- غلط عن غلط يختلف ام اثار، هاي مو بس غلطت لا و ضمت غلطتها و خلتها براس غيرها

- صغيرة و غيرها لعب براسها، اني مو علمودها والله بس انقهر هاي سادس معدل و ما تكمل حرامات ، خوفها هددها بس لا تبطلها الله عليك

- ان شالله، ايام نشوف والله كريم، ام اثار انت غالية و زادت غلاتج بتصرفج الاخير

- الله يخليك و يحفظك

- الله يسلمج، ديار اني ما رايد اخرج عن شرعية الكلام، بس رايد اعيد الموضوع مرة ثانية و هالمرة على الساني، اني رايدج زوجة على سنة الله و رسوله

والشاهد الله لا تعتقدين اني رايدج لخدمة امي لو للبيت لو لا لا ابدا، اني افتخر بكل الأنت بيه و اني مستعد حتى افتحلج مكتب محاماة زايد على وضيفتج و ترتفعين اكثر ويرتفع اسمج، اني رايدج لأن اني اعزج و انت الج محبة بكلبي

- فاجئتني بالموضوع، اني ما مفكرة بال....... قاطعني

- اعرف و اني انطيج مهلة تفكرين شكد ما تريدين يومين شهرين، حتى لو سنتين و الله راضي.

انحرجت شكوله بعد، كلت اله :- الله كريم ، اترخص هسه مع السلامة الله وياج

قفلت الخط من عنده .. و بقيت افكر ويا نفسي ، شي مستحيل افكر بغير خالد .. ابد

بس ما اعرف الموضوع اخذ من تفكيري ..
اني بالفترة الاخيرة تغير وضعي تغير شكلي لبسي
الناس الها الظاهر .. جان كل اليخطبني اعوج و يريدني اكمله العنده مريض لو الناقصه شي ..

الموضوع اختلف، هسه الواحد كام يشوفني بعين المظهر، بنية عدها بيت و سيارة و وضيفة وشكل و ترتيب .. كثروا اللي يتقدمولي .. بس ارفض دائما ارفض رفض تام و شايله هالموضوع من بالي
لأن ولا ليلة تمر باليوم و اني ناسية خالد
ولا يوم يمر و ما اتخيله ..
خالد بالنسبة اليه كلشي و غيره لا شيء
فلهذا ما اكدر اقبل اي مشروع زواج

لما تقدملي الشيخ، رحت حجيت ويا عذراء
اني وياها متعودين نفتح كاميرا و نكعد نسولف بالساعات

فمن طرحت عليها الموضوع كالت :- اي و ما توافقين و شبيه ، شو رجال بيت و مكانة و قيادي و مساندج و يحبج و رجال و هيبه شتريدين اكثر من هيج

- اريد خالد

- خالد صارله ٣ سنين وينه ؟

- كلبي يكلي فد يوم يرجع

- ديار احجي لو تزعلين ؟

- احجي

- الصراحة والله ما شفت وحدة غبيه و ما تفتهم مثلج

- اشكرج

- لا جديات والله ، اذا تريديني وحدة ما تهتملج و ما تهتم المصلحتج ما خسرانه شي اكلج ارفضي و خلي يولي

بس اكو فرص تتوفر اليوم ما تتوفر باجر.. متعرفين باجر شيصير .. تخسرين هيج رجال ليش ؟

- من كل عقلج و اعوف خالد

- خالد ما موجود اصحي ديار و ثقي بالله العظيم لو خالد موجود و يريدج جان كلتلج عوفي و اخذي الشيخ

ولج انت غبية .. شنو البخالد ينراد ؟ .. لنفترض رجع
تتزوجين واحد متزوج اثنين .. و ما عنده وضيفة ولا شهادة ولا بيت ، و مو بس هاي ، طليقج ابن عمه .. لا و مو بس هاي، امج طليقة اخوه ...و مو بس هااااااي .. اهله يعتبرونج عااار ديار

ديار خالد جان يحب ضحى و قاتل عليها مقاتل ما قاتله عليج، و اخءها .. و انت كالج عوفيها للزمن يحلها

يعني قيسي شكد جان يحب ضحى و تقاتل عليها و اخذها و خلف منها و المفروض يزيد حبه .. شسوا ؟
بأول موقف من ضحى شالها من باله و حطج بمكانها
صح لو لا ؟

شنو نسيتي اغتصابه الج ؟
نسيتي شلون بس لمجرد انت ضحيتي حتى يرجع لعائلته كام يعيرج بأمج و اغتصبج بدون ما يهتزله جفن لأن يشوفج مثل امج

وكت اليحبج انت شريفة ووكت اللي تضري .. انت بت امج ... هذا خالد ديار ؟

لا تثقين اكو احد يحب ويأذي
اكو بشر يأذون اليحبونهم بس مجبورين، يمكن تجبره الظروف على شي يتأذى حبيبه منه، فرق عن اللي يأذون بحقارة .. اللي سواه وياج خالد حقارة و عن قصد ديار
و انت بكل غباء نسيتي كل اغتصابه و سوالفه والله شنو احبه ، انعل ابو الحب اليذلني

من حبيتي خالد ولليوم شجنيتي ؟
زوجج اول مرة لواحد مختل لأن يشوفه يناسبج .. ما فكر بمشاعرج .. بعدها لان كلبه لان .. حبج
و من عفتي .. ما تردد بأذيتج
خلاج كل يوم تعيشين شعور الخيانة ويا رجلج
خلاج لا انت لرجلج ولا انت لروحج ولا انت اله
لحد ما اطلكتي شصار . من خيروه لو تبقى بالعشيرة لو تتزوجها .. كنسل موضوعج و كال خليها على الله
هذا خالد

- ليش تشوهين صورته كبالي هو ما جان هيج

- لا جان بس انت اللي حبج عاميج عن كل عيوبه، ديار رحمة لاهلج اصحي، من يوم الطلعتي من بؤرتهم سمعتي احد انتقص من شرفج . احد عيّرج ؟
بؤرة اطين حظج بيها تحنين الها ليش .. والله احب ؟

الحب وحده مو كفاية بعدين ليش تصيرين انانية، الشيخ هم يحبج و صارله سنتين من خطبج و ما دور غيرج ولا حاول يخطب و هو وياج ع الصغيرة و الجبيرة

اذا جان خالد بموبايل يمشيج و يكلج سوي هيج و حطي هيج .. هذا يختلف ، هذا يسعالج برجليه و يرفعج

ترا الرجال هم كصة ، يطلعلج واحد تشوفين على كصته كل الفكر و يطلعلج لاخ تشوفين على وجهه كل الخير ، و صادق رجال شهم متدين صائم مصلي يخاف الله و مجاهد بعد و مو بس مجاهد .. قائد هم تعرفين يعني شلون مكانته حلوة و ما يتقارن بغيره ابد

وكل اللي انت بيه هسه بزوده .. هاي اني وياج مو تخرجت الله وكيج من يطكني الافلاس لو ابقى اجدي من امي و خطيبي لو اروح اطلع للمحكمة بلكت احصل دعوة و اكسب بيها .. و انت بلا حسد اللهم صل على النبي وضيفة و سيارة و ... خايبة حتى معيشج ابيت يطك بالكاع بفلوس ايجار هن و التراب وما فد يوم حجه ولا جاب سيرة فد يوم وواكفلج وواكف لاخوج

- يعني هسه انت شنو جاي تقنعيني، لا تحاولين ما اكد ، جربت مرة وفشلت

- طبيعي تفشلين حبيبتي اذا مكابله خالد وجه بوجه منين ما افتريتي لكيتي شلون تنسي و شلون تعيشين ، طبعا ما تنسي و طبيعي تصير مشاكل

هسه الامور تختلف ديار .. خالد صارله ٣ سنوات غايب الله يرجعه بالسلامة .. رجع تتأملي ؟
و ترجعلج ضحى و رغد ويييييي شهالملا القذرة
الله يرفع بيج و انت تحنسن للقذارة تف عليج

- لا عذراء والله ما اكدر انسى خالد

- ما رجع شلون ؟ ليش تضيعين عمرج على اطلاله ..
الله ديكتبلج حياة افضل عيشيها .. يصير عندج اطفال تستقرين يصيرلج سند ، يلفيلج تلفيله
جذب المرة ما تحتاج رجال، نعم ما تحتاج ذكر
بس هنيالها التلكي رجال و لا تكولين ما احتاج رجال
ترا احنا بشر .. بالليل ما تحسين ما تحنين من فلك الفلكج شنو ثلاجة مجمدة بت الاوادم

- الاحتاجه خالد .. لا تكليلي غيره صعب والله

-يبوووووووووووو اشك هدومي صار ساعة الغي تالي تكول اريد خالد ، يربي ماكو حفرة اطم روحي بيها

ضحكت. . لا جديات والله ما اكدر انسى

-ولج والله بحضن حضنين من صدوقي تنسين خالد و اهله ولا تكولين جان نسيت، ذاك الوكت يختلف و الظروف تختلف احنا ولد اليوم

- عوفي ما اريد

- براحتج بس بداعتي اختلي ويا روحج وفكري زين ولج كافي ضحيتي بروحج وتفوتين سنين عمرج تالي تنعض الاصابع ندم، اكعدي ويا نفسج وفكري

قفلت الخط منها ... حجيها ظل يدك براسي
لا .. خالد ما جان هيج، هو جان احلى شي بحياتي
جنت من اشوفه اطير من الفرح ، هو الإنسان الجان ساندني بكل موقف .. هو مو هيج

مستحيل اكدر اوافق .. لا .. ولا ارد جواب اغلس احسن

غلست ع الموضوع و بكل فترة احس بتلميحاته اليه، وما ادير بال ، غلقت قلبي بوجهه ما انطيت مجال ابد

... الا ما بيوم فات اسامة ملهوف
كال :- سمعتي ؟

- خير ؟

- ابو مرتضى

- شبيه

- تصوب ع الساتر و حالته خطرة و ناقلينه لكربلاء للعلاج

- لاااااا

- اي والله كلش انقهرت عليه

- شلووووون هيج ؟

- بمعركة الفلوجة هو ع الصد الامامي بالمعركة بمواجهة داعش .. و متصوب اصابات قوية، كومي روحي لاهله ترا خطية الحجية و مرتضى ورقية كاعد يبجون

كمت من مكاني، كلت لاثار ديري بالح على ابوي خل اروحلهم، لبست بسرعة و كلبت عدهم .. الحجية مفرفحة تبجي و تصيح :- يمة ابني راح يممممة شمعة بيتي يا يمة

بعدني، هسه فتت ، فات سلام اخوه الجبير و عائلته وياه ، انوب اختهم .. وواحد وره اللاخ التمو و الحجية تبحي و تصيح

مرتضى يبجي ، رقية ...
الحجية تصيح اريد اروحله .. كاللولها :- انت رجليج ما تعينج وين تروحين اكعدي هنا احنا راح نروحله

بقت تبجي و تصيح بس محد اخذها
كعدوا بناتها يمه، و اني كابلتهم، نعت نعي يشك الگلب على ابنها ، بقينا نصبر عليها و نبجي وياها

كرابتهم اجو و نسوان كومة صار البيت هوسة
و الرياجيل كلها تعنت اله لكربلاء .. الدنيا انكلبت عليه هناك .. لا وكفهم طريق ولا شي .. سلام خابر اخته يحجيلها يكللها المستشفى ما فرغت الناس انكلبت علينا

العرفناه هو بغيبوبة .. و العتبة الحسينية متكفلة علاجه بأفضل كادر طبي ..

بقى بالنا مشغول عليه .. مسويله عملية ..و بعده ما كاعد .. كمت اخلص شغلي بالدائرة و ارجع للبيت اشوف ابوي شيحتاج و اروح لبيت الشيخ

الصراحة وكتها كلش خفت عليه
رجال كلش ما يستحق يتعرض لإي مكروه ، المنطقة كلها تحبه و تحترمه ، كلمته طيبة ويا كل الناس، وواكف للجبير و الصغير

٦ ايام يلا كاعد بالمستشفى ..
بكعدته تعدى مرحلة الخطر .. عاد بشير هنا .. ذبح ٣ خرفان جراية دم عنه، ووزع اللحم.

