#شقراء_بغداد

بارت_٣٤



// ابو جراح

وانا معاود من المعمل لاكيت ولد عمي صياح ابو حسن وهو سلم علي وبعدها حكالي ان حرمتو
حاكيتلو ان ضيفتنا مستثقله كعدتها بينا ومحتاجه فلوس لولادتها وبايعه ذهبها لتسد حاجاتها بدون ماتمد يدها لحد مننا وهو حكالي ان اراعي وجودها بينه ومااخليها بالعوز وهي تخجل تحكي عنو

هين انا عميت عيني من الغضب ومالاكيت نفسي الا وانا عندها وافرغ غضبي عليها ... اذتني بكذبها علي وكسرها لكلمتي وكت الي نبهتها ماتبيعو لذهبها .. وانا ما ناسي ولادتها واحتياجاتها
لكن انا مفكر اعطيها لامي وتاخذلها اللازم ماضنيتها بتتصرف بالعجل بدون علمي هيك
وماتحسبلي حساب وتخليني اطلع مكصر في حك اهل بيتي كدام هالعالم .. عملتها شينه ومابلعتها
لكن ساعه الي دحكتها نهارت بالبكي والوجع ذبحها هين انا نسيت كل شي وضل بالي على سلامتها ... وركضت لبره اخذت سيارتي ورحت بنفسي جلبت لها حكيمه وجده التوليد خفت يصيبها ولا يصيب ولدها شي وهي للحين مادخلت شهرها

وساعه الي دخلت البيت معهن سمعت صراخها من فوك وجمد الدم بعروكي .. خفت اييه اعترف خفت
لان اذاها بسبتي صار لو تحكمت بغضبي وحاكيتها باللين وفهمت منها ليه تعجلت وضمت علي هالشي
كان ماتعجلت ولادتها وضلت بصحتها تنعم ....

ضليت انا كاعد على الدرج وهنه فوك بغرفتها واخواتي عند الباب واكفات حدرهن وكل شوي نازله وحده منهن تاخذ شي وتصعد لعندهن
وانا ادخن وحده بعد الثانيه على نفس كعدتي
وايدي ترجف وانا اجر النفس من الجكاره
واسمع صوتها وهي تصيح ..
- ماتحمل ولج يمه شيخه حموووت ماكدر بعدد

بالله كانت ساعات مثل العلكم وصار الغروب وهي تسكت شوي وتعاود تصارخ واصواتهن بتعلى عليها لحين ما سمعت صرخه امي وهي تصيح باسمها وبالعجل دحكت الباب انفتحت وصارت تصيح على صفيه انها تنزل تجلب لها ملح او شكر

نزلت صفيه تركض وانا صحت على امي ..
- يمه واليرحم اهلك وش فيهااا

دحكتلي من عند المحجل وحكتلي ..
- يايمه البنت غميت ماتحملت ومدري وش بيصير بحالها

راحت لعندها وانا تبنجت صرت واكف بمكاني وفاك عيني على الدرج ... وتالي مشيت كعدت وظهري على حايط غرفه امي وبديت بتجويد
سوره الملك وكررتها اكثر من مره وتالي دحكت امي نزلت وهي تدحكلي بعتب ودخلت غرفتها
ماعرفت شو اخذت وراحت صعدت .. ما كدرت حتى اسألها اذا صحت ولا لا .. خجلت من نفسي
كثير ..انا بعمى عيني وصلتها لهالمواصيل وصرت اذى لها ولولدها بدل ماصير لهم حماي

مشيت صليت المغرب الي تأخرت عن وكت فريضتو وكعدت اسبح لحين ماسمعت صوت صراخها من جديد وبعدها سمعت صوت بكي الطفل ..

دمعت عيني وسجدت شكر لربي وكمت وكفت عند المحجل وانتظر نزلت وحده منهن لاعرفو ولد ولا بنت ...

وتالي نزلت ام جراح وانا بالعجل سألتها ..
- كيف حالها الحين ؟
- زينه ما عليها شي
- الحمدلله وش ولدت ولد ولا بنت
- بنت
- الحمدلله على حسن عطاياه الحمدلله
- انته كنت كل هالوكت هين ؟
-اييه
- وليه هالكثر خايف عليها !! مادحكتك خفت بولادتي هيك شو تغير هالمره ؟؟؟
- ما تبلشي واليرحم اهلك

عفتها وطلعت بره وانا اردد الحمدوالشكر لك يارب كومتها بالسلامه من هالشده ...

دخلت للبيت ودحكت مناسك بالمطبخ وصيتهه تنادي على امي ...
انتظرها لحين مانزلت وقلتلها ..
- يمه وشلون حالها
- تعبانه يايمه البت بالويل تجر النفس هي ضعيفه وولادتها معسره هلكتها
- الله يكوي حالها . . يمه البت شلونها
- صغيره يابعد عيني هالكد كدها بنت سبيعي
- يمه خلي اخذهن للمستشفى يفحصو حالهن ونتطمن
- لاااه ماعليهن شي بنيتنا الحين بيغسلوها والحكيمه عندها والصغيره بتبكي وتسكت ماعليها شي
- يمه ماجازف بالبنت وهي ماكامل شهرها اجلبيها خلي اخذها للمستشفى وخلي تينه هين داروها وكاد مالها حيل تمشي
- مابيلزم يابني مابيلزم
- الا يلزم يايمه شدرانا شفيها وهي بنت سبيعي
خلنا نتطمن اجلبيها واليرحم اهلك يايمه
-زين زيين رايحه الحين

صعدت وانا ضليت واكف عند الدرج وانتظرها
لحين ما دحكتها نزلت وبيدها البنت لافتها ببطانيه
فتحتلها يدي وانا ادحكها تنزل درجه درجه واخذتها من ايدها ودحكت وجهها الاحمر وحجمو صغير .. ضحكت بفرحه حسيت ان بنتي رجعتلي
فيها صرت اب من جديد ... رفعتها لوجهي وشميتها وبوستها وامي تحكيلي مايجوز لساتها صغيره ... مارديت عليها واخذتها وطلعت دحكت
صياح واكف ومعو جراح وحسن ومن دحكوها بيدي اجوي يركضون وجراح يصيح ...
- هاذي لي يابه عمتي حكتلي انها من تولد تصير لي انا اخذها اناا
- ههههه يابه صبرك صبرك تلحك عليها
- ودي ادحكها يابه خلني اشيلها
-لاااه بعدها صغيره من نعاود اخليك تكعد واخليها بحضنك لكن الحين مايصير تشيلها
- يااابه
- ابنننني شو حكينااا
- زين عجل وين ماخذها
- لعند الطبيب

مشيت واشرت لصياح يفتح السياره وهو ركض فتحلي الباب كعدت وهو صعد وساق بدالي واخذنا للمستشفى وانا طول الدرب اغطي فيها اخاف عليها من البرد وحاضنها وهي كل حين وتتنعوص وتبكي وانا احير كيف اسكتها ... لحين ما وصلنا
واخذتها للطبيب وحكيتلو انها الحين ولدت وماكملت شهورها ...

صار يفحصها وياخذنا من غرفه لغرفه وتالي
حكالي ...
- ماتخاف البنت تعيش وربك يحفظها ويعافيها
غذوها زين وتكبر وهي نموها كامل ماعليها شي

تشكرته واخذتهه وطلعت بلهفه من تاريخ هاليوم
١١/٣/١٩٩١ زاد نفر جديد في بيتي الهادي
وراح يمليه بحلو صوته ...

عاودت البيت وهي بحضني اشم فيها كل شوي
وصياح يحكيلي لو ما شهدت عليها بنفسي لحكيت انها بنتك والله ... وانا احكيلو ... انها بنتي انا داريتها وهي ببطن امها ...

دخلت فيها البيت وتلكاني جراح يجر بدشداشتي ويريدني انزل لحدرو ويدحكها وانا ماخليتها بنفسو
وكعدت على الدرج وهو واكف يتفحص وجهها
ويطخو باصبعو ويرد يبتعد ويضحك ويعاود لها ودنك باسها ويحكيلي ..
- هاذي الي يابه انا طلبتها من عمتي من كبل
وهي حكتلي انها تخليني اخذها من تولد
- ههه ايييه يابه هي اخيتك دير بالك عليها
- ايه يابه ايه

اخذتها وصعدت لفوك لعند غرفتها .. دكيت بابها
وطلعتلي ام جراح تفاجأت بجيتي لعندها وكبل ماتحكي انا قلتلها ...
- ودي ادخل سويلي درب

راحت وشويه ورجعت فتحتلي الباب ووخرت من دربي ودخلت دحكت التينه نايمه وشعرها منثور
على جنبيها ووجها باين عليه التعب ...
تكربت لعند راسها وهي فتحت عينها دحكتلي وتبسمت .. قلتلها ....
- الحمدلله على السلامه ياخيه وبالمبارك عليكي هالبنت ربي يجعلها باره فيكِ وتلاكين خيرها معها
- الله يسلمك شيخ

حكتها بتعب وهي تحاول تكعد واشرتلها تضل على نومتها .. وقلتلها ...
- وش ناويه تسميها ؟

دحكتلي ومدت يدها عليها وحكت ...
- غاليه .. اسميها غاليه
- والله ونعم مااخترتي

رفعتها وكبرت بأذنها وانا ادحك التينه عينها تدمع
وامي بعد .. كبرت باذنها وحكيتلها بالاخر ...
- اسمك غاليه .. غاليه خالد

بوستها وهي تتنعوص وتميل براسها وجسمها
ضحكت ودنكت خليتها بحضن امها وطلعت
وامي تبعتني وحكتلي ...
- ياابني البنت بتموت من جوعها امها ما تدر حليبها الحين
- لا حول الا بالله وش هالنوب عجل كيف بتتغذى
- اجلبلها من هذا الحليب الي بالمحلات الحكيمه حكتلي بينفع لهاليومين
- وبتضل هيك لايمتى !
- يا بنلاكي مرضع يا ربك يسهلها ويدر حليبها
الحين تعجل ماتسمع بكيها من جوعها
-اييه يمه اييه رايح اجلبو رايح

نزلت بالعجل وطلعت افتر على الصيدليات لحين مااخذت لها حليب يناسبها بعد ماحكيتلهون حالها
و هالصيدلاني حكالي .. بيلزمها شراب لانو بيصير عندها انتفاخ ببطنها باول ايامها ..
وحكيتلو عطيني كل شي يلزمها .. واخذت الحليب مع الممه الصغيره والشراب وعاودت البيت
صعدت بنفسي اخذتهن الها .. وصرت احكيلها
شو وصاني الصيدلاني لحالها .. ومشيت تلمست خدها الناعم وردت ابوسها امي مارضت وطلعتني منها بالكوه ...

