4 красавіка 1557 года на Віцебшчыне нарадзіўся Леў Іванавіч Сапега, выдатны дзяржаўны і грамадскі дзеяч ВКЛ, вядомы дыпламат, пісьменнік і мецэнат. З 1586 года – стараста слонімскі. За перыяд яго староства Слонім стаў адным з самых значных і квітнеючых гарадоў ВКЛ. Былі пабудаваны ратуша, гандлёвыя рады, склаўся гістарычны цэнтр горада з брукаванымі вуліцамі, плошчамі і мастамі, было пацверджана Магдэбургскае права, падараваны герб, якім горад карыстаецца і сёння. Сапега ўдзельнічаў у распрацоўцы Статута ВКЛ 1588 г., які гарантаваў эканамічную, дзяржаўна-палітычную і духоўна-культурную незалежнасць краіны. У экспазіцыі Слонімскага музея прадстаўлены Статут, перавыдадзены ў 1648 г.
Сапегу лічаць патрыётам сваёй Бацькаўшчыны, мудрым і дальнабачным палітыкам, які далёка апярэдзіў свой час.
На цэнтральнай плошчы горада ў 2019 г. быў усталяваны помнік Льву Сапегу. Адна з плошчаў горада носіць яго імя.