#خبايا_الاقدار
... البارت السادس


لبابه... من كال هيج بسرعه وكفت
هو منو حته اثق مو نفسه عمه الشيخ
الكتل اختي؟!

موهو جان شاهد على ذبحهه ودفنهه
بيده ومحد اخذ بثارهه وحته فاتحه
ماسوولهه مثل الناس وهسه يريدني
اثق بي!!

ظليت واكفه بنص الشارع وهو مشه
خطوات ورجع التفت عليه شافني
واكفه بعد مسافه قصيره عني

اجه عليه وحجه ليش وكفتي
امشي لانتأخر البنات وحدهن!؟

لبابه.. رجعني يم اختي اني مااثق
بيك ؟!
جراح.. شنووو؟!

لبابه.. انت منو حته اثق بيك كلكم
تنتمون لهذيج العائله ماما امنتنه بيد
عمه زينب وين ماخذني عن اختي!!

جراح.. امشي بدون حجي زايد
ماراح اكص راسج لمصلحتج..

لبابه.. مااروح والتفتت اريد ارجع بنفس الطريق
بس سحبني من ايدي حيل امشي واتعثر
وهو كل خطوتين سوه من السرعه

اسحب بيدي من عنده
بس يعت بيه حيل لحدما عبرنه شارع
ثاني ودخلنه بفرع بي محلات جام
ترك ايدي وكال امشي بدون صوت
عفاا بنات ماتكدرن اله تتمردن !!

سكتت افرك بايدي وامشي بصفه
فات كدامي دفع زجاج محل
وسوالي طريق كدامه دخلت..

بعدين انتبهت هذا محل تصوير
حجه ويه الولد وطلب مني اروح للغرفه
اخذلي شكم لقطه واني كلشي مااعرف
اخذ الوصل وطلع..

رجعنه بنفس الطريق سالت هوايه
مارد عليه اخر شي انفعلت صحت بصوت
عالي كتله انت شايف نفسك شوفه
حته هيج تسوي بيه منو سمحلك تتحكم بيه!!

جراح.. خلصتي!!
اسمعي اذا حجيتي بالصار انتي التتأذين
مواني لذلك صيري حبابه واسكتي حته لامج
لتحجين ..

لبابه.. شنووووو اني مااضم شي عن
ماما..
جراح.. بكيفج اني عليه نبهتج شتردين
سوي والظاهر عندج راس يابس يراد
قوه يله ينفتح..

لبابه.. سكتت لان مستفز واحس نفسي
عصبت حته ضجت منه حيل رجعنه للمطعم
طلبوا اكل واكلوا واني بس شربت عصير
نفسي انسدت..

فجر سألتني وين رحتي؟! ماعرفت شجاوبهه
بس هو انتبه كالهه دورنه محل مال ملابس
من نطلع اخذكم علي..

دفع الحساب وطلعنه امشي بدون فكر
بس رجليه تتحرك اكو خوف بداخلي تولد
جديد مع العلم ابد ماخفت منه بيوم

ابرار تندل وطلبت من عنده ياخذنه
للعشار اني وفجر نمشي وراهم مسيرين
حسيت على ايد فجر لزمت ايدي وشدت عليهه

فجر.. لبابه شبيج ليش وجهج مخطوف
هذا جغاح شيغيد منج؟!

لبابه.. مايريد بس اني ضجت تذكرت شهد
شكد جانت تتمنى تطلع وتشوف الناس
فجر.. الله يغحمهه

لبابه.. دخلنه محل ملابس جبير هو ظل برا
وابرار حارت ششترت النه حته ملابس
بيت حته لماما بحيث طلعنه محملين وفشلانه
حيل لان هو دفع الحساب واحنه ربع ماعدنه..

رجعنه للسياره بعد مادك علي السبع
ومدري شحجه وياه بس اجت كلمه باذاني
كاله هاهي اخذتلهه وباجر يطلعن..

يعني السبع كايله؟! لو شنو؟!
زين صوري وين ياخذوهن
شراح يسوون بيهن ..

جنت امشي وراهن فجر وابرار كدامي
حسيت علي صار بصفي حجه بصوت
خافت تعرفين رقم خالج او عنوانه؟!

لبابه.. رفعت راسي بعصبيه ونترت بي
زودتهه انت بعد اتحكم اكثر عندك شي احجي
لومتعلمين على اذيه المقابل..

جراح.. هسه بنص الشارع لو بغير مكان
جان جاوبتج بطريقتي ع هذا اللسان
المهم لاتنسين الوصيتج علي !!

وتعداني ويمشي بثقه ضربت الكاع
برجلي شنو من بشر لاعتب عليك
حالك حال جبار عمك العار ابن العار..

وصلنه للسياره صعدنه عفت الباب
مفتوح تعمدت يصعد وسديته حيل
جان يلتفت وصاح هاي منو السدته ؟!

لبابه.. اااني!!!
جراح.. عجيب امرج موهاي اختج وياج
شبيج انتي اسمعي يبنت العم هذا تمردج
حطي بجيبج ومن هاي اللحظه بطلي ..

ابرار.. جراح يمعود هو باب فدوه الهه
شبيك ؟!
لبابه.. لوادري هيج الطلعه وياكم ولا اجي
بس المفروض مااستغرب لان كلكم واحد
كلكم تربيه الشيخ البطل العادل الحاكم بالحق

جراح.. اسمع اللسان وروح ابوي اذا
ماسكتي انزلج هسه !!

لبابه.. انزل يله بس خاف ماجايب سجين
تذبحني !!

فجر... فتح الباب راد ينزل ولزمته اخته
حجيت اني لا جغاح متقصد شي
من حجيت هيج شفت ابتسامه بعيونه العاكسه
من المرايه يمكن ضحك ع اللدغه مالتي..

لبابه.. فجر راسي يوجعني تقربي
عليه اريد انام ع كتفج
حسيت نفسي اريد اتقيء
شعور موحلو وخوف تملكني

مانمت بس غمضت عيوني واول ماغمضتهن
اجت صوره شهد كدامي كانو حقيقه
رجفتهه!!
عيونهه المفتوحه
الدمعه الوكعت باخر لحظه وتطلب السماح ..

نزلت دمعه على خدي حسيتهه
مثل جمره انتشلت من بركان
وحركت گلبي قبل خدي..

مديت ايدي مسحتهه واني بعدني
مغمضه مااريد اشوف احد
ولا اريد اسمع صوت عمري ١٥ بس
شلون اكمل حياتي ومنظر اختي ملازمني..

فززني صوت تليفونه يدك رفعه جاوب
جان يحجي باريحيه وبالغاز
بس اي نفسه!
هاهي تمت!
يومين وتكمل!
يم عماد شمخي!!

هذني الكلمات جان يكولهن بجواب
والمتصل يوجه اسئلته بالترتيب
وختمهه جراح بعباره ..
والله روضلك وحده عمرهه ٢٥ ولا تروض
وحده مثلهه !

شيقصد!!! ومنو هذا اليحجي وياه
رفعت راسي اجت عيني بعينه بالمرايه
درت وجهي بسرعه..

وصلنه لمنطقتهم ظلمه واشجار
عاليه ونخيل كثيف نمشي بالشارع
الطويل مال القصر ياخذ الروح..

وصلنه لبال القصر نزلنه اني بوجهي
للمشتمل وفجر نزلت العلاليك واجت وراي
دكيت باب المطبخ ماما تنتظرنه
بوستنه والقلق مبين عليهه..

كعدت وكمنه نحجيلهه هيج اكلنه وهيج
اشترينه بس ماحجيتلهه الصار كلت
غير يوم اكعد وياهه واحجيلهه

لان جنت حيل متأذيه وتعبانه
بسرعه غسلت ونمت بفراشي..

ثاني يوم دزت علينه الحجيه بركات
اجت نور كالت الحجيه دكول خل يجن يمنه
خطار..

بدلنه وطلعنه للقصر طلع الخطار
عماتي الي بس بالاسم ضحك وسوالف
وماكو وحده كالت ماصار اشهر ع وفاه
اخونه وبنته المغدوره ...

شفت ماما شلون مدنگه راسهه
وماتحجي ومبينه العبره خانكتهه
من شافتهن شلون يضحكن...

عمتي الجبيره اسمهه فيهن مره جبيره
حيل وعدهه جنايين وبنات مستحقات يصيرن
عجايز ..

صوتهه عالي من تحجي كالت يماااا
تقصد الحجيه هذااا السبع مايتزوج
هيج نهايه كلامهه كله ااااا

الحجيه.. شمالج يفيهن يايوم كال اتزوج
چااا لو يريد من باجر فرحه الگصر هاي..

فيهن.. وضرغام چااا يظل وحِييد
الگصر والسلف متروس نساويين
لو ماتحله اله ام تنوره ..

لبابه.. احس حلكي انعوج وراسي
صدع من صوتهن العالي وحلكي اقلد كلامهن
احسه يندار صفح ..

شويه واستأذنت ماما ورجعنه
لبيتنه مرت ايام بطيئه اشبه
بعقارب الساعه بدار متروكه!!

بعد مرور شهر تقريبا قررت احجي
لماما ع الصار بوقتهه ويه جراح
جانت فجر نايمه رحت كعدت يم ماما بالمطبخ
وبديت اسولفلهه ...

ماتوقعت ردة فعل ماما انهارت
تخبلت كامت تلطم ع صدرهه
تبجي وتصرخ هسه ياخذوج مني
هذوله ظلام...

فزت فجر من نومهه. جانت ظهريه
انريد نلزم اديهه مانكدر انهارت
وانعاد عليهه يوم شهد وبابا وماانحسهه
غير وكعت كدامنه بس جثه...

لاول مره اصرخ اكثر من وفاه شهد
اريد صوتي تسمعه القريه كلهه
ماما لاتموتين وتعوفينه فجر حسيتهه
راح تغمى وتوكع فوك ماما..

فتحت الباب وركضت حافيه من المشتمل
للقصر واصيح الحكولي ماما ماتت..

هيج ظلم! هيج ناس الله خلاهه تبطش
بالدنيا حته يخليهم حطب لجهنم
هيام واكفه كدامي واهز بيدهه خاله ساعديني
تدفعني حيل..

اركض لزوجان ابنهه ولا وحده حركت
نفسهه اكلهم ماما ماتت يكلولي شمري
عليهه مي...

الحجيه وعمه زينب ماموجودات
من حلاة روحي واتخيل روح ماما
صعدت وعافتنه

وهن يضحكن ويكولن خلي تموت
اول وحده اخر وحده
تفلت على هيام والواكفات كلهن
وطلعت اركض...

مادري وين اروح جنت متهستره
بهذاا اليوم طار حته الرياجيل الواكفين
اختفوا طلعت اركض للشارع
بدون شعور مجرد اتخيل انعيش بدوم ام
وبدون حمايه اسرع خطواتي اكثر..

ويه ركضتي ع الشارع اجاني
صوت من بعيد بس ميزت اتجاهه من
البستان وهو يصيح يبنت!!

مثل الغرگان ومدوله حبل النجاة
التفتت علي وركضت باتجاهه جان من
بعيد ماعرفته بس من تقربت عرفته ضرغام..

ابجي واحجي الله عليك ساعدني ماما
دتموت محد يمنه الله عليك تعال اخذهه
لاتخليهه تموت..

ضرغام.. ع كيفج اهدي تعالي وياي ومشه كدامي
سريع باوع لرجليه حافيه ومتروسات تراب
نزع شحاطته ام الاصبع مال بيت كال البسيهه..

لبستهه شكبرهه بس هو مشه كدامي
واني امشي ورا كون اطير واوصل لماما
دفعت باب المطبخ بعدهه ع نومتهه
وفجر متخبله حته ترجف ...

سحبت شذر وصاح ساعديني
لبست ماما عبايتهه وشلناهه للسياره
طلع تليفونه اتصل بس. كال جراح
تعال وراي لفلان مستشفى...

صعدت وياه ومامنتبهه ع نفسي بملابس
البيت دشداشه طويله وشالي مخربط وبعدني
لابسه شحاطته وفجر اجت عمه زينب اخذتهه

ضرغام التهه حته ماانتبه عليه بس
جانت ب٢٠٠٦ الوضع متازم حيل حته سيطرات
وحته اكو وهميه تخوف بس كل سيطره نوصلهه
مانحتاج حته تفتيش يطلعلهم هويته ويفوت...

اخذوا ماما من عدنه هنااا اني انهد حيلي
وكعدت بالكاع ماوكعت دمعه من عيني
بس روحي الرايحه ورت ماما..

ضرغام راح مدري شيسوي يدفع
فلوس وباص ودخوليه واني ع كعدتي
بالكاع الرايح والراد يباوعلي حالي حال
المگديه ...

مااكدر اخسر ماما وين انروح
مثل الحمامه الدافعت عن صغارهه
هيج حمتنه بكل قوتهه وتخاف علينه
اني السبب اذا صار بماما شي اني السبب!!!

فززني صوت جراح وهو يكلي هاي
ليش هيج كاعده كومي شو كومي!!

لبابه.. كله من وراك انت جبار الثاني
انت ظالم مثلهم ماما تعرف طينتك
وهيج تخربطت..

جراح.. لاتلغين!!! يمهه انه بگربهه

لبابه.. عبالك اسكت ع عملتك ذاك اليوم
ومااحجيلهه هاي حجيتلهه وشوف حالتهه
اذا صار بماما شي بعد ماعندي شي اخسره
اقتلك بيدي ..

جراح.. سدي حلكج!! وهاج لبسي
وعدلي حجابج واثگلي شوي...