كنت احس اني مسؤول عن وضعها هذا واحاول
اكفر عن غلطتي بزياده اهتمامي فيها ....

هالليله انا وجراح مانمنا نروح ونرد عليها
ها نامت ! ها شربت حليبها! فيها شي!
ولو ما العيبه ننام عندها والله ....

ثاني يوم مشيت للمعمل واخذت كم فلس منو
ونزلت السوك اخذت لها تراجي ذهب صغيره
وضميتها بجيبتي لحين ما فرغت بعد العشى
وعاودت البيت ...
تلكاني جراح وهو يحكيلي انها نزلت هين بغرفه امي ..
دخلت عليها ودحكت فارشين للتينه هين وهي نايمه وبنتها على يدها ترضعها وتدحكلها بعين حالمه
تبسمت وجهرت صوتي بالسلام وهي دحكتلي وبهتت ملامحها وردت السلام ببرود ....
عرفت بخاطرها شي من الي صار البارحه ..

كعدت حدر امي وعيني عليها وامي تحكي وانا اهز براسي وماداري وش حكيها لكن بالي هين
وش وضعنا بعد الي صار ؟ وش الي بالها ؟
وهي ما خلت عينها بعيني ولا سمعت صوتها من ساعه ما كعدت ..

دخلت مناسك وام جراح وحطو الجاي والكعك
وصرنا ناكل كلنا وجراح كاعد حدر غاليه وياكل ويدحكلها .. احسو مايشبع من شوفها مثل ابوه ..

تعمدت اكسر سكوتها وحكيتلها ..
- تينه بتشكي من شي تاعبك حالك مادحكو زين
- لا الحمدلله زينه

حكتها وهي بتلهي نفسها ببنتها وما خلت عينها بعيني وانا هين ماكدرت اسكت واصبر بعد
حكيت ...
- يمه من رخصتك انا ودي اكعد معها لحالنه

كلهن فتحن عينهن علي وانا كملت حكيي ..
- عندي معها كلمتين لو تكعدي انتي والبنات بالربعه لحين مانتفاهم
- ايه يمه زين لكن لاتتعبها بالحكي خلكها ضايك ماتنسى
- ماتخافي يمه ماتخافي ... تفضلو انتو يابه

واشرت للبنات يطلعو معها وكلهن مشن وام جراح عينها بتنط من محجرها ولكنها ساكته ..
والتينه كل هذا وهي ما كان رد فعلها الا بنظره وحده وعاودت لبرودها معاي ...

كمت وكعدت حدرها وطلعت علبه الذهب وفتحتها
وخليتها حدر راس غاليه وقلتلها ..
- هاذي هديه بنتي البسيها لها بالعافيه

- تسلم شيخ بس هالهديه غاليه ماكدر اقبلها
- يولو هالذهب مايعادل غلاتها .. نسيتي انها غاليه اسم على مسمى يولي لا تجادلي

سكتت شويه وحكتلي ..
- شكراً شيخ
- تينه يولي وش فيكي ليه هيك بارده معي !
- ماكو شي
- لا بالله .. انتي زعلتي مني ! احكيلي !!!
- لا ما زعلت
- عجل ليه هيك ! انا عارف انك زعلتي مني ومحملتني سبب تعبك واذاكِ البارحه ادري هالشي
عارفو ومتندم عليه انا ماعرفت اتحكم بغضبي معك واذيتك فيه

اخذت نفس ودحكتلي بهداوتها الي عهدتها عنها
وحكتلي ...
- ما زعلت منك والله .. اصلاً اني الي غلطت بحقك وتصرفت بدون رضاك حقك بهالتصرف
- عجل ليه هالي تساويه معي. ؟
- خجلانه منك صدكني .. ماكدر احط عيني بعينك واني اعرف اني غلطت وياك ويجوز عرضتك لموقف محرج
- ياتينه انا ما وصيتك اي شي بيلزمك تحكيلي
ماانا موصي عليكي لو احتجتي لكماشه شعر اطلبيها مني ليه هالمره تغيرتي ! اناا تفاجأت بالله تفاجأت ماضنيتك بتتعجلي هيك وتضميها عني
وانا صاحبك واخيك وسناد ظهرك
- ماتقصر انته والله ادري بيك ماناسي حتى سالفه جهاز ولادتي
-عجل دامك تعرفيه غلط وتعرفين انا عندك وما بقصر معك ليه ساويتي هالشي؟

سكتت وشالت بنتها من جهتها اليمين وخلتها بفراشها على يسارها .. وعدلت كعدتها واستندت على البوفيه الي وراها واشرت بيدها على مكان حدرها ... كمت وكعدت حدرها وصار ظهرنا على البوفيه وعينا لكدام نتكلم بدون ماندحك بالوجه
حكتلي..

- شيخ احنه تعودنا سرنا واحد لهذا ماراح اجذب عليك بس كون تسر السالفه الي تسمعها مني
- احكي سدك امين
- قبل كم يوم سمعت حجي مو لائق بحقنا اني وياك
واهل هالبيت ماراضين على اني اصير بمسؤليتك
وتصرف عليه وعلى بنتي وهذا حقهم مالهم وحلالهم يريدوه الهم مو لغريب يروح عاذرتهم
بس صعبت عليه بعد هالحجي .. ماردت اشوفهم يحجون بظهرك عليك لانك تصرف كل تعبك عليه بهالوكت الي صعب ينجمع بيه الفلس وبنفس الوكت ماردت احس نفسي ثكيله عليكم والانظار تصير بعدم رضا على وجودي بينكم .. ردت اخلص فتره حملي بهدوء وبدون مغثه لاحد

- دحكي رغم انا عارف من الي يحكي بظهري ويسمعك هالحكي وانتي بعد تعرفين انا ادري بهالشي وكل هذا وماحكيتي لي بالاسم ولا نقلتي لي حكيهن بالحرف ... بتعرفي هالفعل هذا انا بكم ثمنو عندي ؟

- ههه لاا
- بثمنو بكل جاهي ومالي وبحسو قليل .. يولو
انا ربحان فيكي كم مره صرت حاكيلك هالشي
دحكي هالحين من بين اهلي من فيهم مابيكذب ولا بيشيل بكلبو ولا بيطعن بالظهر مثلك ؟
- لااا كلهم طيبين
- طيبين ايه لكن عندهم هالصفات .. انا ناسي واعرفهم ماتعلميني فيهم ... والحين برأيك ياام رأي السديد انا وكت الي الاكي الصادك والامين والي بذل حالو لسعاده هالبيت وفخرو وبيشكر كل صغيره وكبيره بتركو. ! ولا بستثقلو على عيشتي!

تبسمت ودحكتلي وانا ضربتها بسبحتي على رجلها بخفه وحكيتلها ..
- ياتينه انتي اخيتي وصاحبتي وانا من هذاك اليوم لهاليوم حاسبك من اهل بيتي وما بيوم حسيتك ثكيله علي والي بيحكي خلو يحكي انا لو هامني حكيو كنت بكص لسانو لكن هو والهباء واحد بتعرفي ليه
- ليش؟
- لان مايعرفو انا شو ربحت بحياتي منك ومن بنتك هالعمرها يومين انا ربحان بجيتها
- يعني شنو ربحت
- ربحت صدكك وعفويتك وبياض روحك
خسران لو ضيعت من ايدي هيك انسان ماعلى لسانو غير الحك ومايعرف للكذب شي
- ههه اني ممكن اجذب على غيرك بس وياك لا
والله استحي اجذب عليك
- دحكتي و ودك مااربح فيكِ!!!
يولو وش تحكي انتي وش تفكري ول انا لو ما دحكتك يوم واحد بتبدي اعصابي تفور لحين ماتهيج بوجهك ثاني يوم
-هههههههه
- ايييه والله ماكذب عليكي انا تعلقت فيكي والحين ببنتك صارلي يومين اتفرفر عليها ودي لو انها شويه كبيره واخذها انيمها على صدري والاعبها
واعوض فيها هذيك البنت الي راحت من ايدي برمشه عين

دحكتها صافنه عليي وتتبسم ومن صارت عيني عليها دارت نظرها .. حكيتلها ...
- هالحين فهمتي يولي ليه انا بهتم فيكي لاني بحسك شي ثمين عندي صحبتك و مبادئك وبنتك كلها ثمينه وبتحتاج مراعاه .. ما تعاودي تخلي ببالك هالافكار وكل ما تسمعي مثل هالحكي البايخ تذكري انا كيف مثمنك بحياتي وانسيه
- ماشي شيخ تدلل .. وتره اني هم مثمنتك عندي
وربحي بيك اكثر من ربحك بيه مثل ماتكول ..
لان اني لولاك ما صرت ولا وكفت على حيلي
اضل كل عمري مديونه الك لهالكرم والمعزه الي غمرتني بيهن
- ياتينه انا محتاجك وانتي محتاجتني فك الدين هيك واحد بيسد للثاني وما يبقى بينه معروف ودين لا تعيديها برضاي عليكي
- هههه ماشي تدلل
- اييييه اييييه هالحين احس صدري انشرح والله كان هم شثكلو علي لاني خليتك بهالحال
- لاا الحمدلله شبيه حالي كولش زين واصلاً زين ولدت من هسه لان اخاف اطلع بخبالات جديده
- ههههه ايييه صدك بعد ماتبكي مثل هذيك الايام
- ههههه اييي هسه استقرت نفسيتي شويه
- تينه اشم ريحه طيبه هين عندك وش هاذي ؟

رفعت راحه يدها وشمتها وضحكت وقربتها لعندي بعفويه وهي تحكي ..

