- جناااح سندباد سندباد هيييي سندباااد

وهو يكمز من القنفه للمخاد على الكاع ويجرهه وياه على اساس دينقذهه ويصيح ياسمييين ويخبصون البيت بسندباد وياسمين ...

واخذو على هالاسمين ...
صارت غاليه تصيحله سندباد بدل جناح
وهو يصيحلهه ياسمينه ...
وبهذاك الوكت جان السندباد بين الجهال شي جبير وجراح مفتخر بينهم يسموه السندباد على اساس هو قوي وذكي مثله
وهيج انحلت سالفتهم وبطلو يتعاركون ..

جان الشيخ من يشوفهم هيج كلب على كلب ومتفاهمين يكول ...
- ان شاء الله يضل حماي الهه كل العمر

وبيوم كالي وهو يباوع لجراح الي جان
يرسم ساعه على ايد غاليه حتى يعلمهه عليهه وتحفظهه منه ...

- انا اتمنى يضل جراح هالشكل يداري المره ويحترمها وما يغيرو الزمن
- ان شاء الله
- خوفي على رماح مادري وش يصير من يكبر ..طبايعو صعبه ومبين انه خشم يابس ومايعجبو العجب مااظنو يصير مثل جراح
- يا شيخ لا تتوقع من ولد يشوف امه مهمله يحترم المرأه ويقدرها بعد

رفع حاجبه وصفن بوجهي وما رد على كلامي واني سديت على السالفه بعد ورحت التهيت بالمطبخ ...

وبعد يومين بالضبط اجاني الشيخ بالليل وكالي ...
- تين نكعد بره نحكي ؟
- اي عيني

طلعت وياه وكعدنه بالطرمه وهو مبعد عينه عني ويكولي ...
- ضل هذاك حكيك ببالي .. ودحكتو صح
ولدي راح يتعلمو الگسوه والاهمال مني
وجايز ان كلوبهم تثكل علي كل ما يكبرو ويدحكو امهم مهجوره ووحيده
- طبعاً يا عيني .. همه ما راح يعرفون شنو الي ادى لهذا الهجر بس يعرفون انك مقصر بحقهه هذا الي راح يكبرون عليه
- ايييه ايييه
- انته حبيبي ونور عيني احبك واغار عليك بس هذا حق ولازم نفكر للبعيد
- اييه كفانا تفكير بنفسنا العايله الها حكوكها وانا ما ودي ولدي يكبرو وبكلبهم عتب وضغينه علي ولهالسبب انا راح اتناسى الصار بينه وابدا صفحه جديده معها
- زين مااقررت يا عيني
- انتي تعرفين مكانتك عندي ما يغيرها شي وتعرفين انك الاولى بكل شي
ما ودي يضيك خاطرك لو مشيت عندها
ونامي قريره العين ومرتاحه البال انتي
بكلبي وعيني حاضره كل ثانيه من عمري وانا من صباح الله تلاكيني عندك
- اطمن حبيبي ما تلكى مني ان شاء الله الا الي يرضيك

باس راسي وطلع راحلهه وكأن كلبي جره من نص ضلوعي من طلع
احساس يوجع من افكر راح يلمس غيري هالليله وارجع استغفر ربي واكول هذا حقها وحرام عليه هالغيره والتفكير
بس ماكدر مو بيدي اوكف غيرتي بي
لان هذا حبيبي روحي اني الي تعبت بي
وسهرت لراحته وداريته بمي عيني
هي ما تعبت بي هي ما قدرته بس اني
كأن تعبي كله اقاسمهه بي ويوجع هالاحساس ..

خلاني اسهر للفجر واني افكر شحجى وياهه ؟ نام لو بعده ؟ كدر يغفى بدون حضني وريحتي لو متعود عليهه ؟
هم لو رادته ينام على ايدهه يقبل ويخليهه تنومه بدالي لو يبقي هالشي بس الي ؟

سهرتني هالافكار لحد الصلاه وبعد ما كملت صلاه وضليت اسبح سمعت الباب انفتحت وكلبي رفرف عرفته هو ..

وكفت نزعت العباه وهو دخل وفاتحلي ايده ويأشرلي اجيه ...
ركضت حضنته وعيوني تصب دموع وهو يكولي ...
- بالله عرفتك ما تنامي ولا انا الي عيني غمضت من غير ريحتك

هالكلام كدر يهدي كلبي ويطفي ناره
صار يمسح دموعي ويكولي ...
- عجل انا وش وصيتك يولي
- اتعود حبيبي ليضل بالك بس هاي لان اول مره تبعد هيج
- بالله احسب الدكايك للفجر ول بالله انا مريض فيكي ما ظنيت انك لهالحد معشعشه فيي
-ههههه شنو شصار احجيلي
- تتحملي لو حكيتلك ولا كلبك ما يكوى على السمع ؟

ركز بعيني وضل ينتظر جواب واني ادري اني اتاذى بسماعه بس كلتله ...

- اي اكدر احجيلي شنو الصار من البدايه حبيبي فدوه
- خلي نكعد واحكيلك

كعدنا وهو ضل لازم ايدي ويكولي ...

- اول ما دخلت عليها الغرفه هي تفاجأت
وحكتلي .. حياك الله زين للحين تذكر درب غرفتك .. عاد حكيتلها ... من جور راعيتها نسيتها ..
تدرين تين ساعه الي دخلت هالغرفه وادحك لاغراضي فيها ماعرفتها كأن نفسي اول مره تحضرها حسيت اني هين غريب وما عرفت منين ابدا عاد حكيتلها
ان الي صار سببو معروف عندك وانتي تعرفي بداخل نفسك ان هذا جزاه شين عملك مو تكصير مني وكفانا تفكير بنفسنا
ومشاكلنا خلنا نطوي صفحتها ونبدا من جديد وهالفرصه استغليها وعمري بيتك
الي انهدم بالكلمه والفعل الطيب والله
عفى عما سلف
عاد هي تعذرت واستسمحت مني وحكتلي انها تعلمت كثير من هالمشاكل وما تعاود الخطا
- ان شاء الله بدايه خير
- ايييه للحين انا مسيطر لكن ساعه الي تكربت وحضنتني انا فزيت بالله العظيم صرتي كدام عيني وحتى يدي ثكلت وماكدرت ارفعها على جسمها والشاهد الله على حكيي .. حتى انها خجلت وبعدت مني ... والله يا تين طلعت من عندها محتار على مخنوك مادريت وش الي غير حالي هالشكل ...
كلها صارت لاني متعود على حضنك انتي غير ريحتك ما يرغبها جسمي
- واني جنت افكر شلون حتسوي بهالشي واني اعرف راح تصعب عليك
- اييه بالله صعبت
- وشسويت بعدين ؟

- دخلت لعندها وطيبت خاطرها وعاودت نفس ما كنت كبل معها
- يعني شنو الي جنت عليه قبل ؟؟
- انا بكامل وعيي وكت اكربها تين انا معها شيخ ومعك خالد ما يعرف للوعي حد ولا خجل .. كل الي كربتها ما يتجاوزو الخمس دكايك وبعدها حاولت انام وفكري كلو عندك واحسب لهالحكي كيف يكون وكت اعاود وتسأليني عنو

هالحجي بسماعه يولد وجع بكلب المحب بس يزيد اطمئنان على تأثيري بي ..

شميته من ركبته وابتسمت لانه ما خلاني حتى اشتم ريحتهه بي وسابح بنص الليل
وجايني من الفجر وباله يمي ... هالشي نساني كل الافكار والغيره ورجعني بس مشتاقتله ...

وهيجي مشت الايام ... اول فتره اخذ اسبوع يمهه يبات بس الصبح كله يمي
وغداه وعشاه يمي ومن وره الاسبوع
صار ليله يمي وليله يمها وحتى باليوم الي الها يجيني ويكعد وياي كم ساعه يشبعني بحضنه وضحكته ويوصيني على نفسي ويروح ويخلي جراح يبات يمنه ..

وبعد شهر صارت ام جراح حامل
والشيخه مكيفه ومرتاحه لان راح ينرزق الشيخ باثنين اطفال بنفس السنه ..

علاقتي بام جراح حديه على كد السلام وكلام محدود هي كفت حجيها عني واني ماالي دخل بيهه ..

الشيخ قرر يبني ٣ غرف فوك ببيتي
حتى غاليه تاخذ غرفه من هسه والطفل من يكبر هم ياخذله غرفه مايريد احد يبقى يمنه بغرفتنا ... وخلاني انتقل يمهم ببيتهم
لحد ما يكمل البناء ...

وما خلاني حتى اروح انظف البيت بيوم
كله هو يدز ولد ينظفون وره العمال ويشيلون انقاض ..

مهمتي بس الطبخ .. احضرلهم ريوك وغدا من كل ما تشتهي العين ...

حتى اللبن والفواكه اخليلهم ولو طولو للعصر ادزلهم ماعون حلاوه وهمه مكيفين وذابين حيلهم على الشغل ...

كل نومته وكعدتنه بالربعه اني وبنتي وهو وكت ليلته يمي يبقى ما يصعد
ووكت ليلتهه ينتظرني انام يلا يصعد
وينزلي من الفجر يكعدني حتى نصلي سوه ...

ما حسسني بفرق عن قبل بالعكس زاد اهتمامه وحرصه خاف يصير موقف اغار بي او اضوج من شي ودائما ً يكولي
حبج اله يوم يعميني ....
واني اكوله انطيك عيني لو اذيتك بحبي

دخلنا شهر الواحد من سنه ٩٧ وجان رمضان وعمرتنا هالسنه تأجلت بسبب الحمل .. وهالمره بطني جبيره مو مثل غاليه جانت صغيره ... وام جراح بطنها اكبر من بطني ...

من دخلت بشهري بالثاني باول اربع ايام بي وبدات الطلوكه عندي ... واليوم كله الوب من الوجع وتفحصني القابله تكولي بعد مو وكت ولاده واضل اتمشى واني ابجي من الوجع وهو محتار مكابلني وكاعد .. اذا امشي يمشي وياي ولازم ايدي واذا اكعد يكعد يمي ويشربني مي ويلوم بيه لان اصريت على الحمل
وماتحملت لثاني يوم العصر تخربطت واخذني للمستشفى هناك اخذني الممرضات لردهه النساء وهو يصيحلهن

- ول حرمتي بكليه وحده ما تغفلو عنهاا بالكم تتعبوها يولوو

واني من سمعته هيج يصيح وهرج المستشفى بصوته ضحكت بنص الوجع والممرضات يمي يضحكن ويصيحين فهمنا فهمنا ....

و ولدت على ايديهن بسرعه بعد ما ضربني ابرتين راساً صارت عندي طلوكه قويه و ولدت ابني الي محبوب كلبي من اول ما نزرع برحمي ...

وكت اخذته لحضني بجيت واني اتلمس نعومته .. اتلمس بذره حب خالد بايدي
نساني تعب الولاده والوجع وصرت بس اتمعن بي لحد مااخذوه مني ...

ومن شفت الشيخ جان نازع عكاله والشماغ وشايلهن بايده ووجهه احمر
كلتله ...
- شبيك يا عيني
- بالحرام موتي صار حدر عيني لو تفكرين بعد بحمل اذبحك واذبح روحي معك
-ههههههه ما بيه شي حبيبي هاي بصحتي وعافيتي وجبتلك ولد حليو مثلك احمراني
- الحمدلله كومك بالسلامه
- صار عدنا اخ جديد لغاليه
- ما يعوض عن جراح لو يجي العشره
-صدكت والله هي يعجبها بس جراح

بهاللحظه جابوه وهو شاله بايده واشتمه واجه وكف يمي ويكولي ..
- يا روحي وش نسميه ؟
- كيفك عادي نسميه حسين ؟
- سلام الله ع الحسين نسمي ولدنا حسين باذن الله

وصار يكبر بأذنه وصار ابنا حسين مدلل
امه وعدو ابو ...

الشيخ يغار منه غيره ماصايره ولا دايره
بعده الولد ابن انفاس واذا شافني ارضعه
يكولي ...
- ما يشبع هالولد هي كل ساع مرضعتو
- حبيبي غير صغيرون بعده يحتاج تغذيه
- ايييه متهني هو وش عليه
- هههه شبيك وياه هسه هو ديرضع قابل شمسوي
-يولو انا لاني اعرف وش من حلا وره هالرضاعه اغيض منو
- هههههههههه
- بالله اخذ املاكي عجل انا لايمتى اضل محروم وهو يتهنى كل ساعه
- ما بقى شي كلهن كم يوم
-ايييه من اسبوع وانا اسمع هالحكي
هالحين نوميه ماينام ابنك هذا بس يرضع
- هسه عيني هسه

خليته بالكاروك ورجعتله وهو يكولي ..
- دبريلي تعويض ولهااان حسي عاد خلي بالك معي مو عندو ليل ونهار شاغلك وانا ناسيتني
- حبيبي الولد يحتاجله عنايه بعده صغير
- وانا بعد يحتاجلي عنايه عجل تهمليني وتعتني فيه !!! ماا كان تلزم جيتو لو انه ياخذك مني

اضل اضحك واتحايله حتى يرضى وصرت ارضعه قبل جيته وانومه حتى ابقى بس يمه وشويه خفها ويايه بس لو بجى بالليل وصرت اسكته واكوله وليدي حسون حبيبي رأساً من مكانه يشمر المخده بظهري واني اغير واكول حسون حبيبي خالد يريد ينام ..

واذا طلعت لسوك واشتريت فد غرض اله ولغاليه وما ذكرته بشي يشيل خشمه عليه
ويكولي .. تغيرت ايام العشك وصرنا منسيين ...

