#حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_3

رحت للكمبيوتر مال احمد اخويه.. بحثت بيه شنو يعني غشاء بكاره وشلون تنأخذ..

بعدين بحثت ..هل العاده السريه تؤثر علغشاء.. طلعت انو ممكن لو استخدمتي يدك او شي صلب وطلع دم فهذا معنى انو انفضت البكاره ..

بقيت مصدومه واني اقره.. اتذكر هيج شي.. اتذكر سويت ونزل دم يعني اني هسه مو باكر..

معقوله.. لا لا لا.. ياربي اشلون اعرف هسه اني باكر لو لا.. متت من الخوف.. يا شسوي..

بقيت اليوم كله مشغوله واروح منا واجي منا.. وقريت بالنت هم طلعلي.. شلون كم بنت انقتلت لان بيوم العرس طلعت مو باكر..

قريت هوايه قصص بهلموضوع.. وتعرفت عليه كولش زين.. متت خووووف.. اللهي رحمتك..

رحت توضيت ومديت السجاده وبقيت ابجي.. فدوه يارب كون اطلع باكر.. وملاعبه بنفسي.. ربي احميني..

بقيت ابجي وادعي.. يارب مصيبه ووكعت على راسي.. شلون اعرف اني هيج لو لــNOـا .. متت من التفكير لحد ما نمت الساعه 3..

كعدت ثاني يوم ب6..مشبعانه نوم.. وعيوني وارمه.. بدلت ورحت لدوامي.. واحس الدنيا ضلمه بعيني..

كلت لازم اتأكد من موضوعي.. .. اعرف صديقه عندي طالبة طب.. . كتلها.. علموضوع..

وخطيه حيل ضاجت علمودي.. كتلها شلون اعرف دبريني.. كالتلي.. بنت عمي.. دكتوره نسائيه تعالي نروحلها..

كتلها عياده ما اكدر اخاف.. كالت لا لج لبيتها اخذج.. كتلها لحظه اخابر ماما.. خابرت ماما.. كتلها يوووم حتأخر..

عندي كومه محاضرات ويمكن اتأخر لل3..كالت وشلون ترجعين.. كتلها فد مشكله يا ماما منا فورتات وارجع..

كالت ماشي بس حاولي لا تتأخرين هوايه.. كتلها ٱפگـيہ.. مشيت ويه زميلتي رحاب اسمها..

وصلنه لبيت بنت عمها.. دكتوره وزوجها مهندس.. رحب بينه وقدمتلنه العصير.. وكعدت تسولف..

ندست رحاب.. كالتلها سماره جايتج بموضوع.. كالتلها تفضلي..كالتها هذي زميلتي.. واكعه بمشكله..

واريدج تساعدينه ..كالتلها اذا اكدر ليش لا.. كالتلها من جانت صغيره وعمرها.. 13 سنه ..صديقتها لاعبه بعقلها..

ومعلمتها على العاده السريه.. ومعلمتها الطريقه.. وسمر ما تعرفها ولا تعرف حرامها وتأثيراتها..

وهسه عرفت وخافت لا انوب تطلع مو باكر.. كالت اووف هوايه بنات ديجون من وره هلمشكله..

وانوب اهلهم يكتلوهم موت.. عبالهم لاعبه ويه واحد.. كالتلها اي والله الله يستر على بناتنا..

كالت كومي جوه دا افحصج.. دخلت وياها.. اتمددت علسرير وكشفت عليه.. كالت كومي.. كتلها فدوه كولي شنو.

هزت براسها.. كالت ماكو اي غشاء رايح.. منفض من زمان.. كتلها وهسه شلون فدوه دكتوره دبريني والله يقتلوني..

كالت شسويلج حبيبي الله يكون بعونج.. حاولي تصارحين امج.. كتلها لا لا غير تموتني.. اخاف منها..

بقيت ابجي لا يا الله ما اصدك اني اسوي هيج بروحي.. شلون هيج سويت.. اووف يمه شهلمصيبه

ياربي شلون والله اموت.. بقيت ابجي ومخليه اديه على راسي وكاعده علكرسي .. بقت تسكت بيه رحاب.. رفعت راسي الها و كتلها فهميني شلون…

كالت اكو عمليه اسمها ترقيع جربيها.. وتسويلجياها سماره.. كتلها شنو هذا.. كالت ترجعج باكر من جديد..

كتلها بنج عام.. كالت اي.. كتلها ما اكدر اهلي شلون.. كالت يوم واحد لا اداومين.. كتلها ما اكدر اخاف اخاف..

اخذت جنطتي وطلعت.. بقيت ابجي.. دخلت عيوني مورمه من البجي.. كالت شبيج ولج ليش تبجين.. كتلها وكعت وتأذت ايدي..

كالت دروحي اصعدي عبالي فد شي.. عفتها وصعدت.. دخلت للحمام شغلت المي وكعدت جواه ابجي.. يارب انقذني..

رجعت لغرفتي.. لفيت راسي ونمت.. بقيت ايام على هلحاله.. بس ابجي..

اخر شي قررت ما اتزوج.. واهتم بدراستي فقط.. و  ذبيت حيلي بالدراسه.. وما اباوع لاي احد..

حتى اركان انقطعت عنه.. بس اشتاقله.. هوه اول حب الي وتعودت عليه.. يخابر.. ويردون اهلي.. يسلمون عليه.. بس ميسئلهم عليه..

اخر شي هوه اجانه للبيت.. مر سلم ..سأل عني.. امي كالتله فوك نايمه.. كاللهم.. صيحوها اريد اسلم عليها..

اجتني امي.. كومي وعيب.. كتلها ما اريد.. جبرتني انزل.. شافني.. ابتسم وسلم.. وهمس بأذني ليش هيج بذاته..

سكتت.. لو يدري بحالي.. اوووف .. كالت ماما كومي سمر.. سويله الغدا.. كمت حضرتله الاكل وخليت الصينيه.. كدامه وهوه يباوع لعيوني..

كعدت كباله.. كامت ماما راحت .. كال شنو الموضوع ليش هيج هاملتني.. كتله دراسه متعبتني وهاي اخر ايام الامتحانات ما اريد التهي..

كال يعني لو رفعتي خط وبس سلمتي.. ياخذ من وقتج.. سكت.. كال شبيج.. تره والله رايدج.. كتله اجّل هلموضوع ما اريد اسمعه..

كال متردين تسمعيه.. وانتي اللي خابصتني بعد الزواج هيج نسوي وبعد الزواج هيج نجيب..

كتله اركان دخيلك والله تعبانه.. كال فهميني امرج شنو تره انه هم دخت.. كتله كتلك دراسه يا اركان..
تره دراستي صعبه وشاله عقلي.. وشاغله تفكيري.. ومتعبه نفسيتي.. كال ماشي.. اخليج ترتاحين..

