-سالمة عيونج
رحت الها بست راسها، باستني بخدي و كالتلي :- صيري سباعية و احتوي امجد تراه خطية تعبان

-ماكو مرة ما تغار بس هو يعرف ان شاءالله شلون يعدل و ما يخليجن تختلفن بس هو اله حق عليج اني سمعت البارحة ما كادرة، لا تقصرين وياه بنيتي

سكتت ما حجيت

راحت هي لغرفتها نامت و اني صعدت فوك، مشيت على اسامة اطمنت عليه و فرشتله ورحت للغرفة، طفيت الضوا سويتها ظلمة

ورحت نمت ... باللييييل نايمة حسيت الباب انفتح
انعصر گلبي، شكد كرهت الليل وياه، لازم اتقبله و اني لاعبة روحي من نفسي و لو ما احرام انتحر

بقيت دايرة وجهي ما اتحركت
انقفل الباب ..
وتقرب من السرير

بقيت بمكاني متجمدة، اكو شي حسيته غريب ما ارتاحيت ، مديت ايدي اتحسس الموبايل، كلبي كام يدك

جريت الموبايل دست دكمة حت يطلع ضوا الشاشة، انداريت اباوع و الكا خالد مبتسم كدامي
ظلمة و هو اصلع

صرخت حيل حط ايده على حلكي كمت ادفر بيه و اتراجع ع السرير

خالد :- اششش اجيت بس احجي وياج

-وخر مني كووووم

عافني و كام ظلمة و بس الضوا جوا الباب اشوفه مشيت للضوا اشغله هو واكف و راي فتحته انداريتله

هو متكتف وراي :-شرايد مني ؟

-ما متقبلته ولا راضية بيه عايشة وياه ليش

-انت معليك اطلع من عندي بسرعة

- راح اطلعيني بسكوت و تحاولين تخفيني عنه مثل ما جانت تسوي امج بوجود ابوج مو

-خالد لا يجي احد فدوة استر عليه

-بأمكانج تروحين تكولين لامجد اني جنت احب خالد و اليوم ما اريده واريد اعيش وياك و اصونك، وتعرفين راح يتفهم وراح يبعدني بس انت ما رايدة هيج

انت تنتظريني كل دقيقة و تسوين نفسج تريدين تخلصين مني يس اني فاهمج

خالد

-دمرررررتي خالد كاااااافي

-والله جاي اسمع صوت جوا روح الله عليك

-خايفة منهم يعرفون و لو ما هم راح تخليني مو

-خاااالد كااافي الله عليك كافي، ما شفت احد مثلك ما عنده كرامة لازكلي شتريد فك عن

-هذا الماعنده كرامة من سمعج تبجين فز من حيله و اجاج ركض، الما عنده كرامه هذا عجز ينسى

-لا اني ام جسم الحلو ولا اني التطير عقول حتى هيج ما تعوفني خلي المشوهة بحالها و عوفها تعيش عليك الله اطلع

-اني وحدي الشايفج صح ذوله كلهم مصالح
وكت التقصرين وياهم محد راح يرحمج

-خالد اطلع لا تفضحني

-اطلعي وياي

-خالد روووح

-تروحين كدامي و تحجين لامجد كلشي

-خاااالد

-كلت الج امشييي

-انت شنو شارب شبيك اصحى

-امشي كليلة اني احب غيرك و رايدته كافي تخدعين نفسج انت الي و حتى ما تجرئتي يتقربلج لان انت الي ما ارضى يعالجج ولا ارضى احد غيري يساعدج

-خااالد روووح......

☆☆☆☆☆

#اتمنى_ان_افعلها


الحلقة_33

آراك و اتمناك و لا استطيع الوصول اليك..
تناديني و اسمعك و ارفض تلبية مناداتك ..
افأختار الحرام ام نحن وسط الحرام !!..
ام نحن الحرام بعينه ؟!
ايجوز لي النظر لعينك ؟
أيجوز لي مسك يديك ؟
أيجوز لقلبي ان يعشقك ؟
أيجوز لي ان اسرقك ؟
من اهلك
من بيتك
من عالمك
و من كل مانت فيه !
أيجوز لي ؟

............

ديار :- خالد روووح

-كلت الج روحي كبالي

-طوختها كلش اطلللللللع
كمت ادفع بيه و هو يرجع

-تجذبين على روحج لما تبعديني عنج تعرفين كلش زين اني شاغل كل تفكيرج ومستحيل احد يجي يملي مكاني

دفعته مني و ضربته راشدي :- كافي لطشت هواي لعبت روحي منك تفتهم لو لا تصيحلي مو شريفة و انت اللي تتعدى علية ولي منا

لزم فكي :- كد هذا الراشدي انت ؟

دفعته :- كدها و نص وشتريد تسوي سوي، تفضحني !! روح افضح .. تهديدك ما يهمني بعد روح منا

-لا اخليج تتندمين والله

دفعته للباب دروووح، كام يكح قوي ، انرعبت حطيت ايدي على حلكة :- ولك اطلع راح تفضحني والله حرام عليك

كام يكح قوي بعدته من الباب و شردت نزلت ع الاقل اذا طلع احد ما يلكاني وياه بالغرفة، وصوت الكحة مالتة قوية طالعة بس الكل نايم

نزلت جوا سمعت صوت بالأستقبال، فتحت الباب احمد و رائد حاطين شرب و مشغلين اغاني و نركيلتين كدامهم و مسلطنين

باوعلي احمد :- ها ديار ؟

-لا ماكو شي
رديت الباب رائد صار كبالي كمت اشرله ما جاي ينتبه، نزل خالد ع الدرج و هو يگح قوي ، فتحت الباب عليهم كلت :- رائد هذا خالد جاي يكح قوي كوم شوفه

كام رائد و احمد متمدد بمكانه يشرب جكارة ويغني ويدندن ويه الاغنية، سديت الباب عليه و كلت الرائد

:- اخذه منا فدوة ترا والله ما بيه حيل لمشاكله

مشى رائد كبالي بس ما متوازن جسمه يروح منا ويجي منا، لزم الدرج يريد يسيطر

:- يااا رافد شجاك

-ما بيه شي عوفيني

كام خالد من مكانه و نزل :- امشي رائد امشي والله لخليها تحلم تشوف يوم ابيض بحياتها

مد ايده خالد جاي يسحب رائد، وكع رائد للكاع و خالد تعثر بيه:- دكوم يمعود شجاااك

رائد :- حبيب امك متقبل من احاجييييك روحي معلكة بيك

خالد ضحك ضحكة مسموعة و هو يكله :- كوم يا ولد كوووم

كام خالد و هو يكوم برائد كلش سكران
صاروا كدام الدرج اريد اصعد و رائد يغني و خالد يجر بيه و يضحك عليه، طلع ابو امجد :- هاي شنو عمو فوتو جوا ترا ميصير هيج بالليل صوت الضحك ضاج بالبيت

التفت عليه واكفة :- ديار عمو شعندج نازلة

-ااا عمو سمعت الصوت و نزلت عبالي اكو شي

خالد :- دكوووم يا رائد متكلي شبيك

ابو امجد :- اصعدي لغرفتج بسرعة و بليل لا تنزلين

اريد افوت و هم كبالي، خالد رجع يكح من كل صدره
و رائد ديحاول يكوم بس كلش مثكل، سحبه ابو امجد و دخله للاستقبال و خالد طلع برا

اسمع ابو امجد كعد يرزل باحمد و رائد ويكلهم :- ما يصير هيج كافي استحوا على ارواحكم عيب

صعدت ع الدرج، لكيت امجد كبالي بالفانيلة الداخلية و للشورت :- شكو شبيه ابوي

-رائد و احمد سكرانين و جاي يرزل بيهم

-قابل غريبة عليهم، بس تعاي فوتي لمها محتاجتج

-شتريد ؟

-بس تساعدينها يمعودة الليل كله بس تون ما خلتني اعرف طعم النوم، رايح اني للغرفة الثانية انام ما بقالي ساعتين واروح للدوام ابقي يمها انت

-ماشي روح نام

مشيت و اني افكر بالله لو خالد جاي و امجد موجود جان شسويت ؟ شلون اخلص من خالد وحقارته وياي والله تعبت.

فتت لمها كاعد تبجي، تقربت منها :- ها شبيج

-جسمي ديار متت بس فرجيلي

كعدت افرجلها ، طلعت ما ماخذة الدوا مالتها مال الليل، انطيتها الدوم و بقيت افرج فوك الساعة و نص اني بس افرك بجسمها كلش تعبانه
لحد ما نامت، كعد حسوني ابنها
شلته من عدها حتى اخليها تنام ردت اروح لغرفتي خطية امجد وراه دوام

نزلت جوا و اني افتر بالطفل واسكت بيه
طلع عمي :- ليش تنزلين بالليل يا بنتي ابقي بغرفتج

-عمو غرفتي امجد نايم و مها نايمة بغرفتها و الطفل يبجي يعني شسوي وين اروح

-مو ذوله يشربون يا عمو، اخاف عليج والله

حجاها و كام فات عليهم مرة ثانية لكا احمد و رائد نايمين غاطين بنومهم سد عليهم الباب و كال :- جاي يتعبج هذا

-شلع كلبي عمو ما جاي ينام بس يبجي

-جيبي بنيتي وروحي نامي

اخذه من عندي و هو يكله :- اها اها جدو حبيبي ليش تبجي

الطفل قنع بجده، اخذه و فوته جوه يمه هو و عمتي، رحت صعدت فوك لغرفتي، شغلت الضوا فز امجد :- بيش الساعة ؟

- بالستة

-نص ساعة و كعديني فدوة بس خل انام

حط المخدة جواه حظنها ورجع نام :- دخيلك يا الله هالليلة شيخلصها نعست متت بس اريد انام

بس ابقى بالغرفة اغفى، اخذت الموبايل و رحت لغرفة مها، طلعت ملابسه و حذائه و جواريبه، حطيت الجاي ع النار و سويتله ريوك

نزل هو :- صباح الخير

-هلو صباح النور

-حسوني مو بفراشه وينه

-بجى وما قبل بيه نام يم عمي و عمتي، ملابسك حضرتهم فوك و الريوك كملته الك

تقرب اخذ راسي و باسني من كصتي :- مشكورة، تعبتي ويا مها و الجهال، لا اتعبين نفسج بيه اني ادبر اموري روحي ارتاحي.

-لا يمعود فدوة قابل شسويت

-روحي اصعدي و اني راح اوصي امي ما تكعدج الصبح البنات يعوضن

هزيت راسي ورحت للغرفة، قفلت الباب و تمددت ع السرير، امجد طيب و خوش ولد ما يستاهل كل اللي ديصير، لازم ابتعد من خالد كل البعد اذا بقيت هيج لا خالد راح يشوف حياته وينسى ولا اني راح انساه و ارتاح .

بقيت بأفكاري اجيب و اودي للساعة ٩ واني اتكلب بفراشي لحد ما نمت.

خلال نومي اندكت الباب اكثر من مرة و كعدوني بس اني جنت كلش نعسانه و من النعاس نسيت اني متزوجة كل ظني اني ابيت امي و هي ادك الباب بمغلسة ما اريد اكوم

اندكت الباب و اسمع، امجد :- ديار

كمت من مكاني فزيت للباب فتحته بساع، فات هو :- بعدج نايمة ؟

-بيش الساعة ؟

-٤ الا ربع

-اوو واني ما كاعدة والله ما ادري ما نمت بالليل اخذتني نومة
احجي و اني ادور بالغرفة مدري على شنو دايخة كلش، حجه :- ارتاحي اذا بعدج ما شابعة نوم كملي نومتج

-لا يمعود هسه شيكولون عليه

تمدد هو عل الجرباية بحذائة، مشطت شعري اريد انزل
حجيت :- هم اجو خطار

-اي ومكعدينج و ما فاتحتلهم البارحة

-يا الله شكد عيب هسه بيا وجه اطلع الهم .

