التزمت بالقران وظليت هواي ادعي مااشوفهم
كمت اخاف كمت اتمنى ماانام ومايجي الليل
لان حسيت نفسي عايشه وياهم وتركت عيشتي
بالدنيا..

شويه شويه بديت استعيد صحتي وتوزاني
وكمت احجي وشهد بالدعاء واقرالهه قران
احس روحهه تفتر وياي ومرات احس احد يلمسني
التفت اشوفهه بخيالي تحاجيني ودكلي
لاتنسين الوصيه...

حمل الامانه ثگيل وشهد قبل لاننهزم بيومين
اجت وحملتني امانه وكالت هاي وصية بابا
احتفظي بيهه جانت حاسه ع نفسهه
ايامهه معدوده...

الانسان الطاهر والنقي رب العالمين يبعثله
احساس حته بأيامه الاخيره وشهد شفتهه
اكثر من مره باحلامي تاخذني من ايدي ودكول
تعالي شوفي بيتي..

تعدت السنين واني اتذكر بيتهه لحد هسه
جان منظر ماينوصف امشي ونهر يجري جوانه
ومايبللنه دكلي هاي الشجره هديه من فلان
ومااعرفه تذكر اسامي ماعرفهه

تمد ايدهه ع نهر تشرب مي وضحكتهه
مرسومه ع وجهه دكول شوفي مكاني
هذا مكاني الاخير حيل فرحانه بي وادعيلكم
حته الله يحميكم من جبار..

شهد ليومي هذا ماتروح من بالي روحهه غادرت
الدنيا بس بمغادرتهه فتحتلي ابواب يتمناهه
اي انسان احساس عالي عندي اتوقع الشي
قبل لايصير واشوفه كدامي..

موبكيفي ومااكدر اتحكم بشي فجأه يجيني
احساس اتذكر سالفه جواد وخطف عقيق
جان اكو واحد اسمه جواد جيرانه نلعب وياه
فجأه اجه ابالي وكانما واحد وكالي كولي جواد

اربط التخيل بالواقع واوصل لنتيجه
قبل لا اشوف هذا الشخص اعرفه زين
لو سيء كله هذا صار بيه من وفاه شهد...

حياتي جدآ هادئه وطبيعيه تاركه اموري
لله وماخاب من توكل ع رب العالمين
ماافكر بأي شي كل اليجي ابالي اكول
يم الله...

اعمارنه صغار بس المصايب كبار وكعت ع راسنه مصايب خلتنه نكبر بدل السنه عشره لو اقارن هذا عمري ابغداد
احتمال لحد الان مااعرف اجمع كلمتين لان مانعرف غير
المدرسه والبيت

بس هنا عرفت الظالم والمظلوم وعرفت اليتيم
اذا ماعنده سند مايعيش!!
عرفت رب العالمين اذا اخذ شي راح يعوض ابداله
تعويض جميل

والدليل عقيق اخذ منهه ابوهه بس عوضهه
بالسبع التعويض الالهي ماعلي اعتراض لو ينفتح
النه حجاب وانشوف حياتنه المختارهه ربنه
والحياة الي نختارهه احنه راح نسجد باليوم الالف
المرات ع اختيار رب العالمين...

فقدت بابا وفقدت اختي عشنه بظلم وجبروت
وقتل وصوت الرصاص بس وره هذا تعويض
جميل اله حكمه بيهه وهو العادل ماراح
يظلم احد حاشاه لله..

فزيت نص الليل اسناني الاخيره ياكلن
بيه من الالم كعدت ماما انطتني حبايه
قرنفل خليتهه يهدء شويه ويرجع...

ثاني يوم وره الظهر كالت بدلي اخذج لاواب
لو يشلع الرحى لو يشوفلهه حل رفضت
اول شي فشله اني كعدت التايرات مرات
اتصرف بجهل

والشي ثاني نظرات اواب ماارتاحلهه ع الرغم
من اشوفه وكأنو اشوف مستقبلي ويه هذا الشخص
بس اني ارفض رفض قاطع اعيش بالبصره

بعد ملحت ماما وجراح حجه عليه بدلت
ورحت اكوشي ماعرفت افسره اكدر احس
ويه الكل واشوف للكل بس ويه نفسي لا احس
ولا اكدر المح نظره عن مستقبلي...

وصلنه العياده وجراح دخل حجه وياه
كال يخلص البيده وادخلوا اني راح انتظركم بره
انتظرنه ربع ساعه وصاحنه السكرتير..

دخلنه سلمنه من شافنه كام سلم ع ماما
ومد ايده كال تفضلوا كعدنه وماما حجتله
السالفه كال اصعدي خلي اشوفهن..

اول مالزم فكي حسيت دنابيس وتنغرس
ببطىء بالمكان من شدة الخدر يفحص بيهن
ويأذني وساكته حسيت باصبعه لامس شفتي
الجوه بصوره سريعه ..

كال انزلي ونزع الكف وغسل ايده وشفته
شلون عرگان بحيث يحجي ويانه
ويمسح بوجهه بالكلينس ...

كال ملتهبه الرحى الاخيره مانكدر نشلعهه ولا نحشيهه
اله يروح الالتهاب ولازم اتركين الحلويات لان مدمرتهن
بالحلا وهالشي موصحيح...

كتبلنه وصفه ورجع فلوس الكشفه بس
لحدما طلعنه ووضعه موتمام العرك مالي
كصته وركبته ..

رجعت للبيت كلما اجبر نفسي اريد احس
بشي ولو ذره او اشوف شنو السبب
الي اجبر نفسي احس بي وسبب نظراته
مااوصل لنتيجه...

عقيق...السبع اليوم يجي كملت دراسه من وقت
وكال وره العشه اوصل ضرغام مااجه بعده
هاي صار عشر ايام تقريبا اثنينهم غايبين عن البيت

ب٩ وصل كال متعشي سلمت علي كدام
الكل سألني ع علاجي وكال راح اروح للقصر
عندي شغل مالحيت ولاسألت شصاير؟؟

ثاني يوم من رجعت من الدوام جان البناء شبه
كامل بقت بس الكهربائيات بحيث العمال تشتغل
شفتين بس مستعجل يريد يكمله..

صاحتني خاله ساهره للغرفه وسدت الباب
فاجاني كلامهه سمعته منهه ماسمعت من السبع
وهي دكلي بس يتنظف البيت راح يأثثه وتزوجون

سألتهه ليش وشنو السبب؟
حجتلي ع جبار يحجي عليكم وهذا مايستحي هو ونسوانه
ولان عايشين بغرفه وحده وخاف يظل يطلع اشاعات
وهنا ناسهم يريدون سالفه ..

السبع مافتح اي موضوع وياي واساسا مايبات
يمنه مخلصهه شغل خلص البناء وبس مشتملنه
اثثه اثاث بسيط مطبخ صغير لان اساسا
عمه ساهره شرطهه بوقت الاكل ننجمع يمهه
وغرفة نوم حلوه والصاله بيهه تخم وتلفزيون
يعني ع كدنه حاله من حال شقه بغداد...

هذا شهر ١٢ من سنه ٢٠٠٨ بعد اسبوعين
ونفوت بسنه جديده وامتحانات التمهيدي مالتي
بشهر الواحد جنت احل واجب بيتي وانفتح
الباب ...

كمت بابتسامه تلگيته باسني من خدي
وكعد بصفي بحلكه حجي اختصرتهه
علي وكتله صدك راح نتزوج؟

السبع.. ااي ام شهد كالتلج؟
عقيق.. ااي حجتلي كلشي يعني نعيش بالمشتمل
السبع.. ااي هو بنص البيت نهارج يم البنات لان
انه شغل وبليل وحدنه نحسبه غرفة نوم

عقيق.. يعني نسوي عرس مثل الناس
السبع.. بكيفج انه مااحب الشكليات والهوسه
بس علمودج
عقيق.. اني هم مااحب

السبع.. راح انسوي عشه بيوم الحنه لان هاي
من العادات وثاني يوم ماريد هوسه عرس
مجرد زفه بسيطه للبيت

عقيق.. مااريد زفه هو اطلع من هاي الغرفه
اروح بالمشتمل
السبع.. مااريد يحجن حجي ماصخ اوديج يوم الزفه
يم ياسين ومناك اخذج هي سياره وحده
ونجي لبيتنه..

عقيق.. هم اروح صالون
السبع.. چااا وحد عن البنات هو يوم واحد بعمرج
سوي اليعجبج يمج ام سيف وام شهد سباعيات...
هذا الاسبوع عندج امتحانات؟

عقيق.. لااا
السبع.. زين حته اطلعين تشترين التحتاجي
من باجر اخذلج اجازه فلوس راح انطي لام شهد
وانه شغل فوك راسي مالحك..

