ومثل ماتعودنا اول ماتصعد الطياره تحكيلي ومن تنزل تحكيلي و مكان نومك وين يصير تصورلي وتنتبه على اكلك بلا اللحوم بغير دول ماتعرف اصلها وخزنها شلون
- صار بعد
- لا تسبح وتطلع بوجهك للهوا تتمرض وهاي انا دائماً انبهك عليها
- شلون لعد تعرفيني اسبح يلا اطلع
-ايييه نشف شعرك زين لا بس تمشط وتطلع سشور وخليه ينشف
- ماشي
- انته تنام وحدك لو حدرك جماعتك يعني
- وحدي
-اي زين عجل تخابرني كبل ماتنام واذا كنت مشغول بشي وماتكدر ترد على اتصالي ارسلي بالواتساب وطمني زين
- زين حبيبي زين
- و اقرا ايه الكرسي كبل ماتبدا رحلتك لا تستهين بيها وتنساها
- وعيونج ماناسيها اقراهه
- زين وارجعلي بسلامه
- ان شاء الله ارجعلج لاتخافين بعدني ماشبعت ماعوفج
- ههههه يابعد عمري .. وين رحلتك الاولى
- بيروت ذهاب واياب اتاخر بيهه شويه
- توصل بالسلامه ، يلا ننزل حضرتلك الاكل
- شنو هالدلال من الصبح والله اغم الي مايتزوج

ضحكت واخذت ايده ونزلنه اول ماكعد باوع على الاكل جان يكولي ..
- غاليتي اريد زعتر وزيت زيتون شويه
- لحظه

جبتهن اله وهو ضاف شويه من الزيت على الزعتر وصار يخلي الجبن بالصمونه ويضيف فوكاهه من الزعتر وياكل ..
حكالي ..
— الزعتر وين ماتحطينه بأي اكله تلكيه يعجبني ابد لا تنسيه بريوكي
- من عيوني

كرصني بخدي وكمل اكله ياكل لكمه ويدحك للساعه بايده .. دخلت عمتي صبحت علينه
وهو وكف بوسهه و ودعهه واشرلي اطلع وراه .. رحت وهو اخذ جنطتو خلاهه بالسياره ورجعلي ..

واكفين حدر السياره وهو حضني قلتلو ..
-اسامه لا تدحكنا امك عيب
- ماتجي وداعتج حشتاقلج غاليتي صارلج عشره ايام وياي بس تعودت عليج حيييل
- وانا بعدني ماشبعت منك
- اوعدج بس ارجع اطول نزلتي عشر ايام واعوضج
- يابعد عمري ان شاء الله ترجعلي بالسلامه
- الله يسلمج اذا بنفسج شي كوليلي شوكت مجان واجيبلج
- بس انتبه على الي وصيتك عليه كل شي مااريد غيرو
- هههه يدلل حبيبي

بوس خدي وصعد بسيارته وطلع ورجع نزل سد الباب وراح ضلت الدمعه بعيني
ماكنت اظن روحتو هالشكل صعبه

دخلت للبيت وصرت الم بشعري واظفرو
ودحكت عمي نزل من فوك بالعجل شهكت وقلت هذا كان بمكتبو عجل اكيد دحكنا !!!
ياخجلتي منو ياخجلتتتتي ..

مشيت بالعجل للمطبخ وعمتي واكفه تحضر الاكل قلتلي ..
- هاا بنتي شبيج
- اا عمه اسامه مشى
- يوصل بالسلامه ان شاء الله
- اسوي شي عنك
- لا ماعندي شي بس اكمل بيضات الحجيه تحبهن مسلوكات
- زين عجل انا صاعده اصلي الفجر تاخرت عنها

رحت صليت ورتبت غرفتي واتصلت على امي صبحت عليها وسألتها عن الاحوال وحكتلي ماكو شي جديد كلشي هادىء هين

كل الصباح انا اتحسر على اخوي والله مارضيتلو هالطلعه ولا بلعتها عجل جراح هو ابو البيت يصفى بالشارع وحيد !!

امي كانت كل ساعتين ترسلي امشي سوي هالشي واطبخي هالشي وانا على تعاليمها امشي ...

كعدت حدر الحجيه وعمتي وهديل ماكعدت الا على الغدا .. دحكت عمتي ام اسامه هي الي تطبخ وتصب وعمتي ام سالم ماحطت ايدها بشي من ساعه ماكعدت
عمي ملتهي بالزرعات وماكعد حدرنا
الا وكت ماصار الغدا يلا دخل ..

دحكت طبعهم هادىء بارد بكل شي .. ماكو بينهم روح العايله .. ادحكهم كاعدين سوا بس همه كل واحد منعزل عن الثاني ..

الاكل مايخلوه الا على ميز كبير صاير بساحه الدرج .. كل واحد وماعونه الخاص
وادوات اكلو ومحد يحكي ولا حرف كلهم مندمجين باكلهم وساكتين ..

انا ماالفت هالجو .. وين انا متعوده على هوسه اخوتي وسوالف ابوي وجدتي اقل شي ابوي يتطمن علينه واحد واحد ويسمعنا كلمه الله يرضى عليك يابه ..
هين عمي من ساعه ماكعد للحين ماسمعتو نطق حرفين ويه احد ...

دحكتهم كملو اكل و هديل بالعجل كامت تلم المواعين وتاخذهم للمطبخ .. وكفت ساعدتها
وهمه على كعدتهم ..
دحكتهم غسلو ورجعو كعدو نفس مكانهم
وعمتي ام اسامه واكفه تريد تحضر الجاي
وهديل تغسل المواعين .. قلتلها ..
- عمه عنك انا احضرو روحي اكعدي
- لا خلي اعلمج شلون تصبيه وبعد عليج انتي سويه

طلعت صينيه فضيه مربعه وحطت بيها اربع فناجين عريضه بيضه ومذهبه شويه باليده
وحطت شكردان بيضه صغيره بس بيها قطع شكر مو ناعم و كبل ماتصب الجاي رشت عليه هيل مطحون وعلت النار فار فورتين وبعدها صبت وهي تصفي وتحكيلي ..
- عمج يحبه مهيل زياده .. هو خلطه الجاي متروسه هيل بس هاي بالاخير حتى تضل ريحته تفوح اول مايشتمه

اخذت الصينيه وراحت صرت ادحكلهم من باب المطبخ .. عمتي قدمت لكل واحد
وتالي كعدت وصارت تشرب جايها
بس عمي اول ماكضب الفنجان رفعه اشتمه ونزله وبعدين يلا صار يشربو ..

تذكرت امي هين باغلب الاحيان تسويها ومن اسألها تحكيلي .. ريحه الجاي تهدي النفس احب اشتمها تعجبني ..

مشيت حدر هديل وساعدتها بتنظيف المطبخ
وقلتلها ..
- هديل ما نظف هين او نسوي شي بشغل البيت احكيلي حتى اعرف شنو اسوي احسن ماكاعده
- مادري والله اسالي عمتي هي تكولج اذا اكو شي تسويه
- وليش هي مو امك

- لان هيج متعودين .. اني ماسوي شي بس اغسل مواعين الغدا والعشه واشر ملابسنه وانظف حمامنا بس هذني شغلاتي والباقي مرات امي تسويه مرات تجي هاي جيرانه تنظف البيت من فوك ليجوه تلمعه كل ٣ ايام
- وام سالم شنو شغلتها ؟
- ولا شي بس تكول شنو الي يصير والي ميصير
-هاا عجل الحجيه شنو كعدتها هين مالها كلمه ؟
- لاا بس ماتدخل بشي كيفنا شنو نسوي نسوي هي عليها بابويه بس
- زين عجل الحين البيت مامنظف من ايمتى ؟
- هو نظيف البيت مابيه شي قبل ماتجون جانت جيرانه منظفته الصبح
- يعني مثل ماكلتي ٣ ايام
-اي ويمكن اليوم لو باجر تجي مادري بعد شوف همه شوكت يدزون عليهه

سكتت هين حسيتها مطنشه الامر بالبيت
بس تعجبت شلون يخلون بيتهم مامنظف ٣ ايام ولا تنحط عليه وصله مسح !
تمنيت جدتي هين والله كانت سوتهن هنه وصل ولمعت بيهن الكاع ...

بيتنا امي من وعيت عليها هي تشيل وتحط وتمسح وتعطر وحتى عمتي ام جراح هم بيتها دايماً ريحه البخور تعط بي وماتخلي شي ماتنظفو جدتي فوك راسها من ساعه ما تصحى لوكت العشه هي تأمرها سوي هالشي وجيبي هالشي .. هين كلمن على حل شعرو ..

طلعت اخذ تلفوني عفته على الميز ودحكت اسامه مراسلني وحاكيلي هو بيروت وكاعد يتغدا ..
بديت اكتبلو وسمعت صوت عمي جفلت بالعجل مشيتلو وهو بالاستقبال كاعد ..
وكفت حدرو وهو يدحكلي .. ابتسم وحكالي ..
- اكعدي يابه

كعدت حدرو وقفلت تلفوني صار يحكيلي ..
- شلونج هنا بينه مرتاحه
- اييه عمي مرتاحه الحمدلله
- غاليه يااا غاليه بنتي اي شي تحتاجيه بنفسج فد شي من بره من محل يعجبج تشترين شي
كوليلي اني اجيبلج
- تسلم عمي ماتكصر
- حتى لو اسامه مو هنا احنه موجودين اني عندج شتطلبين اعتبريه عندج صار زين يابه
- زين تسلم عمي
- اذا ميعجبج تشتغلين شي هنا كولي يابه
عادي مابيها مستحى اذا انتي متعوده بيتج ماتسوين شي وكلولي بنتنا اميره بالبيت فاحنه مانريد نغير عليج شي انته عزيزه من ريحه عزيز امانه بينا
- لاا عمي مو هيك المكصد .. انا بين اهلي اميره بدلالهم ومحبتهم الي بس انا هم اشتغل واطبخ صح بحديثه بيتنا امي ماتخليني اشتغل كثير كله عليها بس هم اساعدها
وهين من كعدنا بغداد نسينا سوالف الامراء جدتي ماخلت شي اذا مو نسويه ماعدا اخوتي وطلباتهم الي ماتخلص فالشي هذا عادي انا متعوده عليه واحبو
- هههههه براحتج بنتي براحتج البيت بيتج شنو يعجبج سوي بس خلي بالج شغله
- شنو عمي
- اريدج تضلين انتي انتي مايغيرج شي
يعني شعلموج اهلج وشنو تربيتي عليه ضلي بي اذا تغيرتي عن الي اعرفه عنج ابدا ادخل
وتدخلي مايعجبج زين يابه
- اي زين عمي زين
- اخذي راحتج

ترخصت ومشيت وانا كلبي يطكطك يمه
هالرجال نبرتو تخوف وعينو احسها تخترقني والله من كثر مامركز بوجهي ..

صعدت لغرفتي واتصلت على امي ..
حكيتلها الصار وهي بس ساكته اخر شي حكتلي ..
- حلو تنبيه عمج هذا يعني اكو الي خايف عليج منه
- يعني شنو يمه ؟ منين الخوف ؟
- مادري تبين بعدين .. نامي هسه ومن تكعدين نزلي سوي شي للعصريه وقدمي للحجيه وعمج
- زين يمه .. صدك ماعرفتي شي من سالفه ابوي
- ابوج قافل على جراح ما يدخل المنطقه مو بس البيت خطيه مخابر على حسين حتى ياخذله ملابس وحسين رايح ماخذله جنطه الملابس جان يلكطه الشيخ ومشبعه رزايل
اجاني حسين يعيط متخبل يكول رجلج يريد يسيبنا بالشارع مثل المجادي واحد واحد
- يااااه
- والله مهدده اذا عادهه النوب ينطرد وحتى لو رجع جراح هو مايرجع عاد الولد كعد وسكت
- يمه شسالفه ابوي لخاطر الله
يعني انتو متكاونين حتى مخلي حركتو باخوتي !
- ولج شبيج انتي اكولها من وحده اني شكو
- اييي انتي هاي متعودين عليها تطلع اعصابو بعد ماتحركين كلبو
- ياا والله ممسويه شي شتعرفيني ابقيه محروك كلب !
- لاا هم صدك اذا مو تتحايلين عليه
- روحي روحي يلا ماعندج سالفه

ضحكت وسديت الخط وضليت اتصل بجراح
وهو بس يرفض .. ارسلتلو بصمه صوت قلتلو ...
- ويييييينك شعلت اهلي لا تضل ترفض جاوب

مادحكها وضليت انتظر نص ساعه وخابر
جاوبتو وبالعجل قلتلو ...
-ياخيي ميت عايش شسالفتك ماترد وتبرد كلبي
- اييييي غاليه مشغول مو يطلعلك الرقم مشغول ماتفهمين
- ايييه وشدعوا هالاعصاب وياي غير انا من خوفي عليك الح واسأل
- زين زين مابيه شي عايش الحمدلله
- تفاصيل ياخيي احكيلي تفاصيل وين تنام وين تاكل شسويت
- انام بالجامع واكل بالمطعم
- زين بالجامع عندك بطانيه مخده شي
- يولي جامع هذا مو فندق .. حاط راسي على ايدي ونايم والجو طيب مايحتاج غطى
- يابعد عيني ياخيي
- مابيه شي لا تولولين
- اوووف ياربي .. ما لكيت جواب عاد
- لكيت بس ابوي مايجاوب على اتصالي صار من البارحه المغرب اتصل بي وهو مطنشني
- اكتبلو انك لكيت جواب
- كتبتلو وهم طنش
- يتصل يتصل اصبر
- لا مااصبر دزيت حسين الحين يروح ينطيه تلفون وانا اتصل عليه
- زين عجل انتظرك من تكمل اتصالك احكيلي
- زين زين

سد الخط وانا ضليت ادعي يارب ابوي يرضى ويرجعو للبيت خطيه اخوي مايستاهل والله يضل متشرد بالشارع ..

ساعه عدت وانا انتظر بي وتالي غفيت وكعدت على صوت تلفون دحكتو اسامه
رديت عليه وضلينه نسولف عشر دقايق وحكالي راح يرجع لبغداد الحين ..