-عيب امنين شبيج انت لا تشيلين هم لاحد، واذا واحد حجه وياج بس كليلي

باوعتله، يحي و هو متمدد على ظهره و مغمض عيونه :- ليش ما اخذت اجازة ليش داومت

-اجازتيش يمعودة كلهم حرامية انطينا ٢٠٠ الف و ننطيك اجازة ١٠ ايام

مشيت يمه حتى انزعه حذائه ما قبل، كال :-، عوفي لا لا انزلي اني انزع

عفته و نزلت

اسراء :- يمة شنو معليج عروس و نايمة لحد هسه وين صايرة

ام امجد :- من تسهر الليل على مرت اخوج و ابنه و اداري بيهم ما كلتي عروس عيب خل اكوم بمكانها من نامت صحتي عروس، على كيفج ويا البنية هم بنيتنا هي مو غريبة

ام رافد :- المن اخذتوها لعد غير تخدم ابنج و مرته

ام امجد :- هي مرته مو خدامتهم و اني كلت اله الما تقبله على مها لا تقبله على ديار وتعدل بيناتهم و تنصفها ما اقبل هذا الحجي ترا

اسراء :- راح تخلينه يعبدها مثل ما جان عابد مها

ام امجد :-والله ما دامه ما مقصر ويانه خل شيسوي يسويلها رجال و مرته شعلينا

ام رافد :- ديار و امها ما يتأمنن يا ام امجد ديري بالج منهن

ديار :- مساء الخير

ام امجد :- هلا بنيتي كعدتي

-كلش اعتذر خالة بس ما نمت غير ب٩ الصبح و ما دريت بنفسي بعد

ام امجد :- البيت بيتج يمه و المرة ما تتعذر ابيتها، هاج اخذي الوليد غسليله دمر روحه

هزيت راسي و اخذت حساني من ايدها و رحت غسلتله، اجت اسراء حجت :- شكد دكينا الباب عليج يمعودة ناس اجونا حتى عيب

باوعتلها و نزلت عيني منها اغسل ما رديت عليها، هزت ايدها و مشت ، غسلت الطفل و رحت يم مها :- تغديتي

مها :- اكعدي ديار

كعدت :- اوصيج وصية و اني اختج على فراش الموت

-اسم الله عليج

-ام امجد صادقيها و صيري زينة وياها و اهم سي لا تاخذين حجي بناتها و تودينه لامجد هي زينه وخوش مرة بس ما تقبل الفتنة بين ولدها هي تحل المشاكل

-اني ما حجيت ويا احد وبعدين حقهم يحجون اني صدك متاخرة بكعدتي

-لا تكولين حق احد انت ما سهرتي تلعبين لا تخلينهم يدوسون عليج، اذا سمعتي حجاية اشكيها لام امجد لا تشكين لامجد.

جاي نحجي اني وياها فاتت امي و اثار وياها :- مرحبا

كامن ام امجد و البنات يسلمن عليها، كعدت و هي تكول لام رافد :- بشرينا الامير وليام ما تزوج

ام رافد :- ازوجه احلى وحدة ان شاءالله

ميعاد :- ان شاءالله، شفته البارحة بالمحل خطية يكسر الخاطر مشغل اغاني و صافن جنه مركوع بوري

ام رافد :- لا ما بيه شي بس تعبانين بالبضاعة مال الاسواق

ميعاد :- الله يوفقهم ان شاءالله، ابو رافد شلون ان شاءالله مرتاح بحياته الجديدة

ام امجد حجت بسرعة :- هسه عوفونا من ابو رافد، ام اسامة شلون كاعدة وحدج و اسامة و ديار هنا هم استاحشتي

ام رافد :- شتقصدين

ميعاد :- اي والله يا ام امجد هالطايح حظة اسامة لازك بهالبنية ما يقبل يعوفها و اني باقية وحدي، بس الله كريم ما تضل الامور هيج تتغير قريب

مها :- امج و ام رافد متعاركات ؟.

ديار :- ما اعرف

- بعده رافد يريدها ؟

-ما اعرف عن هالموضوع

-زين اكلج صدك خالد جان يحبج الاتذكره بس انت جنت تحبيه و تكولين ما يحس بيه و ما يريدني يعتبرني صديقته

-ولهسه يعتبرني صديقته

-مو عمتي ذاك اليوم تكول ام رافد جانت تكول خالد يحب ديار كتلها عمة هو معتبرها صديقته لوما زوجها على ايده

تحجي وياي همس، تقربت اكثر و كالت :- زين احجيلي الصدك انت جانت عندج علاقة ويا احد بالجامعة

-فترة و انتهت

-عافج لو انت عفتيه

-تعاوفنا اثنينا

-لعد على شنو حبيتو بعض

-جان يتمر عليه هواية فتعاركنا بسبب هالموضوع و تركنا

-هاا، اي احسنلج

كمت للمطبخ و صحت على امي :- ماماااااا تعاي شوفي هاي اثار شمسوية

اجت هي بسرعة، لزمتها بالكراج و كلت الها :- عوفي بيت ابو رافد بحالهم لا تتحرشين بيهم ولا يوصلون يمج فكيني

-واخلي ابنهم هالساقط يفلت بفعلته و جن ما مسوي شي ؟.

-عندج غير حل ؟ شتسوين مثلا تعبت اني تعبت

-اطيح حظهم والله لسوي ليلهم نهار و نهارهم ليل

-عوفيهم رحمة لاهلج فكيهم

- لا والله ما اعوفهم اريد شويه يمشي على زواجج لا ما العب بحالهم لعب فلا اتسمى ميعاد

-يمه تريدين تفضحيني انت عوفيهم، زين مو تريدين رافد شلون تفضحيهم

- كلهم جوا قندرتي

-واذا جوا قندرتج شعندج متزوجته

-بعدين تعرفين

-راح يأذوني نسيتي هم بيت عم امجد

-وشيسوون درو بيج جنتي تحبين خالد و يصربهم وجع غصبا عليهم يرضون و المارضو هم طبهم وجع ناخذ الغايب و يا دار ما دخلج شر نشيل منا و نروح بغير مكان

-كلشي عندج بهالسهولة

-لا ياب لاوم نكعد ندك و نلطم على ناس استحسف اخليهم قنادر برجلي مو اهتم الهم

-يمه ما تهتمين انت عوفيهم اني اهتم سمعتي مو رخيصة هيج حتى ميهمني شيصير عوفيهم بحالهم لا اريد تنتقمين من خالد ولا من احد،من غير شي هو متخبل وما عايفني بحالي

- شسوالج ؟

- كولي شنو الما سواه، ليلة عرسي كلبها عزا و عيشني بخوف بس الله يعلم بي و البارحة خلاه يشك بوسام زميلي يحبني و عدنا علاقة و بليل فات لغرفتي لا حسب امجد يمكن يمي لو احد يشوفه متخبل ما مهتم لاي احد

-وتكليلي عوفيه لهالكلب شلون فات عليج ما كلتي لامجد

-شكول فهميني شكول طردته يكلي بيت عمي، سهران ويا رائد و احمد و صاعد لغرفتي هسه اني شسويله فهميني

-اني اتصرف وياه

-شتتصرفين يمه بس خليه يفك مني

-يغبيه صارلج شكد ساكته فك ؟ خليني اتصرف انت ليش هيج تتراجفين و اليكول احد حاط اسلاحة فوك راسج

-امجد هددني لو صار شي يكتلني

-يا فدوة مو تايهتله غير هو واكبر راس يطلع وراه اسحك راسه بالقندره، يهدد، يعني امجد يومين صارلج وياه وهددج شوكت هاي انت شو ما تحجيلي طايحة الحظ باقية تلطمين وحدج شبيج

-ماكو شي هو بيوم الشك بيه حذرني و كال لو لاحظت شي استخدم سلاحي

-تصرفه وياج شلونه اسلوبه

-اسلوبه حلو و ما بيه شي بس وجود خالد موتر الجو مخلي شاك ٢٤ ساعة

-خلي خالد علية وما الج علاقة

اندكت الباب فتت جوا صحت عمي، طلعوا عيال دعاء اخت امجد جايين يوصلون بيت ابو امجد وياخذون جنتهم وياهم

كعدوا شوية راد عمي يوكفهم على عشا ما قبلوا كالو جايين بس نسلم و نروح، كال عمي :- اصعدي كعدي امجد

صعدت لامجد كعدته و نزلت كعدوا شوية و حطت امهم ٢٥ بأيدي و اخذوا دعاء وراحوا، شوي البيت فرغ من هوسة الجهال لان عدها ٤ جهال صغار

بقت بس اسراء وبتها بالليل اجا رجلها اخذها وراح، انمها نايمة جوا بالغرفة الصغيرة وعمتي بغرفتها فاتت، اني وكفت اسوي جاي و جبن لاسامه حتى اعشيه و انام

سمعت ابو امجد و امجد طلعوا من الغرفة يكله :- نبه ديار ما تنزل بالليل اذا اخوك وولد عمك سهرانين بالبيت

-ليش شكو

-طلعت البارحة الفجر و الكا رائد واكع و خالد يضحك وهي واكفة تتفرج ما يصير

-يابه لازم تحط حد لاحمد الى متى هالشرب هذا تالي الليل هو ورائد مو حتى لعبت ارواحنا والله

-شسوي منعته فترة كام يبات عند جماعته زين اعرف جماعته شنو منين يا ابني عدهم مخدرات بنات يروحون يورطونه و نبتلي خلي يسكر بالبيت و ينهمد ينام ولا يروح بغير بيت

-جانت بس مها يابه هسه مها وديار زحمة يسكرون بالبيت

-انت حذر مريتك وليدي ولو اني والله لو ما مها واكفة و رايدة هذا الزواج فلا اقبل بس بعد هي ديار ووافقت ما كدرت امنع

-ليش اكو شي ؟

-مو كل الينعرف ينكال انت دير بالك والله كريم

-قلقتني اكو شي تعرفه يعني

-اني اعرف ديار من زمان و اعرف طينتها بس هاه هم جاي تميل لامها

-شلون يعني ؟

-اقرب مثال البارحة وين اكو زملاء يجون لبيت وحدة زميلتهم ؟!! والبنات الوياهم شتعرف عنهن مو عدنا يا يابع بنات و جانن كلية و هن بالكلية ما يطلعن مو عطلة و يتواعدن ويا زملائهن والله رايحة لبيت صديقتي

البيت الطلعن منه ما سألهن منو ذوله الطالعات وياهم وين رايحات وين جايات ما سال لا كال ؟ لو ما بنات منفلتات !! وما وراهن اليسأل

امجد :- كالتلي زملائها و بوجودي كلت ما بيها شي بس ما حسبتها هيج

ابو امجد :- لا احسبها و معن بيها زين امجد ..ديار مو مها، ديار امها ميعاد و ميعاد تعرفها شنو

-لا يابه ديار مو مثل امها، لو ما رابيه عدنا

-اخذ الوريدة و شمها تطلع البنية على ذويل امها، يعني بهاي شلتها لو تتفق وياهم و تريد تطلع ميعاد تمنعها ؟ لا جان طلعت والله يعلم وين تطلع و امها ما تحاسب، ما اكلك ديار مو زينه بابا بس عمرها ٢٠ ويحتاجلها متابعة و تعلوم و هي بعد مريتك صارت، انت على كيفك وياها بالهداوة علمها و دليها الصح

شنو هاي ريحة جاي يحترك ؟

جنت كاعدة بالمطبخ ع الكرسي و استمع اجا امجد :- هاي انت هنا ؟ الجاي احترك
مشى طفاه

كمت من مكاني ردت اطلع، صاح :- ديار شبيج ؟

هزيت راسي بمعنى (ما بيه شي ) و هميت التفت حتى اطلع وكف كبالي ابو امجد :- شكو

امجد :- الظاهر سمعتك، ترا ابوي ما جان يقصد.

ابو امجد :- اني لو اعرفها مو زينة جان ما قبلت اخذها لابني، و من زمان تعرفيني شكد احبج و اعزج

هزيت راسي بمعنى (اي)

-كل واحد بينا يابه يحتاج اليتابعة و يدقق وراه، هذا احمد و هو ولد خوف من اصدقاء السوء اقبل يشرب ابيتي ولا يطلع و من يطلع ازرف اذنه بالتحقيق وين رحت وويامن كعدت وانت صرتي بنيتنا و جاي اوصي بامجد عليه

-اني اروح اصعد

عفتهم و صعدت بس خنكتني العبرة هذا الكلام الما تهتمله امي و اني اهتم، رغم محد عابني بس صعبة اسمعهم يحجون على امي رغم الهم كل الحق

ما ادري ليش امي من دون الامهات هيج هواها ادور هذا و تعوف هذا، ابد ما شفتها فد.يوم صلت لو علمتني على الصلاة كل تعلومها زيني شوارب الزلم

لو شكد ما احجي وياها ما ترد
والكلمة التجيها تمسني لو شما تكون ، انجرح و انطحن طحن بس هي ما تحس ، كعدت بغرفتي، مدنكة و ابجي بسكوت، فات امجد

-صدك تحجين بجيتي من كلام ابوي

-ما كال شي غلط !

