أعذروني مشغول هالفتره ، ألنشر جداً قليل ..💜

يالراضع ثدي عصات موسى
شلون تلاويك ألحيايه ويمض بيك ألسَم

سيد سعيد ألصافي |

قهر تنـحت لهاتي وريجي ذبحة موت
ولا فكيت حلگي وتمتم لسـاني

سعد محمد ألحسن |

لـ اخر صفنه بـ التمثال اضل اهواك ..!
لـ اخر گطره بـ الشلال اضل اهواك .. !

علاء محمد جعفر |

ما أگدر أطلعك مني وأرتاح
شيطلع ألوطن من راس الأسرى

علي ألشمري |

اجيب الشمس و اوكفلك يالاسمر فيّ

علي الشباني |

وكـــون تدري

بعيني سفرة شارع مگابل مشيتك

لــيش مـاتحسبني عثره…!

عباس الغالبي |

لگيناكم
سفر نجمه
تطيح اشما جفن يعثر

وحچيناكم
سوالف ماي
حسبنه گلوبكم عنبر

يل موش اعلى گدگم ليش ؟
گدرتو الشمس بالگاع خاف افيايكم تزغر

واهي الدنيه عطش ليله !!
شراع الما تضوكه الريح ما يكبر

كاظم ألركابي |

هاك ألطيف ألبعيني
وخذ كل باب ماغنه بتصاويرك

عيش وموت باچر مايظل غيرك

عزيز عسكر |

گالولي تجي وحطت عصافير المحله

امتانيه الخطار

واغصان الشجر

نفضن ورك حنه وصواني ازغار

وعودان البخور اشتهن طعم النار

وحرگ روحه الشمع

من سمع بيك وذاب

وانه الخاطرك

رشيت ماي الورد عالعتبه

وغشيت برفيف الكلب شباجي 

كلت يمكن يجيك تراب

وبلهفه عطش تانيت

تانيتك تجي لكلبي

تجي لعيني

مثل جية حلم من غير دگة باب

وبلهفة عطش تانيت

واستعجل نبض گلبي عليك

او وكفت الساعه

ومدري شلون
غبت اويا الشمس

وتجرح اللبلاب

عبد ألكريم ألقصاب |