سديت ودحكت ساعه اربعه صارت رجعت اتصلت على جراح جاوبني وبالعجل صاح ..
- ول خليني بروحي لا تضلين تلحين
- خيي شصار فهمني
-غاليه بعدين
- والله ماعوفك جراح والله كلبي موجر نار عليك خيي فهمني بغلاتي عندك احكيلي شصار
- مارضى
- ليش مارضى !
- ابوي يطلب طلبات تعجيزيه مادري احد حاكيلو انا عندي الفانوس السحري واغيرلو الحال مثل مايهوى
- بهداي ياخيي احكيلي بهداي
- استغفر الله .. ول مو قلتلك راح اتصل عليه وارسلت حسين ياخذلو تلفون
- اييي
- ايييه جاوبني بلا سلام كبل حكالي
عرفت الجواب ؟ قلتلو اييه يابه عرفت
وضليت اعددلو بيوت الي اشتركو بالحرب ويانه على داعش وقلتلو كم واحد مات وكم واحد تعوق وماعدنا بس اربع عوايل تهجرت ومارجعت للحين وهاي بس من الشاميه مثل ماطلب زين للحين !
- اي زين بعد شصار
- حكالي وانته شسويت من عرفت عندنا هالكد ايتام وهالكد فقرا معوقين !
قلتلو يابه شسوي انا بطرك ملابسي شسوي يعني
قلي من تعرف شتسوي وترجعلي بكلام يليق بيك وبمكانتي انا يلا بعد تتصل وسد الخط
- يااااربببببييييي شسالفتووو يالله
- ماضل بيه عقل يعني شسوي شسوووووي
شسوي هسه انا عندي ملك ثروه محل راتب وانطيهم ماعندي شي بالحرام لو عندي انطي من دون مايطلب بس انا هالاشتغلو عايش بي
دحكتيني بيوم اخذت من ابوي شي !؟
- ياخيي انا مااعرفك يعني والله اعرف هالشي اعرفو
- والي كملهه بعد طرد حسين وهذا هو مكابلني وكاعد مدلغم الوجه
- حسسسين !!! ليش طردوو
- مانعرف ليش هو انسد الخط من هين وحسين اخذ تلفون وطلع بعدو مامعتب الباب وابوي حكالو بوجهك تطلع لاخوك ولا ترجع بعد
- يالله ياالله هاي شصاير بينكم ليش هالشكل والله حرام اخوي ماسوى شي
هاي لان يساعدك ويتواصل وياك يعني ؟!
- مادري هو ينحزر ابونا ينفهم عقلو لا والله لاينفهم ولا ينعرف فكرو
- وشلون الحين ياربي شتسوون هاي ابوي ناوي عليكم كلكم يشردكم !! شصاااير
- استغفر الله غاليه عوفيني بهمي خليني افكر لا تضلين بعد تتصلين انا من وحدي اتصل واحكيلك زين
- زين ياخيي .. امانه عليك انتبه على حسين لا تفرغ اعصابك بيه خطيه تلكاه الحين شاب نار
-اعرف اعرف روحي يلا بعدين نحجي

سديت الخط وضليت استغفر ربي رحت اتصلت على ابوي جاوبني بصوت مرتاح ويحكيلي ..
- شلونها غاليتنا
- يابه مو بخير انا
- ليش يابه شصايرلك ؟
- اخوتي يابه ليش هالشكل تطردهم هذول اعزازنا
- ههههههه راحو توسطو الك
-لا والله ما حكو شي بس انا كلبي مانطاني عليهم عجل يابه تطرد حسين بلا سبب خطيه الولد وشحكى ! الحين امي تتخبل والله بس تسمع
- تخبلت وراحت
- وساكت عنها !!
- تتحمل مثل ماغيرها تحمل
- ياابه ليش ليش
- كلمن يجي من ايده الله يزيده
جراح من ايده وحسين من ايده واي واحد ثاني من اخوتك يتصرف بهالشي نفسو هم يلحكهم ولو غلطو سبعتهم هالغلط نفسو ينطردون ويضل البيت فارغ هم ما يرجعون
- يابه اخوتي والله طيبين وحاضرين بالي تطلبو بس شويه لين وياهم والله حرام كعدتهم بالشارع وهمه ولد الخير
- ماحافظو على خيرهم يتجازون هالشكل
لادوخين راسك يابه هالشي عندي انا اعرف اتصرف انتي انتبهي على عيالك وريحي بالك
زين
- يابه لا تطول بعدهم الله عليك
- الله كريم يابه

سد الخط وانا ضليت اتصل على امي ماتجاوب والله خبلوني بحالهم هذا صرت ماادحك غير شاشه التلفون ..

نزلت وانا الوب طلعت بالطرمه اتمشى واتصل بامي وماكو رد .. رجعت دخلت كعدت حدر عمتي والحجيه وانا بالي مو وياهم .. تالي اتصلت امي بالعجل رحت جاوبتها ..
- ها يمه ياعيني وينك
- ولج يمه شفتي سوايه ابوج ولج حرك كلبي حررك كلبي هو واحد وبالكوه تحملنه بعده ليش يكملهه بحسييين ليش يربي
- يمه الله يخليكي اهدي اهدي تنحل والله وابوي يرجعهم والله بس صبر
- يااا يرجعهم ولج حسين ماسوى شي لو رجع جراح حسين شيرجعه !!!
- يرجعو والله ابوي مايكدر على تعبك اكيد يرجعو
- احاجيه قبل شويه يكولي ولدي وبكيفي اشمرهم اخليهم ماعليجن انتن مادري شغيره هيج !!! يكولي ابنج مايستاهل تعبج عليه ولا يستاهل يكعد بيت شيوخ وحرام هيج واحد ابن شيخ وتربيته اكوله شبي ابني شبيي لا تخبلني شسوا ومادري بي ! يكولي ابنج نذل خليه يتربى من جديد الظاهر تربيتنا اله ماجانت صح وماجابت النتيجه الي اريدها
ياااربي ابني ماسوه شي هذا تربيتي اعرفه مايمشي بالموزين والله اعرفه طيب كلب ماياذي احد
-يمه فدوه لاتضلين تبكين خلي ابوي يتصرف
- خلييييه يتصرف خلييه بس ليش يحرمني منه ! ليش هيج بهذل احوالنا ! الشيخه تكوم وتكعد وتصيح ياجراح وياجراح وامه متخبله عليه جنت اني واكفتلهم هسه هم كسر كلبي بابني وخلاني اتيه دربي

ليش هيج يسوي !! كم مره سألته ياعيني شنو الي بالك شبيهم ولدك وهيج حقدت عليهم
مايحجي المصيبه مااايحجي ويبرد كلوبنااا
- يمه والله ابوي باله شي انا اتصلت عليه وحكالي انا اتصرف وياهم وكلمن تاذه من ايده جايز اخوتي مسوين شي وضاميه عنا وابوي عرفو
- شمدريني يايمه شمدريني تعبت والله من كد مااحاجيه وماحصلت نتيجه
- اصبري يمه حبيبتي اصبري كم يوم ويبين كلشي
- كلشي ولا حسين بنتي كلشي ولا هالولد
ينهد حيلي والله موبيدي
-يايمه والله هو بخير وحدرو جراح وهو صار رجال مو صغير وتخافين عليه من شارع
- بعدين نحجي بنتي
- وين يمه
- بعدين كتلج عوفيني ارتاح

سدت الخط وانا ضليت اتصفن وكاضبه راسي دحكني عمي صاحلي..
- غاليه صاير شي
- مشاكل بالبيت عمي لا يضل بالك
- محلوله ان شاء الله
روحي لغرفتج ارتاحي

صعدت بالعجل ورحت اخذت ياسمينه حضنتها ونمت بالي اشكال الافكار
ساعه افكر اخوتي غلطانين بشي وابوي عاقبهم لان ماعرفو منهم كبل ؟
ساعه افكر انه سامع عليهم شي
ساعه افكر ابوي هو مو صلح ويه حسين جايز راد يبهذلو شويه بدون شي !!

مرت الايام وانا على اتصال ويه اخوتي وامي .. امي وضعها تعبان وبس تتكاون هي وابوي وعمتي وجدتي نفس الشي ...
حسين وجراح ينامون بالجامع و حسن عرف بيهم راد ياخذهم لبيته بس ابوي ماقبل حكالهم اي شبر من منطقتنا مايعتبون ..

جراح وحسين صارو يشتغلون عمال ومن اسأل جراح انته مو عندك شغلك بمحل ابوي
يحكيلي مايكفي حتى انفذ الي يريده ابوي
امي موصيه حسن ياخذلهم ملابس وفراش بدون علم ابوي ومنطيتو فلوسهن ..

بيت عيالي دحكت وضعو مايعجب هين كل شي على عمتي ام اسامه وهي مره فقيره من اهل الله تخاف من عمي وحتى ماتنزع الحجاب حدرو ولا ترفع عينها ويطلع صوتها
هديل يومها كله على التلفون عرفت عندها حبيب وتستغل نزول امها وتضل تخابر بغرفتها ..

ام سالم هين هي المسيطره صح كدام عمي مايطلعلها صوت بس وراه تمشي وتتامر
مادحكتها كضبت كلاص مي وغسلتو
من العشره الصبح تمشي للمطبخ وتحكي لعمتي سويلنا هالشي على الغدا وتروح
وعمتي بالعجل تبدا تحضرو ..
انا احكي عليها واريد افتهم منها ليش هي تسوي كل شي ليش ماتعلم بنتها او تخلي ام سالم تسوي الشي الي يعجبها ..
تحكيلي .. مابيهه شي احنه اهل

صرت انا اشيل عنها التنظيف ماخليها تكضب شي .. لان طلع البيت كل يوم هي تنظفو وتمسح الاخشاب والمرايا من دون مااحد يحكيلها او يدري عنها .. لان اصلاً هين محد يدري بالثاني كلمن اله ركن خاص بي ..

صار يوم الجمعه واليوم ينزل سالم ومنطي خبر لامو الظهر هو هين ... من ساعه تسعه وكفت فوك راسنا وتحكيلنا ...
- راح يجي سالم على الغدا عيني ام اسامه سويله مطبك دجاج وكسبيه مثل ميحبه وشوفي منو من بناتج تروح تعزل غرفته تمسحهه تعطرهه والملابس هم باقيات بالغرفه بسلتهن ماعزلتهن هديل خلي تعزلهن هسه

عمتي بالعجل حكتلها ..
-اي ان شاء الله هسه اسويله واصيح هديل

انا هين طكت مرارتي كل يوميه تتامر واحنا ساكتين وانفذ على مرامها بس الحين لااا
قلتلها ...
- عيني عمتي ماتسويهن انتي مو هالشي راجع لابنك
- هاي صوتمن طلع !
- صوتي انا مااظنو غريب على مسمعك
- اي وشتريدين ياجنتنه
- ماريد شي غير تكومين بواجبك وماتخلين عمتي تخدمك ابنك يريد مطبك دجاج احدري انتي اطبخيه هذا بيتك ومطبخك محد يخدم الثاني هين كلمن خادم نفسو

عمتي تجر بايدي وتأشرلي اسكتي وام سالم تكربت حدري ومتخوصره وصارت تحكيلي ..
- من شوكت صارت عليه الجهال تتامر
خاف بعدج جديده هنا ومحد علمج مكانج اني اعلمج
- لا تعلميني ولا اعلمك مكاني اعرفو زين بس انتي الي مخليه الناس هين بغير اماكنها
- هااا ياام اسامه هاي شلون جنه عندج لسانها بطولها هي هاي الكتلتي نفسج عليهه
- اكيد عمتي ماترد عليكي لانها مو غاويه مشاكل ومره من اهل الله بس انتي ياعمتي مايجوز تستغلين طيبها هالشكل
انتي كبيره وهي كبيره واثنينكم بنفس الحيل
ليش هي تشتغل كلشي وانتي تزيدين فوكها شغلات ولدك ماعندك شي انتي سويها مابيها عيبه هاذي
- بيها شي لو مابيها اااااني اقرر هنا فهمتي
انتي مايعجبج طلعي منا روحي ولي لغرفتج هي متعوده على هالشي وتسويه لتضلين تزامطين براسي امشي اصعدي وخلصينا
- لاااا والله يعني جاهل هي عندك لو خادمه ؟
تره هي حرمه عمي مثل ماانتي حرمتو واثنينكم نفس المستوى والقدر لاتعلين نفسك عليها
- هههههه حرمه منو ! اني المره الاولى هنا والبيت بيتي اني من تعب رجلي وابني لتحطين نفسج بالنص تره ماتخلصين مني
خليني كافيه خيري وشري عنج روحي ولي لغرفتج عاااد لا تخلين صوتنه يطلع امشي ولي
- والله انا ماامشي من هين واريد ادحك الي يطبخ اليوم
والله ياعمتي اذا طبختي اعوفلك البيت واطلع الحين اخابر ابوي يحدر ياخذني واخلي اسامه يتفاهم زين وياكم بس يدرى

كضبتني من ايدي وصارت تحكيلي ..
- يمه كفي الشر هسه الولد على جيه وخطيه تعبان خلي ياكله لكمه وينام يرتاح ماتسوى هالوكفه والمصايح هو هم ابنه

- عمه انا مااكرهو لسالم يشهد الله احترمو واعزو بس انا احترمك انتي اكثر من الكل هين وماارضى ادحكك مذلوله وساكته
خلي كلمن يعرف مكانو مو هذا حكي عمتي
وانتي مكانك عالي هين البيت هذا هم ينصرف عليه من ابنك وتعبك انتي بي
والرجل رجلك بعد مهما كان انتي على اسمو ليش هو يرضى هالشي الك ومايرضاه الها !؟
شنو الفرق بينكم !!!
ام سالم - انتي لسانج طويل وحيه على امج
هو هاي قسمتي تضل ملاحكتني وين ماروح
امشي ولي واخذيهه وياج فوك ولن يلا
لااريدجن ولا اريد خيرج

تكربت عليها ورفعتلها حاجبي قلتلها ...
- الاااا امي الااا امــي زين !
- مسمومه على امج ولي من وجهي
- امي تاج راسك لا تجيبين طاريها

بهاللحظه دخل عمي وهي سكتت ضل يدحك بالوجوه ومخلي ايدو وره ظهرو حكالي ..
- ها غاليه خير ؟
- عمي تعذرني لو طلع صوتي بس انا ماعرف اسكت عن الحك وصارلي كم يوم ادحك عمتي ام سامه مسلوب حكها هين وهي ساكته انا ماعرف اسكت تريدون تزعلون مني ازعلو بس هاي تربيتي الغلط يضل غلط
عمي انا قلتلها لام سالم كلمن هين خادم نفسو محد يخدم الثاني كلنا كبار وبحيلنا ليش عمتي وحدها الي شايله البيت ويتامرون فوك راسها ؟ لان فقيره ماتعارض !
حتى لو ضلت هي راضيه بحالها انا ماارضى
لان لو درى اسامه انا راضيه لامو الاهانه وساكته تصير عيبه بحكي
انا احبها لعمتي ام سالم والحين ابوس راسها والله بس خلها تكف عن عمتي

كنت احكي بحركه كلب وهو يدحكلي ويهز براسو .. وعمتي ام اسامه تجر بثوبي حتى اسكت بس انا ماهتميت حكيت الي بكلبي وفرغتو . . سكت عمي و بعدين تكرب باس راسي وحكالي ...
- راح اطلع تريدين شي يابه
بنفسج شي اجيبلج حلويات اي شي بالج
- هاا !؟
- تريدين شي اجيبلج وياي
- لا عمي تسلم
دار وجهه وطلع وخلاني اتصفن عجل مارد على حكيي بشي ليش هالسكوت !!

