كلت اله:- اني اكوم ..
ما قبل راد هو يكوم عني
عمتي كعدتنا اثنينه و هي راحت جابت
احمد يخزر برغد و يهمس بأذنها و هي تكله :- شبيك عمري حامل مو فد عجبه ذوله الاجانب بالتاسع و هن يلعب رياضة ما عليها شي لو كامت

امجد :- اكلو يابه كولو بسم الله
... راد يقطع الكلام لان اول دخلتها ، هي ضاجت عافت السفرة و كامت

احمد صاح وراها بصوت عالي :- رررررغد رجعي كعدي

ابو امجد :- عوفها ابني شنو القضية لا تصيح

احمد :- يابه تتزعل هواي

ابو امجد :- ميخالف ابني بعدها جديدة ع البيت و مستغربتنا على كيفك وياها

ام امجد :- على مود الخبز ضاجت شبيها ؟

احمد :- عوفيها يمة لا تشغلين بالج بيها

ام امجد :- على كيفك وياها وليدي بعدها عروس

امجد ساكت مراضي بالوضع حاط الجهال بيناتنا ساعة يحط دجاج كدامي حتى اكل و ساعة يوكل بجهالة ، سوالي حركة بوجهه بمعنى ( عوفيهم اسكتي)

ما اشتهيت اكل، نقشت على الاكدر عليه و كمت للمطبخ، ورحت للمطبخ كملت تنظيف و هم كلهم بالهول مجتمعين

نزلت رغد :- اسمعي هنا مو عبالج من تالي جاية تريدين حق من امي و تاخذين بيتنا فلس احمر ما الج افتهمتي

باوعت بوجهه، كلت الها :- ماشي
اتنرفزت اكثر دفعت سلة الخواشيك ع السنك و طلعت من للمطبخ

اجت عمتي :- شكو شنو هالصوت ؟

-ضايجة على امها عوفيها

-هذا اول يوم الله يستر من تاليها والله يربي اكره المشاكل و ما احبها ابيتي و خايفه هالبنية لا توجع راسنا

-تتعود على طبعا

صعدت لغرفتي، فتت امجد حاط فطومة بحضنه تمددت و هي تمسح على بطني و تكول (هنا اخوي )
ابتسمت الها و امجد تمدد يم بطني و بقو يمسحون عليها و يبوسون بيها هو و بته و اني ابتسم الهم

سحب نفسه و اجا يمي اخذني بحضنه :- شبيج عمري ؟

-راسي

-اي ارتاحي لا تنزلين ترا والله امي ما تحجي

-مو على حجيها بس خطية رجليها كوه يعننها ع الوكفة مو مال توكف تنظف و تغسل

-ميخالف لبين ما تعدي هالفترة

هزيت راسي و فطوم تشبك بيه و تبوس بصدري و تكول ( احبج و الله احبببببج ) ضحكت و بست راسها
سحبتها لحظني ، حظنتها و نمت و امجد حاضني من ظهري، تالي كل احنا غفينا

اندكت الباب فز امجد فتح الباب، اثار و سارة يلبكن بالحجي الافتهمه منهن ان ابوي جوا جاي

كمت بسرعة من فراشي و نزلت للاستقبال ابوي كاعد عمي ما جان موجود طالع بس عمتي و ما كاعدة يمه

نزلنا اني و امجد ، باوعته كاعد لو بودي ازوع من اشوف خلقته شكد اتضايق و يضيق صدري بشوفته

بدون سلام كتله :- شرايد جاي

امجد سلم عليه و كعد و اني بقيت واكفة ، حجه ابوي :- اني سألت على البيت مال سلمان و قدرت سعره عد واحد .. يطلع حق سلمان منه ٨٠ مليون مو ٥٠

-عوفه ما اريده لا تدخل

-ما ادخل شنو مو تريدين حقج

-حقي بأية الناس ما اريدها المرة مريضة و دازلها تهديد ماتت صار بيها شي منو يتحمل

-اسمعي لج اذا انت ما تريدين حقج فأني حق بتي ما اعوفه

-هسه صرت بتك و ادور حقوقي بس هو مو صوجك صوج امي الدخلتك بالسالفة

-غصبا ما عليها تنطيني من البيت ٨٠ مليون ٢٠ الي اني هم ابوج و ٥٠ الج تصرفي بيهن

-ما اريد حق ولا اريد تجيبلي فلوس اطلع منها

-مو بكيفج هاي السالفة بعد ما اعوفها

-انت ما ميت عليه ميت على الفلوس الا انت من يا وكت حاسبني بتك تريد اذكرك بذيج الايام لو لا

ظل يصيح عليه وراد يرفع ايده، كام امجد سحبني منه و صار كدامه و هو يكله :- العفو خليتك تحجي وياها و ما ادخلت بس ما اسمح ايد تنمد على مرتي و ابيتي كاعد على ابساطي ما اريد اطلع عن اخلاقي بس ياريت تعوف ديار و تعوف سالفة ورثها احنا نحلها

كام ابوي من مكانه يصيح علينا و يهدد و ما اعوف حقها و اله اخذه و اسوي و افعل لحد ما طلع من البيت

امجد :- يسالفة الورث الطلعت النا من تالي والله هالورث هذا راح يسويلنا مصيبة رجال مات و شبع موت متذكرين شنو

يحجي و يقصدني بالكلام بس ما يحجي وياي مباشر كام يصيح و طلع ، كعدنا اني و عمتي بالاستقبال نحجي

نزلت فطومة و بيدها الموبايل مالتي يدك، كمت الها بسرعة، باوعت الرقم خالد اخذت الموبايل و صعدت فوك

رديت :- الو ها خالد

خالد :- ابوج شعنده اجا ؟

-رايد ورث

- هه

-تضحك هي كل هالسالفة طلعت من وراك انت التذكرتها

-اي والله عمي صح كلها من وراي، اسمعي حق سلمان لا تتنازلين عنه

-ولو اذاها للمرة ؟

-ميصير عليها شي هو انطاها مهله و خوفها ، اذا تخاف على روحها خل تنطي و اذا بايعه روحها علمود الفلوس بعد.هي الكاتله روحها على هالورث محد كاتلها

-خالد هالحجي يخوف والله اني ما الي خلك مشاكل

-ابوج لا تتصادمين وياه و هي المشاكل ما تجيج

- ما تصادمت وياه بس هو يريد حق من الورث

-شكد ؟

-يكوله حقه ٨٠ اخذ ٢٠ والج ٥٠

-هو صح اني هم سألت على سعر البيت و طلعت حق سلمان من الورث ٨٠ مو ٥٠ ولا ٤٠

- كل السالفة ما مقتنعة بيها

-يربج لتقتنعين اكعدي بمكانج و حقج يجيج و ابوج لا تتصادمين وياه اءا ما تريدين مشاكل اني بالباب من سمعت صوت صياحج وياه هالشي مو من صالحج ديار

-غير نرفزني هسه عرفني بنته ويريد حق

-عار نعرفه بس عار و يطلع الج حقج هلا بيه، اني راح امر على امج اكللها الحجي حتى تخابر ابوج تفهمه ، و انت روحي هسه لان امجد دخل للبيت لا يشك بأتصالج امشي

- اذا تخاف عليه يشك ليش تخابر

-مخابرج متغزل بيج اني شبيج فوك ما رايد حقج، امشي روحي هسه خل اروح لامج

سمعت صوت امجد جوا يحجي ويا امه كلت اله :- ليش مصر تاخذ حقي ؟

-لان اني وعدتج من كبل لا ازوجج سلمان حقج من ورثه يرجعلج اتزوجتي و شبعتي ضيم وياه بس ما كدرت للورث هسه صارتلي الفرصة .. مع السلامة

سده بوجهي، تنهدت :- يالله هالحق هذا اللي الكل يطالب بيه و كاتل نفسه عليه ما عداي

درت وجهي لكيت رغد واكفة تباوع و تراقبني، عقدت حواجبي :- شبيج

-امي اذا صار بيها شي محد يخلصج من ايدي

-اسمعي رغد اليوم اجيتي لهنا و محترمتج عروس و ساكته من تقللين احترامج اوكفج و ما اسمحلج افتهمتي مو انت التهدديني

رغد :- سهله

نزلت جوا امجد كاعد ، سألته اذا يحتاج شي كال :- لا ما اريد

-كوم طلعنا اني و الجهال ضجت من البيت، خلصت الجامعة و صار عرس احمد هلكنا من التعب و من سافرو لليوم ما طالعين مدام عطله و اليوم اجو كوم طلعنا

حجيت و فطومه كامت تكمز كدامي وهي تبوس بابوها حتى ياخذنه و الجهال يتراكصون، كال :- امشي اطلعكم اونسكم برا

صعدت بدلت للجهال بسرعة و نزلت
عمتي كاعدة كلت الها :- كومي ويانا

شفتها بنفسها تطلع بس ما تريد تخرب طلعتنا لان بس اني و امجد كامت تتحجج بمرت احمد جديدة و عيب

كومتها غصب عنها و كلت الها :- ما نتأخر و رجلها يمها
طلعنا و هي كعدت بالصدر و احنا ورا

مرينا من بيت امي، سيارة ابوي بالباب ، حجه امجد :- هو رافد موجود و ابوج داخل للبيت

ما رديت لان لفت نظري خالد واكف بالمحل بس ظهره للشارع ما منتبه النا ، بقت عيني معلكة لحد ما عبرنا المحل شلت راسي لامجد حتى اكله :- ها
لكيته مركز بيه

اني غبيه ما تلامي بيه امي من تكول اتجيبين الشك لو طار لسابع سمه عيونج يفضحنج

كلت اله :- وين راح تاخذنا

- ما رد .. بقى مركز بطريقة

كلت اله افتح :- اغاني خلي الجهال يتونسون و يركصون

شغل الهم اغنية كلب كلب الجهال تموت عليها هالاغنية كانما نشيد وطني عدهم حتى حسوني و حساني يصيحون بسبس ميو

نزلنا بمتنزه العاب هو اخذ الجهال يلعبهم و اني و عمتي كاعدات لا اني بيه افتر ولا هي رجليها يعننها
بقت تحجي وياي و تكلي :- من ماتت مها جنت شايله هم لهالجهال و حيل انقهرت عليهم بس هسه كلش مرتاحة من اشوفهم مرتاحين وياج و مداريتهم ما محسستهم بغياب امهم

-هي وصتني بيهم و اساس زواجي من امجد همه .. شلون اعوفهم

-ميخالف بتي حتى لو هم بس امجد هم يستاهل الاهتمام منج هو مرات يحجي وياي بس اني ارده اكله تعبانه حمل و جهال و بيت شتصير لا انت عليه بس الصدك هو هم خطية ما رايد غير كلمة الحلوة منج لا تبخليها عليه الحبيبي و الحياتي ما تخسرج لو حجيتيها اله و هو يتمناها منج

-ان شاءالله

-والله يا بنتي ما رايده من الله غير يصفي كلوبكم و يخليكم كلب على كلب ساعتها لو متت اني مرتاحة

-عمرج طويل خالة

اجا امجد كعد يمنا :- شمشتهيات اجيبلكم ؟

باوعتله :- مو كانك صرفت هواي اليوم

ضحكو اثنينهم : اي غير لخاطركم قابل صارف على منو اني

-ونهاية الشهر رحمة الله والديه اليدايني خمسة مو

-هسه الله كريم منا لنهاية الشهر قابل كاعدين بالشارع
عود نكسر قاصة امي و ناخذها

- خو حطيت عينك على هالقاصة

ضحكنا اثنينا ، كالت :- الله يسعدكم يمه قابل كاعدين بالشارع تخلصون احنا موجودين

بقى هو يتغزل بامه و راح كام جاب الجهال و اشترالنا لفات همبركر
كلت الها :- خل نكوم مرت احمد جديدة لا نطول

كمنا كلنا و هو شال ولده التوم على اجتافه وراح يجيب السيارة من الكراج و اني و عمتي و فطومة نمشي على كيفنا

جاي نعبر الشارع اجت سيارة سريعه اني سحبت فطوم من ايدها و ركضت بسرعة .. السيارة اجت بقوة داست بريك صار صوت قووووي راد يوكف ضرب عمتي كبل لا يوكف

انشمرت لهناك صرخت و ركضت الها نزل السايق يركض ، وجهه مضروب بالكاع الدم كام ينزل على وجها و هي كوة تحجي :- ولك يمة امجد يمة امجد

اباوع وجهها تخبلت كمت اصيح بالشارع :- امجددددد ، خالة احجي وياي باوعيلي ، امجدددد

التموو الناس عليها هي بس تردد امجد و امجد اجا راد يشيلها رجال ينقلها امجد اجا يركض من بعيد كام يصرخ و يصيح

هي ما فاقدة الوعي بس الدم اللي على وجهه رعبنا شالها امجد و ركض للسيارة ركضت وراه صعدها و خليت الجهال ليكدام و صعدت يمها
داسلها و هو يصيح و يغلط و ما خله حجاية ما كالها
اني ساكته ما رديت عليه اي كلمة الوم بروحي شعندي طلعت و شبيه و لو ضاله بالبيت مو احسنلي
مو تني وجوه طلعه و جه راحة الله غاضب عليه ما تهنيت بشغلة بحياتي ابد

