-عليك بداعت امي كول

-امي لو درت بيكم تفكرون بميعاد الا تكطع روسكم

رافد:- دكول الله عليك

- لواء بالجيش كعدها بالمنصور ويريد يتزوجها

- لواء و المنصور مرة وحدة وزواج !

احمد :- خطيرة خطيرة

رافد :- تستحق الجهاد

ضحكنا و اني اخابر بديار ما ترد

رافد :- انت منيلك معلومات عنها

خالد:- مصادري الخاصة

رافد:- مصادرك صايره هواي ابو الوليد
ويغمز ... اي الله يكثر هالمصادر
بس كون بهالمصادر تفيد اخوك يعني وتنسقلي

-شتريد

-بالقران افتحلها بيت بس خل تأمر من باجر ائجرلها بيت ولك بس خل احظى بيها يحظي

خالد :- الوووو مرت رافد الحكي رجلج اتزحلك

رافد :- خب دكوم تخوفني انت ولك هاي ميعاد اعوف امي و ابوي لخاطرها

خالد:- لو ادري بيك هيج جان دزيتها عليك

رافد :- جايتك ؟!

-ضحكت

-دكول والقران ولك عار اخيك ظال بالضيم و انت الخير يمك

-عيب كافي لا يزعل سلمان هي صارت عمته بعد

رافد :- خرب لشتك سلمان على هيج عمة تكتل

سلمان :- انتم كواو******

طكيناها ضحكة عالية ...... وبقينا نسولف

.............

ديار:- وصلنا للبيت ، الحماية مال عصام بالباب، اخذتنا امي و فاتت جوا و انطت فلوس ابو التكسي و دخلت ورانا

لكينا عصام بالبيت ، كاعد منتظرنا ، شافنا
عصام:- شغلتي بالي حبيبي شصاير وياكم

باست راسه وكعدت يمة :- ما تتخيل شصار بيه عصام ردت اتخربط فد دور من ورا مصايب اسماعيل

عصام:- شكو ؟

ميعاد:- لك عيني اجا و جاب اخوته العار شلون تزوجون البنية بدون علمي الزواج باطل و اني ازوج ديار لواحد اعرفه

-لمنو يزوجها ؟.

-اكيد لواحد من سلاباته الارهابيه الوياه

اسامة يهمس:- ديار هذا شيصير من ماما

-زوجها الجديد

-ماما تزوجت ؟ شوكت شو اني ما جنت موجود

-لما جنت ابيت بتول اسمت اسامة مو هسة نحجي

عصام:- خلي واحد منهم يكرب يمج الا اخ***** ولد القندرة

ميعاد:- يبعد هلي و وكرايبي فدوة الطولك يبعد عمري انت زلمتي و تاج راسي والله افتخر بيك بس يرويحتي اني اخاف عليك مثل ما اخاف على جهالي ما اقبل تنضر بسببي

-منو يضرني غير انعل والديهم انت كعدي و يجيج الصافي

اخذت ايدة و باستها و باست خده :- الله يخليك خيمة عليه و على جهالي بس يبعد عمري لو انت طلعت راح انت تنضر و احنا .. هسه يكولون مكعده جهالها ابيت صاحبها و يفسدوني بالعشيرة وكتها العشيرة تفلسني من جهالي

بس لو خليتهم عليه ما بيهم اليكدر يدوس باب مرة و يدخل دارها ومحد ابيتها .. هم الينعابون لو سووها و الحق الي قانون و عشاير، مع هذا خلي حمايتك قريب من البيت حتى لو حاول احد بيهم يأذينا يصدون عنا ، يبعد بيتي انت من رحت فدوة لطولك

عصام:- يصير خير يابة يصير خير
لعد اني اكوم اروح اتوكل و الحماية راح اخليهم حوالي البيت شتحتاجين كوليلهم و لا تبتعدين عن جهازج من اخابرج بساع ردي طمنيني

-يبعد روحي انت هلي و طوايفي رحتلك فدوة لا تشغل بالك و لا تقهر نفسك اخاف عليك ترا

.....طلعت وراه و هي تحجي
خابر ابو امجد، صحت وراها :- ماما ابو امجد جاي يخابر اركضي

عافت عصام يطلع و اجت ع السريع ردت

ابو امجد :- ها ام ديار وينج خوية

-كفيتوا و وفيتوا خوية ما اريد اورطكم بعد

-لا خويه خاف يأذوكم ذوله ترا ما يتأمنون

-لا تخاف عليه بيتي مشتمل ويا بيت صديقتي و بلغتها وحماية رجلها لواء بالباب شحدة اليكرب

-يعني ما عليكم شي

-لا فدوة العينك ما قصرت ورايتك بيضة الله يكثر من امثالكم بس انتم لو احد اجاكم اطلعو منها اني ما ارضى تتأذون كولو ذيج امها و احجو وياها احنا طباب خير ردنا نجمع راسين بالحلال و السلام

-لا لا لتخافين ان شاءالله

-بس سلمان وينه

-والله يا خويه ما لمحتنه مدري وين ودوه الولد، بس هو الملعون والله ضربه ضربه السماعيل خلا دمه بطوله

-والله هالسلمان طلع زلمة حوك و ما يرضى احد يتدنه الديار كحل عيني بضربته ، امانة الله حجي توصي الولد يديرون بالهم عليه و يحمونه خطية

-لا لا لتخافين ما يخلون احد يگربه بس اسماعيل و اخوته لا ما كاومتهم و طلعتهم من العشيرة فلا اتسمى ابو امجد

-فدوة العينك خوية لا تتصادم وياه عندك وليدات وهذا ارهابي طايح حظه خل يولي

-اني تعلمه لا تخافين

امي تتصل بابو امجد و خالد يتصل بامي
تعذرت امي من ابو امجد وردت على خالد :- ها عيني خالد بشر شلونه سلمان

خالد :- لا تخافين عليه فضت و هذا هو كبالي كاعد ما بيه شي بس خابرت على ديار ماكو

رافد:- اخوك الجبير اني لك انطيني اني احجي

خالد :- اششش بعدته و طلعت برا

ميعاد :-يمكن ناسية موبايلها هناك

ديار :سألتني (مو)
جاوبتها :- موبايلي اي هناك اذا سلمان يمه خل ينطينياه

ميعاد:- تريد تحجي ويا رجلها انطيه الجهاز

خالد :- اي ان شاءالله، هاك سلمان هاي ديار وياك

ديار :- اخذت الموبايل و كلت :- الووو

سلمان :- وين اتي ؟

-اني ابيت امي

-ما اسمح اطلعين بدون علمي افتهمتي يلا تعااااي

-خب انجب غير رادو يعلسونا

-لا تغلطين الوصخة كتلج اني بعد رجلج ما اسمحلج تغلطين علي

-سلمان ترا مو وكتها انت شلونك ؟

-اني زين بس شفتي شلون خليت دم ابوج الخايس يجري

ضحكت:- دير بالك على نفسك ماشي

-لا مو ماشي تعاي اتي هنا يمي

-ما يصير هسه خل نشوف شلون تمشي

-ما تمشي تعاي يمي اكلج لا تخلين اصير عصبي و اضربج ضربه مثل ابوج الخايس

-دكوم الوصخ شنو انت تهدد

-لا حبيبتي اني بعد احميج شبيج

-وشلون تحميني

-هذا خالد يكول راح انطلعكم لكربله تعاي هنا حتى نطلع وبعد ما اخلي احد يوصلج

-انطيني خالد

-ما اقبل مرتي تحجي ويا الزلم

-خب ترا طوختها دنطيني مو وكتك

-راح افتح حتى اني اسمع

-افتح

-تعال خاااالد ، لا لا تلزم الموبايل بيدي ، يلا احجي

خالد:- شنو دا تسجل اعترافي انت دنطيني

-تريد تحجي ويا مرتي ساقط، احجي بيدي يلا

ديار :- اهووو شلون بهذا الينفخ على راسي

خالد:- ديار اني اكول لو اليوم اطلعون مو احسن ؟

- ما ادري اني جيت دا اسألك

-حتى لو كاعدة ابيت اللواء هذا ارهابي تجيبين الخطر لامج و للواء و لكل واحد يمج .. اطلعي و خلي امج تشيع انهزمتي .. و ما انهزمتي ويا غريب الكل يعرف انت عرسج البارحة و اللي انهزمتي ويا رجلج

-وشلون ؟

-راح يجيج رافد اخوي من يرمش عليكم نهاية رقمة 99 البسي عباية و حجاب و اطلعي يوكفلج يم المطعم صعدي وياه وتعاي

احنا راح ناخذ سلمان و نطلع للكراج ونلتقي هناك

-ماشي

معياد:- شنو شتفقتي شيكول خالد

...سولفتلها
كالت :- اخاف عليج يمة خاف ذوله يأذوج

-يوم اول و تالي ما راح يفكون من يمنا

....نص ساعة و اتصل رقم على امي شالته

رافد:- مرحبا ام ديار اني رافد

-هلا عيني هلا، هسه لحظات و اجيب بتي اصبرلي

التفتت عليه امي، فتحت اديها حضنتها ، دمعت عيوني :- ماما ادعيلي

رفعت راسها و كالت :- ربي بجاهك دعوة ام تودع قطعة من كلبها امانة عندك ديار ما اريد ظن بشر يعينها اريدك انت تحط ايدك عليها و تساندها وتحميعا من كل شر

دعت و الدموع جروا على خدودها حظنتني و كامت تبجي، اسامة من شاف امي هيج ودعتني تخبل كام يضرب بالباب و يصيح :- ما تروح ديار ما تروح

مشيت اله اريد احضنه دموعه صاروا مثل المطر و ما ينلزم ويكول :- ما تروحين و تعوفيني ما تروحين و الله ما اخليج تروحين

كمت ابجي بمكاني و هو يركع بالبيبان و يصرخ و اثار كامت تبجي، بست اثار ، ورحت لزمته كوه حضنته بسته كام يصرخ من كل كلبه

اخذتني امي و هو يريد يطلع ورانا.. قفلت الباب و سحبتني من ايدي .. دموعي تجري و كلبي دم شلون راح افركة ... من يوم الجابته امي ولليوم و هو على كلبي اني ربيته مو امي

تسحب بيه بالطريق و اني دموعي تجري، وصلنا لسيارة رافد اخو خالد ، حجة :- امانة ام ديار شتحتاجين اني بالخدمة رقمي صار يمج لا تترددين

-فدوة الگلبك لك عيني كلبي دم على بتي شلون راح افاركها دير بالك عليها الله عليك احرص عليها اكثر من روحك لا يكون احد يراقبك و يأذيها

-لا تخافين عليها ولا تقهرين نفسج .. اخليها بعيوني والله

-تسلملي عيونك ، يلا عيني اني اروح جهالي بقوا بالبيت ، ما اوصيك فدوة

-لا توصين حريص

صعد بالسيارة و طلعنا ....

.......

خالد:- دزيت رافد على ديار و انطيته العنوان و اني تركت سلمان يم احمد و رجعت للبيت

عمي جان مرتفع عده الضغط و امجد و ابوي و رائد كاعدين يمة، بقيت اسأل و اطمن على صحته
اشرت لمها تجي

مها :- ها خوية

خالد:- لميلي غراض لسلمان و لديار اليحتاجونهم مو كلها عود بعدين نودي الباقي ، لمي الضروريات بجنطة قماش و انطينياهم بعد اخوج

ابو امجد :- سلمان وين خالد

-بخير عمي لا تشغل بالك عليه

-وين راح تاخذهم

-والله عمي يروحون لكربلاء احسن

-شماخذهم لكربلاء و منو الهم هناك

-عمي هنا هم منضرين و احنا منضرين .. كربلاء امان و الشغل بيها زين ناجرلهم هناك و نكعدها و سلمان يفتحلة بسطية بشارع الامام يعيشون و مو بعيدين ساعة و شوية نوصلهم

ام رافد :- انت شمصخم وجهك ورايح مورط روحك بديار و رجلها استر علية و اكعد

ابو رافد :- اسكتي يا مرة الناس للناس خوما تكاطعت العالم و ديار ابنيتنا وربت بيناتنا

ام رافد :- ما كافي شمروا ارواحهم بعركة اخوك و تريد تورطهم م ويا بت اسماعيل لا ماكو واحد من ولدي يطلع لو على جثتي

بقوا امي و ابوي يتراددون و اني واكف منتظر الجنطة ، جابتها الي ، اخذتها و امي تصيح وراي، حطيتها بسيارتي و رحت لبيتنا صعدت لغرفتي و صحت ضحى

ضحى:- شنو هاي العركة الصارت ابيت عمك شكو

-عوفيني هسه من العركة ، مليون و نص يمج مو ؟

-شرايد منهم

-٣٠٠ الف

-المن

-دنطيني و اني بعدين اكلج

-و ولادتي خالد غير ضامتهن لجيبوبتي

-يربج جبتي و اني ما خليت بيدج لو ما اخذتج ، دجيبي محتاج

-المن تنطيها ؟

-تحاسبيني انت دطلعيليااااهن

فاتت امي :- خالد ما تروح لكربلاء ويا ديار ، والله لذا رحت وخليت روحك انسى عندك ام

-يمه رحمة لاهلج فكي عن طريقي مستعجل

-ولكم راح تخبلوني انتم شدخلكم رحت انت وذاك اخوك السكط رافد شمرتوا ارواحكم بنص العركة شعدكم

خالد:- العركة ابيت عمي و تريدينا نسكت و نتجبجب شنو مخانيث احنا شو ميلي من كدامي يمه رحمة لموتاج، طلعيلي الفلووووووس

