاحترام
- هييين عندي الي يصدك بضربتين استر على روحك ياعريس اكعد خلنه نضحك يول شبيك
- ول تضحكين علي انااا اغم وخليتك تحضرين اليوم والله لو ادري هاذي دكتك لا حرم عليكي عتبه الباب
انا اثول واغم وخليت تلفوني بايدك ول هي هالخدمه بعمرك سويتيها الي وتمنين بيها
- لاخر عمري اضل امن عليك بيها عجل عبالك غااليه هينه
- ول لااا تخليني اجفص بمصارينك الحين سدي هالحلك سديه
- هاااا تذكرت شغله بعد
حسين اخونا طلع رومانسي ماتدرووون

طفر من حضن رماح وبالعجل كضب وجهي سد حلكي وجراح عافنه نتكاون انا اكرص برجلو وهو خانكني وساد حلكي اصيح وادفر بي وهو يصيحلهم
- لحد يكرب وكت ثاري هذا

اخذ ضفيرتي لفها على ركبتي وانا جريت ايدو عضيتها وصار يكمز ويكفخ براسي
وانا بس صحت ..
- جرااااح دحكو يضرب مايتحمل شقى

كبل جراح مد ايدو وسحبو من ياختو وكعدو حدرو وحكالو ..
- استريح انته عريس استريح

هو يفر راسه من ناحيتي ويحكيلي ..
- كلمه الثانيه اشردك انتي وبنتك بالشارع
والله ماخليكي تباتي هين

ضحكت وانا اعدل بكفشتي ودحكت لحر واسر قلتلهم ..
- تضيفوني عدكم انا وبنتي الليله منو ينطيني مكانو !
حر - الغرفه الك ومزنه الي احكي انا بظهرك
رماح - يلاا غاليه الاخيره فجريها

دحكتلو واطكطك باصابعي وهو راد يوكف وكضبو جراح كعدو وانا تمشيت بهداوه حدر ما كاعد حر وحكيتلهم ..
- حسسين
يتلمس ايدها بالخفى ويبوسها براسها ويطخطخ بيها متعمد

رماح صفك وضحك وانا شردت كبل لغرفه امي سديت الباب وهو يدفع ويصيح ..
- بالحرام انتي خوانه ول عين هاااذي عين
هاي خلك الله كلها عفتينا تدحكين لايدي وين اطخ خرررب بساعه السوده الصرتي بيها اختي امشي لمي غراضك واطلعي يلا
انا حلفلت ماتضلي هين

ضليت اضحك واكح وامي تدحكلي وتبتسم
حكتلي ..
-هااا جمعتيهم حتى تصنفين عليه
ماتكعدين راحه شكبرج صرتي
- يمه فرصه عمري هاذي ماضيعها
- خطيه خبلتيه وخليتيه اعصاب مو جان فرحان شجاج عليه
- ماتخافين على مدلل كلبك الحين تلفون واحد يصعد وينساني

ضلت تضحك وهو يدك بالباب ويصيح يلا ويلا وانا اخذت تلفون امي واتصلت بحر وقلتلو وخرو من هين خلي اشرد لغرفتي

وهو حدر ياخذو وهذا ماتحرك من الباب
عرفها للسالفه وضلو واكفين وحر يضحك ويصنف وهذا يحرم بدمو وانا اشيش عليه من وره الباب طلعت كل لسانو خليتو يتخبل
وتالي دك تلفونو وهو انسحب سمعتو
مشى شويه فتحت الباب وصحت ..
- ماااقلتلكم اخوكم رومانسي مؤدب تلفون واحد سكتو يولو الحكو على خيكم خذتو الحريم

هو كان واكف حدر باب الكليدور وبالعجل شمر تلفونو ركض حدري وانا مالحكت اقفل الباب دفعها وتكافشنا وامي تصيح وحر تدخل هو واسر ومافكوه مني الا جراح صاح من بره حسييييين فكها عاد واحدر هين
يلا هدني وطلع ..

كعدت مكفوشه ومتبهذل حالي ومضووب اصبعي بالباب بس والله مرتاح كلبي وكلهه عندي عسل وبس اضحك وامي تضحك على خبالي .. والله كلبي بارد وروحي خفيفه صارت ارتاااحيت على الاخر صار زمان ما مندكه بي وهاليوم تأرخ بعد عند الكل ..

ما خلاني اصعد لغرفتي انام ضليت نايمه بالهول فرشت حدر حر واسر وخليت بينهم مزنه يتونسون عليها وانا اراسل اسامه وبعدين نمت وعفتهم يحيرون بيها ..

ثاني يوم دزيت اسر اشترالي بعشره الاف حلويات انطيتهم كم شغله والباقي اخذتو ورحت لحسين قلتلو ..
- صحيح انا الي انكتلت وتكفشت وتهجولت
بس اصالحك
- ولي من هين فضحتيني حدر اخوتي وتريدين تصالحين ولي يلا
-هييي يولو تره انا اكبر منك
- جاهله اصغر من بنتك انتي
- تصالح لو لا تره انا العصر امشي لبيتي ولو تموت بعد ماخليك تاخذ مزنه وتصورها
- شجايبه هين يسوى الصلح
- هاااا اخوي ضعيف كدام البنيات
- ول مو احترمتك وانكسر كلبي عليكي ليش تمشين مشي برجلك للاهانه
- هههههههه ول والله احبك والاشيك انا ياخيي عجل غير افرح بيك بطريقتي
واسامه مو هين ماخذه راحتي وانته اعصابك تسوي واهس للضحك
- كون هالاسامه يلكطك فديوم بهمجيتك هاذي وييين الله ويدحكك مثل ماحنه ندحكك ويشرد منك لوحده اجنبيه يخلص من خبالك
- ههههيييي وانا انتظرو يشرد يول انا هالشكل كاضبتو خانكتو حدو يدحك

- مسكين والله هذا الرجل مسكين مظلوم بهالزواجه
- يول تصالح لو لا
- ليش حاركه نفسك على الصلح معقول تريدين خاطري لهالدرجه ! مشتريتلي وواكفه هين تتمسكنين
- مخيطه ثوب انا وبنتي نفس اللون واريدك تنزل تصورنا بالحديقه كبل مايرجع جراح
وياخذنا
- ايييي من الاول وانطقيها

اخذ العلاكه مني وصار يبحوش بيها واخذ جبس ياكل ونزل وهو ياشرلي امشي وراه
اخذت بنتي رتبتها وفتحت شعري ورحت للحديقه وصار يصورنا لقطات بكيفه

بعدين لميت غراضي ورجعنه جراح لبغداد وويانه حسين هم راح للقسم ...

ثاني يوم راسلت حسين اسألو ايمتى يدزلي الصور وهو حكالي بكرا اكملهن
وانتظرتو ثاني يوم ما دزهن اتصلت عليه الظهر وجاوبني وهو يبكي ..
- غاليه امي
- خيرها يول
- امي بالمستشفى واكعه متخربطه من كبل الصلاه
- وووول لا تكذب انا الصبح خابرتها مابيه شي
-والله والله بالمستشفى والله وانا الحين راسح لحديثه امر اخذك !
- ايييه يلا بالعجل انتظرك

سديت الخط وبالعجل صعدت لبست عباتي والنقاب واخذت جنطتي ونزلت وعمي يدحكلي حكالي ..
- خيرج يابه وين
- عمي امي بالمستشفى متخربطه وحسين
حسين راح يحدر ياخذني ونروحلها
- اني اخذكم انتظري بس ابدل

بالعجل دخل لغرفتو وانا وصيت عمتي على بنتي تخليها عندها ماريد احير بيها هناك
ودقايق وعمي طلع وهو يتصل بحسين
طلعنه وصعدت بالسياره واول ماعبرنا راس شارع دحكت نزل حسين من التكسي وصعد حدر عمي وطلعنه لحديثه ..

سألنه حسين شنو الصار لامي يحكيلنه
هي متصله على ابوي و ابوي عايف الديوان وماشيلها لاكيها بالكاع مغمي عليها
وبعدها بالمستشفى ينتظرون تحاليل ..

الدرب كله ادعي يارب امي بخير مابيها شي
واناجي وحتى النقاب شلتو من وجهي اختنكت اريد هوا اتنفس براحه ...

ومن وصلناهم ودخلنه المستشفى بالعجل جراح وكف بوجهي ويرزل حسين لان جابني هين .. توسلت بي يسد هالسالفه بعدين نتحاسب خلي ادحك امي وهو ضل واكف فوك راسي وبايده نزل الخمار على وجهي

دخلت دحكت امي مفتحه عينها بس عليها التعب حتى ماحكت شي بس تبسمت وانا دنكت بوستها واتحمدلها بالسلامه وطلعت وخليت حسين حدرها حاضنها
دحكت ابوي كاضب راسو ويتمشى وعمي منعزل على جهه وصافن ...

سألت جراح ..
- شنو مرضها امي ماعرفتو
- ننتظر دكتور

ضلينه ننتظر اكثر من نص ساعه ودخل الدكتور ووياه ممرضه وهو يحكي ويكتب ومستعجل ابوي كضب ايدو وحكالو ..
-فهمنا شي يابه
حكالو ..
- حجي لازم نسويلها غسيل كلى رجاءاً خلي نستعجل لان الاجهزه عليها سره

ابوي تصنم بمكانو وحسين ضل كاضب ايدها لامي وهمه ياخذونها بالسديه بره
رحت لابوي كضبت ايدو وهو هدها وطلع وراهم ...
جراح اخذني بره ومو بناحيتهم ..
كنت ابكي وهو يحكيلي ...
- علاج هذا يابه علاج لا تخافين
- جراح هذا غسل كلى امي حالتها تعبانه ليش ماتنتبهون عليهاااا
- تهدي يابه تهدي

جبرتو ياخذني حدرهم ورحنه دحكت ابوي
كاعد حدرها وكاضب ايدها وامي يلزكون بايدها الصوندات وهي هاديه بس ترمش
مالها اي حركه ..
حسين يلوب بره ومايخلوه يدخل بس واكفين ندحكهم من الباب ...

عمي كاعد بعيد عنا ويسبح واحنه ضلينه ندحكلها ... من كملو وطلعوها لغرفه ثانيه
وسمحولنه ندخللها دحكتها صفرره بس العين مفتوحه والشفايف ياابسه بيضه ..
ردت ادنك عليها احضنها جراح ماخلاني واخذني كعدني وضل ابوي وحسين كل واحد كاضبلو يد ويدحكولها ...

امي نامت والدكتور فهمنا ان وضع كليتها
منتهي وباخر مراحله واصل كان لابد يسولها غسيل كلى حتى تعيش ..
وكتبلها جدول بالاسبوع ثلاث مرات لازم تغسل كلى ووصانه نلتزم بالموعد لان لا التاخير يفيدها ولا الاجهزه متوفره بكل وكت
كلمن وسراه بيها ...

هين عرفت ان امي عندها كلى وحده
سألتهم ليش امي هذا حالها ومن ايمتى !
ابوي جاوبني ..
- من زمان انا وكعت بشده وانغدرت وهي اخذت نصيبها من هالغدر عشت انا بفضلها لليوم

ماكان الوكت مناسب حتى افهم تفاصيل وليش احنه محد مننا يدري بهالسالفه ! شلون امي عايشه بكلى وحده واحنه ماندري عنها ولا بيوم نبهو علينه !

رجعنه المغرب للبيت وامي مالها حيل تمشي
وصلوها الولد لفراشها وانا ضليت اعتني بيها

حضرتلها شوربه قليله ملح مثل ماوصى دكتور .. و وكلتها بايدي وضفرت شعرها
واحكي وياها وهي بس تبتسم ماترد بشي
خليتهه تنام ترتاح وطلعت ادحك حسين
لكيته كاعد بره .. صبرتو وقلتلو تتحسن
امنا قويه وابوي اكيد يلكالها حل مايخلها تضل تعبانه ..

ابوي من وكت رجع وضل حدرها اسألو يابه محتاج شي اسويلك عشى ؟ بس يردلي لا
ويمسد على راس امي ..
طلعت وسديت الباب وخليتهم براحتهم
اتصلت اتطمن على بنتي وعمي عرفت انه رجع من زمان .. اتصلت باسامه وحكيتلو الصار وقلتلو راح اضل هين هالايام ووافق

ضليت اداري امي وحسين مارجع للدوام بعد
ضل حدرنا ..
ابوي قدم طلب بكل مستشفيات الكبار
حتى يزرعلها كلى ومن نسألو ليش ماقدما من كبل يحكيلنا ..
قدمت ووصلت للعمليه وما رهمت بوكتها

ومره ثانيه هم رجعت سألت الدكتور وهو يحكيلو مو بكل الاحوال الجسم يتقبلها
ومادام صحتها زينه عدها اجسام دفاعيه راح ترفض الكلى المزروعه الا بحاله تقل صحه المريض يلا يمكن يتقبلها الجسم
ابوي كان متخوف انها يجازف بيها وخلاها عايشه على الله ...

امي من يوم الغسيل هي ماوكفت على حيلها بعد .. وسولها الغسيل الثاني وهم بعدها تعبانه
وبعد الغسيل الثالث يلا كدرت توكف على حيلها من جديد ...

ابوي كان اغلب وكتو بالبيت حدرها
والله ادحكو يسفط خصل شعرها وحده وحده
وما يشرب ولا ياكل كبل ما يدحكها تاكل
ويسألها على كل مكان اذا كان يأذيها او لا

حسين متيه دربو وكل يومو هو اعصاب
حتى خطيبتو تشكي منو وانا احكيلها خايف على امي تحمليه ...