وصلنا للمستشفى هو نزلها و اني بقيت يم الجهال ما فتت وياه، هو خابر اهله بالسيارة بس رجعت خابرت عمي، يصيح بأذني شلون و شلون ما افهم بيه و هو يصيح فقد عليها .. انطيته اسم المستشفى و سديت الخط

السايق اللي دعمها اجا صف سيارته و كال :- يابه اني خساركم والله بس والله ما جزت قاصد هي طلعت بوجهي

-الله يا طلعت بوجهك غير انت اجيت طاير

-هسه خوية اني شسوي

-شمدريني زوجي فوك هو يتفاهم وياك

ردت ادخل للمستشفى رجال يصيح :- خوية هاي السيارة الكم ما يصير توكف هنا

بقيت اشرحله حادث يمعود حادث و هو قفل ما يصير و ما يصير .. شوية و اجا احمد سابق ابو امجد ، صاح :- امي وينها شصار وياها احجي

الولد لزمه هاي السيارة الكم
احمد يصيح يريد يفتهم مني و هذا لزك اله .. طك وياه كام يصيح عليه ، كمت افرك بوجهي عفتهم و طبيت
المستشفى جبيرة اضيع وين امشي ما اندل بس دموعي تتجارة و اني الوم بحظي

كعدت الجهال ع المسطبة و كعدت ابجي وحدي فات احمد من عدنا و فات جوا، اباوع الناس تروح و ترجع ذكرت و جه الخنزير ابوي بس يطلع بوجهي تصير مصيبه عساني لا شفته ولا اجاني

اجا ابو امجد يركض شافنا صاح :- ها وينهم ؟

-ما ادري فاتو جوا ما دخلت الجهال

عافني و مشى كمت اخذت الجهال و مشيت وراهم نوب الجهال تعبوا التوم نطو من البجي اشيل واحد يصرخ اللاخ و فطومة نعست هم كامت تنغوص ، خابرتني امي فتحت خط كلها تصرخ حتى اني ابجي وياهم

-شبيج ديار الحادث وياكم لو بس عمتج شبيج تبجين ولج ابدال ما تسكتين الجهال تبجين وياهم

كمت اغلط على روحي اني فكر اني مفكورة من يوم الجبتيني ساعة السودة الاجيت بيها لهالدنيا لو عايفتني بالزبالة و ما مرجعتني اشرفلي

و هي ترزل بيه و تكلي بس خل افهم علعلتيني يمه
سديت الخط منها و اني ابجي، سألت الاستعلامات على عمتي وصفتله الحال حادث و هيج شي

دلاني على مكانها اخذت الجهال و مشيت امجد كدامي لكيته اخذ مني واحد من جهاله و اني ابجي هو تعبان كلش ، كال :- كافي اسكتي منا الناس

-شلونها عمتي

-زينه خيطو الجرح البراسها ٦ خياطات و بس رجلها حولونا ع الاشعة هسه راح ناخذها

-الجهال تعبو لازم نرجع للبيت

-هسه احمد ياخذكم

صاح على احمد كاله مرتك جديدة لا تبقيها وحدها ارجع و اخذ وياك عائلتي

وكف السايق الدعم عمتي :- خوية امانة الله ورسوله شتحتاجون خابروني اني رقمي انطيته للحجي

امجد :- روح خوية توكل قضاء و قدر هذا الشارع بس ادعيلها بالسلامة

بقى يتشكر منهم و راح كلت اله :- ليش عفته يروح ترى السبب من عنده جان طاير

-شنسويله هذا قدرها ما نريد مشاكل امشي ويا احمد و ديري بالج على نفسج و الجهال

اخذت الجهال و رجعت ويا احمد للبيت، لكيت خالد و ابوه واكفين بالباب ، اول ما نزلنا من السيارة صاح خالد بأحمد :- مو نخابر رحمة لدينك محد منكم يرد بيا مستشفى انتم

احمد :- زينة يمعود بس راح يفحصون رجلها بس زينة ما بيها شي

باوعلي :- انت زينة شصار وياكم وكتها يعني الا اطلعون

دخلت جوا هو فات وراي :- شبيج تبجين انت متأذية شلون صار الحادث

-لا بس حظي فكر ما تهنيت بشي بحياتي تضايقت من ايوي كلت اطلع تالي انككفخت بوجهي

-فدوة المهم سالمين

ابو رافد لزم احمد يحقق وياه و يسأله و خالد فات جوا يطمن علية ، كعدت بالهول ما اكدر اصعد بعد .. انوم بالتوم اخذ من عندي واحد و كال :- راح اصيح بتول تجيج

ما رديت عليه اخذ حسوني وراح ، رغد نزلت :- ها شصار ويا عمة

-زينة

-كله صوجج لو ما طالعة ما يصير ويها هيج خطية هيج احسن يعني شستفاديتي من طلعتج

-اكلج تروحين من عندي لا والله ابتلي بيج اليوم جايه و السانج شطوله ما الي هلكج روحي عني

-شنو كاعدة ابيت ابوج و تكليلي اليوم جاية ترا جاية لبيت رجلي ما جاية لبيتج

فاتت امي و هي تسمعها :- بت العمصة بدال ما السانج هالطوله شيلي الطفل عنها و ساعديها الخبث يجري بدمج و بدم امج

شالت عني فطومة و هي تنوم بيها و كعدت يمي :- شلونج باع حظي الوجه انخرط من الخوف شصار وياكم

-تعبت بس اريد انام دخت

-اصعدي عوفي الجهال اني و اثار هنا روحي

-ما بيه اصعد
فاتت بتول تسأل و خالد و ضحى اجو وراها، تمددت ورا ظهر امي ، فات ابو رافد و احمد و ام رافد اجت

كلهم يسألون بأحمد و يخابرون بعمي كال الهم ماكو داعي تجون كسر برجلها و صبيناه و راح نجي

اني مغمضة عيوني من التعب و من دوخة راسي، فتحت عيني صدت بعين خالد دار وجهه مني و هو يتنهد
رجعت غمضت راسي ذبحني من الالم

حجيت ويا امي بصوت ناصي :- شحجه وياج ابوي اليوم

دنكت راسها حتى تسمعني، كالت :- بعدين نحجي ارتاحي هسه، فطومة نامت راح اوديها بالغرفة

كامت ، اني كعدت لان كلهم كاعدين مو مال اتمدد كبالهم، حجه خالد :- ما تروحين تنامين شمكعدج هنا

بتول :- تريدين اساعدج

هزيت راسي و كمت وياها، ضحى مركزة بيه و تسولف ويا رغد ، فتت لغرفة عمي و عمتي نمت يم الجهال غطتنا امي و طلعت

لهناك ابو امجد و امجد جابو عمتي من شافونا نايمين كامو يصيحون اس و اس ، خلوها ع السرير

شلت راسي من الكاع شفتها خلوها ع السرير كمت من مكاني بسرعة ، ويا كومتي افترت الدنيا بيه اريد الزم و اوكف وكعت التفت امجد وراه :- دييااار

كعدني :- شبيج اتخربطتي

-لا دخت افتر راسي واختل توازني

ابو امجد :- رجعي لنومتج بابا ارجعي هم تعبتي انت و حامل ، رجعها امجد لفراشها غطيها

ساعدني اكوم رحت لعمتي غافيه من التعب بست راسها و ما حجيت وياها ، كتله :- شكالولكم عليها ؟

- كسر قوي برجلها صبوها ٥ ايام و ترجع للفحص اذا ماكو تحسن يسوولها عملية

-كله صوجي

-لتلومين بنفسج هذا قدرها، روحي ارتاحي

حجاها و نزل للكاع تمدد يم جهاله :- راح تنام هنا

-اي اذا كعدت امي و احتاجت حمام لو اي شي منو يشيلها و يساعدها

فتحلي ايده و هو يأشرلي تعاي نامي :- اصعد اجيبلك تراكسود تلبسه حتى ترتاح

سكت، طلعت لكيتهم بعدهم كاعدين بيت ابو رافد بس خالد ماكو و رغد و احمد صاعدين

رحت جبت ملابس لامجد و اجيت بدل و نام و اني نمت يم الجهال من الجهة الثانية
بس ما نمت كل شوية اكوم لعمتي تتأذى ساعة تكلي جيبي رجلي منا و ساعة تكلي انطيني مسكن وبقيت سهرانه وياها

ثاني يوم و ثالث يوم .. هلكت بيهن ناس كرايبهم كلها اجت تزور عمتي و كل واحد يجي محمل ويا ابطالة بيبسي لو فواكه و ينراد جاي و عصاير

رغد معتبره نفسها عروس لان مصارلها يومين من اجت من اربيل يا بغرفتها يا تكعد يم الخطار ويا عمتي من يجون

احس ظهري طك من التعب بس بتول تجيني عصرية و امي تجي تشيل عني بس الجهال هي و اثار هم تاخذهم تلعبهم ..

حليمة ما تنازلت عن ورث حتى من وكعت عمتي ما اجت خاف احد يحجي وياها على ورث بس خابرت عمتي و بالموبايل سلمت عليها ما اجت

طلعو الناس بالليل سمعت امجد يكول لامه :- يمه احجي ويا مرت احمد تكوم تعاون ديار تره حامل و فرد وكفة للطبخ و البيت و الخطار و الجهال ما يصير

حجاها و هو يريد يصعد اني واكفة بالمطبخ اكفه قبل لا اصعد، دزت فطومة على رغد ، شوية و نزلت رغد لعمتي

-ها ماما كولي

-بنيتي انت صرتي وحدة من هذا البيت و انت و مرت امجد اثنينجن اعتبرجن بناتي عاونيها هي هم اخيتج ما يصير وحدها و هي حامل

رغد :- شسوي ماما احمد ميقبل اطلع من الغرفة كلما اطلع يصيحلي

-اني احجي ويا احمد بس انت عينج عليها انتن اخوات

-ان شاءالله ماما

كامت من يم عمتي اجت للمطبخ :- شنو بدينا بشغل الحرك

-شنو ؟

-تحجين و تحرضين بعمتي عليه و هسه راح تحجي لامجد و تحرضه عليه

-اكلج رغد عندج شي وياي شبيج من جيتي و لهسة ما تكابليني

-تسوين روحج بريئة و ابوج مهدد امي

-حجيت ويا ابويه و تعاركت وياه حتى يعوف امج بحالها و ما رضى اني شعليه امج خايفة على حياتها تتنازل بحصة سلمان

-و تبيع بيتها لخاطر شكولج

-احترمي نفسج و احجي عدل ترا من من تصعد عندي والله العظيم افتك بيج

- جربي و شوفي شتشوفين مني ، تهدد

تنهدت و هي طلعت :- يربي والله ما ناقصتها لو ما مزوجينها لاحمد اشرفلي لا اريد ورث ولا فلوس

راحت يم عمتي اسمعها تكللها :- حجيت ويا ديار و ما تقبل اشتغل تكلي روحي اني اكمل

هزيت ايدي و طلعت برا حتى اشمر زباله، سمعت طلق عالي بالمنطقة، فتحت الباب و مديت راسي اباوع شنو الموضوع

طلع عمي :- شنو هذا الطلق ؟
وكف بالباب يباوع و اني اباوع وياه صوت الطلق عالي
كالو بالفرع الثاني

كال فوتي:- باباتي احتمال عرس

دخلنا شوية و اجا مهيمن يركض يكل لعمي :- جدو حليمة خابرت جدو داكين بيتها بالسلاح و هي تصرخ

فز عمي طلع لبيت ابو رافد رغد فوك ما تدري بشي، كعدت سم عمتي :- دخيلك ربي بس لا يصير بيها شي و نبتلي شلون اني ويا ابوي شغلة و صارت بيها فلوس والله بعد ما يفك

نزلت رغد تصرخ :- امي راح تمووووت اميييي
نزل احمد وراها يريد يفتهم شنو الموضوع

اجت كبل عليه لزمتني من راسي و تصيح :- كله منج المشووووهة

دفعها احمد من يمي وضربها راشدي و يكلها :- فهمينا شكو و عمتي تصيح من يمها و تهدي بيهم

اني وكفت على صفحة بس ابجي ما رديت عليها لان رجلها ضربها ،نزل امجد ويا هالموقف باوعلي :- ضربتج ؟

- ضربها رجلها

-صعدي فوك

هي تصرخ و تعيط ،امجد ردها :- بعد اخوج هذا بيت مو شارع و تعيطين هيج

احمد :- دكو بيت حليمة

امجد.:- صدك ؟!!
حجوها و هم يطلعون،رغد صعدت تلبس ملابسها حتى تروح لبيت امها، اني ما صعدت بقيت يم عمتي

عمتي :- يمكن غلطنا من اخذناها

-كولي الله يستر و ما يطلع بامها شي هسه اتمنى روحي اطلع و اعرف شكو تسمعين الصياح برا

شوية و جابوا حليمة و اجو، رغد حظنتها و كامت تبجي ، ابو رافد كام يحجي عليه و ابوج ما يستحي و ناس ادور فلوس والله لا يوفقكم و المرة راح تموت

رده امجد :- عمي من رخصتك هذا الكلام ما اقبله لمرتي اجا ابوها و تعاركت وياه و كالتله ما اريد فلوس و اسماعيل هو الداك رجل على مود الحصة شعليها ديار