ضحى :- فلوس ولادتي توديهن لديار فدوة لله .. خالد ما انطي

دفعتها من طريقي كمت ادور بغراض الكنتور و اطلع، لحد ما لكيتهن بملابسها ، اخذت ٣٠٠ و طلعت

امي تصيح و ضحى تبجي و تلزم بيه ... عفتهن و طلعت اخذت سلمان للكراج و انتظرت رافد

شوية و وصل رافد و وياه ديار تبجي و دموعها بخدها :- شكو احد تعرضلكم

رافد :- لا على اهلها كلي هسه انت تروح وياهم لو اني

-بكيفك تريد تروح

-لا والله كلش تعبان يمعود وامي حركت الموبايل عليه ، اطلع انت
فتح محفظته طلع ٢٥ الف من جيبة خلاها بجيب سلمان
رافد :- يلا يا بطل خليك كدها و دير بالك على مرتك ، وهاي خليها بجيبك مصرف الك شتحتاج احنا اخوتك لا تستحي ولا تتردد

ما وصيج ديار صيري سباعية و ساندي رجلج ، خالد جبت موبايلها

خالد:- هاي الجنطة كاملة كل غراضهم بيها

رافد :- اي زين عفية، شوفي ديار الله يشهد من انت و صغيرة و اني احبج و مثل اختي بتي بكيفج احنا اهلج ولا اديرين بال ولا تشيلين هم بس تحتاجين اتصال واحد احنا يمج افتهمتي

ديار مسحت عيوني و هزيت راسي ، طبطب على ظهري :- يلا عفية سباعية ، توكلو

خالد:- راح اخذهم فورتات سيارتي اوراقها ما كاملة اخاف يوكفونه سيطرة

-بس شلون سيارتك وين راح تحطها

-بالكراج و ادفع كراجية مبيت يوم واحد

-انطيني سويجها اني راح امنها هنا ساعه اودي سيارتي وارجع اخذها

خالد :- بعد احسن

ديار :- انطاه السويج وصعدنا كيا كعدنا بالأخير اني من الشباك و سلمان بالنص و خالد يمه و تحركت السيارة

صاح واحد :- افلح من صلى على محمد وال محمد

كلهم صلوا ع النبي و اهل بيته ... و مشت السيارة بيه لحياة ثانية .. لمحافظة ما اعرفهه ولا بعمري داخلتها

تنهدت .. اول شي ودعت منطقتي و رحت للمنصور ..
و انوب ودعت اهلي و تزوجت .. و هسه ودعت بغداد كلها و طالعة لمدينة ما داخلتها و لا اعرف بيها احد
اني و رجال بنص عقل و الواجب علية اتحمل المسؤلية و اشيل الحمل

نزلو دموعي ، الطريق كله اسامه بنص عيوني ما فاركني شلون راح اتحمل فراگه

وكفونا بالطريق .. سيطرة وكالو انزلو
نزلنا طلبوا جناسينا خالد جان شايل الجناسي قدمهن كالوله للتفتيش

ردت امشي ورا سلمان و خالد، صاح ولد
:- يبنية منا تفتيش النساء

خالد :- ادخلي و تلكينا كبالج

هزيت راسي وفتت ممر كاعة حصو .. وبنهايتة اكو غرفة صغيرة ماعدات بيها اثنين نسوان مبردة كبالهن و يفتشن

فتشت جسمي وحدة منهن وكالت :- فوتي

طلعت لكيت سلمان واكف و خالد ماكو

رحت يمه :- لعد خالد وين ؟

سلمان :- كاعد يحجون وياه جوه

-ليش

سوالي حركة بوجهه بمعنى (ما ادري )

صاح السايق :- يا ولد اخذ مرتك خوية واصعدوا بالسيارة على ما يجي كرايبكم

رحنا كعدنا بالسيارة انتظرنا قرابة النص ساعة و خالد جوا بالسيطرة ... السايق جاب جنسيتي و جنسية سلمان و كال :- الولد جوا جاي يستفسرون منه

صاح واحد بيهم :- خوية بعد اخوك اتأخرنا كلش ورانا صلاة

وهذا صاح وراي مريض و كلهم يكلوله امشي

باوعلنا السايق :- شلون بعد اخوك تنزلون لو اطلع

سلمان ما حجه كام يباوع بوجهي ، كتله :- لا ما نكدر خلي ننزل ننتظر خالد

السايق :- ترا قريب الأمام ما يتيه خل اوصلكم هناك وهو يلحگكم ويخابركم هناك التقوا بيه بالامام
ها نطلع

كلها تكله اطلع ، سلمان كاله :-
واني اكرص بسلمان :- خلي ننزل ننتظره

-معليج معليج

-شنو معلية سلمان خالد هناك

السايق:- خوية مو على شي بس جنسيته مو شيعي لهذا وكفوا يحققون وياه تعرفين كربله مهددة بالخطر

ما افهمت الموضوع شنو .. شنو مو شيعي شنو خطر كلش خفت بس اللي جان هو ان احنا ٢٠٠٨ نهاية الحرب الطائفية

بعد تفجير الامام العسكري بسامراء شددوا الحراسة على كربلاء و النجف و الكاظمية كلش ما تدخل الا ينبحث بجنسيتك للحفاظ على سلامة هذه المدن المقدسة من الخطر

فسلمان جان من عشيرة الحسيني فوتوه گبل
اني لأن مرت سلمان ما وكفوا على جنسيتي عبروها اما خالد فجان من عشيرة المشاهدة وكفوه يحققون وياه

وهذا جان اقسى شي مر ع العراق
وهي الحرب الطائفية .. مناطق الشيعة تخاف من السني و مناطق السنة تخاف من الشيعي ويبحثون ع الجناسي ... بعد ما صار اقتتال طائفي بين الطائفتين راحوا بيها الألاف الضحايا الابرياء .. بأسم الطائفية

.....وصلت السيارة قريب من مرقد الامام الحسين
نزلنا و كال :- هذا حدي

كلنا نزلنا ... نباوع منعرف وين نمشي
لزمت ايد سلمان :- هسه وين نروح ؟

سلمان :- امشي وراي

... كام سلمان يتبع الناس التمشي وبيدة الجنطة و اني امشي ورا سلمان ، لحد ما وصلنا للمرقد

انشلع كلبنا بالتفتيش .. نمشي خطوتين وكالو امشي منا تفتيش النساء .. يمكن فرع واحد بيه ٣ وحدات تفتيش

سلمان بسرعة يطلع وتفتيش الزلم شكبرة بس النسوان هوااي كلش طكت روحي واني ما ادري خالد وين و بمدينة ما اعرفها ..

لحد ما دخلنا .. مرقد الأمام العباس على اليمنى و مرقد الأمام الحسين ع اليسرى وبينهم مسافة طويلة يسموها (الطريق ما بين الحرمين )

كلت السلمان امشي نكعد كبال اذيج المروحة ننتظر خالد .. كعدنا و فتحت الجنطة اطلع موبايلي .. مغلق طافي شحن

-سلمان وين موبايلك ؟

-هذا

-خابر على خالد

- ما عندي رقمه

-جيب اكتبه .. دكيت رقم خالد اتصلت ما عنده رصيد

ديار :- ما عندك رصيد هسه شلون بس لا ضعنا

سلمان :- لا تخافين حبيبتي اني وياج

بقيت اباوع بوجهه :- هسه شلون

-باعي الناس مو تدخل خل احنا هم نزور

-شنزور يمعود وخالد ؟

-اني معليه رايح ازور

-انتظر اجي وياك

كام يمشي و اني امشي وراه، اشرله واحد يفوت من التفتيش

رحت وراه للتفتيش الولد كال :- خوية منا التفتيش مال النساء

-اوووو
فتت للتفتيش فتحت عيوني السرة شطووووله و ٤ سروات .. وحدة ادفع باللخ و ضكه و خنكه .. دفعوني بالممر مال تفتيش بعد لا بيه اطلع ولا ابقى بمكاني تحاصرت حيل و كلما تتفتش وحدة اندفع ليكدام

طلعت روحي لحد ما كملت تفتيش، وكفتني امسح المكياج باقي بوجهي

تذكرت خرب حظي باقية بمكياج امي و العدسات اللي خلتلياه حتى ناسية امسح وجهي لو انزع .. بقيت امسح شلون ما كان بس اريد اطلع

حجت المفتشة :- حبيبتي ممنوع ادخلين للامام الا تمسحين كل المكياج البوجهج انت ما جاية حفلة و تخلين كل هالمكياج و العدسات

-ما جاي ينمسح والله

اخذي منا كلينكس مبلل وامسحي كله يلا كله

بقيت امسح لحد ما كالت :- يلا فوتي

طلعت من التفتيش كوة، اباوع سلمان ماكو .. بكل التفتيشات المرينا بيها الكاه واكفلي ينتظر ، هسه ماكو
بقيت ابجي حسيت نفسي خلص تيهت و بعد محد يلكاني .. لا اني ابغداد ولا اندل احد والموبايل و الجنطة عد سلمان

مشيت كبالي درج و الناس تبوس بالباب و تنزل ..
نزلت الدرج ... مكان كلش جبير و بيه اضوية هواي و بارد و الناس حييييل هواي

امشي وخطوة كدام و خطوة ورا ، دموعي بعيني
لا اعرف لا اندل و بعمري ما داخله هيج مكانات دينية او زيارات ضخمة

شفت ناس تدخل باب جوا، رحت وياهم مشيت و دموعي بعيني واكف رجاله كال :- زايرة منا باب النساء هذا الباب للرجال

مشيت للباب دخلت ... نسوان هوايه بعمري ما داخله بهيج ازدحام حتى بالسوك مو هيج

المكان بارد و العطر كلش طيب ..وكلما تتقرب يكثر العطر وكأنه عطر ورد جوري، وكفت كدام شباك شايفته بالتلفزيون هو هذا قبر الأمام الحسين

اخذتني روجة النسوان دفع دفع للشباك انعصرت ويا الشباك، جان ملزمة بارد ومشدشد بيه كومة قمايش خضر ..

باوعت بنص هذا الشباك .. جان اكو مثل التابوت ضخم عليه قماش اخضر وداير ما دايرة فلوس والناس تذب فلوس

معصورة ويا الشباك و بنية يمي لازمة بالشباك و تبجي حيل و تصيح :- دخيلك يا ابا عبدالله لا تردني جايتك من مكان بعيد

كتلها :- عفية يبنية بس خل افوووت
كسرت خاطري بس خنكتني يدفعون بيها عليه واني وجهي راد يفوت بالشباك تكسر، صرت شوربه بنصهن

كوة بألف يا الله طلعت من الازدحام
وكفت بالباب اباوع للشباك ، نزلت ادموعي ، رفعت راسي لله و حجيت :- ربي وحيدة بقبر ابن بنت نبيك لا معين ولا سند .. ما الي غيرك بهاي الدنيا كلش خايفة وما عندي غيرك يساعدني

كمت ابجي بقوة و اني اكول (يا سند من لا سند له )

طلعت من القبر ، شفت اكو نسوان هواي واكفات يصلن
ردت اصلي بس اني حتى ما متوضية، سالت وحدة :- يبنية اذا اريد اصلي وين اتوضى ؟

-حييييل الحمامات خارج مرقد الامام الحسين لازم تطلعين كلش تتوضين هناك يلا ادخلين

-وهم يفتشونا ؟

-اي طبعا

عفتها وطلعت ادور على سلمان افتر بالامام وادعي الله و جملة (يا سند من لا سند له ) ما فاركت الساني

نزل الليل و عدت ساعات واني سلمان ما لاكيته ...

باوعت اكو ساعة جبيرة ... الوقت ب٩ بالليل
ضليت اروح منا وارجع منا ما لكيت احد

كعدت ابجي تيقنت انو اني ضعت من خالد ومن سلمان وبعد محد مراح يلكاني ... ابجي و اسمع بالندائات

(ديار اسماعيل طاهر من بغداد من اهالي الدورة يرجى التوجه الى قسم الندائات زوجكِ في الأنتظار )

شلت راسي معقولة هذا جاي يصيح اسمي ؟!!

رجع عاد الكلام .. فزيت من مكان اي والله اسمي الكامل و من الدورة اكيد اني

لزمت بنية لابسة جرجف كلت الها :- عفية هذا اليصيح وين الكاه ؟

شو هاي كامت تخشخش بوجهي :- شنو ؟

بقت تخشخش وتكلي :- تيهران تيهران
واني مستمرة لازمتها و اسأل ، ندستني وحدة وكالت

:- حبيبتي البنية جاي تكلج اني من طهران .. ايرانيه ما تعرف لهجتنا اسأليني عمري شرايدة

-بس هذا اليصيح بسماعة منو ؟

-هذا ابو الندائات مضيعة زوجج ؟

-اي

-ماما علي كوم وصلها للندائات خطية خاف ما تندل

اخذني ولد صغير عمره يطلع بكد اسامة ..
وصلني للمكان و كاله :- عمو هاي الجنتو تصيحون بأسمها

حجه الولد :- انت ديار اسماعيل من الدورة بغداد

-اي اي

-ذاك رجلج روحيلة ، التفتت ولكيت سلمان كاعد يم حجي، تقربت يمه :- هاي وين جنت سلمان مو كتلك لا تفوت هيج احسن طايح الحظ وكمت ابجي

-غير جنت انتظرج وينج اتي

الحجي:- لا تغلطين بنيتي ، خطية جان يصيح بنص الزوار (يا ناس يا عالم مرتي ديار ضاااعت ) وجبناه للندائات

-الجنطة وينها؟

الحجي:- بس على كيفج يابه الجنطة جوا يم الولد ..