لبابه.. جان شايل علاكه بدلته العسكريه
مبينه جانت بالكوي فتحهه وخلاهه
ع كتفي وعدلت حجابي ..

باوع لرجليه وسكت اجه ضرغام
ظل يحجي وياه وعافه وراح شويه واجه
بيده علاكه وبطل مي..

طلع من العلاكه حذاء دفعه برجله
عليه وشمر بطل المي بصفي
جان يكول لاتموتين وابتلي بيج..

ماحاجيته مو بوضع اتعارك وياه
بس خلي تكوم ماما بسلامه
جانو واكفين كدامي اثنينهم ويسولفون
ضرغام يجر بالتشيرت مالته مثل اليكله
مالحكت ابدل مدري شيحجون...

شويه وطلعت ممرضه من الغرفه
كمت عليهه جانو يسولفون وياهه
بس لحكت على ضغطهه مرتفع انتبهت
هسه..

كمت اردد الحمدلله الحمدلله
حلكي يابس رحت شربت مي
وبالي يم فجر حالتهه موزينه عفتهه
بس ع الاقل عمه زينب يمهه..

شويه وسمحولنه انفوت ماما تعبانه. كوه
تحجي من شافت جراح لزمت ايدي
حيل استقرت حالتهه وطلعنه ويه ضرغام
وجراح كال اجي وراكم...

وصلنه للبيت وماما تشكرت منه
لكينه عمه زينب وفجر وابرار
بلبيت واجت الحجيه شويه ماما تحسنت
بس بعينهه خوف وقلق...

عمه زينب سوتلهه شوربه
وتعشينه وظلينه كاعدين
شويه واندك الباب حييل
صوت نور بنت عاصم تصيح خاله
خاله...

كمت فتحت الباب جان دكلي الشيخ
اليوم ينعنع اعظامج اشردي خايبه..

لبابه.. شبيج شكو منو يمه الشيخ؟!
نور..حبوبتي هيام كالتله انتي تفلتي
عليهه وامي شهدت وياهه وجدي
لازملج الخيزرانه...

بعدهه تحجي وصاحت بيهه امهه
وركضت طبت للقصر مااهتميت سديت
الباب وكعدت يم ماما..

يمكن مرت نص ساعه مواكثر
هي دكه باب هي فتحه بغلط
بصياح ومانحسه مثل الغراب
وكف فوك راسنه..

كلنه وكفنه احتميت بماما
هيام وياه ومرت عامر تكله اي شيخنه
تفلت علينه كلنه وحته ع الشيخه هيام...

عمه زينب تحاول تهدي الوضع
بس شفت بعينه ذاك اليوم
شفته شيطان كدامي ..

هو طويل صاحب بنيه ضخمه
واكتافه عريضه ايده بكد ايدي
٤ مرات صوته خشن شواربه سود

هجم علينه دفع ماما عني وكعت بالكاع
وهيام ومرت عامر لزمن ماما ويشحطن
بيهه للغرفه وهي تعبانه بس تصيح بنتي

قفلن الباب عليهه وعمه زينب تصيح
وحمت فجر حضنتهه واني بين ادين
الظالم بيده عوده يسموهه خيزرانه
تلسع مثل الكهرباء

يضرب على رجليه اكمز اعلى منه
يرجع يضربني على ظهري لازمني
من شعري ويفر بيه وايده مستمره بالضرب

بكدما تأذيت بس اذيتي لاشيء
من اسمع صوت ماما بده يختفي
عن مسامعي وهي تصيح بنتي!!!

صوته وهو يكلهن احمن الخاشوكه
احركهه ع حلكهه الزفر ...

لاحول ولاقوه عندي حته مااكدر
ادافع عن نفسي
الم !! وكسرة يتيم!! ماتنوصف ..

ايد تخلت ع اكتافي وجبار اندفع
عني حيل راد يوكع بس لزم الحايط
جسمي احسه اشتعل نار مااكدر اقاوم اكثر..

رجليه ارتخت صار مثل خيوط بيت
العنكبوت!!

بس ايده محاوطتني حته اذا اوكع
جان لازمني من اكتافي بقوه
وجبار يواجهه ويكله هاي ثاني مره
ياجراح؟!!!

انطاني لعمه زينب بضعفي والمي
ركضت لماما فتحت الباب لكيتهه
كاعده بالكاع وتلهث ابوس بيهه واحضن
واكلهه ماكتلني...

مااسمع سديت اذاني عن صوتهم كل همي
ماما لاتروح مني ابتسم بوجهه واكلهه ماضربني
بس خوفني...

كمت مااسمع صوتهم والظاهر طلعوا برا
وعمه زينب اجت كومت ماما وغسلتلهه
ومددتهه بفراشهه..

هنا انتبهت على اختي فجر!!!
وين فجر؟!

عمه زينب وينهه فجر؟!
زينب.. وينهه هسه جانت هناا
لبابه.. ادور عليهه بكل ركن مالكيتهه نعالهه موجود
وهي اختفت ..

طلعت اسحل برجليه الهزيله
صوت جراح هو وجبار يتعاركون
وضرغام مرتجي بمكانه المعتاد
ويدخن..

حجيت بعبره خانكتني ماشفت فجر وين؟!
ضرغام... لاااا..

لبابه.. وين راحت كمت افتر عليهه مثل
المخبله حسيت بمسوؤليه جبيره
رفعت راسي للسما صافيه والنجوم تلمع
الهي وين اختي؟!

صرت مثل المجنونه ماما واختي؟!
واني اتألم؟!
شهد روحهه ملاحقتني؟!
بابا احس متعذب علينه؟!

طبيت للقصر من باب المشتمل
اصيح فجر بعلو صوتي فجر
ماما تريدج!!!

دنيا ليل وبس صوت جراح وهو يتعارك
واسمعه وحده كلهم ضده جبار واولاده...

ظليت افتر بالطرمه داير مداير نفسي
احس روحي بدت تلتفت مثل مايلتف
الثعبان على جذع الشجره...

تائهه!!
ضايعه !! هذا المكان مومكانه
اريد الامان الي ولاختي ولماما...

طلعت من القصر ورجليه اخذتني للشارع
ضرغام واكف ويباوعلي ماحجه ولاكال وين
رايحه يتفرج على خطواتي البائسه..

مشيت متر تقريبا واشوف خيال
شخص ضخم شايل شي مدري
يتهيئلي الم بده يعصر بروحي
هسه بينت لسعات الخيزران...

وضحت الرؤيه عندي وتقرب اكثر
واشوفه السبع جاي من جهه البستان
وشايل فجر باثنين اديه مثل الطفل
وايدهه واكعه ومبينه فاقده

يمشي سريع تلكا ضرغام تعداني بسرعته
واخذهه لغرفته
صاح بصوت عالي ناوشني
السلاح ياابن عمتي !!

الجكاره بحلك ضرغام وبكل برود
اعصاب حته ماكاله ليش وشلون؟!
سحب المسدس من احزامه
وانطاه السبع..

طلع السبع وسد الباب وكال لضرغام
عينك على الصغيره كومي وياي
وطلعت من الغرفه بالباب التفت عليه
وكال وين ضربج!!!؟؟

جاوبت وكعت ادموعي كتله بكل
مكان!!!

بعدني بس كملت الجمله اجه جراح
يركض باتجاهنه مثل الطلقه
سحبني من ايدي بكل قوته
ودفعني بعيد لجهه البستان..

صاح بصوت عالي موجه كلامه للسبع
كاله ماعندي اسلاح الحگ جمره
وامي واختي بامانتك...

ولزمني من ايدي واخذني سحل
مو للبستان مالتهم لاااا
لطريق البستان القديم

اظلم !! اشجاره ميته!!!
النخيل منحني وقاسي مثل كلوبهم..
صوت الكلاب مثل الصوت اليطلع
من حناجرهم

اتخبط بوسط المجهول ايدي بايد جراح
ترك امه واخته !!
واني تركت امي واختي !!
وين رايحه؟! وشصار؟!
عيوني ماتبصر من شدة الظلام !!
جانت هاي كلهه تساؤلات بعقلي مالگيتلهه جواب...


يتبع......

#خبايا_الاقدار

... البارت السابع

....
لبابه.. مشينه مسافه طويله حيل
حته صرت مااشوف اي ملامح
للقصر والاضويه مجرد ظلام دامس
وصوت حيوانات ...

كلساع اعثر وايدي تريد تنخلع من معصمهه
من كدما ضاغط عليهه هو حافظ الطريق
بحيث الحفره يعبرهه
الشوك يدوس علي!!
بس اني ساعه تلتوي رجلي !! الشوك
نبت بلحمي..

كمت الهث لحظات ماتنوصف احس
روحي تريد تغادرني الخوف متملكني
من كل جانب
اريد احجي اكله اوكف سحبت ايدي من
عنده حيل ارتديت ليورا ردت اوكع..

ويه التفاته سمعنه صوت طلقات
متفرقه !!
هنااا يمكن موبس هبطه مثل مايكولون
انكطعت الخلفه عندي وبعد ماحمل من
شدة الهبطه..

بسرعه سحب ايدي وكمل الطريق
بسرعه جنونيه وابد ماحجه بس
يسحب بايدي واني اتعثر بدشداشتي
الطويله وحجابي كلساع يوكع والزمه..

مسافه طويله حيل عن القصر
فجأه وكف مااشوفه حته جراح مااشوفه
مجرد خيال كدامي من كدما الاشجار عاليه
وحاجبه ضوء النجوم..

ايده ارتخت وسحبني بهدوء علي
وكال لتخافين هسه انتي هنا بأمان
عشره مثل جبار مايكدرون يدخلون
هذا المكان..

لبابه.. مااتحملت بسرعه بجيت احس
راسي راح ينفجر ركبتي تريد تنفصل
عن جسمي كمت ابجي بصوت ومخليه
ايدي على عيوني!!

فتح لايت ووجهه عليه عكمشت عيوني
اكثر صوته يتخلخل مسامعي
ايده انحطت على ايدي وسحبهن من عيوني..

جراح.. ليش تبجين هي هاي حياتنه
دم وقتل كلهه اكشن ونطلع منهه بسلامه

لبابه.. اريد ماما!! اريد اختي
حجيتهه وشهكت!!

جراح.. تعالي !! وسحبني اكثر علي
امج بامان وفجر بأمان بس انتي يالبابه
امشي وراي وخليني اطلعج منا مثل ماطلعت
اختي !!

لبابه.. انت ليش جبتني هنااا
اني اجيت ادور ع اختي؟!

جراح.. تعالي انشوف مكان نكعد بي
والليل طويل اسولفلج!!

لبابه.. وين اكو مكان هنا متشوفه
بستان يخوف يجوز مسكون!!

جراح.. ضحك لا ااا اكو مكان السبع
امشي ولاتسولفين

لبابه.. مشينه امتار قليله جان اكو بيت
ممكمل بناء وصاير خرابه مثل الهيكل
عبالي راح نكعد هنااا بس كمل طريقه
شويه عن البيت..

يضوي باللايت جانت اكو حصيره مفروشه
واكو صندوك خشب بالجانب
جبير مال اهل قبل راح فتحه
واني لازمتله اللايت

طلع منه مخده وشرشف لان جان الجو
حار بشهر السابع السادس تقريبا
بس اكو نسمه هوه واشتم ريحه زفر الظاهر
قريبين ع الشط ...

فرشهن واكو سعفه مسويهه طويله
مثل المكناسه كنس بيه‍ه الحصيره
ونزع شحطاته وكال يله تعالي
اكعدي!!

المكان جوه اشجار عاليه حيل صايره
مثل الكعده ريحه الاشجار حيل طيبه
قطعت ورقه واشتميتهه عرفتهه
اشجار ليمون ..

كعدت بصفه اتنفس سريع
عطشانه حيل ماكو قطرة مي
حسيت بالم برجلي حجيت جراح
رجلي فات بيهه شوك!!

فتح اللايت عليهه جانت اكو وحده
بالكعب سحبهه بسرعه وضغط ع مكانهه
جراح.. رجعي ظهرج ع الشجره!!

لبابه.. ليش جبتني هنااا يريد
يقتلني جبار؟!

جراح.. عايني لبابه هذا الموقف نفسه
صار باختي بيوم منهم اجيت لكيته
يكتل بيهه ومو بس هو وياه ابنه عامر
بحيث ابرار بعمرج جانت يومين
هي فاقده الوعي..

شنو جانت حجته بان ابرار مستحقه زواج
وماعنده بنيه تعبر ١٦ سنه بدون زواج
يريد يزوجهه لابن عمتي بالغصب والترفض
تنقتل اما زواج اما قتل...

هاي يمكن اول مره اواجه بيهه جبار
جنت دائما اتحمل علمود امي واختي
بس بوقتهه منظر اختي مستعد اقتل موجبار
عشره مثله وخلي انحكم...

لبابه.. جان يحجي وعينه ليكدام
سحب جكاره من الباكيت خلاهه بحلكهه
وفتحهه واني كاعده بصفه
بس متجهه علي اباوعله...

جراح.. جان السبع ماموجود
وانه ماعندي اسلاح
بعدني زغير كل الي كدرت
علي اضربه بالسجين...

بس وراهه اشتكه عليه
وردت اروح بيهه
بس لطف رب العالمين
ووگفه السبع هو شالهه
عني وانسجن ٦ اشهر وطلع...

السبع هو وگفه عد حده وترك اختي
وكدرت احميهه وكملت دراستهه
بس وراهه جان عند ابنه الجبير
عباس بنيه هم عمرهه ١٦ سنه
راد يزوجهه وامهه ماقبلت لان زغيره..