- ريحه السفرجل
انا ماحسيت على نفسي الا وانا اشم هالريحه من يدها وهي بالعجل عاودت يدها لحضنها ..

ثانيه كانت بس ثانيه تكفلت بهدوء عجيب ونفس هادىء وبروده سرت من راسي لعند جدامي
صحيت على صوت غاليه وهي تبكي
صارت تهزها لحتى نامت وانا حكيتلها ...
- ايمتى ودك نسجلها باسمي
- ااا شيخ هو اني غيرت رأيي
- وش تكصدي
- ماكدر والله احسها سالفه توجع كلبي بنتي تصير باسمكم انته وام جراح وتضل كل العمر هيج تنعرف بنتكم والله صعبه عليه
- يولو مااناخذها منك هي عندك تضل لكن بالاسم لضمان حكها انا هيك اسوي
- لاا كلشي يصير بهالدنيا ماكدر اجازف هيج
- عجل وش ببالك ؟
- مادري والله بعدني محتاره بامرها اني من قبل جنت متردده بهالقرار مرات اشوفه احسن الها
ومرات اتراجع واتخوف منه بس من اخذتها بايدي وشميتها كلت مستحيل اسوي هالشي
- استغفر الله ... تينه انتي ليه ما تطلكي !

دحكتلي وصفنت شويه وحكتلي ..
- الصراحه اخاف اواجهه
- انا بدبرها ومااخليكي تتواجهي معو
- اخاف يسوي شي او يشتكي عليه ويتهمني ماامن بي والله
- مو بكيفو يتهم وانتي مو وحدك انا معك بفركو لفمو لو حكى عليكي بالشين ومابخلي يدحك طولك
- ماتقصر والله ادري بيك بس تتمنى تتعارك وياه
- ايييييه بالله جبتيهه عدله رايدها من الله انا
- لاا خلي يروح بحال سبيله
- اخذي حكك وحريتك لاتضلي عايشه بالخوف كل عمرك هذا انا مكصدي
- شيخ هو زرع خوف بداخلي وخوف جبير ماينتهي بالطلاك منه
- لكن الطلاك اول خطوه لتتخلصي من مخاوفك
- مادري يخوفني حتى ذكر الموضوع
- تينه انا اكره كلمه خوف انا رجال مابيحمل حتى حروف هالكلمه وما ودي صاحبتي تذكرها وهي بحمايتي لهيك انا من بكرا بأذن الله بابدأ باوراق الطلاك
- شيخ ماريد يعرفون اني بحديثه
- ايه محسب لهالشي انا بضبطو مع المحامي وبخليه يكتب الدعوه من محكمه بغداد سهله ماتشيلي همها
- زين وبنتي شلون ؟

صفنت فيها شوي وحكيتلها ...
- لو نحاول نحصل على عقد الزواج بتسهل الامور
- ومنين اجيبه هذا !! اني ماريده يعرف عندي بنيه اكيد راح ياذيني بيهه ماجازف واني حميتها كل هالشهور منهم
- والله هو حكك تخافي عليها لكن بيضل هو الاب
اخاف انها حرام تصيرلك لو ضميتي خبرها عنه
- يأذيها ياشيخ والله هو مو بوعيه
- القرار الك انتي ادرى بناسك لكن من رأيي
نحاول معو مره
- شلون شنسوي
- حاولي تحكي معو لمره وحده واحكيلو حالك هيك بتسقطي عنك فرض معرفتو لبنتو وبنفهم دربنا لوين بيصير

صفنت على هالحكي وبعدها حكتلي ..
- ماشي راح احاول حتى اريح ضميري منهم
- ايه نحاول وندحك شو ردو وانا معك بكل شي تقرري فعلو
- انته ماكو منك والله
- هههه عجل شلون يابه شيخ انا شيخ
- هههههه شيخ الشيوخ والله .. الله يحفظك وينطيك راحه البال
- بتصدكي انا كل مااسمعك تدعيلي يجيني احساس انه بيتحكك هالدعاء
- من كلب صافي ودعوه يتيم مظلوم ماتنرد
- انا اهلك وانا حكك لا انك يتيمه ولا مظلومه بعد الحين زين
- زين ياعيني زين

ضحكت وطلعت من جوه مخدتها جكليت وقدمتلي كم وحده وحكتلي بضحكتها ...
- هاي اصدقائي الصغار اليوم ترسو فراشها لغاليه بالجكليت
- ههههههههه متخبلين عليها والله
- ههههه جراح يجي يريد يشيلها وياخذها واني نايمه وتشوفه الشيخه وتصيح عليه وهو يشرد
- ههههه هو من ساعه ما دحكها بايدي يحكيلي هاذي الي عمتي عطتها لي
- ايييي مو كالي لو تجيبين بنيه اريدها اليه اخذها اشتريلها مثل اخت حسن وكعد يتشرط يريدها حلوه وسمينه وبس اله تضل
- هههههههه عينو زايغه من صغرو هالولد

ضحكت بعلو صوتها وبعدها اندكت الباب ....

#شقراء_بغداد

بارت_٣٥



ضحكت بعلو صوتها وبعدها اندكت الباب وانا وكفت وعدلت اليشمغ ودخلت امي وحكتلي..
- صحابك عند الباب
- ايه يلا انا ماشي لعندهم

اندرت على التينه وحكيتلها ..
- انا على كلمتي من بكرا ابلش فيها وانتي فكري بالي حكيناه زين
- ان شاء الله شيخ
- يلا تصبحو على خير

طلعت ولاكيت ام جراح متخوصره عند باب الربعه .. رفعتلها حاجبي وحكيتلها ..
- وش عندك !
- ياشيخ انته الي وش عندك معهااا وش الي جامعكم هيك وش هووو
- حسسسسك مايعلى .. اصعدي ووكت اعاود نتفاهم يلا بلا كثره حكي

طلعت لعند اصحابي تسالمنا ومشينا لمكان مسامرنا وعاودت تالي الليل مريت لغرفه امي
دحكتهم نايمين مشيت لعند هالصغيره شميتها
وبوستها ودحكت جراح نايم بحضن جدتو عدلت غطاه وبعدها طلعت لغرفتي ...
دحكت ام جراح تتمشى بالغرفه وهي كأنها بركان هايج ... ذبيت عكالي واليشمغ على الميز وكعدت على الفراش وانا افتح زرار الدشداشه وهي حكتلي..
- ليمتى هالحال ياابو جراح احكيييلي ليمتى نضل هيك
- وشبيه حالنا
- حالنا معدوووم معدووم مااهمك بشي كل همك هالحرمه وبنتها .. ضحكك وحكيك وعينك ومالك كلو لهااااا
- عجل غير هي امانتي شتعرفيني انا مااصون الامانه
- صونها لكن بهداي .. هيك انته حاط عكلك كلو معها وناسيني انا وولدك ماتسأل علينا مثلها لو نموت من جوعنا وهي شبعانه مايهمك
- يامره اعكلي يولي انا مامكصر عليكم بشي
وش هالحكي
- الا مكصر ومكصر من السما للكاع
- هاااااا هالحين انا مكصر ! بشو !!
- بكل شي انته مفضلها علينه هي الكل بالكل هين بالبيت انته والشيخه تكومو وتكعدو على طرواها
شايلينها من كاعها شدعوا ياحافظ كل هذا لانها امانه !
- دحكي انا سكتت وهديت معك بالحكي للحين وفاهم غيرتك وعكليتك لكن لا تختبري صبري كفي من هالحكي

كمت نزعت ثيابي وهي كعدت وحكتلي وهي تبكي ..
- تحبها انته تحبها نفسك وعكلك فيها
- يوووووولي استغفري ربك ياحب هذااااا
- اييييه اييييه ماني غلطانه انته ماتدحك نفسك كدامهه شلون تصير لكن اناااا ادحكك كيف
- يوووولي المره محرمه علي وشلون تدني نفسي عليهه يااااه يولي اخيتي هاذي اخيييتي لا تطلعيني من طوري
- دامها محرررمه عجل وينوو رجلها ماتمشي لعندو وتاخذها لبنتها وش ملزكها فيييك
- مااااخصك بهالحكي انااا عارف وش انا بتصرف ،،، دحكي هالموضوع تنسد سيرتو
والمره وبنتها امانه بركبتي ليوم الدين لاازل معهم ولا انظرلهم بشين .. انا عندي حرمتي وولدي وعايلتي مرتاح فيها مافكر بخرابيط الي بالك هاذي
اوزززني لعكلك اوزززني مو ابو جراح الي تدني نفسو على الحرام

تركتها وتمددت وعطيتها ظهري وتغطيت ضليت مغمض عيني واهدىء بالي وبعدها حسيت عليها تكربت باست راسي وتعذرت وحكتلي ..
- طمنت بالي وشكوكي بفعلك هذا لكن من غيرتي عليك انا هيك اتصرف مابكدر ادحك زلمتي تاخذو غيري
- تطمني لا احد بياخذ ولا حد بيدحك علي انا مالي وكت لهالخرابيط وعندي بيتي ليه اهجمو !
- زين زين انسدت هالسيره بعد لا تضيك خاطرك
- الحمدلله

تكربت حضنتني وصارت تتعذر وتفاهمنا وتكربت منها وتالي نمنا هالليله بسلام ..

