///البارت الأول ///
#درب_العشگ🔥
#بقلمي_الكاتبة_شمس

🔥للعشق دروب وطرق .. مثلما ..
للخير دروب وللشر دروب ..
للحق طرق وللباطل طرق ..
للضياء مسار وللظلام مسار ..
هناك دروب مفتوحة وهناك دروب مغلقة ..
هناك طرق سالكة وأخرى متعرجة ..
والانسان هو الكفيل بأختيار الدرب الصحيح ..
سواء في الحياة او العشق ..
وان لاتحكمه عواطفه بأختياراته وعليه ان يواجه الحقائق قبل ان يخطو اي خطوة .
لان هذه الخطوات هي التي ستقوده لنهاية سعيدة او حزينة ..

.. صارت ساعة 12 بالليل .. بعد مااخذت فرة ع المرضى ..
رجعت للغرفة ..
الجو بي برودة.. شغلت الغلاية وسويت كوب كابتشينو شرابي المفضل!! ..

بعدني اخذت اول رشفة منة ..
اجت بلقيس ممرضة ..
دكتورة . دكتورة .
اجت حالة للطوارئ ومحتاجيج ..

-لعد وأطباء الخفر بالطوارئ وين ?? .

-دكتوره اهل المريضه مبينين ولد عشاير وميردون الا طبيبة تكشف ع المريضه ..

ضحكت .. ههههههه شنو هالتخلف . ليش هو المريض عليه حرج ..

خليت الكوب ع الطاوله . ورحت وي بلقيس . لگيت دكتور فارس دا يحجي وياهم . وهمه يمكن اربع اشخاص مسوين ازدحام وخابصين الجو .

گلت .. السلام عليكم
د.فارس .. وعليكم السلام دكتوره . ياليت تفحصين المريضه بالردهة .
دزيتها ع التخطيط وطلبت تحليل سكر وضغط .
بس الفحص عليج ..

..باوعت للي وياها . گلتلهم بأي ردهة . وشنو اسمها .

اتقدم شخص لابس دشداشة خليجة وشكله حلو ومرتب بس نضراته حادة وصوتة جهوري ..

گال اسمها غنية بالردهة الاولى تفضلي وياي .
رحت للردهة . وصلت الباب .
گتله الردهة نسائية ياليت تبقى هنا .

-اعرف حدودي .. من تشوفيني ادخل الج حق تحجين .

هزيت ايدي ودخلت .الكاتبة شمس
گلت منو غنية .
اشرتلي بنيه متوسطه بالعمر .
گالت هاي دكتوره .

اتقربت . المرية نايمة وبالگوة تاخذ نفس .
اخذت التخطيط .
قرأته . وشفت نسبة السكر والضغط مرتفعات .
گلت للبنية تساعدني حتى افحصها ..
خليت السماعه وافحص صدرها وضهرها من جانب الكتف .كانت نبضاتها سريعه جدا ..
گلتلها حالا ننقلها للانعاش .

البنيه .. دكتوره شبيها امي .
-الوالدة عندها جلطة قويه وضغطها مرتفع لازم نخليها تحت المراقبة ..

كتبتلها ورقة للدخول للانعاش ..
وگلتلها تلگوني هناك اليوم خفارتي ..

طلعت اتقرب هذا الولد . گال ها دكتورة .
گتله الوالدة عندها جلطة قوية .
ولازم ننقلها للانعاش ..

ولد ثاني گال .. يعني حالتها خطيره .
-بلي خطيرة واحتمال تنشل اذا بقت هيج .

صحت بلقيس گلتلها ابقي وياهم لغاية متصعد واني هناك تلگوني ..

شوية واجت بلقيس .
دكتورة اجت حالتج للانعاش ..
اخذت الختم مالي ورحت .
دخلناها .
وشكلنا الاجهزة مال تنفس ومال قلب .
كتبت ع الباص علاج ومغذيات .
گلتلها جيبوه من صيدلية المستشفى .

جيكت حالتها .. الكاتبة شمس
طلعت اخذت باص ثاني كتبت بي علاج من الصيدليات الخارجية لان اكو علاجات مموجودة بالمستشفى.
وگلت محتاجه هذا العلاج حالا من برة .
اذا امكن تجيبوه .
سحب الورقة مني الولد . وگال مسلم ركض جيبة وتعال .

حسيته بس يأمر وينهى .. ماعجبني .
رجعت للجوه .
اكو مريضه احتاجتني . رحت اشوف وضعها ..
بين ماكملت .
اجة الولد نفسه .
-دكتورة من رخصتج .
طلعت وياه للممر ..
گال .. جبنا العلاج وانتي ماكو . حالة الوالدة تعبانة ومحد مهتم ..
هذا يتسمى اهمال ..

باوعتلة بأستغراب ..
إهمال !!!!
لو فعلا إهمال مانزلت من فوگ للطوارئ . ومااهتميت لان اني خفارتي هنا مو بالطوارئ .
ولا نقلتها للعناية حتى تكون تحت المراقبة .
ومثل متشوف عندي حالات هواي .
والوالدة مو الوحيدة بالمستشفى.

الولد .. لو سمحتي لاتعلين صوتج .
اني .. اني دكتورة مو موضفه عندك حتى تحجي وياي بهيج لهجة .
الوالدة اهتمامي بيها مايفرق عن بقية مرضاي .
واكو ممرضات همه الي ينطوها العلاج بموعدة وهسا داخلة واشوفها .

راد يحجي تركته ومشيت . وهو بقى يتناقش وي واحد ومعصب .ويحجي ع المستشفى والاهمال ..

بساعتها كنت ناوية اطردة من المستشفى بس عذرته بسبب قلقة وخوفه ع والدتة .
وهي فعلا كانت بحالة خطرة .
دخلت لوالدته . لگيت الممرضة يمها .
سألتها . نطيتيها العلاج .
الممرضة .. بلي دكتورة .
طلعت السمعه ورجعت افحصها مرة لخ .
طلبت من الممرضة جهاز الضغط .
لگيتة بعدة مرتفع .
گلتلها ضربتيها الابرة .
گالت .. اي دكتورة .
-اوك .
كل شوية وراقبي ضغطها وسكرها .
واي شي يصير بلغوني ..

طلعت الغرفة الطبيبات .
شفت سوزان طبيبة وياي ..
گالت . عندج حالة بالانعاش ??

-اي . وابنها واحد متخلف شلعة الگلبي ..
-سوزان .. رفيف اذا حلو حولي الحالة الي.
-ههههههه .. ولاتبطلين سوالفج . شحصلتي من الي قبلة -سوزان .. گلبي رهيف ينبض بالحب .
-وج هو گلب لو تكسي . شيشوف يحب . تخرجنا وصرتي دكتورة وبعدج ع سوالفج .الكاتبة شمس

تكيت راسي ع الكرسي . وغمضت عيوني حتى استرخي شوية ..

….. اعرفكم عن نفسي……
اسمي رفيف ... اني ملامحي طبيعيه ع

يوني ناعسة وعندي شامة كبيرة جوة شفتي ..

عملي .. دكتورة مقيمة بوحدة من مستشفيات البصرة ..
بابا متوفي قبل اربع سنوات .
ماما مديرة متقاعدة ..
عندي اثنين اخوان الكبير رافد متزوج وعندة ولد وهو مهندس بالبلدية .
والثاني رامي ملازم . ممتزوج ومو دايما متواجد يمنا بحكم شغلة .
عندي اخت وحدة اكبر مني اسمها رحيق ومتزوجة ببغداد .ماخذة ابن خالو .

لان ماما اصلها بغداد وبابا من البصرة . هم اقارب من نفس العشيرة شافها وخطبها ..
بعد وفاة بابا بقينا بالبصرة .لان اشغالنا كلنا هنا .

وعمامي من النوع المتسلط .
بس رافد ورامي ميخلوهم يتحكمون بينا .
وخاصة اني .
شگد حاولوا يبطلوني . ويگولون شنو بنيه تاخذ خفارات بالمستشفى وتبات هناك .
مايفتخرون بية صرت طبيبة بالعكس يحاولون يطمسون مستقبلي وخاصة بناتهم كلهم ممكملات ..

اني حياتي طبيعيه . ماارتبطت ابد .
لان كنت مشغولة بدراستي ..
والان شاغلي الوحيد اكمل اختصاص ..
كنت احب عملي جدا . ومااحس بتعب ابد .
بابا كان يگول انتي مميزة بگلبج وطيبتج راح تخلين كل مريض يطيب من غير علاج .
الله يرحمة كانت امنيته يشوفني دكتورة .
بس توفى قبل مااتخرج ..الكاتبة شمس

ماانكر انه دوامنا متعب والمراجعين ميراعون تعبنه . اذا اتأخرنا شوية يگولون اهمال وممهتمين بيهم .
بس همه ميعرفون انه اكو هواي حالات تحتاجنا .
واحنه طبيبتين خفر باليوم .
ولان البصرة عشاير وناس متحفظة يطلبون الا طبيبة تفحص .
صحيح مو كلهم نفس التفكير . بس اغلبهم .
ووحدة منهم . الحالة الي اجتني قبل ساعة .
ابنها . متعجرف وشايف حالة .