رحت للجنطة طلعت الموبايل و كلت اله :- عفية يا ولد ما عدكم نقطة مال كهرباء بس اشحن موبايلي

-اي خويه روحي هناك كعدي و اشحني

رحت كعدت وخليت الموبايل ع الشحن و شحنته، وسلمان واكف فوك راسي ، فتحت الموبايل بسرعة
وخابرت على خالد من اول رنة رد عليه

خالد :- تحجين صدك جذب يا ديار الو ابوية استلك ليش هيج اخابر عليج على سلمان ماكو وين رحتو
من ذاك الوكت لهذا الوكت ما خليت مكان بالمرقد ما دورت حتى صحت بالندائات وماكو وين رحتو

-هو احنا بالأمام بس جنت مضيعة سلمان و موبايلي طافي

-مبايلج طافي و موبايل سلمان اتصل عليكم ومحد يرد

-ما ادري ، سلمان موبايلك وين

-ما ادري

-بس لا ضايع موبايله

-نعلعلا شليتو حالي بالقران غير تنتظروني بالسيطرة عفتوني اخذ تكسي و اجي للامام

-مو كالو تتأخر و السايق ما قبل الا نمشي كال عود يلحگكم

-شلحك غير تكرمت رجلية بالله العظيم

-هسه انت وين ؟

-راجع لبغداد خابروني اهلي ضحى متخربطة وناقليناها للمستشفى ، انتظروا بالامام ديار و موبايلج مفتوح باجر من الفجر امجد يمكم

-اني اخاف خالد

-ديار دورت عليكم والله لحد ما مليت ، شلون يعني هسه ارجعلج ؟ لحظة خل اشوف يمكن اوكف السيارة و ارجع ابقوا بمكانكم

-لا لا اذا ضحى مريضة ارجع وخلي امجد يجينا باجر اني و سلمان راح نبقى هنا لباجر

-ماشي، اسمعي ديري بالج على نفسج و ٣٠٠ راح ادزهن باجر بايد امجد خليهن الج مصرف

اما فلوس الايجار و غرفة النوم لا تشيلين همها احنا شلناهن ع الروس

-مشكور ما قصرت ما اعرف شلون اجازيج

-دكعدي و استقري و عيشي بخير وهذا يكفيني

-ماشي

-يلا ديري بالج على نفسج و على سلمان، كم يوم و اني اجيج اطمن على وضعج

-ماشي

قفلا الخط منه ، اتصلت بأمي ، هم من اول دكتين ردت

- ها ديار يمه حبيبتي شلونج

-هلو ماما اني زينة، شكو صوتج مو تمام اكو شي

-مصيبة يا امي و وكعت على راسي

-شنو ؟

-اسامة ما لكيته بالبيت من رجعت منج، الحماية اللي بالباب يكول كام يبجي وظل يعض بينا و شرد من عدنا

-وهسه وينه اسامة ؟

-من ذاك الوكت و لهذا الوكت واني ادور ولج ماما راح اموت اخوج ما جاي الكاع شلون فهميني

-ولج ماما بس لا بابا اخذه اسااااامة وين.......يتبع

☆☆☆☆☆☆

#اتمنى_ان_افعلها


الحلقة_12

ديار:- يعني بابا اخذ اسامة ماما فهميني وين اسامة

ميعاد:- ولج ماما والله دخت من الظهر و لهسة اني ادور رجلية وكعن

-ماما اريد اجي ما اكدر ابقى هنا اسامة اكيد عد ابوي

-وين تجين يمعزاية اكعدي بمكانج لما اشوف وين توصل اني اخابرج

-ماما اسامة عد بابا ما اكدر اكعد لازم اجي

-منو يجيبج ؟ دنيا ليل و جايه مناك لهنا و الطريق يخوف استري عليه وكعدي بمكانج

بقيت الوب بمكاني و التلفت احس نار اشتعلت بداخلي :- ما اكدر اظل والله اموت ....بجيت

هي هم كامت تبجي وياي و تصبرني، سلمان كاعد يمي ويكلي :- شنوه شنوه شبيج

اشرتله اوكف اسكت
بقى يلح نهيت الاتصال ويا امي ، حجة :- شبيج تبجين

ديار:- اسامة ضايع و يمكن بابا ماخذه
بقيت اباوع ع الزوار و ابجي :- يا ربي دخيلك لا تضيع اخوي والله اموت، اني صوجي شلون عفته كل عمري ما تاركته لوحده شلون هيج تزوجت و ما فكرت

سلمان:- ديار اني نعست

-انت تفكر بس بالنوم اكلك اخوي ضايع ضايع تفتهم انت لو لا

-جوعان

-اهووووو دوخر مني
عفته وكمت امشي و ابجي و سلمان يمشي وراي ، فكرت اخابر خالد اذا قريب يرجع ياخذني لبغداد ما اريد ابقى هنا

اتصلت بيه ، رن اول رنتين جاوب :- الو ها ديار

جاوبته بنبرة بجي :- خالد تكدر ترجع

-ليش شكو ؟

-اسامه ضايع

-شنو اسامة ضايع وين ضاع

-طالع من بيتنا وما لاكينه

- وانت شتريدين هسه ؟

-ما اكدر ارجع بهالليل اخاف

-وين راجعه يربج تحجين صدك ؟

-خالد ما اكدر ابقى هنا گلبي نار على اخوي ما اكدر عفية تعال

-ديار اسكتي اهدئي و اسمعي كل رجعه الج لبغداد ماكو، تبقين بمكانج باجر يجيج امجد و اخوج احنا ندوره و نلكاه لا تخافين

-ما اكدر عفية والله راح اموت ما اريد هنا
بجيت ...

خالد:- لا يربج ديار تحجين صدك انت و هاي اكول عنج قوية و ما ينخاف عليج هيج تبجين، كولي يا الله يمعودة لا تخافين والله نلكاه اطمني

-زين اذا سمعت اي شي خابرني مو تنسى الله عليك

-بعيني والله هسه اروح اشوف ضحى و مناك اطلع لأمج اشوف شبيها ادللي

-ضحى شصاير وياها ؟

-والله ما ادري، امي تكول نزفت دم و نقلناها للمستشفى و اختي تكول تخربطت لهسه ما اعرف شنو الفلم هل رايح الهم و اشوف شبيها

-عدها العافية

-الله يسلمج، صيري سباعية ديار صح هالأيام صعبة بس ما تشتد الا تفرج وربج قوي نفسج و ان شاءالله تعدي

-ان شاءالله اهم شي عدي هسه الكاه اخوي حتى لو اموت ميخالف المهم الكى اخوي

-لا تخافين عليه ينلكي ديري بالج على نفسج و على سلمان

-ماشي

...سلمت عليه و ضميت الموبايل مبقى بيه شحن كلش قليل

سلمان : لا تبجين ديار اني يمج

-جاي ابجي على اخوي سلمان

-هااا يلا ابجي لعد

درت وجهي منه و اني ادعي الله يحفظ اخوي، كمنا نمشي اني و سلمان و نفتر بالأمام

سلمان:- والله اني جوعان

-المحفظة مالتك و الموبايل وينهن مو جان عندك فلوس

-ما ادري بيهن

-وين ضيعتهم

-اكلج ما ادري هسه اني جوعان جوعان حيل ما اكدر افكر

-مو بحالك سلمان اني هسه بالي يم اخوي اسكت

سلمان:- اني راح اكعد و انت امشي

-وين اروح ؟

-اكلج جوعاااان جوعااان تفتهمين لو لا

- اوووه ...
راح كعد هو، بقيت واكفة اخاف امشي و ارجع اضيعة و النار البداخلي ما تخليني اكعد بودي هسه اصير طير و اروح لبغداد و ادور اخوي
بقيت واكفة دموعي تنزل و عيوني رافعتهم للسما ادعي الله من قلة حيلتي، ايست رحت كعدت يم سلمان، هو حط اديه جوا راسه وتمدد نام
انتجيت ع الجنطة تنهدت و بقيت ادعي :- ربي اذا الي يمك حوبة لا تضيع اخوي فدوة ربي اخذني ولا تأذي

جاي ادعي مستمرة، شفت ولد صغير كدامي قميصه يشبه قميص اسامة ، حتى دورت الراس تشبهه، ظليت ازغر بعيوني حتى اركز بالولد اكثر ... يندار و يطلع صدك اسامة كبالي

فزيت من مكاني اصرخ :- اساااااااامة

باوعلي دموعه بعينه وفتحلي اديه يركض ، ركضتله اخذته بين ادية و هو يشبكني حيل :- الحمد لله و الشكر ربي الف الحمد و الشكر الهي

باوعتله :- شجابك هنا

-اخذت فلوس من جيزدان امي و اجيت

-ولك شلون اجيت شلون اندليت

-ركبت واجيت

-ولك شلون اجيت ما وكفوك ما خفت

-اني عرفت بيكم جايين للامام الحسين صعدت بكية كتله للكراج بس هو ما قبل يوصلني يكلي اهلك وين اني كتله راحو للامام الحسين وعافوني بعدين وداني للكراج و كاللهم اهله بالامام اخذتني حجية و كالت اني اوصله للامام

-وينها الحجية ؟

-ما ادري ناس هواي وضاعت مني

-حيوان ما خفت تضيع ما خفت اتيه وبعد محد يلكاك تدري امي شلون نار عليك عبالها بابا اخذك

-ديار اني اريد ابقى وياج ما ابقى ويا امي

-اني ما عايفتك اسامة كلت بس استقر اني و سلمان ابيت ادز عليك

-معليه ما اروح اريد ابقى وياج
دمعت عيونه

-وين تبقى ولك نايمة بالشارع باجر يجي امجد و ارجع وياه

-تنامين بالشارع اني اني انام وياج ما اريد ارجع ما اريد

حضنته و اني احمد الله و اشكره من وصله لهنا سالم و ما صاير بي شي ، رجعت باوعتله :- شلون اجيت شجابك خرب بغيرتك ردت اموت عليك والله

رجع حضني ويضحك، وخرته :- شكد عندك فلوس ؟

-بس ١٥ الف

-كوم خل نجيب لفات و ناكل خطية هذا سلمان كلش جوعان

اسامة- يلا

مشيت السلمان ندهته :- سلمان سلمان احنه رايحين نجيب اكل تجي ويانا ؟

بقى يدفر نايم ما يريد احد يكعده:- هاك كوم خلي الجنطة جوا راسك لا احد يبوكها

كوه شلت راسه و خليت الجنطة جنه حصان يزاكط ما يرضى احد يكعده ، عفته ورحنا اني و اسامة اشترينا لفات فلافل و رجعنا لسلمان كعدنا ردنا ياكل ويانا غاط بنومته و يشخر و ما يكعد ..

اكلنا وكملنا و ضميناله لفة اله من يكعد ياكل :- اسامة اكعد هنا يم سلمان اني راح اروح للحمام اغسل و ارجع مو تتحرك ماشي؟

اسامة:- ماشي

كمت من مكاني واني فرحانه .. كلش ارتاحيت من اجا اسامة وياي احس اني مو وحدي هو كل اهلي و اكدر اعتمد عليه و ارتاح بوجوده .. من هو مو وياي احس اني وحيدة بهذا العالم

رحت للحمامات شصايرة حل وشد و نسوان كومة و ريحة ، خليت الحجاب مالتي على خشمي و شديته على وجهي منا و منا ..

لازم تجاهد يلا تفوت شلون مشكلة كل مجموعة لازمتلها باب، وحدة صاحت :- يبنات اكو حمام لاخ شويه ليغاد ليش كلكم مكومين هنا

حجيت وياها :- وين صاير

-بس اطلعي منا و امشي مسافة تلكينه كبالج مكتوب عليه

اخذت العباية وطلعت، وفعلا مشيت لكيت حمامات نظيفة وسيراميك و فارغة غسلت على راحتي ورجعت ، كعدت يم اسامة نسولف بس كاعدين واحد لازك باللاخ الجو كلش برد و احنه ما لابسين لبس ثخين غطيت اسامة وياي بالعباية لا يبرد وبقينا كاعدين

اجا واحد يشتغل بالمرقد كال :- زايرة هذا الولد خطية صارله ساعة كاش بالبرد ونايم ، اخذي جنسيتج وروحي سلميها للامانات خل ينطوج بطانية و غطي خطية ترا الجو برد حيل
ويتمرض بس يبقى هيج

كمت من اسامة شلت راس سلمان من الجنطة دار وجهه ليغاد و ضم رجليه واديه من البرد مكشكش ، اخذت الجنسير ورحت جبت بيها ٣ بطانيات الي ولاسامة ولسلمان

خليت الجنطة ونومت اسامة على ايدي وخليته بالنص بيني وبين سلمان حتى لا يبرد، طبكت ال٣ بطانيات سوا و تغطينا بيهم ونمنا لازكين ابعض و ادفينا ..

ما حسينه الا الفجر بسبب الهوسة و الرجلين يم راسنا اروح و ترجع، شلت راسي، صوت ضجة ناس و صلاة و الصبح طالع ، باوعت سلمان كاعد و قاعد حواجبة

شلت جسمي من الكاع متكسرة تكسر :- ها صباح الخير

.. ما رد، حجيت :- هاي شبيك الوصخ كالب خلقتك

-جوعان

-مو كعدناك بالليل و ما كعدت جنك مطي و ترافس

-اتي المطي ولي يلا ما اريد اشوفج

-لا تغلط الوصخ

-لا تغلطين ترا اذبحج والله

-خب درووح ما الي خلكك
فتحت الجنطة على كيف حتى لا يكعد اسامة ادور اللفة ماكو
كعد اسامة :- وينها هاي اللفة البقيناها السلمان

- بالعلاكة هنا
الفت :- وينها هنا جانت

:-كوم يمكن شايلينها ، خل نشتري ريوك خطية حيل جوعان

كمنا ولمينا البطانيات ورجعناها و استلمت الجنسية ورجعت السلمان كاعد ويا ناس صايحيله حتى ياكل ..

