#ارحام_متناثرة

#قصة_حقيقية_عاطفية_اجتماعية

البارت الثالث عشر⚘⚘⚘ بقلم فينوس آرام

رائد ☆☆ جنت نايم واسمع الباب يندك .. ما اهتميت وبقيت بفراشي .. زادت دكات الباب

وانسطرت😑 من الدك كمت من فراشي حتى ماغسلت وجهي ولا رتبت شعري فتحت الباب

وشفت رباب بنت ابو غسان كدامي... بوية والله جمالهة يكتل من تشوفهة من قريب يبين

حسنهة اكثر ..عيون وساع وخضر وشعر اشكر وبيضة كطن ..

رباب☆☆دكيت الباب وطلعلي واحد يفرك بعيونه وشعرة مخربط كلت ماكو غيرة اكيد

هذا رائد يمكن كعدته من النوم عزة شلون فشلة كلتلة... صباح الخير

رائد ☆☆ ياهلا والله صباح النور

رباب☆☆ اسفة كعدتك من النوم بس ساعه 10 ونص عبالي كاعدين

رائد☆☆ لا عادي ماصار شي اني أتأخرت بالنوم لأن اليوم جمعه هههه

رباب☆☆ يا هه اسفة والله نسيت ما ابالي اليوم جمعه... أأ وين خاله اذا موجودة

صيحلياهة.. جنت احجي اباوع بداخل بيتهم دشوف وين خالة

رائد☆☆ والله مو هنا لأن اختي عمتهة توفت ام رجهلة امس واخذتهة الهم وباتت يمهم هناك لأن همة بغير محافضة.

رباب☆☆ يا خوية اسفة البقية بحياتكم

رائد☆☆ وبحياتج الباقية.. ليش الاسف عادي ماصار شي بالعكس رحم الله والديج حبيت اشكرك على مساعدتج لأمي

رباب☆☆ لا عادي مامسوية شي تدلل خالة.. يلة خوية اني اترخص ... ترخصت منه ورحت للسوك ...

ضليت امشي واسولف وية نفسي هاي اول مرة اشوف رائد بس صدك حلو شكله وسيم

كلش... اضاهر يشبه ابوه لان خاله مو وهيج شكلهة ومو بحلاته يبوو اذا اني وهوة نتزوج

شنخلف 😍 يمة صدقة نجيب اجانب .... تالي حسيت على روحي احجي وية نفسي عدلت مشيتي ورحت اتسوكت... من رجعت لكيت

نسوان اخوتي متعاركات وميقبلن يشتغلن😑 مايمر يوم اذا مايتعاركن چلت چوول بيهن

كلتلهن والله الماتسوي شغلهة لا ادزهة لأهلهة مطلكه.. عاد احترمن نفسهن وكامن على شغلهن... نسوان ماتجي الا بالعصى.

ورة جم يوم رجعت خاله ام رائد ورديت رحت الهة اخذت من خاطرهة وجبتلهة المسواك الي تريدة..

ضليت على هالحال حوالي 3 اشهر صدك تعب بس شسوي مرة جبيرة وتعبانه وكوة تمشي خطية نكسب بيهة اجر...

نسوان اخوتي بهالفترة خلفن .كل وحدة منهن جابت ولد وامي طارت من الفرحه عبالك

بحياتهة ماشايفة الولد هلهلت وسوت غدة وعزمت اقربائنه وتتباهة بين النسوان ولدي خلفتهم ولد 😐 ..

يوم عن يوم يزيد اهمال اخوتي النة ..وابوية حالته تسوء اكثر واكثر .. ومسؤلية البيت

ثكلت كلش عليه بس اني اكابر وما اهتم واخذ الدنية بزودي....

ورة فترة اجني بنات ام رائد واني ما ادري بيهن .... مريت عليهة مثل كل مرة وطلعلي

بناتهة خطية سلمن عليه ودخلني للبيت واتعرفنة على بعض..خطية اتشكرن مني هواي

وكالن احنه نتسوك هالمرة طالما موجودين هالفترة هنا ارتاحي انتي..

ورة يوم بالضبط سمعت بالمسجد اليمنه ينادي باسم مرة متوفية.. واني بية سولة اعوف كل

شغلي واضل اصنط اشوف منو توفى ركزت اكثر وكال انتقلت الى رحمه الله الحجية ام

رائد وتشييعهة بعد نص ساعه.... اتعجبت وصحت اهااااا ام رائد تووفت معقولة

ياسبحان الله امس جنت يمهة وكلشي مبيهة
صح هية تعبانه بس متصورت راح تموت ...

حضرنه الفاتحة 3 ايام جانت ايدي بايد بناتهة
ايد على الطبخ وايد بالمطبخ من ذاك اليوم

صارت علاقتي باخوات رائد كلش قوية هنة جانن 5 بنات ومتزوجات اكو بيهم خارج الحلة واكو بيهن بالحلة بس بعيدات عن بيت امهن...

علاقتي اكثر شي قوت بأنعام اخت رائد متزوجه خارج الحلة وعدهة 3 جهال ....

انعام☆☆ رحم الله والديج رباب على وكفتج ويانه.. كرايبنه منه وبينه ماوكفن وكفتج

رباب☆☆ احنه اهل ان شالله ومابيناتنه هالامور وخاله جانت عزيزة عليه الله يرحمهة

انعام☆☆ اووف يا رباب والله ماكاسر ضهري غير رائد هذا كلشي ميدبر لوحدة

رباب☆☆ مفهمت شبي يعني

انعام☆☆ صار صدك يتيم عكب عين امي هوة مدلل لا يعرف يطبخ ولا يعرف ينضف عايش ع الهوسة مهتم بشغلة واصدقائة وبس

رباب☆☆ خطية الله يعينه يتعود شوي شوي على هالعيشة شيسوي

انعام☆☆ شكد امي اتمنت اتزوجه حاولت رادت وياه بس ماقبل اشكال خطبتلة وهوة معاند سودة عليه ماتت وماشافت خلفته

رباب☆☆ ان شالله يلكه بنت الحلال التناسبة

انعام ☆☆ اي والله ان شالله .....

رباب☆☆ رجعت للبيت واني مكسرة من شغل الفاتحة ومهدود حيلي ..

ورة الفاتحة بكم يوم طلعت للسوك ولكيت مشتاق واكفلي براس الدربونه..

رباب☆☆ شفته من بعيد وابتسمت

مشتاق☆☆ صباح الخير ياوجه الخير.

رباب☆☆ صباح النور.. شعجب بينت ماصارلنه اسبوع من متلاكين

مشتاق☆☆ ههههههه ليش متريدين تشوفيني

رباب☆☆ لا مو هيج بس شوفتك صايرة كلفة يامشتاق ههههه حتى المغني رضا علي اشوفه بالتلفزيون اكثر منك

مشتاق☆☆ هههههه ادلل عليه ادلل
بس لا ياولفي تزعل
كل ماتريد اتمنى
كلبي لو روحي اقبل
ادلل عليه ادلل كلبي ادلل
شلوني☻.

رباب☆☆ ☻لاتغني يمعود.. خطية المطرب بعد مايغني من يسمعك اعت

زل ههههه.. شو

خليني اروح اتسوك لايبقون اهلي بلية غدة
..وكمنه نتمشى

مشتاق☆☆ احسن .. خلي اخوتج يحسون بالمسؤلية ويعتمدون على روحهم حرامات محسوبين على الزلم

رباب☆☆ مشتااااق الف مرة كلتلك لا تحجي عن اخوتي ما اقبل ... حجيت وياه بعصبية

مشتاق☆☆ هوة بس هذا المحصلة منج مدكوليلي بشنو فايديج اخوتج؟ اشو عايفين المسؤلية كلهة براسج غيرة مثل الزلم ماعدهم

رباب☆☆ جنة نتمشى ووكفت راسا .. كافي مشتاق اخوتي خط احمر رجاءا اي حجي عليهم ما اتقبلة

مشتاق☆☆ على العموم اني ماجاي على هالموضوع.. جيت اكلج بعد يومين راح اسافر

رباب☆☆ 😳 انصدمت ورديت وكفت وراسا باوعتلة .. تسافر !!! وين ؟

مشتاق☆☆ ايفاد من الدائرة نروح 3 اشهر خارج العراق ونرجع

رباب☆☆ يعني شنو ايفاد.. شتسوون

مشتاق☆☆ حبيبتي دورات تقوية يعني نسافر لبلد امكانياته متقدمه ونتعلم منهم.. منبقى هواي هية بس 3 اشهر

رباب☆☆ التفتت وكملت طريقي وكلتله تروح وترجع بالسلامه

مشتاق☆☆ شقتهة زعلت وركضت وراهة..
اشو زعلانه عبالك

رباب☆☆ لا ليش ازعل هذا شغلك ولازم تأدي يلة مشتاق اتأخرت كلش صار الضحى وبعدني مامتسوكه .. يلة مع السلامه

مشتاق☆☆ عرفت بيهة ضاجت ماحبيت اضغط عليهة والحكهة تركتهة براحتهة
ورجعت

رباب☆☆ من طلع مشتاق ايفاد لخارج العراق كلش اتكئبت و انقبض كلبي هوة اني اصلا

اشوفة بالاسبوعين مرة لو مرتين اشوفه وهوة يمي بنفس المنطقة .. انوب ايفاد خارج العراق

والله يعلم شكد يطول اتنحست كلش وصرت صعبة المزاج وية اهلي كلهم حتى نسوان اخوتي

مر حوالي اسبوع على وفاة خاله ام رائد جنت شأطبخ بهالاسبوع اتنغص لرائد ما اعرف ليش

تجي صورة ابالي ... انقهرت عليه لان كلشي ميعرف....وقررت اليوم اسويلة صينية الغدة

واوديلهيا... طبخت دولمه وصبيتلة بماعون وحطيت خضورات وطرشي مسويته بايدي

ودولكة لبن وخبز تنور حطيتهن بصينية وضليت اراقبة شوكت يجي.. ورة شوي لمحته

رجع ... اخذت الصينية ورحتلة دكيت الباب عليه وطلعلي جان حتى بعدة مامغير

هدومه .. سلمت عليه وسلم عليه.. ونطيته الصينية

رائد☆☆ اوف اوف رباب شلون عرفتي بية مشتهي دولمه صارلي شكدددد يمكن فوك

الشهر ..اخر ايام المرحومه ماجان بيهة حيل تسوي هالاكلات ... لزمت الصينية بيد وحدة

وكعدت اكل بالايد الثانية ههههه اكل واحجي وياهة جان كاتلني الجوع ومكضيهة على البيض والبصل النهار كله..

