#الحوت إهتمامه زائد عن الحد ، يهتم جداً. 🥰❤️

#القوس راح يوفيلك من اعماق قلبه اذا تأكد انك تستاهل هالوفاء من افعالك!🌝💜

‏برج ‎#السرطان مهما كانت المواضيع معقده وصعبه هو الوحيد الي يتفهمها.☺️💚

#العذراء ‏كثير القلق ، التفكير . 😥💙

#الثور محترم ويفاجئك بإحترامه اذا انطيته فرصة 🙃🧡

‏لا تفكر تجرح ‎#الدلو خيكرهك باليوم اللي عرفته بي.😁💛

يقول #الاسد ‏أنا أخشى غضبي؛ولهذا تراني لطيفًا ومسالمًا إلى هذا الحد.🙂🖤

#العقرب بروفيسور في تحليل شخصيتك 🤓💚

#الجدي ينافس جميع الابراج بالمكابرة.🙄💜

‏في علاقتك مع ‎#الحمل ע تكون على نمط واحد معه لكي ע يمل🙁🧡

‏برج ‎#الميزان اللي يضوكه منك يضوككيا دبل سواء خير او شر.😏💛

#ارحام متناثرة

البارت السابع⚘⚘⚘ بقلم فينوس آرام

⚘فرحة☆☆ مرت السنين و وكوة اتأقلمت واتعايشت وياهم... اخوتي صارو شباب ورباب صار عمرهة 12 سنه و اني عمري 9 سنين...

صرت بصف ثالث ابتدائي بس بقينه على نفس الوضع... امي وابوية يفضلون رباب علينه كلنه

ويفضلون اخوتي الولد عليه... جان ابوية يحجي وية اخوتي ويكلهم انتو الي تشيلون

اسمي مو البنات .... وشجرة العائلة ترسم بيكم انتو .. وانتو امتداد لذريتي

ووجودي بهالدنية.. كل هالامور انتو تسووهة مو خواتكم .. لان اول وتالي خواتكم يرحن

للنسيب البنات ميفيدون اهلهم بشي .. انتو سندنة وتشيلون كبرتنه...

هذاالكلام كان كفيل بزرع التفرقة بينة ونفور
اخوتي من عدنه وخصوصا اني لاني اختلف عن رباب .....

اخوتي الكبار غسان و مازن اشتغلو واعتمدو على نفسهم ...واختي جانت هية الكل بالكل بالبيت...

لو مهما تسوي ابد ميعاقبوهة وناطيهة حرية جبيرة واي مشكلة او بلوة تصير توكع براسي

او براس اخوتي وننضرب عليهة... شكد حاول بابا مجيد يمنعهم من ضربي بس مكدر

خصوصا امي متصدك تلكه حجة عليه حتى تكتلني وتضربني ..وبيوم من الايام اجه غسان

متاخر للبيت جنت نايمه وصحيت على عيطة بالبيت كعدتةخايفة ومخترعه..

ابو غسان☆☆ وولك شااارب يالحيوااان يالساااقط هاي تاليهة تجيني شااارب سكرااان

مثل المطي تطوطح يمنه ويسرةةةة لك تعااال ابن الكلب✋👋💥

ام غسان☆☆ لالالا مكييي لاتضربه اصبررر بعد ميعيدهة اصبررر بس خل نشوف ليش شرب لاااتضربة..

ابو غسان☆☆ دكلج وخري عني خليني أئدبة هالساااقط هاي تاليهة يجيني شارب وهوة بعدةة بكد فردة القندرةةةة وخري عنيي

ام غسان☆☆ يعني عليمن يطللع غير على عمامةةة مو اخوتك يشربون وابو مشتاق مو

بعدة يشررب جايبهة من برة المايطلع على اهلة نغل

ابو غسان☆☆ لااا انتي سكتتلج هوااااي ويحتاجلج تأديب 😡✋👋💥💥💥

فرحة☆☆ كعدت من النوم وشفت ابوية مكي ديتعارك وية امي فضيلة واخوية غسان وصار

حجي وصياح وابوية لزم امي فضيلة وغسان موتهم كتل بأيدة وراح جاب القمجي وضرب

غسان صارت امي فضيلة كدامه دتحاميلة لغسان وضربهة ابوية خلاهة فوك اخوية

وموتهة كتل .... كلهة وخري لاتفزعيلة بس ماسمعت كلام .... ضليت جامدة بمكاني

بحياتي ماشفت بابا مجيد يضربني او يضرب ماما امينه جان منظر غريب عليه... ابوية حرم

غسان من الشغل وحبسة بالبيت بس كام يختلق مشاكل وية امي ويتعارك وياهة

ويلزمني يكتلني ويكسر شكو شي بالمطبخ عاد امي فضيلة قنعت ابوية مكي يرجعو يشتغل بلكي يعدل !!!!

مرت الايام وبديت اخذ على اهلي بس امي فضيلة دائما انسه واكلهة خاله وهية تضوج وتكتلني ...

وبيوم اجة ابوية مكي وكال باجر ياخذنه لبستانه لأن تحتاج تنضيف من الدغل الي بيهة..فہ سوة ابوية فزعه عليهة احنه وعمامي ويانه

ام غسان☆☆ رباب يمة انتي روحي للبيت متتحملين شمس وانتي فرحه امشي ويانه دنشتغل يلة يمة

فرحة☆☆ شفت رباب راحت للبيت وماقبلت امهة تشتغل بالكاع اني همين رحت للبيت وراهة دخلت وكعدت.

