حطيت عليه تول ابيض وثبته وجان كلشي بترتيب بسيط .. كملنا ورحت حضرت العشه بسرعه وتعشينه اني وياهه لان غاليه عيني هيج وكت ويه جراح ماتلفي بالبيت ...

ومن خلصنه العشه كعدت تحفلي .. اني متعلمه اخلي الخيط برجلي واحف لنفسي بس هي اصرت هي تحفلي وكل شويه تكولي ..
- يولو حبيبه الشيخ لازم تضوي باجر
وتحرك كلووب نسوان الديره كلهااا

واني بس اتبسم بخجل وهي تحفلي وبعدين كعدت سوتلي ايدي ومن شافت اثر الشخوط تعجبت بيهن برغم اني ماردتهه تشوفهن بس هي اصرت واكلتني اكل بالحجي .. اكتفيت وياهه
ب..
- اثر لجرح قديم لا تهتمين اله

سكتت وغيرت الموضوع بس اني توقفت عند هالنقطه ماكدرت اعبرهه واني افكر اني لو شكد ما ضليت خافيته عن الشيخ لابد يجي يوم ويشوفه وهم نظرته مثل نظرتهه تصير ..

جانت ايدهه خفيفه وبسرعه كملتلي
ايدي ورجلي اني مسويتهه قبل ..
تشكرتهه ومن رادت تطلع كلتلهه ..
- لا تكشفين لاحد عن الي شفتيه
- تطمني كأني مادريت عنو
- اذا شفتي جراح دزيه الي او حسن
- ان شاء الله

راحت واني ضليت كاعده بالحديقه واخذتني الافكار لبعيد ..ضليت احاول انساهه واغسل كل شويه واستغفر ربي بس شي يجذبني الهه وشي بمقاومتي يسحبني عنها وضليت هيج لحد ما دخل جراح كلتله ..
- جراح عمه حاجي الشيخ وكوله يمرلي محتاجته
- ايه عمتي تامرين

طلع يركض وركع الباب وراه واني فزيت من صوته وضلت ايدي ترجف واني اضغط بيهه على راسي واحاجي نفسي ..
ماكو شي انسيه تكدرين ماكو شي

بس الصوت نفسه يتكرر براسي
صوت البجي والصياح بصوت مبحوح
وايدي وهي تتشكك اتلمسهه كل شويه وابجي .. مادري شسوي ماعرف شلون اهدأ.. مادري شوكت وشلون اخلص من هالصوت ...

انفتحت الباب بسرعه ودخل الشيخ بس رفعت راسي باوعتله وهو بشبختين وصل يمي وكعد بمستوايه ولزم وجهي
وضل يباوعلي بقلق .. كلتله ...

- هي ذكرتني اني جنت ناسيه

ماحجه شي بس صوت نفسه السريع ينسمع .. مسح دموعي وكالي ...
- وش رايك تنامي على يدي وترتاحي وتهدأي ؟
-لاااا
-لييه ياعيني ..تخافي مني !
-لاا
-عجل شو
- ماكدر استحي
- ول انتي روحي ومن بكرا تصيري حرمتي هالمستحى مايلزم ياتينه .. امشي معي ولا تجادلي يلا انا ماودي حرمتي تمر ليلتها تعبانه

سحب ايدي وكومني واخذني للغرفه
جنت افقد السمع تدريجياً .. لحد ماتمددت كمت مااسمعه شيحجي بس اشوف شفافه تتحرك وماافهم والهوسه الي براسي
تزيد وماصرت اميز صوت عن صوت منها كلها احسها متداخله والنتيجه مثل وشوشه اصوات براسي وجفوني ثكلت

ضل هو مخلي راسي على ايده ويمسد على شعري لحد مانمت ...

كعدت لكيت يمي جراح وغاليه نايمين
والساعه شفتها بالاربعه الصبح ..
ضليت متمدده واتذكر الصار ..
بالاول مافرزنت شي عن شي بس بعدين تذكرتهن بالترتيب ..

كمت غسلت وتوضيت وصليت الفجر
وضليت كاعده اسبح لحد ما طلعت الشمس ..

رجعت لفراشي وضليت متلفلفه ونمتلي شويه واندكت الباب قوي ..
طلعت جان اشوف الشيخه جايه ..
صبحت عليهه وبعدين كلتلي ...
- كفي اكلك واكل الولاد من وكت واحدري عاوني صفيه ضاله لوحدها
ام جراح مشيت لاهلها
- اي صار

راحت الشيخه وطبيت حضرت الريوك
وكعدت الجهال اكلنا وجراح يباوعلي وبعيونه حجي .. وبعدين كالي ..
- عمتي ليه ابوي بيتزوجك ؟
- ااا هووو يعني
- امي كانت تحكي انه عشكان وش يعني عشكان ؟
- ههه يعني شي حلو
- كيف حلو ؟
- يعني هو عنده شخص خاص يرتاح وياه ويداريه
- والحين ابوي يتزوج لانه عشكان ؟
- انته ماتريده يتزوج؟
- لا انا ودي يتزوج لانه حكالي البارحه
انا وغاليه نصير اخوان بنفس الاب وتضل حدري كل العمر وتضل لي انا
ماتاخذيها مني بعد وتصير تسجل وياي بالمدرسه لانو لو ماصار ابوها مايسجلوها مو صح عمتي ؟
- اي ياعيني صح اذا ماصار ابوها متكدر تدرس
- لااا عجل انا موافك يتزوج حتى غاليه تدرس معي ونصير نروح ونعاود سوا
- ان شاء الله تضلون كل العمر سوه

كمل اكله وغاليه صارت تكوله ..
- ماما تصين عنوسه
- اييه عمتي بعدها صغيره تصير عروسه
- انا هم اصين عنوسه جنااااح اصين عنوسه
- من تكبري وتحكي عدل تصيني عنوسه

ضل يعيب عليهه وهي تعض بجتفه ويدفع بيهه جلبت الا اني جريتهه منه
ورزلتهه وهي راحت ختلت بظهره وتضحك بخباثه وهو فطير بسرعه نسالهه العضه وكعد يوكلهه ..

وقبل ما نطلع انطيته علاكه الملابس مال الشيخ وكلتله ..
- انطيهه للشيخ وكوله سلام من عمتي

اخذهه وركض للديوان واني اخذت غاليه وتمشيت للبيت ..
وصرت انظف وياهه وبعدين بدينا نحضر الغدا للمعازيم ورحنا طبخناه بالمطبخ الي يم الديوان لان الشيخه كالت الولد يتكفلون بالصب بس نطبخه الهم ..

وبسرعه بسرعه نشتغل وام حسن ويانه
ماعافتنه ابد .. وللساعه ١١ ونص
كلتلي روحي لحكي حضري نفسج

وطلعت ركض متلفلفه بالعبايه ورحت من وره بيت الفلاح لبيتي حتى ماامر منا واشوف احد من الكرايب الملتمه ..

طبيت سبحت وطلعت بديت امشط بشعري واعطره من هالزيت .. اني مااخلي الا قطرات على المشط وامشطه بي ...

وسمعت صوت حسن يصيح من باب الكليدور ..
-عمتتتي افتحيلي بالعجججل

ركضت فتحتله الباب وشفته شايل ماعون بي دليميه وعليه لالنكي انطاني اياه وكال
- امي ارستلو غدا لك

تشكرته وراح ركض طلع واني كبل اخذت خاشوكه وكعدت اكل .. واتذكر
كل مايسون دليميه واصير اكلهه بالخاشوكه الشيخه ترزلني وتكولي هاي اكله اصابع ماترهم الا هيك .. والشيخ يكللهه .. خليهه تاكل مثل مامتعوده كلو بيوصل للمعده ...

ضحكت واني اتذكرهم وكملت اكلي
ماخلصت نص الماعون وخليته على الطباخ وغطيته ..

رحت غسلت وفرشت اسناني وطبيت لغرفتي وصرت ابدل وبعدين كعدت اتمكيج ..
باودر خفيف خليت منه على الركبه والصدر وظلال خليت بس كريمي من بدايه العين والباقي كحل ممدود فوك الجفن وبداخل العين ومشيت شويه وردي لماعي على خط الرمش الجوه وحمره
وردي بدون لمعه واخذت شويه منهه ورت الخدود وضليت واكفه الح بالمسكارا ... وبعدين فتحت شعري جنت لافته ونزل عدل وسرح .. اخذت كذلتي الطولانه وكصيتهه شويه ورتبتهه وجبت الماشات وشكلتهن بخصلتين اخذتهن لولوتهن وخليتهن بالنص من وره خليت طباكه وبعدين ثبتنن فوكهن الماشات
وهيج خلصت خلال اقل الساعه ..

ضليت واكفه اباوع بالمرايه لشكلي وافكر راح يشوف فرق عليه بالالوان لو ماتغير شي ؟

جانت الحفره مال الفستان باديه من طارف الجتف ونازله عدله على الصدر بحيث مبينه منه بس شي كلش قليل يبين
مثل خط رفيع مرتفع بس هيج .. واني مالبست اي كلاده ولا تراجي .. اللؤلؤ ما ردت انسأل عنه هسه ...

اندكت باب الكليدور وسمعت صوت ام حسن رحت فتحتلهه وهي هلهلت وكالتلي ..
- يااااصلاااه النبي ياخيه كم عمرك بالله عليكي
- ٣٠ والله وراح اطب ٣١ بعد كم شهر
- ياااااماشاء الله كأنك بنت العشرين باولو
- هههه لا تغرج النعومه تره عجزت
- بعدك باول العمر ياااه . . عجل انا وش احكي على هالجسم كأني بنت الاربعين
- هههههه لاااا مو لهدرجه انتي مبينه بيج الثلاثينات
- اييه لكنك والله بتسطري .. هاللبس ذاك وينو يصيح بغداديه صاحبتو
- هههه لييييش
- لانو احنا مانلبسو ونجيبو هيك فيت قالبو ونعومتو بتلاكي الكرش نط بالنص والصدر وغف لفوك منو والشعر بنعملو كد الجبل لو كان هيك طولو يا ماشاء الله
- هههههههه كلمن على طبعه يضل وهي بعد تتبع الجسم همزين فادتني هالعظمات اليوم
- ههههههههههه والله بخفيه دمك لتلعبي على كليبو لعب

درت وجهي عنها وهي ضلت ترتب بشعري وتصلي على النبي وكالتلي ..
- وكت يدخلو الحريم انتي صلي على النبي بداخلك لتبعد النفس
- ما يصير شي ان شاء الله
- ان شاء الله محفوظين من كل عين

راحت لغرفتي بدلت وصاحتني مكيجتلهه وبعدني دارتب شعرهه وسمعت الباب تندك وطبن النسوان الكبار .. عماتهم ونسوان عمامهم .. واجتي وياهن غاليه جايبهه حسن ..
سلمت عليهن وترخصت ..
اخذت بنيتي بدلتلهه ومشطت شعرهه ورفعته الهه وخليتلهه طباكات المارونيه وهي ضلت مجلبه بيه ...

كاعده يمهن وهي بصفي تلعب بسوارهه لحد مااجه جراح وكال الشيخ يريدهه واخذهه وياه ..
وبدأ البيت ينملي بالنسوان كبار وصغار
والشيخه بيدهه المبخره تبخر وتفتر وتصلي على النبي ..

صفيه ماسمعت منها كلمه وحده منعزله وحدهه ويه بنات عماتهه واشوفهه تباوعلي من بعيد وهي تسولف وياهن

كلشي جان شعوره حلو الا ساعه ماسمعت الشيوخ راح يجون هنا ردت ابجي .. حسيت روحي وحيده لاني من صدك تمنيت يمي اختي صديقاتي وحتى مصطفى مااجه وصار وياي ..

ضليت متصفنه مااعرف شسوي لحد مااجتي ام حسن لبستني العبايه واخذتني وكفتني وره باب الكليدور لان هو جام وجان بس شويه مفتوح واسمع صوت
السيد وهو يردد السؤال عليه بالموافقه
والشيخ يحمحم واني ساكته واضحك وام حسن تأشرلي خمسه خمسه .. وتالي كلتله موافقه وكبل على صوتهن بالهلاهل
ورجعت كعدت وهي ضاله حاضنتني وتهلهل وتهوس هي وباقي البنات
وراحت تركض توزعلهن العصير وعماتهم يطشن الجكليت ويدبجن ويهوسن .. وصوت الرمي بره انعلكت حرب وهنه ويه كل رمي يعلن صوت الهلاهل ...