ورا ٢٢ يوم يلا طلعوا من المستشفى الحمدلله مستقرة حالته ، بس يحتاجله راحة تامة

جان وكتها رمضان لما طلع ، خواته و اخوته جانو موجودين، اني تعذرت ابقى رغم اخته دزت عليه بس عيب هم لمة عائلية عود باجر و امر اتحمدلهم بالسلامة

بقيت مكابلة ابوي و اثار و اسمع الصوت و الهلاهيل و الفرحة بطبته ، و هم ذبحوا على رجله بطبته للبيت سالم ..ووزعولنه لحم و دزولنا فطور

اني و اسامة و اثار صايمين ، بس ابوي لا .. ولو ابوي ماكو لا حركة ولا نفس .. ارفع اوكله، انزله انومه
ووكت تشطيفه اسامة يدخل وياه
تلعب روحي منه، و اصلا اسامة ميقبل احنا ندخل وياه

ثاني يوم الظهر رحت لبيت الشيخ صادق ، جان نايم هو، باركت للحجية و بست راسها ، خطية فرحانة

قبل الفطور بشوية، كمت من مكاني حتى اروح للبيت
طلعت للكراج، صادق صار كبالي لازم جرحه وكوة يمشي ، حجيت :- الحمدلله ع السلامة ان شاءالله تنذكر و ما تنعاد

- هلا بيج عيوني شلونج شلون اخبارج

- والله بالنا يمك كلش قهرنا خبر اصابتك

- الحمدلله على كل حال، وين رايحه ؟

- للبيت

- عيب وكت فطور فوتي

- لا تسلم ابوي مناكه محد اله تعرف

- اخذي فطورج وياج ، علياااااا

صاحت :- ها خوية ها

- فطور لام اثار لا تخليها تروح هيج

بقيت ارفض منهم و اكلهم ما احتاج بس هم اصروا، سوولي صينية و مرتضى وصلي إياها للبيت

بعد ٣ ايام، الخوات كل وحدة راحت لبيت رجلها و فضى البيت مالتهم ، اخوانه يجونه عصريات
رقية امتحانات سادس بعز رمضان .. و ملتهيه بالقراية فوك ما تنزل

مريت عليهم ورى الظهر كلت اسلم عليهم و اشوفهم اذا محتاجين شي او فطور، فتت للبيت، باب الإستقبال جان موجود

شفت الشيخ لازم صدره و مدنكة متوجع ، دكيت الباب :- مرحبا ، تحتاج شي ؟

اشرلي تعاي، اجيت يمه ، انطاني ايده و حجه بوجه :- بس كوميني

تقربت من عنده و سندته ، جان يكول:-لا لا وخري ميجوز حرمة شرعية

ابتعدت من عنده، صاح :- اااااااااااااااااااخ

لزمته :- شيخ بس اكعد، ارجع اكعد

- اديج يمعودة خربتيهااا

-اي بس اكعد

- الكعدة اذتني، اريد اكوم

كومته و هو يصيح حرمة شرعية ، نفرت منه :- اي دخيل بختك يا شيخ متغزله بيك اني و طرشتني بحرمة شرعية غير اساعدك

ابتسم، كومته، رجله جانت كلش مأذيته ، و الكعدة مأذيته، و يلوب لا يكدر يكعد و لا يكدر ينام ، كال :- ولو اتعبج بس جيبيلي علاجي

جبتله علاجه و انطيته المسكنات، رجع كعد، كلت :- هسه متأذي ؟

- اني من زمان متأذي، ما الي مرة الداريني بالله بربج هاي حالة

- ابتسمت

ابتسم هو و يكول :- اي اضحكي يابه اشعليج انت

- اروح اشوف الحجية ، لإن اذا طولت اكثر تكبر الحرمة الشرعية.

ابتسم و هو يكول :- استغفرك اللهي و اتوب اليك

رحت للحجية سلمت عليها ، و شفتها شتحتاج، وكفت بالمطبخ ، طلعت دجاجة كصصتها و خليتها ع النار و سويت الهم تمن و الشوربة خليتها تفور

اجا الشيخ يتمشى :- لا اتعبين نفسج ام اثار هسه اني ادز مرتضى يجيب اكل من برا

- لا حطيته ع النار وراح اوصي رقية عليه

- شوكت تتكرمين و اديرين هذا البيت وراعي البيت

- الاكل تقريبا استوى ، راح اصعد لرقية اوصيها تنزل يمك و تكمل الباقي

عفته و طلعت و هو يتنهد وراي

وصيت رقية و طلعت من البيت، بقيت افكر بيه و بتصرفاته و ردات فعله .. وارجع اهز راسي ..
لا .. ربي ابعد هالافكار عني
غير خالد كلبي لا يهوى و لا يريد ما اكدر

بالليل .. اجا مرتضى و جايب النا ماعون بقلاوة و كال :-هاي ابوي دزها و يكول اقروا الفاتحة بثواب الإمام علي

- كلت اله مشكور

شويه و دزلي رسالة :- وصلتكم البقلاوة ؟

- اي

- بنت الناس رديلي جواب، متت و عدلت و اني الكلمة ما سامعها منج

- جواب شنو

- اني كلت الج سابقا رايدج و ما رايد اتمناج بالحرام ، حرام عليه رايدج حلال

- اني ما ارهم اصير زوجة

- شنو البيج ما يرهم شو بنية و ما شالله عليج

-ما ارهم

- اعتبره هذا جواب ؟

ما جاوبته .. عفته
ليش ما اعرف، ما جاوبته وبس

ثاني يوم العصر .. اندكت الباب
كمت من مكاني .. فتحت الباب ، جان تطلع امي كبالي

ميعاد :- هلووووووو اني اجيييت.....

☆☆☆☆☆☆☆

#اتمنى_ان_افعلها

الحلقة_58

السند ( رب )
و كل من على الأرض وحوش 🖤

..........

... عودة في الزمن ...
... بغداد_الدورة_عام 1990 ...

مكان نفايات و زبالة يطلع منها صوت طفل يبجي بقوة، ليل و ظلمة ومحد بالشارع و الدنيا جانت اواخر شهر اذار، الجو بالليل بارد و الطفل يبجي بصوت واضح

... مر رجال جان شبه سكران، جان راجع من أحدى المقاهي و النوادي الليلية و راجع بالليل للبيت
...سمع صوت الطفل

وكف يستمع :- اكو طفل لو اني كمت اخربط
ركز ..... اي والله صوت طفل
تقرب من الزبالة ، جانت اكو طفل يبجي بقوة

بعدت من عنده الورق اللي مطاير عليه و الزبالة، شلته و هو غاص بالبجي، باوعت يمنى يسرة محد بالشارع
ردت اروح اقدمه للشرطة، بس اخاف من الحزبية ياخذوني، فراري و شارد من الجيش و اتختل ليلية اطلع حتى ما يكمشوني.

ردت اشمره للطفل و اشرد، بس الوكت متأخر و بارد و هذا طفل .. خطية احتمال لو يبقى بهذا الجو يموت ، شلت الطفل و اخذته للبيت

دخلت البيت كله نايم، العائلة بس امي و ابوي و اخوي الجبير و مرته و اني، على صوت الطفل كعدت امي :- شنو هذا ولك

- طفل لكيته بالزبالة مشمور خطية

- صخام الصخم راسك و احنا شعلينا بيه شنو تريد تبلينا ولك، منين ما جبته ترجع

- وين ارجعه والله الجو بارد بره، اخذي هاج شوفي شتسوين بيه سوي

- ولك ماهر وين رايح تعال .. ماهر ، عزا العزاك كون .. بالله منين اجتنا هاي المصيبة ، اش حبيبي اشش انوب مصخن ياربي

نزلت مرت ابني :- شنو هذا الطفل اليبجي عمة ؟

- اندري منين جابه النا ماهر، خطية مصخن انوب جيسي حرارته شوفي

- اي خطية مصخن، عندي علاج مال خافض حرارة جيبي اشربه

- اخذي و اني الصبح اودي للشرطة و نبلغ عنه

اخذت الطفل كلش صغير عمره مال يوم واحد يومين هيج شي، يمكن نغل و امه شمرته حتى ما تبتلي بيه، الله لا ينطيهن طفل هلكدة و يشمرنه.

بدلت الطفل .. طلعت بنية مو ولد .. خطية شكد وشمروج شجابج لهالدنيا ما تكليلي ..

لفينا الطفلة و رضعناها حليب ممة من مالت ابني و نامت، عود باجر للصبح نشوف شلون نتخلص من المصيبة الجابها ماهر

....ثاني يوم .. بنت هاي العائلة اجتهم من الصبح مسيرة، طالع رجلها للجيش و هي اجت يم اهلها
.. هذه البنية ما يصير عدها اطفال .. ورجلها يريد يتزوج عليها لإن ما تخلف، و هي مقررة لو تزوج تطلك من عنده ولا تظل بذلة الضرة و تشوف الضرة و جهالها، وهي بوحدها محد الها

دخلت لبيت اهلها .. حتى تشكي لامها همومها .. تفاجئت اكو طفلة ابيت اهلها

- يمه مني هاي الطفلة ؟

- مصيبة و جابها على راسنا ماهر

- منين جابها

- من الزباله منين يعني

- صخام بوجه ياهو هذا الشامر ضناه بالزبالة، ناس تتحسر ع الطفل و ناس تشمر

- تلكينها بت وحدة بت ليل حبلانة و ما تريد تتورط بطفل و شنرتها هن ذن دين مدينة وحتى يخافن ربهن بطفلة

- يمة شو تعلق كلبي بهالطفلة

- لا تعلق ولا تعلقتي خليني اخذها واوديها للزبالة

- ما راح يكلولج منين جبتيها ؟

- اكلهم من الزبالة

- و شلون لو كالولج دلينا

- عزا و صخام براسك يماهر، كومي كعدي اخوج خل يدليني وين لكاها حتى ارجعها

- يمة خليني اخذها الي، اذا هي مشمورة لو اهلها يردونها ما شمروها، يمكن الله دزها الي

- شدزها الج انت هاي ورطة و مسؤلية استري علينا

- عليج الله يمة انت مو ما تريديني اطلك من هادي، اخذ الطفلة التهي بيها و خلي يتزوج ما الزمه

- انت صاحية

- اذا وديتيها راح يشمروها بالميتم، خليها الية يمه الله عليج

- انوب انت منين طلعتيلي

- اني اداريها والله

...اصريت الا اخذ الطفلة، هي طفل ما الها ذنب بذنوب اهلها، اخذها عندي و اربيها على اديه
من الفرحة لبست عباتي و طلعت للسوك اشتريتلها هدوم و حليب وممه ع الاكدر عليه و رجعت للبيت
وتشكلت بركبة اهل الا توافقون اخذها

وافقوا بشرط رجلي يقبل، انتظرت رجلي لما نزل من الجيش وكلتله على الطفلة، اول بداية ما رضى و كام يحجي ولا تجيبيلنا بلوة و ما النا علاقة

كمت ابجي و اكله :- انت حقك ما يهمك تريد تتزوج و تخلف ويصيرولك جهال و تفرح بيهم، ما تفكر لو تزوجت اني شنو حالي شظل لا طفل ولا ونيس على الاقل خلي هاي الطفلة تونسني و انت تزوج ما امنعك

هو من سمع هيج ووافقت على زواجه، لان .. ايام و اتقبل الموضوع و خلاها عندي .. سميتها (خديجة ) حبيبتها و اعتنيت بيها و صارت بعز روحي
كل دلالي الها وروحي بيها

تزوج هو و صار عنده جهال، بس يحبها لخديجة لأن هي اول طفل جانت النا بالبيت، و هي فرهه تضحك للهوى ، و هو صار عنده ٢ ولد .. و البنية حيالة مو مثل الولد، صح ولده يحبهم اكثر، بس هاي الطفله دوم يضحك الها

كبرت و هي بغرفتي و بين ادية، مشينا بمعاملتها و سجلناها بأسمنا، و دخلت مدرسة و جنت كلشي عدي الها، اهتميت بيها اهتمام ما صاير
كبرت الطفلة .. و صار عمرها ١٢ سنة
و هي ما تعرف حقيقتها .. كله تصيحلي ماما و تصيح لرجلي بابا

الى ان اجا اليوم لللي اتمرضت بيه !

