لم انافس يوما إمرأة لأجل رجل، إما أن يختارني بملء إرادته أو أتركه بملء ارادتي

#العذراء #الأسد #الميزان #العقرب #الحمل #الجدي #القوس #الثور

#شقراء_بغداد

بارت_٥١


سكت وضل ياخذ نفس من جكارته بعدين نفخه وكالي ...

- تينه تتزوجيني ؟
- هاااا!!!!!
- طلبي ماهو بعبث يا تين .. خذي وكتك وفكري فيه ورديلي خبرو
- شيخ فاجأتني مامحسبه لهيج موقف وبالاخص يعني هسه بديت بالعلاج نهائياً ماتوقعتك تفكرله هسه
- صار لزوم ان افتحو لهالموضوع والعلاج وش عليه يضل ماعلينه فيه

سكتت وضليت بحيره وصافنه عليه وهو مبعد عينه مني .. اخذت نفس وكلتله ..

- انطيني وكت مامستعده هسه للزواج
- خذي الوكت الي يمديكي لكن ماتنسي ان بالاخر ترديلي خبر
- اي اكيد
- عجل سدي هالسيره الحين وبكرا نمشي للجلسه الثانيه وماودي انك تتعبي مانمشي للشغل وصيت نجيب يدير بالو بغيابنه
- ماشي مثل متريد

كام وكالي ..
- تصبحي على خير
- تلاكي الخير شيخ

طلع واني ضليت صافنه مادافهمه ليش هو هيج عصبي وضايج وحتى ميباوع بوجهي وبنفس الوكت يطلبني للزواج؟؟
كلش متناقض بتصرفه اليوم ..

الصبح كعدت بالسبعه وضليت متمدده بفراشي وافكر بالراح اواجهه اليوم واحجي ويه نفسي ..
لازم انساه هو ميت هسه لازم بعد مااخاف .. اني اكدر اسيطر على افكاري
اكدر اشيل هالخوف مااستسلم اله اني اقوى منه ..
ضليت اكرر على نفسي بهالكلام لحد ماحسيت اني كادره على المواجهه
كمت رحت سبحت وحضرت ريوك الي ولغاليه .. وبعدين بدلتلهه ومشطتلهه
وخليتهه بالحديقه تلعب بالطيور الي مخليهم جراح هنا الهه .. ورحت بدلت
وتحضرت وكعدت يمهه بالحديقه انتظر الشيخ يجي ....

اباوعلهه شلون تفتر وراهن بالحنطه وهي مدنفشه من الملابس الشتويه وكبوسهه كل شويه تشيله تشمره وارجع البسه الهه اخاف على اذانهه تبرد والجو بارد الصبح بشهر الواحد الجو هنا ابرد ضعفين من جنت بغداد ...

اندكت الباب ومشيت فتحتهه وتلاكت عيني بعينه وهو يبتسم ويعدل باليشمغ على ركبته ...
- صباح الخير شيخ
- والله انه خير دامه بهالوجه
-هههه تفضل
- لاا خلنا نمشي الحين ..يلا جيبي بنتك وكفلي الباب
- صار

اخذت غاليه ورحت صعدت بالسياره وهي بحضني وصلنه يم بيتهم ونزلتها راحت تركض جوه واحنه كملنا طريقنا
وجنت اشوفه يحرك بركبته كل شويه ويضيق عيونه كانه يتوجع منهه ..
كلتله..
- خير شيخ شبيهه ركبتك
- هيك مانمت براحه واذتني هالصباح
- ياا لعد جان خليت الشيخه تفركهه الك
- ماتسوى يابه
- امم شيخ عندي عتب وياك
- لاااه ليه يولو
- البارحه كاعد يمي وتدخن ليش هيج
شنو اني مضوجتك حتى تكسر الاتفاق
- ههه لاااه يولو البارحه كنت موجر اعصاب اعتبريها سماح
- هو انته مسامح عيني بس خوفاً عليك اني احجي واعاتب ماريد تخرب نفَسك بيهه
- حك والله .. تدرين شي
- اي شنو
- انا حدرك انساهه والله لكن وكت ابعد ويصير شي يتعب الاعصاب هنيك مالاكي نفسي غير مدخنها
- وهاااي شلون نحلهه
- يمك انتي فكريلها ماانا مسلمها الك
-امم يلا افكرلها بعد بس ليش عصبي البارحه ؟
- سالفه الها وكت ونحكي فيها
- ماشي على راحتك

عفته على راحته لان شفت ملامحه كبل تغيرت للغضب من حجيتله شنو سبب عصبيتك .. كلت انتظر هو اذا يريد يجي يحجيلي واذا ماحجاهه معناه شي خاص

وصلنا للدكتوره واني قبل ماندخل الهه وكفته وكلتله ..
- شيخ عفيه اريد منك شي
- آمري
- تسلم . . اذا صار وتعبت وطلبت منك ترجعني للبيت لا ترجعني زين .. فدوه لا تخليني اطلع من هالمكان اذا مو مرتاحه

اخذ نفس قوي وبعدين دنك وحجالي ..
- من هالعين انتي تآمرين لكن لو استوجبت راحتك لبعادك من هين باخذك
- لااا لا تاخذني
- لييه احكيلي
- اذا رحت تعبانه اخاف مااكدر احاول مره ثانيه واني تعبت ويه نفسي حتى خطيت هالخطوه
- فهمتك ياعيني فهمتك .. ادخلي الحين وتشجعي وان احتجتي لي انا هين كاعد وكل فكري عندك

ابتسمتله ودخلت للدكتوره وهي وكفت واجتي يمي حضنتني وباستني ورحبت بيه بصوتهه الحلو الناعم ومن كعدت انطتني قطعه ككو واخذت وحده هي واكلناهن وبعدين صارت تحجيلي ...

- شلونهه شابتنا الحلوه
- زينه الحمدلله
- معنويات مرتفعه موو
- ههه اييي
- اي اي هالشي يفرح كلوبنا يلا ارتاحي هين وخلي نسولف متشوقه اسمع باقي الحكايه

ابتسمتلهه ورحت على هذاك الكرسي
غمضت عيني وهي كالتلي ...
- اخر ما وصلناه هو انتقالك لبيت بغداد
وسكن علي معك

فتحت عيني وصرت اباوع للوحه وعم السكوت بينه وبعدها حجيتلهه ...

- علي نفذ انتقامه من خلال محمد
اخذه لدروب الحرام وخلاه يتشبع بيهه
محمد جان صاحب شخصيه ضعيفه من زمان لاحظتهه عليه ويه اهله ينصاع للي يحجي براسه وياخذه بالحيله .. وهو استغل ضعفه بهالنقطه ومشاه لكل حرام
علمه على الكفر طوول اليوم ومايحترم حتى الاذان ويكفر بساعتهه على واهس علي يزيد فوك كل كلمه يحجيهه هو وجماعته الي مسوين البيت ملهى الهم
اني جنت معتزله عنهم بغرفتي ..
بالاول جنت اطلع واسوي اكل وانظف وراهم لان البيت ريحته ماتنجرع من الدخان وريحه المشروب الي مشمر بكل ركن ..

بس بعدين صار هالنقطه يستغلهه علي ويحاول يذلني بيهه بكل طريقه
المسبه والكفران بوجهي مايتركهم ومحمد كاعد وساكت حتى انه مرات يتهجم عليه ليضربني ويهيني وهو ساكت ومدنك ميتدخل بشي .. جنت اصرخ عليه واطلب منه يطلكني ويضلون بذنبهم وحدهم بس هو مايرضى ويسمع كلمه علي من يصير يكوله ... خليهه هنا تبقى خادمه النه
واستغل هالشي محمد لان مااجيبله جهال
وضل يعيرني بيهه طول الوكت ويجبروني على خدمتهم لحد ما بيوم
عرفت ان البيت مسجل باسم علي هو كالهه الي هالبيت باسمي واني اضل حابسج بي .. وفعلاً ضل عازلني عن العالم بداخل غرفتي .. تركت الوظيفه واهلي ماشفتهم ولا جيراني ولا صديقاتي الي كلهم يجون يدكون الباب ويريدوني وهو يدز محمد يكللهم مو هنا بيت اهله
على اساس وهيج مشوهه شهور ..
وكت الي يطلعون يفتحون باب الغرفه بس يقفلون باب السطح وباب الاستقبال
وابقى وحدي محبوسه داخل هالبيت

- زين شنو تسوين وحدك بعد مايطلعو

- اروح ادخل الحمام واسبح واسويلي اكله بسرعه اكل وارجع لغرفتي واكضيهه بس صلاه ودعاء حتى اطلع من هنا واخلص من شرهم جنت ادعي ربي يسخرلي احد من اهلي يفتقدني بينهم ويجي يدور عليه بس ما تحقق هالدعاء الا بعد ما فات الاوان

- هاا شصار وفات الاوان ؟

كعدت واخذت نفس وكلتلهه ..
- اريد مي بلا زحمه
- اي ادللي

جابتلي كلاص مي شربته كله وهي كعدت بصفي وخلت ايدهه على ظهري وكالتلي ..
- هنا الخطوه الحاسمه ياابنتي لاتتراجعين انتي قويه تكدرين

رددت هالشي ويه نفسي وصرت تلقائياً احجيلهه واني مغمضه وكاعده ولازمه راسي ...
- فلس هو وراد ياخذ ذهبي وعاندت مانطيته اله صار يدور عليه ومايلكاه ويتخبل بالاعصاب يضل يصيح بعلو صوته ويخبص الدنيا عليه وبعدين يطلع من يأيس ويرجع بالليل نفس الشي يعيدهه
ومره رجع هو وهذاك سكرانين و واحد يجر بالثاني ... علي وكع بالكاع وضل مدد وهو صار يكولي ..
تعالي نزعيني الجواريب وسبحيني
اني ماتحملت منظرهم وكلتله .. لو تموت ماامد ايدي على واحد نكس مثلك ..
وهو اجاني متخبل ودفعني على الكنتور انضربت بظهري وضل يغلط ويهدد واني كلتله .. انته واحد عار ولابيك ذره رجوله والله فلا رجال وهنا هو تهستر وصار يصيح بعلو صوته ويضربني بكل صيحه منه وبعدها علي صار يكوله سكتهه وخلصنه منهه ... وهو ...
هو دفعني للكاع وشك ملابسي وضل يكولي اخليج تصيرين نكسه مثلي وجاب البطاله الي عدهم بره ودارها كلهه على جسمي وهو يضحك ويكولي صرتي مثلي غركانه بي ونكسه وكسرها يم راسي
بعده ..بعده صوت كسرها وصياحي من خوفي منهه بساعتهه واني جوه ايده بعده براسي يدك لليوم مانسيته .. صرخت لحد ماتيبس بلعومي وتوسلت وردت منه يعوفني وماعافني ...