من تطمنت عليها يلا رجعت لبيتي ودحكت بنتي كلبي كان نار عليها بس ماردت ازعج امي واهلنا بيها خليتها بعيده عن حضني لاجل راحتهم ...

اسامه حدري موجود ونمت هالليله حدر عايلتي ...

صرت اخاف على امي وبالاخص بعد ماحسين رجع للدوام لان حصل فصل اولي
خفت لامي تتخربط ومحد حدرها ..
عمي يحكيلي روحي حدر امك وانا مارضى
لان اسامه هين ماريد اهملو وهو مادحكو غير كل عشر ايام اسبوع واحد ..

انتظرتو يسافر ورحت لاهلي ...
دحكت امي وضعها رجع تعبان مو مثل ماتركتها اخر مره .. صار وجهها ضعيييف
وكاعده على كرسي متحرك وابوي حدرها
واحنه كاعدين هو كاضب يدها ويدحكلها
ولو رادت المي هو يشربها وهو يعدل بشعرها حتى وان هو مرتب ومايرضى انا اسبحها الا هو يدخل يسبحها ويسبح ويطلعون

امي يوم الخميس طلبت مني اخابر على اهل ورود اعزمهم هين ...

قلت لابوي ووافق واتصلت عزمتهم ولحيت عليهم حتى يحضرون بكرا على الغدا
.
.
.
يتبع

#شقراء_بغداد

الجزء_الثاني_بارت_٢٧


صباح يوم الجمعه ...
حضرت الريوك لحسين من ساعه سبعه
وهو كان متأنق ومسشور الشعر ومثبتو
وعطرو فايح بالبيت وياكل بسرعه حتى
يطلع لبغداد هو ورماح لبيت اهل ورود
عشر دقايق وطلع وانا رحت دحكت امي
بعدها نايمه .. كلبي يتكطع عليها
روحها ذبلانه و التعب مبين على كل مسامه بيها ..

امشي وادعي ربي يشافيها ويرجعلها حيلها
حدرت عمتي ام جراح وهدى هين ساعدني بتحضير الغدا .. من اتصل حسين وحكالي دخلو الانبار هين رحت لامي ساعدتها تغير ملابسها وعطرتها لبستها شالها واخذتها تكعد بالاستقبال وخليت بحضنها بنتي مزنه تتلهى بيها ...

ابوي اتصلت عليه ورجع من وكت للبيت
ضل كاعد حدر امي وادحكو شلون يبوس باصابعها واحد واحد ..

ابوي عينو تنطق خوفو عليها صاير حتى عند عمتي ما يروح وكتو كلو حدر امي يا يفتر بيها بالدكاتره يا كاعد يدحكلها ويسولف وياهه
او يكعدون بالحديقه العصريه وبنتي بينهم يلاعبوها ..

وصلو اهل ورود .. تلكاهم ابوي وجراح
ودخلو للاستقبال حسين هو الي وكف امي حتى تسلم عليهم ..

كان حاضر ويه ورود ابوها وامها واختها
بالعجل حطينه الغدا للرجال وحد واحنه الحريم وحد وهين صارتلنه فرصه نتعرف على ورود وامها اكثر ..

البنيه خجوله وناعمه وشاكه الحلك بالضحكه
اختها عكسها .. جامده وتدحك لكل شي حولها
اما ورود عينها بس على امي .. وان سألناهه شي بس تضحك وتجاوب كلمتين
امها منظرها مرتب وبسيطه مو متكلفه وصاحبه غوا ..

كفينا الغدا والجاي وامي طلبت اخذها لغرفتها ترتاح .. اخذتها وهي صاحت لورود وامها يمشون حدرها يكعدون ...

وصارت كعدتنا بغرفه امي هي بفراشها انجضعت واحنه حدرها كاعدين ..
خليت بنتي بحضني ارضعها وامي طلبت من ورود تكعد كدامها ..

كعدت وامي كضبت يدها وضلت ادحكلها
و ورود تتبسم بوجهها .. امي صارت تحكيلها

- حسين من جان يحجيلي عنج يكول يمه البنيه بس تضحك الي يشوفها من بعيد يحسبها خفيفه بس اني ادري بيها فطيره وتضحك على لاهيتهه كلتله شمدريك بيها ؟ يكولي حافظها ومفصلها تفصيل
تدرين يكولي تصبغ اظافرها الاحد ماروني لو وردي ومن الاثنين للخميس اسود لو نيلي

- ههههههههه اييي عمه صحيح مو الاحد بعدني نيشطه اتكشخ باقي الاسبوع امشيها شلون مجان

- شفتي شلون هو مدقق بيج وحافظ كلشي عنج هيج اتمنى تصيرين وياه هم تخلين انتباهج على اصغر تفاصيله وتفرحيه مثل ماهسه فرحتي من سمعتيها عنه

- ان شاء الله عمه

- اريد احجيلج شكم شغله بنتي وخليها بالج كل العمر .. اني مو دايمه وياكم وعمري ايام محسوبه

-لا اعمه اسم الله عليج عمرج طويل ان شاء الله

- كل مايطول العمر يتعب البشر واني اخذت كفايتي من العمر .. انتي صرتي بنيتنا جنتنا الاعز بهالبيت .. الله وحده يعلم شكد فرحانه بيج بينا .. اريد احجيلج هالكلام وتفهميه وتوزنيه بعقلج وتحفظيه كون طول عمرج تستندين عليه بقرارج

- صار عمه احجيلي و اوعدج يضل بالي مانساه بعمري كله

- بنتي شايفه هالبيت تعبت سنين يلا حصلته
وهالولد الوحيد اجاني بعد تعب طووويل وضيم ومرار من انرزقت بحسين ابواب السعاده كلها تفتحت بوجهي وعلى وجهه شفنا خير ورزق من الله ما ينعد ولا ينوصف
حسين صار فرحه بهالبيت صار مدلل من ساعه ما نحط على هالفراش لليوم هو الدلال الي دللته اله ما صار لولد من كثر دلاله صار اناني بيه يريدني بس اله يغار حتى من ابوه
هو رجال عليه الاعتماد صاحب نخوه وروحه طيبه زرعت بيه درر الاخلاق
و اقسم يمين الله عليه ما يزل ويتصرف بطيش وبدناءه .. حسين ربيته بحب و علمته الاحترام ومخافه الله بالناس وحقوقهم ربيته رجال وابن شيوخ بس بدلال الطفل جمعتله بين الاثنين بحيث ويه ابوه هو رفعه راس
ووياي حنين ومدلل .. من كثر دلاله يلوموني عليه وابوه نفسه يلومني ليش ادلل بي هالكد واخاف عليه بجنون .. محد يعرف ويفهم
ان حسين عندي مو مجرد ابن
هو كلبي بس خارج ضلوعي عايش
ومحد يرضى على كلبه يتاذه وينحرم من شي
يكفيني اكولج ان هاي وكعتي هي من خوفي عليه بذاك الحادث من يومها اني ودعت صحتي شكد مرت عليه مصايب وهبطات بهالعمر بس حسين هو الي ماكدر حيلي يتحمل اذيته
اختصرها الج ... اني حبيبه الشييخ وحسين هو ابنه الوحيد تخيلي انتي بعد شلون عزيز هالولد !

- الله يحفظكم اله

- ويحفظج ياعيوني .. هسه هذا عزيزنا سلمناه الج ، تعبي كل هالسنين مو بس بحسين حتى بالبيت والاملاك كلها الج صارت كلشي حطيته بايدج اريدج تحافظين عليه
بنتي لا تضيعين تعبي صوني كل شي بي
اهم شي وليدي حسين هذا روحي هذا كلبي وسلمته الج ان تأذى اني اتأذى وان فرح اني افرح ..
اني ان عشت سنه او شهر شهرين فتاليتي رايحه وعايفته يمج .. اريدج ياعيني وكت
مااني اروح تضلين يمه اداريه
حسين راح يتعب راح ينكسر كلبه وروحه تذبل ،، ابني راح يضل يبجي ليل نهار
ان ماشفتي دمعته فهو بداخله محترك ومهزوز اريدج تبقين وياه لا تعوفي حتى لو هو عافج لا تعوفي ..

حتى لو صيح عليج طردج سد تلفونه ضلي لحي عليه وابقي وياه
لو كدرتي توصليه احضنيه ضلي بزواجكم دائماً احضنيه حتى لو يصير عصبي هم احضنيه راح يهدأ
اذا شفتيه بالليل ميكدر ينام يتذكرني لاتعوفي
اجبريه ينام على ايدج وكوليله امك وصتني
كل ماتشتاقلها احضني ونام

امي خنكتها العبره وماكدرت تكمل كلامها
وانا عفت بنتي ورحت حضنتها وقلتلها ..
- يمه اذكري الله ليش مفاوله على روحك بالموت نلكى علاج ان شاء الله هواي ناس تشافو من بعد غسل الكلى مو كلها تموت
فدوه يمه لا تحكين هالشكل وتكطعين كلبي

- بنتي هي وصيه لازم تنكال العمر يخلص اليوم لو بعدين يخلص مايدوم

- لاا يمه انا ماتحمل اسمع هالحكي منك والله
وحتى ورود خافت دحكيها بهتت ضحكتها

- لاا ميصير تخاف مارضى جنتي خوافه
اريدها سباعيه وكلبها قوي

بوست راسهه ورجعت لبنتي وامي ضلت كاضبه ايد ورود وتبتسم .. ورود حكتلها ..

- عمه عفيه ضلي قويه اريدج ويانه
تفرحين ويه فرحتنا لا تستسلمين للمرض

- ان شاء الله قويه اضل لتخافين اني ماعرف استسلم ، لاتنسين هالوصيه بكل الاحوال
ان لحكت احضر عرسكم او مالحكت عليه
انتي احفظيها بالج ونفذيها

- لااا ان شاء الله تلحكين تحضرين العرس وتشوفين الاحفاد هم وتلحكين على عركاتنا وتصالحينه هههه

-هههه يوم السعد هذا ياعيني

- عمه احجيلي بعد حسين شنو يحب بشنو اكدر اوصله هو ابد ميحجيلي على شخصيته
والشي الي يحبه ويكرهه ابد ولا مره كالي

- هههه اييي هو يريدج انتي تعرفين بنفسج كلشي .. بس اني انطيهن الج
حسين توصليه بشغلتين .. الاكل المنوع وبالاخص الحلويات والدلال
شكد ما بيدج دلليه ولا تفكرين بعدين يكوم يتغير عليج ويستغل دلالج اله
لااا ابد لا تفكرين هيج لان حسين من طبعه يرد الدلال والمحبه اضعاف
ولو هديتي ورده بيوم يردها الج بقطعه ذهب
ماينسى الزين من احد مو عاد دلال مريته حبيبته

- ههههههه وبعد عمه

- يحب الشقى والضحك يحب يتشاقى زايد
وروحه مرحه وفرياحيه يحب الي يشاركه بالسوالف ويضحك ويستمعله من يحجي
يجوز هسه بعد بينكم خجل بس بعدين من يتعود عليج تشوفين شلون طبعه مرح
يعني اذا بيوم لزمج شالج وكلبج هنا ورجع كفشج وعضعضج فلاتتفاجئين تره هو هيج يشاقى وهاي اخته شاهده عليه
مخبلهه وهاي كل يوميه همه هارجينه بصوتهم وخبالهم

- ههههههههههههه اييي كلش زين هالشي
مثل مااحبه لعد الا اعاتبه شلون يضبط عليه من هسه وضام هالروح الحلوه عني
اني مااصدك واحد يضحكني

- هههههههه هو يكول يمه بس اكوللها هين يولي هي تخرب ضحك

- هههههههه ايييي عمه مو بيدي حجيه حلو

-ههههه على كد نيته سبحان الله قسمله هيج بنيه فطيره مثله

ضلت تبتسم وادحك لامها الي مثلها بس تبتسم
اما اختها فعينها بالموبايل مالها دخل بينا
امي حكتلها ...

- هو جان يدور بنيه تشبهني وانتي اول وحده يحاجيني عليهه كلتله لكيتني بيها ؟ وكالي
كلشي بيها مثلج بس شعرهه مادري بعد
ماعرفته
وهمزين طلعتي ام شعر طويل مثل ميريد

- شعري مو كلش طويل يادوب واصل للخصر

- يطول لو ضليتي تعتنين بي يطول
اني هم من جنت بعمرج شعري هيج شويه اطول من شعرج وبعدين طول

- عمه شكد طول شعرج يعني ؟

-هههههه تريدين تشوفيه ؟

- اييي والله بنفسي اشوف شنو جان يريد حسين !

-ههههه صلي على نبيج يلا اشوفج

-ههههههه عليه الف الصلاه والسلام
والله عمه عيني بارده مااحسد

- ادري حبيبتي بس اشاقيج

صارت امي تفتح شالها واني بكلبي قريت المعوذات ونفختها قلت هذني غريبات شمعرفنا بنفسهن ..

امي فتحت القراصه ونزلت لفه شعرها على كتفها وقلتلها ..

