‏أكبر مشكلة في العلاقات لدى هالأبراج هي الأحساس بالملل بسهوله 🦋✨

#الدلو #الميزان #القوس #الجوزاء #الحمل #الأسد

///البارت السادس ///
درب_العشگ🔥
بقلم_الكاتبة_شمس

الليل كلة افكر بالي صار .. وخفت لاتصير مشاكل بسبب هذي الخطبة ..
ساعة اگول ارفض وارتاح احسن ..
وساعة اگول الى متى نبقى هيج .. عمامي يتحكمون بينا بالصغيرة والكبيرة ..

نمت ..
ثاني يوم عندي دوام ..
بعد مافريت ع المرضى وكملت .. رجعت .
شفت سوزان .. سلمت عليها وگعدنا .

من گعدت تنهدت بصوت ..
سوزان .. خير شبيج اليوم تاخذين حسرات ..
رفيف .. اذا اسولفلج متصدگين ..
سوزان .. يمعودة سولفي اصدگ والله ..
رفيف .. تعرفين صگر هذا الي امه دخلت انعاش ..
سوزان .. اي شبي صارحج ..
رفيف .. لا .. خطبني .
سوزان .. لا عليج الله ..
رفيف .. مو گتلج ماتصدگين .
سوزان .. لا وج بس مستغربه . الشباب بهذا الوكت تصارح وتعترف بمشاعرها .. يله تخطب ..
زين گالج اريد اخطبج لو شنو ..
رفيف .. هههههه اصلا ماشفته .. دز اهله خطبوني ..
سوزان .. ههههههه مستعجل الاخ ..

رفيف .. وياليتهم ماخطبوا .. صارت مشكله شكبرها البارحة سمع عمو هادي واجه هو وولده . وهذا ابنه الغثه يگلي انهى عليج ..

سوزان .. خي يولي . شنو ينهى هاي احنه وين عايشين
واخوانج شگالوا ..
رفيف .. طردوهم وماقبلوا على حجيهم .
بس عمو هدد يروح الاهل صگر ويگول ابن عمها رايدها
سوزان .. يعني انتي رايدته الصگر ..
رفيف .. اووووووف مااعرف . بس من سمعت بهذا يريدني تخبلت . ومستعدة اوافق على ابو صگر بس اخلص منه ..
سوزان .. ههههههه والله انتي مكبرتها . الناس بعد مو مثل قبل ماياخذون بسالفه النهوة وهاي السوالف .
رفيف .. بس اهل صگر عشاير وشيوخ وساده . مو مثل تفكيرنا ..
سوزان .. توكلي على الله . واذا صگر من نصيبج ماكو اي قوة تخرب القسمه .
هاي قسمه مو لعبه . وياهو الي يجي يخربها ..

رفيف .. الله كريم .. اني ماقاهرني بس اخوتي مااريد يوگعون بالمشاكل من وراي ..

سوزان .. زين ليش ماتحجين وي صگر وتفهميه .
رفيف .. يااا لو اموت مااسويها .. حتى يگول ذابة نفسها عليه ..
سوزان .. غير هو الي خطبج شنو ذاب نفسج عليه .
رفيف .. واذا مااتصل ابد ..

خلص الدوام كالعادة ورجعت للبيت . لگيته مگلوب .
عمي حسن وعمو هادي وعمتي اميرة وعمتي سميرة ..

دخلت سلمت .. ردوا السلام بثگل ..
اشرتلي ماما ادخل .
رحت بدلت وغسلت ..
وشويه صاح عمو حسن ..
رفيف بابا تعالي ..

اجيت ..
گال اگعدي گبالي ..
باوعت الاخواني .
رامي يحرك برجله بتوتر وعصبيه وكأنه اكو حجي ماعاجبه قبل مااجي ..
ورافد هم شكله ضايج ..
گلت بداخلي الله اليستر ..

عمو حسن .. بابا . الناس الي خطبوج . صحيح ناس وشيوخ ومعروفين . بس مو من ثوبنا . شايفين نفسهم وكم مرة صارت مشكله بينهم وبين ابن عمج .
ولو ماالله ستر جان هسا مسجون بسببهم ..

حلا للنزاع .. عندج ولد عمج موجودين اي واحد بيهم اختاريه . حتى نگلهم ابن عمها رايدها ونفض السالفه ..

صدگ احترگت روحي ...
راد يحجي رامي ..
عمو گاله . اريدها هي تجاوب .
گتله عمو صدگ تحجي ..
اني درست وتعبت ووصلت . حتى اتزوج شخص مثل حسين صاحب مشاكل ومتهور ومايفكر . واخوانه نفس الشي .
اريدك انت تحكم . لو بنتك تنطيها لحسين المشكلجي .
مو هذا اسمه بينكم .
مو انتو نفسكم مليتوا من مشاكله وكل يوم فشلكم وي ناس .
مايتفاهم والغلطة بطارف السانة ..

عمو هادي .. مهما يكون فهو ابن عمج واحسن من الغريب .. لو لان دكتورة ومايعجبج . الرجال بشغله مو بشهادته ..

رفيف .. لا عمو الرجال بعقله وتعامله وسيرته بين الناس ..

عمو هادي .. والله طال السانج يابنت غازي .. هي المدارس والشهادات هيج تربي ..

رافد .. عمي لثاني مرة اگلك لاتتجاوز . انتو طلبتوا رأية وهي حجت الي بداخلها . واحنه اختنه منطيها حريه الاختيار . هذا زواج وعشرة عمر . ومن حقها تختار الي يناسبها ..

عمتي اميرة .. اذا مانريد من ولد عمها .. خلي تاخذ رضاوي . معلم وعنده راتب وماناقصه شي ..

رامي .. عمه رحمه لهلج . هي مزايدة . كم مرة خطبتوها وماقبلت . لو تريد وافقت من زمان .

عمي هادي .. اي لان امها تقرا براسها . من يومكم منحازين الخوالكم واهل امكم وعايفين عمامكم .
بس شكول . الله يسامح يغازي الي ورطتنا بهيج ورطه وخليت بنات بغداد يربن بزرنا ..

رافد باوع العمي حسن وگال .. عمي اني محترم وجودك ولان بيتي مااگدر احجي . جاي تشوف كم مرة يهين امي بوسط بيتنا وساكتين . مو خوف لا .
بس مااريد يعاير امي بتربيتها النا اذا تجاوزنا عليه ..

حسن .. هادي كافي .. لاتخلون الناس تاكل وجهنا . يكولون تعاركوا بينهم ..
البنيه ماقابله ماتشوفوها .. وكلشي بالقسمة سدوا الموضوع ..

گولوا للناس البنيه ماتقبل وفضوا السالفه .
رافد .. اوكف عمي ..
باوعلي ..
رفيف انتي قابله لو لا .

سكتت ماحجيت .
عمتي سميرة . گومي خيه گومي . هي مرتبتها من يمها وحاطتة جوه ابطها وهسا جاية تتشرط علينا .
مطبوخة السالفه من زمان ..

بقيت صافنه ع كلامها ..
ماما .. گالتلها عيب هالحجي ام كرار .. بنتي مو من هاي البنات

الي تعرفيهن .
سميرة .. اي خلي يفيدج هالحجي . نايمه ورجليج بالشمس . تبات برة البيت وبحجة تاخذ خفارات تعرفوها وين تروح ماتروح ..

رفيف تعصبت من كلامها .. مااسمحلج تحجين هيج . ومو انتي الي تحكمين عليه . واذا اني هيج . شكو جايين تخطبون .
اول مرة اطلع الي بگلبي واحجي . مااحب انزل المستواهن . عماتي صاحبات السان ووكحات ..

زعلوا وطلعوا . بعد مارامي گام يحجي على عمتي ..
وعمو حسن صار بالوسط . بينا وبينهم ..
وتالي طلعوا كلهم ..
#بقلمي_الكاتبة_شمس
……………………………………………
انهاريت بيومها وبس ابجي ..
وامي تواسي بيه .
وهنودة تگول . والله وافقي وعلى عنادهم . لان شافوهم ناس واصلين والهم مكانه رفضوا ميحبون الخير الواحد ..

رافد .. هند لاتأثرين عليها .. خليها هي ترتاح وتفكر وتنطينا الجواب ..

نمت بدون غدا حتى ..
ماگعدت للمغرب .. گعدني رامي ..
گوم يحلو شوف شجبتلك ..
فتحت عيني . جايب بيتزا وفنگر وكولا ..

ابتسمت .. گتلة اجن بوكتهن ميته جوع ..
گعدنا ناكل اني وياه ونضحك ..

واجه عبدوووو ياكل فنگر وياي ونتعارك اني وياه ع الفنگر . ورافد يضحك علينا ..

سمعنا الباب اندگت حيل ..
طفروا رامي ورافد .. رادوا يطلعون ..
صار رمي ع الباب ..
تخبلنا ..
ماما گالتلهم لتطلعون .
واني اتوسل بيهم .. بس گالوا .
شنو نسوان احنه يتهجمون علينا ونبقى بالبيت ..

طلعوا وصار صوت وعرك والناس التمت ..
واحنه بالبيت بس نبجي وخايفين .
طلعنا للطارمة .
سمعنا صوت حسين ..
والله اذا تزوجت اخلي طلقة براسها وبراسه ..
رافد .. لك انت رجال وتجرأ واوگف بطريق اختي وشوف شسويلك ..

رامي .. اتركه خي يولي هالمخنث . اذا مااخليه يتختخ بالحبوس مااسمى رامي .
شويه واجت الشرطه . رامي مبلغ وجايين .
اخذوا حسين وراح وياهم رافد ورامي .

بقينا على نار ومانعرف شنو الي صار ..
اندگت الباب . طفرنا .
گالت امي اگعدن اني اطلع ..

رجعت ووياها عمتي اميرة وام حسين مرت عمي ..
مرت عمي .. كله من وراج رفيفان ام المستشفيات ابني سجنوه .
رفيف .. اذا ابنج مجرم وجاي يتعدى علينا شنسويله .
مرت عمي .. من وراج خبلتيه مدري شمسويتله يگول الي ومتصير الغيري ..
ماما .. يا يدادا شمسويتله قابل . هو لازگ متشوفيها ماتريدة . وبعدين هي مو سالفه كل شويه وجايين هادين علينه .
اشو بناتكم ينخطبن ويتزوجن ماندخل ولا نحجي ..
ليش بس وي بنتي تسون هيج ..