رباب☆☆ يا خوية سودة عليه ليش ماجيت علينه وكلت.. احنه جوارين واني حسبة اختك

وتمون عليه اسويلك جدر دولمه الك لوحدك والف عافية

رائد☆☆ ترست حلكي اكل 😐 وهية تحجي كوة جاوبتهة .. لا رحم الله والديج ماتقصرين

فد انة ماريد اثكل عليج هذا الماعون كافي عليه عاشت ايدج تخبل كلش طيبة

رباب☆☆ يا.. اثكل عليه شنو ..لا خوية هذا حگ الجار على الجار تدلل ان شالله منا وجاي

غداك علينه.. ما اعرف ليش هيج حجيت يمكن لكيتهة حجة حتى اشوفة يومية

رائد☆☆ عاشت ايدج ماتقصرين .. انتبهت على روحي خلصت الماعون على وكفة وحدة

خجلت منهة وغصيت باللكمه لزمت اللبن وشربته وهية واكفه بالباب وتضحك من جوة

لجوة خرب والله فشلة شراح دكول عليه😑 كلتلة .. دقايق اغسل المواعين واجيبهن

رباي☆☆ يااا لا الله عليك لاتغسلهن ولا شي بس فرغهن وجيبهن اني اغسلهن بالبيت

رائد☆☆ ههه لا زحمه

رباب☆☆ لا مو زحمه بس فرغهن ولاتغسلهن

رائد☆☆ماجذبت خبر لان اصلا المطبخ مكلوب كوة لكيتلي ماعون نضيف وحطيت بي

باقي الاكل وفرغت الصينية ورجعتلهة بالباب عاشت ايدج ورحم الله والديج

رباب☆☆ ووالديك عيوني .. أا يلة اني اروح مع السلامه

رائد ☆☆ الله وياج وعاشت ايدج مرة ثانية..

رباب☆☆ ابتسمت ودنكت ومشيت ورجعت للبيت ..

رائد☆☆ حلوة ونادرة معدلة وصاحبه واجب وشخصيتهة قوية والله تسوة واحد يفكر

بالزواج علمودهة ههههه....... لك يازواج رائد شبيك شنو نسيت لوانضربت بعقلك.. اوف هية تصفى نشوف شلون تاليهة

رباب☆☆ مرت الايام واني تقريبا يومية اخذ لرائد الغدة وكمت اتفنن بي حتى يعجبة واني

اصلا طبخي يخبل... احس تعودت عليه وافرح من الاكيه.

فرحه☆☆ شفت رباب راجعة وبيدهة الصينية اتنرفزت كلش لان زادت الشغلة عن

حدهة دخلت للبيت وحجيت وياهة.... رباب هاي شدسوين شلون تروحين لهذا لوحدج؟

رباب☆☆ اولا لادكولين هذا ..اسمه رائد ويصير جوارينه بس انتي شمفهمج بهالسوالف

حاطه راسج بكتابج النهار كله ومتعرفين شي عن الاصول

فرحه☆☆ ولج يا اصول بنية شابة وية ولد لوحدهم هاي تسميهة اصووول.. شلون تريدين العالم تفكر بشكل صحيح بيج

رباب☆☆ الصمي وحطي لسانج بحلكج اولا اني ما ادخل بيته من الباب انطي الاكل وثانيا مو انتي الي تحاسبيني افتهمتي

فرحه☆☆ لا احاسبج واحجي وافتح حلكي ولج انتي سمعتج من سمعتي وسمعه اهلج

يعني اي شي تسوي غلط اني اول وحدة اتاذة واهلج كلهم يتأذون بسببج اصحي على تصرفاتج

رباب☆☆ 😏 مامسوية شي غلط حتى اخاف منه... وهسة شتريدين مثلا

فرحه☆☆ جوزي من رائد لا تروحيلة عندة 5 خ

وات يحيرن بي او خلي يتزوج ومرته تحير بالقزرقط مالته

رباب☆☆ ماجوز وبكيفي ولا تغلطين عليه لا اكطع لسانج

فرحة☆☆ هذا عنادج والجهل مالتج شوكت تصحين منه راح توكعين وكعه متكومين بعدهة يا رباب

رباب☆☆ اوووف من الغيرة شسوي بالبشرر اووف قل اعوذ برب الفلق عوذة عوذة عوذة
.. طلعت وعفتهة

فرحه☆☆ سلعة السودة الصرت اختج.. سترك ربي لخاطري اني وين اولي اذا صار شي اوف يا بويةة وين عفتني ورحت..

جميلة ☆☆ اسنطت على فرحه ورباب من جانن يحجن والله شفت حجي فرحه صحيح

ومنطقي رحت طايرة لغسان.... اكولك غسان شنو قصة اخيتك زودتهة ترة يومية ماخذة غدة لرائد افندي شنو القصة؟

غسان☆☆ _🍾🍷😴💤

جميلة ☆☆خرب حظي سكران من الصبح لليل ومن الليل للصبح ادري مدكلي شوكت تصحى من اختك توكعنه بمصيبة

غسان☆☆ معليج بيهة كل لشة تتعلك من كراعهة هاي حبيبة امهة وابوهة.

جميله☆☆ شلون معليه الناس بدت تحجي رجل عزابي وتروحلة يومية تاخذلة الغدة

وخابصه نفسهة مدكلي شنو معناهة بيا وجه نباوع للعالم بعد يمعود اصحى انت واخوتك شلون ساكتين فتيتو مرارتي

غسان☆☆ 🍾🍷😴💤

جميلة☆☆ لا انت ميفيد وياك الحجي اروح اشوف امك احسن.. طلعت وحجيت وية عمتي ام غسان نفس الحجي

ام غسان☆☆ اكلجن شنو انتي وفرحه متفقات تحجن على رباب هاي تاج راسجن

واحسن منجن وبعدين رباب عاقلة ومتسوي شي غلط وهذا يسموه حگ الجار على الجار انتي شمفهمج بهالامور

جميلة☆☆ يا جار رجال عزابي ولوحدة شلون تروح يمه.. والله لو اهلي يعرفون الا يطلكوني من ابنكم

ام غسان☆☆ وييطبج مرض ياريت يطلكوج درب الصد مارد ازوجه 10 نسوان غيرج

يسوون راسج واحسن منج بعد ترة ماتوكف عليج الدنية ويلة امشي مو جاية حضرتج تحاسبينة اني وحماتج استحي على نفسج

عدت سنه على وفاة عمي مجيد الله يرحمه وكوة قنعت فرحه تنزع الاسود.. بهاي الفترة

قل اهتمامي بمشتاق كلش حتى من جان يوكفلي يم السوك علمود يشوفني بس المحة

ارجع للبيت واعوفة ...وهوة همين بهاي الفترة
التهة وية اهلة لأن اخوه الصغير طلع بي

مرض خبيث وانخبصو بيه اخذو لبغداد و ردو سفرو خارج العراق والتهة وياهم فہ كام مايجي وابتعدنه عن بعض كلش..

واني هم بنيت امال على رائد وتركت مشتاق رائد حالته المادية احسن وشكلة احلى بهوااي

من مشتاق هذا اسمر ورائد ابيض 😍وخصوصا بدة يستلطفني ويلمحلي بعيونه

ورة فترة اخذت الغدة ورحت لرائد مثل كل مرة وسمعت يمه صوت ولد ابيته كلتله منو

يمك كلي هذول اصدقائي مجتمعين يمي كمت احجي عليه...ادري ليش ماكلت يمك اصدقائك خوية هالصينية شتكفيكم

رائد☆☆ رباب كم مرة كلتلج لا دكولين خوية اسمي رائد وعيونج الخضرة والحلوة اسمي رائد ومو اخوج...

رباب☆☆هههه خجلت ودنكت

رائد☆☆ واذا على الاكل نجيب جاهز عادي لاتهتمين تكفي هالصينية مادام من ايدج خلص يعني تخبل وتشبعنه

رباب☆☆ زين هالمرة سماح بس مرة ثانية كلي قبل بيوم حتى اسويلك غدة الك والهم يكفيك

رائد☆☆ يابة تدللين .. وغمزتلهة

رباب☆☆ خجلت .. من غمزلي ابتسمت ودنكت ورجعت للبيت ....

وفعلا اصدقائة كامو يجون مرة او مرتين بالاسبوع يجتمعون يمه واني اسويلهم الغدة واخذة الهم..