عقيق.. حسيته مهموم وحته مافرحان كتله
ماتريد تزوج نظل هيج؟
السبع.. ابتسم بتعب وكرصني من خدي
شلون مااريد بس الشغل متعبني

عقيق.. مااعرف شبي بس سكتت رغم
تعامله وحنيته نفسهه بس ماحسيتهه بفرحه
الهم مالي گلبه

ثاني يوم اخذنه جراح كلنه حته فجر ولبابه
للعشار واشترينه هوايه شغلات كله رانيا
اشتري هيج والبسي هيج ونسقي هيج

دخلنه للصايغ واشتريت ذهب هو منطي
لخاله ومتفقه وياه ورجعنه للبيت رتبنه الغراض
بالمشتمل وثاني يوم طلعنه وظلينه اسبوع
يوميه نطلع...

رحنه للصالون اتفقنه اني بيضه حيل
ومابيه شعر بوقتهه حته ماحفيت وجهي بس
رتبت حواجبي وشعري السبع وصاني مالعب بي
لونه حلو وخليته نفسه..

جنت فرحانه لان راح نتزوج وبعد ميعوفني
ولا يوم بس ماجنت اعرف تفاصيل العرس
اعرف مثل ماعودني السبع البوسه والحضنه

ماجنت اعرف العذريه شنو واقل خطأ البنيه
تفقدهه اتذكر الخطف والصار بس محد نبهني
لان ماحجيت بس للسبع وهو ساكت...

تحدد موعد العرس ع جية ضرغام وكالو الاربعاء
يجي جراح هو قايم بكلشي وعاصم وياهم لان السبع
هم لازم مقاوله وماكدر يعوفهه ع النص...

رانيا.. جنت انظف ع العرس واجه سيوف
صاح ماما عمو ضرغام يريدج غسلت اديه
وركضت للغرفه بدلت ملابسي وطلعت
صارله عشرين يوم من يوم الخطبه ماشفته..

فتحت الاستقبال ودخلت جان كاعدبالكاع
يدخن من شافني طفه الجكاره ونفخ الدخان بعيد وفتحلي ايده وهو ع كعدته وكال تعالي تعالي!!!

تقربت اريد اكعد بصفه سحبني من ايدي
خلاني بحضنه الخجل مسيطر عليه ماعنده
تمهيد كل حركاته مفاجئه..

سالته شلونك؟ جاوبني عوفيني من شلونك
احنه ليش ماتزوجنه ويه السبع شكو بعد؟

رانيا.. هو شفتك اني اليوم يله اجيت
شبيك مستعجل
ضرغام.. لعد صبريني
رانيا.. ضرغام كلامك بدون تمهيد موهيج؟

ضرغام.. هااا العفو ماعرفت اصيغ الطلب
يله ممكن تصبريني؟

رانيا.. ضحكت بصوت عالي صاح صوتج
وللللج ومد ايده ع خصري وسحبني
علي وايده وره راسي وباسني بقوه
حته ماكدرت ابتعد

خليت ايدي ع صدره اريد ابعده كعدتي مومريحه
ماابتعد لزم ايدي الي ادفعه بيهه وكمل مشواره

انفتح الباب حيل رضاوي يبجي كاتله سيوفي
وجاي يشتكي اخذه ضرغام يحاجي واني
امسح بحلكي احس الخدر وصل لاذاني..

رضاوي سحب ضرغام اله كومه حته
يحل المشكله كاله امري لله هي منو امك
انوب انته ...

طلعت للغرفه لكيت عقيق تبجي اريد افتهم
شبيهه ماتحجي من طلعت عمه ساهره اجت لزمت
ايدي وكالت عمه ساهره حجت حجي موحلو

رانيا.. ع كيفج حبيبتي شحجت هي تحبج
عقيق.. وصتني ع السبع وكالت لاتخافين
وحجتلي شغلات موحلوه تحجي وتسد اذانهه وتبجي
حته ايدهه ترجف...

رانيا.. ردت اطمنهه كمت احجيلهه بهدوء
واعلم بيهه وكلما احجي تنهار اكثر وتبجي
بحيث حسيتهخ راح يغمه عليهه اخر شي كتلهه
كذب ميسويلج شي لان انتي مريضه..

عقيق.. ماكدرت استوعب كلامهم اني هسه
موبنيه اني مااستاهل السبع كلهه تحترمه
واني هيج شنو ذنبه..

احس كلبي يريد يوكف وتبدل شعور الفرح
للحزن والالم شلون عمه ساهره كالت
البنيه الملعوب بيهه يكتلوهه يعني السبع
يكتلني..

بعد يومين عن الزواج بس ماغمضت عيني
ابد حته من يجي السبع انهزم للحمام بس
يخابرني اريد ابطل انعادت عليه المأساة
وكمت اعيش ساعات مره..

عقيق... اليوم ٢٠٠٩/١/١ مارحت صالون لان
اساسا المكياج مايلوكلي رانيا خلتلي شي بسيط
والبدله عدله مابيهه سيم مثل قبل عبالك
فستان بسيط وربع ردن مستور

كاعده ابيت الشيخ ياسين وكل اعظائي ترجف
رجليه قطعة ثلج واديه احسهم مثل الخشبه
ماينسدن اباوع بالوجوه محد يفهمني ولااكدر
احجي للسبع واليوم شلون بيه ...

ماحسيت بشي حته من اجه ومن صعدنه
ومن طبيت للمشتمل كلهن ماعشتهن ماعشت
غير شعور الخوف وترقب المصير ...

ساعه اكول انتي حجيتي للسبع ويدري
وساعه اكول هم صعبين وعشاير وعمه
ساهره كالت مايسكتون مااعرف بيمن افكر
وشسوي بس دموعي بعيني ورانيا تسكت بيه...

جنت كاعده واتمنى مايجي لاول مره
اتمنى السبع مايجي واشوفه اكو نسوان
عمات السبع وبناتهن حجت وحده مااعرفهه
يمكن عمته..

كالت احنه نبات هناا ننتظر البشاره من السبع
ونروح هاي كعدتنه اليوم

ساهره.. عيب هالحجي هو ومرته شنو بشاره
عندج ولد واتبشروا بيهم رجاءا خلونه نطلع
تاخذ راحتهه لان ع جيه هسه

ردت الثانيه ع خاله اسكتي انتي خاف معيوبه
وتسترين الهه چاااا هي سنتين يمه مانعابت
لو نخطفت والله اعلم شسوو بيهه ويسترهه

احنه عمات السبع وبنات شيوخ وهاي
كعدتنه للصبح انشوف بعينه ونكول
بنت اجاويد واذا ماشفنه وضمهه السبع
هاي معيوبه وسترهه....


يتبع......

#خبايا_الاقدار
♨️♨️

... البارت السادس والثلاثون


ومن عرفو بعافيتي
سكف طين وسعف ذبلان
فكو زيجهم ل الله ودعو تمطر.
...
عقيق.. راسي بالكاع مااكدر ارفعه لان دموعي
تجري اريد اسكت مااكدر حسيت بالغربه
وماعندي احد لوعندي ام كاعده بنصهن اكو وحده
تجرأت وهيج حجت عليه..

خاله ساهره تردهن وهن مستمرات بالحجي وحته
كلمات ماافهمهه لان لهجتهن اهل قبل
بس يباوعن بحقد ووحده منهن طلعت جكاره ادخن..

ام اواب.. ام جاسم هذا الحجي عيب ومايصير
ندري شيوخ وعادات بس هيج كلام مامقبول
لان انتي لا ام بنيه ولا ام ولد لو ام السبع موجوده
محد بيكم حجت هيج ..

ام جاسم.. انه اردن اعرف شچاچن تحمسن
برواحتجن چااا مادكولن اي البنيه علم
وترفع راس السبع شبيچن اطمطمن الهه

ام اواب.. من حجينه بالود وبالتفاهم علمودجن وعلمود
كبرتجن تعرفن السبع زين ولو طب وشاف مرته
مكدر خاطرهه وانتن بهالعمر عيب وزحمه

نوفه.. والله وچنج مرت ياسين صرتي ام البيت
وماندري سدي حليگج واحنه نحجي ويه السبع
حالهه حال بنات الگصر من عرسن انشوف نيشانهن
چااا هي اخذت زينة الزلم..

ساهره.. ام اواب عوفيهن احنه العلينه حجينه
هو يجي ويحاجيهن كومي بنيتي عقيق
ارتاحي اليوم ابدال متفرحين انقهرتي

نوفه.. شنهي يسويهره ماعندج اصول
دكوميهه من نصنه چااا المن كاعدين
ماتتعلمتن اصولنه لو بعدچن حضريات

ساهره.. عفت الاصول الج لان ماشاء الله
انت اخوات جبار ومااستبعد هذا الكلام
تلقين من عنده لان منعه السبع من الجيه
وصرتن السان ابمكانه وحجيتن..

كومي بنيتي ارتاحي والماعاجبه اصولنه
محد جابره يجي وينكد علينه..

عقيق.. كمت ويه خاله للغرفه بس سدت
الباب شهكت حضنتني بحنان ام وايده
تغطي اكتافي بالبرگع مال البدله ..