واضل اراضي بي وهو يستغلهه ويدلل على الاخير فصرت اذا اشتري الهم وفلوسي متكفي بعد اشتري اله مااكوله هيج اشتريتلهم حتى ليضوج واذا كفت الفلوس اخذله شي وياي ...

غيرنا اخشاب الغرفه لثانيه بيضه بس اكبر من هاي وكت الي جاب غرفه لغاليه
ونصبها الهه فوك ورتبناهه الهه وصار بس حسين يمي وهو لو بيده هم يصعده فوك ما يهمه .. نظراته عليه وكت اشيله واناغيله كأنه ساعه الساعه يهجم عليه
حتى نادراً ما ياخذه من ايدي ..

الا اذا هو من وحده يروح يشيله ويبوسه ويلاعبه بس اذا اني شايلته لا هنا ما يطيقه ...

ام جراح جابت توم ولد ... وكال مدام عدنا حسين نسمي عباس والثاني يتسمى
صكر ...

وهيج صار الشيخ عنده ٣ ولد بسنه وحده
ومثل كل عيد يمر عليه ويايه اكون محضرتله عيديته من اول ما يخلص صلاه العيد ويانه ...

متعوده كل عيد لبسته عليه .. اشتريله كل شي جديد كل عيد .. دشداشه وعباه وشماغ وشحاطه وساعه وسبحه جدد كلهن ومحضرات اله على الجربايه
من يدخل وشوفهن يبوس راسي ويحط عيديتي بايدي الي هي مختلفه عن عيايدي الباقين .. واتكفل بلبسه واعتني بكشخته واعطره بايدي والبسه ساعته وارتب كل تفاصيله واودعه بحضنه وبوسه بخده اطبعله بيهه الحمره الورديه وهو يضل يضحك ويطلع وهو يمسح بيهه ...

اني اجمع من كل شهر شويه واضمهن حتى اشتريله بيهن هدايا يااما بعيد ميلاده او بهذني الاعياد ...

وهو مرات بدل العيديه يهديني تراجي ذهب ومره بعيد ميلادي هداني محبس
وبولادتي بحسين لبسني كلاده وبيهه كلمه الله .. واني حتى لو بدون مناسبه من اشوف مرت فتره بينه بدون حيويه وشي حلو اختارله فد هديه بسيطه ..
مرات كتاب مرات مفكره مرات مداليه لسيارته ومفاتيح مكتبه .. او قالب كيك مرتب اخصصه بس اله من يرجع

واكوله من انطيهن اله اليوم بمناسبه اني احبك جبتلك هالهديه ...

يطير من الفرح بيهن رغم بساطتهن
ويردهه الي ثاني يوم لو بورده لو بلبسه على ذوقه ولو ابسط شي يجيبلي شاميه
لو كرزات ... وهيج عشت وياه ايام بحنيه وراحه وتفاهم لاني اتغاضى عن كل شي
يصير بينه من اختلاف او غيره او اي حجايه زايده ناقصه كلها اتغاضى عنها
على اساس حبنا هو الي ارجع استند عليه
وكت كل مشكله تواجهنه وبهالشكل كدرت اكمل حياتي ويه الشيخ خالد .

.

#شقراء_بغداد

الجزء_الثاني_بارت_١


فوك النه خل فــوك
يابا فوك النه خل فـوك

مدري لمع خــــده
يابا مدري لمع طوك

والله ماريده باليني بلوووه

ما لي امل بالروح
بعـــدك حبيبـــي .. بعدك حبيبي

وصلك صُفى للناس
يابا هجرك نصيبي .. هجرك نصيبي

والله معذبــني
وماعنده مروه

ضي الكُمر محجوب
يابا بس وجهك ينــووور

لا بإنس مثلك صار
يابا ولاجن ولا حور

والله سابيــني
بعيونه الحلوه

يسألني البطران
يابا ليش وجهك اصفر

كُل مرض مابيه
يابا من دَرْدِ الاسمر ..

لا والله من دردِ الاشكر اووف من درد الاشكر

والله معذبني وماعنده مروه

حطيت الملابس الي لميتهم من الحبل بالسله وسمعت صوته من وراي يكول ...

- يولو عجل الحين انا ما عندي مروه !!!

انداريت وعلت ضحكتي ملامحي وركضت اله وهو يبتسم بثقه ..

- خاااالد حبيبي رجعت

حضنته بكل قوتي وهو يضحك ويكولي

- رجعني شوكك يا خلي
- روحي انته حمدلله على السلامه ياعيوني
- الله يسلمك يا ضي عيني
- من شوكت انته هنا !
- من اول ماغنى الغزالي انا هين
- هههههههه
- انا من اول ما دخلت البيت ودورت عليكي تحت مادحكتك وسمعت صوت الراديو من فوك وصعدتلك بالعجل
ما ودي تفوتني لحظه غناكِ مع ناظم
- هههههههه اوووووف شكد اشتاقيتلك
- تدرين وش تكميله هالاغنيه عند اهل الشام مره هنيك اسمعتها
- اي شنو ؟
- بالله يامجرى المي سلم عليـهُم عليهم
صعبانه الفرقه علي يابا إشتقنا اليهم اليهم
- اي والله اشتقنا والله والله اشتقنا
- ههههههه بالله هالشهر مر علي بالويل
يولو ليه هالشكل مرضتيني بعشكك ول انا تايه بلاكِ ياتين
- احسن حبيبي احسن هيج اني كلبي يرتاح

ضحكت وهو عض خدي وبعدها اخذت سله الملابس ونزلنا سوه وتلكتنا غاليه
ركضت على ابوهه تحضنه بفرحه
وهو مكيف بيهه ..

حسين الي عمره سنه واكف يم باب الغرفه ويباوعله بالختله هو مو صلح ويه ابوه مثل غاليه ... لان الشيخ دائماً يضوج منه وهو هم صار متخوف من ابوه
وما يتقربله هواي ..

رحت شلته واخذته للشيخ خليته ياخذه من ايدي ويحضنه ويبوسه وحسين خانس بايده .. انتبه عليه الشيخ وضحك وانطاني اياه وكالي ...
- ههه اخذيه لابنك المدلل
- وليدي ما يحلاله غير الدلال عيني شيخ
- بالحرام ما خربو غيرك ضلي هيك شايلتو من ارضو وخليه يضل ولد عمرو مايصير رجال على دلالك هذا
- خالد شبييك بعده جاهل هسه قابل ابن العشرين هو وتحجي عليه كل عمره سنه
- انتي انتي نفسك ماتتغيري معو لو صار عمرو ستين تضلي تركضي وراه عجل ماعرفك انا يولي

ضحكت وحضنت وليدي قوي وبوست خدوده الحمر .. روحي بهالولد صايره
ماكدر اشيل عيني منه ...
ودلاله اكثر من غاليه .. وهو هادىء
ودبدوب ..ابيض وشعره اشكر مثل ابوه
وحلكه صغيروني منفوخ ووردي وايديه مطبكه لحم بحيث افتحهن بيدي دامسح بين الطبكات ... عيونه لونهن بالاول جان ينطي على رصاصي بعدين من عبر الست شهور ثبتن على الاخضر ..
عنده شامه سوده بحجم حبه العدس صايره برجله اليمنى على جف رجله
على العظمه الصغيره المدوره ...
شعره كصيناه مره وحده ووزناه بفلوس ومن بعدهه ماخليته يكصه عفت شعره يطول اريد اسويله كصايب مثل ما جان خالد يسوي من هو وصغير وهم اخذله بيهن صوره احتفظ بنسخه خالد المصغره

يومي يمشي بين دلال الشيخ من اول مايصحى لحد ما يطلع لشغله وبين ترتيب غاليه للدوام وترتيب البيت ومداره حسين
وتدريس غاليه وعركاتنه بالليل الي اكثرها تصير بسبب غيره الشيخ ..

اذا نسيت اسويله حلويات بالليل والتهيت بحسين مرات يتمرض يكلب الدنيا ليش
تتغيرين وياي !! موقبل هم عندج غاليه وجنتي تهتميلي ليش هسه من اجه ابنج هذا تغيرتي ؟؟

واضل ابررله موقفي وبشنو انشغلت ومايقنع .. ومرات اذا رجع من وكت واني بعدني ادرس بغاليه لو اسبحهه وبين ماابدل لحسين وانومه واتاخر عليه وهو يريد ينام هم يسويهه عركه ... واذا نايمين الجهال وبعدني ما مبدله ومتحضرتله وهو هسه راجع هم يتغير مزاجه رأساً واضل بالويل يلا اخليه يفك شويه ...

عنيد كلش بزعله ودقيق بتفاصيل املاكه مثل مايكول .. خلاني هالشي حذره بكل تصرف كدامه ، احسب حتى حساب الكلمه لجهالي لان اني بطبعي لساني ماخذ على حبيبي وروحي وعيوني واذا احجيهن للجهال وهو كاعد كبل ماحس الا شي وانشمر عليه ... يا دفتر يا المخده
مرات اذا متعاركين واني اضوج منه لان بس يتزعل مني واعوفه واصير الاعب حسين وابوس بيه واتعمد هالكلمات اله يكوم يجي عليه يجر اذني يلويها ونتعارك بوكتها عركتنا الجبيره الي نحجي بيهه كلشي وبعدين نتصالح ...

الشيخه جمعتنا بيوم وكالت ..
لازم كل اسبوع نسوان الشيخ يسون غدا ووحده تعزم الثانيه يمهه وتلتمون كلكم على سفره وحده انتو وجهالكم ...

فصار القرار ان الجمعه بيت الشيخه الغدا والسبت بيتي ...

الجمعه بعد الصلاه ننتظر الشيخ يرجع ونتغدا من ايد ام جراح كلنا نجتمع يمهه
والسبت كلهم يجون يمي على الغدا
ويضلون لحد العصر ويروحون لبيتهم

والجهال يبقون سوه يلعبون ..

غاليه وجراح وحد ورماح والتوم عباس وصكر ويه حسين يلعبون وحد .. رماح هو متكفل بيهم .. يكعدهم بشكل دائره ويضل يفر السياره بينهم وهيج يكضوهه

وبيوم بالليل بعد ما نومت حسين واجيت تمددت يم الشيخ كالي ...
- مصطفى خابرك اليوم ؟
- لا ؟ ليش !
- البارحه حكالي راح يتزوج و وصاني اخذك الهم وانا قلتلو يخابر على رقم البيت ويحكي معك وتتفاهمو
- لحظه لحظه شنو يتزوج!! من شوكت هالحجي يعني خطب لو بعده !
- مادري والله عجل انا ليه حكيتلو تتفاهمو
- يااا شيصبرني للصبح اكوم اخابره هسه؟
- يولي نص الليل الرجال نايم وكت تلفنه

ضليت اتأفف وافكر خطب بدون مايكولي منو هاي ! وشوكت ؟

ثاني يوم خابرته الصبح وحجالي ان
عمتي الجبيره رايده دعاء لابنهه وحاصرته الا يتزوج حتى تاخذهه
وهو مختار بنت عمتي الصغيره اسمهه مياده معلمه وصارلها سنتين من توظفت
وراح يكطعون مهر هالجمعه والعرس على راس الشهر ويريدني احضر خطوبته ... رفضت هالشي بدون نقاش
و باركتله وسديت الخط

ضلت الحسره بكلبي على شوفته عريس
ورجع بكلبي الحنين لاهلي وبغداد بعد ما جنت ساده بابه وملتهيه عنه ..

ضليت طول اليوم متكأبه والشيخ اليوم ليلته هناك واني بهيج وكت اصير اعصاب واضل الليل كله سهرانه ما تغمضليعين لحد ماايجي الفجر ويحجيلي كل شي يلا ارتاح شويه ..

ومنا سالفه مصطفى زيدتهه عندي وضليت من وره العشه اني بس ابجي
كاعده يم الشباك بالهول وحاطه ايدي على خدي واتذكر اخوتي وابجي وغاليه
كل شويه تجيني ماما شبيج وادير وجهي عنهه وحسين مبقيته بحضني كل شويه اشتمه وهو يتلمس بوجهي ويرجع يلعب بمكعباته ...

على هالحال وشفت باب الشارع انفتحت و دخل الشيخ بعدني مالحكت اكوم واغسل وجهي وهو صار بنص الهول
ورأساً ضحك وكال ...
- بالله كلبي علمني عن حالك

وخرت حسين من حضني و وكفت داروح اغسل وهو جر ايدي وكال ..

-غاليه يابه عينك على اخيك

اخذني رأساً للغرفه وسد الباب ..
- وش فيكي ياعيني
- مابيه شي
- والبكي !!
- مابيه شي مابيه شييي

كعدت على الجربايه وصرت ابجي ازيد من الاول وهو تقرب رفع راسي وكالي ..
- ودك تمشي لاهلك يجرالك بس اطلبي
- ماريد لاا
- الااا تريدي لكن تكابري على نفسك
- ما كدر اشوفهم خالد عمامي وعماتي كلهم موجودين شلون اروح
- وانتي ليه خايفه !! يولو انتي مسويه شي يسوى هالمخاتل والخوف !