- اخذي بايدج وشوفي

ورود وهي تضحك كربت واخذت شعر امي بايدها وصارت تفتح لفتو وتصلي على النبي
وفتحتو على طولو وصار نازل على رجلها للكاع .. قلتلها ...
- عمه هذا شعرج مثل مال افلام الكارتون
يعني والله والله لو حاجيلي حسين امي هالطول شعرها ولا اصدك اكول يبالغ

- ههههه بنتي هذا تعبانه عليه تعب يلا صار هيج عمري كله اني اعتني بي وما كصيته
من صغري لشيبتي هالشعر ما لايحه مكص
بس كذله ارتبها اطرافه ماكصيتهن ابد

- لعد شلون تعتنين بي مو لازم يكصون الاطراف حتى يطول ويروح تقصف وهيج

- ماعندي بي تقصف مغذيته دائماً
جنت بصغري استخدم الحنه وبعدين بشبابي ورثت زيت ورد ملكي من اجدادي هذا خلاه لشعري يفور فور بالطول والثخن واللمعه
وريحته تنشم من بعيد بعدين خلص صار الشيخ يجيبلي بديل عنه بس هم زيت ورد
يوصيهن كل سنه من بره يجيبهن صندوك
نتقاسمهن اني وغاليه

- زييين يعني معفتي ابد كله عنايه

- اي لازم الشعر يضل يتغذى مثل الشجر هو بس ييبس يموت

- ما شاء الله عمه شعرج هذا رادلي فد عشر سنين يلا اوصل نصه ههههه
خلي حسين يرضى بالموجود

-هههههههه رضى وراح بعد
انتي ضلي اعتني بشعرج وماتحسين عليه الا طولان لركبتج وابد لاتصبغين خليج بطبيعتج حلوه

- ان شاء الله عمه

- راح انطيج هالشيشه العندي استخدميها

لان ماضلت عندي بس هاي البقيه اخذتهن غاليه وياهه

- لاا عمه مااخذها انتي بقيها عندج استخدميها

- مااستخدمها بعد مابيه حيل انتي تفيدج وراج عرس حتى حسين من يشتم شعرج يتفاجىء
هو كلش يحب هالريحه

ضلت ورود تبتسم وانا اخذت الشيشه خليتهه بايدهه وامي قلتلها ...

- شوكت ماتخلص وصي حسين عليهه وهو يعرف منين يجيبلج

- تسلمين عمه الله لا يحرمنا منج

- ادللي حبيبتي ادللي كلشي الي تريدي يجرالج بس كون تنتبهين على ابني

-هههه صار عمه بعيوني اخليه

- شوفي بنيتي هاي نصيحه من جبير
خليهه ترن باذنج يوم الي تحتارين بهالزواج ..
حلقه حسين راهمه باصبعج وحلقتج هم راهمه باصبعه يعني انتي احسبيها هاي
كلوبكم واحد راهم للثاني لا تشككين بيوم
بهالارتباط بحاله عصبيه او تعب دائما باوعي لهالحلقه وتذكري هاي حجايتي

- ماشي عمه

- و شوفي شكد ما هالحلقه راهيه وناعمه باصبعج ومناسبه عليه لو دخلتي هسه فد شي بين اصبعج والحلقه راح تتاذين ويجوز تنكسر او تنشخط حلقتج
هاي احسبيهه الطرف الثالث الي يدخل بينكم
لو شكد ماجان قريب وعزيز مكانه مو مناسب بينكم مكانه يبقى بره هنا يدخل بالنص يأذيكم ويسوي حاجز بينكم لا تسمحين لاحد يدخل بحياتكم بكل تفاصيلهه زين بنتي

- اي عمه زين

- ولو بيوم حسين ضوجج وعال وياج
لا تشهرين بي بين اهله او اهلج بس صدي عنه يوم يومين راح تلكيه جاي يدور رضاج
بس لو سمع طالع هالحجي عنه تخسرين

- ان شاء الله عمه مثل ما وصيتي اسوي

- فدوه لكلبج اريد كون من ينذكر طاريج كلها تكول والنعم من مرت حسين والنعم من جنه الشيخ شكد ماانتي بنوته نازكه ورقيقه اريد تصيرين مسؤوله وحكيمه بالفعل
اكسبي هالعايله تره من جبيرها لصغيرها
ناس ينحطون بلبه الكلب وياهو الي تنخيه تلكيه عند عينج
لو بيوم اخذج طيش الشباب والكبرياء والاحاسيس تذكري انتي بوكت لازم تصيرين مثل امج
شلون ما هي صبرت وتحملت وتجاهلت الصغيره في سبيل نحافظ على الاكبر والاعز
وصارت قدوه الكم وام بيت معدله ينحمد بيها
ربت وكبرت وشالت على راسها بيت وعيال
سنين بصبر ومحبه انتي هم هيج لازم تصيرين .. لان كل بنيه تطلع من بيت اهلهه هي لازم توعى وتعتبر نفسهه ام وحامله مسؤوليه فانتي صيري مثل قدوتج

- ان شاء الله عمه تسمعين عني كل كلام طيب

- واثقه من هالشي حبيبتي هالوجه والروح الحلوه مايجي منها الا كل طيب
لا تحجين لحسين الي حجيناه بس اتصرفي بي من ذاتج

- ماشي عمه مثل ماتريدين

- يلا شنو رأيج اصعدين اشوفين غرفه حسين وغاليه بعدها مسفطه لعاباتهه هنا ومكينتها
روحي ويه غاليه شوفيهن

بالعجل كمت حطيت بنتي بحضن امي وهي شاورتني وطلبت مني ادز على حسين حتى يدحكها ووصتني اسد الباب وراي

اخذتها لورود وصعدنا ...
دخلتها لغرفتي بالاول ورسلت لحسين
' الحك يول خطيبتك فوك بغرفتك والجو الك يلا بالعجل اصعد '

ضليت اطلعلها باغراضي واحكيلها عنهن
واخذتها لغرفه حسين وصرت احكيلها ..
- دحكي هين اخوي يسطر مخادو بالكاع
ويرفع رجليه هين على الفراش ويحط السماعات باذنو وينطلق بغير عالم
والا احدر اهجم عليه يلا يسمعنا وينزل

-ههههههههه عفيه انتو رويسيه شنو

- والله قليل بحكنا هالكلمه
هالحين انا تزوجت وفكيت عنو وعقلنا شويه
بس كبل شبعت الويل منو وشبعتو هم يعني ماخذ نصيبي وحدي لاااازم كلشي بالحك

-ههههههههه

- مره بسببو وكعت وتكسرت رجلي وكتفي ونحرمت من البكلوريا

-ياااا عزا شسوالج

- لح وياي بالحكي وانا صعدت عصبيه وزلكت من الدرج بس والله دللني دلال وكتها
افيييش ياكلبي من اتذكرها احن للكسر والله

طكتها بضحكه عاليه وهو دخل وحكالها ..
- مادري ليش احس هالضحكه بيها طاريي
- ايييي خييي عجل منو غيرك ساس سالفتنه
- اييي شلونك خيتي بنتك شلونها احوالها امورها
- نازله نازله فهمت

طلعت شويه وكبل مايسد الباب مديتلو راسي وقلتلو ..
- ول خيي لا تنسى عدنا سهره باليل زين بس ردت اذكرك يعني
- غاليه بالحرام هالمره ماتسلمين مني
وغلات امي اكسرلك عظم عظم هين احبسك والله واكسرك وحلفت انا بعد جربي عيديها
- اييييه ماتتحمل شقى انته روح خربان مو حسين الاولي
- ووول غاااليه
- عيناااً امي اشبع اشبع طلع حيف كلبك من ابوي

ضحكت ونزلت وهو سمعته قفل الباب
مانطاني كلبي انزل واعوفهم رديت صعدت
وكفت اتسنط وكلشي مااسمع
دخلت لغرفتي ورديت طلعت افكر اجفلو الحين لو اخليه يتهنى ؟؟
قلت يلا خليهم دقايق
وضليت اتمشى وشويه وصحتلو ..
- حسيييين

فتح الباب وحكالي ..
-هااا هاااااااا هاا شكو
- شلونك خيي محتاج شي
- محتاج روحتك من هين ول عرستي ويه عرسي امشي دحكي بنتك
- قلت اخاف عطشانين انزل اجيبلكم مي
عدنا عصير تااازه كلاصين يبرد كلبكم اجيبلكم

سد الباب وطلعلي جر ايدي ونزلني وهو يحكيلي ..
- والله لو تصعدين بعد ياغاليه الا اكسر مكينتج الطرازيه هاي وضلي الطمي
- هههههه يلاااا نازله نازله
- يولي غطي علينا زين ماوصيكي بعد
- سدك امين خيي لو لليل ابيتها هين مايهمك

- هلااا هاي الخوات روحي يلا روحي
-هههه روح انته انا نزلت

طفرهن بايتين ودخل غرفتو قفلها وانا نزلت اضحك وضليت بالمطبخ .. رتبت صينيه
عصاير وحلى وضليت مكابلتها وكاعده
انتظر جنابهم ينزلون ...

حسبتلهم اربعين دقيقه ضبط همه فوك
عاد اتصلت بحسين وقلتلو ..
-يول نزلها راح يمشون اهلها
- اي نازلين

سد الخط وشويه ونزلو .. اخذت ورود قلتلها
- الي يسألك قليلو دحكنا البيت كلو ورتبنه الحلى ودحكت تصاميم غاليه زين
- اي زين

حكتها وهي مدنكه وتعدل بشالها وحسين يغسل وجهو ويحكيلي ..
- غلوي اليوم انتي امر تأمرين
-يممممه صلاه على النبي هذا خيي نفسو !
-ههههههه مو صرتي حبابه لازم اردها
- ول خيي لا تضل حباب ماحبك هالشكل
تضل كابت على صدري هيك
-ليش يولو فوك زيني !
- ماريد زينك احبك بخبالك عجل انا هين ويامن اتونس جراح وصاير شيخ عليه مادحكو ولا احاكيه لازم تضل مثل ماانا اريد
-هااااا يعني تريدين نتكاون يلا ترتاحين
- اييييه حبيبي هذا اخوي الاعرفو

حدر كضب راسي نزلو لوره وضرب راسو براسي ويحكيلي ..
- تدرين اول مره احبك اليوم
- وانا اول مره اريد يجي الليل بسرعه
واسفط من الحيييين الحكي المرتب
هههههههههه
- اسمع بس كون اسمع كلام واحد
الا ارجعك تتوسلين على الصوره وتتوسلين حتى تعتبين هالبيت من عدا تكسيرك
وهاذي مريتي شاهده على هالكلام
استري على نفسك زين يولو
- نتفاهم خيي نتفاهم شدعوا كلشي عندك كسر وطرد يلااا نروح احنه ونتلاكى باللييييل

ضحكت واخذت ورود والحلى ودخلت لغرفه امي قدمتلهم وصرت احكيلهم ...
- فريتهه بكل البيت وحكيتلها على تصاميمي يمه فتحتلها الدفاتر كلهاااا
-عفيه عفيه

ضلت هي ادحكلي وتضحك وانا اسفط بهالحكي يالله شكثر احب هالموااااقف
كون كل يوم يحدرون هين ويتختلون

صارت ساعه خمسه العصر وهمه طلعو
وهم حسين راح وياهم ووياه حسن بسيارتو
وصلوهم ورجعو بالليل ..

حسين بس سلم على امي وبوسها وصعد نام حتى بدون عشه ... وانا سترت عليه قلت خيي خطيه اشهرو ..

يوم الاحد امي كان موعدها للغسيل واخذها ابوي وحسين للمستشفى .. امي من ترجع تكون صفره وجهها باهت وحتى شفتهه بيضه
وتضل نايمه اليوم كله تحس علينه حدرها بس ماتنطق شي تدحكلنا وترجع تنام لحد ثاني يوم يلا تبدا ترجع لطبيعتها وتصير تاكل وتسولف

ابوي ذبلان والضحكه مفاركه وجهه ودايماً ساكت وكاعد حدر امي اذا يسولف بس وياها او ويه جراح كلمتين ويسكت

زواج حسين تحدد على العطله لان هسه وكتهم كله امتحانات .. هو ترك الدراسه
هالسنه مارضى بعد يداوم ويضل بعيد عن امي بس ورود اداوم وينتظرها تكمل امتحانات ...

يوم الاربعاء رجعت لبيتي .. اسامه اول مارجع من سفرو ارتاح وللعصر حدر هين
سلم على اهلي ورجعنه بنفس الساعه ..

ضل كلبي على امي موصيه هدى عليها وابوي وحسين حدرها بس مارتاح اذا مادحكها بعيني وبالاخص يوم الجمعه موعدها لغسل الكلى ..

كنت كل ساعتين اتصل اتطمن واضحكها شويه افتح كاميرا ويه حسين واخليه يدحك مزنه وضليت متواصله وياهم ..

ليله السبت عمي حكالي ...
اوصل خبر لابوي ان لاكين كلى بس بسعر
٣٢ مليون وحكالي ان ماذكر لابوي هالحكي منو بس احكيلو من اسامه وارجعلو خبر ..

رحت بالعجل اتصلت بابوي وحكيتلو وهو
وافق وحكالي اخلي اسامه يتصل بي ويتفاهمو

كعد عمي شرح السالفه لاسامه وهو اتصل بابوي و فهمو عليها ..
التقديم كان من مركز زراعه الاعضاء بالسعوديه والفلوس هاي لتكلفه العمليه بس لازم يدفعون ١٢ مليون لشخص يسرع برفع الطلب عدهم وعمي هو الي راد يدفع للشخص هذا بس انا مارضيت عليه يدفعهن
واتصلت بابوي فهمتو عليها وهو ثاني يوم ارسل رماح و وياه الفلوس سلمهن لاسامه

عمي اخذهن وهو الي تكفل بتوصيلهن للشخص عن طريق النت مو كاش

صار عدنا هالامل ومتمسكين بي وابوي كل يوميه الصبح يتصل يسأل شصار على هالسالفه ونحكيلو بعد صبر ماضل شي
ودخلنه شهر السادس وصلنه الخبر بتمام الاجراءات بالسعوديه و عمي حتى التقديم للسفر مسويه وضل عدنا اسبوع واحد للسفر

عمي اخذني بدايه هالاسبوع لاهلي حتى احضر غراضهم .. وكت الي وصلنه ابوي
كان طالع مو بالمنطقه ...
حسين رحب بعمي ودخله لبيتنه ..