ابو رافد :- كله من امها

فات خالد.:- شصار سولفولي بس كالولي دكو بيت حليمة صدك

ابو رافد :- ما يرتاحون الا يجلطوها للمرة

خالد :- خل تنطي الحصة و ترتاح الفلوس مو اغلى من النفوس

-اني لو ادري انت شمحصل و حاط روحك بسالفة هالورث و اطالب بيه

حليمة :- ما انطي بيتي ما انطي لو يشيلوني جنازة فلس ما انطي والله

ابو امجد :- ابو رافد ظلتها هنا شنو معناها دخيل بختكمو مطرود اشيلكم على راسي بس ترا اني هم عندي عائله ما الي خلك اسماعيل و عمايله

ابو رافد :- خليها هنا ما دام بته هنا ما يأذيكم

خالد :- انت تأمن لارهابي يابه شنو هالحجي بيت عمي شعليهم و ادخلهم بالسالفة تريد تتنازل و تخلص لو تروح تكعد ابيتها و تواجه اسماعيل

تحاجه ابو رافد و خالد امجد و عمي اخذوا جانب السكته لأن ما يردون حليمة تبقى عدنا، اني يغلطون و يصيحون ما ارد

عاند ابو رافد يعوف حليمة هنا ، رضوا ما عدهم حل عمي كال :- منا الباجر الله كريم عوفو السالفة

امجد كال :- اصعدي بعد كافي لا تنزلين الجهال و نومتهم فوك اصعدي

عفتهم و صعدت ، صعد وراي هو :- عمتي منو بقى يمها

-ابوي و احمد و رغد نزلو يم حليمة جوا لا تشغلين بالج

تمددت انام، اجا هو يمي حضني و بقى يداعبني ويحاول وياي ..
رغم تعبانة بس هو هم حقه .. طاوعته
بعدها لزمني وجع بمثانتي قوي
حاولت انام مكدرت كمت كل شوية اروح للحمام و ارجع ، هو نام ما يدري بيه اتألم الجهال نايمين
نزلت جوا صوت حليمة و بتها بعدهن يحجن ما نايمات

صعدت لغرفة اسامة كعدت اسولف وياه عن ابوي، تالي شفت الولد يغفي من التعب بسته و غطيته و طلعت

بقيت افتر من الوجع بالبيت ، طلع عمي للحمام شافني كالي :- شبيج بابا ؟

-ما بيه شي

عافني وراح
صعدت انام وجع ذبحني ، اكعد امجد شيسويلي ووراه دوام خطية ، اكعد منو يا الله متت من الالم

اخذت الموبايل كلت اخابر على امي مرة وحدة ردت ردت ما ردت اعوفها نايمة .. خابرت .. دكة دكتين

ردت عليه و هي نايمة :- ها ديار

-لزمني وجع من قبل ساعتين و لهسه ذبحني عادي لو تقلصات ؟

-وجعيش يا ستار

-ما ادري متت حتى نوم ما جاي يجي العيني راح اموت

-اجيج هسه ؟

-نايمين

- نايمين شلون تموتين يعني اصبريلي هسه اكعد رافد و اجيج

-لا عوفيها للصبح اروح

-تتحملين ؟

-اي شسوي

-ولج خاف صاير شي بالطفل خاف يصير بيج شي

كلهم نايمين

معليج اني راح اجيج كعدت امجد و كتله هيج و هيج كام بسرعة، كال البسي خل اخذج

دكت الباب امي نزل امجد يمشيني كالتله :- ارجع وراك دوام اني اخذها بسيارتي اذا بيها شي اخابرك و اكلك تعال .. ارجع ما احتاجك
بس هو ما قبل الا يجي
كلت اله هي مستشفى نسائي راح اروح حتى لو رحت تبقى بالباب
ما قبل الا ياخذني هو ..

اخذنا للمستشفى دخلتني ع الفحص كالتلي عنق الرحم مغلق ماكو شي يحتاج سونار و السونار يفتح الصبح ماكو هسه سونار
رجعنا للبيت من التعب اخذت فاليوم و نمت ما حسيت بعد ما كمت، امجد موصي امه عليه، امي جايبه اثار و باقية يمي

متعاركات امي و حليمة ذيج تصيح تريدون تبوكون فلوسي و امي تكللها انت البواكة و عمي متضايق من الوضع

مخابر ابو رافد كايله تاخذ مرتك و حاجيه ويا امي كايل الها اخذي ديار ترتاح يمج شوية

امي كايلتله خفتا وراحة، صاعدتلي .. كعدتني و كالتلي كومي وياي نروح للبيت

مشيت وياها للبيت مشي ، بالطريق و اصتكت رجلية من الوجع لزمت ادين امي و كلت الها :- ماما الم ما اكدر امشي ااااخ

-عزا العزاني كون ، امشي بس وياي خل اوصل للسيارة

-ما اكدر

احتارت بيه تعوفني لو تمشيني،اجت اثار تركضلي ومهيمن وياها جانو رايحين يشترون كللتلها امي :- لزمي اختج بس اجيب السيارة

كمت ابجي من الوجع و اني اعصر بأيد اثار هي نطت من البجي عبالها راح اموت كامت تحضن بيه و تبجي و مهيمن لازمني

اجت امي صعدتني بالسيارة و مشت

ساقت بيه السيارة للمستشفى و اني اصرخ من الوجع
امجد ما جان موجود .. ابو امجد و عدهم خطار بس احمد رايح على بتول جايبها و لاحكني للمستشفى

دخلوني ع الدكتورة بسرعة لان جنت اصرخ من الالم، حطو جهاز النبض على بطني الطفل ما بي نبض .
اخذوني للسونار .. تبين الطفل ميت صارله يوم
حولوني للعمليات بسرعة .. حتى يسقطون الطفل

طلعت من الدكتورة كالتلها للعمليات بسرعة الطفل ميت ، كامو يجرون ١٠، ١٠ من الخوف

امي فرفحت ، حضنتني و هي تدعيلي و تبجي
عفتهاو مشيت و امي تصيح ورايه و تقوي بيه
هو صحيح اني شفت اقوى انواع الالم و هو الحرك
بس اخاف من المستشفيات و العمليات و هيج شي
خرطت العافية من الخوف
و الالم ذابحني لحد ما خدروني و بعد ما دريت بنفسي ..

طلعوني و اني فاقدة ... و بالبنج ما انطق
خلوني بالغرفة .. احمد واكف و بتول وعلى راسي .. و اني فاقدة

اصيح :- ماما اريد خالد

ميعاد :- يمعزاية لا تشهرينا الحمد لله ع السلامة امي حبيبتي

-اريد خالد

احمد :- الحمدلله ع السلامة

بتول :- ديار اصحي حبيبتي الحمدلله على السلامة

-خالد وين

احمد ظال يباوع ،امي حاجية :- خالد ابيته ماما شوف الحظ انوب كامت تهذي

- روحي خالد ماما حبيبي خالد

امجد :- ها شلونها شنو سقطت
الحمدلله ع السلامة .. باس راسي

:-اريد خالد .....

☆☆☆☆☆☆

#اتمنى_ان_افعلها


الحلقة_44

يالمبتعد عني ابتعد مني
شثگلهن ذكرياتك تعبني

........

امجد :- الحمدلله ع السلامة

-اريد خالد

ميعاد :- شوف الحظ بالله هاي تذكرني بروحي من سويت عملية المرارة طالعة من العملية اكللهم وين مؤيد و هو مؤيد المدير مالتي لا عرف ولا ولف وياه شجابه على الساني ما ادري

بتول :- هو اللي يتبنج يكوم يحجي شيش بيش ما يدري بروحه

امجد :- اني برا اذا تحتاجون شي خابروني

ميعاد :- روح خالة لا تخاف عليها كم دقيقة و تصحى
راح و احمد طلع وياه
باع الحظ هي ما نطقت الا كبالهم بس كون الله يسترنا و يعديها

بتول :- شهرتنا المكرودة هم خطية ما تدري بروحها

-الف مرة اكلها بطلي تفكير بخالد ولج بطلي حرام اذا ترد

-مو بالكيف خالة النسيان مو شي سهل مرات تحاولين ويا نفسج ما تفكرين بشي تلكين روحج جاي تفكرين بيه بلا ما تدرين

ميعاد :- يخالة بس كون الله يسترها و تمضي على خير

ديار :- جنت بحالة لا اني صاحية ولا اني فاقدة، احس اكو ناس يمي و احس بيهم يجون و يبوسوني ويحجون وياي و اني احجي وياهم بس شحجي ما اعرف ..

لحضات الافاقة من التخدير جان شي اشبه بالحلم

بعد ما وعيت وراح تأثير البنج جان اكو وجع بجسمي، احس بأمي واكفة فوك راسي و بتول يمها
حجيت :- ماما نزلو الطفل ؟

-اي بنية جانت خطية الله يعوضج بالاحسن

بقيت ساكنة بمكاني رجعت حجيت :- امجد وينه هم اجا ؟

ميعاد:- كبل شوية تريد خالد و هسه امجد شلون بحظي اني، هسة اطلع اصيحه الج

.. طلعت ورجعت :- مموجود خابرته هسه يجي

ديار :- شوكت نطلع للبيت ؟

-غير الدكتورة تكللنا حتى نطلع يا بنيتي ارتاحي انت

-عندي وجع ابطني كلش ديوجعني

-هسه اصيح السستر تجي اشوفج

رجعت غفيت كعدت على صوت امجد يحجي ويا بتول و يسأل عني، بس ما تقرب مني ولا سألني

انطوني مغذي و ابر مسكنه كلت الها :- اريد ارجع للبيت ما اريد ابقى هنا

كتبتلي خروج امي على حسابها وردنا نطلع، امجد ما جان بالمستشفى طالع مدري وين خابرته امي حتى تكله راح نطلع ما رد ،

احمد باقي راد ياخذنا بسيارته امي كالتله لا اني جايبة سيارتي اني اخذها لبيتي تبقالها كم يوم ترتاح و الله كريم

سندتني و طلعتني من المستشفى، بقت يمي بتول لحد ما امي جابت سيارتها و اجت صعدتني على كيف و بقت تمشي بهدوء

وصلتني للبيت اسامه جان طاير گلبه عليه اول ما نزلت من السيارة لزم ايدي :- ها ديور حبيبتي

سندت راسي عليه باسني بخدي و اخذ ايدي يمشيني دخلوني للبيت ، تقريبا الساعة ١٠ بالليل دخلنا البيت،نومتني بالغرفة الصغيرة الجوا و انطتني الدوا مالتي و منوم حتى انام ..
اجا ابو امجد تحمدلي بالسلامة و هو واكف وراح

غفيت بمكاني، شوية لهناك تقريبا ب١ بالليل
حسيت احد نزل على راسي باسني بكصتي
اشتميته (خالد) فتحت عيني و هو يسأل امي :- شلونها هسه شنو وضعها

ميعاد :- زينة هسه بس ابعد منها خليها تعيش ويا رجلها كافي السالفة السوتها اليوم بالمستشفى

خالد :- اجيت بس اطمن عليها حجتلي بتول و ضل بالي يمها من طالتني و اني ماكو ما ادري بكل خبر من اجيت هسه بالليل يله كلتلي محد كالي هي بالمستشفى

رافد :- و هسة دريت شراح يتغير خالد انسى بالكلبك و انساها و دوس على نفسك و ابتعد

-الله كريم، راح اروح و باجر اجي اشوفها اذا كاعدة، من تحتاج شي خابريني

ميعاد :- ان شاءالله

اني مغمضة عيوني مفتحتهن ولا حجيت وياه بقيت بس اسمع نبرة صوته و هو يحجي وياهم بهدوء

احس خالد صار شي بعيد مثل النجمة اتاملها كل يوم و ما اكدر اوصلها .. خلص وكته و لازم اتعود ان دوره انتهى من حياتي

لثاني يوم كعدت ب٥ الصبح امي نايمة يمي و اسامه و اثار ، بطني الم خفيف و راسي دايخ فد مرة ...
المنبه مال اسامة يدك
مديت ايدي انده بيه .. خطية كعد على حيله صفن شويه و كام .. صار يشتغل شفتين حتى يحصل ٢٠ بدل ال١٠
بس يتعب من الخمسة للصبح ل١٢ بليل
شكد احجي وياه ما يفيد هو قابل هيج بس يشتغل

رغم امي محددتله مصرف كل شهر تنطيني اله ١٠٠ الف و ما يقبلها كمت اضمهن اله بلكت تلم و كم سنة و اشتريله سيارة بلا هذا التعب

عمره ١٤ سنة راح يدخل ع ال١٥ بس شايل حمل اكبر من عمره و تفكيره بعيد و ما يحب يضل بذلة احد لهيج مخلص كل وكته بالشغل ما يجي الا وكت النوم ما يشوف احد ولا يكابل احد

للظهر و امجد ممر علية ولا احد من بيت ابو امجد اجاني بعد، استغربت عدم اهتمام امجد، جان اذا يروح للدوام يخابرني كم مرة، هسه ولا مرة ولا حتى اجا يسألني شلون صرت

سألت امي امجد ليش ما اجا ولا سأل عني ؟

-احتمال متضايق منج ؟

من شنو ؟.
سولفتلي السويته البارحة كمت اصفن ، اني حاجيه هيج شوكت ؟! والله ما ادري اني هيج حاجية

