شمتو بالورد بعدك
مايدرون نشغة عطر منّه .. إمكفله إتردك
يل بگد ما سَهرتك تنسهر بعدك
الليل إعله البُعد رزقه
العشگ چذاب من يتساوم إبحلقه .

#إيما_صباح

فضّيت العمر موّال
وانا أدريك موسم شوگ لـاچنّك شِحيح إوصال
مـا گالِتك ياهـو إلگال ؟

صغتك للسوالف طوگ
زفّيتـك عطـش للنـوگ
وعثر ليلي إعله آهي وطال

أثاري إلليل يشعل طيف من يسمع عـرس ينگال
.

#إيما_صباح
.
.

يا عزيز إسوالفي الموسم حنين

والشوارع تمشي بيه

صوتك متانيني وين

شلون ألوحه

بيا محطة شوگ أطيح

هذا چم موسم تَعده

وما گِلتلك آنه أحبّك ، چي شحيح
آخ مني

شگد أحبّك چي شحيح

#إيما_صباح
.
.

ندهت إطيوفك لهفتـي
وصوب المرايا إنتچيت

فززت شبّاچ داري
وطرّزت دربك بشوفي، وما إجيت

صرت سالوفة نخل وبلسن فوس
بكثر فرگاك إنحچيت ..

#إيما_صباح
.

بجفاك مااگلك گطعت النِفس
بس گوه ريتي بغيبتك جرّته

حسيتك إتصد من بده اول عذر
الملگه من ينعز تِذل لهفته

الجدم من يثگل مشيها بدرب
عدها درب ثاني وعلي خفّته ..

#إيما صباح

ناسي مدري منيلهم هذا الجفه
بيه من الشوگ ديره ولا عِرف منهم لفه
منيلهم هذا الهوى اليلچم خنگتي شما نِفس بيه شِفه

مانه من كل كتر بيه تصيح علتي
ودوم ع الون انتچي
يمته تغفه بعيني فرحه وما يفززها بچي

يمته يفهمني الأريده شگد اريده ابلا حچي

ويندل من السكته صوتي ويسبگ بجيته الهجر
كونّي ابال الأعزاز شما يمر نسيان امر

كون المفارٓگ صِدف والملگه دوم
ليش منسيه بعثرتي وكلها تذكرني ءمن اگوم
ليش من يسحگني هم يحچوني لوم
الليل ظل الگمره وتسحگه النجوم

وانا ظلي الريح وادري بناسي بوب
وادري سولتهم سراگي ومااتوب

النيته شوف بعينه يمشيها الدروب

وانا ع الماجاي والصَد، شوفي راح
ما عرفت ارغب اليمي
شما گرب من عيني، طاح

حتى من مرت ضحكتي عنها بالحسره التهيت
شماخذه من الدنيا مدري ادري بس بالماخذيت .

#إيما_صباح

اي يريح
فك تعب بيبان عمرك وإنزل بصدري إستريح
وفزز الظلمه بضوه
مرافگ الحيطان يخنگ مرني يل كلك هوى ...

#إيما_صباح

وشيحـوف إلدمع لو شاع ؟

وانه الياخـذ لهفتي إيردها اليّـه إوداع

الضوه المايلتـم إبشبّاچ يتطشر مِسه إعله الگاع

#إيما_صباح

يبعيد بالك ترد مابيه فكّت باب
چي بعد موت الورد جيت النهر تنعاب
مابيه لاسمك عطش جرحك رواني غياب
ومن الحلم للصدگ
ماخله سر للحرگ ما سولفه العطاب

من چان وصلي سما ومالاحه چف ياريت
عاينتك ءمن الگمر مافرزنتلك بيت
خرّبت وي الضوه وصرت الظلمتك صيت

مَر خنجرك والنظر والمو نظر غضيت
وصحت بطعنتك دوى
واشگد رحتلك هوى وخنگه انحسب رديت

من شفت درب الصبح مايلتفت لليل
چيّمت كلشي سهر
وبعيني وشلة نظر عبّرت بيها الويل

واگفيت عنك شمس ما سد مكاني إفياي
فارغ إخلاف الهوى ومحد يعرفه الناي .

#إيما_صباح

❤

وانا شعندي غير الليل ومتاناك

وأغاني استاهدك بيهن وادوّرهن ،
وما الگاك

لـ #إيما_صباح🌿

‏

❤️
اريد اتدثر بصوتك كتلني مسامر الوهواس

واحوك اسوالفك چرچف وأموت إنعاس

بيني وبين نجم جفاك وحشه وسالفة حراس

#إيما_صباح 🌿

من وره البيبان يوصل صوتي سكته

شذنبي كونه يعيش حلمي شما دفنته

إشبيدي كون شموسهم تطفه بشمعتي ؟

غير همه بسوحهم وانا بغرفتي

منها لألله تسابگ الطاير سجنتي

مايوَگف الماي كل ناعور يفتر

امشي والگاع بمشي النهران تعثر

ادري تنكرني السواجي البِسمي تكبر

وادري بيها الصحره تابوت الرِبابه

تنذم الورده التَغني بنص خرابه

رادو يغيبوني لاچن غيموني

ومطرت عيوني وعرگ وجه الترابه

وحصد كل نسيان ذكره

شما عشت يتبنه موتي

الماعرف يتبنه فكره

الفوس يكبر صيتها بطيحة الشجره

ونيّة الطايح علم

حرگو ءمن سنيني دفتر

من كِبر بإسمي القلم

خافو اعبرهم جناح ومايوَگفني سهم ..

.
#إيما_صباح

تاخذني الصفنه إلآخرتي
من أكبر وحمولي إتطيح

وماكو إمتون أتوچه عليها
چن باب إمدولب بالريح

باب إبيت إمشيّد وحشه
چي ما لَم إبحوشه أولاد

يكبر واكبر واتعب واصبح
جد، لكن ما ( عندي ) أحفاد

مشكلتي بهالدنيا إسنيني
من تگصر بعيوني إتطول

أمشي إبحيلي ومن أتذكر
حرماني، أنعد ع المشلول

تبدي دروب العزله إتعثّر
والخطوه إتمن إعله إجدامي
وأتوچه الطايح مذلول

حايط بِصوَر حَسبه إمعلَگ
مدگوگ إبسمار أوهام

وين ألگالي عيون إتلمني
وآنه إبنادم من أحلام ؟

مرات الگاني إشگد والد
للشجره وللعش والگاع

وچم حسره التتربه بگلبي
من يعرضلي الواقع وارجع
لأحضان الحرمان بساع

ثاريني بكل ( سوم ) إيوالم
فشلة عيني، بدمعه أنباع .

#إيما_صباح