ولو ارتاحيتي.. عود ذكريني.. هزيتله راسي اي.. كام.. وصاح.. ام

احممممممد.. يله خويه من رخصتكم..

كالتله وين توّك اجيت.. كالها لا. والله عندي شغل ومريت اسلم واشوفكم.. كالتله كل الهلا بيك خويه.. زارتنه البركه..

سلم وراح.. واجت عليه امي.. كالت شعدج ويه اركان.. عقدت الها حاجبي.. كتلها شعندي..

كالت صار ساعه تتبسبسون جوه.. وحتى ما كمل غداه.. وكام وراح.. كتلها ماكو شي.. كالت بيناتكم شي.. سمر باوعيلي..

كتلها لا ماكو.. كالت واذا اكو اقطعي ولا تفكري بأركان نهائي.. كتلها ليش.. كالت خوالي واعرفهم..
عدهم حكم علمره.. وكل نسوانهم مبوشات وما الهن اي راي.. كتلها.. بس اركان مو مثلهم.. كالت لا اتعس..

هذا دارس حوزه.. يعني تعرفين كمية التعقيد الشايلها شنو.. وانتي ما تتحملين عيشته..

كتلها علعموم لا اركان ولا غير اركان.. اني ممقرره اتزوج ابد.. كالت مو بكيفج.. اني متانيتج تخلصين هلسنه..

واحجي ويه ابوج بزواجج.. هواي جاي يتقدمولج وقسمه احسن من الثانيه.. لشوكت نبقى ننطي رفض.. لحد متعنسين..!!

كتلها شنو اعنس شنو زواج ..ماما شبيج.. اني دراستي ممخلصتها تحجين من كل عقلج.. كالت تخلصين يم رجلج..

كتلها هوه منو.. كالت اللي نوافق عليه ونشوفه يناسبج.. كتلها ماما لا تجننيني.. ما اريد اتزوج هيه كوه..

كالت مو بكيفج.. شنو تبورين عدي.. روحي خلصي دراستج ابيج رجلج.. كتلها شنو ثقلت عليج لكمتي..

كالت لا.. بس اليوم تجيج فرص زواج زينه باجر يمكن ما تحصلين مثلها.. كتلها شجاي تحجين.. اتخرج والله كريم.. ما اريد هلموضوع ينفتح..

كالت يا غبره الرجال مايحب المتخرجه التفتهم اكثر منه.. باوعتلها بإستغراب.. كتلها ماما انتي وين عايشه..

كالت بالعراق وهاي اطباعنه.. الرجال لازم احسن من المره بكولشي.. يله تنسعد حياتهم..

باعينه اني وابوج.. ابوج ضابط جيش وواصل ومكمل.. واني خريجة متوسطه وعلى كد نياتي.. شفتي شلون متفاهمين ومتراهمين..

كتلها عود انتي تحجي من كل عقلج.. كالت اكلي تبن ولا تراددين.. تخلصين امتحاناتج.. واحاجي ابوج بموضوع زواجج..

كتلها ما اوافق والله.. كالت سمر باوعيلي.. مخبصتلج وي واحد انتي.. فتحت عيني كتلها ماما شجاي تحجين شبيييييج..

لو ما مربيتني بأيدج.. كالت لعد ليش خايفه من الزواج.. كتلها الله اكبر.. حياتي واني حره..

كالت والله اخلي احمد اخوج يتصرف وياج وتعرفين شلون مخبل هذا وشكوكي.. بس اكله ما تريد تتزوج يكوم عليج..

كتلها والمطلوب هسه.. كالت كملي امتحاناتج.. ونحجي.. صعدت شايطه من الغضب.. دخلت الغرفه شمرت كل كتبي..

يرربي شهلورطه هاي شلون راح اتزوج شلوووون ..اووووف ربي ساعدني دخيلك.. بعد ما اتحمل..

الله ياخذني ..الله يموتني واخلص.. وبقيت ابجي..

بقيت افكر بحجي امي.. بس لا صدك تريد تزوجني اووووف عونك.. ضليت افكر.. اكول لاركان.. لو لا..

اذا كتله يتفهمني.. راح يساعدني ويساندني لو يعوفني.. بس شلون احجيها ياربي يخجل هلموضوع..

هزيت راسي.. ما اريد افكر بأي احد.. اريد اقره وبس.. بقيت اقره اقره.. لحد ما اجت الامتحانات هلكت نفسي بالقرايه..

حتى اخلص من التفكير.. مرت الايام وخلصت دراسه..

خابرت اركان.. ردت اجس نبضه بالموضوع شيكول.. الووو

اركان.. الوووات يلثكيله.. شلونج..

سمر.. هَــْـِْـْْـِلاّ اركان.. تمام.. انته اشونك..

اركان.. بخير.. دامج بخير.. مشتاق..

سمر ..اني اكثر والله بس شسوي..

اركان.. اي شكو ماكو..

سمر.. ماكو.. غير امي تريد تتزوجني..

اركان.. يعني اتقدملج..

سمر.. شتتقدملي.. تكولي شيلي اركان من راسج.. ميناسبج..

اركان.. و عود ليش ما اناسبج بلا..

سمر.. تكولي خوالي مو مثل اطباعنه.. عدكم حكم علمره.. وتعقيد زايد..

اركان.. ها جا شتريد امج.. نديحج.. غير نستر عليج.. ونحترمج..

سمر.. ما اعرف اركان ما اعرف.. اني هم تعبت من التفكير.. عوفها يم الله..

اركان.. انشالله.. والنعم بلله..

سمر.. اركان..

اركان.. عيونه..

سمر.. سالمه عيونك.. لا بس اليوم شفت موقف هزني.. ودا اسألك بخصوصه..

اركان.. شنو الموضوع..

سمر.. بنيه عروس  خطيه قتلوها.. بعدني ممكمله كلامي.. كال شوف شلاعبه.. اكيد طلعت مو بنيه وكتلوها..

كتله ليش هيج توقعت.. كال هيه التنكتل ليلة عرسها.. يعني غسل عار مو باكر طلعت..

كتله يمكن مغلطانه ويه شخص.. يمكن فقدت عذريتها.. غصب عنها او بجهل.. ومتعرف..

كال وين اكو هيج شي شبيج.. وهيه حتى اللي تلكيها مو باكر.. اكيد راح تنكر وتسويلها سالفه علمود واطلع ادموع التماسيح و تبري نفسها..

كتله خلي نفسك بهلموقف.. لو اتزوجتني وطلعت مو باكر شتسوي.. كال اسكتي لتحجين هيج..