-ادري بس من خوفه عليج يكلي صونها و دير بالك عليها

هزيت راسي (اي)

-كافي لا تبجين يلا مسحي دموعج
دك الباب اسامة :- ديار جوعان

امجد :- جايب لفتين يم مها روح اخذلك وحدة و اتعشى

ديار :- لا اكوم اسويله عشا

اسامة :- شبيج تبجين ؟

-ماكو شي حبيبي
نزلت جوا و نزل امجد و اسامة وراي
امجد :- هسه شلون راح تبقين تبجين

-روح اصعد نام لا تشغل بالك وياي ما بيه شي

امجد :- زين لعد رايح اصعد انام، كملي العشا و تعاي انتظرج

-اخذت نفس و تنهد هزيت راسي (اي)
راح صعد تقربلي اسامة :- منو وياج ديار

-جاي ابجي من امي

-شبيها

-ابو امجد يحجي عليها ما اعرف ليوين راح نبقى نتعير بأمنا، ذاك ابوي ماكو سواية طايح حظها ما مسويها و محد يجيبه بالطاري و عايبينا بأمنا و امي ما مقصرة مخليتنا علج بحلك الناس

اسامة :- بس خل اكدر والله العظيم الا اكتلها

-لا تحجي هيج

-لا احجي لان امنا ساقطة ليش نضوج من الناس و احنا الضايجين منها ؟

-اسامة بعدك صغير على هالسوالف اسكت

-هو اني منتظر اكبر والله اكطع راسها

-كافي اسامة امشي

سويتله العشا وكعدته بالمطبخ ياكل، صاحت مها :- ديار امجد وين ؟

-نايم فوك

-وين فوك ؟

-ما ادري !هسه اصعد و اشوفه ليش

-بغرفتج مو ؟

-كلت الج والله ما ادري

-زين تكدرين تنامين هنا يم الجهال خاف يبجون بالليل

-اذا بجو بس خابريلي ع الموبايل انزل

-شعندج فوك انت ؟

-شبيج مها غير اصعد انام ترا دا تضايقيني بشكج لو ما انت الجبرتيني عليه

-ما كلت الج شي حبيبتي بس تكدرين تساعدين اصعد انام اني و جهالي فوك بغرفتي

-صعدتي البارحة و الليل منمتيه، دكعدي ارتاحي يا عيني

-كولي ما ترديني اصعد ورايدة تاخذين راحتج

-تصبحين على خير

صعدت لغرفتي، لكيت امجد متمدد ع الجرباية و متغطي لحد صدره و فاتح كلوب صفر و جاي باوع فلم

تقربت :- امجد لو تنزل يم مها احسن ترا كلش دا تتضايق من صعدتك هنا

-ديار وراي دوام والله البارحة ما نمت هي تون و كل شوية واحد من الجهال كاعد الليل ما نمته رحت للدوام اغفي

....ما حجيت هم حقه يريد ينام ، بس شلون افاتحه و اكله روح نام بغرفتك مو يمي، هو حجه :- شبيج ليش واكفة تعاي اكعدي

-ااا اروح اشوف اسامة

-هسه اجيتي من اسامة، تعالي باوعي هذا الفلم حلو

بقيت مترددة، باوعلي :- شبيج ديار ترة اني رجلج !!

-بس مها

-لا تتحججين بمها هي الزوجتني و حطت بحظني مرة و كالت اعتبرها زوجتك لا بيوم شكيت ولا كلت الها اريد اتزوج فلا تظلين تتحججين بيها

-مو تنقهر

-كلت الج لا تتحججين بمها ما اضايقج تعاي نامي وما راح اضغط عليج بشي

تقربت من السرير كعدت ع الحافة، هو رجع ركز ع الفلم، كمت، حجه :- ويين

-بس اجيب موبايلي احطهوع الشحن

-يلا

-رحت جبته جايني رسالتين من رقم غريب، كاتبلي ( هذا رقمي الجديد يروحي احفظي يمج مثل ما حافظة ابني ابطنج) و بالرسالة الثانية كاتب ( هو صح الشعور بالقذارة صعب بس هذا بعد اختيارج اني بس حبيت اذكرج كبل لا تنامين يروحي )

بلعت ريكي، حذفت المسج (يا ربي دخيلك سمم حياتي وايامي كلها، انسان جنت اذا اخاف الجئ اله هسه ما اخاف من غيره شلون بيه )

كمت افرك بوجهي اختنكت، تقرب امجد ، حظني من ورا :- شبيج حياتي

حسيت بجسمه طخني كشت روحي بساع عقجت جسمي:- ما راح اضايقج بس تعالي نامي على ايدي

-اريد انزل جوا

-اشش بلا تهرب و تعالي يمي ما اضايقج

بلعت ريكي و هو يسحبني يمه، خلاني بحضنه و هو بس بالشورت وجسمه قريب مني، جسمي كله كزبر كمت ارجف

همس:- لا تخافين ترا ما اذيج والله
حجاها و هو يتقرب من ركبتي، وخر مني بسرعة

بعدني من حضنه و اندار نام، جان كلوب صفر وما مدقق بجسمي بس من تقرب حس بالتشوه و ما استقبلني

ما اعرف اضوج لان كاش مني مدري افرح لان عافني
احساس ضايع مدري شأحس، درت منه طلعت الي غطا و طفيت التلفزيون و نمت.

ساعة و اتصلت بيه مها، رديت بسرعة، حجت :-ديار انزليلي بسرعة راح اموت

نزلت ركض الها :- ها شبيج

ما تحجي بس تون من جسمها ، كمت افرك الها
وهي تون بألم حيل،كعدوا الجهال و كاموا يتصارخون

كمت اخذت حسوني على جتفي و هي افركلها بأيد بس انخبصت كلها تبجي، رحت لغرفة عمي و عمتي كعدتهم كلت الهم :- بس احد منكم يلزم الجهال مها كلش متأذية

اجت عمتي ركضت وياي لخذت الجهال اثنينهم خلتهم يم جدهم ينوم بيهم و هي اجت وياي تفرك لمها
تعبت حيل لحد ما تخربطت

كمت اصرخ عليها و اصيح، طلع احمد من الاستقبال ركض كعد امجد، نزل امجد و هو يلبس اجا شالها وركض بيها للسيارة و اني ركضت فوك لبست و نزلت اركض و امجد يصيح بالباب :- يلاااا

صعدت عمتي توصي اخذناها و طلعنا للمستشفى
فحصوها و انطوها العلاج لل١٠والصبح كالو :- طلعوها ما الها علاج و تخلونها بالمستشفى انطوها مسكنات و خلوها بالبيت
........................

ميعاد :- مريت بسيارتي من محل ابو رافد، لكيت خالد كاعد وكفت السيارة فتحت الموبايل شغلت تسجيل نزلت

:- صباح الخير

تنهد :- صباح النور

- هم زين لكيتك كاعد عندي موضوع وياك

-شرايدة

-شرايد من بنتي خاف الله بيها انت ما عندك خوات ما عندك عرض ؟

- اذا هي بتج الواحد شيريد منها مثلا

-شقصدك ؟

-قصدي واضح

-ابتعد من بتي ولا تتقرب يمها بعد

-شي يخصني

-حرام عليك بنية تريد تعيش ويا رجلها كل ساعة طالع بوجهه ولك كافي السويته شرايد منها بعد عوفهاو

-المثلجن ما يرضن بواحد

-قريب اصير مرت اخوك عيب هالحجي اشايف عليه وهيج تحجي اني مرة كافي خيري و شري وكاعدة لا داكين باب حد ولا واصلين الباب احد عوفونا بحالنا

-هو اخوي لو بيه خير ما ياخذ وحدة مثلج ساقطة بس عاجبة يشد كرون

-فد واحد طايح حظة هم زين بنتي صحت على زمانها و قررت اتركك و سالفة اني ساقطة و اخوك شاد اكرون تتحاسب عليها بس اصبر علية

-شتريدين تسوين سوي ويلا منا

.. طلعت الموبايل سديته :- جنت ناوية احجي وياك بس بموضوع بتي و ابعدك منها بس انت الجنيت على نفسك

-جاية تهددين انت ؟

-اني مرة و انت رجال و نشوف منو اليثبت نفسه

-هه توكلي يابه

طلعت من المحل ، خابرت على رافد ، رد :-الوو

-رافد هسه تجيني بعد ما اتحمل

-خير شصاير

-كلت الك هسه تجيني و الا اكتل روحي واخلص

-دكولي يا الله يمعودة

-وين انت فهمني

-بالدوام والله شصاير

-الصاير اخوك يعيرني و يغلط عليه و عليك كافي تحملنا اني و بتي من اهلك هواي لو تجي تحط حد لو والله بعد ما اسكت

-بس اهدي اخذ اجازة زمنية و اجيج كبل والله العظيم بس اسكتي

-انتظرك

سديت الخط منه، خابرت ابو رافد ، رد :- الووو

ابو رافد :- الو منو

-اني ام ديار ابو رافد رايدتك بموضوع و داخله عندك تسمعني و تفتحلي كلبك والله ما اريد شي منك بس تسمعني

-كولي يابه

-ولو هو صبح و زعجتك بس الشغلة ضرورية و ما تنحجي ع التليفون

-وين تريدين نحجي

-اني براس الشارع اطلع و اني هناك احجي وياك بعيد عن المنطقة

-يلا جاي

.. ابتعدت من المنطقة، خابرته ١٠ دقايق و اجا:- كولي يابه

-شوف ابو رافد رايدة احجي و افتحلك كلبي و ادريك شهم ومعدل و تسمعني

-غير نفتهم شكو

-يشهد الله لا اني ولا بتي فد يوم دكينا بابكم لو دورنا ولدكم اذا خالد يريد بتي و رافد يوكف على بابي يكلي رايدج اليه ذنب اني وبنيتي ؟

-بس

-اسمعني ابو رافد ولدك الف وحدة تتمناهم و احنا نسوان بس يابو رافد كافي ما جاينا بس وجع الراس ما ردتو بتي وكلتكم على امركم ورحت زوجتها وانطيتها و بعدتها من ابنكم

ترضاها ابنك يعتدي على بتي وهي على ذمة ابن عمة ؟

-هذا خالد ؟

-ومو بس هاي يا ابو رافد كل شوية طالع بوجهه، اول البارحة سكران و فايت عليها بغرفتها و البارحة يهدد بيها و ما جاي يعوفها بحالها

الحل يا ابو رافد شنو، الكلت اله اخذها و اتزوج ما رضيتو و الزوجت بتي هيح تسوون بيها

-احط طلقة براسه والله

- شوف ابو رافد صح اني مرة ووحيدة و مال احد بس اعذرني اذا ما رديت ابنك اروح لجبير عشيرتكم و ادخل عنده و اكله بسوالف ابنك وهو يحلها لان اني كلش تعبت منكم

الزوجتها لا خلصت و البقيت ابتليت

-اصبري عليه اليوم نلزمه و نتصرف وياه الأرجوه منج لا تكبرين الموضوع

-لا ما اكبره اصلا بتي التتضرر بس اذا ظل هيج لا اسمحلي كلشي ولا الشرف فدوة

بقى يتعذر مني هواي و اخذ سيارته و طلع

خابرت رافد كال اني جاي بالطريق

انتظرته بالبيت، شوية و اجا، سمعته التسجيل و كتله:- ترضاها هيج يكول عني اشافني و هيج يكول شرفي لعبة عند اخوك و يطعن بيه ترضاها

انت واعدتني توكف بعين كل اليحجي عليه ووعودك ما شفتها منها بس الحجي هاي مرت ٣ ايام و انت لا عاقد عليه و لا جليب احد واني انهدم بيتي من وراك ابني لهسه ما طايق يشوفني و مالي عين احط عيني بعين جهالي بعد الصار و انت ما دا توكف وياي

ليش هيج رافد ليش اني مرة ووحيدة و رايدة اسند ظهري بيك تالي اخوك هيج يكول عني و انت ما داري بيه

كافي تعبت منكم كافي ، هدمتو بيتي و بيت بتي كااافي وين اروح منكم شسوينالكم و هيج نتجازة اخوك كلش شوية طافر على بتي ترضاها على بنااااتك كلييييي

هو فار دمه بقى يهدي بيه و يتعذر وطلع من البيت نار

خابرت ديار و كلت الها :- انت وين

ديار :- راح نطلع من المستشفى ليش ؟

-تعاي و اتفرجي اللي اذاج شراح اسوي بيه

-تقصدين منو ؟

-حبيب الكلب خلدلد

.......

بتول :- اجا ابوي للبيت فاير دمة، كالي انطيني حباية الضغط .. انطيته ووجهه مو على بعضه، كال :- كعدي رائد و خلي يروح يكعد بالمحل بمكان خالد رايدة

بتول :- خير يابه شصاير

-روحي اكلج

.. رحت كعدت رائد كوة كام غسل وجهه و طلع بدال خالد، فات رافد :- خالد وين

-شبيكم اليوم ويا خالد

رافد :- وينه

-بالمحل

فات خالد :- بتول اذا تكدرين سويلي ريوك

بعده جاي يحجي ودفعه ابوي و سحب السلاح عليه :- دايس بيت عمك ولك ؟

خالد :- شنو ؟

-دايس بيت عمك و فايت غرفت ابن عمك خالد

رافد :- يابه اهدئ مو هيج

خالد :- الاخذها عمي لأبنه هاي الي و هم اخذوها مني

هو نطقها و ابوي هجت اعصابه ، سحب السلاح على خالد تلازمنا اني ورافد و امي اجت تصرخ و الجهال تتباجى

خالد كام يصرخ :- اكتل سلاحك ما يخوفنيييي اكتل

-انعل ابوك لابو اليوم الخلفتكم بيه يا عاااااار

كام رافد يصرخ على خالد يطلع و خالد واكف ابوجه ابوي و يكله :- عار اني عار شرايد مني

نريد انهدي واحد منهم انخبصو، ابوي ما يتفاهم و يتشامر من بين ادينا و خالد واكف بوجهه

خالد :- الكمممممم عين تحجون دمرتوني انتم دمرتونييييي خليتوني ساقط و نذل وحقيييييير هسه جاي تحاسبنيييييييي

ابو رافد :- ولك كواد سرسري اليوم اكتلك و اخلص منك لك ****

ثارت طلقة من سلاح ابوي امي فقدت كامت تصرخ و تشلع بشعرها و تجر بخالد اطلعه برا ، اجا رائد يركض وهو يسحب بخالد، اجا احمد و عمي ابو امجد

..............