صرت ابجي واني اكللهه ....
- هو تقربلي بابشع طريقه بابشع من كل بشع تعودت عليه بيهه .. جان ينبت اظافره بكل ايدي وجتفي وبطني ورجلي وبعدين ينبت اسنانه بنص زندي وصدري وهو منبت اظافره برجلي اثنينهن
ويضحك ويتلذذ بكل صرخه الي ووجع
كل مااصرخ من شي هو يزيد بالثاني وبعد ماكمل عافني وطلع قفل الباب
قفلهه والله ماخلاني اطلع حتى اغسل
ضليت اصرخ واكسر كلشي موجود يمي ماتحملت اضل بهالقذاره ريحته وهالوصخ كله بيه دمرني وضليت بهالحال لحد ثاني يوم ومادري شجان صبح لو ظهر كلشي مادري عقلي فصل بساعتهه عن كل شي وباقيه بكعدتي نفسهه بين اكوام الكزاز وبين مافتحوهه وتاكدت طلعو رحت سبحت .. سبحت بس ماراح شي كلشي طبع اثره بجسمي
كل الريحه خلتني اتقيء اكثر من مره
والغسل تعبت ايدي ومااكتفيت احس الصار باقي لازك بيه وماراح ارجع نظيفه مثل قبل .. وجسمي جان جاان ازرك كله والله كله مكان اقوى زراكه من الثاني وكله يوجع حتى العظم يوجع وراسي يوجعني وعيوني كلهه تون عليه
ورحت طلعت نمت وماصليت تجاهلت كل اذان وكرهت الصلاه لاني شكد تمسكت بيهه وجنت خايفه من هاليوم وصارلي ماحمتني .. وصار الليل ورجع لنفس الشي يريد الذهب واني مارد عليه
وعاد تصرف البارحه نفسه .. رجع
رجع يغركني من هالبطل ويكسره يمي
ورجع تقربلي بنفس هالوحشيه وراد يحط الكزازه على وجهي راد يشوهه والله راد يشوهه بيهه واني دفعته وانجرحت بمثانتي وهو شاف الدم منهه يسيل وصار يضحك ويجرح بيهه اكثر وجرح برجلي واني اصرخ بس مايهمه شي ابد مايهمه
نزل ايده وفتح رجلي وصار يجرح بداخلهه وبعدين بطارف المنطقه الحساسه جرحهه بالطول وفقدت من الخوف غميت ومن كعدت لكيت نفسي بفراشي والوجع منها مخيطني خياط ماكدرت اتحرك بالكوه تلمستهه ولكيت شاش متيبس بالجلد
مكدرت حتى اشيله والله مكدرررت
وكل جسمي الدم مطبع اثره عليه كله خطوط دم وريحه عفنه ...لوثني بكل شي كدر عليه ..شوه جسمي دكتوره شووهه
لليوم هو متشوه باثار الجرح هذيج بعدهه بزندي موجوده وجوه كلهه موجوده
طبع اثره بداخل وخارج جسمي هو ماااات مااات واني عشت بالموت كل يوم من وره تعذيبه ...

ماكدرت انسى ولا شي ولا تفصيل ولا صوت وحتى الريحه اتذكرهه وارجع اتقيء ويرجع راسي يوجعني نفس وجعه بهذاك اليوم وصوت التكسير يرجع اشوف كدام عيني كلشي رجع يتكسر واسمع صوتي اصرخ بداخل الغرفه ومحد يسمعني والدم بجسمي بعدني اشوفه لازك ولازم اغسله وميروح ولامره حسيته راح ماحسيت اني نظيفه مثل قبل من هذاك اليوم لليوم اني بعدني متوصخه باثره وماينفع وياه ولا غسل ولا شي ينفع ولاااشي

حضنتني واني بس ابجي وهي تطبطب على ظهري وبعدين وخرتني من حضنهه وشفتهه مسحت دموعهه وبعدين مسحت دموعي وكلتلي ...

- تدرين انتي اشجع امرأه عرفتهه
كدرتي تحملين كل هالوجع والخوف والكوابيس بداخلك وتغلبتي عليها هالسنين
وكدرتي ترجعين تواجهين بكل هالقوه والمصداقيه
- بس اني مانسيت كل ليله اني اعيش نفس هذيج الليله واصحى الكه نفسي تعبانه منها بس لازم اقاوم وتعبتني المقاومه ماريد بعد احاول انسى اريد من صدك انسى دكتوره متعبني هالشي والله متعبني
- افهمك ياعيني .. بس راح نخلص منه من بعد هاليوم احنه نحاربه مو هو يحاربنه .. ونتغلب عليه اطمئني
كومي غسلي وخلي نكعد نسولف شويه

رحت غسلت وجهي وباوعت لعيوني الي انتفخت وخشمي الاحمر .. نشفت وجهي
ومشيت واني ارجف احس ببروده بعظامي ماكدر اسيطرلهه وهي انتبهت عليه وقربت يمي الصوبه وخلت كرسيها بصفي وصارت تحجيلي ...

- اول شي اريد تهدأين وتخلين ببالك ان اليوم هو مو هذاك اليوم وهسه هنا امان
حدرك انا اختك وصاحبتك وبرا الشيخ الي كل همو راحتك وهو يحميكي من كل شي هين محد يوصلك ولا يمسك بسوء

- اي بامان اي هالسنه خامسه بعيده عنها وماكو شي ادري ماكو شي

-عفييه هسه احنه كلامنا بامان وراحه وتعدينا الذكريات .. هسه اسمعيني زين
اول شي اريد تبقين محافظه على قوتك واصرارك لتخطي هالموضوع ..
وثاني شي ... راح نبدأ نعيد تفسير كل الي مضى نقطه نقطه ونستخدم طرق علاج حلوه وبسيطه ونمحيهن لهالذكريات شويه شويه بس اريد تتعاونين وياي وتنفذين الي نتفق عليه

-اي ماشي انفذه

- زين هسه راح اصيح الشيخ حتى نتفاهم

راحت فتحت الباب وصاحته وهو اول مادخل اجه عليه وكف قريب مني ويكولي ..
- تينه يا عيني فيكي شي !تعبتي!
ودك نعاود البيت !!
- لااا زينه
- الحمددلله الحمددد لله ول خلص صبري وانا كاعد انتظر بره
- اسفه
- ماتسوى يا يابه يرخصلك هالصبر

كعد بصفي والدكتوره كدامنه كعدت
وهو جان لابس ستره فوك دشداشته نزعهه ولبسني اياهه وقرب الصوبه كلش يم رجلي واخذ ايدي يدفيهه فوكهه
والدكتوره ابتسمت وكالت ...

- مااظن هذيك الصلاه الكثيره مانفعت ياحلوه

بلحظتهه ضحكت واني ادري بكلامهه صح ..باوعتله وهو يستفهم بملامحه على معنى حجيهه واني رديتله بابتسامه بس
وكملت الدكتوره حجيها ...

- اني ادري ان الشيخ وجوده الك بكل صفات العائله يعني هو النائب عن الام والاب والاخ ولذلك ياحلوه لازم يطلع
على طريقه مجرى العلاج حتى يساعدك بيها .. افهميني بالاول عزيزتي ان الصراحه هنا هي كل العلاج .. يعني
لا تخجلي ولا ترفضي لاستماعه للنتائج الي نتوصلهه

- لااا دكتوره ماتفقنه هيج كلتيلي سرنا واحد
- وانا عند كلمتي سرنا واحد لكن انا حكيت نتائج فقط
- يولو ليه بتضميها عني هيك ! عينك عينك ..
- شيخ عفيه
- ول شوو شيخ شوو !!! انا معك انا مرآتك وش يضرك لو دريت بالي تحكيه معها !! بتخافي ولا تخجلي مني ؟؟؟؟
- اخجل
- ولييه الخجل هذا علاج وش الخجل فيه
- ماكدر عفيه لاتضوج مني بس ماكدر
- استغفر الله
- شيخ خليها على راحتها انته راح تفهم من كلامي الك ملخص مايدور بينا
- ايييه بالله عليكي فهميني وش الي دار بهالساعتين

توترت وانتي اترقب شراح تحجيله
وبعدين عدلت نظارتهه وكالت ..

- كل حاله تدهور نفسي نصنفهه لاسم معين حتى على ضوءه نبدا بالعلاج المناسب و بحاله عزيزتنا ياشيخ نسميها
صدمه .. صدمه اثر اغتصاب ..

هو سكت واني نشف دمي من حجتها هيج ضليت اباوعلهه بعتب وهي كالتلي ...
- الصراحه واجبه ياعزيزتي لاتزعلي مني بس هذا لان اثنينكم محتاجين تفهمون هالطريق منين بدا ووين مجراه وبالاخص الشيخ اظنه محتاج لمعرفتهن اكثر منك

باوعت للشيخ وهو مسح وجهه وبعدين كال بصوت هادىء ..

- كيف اغتصاب ! هي متزوجه يعني وش تقصدي مافهمت

ردت اكوم وهو ضغط على ايدي وكعدني وعيونه دم صارن ومن خزره وحده منه رجعلي رجفتي وكعدت .. والدكتوره كالتله ...

- كل علاقه جنسيه ان تمت بالرفض من طرف الاخر هي اغتصاب وان كانو متزوجين مايحلل التقرب بالرفض ان لم يكن على وفاق وتبادل وباكراه الاخر هو اغتصاب ماله اي معنى ثاني

- زين و كيف هيك شي اثر بهالمدى عليها !! كيف يعني كيف هيك وصلها لهالحال !!!

- انته شنو تعرف بالضبط عن حالها قبل

- الي اعرفو ان كان في اثنين زوجها وولد عمو كانو مأذينها ولكن ماعرف كيف كان هالاذى الي اعرفو كانت محبوسه عندهم شهور

- وهو فعلاً هذا الي صار ولكن بتفاصيل اكثر

- زييين هالجحش الثاني الي مع زوجها كان الو دور بهالحال ؟؟؟ لمسها !!!!

- لا لا تطمن من هالناحيه ماصار الي بالك .. الصار كلو كان من زوجها بس
واظنو كان كافي حتى يبعدو عنها
المهم .. خلي نتفاهم بطريقه العلاج

- استغفر الله الصبر ربي الصبر .. كملي يابه كيف هالعلاج

- تمالك اعصابك شيخ ..انا حكيتلك حتى تعيد موازينك على اساس ان محبوبتك
تحتاج لمراعاه خاصه ان كدرت عليها وتحملتها فطلبي منك تبقى قريب منها وطلبي منها ماترفضو لقربك
وان الك اسبابك برفضو ومعاوده حساباتك فاتركها من هاللحظه حتى اخليك بعيد عن خطه العلاجيه

جانت دموعي تنزل من خجلي بهالموضوع وياه ومادري ليش هي مصره انها تربطني بي وتوضح حبه كدامي رغم مااظنهه ماتدري اني رافضته
ومااكدر عليه ..

ضغط على ايدي الي ماعافهه من لحظه ما كعدني وكال بصوت قوي ...

- محبوبتي شأنها عندي عالي ويخسى هالشارب ويتنكس هالعكال لو رفضتها ودرتلها ظهري .. انا الي حبيتها واختاريتها بكل تعبها ومرضها وداريتها كبل وماتفرك عندي الحين بشي كلو هو انا احسبو شويه تراب وشوائب نمسحو وترجع يضوي نورها

- كفو والله .. ماعندي شك بيك بس ردتها تسمع وتوعى بنفسها ..ان علاجها يبدأ بيك وينتهي بين ايدك

باوعتله وهو مد ايده مسح دموعي واني ماعرف شنو هو هالاحساس الي تملكني بلحظتها من سمعتهه تكول يبدا بيك وينتهي بين ايدك .. حسيته هو المنقذ والخلاص من كل هالجحيم الي ادور بي كل يوم من عمري ..

ميلت راسي على زنده وهو بايده الثانيه قربها ومسح وجهي وتلمس خدي بحنيه
والدكتوره كالت ....