…. بين ماكنت مسترخية . سمعت صوت ولد نفسة الصوت الجهوري . گال دكتوره ريم من رخصتج .
فتحت عيني وعدلت گعدتي ..
گتلة تفضل ..
گال .. قبل شوية كنت خايف ع الوالدة . وماقصدي اعلي صوتي او احجي وياج بهيج حدية ..
رفيف .. لا عادي . بس ياليت تقدرون وضعنا وتعبنا قبل ماتتهمونا بالاهمال وبعدين تعتذرون ..
الولد .. اني مااعتذرت بس وضحت موقفي .. وشكرا ع اهتمامج بالوالده ..
ودار وجهه ومشى ..
بقيت صافنه ع جرأته .
هههههه والله ياربي . شنو من اشكال تجي عليه .

دخلت سوزان .. وج هذا الحلاوة منين .
رفيف .. ياحلاوة عاب شكله متعجرف .
سوزان .. وج طبگت حاجبة تخبل . وعيونه اوووف .
رفيف .. انتي المفروض يخلوج وي بلقيس مو وياي لان متلائمات هههههه .
سوزان .. يا وج راح نعنس واني لسا مالافگتلي واحد . هسا شحال مادكتوره .
رفيف .. لعد ليش طيرتي محمد من ايدج .
سوزان . عاب شكله ماعندة رجوله طلع بس حجي .
مااتشوفيني مااتحملت شهر وياه وانفصلت . وج احب الرجال الحامي والعصبي . مو الفاهي .

رفيف .. خليني اخذ فرة ع المرضى احسن مما ابقى يمج .
رحت للانعاش .
شفت رجال هواي . كثروا ماقلوا .
ماحجيت لان مالي خلگ السانه . الامن هو يطردهم اذا شافهم ..
شافني ولد منهم .
گال صگر اجت الدكتورة ..
التفت نفسه الولد . يعني اسمة صگر . اگول نافش ريشة .
مااهتميت ولاهو اهتم . دخلت من غير مااباوع الاحد .

جيكتها للمريضه ..
سألت المرية الي وياها .
انتي بنتها ..
-اي دكتورة .
-حالتها متدهورة اكو احد موترها لو معصبها .
-لا دكتورة . بس هي من راح اخوي الجبير لسا كل يوم واگعه . بس هالمرة كلش وگعتها ..
-امممم الله يرحمة ويگومها بالسلامة .

اطمأنيت ع البقية .. الكاتبة شمس
ووصيت الممرضة تنطي العلاجات بوقتها . كتبت ع الطبلات كل حالة والعلاج الي استخدمناه .
حتى خاف يجي طبيب الاختصاص يشوف الحالات.
وطلعت ..

شفت صگر يروح ويرجع بالممر . ومخلي ايدة ورى ضهره ويفتر .
شافني وگف . گال بشري دكتورة ..

گتله .. ان شاء الله تصير احسن . والصبح يجي طبيب الاختصاص ويشوف حالتها ويخبركم .

ماانتضرت كلمة منه تركته ورحت للغرفة ..

للصبح .. غسلت ورتبت وجهي . وانتضرت دكتور الاختصاص يجي ..
اجت بلقيس .
دكتورة اجة دكتور حسين بغرفتة ينتضرج ..
رحت . صباح الخير دكتور .
الدكتور .. هلو رفيف صباح النور . عندج حالات جدد .
رفيف .. بلي دكتور . البارحة اجت حالة كلش تعباته وجلطة قويه والضغط والسكر مرتفعات .
ونزولهم بطئ ..
دكتور حسين .. ديلة سويلي كوب كابتشينو . من ايديج خليني اصحصح ونگوم نشوف الحالات .
رفيف.. ثواني دكتور .
رحت للغرفة . سويتله .
( دكتور حسين استاذي وابي الروحي مو بس دكتور . كانت تربطة علاقة بوالدي . وهو الي وسط وخلاني بهذي المستشفى.. احترمة واقدرة جدا . وهو يعتبرني بنته .. وكم مرة سويتلة كابتشينو عجبته . وصار كلما يجي بأستشاريته اني اسويله ..)

اخذت الكوب ..گتلة تفضل دكتور.
دكتور حسين .. عاشت ايدج .
شرب وكمل .الكاتبة شمس
گال يله نتوكل .
سم بأسم الله ومشى هاي عادته ..

اول مارحنا للانعاش ..
وياي ممرضتين واني وبعدين اجت سوزان .
شاف الهوسة يم الانعاش گام يحجي ..
ممنوع توگفون هنا .
هنا عناية مركزة ومعقمة ..
باوعت الصگر اشرلهم ينزلون ..
وهو قابض ع ايدة . لساعة فكرت راح يضرب دكتور حسين ..

تدخلت اني .!!
گتلة دكتور . هذولي عائلة المريض

ه الي بلغتك عنها . واكيد مشغول بالهم عليها ..

دخل الدكتور فحصها . وقرأ التخطيط والفحوصات .
طلب اعادة الفحوصات والتخطيط .
وكتب الها ابرة جوه الجلد ..

طلبت من اهلها يجيبون الابرة . وضربتها بنفسي الها .
البنية الي وياها تشكرت هواي مني وتدعي الي .
گلتلها هذا واجبي ..

بعد ماطلعت نتيجة التخطيط والفحوصات ..
قرر الدكتور نسويلها قسطرة ..

طلعت حتى اخبر عائلتها ..
شفت تقدم صگر نحوي . مااعرف ليش احس بخوف من يجي نحوي .
احسة يريد يتعارك ميتفاهم ابد ..

من غير مااباوع بوجهة .. گلتلهم الحجية لازمها عملية قسطرة لأن عندها انسداد بالشرايين ..

صگر .. وشوكت تسووها ..
رفيف .. هاي يم دكتور حسين بقت .. رحوا وافتهموا منه . ترخصت وكملنا المرضى ..
خلصت خفارتي ..
جهزت نفسي وحضرت جنطتي حتى اطلع .. دا البس بالكوت مالتي ..
اندگت الباب شفت صگر .
وجانوا اكو دكتورات بالغرفة غيري .
مااعرف ليش ارتبكت .
گال . من رخصتج .
استأذنت البنات واخذت جنطتي وطلعت ..
لگيته يروح ويرجع بالممر ..
رفع راسة وباوعلي بنضرة كلها حدية .
عجيبة هالبشر حتى من يسأل لو يطلب حاجة يكون بتعجرف وغرور ..
گتله تفضل ..
صگر .. بخصوص العملية . شتگولين نطلعها ع حسابنا لو دكتور حسين زين .
رفيف .. بالعكس . دكتور حسين استاذي .. وهو قدير بمهنته وفاهم . انصحكم تبقون تراجعون عنده ..
وبعد انتو احرار بهذا الشي ..
صگر .. جيد . هذا هو وشكرا ع النصيحة ..
رفيف .. لا شكر على واجب . اترخص بعد خلص دوامي .
صگر .. براحتج دكتورة . واذا تحبين اوصلج او واحد من الشباب يوصلج ..
رفيف .. لا شكرا عندي سيارة ...
صگر .. 😡😡😡 براحتج ..
حسيته اتعجب او عصب ودار وجهه ومشى ..
هزيت ايدي ومشيت ..

يتبع…..

///البارت الثاني ///
#درب_العشگ🔥
#بقلم_الكاتبة_شمس

طلعت من المستشفى رحت للگراج .. وصعدت السيارة .
طبعا هي مو سيارتي ..
اني بالعادة مأجرة خط ياخذني ويجيبني ..
بس اذا خفر بالمستشفى.
اخذ سيارة رامي اخوية .

دا اطلع من الگراج . لمحت صگر دا يشرب جگارة ومتكي رجل المسطبة ورجل منرلها بالگاع ومتكي ايدة ع رجليه وعينه مافرقتني لحد ماطلعت من المستشفى ..

عجيب هالشخص .. عبالك دا يراقبني ..
اني كنت اراقبة بالمرايا .. محسسته اني منتبهة عليه ..

احنه بيتنا بحي الجزائر ..
منطقة راقية بالبصرة ..
وصلت بيتنا .. نزلت افتح الباب ..
انفتحت باب المطبخ ..
شفت رامي .. ابتسمت ..

رفيف .. نور البيت .
رامي .. ياهلا بوردتنا . ميت من الجوع ومنتظر الگمر يطل يلة اتريگ ..
رفيف .. ههههههه عيني عيني شنو هالدلال ..
رامي .. اتركي السيارة اني ادخلها . ادخلي للبيت .
رحت بوسته ودخلت ..