ديار :- سمعت امي كالت تعاي شوفي شراح يصير بخالد لو كلبي وكع مني كمت ارجف كلت اله :- امجد استعجل خل نرجع

هو يكلي :- شكو

-كتله ما اعرف بس خل نرجع تعبت

-لعد شبيج جاي ترجفين

الف سؤال والف تحقيق و اني كلبي راح، كوة خلصنا وطلعنا المستشفى خلينا مها بالسيارة ورجعنا، لكينا احمد برا و ام امجد واكفين اباب بيت ابو رافد
الوجوه مكلبه وكلها تبجي و خايفة

كال امجد :- خير ؟

ام امجد :-خالد نقلوه للمستشفى ......يتبع

☆☆☆☆☆☆

#اتمنى_ان_افعلها

الحلقة_34

"ثمَّة أسف كبير يقطن في روح كل إنسان تجاه نفسه التي أرقها بالسعي في الطرُقات الخاذلة."

..........

ام امجد :- خالد نقلوه للمستشفى

صرخت :- عزا العزاني شبييييييه

امجد :- لااااااا شصاير

ام امجد :- تعارك هو و ابوه وشايل السلاح عليه ومصوبه، حتى الشرطة التمت صارت هوسة

ديار فقدت توازني كعدت بالكاع بعد رجلية ما شالتني، حسيت حيلي انهد وكأن طلقة و صابت كلبي ، بقيت مخلية اديه على حلكي و شاهكة عيوني

امجد :- شنو اللي صار على شنو تعاركو

احمد :- والله ما افتهمنا هاي بتول تكول طب ابوي دز على خالد و خلا رائد بممان و من اجا تلازمو نريد نفهم سكو ما ندري

طلع موبايله امجد، اني حطيت اديه على راسي، نطق امجد و هو يخابر :- لا بشارع تكعدين فوتي جوا، هسه اني اجي

خلا الموبايل على اذنه و مشى، رحت وراه، بس خابرهم طمنا عليه

امجد :- محد جاي يرد فوتي راح ارجعلهم اني

حرك السيارة و لاف، وكفت بالشارع اباوع ورا امجد و دموعي تتجارة

صاحت احمد:- ديار فوتي جوا

درت عنهم ما فتت رحت امشي كوة لبيت امي، دكيت الباب و اني ابجي بكل قوتي، فتحت الباب :- اسم الله بتي شبيج ولج

-وخرررري مني شسويتي بخالد فهميني شسويتييييي

- يا و قز القرط عبالي مدري شبيج من طاح حظج كل هالبجي على هالمايسوى

-انت شدخلك اني كلت الج لا تأذي لوووو لا كلت الج لا توصلي

-اووووه كافي لا تبجين اني ما اذيته، اني كلت الاهله عليه، شتردين بعد يومين يورطج بسالفة و نبتلي من وره حضرته

-انت دمرتيني و دمرتي

-والله اليدك الباب يلكى الجواب من استضعفني و فات لبيتي و تعدى على بتي بس لان ماكو رجال بالبيت ويحميج خل يشوف النسوان شتسوي عباله اخليه يفلت منها لا والله وبعد وبعد بس خل يصبرون عليه هو واهله لطلع حق دموعج من عيونهم

-يا حق يمممة يا حق خالد تصوب ما راح يسألون ما راح يكولون على شنو صوبوه انت فضحتيني مو فضحتي

-محد راح يتقرب منج ولا راح احد يتجرئ يفضحج

-يمة دمرتيني كافي عوفيني بحالي والله ما طالبة منج شي عوفينييي

-غبية لا تصيرين اني مستحيل اضرج، كلت لابوه ان هو تعدى عليج بعد ما اخذج امجد مو قبل .. يعني لو راد يفتح حلكة بكلمة و ينطق ابأسمج .. عار على امجد لو سكت يشيل سلاحة و يكتل خالد خلاص ويصير دم بين العائلتين ويروحون بالرجلين

شبجتهم لحية بلحية و الزلمة البيهم اليجيبج بالطاري الا من باجر تلكين الفرع ينهجم .. هذا شرف و عرض ما ينسكت عنه ولا راح احد يتجرئ يحجي هم بنفسهم راح ياكلهم الرعب من رجلج و اهله خاف يسمعون و ابنهم ينكتل

-خالد تصوب انت شتحجين خاااالد راح

-خابرت رافد متصوب بس بأيدة لا تخافين عليه كلشي ما يصير بيه

خليت ادية على حلكي و ابجي بقوة، صاحت :- ولج على شنو تبجين غبرة انت انسان اذاج ودموعج تجري عليه

-اني اذيته

-شسويتيله اذيتيه ؟ طلعتي من حياته حتى يرجع مرته ؟ باليوم الف رجال يغدر مرة مواعدها بالزواج شو ما شفنه وحدة انتقمت، و من واحد بيهم ينغدر تكعدين تبرريله افعاله الشينة

اصحي على زمانج ماما كافي هالاستضعاف، شجاج جان اليدوسلج على طرف تهجمين بيته هسه يدمغون على راسج و ساكته

-اخذت الموبايل خابرت امجد، جرته مني، وقفلته :- شرايدة تسوين انت

-اسأل عليه

-ايالج و بالج تخابرين لو تجيبين الشبه النفسج ذوله ولد بليس يخلقون من اصغر موقف حجة عليج اسكتي ولا تثبتين شي عليج

اني عندي تسجيل يثبت ان خالد هو المتعدي عليج بتصرفاتج هاي راح تخليهم يكولون هي الراضية و يصفوج وياه

خليني هيج باعدتج من الموضوع حتى تضل بيناتهم محد يكدر يجيب طاريج من ادخلين يكربسوها براسج و يطلعونه الشريف

كعدت بجيت لوحدي ما رديت عليها، عافتني ابجي و هي مشغلة التلفزيون تباوع، كمت من مكاني، و كلت الها :- اروح للبيت

-لا تروحين خليج

-مها مريضة

-عوفينا من علة عدها عمة و عندها احموات انت الليل كله وياها بالمستشفى اليجي اكله تعبانة و نايمة

-يمه شلون هيج ما خايفة علية انت راح ادمريني شمدريج ما يفضحوني

-اخ يعقلج اخ ولج ماما اني كلت هو اتعدى عليج بعد الزواج تفهمين شنو يعني داس عرض ابن عمه تعرفين شنو يعني جبيررررة جبيرررة

-بس هو ما تعدى علية و اني على ذمة امجد .

-مو كلتي صعد و هو سكران لغرفتي و هجم عليه

-بس ما سوا شي

-اني اكول سوا و انت ما تكولين شي، تسكتين و بس
لو صارت و جابو اسمج، بنية تركته لان امه تعيرها و رادت تعين بت عمتها لان مريضة و اتزوجت شنو ابتلت لو شسوت حتى يتعدى عليها، محد اله حق عليج يحاسبج غير ابوج و عمامج و ذوله غسلي ايدج منهم

كلش كلش يطلكج اي يطبه مرض اذا ما بيه خير ما ازعل عليع ، القندرة التوجعني انزعها كثرة المشي بيها و الصبر عليها توكعني و تأذيني ..

-راح تخبليني كلشي بالحياة ماخذته بهالبساطة

-لا نكعد نتعلم اللطم منج مو

درت وجهي منها و تمددت ع التخم، شالت الموبايل و خابىت رافد :- الوو ها عيوني بشرني شصار ترا كلوبنا اشتعلت

رافد:- بعدين نحجي ميعاد روحي

-بس كلي خالد زين لو لا

-ايده متأذية وبعده جوه الله كريم

-ضيع نفسه هالولد هذا مع الاسف

-روحي هسه ميعاد

ديار :- ضيعته اني الله ياخذني

-اوووووه اكوم لغسلاتي وكفت احسن ممكابلتج، شو كومي فوتي للغرفة البسي اي شي من عندي و انطيني ملابس حتى اغسلهن وياي

شلت راسي اباوعلها :- هجمتي بيت ماما شلون هيج كلبج بارد

-و عساهم شعلية بيهم محد كاللهم يتعدون عليه و يستضعفوني لان اني مرة و ما الي ظهر يسندي يا الكام و لطشنا بحجاية خل يتلكوها

-مو راح تاخذين ابنهم

-و اخذه من عيونهم و غصبا عليهم، كومي لا تفكرين بهالسوالف، كومي ارتاحي بالله هذا وجه عروس لو وجه ارملة ميت رجلها اليوم، دفوتي فوتي ارتاحي يا امي

كمت للغرفة بدلت منها اخذت ملابسي و اني تمددت بالكاع نمت، هي شغلتلي المكيف و حطت غطا يم رجلية و سدت الباب

كمت ابجي بفراشي لساعتين اتمنيت بس اسمع خبر عن خالد ماكو بعدهم بالمستشفى و ما طلعت برا ولا ادري عن شصار بالبيت بقيت منفصله عنهم ابيت امي، تنتظر وين توصل الاحداث

اذا جابو طاريي بالسالفة حتى تمنعهم ما تخلي احد يوصلني و اذا دستروها بيناتهم ترجعني الهم

اجا امجد الظهر كال الها :-ديار وين

ميعاد :- نامت خالة سودة علية شصاير بحالها

امجد :- مو مها خطية وحدها و امي تريد تروح

ميعاد :- ما طلعت هاي خالة صاحبك حلو لا تاكله كله يعني الليل كله سهرانه ويا جهال وويا مرتك بالمستسفى و بالنهار تريدونها كرابه و تخدم و بيها كل الحيل ما يصير خليها ترتاح

-لا حقها بس لان ماكو احد

-خلي امك تكعد يمهم شصار يخالة

-امي تريد تروح للمستشفى بيت عمي هم بتلين

-محد يعتب عليها كل واحد مبتلي بهمه هالدنيا ما عايفه احد بحالة، بعدين خالة ليش هيح ويا ديار انت شمسوي بحالها.

-ماكو ما صاير شي بيناتنا

-لا خالة قبل شوية الدموع تكت من وراك كطعت روحها من البواجي تكول امجد يشك بيه حتى بزميلها شاك ليش خالة ليش

امجد :- مو شك بس صارت مواقف انفهمت

-لا خالة تشك تشك يعني كلش مأذيها، هي لو تريد تخون و مو خوس ادمية جان خانت و هي على ذمة سلمان اشو رجال نص عقل و بيت وحدة و بمحافظة غريبة و صانت و ما فد يوم تعدت على رجلها ٣ سنوات هو مو زوج الها و سترت عليه و صانوه و ما حجت تجي هسه تكول مواقف

اني هسه سكتت لأن احبك و اعرفك انت شهم و اخو خيتك ولا بد تصير مشاكل ابداية كل زواج بس خالة انت ابو عقل الجبير المعدل المفروض تحتويها تسند ظهرها و هي ما الها احد غيرك مو تخلي دموعها تكت سودة علية تكسر باب الگلب

-ان شاءالله ما اقصر وياه، خليها ترتاح هسه اني بالليل ارجعلها

-اخذ راحتك خالة اني عود اجيبها

طلع هو سد الباب عليه و اجت فتحت باب الغرفة باوعتني كاعدة:- ها كعدتي

هزيت راسي

-شرايج لو نبدل و نطلع نفتر بأبو نؤاس بالاعظمية شو مخنوكة

-يممممممة

-وغمة ، ترا ما يصير هيج اختنكنا

-شيكولون عليه هم بيوتهم محتركة مها متخربطة و ابن عمهم بالمستشفى و اني افتر بالشوارع

-طز شيكلون خل يكولون المهم نتونس

-روحي اتونسي انت اني البيه كافيني

- لو اعرف شوكت تبطلين نوح و لطم جان ارتاحيت

كامت للمطبخ، كمت كلت الها :- اريد ارجع لبيت امجد

-مو هسه، اصبري خل نشوف الوضع

-تريدين تخابرين منو

-ابو رافد

-هم هسه بيا حال تلكينهم ملتهين
ما ردت علية، بقت ادور بالموبايل ودكت، شوية و كالت:- الوو هلا ابو رافد