كتله جاوب.. كال ما احب افكر بهلاحتمال.. كتله يعني تقتلني.. كال اهوووو يعني مخابره بعد كل هلمده علمود تحجين بهسوالف التعبانه..

سمر شبيج.. تره شايفه نفسج تصرفاتج صايره غريبه.. كتله بس ردت اعرف جواب منك تقبل لو متقبل بهيج مره.. كال لا طبعا ما اقبل..

اذا كلش كلش عقلت وصرت ادمي وما كتلتها ارجعها بنفس اليوم لاهلها..

واخلص منها..

ما تحملت كلامه هذا.. سديت الخط بسرعه.. يالله شسويت بروحي.. وهاي حب حياتي.. ضيعته.. شسوي يربي

وامي قافله الا اتزوج.. ساعدني.. دنكت كمت ابجي بحركه من وراه اخطائي وجهلي..ضيعت نفسي..

قررت انهي علاقتي بأركان.. عرفت شنو عقليته.. ومراح يتحمل اللي اني بيه..

وره ايام.. امي فتحت سالفة زواجي.. وعددتلي هذا رايدج وهذا خاطبج.. وهذا ميت عليج.. كتلها اي مو اني الاميره ديانا..

كالت يمه البنيه لو كثرت خواطيبها بارت.. كتلها يمه ما اريد اتزوج كوووه خو مو كوه.. كالت مستحيل هذا حجي قنعي روحج بيه..

تتزوجين.. هواي فرص جاي نرفضها.. يمكن باجر ما تجيج مثلها.. كتلها وعساها لاتجي..

كالت صوجي احجي وياج.. اني حجيي ويه ابوج.. وره كم يوم.. اجت عمتي.. كعدت يمها وسلمت.. سألتني خلصتي دراسه..

كتلها.. اي انشالله بس سنه وحده.. كالت صايره شحلاتج جنج تفاح.. ضحكت كتلها شكرا..

كمت للمطبخ.. دا اسوي بالعشا.. واكفه اكلي كباب عروك.. وما احس الا واحد يكرصني.. ويسوي بوسه ام الصوت بالهوا..

ويكول ايواااا دا استمرررري ويحرك بيده دائره.. يقلد تامر حسني .. ضحكت.. كتله عادل ولا تجوز من سوالفك..

جان احتركت.. ضحك.. كال شلونج.. كتله زينه.. شنو جاي ويه عمه.. كال اي جنتي نايمه فوك..

كتله من شوكت اجيتو لعد.. كال من وره الضهر.. كتله حييل ولا ادري.. كال ردت اصعدلج.. كالو عوفها..

كتله لعد وين رنا ليش مأجت.. كال معزومه ويه خطيبها.. كتله هاا.. دنحجي طب بكر. كال السلام عليكم..

رديت وعليكم السلام.. شلونك بكر.. كال بخير.. وطب للغرفه.. جريت عادل من قميصه..

كتله هذا اخوك ليش ما ينهضم.. كال غير احجاره عقده شيهضمه.. ههههه كتله لا عاب حلكك..

كلكم سبورتيه هوه عليمن.. كال على ابو لهب خخخخخخ.. ضحكت.. ههههه يجوز صدوك..

كتله اي ما سولف ماكو منا منا.. كال كولشي ماكو.. صحرا.. وحده وطارت.. كتله ليش طارت..

كال امي ما تريدها.. كتله ليش.. يكول مو من عدنه.. كتله اهوو وشنو يعني.. كلنه دين واحد..

كال هاي قفلت متقبل.. واني هم سديت السالفه.. كتله صر عليها وانته تاخذها.. كال اخذها واخسر اهلي شنو الفايده..

كتله الله ينضرلك.. احجي وياها وهوه كل شوي ماد ايده وماخذ كبابايه من الماعون وياكل.. اخر شي ضربته بالخاشوكه..

اي دكافييي خلصته.. شنو مسويته بس الكرشك.. كال خره باهلج ولج الخلشوكه حاره حركتيني..

كتله يااا سوده عليه.. تعال دا اغسلها الك.. ضحك وكال اي اي غسليليها تحركني.. وكعد يبجي مثل صوت الاطفال..

كتله يبووو سوده عليه.. وليدي حبيبي لتبجي.. غسلت ايده وشلت مي وشمرته بوجها.. ضحك كال خره بهلج.  لو تحركيني لو تبلليني..

تعاي لعد.. اخذ كلاص مي.. واني صرخت لا لا عادل فدوه لا.. انحصرت يم الكاونتر.. ومخليه اديه على راسي.. وهوه

مخلي الكلاص فوك راسي.. ويكول هااا اشمر.. كتله لا لا فدوه.. صاح بكر عاااااادل… نزلت اديه وباوعنه اثنينه..

كاله لا تزعطط وعوفك من هلشقه الجايف.. كاله وانته شلك علاقه.. كاله.. حجيت وياك.. كتلك عوف الشقه.. وخنزر..

اني عفتهم.. ورحت للطاوه الكباب كله محترك.. اشررد والله لو تشوفه ماما😥.. طلعته بساع وشمرته بزباله..

كملت العشا.. اجت ماما.. يمي تساعدني.. سوينه كولشي ومدينه السفره.. كلنه كعدنه حواليها.. زوج عمتي..

وولد عمتي بكر وعادل واخواني واهلي.. كمت جبت الخبز وزعته انوب قواطي الببسي..

جنه مسوين دجاج شوي وكباب.. وبتيته فنكر.. ومقبلات.. خيرات الله كلها..

كعدت اخر وحده.. كالت عمتي تعاي هنا يمي.. كعدت يمها.. وبكر بصفي.. بس بزاوية السفره..

وعادل كبالي.. يحجي هواااي. هههه.. انوب يشكيلهم.. يكولهم حركتني.. علمود هاي ويشيل بالكبابايه..

كاله بكر كافي لصم.. ميصير حجي علاكل.. كاله على عنادك.. هاج سمورتي.. ويشيل الكبابيه وينطيني ياها.. كتله ما اريد..

كال فتحي حلكج بداعتييييي.. ضحكت.. اخذتها واكلتها.. خنزر بكر.. استغفر الله هذا شبيه.. منو يمه..

دنكت.. اكل.. كال دايمه.. كام.. وهمس ستري روحج.. ويأشر.. لصدري.. نازله الحجاب وثوبي نازل بالكعده..

بساع عدلت نفسي.. وكمت من الاكل خجلت.. رحت دا اغسل علمغسله لكيته واكف يغسل.. عفته ردت امشي صاح وراي … يتبع

🌺🌺🌺🌺

#حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_4

كمت من الاكل.. رحت.. جاي اغسل.. لكيت بكر علمغسله.. خفت اغسل مدري استحيت ما اعرف..