مرت السنين وصرنه بسنه 1978 فرحه نجحت وطلعلتهه جامعه ابغداد امي ماقبلت

تروح تكمل بس وكفت فرحه بوجه امي وكلتلهة اروح واكمل ومحد يمنعني

ام غسان☆☆ شلون تروحين وين تبقين بالشارع ولج ماعدنه احد ابغداد

فرحه☆☆ اكو اقسام داخلية بالجامعه ليش ابقى بالشارع

ام غسان☆☆ وهاي شنو النوب شنو يعني

فرحه☆☆ يعني غرف يروحون يباتون بيهة الطلاب البيوتهم بعيدة مثلي

ام غسان☆☆ يا عزةةة كل عقلج اخليج وية الولد هناك

فرحه☆☆ منو جاب سيرة الولد؟ اقسام داخلية قسم للأولاد وقسم للبنات كل واحد لوحدة

ام غسان☆☆ اني كلت متروحين تلعبين شاطي باطي هناك

فرحه☆☆ ههههه منو هذا اليلعب شاطي باطي بلة ؟؟ ماريد احجي اكثر لأن اصلا ما

جاية اخذ الاذن منج اني جاية انطيج خبر مو اكثر.. وبديت احضر باوراقي وحضرت ملابسي

رباب☆☆ كلبي انخمش من عرفت راح تروح خفت عليهة ..بغداد جبيرة ولوحدهة تبقى

هناك شلون ادبرهة... فرحه يعني ماكو شي عليج هناك امان ميصيرلج شي

فرحة☆☆ اي حبيبتي امان ماكو شي اشكال البنات مثلي راحن اقسام داخليه واتخرجن هسة واتوضفن

رباب☆☆ وشراح تطلعين من تتخرجين

فرحة☆☆ مدرسة احياء احقق حلم امي واصير مدرسة 😍

رباب☆☆ ابتسمت بس بداخلي قهرة ما اعرف ليش وصدك ورة يومين ودعتنه وراحت

مرت الايام وصارحني رائد بحبة الي 😍 الارض ماشالتني من فرحتي راسا سألتهة ... شوكت تتقدم؟

رائد☆☆ عندي شغلة اكضيهة واتقدم

رباب☆☆ شنو عندك ياشغلة؟

رائد☆☆ هههههه مو كلشي ينحجي للنسوان غير ننشمر ورة الشمس اذا نحجيلجن ..

وبعدين تعالي اكلج منو يكول امج تقبل؟ احسن مني اتقدمولج ورفضتهم

رباب☆☆ ماكو احسن منك بنضري ...ومعليك بامي تعبت وماعاد الهة كلمه عليه. انت اتقدم ويصير خير ان شالله

رائد☆☆ يا فدوة ال الله مرتي السباعية متخاف

من احد ...

رباب☆☆ مرت الايام وعلاقتي تقوة برائد يوم عن يوم .. وكل محاولات مشتاق حتى يشوفني رديتهة... حتى مرة لحكني للبستان ومانطيته وجه انتبه عليه وسالني

مشتاق☆☆ شبيج رباب شنو صاير احجيلي

رباب☆☆ ماكو شي بس تعبانه المسؤلية ثكلت عليه

مشتاق☆☆ رباب اذا اتقدملج توافقين تعاندين امج علمودي

رباب☆☆ عوف هالموضوع هسة امي مريضة وابوية كوة يجر النفس وبحاجتي اترك هالامر مشتاق

مشتاق☆☆ باقية على الوعد؟ لو غيرتي رأيج

رباب☆☆ ان شالله .. الله كريم... وراسا لبست عباتي وكلتلة خلي نرجع خلصو حصاد المحصول ....

⚘ وبيوم من الايام من سنه 1978 اخذت الغدة ورحت الرائد لان جانو اصدقائة مجتمعين يمه ...

فتح الباب كلتلة اني ادخلة للمطبخ خطية انقهرت عليه لان ميعرف يرتب الاكل ..

كلي فوتي من الباب الثانية حتى اصدقائي ميشوفوج... رحت من الباب الثانية ودخلت

المطبخ دة احضر بالغدة والباب انضربت ضربة قوية ودخلو ناس يكولون احنه الامن

وكف كلبي من الرعب جتفو الولد وعصبو عيونهم واخذوهم..اجوية للمطبخ ولكوني واخذوني وياهم ..

عصبو عيوني واني ابجي واصرخ مامفتهمه شديصير اخذونه وصعدونه بسيارات واني

اتعاتت وياهم احس الشارع انكلب بالهوسة والعياط بس مدشوف شي.. سمعت من الناس يصيحون هذول اعضاء الحزب الشيوعي
_😱_____؟

يتبع،،،،،،،،،⚘

#ارحام_متناثرة

#قصة_حقيقية_عاطفية_اجتماية

البارت الرابع عشر⚘⚘⚘بقلم فينوس آرام

رباب☆☆عصبو عيوني واني ابجي واصرخ مامفتهمه شديصير اخذونه وصعدونه

بالسيارات واني اتعاتت وياهم واجرجر بروحي
احس الشارع انكلب بالهوسة والعياط بس مدشوف شي..

سمعت من الناس يصيحون هذول اعضاء الحزب الشيوعي ...سمعت الحزب الشيوعي

واتذكرت ابو رائد من عدموه 😱 وبديت اصرخ واعيط واحرك بروحي واتعاتت وياهم

وهمة لازميني ويدفعون بيه.. من كثر عياطي حطو خركه على حلكي وشدوهة حتى لا اقى اصرخ...

عيوني جانت مسدودة وايدي ومجتفة وحلكي سادي خلونه واخذونه بسيارات ضلت تمشي هواي بينه ..

حسيت بنفسي متورطه بمصيبة الهة اول ما الهة تالي ...فقدت الاحساس والشعور حسيت

بضيك صدر ودوخة من الوضع الاني بي احتاجيت اتقيء لكن مسدود حلكي بديت

افقد التوازن كل ضني وكل عقلي خلص هاي نهايتي وماخذينه ديعدمونه زادت الدوخه

عندي واتقيئت حلكي مسدود وطلع الاستفراغ من خشمي اختنكت وماكدرت اتنفس لا من

خشمي ولا من حلكي وماحسيت على شي وبديت اعالج وكأنو روحي دتطلع انتبهو عليه

الامن وفتحو الخركه عن حلكي وايدي راسا بديت اكح انطوني شوي مي بايدي وغسلت

نص وجهي لان عيوني ماقبلو يفتحوهة.. واحد منهم زمخ بيه وكلي اذا تعيطين بعد اشد

حلكج واعوفج تموتين...و ردو شدو ايدي
...وصلنه لمكان ما اعرف وين نزلونه وهمةة

يصيحون علينه ... ورة شوي واحد منهم حجة وكال اخذهة يم النسوان وذول اشمرهم هناك...

وصلنه لباب معين وسمعت ديفتحون بي بهالاثناء فتحو عصابة عيوني وايدي من كد ما

انسدت عيني كوة شفت لان المكان شبه اظلم راسا شمروني يم مجموعه نسوان كلهن

مفرعات ومرتبات مبينات بنات عوائل كاعدات ويبجن دخلت اناظر بالوجوه بلكي اعرف احد

كلهن غريبات ما اعرف احد اتكترت بمكان و وكعدت ابجي والطم ومنتضرة اعدامي .. ورة شوي يمكن اقل من ساعه صاحو باسمي...😳😱

جميلة☆☆ سمعنه هوسة وضجة بالشارع طلعت ركض اشوف سيارات وولد لابسين

ملابس مدنية بس العالم دكول شرطة وبيهم يكولون امن طلعت من الباب اريد اشوف

يابيت المن دياخذون شفتهم واكفين يم بيت ابو رائد وماخذين الشباب وياهم رباب لازميهة

ديصعدوهة بالسيارة وهي تبجي وعاصبين عيونهة وشادين ايدهة من ورة.... رادت تجيني

جلطه واصرخ بعالي صوتي وگ غسااااااااااان وگ ماااااااازن عمااااار نبيللل يبووووو اختكم

اخذوهة الحكوووو يبو يبووووو رحت اركض على هذول الشرطه اريد الحك بيهم بس مشت

السيارة وملحكت والناس بدت تهمس وتحجي واني ادك والطم..دخلت البيت واني ادك والطم

واصرخ رباب اخذوهة الحكوني وسويت هوسة شكبرهة بالبيت رحت لغسان لكيته

سكران ونايم طينه.. مازن ونبيل طالعين ما ادري وين مالكيت كدامي غير عمار لان يشتغل

بمحل قريب طلعت بوجهي عليه ..... وصلتلة الهث ولگ عمااار الحك

عمار ☆☆ خير يمه شبيج شصاير؟

ام غسان☆☆ ولك الحكك اختك اخذوهة الشرررطه روح طلعهه ولك يمة استعجل لا يسووولهة شي

عمار ☆☆ فهميني يا اخت منوو شسوت واخذوهة الشرطه

ام غسان☆☆ ولك ربااااب اخذوهةةة لو اعرف شسوت همين اجي عليييك ولك اتحررك شوفلي صررررفة

عمار☆☆ ما عرفت شسوي و وين اروح .. رأسا اجة ابالي عمي ابو مشتاق ...كلتلهة يمه رجعي للبيت واني رايح لعمي هوة يعرف يتصرف

ام غسان☆☆ اارجع شنوو ولك امشييي ركضضض يلة اني جاية وياك امشييي...

رحنه لبيت ابو مشتاق وانقبض گلبي ما ادري ليش وج يمة رباب شديسوون بيج هسة ربي سترك فدوة..

وصلنه ودكينه الباب طلعلنه مشتاق اتفاجاء من شافني بالباب

مشتاق☆☆ شفتهم واستغربت ..عمار.. مرت عمي ياهلا والله اتفضلو

ام غسان☆☆ يمة مشتاق ابوك وين فدوة

مشتاق☆☆ موجود كاعد جوة تعالو دخلو تفضلو

ام غسان☆☆ دخلنه جوة ولكيناه كاعد يدخن ويتفرج اخبار على التلفزيون .. دخلت عليه

اعيط وابجي... الحكنيييي ابو مشتااق فدوة اروحلك الحك رباب راحت مني

مشتاق☆☆ شفت ام غسان بالباب استغرب معقولة شجابهة وهية مقاطعتنه .. كلتلهم

اتفضلو دخلت ام غسان تركض وراحت لابوية وكعت عليه وكلتلهة الحكني رباب راحت مني.