خديجة :- جنت اني اكثر وحدة مدلله بالعائلة، ابوي متزوج و عنده خمس جهال ٣ ولد و اثنين بنات من مرته الثانية، و بس اني لأمي، اخواني ما مدللين بكدي، لأن هم هواي ، و اني وحيدة امي المدلله ، المحد يطخني الما تقبل احد يصيح عليه او يضوجني و شريد مدلله

.. مرت ابوي جانت تكرهني حيل و ما جنت اعرف ليش جانت تسميني ( اللقيطة النغلة ) و هواي جانت تفشر عليه بس امي تردها

لحد ما تمرضت امي صار عدها سل رئوي و اكتشفته متأخر جانت تكح و تاخذ شراب مال كحة كل ضنها عدها كحة الى ان راحت للدكتور و صار يلومها لإن ممراجعة على حالتها

صارت حالة امي تسوء يوم بعد يوم ، الى ان صحيت بيوم على صوت الصراخ، .. العرفته ماتت امي
حيل انقهرت وبجيت و انعزلت و حتى حاولت اموت بس ما متت .. كلش كرهت الحياة من بعد امي

بقيت عايشة ابيت ابوي، بس مرت ابوي كلش ما تحبني و اخوتي كبل جان يغارون مني لإن مدللة اليوم كلهم يكرهوني، و ما عدت مدلله ، ولا الي ام بعد و ادافعلي و تردهم عني

بطلتني مرت ابوي من المدرسة و اني ما مخلصة صف سادس ابتدائي و بقتني لشغل البيت و قنعت ابوي و هي تكله ( العرج دساس ما تعرف اهلها منو وتخليها تكمل و تروح تجيبلك مصيبة استر عليها و كعدها بالبيت)

ما جنت اعرف شتقصد اهلها منو و من اسمعها ادوخ ، و ما اعرف احل السالفة .. امي ماتت شنو ما تعرف اهلي

.. الى ان وعيت ع الحقيقة و عرفت اللي ماتت مو امي، و انما وحدة ربتني، و اني لكاني خالي ماهر الله يرحمه بالشارع مشمورة و جابني لبيت جدي

خالي توفى بحرب الكويت ..
و بيبي توفت، بقى جدي و بيت خالي كطعوا علاقتهم بيه لما ماتت امي، الظاهر جانو يتقبلوني على مود امي من ماتت نكروني

بقيت جوا ايد مرت ابوي، شفت على ايدها انواع العذاب .. شغل و تركيب كله مشكل براسي، حتى لو اجا احد و خطبني ما تنطيني، تريدني لخدمتها

حبيت واحد جيرانه اسمه (مروان) جان دوم من اصعد ارش السطح و انام اشوفه على سطحهم ، كم مرة دربلي رسالة و جنت اطير من الفرح لو وصلني شي منه

وراها كام جابلي مبايل صغير و خلاه عندي و كمت اخابره بليل بدون ما احد يدري، جان وكتها توه نازل المبايل يمكن ٢٠٠٤

جان عجبه عدي المبايل و كلش فرحانه بية بس اضمه بصدري و الشاحنه ماته اضمها بين الغراض الهوسة الفوك حتى محد ينتبه الها وبالنهار بحجة اصعد انظف اشحنه ليما يقبط اشيل الشاحنة اضمها و ارجع الموبايل بصدري

لحد ما اكتشفتني مرت ابوي فد يوم ..
جانت هاي فرصتها، ما وفرت فرصة بسرعة صاحت لابوي و كالتله (تعال شوف هاي الملفيها ابيتك )

بيومها ابوي كتلني و اذاني وحلف اول واحد يجي يخطبني ينطيني اله و يخلص مني

ايامها جانت اصعب ايام تمر عليه، اتمنيت بس الزم مبايل و اخابر مروان و اكله اهلي عرفوا تعال اخطبني

.. كدرت احصل مبايل ابوي بالليل، رحت للتواليت ب٣ بليل، خابرته و كعدت اهمس .. و حجيت ويا وكتله ( اهلي عرفوا تعال اخطبني )

كال (بس اني هسه ما اكدر، ما عندي شغل و اهلي ما عدهم مكان يزوجوني )

- بس انت كلتلي اتزوجج ووعدتني ؟

- اي بس مو هسه فد سنة سنتين ياله

- ما اكدر اهلي يريدون يزوجوني

- انت تستاهلين الأحسن مني، اذا اجاج واحد زين اتزوجي اني ما اوكف بطريقج، اهم شي عدي سعادتج حتى لو عفتيني.

- كمت ابجي و اكله بس اخطبني و حتى لو نبقى سنين بس اخطب ..

ما قبل ، ما طولت بالاتصال اخاف اهلي يكعدون
بس بقيت الليل كله ابجي ، خابرته ثاني يوم ما رد عليه

ظليت مكفخة لمرت ابوي و اخواني و حتى ابوي اذا جان شوية يحبني كام كلش ما يحبني، لحد ما زوجوني لواحد يشتغل عامل بالمولدة

جان مو كل ايام الله عنده سوه، يوم عدل و عشرة ايام يمطر فوك راسي، عشت وياه على الحلوة و المرة و خلفت منه ٣ جهال و كطعت ..
جنت انضرب و انطرد و ارجع اله على مود جهال
و شايله بيت اهله على راسي
هو يعرف من مرت ابوي اني لقيطة فما يحترمني
حتى على فراشي جان يجيب نسوان و اسكت لان ما الي مكان اروحله حتى اخلص منه

حتى ما يقبل يحط بيدي مبايل لأن سمع من مرت ابوي جنت مصاحبة ولد
من اطلب مبايل يكلي (شتسوين بيت حتى ما عدج اهل و تخابرينهم لو رايده ترجعين لصاحبج تخابرينه )
حتى لو تكله اني اجمع و اشتري ما يقبل

الى ان وبعد عشرة ١٢ سنة وياه ع الحلوة و المرة تعرف على بنية و حباها ، البنية حلوة و ما متزوجة و اهلها حالتهم زينة بس ما تقبل بيه لأن متزوج ، شرطت عليه يطلكني يلا ياخذها

بقيت اتوسل بيه .. حتى لو يتزوج موافقة
بس هي شرطت ما تريدني ، حتى بيها توسلت، تكول (اني احبه ما اكدر اشوفج مشاركتني بيه ما اقبل لو اعوفه الج لو تعوفينه الي ) و هو مختارها و يريدها

اضطريت اروح اخذ جهالي و اروح لبيت ابوي، بس مرت ابوي ما رضت بجيتي، و رجلي اتزوج و ذبني اني و جهاله ، احتاريت شلون اسد لكمتي و لكمت جهالي

لا الي اهل و اروح الهم ولا عندي بخت و احضالي برجال زين يلمني ، كمت اشتغل ابيع كلنكس بالشارع حتى اعيش جهالي ابيت ابوي لأن محد ينطيني ، و حتى لو ابوي حن مرة و خلى الف بيد واحد من جهالي من يطلع مرت ابوي تاخذها منهم

ضاكت الدنيا بيا، كل اليتقدم و يعرف عدي ٣ جهال يشرد مني و ما يقبل و جهالي بعز روحي ما اكدر انطيهم لابوهم و اخليهم يشوفون قسوة مرت الاب اللي اني شفتها

قسمت على روحي عسى ما انام بالشارع و اموت اني وياهم ما اعوفهم

يوم على يوم الدنيا تصعب و العيشة تضيك
الى ان بيوم حماي اخو طليقي ، شافني اني و ابني وياي نبيع كلنكس على السيارات ..

تخبل اخذ الجهال من اديه و صعدهم وياه بالسيارة
كمت اتصايح وياه اعيط ما رضى يبقيهم عندي
كتله لو تاخذني وياهم لو ما تاخذهم
اخذهم و ما قبل ياخذهم
بجيت ملخت روحي ما فاد

وبعدين قنعت روحي بروحي و كلت خل اتحمل هالفترة على فراكهم الى ان اكدر اأمن الهم مكان حتى لو اشتري من ابوي غرفة و اعزلها و اعيش اني وياهم
كلشي ما عندي ولا فلس بس جنت اتأمل رحمة الله يساعدني و الكالي شغله و اكدر ارجع جهالي بعدها

بس ايامي تزيد عليه ما تنقص
وفراك جهالي كسر ظهري، كل ما التفت اسمع اصواتهم ، مرات و اني كاعدة اصيح ( اكعد ولك ) و انتبه هم مو يمي .. و ابقى ابجي و اندب بروحي لحد ما افحط

كسر ظهري فراكهم .. كعدت ويا روحي و كمت الوم على امي الخلفتني و اكول :- ما تريديني ليش جبتيني ؟ ليش خليتيني اكبر ابطنج ؟ جان و اني طفلة و موتيني

بقيت الوم بيها و ابجي و احجي ويا روحي
الى ان صفنت ويا روحي و كلت :- اني منو كال امي شامرتني و منو كال امي هرمت بيه و ذبتني يمكن عداوة يمكن بايكيني منها ، يمكن عدي اهل ؟

ما ادري ليش انخلقلي امل رغم اني اعرف ما الي كل امل .. و هالموضوع عقيم .. مرت ٢٦ سنة على الحادثة وين الكاهم ؟

بس كلت بروحي ما خسرانه شي، كل انسان يحن لاصله حتى لو اعرف اصلي منين كافي ، رجعت لبيت جدي و توسلت حدي و خالي يدلوني ع المكان اللي لكاني بيه خالي ماهر

و بالفعل دلوني على المكان، بس هالمكان ما عاد زبالة، شارع عام و منظف .. بقيت اباوع بالشارع وين الكاهم اني مخبل و افكر الكا اهلي ، وين الكاهم

مر رجال حجي جبير كال ( رايده شي بنيتي )
سولفتله سالفتي، شو هءا هم صفن وياي، و خطية حيل انقهر عليه، و كال خل اخذج لمختار المحلة و نسأله
اسمه (ابو عمر ) يمكن اهلج راجعيله يمكن احد جاي يمه و سائله عليه بوكتها .. او يعرف احد

كلتله : حجي السالفة صارلها ٢٦ سنة وين الكاهم بعد

كال :- الأمل باللة بنيتي ان صعبت عل. ابنادم ما تصعب على ربج ادعي و الله كريم

اخذني ووداني للمختار .. حجالة سالفتي ، المختار كاله :-والله يابه كلي شتغديت البارحة اكلك نسيت تريدني اتذكر حادثة فقدان طفلة قبل ٢٦ سنة

اني كعدت ابيت المختار من لا جارة بقيت ابجي و اشكيله حالي و الصار بيه .. حيل انقهر عليه

كال :- روحي و خلي رقمج يمي و اني كل اليمر عليه اكله على سالفتج بلكت الله و يطلع احد مضيع بنية ولو يا بنيتي السالفة قديمة حيل بس اني لخاطرج عسى ولعل حتى لو بس نعرف اصلج

بقى هذا المختار كل ما تصير لمة و ناس تلتم يمه يسولفلهم هاي السالفه بلكي الله و يطلعولي اهل

.......

رافد :- السلام عليكم ابو عمر

- اهلا وعليكم السلام ابو مهيمن شلونك شلون الصحة

- نحمده و نشكره

- الوالد شلونه ؟

- والله على وضعه

- اخوك ما لكيتوله اثر

- لا والله يا ابو عمر جن الكاع انشكت وبلعته احتارينه وين ندور و نلكاه

- يكولون اكو سجون لداعش سرية بالمناطق الجاي يحررونها

- نتأمل لليوم ندور والله وماكو

- ان شاءالله خير

ابو سيف:- اي ابو عمر كمل سالفة هاي البنية

ابو عمر :- مرت ابوها مو زينه وياها و اني جاي ادورلي رجال نشمي يتزوجها لأن هي ما الها احد

رافد :- منو هاي

- والله يا ابو مهيمن هاي سالفتها سالفة كاسرة خاطري جنت اسولف لعمك ابو سيف، اهلها من المستحيل نلكاهم بس اني رايدلها رجال اليتزوجها

- ليش اهلها وين

- اهلها شامرينها بالزبالة من ال٩٠ و ماخذيها ناس مربينها

- هاي وين ؟

- السالفة قديمة اكلك من التسعين بمنطقتنا مشمورة بالزبالة ولاكينها ناس

- بمنطقتنا يعني ؟

- اي

.... ها ابو مهيمن شو صفنت ؟

- والله جني اعرف هيج حادثة ، يعني هم قديمة بس بيا سنة ما اعرف

- شنو هي ؟

- تعرف اسماعيل السكران الجان بالفرع البيه سلمان المرعوص

- ابو اسامة البعدين كالو عنه صار ويا القاعدة ..

