.
احجيلك اعلى السبي ؟
وللسوك من دخلت ومعلكة القمصان
ترضاها يا ابو علي ؟
العباس جف ما اله وجفين للميزان
يبيعون حنه وشمع وعلى الرمح عرسان !
وبالكوفة من اذنوا يا بوية من اذنوا
خلص لساني نشد يا ناس جدي علي شو ماكو بالاذان
يا بوية شم منحري وشوف اختلاف العطر
هلمرة عوف الصدك كلي اطيب الدخان
.
.
.
.
#شعراء_وذواقين_الشعر_الشعبي
#سعد_شميل
#ابو_تراب

.
انا اخت الحتى من ماتوا بعدهم روس
وكت اليغثنى يرجع سالمه عظامه
الهودج ما اهتز بكثر راس حسين
رجف يم بنته مثل الرافض كوامه
الحرمل يستوي من الرمل كد ما حار
مشينه تلوي روج وغط البلامه
القوس الغثنى ما يتهنى ب أسهامه
الموقف جان بالطف للزلم شامه
ولك يا هي التكلها جاريه تصيرين ؟
ما عندة مره تشتغل خدامه
يمكن جنت لابد شو زلغ ما بيك
اليدخل معركة الدم واصل لثامه
تعيرني لان ما جاب اخوي الماي
شليلك فرشه خل نرجع ايامه
مكابل خيمتي يصلي وسمعلك صوت
من ابو ريشات اطلعوا لحد ابو عمامه
.
.
.
.
#شعراء_وذواقين_الشعر_الشعبي
#رضا_العبادي
#ابو_تراب

.
لا تبجين
يا نشغة البرحي ويا دموع التين
لا تبجين
يا زهكه اللبوة ويا صبر شاهين
لا تبجين
تهز مريم النخلة ورطب منها يطيح
وتهزين الليالي يطيح منها سنين
يا بيرغ العفه الما نلثك حاشاه
يكفيني شرف لو كالوا اخت حسين
يا نقطة حياء بكصه التاريخ
مدللة السما انتي شلون تنذلين
لا تبجين
ابوج البجى عين الباطل بصفين
فكس عين الجمل والنهروان شهود
ومن اسمه يتلعثم خوف سور الصين
.
.
.
.
#شعراء_وذواقين_الشعر_الشعبي
#سعد_محمد_الحسن
#ابو_تراب

.
الرمح كد ما افتر براس الحسين
وصل للكاعد يدور اعلى باله
هذا الجانت تحسده المناير
مكطع واكصر من السيف صاير
اشيل ضلوعة بالغربيل وتطيح
جا شمسوية بحسين الحوافر
.
.
.
.
#شعراء_وذواقين_الشعر_الشعبي
#علي_كريم
#ابو_تراب

.
مشى حادي الضعن يا حسين ... متنه
وجم موته اعلى ظهر النوك ... متنه
هذا يصير ايدي وذاك ... متنه
حرت وونينهم حط شوغة بية
.
.
.
.
#شعراء_وذواقين_الشعر_الشعبي
#مله_علي_الفرطوسي
#ابو_تراب

.
يمة اذكريني من تمر زفه شباب
من العرس محروم حنتي دم المصاب
شمعة شبابي من يطفوها
حنتي دمي والجفن ذاري التراب
يمة اذكريني من تمر زفه شباب
.
.
.
.
#شعراء_وذواقين_الشعر_الشعبي
كلمات : #كاظم_منظور_الكربلائي
#ابو_تراب

.
اركض ما اطيح وبية اشمت الكاع
ومو انا اليضل ياهو اليجي يفوته
اركض بالعكس لو بية دار الكون
اصير انا اليهد والناس مشحوته
واكول الموت عز وعيشة الاحرار
مو شغلة امان وكلمة مكبوته
وهنيالي من اموتن واخلص من الموت
واشيل انا انا واركض بتابوته
واصيرن خوف اخوف وانا عايش موت
وشحدة اليجيني واهجم بيوته
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
سولف كول الك واهس تضل وياي
واذا ما الك واهس كول لا تخجل
ما اقبل احبك وانت ما مرتاح
وما ارتاح احبك وانت ما تقبل
فكر باليهمك المهم شتريد ؟
انا كل اليهمني المهم لا تزعل
بكيفك من اجيت وما جبرتك يوم
ما اجبرك بكيفك لو ردت ترحل
ما مليت منك اكدر ابقى وياك
بس المشكلة خاف انا راح انمل
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
تعال الحك علية كبل ... لا اطم
روحي والگلب چا البحر ... لا طم
ترى انا بكل عزا بجفاك ... لاطم
مهدل والعزا يلطم علية