اندكت الباب طلعت امي للباب، صديقاتها اثنين جايات لأن صار يومين ممداومة و طالبة اجازة، كعدن بالهول و طلعتني امي اكعد يمهن يسلمن علية لبين ما تحظر هي للضيافة

بقن يسألن عيالج وين و سبب الاسقاط و الظاهر امي حاجيتلهن عني شوية فبقن يستفسرن مني على حالتي مشفقات عليه

جابت امي الضيافة و ثدمت الهن وكعدن يحجن و يضخكن، فات رافد بلا ما يدري للهول شافهن نسوان اعتذر و رجع بسرعه

هنا اتعدلن و كامن يتعذرن منهن فات هو مرة لخ اعتذر و سلم عليهن و اخذهن بالسلام بالسانة و ترخص و صعد فوك

اندارتلي وحدة منهن اسمها رباب :- هذا زوجج الله يخلي ؟

ميعاد:- يا ولج يا رجلها هذا رافد رجلي شبيج

رباب:- يااا حسبالي رجلها شو زغير ؟

ميعاد:- لا اني وياه نفس العمر مو صغير

رباب:- هي المرة تكبر بساع الرجال ما يبين عليه كبر

ميعاد :- شبيه و بين عليه الكبر بعدني شباب ام العشرين ما تصف يمي و كافي هو عاشكني و ذايب بيه شريد من الله بعد رفودتي هذا

رباب:- الله يحفظكم البعض بس الله يخلي كلش حلو شخصيته و طوله ، عيونه ملونه مو ؟

-اي عيونه خضر ،عيوني لا تحسدنه خمسة و خميسة بعين الما تصلي ع النبي

وبقن يتراددن بضحك و يسولفن لحد ما كامن حطن كل وحدة ٢٥ جوا راسي و سلمن وطلعن صاحت امي على رافد من فوك كالتله :- خالد بالباب

نزل رافد بسرعة جوا، شوية و فات هو وخالد للهول :- ها شلونج ديار

-هلا خالد

-شلون صرتي ؟

-زينة

-تعبانة شكلج حيل
باوعلهم :- ترا تحتاج اكل تعويض الها شتغدت شتريكت

ميعاد :- ريوك ما اشتهت عود قبل شوية جابتلها اثار كيكة و عصير و اكلت

-من هاي وجهه حيل تعبان

-رافد و انت شرايد تسوي البنية الها ام خالد

- ما رد عليه و رجع حجه وياي :- تحتاجين شي ؟

-هزيت راسي بمعنى لا ( لا )

-اني باجر طالع للاردن ان شاءالله راح ابقى اتواصل ويا امج حتى اعرف اخبارج

ميعاد :- و زوجتك السورية شخبارها ؟

-بخير الحمد لله،يلا اودعناكم

سلم و طلع و عيوني تراقبه و هو يطلع، سدت الباب امي وراه هو و رافد و رجعت :- باله يمج، والله ما اعرف شحجي انتم خطية لو جاي تورطون بارواحكم

-امجد ما اجا ولا خابر ابد خاف زعلان صدك

-و زعلتهم اتمنى من الله يطول و ما يخابر

- شتسوين

-اطيح حظهم والله، وكت اللي يسقط طفلج من بطنج من كثر التعب و الضغط و تعاي ديار و صعدي ديار و ما كالو حامل خطية خل نرحمها، بس من تزلك منج كلمة بساعة لا وعي حدو اسنانهم عليج و عافوج و ازت و الميته سوا

بساعات صحتج و عافيتج تعاي ديار اخدمي و ساعة المرض يشمروج و محد يسأل عنج

هو اني اتمناها من الله محد يخابر حتى اكلبها عليهم ازين شواربهم والله

-بالي يم الجهال

-ما عليهم شي اثار قبل شوية جانت يمهم و مشتريتلهم من الالف مالتها لا تخافين عليهم ارتاحي انت

... ثاني يوم سمعت خالد طلع للأردن
هالفترة صابتني كأبة كلش قوية، نفسيتي ادمرت حيل حسيت نفسي ما الي قيمة بهالحياة، لما جنت بحيلي منين ما ادور كلها تصيح (ديار) ما الحك احك راسي، و من وكعت حتى الجهال ما مروهم عليه اشوفهم .

ثالث يوم سمعت مرجعين ام امجد للمستشفى للفحص ورجلها مو زينه و قرروا باجر يسوولها العملية، ابو امجد جاب الجهال بالليل خلاهم يمي و من الباب ما فات جوا

سوولها ثاني يوم العملية ورجعوها للبيت بنفس اليوم
كلت لامي: خل نروح نشوفها و نطمن عليها

كالت الي : اتركيهم ارتاحيلج فترة و اخذج الهم ارجعج لغرفتج

.. بالليل و الناس نايمة جانت حليمة نايمة و ابو رافد وياها بالبيت چافتين اثنين ملثمين حاطين السلاح براس ابو رافد و براس حليمة و مهدديهم ( اذا ما تنطون الحق من الورث خلال اسبوع واحد بس الطلقة هاي تنحط بروسكم و هذا اخر انذار تهاونا وياكم الى ابعد حد و ننتظر ) و مطلعين الطلقة من للشاجور و مخلين كل واحد طلقته بأيده و كايليلهم ( المرة جاية نحطها بروسكم مو بأيدكم ) و طالعين.

ابو رافد متخبل شلون يهددونه و يهددون مرته مخبر عمامه و عشيرته و خابص الدنيا، متهجمين على رافد ان كله من ورا مرتك

رافد ممقصر بيهم و كايل الهم :- مرتي شلها علاقة بالموضوع ؟ بتها الها حق بهالبيت و حليمة ماخذه كلشي و حاطته بأسمها و ما رايدة تتنازل و ابو ديار هو المتكفل الموضوع مرتي شنو الها بالنص ؟

تريدون روحو على اهل اسماعيل و كاوموهم مو تجون على مرة و تكولون مرتك، هي شبيدها و شيطلع منها حتى تكعد تهدد

ملتمين ورايحين لبيت عمي عماد و كايليلهم هيج داخلين على بيت ابو رافد و اسماعيل المتهم

عاد عمي رادهم و كايل الهم :- وكت التنطونه دليل ان اسماعيل هو الهددكم و دز الكم الجماعة الكم حك يمنا ما دام ماكو دليل كل حك ما الكم يمنا

اللي داخلين البيت بالليل ما معروفين منين ولا حتى ذاكرين اسمي او اسم اي احد بس رجعو الحك لصاحبه بس !

فالعشيرة حتى يلموها بيناتهم جامعين ٥٠ مليون و مداينينهم لابو رافد و كايليله تجبر مرتك تبيع البيت و توفي الديانه غصب عنها واذا انت تتكفل الموضوع وتكول اني سداد للدين خير على خير

هو كايل الهم :- لا بأقرب وقت ينباع البيت و ننطيكم حقكم

اجا جايب الفلوس لامي و حاجي وياها حتى تحجي ويا ابوي يعوفهم بحالهم، امي ماخذة من عنده الفلوس و مطمنته ان راح تخابر ابوي و تحجي وياه
الكعدة جانت بحظور رافد و عمه

طلعوا امي خابرت على ابوي و كالتله :- حق ديار صار عندي عوفهم بعد

كايل الها :- شكد سلموج ؟

-٥٠ مليون

-خل يولون حكها ٨٠

-اكلك شوف ما النا خلك مشاكل كافي عليه بتك مسقطة وواكعة عندي و بالضيم يا حالي لا تزيد عليه اساسا حق بنتك ربع لان سلمان اله اخت من ابوه و هي اتزوجت يعني حتى ما الها حق .. بس هذا الحق جان المفروض تاخذه و هي على ذمة سلمان بس حليمة العمصة هي العصت بي و هسه طلع

-حضريلي منهن ٢٠ مليون

-انت شكد نذل حتى بفلوس بتك تريد تستفاد عوفها اشتريلها بيت و اضمن حقها بعد يومين توكع عليمن تستند عليك الكلشي ما شافت منك بس السوالف المكسرة

باقين متراددين هو وياها خصم الحجي كايلتله الك يمي ٥ ملايين بس تريدهن تريدهن ما تريدهن بكيفك

كايللها :- حضريهن الي و اني اجي اخذهن و الفلوس لا تخليهن بالبيت روحي حطيهن بالبنك

-امي ما مجذبة خبر رايحة للبنك هي عدها حساب فاتحة ضمت الفلوس هناك و اجت

خابرني خالد على موبايلي، شفت رقمه رديت :- الو

خالد:- واخيرا هسه ارتاحيت

-ليش ؟

-لان وفيت بوعد قطعته عليج صار اسنين و ما كدرت اوفي

-قصدك الورث مال سلمان

-اي ، اخذته امج مو ؟

-اي بس ابوك الدفعه

-راح يبيع البيت غصب عنها و ياخذ منه ويوفي للدين

-خالد

-اي

-اشكرك

-اني ما سويت شي بس ذكرت اهلج بحقج

-مع هذا اشكرك

-اني خادم

- تخدم ربك ، انت بالردن بعدك ؟

-اي

- زوجتك وياك

-اي

-هاا

سكت ما جاوب، رجع حجه:- الاسبوع الجاي ارجع لبغداد تريدين شي من عمان اجيبه الج ؟

-لا شكرا

-امجد بعده ميحجي وياج

-اي

-ليش ؟

-اذا انت تعرف ميحجي وياي فاكيد تعرف السبب

-لأن ذكرتي اسمي

-ما جنت ادري

- بس كلبج يدري

- من يوم التزوجت ما كمت اسمع لكلبي اصم اذني عنه

-و هو الأحسن، الله يوفقج بحياتج

-و يوفقك انت و مينا

ضحك :- شو احسج متقصدة تذكرين اسمها

-اي انتم مو تحبون بعض فأني جاي ادعيلكم

-اي

-شنو اي ؟

-منتظرة مني جواب لاخ ؟

-لا

- ها زين

-بس هاي ؟

ضحك و هو يكلي :- والله السوالف وياج تونس

-شلونك انت وياها ؟

-زينين حالنا حالكم

-احنا مو زينين

-هسه د، بس جنتو احلى من العسل

-يعني انتو هسه احلى من العسل

-الحمدلله

-شعجب مرتك ما حبلت

-بلي حبلت بشرتني بهاي جيتي اول اسابيع حملها

-هاا

-اي

-ما تغار من تشوفك تخابر

- و تغار شنو يعني ؟ احلى شي يشوفه الرجال بالمرة غيرتها، و بعدين اني ما خاينها انت هسه صديقتي و خابرت حتى اطمن عليج حقج وصل و اكلج وفيت الوعد

- و ضحى ؟

- شبيها ؟

- شلونك انت وياها

- الصراحة مرات استخطيها و مرات اكرها من وره تصرفاتها و ماشية هيج كوة كوة

-راضية بزواجك هي

-انت شتكولين ؟

- لا

- ماكو مرة تقبل بزواج رجلها بس من افعالها

-اصعب شي ع المرة تشارك رجلها

-الصوج منها

- مو كل الوقت لا الاكثر من الرجال نفسه يحب يجدد

-ممكن بس اني مو هيج، اني وكت الاشوف الوضع بحياتي ويا زوجتي مو زين و متعبتني اروح اشوف اللي تريحني غيرها، اذا هي ممقصرة ليش حتى ادور غيرها

- تمدح نفسك هواي

- ما جاي امدح جاي اشرح

- اي ، سلملي

- على منو ؟

- مرتك

- اذا تسمع بأسمج هسه نطلك

- ليش ؟

- حاجيلها عليج و على كل الصار بينتنا رغم هسه كلت الها احنا اصدقاء بس السالفة متخش مخها تكول ( مبيمشي معي هالحكي في صداقة بتتحول لحب بس ما تقنعني ان الحب بيرجع صداقه مشان هيك ما بدي شوفك و انت عم تتصل فيها )

-تغار عليك هواية

-حقعا غير رجلها

اخذت نفس و اتنهدت :- الله يوفقكم يلا مع السلامة

-ديري بالج على نفسج ولا تفكرين

سديت الخط من عنده بقيت اضرب صفنات، حامل منه و تغار عليه ، اشايفه من عنده حب و اهتمام حتى هيج مستقتله عليه و تغار

حجيت لامي على خالد و هيج خابرن و هيج حجينه

كالت :- انت ركزتي مرته تغار عليه منج بس ما ركزتي ان هي ما تغار من ضحى و ما مهتمة الها

-يعني شنو ؟

- يعني شايفتج انت المهدده زواجها و حبها الخالد مو ضحى بكل بناتها

-تعرف خالد بطل يحب ضحى

- يعني لو نباوعلها من الكفة الثانية يعني ما بطل يحبج

-وين تريدين توصلين بهالكلام ؟

-ماكو شي مجرد جاي احلل كلامه

سكتت درت وجهي عنها افكر بكل اللي جاي يصير
وره يومين بعد ما قبطلي ٩ ايام و اني عند امي .. ابو امجد اجانا كم مرة و هو يسأل ع الجهال و ينطيهم مصرف، و ام امجد خابرت مرتين و امجد لا خابر ولا اجا ..