- اي اي هو

- شبيه ؟

- عنده بنية شامرها بالزبلة ، من جابت مرته و هو سكران و يريد ولد و خلفتها بنية شمرها بالزبالة
الأم .. جانت زوجتي السابقة هسه هي عايشة بأستراليا

- تحجي صدك

- بالله العظيم، بس ما ادري بيا سنة

- هيج وربك يسويها ؟

ابو سيف :- سبحان الله

- زين تعرف وينهم ؟

- لا والله ، الادري بتها عايشة هنا بس ما اندلها وين ، بس امها ادري بيها بأستراليا ، اعرف صفحتها على الانستكرام احاجيها

- ياريت والله بجاه النبي الاعظم يا ربي كون تطلع هي و ترجع البنية لاهلها لأن من صدك تكسر الخاطر

- لا نتأمل ولا تخابرها، خلي بالاول نحجي ويا الام نشوف الموضوع و نتاكد منه و الله كريم

بقينا نحجي بموضوعها و يحجيلي عنها،
رجعت للبيت ، فتحت انستكرام راسلت ميعاد

( هلو ميعاد اني رافد ، عندي موضوع وياج مهم ولازم تجاوبيني )

لساعتين ردت ( ما بيناتنا شي مهم لا تبقى تحاول رافد تزوجت و خلصنا )

- مو هيج الموضوع، جاي اسألج على طفلة انشمرت بالزبالة بمنطقتنا

- شنو تسألني ؟ مفتهمت

- مو اتذكر عدج بت شامرها اسماعيل ؟

- اي

- شمرها بيا سنة

- ب٩٠

- بيا شهر ؟

- ٢٧/٣ .. اذار .. اكو شي رافد

- اكو بنية بهيج مواصفات اجت للمختار تسأل عن اهلها

- وينها هاي البنية

- البنية حالها بس الله يعلم بيه و من شلت حالها اضطرت ادور اهلها عسى ولعل تلكه عدها اهل

- انت تحجي صدك لو جاي توهمني؟

- والله العظيم ما جاي اجذب

- حيلي كله ديرجف رافد، شسويت بيه معقوله الكا بتي بعد كل هالسنين

- ما متأكد .. بس نكول يارب

- اني هاليومين لازم اجي بغداد، لازم اجي و اعرف الموضوع بنفسي

- تعاي بس لا تتأملين بالموضوع هواي، هو مجرد تخمين لا اكثر

- وين الله بجاه النبي تطلع بني و ترجعلي ، دخيلك ربي صدك عود بعد كل هالسنوات تستجابلي و ترجعها اليه ما اصدك

.... طار كلبي لما عرفت اكو بنية هيج مواصفاتها و ادور على اهلها .. رافد مراسل المختار و سائل عن الموضوع ، البنية طلعت مشمورة بشهر الثالث يعني احتمال جبير هي

ما كلت لديار اني راح اجي ..
سويتها الها مفاجئة هي و اثار اعرفهم مشتاقيلي هواي صار ٣ سنوات من افترقنا و سافرت .. من يشوفوني اكيد راح يطيرون بفرحتهم

خلال ايام سافرت للعراق، عفت سليم رجلي و رجعت لبغداد ، وصلت المنطقة بغداد الجديدة، اني ادري ديار كايلتي على اقرب نقطة دالة .. دوم تحجيلي على مول تروحله

من وصلت للمول، دورت اسم محل موبايلات اسامة اسمه ( الملكي) كمت ادور بالأسماء كلت اذا ما لكيت وكتها اخابر ديار، بس لازم اسعى حتى اسويلهن المفاجئة

دورت بألاسماء والله ولكيت محل مكتوب جوه بالهامش اسامة اسماعيل و مرتضى صادق، هو هذا المحل مالت ابني

.. باوعته المحل معزل ، سألت الولد ابو الاسواق كلت اله :- صاحب هالمحل تندل بيته ؟

- اي ابن الشيخ يصيرون بذاك الفرع مو الاول الثاني، بس دخلي و اسألي وين بيت الشيخ بساع يدلونج ، ابن الشيخ و صديقه يشتغلون بيه

- اشكرك

مشيت الدنيا ظهر حارة يربي صار ٣ سنوات ما شايفة هيج حر اب يكتل حر .. دخلت الفرع ولا احد طالع، شنو فرع لو مال موته .. ولا نفر
ولو حقهم الجو يكتل

مر واحد صف اباب بيت، سألته :- بيت الشيخ صادق وين ؟

- تشوفين ذاك البيت ابو العمدان المذهبه ؟

- اي

- هو هذا بيته، مصوب هو هسه موجود بالبيت البترحة اني يمه

- اشكرك جدا، المشتمل مالته وينه ؟

- هذا اللي على ايدج اليسرى

- اوووكي ، ثانكيو

مشيت للبيت فرحانه، دكيت باب المشتمل، فتحتلي ديتر كلت الها :- هلووووووووو اني اجيت

- مااااااااااااامااا

- حبيبت ماما انت

حضنتني بسرعة بجت، دموعي نزلو وياها :- يروحي انت يروحي فدوة اروح لريحتج حبيبتي، شصايرة يعيني تخبلين اووووف اشوووو

- مشتاقتلج هواي
حجتها وبجت

- حبيبتي

اثار :- مااااااااااما

ديار :- ابتعدت امسح بدموعي و اشيل من ايدها الجنطة، كمزت اثار الحضنها ما تحجي بس تبجي بصوت عالي عفت الجنطة و حضنتهم

نزل اسامة على الصوت، باوعها ابتسم، راح سلم عليها ، حضنته :- صاير اطول مني يبعد عمري ، صار رجال ابني

ديار :- فوتي فوتي حارة

- حارة شنو كولي معت، يااااايمة فلك مو حر ، بس اني ابالي اروح لشيك لمفتي لازم

- ليش ؟

- اكله اهل العراق هم يخشون النار ، اذا الله مسلوعهم بهالحر بالدنيا انوب يدخلون جهنم ، اووو يحظهم

- بروفا ماما بروفاا ديسويلنا حتى لا ننصدم بجهنم

- اذا هيج زين، اووووع شنو هالخنزير ، او لا هلا .. ها اسماعيل دودة تاليتك هناك .. ولدي يتلطفون عليك، ولا استخطيك يالنذل

- عوفي ماما ، اكعدي ارتاحي

- شلونكم شخباركم

- عال العال ، بس كليلي شلون وصلتي لبيتنا شلون اندليتي

- اكو شي يصعب على امج ؟

-لا والله

اسامة :- متغدية

- اني من اشوف طولك اشبع ييمه شوكت هيج صرت شاب حلو و تخبل

ابتسم .. باوعتلها :- ما صايمة انت مو ؟

- لا صايمة لأن زيارتي اكثر من ١٠ ايام فلازم اصوم

- الله وملتزمة صوم و صلاة ااااالعب

- كبرنا خوما نكضي العمر بس لعب، طلابة و هو شهر هم رجيم و هم صحة بس شنو متت تعب ، دليني الحمام

كمت وديتها الحمام و كلت الها :- اسبحي و راح اطلعلج ثوب خفيف من يمي

سبحت و نامت للفطور سويت اشكال و انواع و طلعت صينية لبيت الشيخ بثواب سلمان
سبحتن الله مها شكد عزيزة علية ووكت لما اريد اطلع ثواب من جدري و انطي ما يجي ابالي غير سلمان كلها تغيب من راسي .. مرات اذكر مها و مهند بس جذب مثل سلمان بكل ثواب ذاكرته
اكول يمكن لأن ما اله اهل يثوبوله الله حاطه براسي و اثوبله .. الله اعلم

كعدت امي المغرب ع الفطور مسوية سفرة شكبرها .. طلعت و ثوبها قصير و احمر و شعرها على اجتافها، عفت من ايدي و حضنتها
شكد مشتاقة لريحتها لنعومة جسمها لحضنها ..
باستني .. باوعتله

:- اكلج ماما صدك ترا ابويه محرم عليج يعني ميصير تلبسين كدامه هيج و انت صايمة

- ليش هو ابوج ينحسب ع الزلم و يتحرم عليه، كلاب الدنيا اي والله، صبييي متت من الجوع

كعدت ع السفرة، و اني رفعت ابوي من السرير كعدته، خليت بأيدي الشوربه و كمت اوكله ، ايده يكدر يرفع و يشيل بيها بس ترجف لما ياكل يدمر روحه لا يبقى وجه لا فراش لا ملابس ما يدمرها فاني اوكله

امي باوعتله :- حطيله سم مو توكلينه

- الله يجازي امي

دك المدفع .. اكلنا
وره شوية كملت امي طلعت للكراج جاي تغسل .. وسمعنا صوت الشيخ صادق ( ان الله و ملائكته يصلون على النبي يا ايها الذين امنوا صلوا عليه و سلموا تسليما )

ميعاد :- منو هذا ؟

- الشيخ صادق اذن

- هذا الخطبج

- اي

- صوته حلو

- اي هو دائما يأذن من هو موجود حتى لو اكو جامع، يكسب اجر الاذان

- الله ينطي العافية ان شاءالله

- اجيتي زيارة لو شغل ؟

- اجيت على مود شغلة مهمة

- شنو هي

دخلت اني وياها وكفنا نغسل و هي تسولفلي ، على سالفة البنية اللي لاكيها رافد

- معقوله يعني هيج و تطلع اختي الشمرها ابوي ؟

- وين الله وصدك

- وشلون يتأكدون

- غير اشوفها اول و نسوي تحليل ياله

- جان كلتيلي منا اني اروح اشوفها و ابوي موجود و احنا موجودين و نسوي تحليل حمض نووي و نشوف

- واصبر غير من عرفت طار كلبي، بس ما اريد اكبر الموضوع لازم اتاكد منه يله

- هيج و تطلع هي يا ربي

- ان شاءالله ربي

- نروحلها باجر ؟

- ان شاءالله

.. كعدنا ثاني يوم اخذت امي ورحنا اني وياها لبيت الشيخ، جانت امي متفقة ويا رافد، من وصلنا هو ورانا بخمس دقايق وصل النا

من شفته دمعت عيوني .. صار قرابة السنتين ما شايفته بس كل يوم اباوع بصور خالد كبل لا انام، من شفت رافد كمت اشوف خالد بوجهه
كمت ادور ملامحه بملامح اخوه
الدم .. دورة الوجه الشعر الطول
كلهم خالد

دنكت و بجيت بسرعة ما تحملت ، هو يسلم على امي و استغربني لما بجيت ، حجه :- اكو شي ؟

باوعته، ادور خالد بوجه ، حتى الصوت بيه من خالد
ابو عمر وكف، يسأل .. امي حجت :- رافد بيه شبه من المفقود خالد يمكن شبهت و اتذكرت

بقوا يباوعون ما حجو، ابو عمر استقبل امي بالبيت، دخلت وياها و اني عيني برافد .. احس روحي اشتعلت ووصلت لركبتي تريد تطلع .. اختنكت حيل
من اشوف رافد يشتعل كل ذاك الحب و الاشتياق المضموم بداخلي لخالد

بقوا يحجون ابو عمر و امي، و اني ضاع عقلي كله التهى بخالد .. كل جرح فز بيه هسه بشوفة اخوه

رغم جنت اشوفه قبل بس من ابتعدت اسنين ورجعت صرت اشوفه يختلف ، نسخه من اخوه خالد ، الفرق رافد اشكر خالد شعره و لحيته اسود مو اشكر بس ابيض

كاموا، ابو عمر يندل المنطقة البيها بيت البنية، كال خل اخذكم الها ، تشوفونها و تشوفكم ، اذا اكو صلة قرابة لابد يطلع شبه ، صوت ملامح .. واذا ماكو نقدم على تحليل DNA مال الحمض النووي الجيني

رحنا، ابو عمر ورافد بسيارة و اني و امي بسيارتنا، وصلنا هناك، خابر هو ، دلوه البيت بالضبط

نزلنا، البنية جانت واكفة بالباب تنتظر ، بس صفت سيارتنا، كامت تباوع بوجهنا و تبجي ، امي نزلت بسرعة من السيارة