عمتي اميرة .. ام رافد خلينا نهدي النفوس . واحجي وي الولد ابن عمهم وزعطوط تصرف برعونيه . لايسجنوه عيب من الوادم شتگول علينا ..

ماما .. هسا زعطوط . من اجه وتعدى علينا وينهى ويأمر بكيفه . ماگلتوا زعطوط . لو كاتل واحد من ولدي شريد احجي ..

دخل رافد ورامي ..
يمه بي حظ ويكتل . جايبلة مسدس صوتي ويخوفنا بي عباله نخاف ونشيل رفيف وننطيها اله ..

اميرة .. لا عمه رافد هاي عود انت العاقل . وكلنا نحجي بيك انت غازي وگاعد . لاتمشي بحجي الزعاطيط وسامح ابن عمك ..

رامي .. هههههه انعم الله عليج اني الزعطوط . شفتيني مخلي مسدس صوتي واضرب واكسر مثل المخابيل ..
اني الي اشتكيت . ومااتنازل والا اخليه بالسجن بلكي يتأدب ..

مرت عمي .. گومي داداه گومي خلي يحترمون عمامهم يله يحترمونا .. وعساها بختج يرفيف ..

طلعن من البيت وهن يسمعن حجي ويدعن عليه ..

رافد صاحني .. رفيف گولي انتي موافقة ع السادة لو لا حتى نرد خبر ونرتاح . احسن مماتكبر وتصير مشاكل اكثر ..

بيبني وبين نفسي فكرت .. ماراح يبعد حسين وعمامي عني . الا اذا وافقت على صگر ..
ع الاقل انسان دارس وفاهم وراح يفهمني احسن من هذا الزعطوط الي راح يبقى كل يوم ناطلي وكل خطبه مخربها ..

گتله رافد اذا الولد واهله زينين وانتو موافقين ومقتنعين بيهم .. اني موافقه .

رافد .. هاهي .. يمة باجر اتصلي عليهم ورجعيلهم جواب .
ماما .. لا يمه استحي .. همة گالوا ننطيكم مهلة اسبوع تسئلون ونرجع نخابر ..

صدگ يومين . وخابرت بنتهم منى ..
سلمت عليها ماما ورحبت ..
منى .. ها خاله شقررتوا . الولد خبصنا وگاعد على نار
ماما .. سئلت اخوتها وعمامها وسألوا وان شاء الله خير
منى .. يعني خالة موافقين ..
ماما .. البنيه موافقه . وهي اهم شي ..

طبعا ماما تحجي والعرگ يصب منها رغم الجو حلو مستحيه عبالك ديخطبوها الها ..

سدت التلفون ..
هند . ها عمه شگالتلج ..
ماما .. گالت احنه باجر نجيكم ونتفق ع المهر والمشيه ..

ثاني يوم طلبت اجازة ..
ورتبت نفسي وسويت شعرلي كيرلي. طلع حلو ..
بس ماخليت شي الوجهي بس كحل ..

اجن النسوان وهالمرة ام صگر وياهم ..
سلمت عليها وسألتها عن حالها وصحتها ..
ام صگر .. البنات مدحن بيج وبوگفتج الي بالمستشفى الله ينطيج بنيتي ..
رفيف .. لا خاله هذا واجبي ..

بعدين گامت تحجي ام صگر ..
البنيه شفناها بالمستشفى والولد انجبر بيها وعجبته . وگال خطبوها الي ..
واحنه سنة ابني الجبير لسا ماطالعه ..
بس گلنا البنيه قسمة وخاف تنخطب وتروح من عدنا ..
احنه هالفترة بس خطوبه وكلها شهرين وتطلع

سنة ابني ونزوجهم بالخير ..

ماما .. اي حقكم والله ..وهاي راح تصير بنتكم بعد ..
ام صگر .. ولان بتنا . احنه جبنا مهرها هذا وهي على ذوقها تختار وتشتري ..
انطتنا قطعة قماش بيضه بيها فلوس وقرآن ابيض فوگه .
وعلاگة على جهه ..
وگالت الحلقة تشتريها على ذوقها لان مانعرف قياسها .
وهذا الذهب مشتريته من مكه من زمان .
الولدي اثنينهم اذا تزوجوا ..
ماادري اذا يعجبج او لا . بس اذا تردين تبدليه گولي ونجيبلج غيره ..

وگالت .. المشية الزلم يگولون الجمعه .. اذا اهلكم وناسكم يناسبهم بس لان عطله وماكو دوامات ..

ماما .. هذا هو علويه حجايتج عدله.. والجان ع الفلوس والذهب مو مهمه بگد السعادة وراحة البال ..

ام صگر .. بقت عقد السيد .. احنه مانريد هوسه ..
نجيب السيد يعقدلهم بيناتنا بيوم المشيه وهاهي ..
واذا تردون من نطلع سوو حفله بيناتكم هاي بقت يمكم ..

ماما .. مصابكم مصابنا صار علويه .. والبنيه عندها الحنه تفرح بيها . واني هم مااريد هوسة وناس .
خلي الزهرة تحظرهم كل كافي ..

ام صگر .. عين العقل . ان شاء الله الزهرة حاميتهم وتدخل المحبه بگلوبهم وتسعدهم ..

قدمنالهم ضيافه .. وبعدين راحوا ..
#بقلمي_الكاتبة_شمس
……………………………………………
فتحت ماما قطعة القماش . لگت بيها فلوس كلها خمس وعشيرنات حسبناهن طلعن خمس ملايين ..
فتحت ماما العلاگة بيها علبه مال ذهب .
تخم حلو وضخم ..
ووياهن سيت نوم ابيض .
گلتلها ماما .. هذا شنو .
ماما .. ماما اكو ناس عادتهم البنيه تعقد بسيت نوم ابيض ويمكن الساده هذا طبعهم ..
رفيف .. يعني شنو مااعقد بفستان .
هند .. عادي اعقدي بسيت النوم . وبعدين البسي فستان .

اجو اخواني وماما سولفتلهم ع موعد المشيه والخطبه ..
وگالتلهم خابروا عمامكم ..
رافد ..
هو بس عمي حسن واخابرة قبل يوم انطي خبر .
بس راح اخابر خوالي .
وولد عم ابوي .
وزلم من العشيرة .
وجماعاتنا ..

ماما .. واحنه هم مانعزم . بس اگل الخالاتك يجن .
لان عماتك اذا اجن يخربنها ..

مااعرف شلون مرن هذي الايام بالتحظيرات ..
حجز رامي كراسي .. وصفهن بالحديقه
اني طلعت وي ماما وهنودة .
اشتريت حلقة الي وفستان طويل البسة بيوم المهر .
ومكياجات ..

بيوم المشية .. اجن خالاتي من الصبح .
ورحيق وزوجها .. وخوالي ..
وگالت واخيرا راح اشوفج عروس .. واريد اشوف سعيد الحظ منو الي وگع گلب رفيف خانم ..
خزرتها . لا الكل يباوعلنا . ولاتطلع صدگ عندي علاقه وياه ..
صار البيت هوسه ..
اني ماعزمت احد لان ماكو حفله ..
بس خبرت سوزان . وتخبلت .
گالت حتى اذا ماكو حفله اجي بس اشوف ههههه .

سوينا غدا للموجودين . من وكت ونضفنا البيت ورتبنا الكراسي بالحديقه .
خاف تجي ناس هواي ..
العصير والمي بردناهن قليل لان الجو بارد ميحتاج .

رحت سبحت وطلعت ..
شسورت شعري وخليته نازل .. وخليت مكياج خفيف ..
لبست سيت النوم .. لبست الذهب مالتي ..
والكل من شافه گام يصلي ع النبي .
واني عندي ملاوي اثنين ناعمات ونازكات لبستهن وياهن .
ماما شافتني نزلت دموعها .. بعدين گالت ليش لبستي الذهب هسا .
گلتلها .. غير راح بس سيد يعقد ويطلعون .
ماما .. لا ماما ميخالف انزعي . خاف الولد هو يلبسج .
من تعقدون وتبدلين ..
نزعت الذهب وبقيت بس التراجي ..

ماما .. صدگ نسيت اگلج .. عمتج اميرة خابرت وتعتب لان ماعازميها .. وگلتلها ماكو حفله بس يعقدون . گالت ميخالف اجي شيگولون ماعندها عمات ..

رحيق .. خررررب شگد ماعندها كرامه مو انطردت المن جايه . لو تريد تخرب ..

ماما .. ميخالف ماما عمتجن مهما يكون . بس انتن خلن عينجن عليها .. لان مرات تمخرط بالحجي وفشله ..

اجت عمتي اميرة وزوجها ..
ووياها مرت عمي حسن وبناته ..
اجت المشيه . وجانت ناس هواي عبالك العشيره كلها جايبيها ..
بعد ماخلصت المشيه .. كلها طلعت .
بقى بس السيد الي يعقد . والشيخ غالب . وصگر وكم واحد وياهم .
والباقين راحوا .

خوالي وعمو حسن هم بقوا ..
اجة رافد .. گال تحظرن السيد راح يعقد ..
خلولي كرسي يم باب الاستقبال . وغشوه ع راسي
وهيلات بين اصابعي ايدي ورجلي ..
وخلو طشت مي وياس وخليت رجلي بي ..
هاي عقائدنا احنه ..
بدأ السيد يعقد .. ويحجي . واني مافهمت شي بس التوتر والخوف الي بداخلي كافي ..
اخر شي گال ..
گال .. هل توافقين يارفيف بنت غازي بالزواج من صگر ابن غالب . وع المهر المصدق بينكم . حاضره خمسة وعشرون مليون .
وغائبه خمسه وعشرون مليون ..
اذا وافقتي .. قولي نعم انت وكيلي ..

اشرتلي ماما .. گولي ..
گلت .. بصوت يرجف .. نعم انت وكيلي ..
كلها صلت ع النبي وبوسني وباركلي ..
اجت عمتي تبوسني ..
گالت هجم بيتج اكول ليش قبلتي بي طلعتي تطلبين بالعالي ..

ماما .. والله حتى مااتفقنا ع الحاظر والغايب همه مخلين من كيفهم ..
عوجت حلكها .. اي صحيح ..

گالت ماما يله روحي بدلي بسرعه ..
اجة رامي من المطبخ ..

سون طريق والبسن حجابجن . راح يدخل الولد يلبسون الحلقات ..
هند .. يابعدهي مامبدله ..
رامي .. شتبدل .. الناس مستع

جله وراهم طريق .
خلن شي ع كتفها وهاهي ..