- اسمعييني يابنتي .. اولاً الحياه فرص
وتجارب .. مااخذتي فرصتك بالاولى لكن حدرك الثانيه الي تمنيتيها .. وانتي اول ما ينقصك هو تغيير مفاهيم بعض الاشياء ونظرتك الهم .. انتي كدام عينك الي تطلبيه مني بس حاولي تشيلي الغشاء عن عينك وتدحكيه كيف فاتحلك ابواب الراحه الي تتمنيها ... فضلاً عن كونه يحبك ووفي الك هو الوحيد الي ساعه يكون حاضر عندك وكت تعبك وهلوستك تهدأي وتأمني وتنامي بعد طول وجع وصراع مع النفس ..ولا تنسي بفضل اصراره وتشجيعه الك انتي قررتي تواجهي وتتركي التناسي والهروب
كدر باهتمامه وحرصه معك ان يتلاحك لهالوضع كبل مايتفاقم .. احرصي على ان تبدأي بتغيير المفاهيم بالاول لانها
اللبنه الاولى ببناء اساس الحياه الجديده الي راح نسعى لوصولها من هاليوم ان شاء الله ...

هزيت راسي بموافقه لكلامها لاني جنت مستعده اسوي اي شي بس اخلص واطلع من الدوامه الي تسحبني كل ليله لداخلها
وترجعني مرهقه ومسطوره ومضيعه مفاهيم الدنيا كلها ...

كملت حجيها وكالت ...

- هسه احب اوضحلكم ان الصبر وطولت البال مهمه .. لان العلاج راح ياخذ فتره من ست اشهر الى عشره هاي اذا كانت متساهله ومتعاونه وتنفذ الي نتفق عليه
اما اذا تهاونت ويه نفسها وتراجعت فالعلاج يطول لاكثر من سنه

- لااا ان شاء الله تداوم على العلاج ومانترك شي منو

- ان شاء الله .. هسه راح نقسم المشكله على عده اجزاء ونصير نبدأ بتفكيكها جزء جزء على مدى هالشهور ...
واول ما نحتاجه للبدء هو الاختلاط
يعني شوفو اي طريقه تكدرون تبقون سوه بيهه وتبعدهه عن الوحده والهدوء
حاول تخليها مختلطه مع اشخاص هي تحبهم ويونسوهه خلال يومهه واتركي
فرط النشاط هذا الي متبعته .. التجيء للراحه الجسديه قدر الامكان ....
حاولي تبقي وكت النوم احد حدرك بنتك او شخص قريب انتي تختاريه ...
واخيراً ... انزعي السواد...

وخرت راسي من ايده وكلتلهه ...
- ليييييش !!!!
- انا الي اسالك لييييش لابستو وانتي بعمر الورد !!!
- تعودت عليه ماكدر انزعه
- كلمه مااكدر هييين احنه اختصاصنا نمحيهه فهمتي !
- ههه ايي ادري بس عوفي السواد مو هسه بعدين
- شيخ هاذي مهمتك الاقناع انته الي تكدرلو انا علي اعطي النقاط واوضحها
- سهله يابه سهله والله انك حكيتي الي صارلي سنين انتظرو .. ابشررري كلو تم
- عشت والله هيييين الحكي الي يريح الكلب ويسر الخاااطر

هو ابتسم بمكر وهي كالتلي ....

- احفظي هالوصايا ونلتقي بعد خمس ايام وان دخلتي هين بالاسود مااستقبلك بصراحه .. لانك هيك تتعبيني بدون فايده
-الله كريم

تشكرها الشيخ وطلعنا وهي كاالتلنا ..
- لو انخطبتو اعزموني احب الافراح انا

ضحك الشيخ بعالي صوته وكللهه ...
- والله مايحضرها احد كبلك وتشهدي بكل حذافيرها

باوعتله وفاتحه حلكي وبعدين كلتله ..
- شووو بكيفكم تقررون
- عجل تعارضي !
- اي شنو بعدني مارديتلك جواب
- بترديه وين تروحي هين انا مكابلك وكاعد ودك عمرين اصبرو واخذك

ضحكت وهو نزل قبلي ونزلت وراه وهو يصوفر ويمشي ومرتااح مبين ولا هامه شي واني كل كلمه احسهه هالكبرهه عندي ...

كعدت بالسياره وباوعتله وهو ضل صافن بوجهي كلتله ...

- كالتلي راح انسى .. اكيد هالشي؟
- مااخليه ببالك والله ومو البدوي الي يخلف بكلمتو
- واثقه بيك شيخ
- ايييه انا داري ثقتنا متبادله وعابره حد الكلام ...

دحكي كيف كل ماتثقي بحكيي وتمشي وره شوري بتعاودي تضحكي
هاي اليوم جبتك هيين متوتره و زدتيني خوف عليكي ولكن طلعتي منتصره واخذتي زمام الامور كلها بيدك
- هههه الحمدلله .. شكد جنت مستصعبتهه وعشتهه لحظات صعبه بس من ساعه الي دخلت وكعدت وياي خف كلشي وحسيت ان الوضع عادي
- الحمددد لله دحكتي كيف وجودي حدرك مهم !! دحكتيه ولااا لااااا !
- ههههه دحكتووو والله
- ايييه عجل فكري فكري الوكت يمشي

هنا اني يغلب عليه السكوت احير بين جهتين ... بين الي ادري ان قربه الي منفعه وبين الي اخاف من اثار هالزواج على كل طرف حتى عليه اخاف يتعبه مني ومن ام جراح ..

وصلني البيت وراح .. اول مادخلت اخذت الحبايه ونمت ومن كعدت سمعت صوت هوسه بره .. طلعت وشفت الشيخه هنا ويه جراح ورماح وغاليه وكاعده بينهم ...
رحت كبل حضنتهه وبوستهه وكلتلهه ..
- شيخه ليش مكعدتيني من شوكت اجيتي
- ما صارلي زمان .. ودريتك تعبانه خليتك تنامي براحتك وش عندي انا كاعده مع الولاد

بستهه ورحت للمطبخ سويت العشه لان جانت دنيا مغرب واني طولت بنومتي

تعشينه سوه وهي كلتلي الشيخ موصيهه تبات يمي وضلينه سهرانين ناكل حلاوه وفواكه دائماً الشيخ يدز مسواك كامل للبيت كل يومين والفواكه كلها من مزارعهم يدزهن بسلال بحيث مايوم حسينا بتغيير الوضع الاقتصادي بالبلد
ولا نقص علينا شي كل هالسنين ..

فرشت للجهال بالكاع يمي بالغرفه واني والشيخه على الجربايه نمنه ..

والفجر كعدنا صلينه اني وياهه ومن حطيتلهه الريوك هي كالت ....

- يا حركه كلبي عليك ياولدي لا اكل ولا نوم ولا راحه مثل هالعالم
- اسم الله شيخه ليش هالحجي خير شصاير؟
- عجل ماتدرين كيف حالو !
- لا والله هو اشوفه زين ليش احجيلي شبي شصايرله
- تارك البيت من وره حرمتو ام حنظله
سوس البلا الله لا يرضى عليها

#شقراء_بغداد

بارت_٥٢


- يا حركه كلبي عليك ياولدي لا اكل ولا نوم ولا راحه مثل هالعالم
- اسم الله شيخه ليش هالحجي خير شصاير؟
- عجل ماتدرين كيف حالو !
- لا والله هو اشوفه زين ليش احجيلي شبي شصايرله
- تارك البيت من وره حرمتو ام حنظله
سوس البلا الله لا يرضى عليها
- هاا متعاركين مثل كل مره
- لاااه هالمره غير .. ماسمعنا غير صوت صريخها من فوك وطلعنا دحكناه مكطع عليها العكال ومخليها تتلاهث بالنفس وهو بركاااان هايج الي يطخو ينفجر بوجهو
- الله يهدي باله ويريح كلبه .. وينه هسه لعد اذا عايف البيت
- كاعد بديوانو اكلو ونومو كلو هنيك
حتى ثيابو ياخذهن له جراح من السته الصبح اول مايصحى ياخذلو الثياب ويرجع الي نزعهم ومايرضى يعتب البيت توسلتو يابني برضاي عليك خلنا نتفاهم هاذي حرمتك لكن هو حكالي لو عتب خيالها كدامو يحركها بارضها
وكلو منهااا ااااخ يالبهيمه الي بلااايه عكل
سودتلو عيشتو
- خليها شيخه هي مو صغيره وواحد يعلمها شلون تتصرف .. واحنه هم تعبنه من كثر الحجي وياهه بس هي هاي ذبتهه
بعد شنسوي ... واني بعد احضرله الاكل للشيخ وادزه اله لا يضل بالج ياعيني
- ماتكصري يابنيتي لكن اناا ودي افهم وش سوت وهيك خلص صبرو معها !!
- شيخه هاي اسرار بيتهم محلوه نتدخل بيهه وتصيرلنه موضوع نقاش خليهم ان شاء الله يرجعون يتفاهمون

تريكنا وجان اليوم جمعه مانروح للشغل
وضليت ويه الشيخه كاعدين نسولف وهي كل شويه وتتحسر على وضع الشيخ
بعدين رحت للمطبخ ... وطلعت دجاجه قطعتهه وخليتهه تتحمض وكعدت سويت برياني مثل مايحبه الشيخ .. كثير بهارات وحار شويه ومكثر بي الدارسين والبتيته وبدون كشمش وقليل فستق ...
طبخته وكملته واخذت الدجاج صفيته وكليته وحضرت الزلاطه والطرشي وكاسات الروبه ورتبت كلشي ودزيت جراح يكوله
معزوم على الغدا يمي ومنتظرته ..

الشيخه كيفت لان راح تشوفه وتكعد تاكل وياه تكول من يوم الي طلع هي ماتشوفه بس بالليل تروحله شويه للديوان وترجع

مديت السفره وصبيت الاكل وانتظرناه لحد ما اجه .. دخل مبتسم وكال ..
- يديم الله هاللمه .. شلونكم يابه
- الحمدلله شيخ انته شلونك
- بخير والحمدلله
- تفضل دننتظرك

ضحك ونزع عباته واليشمغ وكف ردانه وكعد وباس راس الشيخه وتطمن عليهه وهي تبوس بي وتشمشم وتكوله ..
- لا تكطع بامك ياوحيد كلبهه
- ابشري ياتاج هالراس انتي واعذريني
بعيد ومكصر بحكك
- معذور ياوليدي لكن لاتحرمني هالصوت الشجي
- ابشرري ابشرري على هالخشم تآمرين

ضحكو وبدينا ناكل من بعد ماهو مد ايده واكل وبأول لكمتين كالي ..
- تسلم يدك والله اجه بوكتو
- الف عافيه

باوعلي وابتسم وكمل اكله وخلص كل ماعونه وقطع الدجاج الي عنده وهو مايحب احد يزيدله مره ثانيه بالاكل
جان يكول .. ان هذا ماعونه حكه لايزيد ولا ينقص .. يعني لا يرجع منه ولا يطلب فوكه ... فلذلك اني تعودت ان
الماعون الي اعرف يصير كدام كعدته
اخلي جبير وامليه اله ....

الجهال ساعدوني بلم السفره واخذتلهم الجاي وضليت كاعده يمهم لان ادري الشيخ يطلع مايطول وردت اسمع اخباره
وهو يسولف ويه الشيخه ويشرب جايه
ومن كمله وكف وكالي ..

- تينه طالبك بكلمتين
- اي شيخ صار

راح لغرفتي ورحت وراه وهو جان واكف ومخلي ايده وره ظهره وضل يباوعلي وبعدين كالي بصوت هادىء عكس الي جان عليه قبل شويه وياهم ..