اخذتني امي اني و الجهال و رحنا لبيت عيالي، كاعدة ويا عمتي و طالبة ابو امجد يكعد و امجد
بس ابو امجد جان موجود، اجا كعد

كالتله :- بتي صارلها بال١٠ ايام عندي مريضة و ابنك لا وصل ولا سأل عن مرته اريد افتهم شنو السبب بتي بيها صوج

ابو امجد :- متضايق من ساعة الجانت بالبنج و ناطقة بغير اسمه و لليوم هو يسأل و احنه نكله ما عدها شي و هو شاك...... قاطعته

-ابو امجد هالحجي هذا مو وياي و عيب شنو شاك بيها شنو متضايق بتي سقطت ضناها من الوكفة ابيتكم و الخدمتكم و لا ساعة شكت ولا مرة كالتلي تعبت منهم
شنو انتم منتضرينها تغلط حتى اتحدون اسنونكم عليها

ابو امجد :- لا ام ديار ميصير هالحجي هي هم بنيتنا

-بنيتش ابو امجد الله يخليك بنيتيش لا احد منكم سأل ولا احد منكم شاف احوالها

-ليش اني كم مرة اجيتكم

- اجيت على مود احفادك مبقيهم عدها و هي مريض ومن الباب و تروح حتى ما تدخل تشوف ديار شلونها شلون صحتها و رجلها لا اجا ولا شفنا طوله

تشتغل هنا شغل المطي لحد ما فطست و من توكع محد منكم يسأل والله نطقت كلمة بساعة لا وعي منها ؟ هو منو صاحي بالتخدير ويحجي الصدك شو كل اليطلع من البنج يكوم يهذي و انتم اخذتم هذيانها حجة حتى تعادوها

-ما عاديناها ..... قاطعته

-اقصد ابنك ٦ ايام جهاله و مرته عندي بالجذب ما اجا ولا سأل

- متضايق شوية مو قليل عليه امه و و مرته تسقط يعني واحد هم يعذر

-لا ابو امجد لا عذرت يوم يومين ٥ .. عشرة بس ابنك طوخها، بتي ما لاكيتها بالشارع ولا طالعتلي بالحظ يا نصيب حتى هيج يصير بحالها تسقط و محد دايرلها بال و اسكت، تقدرونها يا ابو امجد خير على خير
ما تقدرونها و تبقون كل يوم ادورولها حجة و تشككون بيها كللولي خاطر ارفع دعوة لطلاكها و يا دار ما دخلج شر

ام امجد :- لا الله يبعد الطلاك اسم الله بيش طالبتهم بس هو

- لا تكليلي هو مصل ما هو متأذي هي هم متأذية كافي سكتت هواي و اكول عيب و احترم بس ما لشوف احد جاي يحترم مو هين عليه بتي كاسرة ظهرها ب٣ جهال ورجال و هي طالبة بس غير لخاطركم و نكول انتم ناس زينين و تستاهلون بس من تقصرون بحقها و تكعدولها ع الزلة لا ما اسكت

بقوا يتعذرون من امي و نحطها على راسنا و بنيتنا و ما النا غيرها ولا نلكا مثلها و مثل اخلاقها و ادبها من دخلت لهالبيت و لليوم حسها ما سمعنا رغم الصار وياها
وكامو يقارنوني بمرت احمد و يقنعون بأمي

كالتلهم :- هاي اني جبتها الكم و سالفة لما تكلي اخذي بتج و روحي لبيتج وكت التحاجيت ويا ام رغد مو هينه عليه و هيج تكلي و لا بالعته بس يكلك لأجل عين الف عين تكرمون و اني لخاطر بتي ساكته و اعدي بس يا ابو امجد كثر الدك عل الحديد يفل فلا تخلونه نفل وياكم .. بنية خادمتكم و تحبكم و معتبرتكم اهلها بس من تهيونوها و تأذونها وكتها عذروني ما راح اطلع الكم بهذا وجهي

بقى ابو امجد يمدح بيه و اجا باس راسي و كال الها :- والله وحده من بناتي اعتبرها و لا يضل ابالكم و التهينا منا خطار و منا ام امجد و بعد الدنيا تلاهي ولو حقكم علينا ..

.. و هيج طلعتني امي من مشكلة جانت المفروض تنحسب عليه سوتها اليه حق و هم الغلطانين.

سلمت عليه و كالتلي :- ديري بالج على نفسج و على اخوج و شتحتاجين بس خابريني

-كلت الها ماشي

صعدت لغرفتي فوك اول ما دخلت ، اجت وراي مرت احمد :- الحمد لله ع السلامة عيوني ان شاءالله تهنيتي بالورث مال ابوي ؟

باوعتلها:- الله يسلمج

- انت ما تستحين شلون تاخذين شي مو الج ؟

- احمد هنا ؟

- معليج باحمد جاوبيني ابوج الحيوان يهدد امي و يدز احد يطبلهم للبيت و يحط طلقة بايدها ما خفتي تموت تنجلط لو كل اليهمج الفلوس !

- هي ليش ما خافت على روحها ؟

-ترا فلوسنا هاي و احنا احرار انت شنو و حاطة روحج

-اريد ارتاح رغد ياريت بلا مطرود اطلعين من الغرفة

باوعتلي باستنفار، شمرت التحفية اللي ع الميز للكاع كسرتها و دارت حتى تطلع، امجد صار بوجهه

رادت تطلع كاللها :- بعد اخوج لمي الوصاخة السويتيها

- خلي مرتك تلمها مو بس فالحة تلم ورث

امجد :- رغد خوية جاي اكلج لمي

- ما المها

- روحي
ردت ادنك الم صاح :- عوفي كلشي هي التجي تلم

-لا تكبرها

-كلت الج كووومي

عفت من ايدي وكعدت ع الجرباية هو طلع، خابر احمد كاله :- من مرت اطب غرفتي وبلا احترام تكسرها و توكف بعيني بكل صلافة تجاوبني كدامك خيارين يا تجي تعلمها الاصول يا البيت يتعذرها و بقت يمك

لهناك اجا احمد صعد فوك و جبر مرته تنظف غرفتنا و تجي تعتذر من امجد بس وجها محتقن و عيونها حمر احتمال ضاربها

اعتذرت من احمد و كالت اله :- بعد ما ابقى هنا اريد ارجع لبيت امي

احمد :- الله وياج عود خابري امج تجي تاخذج

ضاله تبجي و ابو امجد يحجي ويا ابنه و يهدي بيناتهم و هي عاندت الا تروح، احمد ما متحمل دوختها ماخذها و موديها لامها ابيتهم

صعدت للغرفة بالليل امجد كاعد متضايق، فرشت للجهال نومتهم هو ما حجه ابد، كملت ورحت يمه

:- انت ليش داير وجهك عني و ما تحجي وياي ؟

-ما حجه

تقدمت و بست راسه و كلتله :- اذا ضوجتك بكلمة اني اسفة بس والله ما جنت ادري بكل اللي طلع مني ولا متقصده ولا ابالي هالحجي اساسا بس ما اعرف شلون هيج حجيت

-لا ابالج ولليوم تضمين عليه و ما تحجين و لهسه صابر و ما غالط وياج لأن منتظر الزم شي حتى اذا تأكدت وكتها محد يلومني لو شما سويت

-راح يصيرلي وياك سنة شفت مني شي؟

-ما حجه

-كل مرة تتهمني و اني اكلك ما عندي شي، لما اتزوجتك قررت التهي بيك و بأطفالك و ما التفت وراي و هذا اللي سويته لا يوم قصرت وياك ولا يوم قصرت ويا جهالك و اعتبرهم جهالي

-اكو شي بداخلج انت ضامته عليه و ما جاي تحجين، انت متزوجتني و مداريتني بس اني ما جاي احسج انت مرتي ولا اشوف منج اللي لازم اشوفه من زوجتي كلبج بعيد عني و كلمة حبي ما تطلع وياج
اكو بداخلج شخص ثاني ؟

- لا

-شلون لا و انت هيج

- المطلوب مني هسه شنو لا اذنب ولا اجرمت ولا اعرف شنو ذنبي و كل اللي يطلع وياي جاي اسوي اكثر من هيج شنو مطلوب مني

باوعلي ، ركز بعيوني، دنك و هو يتنهد و يهز راسه و كال :- ولا شي مطلوب روحي نامي

عفته ورحت للجهة الثانية نمت، شفته نام اخذت موبايله و كمت العب بيه ، اجت رساله اله على برنامج الواتساب

باوعتها من نزلت بالأشعار ، الصورة صورة بنية و مكتوب بيها ( نمت ؟ اشتاقيتلك ) فتحت الرسالة و باوعت محادثات بيناتهم قليل الواضح اكثر الكلام جان اتصالات

رحت دورت بالاتصالات لكيت مقضي وياها بالساعات و هم يحجون البنية اسمه (سمية )

الغريب .. انو و اني اكلب و ابحث ما الي اي ردة فعل لا انقهرت ولا ضجت ولا اي احساس صابتي غير الفضول اعرف شكو بيناتهم .. و كأني دا اقلب كتاب مو خيانة لزوجي ..

لو اقيس احساسي هسه ويا الاحساس اللي حسيته لما خالد يحجيلي عن زوجته فاختلاف فضيع، هناك لما يحجي احس اختنك ويا كل كلمة يحجيها ، هنا ولا احساس .. مو بيدي بس هو احساسي هيج

درت وجهي هو نايم ، ما اعرف جاي اظلمة لو جاي اظلم نفسي

نمت ٣ ساعات و كعدت وياه للشغل حضرتله ملابسه و الريوك، و هو بعده كاعد لازم الموبايل و يراسل

لما صحت عليه ما جاوبني اجا تريك و طلع من البيت
رجعت نمت ولا كان شيء حدث

كعدت الصبح الساعة ١٠ رتبت الغرفة و الجهال و نزلتهم جوا، واكفة بالمطبخ، اجا احمد اليه يسألني ع الريوك و حجه

:- رغد خابرتني

- على شنو ؟

- تكلي اشتاقيتلك و تريديني اجيبها

- اي روح جيبها

- اني اريدها شوية تحسن اسلوبها لان اسلوبها بالبيت كلش مو زين لا صوت ولا تصرفات

-و هي هناك شلون راح تعلمها ؟ امشي الها هسه وروح اشرط عليها و دليها حدودها و علمها على طبعنا شوية شوية و لا تبعدها منك الواضح انت مشتاقلها اكثر مما هي مشتاقتلك

ابتسم بخجل :- ديار اني احبها بس تعبتني

- كل زواج بيت تعب خاصه بالبداية لان مماخذين على اطباع بعض وماكو زواج ما يصير مشاكل

- امي هم تكلي خطية روحلها و اني البارحة وديتها

- ميخالف روح جيبها خطية

- كملي الريوك و نروح سوه حتى اشرط عليها ما تتعارك وياج

- لا اعذرني ما اروح الهم و عمتي منا محد الها روح انت

بقى يحجي ويحاول مقبلت اروح، هو يحبها بس هي خبيثة متعبته بسوالفها .. يلا كلنا متعبين ازواجنا و هم امتعبينا هاي الحياة

راح جابها و شارط عليها ما تتجاوز عليه لان امجد يتضايق و كايله: التجاوز على مرتي اعتبره عليه لان كرامتها من كرامتي فلزم مرتك حدودها

جابها غير اتوب هم يطلعون و هي تكعد تسمع حجي
كبال امجد و عمي و احمد من يكعدون جوا ما تطلع من المطبخ ولا تصعد الغرفتها و هي اسمها واكفة بالمطبخ و اطكطك كلشي متسوي و من يرحون تلزم التفزيون بالهول لو تصعد لغرفتها

عمتي تكلي عوفيها خل تولي
كم مرة حاجتها و تشكي عمتي لعمي تكله :- شوفة عينك اشتغل ليل نهار و عمتي ما ادافع بس لديار اني مو مثل بتها شنو الفرق بيني و بين ديار

اني ما احجي و ما ادخل لان عمتي هي المتصديه للدفاع عني فليش ادخل روحي، باقية بس اعتني بعمتي و بالجهال و ما ادخل بيها ..

امجد راقبت موبايله كم مرة العرفته عنده علاقة حب ويا ابنية بس ابد ما كايلي على شي، هجرني اسبوع و بعدين رجع على كد حاجته و يبتعد مني لا يطالبني بشي ولا يكلي ليش ما تحسين بيه و ليش ما اديرلي بال .. و الصراحة هالشي ريحني من ما يحاسبني

مو بكيفي و لا المحبة بكيف احد
اني ما احمله بكلبي غير الود ..
الود عن الحب .. شي مختلف تماما عن الاخر

بس الامانة لله لا فد يوم قلل احترامي او هاني او حجه عليه حجاية مو حلوة كدام اهله، محترمني و مخليهم يحترموني ، و يتخبل لو رغد قللت احترامها وياي

احمد و امجد يختلفون بالاطباع
احمد شراب عرك بطل فترة ورجع ، و بسبب الخمر من يسكر بالليل يشوفها الويل يكوم يضرب و يأذيها و الصبح يراضيها و كل ليلة نسمع صياحهم، غير ان عادته بسبب العرك و اكثر الاوقات هو بلا وعي، كلماته فشار عليها كبال اهله كل حجيه غلط حتى لو بالضحك

بينما امجد يختلف، امجد انسان هادئ ما يحب المشاكل و يحاول يتلافاها باي طريقه حتى يصفي جو عائلته و اهله، لا يقرب الشرب ولا يحب السهرات ..