اجت هند گالت ..
لاتگومين راح يدخل الولد .
صدگ انقهرت وعاندت .
گلتلها شنو يشوفني هيج بالسيت . الا ابدل .
ماحسيت الا انفتحت باب الاستقبال .
والسيد يصيح . صلو على محمد وال محمد ..
كلها صلت ..

اني منصية راسي . خلت هند الغشوة ع راسي وكتفي ..
اجه رفع الغشوة وباسني بگصتي وصلى ع النبي ..
اني قطرة دم مابقت بوجهي ..
والسيت كله مفتح . حرت شغطي وشأخلي ..
نزلت الغشوه ع كتفي ولميت روحي بي ..

طلع حلقة فضة من جيبه .. هو عساس احنه نشتري بس ماقبلوا . گالوا هو يشتري ع قياسه ..
وجابت هند الذهب .
لبسني الحلقه وهمسلي .
شبيها الدكتورة معصبه ..
ترى هاي مو ردهة نسائيه بالعباس صرتي حلالي ..
من گال هيج صدگ ضحكني ..
وتذكرت من طردته من الردهة ..
طلع يطلب ثار الاخ ..
لبسني الذهب كله وعينه ماشالها مني ..
عبالك يريد يحفظ كل تفاصيلي ..
وهو هم طالع يخبل ..
ولابس زي عربي . مو قاط ..
بس لايگ عليه حيل ..
شويه ودخل الشيخ غالب .
جابت امي شال ولميت روحي بي .
همسلي صگر . بوسي اديه ..
گمت بست اديه .. وباسني بگصتي ..
وگال .. الله يرضى عليج بنيتي ..
وخلة بحظني ورقة گال هذا بياض من السيد ..
وطلع ..
سلم عليه صگر وگال ..
ريتني ابقى هنا بس الشمس غابت ..
اترخص اني ..
باوعتله .. وگتله الله وياك ..
ابتسم وگال .. اتصل عليج ماسنجر بالليل .
فاجأني شمعرفة بصفحتي ..
ضحك وغمزلي وطلع ..
بقيت اباوع وراه وعبالك اريد احفظ كل تفصيل منه ..
حتى يبقى بمخيلتي من اتذكره ..

من طلعوا كلهم .. شغلت رحيق الام بي ثري على موبايلها .. وطلعت اغاني . وگومتني وياها وخالاتي وبنات خوالي كلهن يرگصن ويانا ..

الى ان اجه رافد وعاط بينا .. الاذان راح يأذن بطلن .
لليل ودبجن ع راحتجن ..

رحت بدلت واجيت ..
سلمت على خوالي . واخواني بوست ايدهم وحضنوني ..
عمو حسن واهله وعمتي اميرة طالعين .
بقينا وحدنا ضحك وسوالف ..
وعيني ع الحلقة كل ساعة عبالك مشايفة ههههه ..
رامي گال .. وصيت على عشا من برى لاتسون شي
فعلا كان يوم رائع ..
بس كان ناقصة وجود بابا واشوفه بين الزلم والمشيه واگف .. الف رحمة على روحك ياغالي ..

يتبع..

///البارت السابع ///
#درب_العشگ🔥
#بقلمي_الكاتبة_شمس

شلون أبدي واگلك انة مــشتاگ
وأنت أول شخص زلزل كــياني️
وانت أول عشگ شيبني بــصباي
وانت أول عشك مطبوع بالروح ️
جنت تايه بغربه ودربي كله هــموم
ومشيت بدرب حبك وهو دلانــي ..

صگررر
…………
مر اسبوع ومارجعولنا خبر .. وحسبت رفيف رفضت .
لأن كانت نضراتها الي عبالك ماطيقتني ..
تندمت لأن دزيت اهلي قبل مااحجي وياها واخذ رأيها ..

تالي خابرت منى وگلتلها خابري امها هسا واخذي الجواب منهم ..

بقيت انتظر الى ان ردت منى الخبر الي بالموافقه ..
من صدگ فرحت ..
وعبالك جنت انتظرها سنين وصارت من نصيبي ..
رحت بشرت امي ..
باركتلي وگالت ..
الي ردتها راح تصير من نصيبك ..
دور ماكو حجة .. فرح ابوك والزم شغله وفرحني وياه . انت صرت مسؤول عن هالبيت والعايله بعد اخوك ..
لاتفشلني ..

صگر .. صار يمه . بس خلوني احس بالفرحة شويه ..
دخلن اخواتي باركلي ..
وگالن يلوگ الفرح الك ياصگرنا .. وحضنيني ..

رحت بشرت عمامي وابوي .. باركولي . وقرروا يوم المشيه ..

ثاني يوم راحت امي وعماتي واخواتي الهم ..
شلت خمس ملايين وگلتلها يمه هاي خليهن وي الذهب .
وطلعن اختي اشترت قرآن وعلاگه ماادري شبيها ..

شاورت امي . واني ضليت احوس عليها ..
خليتهن يطلعن .. وفتحت العلاگة .. اويلي شيطلع عليج هذا اذا لبستيه ..

دخلت اختي .. گالت مايصير يالسيد حرام ..
صگر .. وج حراميش . غير راح تصير حلالي ..
اخذت العلاگة مني . وگالت ..
حلالك من تعقد عليها مو هسا ..

شوكت تنورين بيتي يبعد بيتي .. گمت رحت للديوان وعمامي يتفقون ويعزمون ..

صارت المشيه .. وابوي گال البس لبس عربي لاتلبس قاط عود بعرسك البس قاط . لان هي مشية زلم . وبس تعقد ع البنيه وتطلع ..
ضجت حيل يعني ماراح اشوفها ..

وصلنا البيتهم .. تلگونا اخوتها وعمها الجبير وناس هواي جايبين ..
دخلوا الكباريه بالاستقبال . والشباب بقت بالحديقه ..
حجى ابوي والسيد الي ويانا وقرينا الفاتحة ..
گالوا خلونا نعقدلهم ..
عقد السيد وكمل . وگمت اسلم ع الناس . سلمت على ابوي واهلها . ووصلت الاخوها رامي ابو شوارب ههههه
شواربه كبار حيل .
لهذا اسميه ابو شوارب . واني اعرفه لان شفته وياها كم مرة يوصلها ..
گال .. انطيناك روحنا . دير بالك تزعلها ..
گتله .. ومن اعقد عليها تصير روحي اني ومستحيل ازعل روحي ..
هو انصدم وسكت .. مااتوقع اكون جرئ وياه هيج ..

گال السيد . صيحوا البنيه يم الباب خلي نعقدلها .
اني گعدت ع التخم بصف الباب ..
الشيخ گال شگد الحاظر والغايب
الكل سكت . الشيخ غالب گاله خلها 25 ب 25
بدا الشيخ يحجي . وماكو صوت ..
الى ان وصلوا للاخير . گالت نعم انت وكيلي ..
بساعتها ودي ابوس الشفايف الي نطقت وحجت هالجمله (مو تگولون سيد وشلون يتغزل . صارت حلالي بعد )

تفاجات بكلام الشيخ من گال .. يله بويه ادخل لبس مرتك الحلقة حتى نروح الشمس راح تغرب ..

ضجت لأن جاي بدشداشه وعگال ..
وفرحت لان راح اشوفها والبسها بيدي ..

دخلت . شفتها لابسه ثوب النوم نفسه . ومتوترة ومتغشيه ..
ساعتها . ماشفت وحدة گبالي . اكو نسوان هواي بس ماانتبهت .
جان انتباهي عليها بس .
رفعت الغشاوة وبستها براسها . وصليت ع النبي .
هي حلوه . بس من صارت حلالي حلوت اكثر بعيني ..

طلعت الحلقة . لبستني وايدها ترجف ..
ولبستها الذهب هي لافة روحها بهاي الغشاوة جنها مستحيه ..
اجة ابوي انطاها بياض وسلم عليها وطلع ..
وصار لازم اروح . بس روحي وكلي يريد يبقى يمها .
من طلعت . گلتلها اتصل عليج ماسنجر بالليل .
لان ماعندي رقمها…
هي صفنت ماادري انصدمت . يمكن مامتوقعه اعرف حسابها ..

رفيف…
……………
تعشينا وكملنا .. البنات دللوني .. وماخلوني اسوي شي بعدين راحوا خوالي للاستقبال والولد كلهم ..

وبقينا احنه بالصالة . البنات يدگن ويرگصن . واني عيني ع الساعه .
لازمة الموبايل بيدي ومتوترة ..
اجت رساله طفرت للغرفه ..
فتحتها من صفحته ..
كاتب ..
💬شلونج مرتي ..
ضحكت ..
وبقيت صافنه مااعرف شنو ارد ..
كتب.
💬 مدامتي الحلوة ليش ماترد ?

كتبتله 💬هلاو ..
دز
💬هههههههه اروح فدوة للهلاو . بس اني رجلج مو صديقتج ..

عجبتني كلمة رجلج ..
كتبتله .. 💬 بعدنا هسا انخطبنا . يعني خطيبي
دز 💬 مادام عقد عليج بشرع الله صرتي مرتي واني رجلج .
دزيت💬 امممممم بكيفك
دز💬 امممممم طالعة حلوه اليوم
💬 شكرا .
💬 عفوا . راح اتصل اريد اسمع صوتج .

بعدني مارديت اله جواب . اتصل ..
بقيت حايرة گمت اوگف واگعد ..
رفعته ..
گلت . الو .
-ياهلا بهالصوت .
-تسلم .
-نگضيها كلمه كلمه اليوم
-اي لعد شأكول .
-اموت ع لعد بس لو جا احلى .
-ههههه مااعرف متعوده .
-يلوگ كلشي المرت صگر .
-صگر ??
-اويلي على اسمي بلسانج .. گولي .
-ههههههه . لاصدگ انت ليش خطبتني .

-امممم سؤال وجيه .. اذا اگلج حبيتج ماتصدگين .

بس من اول ماطاحت عيني عليج بالمستشفى . عشگتج وبقيت شهر ونص وراج . بس مااگدر احجي .
وحتى حسابج اعرفه وكل يوم اتصفح بي وحفظت منشوراتج كلهن . وكلما اريد احجي وياج اتردد .