ولحد ماكعدن ياكلن الكيك هدأ شويه الجو وخفت دكات كلبي الي جانت تتسارع بهالهوسه بفرح ...
اي فرحانه راح اضل بامان وياه واعيش من جديد على ايده ...

اجتني وره شويه ام حسن مخبوصه وتكولي..
- يولي وينو عطرك وينووو دليني
- بالمجر الاول

راحت ركض جابته واجتي ترشلي منه وتضحك وتكولي ..
- يولي الشييخ راح يحدر الحين هين

ابتسمت وبدا التوتر .. ضلت ترتب بشعري مره تخليه صفح مره ترجعه
اخر شي كالت ..
- خليه يدحك الجسم يولو شنسوي بالشعر

ضحكت وهي رجعته لوره وضلت واكفه بصفي ولابسه شالهه وعباتهه ..
وكومت كل البنات جوه وبقينا بس اني وياهه والشيخه والنسوان الكبار ..

ودخل هو بهيبته الي متغير بيهه هالمره بس زياده ضحكته ...
لابس الي اشتريتهن اله .. النيلي المخصر عليه محليه اكثر .. والرصاصي المذهب مخليه يضوي .. واليشمغ المرفوع من جهه وحده بارز نور وجهه وضحكته

وكفتله ودنكت وهو ضل واكف كدامي واني اباوع لصدره شلون يرتفع وينخفض
وهو لزم بايده اليمين راسي وقربه اله وباسه من منبت شعري والهلاهل وياهه علت ..
باوعتله وابتسمت وهو بعينه نفس اللمعه بمثل كل موقف بي قريب مني يصير ..

كعدنا والشيخه واكفه تهوس هي وعماته كدامنا وهو نظره عليه ونظره عليهن
واني من توتري كضيتهه بس ارفع بكذلتي لحد ما هو قرب راسه مني وشاورني ..
- خليها يا يابه وشحلاتها نازله بمستحى

ضحكت وباوعت لعيونه وهو يبتسم و وجهه احمر ..
طلع من جيبه علبه وقرب ايده يمي وفتحها .. جان بيهه حلقات .. ضحكت وهو كالي بهمس وهو يعدل بيشمغه ..

- البسها وان ما طلبتيها
- حلوه شكرا ً
- هههههه مايلزم الشكر يولووو لاتجننيني عليكي الحين اسكتي

ضحكت واني دايره وجهي عنه وهو اخذ الحلقه والشيخه صارت تهلهل ومديتله ايدي لزمها بحنيه تلمسها من جوه وابتسم وبعدين لبسني الحلقه .. جانت ذهب صب ثكيله .. واخذت حلقته الفضه هم صب ولبستها اله وهو شاورني وكالي ..
- يولي هاذي صدك لو كالو اصابع عروس
- ههههه شبيهن
- كل البلا ياعيني كل البلاااا

رفعت كذلتي من عيني وابتسمله وهو مرتجي ويباوعلي وبعدين عدل كعدته وشاورني ..
- تينتي اسحبيه لشعرك لليسار
- ليش
- هالحين اسحبيه ودي ادحك شي
- شنوو

كلتهه واني اسحبه واباوعله وهو عينه على ركبتي ويبتسم وبعدين كالي ..

- شامه الركبه اول ماخذا عيني شامه الركبه
-عزاا شلون حيااال
- احكيلك بعد ولا نخليهه للعرس

خزرته وهو ضحك ورجع ظهره على التخم وكال لامه ..
- ما تشربونا شي يمه ريكي ناشف
- تدلل ياعين امك

جان يباوعلي وضحكته صفح وبعدين من شرب العصير كالي ..
- تكربي

تقربت بصفه شويه وهو حط ايده على جتفي اليسار واني جسمي كله اقشعر
وباوعتله وهو قرب الكلاص من حلكي وشربني ويشاورني ..
- ودي نتكاسم هالحياه مثل هيك اثنينا
نضوك طعمها من نفس موضع الفم

وخر الكلاص وضل يباوعله وشرب من مكان حمرتي وخلصه كله وخلاه على الطبله من جهته .. وباوعلي وكال ..
- طيب هههه
- هههههههه
- ارجعي انثري شعرك على جهتينك
انا شويه واعاود لك
- وين تروح
- بعاود ياعيني

كام طلع واني رجعت شعري ونثرته منا ومنا وهو رجع دخل وصاح ..

- تفضل ياخويه تفضل

باوعت لمكان وكفته وشفته سوه مجال ودخل اخويه مصطفى .. كبل شهكت
وخليت ايدي على حلكي ..

اخويه حبيبي اجاني ما خلف بكلمته
وكفت واريد امشيله رجليه ماتعيني
اباوعله شلون كبران وطولان وشواربه ثخنانه ومتكشخ بسترته السوده وبنطرون اسود وقميص ابيض وكلهن زايداته اناقه

اجه يمي وهو عينه تدمع وعيني من ساعه ما شافته تدمع لزمته من ايده وتلمست وجهه وهو يبتسم ويمسد على شعري واخذني حضني قوي واني ضليت مجلبه بملابسه وابجي ...

ما وخرت لحد مالشيخ اجه وخله ايده على ظهري .. باوعلي وكال ..
- ول تصخم وجهك بالسواد وانا ماعودت اخلص منو
-ههههههه هسه امسحه

انطاني هو منديله واخذه مني مصطفى مسح وجهي بي وهو مخليه بطرف اصبعي ويكولي ...

- كحيله من يومج ما تغيرتي
- حبيبي وين جنت ليش لهسه يلا شفتك
- جنت ويه الشيخ اتعرف على العائله
وحاير ببنتج ام لسان
- ههههههه هاي راحت يمك يعني
- ايي جابهه الشيخ الثاني يكولي شتسوي بيهه هاي مالتي
- هههههه جراااح بعد وهاي حجايته ماتخلص
- اكوله ولك اني خالهه يكولي واذا
اني ماخلي احد يشيلهه حتى لو خالهه
باوعلهه منا وحاجيهه وهي عيني تزيد فوك حجيه وتتخوصر وتكولي .. موو عيب انته ماتعرف العيب
- يبووو ياغاليه وسالفه العيب مجلبه بيهه
- بنتج تنحط بلبه الكلب صدك غاليه

ضحكت وميلت راسي عليه وهو حضني ويكولي ..
- كد ما شفت الناس هنا شلون كلها فرحانه من عرفو اني خالها وكلها ترحب وتصيح والنعم من هالاصل عرفت شكد زارعه طيب بين اهلهم وشلون بقيتي رفعت راس ابويه
- ربي يرحمه تمنيته موجود وياي اليوم
بس شوفتك عوضت

وخرت من حضنه واباوع للشيخ عاكد حواجبه وصاك سنونه وكالي ..
- اكعدي واحنا نعاود بالليل بعد مايمشو الرجال
- ماشي عيني

عدلت ستره مصطفى وباوعت للشيخ وكلتله ..
-ديربالك على اخويه شيخ
- ان شاء الله

كرصني من خدي وطلع ويه الشيخ واني كعدت مرتاااحه واضحك من كل كلبي
وعماتهم صارو يسألوني عنه واكللهم اخويه الجبير ...

وام حسن كعدت يمي وتكولي ...
- اخيك حليوه يولي بعدو صغير كم عمرو
- ٢٧ سنه
- هاا وش دارس
- هو محامي
- يا ماشاء الله ربي يحفظو لشبابو

النسوان شويه شويه بدن يطلعن ويخف البيت وبعدين للمغرب ما بقى غير ام حسن وياي والبقيه كلهه تحولت لبيت الشيخ ...

رحت بدلت ولبست واحد من الاثواب الي جابهن الي من الشام .. واختاريت الي لونه وردي حتى يبقى ويه المكياج والصبغ اظافر...

وتعشينه اني وام حسن وهي تحجيلي ..
- يولي كلهن دحكن من الباب كيف الشيخ يشربك ويدحكلك ول طكن بغيضهن طكككن ويحكن وش عندها وميت عليها
حرمتو الاولى احلى منها هاذي بعدها جاهل
-هههههههههههههه

- وانا رديتهم لك شكل رد انخرسو هيييك فيه
- شكلتليهن
- حكيتلهن .. ول لو انتن احسن منها خلو ازواجكم يدحكو لعينكن مثلو واسلبو عكلو مثل ماسلبتو هي بفطاريتها وكرم نفسها
-هههههه عشتتي والله
- وكل شوي احكيلهن .. دحكن كيف يشبر شعرها بعينو .. من الله طول وجمال ... ومن صرتي تحضني اخيك
حكيتلهن .. دحكن اهل بغداد هين بينا منورين ببساطتهم ول دحكن كيف اخيها يداري دمعاتها ويرتب جمالها .. وحكيتلهن .. خيرتكم تعرف تدلع هيك بحضن اخيها وهو يضحكلها !!
-هههههه
- والله اخرسسسن خلاااص ومشن كعدن ماتحملن يدحكن لمتكم
- هههههههه والله ماكو منج ياام حسن

ضليت اضحك واني اتذكر حجيها
وبعدين هي كالت لازم اروح اشوف بيتي
والجهال .. وراحت ضليت وحدي متمدده
وانتظر جيتهم ...

وطولو بالجيه لحد التسعه بالليل ..
دخل مصطفى شايلها لغاليه وهي بيدها دب ابيض .. وجراح يمشي ويه ابوه وعاكد حواجبه نفس عكده حواجب ابوه
والشيخ يبتسم بس مو بمثل لهفته اول مره

رحبت بيهم وكعدو بالهول ومصطفى راد يغسل وراح للحمام .. ضليت ويه الشيخ
رحت كعدت يمه وهو باوعلي ورافع حاجبه ..كلتله ...
- خير شيخ شو ضايج ؟

فرك وجهه وكالي ..
- مااا تنامي الليله سمعتتتي
- اي
- اييه ضلي انتظريني بعد ما ينام اخيك
مفهووم
- اي عين صار مفهوم

#شقراء_بغداد

بارت_٥٤


- مااا تنامي الليله سمعتتتي
- اي
- اييه ضلي انتظريني بعد ما ينام اخيك
مفهووم
- اي عيني صار مفهوم

كالهه وراح طلع .. ضليت كاعده يم مصطفى واشمشم بي وكلتله ...
- شلون اندليت البيت
- والله من الصبح خابرني الشيخ وكالي من اوصل حديثه اول ماادخلها اكو بيكم بيهه رجال اثنين ينتظروني على يمين الطريق وصدك والله اول ماشفت مدخل حديثه نزلت وضليت اباوع لحد ما شفت السياره والرجال اول ماشافني اباوعلهم اجه ركض عليه وكالي ..ضيف الشيخ البغدادي انته ؟ كلتله اي اني ..كالي تفضل حياك الله واخذني كبل لهنا
- الحمدلله وصلت بسلامه .. والشيخ دائماً مرتب بفعله
- تدرين اني من حجيج عليه حسيت راح يجي هاليوم
-ههههههههه
- بس والله شيخ عصبي شلون متحملته
-ليش شبي
- عينه تجدح وبالديوان كلمه الثانيه يزمخ بالعالم وهمه منصين الراس وكله على امرك شيخ
-لاااا هو مو لهالدرجه عصبي اصلا كلش متحكم باعصابه وصبور
- يجوز بس كدامكم ..بالديوان صوته يزلزل وحتى من يصيح لواحد يصيحه
بنبره عصبيه ومخنزر يمكن شفته ضحك مرتين بس .. اول ماشافني وسلمت عليه
ومن طلع ديصيحني اجيج
-ههههههههه صدددك والله
-اي والله ولحد هسه هو مخنزر ولج اني من صوت نفسه اكول هسه راح ينفجر بوجه واحد منا خاف بعدين هم هيج يصير وياج ؟
-لاااا والله الشيخ حباب وكلش كلبه طيب
احنه صح نتعارك مرات بس والله ميصيح هيج عليه ..يرزلني اي بس بهداوه مو صياح
- هاااااا ومرته هذيج هم
- اي هم زين وياهه
- شلون قبلت هي وماسوت مشكله !لو عاديه عدهم هالسالفه
- لااا بس هو حجى كلمته بعد محد يكدر يسوي شي والصراحه لحد هسه ممتواجهه وياهه
- والله هو الشيخ مايتعوض بس خايف عليج من مرته
-لااا هم حبابه هي لتخاف كلهم هنا حبابين ومن اهل الله
-الله يسعدج بينهم .. اكولج هذا جراح وين اخذ غاليه شو ماصدك نزلتهه كبل اخذهه وشرد
-ههههه هذا يخاف عليهه وميحب احد يتقربلهه تلكاه هسه يريد ياكلك بسنونه
-هههههههه والله عمي كلمن حاجزله وحده من بنياتنه
-ههههههههه