كعدت ع الجربايه مختنكه كتلهه خاله
اريد علاجي ؟

كامت طلعته من الميز وكالت منو بيهم
وجابتلي كلاص مي شربته هذا العلاج
وقت الحاجه بس هو بي نسبة منوم..

ساهره.. لاتضوجين هذني مايعرفن يسولفن
وعايشات بهذا القصر الطمس راسهم بالوحل
وبعدهن مستمرات بالهمجيه الناس وين وصلت
وهذني يدورن سوالف تعبانه..

عقيق..اسمعهه وامسح بدموعي شحجي خاله
كل كلامهن صح اني مومثل البنات بيوم عرسهن
ظليت ساكته ولازمتني الشهكه

ساهره.. بنيتي عقيق ولو السؤال موحلو انتي
ليش تبجين وخايفه صاير شي ؟اني امج مواتفقنه
ماتضمين عليه شي خاف من ترحون لبغداد صار
شي احجيلي ليش هيج العيون مورمه ولاعبالك
عروس وفرحانه

عقيق..الحجي بحلكي ردت احجي وسكتت
اتذكرت كلام السبع بوقتهه كال ممنوع تحجين
ولو يريد جان هو سولف لساهره...

ظلت تهدي بيه البنات كلهن بالبيت الجبير
لان يغسلن مواعين كامت خاله خابرتهن
كالت تعالن واني اروح بمكانهن حته يظلن يمج..

شويه واجن يمي بالغرفه بس رانيا ظلت هناك
لان خاله ماقبلت كالتهه لتخلين وحده تلزم المطبخ
غيرج...

البنات حالهن من حالي مانحجي بهيج مواضيع
اصلا فجر كامت تحجيلي ع الامتحان وطلعت
كتابي وتأشرلي الاسئله الي اجت بالامتحان..

سمعت صوت الحجيه بركات وام اواب
اجن من البيت الجبير شويه ودخلن
وهن يصلن على محمد باركن وطلعن ...

اباوع للساعه ب٨ اجت ام اواب كالت يله
بنات خلونه نطلع اجه السبع خليهم
يرتاحون هنااا عبالك كالو راح يعدموج
لزمت ايد ام اواب اكلهه لاتروحين واشوف عينهه
مدمعه وباستني حست بخوفي..

كلهه طلعت من الغرفه وظليت وحدي
ايدي ع كلبي اريده يهدء اقره ايات
واتذكر كلامه من يكول اسوي كلشي علمودج
بسبيل ماتتأذين..

اتذكرت كلام الطبيب بوقتهه ماافتهمته
من كاله ممنوع تتقربلهه بالوقت الحالي
مامسموح اي جهد الهه كلبهه ضعيف
واساسا بالمراجعه الاخيره كال عدهه خلل
بكهربائيه القلب هاي اضافه لمرضي السابق...

لبابه... ماما حاولت اطلع عماتي وماقبلن
جنه واكفين بره واجه السبع يحجي ويه
ضرغام الزلم كلهه راحت ماما طلعت حافيه
حاجت السبع وضرغام بس ماسمعنه شكالت..

دخل السبع وهلهلت ام اواب دنك ع الحجيات
بوسهن من راسهن وام ياسين مدري شتحجي
وهو يضحك...

كامت الحجيه بركات كالت خلينه نطلع وليدي
اخذ راحتك وهالله لهالله بالبنيه والله يسعدكم
ويكتبلكم الخير...

من كامت الحجيه عماتي ظلن كاعدات السبع
جان لابس دشداشه راح للمغسله يغسل
والتفت عليهن كالهن چنهه حلتلچن الكعده؟

نوفه.. چااا من الاصول نظل ننطر تبشرنه
السبع.. خاف امي انتي وماادري وهسه
عرفتي السبع حته تنتظرين بشاره لو بعدجن
وره جبار

ام جاسم.. ياعمه موهيج الحجي راحن نروح
ابيت ساهره بس حالك حال زلمنه انشوف
نيشان البت..

السبع.. شنو رأيجن اسوي هذا العرس اسود
عليجن انتن وجبار واجيبلج دم جبار نيشان

لبابه.. ولا وحده حجت كمل كلامه بحديه
وهو يأشر للباب يله اريد اشوف مرتي
وهاي سالفتجن عديدتهه حته لايتگدر خاطري
بس اذا سمعت حرف واحد وروح اختي
اسوي المايعجبكم شيخجن ...

كلهن كامن طلعن واحنه وراهن ماما حجت
وياه واجت ورانه طبن للبيت يدردمن
ويحجن وبعدهن مصرات راح نكعد ننتظر..

عقيق... اسمعه يسدن الابواب ويقفلهن
ويه كل طگه قفل تصيبني الرعشه
لحدماشفت رجليه قريبه ع الباب كمت بدون
شعور افتريت من الجهه الثانيه من الجربايه..

بس فتح الباب بجيت وحجيت بشهكه واشر
باديه اثنينهن لا لا تتقرب اكمز برجليه
كون ينفتح الحايط وادخل بي وينسد عليه..

اشرلي بأيده وهو مبتسم حبيبتي ع كيفج
ليش خايفه تعالي عقيقتي ماكو شي ليش
هيج حالتج؟

ماكدر اجاوبه بس ابجي لامكياج ولا كحل احس
عيوني تحركني من كدما سال الكحل وافرك
بيهن اخذ نفس عالي وتقرب عليه واني اشرله
لاتجي الله عليك عوفني ...

سحبني من ايدي بحنيه وضمني لصدره حيل
وهو يطبطب ع ظهري ويحجي بكلام حنين
اهدي اهدي منو وياج؟ منو مخوفج هيج
هسه اطلع انعل والديهم..

اريد اكله خايفه منك خوفني منك وعماتك
هيج حجن وينتظرن بس اي كلام ماطلع
من عندي بس اشهك..

اخذني بين اديه للجربايه وكعدني كدامه
لازم اديه رفع راسي ولزم وجهي باثنين اديه
وباسني من راسي ومسح دموعي باصبعه الجبير
وهو يحركه ع وجناتي بحنيه..

السبع.. انه شكايلج موكايلج هاي الدموع
مااريدهه كدامي تعرفين شكد اتأذى من اشوف
دمعه وحده منج ليش هيج حبيبتي منو المخوفج

عقيق.. حجيت بشهكه كتله عماتك يكولن معيوبه
السبع.. غضب الله ع راسهن العيب بگلوبهن اكو واحد
عنده عقيقه ويكولون هيج خلي يولن هذني
مايفتهمن بالحجي ...

لاتبجين ابد مدامني وياج انعل ابهاتهم الينزل
دمعتج لاتزعليني عليج احنه شمتفقين
مو تعوفين كلشي وانه امانج؟!

عقيق.. اباوعله وعيوني مغوشه وهو يمسح
دموعي ولازمني من اكتافي ويحرك ايده
عليهن ..

حجه وهو ياخذني بحضنه هااا ينسمتي
الهادئه كلبج هدء لوبعده؟!
هزيتله راسي اي شويه

السبع.. كومي خليني اشوفج خلصتيهه بواجي
خلي اشوف الحلو مالتي
عقيق.. كمت وكفت فرني كدامي ورجع حضني
مد ايده ع شعري فتح البرگع ذبه وفتح شعري
كله انفتح نزل ع ظهري..

همس يم اذني قشعر جسمي كال يله
روحي غسلي وبطلي بجي ...
عقيق.. اخذت ملابسي ورحت للحمام سبحت
وبدلت شويه هدئت بس بعدني خايفه خاف
يسوي شي مثل كلام خاله ساهره..

لبست تراك شتوي وطلعت جان يخابر بواحد
ع الشغل من شافني فتحلي ايده وكعدني ع رجله
لحدماكمل مكالمته..

السبع.. نعيما
عقيق.. الله ينعم عليك المي دافي تسبح
السبع.. اي راح اسبح واجي نصلي جففي شعرج
الجو بارد لاتتمرضين..

عقيق.. راح للحمام واني جففت شعري وسويته
ضفيره بارده حيل رحت فتحت الصوبه بالصاله
وظليت كاعده يمهه طلع لابس تشيرت نص ردن

كتله لاتبرد الجو ثلج رد عليه مابردان كومي
نصلي لاتكعدين يم الصوبه تدفين وتبردين
وتتمرضين..

كمت للغرفه صلينه سوه وره ماكمل ظل
يصلي مدري شنو بعدين سولفلي كال من وفاه
اهلي لهذا اليوم اصلي الهم ويه صلاتي...

سمعت الباب يندك كمل وكام جاب صينيه
اكل جايبتهه خاله ساهره وراحت ماطبت ماشفتهه
كعدنه بالصاله مااشتهي ولاهو اكل شي قليل وشالهه

ردت اروح اغسل المواعين سحبني من ايدي
للغرفه دب الخوف بگلبي سحبت ايدي
من عنده حيل وكتله انت موكلت مثل اختي
امانه منا لمن تلگين اهلج..