ضليت اباوع لعيونه وهو كعد يمي وركز بوجهي ويكولي ...
- انتي ام الحك يولي وهذاك زمان وهذا زمان .. والي كان خوفك منو مشى لدار حكو والحين انتي بذمتي وحمايتي مايكدر يمس خيالك بشر ،انا وكم مره حاكيلك
اكره الخووووف
- مو خايفه بس مستحيه مادري شلون اواجههم بعد كل هالسنين وشحجيلهم لو سألوني ليش رحت ؟؟؟ اكو هواي شغلات موكفتني
- عجل انتي ما تشتاكي لاهلك !
- اي والله اشتاقلهم والله اخوتي هنا مثل جمره بنص كلبي فراكهم
- عرس اخيك الكبير هذا يولي كيف ماتحضريه !!
- ماريد اتواجه ويه احد منهم افهمني
- كيفك .. عجل دام الامر منتهي عندك
بطلي بكي ومناحه

حجاها وطلع من الغرفه واني تخبلت
كمت اضرب على رجلي واحجي ..
- هم رااح هم رااح يربيييي شلون بيه
حيموتننننني .. ميكددددددر يصبر. مستعجل لرووووحته هناك اني ثوله غبره امدااااني اي والله حيل بيه حييل

رجع وهو شايل حسين ويضحك ويكولي
- يولي هييين انا ما مشيتلها لا تتخبلي عليي بتالي الليل

من فشلتي ماحجيت شي دنكت وضليت مخليه ايدي على وجهي وهو تقرب وجر ايدي وكالي..
- لو ما ودك امشيلها يجرالك والله بس عاد لا تضلي مضيكه خاطرك

جريت ايدي منه ووكفت وحجيتله بعصبيه ...
- انته تحجي هالشي لان تدري بيه مااكدر اكولها الك ولا تكدر تسويها صدك حتى لو سويتها اليوم وباجر والي بعده شنووو هاا شنوو شيتغييير !!
اني كل يوم بهالحركان كلب اكضي الليل كله واتجرع هالمر بسكته لان عيب احجي واعترض بس كافي بعد ماتحمل هالشي يخنكني خالد تفهم شنو يخنكني !!

- يولي الي تردينه شنو فهميني ! انا هذا حالي من يوم عرفتيني وش اكدر اغيرلك الحين ؟؟!!!!

- ماريد كلشي ماريد ادري بهالشي مو غبيه اني ومافهمه وهاي اني ساكته وعايفتك براحتك كلشي مااحجي ولا اريد تسوي شي

عفته بالغرفه وطلعت رحت للاستقبال قفلت الباب وكعدت هناك وحدي وضليت ابجي مدري شبيه هيج تخبلت .. ماعرف شنو اريد ولا ادري شسبب هالبجي
اني من يوم الرجعنه من تونس واني الغيره تاكل بكلبي وكاتمتهه واتصبر عليهه شجاني اليوم هيج انفجرت !!!

سمعت باب الشارع انطبكت وعرفته طلع
رحت فتحت الباب واخذت الجهال انومهم
وضليت الليل سهرانه ..

تذكرت اني صار يومين ما مصليه الليل
واني متعوده من يوم الي هو هناك بدل مااضل بفراشي ابجي والافكار تاكل براسي اكوم اصلي واهدأ بيهه ...

رحت للهول اصلي واقرا قران لحد مااذن الفجر صليته وضليت انتظر وعيني ع الباب وطلع الضوا وهو ماكو ..
طلعت رشيت الحديقه وغسلت الطرمه
وانتظر بي ومااجه ..

و حتى على الغدا مااجه ..

متحملت اصبر بعد ودزيت غاليه تروح تشوفه وين
ورجعت هي وياه .. اول ما شفته كلتله ..

- يعني هيج تسوي بيه خالد ! ليش عايفني هيج انتظر
- عفتك حتى يرجعلك عكلك .. تغيرتي مو تينتي الي تعلي صوتها بوجهي وتتذمر مني

رحت بوست راسه وحضنته وكلتله ..
- اسفه حبيبي بس هالغيره عمت عيوني
والله تأذي ماتحس بنارها انته
- ايييه ايييه

وخر مني وراح للغرفه لحكته واول مادخلت كالي ..
- عيونك حمره مانمتي ؟
- لا مانمت ماكدرت
- وانا بعد ماكدرت انام
-هاا صدك ؟ لعد شسويت شعندك سهران !!
- يوووولووو فكينااا عااد
- ايي اييي يعني تحجي وتروح وتريدني اسكت واتحمل بس ماتتحمل تسمع اعتراض مني
- ووول اناا مانمت عندها والله فكينا عاد تيين
- لعد وين نمت ؟
- ماحكيتلك مااانمت يولي شبلاكي
-اييي قصدي وين جنت
- سهرت بالبستان عند هذاك مكانه
تكهويت مع صياح وبعدها عاودت البيت
انجضعت بالربعه وماكدرت انام
-هاااا ليش شنو شتفكر ؟
- افكر بحالك يولي .. ول تين ظنك انا ماا احس بنارك ! يولو فاهمك عدل وانا ادري كل يوم انتي تسهري تنتظري جيتي الفجر وتتصبري حتى ماتضايكيني وعليم الله هالشي زادك غلى عندي وزادني عشك فيكي .. لاني ادحك كيف تبادلي بعادي عنك بالطيب والاهتمام والكلمه الحلوه ادحكك اصيله وحكيمه فعال

- حبك هو هو مايغيره شي بس الصبر هم يخلص والحمل هم يثكل

- والله داري بهالشي ووالله حكك فيه
ياتين افهميني انا مكتفي فيكي مكتفي حد الاشباع ماتهمني حرمه غيرك لكن بركبتي عايله ثانيه مثل مانتي عايلتي وبركبتي وانا احاول اعدل بين هالعايلتين لان وراي حساب وكتاب وهالحرمه حكها تعاتب وتحاسب لو هجرتها وانا مو من طبعي اترك حد الو حك علي مو من شيمي تين .. انا افهم انها صعبه عليكي وهي بعد تصعب علي والله تره انا جابر نفسي مو برغبتي انتي تعرفيني رغبتي وعكلي ونفسي كلها عندك ومااخجل انا من احكيلك هالشي لانك تستاهلي تملكيهن

حضني وكالي ...
- يولي انتي ملكتيني ساعه الي تدحكيها حدري اضحكي وتريحي لان كل هالخلك بعيني سراب وحدك انتي حكيكه انا عيني ماتدحك غيرك ولا يأثر بوجداني غير اسمك وروحك ... ما تكسري كلبي وتحيريني بزماني بمثل حالك البارحه
تناسيها حبيبتي وانا عندك بالي تطلبيه حاضر تبشرين به لكن هذا حك الله

- ما تقصر حبيبي وان شاء الله تلكاني صابره وعند حسن ظنك

بوس راسي وراد ينام عفته ورحت اخذت حسين حتى انومه يمي وغاليه عفتهه تكتب ورجعت للغرفه نمت بصفه وبحضني حسين وهو رأساً جر الغطى واندار انطاني ظهره وكالي ...
- انتظرك انا وانتي حايره بهالدب ماتستاهلي والله
-هههههه حبيبي لعد وين اعوفه ياعيني
- نوميه نوميه هسه انا حكيت شي نامي انتي وياه نامي

يحيرني بهالتصرفات يعني شيتوقع اعوف ابني واضل بس يمه !؟
عفته ينام وضليت انتظر لحد ما غفى حسين يلا نمت ...

صار يوم الجمعه واني بالي يم اهلي شلون ديحضرون للخطوبه هسه ؟ شلونهه مياده هسه صارت حلوه وكبرانه
سمينه ضعيفه ؟ اخلاقهه طبعهه شلونه؟
شكلهم لايكين سوه ؟

ضليت اليوم كله افكر هسه راحو هسه احتفلو وهسه رجعو واخذ التفكير من حيلي حيل ... خابرني مصطفى بالليل باركتله وحجالي شلون صارت خطوبته ويكولي البنيه حلوه وعاجبته من زمان بس من ضغطو عليه يلا قرر ياخذهه

يوم الاحد الظهر اجاني الشيخ وكالي ..
- تين حجزتلك عند طبيب الكلى اليوم العصر موعدنا تحضري
- شنو ! من شوكت حجزت وليش؟
- وش هو ليش !!! عجل غير نتطمن يا يابه وهالطبيب سمعت عنو فاهم وانا ودي اخذك لعندو تحضري ولا تناقشي
- اي عيني صار

بدلت ملابسي وملابس حسين واخذته هو وغاليه لبيت الشيخه وطلعنه للدكتور
وهناك طلب مني اسوي تحليل دم وادرار
ورحنا للمختبر سويت التحليل وضلينه نتمشى وننتظر يصيحونا على النتيجه
و وره وين يلا اخذناه بظرف مسدود ورجعنا للدكتور ...

من صار سرانه ودخلنا وهو ديقرا بي جان يضحك ويكول ..
- مبروك الحمل

بعده ديحجي والشيخ عينه رأساً صارت عليه واني صافنه .. حامل شنو ؟

نظرته جانت بغضب ونكلبت ملامحه للعصبيه وضل يسمع لحجي الدكتور وهو يكول ان مؤشرات الكلى زينه بس يحتاج انتبه على نفسي اكثر وكت الحمل واشرب مي بكثره ومنع عني اي دوا
لحد الولاده ..

طلعنه وهو ساكت يمشي وما يباوعلي
وكفته وكلتله ....
- شبيك خالد اوكف
- تيييين نفسسس مااسمعلك امشي

رجعنه للبيت وهو طول الطريق ساكت بس صوت نفسه العالي ينسمع استغربت وضعه هيج ليش ؟ شسويتله اني !!

اول ما دخلنه البيت هو شمر عكاله والعباه على الزوليه ووكف يفرك وجهه ويكولي بصوت عالي ...

- الزفت الي تشربيه وش شغلووو يولييي تكذبي علي !
- لاا
- لاااا وشووو لااااا عجل هالحمل شجابو الحين يولي وكت حممممل وكت حمل !!
انتي وييييين عكلك يوووولي ويييين
- خالد اهدأ عفيه شبيك هسه اني شسويت ليش هالصياح
- وووول انتي تجلطيني ببرووودك هذاااا
الحممممل شجاااابو الحيييين !!! عجل الحبوب المن انااا شاريها ماااتاخذيها يولي ؟؟

- لاا اخذها بس مادري يمكن نسيتهه كم مره
- دخيييييل الله ويييييين عكلك هذذاااا وييييين وووول انتي كييييف تنامي معي وما ماخذتها ماتفكري بصحتك انتي ؟؟!
ول ساعه الي ناسيه تاخذيها احكيلي
لاتتكربلي احكي شي لييييه توصلينه لهالحااااال فكرررك وينووو يولي وينووو
- حبيبي هسه صارت بعد وهو رزق من الله ليش ضايج ! ماتريد يصير عدنا ولد ثاني
- لاااا مااااااريد والله ماااريد منك انااا ماريد غير هالولدين ماريدلهم ثالث
- خااالد شبييييك لعد منها ماتعترض
- يوووولي انتتتتي غييير عنها انتتتي غييييير
- هسه ليش ضايج عمري مو سمعت الدكتور كال تحاليل زينه وماحجى شي يخوف
- ووول انتي ماتفهمي مااااتفهمي
- شبيك عيني فهمني شنو بالك
- تنزلين هالطفل تين
- شنووووووو
- انا لاكيلك متبرع بالكلى من كبل كم شهر انا رجعت سجلت اسمك بالصحه
واول البارحه وصلي خبر لاكين كلى مناسبه لحجم كليتك من ولد بالانعاش صارلو خمس شهور وعالنين موتو سريرياً و ابوه متبرع بكلياتو للناس
والحمدلله انها مناسبه لحجم كليتك
- وهاي انته اخذتني اليوم حتى تسويلهم الفحوصات الي يريدوهه
- اييه اخذتك حتى اخذلهم التقارير ومحسب لاخر الاسبوع العمليه تسويها
- لااااا لاااا
- ايييييه وانتي خربتي كل تعبي بهالحمل
- حبيبي اني صحتي زينه ما محتاجه ازرع كلى هاي مو صارلي سنين عايشه وصحتي عال العال ليش هالخوف
- تين العمر ياخذ من العافيه وبكلى وحده تتعبي ياعيني وانتي بالاساس الحمل مو بصالحك وهاي ولدتي حسين والحين الثاني وش يضل فيكي من حيل يولي
لا تهدمين دنيتي فوك راسي لا تعندي واسمعي كلمتي هالحمل الحين خطر عليكي حبيبتي انتي روحي افهميني
- مو خطر خالد الدكتور كال كلشي زين وهالعمليه ماريدهه اني زينه مااحتاجلهه
- يالله بلشنى بالعناد
- خالد مو عناد بس اني عندي جهال منو يداريهم لو سويت عمليه حسين منو يداري !!
- عندو عمتو وامي واختو كلهم يداروه
ماضلت عليكي تين صحتك اولى من الجهال
- زين اجلهه من اجيب عود وراهه اسويهه
- ويضلو ينتظرو جنابك تولدي ! يولي هالكلى الناس تشتريها شرايه انا بالويل حصلتها الك الحين لو مااخذتيها يعطوها لغيرك ماتضل تنتظرك يولي
- اي احسن خلي غيري يستفاد منها اني زينه مابيه شي عفيه هسه شكو دتوديني لعمليات وهوسه ماريد

عفته يستغفر ورحت للغرفه ابدل ملابسي وهو رجعلي ويكول ....