-سلمان كوم راح اشتري ريوك

حجه الرجال :- الاكل خير من الله اختي تفضلوا

-لا شكرا

....انتظرنا يكمل اكل و طلعنا ، سألت اسامة اذا جوعان، كال :- لا الفلافل لحد الان ابطني حتى توجعني

-حتى اني نفخت بطني

بقينا نفتر بالامام نجي منا و نروح منا .. ورحنا للامام العباس هم زرناه و مشينا بالفروع مال كربلاء ما خلينا فرع يعتب علينا و احنا نمشي سوا ، اخر شي قررنا نرجع للامام .. الظهر تقريبا ب١٢

جان نمشي بالفرع مال الامام و كبالنا القبة الشريفة ، باوعنا واحد واكف اباب مطعم يصيح :- كباب دجاج كص تفضل يزاير

مشا سلمان اله :- خلي اشتغل وياكم

الولد :- والله اني عامل هنا ذاك الحجي و احجي وياه

راح للحجي كاعد ع الكرسي و يشرب جاي :- حجي شغلني وياك

-روح منا ابني

-شبيك شبيك الله عليك الله عليك

-روح باباتي ما نحتاج

-بس اني محتاج اريد شغل جربني جربني

-ابوية تفهم انت لو لا ؟ جاي نكلك ما نحتاج

-مشى سلمان و غم ابو المطعم، صاح عليه :- تعال تعال لك هاي عليمن

سلمان :- شيل ايدك دشيل

ديار:- عمو ما يقصد فدوة عوفه

ابو المطعم :- شايف اذا بعد تعيدها الا اثرمك ثرم يلا منا

سلمان ما كعد راحة ، دفع الطبلة مالته و كاله :- دروووح الوصخ

والتموا عليه لزموه و اني لازمه بالحجي :- عمو عليك الله والله هو مو صاحي مريض عليك الله عوفه والىه بعد ما اخليه يجي يمك

كام يوخر بيه و يكلهم ادبوا، فات حجي جبير بالعمر لابس عكال اسود:- ها يابه خير خير شكو كولو يا الله ؟

هم ابتعدو وابو المطعم وكف كاله :- هلا مولاي والله هذا واحد طايح حظه فات من عدنا راد يشتغل كلناله ما نحتاج و تجاوز و كسر الغراض

الحجي :- خير خير ان شاءالله ، يلا ما صار شي عدوها

ابو المطعم :- و هاي لخاطر سيد حسين نعديها الك و ما نحاجيك بس لو مريت منا بعد و حجيت الا نكتلك

الحجي:- ما صار شي لا تحجي هيج ابو رحمن المسامح كريم و هو بعد ما يعيدها

انتم منين بوية ؟

ديار:- من بغداد عمو والله بعد ما يعيدها و بعد ما نجي منا

-انت شتصيرين منه ؟

-مرته

-رجلج شبيه ؟ جنه مو بوعيه

-لا عمو ما بيه شي والله بس هو عنده خيط

-خيط !! شلون يعني ؟

-بضربة بوش الأولى وكع البيت عليهم امه ماتت و هو عاش بس هيج عاش بيه خيوط بعقله

-هاا ضحايا حرب ، ما صار شي بنيتي اخذي زلمتج و كملو زيارة انتم منين ؟

-من بغداد

-منين من بغداد

-من الدورة

-يا هلا و مية هلا

حجه واحد من العمال :- شهلا سيد تدري بالدورة شكد كتلو بينا

الحجي :- عيب هالحجي اليكتل ماهو منا شيعي جان او سني كلنا اخوان .. هذا الحجي ما اريده ينعاد ، ابو رحمن علم عمالك ما يسمعون الناس حجي عيب

عافنا و مشا و احنا مشينا للامام ، و اني ارزل بسلمان :- طايح الحظ صرت علينا رامبو و كاعد تتعارك هو احنا نعرف احد هنا ؟ لو لازمينك و كاتلينك شنسوي

سلمان:- اسكتي الوصخة اني غير ردت اذبحهم بس ما خلوني

-دنجب غير لو ما هذا الحجي يجي جان سووك طلي مشوي

بقى يعيب عليه بوجه ويسوي : ننننننننن
غميته و مشيت اشترينا اكل و كعدنا نتغدى ورحنا بالأمام تمددنا ...

للعصر انتظرنا احد يجي ماكو، خالد كال امجد من الفجر يجي، وهسه صارت ٥ العصر ومحد بيهم بين ..

رحت اشحن الموبايل و خابرت مها
ديار :- الووو هلو مها

مها:- هلو حبيبتي ديوره شلونج

-الحمدلله بس خالد كال امجد يجي الصبح و ما اجا

-اي والله عمري على اساس يجيج بس عمامج اجو علينا و وياهم ناس من عشيرتهم و ما كدر يجي التهى ويا ابوه بلكي ان شاءالله باجر يجيج صبري عمري

-شصبر انام بالشارع لو مبقيني عد امي احسن خلي نرجع

-ولج هي امج جايتنه هسه خابرت بالطريق النا .. لأن عمامج يردون جهالهم و هي تاهمتهم ماخذين اسامة و تكول جاية بالطريق الا ازين شواربهم

...صفنت ويا روحي اني حاى نسيت اگل لامي اسامة يمي، غلست ما حجيت و كلت :- خالد وينه ؟ هو كال اذا ماكو احد اجاج اني اجيج

مها:- ولج هم خطية خالد البارحة عركته هو و امه و مرته للظالين

-ليش شكو

-هو على اساس يبقى هناك يمج يأمنلج بيت ويرجع، مخابرته امه كايلتله مرتك نزفت و نقلناها للمستشفى راح تسقط هسه تجي ، ليش ما يجي ويلكاهن بالبيت كلشي ما بيهم

-يعني ضحى ما بيها شي ؟

-لا ما بيها بس ما يردنه يتورط بسالفتكم يگلله اطلع

-لا خطية لعد بعد ليجي

-ما تعرفين طبع خالد عناده ماكو مثله يموت ولا يقبل احد يفرض عليه

-يلا لعد روحي و اسأليلي امجد شوكت يجيني

مها:- ان شاءالله عمري ديري بالج على روحج وصيري سباعية

-ان شاءالله

.................

خالد : من خابرت عليه امي و اختي بيداء بالأمام و اني ادور على ديار ايست الكاها حتى بالندائات صحت و ماكو، خابرت امجد كتله :- خوية هذا الحال شسوي ؟

امجد :- ارجع و اني باجر من الصبح اغبش الهم

-وشلون يبقون بالشارع الليلة ؟

-ينامون بالامام ما عليهم شي ارجع لمرتك و من الصبح اطلع

خالد:- ان شاءالله

... رجعت بالطريق خابرتني ديار خايفة قهرتني حيل ردت ارجعلها كالتلي لا ارجع لمرتك مريضة .

فرجعت الطريق اخابر امي اسألها يا مستشفى انتو لا امي ولا ضحى ولا اختي يردن .. ضجت كلش و طفرت روحي

فتت للبيت والكاهن كاعدات بالاستقبال ملمومات و يسولفن و يضحكن ، تفاجئت :- يمه مو خابرتيني گتيلي مرتك نزفت و بالمستشفى ؟!!

الام:- لا مو بالمستشفى ردنا ناخذها بالمستشفى بس هو نزيف بسيط و وكف

-اذا بسيط و ما بيها شي خابرتيني و جبتيني مناك لهنا عليمن ؟

-والله يمه ما اريدك تتورط بسوالف ديار ابوها ارهابي اچفينا شرهم

-يعني جذب ؟

-كتلك يمه اچفينا الشر

اني سمعت هيج و تخبلت كمت اشيل و اكسر فوك روسهم ، كلهن هجن لغرفهن وكفت اتعارك ويا امي ورجعت صعدت لضحى بهذلتها تبهذل، و طردتها من الغرفة و كلتلهم:- انعل والديه اليوصل يمي و اريد اشوف يا كو**** ابن **** يتحكم بيه

... قفلت الغرفة و نمت الصبح كعدت على صوت بيداء :- خالد خاااالد

فتحت الباب :- ها بيداء شكو ؟

-ام ضحى جوا و جايه تاخذ بتها

-و على اي اساس تاخذها ؟

-ما ادري انزل انت و تصرف

-انزلي هسه اني جاي وراج
غسلت و لبست و نزلت جوا لأمها واكفة بالباب:- شنو عمه احد طاردج و لازمة الباب

-البيت اليطرد بتي طاردني

-ومنو طارد بتج ؟

-ما طردتها من غرفتها

-طردتها بالشارع لو كلت الها روحي كابلي امي و ما اريد اشوف خلقتج ؟

-بتي مو فصلية عدكم حتى تطردها من غرفتها و تخليها تنام جوا

-عمه من الأخير انطيني ترا ما لي خلگ، شرايدة ؟

-بتي تروح وياي

-اي الله وياج و وياها درب السلامة

ضحى وهي تبجي :- مع الأسف عليك خالد حسافة كل الحب الجان بيني و بينك هسه جاي تضيعه

-من سوالفج شيجي من ايدج الله يزيدج و احمدي ربج و اشكريه ما سويت شي كلت حامل و اكتفيت بطلعتج من الغرفة

ضحى:- والله خالد اني ما اقبل تروح لديار لو اني لو ديار

-مو اني التحكمني مرة لو توذنين وحق ربج ما تحركيلي شعره

-شعدك وياها ؟ طلعت روحي ديار ديار ديار

-ولج بت الاوادم مو زوجتها و راحت ويا رجلها شعديييييييي بعد بس والله انت فلا ادمية جان المفروض هنا اجيبها و اتزوجها واخليج تبوسين الايدين و الرجلين حتى اباوعلج بذاك الوكت تصيرين ادمية و توعين على روحج بس من محترمج و مقدرج ما يرضيج

ضحى:- اي بالعافية عليك و عليها اني اريد اروح لبيت اهلي ما ابقى عندك

خالد: كمت من مكاني اشرت عليها بأصبعي و حجيت:- باب البيت لو طلعتيه قسما بالله العظيم يا ضحى ما الج رجعه منه ..

كمت و امها كامت تتصايح ، اخذت باكيت جكايري و محفظتي و سويج سيارتي و طلعت للاستوديو كعدت اشتغل
مشيت صور معاملات و شغل ع الحاسبة و اظهر تصوير عرسان ، ضحى ما سكتت مخابرات انطيت الجهاز صامت ما رديت وعفته على صفحة

فرغت شوية العصر قفلت الاستوديو و كلت خل ارجع لبيت عمي اشوف شكو ماكو، وصلت لهناك و الكى امجد كبالي :- ها امجد شو هنا ؟

-والله ما كدرت اروح ذوله اخوة اسماعيل و عمامه جايين يطالبونه بولدهم و شلون نزوج بتهم بدون علمهم

-ولك وديار هناك وحدها يعني

-شسوي والله ما كدرت

-من خرب بيومك غير تحجي تكول
جاي ارفع الجهاز اتصل، فاتت ام ديار وبتها الصغيرة على ايدها
التفتت لأحمد :- هم عمام اسماعيل مو اجو الصبح ؟

احمد : كالو نرجع العصر و هل منتظرينهم

كعدت ميعاد تشكي و تبجي على اسامة ابنها ماكو و تشكي لابو امجد ، ندسني رافد :- خايب شوف القهر شلون تبجي يا بوية مال الفها بحضني و اسكتها

-رافد رحمة لدين محمد ترا كلش مو وكتك

رافد:- خب دروح انت ملتهيلي بالبنتاية و عايف الاماية

خالد:- البنتاية شنو شبيك رافد احجي عدل

رافد:- لا تفرها خوية ترا اذا مرتك و امي مشت عليهن احنه اخوة و زلم بيناتنا نفهم بعض

-شتقصد ؟

-غمز الي :- ترا البنية متزوجه

-ما حجينا شي بس اهتمامك بيها كلش زايد عن اللزوم ، هاي امها هنا كاعدة تبجي على ابنها و ما مهتمة لبتها هناك شبيها و شحالها ، انت الوحيد المحارك بيناتنا ، يلا يخوي الحب ما يعرف مسميات ولا اله احدود

-حبيش انت خليني محترمك و كوم مني، لا اشو اني اكوم منك

.. كمت منه و اني اسأل نفسي:- الكل منتبه الي اني مهتم بديار اكثر من اللازم حتى اكثر من امها ، امي تضايقت مرتي غارت اخوي يبسمرني .. رغم البنية زوجتها بأيدي و هيج حجيهم .. الخلل بيهم لو بيه ؟

اني بالنسبة الية اشوف هي بنية مسكينة لا حول ولا قوة التجئت الي ساندتها و عاونتها .. زحمة بنية تفتح كلبها الك و تبقى بس تستمع ..