تراجعت.. ردت اروح للمطبخ اغسل.. صاح ورايه بكر.. درتله وجهي.. كال تعاي غسلي كملت.. كتله لا عادي.. اروح للمطبخ..

رحت للسنك غسلت.. رجع اجه يمي.. كال عدكم عود اسنان.. صفنت بوجها.. كتله هااا..

كال شبيج.. عود اسنان.. كوه تستلمين.. دا اطلعله يهز بيده وكال استغفر الله.. انطيته.. اخذه من ايدي ومشه ..خررب هذا شبيه.. هوه حظي ويامن كعد بقت عليك..

سويت الجاي.. ورحت وديته يمهم.. دنحجي ..حجت عمتي ويه ابويه بصوت واضح.. كلنه انتبهنه.. .. والله يا عزيز.. اني جايتكم اليوم وداكه بابك..

كالها تفضلي.. كالتله اني سمعت تريد تزوج سمر.. وانه من هيه وزغيره.. احبها ومخليه.. عيني عليها واريدها لواحد من ولدي..

واني هسـnowــہہ اريدها لعادل.. لان بكر مو ناوي يتزوج. واني اريدلي جنه بالبيت.. تملي عليه البيت

كاللها ابويه..  بس هيه تدرس.. كالتله اي شكو بيها تخلص دراسه ما عدنه اشكاال..

ردت اكووم استحيت.. كالت لا عمه كعدي اري اشوف رأيج.. اباوع لعادل.. دنك.. ومشال راسه.. خجلت ابقى.. عفتهم وطلعت..

بقو همه يحجون.. ياربي وقتها.. انوب من عادل.. حاسبته اخويه شلون هيج.. اروح اتفشل وياها بسالفتي..

اوووف ياربي هووواك.. ساعدني.. كعدت بغرفتي.. لشوي حسيتهم طلعو.. نزلت اغسل المواعين..

كالت امي سمعتي لو لــNOـا.. باوعتلها.. ها.. كالتلي.. عمتج رايدتج لعادل.. كتلها.. يوم ما افكر بزواج..

كالت لا تفكرين.. بعادل.. الجاي احسن منه.. كتلها لا عادل ولا غيره ما اريد.. كالتي ابن ام روده.. بالوزاره يشتغل..

ورايدج.. كتلها.. يوووم.. كالت وسممم.. توافقين.. غصب.. كافي.. كله رفض رفض رفض.. كتلها كاعده علكلبج..

اجه بابا كاللها لا تضايقيها ام احمد.. على راحتها.. تفكر وترد جواب.. كملت غسل رحت لغرفتي..

افكر افكر.. ياربي حبكت الا اتزوج.. شلون بلله وسالفتي شيفضها.. انفضح واموت غير..

اكتل روحي شلووون. بقيت الليل كله ولا نمت ولا غفت عيني.. كعدت الصبح..

عيوني وارمه.. راسي دايخ.. اخذت الفون.. شفته.. 8 اتصالات من اركان.. شمرته.. وكعدت صافنه.. افكر..

قطع افكاري اخويه احمد.. وهوه يصيح.. سمررررررر.. صحت.. هااا.. كال تعاي دوريلي تك هذا حذائي شو ماكو..

كعدت ادور بغرفته.. لكيته جوه الجربايه.. لبس وطلع.. كعدت عله سريره.. ياربي شلون بلوه شلون راح اخلص..

احس هم وكاتم على انفاسي.. شلون هيج غلطت وضيعت نفسي.. رجعت افكر.. من جهه عادل اسبورتي..

وابن عمتي.. والي وياه ميانه.. يا ترى يكدر يتفهمني لو حجيتله الحقيقه.. اي اخذ ابن عمتي احسن..

بلكت يستر عليه.. لان زوج عمتي هم مو غريب.. يصير ابن عم بابا.. يعني عائله وحده.. اكيد راح يتفهمني..

راح يتفهمني لو لا.. واذا عصب وتخبل وما صدكني شلون.. لا عادل اعرفه.. سبور فد مره ما عنده عقليه متخلفه..

لو بكر جان كلت لا بس عادل اعرف تفكيره.. اعتقد.. يتفهم.. بقى صراع براسي بسبب هلشي اقبل لو لا ..اقبل لو لا

اجت ماما.. كالو شنو مافكرتي.. تره اني ارد جواب موافقه والله.. كتلها عله منو.. كالت على ابن مرويده..

كتلها لا عادل احسن.. شنو عادل.. حتى وضيفه ماعنده عطال بطال.. كتلها ماما.. عادل اعرفه.. والاعرفه.. احسن من الما اعرفه..

كالت وعادل شعنده.. كتله عنده اخلاق تكفيني.. شسوي بالباقي.. كالت هاي اخر قرارج..

كتلها لو تبقى عليه ما اوافق.. بس غير انتي.. كالت هاهيه.. راح ابلغ ابوج.. واشوف..

وره ايام.. كالت خابرت عمتج.. وانطيتها الموافقه.. وكالت جايتكم باجر يتفقون علخطبه..

كتلها بهسرعه.. كالت اي خير البر عاجلو.. سكتت.. كتله يمك ربي..

بهلفتره.. اركان.. تعب يتصل.. واني ما ارد..

ثاني يوم اجت عمتي واجه عادل.. بس عادل مو ذاكه وجه اليضحك ويايه وينكت.. يمكن خجلان ما اعرف.. واني هم خجلانه منه.. لان اعتبره اخويه..

اباوعله.. ولا شال عينه عليه.. ولا جن ذاك اليوم الازمني ويضحك ويايه.. مشاعر الخجل والخوف.. اتمالكتني.. بقو يسولفون علحاظر والغايب..

عادل ساكت ومنزل راسه.. اني بره بالمطبخ مدخلت بس اباوعله من باب الصاله.. بكر مو وياهم.. مجاي..

اتفقو على كولشي.. واني غلقت فوني علتمام.. لحتى ليتصل اركان.. شكوله وافقت على غيرك.. يتخبل غيير..

وما اكدر اكوله ليش انجبرت اتركك.. واوافق علغيرك.. ادري اركان.. ما يكدر يتحمل سالفتي..

عسى ولعل عادل يتفهمني.. وهوه ابوه ابن عمنه وهوه ابن عمتي يعني صلة مقاربه.. راح يتفهمني.. اي يتفهمني.. بس ما اعرف شبيه..

وليش ما اجه تشاقه ويايه مثل كل مره وضحك.. معقوله خجلان.. اللي اعرف عادل جريئ ما عنده خجل.. اوف يمكن هلموقف غير..

رحنا اشترينا الذهب اني وماما وعمتي.. عادل مقبل يجي.. كالت عنده شغل.. وهوه عطال بطال.. ما اعرف يمكن صدوك عنده شغل..