هو طلع وام سالم هم طلعت .. جرتني عمتي وحكتلي ...
-اي ليش يايمه ليش هالملاسن مو اعرفج عاقله
- عمه ان ترضيها على نفسك انا ماارضاها
شنو هي تتامر هين علينه ابنها هذا ماتكوم تطبخلو عجل لو كان هذا اسامه كانت تروح تطبخلو !؟ هي سلام ماتسلم عليه الا بالصدف
- بس هذا سالم ابنه قابل غريب ان سويتله اكل فهو للكل قابل بس اله مو كلنا راح ناكل
- عمه انتي بالك شي وانا بالي شي
و بالحرام بالحرام لو وكفتي على طباخ ازعل منك والله امشي ارتاحي وانا اطبخلو
- انتي تطبخين ؟ لعد مو صار ساعه تهوسين
-انا هوست حتى ماتتامر عليكي بعد بس انا كنه البيت خليني انا اطبخ احسن ماتروح تتمسكن كدام عمي وابنو وتحكي مايرضن يطبخن لسالم ومايحبنو ..
انتي روحي اكعدي وخليني انا اتصرف والله لاتوبها من هالشي والله

ضلت تستغفر وحاطه ايدهه على خدها اخذتها وقلتلها اصعدي فوك احسن ماتحدر تسمعك حكي .. تقلي ..
- خلي اروح اشوف غرفته شمحتاجه مدامج راح تسوين الغدا
- ول استغفر الله .. عمه انتي ماتفهمين انا على شنو حاركه اعصابي خلي هي امو هي
تحير بي ماعندها شغله خلي تحرك نفسها
- ولج راح توكعينه بمصايب انتي هاي العمر كله ساكتين وصابرين ليش حجيتي يايمه ليييش
- وعلى شنو الصبر والخوف بيتك هذا بيتك
عمتي برضاه الله عليكي اكعدي واسكتي لا تسوين شي زين بس اكعدي انا اليوم حطيتها بالي الا هي تروح تسوي الي تتامر بي خلي تنزل هالريشه الي على راسها

اخذتها للدرج وراحت هي صعدت رجعت اني للمطبخ و صرت احضر الغدا واحكي بداخلي ..
عجل الهوسه هاي كلها والحجيه ساده بابهه وكاعده ! يممه تمنيتها جدتي كان طكت راس براس ..

عمتي فقيره واميه كلشي ماتعرف اسامه دايماً يوصيني عليها وهي ادحكها ساكته بس كلمه الحاضر والصار تطلع من لسانها وهاذي مستغلتها .. ردت احكي لامي وبعدين قلت هي بيا حال خليها بعيده عن مشاكلي ..

حضرت الغدا ورتبتو على الميز وارسلت لهديل انها تنزل تتغدا .. كان سالم واصل قبل ربع ساعه وراح يسبح من طلع كان لابس روب الحمام وانا دحكتو من كنت احط الاكل على الميز .. جوه حد ركبتو مطكع بنفسجي
خربت ضحك قلت هذا الي تزامط بي امو
هو الله اعلم شلونها ليلتو ...

التمينا على الغدا وانا كنت مخليه صحن كبير مرتبه بيه مطبك الدجاج ومحضره السوب وياه .. عمتي بالعجل مدت ايدها حتى تصب للكل انا جريتها وشاورتها ..
- حرمتو هي تحطلو الاكل مو هي المره الاولى والوحيده هين خليها

ضلت تخزرني وانا كاضبه ايدهه جوه الميز
انتظرت ام سالم حطت الاكل لرجلها وابنها يلا انا اخذت وحطيت الي ولعمتي وهديل قلتلها تحط لنفسها لان اقرب عليها
والحجيه اكلها وحد مطبوخ ..

اكلت هالمره براحه حسيت هذا اكبر انجاز بحياتي رغم بساطتو بس مفتخره بي ..
ومن صار وكت الجاي انا اخذتو قدمتو
ومخليه عمتي كاعده حلفتها بالله ماتتحرك الا احركو لكلبها بكعدتها ..

سالم دخل غرفتو وبعدين صاح ..
- يمه الغرفه ليش مامتهويه والملابس ممعزله وينجن لعد كاعدات شتسون وينج هديل

ركضتلو امو وانا كضبت هديل قلتلها ..
- امو تحير بامرو كملي المواعين
- ولج هسه يجي يكسرني لو مارحتله

- ليش يكسرك انتي عندك شغلك انا اروح بدالك

رحت لغرفتو ومن الباب قلتلو ..
- خيي هديل قلتلي ادحك بشنو طلبتها هي تغسل المواعين وايدها منكعه احكيلي امرك
- ماريد شي تسلمين

ابتسمت ودحكت ام سالم واكفه تعزل الملابس ودايره ظهرها على الباب ..
رحت بالعجل لعمتي وقلتلها ...
- شغلتها والله وغصب عنها
- اوووف منج اوف يعني هسه شلزوم هالهوسه كلها جان سويناهه وفضت
ليش خليتن الولد يصيح
- ويصيح عجل امو هين ما يطلبها وانتو على شنو مرعوبين هالشكل ادحكم حاسبين نفسكم مأجرين هين وساعه الساعه تنطردو
- لعد هي جذب ليش مو كاعدين بفضل هالرجال وخيره وهذول اهله مرته وابنه لازم غصب علينه نطيع ونتحمل عيب ننكر خيرهم
- لااا تنكرين خيرهم انتي كفيتي وزياده
بس لا تنسين انتي الك كامل الحك بهالبيت
وانا متاكده عمي مايرضى مذلتكم بس ماعرف ليش هو ساكت
- عمج هيج طبعه يدري بكل شي بس ميحجي واذا حجى معناهه شغله تخوف يعاقب كل واحد هنا باسلوبه فلا تشوفينه ساكت معناه ماله دخل بالرايح والجاي تره هو عينه عشره عشره بالبيت بس يدخل وكت الي يعجبه
- هاااا عجل عمي يخوف
- الله لا يشوفج اعصابه متشوفين البيت كله خانس لان محد يعرف شنو الشي الي راح يكلبه علينه
- الله يهديه علينا

رحت اتصل بحسين جاوبني وهو يلهث قلتلو
-ها خيي وينك
-بالشغل وين يعني
- وشبيك اعصاب
- ووول تعباااان تكسر ظهري واخيك مايعرف يفرك
- عمت عيني عليك ياخيي
- ااااخ يمه يولو هذا عمك شدراه انا مطرود من بيتي
- ياا درى !
- اييه خابرني يحكيلي اجي اخذك عندي اجيبلك شي قلتلو لاا انا بيت عمي كاعد
وكلها يومين ويرضى الوالد ونرجع
تحلفتلك والله قلت بس اكضبك اندمك على لسانك هذا حدرو
- ياخيي والله ماحكيتلو شي جايز هو سامعني احكي ويه امي بس انا والله ماحكيتلو
- يلا يلا بعدين من نتلاكى نتحاسب خلي اروح اشرب مي ريكي نشف
- من ترجعون وترتاحون خابروني زين وصي جراح يخابرني
- مللتي والله هو بحالك عوفي الرجال
عوفيه
- ول انا بدون جراح مااعيش غصبا عليه يتحملني روح يلا

سديت الخط ورحت كلبت الغرفه على بطانتها ونظفتها لان من الصبح اسامه يرجع هين ..
رتبتها على اخر حبه وسبحت و هم نزلت احضر للعشه .. والليل كلو اتصل بجراح
وارسلو .. والله ماتحمل بدونك ياخيي ماتتصل عاد مو حاله هاذي ..
وهو مايرد وللساعه ١١ بالليل اتصل ..
- ها غلوي شلونج
- جراح وينك والله بطيت كلبي ماترد ياخيي تشب بكلبي النار هالشكل
- نايم والله تعبان راجع بالخمسه ونمت
- اوووف ياربي .. بعدك ماتعشيت
- اييه بعدني
- احكيلي كبل ماتروح شصار على هالسالفه ايمتى تفض شمفركلهه
- مادري اجمع فلوس والله كريم
- خيي انا ارسلك الفلوس وارسلك ذهبي وكل شي تطلبو بس خلصنا والله امي وامك متبهذلات بدونكم
- خليهن الك من ايمتى انا اخذ منك يولو !
انا عندي حيل واشتغل وادبر امري عندي شغلتين الحمدلله كافياتني بس اريد شويه وكت
لا يضل بالك زين
- بعون الله ترجع ماتطول
- يلا اروح اجيب اكل

سديت الخط وضليت ادعي ربي يهدي ابوي عليهم ويرجع بيتنا عامر بضحكتهم ..

نمت بعد ماعرفت من اسامه انه يوصل بغداد بكرا ساعه خمسه الصبح .. وقتت المنبه على ساعه اربعه ونمت ..

كعدت هالمره متلهفه وبداخلي نشاط كبير
احس حياتي صارت كلها تتمحور على اسامه ادور الي يرضيه ويخليني ادحك بسمتو ادور التعب لاجل ارتاح من ادحكو يرضى حدري

نزلت حضرت الاكل مثل مايحب وخدرت الجاي المهيل بكثره وحطيتلو الكعك ومانسيت الزعتر وصعدت سبحت بالعجل وطلعت تمكيجت بكحل وحمره اللون الي يحبو
عطرت الغرفه واخذت شالي ونزلت وانا ادحك الساعه صارت خمسه ونص والجو بدا يكشف واكفه بالطرمه وادحك لزرعات عمي
موردات وريحتهن طيبه ومكانهن نظيف
كاضبه التلفون واريد اتصل وبعدين اتراجع
اريد ادحكو من يدخل ويلكاني هين انتظرو
شراح يسوي !...

ضليت ادحك لفوك ودحكت هين يطل بس مكتب عمي والشباك عريض على اكثر من نص البيت .. تطمنت انه مسدود وقلت اكيد عمي بعدو نايم جوه ..

اتمشى واحسبهن دقيقه دقيقه صارت ساعه ٦ وربع وسمعت صوت سياره طبكت بالباب
ضحكت وصرت ادحك بكاميرا الموبايل اعدل شعري وهو فتح الباب بس دحكني ضحك وسد الباب بالعجل وحدر علي حضنتو
وهو يحكيلي ..
- حبيبتتتتي حبيبتييي
- يابعد عمرررري حمدلله على سلامتك
- ربي يسلمج

حط ايدو على وجهي وضل يتلمسو وبوس راسي اخذت ايدو بوستها وقلتلو ..
- والله البيت مايسوى شي بدونك
- حبيبه روحي هاي رجعتلج واعوضج والله
-انته احلى عوض يلا ندخل
- بس ادخل السياره هاي سالم شوكت رجع
- بارحه رجع
- يلا انتظريني جوه

دخلت وهو دخل سيارتو وقفل الباب ورجعلي حضني ويبوس وانا اخذتو للمطبخ هين اكو ميز صغير مخصص للريوك وانا محضرتلو الاكل بس حميت الجاي بين ماغسل ورجع

صار ياكل وانا بس ادحكلو واحس بروحي ارتوت الحين .. صرت افهم ليش امي كانت تسهر للفجر تنتظر ابوي يرجع حتى تحضنو ويتريكون سوا .. وصرت افهم ليش هي مفضلتو علينه بكل شي .

..

احس دنيتي صارت شي ثاني وكت الي تزوجت وجربت شعور المحبه وصار بحياتي شي غير اخوتي هين راحه بنص الصدر تصير .. شي مثل ان هاي اللحظه هي الي انا مخلوقه حتى اسويها ..

هو كان يحكيلي عن رحلتو بس انا ماكنت اسمعو زين مادري بالي صفن بس ادحكلو
وهو حس عليه كرصني وحكالي ..
- احبج ولج
-ههههه وانا احبك اسوم
- صدقه لهالحلك من شوكت كاعده
-من الاربعه
- حيل ليش حبيبي جان ضليتي نايمه اني بكل الاحوال اجيج
- لاا ماكدرت اذا مو ادحكك تدخل وانتظارك شي حلو
- احبج والله يمكن هاي احلى رجعه للبيت صارتلي كل مره ارجع مطفي كبل بوجهي للغرفه اسبح وانام واهلي مايدرون بيه شوكت اجي شوكت اطلع
- ماكو بعد هالشي ياعيني خلص هذاك زمان
هسه كل شي بالتفصيل عندي
-ههههه حلو هالتفاصيل بيهه اهتمام يجنن
يلا خلي نصعد
- اغسلهن واصعد وراك
- لا انتظرج كمليهن بسرعه يلا

اخذتهن غسلت بالعجل ونشفت ايدي ورحنه صعدنا سوه لغرفتنا .. دخل يسبح وانا غيرت ملابسي لبست شورت وفانيله وفتحت شعري بعدو رطب ..
اول ماطلع يصوفر ويحكيلي ..
- مشتاااق يالله مشتاااق
ضحكت وحضنتو واشتميتو براحه يالله صارت راحتي بشمتو .. سبحان الي غير خوفي ومزاجيتي ولساني كلهن غيرهن لحب ورضا هالشكل حدرو ..

نمت بحضنو وضليت انتظرو يغفى هالتفاصيل صح هي صغيره بس تعنيلي شي كبير ... احس مالازم افوت دقيقه من اني ادحكلو ..

