#شقراء_بغداد

بارت_٤١



صارت تغمض عينها وترجع تفتحها وانا اصيح عليها ان تضل صاحيه معي ولحين ماعبرت باب الرئيس هي وكعت يدها من ركبتي وغميت ...

فتحولي الولد باب السياره وواحد منهم صعد ساق بدالي وانا مخلي راسها بحضني واصحي فيها واتلمس نبضها كل شوي لحين ما وصلنه المستشفى انا كل اطرافي ترجف ...

اخذوها ودخلو فيها للطوارىء وسألني الممرض حكيتلو طعن بالسكين وسحبتها وهو هين راح يركض للطبيب ومن سمع هيك حكالهم حولوها عمليات الحين
واخذوها للعمليات وانا اركض وراهم من مكان لمكان وادعي ربي لا تكسر ركبتي فيها لو صارلها شي عمري مااسامح نفسي على غفلتي عنها ...

ضليت واكف بره قاطع العمليات ودحكت ولد عمي صياح ونجيب هين اجوي يركضو ... صياح حكالي ...
- وش الصااار ياخوي
-حمزه ياخيي حمزه غدر فينا كلنا صاحبنا ياصياح الحاسبينه اخونا طلع خاين وغدار
- لااااا يالخسييييس لااا يالردي والله لاجلبو لو كان بجبال
- هييييين ابغيه عنننند رجلي ياصياح
ابغي اذبحو بيدي واذبح سنين خوتو معو
واخذ بدم اخيتي
- ابششر ياخوي والله مايهدالي بال لو ماكضبتو بيدي وشحطتو لعندك الحين انته خلي بالك عليها وانا امشي ادور وين ولى هالردي
- اييه ايييه تحرك يلاا كبل لايطلع من الديره

راح صياح وضل معي نجيب ارسلتو للبيت لحتى يجلبلي فلوس وينطي خبر للولد بالمعمل ان يكفلوه لحين ماعاود

وضليت وحدي انتظر خبر منهم وادعي ربي بجاه كل عزيز وعظيم عندو يرأف بحالها وحالي ..

هاليوم انا انكسرت من جهتين واثنينهم غوالي عندي .. طعنه صاحبي صابتني بلبه الكلب ساعه الي سمعت حكيو وتهديدو وساعه الي كنت اتكاون معو وادحك عينو كلها حقد وغل ولاكانو هذاك عضيدي وخويي الي عشنا سنين صغرنا وشبابنا سوا ....
والتينه هدمت حيلي بوكتعها ..من يومها تحذرني منو وتحكيلي لاتغفل عنو تحكيلي احدر عندي واكعد معي كأنها كانت تريدني ادحكو بعيني او اسمع حكيو
وانا غفلت عنها وصدكتو ووثقت فيه وكذبتها وهي الي مابيوم كذبت علي بشي
والحين فدتني بدمها وشبابها وتحكيلي دينك رديتو .. لهاليوم هي حاسبه خوتي لها وحفاظي عليها دين واجب تردو ،،وانا جازيتها بالغفله لحين ماوصلتها الموت بيدي ....

كنت اتمشى والوم بروحي وساعه ينغزني كلبي على تينه. وحالها وساعه تعود بيه الذكريات للي سميتو صاحبي
واكره روحي كيف هيك امنت فيه وسريتو كل هالسنين .. لحين ما انفتح باب العمليات وطلع منها دكتور وحدر لعندي مسرع وحكالي ...
- خويه الدكتور الجراح دزني الك ويقلك كدامنا خيارين .. يا نشيل الكليه والمريضه تعيش بكليه وحده وماعليها شي يااما نكمل الجراحه وتتحملون نتيجه المضاعفات بالمستقبل
-اي مضاعفات خويه
- فشل كلوي
- دخييييلك يااااالله دخيلك
- دحك ياخوي الطعن صاير بنص الكلى تعرف شو يعني بالنص ! يعني بمركزها متكطع الحين حتى لو اجرينا الجراحه ماتعود مثل الاول وتصعب عمليه شفائها وتاخرها واي تعب او على غفله تلاكيها توكفت وتصير تتعب جسمها بالازيد اخصمها من الحين وماعليها شي هواي ناس عاشو بكلى وحده وصحتهم من احسنها
- يووووول شلووون شلووون
- استعجل بقرارك ياخوي الدكتور ينتظر جواب

دمعت عيني بهالموقف محتار وش اسوي اوافق بنفسي على خساره كليتها ولا اخليها واوافق على خطرها للمستقبل !!
احترت وكلبي يتعصر وتعلكم ريكي وبالويل يلا حكيتلو ...
- لو شلتو كليتها بتكون بامان بعد الحين!
- اي بامان
- عجل توكلو وردوها لي سالمه متعافيه
- ان شاء الله .. راح تجيك الحين ممرضه تنطيك اوراق وقعها واحنه نكمل الي بديناه

راح يركض لعندهم وانا كعدت بالكاع وكضبت راسي .. واعاتب نفسي ..
- يول انااا شسويت فيكي ياتينه خسرتك عمرك بغفلتي خسرتك كليتك ماصنت الامانه فيكي ماااصنتها مثل ماوعدتك خلفت انااا خلفت بالوعد خلفففقت

ماصعب علي حال مثل هالحال ..
الملامه والندم يكطع بحشاي والخوف عليها مرجف كل طولي .. خوفي عليها نساني حتى حمزه وسالفتو كلها وصرت
ماابغى شي غير انها تطلع وادحكها سالمه ...

بعد ساعه طلع الجراح ومعو هذاك الطبيب وحكولي انهم بيكملو خياطه وتضميد وياخذوها للعنايه ... ومشو بالعجل وانا فكري مايركز بشي حتى اسئلهم وش الي يصير بعد الحين بحالها . !

دحكتهم حين طلعوها وركضت وراهم وعيني ماتدحك غير الصوندات متلفله عليها .. وهنيك عند العنايه ماخلوني ادخل وادحكها ضليت بره واكف وانتظر يرجع هالطبيب وافهم منو ...

كنت بساعتها حاس بغربه وعجز ..
كل ملكي واهلي وديرتي كلها حسيتها رماد كدام خسارتها وخوفي عليها
حين الي توفى ابوي انا كنت جبل شامخ دفنتو بيدي وكمت بعزائو وشلت حمل المشيخه والمعمل والاراضي وبركبتي اربع حريم داريتهم وحفظتهم وحفظت كل هالحلال ومشاكل الديره كلها شلتها فوك كتافي ومادحكت بيوم اني تعبت واحتجلتو بشي ولا شكيت من فقدو ..

وبيوم الي احترك معملي ودحكتها حدري ساندتني وتتبسم وتفكر تعيدلي كل شي هونت علي خسارتي الثانيه فيه وماهمني شي من الي خسرتو بهالسنه عليه ... الا حالها الحين
كسر كل جلمود فيي كان ماينكدر عليه
بهالسنين كلها ...

وصيت واحد من الممرضين يدحكلي وينو هالطبيب ويخليني احكي معو
وهو راح وتالي عاود ومعو الطبيب نفسو
حكيتلو ...
- يااابه واليرحم اهلك فهمني وش حالها الحين
- مستقر لكن تاخذلها كم يوم تحت العنايه لحين مايمشي الجسم نظامو على الكلى الوحده ونتطمن كل الامور بخير وترجع سالمه لبيتكم
- الله يبشرك بالخير يابه ماكصرتو

صرت احمدالله واشكرو ردها لي من الموت وصار اليوم دمها الي فدتني فيه دين بركبتي وعاهدت نفسي احفظها حتى من الهوا البارد الي يمرها ...

بعدها اجوي هين نجيب وامي تبكي وتسرع بممشاها حدري ومن دحكت ثوبي الي مصبوغ بدمها شهكت ولطمت على صدرها واجتي حضنتني وهي تبكي
اخذتها كعدنا وصرت انا احكيلها ...
- يمممه التينه فدتني بدمها يايمه خسرتها كليتها انااا بغفلتي وطيشي وعمى عيني الحين هي بين الحيا والموت
- اذكر الله يابني اذكر الله ان شاء الله تكوم بسلامه
- لا اله الا الله .. يمه ماكادر اسامح نفسي على الي جرالها هييين تدك بكلبي هيين انا اتكطع يايمه بحشاي ناار ماتطفى من بعد ماخسرتها كليتها يايمه وش ذنبها هيييي وش ذنبهاااا اناا المفروض اكون الحين بدااالها انااااا
- اسسسسم الله عليك ياولدي اسم الله
الله يحفظكم بجاه عزو وجلالتو
- اناا محفوظ وعايش الحين بفضلها ياامي بفضلها هي خذت عني الطعنه من صاحبي وخويي الي ودو يغدر فيي بظهري هي حمتو لظهري من طعنه غدر يااايمه وش اسوي واجزيها وشش اسوي
كيف اعوضها خساره دمها وكليتها يايمه لو افديها بمال الدنيا كلو مايجازي عملتها معي .. اخيي الي حاسبو للشده معي هو الي يغدر والغريبه الي اويتها ببيتي هي الي تحميني وترخص دمها لحمايتي
يايمه تحكيلي باخر شهكتين الها انها ردت دينها .. دين حاسبتو اهتمامي فيها ديين وبالها تردو ودفعت حكو دمها

كنت احكي والعبره خانكتني وبالتخر تذكرت عينها وهي تدحكلي ومبتسمه وصوتها والدم بيدي ماسيطرت بساعتها على دموعي وبكيت وانا اسمع صدى صوتها وهي تصرخ باسمي وشهكتها الي سرت على ظهري وكت الي انطعنت وتمسكت بثوبي بكل مافيها من حيل
بكيت هالخوف والندم والعجز كلو كدام امي وهي تحكيلي ...
- تبكي ياخالد!! ولدي الشيخ يبكي
-يبكي يايمه عجل هو كلب ولا حجر مانا متكطع الحشى على حالها والله ماهمني غدرو ولا خسارتي ولا سنين صحبتي الي كضيتها معو لكن صوتها للحين يرن باذني وكت الي صرخت باسمي مفزوعه بخوفها علي وشهكتها هين ياامي هيين بظهري كان نفسها حسيتو من كوه وجعها حسيت فيه سرى على طولي بحين شهكت بحركه وجع .. تحملت انها تنذبح ولا ان يصيرلي شي وتتعجبين من دمعي عليها يايمه تتعجبييييين !!!!
- والله انها اصيله ورباه عز وشرف والله ماضاع فيها التعب والحميه .. ربببي يشافيها بجاه حبيبو محمد ويحفظها لبنتها وش ذنبها هالصغيره لا اب ولا ام ضاله وحدها من يد ليد يدارو فيها
- غاليه بنتي اناا ماتضل وحيده اناا عندها
- ماتكصر ياولدي لكن تضل وحيده بلا اهل وحالها مثل حال امها دخيله
- حكييييتلك بنتي انااا والتينه وصتني انها امانتي وانها الي اناا ووكت تصحى انا اقنعها واسجلها على اسمي ماخليها تضيع
-الله كريم يابني الله كريم خلها الحين تكوم من هالشده بالخير والسلامه والباكي سهل

مسحت وجهي بيدي وفكدت اليشمغ والعكال مادري وينهم ولا ادري متى شلتهم من راسي مدري وكعو من خبصتي !؟؟؟

للعصر امي عاودت وانا ضليت مكابل هالردهه وكاعد و ولد عمي كل حين واحد منهم جاي لهين وصار الليل ومشيت للبيت ودي اتطمن على غاليه
اول مادخلت ادورها وجابها لي جراح
مارضت تتكرب مني لان ثيابي مدمايه
صعدت لغرفتي وام جراح حضرت لي ثيابي سبحت و لبست واخذت هالثوب المدمى ونزلت لعند امي حكيتلها ..
- يمه هالثوب تحتفظي فيه لحين الاكي كتالها
- يايمه شبلاك هذا دم وريحتو عفنه بالثياب تصير ارميه واليرضى عليك بيصير نكس لو يتخمر هيك
- يممممه دم التينه هذااا يمه دمهاا ماهو بعفن ولا نكس هذا اطهررر دم .. هذا دم الي بسبتو ولدك الحين عايش ماتحكي عليييه ماتحكي
- زين زين يابني زيين تهدا يايمه تهدا
- بتحفظيه يايمه زييين !
- ايييه يابني فهمت فهمت

تركتو عندها ومشيت اخذت غاليه لحضني اشمها وهي متعلكه بركبتي
وهاديه مو من عوايدها سألت جراح عنها وحكالي انها من الصبح هيك مالها خلك شي ...
عرفت ان كلبها عند امها ومامرتاحه
رادو يخلون العشى ماخليتهم واخذتها وصعدت لغرفه تينه ... دخلتها وكل المواجع هاجت .. مشيت فيها وانا اتذكر كيف كنا هين وكت حنه مناسك ووكت تمشكلت معها كبل ولادتها ووكت الي شلتها نايمه لهين .. وادحك بصورتها الي على جانب السرير ..ادحك ضحكتها وهي ماسكه يد بنتها والحين اثنينهن هاديات وماينسمعلهن صوت ..
تينه هنيك نايمه وغاليه هين بحضني خانسه ...

انجضعت على فراشها وغاليه نومتها على يدي وابوس فيها والاعب شعرها لحين مانامت وانا ضليت صاحي عيني ماتغمض وصوتها للحين براسي يضرب
تركتها نايمه وغطيتها ونزلت صحيت جراح وارسلتو ينام عندها وطلعت اخذت سيارتي ومشيت للمستشفى ....

تمشيت بالردهه وانا ضايكه الدنيا بعيني
تالي طلع منها ممرض مشيت لعندو توسلتو يدخلني وهو يرفض تالي خليت بجيبو كم فلس وانا احاول معو يلا اخذني وحكالي نص ساعه واطلع من هين ..