اخوتي حر واسر ينزلون الغراض وانا دخلت شايله بنتي ودحكت امي كاعده هين بالعجل فتحتلي ايدها .. رحت حضنتها وبوستها
وخليت بنتي بحضنها ووكفت انزع النقاب
وحسين مد راسو من باب الاستقبال وحكالي
ان عمي يريد يسلم على امي ويمشي

حطيت حجاب على راسها وبعدين دخل عمي وياه حسين ..
ضل يدحك لامي وامي ابتسمت بوجهو وحكتلو ..
- شلونك ابو سالم
- عايش الحمدلله شلون صرتي ان شاء الله احسن
- بخير الحمدلله احسن هسه
- ان شاء الله نهايه هالاسبوع السفر واني هم حجزت وياكم وكل الامور هناك رتبناهه
حتى السكن بس شدي حيلج هالكم يوم
- تسلم تعبناك
- احنه اهل مابينه تعب يابه
- اكعد عيني ارتاح هسه الشيخ على جيه
-لا راح اخذ حسون واطلع اشم هوا شابع من كعده البيت

- لا خليك هنا ما ضيفناك بعد
غاليه ماماتي جيبي الضيافه لعمج يلا

كعد عمي وانا دخلت المطبخ دحكت شكو بالثلاجه لكيت عصير تمر هند صبيت بكلاص وحسين حدر حكالي .. اكو علبه
بيتي فور هين حطها على الميز وانا خليت منها لعمي واخذتلو الصينيه .. صار ياكل ومدنك راسو وامي شاورتني ...
- بنتي افتحي باب الميز الي بي العطورات
تلكين علاكه سمائيه جيبيهه

رحت بالعجل للغرفه واخذتها كانت ملفوفه
مافتحتها ودحكت شنو بيها بالعجل اخذتها لامي وهي خلتها حدرها ومن عمي راد يطلع
حكتلو ..
- ابو سالم هاي سلام للحجيه

اخذها من ايدها وحكالها ..
- يوصل ان شاء الله
- ضروري تحتفظ بيهه لاتنسى
يعني وصللها هالحجي
- ان شاء الله ،،، يلا اودعناكم يابه ماعندج الا العافيه شدي حيلج هاليومين وان شاء الله تفرج
- الله كريم

عمي طلع وامي صاحت لحسين وطلبت منو ياخذ عمي لحجلان وللنواعير ويعشيه سمك هناك يلا يرجعون لهين ..

من طلع سألت امي ..
- يمه شنو الي ارسلتيه للحجيه
- غراض مال عجايز قابل شنو
- هاا يمه تره عمي هو الي يدور بسالفه السفر ودبرها بس يستحي يحكيها لابوي خلاها بوجه اسامه
- اعرف والله يسلمه ماقصر
بنتج صايره تشبهج من جنتي صغيره هم هيج الخشم والحنج نفسه
-ههههه موو زين ورثت جمالي
- بس دوران وجهه على اهلهه وبالاخص الخدود هاي النازله مثلهم
- ايييه مااخذت خدودي المرفوعه كان صارت احلى
-اخذت عيونج والخشم هاي اهم شي
- ههههه من الجهتين هي حلوه يمه
- الله يحفظها الج جيبيلها اخ من هسه حتى يربون سوه تره العمر يركض ركض متحسين عليهم الا كبرانين وبالمدارس
- ان شاء الله يمه

نظفت البيت وحضرت العشه وخابرت على حسين حكالي ان عمي من المغرب رجع
تالي رجع حسين وابوي تعشينه سوا وبعدها نظفت المطبخ وكعدت حدرهم ..

حسين نايم ومخلي راسو بحضن امي تلاعب شعرو وابوي مشغل التلفزيون ويدحك على امي صافن عليها ويفر بالريمونت بيدو
كعدت حدرو وقلتلو ...
- يابه وين البال
- بصاحبتو
-هههههه ماحفظتها بس تتصفن عليها
- وجلال الله احس كل مادحكلها كأنها اول مره رغم انا حافظها اكثر من نفسها
- تناقض عجيب هذا
- ايييه والله
- يابه تذكر اول مره دحكت بيهه امي
- اييييه اييه كان ملكاهه عجيب
- شلون تلاكيتو يابه احكيلي
- كنت اصلي الفجر بيتي و صار نصيب بعد هالصلاه ملكاهه
دحكتها هين حدر شجر التين كانت كانها غزال مجروح
- يعني ماكنت تعرفها !
- لا بس بعدين تعارفنا وصار بينه عشره
واسرار ونصيب
- امي شكانت هين تسوي ؟
- حدرت ضيفه علينه والتكينه
- شنو حكيتو اول شي تتذكر؟
- كلشي اتذكر انا من هذاك اليوم
حتى لبسها اذكرو .. قميص نيلي خفيف وتنوره كريمي كصيره وجونا بارد بالشته
كان وهي مصيفه امي كانت ادثرها بالغطى وهي كاعده
كان شعرها لركبها تدك اطرافو
اول فكره اخذتها عنها انها بنت عز
- يابه حبيتها من اول نظره يعني
- مادري والله
- شلون ماتدري !
- مادري ايمتى حبيتها وتغيرت نظرتي عنها
بس يوم الي صار هذاك الحادث بحينها عرفت كثر معزتها عندي
- تكصد يوم الي خسرت كليتها !
- ايييه هو اياام سوده مرت عليه
الحين انا رجعت اعيشها نفس الخوف والقلق ويباس الريك
- تتشافى ان شاء الله ما ضل شي لعمليتهه
- نذرت اجهزه تصفيه دم اشتريها للمرضى الي مثل حالتها واوزعها للمستشفيات الي ماتتوفر عدهم واخلي الناس تتعالج بيها بالمجان بس كون تنجح عمليتهه وترجع لحيلها
- ان شاء الله يابه ربنا رحيم بعباده مايخلينه على هالحال
- مامرتاح كلبي ياغاليه والله انه مامرتاح
بس اتأمل خير

ضليت ادحك لامي وادعي ربي يلطف بحالها
ثاني يوم بديت احضر بغراضهم وارتب جنط السفر وامي كاعده حدري اسألها على الشي الي اخليه وهي تدليني على الي تحتاجه
رتبت كلشي حتى اوراق الدكتور والتحاليل
وخليتهن حدر الزاويه ..

جدتي كل عصريه تكعد حدرنا وتضل تتعشى وتتعلل واخوتي هم يتعللون هين وتالي يرجعون لبيتهم ينامون ...

صار يوم الاربعاء خابرني عمي حكالي ..
-ها بنتي رتبتي كلشي ناقصكم شي !
-لاا عمي كلشي حضرتو وجاهزين اهلي
ضل بس حسين اليوم احضرلو الجنطه
-اي تره ماضل شي موعدنا السبت لو تقنعين ابوج يجون يباتون يمنه الجمعه حتى السبت من الصبح نطلع على راحتنه مانتعب امج ببهذله الطريق
- والله ياعمي ابوي مايرضى لهالشي يستحي يبات بغير بيت
- بس احنه اهل يابه قنعي قنعي وخلي حسين هم يحاجيه لان شوكت يطلعون من حديثه شوكت يوصلون ويرتاحون والطياره الصبح
وامج تعبانه على هالحاله تضل اليوم كله هي من مكان لمكان هم احسبيهه انتي
- اي والله صدكت ياعمي بس احاول ويه ابوي ان مارضى تعذرني
- حاولي حاجيه ورجعيلي خبر
- ان شاء الله عمي

سديت الخط ورحت لامي حكيتلها وهي بدون ماتركز بكلامي حكتلي ..
- اخذيني لغرفتي
- خيرك يمه
- تعبت كلش وظهري ديوجعني
- اسم الله عليكي

اخذت ايدها وهي اصابعها راخيه حتى ماكدرت تكضبني زين ضليت انا حاضنتها وامشيها واخذتها نومتها بفراشها وغيرتلها كيس الادرار وغطيتها وضليت كاعده حدرها وهي تضغط على شفافها وساده عينها قلتلها..

- يمه اخابر ابوي ياخذك للمستشفى
حالك مايطمن
- مابيه حيل امشي
- شصارلك ياعيني كنتي مرتاحه شتعبك هيك
- مادري كومي جيبيلي مي عطشت كلش
- اييه يمه تامرين

بالعجل رحت اخذتلها المي وشربتها وهي حكتلي ..
- روحي جيبي البنيه عايفتهه بالهول وحدهه
- خلي اطمن عليكي واروحلها ماعليهه شي
- لا جيبيهه انومهه بحضني بين مايرجع ابوج

ابتسمتلها ورحت اخذت بنيتي الي صار عمرها خمس شهور .. خليتهه بحضن امي
و امي صارت تبوس بايدها وتخليهه على وجهه وتشم بركبتها وتناغيلهه ..
' يامزنتنه الحدَيثه يا فرحه بيتنه
الشكره ام خد وخد بنت الغاليه وعلى امها غاليه حليوه ومدلعه '

بنتي تضحك ويه ضحكت امي وتفرفر براسها
وامي حكتلي ..
- بس يصير عمرهه سنه صوغيلها حجول
- اكييييد اصوغلها واجمعهن الها مثل ماجمعتيهن الي
- ماتكومين تاخذيلنه صوره

بالعجل جريت تلفون امي من الميز وصورتهه هي وبنتي وخليتهه ادحكهن
حكتلي ...
- اكو فلوس هنا بالمجر اخذيهه حطيهه بكنتور حسين
- ليش يعني !
- لان هو ماعنده وخاف محتاج شي ويستحي يطلب
-هاااا عجل هو مو. رجال ما يدبر حالو
صار صاحب عايله بعد تضلين تصرفين عليه
- هو لو ما كعدته وياي جان طلع واشتغل
وجاب اضعافهن بس غير كاعد بالبيت
سوده عليه هالسنه هم ضاعت عليه
- ماتخافين عليه اصلا هو يريدها من الله حتى يصير هو وحرمتو سوه نفس المرحله
- كون الله يسعدهم ويهنيهم
بنتي باجر اريدج تنظفين الغرفه
- كل يوم انا انظفها يمه ماتوصين
- لا هالمره اريد غير تنظيف
اكو غراض جوه الجربايه اريدج تاخذيهن الج
باجر تعالي نظيفها وطلعيهن اخذيهن
- شنو هنه شو خلي ادحكهن
-اكعدي لاتفردشين من هسه ابوج على جيه
- بس ادحكهن واخذهن واصعد
-لااا عوفيهن هسه يجي يشوفنه مهوسات
باجر اخذيهن مطايرات
- زين شنو بيهن
- هديه ضامتهه الج صار سنين
- عجل ما هديتني اياها من كبل ليش الا اليوم
- هههه من تاخذيها تعرفين ليش
فد كم يوم وذكري حسين بشغله جنت ضامتهه اني وياه كوليله خلي يطلعهه
- وهاذي بعد شنو
- هاذي حتى لاتنسيني
- يمه عفيه شهالحكي
- اكلج اني ماسبحت اليوم
- غير ابوي مادري وينو عنك
- خطيه هم بركبته كومه شغل وناس
كومي اخذيني خلي اسبح قبل مايرجع
- يعني انا اسبحك واخيراً
- لا اني اسبح بس وصليني للحمام
-لااا يمه انا اغسلك ليش تخجلين مني
- اني ارتاح هيج بنتي فدوه لاتعبيني يلا

اخذتها للحمام وكعدتها على الكرسي وهي طلبت اخلي حدرها روب الحمام
خليتو بالسله وكريب منها ورادت مي بارد
فتحتلها وخليت حدرها الصابون والشامبو
وطلعت ..
تذكرت فلوس حسين اخذتهن من المجر
وحسبتهن طلعن ٣٠٠ الف صعدت خليتهن
بالكنتور ونزلت ضليت حدر بنتي اصورها وارسل الصور لاسامه ..

سمعت صوت امي تصيحني رحت دخلت للحمام ودحكتها لابسه الروب ولافه شعرها
انا ادري بيها تعبانه وايدها يادوب تعينها
وكل هذا ومارضت اعينها واغسللها
ولو ما رجلها المتورمه هم ماتخليني اساعدها بمشيتها ...