-ام ديار الصار بينا كافي رحمة الوالديج فكي عني و عن ولدي، صوبت ابني بيدي شرايدين مني بعد

-سلامتكم ابو رافد اني ما ردت الامور توصل لهالحد بس انت كبرتها و اخاف بتي التوكع بيها تعرف عيالها بيت اخوك، فكلي الصدك حتى اذا احد جاب طاري بتي بالموضوع و انفضحت اخابر عمامها و يجون يتصرفون وياكم

-لا يتصرفون ولا نتصرف اني وصيت ولدي ينبهون العائلة ما ينجاب سيرة ونلمها شلون ما جان و لا اخلي احد بيهم بعد يوصلكم بس فكينا انهجمت بيتنا يبت العالم شرايدة من عدنا

-العفو منك دا تحاسبني و كاني اني السبب مو ابنك المعتدي ترا لو رايدة اهجم بيوتكم اخابر عشيرتها و اكلوهم تعدو على بتي وكتها انت و اخوك تتذابحون و جيب اليخلص ابنك من عشايرنا، بس اني اودكم و احبكم و ما اريد فضيحتكم يا ابو رافد

-مشكورة و رحم الله والديج

قفل الجهاز بوجهه :- محد راح يجيب طاريج بس اسمعي هم ناس فايته على ناس و لابد لابد ينسمع اسمج فأنت بيني عكس هذا

-شلون يعني ؟

-اضحكي بس تبجين و تتكدرين وتعتكفين على روحج يشكون بيج و اذا شكو بيج يوكعوج، يخلونها براسج ويسوونج ساقطة و انت الغريتي ابنهم ووكعتي و هو جان سكران و يلوفوها عليج

-انت دوختيني

-لان السالفة مو سهلة بتي

-وشنو الراح نستفاده من كل هذا ؟

-النستفادة ما تتورطين اذا هو كل شوية طالع بوجهم و رجلج الشفية يهدد والله عندي اسلاح، بعد يومين ورطج و طلع منها شكول و شحجي اني

-خالد ميسويها

كامت تقلد عليه بحلكها و هي تكلي (خالد ميسويها) رب السوا كل هذاتوكف عليه ينكر احتمال كلش وارد يورطج ويطلع منها هيج بس يريد ينتقم منج كلش توقعي منهم ذوله

- كلش دوختيني و ما جاي افهم اي كلمة منج، خابري رافد شوفي خالد شلون صار

-الناس بالناس و الكرعة تمشط بالراس، اكلها اخاف يورطون تكلي خالد ولج يمه انت عقلج بيه شي ؟

اندكت الباب قوي، اثار اجت تركض من الخوف، باوعتلي امي و كالت :- اخذي اختج و دخلي جوا و سدي الباب

لزمت اثار ودخلنا وكفنا ورا باب الغرفة، امي راحت طلعت للباب، فاتت ام رافد لنص البيت تصرخ :- اكحاا**** ساقطات هجمتن بيتي كتلتن ولدي ااااالله لا ينطيجن *

ميعاد :- هنا حدج عيوني احترمي نفسج لا والنبي اندمج على كل كلمة تحجيها بيج خير لمي ابنج لا تجين تهوسين ابيتي يلاااا

- ولج سااااقطة ام الزلم ال******* انت تكليلي لمي ابنج جان لميتي نفسج وبتج بنات الشوارع هجامات البيووووووووت

-انت الهجمتي بيتج بنفسج عبالج انساها من خليتي دموع بتي عشرة عشرة على خدها و عيونها تكت ليليةو تعيرنها ابوضعها و تقارنينها بابنج حتى ما تاخذه، و هاي حطته على كلبج حيري بيه يلااا منا

-اصبرن عليه لا ودم ابني الوكع يا ميعاد لا ما اخليجن فرجة لامة محمد

- دطلعي من بيتي اطلعي بيج خير لمي رجلج الما تدرين عنه لا تجين تتمرجفين كبالي وتهدديني

-رجلي شعده وياج احجي

-لو رافد يقبل جان حجيتلج بس اني لخاطر رافد ساكتتلكم الا لو ما هو واكف بعيني جان حجيتلج بس اكول روحي دوري رجلج بدل ما باقية ادورين وراي وورا بتي

- العندج كولي ميعاد

-ما اكول و فاركيني يلا من بيتي،

دفعتها للباب و كالتلها :- لو انجاب طاري بتي بالسالفة اصيح عمامها و اخليهم يتفاهمون وياكم عاد تعرفين اسماعيل و اخوته ما يحتاج اكلج شنو هو و بيت عمكم كتالكم فستري على ولدج و حسج عينج توصلين الباب بيتي لو تحجين باسم بتي من صدك ينهجم بيتج

كامت تدعي على امي ، دفعتها للباب و سدت الباب و فاتت للبيت خابرت رافد و حجت :- رافد تجي تتصرف ويا امك لو شلون لك عيني راح تفضحني و تفضح بتي تصرخ بنص البيت فدوة تعال جسمي كله ديرجف

رافد :- شجابها امي الكم خررررب مو وصيناها

-شوصيت لك عيني هجمته للبيت عليه و على جهال وذيج الدعاوي و الفشار المينلبس عليه ثوب كافي تعبت عفية الحكني دا انهار اني كلش نفسيتي تعبت بعد ما اتحمل

-جاي مسافة الطريق و اني يمكم و هسه اخابر امي احجي وياها، ابقي بالبيت لا تطلعين

-باقية عيوني باقية حتى هيانه بنتي خالتها يمي ميته من الخوف لا تنفضح و ابتلي

-اذا خايفة تنفضح بتج ليش حجيتي لابوووووي

-اكولك دا ارجف اني من تجي نحجي استعجل فدوة رافد

.............

بتول :- خواتي اجن و كرايبنا و امي رجعت من المستشفى تلطم و تزلغ بخدودها و تصيح (هجمن بيتي) مثل الموس بزردومها لا تكدر تحجي ولا تكدر تسكت

اليسأل ما نعرف شنو سبب العركة لان رافد وصانا هيج نكول اذا حجينا ينهدر دم خالد فاحسن ننكر كال احنا نتصرف .. شيتصرفون ما ندري

فات رافد العصر عصبي كال :- وين امي

بتول :- بشر خوية خالد شلونه ؟

-زين زين بناته وين هسه ؟

-اجت ضحى لهنا بقت شوية وراحت

-امي وين كليلي

-خوية بس فهمني شصاير

-خالد فايت على ديار لغرفتها بالليل ابيت عمي و هو سكران و ميعاد شاكية لابوي اذا ما يتصرف تخلي العشاير تصرف

شهكت من كل كلبي :- عزا العزاني اخوي راح يمة

-خالد ما يرتاح اذا ما يوكعنا ابلوة شكبرها

-هي ليش خلت براسه عقل سودة عليه العاقل يصير بيه هيج

-احجيلي على امج العاقلة الرايحة على بيت ميعاد متعاركة وياها بالله لو احد سامع شلون نزلكها ؟

- ما ادري عن امي انت كلي عمي شكتله

-كلناله متعارك هو و ابوي صارله ايام ما يلفي للبيت و ابوي طكت روحه تحاجه وياه خالد ما سكت كام يتجاوز ابوي انفعل و طلع اسلاحة

-وصدك و لك عمي يعرفنا ما يصدك

-هو ما يصدك ما يصدك بس شنسوي بتول خوية لو عرفوا خالد مسوي هيج و دايس بيتهم و فايت على مرت ابنهم ينكتل حي على الصلاة، خليهم شاكين ولا يعرفون هاي بعد كليلي امج وين

-جوا كاعدة

-صيحيلياها بالعجل

-رحت صحت امي و اخذتها للاستقبال كاعد رافد، حجت بهمة :- اخوك وييييين يمة

-اخوي راح ينهدر دمه بأفعالج

-وعزا وصخام براسي وليدي يما راح امن ادية

-يمه خالد فايت على ديار ابيت عمي و هو سكران

-هي هي هي البربو*** هي التصيح ابني و تريده هي الورطته

-اسكتي يمه رحمة الوالديج بيوم العرس هم هي راد يكلبها هي ورجلها بالسيارة و من يوم التزوجت لليوم هو ما فارك بيت عمي يروح و يرجع انت رايدة ابنج لووووولا ابنج اذا ما لازمنا يموووت يمه شرف هذا مو حجي السان

-منيلهن شرف هالساقطات اني الورطن ابني

-كافي اتهميهن و اجيبيهن بالطاري عوفيهن رحمة لدينج خايفة على ابنج اسكتي طموها يمه سواية خالد لا تنحجي ولا تنكال طميييييها، بيت ميعاد لو وصلتيله والله العظيم يا يمه هذا البيت ينهجم من فوك ليجوا

- ابني كلي وليدي شلونه

-نزف دم هواي و ايده سوولها عملية وبعده من يكعد اخلي يخابرج و يطمنج بس اكعدي اهنا و اضبطي خواتي ولا تخلين كلمة تطلع ترا والله ينهجم بيتنا

- سهلة اني الها ميعاد وبتها لا ما اخلي النوم يحرم على عيونهن فلا اني امك يا خالد

-كافي تهددين لخاطر الله كافي فكونا تعبناااا تعبناااا مرة تزوجت وراحت لحال سبيلها عوفوهاااا

-ظل انت ظل سدسد لميعاد ***

..........

ميعاد :- كومي خلي اخذج لبيت عيالج

- مو كلتي ما اروح

-لا كتلج مو وكتج بس لازم تروحين اذا راح اطولين هنا راح يستغربون شبيج، لازم تروحين و اني اروح وياج اشوف الوجوه بيها مجال لو لا .. اذا حسيت اكو شي نتصرف

-معيشتني وكاني بمافيا تخطيط و جس نبض و استكشاف تدرين خالد هسه بيا حال

-ولج يمه راح اكتل روحي منج اااااخ يابه ما الكالي حفرة اطم نغسي و اخلص منج ، انت مستهينة بهالسالفة ؟ تعرفين شنو يعني يفوت عليج بالليل و انت ابيت عمه تدرين شكبرها .. الشرف مو شوية

-انت و ابوي ما خليتو قيمة للشرف حتى استعظمة عشت وياكم كل يوم اشوف اتعس انواع الانتهاكات

-راح يكعد معروف عبد الغني الرصافي يصفلي خواطر و صور شعرية تحاكي الواقع الأليم، خب دكوووومي
.... بدلي يلا بسرعة

كمت بدلت ملابسي لكيتها غاسلتهن، لبسنا كملنا دنطلع، رافد صف سيارته اباب المخل مالتهم و اجانا

رافد :- وين ؟

ميعاد :- هلو عيوني هلو كلبي رايدة اخذ ديار لعيالها

-ها، ميعاد شنو استفاديتي من حجيتي لابوي و كبرتيها

-تعال فوت جوا نحجي لا احد يشوفك ويانا يكوم يشمر حجي من غير هيج گملتنا بگعة فوت

فات رافد و بقينا واكفين بالكراج، سدت الباب و كالته :- شجان المفروض اتصرف اخوك ما دا يعوف بتي بحالها، شكيتلك و كلت الك اخوك تعدى على بتي شسويت ؟.

-يعني اني ما بيه خير ارد اخوي

-حشاك ينكص الساني لو حجيت عليك عيوني انت، اني كل السويته شكيت لابوك حتى يوكف خالد عد حدة كل سوية مهددها و طالع بوجها كلنا مقهور بس الدا يسوي ما يرضي احد انتظر بتي تنفضح يلا اكعد الوم بروحي

-وهسه ارتاحيتي من صار هيح

-تزعلني بهالكلام اني ما كلت لابوك كبرها و لا ادري بيه راح يسوي هيج كلت الك بس شكيتله حتى يلزم خالد
بس الظاهر انت متضايق مني و حاسبني اني السبب مكافي امك اجت غلط و اخوك يعير الصبح و هسه انت تلوم

دارت وجها انقهرت، حجه هو :- مو قصدي اغثج لو اضايقج ميعاد بيتنا اشتعل تدرين

-واني شذنبي اذا هاي افعال اخوك شنو كلت اله اسكر و فوت عليها لو شورطته ؟ تجوون و تشمرون اخطائكم بروسنا كافي رافد طوختوها

-طوخناها ميعاد بس الله اليستر لو عرف عمي بالسالف والله ينهجم بيتنا

-جان فكر بهالسوالف اخوك مو صغير هو

-شارب بيومها خرب بيومه ورطنا

-مهتم لسالفة دوسة بيت عمك بس ولا احد بيكم اهتم بأعتدائه على بتي مع الاسف عليكم

-مو هيج

-كافي رافد وصلت وياكم لهنا اني طالعة اعتذر منك

-ميعاد

-مع السلامة

فتحت الباب هو اخذ نفس و كاللها :- ديري بالج زين
صحت وراه :- رافد

التفت عليه، حجيت :- خالد شلون صار
حجيتها و بجيت

باوعلي :- الج عين تحجين عن حالة بعد الكل السويتي بيه انت دمرتي خالد دمرتي

طلع من البيت، دارتلي امي :- دموعج هاي ما اريد اشوفهن لو نزلن اطيح حظج لا تجيبين الشبهة النفسج

صعدت ، صعدت يمها:- شتردين مني اسوي هذا مو اي بشر هذا خالد .