السبع.. ضيق عيونه وهسه شمسويلج يااخت
هاي عقيق لاتخافين ابد مني ولا راح يصير
شي من السوالف المعبين راسج بيهه

عقيق.. كول والله
السبع.. والله تعالي يله مثل كل يوم ماتجين
بحضني؟

عقيق.. مددت بصفه مثل كل مره وخله ايده
جوه راسه واندار عليه وخر ضفيرتي من كتفي
وباسني من خدي...

السبع.. سولفيلي منو مخوفج وشكالولج؟
عقيق.. خاله ساهره حجتلي شغلات مااعرفهه وكالت
اذا البنيه عليهه شي يكتلوهه..

السبع.. مابيج شي انتي لاتفكرين هيج اساسا
حالتج ماتسمح لهيج سوالف احنه متفقين اي شي
يزعلج ويضوجج تحجيلي ليش هيج كاتمه
بداخلج لومتخربطه..

عقيق.. استحي شحجيلك
السبع.. ممنوع اسمع هالكلمه مااريد تستحين مني
اعتبريهه سوالف عاديه اناقشج وافهمج
مااقبل تضمين بكلبج ..

عقيق.. عماتك اذا حجن شكول
السبع.. محد تحجي هذني بطرانات وجبار دافعهن
لان اله ايد بالخطف مالتج ويدري انه متكتم ع الموضوع

عقيق.. خاف تسألني خاله لو ام اواب
السبع.. كليلهن كلشي تمام والباقي السبع
كال لاتحجين مايقبل عماتي مايسألنج بس خاف
ام شهد تطمن عليج..

عقيق.. يخوفن عماتك
السبع.. هذني بعرس ضرغام هم هيج سون والبنيه
غريبه ومن غير محافظه وحته تعاركن ويه امهه
لان ردتهن بس ضرغام مسودن هم مشتمل عنده
وطلعلهن شايل المسدس كالهن التبقه كاعده هنا
الصبح ادفنهه بالنجف ...

وتالي رجعن بس بعدين اعترفن واعتذرن كالن
جبار كال لان ضرغام دك رجل اله ياخذهه عباله
عنده شي وياهه وهو مايحب التدرس.

عقيق... اسمعه وهو يسولف مركزه بوجهه فجأه
سكت وكام يحرك اصابيعه ع ركبتي غمضت عيوني
وهو مستمر بلمساته منين مااميل راسي يحركهن...

حسيت بشفايفه وهي تنطبع ع رگبتي انتفضت
واني ابعده لزم ايدي وباسهه رفعهن اثنيهن
واني مافتحت ابد بس الاحساس الجميل
مالي كياني...

صار اكثر جرأه وايده ع خصري ويصعد ابوساته
لحدماوصل حافه شفتي ايده تخلت على فكي
وباسني من شفايفي بهدوووء وكأنو عنده لوحه
فنيه ويلون بيهه...

ماكدرت اسيطر ع وضعي ولا ع احساسي
شعور فضيع اريده اكثر مااريده يبتعد
ابتعد شويه ورجع بشوط ثاني بس هي بوسه
وكأنو حلقت للاعلى من شدة الشعور الحلو...

ابتعد وسحبني لحضنه وكال غمضي عيونج
غمضت وايدي ع كلبه صوته يتخلل مسامعي
كال راح اسألج بس مااريد خوف ولااريد ارتباك

هزيت راسي شدد قبضته اكثر ورفعني
لصدره صار نص جسمي علي جان يكول
وره الخطف شكد ظليتي تنزفين؟

غمضت عيني حيل ولزمته من تشيرته بقوه
لزم ايدي وكال مجرد سؤال لتخافين؟
واني ع وضعي جاوبته عشر ايام؟

السبع... تألمتي؟
عقيق.. اااي
السبع.. ليش عشره وليش ماحجيتي
عقيق.. شي قليل موهواي وحته خاله متدري
بس موهواي اكو...

فتحي عيونج فتحت مليانات دموع باسني
منهن وكال ديربالج تنزل دمعه ترى اموتج..

عقيق.. انت مافرحان حسيت بيك انت تتمنى
تزوج مثل الناس
السبع.. صحيح مافرحان بس راح اكلج السبب!!

ياعقيق انه ماخذ عهد ع نفسي مااتزوج
ابد لان عندي ثار ومااتزوج قبل مااخذ بثاري
وحگ ابوي وامي ...

بس وين ياعقيق اجيتي گلبتي كياني
خليتي اخر همي الثار وهمي الوحيد
شلون احمي عقيق وشلون اسعدهه...

اتمنيت ابوي موجود بهذا اليوم تمنيت امي
واخوتي بس الحمدلله ع كل حال انتي اجمل
تعويض الهي وان شاء الله اكدر احميج واسعدج..

عقيق.. اني هم تمنيت ماما وبابا يفرحون
اني وياكم متشابهين .

السبع.. اثنينه عدنه نقص وكل واحد عوض النقص
بالثاني شو تعالي اموت ع سوالفج ياراحتي
وهدوئي...

واخذني بحضنه وهو يسولفلي عن طفولته
واني هم احجيله لحدما بديت انعس وهو يلعب
بشعري لان ماخذه علاج..
....

ام جاسم.. شنهي لاصايره ولادايره زلمه يطب
لمرته مايطلع يبشرنه

ضرغام.. والله كتلتيني شيبشرج انتن حاشرات
رواحتجن بكلشي

ام جاسم.. هسه يعرس جراح وهم اطردونه
جراح.. اطمئني مااتزوج بالبيت ولا اريد اشوفجن

ام جاسم.. والله ماتستحون ضرغام طردنه بعرسه
وهسه السبع وانت تحجي هيج ولكم شمالكم
صايرين تتراجفون كدام هالنساوين..

لبابه.. جنه كلنه بره نغسل مواعين والجو ثلج
وضرغام وجراح ناصبين ع ام جاسم وعماتهم
شويه ودخل اواب صاحت ام جاسم هايالدختور
ماتجي تشوف هالسن الاكشر بس هذا ظال عندي

اواب.. حجيه بليل مااشوف
ام جاسم.. فلك طرك ذاك اليوم كتلي بليل وهسه
بليل ماتشوف حبوبه شجاك لوماابيك جريم
ومعروف

اواب باجر الصبح اشوفلج موظاله هنا انتي؟
ام جاسم.. غير يطلع السبع چااا نسه روحه
مادكن البال علي ..

ساهره.. عيب عيب موكالجن اطلعن اله تخلنه
يصير موخوش
ام جاسم.. چااا هو من زمان موخوش ومسودن
كله من هذا واشرت ع ضرغام

ضرغام.. انتي روحي وردي عليه
ام جاسم .. يبعد خالتك ولك ليش ماتروح لعمامك
ضرغام رحتلهم ذاك اليوم هو شباقي بعمامي
بس واحد وخربان

ام جاسم.. خافنك تزعل اذا حجينه بنات السلف
شكال وارناب وانت عفتهن واجيت لبنت بغداد
متشوفهه شلون مايعه

رانيا.. وين مايعه من الصبح لسه كربتوا ع راسي
كراب الخيل وهسه صرت مايعه حجيه ماستبردتي
ماتفوتين جوه

ام جاسم.. عمت عين السانج طبعا چااا اذا كاعد
كبالج وتتهامزون بيج كل الحيل...

رانيا.. باوعت لضرغام مبتسم بس ماعلق
لان الولد كاعدين كملت شغل وطبيت جوه
بدلت ملابسي ونيمت الجهال بيدي التليفون
اجتني رساله من ضرغام..

كاتب لااطلعين بعد تشتغلين نامي اني
راح اروح للقصر اني وجراح وباجر الصبح
نجي محتاجه شي؟

رديت علي لاسلامتك سديت التليفون
وفرشنه كلهه تعبانه بسرعه غفينه
حسيت ع لبابه تكعد بيه ودكلي ضرغام
يصيحج...

فزيت ع طولي ضرغام مو بالقصر كالت
لا اجو وكال صيحي رانيا وكومي سويله
كهوه كاعد بره ...

الله عليج لبابه مكعدتني نص الليل ع كهوه
سويله خليني انام
لبابه.. كومي ولج هو كال صيحي رانيا
دكومي موخطيبج..

رانيا.. كمت بنص الليل جانت ب١ ونص
لبابه مخليه الكهوه ع النار بس صبيتهه
واخذتله الكوب وطلعت بارده حيل لافه نفسي
بالقمصله وهو كاعد بالحديقه

انطيته الكوب لابس تشيرت خفيف كتله ليش
كاعد هنا ماتبرد والجو ثلج ؟
ضرغام.. ماابرد جنتي نايمه؟
رانيا.. ااي

ضرغام..ليش كعدتي لبابه كالت كاعده كتلهه
صيحيهه ماادري بيج غافيه ...
رانيا.. خومابيك شي؟

ضرغام.. لامابيه شي بس السهر تعبني هاي الفتره
الراحت انذار والليل كله كاعد وتعودت
رانيا... كوم نام موزين عليك حته الجوه عيونك
صاير اسود...