ثاني يوم وكلت محامي وحكيتلو تفاصيل سالفتها
وتفاهمت معو ان الدعوه تصير من بغداد وهو حكالي ان سالفه البنت وتسجيلها هو يدبرها
وحكالي لوكتها بتعرفو .. وانا عطيتو الي يلزم
واعتمدت عليه ....

ثاني يوم ارسلتلو عنوان بيت زوجها بعد مااخذتو منها وهو لاخر الاسبوع حكالي ان التبليغ لدعوه الطلاك ارفعوه للبريد ....

وضلينه ننتظر خبر من المحكمه واسبوع اخذ اسبوع ورجع المحامي عاد رفع الدعوه والسبب بالتاخير كان انهم مايلاكوه لزوجها ..

وبعد شهر وصلني خبر من المحامي ان زوجها
حاضر للمحكمه وبدورهم طالبين حضورها
من سألتو عن السبب لاني كنت متفك معو انها ماتحضر محاكم لكن هو حكالي ان القاضي مدحك حالتو مو زينه وطلب حضورها لحتى يتفاهمو

وحكيت للتينه وهي رفضت تروح تواجهو
وضليت ليومين انا الح عليها انها تخصم الامر هذا لاخر مره وتنهي الي بدأ وبالليل رجعتلي خبر انها موافقه تروح تواجهو ...

وصلت خبر للمحامي وحكالي انتظر الموعد الي تقررو المحكمه ....
وجر اسبوع من بعد هذاك اليوم وتقرر الموعد
واخذتها من بعد صلاه الفجر طلعنا لبغداد
وانا ادحكها متوتره طول الدرب لحين ما وصلنا
المحكمه وتلاكينا مع المحامي وكعدنا ننتظر
دورنا ...

وهي كاعده حدري وتطكطك باصابيعها وتزفر بالنفس بقوه وانا اصبرها واهديها وهي ماتحكي شي غير انها تهز براسها ...

وبعد حوالي نص ساعه من كعدتنا دحكتها جمدت بمكانها وعينها على رجال كدامها واكف وملابسو رثه وشعرو عالي ووجهو عليه كدمات ضرب قديمه وحتى ركبتو فيها اثار جروح ..
دحكتو يدحكلها بغضب واجه مسرع عليها وهو بيعرج بمشيتو وهي تمسكت بعباتي حكيتلها ..
- ماتخافي اهدي اهدي

وكفت وصرت بينو وبينها وهو صار يدحكلي من فوك لتحت وحكالي ..
- منو انته شجابك بالنص
- انا ولي امرها بتعترض !

- ياولي امر!!!! ولج ساقطه منين جايبته لهذاااا منييين هو الي شردتي وياااه مووو هووو

دفعته وهو مثل الخركه بس لسان يلعلع بصوتو
- تبيعين شرف برااااسي وانتي اكبر ك...ة
لانعل ابوج ياابوالخلفج

ضربتو على فمو واجوي تدخلو الامن والمحامي
اخذني بعيد عنو وهو ينبهني مو لصالحنا التهجم عليه وانا حكيتلو ..
- قسم برب العباد ان ماطلع من هين مطلكها لاهجم بيتو واحرك ساس الخلفو
- يطلك يطلك ان شاء الله بس اهدأ وخلي نشوف شغلنا

اخذت نفس واستغفرت ربي ودحكتلها حاطه يدها على اذانها ومغمضه والدموع تجري .. مشيت لعندها وحكيتلها ..
- تينه يابه ماتخافي ارفعي راسك دحكيلي يولي

رفعت راسها ودحكتلي وهي ترجف .. كعدت حدرها وحكيتلها ..
- يولي هذا ماهو برجال مابيسوي شي ماتخافي الحين بس يدحكو شكلو بيحكمو لصالحنه تشجعي وبسك بكي يابه
- ماشي ماشي بس ابقى يمي مو تعوفني
- لاااا شلون اعوفك حدرك انا يولو

هزت براسها ومسحت دموعها وشويه وصار
دورنا ... دخلنا لعند القاضي وبدأت الاسئله
لسبب الطلاك وتينه ردت عليه ...
- سكير ويتبع وياي اسلوب التعذيب وهو مايدري بنفسه

رجع السؤال عليه وسأله لزوجها وهو انكر ..
- مو بمثل ما تكول حضره القاضي ماعذبتها انه
صحيح اشرب بس ماعذبتها هي الي عالت وياي وشردت من بيتها واهلها صارلها شهور ماندري بيهه وين ماوين وهسه يلا طلعت ويه مادري منو هذا

وجهلي السؤال القاضي ..
- حضرتك شنو تقربها
- انا وصي عليها من بعد ابوها
- الكم صله قرابه
- لا كل منا من عشيره مايربطنا غير صحبه انا وابوها قديمه وهو امني عليها ووكت الي ضاكت فيها الدنيا التجئت لي وهذا كل شي

دحكلها وسألها ..
- بنتي احجي الصار بالضبط حتى نحكم بالحق
- سيدي من هذيج السنه هو بدأ بالشرب وكل المحرمات واثرهن كله اني تحملت عواقبه
من اهانه وتعذيب بدون ذكر تفاصيل لانها صعبه عليه بس من جور ماشفت منه تركت البيت والتجئت لعائله الشيخ لانها وصيه ابويه ومالكيت من يحميني منه غيرهم
- زين وهسه نسمع منك شنو اعتراضك للطلاك
- ماعندي اعتراض انه ماتشرف بيها مره الي بعد السوته وكل حك مالها عندي
- سيدي اني متنازله عن كلشي

سكت القاضي شويه وهي عينها علي تدحكلي وانا اطمنها بعيني وابتسملها وتردلي الابتسامه وهالمحمد متخبل يفرك بوجهو ومايعرف يوكف عدل ويثبت والقاضي صار يدحكلهم وتالي حكى ..

- من حسب ما توضحلي ان الحق يرجع لصاحبته بالطلاك برغم عدم علمي بالتفاصيل الي تسببت بهذا الوضع لكن كل اناء ينضح بما فيه

وتم الطلاك بينهم واجتي لعندي وكفت وهي تتبسم
وتمسح دمعتها والقاضي يدحكلها ويبتسم ومحمد وكت الي راد يمشي تكرب علينا وعينو حمره من الاعصاب ويصك باسنانو وهي ختلت وره ظهري
وكبل مااسوي شي دحكت القاضي اشر للامن واجوي اخذوه بهدوء لبره ...

طلعنا ووكفنا ويه المحامي وتشكرناه على تسهيل الدعوه وهو طلع ظرف وحطه بايدي وحكالي ..
- اني وعدتك شيخ ان ادبر سالفه تسجيل البنيه
وهاي جبتلك نسخه من عقد الزواج ونسخه من جنسيته والباقي عليكم

تشكرته وهو راح لشغله وانا وكفت حدرها وحكيتلها ..
- تينه دحكي هاي معنا العقد ولكن هاي نسخه من الجنسيه جايز انها ماتمشي عند النفوس
- لازم نمشيها عفيه سوي اي شي
- ليه ما حكيتي عن بنتك كدام القاضي لحتى هو ينطيكي الحل
- لااا متاكده لو عرف محمد مايطلك ويضل يسويهه هوسه وراح يخلونه نرجع سوه لاجل البنيه
وماريد ماتحمل شفته بس شافني شسوه النوب اصير يمه و وياي بنتي
- استغفر الله والله مانها راهمه مايعرف عندو بنت
- مايستاهل يعرف خليها بعيده وبأمان
- لااا امشي نحكيلو الحين وبري ذمتك كدام ربك
وهاي انتي تطلكتي منو مايكدر على شي بعد
- اخاف عليها اخاااف
- يولي امشي انا معك والبنت مانخلي يعرف مكانها بس ننطي علم عنها ونعاود البيت يلا تحركي يلااا

اخذتها بالغصب ومشينا لعندو وهو من دحكنا
دار وجهو عنا وساعه ما وكفنا حدرو دحكلنا وحكى ...
- شعندج جايه بعد شتريدين

اشرتلها تحكي وهي حكتلو ..
- اكو شي لازم تعرفه
- شني !
- تره صار عندك بنيه .. من طلعت منك جنت حامل وولدتها قبل شهر
- هههههههعععععععععععععههه انتتتتي من كل عكلج اصدكج !! هاي سنين انتي يمي ماحبلتي وجبتي من تروحين يلا تطلع سباعيتج ولييي لج ولييي يلااااا جايه تكربسينهه براااسي
شمدريني من يا كواد هالبنيه وهسه جايتني بنتك

كضبتو ووكعت عليه ضرب على وجهو وهي تحكي بحركه كلب وتبكي ..
- الله لاااايهنيك لا بدنيا ولااا باخره والله لتعض اصابعك نددددم على كل كلمه الله ينتقم منك حسبي الله بيك حسببببي الله

دفعتو للكاع واخذت يدها ومشيت بعجل وانا انفخ نار مو نفس وهي تشهك وتبكي صحت عليها ..
- لييييه تبكيييي لييييه بيستاهل هاااااذ تبكي عليه
اسكتتتتي اسكتتتتي بسك عاااد

اخذتها للسياره وكعدت وصرت اضرب بيدي على الباب وانا احكيلها ...
- انااا الغلط. منييي انااا ليه اخذتك لعندو لييييه
-ماتلوم نفسك شيخ ..هو واحد نذل وهذا المتوقع منه

- اناا غلطططت غلططت ولا انا شتوقع منو
يدورها وياخذها بالاحضان !
- مالك ذنب بشي شيخ عفيه لاتحرك باعصابك هيج هو الخسران هوو
- استغفر الله استغفررر الله يولي انا ردت امشي على حك الله ومايجوز مايدري عن بنتو
- مو اني كلتلك من قبل .. تعامل بالحق ويه الي يعترف بهالحق ويحسبله حساب ..هذا مايعرف شي عن دين ورب
- ايه بالله ايييه ... استغفر الله استغفر الله

عاودنا لحديثه وانا طول الدرب بدحكها كاضبه راسها وتعصر فيه ووكت مااسألها بتحكي انها
مصدعه ..