- طمنيني عن حالك
- زينه لا يضل بالك
- بتاخذي ادويتك بوكتها ؟
- اي اخذها
- زين وحكي الطبيبه وش صار عليه !
- اي وحده منهن تقصد
- السواد يا يابه ما ودك تنزعيه ؟
- ممكن نأجلهه شويه
- لاااا
- بس شويه كم يوم مو اكثر وداعتك
- ليه وش يغيرو هالكم يوم !!
- اممم بالي شغلات اريد اسويهه يلا
- ماتحكيلي عنها ؟
- طبعاً احجيلك وهو اني اكدر اضم عليك
- اييييه كدرتي يولو هالحكي ما بصدكو
- لاا عفيه هذاك وحد
- كلو واحد ياتينه ماينفع هالحكي
- يعني بعدهه السالفه بالك ؟
- كلمه كلمه تدك بهالراس ياتين
- بس يعني انته مو فهمتها بعد شكو
- هه هو لاني فهمتها هييين اناا مصيبتي
الحين خلك من هالسالفه .. اييمتى تنزعيه للسواد ذبحتيني فيه
- كم يوم
-لااااا ماينفعو .. ماتنسي ان عندك اربع ايام ضاله للجلسه ولزوم تمشي وانتي مغيرتو ..شو نفع التاخير هين يولو !!
- لعد اذا هيج اني عندي حجي وياك
يعني يرادلنه كعده
-اييييه؟
- اي شوف وكت فراغك ونكعد نحجي
- ونخلص منو؟!
- اذا تفاهمنه اي
- زين عجل هالليله امرلك وان ماكدرت بكرا بحيل الله
-على راحتك شيخ اخذ وكتك
- زين .. ضلي حدر امي ماتتركيها تمشي من هين
-صار تدلل

تبسملي وبعدين طلع ... رحت كعدت ويه الشيخه وهي ضحكت وكالتلي ...
- والله يهالحريم لعبتن بولدي والله
وحده تصعدو للغيم وتربيلو جنحان ووحده تاخذو لدروب جهنم

-ههههههههههه
- بتضحكي يولو عجل ما تخفيها معو
-هههه شيخه هو اني هسه اريد احجي وياج بهالشي
-هااه اييه بالله شو عندك احكي

تربعت وتقربت يمهه ولزمت ايدهه ونزلت عيني وحجيتلهه بسرعه ...
- الشيخ طلبني للزواج
- يااهلساعه المبااااركه ايييه كيف هيك
- ههه مادري هو هيج كبل حجاهه الي وكالي اخذي وكتج ورديلي جواب
- وللحين ماردتيلو ؟
-لا بعدني
- وشتنتظري يولوووو بتعلي كلب ابني انتي الثانيه
- شيخه مادري خايفه
-لييه بعد خايفه!!!
- يعني ادري الشيخ رجال شهم وماكو مثله ومايقصر وياي بس ام جراح شلون!! اخاف حتى جراح يتغير بعد هالزواج ويصير يضوج منا .. اني مااجيت حتى اخرب بيته وعائلته بس المشاعر اخذت طريق ثاني واني ادري
لو شكد مااتجاهل هالموضوع هو يبقى
ماينسي .. محتاره شيخه عفيه دليني الصحيح
- دحكي يابنيتي .. انا من سنين تمنيتك
تصيري حرمتو لاني مادحكت ولدي
مرتاح بعيشتو مثل مادحكتو من يومك معو.. لكن هين ماعلينا بالامنيات علينا
برغبتك ... انتي اخذتي زواجك الاول مو بقناعه تامه وما ودي يصير الثاني مثل الاول .. دحكي كلبك وعكلك وش يختارو
وامشي عليه ... وماعليكي بحكي حد مننا
لانك لو ماتنسعدي بهالزواج ماراح تسعدي ولدي وانا هين ماارضاهه منك

صفنت بحجيها شويه وبعدين كلتلها...
- راح اخذ بحجايتج شيخه واشوف كلبي وعقلي شيقررو واخصم هالسالفه
-ايييه عيين العكل يايمه

هي راحت نامت واني ضليت على كعدتي وافكر بالسالفه ... وراجعت كل
ذكرياتي وياه وكلها جنت اقارنها بايوب
واكثر شي جنت اسأل نفسي لو رجع ايوب بحياتي راح يكدر يصيرلي مثل الشيخ ؟ راح يكدر يتحملني بتعبي هذا ومرضي ويتقبلني بي ؟؟؟
ياترى الوطن هالمره راح ينطيه وكت الي ويتفرغ لاهتمامه بيه خلال هالفتره لو على اي ساعه يكولي انتظريني عندي شغل الوطن يطلبني ولازم البي ؟؟؟
وراح يفضلني هيج على زوجته واولاده ويحارب كل اهله وتقاليده علمودي ؟

ماخلصت من التفكير وماعرفت اتخذ قرار واجه الليل وكملنا العشى ودزيت للشيخ صينيته وتعللنا وجراح راح لبيتهم لان باجر عنده دوام والشيخه هم جانت هناك تطمن عليهن وبعدين رجعت نامت يمي واني عيني مااخذت نوم ...
جنت اقارن بين كل تفصيل مر بحياتي قبل ماادخل حديثه وماعرفت اتخذ قرار

متمدده بفراشي وسمعت اندكت الباب
مال كليدور .. عرفته الشيخ اجه رحتله
وهو جان منطي ظهره للباب ..
اول مافتحته واندار باوعلي وابتسم وهو بعينه هذيج اللمعه نفسهه ...
هنا عرفت اني اتخذت القرار من كالي ..

- داري ان الوكت متأخر لكن ماهان علي اترك طلبك ومالبيه بنفس يومو

ضحكت وكلتله ...
- الوكت كله الك شيخنا ،،تفضل
- لاا خلنا نطلع نتمشى ..امنت الدرب لناحيه البستان عند كعدتنا ودي هنيك نكعد ونتسامر هالليله
- صار تدلل ..بس انتظرني دقيقه
- على راحتك

رحت لبست شالي والعبايه واخذت بعلاكه كليجه وطلعتله ..
مشيت بصفه وساكتين اثنينه وهو اخذني من وره بيتي وكبل كله مشينا وبعدين افترينا من وره بيت الفلاح ودخلنا البستان .. وجان الطريق فارغ ماينسمع بي بس صوت خطواتنا والحشرات ..

وصلنا وشفت المنقله مشتعل بيهه الجمر وعليهه الدلات وبالنص كدام الفراش محطوط خشب مكسر ومشتعله بيه النار
وهالمساند الحمر نفسهه بمكانهه موجوده

الريحه الدافيه وصوت طكطكه الخشب وهو يحترك وصوت الهوا الي يحرك بالاشجار من داير مدايرنا جان كفيل بأنه
ينطيني راحه وسكينه تخطي على كل تفكيري بهاليوم وتمحي كل وجع راسي

كعدنا وهو قرب المنقله كدامه وصار يشوف الكهوه وبعدين صب فنجانين
وانطاني واحد .. تبسمت وشكرته
وشربناهن بنفس اللحظه ورجع كررهن
وهم شربناهن وبعدين قدمتله كليجه
ضحك واخذله اثنين ورجع ظهره على المساند وصار ياكل ويباوع للنار
واني هم رجعت ارتاجيت وصرنا اثنينا نباوع للنار وساكتين ونسمع صوت طكطكه الخشب ..
كسرت هالسكوت وكلتله ...
- احب اجواءك الي ترتبهه بدقه وهدوء
- لاني احب وكت اكون حدرك هيك يكون الجو وكنت اتمنى تطلبي هالطلب
من زمان ..لاني مفكرلو بهيك جو وكت نحكيه
- وانته تعرف شنو اريد احجي ؟
- حاس فيه لكني حاب اسمعو منك
- هههه
- شو

ضحكت وهو باوعلي ورجع راسه وميله لناحيتي وصار يبتسم ويباوعلي ويكولي بهدوووء وصوت ناصي ..
- شو ودك تحكيلي
- اختاريتك شريك لعمري ياشيخ

تحولت ملامحه لصدمه وكالي ..
- بالله عليكي !!!
- والله
- عيديلي بعد خلي افهمو لمكصدك عدل
- اريدك شريك بعمري .. موافقه نتزوج
- يالله .. دخيل اسمك ..

عدل كعدته وصار يكولي ..
- تينه انا ما ودي توافقي هيك بسبب حكي الطبيبه او جايز امي حكتلك شي ما مستعجل انا والله
- شيخ

اخذ نفس قوي وكالي ..
- يا عينو
- تسلملي هالعين .. اني حجيت ويه الشيخه صح .. بس هي كالتلي شوفي كلبج وعقلج شنو يكولج واختاري
- اييه. !
- واني اليوم كله افكر مابين عقلي وكلبي وتفصيل تفصيل فكرتله وماقررت بس بصراحه .. للحظه الي طلعت وفتحتلك الباب وشفتك هنا قررت
- يعني من الي منهم اختارني ؟!

- وعيونك اختارك عقلي وكلبي اثنينهم مطمئنين الك وما يفضلون غيرك

دنك وصار راسه بين ايديه وبعدين رفع راسه واخذ نفس وزفره قوي وصار يضحك ويباوعلي ويكولي ..

- يا راحه عمري وثمار سنيني اطلبي
اطلبي وش تريدي يجرالك لخاطر هالفرحه اطلبي البيكي والله البيكي بماي عيني بس اطلبي
- تسلملي عينك .. طلبي هو بس تصبر عليه ..ادري اني اتعبك وادري قراري ما يرضيك بس اريد تسمعني شويه
- احكي براحتك ياتينه شيخك ما يغثو حكيك لا والله
- يخليك الله الي ياشيخ ..

درت وجهي عنه وهو كالي ...
- كبل ماتحكيلي شي ودي اطلب منك
تنزعيها لعباتك هين .. ودي اكمل كعدتي معك بحريتك وبراحه هين وسط العلن
وماعليكي مايدحكك هين حتى الطير

ضحكت ونزعتهه هي والشال وفريت ظفيرتي على اليمنه وضليت مدنكه والعب باطرافها وهو رجع راسه مثل قبل شويه وضل يباوعلي وهادىء ..

كلتله واني اباوع للنار...
- انته تعرف اني بديت بطريق جديد وبعدني باول خطوتين بي .. اصارحك
بأني ماعندي هسه الشجاعه الكافيه حتى اكمله بس اني متأمله ان استمد شجاعتي منك بباقي الايام واكمله لذلك احجيلك اول
اصبر عليه شويه لان اكو فد نقاط صعبه عليه فوك ماتتصور هي صعبه

- احكيها وش هي

- يعني ماعرف هيج احجيها بس اكولك
اني راح اراعيك من كل ناحيه واشيلك بعيني بس بالعلاقه الزوجيه يعني هنا
ماكدر والله اسفه ادري يضوجك هالشي
وممجبور عليه بس اني داصارحك بكل
شي ..
لاني اريد اكون وياك مثل صلاتي
لا اخاف ولا اجذب بيهه ..

باوعتله وهو ابتسم واشرلي براسه ان اتقرب .. قربت راسي شويه كدامه وهو دنك وباس راسي من منبت شعري
بهاللحظه حسيت برجفه بنص ضلوعي صارت بلحظه ولحظه الثانيه خفتت
رفعت عيني باوعتله وهو يبتسم وكالي بكل هدوء ..

- وظنك انا مو داري هالشي !