عطاني هالاكياس لبستهم ودخلت لعندها وسديت الباب ... مشيت لها بهداوه وانا ادحكها كيف نايمه وكيف هالاصوات عندها والصوندات الي مشكله بيدها وحلكها واتذكر كيف كانت ضحكتها وكسره رائها وشقاها معي ..

وكفت حدر راسها ودنكت كضبت وجهها تلمستو وبوست جبينها وحكيتلها وانا هيك مكرب منها ...
- مشكوره يابنت العز الله فيكي كتبلي عمر جديد ،، ماكصرتي ورديتي تعب ٣ سنين ضعفينو ..

عدلت غطاها ودخلت كم شعره منها طالعه من هالكيس وضليت كاعد حدرها
واحس ان الحزن عليها ينخر بصدري نخر حكيتلها ..
- سامحيني انا كذبتك وصدكت غيرك وانا الي خسرتك عافيتك وحرمت بنتك منك ..انا ذبلتك انتي وبنتك وطفيت ضحكتكن ... دمك ياتينه بركبتي دين واخذلك بثارك عهد علي يالعزيزه عهد علي ابكيه ندم واحرمو كل فرحتو واهدر دمو كبل ماتصحي عهد علي ...

تلمست اطراف اصابعها ودعيت ربي يشافيها ومايطول بغيبتها عني .. وبهالحين عاود الممرض وطلعت معو
وضليت الليل كلو انا كاعد هين عند باب الردهه هاذي .... ساعات اغفي من التعب واصحى على صوت الناس حدري
وعند الصباح دحكت ولاد عمي جايين ومعهم الريوك ..اكلت بالغصب منهم وسألتهم على حمزه حكولي ان صياح متكفل فيه وماخذ معو رجال من بارحه للحين محد يعرف عنو شي طلع يدورو وماعاود بعد ....
انا اعرف بولد عمي مايعاود الا واهو كاضبو ...

وهيك تكفل المعمل وتوكف كل الشغل فيه والبيت ماادخلو الا بالليل امشي اخذ غاليه لحضني اشم فيها ريحه امها واتعذر منها لاني سبب بغياب امها عنها وهي صايره تبكي ليل نهار ومايرضيها شي .. امي تحكيلي جراح حاير فيها وياخذها من مكان لمكان وبس تدخل البيت وماتلاكي امها تضل تبكي وماترضى حد يكربلها

اصير انا اسكتها واشيلها واطلع للمحل اشتريلها وابوس فيها واتلاطف معها بالحكي وهي تسكت وتهدا وتضل متعلكه بركبتي ... ومن اعاود البيت اخذها وجراح معنا ونصعد لغرفه امها اخليهم
يكعدون ياكلون ويطشرون الالعاب وانا اضل ادحك عليهم وادخن وتالي انجضع واخلي راسي على مخدتها واغفالي شويه واصحى الاكي غاليه تدحس نفسها بحضني .. انومها على يدي وغطيها معي واوصي جراح ينام حدرنا ...
وحين الي ادحكها تنام اطلع واوصي جراح عليها ...

وانزل وكبل امشي للمستشفى صارت وكت سكنتي بالليل ...
هالممرض يوميه احط بجيبتو كم فلس وادخل لعندها واضل اتلمس وجهها واحكي معها شوي بعدها اضل كاضب راسها واقرالها سوره يس انا حافظها كلها
ومشت خمس ايام هيك بهالوضع وباليوم السادس دحكت الطبيب المختص فيها يركض مع ممرضين انا هين كلبي نغزني وخفت لا صايرلها شي وهذا ركضتو عليها ...
وضليت على كعدتي هيك عند الباب ولحين ماطلع مشيت لعندو وهو وكف من دحكني .. كأني قريت بعيونو ان الوضع يخصنا بالعجل حكيتلو ..
- وش فيها احكييلي ياخي
- مضاعفات عمليه
- اييه احكي فهمني وش صااار
- ارتفاع باليوريا مفاجىء .. تدخلنا الحين ونسيطر على الوضع بالابر بهالكم ساعه ان شاء الله
- ارجاااك خذني لعندها ادحك حالها
- ياخوي مايجوز
- دكيكتين بس ادحكها واليرحم اهلك

اخذني ودخلنا لعندها وانا مشيت حدرها مسرع وادحك خديها محمر ومتحسس وركبتها بعد متحسسه ويدها كضبتها وادحكها منثور عليها الحمار وكف يدها منتفخ وهو كشفلي عن رجولها ودحكتها منتفخه ..دحكتلو وعيني ماليها الدمع وهو حكالي ...
- ماتخاف هي هاذي اعراض ارتفاع اليوريا وكت ترجع تنزل يهدا هالتحسس ونعالجو والانتفاخ من وحدو يخف
- ليييييه هيك يصير معهااا كانت زييينه مو حكيتلي كلها يومين وتصحى وترد لعافيتها ويييينو حكيك !!!
- ما ظنيت بتتضاعف هيك الاحوال والجسم مااخذ على حال كلى وحده للحين مابيدي شي ماسويتو
- عجل خسرتها كليتها وماعيشتها بالثااانيه !!! وش فايدددتك عندها ماحكيتلي هذيك الايام ان حالها ماكاعد يتحسن ليييه تركتني اتامل تصحى كل يوووم ماتركتوي اخذها لغير مستشفى لو ماتكدر عليها غييييرك بيكدر
- ياخوي افهم وضعك وخوفك لكن مو بيدنا احنا تعبنا واهتمينا بصحتها بكل ماكدرنا عليه وحتى غيرنا كان عالجها بنفس الطريقه .. وكليتها هذيك ماتفيد وكت شلناها كانت ضاله على خيطين وتنكسم نصين لو حتى رجعنا ربطنا القنوات الي فيها ماترجع مثل الاول
- وشفايده هالحكي الحيييين وشفايدتو
انااا ودياها تصحى تفهههههم انت ولااا ماتفهم ... ودياها تصحى سوي كل شي وخليها تكوم على حيلهاااا لا تتصفنو هيييك وتخسروني اياها
- اصبر ياخوي اصبر احنا تعبنا معها ونحاول مانكف عنها

دحكتلهه اخر نظره ومشيت بره معو وكعدت وكضبت راسي والوم بنفسي على الصار لها بسبتي ...

مشيت كصيت باص لدكتور الجلديه وحكيتلو سالفتها وهو بدورو مشى معي ودخل لعندها دحكها وكتب لها وصفه
اخذتها من الصيدليه ووصيت الممرضه تدهنو لها كل صبح ومسى وحكيتلها انا كاعدلك هين وودي ادحكك تنسيها ..

وهي صارت كل ماتدخل تدهنو لها تطلع تحكيلي انها دهنتو وتمشي لشغلها وتعاود بالليل وهيك مشاها الخوف لاني بساعتها كنت موجر اعصاب وكل كلمه تنطك معها شرر ...

عاودت بصباح ثاني يوم للبيت وصعدت لغرفتي انجضعت وغمضت عيني تعباان وكاره الدنيا .. دخلت ام جراح وحكتلي ..
- يااهلا والله هلا بالشيخ الي ناسي اهلو زين اني دحكتك بغرفتي هاليوم .. عجب مانمت على ريحتها وتغطيت بغطاها مثل كل يوم !!

رفعت راسي ودحكتلها وهي متخوصره وعينها ودها تنط حكيتلها ...
- دحكي انا تعبااان ومالي خلك الحكي معك امشي اطلعي وخليني انام يلاا
- ايييه وكت توصل السالفه عندي تتعب ومالك خلك ووكت حضره التييينه تتعب تكابلها ليالي ماتغمضلك عين كضيت عمزك تركض لها ولبنتها وناسينا انا وولدك ماتدحكو وتسال شلون حالو شناكصو مريض متعافي مايهمك ولدك وولد الغريب الماينعرف اصلو تركضلو متلهف

كمت وكضبتها من زندها وعصرتو بيدي وكضبت فكها بقوه يدي وحكيتلها ...
- الغرييييب الي تحكي عنوو حمى ظهري ومالي وبيتي وانااا كيييييفي اسأل على الي ودي اياااه انتتتتتي ماخصك
تركتك يومين طلعلك حس وصار لسانك يلعلع كدامي عجل وره ظهري وش تعممممممملي بتأذيهاااا لبنتهااا ؟؟؟

- يلعنها الله هي وبنتها عساها ماتهنت بعيشه

- ولللللللللل اسكتتتتتي اسكتتتي

ضربتها ورميتها على الفراش وكانت هاذي اول مره اضربها ...

- تدعي عليهااااا يولييييي تدعي على الي هدرت دمها لعيشتي هيييييك جزاااتهااا هيييك !!! عمررررك كلو تضلي بهالحقد والغييييره ماتنصلحي الحرمه ماسلمت منك وهي بفراش المووووت ماااسلمت من لساانك
- ولااا عساهااا تسسسسلم هجامه البيوت هاااذي اكرهااا اكرهاا واكررره بنتها وكعدتها هيين اكررررهاااا اخذت كل الي كااان بيدي البيت والاهتمام والزوج كلو اخذتو برمشه عييييين تفهههههم

- بسسسسك عااااد بسسسك تمثلي دور الضحيه والمظلومه كل الي رااااح من يدك كااان بسبتك انتتتي الي اهملتي وتعاليتي عن اهل هالبيت وخسرتيهم من يددددك محد خذ منك شي ... ول انااا سلمتك البيت وخليتك تكوني حرمتني مدللـه ومعززه وانتي وش كان ردك هاااا وش كااان .. كضيتها اهمااال وحيرتك بلبسك وزينتك وتباهيكي كدام الحريم انتتتي حتى امي ماسلمت من حقدك ولا سلمت من تكبرك هااذ الي مدري على شو متكبره عنا !!!!
- مااااتكبر اناا لكن انتو ماتدحكو غيرها زيييين مخلينا كلنا صغار كدام حضرتهاااا
- اااايييييه اييييه صغااار كداامهااا صغااار وماتسوو شي عجل انتتتي كدرتي توكفي معي لو مره وحده بهالعمر مثل وكفاتها !! كدرتي بيوم تشيلي همي كدرتي تسعديني وكت حزني ومصابي !
عرفتي بيوووم انك تصليني !
بيتي سنين عشتي فيه وصرتي الكنه الوحيده فيه كدرتي تداري اهلو بمثل ماهي دارتنا ! عرفتي تسعدي امي الي اختارتك من بين هالحريم كلها وتشبثت فيكي عرفتي تسعديها وتأنسي وحدتها !
ماتدحكي هذووووول ماتدحكيهم كل همك صارت احسن منك ونحبها ازيد منك ! عجل ماتصيري مثلها ولا احسن منها لييييه بتضلي تشلعي كلبي بتكبرك هااذ وكرهك لهل البيت ولها .... والله لو انها كانت حرمتي كااان عيشتني ملك ودارت كل تفاصيلي ماكانت بتخليني اكرره كعدتي هيييين وان جيت مادور غير النوم لاخلصو ليومي ..
- عججججل دااامك تتمناها ماتزوجتها وطلكتنننني ليييه بتضل تشاركني فيك من بعيد.!! وتضلو تحررركو بروحي بهداكم
- يوووووول اسكتتتتي اسكتتتتي الله لاااايرضى عليكيييي علكمتي ريكي
اناا بالالف حكيتلك مااااتزووووجها ماتزوووجها يلعن ساااعه الدخلت فيها هييين

تركتها ونزلت ودحكت امي عند الدرج حكيتلها ..
- هااااذي خيييرتك يايمه هااذي زييينه النسا الي جبتيها !!! تحمليها انتي انا بعد انفكست مرارتي وكضى صبري معهااا
تاركها وتاركلك البيييت وماشي

طلعت وتركتهم واخذت سيارتي ومشيت لعند الجرف بالصوب الثاني هنيك قلال من رجالي وباخذ راحتي بدون ماحد يمر علي كل حين ....

نزلت وكعدت حدر الجرف ومديت يدي اخذت مي وغسلت فيه وجهي وركبتي كنت غادي ناار وهالمي بارده هدأت راسي شويه ..
ضليت كاعد هنيك واستغفر ربي واطلب منو الصبر بهالمصاب .. التافت علي الدنيا من كل صوب وراحتي الوحيده معلكه بين الحيا والموت .. والله صرت اخاف تمشي الساعات وتحين ساعه مادحكها بينا بعد ..

كنت محتاجها مادري ليه كل حاجتي صارت عندها .. لا بام ولا اكل او شرب ولا صاحب ولا اي شي غير اني ادحكها كريبه مني ...
مشيت شغلت السياره وطلعت للمستشفى
وهنيك مشيت لعند هالطبيب وهو من دحكني هيك جايو منتهي من التعب وكف واجه حدري وحكيتلو ...
- جايك تمشي معي تدخلني لعندها ولا تبسبس بشي ترا انا ماطايك الهوا الي بخشمي

هو مشى كدامي بالعجل ودخلت لبست الاكياس وحكيتلو ..
- رحم الله والديك يابه امشي انت انا ساعه واطلع
- لاتتاخر اكثر رجاءا لاتحرجني
- زين يابه زيين

طلع هو وانا كعدت حدرها وكضبت يدها دحكت حساسيه فيها خفت شوي عن اليومين الي فاتو .. ولكن خدها بعدو احمر ..تلمستو فيه شويه دهن هذا يعني الممرضه ماصارلها زمان طالعه من هين

كضبت يدها باثنين ايديني وخليت راسي على صدرها ودمعت عيني .. هين حسيت برجفه بنص صدري سرت وصرت احكيلها ...
- تيينه بالله العظيم تعبت يولو ماتصحي وتعينيني .. كل ديرتي غربه بعيني بدونك
ماظنيت روحي لهالحد انا متعلك فيكي
مايحلى بعيني شي غير كربك ماتكسري الي بكى مني بطوله نومتك هين مالي غيرك انيس يولو ماتمشي وتتركيني غريب بين اهلي ...
بنتك مشتاكه لك وتدورك ليل نهار صارت تريد حضنك ماعاد تحتاجي تدوري لها على اللعابه الكبيره لحتى تقنعينا تعاود لحضنك هي تدورو والله عينها على الباب بوكت جيتي تتامل ردتك معي ومن ماتدحكك معي تجيني تبكي خايب املها .. كيف تسلميها لي امانه ياتينه اناا مو كد حملها والله مثل ما مكدرت على حفظك ماكدر عليها بعد
صدكيني اخجل احط عيني بعينها وهي عينها تدورك بكل شبر من البيت
دخيل ربك ماتتركيها بركبتي وترحلي والله ماكدر عليها والله

ضليت مخلي راسي على صرها وصرت اجود لها سوره يس والملك وادعي ربي يفرج همي فيها ...