رباب☆☆ هاي شنو شجابج هنا روحي اشتغلي وياهم

فرحه☆☆ مو شفتج جيتي انتي هنا اجيت وياج.

رباب☆☆ لا بالله انتي شكو جاية.. اولا اني بيضة وما اتحمل شمس انتي سودة تتحملين عادي ..

وثانيا اني اشتغل ابيتنه واساعد امي انتي كلشي متشتغلين ... يلة روحي وياهم اشتغلي لا تبقين هنا

فرحه☆☆ اتذكرت كلمه امي امينه وابوية مجيد كلولي أي موقف صعب يمر عليج لازم

تكونين قوية فہ كلتلهة... اني مامجبورة اشتغل بالكاع وبعدين واذا شكرة وعيونج

خضر وشنو يعني ماعندج ايد تشتغلين ؟ واذا على البيت اني بعدني صغيرة ما اعرف اشتغل شي

رباب☆☆ حجت هيج وياية اتخبلت ورحت اصيح امي من البستان ...يمةةةةةةةة وج يووووم تعالي شوفي هاي.

ام غسان☆☆ جنت انضف الكاع من الدغل واسمع رباب تصيحلي...ها ها رباب شبيج شكو ولج خرعتيني.

رباب☆☆ عيني فرحة متقبل تشتغل بالزرع تريديني اني اطلع اشتغل يلة هية تشتغل حاطة راسهة براسي هالسودة😒

ام غسان☆☆ شنو ؟ رفعت راسي شفت يمنى ويسرة هاي ماكو رحت طايرة للبيت.... دخلت

لكيتهة كاعدة تلعب وتفتر بالبيت... ولج انتي شعندج هنا ليش ماطالعة ويانه امشي يلة دنخلص قبل المغرب

فرحه☆☆ ليش اني اطلع بهالشمس ورباب متطلع ؟

ام غسان☆☆ وانتي تجيبين نفسج على رباب امشييييس كدااامي وبلا لغوة زايدة

فرحه☆☆ ما ما مااطلع معليه .

ام غسان☆☆ شنو معليه؟ لعدد مين نصرف عليج يالحيوانه امشي ولا تصيرين انانية

ويانه احنه اهلج.. امشي ونفس متتنفسين 👋✋💥كوووومي كداميي يلةةةةة

فرحه☆☆ضربتتي وجرتني من شعري واني اصرخ وابجي واكلهة بابا مجيد يصرف عليه انتو ماصرفتو عليه ...

بس مكدرت اكسر كلمتهة وطلعتني اشتغل وياهم بالكاع.. جانو بس اخوتي وعمامي وولد

عمامي وامي يشتغلون واني البنت الوحيدة البينهم اشتغل وعيوني تصب دمع وانوب

اتذكرت دلال امي امينه وابوية مجيد شلون جانو يعاملوني بحنية ويخافون عليه من الهوى الطاير.....

كملنه شغل و

رجعنه للبيت جنت هلكانه من التعب والشمس ضربت براسي واذتني كلش

..حطيت راسي على فراشي وغفيت حتى بدون ما اسبح...

ورة يومين اجة بابا مجيد وشكيتلة وحجيتلة الي سوته بيه خالة فضيلة

مجيد ☆☆ ميخالف بابا هاي امج مستحيل تكرهج بس انتي صايرة حساسة شوي منهن

فرحة☆☆ لا والله بابا بس هية تفرق بنتهة رباب عني لان شكرة وبيضة وعيونهة خضر...

يابة ليشش اني سودة ومو حلوة ليش هيج الله خلقني😢

مجيد☆☆ منو هاي السودة والمو حلوة ؟ اصلا انتي اجمل وحدة شافتهة عيوني ..انتي مو تثقين بأبوج؟

فرحة☆☆ اي 😔

مجيد☆☆ مو تعرفين شكد سافرت ورحت لمحافضات العراق وافتريتهة كلهة

فرحة☆☆ اي 😔

مجيد☆☆ ماشفت وحدة بحسنج وجمالج ولا شفت اجمل منج بنيتي...شعرج يخبل وعيونج

ورسمه وجهج وكل معانيج دكول كمر خوبن سمارج عسل... بوية اني يمج اسود مابين بالظلمه

فرحة☆☆ بس خالة فضيلة وبنتهة يضحكن عليه يابة😢

مجيد☆☆ ههههههه اي وشنو يعني خلي يضحكن عليج قابل شصار من ضحكن عليج اتحولتي خروف مثلا

فرحة☆☆ هه☹ لا

مجيد☆☆ شوفي فرحة اني اليوم يمج وادافع عنج بس باجر يجوز مو يمج اسمعي

كلامي وخليه ترجية باذنج.....مو كل الناس تحب نفس الاكل ومو كل الناس تحب نفس اللبس ومو كل الناس تحب نفس البشر ...

فرحة☆☆ شجاب الاكل بالنص 😐

مجيد☆☆ ابسطهة الج اكثر.. اني احب السمج بس انتي متحبيه مو صح

فرحة☆☆ 😝 اي ماحبهة

مجيد☆☆ هههههه و اني احب اللون الاصفر بس انتي متحبين هاللون مو

فرحة☆☆ اي 😐

مجيد ☆☆ خلص يابوية مو شرط الي تحبة امج فضيلة واختج رباب معناه الدنية كلهة

تحبة احنه منكدر نسيطر على الناس ونتحكم بالي يحبو والي يكرهو بس نكدر نفرض احترامنه عليهم فهمتي بنيتي ...