طفيت و نزلت، سبحان الله اسامه ولابس حجاب، امي مدت الها اديها ، ذيج اجت حضنتها و كامت تبجي بصوت عالي

وكفت ، بأيدي مفاتيح سيارتي، ومتجنبه ما تقربت بس اباوعها ، معقولة يعني ، هي ؟ حتى ما بجيت، لأن خلصت ادموعي سلفنا على خالد، و التساؤل بداخلي جان اكبر من انو ابجي .. ما معقوله بعد كل هالسنوات .. هيج بهالسهولة ترجع ؟

ابتعدت امي، حجه رافد :- البنية تشبه ديار و اسامة حيل تنطيهم شبه

ميعاد :- بتي ، كلبي يكلي هي هاي بتي ، والله هي

خديجة :- يعني انت امي الحقيقية ؟
حجتها و هي كوة تنطق و هي تشهك

ابو عمر :- نسوي التحليل اول، يلا نتاكد

باوعتلي هي ، حجه رافد :- ديار تصير بنت ميعاد اللي هي ان شاءالله امج، وديار اختج

طلعت مرة من البيت كالت الها :- ابوج من يجي و يعرف بته واكفه ويا الزلم بالباب يكسر ظهرج فوتي جوا يلا

ميعاد :- ما الها فوته جوا البنية تروح وياي

- و انت منو

- ميخصج ، خليج بحنيتج حبيبتي، يلا عيني البسي حتى تروحين ويانا

ديار :- مو نتأكد الاول ؟ يعني مو كال هي ؟

ميعاد :- هي .. البسي و تعاي ويانا

حجت مرت الاب:- ما الها طلعة ابو ما يقبل

ميعاد :- ابوها ذاك مطمور بالبيت ، و العندج خلي الج

حجت :- خديجة لو طلعتي غراضج تتشمر بالشارع

سكتت هي، امي حجت :- و شمرتهم عايزة بيتج اني ، بيتي بأستراليا يسواج و يسوى بيتج

خديجة :- يعني صدك اني مو بحلم، انت امي ؟

ميعاد :- ان شاءالله ، يلا اخذي البي تحتاجي و تعالي وياي

ديار :- ما ادري ليش جان ردة فعلي باردة لدرجة البنت خطية حست انو اني ما رايدتها، بس بالحقيقة انو ما اريدعا، ما مصدكة الموضوع حقيقي، شنو بين ليلة ويوم تطلع بنية ما اعرفها و تكول اني اختج
معقوله بهالسهولة تنلكي اختي اللي ضاعت قبل ٢٦ سنة

.. هي اكبر مني اني مواليد 1992
اخذت الها علاكة و لبست عبايتها و صعدت ويانا بالسيارة ورا، امي سلمت على ابو عمر و غلست على رافد .. و صعدت

اني اباوع البنية من الجام ، شبه بينها و بين اسامة قوي، يربي معقولة هي صدك ؟ العقل ما ديشيلها

كلت الها :- جهالج وين ؟

-عد بيت عمهم

ميعاد :- تريدين نمر ناخذهم

بجت بساع و هي تكللها :- اطبين الجنة بس تشوفيني جهالي والله انكسر ظهري على فراكهم

ميعاد :- تندلين البيت ؟

- اي اندل

- امشي ديار

حركت السيارة، و مشيت دلتني المنطقة، و البيت ..وصلنا فتحت السيارة بلهفة و الدموع مخلوطة بفرحة وجهه و هي ادك الباب، انكسر خاطري عليها

طلع رجال ، نزلت امي، حجت اللي اسمها خديجة :- بس اريد جهالي اشوفهم

باوع لامي :- منو هاي المرة

ميعاد :- تكدر تعتبرني خالتها وراح اخذها ابيتي و الجهال راح يكونون بأمان وياي، مثل مدا تشوف حالتنا زينة و ما راح اخلي الاطفال بالشارع مثل مشفتهم حضرتك

هذا الرجال ابتسم لامي و هو يكللها :- نتشرف بيج ست، تفضلوا جوا

ميعاد :- اشكرك لازم ارجع للبيت ، بغير وقت ان شاءالله

- اي متشرف احنا نتشرف

فات للبيت يصيح الجهال، و خديجة فرحانه و تحضن بأمي، اتراكضولها جهالها ٣ ولد ، اكبرهم عمره ١٠ سنوات اقل من اثار .. بقت تبوس بيهم و تبجي و هم يبجون بحضنها
امي شالت الصغير و خديجة كادت الاثنين ، بقيت افكر ، لمجرد شبه تيقنت امي هاي اختي و جابتهم كلهن ..زين اني ليش ما متقبله الموضوع ؟ بكل الاحوال البنية محتاجة و ما الها احد

اخذتهم ورجعتهم للبيت، ويا ما صفيت السيارة، الشيخ جان بالباب، نزلت امي ، هو حجه :- ها السلام عليكم

ديار :- و عليكم السلام هلا ابو مرتضى

ميعاد :- هلا ومرحبا عيوني، انت الشيخ مو ؟

صادق :- نعم اني، انت امها ان شاءالله، كالي مرتضى البترحة ان الوالدة اجت من استراليا، الحمدلله على سلامتكم يابه

ميعاد :- الله يسلمك عيوني الله يحفظك والله هواي يمدحولي بيك و بعائلتك، من ابنك مرتضى ويا ابني و لحد وكفتكم ووكفة الحجية ويا بنتي .. ما اعرف شلون اشكرك بس تكولك ممنونة منك جدا

- ما يحتاج شكر ديار و اسامة من اهل البيت، و الهم معزة خاصة

ميعاد :- الله يديمها عيوني

ديار :- شلون صار جرحك ؟

- والله للاسوء نتحمل والله كريم ، اذا تكدرين فد شوية تمرين ع الحجية اكون ممنون لأن محتاجتج

- اي هسه امرلها

اشرت لامي يدخلون جوا، و اني طلعت لبيت الشيخ، هو دهل وراي :- ولو ما الي حق اسأل بس البنية الثانية هي و الجهال منو ؟

- والله يا صادق لو احجيلك ما تصدك، شي اغرب من الخيال

- جانبا عن الخيال، اسمي و انت تلفظينه حيل ينحب ياريت بعد تجرديني من الالقاب لما تصيحيني

ابتسمت، و هو ابتسم :- اروح اشوف الوالدة

فتت للحجية، سلمت عليها ، رقية جان عدها امتحان انكليزي و سادس علمي، فما نازله جوا ابد و الحجية خطية باقية

ساعدتها و كومتها للحمام و نظفتلها فراشها و طلعت الها ملابس، غسلت الها و بدلت الها، رفعت اديها و كامت تدعي ( بجاه هذا شهر رمضان يوفقج و ينور دربج يا ربي )

بست راسها (مشكورة حجية انت بمثابة امي )

- الله يحفظج بنيتي

انطيتها العلاج وانطيتها، لكيت الشيخ مخلي لحم ع النار ، حجيت :- انت تطبخ

- اختي راح تجي اليوم بالليل خابرتها

- اخذ راحتك شيخ هسه اني اطبخ ابيتي و ادزلكم ما عندي شي

- لا لا ما يحتاج لا اتعبين نفسج، بس اذا تكدرين ناوشيني الكرسي حتى اكعد

- جرحك مو لازمه طبيب

- سلام راح يجي فد شوية

- اذا تريد اخذك تره ما عندي مانع

- صايرة اطلعين هواي بالسيارة اني مقاربة

- حكت، هو ضحك و بقى يهز راسه ، من انت مراقبني :- وين شفتني اروح ؟

- رحتي السوك الصبح

- مو تسوكت للبيت

- اسامة و مرتضى موجودين

- ميعرفون الاحتاجة بكدي، اني ام البيت

- كولي مليت و اريد اطلع

- شييخ

- اي مو كلتيها صادق ترجعيها شيخ ليش

ضحكت :- زين تكدر تكوم تروح للاستقبال حتى اني اطبخ تعرف حرمة شرعية و هيج امور

- اي حقج يابه، بس تعاي عينيني خل اكوم

- مو هم حرمة شرعية

- دروحي بوية اني ادز من برا شهالطلابه

- ضحكت و كمت ، مديتله ايدي ، خلاها بأيدها، لزمها حيل و كام، لزمت ظهره

- استغفر الله ربي واتوب اليه

- حرمة شرعية مو

- هو انت خليتي بيها حرمة يا بوية ، شكو شيطان بداخلي تهيجي

- وكفت على صفحة :- اسفة

- لا تعتذرين، اتقشمر وياج، اسمعي والله مو هذا طبعي ، لا طبعي اوكف ويا بنية ولا عمري ضحكت لمرة غريبة بس انت ما ادري ليش احسج اليه اقرب مني لهذا كلما احاول اعاملج كغريبة الكاج اقرب شي لكلبي

-اروح للبيت

-السالفة الاغرب من الخيال شنو هي ؟

- البنية الشفتها تصير اختي، ابوي لما جابتها امي، جان سكران و شمرها لأن ما يريد بنية وهسه لكيناها

- سبحان الله

- مو اكيد لهسه ما سوينا تحليل

- البنية تشبهكم من شفتها خمنت اقاربكم بس استغربت لان الاعرفه اقارب ما عندج لهيج سألت

- بعد هاي حكمة ربك

- شو احسج ما راغبة الموضوع

- ما اعرف لهسه مستغربة

- هم حقج

- اترخص منك لازم ارجع للبيت

- اخذي راحتج

رحت للبيت .. دخلت البنية كاعدة تسولف ويا امي، و امي تسمع الها .. اسامة اشرلي رحت اله

بقى يسألني و اجاوبه و هو مستغرب ، لهسه ما سلم عليه ، الغريب ردة فعله مثل ردة فعلي .. من كد ما استغربنا ما اتقبلنا الموضوع ، بس امي كعدت تثرد سوالف وياها

وكفت اطبخ، هي اجت حجت :- اذا ما رايدتني بالبيت عادي اروح ؟

- مو جبتج لبيت بسيارتي شلون يعني ما رايدج بعد

- هيج حسيت

- كل الموضوع مستغربة الوضع ، يعني اخت تطلعلي من بعد ٢٦ شلون استقبل الموضوع

- انت مكملة دراسة مو

- قانونية

- اني ما مكملة سادس ابتدائي بطلوني

- لا تعتقدين عشت عياة مرفهه، اذا انت فعلا اختي، فاكولج خلصتي من هم جبير كبل لا ادخلين بيتنا، جان تعرضتي للي تعرضتله اني و انهار، و حتى اثار ..
اذا انت شمرج، فاختنا الجبيرة ماتت بسببه و اني احتركت و عشت حياتي مشوهه بسببه

- تشوهتي ؟

جنت لابسه بنطرون و قميص، رفعت الها القميص و كلت الها :- كل جسمي جان هيج
اتزوجت اثنين و عانيت الويل بس حتى اعيش . لا تعتقدين بسهولة وصلت لهنا

اجت امي :- هااا ؟ اتفقتو

- على شنو

- ديار ماما ليش هيج جامدة ، فكيها

- لازم اسوي الفطور مبقى شي، حتى اودي لبيت الشيخ

- هنا الحجيييي، بيت الشيخ اممم

- شو ييي و مممم شكو ؟

- ماكو شي عصفورات براسي ديزقزقلي

- نشيهن

- بس هيبه شكلة و حلو ، خو الجرح زايدة جمال، كلتيلي قيادي هو مو

- ماما سوالفج بطليها

دك موبايلي، باوعته عذراء، وصيت امي على الاكل و اني صعدت فوك اسولف ويا عذراء

اخذتني السوالف ، كمت اسولفلها و هي متعجبه ..
الى ان كلت الها : روحي بعد ما الحك

نزلت و الكا امي واكفة بالباب مطلعة الصوندة و ترش، الثوب فانيلة نيلي، و الجاكة لنص رجلها و عود لافة الحجاب

جان تكوله :- لا لا ديور حتطبخ لا اتعب روحك شيخنا

الشيخ :- لا دزيت مرتضى راح يجيب اكل جاهز تفضلو يمنا اليوم

ميعاد :- ما نريد نكلفكم شيخنا

ديار :- ولج يمممممممممممه ....

☆☆☆☆☆☆☆

#اتمنى_ان_افعلها


الحلقة_59

"مهما كان فأنت لا تريد لتلك الذكريات أن تنمحي من ذاكرتك"

........