…………………………………
- ليش ??
-خفت منج .
-هههههه صدگ تحجي .
-اي بعلي . شايفه روحج بالمستشفى شلونج . گالبه وجهج عبالك عسكري . مثل رامي اخوج بس ذاك عندة شوارب .
-هههههههههه لااااااا شنو هاي .
-هههههههه مااعرف اجامل ترى . الي يشوفج يگول شايفه حالها ومغرورة .
-واني الي كنت اشوفك متعجرف ..
-متعجرف شنو ?
-لا يعني قصدي شايف حالك . مو انت تگول عليه مغرورة ..
-ههههههه وهسا شتشوفيني هم متعجرف .
-ماادري بعدني ماااعرفك . بس احسن شويه . طلعت تضحك وتسولف .
-ههههههه سويتيني كلش ترى .. بس انتي گولي ليش وافقتي عليه ..
-مااعرف بس من سألوا اهلي ولگيت شخصيتك ومواصفاتك مناسبه الي . وافقت ..
-هااااااا بس .
-اي بس ههههه..

بقينا ندردش ونسولف حوالي كم ساعة .. لان ان دخلن البنات نعسانات يردن ينامن .
اترخصت منه وغلقته ..

بس بقيت الليل كلة افكر بي . وصوته يموت بالموبايل .
وكلامة . الي يشوفه يگول فعلا متعجرف وشايف حاله بس من يسولف وياها يلگاه مزوح ومو معقد مثل مااتوقعت ..

كانت بيبي الله يرحمه . دايما تگول .. بمجرد مايصر عقد بين كل اثنين على سنة الله ورسوله . الله يدخل المحبة بگلوبهم ..
واني من هاليلة حبيته ..
وعبالك صار سنين احبة مو يوم ..

قبل ماانام ..
دز رساله .. بيها رقمة . وگال دزيلي رقمج .
ودز رساله ثانيه 💬 كم اتمنى ان يأتي ذلك اليوم سريعا الذي اقول لكي فيه تصبحين على خير وانتي على وسادتي وبين احظاني ..
تصبحين على خير ياوردتي ..

ضحكت وتغلغل الفرح بداخلي .. معقوله الحب هيج حلو
وخاصة اذا كان حلالج ومطمأنه الج ..
كتبتله .. 💬 سيأتي ذلك اليوم بأذن الله الذي اقول لك فيه وانت من اهل الخير يازوجي و……… وانا الى جانبك ..
دز 💬 ههههههه دكمليها مو شلعتي گلبي ..
دزيتله ستيكرات ضحك ووحده قلب .
ووقتت المنبه ونمت ..
بعدين ذكرت رقمي . كتبته ودزيته اله ..
رجع رمش عليه ..
ابتسمت . كتبت على اسمه .. صگر رفيف ..

للصبح .. شفت خوالي وخالاتي مغبشات ..
يردون يرحون ..
سلمت عليهم .. ورحيق وياهم تروح ..
همه ع كيفهم يتريگون . اني بدلت بسرعة لبست ثوب وفوگة سترة. واني رشيقه طلع حلو عليه .
خليت مكياج خفيف ولفيت الشاله واخذت جنطتي وطلعت .
سلمت عليهم وودعتهم لان طلعت قبلهم ..
اجاني الخط ورحت ..
گتله عمو ممكن توگف يم السوبر ماركت .
وگف . اخذت علبة شوكلاته كبيره . وصعدت .
وصلت للمستشفى كلها باركتلي . ووزعت الشوكلاته .
سوزان خبصتني سولفيلي .
گلتلها لو جاية جان شفتي بعينج .
سوزان .. لا والله استحيت اجي وانتو بس اقارب وگلتي ماكو حفله بعد شعندي جايه ..
رفيف .. والله من گلتي راح اجي صدگتج .

عندي مراجعات ومرضى . كملت . اندگت الباب .
گلت تفضل ..
انفتحت الباب .
گال دكتورة گلبي يوجعني ..
رفعت راسي تفاجاة بصگر گبالي .. لابس بنطرون وقميص وسترة يخبل طالع ..
ابتسمت ..
گتله .. اهلا وسهلا
صگر .. لو قبل جان گلتي هيج
رفيف .. لا طبعا ..
صگر .. مو ادري بيج متعجرفه هههههه
رفيف .. اي صحيح اني الي مطابگة حواجبي .
صگر .. يله اخذي اجازة زمنيه وخلينا نطلع ..
رفيف .. مااگدر لان اني ماخذه اجازة كنت .
صگر .. زين اروح وارجعلج .
رفيف .. اوك واصلا مابقى شي للدوام ..

راح الى ان كملت . واتصلت عليه ..
گال ياهلا بمرت صگر . ثواني يمج ..

رتبت نفسي وطلعت انتظره بالحديقه .
اجه دخل بالسيارة .. صعدت .
گال نورتي ..
گتله بوجودك .. وين حنروح .
صگر .. مو تگولين بعدني مااعرفك . اريد اعرفج على صگر ..
ضحكت . گتله . لعد خليني اتصل على ماما ..
والسايق خطيه لايجي ..
صگر .. خطية شنو .
رفيف .. هههههه لو شايفه رجال شايب .
صگر .. اي شايفه . بس الشياب هم مو راحة .
ضحكني .
طلعت جهازي ..
اتصلت على ماما وگالت لاتتأخرين .
واتصلت ع السايق گتله لاتجي ..

شويه ودگ موبايلي .. باوعت صگر دگ عليه ..
استغربت باوعتله بتساؤل ضحك .
گال اشو خليني اشوف شنو كاتبة على اسمي .
راويته الاسم ..
گال .. اويلي يابة . اي والله اني صگرج وللموت ابقى هيج ..
راواني اسمي .
كاتب عليه . حبيبة صگر .
ضحكت ..

رحنا تغدينا بمطعم .. هو طلب قوزي على تمن .
گال لاتباوعيلي . احنه هيج اكلنه . سوالف البيتزا وهاي الشغلات مااكلها ..

گتله لاعادي اني هم اكل وياك ..
گال .. تحجين صدگ ..
رفيف .. اي والله شبيك . اشو شهيتني . بس لاتكثر مااكل هواي ..
صگر .. الظاهر راح اكتشف بيج شغلات تعجبني .
رفيف .. كلنا ولد البصرة قابل اني منين .
صگر .. اموت على بنت البصرة وماتحلالي غيرها ..

جابوا الاكل . اكلنا وهو يفلس لحم ويخلي گدامي لو يسويلي لفات ..
كملنا . دز على جاي .
گال .. شوكت نعقد محكمه .
رفيف .. بكيفك ..
صگر .. اني بودي باجر . بس انتي على فراغج .
رفيف .. خليها يمر اسبوع واخذ اجازة ..
صگر .. اني عندي

معارف هواي بسرعه اكملها حتى اذا تاخذين زمنيه .
رفيف .. ماشي ..

گال شبيج البارحة ضايجه بالعقد . عبالك مجبوره عليه .
رفيف .. لا هههههه بس ضجت على شغله ..
صگر .. شنو تخصني .
رفيف .. لا ماردتك تشوفني بهيج منظر واشتريت فستان عبالي الحگ ابدل . ومابدلت .
صگر .. عادي غير يوم البسيه الي . وارجع البسج الذهب وناخذ صور بعد .
رفيف .. هههههه تحجي صدگ .
صگر .. اي وربي شبيج . اني هم ماشفت شي . واريد صور النا مااخذنا ..
رفيف .. بعد مانعقد محكمه تعال النا واخلي هنودة تاخذلنا صور ..
صگر .. هنوده منو
رفيف .. مرت اخويه ..
……………… .
صگر .. بس لامرت ابو شوارب .
رفيف .. هههههه شبيك وياه الرامي .. بس هو عندة شوارب .
صگر .. لا بس هو شواربه طوال ويخوزر عبالك العگيد ويهدد بيه .. من عقدنا دير بالك عليها هاي روحي ..
رفيف .. ههههههه حبيبي ..
صگر .. منو اني .
رفيف .. ههههههه رامي .الكاتبة شمس
صگر… اگلج حتى اذا اخوج مااقبل تغازلين واحد گدامي ..
رفيف .. اممممم اذا گعدت ويانا وشفت الغزل الحقيقي شتگول ..
صگر .. اموتج غير ..
رفيف .. هههههه يله تأخرت انگوم ..

دفع الحساب صگر وگمنا . وصلني للبيت . دخلت يله راح ..

لگيت اهلي نايمين . رحت غسلت وبدلت ونمت ..
للعصر كلش گعدت ع صوت الموبايل ..
باوعت صگر ..
رديت .. شبسرعه اشتاقيت ..
صگر .. رفيف انتي صدگ ابن عمج ناهي عليج ..
طفرت من مكاني .. واستغربت .
گتله منو الي گلك ؟؟؟

يتبع...

///البارت الثامن///
درب_العشگ🔥
بقلم_الكاتبة_شمس

گعدت العصر ع صوت الموبايل ..
باوعت صگر ..
رديت .. شبسرعه اشتاقيت ..
صگر .. رفيف انتي صدگ ابن عمج ناهي عليج ..
طفرت من مكاني .. واستغربت .
گتله منو الي گلك .....!!!!!
صگر .. يعني صدگ ..
رفيف .. لا موهيج السالفة.
صگر .. جا شنو گولي ..

حسيته عصب وصوته عالي خفت .. گتله هو ماببالة اني بس من سمع انت خطبتني تخبل ..
وگال اذا وافقتي انهى عليج ..
صگر .. ليش هو وين يعرفني ..
رفيف .. ماادري بس رامي گال مرة عنده مشكله وياكم مدري شنو ..
صگر .. اخوانج بالبيت ??
رفيف .. اي يمكن . خلي اشوف لحظة ..

طلعت .. سمعت صوت رافد ..
گتله . هذا صوت رافد .
صگر .. خوش گليلهم اني جاي ..
رفيف .. اوك باي ..

شمرت الموبايل ع السرير . وطلعت ..
رحت للمطبخ لگيت رافد يلعب وي ابنه .
رافد .. هلا بهالطول ..
رفيف .. رامي وين ?
ماما .. شكو شبيج ..
رفيف .. شوكت طلع حسين من السجن ..
رافد .. البارحة رامي اتنازل عنه . لان عمي حسن ضغط عليه واترجاه ..

نزلن دموعي .. وهو طلع منا رايح الصگر . گايله اني ناهي عليها ..
وصگر هسا جاي بالطريق يفتهم السالفه منكم ..

طلع رافد موبايله واتصل على رامي ..
الو رامي وين انت ..
ها .. اذا تگدر تجي للبيت ..
لا ماكو شي .. بس صگر راح يحي وعيب منه .
يله مو تتأخر ..