اخذتها لفراشها وقلتلها ...
- يمه ياثوب اطلعلك
- عوفي بعدين من يجي ابوج
-هاااا تريدين ابوي يتخيرلك والله مانك هينه
حتى بهالوكت تدلعين عليه
-ههههههه هو يحب هيج شسوي يعني
- يعني كل يوم هو يتخيرلك شتلبسين
- اي هو يختار ويلبسني
- عجل شبي رجلي مايسوي هالشي بس يتأمر
- ههه تغارين من رجلي هههه
- اييه اغار عجل ليش ماغار
- ارضي بالي عندج بنتي رجلج ذهب والف وحده تتمناه
- عساهه بالحرك ان شاء الله الي تتمناه وتحط عينها عليه
- ههههههه ديربالج عليه لعد
- شايلتو بعيوني يمه ماتخافين عقلت والله
وصرت ام بيت معدله
- عفيه بنتي عفيه ضلي رافعه راسي لان كل تصرف تسويه مرجعه عليه ضلي اختاريلي الزين
- اطمني ياعيني بنتك محبوبه ومحببتك عند عيالها
- الله يحفظج حبيبتي .. خابريلي حسين شو لحد هسه مارجع شوفي وينه
-يمه وينو يعني هين بالحديقه حدر اخوتي تعرفيه مايطلع بعيد
- ميخالف كوليله خلي يرجع

اتصلت عليه وقلتلو امي تريدك ارجع
وهو دقايق ودخل .. امي فتحلتو ايدها
وهو حضنها ضلت تحكيلو ..
- وين جنت حبيبي
- هين يمه كاعد حدر حر واسر نازلين كيم
خسرت نفسي وطلعت
- يابعد عمري جوعان
- لا اكلت قبل شويه وياهم
- الف عافيه اكولك شخبار ورود
- زينه ودايماً تسأل عنك
- هم دتجهز للعرس
- اييه يمه مو انطيتها الفلوس وهي كل كم يوم تطلع ويه امها وتشتري كم شغله
- لاتقصر عليها ابني هاي عروس كلشي يعجبهه ويصير بنفسهه من الغالي والزين
وهو كله الك مرجعه انطيهه شكد متريد
- ان شاء الله يمه
- هنا بكنتوري تندل القاصه ورمزها
خاف تحتاج شي للعرس اخذ منها
تره هذني فلوسي جامعتهن من الي ينطيني اياهن ابوك يعني كلهن الك

-لااا يمه تسلمين انا ان شاء الله بس نرجع من السفر اشتغل واسد العرس
- سبع انته ادري بيك بس خاف يعني تعتاز وتضل حاير تره هذني اني اجمعهن بس الك
اخذهن زين يمه
- مانتعاز ان شاء الله وخليهن هذني اشتريلك بيهن احلى اثواب للعرس
- الله كريم تعال خلي احضنك شو مداشبع منك
-ههههه كيك انا يمه ماينشبع مني
-ههههه يحفظك الله ياروح امك

بوستو امي بعيونو وخدو وحتى ركبتو
وضلت ادحكلو وترتب شعرو وهين ابوي
دخل .. وحكالنا ..
- ها يولو متجمعين حدر تينتي استغليتو طلعتي
حسين- يابه هنه هالخمس دقايق كعدنا
موقت انته ماشاء الله ايمتى ما انا اكعد حدر امي انته تحدر
- احس املاكي بخطر ولزوم احدر ادحكها
- احنه ولد هالاملاك يابه النه حكوك
- بالجنه تاخذ حكك ان شاء الله يلا ماشبعت
- هو اليدحك هالحلوه يشبع يمل !

كضبو ابوي من ياختو وجرو من الفراش
وطلع حسين وهو يضحك ويشمر بوسات لامي .. وانا عرفت سره الطرد وصلني
بالعجل اخذت بنتي وردت اطلع وامي صاحتني ..
-تعالي خلي ابوس بنيتنا
- وانا ماتبوسيني

ضحكت امي وبوستني واخذت بنتي شمتها وبوستها وخلتها بايدي وهم بوستني مره ثانيه ودحكت بنص عيني وحكتلي ..
- احبج ماماتي
- فديييت الام الحنون وانا احبك يمه

بوست راسها وطلعت .. وصيت حسين يطفي الاضويه ويقفل البوب وصعدت لغرفتي ..
اتصلت باسامه وفتحنه كاميرا وضلينه نسولف حوالي نص ساعه وبعدين سديت ونمت ...

كعدت على صوت التلفون دحكت هذا عمي يتصل والساعه ٥ الفجر .. عدلت كعدتي
وفتحت خط واسمعو يكح قلتلو ..
- هلا عمي

مارد عليه بس يكح وانا صرت اسمع صوت من بره ماعرف منو يصرخ ..
حفزت من فراشي و التلفون بايدي وطلعت من غرفتي دحكت حسين هم فتح باب غرفتو ويسألني شكو ونزلنه الصوت من غرفه امي
هذا صوت ابوي يبكي ..
كان يصرخ يولي تين
انا انقبض كلبي وصارت ايدي ترجف اسمع صوت التلفون وادحك عمي رجع يتصل
فتحت خط وهو حكالي ..
- نزلتي
- عمي ابوي ابوي يبكي هين ابوي يبكي والله هين اسمعو

سد الخط وحسين ضل يدك بالباب ويصيح ..
- يابه شصاير فهمنا ياابه راح ادخل

بعدو مافتح الباب وابوي صرخ علينه بعلو حسو ...
-لحد يدخل هيييييين بررررره لحد يدخل
- ياااابه امي شبيها يااابه رد عليه فهمننني

ضل حسين يدك بالباب ويدفر ويصيح ..
-يمممه وينك احكيلو خلي ادخل شصارلو ابوي من الصبح وينك يمه ردددي مو احاكيكي يمه ماتسمعييين يممممه

انا ارجف رجف واتصلت بجراح .. جاوبني وانا بالعجل قلتلو
- جراح ابوي هين يبكي ويصرخ مانفهمو احدر بالعجل خيي
- ياستار يارب افتحي الباب يلا طلعت

شمرت تلفوني وطلعت فتحتلو الباب دخل يركض بالشورت وانا ركضت وراه دخلت وضل جراح يتسمع من الباب ويأشر لحسين يسكت .. وصرنا نسمع ابوي يصيح ..
' يولي ضل يومين بس يومين ليش ماصبرتي
ول يااااابه خذوها من ضلوعي يااااابه من نص صدري خذوها يا يابه خذوهااااااا '

شهكت ولطمت على صدري وادحك لحسين راح يدك بالباب ويصيح ..
- يمه ردي سمعيني صوتك انا حسين يمه ليش ماترديني حدرك

جراح كضبو وكتف ايدو وحكالي ..
- اتصلي برماح واحكيلو يحدر هو وجدتي هين

اتصلت بيه وقلتلو وهو بالعجل سد الخط
وانا رحت كضبت جراح من وجهو وخليتو يدحك بعيني قلتلو ..
- جراح ابوي شيكصد هااا شيكصد
ماصبرت فهمني شيكصد !!
- غاليه اهدي اهدي هسه نفتهم
- ايييه هسه نفتهم هسه

دخلت جدتي ورماح وصارو يسألون شصاير وجراح بس يأشرلهم على الباب وحسين يدفر برجلو بالباب ويصيح على ابوي يريد يدخل
وابوي مايرضى ...
جدتي فتحت الباب وصاح عليها ....
- برررررره لحد يدخل هييييين ماتفهمووون لحد يدددخل هييييييييييين

سدتو بالعجل وضلت دايره ظهرها للباب وساده حلكها وتدحكلي .. كلنه سكتنا بس حسين يصرخ على ابوي ماسكت
وسمعنا صوت عمي ابو حسن من باب الكليدور يصيح
- خيركم يابه شجاكم من الصبح تصارخون

طلعلو رماح وانا كضبت ايد جراح وقلتلو ..
- جراح انته احكي ويه ابوي خليه يطلع يفهمنا اخاف متكاونين !

حضني ويعصر براسي على صدرو ويحكيلي ..
- كل شي بأمر الله وماعليه اعتراض هو مالك الروح
- وانا شسوي بهالحكي الحين قلتلك احكي ويه ابووووي يلاااا احكيلو شي

دك الباب وصار يحكي ..
- يابه خلي ناخذها المستشفى نتطمن
بس اطلع خلي نتفاهم كلمتين بس يابه دخيل الله مايصير هالشكل

ابوي يعلي صوتو ويصرخ ..
- ول يابه خذوهااااا خذوهاااا من ضلوعي خذوهاااا
- لا اله الا الله
إنا لله وإنا اليه راجعون

من سمعت هالكلام من جراح وكعت بعد رجلي ما شالتني ضليت اشهك وادحكلو
وهو نزلت دمعتو وكعد حدري حضني وانا احكيلو ..
- لاااا والله عفتها زينه تشاقينه وصورتها
وسبحت وتضحك ويانه والله مابيهه شي
خيي والله خليتها تنام مرتاحه مابيهه شي والله حتى اسألو لحسين
- امر الله غلوي امر الله هذا

ضليت اصرخ هين فقدت وهو مثبتني بين ايديه وحسين كسر الباب يدك بيها وابوي يصرخ ويبكي وتالي جراح حكالي ..
- ادخلي انتي يجوز امك مكشفه ومايرضى احنه ندخل

وكفني وانا فتحت الباب وبالعجل ابوي صاح ...
- وووول اطلعييييي برررررررره لا تدخلييييين برررره
- يابه بس انا ادخل بس خلي ادحك امي
- بررررررررررره يولي بررررره امشي برررره لحد يدخل هيييييييين

جرني جراح وسد الباب وضل حاضني
وجدتي كاضبه ايد حسين ماتخليه يضرب بالباب والتمو اخوتي وعمتي ام جراح وهدى كلها تتصفن بوجهنه وجراح طلب من الكل يطلعون ينتظرون بهذاك البيت وضلت بس جدتي واحنه ...

مر الوكت وابوي يصرخ .
' يولي هنه يومين وكنا عشنه عمر ثاني
يولي مو وعدتك نروح بيت الله سوا ليش رحتي وحدك ليش يوووولي ليييييش '

حسن يضرب براسو بالباب ويبكي ويصيح على ابوي ..
- خلني ادحكهااااا يااااابه لاتخليها بس الك امي هااااي امييييي انا لو كعدتها تصحى والله تصحى

جراح كاضبني وبنتي صارت تبكي صعد اخذها وطلع مادري المن انطاهه ورجع حضني ويحكيلي ...
- صيري قويه اخيتي ماتضعف مايجوز لاخت الرجال تضعف وتهون
- خيي هاذي امي اااامي هييين ماعرف بحالهاااا
- اليوم ودعتنا امك
- لاااااااا بعد وكت على الوداع خييي مو وكت ودااااع امي عمليتها هالايام ضل يومين لسفرها وترجعلنا زينه تمشي على حيلها
- مامقسوملها يايابه هذا عمرها وهذا حده
واليوم هذا هم يمر علينه
- يووووول بعد وكتتتت احكيلو امي لكينه علاجهه لزوم تتعالج عرس حسين شهر الجاي شلون ماتحضرووو يعني ماتحضرووو
- تحضرو يابه تحضرو بس كافي اهدي

ضلينه على هالحال كلنه نتصارخ ونلوب
ونحاول ويه ابوي مايرضى يفتح لاحد
تالي جدتي دخلت عليه وسدت الباب ضل هو يصيح عليها ويطردها بس هي ماطلعت
وره شويه ابوي سكت وهي طلعت وسدت الباب وخلت راس حسين بحضنها وحكتلنا ..

- يودعها ويطلع اسكتو خلوه براحتو حدرها

بكيت انا بحضن جراح وجدتي ساده حلك حسين وتسكت بي ...
وضلينه ننتظر ابوي يطلع وطول وجدتي تأشرلنه اسكتو ولاتطلعون صوت ..

تالي انفتحت الباب وطلع ابوي وجهو احمر وشايل ملابسو بايدو وبصوت مبحوح قال ..
- يابه جراح حضر للجنازه

ماتحملت بعد اسكت هاذي صارت حقيقه امي ياخذوها جنازه من هين .. دخلت اركض لفراشها وادحكها نايمه عدل ومتغطيه وشعرها ممدود على طول الغطى ولابسه دشداشه ورديه وردانها طويله ..

حسين يهز بيها ويفتح بعينها باصابعو ويبوس بيهه يتوسلها تصحى حتى ايدها ورجلها بوسها ويتوسلها تصحى وترد عليه ويضرب على راسو .. وانا نمت حدرها حضنتها وضاله ادحك لحسين ماثبت بمكان يروح لرجلها يبوس ويرجع يكضب وجهه ويتوسلها بس ترد عليه بكلمه وحده واخر شي تعب وضل مخلي راسو بركبتها ويبكي
كربت ايدي عليه وحضنتو هو وامي
جسم امي بارد اتحسسو ودمعي حار ينزل عليه .. امي اليوم مالها نفس ولا صوت بهالصباح ... امي لاول مره ماترد على حسين وماتبادلني الحضن ..
ما طيبت خاطر ابوي وخلتو مهدود الحيل
امي ودعتنا واحد واحد بدون مانفهمها
امي تدري بنفسها ماتصبح اليوم الا عند ربها

جرتني جدتي من حضنها وجراح اخذو لحسين بره سحلو بالغصب طلعو وجدتي
غطت وجه امي وانا امنعها وهي تردد لا اله الا الله وتخليني اصرخ واملخ بروحي ماريد امي تروح من هييين خلوهه تضل حتى لو ميته خلوهه تضل ادحكها هين بس لاتروح

طلعت ادور ابوي ولكيتو كاعد بكل هداوه وصافن على صورتهم المعلكه هين
نزلت على رجلو وقلتلو ..
- يابه ماتخليهم ياخذون امي فدوه يابه والله متحمل بدون مادحك امي هين ابوس ايدك يابه ماتخليهم ياخذوها
- توسلت كبلك يا يابه واخذوها

ضليت مخليه راسي على رجل ابوي وابكي وهو يسبح ودحكت جراح ورماح دخلو لامي شالوهه من فراشها وردت اروحلها ابوي كضبني وضل عاصر على ايدي
ضليت اصرخ على جراح لا ياخذها بعدني ماشبعت من امي وهو طلع ..
دحكتو طلع شايلهه بين ايديه

تالي رجع رماح وصاح ...
- يابه يلا راح نمشي

هدني ابوي وراح طلع وراهم .. بدون يشمغ ولا عباه ولا حتى مطبك زرار ثوبو الاسود
طلع يتلمس بالحايط ويكضب برماح وراح وره امي ....