بيومهه صارت هوسه وجدل
والبنيه وكفت بوجه جبار
وكالتله اشتكي عليك مثل السانج
بالضبط..

ثاني يوم البنيه اختفت وظلوا
بحدود الشهر يدورون عليهه
ومحد لگاهه وكلهه عبالهه انهزمت
بس وراهه لكوهه ميته بغرفة
الناعور القديم محد يوصلهه ابد..

البنيه ممكتوله بس بالطب العدلي
كالو مضروبه ع راسهه وميته
ماكو دليل بس الحقيقه هو او ابنه
او واحد من ازلامه كتلهه

لبابه.. يعني هسه هو راد يكتلني؟!
جراح.. اي واحد او وحده تشكل خطر
على حياته ومخططاته ينفيهه ..

انتي هسه جان ناوي يزوجج لأبن
عامر ودفاعي عنج خلاه يتعربد اكثر
وكال لو اكتلهه لو ازوجهه..

خلي اكون صريح وياج لحمايتج
كتله انه اتزوجهه بس الظاهر اله غايه
وماراح يسيطر عليج اله بزواجج من ابن
عامر..

تعاركنه انه وياه وكال اكتلهه
ومن وكفت بوجهه انطه امره لعامر
وهذا اتعس من جبار معناتهه مستعد
يكتلج كدام الملأ

لبابه.. اني ممسويه شي؟! ومن يكتلني
ماكو حكومه؟!
جراح.. ياحكومه جبار من عهد النظام السابق
هو صكاك وصدام مالزمه ولا يوم اخذ حكم
ولا انسجن يوم...

وهسه اجت المليشيات والعصابات
وجبار وياهم يكدر واحد يطخه بشعره
كلنه عدنه عوائل ونفكر بيهه..

هسه اكتله وخلي انعدم بس امي
واختي شلون عبالج اذا مات جبار ماراح
تطلع الذيول الورا ذنب اختي شنو حته تروح
ضحيه؟!

لبابه.. وشكد راح اظل هنا شوف لابيت لا اكل
شلون اعيش؟!
جراح.. ماتظلين السبع يجي ويطلعج
وانه ارجع لجبار وشيريد يصير خلي يصير..

لبابه.. وماما واختي؟!
جراح.. ماعليهم شي خافي ع نفسج لان خلاج
براسه وانتي جريئه مومثل فجر يخاف بيوم
تشهدين ضده..

لبابه.. اني عطشانه
التفت عليه وشمر الجكاره
وكال كومي..

كمت نفضت ملابسي ومشينه جهه الشط
نزل خطوات كدامي ع الجرف جان يكول شلون
تشربين لا كلاص لا ماعون ..

شو انطيني ايدج ؟! انطيته ايدي سحبني
ع كيف والايد الثانيه بيهه لايت
الجرف بي حصو خشن كدرت اثبت رجلي
حته لا اوكع بس ايدي بأيده..

انطاني اللايت كال الزمي والزمي قميصي
لاتوكعين ودنك يشيل مي بايده اثنينهم
واني اشرب منهن..

شعور فضيع مومي شط العرب عبالك
شربت مي زمزم من كدما ارتويت
رغم خجلانه حيل بس لان ظلمه مايشوفني

اخاف اتقرب للمي بعيده عنه هو يشيل
ويظل حابسه باثنين اديه واني ادنك راسي
اشرب ..

جراح.. هاا كملتي
لبابه.. ااي شكرا
جراح خلي اغسل ظلي بمكانج ثابته وضويلي

لبابه.. الشط يخوف شوفه شلون يرعب
جراح.. من صغرنه احنه هنا السبع ماتحلاله
النومه اله هنا وانه وضرغام نشرد تالي
الليل ونجي يمه..

لبابه.. دنك راسه غسل شعره
ويشيل مي ويمسح بركبته
التفت وكال يله نرجع ..

رجعنه لنفس مكانه كعدنه هدوء
صوت ماكو فقط اصوات حيوانات بعيده
لوصوت صراصر ..
رفعت راسي للسما اباوع السما صافيه
والنجوم تلمع ..

هو مرتجي ع جذع الشجره ومدد رجليه
وطابكهم والجكاره بيده بس نارهه تلمع
حجيت بسؤال انت شكد عمرك؟!

جراح.. ٢٣
لبابه .. وشوكت تتخرج
جراح .. بعد ٤ اشهر واتخرج
لبابه.. زين اني اذا طلعت منه ماما شلون تطلع
جراح.. فكري بروحج

لبابه.. هذا المكان تسموا البستان القديم
جراح .. اي
لبابه.. ليش؟!
جراح.. هذا البستان مال عمي فاضل ابو السبع
جدي الشيخ جان موصي اذا مات الشيخه
لعمي فاضل

بس انكتل بجريمه هو وعائلته وتحولت الشيخه
لجبار وهذا البستان ظل من يوم وفاة عمي
محد يدخله السبع مايقبل

شوفي ذاك الهيكل هذا بيت عمي فاضل
جان يبني بي وناوي يطلع من القصر
بس مات قبل لايكعد بي..

لبابه.. ليش كلت عشره مثل جبار مايفوتون هنا
شنو يخاف؟!
جراح.. محد يفوت لهنا اي واحد يفوت
يضرب علي السبع بالنسبه اله هاي منطقه محرمه
ممنوع احد يدخلهه..

لبابه.. وهاي صوت الطلقات شنو؟!
جراح.. هاي طگطاگات تلگين ضرغام
ضاج ورماله شكم وحده..

لبابه.. شنو من حياة عايشيهه
وهيج عدكم قصر وفلوس وكاعين كلكم
بي موهاي اراضي هواي..

جراح.. هذا القصر قبل بيوت الكويتين
لذلك تشوفي قليل تواجد بالبصره
ودائما قريب ع الشط..

اما سبب ماعدنه اراضي لان كلهه بأسم
جبار شلون وليش ماندري ؟!
جانت كل الكاع باسم عمي فاضل ابو
السبع لان انسان خايف الله وجدي موكله
بالكاع

بس من انكتل والسبع جان عمره ١٠ سنوات
جبار جاب ورقه موقع عليهه ابو السبع
بان محول الوكاله باسم جبار

وجدي الشيخ ماطول ورا عمي المرحوم
وتمرض وعاف الدنيا بما حمل ورا جبار
واحنه تجردنه من كل ملك لان كلهه
حولهه جبار بأسمه..

حته السبع مايملك شبر بهاي الكاع
بس بستان ابو الي ماكدر جبار يوصله

يعني من الواحد يعاتبنه ليش ماطلعون
وليش راضخين لجبار لان ماعدنه ارض
ولا عندي راتب اله اتخرج..

لبابه.. جان يحجي واني صافنه
علي رغم ملامحه ماتبين بس احس
بحركاته يتخيلي حركاته وهو يسولف..

سكتنه اثنينه وبديت انعس
رغم عقلي مشوش بس حسيت
اكو سند اكو من اعتمد علي ...

خليت راسي ع شجره وغمضت
عيوني شفت حلم وردي اني ادرس
مثل ابرار واطلع من هذا المستنقع

داهمني النعاس وغطيت بالنوم رغم
وضعيه نومي كسيفه مااعرف شكد نمت
بس فزيت ع ايده وهو يخلي راسي
ع المخده..

من شافني فزيت كال اسم الله
بس نامي هنا وطبطبلي ع المخده
صار راسي يم رجله وهو ع نفس
كعدته..

تغطيت بالشرشف بي ريحه
جكاير وبسرعه غفيت رغم المكان
الياخذ الروح بس احس بامان
كأنو نايمه يم بابا...

فتحت عيني ع صوت العصافير
جانت الشمس طالعه فركت عيوني وكمت
اتلمس راسي شالي ماكو ملفوف ويه الفراش

اباوع لمكان جراح ماكو وين راح
معقوله عافني وحدي!!

كمت وكفت اباوع ماكو اول مره اشوف
هيج مكان بستان بس اشجار كثيفه
اغصانهه متشابكه بحيث
كل الاماكن مظلله..

تمشيت شويه امشي واشتم هوه
نقي اخذ نفس عالي احس رئاتي
تنتعش امشي ع زقزقه العصافير..

لحدماوصلت قريب ع الشط
كلما اتقرب كلما يبين اكبر
وكفت مسافه قريبه وظليت اباوع
ع ابداع الخالق..

فززني وهو يطلع من المي رافع راسه
جسمه بالمي وينفض براسه والمي
يقطر منه..

رفعتله ايدي مبتسمه فرحانه
لگيته عبالي راح للقصر وظليت وحدي
اشرلي بأيده روحي معناتهه ارجعي.

رجعت بنفس طريقي وكعدت ع الحصيره
انتظره شويه واجه يفرك بشعره
باثنين اديه..

جراح.. صباح الخير
لبابه.. صباح النور شوكت كعدت؟!
جراح.. مانمت
لبابه...ليش؟
جراح.. بهيج وضع مانام اظل انطر
لبابه.. شنو تنطر؟!
جراح.. اراقب...

لبابه... شراح نسوي اظل هناا؟!
جراح.. لااا هسه يحضرولي السياره ونطلع
لبابه.. وين؟!
جراح.. لبغداد لبيت خالج

لبابه.. فهمني شلون؟!
جراح.. شكد حجيتي بوقتهه يابه الصور
اخذتهن حته ارجعج للدراسه وطلبت عنوان خالج
حته اتواصل وياه

ولكيت خالج وحجيتله وراح اقدملج
وادرسين يمه بس بمسوؤليتي يعني
اني اصرف عليج موخالج

لبابه.. لعد ليش السبع خابرك وكتله
خلصت يعني فكرتك لو فكرة السبع؟!

جراح.. لا طبعا فكرتي بس انه ماامشي
بدون مسانده يعني لاسامح الله وصار شي
مااتحمل المسوؤليه وحدي..

لبابه... اسالك سؤال؟!
جراح.. جواب
لبابه.. شكد عمر اخت السبع من ماتت
جراح.. توأم مالته

عمي عندي ٤ السبع والبنيه توأم
وبعد ولد اثنين ازغر هاي توأم متماثل
هي والسبع بكلشي

وثار السبع مو لابو ثاره ع اخته
دمرته مايكدر ينساهه حيل
متعلق بيهه ..

لبابه.. بعدنه نحجي ونسمع حركه من بعيد
فزيت اني بس هو طبيعي كال هذا السبع

لحدماوصل يمنه صبح علينه ومدري
شحجه ويه جراح تقربت علي
كتله واختي وماما..

السبع... مابيهم شي بأمان روحي ويه
جراح ومناك من توصلين اخليج تحاجين
امج..

لبابه.. ليش بس اني !! وفجر ليش تبقه!؟
السبع.. فجر صغيره وتختلف عنج لاتخافين عليهه
ثبتي نفسج بالاول وادزهه وراج
بالتداريج..

لبابه.. اريد اشوف ماما ؟
السبع .. متكدرين اخذهه جراح ومن توصل
خابرني سلمهه امانه عند خالهه كله بتنه
اذا صابهه مكروه يصيبك اضعافه..

لبابه.. عافنه ومشه واني وجراح
طلعنه من مكان ثاني كال هاي الكاع
موالنه بس مشينه هواي لحدماوصلنه
الشارع ..

لگينه ضرغام واكف انطه السياره
لجراح ورجع يمشي واني اخر محطه
ودعتهه وماشفت ماما واختي
وماادري ثقيت بجراح والسبع
ياترى اهل للثقه لولا؟!

قبل لانوصل نزلني بمطعم
جنت ميته بس اريد اروح للصحيات
غسلت واشترالي لفتين كص ورجعنه
للسياره

طريق شطوله وماسمعت صوته ساكت
ومخلصهه صفنات واني تعبانه انام
واكعد وبعدنه ماوصلنه

واخيرا وصلت بغداد هو يندل عنوان
خالي اخذني مباشرة عليهم والظاهر
خالي عنده علم بكلشي ...

استقبلوني وخالي حاضني ويبجي
صار اشهر ماشفناه وهو جان يوميه
يجي يطمن ع ماما لان ماعدهه بس هذا
الاخ...

بالباب واكفين وطلع من جيبه فلوس
وتليفون صغير عادي
جراح.. خليهن عندج والتليفون ممنوع تحاجين
بي احد اله اني اتصل بيج ..

لبابه.. سلملي ع ماما وخليهه تحاجيني
انت وعدتني
جراح.. ماشي اي شي تحتاجي تبلغيني
واي خطر يصير تنطيني خبر لااطلعين وحدج
حاليا عطله من تبدي المدرسه اني هم اجي
ارتبلج الوضع..

لبابه.. حجه هيج وصعد بالسياره
دك هورن لخالي وشال ايده
وراح احس گلبي انقبض شلون اعيش بدون
ماما وفجر..

حسيت نفسي انانيه وفضلت مصلحتي عليهن
يعني اني راح اعيش حياه هادئه واكمل دراسه
وفجر راح تظل عايشه بالخوف..

يحجي ويايه خالي واني بعالم ثاني
دخلت ويا للبيت فارغ جابلي مي
وكال هسه تجي خالتج ورانيا راحن لطبيب..

خالي عنده بنات اثنين الجبيره سهاد متزوجه
والصغيره رانيا اتزوجت وصاروا عدهه اثنين
اطفال واطلقت...

كمت غسلت ورجعت كعدت ماعندي
حته ملابس ابدل ٦ اشهر قبلت حياتنه
رأسا ع عقب مانكدر نوكف ع رجلينه
تجينه الضربات متتاليه..