شفت ماما بالمطبخ . يوووووم ميته جوع .
ماما .. وهذا الريوگ محظر . من الصبح اجة رامي وجايب گيمر وياه ..
حضنتها ورحت ابدل ..
لبست تراك شتوي طويل . وطلعت .
شفت هنودة وعبدو نزلوا من غرفتهم ..
ركضت شلته حبيب عمتو عبدوووو حضنته وبوسته وهو يضحك فديته يخبل يشبه عمته .
رامي .. ههههههه اي لان عمته مگطعه الدنيا بجمالها .
رفيف .. ماما شوفيه شلون يحجي . الله عليج هنودة مو اني احلاهم .
هند .. لا رافد احلى هههههه .
رفيف .. اي طبعا القرد بعين امه غزال .
رامي .. ههههاااي وينه رافد خلي يجي وعود گولي هالحجي گدامه ..
ماما .. كافي شقى الاكل گدامكم حرام .
وبعدين انتي كبرتي وصرتي طبيبه وبعدج تتزعلين .

ضحكنا وگعدنا نتريگ .. ربي لايحرمنا من بعض . تربيتنا وطبعنا يختلف عن بيت اعمامي ..
احنه متفاهمين وماما ربتنا ع عاداتها . وبابا كان ميعارضنا ولايكسر بينا لأن يعرف تربيتنا وماغلطنا بيوم .
وجودة ناقصنا . ترك فراغ كبير بحياتنا .
صحيح صارلة اربع سنوات. بس عبالك البارحة توفى .
منظرة وهو يصارع المرض لسا ببالي . ورغم مرضة بس ماكان يحسسنا وابتسامته النا متفارگ وجهه .

كملت ريوگ . گلتلها ماما رايحة انام تعبانه حيل ..
رحت للغرفة . غلقت موبايلي ونمت ..
ماگعدت للعصر من التعب ..

طلعت للحمام غسلت . ورحت شفت رافد بالمطبخ وماما وهنودة ديسوون كبة .
اجيت بهدوء وحضنت رافد وبوسته . هو طفر خطيه .
رافد .. هههههه وج كبرتي وبعدج هذا عقلج .
رفيف .. اني اكبر واتصرف بعقل . خارج هذا البيت فقط .
اما هنا فأني طفلتكم المدللة وواجب عليكم تدللوني ههههه
رافد .. هاج يمه استلمي . ندلل عبدوو ندللها ..
هند .. لا تريد تغطي ع حجايتها مال الصبح .
رافد باوع ..
اها شحجت ??
رفيف .. معليك حبيبي لاتسمعها تريد تخرب بينا ههههه

(رافد بالنسبة الي مو اخ وانما بمثابة اب .. وهو يشبه بابا حيل . لهذا متعلقة بي زايد ..
من بابا تمرض بهذا المرض .. انتقلت المسؤولية الرافد .
لان ماما وبابا دايما كانو يسافرون عمود العلاج ..
ورافد كان النا اب وام واخ . حتى اجلوا سالفة الاطفال ماراد شي يشغله عن مسؤليته اتجاهنا .. وهند كانت طيبه وصبرت وشالت وياه الحمل ..
دراستي ومستقبلي كله اتحمل مسؤوليته رافد . ماانكر رامي هم الة دور . بس الدور الاكبر الابو عبدو ..
عبد الله اسم بابا .. ومن توفى قرر رافد يسمي ابنه ع اسم بابا .. وهسا صار عدنا عبدووو الصغير فديته .)

شلته وگمت اعظ بخدودة يخبلن .. وهو يعيط .
رافد .. وج خبله اتركيه راحت خدودة منج ..

نزل رامي من غرفته ..
گلتلهم سمعت اكو واحد مستلم راتب حيعزمنا ع عشا ..

رامي .. ههههه ترى الصحة استلموا قبلنا بس ماشفنا شي منهم ..

هند .. ههههههه انقصفتي رفيف .

رفيف .. اليوم عليك وباجر عليه ..

ماما .. باجر تجي رحيق وزوجها . ونطلع فد مرة اجلوها طلعت اليوم .. سويت كبة برغل وتعبت عليها .

رامي .. اي احسن خلوها ع باجر لأن متواعد وي جماعتي اليوم ..

گمنا نسوي عشا .. هند تگلي كبة . لأن اني مااعرفلها تتفكك من اگليها مااعرف ليش .
واني سويت زلايط ومقبلات ..

كملنا .. ودا نتعشا . اجو عمو هادي وزوجته ..
دايما وي العشا يوقتها ..
همستلهم . لو طالعين مو احسن .

ماما خزرتلي . گمنا سلمنا . مرت عمي گالت حسون بالباب البسن حجابات .
ركضت غيرت تراكي لبست دشداشه . ولبست حجاب وطلعت سلمت .
وهذا عينه زايغه . من كنا اطفال هو سوالفه مكسرة وحتى شرب يشرب .
بس امة گوة مسويته آدمي وتمدح بي . اخواني مايرتاحوله ..
ومايقبلون نگعد يمهم اذا هو متواجد ..

رحنا للمطبخ . وهمه گعدوا يتعشون ..
گمت احجي . خرررب اكو واحد يجي وكت عشا ..
راح يبقون لنص الليل ادري بيهم ..

هند .. دتعالي خلي نگلي وناكل . مبين وراهم سالفه بجيتهم ..

گلينا كبة وسويت جاي .
وگعدنا ناكل بالمطبخ وحدنا ..
ومرت عمي كل ساعة تگول .. يااا خطية البنات گومناهن من عشاهن ..

تعشوا وكملوا وراحوا للاستقبال ..
رافد .. سوولنه جاي يابة ..

اني رحت الم المواعين . وهند صبتلهم جاي .

.
وعبدوو يركض ورانا ههههه .
دا نغسل المواعين وبدوا يحجون ..

عساس حسون مسوي مشكله وي ناس سادة .. من الگرنة . ويردون رامي يتوسطلهم لأن عنده معارف وكذا .
رافد گام يحجي عليه . گله متبطل مشاكل صرت شكبرك وبعدنا حايرين بطلايبك ..
مرت عمي گالت . احنه اجيناكم تحلوها لو تعاركونا ..
ماعجبها الحجي .
بس عمي سكت لان مصلحته يمهم ماگدر يحجي ..
رامي گله اشوف وارجعلكم خبر ..

……………………………………………

هالمرة طلعوا من وكت لأن ماعجبهم كلام رافد ..
ماما . گالتله صحيح هو غلطان بس مو لازم تحجي عليه وببيتك ..

رامي .. يمه رحمة لأهلج . ذوله مايجون اذا موهيج . كل يوم مفشلينا وي ناس .
والله استحي اگول عمامي كذا . گد ما مشاكلهم تارسة الدنيا ..
دور وي السادة . هاي عشيرة متتفاهم وقوية والها صيتها بالگرنة ..

ماما .. والله شمدريني يمه بس مااريدكم تتخاربون وي اهلكم ..

رافد .. عماميش يمة عبالج ننسى واحنه صغار شنو جانوا يسوون بيج وبينا . بس غير الخاطر ابونا ولأن من ريحته ساكتين .
والله الي مثلنا يتبرى منهم ..

رفيف .. اووووه مو كافي هالسيرة ترى ضجنا .

رامي .. اي عيني دكتورتنا شلونه الدوام .. هم اكو ولد صاكين ترى اذبحة الي يتقرب الوردتي ..

رفيف .. هههههه واذا اكو صاك . قابل اگلك حتى تطيرة مني ..

رافد .. ههههههه لا مانطيرة لان القطار راح يفوتج .

رفيف .. ماااااما شوفي شيحجون ..

ماما .. هههههه انتي الي جنيتي ع نفسج .

هند .. وينها عمتج اميرة .. جان گالتلج . يا وج رفيف دكتور وخبصة وماعرفتي تلگفيلج دكتور من المستشفى مو راح تعنسين يحظي .هههههه

كلنا ضحكنا ..
رفيف .. اي والله دمرتني كلما تشوفني تسألني هالسؤال ..
ماما .. وبعدين تگول . والله لو تاخذ نضوري احسن مما تبقى عانس ..

هند .. اي هههههه وبنتها تگلها لا يمة مانريدها تضل تتكشخ علينا وتشوف نفسها لأن دكتورة ..

رافد ورامي .. ههههههه خرررررب وج رفيف صايرة تصنيف وماندري ..

رفيف .. اگلكم اروح انام احسن الي وراي دوام باجر وانتو گالبين عليه اليوم مااعرف شبيكم ..

رحت الغرفتي .. بقيت اتصفح بالفيس شويه . وبعدين رحت للانستا .
گمت حظرت ملابسي .
اني لبسي اغلبة تنانير طوال وستر او بنطرون وبلوزة طويلة وفوگاه كوت لأن باردة .
طلعت تنورة وسترة رهمت وياها وقميص وشال .
حظرتهم ونمت ..
گعدت ع صوت المنبه ..
رحت غسلت شفت هنودة دتسوي ريوگ الرافد عندة دوام .
گلتلها صباح الخير .
هند .. صباح النور . تتريگين ويانا .
رفيف .. لا يسلمو . بالمستشفى اكل اي شي ..
هند .. شلون تاكلين بالمستشفى بس الريحة تسد النفس رفيف .. اي شأسوي مااعرف اتريگ من الصبح .