كريب ما وصلنا لديرتنا حكيتلها ...
- تينه انا من بكرا بمشي لعند اخوالي و بطلع بسفره للشام من هنيك بشرف على تجاره معملنا الجديده هالسنه وبعاود بعد شهرين او ثلاث
وهيك انتي بتقضي عدتك براحتك بالبيت
- لااا شيخ ليش تبهذل نفسك هيج علمودي
مو اله تسافرتره عادي ابقى
- لاا هيك اريح للكل وانا بكل الاحوال كنت ناوي على هالسفر وهالحين انسب وكت لها
-زين شنو تسوي هناك
- عمي مو حاكيلك عنو عندو خطوط نقل على الحدود
-اي
- ايه وانا كنت موصي واحد من ولادو يدحكلي هنيك اذا السوك عندهم بيمشي عندو شغلنا لحتى نفتح فرع هنيك وهو سأل وجابلي خبر انه ملاكي
صاحب معمل ودو شريك لان شغلو واكف ورأس مالو مايكفي وانا فكرت ودحكتها احسن شي اتشارك معو وبخبرتي وخبرتو نجيب منتوج جديد
وهو بينتظرني ازورو لحتى نتفاهم على حسب الاصول
- اذا هيج لعد الله يسهلها الك ويفتحلك من عظيم ابواب رزقه ويجعلها شركه خير بينكم
- ان شاء الله .. انا من الحين تفائلت من بعد دعائك

تبسمت ورجعت راسها على الجامه بتعب واول
ماوصلنا للبيت ونزلنا دحكتها دخلت مسرعه
كفلت السياره ودخلت .. دحكت امي اجتي لعندي
وتتسآل ..
- كواك الله ياوليدي
- هلا يمه
- وش صار ليه البنت تعبه !
- مادري وش بلاها من كم ساعه وهي مصدع راسها

بعدنا نحكي وطلعت هي من الحمام غسلت وجهها ويدها ترجف مشيت لعندها وحكيتلها..
- يولو شبلاكي
- ماكو شي هيج شويه نفسي لعبت من الطريق
- زين امشي تريحي يابه وانسي هالصار زين ماتعاودي تفكري فيه
- اي

صعدت لغرفتها وانا صرت احكي لامي وش صار معها اليوم ووصيتها تنتبه عليها ورحت تغديت وطلعت لعند الديوان ....

لليل عاودت للبيت وانا اصعد سمعت صوت بكي الطفله مشيت لعند غرفتها ودكيت بابها .. سمعت صوتها وهي تحكي...
- تفضل
دخلت ودحكتها كاعده بالكاع وبنتها على سريرها
تبكي وهاذي بالكاع كاضبه راسها وتبكي معها
تكربت منها وحكيتلها...
- يولو ياتينه شفيكي انتي وبنتك هايج عليكم البكي هالليله !
- عفيه خليك يمهه
- وييين رايحه اكفي فهميني وش بلاكي اليوم كلو
- راسي يوجعني ومداتحمل صوت بجيها ومااعرف اسكتها

اخذتها شلتها بحضني وصرت اناغيلها والتينه كامت طلعت ..استغربت حالها مايوم دحكتها بزعت من بنتها وتركتها هيك ...

ضليت شايلها واتمشى فيها واحكي معها واضحك وابوس فيها وهي صافنه علي وهاديه ..

كعدت والتفت لحتى اخذ الممه ودحكت هين يشمغ فلسطيني كضبتو وصرت اتسأل هذا لمحمد ؟ وبتذكر فيه ايامها معو كبل ولا لشي ثاني !!!

دخلت هي وكعدت بهدوء حدري ...
-صرتي احسن
- اي
- ليه هالوجع الي براسك من كثر تفكيرك؟
- لا بس داقاوم نفسي وصعبه شويه
- مافهمت
- اكو لحظه ضعف وداقاومها وصعبت عليه
بس هسه احسن لا يضل بالك
- تينه تحبي تحكيلي شي انا اسمعك
- لا ماكو شي يسوه ينحجي لا يضل بالك شيخ والله صرت زينه

مدت يدها واخذت بنتها وصارت تحضنها وتشم فيها وبعدها دحكتلي وابتسمت ...
- شكراً شيخ دائماً تجي بالوكت المناسب
-ههه اييه
- يعني هسه من باجر مااشوفك
- اييه بطلع من الفجر لعند اخوالي بسلم عليهم وادحك وش يحتاجو ومن هنيك بطلع للشام باذن الله
- تروح وترجع بالسلامه شيخنا
-الله يسلمك
- راح اضل ادعيلك كل الوكت وعمري كله ماانسى وكفتك وياي
- هذا واجب عليه حمايتك ياام غاليه
-ههههه اول مره تكولها
- هههه كان ودي ادحك كيفها سهله عندي ولا ثكيله
-وشطلعت
- ثكيله نرد للتينه احسن
-هههههه بكيفك شيخ
- اييه وش بنفسك من الشام احكيلي
- ربحك بشغلك ورجعتك سالم ماريد غيرهن

تبسمت وانا ادحكلها وحكيتلها . .
- بدعوتك ان شاء الله

وكفت وطلعت سبحتي من جيبي وخليتها على غاليه على بطنها وحكيتلها ...
- راح تكبر لحين مااعاود خليها عندها تلعب فيها ويضل شي من ريحه ابوها معها

وكفت وهي شايلتها ودحكتلي ودمعت عبنها وتبسمت وحكتلي ...
- والله صعبه روحتك علينا
- بعاود يابه بعاود
- فدوه انتبه على نفسك ولاتضل بس للشغل هم اطلع وتونس هناك واذا حصلت تلفون خابر وطمنا على اخبارك
- ان شاء الله وانتي من اليوم اريدك تشمري وره ظهرك كل شي اسود بحياتك وابدي بحياه طيبه مع بنتك واتركي مخاوفك يا يابه
- ان شاء الله

طلعت فلوس وخليتهن على الميز وهي رفضت تاخذهن وانا رفعت اصبعي ونبهتها ...
- لو تجادلي فيها مره الاخرى ماتلاكي الي يسرك
خليها عندك وان عوزتي اطلبي من امي
- مشكور خويه مشكور
- هذا واجبي ..

يلا تصبحي على خير ياتينه
- تلاكي الخير ياشيخ

طلعت منها ومشيت لغرفتي كعدت ام جراح وخليتها تحضر جنطتي وصرت احضر اوراقي والفلوس والجواز وانااحكيلها اني رايح بشغل وبطول هالثلاث شهور وهي توصيني على نفسي وتالي وصتني على اغراض الها ولولدها
تركتها تحضرهن ونمت ....
وتالي كعدت على الصلاه ..صليت وبوست جراح وامو ونزلت واخذت جنطتي ورحت لعند امي وكعدت اوصيها على البيت وهي تدعيلي وتوصيني ماطول بغيبتي عنها

وكبل مااطلع امي اشرتلي على علاكه حدر سجادتها وحكتلي ...
- هاذي شويه مواكيل لدربك يابني خذها معك
- يمه التينه حضرتها ؟
-ههههه ايييه يايمه هي سهرت ليلها تحضرها
- ههه تشكريها يايمه وبالله عينك عليها وماتكصري عليها بشي
- ماتوصي يابني توكل وانته متطمن

بوست راسها وودعتها واخذت العلاكه وطلعت
بسيارتي لعند اخوالي بالباديه وتبعني لعندهم بعد يومين ولد عمي الي صار مرسال بيني وبين زلمه الشام وبعد مادحكت وش يبغو اخوالي من تجاره من هنيك سافرنا للشام بسيارتي نتكاسم ساعات الدرب بالسياقه...

وصلنا للشام وتلكانه الرجل واحسن ضيافتنه عندو وصرنا نتفاهم بامور الشراكه وكل يوم نطلع ندحك المعمل ومحال البيع وننزل للسوك يعرفنا على بلدهم وياخذنا لمطاعم مشهوره عندهم
والليل ننزل للكهاوي نتعلل مع ربعو
وبين كل اسبوع ننزل سوك واحد من مناطقهم وانا اخذ من عندو شغلات للاهل

مره شفت ثوب وردي فاتح طويل وعليه نقش ناعم ملون بكل لون .. من شفتو ضلت عيني عليه رجعنا للبيت بالليل فكرت بيه لو اخذو للتينه واجبرها تنزع هالسواد دامها تطلكت واصبحت حره مايلزم تضل حابسه نفسها بالسواد كل عمرها ..

رحت ثاني يوم من الصبح واخذتلهه اصغر قياس واخذت وياه اربعه غير شكل واحد منهم سمائي وقماشتو ناعمه
والثاني اصفر فاااتح مطرز بابيض وازرك والثالث احمر طولو ثلاث ارباع ساده ومنفوش والرابع ابيض طويل وقماشته ناااعمه وردانه مطرزه ببرتقالي فاتح ...