- هالاسم تمحينه من بالج نهائي تحسسين المقابل انت طبيعية و تضحكين و ما مهتمة

-مستحيل ما اكدر

-المستحيل يصير لو جان حياتج مرهونه بهالمستحيل
ما دا اصدك ديار البلغت على ابوها مرتين ووكفت ابوجهه هسه بهالحال شصارلج انت

-شنو الما صارلي حتى تسالين

-كافي تندبين حالج صيري قوية بتي هاي الدنيا تكسر الضعيف و وتنحني كبال اليحط راسه وياها ..

-وين ماخذتنا انت طلعتي الفرع

-تريديني ادخلج على بيت عيالج بهالوجه، خل افرج شوية انت و اختج و اوكلجن موطة و تشمن هو و نرجع الهم الدنيا ليل و خلص الغروب و الهوى عذيبي يريح نفسيتج

-صدك تحجين بحال طلعة انت ؟

ما ردت علية درت وجهي منها اتأفأف ، رجعت حجيت وياها :- ساعة تكولين محد راح يجيب طاريج ولا احد راح يعرف و ساعة تخافين احد يشك بيه

-لازم نحط احتمال لك شي حتى لو صار شي احنه متوقعين ما نننصدم و نتصرف على هالاساس

-اني كلش تعبت من تفكيرج

دنكت راسي ابجي هي ما ردت علية، شغلت اغاني راقصة و كامت تصفك لاثار و اثار تكمز تركص وكفتنا يم محل موطة نزلت اشترت النا موطة بقوقعة بسكت اني وياها و اثار .. حطتها كبالنا و كالت :- الجاي اسوي لمصلحتج اكلي و بردي گلبچ ولا تخلين شي يبين عليج من يجي خالد اكيد راح تشوفينه

بقيت دايرة وجهي منها و ما اكلت
خلصت الموطة هي و اثار راحت اشترت نص كيلو موطة بعلبة سفري و كالت :- هاي لمها خطية وجهالها
طلبت يحطون الموطة مالتي بجيس يحفظها

ورجعتنا لبيت عيالي، فاتت هي كبال و كالت :-، البجي عوفي و لا تحسسينهم بشي

ودخلت عمتي و مها بالهول، حجت :- مساء الخير شلونج مهاوي كالتلي ديار مريضة اجيت اشوفج

راحت سلمت على ام امجد و على مها و حطت الموطة كبال مها و ام امجد و كالت الهن :- هاي شوية موطة جبتلكم ويانا طلعت ديار و اثار يتونسن خطية صارلي هواي ممطلعتهن

ام امجد :- بالعافية بس مو وكتها

ميعاد :- ليش خالة شكو شصاير

-شنو ما سمعتي بخالد ابن ابو رافد شصاير بيه

-اي والله سمعت شلون انقهرت عليه خطية، بس شنسوي هاي اجت مقهورة على مها و منا خالد هم واكع انسطرت جرتها فرد نومة كلت اطلعهن اونسهن

ام امجد :- اي زين تسوين

اباوع لام امجد مو طبيعية ، رحت لمها تفقدت ادويتها و انطيتها علاجها و سألتها اذا متعشية كالتلي :- ما اشتهي ما اكدر

باوعتلي :- بيج شي

باوعت لامي، و كلت الها:- لا بس دايخة ولعبانة نفسي

-خاف لان نمتي هواي

-شنمت ب١ كعدت ب٣

-لعد نعسانة روحي ارتاحي

-و انت و الجهال

-ما عليهم شي عمتي هنا و هم راح ينامون اصلا

-لعد خل انومهم و اصعد

فرشت الهم، امي تعذرت منهم حتى تروح للبيت، انطتني ١٠ مصرف لاسامة و كالت :- مثل ما وصيتج لا تنسين و شيصير وياج خابريني و شيسألونج نكري

لا تجذبين تره جذبة على جذبة تجمع و تنكشف
كلشي يسألونج ما اعرف

-ان شاءالله
راحت و اني بقيت انوم بالجهال، فات امجد، تمدد يم جهال، حجيت :- ها شنو اخبار خالد

-والله ما رايح ابوي هناك اني رحت لجماعتي انسق وياهم ع الغياب الغبته اليوم

-راح يكطعوها من راتبك

-لا نسقتها بيني وبين واحد صديقي باجر اني اشيل عنه و الزم خفارة

-يعني تبات باجر

-اي ، التقيت امج بالباب

- اي

-تكلي تقريبا كملت جوازات السفر مال ديار و اسامة و اثار و قريبا راح اخذهم و اروح حتى اعالجها

-هاا

-بيني و بينج ما احسها وكتها

-معرفت خالد و ابوه ليش تعاركو

- مها مريضة و الوضع كلش تعبان محتاجج هسه

-ما خابرتهم

-منو هم ؟

-شبيك جاي احجي وياك على خالد

-مو كتلج ما ادري عنهم ما جنت وياهم

-مو ابن عمك غير لازم تخابره تسأل عنه

-اي متصوب بايدة عمي متعارك وياه ومصوبة هو خالد هم متخبل هالايام كافي علية ضيم مرتي اليومية الماخذها و جايبها و دوامي المعلعل بيه و جهالي الضايعين اعوف همومي و احير ابيت عمي من صدكج انت ؟راسي صاير هالكبرة، اصعد انام.

كام طلع من عندي، دنكت حسرة بكلبي مثل النار التشتعل بداخلي، اتمنى روحي طير هسه و تشوف خالد و تطمن على صحته

بودي ابجي بس من ورا امي حتى البجي كمت اخاف منه

فات عمي للبيت، سمعت صوته، خليت الجهال بمكانهم غطيتهم و طلعت :- هلو عمو اسويلك استكان جاي

-اي والله يابه ياريت، صداع براسي ذبحني

رحت للمطبخ و مها طلبت من عمتي تعينها حتى تكوم بمكانها تنام، راحت عمتي ودتها ورجعتلي، ندستني :- ديار يمه اريد احجي وياج

-كولي خالة

-صاير شي ؟

-مثل شنو

-مو السمعناه خالد و امج متعاركين و صايرة سالفة على هيج موضوع

-خالد و امي متعاركين !! ما اعرف اليوم جنت ويا امي ما كلتلي

-ديار صح انت جانت عندج علاقة بخالد احجيلي الصدك

-اني من جنت صغيرة ما انكر جنت احبه بس من تزوجت سلمان بعد بطلت وكبرت على هالموضوع

صاح ابو امجد :- تعالو اهنا احجو ام امجد

اخذت الجاي لابو امجد و جسمي كله يرجف من الخوف لا ازلكلي بكلمة و افضح نفسي

رحت يمه انطيته الجاي لاحظ ايدي ترجف، كال :- اكعدوا

-شوفي بتي اني اعرفج من انت و صغيرة و اعرف اخلاقج و ما اشك بيها بس صارحينا عندج شي ويا خالد

-خالد صديقي حتى من جنت على ءمة سلمان يومية يخابرني و يسأل عني و كل مرة يجي يجيبلي مسواك بس ما عندي شي وياه

ام امجد :- قبل شوية كلتي جنت احبه

-لما جنت صغيرة ومها تدري و صيحوها و شهدوها بس بعدين تزوجت و التهيت عن هالسالفة

ابو امجد :- شلون هيج و ابو رافد جان يكلي خالد يريد ديار و رافد يريد ميعاد و هو رافض و خالد حاط اباله

-رافد يريد امي ما انكرها بس خالد لا لان هو جان يستعل وياي خط ويحب وحدة بالخط مالتنا، بس ام رافد كلما تحجي تجمعني ويا امي

-خالد جان رايدج

-اسأله اله اني ما ادري ولا مرة كايلي

-تحلفين على هذا الحجي

باوعت بعيونه، ادية كامت ترجف :- عمو احلف ما عندي شي بس اذا حلفت اطلب منك ان تخلي ابنك يطلكني ما اعيش وواني مشكوك بيه ما اتحمل

-لا احنه ما نشك بس

-هذا شك عمو اذا بدر مني شي غلط حقك تحجي بس اني ما سويت شي و اذا مسوية كول

-يعني تنكرين خالد ما جان رايدج

-مو قصة انكر اني جاي اكلك الاعرفه هو جان يعتبرني صديقة بالجبيرة و الصغيرة واكفلي و الاعرفه جان يحب وحدة بالخط بعد يحبني لا ما ادري

ام امجد :-واكفلج و اليوم ما سألتي عنه ولا اجيتي البيتهم ولا كلتي

-لأن جنت تعبانة الليل ما نايمته و خابرت امجد سألت كال بخير و اطمنت عليه

...باوع عمي بوجه عمتي و رفع حواجبة و هز راسه بحيرة :- والله يا عمي شكد اني احبج بس هالزواج ما ادري لاعب كلبي منه لان ابو رافد جان حاجيلي هواي حجي و مها الوكفت كبالي و كالت اني اعرف ديار كلشي ما عدها و هي موافقة ع الزواج .. ولخاطرها وافقت

كمت من مكاني :- تصبح على خير عمو

صاح وراي رفعتله ايدي ما كدرت اكمل بعد اختنكت خفت يا ساعة اجفصها، دخلت الغرفتي اول ما فتحتها، انفجرت بجي

شفت امجد نايم كبالي حطيت ايدي على حلكي وكمت ابجي بسكوت، رفع راسه :- شبيج ديار ؟

-ماكو شي بس مختنكة

-مختنكة من ايش ؟

-بس اريد انام

عفته و كمت للفراش، حاول يعرف شبيه ما كدرت اضم ادموعي ظليت ابجي لحد ما هو مل يسأل و دار وجهه و نام.

بقيت ابجي بفراشي لوجه الفجر، اجت رسالة مكتوب بيها (حسافة الأيد الانمدت الج تساعدج هسه تعوقت )

نزلت جوا طلعت برا بالكراج خابرت، رد ، ما حجيت بس ابجي، نطق بتعب :- هالدموع ندم لو تأنيب ضمير لو خوف

-ردت اموت من عرفت صاير بيك هيج شي والله، خالد لا تسوي بنفسك هيج كافي

-متوقعه اتركج بعد السويتيه

-والله ما سويت امي السوت اني منعتها منك

-بسيطة اذا جنت حاقد عليج هسه حاقد عليج و على امج

-شتريد تسوي

-اني و امج تراهنا لو اني لو هي

-و اني شذنبي

-ذنبج دمرتيني

- خالد بس كلي انت شلونك

-تسألين على لوني و انت السودتي وجهي من خليتيني ورا ظهرج و اخذتي ابن عمي

-عليك الله كافي والله تعبت

انسحب الموبايل من عندي ويا ما انسحب بقوة وكع بالكاع طلعت البطارية من عنده

ام امجد :- ويا منو جنتي تحجين ؟

بقيت اباوع بعيونها و الدموع تكت، دنكت ع الموبايل حطت البطارية ابطنه و فتحته

:- خالة

-اشششش ولا كلمة فوتي جوا

-خالة دخيلج

-صدك بت امج ولج

-خالة بس افهمج والله

ظلت تكلب بالموبايل رقم غريب و مخابرني مرة مطولة وياه ٦ دقايق و بس رسالة الدازلياها قرتها

-طايحة الحظ و تنكرين من نسألج، خالد هذا مو

-ما عندي شي وياه والله

-شلون ما عندج و جاي يكلج الايد الساعدتج تعوقت ويتحسف

- خالة عليج بس اشرحلج

-شتشرحيلي ولج يمعزاية اني هسه لو احجي لابو امجد و امجد يذبحونج ولج و يتورط ابني و ينجلط رجلي من وراج و من ورا هالعار خالد

بقيت ابجي و اتوسل بيها، كالتلي :- فوتي كبالي بسرعة بدون صوت طايحة الحظ .... يتبع

#اتمنى_ان_افعلها


الحلقة_35

بقيت ابجي و اتوسل بيها، كالتلي :- فوتي كبالي بسرعة بدون صوت طايحة الحظ

-خالة

-اشششش فوتي

مشيت كبالها اخذتني، للغرفة اللي نايمة بيها مها، مها من سمعت صوت البجي فزت :- ها خالة شبيها ديار ؟

-اخذي شوفي بعينج هاي المأمنة بيها و ردتيها تصون رجلج و جهالج تالي فجريات الكاها تخابر ابن عمة هسه اني شحجي و شكول فهمني

اخذت مها قرت الرسالة ، شالت راسها :- منو هذا ؟

اني بس ابجي ما رديت، حجت ام امجد:- خالد اكو غيرة يعني، سألتها و نكرت و سألتج قبل و نكرتي و حتى ام رافد سألتها و نكرت علاقة ديار بخالد تالي الفاس وكع بالراس

مها:- والله خالة ما ادري اني بكلشي ، ديار احجي شجاي يصير ؟

ديار :- كعدت يم مها، مسحت وجهي اخذت نفس و ام امجد ترزل :- صار بيناتنا حب فترة بس امه ما جانت تريدني و مرته كل يومية تجي لبيتنا تتوسلني ابتعد منه حتى يرجعها، قبلت طلبج و اتزوجت حتى ابتعد من عنده

ام امجد:- و اذا مبتعدة من عندة شعندج مخابرة جذبة جديدة هاي ولج عبالج اصدكج بعد

-هو دزلي رسالة والله

-ودزلج! تخابرينه ؟

-ما حجيت وياه شي والله بس كلتله اني مالي ذنب بأمي هي التعاركت وياه

-يعني العركة الصارت من ورا امج !!