ظل يباوعلي الضوه مفتوح واشوفه بكل وضوح
ركز بعيونه وكال ليش حبيتج انتي اني ماحبيت
بس وحده وانتهه الحب شلون كدرتي تحركين
احساسي من جديد..

رانيا.. خاف لان اشبهه
ضرغام.. لااا بس بالشكل تشابهن بس بالطبع
تختلفين انتي متمرده وغبيه

رانيا.. جاي تمدحني لو تذمني
ضرغام.. غزلي معوق مووو؟ من تصير عندي مشاعر
هائله مااعرف اعبر تذكرين شلون جنت استفزج
عبالك واحد ساقط من الشوارع..

رانيا.. لاحشاك بس جنت جدا مستفز
ضرغام.. تجيني حالات هسه مرتاح من اضوج
اصير ماانطاق

رانيا.. ضرغام تحبني؟
ضرغام.. مممم
رانيا.. ليش مادكولهه؟

ضرغام.. تصفط حجي الحب بالگلب ولومااحبج
ماارتبط بيج
رانيا.. عيونك حلوه؟
ضرغام.. جنت ع نفسها براقش...

سحبني من ايدي حيل لوره البيت ظهري
طخ بالحايط وكام يبوس بشراهه اكتافه تصعد
وتنزل ويه كل حركه وميلة راس..

يتركني اخذ نفس ويرجع من جديد وايده
اكثر جرأه لحدما ماكو منفذ للهروب حضنته حيل
يله هدء وعبالك بركان وثائر...

ابتعدت شويه واني اتلفت اريد ارجع
لزمني من ايدي باسني من بطنهه
وتركني..

رجعت للبيت بوجهي للفراش لبابه
لازمه تليفونهه تراسل بجراح
واني مثل عاصفه وكسرت شكو سنبله
يابسه بداخلي...

لبابه.. جراح احس بحبه يوم عن يوم
اكثر من قبل ابد مازعلني مدللني بالحجي والفعل
وشريد وشطلب ينفذ بس حالته النفسيه
بعدهه لقاء ماكو بيناتنه مجرد رسائل...

جنت اراسل بي بالليل هو واواب بالاستقبال
كال يله نامي خلي نلعب داس دومنه
اني واواب وانام..

هستوني مددت فزت فجر ع حيلهه
فتحت الضوه كتلهه اسم الله شبيج
فجر.. لبابه شفت حلم موزين وين السبع وين ضغاام!؟

لبابه.. اسم الله فجوره تعالي نطلع للمطبخ
لاتكعد الجهال اشفتي اشبيج؟

فجر.. موزين موزين كمت ابجي مااريد احلم
بيهم مااريد اشوف احد اريد اكون طبيعيه

طلعت للمطبخ واني ايدي ع كلبي يتهيألي
الراح يصير شفته بمنامي شفت اليصير كله
بمنامي اكو احد راح يموت..

انفعلت حيل تركت ايد لباب واسمع صوت
جراح بالاستقبال ركضت بدون وعي للاستقبال
فتحت الباب وابجي واحاجي بجراح

جراح كوم راح يصير شي شفت حلم موزين
المصيبه جراح مايعرف بحالتي وماجان شاهد
ع الصار صافن بوجهي ويحاجي لبابه شبيهه
خاف مصخنه..

تقدم عليه اواب وكال اهدئي اخذي نفس
عالي واكتمي بصدرج ماكو شي لاتخافين

فجر.. واحد غاح يموت انت تصدگني
اواب.. اصدگج بس ع كيفج تعالي اكعدي
واشر لبابه اتجيبلي مي..

الوحيد افتهمني ضرغام ماموجود وجراح واكف
مصدوم عباله اهذي لوبيه شي كلساع وكال
فجر خاف بعدج نايمه..

اواب.. شحلمتي منو يموت؟
فجر.. ماادغي منو! بس شفت بابا وعمو ابو السبع
حفغو( حفروا) قبغ وكالو ننتظغ اليوم فلان
يجي كالو الاسم بس مااتذكغ منو؟؟
واني بجيت لان احبه اكو واحد عزيز غاح يموت
اواب انت تصدگني غاسي يأذيني.....

.
يتبع.....

#خبايا_الاقدار
♨️♨️❤️

... البارت السابع والثلاثون


جراح.. شبيج فجر هذا كابوس ماكو شي
فجر.. انت ماتعغف باوعت لاواب كتله حاجي فهمه
كله اي شي اكو واحد غاح يموت..

اواب.. هسه افهمه تعالي لبابه اكعدي يم اختج
لاتخافين اذا احد يموت فهذا حد يومه

فجر.. اني شفتهم مااغيد اشوفهم تعبت منهم
حطيت ايدي ع وجهي وبجيت منظرهم يتراولي
شلون حفرو وشلون فرحانين ومنتظرين اليجي...

لبابه...خفت حيل من حلم فجر ركضت ع ماما
اطمن عليهه واكفه واباوعلهه تتنفس لولا هزيت
رانيا اكعدي هستوهه غفت خطيه انهبطت كامت
بسرعه واحجيلهه عن فجر..

طلعنه للاستقبال وماكعدنه ماما نخاف عليهه
فجر تهز برجلهه وعيونهه عمر لازمه راسهه وتصييح
راح ينفجر ...

اجه ضرغام جراح صاحه وكلهه ملامح الخوف
واضحه عليهم حجه ضرغام هاولج فجر خاف
اني المنتظريني؟

فجر... مادغي يجوز انت
ضرغام.. عاب هاللسان اشفت اسمعت؟
فجر.. انت ولا السبع..

ضرغام.. يله بله هسه شحجي وياج كومي نامي
وتغطي زين..
فجر.. ماتصدكون واحد غاح يموت وعزيز علينه
نحبه بابا وعمو ابو السبع فغحان حيل

ضرغام.. الله يستر هو انتي طلعتي جواد
كلشي نتوقع منج كومو ناموا يمعودين والكاتبه
الله يصير قابل ندفع الموت بدينه..

فجر..غجعت لمكاني مانمت اعصغ دماغي
اغيد اتذكغ منو اليموت شكالو الاسم بس نسيت
ابد مااجه ع بالي...

عقيق... كعدت ع صوت السبع وهو يكعد بيه
فتحت عيني كال صباح الخير جان مبدل لابس
دشداشه وكاعد ع الجربايه ويدكم باردان الدشداشه..

جاوبته صباح النور شوكت كعدت؟
السبع.. قبلج بشويه اجت ام شهد جابت ريوك كومي
نتريك حته اتقفلين البيت وترحين يمهم

عقيق.. كمت للحمام غسلت ولميت شعري
رحت للمطبخ خليت الريوك ع الميز وصحته
تريكنه بوسط هدوء تام

سالته بيك شي ؟ رد عليه وهو يشرب جاي
لامابيه شي بس اجاني شغل ولازم ابدي بي
وحاير شلون اروح للعماره واعوفج شهر...

عقيق... لاتوكف شغلك علمودي اني شعليه
راح ارجع اداوم واظل يم البنات روح لشغلك
اني يم خاله ساهره..

السبع.. الله كريم كومي يله بدلي واخذي علاجج
حته انروح للبيت خاف يجي خطار
عقيق... كمت لميت المواعين غسلتهن بسرعه
ورحت للغرفه طلعت فستان طويل ومستور
لبست حجابي مكياج ماخليت بس لبست سوار
وحلقه وطلعت..

لكيته بالمطبخ باسني من خدي وابتعد ورجع
باسني من خدي الثاني وكال لتضوجين
اي وحده تحاجيج خابريني اجي انعل ابهاتهن

ابتسمت بوجهه وطلعنه قفل الابواب ورحنه
اول ماطبيت المطبخ واكفه ام اواب بس شافتني
هلهلت وطلعت جكليت من الكاونتر طشته فوك
راسي..

طبيت وياهه للصاله كلهه كاعده دنكت ع الحجيات
بوستهن وكعدت عيني عليهن وادعي بكلبي
كون مايحجن..

بس ماتحملن لازم ينكدن حجت نوفه هاعروسنه
بشري جبتي النيشان ؟؟

بلعت ريگي اريد احجي بس نقذتني
ام شهد كالت ماكو داعي اني رحت الصبح
وحاجاني السبع وكال وصي الكل التطلب
هيج دزيهه عليه اني افهمهه..

نوفه.. غير انشوف من البنت خايبه چاا انروح
لزلمه
ام شهد ... والله داده هو كال هيج هسه اكوم
اصيحه واسألنه البنيه فقيره وصغيره وتنحرج
هو ابنكم وسألوا

ام جاسم.. اكعدي يسويهره وين جايبته هسه
يكوم يمطر علينه مالنه خلك اسكتي نوفه
مالنه غرض مالنه غرض سوادينه..

عقيق.. اخذت نفس براحه خلصت من اسئلتهن
شويه وكمت للغرفه يم البنات فجر وضعهه موطبيعي
انفتح الباب الحجيه بركات كالت اريدنج وحدج..