جدتي هم طلعت وضليت وحدي اصرخ هين
وحدرت ام حسن تحضني وتهدي بيه وانا نار شبت براسي ماكدر اصدك امي الي نومتها بيدي وبوستها كبل كم ساعه الحين بعد راحت مادحكها !!!!

مادري ايمتى دخلت عمتي ام اسامه تدورني وتصيح باسمي .. قلتلها ...
- عمه امي موهين بعد اخذوها

حضنتني وضلت تبكي على بكيي وحكتلي
- اسامه راجع خابرته راح يجيج بعد كم ساعه هدي نفسج يمه هي الاعمار بيد الله

تمددت بفراش امي واشتم بريحتها وتغطيت بغطاها وشويه وعمتي شالتو عني وحكتلي ..
- كومي اسبحي بنتي يلا مايجوز بعد لزمتي ميت
- لاااا تسمين امي ميته لاااااتسمينهاااا
- استغفر الله استغفر الله ربي الصبر على هالبلاء كومي ياعيني دكومي وياي

جرتني واخذتني للحمام انا ضليت كاعده بالكاع وهي سبحتني وطلعتني خلتني اتمدد على القنفه وراحت ...

دحكت الساعه صارت ١١ واهلي مارجعو
رحت اتصلت بجراح مايرد ولا اي احد من اخوتي يرد ...

ضلت عمتي كاعده حدري وتنشف بشعري
وانا قلتلها ...
- عمي راح وياهم
- اي راح
- ايمتى يرجعون

- شويه هسه شويه ويرجعون

ساعه ١٢ اتصل اسامه ..
- غاليه حبيبتي انتي وين
- هين بيتنا
- اني طبيت حديثه هسه راح اوصل
من الخمسه طلعت علمودج رجعت من الكويت باول طياره
- اسااااامه امي راحت مارجعوها للحين
- هسه يرجعون حبيبي يرجعون لاتضلين تبجين كافي يلا
- ايمتى توصل
- دقايق واني يمج

سديت تلفون وضليت انتظرو احس بغربه والله هين وحدي ...
وسمعت صوت سيارتو بالعجل طلعت تلكيتو وانا ابكي .. حضني ويبوس بوجهي وضل يصبرني ودخلنه كعدنا وهو بس يمسح بدموعي .. تالي دك تلفونو ودحكتو عمي
يتصل .. جاوبو وبعدين حكالي ..
- لازم اروح حبيبي راح يطلعون
- وين يطلعون
- للمقبره رايحين هسه بوجهم من المستشفى
- ليييش مايحدرون هيييين شلون مايخلوني ادحكهااااا
- مادري والله مادري لازم اطلع
- وييين رايح اصبر اروح وياك
-لاااا ماكو روحه اهلج مارادو ياخذون اي مره ضلي هنا
- يول امي هاذي شلون ماحضر دفنتها لاتخبلووووني امي هاااذي امممي
- الله يخليج اهدي بس اهدي
هسه اخابر جراح اصبري

اتصل بجراح وفتح السبيكر قلتلو ..
- جررراح شلون تدفنون امي وانا مو حدرهااا ليش مارجعتوها هيييين ليش
- يولي طالعين احنه بعدين
- راح امشي ويه اسامه ماضل هين
- يولي والله وجلال الله لو طلعتي الباب اعوف الجنازه واحدر اكسرك والله
ضلي بيتك ماعدنا مره تدخل مكابر بنص الزلم وجلال الله لو طلعلك صوت بره احرمك من العزا كلو

سد الخط وانا ضليت ادك على راسي اريد اروح اريد اوكف حدر امي باخر لحظه
وتوسلت باسامه وهو مارد عليه غير ديربالك على نفسك وطلع ..

هين وجعي صار اضعاف الصبح رضيت وكتها بحكم الله بس الحين مارضى بحكمهم
اريد احضر دفنه امي والله ماصايره هاذي والله ....

نحت وبكيت وشلعت الشعر وتمرمرت وحدي هين وعمتي بس ادحكلي وتبكي
تالي وين يلا سمعت الباب انفتحت مالي حيل اروح ادحك منو .. وضليت على كعدتي ودخل اسامه مخبوص ..
كعد حدري على ركبو وكضب وجهي وصار يحكيلي ....
- تسمعيني مووو باوعيلي ركزي وياي
-اييييه
- اسمعي غاليه ابوج تعبان تفهمين شنو تعبان
دفنو امج وهو مدري وين هج متخبل ويه جراح وحسين بالمستشفى يمه بس حر واسر
اخوج وكع على الكبر فقد شالوه لاايد ولارجل
وابويه هنا مختنك الربو خانكه راح اخذه انومه بالمستشفى لان ازرك وجهه
سمعتينييي محد ضل هنا قوي كلهه وكعت
وفاتحه امج انتي مسؤوله بيهه لا توكعين انتي الثانيه اهلج مهدود حيلهم ومحد هنا حتى عماتج مالحكن يجن روحي عاونيهم هاي وكفتج لامج احسن بدل البجي فهمتي
فهمتي حاجيني
- اييه فهمت
- رايح اني ديربالج على نفسج

طلع وانا ضليت ادحك على خطاه ورجع كلامو يرن باذني .. وعمتي وكفتني وخلت العباه على راسي وطلعنه من هالبيت

رحت حدر جدتي وهي حكتلي لاتسوين شي بس سكتي بنتك ..

اخذت بنتي حضنتها ودخلت لغرفه جدتي
ارضعها وابكي ودخلت عمتي تضرب على وجهها وتحكيلي ...
-ولج بنتي مو زين ترضعيها هيج
هسه تختنك صدرج حار من القهر عوفيها يمه عوفيها موزين
- شسوي عمه فهميني شسوي والله ماضل بيه حيل
- سوده عليه يايمه والله حاسه بيج بس بنتج لاتتمرض حليبج الها موزين هسه جيبي اني اداريها ارتاحي انتي

اخذتها وطلعت وانا تمددت وضليت ابكي وتذكرت حسين وحالو بالعجل طلعت رحت ادور على تلفون واخذت تلفون عمتي ام جراح واتصلت على حر سألتو عن حسين
حكالي ... ضغطه مصفر جان وهسه صعد شويه بس يرتاح ويصحى يرجعوه للبيت ..

تحمدت الله لطف بحالو اخوي مادري شلون يعيش بعد امي ..
اتصلت بجراح ورفضني رجعت مرتين اتصلت وهم يرفض .. عفتو وضليت كاعده
ودخلت جدتي خلت بايدي ثوب الاسود
لبستو وانا اشهك احس صدري تشكك وماضل بيه حيل ..

تمددت بالكاع وصرت اتذكر امي البارحه وكلامها وضحكتها واخر شي نظرتها من تحكيلي احبك ماماتي ودعتني امي والله ودعتني تدري بنفسها تموت ماتحملت المرض والوجع بعد ماصبرت للعمليه

ماصرت ادري شيصير هين لحد الليل دخل اسامه وشايل بنتنا وحدر حضني وخلاهه بحضني وكعد .. قلتلو ...
- ماكدرت اسوي شي
- المهم بعدج بحيبج هذا الي اريده
- اسامه ابوي وين حسين شلون صار
- ابوج مادري بي لان جراح ميجاوب
وحسين نايم بغرفته رجعوه الولد من المغرب
- وعمي شلون صار
- زين عفته بره واكف ويه عمامج
- هم اخذته للمستشفى
-ايي كالعاده اوكسجين وابر موسعه قصبات
تدرين هو بعده دايخ بس مايرضى يدخل يرتاح
-ليييش
- لان بس يدخل راح ينام علاج الربو مالته ينومه بهيج حاله ويرخي جسمه وهو مكابر بعده كاعد تك عين مفتح
- خطيه اسامه اجبرو يدخل
- يستحي من الزلم شلون يعوفهم وينام
- بس هو مريض الحين حالتو تختلف
امشي دخلو الله يخليك كسر كلبي والله اخذه لبيتنه خليه ينام
- يلا زين رايح
- اسامه فدوه سويلي طريق اريد ادحك حسين
- ماشي شويه واجي اخذج

من اول ماطلع وانا مشيت لبست الشال وخليت نصو ينزل على وجهي ولبست العباه وضليت انتظرو حدر الباب ..
وشويه ورجع وطلعنه ..

هاذي اول مره امشي واسمع صوت الرجال هين كريب حدري و عينهم ولو من بعيد بس احسها تدحكلي ..
دخلت بيتنه بالعجل .. ودحكت عمي نايم على القنفه هين .. صعدت فوك ودخلت دحكت حسين نايم ورافعين رجله على المخاد
وخلين بايده المغذي بعدهم معلكيه هين فوك بالشباك ..

كعدت حدرو وضليت ابكي عليه .. البارحه كان يضحك وصوتو مالي البيت اليوم روحو ذبلانه ..
بوستو وضليت مخليه راسي على صدرو
واسر حكالي ..
- خليه نايم احسن
- حكولك راح يتحسن مايضل هيك !
- اييه للصبح يرجع زين لتخافين

كضبت ايدو ابوسها ودخل اسامه يسألني على الفراش وين ..
رحت وياه وطلعتلو فراش وقلتلو ..
-راح انام حدر حسين
- لاا نامي يمي هسه افرش لابويه واجي هنا نام بغرفتج
-بس انا اريد اضل حدر اخوي خاف يحتاجني
- كلت لاا

نزل وانا دخلت دحكت حسين على نومتو
تأكدت من اخوتي يضلون هين حدرو ورحت لغرفتي ..
وره شويه دخل اسامه وشايل ماعون فواكه وبطل مي ..
كعد حدري وشربني مي وحكالي ..
- لازم تاكلين باجر وراج يوم طويل وصعب
اخوج تعبان لازم اداريه وبنتج تحتاجج
- ماكدر والله ماكدر
- كلنه منكدر هسه وروحنه محتركه وعقلنا طاير بس لازم نوكف ونشد حيلنه
- اسامه صرت يتيمه انا امي ماتت
- الله يرحمها ويسهل عليها هالليله باخرتها
اني هم يتيم وابويه ميت وهم تأذيت وانكسرت وبجيت بس عشت لازم نعيش حبيبي لازم نعيش اذا مو لنفسنه فلاهلنا
عندج اب واخ منهارين يحتاجون وكفتج
واني احتاجج مريتي مو انتي سندي وام بيتي
شلون تعوفيني بدون سند ! تعوفين بنتنا من ايد لايد !
-لاااا
- لو امج الصاير بيهه هالشي جان معافتج
وشالت الكل على راسهه صيري قويه مثل امج مو تكولين اني قويه من اربع جهاتي
وين قوتج ! يلا لازم تبينيهه هالايام

حضنتو وبديت اخذ نفس واهدأ وقررت ادفن هالحزن بالگلب واداري اهلي ..

نمت بحضنو هالليله وهو كعدني الفجر
وتذكرت فجر البارحه شلون كان اسود
بالعجل نزلت دموعي وهو مسحهم ويحكيلي
- اذا تحبيني كافي بجي لخاطري لاتبجين

بوست ايدو وبعدها نزلنه دحكت جراح هين نايم على القنفه .. بالعجل فتحت باب الغرفه
ودحكت ابوي نايم هين ..

ردت اكعد جراح واسامه ماخلاني .. بس دحكت عمي مو هين .. قلتلو..
- عمي طلع يجوز يشم هوا
- مادري بس سيارتي مو هنا اكيد طلع بيهه
- وين يروح بهالصباح ؟
- الله اعلم ابويه ماينفهم

رحت حضرت الريوك وكعدنا ناكل انا واسامه بالمطبخ .. ومن صارت ساعه سته ونص دك المنبه بتلفون جراح ..
رحت اطفيه كبل لا يكعد بس مالحكت عليه
لكيته كاعد ويفرك بعيونو ..

من دحكني اشرلي احدر .. رحت حضنتو وقلتلو ..
- ليش ياخيي لييش
- لو واصله انا الي اموت ومااندفن
- بس هاذي جنازه ضلت بكلبي ياخيي ماحضرت حدر امي هاليوم
- هذا بيت امك وريحتها هين ضلي بي
طلعه حدر الرجال وصوتك بنصهم ينسمع لااا والله ماتصير وحتى اليوم لو سمعت صوتك على وانسمع بره ادخل اجنزك وارجعك لبغداد واحرمك من العزا
-جراااح شبيك وياي شسويتلك اناا
- غاليه تعبان وروحي طافره جاي انبه عليكي بهالشي حتى لا تصل بيه مواصيل ادخل عليكي اعمى واتصرف بالي مايرضيكي اخيتي عمري كلو حافظك من العين ومايعرفك بشر لا تضيعين تعبي
زين
- زين خيي تأمر ما يطلعلي صوت وحتى من هالبيت مااطلع واعتب الباب
- اييه عفيه مالك لازم بشي هنيكه يدبرون كل شي واذا تتحملين تمشين حدرهم ساعه مايبدا العزا فاطلعي من الحين لان راح ننصب الجادر وبعد مايفرغ الشارع واذا ماتتحملين ضلي هين احسن
- مادري خيي مادري
- فكري وشوري رجلك واذا بنفسك خليه ياخذك الحين
- زين كبل ماروح اريد اعرف وين كنت !
ابوي شصار بحالو ! ليش مارديت على احد
هواي اتصلنه عليك وضل بالنه على ابوي
- خايف عليه ياغاليه ابوي سوا العجب
.
.
يتبع

#شقراء_بغداد

الجزء_الثاني_بارت_٢٨


صباح اظلم كان هاليوم .. شلت بايدي الحرمه الي ياما تكاسمت حدرها الضحكه و اشكال الحلى وصغار السوالف والتفاصيل ..