سد التلفون ..
گتله خابر ع عمو حسن وگله ..
رافد .. لا خلي افهم السالفه بالاول يلة ..

ماما .. روحي غسلي وجهج والبسي گلبيه . لايجي الول
رحت غسلت . ودخلت لبست گلبيه لان كنت لابسه تراك .
وخليت شال هيج ع راسي .
لان بعدني ممتعوده عليه واستحي اطلع بلا حجاب ..

اجه رامي سمعت صوته ..
طلعت . لـگيت رافد يسولفلة ..
باوعلي .. گال شنو السالفه .
گتله .. شمدريني صگر جان معصب ومال صدگ ابن عمج ناهي عليج ..
ماادري منين سامع ..

ضرب ايد بأيد رامي وگال .. عبالي يتأدب اذا انسجن بس طلعت غلطان .. شلون اقتله وادخل بي سجن .

ماما… شنو هالحجي .. هو يسوي هيج عناد حتى يستفزكم .. هسا يجي الولد وفهموه . انه بينكم خلاف وهو يتعمد يسوي هيج ..

رامي .. وهذا صگر اذا يضل يحجي وعباله احنه متعمدين سكتنا ع النهوة .
گبل اگله الله وياك وماعدنا مرة ..

رافد .. اي مو هي لعبة البارحة عقدوا واليوم انگلة طلگ وهي هاي الي يريدها حسين وعمك ..

اباوعلهم شلون يحجون ودموعي تنزل .. ماهمهم اني وشنو احس . رامي ادري بي مايتحمل وخاف صدگ يگله ماعدنا مرة ويتعاركون ..
اوووف ياربي حتى هالفرحة مادامتلي ..

ورى شويه الباب اندگت ..
ماما .. اشرتلهم .. وگالت . بالهداوة احجوا وي الولد وتباوع الرامي ..

راح رافد فتح الباب .. ورامي فتح باب الاستقبال .
سمعتهم يسلمون ودخلوا . اني بقيت بالمطبخ ماطلعت .
ماما لبست عبايتها . وراحت سلمت ورجعت ..
وهند دا تسوي جاي ..

دخل عبدووووو يمهم .. جابه رامي وگال بعد لاتخلنا يجي ..

اسمعهم يحجون ..
صگر .. الله بالخير
رافد &رامي .. الله بالخير والعافيه ..
صگر .. يمكن رفيف گالتلكم سبب جيتي . واجيت افهم السالفه قبل مااتخذ اي اجراء ..

رافد .. خويه انت منو الي گالك حسين اجة .
صگر .. لا مو هو ليش اني شايف وجها ومااعرف شلون احجي وياه ..
رامي .. منو الي اجه ..
صگر .. ماادري مودين طارش الابوي .. وگايلين عساس البنيه محجوزة الابن عمها من الصغر ..
ومامتزوج علمودها . وهو ناهي عليها .. واهلها ضاحكين عليهم ومنطيها من وراه ..

رافد .. خويه دروب ابن عمي اعرفهن كلهن .. البارحة طلعناه من السجن اجه هاد علينا بمسدس واشتكينا عليه
ولان اشتكينا هيج يسوي ..
غرضه مو البنيه .
غرضه ينتقم منك ويوگف قسمتها ..

صگر .. وهو منين يعرفني ..
رامي .. اني اگلك .. انتو عندكم مشكله وي ال……
صگر .. اي نطلبهم ثار . بس مشوا علينا وفصلوا . والولد منهزم ودمة مهدور ..
رامي .. اي اخو الولد الكاتل يصير صديق حسين ابن عمي .
ومره انتو متعاركين وهو صاير حاجوز الصديقه . وانتو كاتليه وياه وباسطيه . وهو مشتكي عليكم ..

صگر .. بس لا هذا الولد الاسمر الضعيف .
رامي .. اي هو .
صگر .. هذا الملطلط ابن عمكم ..
رافد .. مع الاسف ..
رامي .. هسا فهمت ليش نهى وماقبل ننطي رفيف الكم .
صگر .. هاهي خويه .. من هسا صارت السالفه يمي وتخصني .. لان مشكلته من البدايه وياي .
واني اعرف شلون اوكفه عند حده واعلمه مايجيب طاري مرتي وين ماجان ..

رافد .. خويه لتتكبرها وخلي يولي . لان هذا مشكلجي ومالنا خلگة يضل كل يوم ناط النا ..

صگر .. شحدة .. مو صگر الي يخاف من واخد زعطوط
رافد .. ترى كلنا مانخاف ونگدر كلشي نسوي . بس مو حلوه نتسمى اهل والناس شتگول كل يوم مشاكلنا عالگة ..
صگر .. لا خويه واني هم ماگلت نحلها بالذراع . اكو طرق ثانيه نحلها بيها . اني افهم ابوي السالفه . وانطيكم علم ..

رافد .. ان شاء الله .
صگر .. وهسا بيها مجال اشوف مريتي شويه لأن ضغطت عليها بالتلفون ..
رافد .. اي حقك . هسا اصيحها الك ..

رفيف .. گاعدة واسمع . اجه رامي ..
تعاي خانم . هذا الاخ من هسا ضارب ميانه ويگول مريتي شنو السالفه ..
ضحكت هنودة . گالتله اي صدگ مرته قابل مجذب .
رافد ضحك .. گاله عود من تخطب نشوفك شتگول ..
روحي يابه الولد منتظر ..
رامي .. بس مو تاخذج السوالف ..
ماما .. هاي شبيك وي البنيه دا تخجلها ..
رامي .. اختي واغار عليها ..
هند .. يا رجعنا النفس السالفه . نسيتوا شسوه برحيق واحمد . جان يگعد بنصهم بحجة يتشاقه .
بس هسا لان الولد غريب يستحي يسويها .
رافد .. لا هنوده شنو هالحجي . الولد كبر وعقل مو مال هالسوالف ..
بقوا كلهم يضحكون .
وماما تأشرلي. وج فشله الولد منتظر ..
انطتني هند صينيه الجاي ..
ودخلت بيها .
……………………………………..
شافني . گام ومبتسم ..
اني منصية راسي .
گال . ياهلا والله ..
-هلا بيك .
شبي الحلو زعلان
-لا ليش ازعل . ماكو احد معيط عليه بالتلفون .
-ههههههه يايابة .. بس لاتنفجرين عليه .
-ابتسمت .
-اي هيج .. اني اعتذر .
-باوعتله بأستغراب . هاي منو الي يعتذر .
-اني والله . صگر شبيج ماعرفتيني .
-هههههه لا ماعرفتك .
-رفيف احنه ولد عشاير . وعدنا مايصير ناخذ البنيه الي عليها نهوة . عدنا عيبه وماتصير وننفضح بين العشاير.
والي يعقد على بنيه منهي عليها .
لازم يفصخ وياخذها الناهي ..
من سمعت تخبلت . بعد ماصرتي مرتي وعشگتج اتركج مستحيل اتحمل يصير بيه هيج ..

ابتسمت لحجايته الاخيرة ودنگت .
ضحك .. گال ليش تضحكين . لان گلت عشگتج .
اخر شي افكر بي هو اتعذب بدروب العشگ هيج ..
عيب من اهلج اني اروح .. وبس تفظ هاي السالفه نعقد محكمه حتى محد يگدر يحجي بعد ..
ويمكن استعجل بالزواج ..

رفيف .. لا ليش تستعجل اذا نحلت.
صگر .. ويمكن اني اريدها حجه وغمز وكرصني من شامتي الي جوة شفتي ..
استحيت ..
وگتله . خلي اصيح اخواني .

رحت گلتلهم صگر يريد يروح . اجو .
دخلوا سلموا عليه . ويحجي وياهم ع السالفه . وماما يمي واگفه بعباتها ..
واني عيني عليها وهو يحجي ومحروگ دمه . يخبل من يتعصب .. بس من يضحك يطلع احلى ..

اخر . شي گال في امان الله وسلم بأيده . وباوعلي وراح عود يستحي من اخواني لأن واكفين .
ولاعبالك قبل شويه جان يتغزل .
گدام اخواني . يصير فعلا صگر . ومايباوعلي ابد .

طلع . اتصل رافد على عمي حسن وگام يفرفح .
وگاله السالفه صارت تخصهم وراح تتدخل بيها عشاير .وخلي ابن اخوك الصايع عود يصير رجال ويحلها ..

سوينا عشا ودا نتعشا ..
دگ الموبايل مال رافد ..
گال هذا صگر ..
الو .. سلم وكمل . وبقى يحجي وياه بالربع ساعة ..
من سدة .
گاله رامي . ها شگال ..

رافد .. يگول . شيخ غالب . راح يودي طارش الشيخنا . وتصير گعده .
لأن حسين مرتين يتعدا عليهم . مرة من هد هو وصديقه عليهم .
ومرة من راد ينتقم وطلع سالفه النهوة وحدة .

رامي .. اي خليه . بلكي يكسروه من العشيرة ونرتاح .
ماوراه بس المشاكل ..

ماما .. خلونا من سالفه حسين وتعشوا . طلع ارواحتنا مانرتاح منه ابد ..

لليل .. اتصلت عمتي اميرة ..
وگالتلها .. افسخوا الخطبه انتو احسن مما الولد يفسخها لأن حسين مودي طارش لاهل الولد وگالهم اني ماهي عليها . وهمه عشاير ومايرضون ياخذون بنيه منهي عليها واذا فسخوا تصير حجايه على بنتج ..

ماما .. يا يدادة جا ماگالج حسن . الولد اجه لهنا وافتهم السالفه وانگلبت السالفه على ابن اخوج وراح يگاوموهم .
اميرة .. يا شمسوي هو ويگاوموه . لان يريد بنت عمه وهو احق من غيره عليها ..

ماما .. اي دخلي يدرس ويتخرج ويتعين ويصير براسه خير يله يحقله ياخذها . بنتي ربيتها وتعبت عليها وصارت دكتوره حتى انطيها الواحد جاهل .
والحجي صار مو يمنا يم الشيوخ . عود تفاهموا وياهم ..
وسدت التلفون ماما ..

من سولفت شگالت عمتي .. تخبلت . بابا شلون تربى وعاش وي هيج بشر . الحمد لله الي طلع يختلف عنهم

مرت الايام ..
وقرروا يوم الگعدة . بعد مادزوا ع شيخ عشيرتنا .
وحظروا عمامي كلهم وحتى عمو هادي .
واخواني هم ..

كنت بيومها گاعده ع نار ..
للمغرب يله رجعوا ..
من اول مادخلوا واني عيني ع حلگهم اريد اعرف شصار
بس البرود العدهم موتني ..