عيشته شغل يرجع ينام ساعتين يطلع يتونس كم ساعة رجع للبيت كعد ويانا شوية و صعد نام لان ورا دوام .. ما اله حس

غير الاختلاف البيني و بين رغد . هي حساسه تبجي بسرعة تتضايق بسرعة عصبية ووقت عصبيتها يفلت السانها و يعمي عليها

اني باردة الواحد لو يحجي منا لباجر اباوعله كانما اباوع لتلفزيون، كل شغلي بهدوء اشتغل و ما احجي ولا اشكي،مرات يوصل بيا التعب لحد ما دموعي دكوم تشكي وكتها امجد يحس ويكوم يحجي عني و يخليني ارتاح

الفرق بيني اني و امجد يختلف بين الفرق بين احمد رغد ، و حتى ابو امجد و عمتي لاحظو و كلما يحجون يذكرون الفرق، سببو عقدة حتى لاحمد و رغد كامو يتقارنون بينه.

... امي باعت البيت اللي بالشعب مالتها جابلها ٥٧ مليون بعد ما اشتراه السيد الها ب٤٠ .. جملت الفلوس اللي اخذتهم من ورث سلمان على فلوس البيت و اشترت بيت زين و احسن و اجرته ب٤٠٠

ايجار بيته انطتنياه كالتلي:- مصرفج هذا حتى ما تحتاجين للرجال و عازة الرجال المرة الساندة ظهرها براتب ماكو شي يكسرها فلا تخلين احد يكسرج

اني حاجيتلها على البنية اليحبها امجد لهذا جاي تامن حياتي حتى ما احتاجله

الفلوس اللي انطتنياهن امي، كمت اخذ منهن ٢٠٠ انطيهن بثواب سلمان للمؤسسات الخيرية لان هذا ورثه و هو كلشي نا اسفاد من ورثه خلصها تشرد ع الاقل تجيه الرحمة و الثواب بجال هالورث

و ال٢٠٠ البقية كلت اجمعهن بلكت اكملهن من امجد و اعالج نفسي بيهن و اكمل النقص اللي بجسمي.

حليمة بعد شهور زعل و ضغط و مطالب من ابو رافد حتى تبيع البيت و تفك دينه، قررت تبيع البيت و تشتري بيت اصغر .

...كاعدين الصبح اندكت الباب ، امجد كاعد يتريك يريد يطلع لدوامه و اني منتظرته يكمل حتى اغسل مواعينه و اروح لجامعتي

سمع الباب تندك راح فتحه، طلع رافد فات للبيت و كاله :- رغد وين

-فوك جاي تبدل تريد تطلع لجامعتها ليش اكو شي

-امها بالمستشفى

ديار :- يا ستار شصاير ؟

رافد :- مو باعت البيت البارحة و ساطين اثنين امسلحين حاطين السلاح براسها و مهددينها ادليهم على الفلوس

امجد :- هذا عرف ما دامه يعرف عدها بهالليل فلوس

-مبين عرف و ابوي ما جان بالبيت ،  بايت يم امي البارحة و ساطين عليها و خطسة متخربطة و نقلناها للمستشفى

ديار :- كون متأذاية ؟

رافد :- والله جلطة صابتها هسه بالمستشفى اجيت حتى اخذ بتها

امجد :- لا اله الا الله مو خوش خبر

رافد :- ديار تعرفين شي عن ابوج ؟ ما سامعة اذا هو اله ايد بالسالفة

-ما متواصلة وياه ابد ما اخابره

نزلت رغد حتى تطلع للجامعة صبحت علينا ورادت تمشي، صاحها امجد اجت تقربت من عدنا، دموعي نزلت الله لا يحطني بهالموقف لو صار بامي شي يمكن انجن

كال الها :- عوفي الجامعة و كعدي رجلج روحي وياه للمستشفى

رغد :- خير امي بيها شي ؟

امجد :- ما بيها شي بس تعبانة و شايلينها للمستشفى

صرخت وووكعت الجنطة من ايدها و هي تصرخ :- شبيها امي احجو شبيها امي كوووولو

امجد :- ديار اصعدي كعدي احمد

صعدت و اني امسح بعيني، خبرته نزل ركص و اني اسمع صوت صريخ و بجي رغد.

سألتني عمتي و كلت الها كامت تبجي و هي تكول :- لا حول ولا قوة الا بالله العلي العظيم

طلع احمد اخذ رغد و طلع للدوام، امجد كال :- اني رايح للدوام عود من اجي اروح للمستشفى

اني بقيت كاعدة ابجي اني و عمتي ، باوعت الساعة ٨ و عشرة ، يا عزه بعيني الخط مالتي ماكو
خابرته، رد عليه ، سألته ، يكلي :- والله اختي دكيت هواي و انتظرت و ما طلعتيلي

كمت من مكاني ، كلت الها :- خالة راح اخذ تكسي و اروح للجامعة ابو الخط رايح و عايفني

- تريدين فلوس عندج مصرف لو انطيج

- لا خالة عندي مشكورة

طلعت من البيت مستعجلة مشيت بالفرع، مريت من المحل اللي براس الفرع شفت خالد بالمحل، فتت :- صباح الخير

-هلو ديار صباح النور

- سمعت بحليمة

- اي دريت

- تتوقع ابوي

- ما ادري، يمكن اي ويمكن لا ، اللي اشتروا البيت و كرايبهم هم المتهمين لان محد يعرف ان بهاليوم تسلمت الفلوس لام رغد غيرهم، احتمال هم و احتمال ابوج مراقب

-و احتمال هاي كلها خطة من ابوي

- و بأحتمالج هذا راح تخلين المصيبة على راسج و هي بعيده عنج ، ابعدي ابوج من السالفة و اليشك بيه كليله اذاك ابوي و هنيالي لو بشرتوني بقتله، و اتبري منه

-بس حيل انقهرت عليها صار ساعة ابجي

- بالعكس اني ما انقهرت

- ليش خطية

- و سلمان هم خطية من جانت تضوكه انواع العذاب و جردته من بيت ابوه و جانت بعز الصيف اطرده بالحر و بعز البرد تكعد جوا المطر و ما عاش بخير ابوه و خلته يتنازل الها و تالي تشرد بالشوارع لحد ما مات و هو ما شايف ذرة من خير ابوه تتوقعين واحد مثل سلمان و براىته ما تطلع حوبته ؟

الله يمهل ولا يهمل، و امهلها وكت هواي حتى اتوب و هي كلما جاي تكتل روحها على هالبيت ومجفجفة على الفلوس لحد ما هذا البيت الكتلت نفسها عليه كتلها.

- الله يرحمه شكد عنده حوبة يم الله و طلعها

-ماكو انسان مظلوم ما اله حوبة و لابد بيوم الله يطلع حوبته شلون بسلمان و هو رجال مريض ما مأذي احد

-الحمدلله على كل حال، يلا اترخص اروح

- خطج وين لعد ؟

-منتظرني هواي و اني جنت ابجي ويا عمتي ما سامعته ورايح

- اقفل المحل و اوصلج

- لا راح اخذ تكسي و ارجع للبيت، شوكت رجعت من الاردن

- قبل ٤ ايام اني هنا

- هاا ، شوكت تجيب

ابتسم:- بعدها بالشهر السادس

- هاا اي ، مع السلامة

- انتظري اوصلج

-ما اريد شكرا

عفته و طلعت و هو يحجي وراي ويصيح، وكفت تكسي كبال عينه، هو اجا حاسب التكسي و انطاه الكروة

و ضرب السيارة و كال:- يلا توكلي و ديري بالج على نفسج

... مشيت للجامعة
اعز الاصدقاء صارو اليه هم مريم و عذراء و وسام و مهند صارلنا ٣ مراحل ممتفاركين و الكل تعرف صداقتنا من صدك محد بينا ينطي بالاخر وشكد ما حاولو يخربون بيناتنا احنا نفهم بعض و ماكو احد كدر يدخل بينا

عذراء يتيمة اب و امها انسانة بسيطة كم مرة اني رحت وياها للبيت زرت امها و هي مرتين جاية الية مرة عند عيالي و مرة عند بيت امي

وسام و مهند ما يكفون اتصالات لو صار ويانا شي وكانهم اخوتنا من صدك نستند عليهم
وسام فسخ خطوبته ويا بت عمه ، ومريم تحبه من ذاك اليوم لهذا اليوم بس ما مصارحته و منتظرته و هو ما حاس عليها

امجد يتضايق منهم بس اني باعدتهم عن امجد و ابد ما احجي بيهم كدامه و لما اريد اطلع وياهم، اطلع و اكمل و ارجع اكله طلعت ويا زملائي اليوم، ميحجي

لان اذا اخذ اذنه قبل لا اريد اطلع يكوم يحقق منو هم ووين رايحن وشكد راح تبقون و يبقى يدقق بكلشي و من ارجع يبقى يسأل ويتحقق وياي كأني مسوية شي بس جربته اطلع يلا اكله شفته يسكت فاخذتها طريقة احسن

... حليمة صابتها جلطة و بيت ما عدها لان باعته، قرر ابو رافد يأجر بيت الها يتشاركون بأيجاره هو و احمد و تجي رغد تكعد ويا امها اداريها

ابو امجد و امه ما عارضوا كالوله :- ما بيهاشي مرة مريضة و تحتاج بتها اداريها اخذ مرتك و اعزل
و حتى يخلصون من المشاكل لان من يوم التزوج احمد القال و القلت ما يخلص بالبيت خصوصا عيالي كلش يكرهون هاي الصفة ما يحبوها ولا يحبون المشاكل يحبون يعيشون حياتهم بهدوء و كلشي بعقل ينحل

فاحمد اجر ويا عمه و طلع عزل من عدنا، بقى البيت النا اني و امجد و اسامة وياي سويتله غرفته تجنن و الامانه لله ما فد يوم واحد من عيالي سمعني حجاية عليه بالعكس كلش يحبوه

لان هو محلي خبزته وياهم يجيب هداية لعمتي ، من يجي من الشغل يذكر عمي اباكيت جكاير و لو احتاج البيت يتسابق ويانا حتى يصرف خطية رغم امنعه بس هو ميقبل يحب يجيب بنفسه و يفتخر ان هو جايب

كلش افرح من يدخل عليه و جايبلي هدية لو اقل شي اكوم ابجي الولد الربيته بأيدي كبر و كام يجيبلي ، من صدك احسه ابني و مداريته حالة حال جهال امجد

بس هو هادئ مثلي ما يحجي ولا يرد على احد صوته يا دوب ينسمع مرات اتفاجئ ويا اصدقائه يضحك و يطلع صوته عالي لان هو كلش هادئ

عكس اثار كلما تكبر يطول السانها وياها يومية جايتني هي و سارة بت خالد انوب البنية جانت فقيرة من صادقت اثار كام السان ما يتلاحك عليه

من تجي يمي اتساعدني بالجهال يبووو شكد تحجي و شكد تسأل و تحير بغراضي شتسوي يا مكياج يا ملابس يا احذية يا اكسسوارات تلعب هي و فطومة و سارة ازياء و حسوني و حساني متفرجين
وتكلبلي الدنيا ، مرات يطك بعقلي اهججها من البيت و اكتلها و مرات لا اتحملها هي زعابيلها

عمرها ٩ سنوات بس روحها بالحمرة و الكحلة كلما اصعد الكاها ملغمطة روحها بمكياجي، اني ما احط بكدها ولا عندي واهس بالمكياج مثلها

مشت حياتي طبيعي بهالفترة ..
بس بقت حياتي ويا امجد جامدة مثل ما هي و هو تعود على هالشي كام يعوض هالموضوع بالمراسلات ويا البنات

ما فكر فد.يوم يتزوج ولا فاتحني بموضوع، رغم يعرف اني ادري بكل مراسلاته و مرات احسه يتعمد يخلي الموبايل قريب مني وبلا رمز حتى افتح و ادور بيه حتى احجي، بس ما حجيت كل مرة نفس اول مرة ما اهتم.

.......

خالد :- دخلت المحل المغرب لكيت رافد كاعد سلمت عليه : ها ابو مهيمن شلونك

- هلو خالد

-كالت امي كملت بيتك

- اي والله

- و شوكت ناوي تنتقل بيه ان شاءالله ؟

- والله اليوم ناوي احجي ويا ميعاد حتى نفضي نفسنا يوم ننتقل هناك

- ميعاد ليش ؟ ليش انت راح تخلي ميعاد بذاك البيت

- اي غير هي الساعدتني حتى ابني فوك ال١٨ مليون صرفت وياي على بنائه

- بس اني اشوف منى و جهالها افرض

- ادري بس ميعاد.....

-شاركتك ، اي عادي تكدر ترجعلها فلوسها دفعات على ما يصير عندك ، فكرلها رافد ابنك مو صغير و جهالك كبروا الى متى انت حاصرهم بالطابق الثالث بغرفتين
حق الله منى صبرت وياك صبر ما يتجازى لا ب١٨ مليون ولا باكثر منه.

و بعدين ميعاد كاعدة ابيتها لو شلتها بهالبيت ما راح يتغير عليها شي غير ان غيرت بيتها انت كاعد تدفع ايجار و هي ابيت وحدها بس هي و بتها.

-وشلون احلها ويا ميعاد اذا حجيت وياها هسه راح تكلب الدنيا و اني ما الي خلك هوسة راسي تعبان

-كللها وعد عليه ب١٨ مليون النطيتينياهن ازيدهن و اشتريلج كاع بأسمج و اذا تردين اوفيجياهن تقسيط

- ان شاءالله ..

