الوحشة طفله
مسودنه وبالروح تركض ..


#كاظم_الگاطع !

جنه ازغار ونلعب دعبل...
خسرانين نخاف نبطل......نطلب جور
جنه ازغار ونلعب طوبه..بلجن عاد نسجل كول
تالي تصير اللعبة معارك وتصير بكيف الباطول..
مرة ولن ارجع متأخر ..شحتتني امي لذاك الصوب
شالت كوم احجار وصاحت..بالك بالك خاف تلوحك...

#كاظم_اسماعيل_الگاطع

چنت اگلهم نار بيه نار بيه
وچذبوني
ومن بقيت رماد گالو :
ليش ما گلت احترك .. !

#كاظم_اسماعيل_الگاطع

على جناح الفخاتي
الطايحه امن الشجر محترگه
قرينه اخبار حلوتنه وشربنه
دموعنه الزرگه

#كاظم_اسماعيل_الگاطع

جنه فرحانين...
ما ندري الخبز ياهو اليجيبه...
صافي مثل الماي املنه ...
وبطرك لعب الشوارع...
لا جكاير لا سياسه ولا حبيبه....

#كاظم_اسماعيل_الگاطع

لتنوم القصائد من وكت بالليل
نوم لمن وكت مثل المرض يعدي


#شكسبير-الشعر-الشعبي

#كاظم_اسماعيل_الگاطع

گلوب الما صحت من ذيچ الجروح
تبقى امفطرة ، رجلين رعيان

#كاظم_اسماعيل_الگاطع

ياسنيني الرايحات اوداعة الله

انطني بوسه،، موادع الخل الخليله

#كاظم_اسماعيل_الگاطع

2019/12/31

"رحله ممتعه في خيال القصيده "

#ابو_الطيب

امس واني بحلاة النوم
وبفكرة شعر بالليل متعذّب
ونسمات الهوى بنيسان
ترفه اعله السطوح اتهّب
ندهني صوت شاعرنه
وعرفته صوت ابو الطيب!!
سألني عن جديد الشعر هالايام
والناس اعله الضيم لصابهه.. شتكتب؟؟
اشتكتب والجديد البي فرح چذّاب.!
والگلك جديدي يفرحك يچذب

امي امن الزغر تنگل حطب للنار
ويفوّر جدرها ومدري شتركب
ومصباح اليتم صبتلي بالماعون
من ضگت الحزن شفت الحزن طيّب

بگماطي چنت واسمع نعاوي افراگ
واطگگ لهاتي بحلگي من تحلب
من الباطل تشيّب لحايا الناس
مو من الكبر بنيادم.. يشيّب
تسأل عالسمار الغلّف الوجنات
دمك محترگ.. لو گلبك معطّب
وانه انسان ما اقبل اشوف انسان.. متعذّب
البلبل ما يغرّد من يشوف اغراب
فوگ التيل متكهرب

مبعد يا قطار الفرح وين تريد؟
اخذنه وياك.. بلچي بدوستك ويّاهم انچلّب
اخذ وياك شاعر كل رصيده جروح
يفتحلك حساب بأي مدينة طب
اخذ وياك شاعر محّد يحس بيه
يدور عن دوه الشريان متصلّب
حگ الله بمهابه يكون اله الدكتور
وللردهه الجروح ايمرن بموكب
دنيا وغيرت من البشر اطباع
وگلب الضيف ما يقراه المعزّب
لو ميّة سنه بعد الثلث تيّام
ما واحد يگلك طلبتك يا ضيف
الا نمدها اله وبلسانه يطلب!!

گالوا بيض هدهد بالصدر خليه
شو طلعوا حيايا وفرخوا بالعبّ

انا الحسبوا عليّ دگة الميزان
وانطوني الگشر وتقاسموه اللّب
انا الربعي نسوني بلسمة المحصول
ومن رديت بس الشوك
ظل بصايتي امچلّب
ملحه اهدومنه مالات عشر سنين
مو سمران..بس هنه علينا الوانهن تگلب
ما غيروا طبعي وذاك آنه ظليت
بدوي بغير ناگه والرمل بالعين
لكن بامتحان الصبر ما ارسب