ماما .. يله عاد صرلكم ساعه . ماي وجاي . ماتسولفون .
رافد .. شنسولف. هاهي انحلت . وحسين اذا حجة او تعدى عليهم او على رفيف ينكسر من العشيرة واعتبروا النهوة باطله ..

ماما .. الحمد لله ..

رامي .. بس السيد ابو صگر . من حجى هز الديوان هز . صدگ حجاي وصاحب كلمه . بحيث خله شيخنا مايعرف يحجي .
خو عمي هادي . بس يتبجبج ويتعذر . واحسبوها عليه وبعد ماتتكرر . ولاتگولون السانه متر من يجينا .

رافد .. اي وگالهم .. من يوم الي عقد عليها ابني صارت بنتي . واي غلط اتجاهه يعتي غلط بحقنا . والي يغلط بحقنا مانعذرة ونگاومة ..

رامي .. اي لو استاذ صگر .. يگول صارت مرتي والي يحط عينه عليها افگس عيونه من غير مايرفلي جفن ..

جاي يحجون واني ابتسم ومستمتعه ..
( فدوة شلون يدافع المرته .. واتخيل شكله من معصب) . ادور اتخيلت شكل عمو من

يحجي وخايف واضحك ع الموقف. اجت رساله ع جهازي .

……………………………………..
فتحتها ..
💬جاهزة تكونين مرتي بالقانون باجر ..
ضحكت . ودزيت .
💬 باجر ?? شلون نلحگ
💬 عليج الجاهز. بس تدخلين تنطين موافقتج للقاضي وتبصمين وهذا هو ..
💬بله اني مموافقه شلون ..
💬 اي عادي من اجي وگوليها وانتي تباعين بعيوني اريد اشوف شلون تگوليها بعد ..
💬 هههههههه تعرف نقطة ضعفي .
💬 اني صگر ماتعرفيني .
💬 لا هسا عرفتك وحفضتك كلش زين .
💬 هههههههه اموت عليج .

ضحكت .. ومااعرف شنو ارد ..
دز 💬 ترى مايرادلها هالگد تفكير . گوليها وريحيني .
💬 استحي ..
💬 تگوليها لو اخليج تگوليها گبالي ..
💬 ههههههه لا حباب انطيني وقت ..

اتصل فيديو ..
يااااا عزا باوعت الروحي بالمرايه حلوه . سحبت شال وفتحته ..
هو نايم ع السرير لابس تشيرت ربع ردن وعضلاته باينه حلو شكله وحتى استحيت اباوع .
گال .. بله هذا شنو الي لابسته على راسج . من ذيج المره شفتج وگلت يمكن تستحي من اخوانها .
بس هسا احنه وحدنا وانتي مرتي ..
اريد اشوف شعرج هو نفسه بالعقد . لو مستعار .

-يا شنو مستعار والله شعري .

-اي دخلي اشوف واتأكد ..

-سويتها عناد ونزلت الشال . كنت رافعته الشعري . درت وجهي وگتله شوف والله شعري .
گال .. ايباااااه هسا ردتلي روحي .
-ضحكت اني ..
-گال يله گوليها .
-شنو ??
-مو گتلج اذا ماكتبتيها اخليج تگوليها گدامي .
-لاعفيه استحي .
-ماتگليلي انتي دكتوره وداخله تشريح واشكال شايفه المفروض تكونين جرئيه. اشو دومج ترجفين . وين ذيج رفيف القويه الدكتوره الي رزلت صگر بالمستشفى.

-هههههههه راح تبقى لازمها عليه . اي لازم اكون قويه گدام الغربه والمااعرفهم لان اذا اضعف يستغلوني .
بس هسا انت صرت غير ..

-بااااوعلي وگال بالقرآن احبج ..
-گتله واني هم . طلعت لااراديا ..

-اگلج مرمرتي گلبي . الاحسن باجر نعقد محكمه ووراها بأسبوع نتزوج ..

-لا شنو هاي مو گلت نتعرف هالشهرين .

-صار عشر ايام نتعرف مو كافي . عرفتج وعرفتيني . ومن نتزوج تعرفيني اكثر . خير البر عاجله .

-انت تحجي صدگ .

-اي بعلي شبيج .ماگالولج اخوانج . ابوي گالهم ناخذ البنيه من وكت عن المشاكل ..

-لا عفيه كلشي ممسويه ولامشتريه .

-شني هي يوم واحد اشتري المهمات . والباقي اخذيهن من دبي ..

-دبي شنو .

-اي لان سنويه اسد ماطالعه .. قررنا نتزوج ونطلع الدبي فترة ونرجع .. وهناك عندي شغل يعني بيها وبلاها احنه طالعين هم شغل وهم شهر عسل ..

-لاصگر دا تفاجأني .. دوامي شلون .. لا لاتخليني امام الامر الواقع ..

-قابل اني گتلج بطلي .
اني ارتبها واسويلج اجازة شهر ..
نروح ونرجع بيهن ..

-شلون ترتبها ..

-عندي طرقي الخاصه عليج الجاهز ..
وهو اول وتالي انقلج يمنا ..

-ماادري خلي اشوف اموري . ماالحك مالحك .

-هههههه لاتدوخين . ارتاحي وعلكيفج اشتري واطلعي واذا تردين اني اجي اخذج لو ادزلج وحدة من البنات ..

-لا شكرا ماما وهنوده يمي ..

-شبيج انخطف لونج . لاتخافين بعدنا مامحددين موعد . لاتتوترين .

-ها زين ..

-يله حبيبتي روحي اتعشي واكلي زين ترى ضعفانه . ولو ادري بيج من التوتر ماراح تاكلين اليوم العرس ههههه

-ههههههه اي اضحك عليه .

-اموت عليج ..

-احبك ..

-ههههههه واخيرا . اني هذا عشاي تعشيت ..

كملت المكالمة .. طلعت لگيتهم صابين العشا .
گالت ماما . دريتي بموعد الزواج ..
واني ضايجه . گلتلها اي ..
رامي .. وشبيج عفستي وجهج . بس لا بطلتي ..
رفيف .. لا بس مالحگ كلشي ممشتريه لسا .
ماما .. عادي من باجر كل يوم نشتري شويه . بس دوامج شلون ..
رفيف .. صگر گال اني ارتبها واخذلج اجازة ..
رامي .. عاد انطينا من وقتج خلينا نشبع منج قبل لاترحين ..
نزلت دموعي وحضنته .
رامي .. لاتبجين يوردتي . كل اجازة اجي اشوفج حتى اذا بالمستشفى واخلي استاذ صگر يجيبج النا .
رفيف .. انت باجر تلتحق . وبعد كم يوم يله تجي . بس لا بزواجي يصادف دوامك ومااشوفك من اروح الدبي ..

رافد .. هلا ياب دبي شنو .
رفيف .. اي نتزوج ونسافر الدبي . عنده شغل . ولان سنوية اخوه مطالعه .
رامي .. والله لو للمريخ الحگج . بس لتخافين من يتحدد الموعد اخذ اجازة اذا دوامي واجيج . كم رفيف عندي ..

من هسا گمت اشتاق الاهلي . واخواني . وعبدووو حبيب عمته .
تعشينا وكملنا . اتصلت على رحيق . گلتلها .
تخبلت گالت ليش هالسرعه .
گلتلها من ورى ابن عمج الغبي غير ..
رحيق .. يله كلشي بالقسمة . جائز مقسوملج بهيج يوم تتزوجين . وترحين الدبي بعد عيني عيني .
رفيف .. ههههههه دعوفينا . اريدج تاخذين اجازة من استاذ احمد . مو تجين مثل العقد بنفس اليوم ..
رحيق .. لا اجي قبل اسبوع ..
رفيف .. ها اوك يله باي ..

رحت نضفت المطبخ .. وكملت . دااحظر لبس الباجر .
اجتني ماما . گالت رفيف .
خليلج ورقة وقلم واكتبي احتياجاتج كلها حتى متنسين وبالسرة تشتريهم وماندوخ ..
يعني شغلة الكماليات والمكياج اكتبيهن وحد .
والملابس وحد .

رفيف .. ان شاء الله ماما .
وصدگ طلع

ت ورقة وقلم . وگعدنا اني وهنودة نكتب .
بعدين گالت . هم تشتريله نيشان .
گلتلها اي لان همه عشاير وخاف هالشغله عادة عندهم .اشتريله ع ذوقي وبعد ماادري اذا عجبه ..
هند .. وشلون تعرفين قياسه ..
رفيف .. اخذ رقم منى من جهاز ماما . واحجي وياه ..

ثاني يوم بدلت وتشيكت .. ورحت للمستشفى بعدها اخذت اجازة وطلعت .
اجه صگر اخذني وطلعنا ..
كان مجهز كلشي . اوراق الصحة وكذا .
بس عقدنا وطلعنا ..
گتله اليوم غداك عدنا تگول ماما .
گال . خوش جا خلينا اليوم ناخذ صور .
رفيف .. ياصور .
صگر . جا شتردين تضيعين عليه الفستان الي اشترتيه ومالبستيه الي ..
ضحكت اني .
گال بس كون اخوانج ماهمه زحمة منهم ..
رفيف .. لا رامي التحق . ورافد ميفوت نومة الظهر لتخاف هههههه .

رحنا البيتنا وباركولنا اهلي .. ماما وهنودة مبدعات بالطبخ .
سمج وبرياني ودولمه وتبسي ومقبلات وفواكه وخلاوة وخيرات الله كلها ..

صگر .. اليوم حالفين تموتوني .
رافد بأستغراب .. ليش
صگر .. هذا الاكل كله مايتفوت ووين اخليه ومنا المره خاف تخترع من تشوفني هالگد اكل ..
رفيف .. لاعادي اكل بالعافيه ..

ضحك رافد وگال .. عمه سيسنا احنه ..
ماما .. هههههه بدت الغيرة ..

اكلنا وكملنا شلنا المواعين كلها وصبينالهم جاي .
اخذت هند ع جهة .
وج هنوده رجلج ماناوي يگوم . واني وصگر متفقين ناخذ صور لان مااخذنا بالعقد ..
هند .. دروحي البسي وعدلي .. واني احجي وياه اصلا هو تلگيه نعسان بس يستحي من صگر يتركه وحده ..