فرحة☆☆ 😓 لا مفتهمت شي

مجيد☆☆ بنتي هنة يحبن الشكرة والبيضة ويشوفنهة حلوة... بس اني وامج امينه الله

يرحمهة وغيرنه نحب شكلج وسمارج ولون عيونج...كل شخص اله مقياس معين بالجمال والحب ..

فرحة☆☆ بس كرهني بنفسي خلني اشوف نفسي قبيحة واحتقر نفسي حتى كمت احجي

وية الله اكلة ليش خلقت اختي حلوة واني لا.. هوة الله ليش يضلمنه هيج .. وحطيت ايدي على عيوني وبجيت

مجيد☆☆ بنتي خلي ثقتج بنفسج عالية ولاتسمحين لاحد يهزهة الي يكولج سودة ومو

حلوة كوليلة هاي خلقة الله واني عاجبني شكلي وبيك خير اخلق وحدة مثلي وتعال احجي ..

وبعدين ليش دكولين هيج عن رب العالمين يا بنتي لا اني ولا امج ربيناج هيج ..منو احنه

ونعاتب ربنا ونزعل منه المفروض تحبين نفسج وشكلج وتحبين رب العالمين لان خلاج

كاملة والكمال لله ..شناقصج ايد رجل يابنتي غيرج يتحسر علے هالنعمه الانتي بيهة

فرحة☆☆ يعني اني حلوة يابة مو سودة ولا شكلي يضحك والله كمت اخجل من نفسي☹

مجيد☆☆ قربت راسي عليهة وهمستلهة اكوول.... يعني فضيلة عود حلوة 😝اشو

لاشكرة ولا بيضة وحال الضيم حالهة الخشم شكبرة عبالك راس بصل ومعلك بوجهة

والكصة شكبرهة سنطيحة وعيونهة دكم وحلكهة مثل طشت امج التغسل بي هدوم

وفوك الظيم لسانهة مينجرع وتقلد على الناس.. ها بلة هاي شتحطيلهة واتطيب يابوية 😁😂

فرحة☆☆ 😁😂

مجيد☆☆ بنتي الوردة خليج واثقة من نفسج وقوية ولا تسمحين لاحد يهز ثقتج

وهاي الثقة تزيد بدراستج وشهادتج اسمعيني فرحة اخاف اني مموجود.. بااالج وياج تتركين

مدرستج فهمتي بوية ضمان مستقبلج هالمدرسة والشهادة هسة بوكتكم مريودة والهة وزن وثكل..

لو شكد ماسوو وياج واجهيهم واتحديهم ونجحي بحياتج.. حققي حلم امج امينه وصيري معلمه

فرحة☆☆ ان شالله يابة ☺

مجيد☆☆وردة بنيتي يلة هسة جيبي الكتب خلي اقريج مبقى وگت...

جنت دائما انجح واخذ درجات بين ال 8 و 9 ومرات 7 من 10.. مرات قليلة اخذ 10 لان

اعتمد على نفسي بالدراسة..او يجي بابا مجيد ساعتين يحاول ينطيني الدروس المهمة

والباقي اني اتهجة واقرة لان محد يقريني بالبيت اخوتي يعرفون يقرون بس عدهم

انانية وابد ميحبون المساعدة ولا يقبلون يساعدوني بشي احنه الاخوة والخوات بيناتنه

ممتصافين.. ماكو حنية على بعض ماكو حب بيناتنه واحد يتصيد خطاء الثاني

(رحمة ماكو بيناتنه ابد ) جنت افتقد امي امينه هواي... وكلش ارتاح من اتخيلهة يمي
واغفى على رجلهة لو ايدهة واسولف وياهة...

⚘بهالفترة رباب كبرت اكثر وصارت كلش حلوة وتخبل شعرهة طويل لخصرهة واشقر

مثل الذهب وعيون واسعه وخضرة ورموشهة طويلة وهي بيضه ورشيقة وملامحة تخبل فہ

هواي خطابة جانت تجي عليهة من ضمنهم ابن خالي الجبير خطبهة بس امي و مقبلت وصارت زعلة بين امي فضيلة وخالي الجبير

ابو غسان☆☆ بيت ابو كرار ترة مايتعيبون فضيلة شبيهم ليش نرفضهم

ام غسان☆☆ اووع هالعوبة هية وابنهة انطيهم رباب ليش يابة جايزة منهة

ابو غسان☆☆ وبيت ابو حيدر وبيت ابو ناهض وبيت ام قحطان وغيرهم ادري شبيهم

بشنو ميعجبوج خوش ناس وخوش ولد ومستورين

ام غسان☆☆ بلة انت كل عقلك تحجي؟ اني ما انطي رباب لحي الله واحد ..