......

وكت اللي قرر رافد منى هي التكعد بالبيت، ما حجه لامي راد يكعد منى ياله يعرف، بس هالموضوع صادف ويا موضوع اكبر من هيج

امي جانت شاكة بتصرفات رافد عنده وحدة بحياته، راقبته و ما عرفت شي، الى ان بيوم وصل مرسال لامي ع الواتساب

صورة رافد متمدد على جرباية مو جرباية منى ولا بيته، مبين من الاثاث .. شقة ، طالع نص صدره عاري و جسمه الباقي متغطي بلحاف و يضحك

امي ساكته و مخليه الموضوع ابالها محاجية شي مرايده تشهر و الناس يتشمتون بيها، رادت من يجي تحجي وياه بهدوء

بنفس اليوم اني سمعت من عمتي ان منى مرت رافد راح تشيل، سألتها كالت :- رافد مكمل بيته و راح ينقل منى و جهاله بالبيت

حزت بداخلي اللي اعرفه امي دافعه بهذا البيت ب١٥ مليون و اكثر، و هي ما جابتلي سيرة عن هالموضوع بالعكس كل مرة تكلي :- بيتنا قرب يكمل و فرحانه لان البناء و التصاميم جانت كلها حسب مزاجها و هي مرات تدفع من جيبها حتى يسوي هيج ديزاين و هي ديكور

خابرتها استفسر منها :- الو

ميعاد :- هلو ماما ديور شلونج

- هلو ماما شلونج انت

- الحمدلله

- شبيج دا احسج مو على بعضج ؟

- شوية متضايقة

- ليش؟

- وصلتني صورة لرافد بشقة بس ما اريد استعجل و اخبص الدنيا اريد تمضي ايام ع الحادثة و اهدئ حتى اتصرف بعقل مو بغيرة و اخسر وياه

- هو رافد معروف ابو نسوان مو شي غريب

- وراي مو كدامي ، بس الشاكة بيها هالمرة مو غريبة

-منو ؟

- بعدين تعرفين الله كريم

- ليش تضمين بكلبج عني احجي حتى ترتاحين

- مو ما متأكدة امي من اتأكد احجيلج الموضوع

- اكلج يوم اني خابرتج هم على موضوع

- البيت مال رافد مو انت الراح تسكنين بيه ؟

- راح اسكن بيه شنو غير بيتي و كملت بنائه بنفسي و على مزاجي

- ماما اني ما اريد اقهرج بس سمعت رافد راح يشيل منى بالبيت

- منيلج هالحجي

- من عمتي كالت جاي يلمون بغراضهم

- شدا تحجين ديار هالحجي مو معقول

- والله هذا السمعته

- روحي عسه خل اتاكد من الخبر و ارجعلج

- ماما ديربالج بالحجي لا تستعجلين

- روحي ديار

- هسه راح اجيج

قفلت الخط بوجهي، اثار جانت يمي كلت الها خل نروح لبيت ماما، اخذت فطومة وياي و بقيت حسوني و حساني يم عمتي ورحت للبيت

لكيتها شايطة و تفتر بالبيت و تسب و تلعن برافد و تصيح :- النذل لعب عليه خلاني احط فلوسي و ابتي تالي يروح يكعد غيري بمكاني

-ماما بس اهدي حتى لو كعدها هي هم مرته و عدها جهال وخط...... صرخت بيه

- و اني ما حجيت شي ما كايله بس من يواعدني و يعشمني ويخليني اشرف ع البناء و كله اني اختاره و تالي ينطيه الغيري ما اسكتله والله ما اسكتله 

اني وحدة طايحة حظ يايوم مأمنه للرجال حتى هسه اجي امن، من طاح حظي بيوم الحبيته والله بس الما تفتهم و التريد تحط ركبتها جوا رجال ، تحب
جنت اني الاكسر بيهم و انزعهم مثل نزعة القندرة تالي يجي رافد يلعب عليه و يغلبني امداني و امده كصتي لو غلبني اني اله

بقت تمشي بالبيت و تتحلف و تتوعد و عصبية، اجا رافد فات للبيت بكل هدوء يكللها :- شبيج ليش تصيحين بالموبايل

-احجي الصدك البيت منو راح تنتقل بيه

- مقرر اليوم اجي احجي وياج بهالموضوع

- احجييييي

- لا ترفعين صوتج ميعاد احترمي نفسج

- لا تثير اعصابي و انطق

- منى راح اشيلها بالبيت

- و هنا اني فزاعة خضرة موووووووو

- شنو الموضوع اجت هالمشوهة و حجت براسج و كلبتي عليه

دفعته بقوة و هي تكله :- بتي تشرفك و تشرف عشيرتك افتهمت من تجيبها على اسانك اكطعه

- اجا هو لزمها راد يضربها دفعته منه و كلت اله :-، من اتمد ايدك على امي والله اذبحك حيوان

- لزمني من شعري و كام يلف براسي و يغلط :- المشوهة الكح.... بعدج من جوا اخوي و صرتي جوا ابت عمي و جاية تحجين الساااااقطة

ضربته امي بأثنين اديها على ظهره و ساحبته مني و هي تغلط عليه

لازمها كايم يضرب بيها كمت اضرب بيه، بس ما كدرتله لا اني ولا هي .. هو اقوى من عدنا
بهالاثناء اثار من شايفة رافد يصرخ على امي راكضة على اسامه بالفرن كايتله :- الحك رافد كتل ماما و ديار

شايل حديدة بأيده و جاي ركض للبيت اول ما فايت و منوم الحديدة براس رافد ، امي كايمة تصرخ و جاره اسامه وراها ورافد راسه يبز دم و يتحلف بأسامة يكتله

و امي تصرخ و تكله :- اذبحك والله لو اتقربت من ابن سكط اطلع منا يلا

اسامه :- مخنك لو بيك خير واجهني مو تكدر على النسوان ابووووو النسوان

ديار :- اسامه تعال فدوة بس تعال

- عوفيني والله امص من دمه الهالساقط

رافد :- فتحلك ملهى ابن الكو... عندك خوش كحا***

امي شلت قندرتها و ضربتها براسه و كامت تغلط عليه و تكول :- قندرتي تشرف راسك سكط

من ضرته بالقندرة رجعلها طاير لزمها من راسها و يضرب بيها و تلازمو اسامة و رافد ، تولينا ولين اسامه لازم و اني و امي ندفع بيه و نجر

فات خالد و رائد يسحبون برافد يريدون يفك من البيت ، يفلت من اديهم و يتوعد لامي و اسامة

و هو يصرخ :- لا ما اخلي النار مشتعلة بيكم و محد يطفيكم انت و ابنج الكو** لا ما ندمتكم فلا اطلع اسمي رافد ......

☆☆☆☆☆

#اتمنى_ان_افعلها

الحلقة_ 45

اصومُ عنكَ ثم اتضرع اليكَ شوقا
لكي لا اتذكرك فأنا
احتاج ان لا احتاج
اتمنى ان لا اتمنى
اود ان لا اود
لكني اشتاق اليك
بكل ما اوتيت من ضعف 💔

......

خالد :- رافد كافي امشيييي

رافد :- عوفني ادبه هالساقط هو و امه عوووووف

ميعاد :- اطلع برا بيتي يلاااا

رائد :- مدكلي شجاك دمشيييي

يسحبون بيه و اني و اثار لازمين اسامة و هو يغلط على رافد و يصيح عليه و ذاك كلما سمع حجاية من اسامة يكوم يفور بأديهم

سحبو رافد حيل من البيت و طلعوه و اسامه كام يضرب باثاث البيت و يكسر و يصرخ على امي

- هءااااا الزواج الكتلتي روحج عليييييه ، هذا الساقط الفضلتيييييي عليه ، هءا العفتينا وراج لخااااااطرة

فهميني بس فهميني هسه منو واكف وياج هو لو احنه، ليش عفتينا لييييش ، بعتينا بحضن واحد منا ليش انت مو مثل الامهات لييييييببش

خليتيني اعيش اسنين ابيت مو بيتي حتى ما اشوفه كبالي و انت وياه ، ارتاحيتي هسه من هيج سويتي بينا

من الصغر لا انت دورتينا ولا ابوي الشافنا ليييش
كل حبكم و اهتمامكم جذذذذذذب جذذذذذذب
حسبالج من تنطين لاثار مصرف كسبتيني
اني جنت رايدج مااااا رايد فلوس رايد اشوفج حالج حال كل الامهات ساترتنا و كاعدة هسه كليلي فرحاااااااانه

هي كعدت ع القنفة دارت الوجه عنه و تبجي، و هو مستمر يصير و يضرب شكو شي يطلع كدامه و يبجي

تقرب منها وجه ايده عليها و هو يكله ، روح الزلمة امه و انت كلما اشوفج اكره روحي

حجاها و طلع و هي ركضت وراه :- لا تطلع هسه اسامه اكعد و استر عليه ابني

لزمته جر اديها من جتفه بسرعة و حجا :- لو رايدتلنا للستر ما عفتينا و اتزوجتي

ديار :- ماما عوفي اني احجي وياه
فاتت هي تبجي و هو راد يطلع، لزمته:- ليش تأذيها اكثر اتزوجت ما غلطت مو من حقنا نحاسبها و وواجبنا نوكف وياها لا تصير انت و الدنيا ضدها

-من اسمع بجيها اتأذى خليني اروح

-وين تروح مشفته و هو يتوعدلك النذل، لا تخليه يحرك كلوبنا بيك

- شيريد يسوي خل يسوي ما يهمني، لازم ارجع لشغلي

-اسامة اذا ما تفكر بأمي فكر بيه ما الي بالدنيا غيرك ليش تكسرني بيك بداعتي حبيبي ارجع

- ديار جاي اكلج اروح لشغلي صحباني هناك شحدة يتقرب الا ما رايد روحه

سحب نفسه مني بقوة و طلع، رجعت لأمي كالت :- ليش خليتي يطلع

- هو طلع منج من يوم التزوجتي و لا اني ولا انت كدرنا نلزمه عوفي الله يحمي

-ما اعديها اله هالحقير والله لا ما اطلعها من عيونه

اثار :- يعني بعد مهيمن ما يحجي وياي ماما ؟

شالت النعال امي بخركة كلب، شردت ذيج شمرته امي وراها اجا بظهرها :- كومي بنت القندرة اني بيا حال و انت تكيلي مهيمن طايحة الحظ

راحت للغرفة تبجي من امي، حجيت :- ما جان لازم يصير هيج لو متفاهمين وياه احسن

- مشفتي هالخسيس يكلي المشوهة حاجية براسج نعالج يكعد تاج فوك راسه لهالنذل

-و ما دامه نذل ليش سلمتي روحج اله و حبيبتي

- طايحة حظ و غبرة و غبيه اني ما احب ولا بعمري غرفت الحب من تالي عود اكول سندني ووكف بوجه اهله لخاطري طلع مو سند لا مخنث و بايع اهله على مود النسوان بس امداني و لا انساها الروحي هالسواية و الا اطلعها من عينه

دك موبايلي، اجت اثار و هي تبجي :- تعاي موبايلج يدك

كمت من يم امي رحت للغرفة، شفته خالد، رديت عليه :- راضي هسه و هيج اخوك يسوي

-اطلعي من كل الحسابات انت و ارجعي لبيتج

- اي بيت هذا و امي بهالحالة اخوك نذل نذللللل خالد

- و امج صلفة و حقيرة و ما مترباية

- اه والله هيج ؟

- لا تقفلين الخط و اسمعيني، ارجعي لبيت رجلج ولا تتأذين وياها

- اللي ينوي يأذيها يدوس عليه بالاول و بعدين يوصلها افتهمت

- انت ليش هيج غبية

- لما نشوف زلم امثالكم و ننخدع بيكم نصير اغبياء اعذرنا

- ها و هسه اني انصفيت ويا رافد و طلعت نذل

- و ماكو انذل منك افتهمت كافي السواه اخوك ويا امي و هسه انت واكفله فوك ما خاينها و ماخذ فبوسها بيا عين جاي ادافعله هااا

- و امج ضاربته بالقندرة و اخوج بالحديدة و انت باظافرج مجرحه جسمه و مخليته يجري دم

- جان بودي اشرب من دمه بس حرامات العار ما يشرفني انكس روحي بيه

- هيج يعني ديار صافة ويا امج

- انت من شوكت ويا رافد و من شوكت ايدته

- من لما عاف امج لأن هي بشر ما تستاهل

- اخوك اليستاهل مو ؟ من هو عار و ابو نسوان و يومية ويا وحدة و من شقة لشقة ما ينعاب لان رجال بس هي من غلطت كبل بزمانها تعلكت بيها و انكتبت هي ساقطة لأن مرة ، روح انت و عقلك روح

- اجيت ابلغج

- تبلغني ان اخوك راح يأذي امي و تريدني اعوفها و احمي روحي ؟

-بكيفج بعد

- انت بعقلك شي ، روح الله يهديك
سديت الخط بوجهه، اتصل امجد بسرعة، رديت :- صار ساعة اتصل و انت مشغول ويا منو جنت تحجين