اجت يوم الخطوبه.. ك

عدت الصبح.. الساعه 5 قبل الكل.. طلعت بالطرمه.. فتحت اديه واني اتنفس هوا الصبح..

وارتل اية @والصبح اذا تنفس@ بقيت اكرر بيها واني استنشق الهوا.. يارب عليك توكل فأكلني

رجعت كعدت علمرجوحه.. اللي بالحديقه. وافكر.. شراح يصير بيه.. راح يتفهموني.. راح يرحموني..

شلون لو ما صدكوني.. وقتلوني.. اوووف ربي اريد اخلص من هلافكار.. الله يلعني شسويت بحالي..

بقيت افكر ودموعي تنزل علرواء.. طلعت امي.. كالت هاي شمكعدج من الصبح.. التفتت الها.. كالت جاي تبجين..

اتقدمت يمي.. كالت شبيج.. كتلها ماما ما اريد اتزوج.. كالت تنسعدين لتخافين.. كلنه جنه خايفين لما انخطبنه بعدين اتعودنه..

كتلها.. ماما مجاي تفتهميني.. كال شفتهم بنتي دطبي تره ورانه كومه شغل كومي دكومي..

عافتني وطبت جوه.. باوعت للسما.. وكتله وحدك تعلم الحال.. ساعدني.. كمت طبيت وراها..

تنضيفات بسيطه وريوك.. لشوي اجو. خوالي اللي بالنجف.. اني سلمت عليهم وطلعت بساع..

اشوف وجه اركان يسأل بوجوهم.. ليش اتزوجت.. ردت اتهرب منه.. رغم حبي اله.. عفت ومشيت للصالون..

عدلتني ام الصالون ومكيجتني.. اباوع لشكلي حلوه صرت بس مو فرحانه.. اي فرحة خطبه ماكو..

جانت خالتي جايه ويايه.. للصالون.. خابرت علاخويه اجه رجعنه للبيت.. دخلت اشتغلت الهلاهل والصفكات والهوسات..

جنت ابتسم ابتسامه كذبيه.. ما اعرف اذا هذا الزواج.. راح يكون خلاصي.. او حكم اعدامي..

كعدت.. جانت بدلتي حمره.. جدا نازكه مابيها شغل هوايه.. كولش حلوه ..لشوي.. كالو اجو.. دخلو الرياجيل للاستقبال..

والنسوان اجت يمي.. كعدو قدمولهم عصير وبيبسي.. كالو كومو دنعقدلهم.. لبستني ماما الكاب مال البدله ومشيت..

دخلت عادل كاعد.. بس هلكد صاير حلو.. ههه بس ابد مباوعلي.. كعدت بقى الشيخ يردد العقد..

حجه ويايه وكال اجعليني وكيلج.. كتله رضيت بك وكيل لي.. ردد العقد ويه عادل وعادل انطه الموافقه..

واشتغلت الهلاهل. والهوسات.. اترخص الشيخ وكام.. كال عادل شال عينه على امه ها خلصت اروح.. امه خزرته..

كالتله لا تعال بعد لبسها النيشان.. استغربت ليش هيج يتصرف.. كعد لبسني الذهب والحلقه والساعه وكولشي..

وهوه يلبسني.. حتى مباوعلي وكالي حلوه لو لا او ولو نضره زغيره لعيوني.. همست عادل شبيك..

شال راسه كال شبيه.. كتله مو على بعضك.. دا احسك غريب مو ذاك عادل الاعرفه ودوم اضحك وياه..

كال لا ماكو شي بس شوي دخت.. تعرفين هوسة الخطبه والناس.. كتله حقك اني هم دخت..

كملت الخطبه.. راحو وهوه بس هلكلمات كالها ماحجه بعد ابد.. يمكن صدوك تعبان..

بدلت البدله ومسحت مكياجي.. ورحت الغرفتي مختنكه.. بس اريد ابجي.. ما اعرف ما احس بسعاده او طعم الفرح..

كلها تركص وتغني واني كلبي يبجي.. وحته عادل محاول يحجي ويايه كلمه وحده.. يريح بيها نفسيتي..

بقيت ابجي ابجي لحد ما نمت.. اجت بليل ماما كالت تعالي تعشي.. كتلها ما اريد.. بس كمت صليت ورجعت نمت لثاني يوم..

ما عندي حل لهمي.. غير انهزم منه بنومي..

مر اسبوع وعادل لا خابر ولا اجه.. سألتني ماما.. عادل يخابرج.. كتلها لا.. كالت ليش.. كتلها اني اصلا مطفيه جهازي..

كالت ليش كتلها سيمكارتي.. توقفت خدمته مابيه رصيد.. كالت حتى لو ..جان اتصل عله واحد من عدنه وطلب يحجي وياج..

خابرت امي على عمتي.. كالت مستحي ويريد يجي هليومين.. كالتلها هلا بيه.. وفعلا وره يومين..

هيج اجه بدون موعد.. اندكت الباب.. كالو عادل اجه.. لا لابسه لا محظره روحي.. اصلا واكفه دا اغسل مواعين..

رحت ركضت بساع..غيرت لبسي.. وحمره ومكياج علسريع خفيف.. وعطرت.. فتحت الباب دا اريد انزل..

صار بوجهي عادل.. كتله هلا عادل.. كال هلا سمر.. كتله ننزل لو وين ترتاح.. كال خالي كال اصعدلها بالغرفه ..

كتلها هلا بيك.. دخلته بأرتباك.. الغرفه هوسه.. لان بدلت بأستعجال.. ملابسي النزعتها علسرير..

والملابس كلها مطلعتها من الكنتور.. لما اختاريت البس.. كمت امشي واعزل وابتسم بوجها.. واحس العرك يصب من الخجل..

كال تعاي كعدي شجاي اتسوين.. كتله اسفه.. بس الفرفه شوي مهوسه.. كال عادي عادي.. تعاي..

كعدت.. باوع بعيوني.. كال ليش وافقتي عليه.. عقدت حاجبي.. كتله ليش انته مقابل على هلزواج..
كال اني جاي اسئلج الج جاوبي.. كتله.. لان اعرفك واعرف اخلاقك.. كال جنت معتبرج مثل رنا.. كتله الله شاهد اني هم نفس الشي..

كتله يعني هسه متريدني.. ابتسم.. ومد ايده يبعد كذلتي عن عيني.. كال لا ليش ما اريدج.. وين الكه احسن من بت خالي..

بقى يبعد بشعري.. اتقرب يشمني من ركبتي وبوسني ابتعدت.. عادل هاي شدسوي.. مو وقت هلسوالف.. احجي وهوه بعده يحاول..