من اريد ازوجهة انطيهة لواحد مركزز مال وجاه يعيشهة ملكة زما

نهة تريد هالجمال ازوجهة لفلاح مثلا؟

ابو غسان☆☆ بيبيتي احلى منهة واتزوجت جدي .. وجدي جان فلاح وابن فلاح وعاشو

عيشة مستورة وخلفت منه ابوية وعمامي شدخل الجمال بالنص ؟

ام غسام☆☆ هاي بيبيتك مو رباب كل عقلك انطيهة لواحد يشلع كلبهة اوع ...هذا جمالهه

يتكاتلون عليه الزلم شوفهة بعدهة ماكملت 13 سنه وشوف خطابتهة يومية 10 ..10 متوازية

انطيهة لياهو الجان... معليك مكي انت اطلع منهة وعيونك وغلاتك اذا مازوجهة زواجه العمر فلاا اسمي فضيلة..

فرحة☆☆ بهاي الفترة بابا مجيد اتزوج وصار عندة ولد سماه احسان جنت اروح اشوفهم شوي وارجع...

اما الدراسة بدت المواد تصعب عليه وجنت احتاج ابوية مجيد مرات يساعدني

بالرياضيات فہ جنت اكلة لابوية مكي وهو يدز واحد من اخوتي على بابا مجيد.. كلتلة لابوية

مادعرف احل رياضيان ودز اخوية مازن على بابا مجيد لان الرياضيات جان صعب عليه..

مجيد☆☆ جنت كاعد العب ابني احسان واجاني مازن كلي فرحه مدتعرف تحل تمارين الرياضيات ...

كلتلة هسة اجي ما اتأخر... طلع مازن واشوف شكرية كالبه وجهة ... خيرج شكرية شبيج؟

شكرية☆☆ ادري لشوكت تبقى مسؤل عن هالطفلة ترة شلعت كلبي شعندك وياهة؟

مجيد☆☆ شتقصدين شكرية؟ شعندي وية طفلة عمرهة 9 سنين مثلا؟

شكرية☆☆ شمدريني اني اسألك؟ اهتمامك بيهة مو طبيعي جنت تاخذهة للمدرسة

وترجعهة بيدك وانوب هسة حطيتلهة حنتور ياخذهة ويجيبهة وتروح يومية سااااعتين

ادرسهة وتجي وتشتريلهة وكل هذااااا من جيبك وكل طلباتهة اوامر بالنسبة الك عمي

على كيفك ويانه ترة هية مو بنتك صعدت لو نزلت تبقى انت خلك زووووج خالتهة المرحووومه😒

مجيد☆☆ اي صح اني مو ابوهة ولاعمهة ولا خالهه..اني الشخص الرباهة ياشكرية..

شفتهة كدامي تكبر يوم يوم 6 سنين عاشت بحضني اول كلمه نطقت بيهة هية كلمه( ابا )

وكالتهة الي اني ....شاركتهة بفرحهة ابجيهة بضحكتهة بلعبهة وحتى جنت بمرضهة اسهر وياهة شلون تريديني انسى كل هالامور...

هذه بنتي حتى لو مو من صلبي اتعلقت بيهة وما اكدر اتركهة وبالاضافة لهذذا كلة هية وصية امينه

شكرية☆☆ ااااهووو همين جاب سيرتهه

مجيد☆☆ مرة متوفية بشنو يغثج ذكرهة؟

شكرية☆☆ انت منتبه على نفسك شكددد تذكرهةةة ؟ ودائما اطلع الهة ثواب وتقرالهة

الفاتحة وكل سنه بيوم وفاتهة تسوي غدة لروحه وتروح تزور قبرهة... لاا وتريد تاخذني همين وياك ازور قبرهة...

مجيد☆☆ كل عقلج تحجين؟

شكرية☆☆ اي كل عقلي احجي....هاي مامخلفة الك وهيج تذكرهة لعد لو عندك اطفال منهة شسويلهة تمثال؟

مجيد☆☆ تستاهل المرحومه اكثر من هيج

شكرية☆☆ طيب مو اني كدامك اشو فد مرة لابسني يارجال... لو حك الينموت نصير عزاز

مجيد☆☆ بشنو مقصر وياج ؟ كلشي تريدي يجي يمج... مادة فلوس حب وعاطفة وحنان

اتحداج دكولين مقصر بيهن.. بس انتي متحمدين ربج تغارين من مرة ميته لان في

يوم من الايام كانت زوجتي؟ تغارين لان اقرالهة الفاتحة واثوبلهة وفوك الظيم تغارين

من طفلة ميتعدة عمرهة ال10 سنين لأن معتبرهة بنتي واداريهة واذكرهة..... وين

الرحمه الي تكون بگلب المراة المفروض انتي عندج رحمه اكثر مني بهيج امور...شكرية اني

قبلت اتزوجج لان مدحولي بيج خواتي وكالن عقلهة جبير ويوزن بلد !!!!! وينة هالعقل

شكرية☆☆ مو بيدي اغار واضوج وتطلع روحي همين.... اني وابنك احق بهالفلوس

التصرفهة على هالطفلة الي حتى ابوهة وامهة شامريهة وممعترفين بيهة

مجيد☆☆ شكررريةةةةةة.. وعقدت حاجبي عليهة وخنزرت بعيني

شكرية☆☆ 😨

مجيد☆☆ كلمه ثانية والزمج الباب وادزج لأهلج انتي وابنج... ترة مو اني التلوي ايدي

مرة افتهمتي ..بس اضاهر انتي مو مال حجي وتفاهم المثلج يمشي بالاوامر .. خليت احسان بفراشة بالكاع وكمت ...