طلعت وضليت اليوم كلو انا بالمستشفى اتمشى بالحديقه ادخن واكعد مع ولد عمي اسألهم وش صار على حمزه ويحكولي انهم مايدرو عنو شي وصياح للحين ماعاود لكن ارسل خبر انه مايرضى يعاود بدونو ...

صفنت شوي وحكيتلو ..
- احركو نص كاعو واحكو لاهلو ابنهم دمو مهدور ولو ماكضبتوه هاليومين عاودو حرك الباكي منها واحكي لاهلو يسلمو ولدهم يسلمو على حلالهم غيرو مايمشي بعد

ولليل عاود ولد عمي وحكالي انه حرك نص كاعو ووصل التهديد ...
انا من بعد اسبوع يلا وصلت لهالحكم معو ومو برضاي غصب عني هيك تعديت على حلالهم لكن العايل يتحمل

ودخلنا سنه ١٩٩٤ وكانت ساعاتها الاولى لي حدر تينه اقرالها القران وادعي ربي يشافيها لي بهالسنه الجديده

ومشى اسبوع من الشهر الاول وانا تارك البيت كل وكتي اكضيه بالمستشفى وان ردت اغير ثيابي ارسل ولد عمي يجلبوهن لي هين ابدل واكل واليشمغ تركتو مالبستو من هذاك اليوم لليوم
ولحيتي عليت وهامل البيت والديره كلها
لكن بيوم واحد من ولد عمي حكالي ان غاليه مريضه ... هين تركت المستشفى
ومشيت لعندها واول مادخلت البيت مشيت لغرفه امي ولاكيتها نايمه بالفراش
وحرارتها مرتفعه اخذتها لحضني وهي تبكي وتدور امها صرت اتمشى فيها والاعبها لحين ماهديت واخذتها لفوك لغرفه تينه وكعدت معها العب واتصنع الضحكه وهي وكت كانت تسحب بغراضها من تحت السرير تبين معو
دفتر كضبتو ودحكتو مفكره لسنه ٩٣
فتحت اول ورقه منو ودحكت مكتوب

- الى ابنتي واميرتي غاليه ...

#شقراء_بغداد

بارت_٤٢

كان في دفتر كضبتو ودحكتو مفكره لسنه ٩٣ فتحت اول ورقه منو ودحكت مكتوب

- الى ابنتي واميرتي غاليه

دحكت للدفتر وبعدها دحكت لغاليه وفكرت ان هالدفتر خصوصي الها
مايجوز انا اقرا وش الي مكتوب فيه
كمت اخذتو وضميتو بكنتورها حتى لا يصلو حد ...

ودحكت على الميز موجود جهاز موسيقى وفيه اسطوانه شغلتها وكانت اغنيه ناظم الغزالي ياام العيون السود
ضحكت وانا اتخيلها بكلمات الاغنيه
وكان في مجر صغير بطرف الجهاز فتحتو ولكيت فيه محبس فضه اخذتو وصرت اتلمس فيه ونمت بفراشها وانا اتأملو وغاليه صعدت نامت على بطني ومن دحكتو بيدي حكتلي ..
- مال ماما لا تضيعو
- لا يابه ماضيعو ماتخافي
- وين ماما وينهااا
- راحت تجيبلك لعابه كبيره بطولك ويمكن اطول منك والحين هي تدورها
- مااااليد ماااليد

هين انا ضحكت بوجع والله هالذكرى ببعادها تحفر بكلبي حفر السهام ..
غاليه مثل امها ماتلفظ الراء ..احيان تلفظها "ل" واحيان "ن" حتى جراح
تسميه جناح وكثير يتمشكل معها على هالاسم وهي تعند فيه وتحكيلو جنااح

يعني هي مشت وخلتلي كل شي منها هين لكن بغيرها انا ماترضى نفسي والله مايهدالي بال لو ماادحك طولها هين ببيتي مره ثانيه ...

نومت غاليه على بطني وضليت ادحك بهالمحبس شكلو حلو وغالي ليه مادحكتها تلبسو ولا مره ! خليتو بمحفظتي ونمت

وصحيت بالتالي على حركتها وشلتها نومتها حدري وضليت صاحي طار من عيني النوم ..وانا هالايام صاير نومي كلو ساعتين ثلاث ...
نزلت كعدت بره بالحديقه وادخن وحاير بأمري وين يصفى !
دحكت امي اجتي حدري كعدت وصارت تحكيلي ....
- مايصير حالك هذا يابني بتموت وراها انته ! هالديره بركبتك لاتنسى يابني كافي حزن اصحى على زمانك الوكت يمشي والديوان فارغ والرجال تسأل عنك لاتخلي بظهرك شامت يابني
- يمه انا بشر ولي حد بتخلص عندو طاكتي والحين انا مصفففر ماعندي لا الحيل ولا الخلك الي يحمل همهم ولا صدري رحب للكل مثل الاول انا ممرود حالي يااامي افهميني
- افهمك يابني عجل مانحنا كلنا حزنانين على حالها لكن وش بيدنا هذا امر ربنا هو العافيه بيدو ساعه يبسطها وساعه يكبضها
- مو مثل حزني يايمه مو مثلو ..انتو تحزنو عليها ساعات انا للحين صوتها يضرب براسي وكاره نفسي ماصنت الامانه فيها ولا الي كادر على رعايه بنتها الي هي الثانيه بعد صارت امانتي
حملي فيهن ثكيييل يايمه ثكييل
- لااا بالله انته حزنك ماهو بالامانه انته همك وحزنك كلو لانها بعيده عنك
-ايييه عجل ليه مايحزني بعدهاااا يمه احكيها لك من الاخر انا مااستانس الا معها ومايجيبلي راحه البال الا وجودها بينا هييين بغير رجعتها للبيت سالمه
ماتفكري يعود ولدك مثل اولو
- هو بحالتينو مايعود مثل اولو .. يابني لاتنسى عندك حرمه وولاد خلي بالك عليهم شوي
-ماعليهم شي محفوظين بينكم وش عليهم يايمه .. انتي داريهم انا مالي حيل بني ادم
-عجل هيك التينه تطلع مأثره فيك وانا مو داريه ! ماظنيت ياخذك درب العشك بشباكو ياخالد

على هالكلمتين انا درت وجهي لعندها وركزت بعينها وهي تتبسم ..مادري وش صابني وكت سمعت حكيها لكن حكيتلها

- اي عشك يمه هو انا بعمر اعشك !
-العشك مالو زمان ولا مكان يابني وانته اعشكت بغير الزمان والمكان المناسبين
ماحكيلك غير جوز منها تتعب كليبك وتهدم عايلتك ..يابني دربك مانخلك للعشك احذر من مطباتو
-يمه حكيتلك ماني بعاشك وش لزووم هالحكي
- كانك تكذب على نفسك ماتكذب علي
انا امك ياولد افهم لمعه عينك ليه ولمين
والله ساعه الي دحكتك تبكي عليها هذاك اليوم حكيت ان ولدي تثبتت عليه ظنوني
وطلع عاشكها للتينه
-يمممه انا بكيت عليها لكونها
-اييه لكونها شوو احكيلي شوو
- لكونها عزيزه عندي واذاها ياذيني

حكيتها وبحينها عنيت كل حرف من الي حكيتو فعلاً اذاها ياذيني
- واهي عزيزه لانها اخيتك ؟
-مااادري يمه ماادري هالحين انا عايزني دوخه بااال استغفر الله
- دحك ياولد لو صفيت على جواب انك مانك عاشكها فهذا زين وان صفيت على انك عاشك حروف اسمها وتضل تندبها ليل نهار فاحكيلك هييين تهدااا وحكم عكلك وحاول كل مابيدك تبعد عنها
انته صاحب عايله وعندك ولدين وحرمتك ماهي بهينه بتسود عيشتكم والله
ولاتنسى بركبتك المشيخه والحلال والولاد مو بس هالتينه وتضيع عمرك عليها وتنسى الي كان كبلها .. انا احكي لمصلحتك يابني ..الحين انته غالب عليك التعب والخوف بفكدها لكن وكت تصحى من خوفك دحك على الي حواليك لاتخلي عينك صوب التينه وبس .. فهمتني يابني

-اييه فهمتك

ربتت على كتفي ومشت وانا صرت افكر بحكيها يعني هي لهالدرجه واثقه اني عاشكها ؟ هو صحيح اني ماصرت ادحك شي غيرها وكلو خليتو فدا لعينها لكن مابيوم دحكتها بغير نظره الصاحبه
ولا مفكر اني اتزوجها بيوم وتصيرلي مره .. وحكيها لامي صح لو صارت بتخرب علي الاول والتالي وعمري مو عمر عشك لا وكتي يسمح بهالشي

استغفرت ربي وشلت هالافكار من راسي ومشيت لعندها بالمستشفى ولكن هنيك حسيت ان يومي مايكمل لو ماكعدت هالساعه مثل كل ليله معها ...

واول مادخلت ودحكتها رنت ببالي
.. عزيزه عندي واذاها ياذيني..
مشيت حدرها وتلمست خدها وحكيت
-اييه بالله عزيزه عندي

كعدت حدرها وكضبت يدها ورفعتها لوجهي ثبت اصابعه على لحيتي وحكيتلها
-يولو وش يسموه حالي معك ! انا حاس اني بساعه بتمدد هين حدرك لو نفذ صبري ... مادري وش الي بلاني ببعدك
كنتي كريبه مني واعاود البيت ادورك بكل زويه منو .. كل ليله انا اسهر خصوصي حتى اكل الحلى من يدك الحين انا كاره البيت والاكل مر يدخل بافمي ... اعترفلك انا كنت اتعمد الوكفه كدامك بكامل كشختي لحتى ادحك بعينك هذيك النظره الي تصيري تتمعني فيها بكل تفاصيلي مابيوم همتني نظره من بشر غير نظرتك هاذي الي للحين اذكر اول وكعتك بيدي كانت من بعد مادحكتيها بعيني ..

تذكرت بحينها نظراتها وبسمتها ولهفتي معها وخليت راسي بهداوه على صدرها وغمضت عيني ورفعت يدها خليتها على وجهي وحكيتلها ..
- يولو انا لو عاشكك مابخلي الدنيا تاخذك مني لكن مادري وش الي فيني كل الي اعرفو اني تعبااااان ببعدك والله تعبااان
ارحمي بحالي يا يابه وبسك نووم
هين انا وبنتك حالنا بالويل كوي نفسك وعاودي لنا ياتينه بالله انا حاس انك الفاصل بين حياتي ومماتي ولو يسموه عشك خله يكون عشك ويكون الاكثر منو ولو كان اسمو مرض ولا جنون ولا عمى عين خله يكون انا ماهمني وش اسميه
انا همي هالتعب ينزاح بعودتك معي
بصدري جمر يكوي هالضلوع وكت الي اكعد بره واتركك هين ودي اضل نايم هيك عندك لحين ماتصحي ونعاود سوا للبيت .. يول انا بعد مترين مو حاملهم
كيف بكدر لو خسرتك وضليتي بهالنومه يووولووو

كضبت كتفها وصرت اعصر فيه وانا عيني تدمع وانا اتخيل هاذي خسارتي معها بهالايام اودعها واضل وحيد بعدها
ماتحملتها هييك فكره بالبال ماتحملت وجعها ..
رفعت راسي منها وصرت امسح وحهي واتعوذ من الشيطان واستغفر ربي وادحك عليها وتالي ضحكت وحكيتلها

- والله لو اني ادحك نفسي كبل كيف هيك انا ابكي بحضن مره واتوسلها كنت اكص هالراس ولا اخليه هيك يساوي لكن اليوم انا مربط فيكي لا عندي العكل ولا الحيل

كضيت باكي الوكت بالتلاوه لها وبعدها مشيت كعدت بره اتصفن بالحيط وساعات يكعد حدري واحد من الممرضين يحكيلي ان كعدتي هين ماتفيد بشي ولزوم امشي ارتاح بالبيت .. وانا
ادري ان حكيو صحيح لكن ما ودي امشي واتركها هين وحيده ولو صحت ساعه الساعه كون تلاكيني حدرها وتعرف اني ماتركتها ولا ساعه ...

ومشت الايام هيك والطبيب اقترح ان نبحث لها عن كلى ونسجل اسمها بكل المستشفيات لحتى وكت نلاكيها نزرعها لها وعسى ان يعود حيلها ويخف الحمل على الكلى الوحده ...

ومشيت انا ومُلهم الي بدورو سأل كل الاطباء الي يعرفهم وسجل اسمها باكثر من مكان وانا مشيت لمدينه الطب ببغداد استفسرت وهمه يرسلوني من مكان لمكان لحين ماثبتت اسمها عندهم وضليت انتظر متأمل نلاكيها ...