بعدته حيل.. وخرررر.. كال شبيج.. مو صرت رجلج.. مو لازم اعتبرج مو اختي.. خلي عيني تشوفج بغير نظره..

كتله بس مو هيج.. كال لعد شلون.. كتله بعد وقت.. كال وشنو اليمنع.. مكايلج اريد اخذج هسه..
فقط دا ابوسج.. وهذا حقي.. ميصير تمنعيني.. كتله عادل شبيك.. اول شي خل ناخذ ع

لى بعض.. تره بعدني متعودت عليك..

لسه احسك.. عادل ابن عمتي الخبل.. ممستوعبه انصير زوجين.. كال سلميني نفسج وراح تتعودين..

كتله صعب عادل مو وقتها.. تره هاذي اول جيه الك بصفة خطيبي.. كال اني مناوي اطول بالعرس.. حنتزوج بساع.. لذلك اريد اتعرف عليج..

وبصراحه.. يمكن كايلج من اني تركت حبيبتي وامي منعتني منها.. لذلك اريد انساها بيج.. اتقرب يمي اكثر..

وخله عيونه بعيوني ويمسح بشعري.. كال سمر نسيني.. ما اريد اتذكرها.. اريدج انتي تصيرين كولشي..

واتقرب بوّسني.. بقيت جامده بين اديه.. ما اخفي شعور حلو حسيت بيه.. هوه مستمر.. تفاعلت وياها..

هوه ثار اكثر.. ابتعدت.. ضحك.. كال لا لتخافين.. مراح اتعده الحدود واطلب شي متكدريله..

نبقى هذا حدنه.. يربي شكد خجلت.. من بوسني نسيت هوه عادل.. بس من باوعلي شفت بيه عادل اللي اعتبره اخ كل هلسنين.. شعور مخجل..

عدل ملابسي.. ورجع كعد عدل.. كتله انزل اجيبلك عصير.. كال اني ما اريد كولشي غيرج..

كتله عادل كافي.. تلحك وره منزوج.. كال حلاة هذي الشغلات بالخطوبه ويغمزلي.. بعد الزواج تصير ممله..

كتله هاي شدتحجي عادل عيب.. جرني وليمه وكال تعااااي بعد اني رجلج كلمت عيب بيناتنا انسيها..

قرب راسه وهمس بأذني كلام.. تخبلت.. نفرت من مكاني.. كتله مستحييييييل.. عادل شبيك.. تره احنه مخطوبين ممتزوجين..

وهسه كتلي ما اتعده الحدود نبقى هيج.. كال واني مكايلج شي.. لتخافين عادي تره .. كتله عادل دتضايقني..

كال هااا.. اوك براحتج.. وراد يكوم.. انوب دار وجه.. كال العرس اريده بعد اسبوع.. وامي رافضه..

كتله ليش بعد اسبوع.. كال ما احمل اريد اتزوج وانتي مو قابله اطاوعيني.. خل نتزوج هم تمنعوني..

كتله براحتك.. كال باعي سمر.. اني ما اريد العرس هوسه وموسيقى اريده بيناتنه.. لان صراحه ما عندي فلوس..

حاليا كاعد من الشغل.. وهاي الفلوس بدل منشمرها علعرس.. نستفاد منها بعد العرس..

شتكولين.. كتله بعد احسن اني هم ما اريد زفه وهوسه اتضايق..

كال خوش لعد.. راح اخبر اهلي بقرارنه.. وانتي هم خبري اهلج العرس بعد اسبوع.. من كال هلكلمه.. انقبض كلبي.. وهزيتله راسي..

اجاك الموت يا تارك الصلاة.. قرب موعد محاكمتي علسويته طول هلسنين بنفسي.. عونك يارب..

راح عادل.. وكلت لماما.. كالت شنو السالفه.. دفانة عجوز بساع بساع.. شورانه ليش هيج مستعجل..

كتلها ماما مو تردين تخلصين مني وتزوجيني.. وهاي راح اروح بسرعه.. كالت اريدج تتزوجين اي.. بس غير اريدج هم تنسعدين..

كتلها خلاص اني مو هامني شي.. عادي.. كالت لعد خل نروح نصبغ شعرج.. رحنه اني وياها للصالون..

امي تكولي ميشي.. كتلها ما اريد.. بس صبغ.. صبغت لون اشقر زيتوني.. كولش حلو صار لونه..

ورجعت للبيت.. انوب ثاني يوم اجت عمتي.. انطتنه فلوس الصبغ.. مقبلت احنه نصرف.. وانطتنه مبلغ مادي جيد.. اشتري بيه نيشان ملابس..

رحت للسوك اني وعمتي وامي.. اشتريت ملابس طلعه وبيت وسيتات نوم ومكياج وعطور وووو شغلات العرس المتخلص..

وماما.. هم اخذتلي 7 قطع قماش.. ودتها للخياط.. اخذ مقاسي.. وفصلهن.. بعد 4 ايام جابوهن.. فصالهن رهيب..

كملنه ترتيبات العرس.. اشتريت الغرفه انـّ'ℳέ'ـّيٌ وعادل.. كولش حلوه والبردات والفرشات.. كملنه كولشي..

اجت يوم الحنه.. وكنت لابسه فستان وردي.. بس الفرحه لسه ما حسيت بيها.. جمت متانيه عادل يحنيني..

عادل ما اجه.. اجو بس اهله.. كال حنو اصدقائه.. وبقى وياهم.. ضجت.. يعني مبدله ولابسه فستان حنه المن.. غير يشوفني بيها..

بس صوروني.. ثاني يوم العرس.. هم نفس الشغل والصالون والهوسه.. هلكت لحد ما كالو اجت الزفه..

والله وكأن كالو اجه عزرائيل مو زفة عرسي بكد مخايفه شراح يصير بيه.. للحظه مرت على بالي كل هلسنين..

شلون غلطت وشلون حبيت اركان.. وعفته واوافقت على عادل.. قطع شرودي.. عادل وهوه يكعد يمي..

نتبهت لهوسة العرس.. واني منزله راسي ابد ما رفعته..

اخذونه زفونه.. انوب نزلونه للتصوير.. ورجعونه للبيت.. بعد الزفه والعشا وهسوالف زفونه لغرفتنه..

وهنا خلص دمي.. لو انذبح ما يطلع مني قطرة دم.. مثل المسجون ويتاني حكمه.. شنو افراج لو اعدام… يتبع

#حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_5

زفونه للغرفه.. دمي جمد.. احس دخلت قاعة محكمه واتاني حكمي.. شراح يكون.. اعدام لو افراج..

قفل الباب عادل.. اني جنت مدنكه.. الخوف والخجل والارتباك.. مشاعر مختلطه. ما اعرف شلون اتصرف بيها..