نمت بعد نومتو وماحسيت بعد الا على صوتو وهو يكعدني .. كعدت وبوستو صرت الم شعري وحكالي ..
- حبيبي شمسويه بدون متكوليلي
- شنو ماسويت شي
- لاا مسويه
- شنو !

دحكتلو وهو جر ايدي بوسها وحكالي ..
- اروح فدوا لمريتي والله من سمعت هالحجي فرحتي زادت اضعاف اضعاف فرحتي الصبح بشوفتج
- ياعساها ماتفاركك
- شكرا غاليه من صدك شكراً رجعتي لامي الشي الي حتى بفلوسي ماكدرت ارجعه
- هاا ههه لاا هذا واجبي
- والله ونعم من اختاريت اخت رجال والله اصيله فرحتي كلبي ورفعتي راسي
امي حجتلي قبل شويه نزلت اسلم عليهه وصارت تحجيلي شلون داريتيهه هالايام ومارضيتي الها تصرف عمتي
- اكيد ماارضى عجل شنو فرقها هي عنها انا اكره الي يحسبون نفسهم اسياد والقوم عدهم عبيد
- اي والله هالشي من زمان ردت اغيره ومتغير .. تعرفيني دائماً طالع ومادري شيصير ميصير هنا بس مرات هديل تراسلني تحجيلي اذا امي مغثوثه واضل احجي ويه امي بس هي كضتها اسمتو واسكتو عمكم وفضله وعيب وميصير .. صرت اشتغل واصرف على البيت حتى لا تضل امي تحس بهالشي بس هم مافاد عاد عفتهه بعد
بس وكفتج ريحت كلببببي هسه اني صدك صدك مرتاح ومطمن لو شكد مااغيب عن البيت عندي الي يداري اهلي بدون منيه
- اسامه حبيبي ضل متطمن عهد علي ماارضى الهم ذله ولو اعرف ازعل الكل اشتري رضاك
- فدوه لله شلون مره معدله

بوسني وهين حسيت باحلى انتصار بحياتي
نزلنه كعدنا ويه الاهل وهين دحكت عمتي متبسمه وكاعده حدر ابنها ..
حضرت الغدا والتمينا كلنه نتغدا وانا كاعده حدرو هو ياكل ويشاورني .. وانا اتبسم وادحك الكل عيونو علينه احكيلو بعدين
بس هو مستمر يشاورني ويضحك بهداوه ..

كضينا هاليومين سوا ومرتاحين خابرت امي
حتى افهم منها ايمتى العزيمه حكتلي ..
اعذريني بنتي بس وضع البيت مو مال عزايم اثنينه محروكات كلب وبالنه مشدوه على ولدنا بس تصفى الامور اسويلك احلى عزيمه

عذرتها وماحكيت هالشي لاسامه قلتلو مادام جراح مارجع مالي نفس ادخل البيت خلي اشبع من كعدتك هين لاحكين على الروحه ..

اخذني اسامه زياره للامام الكاظم عليه السلام
رحنه بعد صلاه المغرب وسهرنا بره لنص الليل يلا رجعنه محملين لكل واحد بالبيت شي من الكاظميه ..

ام سالم صارت ماتحكي ويه عمتي ولا وياي
وانا مشدده على عمتي انها ماتتحرك مثلها
وغيرت طبع هديل وروتينها ..
صار الطبخ مسؤوليتي انا الي احدد نوع الاكل اليوم واطبخو ونتقاسم التنظيف انا وهديل هي عليها الجوه وانا الفوك وطلبت من عمي يلغي جيه هالمره جيرانهم الي تنظف هين وهو ماحكالي غير صار انتهى موضوعها ..

بيت فيصل يحدرون علينه كل يومين يتعشون ويانه ويمشون بنص الليل لبيتهم .. طيبين ودحكتهم مثل اطباع هالبيت باردين ومالهم دخل بشي ... يمكن انا الوحيده الي يطلعلي صوت بالبيت ..

انا اطلعلهم مواضيع واخليهم يسولفون واشغل هديل وياي وماخليهه تضل بغرفتها طول النهار .. انوعلهم بالاكل الحلويات و غيرت نظامهم الي ماياكلون اذا مو على الميز حتى لو شرب الجاي .. صارو اذا كاعدين بالصاله
اخذلهم الحلى عندهم وشويه شويه تغير هالشي ..
اسامه اول ايام بارد وثكيل بتصرفو حدر اهلو
بس بعدين خليتو يكسر هالشي .. صرت احكيلو ..
البيت والاهل راحه مو حرج
وهو على سوالفي يسولف شويه ويضحك وطلع من جمود هذاك ويه اهلو ..

اما عمي فهو عالم وحدو صعب اصلو
كل يوميه الصبح اسمع من مكتبو احلى الاغاني .. اكثر اغنيه اسمعها يشغلها هي
' ماريده الي ميرابط يا بابا ماريده '

سألتو على اسمها مره لاني مالكيتها باليوتيوب حكالي اسمها ' شناشيل '

تدرين شكان ردو !
-شنو مارضى بي ؟
- يحكيلي من قلك العوز بس اكل وانته ظنك احنه الكبار هين ناسينهم وعايفيهم بجوع ؟ حتى ننتظر جناب جراح ياخذلهم مؤونه !

غاليه ردت اركع راسي بالحيط والله تعبت حتى جمعتهم فلس فلس ويستهين بيها !

تالي حكيتلو .. يابه وش الي يرضيك فهمني
انا طعتك وتعبتك وسويت كل هذا لاجلك شنو اليرضيك اكثر بعد احكيلي فهمني !

حكالي .. تضل للحين ماتوصل عشر من الي اريده منك .
قلتلو بس فهمني المطلوب شنو !
حكالي .. المطلوب تفكر باكثر من رضاي
قلتلو يابه انا ماعندي شي حتى اسوي اكثر من الي وصلتو للحين انا بطرك روحي
والفلس الي عندي ذبيتو عليهم وكعدت مصفر
حكالي .. اييه مثل ما جمعتهم اجمع غيرهم
قلتلو .. وين المفروض اوصل !
حكالي .. اعلى من الي تعلمت عليه
قلتلو .. ماعندي الي يساعدني على هالشي لو عندي ماكصر والله
حكالي .. كيفك ضل بره واسس حياتك وحدك وانسى هالبيت
قلتلو .. ماتنازل انا عن رضاك يابه وارجع لبيتي مرفوع الراس انطيني بعد صبر وان شاء الله اعجبك
حكالي .. مااظن راح ادبرها وحدك يمكن تاملت بيك ازيد من اللازم صدك من كال ايد وحده ماتصفك
قلتلو .. يابه انا مو بحاجه الايد الي تصفك
انا ايدي الوحده تربت وتداري والنه غير كعده واوعدك هي الاخيره

- اوووف ياخيي والله مافهمت ابوي شناوي

- انا بديت افهمو بس مطلبو صعب وانا مصفر الفلس يحتاجلي وكت اكثر

- حكيتلو على حسين فهمت شسالفتو هالمكرود؟

- ههه هذااا سالفته اتعس مني
اول ما فتح حلكو حسين ابوي سكتو وحكالو اذا يرجع جراح بسنه انته بسنتين ويجوز لو ادبرهه لو لا وامشي اطلع بره انا طلبت اتفاهم ويه جراح شدخلك انته
حكالو الك عشر دقايق تدحك امك وترجع من وين مااجيت

- اويلي عليك ياحسين من يومو مظلوم من ابوي وشابع رزايل .. هسه شناوي تسوي !؟

.
.
يتبع

كان بيها مقطع حلو هو يرددو ساعه مايرتب كتبو ..
' فدوه للشناشيلات تكعد بيهن الحلوات
تكثر بيهن الضحكات فدوه للشناشيلات '

كثر ماحاولت اكسر على برود حياتو ماكدرت
هو معتزل بمكتبو او حدر التلفزيون ..
ما ينام بغرفتو ويه ام سالم عندو بمكتبو قنفه تنفتح وتصير بيها مكان ينام بي براحه ..

مرات اسأل اسامه شعندو عمي معتزل بمكتبو؟ يحكيلي عندو جو خاص مايحب احد يكطعو عليه ..

خلصت العشر ايام وصارت رحله اسامه وهالمره يطول عشره ايام يلا يرجع ..
احس بروحتو تغيب نص فرحتي وياه

نفس الايام مشت وجراح وحسين على وضعهم يشتغلون ليل نهار .. جراح يشتغل بمحل ابوي العصر لحد الليل والنهار عماله
هو وحسين .. امي تمرضت على فراك حسين
معدتهه دايماً تاذيهه وتتقيء وروحهه ذبلانه
احكي ويه ابوي يردلي .. كثر دلالهه لحسين ومحبته نساهه تزرع بي القيم خلي كل واحد يتحمل نتجيه خطأو ...

عدا هالشهر واخوتي بعاد عن البيت
وشهر ثاني وهمه نفس الحال .. امي فجاه تحسن حالها بس ماعرفت شلون من سألتها
تحكيلي ... رضيت بقسمتنا ..

انا حللت وطلعت حامل اخذني عمي بوكتها للتحليل لان اسامه مسافر .. بيومها فرحه البيت بهالخبر خلتني ابكي والله بالاخص عمتي ام اسامه تهلهل وتحضن وتبوس
وعينها تلمع من الفرح ..

مانطيت خبر لاسامه كان بنفسي ادحك فرحتو حدري واحكيلو .. ووصيتهم ماينطوه خبر
ومن رجع بعد اربع ايام وتلكيتو من الصبح
مثل كل مره خليتو ياكل ويسبح وبعدين كبل مايكعد قلتلو ..
- حبيبي شتتمنى ؟
- تضلون بخير
- يعني ماتتمنى تصير اب
- ههه هذا حلم مو بس امنيه
- وليش تحسبو بعيد
- مادري بس ماتخيل نفسي اب
- زين واذا قلتلك راح تصير اب بعد سبع شهور
-ابوسج من راسج

دحكتلو وانا اضحك وهو كان ينشف بشعرو صفن شويه ودحكلي حكالي ..
-حامل ؟

هزيتلو براسي وهو شمر المنشفه وحدر كضب وجهي وفاك عينو ويحكيلي ..
- مو شقى ! الله عليج
- ههه والله حامل بشهرين
- جذابه ماصدك شوفيني وين تحليل شوكت شلون عرفتي
-عمي اخذني حللت لاني كنت شاكه بنفسي حامل وتاكدت قبل اربع ايام
-يعني صدك صدك حامل وراح ارجع بعد الكاج بطه تتمشين

ضحكت وهو هجم عليه يبوس ويضحك وبعدين عافني وطلع ركض راح لغرفه امو يحكيلها غاليه حامل وصوتو هرج البيت
ورجعلي يحكيلي طلعي التحليل ..
انطيته الورقه وضل يقراهه ويبوس بيه
ويرجع يبوسني يحكيلي ...
- لج انتي سبع سعادات انطيتي لحياتي
بيش اجازيج حبيبييي
- ضل حبني وانا اصير بطه مو ابطل مااعجبك
- هو غير ميت على شوفتج بهالبطن
من هسه اكلج اذا ولد اسمه ايهاب واذا بنيه كيفج انتي اختاري
- ان شاء الله

بيومها اسامه يغفى شويه ويكعد يتلمس ويضحك ويرجع يغمض وينام ..
ارسلت لاخوتي بالكروب ..
' عندي بشاره يا حنين يرد اول واحد ويحصلها '
بالعجل رد اسر ' اخيك هين بشري '
كتبتلو ' انته اصغر خال واحنهم '
ردلي ' منين اجاني الخال '
كبل مااكتب شي ارسل حر ' ها يولو حامل '
كتبتلهم ' ايييه ماتباركون '
ارسلولي بصمه اثنينهم يحكون بيها
' ياابه مبرووك والعز النا بهالولد اخيرا راح نصير خوال ول غاليه ابنك عندو سبع خوال منو كدو يابه '

رماح ارسلي .. ' تكومين بالسلامه يولي والله وكبرتي وسبقتيني بالولد '
قلتلو ' تزوج يلا حتى يحضر ابني عرسك '
ارسلي ' زواج الاكشر هذا مادحكين الصار '

ضلينه نسولف وبعد وين ارسلي جراح
' غلوي ول يابه فرحتلك والله ان شاء الله تجيبيلنه بنت ونشبعها دلال مثلك '
قلتلو ' ايييه والله انا بعد اتمناهه بنت وانته كون تسميها '

اختفى هين بعد ما رد بس اخوتي عوضو عنو
حسين بالاخر يلا ارسلي ' يولي بس اولدي واشمريه على امي خليها تتلهى بي وانا اربيه الك وياهه ماتحيرين ولاتعبين نفسك احنه هين معوزين حنان وجهال وهرج انتو خليكم لاتموعون ثلج بيتكم '

ضحكت من كلبي على حكيو وتمنيت ربي ينطيهم طول العمر ويدللون ولدي ..

مشت الايام ودخلت انا بالرابع وهين سمعت من جراح راح يتصل بابوي ..
ضليت ادعيلو يتوفق هالمره .. وانا اتراسل ويه حسين حتى اعرف ايمتى يخلصون حكي واتصل على جراح افهم شسوا ..

دقايق وارسلي حسين رايحين للمضيف ابوي طلبنه ...
وضليت على نار ماسكنت ولا هديت لحد ما عبرت ساعتين واتصل جراح ..
- ها خيي بشر
- والله ترزلنا خوش رزاله بس لان شويه
-ليش ترزلتو وشصار انته شسويت بهالسالفه ؟
- انا مو تدرين كنت اشتغل طول هالاربع شهور
-اييه
- اييه جمعت مبلغ زين وتراسل ويه رماح دليتو على مكان كنت جامع بي كم فلس بيتنه وجابلي ضفتهن على الي عندي وكدرت
اجهز مؤونه كامله لهالعوايل حملنه كيه كامله واخذناهه وزعناهه على كل بيت كبل الفجر
ماعرفو هذني منين بس حسين كان كاتب بورقه بداخل كل كارتونه ' شكر لدم اخونا '
والله وزعناهن وانا كنت مسوي قائمه باسمائهم والله تعبت من كثر ماسألت على كل بيت وشعندو من عيال ..
واليوم خلصنه ابوي من حكيتلو يابه صار لازم نتفاهم حكالي احدر هين ..
كعدت حدرو حكيتلو الي سويناه الهم

#شقراء_بغداد

الجزء_الثاني_بارت_٢٣


شهر التاسع من سنه ٢٠١٧ ...