سمعت هيج لو اتخبلت ... شبيهةةةة رباب عمتار شنو صاير فهمني

ابو مشتاق☆☆ خير فضيلة شصاير شبيهة رباب؟ احجي

ام غسان☆☆ اخذوهة الشررطه مدري الامن وگ عيني ابو مشتاق ابوس ايدك طلعلي رباب الحكلياهة لايسوون بيهة شي

ام مشتاق ☆☆ عرفت ام غسان وابنهة يمنه دخلت للهول حتى اسلم عليهم واسمع دكولهم

رباب اخذوهة الشرطة مدري الامن.. 😱 عزةةةةةة صخااااام ليشش اخذوهة شسووت

ابو مشتاق☆☆ احجيلي شسوت خليني افتهمممم .

مشتاق☆☆ليش اخذوهة شدلاهم بيهة شنو صاير شمسوية فهمني عمار احجيي

ام غسان☆☆ ماااا سوووت شي وعيونك انت ابو مشتاق غير اعرف شمسوية كلشي ما

سوت ليش اخذوهة وج يمه وينج وج يمه شصار بيج

ابو مشتاق☆☆ اني عندي عرف بالداخلية هسة اروحلهم .. لبست ملابسي ودة اطلع

جلب بيه مشتاق وكلي ماعوفك ... كلتلة اخذ المفاتيح وانت سوق..

راس

ا رحت لصديقي ابو همام هذا صديق قديم اتعرفت عليه بجلسات السمر والكيف والشرب..

وصلنة الة وكلتلة لمشتاق ابقى بالسيارة بس اني انزل .. التقيت بابو همام واني خجلان

شلون اكله بنت اخوي بالسجن واني حتى تهمته ما اعرفهة شنو ... الله لايوفقج فضيلة.. كلتبة... جاييك بخدمه خوية ابو همام الحكني رحمه لاهلك

ابو همام☆☆ كول وادلل ابو مشتاق .

ابو مشتاق☆☆ دخيلك ابو همام بنت اخوي اخذوهة الشرطه مدري الامن ومنعرف عنهة شي ولا نعرف هية وين

ابو همام☆☆ اذا أمن يعني قضية سياسية وهسة عاجين على جماعة لحزب الشيوعي
واذا شرطه تختلف تهم ثانية..

ابو مشتاق☆☆ لا ياحزب شيوعي هي اسمهة متعرف تكتبة دخيلك البنية عرض وانتة تعرف العرض شنو يعني مصيبة

ابو همام ☆☆ اذا بعدهم بالحلة اكدر اطلعهة بس اذا ترحلو بغداد صعب.. ولا يهمك ساعة

ساعتين واجيبلك الخبر وبنت اخوك اطلعهة ان شالله بس انطيني اسمهة الكامل .

ابو مشتاق☆☆رباب مكي اسمهة بنية بيضة وعيونهة خضر وشعرهة اشكر

ابو همام☆☆😐 على هاي المواصفات الله اليستر عليهة.. اروح اتلاحك قبل لايصير شي

ابو مشتاق☆☆ كلي الله يستر لو انهد حيلي خوية اروحلك فدوة بس سويلي جارة وشكد متطلب اني حاضر

ابو همام☆☆ اخذت سويج سيارتي ودة اطلع
كلتلة...عيب هالحجي ابو مشتاق احنه اخوان

وافضالك عليه هواي اجى الوكت الاردهن الك خوية يلة اني رايح صعدت السيارة وشغلتهة

ابو مشتاق☆☆ ابو همام اني منتضرك هنا ماروح لمكان كاعد بسيارتي ..

اشرلي بمعنى تمام وشخط السيارة وراح.. رجعت كعدت بالسيارة يم مشتاق

مشتاق☆☆ بشر يابة عرفتو شي فدوة اروحلك

ابو مشتاق☆☆ هسة راح ديشوف بلكي الله يوصل الهة ... يكول هسة موجهة اعتقالات

على الحزب الشيوعي بس هاي الحيوانه وينهة وين الحزب الشيوعي اسمهة متعرف تكتبة ما اعتقد هالامر..

حطيت ايدي على راسي اوووف يا الله وين جانت هالمصيبة لو بس اعرف تهمتهة شنو

ولك مشتاق خاف دعارة عزة بعينك مكي اقتلهم كلهم خلاص وحق الله

مشتاق☆☆ اسكت يابة رحمه لأهلك براسي الف سؤال رباب وين الامن وين شراح اسوي ما اعرف..

ام غسان☆☆ رجعنه اني وعمار للبيت لكيت اخوتهة مازن ونبيل راجعين احجي وياهم ادك

الطم يسوون نفسهم مهتمين بس مبين جذب ولا مهتمين... جنت تعبانه ودخلت للهول

واشوف مكي نايم هيي هيي والله يالله بهالظيم ونايم المحروس والله ياب انيالك لا

مهتم ولا داير بال نام نام شكو عليك.. ورة شوي اجتي مرت مازن سعاد

سعاد☆☆ 😏خير عمه بشري مالكيتو رباب؟

ام غسان☆☆ انجبييي لجج ادبسززز افرك حلكج فرررك اذا جبتي سيرتهة بالعاطل افتهمتي لو لا

سعاد☆☆ هسة شحجينه.. اوف اوف الله يستر علينه ياربي خطية الله يعينهة مدري وين صفه بيهة الدهر😏

ام غسان☆☆ تمشين منا لو امشيج بمعرفتي يا بنت صبيحة كلمه ثانية تنطردين برة

وتنحرمين من جهالج يلة طلعي برة.... راحت انكشعت برة التفتت على مكي.. ادري شهالنوم

الثكيل من يمته جان نومك ثكيل هيج مكييي مكييي اكعد شوف بنتك وين وك والله عليك

كلب بنتك ماخذيهة الامن وانت ناايم مكيي.. يا اشو هذا لاحس ولا نفس ميتحرك...

خضيته قوي يا😳 هذا جسمه بارد يبوووووو الحكو ابوكم ماااات... وصارت المصيبة مصيبتين ابيتنه...

مشتاق☆☆ مر اكثر من ساعتين ونص يلة بين ابو همام... راسا ابوية نزل من السيارة واني نزلت وياه..

ابو مشتاق☆☆ ريح كلبي ابو همام رحمه لاهلك لكيته بشر ؟

ابو همام☆☆ بنتكم ماخذيهة بتهمة انتمائهة للحزب الشيوعي ولاكيهة وية شلة شباب ابيتهم.

مشتاق☆☆ حجة هيج ابو همام وفقدت كل حواسي لاكمت اسمع ولا اشوف ولا اتحرك

اتغيبت بعالم ثاني ... ووكمت اربط الاحداث بمخيلتي من يوم البدت تتغير عليه

ابو مشتاق☆☆ ابو همام ياحزب شيوعي هاي دابة كلشي متعرف حتى اسمهة متعرف تكتبة يا انتماء يا شيوعي صدك تحجي انت

ابو همام ☆☆ كول ربك ستر حصلتهة بالوقت الضايع جان الهم ربع ساعه ويرحلوهم لبغداد

هسة الاجرائات مشت امشي وياية اكتب تعهد على بنت اخوك حتى يطلعوهة.

ابو مشتاق☆☆ يلة امشي بس كون مابيهة شي ... دنمشي واشوف مشتاق مسطور وواكف صحت بصوت عالي مشتاق،

مشتاق☆☆ فزيت على ابوية صاحلي حركت نفسي كوة وكلتلة يابة ما اكدر اسوق احس جسمي ثكيل ..

ابو مشتاق☆☆ امشي اصعد يالعاشگ امشي. صعدنه السيارة واني سقتهة .

مشتاق☆☆ وصلنه لمبنى الامن ..دخلنه ونسمع ونين المساجين من التعذيب... صوتهم يحفر براسي ومدكدر اتخيل شنو صاير برباب

رباب☆☆ دخلوني للسجن ورة شوي صاحو باسمي نشف دمي كلت خلص يا رباب حياتج

خلصت حيعدموج بديت اتشاهد اجو جروني واخذوني لغرفة ضلمه وبيهة اثنين نسوان

وبيدهن قمجي وشطب رمان اول مادخلت استلموني ضرب على اليوجعني ويشيلن

ويشمرن بيهة الى ان حسيت روحي راح اخرب خلص بعد مبية حيل اتحمل وكعت

بالكاع وهنه بقن يضربن حتى بوكسات ضربني ما اعرف شكد طول هالامر بس حسيته دهر وماراح يخلص ...

من انهاريت من التعب وبعد ما اكدر احرك جسمي واحس وجهي ورم حسيت الباب

انف

تحت ودخلو اثنين واخذوني للتحقيق سالوني شنو اسمي...

جنت كوة احجي وابجي من الألم جاوبتهم ..
رباب مكي..

المحقق☆☆ اعترفي شعندج وية جماعة الحزب الشيوعي

رباب☆☆ 😭والله العظيم ماعندي شي وما اعرف شي اصلا ما اعرف شنو حزب شيوعي

المحقق☆☆ اكلج هاي الكلاوات سامعهة وشابع منهة احجييي شعدكم مجتمعين ابيت هذا الشيوعي ابن الشيوعي

رباب☆☆ عزة العزاج رباب صخام الصخمج شراح يخلصني ..اني احجيلك سيدي والله

العظيم هوة جان واعدني بالزواج ويحبني واني احبة وهو وحيد ماعندة احد امه ميته

واخواته بعيدات فہ اني اسويله اكل واجيبلة واليوم جانو اصدقائة يمه وجبلته جدرية

الاكل وكلتلة اني ادخل اصبلك بس والله العظيم ماجنت اعرف همة حزب شيوعي عبالي مجموعه اصدقاء ويلتكون 😭

المحقق☆☆ هااا اكلل ههههه بس والله انتي خوش اكل بيج اقصد من ايدج .