- انااا حجزتها وانتهى وبكرا تمشين تنزلين الولد وتسوين العمليه
- من كل عقلك شلون اكتل ابني بايدي!!
حراام شلون انزله
- بعده اول شهر يجوز تنزليه و دامو خطر على حياتك يجوز لا تعلميني بالحلال والحرام
- ماانزله هذا ابني شلون اكتله
- تييييين لا تختبري صبري
- خالد ابنا هذا قطعه منا شلون اتخلى عنه
شلووون لتخبلني ماااكدر افهمني ابني عزيز عليه ماكدررر
- يوووولي انتي اعز من عشرين ولد
وش يفيدني الولد لو صارلك شي !
- ما يصيرلي شي وهو العمر بيد الله
- ووول انا للحين اذكر كيف تعسرتي بولاده حسين وصلتي للموت وحييتي
والحين تجيبي الثاني !!! تجلطيني انتي !! تخليهم اثنين وتضلي تركضي وراهم ليل نهار وتتعبي وتهجمي بيتي
- عيوني التعب لولدي راحه اني ما يصيرلي شي لو ربيتهم وركضت وراهم وداريتهم المهم اشوف ضحكتهم بس اذا راحو من ايدي هنا اني اتعب وامووت افهمني
- يووولي تييييين حطي عكلك براسك لا تاخذك مشاعر الامومه الحين .. نزلي الطفل وضبطي صحتك منا لسنتين واحملي وسطري كل سنه واحد ما اعترض لكن الحيييين لاااا والف لاااا
- شنزل يااا خالد اكوله ماكدر تريدني اذبح ابني بايدي ؟؟ والله لو اعرف على ولادته اموت مااسويهه
- استغففففر الله ول تريدين تموتيني انتتتي مااااتفهمي كم دوب اضل احكيلك يابنت الناس هالحمل خطططر على حياتك يوووولي افهمي عاااد شيبتي كلبي
- افهمك افهمك بس العافيه بيد الله ما تجيبها العمليه ولا تنقصهه
- يولي عجل الله المن حطلنا هالعكل !
حتى نأدي نفسنا وتالي نحكي من عند الله العافيه !!! ماتداري نفسك بالاول يولي
وبعدها الحمل يجي ما طاير لكن الحين الكلى هاذي لو راحت فرصتهه ماتعاود افهممممي اوزنيها بعكلك كفي المشاعر غادي لا تهجمين بيتي تين حطي عكلك برااااسك وكفي عناد

كعدت وانطيته ظهري وضليت ابجي بهدوء ماكدر انزل الطفل كلبي ماينطيني
اتخيله يصير مثل حسين وهيجي اني اخسره كلبي يتكطع وادري الحمل يتعبني ومو بصالحي ادري حجيه صحيح وهالفرصه متتعوض بس كلبي ماينطيني افكر بنفسي واتخلى عن ابني

- تحضري بكرا من الصبح نمشي للمستشفى تنزلي الولد وانا اطلب منهم يحفظوها لي لاسبوعين ثانين
- مااانزل الولد مااانزله افهمني خالد الله يخليك كلبي ماينطيني
- تيييين هالولد انااا مااريدو وكفي النقاش

.
.
يتبع

#شقراء_بغداد

الجزء_الثاني_بارت_٢


وطلع صباح اليوم الي توسلت ليله يطول
ومشيت بقرار خالد بعد ما فشلت كل محاولاتي باقناعه حتى احتفظ بهالطفل وهو ختمهه بحجايه ..

اذا ما تفكرين بيه وما تفكرين بصحتج فكري بغاليه وحسين بعدهم جهال ويحتاجلهم رباه وتعب وهالطفل راح ياخذ كل حيلج وصحتج

خلاني اسكت واصفن لهالجهال وصرت افكر لو صارلي شي منو يداريهم ! محد
يكدر يحبهم ويهتملهم مثلي ...

تراجعت عن قراري ومشيت وياه الصبح للمستشفى بعقلي اكول هذا صح وبكلبي اكول لا خطيه ابني هذا ..

على طول الطريق ساكته وحتى من صار سرايه للدكتوره هو دخل وياي وحجى بدالي ... شرحلهه وضع صحتي وهي قبل ما تحجي على الاجهاض كالتلي ..

- بكل الاحوال بمثل هالحالات اثناء الولاده نفضل عمليه قيصيريه على الطبيعي

ما رديتلها شي بس باوعت لخالد وهو فرك كصته ودار عينه بعيد عني ..
طلبت انها تفحصني ورحت للسديه
وفحصتني وكالت ...

- راجعو طبيب الكلى بالاول واستشيروه على الاجهاض اذا ضروري لان وضع الحمل طبيعي احسن ما نستعجل استشيروه

كيفت بهالخبر وطلعنه منها وكصينه باص لدكتور الكلى وهو اشوفه منزعج
وحتى ميحجي شي وياي ولا يباوعلي بس يستغفر ويفر بسبحته .. لحد ما دخلنه
وحجاله كل شي كال الدكتور ...

- زرع الكلى مو شي ضروري اذا حافظتي على نشاط وصحه الكلى الوحده الي عندج وحتى تحافظي عليها تجنبي الحمل لانه ان نجح بالاولى فبسبب انها بعدها بنشاطها والي استنفذته شي قليل فنجحت الامور لحد هسه بس الي جاي بعد يصير حمل بثلاث ارباع النشاط الي جان موجود وهذا هم ياخذله فد ربع وتصفين بنص نشاط لكل عمرج وهنا تبدا المتاعب

رأساً تشكره الشيخ وطلعنه ضلينه واكفين بنهايه الممر وهو كالي ...
- دحكي هاي خلصنه من عمليه الزرع بالله همها كان حجر على كلبي

- خالد كلبي ما ينطيني ابني غالي عليه

- يولي انتي اغلى من الابن واغلى من روحي يولي عجل انا ما يحز بخاطري هالولد ! عجل هو مو ولدي ! لكن انا
ابذل الغالي والنفيس لاجل عينك حتى ولدي انا ماريدو والله ارخصه كدام عافيتك .. تين ان عشتي انا اعيش ان صارلك شي انا وش اسوي بالولد !!!

- حبيبي ادري والله ادري بس هيج انتو دتكلولي بعد ماايصير عندي جهال بعد انحرم منهم مايصير عندي بعد ولد

مسح دموعي ولزم جتفي بقوه وكالي ..
- هذول ولدي كلهم ولدك .. جراح واخوتو كلهم ولدك وطوع امرك
والله وجلال الله مااخليكي تحسي عندك ولد واحد و عاتبيني لو صار غير هالحكي

جان كل ما تنزل دمعه مني يمسحها ويمسد على ظهري واخذني بره للحديقه كعدنا وضل لازم ايدي ويباوعلي واني كلبي يوجعني ... ماامصدكه بعد راح انحرم من الجهال ومايصير عندي ولد ثاني من خالد .. جان بنفسي بعد بنيه
وولد وكلهم يطلعون بجمال ابوهم واضل اشم ريحته بيهم بس تصبرت بالحمدلله
رزقني بهالاثنين ولازم احافظ على صحتي لاجل عينهم ..

تذكرت بهاللحظه ضحكه حسين واني عندي هالضحكه تسوه عشر ولد وخوف
خالد من خسارتي همه السبب الي خلاني اوكف من جديد واروح احجز عند الدكتوره حتى انزل الطفل ...

علمود حالتي الدكتوره كتبتلي باجر من الصبح موعدي يمها ..

ورجعت بالطريق هادئه وكل الي افكر بي حسين ابني اشتاقيتله ، خالد يكولي ..
- تينتي طمني كلبي احكيلي شي لا تسكتي هالشكل
- اطمن حبيبي مابيه شي
- احمدي الله يا يابه هاي عندنا اثنين يسون الدنيا والي عليها ربك رحيم ماحرمنا من فرحتهم
-والنعم بالله .. لا اعتراض على حكم الله الحمدلله اهم شي عندي تطمئن وتبطل خوف عليه هيج ونتعارك كل شويه
-هههههه هاااا يولي مليتيني
-لاا بس السالفه تضوج كل يوميه عركه
- ايييه بالله حكك لكن هاذي ختامها ان شاء الله
- ان شاء الله

وصلني للبيت وكالي ادزلج الجهال
وراح وره شويه اجوي ويه جراح
ورأساً اخذت من ايده ابني حسين وحضنته وضليت ابوس بي ردتلي روحي بحضنته ...
وغاليه واكفه ومنتبهه عليه شلون ابوس بي وهي عفتهه حسيت الغيره بدت عدها
رأساً نزلت حسين وكعدت بمستواهه وفتحتلهه ايدي وضحكت وهي اجتي لحضني ..

بنيتي راحه لكلبي من احضنها احسها صديقتي روعه مادري ليش هالاحساس يصيرلي ويذكرني بيهه كل مااحضن غاليه !

اني حاولت اتواصل وياهه بس هي رقمهه ما يحصل ولا مره حصلتهه
بكل هالسنين ضليت كل مااذكرها ادعيلهه بالتوفيق والراحه ...

حضرتلي جنطه صغيره بيهه شغلات الضروريه باجر احتاجهه وضليت اليوم كله حاضنه حسين احس هيج حاضنه وياه ابني الثاني واودعه ..

بالليل نايمه بحضن خالد ولا هو الكدر يغفى ولا اني اثنينا فكرنا بالطفل وهو كل شويه يشد على حضني اكثر واني اطمنه وابتسمله حتى يخف توتره من يشوفني هادئه ..

بعد ما تحضرنا الصبح وقبل مانروح لبيت الشيخه نودي الجهال وصيته ما يعرف بهالشي غيرنا كل العمر ماريد احد يدري اني نزلت الطفل ومايصير احمل بعد وهو كالي الي تريدي يصير ويضل سرنا واحد ليوم الدين ...

ورحت للمستشفى ونزلت الطفل واني عيني تدمع خسرته وكلبي يمه وهو بعده قطعه دم ..

ضليت لليل بالمستشفى وهو وياي مره يلزم ايدي ومره يبتسملي ويكرص خدي بهداوه ويوكلني ومن رجعت للبيت هو وياي يغسلي ويظفرلي شعري ويسالني شتريدين شمحتاجه اجيبلج واني كلتله كلشي مااريد بس احضنك وانام
ماامحتاجه بس ارجع للامان الي بحضنه

وضل منومني على ايده حتى الجهال ماراح جابهم .. والصبح ماراح للشغل
والجهال اجوي وهو يسألهم متريكين
ويكللوه اي ...
بس حسين كل شويه متعوده اوكله شي
واني ضاله كل شويه اوصي ينطيه شي ياكله ..

بهالموقف صدك تحققت حجايته الي دائماً يكولي اياهه ان ..
هو وياي خالد مو الشيخ

جان لابس بجامته النيلي وبلوزها وكاف ردانه ومهتم بامور البيت ..

غاليه تريد تبدل يوكف وياهه يم الكنتور
ويطلعلهه ملابس وهي تتنعوص عليه
وهو يضحك لحجيهه ومن تقتنع وتاخذ ملابسها تبدل وتجي تريد تسوي شعرها
وتجيبلي المشط ياخذه مني وهو يمشطلها
ويمدح بجمال شعرها وينفخ بريشاتهه
وبعدين يختمها ...
بس تضل امج احلى منج

و اني باقيه متمدده بفراشي ويمي ع الجربايه حسين وهو بالمطبخ اسمعه يطكطك ...

اسأله شمحتاج يكولي ادور السيخ
اريد اشوي ..

ويجي يسد الباب ويروح يشوي وبعدها
يرجع وشايل صينيه الاكل ويحطها ع الجربايه وياخذ حسين بحضنه ويوكلني ويوكله قبل ما هو ياكل ..

اتشكرته على الاكل واكوله اكعد يمي كلشي ماريد بس هو كل شويه يذكر شغله ويروح يسويهه ويكولي ..
يولي خفايف هاذي اكضي بيهن الوكت

ومن حسين يبلل ملابسه ولازم اكوم اغسله يضل واكفه يمي اغسله ع المغسله والفه بالخاولي وهو يشيله ويحاوطني بايده الثانيه ونرجع للغرفه اكعد البسه واعوفه يفتر وهو وراه وراه واني نايمه

للمغرب بدل ملابسه وطلع وبرجعته جايب العشه وصار ينبه على غاليه ماتحجي لاحد امهه مريضه وتعبانه

ضل مداريني لحد مارجعلي حيلي ورجعت اخذ اعشاب تنشط الكلى

مشت الايام وصار باقي على دخولنا لرمضان اسبوعين وبيوم الجمعه صادف احنه ملتمين كلنه على الغده بيت الشيخه
والشيخ كال ..

- يمه ان شاء الله رمضان هالسنه نحييه بمكه عند بيت الله
- بعون الله يابني بعون الله
- اييه انا ناوي اخذكم كلكم للعمره ان شاء الله
- حتى الولاد؟
- ايييه وكاد الولاد معنا واولهم جراح ولدي العود
- ابو جراح انا مكدر امشي للعمره هالسنه

كلنا باوعنا لام جراح وهي كملت حجيها وكالت ..
- خلي التوم هين عندي واخذو جراح ورماح يعتمرو بدالي
- هاا خير ؟ ليه ماتكدري
- انا حامل

وكفت اللكمه بحلكي وبالكوه نبلعت
باوعتله وهو يباوعلي ورافع حاجبه
بعدين باوعلهه وكال ...

- يازين هالخبر تكومين بالسلامه ان شاء الله وعسى هالمره تولدين بنت اخيه لغاليه تصير
- ان شاء الله

باركتلهه واني بالكوه مسيطره على دمعتي لا تنزل ومدنكه اوكل حسين
وبعدين اخذته وكمت اغسل وره ماشربنه الجاي اخذت جهالي ورجعت للبيت وبس ذبيت عبايتي دخل الشيخ ..

هنا اني انهاريت بعد .. ضليت واكفه كدامه واباوعله بعصبيه والدموع تجري
وهو بس يفرك بكصته و ميباوعلي
كلتله ..