رحت سويتله ماعون فواكه وكعدنا ناكل وهو كالي...
- دعاء جايهه خطابه
-هاا منوو
- ابن عمتنه الوسطاني فؤاد
-هاااا
- حاجتني عمتي عنهه كم مره بس اني رفضت .. ماعدنه احد بالبيت وتدرين باامي مريضه
- ماتتزوج لعد
- بعد مالاكي بنت الحلال
- ان شاء الله تلكى الي تريح بالك
- ان شاء الله
- دعاوي اذا الهه نفس بفؤاد انطيهه لان عماتنه خوش عمات نفسهن طيبه وتضل تحبهه من ريحه اخوهه
- ماعندي اعتراض عليهم بس لان ماعدنا غيرهه بالبيت واني كلتلهه لعمتي
لو عدنه جنه جان انطيتكم
- اي لعد دورلك على مره .. اني لو اعرف وحده هنا جان خطبتهه الك
بس ماكو غير اخت الشيخ وهي تكره اهل بغداد
- ليييش عيني شبينه وتكرهنا
- هيج نفسيتهه بعد . . هسه انته خلي سالفه الزواج بالك هم كبرت بعد شتنتظر
- اي الله كريم .. كومي افرشيلي خلي انام
- امشي بغرفتي نام
-لا يابه
- لااا والله هسه قابل شنو دكوم نام هناك اني اضل انتظر الخاتون شوكت تذكرني وتجي تنام يمي وهم اريد انظف البيت
- هههه ديلا لعد اني مطفي بصراحه
وراح انام بعد ماعليه بيج باجر اصحصح ونشبع حجي
- هههه براحتك حبيبي نوم الهنا

راح للغرفه وهو يتثاوب .. كمت لميت المواعين غسلتهن واتذكرت الشيخ راح يرجع وبعده عصبي .. كعدت اعصرله برتقال وشويه حامض ولكيت بالثلاجه قطعتين كيك هم حضرتله وحده ورحت الملم البيت ...

وصارت ساعه وحده ونص اندكت باب الكليدور واني كاعده بالهول رأساً كمت فتحتله ... كلتله ..
- هلاا شيخ شو تأخرت
- ظنيتك كاعده معو
- لاا خطيه نام من العشره
-اييه زين

دخل واني كلتله ..
- شيخ غاليه وين ؟ شو مااجابهه جراح بعد
- نومهه عندو
- يااا لييش
- ما يبغى خالها ياخذها منو ونامو من زمان
- هههههه والله ياسوالفك ياجراح هسه قابل راح ياكلهه

خوفني شكله هيج ساكت ويباوعلي ورافع تك حاجب وصاك سنونه .. كلتله ..
- شيخ بيك شي ؟

زفر نفس قوي وراح للاستقبال ... رحت وراه وهو شال عكال واليشمغ وشمرهم على التخم بعصبيه واندار يباوعلي وفاتح عينه على وسعها .. بلعت ريكي وهو كالي ...
- شعلتتتي اهلييي
- شسويت !!
- يوووولي بتتلزكي فيه ومكشفه الجسم
وبوسط هالحريييم !!! عججججل انااا
واكف حدرررك شوو فهميييني !!
بتدلعي عليه كداااام عيني هييييك ظنك سهله !! هااا
- شيخ اخويه هذا قابل شسويت
- وااااان كاااان مااابفهم هيييين انااااا تينه ماااابفهم ... عند حلالي يتكطعن الخيوط الي بهالراااس مااااافهم اخيك ولا ابيك
ولااا حتى ابنك مااااايلمسك غييرررررري تفهمممممي غيرري انا
محرم بعيني الي يلمسك من اهلك
ولااااا تحكيلي بسبسه قلتلك مااافهمها عكلي مايتحملها وانتي تزوديها بالددددلع
والحكي المعسووول وجسمك المكشف وهو يتلمسوووو وانااااا ولااا حسبتيييلي حسااااب ماااافكرتي ان الي هييين واكف

رجلي ادحكلو اخاف ماااايرضى اخفها كدامووو وكدام اهلوووو اخذتيه محاااضن بالعجججل واناااا انسييييت بعرض الحاااايط انضربت ولاااهمك غيرووو

بالاول خفت من عصبيته بس من فهمتها غيره هدأت وتقربت يمه وهو دار وجه عني وصار يفرك عيونه ويستغفر

خليت ايدي على وجهه ودرته عليه وهو مضيك عيونه ويباوعلي .. كلتله ..
- اني ماانساك شيخ ومادري هيج راح تنفعل وتنقهر من هالتصرف جان ما سويته .. بس اني متعوده على هالنوع من القرب منه وتدري اني صار شكد مشايفته

- مااا تبرري تينه .. هالحكي انااا اعرفو
لكن ما يوكل خبز عندي .. الي احترك هييين ما يطفيه اعذار

عافني وراح كعد .. ادري بي طبعه صعب وما يقنع بسهوله .. ضليت واكفه اباوعله وافكر شسوي واراضيه !!؟؟

تالي كعدت يمه واباوعله وهو يباوعلي
وحواجبه طابكهن وكصته بيهه خطوط متجمعه ونفسه عااالي عبالك جان يركض
وهسه وكف ...

تدنيت يمه اكثر ومديت اصابعي لبين حواجبه وفتحتهن وهو جر نفس ودار وجهه عني .. رجعت خليت ايدي على وجهه ودرته عليه وهم لكيته راجع طابك حواجبه هيج .. رجعت فتحتهن وكصته هم تلمست هالخطوط وكلتله ...

- راح تطلعلك تجاعيد من كد ماتطبك بحواجبك هيج
- ول اي خرابيط هااااذي وخرري عني
- والله شبيك .. اصلاً تصير محلو من تخنزر

باوعلي وهو مخنزر ازيد كلتله ..
- مثل هيج يعني .. محلو

خليت ايدي اثنينهن على كصته وسحبتهه من الجهتين ورجعتهه راخيه وكلتله ..
- كااافي تخنزر عفيه هسه شلون اضل كل شويه افك بيهن
- اترررركيهن هي هااذي الي هامتك
- شيييخ
- دحككككي حتى هييين تفضليه وتعامليه اززززيد مني حتى بالحكي هووو غييير
- شنوو هسه شحاجيه اني
- مااااحكيتي شييي خلصنا

وكف واخذ شماغه والعكال بيده وراد يطلع رحت وراه لزمته من ايده وكلتله..

- عيوني شبيك وين رايح
- امشششي الاكي شي يطفي ناري
- واكو شي احسن مني !

كلتهه وصرت كدامه وهو ضل مركز بعيني وهم مخنزر . . جان شعره نازل على كصته رفعت ايدي خليتهه على جتفه والثانيه صرت ارفع بشعره واكوله ..

- مااريد نار الغيره تأذيك ..انته عندي الكل بالكل .. اخويه يوم وانته رجلي دوم

خليت ايدي على كلبه وكلتله ..
- هدأ كلبك هدأه .. مايغلى عليه شي
يبقى كلب خالد هو الاولى بكل شي عندي

بدأ نفسه يهدأ واني رفعت اصبعي لحاجبه عدلت شعراته وهو رخاهن ..
تلمست خده وكلتله ..
- اسفه لتعبك كل اليوم مني ... اسفه لكل شي ما رضاك وخرب فرحتك بهاليوم

سحبني من خصري وضل مخلي عينه بعيني ويكولي..
- ما عاد تحركي كلبي
- لااا ماتصير بعد والله
- وما تحكي حبيبي لغيري ولا والي زرعك بكلبي ان سمعتها مره ثانيه اكسرلك فكك
- ههههه صااار تدلل
- ما تفردي شعرك كدام عين غير عيني
ما يدحكو جنس بشر غيري
- هم تدلل
- بكل مكان وزمان ابغى عينك تدحك لي اناا بس اناا والباقي مالهم غير نظره بس
- هي اصلاً ما تشوف غيرك
- ممنوع تكعدين حدر امي لحتى تظفرلك
انا بالويل كنت ادحكها وساكت لو تكررت من بعد الحين مااسكت لا والله وبهجم اليوم عليكي انتي وياهه
- ههههههه حتتتى هاااي
- اييييه ايييه ماتحملها ماتتعحبي كل تفصيل فيكي انا مالكو ما تحمل غيري يتهنى فيه حتى لو بنظره ... انا ساعه كنت ادحكها تغلغل اصابيعها بطولو
اتمناهه فرصتي وانا الي ادحك كيف ملمسو .. حتى هالطوارف الي ساعه تحكي معي بسالفه موترتك وتلعبي فيها باصابعك اتمنى انا الي اتلمسها ساعتها واخذها حتى من يدك

قرب وجهه على وجهي واخذ نفس وغمض وصار يكولي بكل هداوه ..
-هيييك انا فيكي مجنون ماعندي عكل وفهم بعشكك

نزل يشتم من خدي لحد ركبتي .. وخرت منه بهدوء وهو باوعلي بعين ذابله بعدين مسح وجهه واني كلتله ...

- اا هسه اجي

عفته ورحت للمطبخ واحس كلبي يدك براسي وايدي ترجف .. اخذت كلاص مي شربته كله ونكعت ايدي مسحت ركبتي ..
مااحب هالشي مااحبه ..

هدأت نفسي شويه واخذت الصينيه ورحتله لكيته كاعد وصافن ..
كعدت يمه وخليت الصينيه على الطبله
وهو صار يباوعلي واني درت نظري عنه وصرت اقطعله بالكيكه شويه
وهو كالي ...

- زعجك تصرفي !
-لاا لااا
- تينه بالله دحكي علي وفهميني سالفه
-اي شنو
- احكيلي حدي لوين بلمسك ؟

درت وجهي عنه وضجت حيل ضجت من هالسؤال .. رجع كالي...
- فهميني حتى مااتعدى الي يزعجك
لزوم اعرفو تينتي
- مادري والله
- وشو ماتدري؟
- مادري يا شي يضوجني ارجوك خلي نعوف السالفه
- زين ..انتي فكري فيها واحكيلي وكت مايعجبك ..انا ما ودي غير ان يصيرلي علم بمكان حدي معك لاني هيك برغبتي المسك احضنك ومتخوف منها احكيلي انتي شي واحد اكدر اسويه بدون ما يزعجك
- انطيني شويه وكت
-ايييه خذي وكتك بس كان ودي افهمك ان لزوم تبيني لي الحد المسموحلي فيه

ابتسمت شويه وهو اخذ العصير يشربه
وصار ياكل كيك واني اباوع لظهره عريض ومبين قوته .. وطريقه كعدته
الي ساند عكس ايده على رجله ومقدم ظهره شويه .. وملامحه العفويه وهو ياكل .. وعطره القوي ممزوج بدفو نفسه
كلها جانت تترافد ويه تفكيري بأن..

هذا رجلي بعد مو صديقي ..اكدر التجىء له بدون خجل وقيود ...

تدنيت يمه كلش وخليت راسي على زنده
وضليت لازمه اصابعه وهو ضحك وباسني من شعري .. كلتله ..

- هاي احبهه

ضحك وسحب ايده وحاوطني بيهه وكالي
- وهااي انا احبهه لزوم تحبيهه بعد

ضحكت وهو قرب راسي لصدره وضل مخلي ايده على زندي واخذ نفس قوي وكالي ..
- ريت الوكت حدرك ياتينه ما يخلص مرتاحه هيك ؟
- اي مرتاحه
- يعني حضني ما يزعجك !
- لاا احب هيج هدوئك وياي بي
- عجل ما تفاركي حضني بكل لحظه انا معك هين

حضني باثنين ايديه وراد يقرب راسه يم ركبتي وبسرعه تراجع وضل يتلمس بشعري وفتح الكماشه ذبهه واخذه يفتحه بايده لحد مانثره كله على جسمي وضل يتلمسه من الطول للطول وهو يكول ..