رحت غسلت وبدلت . رتبت وجهي اني اخلي مكياج خفيف يعني مجرد كحلة وماسكرا وحمره خفيفه ..
لبست حجابي وطلعت ..
شفت رافد ديطلع . سلمت عليه .
گال اوصلج .
گتله لا حبيبي روح الله وياك .
اتصلت ع ابو محمد راح يجيني ..
رافد .. مو گالج مااجيج البارحة عنده شغل .
رفيف .. اي يوصلني ويروح الشغله وبالرجعه اتصل ع رامي يرجعني ..
رافد .. يله الله وياج . وديري بالج على نفسج ..
رفيف .. ان شاء الله.

اجه السايق ورحت للمستشفى .
سلمت لگيت البنات يردون يطلعون .
نزعت السترة ولبست الروب . وشغلت الغلاية .
سويت كوب كابتشينو . شربته وطلعت .
رحت للردهات ..
كملت الملاحظات . وجهزت تقارير . ووياي الممرضه .
رحت للانعاش .
تذكرة والدة صگر . مااعرف ليش رجلية اخذتني العندها اول شي ..
شفت بنيه ثانية غير ذيج الگاعده ..
گلتلها صباح الخير .
البنيه .. صباح النور دكتورة .
رفيف .. شلونها الحجيه اليوم .
البنية .. والله دكتورة بعدهي .
رفيف .. الدكتور حسين شوكت گاللكم يسويلها قسطرة .
البنية .. يمكن عگب باجر .
رفيف .. مشافاة ان شاء الله.
اخذت جهاز الضغط قسته الها . شفته نازل شويه احسن من قبل .
وحتى تحاليلها احسن .
كملت المرضى . وردت اطلع انصدمت بشخص حيل .
هو تراجع وگال اعتذر خوووو . وسكت .

رفعت عيني . هذا صگر .
گال . ماقصدي .
قاطعتة .. مصار شي .
صگر .. الوالدة شلونها .
من غير مااباوعله .. گتلة احسن ان شاء الله.

تركته ورجعت للغرفه . اجة دكتور الاختصاص . اخذت فرة وياه هم .
وسوزان راحت وي دكتور ثاني ..

شفت صگر وقف الدكتور . وبقى يسألة عن حالة والدته والدكتور يشرحله .
اني كنت اكتب ملاحظات الي يگولها الدكتور .
رفعت راسي شفته عينه عليه ويحجي وي الدكتور .
كان يناقش الدكتور بصورة مو طبيعية وعبالك غير شخص واگف مقابيلي . كان لبق بالكلام .
وحتى الدكتور اندمج معاه بالكلام ..

كملنا وطلعنا .. حسيت بجوع .
ردت ادز احد يجيبلي شي اكله ..
بس شفت الجو مشمس حبيت اطلع للكافتريا بنفسي .
كانت بوسط المستشفى كافتريا صغيرة .

طلعت من الباب الحديقة المستشفى اخذت نفس قوي .
الجو رغم البرودة بس منظر الشمس رائع بالشتا .

لفيت الروب عليه ودا امشي ..
گلت الصاحب الكافتريا ..
ممكن كوب شاي ولفة جبن اذا اكو .
گال ثواني دكتورة ..

گعدت ع المسطبه الي مقابيل الك

افتريا . سمعت صوت .
انطيني كوب جاي .

اني سويت نفسي مشفته . اجه الولد جاب اللفه والجاي
طلعتله فلوس ..
گال واصل .
بأستغراب گتله .. من منو ??
باوعت الصگر يباوعلي ويشرب جاي . والايد الثانية لازم جگارة .
گتله .. لا اني ادفعهم رجعهم للأخ ..
تقدم صگر .. مايسون والولد ماعنده خردة گتلة خلي حساب الدكتورة وياهن ..

رفيف .. لا شكرا . عندي خردة تفضل .
صگر .. ترى مابيها شي ليش مسويتها فد قصة ..
رفيف .. لا بيها . لا اعرفك ولاتعرفني بأي حق تدفعلي .
طلعت الف ونص ونطيته .
تفضل اخذهن .
صگر .. الي يريحج واخذهن . خلهن بجيب الدشداشة الفوگ ..
اني تركته ومشيت .
شگد متعجرف وشايف نفسة بحياتي مشايفه هيج انسان وجرئ .. لو اخواته يقبل احد غريب يدفعلهم ..
هي امة وعجوز والا دكتورة تفحصها ماقبل دكتور .

وصلت للغرفه خليت اللفه والكوب الطاوله . حتى طارت شهيتي .
شربت الجاي بس ..

اجت الممرضة .. دكتورة الحگي مريضه بالانعاش تخربطت .. تركت كلشي ورحت اركض ..

يتبع……

///البارت الثالث ///
#درب_العشگ🔥
#بقلمي_الكاتبة_شمس

گاعدين اني وسوزان وجاي نسولف ع هذا المتعجرف . وهي ماخذها الواهس بالحجي واكلت اللفة بطريقها ههههه ..

اجت الممرضة .. دكتورة الحگي مريضه بالانعاش تخربطت .. تركت كلشي ورحت اركض ..

واجت وياي سوزان .. لگيتها بالگوة تاخذ نفس .. الضغط مرتفع حيل رغم هي مماكله شي ..
بسرعه نطيتها ابرة مدرر .
وخلينا الها اوكسجين لأن بالگوة دتاخذ نفس ..
والبنيه الي وياها تبجي ..
گلتلها لتخافين هسا تصير احسن ..

شويه ودخل صگر وولد مرعوبين . گال شبيها امي .
گتله ماكو شي لتخاف . ضغطها مرتفع . واختنگت شويه هسا خليتلها جهاز تنفس وضربتها ابرة الصدرة حتى تفتح النفس مالها وان شاء الله احسن ..

خزر البنيه يمكن اخته . وگلها وانتي المن مخليج غير تراقبيها لو اخذتج الغفة ونمتي ..

گتله .. رجاءا لتعيط . مصار شي . واني راح اتصل بدكتور حسين يجي يشوفها ..

طلع گدامي .. وگال شكرا .
استغربت .
گتله العفو هذا واجبي ..
گال آنة اعتذر لأن طلع صوتي . بس الوالدة كلشي بحياتي ومااگدر اخسرها ..

استغربت من اعتذارة وگتله . الله يحفظها الكم وطلعت موبايلي دااتصل بدكتور حسين .
واصلا ماردت انطيه مجال . لأن هيج نماذج ماينعطى الها وجه ..

حجيت وي دكتور حسين وگال نص ساعة اني يمكم ..
سوزان ..وج خرررب شلون صاك .. ومن يحجي اووووف شمالج يحظي ماتنطي وجه .
رفيف .. وج اني طبيبة والي سمعتي . وهو مراجع لااكثر ولا اقل . اذا كل واحد يجي اگعد احجي وياه لا هاهي .
وتدرين اني هذا طبعي ومااغيره ..
ويله امشي راح يجي الدكتور.
شوكت يسويلها عملية وتطلع ونخلص .
موگفين المستشفى ع رجل ..
وتارسين الممر ..
حتى ماعدنا حرية بالتحرك .

سوزان .. والله ليتهم يبقون منورين المستشفى .
رفيف .. ههههههه راح تخبليني انتي .. قصدج مهوسين المستشفى ..

اجة دكتور حسين ودز عليه ..
رحت وياه للردهة .
وهالمرة شفت وياهم رجال كبير مبين عليه الوقار .
سلم والدكتور رحب بي . يمكن يعرفة .
وگعد يشرحلة حالة المريضه .
والي عرفتة هو يكون زوجها يعني ابو صگر ..
وقرروا يسوون العملية الصبح . بس بغير مستشفى .
يردون ع حسابهم ..

كملوا طلعوا برة بالممر . واني واگفة وي الدكتور ومسوية نفسي دااسجل ملاحظات ..
صگر بوجود ابوه مايحجي ويمشي وراه .
والدكتور يگله شيخ غالب ويرحب بي .
واعتذر لان ماعرف المريضه من طرفة .
بس صگر كانت عينة بغير مكان .
رغم شخصيتة وكلامة . بس نضراته متعجبني ..
ومااگدر اترك الدكتور واروح ..

اضطريت ابقى ..
كمل الدكتور كلامة وسلم عليهم . ورجعنا .
سألتة دكتور انت تعرفهم .
دكتور حسين .. اي بابا ذولة سادة وشيوخ كبار بالگرنة .
وصاحبين شركات واملاك ومعروفين ..
واهل نخوة وافضال هواي ع الناس ..

شايفة شيخ غالب هذا . ماكو مشكلة بالعشاير مايحلها .
وبسبب كلمتة المسموعة . ووگفاتة وي الحق خسر ابنة الكبير ..