رفعت حاجبي وباوعتله مستفهمه .. وهو كالي ..
- كنت ادري انك راح تطلبيه ولكن الي مادريت عنو وفاجئني وفرحني وعطاني الصبر والقوه لحتى امنحك اياها وكت تحتاجي لها هو تشبيهك لي بصلاتك
كبير هذا التشبيه ياتينتي كبيير
ما ينرد لا والله ولا بيوم تلاكيني غير
الامان الي تدخلينو بنطقك ل الله اكبر
هيك انا اصيرلك ما تهمي و لا تحسبيها
شي يزعجني بالعكس انا رايد اتعبلك
واحصل كل شي منك بصبر وتأني

- يشهد الله الامان الي احسه وياك يعادل امان الصلاه

- فخر هالشي لي والله انه فخر .. افخر بنفسي انا ساعه الي ادحكك حدري تأمني وتنامي

تبسمتله بخجل وهي اشرلي اتقرب بصفه
وكالي ...
- خليه لراسك هين على كتفي ودي احكيلك شي

جنت متردده بالاول بس هو ضل يأشرلي على جتفه ويكولي يلا لحد ماتقربت منه وخليت راسي على جتفه الايمن وهو شال ايدي وخلاهه على زنده ورجع راسه على راسي وصار يحجيلي ...

- دحكي كيف هالهدوء هين يريح النفس
وريحه الشجر والتراب المبلل مع دفو هالنار حدرنا هيك تخلي الصدر منشرح
والفكر هادي ومرتاح
-ايي ماكو احلى من هيج جو
- انا عندي ساعه الي ادحكك حدري
هالجو كلو يعيد نفسو ويملي ريتي من هواه وريحتو .. واسكن بهدوئي
وحك عينك ياتينه ماكدر على هالهدوء معي حد كبلك .. انا لا عشكت ولا راح اعشك حرمه غيرك .. انتي بديتي هالحب بهدوء وسلاسه وهيك انا ودي ابدأ زواجي معك ...

رفعت راسي وباوعتله وكلتله ...
- يجوز يطول تصبر عليه

ركز نظره بنص عيني وكالي ..
- ما ودي زواجنه تقليدي ياتينه .. ودي
اعيش معك زواج منفرد بكل تفاصيلو
صح انك عاشرتيني هالسنين لكن دحكتي
معك الشيخ بس مادحكتي خالد

ابتسمت وكلتله ...
- اذا الشيخ هيج اخذ عقلي خالد لعد شيسوي

ضحك واني كلتله ..
- يا بختي بيك

رجع بوس راسي وخلاه على جتفه وكالي..
- انا محتاجك ياتينتي جايز اكثر منك
- ليش ياعيني
- ثلاثين سنه عدت مادحكت منهم سنه لنفسي والعمر عزيز عند بن ادم ياتينه
- اعوضك عنها وعد .. دامك اختاريتني لنفسك وكلبك ماتلكى غير الي يسرك
واني افرح لو حققته الك هيج احس استاهل صبرك
- وانا واثق وداري ان سعادتي ماتكون الا بيدك وحدرك .. تينه انا ودي نبني حجر جديد ومختلف بأساس زواجنه
كل شي كل تفصيل منو ودي اياه مختلف عن كل هالناس .. انا الي علي اصبر معك لوين ماتحبي وعهد رجال ماتدحكي مني شي يخل بطلبك .. وانتي مثل ماعودتيني كل شي تفكريلو وتدبرينو
لي هالمره بعد فكري بكل تفصيل مختلف
واطلبي الي تحتاجي له ماتلكي غير يتلبى
- صار تدلل .. ان شاء الله ابني هالزواج على كل مايبهرك ويرضيك
-ان شاء الله واثق انك تكدري عليه
-بعد شنو بالك
- الي ضل هو شي صغير احكيه لك بيوم عرسنا

من ذكر كلمه عرسنا حسيت بكلبي دكاته سرعت وضليت مبتسمه بخجل وساكته
وهو قرب من حلكي قطعه كليجه ..
اخذت عضه منها وهو اكل الباقي وكالي ..
- اول ما مشى فيي هو حب طبخك ونفسك بالاكل وبعدها بدت رحمه الله
-ههههههههه
- وهاذي الثانيه كانت بدكه الحنك تطبعت هين صوت وصوره بهالبال
- ههههه والراء الثالثه

-لااااا هاذي كانت كبل الاكل ايييه نعتبرها صفر واحد اثنين هههه نحسبها باعداد طبيعيه
- هههههههه ينراد تعيد حساباتك شيخ
مانقبل الغلط احنه المحاسبين
- هههه زين عجل عيدي احكيلي ابو جراح

ضحكت ورفعت راسي وضليت اباوعله وكلتله ..
- ابو جراح

ضحك بعلو صوته وكالي..
-هاذي واحد

واخذ كليجه اكلها وكالي ..
-هاذي اثنين

واني ضحكت من كل كلبي على حركاته
وهو كالي..
-هااذي الثالثه هييك رضيت ياحضره المحاسب !
-ههههه اييي رضيت
- بس هو التعداد ماخلص لكن ياخذ وكت خليهه بعدين كل يوم من العمر اعددلك منو
- لعد راح احفظهن بعقلي حتى احسب شكد شغلات وكعنك بالحب هههههههه
- مابيخلصوووو يولوو بالله ماينعدو

ضحكت وهو كالي ..
- من رخصتك يابه اسمحيلنا
انا وكلبي ودنا ننام بدارنا

نزع عكاله واليشمغ وتمدد وخله راسه بحضني وضل مغمض واني صارت ايدي ترجف بس بشعور بي نوع من الفرح والمفاجأه والاستغراب ..
جان شعره متنثر على كصته ويتحرك شويه بالهوا لانه حييل ناعم ..
قربت منه ايدي الترجف ماكدرت اسيطرلهه بس ماقاومت رغبتي بملمسه
وتلمسته ورفعته ..
فتح عينه وباوعلي وابتسم وكالي ..
- ضلي هيك لحين مااغفى
-صار

ابتسم وضل مغمض واني امشي اصابعي بشعره وهو شعره ناعم ضليت اجيبه منا اوديه منا لحد ماغفى ...

مديت ايدي واخذت الفروه الي هو دائماً بالشته بالليل من يمشي شايلهه بايده
وهي لونهه جوزي وعريضه مثل العباه بس مبطنه وثخينه .. فتحتهه وغطيته بيهه
وضليت اتلمس شعره واباوع لمعاني وجهه ...

لاول مره ماينام وهو عاكد حواجبه وضاغط على فكه بقوه تبرز حدوده

جانت ملامحه مسترخيه وفاتح حلكه شويه وايده مخليهه على صدره براحه
مو متجتف مثل كل مره ..
كل شي بي جان يوضحلي شكد مرتاح بقربي .. واني بداخلي اطمئنان جبير
ان اختياري هالمره مااندم عليه .. مرتين اخطأت بالاختيار والثالثه احسهه هي الاصح ...

مااكدر اجزم اني حبيته وملكته كلبي بس اكدر اجزم على اني مرتاحه باكثر مره بعمري ...

ارتفع بعد فتره صوت المآذن بتلاوه القران الي تسبق صلاه الفجر ..
وبدت اصوات العصافير باعشاشهه فوك هالشجر تزقزق ... بس الجو بعده اظلم

تلمست راسه وصرت اكعده وهو اول مااخذ نفس عالي وبعدين سحبهه لايدي وخلاهه على كلبه وباوعلي وهو يبتسم
كلتله ...
- راح يطلع الفجر

عرضت ابتسامته وكالي ..
- نعقد اليوم ولا بكرا؟
- ههههههههههههههه بهالسرعه !!
- عجل وش نتاني ياعيني
- على الاقل خلي ننطي خبر للاهل
-امي و تدري من ضل غيرها!
-ام جراح
- هاذي عزلتها عن طاري الاهل ولا تسألي عن سبب
- ماشي زين اهلي يعني لازم على الاقل اكول لاخويه
- انتي حاكيتلو عني
- ايي حاجيتله كلشي عنك بس ماحجيتله الي صار قبل
- اييه زين عجل انا اليوم اتصل فيه واحكي معو واطلبك منو ولو ودو امشي لعندو من بكرا اخذ عمامي وامشيلو
- هههه بكيفك عيني اتفق وياه بالاول
ونقرر شوكت العقد
- على بركه الله

رفع راسه من حضني وكعد يعدل بدشداشته وهو يلبس عكاله كالي ..
- حكينا بكل شي عدا هالسواد ايمتى تنزعيه ؟
- هههه بيوم العقد شيخ
- ماعديه اكثر من يوم لا والله

ضحكت ولبست شالي وهو وكف ومدلي ايده لزمته وكومني وهو يضحك وكالي
- حكيتلك انا بحبك لو نسيتها ؟
- هههه لا ياعيوني ماسمعتها بس شفتها
- عجل بتكفي ولا اسمعها لك
- هههه لا تعودني على الطمع

انداريت واخذت عبايتي لبستهه وهو رافع ايده ويمدد بجسمه ويكولي ..

- اطمعي وتدللي وتدلعي كلو عطش مامروي لكلبي يولوو

ضحكت ووكفت كدامه ورفعت ايدي عدلت وسط اليشمغ من يم كصته وكلتله
- ارويه لكلبك وبعدين ابدي بيهن

اخذ نفس وكالي ...
- كأنها بدت تصعب يولو .. لاتحكيلي شي وتولعين جمري .. حضري نفسك للعقد ومن ليتلو ابدي حضري نفسك للعرس مااعديلو غير اسبوع المحكمه

ضحكت وكلتله ..
-صاار تدلل

طفى النار ومشينا للبيت ....

#شقراء_بغداد

بارت_٥٣


مشينا للبيت والشيخ دخل وياي ..
شفت الشيخه واكفه تغسل وتفاجأت بجيتنا هيج سوه بهالوكت وكالت ..
- عجل انتو تتسامرو بره وانا افكر وين مشت هالمره بنصاص الليالي !!
- هههه قابل وين اروح ياعيني
- يمه ماتخافي كل ماتدحكيها اختفت اعرفي انها معي
- ايييه وش عليه

كملت وضوئها واحنه واكفين وبس نبتسم وبعدين هو توضينا ورحنه يمهه نصلي
وكملت ورحت حضرت الريوك وكعدنا ناكل وهو على طول اكله يبتسم ومدنك
جان الشيخه تكول ..

