شسويله الدمع
غيم ابشاطي الشوف
لا ينزع اعيوني او لا يكت ويروح !!

عبد السادة العلي

كلبك جان يغريني ...
بعد ما عاد يغريني
ولا اسمك اذا ذكروه يعنيني
من بعت الغصن للريح
واتدنيت يم كلوب
لا عرفت طعم طينك ولا طيني
ومن دليت جيش الليل بالغربة
عله جروحي
ذبح حلمي ... وبقى بعيني
جنت موكد خضار واشتعل بركان
واتعناك
بس هسه البرودة البيك تجويني

غانم الفياض

روحي شگادها لچف ليل، لو مَرّ الصبح يشهگ ؟
مو ثوبي
شندهني لثوب بالنيّات يتلثگ ؟
شٓريت و أدري بالغشمه فِشل و دنان تتسوگ .

لـ رغد قاسم

لو ردت الگلب يرتاح
تعب العين من تبجي

ريسان الخزعلي

‏انظر بقلبك..وستعرف أن كل ذرات الكون في رقصة عشق أبدية , ستعرف أنها تتلمس العاشقين فتعرفهم !

- #مولانا_جلال_الدين_الرومي

مر بيه ركض صبيان ..
فزز واهسي من سنين ..
لو دگـة چـذب ع الباب ..
تگشط جلــد المتانيـن ..

#كاظم_الركابي

يحنطاوي...
الدرب لو خطته جدامك
يتل حيلي ويضل ضاوي
شحلات الطول والمشيه
وطعم الشفاف خستاوي
الغنج من هور العماره
وسواد العين بصراوي
.
محمد عبد الاله النقيب

تذكرني چفافيك...واحن لايام عشرتنه
واگوم اتعثر بجدمي
وألمِّلم كل دساكرنه
اهنا چنه وگعدنه..اهنا
تسامرنه وتعاتبنه
اهنا يم شاطيء الگصبات
تذكر من تعاهدنه
وبنينه عشوشنه ويه الطير
وعله البير بچفافي اخلاص طرزنه
يسمر والبيادر هاي
فيهن بيه غطنَّه
وتهلهل بنات اسهيل..اجتنه وعجنت الحنَّه
وآنه اليوم اجيت وحيد
وإتذكرت موگفنه
وتلگتني الطيور تصيح خلك وين ناشدنه
گلتلهن سگم ورفيف چلاي سيلنه
گالتلي يزامل هاي واحة وفه واحتنه
وكل خل الوفه الخلَّه يهننَّه ويزفنَّه
گلتلهن وَفي لاچن
وفاي بتبِن باعنَّه

زامــــل سعيد فتاح

بعيوني سمارك طاح
واول طيحته البرحي يشهي الريج
يل طبعك عسل .. ومرورة اللكاح
يل شاتل كفاك عناد .. احب مناطر الفﻻح
خليني ..
خليني الم صورك من ابعيد
وشوف اشبع .. بكد ما طين تشبع عودت السباح
خليني ..
خليني ادلل واهسي بطرواك
تدري بواهسي امنتروح ؟
حبله متانيه وبثوب ابنهه تحوك
هيج احسب خلك .. ياواهس الكاروك
خليني ..
خليني احسك مرة لو موجود
شيضرك اذا تانيت ؟
سوباط العشك متروك .. مامش سالفة عنكود
خليني اعله بالك عود
دندن عالدفو بروحي ..
بروحي .. جا هيه الجفوف اشتحجي من اتكود
خليني ..
خليني اخم مرايتي ارد الكاك
ياخد اليقنعك جان وتهم بيه ؟
بيمن عينك تحط شوف وتحول
بيا شامه صفنتك جانت اتطول ؟
وره اشفافي اضن حسيت ..
صوت الضحكة من يختل ؟
كلي بيا رمش تﻻح ..
يل حتى بهواك منافس القداح
يل شاتل كفاك عناد .. احب مناطر الفﻻح

وفاء الخفاجي

يحوريّه…

على عيوني ولا خطفت مثل قدسيتج ابنيّه
انتصاوغ والعشك جتّال راعيّه
اريد اطفى ورمادج يشتعل بيّه!
اريد ابجي ويشح فيضي واجيسج سالفه وشفّه
ترسني الشيب جم گمره وصلات المو عمر صلفه !
العشك ينباك من يغفه!
ابتهل يم عيد ميلادج ربيع ودنيا تندلـج
واباريلج هوى ورهبان واسجد لسمج وضلّج
ينجمه شلون امد الشوف واوصلـّج
اريد الكلشي بيج وجيتي مو كلّج !!!
شغنيلج ؟
اخاف اعثر بجي ونسيان يم رنة خلاخـيلج
خفت من صفنتي اطيحين واستحيف منو يشيلج ؟
شغنيلج ؟
وانه شما يحترك مكتوب مصحف شوك اوديلج !
اغفريلي الذنب عثرة گلب وارتاح
لو عبدج واصليلج !

وسام سباهي

من كل
السراب
البايت بروحي لگيتك ماي ..
ومن كل
گيض عمري الفات
وحدك والمتني فياي ....
يشايل كل نده الله ابين شفتينك ..
يبس عمر الورد بيّ
دَ مُر بيّ
ولو نگاط
بلكي
ارجع العمر صباي

#لطيف_العامري

٠
تمشي و بـ عطرك كَدتني ..
بـ زلفك اسكر تيهتني ..
وسافرت للـ مدري وين ؟؟
سرفنت حيلي ولبست "الصنطة" ثوب ..
بلا شعور ..
جانوا الركاب سرب من الطيور
.
#يوسف_الدراجي

كون حيطان الغرف عدهن لسن
جان كالن شوگكم شمخلي اثر
وكون هذا ال ع الجتف يشهد صدك
جان كلكم بالاسبوع ابجي شهر

سيف الحلفي

.
.
.
.
احس الضحكة
چذابه لان مو عينك گبالي

#علي_شميل

.
.
يـ آدم طگ المعاتب ..
دنزلنه لمچان نشوف بي خضره
دنزلنه لمچان يحلل الخمره
ألمن نزلتنه لدنيا بيها الماي يتمنن عله الشجره .
.
لـ عباس الغالبي .

تعال اهنا .يالمبعد...يالمبعد تعال اهنا

يالبوصلك تداوي الـ آه

جفيت ويبست اعروكي ...يماي الروح

تعال متانيه عثوكي...اخذها وروح

كفاني اتجرح بشوكي...كفاك جروح

كفالك هل بعد كافي

جفافك ذبل اشفافي

ركض كلبي بجدم حافي

شفت ضحكة سرابك غاد ..

ركض كلبي وركضة ويا
.
تعال اهناااا.
.

تعال وكلشي يجرالك ...يبس تعود

نذر لنطش على خيالك..وشوفه خدود

وكله الكلبي هنيالك ...دبسك هود

اجاك الجنت تنتظره

الخياله بخاطرك حظره

وتطوفه ارويحتي الخضره

يبارد ثلجت روحي

وحرام انجان اكول اشا
.
تعال اهناااا.
.

تعال تمدد بكيفك ...يكل الكيف

وفر لمطرلك بصيفك...وَاعَيِشَك طيف

وأكلك حن على اوليفك...محنة ريف

ومشط كذلتك بيدي

ولم انفاسك بجيدي

وغنيلك هلا بعيدي

وكلك ياحلو شتامر

شتطلب ما أكلك لا.
.
تعال اهناااا.

لـ عدنان البركي

للذين يحلّون مشاكلهم بالهرب منها

| مسائكم سعيد