الدكتور يحجي واني اسمع .. بس ماكنت متصورة همه هيج .
گتلة لعد اذا همة من الگرنة شعندهم هنا بهذي المستشفى ..

الدكتور .. الله العالم جائز كانو مارين منا او عدهم اقارب هنا وتعارضت وجابوها ..

راح الدكتور الغرفتة واني رجعت للغرفة .
طلعت موبايلي شفت . رحيق متصله .
رجعت اتصلت عليها ..
ردت ..
هلو دكتورتنا .
-هلا حبيبتي رحوقة اجيتي لو بعدج .
-اي اجيت قبل ساعة وهسا دا اسوي برياني وي ماما .
-امممم اليوم برياني لعد كثرن توابل وحشو .
-تأمرين امر ههههه بس مو تتأخرين .
-لا ان شاء الله اخلص ب 12 واجي . بس گولي الرامي مو يتأخر علية .
-اوك .
-يلة باي .

اجت سوزان . وج رفيف فاتتج .
-شنو??
-ابو الصاك
-ياصاك
-صگر العصبي شبيج .
-هاااا شبيه .
-ابوه طلع بسيارة مظللة ووراه سيارتين حماية .
-اي ويعني .
-يعني شنو . شبيج وج مبينين واصلين اتنحنحي شويه مو گالبة خلقتج بي .
-وج سوزان انتي طبيبة لو خطابة . ولااعرفج صايرة .
-غير صديقتي واتمنالج الخير قابل مثلج ضامة اخوج عني وماتعرفيه عليه ..
-ههههههه دور رجعنا الرامي .
-اووووف يرامي موتني .
-گتلج رامي طبعة غير مايقتنع ولا تدخل بعقلة اي وحدة اليم من ناحية البنات .
-انتي دعرفينا ومعليج .
-اوك هو اليوم راح يجي يوصلني . تعالي وياي وشوفي بعينج .
-اي هيح من البداية وصيري خوش صديقة ههههه .

(سوزان حبابة وصديقتي من الجامعه وگلبها طيب . بس هي متقلبة . مايعجبها العجب . كل واحد يعجبها وتريدة وبعدين تگلب وتگول مو هو الي احلم بي . كان واحد يحبها من الجامعه وصارت عندهم علاقة ووصلت للخطوبة وبطلت وتركته . لأن تگول فاهي وماعندة رجوله .
وواحد حبته بس طلع عندة سوالف مال نسوان وتركته . لهذا ماردت اقربها من رامي.
رامي اخوية واريدلة وحده تستحقه وتسعده بحياته . واصلا اني اعرف اختيارة ومواصفات الي يريدها مثالية ومموجودة بأي وحدة )

مر اليوم عادي بين مرضى ومراجعات . الى ان صارت ساعة 12 . كملنا معاينة .
وردنا نطلع . اتصل رامي گال اني بباب المستشفى منتظر .
ن

زعت الروب . ولبست السترة . اخذت جنطتي .
ادور ع سوزان ماكو اختفت .
اتصلت عليها .
گلتلها رامي برة منتظر واني رايحتلة مو تتأخرين .
گالت ثواني واطلع ..

رحت لگيته بالباب . صعدت وسلمت عليه .
راد يشغل السيارة . گتله انتظر صديقتي خطيه الخط اتأخر عليها خلينا نوصلها ويانا .
رامي .. اني بخدمة دكتورة رفيف وصديقتها .
رفيف .. هههههه فديت اخويا حبيبي .
واني دا اضحك . صار مقابيلي . صگر وهو يخوزر بينا نزل من سيارة ووياه ولد شايل علاليگ .
بقت عينه علينا . واني درت وجهي بسرعة ليشوفة رامي
…………………………………………
شفت سوزان اجت ..
گتله اجت سوزان ..
باوعلها . وضحك . گال هاي المهرج صديقتج .

رفيف .. هههههه لاتشوفها هيج بس هي طيبة گلب .
رامي .. وشعليه بيها قابل اريد اخطبها ..

حجيت بداخلي .. عزاااا هاي شمسويه بروحها لابخة المكياج كله ع وجهها ..

فتحت الباب وگالت السلام عليكم ..
ردينا وعليكم السلام .
سوزان .. اسفة تأخرت عليكم وخليتكم تنتضرون .
رفيف .. لا عادي حبيبتي ..
گتله رامي اعرفك صديقتي سوزان .
گال .. اهلا وسهلا خيتي .
هي عبست وگالتله . اهلا بيك .

الطريق كله ساكتين .
الى ان وصلنا سوزان . سلمت ونزلت .
حرك السيارة وشغل نور الزين .
ضحكت .
گتله لعد ليش مسويها فاتحة قبل شويه ..

رامي .. هههههه حبيبتي اعرف هاي النماذج . اي اغنية اشغلها حتى وان كانت من غير قصد عبالها الها .
هي عيونها ماشالتها من المراية تريدن اشغل اغنية دور تجلب فد مرة .

رفيف بداخلي .. خررررب سوزان فضحتني .
گلتله .. البنيه هي هيج طبعها ماتقصد شي .
رامي .. نسيتي اني ملازم ومارة عليه نسوان اشكال الوان . واعرف البنيه من مشيتها بالگاع .
ماادري شلون انتي مقتنعه بيها وتمشين وياها .

رفيف .. اني اباوع الگلب الانسان مو الشكله او تصرفاته وسوزان طيبة گلب بس هي لبسها ومكياجها اوڤر وهاي حرية شخصية مالنه علاقة بيها ..

رامي .. اني وياج . بس احنة بالبصرة وكلها عشاير وتفكيرها غير .
بالنسبة الي او الج تربيتنا تختلف . لان اني عشت ببغداد ودرست هناك وانتي ماخذة طباع امي وخوالي .
وفاهمه ومثقفه ..
بس غير ناس مهما كبر عقلهم يبقى تفكيرهم محدود ..

رفيف .. اووووه رامي . تورطت البنيه صعدت ويانا سوتها قصه .

رامي .. هههههه مو اني اتوب اتناقش وياج . بس شأسوي اتحمل المدللة مالتنا ..
وگرصني من خشمي .

وخرت ايده .. مو تدري بيه مااحب هالحركة .

رامي .. احب اضوجج مو بيدي هههههه .

وصلنا قريب بيتنا . نزل رامي اشترى فواكه ولبن .
ورحنا للبيت ..
نزلت فتحتلة الباب ودخلت ..
شفت جنه گبالي ..
صحت جنو حبيبة خالتو ..
شافتني اجت تركض حضنتها وبوستها واشم بيها ..
افيييش هالريحة حياتو انتي ..

رحيق .. ياهلا والله
رحت حضنتها وبوستها . تجينا بالشهر مرة واشتاقلها حيل رفيقتي بغرفتي وصديقتي . صحيح مرات نتناگر ع الملابس والغراض بس مابيوم وحده تعاركت وي الخ او سمعنا بعضنا كلام محلو ..

دخلت للصالة لگيت احمد زوج رحيق وهو ابن خالي .
سلمت عليه .
اجه عبدووو من غيرته . لان شايلة جنو .
حضنتهم اثنينهم .
واخذتهم للغرفة . فتحت ثلاجتي صغيره مخليتها بالغرفه . كنت دايما اشتري حلويات وكذا .
اخليهم بيها .. نطيتهم كل واحد كاكو .
بس همه طبعا مايقبلون بالقليل .
فتحوها واخذوا بعد .
الفرق بينهم سنه .
عبدو سنتين وجنو ثلاث سنوات .
لان رافد اتأخروا يله جابو احلى عبدووو .

بدلت ورحت ساعدتهم بالصب .
گعدنا كلنا ع السفرة .

واحنة دناكل .. انفتح موضوع حسون ابن عمو .
سأل رافد رامي ..
گلة شصار ع شغلتة ..
رامي .. اتحققت من الموضوع . طلع صديق حسين عندة طلابة وي ذولاك وهو متدخل عود صديقه ومحصل هالمقسوم ..
وخابصنه يريد يشتكي عليهم ..

رافد .. مالك دخل بعد . واني احجي وي عمي يبعد ابنه عنهم مالنا خلگ مشاكل .
خو ماافرط بخوي عمود حسين . يريد هو يهد ورى ابنه .

رامي .. قابل اني زعطوط . والله لو احس حسين وياه الحق . مااتركة وابقى وراه لو عشيرة توگف بوجهي بس ادري بحسين مال طلايب .
وصديقه اخوه كاتل واحد منهم .
وهم يدورون ثار . واي واحد يوگف بوجههم ياخذوه بالموجة ..

احمد .. شنو احنه وين عايشين . اكو دولة تاخذ الحق .
رامي .. هنا ماكو دولة العشاير هي الي تحكم .
ويدورون ع كتال ابنهم ويسلموه للعدالة لأن يدرون الدوله مابيها حظ ومابيها حيل تدور ولو تسجل ضد مجهول ..
واكثر النزاعات تنحل بگعدات العشاير . مو الدولة تحلها ..