#كاظم_اسماعيل_الگاطع

باعوك صفقة خشب واحد يريدك جسر
وواحد يريدك درج وبثنينهن تنداس !
.
.
#كاظم_اسماعيل_الگاطع
هذا حال العراق 🇮🇶😔

#لو_ماخوف_السيطرات...*

وجه متعوب وشعر مليان شيب
والله لو افتح اديَّ
امشي بالشارع صليب
چني آني .. موش آني
امشي وسط اولايتي وجني غريب
خلّوا الوهواس بيَّ
وابدا الوهواس هذا ما يطيب
حطّوا بصدري مخالب
والمخالب مال ذيب
وصار ثمن اسنين حملي
وصار سبع اسنين اطلگ
بعد .. چا يمته اجيب ؟
ورادو اوصي گبل ما ضني يخيب
كلشي يوگف .. الا .....
شغل الصيدلي وشغل الطبيب
كلشي جف الا همه
صدور مليانه حليب
رزق ما مشمول بالقطع المبرمج
ولا رزق من چانوا يودي ويجيب
ناس ماعدهم ضماير
سوده اجتهم
تنده الميت بگبره .. اتگله جيب
احنه ما عدنه بعد غير الامانه
منو يسأل عنّه لو ردنا نغيب؟
ولو ما خوف السيطرات
الناس ما تحتاج جيب
لو ما خوف السيطرات
الناس...
ما تحتاج .. جيب

الجبل #كاظم_اسماعيل_الكاطع

تمنيتج..

#كاظم_اسماعيل_الكاطع

#قصة_الصدر...*

مثل البحر ويّ الحوت
قصته الصدر ويّ الموت
يا لابس چفن عندك جواز
ابكل مدينه تفوت
ها ،، يالسافرت
بحر النجف بي ماي
من جوّه البيوت يفوت
من طول السنين
وهودجك رحّال
عندك تذكره للموت
هذاك مسجد الكوفه
وابن ملجم گعد مبهوت
الموعد ساحة العشرين
كوّر بالجفن من فوگ هذا الراس
الظهر ،، صلّت وراك الناس
صلاة الليل ابد متفوت

ياللاّبس چفَن لايگ عليك الموت
للمثلك عراضه ،، وفد عشيره انصير
اول بيرغ ابغداد ،، ثاني بيرغ ابطهران
ثالث بيرغ ابيروت ،،،،،
ودمّك من ندهته بليل
ويّ الخيل ،، يركض ينده اهل الكوت
البحر والحوت
والسكته وصدى الامواج
ريشه اطيح خدرانه
اعله ميل الليل
نسمع صوت
اشعجب كلمن قفل بابه
ويگضون المسه ببيوت
لا وگفه على الشاطي
لا مسواگ للسهره
ما طلعوا سوه
و وگفوا على حانوت

متراضين هالايام مامش صوت
محد ودّه للثاني ،، رساله بيد كاتم صوت
البحر والحوت ،، زعلانين ،، متراضين
محد يعزم الثاني ،، اعله وجبة موت

اشعجب هذا السكوت ؟؟
وقصة البسكوت ؟؟
البحر يتمنه موت الحوت
بس الحوت لو مات البحر
هم مثله راح يموت
من شايف عدو
ويّ عدوه يموت ؟؟

#كاظم_اسماعيل_الگاطع

كبل سنتين ...ماتت ضحكة ايامي..

وچفن حسرات لف روحي ولياليهه..

#كاظم_اسماعيل_الگاطع

دنيه موالفه للغير كوه نريدها ويانه

من شفنه القطار يصيح
طير وشاف جنحانه

شال الناس كل الناس وانه وياج خلانه

تعبان شكثر تعبان
وانتي وياي تعبانه

رجعنه امن المحطة بليل
چنّه وجوه دفانه

#كاظم_اسماعيل_الكاطع 🖤

#الغابه...*

#عن_دول_الجوار

كلشي ولاتجنون اسلاح
گالوا لتصنعون اسلاح
واحنه بغابه وداير ما دايرنه اذيابه
وداير مادايرنه اذيابه
وهتك اعراض وسفك ارواح
وكل جار ايراوينه انيابه
وكل جار ايسمّن بچلابه
ويحد بخنجر ذبّاح
بوسط الغابه الشرك امكهرب
والغار امسگّف برماح
وطيور بگاع المحترگه
ويا ويله الما عنده اجناح
مناه ظلمه .. ومنا ظلمه
بس عدنه اينوّر مصباح