- ياااسبحان الي سوااه وجمله بعيني
- ليش هيج تحبه ؟
- مادري لكن يجذب عيني ساعه الي يتمايل ولونو الاسود انا احبو اكثر من الاشكر .. هيك ادحك فيه القوه والنعومه بنفس الوكت وهالشي يعجب مفاهيمي
-ههه كُله كدامك
- تحضري بكرا نمشي نحلل حتى نتعجل بعقد المحكمه
- صاار بس اكو شغله

وخرت راسي من صدره وضليت اباوع بوجهه وضحكت وهو ضحك لضحكتي وكالي ..
- شو يانظر هالعين
- البس اسود عادي لان ماعندي غيره تعرف يعني
-هههههه ول عجل مااشتريتي البارحه
- نسيت جنت مستعجله
- عجل دامها هيك نأجلها لبعد بكرا وانزلي السوك بكرا اخذي الي يلزمك
- لاا عادي خلي نروح هي شغله ساعه
- ولاااا دكيكه بعد ينلبس ابد والله
- هههههه ماشي لعد مثل متريد
- على ذكر اللبس تشكري على هالهديه
عليم الله فرحت كلبي فيها
- عجبتك اهم شي !!!
- ايييه عجبتني عجل كيف ماتعجب ومن ذوق تينتي حبيتو للون
- اييي الحمدلله عجبتك
- تسلمي ياعيني
- تدلل اني حبيت كلشي يخصك بعد يكون على ايدي
- ياااحلاهااا والله
- خالد
- لبيكي خالد وعشيرتو
- يحفظك ربي .. تنام هنا اليوم ادري انك ماترجع للبيت وماارتاح لنومتك بالديوان
- وش تدري بعد
- بس هيج مادري غيرها
-هااا
- ادري بيك متريدني اعرف شي غيرها
لو ردت جان حجيتلي واني مادخلت بالاكثر
- زين تسوين خليكي بعيده من هالهرج
مايسوى تسمعيه
- ماشي .. هسه تبقى هنا
- اذاااا تنوميني مثل هذاك اليوم ايييه اضل هين غيرو امشي احسن
-ههههههه تدلل انته

رحت صعدت للبيتونه جبت فراش اني مصفطته على بوفيه هناك .. ونزلت
فرشتله بالاستقبال وحطيتله بطانيتين
وجبت الصوبه هم خليتها بنص الاستقبال
وهو نزع دشداشته واجه تمدد ..
طفيت الضوا واجيت كعدت يم راسه وهو شال المخده واجه خله راسه على رجلي وتلفلف بالبطانيه ...
ضليت العب بشعره لحد مانام ..
جريت المخده داخليهه جوه راسه واكوم وهو كعد جان يكولي ...
- ويين ماشيه !!!
- داروح انام
-لاا يابه هذا غش
- شبسرعه كعدت !
- انا هيك نومي خفيف .. حدري نامي هين
-لااااا شنو
- ايييه وش فيها عجل تغشيني تخليني انام وتمشي !
- هههه لعد شسوي
- انتي ضليتي معي لحين ما صحيت وهالمره بعد تضلي
- عيب خاف يكعد مصطفى
- نكعد على وكت الفجر كبلو يلاا لا تطوليهه

فتح البطانيه واشرلي اجي وهو يضحك
كمت وخليت المخده بمكاني وهو تدنى وفتح ايده .. اجيت تمددت وهو غطاني وكالي ...
- مرتاحه هيك. ؟
- اي

اخذ نفس قوي وراد يقربني لجسمه ما قبلت عافني براحتي .. وضل بس يباوع لعيوني وبعدين غمض واني ضليت صافنه شويه عليه ونمت .....

كعدني على صوت الاذان وهو بس يتلمس بطارف اصابعه خدي .. ابتسمت وكلتله ..
- صباح الخير
- صباحي انتي ياوجه الخير

ضحكت وهو كالي ...
- تدرين انا اليوم احبك اكثر من الي كبلو
- اممم ليش
- لانك شجاعه اليوم انا حسيت بشجاعتك كيف انها كبيره
- شلون مافهمت ؟
- هيك يجيلها يوم وتفهميها ... الحين خلينا نصلي سوا هالفجر

كمنا وهو اخذ الصوبه بره طفاها وترسها نفط ورجع شغلهه وعافهه بره يروح دخانهه ورجع يغسل ...
فرشت سجادات وهو طلع جابهه وخلاهه يمنه ووكف كدامي وكبر ...

خلصنا الصلاه وضلينا نسبح لطلوع الشمس وبعدها رحت احضر الريوك
وهو اجه يمي بالمطبخ ضل واكف ويكولي...
- حضريلي هويتك واخذي صور بدربك
اليوم حتى مانتعطل
- ماعدنا شي ليش مستعجلين
- يولو هو الي يدحك هالراحه يهلو يبعد!
-هههههه لااا حقك اذا هيج
-ايييه عجل ما تجيبي هالسيره بعد
واليوم ارسلك فلوس بيد امي حك جهازك
وانتي خذي هالاسبوع كلو حضري فيه
- ماشي عيني
- بكرا لزوم نمشي للجلسه تاخرتي عنها
- ايي صح اذا صار مجال نروح
-يصير عجل وش عندنا هو تحليل نخلصو بالعجل ونمشي لعندها لزوم نعزمها على العرس
-اييي هسه تفرح خطيه

اخذت الصينيه ورحت يم الصوبه كعدنه
نتريك ومن كمل اكل كالي...
- اخيك ايمتى يصحى !
- بالسبعه هيج
- زين عجل من يصحى احكيلو يحدر لعندي بالديوان
-ماشي
-واليوم لا تطبخي الغدا انا موصي ولدنا على ذبيحه لاجل عينو وما ودي تتعبو فيها هنه يطبخوها
- تسلم ياعيني
- الله يسلمك .. انا امشي الحين كبل مايروج الدرب بالناس

وكف ولبس شماغه وعكاله واني انطيته عباته اخذهه وابتسملي وطلع ...

اني رجعت تمددت بفراشه وضليت اتذكر هالليله .. شكد جان عصبي وشكد صار هادىء ورجع مرتاح ...
شنو من حنيه شايل وشنو من احترام وحذر بالتعامل !!!
كلهه جنت فرحانه بيهه لاني ملكت هيج رجل يملك هالصفات ويداريني بيها ...

كملت نومتي هنا وبعدين كعدني مصطفى
واول ما كالي ...
- لعد اني كل شويه افز واكول هسه تجي وانتي جنابج نايمه هنا ! ماكلتيلي لعد حتى اعوفلج الغرفه ليش نمتي هنا وحدج
- لاااا مووو
- شنووو
- هو اني ضليت انتظر غاليه ومااجتي فصليت ونمت هنا شويه على الدفو
- هااااا هاي متريكه ؟ ويامن !
- اااا ويه الشيخ تريك يمي وره الصلاه وسأل عليك
-هاا وشعنده شيخج من فجر الله يفتر
- هو متعود يكعد الفجر يتريك ويطلع ميبقى نايم
- ماشاء الله
- اليوم مسوي عزيمه الك وكال من يتريك خلي يجيني
- والله جني راح اشبع تشاريب اليوم
- هنا دليميه ماكو تشريب كله خبط شي فوك شي
-صددك يعني هوسه اني ماحب الاكل المخلوط
- لاا لاا راح يعجبك لتخاف
-اذا ماعجبني اجيج تسويلي غيره
-ادلل من عيوني
-هاي بنتج اخذهه هذاك الوليد موو
حبسهه يمه
-هههههه اييي منومهه يمه مقبل يجيبهه
- والله عمي من هسه شايخ عليكم شيسوي لو يكبر

ضحكت ورحت سويتله ريوك وخليته ياكل واجيت لميت لفراش ورحت عزلت الغرفه وجان تندك الباب ..
طلع مصطفى فتحهه وسلم على الشيخه
ودخلهه للهول ...
رحت سلمت عليهه وهي جانت شايله علاكه انطتهه لمصطفى وكلتله ...
- ياابني هالثياب ارسلهم الشيخ ويقلك
البسو واحدر لعندو الحين
- هاا مشكورين ..من رخصتكم

راح للغرفه واني ضليت وياهه جان تكولي..
- وانتي بعد تحضري حتى نمشي للسوك ونعاود كبل الظهر
- راح اتعبج هالايام شيخه
- لااااه فرحه ولدي تسوى التعب
يا زينك والله بليلتين خليتيني ادحك ولدي رجلينو ما تطخ الارض من فرحتو يمشي ووجهه مبسم
- ههههه الله يكدرني واسعده اكثر
- بالك عليه يايمه هذا وحيدي وشكى سنيني ما تتعبينو واحفظيه واحفظي بيتو
تراه يحبك واجد
- بعيني اخليه شيخه لتخافين
- ما تكصرين يابنيتي

طلع مصطفى وهو لابس الدشداشه ويعدل بالياخه ويكولي ..
- هااا شلوني
- حلوو ياعيني ناقصك بس اليشمغ
- اي هذا موجود بالعلاكه بس مادبرته ماحاطين عكال
-هاا تعال اني اسويه الك
- شمعرفج بي !
- اعرف اعرف تعال

اخذته وهو كعد ولفيته اله وثبته ليوره
وكام يباوع بالمرايه وكالي ..
- صايره انباريه معدله
- ههههه افتخر منهم صرت
- هذا يضل هيج ثابت مو
-اي ما عليه شي
- زين لعد راح اطلع
-واني هم راح اطلع ويه الشيخه للسوك
- يلا زين انتبهي على نفسج

راح طلع واني بدلت ورحت ويه الشيخه للسوك ..
اشتريت ملابس طلعه واخذت هدايا لعلي ودعاوي ورجعنه بسرعه ...

وضليت هاليوم بيت الشيخ وغاليه مجلبه بخالها وجراح كاعد وحده مطنكر ..
سمعت ام جراح ماتجي الا وره العرس
جان بنفسي اكعد احاجيهه ونتفاهم هسه راح تكبر المشاكل بينه اكثر ...

مصطفى العصر رجع للبيت وكال يجيني قبل يوم العرس .. انطيته هدايا اخواني ووصيته يبوسهم ويجيبهم بالعرس بس هو ما قبل يجيبهم كالي بس اني اضل ادري بي لحد ما يتم ..

ثاني يوم طلعنه الصبح اني والشيخ ورحنا
حتى نحلل ..
بالبدايه هو وما خلاني ادخل بقاني بالباب
وبعدين اجه اخذني كعدني واني مديتلهه ايدي وهو دار وجهي عليه لحد ماكملت
ردت اشيل الكطنه هو اخذهه ونزل رداني عليهه بدون ماالمح الدم ..
هالموقف زرع بيه الاصرار حتى اكمل طريق العلاج واعيش براحه وياه ..

من بعدها طلعنه للدكتوره واول ما دخلنه كامت رحبت بينه وهو كللهه ..
- يابه انا بالاول اتشكرك على باب الجنه الي كنت منتظرو ومفاتحو حصلتو من كلمتينك معها .. البارحه خطبنا ونتعذر لان ما عطيناكي خبر لكن العرس بالله مايصير لولا وجودك وسياره تجي لعند بابك تاخذك وترجعك واعذرينا تعجلنا فيها وما ضل لنا وكت لشي والله

باوعتلي الدكتوره وضحكت وكالتله ..
- الف الف مبروووك والله فرحتوني بهالخبر ومدام عروستنا مرتاحه وفرحانه هذا يكفي ويعوض عن كل شي

كعدنا وهو ترخص وكعد بره .. وهي كالتلي ...
- احكيلييي ياعيني شصااار وهالوجه ورد
- هههههههه حباااب دكتوره كلش حبااب
- ربي يسعدك فيه .. دحكتي اصراري عليكي كيف نتائجو حلوه
- اي والله تسلمي وعيتيني على شي عمري ما حلمت بي
- زين هسه ارتاحي بمكانك وخلي نحكي بهالسالفه اكثر

رحت على هذاك الكرسي وهي هالمره خلت كرسيها الصغير كدامي وكعدت
وصارت تسألني ...