طلعن البنات وكعدت بالكاع طلعت علاكه قماشه
من جوه عباتهه وبيهه سحاب فتحتهه بالكاع
انذهلت من المنظر ذهب هوايه بكميه مااتوقعهه

الحجيه.. يابنتي هذا حگج من ام السبع
سنين ضامتهه وحملهن ثگيل عبنهن امانه
واخاف وحده من نساوينه يلگهن وانه مره جبيره
وماعندي سلطه يم جبار

هذا الذهب امنته يمي المرحومه ام السبع جان
عدهم بنيان ابيتهم بالبستان القديم ويوميه
تطلع من الفجر وتخاف ع ذهبهه جابته يمي
وراحت لرحمه ربهه...

گبل يابنتي فاضل وليدي جان يجي تهديد
ومايخاف وهي بيوم كالت يمه هذا ذهبي يظل
امانه عندج لمرت السبع حته اذا طالبوا اهلي
بي كولي ماعدهه..

جان فاضل يموت عليهه مدللهه ملكه بين نساوين
القصر ماتطلع للزرع ولا للحلال بس من بنت بيتهه
تطلع تنظفه هي اولادهه ...

ماتت غدر وظلن ذهباتهه يمي وطالبوا اهلهه
ومشيت ع وصيتهه ماكلت عدهه ورحت سألت
شيخ دين كال اذا بفلوس اهلهه حرام عليج بس
هي كالت هذا خير فاضل اهلي مالهم حصه

وهسه اجه الوگت يابنتي لازم اسلم الامانه
وهاي احطهن بيدج وخليهن ذخر الج ولرجلج
واذا الله نعم عليكم بالرزق خليهن لأولادكم

عقيق.. حجيه هذني هوايه
الحجيه.. اهل گبل يابنتي شتحصل المره تسوي
ذهب ذخر الهه واحنه خير من الله ورجلهه
عنده ومغرگهه بالذهب هي حصة مرت السبع
وانتي مرته ..

عقيق.. صافنه مذهوله لمتهن ورجعتهن بالعلاكه
القماش وكالت كومي اخذيهن لبيتج لحد يشوفهن

باستني وطلعت تمشي حانيه ظهرهه وع العكاز
طلعت التليفون خابرت السبع كتله اريد ارجع للبيت
بشغله كال روحي ماكو احد...

اخذتهن ورحت للبيت ضميتهن بالكنتور وقفلته
ورجعت يم البنات كعدت... ماعبالك عروس جدا طبيعيه هم سوو غده للموجودين بس هدوء محد حاجاني وكل
اليتغده يروح محد بقه بس احنه حته
الحجيات راحن...

السبع ماشفته بعد يجون زلم خطار
وهو يمهم ام جراح وابرار نزلن جوه يمنه
وخاله ساهره تسوي عشه اجه سيوف يركض
كال اجه خطار ...

جنت يمه خاله واكفه وشفتهم بيت خال جراح
ابو نوال لان البارحه مااجو ونوال وامهه
تلكتهم خاله ودخلتهن للصاله لبابه جانت
بالحمام...

وجه ام جراح ثگيل وعينهه ع باب الحمام
خاف تطلع لبابه وتضوج ولاعبالك اكو سوء
فهم بيناتهم تخيلي الام والبنت متفقات

لبابه.. طلعت من الحمام صارن بوجهي
بسرعه انقبض گلبي سلمت ورحت للغرفه
مشطت واني اباوع بالمرايه واحجي
ويه نفسي اظل بالغرفه مااطلع لو اطلع عادي..

فززني صوت فجر وراي وهي دكلي لاتفكغين
خليج قويه هن الخطاغ وانتي ام البيت

لبابه.. فديت التفتهمني ابتسمت بوجهه
فجر.. ليش تحبسين نفسج هو بيتنه وهن خطاغ
عامليهن باخلاقج كلشي تحدد وانتهى اذا ظليتي
تنهزمين دليل ع انو انتي اكبغ جبانه..

لبابه.. موجبانه بس اتجنب المشاكل
فجر.. حلاتهه بالعغايك( العرايك) تصرفج
دليل على داخلج مهزوز ..

لبابه.. حجت هيج وطلعت كدامي فجر احسهه
اكبر مني بعشر سنوات احمد الله عندي هيج
اخت

طلعت من الغرفه لكيت عقيق كاعده يمهن
شفتهه مبدله كتلهه شوكت رحتي كالت اني وفجر
بدلت واجيت ..

كلما ارفع عيني اشوف نوال تباوع باركان
البيت ونظره شمئزاز ظاهره منهه مااعرف ليش
تصرف هيج مع العلم ابد ماباوعتلي...

امهه ماتنوصف كل كلمه تشمرهه تسم سم
اول شي ع عقيق ابدال ماتبارك كالت
والله البارحه احجي ويه ابو نوال وكتله السبع
يستاهل وحده كون تهز الكاع بمشيتهه

فجر.. شنو يتزوج مدغعه( مدرعه)
حته من تمشي تهز الكاع
ام نوال .. لا يعني هيج ضخمه ومن هذني الشيخانيات..

ام جراح.. الطيبون لطيبات ياشيماء وربج اعرف
بالنصيب عقيق والنعم منهه اسم ع مسمى تربيه
واخلاق عاليه صارلهه سنتين ويانه مارفعت
صوتهه ولا يوم زعلت احد...

ام نوال.. الله يخليهه بس احنه متعودين
ع نسوان القصر وحجيت هيج
لبابه..ماعجبهه الحجي دب هدوء ورانيا
جابت تقديم الهن وماقبلن يشربن شفت
رانيا عيبت بوجهه لان رجعنه بيدهه..

ام نوال... ماكو نصيب لابرار شوطولت؟
ام جراح.. خيه شطولت السنه تخرجت وتتعين
وتشوف نصيبهه
ام نوال ... البت من تتخرج شكو بعد من مايجيهه
نصيب تخوف راح تظل ع گلب امهه

فجر.. نوال هم تخغجت ( تخرجت) ولسه
ماتزوجت بعني ظلت ع گلبج خاله؟
نوال.. نوال تختلف ماعدنه بس هاي وابوهه متعلق
بيهه يريد واحد كامل مكمل

فجر.. ابغاغ ( ابرار) هم وحيده وجغاح يحبهه
ومتعلق بيهه يكول ماازوجهه غيغ لليستاهلهه

لبابه.. ابرار ساكته وفجر جنهه عجوز عدهه
كومه جهال منين ماتحجي ام نوال تردهه فجر
لحدماسكتتهه وماما واكفه باب المطبخ وتخرمش
بخدودهه دكلهه اني اعلمج...

اجه ابن عباس كال السبع يكول خلي يكعدون
جراح !!! جاوبته ابرار كلساع اكعده ومايقبل
يكعد

ام جراح.. كومي لبابه كعدي كليله اجه
خالك وميصير المغرب صار وهو نايم..

لبابه.. كمت بدون مااباوع ع نوال حسيت عمه
زينب متعمده لان اول مره ادخل غرفة نومه
واصلا مااصعد ...

صعدت فتحت باب الصاله شفت غرفته
ظلمه فتحت الباب وفتحت الضوه من الباب
واكفه واصيح جرااح جرااح بس هو بسابع
نومه تقربت اله هزيته جراح اكعد..

فز مرعوب شمر الغطه وهو لازم ايدي بقوه
يلهث مرعوب من شافني ترك ايدي
وفرك وجهه وكال هالبابه شكو؟!

لبابه.. شبيك هيج فزيت بس كتلك اكعد
جراح.. ماادري عبالي موبالبيت رفع نفسه
ارتجه ع تاج الجربايه جربايته نفر وبيهه تاج
صغير ودنه رجله سوالي مجال كال اكعدي

لبابه.. لا مااكعد راح انزل بس عمه كالت كعدي
والسبع دز عليك اجو بيت خالك..
جراح.. هاااا بيش الساعه هسه
لبابه.. ب4 ونص بعد نص ساعه ويأذن كوم يله..

جراح.. تعالي اكعدي خليني اشوفج صارت حته
الشوفه كدام امج بالبوگه
لبابه.. كعدت ع حافه الجربايه واحد صافن
بعين الثاني بلع ريگه وكال خوماضايجه؟

جاوبته لا حاليا ماضايجه والباقي يعتمد
عليك راح تنزل وانشوف نوال شتسوي انت

جراح.. شسوي؟ يابه انتي ليش لازكه بالموضوع
نوال انتهت بالنسبه الي بطلي هاي السوالف
فدوه

لبابه.. سكتت ماحجيت قرب نفسه عليه
وباسني من خدي ابتعدت بسرعه لزم ايدي
بعدتهه حيل وكمت وكفت

كتله لاتتقرب اكثر خلي علاقتنه حلوه
بعيده عن هاي السوالف منا لمن نتزوج
مااريد اعيش الشعور مرتين عشته سابقا
مااريد اعيد الخيبه مره ثانيه..