ديار :- ولج يمممممممة ، تعاي فضحتيني، يحظي صارلي سنتين و نص كاعدة هنا والله ما فد يوم رشيت الشارع خزيتيني يممممه

- و غمه ، اسكتي منا الشيخ

- عزا يمه والله هذا معقد ما يقبل ، فووتي عيب

- تسلم شيخ هسه اشوف البنات اذا نكدر نجي نفطر يم الحجية

- هو انت شوكت اجيتي و اخذتي وياه ميانة و حجيتي دفوووتي

مديت نص عين من الباب، صادق يباوع بالفرع، لحيت على امي حتى تفوت، كوة فاتت

- يمه لا اطلعين و الله عيب من الشيخ

- شو هواي مهتمتله للشيخ ؟

- ماكو شي بس عيب

- بس عيب !! امممم

- خل اكمل الفطور اذا ابقى عليج ما اخلص
فتت لكيت خديجة تركب، كلت الها :- روحي ارتاحي اني اكمل

خديجة :- ما عندي شي كملت

ميعاد:- ديار عوفي الاكل و تعاي كعدي اريد احجي وياج

- مشيت وياها .. كعدت الشيخ بعده طالبج للزواج ؟.

- اي ليش ؟

- رديتيله جواب ؟

- لا

- ليش ؟

- عيب ارده، و بنفس الوكت ما اريد

- اريد اظل هيج ما محتاجة رجال بحياتي

- العمر يمشي ديار و العيشة وحدج صعبة، واخوج مصيره يتزوج و الرجال لعائلته مو لاختهه، و الفرصة التتوفر اليوم ما تتوفر باجر ، اريد اسألج ما تتمنين تصيرين ام ؟ ما تتمنين تكونين عائلة

- اتمناها ويا شخص واحد

- نرجع لنفس المحطة ديار، ترا خالد بنفسه من اطلكتي اتفقتوا ما ترجعون لبعض انت الغلطتي ورجعتي

- شنو ناويه تقنعيني مثل ما قنعتيني بأمجد و تالي شفتي شسوا بيه

- شسوا ؟

- هاااه لازم نسيتي شسوا بيه

- ما اتذكر السواه غير الزيت الي بافعالح انت الكلبتي ضدج

- انت بكيفج تخلين الحق باطل و الباطل حق

- لا مو هيج بس اني اكول العليه و المو عليه، كل انسان بيه حق و باطل، الباطل مالت امجد من ما وكف وياج بسالفتنا و لما اجته رسالة و عاقبج، الا ارجعي و اتذكري ديار منو الجان يتمنى منج الضحكة ؟ منو اليتمنى منج الكلمة ؟

جان محترمج و يجيب ويخلي بأيدج و اهله يموتون عليج، انت الما حاولتي وياه، انت الخليتي يحس هو هامش و اكو احد غيره بحياتج ، انت العيشتي بشك

انت لو جايبته بالكلمة الحلوة و العيني و الاغاتي .. ما اجا وياج ، جان سوا السواه
ولج يمه جنت اركعلج منا و تفتكيها منا
ديار لا تخابرين خالد
ديار ابتعدي من خالد
ديار جوزي من خالد
و انت الما ابتعدتي

- ولا اراح اكدر ابتعد ، خالد عايش بيه ليش اعيد الغلطة نفسها

- لا مو نفسها، امجد جان مجبور عليج بينما هذا يحبج، ويا امجد خالد جان يفرفر فوكاكم ٢٤ ساعة ، ويا هذا خالد ماكو وبعيدين و الامور كلها تختلف
... ٣ سنين مرت متأملة يرجع ؟
ولو رجع مستعدة تاخذين واحد متزوج اثنين ؟ ضحى ما يحبها، متأملته من يرجع يطلك السورية ؟
لو تبقين و تعيشين بين نار الضراير و نار اهله اليكومون يعيرون بيج و يكعدون يعيرون بيج، هاي لو قبلو .. ولج موكفة حياتج ليش بنية وحلوة و الخواطيب كثروا على بابج موكفة قسمتج و حارمة نفسج الامومة و العائلة ليش ؟
الى متى تبقين غبية و باقية تمشين بعواطفج
المثلج هسه تحمد الله داز الها واحد يحبها

اخذي اليحبج مو التحبي

- شلون لو رجع خالد ؟

- الف الحمدلله و الشكر لو رجع، تعوفينه لنسوانه و انت بحياتج و هو بحياته و كل واحد بعيد عن الثاني و الله كفيل بالكلوب ينسيها، ولو ما رجع .. غباء تخلصين كل عمرج تنتظرين

- لا تحاولين ما اكدر ، وبعدين عوفج مني، ماما شلون تأكدتي البنية هاي اختي الضايعة و جبناها، يعني شنو لمجرد اكو شبه .. ترا لهسه السالفة ما خاشة بعقلي

- مذبوبه بالزبال بالسنة و الشهر المكان اللي انشمرت بيه بتي، غير الشبه البيها منكم، البنية سولفتلي عنها هم متأذايه حيل

- انت بنفسج مو متقبله ، دا تكولين ( البنية سولفتلي ) متحسيها بتج

- هو طبعا غير ما ربت بحظني مثلكم بس ما اكدر انكر مو هي، و اذا هي ساعتها اسعى بجهدي اثبت النسب و اخذها وياي اطلعها برا تعيش و تعوض الايام الانحرمت بيهن هناك ..

- ما اعرف ليش باردة مشاعر من اشوفها مدا يحيني اي احساس، احسها وحدة غريبة

دنحجي، دك موبايلي، باوعته ( ابو مرتضى )، رديت :- الوو

- هلا بيج ديار

- هلا بيك، كول ؟

- الفطور يمنا دزيت على كباب شوي و دجاج حولو عدنا

- لا والله سويت فطور مشكور

- زيادة الخير خيرين جيبي فطوركم هنا و خلي الوالدة تتعرف على الحجية

- مو اخاف تصير هوسة مو يع........ قاطعني

- عيب هالكلام تعالو و خلصت

- ان شاءالله لعد اگل لامي و نجي

سديت من عنده، كلت الهم يلا خل نروح، بدلنا كلنا، بس اثار ما قبلت تروح كاعدة فوك على ايبادها ما تنزل

دخلنا عدهم و سلمنا عليهم، الشيخ، سلم و كعد بالإستقبال بعد ابد ما طلع ، بقت امي تتعرف على الحجية و تسولف وياها

مدينه سفرة بغرفة الحجية ، للشيخ و اخو هم جان جاي و اسامة و مرتضى و علي ابن خديجة عمره ١٠ سنوات

كعدنا، الشيخ صاح على خبز، كلت لرقية اكعدي اني اكوم، اخذت الهم .. اخذت الهم، شفت الشيخ ما يكدر يكعد بالكاع، كاعد ع القنفذ

الباب مفتوح و اني من طرف الباب اباوع، صحت :- ابو مرتضى لو تحط طبلة و تفطر

- مو صايم خليها عود بعدين

رحت جبت صينية و صحت على مرتضى يحطها كبال ابوه، صاح :- مشكورة يابه

... الحجية طابت لامي .. وحبت سوالفها تكللها :- انت معدله

و امي واكعة صبغ و بتلايت بالمرة
كملوا فطور ، صادق و اخوه طلعو للدكتور و احنا بقينا نسولف ، امي دزت على احسابها كعك و كرزات و ضحك ويا البنات

و الحجيه تكللها :- العباس عليج لا تروحين انتظري بناتي من يجن بالعيد يتونسن وياج هسه يتخبلن على سوالفج، ولج ديار انت ليش مو على امج

كملنا و طلعنا للبيت .. ممرتاحة لسالفة اثار ٢٤ ساعة فوك متشكله ع الايباد، اول ما دخلت البيت كلهم كعدوا ، اني صعدت فوك، نزعت حذائي و دخلت هي مندمجة بالايباد ..

سحبت الايباد منها، فزت هي بساع :- جيبي

- اريد اشوف

- معليج جيبييييي

- اششش كعدي ولا تخلين احد يسمع، خل اشوف شدا تسوين

بقت تكرص بيه و تكلي :- انت شعليج بيه دجيبيييي

لزمتها من اذانها :- منو هاي التكرصيها ولج ؟ ايدج من تنمد عليه اكسرها الج افتهمتي، والايباد اني اشتريته الج و بكيفي وكت ما يعجبني اخذه منج

اخذت الأيباد .. اباوعها مسوية تلكرام و تحجي بيه ويا بنية، و هاي البنية تعلمها ان راح موديل البنية تحب ولد بعد هسه الموديل بنية تحب بنية و عادي باوربا المثقفين كلهم هيج يتزوجون
البنية تتزوج البنيةو الولد يتزوج الولد
و فيديوهات لاجان و فرق مو سيقية لشباب يعشقون بعض

بقيت صافنة بالموبايل ، شلت راسي :- شنو هذا اثار شدا تتعلمين شنو هاااااااااالحجي ؟

- راح امسحها بس انطيني

- انت مقتنعه بحجيها هاي ؟

- لا بس هي تكلي احبج

- ومنين عرفتيها ؟

- وياي بالمدرسة

- ولج لا تخبليني بالمدرسة شلون ، شنو تعلمج هاي اثار وكفتي عقلي، اريد استوعب الموقف ، اباوعلها و ارجع اقرأ .. كعدت ، هي كامت تبجي و تكلي

- ما اعيدها بس انطيني ايبادي يالله

- تدرين اسامة لو عرف شيسوي بيج يابه و القران يلعكج بالمروحة تعليك و محد يلزمه، تذكرين من ضرب امي طلقه و تالي محد لزمه و طلع انت هيج يكتلج و محد يحجي وياه

كامت تبجي و تلزم بيه و تكلي :- لا والله اني ما مسويه شي لا تحجيله والله بعد ما اعيدها

- من شوكت انت ويا هاي البنية ؟

- مو هواي

فاتت امي، شافتها تبجي :- شبيها اثار
راحت هي حضنت امي و تتمسكن، كلت الها :- ماكو شي بس مكابله الموبايل ٢٤ ساعة و كاعدة ما تنزل، الايباد يبقى يمي

ميعاد :- ذالتها بالايباد ولج شرايدة منها عطلة خليها تلعب بأيبادها

- مااااااما مو اعرف بمصلحتها انت و مو عدوتها اني حتى اذلها بايباد لو ما اني اشتريته الها، بس اعرف شوكت انطيه إياه

اثار:- ما ما اريد ايبادي

-مو اصيحه لأسامة والله اثااارر

ميعاد :- هاي شبيج ديار ليش هيج وياها

- عوفيها هاي طالعة عينها زايد و ادللت هواي لحد ما استهترت

- اخذت الايباد و نزلت جوا ، صياح الجهال ما ينحمل ، و خديجة كاعدة ، لا عندي ميانة وياها ولا احب اجرحها بكلمة

صحت :- يا حلوين اكعدوا شوية، صاحت بيهم هي، وكعدتهم يمها ، كعدوا ، بس هوسة ما متعودة عليها ولا متعودة لوجودها و لا احس بيها اختي يا الله شلون

داريت ابوي و شفت وضعه و كعدت، حطيت ايدي على خدي و افكر بأثار ، بالله ربي شلون اني ويا هالطفلة و يرسخون هاي الافكار ابالها بنية تحب بنية وولد يحب ولد ، ادور ربي جهال ١٢ سنه وينج وين الحب انوب بنية ...