رحت للغرفه . شفت موبايلي بي رساله فتحتها .
💬 هذا اخوج الظاهر ماينشلع من مكانه راح يشلغم
💬 ههههه لتخاف راح ادز القوات تاخذة .
💬 هههههه ياالله مو تتأخرين .
💬 لا مااتأخر . بس ابدل .
💬 منتظر على احر من الجمر .

لبست الفستان . كان طويل ومخصر ع الجسم لونه بيج وردانه شيفون . مشطت شعري . وسحبته ع جهه
وخليت مكياج حلو وطوخت الشامه لان يحبها .
صبغت اضافيري ماروني وهمه اطوال طلعوا يخبلون .
لبست التراجي . ورشيت عطر.
لبست حذاء عالي . لان رغم اني طويله بس هو اطول مني .

فتحت الباب الهنوده . گالت صعد يله .
اخذت علبة الذهب . وگلتلها موتتأخرين نيميه هو وعبدووو وتعالي اخذيلنا صور ..
رحت للاستقبال واتمايل بمشيتي .
هو مدنگ ويلعب بالموبايل يمكن ديدزلي رساله ..
رفع راسه . صفن بوجهي وابتسم ..

يتبع……

///البارت التاسع///
درب_العشگ🔥
بقلم_الكاتبة_شمس

رحت للاستقبال واتمايل بمشيتي .
هو مدنگ ويلعب بالموبايل يمكن ديدزلي رساله ..
رفع راسه . صفن بوجهي وابتسم ..

گال .. اوكفي خليني استوعب ..
رفيف .. هههههه شبيك ..
صگر .. تعالي يمي گام وسحبني من ايدي . وگعدت يمه ..
هو هذا نفسه مال العقد ..
رفيف .. اي ومالبسته .
صگر .. خرررب غير ابوي دومه مستعجل . بس همزين مالبستيه . جان شلغمت عدكم هههههه .

دگت الباب هند ..
هو ابتعد عني بسرعه .. خلة بينا شبيرين .
صدگ ضحكني ..

هند .. نيمتهم مؤقت واجيتكم ..
صگر .. راح انزحمج خويه ..
هند .. لا على بختك خويه شمسويه هسا اني ..

انطيتها موبايلي .. ونزعنا حلقاتنا ..
لبسني ولبسته الحلقات وهند تصور ..
وهو خجلان ومستحي منها ..
بعدين بدأ يلبسني الذهب ..
ودور گمنا ناخذ لقطات .. بس ولاتگولون ذاك صگر الي يتغزل .. انگلب انسان خجول ..

كملت تصوير وطلعت ..
گال .. هفففففف واخيرا . حتى النفس گطعته ..
رفيف .. ههههههه معقوله هيج خجول ولاعرفتك .
گال .. لاتشوفيني وياج جريئ غير انتي مرتي ..
بس وي غيرج لا ..
واني المرة الها حرمة عندي .. مااباوع الا الحلالي ..
گتله .. احم احم ..
صگر .. اگلج راح اروح وكلشي ممحصل ..
رفيف .. يمكن رافد نزل .. خليني . اروح .
صگر .. لا عليج الله . وراح گعد ع التخم .
خربت من الضحك عليه .
هيج تخاف ..
صگر .. خوش اطلبج وحده . وبعدين مو صگر الي يخاف بس احتراما الهم وببيتهم ..
والا انتي مرتي شرعا وقانونا بعد لويش اخاف ..

ضحكت اني ..

صگر .. بسيطه اشبعي ضحك هسا .. ويلمس بليحته ويتوعدلي ..
گتله اروح ابدل واجي لايگعد احد.
رحت بدلت . وسويت جاي وكعك وجبته يمه ..

لگيته يشرب جكارة ..
گتله ابد مااحب ريحتها ..
نفخ بوجهي وگال . وليهمج حطفيها ..
دور باوع وگال . شماتلبسين بعد مايحلالي الا ذاك الثوب .
صدگ حوليلي الصور كلهن .. خليني اتمعن بيهن زين .
رفيف .. ما ماادزهن .
گام يتلاوه وياي ع الموبايل . اندگت الباب طفر .وابتعد عني ..
ضحگت وگمت .. لگيتها ماما .
گالت اخذتني النومه خالة اعذرني .
صگر .. لا خاله على راحتج .. وگام يشرب جاي ويضحك .
شويه ونزل رافد وهند ..
گال صگر . جا اني اترخص ..
سلم على اهلي وعليه وراح ..

دز رساله وهو بالسيارة يمكن ..
💬اوصل للبيت الگي الصور كلهن مرسولات الي ..

ابتسمت كسر خاطري ..
رسلتهن اله ع الواتساب ..

واخذتلي غفة شويه ..
گعدت الاذان يأذن .
صليت وكملت وگمنا نسوي عشا اني وهنودة ..
اجه عبدووو جايب الموبايل ..
يگول اوووو اووووو . هو يسمي الموبايل اووووو .

باوعت صگر ..
-صح النوم ياحلو
-هههههه شمدريك نايمه ..
-گلبي گالي ..
-ههههههه .
-اگلج حب . الشيخ يگول غداهم عدنا باجر . اني خابرت رافد وگلت انطيج خبر ..
-الا باجر يعني . مو عندي خفارة ..
-اي عادي . من تخلصون غدا اخذج اوصلج اني للمستشفى..
-لاشيجيبك . عادي اخلي اهلي يوصلوني اول .
-تدرين صار ساعة مخلي الصور واباوع .. وحتى راويتهن الامي . وگامت تصلي ع النبي .
تگول جنتي تخبل ..
-هههههه لا شگد عيب . هسا شتگول عليه .
-شتگول يعني . رجال ومرته ماخذين صور جريمه لو شنو ..
-هههههه اممم زين راح اروح يصيحولي .
-على راحتج حبيبتي .
باي
باي ..

تعشينا وكملنا . گال رافد غدانا عند اهل صگر باجر . سويت روحي ..
گلتلهم اني باجر خفارة مو تبقون هواي هناك حتى توصلوني للمستشفى وترجعون للبيت ..
رافد .. اي موتتدللين .

ثاني يوم رحنا الضحويه الهم .. بيتهم كبير .
ببداية البيت . مضيف كبير معزول ..
وبعدين ندخل للبيت .
صالة كبيرة واستقبال مفتوح عليه ..
لجوه مطبخ ووصاله صغيرة داير مدايرها غرف ويم المطبخ ممر للصحيات . ودرج يصعد للطابق الفوگ .

بيتهم واسع وحلو والاهم نضيف ..
سلمت على خاله ام صگر واخواته الكبار . وعماته جايات ..واخواته الممتزوجات اني مشايفتهن .. اجن ورحبن بيه
ومايحجن ولايطلع صوتهن بس يبتسمن . دور راحن للمطبخ وبعد ماشفتهن ..
گعدنا يم خالة ام صگر . بالغرفه مالتها ..
صگر ابد ماشفته بعد . عندهم عادة اذا اكو نسوان بالبيت ماكو اي رجال يدخل ..
عندم ممر خارجي يودي ع المطبخ مناك ياخذون احتياجاتهم ويطلعون للمضيف .
طبعا .. رافد دخلة صگر للمضيف وي ابوه وعمامه ..

سولفت خالة ام صگر . ع الزواج وگالت استعجلوا الزلم واني جنت ماناويه ازوجه الا لمن تطلع سنوية اخوه ..
بس بعد كلشي بالقسمة ..
فالاحسن . ياخذ مريته من بيتها للفندق . ومناك يسافرون الدبي ..
وهو هم عنده شغيلات يگضيهن ..
ولو هو تيه الشغل كله من يوم الي خطب وتضحك ..
استحيت من حجايتها ..
ماما .. كلهم هيج علويه .. من يخطبون ينسون الدنيا بفرحتهم .. وبعدين يلتفتون للعيشه والمسؤوليه ..

ام صگر .. شأريد منهم اهم شي سعادتهم واشوف ولدهم .. مو ذاك اسد الي راح وعاف اثنين بنيات صغار

ماما .. خطيه الله يرحمة وبناته يربن بوجودكم ان شاء الله.
ام صگر .. ردته يشيل جنازتي تالي اني

الي شفت جنازته وگبرة .. وگامت تبجي ..

بقينا ساكتين شويه .. دور گالت منى . مابقى شي ع الزواج تلحگين تجهزين .
رفيف .. ان شاء الله من باجر نطلع والله كريم .
دور اشرتلها اجت يمي ..
گلتلها .. اريد اعرف قياس ملابس صگر .. حتى اشتريله .
گالت گومي وياي .. واخذتني الغرفته ..
افيييش ياريحة هلي تخبل الريحة ..
والغرفة مرتبه .
دشداشته معلگة . انتبهت هواي يلبس دشاديش .
رحت اباوع للحجم مالها .
…………………………………
گالت منى .. اني رايحة وشويه وارجعلج .
راحت ..
بقيت اتلمس بغراضه واشم بدشداشته .. ريحته مميزة .
فتحت الكنتور .
اباوع الملابسه شلون مصفطه .
اباوع للقياس مالهن واتلمس بيهن ..

سمعت صوت .. استحيت . طلعت بسرعه گلت لايشوفني واحد شيگول عليه .

لاگتني منى .. ها اعذريني عفتج وحدج ..
رفيف .. لا عادي . بس اريد اروح للمغاسل ..
گالت اكو فوگ .
بس يله تعالي .
رحت وياها ..
مريت ع المطبخ . البنات يطبخن بهدوء وماكو اي صوت ..
رحت للمغاسل ورجعت ..
گلتلهم بنات تحتاجون شي اساعدكم ..
گالن لا ..
انتبهت اكو بنيه گاعده وياهن .. گلتلها السلام وعليكم .
گامت . وعليكم السلام .
حجت منى .. هاي مرت اسد الله يرحمة ..
من گالت مرت اسد .
كسرت خاطري حيل . لابسه سواد من فوگ لجوه .
گلتلها البقيه بحياتج . والله يصبرج .
گالت شكرا ..
طلعت واني گلبي مكسور عليها .

رجعت يم ماما والنسوان بالغرفه . عبدووو يبجي مستغرب لأن من اجينا كان نايم وگعد شاف نسوان وبيت غريب خاف . وهو ممتعود بس علينا ..

صاحت منى .. صيحوا الق وبنين يجن ياخذنه ويلعبنه بالحديقه ..

شويه واجن وحده عمرها اربع سنوات .. ووحده سنتين
يركضون ويلعبون . الشعر اشهب وحلوات . على امهن حلوه .