جراح.. انتي موصاحيه ياخيبه ولج
دنزلي احسنلج صايره حته حجي ماتعرفين
تحجين..
لبابه.. ليش تصيح وبسرعه تتنرفز
جراح.. لبااااابه انزلي...

لبابه.. صاح وشكله تغير صاير واكف ع شعره
من العصبيه عفته ونزلت كتلهه عمه كعد
هسه ينزل...

ظلت عيني ع الدرج انتظره ينزل تأخر كمت للمطبخ
واشوفه واكف ويه ضرغام طلع نازل من الخارج
مادخل ابد ليجوه وماسلم تعشوا وراحوا وكلساع
ام نوال تسأل علي ومااجه...

عقيق... صارت ب11 بعد ماكو احد صاحني السبع
ورجعنه للبيت سبحت وبدلت ومددت بفراشي
وهو مطلع اوراق ويحجي بالتليفون ويه مهندس

كمل واجه خله التليفون ع الميز ونام بصفي
مد ايده جوه راسي وباسني من خدي سألني
اخذتي دواج هزيتله راسي

عقيق.. اليوم الحجيه بركات انطتني علاكه
ذهب كالت هاي مال ام السبع
السبع.. اي كالتلي خليهن يم ام شهد احسن لان
انتي كل نهارج هناك وهذا فارغ

عقيق.. ام نوال كالت السبع يرادله وحده
تهز الكاع شيخانيه!
السبع.. منو كالهه احب الشيخانيه انه اموت
ع الرقيق ودغدغني من بطني..

ضحكت بصوت عالي وهو يضحك ع ضحكتي
العب باصابيعه واحجي كتله يوم الاحد اداوم
السبع.. بكيفج داومي ماظل شي عن امتحاناتج
اريد تنجحين حته اخذج لسوريا

عقيق.. ليش؟
السبع.. هم انشوف طبيب وهم نتونس
بس اخلص شغلي هذا الشهر يوم الاحد اخذج
للعشار اريد صور الج
عقيق.. شتسوي بيهن؟
السبع.. نريد نعقد محكمه امور دنيا كلشي
يصير حته مرتي شرعا وقانونا

عقيق.. حضني اكثر وهو يلعب بخصلات شعري
هدوء مااعرف بيمن يفكر اتمنى اسأله ويشاركني
بس طبيعته تختلف مايحب يحجي كلشي...

غفيت واني ع ايده حسيت وهو يسحب
ايده من جوه راسي وغطاني وطلع بره
شفته اخذ باكيت الجكاير وسد الباب ..

مرات مااعرف افسر شخصيته وبشنو يفكر
ومرات احسه مهموم واباله اشياء هوايه
بس يحاول كدامي يعاملني بحنيه ولطف
حته لا احس...

رانيا... باجر دوام كاعده اكتب خطه واسئله
عندي امتحام يم الرابع دك تليفوني المتصل
اختي سهاد كل شهرين تخابر مره..

فتحت خط سلمت عليه وحاجت ماما شويه
وكالت انطيني رانيا اخذته من ماما جان دكول
انتي شكد رعنه ومتستحين اطردين اخوج
وتلزكين نفسج برجال غريب..

رانيا.. يااخووو؟ شنو انتي تدرين عدنه اخ
سهاد .. اسمعي ولج رانيا لاتحجين لماما بس اني
اعرف صار اسنين واصلا الشقه الكاعده بيهه
هو انطاهه الي لعد اني وين اكدر اعيش بالخارج

رانيا.. اوكفي سهاد شتحجين تعرفين قبل لاتسافرين
ولج ع حياة بابا وماحجيتي
سهاد.. الله يرحمه بابا جنت مضطره خالو اتفق
ويه زوجي وانطاه الشقه وزوجي ذبح نفسه
حته نسافر وكال اذا كلتي لابوج اطلگج

رانيا... تف تف عليج ياحقيره ياسالفه حرامات كسرة
ظهر بابا عليج تذكري هو ربه جهالج ولج يوميه
ماخذلج صينيه سم ويرجع بعز الظهر يلهث من الحر
علمود تجازينخ بالنكران

سهاد .. انجبي لاتغلطين صايره سوقيه وهمجيه
من عاشر القوم اربعون يوما متستحين تغلطين
واني اختج الاكبر فكرت بحياتي ومستقبل
جهالي وشمدريني بابا راح يموت ومايدري كلت
من ارجع للعراق احجيله..

رانيا.. شتحجيله ع صخام وجهج شلون انطاج كلبج
وانتي تدرين قبل سنوات وماحجيتي ع الاقل جان شافه
مره وحده قبل لايموت

زين وماما مافكرتي بكسرتهه خليتي ايدج
بايد خالج النذل ع حساب امج تدرين شكل ضغط
وسكر عدهه من الصدمه وانتي جايه تحجيهه
برحابة صدر..

اسمعي لج وحق الله وروح بابا اذا اتصلتي
مره ثانيه اخزيج وخاف الج نيه تتفقين ويه اخوج
علينه اطيح حظج وذاك رجلج العار خلي هو يفيدج

سهاد.. اوووي شلون الفاظ طبعا. زوجي يفيدني
منو يفيدني ماما لو بابا اولهم وتاليتهم ميتين
المهم ضمنت مستقبل اطفالي وحسام ونعم الاخ
ومدام هذا السانج الطويل اله اخلي يكصه الج

رانيا.. خوفتيني اذا رجال خلي يوصل
اني اصير رجال وره بابا واريد اشوف شلون
يجي هو وخالج سديته بوجهه..

كلبي يفور معقوله جانت تخلي عينهه بعين
بابا وهي تعرف كلشي اتذكر من سافرت شكد
بجه ودخل مستشفى ويكول انتن روحي
شلون هيج اتفقت ويه اخوهه حته تحصل التريده
ومات بابا بحسرة الولد..

العقل مايستوعب كمية القذاره التصير
بالمجتمع ويوم عن يوم نكتشف الانسان
جاي ينزل الى اقصى درجات الانحطاط
وانعدام الضمير..

خفت ع ماما تتخربط ماحجيت طلعت بره ادور
ع ضرغام اريد اوصي خاف يخابره حسام او
خالو لاينطيهم مجال دورت ماكو الحديقه فارغه

فززني صوته وهو يكول بشششش
التفتت علي شتقصد اني بزونه؟

ضرغام... تقريبا
رانيا.. وين جنت؟
ضرغام.. كاعد بس سمعت الباب انفتح وكمت
شبيج ؟

رانيا.. تعال اسولفلك
ضرغام.. تعالي بالاستقبال محد اكو شكو شصاير؟
رانيا... حجيتله كلشي عن سهاد
ضرغام.. وعليمن مقهوره ماراح تغيرين شي العليج
بس تاخذين حذر واذا اتصل بيج لاتجاوبي خلي
يجي هو ونتفاهم ..

رانيا.. دنكت لازمه راسي خله ايده ع راسي
وباسني جان يكول يابه مدامني موجود
لادنگين راسج

اني وياج وماكو شي لاتقلقين تصيرين
موحلوه !! ضحكت اني حلوه بكل حالتي
ضرغام.. متأكده مامجرب كل الحالات
اعتقد اكو حالات اشوفج غير!!!!!

رانيا.. شتقصد؟
ضرغام.. اني مااعرف اشرح موكايلج فاشل
بالتعبير اني اعرف اطبق وسحبني من خصري

وخله راسه يم اذاني وهو يحجي شنو هالرشاقه
خليني اقيسه اتاكد!! حركت راسي كزبر
جلدي من انفاسه ..

رانيا.. ضرغام عوفني لا احد يجي
ضرغام.. محد يجي ولزم وجهي باثنين اديه
وبده بوسات عميقه متقطعه من كل وجهي
لحدما تمركز ع شفايفي واحنه ناخذ نفس الهوه

ابتعد وهو يضمني لحضنه بوسط هدوء
احساس غريب وجميل وعبالك بنت العشرين
واول تجربه الي مااعرف شلون اوصفه بس اكول
اشاركه بكامل احساسي واحس بي بالكامل...

ابتعدت عن حضنه وكمت وكفت وهو مرتجي
ع الحايط وخله الجكاره بحلكه وعينه تصعد
وتنزل ع طولي نظراته قويه وجريئه بنفس الوقت...

ابتسمتله وكتله تصبح ع خير وطلعت
للغرفه لكيت فجر تفرش فرشت بصفهه
ومددت واني افكر بحسام معقوله يكون
حجر عاثر بطريقي لان ماتقبلت وجوده...

ماغفيت لان مشغول بالي بالتفكير اسمع
حركه ع الدرج سريعه وصوت عمه زينب
وهي تصيح يايمه سوده بوجهي منيلكم هالخبر

ركضت فتحت الباب صارت كدامي تبجي
وتلبس بحجابهه وتصيح كعدي ساهره
سألتهه شكو خاله شصاير؟؟

زينب... يايمه يا ام الخير خابرونه من القصر
يكولون الحجيه بركات ماتت ودموعهه تجري

ركضت لخاله كعدتهه وكعدن البنات كلهه انخبصت
ركضت ع فجر شفتهه كاعده بالزاويه وتبجي
بصوت عالي لزمت ايدهه فجر لاتبجين
حد يومهه هذا...