الحرمه الي من يوم الوعيت بي وانا ادورها بعيني واتطمن على الي تمنيت بشبابي الاكي مثلها تصير عون الي انا جراح مثل ماصارت هالحرمه الغريبه عون لابوي وسندتو بيوم انا ولدو نفسي حزام ظهرو بكبرتو ماكدرت اسندو ..

بايدي شلتها بتابوت على كتافي وحدري اخوتي الي كلها تصيح .. لااا ياربي عمتنا صغيره على الموت ...
تناسينا بكثر ما نعزها ان الموت قدر على الكبير والصغير برمش العين يحدر ..

حسين كان اصعب شي واجهني بهالدفنه
وابوي كان كسره ظهري وكسره كلبي
اعرفو يدحك الدنيا بعينها بس الي دحكتو بعيني شي يختلف ...

كان قوي مكابر على كل خطوه مشيناها بيها
للحظه ما همرنا عليها التراب هين طلع صوتو ...
ابوي هين ماحسب حساب احد صار بعالي الصوت يحكيلها ...

- انااا اشهد ان لا اله الا الله وان الموت حك
وانا اشهد انك انتي اميره النساء وان الدنيا من بعدك فناء و اشهد ان النور بوجودي انتي واشهد ان موتي انتي واشهد اني ماحييت ولا صرت الا حدرك انتي واشهد ان هالعين بعدك عميه وان الحيل مدفون حدرك واشهد اني بغير صوتك مااعيش

دحكت ابوي يلم حفنه تراب ويحط بجيبو
وبعدها هين وكع حسين واخذوه الولد بالعجل
للسياره انداريت وادحك ابوي يمشى ويتعثر
ركضت حدرو كضبتو وقلتلو..
- يابه شد حيلك العزا بعدو مابدا
- اخذني للسياره وحدنا امشي

اخذتو بسيارتنا وبس حركت حكالي اطلع للنجف .. وطلعت بي للنجف ..
طلب نزور المكبره اول و وكفنا حدر دفان ابوي وصفلو المكان وهو صعد ويانه اخذنا حدرو ..

نزلنه هين وابوي مشى يتلمس كبر رجل
وطش التراب على كبرو وضل كاعد حدرو ويبكي يحكيلو ..
- هاذي الامانه رجعتها حدرك اليوم
صنتها بروحي بس ماكدرت اسلم عليها من الاذى ياعم والله عييت افهم كثر فداها لي
عييت افهم سبب عيشتي على موتها
مارايد العيشه على حسابها والله من هذاااك اليوم لليوم وانا اتمنى لو ميت بغدر ولا مرضها
ياعم احبيبتي حدرك رجعت مادفنتها حدر اهلها هين ماكدر على بعادها بس تلاكيها وحيده وغريبه الحين لاتخليها والله اني ماعودتها على الوحده والغرب والخوف
والله انها هسه تدورك دايماً كانت تذكرك لاتنساهه بهاليوم ياعمي لا تنساهه

قريتلهم الفاتحه واخذت ابوي للسياره ومشينا لحضره الامام .. اول مره ابوي مايمشي الا محني الظهر منزل الراس متبهذل اللبس
امشي بايدي وثكلو كله على جسمي
دخلتو الامام وهين ابوي انهار بعد ماكدرت عليه ... من ويل حالتو كل الي حدرو خلوه براحتو وسعو اله المكان وضل ابوي كاعد وكاضب الشباك وينعى فراكها ..
مو كل الكلام اكدر افهمو من بين هالبكي
بس الي رسخ بالي ..
- شلون بلوعه الكلب ياعلي
شلون على فراك الاعزاز
من صبر الصبرته بفراك ام بيتك صبرني
مؤمن انا بامر الله و اشهد ان لاحي غيرو
بس ماعلمتونه منين نجيب الصبر تعودناه منكم هبه توهبوه للحي
اوهبني الصبر ياربي انا مااعقلها هالليله تينتي بنص التراب تبات مو بين ايديه
ياربي ماضل بالعقل حيل ويتصبر ويتناسى
دفنتو روحي وخليتو جسمي مفجوع بلياهه
رجيتك يامن ضكت لوعه العشك رجيتك
توكفلها هالليله رجيتك لاتخليها بين منكر ونكير حايره دخيل وداك بابك وما ينرد الدخيل
ضل ابوي يضرب براسو بالشباك وانا اكضبو وهو يصيح يولي تين شلون حالك يولي .. عاوني رجال كبير على اخذو من هين وابوي كان ينزف خشمو دم صبغ لحيتو
البيضه .. متكابلين عليه واخذناه لمفرزه هين
وكفو الدم وضربوه ابر تنزل ضغطو
وضليت كاعد حدرو اريد اخذو للمستشفى هين مااندلها ومن اسأل يحكولي هالابر كافيه
ساعه واخذو للبيت يرتاح ..

وضليت حدرو اغسل وجهو واقفل ازرار ثوبو وهو يون وماينفهم كلامو
صرت ادحكو يغفي عاد عاونوني الولد عليه واخذتو للسياره ورجعنه لحديثه بنص الليل
اخذتو خليتو على ظهري ودخلتو لغرفتو هين نومتو على نفس الفراش وحدو بدون عمتي
وضليت حاير شلون بساعه الي يصحى !!

صعدت دحكت حسين نايم وحالو حال ابوي مايفرك عنو شي ..
نزلت دحكت العم ابو سالم هين وصوت نفسو يخرخش ..
انجضعت ونمت تعبان ماحسيت الا على صوت المنبه .. فتحت عيني وتذكرت صعب اليوم الي منتظرنا ...

دحكت اخيتي هين حكيتلها على السواه ابوي
وطلعت احضر للعزا ..

اول يوم اتصرف بدون مشوره الشيخ واول يوم ادحك ابوي كاعد بلا يشمغ ولا عباه المشيخه ولا سبحه بايدو ..
كاعد باول الجادر ويرد السلام بس والي يصبرو وياخذ بخاطرو يهز براسو بس
وانا الي اتكفل بالرد واصيح للولد يضيفهم كهوه و اوجه الكل لان ماحضرو اهل بيتي عزاء همه يتكفلوه من كبل وكلهم مايعرفون اي شي لازم يصير وباي وكت ...

صار الغدا وابوي من البارحه لليوم حتى المي ماشربو بس صافن .. توسلتو ياكل
مايرد ولا يدحك لوجهي ..

انتبهت هين على اسامه محتار بابوه

كل ساعتين راجعتلو نوبه الربو قلتلو ياخذو للبيت يرجع معذور وابوه ما رضى يتحرك من هين ..

خليتهم ياخذوه بره يتنفس ويرتاح مالنه حيل وكعه مريض بعد ..

حسين كعد الظهر بس نزل هين ودحك ابوي رجع وكع يمشي خطوتين ويوكع
ارسلت على مضمد هين نعرفو
وكفلتو بحالتو تالي عرفت ان ضغطو نازل مابيه حيل وضالين منوميه بغرفتو
وحدرو اسر هذا الي كدرتلو عليه ..

صار الليل وكفت الناس وابوي كضب كتفي ومشى وطلب اخذو لكبر عمتي ..
انا مااجادل ويه ابوي لان افهم هين مايصح الجدل ...

اخذتو الها ونزلتو حدرها .. قريتلها الفاتحه ومشيت بعيد عنه ضليت بس ادحكلو شلون يشبر التراب بايدو ويرتبو من الحواف
يبكي وينوح عليها ويترس وجهو بترابها
امشي اخذو من فوك التراب واخليه بالسياره وهو مايحس عليه لايعترض ولا يدحكلي ولا ينطق بشي بس راسو يرجف ...

رجعت للبيت دحكت حسين بالشارع وابن عمي حسن مكتف ايديه وره ظهرو واخوتي كلهم حدرو يهدون بي وهو يصرخ عليهم ومن دحكني نزلت ابوي ضل يصرخ عليه
ليش مااخذتو لكبر امو ليش بس ابوي يحكلو يروحلها ...

دخلت ابوي لغرفتو و وصيتهم يجيبون غاليه حدرو ورحت لحسين اخذتو بحضني ومشيت بي لحديقتنه كعدتو ..
قلتلو ..
- حسين يا يابه ارتاح واكل كوي حيلك واخذك الها
- مااارتاح انااا بدونها مارتاح وهسه تاخذني الها والا والله اهج بهاليل وحدي ماتلكوني بعد
والله وترابها مارجع لهين بعد
- لا اله الا الله يولي هسه ان رحت شستفاد
هين اكعد صلي واذكرها بالدعاء احسن من البكي على التراب
- ماريد اصلي اريد اروووووح حدر امي
تاخذني لو اروح اناااا
- امشي يلا اذا روحتك تعقلك امشي

اخذتو ورجعت لمكبره الرحمن هين احنه ندفن بحديثه ...
حسين انا ماكدر ادحكو بهالحال متعذب
مشيت بعيد عنو ماردت حتى اسمعو
انا كلبي على اهلي لين وبالعجل يتفطر
ولزوم اضل كوي حدرهم مااتأثر

حسبتلو نص ساعه ورجعت عليه قلتلو ..
- حسين امك ماترضى السويته بنفسك
ماتعرفها اذيتها هي اذاك
وانته كاعد تاذيها هين تخليها محتاره بامرك
ياخوي هذا امر الله واحنه رجال ندفن الحزن بالكلب ونمشي عليه مانرضاها الك المناحه
هين والمصايح بنص الشارع والعالم يتفرجون على ضعفك ماارضاها لا انا ولا امك
- يول انا ماعندي فكر ماااعندي لا تحكي ماافهمك
- لزوم تفهم ان مافهمتو اليوم تفهمو بكرا
هذا عمر مو بيدك توكفو تتحمل غصب عنك مو صغير وعافتك امك انته رجال مشورب وعليك الاعتماد
- يعني رجال ماتبكي ماعدها كلب
مو حجر انااا مو حجر هاذي امي تفهم شنو امي
- افهم افهم وماامنعك تبكي بس كوي حيلك كدام اهلنا وابكي بغرفتك اذكرها بينك وبين ربك .. امشي نرجع يلا خلينه ابوي وحدو
امشي ندحك حال ابونا حسين افهم ابونا محتاجنا حدرو لا تكسموني نصين كل واحد يكع من جهه واحير بينكم شد حيلك ياخوي
هو البقاء لله

اخذتو ورجعنه دحكت ساعه ٢ بالليل وغاليه كاعده بالحديقه تبكي وبالعجل حدرت علينه
حضنت حسين وهو يحكيلها ..
- امي ريحه ترابها طيبه ياغاليه والله طيبه
بس هالمره بارده مو دافيه مثلها

جريتهم اثنينهم حضنتهم واهدي بيهم وغاليه حكتلي ..
- خيي خوالنا ضلو بالمضيف حدر عمي واسامه امشيلهم اسألهم خاف اعتازو شي ويخجلون يطلبو
- زين يابه هو انا بالاصل رايح ادحك عمك
اخذي حسين خليه ياكل
- حسين هين ورود تنتظرك مارجعت
ضلت هي وامها هين كاعدات حدر جدتي
- روحلها حسين يلا ياخوي روح
- ماريد راح اطلع
- يول وين ماشي البنت تنتظرك سلم عليها وروح
- ماريد ادحك اي احد

طلع وانا مشيت وراه قلتلو ..
- يول هين امشي لخوالك
- جراح مالي خلك دخيل ربك عوفني
- وين رايح
-انام
- يول هين عماتنه وبناتهن وين ماشي
- اصعد فوك مادحك احد

ضليت ادحكلو وهو دخل بيتنا وانا مشيت للمضيف سلمت على الخوال ودحكت ابو سالم منجضع هين وحدرو جهاز الاوكسجين مخليه بوجهه .. عتبت عليه وطلبت من اسامه ياخذو لبيتو يرتاح وهو مايرضى ويقول للصبح اصير زين ..