هذا الفرق بينج وبين امينه الله يرحمهة... عرفتي ليش الحد هسة اذكرهة و اثوبلهة وميفاركني ذكرهة؟

شكرية☆☆ 😒

مجيد☆☆ حضريلي الجراوية وملابسي اريد اطلع..

شكرية☆☆ وين طالع بهذا البرد

مجيد☆☆ 😡حضريلي هدومي

شكرية☆☆ 😑 هسة اجيبهن

مجيد☆☆ غيرت ملابسي وطلعت رحت لبيت ابو غسان لكيت غسان واخوته بالبيت

كعدنه بالحوش ودرست فرحه وفهمتهة على دروسهة حوالي ساعه وطلعت... رحت اتمشى

لدكان ابو غسان شفتة كاعد ومحد يمه... اييه الحمد لله... سلمت عليه وردلي السلام

مجيد☆☆ ابو غسان عندي جلمتين وياك مكدرت احجيهن بالبيت عندك اليوم.. كلت اجيك للدكان واسولف وياك

ابو غسان☆☆ كول خوية أأمر

مجيد☆☆ محشوم خوية ما يأمر عليك ظالم.
شغلة اطلبهة منك واترجاك يامكي بحك الخوة الي بيناتنه تسمعني وتلبي طلبي

ابو غسان☆☆ ضحكت ضحكة ارتباك شنو هالطلب الي يريدة ابو احسان؟ كول خوية وان شالله مگضية

مجيد☆☆ طلبت منك قبل متضرب فرحه انت وام غسان بس للأسف محد سمعلي ..

وطلبت منك متفرقون بينهة وبين اختهة رباب وهمين محد سمعلي.....

ابو غسان☆☆ راسا اتبلعجت وحسيت صرت بنص هدومي وخجلت من كلامه ...اا ليش خوية شنوو صاير ؟

مجيد☆☆ ام غسان حرمه وما اكدر احجي وياه

ة بس العتب عليك يا مكي ليش هيج

تعامل فرحة؟ شنو السبب ادري مو بنتك هية مو منك ومن صلبك هالتفرقة ليش بين الخوات

ابو غسان☆☆ _ادخل بالموضوع ابو احسان شنو صاير

مجيد☆☆ حجيتلة.. كل شي فرحة شكت منه .. وهاي اخر شي من اخذتهم للبستان ينضفوه من الدغل ...

ليش هيج مكي يعني عدكم بس رباب بنتكم لان حلوة؟ معقولة!! موانتو تصلون وتصومون

معناهة تعرفون الله مو صحيح.. زين المن صلاتكم وتعبكم اذا بين ولدكم ما ناصفين ..

وبعدين رباب اكبر من فرحة يعني شغلهة بالارض اضبط من اختهة شنو هالتصرفات الي تصرفتوه وية البنت

ابو غسان☆☆خوية مو هيج.... وقاطعني

مجيد☆☆ ااني اعرف مو من حقي اتدخل بينكم وانتو عائلة.. بس يامكي خلي ربك بين

عينك بأولادك...اسمحلي اكولك انت وزوجتك تربيتكم غلط زرعتو التفرقة بينهم وخليتوهم

واحد يكره الثاني وهذا مردودة عليكم ... واحملك امانه توصلهة لام غسان ... كلهة

فرحه ماطلع شكلهة على الجوراين فرحه تشبهج بالشكل واللون خلي ربج بين عينك

وحكمي بالعدل والضمير بين بناتج.. جريت نفس مليات حسرة ...طولت عليك خوية

اعذرني على صراحتي بس بكلبي حسرة على هالطفلة وروح المرحومه امينه احس فرحه

بنتي واحبهة واعزهة اكثر من احسان احسهة ذكرى من امينه وامانة بركبتي ياخوية

ابو غسان☆☆ ضليت متبلعج ما اعرف شحجي.. صار خوية يجرالك ومتفهم موقفك

وان شالله متتكرر هالامور ...رجعت للبيت واني افكر بكلام مجيد رجال غريب وكلبة حن

على بنتي اكثر مني والصراحة فعلا احنه نفرق بمعاملتنه بين الاولاد بس المصيبة اتعودت

على هالامر حتى لو ردت اعدل بمعاملتي وية اولادي لا اراديا ارجع واميز رباب عنهم دخلت

للبيت وشفت فضيلة تمشط شعر رباب وفرحة عايفتهة هية تمشط شعرهة... صحت لفضيلة واجتي يمي

ام غسان☆☆ ها ابو غسان خير شبيك اشو مو على بعضك

ابو غسان☆☆... بعد ماكو روحة للبستان علمود الشغل.. نروح نتونس نغير جو اي بس

بعد ما اخذكم تشتغلون.. انتي والبنات تبقون هنا اخذ الولد كلش كافي

ام غسان☆☆ استغرب اشو بدون مقدمات حجى وياية...هاه شعجب مو عوايدك شصاير صاير شي؟

ابو غسان☆☆ ماصاير شي ..😒صبيلي جاي فضيلة راسي يوجعني...