فوك الساعه يله اجت خاله ورانيا
واطفالهه ماخذتهم لطبيب فرحن بيه حيل
حسيت بامان بس بالي وفكري يم ماما وفجر..

جانت خاله جايبتلي ملابس وياهه
لان خالو شافني ماجبت شي وياي
وهو مخابرهه كمت سبحت وبدلت
وكعدت بغرفه رانيا وابنهه يرسم بالكاع
بعده صغير عمره ٤ سنوات..

فززني صوت التليفون الي انطاه جراح
مااعرف شلون اجاوب ورقم مكتوب السبع
كلبي يخفق بأذاني ..

ضغطت ع رد وخليته ع اذني اجاني
صوت ماما وهي تصيح لبابه حبيبتي
بسرعه بجيت مااتحملت كمت ابجي
وهي تبجي وياي..

لبابه.. ماما اني اسفه طلعت وظليتوا هناك
ساهره.. هسه ارتاحيت هسه انتي بامان
ماما انتبهي ع نفسج خالج يمج بمثابه
ابوج

لبابه.. وانتي وفجر ؟!
ساهره.. اني جبيره احمي نفسي وفجر
لتخافين عليهه حاميهه السبع تمشي ملكه
محد يكلهه ولج بس انتي مهدده وطلعوج ..

لبابه.. وشوكت اشوفج؟!
ساهره.. خلي يهدء الوضع والسبع وعدني
اشوفج صيري عاقله اي شي تحتاجي
نصيحه شي تحاجين مرت خالج..

اني اتصل عليج بين مااشتري
تليفون بالخفيه اني مرتاحه وفجر
هاي تسلم عليج بس انتي اهتمي بنفسج..

لبابه.. ماشي ماما ماراح اخيب ضنج
وراح ارجعلج تعبج اضعاف بس انتي
اهتمي بصحتج...

ماما ار اسألج قبل لايخلص رصيدكم
فجر وين راحت البارحه وليش جابهه السبع؟!

ساهره.. من خوفهه عبالهه راح يقتلنه
جبار رايحه ادور ع السبع ومتلكيهه
بالشارع ومغمي عليهه وجابهه وهسه زينه

والبارحه السبع وكف جبار عند حده عنه
بنتي لبابه هانه اهانه تسوه نفسه وخلاه
دنك ع راس فجر وباسه وانتي اختارلج حياة
افضل بعيده عن جبار وظلمه...

لبابه.. ارتاحيت من كلام ماما نهيت الاتصال
واحس براحه جبيره اريد اشكر جراح والسبع
وضرغام ع كلشي ...

بدت حياة جديده يم بيت خالو
عائله هادئه حيل رانيا كل وقتهه اطفالهه
معتنيه بيهم لوتقره كتب ...

خاله مره جبيره مخلصتهه صلاة
وقراءه قران مدلليني حيل
والاهم ماخذه راحتي ماكو شي يقيدني..

مر اسبوع كامل رغم افكر بماما وفجر
خاف بيهم شي وارجع اكول لا هي كالت
احنه بامان وصوتهه جان مال وحده فرحانه..

جانت الساعه ب١٠ بليل كاعده اباوع
كارتون ويه ابن رانيا والتليفون بصفي
دك وسكت عبالي مكالمه طلعت رساله..

فتحتهه من جراح هو خازن الاسماء
كاتب شلونج؟!

... زينه انت شلونك
... الحمدلله شلونه وضعج مرتاحه؟!
... اي مرتاحه
... عندج فلوس؟
... ااي ماصرفت منهم

... لاتتقيدين اصرفي التريدي
اني هسه ملتحق من انزل امر عليج
... ماشي
.. ديربالج ع نفسج .. مع السلامه..

لبابه.. افرح بحروفه كلساع ارجع اقره الرساله
وارجع ابتسم واخلي ايدي ع كلبي
واتذكر هذيج الليله ..

بيوم منهن بس اني ورانيا بالبيت
واطفالهه راحوا ويه خالو عصريه
واندك الباب هي جانت بالحمام.ظل الباب يندك
ومااكدر اطلع اله كملت .

لفت بسرعه شال ع راسهه فوك الخاولي
وطلعت تركض للباب واني اباوعلهه من المطبخ
شفتهه تحجي ويه واحد من ورا الباب..

صوته موغريب لحدماصاحتني
لبابه تعالي عليج ماانكر خفت خاف من جماعه
جبار بس اكو بصيص امل يطلع جراح..

تقربت للباب اشوفه ضرغام
لابس تشيرت اسود وبنطرون اسود
الساعه سوده بيده والمسدس بحزامه
صدك طالع كشخه اول مره اشوفه هيج..

سلمت علي وانطاني علاكه كال امج
دزتهه الج ردت منه يدخل ماقبل
سلم وراح..

من دخلت رانيا تمشط اشوفهه تباوعلي
واني اطلع بالغراض جان دكلي
هذا شيصير منج؟! اول مره اشوف
گمر لابس اسود!!
.
يتبع.......

#خبايا_الاقدار
💐💐💐❤️
... البارت الثامن


رانيا... ماكتيلي شيصير منج!؟
لبابه.. ابن عمتي اسمه ضرغام
رانيا.. متزوج؟!
لبابه.. متوفيه مرته

رانيا.. هذا الجمال كله وماعنده مره الك
بيهه اراده ربي اكول شنو شغله؟!

لبابه.. ضابط
رانيا.. صدك؟! اكره الضباط مع الاسف ضابط
لبابه.. ليش تكرهيهم
رانيا.. طليقي ضابط وخاين ومشعول صفحه

لبابه.. طلعت الغراض جانن ملابس
وحافظه مال كليجه انطيت لرانيا وبدينه ناكل
وارتب بالملابس سألتهه انتي ليش اطلقتي
بس اتذكر كالو ممتراهمين؟!

رانيا.. لاعيوني !! سمنه ع عسل جنه هو مدللني
واني مدللته بس خيانته ماكدرت ابلعهه!!

لبابه.. سولفيلي.. احنه جنه صغار من تزوجتي
رانيا.. ااي اسولفلج شعندي بس خلي اجيب
المشط اسرح شعري..

شوفي يا لبابه اني جنت مرحله ثالثه علوم
حاسبات بيوم منهن رجعت من الدوام امشي واكو سياره
دكتلي هورن رادني اوخر من الطريق

بس اني ماوخرت الطريق شكبره اله منا حشك
السياره ظل يدك هورن واني ولا التفتت علي
مااحس غير السياره اطخ برجلي خفيف
تعمد يضربني والله شنو انزعج

التفتت علي كتله انت اعمه ماتشوف هذا
الطريق شكبره وهو جنه السان دلاله اكلني
بكشوري..

حجيه منه وحجايه مني رزلته وكتله
اله اشتكي عليك وبهالحجي وهو يحجي
ويخلي ايده ع احزامه عود شوفي مسدسي

كولي وصلت للبيت وحجيت لبابا وهم
حجه عليه كال اتجنبي هيج مواقف
وهذوله بالحزب الضباط واذا خلوا براسهم
شي يسووا ..

كولي راحت ايام ورجعت ايام اداوم طبيعي
بس مرات المح نفس السياره تمشي وراي
لو من انزل من التكسي اشوفه يراقبني

ليش مابيوم اجت مرت خالي وكالت اليوم العصر
اكوناس جايين ع رانيا ورايحين لخالي وكايليله
انريد نخطب بنت اختك ...

اني فارغه لاعندي حب لا اعجاب كلت
اذا شخص مناسب اقبل اجو اهله وخطبوني
وهم مبينين عائله زينه وكنالهم انرجعلكم الخبر

طلبت اشوفه واتفاجىء بي هو نفسه
ابو السياره اتذكرت كلام بابا من كال اذا
رادوا شي يسوو..

بالاوا رفضت بس محاولات التقنيع ومابي
شي ومناسب واهله خوش ناس وبهالحجي
ومشيت ع مبدأ اخذ اليحبك ولاتاخذ التحبه
مدام هو حابني ورايدني هاهي اتوكل
ع الله واتزوج...

اتزوجته طليقي اسمه وسام من ليلتهه
صرت حامل بسيوفي وجبت واحنه
طيور حب مدللني فلوس طلعه كلام حلو

وراهه ع الاربعين صار عندي رضاوي
ومن تخرجت ردت اتعين وماقبل كال الاطفال
صغار اني اوفرلج كلشي..

كتله طلعني من اهلك وفعلا اسبوع راح
اشترى شقه مناسبه واسقرينه بيهه
حياتي تتمناهه كل بنيه من كدما سعيده..

التهيت باطفالي واشوفهم يكبرون
كدام عيني وفرحانه بيهم ليش مابيوم
دك التليفون الارضي قبل السقوط
واجاني صوت بنيه ناعم تسأل عن وسام..

من رجع واجهتهه كال متعرفين المعجبات
ومدري شنو واني ممنطي مجال وكالعاده اخذني
بكلامه المعسول وصدكت..

صار وسام يغيب عن البيت بحجه الوضع
مهدد هذا الحجي ٢٠٠٣ واني مصدكته
لحدما اجه يوم جنت نايمه طلعت ادور علي
لكيته يخابر

وهم نكر وماكال منو كال هسه دك التليفون
وكمت اشوفه ظليت قلقه وعيني علي
اراقبه مامرتاحه ابد سولفت لصديقتي
كالت اختبري..

وفعلا كتله راح اروح لاهلي اظل يومين
لان هو يريد يلتحق طمنته ع حسب الاصول
واخذت اطفالي واجيت لاهلي

ورا ساعات طلبت من بابا ياخذني بس
نمر من شارع الشقه اذا سيارته موجوده
اصعد ماجنت متوقعه ابد جنت اكول ع نفسي
مريضه وظالمته..

شفت سيارته موجوده وع اساس هو ملتحق
بسرعه فتحت باب السياره وركضت حته
بابا يصيح وراي بس ماجنت اشوف بس
اكول خاني..

عندي مفتاح فتحتهه وطبيت وانصدم بوسام
هو وياه وحده تسرح وتمرح بغرفة نومي
والاكل والفواكه ولابسه ملابس نوم..

هنا تخبلت هجمت عليهه ملختهه بس تذكرت
هي سكط مواني احاسبهه المفروض احاسب
ابو اطفالي غلط ورزايل وراد يمنعني وماكدر

لميت العماره علي من كدما عيطت وبابا صعد
وشاف الوضعيه بعينه ماعندي حل ولاردت اسمع مبررات
من عنده عفته ورجعت لاهلي..

بسرعه قدمت اجراءات الطلاق ماخله
ناس وساده وشيوخ مادزهم بس مارجعت

ظل يماطل بالطلاق ٣ اشهر حاول بكل
الطرق ارجع وكلت لو اكتل نفسي وماارجعله
طلع من عيني فدمره وكمت اكرهه..

طلقني واخذ تعهد كدام القاضي بالحضانه
بان اذا تزوجت ياخذ اطفالي من عندي
بحكم بس مقابيلهه انطاني الشقه ضمان..

هو اساسا الحضانه اخذهه هوو دفع فلوس
وواسطه وكسبهه بس من شاف حالتي
انهاريت ع اطفالي كال اتنازلج بس بشرط
اليوم التتزوجين بي اخذهم من عندج..

مااريد لازواج ولا بطيخ اهم شي
اطفالي واخلص من عنده وطلگني وكعدت شهر بالشقه
وبعدهه اجيت يم بابا والشقه اتأجرت وفلوسهه
الي وهو يدز النفقه كامله..

لبابه.. الله يساعدج اكول ممهتمه طلعتي
مجروحه
رانيا.. من اليوم الشفته ويه غيري واني دمعه مانزلت
من عندي اذا بيوم بجيت بجيت ع اطفالي لان مالهم
ذنب

ابد كلبي مارف علي وكرهته طلع من عيني
لو يملكني الدنيا مقابيل ساعه وياه ماارجعله..

لبابه.. الله يعوضج
رانيا.. راح اكوم اغسل ملابس اخذي راحتج

لبابه.. شنو هاي الناس كل واحد همه لون
رانيا شكد حلوه بشرتهه صافيه وع صفار
ملامحهه حلوه وعدهه شفايف عبالك منفوخه
بس همهه اكبر من جمالهه...

كملت ملابسي ورحت للتليفون طلعت رقم
السبع ردت اتصل بي بس ترددت ردت احجي
ويه ماما ..

بعدني لازمته ودك تليفوني جراح بسرعه
رديت بس كلت الووو
كال شنو هاي لازمته بيدج..

لبابه.. اااي ردت اخابر ماما
...شلونج؟!
.. زينه وانت
.. بخير اجاج ضرغام
.. ااي وجابلي غراض من ماما

جراح.. فتحتي الغراض
... اي
... اكو علبه صغيره بجيب الجنطه لگيتيهه؟!
... لا ماشفتهه وين؟!

.. بالجيب الداخلي كومي طلعيهه
.. كمت للجنطه مامنتبهه ع الجيب صاير داخلي فتحته
طلعت علبه صغيره بلحظتهه كلبي
دك سريع واجتاحتني نوبه مشاعر قويه..

التليفون ع اذاني وحجه بصوت هادىء
هاا لكيتيهه؟!
... اااي
... افتحيهه

فتحتهه شهكت جانت مداليه غريبه
قطعه مربعه مقسومه اربعه اقسام
القسم الفوك مكتوب اسمي ومواليدي بالعربي
والجوه بالانكليزي والمداليه ذهب..

اريد احجي اريد اكول هاي من ماما؟!
بس كلبي دليلي كالي لا من عنده
حسيته رغم بعده بس سمع دكات كلبي..