كاعده بالحديقه على المرجوحه اهزها برجلي واني صافنه بالفراغ .. اتذكر شلون جان هالبيت مايهدأ ولا يسكن من صوت ولعب الجهال ... دلع غاليه وصوت ضحكتها العالي ويه اخوتها وركضها من غرفه لغرفه
عركاتهه ويه حسين ودمعاتهه الي تتحايل بيهه لجراح حتى يعاقب حسين لان زعلها

رماح الهادىء الصغيرون ربى على ايدي
جان يحب يحط راسه بحضني واضل افرك بشعره ويغفى ..

عباس وصكر صارولي اصدقاء رغم صغرهم بس جانو حنينين ويايه ومطيعين
يحبون يكعدون بالهول ينتظروني اجيبلهم سله المكعبات ونكعد نسوي قلعه وهمه يهندسوهه بكيفهم ..

صديقي الاول جراح .. ماشفت مثل حنيه كلبه ولا مثل رزانته .. طفولته كلهه كضاهه يشتري ونسوي عزومه لو ينتظر حلى اليوم شنو .. طبعه طبع ابوه ..
يحب يخصص اخر الليل لسوالف يومه
ويستشير ويفضفض وياكل بنفس الوكت ..
كبر وصار يستحي مني .. يراقبني بعيونه
ويبتسم لو تلاكت عيني بعينه ..

طلع الكل من هالبيت وبقى بس مليان بذكرياتهم ..

صار اربع شهور كلبي مفرفح على ابني لو سبب واحد اعرفه ليش جان ارتاح كلبي
جان على الاقل خابرته وعلمته شلون يحل مشكلته ويه ابوه ويرجعلي .. بس عيني بعين الله انتظر يهديله السبيل ..

مشى العمر وتغيرت الايام .. وبينت هسه وحده الكُبر .. صرت اني هسه مثل جارتي
الي جنت اخذلهه ماعون الحلاوه الجكليتيه
وكت العصريه واكول خطيه مره جبيره وكاعده وحدهه اروح اونسهه واكعد يمهه ..

دار الزمن وصرت اني المره الجبيره الكاعده وحدهه والي تفرح باليدك بابهه ...

بدأ صوت المآذن يعلى بالتجويد قبل الاذان
وهنا انفتحت الباب واشوف هذا حسين ابني
حفزت من مكاني وكلبي رفرف عليه
رحت حضنته ودموعي تجري وهو ساكت وحاط راسه بركبتي ..
- وليدي يمه ياروحي يارووحي
- يمه مشتاكلج والله والله مشتاكلج
- ياروح امك حبيبي حسوون رجعت بعد رجعت متروح مو
- لا يمه اروح ابوي طردني للمره الثانيه
- شنوو ليش حسين ليش انته شمسوي لابوك شمسوي ولك يمه فهمني مو كلبي شيب
- يمه وحك عينك وغلاتك عندي مامسوي شي وحك عافيتك ماغلطان بشي ولا ماشي بدوب مو زين ولا بادره مني العيبه مو تعرفيني انتي ياامي مو تعرفيني رباه ايدك انا
شتعرفين اغلط واحرك كلب ابوي !!!
- لا يابعد روحي لا والله اعرفك ماتسوي الموزين وكل خطوه ماتخطيها اذا مو برضانا بس شسوي يايمه من حركه كلبي اسال لعد ابوك مترهي عليك ويطردك !!
- ايييه مترهي مترهي
- لاا والله يحبك لك انته ابن عزيزه كلبه انته متعرف شنو من فرحه فرحها يوم ماعرف بيه حامل لك انته الولد الوحيد الي من دمي ودمه يعزك معزه خاصه لتشك بمحبته الك
- عجل يمه اليحب هالشكل يتعامل !
انا بس سلمت عليه قلتلو كواك الله يابه وهو يردلي شجابك هين !انا ردت احكي ويه جراح شدخلك انته هين امشي ارجع منين ماجيت
- سوده بوجهي يربي شلون بيه ولك يمه والله ماعرف شجاه الرجال هيج
- يمه هسه انا عندي عشر دقايق اشبع منك
بيهه وامشي
- لااا ياكلب امك شفت منك اني وين رايح
- شسوي حكم الشيخ بعد احسن مانطرد للمره الثالثه امشي بكرامتي
- حسين حبيبي راجع افعالك يمه تذكر خاف حاجيلك كلمه كدامه لو بظهره مايرضى عليهه .. تذكر ابني كلشي صار وياك هذيج الايام ارجع اتذكره زين وافهمه ..
ابوك مستحيل يسوي هالشي بدون سبب
لان جراح وفهمنا سالفته اكيد رايدله المشيخه وراه ويريد منه فعل يسوه يحصل تعب ابوه
بس انته شسالفتك ؟ هاي الحيرة عقلي
- ان شاء الله يمه
انا هم ناوي اصفن لسالفتو واتمنى الكى شي يسوه
- ان شاء الله تلكى حبيبي وتخلص من هالعقاب .. تعال خلي احطلك شي تاكله
-يمه مالحك
- تلحك تعال خلي اشبع بشوفه طولك وليدي
والله البيت اظلم بدونك .. كلبي مستاحش بدونكم والله فراك الولد صعب حسون
- والله حاس بنار كلبك ياامي وان شاء الله ماطول الغيبه

بوس ايدي ودخلنه للبيت وهو حاضني
رحت للمطبخ صبيتله ماعون تمن ومركه
وضل ياكل وهو واكف .. رحت لغرفتي
اخذت فلوس واجيت انطيه مقبل ياخذهن
كالي ..
- اشتغل انا يمه والله اشتغل واكفي مصرفي
- بس يفيدنك ياعيني اني مامحتاجتهن
- بالحرام ماخذهن خليهن عندك انا معتمد على نفسي كافي شبعتيني العمر كله بدلالك
- غير هالوحيد انته شلون مادللك
اجيبلك ملابس هسه راح يبرد الجو بعد بالليل
-اخاف ابوي مايرضى اخذهن ؟
- ملابسك هنه شنو مايرضى .. اكل انته يمه اكل طلع من ثلاجه شيعجبك واكل بين مالملك ملابس
- يمه فدوه خليلي حذائي الرياضي الابيض
وعطر على ذوقك
صعدت بسرعه لغرفته وضليت اطلع بالهدوم واسفط بالجنطه .. لميتله كم قطعه ملابس بيت وداخليات وبنطرونين للطلعه وبلوزات بهاريه وحذاءه وعطر ومشط وجواريب
ونزلتهن اله ...
اخذهن وكالي ..
- يمه مشتهي كيك من ايدك بلكي تسويلي وحده وادزلك حسن ياخذهه
- صار يمه من عيني باليل اسويلك
-لا خليهه بكرا الصبح ابوي اكيد يلكطها ويحرمها علي وتضل بنفسي

- والله زمن وصرنا نتختل .. باجر يمه اسويلك واخابر حسن ياخذهه
- انتظرهه يمه داريني بيهه زين
- زين حبيبي ادلل فدوه انتبه على نفسك وشتحتاج يمه كول لا تستحي انته شكد ماتكبر تضل ابني المدلل
- مااحتاج غير دعائك يالعافيه انتي

بوسته وشميته وضليت اتلمس بوجهه واكوله رتب لحيتك وخفف شعرك وهو عينه تلمع
ويبوس بايدي .. طلع وهالمره الوحيده الي حسيت بيها فعلا ابني حسين كبر ...

اليوم ليله ام جراح والشيخ يتعشى يمها
ماسويت عشى ولا الي نفس اكل وحدي
صار فتره احس بخمول وتعب ودائماً
لعبانه نفسي واتقيء .. اكلي قل هواي واكثر وكتي متمدده اكلب بالتلفون لو احجي ويه غاليه الي مافوتت يوم بدون ماتسألني شي عن الحمل ...

ساعه عشره صارت خابرت حسين اطمنت عليه وكمت اريد اقفل البوب حتى انام
جان تجيني رساله من الشيخ كاتبلي ..
' انتظريني '

كعدت بالحديقه انتظره وهو نص ساعه
ودخل بهيبه مشيته الي ملينهه بشاشه وجهه وابتسامته وهو يباوعلي ..

رحت يمه بوست خده وهو بوس راسي وكالي ...
- رجع الدم بوجهك يولي اثاري حسين اعز مني
-هههه حسين ابن هالكلب وانته الكلب كله
- ههههه تعرفين شلون تلوتين بالكلام من يكدر لسانك المعسول انتي
- انته تكدر
- تين ما بخاطرك شي من شيخك ؟
- لا ياعيني اطمن اني مسلمه امري الك واثقه ماتاذي كلبي بابني بس شده وتزول ان شاء الله
- هذا درس ياتين درس للي يخطىء بجهاله
درس حتى يوعى بعد يفتح كل خلايا عقلو
-بشنو خطىء ليش متحجيلي
-لان كلب الولده مايضم سالفه
-ههههههه
- دحكتي ! انا ساكت عنها لانك راح توضحيها لابنك وتضيعين تعبي عليه
-زين بس كولي يعني هو حاجي شي لو متصرف بشي مو زين مسوي شي بدون مندري يعني
- اهااا هو مشكلتو ان كل هذني ماسواهن
- شنوو!!! تره اول مره مافهمك
- تفهمين ويه الايام
اسمعيني تينتي بكرا الغدا جماعي بيتنا
انا ادري بصحتك مو تمام ماريد تحضري شي او تدخلي بشي ابد .. ام جراح تتكفل بكل شي .انتي ضلي هين كبل الغدا انا ارسلك واحد من الولد
- صار ياعيني بس والله لو ماهاللعبان نفس الزايد جان اني طبخت وياهه ماعندي شي بس كاعده
- ارتاحي ارتاحي وانا بكرا العصر بأذن الله امشي ادحك التحليل شصار عليه
لو ما كعدتي ويه الولد اليوم كان رحت اخذتو
- شصار بسالفتهم هسه شقررت
- شقررت !همه شسوو حتى اقرر!
مصفنين وهاي فرحانين بكم علاكه غذائيه موزعينها عجل انا ما منطي حصه لكل عايله منهم من حصاد اراضينا !!
- ميخالف ياعيني هسه همه مو زين منهم
اشتغلو ولموهن فلس فلس بهالحر بالعماله وسوو هالشي هم على كيفك وياهم
- زين منهم لو ماكان هالوضع نفسو الحين
بس دام فكرهم هالصغر وهاذي محدوديتهم
مايرضيني ولا ادحكو شي قيم
- انته وين تريد توصل ويه جراح
- اريد اخليه صاحب سيط بافعالو مو ابن الشيخ الكبير صاحب الميراث
وهذا هو يبنيه بايدو
- الله كريم .. جراح ذكي وصاحب اراده وعزم اكيد يكدر على الي بالك
- ان شاء الله يكدر لان لو ماكدر عليها راح يخسرني تعب العمر
- شلون يعني
- تخيلي كل الي انا ورثتو من ابوي وتعبت عليه سنين ومضيفي العامر هذا والاسم الي تعبت يلا رسختو بين اهلي كل هذا اسلمو لغير ابن بيتي والي ياخذو جايز بفعل واحد متسرع منو يخرب كل هالتعب والسيط
المشيخه امانه بهالاعناق ان انخانت الامانه مره بس مره تهدم تعب اجيال كلها تصير كلمه الشينه تلحكهم ولو كانو اصحاب جود وكرم .. تضل العيبه بالوجه ظاهره من فعايل فلان الي تسلم المشيخه بالاخر
- صح والله . بس انته بعدك بحيلك ماشاء الله ليش تعوف المشيخه من هسه !
- ياتين العمر هم اله حوبته
ان اليوم انا واكف على حيلي شامخ جايز بكرا ماكدر ارفع راسي من هالفراش لزوم اأمن على تعبي واربي ولدي على الي تعلمتو بسنيني بين المضايف غير هذا انا اموت ماادي الامانه
- لاا اسم الله على عمرك حبيبي اسم الله
- كلنه على درب واحد نمشي ياعيني
- ربي لا يفجع كلبي بيك بيوم بجاه حبيبه محمد

ابتسم وبوس راسي وكالي ..
- يعز علي اخليكي وحدك هين والله
- كلهن ساعات ويطلع الفجر واشوفك مثل كل يوم
- ماتمشين تنامين حدر امي
- لا خليني هنا مرتاحه ماعليه شي مثل كل يوم اقفل بابي وانام
- عجل نامي من الحين ياعيني لا تاخذك الافكار وتسهرين وحك عينك كلشي يرجع احسن من الاول بس اصبري كم يوم
- تلكاني صابره وراضيه ان شاء الله

بوس خدي وطلع .. اني اعوف باب الشارع ماقفلهه بس باب الكليدور والاستقبال اقفلهن
واروح لغرفتي انام ..

ثاني يوم كعدت على صوت الاذان وبمرور هالعمر صرت اعرف ان كعدتي للصلاه بهالوكت قبل الاذان بدقايق هي نعمه من ربي لان صوت الاذان مو بهذاك العلو الي يكعد واحد من نومه ..
ابدأ يومي ب
' الحمدلله الذي هدانا لهذا وما كنا لنهتدي لو لا اذ هدانا الله '
اتوضى واصلي الفجر على نفس سجادتي من سنين رغم انها احتكت شويه بس احسها عزيزه وقيمه عندي ماحب ابدلها هالسجاده جبتها من مكه الها مكانه عندي ...

بنفس التوقيت على كعدتي وبأثناء مااني اسبح بالصلاه على النبي اسمع باب الشارع تنفتح
الم السجاده بفرحه وانزع احرام الصلاه
وامشي افتح باب الكليدور الكاه واكف ومتلفلف باليشمغ على وجهه يحضني وابوسه من وره اليشمغ على شفته يلا هو يفتحه ويرفعه عن وجهه ..

ندخل جوه نكعد متحاضنين وهو يعيدلي نفس الحجايه من سنين ...
- اليوم انعم الله علي بحضنك من هالصباح وكاد يومي حلو
- عسى الله يديم بينا هالنعمه

يبوس راسي ويكولي ..
- نتريك بعدين خلي نناملنه ساعه بهداوه وراحه بال

نروح للغرفه نتمدد وننام متحاضنين
هاي احلى جزء بيومنا .. قوتنا وراحتنه وهداوه بالنه كلهه بهالعاده الي بقينا عليهه ثابتين من سنين ..