بس هم شكوكية من الحباية يسوون كباية شعندي قابل وياها، البنية تزوجت وراحت بحال سبيلها الله يوفقها

... و اني دا افكر واحجي بهالسالفة، دكيت رقم ديار بلا وعي و اتصلت ، تسائلت ويا روحي :- حتى رقمها حافظه هه
هزيت ايدي ... ردت

ديار :- الو خالد

-ها ديار هسه شفت امجد هنا والله تخبلت شلون ما جايج ، انت وينج كون محتاجة شي شصاير وياج ؟

-لا زينه كاعدين بالامام ما علينا شي، بس خالد اگلك شغلة

-شنو هي كولي

-اسامة اجا لكربلاء يمي محد يدري حتى امي ما كلت الها

-شجابه يمج هذا شلون اجا الدنيا مكلوبه عليه هنانه امه هاي كدامي جاي تبجي

-ما ادري اني نسيت اخابر امجدي احجيلها بس من كالتلي مها عمامي جايين ما حجيت على اسامة خفت احد منهم يكول هو رايح لكربلاء ويتبعونه

-لا شيجيبهم لكربلاء، هو دخول كربلاء سهل غير گلبوني على البطانة يلا دخلوني السيطرة مو انوب اسماعيل و جماعته

-ما ادري اذا هيج كول لماما اسامه يمي لا تبجي وخل تخابرني من ترجع للبيت

-انت محتاجة شي خايفة ؟

-لا خالد اني ما اريد اثكل عليك سمعت انت و امك و مرتك متعاركين بسببي اني ما اعرف اجازيك مو ازيد عليك

-تؤ ملج علاقة لا تشيلين هم لهالحجي اني الكتلج تروحين كربلاء و اني اتحمل اثار حجايتي ما اعوفج وحدج لا تخافين
بس اتحملي باجر اذا صدك ما اجاج امجد اني الظهر يمج

-ماشي

-ديري بالج على نفسج و اذا احتاجيتي شي لا تترددين اتصلي و ما الج علاقة عسى ما ب٣ بالليل اخذ سيارة رافد واجيج

-مشكور وما قصرت والله ما اعرف شلون اجازيك امي وابوي ما وكفولي بعمري بكدك

-لا تحجين هيج الناس لبعضها قابل شكو ، يلا ديري بالج على نفسج

-ماشي مع السلامة

-الله وياج
قفلت الخط منها، صفنت: حتى هي منتبهه عليه مهتم بيها اكثر من امها مو بس رافد

ميعاد :- والله گلبي خلص يا ناس ابني ما هو وين الكاه

رافد :- ام ديار ما بلغتي عليه ؟

ميعاد :- لك عيني بلغت البارحة يكلولي لازم تمر ٢٤ ساعة يلا يعتبر مفقود

رافد :- بس هسه مرت ٢٤ ساعة على غيابه اخذج نبلغ الشرطة و ندورة

-لا يا عيني اتعبك هسه يجون عمامه الا ازين شواربهم بالقندرة والله ماكو غيرهم ماخذين ابني

رافد:- لا ام ديار لا تظلمين بختج ترا الناس احنا ضدهم مو وياهم بس اجو الصبح و كامو يهددون يردون ابنهم يعني لو عدهم ما جان حجو و ذوله ولد عشاير الجايين مو هيج

ميعاد:- يمه عزا العزاني ابني لعد وينه ؟
ودنكت تبجي و تشكي و بتها يمها تبجي مثلها

رافد :- كومي يابه كومي ندورة بسيارتي نفر على نقاط الشرطة لابد مار عليهم

خالد:- اكعد بمكانك الولد بخير يطلعون عمامه و اكلها بمكانه

رافد:- اذا حجيت ادوس ابطنك و القران خليني استفاد

خالد:- طلعها من عقلك رافد المرة بعقلها واحد لاخ

رافد:- انجب و خليني اشوف رزقي ، كومي ام ديار اني منتظرج بالسيارة اليوم ما اخلي نقطة ابغداد ما ادورها ولا يهمج

ميعاد:- والله انتم ما اعرف شلون اجازيكم اخوك خالد الما عاف بتي لو بيت ابو امجد الما تركونا لو انت بالعافية عليكم هالنفس الطيبة اي والله

رافد:- شدعوة ترا احنا اهل

ابو امجد :- هسه انت وين ماخذ المرة ؟

رافد:- عمي ندور خوما نكعد هيج و الولد ضايع، واحسن لا يجون عمام اسماعيل و تتصادم وياهم ما بينا حيل مشاكل ذوله يدورولهم حجة اذا نعرفهم مو هم الماخذين الولد نزيد المشاكل ليش

ابو امجد :- بس دير بالك ابني

رافد:- لا توصي حريص ابني

ام رافد:- رافد يمة بس تعال شويه

رافد :- رايح يمه محتاجة شي ؟

ام رافد :- اي يمه گبل لا تطلع بس تعال مرتك تريدك

خالد: شفته راح ضحكت :- روح بيها رافد انغسلت

كمت من مكاني ورحت وراه لكيت امي تتعارك وياه شلون يروح وياها و تگله :- انت و اخوك ربيتولي علة راح تسوون بيه جلطة ولكم جوزو من هالعاىلة فكونا ما بيه حيل اخسرلي واحد منكم و يتصخم راسي

باوعلي رافد و ضحك، ابتسمت :- رافد ترا صدك زايدة منك تروح وياها جاي اكلك مكان الولد اعرفه هسه اگللها وفضت

ام رافد :- يمه عزا العزاني يممممه الصخام الصحمني انوب خاطف الولد يمة ، راح يجلطوني ذوله

وكعدت بالكاع تلطم على راسه :- شقصتج يمه والله ما خاطفة الولد يم اخته

رافد :- اسمع لك اموتك دك بالنعال لو حجيت تلصم و تسكت لحدما ارجع

ام رافد :- انوب مخلي عينك ع المرة عزا العزاني كون يمه يما يرتاحون ذوله اذا ما يجلطوني ولك قااااااااسم تعال شوف ولدك شووووف

رافد :- يمه بس لا اطيرين رزقنا دكااافي رايح افر شوية وارجع

ام رافد :- والله اكول لمرتك واسويها سودة مصخمة عليك ولك انوب ادور وحدة بكد امك

-اكلج ذيج مرتي تريدين تروحين تحجين احجي مو اني النخوفني مرة، و من ثم اني وياها نفس العمر منين سويتيها بكدج حجية تريدين تصغرين بروحج بس بروح ابوج تسويلي فضل لو خليتي مرتي اطير لاهلها حتى اتزوج ميعاد بمكانها

خالد:- مو هيج الحجي رافد احجي عدل هاي شبيك

رافد :- طير انت ، باااي ادعولي بالتوفيق و الرفاه والبنين و الولد الصالح

رائد:- هذا وين رايح

خالد:-اسكت رحمة لدينك و كابلني نرضي الحجية ترا اذا بقت هيج والقران اطك و تموت من ورانا

دنكنا على امي وهي تلطم و ادك على راسعا و ادعي عليهن، بست راسها :- هاي شبيج يمه تحجين صدك

رائد:-غير افتهم حتى اعرف امي الحلوة شبيها

كعد وتمدد بحضن امي :- شصاير يمه

كعدت يم امي لفيت ايدي على جتفها و حضنتها و حجيت:- رافد اخذ ميعاد يفتر وياها شوية مضيعة ابنها

رائد:- رووووح رافد ايدك بالدهن يااااابه

نكثتنا من حظنها وكامت على حيلها :- من انعل ابوكم لابو ميعاد وياكم كواو****

وطشرتنا ... كمت من يمها اضحك، باوعت ضحى بالمطبخ ، غمزت الها .. عافتني ومشت زعلانه
هزيت ايدي ومشيت لبيت عمي

.............

ديار :- مر اليوم بكاملة بملل نمشي منا و نروح منا
بس الحلو بالموضوع انو نفتر ما خلينا مكان يعتب علينه تعرفت على مدينة ما جنت اعرفها غير بالجغرافية لما نعدد محافظات العراق ..

ولا جني اني هنا، حجاب و عباية و متخرذله تخرذل ما اعرف البس الحجاب مو انوب الحجاب و العباية بس هم هنا ما يقبلون وحدة سافر، كلش كلش لابسات عباية اسلامة جبه

بس ما عندي اشتري منها و امشي براحتي باقية انحثل بالعباية ... بالليل جعنا ردت اجيب اكل بالفلوس الظلت
ادور جيبي ماكو
سألت اسامة دور ... ماكو
سلمان ما عده

لعد هسه شلون راح نشتري اكل ؟

اسامة:- اروح اطلب منهم ؟

-منين ؟

-من ذوله
يقصد الحاشية اللي تشتغل بالامام

... لا يمعود ما ينطون اكل

-لعد شلون نضل جوعانين

طلعت جيسين فستق اشتريته من بسطية كتلهم خلي ناكله و انام شنسوي لحد ما باجر

اكلناه و ردنا انام ، سلمان عاقد وجهه عوزه بس يبجي ، سألته :- شبيك سلمان ؟

-اني اريد ارجع لأهلي ما اريد ابقى هنا

-وين نرجع ما شفت بابا يهدد بينا

-معليه اني اريد ارجع ما ابقى
باوعتله شو هذا بجى

-هاي شبيك سلمان قابل طفل انت

-معليج اتي الوصخة اني اريد اهلي

-يا اهلك حليمة العمصة الدك على راسك لو رغيدة المسويتك خادم عدها ؟

-انجبي اتي معليج لا تحجين عليهن يلا

باوعت هذا تخبل عليه بهالليل بلا وين اروح بيه، عفته يبجي جبت بطانيات و نمنا اني و اسامة هو بقى يون بمكانه لحد ما نام ، غطيته ورجعت نمت بصف اسامة ..

ثاني يوم كعدنا، بطونا ميته جوع، خابرت امجد يدك الموبايل ومحد يشيله .. لا عندي فلوس وارجع ولا اكدر اتحمل بعد كلش ضاكت الدنيا بعيني و سلمان بعده مطنكر

كتلهم كومو خلي نمشي نسأل اي احد بلكي يوزع ثواب
مشيت لاواحد كاعد اباب السياج مال الحرمين

حجيت وياه :- هلو

التفت اليه :- مرحبا اختي تفضلي

-بس اريد اسأل اكو احد يوزع ثواب هنانه شي

-محتاجة شي ؟

-ضاعت فلوسنا و ما نكدر نشتري و جوعانين

-انتم منين

-من بغداد

-يعني قصدج ما عدكم فلوس كروة ترجعون ؟

-لا اكل هذا مريض خطية جوعان

-جايين هنا شنو اقامة لو زيارة لو شنو مفتهمت ؟

-جايين نعيش هنا

-تعيشون هنا شلون و ازتم حتى فلوس اكل ما عدكم؟ على العموم خوية كومي وياي نضيفج بمضيف الامام الحسين و ان شاءالله الله يحلها

اخذنا الرجال و ودانا لمكان يوزعون بيه اكل، جابلنا ٣ صواني صغار كل صينية بيها صمونه و جبن مثلثات ٢ و بيضة سلك حطاه، كال :- خوية تريدون جاي ؟

سلمان :- اي اي جيب عمي جيب

راح الولد جابلنا كلاصين جاي حار و خلاه كبالنا و كال :- الف عافية ثواب ابو عبدالله من تكملون اقروا الفاتحة

سلمان:- شكرا عمي شكرا

بقينا ناكل بس الولد كام يحجي ويا البصفه ويسأل و يباوعون علينه، خلونا نكمل ريوك و اجو يمنا حجو :- خوية انتم جايين هنا المن

سلمان :- هذا ابوها ارهابي و يريد يكتلنا و اجينا هنا

ندست سلمان و خزرته :- لا عمو مو هيج بس احنا اليوم يجي ابن عمي و ياخذنا

تقرب الولد :- خوية احجيلي الصراحة مال تندسين الولد بعد حجايته الكالها ما مقبوله

ديار :- لا والله عمو ماكو شي احنا منتظرين ابن عمي يجي ويروح

-انت قبل شوية كلتي نريد نعيش هنا ، هسه دكولين اروح و هذا الولد حجه حجاية جبيرة ، انتم منين خوية ؟

-كتلك من بغداد والله ما عدنا شي

-منين من بغداد ؟

-من الدورة

بقى واحد يباوع بوجه اللاخ ، حجه واحد بيهم :- كاظم اني ما مرتاح لهالسالفة خل نبلغ الامن يجون يتصرفون وياهم

ديار :- لا عمو والله هسه نروح بس لا تبلغ والله ما عدنا شي

-اختي ما تروحين هاي انسيها ، احنا كاعدين هزا يا تحجين سالفتج النا يا مضطرين نبلغ الأمن يتصرفون وياكم

جاي نحجي و فات الحجي اللي البارحة خلصنا من المطعم ، من شافنه عرفنا تقرب

سيد حسين :- ها هالمرة شمسوين ؟

حجه الولد :- سيد تعرفهم ؟

السيد :- لا والله بس البارحة تعارك هذا الولد ويا ابو رحمن ابو المطعم و مبين الولد مو تمام طلع ضحايا حرب خطية ليش شصاير

- سيد البنية كالت احنه نريد نعيش هنا و الولد هذا كال ابوها ارهابي و شاردين منه، و هي نكرت كال لا ابن عمي راح يجي وياخذنا

السيد :- شسالفتكم بوية البارحة الولد تعارك ويا الحجي ابو رحمن يريد شغل انتم زوار لو جايين بسالفة احجولنا

اني بقت دموعي تجري خفت حيل و سلمان يخربط بالحجي وياهم ، كالو :- مضطرين نسلمكم لامن العتبة لأن هذا خطر ع العتبة و العتبتين الحسينية و العباسية مهددات بالتفجير و اعذرونا سالفتكم ما ارتاحينالها

اني حجه هيج كمت اتوسل بيه و دموعي تجري و اسامه من شافني هيج كام يبجي ... حط ايده السيد على راسي و كال :- اتهدي بالله بوية و اذكري الله انتم بحمايتي محد يكضكم

بس كعدي ، وينهم ولدنا بطلين ماي على السريع يلا

جابولنا مي و كال :- تهدي بوية اذا جايه شاردة و وراج سالفة احنا خدام ابو عبدالله و حاشى نطرد احد لابد بسده

اني وياج و اعتبريني ابوج و احجيلي بنيتي السالفة كلها حتى اساعدج ..