امي ارسلت صناديك برتقال ورمان للمستشفى بيد ولاد عمي وحكتلهم يوزعوها للكل هين صدقه دفع بلاء عنها

انا صار وكت ملاكاتي برجالي هين بحديقه المستشفى وكلها تدك صدرها للخدمه وكل مايجون محملين بالاكل والشرب ويحاولو يأنسوني شوي ويجبروني على الاكل معهم ويطلبو اعاود الديوان وانا احكيلهم مااعاود ادخلو لو مااخذت بثارها عجل وش فايده هالعكال والديوان وهالمشيخه كلها وانا على اهل بيتي ماكدرت اخذ حكهم
وهمه من يسمعو هيك يتركو السالفه

وخلص شهر الواحد ولا لكيت كلى تناسبها ولا هي الي صحت .. تاخذلها يومين ثلاث نازل اليوريا عندها وتعاود ترتفع ويركضو الاطباء عليها وواحد منهم اقترح يعملو غسيل لها وعارض الثاني وانا هديت عليه حكيتلو بتخسروني اياها هييك بتضل كل عمرها تغسل كلى
وهو يحكولي الوضع حرج مايمشي بالابر وانا احكيلو يمشي لزووم يمشي

كنت اخر ايام اتمشكل مع الرايح والجاي يا من ممرض او طبيب وصرت اكعد حدرها بالساعات محد منهم يحكي ويتدخل عرفوني كلهم وانا نفذ صبري صرت ادفعو وادخل لا اخذ اذن هذا ولا ذاك ...

وبيوم انا كنت طالع من عندها ولاكيت نجيب واكف وينتظرني واجه حدري وحكالي ...
- البشاره ياخوي البشاره
- خييير
- هالنذل كضبو صياح وهو الحين عند الديوان ينطرك
- والله وكفو امشينا

طلعت معو ركض مشينا للبيت وانا الدرب كلو افكر كيف اتفنن بعذابو
وحين ما وصلنا دخلت الديوان من بعد شهرين ودحكت صياح كاعد وكاضب بيدو حبل كان طرفو الثاني ملفوف على حمزه ومربطو فيه ...
ضحكت وحكيت بعلو الصوت ...
- عششششت يالنشششمي عشششت يالذيب والله وكضبتو وجبتو مربط كفووو والله كفووو
- عند عيناك خويه ناطرتو ليالي وحلفت مااعاود الا واجلبلك كتال اخيتك
- ماكصرت ياعضيدي الحين سلمه لي وخليني اطفي ناري فيه

شمر الحبل ليدي .. كضبتو وهو اخذ رجالو ووكفو حدر الباب ..

دحكتو ثيابو رثه ومتربه ووجهو مزرك من الضرب وهو يدحكلي بكل حقد وغيض ...

كعدت على مستواه وكضبت فكو وصارت عيني بعينو حكيتلو ...
- تغدرني ياحمزه ! هذا جزاه سنين الخوه معك هيك تجازي صاحبك تطعنو بالظهر هيك الحقد والكره مالي صدرك علي !
- وانته ماكصرت بعد حركت كل املاكي
- عجل اسكت لعملتك والثار يصير منسي! وش سبب هالحقد كلو انا اذيتك بشي جاوووووبني اذيييتك ! اذييت اهلك
تحرك معملي وسنين تسحب بفلوسي وتخسرني شغلي وتاليها تطعن اخيتي وتمشي !!! ليييييييه وش سببو فهمنننني لووو عايل انااا معك كنت تعاال طالب بحكك هيييييين ماتعرفني انا ماكل حك بشر لييييه بتغدر وتطعن فيي ليييييييه

ضحك وحط عينو بعيني وحكالي ..
- خلييييك احركو لعكلك بهالفكر مااحكيه لك لكن انته تستاهل كل هالاذى تستاااهلو
وهي انا نبهتها تمشي وماتندك فيي وماسمعت وهاذي جزاااه اليعاند حمزه

ضربتو على نص فكو ودفعتو للكاع وكعدت فوك صدرو ودميت وجهو بالضرب بكل شبر منو وتالي كمت عنو وسحلتو للحيط وركعت راسو مرتين وثلاث وهو يصارخ ويشتم وانا ماارد عليه الا بالضرب وبالاخر دحكت سيف والدي معلك بالحيط مشيت سحبتو وطلعتو من غمدو وخليتو على ركبتو
صرت ادحكلو وهو كان يترنح و وجهو كلو دم ومن دحك السيف على ركبتو نزل راسو وسكن بمكانو ...

صارت كدام عيني صورتها وشهكتها وضغطت على ركبتو بنبله السيف لحد ماسال دمو منها بعدها رفعتو عنو واستغفرت ربي وحكيتلو ...
- امشي اطلع من هين انا عفيت عنك

دحكلي وعاكد حواجبو حكيتلو ..
- امشي يول من هييين ماودي اذبحك
روح هالدم انا حقنتو صدقه لوجه الله عسى انها تدفع البلاء عنها ولو انا كنت مخطي بحكك وفي شي انا عاملو بكصد او بدون وهو الي وصلك لهالمواصيل من الحقد معي فهذا اليوم اعتبره فك بفك
انته خذيت بثارك وانا خذيت بثاري وانتهينا لكن بتاخذ عايلتك وبظرف يومين تمشي من الديره ولو دحكتك هين اعاود لذبحك هالمره فهممممت ... امشي يلاا اطلع ولا عاد تخليني الاكي وجهك

تركتو ومشيت طلعت للولد وهمه كضبوني وسطرو راسي ليه هيك تركتو ومايتامنلو وتعبنا يلا لكيناه ومن هالحكي بالاخر رديت عليهم ...
- دحكو مايجوز لو صرنا اصحاب الحك نطغى جايز يجي يوم ونصير نحنا بدالو وكاد نطلب ونتمنى الرحمه وكفانا دم ومصايب خله يطلع من هالديره وذنبو يضل حاملو بركبتو كل عمرو يتحاسب عليه

دحكتو طلع ويمشي وكاضب راسو حكيت لواحد من الولد ياخذو يشمرو عند باب اهلو ....

مشيت غسلت يدي من دمو وحسيت ان هم وانزاح عن صدري ساعه الي دحكتو يمشي من هين وخلصت سالفتو ...

وعاودت للمستشفى مادخلت ضليت بره اتمشى وادخن صرت التجىء هين لحتى مادحك احد واضل لوحدي .. مالي خلك اسمع حكي احد وزنتو براسي ..... ولليل انا اعرف وكت المناوبه ومن يمشي ومن يضل وتركتهم خلصو شغلهم هين وبعدها دخلت والممرضين هين يعرفوني صرت اسلم وادخل لعندها ...

كعدت حدرها ودحكت على خدها اليوم متحسن خاف حمارو وركبتها بدا يختفي الاثر منو تأملت فيها خير ودعيت ربي يعجل بشفائها صارلها شهرين بهالنومه
ومادحكت منها استجابه لشي .. ختمتو للقران حدرها طول هالايام واخذت تقاريرها لغير اطباء وتدخلو هين اكثر من طبيب من جراح او استشاري وكلها تحكي اصبر وانا مناطر تالي الصبر وين

خليت راسي على كتفها وكضبت يدها وحكيتلها ...
- انا وعدتك اخذ بثارك كبل ماتصحي واليوم وفيتلك بوعدي لكن هديتو في سبيل الله عسى ان تنحسب صدقه عند ربنا ويرفع فيها البلاء عنك .. انا طال صبري معك ياتينه وللحين مامليت من مناطرك تصحين وضال هين حدرك ليوم مايفرجها ربنا

غمضت عيني وضليت مخلي راسي على كتفها وهديت روحي هيك ... متعود اقرالها سوره يس كبل مااطلع من عندها
قريتها وعدلت غطاها وطلعت كعدت بره ادخن وفكري فارغ تعبت من تفكيري بكل شي صار .. صرت مالي فكر بشي ولا اتأمل غير صحوتها ادري بنفسي من حينها يعاود نشاطي ومحياي لكل شي ..

كريب الفجر مشيت للمسجد كنت مشتاك للصلاه هنيك ورحت توضيت واخذتلي مكان حدر امام المسجد وصرت اصلي حدرو وجودنا القران وكضبنا التسبيح
لحين الشروق بعدها سلمت عليهم وكلهم دعو بالشفاء لها ومشيت عاودت المستشفى ... وكنت نعسان كعدت على الكرسي الي حدر الباب ورجيت راسي وغفيت وتالي كعدني صياح وحكالي ..
- ليه ياخوي مكسوره ركبتك هين ماعاودت لبيتك نمتلك ساعتين ثلاث براحه
- مالي راحه غير هين ياخوي هنيك عيني ماتاخذ نوم
- الله كريم ياخوي الله كريم .. ودي اسألك
-اييه
- انته ليه هالكثر معلك روحك فيها ؟ بداخلك شي احكيلي وانا خويك
- هه صرت مثل امي ياصياح
- عجل كيف اغفل عنها
- ما في شي انا اعزها وحالها اثر فيي لاني كنت واعد بحمايتها وما وفيت بالوعد دحك هاي خسرتها كليتها وعافيتها وحرمت بنتها منها الملامه تاكل بروحي ياخوي .. لانها كانت تنبهني عليه وتحكيلي احذرو لا تغفل عنو وصدكني انا ماكذب عليك لكن انا حسبتو خويي ومايغدر وكل حسباني اثاريو غلط بغلط وندمي عليه يضل لكطع النفس مانساه
- يجازيه ربو ياخي ..

وانته ماغلطت بشي هذا قدر وصار ولو ما وجودها حدرك هذاك اليوم كان لا سامح الله خسرناك بدالها وساعتها نهدر دمو ودم اهلو ومانخلي عليه سكيفه وحتى ام غاليه انا مامستهين بثارها لكن انت وكفتني عنو
- الدم يجر الدم ياخوي وانا حقنتو في سبيل الله
- والنعم والله دومك حكيم بفعايلك
الحين تريك معي جيتلك متعني ناكل سويه

فرش الاكل وصرنا ناكل وهو يحكيلي اخبار ديره وانا ساكت واستمعلو وعلى كعدتنا هيك طلع واحد من الممرضين واجه حدرنا وحكالي ..
- مريضتكم صحيت
انا بالعجل كمزت من مكاني وودي ادخل عندها لكن دحكت الطبيب يأشرلي اضل هين ومنع دخولي معهم .. وصرت اضحك واحضن بصياح الي هو بدورو يتحمد الله ويصبر فيي ...

وبعدها طلع الطبيب وحكالي ..
- الحمدلله على سلامتها والله ونلت جزا صبرك
- الحمدلله الحمدلله بشرني على وضعها
- مستقر للحين ووصيتهم على كم تحليل بيخلصو اليوم ونحكي بوضعها
- ان شاء الله خير ان شاء الله
- ان شاء الله تلاكيها بالطابق الرابع اصعد يدلوك غرفتها

تشكرتو ومشيت للمصعد وهنيك سألت لحين حصلت رقم غرفتها ودخلت لعندها وصياح ضل برا ...
طلعت الممرضه من هين وضليت حدرها
اهمس بالحمدلله وتكربت حدرها وهي فتحت عينها وانا غمضت عيني واشكر ربي من كل كلبي اشكرو لهاللحظه الي صبرت لها وعطيتها كل حالي ومالي

كعدت حدرها وكضبت وجهها وهي تبسمت .. بهالحين انا نزلت دمعتي ماسيطرت على فرحتي فيها كنت خايف لا تالي هالصبر واخسرها وبالتالي عاودت لي وتبتسم ...

ضليت ادحك لعيونها وكل تفصيل فيها كاني مامدحكها من كبل وهي حكتلي بصوت متعب ..
- شيخ
- يابعد اهلو
- ليش هيج تعبان

ضحكت وحكيتلها ..
- اول ماتسألي عن حالي يولو ! تعبي بسبب بعدك ياتينه بالله مالي غنى عنك

تبسمت وضلت مركزه عينها علي وانا حكيتلها ..
- شلونك يا يابه بيوجعك شي !
- لا زينه
- مرتاحه بنومتك هيك عطشانه !
- شربتني مي هالممرضه مرتاحه لاتخاف

كنت ادحكلها واتبسم وشي في ضلوعي يبغي يتحرر ويرفرف هيك شعور ماسيطرتلو وماحسيت الا وانا حاضنها وراسها بنص صدري هيك عاصرها بحضني واخذ نفس اقوى من الثاني واحكيلها ..
- بعادك مر ياتينه مر ماينجرع حملو
بخوف عشت ايامي انا الي ماعرفتلو معنى بسنيني الثلاثين وكت وكعتي بيدي بدمك هين عرفت كيف يكون الخوف

رفعت يدها وخلتها على طرف ظهري وهي تحكيلي ..
- اهدء اهدء بس حتى لو خايف عليه ماسامحك على هالتدخين
- ههههههههه يولوووو انتي بس عاودي وسوي الي تبغيه لا تسامحي خلينه نتكاون من جديد وخليني اسلمك الباكيت واجي لعندك كل ساعه اطلب حك تعويضو
- هههه متغير يولو
- هههههههههههه ياااويل حااالي ياووويلي يا يابه ول مشتاااكلك عليييم الله مشتاااااك لايامنا ماتعاودي لهالنومه تينه بالله اذبحك واذبح حالي وراكي ولا اضل بالصبر هذا الي يشل الروح

بعدت عنها وهي تدحكلي وتضحك وحكتلي ..
- صاار تدلل

تبسمت ووعيت وش كنت عامل معها وتغيرت نبرتي وحكيتلها ..
- انااا اتعذر ماكصدت شي لكن هيك من خوفي عليكي وهيك يعني ااا ماتحسبيها شينه بحكي اانا مانتبهت وهيك
- هههه افهمك افهمك
- ايييه

كمت وتمشيت ومعطيها ظهري وامسح بوجهي نمليت عرك وخجلت من عملتي عجل انا وش جرالي احضن بالحرمه هيك ياشين ماعملت والله ...
سمعت صوتها تحكيلي ..
- شيخ بنتي شلونها

مشيت لعندها وحكيتلها ..
- بنتك مداريها اهلنا تطمني
- الحمدلله

دحكتها غمضت عينها حكيتلها ..
-هااااا وش فيكي
- نعست شويه
-وووول وش نعستي ماصدكت انك صحيتي ماتنامي يوولووو لا تجلطيني
- عفيه شبيك تعبانه عوفني انام
- ههههه ول لا تتنعوصي نامي لكن اصحي ايييه ماتاخذيلك يومين يلا
- ههه لا لا

كعدت حدرها ودحكتها وهي تغفى وبعدها طلعت لاكيت صياح واكف وينتظرني حكيتلو ...
- والله وانها ردت بعافيتها ياخي
-الحمدلله الله يحفظها لكم ياخوي
- ان شاء الله .. ابغاك تمشي للبيت تبشر امي بحالها وتوصيهم على ثياب واكل وكل مايلزم زين وعاود بالعجل
- من هالعين تآمر

تركتو مشى ودخلت لعندها وكعدت اطالعها وهي نايمه واشكر الله ردها لي وماضيع صبري وتعبي هالشهرين

صار حضنها هيك بلسم حسيتو مسح كل تعب فيي ورجعلي الحيل والنشاط والضحكه وهين تأكدت اني عاشكها ومادريان عن نفسي ... لاني معها حسيت بنبضه بالكلب كويه وسريعه وفيها من الفرح ما مدحكو غير بحلمي اني اكعد ثاني يوم والاكيها متعافيه ...