رحيق .. بس مو كل البصرة هيج . لاتخلون محمد بعد مايطب البصرة هههههه .

رفيف .. لا طبعا مو كلها . هسا احنه مو بالجزائر . تخبل لا مشاكل ولا طلايب . بس هاي بالاقضيه والنواحي تكثر المشاكل وشغلات العشاير ..

ماما .. ديله اكلوا واتركوا السوالف هاي والمشاكل . الله يبعدنا ان شاء الله.

كملنا غدا . ورتبنا المواعين وغسلناها ..
گلتلهم انام شوية واگعد .

رحيق .. ياخبيثة واني جاية كم يوم تتركيني وترحين تنامين .
رفيف .. امواااح حبيبتي انتي .. اليوم سهراية بس خليني انام

شوية حبابه ..
ماما .. هههههه اتركيها اذا مانامت تطنگر علينا اليوم كله هند .. اي خليها تصحصح حتى نخسرها بالليل اليوم طلعتنا برعاية رفيف ورامي ..

رفيف .. ولاتفوتج فايته ههههه .
ورحت نمت… .
گعدت العصر .. لگيتهم ديشربون جاي .
رحت صبيت وگعدت يمهم ..
رامي .. يله ام الفوف . كملي وبدلي . ونريد مطعم فاخر مو دليفري .
رفيف .. تدلل افخر مطعم والحساب بالنص 😉
رامي .. خرررب صايرة حيالة .
رفيف .. اخت اخوي انة ..

الكل .. ههههههه يله اتفقوا وخلصونا .

رامي .. هاهي عمي . گوموا بدلوا .

رحنا بدلنا . ولأن اطلع وي اهلي . لبست بنطرون وبدي وفوگاه كوت ابيض وحذاء رياضي ابيض .
غالبا ماالبس تنانير اذا وحدي .
……………………………………

ورحنا ع مطعم جيكور .. طلبنا وجبات سريعة ..
اكلنا وتونسنا وبعدين طلعنا المول البصرة .. وتحملنا اني ورامي كافة المصاريف والنقل…

رجعنا حوالي ساعة 12 . تعبانين .
جهزت الاستقبال الرحيق وزوجها . فرشتلهم والجنة هم ورحت الغرفتي ..
راسلتني سوزان ..
💬گالت وج جبت صفحة صگر ..
💬خرررب شلون جبتيها ولاتگعدين راحة ..
💬لعد شعبالج الي اخليه براسي ماافوته ..
💬اي وبعدين . شحتسوين بيها ..
💬مااسوي .. يكفي اباوع الصورة . وج راح ادزلج الصفحة وشوفيه . يخبلن صورة وخاصة بالصيد شوفيه شلون لابس . وعضلات وكذا ..
💬دروحي خليني انام . وانتي استمتعي بالصور .
💬 يانوم باجر ماكو دوام لليل خفر . واني ضايجة لان ماراح اشوف صگر واهله الحلوين .
💬 هههههه باجر الصبح يطلعوها الغير مستشفى .
💬 لابربج .
💬 ماسمعتي دكتور حسين من گلهم يسويلها عملية بالمستشفى الاهلي ع حسابهم ..
💬 لا حرامات .. دروحي هبطتي معنوياتي وامالي بعد شلون اشوفه ..
💬 ههههههه يله باي ..

سديته منها واضحك .. اجتني رساله صورة . فتحتها بيها صورة الحساب مالتة ..
كان مخلي صورة لابس بيها لبس عربي ونضارات ورافع وجهها . حتى بالصورة متعجرف .
مااعرف ليش اثارني الفضول ورحت .
دخلت ع صفحته ..
بقيت اباوع الصورة .
كان ماخذ صور وهو وشيوخ . ووالده هم .
لو بالصيد ..
ومقطع فيديو .. لازم سلاح ويسوي هوسات .

صحيح مااحب شغلة العشاير والشيوخ بس عجبني لبسة وشخصيته ..

واني اتصفح . لفت نظري صورة لابس بيها رسمي وگاعد ورى مكتب ..
امممم شگد حلو بالرسمي بس اللبس العربي يلوگلة اكثر ..
بقيت كم ساعة اتصفح . وادخل ع التعليقات .مالته وشلون يحشش وي جماعته .
واني ماخذني الواهس واضحك . بعدين انتبهت ع نفسي شنو هاي ياربي . معقوله خبلتني سوزان وياها .
احس روحي انعديت منها هههههه .

ردت اخرج من الصفحة نزل منشور ..
طالب الدعوه الوالدتة بالشفاء .. ابتسمت ودعيتلها بداخلي .
تذكرت بابا من مريض شلون اتعذبنا وندعي اله ونطلب دعوات الناس ..
الله لايفجع شخص بواحد من اهله ..
حسيت روحي اشتاقت البابا ..
گمت نزلت صورته بحسابي . وكتبت ..
(اللهم ارحم من اشتاقت لهم أنفسنا وهم تحت التراب!!)
بعدين خرجت من الفيس كله .. ونمت ..
وكانت دمعتي ع خدي ..

يتبع.....

///البارت الرابع ///
#درب_العشگ🔥
#بقلم_الكاتبة_شمس

گعدت مختنگة الصبح .. مر طيف بابا علية ..
عبالك كان يمي گاعد ويبتسم . بس كلما اقترب منه يبتعد شگد تمنيت احظنه واشبع منه ..
تندمت حيل لأن انشغلت بدراستي ومااستغليت فرصة مرضة وگعدت يمه وباريته ..
ولو هو گضاها سفر للعلاج ..

رحت للمطبخ لگيت ماما گاعده ويمها جنه وعبدووو دتريگهم ..
گلتلها . صباح الخير ماما ..
ماما .. صباح النور . شنو هالنشاط من الصبح . غير اليوم خفر انتي ..
رفيف .. اي خفر بس گعدت مخنوگة . حلمت ببابا ..
ماما .. ان شاء الله خير ..
رفيف .. يوووم اشتاقيتله هواي .. نزلت دموعي .
ماما .. كلنا مشتاقيله حبيبتي .. لابد انتو تطلعون وتمشون وتداومون . وتنسون .
الا اني .. كلشي بالغرفة يذكرني بي .. مااذاني بيوم لو جرحني ..
حتى من حبني سوى المستحيل واخذني .. رغم تفكير اهله وعادتهم .

رفيف .. بابا ماكو منه .. كبرنا وهو مابطل كلمة حبيبتي الج . ابد ماشفته يوم صاحلج بأسمج ..
ماما .. اي والله ماكو منه . مااعرف شلون ابوج طلع من هيج عائلة .. بس ولو درس ببغداد ومحامي ومثقف .
مو مثلهم ..

بقينا نتذكر اني وماما ودموعنا تنزل .. دخل رامي مبدل يريد يداوم ..
ياساتر من الصبح .. شكو هالبجي ..

ماما .. ماكو شي ماما . تعال اسويلك ريوگ .
رامي .. لا اتأخرت .. باوعلي ..
يحلوه خليتلج المفاتيح ع الكومدي اخذيهن .

شويه واجت سيارة الفوج مالته . سلم وبوسنا وطلع ..
بعدين گعدت هند ورحيق واحمد .
تريگنا وكملنا .
گالت رحيق .. رفيف ترحين ويانا للسوگ محتاجه غراض .
رفيف .. وانتي تاركة بغداد كلها وجاية تشترين منا .
رحيق .. لا وج بس اشتهيت اشتري من سوگ البصره .
احمد .. كلمن يرجع الاصله فوفة .. رحيق من يومها اشكال اكو ببغداد . تگول مايحلالي الا سوگ البصرة ومولاتها ..

ضحكنا عليها . گلتلها بس ابدل واجي .
ماما .. مو تتأخرن ..
رحيق .. لا مانتأخر ان شاء الله

بدلنا واخذنا احمد .. اشترت رحيق الها والبنتها . وزوجها يضحك يگلها بالجذب اذكريني بفانيلا . شورت ..

خربني ضحك .. شفت يلگ شتوي حلو اشتريته. واخذت بوت قصير ..
ورجعنا ..
لليل عندي خفر بالمستشفى .
لبست بلوز وبنطرون وفوگة يلگ الي اشتريته طويل ..
ورتبت نفسي مااعرف ليش كنت اتمنى اشوف صگر بيومها ..

اخذت سيارة رامي ورحت .. دخلت للمستشفى . ذبيت جنطتي باللوكر . واخذت سماعاتي ولبست الروب .
ورحت للانعاش بوجهي ..
كنت اتمنى اشوفه او اشوف امه موجوده .
بس كانت مريضه ثانيه بمكانهم .
بقيت صافنة .
گالت بنيه .
دكتوره . همزين اجيتي . هذا المغذي مايمشي مااعرف شبي ..
سويته الها . وطلعت .