اتصلت بغاليه وقلتلها ..
- غلوي اخذي خطيبه حسين لبيتنا خليهه تكعد حدرو تواسيه وتشد عزمو
- ياخيي اخاف مايرضى ونتكاون
- لا اخذيها بس انتي لا تدخلين لاتخلين امها تمشي بس هي اخذيها وانا ارسلك اسر الحين يوصلكم
- زين بس ردت احكيلك ان ابوي مقفل بابو من ساعه مارجع ومايرد عليه
- استغفر الله هو مااكل بعدو
-لاا بس طلب تمرات واخذتلو اكلهن بس هاذي
- خليه براحتو لا تزعجيه تحضري يلا

سديت الخط واشرت لاسر يروحلهم
ادحك هين خوالهم صافنين بالحياطين
ومصطفى تدمع عينو بسكات ..
خليتهم يرتاحو وينامو وطلعت رحت كعدت بحديقتنه وافكر بحال اهلنا شلون يتغير بعد هاليوم ؟

اتصلت غاليه جاوبتها..
- ها غلوي
- خيي راح اضل هين هالليله لان ورود ضلت حدر حسين ومارضت ترجع
- زين تسوي ضلي براحتك
- نام عند ابوي تره جدتي وامها هين رجعو ونامو الحين ضل ابوي وحدو
- يلا رايح

رحت لبيت عمتي ووالله احسه انطفى بعدها

عمتي تأثيرها كبير علينا كلنا ما بينا حد ما انكسر على غيابها وكلنا حاسين بفراغها هين

دكيت الباب على ابوي كم مره وهو ردلي زين روح نام ..
سبحت ونمت هين والصبح كعدت على المنبه
ورحت ادك الباب على ابوي مايرد فتحتو
ودخلت دحكتو كاعد بالكاع وصافن وبحجرو ثوب ابيض .. نزلت حدرو وبوست راسو
قلتلو..
- يابه اليوم ريوكك من ايدي نطلع ناكل هين على الهوا الطيب وحدنا والجو هادىء يريح بالك شويه
- صار هذا الصباح الثالث ماسمعتلها صوت
يول انا شلون عايش للحين
- يابه قضاء الله هذا والجزع حرام يا يابه
- لا تلومني يا يابه مااملك هالكلب انا مااملكو
- فاهمك والله فاهمك وكلنا متاذين على فراكها بس يابه احنه ناخذ الحيل منك لزوم تتكوى
هاليوم هي محتاجه لوكفتك انته وحسين مو انتو اهلها لزوم تكومون بواجب عزاها
يا يابه رادتكم ذخر لهاليوم شد حيلك كوي كلبك لا تخلي عليك شامت انته الشيخ هين
والشيوخ ما تنكسر ولا ينهدلها حيل
كوي كلبك يومين ضلن يا يابه كوي كلبك

اخذت ايده وكفته واخذته يغسل وكعدتو بالحديقه ورحت للمطبخ خدرت جاي وجبن خليت واخذتلو .. الف الخبزه واخليها بايدو
وارجع اذكرو لزوم يوكف على حيلو هاليومين ولزوم يداري حسين وعلى هالحال
كدرت اخليه يرجع لوعيو ويطلع يسلم على العالم هين ...

حسين هم دحكتو اليوم واكف حدرنا وخوالو ماتركوه وحدو ..
كان النهار يمشي بصمت وسلام بس الليل
يكضي بالمكبره ..
اثنينهم ادحكهم يمشون للسياره ينتظروني
واخذهم واضل هناك ادحكلهم يتباكون على هالتراب احسبلهم نص ساعه واخذهم بالتواسيل للبيت ..

خلصت الفاتحه ورجعت الكل لبيوتها وضلت غاليه هين حدر اخوها .. حسين متعصب وماينحمل صاير ويصرخ بوجه كل من يكربو .. حابس نفسو بغرفتو وحتى تلفون مايكربو ...

ابوي من بعد ماخلصت الفاتحه بدا هين يفقد
صار يطب ويطلع بغرف البيت يصيح
يولو ياتين منين اصلك
يولو عينك الي بعيني طفت بغيابك يولو مادحك اهون عليكي يولو !

انا مابين البيتين والدوام والمضيف مفتح ابوابو بس محد يدخلو لان ابوي مو هين
محد يكرب صوبو ..
تلفوني مايسكت على طول اليوم اصحاب ابوي ومعارفو يتصلون يتطمنون ويعزون
واخوتي كل شويه واحد طالعتلو سالفه
وغاليه تخابرني تبكي محتاره ويه حسين
كلشي تسويلو يحكيلها ماتفهمين وماتعرفين امي مو هالشكل تسوي وانتي مو مثلها ماتصيرين مكان امي ..

يوم السابع ذبحنا وطبخو الاهل اشكال الاكل وتوزع للجيران والخوال هين حدرو وعيال غاليه والبيت مليان ناس ..

ابوي على شكلو ضل ثوبو اسود كل ما اقفل ازرارو ادحكو بعدين مفتحها وكاعد مفجوع
من خوفي على ذكرو بهالايام بعدين على لسان الغير ماخليت احد يدحكو والي يطلب يلاكيه احكيلو مريض وبس يتحسن هلا بيكم

بالليل بعد مافرغنا من الضيوف رحت كعدت حدر ابوي الي كان صافن على الصوره الي معلكه الهم وهمه بالعمره واندكت الباب
طلعت ودحكتو عمي ابو حسن ..
دخل بالعجل رغم انا ماكنت اريد يدحك ابوي بهالحال ..

كعدنا وعمي صار يصبر ابوي ويحكيلو
كل احنه على هالدرب اليوم لها بكرا النه
وهذا قضاء الله والعمر مايوكف على احد
عاد ابوي رد على حكيو ...

- لجت ضواري و فرجت عويت الذيب
يوم انه عوا حث الهموم الدفينه

ينعى حبيباً شطب الكلب تشطيب
كاس المراره شربنا معه طينه

يابو حسن في بها عالم الغيب
لكن عذاب الكلب لوعه جنينه

والله لوما اخاف كاله العيب
الا اسوي فوك كبره فنينه

احس كأن يخمش في ضامري شيب
وانوه نوه الي نشلت يمينه

ووسط الف شراره تحز مثل المحاديب
يولي مشارك الروح وينه !!

باريتهم وسنين وكتي مغاضيب
ومو عيب هو بيوم عكر جبينه

ولا كشف سري بيوم بين الاجانيب
وصان الامانه وحطها بموك عينه

هذا اليدور سالمات العذاريب
نفوسن عفيفه وبالهداوي رفيعه

في صبرها عدت زمان المصاعيب
وفي حلمها سعدهه علينه

الااا ياعين حي ذيك الرموش المهاذيب
وزيدي عليهن عبرتي يا حزينه

هيهات ياخالد مثل طبعها تجيب
بنات حوى واسأل مجاورينه

ما أسب خلك الله لكن عارضي شيب
وهي الحنون الي ماتعرف الضغينه

حگي عليها اجوض ثم اشعط الجيب
وحگي ان هذيت وصحت يولي ياتينه

وحگي لو ان الهموم سوت بي جناديب
ويني وانا الي شفت السعد من يدينه !

وطربت بوم بعاليات الشخانيب
ثم قلت ياام حسين حدري هينه

ادوي على فخر بني الرعابيب
قوليلها حال الرهاين بكينه

يولي جروحنا والله عيت تطيب
ما غير بعزوم الكريم اعتزينه

يجعل لها الكوثر هني المشاريب
ردو امين يالسامعينه

ابوي كان يقرا هالابيات ويأشر على صورتها
ينطقها والعبره خانكتو وعلى كل بيتين يسكت شويه ويكمل بصوت مخنوك ..
رددنا امين وهو من بعدها مشى لغرفتو وسد بابو .. عمي طلع وقفلت الباب وراه ورجعت ادحك غاليه بالمطبخ حاضنه بنتها تلولي الها وتبكي .. حضنتها وقلتلها ..
- كافي يولو ارحمي نفسك هذا امر الله
- ياخيي كلبي مجمر بفراكها هاذي امي كلشي بحياتي انا ماعشت يوم بدون صوتها
هي صديقتي واخيتي وخسرتهم الحين

- غلوي لا تفكرين بس بنفسك فكري بامك
تذكرين شلون كانت تعبانه من مرضها
المرض مو هين على حالها الضعيف
ولو ضاله عايشه بعد تتاذى اكثر انتي تريدين امك تتاذى لو ترتاح !؟
- اريدها ترتاح بس مو بالموت
- هذا المرض ماله راحه غير موت الجسد
فكري انها الحين مرتاحه من مرضها هي بس غابت بجسدها من هين وروحها ضلت حدركم ماتفاركم
- جراح احبها ماكدر صعب علي والله صعب
- انتي اليوم ام مثلها انتبهي على عيالك وصبري نفسك الموت قدر كل مخلوق
ما منه مهرب كوي كلبك
- ان شاء الله
- ترجعين لبيتك بكرا ترتاحين مو احسن الك ولبنتك
-لااا ما خلي ابوي وحدو
- ابوي ما تكدرين تكربيه ولا حسين كلمن انعزل بنفسو لا تضلين هين تعبانه ارجعي ارتاحي بيتك
- ماريد ارجع انا هين مرتاحه بينهم ارتاح
- زين يابه كيفك
يلا ما تفرشيلنه نام خلي انوم مزنه بحضني اليوم مشتاكلها

خلتها بايدي وراحت تفرشلنه ونمنه هين اثنينه
يوم الثامن صبحنا بحمد الله ..
دخلت امي شايله الريوك ورادت تدخل ادحك ابوي وهو كان مقفل الباب .. ضلت تواسي بغاليه وتشد حيلها وتنتظر ابوي يطلع وما طلع .. رجعت بعدها لبيتها وانا عتبت على ابوي من وره الباب قلتلو ..
- يابه ليش ماتطلع ادحك امي مو هين حدرت وبالهه عليك صارلهه كم يوم ما سمعت منك الكلمه لايمتى تضل هالشكل يا يابه

اسمعو يكح بس مايردلي جواب خليتو براحتو
وطلعت ادحك امور بيتنا ..
للمغرب غاليه اتصلت وحكتلي ان ابوي طالبني وحدي وكاعد ينتظرني بالاستقبال
عفت كل شي ومشيتلو ..

دخلت سلمت عليه وبوست راسو وايدو
وكعدت حدرو وهو حكالي ..
- وصي اخيتك تصعد غرفتها وتسد بابها
-ابشر يابه

رحت لاخيتي واجبرتها تصعد ذممتها ماتنزل
ورجعت لابوي سديت الباب وكعدت حدرو
قلتلو..
- اييه يابه آمر
- اريدك تسجل وصيتي
- اذكر الله يابه عمرك طويل ان شاء ومنحتاج هالوصيه
- العمر رمشه عين يا يابه رمشه عين
وانا من بعد هاليوم ماريد ادحك احد اريد اوصيك على ثكال الي املكو واعيش خالي البال منكم
-ليش يا يابه تريد تعزل روحك عنا هو احنه من النه غيرك هالعايله بكبرها واكفه على حيلها بوجودك .. حسين وغاليه يتصبرون بيك يا يابه لا تخليهم وحدهم محتاجيك همه
- يول انا الي خسرتو يستاهل انصبلو الحزن
بهالصدر سنين وتحرم على عيني عشره بشر بعدو يول انتو لو عايشين يومين من العشتهم حدرها كان ما تلوموني بمصابي عليها
- مانلومك يابه ندري كلنه ندري بمعزتها
وحسن عشرتكم بس انا بالي على حسين وغاليه محتاجيك يا يابه انا ماكدر على الي تكدر عليه انته
- ماناسيهم وتضل عيني عليهم بس اريد انعزل بيهم هين مرتاح البال من الي بره
- على الي تأمرو يابه اسمعك
- افتح تسجيل بتلفونك حتى يضل على كلامي شاهد
- صار يابه صار

فتحت تسجيل الصوت وقلتلو..
- اييه يابه اسمعك
- فتحتو لهذا المسجل
-اييه فتحتو
- اسمع ياجراح هالوصيه هي وصيه المرحومه بولدها انقلها الكم وتتنفذ بالحرف
-الله يرحمها تأمر يابه انته وعمتي تأمرون
ابشر ما نزل عنها
- هالبيت هو بيت غاليه حصتها ورثها من امها ، بهذاك الزمان وكت ماكانت غاليه عمرها بالخمس سنين هي طلبت ابني هالبيت
الها رادتلها ورث من امها بكبرتها ترثو
ما كنا بوكتها متزوجين كان همها وفكرها الوحيد هو غاليه وجمعت الفلس على الفلس
و خلتلها هالبيت ذخر الها
هالبيت بيت غاليه هي حره بي
اخيتكم تورثوها هالبيت وحصتها من ميراث ابوها انتم وكرمكم عليها
معلوم يابه !
- اييه يابه معلوم
- واخيك حسين امه وصت كل ذهبها حصتو
وحدو وكل فلس هي جامعتو هين هم حصتو وحدو وانا كاتب الكاع الي حدر هالبيت باسم حسين ماخليتها تنبنى كل هالسنين لاني رايدها لحسين حتى اخيكم يضل حدركم
هالكاع هاذي سندها اكضبو خليه عندك
وكل من يسمع كلامي هذا خليه يفهم
ان الي يأذي حسين يتاذى
الي يظلم حسين ينظلم
الي يعيل بحسين ما يسلم بدنياه ولا اخرتو
لااا تأذون حسين يا يابه كلمن يريد يسلم على نفسه ودنياه لا يأذي حسين ولا بكلمه لا تأذون حسين يولو والله وجلال الله ما تسلمون من الاذى وانا مااقولها من محبتي اله
انا انبهكم على الي دحكتو بهالعين الي اليوم عمت ماادحك غير خيال
حسين امه كانت كل ما يرتفع اذان الفجر
وهي ماتكدر تكوم للصلاه تضل تدعي لحسين
انا سمعتها ودحكتها وشهدت على دعائها
و الي سمعتو يرجف البدن يا يابه يرجفو
امه كانت تسمع صوت تكبير الاذان وهي
تصير تكبر الله وتصيح ابني حسين يارب
يصيح المؤذن حي على الصلاه وهي تتعذر
من ربها على عجزها لهالنداء
ويصيح حي على الفلاح هي ترد
فلاحي بحسين يارب وصلاحي بحسين
ما يخفت صوت المؤذن الا وهي تقول
اودعتك حسين ابني وحيدي وانته الله الاكبر القادر المقتدر ما ترد ضعيف الحال
اريد كون الي يأذي حسين يتأذى والي يكيد لحسين ما يسلم من كيدو كون الي بصدر حسين من هم يرجع مضاعف على كارهينو
كون الي يذم حسين ينذم والي يسعد حسين
ينال راحه الدنيا والاخره