-لا بس هي شكته لأبوه وكالتله خل يبتعد من بتي تزوجت، و ابوه متضايق منه و متعاركين ابيناتهم

-يعني بسببها و تنكر يمة منجن مو نسوان من غضب الله على راسج، عالكات راس براس و ماخذات جانب، يصير الصبح و اخذج الامج اذا ما ادبتج حسابي وياج يطول، و موبايلج هذا صار يمي ما انطيجياه و بس تحجين اسولف لامجد كلشي

كامت من عدنا وراحت برا، التفتتلي مها :- ليش ديار هيج ؟

-ما جاوبتها

-مو سألتج مو كلت ليش هيج ديار

-اني لخاطرج عفت كلشي و قررت ابتعد منه و اربي جهالج بس هو اللي ما جاي يعوفني، بيوم العرس راد يكلب السيارة بينا و ثاني يوم خله امجد يشك بوسام عنده علاقة وياي و لهسه ما خلصانة منه كل يوم يدز رسالة و يهددني بيها

-يعني انت ما رايدته ابد ؟

-اني طلعت من حياته و ما اريد ارجع و تزوجت حتى ما ارجعله لأن تأذيت ابوه ما يريدني و امه تكوم تكعد تعيرني بوضعي و مرته تريد بناتها لهيج عفته

-لهذا السبب مانعة امجد منج ؟

دنكت رجعت سألت :- بعدج تحبينه ؟

-البكلبي بكلبي ما ضارة احد بيه بس امجد من حاول يتقربلي كش من جسمي و ابتعد مني بعد ما حاول يتقرب

-يعني هو الما راد ؟

-ما كال بس هو من تلمس التشوه البجسمي ما اتقبلني دار وجهه و انطاني ظهره

هزت راسها ، حجيت :- راح تكول لامجد مو ؟

- والله ما ادري احتمال تكول لابو امجد، بس ليش جذبتي عليه و اني اقرب الناس الج ليش ما كلتيلي عندج شي وياه

-ما ردت اكول لاحد ردت الشي ينتهي و بس

-وجذبتي لحد ما هسه محد مراح يصدكج، ليش تسوين بنفسج هيج ؟

-كلشي بحياتي احاول ارهمة و تتماشي وياه و ما جاي يصير كلشي مو على مرامي، تعبت

-اصعدي فوك اني احجيلج ويا عمتي و ديري بالج امجد يحس اكو شي.

هزيت راسي و كمت و اني افرك بأدية، صعدت فوك فتحت الباب ودخلت، حس امجد شال راسه :- ها

ما رديت عليه، حجه :- بيش الساعة ؟

-ما ادري

باوعها بقى يركز بيها كوة كلت اله :- بستة وربع

امجد :- من تصير بالسبعة كعديني

-اي

رجع نام، و اني افور بمكاني من التوتر، كل شوية يجي ابالي تفكير شكل شنو راح تسوي امه و اختنك

اتذكرت: شلون لو خالد يدز رسالة يهددني بيها ؟لو يذكر سالفة طفل و هيج شي و انفضح وتنخبص الدنيا فوك راسي !

ياربي شورطت روحي اني
هذا الزواج اصلا كله غلطة بحياتي و كلما جاي استمر بيه اتورط اكثر من الفات، بس لو صدك و اني حملت من خالد شراح اسوي ؟

زين ليش ما فكرت بهالموضوع قبل لا اتزوج شبية كملت، شجنت اتوقع من كعدت كبال بيت خالد ما راح انفضح و اهله كلهم يدرون و يكرهوني !

اروح و ارجع بالغرفة افتر راسي
اتضايقت حيل و اختنكت ما اعرف شلون اخلص روحي من كل هذا !

شفت موبايل امجد كبالي، باوعته نايم
تقرب منه على كيف، اخذته فتحته طلعت رقم خالد ، كتبت اله (موبايلي صار عند ام امجد عرفت كلشي لا تراسل هناك بعد و عوفني بحالي الله يخليك ) دزيت الرسالة اجاني تقرير تم التسليم بسرعة حذفت كلشي من موبايله

ردت ارجع الموبايل بس خفت خالد يدز شي مرت دقايق ماكو مسج هم زين، رجعت الموبايل للميز

كعدته :- امجد صارت بالسبعة تكعد

حجه :- كاعد

رجف گلبي، بلعت ريكي و ابتعدت منه، كعد باوعلي :- شبيج؟

-ماكو شي

باوع على موبايله، شاله و دور بيه و كام على حيله :- حضريلي ملابسي بسرعة

-اي

رحت بسرعة لغرفته هناك حضرت كلشي يحتاجة و نزلت جوا حتى اسويله ريوك لكيت ام امجد كاعدة ووجهه ما يتباوع مبينه كلش ضايجة، من شافتني، حجت :- شعندج ؟

-اريد اسوي ريوك لامجد

-تلعبين من ورا ظهرة و تخدمينه ولج

-ما رديت عليها مشيت اسويله الاكل

هي بقت تفتر و متضايقة نزل هو، باوعها :- ها يمة شو كاعدة ؟

-روح توكل يمة

-اكو شي

- لا امشي

-صاير شي بينج و بين ابوي

-لا يمه لا تشغل بالك روح بالسلامة وليدي

باس راسها و حجه :- اني اليوم راح الزم خفارة ما ارجع ديرو بالكم على معا و الجهال

-ان شاءالله وليدي لا تشيل هم

اجا للمطبخ تريك ع السريع ووكف بالباب:- تحتاجين شي ؟

هزيت راسي (لا ) ، طلع فلوس ٢٥ الف انطانياها :- خليها مصرف عندج اذا احتاجيت شي للبيت انطي

-اي

-ديري بالج ع الجهال ، يلا مع السلامة

طلع و اني رجعت صعدت لغرفتي فوك بعد ما كابلتهم، للصبح عمتي دزت اسامة على امي رجع كال الها: ما موجودة

خابرتها و كالتلها :- اريدج ابيتي بسرعة تجين

حاولت امي تفهم شكو بس ام امجد ما حجت اي شي بس كالت الها :-تجين و تعرفين

خابرت على موبايلي، ردت عليها ام امجد :- موبايل بتج يمي صار

ميعاد :- خير ان شاءالله شكو حتى ماخذة موبايل بتي ؟

-كلت الج تجين و نحجي

ميعاد :- مسافة الطريق و اني يمكم

ام امجد :- منتظرتج

بقيت اني انظف و اغسل بالجهال و اوكلهم، فاتت امي شافتني بالمطبخ، اول ما دخلت فاتت ام امجد، كالتلها :- فوتي ابو امجد ما موجود و امجد بالدوام لا تخافين

ميعاد :- اخاف منين يمة

-من عمايل بتج

-الحمدلله اعرف بتي ما يحتاج تكليلي بعمايلها

-يعني تعرفين بيها عدها علاقة ويا خالد و هي على ذمة ابني

عقدت حواجبها، باوعتلي عيوني كامت تكت، تخصرت الها :- و انت مخلية دموع بتي تجري على هالتلفيق هذا ؟

-تلفيق لو حقيقة بالخمسة الصبح لكيتها تخابر بخالد

-واءا خابرت يعني خانت ترا ما ارضاها هالحجي على بتي و اعرفي حدودج ام رافد

-وفوك الحك صوتج عالي شنو من طينة انت

-احترمي ام امجد و خليني محترمة كلش زين اعرف بتي غمة و ما بيها خير لان عافت كلشي و ضمت البكلبها بس حتى تخدم ابنج و مرته و جهاله و تترك ابن الناس يرجع مرته شذنبها اذا هو ما هادها ؟

بيكم خير وكفوا ابن ابن عم ابنكم تره عجزت و اني اتعاؤك وياه و اكله ابعد هسه جاية اتذبين الصوج ابتي

-لا تبرين بتج و انت تعرفينها كلش زين شنو ، بتج جذابة و انت هم جذابة

-والله خلف الله عليج اذا طلعنا جذابين لا احد دك بابج و لا كالج تعاي اخذي بتي انت الجيتي و صرتيلها مي و حرير حتى ترضى بابنج

-عبالي شريفة

-و غصبا عن لليرضى و الما يرضى و حجايتج هاي ما ينسكت عنها اني اخذ بتي و اطلع و اخابر ابوها اشوف يرضى ينكال على بته هيج كلام

-اسمعي ميعاد لا تكبرين السوالف و تفضحيها فوك ما هي مفضوحة

-مفضوحة عليكم البيه خير يمدها على بتي و شوف اذا ما علكتها بركبته، وكت التشوفيها مدخلته للبيت و خاينة ابنج وياه ذاك الوكت احجي غير هالحجي والله والله والله الدنيا فوك هالبيت اهجمها

-اني اعرفج شبيه تورطت و اخذت منج بنية

-و اطولوني انتم روحي لمي ابنج يفتر سكران والله عالم بمكسراته، عايشين دور الملائكة هواي شوية جناحكم عمي عمانه

اسمعي، لا تظلين تباوعين بعيوب العالم و عيبوكم مفضوحة عيب عليج، كومي ديار البسي خل نروح

مها :- خالة مو هيج الحجي هدو خل نتفاهم

ميعاد :- ليش هي عمتج خلت تفاهم ما تعرفيها انت ديار حتى تكولين عليها مو شريفة هالكلمة ما اسكت عنها

كامت مها تتوسل بام امجد و امي تنتر بيه حتى الم ملابسي و اروح وياها ، شافتني ابجي :- لطامة شبيج مسوية ذنب انت و خايفة جايبة الشبهه الروحج بخوفج منو يسوى و تخافين منه و تنزلين بدموعج الما يصدكج طز لا يصدك كافي اني اعرفج شنو امشي

ام امجد كلش ضاجت من امي وكفت تتعارك وياها شلون تكول عليها (طز )

ردتها امي :- و سبعين طز شمنتظرة مني اكلج عفية و اعذرينا و انت تكولين على بتي مو شريفة

ام امجد :- و الفجريات تحجي ويا صاحبها

-و اذا هو لازكلها و تخاف لان ابنج مهددها

-و ابني ليش يهدد لو هي ماعدها شي

-بنية و عافت التريدة و تزوجت و هي كل عمرها ٢٠ شتريديها نبي و ما تبجي و ابنج شكاك شلون تبجي كام يهدد بروسنا و سكتت لعيونكم الا بنية عروس و تتهدد منو يقبل بس غير كلت اقربائنة و عشرتنا حلوة و ما اريد اخبرها بس الظاهر محد يحترم و كل الكام و حاد نيابه على هالبنية

باعيها بضميرج هذا وجه عروس الحزن ماكل ملامحها لو هي مو شريفة مثل ما تكولين ما لعبت ع الحبلين و ضربت الدنيا بعرض الحايط و سعدت نفسها

بس هي غبية ضحت بروحها لهذا و ذاك و محد راضي

مها :- ميخالف خالة اكعدي اهدي و نحل الامر بهدوء فدوة ما نريدها تكبر

ميعاد :- ليش خالة هو منو رايدها تكبر منو يحب الفضيحة البته و سيرتها تصير على كل السان بس من ينكال عنها مو شريفة لا هنا ما نسكت، كافي ينسحك على راسنه و نسكت و نكول جيران و قربة و محد مقدر

ام امجد :- ميعاد انت ليش تصيرين باطله اني يا يوم ما مقدرتها و حاطتها على راسي بس منو يرضاها جنتي فجريات تحجي ويا اليحبها الفجر

ميعاد :- ليش تسأليني ما سمعتي منها ليش خابرت

ديار :- هو دزلي رسالة و اني خابرته حتى اوضحله اني ما الي علاقة بكل الموضوع و ابعد نفسي و بقى يهدد