لبابه. .. حلوه شكرا
... البسيهه لتنزعيهه ابد
.. هاي بمناسبه شنو؟!
... بدون مناسبه اشتريت لابرار والج لان انطوني
رواتب التدريب..

لبابه.. شكرا جراح بس موغاليه
... مو غاليه عليج!! يله اهتمي بنفسج
راح ادزلج رصيد حته خاف تخابرين امج

لبابه... سديته من عنده وكمت اكمز بالغرفه
لازمه المداليه واركض مااعرف اوصف فرحتي
ركضت لرانيا جانت بالحمام تغسل ملابس..

اصيح شوفي جراح جابلي هديه
شوفيهه شكد حلوه ولازمتهه باثنين اديه
رانيا.. يمه فدوه لهاي الفرحه بالعافيه
حبيبتي

لبابه... هذا اليوم كلما اتذكره ارجع اعيش
الفرحه من جديد يوميه يتولد عندي شعور
جديد يوميه كلبي يدك بنبضه غريبه من اسمع
صوته..

بليل جنت انتظر مكالمه من ماما صارت ب٩
دك تليفوني السبع بسرعه رديت اجاني صوت ماما
شكد مشتاقتلهه وصتني ولاتسوين هسج ولاتحجين
هيج وبعدهه انطتني فجر..

لبابه.. هافجوره شلونج ولج مشتاقتلج
فجر.. لبابه الحقيغه اني هم..
.. ولج سدي خلي اخابرج لايخلص رصيدكم حته
انسولف..

رجعت دكيت عليهم جاوبتني سولفيلي
شلون عايشين انتي مرتاحه؟!
فجر.. اي مغتاحه وماما زينه وكلهم زينين
ويانه بس الحجيه مغيضه

لبابه.. ياخطيه شبيهه؟!
فجر.. مو قبل اسبوع تعاغك السبع وجباغ
والحجيه تخربطت
لبابه.. عليمن؟!

فجر.. ماادغي محد يحجي ولج لبابه خطيه
نوغ غاح تزوج ابن عمهه عامغ وهي تبجي

لبابه.. ياحقير ياجبار ماكلتوا للسبع يمنعه
فجر.. الباغحه حاجيته كتله ساعدهه خطيه
هي ماتغيد تزوج اين عامغ لان موحلو ومثل جباغ

وكالي ماسامعه ناغهم تاكل حطبهم
عوفج منهم خليج بامج وبحالج
هذوله ماينظفون ونوغ اولهه وتاليهه تزوج..

لبابه.. خطيه احبهه الله يساعدهه ولج لبابه
انتي وين تلگين السبع وتحجين وياه؟!

فجر.. غاح اكلج ولادكولين ماما اطيح حظي
لبابه السبع مايقبل واحد يدخل غفته (غرفته)
بس اني !!

لبابه.. لج فجر انتي تعرفين السبع عنده
ثار ويه بابا ديربالج تأمنين شلون تروحين غرفته
شتسوين؟!

فجر.. اغوح ادور علي من احتاج شي
وضغام يكلي والله وكت وحده بكدج فصعونه
اطب وتطلع بكيفهه والسبع ساكت

لبابه.. رغم اني موجبيره بس حسيت بمسوؤليه
وخوف ع فجر نبهتهه وعلمتهه ماتختلط بيهم
احتمال السبع يشوف اخته بيهه بس غير شخص
راح يفكر غير تفكير..

سديته منهه بس بالي يمهم
ليش اني طلعوني من القصر وفجر معززه مكرمه؟!
السبع يكدر يحميني مثل ماحمه فجر..

هوايه تساؤلات براسي وماالكه جواب
بس الي اعرفه جبار راد يزوجني لابن عامر
وخاف يقتلني وهم طلعوني...

مر الحال مثل ماهو بالاسبوع مره
يحاجيني جراح وماما اشترت تليفون سري
كالت جابه ضرغام محد يدري حته تخابرني

اليوم اول يوم الي بالمدرسه بدايه عام دراسي
جديد بس مقهوره حيل رغم خالي ممقصر
وطلب مني اطلع اشتري ملابس وهو راح لمدرستي
وكمل كلشي ..

بس محتاجه ماما ومحتاجه فجر
اتذكرت شهد وشلون قبل نفرح بعام دراسي
جديد خنكتني العبره وكعدت ابجي

وحيده!! لا اخت لا ام يمي
محتاجتهم كلهم شلون اكدر ادرس واكمل
مشواري بوسط هيج وضع..

جان الدوام مالتي ظهري ورانيا مدرسة
حاسوب دوامهه صباحي خالي كال ب١٢
اجي اخذج للدوام ..

صارت ب١١ صاحتني خاله كومي غسلي وتعالي
تغدي صبتلي ماعون تمن وعلي لحم اكلت وفرشت
اسناني ورحت للغرفه طلعت ملابسي

فرشت صدريتي ع جربايه وقميصي
الابيض وصافنه عليهن شهد صايره بين عيوني
احس بتأنيب الضمير شهد اندفنت بالتراب
وفجر اندفنت بالقصر واني ماشيه حياتي..

بوسط فكري دك التليفون جراح
بسرعه رفعته كتله الوووو
جراح.. ياهله تحضري جايج بالطريق
لبابه... وين؟!

جراح.. اليوم اول يوم مدرسه الج شنو ماتدرين
لبابه.. لا ادري خالي كال اني ب١٢ اجيج
جراح.. خابرته استأذنت منه اني راح اخذج

لبابه.. سديته وع السريع بدلت ودموعي ماجاي
توكف فتحت الباب خاله شافتني ابجي
ماكدرت اكلهه منظر شهد وهي تنذبح انعاد كدامي..

حاولت تهديني بس لزمتني الشهكه
مااكدر اكمل مشواري وحدي اريد
فجر وماما ..

باوعت لنفسي بالمرايه طولي متوسط
جسمي طبيعي بس بيه لحمه
ملامحي جدا عاديه حالي حال البنات
بس بيضه وعندي وجنات..

جنت لابسه صدريه سوده
وقميص ابيض ولابسه ربطه
موشال لونهه ابيض ساده ..

شلت جنطتي اشتراهه خالي بس بيهه
شكم دفتر وقلم وطلعت للمطبخ يم خاله
شويه ودك التليفون بيدي رفضته وانطيته
لخاله وطلعت..

لگيته واكف وهالمره السياره مبدلهه
فتحت باب الصدر وسلمت
جراح.. شلون؟
.. زينه وانت
... الحمدلله محتاجه شي قبل لانروح

... لا خالي اشترالي ممحتاجه شي
... خالج؟!
.. اااي
... هااا زين..

حرك السياره واني سئلته عن ماما
وفجر وقسم بأن هم بخير ومرتاحات
وهو هذا الشهر يتخرج

وصلني للمدرسه ردت انزل كال اني ارجع اخذج
لبابه.. ماكو داعي هي مدرستي القديمه نفسهه
جراح.. بس بيت خالج بعيد شلون ترجعين وحدج
علما انشوفلج خط...

سديت الباب وطبيت للمدرسه شبيك
ياگلبي مخزيني احس اذاني كامت توش
من كدما ينبض سريع..

جان بدايه دوام ماطولنه ل٣ وكالو
اطلعوا جنت خايفه بشكل اكيد جراح
يجيني ب٤ عباله دوام كامل وشلون راح
ارجع والمشكله ماعندي صديقات كلهن ناجحات للرابع
ومدرستي بس متوسطه..

قويت حالي ولازم اواجه واكون قويه
قابل يوميه جراح موجود طلعت ويه البنات
وكلت ماامشي وحدي وين مااكو مجموعه امشي
وياهه..

بس عبرت الشارع شفت سيارته
دخلت بفرع المدرسه بسرعه
رجعت لنفس الطريق لكيته واكف بالباب

فتحت الباب وصعدت الهث لان مشيت
سريع كال وين جنتي؟!
لبابه.. ماعبالي تجي وطلعت ويه البنات
وشفتك من بعيد واجيت

جراح.. شلون مااجي ادري اول يوم نص
دوام بعد لااطلعين وحدج جبتج هنا احميج
امج محملتني امانه..

لبابه.. اي ميخالف بس شوفلي
خط قابل تظل يوميه موعندك دوام
جراح... اي من باجر ياخذج الخط خالج
يعرف واحد ثقه..

لبابه.. وصلنه للبيت مد نفسه ليورا وسحب
علاكه كال اخذيهه الج سألته شنو؟!
جراح.. شغلات تحتاجيهه صيري سباعيه
واهتمي بدراستج ترى اذا مستواج موزين
ترجعين للقصر..

لبابه.. هزيت راسي ونزلت مجرد ماينذكر
القصر كدامي معدتي تتخربط طبيت
للبيت رانيا هي واطفالهه نايمه
بدلت ورحت فتحت العلاكه..
دفاتر واقلام قرطاسيه كامله

خليتهم بالكنتور ونمت كعدت ع التليفون
ماما تتصل حجيت وياهه وسولفتلهه
ووصتني كالعاده ...

استمريت بدراستي طبيعي
تقريبا بعد شهر كامل لان هستوهه بدت
امتحانات الشهر الاول عدنه..

خابرتني ماما كالت راح يجي ضرغام
ياخذج لان عرس نور بنت عاصم
وجبار كال لازم تحضر واني مااريد مشاكل
وحجيت ويه السبع كال خليهه تجي بأمان

جنت خايفه حيل شلون خاف بعد مااكدر
اطلع وشيسوي. بيه جبار اله اكون موجوده
بالعرس ركضت ع جراح اتصلت انطاني مشغول..

ورجع هو اتصل حجيتله السالفه
كال اي ضرغام راح يجيج ماكو شي
لاتخافين جبار مايريد احد يسأل عنج ويكولون وين؟!
وانتي هم شوفي امج ..

لبابه.. خاف بعد مااكدر ارجع
جراح.. لااا اترجعين اني ارجعج يومين واجي
ماعندي نزول

لبابه.. انت تخرجت؟!
.. اي
.. ع الخير
.. بعد وكت الخير يصيبج

لبابه.. حضرت غراضي ثاني يوم عندي امتحان
ودوامي صباحي خابرت ماما فهمتهه كالت امتحني
ويجيج ضرغام ياخذلج اجازه...

اني ادري بمدرستنه ماينطون اجازه واله ولي
الامر سولفت لماما كالت خلي خالج ياخذلج
احجيله..

حجيت لخالي كال اني الدرس الثالث اجيج
اطلعج ارجعي للبيت وانخابر ضرغام
يجيج لهنا..

ثاني يوم امتحنت وانتظر هسه يجي
خالي ماكو شويه واجت ابنيه كالت المديره
تريدج؟!

رحت واشوف رانيا ووياهه ابنهه سيوفي
كالت بابا بالشغل وخابرني امر عليج
اخذتلج اجازه امشي نرجع لبيتنه ومناك روحي..

جبت جنطتي وطلعت وياهه كالت خلي
انأجر تكسي بس لمحت ضرغام بوسط الازدحام
بالجهه الثانيه كتلهه ذاك ابن عمتي اجه
هو ياخذنه

رانيا.. منو ابو الاسود
لبابه.. ااي
رانيا.. لعد اني اروح تكسي وانتي تعالي اخذي غراضج
لبابه.. عليمن هو يوصلج وانروح مناك

بعدنه نسولف طبكت السياره كدامنه
رانيا ماقبلت تصعد بس اني اجر بيهه
وصعدتهه خلت ابنهه بحضنهه واني بصفهه

باوعت لضرغام نفس لبسه كله
اسود والنظاره سوده الساعه مزينه ايده
والمسدس يم الكير مخلي

ابن رانيا كلساع يمد ايده يريد
ياخذه ورانيا تجر ايده هدوء ماكو
غير بس السلام ...

وصلنه للبيت نزلنه اثنينه جبت
غراضي وسلمت عليهم وطلعت
اشرلي اصعد بالصدر وخليت الجنطه
بالخانه الوره

طلعنه من بغداد فززني بصوته
هاي شتصير منج البنيه؟!

لبابه.. منو رانيا؟! من كلت هيج داس بريك
انشمرنه ليكدام حته راسي انضرب بالجامه
الله ستر ما انگلبنه..

اسم رانيا اجه صب على مسامعه
خلاه يفقد السيطره ع السياره
حته السيارات الورانه كامت ادك هورون
ويصيحون يمعود انتبه..

نزع النظاره شمرهه بانزعاج كدامه وفرك
وجهه وكمل سياقه خفت اسأله شبيك
بعدين ربطت عندي وانذكرت اسم
زوجته رانيا..

بحدود الربع ساعه ساكت وحته سياقته
بطيئه رجع سألني بنت خالج؟!
... ااي هو عنده بس هاي

ضرغام.. متزوجه؟!
.. مطلقه وعدهه اثنين اطفال
.. والاطفال عدهه؟
.. اااي الهه الحضانه

لبابه.. سكت بس موضرغام الهادىء ساعه يدوس
بانزين بدون شعور احس السياره تبدي تميل بينه
واكله ع كيفك يله ينتبه ..

حاول يشتت فكره مد ايده فتح المسجل
جان برنامج طالع بالاذاعه اسمه صباح
الخير ياعراق..

شويه هدء وكام يسوق طبيعي جنت اسمع
بتركيز ع البرنامج وفقرات طبخ ومشاركه
وصلوا لفقره طلبات المستمعين..

خابرت وحده كالت اطلب اغنيه
صلاح البحر مو وقتهه جان الصوت عالي
وفجأه طلعت اغنيه تعزف ع الجرح..