رخى جسمي اعلى مودك ... من رخصتك
واسومن بيك غالي ... من رخصتك
دست فوكي دكلي ... من رخصتك
حتى براحتك تسحك علية

بعسر غيري النوايب ... فاتحت من ؟
وسهم غدرك بگلبي ... فات حتمآ
كتلتني وجاي تنشد ... فاتحة من ؟
ولا جنك رحت جناز بية
.
.
.
.
#شعراء_وذاوقين_الشعر_الشعبي
#حسين_صالح
#ابو_تراب

.
ما تعرف تحب بس انا المچلب
حبك الي تكطر مثل ماي الحب
نتلاكه وتستحي مدري انا ما اهمك
وانا بملكاك اشبه ملكى المعزب
اشوفك واحترك بس طبعك البارد
عليك انا التفت بس راسك يعاند
حركتي عليك تشبه حركه الوالد
سنطه مغربية براسك من تنام
وانا بنومي حيرة واحد مواعد
اول ما عرفتك شو جنت تهتم
وكتلي بجسمك ابقى حالي حال الدم
خفت تطلع وتيبس مثل ماي الصيف
وكتلك عض اصبعك قبل لا تندم
كتلي الذنب بيك وكتلك شبية ؟
ثابت حبي الك دكات حجية
.
.
.
.
#شعراء_وذاوقين_الشعر_الشعبي
#علي_شاكر
#ابو_تراب

.
ترى بس انت أمن كلها خطار
الوحيد الما عرفت شلون اعبرك
لو بيدي وشبيدي وما مخليك
ماي بجفني من تمل افرك
عود بخور وارضى بعيشتي وياك
بفطر بيتك تعلكني واعطرك
.
.
.
.
#شعراء_وذاوقين_الشعر_الشعبي
#مروان_العنزي
#ابو_تراب

.
لو عندي صاحب زين يوكفلي بالضيج
ما دخنت باكيت يومية على الريج
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
شلك علية يا زمن وشرايد ؟
انطيتك الي ردته مني وزايد
ضحيت ب أغلى احبابي
وخسرت كل اصحابي
شتريد تاخذ ؟ بينت ومعاود
شلك علية يا زمن وشرايد ؟
نيشان اكثر من جرح مو كافي ؟
كضيت عمري وياك ما متصافي
الماي يمي والعطش بشفافي
شتريد تاخذ بينت ومعاود ؟
شلك علية يا زمن وشرايد
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
المفروض اروحن وانت تلحكني
انا بسنتين اسبكك ليش تسبكني ؟
شلون تروح وتفك الشراكه شلون ؟
سهلة الشغلة عندك من تفاركني
طاحن فوك راسي وخشمي فوك الماي
ومعاند زماني وما يغركني
ما حشمت مرة شكد سحكني البين
ذخرتك عون الية شلون تسحكني
شلون تروح وتفك الشراكه شلون
سهلة الدنيا عندك من تفاركني ؟
فرق شبرين ما بين الدللولين
وكماط اليشبكك جان يشبكني
لعيونك عفت كاروكي وتنحين
يوم سمعت شخصك راح يلحكني
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
جابولي الحجي ومحطوطله چماله
كالوا صاحبك ... كتلهم شماله ؟
كالوا حجى بظهرك كلت خل يرتاح
الماعنده فرس يكره الخياله
ابالي الموش زلمة شلون افكر بي
وانا چي خوش زلمة حاطني اباله
ماريد العنب وسلالي كلها بخير
خل ياخذ صحبته وياخذ سلاله
واكو عنده حجي يفشل وما جابوه
بس هو المهم كدامهم كاله
كالوا يعتذرلك كلت مغشوشين
الما يرهم نهر ما يرهم وشاله
مو شمرة عرب ويريد يرهم شيخ
ومن لويت لسانه احترمه حسباله
ماخذ دور بدوي وهو يمي يضيع
واذا خطار اجاله يتيه خياله
.
.
.
.
#شعراء_وذاوقين_الشعر_الشعبي
#وسام_سباهي
#ابو_تراب