شفته نزع سترته.. انوب توجه للكنتور.. طلعله تراكسود.. وبدا يبدل.. واني كاعده.. التفتلي..

كال شنو ما تبدلين.. كتله هاا.. كمل انته ..كال شنو تستحين مني.. دنكت.. كال راح ادير ضهري اخذي راحتج.. ما اتقرب..

طلعت ملابس.. سيت نوم ابيض.. كبير وفخم.. نزلت الطرحه.. وبديت ابدل.. اريد افتح السحاب.. بعيد على ايدي وما اكدر انوشه..

حاولت صعبت.. التفت.. كال ديري.. درت ودنكت راسي.. فتح السحاب.. وراح كعد علسرير ودار وجها..

كملت لبس الروب.. باوعت للمرايه.. ابتسمت ابتسامه خفيفه لنفسي.. وكأني دا ارفع من معنوياتي..

واحاول اخفي الخوف الدا احسه حتى على نفسي..  بس عادل ما اعرف شبيه.. مو على بعضه.. مثل المجبور عليه..

بس هوه سبق وحجينه وكعدنه.. كان مرتاح ويايه وما تضايق.. اتقربت كعدت يمه.. كتله بيك شي..

جان مخلي اديه ثنينهن على راسه ومدنك.. رفع باوعلي و كال لا ولا شي.. يله راح اطلع.. لان امج واقاربج يردون يودعوج..

طلع.. دخلت امي.. توصيني لا تخافين.. وصيري سباعيه.. وتبوسني.. انوب كامت دموعها تصب..

وتكولي والله يا يمه ما اعرف شلون راح اسلك بالبيت وانتي مو وياي.. رفيجتي انتي.. باستني من راسي..

اني مثل الواحد وشافله حجه يبجي.. انفجرت بالبجي بحظنها.. بقن بنات خالتي يبوسن بيه وخالاتي وامي تصبر عليه..

لشوي راحو.. وعمتي دخلت العشا النه.. طب عادل.. كالت عمتي تحتاجون شي.. كاللها لا يمه.. هاهيه..

اذا نحتاج.. نصيحلكم.. طلعت وكالت الله يسعدكم.. قفل الباب.. كعد هوه ياكل.. ياكل ياكل.. بشراها وغضب على وجها..

اني كاعده علسرير.. حتى مكالي تعالي اكلي.. سكت.. لشوي.. كال شنو متاكلين.. كتله هاا لا ممشتهيه.. نفسي مسدوده.

كال براحتج.. انوب كال ناوشيني.. المي من يمج.. كمت انطيتهياه.. اتقربت بيه ريحه كريها ما اعرف شنو هيه..

بس مو ريحة جسم.. لا لا ريحه ما اعرف.. اول مره اشمها.. بس ابد مو طيبه.. ما عرفتها..

لحد ما كال هذا المي حار.. ذيج ثلاجه زغيره طلعيلي منها مي.. فتحت.. لكيتها كلها بطالة بيره..

تعجبت.. ما كنت اعرف عادل يشرب.. سكتت طلعت المي.. وانطيته.. عرفت شارب وهاي ريحة شرب..

لشوي.. كام طلع قوطية بيره شربها كامله.. وكف.. كتله شبيك.. كال دا احس روحي تلعب.. كتله خاف ثقلت بالاكل..

طلع بساع.. ورجع.. كتله هاا.. كال تقيئت ومخلي ايده على راسه.. وكعد علسرير.. كتله تريد ادلكلك فروة راسك لحتى ترتاح..

كال لا لا ميحتاج.. بس راح انام عادي متتضايقين.. كتله وليش اتضايق.. كال يعني لان عروس وحقج اتفرغلج..

كتله حتنام.. قابل حطير.. عادي حبيبي ارتاح ولا يهمك.. جنت احجي واني ارجف.. واتمني ما يتقربلي اخاف يعرف..

انوب خفت اكثر من شفته ضايج وتعبان.. انوب سكر.. شلون راح يتفهمني.. اويلي يابه شيخلصها..
نام هوه.. اني بقيت كاتلني الخوف والتفكير.. لل3ونص بليل.. وهوه نايم.. بدا يتقربلي..

متت خوف لا اكدر امنعه ولا اكدر اكتم خوفي.. دكات كلبي يمكن حسيت البيت كلها سمعتها..

احس كلبي راح يطلع من مكانه من الخوف.. بدون مقدمات.. اتقربلي.. تأذيت حيييل.. بس بدون اي نفس بس الزم بالفراش واعصر بأديه..

ابتعد كال دتتألمين.. همست اي.. كال بس ما دا احس بشي.. من كال هيج خلاص صوفرت من الخوف و ما بقت روح بجسمي..

ما جاوبت.. رجع تقربلي 3 مرات.. ابتعد.. يكفر ويغلط.. كتله شبيك.. كال جاي تتأذين..بس ما جاي احس بيج بنيه..

كأني متقربلي لبنت متزوجه سابقا.. كتله يعني شنو.. كال دم ماكو ومن اتقرب دا احس بفراغ يعني غشاء ماكو دتفتهمييييييين..

صرخ بوجهي.. خليت ايدي على راسي.. ابتعد مني وراح طلع بطل بيره وكلاص و اتمدد على كنبه مفرده.. ويدخن جكاير ويشرب بعصبيه..

اني لبست وكعدت ميته خوف.. السكوت اصعب من الحجي.. تحس عيونك تفضحك من الخوف..

باوعلي بغضب.. واجه.. لزمني من زندي حيل.. كال فهميني امرج شنو.. بقت دموعي تجري..

كال ولج احجي اكو احد متقربلج.. كتله لا والله محد متقربلي بحياتي غيرك.. كال هاي سولفيهن على واحد زوج غيري..

لج بابا دا احس بفضاء ماكو تعرفين شنو يعني ما احس ببكارتج.. جاوبيني انتي باكر لو لــNOـا ..

سكتت.. صاح بكل صوته جاوبييييييييييييييي.. ويهز بأيدي.. وجسمي كله ينهز وياه من قوة لزمته.. هزيتله راسي..

كال شنو اي.. انتي باكر لو لا.. هزيتله راسي.. بـ معنى لــNOـا.. كال شلووون.  لج احجيها احجيها.. اي لو لا..

كتله عادل بس اسمعني خل اشرحلك.. كتله هيج.. لو حسيت عيونه وكفن بالطول.. لزمني من شعري..

ولطشني بالكاع.. ودفر برجله ..ويغلط ويفشر وكلام عمري مسامعته من الغلط والاسائه طلعني بنت ليل..

واني كاعد وابوس برج

له بس اسمعني وهوه يدفرني.. وساعه يضربني براسي برجله ..ساعه على خاصرتي..