مو وگتهه وذكرتني بيهم
لا على بختك جنت ناسيهم
استوهه كامت عيني تغفه
والجرح الليله يشفه ....

خاف من سمع اسمهه فز هسه
راح يگلب السياره بينه كوه تماسك
اعصابه سد المسجل ووكف السياره ع جهه
ونزل..

اكو بطل مي بالسياره اخذه
اباوعله من الجامه مدنك راسه وفرغ
البطل جان بي ثلج كله ع راسه وركبته

ماكدرت اظل اباوع احس ضرغام يخوف
اكثر من السبع شراح يوصلني بسلامه
اخلص من مخبل اوكع بواحد اضرب ...

رجع صعد وساق بسرعه جنونيه واني
حابسه نفسي ماخليت ايه ماقريتهه
شكد عصبي ولامبين هذا الهادىء البارد..

وصلنه لشارع القصر منا ضرغام اليبس
دمي ومنا اجيت لجبار انخبطت عندي
جنت مرتاحه اجيت للاكشن مالتهم..

وكف السياره باب المجمع وهو ساكت
فتحت الباب اخذت جنطتي ونزلت دكيت الباب حيل
فتحته ماما حضنتهه حيل وهي تبجي
واني ابجي..

اجتني فجر تركض مشتاقتلهه حيل
متحاضنين ونبجي صار اشهر ماشايفتهم

دخلنه جوه وماما تكرص بخدودي
دكلي سمنانه اباوع لفجر نفس حالهه
بس وجهه مورد ..

غسلت وبدلت وماما محضره الغده
بسرعه صبت وتغدينه ورحنه اني وفجر
للغرفه تسولفلي.

فجر.. الحنه مالتهم بليل
لبابه.. غير العصر
فجر.. هم كالو الحنه بليل وخطيه نوغ بس
تبجي وهو قبيح مثل الشيخ

لبابه.. هو شسمه؟ وشكد عمره
فجر.. اسمه وليد وعمغه ٢٠ بس جبيغ
حيل بكد السبع..
لبابه.. قصدج ضخم

فجر.. احنه انغوح للحنه
لبابه.. ماانروح خاف يصير شي
فجر.. مايصيغ شي محد يحجي ويانه
حته هيام ماتحاجينه..

لبابه.. ماجبت ملابس حفله شنلبس
فجر.. ماما جابتلج البارحه هي وعمه زينب
لبابه .. كومي لعد انسوي شعرنه

التهينه وحدنه هي تسويلي واني اسويلهه
لان شعرنه موسرح بي كسره ماطلعنه من المشتمل
لحدماصارت الحنه بليل..

ماما مشتريتلي ثوب كلوش بي حزام
شيفون ميدي وردنه تلث ارباع
وفجر نفس الثوب بس غير لون ..

لبسنه وطلعنه للقصر دخلنه ويه ماما
احس عيوني تريد تطلع من الهوسه
اعداد موطبيعيه بس نسوان والزرق
ورق موطبيعي ...

سلمت ع نور بس تبجي وامهه تكرص
بيهه تسكتهه بس حيل انقهرت عليهه
تخيلت نفسي بمكانهه جان هسه هيج
حالتي..

شفت عمه زينب تحجي ويه وحده
استحي اكوم اسلم عليهه ظليت اباوعلهه
اريدهه تبقه وحدهه ..

طلعت ابرار من الغرفه مبين الانسان
المثقف لابسه بدله طويله ارادنهه شيفون
وشعرهه عبالك ليل طويل حيل لحد الركبه
ولابسه نظارات ..

سلمت عليه وتعدل بشعري لان بسرعه
انفش صار مكهرب عجبني شعرهه حيل
شلون حلو ومعتنيه بي..

اجت عمه زينب حضنتني وباستني
وتصيح كبرانه لج ابرار شوفيهه
شلون كبرانه ...

خلصت الحفله وراحت الغربه وظلوا بعد
هواي ناس عماتي وعوائلهم وخوال نور
واهل هيام صايره لخه..

بدت حفله برا وضربوا طلقات
رحت كعدت يم نور بالغرفه جانت يمهه خالتهه
تسكت بيهه وهي تبجي محد حاس بألمهه..

اخر شي كلت لماما راح ارجع للمشتمل
لان تعبانه وجايه من طريق طويل
وماما وفجر ظلن وصتني اقفل الباب..

طلعت من المطبخ هو ممر طويل بين المشتمل
وبين القصر ياخذني للمشتمل بس مزروع شجر ونخل
عالي...

مخليه الشال ع راسي وطلعت امشي
اكو ضوه خفيف متسلل من الاشجار
ومنتبهه ع الصوت البرا والحنه والركص..

مااحس غير انطخ بجسم رجال شهكت
وردت اعيط بس صوته بحنيه وهو
يكول هاي انه لاتخافين!!

هيج احس روحي صارت مثل قطعه
جليد وذابت بحراره شمس عاليه..

هو واكف قريب عليه واني ع وكفتي
رجليه اتشجنت رفعت راسي اريد
اشوفه مامبينه ملامحه بس صوت انفاسه
والجكاره بيده مشتعله..

احس صار يتقرب اكثر
مدري يتخيلي حركت نفسي اريد
اطلع بس ساد الطريق عليه ويباوعلي..

اجانه صوت السبع صاح جراااااح
بسرعه فزيت ضربته بكتفي وطلعت اركض
للمشتمل مخليه ايدي ع كلبي...

ابدل وارجف صرت كلما جالي ومااقاوم
وجوده كلشي بيه صار يفكر بجراح
مااريد اوكع اذا سمعت ماما ماتقبل

اصلا عمري غلط مال افكر بهيج
سوالف بس ماادري ليش جاي اتعلق
بي يوم بعد يوم ...

ظليت بفراشي اريد اغفه ماكدر سمعت
صوت ماما وفجر اجن جبرت نفسي حته
انام رغم شكد جنت تعبانه ..

ثاني يوم عرس ومن طبيعتهم شيوخ
طبخوا اكل مو طبيعي وناس هوايه
عبالك مو بالبصره عازمين الدنيا كلهه...

ماطلعنه الصبح لحدماصارت الزفه رحنه شفنه
العروس وابد ماتحركنه كله بصف ماما
صبوا عشه وتعشوا وكالوا راح يزفون العريس..

بهذاك الوقت رغم عمري صار ١٦ بس مااعرف
اليصير شنو هذا الموقف ماانساه ابد كلما اتذكره
اغم نفسي من الفشله..

من زفوا العريس ورا نص ساعه سمعنه صوت
طلقات وهلاهل والنسوان فرحانه ماما جانت تشتغل
واني كاعده يم الحجيه يمهه عماتي ..

شويه واجت ام نور تبجي وتصيح بنتي راح تموت
كتلكم صغيره كلكم ماعدكم مخافه الله
تسكت بيهه الحجيه وهي تبجي..

كلهه انخبصت وشفت نور شلون طلعوهه
من الغرفه ماتكدر تمشي ووجهه اصفر وشالنهه
النسوان واخذوهه للمستشفى..

ماما برا تغسل مواعين اني طلعت ويه الهوسه
وكل اثنين واكفات يسولفن افتريت ورا البيت
جان الطبخ ورا البيت لكيت جراح يتحاسب
ويه ضرغام

راح ضرغام واني واكفه اشرلي تعالي ورا البيت
حلو كله ثيل وحديقه وبيهه اضويه
مشيت يمه كتله خطيه نور تخربطت

جراح.. شبيهه؟!
لبابه.. ماادري ماتكدر تمشي حته شالوهه
وامهه تعاركت ويه الحجيه دكلهه صغيره وانتم ظلمتوهه
خطيه ماتريد وليد

جراح.. عوفج من نور انتي تعشيتي
لبابه.. ااي بعده يسولف ومدنك ع الصونده فتحهه
جان شباك الغرفه مال الحجيه ع الممر

واسمع صوتهم وعياط ام نور وهي تصيح
مااتحملت وبعد هواي حجي موحلو
بس اني كل الي ابالي قصدهم متريد وليد

اجيت نمت بعين جراح روح وراهم
للمستشفى وهو يكلي صار عدهه هبوط
بالضغط هسه تصير زينه ..

واني اكله لا ماتكدر تمشي وامهه
متخبله وهو يصيح يارب الصبر
كتلج هسه تصير زينه...

من ماحصلت منه جواب عفته وطبيت
لان شفته يتهرب مني وضجت كلت
اني شكو حاجي خلي اكعد واسكت

تلكتني فجر طايره وتجر بيه دكلي
تعالي وياي اخاف اروح ظلمه اريد
اروح للسبع..

لبابه.. شسوين بالسبع؟!
فجر.. خطيه يلحك نوغ امهه دكول غغانه بدمهه
ولج يمكن وليد مثل جباغ

لبابه.. اني الثوله طاوعتهه عبالي من كدما يكولون
وليد ابن عامر وعامر مثل جبار كلت يجوز كالتله
مااريدك وضربهه سجينه..

رحت ويه فجر ادور ع السبع شافت جاهل صغير
دزته صاحه واجه اني جنت واكفه ع جهه لان
استحي منه مامختلطه بي

اجه لابس دشداشه بيجي وشايلهه شويه
ومبينه ايده وسخه دنك ع فجر لان كصيره
وسمعته كالهه هافجر شبيج؟!

وهي انطلقت السانهه يرتل وتصيح نوغ غغانه بدمهه
وهذا وليد يضحك وهي بالمستشفى ..

رفع راسه حاجاهه بهدوء ولاعبالك
نفسه اليخافون منه كالهه لا مابيهه شي
متخربطه ومتعوره هسه خابرتهم زينه
لتخافين ..

ارجعي يم امج ولتحجين لاحد
ولطلعين بالليل روحي اكعدي يم اختج
جان كلامه الى درجه من الحنيه
ويفهم بيهه مثل مانفهم وانقنع طفل ...

رجعت فجر واثنينه قلقين ع نور
ماحصلنه لامن جراح ولامن السبع
بعدين عرفنه حجم الفاينه مالتنه ...

كمل العرس وثاني يوم من الصبح
كعدتني ماما كالت كومي بدلي ضرغام راح
يروح لبغداد حته تروحين وياه

سألتهه ع نور كالت شبيهه عروس
بعد مونو الصغيره المهم ماتعمقت
وياهه كمت غسلت وبدلت وودعت ماما وفجر
وطلعنه للبغداد

جراح جان بيوم الحنه نازل يظل اسبوع
ويروح بس ضرغام يلتحق واخذني وياه
من البصره لبغداد هو ساكت حرف واحد
ماحجه ...

وصلنه لبيت خالو دكيت الباب وهو بالسياره
ينتظر يفتحو يله يروح تاخروا يله اجت مرت خالي
بس فتحته انصدم بيهه تبجي وتصيح على ضرغام
ساعدنه وليدي الله يرضه عليك..

خاله تدري بي ضابط نزل من السياره واني طببتهه
جوه دك الباب يله فات وخاله مخليه خدودهه
تجري دم..

حجت بصوت مبحوح رانيا راحت لدوامهه
ومااجت تاخرت وتليفونهه مغلق وراح ابوهه
وراهه وطلعوا اليوم طالعين من وقت عدهم اجتماع

هاي هسه ب٢ وهم طالعين من ١١ وبنتي ماكو
الله يرضه عليك انت موضابط ساعدنه ابوهه فقير
واخوتي يتشمتون بيه

ضرغام.. اهدي يمه ع كيفج ماعدهه
تليفون؟ اتصلوا بيهه

.. اتصلنه بيهه مغلق ماتتاخر هي ابد ومدرستهه
اعداديه ولد وقبل يومين كالت اكو واحد
بالخامس مضايقهه يمه خاف صار شي ع بنتي

ضرغام انطيني عنوان مدرستهه واقفلن الباب
عليكم وانطيني رقم تليفونهه ..

لبابه.. بسرعه اخذ المعلومات وطلع بس جان
يحجي بهدوء وملامحهه بارده لا غضب لا فرح
لا قلق مااعرف شنو اوصفه..

لحد ال٤ العصر اندك الباب حيل
ركضت اني فتحته وخاله من الصدمه تزحف زحف

واشوف رانيا عيونهه منفخه وملابسهه
كلهه تراب ومبهذله ملعوب بيهه خلقه
وضرغام مرتجي ع باب السياره بوكفته المعتاده
وطابك رجل ع رجل..

اخذتهه خاله واثنينهن يبجن
وهو اشرلي فوتي جون لااطلعين وحدج
وكلي لهاي بنت خالج خلي ادير بالهه !!

سديت الباب وطبيت واسمع
رانيا تبجي وصوت ضرب ع خدهه
وتصيح لج ماما راد يعتدي عليه
ماما هذا ضرغام لمني وسترني!!

#يتبع

9_____10
#خبايا_الاقدار
❤️♨️♨️

... البارت التاسع


لبابه.. اباوع ع رانيا منتهيه تضرب بوجهه
وجهالهه مفزوعين خلت الدم يجري من خدودهه
وخاله لازمه اديهه وهي تعيط بعلو صوتهه..

جانت لابسه تنوره وقميص فضفاض
والقميص مكطعه الدكم من عنده
وطالعه فانيلتهه الداخليه بيضه ..

كعدت ع الدرج كدامهه وابجي على
بجيهن هي وامهه لحدماتعبت وسيوفي
ابنهه تخربط ركضت شالته خاله واني كمت
يمهه..

ماااعرف شسوي بس خليت ايدي ع شعرهه
امسح بي وهي مرجعه راسهه ع التخم وكاعده
بالكاع...