ام غسان☆☆ اي صار .. يمي قوري الجاي على الصوبة والاستكان يمي حطيت شكر ودة اصب ..ورد حجة

ابو غسان☆☆ وشغلة ثانية كفي لسانج عن فرحه يافضيلة

ام غسان☆☆ مفتهمت حجيك يعني شنو شتريد توصلي بهالكلام😒

ابو غسان☆☆ كلاااامي واضح و الاطرش يفهمه لا تضلين تعيريهة بشكلهة.. لأن ربج

انطاج رباب شفتي نفسج على الناس ولج لعد لو انتي الحلوة جان شسويتي بالوادم جان

تمشين واتفلين علينه لان سمر مو بيض مدكوليلي شنو من بشر انتي

ام غسان☆☆ على كيفك يابة اليسمعك هيج تحجي يكول ايبااه ابو غسان مثال اعلى لاهلة

ترة انت مثلي اذا مو اضرب مني بعد بهالسوالف

ابو غسان☆☆ وحك رحمه امي كلمه ثانية واتزوج عليج مرة تسوة راسج ششكرة وبيضة

ومعدلة شكلهة يكون يفتح النفس😍 مو مثلج وجهج اغم 😝

ام غسان☆☆ 😱 تتزوج عليةةةةةةة

ابوغسان☆☆_____؟

يتبع،،،،،،،،،،⚘

#ارحام_متناثرة

البارت الثامن⚘⚘⚘بقلم فينوس آرام

#قصة_حقيقية_عاطفية_اجتماعية

ام غسان☆☆ 😱 تتزوج عليه

ابو غسان☆☆ بديت احجي بحنية واميل براسي يمنه ويسرة... اي اخذهة شكرة وبيضة

وعيونهة ملونه تشرح الصدر .. وانتي لا تخافين ماطلكج اجيبهة فوكاج.

ام غسان☆☆ انت صدك تحجي لو تتشاقة شنو شبيك شنو معنى هالحجي؟

ابو غسان☆☆ الشرع حللي 4 واني ماريد 4 اخذ بس 2 كلش كافي

ام غسان☆☆ ليش يابة شناقصني 😡

ابو غسان☆☆ شناقصج ؟ بياض وعيون ملونه وشعر ملون اريد كل هالسوالف مابيج

ام غسان☆☆ وهاي مين طالعلي بيهة يابة تريد وحدة ملونه

ابو غسان☆☆والله البركه بيج زرعتي هالفكرة براسي الشكرات حلوات وتمشين

واتدللين برباب وتقلدين وتصنفين على فرحة لان سمرة زين انتي سمرة وتقلدين على السمر

لعد لو شگرة شسوين؟ 😀والله زرعتيهة ابالي عاجبني اجرب الشكرة بما انو انتي سمرة ☻

ام غسان☆☆😡وانت شحالك دتاخذك وحدة ملونه شايف نفسك لا مال ولا جمال علة شنو ترضى بيك.

ابو غسان☆☆ الحسن بس للبنات مو للزلم واذا ع المال يجي ابيعلهة المزرعه وانطيهة

سياكهة(مهرهة) ... اووف اخذهة اصغر منج وبعدهة حديثة وعيونهة ملونه....بويةةةة اشو الدنية صارت حارة تكتل طفي الصوبة طفيهة😰

ام غسان☆☆ 😨 هذا الخبل شديحجي بعدنه بعز الشتى ومن ذكر البيضات والشكرات

هيج احتر 😡 خرب حظج فضيلة وين جانتلج هالشغلة... سكتت عنه ماجاوبته بس اباوعلة بتك عين.......

صبيتله الجاي ونطيتة الاستكان وطلعت رحت للمطبخ.. والله يالله ماناقصني غير المخابيل..

ماكو غير مجيد قاري براسه اوووف شوكت اخلص منه هالمجيد....

اوووف ياالله حتى اختي ماتت ناقصة عمر من وراه😧 منين طلعليي هذا.

⚘فرحة ☆☆ من ذاك اليوم وامي بطلت دكولي سويدة.. بس بتصرفاتهة دكولهة وتعنيهة وتجرحني هية ورباب.

اما ابوية بعد ابد ما اخذنه للمزرعه حتى نشتغل بيهة... كمنه نروح نتونس ونرجع فہ شوي ارتاحيت من هالامر...

من توفت امي امينه واحنه مامشترين ملابس للعيد لان حزانه ولانطب ولانطلع لأحد ابد لأن

عود خالتي فضيلة جانت حزينه على امي ومتقبل نشتري شي جديد للعيد فہ صار حجي بين رباب وامي فضيلة...

رباب☆☆ يمة هالعيد لازمم تشتريلي ملابس بعد هاي هية خالتي صارلهة كومه متوفية ...
واني كبرت اريد هدوم حلوة وجديدة

ام غسان☆☆ اي ان شالله يمة اذا انتي ما اشتريلج المن اشتري.

فرحة☆☆ ليش خالة شوكت العيد .

ام غسان☆☆ خالة تخلخلج... كم مرة كلتلج لا دكولين خاله يالعوبة اني امج.

فرحه☆☆ 😔..

رباب☆☆ التفتت على فرحه وكلتلة .. بعد تقريبا اسبوعين ويصير العيد... اكلج يمة وين

اتطلعونه بالعيد والله ضاكت روحي من البيت خلي نروح لكربلا مثل قبل كم سنه من رحنه سفرة.

ام غسان☆☆ والله ياريت اني همين عاجبني اروح بس هذا ابوج وين يقنع ياخذنه يكول الدرب بعيد وانتو كومه شلون احير بيكم.