اذن الاذان كلها گامت تصلي ..
كملنا صبوا الغدا . طبعا اخوات صگر .الممتزوجات
هيلين وشيرين اسمائهم ..
عبالك مكينه .. وبدون صوت . عجبني حيل ..

گعدنا نتغدا كلنا . صاحت خالة ام صگر ..
وين ام بنين ماتجي .
منى .. تستحي . خليها يم البنات بالمطبخ ..

واحنه نتغدا .. گالت خالة ام صگر ..
گالج صگر لو لا ..
گلتلها .. شنو
گالت .. اسمعي يمه انتي بعد صرتي بنيتنا . احنه من راد صگر يخطبج الشيخ ماقبل ومن غير مايعرف انتي منو ولان احنه عوايدنا السيد ياخذ علويه ..
بس لان صگر هاويج .. الشيخ گاله اذا اخذت عاميه . تلبس لبسنا وتاخذ طبعنا ..

صفنت عليها .. انحرجت لأن الكل گاعد وحجت . ومااگدرت احجي شي ..
گالت .. يعني تلبسين عبايه مثلنا وتاخذين طبعا شلون البنات يلبسن تلبسين .. وخفارات مانريد لان مو حلوة جنة الشيخ والساده تبات برة بيتها بالليالي ..

احس روحي تغلي وهي تحجي .
گالت مو تزعلين انتي حاله حال بناتي ومثل ماانصحهن انصحج . المرة مالها . غير بيتها ورجلها .
وهاي ام بنين .. من اخذت اسد جانت تدرس . بس بعدين تفرغت البيتها ورجلها وبناتها .

هي تحجي واتي ساكتة احس روحي بدوامة مااعرف شنو تاليها ..

تغدينا وكملنا او بالاصح بس انقش .. لأن من قهري ماگدرت اكل شي ..
.. شويه واشرتلي منى . گالت تعالي .
رحت . گالت صگر فوگ يريدج ..
گلتلها خاف عيب ..
گالت لاعادي وانتي مرته بعد ماكو عيب .
واني هنا اداري عليج اذا سألوا ..

صعدت ورجليه تصعد بثگل ..
شفته واگف فوگ ويضحك ..
سحبني ودخلني للغرفه ..
بوسني بخدي . وبالعاده اني استحي ومااخليه . بس من التفكير. مابديت اي ردت فعل ..

صگر… شبيج حبيبتي بيج شي . احد سمعج حجايه ..
رفيف .. لشوكت ناوي تضم عليه .
صگر .. شنو .
رفيف .. شنو الاتفاق الي بينك وبين اهلك يله وافقوا عليه ..
صگر .. شنو منو گلج .
رفيف .. امك عبالها انت گايلي . واضطرت تحجي .
صگر .. شگالتلج?
رفيف .. صگر انت من اخذتني اني هذا لبسي واقتنعت بيه . وتدري بيه اخذ خفارات ..
تخطب وبعدين تخليني امام. الامر الواقع . ماتصورتك هيج تطلع . ليش ماحجيتوا من البدايه ليش هسا .

صگر .. رفيف .. انتبهي النبرة صوتج ..
اني اتفقت وي اهلي بس گلتلهم هي دكتورة مو ربة بيت والبسها عبايه . وگلتلهم بعدين اني وياها نتفق على طريقه لبسها محد يتدخل . والجان ع الخفارات گلتلهم من تنقل هنا بعد ماكو خفارات .
ماادري بأمي تسبق الحجي وتروح تحجي وياج ..

رفيف .. وشبي لبسي . لابسه حجاب ومستور .وبعدين شمنتظر يله تگلي ع رأيك بلبسي لمن نتزوج ..

صگر .. لا اني گلت مو وكتها واحنه راح نتزوج ونروح الدبي . گلت بعد مانجي . افاتحج بموضوع الجبه لو عبايه اسلاميه تلبسين شنو الي يريحج ..

رفيف .. هذا رأيك لو رأي اهلك .
صگر .. شنو شايفتني زعطوط . لو اريد اخذ حجيهم من البدايه گتلج . بس اني ردت نحجي بهداوة . ولان هنا منطقه شعبيه مايعرفون دكتوره وشي .
اسمج مرت صگر ابن الشيخ غالب . ومرت سيد .
تضل تنتقد .
خارج الگرنه مااحجي وبكيفج . بس للدوام تلبسين ..

رفيف .. مو گتلك لانستعجل . خلينا نعرف بعض اكثر .
اني اختاريتك لان دارس وفاهم وماتهمك هيج شغلات .ولان شفتني ع طبيعتي واختاريتني ..

صگر .. وفعلا ماتهمني .… قاطعته ..
ر

فيف .. اني حتى اخوك مادريت بي متزوج وعندة بنات الا هسا
حتى اخواتك الممتزوجات ماشايفتهن ولا اعرف اساميهن ..شفت شلون مااعرف شي عنكم وعن عائلتك .
احس روحي غريبه بينكم ..

صگر .. شنو غريبه .ليش تتحسسين. شي طبيعي باول فترة هيج وبعدين تتعودين ..
واني نفسي مثل ماعرفتيني ومااتغير ..
وبعدين اني عبالي تدرين بمرت اسد .
ومااجه ببالي اذكرها . لأن هي خلصت العدة عند اهلها . وبعدها تجي فترة وتروح . واني بحكم شغلي مامتواجد وناسيها والله ..

سكتت ودموعي نزلن . رفع راسي بإيدة وگال . لاتاخذين الامور بجديه . والعمر گدامه تعرفين كلشي عنا وتتعودين .
مااريد اشوف دموعج .. اضحكي يله ..
ابتسمت بس داخلي يغلي ..
گال .. اي هيجي اضحكي . واني احرگ الگرنه كلها علمودج ..
……… .…… …………………………… ..،.
گال خلينا ننزل . ومن توصلين نتخابر ونسولف على راحتنا ..

نزلت . هو راح للمضيف . واني رحت يمهن .
اباوع على ماما تريد تنفجر . وساكته ..
شويه . وگالوا رافد دز عليكم يگول يله ..

حسيت انطوني افراج . بس اريد اطلع ..
سلمت عليهن وبوستهن كلهن وطلعنا .
طبطبت ع ظهري خاله ام صگر وگالت ..
مو تزعلين مني يمه ..
ابتسمتلها وطلعت ..

شفت صگر والشيخ بالباب . سلمت عليه وبوست ايده
گال الله يرضى عليج بنيتي ..
يوم الي تنورين الگرنه من صدگ ..

صگر عينه عليه ويبتسم ..
صعدنا بالسياره ومشينا ..
الطريق كله ساكتين . ومانحجي ..

رافد .. اين انتم ياقوم . شنو السالفه شكو صاير شي .
ماما .. مو وكتها خلينا نوصل وبعدين ..

وصلنا . دخلت گبل الغرفتي بدلت .
صاح رافد .
طلعت . گال فهموني شصاير ..
سولفتله امي كلشي ..
ضاج وگال ..
ليش ماحجوا من البداية وخلوا شروطهم شنو يخلونا امام الامر الواقع ..
اذا احنه اخوتها وراضين على لبسها وحجابها قابل هي طالعه عريانه ..

ماما .. يردوها مثل بناتهم يأمرون وينهون عليهن . اربي واكبر واوصلها تالي الغرب يمشوها ع مرامهم .. اني امها ومايوم ضغطت عليها بشي .
وفوگاها تقارنها ببناتها ومرت ابنها . وتفتخر لأن بطلوها من المدرسه . هالترملت وبقت لاوضيفه التنفعها ولارجل .
رافد .. يمه كافي . مو عوايدج هيج تحجين بمكان ماتهديها تشعليها .

ماما .. اسكت يمه من قهري احجي . لو حاجين من البدايه جان تفهمنا موقفهم . بس مو عقدوا سيد ومحكمه ومابقى شي ع الزواج يله يحجون ..

رافد .. صحيح حجيج يمه .. بعدين هي عليها برجلها ولو يريد هو يگلها. ورفيف عاقله وبالكلمه الحلوه والضحكة تخلي الناس غصبا عليها تقدرها وتحترم مكانتها ووضيفتها ..
تركتهم يتناقشون ورحت . اتصلت ع سوزان .
حتى الدوام نسيته .
گلتلها تاخذلي اجازة ..
سوزان .. ليش اكو شي ..
رفيف .. لا بس هسا اجينا من بيت اهل صگر وتعبانه .
سوزان .. عيني عيني . قابل مثل حظي مگابله المراجعين بلكي يجي واحد مثل صگر ههههه .

ضحكت وسولفت وياها بس على عيوني .
سديته منها ونمت . من اضوج او اتعب علاجي النوم ..
گعدت بالليل مكسر جسمي تكسر ..
شفت اتصالات من صگر ورامي ..
صگر مااگدر احجي وياه بعدني ضايجه منه .
اتصلت على رامي ..
رد عليه .. هلو حبيبتي شلونج گالولي ضايجه وحتى دوام ماداومتي ..
رفيف .. ماكو شي حبيبي تسلم ..
رامي .. اگلج رفيف .. اذا تحسين نفسج تورطتي او تندمتي گولي . مدام بعدكم بالبدايه . مو اول ولا اخر وحدة تفسخ خطوبتها .
عندي سعادتج وراحتج . اهم من حجي العالم .
رفيف .. اووووف هاي ماما گالتلك . ماكو شي تفاهمنا اني وصگر وخلص . ماما وحدها كبرتها ..
رامي .. اكييييد . اطمأن .
رفيف .. وعيونك حبيبي . لو احس نفسي متندمة من غير متگول انت ..
رامي .. ريحتيني . الله وياج يبعد اخوج .
رفيف .. الله وياك حبيبي. دير بالك على نفسك ..

سديته منه .. اتصل صگر ..
رفعته .. گال شفتي مكالماتي شگد ..
رفيف .. كنت نايمه ماادري .
صگر .. وهسا مو مشغول ..
رفيف .. اي اتصل رامي وجاوبته ..
صگر .. كلها تطمنيها عليج وكلها اهم .. الا صگر. لو يشتعل من الليل للصبح ماتهتميله ..
رفيف .. صگر شبيك .... گتلك نايمه وهسا گعدت واتصل رامي وجاوبته بيها شي .
صگر .. لا مابيها . اني الغلطان . عود من تصحين اتصلي بيه . خليج ع راحتج ..
مع السلامه .
گتله باي . وسديته . لأن فعلا ماعندي مود اخذ وانطي وياه بالحجي . وبعدني ماصاحيه .
فتركته ع راحته .…

يتبع………