- ايمتى العرس ان شاء الله
- هههه بس يخلص عقد المحكمه حوالي اسبوع من باجر يبدا
- مااشاء الله متعجل الشيخ
- ايي بس اني متخوفه من هوااي شغلات دكتوره
- اييه احكيلي عنها
- يعني اول شي واجهت صعوبه بي هو تعاملي وياه يعني صح اني احجي واضحك وياه وهم حضنته بس للحظه احس روحي تنفر ولحظه ثانيه احاول اسيطر وهيج باقيه بينهن

- اممم هالشي جداً طبيعي ياامي لان احنه بعدنا باول خطوه اكيد نواجه بيهه تشتت
بس هنا هو العلاج ياحلوه .. بالمواجهه مع الخوف
-يعني شسوي
- نحكي فيها بالاخر كمليلي بعد شنو الي ضجتي منه بقربه
- نفسه من يصير قريب على وجهي او ركبتي هو مره وحده تقرب بس شويه وما حبيتهه اببد حسيت لاازم اغسل هسه
مادري ليش بس توترت بساعتهه وهو حس عليه وهالشي يزعجني اكثر
مااحب احسسه ديضوجني بقربه
- اهاا وبعد كمليلي
- اففف متخوفه من يوم العرس دكتوره كلش يرهبني رغم اني تفاهمت وياه على ان ماتكون بينا علاقه وينطيني وكت وهو تقبل هالشي وكالي ادري راح تطلبيه ومايزعجني ووعدني انه مايتقربلي بس
اخاف يتغير بلحظه
- مااظن انه يكسر بكلمته معك .. هو رجل حدي الكلام وراح يبذل كل طاقته بالسيطره والبعد حتى يحفظ كلمته كدامك
صدكيني ماراح يعرض نفسه لموقف محرج معك من هالناحيه تطمني
- اتمنى يصير. هيج لان مااريد انفر منه
اريد اتقبله بهدوء
- دامك تريدي تصير
- ان شاء الله .. زين دكتوره اكو شغله
هو ميعرفها وهاي اكبر مخاوفي
- اييه احكيها
- جسمي بي اثار جروح مااحب يشوفها وادري انها ماتروح شسوي
- خليني ادحكها

ترددت وكلتلها ...
- شلوون لااا
- بنتي انا ادحكها لانها مهمه انا اعرف الاثر الي يتعالج من الي يضل دايم
يلااا يولوو

نزعت بلوزي وشوفتهه الاثر الي بزندي وهي تلمسته وباوعتهن من كل جهه وبعدين شوفتهه باقي جسمي كالتلي ...

- عندي طبيب مختص بهالاشياء انا اثق فيه ومراجعيني ارسلهم لعندو وكت الحاجه واخذك لعندو ان شاء الله
- يعني تروح هالاثاار دكتوره
- بأذن الله لكن تطول بالشهرين هيك
-اي ميخالف بس اهم شي يرجع جسمي طبيعي .. لو يضل هيج مستحيل اخليه يشوفه لو اضل ميه سنه وياه
-اييه فاهمتك يابنتي لكن ما تخافي
بعد العرس وهوستو تفرغي حتى نمشي لعندو وناخذ العلاج المناسب وانتو بعاد هالفتره ما يهم .. نرجع جسمك مثل اول واحلى بعد وخليه يتهنى فيه على الحاضر

ضحكت وكالتلي ..
- خلي نكتفي بهالحد اليوم لان ماريد اتعبك وراكي عرس وتحضيرات خلي بالك يضل مرتاح هيك ومتفائله وفرحانه
اليوم من دحكت ضحكتك حدرو زاد عندي الاصرار حتى اعالجك وارجعك باحسن حالاتك لتعيشو سوا وتنعمو بحبكم
- ان شاء الله دكتوره اني واثقه بيج والله
- مااخيب ثقتك فيي ياشابه

رجعنا كعدنا يم المكتب وصارت تباوع لدفترهه وبعدين كالتلي ...
- تعرفين متسلق المرتفعات كيف يكون صاحب حلم وعندو حب الاكتشاف والنشاط وكل القوه لكن باول تجربه الو
وكع من الاعالي وتكسر وصابتو رهبه المرتفعات والخوف من نفس الكدمات والالم .. واخذلو سنه سنتين هو بعيد عنها
لكن كل ما يدحك هالاماكن يرجع شغفو باكتشافها وتحقيق تجربتو الاولى واكمالها
ويضل بين خوفو من الي صار وبين حلمو الي ماتحقق وبعدو بكلبو راسخ
هين لو انتي بمكانو اي قرار تتخذي ؟

- اكمل حلمي وارجع احاول

- زين الولد هو بعد نفس قرارك اتخذ
ورجع حتى يحقق حلمو .. وصعد وعند نفس المكان بعد خطوتين من بدايه مشوارو توكف .. وصار يدحك لتحت
ويدحك لوره ويرجع يدحك لفوك
واتمالكو الخوف هين .. شنو يسوي وهو بنص الطريق متعلك ؟؟؟

- لازم يكمل

- زين ليش ما يرجع وهو بعدو كريب على الكاع ويتخلص من الخوف ؟

- لااا لو رجع راح يضل يحس بالفشل كل عمره ويغلب عليه الخوف اكثر هيج راح يخسر كل شي تعب عليه

ابتسمتلي وكالت ...
- وهو فكر نفس تفكيرك وكمل دربو
وكل ما كان يصعد خطوتين يرجع للخوف نفسو بس كااان يواااجه خوفو
هو صرخ وبكى وزاد خوف وارتباك لانو وحدو معلك بين السما والكاع
بس حلمو واصرارو على ان ما يفشل ويصنع بحياتو انجاز وهو تغلبو على نفسو ومخاوفها خلاه يوصل للقمه
وهنيك كعد وضحك وصاح بعالي الصوت ... نجحت اناا قوي كدرت انجح واحقق هدفين بدل الواحد ...
هذا ماكان راح يصير لو انه ماتحلى بالثقه بالحلم الي راسمو بالو .. وثقتو بذاتو انها تستحق الافضل ومارضى بالقليل راد القمه ولا شي عداها ..
وانتي طريقك نفسو ...
الخوف والخطر وراكي وزال لكن الرهبه منو هي سبب مشاكلك ...

- صحيح .. والحل شلون ؟

- تواجهي وتكملي للنهايه حتى تدحكي انه كلو وهم وسراب يختفي بمجرد وصولك عندو

- اني دااحاول بس الذكرى الي تجي بلحظه تغلب على كل قوتي الي اجمعها تجاهه

- اييه انا مااحكيلك تتجاهلي الموضوع وماتخافي منو ..لا انا ودي انك تخافي لكن تعيشي الخوف ما تهربي منو
عيشي للاخير خليه ينتهي وانتي واكفه صامده فيه وهو من مرتين ثلاثه يتلاشى
يعني مثل هسه مخاوفك حضنو ! نفسو !
اكربيها .. خليه يحضنك بالاول راح تخجلي ترتبكي تتوتري لكن من تتحسسي حبو وامانو راح تهدأي

- زين ونفسه اني بصراحه اضوج منه لان افكر راح يتقربلي اكثر مدامه هيج منفعل ونفسه عالي فبسرعه اوخر ماريد يصير هالشي

- لااا ما حكينا بهالنقطه .. وحكيتلك لو مهما انفعل يسيطر صدكيني .. هو خوفو على نفسو وصورتو كدامك اكثر من خوفو على تقبلك الها ..

ثقي فيه هو مايخلي نفسسسسو باحراااج يخل بمصداقيتو معك
- اذا هيج لعد راح احاول ومااتجنبها
- اييه حاولي فيها واتذكري انتي باول مره راح تحاولين حتى تزيدي ثقتك فيه
وبالثانيه حتى تتقبليها وبالثالثه حتى تأمني فيها وتصيري تحبي نفسو عندك
- مااشي دكتوره راح احاول

كلامها زرع حب المحاوله والاستكشاف بيه .. ردت اكتشف اول شي قدرتي على ضبط نفسي وبالثانيه ردت اكتشف قابليته لاي حد توصل بحفاظه على وعده الي ..

- عندك شي بكرا ؟
- لا
- زين انا عندي نزله للسوك وفكرت لو نطلع سوا حابه اشارك بجهاز عرسك
- ههههههه صددددك دكتوره
- اي والله .. انا مهمه عندي فرحتك وودي اختارلك اذا قبلتي يعني على ذوقي لبسك معو ادري انك محتاره مابين كثير اشياء وحابه ابعدك عن الحيره
- ياااالله دكتورره .. شكراااً والله فرحت كلش فرحت اكيف لو تجين وياي والله كلش افررح نطلع سوه
- ما حكيتلك اختك مو بس طبيبه الك

رحت حضنتهه وهي تضحك .. كلتلهه
- راح اطلع اكول للشيخ اكيد راح يفرح
- اييه يلا احكيلو

رحت ركض فتحت الباب وهو رفع عينه رأساً عليه .. واجه يمي واني اضحك كلتله ...
- شيخ راح نطلع اني والدكتوره سوه
- يوااشك يابه وييين تطلعين !!
- ههه قصدي نجهز للعرس سوه
هي كالتلي عدها روحه للسوك باجر
وتريدني اجي وياهه وتختارلي جهاز العرس على ذوقها
- هااا .. ايييه وش عليه دامو مفرحك هالكثر اطلعي معها
- شكررراً
- هههه ما تبلشي يولو

دخلنا يمهه وهي كالتله ..
- اييه شيخ عروستك خليها معي بكرا
اجيبها لك جاهزه مكمله
- هههه بالك عليها يا يابه
- بعيني ما تخاف
- تسلمي .. احكيلنا الامور طيبه ان شاء الله
- اييه الحمدلله .. لحد هسه احنه بعدنا على البر كلشي بخير وماردت اتعبهه ونطول لان اريدهه ترتاح عرسها قريب لازم تركز بس على نفسها وجمالها
والباقي عدنه وكت اله بعدين مامستعجلين
- زين يابه يصير خير ان شاء الله
- نلتقي بكرا الصبح ونطلع
- اي ان شاء الله

رجعنه للبيت وهو كالي ..
- دامك تطلعي معها تاخذي امي معك ولا لا؟
- اخذها طبعاً شلون اعوف الشيخه
- وان سألتك عنها ؟
- مادري شتكول انته !
- احكيلها صاحبتنا وحبت تشاركنا الفرح
- ماشي

وصلني للبيت وراح .. اني بدلت ورحت للشيخه واخذت غاليه من جراح بالكوه
ماتقبل تعوفه .. اريد احضنها اكعد وياهه وهي بس تتشرد مني ..
شويه وعفتهه راحت ركض تلعب وياه
هو مستغل عطله نص السنه ومكضيها لعب وياهه .. يحبون يبنون بالمكعبات
وجان رماح يخربهه عليهم دائماً وهسه ماكو هو ماخذين راحتهم باللعب ..

حجيت للشيخه عنها وهي مااعترضت
وكالت مدامها محبه الكم هلا بيها ...

ولليل رجعت لبيتي وياي جراح وغاليه
فرشتلهم يمي بالغرفه ونامو واني ضليت الملم كم شغله واتوقع الشيخ بأي لحظه يجي فما نمت ..

وللساعه ١١ سمعت باب الشارع انفتحت
عرفته هو .. وهالمره فتح باب الكليدور ودخل رأساً .. قبل جان اله يستأذن ويصيحني يلا .. بس هسه بعد كلشي صار بأسمه وملكه ...