كلمن بيده احجار وهدّوا نص الليل
ويا ليل اشگد بيك اشباح
واليگصد بغداد بغاره
باسطنبول يرد يرتاح
وبسوريّه الثعلب ماكر
ماكر جداً...
مو حواء الغشّت آدم
هوّه القدمله التفاح
وذاك اللي گاعد يتفرج
هذا اتصوب .. ذاك الطاح
ومن روجات البحر الاحمر
شفنه الدم وشفنه الكاتل
ومعگل چان التمساح ..!!

ويا بستان الما جر حسره
ياعود الما وّن وناح
هضبة. نجد وربع الخالي
خلوا گاع الله الخضره
هيمه ومبزل للأملاح
گطره وطاحت...
شيرد ماي الگصه الطاح؟؟
وشلون ابنادم يرتاح؟؟
منهو يعيش بهاي الدنيا
ومامش جوّه الراس اسلاح؟
شافوا بغداد ابعزتهه يوميه الناس اتزف عاشگ
وحزن الحلوه ايصير افراح
ما فادتهم هاي الفكره
ورادوه ايطيح وما طاح
ما يعجبهم يكبر سنبل
ويصير ابطول الفلاح
شافوا شمس الديره اتعلّي اتعلّي اتعلّي
وبحجارتهم ما تنلاح

گالوا لا تجنون اسلاح
واحنه بغابه
وداير ما دايرنه اذيابه
وهتك اعراض وسفك ارواح

للعملاق #كاظم_اسماعيل_الكاطع

#الحرب_والسلام...*

بالحرب او بالسلام
يا شعبنه برغد نام
للحرب عدنه سلام
وللسلم عدنه حمام
خطوه خطوه اتعد دربنه
ونعرف انحط الاقدام
وگطره گطره انعد بحرنا
والبحر من مر عليه طارينه گام
والبحر من شلنه ادينه
اتبسم ،، ورد السلام
يامحب حب اعله كيفك
وازرع بشاطي الجفن وردة احلام
ما تلوح الشمس وجنات الحبيبه
عاليه اشجار الغرام
يا گمر نام اعله خد شاعر
غمض ليله بحياته
و وندهته بنت الكلام
شوف يا شاعر خوذهم
والسلاح الظل بأثرهم
شوفها بعين القصيده
وشوفنا بعين الالهام
همه عافوا كلشي عدهم
واحنه حته اتراب بدلتنه نجيبه
ومايظل بأرض الحرام
طيح ياسنبل على اچتاف الحبيبه
الغاليه ام عشرين عام
من تلاگيني ويمر كحل بجفنها
تصير دمعات الكحل عالوجنه شام
نامي ليلچ يالحبيبه
ومن تمر نسمات وتجّفل الگصيبه
والله اعت الريح من زيگه بديَّ
وينگطع نفس الانسام

يا ملاعيب الاطفال وما جفلتي
وما يصل يمچ قفلهم
حته لو نبني سگف من العظام
يا "وسام" امشي اعله طولك
والله اخيط ،، جلدي ثوب
ولا يشگ البين دشداشة وسام
جاي من السوگ والسلّه خفيفه
قصّرِت بعت الحمام
لا تهم شيصير باچر
نعرف اضنون الليالي
لن قره اعراقنا چف الايام
يا طياير الورق طيري اعله كيفچ
عاليه اسطوح الحمام
وصيحي:-
يا غيرة شعبنا
اتصير كل غيرتنا مهره
ويصبح مچتف عدونا وگايده
بحبل اللجام

#كاظم_اسماعيل_الكاطع

#باجر_عيد ...*

باچر عيد ،،
باجر تعرض عيونك يغايب
والحزن بي يشگ اشطوط
ميهن وي دمعي ايزيد
باجر
من يحن الشوگ ويحن الگلب
ويريد وين الگاك
يالذبك زماني بعيد؟
باجر
كل ولف يشتم عطر ولفه
وتصك حنته اعله الايد
وآنه وحيد
دمعات العذاب امطرگه ابجفني
وتصب اشما يمرن غيد
انشف ايد .. واكتب بيد
ويحن الگلب .. ويريد