- احكيها يابني احكيها وش الي وره ضحكتك هاذي بفرحتك
- هههههههه يمه ولدك عرسو ما بكالو غير اسبوع
- بصلاااااه محمد عليييك يابني !!!
- عجل الكلب وحصلتو وش باكي انتظر ياامي

اندارت عليه وضربتني على جتفي واني بس مدنكه واضحك وكالتلي...
- يولوو ماصبرتيلك يومين بساعتها ركضتيلو
- ههههههههههههه شييييخه عفيييه
- هاااا يمه خييير بتشيشها علي انتي !
ودك اتعلعل ازيد !!
- لااا يابني لكن هيك تفاجأت فيها
- ماتتفاجأي ماانا صارلي كثير طالبها والحييين يلا فكرت تردلي الجواب
- لعد غير واحد يفكر
- ايييه يابه الحين خلصنا ضل عدنا وكت التنفيذ
- يابني اسبوع ! بالعجل ليه ماتصبرلك لاخر الشهر نجهز لعرسكم بالراحه
- وش عندنا يمه فضوها بيومين
انتي الحين خلك من العرس حضري للعقد بكرا بأذن الله
- ووول انته بتجيب اجلي ول انا وش احضر من اليوم لبكررااااا
- بكراا يعني بكراا .. ماتعزمي غير العزاز مننا واحكي مع ام جراح على هالشي واحكيلها ماااودي صووت يطلع
- زييين يابني زيين .. عجل ماتمشين للشغل اليوم ضلي حتى ننزل السوك
- لااا يمه محتاجها هنيك بشغل مهم نكضيه ونعاود من وكت مااتاخر شغله ساعتين
- ايه خلها ببالك ورانه مشيه للسوك ونكضيه اليوم ركضه بركضه
- اييه واركضو هاليوم وش عليه استاهل انا تعبكم
- ههههههه تستاهلو ياعين امك

باوعتله وهو فتل شواربه وضحك وكالي
- امشي ناميلك ساعه وانا اكعدك لتحضري نفسك
- ماشي

اخذت الصينيه غسلتها ورحت لغرفتي وعفته كاعد ويه الشيخه ..
رأساً غفيت وبعدين كعدت على صوت الباب يندك .. رحت فتحته وهو كالي..
- ادري انك ماشبعتي نوم لكن ورانه شغل الساعه سته ونص الحين تعجلي البسي
-ايي ماشي

درت وجهي واني اتقاوب ورحت فتحت الكنتور وطلعت ملابسي وانداريت شفته بعده واكف يم الباب ويباوعلي ويضحك
جان يكولي ...
- اخر يوم لهالثياب هين لاحركهم والله بكرا

ضحكت وخرت عيني منه بخجل وهو سد الباب وراح ..
بدلت بسرعه وطلعت وياه للمعمل ..

اول ما وصلنا ودخلت المكتب كالي ...
- يلا ماتتصلي باخوكي الحين كبل مايمشي
- شراح تكوله ؟
- بتسمعي وكت احكي
- ماشي

شلت سماعه التلفون ودكيت عليه وضليت انتظره يجاوب ومن جاوب وسمعت صوته كبل مديتله السماعه وهو ضحك واخذهه مني ..
اني مدري شجاني حسيت احترييت وتوترت بمجرد ماسمعته يسلم عليه
كبل عفته وطلعت بالممر بعيد عن الغرفه
وضليت اهدء بنفسي ادري من الخجل هيج يصيرلي وصرت افتر بالممر لحد
ماطلع هو من باب المكتب وصاحني
رحتله وكالي ...

- ودو يحكي معك
-يممه عزا شصار
-هههه يولو احكي الحين

رحت شلت السماعه وحجيت ..
- ها حبيبي شلونك
- هلا عيييني هلاا والله
-ههه هلا بيك
- شنو هالاخباار من الصبح عمي ماعرفت هيج الامور مطوره
-ههه هاااي شبيك
- اكلج شيخكم هذا يكولي يريد يجيب عمامه ويجي هنا زين انتي غير تنطيني خبر من وكت داارتب اموري
- والله مادري هي بارحه هيج صارت واليوم حجالك
- وانتي موافقه برضاتج لو صار شي جبرج احجيلي بروح ابويه
-هههه شبيك اي هسه شكو دتحرجني هيج
- ههههه ولج غير افهم شعجب هسه يلا
- مادري صارت بعد هيج احسن واامن الي
- تدرين اني قبلت لان هو حجالي فد حجايه حلوه
-شنو
-كالي .. بيتي هي سنين بحمايتي ماعليهه كلام بس من طلعت وحدهه صار وصالي بيهه صعب واني رايدهه تضل هي وبنتهه باسمي وحمايتي .. والصراحه اني شفت حجيه منطقي وتدرين بيه من زمان ماعاجبتني سالفه الكعده وحدج وكلتله
حجايه وهو ضحك بيهه
- صدك شنو هي
- كلتله اوافق بس بشرط ماتشيخ على اختي تخليهه بعينك
-ههههههههه
- كالي ابشر ههه
- ههههه اووف ياعيوني شلون ارتاحيت بكلامك احلى اخ والله
- تستاهلين كل الخير والسعاده انتي ياخيتي وكليله خليهه بينكم هنا بس تطش السالفه تصير ملحمه للضالين
- زين لعد تعال خلي اشوفك
- شلون اجي ياعيني
- حباب مصطفى شبيك لعد تعوفني وحدي بهاليوم والله ماارضاهه منك
اني شعندي غيرك
- هسه خلي اروح لشغلي اليوم واشوف اذا كدرت اجيج باجر بس ماراح احجي لاحد هنا خليهه تكمل يلا
- بكيفك حبيبي شنو الي تشوفه زين سوي
وباجر انتظرك عفيه لتكسر بخاطري
- لا ان شاءالله اجي ادللي .. يلا لازم اطلع تاخرت
- الله وياك ياعيني

سديته وباوعتله وهو رافع تك حاجب كلتله ..
- يكول خلوهه بينتاكم هناك خاف تصير مشاكل ويمكن باجر يجي
- حياه الله
- اوووف مامصدكه باجر اخيراً اشوفه

شكد جنت اريد التقي بي بس هو مايقبل
وابد مايكولي على السبب
- من خوفه عليكي مايرضى
- اي يجوز

كعدت وصرت اشوف شعندي من شغل
وهو ضل على وكفته ويباوعلي بعدين زفر النفس وكال ..
- بعد ساعه امرلك ونعاود البيت
- اي ماشي

طلع وهو عاكد حواجبه وتغيرت نبرته مدري شجاه بسرعه يتغير مزاجه ..

رجعلي وره ساعه واخذني وطلعنه
وبالطريق كالي ..
- وش مفكره تلبسي ؟
- مادري خلي اشوف
- ودي ادحكك تزهري مثل ماتمنيتك دايماً
- ههه صار
- افتحي هالمحفظه وخذي الي يلزمك لبكرا
- لااا ميحتاج
- هااااا ياتينه مانبطلهااا لهالسالفه
- اي اي نسيت اسفه نسيت

شمر المحفظه بحضني واني فتحتها بس ماعرفت امد ايدي على فلس واحد
كلتله ..
- مادري شكد اخذ انته من نوصل انطيني بكيفك

هو ضحك واني سديتهه ورجعتهه بمكانهه يم الكير .. ومن وصلنا للبيت
وطبك بالباب .. اخذ محفظته وانطاني فلوس وكالي ..
- هاذي دبري فيها اليوم وذهبك انا اشتريه
- لااا شنسوي بالذهب
- ول يابه عجل العروس ماتلبس ذهب ماتاخذ مهر !!
- منو كالك اني مهري اريده ذهب
- ها عجل وش تريدي ؟
-ههههه كلشي ماريد
- لااا بالله احكيلي .. انا ما سألتك عنو لاني مفكر اخذلك طقم ذهب وانتي لو ودك فوكو بنسجلو بالمحكمه ويجرالك
- لا ياعيني تسلم لا رايده ذهب ولا فلوس
والله شيخ ماريدهن مهر
- زين عجل وش ودك احكيلي حيرتيني معك

ضحكت وكلتله ..
- اريد مهري عمره بنفسي تنكتبلي زياره لبيت الله وياك شيخ اذا هالشي سهل عليك

ابتسم وباوعلي وكال ...
- تآاااامرييين ياضي هالعين عجل حرمتي ودها كربي من الله وارفضو !
لا بالله ما ينكالو غير ابشري ..
اول ما نخلص العرس ارتبها واخذك بأذن الله
- تسلم ياعيني
- انتي الي تسلمي على هالنفس الطيبه
دايماً تجيني بغير المألوف .. الحين هذا احسبيه تم وغيرو ؟
- هاهيه بس هذا كلشيي ماريد غيره
- لااا يا يابه اطلبي شي الحين يتنفذ
- عندي كلشي الحمدلله واني طلبت منك مهر غالي وهذا يكفي .. لا رايده الذهب ولا الفلوس كلهن رخاص كدام الي حصلته

ضحك وضل يباوعلي وكال ...
- انا اليوم تأكدت ان ربي يحبني كثير وخلاكي بدربي .. عسى الله يكدرني على اسعادك وحمايتك
- واثقه بيك شيخ

ضل يبتسم بوجهي وبعدين كالي ..
- انزلي وصيحي الوالده وخلي اخذكم للسوك يلا
- ماشي عيني

نزلت وطبيت البيت ورحت كبل على غلاتي شلتهه حضنتهه وهي تجر بخشمي هاي متعلمه عليهه كل مااحضنهه تسوي هالسالفه وتضل تضحك ..

نزلتهه وطبيت حجيت ويه الشيخه وهي جانت متحضره بس لبست عباتهه واخذنه غاليه وطلعنا ...

وصلنا للسوك وراح وضلينه احنه نفتر
اول مااشتريت لبنيتي اخذتلهه فستان ماروني قديفه وبي حاشيه ذهبيه ومدنفش
واخذتلهه طباكات بلونه وهي شايله علاكتهه ومكيفه بيهه وكل مانوكف بمحل
تفتحهه وتضل تباوعلهه وتباوعلي وتضحك ...

واني الشيخه تدورلي وين البدله الي تلبس وياي ثنين وكل شويه اكللهه جبيره والله
وترجع تحجي عليه ماتاكلي ماتسمني ضاله كد زرزور ابني شياخذ منك عظم
وتخليني اخرب ضحك بنص السوك واضل اغطي بوجهي ..

تالي صفيت على فستان طوله ثلث ارباع وردانه تول مطرز منه وبي وهو ضيك من الصدر والحفر مالته بشكل مربع وكلوش من الخصر منفوش
كلت هذا احسن حل ميبيني كلش ضعيفه
وهو كشخه قماشه ملمع وجان بي لونين
سمائي و ازبري .. الشيخه اختارتلي الازبري واخذته ..

واخذتله حذاء كعب ابيض جان عادي كعب كلاسك رفيع وساده .. وكلتلهه للشيخه اريد اشتري مكياج ... اني ماعندي غير كحله ومسكارا واربع حمر جانن وكسرتهن غاليه وضلت عندي بس السحريه هاي مرات احط منهه شويه
واني جنت مقرره اني اخلي مكياجي لان اني وحدي اعرف شأريد ...
ورحت اخذت المكياج وماشات ام الورده الكرستاليه اخذت منهه اثنين وصبغ اظافر مااخذت لان بنيتي عدهه كل الالوان ...

وتسوكنا وقبل مانطلع شفت محل ملابس رجاليه واذكرت الشيخ .. كلت اكيد صعبه على ام جراح ادزله ملابس لخطوبته وتخليه يتكشخ ..

فحجيت للشيخه نروح ناخذله وهي كالتلي عنده وهواي بس اني اصريت اخذله ومااخليه بموقف محرج وياهه ..

ورحت للمحل ضليت اباوع للدشاديش واذكر كل الوانه واتلمس قماشتهن
وتالي اخذتله وحده لون نيلي طوخ ودكمهه فاتح وقياسهه اخذته اضيك من الي متعود عليه حسيتهه راح تترتب اكثر
وضلت العبايه احتاريت مابين الرصاصي المايل للفضي لو الحليبي
والشيخه اختارت الرصاصي وجانت من النوع الثخين .. صار حسابهن غالي والشيخه كملت فوك فلوسي ..
اخذتهن ومتخوفه من اختيارهن لان هو باللبس حيل صعب ارضائه ...

اخذنه تكسي ورجعنه للبيت .. الشيخه ارتاحت شويه وكالت اروح لبيتي واعزم وارتب لباجر ...