رحت يمه ورحبت بي بابتسامه وهو صافن بوجهي ويبتسم .. نزل عينه لايدي واخذهه تلمسهه وكالي ..
- لو ما العيبه كنت حتى الاسبوع عجلتو
-ههههههه والمحكمه شلون
- نتفرغلها بعدين
- لااا خلي تصيرلنا فتره خطوبه على الاقل اسبوع
-ههههه هاذي صارتلك ارتاحي

اخذني وكعدنا بالاستقبال ..نزع اليشمغ والعباه وفتح ايده على التخم وكالي ..
- تكربي لهين تينتي

تقربت وهو خله راسي على جتفه وحاوطني بايده وصار مخلي راسه على شعري ويكولي ...
- مشتاكلك يولو
- واني هم اشتاقيتلك
- دخيل لهجتك انااا
-ههههه
- تينتي ودي اوصيكي بكم شغله نفسي فيها
- اي عيني كول

#شقراء_بغداد

بارت_٥٥


تقربت وهو خله راسي على جتفه وحاوطني بايده وصار مخلي راسه على شعري ويكولي ...
- مشتاكلك يولو
- واني هم اشتاقيتلك
- دخيل لهجتك انااا
-ههههه
- تينتي ودي اوصيكي بكم شغله نفسي فيها
- اي عيني كول
- ودي ادحكك ماخذه راحتك باللبس حدري .. لان بنفسي ادحكك براحه ومااحس انك متقيده بوجودي بشي
- هو اني ماامتقيده بيك شيخ ليش تكول هيج
- انا حكيتها لاجل تحسبي حسابها وكت تشتري .. يعني بالمختصر ودي ادحكك
غير شكل عن الي عرفتو بنفسي ياتينه تبهري عيني بكل ثانيه معك وماتخافي انا عند وعدي ماانسيتو
- امم ماشي تدلل
- دحكي ودي تضلي هيك بنعومتك وصغرك وبساطتك ما تتكلفي باللبس خذي كلشي مثل بساطتك لكن فيه الي وصيتك عليه
- اي اكيد تدلل
- و عندي طلب صغير لو ما يزعجك فهو بنفسي
- شنو هو
- بيوم العرس ودي ترفعي شعرك وانا الي افتحو بالهدى لو كان هالشي مايزعجك
- ماشي تدلل
- تسلمي يانظر هالعين .. لو يحضر اخوكي هين ما تكشفي شبر من جسمك كدامو ولا تزعليني منك
- لاا عيني تدلل ما كو زعل ان شاء الله
- ان شاء الله
- بعد شنو
- ودي تكوني مرتاحه بهاليوم وما تعارضيني بشي وانا مااسوي الي يزعجك ويضيك خاطرك مني
- ماشي واني عندي طلب
- امري
- لا تنسى اني قبل ماصير زوجتك جنت صديقتك وصاحبه سرك وضحكتك لا تخلي هالشي يغيره الزواج رجاءاً بس هالطلب عندي منك
- ابشرري والله ما يحتاج فيه الوصيه
هذا منبع حبك كيف انساه واغيرو !
تطمني انتي تضلي كل فرحتي وهالزواج انا حكيتلك ما يكون تقليدي وتدحكي لو انك تسعدي كلب خالد كيف يجازي هالسعد
- ياعسى ربي لا يحرمني منك
- ربي يحفظك لي .. امشي نامي الحين ما ودي السهر يتعبك

وخرت منه وهو وكف .. اخذت عباته واليشمغ وانطيتهم اله وودعته وطلعت قفلت الباب وراه ورحت نمت ...

وثاني يوم تحضرت وضليت كاعده انتظرهم يجون ...وبالتسعه دخلت الشيخه
صبحت عليهه واخذت الجهال نزلناهم لبيت ام حسن وطلعنا ...

وصلنا لعماره الدكتوره وهي جانت جوه تنتظرنا ..صعدت ويانه وسلمت على الشيخه ومشينا للسوك ...

وصلنا وراح وضلينه احنه نفتر هناك واني حجيتلهه شنو طلب الشيخ البارحه وهي شجعتني على طلبه وكلتلي ..
مبادره حلوه منه بكسر الحواجز بينكم
وبهيج بدينا بالشرايه وهي جانت تختار قطع وتكولي تعالي شوفي واني اختار منهه اليناسبني ....

جان اكثر ملابس البيت كصيره للركبه
وردانهه للعكس ..او ردان كامل ثخينه بيهن بساطه حلوه مثل دكم مسطره على طوله او هو ساده ونقشه تطريز صايره على الياخه او بحافاته ...
وبلوزات وبجايم رهمتهن اني .. وللشيخ
اخذتله بجامتين فكرت اخليه يغير شويه من الدشداشه بالبيت ....

وبعدها اخذنا نواعم عطور على شغلات شعر كثرت بالطباكات والطوك والوان الحمر ..
وبقت ملابس النوم الدكتوره كالت لازم تاخذيهن يجي وكتهن واني اكللهه بعدين وهي تشاورني لااا خلي ناخذهن مدامني وياج ...
ودخلنه للمحل .. هي تحجي وتطلع واني بس اي ولا لحد ماخذنا كم قطعه وطلعنه
والشيخه منطلقه ويه الدكتوره يسولفن بكل شي ماسكتن ابد ...

اخذنه تكسي للبيت والدكتوره مقبلت ترجع ويانه رغم عزمانهه على الغده ويانه ومقبلت كالت اعوضهه بالعرس
وراحت بتكسي وحدهه واحنه وحدنه

الشيخه كبل راحت لبيتهه ترتاح واني غسلت وصليت وسويتلي غدا خفيف تكلاه وكعدت اكل ... وبعدين رحت
فردشت الغراض وصرت اصفطهن بالكنتور ... وسويت خانه للشيخ وضليت ارتب الملابس وبعدين نمت ....

ولليل اجتني الشيخه وكعدنا نتعلل جان تكولي ....
- دحكي يايمه بعد طلعه وكعده مع الشيخ
مايصير لحين الزواج
-يااا ليش
- ول خليه يشتاكلك لو بتضلي حدرو هيك يشبع منك مايتلهف لعرسو
-ههههه وهو راح يقبل
- قبل وان ماقبل هالكلمتين مايتغيرو وان غافلتيني ومشيتي معو ازعل عليكي والله
- لااا شيخه شلون اكسر كلمتج ادللي صار
-ايييه يرضى عليكي

ضلينه على كعدتنا ناكل دبس وراشي ونحكي بالخبزه كل شويه وجان تنفتح باب الشارع وهي دفعتني وكالت...
-ووول امشي كفلي هالباب لا يدخل هين
- شيخه عيب شلوون اطرده !
-امشششي يولي لا تخليني ابلش فيكي

ركضت لباب الكليدور قفلته وهو اجه يفتح بي ويصيح ..
-يولو وينك ماتفتحي هالباب

اجتي الشيخه ووكفت وره الباب وكالت..
- مانفتحو يابني مانفتحو
-هاااه يمه لييه ماتفتحو!!!
- مايجوزلك ادحكها لحين العرس
- يمممه وش هالحككككي افتحي واليرحم اهلك
- حكيتلك ليوم العرس ما تعند
-يممه حرمتي هاذي عجل تحرميني من حرررمتي !!! افتحي خلي ادحك وش بلاجن علي بهالليل
- ما بلانا شي ،.هاذي العادات العريس مايدحك عروستو ليوم العرس يلا توكل لبيتك ياشيخ
-استغففففر الله استغففر الله ..هييين يايابه هييين

راح هو وركع الباب وراه واني واكفه يم الشيخه اضحك وهي تكولي...
- ول خليه يتحرمص عليكي لا تصيري عند يدو خليه يحلم ينالك ويتلهف لعرسو
معك
-هههه ماشي بس خطيه هسه يضل عصبي
- وش عليه خليه يتحمل يومين

ضلت شويه يمي وبعدين رجعت لبيتهه
ووصتني ماافتحله الباب ...

نمت وعند الفجر اندكت الباب عرفته هو
ما طلعت فتحت ضليت بفراشي ...
والظهر هم اجه ووكف لباب الكليدور
وحاجيته من وراه ...
- شيخ حلفتني ماافتح اسفه ماكدر
- ووول عجل تحرميني منك وانتي حدري ماتحملها تينه افتحي الباب ادحكك دكيكتين وامشي
- ياعيني والله محلفتني شلون اكسر الحلفان!
-استغففففر الله عججججل دامها هيييك
انتو تتحملو الجاي

طلع وضلت باب الشارع مدروعه ورجع هو طبكهه حيل واني اضحك ..
بس الشغله زينه هيج حتى ارتب نفسيتي بهدوء وعلى راحتي ...

جنت اسأل جراح عليه كل مايجي هو وغاليه يمي ياكلون لو ينامون .. واعرف منه شديسوي واكل لو لا ووين يطلع

يوم السبت الشيخ دزلي خبر بيد جراح
ان لازم اتحضر باجر عقد المحكمه والي وراه الحنه والعرس ...
خلاني ادك والطم .. لا محضره شي للعرس ولا خابرت اخويه ولا الشيخه
محضره شي هم وخلانه نتراكض ..

اني عرفت الصبح من جراح وركض دزيته يصيح الشيخه وهي من اجتني تهرول وتصيح ..
-يولو هالصكع الصابو على العرس
راح يبهذلنا والله
- شيخه شفتيه مقرر وهسه يلا يكول
شسوي هسه
-اااامشي البسي تانطلع ناخذلك ثوب العرس ول انا حتى ماعزمت احد ياااويليي منووو اخذ حك منعو والله
اركضي تعجلي

ركضت لبست بسرعه وطلعت قفلت البيت ورحت وياهه وهي دزت جراح
يكوله طلعنه ويضل ويه غاليه...

وهناك ركض رحنه لسوك الاعراس
واني من خبصتي مادري شداشوف
عاد كعدت اخذت نفس وصفيت فكري شويه وضليت اتوسل بيهه تعوف البدلات
مالبسهن وشكد تعاركنا يلا رضت من شافتني اختاريت فستان طويل ومنفوش
لونه بصلي وهم ردان شيفون وملمع بس من الصدر الباقي ساده ...
اجرته وللعرس اخذت هم فستان ابيض
طويل وعلى الزند صايره قطعه ستن عريضه محاوطه الفستان كله يعني صاير مكشوف من الجتف ومثبت على الايد والصدر وقماشه ناعم مو ثخين ناعم مثل الحرير ومابيه غير حزام فضي صاير بشكل وردات متجمعه على الخصر ...
تعاركنا هي تكول بدله احلى واني اكوللهه مو بعمر بدله ماريدهه ... وتالي صفت
على اختياري هذا ...

ورجعنا وره الصلاه .. ارتاحت تفسيتي من خلصت من هالجزء واول ماطبيت البيت اجتني ام حسن ..
- هااا يولو سمعت العرس بعد بكرا
- اي والله شفتي
- عجل خفي يدك يلا
- خلصت من الملابس بقى بس ترتيب البيت العصر ابلش بي
- عجل امرلك العصر

راحت واني كعدت تغديت ونمت كبل
والعصريه كعدت انظف اني وام احسن
وهي جانت جايبه وياهه فرشه عرسها
وبرداتها وكلتلي بليله الحنه نفرشها

نظفنا كلشي ورتبنا ورادت تسويلي باقي جسمي ماقبلت كلتلهه اني اسوي عاد هي كلتلي نسوي تنظيف وجه ورجل ...

وراحت خلت مي ع الطباخ وبي ورقه غار وجابتلي الخاولي وضليت على البخار وهيمن شافت وجهي عرك جابت
طرف الليفه وحكت الوجه حك واني اصيح عليهه ولج كافي وتكلي هسه تطلعين حمره تخبلين اشيلج الوصخ شيل
وصدك صرت احس وجهي نصلخ
غسلته بمي بارد وبعدين جابت خياره كشرتهه هي صار تاكل بيهه واني افرك وجهي بالكشر وافرك ايدي ونضحك
عفتهن ورحت كعدت بالحمام وهي جابت المحجاره ولزمت جف رجلي وتحك بيهه وهي كلشي مابيهه بس ارتاحت نفسياً من سوتهه ..

وكعدت رتبتلي حواجبي شويه واخذت شويه منا ومنا بالوجه جان هستوهن طاكات لان بدايه الاسبوع حفيت ..

راحت لبيتهه واني سبحت ونمت وكعدت من الصبح حضرت ريوك وكعدت الجهال اكلو وبدلت لغاليه ووصيت جراح عليهه وهو اخذهه وراح لبيت ام حسن يلعبون ويه حسن واخته ..

لبست وتحضرت والشيخ بالباب يدك هورن ... طلعتله وشفت الشيخه كاعده ليوره وصياح ابو حسن كاعد ليكدام
يم الشيخ ..
صبحت عليهم وكعدت يم الشيخه وطلعنا للمحكمه ...

اول ما نزلنا هناك الشيخه جرت ايدي ومشت كدامهم واني اباوع للشيخ واضحك وهو مخنزر ...

ضلينه واكفين بجهه وهمه بجهه واكللهه خطيه هيج وتكولي بس هالليله خله يصبر
وهو يحجي ويه صياح وياخذله نظره

صار دورنا دخلنه ومن وكفت يمه اوقع
هو شاورني وكالي ...
- حسبي حسابك بينا زعل

حجاهه ووخر .. ضليت اباوعله وهو دار وجهه مني ..رحت كلت للشيخه ...
- شفتي شيخه زعلان مني
- يرضى يرضى ما عليكي

طلعنا والشيخه هلهلت وباركولنا ورجعنه
تغدينا بيت الشيخ جانت ام حسن هناك محضره الغدا .. ردت فرصه احاجيه بس هو استعجل وطلع ...

رجعت لبيتي ووياي غاليه وجراح وحسن
عفتهم بالهول ورحت تمددت وافكر شلون
شيصير باجر واهدء بنفسي كل ماتوتر ..