اجا اسامة، صاحلي ، كمت وياه للغرفة :- ديار شنو يعني هاي البنية راح تعيش ويانا ؟

- والله حبيبي ما اعرف لازم تحلل و هيج امور اذا ثبتت هي اختنا بعد ننجبر بيها

- شو اني اكول مو اختنا

- امي تكول هي ، بس تره هي تشبهك هواي

- ما ماخذ راحتي البيت هوسة و استحي افوت و اطلع كبالها

- راح انطيها الغرفة الفوك هي و الجهال هاي الفترة و اني و اثار ننزل جوا

- ماشي

كمت الها كلت الها :- خديجة استقري فوك هالفترة انت و جهالج بين ما نخلص تحاليل و نشوف وين توصل

هزت راسها و كامت ، وصلت يمي ، حجت :- والله جاي احس روحي مذلولة هنا ، لا احسج راغبتني ولا حتى ادراضية بكعدتي بالبيت ، اني اول ما شفتج والله طرت من الفرحة صارت عدي اخت انت ليش ما فرحانة بيه

- مو هيج بس غير نتأكد

- كامت تبحي، اخذتها بحضني :- انت لا تتحسين مني، وعد لو طلعتي اختي والله العظيم اسندج و ما اخلي احد يأذيج لو يأذي جهالج و اولهم رجلج ارفع عليه دعوة و اجرجره محاكم و اطالبه بنفقة و غايب الج ما اخليج تحتاجين ذرة والله

حضنتني و كامت تبجي، بجيتها بيها انكسار و ضعف، بقيت اطبطب عليها، و كلت الها :- لا تبجين اصعدي و ارتاحي انت و جهالج فوك ، امي هناك اكعدي وياها

صعدت و جهالها صعدوا وراها، فرغ البيت من الهوسة، بس انكسر خاطري عليها، حتى لو مو اختي تقهرني المرة المكسورة الما الها جنح

طفيت الاضوية ، شغلت ضوه خفيف نصيت التلفزيون، اخذت كتاب من مكتبتي و تمددت اقرأ ، تمدد يمي اسامة و هو يلعب بموبايله

اجت الوطنية دفرت اسامة برجلي :- كوم سد الباب خل يبرد الهول كوووم

فاتت امي وواثار نامن بالغرفة الجوة و اني و اسامة نمنا بالهول بلا فراش هو على موبايله و اني على كتابي لحد ما غطينا بالنوم جاية امي مغطيتنا بلحاف واحد كمنا واحد يجر من اللاخ حتى نتغطى

للسحور كوة كعدنا ، امي سوت هي و خديجة عشتو اني ام البيت و نسيت اعزب

ثاني يوم عفتهم بالبيت ورحت لدوامي.
...........

ميعاد :- كاعدة الظهر و اندكت الباب مال البيت، كمت من مكاني، فتحته ،طلع الشيخ لازم جرح صدره و واكف، عيونه بالكاع

- السلام عليكم

- اهلا عيوني و عليكم السلام

- شلونكم يابه

- على الله الحمدلله

- ام ديار اني جاي احجي وياج بموضوع اريد اختمه

- اي كول

- الحجي مو مال وكفة على الباب

- زين تفضل فوت بالهول ابو ديار موجود و نكعد نسولف

- اخاف بيها احراج يابه

- لا بالعكس كل احراج ما بيها هلا بيك

دخلت جوا سويت طريق و رفعت اسماعيل على سريرة ، هو بس يون ، و يقلقل ما تعرفه شيريد

صحت للشيخ تفضل، ولبست حجاب، و الحجاب اللاخ لفيت بيه نفسي ، رغم هو مدنك ما رافع عينه

كعد، حجه :- الله بالخير

- الله بالخير هلا بيك عيوني

- ما ادري اذا ديار كايلتلح بالموضوع

- اللي هو ؟

- اني طلبت ايدها على سنة الله ورسوله وردت منها جواب و هي ما ردتلي

- تريد الصدك هي سولفتلي و مدحت بيك هواي و من كثر ما مد٩ت بيك من ابعيد انزرعتلك محبة بكلبي و دعيتلك لان واكف الهم و مساندهم و هم هنا، بس احجيلك الصدك يا شيخ و اريدك كون تساعدني

- شنو ؟

- انت لابد تعرف بالشباب و ايامه لا بد الواحد يمر بتجربة ويا انسان

- افهم

- ديار تعلقت بواحد، هذا الواحد جانت تحبه بس ما صارت القسمة لأن متزوج هو، و ما رادت تاخذه من مرته و جهاله عافته و اتزوجت ، بس هو ما عافها بحالها ، حار شسوا مشاكل بينها و بين رجلها حتى يطلكهم رغم هو اتزوج وحدة سورية بس ما كف بقى وراها الى ان طلكها رجلها و من اطلكت، عافها و ما اتزوجها و كسر بيها لأن كسرت بيه كبل، راد بس ينتقم منها .. الولد ما اريد احجي عليه لان بطريقه لزوجته الثانية السورية انفقد
مات .. ما مات ما ندري
بس هي من هاي الحادثة بعد جزت روحها من الزواج و من كلشي .. تجربة مرت بيها تخاف تفشل

- يعني هي اللي انفقد تحبه لو شنو ؟

- هو شخلى على حالها و تحبه بس هي ضميرها يأنبها تكول لو ما اني بحياته و ما صاير كل هذا جان ما انفقد، بس هو كسرها و ما رادها لهال بيها خوفة بعد لا ترضى تتزوج ولا تقبل تعيد التجربة

رغم تحجيلي عنك هواي، و الحجي بيناتنا هي هاوية بس بس مترددة تخاف لا هم تفشل وياك ، لهءا ما رادتلك جواب

- اذا الفات صار عدها ماضي فالماضي ما يتحاسب عليه، سبحان الما يغلط بحياته

- الله يحفظك و يخليك معدل و شهم والله هواي تمدحلي بيك و ادريها هاويتك بس تخاف تخطي الخطوة لهذا ظاله معلكة لا هي كايله الأي ولا هي كايلة ال لا ..

- الله يخليكم يابه، والله اني حسب شفتها البنية صارلها ٣ سنوات عايشة هنا .. لا فد يوم سمعت الها حجاية لا نظراتها ملعبه، ترا البنية المو زينة مبينه و هي رغم محد الها صانت نفسها بنفسها و هيج مرة بصراحه اني احترمها ، لهذا اني رايدها بالحلال

- ما نلكا احسن منك كافي فادي دمك للوطن المثلكم ما يتجازه والله بلا مهر يكبع و ياخذ اليريدها

- الله يحفظكم لا هذا واجبنا حفظ الارض و العرض و المقدسات

- الله يخليكم، اني احاول اقنعها و اعتبرها مكضية ان شاءالله

- ان شاءالله، العافية عدكم يابه اني اروح اكوم

- هلا بيك عيوني

كام راح .. بقيت ادورها براسي .. و اشوف شلون ارتبها ويا هالمصيبة اللطامة بتي.

ديار :- دخلت البيت الساعة ٣ الظهر حارة و شمس تكتل و رمضان متت ، فتت كبل سبحت و تمددت بالهول، الجهال يتكامزون ويلعبون ويا اثار
لافتهم وراها و خابصة البيت
ايباد بعد ماكو بيدها كامت تلعب
ما ردت اطوخ عليها بالموضوع و اكبره و اخليه ابالها فسكتت بعد حتى ما حاسبتها لا تحسب اني كاعد اضغط عليها

متمدده و امي كبالي صافنة كلت الها :- ها يوم بيش تفكرين

- بالعيد

- شكو ؟

- مو عدنا خطبة

- خطبة منو ؟

- خطبتج غير

-يا ستار يا ربي انوب خطبتي

- غير اجا الشيخ اليوم الي و طلبج مني ووافقت

- كعدت من نومتي على حيلي :- عليج الله

- اي والله

- استعدلت :-، تحجين صدك لو تتشاقين

- لا والله احجي الصدك

- كمت من مكاني، كامت هي بسرعة وراي
دخلت للغرفة، حجت :- دياار

- ما اريد اسمع اي شي

- لا تسمعين و مو بكيفج ، حجيتله على خالد

شهكت :- عزاااا انوب سولفتي اسراري اله

- اي ليش لا هو رايدج بالحلال سولفتله بس بطريقة شوية مختلفة

- ماما منو طالب منج ، لا تدخلين بحياتي

- لا ادخل و مو بكيفج اءا تبقى عليج تخلصيها لطم

- ما شاكيتلج حال، غير خالد ما اكدر اشوف

- خااااااااالد ماااات ديار

- ما مات خالد ما مات

- ماااااااات، و حتى لو ما مات، تعتبري مااااااات ، ما اكتفيتي بكل المشاكل الصارتلج وياه

- الرايدته مني شنو انت اني حرة احب منو و اتعلق بمنو

- رايدة سعادتج، ما رايدة تذبلين هيج بعز شبابج، و اكو رجال متمنيج ورايدج

- تعرفيني ما اكدر

- ديار اني امج و اعرفج، تنكرين انت تعودتي على حبه الج، تنكرين من تشوفينه يتقرب منج ، تفرحين و ما كمتي تتضايقين، تنكرين تهتميله و تفكرين بيه

- خالد بداخلي

- خالد تحنيله مو بداخلج لو صرتي قوية و شوية دفعتي روحج دفعه ليكدام والله تعيشين و ترتاحين ويا انسان يحبج

- ما اكدر تفهمين ما اكدررررر

- سؤال لو انت المفقودة و خالد ينتظرج و ما متزوج ، يبقى ينتظر لو يتزوج و يطوي صفحتج؟ ولج انت غدرتي رجع وحدة و جاب اللخ و انت متزوجه و رجلج ويحبج و ما تقبلتي ولا كدرتي تكليله احبك بسبب حبج اله، كافي انطي نفسج فرصة و عيشي ولو يوم واحد بدون خالد

- ما اكدررررررر

- جربي ، خطبة بس عسى ما اطول سنة حتى لو سنتين، جربي يمكن تحبينه يمكن ينسيج يمكن تكدرين ليش هيج موكفة حياتج هسه ما اكلج زوتج، بس خطوبة

عجبج عجبج .. ما عجبج خيولي
المهم بس جربي و اخطي خطوة

- كعدت ابجي

كعدت يمي، و خديجة واكفة بالباب تباوع لحجينة، حجت و ادخلت :- والله الرجال الاجا شلون شخصية و هيبه و عنده بيت و جهال ما عنده خالي مختلي بس الج، يعني شلون الوحدة ترفض واحد هيج

بقن يحجن هي و ماما .. ما قبلت و لا جاي تدخل بمخي ، لبسن وراحن على مختبرات على حساب امي عل. قضية التحليل ..

اني بقيت افتر بالبيت ..
احتاريت كمت اجيبها منا و اردها هنا .. خابرت على عذراء و حجيتلها كل البالي

كامت تكول :- والله وعفية بخالتي ميعاد بس هي مرة والله ما تنلام بيج

- ما اريد افهمي

- دا تكلج بس خطبة ، جربي ديار ترا ما خسرانه شي

- ما اكدر

- اذا انت مقنعه روحج ما اكدر ما راح تكدرين، قنعيها تكدرين ، لو خالد بيه خير الح وحق هذاااااااا الله الا اني الاوكف وياج و اخش بعينج لو نسيتي بس عيشي ولج اطلعي حتى لو رجع اطلعي من حياته و عيشي والله ما يتجرأ يتقرب منج بعد

كعدت تقنع بيه و تحجي ، و للفطور هي تحجي تحجي تحجي .. حتى اسامة سامع امي تحجي وياي ، اجا يكلي ( ليش ما توافقين الشيخ خوش رجال )

البيت هوسة ، افكاري هوسة حسيت كلشي بحياتي هوسة ، فطرت كملت ، كلت لامي راح اطلع ع الشارع شوية و ارجع

اخذت سيارتي وكمت افتر بالمنطقة، قفلت الجام و شغلت اغنية (مشاعر ) اغنية هادئة و تلخبطت مشاعري وياها

بقيت اتذكر اللحظات اللي احجي بيها وياي لو يلمحلي .. جنت كلش اتضايق بعدها صار عندي الموضوع عادي، الى ان كام من يلمحلي ابتسم و اضحك

لا ... اني احب خالد مستحيل ما اكدر
بس خالد ماكو .. لا هو يرجع اني حاسة
و حتى لو رجع ، جنت وياه و اني بحيرة اتمنى ابتعد منى بس ما اكدر لان اهله خيروه يا اني يا هو .. غير ان كل الطرق مسدودة بوجهنا

" عوفي كل اللي يتعبوج و اولهم اني"
لا .. مستحيل مستحيل ما اكدر اعوفه هو شي عاش بداخلي من اني وصغيرة شلون هيج اعوفه

وكفت السيارة، خابرت عذراء ابجي، اول ما ردت كالت الو، بجيت و كلت الها ( ما يطلع من بالي ما اكدر انساه ما اكدر )

- ماكو شي ينسي بسهولة ، الايام كفيلة تنسيج، وبعدين يا حبيبي مدا نكولج اتزوجي، دنكلج جربي و انخطبي و ابقى سنة سنتين انطي فرصة لنفسج تجربيها تكدر لو لا ..