ساعه سبعه يتريك ويطلع واني اتلهى انظف البيت الي مابيه شي بس تكضيه وكت
واخابر غاليه اكضي وياهه وكت بسوالفهه الحلوه .. بنتي بكل شي قويه ورداده لسان الا ويه رجلها دجاجه مصلحه لاتهش ولا تنش

يحاجيها تحاجيه يسكت تسكت يبوسها تبوسه
شيسوي هي تقلده .. واني عقلي كله ازقه الها زق كل يوميه اعلمهه شي وانصحهه وهي بس اي وافتهمت وتسده وره كم ساعه ترجع
اكلج يمه هذا هيج كلي اردله هيج لو اسكت ؟
تخليني اريد اشك الهدم الي عليه ..

اتفاجىء بيهه والله مااتوقعتهه هيج فاهيه وتنثول ويه رجلهه .. على الدلع والدلال الي جانت تمشيه على اخوتهه وابوهه كلت هذا اسامه اقل شي يمكن يكوم مايسد الخط وياهه
طلعت بس هنا سباعيتهه ..

حضرت الكيكه لحسين وسويتله اثنين وحده بالككو ووحده بالبرتقال وغلفتهه وخابرت حسن اجه اخذهه بسكوت ..

الظهر رحت لبيت الشيخه ويه عباس وكت الغدا سلمت وكعدت وياهم .. تغدينا وكملنه ورحت اصب الجاي واجيت قدمته جان يأشرلي الشيخ اكعد بصفه ..

كعدت وصرنا نشرب الجاي والولد عباس وصكر وحر واسر كاعدين هم ويانه
رماح عنده تطبيق وكاعد اقسام داخليه بغداد
ينتظر يبدا الدوام حتى يحول هنا ..

دك تلفون الشيخ وهو اول ماجاوب ساكت جان شويه ويصيح بعصبيه ..
- ول هذا انا ماقلتلك لا تشغلو وان كان ابني لا تشغلو وصيت انا ولا ما وصيييت
ايييه لا تحسبو غريب ولا كريب هالولد هذاااا تعثر دربو زييين
خلني اسمع مره الاخرى مدخلو عتبه بابك
اطردو اييييه اطرود انا طردتو ضلت عليك خله يتهجول بالشارع هو يحير بامرو انا مانكسر كلبي عليه انته ليش ينكسر كلبك !
ولااا حتى حسين اثنينهم نفس شي اثنينهم ماتشغلهم
يلا يلا مع سلامه

كلنه باوعنه عليه والكل ساكت .. كلتله الشيخه ..
- شجرالك على الولد انت يعني تريد تكسر ركابهم من كل صوب !
-ايييه انا ناويلهم شر ما مبين يعني !
-والله بعكلك ضميمه ولا انك ولدي الاعرفو

سكت ماردلها واني كلتله ..
- لو تتهدأ وياهم شويه خلي يعينون نفسهم خطيه مو ولدنا هذوله
-تين لا تدخلي ولا احد يتدخل ولدي وانا كيفي اتصرف بيهم

سكتت وباوعت للولد كلهم ساكتين ومدنكين بس عباس كال ..
- يايه هذا ظلم يصير مو عقاب ولا تربيه
ميصير نكطع الارزاق مو هذا الي متعلمين عليه !

باوعله الشيخ ورافع حاجبه وكال ...
- ايييه بعد كمل
- اييه يابه قرارك احنه نحترمو وعلى هالراس بس من تصل لكطع ارزاق اخوتي هين تعذرني يابه سكتي عليها ثكيله
عجل همه من يدورون الشغل غير حتى ينفذون الي تطلبو منهم شلون بهالحال يضيع وكتهم بالشارع يدورون على شغله وتالي مايلكون شلون يعيشون ! يكتلهم الجوع مو تعرفهم اكلهم كله من المطاعم منين يصرفون !!!
هم حك الله هذا لازم مانكطع دربهم خليهم بره بس لا توكف بدربهم خلي همه يدبرون حالهم لا كلش تخنكهم من كل جهه والله حرام يابه
هذول اعزازنا والكبار حرام يصير بحالهم هذا ونسكت

شرب اخر قطره جاي بالاستكان وحطه بالكاع وكال ..
- وانتو ياولد رأيكم؟

حر واسر كالو ..
- براحتك يابه انته ادرى

وصكر كال ..
- اني من راي عباس

فر سبحته مرتين وهو يباوعلهم برود رفع اصبعه واشر على حر واسر وكال ..
- اصعدو اخذو تلفون والشاحن والمحفظه واطلعو دورو اخوتكم وين اكعدو حدرهم

كلنه صفنه عليه والولد فكو حلكهم .. رجع اشر على صكر ..
- انته هم تلحك اخوتك
وعباس تطلع توصلهم وتبلغ سلامي لحسين تحكيلو ..ابوي دزلك الي يشبهك علمو وتعلم منو .. زين يابه بالحرف تنقلو وتبات حدرهم سوولكم خوش لمه تونسنو هالليله بالشارع

من صدمتنا ببرود اعصابه بطردهم كلنه ساكتين منعرف شنحجي .. جان يطك بالسبحه ويكول ..
- يول اشو تتصفن بوجهي وش حكينااااا
امشو اطلعو يلاا عجل انتم صمان ماتسمعو مو قلت تلحكون اخوتكم شمكعدكم هين !!!

لزمت ايده وكلتله ..
-شيخ على بختك مو كل ولدنا يطلعون كافي هذولاك الي حاركين كلوبنا لليوم لاتطردهم فدوه
-تين انا ما قلتلك لااااا تدخلي
-بس ميصير هيج والله ميصير
- كلمن ينطرد من هيييين هو من ايدو
ماطرد احد عبث انااا وهذول السبع ولد مايستاهلون دقيقه يكعدون بهالبيت
ولو هالرماح هين كان هم شردتو بالشارع حدرهم ..بالحرام مامنهم احد يرجع ولا يعتب شارع بيتنا واسمعن انتن يالحريم
فلس واحد لو عرفت واصل لايدهم

اخلي حتى بالاحلام ماتطولن خيالهم
والي تعلى كلمتو على هالكلام ينال جزاتو ويزيد عليها

سكتنا كلنه واباوع لام جراح تبجي وحاطه ايدهه على حلكهه رادت تكوم صاح بيهه وكعدهه والشيخه ماكالت غير ..
- هو العرك دساس عيناً ابوك ساعه الي يهيج يهيج

ما رد عليها بس ضل يفر بسبحته ويباوع للباب والولد نزلو واحد واحد مبدلين وماخذين بايدهم علاكه ملابس وكفو يباوعولنه وهو كاللهم ..
- ما سألتوني ايمتى ترجعون ؟

سكتو ودنكو راسهم وهو كللهم ..
- ايمتى مايفهم حسين غلطو ويفهمكم ساعتها ترجعون
تمشون تكعدون حدرو وترجعون تحسبون افعالكم وكلمن يحاسب نفسو ويدحك بشنو مكصر وما منكم احد يفكر ما مسوي شي ومالي دخل كلكم بنفس الغلط واكعين
تطلعون من هين ما مرضي عليكم لحين ما تفهمون الغلط وييييين وتصلحوه يلااا ينالكم رضاي ...
توكلو يلا

طلعو بدون كلام وضلينه احنه نتصفن بوجهه
جان يطك بسبحته وكال ..
- تين امشي نروح لبيتنه انا اناملي ساعه وانتي تلمين الغرض الي يعوزك وتكعدين هين بينا بعد .. دحكي اي غرفه من غرف الولد مناسبه الك ورتبيها

رحت وياه واني ساكته من دخلنه بيتنه
كلتله ..
- خالد امهم خطيه على الاقل برد كلبهه بكلمتين عنهم
- انتي كلبك بارد على ولدك ؟
- لا بس اهون شويه
- عجل انتي صبريها بمثل ماصبرتي نفسك
- ان شاء الله .. ليش تريدني اضل هناك مو هذا بيتي ومرتاحه بي
- البيتين فرغن وانا اريدك حدر عيني تضلين ماريد فكري يضل عندك
- زين شلون ياغرفه اكعد تناسبنا
- غرفه رماح كبيره رتبيها النه
- خاف يرجع هالايام
- مايرجع هين ماعندي ولد بعد يعتب الباب
وزين ذكرتيني بسالفتو
- شنو شتريد تسوي ؟

فتح تلفونه واتصل على عباس وكله ...
- اسمع يول هذا اخيك رماح ايمتى ماتسمعو يريد يرجع هين تحكيلو ابوي مايرحب بيك بالبيت وشلون مايريد يدبر حالو خله يدبرو
اييييه يضل كاعد حدركم حاله من حالكم
يريد يرجع لبغداد يريد يضل هين بالشارع وين مايولي خله يولي ماهمني انا المهم مادحكو هين مفهوووم

سد الخط وتمدد وكالي ..
- كعديني بالاربعه حتى اروح اخذ تحليل
- ماشي عيني

ضليت افكر بسالفه هالولد شنو الي غلطو بي كلهم ؟ وليش اليوم بالذات مو هذيج الشهور ؟

اخذت فرشات وملابسي وغراضي وانتقلت بيت الشيخه بغرفه رماح رتبت غراضي جانت غرفته هي غرفتي قبل هنا وجربايته ام نفرين غيرت فرشتهه ونظفته ونزلت كعدت ويه الشيخه ... تسألني اذا اعرف شي من الشيخ واحلفلهه ماعرف ..

كعدت احجي ويه ام جراح واصبرهه
اكوللها ..
- الشيخ اكيد مايكره ولده ولا يريد اذيتنه هو بس عنده فد غايه باله خلي نصبر لامره ونشوف تاليهه لانصعبهه عليه ويضل حاير بينه

جانت بس تهز براسها بدون مترد شي
على العشه رجع الشيخ ومن كملنه اكل وجاي كالي اروح لغرفه الشيخه .. رحت واجه ورايه طلع ورقه التحليل وكال ..
- تين يولو هالتحليل اخذتو لدكتور وحكالي نسبه الكرياتين عندك مرتفعه وهو السبب بكل هالاعراض ومن حكيتلو على كليتك طلب فحص ثاني الها ولزوم بكرا نمشي حتى تسوين هالفحص
- ضروري يعني
-اييه ضروري بكليتك تعرفين مانتهاون
- ماشي نروح

ثاني يوم رحنه للدكتور سويت سونار وتحاليل جديده وطلع ارتفاع باليوريا الكيرياتين
رجعت هالايام انتظم بالعلاج لان من فتره طويله تركته ...

عدا اسبوع على طلعه الولد والبيت كئيب
كل وحده منا كاعده وحاطه ايدهه على خدهه وتتصفن مالنه نفس بشي والشيخ على كد الاكل يجي وساكت ميحجي شي
غاليه تخبلت من سمعت كل اخوتهه بالشارع صفو وضلت تتوسل بالشيخ يرجعهم وهو ميقبل وكل مايسكتهه ترجع ثاني يوم تخابر وتعيد نفس الحجي ...

عزمتهه كلت عيب طولت عزيمتنا ومبين سالفتهم متنفض هالايام ردتهه تجي مقبلت
كالت حالي حال اخوتي مااكعد بيت مابي صوت اخوتي ولا اعتب بابه ..

حسين من اخابره واسأله على وضعهم يكولي عايشين الحمدلله .. مأجرين مشتمل صاير طابق ثاني وكاعدين وكلهم يشتغلون ويلمون فلوس الايجار والعيشه ..
يكول كل ليله نلتم ونضل صافنين نفكر ونحاسب نفسنا شنو الشي الي غضب ابويه هيج منا ومانعرف
وجراح عايفهم ورايح للرمادي ماقبل يكول شعنده رايح وضلو همه وحدهم ..

دخلنه شهر العاشر ودوام الولد راح يبدا
حاولنه ويه الشيخ بس يوضحلهم شي ينطيهم عقاب ثاني راح يضلون بره عايشين سنين اذا يعوفهم على عمى عينهم هيج وهو مقبل
كال كل اعمى يصنع لنفسه طريقه حتى يعيش
خلي يدبرون نفسهم بنفسهم ..

حسين لازم يروح لبغداد يداوم اقسام داخليه
وضل حاير شلون يروح ويعوف بقيه اخوته هنا ! ..
رماح اصلاً مارجع ولا وصل من سمع هالحجي من الشيخ عليه ..

نص شهر العاشر حسين كال ..
- يمه راح نطلع كلنه ويه جراح للرمادي
مدبر شغل هناك ويريدنه نعاونه
-شكد تضلون هناك
- مادري بعد يم الله بس احنه من الصبح نقفل البيت ونطلع
-الله يحفظكم

راحو من الصبح للرمادي وعرفت بعدين ان
هناك اكو مشروع بناء وماخذهم جراح عماله
خمستهم ...

ضلو ٣ اسابيع ورجعو كلهم لحديثه وجراح ماخلاهم يرجعون للدوام ياخذهم من شغل لشغل وحسين يكول ..
مانصرف شي احنه بس العشه جراح يدبره
وكل يوميتنه عنده نلمهه ..
جراح صار مايكعد وياهم يتنقل بين منطقه ومنطقه وميكول شنو الي باله بس قبل ميطلع يكللهم رايح لهالمكان ويروح ..
الولد ضلو من شغله لشغله يتنقلون ومايصرفون بس على كد المسواك الباقي يجمعوه لجراح ...

ودخلنه شهر ١٢ اول اسبوع بي يوم جمعه بالليل دك تلفون الشيخ .. عرفناه عباس لان بس هو من الولد يجاوب على اتصاله
سده منه وكال ...
- الولد راح يصلو هين لا اريد بكي ولا صوت يطلع ولا وحده تكف وتسلم عليهم

فرحنه وصرنا ندعي ربي يعديها على خير هالمره ...

من وصلو وسمعنه صوتهم صرنا نريد نطير ونحضهم واحد واحد وحتى الشيخه تدمع عينها من شافتهم ... سلمو وردينا السلام بس على كعدتنا ...

اباوعلهم شلون مبين التعب بوجوهم
ولحاياهم طولانه شعرهم ثخين وممرتب مثل قبل ..يباوعون بالوجوه ونظرتهم تكسر الخاطر ...