- شرايد امجد

- شصاير بين امج و رافد

- ماكو شي ما صار

- وليش طالعة من البيت بلا ما تكليلي

- ترا كلت لامك و كالتلي روحي بعد شكو تره ما ناقصة

- ارجعي للبيت

- امي وحدها هنا ما اكدر اعوفها

- و اني كلت الج ارجعي

- و اني كلتلك امي محتاجتني لا تصدك افضل لو افضل احد غيرك عليه فلا تحطني بهذا الاختيار

سديت الخط منه، رجع اتصل بيه مره ثانية، رديت ، كام يصيح :- شنو انو و تقفلين الخط بوجهي لج اسحلج بالقران من بيت اهلج شحط و ارجعج للبيت افتهمتي و امج هاي التحجين عنها ما اعترف بيها ب**** ارجعي ولا تخليني اندمج

- ما ارجع و شتريد تسوي سوي

فاتت امي، صاحت :- لا هيج تحجين ويا رجلج اسلوبج كافي عليه مصيبة وحدة

كلت اله :- مع السلامة
عفت الموبايل مفتوح و تركته ع الميز، حجت امي :، ليش هيج تحجين وياه ؟

- اعصابي تلفانة و هو يصيح و يتأنر و يكلي ارجعي

- اي ارجعي و انت و اسامه ؟ لا ما ما ارجع

-شراح تسويلنا ، بالعكس هناك بيت عمهم تكدرين تعرفين اخبار منهم و تعرفين بنواياهم و تحذريني و تحذرين اخوج، امشي لا تخسرين رجلج بساعة شيطان امشي و معليج بيه

البسي خل اوصلج الهم بسرعة

رحت لبست حذائي و الحجاب و طلعت من البيت، ركبتني سيارتها اني و اثار و فطومة و طلعت لافت الفرع و مشت بينا شوية

كلت الها :- وين رايحة انت رجعيني للبيت خلي انجب و اكعد

- ارتاحي و ارجعي ما اريدج ترجعين باعصابج و اطكين وياه هو ما اله ذنب

فرتنا بالنص ساعة تفتر بينا بس كلوبنا خلصانه لا حجينا ولا نزلنا، وكفتنا يم مطعم ، نزلت اشترت النا صاج الي وحدة ، و لفطومة و اثار وحدة و هي ما اشترت

:- ما اشتهي

- خليها يمج

فطومة و اثار قسمن اللفة و بقن ياكلن و يسولفن ، لفت امي ورجعت بينا لبيت ابو امجد ما رادت تدخل الهم و تخليهم بموقف ويا بيت اخوهم

نزلت ام رافد فتحت الباب و تصيح :- برابي*** يعلكن لحية بلحية و بعدين يطلع بسيارتهن يفترن كحا** ما تنكسر عيونهن عساجن بالشلل ربي اني مثل ما شليتن حال ولدي

ميعاد :- لا تسمعيلها من ترديها ترتاح اتجاهليها ما النا خلكها

- شراح تسوين ؟.

- مضطرة اخابر ابوج ياخذ اسامه يمه يأمنه

- و انت؟

- اني ما عليه اكدر احمي روحي بس خل امن عليكم و الباقي سهل

- و اثار ؟

- محد مراح يندك بيها

- ولو حاولو يأذونا بيها

- لا تخافين لو حاولو هم هم عدهم بنات و يخاف ن عليهن من ابوج لو اذوها

- ديري بالج على نفسج و كل نص ساعة خابريني لأن راح يضل بالي يمج

- اطمني اني اخابرج

نزلت اني و فطومة من السيارة و طلع خالد بعد ما امه كملت قوانتها، وكف بالباب و هو يتفرج ، عفته وراي و دخلت لبيت ابو امجد

لكيت امجد كاعد رجل على رجل و منتظرنا

- هلو عمه، اني راح اصعد فوك تعبانة

امجد :- رجعتي ؟

- ما رديت عليه، صعدت فوك للغرفة اجا وراي هو سد الباب و كال :-، منو هذا التصيحين عليه و تسدين الخط بوجهه ؟

- اعصابي تعبانة جانت اعتذر

- بعديش تعتذرين بعد...... قاطعته

- امجد الله يخليك كافي و الله تعبانة

- تقرب من يمي وكعد ، بيت عمي صاحولي كبل شوية و غرفت بالعركة و عرفت انت غالطة على رافد و على عمي و على عشيرتنا

- على رافد بس ما جبت الباقين

- كالولي طلكها ما تفيدك هاي ساقطة مثل امها

- و انت راح تسوي هيج

- مو اني الاقبل لاحد يكول عنج هالكلام تعاركت وياهم و طلعت و انعل ابوهم لا ابو رافد هم شعلينا بيه و بسوالفه و حتى بسوالف امج ، امج ابيتها و انت ابيتي

- خايفة عليهم منهم حيل

- امج ما تنكدر

- بس تنكسر لو احد منهم اذى اسامة

- الله كريم ارتاحي هسه و ان شاءالله كلشي ينحل

تجيت راسي على صدره هو فرح فتحلي حضنة، رجع ليورة تمدد و اخذني بحضنه :- لا تخافين و اني موجود ما اخلي احد بيهم يأذيج

- بس امي

- لا تفكرين
بقى يمسح على راسي، و هو يهمس بصصوت ناصي و يطمني، ردت اغفى ، اندك الموبايل

فزيت من صدرهو هو فز ..
باوعته امي ، رديت عليها بسرعة :- اسمع دورية شرطة برا بس لا على اخوج

- اطلعي

- ولج باد جسمي اريد اكوم ما بيه
تحجي و هي تحاول تطلع صرخت :- اي ولج الشرطة اباب الفرن

فزيت من الجرباية بسرعة جريت حجابي

امجد :- شكو ؟ شبيج

- اسامة اجت عليه الشرطة

لبس هو كبالي و نزل بسرعة، طلعت وراها وكفلي ابو امجد بالباب :- فوتي احنا نحلها

-شتحلها هذا اخوي

حجيتها و اني اطلع بقوة و اركض ، امجد سبقني و رافد واكف يحجي للشرطة ، راشيهم الكلب و امجلبكين اسامة و يريدون يسحبونه

وكفت امي بعينهم و اخذتهم بالسانها :- شسوا و تاخذونا ؟ اللي جاي يدعي عليه رجلي و نذل تعدى عليه و على ولدي و هو رده ما تردون اللي اتعدى علينا تسحبون الدافع النا ليييش
مو انتم شرطة مو بخدمة الشعب ليش تاخذون ابني ليش

واكفة و هي لابسة نفنوف نص ردن ابيض و بيه ورد صغار سمائي ووردي و الحجاب اسمه على راسها، خصلات شعرها متمايله من جو الحجاب و متبدي على جتفها

اسامه تضايق و هي واكفة بنصهم هيج و تتوسل بيهم كام يصيح عليها :- طبي جوا لا ادافعلي روووحي

اني اريد اتقرب و ابحي و امجد يجر بيه و يكلي :- ارجعي لا توكفين كبال الشرطة روووحي

- اخوووي امجد وخر راح ياخذون اخوي

خالد و رائد ساحبين رافد و يتصايحون وياه، هم يحبون اسامه بصف محلهم و من كرايبهم و دوم وياه فما قابلين باللي يسويه رافد

وذاك يبعد منهم و يغلط عليهم حاولو يحجون ويا للشرطة كالوا :- اجرائات بسيطة نحقق وياه و نرجعه

اخذوه امي رفعت الموبايل على ابوي كالتله :- هسه تجي اخذو ابنك للحبس الحكني بسرعة اسماعيل

لزمت امي تبجي و هي تباوعله، رادت تركب سيارتها وكف يمها امجد كاللها :- اني راح اروح وراه الافضل ما تروحين انت و تجيبين السمعة الج، اءا صار سي اخابركم

بقيت لازمة بأمي و ابجي، امجد و خالد و رائد ركبوا وراه اسامة و طلعوا، رجعت امي للبيت تفور و تغلي و تبجي و تكول :- النذل ما واجهني كسرني بأبني الحقير

اجا ام امجد وراي فاتت عدنا و بقت تواسي بامي و اني ابجي و اثار يمي تبجي، نص ساعة و خابر ابوي على امي و كال الها :- هذا اسامة بسيارتي لا تخافين عليه طلعته

امي كامت تبجي بالموبايل قوي، سد الموبايل منها ابوي و جاب اسامة و اجت ، حضنته امي و بجت دفعها من عنده و فات جوا

فات ابوي للبيت، و اني و اثار نمشي وراه امي و عيونا تصب، ام امجد انسحبت، كعد ابوي و امي كعدت تبجي و تشكيله و تكله :- ثقيت بيه و طلع نذل

اسماعيل :- ابعدي ولدي من خرابيطج ميعاد خربطي ابعيد عنهم

ميعاد :- تزوجت ما خربطت و لا زنيت

اسماعيل :- ما يفرق كلهن نفس الشي الولد متأذي منج هواي

ديار :- لا تكعد تنطي نصايح و انت اكثر واحد تأذينا منك عوف امي لا تخطها بلسانك و تكللها اذيتي ، اذيتها لاسامة ما تنقاس بأذيتك الي

اسماعيل :- كبرانه و صايره حايط دفاع لامج ولج

- ع الاقل ما تركتنا و بقت ويانا مو مثلك على ارهابك و نجماتك الما ادري منين جايبهن بعتنا و باقي تبيع بينا

ميعاد :- مو وكته الحجي ديار الراح ولى، اسماعيل اشكرك على وكفتك حتى لو جان هذا واجبك اني اشكرك

اسماعيل :- لو ردتي ترجعين و نرجع و نرجع بيتنا و عائلته راح اخلي رافد يحلم يشوف ضوا الشمس هو و اهله، و اوعدكم لا اذيكم بشرب ولا بسوالف قديمة نفتح صفحة جديدة

ميعاد.:- هسه الحجي مو وكته خل اشوف ابني و اطمن على وضعه و استقر و الله كريم

اسماعيل :- راح اتركج ترتاحين و تاخذين وكت وفكري ورديلي جواب

عافنا و طلع من البيت، انداريت لامي :- ايااااج اياااج ترجعيله اتبرى منج والله

- ديار مو وكته الحجي

- لا وكت ولا هم يحزنون هءا الخنزير ما ترجعينا لحياتنا اثار بعدها صغيره تريدين تعيدين مأساتي ويا اثار ؟

- ديار كلت الج مو وكته و ما مفكرة بيه وراسي هسه دايخ و ما جاي افرزن الصح من الغلط تعبت كاااافي ريحيني مو تزيدين عليه

حضنتها اثار و هي تكللها :- ماما اني خايفة خاف يأذون اسامة

- امشو فوتو كبالي للغرفة يلا نامو

فتت للغرفة، اسامة مغمض و داير وجهه للحايط، اشرتلي انهده و اسأله، كعدت يمه بست راسه حجيت وياه :- اسومي حبيبي

-ديار ابتعدي خليني انام

- اريد تحجي وياك

- ما الي خلك وخري

اشرتلي عوفي، فرشت لاثار و الية يمها، كتلها :- لا اروح للبيت امجد ينتظرني

ما ردت عليه ، تمددت و اثار حضنتها، نزعت الحجلب من راسي و تمددت يمها من الجهة الثانية و حضنتها، ما ردت اعوفها بهذا اليوم ع الاقل تحسنا بحضنها و ترتاح

خابرني امجد و اسمع صوت الموبايل يدك بالهول، باوعتها غفت :- الله لا ينطيك رافد بجاه كلمن عنده جاه يم الله، عنرها ما ثقت بأحد و تاخذ منهم ما تنطيهم و من ثقت بيه كسرها و لعب عليها و خانها

طلعت من الغرفة خابرت امجد كال اني بالباب، فتحت اله الباب، دخل سألني عن امي و عن اسامة سولفتله

- ما دام نامو امشي وياي للبيت

- خليني يمها بس اليوم

- باجر و تعاليلها، بقت عالليلة ارجعي للبيت احسن
لبست وكمت وياه، طفيت البيت كله و طلعت

دخلت لبيت ابو امجد احمد و رغد جانو موجودين، اول ما شافتني رغد كالت :- هلو عيني شلونها امج

- زينة

- الحوبة تبطي و ما تخطي الحمدلله ما خطتكم جلطة امي و مرضها

ام امجد :- عيب عليج الشماتة حرام ديار مثل اختج المفروض حبايب و تسألينها شلونها تشوفين اخبارها مو تكعدين تتشمتين

رغد :- ماما انت من يوم يومج ويا ديار و ما تنطين بيها حتى لو باطل

- ما فد يوم شفتها باطل و صفيت وياها اني ويا الحق و حجايتج باطلة

ضاجت و كامت من مكانها ، حجيت اني :- خالة صاعدة انام

عفتهم و صعدت فوك انام ، نومت الجهال و خليت فطوم بحضني و نمت، اجا امجد حضنا و نام

العرفته بيت ابو رافد ضاغطين على عمي و امجد ان عوفو بتها و هن بنات ساقطات و لازم تساندونا و نبعدهن، بس عمي و امجد ما راضين

عمي كايل الهم :- مشاكلكم على كدكم ما توصل بيتي ولا تخرب حياة ابني، مريته حبابة و خوش بنية و شايلتنا على راسها و اخلاقها زينة شعلينا بيكم و نكسرها و نطلكها ؟

متحاجين هم و ابو امجد و طالع منهم عمي و عايفهم