Главное управление юстиции Минского облисполкома

Традыцыі продкаў
Вяселле з каларытам

💪

Маладыя Уладзіслаў Мароўскі і Лізавета Сакалова бралі шлюб у народных беларускіх касцюмах

І хоць усё больш надаецца ўвагі спрадвечнай нацыянальнай культуры, згадзіцеся, што не часта можна сустрэць жаніха і нявесту ў народным адзенні. Сучасныя маладыя дзяўчаткі мараць пра раскошную белую сукенку

З нацыянальным каларытам адбылася святочная імпрэза ў аддзеле загс Крупскага райвыканкама ў лістападаўскую суботу – згодна з традыцыямі беларускага народа. Бо вяселлі нашы продкі спраўлялі восенню, калі ўся сельскагаспадарчая праца пароблена.

Маладую пару беларусаў і гасцей запрасілі ў светлую залу, дзе адбываюцца самыя таемныя і прыгожыя дзеі – жаніх і нявеста становяцца мужам і жонкай. Здаўна беларускі рушнік сімвалізуе дабро, чысціню, сямейнае жыццё. Маладыя ступілі на рушнік – і святочная імпрэза пачалася.

– Паважаныя маладыя! Сёння ў вас вялікае і ўрачыстае свята – вы ўступаеце ў сямейны саюз,

– звярталася да жаніха і нявесты загадчык аддзела загс Вольга Ермаловіч.

– Хай назаўсёды захаваецца тое пачуццё, якое прывяло вас сёння ў гэтую залу. Прайдзіце разам свой сумесны шлях, дзелячы хвіліны радасці і няўдач на дваіх.

Жаніх і нявеста пацвердзілі гатоўнасць узяць адказнасць за лёс і шчасце адзін аднаго, а рашэнне стаць мужам і жонкай з’яўляецца шчырым. Подпісамі засведчылі свае жаданні, абмяняліся пярсцёнкамі – сімвалам вечнага кахання і вернасці.

– Паважаныя Уладзіслаў Вітальевіч і Лізавета Аляксандраўна! Аб’яўляю вас мужам і жонкай!

– урачыста вымавіла Вольга Ермаловіч, і раздаліся гучныя апладысменты.

Маладыя павіншавалі адзін аднаго пацалункам, а вальс закружыў у першым сямейным танцы. Віншавалі маладых самыя родныя людзі – бацькі:

– Жадаем вам прайсці свой сямейны шлях, разам пераадольваючы перашкоды, и пабудаваць моцную сям’ю, кахаць адзін аднаго, дапамагаць, быць самымі шчаслівымі! Хай у сям’і будуць мір, радасць і святло!

Сярод ганаровых гасцей – старшыня Крупскай раённай арганізацыі РГА “Белая Русь” Жанна Хадатовіч. Яна павіншавала новую беларускую сям’ю, уручыла падарунак.

Дарэчы, нявеста – асоба вядомая сярод аматараў мастацтва ў нашым горадзе. Некалькі гадоў таму ладзілася персанальная выстава яе карцін у мастацкай галерэі імя Б.У. Аракчэева. Тады Лізавета была навучэнкай каледжа мастацтваў. Цяпер – дыпламаваны мастак. І вось новы статус – маладая жонка. А наперадзе новы творчы праект пад назвай “Сям’я”.

– Я родам з Клецка, а Ліза з Крупак. Пазнаёміліся каля трох гадоў назад на адным з канцэртаў. З той пары разам. Чаму абралі ў якасці шлюбнага адзення народныя касцюмы? Бо паважаем нашу нацыянальную культуру, традыцыі нашых продкаў, свой род. У іх – непаўторная самабытнасць нашага народа,

– расказвае Уладзіслаў.

– Прапанову рукі і сэрца Улад зрабіў мне падчас фестывалю культуры сярэднявечча і музыкі, які адбыўся ў музеі народных рамёстваў “Дудуткі” ў жніўні. Ідэя з фестывалем была мая. Я і падумаць не магла, што мяне чакае сюрпрыз,

– успамінае Лізавета.

– За месяц-два да гэтага я спланаваў зрабіць Лізе прапанову стаць маёй жонкай, а тут Ліза прапанавала паехаць на фестываль. Усё само сабой і склалася. Атмасфера фестывалю паўплывала на наша сумеснае рашэнне браць шлюб у народных касцюмах. Элементы касцюмаў збіралі самі. Прызнацца, было не так і проста. Але гэта таго варта. Нешта знайшлі ў прадажы, спадніцу Ліза пашыла разам з мамай, таксама зрабілі вэлюм і вяночак з кветкамі. Хромавыя боты пашчасціла знайсці 1978 года выпуску, але новыя. Тканіна касцюмаў, зразумела, льняная. У народных касцюмах – сакральны сэнс. Сямейным традыцыям пакладзены пачатак.

– дзеліцца Уладзіслаў.

Хай жа шчасціць маладой беларускай сям’і!

🌸

❗️

Please open Telegram to view this post