اطمنت للحجي شوية و جنت مضطرة احجي حتى ابري نفسي و ابري سلمان لان شكوا بينا خاصة لما عرفوا بينا من الدورة ، لان هاي المنطقة هواي راحو بيها ضحايا الطائفية

حجيت السالفة للحجي كلها ...
بدون ما يشوف جناسينا ولا يعرفنا .. جان يباوع لسلمان و كال :- انت سيد بوية مو ؟

بقيت صافنة هذا منين عرف سلمان سيد ؟.....

☆☆☆☆☆

#اتمنى_ان_افعلها

الحلقة_13

لابد ان يشرق الضوء في اخر النفق 💙

........

(ومن يتق الله يجعل له مخرجا و يرزقه من حيث لا يحتسب ومن يتوكل على الله فهو حسبه ان الله بالغ امره قد جعل لكل شيءٍ قدرا )

الثقة بالله ما هي الا حبل نجاة ممدود من السماء الى الارض فتمسكوا بذلك الحبل جيدا ❤

...........

سيد حسين :- اسمعوا بوية چفيلكم العباس اخو زينب انا ذوله الناس لا اعرفهم و لا شايفهم بحياتي
واشر علينا ...
غير مرة وحدة شفتهم بمطعم ابو رحمن يتعاركون وياه و فاككت بيناتهم.

التفت علينا : انا اسمي سيد حسين ابن السيد صادق ابن السيد حسين، اهل كربلة يعرفوني نذرت عمري من ٦٠ سنة لخدمة الأمام الحسين.

(قل لا اسألكم عليه اجرا إلا المودة في القربى ) و الرسول يگول حسينا مني و انا من حسين احب الله من احب الحسين )

وانا حبا و اجرا لرسول الله حبيت ابن بنت نبيه ، شعر راسي شاب بحب الحسين ... ما يوم ملت عن طريقة ولا يوم مليت من خدمته ، وسام شرف اليه بالدنيا و الاخرة خادم للحسين.

البارحة و اني بالطيف، جن جدي حسين اجاني مغضب و اسمعه يصيح (انهض يا سيد حسين ) شلت راسي واذا بجدي حسين جدامي

تريدون الصدك جدي ميت كبل ٩٠ سنة و انا ما ملحك عليه ولا شايفة بس بالطيف جن هو جدي هاذ الكبالي

جن مغضب و متضايك مني وكال : انا شايل بخاطري عليك سيد

كتله : ليش جدي شصاير ؟

كال :- ابني يجي دخيل عدي و ليلتين يبات بيهن ابيتي و هو جوعان و متكدر ليش هيج سيد ما رضيتها اعليك

كتله : وجدي محمد ما ادري عنه

كال :- لا، انت شفته وحجيت ويا وما عاونته وانا شايل بخاطري اعليك.

فزيت من النوم ويا صلاة الفجر ، سألت المرة و كلت الها : يا مره احد جاي لبيتي وما مضيفينا

كالت :- لا والله سيد محد جاي

كتلها :- جا منهو هاذ الجدي يكول عليه ابني و جاي دخيل ونام جوعان ...

تريدون الصدك اني اجيت هنا صليت الفجر جماعة بالامام و نسيت الطيف، هسه من حجتلي هالمرة هاي قصة هاذ الرجال المريض وكالت عنه البارحة بجا يريد اهله و نام جوعان اتذكرت الطيف

التفت عليه :- رجلج سيد بويه مو ؟

ديار :- ما اعرف بس هو عشيرته بالجنسية قريتها حسيني

بعدني هسه حجيت شو ذوله كلهم صاحوا ( اللهم صل على محمد وال محمد ) دخيلك يا ابو عبدالله
وهذا البجا و هذا الشال اديه للكبه و يصرخ :- يا ابو علي دخيلك انا يا ابووووو علي

وناس التمت و ناس تحجي لناس و صارت عيونهم تبجي بجي مو طبيعي ، اباوعلهم :- ذوله شبيهم ؟

واحد منهم كعد بالكاع يبجي من كل گلبه، ومرة كامت تمسح بقميص سلمان و تبجي و تكول :- من بختك سيد

اني صافنه مستغربة ممصدكه كل اللي جاي يصير ، طيف شنو اجاني بالحلم شنو ، بس الصدك والله حصرتني الضحكة وكوة ضامتها بگلبي لان عيب الناس تبجي و اني اضحك ما يصير بس الموقف غريب و هاي العالم لازمه بسلمان و تبوس بيه ..

الرجال يطلع عمرة ب٨٠ سنة وجهه مجعد و لابس عكال و غترة سودة او اهل كربله يسموها (شطفة ) سودة ، حط ايده على جتفي و كال :- ما مصدكه بتي ؟

-لا عمو مصدگه والله

-اسمعي بنيتي زلمتج زلمة مبخوت الله انتشله من الارهابيين الرادو يخلونه انتحاري و جابه هنا و صدكي و ثقي و تذكري حجايتي راح تشوفين وياه خير بعمرج ما راح تشوفين مثله ديري بالج عليه و انا شفتج البارحة تغلطين عليه و ترزلين بيه ما يجوز

ديار:- لا عمو بيناتنا احنه متعودين نغلط هيج هو بالمنطقة احنا نسمي سويج

-يعابيه الله كلمن يعابيه ليش بويه هيج وياه خطية تراه سيد و بخيت و من اهل الله ما يجوز ... بئس الاسم الفسوق بعد الأيمان .. من تنعتين احد بغير اسمه استهزاء هاي بأعتبار طلعتي من الدين كله و صرتي فاسقة لا بوية حرام ما يجوز

-لا حجي والله يعني مو قصد هيج

-لا بتي ما يصير السيد ينغلط عليه ولو هو مو كل سيد سيد بس اكو سادة من اهل الله و بختهم شكبره و اكو الله يهديهم ما نكول غيرها .. بس ما يصير يا بنيتي

هزيت راسي و اني بعدني ما مستوعبه كل الموضوع

رجع حجا وياي رجال واكف هم جبير بالعمر :- بتي هسه انتم ما الكم احد هنا يعني تستقرون ؟

ديار :- عمو هو هددونا و شردنا هنا على اساس ولد عمي يجون بس تأخروا و صارلنا يومين انام بين الحرمين

سيد حسين :- احجيلي البارحة ليش نمتوا جوعانين مو اكو مضيف و ثواب نوزع يومية بثواب الامام الحسين ليش ما اخذتوا

-ما اعرف ما اندل اني بعمري ما زايرة الامام هاي اول مرة

-هلا بيج و كل الهلا ، هو وين اهله ؟

-عموا ابو مات صار سنين و جان عايش ويا مرت ابوه اخذت حقه بالبيت و يومية جانت تكتله بس هو البارحة يبجي عليهم يكول اهلي اريد ارجع

هز راسه الرجال انقهر و اثنين زلم حاظنين سلمان و عيونهم مدمعة .. كام من مكانه و اخذ سلمان لزم ايده و كال :- تشوف ذيج الگبة هذا ابوك الحسين، و هاي الكبة يصير عمك العباس و هذا بيتك و احنا اهلك بوية

يا بختك عد الله من قدر كل هالاقدار و نجاك من الموت وجابك هنا بنصنا ، لا تخاف بوية احنا اهلك و اني عدي بيت ائجره للحملات اللي تجي من الدول زيارة و بالاربعين و زيارة عاشوراء افتحه للزوار مكان استراحة .. راح اخليكم تعيشون ما اريد ايجار منا لما الله يفرجها عليكم و تكدرون تنطوني حق ايجاري

كام رجال كال غرفة نومهم عليه سيد بثواب الامام
ذاك كال براد مي بثواب الامام الحسين
ومرة كالت فراشاتهم عليه بثواب ابو عبد الله ..

بقيت اباوع ، بحلم بعلم حقيقة اللي جاي يصير لو شنو ؟
اسامة واكف بصفي بس صافن مثلي ، دار وجهه عليه :- ديار عود صدك راح ينطونا بيت

-والله ما ادري يا اسامة لهسه ما مصدكة اللي جاي يصير حقيقة

الحقيقة إن كربلاء هي مدينة المعجزات، ربما من يسمع قد لا يصدق أو يعتقد إنها خرافة او اختراع من عقول البشر.

لكن لو جلست و تعايشت مع اهل كربلاء لأستمعت لعشرات القصص المماثلة التي سيرويها لك الكربلائيون بكل يقين و ثقة.

الأرض التي كانت صحراء فتحولت قبلة للعاشقين بمصرع الحسين في الطف يقصدها الملايين بقلوب محبة و عيون مدمعة.

إحصائية سنوية تشير إلى إن أكثر من ٣٠ مليون زائر سنويا يطئ أرض كربلاء لزيارة قبر الامام الحسين.

أكدت الإحصائيات العالمية إن أضخم تجمع سنوي في العالم يحدث في كربلاء، و أعظم مسيرة راجلة عالمية هي مسيرة الأربعين حيث أن الناس تقصد الحسين بن علي مشيًا على الاقدم من مسافات بعيدة.

فإن كانت الكعبة المشرفة قبلة المصلين
فإن قبر الحسين قبلة العاشقين
تهوى اليه أقدام المحبين من كل مكان و في كل حين
ففي الحسين لغز لا يعلمه إلا من تعلق قلبه بحب الحسين.

ديار :- حقيقة جنت ممصدكة كل اللي يصير
اخذونا اني و سلمان و اسامة لبيت يصير قريب من الامام
دخلنا بيه هذا الرجال السيد ..

وكال :- هذا بيتكم بوية تعيشون بيه بالهنا

للبيت جان بسيط عبارة عن غرفة نوم و هول و مطبخ و حمام و كراج بنص البيت الكاع مالته شتايگر
المطبخ بيه طباخ منضدي صغير و ٣ رفوف عليه مواعين
الهول بيه حصير و ٣ مخدات
وغرفة النوم بيها سريرين منفصلات حديد و اكو ديلاب طلاقتين

امشي بالبيت و ما مصدكة لهسه كل اللي جاي يصير
يحجون وياي و يسألوني و اني اصفن و لهناك انتبه يسألون و اكلهم :- ها ها شنو ؟

من كد ما انضرب عقلي بالشيء اللي صار وياي
كعدنا الحجي بالغرفة و كال :- هذا بيتكم بويه وانا من باجر ادور شغل لسيد سلمان يطلع يشتغل و يكد عليكم

اباوع مدري اضحك مدري ابجي
سلمان المرعوص صار سيد سلمان لا و يكومونه بمولاي و يكعدونه بمولاي و سيدنا

هو خطية حيل فرح من شاف الناس اهتمت بيه وكاموا يمدحون بيه طار من الفرح تباوع الوجه ما كامت الضحكة تفارك اسنونه ، جارخ حلكة على اوسع نطاق وهو يضحك

دار وجهه الحجي وحجة :- شلون عقدتو عقد زواجكم ؟

-ديار ما اعرف هو عد بيت عمي ابو امجد دخل علينا شيخ و كالي كولي انت وكيلي و كلت

-تتضايكين لو رجعت عقدت الكم من جديد

-لا عادي

صاح اثنين زلم يعرفهم و كعدنا بالغرفة و عقد النا و كال :- راح اسعى و اشوف شلون اكدر ازوجكم قانونيا بدون حظور ابوج

هزيت راسي (اي) ... طلع

طلعو من البيت و عافونا وحدنا ، اسامة يركض بالبيت يضحك و سلمان نافخ روحه ويكلي :- الوصخة بعد كله تكليلي السيد افتهمتي

اني منا وهيج اسمي السيد سلماااان

ضحكت ، كعدت هيج لحظة اتأمل بيها اللي جاي يصير
تذكرت ( يا سند من لا سند له ) رفعت راسي لربي و كلت :- الحمد لله رب العالمين

صفنت ... يمكن اني بعمري ما مصلية لالله
لا امي بيوم علمتني على صلاة ولا ابوي صلاة كبالي غير لما صار ارهابي

بس هسه صارت عندي رغبة اصلي من صدك و اشكر الله لأن الصار اليوم اللي لحد هسه ما مصدكة بيه ابد ما يخطر على بال بشر

معقوله الله هيج عوضني ؟
بعدني من ابوي و من مستنقعات امي و جابني هنا و انطاني بيت ! يعني هاهية اني استقريت و هذا بيتي ؟!!