سويت غدا خفيف الي ولبنيتي اكلنا ورحت نمت والعصر كعدت انظف البيت وارتبه واندكت الباب رحت فتحتهه جان تطلع ام حسن ..

كبل حضنتني وباركتلي وكلتلي .. اجيت اعاونج بكل شي وماامشي منا الا اخليج كامله مكمله ..

كبل ذبت عباتهه وصارت تنظف وياي
واني عندي تخم صغير بالاستقبال

حطيت عليه تول ابيض وثبته وجان كلشي بترتيب بسيط .. كملنا ورحت حضرت العشه بسرعه وتعشينه اني وياهه لان غاليه عيني هيج وكت ويه جراح ماتلفي بالبيت ...

ومن خلصنه العشه كعدت تحفلي .. اني متعلمه اخلي الخيط برجلي واحف لنفسي بس هي اصرت هي تحفلي وكل شويه تكولي ..
- يولو حبيبه الشيخ لازم تضوي باجر
وتحرك كلووب نسوان الديره كلهااا

واني بس اتبسم بخجل وهي تحفلي وبعدين كعدت سوتلي ايدي ومن شافت اثر الشخوط تعجبت بيهن برغم اني ماردتهه تشوفهن بس هي اصرت واكلتني اكل بالحجي .. اكتفيت وياهه
ب..
- اثر لجرح قديم لا تهتمين اله

سكتت وغيرت الموضوع بس اني توقفت عند هالنقطه ماكدرت اعبرهه واني افكر اني لو شكد ما ضليت خافيته عن الشيخ لابد يجي يوم ويشوفه وهم نظرته مثل نظرتهه تصير ..

جانت ايدهه خفيفه وبسرعه كملتلي
ايدي ورجلي اني مسويتهه قبل ..
تشكرتهه ومن رادت تطلع كلتلهه ..
- لا تكشفين لاحد عن الي شفتيه
- تطمني كأني مادريت عنو
- اذا شفتي جراح دزيه الي او حسن
- ان شاء الله

راحت واني ضليت كاعده بالحديقه واخذتني الافكار لبعيد ..ضليت احاول انساهه واغسل كل شويه واستغفر ربي بس شي يجذبني الهه وشي بمقاومتي يسحبني عنها وضليت هيج لحد ما دخل جراح كلتله ..
- جراح عمه حاجي الشيخ وكوله يمرلي محتاجته
- ايه عمتي تامرين

طلع يركض وركع الباب وراه واني فزيت من صوته وضلت ايدي ترجف واني اضغط بيهه على راسي واحاجي نفسي ..
ماكو شي انسيه تكدرين ماكو شي

بس الصوت نفسه يتكرر براسي
صوت البجي والصياح بصوت مبحوح
وايدي وهي تتشكك اتلمسهه كل شويه وابجي .. مادري شسوي ماعرف شلون اهدأ.. مادري شوكت وشلون اخلص من هالصوت ...

انفتحت الباب بسرعه ودخل الشيخ بس رفعت راسي باوعتله وهو بشبختين وصل يمي وكعد بمستوايه ولزم وجهي
وضل يباوعلي بقلق .. كلتله ...

- هي ذكرتني اني جنت ناسيه

ماحجه شي بس صوت نفسه السريع ينسمع .. مسح دموعي وكالي ...
- وش رايك تنامي على يدي وترتاحي وتهدأي ؟
-لاااا
-لييه ياعيني ..تخافي مني !
-لاا
-عجل شو
- ماكدر استحي
- ول انتي روحي ومن بكرا تصيري حرمتي هالمستحى مايلزم ياتينه .. امشي معي ولا تجادلي يلا انا ماودي حرمتي تمر ليلتها تعبانه

سحب ايدي وكومني واخذني للغرفه
جنت افقد السمع تدريجياً .. لحد ماتمددت كمت مااسمعه شيحجي بس اشوف شفافه تتحرك وماافهم والهوسه الي براسي
تزيد وماصرت اميز صوت عن صوت منها كلها احسها متداخله والنتيجه مثل وشوشه اصوات براسي وجفوني ثكلت

ضل هو مخلي راسي على ايده ويمسد على شعري لحد مانمت ...

كعدت لكيت يمي جراح وغاليه نايمين
والساعه شفتها بالاربعه الصبح ..
ضليت متمدده واتذكر الصار ..
بالاول مافرزنت شي عن شي بس بعدين تذكرتهن بالترتيب ..

كمت غسلت وتوضيت وصليت الفجر
وضليت كاعده اسبح لحد ما طلعت الشمس ..

رجعت لفراشي وضليت متلفلفه ونمتلي شويه واندكت الباب قوي ..
طلعت جان اشوف الشيخه جايه ..
صبحت عليهه وبعدين كلتلي ...
- كفي اكلك واكل الولاد من وكت واحدري عاوني صفيه ضاله لوحدها
ام جراح مشيت لاهلها
- اي صار

راحت الشيخه وطبيت حضرت الريوك
وكعدت الجهال اكلنا وجراح يباوعلي وبعيونه حجي .. وبعدين كالي ..
- عمتي ليه ابوي بيتزوجك ؟
- ااا هووو يعني
- امي كانت تحكي انه عشكان وش يعني عشكان ؟
- ههه يعني شي حلو
- كيف حلو ؟
- يعني هو عنده شخص خاص يرتاح وياه ويداريه
- والحين ابوي يتزوج لانه عشكان ؟
- انته ماتريده يتزوج؟
- لا انا ودي يتزوج لانه حكالي البارحه
انا وغاليه نصير اخوان بنفس الاب وتضل حدري كل العمر وتضل لي انا
ماتاخذيها مني بعد وتصير تسجل وياي بالمدرسه لانو لو ماصار ابوها مايسجلوها مو صح عمتي ؟
- اي ياعيني صح اذا ماصار ابوها متكدر تدرس
- لااا عجل انا موافك يتزوج حتى غاليه تدرس معي ونصير نروح ونعاود سوا
- ان شاء الله تضلون كل العمر سوه

كمل اكله وغاليه صارت تكوله ..
- ماما تصين عنوسه
- اييه عمتي بعدها صغيره تصير عروسه
- انا هم اصين عنوسه جنااااح اصين عنوسه
- من تكبري وتحكي عدل تصيني عنوسه

ضل يعيب عليهه وهي تعض بجتفه ويدفع بيهه جلبت الا اني جريتهه منه
ورزلتهه وهي راحت ختلت بظهره وتضحك بخباثه وهو فطير بسرعه نسالهه العضه وكعد يوكلهه ..

وقبل ما نطلع انطيته علاكه الملابس مال الشيخ وكلتله ..
- انطيهه للشيخ وكوله سلام من عمتي

اخذهه وركض للديوان واني اخذت غاليه وتمشيت للبيت ..
وصرت انظف وياهه وبعدين بدينا نحضر الغدا للمعازيم ورحنا طبخناه بالمطبخ الي يم الديوان لان الشيخه كالت الولد يتكفلون بالصب بس نطبخه الهم ..

وبسرعه بسرعه نشتغل وام حسن ويانه
ماعافتنه ابد .. وللساعه ١١ ونص
كلتلي روحي لحكي حضري نفسج

وطلعت ركض متلفلفه بالعبايه ورحت من وره بيت الفلاح لبيتي حتى ماامر منا واشوف احد من الكرايب الملتمه ..

طبيت سبحت وطلعت بديت امشط بشعري واعطره من هالزيت .. اني مااخلي الا قطرات على المشط وامشطه بي ...

وسمعت صوت حسن يصيح من باب الكليدور ..
-عمتتتي افتحيلي بالعجججل

ركضت فتحتله الباب وشفته شايل ماعون بي دليميه وعليه لالنكي انطاني اياه وكال
- امي ارستلو غدا لك

تشكرته وراح ركض طلع واني كبل اخذت خاشوكه وكعدت اكل .. واتذكر
كل مايسون دليميه واصير اكلهه بالخاشوكه الشيخه ترزلني وتكولي هاي اكله اصابع ماترهم الا هيك .. والشيخ يكللهه .. خليهه تاكل مثل مامتعوده كلو بيوصل للمعده ...

ضحكت واني اتذكرهم وكملت اكلي
ماخلصت نص الماعون وخليته على الطباخ وغطيته ..

رحت غسلت وفرشت اسناني وطبيت لغرفتي وصرت ابدل وبعدين كعدت اتمكيج ..
باودر خفيف خليت منه على الركبه والصدر وظلال خليت بس كريمي من بدايه العين والباقي كحل ممدود فوك الجفن وبداخل العين ومشيت شويه وردي لماعي على خط الرمش الجوه وحمره
وردي بدون لمعه واخذت شويه منهه ورت الخدود وضليت واكفه الح بالمسكارا ... وبعدين فتحت شعري جنت لافته ونزل عدل وسرح .. اخذت كذلتي الطولانه وكصيتهه شويه ورتبتهه وجبت الماشات وشكلتهن بخصلتين اخذتهن لولوتهن وخليتهن بالنص من وره خليت طباكه وبعدين ثبتنن فوكهن الماشات
وهيج خلصت خلال اقل الساعه ..

ضليت واكفه اباوع بالمرايه لشكلي وافكر راح يشوف فرق عليه بالالوان لو ماتغير شي ؟

جانت الحفره مال الفستان باديه من طارف الجتف ونازله عدله على الصدر بحيث مبينه منه بس شي كلش قليل يبين
مثل خط رفيع مرتفع بس هيج .. واني مالبست اي كلاده ولا تراجي .. اللؤلؤ ما ردت انسأل عنه هسه ...

اندكت باب الكليدور وسمعت صوت ام حسن رحت فتحتلهه وهي هلهلت وكالتلي ..
- يااااصلاااه النبي ياخيه كم عمرك بالله عليكي
- ٣٠ والله وراح اطب ٣١ بعد كم شهر
- ياااااماشاء الله كأنك بنت العشرين باولو
- هههه لا تغرج النعومه تره عجزت
- بعدك باول العمر ياااه . . عجل انا وش احكي على هالجسم كأني بنت الاربعين
- هههههه لاااا مو لهدرجه انتي مبينه بيج الثلاثينات
- اييه لكنك والله بتسطري .. هاللبس ذاك وينو يصيح بغداديه صاحبتو
- هههه لييييش
- لانو احنا مانلبسو ونجيبو هيك فيت قالبو ونعومتو بتلاكي الكرش نط بالنص والصدر وغف لفوك منو والشعر بنعملو كد الجبل لو كان هيك طولو يا ماشاء الله
- هههههههه كلمن على طبعه يضل وهي بعد تتبع الجسم همزين فادتني هالعظمات اليوم
- ههههههههههه والله بخفيه دمك لتلعبي على كليبو لعب

درت وجهي عنها وهي ضلت ترتب بشعري وتصلي على النبي وكالتلي ..
- وكت يدخلو الحريم انتي صلي على النبي بداخلك لتبعد النفس
- ما يصير شي ان شاء الله
- ان شاء الله محفوظين من كل عين

راحت لغرفتي بدلت وصاحتني مكيجتلهه وبعدني دارتب شعرهه وسمعت الباب تندك وطبن النسوان الكبار .. عماتهم ونسوان عمامهم .. واجتي وياهن غاليه جايبهه حسن ..
سلمت عليهن وترخصت ..
اخذت بنيتي بدلتلهه ومشطت شعرهه ورفعته الهه وخليتلهه طباكات المارونيه وهي ضلت مجلبه بيه ...