رباب☆☆ اووف 😐 لعد شلون والله ضوجه

ام غسان☆☆ ربابة ابوج يكول يعجيج تلبسين حجاب لأن شوي كبرتي وعيب بعد زحمه تبقين مفرعه

رباب☆☆ 😝 ااايع شنو حجاب يمه.. اضوج منه ماريد البسة صدك تحجين انتي

ام غسان☆☆ بكيفج منجبرج على شي بس الحجاب حلو

رباب☆☆ اصلا جمالي يروح بالحجاب ولا احبة ما ادري شلون تلبسي انتي

ام غسان☆☆ فتحنه عيونه على هالدنية واحنه ملكجات لانعرف شوكت ولا ندري ليش اتحجبنه..

رباب☆☆ هسة عوفي الحجاب يا امي بعدني صغيرة ياحجاب.. كليلي شوكت تشتريلي ملابس مو روحي طلعت.

فرحه☆☆ ااا أني شفت نفنوف كلش حلو بالسوك لونه احمر وعلى كدي يخبل...حجيت

وياهة واحس نفسي مكسورة جناح واخجل اطلب منهة شي لأن اصلا متنطيني وجه من احجي وياهة.

ام غسان☆☆ اي وشتريدين؟

فرحة☆☆عفية اشتريلياه اتمنيت البسة من شفته كلش حلو عفية اريد البسة بالعيد.

ام غسان☆☆😂 تلبسين احمر شتطلعين ولج مضحكة تصيرين ..شوف يالله ههههههه

رباب☆☆ 😂

فرحة☆☆ سكتت ماحجيت صح ماكالتلي سودة لو سمرة بس حز بكلبي كلامهة وانقهرت

كلش وراسا بجيت 😢😭.. يمة وينج شوفي اختج شكد تقلد عليه ضليت ابجي و هية

لاانكسر كلبهة ولاخاطرهة علية ولا اهتمت اصلا ..

جان بابا مجيد يمر عليه بالاسبوع تلث مرات او اربعه  حسب فرغته.... مر عليه ثاني

يوم بالمدرسة....من شفته ركضت عليه ورأسا حضنته حيل وبجيت ...

مجيد☆☆ هلا هلا بنيتي البطلة ... ها هاي شنو شبيج بابا.. ليش تبجين شنو صاير؟

فرحه☆☆ اريد ارجع لبيتنه واعيش وياك يابة

مجيد☆☆ على هاي تبجين ههههه يابنيتي مو تعرفين اني دائما ابات خارج البيت..تعرفين

بشغلي مرات اسافر منو يبقى يمج؟ وما اكدر ابقيج يمج خاله شكرية 😕

فرحة☆☆اني اعرف خالة شكرية متحبني بس ماريد ابقى يم خالة فضيلة ولا رباب ولا عمو مكي ماحبهم ولا يحبوني 😭

مجيد☆☆ هذا شلون حجي بلة اولا خالة شكرية تحبج بس هية عدهة اخوج احسان

وكح وشالشهة فمتكدر تعتني بيج... وبعدين صارلج كم سنه يمهم هذول اهلج يابنتي لازم

تتعودين انو هذا ابوج وهاي امج عجبج او ماعجبج لازم تقبلين هالوضع

فرحة☆☆ يابة يعني حتى الهدوم حسرة عليه ومتقبل تشتريلي اللون الاحبة وتقلد عليه دكولي سمرة وتلبسين احمر شتطلعين

مجيد☆☆ وانتي ليش تطلبين منهم؟ اني موجود ليش مدكوليلي؟

فرحه☆☆ عبالي هالسنه همين حتبقى خالة فضيلة حزينه على امي ....بس رباب كالت

تريد تشتري هدوم للعيد وحجيت وياهن كلتلهن عاجبني نفنوف لونه احمر... وضحكن عليه

مجيد☆☆ هههههه امشي يابة امشي.. هسة نروح نشتري هالنفنوف العاجبج اني وياج.

فرحة☆☆ 😀 صدك بابا

مجيد☆☆ صدك شنو؟ يايوم مجذب عليج يلة امشي... رحنة للسوك وشفت النفنوف الي

تريدة جان سعرة شوي غالي واني حاليا ضروفي تعبانه بس ماحبيت اكسر بيهة...

حجيت وية صاحب المحل يعرفني ويعرف اخوتي الولد اخذت منه النفنوف بضمان اخوي

حمزة لأن عندة دكان غذائية كدامه كلتلة يومين واسددهن الرجل ماعارض لان يعرفني ويعرف اهلي

فرحة☆☆ رجعت للبيت طايرة وفرحانه بالنفنوف لونه احمر وفصاله يخبل جان كلش عاحبني 😍

رباب☆☆ شفت النفنوف الاحمر وانصدمت هاي اشترت ملابس قبلي خرررب راسا سألتهة
... شنو هاي منو اشترالجياه؟😒

فرحة☆☆ رفعتلهة تك حاجب وجاوبتهة ابوية مجيد اشترالياه .

رباب☆☆ 😂 سودة وتلبس احمر شتطلعين قرد

فرحة☆☆ بيج خير اخلقي وحدة احلى مني وعود تعالي عيبي علية.... هسة تروحين للنار وتحتركين هناك .. وعود خلي يفيدج جمالج

رباب☆☆ يووووم يمةةةةة تعالي......صحت على امي واني روحي طالعه من فرحه شنو هالثقة التحجي بيهة ولسانهة طولان يرادلة كص....