دا افكر و سلمان و اسامة يتراكضون بالبيت اندك الباب
ردت اكوم افتحه حجة سلمان :- اني رجال البيت ممنوع المرة تفتح الباب افتهمتي

:- خب دروووح

فتح الباب طلعت مرة جايبتلنا صينية بيها تشريب لحم و ماعونين تمن برياني و زلاطة و فواكه و كالت :- خالة اني جيرانكم هنا شتحتاجين امانة الله ورسوله تكولين احنه نعرف سيد حسين و نقدره و ان شاءالله نصير جورة طيبة

اخذت منها الصينية :- مشكورة خالة الله ينطيج ان شاءالله

حجت :- بعد عمري حبيبتي اعذرينا ترا من غدانا جبتلكم لان وصانا عليكم سيد حسين

-ما تقصرين الله يحفظكم خاله و يحفظ السيد حسين

-هلا بيج حبيبتي شتحتاجين كولي

- ان شاءالله

خلينا الصينية وكعدنا نتغدة اني و اسامة و سلمان ، سمعت صوت الموبايل يرن .. كمت اله .. باوعته رقم امي

رديت :- الو

ميعاد :- وين صرتي لخاطر ربج من البارحة ادك عليج وماكو شصار بيج

-ما ادري بالموبايل بالجنطة ، ليش شكو شصاير

-اني و ابو امجد و امجد جايين عليج بالطريق اسامة يمج و ما تكولين طايحة الحظ حيلي راح عليه عبالي الولد ضاع

- ماما كلت الخالد يكلج

-وخالد شنو ما تعرفين تتصلين و اطمنيني الى متى تبقين شالعة گلبي شلون وياج ؟

-هسه انتم وين ؟

-احنا بالطريق لا تتحركين ابقي بالامام احنا جايين

-احنا مو بالامام

-لعد وين ؟

-لكينا بيت حجي سيد هنا انطانا بيت و كعدنا

- منو هذا ولج ؟

-ما اعرفه سيد يشتغل بالامام

-تحجين صدك انت ؟

-اي والله شبيج قابل اجذب عليج

-ابيش اجرلكم البيت

-عود من تجين نسولف براحتنا

-ماشي يلا

... قفلت الخط منها ، باوعت خالد متصل ٧ مرات
رجعت رمشت عليه لان ما بقى عندي رصيد
بس ما اتصل

تركت الموبايل و گمت انظف بالبيت و اغسل ... سلمان راح جاب من الجيران ماسحة و مكناسة و غسلو وياي هو و اسامة

سمعت الموبايل رن ، رحتله ركض
رديت طلع ابو امجد :- ها يابه احنا بالأمام هسه انتم وين ؟

ديار :- هسه عمو احنا جايين

لبست عباتي و ردت اطلع سلمان ما قبل كال اني اروح، اتصلت بعمو :- عمو انتم وين سلمان يريد يجيكم

-والله بنتي احنا كبال باب القبلة استعجلوا شوية

-ماشي
غلقت الجهاز من ابو امجد كتله :- تلكاهم مقابيل باب القبلة اركض بسرعة ، تندل البيت ؟

-اي اييي اندل

-ديلا روح

راح واني بقيت بالبيت رجعت فرشت الحصيرة ورتبت المخدات حتى يجون يشوفون بيتي نظيف .. طلعت الزبالة برا رتبت الجراجف ع الأسرة

اتصل بيه عمو ابو امجد :- ولج يابه هذا سلمان تيه البيت منين نجيكم

-مو كتله اخ منه ،
لبست العباية و كتله :- ابقى هنا
وطكيتها ركضة بعباتي .. اول ما طلعت فرعنا صاروا كبالي

حضنت امي و سلمت عليها و هي باستني و تحضن بيه مشتاقتلي شلت عنها اثار و سلمت على عمو ابو امجد و على امجد و تمشينا للبيت و هم يسألوني

ابو امجد :- ولج بابا هذه سالفة ما تخش بالعقل شنو حلم شنو انطوكم بيت انت صاحية ؟

-والله عمو هذا الصار واحد حجي يكول جدي اجاني بالحلم على سلمان

-خاف يعرفكم خاف من جماعة اسماعيل والله يابه اني خفت ما مطمن للسالفة

-لا عمو شو احسهم خوش ناس لان الحجي يشتغل بالامام الحسين يعني مو مال ارهابي ويا ابوية وبعد ما ادري هذا كل الصار و كاعد انظف بالبيت اني و سلمان

امجد :- والله يابه مو بعيدة على الله اثنين مثل ديار و سلمان و ضاكت بيهم الدنيا وهم بهالحال ليش الله ما يسوي بيهم معجزة

ابو امجد :- والله يابه ما ادري شلون ما اجيبها ما جاي تخش بعقلي

ميعاد:- هسه شلون و ليش المهم استقروا و كعدوا بلكت هذا الرجال يلكى شغل لسلمان ما كلتيله

ديار :- لا كال راح ادورله شغل و هم كال راح اسعى ازوجكم بالمحكمة بدون حظور والدج

ميعاد:- وين الله بلكي ربي هذا يوكف وياج ويساعدج

... دخلنا للبيت كام ابو امجد يفتر بالبيت و امجد ويفرون براسهم و اثنينهم ما مصدكين

-بيت ينطوكم بس لان شافو بيه حلم

-عمو مو بس هيج تبرعوا بغرفة نوم وبراد مي بثواب الامام و فراشات ..

-شنو السبب

-يكولون سلمان دخيل عد الامام الحسين و الحسين ما يرد دخيله

ميعاد:- من هاي يصيحون دخيل ابو عبدالله اثاري الدخيل اله قيمة هنا

-ماما لو شايفتهم شلون يبجون مدري تضحكين من الصدمة مدري تبجين

امجد :- ليش يبجون ؟

-ما اعرف لزمتني الضحكة والله ولزمولك سلمان ابو راس تبوس

امجد :- هههههههههههه والله يلوك للمرعوص شيريد بعد

-انجب الوصخ احترم نفسك اته ابيتي

امجد :- ههههههههههههه والله عمي خوش انا شكبرني و عليه العتب وكاعدلي بغرفة هالكدها ابيت اهلي ما عدي بيت و انت المرعوص صار عدك بيت

ديار :- هههههههشحدك تكول عنه مرعوص يمعود صار اسمه مولاي و سيد سلمان
صدك اكلك عمو هو من شوكت سلمان سيد شو ما ادري بهالسالفة

ابو امجد :- من زمان ندري بيه و مو بس هو حتى احنا المشاهدة سادة بس احنا ما عدنا تقديس الانساب .. عدنا الانسان هو وعمله سيد مو سيد ما تفرق عدنا بس بالمذهب الجعفري تختلف عدهم مكانه للسادة

ديار :- عمو والله ما شفت اشسوو بسلمان

ابو امجد :- لا تستهزئين بنتي ترا سلمان احنا اهل المنطقة كلنا نعرفه رجال بخيت و من اهل الله صح ما نميزه و نكول عنه سيد بس نعرفه من اهل الله يتيم و مريض شلون ما يصيرله مكان يم الله

ميعاد :- بلكي يا بنتي هيج و بجال سلمان تعيشين بخير و ما تحتاجين لاحد

.....دنحجي اندكت الباب
طلع امجد فتح الباب .. طلع سيد حسين و ابنه
استقبلهم ابو امجد و كعدوا بالاستقبال و اني و امي وكفنا بالباب نستمع الهم

...بقى سيد حسين يسأل ابو امجد على سالفة حرك جسمي و عن وضعي و وضع سلمان ويا اهله و صار يسأله عن ابوه و عمامة

وعرف ان اله حق ابيت ابوه و مرت ابوه ماخذه حقه التفت حجي حسين لسلمان و كالك :- حقك يرجع نحجي ويا مرت ابوك ونخليها تنطيك البيت

سلمان :- لا لا لا لا تدخلون باختي و بحليمة

السيد :- ما تريد حقك ؟

سلمان :- لا ما اريد بيت شنو تريدون اطردون اختي

السيد :- والله يا بوية انت صدك الله باليك بس مبتليك بكلب ابيض بالعافية عليك كل الصار وياك ما ترضى اختك تصفى بالشارع و النعم منك

ابو امجد :- هو ابن منطقتنا و نعرفه من زمان زلمة غيور و صاحب نخوة لو ما شوية سوالفه مو سلمان

ضحك و فتح حلگه طلاقتين

السيد :- لا لا هو خوش زلمة و انا راح ادورله شغل و يشتغل و يكد على عائلته باوع لأسامة هذا اخو البنية مو ؟

ابو امجد :- هذا هم سالفته سالفة والله يا خوية اجا مناك لهنا وكف عقولنا حسبالنا صار بيه شي ما خلينا شارع ما دورناه عليه تالي جلي تابع اخته ما راضي يعوف اخته وحدها

-زلمة عفية عليه ، انت طالب ؟

امجد :- اي والله طالب خطية بس بسبب سوالف ابوه كعدوا

ابو امجد :- خوية تريد الصدك اني من سولفتلي البت و لهسه اني ما مصدك الصار

سيد حسين :- حجي من تجي لكربلاء تصير هاي السوالف عندك عادية احنا بكبر الامام الحسين يومية نشوف المعجزات ..

اسولفلك سالفة و عليه العباس اخو زينب بكل كلمة اكولها الك ... مرة من المرات بالثمانينات جانت علينا ولية و اليقرأ للحسين يكضونه يذبونه بالحبس ولو يموت لو بقدرة الله يطلع

مرة من المرات والدي الله يرحمة ويرحم اهلك

-الله يرحمة

-جان واكف و هو رجال چبير و ينعى الأمام الحسين بليلة عاشوراء ويبجي و الناس ملتمة عليه تحيي الليلة و تبجي

اجا الامن لم الموجدين وصعدهم بسيارة و رادوا ياخذون والدي ، وكف والدي وحك هو العباس ابو فاظل تجى ايده ع السيارة و كال

:- وجدي محمد السيارة ما تتحرك الا تنزلون كل الاعتقلتوهم
يريدون يمشون السيارة يدفعون بيها السيارة وكفت ما تتحرك

نزلوا الاعتقلوهم اشتغلت السيارة ، صعدوهم وكفت الله شاهد .. جان يكضون بوالدي و يكلوله (دخيل بخت جدك سيد اعذرنا ) و يعوفونه و يروحون ولا اخذولهم واحد ولا سجنوا احد كلها كرامات ابوا عبدالله

ابو امجد :- والنعم من الامام الحسين ، والله يا عمي جنه نجي و نزور الامام كبل ونكعد بالامام لا نعرف سني ولا شيعة رب الخلانا هسه لازمين كلوبنا و احنا ندخل كربلاء

السيد:- لا كربلاء امن لا تخاف احنا اهل و اخوة

ابو امجد :- والله عمي اخوة بس هالطائفية الدمرتنا الا بشرفك نتوكف بالسيطرة و نتحاسب احساب الارهابيين والله لان جنسيتي لقبها سني وين صايرة بيا عصر ..
اني داخل محافظة عراقية انذل بجنسيتي

السيد :- لا حشاك من الذلة بس اسألك سوال و عليك بعزيز كلبك تجاوبني

-اي

-من مريت بفرع الامام كم وحدة تفتيش كضتك ؟

-اكثر من وحده هواي

-اكو بيهن وحدة كالتلك طلع جنسيتك منين جاي شنو انت على يا ملة ؟

-لا والله

-دخلت الامام و صليت ؟

-الحمدلله

-اكو احد كالك ليش تصلي مجتف لو احد ادخل بشؤون صلاتك

-لا والله الله شاهد

-بويه السبب مو بينا السبب بالحكومة من تلزم جنسية العراقي و تصنف انت سني و انت شيعي المفروض واجبهم يحفظون الامن بدون ما يفرقون احد عن احد كلها محافظاتنا وكلنا عراقيين بس هاي سووها ويانا فرق تسد وخلو ناس تضرب بناس و باكو الجوانا و الورانا

....بقوا يحجون و تعرفوا على بعض و عمو ابو امجد اخذ موبايل سيد حسين و امنه علينا و بقى يوصي علينا

درت وجهي على امي تهز ايدها بحيرة :- والله يا يمة الله باوعلج بهذوله الناس مدري وين جان الله ضامهم

ديار:- الحمد لله

طلع السيد حسين و سلم على امي و هو مدنك ، اشرت لامي تلف عبايتها زين .. لفتها و سلمت عليه و شكرته على وكفته وياي

هو رحب بيهم و طلع

ابو امجد كعد يحجي وياي : ديري بالج على رجلج و صيري سباعية و احنا عود جنه ناوين نشتريلكم غرفة نوم بس الناس تبرعت الكم و السيد ما قبل كال بثواب الامام غرفتهم واصلة

فبهاي الفلوس راح اروح اشتريلج ثلاجة و نجي اني و امج مو احسن الكم ؟

- تسوي فضل عمو

-يلا ام ديار امشي ويانا، امجد يابه انت اوكف ويا اختك شوفلها نقط الكهرباء شتحتاج شعطلان روح اشتريه و صلحه الها و استعجل حتى نرد لاهلنا الظهر

امجد :- اي يابة ادلل

كام امجد فحص كل نقاط الكهرباء و الاضوية و الشمعات و الما تشتغل فتحها وراح اشترى جدد و شكلهن وبقى يشتغل و سوا واير السحب و اهل المنطقة كاموا يساعدونه

ماما و عمو امجد راحوا اشترولي ثلاجة ام البابين تخبل بيضة .. الفرحة ما وسعت گلبي و اني اشوف صار الي بيت و غراض كامو يجيبون البيتي

امي منها اتبرعت و اشترت الي على درزن درزن مواعين كوس خواشيك قوري ومن هالسوالف ب١٥٠ الف و اجت جابتلياهن ..