ليش يارفيف هيج ضجتي . هي كلها كم يوم شفتي .
وليش بس هو .
اشو حياتي كلها شفت اشكال وانواع من الرجال . ماكو واحد شدني هيج ..

بس ماكو مثله رجال مر بحياتي .. شخصية ماشفت مثلها بس ببابا الله يرحمة .
معقوله شدني بهذا الشكل لان تصرفاته تشبه تصرفات بابا لو اكو شي ثاني ..

طردت الافكار الموجودة ببالي ورحت افتريت ع الردهات كلها جيكت الحالات .
ورجعت للغرفة .
لگيت سوزان تگلب بالموبايل ..
بوستني وگعدت .

سوزان .. شفتي الحظ العصفور طار .
رفيف .. ياعصفور ..
سوزان .. قصدي الصگر طار ..
رفيف .. ههههههه ضحكتيني واني ضايجه .
سوزان .. لويش ضايجه ع الصگر الي طار .
رفيف .. انتي شتحجين شلي بي ..
سوزان .. امممم يمكن انتي بمكان گلبج حجارة . اني واحد مثله يتقربلي واصدة واگول عليه متعججججرف .
رفيف .. لتقلدين عليه .
سوزان .. صدگ شگال رامي علية.
رفيف .. ههههه گال مهرج ..
سوزان .. لا بربج .
رفيف .. والله . وج اكو وحده تسوي سوايتج . لابخة وجهج لبخ وجايه . جان خليتي طبيعي . خوفتي اخويه .
سوزان .. اوووي خوفته . طلع هم مايع مااريدة بطلت .
رفيف .. ههههههه وج الي يشوفج يگول رامي لازگ بيج ومترديه ..
سوزان .. تقلدين مو . اذا مااتزوج اغاته شوفي .. وله اگلج اني عيني ع دكتور حسين يخبل مايتفوت وشخصيه .
رفيف .. عزااااا وج دور رحتي الدكتور حسين . بگد ابويه سوزان .. ليش هو اكو احلى من الشيب والوقار .

رفيف .. دكافي كافي هواي حميتي اليوم . ههههه دكتور حسين . لا مو الهلدرجة .
سوزان .. اروح للطوارئ اني احسن اليوم خفارتي هناك احسن من هنا . ع الاقل هناك ناس رايحة راجعه .
مو هنا بس العجايز ..

راحت واني متعجبه بيها .. الي يشوفها يگول مو طبيبه .
دخلت بلقيس . سلمت ..
وگالت دكتورة .اكو مريضه جابوها هسا .
رحت شفتها وكتبتلها علاج .
وبقيت شويه الى ان نطوها العلاج واخذته .
رجعت للغرفة .
بقيت اتصفح بالفيس .
اخذتني ايدي الصفحته ..
ماناشر شي .
دخلت ع منشور والدته ..
الكل تتحمد السلامتها ..
لفت انتباهي .. واحد كاتبله . الحمد لله على سلامة الوالدة استاذ صگر ..

استاذ ??
اممم ليش هو شنو يشتغل ..

خلص اليوم عادي .
للصبح ردت اطلع من المستشفى . صار بوجهي دكتور حسين . سلمت عليه .
-هلو رفيف صباح النور . ها راجعه للبيت

.
-بلي دكتور ..
-اوصلج .
-شكرا دكتور .. من رخصتك ..
ردت اروح . گتله دكتور شلونها المريضه ام القسطرة الي سويتلها البارحة…
-ها اهل الشيخ غالب .. لا الحمد لله طلعت سلامات . وهسا شوية وامر للمستشفى اشوف حالتها واذا زينه اخرجها ..
ترحين وياي تشوفيها ..

هاااا .. لا تعبانه . بس سلملي عليها وطمني اذا زينه ..
دكتور حسين .. ان شاء الله.
#بقلمي_الكاتبة_شمس
…………………………………………
رجعت للبيت ميته تعب ..
الكل بعدة نايم . بس الولد دوام ماكو .
سلمت ع ماما . ورحت نمت بسرعه ..
ماحسيت الا جنو تصيحلي .
هالة هالة . هي تصيحلي هاله عود خالة .

فتحت تك عين . گلتلها روحي الماما .
شويه واجت رحيق بيدها گلاص مي .
تگومين لو اذبة عليج ..

رفيف .. لاااااا حبابه نعسانه اريد انام .
رحيق .. وج راح نروح گومي . اريد اشوفج .
رفيف .. لا صدگ مصارلكم يومين من اجيتوا شبسرعه ترحون ..
رحيق .. اي احمد خطيه ماخذ يومين اجازة عمودي . وخلصن .
رفيف .. اي خلي يروح وانتو ابقوا خلونا نشبع منكم .
رحيق .. يماااا واعوف حبيب الگلب وحده . اموت غير .
رفيف .. شدعوه تموتين . قحط .
رحيق .. من تحبين وتتزوجين راح تتذكرين كلامي ..
رفيف .. يمااا الله يبعدنا خليني هيج حرة احلى .
شجابني ع الحب والزواج ..
رحيق .. اي خلينا نشوفج عود . دگومي يله نتريگ سويه

گمت وياها . تريگنا . وبدلوا وراحوا قبل الغدا . امي توسلت بيهم يبقون وماقبلوا .
گالوا ورانا طريق .
گالتلهم عاد تغدوا واطلعوا ..
احمد .. لا عمة هم يله نوصل واذا جعنا ناخذ من الطريق ..
بوستنا وحضنت جنو حيل وعضيتها وبجيتها قبل لتروح .
فديتهم يخبشوون بخدودهم ..

راحوا ماشبعت منهم . بين الدوام والنوم . خلص الوقت .

بقيت ع هذي الحالة شهر .. من المستشفى للبيت .
وع نفس الروتين ..
وبقت صفحة صگر . شاغلة تفكيري .
اضوج ادخل عليها .
استمتع بمنشورات . اضحك الضحكه .
وادعي الدعائة . واراقب تعليقاته ..
گمت احس باحساس خفي اتجاهه .. وگعت نفسي بمطب ماله مخرج .. وهو الحب من طرف واحد .

كنت اگول عليه متعجرف . ومااحب تعصبة وحديته .
بس من كان يكتب يومياته ماادري شلون عيشني وياه لحظة بلحظة .
وصار يشغل تفكيري وحياتي بهالسرعة ..

كنت دايما اقطع افكاري .. واگول هي صدفة وراحت الحالها . لويش الهلگد انطيته اهتمام ..

كلما اگول خلص راح اقطع التفكير .. يرجع يمر بخيالي وارجع ادخل ع صفحته وابقى اراقبة ..

اني المفروض واعيه ومثقفه وماانجرف الهيج مشاعر .
كنت انتقد سوزان وتصرفاتها ..
بس اشوف نفسي صرت مثلها .
كنت احسد ماما وبابا ع حبهم واتمنى احد يحبني مثل حب بابا الماما ..
هو الي شافها وراقبها . وطلبها وسوى المستحيل واخذها رغم اهله معارضين .

اني ليش ماكو هيج انسان بحياتي . مع انه ماناقصني شي . جمال ونزاكة وشهادة ووضيفة . مو اريد اجمل بنفسي . بس اني فعلا دااحس ماناقصني شي .
ليش ماالگة الانسان الي اتمناه .
وحتى من لگيته . مااهتملي وگمت اني الي اركض وراه مو هو واراقب صفحته ومعيشة نفسي بوهم ..

حتى رحيق .. احمد هو الي حبها وخطبها . وهسا شحلاتهم . اللهم لا حسد . بس دااشوف نفسي راح ادخل 28 سنة واني ماعندي عائله رغم اني احب الاطفال وجو العائلة والاستقرار ..

افكار لأيام تاخذني وتجيبني . والسبب صگر ودخوله بدون مقدمات الحياتي ..

بيومها ضجت حيل . ونطيت صفحته حظر . حتى ماافكر بي . مو رفيف الي تضعف ووتنجرف ورى عواطفها بهذا الشكل ..
يجي يوم الي اخذ بي الانسان الي يستحقني ويقدرني واكون عائله حلوه ومستقرة ..
ربي ثقتي كبيرة بيك .
صار فوگ الشهر افكر بأنسان غريب . نسيني هالشخص وعوضني بالاحسن ..

حاولت انساه . وفعلا گمت افكر بي . لكن سرعان مااشغل نفسي بغير شي . او اروح اگعد وي هنوده لو ماما واسهر وياهم الى ان اتعب وانام بسرعة حتى ماافكر بي ..

بعد شهر ونص ..
گعدت العصر وتفاجأت بوجود خطار ..
غسلت وبدلت احنه عادتنا نبدل من يجي خطار .
لفيت شعري . ووجهي صافي مخليت اي شي بي .
مجرد غسلت بالصابونه .
وردت ادخل اسلم . عبالي صديقات ماما . كانوا دايما،يجونا ..

صارت بوجهي هنوده دتضحك ..
گلتلها منو هنا ..
ماادري مااعرفهم . بس يگولن جايات ع شغلة خير .