رانيا.. ساعديني خلي اكوم لان دايخه
لبابه.. سندتهه كلساع تريد توكع كالت اخذيني
للحمام ..

خاله راحت اخذتلهه ملابس واني ظليت
اسكت بجهالهه يكولون ماما تبجي
خلي يجي جدو يسكتهه...

طلعت من الحمام نامت بفراشهه
شعرهه رطب والجو جان شهر ١١
بي بروده خاله اخذت الجهال واني كعدت
يم راسهه..

حسيتهه مثل فجر اختي ضامه راسهه
وتبجي خليت ايدي امسح براسهه كامت
تشهك..

لبابه.. لاتسوين هيج بنفسج هاي رجعتي
لبيتكم ولجهالج الله ستر
رانيا.. ليش هيج يصير وياي كلشي
مااريد بس حياة طبيعيه !!

لبابه.. ارتاحي هسه ونامي واني
اظل يم الاطفال طفيت الضوه وطلعت
كعدت يم خاله وشويه اجه خالو
شفته شلون مفزوع جان يدور عليهه..

عفت تليفوني بالغرفه جابه سيوفي
واجه يركض باوعت رقم غريب
ترددت اجاوب لولا خفت مارديت ..

بس خلص الاتصال اجتني رساله
مكتوب بيهه اني ضرغام!!

انتظرته يتصل شويه ودك كمت جاوبته
صوته يختلف عن الحقيقه سألني شلونهه
بنت خالج؟!

لبابه.. ملخت نفسه‍ه وجهالهه خطيه انفزعوا
وهسه نايمه
ضرغام.. ابوهه موجود؟!
لبابه .. اي خالو موجود.

ضرغام .. انطينيا اذا يمج؟!
لبابه.. اخذت التليفون لخالو جان برا
بالطرمه اسمعه يتشكر منه ويحجي
عفته ودخلت جوه شويه واجه خالو

كال هذا ابن عمة لبابه ضابط استخبارات
وكال اذا تريد تقدم شكوه حته انسحله
ليش يفوت بعملته..

ام رانيا.. هو عرفهم اندل مكانهم رانيا بس
تبجي مافهمت شي منهه بس كالت نفسه
الطالب..

... يكول هذوله بالتوقيف بس اذا
ماقدمتوا بلاغ يطلعون بكفاله
هسه خلي تكعد رانيا واشوفهه..

لبابه.. اخذت تليفوني ورحت للغرفه لكيتهه كاعده
بس مدده بفراشهه فتحت الضوه وكعدت يمهه
كتلهه خابر ضرغام ابن عمتي..

رانيا.. صوتهه مبحوح سبحت ونامت وشعرهه
رطب ومنا عيطت هوايه كام صوتهه ماينسمع
كالت اتشكري منه..

لبابه.. يكول تريد تشتكي عليهم
رانيا.. اي اشتكي بس بابا فقير وين يدبر
المراكز
لبابه.. هو ضرغام يساعدكم انتي بس كولي
لخالو..

لبابه.. لليل حجت ويه خالوا واتفقوا باجر
يشتكون وخالو اخذ رقم ضرغام مني
وخابره واتفقوا الصبح يرحون وانطاهم العنوان..
..

رانيا... المتعوب يظل طول عمره يركض
علمود ساعه وحده مرتاح بيهه واذا فرح بهاي
الساعه راح يعيش اشهر يدفع ثمن فرحته..

قبل زواجي جنت اسعد بنيه مدلله عند اهلي
لبس ومصرف واطلع سفرات ويه البنات
وعندي صديقات ومرتاحه بقسمي وكليتي..

وبعد مااتزوجت جنت اكول الله شكد يحبني
وهيج رزقني راحه وحياة هنيئه بس السوا وسام
ماكدرت اعبره ابد

شكد حاولت اتغاضى عن خيانته وارجع لخاطر
اطفالي وشكد حجوا عليه اهلي وخالاتي وكالوا
كل الرياجيل هيج وهاي نزوه وبهالحجي..

بس جنت مقتنعه اليخون مره يخون عشره
وعشيرين ومحد يكدر يوكف بوجهه لان
تعود ع الخيانه والتبرير ...

رجعت لبابا مطلقه ورغم ماقصر ويايه
ابد بس جنت اكره نفسي من ورا نظره المجتمع
حته صديقاتي اكو منهن بدن ينسحبن
وهاي الي دكول زوجي مايقبل وهاي دكول اهلي
كالو لتصادقين مطلقه..

اكتشفت مجتمعنه شكد تافه وينظر للمرأه عباره
عن سلعه ومجتمع ذكوري ينصف الرجال
ويحط من كيان المرأه..

مافكرت ارتبط ابد رغم شكد تقدمولي
بس مااكدر اخسر اطفالي ادري بوسام
ياخذهم مني سواء بالقانون او بالعشائر

تعينت بمدرسه بنين مدرسه حاسوب
والمدرسه ثانويه وبيهه ولد طالعه من الطريق
رغم بالفتره الاولى جنت البس لبس مستور
بس اسمع حجي هوايه كمت ادخل للصف
لابسه عبايه اسلاميه..

اكو مدرسات ويايه بس جان كادر ماكو
ويوميه ينسبوني على غير مدرسه
جانت ويايه مدرسه فنيه ومدرسه عربي
ونفس المعاناة يواجهنه رغم عمرهن جبير..

عندي طالب بصف خامس مبين جبير
بالعمر اني بطبيعتي اتجنبهم حته تحضير
مااحاسب لان مايفيد وياهم

مره من عدهن اجه نص الدرس ماقبلت
يدخل كتله روح جيب ورقه من الاداره
هو راح مااجه بعد والمراقب سجله غياب..

مرت ايام واني هاملته حته ماظلت ابالي
بس هو الظاهر حزت بنفسه شلون اطرده
كدام زملائه كام يوكفلي بطلعة المدارس
يسمعني كلام حته جانت وياي ام الفنيه
وكالت هذا نفس الشي سوه وياي..

لحد اخر مره جنت اشرح وهو كسلان خبص
نفسه يريد يكوم يشرح كتله تفضل جان يكوم
يكلي ست اني اريد اكلج انتي صاكه..

هنا اني انهديت بي ارزل وهو يضحك وسوه
الصف مهزله جماعته التعبانين يضحكون وياه
ماعندي حل غير اعوف الصف واطلع..

رجعت سولفت لبابا وراح للمدير يريد
يقدملي نقل وكال راح اروح للتربيه بلكي
احصلج غير مدرسه..

بيومهه جان اكو اجتماع والطلاب طلعناهم
من وقت واحنه جانت عدنه درجات وسجلات
تاخرت بالدوام فوك ال١ يله طلعت

امشي بالشارع وحدي ودنيا الظهر واكو خوف
بداخلي صعدت كيات ونزلت بمنطقتنه امشي
مااحس غير سياره تكسي طبكت عليه
رادت تضربني وهي فتحة باب هي
شحطه لداخل السياره...

جان واحد يسوق انتبهت علي هو الطالب
نفسه وواحد جبير بالعمر يطلع عمره
ب٣٠ هو لازمني ويكله هي هاي الشاده وياك...

بالاول جانت غايتهم مو اعتداء طلع تليفونه
وياخذلي صور حته يهددني بيهن
وكف السياره بمنطقه فارغه واني كلما
اعيط كلما يسد حلكي ...

يمكن الشغله الوحيده سويتهه صح هو
العياط اعض ايده وبس يوخر اعيط
اريد احد ينقذني بس منطقه فارغه
حته بيوت ماكامله ومثل الجوله..

من شافني هيج حاول يعتدي
عليه منين مايلزمني اضربه الطالب مايكدر
يجي للسياره بس يراقب وهذا مبين اول
مره اله لان كام يتوسل اعوفج بس لاتفضحينه..

بالاول اخذوا تليفوني وغلقوا بس من شفته
هيج كال كتله ميخالف مااحجي وانقل من المدرسه
بس خلوني اروح..

انطوني التليفون بسرعه فتحته
ونزلت اركض وهم حركوا السياره وراحوا
مااندل اني وين عيوني مغوشه من الدموع
وحايره استر بنفسي ركبتي وصدري كلهه
طالعه..

دقايق ودك تليفوني ماجنت اشوف بس عبالي
بابا بسرعه رديت اجاني صوت رجال غريب
وبدون اي مقدمه كال انتي وين اني ابن عمة
لبابه...

ماافكر بشي اريد احد يساعدني وصفتله المنطقه
وكتله ماكو ولاطير هنا حته ماكو احد اسأله
قريت هواي قطع واكله هيج اكو مكان كال هاهي
ظلي ابمكانج دقايق ...

شويه وشفت سياره سوده بس التراب
معجعج وراهه اني جنت واكفه بنص هيكل
بعده ماكامل بناء قميصي
ماساترني وتنورتي الفتحه مالتهه انشكت..

نزل نفسه الكالت لبابه اسمه ضرغام
نفس اللبس مالته وتقرب عليه من شافني بسرعه
دار وجهه كمت ابجي مااتحملت منظري..

راح لسيارته اكو خاولي جبير شمره عليه
خليته ع اكتافي وصعدت ورا وهو حرك السياره

صدك ضابط بس صعدت كام يستوجب بيه
حجيتله كلشي واني ابجي كال تندلين عنوان
الطالب؟!!

رانيا.. لا مااندله
ضرغام.. انطيني اسمه الكامل واسم مديركم الكامل
رانيا.. انطيته اله واني مدنكه

ضرغام.. يعني الانسان يكدر يحمي نفسه
ويكدر يوكع نفسه بوسط المشاكل
انتي بعدج صغيره وطالعه بهيج لبس وادرسين
ولد مراهقين شجابرج؟!

رانيا.. وضيفتي هاي؟!
ضرغام.. تكدرين تنقلين؟! وتكدرين تنجنبين
هيح نماذج؟! المهم هاي وصلتي لاهلج
والحمدلله ع السلامه..

فززني من صفنتي صوت الشرطي وهو يصيح
بأسم بابا حته ندخل لغرفه الضابط..

ماتوقعته هو نفسه فتح الباب ودخلنه
وانصدم بي شلون هيبه شلون كعده
الزي مالته والساعه سوده كام مد ايده سلم
ع بابا...

اجت عيني على نجماته موضابط هذا رائد
وبعده صغير شوكت صار اشرلنه نكعد
سولف ويه بابا واني مدنكه..

طلب من بابا يقدم الدعوه بأسمي
لان جان بابا مسوي الطلب بأسمه
طلعنه من عنده كملنه الاجراءات ورجعنه

كام من مكانه خله مسدسه بحزامه
وكال تفضلي وياي وانت ابو رانيا انتظرني
هنا بين ما اخذهه لقاضي التحقيق..

دخلني بغرفه بيهه واحد بكد بابا
سلم علي وسألني شكم سؤال
وكاله هاهي ابو ليث تحولت الاوراق
للقاضي..

بيني وبين نفسي اتسائل هو ابو ليث؟!
بس لابيده حلقه لاشي تذكرت ميته
مرته..

طلعنه من الغرفه مايباوع ابد
سلمني بيد بابا وكاله هاهي
اذا احتاجكم اتصل بيكم..

...

لبابه... رانيا مااداوم اخذت اجازه بين مايشوفون
حل واني ملتهيه بدراستي وامتحانات اتواصل
ويه ماما وفجر زينات...
رانيا سالفتهه مستمره والولد اخذ عقابه
وانسجن وهي ماقبلت تتنازل

بيوم منهن خابرتني ماما مبين من صوتهه خايفه
كالت ممنوع اطلعين وحدج وخلي خالج ياخذلج
اجازه شويه الوضع موتمام مافهمت شكو حجت
ع السريع وسدته..

رحت خابرت جراح مغلق ترددت اخابر ضرغام
بس كلت حاله حال جراح اتصلت بي جاوبني
سألته ع جراح كال بالدوام

لبابه.. صاير شي ماما كالت اخذي اجازه
ضرغام.. اي لداومين شويه عدنه جبار
متخبل بالجديد ومابينه طلابه جديده..

لبابه.. ليش اني شعليه؟
ضرغام.. يريد يزوجج بحكم انتي العانس مال
العشيره..

لبابه.. اني عانس اني بعدني صغيره
وماما ماكالت هيج؟
ضرغام.. شسوي لامج تضم عليج سألتيني
جاوبتج..

لبابه.. وين جراح ؟! خلي يفتح جهازه
ضرغام.. لاتخافين باجر خالج ياخذلج اجازه
وظلي بلبيت واذا مااجه جراح انه اجيج..

لبابه.. ضرغام الله عليك اني مااريد اتزوج
ضرغام.. ااي ميخالف عود اكل لجراح
لبابه.. شنووو؟
ضرغام.. يله مثل ماوصتج امج لاطلعين
بين ماانشوف حل..

لبابه.. مخبل مخبل !! شلون يحجي مستفز
وين رحت جراح صدك محتاجته تعودت بكل محنه
الكاه اول واحد ...

خالو اخذلي اجازه وظليت كاعده بالبيت
قلق وخوف ومصير مجهول حته ماما
ماتخابرني هوايه!!

عيني ع التليفون شوكت يتصل جراح
بيومهه للعصر دك بسرعه ركضت ع التليفون
جاوبته بلهفه بدون الو بسرعه كتله جراح..

جراح.. شلونج
لبابه.. موزينه جراح وينك ليش جهازك مغلق
... دوام والله وانذار وهاي المنطقه ع الحدود
ماكو تغطيه.