رباب☆☆ يمة هذا شبي هذه الناقصة دخيلك ربي.. والله ماعندي شي سيدي والله العظيم

المحقق☆☆ يعني تريدين تقنعيني بنية بهالجمال وهالحلاووة وبنص مجموعه شباااب صايعه متسوووون شييي لا ما اكدر اصدك😏

رباب☆☆ 😭 ماكو شي والله العظيم هوة خطيبي والله

المحقق☆☆ هههههههههه خلينه ناكل من اكلج حالنه حال الشباب الجنتي وياهم

رباب☆☆ 😱😱😭 عزة العزاااني عزة العزاج رباب.. سيدي دخيلك اني اختك فدوة ابوس ايدك

المحقق☆☆ انجبي لجج... اكطع لسااانج حشاهة لاختي. اختي مو دايحة مثلج وبنص

الشباب وابيت لوحدهم هسة استشرفتي بنت الكلب .. بهالاثناء اندكت الباب وصاحو باسمي

(رباب مكي) لاحد يتقربلهة ابو همام موصي عليهة ضحكت هههههههههه ها ولج ودكولين شريفة..

ابوو همام بنفسة موصي عليج عمي بالعافية عليه شابعيج دك وكتل وبعدج حلوة خلي

يتهنى الف عافية ههههههههههه ... صحت عليهم وكلتلهم اخذوهة ورجعوهة للحجز

رباب☆☆ رجعت للحجز وجسمعي مكسر من الضرب واحس وجهي منفوخ وشفايفي تجري دم....

ورة فترة همين صحو باسمي كمت الطم واصرخ مااامسوية شييي والله العظيييم...

عبالي راح ياخذوني يعدموني لو يعذبوني مرة ثانية... جروني واخذوني لغرفة المحقق بس

غير محقق مو هوة نفسة الجان يحقق وياية دخلت وشفت عمي ابو مشتاق ومشااق ورجال غريب وياهم

بس شفتهم حسيت بأمان وركضت عليهم اتقربت عليه دفعني عمي بس مهتميت ارتميت

عليه...عمييي فدوة والله مامسوية شي خلصني طلعني منا اروحلك فدوة عميي😭

مشتاق☆☆ شفتهة انصدمت حالتهة مبهذلة ومضروبة وجهة احمر وازرك وشفتهة مورمه وتجري دم

ابومشتاق☆☆ متقبلتهة من اجتي عليه خصوصا من عرفت بيهه جانت وية شله شباب

لان متأكد هية مو من ضمن الحزب الشيوعي لأني طرف بيه بس متستر وخافي روحي ..

كملنه الاجرائات وطلعناهة مكتوب على كتابهة اشتباه .. يعني مشتبهين بيه كانو وطلعت برائة....

اخذناهة رجعناهة بالسيارة سالتهة ... لج ساقطة شعندج بنص الشباب؟ شعندج وية رائد ... احجي

رباب☆☆ انرعبت من هيج حجة وياية ..
والله ماعندي شي عمي بس امي تطبخ ودزتني انطيهم الجدر ولزموني

ابو مشتاق☆☆ سكتت عنهة لان اعرف جوابهة كذب وما راح تعترف بشي.. وصلناهة لأهلة وكلتلهة انكلعي نزلي يلةةةة

رباب☆☆ نزلت ركض دكيت الباب على اهلي طلعتلي جميلة تباوعلي تك عين وصاحت اجتي اخيتكم ...

دخلت شفت كوم نسوان لابسات اسود وينعن كل ضني عليه هيج مسوين لان عبالهم متت

صحت بصوت عالي رجعت يمه مابية شي وادور بالوجوه عليهة ...كشفت وجهة امي من

العباية وصاحت يبووو ... ورة دقايق افتهمت ابوية اتوفى بعد ما اخذوني 😔 الامن..اجتي

فرحه وحضرت فاتحة ابوية وعرفت بالصار ضلت تلوم بيه وتحجي عليه وافهمت منهة شنو يعني حزب شيوعي ...

ارتاحيت من عرفت هوة شي مو عيب بس الهم اهداف معينه...خلصت الفاتحة واحس

العالم تحجي عليه بنضراتهة بس اني اكابر وكمت اسوي تصرفات على اساس اني جنت

افتخر بانتمائي لهلحزب حتى اغطي على تواجدي ابيت رائد بين هالشباب..

⚘مرت السنين ومشتاق كلما يشوفني يتجاهلني وابد ميتقربلي... وبسنه 1980

سمعت مشتاق يريد يتزوج متحملت ورحتله وكفت يم دائرته... طلع وشفته ورحت اركض عليه.. مشتاق صدك راح تتزوج

مشتاق☆☆ اي حتزوج عندج مانع بنت عمي

رباب☆☆ ليش متريد تصدك ماعندي شي وية رائد ليش هيج تعاملني

مشتاق☆☆ لانج كذابة... تتذكرين من سالتج شنو اهداف الحزب الشيوعي معرفتي

تجاوبيني ماكو شخص منتمي لحزب ميعرف اهداف حزبة... وعلى فرض عرفتي الاهداف ما اكدر اتقبل انج جنتي بنص شلة شباب وابيتهم

رباب☆☆ يعني انتهى حبك...وقاطعني

مشتاق☆☆ من ذاك اليوم قتلته لحبج بكلبي. وهسة الله وفقني ببنية وياية من الدائرة خلوقة وحبابة وتحبني والاهم من هذا مدور مركز وفلوس...

رباب☆☆ بقيت صافنه على كلامه ورة شوية طلعت بنية شلون حلوة اجتي وكفت يمنه

وكلهة اعرفج على بنت عمي .. وعرفهة عليهة
..بنية مثقفة ووجهة بشوش وحلوة😢

وعرفت انتهه اخر امل الي وراح 😔 وتزوج بنفس السنه مشتاق ....

وبسنه 1982اتخرجت فرحه واتعينت بمدرسة اطراف الحلة قريب

ا على مرزعتنه فہ اقترحت

عليهم نروح نسكن ابيتنه الي بالبستان حتى فرحه تكدر اداوم ... رحنه كلنه وقفلنه بيتنه وتركناه...

وسالفتي بدت تنسي شوي شوي بس من يومهة مااجوني خطابة بعد هالحادثة..

اما سيطرتي على البيت نفسهة ما اتغير شي لان اخوتي لا يحلون ولا يربطون وميحبون المسؤلية اصلا...

زوجات اخوتي جانن يسابقن على الخلفة كل وحدة صار عدهة 5 جهال.. كلش حبيت ولد

اخوتي واتعلقت بيهم... جنت اوكلهم بيدي وانيمهم يمي وما اقبل على امهاتهم من يضربوهم ...

بس هنة جانن يتعمدن يضربون جهالهن حتى يحركن كلبي...مرت الايام وبدن شوي شوي

يعزلن وحدة ورة الثانية ما اهتميت بعد احسن خلي يعزلن.. ضلينه نعتني بالكاع ونزرعهة

ونحصدهة والرزق ماشي الحمد لله .. وبيوم من الايام فجئة اخوية غسان وكع واتمرض

مرضة قوية كالو لازم يبطل شرب وجكاير ... امي من حركه كلبهة كالت ربي اخذ كلشي

مني بس لا تاخذ غسان وضلت تنذر وتندعي
.... ورة اسبوع بالضبط امي طلعت للبستان حتى تحصد وصلت يم شجرة رمان

وو_________؟

يتبع،،،،،،،،⚘

#ارحام_متناثرة

قصة_حقيقة_عاطفية_اجتماعية

البارت الخامس عشر⚘⚘بقلم فينوس آرام

رباب☆☆وبيوم من الايام فجئة اخوية غسان وكع واتمرض مرضة قوية كلش كالو لازم

يبطل شرب والجكاير ... امي من حركه كلبهة كالت ربي اخذ كلشي مني بس لا تاخذ غسان

وضلت تنذر وتندعي.... ورة اسبوع بالضبط امي طلعت للبستان حتى تحصد وصلت يم

شجرة رمان جبيرة دتمشي من يمهة وعثرت
ووكعت جفي على وجهة وجان بالارض سعفة

نخل مكطوعه ويابسة.. عثرت ووكعت ودخل بعينهة اليمنه شوكه جبيرة مالت السعف

بهالاثناء جنت اني فوك السطح انشر الزوالي الغسلتهن سمعت عيطة وجنهة صوت امي

اتقربت على السياج مالت سطحنة ماشفتهة نزلت اركض وطلعت للبستان كمت ادور مثل

المخبلة .... يمةةة يمةة وينج يوم ... سمعت ونين يم شجرة الرمان رحت اركض واشوف

امي امددة على الكاع وعينهة غركانه بالدم بديت اصرخ... مااااااازن نبيللل عمااار..

بس اتذكرت هذول بالجيش لأن حرب ايران بس غسان ماجان لابس بالجيش لان

مرضة قوي وطلعوه اسباب صحية صحت بعالي صوتي غسااااان وماكو رد ..مالكيت

كدامي غير فرحه وصحت بصوت عالي فرحةةةةةة وج فرحةةةةةةةة لحكيلي

فرحة☆☆ رجعت من الدوام تعبانه لأن مدرستي مسافة عن بيتنه ولازم انزل بطريق

ترابي وامشي حوالي نص كلم يومية روحة ردة لأن ماكو سيارات توصل لهناك .. يعني

يومية تقريبا امشي 1 كلم حسيت رجلية صارن خيوط بس كلت ميخالف اهم شي

حققت حلمي وحلم امي وابوية الله يرحمهم وصرت مدرسة ...رجعت وسبحت واتغديت و

ستوني حاطة راسي على المخدة اريد ارتاح وسمعت صوت رباب بس مثل الحلمانه لان

الصوت بعيد بقيت بفراشي كلت يجوز لأن تعبانه هيج اسمع ثواني ورديت سمعت صوت

رباب مرة ثانية تصرخ باسمي .. راسا فزيت من مكاني وكلت خلي اطلع اشوف شكو

طلعت للبستان وصار صوت رباب اوضح رحت اركض شفت امي فضيلة واكعه ووجهة بي دم

مثل وجه امي امينه صرخت وكعدت يمهة.... ولج شبيهةةة رباب شصاايررر

رباب ☆☆ساعدينييي دنشيلهة وندخلهة جوة بسرعه

فرحه☆☆ حاولنه نشيلهة بس مدنكدر امي سمينه دنحاول مرة ثانية انوب امي رادت

توكع واتأذت بزيادة كلتلهة نيميهة عے الكاع حطيتها ورحت للبيت اركض..... مالكيت كدامي غير الجناين

كلتلهن امشن وياية اخذتهن ورحت للبستان اتكابلنه عليهة ووصلناهة للبيت ... بين

مادبرت سيارة واخذتهة اني ورباب للمستشفى كلنه امي ماتت خلص .... الشوكه كانت داخلة

بشكل سطحي للعين لكن مأذيه القرنية وتالفتهة من العين اليمنه والعلاجات كانت

غاليه بذاك الوكت احتاجت اكثر من سنة ونص مراجعات وعلاجات لكن ماكو فايدة فقدت بصرهة...