انوب لازمني بوكسيات.. حلكي كله صار يجري دم.. كمت بس اتفل دم ودموعي تجري بغزاره.. واكوله بس اسمعني فدوه الله يخليك..

كال ولج شسمع اصخام وجهج بنت الكلب.. بنت السكط.. امج هيج وخوالج هيج.. كتله والله محد اتقربلي..

كال وبعدج تنكرين.. بقى يضرب راشديات وبوكسيات على وجهي وجسمي..  والباب كامت ادك حيل.. ويصرخون ولك شكو افتح الباب..

كال انتي عار لازم اخلص منج.. لزمني خنكني من ركبتي.. كمت ادك بأديه علكاع اختنكت.. انوب كمت اضرب عليه..

وازلغ بجتفه وركبته.. احس روحي طلعت من عيوني.. خلاص شفت الموت بعيني والله..

كل جسمي.. يضرب بالكاع.. الى ان نكسر الباب ودخلو امه وابوه.. عمتي جرت عادل مني.. اني بس اكح واريد اجر الهوه ماكو مختنكه..

اريد اشوف ماكو من كد ما خنكني.. اسمعه يكلها هاي الفضلتيها على حنين.. هاي الكلتي عليها بت اخوج.. واعرفها..

اخذيها للشريفه بت اخوج.. كالتله نجب شبيها احجي.. كالها اسئليها.. اتقربتلها طلعت مو باكر..

صرخت يمممممه.. عزا العزاج كوون.. واجت تضرب عليه.. صدك ولج يحجي لو جذب.. ابو كاله شنو يعني خادعتنه..

كاله اسئلها.. سئلتها انتي باكر تكلي لا.. تعترف بنفسها.. ابو كام يغلط ويسب ويتفل عليه.. وعمتي تضرب وتغلط عليه وعلى امي..

نهوني كتل.. صاح ابوه.. شيلها شيل هزباله من بيتنا ودها لبيت ابوها عساها لا رجعت.. خل يغسل عاره ونفتك..

عمتي كالت اي يغسل عاره واخوي واعرف لو يدري بيها يذبحها.. بس هاي تهرم ويه الولد..

غريبه ..مو امها شردت و عافت اهلها واجت لبغداد.. ويه اخوي.. هاي بت امها واضرب بعد..  يلعبن شلم بلم..

كوه احجي.. كتلها عمه والله محد ادنالي.. كالت هش هششش بنت الخايبه بنت ال….  وفشار وغلط على امي ميلبس عليه..

كالتله شيلها وديها لابوها.. خل يذبحها رجعها.. لزمني من ايدي عادل وجرني.. كمت ابوس بيده استر عليه الله يخليك والله ما غلطت وي واحد والله..

والله اني سويت هيج بنفسي.. عادللللل فدوه لا ترجعني لاهلي وتفظحني يذبحوني والله يذبحوني.. ابجي واتوسل بيه وهوه يصرخ ويفشر عليه ..

ولا يسمعني.. لحد ما سمعت بكر صاح بصوت عالي.. هاي شكوووووو.. امه كالت اجه بكر .

خو هذا خبل ما يتفاهم بهيج امور.. طلقه  براسج ويفكنه.. دخل بكر.. باوعلي.. فتح عيونه..

صاح هاي شمسوي بيها كلب.. عادل لازمني من زندي.. شمرني حيل على بكر.. كاله بت خالك هاي طلعت مو شريفه..

اني كعدت من الم بالكاع ..ما الي سيطره اوكف.. كاله شتحجي لك اشررف منك حقير شلون تحجي عليها هيج..

كاله يا خوي هاك اسئلها انتي باكر لو لا.. ولك وصلتها 3 مرات.. ماكو دم.. ما احس بيها بيها بنيه..
بقى يباوع بوجه عادل بغضب.. كاله شتحجي.. كاله كدامك واسئلها.. دار وجها عليه.. كال اليحجيه صدوك..

بقت بس دموعي تجري ومدنكه راسي.. لازمني حيل.. وصاح.. جاي احجي ويااااااااااااج.. صح انتي مو باكر..

هزيتله راسي اي.. دفرني عادل بخاصرتي.. كاله شفت.. شفت بت خالك الشريف شطلعت..

جرني من ايدي عادل.. وكاله خل ارجعها لبيت الخلفها.. ونطلع من عارها.. راد يمشي بيه..

لزمني بكر .. كاله.. دخلت بيتنا.. صارت عرضنا.. احنه نعرف شلون نتصرف ويه عرضنا ونغسل عارنا.. يتبع

🌺🌺🌺

اهواي امهات وأخوات غافلين عل بناتهم او خواتهم خصوصا في مرحلة المراهقة..

وبالتالي البنت توكع بمشكلة 💔او مصيبة وبالأخير تنكتل وتروح سمعتها وسمعة اهلها ..وكله هذا سببه من الاهمال الأم وصديقات السوء والانترنت اللي دمرهم

أتمنى تكون هالقصة كفائدة وعبرة لكم
لان من واقع حياتنا 🌸

#ملوكه

سيرومات هايدروليك اسد وفيتامين سي..اكيد اثنينهن زينات كمرطب ويصفي البشرة..وبنفس الوكت يستعمل وي الديرمابن🌚🌺

فعمري..اللي عل يمنة هذا مضبوط
وعل يسرى فيتامين سي..مادري بعد بهالشركه اذا زينة اولا ☹️

اني اللي اعرفه لسيروم فيتامين سي..احسن شي من شركة oznsturals وشركه pharmaceris

#ملوكه

وووف🥺💔
يله مبقى شي عيوني ..كم ساعه وتصير الظهرية وانشر البقيه

فاتشوقي بعد اكثر 😅حته تصير متعة بالقراءة

#ملوكه

حبيبتي مدام منزل دم فاطمني ماكو شي🌸

وحجيت قبل عن هالموضوع فهسه اوجهه
فياريت تركونه لان متحصلون غير اثم🥺💔 يعني اذا احد من اهلج وشافج شي اكيد تخجلين..زين لمن الله كبالج وديشوف هالشي فشنو رح يكون موقفج؟..
الشغلة سالفه تعويد..اذا تركتي بعد تتعودين وابد مترجعليه

#ملوكه

حبي اذا تريدين اسعار مناسبة للساعات ماتلكين بالبيجات
لأن اكثرية يبيعوهن غالي.💔🤦‍♀
بس اذا بالسوك اشويه ارخص تلكين

واذا ماتكدرين تنزلين للسوك..
فاحجزي من بيجات للهدايا وتوصيهم عل فلان سعر وشكل للساعه وهم يجهزوها ويرتبوها ببوكسات😇

#ملوكه