فجر... هسه اتذكرتهه اتذكرت بابا كال الحجيه
راح تجي بس نسيت منو لو ادري رايحه شابعه
منهه شوف اني احبهه حيل والسبع يحبهه
هسه يتأثر عليهه...

رانيا.. كومي بدلي كلهه راح تروح جهالي نايمين
اخاف عليهم شلون اكعدهم خاف نظل وحدنه
طلعت للضرغام ماموجود مبين رايح ...

رحت ع عقيق كلت خاف وحدهه وتخاف بس
دكيت ماكو يمكن رايحه ويه السبع
ماكو حل غير اخذهم وياي دزولنه سياره
ورحنه...

اول مره اشوف فاتحه يمهم بالقصر من مات عامر
ووسن مارحنه بس مثل هاي ماشايفه الصريخ
لراس الشارع وناس هواي كلش هواي زلم واكفه
ونص الليل تقريبا ب1 ونص..

دخلنه للقصر بس نسوان وكالو اخذوهه
يسوون شهاده وفاه كلهه تبجي ومفزوعه
وجهالي احسهم راح يتخبلون من الصوت
حايره وين اوديهم صاحتني عقيق كالت تعالي هناا

فتحتلي غرفتهم القديمه وحطيتهم بيهه نامو وظليت
يمهم اخاف يكعدون وينهبطون عقيق كاعده
يمي واجن فجر ولبابه وسدينه الباب وكعدنه

فجر ماتحجي بس تبجي مصدومه حلمهه تحقق
سألت عقيق شكال السبع؟
عقيق.. جنت نايمه وهو كاعد ماادري بي بس كعدني
عيونه حمر كال بدلي بسرعه الحجيه متخربطه وطالبتني

وطلعنه ع السريع بس مالحكنه عليهه
بس وصلنه جانت ميته ويصيحون دكول نور
فجأه تخربطت وكالت صيحولي السبع اريده
وجبار مامخابر يكلهم لحد يخابره لحدما عاصم
خابرنه بس مالحكنه

رانيا.. الله يرحمهه برحمته قبل يومين بنصنه
وتوصيني ع ضرغام دكلي يتيم من يومه وفقد
اهله ومرته واولاده صيري سند وعون اله وخلي
اسمه عالي وخلفيله جهال هو يحبهم...

هيج الانسان البارحه ويانه واليوم
نكول الله يرحمه حجيه وخوش مره
الف رحمه ع روحهه...

عقيق.. بدت الفاتحه واني وصاني السبع مااطلع
من الغرفه ولااطبين بنص النسوان ازدحام
ولاتشتغلين مالج علاقه نور فتحت غرفتهه لرانيا
والبنات ساعه يمي وساعه بغرفة نور..

للمغرب يله رجعوا انفتح الباب ركضت
حضنته طبطب ع ظهري وكال خليني اسبح
كلي تراب ..

ابتعد عنه اشوف الكسره بعينه وكانو امه ماتت
الحزن مخيم ع وجهه تعبان حيل كعد ع الجربايه
دنكت اريد انزعه الجواريب لزم ايدي
سحبني باسني من راسي وكال لا ادنگين...

كعدت بصفه وهو يوخر شعري وره اذاني
سألني خوماگلبج يأذيج؟
عقيق.. شويه احسه مثل البالون بس هسه يروح
بالي يمك

السبع.. ماعندي بعد من ريحه ابوي كلهه راحت
وماعندي عزيز بعد بس انتي
عقيق.. لاتحجي هيج فدوه

السبع.. قصرت وياهه هواي التهيت بشغلي
وتركت القصر وهي الكاهه بالباب واكفه دكول
انطر جيتك لا اعتراض ع حكمك ياربي املي بالحجيه
بيوم راح تحجيلي الحقيقه وهاي ماتت وماعرفتهه

عقيق.. جمره الله من يبعد شي عن العبد معناتهه
موبصالحه جاي تشوف الله شكد يبعد عنك موضوع الثار
لمده طويله فوك 30 سنه

عمك اجه من بغداد يحجيلك الحقيقه ومات
والحجيه ماتت وماسولفتلك معناتهه هذا الموضوع
شر الك والله جاي يبعده عنك انت انسان مؤمن
المفروض تؤمن بحكمة رب العالمين...

السبع.. ونعم بالله هو بعد الحقيقه اندفنت وياهم
خلي اكوم اسبح لااطلعين انه اخليهم يجيبولج
عشه هوسه وناس غربه حته لاتعبين..

عقيق... سبح ورجع صله وانه كاعده اباوعله
اندك الباب جراح يصيحه وطلع اجن البنات
يمي وتعشينه وحدنه...

وره ساعه نسمع طكطكه المواعين
يسولفن ويگصن باعراض الناس ويشتغلن
لحدماكملن طلعت اريد اغسل ووياي سيوفي
اغسله ...

سمعت صوت اثنين يسولفن مافهمت شكو
وماسمعت الكلام بالضبط ولا اعرف الاصوات
بس سمعتهن بطاري السبع ....

رجعت للغرفه شويه واندفع الباب ايناس
بنت جبار صاحت مسعدات جايات خطار
ماتكومن تكرفن ويانه..

فجر.. احنه خطاغ القصغ موالنه وماكاعدين
بغغفة ابوج كاعدين بغغفة السبع

ايناس.. انجبي انتي انوب عليه الزعاطيط
كومن يله تغسلن الحوش وتصيرن اوادم
والماتكوم اصلخ جلدهه صلخ. خاف لبالجن
انه فقيره

رانيا.. احترمي نفسج احسن مااكوملج انتي موبنت
شيخ شوماتعرفين تحجين خطار احنه وغصبا
عليج واذا ماعاجبج انخابر زلمنه تجي تردج

ايناس.. مصدكه روحج اخذتي ضرغام ترى
گبلج لعب ع هواي وهذنيج حبيباته كاعدات
بالهول روحي سأليهن شچم وحده ضاحك عليهه

رانيا.. هو انتن مضحكه جان ماكدرلهن
روحي بابا منا ولتمثلين دور الشيخه براسنه
ايناس.. محد حاجي وياج كلامي ويه مرت السبع
وبنات عمي

فجر.. انتي بنت جباغ عدونه وعدو بابا اوكفي
يمج اصيحلج السبع اكله تحجي ع عقيق
ايناس.. اني اعلمجن جنت ساكته گبل لغايه
براسي بس هسه اني الجن..

عقيق.. طلعت واحنه صافنين شنو من ناس
وشنو من بنت شيخ بس بالاسم واللسان
قبيح ولاعبالك بنيه..

فجر... اباوع للساعه ب12 النسوان
نامن وليل الشته طويل وكلهه تعبانه من النوح
واللطم طلعت من الغرفه هي خارجيه بابهه ع الطرمه
يسمو الحوش امشي مسافه يله اطب المطبخ

ردت اشوف ماما بعدني ماواصله المطبخ
هي لزمه من زندي هي ايد تخلت ع حلگي
وانسحبت بقوه رجليه تخط بالكاع واحسهه تزلغ
واني ارافس بين اديه موضخم الرجال عبالك شاب...

ماانخطفت بس اخذني للممر حته يهددني
طبكني ع الحايط وايد خلاهه بركبتي وايد
ع حلكي وملثم ويكول كلمتين اسمعيهن
واهدج ...

فجر ... اني بنص القصر يعني هذا من القصر
واكفين بالممر البصف المضيف يعني
موغريب منهم وبيهم رغم شكد جنت خايفه
بس جنت اتلاوه وياه اريد انزع اللثام مالته...

عضيته من ايده حيل ماوخرهه بس حركهه
واعض اصبعه حسيته راح ينشلع من مكانه
وطلع صوت وهو يصيح اااخ يابنت الكلب..

سحب ايده بحركه سريعه من كدما جنت
مركزه ويه حركاته جان لاف شماغ ع وجهه
بس جريته وكع بهاللحظه سحب اسلاحه

واني مصدومه واني صافنه بذهول علي
واحس نفسي بدوامه واني اشوفه كدامي
مستحيل هو جنت اسمع عن الخاين بس هسه
عرفت الخاين منو انكشف كدامي وياريتني
ماكشفته مااكدر ابلع حته ارمش وهو مصدوم
اكثر مني....


يتبع.....

ادعولها حبايب🥺
ان شاء الله تكون حاجتج مقضية وربي يسرها ومايصير اله كل خير🤲🏻🦋

#ملوكه

يي حبي زين هالغسول وماركته معروفة🥰

#ملوكه

هذيني أحسن واقيات شمس👇🏻☺️..واهم شي كون نسبته واقي 50 او60..

#ملوكه