.
ماردت احبك حاولت
من لفضة اسمك حاذرت!
كلمة وشلتها من الحجي ومن اللسان اخفيتها
وبيبان روحي مقفله وعن لا احب سديتها
صلفه امنياتي الرادتك
سالتني عنك بس صمت كلش ولا حاجيتها
كالتلي وينه وجاوبت
ما ادري
ما دليتها

.
.
.
.
#شعراء_وذاوقين_الشعر_الشعبي
ل#ايهاب_المالكي
#ابو_تراب

.
هسة احنا زعلنه اسراري شعليهن
غير انت حبيبي وتحتفظ بيهن
غلطة انا جبتها لروحي والله
نهر عمري عليك رسمت مجراه
اسرار اطفال لازم ب أيدي اباريهن
ضنيتك حبيبي وتحتفظ بيهن
كتلك هذا سر و كلت كده
نقطة ضعفي يم ناسك تعده
الشماته تكيف الها
ويمي تدك رجلها
اذا نرجع تكلي ما مسويهن ؟
عود انت حبيبي وتحتفظ بيهن
.
.
.
.
#شعراء_وذواقين_الشعر_الشعبي
#علي_طالب
#ابو_تراب

.
استعجلتي ترى الخنتيني ويا
تعنالج لان فاركله غالي
الفرق مابين نيته ونيتي وياج
رادج للهو وردتج حلالي
راد براسج انتي يخلص الليل
وانا ردتج تصيرين ام جهالي
ومابية نقص جان النقص بيج
لان تردين واحد لا أبالي
الطيب لو بكلشي الاول يصير
اذا ميخون ينذب على التوالي
كل هذا واكول الطيبة ذلة والغدر عاش
واشوفج وارجع ل طبعي المثالي
لهسة وگلبي يمج ماله رداد
اجي كامل واردن صدري خالي
واحير الشافني مذلول مهيوب ؟
نازل راسي لكن دمعي عالي
وبعد شيفيدني تكبرين بالعين
صغرتي وكبرت بعيني الليالي
.
.
#شعراء_وذواقين_الشعر_الشعبي
#رائد_ابو_فتيان
#ابو_تراب

.
للي خذوا غيبتك مجبور افضي الخلگ
واجاتل وي الحجي والخيل داست علية
سحكت ضلوعي سحگ
يامن مكدر علية غيرك فصاله صعب
جم دوب اخيط واشگ ؟
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
هاي هي وداعتج لا تستحين
دوسي فوك الروح اللعبي
واعديني ولا تجين
حبي غيري اشاقي اضحكي
صاحبي وحقج يحلوة تصاحبين
انتي مو أول حبيبة
تمرعد بسجينها هدوم السنين
وليش كل احنا حزانه ؟ لا يشيل هموم گلبج
يكفي بس انا حزين
يكفي اشيل همومج هموم الشماته
هموم وكتي وكلهن بهالركبه دين
وصيري شتصيرين صيري
صيري ليل لوحدي اسهرة
صيري شط بليل اعبرة
صيري شتصيرين صيري
يوم بيضة ويوم سمرة
يوم غيمة ويوم كمرة
صيري يا زرع العمر شتت ونين
مو عجيبة تموت كطرة ندة بخد الياسمين
واني وحدة الي احبها
وانتي .... ! يدري الله شكثرهم عاشكين
ومعجبين وعايفين
وما اكول اكثر شكولن ؟
هو ذنبي لا سكنت وي الاجوني ولا تبعت الراحلين
.
.
.
.
#شعراء_وذاوقين_الشعر_الشعبي
#الكاطع
#ابو_تراب
_