- لييش يعني لييييش !! هي تفرحلهه بهالخبر واني تجبرنننني انزله و ارل ماسمعت بالخبر تلكيته بالصياح والعصبيه ومافرحك ولا لحظه مافرحك

- حبيبتي انتتتي تختلفين كم مره انا احكيلك هالشي هالحمل كان ممكن يخسرني اياكي يولووو

- ماااجنت راااح اموووت خالد ما جان راح يموتني هالطفل ليييش حرمتني منه

- يولي صحتك اهم من الطفل ول لا تشلعين كلبي تين

- جان بهالوكت اني اجهز لولادته ويكبر ويه حسين ويمكن هالبنيه الي تتمناهه تجي من هالحمل

- تينتي اهدي برضاي عليكي اهدي حبيبتي

- محرووك كلببببي خااالد محروك كلببببي تمنيته هالحمل والله تمنيته ولليوم روحي لايبه عليه ... اني المفروض ابني يجي قبل ابنهه ليش ما همك مثله لييش
لو مبقي ومفرحني بي شراح يصير ليش كرهته من اول ماانخلق

- استغفر الله يولي انا اكره ابني انااا!!!

-اييي اييي كرهته لو ماكارهه ماجان سويت هالهوسه كلهه عليه وجان هو بعد كم يوم بينه وماتخليني اتحصر على الولد واحسد التحمل

جنت احجي بعصبيه طلعت كل الي كاتمته بصدري من ذاك اليوم لليوم
وهو ساكت وكاعد يباوعلي .. عفته ورحت لغرفتي قفلت الباب وضليت بفراشي ابجي ...

موقفه وياهه رجع فتح هالجرح وذكرني اني بعد مستحيل اكدر احجيله هيج خبر واشوف هالفرحه منه والغيره اكلت كلبي اكل ...
ابني المفروض يجي قبل ابنهه ليش اني تخليت عنه ورضيته ...

ضل هالندم بروحي وشكد مااحاول يحاجيني مارديت عليه ولا تحركت من مكاني ... جنت تعبانه وبس اريد ابقى وحدي ...

وضليت هيج لحد المغرب على الصلاه طلعت غسلت وصليت ورحت احضر العشه والجهال اثنينهم ماكو للساعه سبعه ونص اجوي ويه ابوهم ..

هو بس يباوعلي ومايحجي شي وخليت الصينيه واخذت حسين بحضني واوكله
واباوعله بس لازم الخبزه بيده وصافن عليه ... اني ماكدرت اخلي لكمه بحلكي
وهو كضاهه بس صفنه ..

اخذت الصينيه ورحت اغسل المواعين
وهو اجاني وضل واكف ورايه ويكولي

- يولي عدنا حسين وغاليه ولادنا ما محرومين الخلفه احنه ياعيني لاتكبرين السالفه وتضيكين خلكك

ما رديت عليه وهو جر نفس قوي وكالي ..
- فهميني وش الي بالك وش الي مضيك خاطرك هالشكل

سديت البوري ونشفت ايدي وباوعتله
وكلتله ..

- راح انسأل هواي ليش ماجبتي اخ لحسين ؟ وراح هي تتعمد بكل مره تحجي بحملهه كدامي واني ماكدر ارد
بس بكل مره اشوفهه اتذكر اني ما تمرني بعد هالفرحه

عفته صافن ورحت لغرفتي تمددت وشويه واجتني غاليه تسألني شبيه
ونامت بحضني وحسين هم كل واحد من جهه وهو ادري بي موجود بس ضل بره

فرشتلهم ونومتهم وتمددت وهو اجه نام بصفي ولاول مره انام منطيته ظهري ومااحاجيه ..

والصبح كعدت تعبانه وخشمي مسدود
وما شفته يمي .. رحت احضر الريوك
وهو اجه ومن دون مااساله شي هو كال

- صليت بالجامع ودعيتلك
- تقبل الله صلاتك

كعدت غاليه وضلت يم ابوهه يمشطلهه
واني جبتلهم الريوك وهو مااكل بس يشرب جاي .. عاد كلبي ماانطاني اعوفه
سويتله لفه وخليتهه بايده يلا اكل
ومن رحت اغسل مواعين اجاني وضل واكف بس يباوعلي ومتجتف .. كملت وكلتله ..

- اذا تكدر توصي احد يشويلنه سمج للغده
و خضورات هم ماعدنه

حجيتهه ورحت امسح الكاونتر وهو كالي

- كان ثمن حمايتك لي كبير دفعو ياتين

رأساً نزلت دمعتي وعفت الي بيدي وهو
رجع كالي ..
- داري انك تدفعي ثمن حياتي صحتك وضناكِ وفرحتك ... انا اسف تين اسف والله خجلان منك بسببي انا انتي تجمعي الحسره بكلبك على الضنى
انا لو ماغفلت عنو وما كنت ضعيف بهذيك الساعه وخليتو ياخذني غدر
ماكان صار الي صار وماكنت دحكت دمعتك ووكفت عاجز كدامها

رحت حضنته وهو خله راسه بركبتي ويكولي ...
- اسف سامحيني تين سامحيني
- ياعيني انته اغلى من صحتي واغلى من الضنى ولو ينعاد بيه الوكت هم ارجع واسوي نفس الي سويته ومااتندم اني عمري ماتندم على شي بذلته الك حبيبي
لتكول جنت ضعيف لتكول سامحيني انته ماغلطت لتحجي هيج تاذيني بهالحجي

رفعت راسه وشفت دمعته على خده
تخبلت .. كبل مسحتهه وبوست عيونه وخده وضليت لازمه وجهه وهو عيونه حمر وباهته ...

- خالد شلون تنزل دمعتك واني عندك
حبيبي فدا لعينك اروح اني وصحتي وابني وكلشي املكه يرخص لتراب رجليك .. كسرت كلبي والله ليش هيج يعيوني انته لييش

- يولي ماتهونين عندي ول انا عاجز اسوي شي كدام حزنك داري انك تضلي العمر كلو تتمني لو انك ماطاوعتيني
وتحمليني ذنب هالطفل الي راح
- من عمت عيني لو عاتبتك على هالشي بعد .. اسفه حبيبي اني من عصبيتي هيج حجيت بس والله ماعندي اغلى منك ولا اريد شي بعد والله وعيونك مااريد بس وجودك وياي

حضني بكل قوته ويكولي ..
- تينتي ماتصدي عني ول انا مادحك الدنيا الا من عينك
- ماتنعاد حبيبي اني وين اكدر بدونك
ياعيني

لزمت وجهه وتلمست طرف رموشه وابتسمتله وهو كالي ..
- احبك والله اعشكك انتي اغلى من كل ولد عندي لا تعتبي علي تين لكن انا فيكي مااجازف
- انسدت هالسالفه بعد عوفهه هاي الله انطاني حبك وعافيتك وهذني العيون يستاهلن اضحيلهن بروحي لا تهتم لهذاك حجيي تعرفني مزاجي من يُخرب يخَرب
كلشي بس بعد ماينعاد هالحجي وعيونك
- راضي انا بكل شي تحكيه وفاهم انه بعصبيه لكن ما ودي تحزني
- ماكو بعد لا حزن ولا اي شي هاهيه عمري انسى
- وشووو؟
- عمرري عمرري
-ههههههه يااااحلاااات حروفك والله انك المي الي يسكي عروكي ويحييني

غيرت دمعته كل تفكيري وشوفتني ان تعبه عندي اكبر واكثر من قهري على الحمل ... كدرت اتحمل فكره ماكو جهال بعد بس ماكدرت اتحمل اشوف دمعته وحزنه هنا نقطه ضعفي ...

ومن بعد هالموقف تغيرت وكلت الحمدلله
عندي هو يعوضني وجوده وحبه عن كل شي ..

دخلنا رمضان والشيخه كالت ..
كل يوميه الفطور نتقاسم تحضيره اني وام جراح ونسوي سفره وحده بيتهه ..

ومشينا بالكلام اني احضر من العصر الاكل الي عليه واحضر حلويات واخذهن واروح يمهم وهي تصب اكلهه واني اصب اكلي وصفيه عليهه المواعين
واني عليه التحليه وام جراح الجاي

وهيج بقينا لحد ما صار وكت سفرنا
للعمره ...
رحنا بثاني عشره من رمضان سنه
٩٨ ...
ويانه الشيخه وصفيه وجراح وغاليه ورماح ...
وام جراح اخذت التوم وراحت لاهلهه

هناك اول ما دخلنا المدينه المنوره
الشيخ محاوط امه وعينه عليه ويبتسم
والجهال يتمشون كدامنه

وقبل ما نبدأ بالاحرام اخذني على جهه وكالي ..
- دحكي الحين انا مايجوزلي المسك من بعد اليوم هاذي راح نعاود كأننا عزابيه
وما يحلي لمسك الا بعد مااوفيكي مهرك
- رجعنا للبدايه ههه
- ايييه نعاود هالمره احباب ونعاود ان شاء الله لزواجنا بمرضاه الله ونبيو
- عرفت ليش ردت مهري عمره
حتى اجدد العهد وياك من بيت الله حبيبي
- ول عكل حبيبك انتي نعمتي وهدايتي
عسى ربي يكمل عمري ويه عمرك

ابتسمتله وكلتله ..
- بس دنك شويه
- امري

دنكلي شويه واني قربت راسي كأني اشاوره بس اني شميته ومليت ريتي من ريحته ووخرت وهو يبتسم .. كلتله ..
- لا تنسى تره احبك اني
- ههههه يولوو تره يجوزلنا الحكي
- اييي ميخالف بس حبيت اكولها الك بصفتي زوجتك هسه
- كل يوم تسمعيني هالكلمه يولو ماتنسي
- انته سمعنياهه وتدلل
-هااا تساومي فيها !
- لعد بس انته تريد تسمع اني هم اريد
- والراء واللعد هم لا تنسيهم حبيبتي مااكدر بدونهم انا

ضحكت ورجعنا للشيخه وافترقنا هنا
حتى نبدا بالاحرام ...

كلنه لبسنه الابيض وحتى الجهال جانت الشيخه مخيطتلهم دشاديش بيض
همه ماتجوزلهم العمره لانهم مو بالغين بعدهم بس احنه ردنا نزورهم ونشوفهم بيت الله ومثل ماكال الشيخ ..

حتى يكبرون ويكبر حب الله ومخافتو بكلوبهم ...

بكل مناسك العمره اوكف محتاره شلون
اشكر كل هالنعم واني بيت الله ؟!
الصلاه التسبيح الدموع والادعيه كلها
قليله تصير بلحظه وكفتي ويه احبابي
كدام الحجر الاسود وهيبه المكان وانشراحه صدري بي ...

جنت اجيب كتاب الادعيه واكعد يم نسوان اثنين كبار ومايعرفن يقرن
واحنه صارت كعدتنا ومشيتنا سوه
واصير اقرا بصوت عالي جمله جمله
وهنه يرددن ورايه لحد ما يخلص الدعاء
وغاليه تكعد بصفي وتستمع وياهن وتردد
ورافعه ايديهه الصغيرونه بالدعاء مثلهن

اشتريتلهه لباس صلاه من هذا ابو التنوره ويه مصلايه وحافظه للقران قماش كلهن نفس اللون ابيض ومطرزات بالوردي بالاطراف ...

والشيخ مره اجانه وجايب لكل واحد منهم سبحه لون ووصاهم يحافظون عليهه
ويسبحون بيهه بكل صلاه ..

اخذنا صور جماعيه بكل مكان وصور النه بس اني وياه بالاحرام الابيض
وشبعنا من مي زمزم ..

ووكت الطواف هو مخلي الشيخه كدامه واني بصفه والجهال وصفيه كدام الشيخه

من قبل اني يجذبني صوته الثابت والعالي بوكت الصلاه او التلاوه وهسه زادني انصات اله وكت ماايردد
لبيك اللهم لبيك ... يخلي جسمي يقشعر
يمكن من هيبه الاجواء او يمكن من كثر مااحبه يتخلل كلشي منه لاعماق اعماقي

رجعنا بثاني يوم عمرنا لامواتنا
وهو بحيله ماشاء الله يسوي السعي بين الصفا والمروه شبختين واني مايصير اهرول مثله وهو يكولي انتظريني اكمل وارجعلج اخذج تسعين بينهن ..

واضل انتظره يرجع ويرتاح شويه ونمشي نسعي بينهن ...

وعيدنا بجبل عرفات وعشنه اجواء العيد الاسلاميه بمكه ورجعنا من بعد طواف النساء الي رجعه حلال عليه وهو بساعتهه كالي ...
- الحين تم مهرك يا يابه وبدينا زواجنه من جديد
- عشت ياروحي والله كفيت ووفيت وكد كلمتك وياي
- عند عينك يالحبيبه .. بخاطرك شي بعد ضل هين ؟
- لا عندي انته كل شي اريده هو بس انته
اني طلبت من ربي مايعيشني يوم بدونك
- وانا بعد طلبت من ربي يرحمني فيكي
ولا يخليني اكصر معك بشي وطلبتك زوجتي بالجنه لو دخلناها ان شاء الله
- يابعد عمري ان شاء الله ندخلها سوه
ونعيش هناك راضين مرضيين
- بأذن الله ياعيني بأذن الله

رجعنا محملين بالهدايا للعراق واني مانسيت اخوتي ذكرتهم بالدعاء وبالهدايا

وره رجعتنا بيومين خابرت مصطفى وطلبت منه يجي حتى انطيه هداياهم
وهو كالي ..
ان دعاء انخطبت ثاني يوم العيد وعرسهه
بعد اسبوعين ...

هنا صدك بجيت وانقهرت شلون اختي تكبر وتتزوج واني ماشفتهه من سنين
ولا عشت وياهه شي ..