كنت صافن فيها واحكي بداخلي ..
مااضيعك من يدي لو اصبرلك ليوم شيبي .. اخليكي تصيري حرمتي واتهنى بعشكك ....

للظهر عاود صياح ومعو امي وغاليه وانا صحيتها واخذتهم بالاحضان وامي صارت توكلها وبنتها بحضنها متعلكه بركبتها وبعدها بشوي دحكتلي وانتبهت حالها تغير .. مشيت لعندها وحكتلي ..
- اخذها اريد اكوم لعبت نفسي

اخذتها من حضنها وخليتها حدر امي واجيت مسكت يدها ومشيتها بهداوه للحمام ووكفت حدرها وهي استفرغت كل الي اكلتو وبعدها تمسكت فيي وصارت تغسل وجهها وانا ارفع بشعرها لوره اذنها واندارت علي ويدها ترجف
ووجها اصفر ..بالعجل دنكت وشلتها وهي صايره عظمتين وهالكدها مابيها خمسين كيلو ...
مددتها بفراشها وغطيتها وهي مغمضه عينها وصيت امي عليها وطلعت مشيت حكيت مع الطبيب وحكالي ..
شي طبيعي صارلها فتره تاركه الاكل
ومعدتها مخربطه هي من حالها تستقر

عاودت لعندهم واخذت غاليه بحضني وادحكلها نايمه .. انمردت روحي عليها
حتى بالاكل ماتهنت ...
خليت امي تاخذ غاليه وتعاود وضليت حدرها كل شوي اصحيها تحكيلي كلمتين
وتنام المهم اتطمن انها بخير ...

للمغرب صحيت وعدلت كعدتها وشربتها مي وهي حكتلي ...
-شكراً داتعبك وياي
- يولوو انا الي اشكرك بفضلك انا اليوم عايش ومانسى تضحيتك هاذي كل عمري
- تستاهل اضحيلك شيخ
- كيف كدرتي هيك تجازفي بروحك لاجلي ؟
- مادري بس خوفي عليك جان اكبر من افكر اذا اتاذى او اموت كل الي همني ماتوصلك الضربه
- اصيله والله ..ربي يرحم الايد الي ربتك
تضحيتك هاذي الاخو ماسواها لي
ربي يكدرني واعوضك هالاذى
- الحمدلله عدت سلامات ومابيه شي لتخاف عفيه اضوج اشوفك هيج قلق ومقهور
- تينه اناا اسف
-اسف !!!ليش؟؟
- اتعذر منك يا يابه سامحيني بسبب هالحادث انتي خسرتي كليتك اليسار

دحكتلي بشك بالاول وبعدها انا دنكت راسي وشوي وسمعت ضحكتها وحكتلي
- فدوا الك شيخ عبالي شو شكو وتتعذر مني
- ول احكيلك كليتك !!! بتعيشي بكليه وحده بعد الحين
-اي واذا ليش ضايج
- من كل عكلك !
- يعني هسه راحت شنسويلهه بعد
صح تفاجأت بس فدوا الك مادام خسارتها خلتك عايش وحفظتك لاهلك وناسك هاي الف الحمدلله عليها

سكتت بالله ماعرفت وش ارد عليها عجل ماهمت لحياتها همت لعيشتي ويه ناسي !

- شيخ اني ماعندي شي مهم اخسره ولا مهمه حياتي او موتي بس انته عندك المشيخه وتعب والدك والمعمل وزوجتك وولدك وامك كلها بحاجتك .. اني شعندي هي بس هالغاليه ومتأكده لو رحت هي تعيش بايد امينه بس انته اهم مني لذلك يرخصلك كل شي

دحكت بعينها وحكيتلها ...
- انا لكل هذول ايه لكن من بينهم بس انتي لي

تجمدت ملامحها وهي تدحكلي .. حكيتلها
- لو اعيشلهم احتاجك معي لهيك لو ودك اضل معهم زين ضلي معي مفهووم
- اي

بعدت عينها عني وانا هييين بديت نار العشك تعلى مشاعلها بصدري .. صرت اكره تمر الثانيه وهي تتجاهلني فيها
واكره الي يداريها غيري ومبعد عنها كل حد ومخليها تحت عيني بس ...

مشيت اخذت برتقال شيفتو واخذتو لعندها خليتو بحضنها وعطيتها شيف منو وهي اخذت الثاني عطتو لالي .. تبسمت واخذتو منها وصرنا ناكل وهي حكتلي
- احس ملمس خدي خشن ليش ؟
- كان فيه حساسيه كبيره ماشيه على طولو
-هااااا صدك !
- اييه والله
- وهسه شلونه خف ؟
- اي خف بكثير عن الاول .. صار بس لون خفيف هيك وملمسو بيتحسن هاليومين لا تخافي
- ها زين

اخذت شيف ثاني وصارت تاكل وتدحك للغرفه وانا تبسمت وحكيتلها ...
- بالله عليكي انتي كيف هيك بتثقي بحكيي لهالحد كلو !
- ليش هالسؤال مفهمت !
- يعني الحين انتي حتى ماطلبتي مراه تدحكي فيها وجهك اكتفيتي بوصفي وكلمتي عنو .. صح انها مو جديده عنك من يومك معي انتي تدحكي بعيني مثل المراه وتكتفي بوصفي لكن دايما انا اتفاجىء بثقتك هيك
- ههههههههه والله مادري بس اني احس من بعد كلمتك مايحتاج ادقق وهيج تعودت اشوف كلشي احتاج اعرفه من خلال شوفتك اله
- يا عسى ربي يكدرني على مداراه هالثقه وحفظها كل العمر صدكيني ثقتك هاذي ماتتثمن عندي بكنوز الدنيا

تبسمت ودارت عينها مني وبعدها دحكتلي وحكتلي ..
- زين لعد اوصفلي شكلي شلونه هسه
-ههههه .. وجهك مصفر وخديكي مورده من هالتحسس ..تحت عينك هيك لون بني
وحواجبك متشعفره وطولانه وشفتك متيبسه ولونها مايل للبياض ..
في شعر هين على اطراف شفتك ههه وفي منو عند اسفلها وعند دكه الحنج
وضعفانه كثييير
- ههههههه يااا عفيه يعني هسه راعيني شويه واحجيلي بيج طلعه هسه تخليني قلقه شلون كاعده هيج وياك وتباوع لشعر وجهي
- ههههههههه عجل اكذب عليكي ! مايجوز تخرب الثقه هيك يابه .. مراااه انا مراااتك مابكذب عليكي
- رجعني للبيت خلي اعدل شكلي لعد
- ههههه ماتعاودي لحين يومين يا يابه
- ايييي ضجت شكو بعد مو صرت زينه
- يووول ضجتي من ساعتين كعدتيهن هين وانااا مشتول من شهرين عجل حالي شلون !
- عزاااا شهرين !
- ايييه شهرين نايمه هين وتاركتني اتلوع بالصبر برا واتمشكل مع الرايح والجاي
- ياااااا ههههههه مادري
- يابه هو انتي يمتى تدرين
- هههههه يلا استاهل التعب يولو
- هه بالله كأنها عاجبتك يولو ومجلبه فيها
- تعلمتها منك
-ايييه لكن انا احكيها لك انتي لاااااااا
- لييش يولووووووو ليش
-وووول اخيك الصغير اناااا تحكيلي يولواسكتتتي لا اطلع ضيمي فيكي الحين
- هم رجعنا اسكتي سكتت يلا ضل سولف وحدك

ضحكت وتركتها تتصنع الزعله معي
هيييك انا مرتاااح ادحكها بكل حالاتها الي تعودت عليها ...

صرت اتحرش فيها واشمر عليها كشور البرتقال وهي تضحك وتعاود تشمرو علي وبعدها حكتلي ...
- مو متريدني احجي شكو تتحارش
- غيرت رأيي ودي نحكي
-هااا بالمزاج موو
-اييييه اييه بالمزاج
- زين اكولك انته ماجعت !
- يعني هيك بين وبين
- زين اني جعت واريد اكل بدون مااتقيء يصير !
- احكي مع الطبيب وادبرها لك تآمري
- تسلم

مشيت لعند الطبيب وحكيتلو وهو حكالي امشي اجيب الاكل وهو بيرسل ممرضه تعطيها ابره تهدي معدتها ...

واخذت الاكل وصعدت لعندها خليتو على رجلها وكربت الكرسي حدرها وصرت اكل معها وهي تحكيلي ..
- اول مره اشوفك بلحيه حلوه عليك كولش
- ههههه ناسي الحلاقه من زمان
- بس احلى من بس شوارب
-هاا هيك رأيك! اخليها يعني
- كيفك بس حلوه اذا تريد خففها رتبها وشوفها ويه اليشمغ شلونها تصير
- ايييه ذكرتيني باليشمغ
-من شوكت نازعه
- من هذاك اليوم المشئوم لليوم مالبستو
- اووي شكد لعد خايف عليه

هين انا طكيت ضحك بالله غصيت بلكمتي وهي تعطيني مي وتحكيلي ..
- اسم الله شجاك
- يولو حكيك ماعرف وش افسرو والله مادري ليه هيك تتنعوصي فيه بتجننيني انتي ماتحكي عدل
- ياا هسه شحجيت داده متكولي
- ااااهههههههههههه داده وشو داده النوب!
- ماتعرفها هاي بغداديه بحته

ماكملت اكل والتهيت بالضحك معها وهي كانها متعمده نعوصتها بالبغدادي معي
وتخليني ازيد بالضحك بفرحتي بصوتها وكربها ....

كملنا الاكل وضلينه صافنين هيك وبعدها حكتلي ...
- اريد اسبح يصير
- لاااا الجو بارد تمرضي ازيد من هيك
- بس شعري شوف شلون وصخ وريحته معفنه صار شهرين ممغسول حطك بعد ماتحمل عفيه
- زين زييين خلي ادحكلك وحده من الممرضات
-لااااااا عيني لاا اكعد واسكت لا تجيبلي وحده منهن ماريد عزاا والله اتخبل وحده تلزم شعري
- عجل كيف بتكدري وحدك
- اكدر هو شكو .. اتخبل احد يطخه
اخذني وهسه اني ادبرهه
-امشي يابه امشي

اخذتها للحمام ودخلت لها الكرسي وخليت حدرها الصابون والدوش المتحرك فتحتو وخليت ميو دافي وطلعت .. سديت الباب ووكفت وراه واحاكيها ...
-هااا دبرت معك
-ايي دبرت
-محتاجه شي
-اي ملابس لان هذني تنكعن شويه
- زين زين

مشيت فتحت جنطتها وطلعت منها ثيابها
وانا احكي ..
-والله وكت الشيخ الي مايحضر كلاص مي لنفسو يوكف الحين تحت ايدين هالصغيرونه يدلل ويداري

ضحكت ومشيت حدر باب الحمام وصرت انتظرها تكمل وحين ما كملت فتحت الباب ومدت يدها عطيتها الثياب
وهي تلبس وتحكيلي من ورا الباب ..
-شو هذني كبار
- هههههه طارت لحماتك الكانت امي تجمعهن بالويل فيكي
- ههههههه هسه تهد عليه بس ارجع

طلعت ومتمسكه بالباب ولافه شعرها بالمنشفه الكبيره ونازله على طول يمينها
مديتلها يدي مارضت تمسكها تركتها براحتها تمشت لعند فراشها وتمددت
غطيتها ورحت فتحت البطانيه الثانيه الي جلبها صياح لهين وغطيتها فيها ولفلفتها حد راسها وهي تضحك كعدت حدرها وصرت ادحكها وحكيتلها ...
- اليوم انا اسعد من على هالارض
- لييش
- لان حصلت ثمار صبري فيكي
- عساك دايماً سعيد

ضحكت وضليت ادحكلها حكتلي ..
-عيونك ذبلانه وحمره شنو منايم !
- هيك ساعه عند الصبح نمتها
- لعد نام هسه مبين عليك التعب

انا بالفعل كنت نعسان ..مشيت طفيت الضوا واجيت حدرها كعدت على الكرسي وخليت راسي على الفراش حدر بطنها وهي حكتلي ...
-شلون تنام هيج ظهرك يتكسر
- عجل وين اروح انام !! ما عليكي انا متعود بهالنومه نامي انتي نامي

شالت الغطى من عندها ولفتو على ظهري وانا اتبسم وهي تدحسو من عند ركبتي وتلفلف كتافي ... كنت مرتاح بهالنومه والله ماحسيت بتعب فيها وغمضت عيني بالعجل وماحسيت الا عند الصباح على دكه الباب ...