واخذت لصفيه ومناسك كل وحده اثنين بلون احمر و الوردي الي مطوخ لونو
ولغاليه اخذتلها بدله صفره وعليها فراشات بلون بني . ..
ام جراح اذكرتها بلاساور والحلك اخذتلها قطعتين ومعها ثوب ..
وامي ثوب وجاكيت وخاتم فضه ....
و ولدي جراح مانسيت حصتو من الالعاب الخشبيه ومعها اخذتلو قطار

جمعت لهم هالهدايا من كل نزله للسوك
و بشهرين انا خلصت شغلي التام وفتحنه شراكه بينا واشرفت على شغلهم هنيك وتفاهمنا بكل التفاصيل وحددنا كل ست شهور من السنه تصير لي زياره لعندهم
وهو الرجال ابن اجواد وملكاه طيب
مادحكتو بيوم يتعامل بوجهين لا مع عامل ولا شراي ومع ذلك اخذت الحيطه والحذر منو والله يسرها لنا وهو طار بفرحتو لانو بيفتح معملو من جديد بحيل اكوى من كبل وبينزل للسوك بشي جديد

كنت موصي على البضاعه لتجاره اخوالي وانتظرتها تكمل بحدود ال١٥يوم من الشهر الثالث الي صرت بي عندهم .. والرجل بطول هالايام فاتح لنا مضيفو ويكرمنا بكل خير ....

وحين ماعاودت العراق مريت على ديره اخوالي بالاول وتريحت عندهم وعطيتهم بضاعتهم الي وصو عليها وبعدها وصيت ولد عمي انه يعاود لبيتنه ويوصل خبر لهلي اني بكعد عند اخوالي اسبوعين وبعاود البيت ..

كان ودي تخلص عدتها وانا بعيد عنها
ماارتاح بوجودي كربها وهي كاضبه عده طلاكها هيك نفسي ماترضاها ...

بهالاسبوعين فريت عرب خوالي كلهم
عاودت للصيد بالبريه ومشيت ادحك النوك(الناقه ) كم صارن للحين ؟؟
و ولد خالي وابنو يحكولي عنهن كل وحده وش ولدها وكيف يحاموهن من الغزو الي يصير بين العرب المختلفه وبيحوشو الحلال فيه .. ولكنهم اسباع وماينغلبو مأمنين ديرتهم وحلالهم ...

وكت ماعاودت اخذت معي حليب الناكه امي بتفرح فيه وفكرت اعطي منو لغاليه بيكوي عظمها ويزيد مناعتها هالحليب هو دوا وشفاء ماله مثيل ...

وحين ما وصلت تلكوني رجال ديرتي بالسلام من بعيد على طول الدرب لحين ماوصلت البيت ودحكت جراح ترك لعبو واجاني يركض ويصيح ..
جدتي عاود ابوي عاود

اخذتو شلتو وضليت حاضنو واشم فيه
وطلعت امي تهلي وترحب بعودتي
وارسلت الولد جابو الذبيحه وضلت موكفتني عند الباب لحين ماذبوحها تحت رجلي يلا دخلتني البيت وهي تحضن فيي

دحكت البنيات كلهن هين واكفات ينتظرني واولها تكربت مناسك باست يدي وانا بوست راسها وتسالمنا وبعدها ام جراح وصفيه .. والتينه واكفه بهدؤها وبسمتها عند الباب وانتظرت الكل تبعد وهي تكربت حكتلي ..
- حمدلله على سلامتك شيخ
-الله يسلمك يا يابه

ضلت ادحك بعيوني شويه وبعدها ترخصت و مشت للمطبخ .. كعدت مع الاهل واحكيلهم اخبار سفرتي واحوال اخوالي لبين ماتحضر الغدا واكلنا كلنا بسفره وحده ردتلي فيها الراحه من دحكت حريمي كلهن بخير وعافيه وحواليه ...

بعد الغدا وصيت تينه تجلبلي غاليه
وياصلاه محمد وكت دحكتها شايلتها
مبين بياضها وفمها مورد وصغير وزايدو حلى خدودها المليانه وهالعين باين لونها الحين عسليه ورمشها ثخين
وهالانف مثل امها منحوت وبس زرفين
باين منو ...

اخذتها بحضني وخليت راسي بركبتها واشم ريحتها الطيبه وابوس فيها واناغيها
وهي تضحك وتتنعوص بصوتها وانا اصير بودي لو اكلها ...

اخذتها ورحت تمددت على فراش امي والاعبها واشمها من كل مكان واعضعض ايدها واصابعها وتالي غفيت وانا منومهه على صدري ..

من كعدت مالاكيتها بحضني ودحكتها بتغرب .. كمت سبحت بالعجل وطلعت
لديواني اشتكتلو والله وكعدت هنيك لنص هالليل ادحك اخبار ديرتنا وش حالها

وكت عاودت للبيت دحكت امي كاعده للحين مانامت ورحت لعندها تمددت وراسي بحضنها وحكيتلها....
- يمه صار شي بغيابي
-لااه يابني كلو كضيناه بالخير والحمدلله
- الحمدلله .. يمه انا بالي شي وودي تعاونيني فيه
- خير ان شاء الله
- ودي اخلي التينه تنزع هالسواد وانا اخذتلها اثواب ملونه لهالسبب
- ماظنيتها ترضى
- لزوم ترضى يمه لزووم عجل بتضل لابستو كل عمرها وهي صغيره حرام تدفن نفسها هيك
- اي والله عجل بلكت على يدك ترضى تنزعو
- انا بحكي معها بكرا وانتي ضلي لحي عليها ماتتركيها زين
-زين يابني زين

بوستها وصعدت لحجرتي نمت وثاني يوم كعدت متاخر على طلعه الفجر وصلاتو وحين مانزلت دحكت امي والتينه يتريكو صبحت عليهن واثنينهن وجوهن مبسمه ومشرقه بهالصباح
كعدت معهن والتينه كامت جلبتلي جاي وكعدنا ناكل وبعد ماخلصنا وهي مشت للمطبخ انا مشيت لغرفه امي وطلعت من الاغراض الي هين موجوده اخذت منها هديتها وصحت عليها ..
وكت ماادخلت اشرتلها تسد الباب
سدتو ووكفت كدامي ...
- ها يا صويحبتي شلونها ايامك هين
- بكل خير ونعمه شيخ ..انته شلونها سفرتك ارتاحيت بيها
- ايييه الحمدلله كضت بالخير والشغل مشى زين
- الحمدلله ان شاء الله تتوفق بي اكثر ويزيد برزقك هالشغل
- ان شاء الله ... تينه ان طلبتك بشي ترديني ؟
- لااا شيخ انته تأمر
- عجل دام هيك اسمعي ... انا ودي تنزعي هالسواد ماله لزوم بعد
- لااا لاااا عفيه شيخ لااتحرجني هيج
- ليه بحرجك يولو .. ما تطلكتي وكضيتي عدتك و ولدتي بنتك بعد مايلزم السواد وهو من زمان زايد وجودو مايلزم والله
- شيخ اني مو علمود هالاسباب لبسته
-عجل لشو
- اني ماتحلى بعيني هالالوان بعد مو حجيتلك نفسي تركت كل هالزينه والغوى
والاسود احسه مناسبني ومرتاحه بي ماريد اغيره رجاءاً افهمني
- يولي انا ماحكيتلك تتحرري من هالماضي المعلك بذاكرتك ليه بتضلي مقيده نفسك فيه
- ما مقيده نفسي بشي بس هاي رغبتي بعد غير الاسود ماريد البس
- ليييه يولو ليييه
- شيخ فدوه اني نفسي اكتفت وملت ولو كل انواع اللبس والزينه هسه تصير كدامي ماتهمني اني هاي اختاريت اسلوب حياتي بعد ومااريد اغيره رجاءاً لا تضغط عليه

سكتت ورميت العلاكه على فراش امي وطلعت .. مدري وش الي يغضبني هيك
هي ما ودها خلها بكيفها ليه انا حارك اعصابي عليها !!!

رحت للمعمل وكضيت شغلي فيه وبالظهر كان عندي رجال ضايفيني بديواني ضليت معهم ولنص الليل يلا
عاودت البيت ..

وكفت اغسل ومشيت للمطبخ ادورلي شي اكلو وانا فاتح الثلاجه سمعت صوت التينه وراي ..
- شلونك شيخ
- زين

سديت باب الثلاجه واندرت عليها دحكتها شوي ومشيت كبل مااطلع حكتلي ..
- لا تروح بس شويه عفيه

اندرت عليها وحكيتلها ..
- وش عندك

ابتسمت ومشت كدامي وهي تأشرلي بتوسل امشي معها .. ومشيت معها ورحنا كعدنا بالحديقه الوره البيت
دحكتها حاطه مفرش على الصبه وعليه
بالوسط ماعون فواكه مشيف وماعون حلى .. تبسمت ودحكتلها وهي تبسمت وكعدت واشرتلي اكعد حدرها ..
كعدت وصار بينا المواعين دحكتلي وحكتلي..
- يااخي ذواق انته باللبس كولش حلوات هالفساتين والوانهم كولش عجبتني
عاشت ايدك والله احلى اختيار واوعدك
البسهم وانزع الاسود بس انطيني وكت ووعد مااكسر بخاطرك

كانت تحكي وهي تصب العصير بالكلاص وقدمته لي وتبسمت ..
اخذتو منها وحكيتلها ..
- تلبسيهن بالهنا .. يولو انا وش ودي غير اني ادحكك مرتاحه بعيشتك وبشبابك
ياتينه هالعمر ايامو تمشي ان ماعشتيها الحين يمتى ودك تعيشيها ؟ الشباب ان راح ما يرد
- صح حجيك بس تدري شنو
- ايه شو احكي
- اني مااضم عليك انته صاحب اسراري
بعد اكو بداخلي كسر جبير ياذيني لليوم
وحمله وذكراه براسي مسوده كلشي بعيني
- وليمتى تضلين هالشكل
- مايطول ان شاء الله .. وعد مااكسر بخاطرك بس اتعدى هالشي تلكاني نازله ولابسه واحد من هالفساتين

ضحكنا وصرنا ناكل وبعدها حكيتلها ..
- بكرا اروح للنفوس تاخرت بتسجيل غاليه
- على راحتك شيخ
- تينه وان مارهمت بسجلها على اسمي ؟
- لا ان شاء الله ترهم ارجوك اني اريد بنتي على اسمي فدوه
- يصير خير ان شاء الله

مشينا بعدها كل واحد لغرفتو وثاني يوم مشيت للنفوس واجيت قدمت الاوراق واعترضو لانها مو الاصليه وبعد ان مكان الولاده يختلف عن اصل الوالدين وصارو بشك عليها وكملت من دحكو هويتي ومالنا صله قرابه وصرت اجيبها من هين اوديها من هين والموظف يبس راسو لو الاصلي لو ماتسجل ...