الشيخ اشرلهم يضلون واكفين بمكانهم يم الباب وكال ..
- جراح احدر اكعد هين وانتم ضلو بمكانكم واكفين لان هي كلمتين ان عرفتوها تدخلون ماعرفتوها تديرون ظهركم وتمشون بلا نقاش

جان رماح وياهم وضلو ستتهم واكفين يم الباب وبس جراح كعد على يمين الشيخ
كال ..
- يابه طلبك كلو تنفذ وان امرت بغيرو هم يتنفذ مانريد غير رضاك
- شلون تنفذ اشرحلي شسويت من فعل يستاهل رضاي !
- اول شي يابه انا راح احكيلك على شغلي الي لنفسي صنعتو بعيد عن الي اريد بيه رضاك
- اسمعك
- مثل ماتعرف يابه انا يوم مشيت من هين اخر مره مابجيبي غير فلسين يكضن يومي
وانته طلبت مني اسوي شي اكبر من هذاك
بالاول انا ظنيتك تريد اعيل هالايتام والفقرا
بعدين فكرت ان هالمطلب غايتو شنو؟
وين ابوي ناوي يصل وياي بهالشي؟
فكرتلها كثير وتالي فهمت ..
انا المستفاد بكل هذا التعب فهمت انك تريد تعلي شأني بين اهل ديرتي بعمل خير انذكر بي طول العمر وهين راح يرافك اسم جراح صفه خيره تنذكر لو طرى اسمي ..
وهين لكيت الفكره الي توصلني لهالشي
درجت قائمه باسماء اشخاص معروفين بكبر شغلهم بكل الانبار ومشيتلهم واحد واحد التكيت بيهم بلسان وكلام طيب كسبت نصهم
سجلت كل واحد ومطلوب شغله من عمال ومن مواد او خدمات صعب يحصلها
هين قسمت شغلي لاثنين ..
الاول اجمع كل هالمحتاجين لاشغال من اهالي ديرتي والثاني اجمع كل الي يطلب شغيل عندو ونوع الخدمه المحتاجها

سويت صفحه بالفيس وشاركتها ويه جماعتي وجماعتي شاركوها ويه غيرهم وبدو ولد ديرتنا وغيرهم بعد من اهالي حديثه يراسلوني وتواصلت وياهم و ويه الجماعه هذولاك وكدرت اشغل ٣٧ ولد من اهالي الشاميه و٢٢ من الحقلانيه والبقيه الشغل الي ردتهم بي ما رضو عليه

- وعفتهم ؟

- ههه لاا شغلتهم هين بترميم محل طابقين
هالمحل انا اشتريتو من ولد بالتقسيط
وناوي افتحو الهم مطعم صغير للاكلات السريعه اخليه شبابي يمشي شغلو هالوكت

- ايييه وبعد

- للحين انا ماوكفت بشغلي بس هذا الي انجزتو لليوم وبعون الله اكدر ارتب هالمطعم و يضل لهالولد مصدر رزق وكل الي يطلع منو ينصرف على اهل ديرتي وهذا عهد علي امام الله اني بعد ماارجع حك اخوتي الي جمعتو منهم هالايام ، كل الي اكسبو من هالشغل ينصرف لتدبير حال بني ادم
وانا الله رازقني بالحيل والعقل وادبر امر عيشتي
يابه انا اشكرك انته وعيتني على نفسي يشهد الله بكل ما اتعب واسعى لشي شغله بهالشهور اترحملك بيها .. دحكتها نعمه من الله ودكت بابي هين انا اطلب رضاك حتى اتوفق بباقي دربي انا بدون رضاك يابه اضل متعثر

ابتسم الشيخ ورفع ايده اشرله يجيه وهو كبل راح حضنه ويبوس بي من جتفه وراسه ويدنك على ايده يبوسهه واحنه بس دموع
فرحانين ومتأثرين بموقفه ..

رجع كعد يمه والشيخ كال ..
- دحكت يوم الي فهمت الهدف وين عرفت ترسملك طريق وسعيت ووصلت
جراح يابه زمان كانو يقولو ..
الي يلبس التاج لزوم يحمل وزنو
احنه الرجال تاجنه عكلنا لزوم نعرف نثبت ونكف وكفه اسود شامخه ونتحمل كل الي يكع على هالعكال من بلاوي ومطالب
هين انا ردتك تتعلم الصبر وتتحمل الضياع بس بثقه .. وردتك تتعلم ان الانسان مايصنعوه اهلو هو يصنع نفسو
انا لو بعد كبل كم سنه مسلمك المشيخه
واحكيلك امشي ياجراح اكعد بمكاني وشيل امر هالديره على كتافك ماكنت راح تكدر تدبرها اسبوع واحد ماتتحمل ولو صبرت فتصبر بجزع مو برحابه صدر
لانك ماتعرف قيمه الي فوك راسك موضوع
وبعدك للحين ماتعرفو ولا واحد منكم يعرفو الا ساعه ما يكضبو ويدحك ثكل وزنو بدنياه واخرتو

ويوم الي سألتك على ديرتنا انا ماسألتها عبث
ردتك تدحك نفسك وشكثر انته جاهل بامر ديرتك وشكثر انته بعيد عن مسؤوليه ساعه الساعه تنحط بيدك وانته ماتعرف شبرين هالديره وشكثر ومن فيها سعيد ومن تعيس

مااظن يخفى على احد هين ان انا عيني عليك انته الشيخ من بعدي لان انا من صغرك ادحك بيك الي ماتعرفو انته عن نفسك ولو كنت فشلت بفهمي اليوم ارجعك بره واذيك اكثر واخليك تفهم ولو تطلب مني الامر ابعدك عن عيني عشر سنين بس مااسلمك هالمكان الا وانته كاشف قدره نفسك لنفسك ..

دنك جراح على ايد ابوه وبوسهه وتشكر منه
وكال ...
- يابه انا كل هذا افضل رضاك عليه ان منحتني رضاك تسعدني وترفعني بعين نفسي
وان مارضيت فاضل محرمو على نفسي هالمكان
- رضيت يابه رضيت عليك دام انك وصلت للي اريدك تفهمو رضيت
- الحمدلله الف الحمدلله

رفع راسه الشيخ وباوع للولد الي بعدهم على وكفتهم .. ضل يفر بسبحته وكال ..
- حسين
- نعم يابه
- فهمت غلطك وين ؟
- يابه انا عصرت مخي على هالغلط وماعرفتو كل ماافكر هذا هو غلطي ادحكو لا
رايد منك بس تحكيلي اي يوم انا غلطتو بس دليني هالمره يابه
- رماح يالدكتور عرفت انته ليش مامرحب بيك هين ؟
- والله يابه انا ماسويت شي يغضبك وظنيت طردي على واهس اخوتي يعني
- هاااا وانتو يا حر ويااسر فهمتو ؟
- يابه احنه عمرنا مافتحنه حلكنه بكلمه تغضبك وكل افعالنه انته تدري بيها مايوم تعدينا للي مايرضيك
- هااا زين زين وانته ياعباس ؟
- يابه ان كان على كلامي هذاك اليوم فانا حكيت الحك ومااعتبرو غلط وان حاسبتني عليه فهذا مو حك
- صكر اذكر قلتلي انا من راي اخوي ! الحين شنو صار رايك ؟
- مادري يابه انا متحير بامري كدامك لا ان سكتت ترضى ولا ان حكيت ترضى
- يعني ؟
- يعني كيفك يابه انا بكل الي تطلبو حاضر
- عجل مدامكم للحين ثولان تطلعون بره ومادحك خيال واحدكم يعدي حدري

الولد كلهم ضلو ينافخون وجراح رأساً لزم ايد الشيخ وكال ..
- لاا يابه اترجاك لا
اخوتي طايعين الك والله وتعبو هالشهور كلها ماضاكو طعم الراحه رايدين رضاك ويدورون عليه بس محد منا فهم مقصدك وين
- عجل وش الفايده منهم ان ماعندهم عكل يفهمهم
- يابه استحلفك بالله لا تطردهم بعد وحك عينك متبهذلين وسنه دراستهم راح تفوتهم
عليك بنور محمد يابه احلفك بنور نبينا
تفاهم وياهم اسمع منهم وفهمهم دليهم ولو على راس خيط الموضوع لا تردني يابه هاي اول مره انا اتوسلك واطلبك بشي

عدل كعدته الشيخ وكال للولد ..
- مثل ماشفع يوسف بيوم لاخوته
انتم شفعلكم جراح وهو عندي
بمعزه يوسف عند يعقوب
اكعدو اكعدو

كعدو الولد وكال ..
- تين مي لولدنا

كمت بسرعه جبتلهم المي وقدمتلهم ورجعت كعدت جان يكول ..
- انتم السته غلطتو نفس الغلط وظنكم هو ماكو غلط .. غلطكم هو سكتو عن الظلم ..

انا يوم ما طردت جراح على سؤالين صغار
مادحكت الخير منكم وكف بوجهي وحاججني وحكالي ليش يابه هذا اخوي ليش تطردو !
تريد الجواب انا اجاوب بدل عنو! تريد الشغل انا امشي اشتغل حدرو انا اعينو ونرضيك
احد منكم نطق هالشي ؟؟؟!!!
الكل خنست وسكتت ...
انطيتكم مجال يومين وثلاث وما منكم واحد سوه شي .. تالي حسين كدام عينه يدحكني
ارفض الكلام ويه اخوه واقسي عليه وياخذ تلفون ويدير ظهرو ويمشي ولا كأن السالفه تخص اخوه وابن ابوه ...
سكت عن حك اخوه وتخلى عنو بشدتو
والي ما يعرف حك الاخوه ماله مكان بينا
انا مااربي قليل نخوه انا رباتي للرجال الي ماتفوتهم صفه حسنه الا مايكون الهم منها نصيب ..

ويوم الي مشى حسين انعاد نفس الغلط من البقيه .. مادحكت رماح الي اكبر من حسين والي هو كبير البيت بعد جراح مادحكتو رفع حسو واعترض على طرد اخوه
مادحكت اقرانو عباس وصكر حزت بكلوبهم مشيه اخوهم وهو يصيح بلا سبب انطردت
وامهلتكم اربع شهور ... اربع شهور انتو
ما رف كلبكم على خويكم ... مادحكت منكم واحد الي اخذ لاخوه فراش او هدم يلبسو
مادحكت الي ذكر اخوه على الاكل وتعلكم ريكو لان خويه ينام وياكل بالشارع وهو هين مترف العيش !
مابيوم سمعت منكم واحد بس واحد يفكر ياخذ لاخوتو طبخه بيت ويمشي يدحكو شمحتاج
تعرفون خويكم يكد ويتعب ويشتغل من الصبح ويوفر بمصرفو وما اخذتو علاكه فواكه وانتو تمشون ادحكوه ولا علبه حلى
وانتم تصرفون الالاف كل يوم على نفسكم
تلبسون وتطلعون وتاكلون وناسين اثنين من خوانكم الي بينكم وبينهم نفس الدم
نايمين بالشارع والحر يصكع فوك روسهم طول النهار ..
اربع شهور انا كل يوم ادحكلكم بي اتأسف عليكم وادحكم بالعين الصغيره وحاسبكم حشرات هين اجر الصبر وياكم شهور
متأمل واحد منكم يتحنن كلبه وتطلع من لسانه كلمه حك
تالي يلا عباس نطق وقلت يلا خلي ادحك من الي يتشجع ويكف حدر اخوه ويسندو بكلمتو
وتالي هم رجعتو لنفس الغلط
صكر شمرها كلمتين مثل الشص ياتصيب ياتخيب وهو بالاصل مطنش الدنيا دافرهه برجلو وحر واسر انا غاسل الايد منهم
جهال حرام حتى اسميكم شباب
جهال مالكم لا راي ولا فكر ولا شجاعه اي صفه من صفات الرجال ماتحملون
ورماااااح اااخ يارماح حاير بشهاده الطب وناسي وراه اهل واخوه واكعين بشده
تمنيت لو بيكم رجال الي يحدر يحاججني
رجال الي يكف بوجهي ويعترض على طرد خويو وطولت بعادو عن البيت

غاليه وهي بنت وبعيده عنا ومن يوم ماسمعت بسالفه جراح لليوم وهي ماخلت شي ماسوتو حتى الين وياكم واتفاهم .. وهي حامل وروحها بخشمها صايره وبراسها بيت وعيال
ومافكت عن خويكم ساعه اذا مااتصلت وتطمنت وتكاطعت ويانه وماعتبت بيتنا لان اخوتها مو هين ومو راضيه على حكمي عليهم ..
دحكتو الفرق !
دحكتو غلطكم ويييين !!!!
الي يسكت عن الظلم هذاااا شيطان
وانا مالفي شياطين بيتي انااا بيتي لاهل الله والرجال والي بدمهم نخوه

انتم ماتفهمون كبر غلطكم كبر سكوتكم هذا
ماتفهموه .. جهله انتم عقلكم على كد يومكم بس مايفكر لبعيد ..

اليوم انتم سكتم عن ظلم وهو ظلم لخويكم
خوفاً من ابوكم بكرا هم تسكتو عن ظلم غريب خوفاً من الاكبر منكم
جايز الي يظلم شرطي او ضابط او مدير او حتى دكتووووور اكبر من دكتوررنا هين
وهم تسكتو ليييييش لان هاذي صارتلكم سهله
تكفون ايدكم من الناااااس وحكها حتى تسلمون على مصالحكم كلمن يضل بامان ماتصيبه صايبه بسس انتوووو نسيتو هذااا كله حسااااب وكتاب عند ربنااا يوم الي ينعرض وتنسأل يا حسين ويا رماح يوم الي تنسأل ليش سكتت عن حك اخوك !
شتجاوووب هاااااا شتجاوب ربك
تحكيلو مادري لو ماعرفت لو ماتدخل ابوي هو يقرر!!!

وانته ياصكر يوم الي يسألك ربك لييييش ما عنت اخوك وسندتو بكلمتو يوم الي شهدك ابوك !!! تعرف ترد لو تحكي حرت ويه ابوي كيف ارضيه !!!!