دحكتها كاعده ودارت عينها مني وكت صرت ادحكلها .. مشيت فتحت الباب ودحكتو صياح جايب معو الاكل وترمز الجاي ... دخل وهو منزل راسو صبح عليها وتحمدلها بالسلامه ومشى ...

خليت الاكل بمكانو ودخلت الحمام غسلت وطلعت وهي ودها تكوم ودحكتلي تبسمت ومدت يدها ودها اساعدها تبسمت لها وكضبتها وهي تمشي حكتلي ..
- تحملني هاليومين
- اتحملك عمرين شرط تعاودي وتعمليلي حلى جديد
-ههههههه تدلل

وصلتها للحمام ومشيت فتحت العلاكه دحكت جايب بيض مسلوك وخبز ومربى وجبن وجرك وكلاصين وشكر ..
رتبتهم وهي طلعت من الحمام ساعدتها وكعدنا ناكل .. انا نزلت على الاكل وهي اكتفت بلكمتين وبعدها ضلت صافنه بوجهي ... حكيتلها ..
- خير وش في بالك !
- اتذكرت شي الصبح من اول ماكعدت وباوعتلك
- اييه وش هو احكيلي !
- هو ....

#شقراء_بغداد

بارت_٤٣


- خير وش في بالك !
- اتذكرت شي الصبح من اول ماكعدت وباوعتلك
- اييه وش هو احكيلي !
- هو اتذكر اني حلمت بشي خلال هالايام
- اييه
- اتذكر جنت واكفه على تراب وداير مدايري دخان اسود واجتي مريه حلوه اخذت بايدي ومشتني ليكدام بدون ماتحجي ولاتباوعلي وكل مانمشي يصير كدامنا ضوا قوي ويختفي هالدخان بس من اندار الكاه يرجع وهيج ضليت امشي واسمع اصوات مافهمها صوت بجي صوت اطفال صوت تكسير هيج جانت وبعدين فجاه اجه رجال ضخم كلش ووجه نوراني جر ايدي من المريه كلتله منو انته كلي عمل صالح واخذني رجعني لنفس الطريق الي عبرته وهالمره مشيته بسرعه وبعدها كعدت ولكيت نفسي بالمستشفى

تبسمت بفرح على هالمنام وهي حكتلي
- انته سويت شي حتى يصير عمل صالح ويرجعني !
- هههههه ايييه ايييه
- صددك شنو
- حمزه كنت هادر دمو وعالنو بين اهلو وصياح كضى هالايام يدور عليه لحد ماكضبو وجلبو لي كنت ناوي اذبحو لكن باخر لحظه تراجعت وعفيت عنو في سبيل الله حكيتلو انها صدقه لوجه الله عسى يرفع فيها البلاء عنك والحمدلله ربي استجاب وبظرف يومين ردتلك عافيتك
- زين سويت والله لو اني موجوده جنت ايدتك على تركه
- اييه عجل مادري بهالشي !
- شيخ غاليه تجي اليوم اشوفهه ؟
- لاا يابه ما هي بزينه عليها المستشفيات وهي صغيره
- لعد شوكت اطلع واشوفهه
- بكرا ان شاء الله
-ليش ما اليوم
- لااا تينه اليوم عندك تحاليل تعمليها ولزوم ترتاحي هين

تأففت وخلت يدها تحت خدها وضلت صافنه بوجهي وانا بالاصل احب هالنظره منها وخليتها تدحك بكيفها

بعد ساعه دخل الطبيب لحتى يعمل الفحوصات و وكت مشى اخذتها بالكرسي المتحرك بره للحديقه فكرت انها من زمان ما لاحتها شمس لزوم تطلع هالصباح ...
صرت احكيلها هين كنت اكعد وانتظر بالنهار وهين مكاني بالليل واحكيلها اني كنت كل ليله ادخل لعندها احكي معها وتسألني شو احكي اعبرو لسؤالها بغير سالفه ...
ضلينا بره لحين الظهر عاودنا الغرفه وهي تتشكرني كل ساعه على كل شي
لو عدلت حجابها تشكرني لو عطيتها مي تشكر وانا بالاخر حكيتلها اسكتي بزعت من الشكر وهي تضحك ...

زارونا صياح ونجيب وحريمهم ومعهم الغدا وكت اكلنا ادحكلها كل شوي اخاف تعبت اخاف ودها شي وتخجل تحكيلي بوجودهم وصياح ينغزني كل شوي ويحكيلي .. عينك الحرمه راح تغص بلكمتها ...
وانا اصير اضحك وابعد نظري عنها
ولحين مامشو انا ادحكلها بالخلسه ..

حكتلي ودها تنام وتركتها تنام ومشيت ادحك التحاليل وش صار عليها ..
وهنيك حكالي الطبيب ان عندها نسبه بروتين مرتفعه شوي وهالشي متعب لها وصفلها ادويه نوعين ووصاني اداوم على هالتحاليل كل العمر كل شهر لزوم تحلل حتى ندحك الكلى بحاله زينه ولا تعبت ...

اخذت الادويه وعاودت لها ودحكتها للحين نايمه .. كعدت حدرها وصار بودي ادهن لها خدها بنفسي .. واخذت المرهم
ووكفت حدرها وصرت بطرف اصبعي اخليه على خدها وادهنو بهدووء وانا احس هيك النفس زاد قوتو .. ودي افهم ليه حبيتها هيك ! ليه هي مو غيرها !
جيتها لحياتي غريبه ومعزتها عندي اغرب مالاكيت حالي الا وانا عاشك لها
وياخوفي من تالي هالعشك وين بيودي ؟؟

صحيت هي وانا ادهن بخدها الثاني وضت تدحكلي وانا اتبسم بوجهها حكيتلها..
- زين انك صحيتي
- شدتسوي
- وكت علاجك صار وانتي نايمه وصرت انا ادهنو الك ..زعجك هالشي!
- لاااا بس لو مكعدني ليش تعبت نفسك
- لاا مابه تعب يابه

مشيت للحمام غسلت يدي وعاودت كعدت حدرها وهي فاتحه شعرها وتفاكك فيه وشكلها مزعوجه حكيتلها ...
- وش زاعجك هيك
- شعري مامشطته بارحه وشوف صاير كعكوله شكبرها
-هههههههه من وين اجيبلك مشط الحين اصبري لبكرا ومشطيه
- لااا هسه افُكه خصله خصله
- نيال خلكك هالطول كلو بتفكيه !
- هههه لعد شسوي مضوجني هيج ع الاقل افكه اكدر اضفره احسن ما ضال هيج ادوس عليه كل شويه
- كيف كدرتي توصلينو لهالطول ؟
- ما كصيته من اني وصغيره .. بيبي جانت متقبل نكص شعرنه وبالاخص شعري تحبه لان مثل ثُخن شعرها وبقيته يطول لهاليوم
- يعني صارلو ثلاثين سنه مامكصوص
- ههههه ايييي ربيته ثلاثين سنه
- يحرسو الله من العين يستاهل التعب والله

ضليت ادحكلها وهي تفكك بخصلو وضلت هيك معو لحين ما تركتو ورجعت راسها على المخده وحكتلي...
- تعبت ايدي راحت
- هههههه زين انك طولتي فيه ظنيتك خصلتين وبتتعبي
- لا اهم شي خلصت من الكعكوله جانت يم ركبتي مضوجتني هسه انام براحه

صارت تسحب فيه من وره ظهرها وتميلو ليسارها وهو طولو هيك واصل لعند ركبها حكيتلها ..
- ما تضفريه اريحلك من هيك
- تعبت فد شويه

بهالحين اندكت الباب ودخلت الممرضه واجتي لعندها وحكتلها ..
- ما شاء الله كل هذا شعرك
- اذكري الله يابه
- ذكرناه خويه

هين كان ودي لو اسحلها لبره ماتحمل نظره اعجاب عليها وحكها تتعجب عجل هالشعر نادر الي يملكو بهالثخن والطول

كانت تضربها الابر بالمغذي وبعدها شكلتو بيدها وطلعت وهي حكتلي ..
- خطيه فشلتها

- عجل ما تصد عينها
- هههههه وشكو ضجت من يمك اني شعري وماضجت عليه
- اييه ماتفهمي جايز عينها تحسدو وش تسوي ساعتها ! لميه يلا لميه
- بعدين خلي انام

غطت عينها وانا ماتحملت مشيت حدرها ومسكتو وهي فتحت عينها وحكتلي ..
- شنو شدتسوي
- اضفرو عجل لو دخل حد هم يدحكو هيك !
- لااا عوفه شنو عفيه اني اضفره عوفه
- اسكتتتي بله .. حكيتلك انا اضفرو اعرف اضفر انا ماتخافي
- ومنين تعرف!
- كنت بالباديه اضفرو لشعري
- ههههههه صدك شلون يعني تضفره
- اي بالله كنت بعمر ال ١٥ وشعري يوصل لعند اكتافي وعاملو اربع ضفاير صغيره من كدام والي وره تاركو مفتوح
- وليش بس اربعه !
- اثنين من كل جهه حتى مايضل يتناثر الشعر على وجهي
- شكد حلوو وشعرك جان بنفس هالشكار
- لاا كان شكارو افتح من هيك وسرح ازيد من الحين
- شلون هالكد سرح
- دحكي انا شعري الحين سرح بمثل شعرك لكن زمان كان ازيد من هيك

كنت اضفر شعرها وامشي خطوه كل مااصل لنهايتو ..ومن حكيتلها على شعري ضلت عينها عليه مشيت حدرها ودنكت راسي وحكيتلها ..
- امسكيه لحتى تفهمي وش كصدي

خلت يدها متردده على بدايه شعري وضحكت وحكتلي ..
- هو هسه وانعم من شعري لعد قبل شلون يمكن يطير بالهوا
- هههههه كنت ارفعو من هين ينزل من هين لهيك كنت اظفرو وبعدها تبدا تنحل الضفيره من كثر حركتي ومطاردي بالخيل فاصير اجمع هالضفاير مع الباكي واربطهم لوره
- شكد حلووو هههه الله يحفظلك هالشعر عيني لعد كل هذا عندك ومتعجب بشعري وخايف عليه !
- انا هالحين كلهن مايطلعن بطول الاصبع الا انتي عين الله عليه كانو حبل

صارت تضحك وبعدها مسكت ضفيرتها وانا كعدت وادحكلها وهي حكتلي ..
- شكراً على هالضفيره مصفطه تصفط
- ايييه حتى ماتزعجك وتنحل كل حين
- هههه تسلم عيني تسلم
- سالمه عينك
- شيخ هواي متغير مدري اني هيج احس
- ههههههههه لا لا تغيرت اييه
-هااا شنو السبب شو ماحجيتلي
- هيك فرحان بعافيتك
- هااا . . هسه باجر نطلع
- اييه بالصباح ان شاء الله
- اي همزين خطيه انته هواي تعبت وياي هم لازم ترتاح وهسه ام جراح اكيد ضايجه لانك بعيد عنها هالايام
خطيه عود عوضها مو تعوفها وتطلع

كانت هالكلمتين منها مثل السهام نبتت بصدري ... عجل انا وين ماشي بكلبي لويين وهي همها وفكرها ويين ....

ما ظنها بتدحك غير خوتنا ولا بيوم تفكر او تشك اني عاشكها ...
دخنت باعصابي ومشيت طلعت وتركتها
واخذت اتمشى بره وادخن وانا اهدي بنفسي واحكي .. حكها ماتفكر مثلي لانها بنت اصيله وما بتدحك لرجال متزوج وحاسبها زمان اخيتو وعيشها ثلاث سنين بهالخوه وكاد ماتفكر هيك وكااد ...

عاودت لغرفتها ودحكتها نايمه غطيتها وطفيت الضوا واجيت لنفس مكان البارحه ونمت فيه ....
لليل كعدت على دكه الباب مشيت فتحتو ودحكتو الطبيب هين .. حكالي بيدحكها كبل مايمشي خلصت مناوبتو اليوم والصبح مانلاكيه ...

دخل فحصها وحكالها تعليمات تلتزم فيها ومن ضمنها التحاليل وماتشيل ثكل وتمتنع عن اللحوم هالشهرين وتكثر بشرب المي وممنوع الحمل الا بحاله زرعت كلى ثانيه ونجحت معها .. او كانت مؤشرات كليتها هاذي باحسن حال

حزني كثير هالخبر يعني فوك مانا خسرتها كليتها وبعد احرمها من الخلفه
كلو هذا ذنبو بركبتي .. انا الي دخلتها لمعملي وخليتها بهالحال بغفلتي ..

