Першы дзень прэс-туру па Мінску прадстаўнікоў Выдавецкага дома "Педагагічная прэса" пачаўся з наведвання ўстаноў адукацыі Ленінскага раёна

🏫 У дзіцячым садзе № 56 пад кіраўніцтвам Наталлі Пахілка карэспандэнтаў азнаёмілі са здароўезберагальным асяроддзем.

Ва ўстанове працуе пункт карэкцыйна-педагагічнай дапамогі. Настаўнік-дэфектолаг Кацярына Калініна расказала пра раннюю дыягностыку і суправаджэнне развіцця, пра тое, як сфарміраваць у малых прыгожае і правільнае маўленне з дапамогай гульнявых метадаў. З гэтай мэтай педагог выкарыстоўвае свой аўтарскі шматфункцыянальны дапаможнік "Речецветик".

Настаўнік-дэфектолаг Алена Шырко прадставіла здароўезберагальную тэхналогію нейрасцежак, а педагог-псіхолаг Кацярына Кісель расказала, як выкарыстоўвае разнастайнае сенсорнае абсталяванне для работы з дзецьмі.

У гімназіі № 1 Мінска, вядомай дасягненнямі вучняў у конкурсным і алімпіядным руху, працуе цэнтр інтэлектуальнага развіцця. Пра гэта паведаміла дырэктар установы Наталля Бушная. Педагог Таццяна Шчаўрук, якая на пастаяннай аснове рыхтуе пераможцаў гарадскіх алімпіяд па біялогіі, падзялілася з карэспандэнтамі сакрэтамі работы з адоранымі навучэнцамі.

📌 Калектыў ЦКРНіР Ленінскага раёна пад кіраўніцтвам Наталлі Сакратаровай прадэманстраваў штодзённую работу з дзецьмі з інваліднасцю, якія маюць цяжкія множныя парушэнні развіцця.

Адукацыйныя праекты выхаваўчага напрамку, развіццё вучнёўскагага самакіравання, работу школьнага медыяцэнтра прадставіла дырэктар сярэдняй школы № 164 Б.В.Карпенкі Святлана Багдашова.

Ва ўстанове працуе музей, прысвечаны гісторыі і развіццю Ленінскага раёна. Тут дзейнічае сцяганосная група, якая ў мінулым годзе прымала ўдзел у нясенні Вахты Памяці на плошчы Перамогі. Педагогі расказалі пра цікавыя праекты па добраўпарадкаванні тэрыторыі і прадставілі аўтарскае дызайнерскае афармленне кабінетаў школы, якое ажыццяўляе калектыў сваімі сіламі.

Адбылася сустрэча намесніка дырэктара ВД "Педагагічная прэса" па развіцці Людмілы Пастарнакевіч з начальнікам упраўлення па адукацыі адміністрацыі Ленінскага раёна Наталляй Кучынскай.

Кіраўнікі абмеркавалі вынікі прэс-туру, пытанні супрацоўніцтва і далейшай інфармацыйнай падтрымкі з мэтай распаўсюджвання лепшага вопыту работы ўстаноў адукацыі раёна, а таксама арганізацыю падпіскі на "Настаўніцкую газету" і іншыя выданні медыяхолдынга.

🔜 Больш падрабязна чытайце ў найбліжэйшых нумарах "Настаўніцкай газеты".