عاودت للبيت وبعدني ماعتبت الباب واجاني ولد عمي يحكيلي في ضيوف ينتظرو بالديوان ومشيت لعندهم وبالي كلو بسالفه غاليه شلون بأسجلها ؟؟؟؟

وحين ما عاودت بالليل وحكيتلها انصدمت وصارت تبكي وتندب حظها
وانا حكيتلها بحاول بعد مره ولو حتى كلفني الموضوع امشي لمحافظتو اسجلها

وصرت كل اسبوعين اعاود احاول فيها
وحكيت مع المحامي الي كلفتو بالطلاك
وهو بدورو مشى معي لهذا الموظف وحكينا كل شي لالو وهو معند راسو وصار يزكح ويهوس وفرج العالم علينا بتهمه انتو ضامين البنت عن ابوها وبعرف سوالف العداوات بين الاهل
وماشارك بالحرام ... وحرت معو كيف بقنعو وكلها هين صارت اذا حكيت معهم ليتدخلو بيردو نفسو من الخوف يتورطو بشي مخالف للقانون ...

ومشت الشهور على هالحال انا بسأل بكل مكان عن هالحاله وبيحكو الا اوراق الاب الاصليه ...

بهالحين صار عمر غاليه ١٠ شهور
وهي كبرانه وحليانه وملعبه البيت كلو بصوتها ...
جراح مايفاركها ليل نهارو معها ياكل ويشرب حدرها وحتى نومو صار عندها
بغرفه تينه .. حتى التينه تحكيلي انها ماتعبانه بتربيتها بسبب جراح هو الي يداريها ويلاعبها وكت النهار ..

واذا يطلع مع اصحابو بيرجع جايبلها شي
وهي تحكيلو مايصير تاكلو .. بيكعد هو وياكلو حدرها ويحكيلها من تكبري اشتريلك منو ...

كنت دايماً احاول اقنعها اسجلها على اسمي وهي مابترضى لحين ما وصلت غاليه لعمر السنه حكيت معها بحزم وهي حكتلي ... انها بتحاول تحكي مع ام جراح
اذا رضت اسجلها على اسمي واذا ما رضت تحكيلي بساعتها الحل البديل ...

رضيت انا وحكيتلها لليل الاكي منك الخبر ...
ووكعت ماعاودت بالليل صعدت لغرفتها بالاول دكيت بابها وهي فتحتلي بالعجل
كأنها كانت عارفه بجيتي .. دخلت وكعدت معها وحكينا ....

- هاا يالتينه وش صار معك اليوم
- ماصار شي بس ماقبلت ام جراح
- اييه ؟
- اي ماقبلت وهاهيه لذلك عوف السالفه
- وش حكيتو بله علميني حاب اسمع شو كان ردها
- ماقبلت المره حقها ماتقبل عوفها براحتها لو بدالها هم اسوي نفس الشي
- تييييينه انتي سمعتي شو حكيت ردي على كد سؤالي يلا

سكتت ودارت عينها مني وضلت تهز برجلها رادت تحكي وانا سبكتها وحكيتلها..
- بدوون مضاميم بالحرف الواحد ياتينه بالحرف الواحد ابغى اسمع ردها

نزلت راسها وحكتلي ..
- اني كلتلها ام جراح بنتي صعب تسجيلها بالنفوس وصارلنه سنه نحاول ومارهمت والشيخ عرض عليه اسجلهه باسمكم واني كلتله اخذ رأيج بالاول اذا رضيتي حتى اسجلها
-ايه
- وهي كالتلي .. غير اعرفها بنت منو بالاول يلا ، اشوف دمها يشرف يصير على اسمي

ضربت كف بكف ونفسي صار نااار من الاعصاب وتالي حكيتلها ..
- ايييه كملي
- اي هو هيج
- كممممملي تينه كملي
- اي بس اهدأ
- هادي انا احكي يلااا
- اي واني كلتلها .. ليش تشككين بيها مو حرام هالشي ،كالتلي ،،انتي من اول يوم عجيبه جيتج وسالفتج ولو هالبنيه بنت حلال والها اهل ينعرفون جان ماحتاريتي بيها صارلج سنه ورحتي لابوها وغصب عنه يسجلها باسمه بس انتي الله اعلم شنو وراج ومضمضمين عليه واني ماارضى اسم الشيخ يصير لمجهولين النسب
من سمعت هالحجي منها صراحه عذرتها
لان اي شخص بدالها راح يحجي نفسه
ويسمي بنتي مجهوله نسب واني غلطتي صارت من البدايه ماحجيت لمحمد على حملي بس خوفي منه غلب على عقلي
وهاي اني داادفع ثمن خوفي بعد مرور سنتين باقي اثر هالغلطه وياي

كنت ساكت ولكن بداخلي نار من الاعصاب مغلفهه بالسكات وهي عاودت تحكيلي ...

- شيخ اني كلتلها هاي نظرتج عليه انتي حره بيها ماعاتبج ولا ازعل عليها وحتى
السالفه الي اجيتج بيها اعتبريها ما نحجت
بس طلبت منها شي واحد
- وش هو
- كلتلها لا بيوم تحجين كدام الغير على بنتي بمثل ما حجيتي كدامي حرام تخلين وياهه سمعه مو زينه من طفولتها وهي مالها ذنب بشي وحتى لا يصيرلج ذنب وانتي ماتدرين شنو المخفي من سالفتي
لا تحجين بيهه ولا تذكرين لاحد اني اجيت وطلبت منج هالطلب وهي قبلت وكالتلي مااحجي بيها بس بنتج ماتتسجل على اسمي كلتلها موضوع وسديناه وماينعاد بعد كل العمر

- استغفر الله استغفر الله يولو انتي ليه هيك تتجفي شرها بالسكوت ما ترديها وتكفي بعينها هذا حكي ينسكت عليه
- شيخ يعني اكعد اتعارك وياهه عيب
عليه
- وليه عيب هااا ليه ! ول انتي ماتعرفي لو هالحكي موجه الها كانت شالتك من ثوبك ولطختك بهالحيط وانتي تحكيلي عيب !
- شسويلها يعني كل واحد يتصرف باخلاقه وشخصيته اني احسها عيب عليه
واني كاعده بيتها اتطاول بالحجي وياهه
مو اخلاقي هاي .. اني المهم ياشيخ عندي انته والشيخه تعرفون كل سالفتي وواكفين وياي مادامني راضيتكم وطايعتكم ومرتاحين ويايه هاي يكفيني شسوي لحجي البقيه مايهم عندي والله

- وان كااان ياتينه وان كاان في عالم مايفهمو سياستك هاي بيحسبوها ضعف شخصيه وتنحسب ضدك على انك ساكته لان هالحكي صح عليكي ومالك عذر تدافعي عن نفسك فيه .. فهمتي !!

انا لا كاره ام جراح واحكيلك تمشكلي معها ولا انا الي مابهتم لحرمتي وارضى عليها الشينه ... لكن سكوتك عندها غلط واكبر غلط انا ماودي انها تتفرعن عليكي لانها من يومها حاسبتك صغيره مكام كدامها وهيك بتصير تدحكلك بالنظره الشينه وانا ماارضاهه عليكي ولا انا الي بحب ادخل بمشاكل الحريم لهيك ودي انك تاخذي حكك بنفسك ..
انتي ماغلطتي بشي وانا عندك شاهد من الالف للياء زوجك هو الي عديم اصل وبلا غيره وهو السبب بكل هالمواصيل
والذنب والعار بيلحكو لنص كبرو

- شيخ انته تعرف وتشهد على كل شي بس همه لا واذا ردت احجي واتعارك لازم يصيرون يعرفون الي تعرفه وهالشي ياذيني اكثر من الي بالهم يحسبوه عليه

- يعني بتضلي هيك تسكتي كل عمرك

- لعد اخليهم ينظرولي بشفقه وانسأل الف سؤال على السالفه الوحده .. وين امج وين ابوج وين عمج ليش زوجج هيج ليش اهله ماكو ليش شردتي منهم هذني كلهن شجاوبهن .. افهمني جوابهن يذبحني لو احجي كل وحده منهن سجين تغرس بكلبي بحجيي عنها

- عجل انا الي باخذلك حكك انتي بتضلي كل عمرك عايشه بالخوف .. الخوف ياتينه انا مااعرفو لكن انتي معشعش فيكي هالخوف