كل يوميه مصطفى يكولي هاليومين اجي ومايصحله مجال لحد ما مشت عشر ايام ا وصار وكت زواجهه قريب
واني حسيت نار وشابه بضلوعي شلون مااشوفهه .. اختي هالوحيده تتزوج ومااوكفلهه عمت عيني

حجيت للشيخ اريد احضر زواجهه
وهو وافق وشجعني على هالخطوه
وكلتله اريد اخذلهه كم شغله لجهازهه
كالي اخذي الي تريدي .. انطاني فلوس
ورحت اني والشيخه للسوك اريد اخذلهه
ملابس ماعرف قياسهه مادري بيهه سمينه لو ضعيفه وشتحب يالون
وهالشي يجرح بكلبي وخلاني مثل المخبله افتر بالمحلات ومااعرف شاخذ ما اعرف عنها شي !!!!

تالي الشيخه اقترحت اخذلهه ذهب يفيدهه وهيبه كدام عيالهه ..

ورحنا للصايغ اخذتلهه تراجي وكلاده خفيفه .. والشيخه جملتني فلوس ويه العندي ومن رجعت طلعت الفلوس المجمعتهن ورجعتهن الهه ..

حضرت احلى ملابسي وملابس الجهال وبيوم حنتهه من الصبح راح هو وصى الولد يحملون الفواكه والمخضر بالسياره
واني بقيت اسبح الجهال وابدللهم وغاليه لبستهه ذهبهه تراجيهه والشباحيه وشعرها عفته مفتوح على طوله بس خليتلهه طباكات ولبستهه ثوب ماروني كصير وكالون ابيض وحذاء اسود
وحسين لبسته اوفر نيلي ومنقط بابيض
وحذاء ابيض وهو دب طلع هالكبره بالكوه يمشي هو وشعره الاشكر مسويته اله ذيل حصان ...

واني لبست ثوب طويل سمائي ساده وكلوش ولبست سوار وكلادتي بكلمه الله الذهب ومحبسي وحلقتي هنه دائماً بايدي
وشال كريمي ومكيجت وحضرت ملابس الشيخ . اختاريتله الدشداشه النيلي والعباه الكريمي ورتبته بايدي وعطرته مثل كل مره ختمتهه اله ببوسه وضحكه وطلعنه
هالمره لبغداد بعد غياب ٨ سنين ...

اول ما دخلنا بغداد خنكتني العبره

يضل الانسان يحن لديرته وناسه واصله لو مهما عاش بعيد يضل الاصل هو الموطن ..

بعدهه بغداد حلوه وهواها مثل ماحفظته ريتي وشوارعها مشرعه ابتسامتهه للرايح والجاي وبعده صوت الكهاوي
يضج باغاني الراديو والدلعب اغاتي

اغاتي وعيني ولكنه بغدادي باصوات الرياجيل الكبار الي يرحبون بيهه بصدر منشرح من بعيد بمعارفهم وشوفه البنات يتمشن باثوابتهن الثلاث ارباع والشعر المنثور والكعب الناصي تذكرني بايام كليتي وسنين عشريني ...

وصلنه لمنطقتي باب الشيخ العصر وكلبي يدك سريع ومجلبه بايد الشيخ وهو يضحك ويكولي ..
- هااا يولو مااطاير انا
- عفييه
- ماتخافي يولي شيختهم انتي وبحمايه شيخك تدخلين بزودك وتمشين بزودك
- تبقى وياي مو ماترجع !
- وكاد اضل معك عجل انا اخليكي وحدك هين !! وش عندي اهم منك وامشيلو
- اوووف ريحت كلبي
- ادخلي بزودك حبيبتي عندك بظهرك من يسندك لاتنسي
- ياروحي انته قوتي والله

ضحك وبوس ايدي وطبك السياره ببدايه الدربونه لانها متدخل الفرع ضيك
ونزلنا وهو اخذ حسين شاله وغاليه ضلت ايدهه بايدي وهنا سألتني ..
- ماما احنه وين يابيت نوح؟
- بيت جدو حبيبتي
- عندي جدو هين !
- لا جدو مات بس هنا خالو وخاله العروسه
- اكعد يم خاله العنوسه
-اي اكعدي هي تكيف بيج وتحبج

ضلت تباوعلي كل شويه وتضحك واحنه نمشي بداخل الفرع واشوف شلون هوسه الجهال بالباب ومصطفى مخبوص ويه كم ولد مدري شيحجون ويأشرون على الكهرباء ..
ومامنتبه علينه عاد شاورت غاليه ..
- صيحي على خالو وروحيله يلا

هي فلتت ايدي وصاحتله ..
- خالوووو مصطفى

وراحت تركض وتصيحله خالو وهو التفت وضل صافن هو والولد عليهه
وبعدين ركض شالهه وحضنهه واجاني
بسرعه وحضن راسي وباسه والشيخ جرني منه وكال ..
- هااا خويي خير بنص الشارع !
- ههههه نعتذر عيوني بس اللهفه عليهه غلبت الفكر .. ياااهلااً وسهلاً بيكم نورت بغداد بجيتكم
-منوره باهلها
- تفضل اغاتي تفضل .. عليييي تعال هنا

من صاح علي كلبي فز من مكانه وضلت عيني على الولد ياهو منهم راح يجي
وشفته جان شايل صندوك بطاله الببسي
وذبه من ايده واجه بسرعه ويباوعلي
عينه بعيني واول ماوصلنه كال ..

- اخيتي زهراء

ماكدرت احجي شي من عبرتي بس هزيتله راسي وهو حضني ووخر بسرعه واباوع لملامحه الي متغيره وماحيه الطفوله من وجهه واثار الشباب هي الظاهره عمره هنا ٢٣ وشاب مرتب وهيئته رزنه ..

اخذني مصطفى للبيت ويه جهالي وضل الشيخ ويه علي واكف ويباوعلي

اول مادخلت اسمع اصوات الهلاهل والضحك وهوسه الحجي ومجلبه بايد مصطفى وهو ضاغط على ايدي وموكفني وراه ويصيح على مرته

اجتي مرته بطنهه كدامهه وهي ناعمه وحلوه وهو يباوعلهه ويضحك ورأساً كالهه ..
- اريدج تاخذين هاي المريه لدعاء
-ومنو هاي وشكو لازم ايدهه ؟!
- شعليج هسه دروحي يلا اخذيهه ودخلو جوه يلا غلو عود اطلعيلي من تضوجين

عافنه وطلع وهي مشت كدامي واني اضحك بحسره .. تدليني على بيتي !

اباوع البيت مجدد صبغه وكلشي باقي على حطته .. دخلت الهول وجهالي كل واحد من جهه لازمتهم واول ماصارت عيني بعين دعاء هي وكفت وشالت بدلتهه ومشت الي وحضنتني وهي تصيح

- اختي حبيبتي اختتتي اختتتتي اجيتيني تمنيتج تجيني والله تمنيت اشوفج

ضليت بس ابجي واني حاضنتهه ماعرفت احجي شي واجتي وحده سحبتهه مني باوعتلهه هاي امي
.
يتبع

#شقراء_بغداد

الجزءالثاني_بارت_٣


بعدهه بنفس الابهه والخشم العالي
كالتلي ..
- هليتي ونورتي عيني هذول جهالج منين بله !
- من تاج راسج

درت وجهي عنهه وجريت ايد دعاء واخذتهه كعدتهه وضليت بصفهه كاعده
واعدل بدلتهه وامسح بدموعهه وكل شويه ابوس بيهه وعرفتهه على غاليه وحسين وضلت تحضن بيهم وتبوس ومكعده غاليه بصفهه وفارشه البدله بحضنهه وغاليه تضحك مكيفه بيهه
وحسين مكعدته بحضنهه وتسألني

- منو رجلج ؟ شوكت تزوجتي ليش ماندري احنه فهميني احجيلي شي
- تكمل الحنه و نحجي براحتنه

شفت نسوان اثنين عينهن متركزه علينه
اشرتلهه بعيني عليهن وسألتهه..
- هذني منو ؟
- هذني خالاتنه شبيج
-هااا راجعه بينكم العلاقات
- اي من زمان يجونا ونروحلهم بس مصطفى ميروح وخوالي دائماً يجون يمنه يباتون اذا عدهم شغله هنا
وحتى امي رادت تزوج مصطفى وحده من بنات خالي الجبير وهو ماقبل وراح اختار مياده
- هاا وهسسه هذني البنات الصغار بنات خالاتي يعني
-اي هذني اثنين منهن بمعهد معلمات واثنين بعدهن بالمتوسطه واكو مزوجات مااجني بيوتهن بعيده
- زين اكلج هالفتره امج شلون تعاملهه ويه عماتنه
- ليش متكولين امي ؟ انتو شنو الي بينكم
- معليج بهالشي حبيبتي سوالف قديمه
هسه احجيلي
- ما مندكه بيهن وعماتنه مو دائماً يجن هنا احنه نروحلهم كل جمعه للبيت الجبير نلتم على الغدا ونقرا الفاتحه ولليل نتعلل ونرجع ومرات نلتم ونروح للنجف وامي تجي ويانه هم ،يعني ماشفتهه فد يوم متعاركه ويه احد منهم زينه علاقتهم
- اي الحمدلله
- شكد عندي حجي وياج وبنفسي اعرف كلشي صار وياج اليوم تبقين تباتين مو
- اي ابقى لعد شلون اعوفج بيوم عرسج
- لعد ليش مااجيتي بعرس مصطفى
- بوكت خطوبته ماجنت مستعده للرجعه هنا ووكت عرسه جنت مريضه
- خير شنو شصارلج
- هيج شويه تعب هسه احجيلي خطيبج شلونه حلو ؟مقتنعه بي ؟
- اي حلو زين وحباب كلش ويايه وعمتي صارلها سنين كل ماتشوفني تكعد تقنعني بي وتحجيلي شيسوي ميسوي
- هم ملتقين قبل الخطوبه
- لا هيج كم مره شفته من بعيد ببيت عمي وبالخطوبه مصطفى ميقبل يجي لبيتنه بس شفته مره وحده من طلعنه نشتري ذهب وحتى عمتي عزمتنا يمهم مره ومصطفى مقبل نروح
- عفيه عليه خوش يسمع الوصيه
- كلش حريص والله مرات احس شخصيته اقوى من شخصيه ابويه
متحكم بكل شي هذا الدينار اذا ينصرف بالبيت لازم يعرف المن وشلون انصرف
امي كلش تخاف منه وما تخطي خطوه بدون علمه
- هو الاحسن .. ياريته جان جبير بذاك الوكت وياي جنت مااعتازيت لاحد
- منو الاذاج بس فهميني شو كل واحد يحجي شكل عليج ولحد هسه مامفتهمه شنو سالفتج
- سالفتي طويله بعدين نحجيهه

ضليت اباوع لوجوه الكاعدين واحاول اتذكرهم منو وعرفت كم وحده منهن والي ماعرفهه اسأل دعاء عليهه
امي اشوفهه واكفه من بعيد تباوعلي وعاوجه حلكهه وتتبسبس ويه وحده من خواتهه ...

غاليه رادت تروح لابوهه اخذتهه وبقيت حسين بحضن دعاء وطلعت وصلتهه للباب وضليت واكفه اباوعلهه لحد ماراحتله ورجعت امشي واباوع لكل ركن بيتنه ..
رحت لحب المي تلمسته وشربت منه
وضليت واكفه بنص الطرمه واباوع لفوك وسمعت صوت يكولي ...

- تره البيت مو بيتج وشوكت مايعجبج تجين وترحين

باوعتلهه وابتسمت بحزن هاي امي الي تحجيلي هالحجي ..!

- ولا هو بيتج هم هذا بيت ابويه والي هنا اخوتي بكيفي اجي واكعد شوكت مايعجبني
- نايمه بالعسل انتي ..عيني هالبيت تسجل باسمي واني الوصيه على اخوتج من جانو قاصرين واني الي بمزاجي مبقيتج هنا ولا انتي ماتشرفيني
-هاااا ياسبحان الله دائماً عدنا نفس الشعور انتي هم ماتشريفني وهم اني باقيه بمزاجي هنا وحجيج هذا خليه الج وصيه ماوصيه هاي سوالف متهمني اني جايه احضر عرس اختي وارجع لبيتي
- ومنيلج هالبيت عيني جبتيه من ورث ابوج لو بتلال الذهب العندج لما طلعتي بطرك ثوبج شارده ياهو هذا اللفاج وضحكتي عليه بدموعج هذا يا اغم
- والله لو ماعمرج وشيبتج جان عرفت شلون اردج بس مخليتج للايام هي كفيله ترجعلج الصاع صاعين

عفتهه ورحت للهول طبيت ووكفتني وحده من خالاتي لزمت ايدي .. باوعتلهه
وهي كالتلي ...
- اوكفي خلي نشوفج نسلم عليج وين جنتي غاطه ؟شبيج مابيج سولفيلنه
- تريدين اخباري لو تريدين تسلمين؟
-اثنينهن
- اعتبري السلام بينه وصل واخباري زينه وتسر الخاطر من رخصتج اشوف ابني

عفتهه ورحت لدعاء اخذت منهه حسين وبوسته وضليت مكعدته بحضني واطلعله ككو من الجنطه واوكله وشويه وسمعنه صوت الهلاهل من بره عرفت اهل العريس اجوي .. يعني هسه راح اتلاكى ويه عماتي ...

وكفت رأساً ورحت لاخر الهول ضليت واكفه هناك حتى مااصير بوجهم واخليهم يكملون هوساتهم ويحنوهه براحتهم

ضليت اباوعلهم شلون يهوسن ويهلهن وشفت العريس طويل واسمراني وجسمه زين بس دعاء احلى منه .. دعاء مربربه وبشرتهه بيضه وملامحه حلوه ..

اشوفه شلون يستحي يباوعلهه وبالكوه يلبسهه ذهبهه حتى عينه ميحطهه بعينهه

ام العريس الي هي عمتي الجبيره هي حنتهم وضلت تهوسلهم وتدبج ويه بقيه النسوان ..