كاعده يمهن وهي بصفي تلعب بسوارهه لحد مااجه جراح وكال الشيخ يريدهه واخذهه وياه ..
وبدأ البيت ينملي بالنسوان كبار وصغار
والشيخه بيدهه المبخره تبخر وتفتر وتصلي على النبي ..

صفيه ماسمعت منها كلمه وحده منعزله وحدهه ويه بنات عماتهه واشوفهه تباوعلي من بعيد وهي تسولف وياهن

كلشي جان شعوره حلو الا ساعه ماسمعت الشيوخ راح يجون هنا ردت ابجي .. حسيت روحي وحيده لاني من صدك تمنيت يمي اختي صديقاتي وحتى مصطفى مااجه وصار وياي ..

ضليت متصفنه مااعرف شسوي لحد مااجتي ام حسن لبستني العبايه واخذتني وكفتني وره باب الكليدور لان هو جام وجان بس شويه مفتوح واسمع صوت
السيد وهو يردد السؤال عليه بالموافقه
والشيخ يحمحم واني ساكته واضحك وام حسن تأشرلي خمسه خمسه .. وتالي كلتله موافقه وكبل على صوتهن بالهلاهل
ورجعت كعدت وهي ضاله حاضنتني وتهلهل وتهوس هي وباقي البنات
وراحت تركض توزعلهن العصير وعماتهم يطشن الجكليت ويدبجن ويهوسن .. وصوت الرمي بره انعلكت حرب وهنه ويه كل رمي يعلن صوت الهلاهل ...

ولحد ماكعدن ياكلن الكيك هدأ شويه الجو وخفت دكات كلبي الي جانت تتسارع بهالهوسه بفرح ...
اي فرحانه راح اضل بامان وياه واعيش من جديد على ايده ...

اجتني وره شويه ام حسن مخبوصه وتكولي..
- يولي وينو عطرك وينووو دليني
- بالمجر الاول

راحت ركض جابته واجتي ترشلي منه وتضحك وتكولي ..
- يولي الشييخ راح يحدر الحين هين

ابتسمت وبدا التوتر .. ضلت ترتب بشعري مره تخليه صفح مره ترجعه
اخر شي كالت ..
- خليه يدحك الجسم يولو شنسوي بالشعر

ضحكت وهي رجعته لوره وضلت واكفه بصفي ولابسه شالهه وعباتهه ..
وكومت كل البنات جوه وبقينا بس اني وياهه والشيخه والنسوان الكبار ..

ودخل هو بهيبته الي متغير بيهه هالمره بس زياده ضحكته ...
لابس الي اشتريتهن اله .. النيلي المخصر عليه محليه اكثر .. والرصاصي المذهب مخليه يضوي .. واليشمغ المرفوع من جهه وحده بارز نور وجهه وضحكته

وكفتله ودنكت وهو ضل واكف كدامي واني اباوع لصدره شلون يرتفع وينخفض
وهو لزم بايده اليمين راسي وقربه اله وباسه من منبت شعري والهلاهل وياهه علت ..
باوعتله وابتسمت وهو بعينه نفس اللمعه بمثل كل موقف بي قريب مني يصير ..

كعدنا والشيخه واكفه تهوس هي وعماته كدامنا وهو نظره عليه ونظره عليهن
واني من توتري كضيتهه بس ارفع بكذلتي لحد ما هو قرب راسه مني وشاورني ..
- خليها يا يابه وشحلاتها نازله بمستحى

ضحكت وباوعت لعيونه وهو يبتسم و وجهه احمر ..
طلع من جيبه علبه وقرب ايده يمي وفتحها .. جان بيهه حلقات .. ضحكت وهو كالي بهمس وهو يعدل بيشمغه ..

- البسها وان ما طلبتيها
- حلوه شكرا ً
- هههههه مايلزم الشكر يولووو لاتجننيني عليكي الحين اسكتي

ضحكت واني دايره وجهي عنه وهو اخذ الحلقه والشيخه صارت تهلهل ومديتله ايدي لزمها بحنيه تلمسها من جوه وابتسم وبعدين لبسني الحلقه .. جانت ذهب صب ثكيله .. واخذت حلقته الفضه هم صب ولبستها اله وهو شاورني وكالي ..
- يولي هاذي صدك لو كالو اصابع عروس
- ههههه شبيهن
- كل البلا ياعيني كل البلاااا

رفعت كذلتي من عيني وابتسمله وهو مرتجي ويباوعلي وبعدين عدل كعدته وشاورني ..
- تينتي اسحبيه لشعرك لليسار
- ليش
- هالحين اسحبيه ودي ادحك شي
- شنوو

كلتهه واني اسحبه واباوعله وهو عينه على ركبتي ويبتسم وبعدين كالي ..

- شامه الركبه اول ماخذا عيني شامه الركبه
-عزاا شلون حيااال
- احكيلك بعد ولا نخليهه للعرس

خزرته وهو ضحك ورجع ظهره على التخم وكال لامه ..
- ما تشربونا شي يمه ريكي ناشف
- تدلل ياعين امك

جان يباوعلي وضحكته صفح وبعدين من شرب العصير كالي ..
- تكربي

تقربت بصفه شويه وهو حط ايده على جتفي اليسار واني جسمي كله اقشعر
وباوعتله وهو قرب الكلاص من حلكي وشربني ويشاورني ..
- ودي نتكاسم هالحياه مثل هيك اثنينا
نضوك طعمها من نفس موضع الفم

وخر الكلاص وضل يباوعله وشرب من مكان حمرتي وخلصه كله وخلاه على الطبله من جهته .. وباوعلي وكال ..
- طيب هههه
- هههههههه
- ارجعي انثري شعرك على جهتينك
انا شويه واعاود لك
- وين تروح
- بعاود ياعيني

كام طلع واني رجعت شعري ونثرته منا ومنا وهو رجع دخل وصاح ..

- تفضل ياخويه تفضل

باوعت لمكان وكفته وشفته سوه مجال ودخل اخويه مصطفى .. كبل شهكت
وخليت ايدي على حلكي ..

اخويه حبيبي اجاني ما خلف بكلمته
وكفت واريد امشيله رجليه ماتعيني
اباوعله شلون كبران وطولان وشواربه ثخنانه ومتكشخ بسترته السوده وبنطرون اسود وقميص ابيض وكلهن زايداته اناقه

اجه يمي وهو عينه تدمع وعيني من ساعه ما شافته تدمع لزمته من ايده وتلمست وجهه وهو يبتسم ويمسد على شعري واخذني حضني قوي واني ضليت مجلبه بملابسه وابجي ...

ما وخرت لحد مالشيخ اجه وخله ايده على ظهري .. باوعلي وكال ..
- ول تصخم وجهك بالسواد وانا ماعودت اخلص منو
-ههههههه هسه امسحه

انطاني هو منديله واخذه مني مصطفى مسح وجهي بي وهو مخليه بطرف اصبعي ويكولي ...

- كحيله من يومج ما تغيرتي
- حبيبي وين جنت ليش لهسه يلا شفتك
- جنت ويه الشيخ اتعرف على العائله
وحاير ببنتج ام لسان
- ههههههه هاي راحت يمك يعني
- ايي جابهه الشيخ الثاني يكولي شتسوي بيهه هاي مالتي
- هههههه جراااح بعد وهاي حجايته ماتخلص
- اكوله ولك اني خالهه يكولي واذا
اني ماخلي احد يشيلهه حتى لو خالهه
باوعلهه منا وحاجيهه وهي عيني تزيد فوك حجيه وتتخوصر وتكولي .. موو عيب انته ماتعرف العيب
- يبووو ياغاليه وسالفه العيب مجلبه بيهه
- بنتج تنحط بلبه الكلب صدك غاليه

ضحكت وميلت راسي عليه وهو حضني ويكولي ..
- كد ما شفت الناس هنا شلون كلها فرحانه من عرفو اني خالها وكلها ترحب وتصيح والنعم من هالاصل عرفت شكد زارعه طيب بين اهلهم وشلون بقيتي رفعت راس ابويه
- ربي يرحمه تمنيته موجود وياي اليوم
بس شوفتك عوضت

وخرت من حضنه واباوع للشيخ عاكد حواجبه وصاك سنونه وكالي ..
- اكعدي واحنا نعاود بالليل بعد مايمشو الرجال
- ماشي عيني

عدلت ستره مصطفى وباوعت للشيخ وكلتله ..
-ديربالك على اخويه شيخ
- ان شاء الله

كرصني من خدي وطلع ويه الشيخ واني كعدت مرتاااحه واضحك من كل كلبي
وعماتهم صارو يسألوني عنه واكللهم اخويه الجبير ...

وام حسن كعدت يمي وتكولي ...
- اخيك حليوه يولي بعدو صغير كم عمرو
- ٢٧ سنه
- هاا وش دارس
- هو محامي
- يا ماشاء الله ربي يحفظو لشبابو

النسوان شويه شويه بدن يطلعن ويخف البيت وبعدين للمغرب ما بقى غير ام حسن وياي والبقيه كلهه تحولت لبيت الشيخ ...

رحت بدلت ولبست واحد من الاثواب الي جابهن الي من الشام .. واختاريت الي لونه وردي حتى يبقى ويه المكياج والصبغ اظافر...

وتعشينه اني وام حسن وهي تحجيلي ..
- يولي كلهن دحكن من الباب كيف الشيخ يشربك ويدحكلك ول طكن بغيضهن طكككن ويحكن وش عندها وميت عليها
حرمتو الاولى احلى منها هاذي بعدها جاهل
-هههههههههههههه

- وانا رديتهم لك شكل رد انخرسو هيييك فيه
- شكلتليهن
- حكيتلهن .. ول لو انتن احسن منها خلو ازواجكم يدحكو لعينكن مثلو واسلبو عكلو مثل ماسلبتو هي بفطاريتها وكرم نفسها
-هههههه عشتتي والله
- وكل شوي احكيلهن .. دحكن كيف يشبر شعرها بعينو .. من الله طول وجمال ... ومن صرتي تحضني اخيك
حكيتلهن .. دحكن اهل بغداد هين بينا منورين ببساطتهم ول دحكن كيف اخيها يداري دمعاتها ويرتب جمالها .. وحكيتلهن .. خيرتكم تعرف تدلع هيك بحضن اخيها وهو يضحكلها !!
-هههههه
- والله اخرسسسن خلاااص ومشن كعدن ماتحملن يدحكن لمتكم
- هههههههه والله ماكو منج ياام حسن

ضليت اضحك واني اتذكر حجيها
وبعدين هي كالت لازم اروح اشوف بيتي
والجهال .. وراحت ضليت وحدي متمدده
وانتظر جيتهم ...

وطولو بالجيه لحد التسعه بالليل ..
دخل مصطفى شايلها لغاليه وهي بيدها دب ابيض .. وجراح يمشي ويه ابوه وعاكد حواجبه نفس عكده حواجب ابوه
والشيخ يبتسم بس مو بمثل لهفته اول مره

رحبت بيهم وكعدو بالهول ومصطفى راد يغسل وراح للحمام .. ضليت ويه الشيخ
رحت كعدت يمه وهو باوعلي ورافع حاجبه ..كلتله ...
- خير شيخ شو ضايج ؟

فرك وجهه وكالي ..
- مااا تنامي الليله سمعتتتي
- اي
- اييه ضلي انتظريني بعد ما ينام اخيك
مفهووم
- اي عين صار مفهوم