من بعد مامشى الطبيب هي دحكتلي وحكتلي ..
- زين نصائح خفيفه ومكدور عليها
- اسف انا ياتينه
- هاي شنو شيخ ليش الاسف هو شكو
- ماسمعتي وش حكى عن الحمل انا حرمتك منو وخليتو يصير خطر على حياتك
- هههههه الي يسمعك يكول اني كاتله نفسي على الخلفه هو قابل بعد اني مفكره بحمل جديد هاي اني رزقي من هالدنيا بس غاليه لا قبل ولا بعدين افكر بغيرها
- لييييه يعني ما ودك تتزوجي بعد !
- لااااا يا زواج عزا
- هااا ليه بله رافضتو ! احكيلي بنفسي اعرف ليه
- عندي سببين .. الاول هو اني مااثق برجال بهالدنيا غيرك يعني فلذلك مافكر بالزواج وبلاخص الي يجي غريب شلون اكدر اتقبله مستحيييل
- اييه والثاني!
- هذا خاص
- ماتحكيه ؟
- لا اعذرني شويه خاص

تركتها بكيفها وسديت هالسيره ونزلت جبت العشى وعاودت لها .. اكلنا وبعدها
هي حكتلي ..
- راسي يوجعني ماكو هنا براسيتول
- نفس وجع كبل
- لا هيج خفيف
- ماتكذبي يولو
- اييي هسه بالحالتين يوجع

كانت متنفرزه وتحكي وهي مغمضه عينها ضليت كاعد وادحكلها لشوف تاليها شكثر تتحملو ...
وصارت على نومتها تبكي مشيت لعندها وعطيتها الدوا شربتو وضلت مغطيه راسها وتحكيلي ...
- عوفني وحدي شويه
- لييه
- ماحب تشوفني هيج
- تينه دحكيلي يابه ..فهميني وش صار وهيك وجعك راسك تركت تضحكي ومافيكي شي
- مادري

تكرفصت تحت الغطى وانا مشيت بعيد عنها وفكرت امشي اسأل الطبيب لكن ترددت وفكرت انتظرها تهدا شوي وادحكها راح تنسى هالمره او لا ؟

طفيت الضوا وكعدت حدرها وهي كل حين تندار على جهه وماثبتت على نومه
وضلت هيك بحوالي النص ساعه بعدها حكتلي ..
- انته هنا ؟
- اييه هين
- مو تروح عفيه ابقى يمي

- ما تخافي هين عندك اضل
- وينك مااحسك قريب مني
-حدرك هين انا
-ماكو تجذب عليه بعدك تجذب ماتجي

حكتها وصارت تبكي مشيت لعندها ورفعت الغطى من راسها ومسحت دموعها وهي وجهها حار تلمست يدها حاره وركبتها .. خفت عليها وتذكرت حالها هذاك اليوم هم هيك حرارتها
مشيت بالعجل فتحت الضوا واجيت حدرها وهي مغمضه عينها وتبكي
كعدتها وصرت احاكيها ماترد علي بس تبكي .... رفعت غطاها وشلتها للحمام
وكفتها وغسلت لها يدها ووجها وهي بس تشهك ومافهم معنى لبكيها ؟؟؟

رجعتها لفراشها وكعدت حدرها واهديها
غطيتها ونزلت للصيدليه اخذت شراب خافض حراره وصعدت لعندها وهم لكيتها تبكي صرت احكيلها ..
-يولووو ليييه هالبكي فهميني يااابه لييه تبكي
-لييش ترووح
-هين عندك والله هيين موجود حدرك

كعدت حدر راسها ومسحت دموعها وهي تمسكت بيدي ويدها عركانه وحاره
فتحت الدوا وشربتها منو وهي سحبت يدي حدرها .. كعدت وهي خلت راسها على بطني وحكتلي ...
-ابقى يمي هيج بس ابقى كلشي ماريد بس ابقى هنا
- صار تآمرين هين عندك انا

لفت يدها على بطني ومخليه راسها هين
وصارت تهدا وكل شوي تحكيلي مو تروح لحين ما غفيت ...
كنت اتلمس شعرها وفكر بحالها هذا
كيف هيك بتنهار بالبكي بلحظه وبلا سبب؟ وليه بتريدني هيك عندها !!!

رجعت راسها للمخده وغطيتها وفتحت الشباك وضليت واكف عندو والهوا بارد يضرب بالوجه وانا شرد فكري بحالها هيك كيف افهم شو وراها ؟؟؟
قررت بكرا احكي معها واخليها تفهمني بالحرف وش يصير معها ...

ولكن الصبح وكت صحيت حكتلي ..
- شيخ عفيه لا نتريك ولا شي خلي نرجع للبيت بسرعه اريد اشوف غلاتي ماصبر بعد
- زين زين تهدي بالاول نحكي بشي وبعدها نمشي
- اي شنو احجيلي
- هو البارحه وكت كان ودك تنامي
-اي شنو شصار !
- حكينا بشغله تذكريها ؟
-لا شنو احنه هواي نحجي ياهي تقصد

فهمت هين انها كالعاده ماتذكر بكيها وحكيها معي ولا حضنها ولا شي لانها لو تذكر وحده منهن كانت خجلت معي او تعذرت او بانت عليها رده فعل لشي لكن مابالها ولا شي من الي صار ..
وهين لغيت قرار الحكي معها بهالخصوص لان مايجيب نتيجه غير قلقها لهيك فكرت استشير طبيب وادحك وش هالي بيصير معها ....

سديت على هالسيره معها بكم كذبه وتحضرنا بين ما وصل صياح واخذنا للبيت وهنيك امي استكبلتنا بالهلاهل واخذتها لحضنها وتسمي عليها و واحد من اعمامي كان حاضر هين وارسل يذبحون من حلالو ومارضيت انا وارسلتهم ياخذو من حلالنا ويعزمو الكريب والغريب على الغدا هين
هذا فجران دم سلامتها ....

دخلت ودحكت فارشين لها هين بالربعه وهي متمدده وبحضنها بنتها وعند راسها امي .. تبسمت من دحكتهم هيك ملمومين مع بعضهم بخير وسلامه وحمدت الله ماحرمنا هالراحه ...

صعدت لغرفتي ودخلت للحمام حلقت لحيتي وسبحت وطلعت اخذت لبس الشيوخ وعاودت لبسو وختمتو بالعطر والمسبحه والساعه ورتبت اليشمغ ونزلت
اول ما دحكتني ام جراح وحكتلي ...
- حياك الله شيخ والله وعاودت لنا بعد طول غياب
- بفضل الله بفضل الله ..شلونك وشلون الولاد
- بخير نشكر الله
- الحمدلله يلا انا امشي الحين اودعناكي

مشيت للربعه ودحكتلهم وامي ضحكت وهي تحكيلي ..
- والله وعند كلمتك ماعاودت الا عاودت
- عجل هين المشيخه بتصير يايمه هيين
- ههههههه الله يحفظكم يايمه رديتو ورد معك فرح هالبيت
- عجل غير احنا الي محلينو وش يسوا بدونا
- اي والله صدكت ماله لزوم دونكم هالبيت اظلم
- ربنا يديم نورك فيه يايمه .. الحين انا لزوم امشي للديوان لكن عينك عليها
العلاج بوكتو والاكل خفيف ماتنسي يمه
- روح وتطمن يابني تطمن

مشيت للديوان وانا راضي عن نفسي لاني وفيت حك المشيخه الي عندي باهل بيتي ورديتها سالمه وحكها اخذتو ....

ضليت اليوم كلو بالديوان وماعاودت لنص الليل ودحكت امي عندها فارشه حدرها ومن حست على وجودي عندهم
كامت واجتي حدري حكيتلها ..
- شلونها يمه ؟
- زينه يابني ماتخاف
-الحمدلله عجب للحين صاحيه
- انتظرت جيتك لاحكي معك كلمتين
- هاا خير ان شاء الله
- امشي لغرفتي نحكي براحه

مشينا وهنيك كعدت حدرها وصارت تحكيلي ...
-يابني الحين الحرمه بخير وعافيه وردت لعند بنتها وكفيت حكها لكن ضل حك حرمتك ماتنساه .. مو بس التينه الها حك عندك حرمتك بعد حكها ازيد من التينه
- يمه انتي تدرين اني هذيك الايام تعبان وهي بتزيدها علي وتفهمي بعادي ليه
- اييه اييه فهمتو لكن حكيتلك الحين عاودت ومرتاح خلي عينك على حرمتك وش ذنبها هيك هاجرها حرام يابني حرام بترضاها على اخياتك هيك ! اصعد لعندها وطيب خاطرها بكلمتين وخلك لين معها تكسبها يابني لاتنسى ام ولادك هاذي
- زين يمه زيين ان شاء الله
-ربي يرضى عليك ياعين امك

بوست راسها ومشيت صعدت لغرفتي وهنيك دحكتها صاحيه .. عطيتها ظهري وصرت انزع الساعه والعكال والعباه
وانا حاس كاني غريب هين بغرفتي والوضع هيك متوتر ومستصعبو ...

فركت كصتي واستغفرت ربي وصرت احكي لحالي ان هاذي حياتي مو هذيك الاحلام لزوم هين انا اكون والحرمه حكها علي واجب وهجرها متعمد هيك بيصير حرام ...

مشيت كعدت حدرها وكضبت يدها وهي تدحكلي ورافعه الحاجب .. جريت راسها بستو وحكيتلها ..
-حكك علي هالبعاد كان بالغصب يا يابه
- نمت على باب غرفتها شهرين وهي مو صاحيه وانا هين انتظرك كل ليله ومافكرت تدحك بوجهي لو دكيكه من يومك
- كنت تعبان والهم تارس صدري والثار متربع براسي وماتنسي بنتها خفت لا تتيتم واصير انا سبب يتمها كل هذا كان فيي ياام جراح افهميه واليرحم اهلك
- زين زين لكن ماتعاود لهذا الهجر مااستاهلو منك يابو جراح
- ايه بالله حكك

تكربت حضنتني وحكتلي ..
-مااشتكت لحرمتك
-ايه اشتكت ايه

تكربت منها وانا شارد البال مافهمت وش الي تغير هيك ؟ وبعدها ضليت مخلي يدي تحت راسي وادخن وهي كل حين تحكيلي
- ماتنام وش الي مسهرك!
- هيك افكر كيف اعاود المعمل ماعليكي نامي انتي نامي

انا كانت الافكار تاخذني لحريكه بوسط صدري شاعله ماعرف كيف اطفيها ولا شو ابغى لها ! افكر لو التينه حرمتي كنت هيك بتكرب منها بكل هالبرود والغصب !!!
وادري ان الجواب لا ، لكن ليه معها بيصير لا ؟ هالمشاعر الي نزرعت لها بداخلي هيك بتغيرني حتى بهالحال ؟

اخذتني كثير افكار لحين مانمت واخذت الصباح معو بالنوم كنت كل مااحكي الحين انزل الاكي نفسي معوز نوم ازيد
واخذ الساعه بعد الاخرى لحيين صلاه الظهر يلا نزلت وتغديت معهم وبعدها صليت وطلعت وكنت افكر لو اتجنبها للتينه جايز تهدا افكاري حولها واعاود
مثل اول معها ..لان هالحال يتعبني ماصارلو غير يومين والوب على حضنها احس اني بلياه ماكدر اتوازن
واتهدا .. ضال مشدود الاعصاب والجكاره ماتنزل من يدي ...

صرت اعاود تالي الليل ادحكها واتطمن عليها واصعد انام واطلع من الصبح وهيك اتهرب منها لكن فكري كلو عندها
وصلت لحال ماركز بسمعي مع الي حولي واكضيها استغفر الله لحتى اشيلها من هالبال وتالي اول ماايخلص اليوم واعاود للبيت وادحك ضحكتها وصوتها الناعم وهي تسلم علي بيعاود كل الي كضيت النهار اتهرب منو ...

ومشت الايام وهي صار حالها احسن
وتحسسها راح وعاودت للمطبخ وبنتها عاودت لجراح تمسكت فيه وين مايمشي تمشي معو ينام ياكل كل شي هي تشاركو فيه .. وغيرتها على جراح بتحرك .. لا بتخليه ياخذ اخوه رماح معو ولا بتخليه يلعبو معهم ولا حتى يلمسو
ومن سمعت هالسنه يسجل بالمدرسه
انجن حالها وتتوسل فيي حتى اسجلها معو وتحكيلي ياخذوه اصحاب غيرها وهو يكعد يحلفلها مايلعب ويه غيرها
وعاودت تنام حدرو وامها بزعت تحاول معها تنام عندها ماترضى لو جراح معها لو ماتنام ...
تالي عفناها بكيفها وانا وكت اسألو لجراح اذا كانت مضايقتو او شي هو يحكيلي انه بعد ما يحب ينام بدونها ويستحي يحكي لعمتو هيك ومكيف بحكي غاليه لانها متمسكه فيه ودايماً يحكيلي
يابه عمتي مو حكتلي انها الي ليه تريدها عندها ؟
وانا احكيلو انها بتحبها وماتكدر بدونها وكان كصدها انك تحميها تدللها مو تاخذها منها .. وهو مايرضى ويحكي لا غاليه الي هي حكتلي وكت تولد تعطيها الي وانا هيك اخذتها وعلكتها فيي ماعاودها لها ...

خليتهم يضلو هيك واحد متمسك بالثاني صرنا حتى لو نسأل نذكر اسمهم اثنينهم
ولو نشتري شي لاثنينهم وامي لو تطلع اثنينهم تاخذهم وضال رماح وحدو ماترضى غاليه انه يكرب صوبهم ...

كنت كل ليله اخذ تينه للمطبخ واجبرها تسوي كدامي خليط من كركم وزنجبيل مطحون ومي دافي وليمون وتشربو كلو
وهي تضل تحكيلي مطيب وانا اجبرها تشربو لحتى يعيد نشاط كليتها وينقي جسمها من السموم ..
واخذتلها هيك فتره شهرين تشربو بعدها
جبتلها وصفه جديده مكونه من كرفس ومعدنوس وزنجبيل وليمون كلها تغليها وتبردها وتشربها ...

كنت اتعامل معها بحزم لحتى تلتزم بعلاجها وهالشراب ولكن بداخلي اتيه واضيع زمام اموري لو انها ضحكت كريب مني او نطكت رائها او ان مشت ليله مادحكتها فيها بيطلع علي صباح اسود واول مابلشو بالمعارك معها واطلعها هامله للعلاج وتكسر كلمتي وهيك اضيعها عليها ....