اني هنا تذكرت الذهب الي جبته الهه
وكلت خلي البسهه كدام عيالهه احسن

خليت حسين بحضن بنيه صغيره ورحت وبيدي علبتين الذهب الصغار ..

وصلت يمهم وصرت من جهه دعاء وهي تباوعلي وتضحك .. سلمت على العريس وهي كالتله ..
- هاي اختي زهراء

ضل صافن بوجهنه وبعدين كال ..
- اهلاً وسهلاً

ابتسمتله وفتحت علبه الكلاده ودنكت لبستهه وهي تتشكرني وفتحت علبه التراجي شوفتهه الهه وضحكت وكلتلهه
- هاي خليهه بعدين البسيهن رجلج هسه لبسج تراجي بعد وين احطهن

ضحكت و شاورتني ..
-مالاتج احلى باجر البسهن وانزع هذني

ضحكت وبوستهه وضليت واكفه يمهه واباوع لعماتي الي كل وحده صفنتهه
شكل .. عاد اني ضحكت وكلتلهم بصوت عالي شويه ...
-هاا شلونكم

اباوع لدعاء حاطه ايدهه على حلكهه وكاتمه ضحكتهه .. واجتي هاي البنيه الصغيره تتدافع من بين النسوان وشايله حسين وهو يبجي .. رحت اخذته منهه
وطلعت بي بره ولحكني عماتي ..

بوستهن وهنه ماانطن اي رده فعل بس كالن ..
- ليش رحتي ؟ وين جنتي كل هالسنين
- سوالف طويله بعدين خلونه هسه فرحانين شكو مرجعينا للماضي
- هذا ابنج ؟
-اي ابني حسين
- شوكت تزوجتي يامعزايه ولج وين جنتي
- اي عمه كلتلج بعدين نحجي هالشي
- رجلج وياج ؟
- اي وياي بره هو وبنتي يم مصطفى
-عندج بنيه هم !
- اي عندي بنيه عمرها ٨ سنين
- يااااه من ذاك الوكت انتي متزوجه ولج شلون
- عمه الحجي هواي مو مال هيج وكفه
خليهه بعدين

جانت عمتي الجبيره هي الي تحجي
وعمتي الصغيره تباوعلي وعيونهه تدمع
اجتي حضنتني وكالت ..
- والله بهذاك اليوم عرفت صايرلج شي
ليش محجيتيلي شصارلج ليش مااجيتي لبيتي ليش خليتيني عايشه بذنب كل هالسنين
- لااا عمه لااا شكو تلومين نفسج
- والله مارتاحلي كلب دايماً اكول بنت اخويه وروحه ماحميتهه ماداريتهه ومافهمت شبيهه ..اني شفتج بعيني شلون تعبانه وماسويتلج شي ضلت تدك بكلبي والله مارتاحيت واحس اخويه يلومني عليج
- لاا عمه الحمدلله اني عايشه ومرتاحه
وانتي مو ذنبج بشي هو ابو الذنب راح لدار حقه انتي شعليج تصرفتي على لاهيتج
- لو بس افهم شجان صاير بينكم
- بعدين عمه بعدين

جنت اسكتهم بكلمه بعدين واني مادري شراح احجي بهاي البعدين ؟

عماتي بقن بس دزن بناتهن وجناينهن
وخالاتي بقن بايتات هنا وشفتهم ديحطون العشه رحت طلعت للباب وادور بعيني على الشيخ او واحد من اخوتي وشفت علي رأساً من اشرتله اجاني يركض

- ها خيتي محتاجه شي
- اريد الشيخ وين راح؟
- هو مصطفى كاعدين بالكهوه براس الشارع
- هاا زين تكدر تروحلهم وتكوله اريد ينزلي الغراض والجنطه اريد ابدل للجهال وهم اريد احاجي
- صار هسه اروحله

راح واني طبيت ورديت الباب وشفت دعاء طلعت من الهول رحتلهه .. وكالتلي
- امشي وياي خلي نصعد اريد ابدل
-يلا امشي

صعدت وياهه ويانه بنات خالاتي اثنين
ضليت اني وياهه وحدنا بغرفتهه الي هي غرفتي قبل ..

عفتهه تبدل ووكفت يم الشباك تلمست البرده وباوعت للجربايه نفسها جربايتي
شكد جنت ارتاح من انام بيهه انسى كل الدنيا .. جانت هالغرفه محتويتني بكل تعبي وهمي وسعادتي كلشي شاركته وياهه ...

شفتهه لبست دشداشتهه ووكفت يم المرايه تفتح شعرهه واني فتحت البرده شويه وضليت اباوع من الشباك وبيدي حسين يضرب على الجامه ..
شفت الشيخ ومصطفى اجوي وشايلين الغراض وعلي شايل صناديك الفواكه
وراهم هو وصديقه .. حسيت هنا عائلتي من شفته هنا امنت .. رأساً رحت خليت حسين بحضن دعاء ونزلت ركض
فتحتله الباب ..

من شافني هيج الهث ضحك ومصطفى دخل الغراض وراح للمطبخ ..
وعلي هم حط الصناديك بالطرمه وطلع
بقينا واكفين اني وياه يم الباب ..كلتله..

- اشتاقيتلك حبيبي
- وانا اشتكتلك ياعيني ..ايييه احكيلي كيفو اللقاء
- يعني زين .. عماتي هنا وخالاتي بقن كاعدات جوه بالهول
- هاا صار حكي بينكم
- كلهم يسألوني ليش رحتي وين جنتي
ومجاوبتهم شي بس كلتلهم بعدين
-اييه وناويه تحكيلهم كلشي
-مادري هو ردت اسألك شنو احجيلهم

صفن شويه وباوع لداخل البيت ورجع باوعلي وكال ...
- انا تذكرت الحين سالفه
-شنو
- انته ليه حدرتي على حديثه مو غيرها؟
كبل اسألك ماتجاوبي واحترمت رغبتك لكن الحين تذكرتها وابغي الجواب

بلعت ريكي وضليت صافنه مادري شحجي !؟ ماحب اجذب عليه بس شلون احجيهه !!

-هاا وش مصفنك
- عوفهه بعدين
- ليه ؟ اختصريها بكلمتين انا ماودي افتح دفاتر كديمه لكن لزوم افهم وش عرفك فيها ؟
- احم هو
-احكي تين وش مخوفك هيك ؟!
-ما خايفه لا
-عجل احكي وشو
- قبل بالكليه جان عدنا زميل يحجي بيهه هواي هو من الانبار واهله انتقلو لبغداد
وجان دائماً من نلتم يحجي على منطقته ويعرفنا على عاداتهم وهالاشياء فضلت طابعه بالي
- هااا ووين صفى حالو
- مادري بعد وين راح
- ايييه كثر الله خيرو دلاكِ دربي وجابك لكلبي

- هههه يولي حبك مو عيبه وينضم
حبك شي افاخر فيه
-يابعد عمري
- دحكي هاذي انا اول مره احكي فيه كدام بشر غيرك لانهم طيبين وخوانك انا حكيتو
- ايي احسن بس تدري شغله
- وش هي ياعيني

رفعت رجلي شويه وشاورته ..
- اليوم اني احبك اكثر من الي قبله
- ههه يابختي والله

نزل علي واني وخرت من يمه واجه يمنه وكال ..
- خيه اني اخذ الشيخ ونام بيت صاحبي اتفقت وياه من العصر
- هاا ماشي
- يلا اني طالع كدامك شيخ

طلع واني لزمت ايده وكلتله ..
- حبيبي الصبح خليني اشوفك
- كيف احدر هين يولي والبيت كلو حريم
- اوكف بره كدام البيت واني اشوفك من الشباك ههه
-هااا سوالف المراهقين هاذي يولي كبرنا عليها
- لا لا بعدنا شباب
-يلا تآمرين

طلع وقفلت الباب وراه وصعدت لغرفه دعاء شفتهه فارشه للجهال ومنومتهم
وفارشتلي بصفهه .. بدلت وحضنتهه ونمت براحه ومبتسمه وتمنيت هالليله اطول واضل اختي بحضني ..

حضرنا العرس وشفت اختي ببدلتها البيضه وشاركتها فرحتها وودعتها
ووصيت عمتي عليهه و ودعت اخوتي
ورجعنا لبيتنه ..

رجع روتين ايامنا بين تربيه الجهال ومداراه الشيخ وترتيب البيت ..

ام جراح ولدت توم ولد سماهم الشيخ
حُر و آسر ..
من سألناه عن سبب هالاسامي كال ..

- حُر هو نوع من الجوارح و مكمل لاسماء اخوتو
وآسر هو القوي الي يغلب ويأسر خصمو
وانا ودي ولدي كلمن يحمل صفات اسمو
ولد خالد جوارح ما ينكدر عليهم

الولد اثنينهم بيض وناعمين وبدت ملامحهم تبين مختلفه من عبرت الاربعين مالهم ..

وبوكتها اخذنا كُلنا ويه بيت ابو حسن
زياره لكربلاء وزور الجهال كلهم وبالاسم يودعهم عند الامام ...

وهيج صار عند الشيخ ٧ ولد وبنيه وحده
بس بنتي غاليه صارت نصيبه من رباه البنات ..

دخلنا سنه ٩٩ و الشيخ صار يبني غرف للولد بالطابق الثاني بيتهم يحضرهن الهم من يكبرون ..

وغير ترتيب الديوان وفرشه .. وصاهم بالمعمل يسون اله تخم على طول الديوان وطبلات خشب وفر الديوان كله بيهن

وبنهايه السنه اشترى سياره ثانيه وبقى هاي المرسيدس البيضه ماقبل يبيعهه
يكول هاي انتيكى ابقى محتفظ بيها كل العمر ...

عباس وصكر صارو همه ولدي
اكلهم نومهم كله يمي ..

هو صار يجيبهم وياه من يجي عليه العصر ويبقيهم يمي لحد ماتعودو وصارو مايفاركوني ودائماً يكولي هذولي ولدج
انهي وامري بكيفج عليهم ..

واني مكيفه بيهم العبهم ويه حسين واعلمهم يرسمون وماحسيتهم يفرقون عن حسين مدللين ومحبوبين مثله ..
ملابس من اشتري لجهالي اشتري الهم هم واذا اخذت فد لعبه لغاليه لازم اذكر جراح ورماح هم وبعدنا مستمرين على عزايم الجمعه والسبت ..

بشهر الرابع من سنه ٩٩ الشيخ وامه
راحو لبيت عم الشيخ الجبير جان راجع من العمره وراحو يسلمون عليه واخذو وياهم غاليه وجراح ورماح وعباس وصكر يمي اعمارهم ٣ سنين وهمه حركين صايرين مايكعدون ولا رجليهم تتعب من الفره .. واني عيني بس عليهم
و همه وحسين شكو شي كدامهم يجروه واني الملم وراهم ...

والساعه ١٢الظهر اندكت الباب
جريت شالي لبسته وطلعت فتحت الباب
واشوف رجال شايب سمين شويه وبيده
عصا رفيعه ولبسه مو نظيف و وراه كومه طليان كالي ..
- السلام عليكم يا يابه
- عليكم السلام عمي تفضل ؟
- يابه انا رايد شربه مي لي وللشياه
حدرت على ديوان الشيخ وما استضافوني
- ماضيفوك !! معقول ليش !؟
- الله العالم يا يابه باب الديوان مكفل وناحيه البيت اهلو ما خلوني ادخل لكاعهم انا والشياه وانا ردت شربه مي وانا رجال شيبه ومتعني الدرب هذا من فجر الله وتعبان والناس هينه مايرحمو
- لااا ياعمي اهل هالبيت طيبين وكريمين
بس يجوز لان صاحب البيت ماموجود
تصرفو هيج وان همه ما ضيفوك اني احطك على راسي تفضل البيت بيتك

دخل للطرمه وكالي ..
- جزاكِ الله خير يا يابه انا هين اكعد
يكثر خيرك
- لااا ياعيبه العيبه هذا البيت شكبره وتكعد هنا بالطرمه بهالظهريه !
لا والله ماتصير تفضل جوه عمي الغدا حاضر
- لاا يابنيتي باين ان زلمه بيتك ماهو هين وجايز مايرضى ادخلو خليني هين انا ارتاح وامشي
- عمي زلمه بيتي لو رجل مضياف
وبيته مفتح ابوابه للبعيد والقريب
وان درى مبقيتك بره مايرضاهه والله
تفضل وارتاح اكل وغسل على راحتك

ابتسملي واني اشرتله يدخل ورحت كدامه
مشيت وفتحتله باب الاستقبال وخليته يكعد ورحت للمطبخ اخذت سراحيه المي والكلاص واجيت قدمتله وكلتله ..

- كل الهلا عمي زارتنا البركه
- البركه بيكم يابه
- عمي اترس سطل مي حتى يشربن الحلال
- لو ما يتعبك
- لاا من عيني ادلل ، من رخصتك شويه واجي اخذ راحتك

رحت للحمام واخذت السطل وطلعت بره ترسته وخليته يم الباب واخذت طشت هم ترسته مي وجريته يم الباب ورحت صحته حتى يطلعهن ..
وضليت واكفه اني والجهال بالباب نباوع للطليان شلون اجني على المي وشلون هو يجمعهن ..

مديت راسي وباوعت لجهه الديوان
وماشفت احد من الولد هناك ..
واستغربت هالمره شعجب الديوان مقفول ؟
الشيخ كل عمره عايف ابوابه مفتحه

ضحك وهو يباوعلي واني احس حتى الضحكه بهتت بوجهي مادري بس محلو هالشعور من احجيله على هيج اشياء
نص منهه مخفي ..