رفيف .. همزين مادخلت لعد .
هند .. لا تعالي دخلي خلي نشوف شيردن . بس خلي اجيب مي واجي .
راحت جابت مي وقواطي عصير .
ودخلنا .
سلمت . هن گامن بسرعه وسلمن عليه وبوسني .
بقيت صافنة .
بعدين لمحت بنيه وياهن شايفتها بس وين ماادري ..

حجت مريه كبيرة ومبين عليها الوقار ..
گالت احنه جايين نخطب المحروسة .الابنه .
هو شافها وعاجبته وسألنه عليكم ونعم الناس . ومن عرفنا ابوها الاستاذ غازي المحامي . زادنا نسبكم شرف .
اني مستغربة . بحياتي مااتوقعت اتزوج زواج تقليدي ومن غير مااعرفة ويعرفني او حتى شايفته ..

البنيه الي وياهم حجت .. گالت امي رادت تجي بس مريضه وصارلها شهر من سوت عمليه والدكتورة تعرف حالتها ..

انتبهت بسرعه الحجيها .. معقوله واني اگول وين شايف

تها ..
لامستحيل هو . يمكن واحد من اقاربه او الي وياه ردت اتأكد اكثر .
گلتلها لاصغرا بيج . بس ماتذكرتها ..
البنيه .. امي الي تخربطت عندكم واخوي صگر الي بقى بالمستشفى يمنا وگلبها للمستشفى وانتي صرتي عصبيه عليه هو نفسه ..

گلتلها . ها اي تذكرت .. ( مااتوقعت هيج الصدفة تلعب دورها . وليش صدفة . يمكن قدر الله وقسمته .. )

گالتلها ماما .. نشوف اخوتها وعمامها ونرجعلكم خبر ..
المريه .. بس يسئلون عن الشيخ غالب . گولولهم الساده وماكو احد مايعرفنا . وأسألوا براحتكم ..
الوالد الله يرحمه . لزم قضايا للشيخ .ويعرفة حگ المعرفه .
واني اخت الشيخ .
وهاي منى اخت صگر وبنت الشيخ اخوي .
وهاي اختي……
وبقت تعرفنا عليهم ..
وبعدين سلمن وطلعن ..
واني لساتني مصدومة وممصدگة .
وماحسيت بفرح او او اي مشاعر . مجرد توتر وخوف واستغراب....

يتبع..

قۣۗـۙصۣۗـۙصۣۗـ📚ۙ وۣبۣۗـۙسۣۗ

///البارت الخامس ///
درب_العشگ🔥
بقلم_الكاتبة_شمس


انة صكر ابن البصرا يلما تعرفوني…..
السلام عليكم
اسمي صگر غالب ال…… محامي مع وقف التنفيذ ..
يعني اشتغل بقضايا الي يوكلني بيها الشيخ وبس ..

ابن شيوخ ابا عن جد . سادة وجدنا رسول الله ..
معروفين بالنخوة والوگفات الحلوه ..
مو غرور . بس افتخار بأهلي واصلي وعمومتي ..
انة من يوم الي جابتني امي .
علمني ابوي ع القوة وخلة گلوبنا خشنه .
ماعرفت الخوف بيوم .
ولا رضخت الاي بشر بساعة ..

احنه اثنين اخوة .. انة واسد اخوي الله يرحمه .. راح من عدنا بساعة غدر ..
ابوي الشيخ . من كبار الشيوخ وماكو مشكلها ماخلها بين العشاير ..
بيوم صارت شغلة فصل .. وابوي تكفل بيها .
وحكم الطرف . والطرف الثاني ماقبل ع الحكم وبقى يتوعد الابوي ويهدد ..

بساعتها ردت اگاومهم واهجم عليهم . لو مالشيخ يگعدني ..
بيوم طلعنا وجان اسد اخوي يسوق ..
وابوي لگدام وعمي وراه واني ورى اسد .
اعترضتنا سيارة وضلت ترمي علينا ..
وجانت بجهتنا ..
اتصوبت اني بكتفي ..
وابوي الحمد لله مابي شي هو وعمي .
بس اسد لگيناه سابح بدمه ..
ابوي گام يصيح .
الحگ اخوك . وليدي راح يابويه ..

اخذناه للمستشفى ماطول ومات ..
انگلبت المستشفى بيومها ..
ابوي بيومها مانزلت دمعته ابد .
ويگلي لاتخلي العدو يتشمت بينا ..
ابجي ببيتك ونوح على اخوك ..

هو يواسيني .. على روحت عضيدي واخوي الوحيد .
واگعد بتوالي الليل الگيه يبجي بصلاة الليل ..
ويهمس بأسم اسد ..

امي من يوم الراح اسد . وهي ماصحت . كل يوم وگعة ومستشفى .
اني عندي اربع اخوات ..
اثنين متزوجات . واثنين لا .
وديناها عند اختي الجبيرة حتى بلكي تبعد وترتاح ..

بيوم . خابرت منى اختي .. گالت الحگ امك ياخوي ..
ركبت بلا وعي واجيت اركض للمستشفى .
همه راحوا قبلنا ..
اتفاجأت بولد عممومتي وراي ..

دخلنا المستشفى جانت نص الليل .
وماكو دكتورة بس دكتور ..
واحنه ماعدنا مرة تنكشف على رجال ..
گلتلهم الا دكتورة تفحصها ..

الدكتور .. اوك اخذوها سوولها تخطيط وتحاليل واني هسا ادز دكتورة تجيكم من فوگ ..

شويه اجت دكتورة ..
بالبداية مااهتميت الشكلها ولا منو هي ..
المهم عندي امي ..
گالت شسمها المريضه ..
گلتلها غنيه ..
رادت تدخل الردهة باوعتلي . وگالت هاي ردهة نسائية مايصير تدخل ..
تعصبت من حجايتها .
ورديتها . گلتلها اعرف حدودي من تشوفيني ادخل يله الج حق تحجين .

جانت شايفة نفسها حيل ..
طلعت گالت لازم ننقلها للانعاش ..
وگالت عندها جلطة .. اتخربطت احوالي ..

هي حجت وي الممرضه وراحت ..
اخذنا الوالدة للانعاش ..
وشويه واجت جيكت حالتها . وطلعت بيدها ورقة .
گالت هذا العلاج اريدة من برة ..

اخذته منها وانطيته المسلم .. گتله ركض جيبه وتعال ..

حسيت نضراتها غريبه وكأنه ماعاجبها ..
خليتها ببالي ..
اجه مسلم جاب العلاج .
گتله اوگف خلي تجي الدكتورة ..
مسلم .. خلينا ننطيه للممرضه هي تعرف ..
صگر .. لا الا الدكتورة تجي ..
رحت ادور عليها .
طلعت من ردهة ..
گلتلها -دكتورة من رخصتج .
جبنا العلاج وانتي ماكو . حالة الوالدة تعبانة ومحد مهتم ..
هذا يتسمى اهمال ..

باوعتلي بأستغراب ..
إهمال !!!!
لو فعلا إهمال مانزلت من فوگ للطوارئ . ومااهتميت لان اني خفارتي هنا مو بالطوارئ .
ولا نقلتها للعناية حتى تكون تحت المراقبة .
ومثل متشوف عندي حالات هواي .
والوالدة مو الوحيدة بالمستشفى.

گلتلها .. لو سمحتي لاتعلين صوتج .
-اني دكتورة مو موضفه عندك حتى تحجي وياي بهيج لهجة .
الوالدة اهتمامي بيها مايفرق عن بقية مرضاي .
واكو ممرضات همه الي ينطوها العلاج بموعدة وهسا داخلة واشوفها .

تركتني وراحت .. اوووه شگد گوية عين . وين جانت الك هاي ياصگر .
نسوان العشيرة كلها تدنگ من تمر يمهن ..

عصبتني حيل وطلعت قهري بالولد ..
شفتها الليل كله تروح وترجع تشوف حالة الوالدة ..
سألت عليها عرفت اسمها رفيف ..
رحت ادورها بالغرف ..
جان الباب مفتوح شويه ..
شفتها مغمضه ومخليه راسها ع الكرسي ..
رموشها طوال وعندها شامه جوه شفتها محليتها وميزتها بنومتها تحسها ملاك ..ولا عبالك ام اللسان الي مساع ..
تجادلني بالحجي ..

رجعت دگيت الباب .. گعدت .
كحيت وگلتلها .. دكتورة رفيف من رخصتج ..

عدلت گعدتها ...
وگالت تفضل ..
گلتلها .. قبل شوية كنت خايف ع الوالدة . وماقصدي اعلي صوتي او احجي وياج بهيج حدية ..
رفيف .. لا عادي . بس ياليت تقدرون وضعنا وتعبنا قبل ماتتهمونا بالاهمال وبعدين تعتذرون ..
گلتلها .. اني مااعتذرت بس وضحت موقفي .. وشكرا ع اهتمامج بالوالده ..
ودرت وجهي ومشيت عنها واضحك