تركتها وطلعت ودخلت على ام جراح تفاجأت بشكلي هيك مدخن اعصاب
جمدت بمكانها وانا مشيت كضبت زندها وحكيتلها وانا صاك اسناني ...
- يولي تسودي وجهي كدام ضيفتي
ماتعرفي انا من احكي الكلمه ماعليها نقاش ومجادل
- ما فهمتك شيخ
- وشووو الما فهمتي شكلك ناسيه حكيك هالنهار هاااا نسيتييي
- لااا
- يوووووولي انااا بدخل حرام ببيتي احككككي انااا بدخل حرااام !!!!
-لااا حشى
- عجل بتطعني بشرفها واصل بنتها هيك بالوجه ما حسبتي حسابي ماحكيتي انا كيف بداريها لو كانت بنت حرام وامها كيف اخليها اخيتي وادخلها بيتي وانا مادري وش اصل الي بطنها !!! ماتحسسسبي انتتتي ماعندك عككككل
- سألتها انا وهي ماتحكي كل مااسلها ماتحكيلي وش سالفتها
- وانتتتتي شخصك فيييييها كم مره انااا حكيتلك مااالك دخل فيها الحرمه بامانتي
بتجي انتي تطعني بشرفها وتسميها بالحكي وتزيدين همها !! وش استفدتي من غرورك ومنفختك عليها هالسنتين
وش استفدتي من طعنك فيها وظن السوء
مااخذتي غير تسجيله حرام بكتابك

دفعتها على السرير ومشيت بعيد عنها ورجعت لعندها حكيتلها بتهديد ..
- لو سمعت هالحكي طلع عليها من اخر الدنيا ارجع عليكي احملك الذنب واحاسبك عليه وبتعرفي كيف الحساب يصير .. الحرمه وبنتها امااااانه بركبتي ليوم الدين سمعتتتي هاذي المره الالف الي احكيها الك ماتغلطي بحكهن
هالمره تنبيه الك الثانيه ماتلومي الا نفسك

تركتها ونزلت صرت اتمشى بره وادخن وبعدها هديت اعصابي وعاودت لغرفه امي نمت عندها وطلعت من كبل الفجر للجامع وبعدها ماعاودت البيت ضليت اكضي شغلي وحاير بديواني ...

ولليل من عاودت دحكت البيت كلو مطفي اضويتو ونايمين .. وانا بالي عند غاليه مشتاك اشمها .. صعدت ودكيت باب غرفتها .. فتحتلي التينه ورحبت بجيتي عليها ودخلت مشيت لطرف السرير
كعدت ودنكت اشم هالغاليه الي تربعت بنص كلبي بحلاتها ...

جراح كان نايم على طرف السرير الثاني وهي بالوسط وتينه مكانها وين ماانا كعدت .. بوستو هو الثاني صاير ماادحكو الا هيك خطف ملتهي كل وكتو بهالغاليه

وكفت التينه كبالي وحكتلي ..
- ماصرنا نشوفك شيخ
- ايييه بالله الشغل واجد (هواي)
- الله يكون بعونك
- صار معك شي اليوم ؟
- لا الحمدلله كلشي بخير
- وكاد ؟
- اي اكيد والله
- زين الحمدلله
- مارضيت على عصبيتك عليها ماحب تتعاركون بسببي كم مره احجيلك هالشي ياخويه ليش تخليها تكرهني هيج
- هذا الحك ياخيتي حك لو انها مامشت عليه وزلت وكاد بتحصل نصيبها من البهذله وانتي بعد لو زليتي تحصلي نصيبك منها انا مابعامل حد بخلاف حد
الكل تاخذ حك زينها وشينها
- مفهوم شيخ مفهوم
- دحكي انا بفكر بغاليه ليل نهار يشهد الله مانسيت سالفتها لكن مارهمت معاي والله
اعذريني ياتينه ماكدرت اوفي بوعدي لك
- لاااا شيخ لاا شنو تعتذر اصلاً انته تعبت وسويت الي عليك وزايد ماقصرت يشهد الله
- ماكدرت اسجلها ياتينه هالشي بينهش بصدري
- شيخ احجيلك شي
-ايه
- شوف هسه اني شلون مرتاحه وما مفكره بالموضوع تدري ليش
- ليه
- البارحه سويت استخاره بالقران علمتني عليهه الشيخه
- ايه خير ان شاء الله
- اي خير .. الايه الي طلعتلي ..
اصبر لامر ربك .. واني قررت اوكل امرها لرب العالمين واصبر واشوف
شنو قدرنا اني وبنتي
- وكاد بتصبري ؟
- اي اصبر لو طال الصبر ميه سنه مادام التجئت لربي بحيره وكلب مكسور وهو يدري شكد تعذبت كل هالسنين وماريد العذاب يرجع لبنتي هم واني ناجيته هواي
يلا استخرت ومن قريت هالكلمات كلبي برد واتفائلت وقررت اني اصبر واشوف شمكتوب .. اكيد ربي مايضيع اجر الصابرين ... واني بصراحه جنت اريد
ارجع احاجي محمد وكلت اجازف هالمره وحتى لو طلب تحليل اسويلها بس الشيخه كلتلي جربي الاستخاره ومن جربتها تراجعت عن قراري

- والله وجلاله الله لو حاكيتلي انك ناويه لهالقرار لاكسرها لرجولك وماخليكي تمشي لعندو كل عكلك بعد الصار بترجعي تذلي نفسك كدامو هيك !

- من لا جاره شيخ اني هيج فكرت لعد هينه عليه عمرها يمشي وماعدها بيان
ولا هويه .. بس هسه اني اختاريت اصبر لامر ربي اكو احساس بداخلي يكولي
حتى اني قدري راح يرتبط بهالصبر مو بس قدرها وحابه اشوفه شنو

- ان شاء الله يكون خير .. انا معك ياتينه بنصبر وعلى الله نتوكل

وختمنا سالفه غاليه بالصبر وننتظر ربها يدبرها ومشيت الايام ... وغاليه صارت تمشي وجراح نهارو يكضي معها بره
وحكك امنيتو بأن يصيرلو اخت وياخذها
يشتريلها ويداريها بنفسو ..

وام جراح صارت حامل .. والتينه بنفس
بسمتها وهدوئها تتمشى بينه ولسانها ما ينطك الا بكل طيب مع اهلنا .. حتى
عماتي ونسوان عمومتي صارو يحبوها ويمدحو بملكاها الهم .. وامي روحها بغاليه ان طلعت لسوك خذتها معها وان مشت على زياره اخذتها ومعهم جراح
وبيعاودو محملين العاب وثياب وانا ماتمرلي ليله اذا ما اصعد اشمهم وابوسهم ومرات اعاود الظهريه انام واخليها على صدري وهي على نومتي تنام وكل شي
كان من احسنو ..

لحين هاليوم الي بديت اصحى فيه من غفلتي ...

بوكت الغدا صدفت هالمره انا معهم اتغدا
وكل شي كان طبيعي وصفيه جابت الجاي وصرنا انا وامي نشربو وغاليه وجراح يلعبو هين حدرنا وام جراح كاعده تحيك والتينه صارت تحكي وتنبه جراح لا ينضرب بالشباك وهو يلعب مع غاليه وماينتبه لها عاد هي كامت
وراحت للشباك سدتو ومسكت طرف البرده تسحبها وهين غاليه وكعت المزهريه من على ميز التلفزيون
واجتي خايفه لعند امها تمسكت برجلها وتبكي والتينه هين تصنمت ...

صارت على وكفتها ماسكه طرف البرده وتدحك للمزهريه المكسوره وصافنه ولا همها بكي بنتها عند رجلها وهي تسحب بثوبها لتشد انتباهه لكن عبث التينه على صفنتها لحين ما رخت يدها من البرده وانا هين دحكتها هالشكل بالعجل شمرت
الاستكان من يدي وطفرت لعندها وهي وكعت من طولها وانا كضبتها ..

حطيت راسها على يدي واحاكيها وهي تدحكلي وتبسمت بتعب وبعدها غميت


يتبع..

حبيبي🥰✨فدووة لكلبج

#ملوكه

عيوني هاي من العصبية فانتي نفسج تكدرين تتحكمين باعصابج

هسه ابسط شي شخص اكبر منج مثلا ابوج او مدرسة ..الخ من يحجون وياج تجاوبيهم باحترام وبدون عصبية🙃 فنفس الحاله ياعيني وي بقية البشر
عودي نفسج عل قلة الكلام مثل كحديث عن النبي من كان يؤمن بالله واليوم الآخر فليقل خيرا أو ليصمت

فالكلمة قبل ماتنطقيها حسبيلها الف حساب يله تحجين
انتي بينج وبين نفسج اي حجي تريدين تحجين حسبي بالبدايه من1 ل10 وفكري زين يله دكوليها

واقري كتب من تنمية وطريقة كلام فهالشي يفيدج☺️🌸

#ملوكه

عمري سمار جوة شفايف..سببه نوعين

★مرات تكون من خربطات هرمونية بالجسم..فتطلع كسواد او احمارر يم الفم
وهاي تكون مؤقتة..يعني تجي وتروح حسب هرمونات الجسم
★ومرات تكون من جفاف البشرة وكثرة افراز صبغة الميلانين

فكون باليوم اشكد ماتكدرين اشربي الماي حتلو متريدين هم اشربي
مثل الوردة من نسيقها بالماي🙈🌹 تورد ومن نهملها تجف وتذبل فنفس الحالة بشرتنا
والاستمرار بالماسكات اشويه يخف اللون.. مثل ماسك التمن وماسك بياض البيض وماسك الخيار واللبن او ماسك النشة..
ويوميا بعد ماتغسلين بشرتج صبح ..سدي المسامات بثلج
واهم شي رطبيها يوميا حته لاتسمر بالزايد🥺


#ملوكه

لاحبي هالقصة بالعراق صايره 😅بس اللهجة تختلف احتمال من اهل الجنوب لو من الموصل قريتها بس ربعها عود كلت بهاليومين اكمل قرايه

فاقريها حتلو باليوم بارتين رح تعجبج😍💞

#ملوكه

هذيني حبي 👇🏻😇بيجات لملابس البيت بالبصرة

#ملوكه