واجه صباح يوم الحنه كلشي جان خبصه
وكل شويه اسمع سياره احد طبكت بره ومن بعيد يرتفع صوت السلام بينهم وبهذاك البيت صوت الهلاهل كل شويه يعلى ... واني يمي ام حسن وياي وياي بكل شي ...
لوره الغدا اجتي ام الصالون لبيتي وضلينه بس اني وياهه بغرفتي
رتبت شعري واني سويت مكياجي مااحب احد يحطلي ويضل يتفنن بوجهي اني اعرف شنو يلوكلي واسوي ..
هي بس رتبتلي الفستان والشعر وخلتلي بوطره على جسمي وراحت كعدت ويه البنات ..

الشيخه رادت الحنه يصير بيهه ذكر

مولود واجني النسوان وبدأ الدك والدفوف
والبنات مقصرن كلهن معلمات على ركصتهه ... صارت حنه حلوه والدكتوره جانت حاضره بيهه وكاعده يمي كل مااباوعلهه تطمني بعينهه وتمدح بجمالي
وبنتي جلبت بيهه كل شويه تعض خدهه وغاليه تخنزر عليهه وتهددهه بجراح لحد ماشردت منهه ...

لليل تعشو المعازيم وصارو يمشون
واغلبهم باتو بيت الشيخ ...
ضلت يمي الشيخه ومناسك وام حسن
ينتظرون الشيخ يجي حتى نتحنى لان هو حسب كلام الشيخه موصيهه بعد ما يمشون النسوان ادز عليه ويجي يحني

رجعت عدلت حمرتي وتعطرت ويمي مناسك لازمه جتفي لحد ما دخل الشيخ
يباوعلي ورافع حاجبه .. صارن يهلهلن
وهو كعد يمي وعدل شماغه ..
جان لابس دشادشه جوزي والعباه كريمي
والساعه ذهبي .. كلش كاعده حلوه ويه شكاره ....
ضليت اباوعله واتمعن بتفاصيله وهو يفر بسبحته ورافع حاجبه وداير وجهه عني
عرفت بعده الزعل بخاطره ...
شاورته وكلتله ...
- اشتاقيتلك

باوعلي بطرف عينه ودار وجهه ..رجعت كلتله ...
- هيبه كشختك ويه هالشكار

هم نفس النظره عادهه .. كلتله ..
- معقول تنحيني وبخاطرك زعل ؟
- ما حسبتيلو عجل
- امر الشيخه بعد مو بيدي
- عجل خلو يفيدك بهاليوم
- خااالد حباب شبيك

ابتسم شويه ودار وجهه رجعت شاورته
- بغلاتي عندك خلي نعيش هاللحظه براحه حباب فدوه
- مارضيت بعد
- اراضيك العمر كله بس هسه خف الزعل شويه واضل اعوضك عليه وعيونك الحلوه ماانسالك التعويض

ابتسم وكالي ..
- عجل تحضري للدلال الكثير
- بعد عمري دلالك واجب

ضحك وطبك سبحته وكالي ..
- لخاطر هالحرف والصوت بنسى

ضحكت وهو اشر لمناسك واجتي خلت صينيه الحنه وراحت تاخذلنا صور جماعيه وصور وحدنا وبعدين اخذ ايدي حناهه واني حنيتله اصبعه الصغير وهو بس يبتسم ووجهه احمر ..
ضلينه كاعدين سوه وهمه راحو جوه
جان يتلمس خدي وطرف من شعري وكالي بهمس ...
- هذا مكياج يدك ما ؟
- اي اني سويته
- دخيل هالنعومه وهالحلى بحبها للمساتك وبميزها من بين الكل ماتغيريها
- صار

تلمس اصابعي واني شبكتها باصابعه وضلت عيني بعينه واتمعن بلمعت عينه كلتله ...
- بعيونك لمعه تجذب
- من كثير هالاحساس يولو
- احبها لانها بس وياي
-ههه بديتي بدرب التملك
- هههههه يضوجك !
- لااا ريتك ياتينتي تملكين كل مافيي وتوهبيني اياه بسعدك وعينك

دنكت بخجل وهو كالي ..
- دحكيلي
باوعتله وهو ابتسم وتقرب لاذني كالي ..
- بديت ادحك نفسي بعينك كأنو سحر العشك صابك

فتحت عيني على وسعها وهو عاض طرف شفته ويبتسم .. واني مدري شجاني تبنجت معرفت اسوي شي
هو ضحك ورفع ايدي باسهه ووكف
وكالي ..
- بتدحكيه انتي بعد بهالايام .. نلتكي بكرا اودعناكي

ضليت بس اباوعله وهو يضحك وطلع
مادري هالحجايه وين اخذتني ..
معقول يرجع الحب من جديد؟
معقول الكلب يدك مرتين؟
تقبلته شريك بس اكدر اخليه حبيب وخليل؟

كلهه جانت تدور بالي هالاسئله ومادريت شنو جوابهه ...
تركت هالتفكير ورحت اغسل ايدي وابدل
وضلينه اني ومناسك وام حسن نتعشى
ونسولف والشيخه راحت ...

نامت مناسك يمي هي وبنتهه وغاليه نامت بحضني هالمره من وحدهه اجتي
واني كيفت بيهه احب قربهه بس هي ملتهيه ويه جراح وكت تحتاجني تجيني

بيوم العرس ام حسن من الصبح اجتي يمي تريكنه سوه وبدينا نرتب البيت بسرعه وهي فرشت الفرشه وغيرت البرده وطشت الجكليت على الجربايه
وبخرت البيت كله ...
واني رحت سبحت وطلعت امشط وبعدين عفته مفتوح ينشف وصرت البس غاليه بدلتهه البيضه وهي مكيفه بيهه واول ما كملتلهن شعرهه باستني وراحت لجراح الي جان كاعد بالمطبخ ينتظرهه ..

لبست فستاني الابيض وكعدت اتمكيج
سويت رسمه عين ثكيله بالكحل ودمجت بالطرف الوان ترابيه دمجتهن خفيف وبالبدايه شويه لمع من المدمع شي خفيف
وحمره ماروني وضليت الح بالمسكارا
بين مااجتي ام الصالون هم بس سوتلي شعري رفعته وخلتلي كذله صفح ثبتهه
وخلت الطرحه فوك التسريحه ومن راحت طلعت طقم اللؤلؤ دالبسه ودخلت ام حسن ... صلت ع النبي وبعدين شافت العلبه كالتلي...
- هاذي شبه ولا حكيكه !
- ههه لاا لؤلؤ حقيقي
- بسم الله مااشاء الله يبهر العين والله من وين لك هذا؟
- هديه من الشيخ
- ايييه يابه يحلالك والله عشكو ومالو وكلبو وعينو كلو ملكك صار تهني فيه تستاهلي
- ماريد بس راحته وياي
- انتي ملكيته بعطائك انا عمري ما دحكت حرمه تعطي بمثل ما عطيتي للشيخ .. انا صياح يحكيلي كل شي ودايماً يمدح فيكي وباصلك على وكفاتك مع الشيخ وحرصك عليه وكان يحكيلي
ولد عمي ماابتدا عمرو الا ساعه الي دحكها
-ههههههه هو هم هيج يكولي
- هههه افرحي يابعد عيني افرحي فيه وتهني تستاهلو الفرح والله

وكفت ورايه ولبستني العقد وعدلتلي الطرحه ورشتلي العطر وبعدين وكفت اخذت نظره على هالفستان مرجعني لعمري العشريني وتمنيت لو اني اول ماالبست لبسته بس للشيخ ...

طلعت كعدت يم النسوان بالاستقبال وكللها عينهه تركزت على العقد حتى الشيخه سألتني عنه وكلتلها هديه من الشيخ .. ضحكت وباوعتلي بمكر وكلتلي

تهني بي ...

الدكتوره اول ما دخلت هلهلت وفرحتي بجيتهه زادت .. وكفت حضنتهه وهي تكولي...
- ياويل صبرو على هالجمال ياويلوو
-ههههه هاا دكتوره اتراجع
-لااا يولي افرحي معو عجل هو العمر وش ضل فيه عيشي وتمعشكي كبل ماتشيبي مثلي افرحي يولي بهالشباب افرحي
- افرح اكيد مدامج وياي افرح

كعدت يمي وضلت توصيني اهدء وكل شي يمشي طبيعي واخلي تفكيري بس ويه الشيخ ومااستصعب الامور .. واني اكرر كل كلمه تحجيها بالي واعيد على نفسي ان كلشي راح يمر بخير ...

ضل الدك والركص لحد المغرب تعشو وصار رمي الطلق وهوسات الولد بره
واجتي الشيخه تصيح للبنات يلبس ويروحن للهول ومن هناك يطلعن

جانت واكفه يمي مناسك والدكتوره واني منزله الطرحه على وجهي واترقب دخلته

لحد مادخل وسلم على الدكتوره وتشكر منهه لجيتهه وسمعته يكللهه ..
- وصيت واحد من رجالي يوصلك لباب بيتك تلاكيه كاعد عند الباب ينتظر اشارتك

تشكرت منه وودعتنه ومشت ومناسك هم باركتلنا وراحت جوه واجتي الشيخه بوسته وباركتله وكلتله ..
- تهنى ياولدي عساهه زواجه السعد
عشاكم هنيك خليناه والحين بنمشي وتهنو
هالليله بصبركم وثمار التعب

راحت وسمعنا طلعتهم وهو ضال واكف يم الباب تاكد من الكل مشت واجه وكف كدامي ومدلي ايده .. لزمتهه ووكفت كدامه ..
اخذ نفس وتلمس الطرحه من طرفها وصار وهو يريد يرفعها يكولي...

- العيون الي ورى البركع الغاوي عذاب
البلا في بركعٍ ابيض ولا في العيون !!

والله اني كبل اشوفش وكلبي مايهاب
غير نضراتج كذيا توردني الجنون

في جدليتش ظلمه الليل والوجهه السحاب
والشفاه الفاكهه والعرب ما يدركون وعينج الموت المصفر
وان طار الحجاب انا لله وانا اليه راجعون

من يكول ان سن العشرين هو عز الشباب
علموه ان الثلاثين هو عز الزيون

احدث بروحي على الدرب لو دونش ضباب واتبعش برضاي مبغى الي حولي يشعرون

في عيونش معركه موت ورموشش حراب
ونجلتين عيونش بهالخلايك يبتلون

وعكدج الزاهي بمنحرش لاذاب ذاب
ذاب من النعومه على الصدر الحنون

صرت اداري كل جاهل وانا عالي جناب
وصرت احامي دون وجهج وانا احبش وامون

كولي اصلاً كيف ما تستحي منك الثياب وانتي احلى من لبس كل شكل وكل لون

ودي الهيام بعينش بلا نكاش
ولاعكب بركعش بركع ولاعكب عينش عيون ..

ختمهه ببوسه بين عيوني وبدايه شعري
وتلمس بجف ايده خدي .. ميلت وجهي عليه واخذت ايده بستهه وكلتله ...

- يا بختي بحب الشيخ البدوي
- بختي انا بجمال بغداد في بيتي وبين يدي انا ملكتو حلالي

تلمست تطريزه عباته السوده المذهبه
ومشيت ايدي على صدره وياخه دشداشته البيضه وغمضت عيني ويه شمه عطره
وكلتله ..
- عطرك مو غريب عليه كأني اعرفه من زمان

ابتسم وقربني من ايدي اله ورفعهه على جتفه وكالي ...
- بوادر العشك يابه
-هههههههههه
- يا زين هالضحكه والله انها بتشرح صدري ساعه الي ادحكها ويه دكه هالحنك

نزلت عيني بخجل وهو كالي ..
- داري ان الخجل لايك عليكي لكن استسمح منو اليوم ودي ادحك عيني ماتفارك عيني

باوعتله وابتسمت .. تلمس طرف شفتي وكالي ..
- حبه الرمان هاذي بتلعب بموازيني
مطول لاملكها ؟
- لا ان شاء الله قليل
- بصبر عليها لتنضج بحلاها ازيد

تلمس كذلتي بطارف اصبعه واني اباوع لعينه اللامعه .. صار يفرك بطرف كصته ويكولي ...