صرنا نشتغل من جديد بامور المعمل بالبيت ونرتب كل صغيره وكبيره وساوينا اعاده افتتاح وبيومها وزعنا فيه حلى من هي الي كانت عاملتو وزعناه لكل العمال .. والكل فرحت بعوده شغلنا ومكتبها غيرتو لغرفه ثانيه حدر غرفتي على اليمين وصارت هي الامينه الوحيده لحسابات معملي ...
واشتغلنا بجهد وتعب ازيد من كبل وانا كضيتها ارسل لفلان وفلان حتى نعاود صيتنا بالسوك ومن بين العزايم والحكي المعسول وهيك كدرنا نرجع رجلنا بالسوك وكان خفض الاسعار هو اول مامشينا فيه واخذ بنتيجه مرضيه صح مع ربح بسيط لكن المهم الحين نمشي بالسوك هالفتره وبعدها نعاود لربح ازيد من الاول ...

وبيوم طلعنا انا وتينه لنشتري كتب لازمتنا وهنيك حكتلي ..
- خلي نشوف اكو العاب هنا
-هااا بعدها بالك هالعابه
- ايي حتى لو متنام يمي بس بنفسي اشتريهه الها افرح من اشوف ضحكتها
- حك والله ..

نفرحها عجل هي بنيتنا الوحيده

ومشينا ندور هاللعبه لحين مالاكيناها باخر السوك وكانت لعابه طويله رجولها
وشعرها اصفر وعليه قبعه حمره وثيابها ابيض واحمر وشكلها مبسم وبيدها سله صغيره .. تينه اخذتها وتضحك كانها لها
واول مادخلنا البيت مشيت لعند بنتها وهي تضحك وعطتها اللعابه وغاليه انصدمت من دحكت طولها وصارت تحضن بامها وتبوس واخذتها وركضت لجراح وهو مسكها ووكفها حدرها ويحكيلها اطول منك اكلي ازيد حتى تطولي مثلها وهي فرحانه فيها فرتها على كل من بالبيت ...

ومن صعدت لغرفتي لحكتني ام جراح وكبل حكتلي ...
- والله زين هالشغل يدر العاب
- خيييير وش عندك
- يعني انتو بتمشو تشتغلو ولا تفرفرو بالاسواك وتتمشورو
- كان عندنا لوازم ونزلنا ناخذها وش صار يعني
- لاااااااه بتضل حاسبني الغبيه العميه الي مادحك وش يصير وره ظهري
- بسسسك يولي بسسك حكي تعبان اوزني بالول وبعدين احكيه
- مااوزن شي هي واضحه مثل عين الشمس انته تخوني معها
- لااااه لااااه وهيك تحكيها بالوجه
- ايييه احكيها اييه لاني بزعت من هالحال يومك كلو معها تكضيه وش دراني وش يصير هنيك وانتو لحالكم !!
انته بتمشي على مايها وين يسير وحاليتلك بنت الشارع هاذي ومفضلها على بنت الاصول

هين ضربتها كف على وجهها وهي سكتت .. مسكت فكها وحكيتلها ...
- تجاوزتي باليكفي وسكتلك باليكفي بعد وكل مره اخليلك عذر لكن هالمررره لااا بتاخذي جزاه حكيك

دفعتها ومشيت نزلت وطلعت من البيت
ورحت لعند الديوان نمت ساعه وبعدها بدا يمتلي بالرجال ... وهيك كضيت الايام
مكاطع معها حتى النظره ومامخلي لها وجود .. امي تحاكيني عنها واحكيلها وكت تعرف كيمتها وتعرف تكضب لسانها ادحكها حرمتي واعطيها حكها
تضل بهالرعونيه ماتلاكي غير الجفى

يومي يكضي بالشغل والديوان ونومي كلو بالربعه وهيك مشى الحال عشر ايام
وبعدها بوحده من الليالي كنت نايم ووجهي على الحايط وسمعت صوت تينه وهي تصرخ ..
- ابووو جراااح

كعدت مفزوع واندرت دحكتها ماسكه يد رجل ملثم وبيدو خنجر وودو يمشي وهي كاضبتو بكل كوتها .. ركضت لعندو وهو
جرح يدها بالخنجر وركض كبلي لانو كان واكف عند باب الربعه وبالعجل ركض برا وانا ركضت وراه وفزعت لصياح والولاد الي عند الديوان وهمه ركضو على اثرو ناحيه البستان وهين تذكرت تينه وعاودت لها مسرع ودحكتها واكفه بمكانها وترجف ويدها مدمايه وامي عندها وام جراح وكلها بتسأل وش صار ومن هذا ...

انا تركت الحكي وكضبت يدها تلمست عمق الجرح ودحكتو على طول وريدها الايمن وهي ترجف بالعجل صحت عليهم لحتى يلبسوها عباتها .. واخذتها ومشيت للمستشفى ...
وهنيك دخلتها الطوارىء وهي كاعذه على السديه ومتمسكه بثيابي وتدحكلي وتحكيلي بخوف ...
- دم هذا دم هواي مايروح
- يروح يابه يروح ماتخافي

كنت اهديها وانا خايف اكثر منها .. خلت راسها على بطني وانا غمضت عينها وضليت مخلي يدي على عينها حتى لاتدحك منظر الدم .. والطبيب يمسح فيه وبعدين حكالي نومها لحتى يبنج ويخيط الجرح وهي هين تهسترت صارت تبكي وتحكي بفزع ماتريد يمسك الجرح وكثير حكي مافهمتو .. وتالي حكالي الطبيب امسكها واثبت يدها وضربها ابره منومه وبعدها بدا يخيط الجرح وبالاخر حكالي انه بنجو فوك الخياط حتى ماياذيها من تصحى وهين حكالي سالفه ضلت ببالي
وكت حكيتلو انها كويه وماعندها هالخوف لكن مدري وش صابها من دحكت الدم .. هو حكالي ... هاذي عندها
خوف وقلق نفسي منووسماه فوبيا الدم ...

اخذتها عند الفجر من المستشفى وكانت كل شوي تغفي وتعاود تصحى وتكضب راسها وعرفت هين بدا الوجع نفسو

دخلتها البيت ونومتها بفراش امي وضليت كاعد حدرها وامي تسألني من هذا و كيف هيك صار واحكيلها مافهمت شي بعدين نحكي . ..

ولا كدرت انام ضال ادحكلها وافكر ليه هي كل مره تنقذني من الغدر والموت !

وعند الساعه عشره هي صحيت ولاكتني حدرها ضلت تدحك بعيني كم دكيكه وبعدها حفزت من مكانها وحكتلي ..
- شيخ عرفته منو لزموه !!
- اهدي اهدي انتي احكيلي بالاول وش صار
- اني جنت نايمه يم غاليه وجراح والشيخه وصت صفيه تاخذلك فراش قبل ماتجي وهي نست وبعدين اني كلت اخذلك فراش من اطلع من الحمام ورحت سبحت ومن طلعت رحت اخذت دوشك وبطانيه واجيت وجان اشوف هالرجال هستوه يريد يجي عليك واني كبل ذبيتهن من ايدي وصحتك وضليت مجلبه بيه
حتى اظافري نبتتهن بي بس هو ضربني على رجلي وبعدين انجرحت ومكدرت الزمه اكثر
- والله انك شجاعه صار ثاني مره ترمي بنفسك للموت كبلي وتحميني منو مرتين كان رحت فيها غدر وانتي تاخذي الضربه عني والله فضلك هذا بركبتي ليوم الدين ماانساه .. تسلمي يابنت العز تسلمي والله كل كلام الشكر كدام وكفتك هاذي مايكفي حكها عسى الله يكدرني واجزيكي حك دمك الي هدرتيه مرتين لحمايتي
- ههه خجلتني شيخ فدوا الك هالدم المهم سلامتك .. انته رجال ماتستحق تنطعن غدر حتى الموت لا سامح الله لو يجيك يجيك بهيبه .. حرام تتاذى غدر ماتلوك على الشيوخ
- والله دامك معي حتى الموت احتار فيني

- هههههه ماخليه يوصلك ابد اضل اخذ عنك الضربات شعندي اني انضرب واضل مدللـه ههههههه
- هههههه ياويلي على هالكلب الفطير

تطمنت عليها وطلعت لولد عمي وحكيت معهم وبالتالي عرفت ان هالرجل هو حمزه والي كاضبو ابن الفلاح الكبير
وصياح ذبحو بكاعو واخذوه من الصبح لديره اهلو ومعهم ثلاث شهود على الي جرى ...

حزت بكلبي موتتو هالشكل رغم كرهي له لكن بينا ملح وزاد وسنين كاعد حدر يميني واليوم هيك يموت بذل ماتمنيتها له
وتمنيت لو يجيه يوم ويتندم وينسى هالحقد لكنه مصر عليه لحين ماجابلو المنيه ...

دحكت هالقدر خلى التينه تحاميني منو لحين ما مات وماخلت يمسني اذى منو
كتبلي ربي عمر جديد هالمره بعد بفضلها
وضلت ببالي كيف اجازي حكها !!!

لليل عاودت البيت ومشيت لغرفه امي تدحكها ومالاكيتها هنيك فكرت انها صعدت لغرفتها وانا ودي اعبر الدرجه الاولى سمعت صوت المي بالمطبخ
مشيت للمطبخ ودحكتها واكفه وفاتحه المي بالسنك وودها تمد يدها المضمده تحت المي ... بالعجل ركضت ومسكتها ودرتها حدري وهي تحكيلي ..

- عوفني لازم اغسلها يضل الدم لازك بيهه وميروح
- ول مافيها دم انتي جنيتي مافيها دم
- لااا لاا بيها وهذا اثره بعده هسه يضل بجسمي ميروح لازم اغسله ماااحب اشوفه عوفنني

كانت تحاول تسحب يدها مني وتبكي ودها تغسل يدها وهي مافيها ولا كطره دم ومضمده لكن مادري هي وش ادحك
صارت تبكي وتحكي ...
- عوف ايدي خلي اغسل بس شويه عفيه الله يخليك بس شويه
- استغفر الله .. انا اغسلها الك

اخذتها كريب المي ومسحت بطرف اصبعي هيك بللتو ومسحت على الضماد وغسلت اصابعها وهي تمسح بدموعها وسكتت .. انقهرت على حالها عجل هيك نفسيتها تعبانه من منظر الدم ومطيره عكلها والله مافاهم كيف اتعامل معها ..

ضلت ماسكه الضماد وتدحكلي وترجع تدحكلو .. اخذتها وصعدت لغرفتها صرت اعرف وش يلزمها بهيك حال
وهي تمشي معي طايعه وهاديه ويدها بيدي ..
دخلت لغرفتها وطفيت الضوا وسديت الباب واخذتها تمددت بفراشها وانا كعدت حدر راسها وتانيتها من حالها هي تكربت
وخلت راسها على بطني ويدها كضبت فيها كف يدي وصارت تحكيلي ...
- دتتعب مني مو
- لاا ماتعب
- اني هواي صايره اريدك يمي مو تضوج مني بس مااحب غيرك
اريدك بس انته وياي

مادري ان كانت واعيه لحكيها او لا لكن رضت كلبي فيه وفجرت اشواكو المكبوته وخلتني احضنها وابوس راسها
واحكيلها ...
- ولاا انا احب غيرك ولا ودي غيرك معي وبضل العمر كلو حدرك كل ماتتعبي انا حدرك ماخليكي لوحدك عشكي انتي

دحست راسها ازيد بجسمي وشالت يدي خلتها على خدها ونامت هيك بكل هداوه
وضليت انا صاحي اتلمس شعرها وافكر بهالحال كيف اخرتو .. بضل اعشكها بالخفيه ؟؟؟؟؟؟ لزوم الاكي درب وصال معها لاني بلا هالحضن منها صرت احس كأني ضايع وهين الاكي مسكني
ماكدر احيل عنها والله مكدر ...

عند وجه الفجر تسحبت ونزلت جوه صليت واستغفرت انا ادري الي جاي يصير حرام لكن ماعارف اوكفو ..

وثاني يوم كالعاده دحكتها تنزل وتبتسم وهي تصبح علي وادري انها ناسيه كيف كانت ليلتها ....

وانا حكيت مع جارنا الطبيب على ان ودي طبيب اختصاص مخ واعصاب
وهو حكالي بيرجعلي خبر

وعاود بعد هاليومين بخبر عن طبيب باطراف حديثه وصدفت عندي اشغال كثيره وضيوف باتو عندي ليالي وماكدرت امشيلو ...

وضل هالشي ببالي يزعجني لكن وكت وصلني خبر الي كنت احسبلو ليالي
بعد طول شهر ونص فرحني ونساني كل همي بمرضها ....

وتعمدت هالليله اتاخر ازيد من كل يوم
ومشيت لعند غرفتها بالهداوه ودخلت وعطيتها ظهري وصرت اصحيها لحين ماصحت وحكتلي ...
-شيخ ! خير صاير شي
- بالاول اكدر اشغل الضوا ولا ..
- اي اي شغله عادي

شغلتو واندرت عليها ودحكتها تلم بشعرها وره اذنها .. وكامت اجتي حدري وحكتلي ..
- خوفتني شنو شعجب جاي بهالوكت
- هههه يعني شو ما مرحب فيي هين !
-لاااا عيني كل الهلا بيك بس عبالي اكو شي
- ايييه في شي وماكدرت اصبر عليه لبكرا
-شنو هو ؟؟
- هديتك
-هديتي !!!
- اييه هديتك الي كنت موصي عليها من زمان اليوم وصلت صارلي شهر ونص انتظر وصولها وماكدرت اصبر لو ماعطيها لك بنفس الليله