⚘بسنه 1984 اخوية عمار اتزوج بنت الشخص الي كان يشتغل وياه سوينه عرس

لكن مو ضخم لان احوالنه بدت تتراجع ... ورة كم اسبوع اخوية غسان تركنة واخذ زوجته

وراح اجر بيت يم بيت اهل مرته ... ما اهتمينه لان همة اصلا ماجانو شايلين مسؤليه

روحهم وجانو براس رباب.. ومن اجيت اني شاركتهة المسؤلية فعلا المسؤليه كلش ثكلت

علينة لان جنت اني اصرف من راتبي و رباب من البستان .. وجان وقت حرب وقصف و

الصواريخ توكع عامي شامي وياما قتلت ناس وهمة ببيوتهم... بهالفترة رجعنة لبيتنه الي بالولاية

وتركنه البستان لان بيت ابو ريسان باعو ارضهم وراحو جوة بالعرب يم عمامهم والناس

الي اشترو ارضهم مارتاحينالهم فہ ما اتعاملنه وياهم... رباب شافت المسؤلية لوحدة صعبة

مدتبرهة ورجعنه... بهالفترة كدرت انقل نفسي من مدرسة القرى والارياف لمدرسة المدينه...

اول شي فكرت بي ازور اخوتي ولد ابوية مجيد .. واول جمعه من رجوعنه رحتلهم

اركض ..دكيت الباب وفتحلياهة ابنة الجبير احسان.... باوعتله وگ عيني سبحاان الله

نسخةةة من بابا مجيدد ابتسمت وكلتلة احسان عرفتني

احسان☆☆ ليش منو كلج ناسيج اصلا وابتسم .. شلونج خيتي شخبارج

فرحه☆☆ ياعمري والله نفس نبرة صوت بابا مجيد ونفس طيبة كلبة وحركاته فدوة لعمرك

يابة الخلف مامات .. بخير ياعمري الحمد لله مشتاقتلكم كلش شلونك اخبارك انت واخوتي

احسان☆☆ تعالي تعالي دخلي جوة مو مال وكفة على الباب.. هسة اصيح امي تعاي دخلي

فرحه☆☆ دخلت البيت وعيوني دمعت من اشتياقي اله.. اباوع للاماكن الجنت العب بيهة

اني وامي امينه وابوية مجيد بكل ركن وزاوية من البيت عندي ذكريات .. طلعولي باقي

اخوتي فدوة لعينهم بعدهم صغار ستوهم دتخط الهم شوارب سلمت عليهم وصافتحهم

واجتي خالة شكرية وسلمنه على بعض وكعدنه نسولف سوية

فرحه☆☆ خالة شلون مدبرة العيشة احجيلي لا تخجلين اني حسبة بنتج

شكرية☆☆ والله يايمه ربج مدبرهة مو اني... الاوضاع كلهة تغيرت بهالوكت واحسان بعدة

يدرس ماصار عمرة 18 سنه لا اكدر اكعدة من المدرسة لان وصية ابوهم لازم يدرسون ولا اكدر ابقيهم يحتاج مصرف قبة ومنين اجيب

فرحة ☆☆ لا يمعودة خاله شتبطليهم... تدللين انتي واخوتي كل شهر نص راتبي

اسلمه بيدج والله خاله ياريت اكدر انطيكم اكثر بس بيت اهلي همين عليه مصرفهم

شك

رية☆☆ 😳 لا يمه شذنبج انتي تنطين راتبج .. خجلت من كلام فرحه استصغرت

نفسي هواي وحسيت اني شكد جنت تافهة من حاربتهة وهية طفلة وجنت اضوج منهة

فرحة☆☆ شهالحجي خاله ؟ احسان والولد اخوتي الله شاهد اعزهم اكثر من اخوتي من امي وابوية

شكرية☆☆ حقى المرحوم من جان يحبج يا يمة

فرحه☆☆ لاني بنته يا خاله وتربيته اني احس بأنتماء الة اكثر من ابوية الخلفني..

ترة العبرة بالي يربي مو اليخلف.. اذا العبرة بالخلفة فہ الحيوانات همين تخلف ..

بس الله ميزنه ونطانه عقل حتى نربي ونتربى واني ابوية مجيد ماقصر وياية ابد وبفضلة

وصلت لأعلى المراكز ... وهسة لازم ارد الدين الي بركبتي واردلة الجميل بأخوتي

شكرية☆☆ رغم صغر عمرهة بس هالبنت واعية وافهمة اضعاف عقلي وعمري ..كلش

خجلت من نفسي وحتى معرفت شلون اتصرف .. كامت واترخصت دتريد تروح جلبت

بيهة.. والله العظيم ماخليج اتطلعين اليوم غداج يمنه مو هذول اخوتج واني خالتج اذا تروحين ازعل عليج

فرحه☆☆ اتغدينه سوية وصارت علاقتي بخاله شكرية وولدهة اقوة بهواي من قبل...

رجعت للبيت واني احس مسوية انجاز ورديت لو شي بسيط من افضال ابوية مجيد عليه..

ورة كم يوم داومت بنفس المدرسة الي درست بيهة ☺.... شي كلش حلوة من تكون طالب

وتدرس بمدرسة معينه وبعدين ترجعلهة معلم او مدرس هههههه تحس روحك ماخذ البطولة😂 ....

مرت الايام واهلي بتفككون اكثر واكثررر بعد ماغسان طلع من عدنه مازن همين اخذ زوجته

وطلع وبقى عمار ويانه بس عازل سويناله مطبخ وحمام يم غرفته بالسطح واستقر

...ونبيل بالعسكرية.. المزرعه انتركت وانهملت لان محد يروح يسگيهة مي ويعتني بيهة

ورباب ماكامت تكدر تعوف امي .. وامي حالتهة تسوء يوم عن يوم وبدت عينهة الثانية

تتأذة الى ان بسنه 1985 فقدت بصرهة تماما وصارت عمية... جان وقت حرب وشارعنه

ماجان يخله من الشهداء الي يجيبوهم بأستمرار هواي ترملن وهواي شهداء بأول عمرهم استشهدو...

مرت الايام وهواي يجوني خطابة لكن ما اقتنع بيهم بسهولة لأن ابالي اهداف معينه

لزوج المستقبل اهمهة يكون عندة غيرة علية وخلوق ومثقف وواعي ومتفهم .. وبيوم من

الايام صديقتي انسام اتخربطت كلش بالدوام واستفرغت ودمرت ملابسهة حاولت تتصل

بأهلهة بس التلفون الارضي مالت المدرسة جان مكطوع ومبي حرارة..

اخذت اجاز زمنية واخذتهة لبيتنه ارتاحت وانطيتهة ملابس مني وغيرت ملابسهة بس

بقت كوة تتحرك مبيهة حيل .... اخذت منهة رقم تلفون اهلهة الارضي ورحت اتصلت عليهم من جوارينه بيت ام سكينه
☏☎☏☎

فرحه☆☆ الو مرحبة العفو بيت ابو فارس

فارس☆☆ اي نعم تفضلي

فرحه☆☆ العفو اخي ترة انسام اتخربطت ومابيهة تمشي ياريت تجون عليهة خطية كلش تعبانه

فارس☆☆ انسام .. شبيهة شصاير عليهة هية وين هسة بالمدرسة؟

فرحه☆☆ لا والله اني صديقتهة جبتهة لبيتنه لان تعبت كلش.. اذا تكدر تجي حتى تاخذهة خطية

فارس☆☆ دقايق اختي واني يمج بس شلون اعرفج؟

فرحه☆☆ راح انتضرك بالمدرسة اسمي ست فرحه

فارس☆☆ رحم الله والديج اختي .. سلمت عليهة وغلقت الخط واخذت امي وياية.. وصلنه للمدرسة ودخلت امي تسال عن ست فرحه

فرحه☆☆ غلقت التلفون ورحت للمدرسة ودخلت لغرفة المدرسات وكعدت كلتلهم اي

احد يسال عني انطوني خبر لان اهل انسام بالطريق.. ورة ربع ساعه او ثلث ساعه تقريبا

اجتي مرة لابسة عباية وتسال عني طلعلتهة كلتلة خاله انتي ام انسام كلتلي اي .. رحبت

بيهة وسلمت عليهة وكلتلهة انسام ابيتنه خطية عفتهة نايمه و تعبانه كلش ....اخذتهة

دنطلع كلتلي هاي سيارتنه وابني ديسوق صعدت وياهم ودليتهم بيتنه .. ردت منهم

ينزلون بس ماقبلو.. نزلت امهم اخذو انسام واتشكرو من عدنه وراحو... ورجعت للمدرسة
لان ماخذة اجازة زمنية وميصير ابقى .