- خلي نتعشى يلا كبل مايبرد الاكل

اخذ بايدي وكعدنا يم الصينيه .. راد يمد ايده على الاكل ولزمتهه كلتله ..
- بنفسي اني اوكلك تسمحلي !
-ههه مسمحولك يا يابه

ابتسمتله وصرت اخذ شويه بالخبزه كباب واوكله وانطيه شويه من انواع الزلاطه
واشربه العصير وهو بس يباوع لعيوني وهااادىء حتى لكمته يبلعهه بهدوء

بعدين صار يحمحم وكالي ..
- يكفي شبعت
- بعد مااكلت شي
- لااا تسلمي شبعت

اخذ اللفه من ايدي ووكلني وسوالي الثانيه هم وكلني وبعدين تلمس خدي بظهر ايده وهو يبتسم واني اشرب العصير ..
ضل مرجع ظهره ويتلمس بطارف الطرحه وكالي...

- حبيتو لهالفستان وتمنيتك تلبسي هيك شي ناعم وبسيط ويجملو عودك
- حققتلك امنيتك لعد
-انتي كلك امنيتي

باوعتله وابتسمت وبعدين كلتله ..
- راح اكوم اغسل

اشرلي بملامحه بموافقته ووكفت ردت ادنك اشيل صينيه وهو كالي ..
-اتركيهاا يابه انا اخذها
-لاا شلون
- اتركيها ياعيني امشي غسلي ماعليكي منها يلا
- ماشي

رحت غسلت وهو اخذهه للمطبخ واجه يمي غسل وكالي ...
- ما تخطي للمطبخ ابد
-هههه وشلون اعوفها بدون غسل
- اغسليها الصبح الحين خلك حدري وبس
- صار تدلل

نشف ايده ورجع الخاولي واخذ ايدي
خلاهه على خده وضلت عيني بعينه
وبعدهه كالي ..
-غمضي عينك ياعيني

غمضتها واني ابتسم ومااحس الا انرفعت
باوعتله متفاجأه وهو يضحك ويكولي

- ودي اعيد الكره بشيلتك هالمره حرمتي ماعدتي غريبه حديثه ياتينه اليوم انتي
حرمه شيخها
-ههه ياشيخ الشيوخ انته اهلي وكل مايحلى بعيني ربي يكدرني على اسعادك
- ضلي بحضني اضحكي هيك تسعديني

ضحكت وميلت راسي يم ركبته وهو اخذني للغرفه وكعدني على الجربايه
واجه كعد يمي .. ضليت اتلمس اصابعه
وحلقته وهو تلمس حبات اللؤلؤ على ركبتي وكالي ...

- ناكص ادحك منثور حولها سواد شعرك

دارني للجهه الثانيه وصار يفتح بالطرحه ويشمر الماشات بحضني .. ومن شالها وشمرها على طرف الجربايه وخر شويه وكالي ...
- تينتي ارحميني بطلب واحد
- شنو ياعيني
- احكيلي تم لا تسألي عنو
-هه تم

دخل ايديه من جوه ايدي وحاوط خصري وبعدين قرب راسه باس جتفي وضل مخلي وجهه عليه ويباوعلي واباوعله
وكالي ...
- ماالاكي نفسي الا حدرك تينتي ماتحرميني منك بيوم
- طول ماهالنفس بيه ماابعد عنك

رجع اخذ نفس قوي وباس نفس المكان ورفع راسه وكال ..
- دخيلك يالله دخيلك

وخر ايده وصار يفتح شعري واحس بايده ترجف .. نثره على جسمي وقربه على جتفي ودارني عليه وضل يباوعلي ويبتسم ويكولي ...
- لوحتي هيك من سواد شعرك تبدا وتنتهي يوم الي انتصر بملك كلبك وروحك وجسمك وادحك نفسي بمراه عينك
- ما عشت وكدرت لولاك .. اتعب واكملك جمال هاللوحه بس صبرك عليه واجازيلك هالصبر باحسنه
- اصبر وان خلص الصبر اتحمل اللوعه بسكات وانتظرك لاتنسي هالشي
- اعوضه وعيونك اعوضه

كلتهه وتلمست خده وهو غمض عينه واخذ نفس وكالي ...
- ودي ادخن جكاره هالليله محتاج للهداوه منها
- ماشي براحتك

وكف وكالي ..
-غيري ثيابك على راحتك انا بطلع ادخن برا

طلع واني تمددت وضليت صافنه بالسكف .. وبداخلي فرحه بأني كدرت اتجاوز هاليوم بقوه وراحه ..

كمت رحت نزعت الفستان وركضت للحمام سبحت وغسلت شعري زين و
لبست ثوب ستن للركبه ونص ردان ولبست فوكاه روب وضليت واكفه كدام المرايه امشط بشعري وهو دخل ..

ابتسم وكالي ..
- شكلي انا بعد محتاج للحمام
- محضره ملابسك بي

ابتسم وراح وطول بالحمام ضليت انشف بشعري وبعدين صرت الم الجكليت من الفرشه وجمعتهن على الميز ..
وهو دخل لابس بجامته النيلي ومتغير شكله بيهه ضحكت ورحت يمه وهو ينشف باذانه ويبتسم كلتله ..
-يالله شكد حلوه عليك ..نعيماً
-ههههه الله ينعم عليكي .. تفاجأت فيها ولكن مالكيت غيرها البسو
- ايييي مدامك يمي البسها شكو بيها
خلي لبس المشيخه بره هالبيت هنا لخالد وبس
- بتكلبي موازينو لخالد
- لازمله حياه مختلفه جديده وحلوه
حياه الشباب ياعيني

ضحكت وهو شال شعري وشمره على وجهي وبعدين اخذ بايدي للجربايه وكعد وضل لازمهه ويكولي ..
- انا لو مخليني الحين وحيد بنص كونه
من ستين فارس ولا هالاختبار دخيل الله
دخييييل الله كيف بيمشي

جنت حاسه بتعبه من هالشي وادري بصعوبتهه عليه بس ماواثقه بنفسي
حتى اكدر اسمحله يتقرب مني ..

لزمت راسه وخليت اصابعي بشعره
البارد وكلتله ...
- اثنينه اختبارنه صعب ..سامحني خليتك بهالحال
- انسي واتركي كل شي الحين ودي انك تنوميني على ريحتك
-صار من هالعين تدلل

رحت سديت الباب واجيت طفيت الضوا وتمددت بصفه وهو تقرب كلش عليه وشال ايدي خلاهه وره ركبته وضل مخلي راسه بركبتي ...
كالي ...
-العبي بشعري ودي انام
- تدلل
- ماتتحركي من هين ما ودي اصحى
خليني انام وانسى ضلي لاتتركيني العبي بشعري وخلي هيك نفسك حدري اغفى على صوتو

حجاها وحضني حيل وضل يدحس وجهه بركبتي واني اتماسك شويه والهي نفسي بشعره ...
وهو رخى جسمه ونام ... ضليت اباوعله
واكول ...
راح احارب نفسي واعوضك هالصبر
والله مااخلي بنفسك شي ...

وجوده بحضني بهالهدوء كله ادري انه كلفه هواي من الصبر والتعب وهالشي
انطاني حافز واصرار اكثر حتى اقاوم كل مشاكلي النفسيه وارجع نقيه جديده بس اله وافرحه مثل مافرحني اليوم ...

نمت وايدي بعدهه بشعره ومن كعدت لكيته كاعد وضال صافن بوجهي
ابتسمت وخليت ايدي على ايده ورجعت غمضت وهو قرب راسه لراسي وكالي
- اشتكت لصوتك اصحي عاد

فتحت عيني وهو باسهن تلمست وجهه وبست راسه وكلتله ..
- عسى كل صباح بعينك يبدا
- عسى ربي ينعم علي بصوتك كل ثانيه بعمري
- خااالد
- يانظر عينو
- تدري باول يوم نمت بي بهالبيت حسيت ان ناقصه شي وضليت كل يوم احس اكو نقص عندي هنا مداعرفه بس ساعه الي غفيت بحضني عرفت نقصي هو انته
يمكن اني تعودت على وجودك بكل تفاصيل حياتي
- والله ؟
- اي والله هسه من اول مافتحت عيني وشفتك عرفت مكانك هنا جان ينتظرك
واحساسي بمكانه مو عبث
- عجل احساسك هذا ماحس هيك من اول سنتين ثلاث كان عندنا الحين ولدين
-ههههههههههه هو شويه يتاخر يلا يفهم
- هههههه تدرين بكل هالكرب وللحين مشتاكلك مو كادر اعرف كيف اروي شوكي منك

تلمست شواربه وضحكت وكلتله ..
- اخذ كل الي ممكن يهدأ اشتياقك

رفع ايدي لوره ركبته وحضني وضل يشتم بكل قوته ويهمسلي ...
- لو بيدي افتحو لهالصدر واضمك فيه هيييك ودي ارتااح هيييك

وخر مني وتمدد على ظهره وضل يكولي
وهو يأشر بالهوا ...

- دحكي هين الشياطين تتفرفر فوك راسي وانا اكفل عليها الباب من كل جهه
كل ساعه لخاطر عينك اعرفي كدر حبك كيف هو كبير

- اعرفه يانورعيني اعرفه والله لا يحرمني منه

ضل ساكت ويفرك بوجهه وبعدين كالي ..
- خلي نمشي من هين احسن
وها تذكرت .. لا عاد تسبحي وتنامي حدري اسبحي كبل جيتي زين
- هههه زين

راح طلع واني ضليت اضحك مادري شجاني بالضحك هيج بس بالكوه سكتت

بدلت ملابسي ولبست ثوب سمائي للركبه وردان ومشطت شعري وعفته مفتوح ورحت غسلت وماشفته بالبيت رجعت خليت شويه حمره وكحله ورحت للمطبخ
عزلت الصينيه وغسلتها وخدرت الجاي
وهو دخل للبيت وصاحني شفته شايل صينيه الريوك وكالي...

- دحكي امي ماخلت شي ماارسلتو لنا
حدري ياعيني
- تسلم ايدها خلي اجيب الجاي واجي

كعد هو بالهول ورحت صبيت الجاي واجيت كعدت يمه .. هو خاط الجاي
واني صرت اوكله وهو ضحك وكالي ..

- هالدلال ما هو زين يا يابه هيك اتعود عليه وماخليكي تتهني باكلك
- لااا احب اوكلك بايدي ماينطيني كلبي افوت هالفرصه من دلالك

ضحك واخذ الجاي شربه واني اوكله لكمه والثانيه ياخذهه من ايدي يخليها بحلكي وهيج كملنا الريوك ..
وكمت غسلتهن واجيت يمه وهو ضل يباوع لمشيتي من رجليه لحد راسي ورفع حاجبه كالي ...
- انا لو وين ماادحكك احبك وتسلبي عكلي بطولك

ضحكت وهو فتح ايده اشرلي اجي ورحت كعدت يمه وحضني ضل يبوس براسي وكالي ..
- مرتاحه من بارحه لليوم ؟
- اي كولش مرتاحه
- ما ضايكتك بشي
- لااا خالد لاتكول هيج اضوج والله
-ليه ياعين خالد لييه !
- مااحب تكول ضوجتج بشي انته بكل شي تسعدني ومريحني لاتضل تتخوف من تصرفك وياي حباب اضوج والله
- هههه هالنعوصه اخرها شين يولو احذري
-هههههههه خااالد
- وهاذي بعد
- هههه شلون شسوي ماكدر اسكت تره
- ههههههههههههههه يولووووو هاذي الكارثه لاتحكيهااااا

خليت ايدي على حلكي واضحك وهو يضحك ويجرجر بشعري واني اجره من ايده وهو يكولي عوفي الي صار ويشمر بي منا ويرفعه ويرجع ينثره ويشم بي
احتار شيسويله واني بس اضحك

بعدين راد يطلع ورحت جبتله شماغه والعكال لبستهم اله وهو كاعد ورتبتهن
وهو باس راحه ايدي وكالي ..
-هاذي عوديني عليها
- صار
- لاكيلك غير كلمه بعد الحين هاذي ابعديها لابعد عنك كلمه الثانيه مااضمنلك وش يصير
-هههههه ماشي

وكف ولبسته عباته وكلتله ...
- لا تتاخر خلي نتغدا سوه اليوم
-ان شاء الله
- ودزلي غاليه اشوفها حباب لا تنسى
-هههه من هالعين ابشري

طلع واني رحت اسكي الحديقه ووره شويه اندكت الباب .. ركضت افتحهه
وجان تطلع ..
ام جراح ..

يتبع..

عيوني مبين بشرتج جافة فقللي من الصابون ولمن يتكشر ينرادله ترطيب🌚🌺
فباليوم 3 مرات رطبي بأي مرطب من سيرافي ؛ajanta ؛ بيوديرما ؛لاروش بوزيه ؛ فيشي

#ملوكه