ميعاد :- سمعتي ؟ بدال ما لازمة براس بنيتي و مخلية دموعها تكت روحي لومي ابن حماج تراها طلع ارواحنا، خلي ايدج بأيدي و ساعديني ابعده منها تره تعبت والله شسوي هو طايح حظ و ما جاي يجوز منها شتسوي ؟

ام امجد :- و تخابرة ؟

ميعاد :- اني ما اريد اظلمج و اكلج انت باطل ام امجد بس كتلج البنية صغيرة و ما عرفت تتصرف بس مو هيج تسوين بيها

ام امجد :- والله لا ضربتها ولا تعديت عليها كلت الها تجي امج و هي تحاسبج

-اني احاسبها و اكسر راسها ما اقبل الها الغلط بس ما اقبل تسوون بيها هيج لان هي ما غلطت بقصد،
بس حجايتج مال بتج و لو ما مخذتها مردودة عليج و كلش عيب وما ارضاها

بقت مها تهدي بين الطرفين، امي شافت عمتي بعدها ضايجة كامت و كالت :- كومي روحي وياي امشي

وكفت ام امجد كالتلها :- وين ماخذتها ؟

ميعاد :- لبيتي وين اخذها خوما اخليها هنا

ام امجد :-كتلناها لو خلينا الدم بطولها، لو اجا ابو امجد و سألني شكول ؟

-والله ام امجد تريدون تكبروها نكبرها لا احنه قليلين شر ولا كصيرين السان و ان ردوها صغيرة نصغرها و لم الموضوع بيناتنا و نمشيها

ام امجد :- ولو ما تابت ؟

-هي شسوت حتى اتوب لا تحجين هيج ترى ما اقبل، هاي كدامج و اخذي منها وعد شما يسوي لا تخابرة و تتوسله تجيج و انت تحلين الموضوع

-لو صدك هو متقرب منها و هي ماعدها شي اكلب الدنيا فوكاه و فوك اهله هي هم بتي و لو ما احبها ساعة العرفت اكعد زوجها و اسويها هوسة بس هي هم مثل بتي و عاشت عندي و ما ردت اظلمها بس و هاي هي تسمع والله ثم والله لو نعادت يا ديار اكبرها و ساعتها حتى امج ما تخلصج من ادين امجد و ابوه

-هي بنيتج و علميها شدي ورخي وياها و اني من زوجتها خليتها امانة عندج حالها حال بناتج الما ترضي عليهن لا ترضي عليهن

-هالمرة نعديها و نسدها بيناتنا بس خليها ابالج موبايلج عندي و افعالج مراقبتها افتهمتي

-هزيت راسي اي

ميعاد :- ايييه الله يدهي سركم اني اروح

طلعت و اني رحت وراها، دارتلي بخزرة :- لو شما اعلمج غبية اني مو كتلج ابعدي عنهم ولج لا تخابرين و لا تسألين ليش هيج ديار

-هو خابرني

-انجبي ولا كلمة زين ربج هسه و عدت ورضت المرة لو فاضحتج كبال رجلج و ابوه و الامة تتفرج احسن ؟ و تخلين الما يسوى يتشمت بيج

خالد لو شما يسوي ويهدد عوفي لا تبرريز ولا تحجين يثولة تلوفيها على روحج و توكع براسج، ليمتى ابقى اني اسد بيها و انت تفتگيها، كااافي

هزيت راسي

-اي ابقي ابقي هزهزي براسج جنج غراب افهمي عاد اتوعي شلعتي كلبي

-كافي افتهمت

-شفتهمتي هسه من اروح منج تفتكيها بمصيبة لخ ما استغرب اذا فد شوية لو اجا خالد تلبسين و تروحيله

-لا ما اروح

-اوووي يمه مشكورة ورحم الله والديج حيل مفضلة علينا على كيفج يمعودة

-يمة والله من البارحة منايمة تعبت كافي

-دصعدي نامي ولا تفكرين امج بظهرج لا تخافين

هزيت راسي سلمت عليه و طلعت
رجعت للبيت ام امجد بعدها ما تحجي وياي، كملت الغدا و كعدت الجهال على الافلام كارتون يم مها و صعدت لغرفتي انام.

ساعة نمت و فاتت ام امجد للغرفة كعدتني و كالت :- اسمعي اني من رضيت تبقين على ذمة ابني مو بهالبساطة و اني راح اراقبج كل يوم و اشوفج اي خطأ احجي لامجد كلشي ولا تتوقعين امج تخلصج لو درى امجد.

تعيشين وياه ما اريده ينقصه شي حاجته و امورة كلها تقضيها جهاله و مرته و الا والله يا ديار ما اسكتلج افتهمتي ؟

هزيت راسي (اي) ، رجعت حجت :- سيد جعفر منو ؟

-جيرانه بكربلاء

-شعندج وياه ؟

-ما عندي بس هم جانو ما مقصرين ويانا و امه تحبني

-مخابرج مرتين

-شيريد ؟

-ما ادري

-خل اخابره

-ممنوع موبايل ما الج

سكتت، كامت من عندي و كالت :- يلا انزلي كابلي جهال امجد كومي لا بس فالحة فجريات تخابرين

كمت من مكاني نزلت يمهم بس من النعاس نمت جوا، كعدتني و هي تصيحلي حتى اكوم لجهال امجد تعاركوا و حسوني طشر الشكر

كمت فاككتهم و غسلتهم و لميت و كعدت بعد ما اجاني النوم بس حيل دايخة، اجا ابو امجد كال جبنا خالد و هسه هو صحته زينة

اني اباوع على ابو امجد مركزة و هو يحجي انتبهت لعمتي و هي تخزر بيه، كمت من يمهم و بقيت بالمطبخ كاعدة

بالليل سمعت صوت باوعت، فايت خالد ووياه احمد، رايد يفوته للاستقبال خالد ما قابل كاعد بالهول

عمتي حيل تضايقت، فاتتلي للمطبخ كالتلي:- فوته جو ما تفوتين من كدامه افتهمتي ؟

هزيت راسي (اي) .. مشت و احمد صاح على جاي الهم، سويت الجاي و صحت على ام امجد تشيله، ما اجت ولا كأن سمعت

صحت على احمد يجي ياخذ الجاي صاح (جيبي شنو مستحية ) فتت الهم حطيت الجاي كبالهم، شلت راسي لخالد :- الحمدلله على سلامتك

باوعت ايده خنكتني العبرة، غوركت عيوني و اني احجي، هو مركز بيه، كال :- الله يسلمج اشوفج تعبتي نفسج و سألتي عني

باوعت لام امجد فاتت و هي تأشرلي اطلع، انداريت اطلع و خالد صاح و طلع دفتر من وراه خلاه على رجله ، انصدمت دفتر مذكراتي بأيدة رجفت و احس ضغي هبط من الخوف

حجه هو :- ديار امجد وين ؟

ام امجد :- شرايد منه ؟

خالد و هو يمسح ع الدفتر:- عندي شغل وياه

بقيت واكفة اباوع بعيونه تصنمت بمكاني، حجت ام امجد :- فوتي لمها ديار شوفيها شتحتاج

عمي شك اكو شي كام يباوع بالوجوه ، خالد مبتسم و يباوعلي بنظرات ماكرة ، طلعت منهم كل حيلي هابط
اديه ترجف:- لا خالد ما يسويها، اي اعرفه ما يسويها

مها نايمة تون و اني افتر يمها انضرب دماغي من الخوف كمت ما اشوف كدامي، لزمني وجع من يم ركبتي لنص راسي ذبحني كمت اضغط على راسي بس اريد الوجع يروح

افتر منا و منا ما عاد الالم يفاركني
اني اصلا قبل يوم ما نايمة سهرانه بمها واخذتها للمستشفى رجعت لاكيت مصيبة خالد هدت نص حيلي نمت ساعة و كعدت لثاني يوم نمت بس ساعتين .. ولا اكل ولا شرب صار يومين ما عدت اشوف كبالي شي

غوشت الدنيا بعيني ووكعت
انتهت على وكعتي فطومة بت ضحى راحت ركض لجدها تكله (جدو جدو ديال ماتت ) فكايم احمد و خالد راكضين بسرعة رايد يشيلني خالد احمد شايلني عنه بسرعة خلوني بالسيارة وعيت

احمد و خالد و ام امجد، و ابو امجد بقى بالبيت يم الجهال لان فرغ البيت، وعيت على ايد ام امجد و هي تضرب على خدي تريدني اصحى فتحت عيوني و اسمع خالد يكله :- احمد اطبك ع المضمد مو للمستشفى خل نسوف شبيها

ام امجد :- فتحت كعدت ما بيها شي

الفت خالد و هو يكللها :- فاقدة هاي احمد استعجل يمعوووود

عمتي كلش متضايقة من صعدت خالد بس هو ما داير بال حتى احمد من مانعه يجي وياهم لان هو مريض
وصلوني المضمد نزلوني

قاسلي الضغط نازل ٦ درجات
كايللهم شوفوها احتمال عدها فقر دم، ويحتاجلها مغذي، كايله خالد :- يعني ناخذها مستشفى ؟

كايله :- اذا تكدرون روحو بس اذا هاي عوفوها اليوم انطيها بس المغذي و باجر تروح دكتور اختصاص احسن

كلت الهم :- اريد ارجع لامي ودوني لامي

ام امجد :- احمد امشي خل ناخذها لامها

خالد :- لا نطلع بيها للمستشفى

ام امجد :- ارجع لبيتك خاله تلكى امك ضال بالها عليك روح

خالد :- امشي احمد

احمد :- صدك خالد خل نرجعها لامها هي باجر تاخذها للدكتور و تشوف شبيها

خالد :- من خر*** بطينتكم من هي بحيلها تريدوها و من وكعت رجعوها لامها تستاهل كل اليجرالها والله

حجه هالكلام بعصبية و طلع من المضمد اخذ تكسي وراح، و اني رجعوني لبيت امي لكيت اسامة منتظرني براس الفرع بس شاق سيارة احمد اجا ركض عليه

-شبيها ليش وكعت خالة شبيها ديار

نزلت كوة و امي واكفة بالباب بس صفو السيارة اجت علية ركض :- سودة علية بنيتي انهد حيلها يمة

اخذتني من ايد ام امجد و فوتتني جوة هي و اسامة، فاتت ام امجد امي كامت تحجي عليها :- شسويتي بيه ليش هيج شسوت و هيج سويتو بحالها موتو بتي يمه

ام امجد :-، على كيفج عيوني شسوينالها وهي واكفة وكعت لا احد جاي يمها ولا احد متكرب منها

ميعاد:- من القهر ذبحتوها لبنيتي كتلتوها ماتت من قهركم زواجة المصخمة عساها من ساعة الاخذتكم و بتي ما شافت الخير

كامت تحجي ام امجد ما قبلت امي كامت تترادد وياها، فات احمد سحب امه و تعذر من امي و كال الها :- احنا عود باجر نجي وناخذها للدكتور

كايلتله :- لا خلفت الله عليكم ما اريد من احد شي عوفو بتي و شوفوني اكفاكم موتوها من القهر لا اكل ولا نوم تريدوها بس للخدمة لحد ما وكعت

... عافو امي و طلعت، هي كابلتني و كعدت :- ها ديار يمه شصار وياج

كوة حجيت :- راسي يوجعني راح اموت

-اكوم ابدل و اخذج للمستشفى وجهج اصفر كركم صاير

اندكت الباب، طلع اسامه و امي تبدل، صوت خالد يكله :- شلونها ؟

اسامة :- امي راح تاخذها للمستشفى هسه وجهه كلش تعبان

-من ترجع تعال كلي اني راح اكعد بالسيارة ابابنا

اسامة :- ماشي

سد الباب، فاتت امي :- منو بالباب ؟

-خالد يسأل على ديار

-اله عين و يسأل هالناقص هذا خل يولي اطرده

-هو راح

.. اجت كومتني ووصت اسامة يبقى ويا اثار بالبيت و راحت للمستشفى قاسولي الضغط و سوولي تحليل دم

ضغطي هابط و دمي ناقص ، حطولي بطل مغذي ساعة و اني نايمة فاقدة من التعب ما ادري ..

الدكتور اجا يتفقد، يسألني كلت اله انو صارلي يومين مماكلة و نوم قليل كال :- صابها الايعاء
تحتاج راحة تامة و تغذية جيدة و ترجع توكف على حيلها

كتب لامي على فيتامينات ووصاها توكلني لحم و اكباد حتى دمي يستعدل و كال بالعافية

طلعنا امي اشترتلي لفة معلاكة و قوطية بيبسي و كالتلي اكلي، بس ما جنت اشتهي ابد ما انطيت اي ردة فعل اني و الميت سوا جثة هامدة من التعب

رجعتني للبيت جان خالد واكف براس الفرع و رافد واكف وياه، بس صفت سيارة امي، اجا رافد :- ها خير شبيها

ميعاد :- ليش هم خلو بيها خير دمروها للبنية

رافد :- من ايدها