ورة 3 ايام اجتي انسام خطية جان عدهة فقر
دم ومتخربطه وتحمدنالهة على السلامه.. مر على هالامر حوالي شهر جنت انتبه اخو انسام

يوصلهة ويرد يرجع عليهة ياخذهة..... كلش حبيت علاقتهة باخوهة اهتمام وخوف عليهة

وحب.. اقارنهم باخوتي وما الكه اي وجه للمقارنه جنت كلش اخاف لا اصيبهم بعين

واحسدهم حتى جنت اتجنب اسولف وياهة عن اخوهة.. لاني فاقدة هالاحساس عندي

اخوه بالوجه شدة زلم 4 اخوة يسدون عين الشمس بس بالواقع واحدهم المرة احسن منه

وارجل واكثر شهامه وغيرة .. رغم كل مصايب رباب واخطائهة بس اليشفعلهة حبهة الحقيقي

النه وكلبهة الطيب صح هية تحبني اقل منهم بس وكفت وياية وساندتني بهواي مواقف ....

ورة تقريبا شهرين اجتني انسام وكلتلي اخوية فارس عينه عليج وكلش منعجب بيج ..الفرحه

ماوسعتني وماصدكت بس اتمالكت نفسي لان عيب فشلة شدكول عليه جنة المستقبل

ممصدكه جاهة عريس😂 . سويت نفسي طبيعية.. ههههه يا ليش وين شافني 😁

انسام☆☆ ولج شبيج هذا التصلتي عليه وحجيتي وياه وصعدتي وياه ووية امي بالسيارة من اجه اخذني

فرحه☆☆ هاا اي اي وشعرف مني حتى ينعجب بيه

انسام☆☆ يكول رزنه وثكيلة وبنت ناس ومثقفة كل المو

اصفات الحلوة بيهة بعد شريد اكثر

فرحه☆☆ مشكورة حبي رحم الله والديج او والديه

انسام☆☆ هاي شبيج ولج.. اكلهة عينه عليهة دكولي مشكورة بابا اخوية يريد يتقدمممم الج


فرحه☆☆ بلحظات قصيرة جدا اثناء كلامهة حققت بخيالي حلم جبيرررررر جدا رجل

وشهم وعندة غيرة وناموس ومثقف هو هذا الجنت اتمناه كلهم من صغري يستحسفون

بية كلشي لاني سمرة! معقولة تعدل الدنية وياية ويجيني زوج ابن حمولة؟ جاوبتهة .. اي

حبي اتقدمو لأهلي ويصير خير ما اكدر انطيج كلمه من نفسي عندي اهلي يقررون وياية

انسام☆☆ والله حقج... بس اخذيهةة مني اخوية ميتعوض وميتفوت اصلا غبية الترفضة😏

فرحه☆☆ 😒مين يشهد للعروسة ترةة اني همين ما اتعوض وما اتفوت وكسبان الياخذني 😎

انسام☆☆ 😇 لو مابيج هالمواصفات ما اخطبج لاخوية 😍

فرحة ☆☆ ههههههههه دكومي دك الجرس لاتجي المديرة تدفرنه وتجيبلنه كتاب طرد وميفيدني اخوج بعد

انسام☆☆ لا بلة اخويةة يسوة ابو الوضيفة عيني

فرحه☆☆ لا عيني لا وضيفتي اهممم.. دمشيي من هسة بدت تمدح وتلمع باخوهة ... مشينه وكل وحدة راحت لصفهة ادرسة

... ثاني يوم كلتلي انسام يوم الجمعه نجيكم خطابة.. كلتلهة كل الهلا بيكم ... رحت للبيت وحجيت وية رباب وامي

رباب☆☆ 😳 خطابة؟

فرحه☆☆ اي اخو صديقتي انسام الجبتهة لهنا خوش ناس ومستورين بس اكيد لازم يسالون عليهم

ام غسان☆☆ بالخير يمه.. جنت اتمنى عندي عيون واشوف عريس بنتي الصغيرة

فرحة☆☆ اااول مرة امي فضيلة تحجي كلمه متاذيني بيهة وتتمنالي الخير وتناديني بنتي الصغيرة

رباب☆☆ انصدمتةمن كلام امي شلون باركت الهة وفرحتلهة... ما اعرف ليش ماحسبت لهذا

اليوم ابد .. ماتخيلت فرحه راح تتزوج قبلي... كتمت بكلبي وسالتهة... عندة شهادةة مثلج فرحه؟

فرحه☆☆ فارس مهندس ومتعين وحالة اهلة زينه عدهم خير من الله ... وهسة لازم اكول

لاخوتي حتى يحضرون نفسهم العصرية امر عليهم ان شالله ... رحت العصرية لبيت اخوية

غسان حجيت وياه وكلي الله كريم اذا اكدر اجي!!!!!!! كلتله كل الهلا بيك وطلعت ماهتميت

اله ولا عبالك اخونه وجبيرنه.... ورديت رحت لمازن وكلي ان شالله اجي ... ما اعرف ليش

كلبي ما ارتاح واتأكدت هذول لا حزام ضهر ولا سند كلت ياربي المن اروح منو يوكف وياية بهالخطبة

راسا اجى ابالي مشتاق ابن عمي كلت اكيد ماراح يفشلني ..طلعت لبيت عمي وسلمت عليهم ..

يووو متغيرين هواي عمي ابو مشتاق بطل شرب يكولون لان اتأذة منه .. وام مشتاق

كلش متغير شكلهة والشيب ماكلهة على فراك ابنهة الصغير لان المرض الخبيث قضى عليه

خطية... حجيت وية مشتاق وكلتله عن الخطبة...

مشتاق☆☆ ايه مو تدللين بنت عمي ههههههه والله كبرتي وصرتي عروس هذاك اليوم جنتي هالكدوتج مفعوصة واليوم نكعد بمشيتج

فرحه☆☆ ضحكت وخجلت من هيج حجة.. هههه اييي كلنه نكبر شعبالك😁

مشتاق☆☆ صار وتدللين ليش لا اجي وعلى راسي

فرحه☆☆ يسلم راسك خوية العزيز... والله التجأت الك لان ماعندي غيرك انت تعرف

اخوتي مينشد بيهم ضهر لا اليمنه ولا البعيدين علينه

مشتاق☆☆ اعرفهم من زمااان غيرة سزززز والله لو وما عمي مكي بعيني لا اتبرة منهم كدام العشيرة ...

فرحه☆☆ انقهرت كلش من هيج ججة وكلتلة.. الحجيته صح بس يبقون اخوتي مهما يصير وانقهر من احد يحجي عليهم...

فدوة مشتاق اريدك تحضر مشيتي انت وعمي و تسال عن الولد وتفصلة تفصيل فدوة هذا زواج مو لعب

مشتاق☆☆صار وتدللين غالي والطلب رخيص اجيبلج قرارة من جوة الكاع

فرحه☆☆ رحم الله والديك اوكفلك بالافراح
ان شالله ..ورة شوي طلعو 3 اطفال ولد وبنيتين كعدو يمنه .. ياعيني هاي جهالك مشتاق

مشتاق☆☆ اااي جهالي يوسف و وردة ونرجس.. لا مخلين ليلي مثل الناس ولا نهاري مثل العالم دووخه وسطرة راس

فرحه ☆☆ هههههههه الله يحفظهم احلى شي دوخه الجهال... يلة مشتاق اني اترخص

اتأخرت.. سلمت على عمي ومرت عمي ودة اطلع ماقبل مشتاق

مشتاق☆☆ انتضري اني اوصلج بس اجيب السويج لحظة

فرحة☆☆ ماكو داعي مشتاق هية خطوتين هسة اوصل

مشتاق☆☆ دمشي امشي حتى لو خطوتين ابن عمج ديوصلج عيب ترفضين

فرحه☆☆ توصيلة بلاش ليش ارفض 😐 بس غير اجاملك شوي فشلة اكلك يله امشي مثل الممصدكه ...

مشتاق☆☆😂 اي عفية خليج صريحة بنت عمي ...

فرحة☆☆ ضحكنه وطلعنه واخذ جهاله ويانه تلاثتهم صعدت يمه بالصدر وشغل السيارة ومشينه..

وصلنه للبيت وجلبت بيهوردت منه يبقى على العشة بس ماقبل كلي غير وقت ان شالله

دخلت للبيت واني كلش فرحانه بموقف مشتاق فعلا انسان نبيل واخلاقة عاليه وحتى

زوجته اخلاقهة عاليه وحبابة.. دخلت للهول وشفت رباب واكفة يم شباك الهول تباوع ع الشارع..

رباب☆☆ 😔هذا الجابج مشتاق مو ؟

فرحه☆☆ اي حبيبتي هذا مشتاق ويسلم عليكم هواي

رباب☆☆ يسلم على الدنية كلهة بس عليه ماصدك يسلم

فرحه☆☆ الفات مات انسي وابدي صفحة جديدة

رباب☆☆ 😢 شنسة هو الماضي مالتي همين ينسي ..الله كريم

فرحة☆☆ ماعرفت شجاوبهة مسكينه الله يعينهة امي جنت عليهة وما

دة تكدر تغيؤ من نفسهة

صار يوم الجمعهة واجة عمي ابو مشتاق ومشتاق واخوه الاصغر منه وحضر عمار واجه

مازن بس غسان ما اجة وصارت الكعدة وتمت الخطبة باركتلي رباب بس مبين عليهة القهر

عذرتهة لان مهما يكون هية انثى والمشاعر مو بيدهة ومتكدر تتحكم بيهة....

بفتره الخطوبة جان فارس يجي لبيتنه هوة واخته انسام وصار كلام بيني وبين فارس عن امي امينه وبابا مجيد .

فارس☆☆ ليش مربيتج خالتج وزوجهه؟

فرحه☆☆اي لان خالتي ماجانت تخلف وبقت حوالي 6 سنين ماعدهة خلفة وامي من حبلت

بية كلش جانت تعبانه لان جبيرة بالعمر وهواي مخلفة تعرف بعد شلون تتعب المرة.. فأخذتني خالتي حتى تساعد امي فضيلة..