وكعدنا اني وياها نرتبهن بالمطبخ ، حجيت وياها :- شحتسوين راح تظلين ابيت عصام ؟

-اي لعد شسوي وين اروح

-تعاي هنا و عيشي وياي هنا و عوفيه

-لا يمه اعوف بغداد شبيه ما اكدر دوامي شغلي ابقي انت هنا و ديري بالج على نفسج

-اسامة لا تخلينة ابالج يبقى يمي

-لا يروح وياي مو بكيفه خل يولي

-يروح يشرد مره لخ ؟ وخاف ذيج المرة الله سترها هالمرة يضيع من صدك عوفيه

-لا خلي يولي انقله هناك و ارجعه لمدرسته

صفنت ... هم رحتي لبيت خالد ؟

-بعدج تسميهم بيت خالد
باوعتلي صفح :- ادري بكلبج يهواه

-هو متزوج و اني متزوجه بعد حتى لو جنت اتحلم هم بعد ما يصير

-اول واتالي خالد يتزوج

-ليش ؟

-مرته نكديه مكفرته عيشته

-بس يحبها

-الحب مو كلشي يمة خاصة النكد يكتل ابو الحب و يخلي الرجال يكوم يدور الراحة بغير بيته

-هي تغار عليه هوايه سمعته متعارك ويا مرته البارحة

-اي ادري

-منو كالج ؟

-رافد

-شنو وين حجيتو

-طلعنا ندور على اسامة اثاري خالد العينتين يعرف مكانه و ما كايلي

-يعني شسولفلج على خالد ؟

-السولفلياه يحبج

انصدمت، توكفت اديه عن الشغل :- منو يحبني ؟

- خالد

-لا خالد ميحبني متعاطف وياي اني اعرف

- ماكو احد متعاطف لهالدرجة ديار ، خالد يحبج بدون ما يدري و اهله كلهم منتبهين لهاي السالفة بس هو ينكر

-لان حجيتله و نخيته هو غيرته ما سمحتله يتركني بس ما اعتقد عنده شيء

-بكيفج .. تجي الايام و تعرفين اذا صدك جان يحبج لو تعاطف .. بس اتذكري اليحب راح يستمر و التعاطف راح ينكطع بمجرد ما تصيرين بخير منها و احكمي

... بقيت صافنة :- معقولة يعني !!
مستحييييل اخر شي ممكن افكر بيه بيوم ان خالد يحبني ..
رجعت سألت ماما :- ورافد ليش سولفلج هالسوالف

-رافد صار محبس بأيدي

-شلون يعني ؟

-يحبني

-بس انت مو تحبين عصام ؟

-زيادة الخير خيييرين يبنيتي

-اكلج يوم لهنا وكافي خيرين شكو لا تخربين سمعتنا كدام بيت ابو رافد و ابو امجد هو ما النا اقارب بيهم حظ غيرهم

-لا و اني امج غلست بس خلي محسيته اني ما ادري و هو يصيرلي خادم بس حتى يثبتلي حبه

-و شتستفادين ؟ ترا اللي تحبينه ضابط و لواء و ما ناقصة شي ليش ما تبطلين سوالفج يوم ترا لعبت نفسي

-اني كتلج حبيته ؟
كتلج صادقته ؟
كتلج انطيته مجال ؟
لا .. كل القصة بعت عليه ثكل على شوية دلع و الا صاير حجل برجلي امشي بيه وين ما اريد

-لو ضاله على ذمة ابوي هواي اشرفلنا هسه كمتي تشتغلين زوجي

-لج ماما اني مو غبيه و اجي اخبط ، بس هاي ام رافد صايرة تسمعني حجي و ادوس بمصراني فمن تريد ادوس زايد اكفخها بأبنها الجبير على حلكها و اسكتها

-ما ادري انت شلون تفكرين بس هالتفكير اني ما احبه

-اكول ظلي بتي ظلي بهذا تفكيرج احسن

هزيت ايدي و بقيت اشتغل سكته
كملنا شغل و تقريبا رتبنا البيت و نظفنا ، اسامة اجا همس بأذني:- ديار راح اروح البد فوك لا تكولين لأحد و اذا سألت عليه ماما كوليلها راح

-ليش ؟

-ما اريد اروح وياها و هي ما تقبل

-معليك اني ما اعوفك تروح لو هسه الدنيا تنكلب

.. رغم حجيته بس هو خوفه بگلبه راح من صدك لبد ساعة هم كاعدين و هو ما مبين

من رادو يروحون امي بقت تصيح على اسامة، دفعتها برا كتلها من تالي جاية تكولين ابني كل عمري اني اربيه و تخذينه ع الحاظر الام الربت مو جلبت و اني امه

ضحكت و كال :- ولج و مدرسته اريد انقله

-انقله لهنا و اخلي يكمل معليج بيه

رضت عافته، التفت عليه ابو امجد :- هاج يابه هاي ٣٠٠ الف مصرف دزهن خالد الج جان ناوي بيهن يعاونج بس من ضيعج ورجع لبغداد انطانياهن و كال اسلمهن الج

-سلملي عليه هواي و اتشكرلي منه

.... بقيت بالبيت و سلمان اخذ اسامة و راحو للامام هتاك يفترون .. فرغ عليه البيت ، كعدت بالكراج

بحلم بعلم اني كاعده و هذا بيتي
جاي افكر بالبيت و خطر على بالي خالد و كلام امي
بقيت افكر بيه، اتذكرت الموبايل ما ادري عنه و اني رمشتله ..اكيد هسه خابر

رحت طلعت الموبايل لكيته متصل ٣ مرات
ورقم غريب متصل .. عرفته هذا رقم ابويه الخابرني منه، تجاهلت لا رديت ولا اتصلت .. بس رمشت لخالد

بسرعة خابر :- الووو

ديار :- هلو خالد شلونك

-لوني مثل لونج شلونج اليوم

-اليوم عال العال

-يا الله اجوج بيت ابو امجد شافولكم بيت

-لا يا بيت ابو امجد

-لعد شكو ؟

...سولفتله السالفة
بقى يكول :- تحجين صدك ؟ ، الله عليج

-اي والله

بقى ساعة ما مصدك بالقصة اخر شي :- الحمدلله عسى ان تكرهوا شيئا و هو خيرا لكم .. عسى يكون سلمان وجه خير عليج و تخلصين من كل شي

-ان شاءالله، صدك خالد اجيت اكلك

-شنو ؟

-مشكور ع ال٣٠٠ الف ما جان اكو داعي و مرتك حامل

-لا تحجين هيج ما بيناتنا شكر و مرتي الله كريم علما تجيب و عندي خير من الله والولادة تسهيل من الله

-ان شاءالله تكوم بالسلامة، هي حامل ببنية لو ولد

-والله اخذت سونار و تكلي ما مبين بعد الله كريم

-انت شتتمنى

-ماكو رجال ما يتمنى الولد بس شيجي من الله رحمة

-ان شاءالله يا ربي يرزقك بالولد الصالح على وكفتك هاي وياي

-عاد كلما نحجي راح تكليلي وكفتك شسويت يربج لا تحجين هيج

- هههه مشكور

-اووو هم كالت مشكور ، اكول روحي روحي احسن

ضحكت:- يلا مع السلامة

-الله وياج بس لا تنسين شتحتاجين لا تترددين و شيصير وياج طمنيني

-ماشي باي

-هلو

..... نهيت الاتصال و تمددت افكر بيه و سرح خيالي و كأني ما متزوجة .. بعدين اندك الباب و دخل سلمان و اسامة

انتبهت على روحي :- اني حرام عليه اسوي هيج اللي جاي اسوي ما يفرق شي عن اللي جانت تسوي امي ، خيانة ..

لازم اخذ وعد على نفسي بعد ما اخابر على خالد و احاول ما اتخيله و اسرح بيه بخيالي

بس هالشي ما صار ..
على الرغم جنت متزوجة يس زواجي من سلمان شكلي لا اكثر داخلي ما بيه اي مشاعر لسلمان هو مثل اخوية بالضبط، مثل ما احب اسامة احب سلمان .. بس اسامة اكثر.

بقيت اسرح بخيالي و اني اتخيل خالد و شكد ما احاول انسى نفسي و ارجع اتخيل ..
بس اخذت وعد ما اتصل بيه
وفعلا ما كمت اتصل الا لما هو يتصل يستفسر علينا

... بهالأيام الناس جابولنا غرفة نوم حلوة النا اني و سلمان .. و جابولنا البراد و الفراشت و الزوالي

و ال٣٠٠ الدزهن الي خالد اشتريت بيهن كاونتر صغير على كدي و سنك .. وصفطت غراضي بيهن

السيد راد يشغل سلمان بالعتبة بس جان امي مدارس يمكن بس صف اول ابتدائي و مبطلينه اهله
فلكاله شغل بمطعم قريب على الامام الحسين
يوميته ٢٥ الف ..
يومية يطلع من الساعة ٥ الصبح يرجع ب٥ العصر
خطية يرجع تعبان يبقى طول اليوم نايم .. ما يكعد الا كم ساعة و يرجع ينام لأن وراه شغل

يجيب اليومية مالته يخليها بيدي و يروح ينام لا يحاسبني لا يكولي وين فلوسي ، حتى اكل لا يطلب ولا يتأمر شكو بالثلاجة يطلع ويا صمونة صغيرة و يكعد ياكل بهدوء بدون ما ادري بيه

..خابرت امي على نقل اسامة بس التفاجئت بيه خالد حاجي ويا امي على رجوعي للمدرسة على رغم المدرسة فاصليني بس منطي فلوس للمدير مرجعني و ماشي بيها و ناقل اوراقي و اوراق اسامة و جابهن لكربلاء ..

.... اندكت الباب ، جنت وحدي بالبيت اسامة ويا سلمان بالشغل .. فتحت الباب خالد كبالي

ارتبكت :- هلو خالد هلو شلونك

-شلونج يابه شنو هالبيت هذا

راد يدخل البيت، شافني ارتبكت :- ها ما مرحب بيه ؟

-لا بالعكس بس سلمان ما موجود بالبيت ، اجيب عباتي و نروح للامام

-يخبله سلمان الوصلني للباب هذا وراي قابل شميت ايدي و اندليت البيت

والله صدك وسلمان يدخل وراه اثاري جان شايل على جتفه اكل النا ومشي اسامة وياه بس اسامة موكع شوية و كاعد يصكع براس اسامة شلون موكع الاكل

فات سلمان و هو يرزل بأسامة .. ناوشني الاكل وهو عصبي عود يأشرلي فوتي جوا

دخلت للمطبخ وراح هو وخالد للاستقبال
باوعت الاكل .. جايب كباب و دجاج شوي

هو يشتغل بمطعم .. و شيزيد هناك ينظفه و يجيبه النا للبيت صمون كباب لحم دجاج اشكال الوان .. حتى نادرا ما اطبخ على كد ما سلمان ينگل النا

اسمع خالد يمدح بسلمان و هذا ينفخ بروحه ويحجيلة اني هيج اشتغل و هيج اجيب و هذا مستلمه :- عفية و عفية

سويت صينية غدا النا و رحت وديتها للاستقبال ، كام خالد من مكانه ياخذ الصينية من ايدي :- يابه شنو هالزحمة هاي

-رحمة يمعود هلا بيك

باوعلي وضحك :- شفتي مو هذا الزواج البجيتي دم ما تريدين تتزوجين ؟ شفتي الله شكاتبلج ؟

ابتسمت :- الحمدلله رب العالمين جان اختياره الي احسن من اللي اني اختاره لنفسي، شعدنا غير سلمان يابه

سلمان ضحك و كام حضني و باسني كدام خالد
كام يضحك :- هههههههههه لك سويج مو هنا تحضنها يربك لا كدامي

كمت ادفع بسلمان وهو واكع بوس بخدي ويكلها :- اخبها هاي مرتي مرتي هاي

خالد :- الله يديمها عليكم

ديار:- اكعد عيب خلي الرجال يتغدا ، اسامه روح جيب مي من الثلاجة

كعدنا ناكل
سلمان :- اكل اكل تره هذا اني جايبه الاكل

خالد :- عاشت ايدك

دنك ياكل ورجع كاله :- طيب الكل خالد مو اني جبته

خالد :- اي اي طيب عاشت ايدك

رجع باوعلي :- ها ديار طيب

-اي اكل
خزرته

رجع باوع لاسامة :- ولو اته ما تستاهل تاكل بس يلا اكل يالجايف

اندار لخالد :- ها طيب الاكل الجبته ؟

خالد طكها ضحكه :- ولك ابن الخوش مرة جايب اكل انت لو مان علينا مو وكف بزردومنا شجاك

كمنا نضحك .. وعود تاب كل شوي و عاده طيب الكل الاني جبته ؟

خلصت الغدا صبيت جاي و فتح خالد الموضوع ويا سلمان و كاله :- خلي ديار ترجع للمدرسة و هاي نقلت اوراقها مناك و جاي هنا

سلمان ما عارض كاله :- اي اي اني اريد تصير دكتورة حتى تعالج رجلي

خالد:- ان شاءالله تتعالج رجلك و تكوم تمشي بطولك

ديار:- بس فاتتني كل الدروس و هذا ثالث صعب شلون راح اقرأ

-ديار لا تكولين شي صعب .. الصعب خلي كدامج اقري وسوي صعب .. انت كاعدة بالبيت بدل ما باقيه تروحين منا و ترجعين منا اقري

-مو اني جنت مفكرة السنة تجي ارجع

-لا صارتلج فرصة هسه ترجعين استغليها ..

.... بقى يسولف وياي و يحجي و اني سرحت راح بالي بعيد .. وكام خيالي يجرخ هو كاعد و استكان الجاي كباله كدامه و يحجي و اني صافنه بيه

شال راسه باوعلي ، شافني مركزة بوجهه .. ابتسم
كمت من مكاني ورحت للمطبخ

بعدها كام راح ويا سلمان و اسامه للامام
واني بقيت بالبيت ..
عقلي انضرب بيه