- ايييه الحين انا وين ابات هالليله ؟ اخيك اخذني بالحكي والسياسه وضيعنا بالحكي
- حبيبي غير هنا تبات يمي
- وين يولي مالبيت مليان حريم
- شفت عمامي ؟
- ايييه دحكتهم وسلمت عليهم
-عرفوك منو ؟
- اييه حكالهم مصطفى وهمه تصفنو وبلشو اسئله
- ياا شسألوك؟
- من وين وشجابك وشعرفك ببنتنا وهالحكي و واحد منهم كان ودو يدخل يحكي معك ماخليتو وحكيتلو ..
لو عندك حكي انا زوجها احكيه بوجهي هين مالك دخل فيها
عاد حكالي .. عايله معو انتي ومع اهلو و يريد ياخذ حكو ..
حكيتلو .. لو انك طلاب حك ديواني مفتحلك ابوابو احدر علينا واخذ حكك من هالعين لكن هين حرمتي ما يحدر صوبها بشر
عاد خذوه بعيد عنا لحين مامشو

دمعت عيني من موقفه القوي الي حسيت رجعلي بي هيبتي بين اهلي ..

ابتسمت ودمعت عيني وتقربت بوست خده وهو ضحك وكالي ..
- يولي لا يحدر اخيك
- حبيبي شكراً
- اسكتي بالله عليكي اسكتي عجل انا ان مادافعت لحرمتي لمن ادافع ؟ هذا واجبي يولو
- خااالد احبك والله
- هههه وانا احب اسمي منك واحبك ضعفين حبك لي

جان واكف قريب مني ويعدل بشالي من يم خدي ويبتسملي واني اكوله ..
- عادي اعرف عماتي عليك ؟
-اييه عادي وش فيها
- اروح اصيحلهم لعد
- لاا مايلزم تروحي بس دحكي وراكي

انداريت بسرعه وشفتهن واكفات ووياهن امي ويباوعن علينه .. رجعت باوعتله وهو كالي ..
- تشبهي عماتك يولو

ضحكت وهو مشى كدامي باتجاهن
وكفنا كدامهن واني كلتلهم ..
- اعرفكم برجلي الشيخ ابو جراح

عمتي الصغيره رأساً كالت ..
- حياه الله الشيخ الف هلا ومرحبا عيوني
- الله يحي اصلك ...زادنا شرف بملاگاتكم

تقربت يمه وكلتله ..
- شيخ هاذي امي

باوعلهه وهي رافعه الحاجب وتباوعله بطرف عينهه .. رجع باوعل وفر سبحته وكال ...
- دمك ونفسك الطيبه وجمالك على عماتك مالك شبه من امك

ضحكت وهو يباوع لعماتي وحجالهم ..
- ول يابه واحد من خويكم نطلبو زياره لديرتنا احدرو معو بحينها حياكم الله مضايفنا بوابها مشرعه للكريب والغريب
وحياكم الله بكل وكت

عمتي الجبيره سألته ..
- ديرتكم الانبار؟
- اييه الانبار قضاء حديثه اسألو عن مضيف الشيخ ابو جراح وياخذوكم لحدر الباب
- ان شاء الله نضيف عدكم فد يوم
- كل الهلا يابه كل الهلا

باوعلي وكالي ..
- ما تعشيتي للحين ؟
-اي بعدني
- زين عجل وش رايك نطلع نتعشى على دجله صار زمان مامشينالها
- اي ياعيني صار هواي
- عجل احكي لخويك يمشو معنا وودعو خيتكم بكعده طيبه
- يابعد عمري
- ادري انك هين ماتاخذي راحتك معها
يلا تعجلي انا سابكك للسياره واحكي لمصطفى لو ودو يمشي معنا هو وحرمتو حياهم
- ماشي ياعيني هسه اكوله
- انا اخذ علي وسابكك اخذي بساط معك لاتنسي
- اي عيوني صار
- يلا تعجلي

راح واني باوعت لعماتي كلهن مصفنات علينه كلت لعمتي الجبيره ..
- عمه راح اخذ دعاء ونطلع من رخصتج يعني ..اخيتي واريد اشبع منهه هالليله
- اذا مصطفى يروح اخذيهه
- اي اكيد يروح .. يلا من رخصتكم

عفتهن ورحت صعدت لغرفه مصطفى
ودكيت الباب طلعتلي مرته .. وهو من شافني راساً اجاني .. كلتله ..
- مصطفى الشيخ عازمنا على العشه بره
وكالي نطلع كلنه هو هسه اخذ علي وينتظرونا بالسياره
- هاا خير ان شاء الله شعجب ؟
- علمود نكعد براحتنا يلا بدلو بسرعه دينتظرونا
- يلا ماشي هسه مانتاخر

رحت لدعاء وخبصتهه حتى تبدل وطلعت هم خبصت مصطفى ومرته
واخذنا فرشه وطلعنا ..

مصطفى ومرته يمي وره وعلي ليكدام ومكعد بحضنه غاليه

رحنا على شواطي دجله الجو بي بروده حلوه بنهايه الثاني وهناك الولد جابو منقله جبيره ومكسرين بيهه الخشب وشعلو النار وصارت بالنص تدفينا بين ماجابولنا العشه .. سمج مشوي وصرنا ناكل ونسولف ..
علي متكفل بغاليه يفلس ويوكلهه واني اوكل بحسين واباوع لمتهم وضحكتهم
وارجع اباوع للشيخ الي عينه ماشالهه عني .. كل شويه ابتسمله بامتنان
بكلبي شُكر اله جبير لو كضيت عمري اداري واهتم بي مقابل هالفرحه مااوفي
اضل ممنونه اله كل حياتي ..

وره العشه والجاي راح مصطفى ومرته
يتمشون وضلينه اني ودعاء نسولف شويه وخليت حسين بحضن الشيخ واخذتهه ورحنا تمشينه شويه بعيد عنهم بس بعدنا كدام عينهم ..

صرت انصحهه شلون تتعامل ويه رجلهه وعيالهه وحجيتلهه كم شغله على ليلتهه باجر وشلون تهدأ نفسهه وتتهيء
وهي جانت كلش خجوله وكل شويه تكولي كافي اسكتي واني اضحك عليهه
كل شويه احضنهه وهي تكولي اني اكبر منج ..

هي اسمن مني وملامحهه اخشن مني
واني رغم بالثلاثينات عمري بس بعدني رشيقه و ناعمه ..

رجع مصطفى ومرته وصاحولنا من بعيد
رحنه كعدنا وياهم وهمه جايبين جيس حب شمسي خليناه بالنص وكعدنا نكرز
جان دعاء تسأل ...

- اكولج انتو شلون تعرفتو شلون صار زواجكم ماحجيتي

ضحكت وباوعتله وهو هم ضحك كلتله
- شيخ شتكول منين ابدأ
- هههههههه هنه كثر يابه براحتك

ضليت اضحك واباوع لمصطفى وهو هم
يبتسملي ورجعت دعاء تكولي احجي
عاد كلتلهه ..
- اني جنت ضيفه بيتهم وتعرفنا هناك
وبعدين صرنا نشتغل بمعمل سوه وبعدين خطبني وصار الزواج
-بس هيج. ! تفاصيل خيتي تفاصيل
-يعني ياتفاصيل
-شوداج لبيتهم وليش خطبج ليش قبلتي
-هههههههه عوفيهن هذني اسرار
- مو كلتيلي تحجين شو كلشي ماكو
-شلون ورطه هاي هسه شي صار وراح شكو تلحين بي
-ازعل عليج والله يضل كاتلني الفضول
- ول يابه انا احكيها الك

باوعت للشيخ وهو فر سبحته وكال ..
- بيني وبين والدك الله يرحمو عهد وهالعهد كان يلزمني بحمايه اخيتك وحفظها وبهذيك السنين الفاتت انا تكفلت فيها على اساسو للحين زين !
- زين من شوكت تعرفه لابويه
-من زمان بينه معرفه
- زين وبعد
- اييه اخذتها بيتنا وصرنا اصحاب سرنا وشغلنا واحد وهي كل يومها حدر امي
-اي
- اييه بعدين حبيتها
-هههههه يااا
- اي بالله حبيتها وصيت امي طلبتها للزواج رفضت ماحكينا شي وعاودت بعد فتره هم طلبتها ورفضت وبالثالثه حكتلي
اسأل خويي وسألتو لمصطفى بحينها
ساعه الي وافق وافقت وهيك تزوجنا
- يعني مصطفى تدري بكل شي ومحاجيلنا !؟؟

مصطفى كام يحك بكصته ويكول ..
-اي يعني شويه هيج مرات قبل هاي قبل

ضل يتعاتب هو وعلي واني اباوع للشيخ وابتسم ودعاء تكرص بايدي وتشاورني
- تحبيه هاا بينكم قصه حب وماحاجيه
- ههههه ولج عيب

ضحكت وعلت صوتهه وحجت ..
- شيخ زين اختي خوش مره لو متعبتك
-لااااه مالها مثيل اخيتك معيشتني ملك
- هههههههههه الله يحفظكم

باوعتله ورجعت لزمت ايد دعاء وكلتلهه

- هو معيشني ملكه ماكو رجال مثله
- شمسويلج وهالكد تحبيه
-ههههه هوااااي هوااي ماينحجن بس مدللني هواي
- يعني شلون كوليلي حبابه
-هههه يعني مثلاً اخذني سفره لتونس
واخذني عمره وزيارات كل فتره
من غير تعامله الحلو واسلوبه
- صدددك !! صددك لو تشاقون وياي
- صدك شبيج
- بالعافيه عليج خيتي بس اريد اسأله سؤال للشيخ
- اسألي يابه
- يعني انته تداريهه هيج وتسفرهه وزين وياهه لانها زينه وياك لو لان انته تحب هالشي لو شنو فهمني الله عليك
- هههههههه دحكي العمره كانت مهرها
-مهر ؟
-اييه من ساعه الي خطبتها هي طلبت مهرها عمره وانا وعدتها وكت الي ارتب اموري اخذها واخذتها مع الاهل برمضان هذا
- هااا ماصار هواي
- لاا .. وسفره تونس هاذي كانت مطلبي
انا احب السفر ودايماً كل سنه اطلع للشام للاردن وشابع منهم حكيتلها اختاري وين نسافر وهي اختارت تونس واخذتها
- يعني كلهن علمودها
- عجل يابه رد الزين وش يكون ؟ لزوم يكون بالزين
- ههههه هسه لازم ارجع اسألج انتي شمسويه للشيخ وهيج مدللج هههههه
- ههههه شمسويه يعني مداريته وطايعته
اكو غيرهن

باوعت للشيخ وهو رافع حاجبه ويبتسم
ويفر بسبحته جان علي يكول ..

- لااا مبين اكثر من هذني لا تقشمرج هيج دعاء
- ههههههه عفيييه شبيكم وياي
- الله عليج احجيلي بس فهميني حتى استفاد بزواجي شبيج
- ولج خيه هي مو خطوات واعلمهه
هي مشاعر مشاااعر

كلهه ضحكت وجان هو يكول ..
- خيتي دحكي الحين هاذي جملتها فيها شغلتين هنه رباط كل الحكي لو عرفتيهم تعرفي وش صار بحالي حينها

ضحكت لان عرفتهن وهي صفنت وتباوعلي وتعيد بالجمله جان تضربني على رجلي حيل وتكول ..
- لكيتهه المشاعر يعني لان تحبك مو
- اييه هاذي وحده
- والثانيه شنو
- الثانيه الحين لو عرفتيها وش تطلبي اعطيكي

علي كال ..
- هسه مافهمنا ليش يسمون جنابك ابو جراح مو ابو غاليه

غاليه رأساً نطت وكالتله ...
- خالو جناح اكبر مايصين اني كبلو
-هاا؟؟
- خويي انا عندي حرمه كبلها وولدي الكبير اسمو جراح
- هاااا !!!
- وهاي عايشات سوه انتن !؟
- لاا اني عندي بيت وحدي وهي بيتها وحدها

ضل رافع حاجبه ويباوعلنه ودعاء نفس الشي بس مصطفى منتجي ويكرز حب ويباوعلهم .. جان يكول ..
- هسه شكو تصفنون ماسمعتو الرجال حاطهه بعينه وشكو بيهه عنده نسوان اثنين هذا شرع وحق

مياده شمرت الحب الي بيدهه ودارت وجهه عنه وهو كال ..
- يعني للي يريد بس الي مكتفي بمرته هاي بعد مو حق
- ايييه خويي حكيك عدل هذا شرع ما به عيبه ... انا حرمتي الاولى عندي منها
اربع ولد والخامس بالطريق ومتزوجها من كبل ماادحك اخيتكم باربع سنين لكن انا روحي ماتهوى غير دارها

علي اخذ نفس وكال ..
- المهم متصافين ومرتاحين بعيشتكم الله يهنيكم
- ويهنيك ياخوي

شاورتني دعاء .
- هاي كل شويه مكتشفين شغله خاف النوب يطلع جد ومندري
-هههه مو هيجي عاد تره ولده صغار بعدهم اصغر من غاليه وحسين
-هااا زين هاي شلون يجي يمج ويمهه
- يوم يمي ويوم يمهه
-وهي زينه وياج لو وكحه
-لا حبابه

لمينه غراضنا ورجعنا للبيت وغاليه نامت بنص الطريق وضل شايلهه علي
من نزلنا ..

كلهم دخلو وضلينه اني وياه بالطرمه واكفين كلتله ...
- تعبان حبيبي
- لااه زين اليوم كان حلو الكعده مع خوانك طيبه ومريحه
- اي همه حبابين .. خاالد تدري تفاجأت من حجيت كدام اخوتي على حبك