- و اذا ما كدرت

- ماكو اسهل من فسخ الخطوبة

-اخذت نفس

كالتلي:- ليش ما تصلين استخارة و تستخيرين ربج و هو يختارلج مو احسن ما حايرة

- ما اعرف كلش ملخبطة انوب امي حاجيتله على خالد

- احس حتى يحس ان ماكو شي مضموم عليج و يعرف شنو البداخلج و يحاول يعيد نفسه وياج ، احلى شي تصارحي

- بس امي ما حجت الصراحة

- حجتها بس ناقصة و جابتها عدل

- و اذا تندمت

- لا تخلين الخوف ابالج بس ادعي ربج يوفقج، والله هو واكفلج و ساندج ادعيه

نهيت الإتصال بعذراء بقيت افكر و افكر و افكر .. تلخبط عندي كلشي ساعة اي و ساعة اكول لا خالد ما اكدر انساه بداخلي عايش

لفيت سيارتي و رجعت للبيت، لكيت صادق، منتجي على سيارته و مرجع راسه ليورا و مغمض ، رجله ملفوفة لفوك الركبة و ايده، و حتى صدره بس لابس تراك رصاصي وواكف ..

صفيت السيارة، فتح و اندار يباوع، شافني تحرك من مكانه، طفيت و نزلت، حجه :- اهلج موجودين بس سيارتج شفتها ما هي و ظل بالي عليج، وكفت انتظرج

- شاعنيلك

باوع .. هو بكل مرة احجي وياه ما يخلي عينه بعيني و يركز يستحرم، بس ، هسه ركز عينه بعيني و بقى يباوع

- وكفتج هاي و شوفتي الج كفيلة تعيشني شهر مرتاح عسى لو بنص النار ع الساتر من اتذكرج انسى كلشي ، ما رايد الحرام و اكرهه و دعيت الله بليلة القدر اليكتبج الي و يبعد الحرام عني و عنج

-موافقة

بقى مركز بعيوني، ابتسم ، مد ايده يحك لحيته و هو يباوع بالفرع و الضحكة وضحت بوجهه

- اترخص
فتت للبيت و اسمعه يقهقه و يضحك و يباوع للسما و يكول ( اشكرك اللهي ) .. استغربت ، هيج اني امنيته و ديشارك فرحته ويا ربه بموافقتي

فتحت الباب، انركع براس امي
دخلت ، شعندج هنا

- منتظرتج تالي شفت فلم رومانسي كلش عجبني

- ضحكت و فتت

فاتت وراي ،تعاي تعاي وين رايحه

- شكو بعد

- تعاي احضنج و افرح بيج

اخذتني بحضنها ، و هي تكلي :- بجاه هو النبي محمد يا يمه اليسعدج و يمسح على كلبج و يوفقج ويا اليحبج و يفتحله كلبج

باوعت خديجة تباوع علينا من امي حاضنتني، ابتعدت من امي (امين )

دخلت جوا .. بدلت ملابسي، و اتمددت يم السرير مالت ابوي بالهول اخذت الكتاب و الموبايل و كعدت ، شفت اكو رسالة واصلتني من صادق

مكتوب بيها (باقي بس ٥ ايام للعيد )

كتبت اله ( اي )

رد ( شثكلهن )

- ناوي تخلي المهر بيهن

- اي كبل لا التحق

- شوكت تلتحق ؟

- ابوره العيد

- بس جرحك بعده اخضر

- اخ يابه لا تحجين وياي هيج والله كلبي يكوم يوجعني

ضحكت .. ديلا هو شحجيت اني
كتبتله ( ابو مرتضى تعرف اني عندي تشوه بجسمي فما اريد نستعجل بالخطبة اريد اتعالج ياله )

- لا تشيلين هم لهذا الموضوع اني عندي سفر قريب على رجلي لايران و اخذج هناك التجميل عدهم كلش ممتاز و رخيص

- ان شاءالله

قفلت الشاشة و اخذت كتاب اقرأ، اندمجت اقرأ ، و كأني اتهرب من شي بداخلي ما اريد اسمعه ، و كأني بروحي تمردت على كل مشاعري وصرت بلا مشاعر

بقت امي كاعدة يمي تسولف من شافتني كلمة وياها و كلمة ويا الكتاب ، عافتني وراحت ، اجت اثار ، باست خدي و كعدت يمي

- احبج لا تزعلين مني

- اني مزعلانه منج بس هالموضوع كلش اخاف عليج منه، حرام مذكور بالقران بقوم لوط ، اللي سووه الله عاقبهم بالحجار الى ان ماتو كلهم

- يعني شلون

- يعني اذا سويتي هيج بعد الله ميحبج و يمكن يموتج ، تذكرين بابا من جان سخيف شوفي الله شسوا بيه ، كل واحد يغلط الله يعاقبه

باوعي شغلات حلوة تفيدج شنو هاي السخيفة تراسليها

- بعد ما اراسلها والله

- جايه تريدين الأيباد ؟

- اي

- انطيجياه بس بشرط رمز مينحط بيه ووكت ما يعجبني اجفت عليج و اكولج انطيني و لو شفتج غلطانه بشوية يتكسر وبعد ما الج ايباد

- والله بعد ما اعيدها

- طلعت الها المفاتيح من صدري، كلت الها :- تلكي بالكنتور اخذي و تعالي تمددي يمي، راحت جابته و اتمددت على رجلي تباوع ، بقيت اقرأ

اجت رسالة، فتحتها مكتوب بيها ( اول ليلة انام بيها و اني كلبي كلش مرتاح ) ابتسمت

سديت الموبايل ورجعت اقرأ، كمت اتهرب من كلبي بتلهية عقلي بالقراءة ..

مرت ايام .. امي سوت تحليل و النتائج تطول يلا تطلع
اتفقت الحجية ويا امي على يوم الخطوبة ..
قرروها ثاني يوم العيد

مشاعري مدا افهمها
مرات اكول اني دا اخون خالد .. و مرة اكول هو لو موجود يمكن يتمنالي السعادة .. لا جان ما قبل، بس هو بكل الاحوال صعب ياخذني .. و الأصعب هو ماكو
ما موجود

انطى فلوس هو لامي، اشترت فستان بصلي ، و حجزتلي عد صالون ، و عزمت بس عذراء و امها و مريم اتزوجت و رجلها ما يقبل تجي .. فعذرتها

اول يوم رمضان ، رغم هو جان اخر يوم صيام بالنسبه اله ، بس كعد من الصبح راح جابلنا كيمر و عايدنا

من يعايدني عيونه تبتسم .. ما اعرف ليش احب اشوف هاي الابتسامة البعيونه

خواته اجن اخر يوم العيد .. اخوانه كلهم التمو
العرفته رقية تضايقت لما عرفت ابوها راح يخطبني ، جانت تتامل يرجع امها بس هو جان رافض يرجع زوجته القديمة.

بيومها جانت عذراء وياي بالصالون ..
لبست الفستان و مكياج و عدسات لونهم اخضر فاتح
جان شعري كله منزل و مبروم، شوي بيه رفع منا ومنا
باوعت نفسي حيل حلوة

اسامة اجانا بسيارتي، من شافني ابتسم يكلي ( طالعة عروس ) ضحكنا اني و عذراء و هي تكله ( لعد شنو هي فزاعة خضرة غير عروس )

ومشغل النا اغاني عالية و يضحك هو و عذراء ، ابتسمت و درت وجهي اباوع الطريق ، اتذكرت زواجاتي السابقة بالأثنين جان خالد بيهن و بالأثنين بجيت بيهن دم

انت بيه .. و نظراته الحقد بزواجة امجد ما انساهن

وصلنا البيت، رفعتلي عذراء الكب و نزلت من السيارة

جان الكل موجود و مبدل و فرحان ، عيد و خطبة ، الفرحة بفرحتين ، صوت الهلاهل و الصفكات و الهوسات و ( هاي الرادها و هاي التمناها )

شوية و كالو سوو طريق للشيخ هو و عمه الجبير و اخوه الجبير ، دخلونا للغرفة ..
الزلم برا مو بأنصاف يمكن الدنيا كلها ملتمة ، رغم هو ما عازم هواي .. اسامة و مرتضى وكعوا بيها

فتنا للغرفة امي وياي و اخته الجبيرة و عمته

وكف هو اليعقد النا اني وياه و اخوه و عمه شهود، وكف كبالي .. اني لابسه البركع و الكب منزلته مطالع من عندي اي شي

وكفت كبالة مدنكة .. حجه هو :- رددي زوجتك نفسي

- زوجتك نفسي

- انكحتك نفسي

اختنكت الكلمة بحلكي، احتريت كلش من الخجل، همس :- كوليها

حجيت بصوت ناصي (انكحتك نفسي )

صاح عمه (ارفعي صوتج باباتي حتى نسمع و نشهد على الزواج )

رددتها بس سبحت بالعرك .. كوة خلصت العقد وياه
همس :- مبروك علينا
تقرب باسني من راسي و تنهد و هو يبوس

هلهلت اخته و عمه حجه :- مبروك و شايفين كل الخير بالرفاه ووالبنين ان شاءالله
و اخوه كام يباركله و هو يسلم عليهم اني مدنكة

و اخت صاحت ( الف الصلاة و السلام عليك يا حبيب الله محمد ) و اشتغلت الهلاهيل .. و الهوسات و نتشكر

طلعوا اخو و عمه و خواته ، و امي وكفت بالباب، حجه :- حلال و بين ادية يرادلها بخت

تنهدت .. و بعدني مدنكة رفع وجهي و نزل الكب من راسي :- اللهم صل على محمد و ال محمد

لفني بأثنين اديه و حطني على صدره و هو يكول :- خل يحس بوجودج صارله ٣ سنين يدك بلياج و يتمناج

رفعتله وجهي ابتسم و هو يبوسني من اخدودي ، ابتعدت من عنده ، فتح الكب من ركبتي و شمر الرداء من عندي و هو يباوع تفاصيلي

خجلن ابتعدت عنه، ابتسم و تقرب يهمس يم اذني :- كلج مالتي و حلال و يا ويلج لو بعدتيني منج

مدري ليش تضايقت ، و غرت الدموع بعيني ، حجه :- شبيج

- خايفة اتندم

- من كون يعايبيني العباس لو خليتج تتندمين فد يوم والله احطج على راسي

فاتت اخته : هاي شلون يا ابو مرتضى تلحك العمر كله بين اديك و تنهيها تعالو اكعدو بالصالة نكطع الكيك

- اي يابه اخذ ايدي بأيده و طلعنا، امي حيل فرحانه و عيونها ادمع من الفرحة ، كعدنا بالصالة اشتغلت الاغاني ، هو كال:- لا طفوا الاغاني المكان التحضرها اغاني ما تحضره الملائكة ولا الله يبارك بيه، طفو يابه

طفوهن و بقوا بس يباوعولنا، ابتسم و كاللهم :- ما كلتلكم اسكتو و باوعو بوجهي

كلها ضحكت، امي كالتلهن :- شبيجن ما تعرفن صفكن يلا :- طلع البدر علينا

كامن يغننها و هن سكرانات ضحك، عاد عماته الكبار كامن يدكن هوساتهن القديمة و البنات يهوسن

فتحت اخته علبه بيها طقم ذهب كامل ( محبس و تراجي و اسوار و عقد و حلقة ) لبسنياهن كلهن، و امي انطتني حلقة فضة لبستها اله
و تولونا بالجكليت

كصصنا الكيك اني وياه، وكلني، ووكلته ، اكل و يهمسلي :- شوكت يجي دورج و اكلج

ما رديت عليه ، دنكت

نص ساعة و كاللهم :- يلا يابه كافي تعبنة

كامن كلهن هن يروحن ، و اني وكفت انتظره يروح ، جان يكلي :- ها ؟

- ها ؟

- لا تنتظرين اروح اليوم ما افارك عطية الله

ضحكت امي، كالته :- اخذوا راحتكم بالغرفة

سحب ايدي و دخلني للغرفة

شكولوها ؟

شنو هي ؟

هيت لك .....

☆☆☆☆☆

احم و يله 🤗رح انزل استفساراتكم بالسرة

ماشاء الله اليوم الاستفسارات والاجوبة..مشكل يالوز😂🌚

#ملوكه