باجر عيد
والوحشه ترس دنياي
وبغصن المحبه يعصف جويريد
باجر عيد
باجر الحزن يلگاني واتلگاه
يلبسني والبسه اجديد
با محله الحزن بالعيد
با ذلة الفرح بالعيد
وانته ابعيد
باجر والدموع اطوف بالحسرات
والشوك اعله دربك
يطوي بي البيد
واحاچي ادروب ما تحچي
وگول اشگد وكيحه الروح
خامه وما رضت بدموع شوگي اتبيد؟
ولا هي اتهيد
باجر
بس خيالك ينزل ابعيني
وتمر بي الف حسبه الف سالوفه
ليام انگضن ضحكات ،، ومواعيد
و احس اوحيد
انشف ايد
واكتب بيد
وشطوط الحزن وي دمع عيني ،، اتزيد

#كاظم_اسماعيل_الكاطع
شباط / 1967

#ليلة_الميلاد...*

الشمع طافي
وظلال الليل غلّف ساعة الوحشه
الثلج عشّب على اعيوني
وبرد بين الضلع والضلع يتمشّه
المطر ينزل على المعطف رصاص ودم
وشوف الناس كلمن گاعد ابنعشه
ريح ونار .. غيم وليل
دوّرت الشجر عن طير
يرثي لحالتي بعشي وارثي لحالته ابعشّه

الشمع طافي وضوه الميلاد
مات بليلة الميلاد
اغاني الحب صفت عميه
صفت خرسه
صفت طرشه
وضوه الميلاد مات بليلة الميلاد
ياريت الليالي الماضيه بذاك الفرح تنعاد
ياريت الزمن يفحط ولا يمشي
ويرد اردود لايام العشگ والشوگ والميعاد
ظلمه والنجم تعبان
وجرح الگمر مايرهم الهه اضماد
الليله اطويت صفحه من العمر سوده
الليله احرگ ثلاثيني
واسوي الذكريات ارماد
انه لوحدي ابمسية افراگ
الف كيلو متر تبعدني عن بغداد
نسجت الدم عليه اجناح
بلجي ايطير ويذبني ابحضن بغداد
بلجي اگدر عذاب الليل .. ماينراد
انه لوحدي ابمسية افراگ
ادور عاليوديني اعله شباچ الحبيب
اطلب نذر ومراد
خيول الريح سحگتني
إشيريد الريح؟
شجره بلا جذر چنّي
وخيمه بلا وتد چنّي
يابرد الشته اتگطّر على اضلوعي
ويا حزن التراب اضحك على الفرحان بالميلاد
انه لوحدي بعذاب النار
وصديقي الچان يبچي وياي
صار اويّ الرماد ارماد

#كاظم_اسماعيل_الكاطع

#تذُكروني..

تذكروني...
من يجي الليل وصوركم ياهلي
اتگابل اعيوني
من تجي الناس وعذر الها
وعذر عدكم ماتجوني
من يوج تنورنا ومن تخبر امي
على دخانكم حنّت اعيوني
من تمر يمكم حمامه
اتذكروا كسرة جناحي
والله لا ينطي الذي منكم خذوني
اتذكروني...
اتذكروني..بدمعه
بحچايه
بجگاره
حتى اگولن مانسوني
خطوه مجنونه خذتني بشارع اظلم
ليل والغربه صفت بيع وشره
يهلي اشتروني...

" يا غريب اذكر هلك "
وتذكرتكم
هلي يامن ضيعوني

هلي شمدريكم انه انچوّى بالنار
ذكرتوني وبچيتوا لخاطري ادموع
شفت ظيم الليالي وتعب الاسفار
وضگت طعم الخناجر بين الضلوع
طحت بمرض مثل امراض الاشجار
سكتاوي الألم .. ماتگدر اتلوع
وحگ حزن الغروب ودمع الاشجار
انه بگلبي غصن للفرح مگطوع
ردت اشتري الراحه بغربة الدار
وشفت روحي .. ونا الشراي مبيوع
انسى الموضوع كله وذيچ الافكار
وشفت روحي التهيت بغير موضوع

#كاظم_اسماعيل_الكاطع