فارس☆☆ وبعدج يمهم لو شلون؟

فرحه☆☆ لا اتوفت امي امينه من صار عمري 6 سنين اجيت لبيت اهلي بس الرباني ابوية

مجيد الله يرحمه بقت علاقتي بيه اقوى من علاقتي بأبوية مكي

فارس☆☆ بس هوة حي الله زوج خالتج يعني حتى مو خالج حتى تكون هيج علاقتج بي

فرحة☆☆ شوف فارس الحيوانات من نربيهة بالبيت تبقى وفيه طول العمر النه شلون اذا

ربيت بشر تربية صحيحة وغمرك بحبة وحنانه شلون تجازيه؟

فارس☆☆ اجازيه بالخير طبعا يعني شلون قابل اجازي

فرحه☆☆ خلص هذا الاقصدة زوج خالتي رغم غريب عن اهلي لكن بقى محتويني حتى

بعد وفاة امي امينه هوة الأصر على تكملة دراستي وضل ياخذني ويرجعني واتحمل

مسؤليتي وتدريسي ونفقات مدرستي الى ان اتوفى

فارس☆☆ وليش اهلج ماخلوج تكملين دراسة؟

فرحة☆☆ لا مو ماخلوني بس امي وابوية تفكريهم بسيط كلش... عدهم البنت يكبروهة

ويزوجوهة ميهتمون للشهادة حالهم حال اغلب العوائل العراقية بزمنهم لذلك كلتلك ابوية

مجيد اله فضل عليه بدراستي وشهادتي وبسبب هالفضل نطيت لاخوتي من ابوية

مجيد نص الراتب الهم كل شهر يوصلهم لان ماعدهم معيل.

فارس☆☆ اي ميخالف بس مهما يكون يبقون ولدة غربة عنج لا همة اخوتج ولا ولد عمج ولا

من دمج فہ ليش شايلة مسؤليتهم عدهم عمام يتكفلون بيهم

فرحة☆☆ اني ميخصني بعمامهم ولعلمك همين تربطني علاقة حلوة باخوة ابوية مجيد

اعتبرهم عمامي بس ضروف الحرب خلتني شوي ابتعد عنهم واذا صارت قسمتنه

واتزوجنه همة اول المدعوين لان اعتبر نفسي عندي اباء اثنين وام وحدة

فارس☆☆ باوعت لعمتي ام غسان ولاطفتهة بالحجي ... ها عمة شفتي متريدج فرحة ههههههه

ام غسان☆☆ سمعت فرحه شلون حجت ومانطت بية كدام خطيبهة ولا حجت عليه

ضليت مقهورة والندم ماكلني على كل السويته بهالبنت والظيم الشوفته الهة ..معقولة تحبني؟

زين شنو الي يخليهة تمدح بيه كدام خطيبهة
بس من حجى وياية فارس وكلي فرحه متريدج كلتلة ....يمه حقهة متريديني

فرحه☆☆ سمعت امي كالت حقهة متريديني خفت لا تحجيلهة شي عن الماضي ودكله

ماجنت اريدهة لان بنية وجبيرة بحقي هالكلمه راسا نطيت بالحجي. وضحكت كلتلك

عندي ام وحدة لان امي فضيلة وامي امينه الله يرحمهة خوات والخوات واحد.. بس ابوية مجيد وابوية مكي الله يرحمهم غرب لذلك كلتلك عندي 2 اباء

فارس☆☆ الله يرحم الراحو ويحفظلج الباقين

فرحه☆☆ رحم الله والديك بس كلت من هسة اكلك عن علاقتي بأخوتي ولد بابا مجيد.. الراتب ماقطعه عنهم ولا اتركهم مستحيل

فارس☆☆ خلص فرحه الي تشوفي صح سوي وطالما بحدود الادب والاخلاق ماعندي

اشكال والراتب راتبج والج حرية التصرف بيه ما ادخل بهالامر

فرحة☆☆😍....مرت الايام و اتزوجت بنهاية سنه 1986 حضرو اخوتي ولد بابا مجيد ودك

وركصو ركص عبالك اخوهم المعرس مو اختهم 😑 هههههه صار عرسي كلش ضخم

لان الدنية كلهةة حضرت بيه اخوان بابا مجيد و ولدهم وعمامي وخالاتي ...فارس انسان مثقف وراقي وفعلا مكسب الي هالزواج

للاسف بنفس السنه اخوية عمار طلك زوجته وذبت جهالهة كلش صغار بنية ولد وشمرتهم على رباب وراحت اتزوجت... رباب كلش

اتعلقت بيهم واعتبرتهم اولادهة.. نصحتهة تتركهم لابوهم عمار بس هية كلبهة كلب

سمجة رهيف ومقبلت .. هالامر زاد حقد وكره اولاد غسان و اولاد مازن الهة اعتبروهة دتفرق بينهم وتفضل اولاد اخوية عمار عليهم...

مرت السنين وبدو يتقدمون الرباب..منهم العجوز او المطلق او بي فد عيب معين بس

جانت ترفض رغم جانت تنقهر من وحدة تتزوج ...وجان تبريرهة انو هية متريد تكون

اقل من مشتاق واذا تزوجت لازم تاخذ شخص بي خير مو حي الله واحد لان تعبت من المسؤلية....

اما اخوية احسان رسب بصف سادس اعدادي خطية مكدر ينجح ....وراسا اخذوه للجيش

⚫وابداية سنه 1987 بداية شهر الثاني اجاني خبر صدمني وخلاني افرفح اخوية احسان استشهد بمعركه اسمهة نهر جاسم بالبصرة 😭...

رحت مفرفحة لخالة شكرية كابلتهة و ادك والطم حسيت فقدت ابوية مجيد للمرة الثانة

لان كلششش يشبهة سودة عليه اطباعة وشكلة وحتى ذبة كلامه😭 جابوه ملفوف

بالعلم خاله شكرية نامت نيوم على التالوت وتنعي وگ ياوليدي ماشفت شي من حياتك

صدك والله شباب بأول عمرة وراح مو بس هوة هوااي شباب وياه كووم كومم الله يعين

اهاليهم ورة اقل من

اسبوع جابولنه اخوية نبيل شهيد وصارت المصيبة مصيبتين عليه

... امي تعبت على فراك نبيل والمرض هد حيلهة وطلبت تشوفني ورحتلهة

ام غسان☆☆ يمة فرحه سامحيني وابريني الذمه ابوس ايدج

فرحه☆☆ كلش انقهرت على حالهة فقدان بصرهة اثر عليهة وخلاهة تضعف وتتعب

وفوكاهة استشهاد نبيل ..كلتلهة يمة مسامحتج لا تخلين ابالج الفات مات ....راسا هية شهكت بالبجي

ام غسان☆☆ والله يمه ماحسبت البنات يشيلوني اتربيت هيج على كلام اهلنه الولد

احسن من البنات وكرهتهن بالفطرة مو لان اني اكرههن والله يايمه مامتقصدة افرق بينج وبين اختج بس بس ..

فرحه☆☆ شفتهة تلبكت بالكلام قاطعهة وكلتلهة يمة انسي هالامر الصار صار ..عوفيه

ولا تهيجين المواجع ماضي ونطويه منفتح دفاتر..قديمه بوستهة من راسهة وطلعت لان

ما اتحملت ابقى اكثر اكو شي بداخلي يكلي سامحيهة واكو شي يرفض ..

رباب☆☆ ضلو يمي ولد اخوتي عمار اربيهم وملتهية وياهم.. وشفت امومتي بيهم وبنفس

الوقت اعتني بأمي لأن تعتب كلش من جابو اخوية نبيل شهيد بس تنعى وتبجي .... وبيوم

20/2/1987 كان يوم جمعه ..جنت

__؟

يتبع،،،،،،،،،⚘

عمري طبيعي الأموات وخاصة القريبين كلش..كل فترة وفترة..يجونا بالحلم

هاي معناه 🥺انو محتاجين دعاء؛ محتاجين صدقة..او يجوز مامرتاحين
فانتي من تقريلهم قران او حتلو بس سورة الفاتحه وتهدين الها..متدرين اشكد فرحتيها
او مثلا طبختي فد اكله ووزعتي للجوارين..بنية ثواب لبيبتج..فهذا الثواب كله يوصلها ورح ترتاح

فتجيج بالحلم لأنو ملتهين بالحياة ومدتذكريها بصلاتج وبدعائج او بصدقات
فدايما ذكريها❤️

#ملوكه

عيوني الكبة بكل بيت تلكينه طبخ شكل ومقادير شكل

فاكتبي باليوتيوب ..الكبة العراقية او الكبة العراقية السلق..رح يطلعلج اشكال اكو بالبرغل واكو بالتمن ..فأنتي شوفي ياهو اللي يعجبج سوي🤗✨

#ملوكه

حبي بشرتج تعبانه كون تعتنين بيها من تقشير مرة بالأسبوع وغسول يومي ..وماسك بياض البيض فد مرتين بالأسبوع..وماسك التمن فد 3 مرات بالاسبوع..والترطيب اليومي وماي اشربي اهواي

هذيني العنايات اذا تسويهن بشكل روتين كل اسبوع ..ف رح تشوفين فرق😻💞


#ملوكه

عيوني سبب المكياج يطكع
أنو اول شي البشرة قبل المكياج ماغاسلته زين والتقشير هاملتي فكون بالأسبوع مرة او مرتين تقشرين
ولازم قبل المكياج ترطبين البشرة..ومن تخلين الفاندوشين وزعي ببيوتي بلندر المرطبه واخير خطوة تثبتي بباودر

اذا تسوين هالخطوات فالمكياج ابد مايطكع ولايتكتل🌚🌺

#ملوكه