وانتو يالجهااااااال ياحسافه طول اللحايه والشارب بوجه جاهل لانفع بفعل ولا بكلام
ول انته سميتك حر تفهم معنى اسمك انته يول لو ماتفهم !!! جااااااوب تفهموووو

كلهم جانت عيونهم تدمع ومدنكين الراس
وبصيحه الاخيره لحر يلا رفع راسه وكال ..
- اييه يابه افهم
- تفهم بس ماتحمل صفات اسمك
حر انته حر مايكضبك شي ولا يوكفك شي عن مرادك كان لزوم تحرك الدنيا وترجع خويك لبيتو وتدخل بعيني تحاجج بلا خوف

واسر هه ااااسر ول تخيرتلك هالاسم وتمنييييت اخر ولدي يصير اسر اسم على مسمى ... اثاريك طلعت خووووان عشره
وصاحب مصلحه حالك حال الي اكبر منك

ول حسافه والله الف الف حسافه على كل يوم اصحى بي وانا اتأمل ادحك سبع رجاااال حدري يكفون .. تخيرتلكم زينه الاسامي وانا اتأمل كل صفه بهالاسم تترسخ بروحكم
تاليكم طلعتو خنااااايث من موقف واحد تكشف عن داخلكم الهش وخلاني اتنددددم
ما كشفت عنو من زمان وعدت ترباتكم
كان لزوم اربي جهااال بلحايه هالسنين
ياحيف والله ياااااحييييف ولد ابو جراح هاذي سواتهم ياحيف

راح جراح كعد يم حر واسر وكال ..
- يابه هذول رجال والله رجاال و واحدهم كلبو اصفى من الغيم وعودهم كوي وصبرهم طويل تحملو كثير من الصعاب والمشقه حدري وسندوني انا لولا وكفتهم ماكنت اكدر اكسب رضاك

قبل مايحجي الشيخ شي حر واسر حضنو جراح ويبجون .. ودنك صكر على راسه بوسه وصارو يعتذرون منه وعباس هم دنك بوس راسه وجتفه واعتذر منه وهو ضل يهدي بيهم .. حسين راح على الشيخ دنك باس راسه وجتفه وكال ..
- يابه انا متعذر من جراح من زمان ويشهد الله ماعفت اخوي لحظه وان كان سكوتي هو سبب غضبك عليه انا اتعذر عنو يابه والله ماكان سكوت رضا بس طاعه الك بقرارك
- لا تطيعني على الظلم صير صاحب حك وخلي موقفك موقف شهامه ورجوله هي الرجال وكت الشدايد تبان
- حكك علي يابه حكك علي وحك اخوي
على راسي وانا تعلمت من هالغلط كثير
يابه والله توضحلتي الحياه اكثر من اي يوم بعمري العشرين .. سامحني يابه
يشهد الله اخوتي كلهم بمعزيه روحي وهمه يعرفون حسين يفديهم بدمو لو اعتازو
يابه احنه بينه خوه طيبه وان ماتبينتلك بس احنه واحدنه ماينام اذا مايتطمن على خويه
وان كان هالحد الي احنه بيه ما رضاك نوعدك نتغير ونخليك مرفوع الراس بينه

كعد رماح بصف حسين وكال ...
- يابه كلامك نبت سهام بكلوبنا ماعشنه ولا حيينا وانته متحسف علينه وخايب املك بينه
يابه احنه واحدنه يتعب ويكد طول يومو حتى يكف وكفه شرف حدرك ونسمع كلمه الفخر منك .. انا صح ماكنت حدر اخوتي هالفتره وضليت وياهم بس على التلفون بس انا بنفس الوكت ادرس وابني لنفسي اسم تفتخر انته بي كبلي انا صح تهاونت بهالموضوع بس لاني حسبتها لصالح المشيخه لجراح وانا اعرف هالشي وارد بعايلتنه فماتدخلت
لا تحسبنه رجال خوانه يابه
احنه ولدك رباه ايدك ما تربي هالايد الا رجال حميه ..
واتعذر انا يابه اتعذر منك ومن خويي جراح ومن حسين ومن كل اخوتي اتعذر منكم على تكصير وعلى بعدي وكت هالشده

بوس ايد الشيخ وراسه وبوس حسين واعتذر منه وراح بوس جراح وهم اعتذر وكعد بداله عباس وصكر ..
عباس كال ..
- يابه ليش مارضيتلي وكت الي اعترضت
- لانك متاخر يلا صحيت كان لازم تاخذ نصيبك من الغلط وبنفس الوكت حتى يتحمل اخوك توأمك ذنب رخاوتو بهالموقف
- اتعذر انا يابه على سكوتي هالايام كلها بس يشهد الله انا مارضيتلهم هالشي وسكتت احتراماً الك ولقرارك
- لا تسكت وكت الي يكون حدر عينك حك مسلوب لا تسكت
- ان شاء الله يابه ماتسمع عني الا كل طيب
وهالدرس بعمري مانساه

بوس ابوه وراح كعد يم جراح وتقرب صكر
يمسح بعيونه وكال ..
- يابه غلطان انا والله ادري الغلط الي بيه اكبرهم كلهم
- اييه انته جمره بكلبي ياصكر جمره قابض عليها بصدري وساكت تدري ليش !
لانك ما طلعت صكر جارح مثل ما ظنيتك
- سامحني يابه والله اوعدك اتغير
صحيت على عمري والله صحيت وعرفت كل اغلاطي و وعيت على نفسي واوعدك
ما تضل هالجمره بصدرك مني بس انطيني هالفرصه يابه وسامحني

جان يحجي ويبجي حتى مارفع راسه والكلمه تطلع منه بشهكه لدرجه ان الشيخ تقرب يمه وحضنه حتى يسكته .. بس هو زاد بجي بحضن ابوه خلانه كلنه نبجي وياه
الشيخه تمسح بفوطتهه كل شويه وام جراح لازمه ايدي وتبجي من فرحتها بولدهه

مسح على راسه الشيخ وهو وخر من حضنه وضل يمسح بوجهه وابوه كاله ..
- مسامح يا يابه بس كون ادحكك غير شكل بعد
- عند عيناك يابه تلكاني ان شاء الله
- ان شاء الله روح غسل روح

راح صكر يغسل والشيخ يباوع لحر واسر الي همه ايدهم بايد جراح ومدنكين الراس
كومهم جراح واخذهم بايده للشيخ وكال ..
- يابه هذول اعزاز عندي ولدي مو بس اخوتي ان رضيت عنهم معناهه رضيت عني

تقربو اثنينهم حضنو الشيخ وبوسوه ويتعذرون وهو كال ..
- جراح اكذب انا ان قلتلك رضيت عنهم بس ان تكفلتهم وتعهدت ترجعهم الي مثل الي محسبهم بالي ارضى عليهم وعليك وافتخر وانسعد بسعاده تزيدكم حسنات دنيا واخره

حضنهم جراح وكال ...
- انا اوعدك يابه هالسعاده تصيرلك على اسم حر واسر ان شاء الله
- ان شاء الله .... يول حسين
- نعم يابه
- احدر يابه احدر

كعد حسين يمه والشيخ جر راسه بوسه وحسين ضل مبتسم وفاك عينه على وسعهه
كاله الشيخ ...
- ان كان جراح بمعزه يوسف من يعقوب انته عندي بمعزه هارون من موسى بس لا تندك بالي انا وياك نعرفو خط احمر
- ههههههههههههه يابه تروحلك فدوه هالخطوط بس احضني احضني واوعدك شهر تكميل اخليك مرتاح مني

ضحك الشيخ وحضنه ومن وخر حسين يفرك بايده ويصيح ...
- ايييييييه نعنشنا نعنشناااا اليوم
- ههههه يحفظكم الله ... اسمعو يولد
بكرا بعون الله تذبحون وترتبولنه غدا معدل
وتعزمون غاليه وعيالها لزوووم يحضرون لزووم لان خبر راح يفرحها بكرا انا اعلنو
- شنو يابه غششنا
- هههه الخبر بعيد عن المشيخه بس يخصكم
هديه محضرها لولدي اريد انطيها بحضور اخيتكم
.
.
.
يتبع

#شقراء_بغداد

الجزء_الثاني_بارت_٢٤


صباح جديد يبدأ بلهفه من كل افراد البيت
اليوم ولدنا من الفجر كاعدين تسابقو على الصلاه الجماعيه ويه الشيخ ..
تريكنا بسفره وحده والكل تبتسم مرتاحه بعد طول هالغياب ...

ساعه ثمانيه الصبح الولد اخذو الذبيحه لمطبخ المضيف الي بره وكالو احنه نطبخ لحد تدخل

عفناهم بنشاطهم واني صرت احضر حلويات وام جراح تحضر الزلاطه والخبز ..
طبخت شويه برياني لغاليه لان متاكل اللحم
و رحت نظفت غرفتهه وهويتهه واني كل شويه اتصل بيهه حتى اعرف شوكت توصل
وساعه بال١١ وصلو ...

جنت بيت الشيخه هناك انتظرها وطبكت سيارتهم البيضه العاليه كدام الحديقه ..
نزل اسامه و راح فتح الباب الوره ونزلت غاليه وبطنها كدامها ... كبل دمعت عيني من شفتهه هيج ..

مانتبهت على احد بس عليهه .. اشوف مشيتهه وهي لازمه ايد اسامه وترفع النقاب من وجهه .. تباوعلي وتضحك وجهه متفح
والفرحه ماليه معانيهه ..

رحت حضنتها وهي تبوس بيه وبطنها اطخ بيه واضحك ... لزمت وجهه بوستهه وكلتلهه..
- كلها ايام وتجيني وابنج بايدج
- ان شاء الله يمه يجي هاليوم وتدللين ابني مثل ما دللتينا

دنك اسامه باس راسي وسلم ودخل ويه الولد
سلمت على ام اسامه والحجيه ورحبت بيهن
دخلنه وكعدو كلهم ..

هنا يلا انتبهت على ايوب .. لابس دشداشه بيضه واليشمغ وبيده سبحه سوده ..

جنت هنا نازعه المناظر تعلمت اتقبل شكلي ومااستحي منه .. هالعين البيضه هي وسام فخر الي وصار كل من يباوعهه يرجع يباوع لعين الشيخ ويسكت مايحجي شي ...

غاليه نزعت جبتهه والنقاب واجتي لابسه فستان سمائي مال حمل وهي سمنانه وجهه المقسم صاير هسه بي عبالك اربع خدود
مسويه شعرهه ضفيره هنديه صفح وكاعده هادئه تباوع لاخوتهه وتوزع ابتسامات
شاورتهه ..
- شبيج شو مو على طبيعتج
- يمه اسامه هييين
-ههههههه صدك تحجين !
- والله عجل ترديني استخف وهو هين كاعد
لاا عيني لاا انا بايعه ثكل ومدلعه زياده
- هااا هم زين بدرت منج هاي
- ايي بس هذا ابنك حسين احس راح يفشلني
يمه نظرتو مو راحه اعرفها واخاف مااكضب لساني عنو دحكي اذا زليت كرصيني سكتيني زين

ضليت اضحك واباوع لحسين وهو يأشرلهه اصبريلي ويمسح بلحيته ...
عفتهم ورحت اصب الاكل واساعد ام جراح
ولكيت هناك عباس يغسل الكلاصات
واخذ السفره وراح فرشهه بالصاله لان احنه كعدناهم بالاستقبال الصغير ..

هالولد خدوم بدون مااحد يكوله هو يعرف شمحتاجين ويسوي من وحده ..

دخلو حر واسر شايلين صياني الدليميه الي همه طبخوها باشراف جراح ورماح ..
واني اخذت الفواكه والخبز واكل غاليه
وسراحيات اللبن والمي يرتبهم عباس
رتبنه السفره ورماح صاحلهم حتى يجون يتغدون ...

التمينه على الغدا وجانت فرحتي بوجود ايوب بينه بصحه وعافيه والضحكه على وجهه
اكثر من فرحتي بغاليه ...
اليوم ايوب رجع لدياره وكاعد ويه ناسه اليحبهم وبين اهل حديثته ومن اكلهم ياكل
بعيد عن عائلته الي مااحسه فرح بيوم وياهم
واحس ميوله اكثر لعيال ايهاب يرتاحلهم اكثر من ولده ...

انتبهت على غاليه تبسبس وحدهه كلتلهه .
- ها شدكولين
- يمه مادحكين اسامه ماياكل
- يا ليش !!
- مايعرف ياكل بيدو الا بالخاشوكه وانا اشرلو لا وهو مايرضى وضال ياكل بس زلاطه
- ههههه يبوووو منكم هسه خلي ياكل بخاشوكه مو اني وياج دناكل هيج
- يمه عيب من اخوتي هسه يحسبوهه بزر نستله ويضلون ينفخون بريشهم علي
وانا الف مره احكيلو جرب اكل بايدك يحكيلي اضوج ماحب
ولا هو حكو مايكدر اذا اهلو معلميه على الشوكه والسكين واتكيت وين يدبرها هين
- ههههه اكلي يمه دكلي هو يدبر نفسه مو صغير هسه واحد من اخوتج يفشله ويخليه غصب عنه ياكل

سكتت وضلت تباوعله والخاشوكه بيدهه
اباوع لايوب ناسي نفسه ويه حسين اثنينهم متاكبلين على صينيه وحده والشيخ معروف ماعون اله وحده ما ياكل بغيره ..

انتبهت على جراح قدم الاكل يم اسامه وضل يشاوره بعدين اسامه عاف الخاشوكه وصار ياكل بايده وكل شويه يباوع لبنطرونه وينفض بي ...
هنا يلا غاليه صارت تاكل ..
شاورتني غاليه ..
- يمه تدرين احس عمي مو هو نفسو الي اعرفو بيتنا هناك ... والله متعجبه عليه عجل هو ليش ما يطلع صوتو بالبيت ولا يضحك ولا يجامل لا ويه ولدو ولا ويانه احنه الحريم
- خلي هسه مرتاح شكو ادققين وراه
- خلي يصبرلي اذا ما دحكتو هالشكل بالبيت بعد الا افشلو واذكرو بهاليوم
- غاااليه معليج بعمج اني كم مره كايلتلج ابتعدي عنه عيب هذا رجال جبير واله اسلوب حياته لاتخربين عليه
- وشدعو هالاسلوب البارد هذا كأنو مايدحكنا والله انا طاك كلبي من الملل بهذاك البيت
خلف الله على اسامه الي يكعد وياي اسبوع
يونسني ويخفف وحدتي .. باردين يمه ماينحملون مادحكيني شلون صرت كله منهم
اخاف احكيلي كلمتين وينزعجون
- هههه كلمن وطبعه بنتي كلمن وطبعه

كملنه الاكل وصارو الولد يلمون السفره