ام غسان☆☆ ها ها خير ... باوعت شفت نفنوف جديد لونه احمر شنو هذا النفنوف مينلج

رباب☆☆ اشتراه عمو مجيد الهة😒

ام غسان☆☆ يلة همزين خلصت من مصرفهة عوذة خفة وراحة .

رباب☆☆ اريد نفنوف مثلة لو احلى منه يمة وبااجر تشتريلي

ام غسان☆☆ صار يمة صار اشتري الج وحك عيونج الخضرة اشتري وتدللين اخذج باجر ولايهمج.

فرحه☆☆ اشترت امي نفنوف لونه اخضر لرباب حتى يصير بلون عيونهة ..

صار العيد ولبسنه الملابس الجديدة ورحت اعايد ابوية مكي وامي فضيلة عايدوني بس

امي ما بوستني بس ابوية وشال درهمين وانطاني عيدية ...بس من اجتي رباب ضلو يبوسون بيهة وانطوهة عيدية ربع دينار...

سكتت وحطيت بجيبي الدرهمين وكعدت بزاوية الهول.... ابوي وامي جانو كاعدين

ويتغزلون برباب وجمالهة.. وتهوسلهة امهة وتبوس بيهة واني اباوع عليهم 👀...

اجوي اخوتي ودخلو عايدو ابوية وامي.. جيت اعايدهم ماردولي وخصوصا غسان ابد ماشاف

بوجهي.. بس رباب عايدوهة كوة من ورة خشومهم.... حتى من عايدوهة مابيناتهم حب

الاخوة عبالك مجبورين عليهة بس هية كلش تحبهم رغم هيج يعاملوهة ....ورة شوي امي راحت للمطبخ وصاحتلي جانت دتحضر الريوك ورحتلهة...

فرحة☆☆ نعم ماما

ام غسان☆☆ جيبي الدرهمين يمة انطينياهن بسرعه

فرحة☆☆😨 ليش

ام غسان☆☆ لأنج بعدج ثولة متفتهمين وتضيعيهن... هاي درهمين شنو عبالج قليلة يلة بلا لغوة وطلعيهن بسرعه

فرحة☆☆ خنزرت عليه وفتحت عينهة كلش. خفت منهة وانطيتهة الدرهمين واني عيني

عليهن ومقهورة اكلهة هاي عيديتي اريدهة😢 رأسا شالتهن ونطتهن لرباب

ام غسان☆☆ هاج رباب حطيهن وية فلوسج يمه انتي معتبره ميضيع شي منج.. وانداريت

على فرحة.. لج انتي غضب.. بالج وياج تحجين لمجيد ترة اموتج وادفنج بالبستان افتهمتي

فرحه☆☆ 😨 ضليت ساكته واخاف احجي... اخذت الفلوس رباب ونضرتلي بنضرة مكر

وضحكة استهزاء وراحت... حطت امي الريوك واتريكنه خلصنه وكملنه وكمنه... وراسا الباب

اندكت وطلع بابا مجيد جاينه ديعاد ابوي مكي طلعت ارركض عليه حضنته وعايدني وبوسني

مجيد☆☆ فديت بنيتي الاميرة الحلوة لج شنو هذا النفنوف يخبل عليج ماشالله طالعه كمر

فرحه☆☆ 😀 والله بابا صدك يعني حلوة طالعه اني 😍

مجيد☆☆ اذا بنتي الكمر مو حلوة لعد منو الحلووو شو دتعالي وكعدت بالحوش وكعدت

فرحة يمي.... مديت ايدي بجيبي وطلعت ربع دينار وانطيتهة العيدية

فرحة☆☆ 😗 حبيبي بابا شكرا..فرحت بالربع دينار مديت ايدي بجبي دة احطه ويةة
الدرهمين واتذكرت اخذوهن مني راسا انقهرت☹

مجيد☆☆ شبيج بابا اشو انكلب وجهج؟

فرحه☆☆ اتذكرت امي فضيلة من كلتلي اذا تحجين اموتج وادفنج بالبستان 😦 كلتلة مابية شي بابا.

مجيد☆☆ يلة طالما مابيج شي اني اروح.. فروحه باجر امر عليج اخذج تعايدين عمامج
اخوتي زين بابا عود اتحضري مو تعطليني

فرحة☆☆اخذني اليوم وياك وباجر همين ☹ ماريد ابقى هنا

مجيد☆☆ لا اليوم لاهل ابوج ميصير عيب لازم تروحين تعايدين عمامج...

وباجر ان شالله اخذج اني.... زين بنتي صيري قوية وعاقلة ومؤدبة مثل ما علمتج ماما امينه

فرحه☆☆ قوية..☹ اي بابا حاضر

مجيد☆☆ عفية بنيتي وردة سباعية .. يلة بنتي اني رايح .. يلة خوية ابو غسان اترخص

ابو غسان☆☆ مرخوص خوية مية هلا بيك

فرحة☆☆ طلع بابا مجيد ورباب تباوعلي تك عين لأن بابا مجيد مانطاهة عيدية حطيت

ايدي على جيبي ولزمتة قوي خفت لا تاخذ فلوسي مرة لخ....ورة شوي اجتي امي فضيلة

ام غسان☆☆تعالي فرحة