لبابه.. جراح مااداوم ضرغام كال جبار
يريد يزوجج..
... اهدي ع كيفج اني اليوم نزلت وشفت الهوسه
عمتي خاطبتج لابنهه وجبار منطيج

... ليش السبع وين انت موكلت السبع
يمنعه
... السبع عنده شغل بالعماره صار شهر
ماموجود وهو من يروح السبع تصفه الساحه
لجبار..

... وهسه راح يزوجني جبار مثل نور
جراح.. لاا طبعا انتي بس اهدئي ليش هيج
صوتج يرجف
لبابه.. جراح اني خايفه راح تجي امتحانات نصف السنه
ومنا هاي السالفه..

جراح.. ماادري يالبابه الله موجود لاتهتمين
مااعوفج خليهه ابالج اني وياج لاخر لحظه

لبابه.. كلام جراح يختلف كلساع يجر
نفس مبين مهموم وصاير شي سديته منه
واني ضايعه..

ركضت لرانيا حجيتلهه كالت انطيني
اخابر امج افتهم منهه دكت ع ماما من
رقمهه واني كاعده يمهه

ساهره.. يارانيا اني بنص الظيم صح مالهم
علاقه بيه وبفجر بس الشيخ ماعنده غير
لبابه مسوي علينه هوسه لازم يزوجهه
هنا ماعدهم بنات تدرس وماعدهم وحده
تعبر ال١٥ بدون زواج..

رانيا.. عمه اشتكي عليهم موهذا ابن حماتج
ضرغام ضابط مايشتكي وين صايره هاي
شنو ساكتين ع الظلم والجور وتحكمه بيكم
غلط والبنات كبار...

ساهره.. ماادري من احجي محد يسمعني
كلهم عدهم غايه ابراسهم ومحد يفهمني
البارحه اجه جراح وتعارك ويه الشيخ
ومصر ع زواج لبابه...

لبابه... اسمع كلام ماما وكلبي يفور
يعني حته هنا وماخلصت ومحد مأمن عليه

ثاني يوم من الصبح اجاني ضرغام اخذني
شكد بجيت وعيطت بس خزرني وكال
لادوخيني !!

اتوسل بي لاترجعني للقصر. وهو ساكت
مايحجي استسلمت للامر الواقع وياريته
يذبحني مثل اختي واخلص..

وصلت للقصر بوجهي للمشتمل بجيت
بحضن ماما وهالمره مبين الحزن بعيونهن
هي وفجر اجت عمه زينب سلمت علينه..

احس كلشي سريع حياتي بين يوم وليله
تتغير تعصف بيهه الرياح ويوميه
تكسرلي غصن...

ماطلعت ابد خايفه!!
ليش بس اني هلكد كارهني !!
حالي حال اختي فجر بس ليش هيج يحاربوني..

ورا العشه اندك باب المشتمل وصوت
جبار وهو يصيح يالله..

هنا تخبلت كمت اكمز اريد ماما تضمني
مااريده يضربني مثل قبل بس ماما تهدي
بيه وعبالك تعرف شي...

فجر فتحت الباب ودخل جبار والحجيه
وعمه زينب وضرغام وجراح وعامر وعاصم...
من شفت جراح عبالك شفت بابا

ابتسمت بوجهه وشعور الامان سيطر
عليه كعدوا كلهم بالكاع واني واكفه افرك بأيدي
اشرتلي عمه زينب اكعد بصفهه

صرت كدام جراح مارفعت عيني
جبار يسولف واني روحي احسهه
تريد تطلع...

جبار.. بنتي لبابه انتي كبرتي ولزوم تمشين
بعاداتنه وتقاليدنه وشوفت عينج ماعندنه بنت
بلازواج بعمرج ...

لبابه.. مااريد اتزوج انت مو ابويه حته تتحكم
بمصيري...

من حجيت هيج باوعلي جراح بخزره
وغمض عينه وفتحهه بملل..

جبار.. هذا السانج اكوم احشه الج
من بلعومج من انكول ماكو دراسه
محد طاوعني..

ضرغام.. ماحجت غير الحق ليش ماتتقبل
الكلام الينفرض عليك؟!

انت ابوهه؟!
حته تقرر مصيرهه
زين عندك ولد مامتزوج وتريدهه اله؟!

جبار.. ضرغام!!!!!!
ضرغام... خليك بالواقع جبروتك مشي ع عائلتك
فقط لاتدخل بغيرك خالي جبت السنين كلهه انت
ظالم ماعاجبك تجرب شعور تكون مظلوم؟!

عامر.. ضرغام موچنك اتجاوزت وماتدري
بروحك يبن عمتي..

ضرغام .. ماتعلمني حضرتك شوكت احجي
والمن اوجه كلامي اذا انت نسخه ابوك
لاتمشي هاي السوالف براسنه ترى جبار واحد
كافي علينه مواثنين..

جبار.. تحجي صدك يضرغام تجاوز ودكول جبار
بدون الشيخ هاي التربيه التعلمتهه

ضرغام.. عجيب!! ماشايف احد ينغث من اسمه
انت مو اسمك جبار وخالي اخو امي
واذا ع كلمه شيخ فأنت شيخ ع غيري

الحجيه... جده ضرغام دمك شوكت يبرد
خايب استجن مو راسك انترس شيب
جنك بارود

عامر.. لا شيخه هو من سكن بغداد
شتترجين منه بعد..

ضرغام ..لك عامر تطلع لا اكوم اخربط
وجهك وانعل ابو اليطلع وراك كووووم بسرعه
قبل مااخلي السانك يحجي مگلوبي..

لبابه.. ضرغام كام لعامر وعاصم دفع عامر بسرعه
وطلعه ورجع ضرغام كعد وطبك المخده
وارتجى وفتح الجكاره ...

عاصم .. هسه احنه اجينه انحل المشكله
لو نتعارك
ضرغام.. يامشكله؟! ترى زودتوهه كل واحد بيكم
عنده بنيه يتحكم بيهه مامسموح يتحكم بغيره

الشيخ.. ياضرغام خلينه نتفاهم كعدت البنت ببغداد
غلط يم خالهه لو تجي هنا لو انزوجهه

ضرغام.. جبناهه هنااا وين تدرس
بمدرسه ابن عامر؟!

الشيخ.. چا اله تدرس هاي بناتنه كلهن مايدرسن
حالهه حالهن ويه اخيتهه..

ضرغام.. اخيتهه موانت مسؤؤل عنهه خابر
السبع وكله وشوف رده يقبل..

الشيخ.. چااا اتزوج لبابه انت ؟!
ضرغام.. انت شتحجي ليش تخلون الواحد يطلع
من طوره

ماعندك راي ولا عندك معرفه بس زواج وخلفه
كل انجازاتك تزوج بالقاصرات ومن يوكعن بمصيبه
تغسل عارهن..

تماديت بشيختك هواي وروح اولادي
تعرف الموكفني عنك شنو جان هسه
ساحلك بالسجون ...

الشيخ.. تهددني وحق من حق الحق امحيك
من الوجود خاف شايف روحك بالنجمات
ع جتفك

ضرغام.. يابه اني هم زايده مني كاعد اناقشك
ظل بمكانك نص ساعه وعود تعال عاتبني..

لبابه.. طلع ضرغام والتليفون بيده
ركض وراه عاصم والحجيه يتوسلون بي
بس سمعت الحجيه دكله فكر بينه ولك
شنو ذنب الجهال...

جراح ساكت ماحجه ابد اباوعله اريده
يحجي وهو مانطق حرف واحد طلعوا
كلهم وماما مخليه ايدهه ع راسهه..

شويه واجت عمه زينب كالت تعالوا يمنه
بالمضيف السبع وصل !!

رحنه كلنه وهاي اول مره ادخل المضيف
شكبره وبي ديوان كعده ودلات كهوه بالنص...

ضرغام كاعد بصف السبع وجبار بالزاويه
وهالمره عباس ابن جبار الجبير كاعد
ورجل عمتي فيهن هم كاعد...

الشيخ.. ترضاهه يالسبع ضرغام يتجاوز عليه
وع عامر بمثابه اخو الجبير

السبع.. رحمه الله امرءُ عرف قدر نفسه
محد يتجاوز عليكم اذا ماانتم جبتوهه لنفسكم

جبار.. والله خلي انزع عگالي مدام هيج
الحجي صار يبن اخوي العود

السبع.. ابو عامر جاي من طريق طويل
ومايوم رحت واجيت اذا مالگيت طلابه
جديده..

عامر.. ياخويه يالسبع دراسة البنت غلط
شنهي ماعدنه بيوت شدكول علينه الوادم
تدرس ببغداد ..

السبع.. عندك حل احجي ماعندك اسكت
الف مره سمعت هالحجي المابي نفع
احجيلي ابو عامر شنو اعتراضك؟؟

جبار.. البنت محل زواجهه اما تزوج حالهه
من حال بناتنه اما تكعد يم امهه واختهه
وماتطلع جنطتهه بظهرهه تريد تدرس..

السبع.. بعد اكو واحد عنده امر زايد
مدام كاعدين خلونه نحجيهن؟!

جبار.. ماكو شي انه انطيت كلمتي لعمتك
نوفه وكتلهه البنت لابنج وهسه تريد تفشلني

السبع.. لبابه تقبلين تزوجين؟!
لبابه.. لااااا

السبع.. سمعت ردهه!!! ماكو اكراه بالزواج
ماكو غصب هاي مشيهه ع حفيداتك مو
ع بنات عمنه

جبار.. بنت عمك يالسبع چنك نسيت ثار
ابوك ودم اختك وكمت ادافع لبنت قاتل

لبابه.. متحملت بسرعه كمت وكفت واعرف غلط
الحجي كدامهم بحكم شيوخ وزلم بس كلشي
ولا ينذكر بابا..

حجيت واني اشر بأصبعي بابا مو قاتل
بابا عمره مااذاله شخص مو مثلك يذبح بدم بارد
ومسوي نفسك شيخ

بابا ماقتل احد هو كال ماقتلت اصلا بابا
جان بالشغل وهاي تهمه دبرتوهه لبابا
وخليتوا اسلاحه يم الجثث بابا بريء
انت قاتل ويطلع كلشي منك

ماجنت حاسه بالي احجي بس انفعلت
من اشوف انسان مثله ايده ملطخه بدم
ويبرىء نفسه ...

سديت اذاني عن كل الاصوات الداير مدايري
بس صوتي اسمعه
بس صوت بابا من حجه السالفه يتردد
ع مسامعي...

كام عامر يريد يضربني ومنعه جراح
ماما تريد اطلعني والسبع كال عوفيهه!!

جنت ارجف ايدي ترجف شفت ايد عامر
مخليهه ع السلاح البصفه
اذاني كامت توش هالمره من الخوف..

صارت اشارات بين السبع وجراح
شفت السبع رفع حاجبه واشرله براسه
اجه جراح اخذني من ماما وطلعني برا...

جراح.. هاج شوي اهدي ماادري بيج هيج
وكحه مدري سباعيه!!

لبابه.. فتحلي الصونده مي بارد غسلت وجهي
وكتله ماشفته شلون يتهم بابا وهو بريء

جراح.. لبابه صيري عاقله وفوتي
جوه وياي وممنوع تحجين والي احجي
اني كولي بكيفك

لبابه.. شنووو؟!
جراح.. والله ماادري شكول دتعالي وهي تنحل

لبابه..رجعنه للمضيف جبار عيونه ناطه
متخبل وعامر نسخه ابووو والكل ساكت

السبع.. هسه اسمعوا لبابع تظل ع دراستهه
وفجر من السنه الجايه ترجع ويه اختهه
السنه تخلصهه لبابه ببغداد والسنه الجايه
تدرس هنا واني اتكفلهن ..

جبار.. ماكو هيج حجي يالسبع دراسه
ماكو احش رجلهه التطلع..

السبع.. اعيد الكلام؟!

لبابه.. الكل سكت وعبالك بالاعاده انفجار
كلهه سكتت حته جبار ...

السبع.. مشكلتك دكول لبابه يجون عليهه
وكبرت ولازم تزوجهه موصح؟!

جبار.. چااا شكول صار ساعه
السبع.. انه اخطب لبابه لجراح انت اليجيك
كله موگفيهه لابن عمهه ...

لبابه.. من كال هيج بسرعه التفتت ع جراح هزلي
راسه بمعنى وافقي رجعت دنگت

جبار.. انه مااقبل جراح ماتوالمه لبابه
جراح.. هم عوزك تدخل بيه لحد الان ساكت لان حجه
بمكاني السبع لهنا وحدك بنت عمي الي
واني مسؤؤل عنهه ...

جبار.. هيج صار الحجي يولد اخوي وابن اختي
تعلون صوتكم عليه وتمشون رايكم بالگوه
يصير خير...

لبابه ... بسرعه طلع وعامر طلع ورا والسبع كام
هو وجراح وضرغام ع نفس كعدته مرتجي
. ع المخده...

التفت السبع ع ضرغام دفره برجله ماتكوم
ولك ماتجي للبستان
ضرغام.. اذا يروح جراح مااروح

جراح.. دكوم ولك من يمته صاير تزعل
صاير جنك شايب خلكك كصير
السبع.. شعدكم متعاركين؟!

الحجيه.. يمه ضرغام صاير ماينحمل عوزه يطك
الواحد خايب خلي انزوجك بلكت لنك فاك علينه

ضرغام.. برأيج شيختنه العرس يفك
الحجيه... منا البنات چاااا شلون مايفك ولك

لبابه.. السبع مد ايده لضرغام لزمهه وكام
طلعوا تلاثتهم للبستان القديم ولا كأنو شي
صاير..

زين واني شو خطبوني وعافوني
اني هسه شنو وضعي ؟!